2 यूहन्ना

2 JOHN

2 यूहन्ना

अभिवादन

¹ मेरे बज़ुर्गेरे तरफां तैस च़ूनोरी बीबी, ते तैसेरे मठ्ठां केरे नोंवें ज़ैन सैहीं आंव तैस सच़ैईारे वजाही सैहीं सच़ो प्रेम रखताइं| ² ज़ै असन मां मज़बूत रहतीए, ते सदा असन सैहीं साथी अटल रालही| ³ बाजी परमेशर, ते बाजी केरू मठ्ठू यीशु मसीहेरे तरफां अनुग्रह, ते दया, ते शान्ति, सच़कच़, ते प्रेमे सैहीं असन साथी रहले|

सच़्च़ ते प्रेम

⁴ आंव बड़ो खुश भोव, कि मीं तेरे केतरे मठ्ठन तैस हुकमेरे मुताबिक, ज़ै असन बाजी केरे तरफां मैल्लोरो थू सच़्च़े पुड़ च़ल्लते लाहे| ⁵ हुनी हे बीबी, आंव तीं कोई नोंवों हुकम न देइं, पण तैए पेहिलो देंतेरो असन कांए लिखताइं; ते तीं कां बिनती केरताइं, कि अस एकी होरी सैहीं प्रेम रखनो| ⁶ ते प्रेम ई ए कि अस तैसेरे हुकमां केरे मुताबिक च़लम: ई तैए पुरानो हुकमे, ज़ै तुस पेहिलो देंतेरो तुसेइं शुनोरोए ते तुसेइं इस पुड़ च़लोरू भी लोड़े| ⁷ किजोकी बड़े एरे टपलाने बाले निसोरेन, ज़ैना इन न मन्न, कि यीशु मसीह जिसमे मां भोइतां आव: टपलाने बाले मसीहेरी खलाफत केरने बाले इनान| ⁸ अपने बारे मां हुशार राथ; कि ज़ै मेहनत असेइं की, तैस तुस न बगाड़ा: बल्कि तैसेरो पूरो फल हसल केरा| ⁹ ज़ै अगरोंव बधते, ते मसीहेरी तालीमी मां बनोरो न राहे, तैस कां परमेशर नैइं: ज़ै तैसेरी तालीमी मां मज़बूत रहते, तैस कां बाजी भी आए ते मठ्ठू भी| ¹⁰ अगर कोई तुस्न कां एजे, ते ईए तालीम न दे, तैस न त घरे मां एजने देतथ, ते न नमशकार केरा| ¹¹ किजोकी ज़ै कोई एरे मैंन्हू नमशकार केरते, तै तैसेरे बूरे कम्मन मां शामिल भोते|

आखरी अभिवादन

¹² मीं बेड़ी गल्लां तुस्न लिखन्न, पण काकल ते शैही सैहीं न लिखनी चैहीं; पण मीं उमीदे, कि आंव तुस्न कां एजेहेलो, ते सामने भोइतां गल्लां केरेलो: ज़ैस सैहीं तुशी खुशी पूरी भोए| ¹³ तेरी च़ूनोरी बेइहिनारां मठ्ठां तीं नमशकार ज़ोतन|