3 यूहन्ना

3 JOHN

3 यूहन्ना

अभिवादन

¹ मेरे बज़ुर्गेरे तरफां ट्लारे गायुसेरे नोंवें, ज़ैस सैहीं आंव सच़्च़ो प्रेम केरताइं| ² ट्लारा, मेरी ई प्रार्थनाए; कि ज़ैंन्च़रे तू आत्मिक तरकी केरी रवरोस, तैंन्च़रे तू सैभी गल्लन मां तरकी केरतो रह| ³ किजोकी ज़ैखन ढ्लाहे एइतां, तेरे तैस सच़्च़ेरी गुवाही दिती, ज़ैस पुड़ तू सच़्च़े च़ल्लतस, त आंव बड़ो खुश भोव| ⁴ मीं इस कैरां बेद्धतां होरी कोई खुशी नैइं, कि आंव शुनी, कि मैरां मठ्ठां सच़्च़े पुड़ च़लतन|

गयुसेरी तारीफ

⁵ हे ट्लारा, ज़ैन किछ तू तैन ढ्लाहन सैहीं साथी केरतस, ज़ैना परदेशी भी आन, रोड़ी नीति सैहीं केरतन| ⁶ तैनेइं बड़े लोकां केरे सामने तेरी गुवाही दितोरी थी: अगर तू तैन इस तरीके सैहीं भेझ़ेलो ज़ैस तरीके सैहीं परमेशरेरे लोकां केरे लेई जैइजे त रोड़ू भोलहू| ⁷ किजोकी तैना तैसेरे नोंवें लेई निसोरेन, ते होरी कौमन कैरां किछ न नेन| ⁸ ऐलहेरे लेई एरां केरी इज़त केरनी इषो फर्ज़ए, ज़ैस सैहीं अस भी सच़्च़ेरे हके मां तैन केरे मद्द केरने बालेम|

दियुत्रिफेस ते दिमेत्रियुस

⁹ मीं कलीसियाइ किछ लिखोरू थू; पण दियुत्रिफेस ज़ै तैन मैरां बडो बन्नो चहते, असन कबूल न केरे| ¹⁰ ते ज़ैखन आंव एजहेलो, त तैसेरे कम्मां केरी ज़ैना तै केरी रावरोए याद करेइलो, कि तै इशे बारे मां बुरी बुरी गल्लां केरते, ते ढ्लाहन कबूल न केरे, ते तैन ज़ैना कबूल केरने चहतन, तैन भी ठाकते: ते कलीसिया मैरां कढतन|

¹¹ ट्लारव, बूरैई पत्ती नैइं बल्कि भलैाई पत्ती च़ल्ला, ज़ै भलाई केरते तै परमेशरेरे तरफांए; पण ज़ै बुराई केरते, तैने परमेशर नैइं लवरो| ¹² देमेत्रियुसेरे बारे मां सैभेइं सच़्च़े भी एपू गुवाही दिती: ते असेइं भी गुवाही दितोरीए, ते तू ज़ांनतस, कि इशी गुवाही स्च़ीए|

आखरी अभिवादन

¹³ मीं तीं बड़ू लिखनू त थू; पण शैही ते कलमी सैहीं लिखनू न चैइं| ¹⁴ पण मीं उमीदे कि तीं सैहीं जल्दी मुलाकत केरेलो: तैखन अस आमने सामने गल्लां केरमेले| तीं शान्ति मल्लती राहे| ¹⁵ इठेरे दोस्त तीं नमशकार ज़ोंतन, ऐठैरे दोस्तन नोंव घिन्तां नमशकार ज़ोइयां|