TITUS

TITUS

¹ Daku pau Titus! Yaku, Paulus, Yakumo komo tulise naiya suratia tukon yakukai meeng ko Mian Bisa napeleleani tukon Yesus Kristus Narasul. Yaku pinili tukon binotiikon sulano molapamo ko Mian Bisa namian molapamo pinili sulano konapomanggaan namoonggol. Yaku koidan sio kuotunggule yanila sulano toiyo kootunggul mo bisa mo inotunggukon doi nda agama. ² Dootungguloo komaanano moinian baikon naikon kita mantalima tuboan mobisa tukon posidutukon. Ko Mian Bisa lapamo janjikene kotuboan akiyoon kodunia natinealikon -- tukon Mian Bisa aki nabakala-kala. ³ Doi tempono mo tantu, Mian Bisa okitakene kona janjidoo doi nateteba lalomo. Tetebadoo lapamo bineekon doi yaku, tukon yaku basilinganggene luwedoi Mian Bisa Pasalamaton kita naparenta. ⁴ Titus, ikoo tutuu daano kupau, sabab ikoo tukon yaku posinggat-singgat lapamo mangangga doi Kristus. Yaku moinikene boliisi ko Mian Bisa Tamanggita tukon Kristus Yesus Tomundo Pasalamat kita, beena balakaat tukon monondokan doikoo. ⁵ Yaku tinggale ikoo doi Kreta sulano mumoola uruse kolangge-langge mo lapamo inatur. Tukon koidan, sulano mumongoduduk katua-katua jemaat doi memeeng kokota. Tukon neneeke naiya kupobontiikon-pobontiikon nia: ⁶ Meeng kokatua jemaat siokai meeng komian mo akiyo kososiboliino; yana sio natongo meeng kona boloki; kona labuk-labuk sio nalapamo mangangga doi Kristus tukon bolikon doi natinoiyau salaku pau mopalalentel tukon mo aki namoola inatur. ⁷ Popiala jemaat doiyamo mian mo uruse ko Mian Bisa nalimang, yana aki namoola ano kososiboliino. Yana aki namoola banggal-banggaal kai nggonggimolon, kai nggolonguwon, kai yase poakate, kai yase kaane kodoy. ⁸ Yana sio nasanaang motalimayo komian doi nabonua, yase kolangge-langge monondok, moola taane kobutongo, moloyos konoano, moliyous tukon taatur kona tuboan. ⁹ Yana sio nabataani kokoonggol doi otunggul mo moola inangga, pokakana komo lapamo inotunggukon doi yana. Tukon kalu buno doiya yana moola mongotinau mian loloiyo kootunggul mo bisa, tukon otudoikene komian nasala mo lawane yana. ¹⁰ Sabab badaang komian mo yase banggabut, pololokon mian badaang mo baagama Yahudi; yanila okoliiyo komian bailon tukon napo bakala-kalaan. ¹¹ Komian mobuno doiya sio nakinukup kobabano, sabab konapakaluarga badaang yanila komo banggabut tukon otunggul-otunggul mo akiyo kotakoso. Yanila kubaiyo doiya tolongo yase moumbolii untung mo aki napantas! ¹² Biasa daano komeeng konapo nabi, mo luwedoi Kreta koidan, bantile, "Kreta miano sidutu kala-kala, tukon buno iyayon mobarani mo modoko tukon bea." ¹³ Oila donabidoo nabinantil takainomo bisa. Doiyamo kosababpo ikoo sio mutoguure yanila tukon tegaas; sulano yanila natataap bataani doi otunggul mo bisa ¹⁴ tukon akimo napo mangangga doi Yahudi miano nanunuton kai mian badaang naaturan-aturan kinubai mo tolayo kootunggul mo bisa. ¹⁵ Sasaibino kolobo daanokai momoliyous doi tukon koidan tuuk doi mian mo moliyous. Bai doi mian badaang kona pikiran mo lokis tukon mo aki namangangga, akiyo kolangge meeng mo moliyous, sabab konapo pikiran tukon noano lokis! ¹⁶ Yanila bantile baikon yanila tingoniiyo ko Mian Bisa, padahal konapokokubai yanila akiyenggene. Yanila mosikitene, tukon yanila aki nayase taat; doi yaniladoo doiyamokai komian mo aki natendenge kubaiyo kolangge mo monondok.

¹ Bai ikoo, Titus, siokai muotunggulikene kootunggul mo kana. ² Otinauwo komian mala-malaneno mo motuwa, sulano napotaane kobutongo, bapandoikon tukon tubo buno mian mo inodotii. Yanila sio koidan nabataani doi otunggul mo bisa luwedoi Mian Bisa, tukon meseseangan motalakana tukon moola taane kosakisawan. ³ Bunomo koidan siokai ikoo muatinauwo koboiboine mo motuwa, sulano konapokokubai pokokonoi tukon oila komo moola kinubai doi mian mo tubo motolongo moini doi Mian Bisa. Yanila aki namoola bakala-kalakene komian bailon, tukon aki namoola todudukene inume kosuka, yanila sionapootunggukene kolangge-langge mo monondok, ⁴ sulano tukon doiya yanila moola otunggule kopau-pau boine sulano naseange kona langkai tukon nalabuk-labuk, ⁵ teali mangalati, tubo moliyous tukon teali boloki doi rumah tangga mo monondok mo odotiiyo kona langkai. Tukon kalu buno doiya akiyo komian mo moola totulaiyo kobilita monondok doi Mian Bisa. ⁶ Bunomo lakon, otinauwo kopau-pau malane boine sulano yanila nateali mangalati. ⁷ Doi sasaibino kolangge, siokai muteali contoh doi kokubai mo monondok. Kalu ikoo bangotunggul, siokai mojujur tukon totubo konoamu. ⁸ Pakeyo kobantilan-bantilan mo talakana, mo aki namoola mian sosiboliiyo, sulano komian molawane ikoo nateali mamaa sabab akiyo kolangge-langge molokis mo moola yanila bantile doi kita. ⁹ Ata-ata sio naloingiyo kona tuan, tukon sanaanggene kona tuan noano doi sasaibino kolangge. Yanila aki namoola tumbak-tumbak, ¹⁰ kabai pondikuk. Siokai napootudoikene baikon konaposikap sidutu monondok tukon setia, sulano tukon donaposikapoo mian nggaale kootunggul doi Mian Bisa, Pasalamaton kita. ¹¹ Sabab Mian Bisa lapamo okitakene kona maasi mosalamatene doi sasaibino kobanggapi. ¹² Mian Bisa namaasidoo otunggule kita sulano naaki nda tubo pototonggulung tukon Mian Bisa namongiasan tukon akimo naloloiyo kodunia namongiasan. Kita inotunggul sulano ndatubo doi dunia nia lalomo tukon kita toiyo taane kobutonggita, moloyos tukon taat doi Mian Bisa. ¹³ Budodoiya kita daano mototiiliyo ko Oloyo doi kitadoo mo moinikene; doi Oloyodoo kodunia kitayo Yesus Kristus nababasalan, doiyamo Mian Bisa mo Babasal tukon nda Tomundo Pasalamat. ¹⁴ Yana lapamo salakanggene kobutongo tuuk doi kita sulano kita tongosodii luwedoi sasaibino kokulokisan, tukon tealikene kita meeng komian mo tongosodii luwedoi lalim tukon tealikene kita koona-Mo, tukon komo setia mokubai monondokan. ¹⁵ Otunggukene sasaibino doiya, tukon otinauwo polong teguure doi mian molengele ikoo tukon doi nataanggaan. Inai mopataikene meeng komian molailainggene nakitayo ikoo.

¹ Ingotiikene doi muanggota-anggota jemaat sulano yanila naanggayo doi napo katua-katua tukon pamarenta negara, tukon taat tukon koidan tataap basadia mokubayo doi memeeng kolangge monondok. ² Bontiikene doi yanila sulano inai nabakala-kala kabai ponggeeleki tukon indee komian koidan, bai sulano konapoo lenggang namonondok. Siokai donapolenggangoo namantalamuyuk doi sasaibino komian. ³ Sabab loolukon mau kita koidan bai longas, sala tukon aki nda taat. Kita kinubai ata doi moisalomo komo iniyas tukon minooton; kita tubo tukon tetel-tetel molokis tukon noa mosikit, tukon pomosikiton. ⁴ Bai ko Mian Bisa, nda Pasalamaton otudoikene kona seang tukon namondokan konoa-No doi kita. ⁵ Yana salamatene kita, bolikon kita molapamo kubaiyo kolangge mo monondok, bai sabab Yana susuungo seange kita. Yana salamatene kita loloiyo doi Mian Bisa Na Roh, mo beena kita sinuungan boolu tukon tuboan boolu tukon lolo doi nakumesiano kita. ⁶ Mian Bisa beekene kona Roh doi kita tukon luwedoi Yesus Kristus Tomundo Pasalamat kita, ⁷ sulano Yesus namaasi, kita pokindokon koidan tukon Mian Bisa tukon kita malaat tuboan mobisa tukon posidutukon doi kitadoo momoi-moinikene. ⁸ Nabantilan nia bisa tuuno. Yaku yase ikoo mubantile tutuuno nalengge-langge nia, sulano komian badaang mangangga doi Mian Bisa tutuuno moumboliiyo tukon kubaiyo kolimang-limang mo monondok tukon modaano kotakoso motuuk doi sasaibino komian. ⁹ Dedeenggene kopoonggeelekian mo akiyo kotakoso, salita-salita tundun, poonggeelekian, tukon ponggimakonan motuuk doi ukum agama. Sasaibino doiya akiyo kotakoso tukon akiyo kountungo. ¹⁰ Mian mo kubaiyo konggalanggabutan doi jemaat, siokai muteguure idan lua luunggon; lapamo doiya inaimo koidan mopolaing tukon yana. ¹¹ Ikoo toiyo mian mobuno doiya bati-batinggai tukon nalalim-lalim okitakene baikon yana salamo. ¹² Soisobiton kalu lapamo yaku bintekene Artemas kabai Tikhikus doikoo, kakaate soisobit sulano mulubat doi yaku doi Nikopolis, sabab yaku batetel dungol indaa popupuson kotimul. ¹³ Kokobukuan tutuuno sulano mutomboniiyo Zenas, domopandoidoo ukum, tukon Apolos, sulano yanila moola lengget tukon akiyo kokakurangan oioila. ¹⁴ Konda mian-mian sio namonggiotunggukon kokubaiyano kolangge-langge mo monondok sulano moola laate kona pinalaluu-pinalaluu mo pinalaluu tuuno; tukon inai naikon napotubo akiyo kotakoso. ¹⁵ Utus sasaibino mo daano polaing yaku, makapatu teteba doikoo. Pelenggene komai teteba doi tula-tulanggita mo pomeenggon manganggaan. Boliisi ko Temeneno nabalakaatiyo Utus sasaibino. Komai Hormat, Paulus