INOKITAKON

INOKITAKON

¹ Buku nia antoko oila kokaliangano komo inokitakon doi Yesus Kristus tentang langge-langge naikon mo teali. Mian Bisa bontiikene doi Kristus sulano yana tudoikene doi Mian Bisa napeleleani oila komo sio namosobit nateali. Kristus sumboliiyo kona malaekat doi Yohanes, napeleleani, sulano nabontiikene do kadadian-kadadianoo doi yana. ² Maka Yohanes salitayomo sasaibino komo kinitadoo; tukon naiyamo kona lapulan teteba kaliangano luwedoi Mian Bisa komo inokobukuanggon doi Yesus Kristus luwedoi nakasaksian. ³ Kinatauwan kai komian komo bacakanggene tukon komian komo ndongoliiyo kobilita nubuat naiya buku nia tukon taat doi oila komo totulis doi lalomo. Sabab akimo namalumbit koidan sasaibino naiya naikon teali. ⁴ Utus-utus mo daano doi pitu kojemaat doi lipu Asia! Yaku, Yohanes, moinikene komuyu pobinee balakaat tukon monondokan moluwedoi Mian Bisa -- doiyamo yana mo daano, mo lapamo daano, tukon mo daano banggadudul -- tukon koidan doi pitu koroh mo daano doi Mian Bisa nabatomundoan salaano, ⁵ tukon luwedoi Yesus Kristus, sakisii mo taat. Yanamo kotumbe-tumbeno moinotuboi koidan doi namatean tukon Yanamo koponguasa tomundo-tomundo doi dunia nia. Yesus mamaasikene kita, tukon luwedoi namatean Yana sodiiyo kita doi nda lalim-lalim, ⁶ tukon tealikene kita meeng kobangsa motangalaas imam-imam mo leleaniyo ko Mian Bisa, Tamano. Yesus Kristus doiyamo komo babasal tukon balakuasa tuuk sidutu-posidutukon. Amin! ⁷ Kitayo, Yana lubat polaing kobunom! Sasaibino komian naikon kitayo Yana, tongusokon koidan yanila mo lapamo tebeke Yana. Sasaibino kobangsa doi dunia naikon kokiil sabab Yana. Oode, tantu Amin! ⁸ "Yakumo kotumbeno tukon kobunduno," Temeneno Mian Bisa nabantilan, mo daano, mo lapamo daano, tukon mo daano banggadudul, Komo Babasal Konakuasa. ⁹ Yaku Yohanes, utusomu mo pomeenggon nasib tukon komuyu doi sakisaawan lalomo mo tinoupi samba-samba ko Kristus pololaing. Kita sabar sakisaa salaku koona namian. Yaku sinakukon doi togong Patmos sabab yaku ampakonggene koteteba moluwedoi Mian Bisa, komo kinokobukuanggon doi Yesus mololoi doi nakasaksian. ¹⁰ Doi Temeneno naoloyo, ko Mian Bisa Na Roh kuasaiyaku, maka yaku lengele kolalo mo babasal -- buno trompet alalo -- basilingan doi tonggulunggu. ¹¹ Do alaloo bantile, "Tulisemo oila komu kinita, tukon kapatuwomo do bukudoo doi pitu kojemaat doiyamo: Efesus, Smirna, Pergamus, Tiatira, Sardis, Filadelfia, tukon Laodekia." ¹² Yaku mbaleng doi tonggulung sulano kukitayo indee doiya komo basilingan doi Yaku. Maka yaku kitayo pitu koposi aino mo kinubai luwedoi mosoni. ¹³ Doi tanga-tangano do posidoo aiaino kokondong komeeng komian mo tokita buno banggapi. Yana mapake jubah kona bulusanan polong doi aino. Doi oyopo yana mapake potutup oyopo mosoni. ¹⁴ Kona buuk moute buno domba buluno, moute buno kapos. Komatano auaungan buno bilat; ¹⁵ koaino motontilang buno tambaga mo sinua. Koalalo buno paisu tuwong mokukuungan babasal. ¹⁶ Kolimano bakalinga taaniyo kopitu kobituwon pauno, tukon doi babano sumbot komeeng kobakoko mo mamangan molua komangano. Koduduso montootilang buno oloyo doi oloyo nasuunan. ¹⁷ Salataa yaku kitayo, yaku sosuleengget doi salaano buno mian momate. Bai yana abese kolimano bakalinga doi yaku maka bantile, "Inai momatakut! Yakumo komo tumbeno tukon mo doibundu. ¹⁸ Yakumo naiya komo tubo! Yaku matemo, bai kitayomo, Yaku tubo sidutu-posidutukon. Yaku balakuasa doi matean, tukon doi dunia mian mate. ¹⁹ Tobikon doiya, tulise kolangge-langge ikoo mo kitayo, doiyamo langge-langge komo daano budodoiya nia, tukon langge-langge komo naikon teali koidan. ²⁰ Naiyamo kolaasia moluwedoi pitu kobituwon pauno ikoo mo kitayo doi limanggu bakalingano, tukon luwedoi pitu koposi aino mosonidoo: Pitu do bituwonoo pauno doiyamo sasaibino komalaekat doi pitu kojemaat, tukon pitu do posidoo aino doiyamo pitudoo kojemaat."

¹ "Doi malaekat doi jemaat Efesus, tulise buno naiya: Naiyamo koteteba moluwedoi Yana komo mataani pitu kobituwon pauno doi limano bakalinga, tukon ampakon doi antara pitu koposi aino mosonidoo. ² Yaku toiyo oila komo komuyu kubaiyo: Komuyu balimang kokobukuan tukon komuyu sabar tuuno. Yaku toiyo baikon komuyu akipo mebee noa doi mian molokis. Tukon komian mo mangakukene kobutongo rasul banggokai bolikon, lapamo komuyu ujiyo, tukon komuyu laatemo baikon yanila kala-kala. ³ Komuyu sabar tukon komuyu sakisaa sabab yaku, tukon komuyu aki namoloto konoamuyu. ⁴ Bai naiya daku kabalatan motuuk doi komuyu: Komuyu akimo koidan poseseange Yaku buno doi tumbeno. ⁵ Tobikon doiya, poneneeke bulaando kona odoonan kopotuwongan! Pobadodoloon doi polalim-lalim, tukon polakukene oila komo komuyu nailakukon doi tumbe. Kalu aki, maka Yaku naikon lubat doikoo tukon bubute koaino komu posidoo doi natongusolan. ⁶ Mau kai nadaano komeeng kolobo mo monondok doikoo, doiyamo: Komuyu mosikitene Nikolaus pololaingo nakokubai, Yaku mo mosikitene koidan. ⁷ Indee komiano moola molongol, siokai napalatikanggene oila komo Mian Bisa Na Roh nabinantil doi jemaat-jemaat! Yanila mo manaang, naikon Yaku pataikene namakaan sao moluwedoi kayung tuboan mo tubo doi Mian Bisa naasi." ⁸ "Doi malaekat doi jemaat Smirna, tulise buno naiya: Naiyamo koteteba moluwedoi Yana komo tumbe tukon mo doibundu -- mo lapamo mate tukon tubo koidan. ⁹ Yaku toiyo kopoo susa-susaan; Yaku toiyo komuyu talalais -- bai kona tutuuwan komuyu kaasa! Yaku toiyo koloobu-loobu komo inotuuk doi komuyu luwe mian mo mangakukene kobutongo Yahudi, banggokai bolikon; yanila daano setan namian! ¹⁰ Inaikai matakut naikon kosakisaa mo akimo namalumbit koidan komuyu sio potoupiyo. Neneeke, Ibiliis naikon usekene kosoobos luwedoi komuyu doi talunggu lalomo sulano nasobayo komuyu. Komuyu naikon sakisaa songulo kooloyo kolumbito. Siokai komuyu potaat doi Yaku polong pomatekon, maka Yaku naikon beena doikoo tuboan mobisa tukon posidutukon salaku tambo manaangan. ¹¹ Indee komiano momoola molongol, siokai napalatikanggene oila ko Mian Bisa Na Roh nabinantil doi jemaat-jemaat! Yanila mo manaang, tutuu aki naikon nasakisaa oioila doi matean koluano." ¹² "Doi malaekat jemaat doi Pergamus, tulise buno naiya: Naiyamo koteteba moluwedoi Yana mo taaniyo sabel momangan molua komangano. ¹³ Yaku toiyo iyaando kopoo dungolan, doiyamo doi Ibiliis nalipu nabatomundoan. Komuyu taat doi Yaku. Maka salataa Antipas, Daku sakisii mo satiadoo, inakate doi salaamuyu doi markas Ibiliis, komuyu akipo manyangkal baikon komuyu mangangga doi Yaku. ¹⁴ Mau nabuno doiya daano komoimoiya kolangge komo Yaku aki kusanaanggene moluwedoi komuyu: Daano kosoobos komian doi antara komuyu komo loingiyo oila komo Bileam nainotunggukon. Bileam otunggule Balak bulaando kootuwongano ko Israel miano doi lalim lalomo; tukon oluuliyo yanila namakaan kinaan mo lapamo sinosubakon doi pilogot tukon lakukangganano kolangge-langge mo lokis. ¹⁵ Bunomo lakon koidan daano doi antara komuyu mian-mian mo taamo sasaibino Nikolaus poloolaingo naotunggul. ¹⁶ Tobikon doiya, pobadodoloon doi polalim-lalim! Kalu aki, naapa koidan Yaku naikon lubat doikoo tukon lobosiyo do mian-mianoo tukon sabel mo daano doi babang-Ku. ¹⁷ Indee komiano moola molongol, tadukai napalatikanggene oila ko Mian Bisa Na Roh nabinantil doi jemaat-jemaat! Yanila mo manaang, Yaku naikon pataikene makaan manna mo tosookon, tukon suwe-suwele naikon mantarima doi Yaku meeng kobatu moute. Doi batudoo totulis meeng kosambu mo boolu, mo aki natinoi mau indee miano koidan, sangalaasan luwedoi mian mo talimayomo." ¹⁸ "Doi malaekat jemaat Tiatira, tulisemo buno naiya: Naiyamo koteteba moluwedoi Mian Bisa Napau, komatano kolot-kolot buno aung, tukon koaino nggilep-nggilep buno tambaga mosinua. ¹⁹ Yaku toiyo sasaibino komo komuyu kubaiyo -- Yaku toiyo komuyu seseangomo kotulamuyu, komuyu taat, komuyu balimang, tukon komuyu sabar mosakisaa. Yaku toiyo komuyu budodoiya balimang lobian badaang tukon doi loolukon. ²⁰ Bai naiya daku kabalatan motuuk doikoo: Komuyu mebee noa doi Izebel, molukodoo mo akuiyo kobutongo Mian Bisa sosumboliiyon. Badaang daku peleleani yanamo tipuwomo tukon mootunggule sulano namongkubai tukon sulano namakaan kinaan mo lapamo sinosubakon doi pilogot. ²¹ Lapamo kubeena todanan doi yana sulano nabadodoloon doi nalalim-lalim, bai yana aki nayase tade molakukanggene kolangge-langge mo lokisoo. ²² Poneneeke! Yaku naikon tikakene yana polong masakit doi tampat mooloan. Idoo yana tukon mian-mian mo balolowa tukon yana naikon sakisaa tuuno. Sasaibino doiya naikon Yaku lakukanggene budodoiya -- alaasene kalu yanila tade molakukanggene kolangge-langge mo lokis posinggat-singgat tukon yana. ²³ Doi napololaing naikon Yaku akateyo koidan sulano sasaibino kojemaat nasadaliyo baikon Yakumo yana mo botukiyo kobanggapi napikilan tukon noano. Komuyu naikon Yaku balase menurut pokokubai komuyu suwe-suwele. ²⁴ Bai komuyu komo bai-bailon modaano doi Tiatira aki namololoi otunggul mo lokisoo, tukon aki palajalio koilimuu-ilimuu Ibiliis. Yaku bantile baikon yaku aki naikon kusuungiyo doikoo kotanggungan mo motoong. ²⁵ Bai polong doi tempo kulubatan naikon, siokai komuyu potataap loingiyo oila komo lapamo komuyu milikiyo. ²⁶ - ²⁷ Yanila mo manaang, tukon komo polong doi napupusan banggadudul kubaiyo oila komo Yaku mo yase, naikon kubeekene kuasa mo pokakana buno komo Yaku tarimayo luwedoi Tamang-Ku. Yanila naikon mantarima kakuasaan luwedoi yaku sulano maparenta bangsa-bangsa tukon tongkat besi, tukon sulano momanase kobangsa-bangsadoo buno tabunan tano. ²⁸ Yanila naikon mantarima bituwon mandala moluwedoi Yaku. ²⁹ Indee komiano komo moola molongol, tadukai napalatikanggene oila ko Mian Bisa Na Roh nabinantil doi jemaat-jemaat!"

¹ "Doi malaekat modaano doi jemaat Sardis, tulise buno naiya: Naiyamo koteteba moluwedoi Yana mo daano kopitu koroh moluwedoi Mian Bisa tukon kopitu do bituwonoo pauno. Yaku toiyo oila kopoo kinubai. Kona binantilan komuyu tubo, banggokai komuyu mate. ² Tobikon doiya, pobanguno, tukon pokakabukuanggene oila komo daano doi komuyu moakiyoon doiya namate sasaibino. Sabab Yaku laate baikon oila kopoo kinubai, akiyoon nadaano komeeng mo talakana doi Mian Bisa salaano. ³ Jadi, poneneeke koidan oila komo lapamo inotunggukon doikoo buunia tukon oila komo lapamo komuyu lengele. Poambakonggene doiya tukon pobadodoloon doi polalim-lalim. Kalu komuyu akipo bangun, Yaku naikon lubat doikoo buno pondikuk; tukon komuyu aki naikon potoiyo oila kotempono Ku lubatan. ⁴ Bai doi komuyu tanga-tanga doi Sardis daano koidan komian mo dagaiyo sulano kona pakean natataap bilisii. Yaniladoo ampakon polaing-laing Yaku tukon bapake moute, sabab yanila pokokonoi tukon doiya. ⁵ Doi yanila mo manaang, naikon pinekeikon kojubah moute. Yanila sambuno aki naikon Kuapuse luwedoi Buku Mian Tubo. Tukon Tamang-Ku salaano tukon Namalaekat-malaekat Yaku naikon akuiyo baikon yaniladoo daano koonggu. ⁶ Indee komiano moola molongol, tadukai napalatikanggene oila ko Mian Bisa Na Roh nabinantil doi jemaat-jemaat!" ⁷ "Doi malaekat jemaat doi Filadelfia, tulise buno naiya: Naiyamo koteteba moluwedoi Yana mo moliyous tukon bisa. Yanamo kopataani Daud nakunci; kalu Yana bukayo, akiyo komeeng komian momoola tutupe, tukon kalu Yana tutupe, akiyo komeeng komian momoola bukayo. ⁸ Yaku toiyo oila kopoo kinubai. Yaku toiyo baikon komuyu aki nabubula kopoo bukuanan; komuyu lapamo tulutiyo Ku otunggul tukon taat doi Yaku. Doi komuyu lapamo kubukakene komeeng kotataapon, mo aki namoola tinutup doi indee komiano koidan. ⁹ Poneneeke naiya: Komian komo teali Ibiliis namianoo, pakala-kala komo akuiyo kobutongo Yahudi banggokai bolikon, naikon Yaku kubaiyo sahingga yanila lubat totuuku doi salaamu. Tukon yanila naikon toiyo baikon Yaku seseange ikoo. ¹⁰ Tobikon sabab komuyu lapamo tulutiyo Ku parenta sulano pokokoonggol, Yaku kai naikon lindungiyo ikoo luwedoi tempo susaan naikon mo lupayo posaapon kodunia. Langgedoo doiya naikon teali sulano nasobaiyo sasaibino komian doi dunia. ¹¹ Yaku mosobit lubat! Podagaiyo mono-monondok oila komo daanomo doi komuyu, sulano naakiyo komeeng komian kai moolayo kotambo mumanaangan. ¹² Mian mo manaang, naikon kutealikene selaku sudong doi ku Mian Bisa bonua lalomo moliyous, tukon Yana naikon dungol doi tampatoo sidutu-posidutukon. Daku Mian Bisa sambuno, tukon ku Mian Bisa nakota sambuno -- doiyamo Yerusalem boolu komo naikon bulus luwedoi surgaa luwedoi ku Mian Bisa -- naikon kutulise doi mianoo butongo. Tukon koidan kosambunggu mo boolu naikon kutulise doi butongo. ¹³ Indee komiano komo moola molongol, tadukai napalatikanggene oila ko Mian Bisa Na Roh nabinantil doi jemaat-jemaat!" ¹⁴ "Doi malaekat jemaat Laodekia, tulisemo buno naiya: Naiyamo koteteba moluwedoi Mo Bisa, sakisii mo taat tukon talakana, sasaibino kolangge naluwean luwedoi Mian Bisa komo tealikene. ¹⁵ Yaku toiyo oila kopoo kinubai; Yaku toiyo komuyu akipo memel tukon aki koidan pomoonas. Kona tutuuwan komuyu aladomeeng! ¹⁶ Bai komuyu tolongo matalamas; moonas aki, memel aki. Doiyamo kosababpo Yaku toluwekene komuyu tobuat luwedoi babanggu. ¹⁷ Komuyu bantile, ’Kami kaasa tukon lobian sukup; kami aki nakakulangan oioila.’ Bai komuyu aki potoiyo bulaando kotalalaisan tukon bulaando kona susaan komu ndondoong! Komuyu talalais, balalau, tukon piit. ¹⁸ Tobikon doiya Yaku otinauwo komuyu sulano pomongoli luwedoi Yaku komosoni, doiyamo mosoni mo tulen, sulano komuyu poteali kaasa. Pomongoli koidan pakean moute luwedoi Yaku sulano komuyu pobapake tukon potobukiyo kobutomuyu mo talalau tukon makubaiyo mammaa. Tukon pomongolimo koidan pakuli sulano nasinolitikon doi matamu sulano komuyu moola mokita. ¹⁹ Mian-mian komo kusineang, yanilamo kai daku nggimalan tukon kuninanal. Tobikon doiya, siokai komuyu posamangat, tukon badodoloon doi polalim-lalim. ²⁰ Kitayo! Yaku kokondong doi tataapon salaano tukon tokiyo. Kalu daano komian mo lengele koalalonggu, tukon bukayo kotataapon, Yaku naikon usok pososuung yana; Yaku naikon kaan posinggat-singgat yana tukon yana kaan posinggat-singgat Yaku. ²¹ Yanila mo manaang, naikon Kupataikene osulang doi Kukursii pososinggat Yaku, buno pokakana Yaku susuunggu kai lapamo manaang tukon budodoiya Yaku osulang pososinggat ko Tamang-Ku doi nakursii. ²² Indee komiano momoola molongol, tadukai napalatikanggene oila ko Mian Bisa Na Roh nabinantil doi jemaat-jemaat!"

¹ Sambuno lapa doiya yaku malaat pokita koidan. Yaku kitayo komeeng kotataapon tobuka doi surgaa. Doibundu tololongol koidan komeeng koalalo doi tumbeno lapamo basilingan doi yaku pokakana kotrompet alalo. Do alaloo bantile, "Mai liba naimbaa. Yaku naikon tudoikene doikoo oila naikon komo teali." ² Banggadudul ko Mian Bisa Na Roh kuasaiyo yaku. Maka yaku kitayo doi surgaa daano komeeng kokursii, tukon daano komeeng komian moosulang doi kursiidoo. ³ Do mianoo duduso montotilang buno polmata baiduri pandan tukon polmata delima. Meeng kotandalo warna zamrut tikume do kursiidoo. ⁴ Doi lalom kondodoongo do kursiidoo moginogosi potikunggon daano kolua kolono sangkap kokursii bailonggon. Idoo osulang kolua kolono sangkap kokatua mo bapake moute, tukon momapake songgo mosoni. ⁵ Luwedoi kursiidoo tasabul kodidip laango monggilep tukon sumbot koguluk alalo mo palakuluk. Tukon doi kursiidoo salaano daano kopitu koposi mo kolot; doiyamo pitu ko Mian Bisa Na Roh. ⁶ Talaat koidan doi kursiidoo salaano kolangge meeng tokita buno tobun molino, bilisiih buno kristal. Doi potikunggon do kursiidoo, doi sasamba kolisuko, daano kosanggapo komahluk, doi salaano tealikon tukon doi taalikon doi tonggulongo moono tukon matano. ⁷ Mahluk mo tokita tumbe buno singa. Kokoluano, buno saapi langgilo. Kokotoluno daano koduduso buno banggapi duduso. Kokasangkapo, tokita buno tomisi rajawali mo benga. ⁸ Komahluk komo sangkap, suwe-suwele daano konoom kokapilo, tukon napotikunggonan tukon doi lalom taalikon moono tukon matano. Oloyo popook do mahluk-mahlukoo aki natade-tade kona mananian, "Moliyous, moliyous, moliyouso ko Temeneno, Mian Bisa Mobabasal Konakuasa; mo daanomo, mo lapamo daano, tukon mo daano momeenggon." ⁹ Do mahlukoo mosangkap mananikene kolagu-lagu panggaal, pongodotii tukon syukuur doi Yana mo osulang doi kursiidoo, doiyamo Yana mo tubo polong sidutu-posidutukon. Tukon doi tempo do mahluk-mahlukoo namananian, ¹⁰ do katuadoo molua kolono sangkap sosuleengget doi mianoo mo osulang salaano doi kursiidoo, maka sosubaiyo Yana mo tubo sidutu-posidutukon. Doibundu yanila sakukene komai paisonggo-songgo doi kursiidoo salaano maka nabantile, ¹¹ "Oh Temeneno, oh komai Mian Bisa! Tongo Ikoo komo moola mantalima panggaal, pongodotii tukon kuasa. Sabab Ikoomo kopapasitaka sasaibino kolangge tukon luwedoi mumongiasan koidan sasaibino do langgedoo lapamo teali tukon tubo."

¹ Doibundu yaku kitayo komeeng kobuku luluno modaano doi limano mo osulang doi kulusiidoo. Bukudoo moono tukon tulisan doi sembeleng suwe-suwele tukon inobosi pitu kosegel. ² Maka yaku kitayo komeeng komalaekat mo barani mowookon tukon alalo mo babasal, "Indee komo moola bendinge naiya segel-segelia tukon mobukayo naiya buku nia?" ³ Bai mau doi surgaa, mau doi dunia, kai doi dunia nia suukano aki natalaat komeeng komian koidan mo moola bukayo do bukudoo, tukon nakitayo kolalomo. ⁴ Maka yaku kokiil yodi-yodi sabab akiyo komeeng komian kai mo moola bukayo doiya bukudoo, tukon nakitayo doi lalomo. ⁵ Maka daano komeeng komian moluwedoi katua-katuadooila bantil doi yaku, "Inai mokokiil! Kitayo! Kosinga moluwedoi Yehuda nabangsa benseno, Daud naturunan mo babasal, manaango. Yana moola bendinge dosegeloo mopitu tukon bukayo do bukudoo." ⁶ Doibundu yaku kitayo komeeng ko Domba Na Pau mokokondong doi tanga-tangano kulusiidoo tinikumi doi sangkap komahluk tukon sasaibino do katuadoo. Do Dombadoo Na Pau tokita buno lapamo tinembel. Yana daano kopitu kotanduko tukon pitu komatano: doiyamo pitu koroh moluwedoi Mian Bisa mo lapamo sinumbolii doi posaapon kodunia. ⁷ Doibundu do Dombadoo Na Pauno maju tukon alayo do bukudoo luluno doi mianoo limano bakalingano mo daano osulang doi kulusiidoo. ⁸ Daanoon Dombadoo Na Pauno mokubaiyo buno doiya, totukumo kosanggapo komahluk tukon domo lua kolono sangkap do katuadoo doi salaano. Yanila suwe-suwele mataani kacapi tukon manggo mosoni mo inontoki kemenyaan, doiyamo Mian Bisa namian nasambeang-sambeangan. ⁹ Yanila mananikene komeeng kolagu mo boolu: "Ikoo moola alayo do bukudoo tukon bendinge kosegel-segello. Sabab Ikoo lapamo inakate, tukon doi mumatean, kobanggapi doi sasaibino kobenseno, kosilingan tukon bangsa lapamo Ikoo oliyo tuuk doi Mian Bisa. ¹⁰ Ikoo lapamo tealikene yanila meeng kobangsa motangalaas imam-imam, sulano yanila naleleaniyo konda Mian Bisa, tukon mobaparenta doi dunia bungkukono." ¹¹ Doibundu yaku kitayo koidan. Yaku lengele komalaekat alalo komo doi libu-libuso tukon doi juta-juta kona kadaang. Yanila kokondong tikume dokulusiidoo tukon domahlukoo mosangkap tukon sasaibino do katuadoo. ¹² Tukon yanila manani tukon alaloila mo bukuan, "Domba Na Pau mo lapamo tinembeloo, moola namantalima kuasa, kokaasaan, kopandoiyan tukon bukuanan; Yana moola nainodotii, inakabasal tukon ngginaa-nggaal!" ¹³ Maka yaku lengele sasaibino komahluk doi timbu, doi dunia, doi dunia suukano tukon doi tobun lalomo -- kona palusan sasaibino komahluk doi dunia nia -- manani, "Yana komo osulang doi kulusii, tukon Sang Domba Na Paudoo, daano motanggaal tukon inodotii tukon babasal tukon balakuasa polong sidutu-posidutukon!" ¹⁴ Maka do mahlukoo mosangkap timbiliyo, "Amin!" Tukon do katua-katuadoo sosuleengget tukon sosubaiyo.

¹ Sambuno lapa doiya yaku kitayo do Dombadoo Na Pau bendinge do segeloo komeengo doi antara mopitudoo kosegel. Maka yaku lengele komeeng doi antara mosangkap komahlukoo bantil, "Maimo!" Koalaloo nabulunganan buno guluk alalo. ² Maka yaku kitayo, maka tokita komeeng koadalan moute. Komo lokitiyo mataani meeng kopanah batango, tukon doi Yanadoo binee meeng kosonggo. Yana maju buno meeng kopemanaang mo ampakon rebuute kokamanaangan. ³ Doibundu do Domba Na Paunodoo bendinge dosegelloo koluano, tukon yaku lengele domahlukoo koluano mo bantile, "Maimo!" ⁴ Maka komeeng koadalan bailon tobuat koidan. Doiya adalanoo memela kobuluno. Kopolokitino binee kuasa sulano naapusanggene kopookindokonan doi dunia bungkukono, sulano kobanggapi moola mangakate. Maka Yana binee meeng kobakoko mo babasal. ⁵ Maka do Domba Na Paudoo bendinge dosegelloo kotoluno. Tukon yaku lengele domahlukoo kotoluno mobantile, "Maimo!" Yaku kitayo, maka tokita komeeng koadalan momopook. Komo lokitiyo mataani meeng kopasang kotimbangan doi limano. ⁶ Tukon yaku lengele kolangge meeng komo nalinongolan buno alal mo wookon doi mahlukoo mosangkap tanga-tangano. Do alaloo bantile, "Meeng koliter kogandum monondok popaason tambo meeng kooloyo, tukon tolu koliter kogandum kaliangano bailon popaason tambo meeng kooloyo koidan. Bai inai molusake kozaitun batango tukon anggur asino!" ⁷ Doibundu do Domba Na Paudoo bendinge dosegelloo kosanggapo. Tukon yaku lengele mahluk kosanggapo, bantile "Maimo!" ⁸ Yaku kitayo, maka tokita meeng koadalan mo mbole. Kopolokitino kosambuno Maut. Doi tonggulungo Yana linoolaing nggaup-nggaup doi Alam Maut. Kokakuasaan doi soobos sangkap kodunia nia sinalakanggon doi Yanila, sulano Yanila namoola mangakate luwedoi polobosian, lolo doi tempo malaalan, lolo doi panakit tukon lolo doi iyayon-iyayon mobarani. ⁹ Lapa doiya do Domba Na Paudoo bendinge kosegel kolimano. Maka yaku kitayo doi balabaan suukano daano ko mian-mian mo mate inakate uli-uliko sabab yanila mokobukuanggon teteba moluwedoi Mian Bisa luwedoi napoo basakisiian. ¹⁰ Yanila nggeleamon tukon alalo mo babasal, "Oh Temeneno Mobalakuasa, mo moliyous tukon mobisa! Bulaando kona malumbitan koidan maka nasodo Ikoo adiliyo kobanggapi doi dunia tukon muukume yanila sabab yanila akateyomo kami?" ¹¹ Yanila suwe-suwele binee meeng kojubah mo moute. Maka yanila sumboliiyo tade naapa koidan, tukon kalu polongo koaito doi tula-tulano mopomeenggon doi palajuangan tukon utus-utuso nila komo inaikon inakate buno yanila. ¹² Maka yaku kitayo do Domba Na Paudoo bendinge kosegel konoomo. Potealikon koleali mo babasal. Kooloyo teali mopook buno toik mopook mo kasal, tukon kobituwon teali memela buno sau. ¹³ Kobituwon-bituwon pauno otuwong luwedoi timbu doi buta bungkukono pokakana koara saono mo akiyoon namoyoo tuuno topuduli doi batango doi tempo mbombuul mo makansang naunggotano. ¹⁴ Kotimbu lapus buno kalataas linulun, tukon sasaibino kobungkuko maka togong tasaakon luwedoi natangabosan. ¹⁵ Maka kotomundo-tomundo doi dunia, sasaibino kopembesaal, kotalenga-talenga, mian-mian mokaasa tukon mian-mian mobalakuasa, tukon mian-mian bailon, mau ata, mau kai mian mo bebas, sasaibino seekene kobutongo doi leleeng lalomo tukon batu-batu nggoango doi bungkuko. ¹⁶ Doi bungkuko-bungkuko tukon do batu-batudoo, yanila nggeleamon, "Pisaiyomo kami! Seekenemo kai kami luwe napandangan Yana mo osulang doi nakulusiidoo bungkukono napambaleng, tukon luwedoi do Domba Na Paudoo nanggimalan! ¹⁷ Oloyo lokis lapamo lubat, budodoiya Yanila okumbeyo kona pai liitan, tukon akiyo komeeng komian kai moola bataanggon doi Yanila salaano!"

¹ Lapamo doiya, yaku kitayo kosanggapo komalaekat mokokondong doi sangkap kodunia pasuno. Yanila taane kosanggapo nalubatan kombombuul doi dunia sulano inai nadaano kombombuul mo puul doi buta tina kai doi tobun, kai doi kayung-kayung batango. ² Maka yaku kitayo komeeng komalaekat bailon motabuat luwedoi tolopot taalikon. Yana mababa segel moluwedoi Mian Bisa mo tubo. Tukon alalo mo babasal do malaekatoo uange kosanggapo komalaekat mo lapamo malaat kuasa moluwedoi Mian Bisa sulano namanase kobuta tina tukon tobun. ³ Malaekatoo bantile, "Inai looluk momanase kobuta tina kai tobun, kai kayung-kayung batango kalu kami akiyoon mai mebee paloosan segel doi moi Mian Bisa Napeleleani-peleleani paaso." ⁴ Maka yaku binontiikono baikon daano kosakat sangkap kolono sangkap koloon kona kadaang komian mo binee paloosan segel moluwedoi Mian Bisa doi yanila paaso. Dopai mian-mianoo inala doi songulo lua kobenseno ko Israel miano; ⁵ memeeng kobenseno songulo lua koloon komian. Doiyamo moluwean doi benseno: Yehuda, Ruben, Gat, ⁶ Asyer, Naftali, Menasye, ⁷ Simeon, Lewi, Isakhar, ⁸ Zebulon, Yusuf, tukon Benyamin. ⁹ Lapa sambuno doiya yaku kitayo koidan, maka tokita kobanggapi mo madaang tuuno -- akiyo komeeng komian kai moola aite kona kadaang. Yanila daano mian moluwedoi memeeng kobangsa, benseno, negara, tukon silingan. Tukon mapake jubah mo moute tukon koidan mataani kokayung palem panga-pangano doi limano, dopai mian badaangoo kokondong sasalaane do kulusiidoo tukon do Domba Na Paudoo. ¹⁰ Maka tukon alalo mo bukuan, yanila bantile, "Konda kasalamatan nalubatan luwedoi nda Mian Bisa, mo osulang doi nakulusii, bungkukono, tukon moluwedoi Domba Na Paudoo!" ¹¹ Sasaibino komalaekat kokondong boiligiyo do kulusiidoo tukon sasaibino kokatua tukon kosanggapo do mahlukoo. Malaekat-malaekatoo sosuleengget doi kulusiidoo salaano maka nasosubaiyo ko Mian Bisa. ¹² Yanila bantile, "Amin! Tanggal konda Mian Bisa mo babasal tukon napandoi. Yana pantas nabinee lobi-lobian koucapan-ucapan syukur tukon doi pongodotii. Yana balakuasa tukon bukuan polong posidutukon! Amin." ¹³ Daano komeeng komian moluwedoi katua-katuadoo mansadai doi yaku, "Mian-mian mo mapake jubah moute nia, indee miano yanila tukon inaando kona pai lubatan?" ¹⁴ "Yaku aki kutoiyo, Tuan. Tuan susuungo komo toiyo," yaku timbiliyo. Maka Yana bantile doi yaku, "Naiyamo komian mo lapamo salamat luwe lounu pasakisaawan mo hebat. Yanila lapamo kumesiyo kona pai jubah tukon kubaiyo teali moute tukon sau doi Domba Na Paudoo. ¹⁵ Doiyamo kosababpo yanila mokokondong doi Mian Bisa nakulusii salaano, tukon sambeang doi Yana oloyo popook doi Mian Bisa Nabonua lalomo. Tukon Yana mo osulang doi kursii bungkukonodoo naikon polaing tukon yanila sulano lindungiyo yanila. ¹⁶ Yanila aki naikon koidan namotoupi laal kai lou; kai oloyo matano namoonasan tuuno aki koidan nasuayo yanila, ¹⁷ sabab do Domba Na Paunodoo mo osulang doi kulusiidoo tanga-tangano naikon teali pototooli yanila. Yana naikon loolainge yanila doi paisu matano mo mebee tuboan. Tukon ko Mian Bisa naikon itase sasaibino kopai matano paisuno luwedoi yanila matano."

¹ Salataa do Dombadoo Na Pau bendinge dosegelloo kopituno, surgaa teali kiis uga-ugaate sembeleng kojam kona kalumbit. ² Maka yaku kitayo domalaekatoo mopitu kokondong doi Mian Bisa salaano, tukon yanila binee pitu kotrompet. ³ Meeng komalaekat bailon, mababa meeng kodupa mosoni, lubat tukon kokondong doi balabaan salaano. Doi yana binee badaang tuuno kokamangian sulano nainabos doi sasaibino ko Mian Bisa nasambeang-sambeang tukon sulano nasinosubakon doi balabaan mosonidoo mo tangabos doi kursiidoo salaano. ⁴ Posinggat-singgat tukon sasaibino ko Mian Bisa namian nasambeang-sambeang, kodupa tibolungo mo daano mokolotoo kobung liba doi malaekat mo kokondong limano doi Mian Bisa salaanodoo. ⁵ Doibundu malaekatoo pulutemo do kamangiannoo, tukon totuiyomo bilat moluwedoi balabaanoo, maka nasakukene doi dunia bunggono. Maka kokuluk duluk-duluko tukon kodidip potadi-tadimo, tukon tealimo koleali. ⁶ Salataa doiya, pitu komalaekat mo mataani pitu kotrompetoo basa-basadiamo mopuuke. ⁷ Malaekat komeengo puuke kona trompet, maka koudan es tukon bilat moposombuli sau otuwong tukon makansang doi dunia bunggono. Soobos tolu kodunia kabus mosua, bonomo lakon kosoobos tolu kokayung-kayung, tukon samba-samba kobulung mo mandaba. ⁸ Maka domalaekatoo koluano puuke kona trompet, maka daano kolangge meeng mo babasal tuuno mo tokita buno bungkuko mo kolot-kolot mosinakukon doi tobun lalomo. Soobos tolu kotobun tobolii teali sau, ⁹ tukon matemo kai kosoobos tolu doi sasaibino komahluk doi tobun; bunomo lakon koidan manaso koidan kosoobos tolu kokapal-kapal. ¹⁰ Doibundu malaekat kotoluno puuke kona trompet, maka komeeng kobituwon pauno mo babasal, mo kolot-kolot buno posi, tuwong lengget doi timbu, maka pisayo kosoobos tolu doi paisu-paisu tukon paisu-paisu matano. ¹¹ (Kosambuno do bituwonoo "Mosopot".) Maka kosoobos tolu kopaisu teali mosopot, tukon momate badaang komian sabab monginum do paisudoo mo tealimo mosopot. ¹² Maka malaekat kosanggapo puukemo kona trompet. Maka tongumbas kosoobos tolu kooloyo, soobos tolu kobituwon, tukon soobos tolu kobituwon-bituwon pauno maka lapus kai kosoobos tolu moluwedoi yanila nabukuanan laango. Koidan soobos tolu doi oloyo aki namadialan tukon bunomo koidan doi soobos tolu luwedoi popook. ¹³ Maka yaku kitayo, tukon yaku lengele komeeng kotomisi rajawali mo daano mobenga tatandak doi dapang, bantile, "Silaka! Silaka! Silakamo kai sasaibino komian doi dunia kalu naikon tololongol kotolu komalaekat bailonggon mopuuke kona trompet naikon."

¹ Maka malaekat kolimano puuke kona trompet, tukon yaku kitayo komeeng kobituwon pauno otuwong lengget doi dapang doi dunia bunggono. Bituwon paunodoo binee motombing matean kuncino. ² Maka do bituwon paunodoo bukayo komotombing mateanoo maka sumbot kotibolung luwedoi lalomoo buno tibolung doi poolu mo babasal. Kooloyo matano maka dapang teali kalipookan luwe tibolung moluwedoi motombingoo. ³ Maka luwedoi tibolungoo lalomo tobuato kobetek-betek mo obulus doi dunia. Do betek-betekoo binee kuasa mo pokakana buno komo bineekon doi mandasopit. ⁴ Yanila pinantan momanase kobulung, kai kayung-kayung, kai langge-langge mosinakakon bai-bailonggon. Yanila tolongo moola lobosiyo komian mo akiyo kopaloosan segel doi paaso moluwedoi Mian Bisa. ⁵ Do betek-betekoo aki napinataikon moakateyo dopai mian-mianoo, bai tolongo sakisaayo yanila lima kobituwon kona kalumbit. Masakitan mo sakisaa moluwedoi do betek-betekoo buno pokakana masakitan konakalumbit mandasopit nabakakatan. ⁶ Doi lima kobituwon kolumbito, dopai mianoo kakaate sulano namate, bai yanila aki namoola mate; yanila yase momate, bai komatean odoon doi yanila. ⁷ Kondondoongo do betekoo buno kaladai mo batotobo sulano namolobosi. Doi olunoila daano kolangge meeng mo tokita buno songgo mosoni. Koduduso yanila buno banggapi duduso. ⁸ Yanila nabuuk buno boine nabuuk, tukon yanila ngolingo buno singa ngolingo. ⁹ Yanila oyopo tinutupi tukon meeng kolangge mo adukon buno bokukum besi. Yanila kapilo alalo buno meeng kotambuno babasal kokereta-kereta kaladai alalo mo daano momolobosi doi polobosian lalomo. ¹⁰ Yanila daano kopuuso tukon upason buno mandasopit. Tukon doi puuso lalomoila doiyamo kona talaatan yanila nabukuan sulano nasakisaayo kobanggapi doi lima kobituwon kona kalumbit. ¹¹ Yanila daano kona tomundo mo parentayo yanila, tukon do tomundodoo doiyamo malaekat mo moola tanggung jawape luwedoi motombing matean. Kosambuno doi silingan Ibrani lalomo doiyamo Abadon; tukon doi silingan Yunani lalomo Apolion (koalatino "Pamanas"). ¹² Kosilakaan tumbeno lapamo tinotonggulung. Nalapa doiya daano kolua kosilaka koidan komo sio nalubat. ¹³ Doibundu malaekat konoomo puuke kona trompet. Maka yaku lengele koalal molubat luwedoi sangkap kopasuno dobalabaan mosonidoo mo tangabos doi Mian Bisa salaano. ¹⁴ Do alaloo bantile doi malaekat konoomodoo, "Sodiiyomo kai kosanggapo komalaekat komo tokooton doi Efrat Paisunobatango!" ¹⁵ Kai sinodiimo do malaekatoo mosangkap. Yanila lapamo sinadiakon kusus doi jam, oloyo, bituwon tukon taun doiya sulano namangakate kosoobos tolu doi sasaibino kobanggapi. ¹⁶ Yaku binontiikon baikon koaito kopasukan-pasukan momolokiti do adalanoo kona kadaang lua kosakato kojuta. ¹⁷ Tukon doi pokita lalomo, yaku kitayo do adalan-adalanoo tukon polokiti-polokitino. Kopolokiti-polokitino mapake kalambi besi mo memela tuuno, manampal buno batu nilam, tukon mokuni bolelang. Do adalan-adalanoo kooluno buno singa oluno, tukon doi babano tobuat kobilat, kotibolung, tukon bolelang. ¹⁸ Soobos tolu kobanggapi tangakate luwedoi tolu do balaadoo; doiyamo bilat, tibolung, tukon bolelang mo tobuat doi adalan-adalanoo babano. ¹⁹ Kona bukuanan do adalan-adalanoo talaat doi babano tukon koidan doi puuso. Kopai puuso-puuso buno binda modaano kooluno. Tukon doi puusodoo, do adalan-adalanoo sakisaayo kobanggapi. ²⁰ Bai kolabino kobanggapi mo aki natangakate luwe do bala-balaadoo aki koidan namongotinggal limanoila susuungo nakinubai. Yanila aki natade mososubaiyo koroh-roh lokis tukon sosubaiyo kopilogot-pilogot mosoni, suasa, tambaga, batu tukon kayung mo aki namoola mokita kai molongol, kai momoola ampakon. ²¹ Yanila aki koidan naotinggale konapoo kokubai-kokubai mo lokis, doiyamo mangakatean, motoiyan-motoiyan mominasaingdinggon, balolowaan tukon pondikukan.

¹ Maka yaku kitayo komeeng komalaekat barani bailon obulus luwedoi surgaa. Yana binungusi tukon bunom, tukon komeeng kotandalo mokaloyo kooluno. Koduduso montootilang buno oloyo matano, tukon koaino buno aung sudongo. ² Doi limano daano komeeng kobuku pauno mo tobuka. Koaino bakalingano banggaulanggene doi tobun, tukon koaino bobo banggaulanggene doi buta tina. ³ Maka Yana nggeleamon tukon alalo mo babasal buno singa-singa mongangaton. Sambuno lapa do malaekatoo monggeleamon kopitu koduluk timbiliyo tukon alalo mopalaguluk. ⁴ Buno doiya kopitu do dulukoo mobasuala, yaku yase motulise, bai yaku lengele koalal moluwedoi surgaa mobantile, "Rahasiakanggene oila do dulukoo mopitu nabinantil; inai motulise!" ⁵ Maka malaekat yaku mo kitayo mobanggaulanggene koaino doi tobun tukon doi buta tinadoo tidekene kolimano bakalinga doi timbu. ⁶ Yana batotopi tukon Mian Bisa sambuno mo tubo sidutu-posidutukon, mo pasitakayo kotimbu, dunia tukon tobun tukon sasaibino kolangge mo daano doi lalom. Do malaekatoo bantile, "Kotempono akimo nabinuntus koidan! ⁷ Bai kalu naikon domalaekatoo mopitu puukemo kona trompet, ko Mian Bisa laksanakanggenemo kona tetel linaasiakon, buno komo lapamo yana pelenggene doi napeleleani-peleleani, doiyamo sasaibino konabi." ⁸ Doibundu do alaloo mo lapamo yaku lengele moluwedoi surgaadoo, basilingan koidan doi yaku. Yana bantile, "Ampakono mualayo do bukudoo luluno mo tobuka doi malaekatoo limano mo banggaulang doi tobun tukon doi buta tinadoo." ⁹ Maka yaku kai ampakono doi malaekatoo tukon yaku kabiyo sulano yana nabeekene doi yaku do buku lulunodoo mopoipoisik doi yaku. Yana bantile, "Alayomo tukon kaane naiya. Doi tiamu lalomo yana naikon teali mosopot, bai doi babamu lalomo yana maamis buno dokot." ¹⁰ Yaku alayo do bukudoo luluno poipoisikoo luwedoi limano maka kukaane. Doi babanggu kotamiso buno dokot, bai sambuno yaku kuwete, doi tianggu lalomo yana teali mosopot. ¹¹ Doibundu yaku pinarentakon, "Babilitakene koidan kobilita Mian Bisa tentang bangsa-bangsa, negara-negara, silingan-silingan, tukon tomundo-tomundo."

¹ Sambuno doiya yaku binee meeng kopatolo kayung mo buno meeng kobatang tongkat pongukur, maka pinarentakon, "Ampakono moukure ko Mian Bisa Nabonua tukon balabaan. Aitemo bulaa kona kadaang komian bakaleda doi lalomo. ² Bai inaikai moukure kobasaleano mo taalikon tonggulung doi Mian Bisa Nabonuadoo, sabab do obosoo doiya lapamo sinalakanggon doi mian mo aki natingoniiyo ko Temeneno. Yanila naikon tudo-tudongiiyo kota mo moliyousoo sangkap kolono lua kobituwon kona kalumbit. ³ Yaku naikon mosumbolii lua komian daku sakisii mo mapake pakean mandaungan, tukon yanila naikon umumkanggene ko Mian Bisa nabilita kolumbito soloon lua kosakato noom kolono kooloyo." ⁴ Lua do sakisiidoo doiyamo lua kozaitun batango tukon lua koposi aino mo tangabos doi Temeneno salaano mopasitakayo dunia. ⁵ Kalu komian mosoba-sobayo kubaiyo kolangge mo aki namonondok motuuk doi yanila, maka luwedoi babanoila tobuat kai kobilat mo suayo kona musu-musu. Tukon kokubai mobuno doiya, sasaibino komian mo yase osokitiyo yanila naikon tangakate. ⁶ Yanila daano kuasa sulano natutupe kotimbu sulano inai naolubatene koudan selama yanila daano moumumkanggene kobilita moluwedoi Mian Bisa. Yanila daano koidan kokuasa luwe sasaibino kopaisu matano, sulano moboliiyo kopaisu teali sau. Tukon yanila daano koidan kuasa sulano naumbase kodunia tukon sasaibino kobalaa kaliangano, kotempono yanila nayasano molakukanggene. ⁷ Salataa yanila lapa babilitakanggene konapai bilita, iyayon mo tobuat luwedoi motombing matean naikon lawane yanila. ⁸ Tukon yanila bajano naikon tasabul doi kota babasal loloono babasal, doi naando konapo Temeneno nasinempanggonan. Kosambuno moinandekon do kotadoo doiyamo Sodom kai Mesir. ⁹ Komian doi sasaibino konegara, suku, silingan tukon bangsa naikon kitayo yanila bajano selama tolu sembeleng kooloyo, tukon aki napinataikon do bajan-bajano natinadin. ¹⁰ Kodunia tumbuno naikon laba-laba luwe namatean kolua do sakisiidoo. Yanila naikon lamekene tukon pokopotuy hadia, sabab kolua komian do nabidoo olubatene badaang kosakisaawan doi sasaibino komian doi dunia. ¹¹ Salataa tolu sembeleng kooloyo, lubato kai koansaang tuboan moluwedoi Mian Bisa tukon usok koidan doi lalomo kolua komian do nabidoo. Yanila tubo kokoidan sahingga sasaibino komian mo kitayo yanila teali matakut tuuno. ¹² Doibundu kolua komian do nabidoo lengele koalalo mobabasal mo uange yanila luwedoi surgaa, "Maimo liba naimbaa!" Maka doi napo musu-musu matano salaano, yanila kai libamo doi surgaa, tinombuki bunom. ¹³ Maka doiya kosinggatoo tealimo kai koleali mo lokis. Tongobos songulo lua do kotadoo manas, tukon pitu koloon komian momate sabab doiya lealidoo. Komian bailonggon teali matakut tuuno, maka yanila nggaale kona babasalan ko Mian Bisa doi surgaa. ¹⁴ Silakaan koluano lapamo lapa. Bai kitayo kai! Silakaan kotoluno naapa koidan naikon tuundu. ¹⁵ Maka malaekat kopituno puuke kona trompet, maka doi surgaa tololongol koalalo-alalo mobabasal tuuno mo bantile, "Kokuasa tuuk moparentayo kodunia budodoiya daano doi Temeneno limano tukon Tomundo Pasalamat komo dondiikenemo. Yana naikon baparenta tuuk sidutu-posidutukon!" ¹⁶ Maka kolua kolono sangkap kokatua mo osulang doi yanila nakulusii doi Mian Bisa salaano, tootuku tukon sosubaiyo ko Mian Bisa. ¹⁷ Yanila bantile, "Temeneno, Mian Bisa Mobabasal Konakuasa, mo daano, tukon mo lapamo daano! Kami bakinatauwan doi-Koo sabab Ikoo lapamo pakeyo Mu kuasa mo babasal, tukon lapamo tambuun maparenta! ¹⁸ Komian mo aki natingoniiyo ko Temeneno, nggimal sabab laatemo kotempono Ikoo mukumbeano Mu nggimalan, tukon laatemo koidan kotempono Ikoo mupalesaano komian momate. Naiyamo kotempono sulano mebee tambo doi Mupeleleani-peleleani, sasaibino konabi, tukon sasaibino Mu mian, doiyamo sasaibino komian mo bakaleda doi-Koo, babasal mau kai poipoisik. Naiyamo kotempono sulano naminanas ko mian-mian mo manase kodunia!" ¹⁹ Maka tobukamo ko Mian Bisa Nabonua doi surgaa, tukon doi lalomo tokitamokai ko Peti Perjanjian doi lalomo. Maka tealimo kai didip nopopondili tukon koguluk alalo mopalaguluk tukon tolindungan, tukon leali tukon udan es mo babasal.

¹ Maka tokita doi timbu komeeng kolangge mo sosibong tukon mominasaingdinggon. Meeng koboine mo pakeyo kooloyo matano salaku napakean, daano mokokondong doi bituwon bunggono. Doi oluno talaat komeeng songgo mo tongokokondong luwedoi songulo lua kobituwon pauno. ² Do boinedoo daano motianan, tukon tobikon laatemo kotempono sulano namosuung, maka yana wookon namasakitan. ³ Maka tokita koidan doi timbu komeeng kolangge mo minasaingdinggon. Daano komeeng kobinda momemela mo babasal tuuno mo daano kopitu kooluno tukon songulo kotanduko. Doi meeng kotandukkodoo daano komeeng kosonggo. ⁴ Tukon kopuuso yana unguwo kosoobos tolu luwedoi bituwon pauno doi timbu tukon sakukenemo doi dunia. Bindadoo kokondong doi boinedoo salaano mo yase mosuung tukon kona makisuut lemese kona pau, kalu yana sosuung. ⁵ Maka do boinedoo mosuung meeng kopau mala-malaneno naikon mo parentayo sasaibino kobangsa tukon tongkat besi. Bai do paudoo linambas luwedoi boinedoo, maka binaba doi Mian Bisa tukon doi kursii salaano. ⁶ Maka boinedoo obulen doi padang gurun, doi lipu mo lapamo Mian Bisa sadiakene doi yana. Doi lipudoo yana naikon piniala sololoon lua kosakato noom kolono kooloyo kona kalumbit. ⁷ Maka doi surgaa teali kopolobosian. Mikhael polaing kona malaekat-malaekat molobosi molawane bindadoo. Tukon bindadoo kai, namalaekat-malaekat motomboniiyo, lawane Mikhael. ⁸ Bai do bindadoo linunggui. Yana tukon namalaekat-malaekat aki napinataikon koidan modungol doi surgaa. ⁹ Do bindadoo mo babasal sinakukon doi tongkulung! Yanamo do binda motuadoo mo sinombuikon Ibiliis, mo tipuwo sasaibino kobanggapi doi dunia. Yana sinakukon doi dunia tukon sasaibino kona malaekat. ¹⁰ Maka yaku lengele alalo mo babasal doi surgaa bantile, "Budodoiyamo kai kotempono ko Mian Bisa nasalamatanano kona mian! Budodoiya ko Mian Bisa otudoikene kona kuasa salaku Tomundo! Budodoiya ko Tomundo Pasalamat mo pinaladandikono koidan otudoikene kona kakuasaan! Sabab komo tuduwo koutus-utusonggita doi Mian Bisa salaano oloyo tukon popook, lapamo tinobuatonggon doi surgaa. ¹¹ Koutus-utusonggita lapamo lungguiyo yana tukon do Dombadoo Na Pau sauno, tukon koidan bilita bisa moluwedoi Mian Bisa komo yanila babilitakene. Yanila yase sosubakene kobutongo sampe mate. ¹² Sabab doiya, siokai kosurgaa tukon komo dungol doi lalom, laba-laba! Bai silaka kai kodunia tukon tobun, sabab ko Ibiliis lapamo obulus doikoo tukon nggimalan mo babasal tuuno, sabab yana toiyo baikon kotempono baino soisik koidan." ¹³ Salataa do bindadoo toiyo baikon yana molapamo sinakukon doi dunia, yana mulaimo mobuluke do boinedoo mo lapamo suunge dona pau malanenodoo. ¹⁴ Bai do boinedoo binee lua kotomisi rajawali kapilo mo babasal sulano nabenga doi nadungolan doi padang gurun, iyaando yana naikon napinialaan tolu sembeleng kotaun kona kalumbit tongosodii luwedoi binda molobosiano. ¹⁵ Maka do bindadoo supakene luwedoi babano badaang tuuno kopaisu taalikon doi boinedoo, sulano nalaline. ¹⁶ Bai kodunia tomboniiyo do boinedoo; kodunia bukayo kobabano tukon kuwete kopaisu mo sumbot doi bindadoo babano. ¹⁷ Do bindadoo teali nggimal tuuno doi boinedoo, maka yana ambakon molobosiyo kokatulunan mo bailon moluwedoi boinedoo, doiyamo sasaibino komian mo taatiyo ko Mian Bisa naparenta-parenta, tukon mo beena kasaksian tentang Yesus tukon nakuasa. ¹⁸ Maka do bindadoo kokondongo doi tobun bibilo.

¹ Doibundu yaku kitayo komeeng koiyayon motobuat luwedoi tobun lalomo. Yana daano songulo kotanduko tukon pitu kooluno. Doi sasamba kotanduko daano komeeng kosonggo, tukon doi sasamba kooluno totulis komeeng kosambu pototulai motuuk doi Mian Bisa. ² Iyayon yaku mo kitayodoo buno macan tutul, tukon koaino buno beluang aino, tukon kongoolo buno singa ngoolo. Maka do bindadoo beekene konabukuanan susuungo doi iyayonoo, tukon konakulusii, tukon nakakuasaan mo babasal. ³ Do iyayonoo oluno mopitu daano komeeng tokita buno pakol mobabasal tuuno, bai do pakoloo tangalino. Posaapon kodunia loingiyo do iyayonoo tukon noa masaingding. ⁴ Tukon yanila sosubaiyo do bindadoo sabab yana lapamo beekene kona kakuasaan doi iyayonoo. Tukon yanila sosubamo doi iyayonoo koidan. Yanila bantile, "Akiyo komo pokakana doi iyayon nia! Akiyo komo moola polobosi molawane yana!" ⁵ Do iyayonoo minoolakon mabantil langge-langge mo binanggal-banggaalkon tuuno tukon totulaiyo ko Mian Bisa. Yana minoolakon namaparenta sangkap kolono lua kobituwon kona kalumbit. ⁶ Maka yana tambuuno mototulaiyo ko Mian Bisa, tukon Mian Bisa sambuno. Bunomo lakon ko Mian Bisa nalipu dungolan, tukon sasaibino komo dungol doi surgaa bai yana totulaiyo. ⁷ Yana minoolakon koidan molawane ko Mian Bisa namian tukon lungguiyo yanila. Tukon kakuasaan luwedoi sasaibino kobenseno, negara, silingan tukon bangsa bineekon doi yana. ⁸ Do iyayonoo naikon sinosubai doi sasaibino komian mo tubo doi dunia, alaasene komian kosambuno molapamo totulis moakiyoon kodunia napinasitaka, doi mian motubo nabuku lalomo Domba Na Pauno koona mo lapamo tinembel. ⁹ Tobikon doiya, kalu komuyu moola molongol, polengele naiya bilita nia: ¹⁰ "Mian mo sio natinaan, pasti naikon tinaan. Tukon mian mo sio nainakate tukon bakoko, pasti inakate tukon bakoko. Doiyamo kosababpo ko Mian Bisa namian sio nasabar tukon taat." ¹¹ Maka yaku kitayo komeeng koiyayon bailon motobuat doi buta sakean lalomo. Yana daano kolua kotanduko pokakana kodomba pauno tanduko. Koalalo buno binda alalo. ¹² Doi iyayon tumbenodoo salaano yana mapake kakuasaan mo babasal yana mo laate luwedoi iyayonoo koidan. Posaapon kodunia tukon sasaibino komo dungol doi bunggono, pinakisaakon mososubaiyo do iyayon tumbenodoo, kona pakol mo babasal lapamo tangalin. ¹³ Iyayon mo koluanodoo mokubai langge-langge mominasaingdinggon mo babasal. Doi sasaibino komian salaano yana mongkubai bilat obulus luwedoi timbu otuwong doi dunia. ¹⁴ Tukon sasaibino komian mo tubo doi dunia yana tipuwomo tukon nalangge-langge mominasaindinggon yana mo kubaiyo doi iyayon tumbenodoo salaano. Tukon yanila sasaibino pinarentakono mokekendenge komeeng kotimbalang moluwedoi iyayonoo mo lapamo pinokoli bakoko bai tataap tubo. ¹⁵ Do iyayon koluanodoo minoolakon mebee ansaangan do timbalangoo, maka do timbalangoo moola basilingan tukon akateyo sasaibino komian mo aki nayase sosubaiyo yana. ¹⁶ Sasaibino komian babasal tukon poipoisik, kaasa tukon talalais, ata tukon mian mobebas, do iyayonoo pakisaayo sulano namantalima paloosan doi limano bakalinganonila kai doi paasoila. ¹⁷ Akiyo komeeng komian kai moola bangoli kai mabalukon meeng kolangge, kalu doi yana akiyo do paloosanoo, doiyamo do iyayonoo sambuno susuungo, kai angka mo nyatakanggene do sambunodoo. ¹⁸ Naimbaa palaluu nadaano kopandoiyan. Mian mo pandoi moola naaite koalatino luwedoi angka iyayonoo, sabab do angkadoo daano kai meeng kobanggapi sambuno. Koangkano doiyamo 666.

¹ Doibundu yaku kitayo, maka tokita do Dombadoo Na Pauno mokokondong doi Sion Bunggulo bunggono. Polaing yana daano ko 144.000 komian komo doi paaso suwe-suwele totulis kosambuno tukon Tamano sambuno. ² Maka yaku lengele koalalo moluwedoi timbu momuuk buno paisu otuwong mo babasal tukon buno guluk motolindungan modeikon lobo. Do alalodoo tololongol buno musik alalo moluwedoi pomaen-maen kasapi mo daano momaenggene kona kasapi. ³ Doi kursii salaano tukon kosanggapo komahluk tukon sasaibino kokatua doi potikunggon do kursiidoo, 144.000 do mianoo mananikene doi meeng konanian mo soodo. Do nanianoo aki namoola inotunggukon doi meeng komian kai alaasene luwedoi 144.000 do mianoo mo lapamo binebaskanggon luwedoi dunia nia. ⁴ Yaniladoo mian mo tataap bilisii buno mian moakiyoon naosowaan, sabab aki namongkubai pososuungan tukon boine. Yanila loloiyo do Dombadoo Na Pau mau inaandomo kona ambakonan. Doi antara sasaibino kobanggapi, yanilamo kai komo lapamo binebaskanggon salaku pososubakon tumbeno doi Mian Bisa tukon doi Dombadoo Na Pauno. ⁵ Yanila aki nasidutu kala-kala; tukon akiyo kopangasalakon mau nabaino soisik doi yanila. ⁶ Maka yaku kitayo komeeng komalaekat bailon mo benga tatandak doi timbu. Do malaekatoo babayo kobilita tentang Bilita Monondok mo bisa sulano napinolonggon doi banggapi doi dunia doiyamo doi sasaibino kobangsa, benseno, silingan tukon negara. ⁷ Do malaekatoo bantile tukon alalo mo babasal, "Pomatakutene ko Mian Bisa, tukon ponggaale kona babasalan! Sabab laatemo kotempono ko Mian Bisa napalesaano kobanggapi. Pososubaiyo Yana mo tealikene kotimbu, buta, tobun tukon sasaibino kopaisu matano!" ⁸ Malaekat koluano tunduwo komalaekat tumbeno maka bantile, "Lapamo tuwong! Kokota Babel mo babasal lapamo tuwong! Yana lapamo kubaiyo doi sasaibino kobangsa teali malangu tukon anggur paisuno -- doiyamo anggur moluwedoi namoot molokis!" ⁹ Meeng komalaekat kotoluno tunduwo do malaekatoo molua, maka bantile tukon alalo mo babasal, "Mian mo sosubaiyo do iyayonoo tukon timbalango, tukon mapake paloosan do iyayonoo doi paaso kai doi limano, ¹⁰ doiya mianoo naikon monginum Mian Bisa naanggur, doiyamo anggur nanggimalan mo lapamo kundange galaas doi lalomo, aki namoola kinurangi mau nabaino soisik! Sasaibino do mianoo naikon sinakisaa doi bilat lalomo tukon belerang doi malaekat-malaekat momoliyous salaano tukon doi Domba Paunodoo salaano. ¹¹ Tibolung moluwedoi bilat mo sakisaayo do mianoo naikon kobung banggadudul momeeng polong sidutu-posidutukon. Oloyo popook akiyo kona tade-tadean yanila tasakisaa, doiyamo yanila mo sosubaiyo do iyayonoo tukon timbalango, sasaibino komian mo mapake paloosan do iyayonoo sambuno." ¹² Doi langge nia lalomo ko Mian Bisa namian mo taat doi Mian Bisa naparenta-parenta tukon taat doi Yesus, palaluu nateali sabar. ¹³ Maka yaku lengele koalalo moluwedoi surgaa bantile, "Tulisemo naiya: Mulai budodoiya, kinatauwan doi mian mo matemo bai tau-tausono leleaniyo ko Temeneno!" "Bisa!" Mian Bisa Na Roh timbiliyo. "Yanila naikon tade mobalimang babalat, sabab konapo hasil baleleanian sidutu naikon lolainge yanila." ¹⁴ Doibundu yaku kitayo, maka tokita komeeng kobunom mo moute. Doi bunomoo bunggono osulang komeeng komian mo tokita buno banggapi. Doi oluno daano komeeng kosonggo batomundoan mosoni, tukon doi limano daano komeeng kosabel mo mamangan. ¹⁵ Doibundu komeeng komalaekat bailon motobuat luwedoi Mian Bisa Nabonua. Tukon alalo mo babasal, Yana bantile doi Yana mo osulang doi bunom bunggonodoo, "Aakenemo komu sabeloo tukon pupuiyomo budodoiya, sabab laatemo kotempo bapupuiyan; dunia moolamo tuuk napinupui!" ¹⁶ Maka Yana mo osulang doi bunom bunggonodoo aakenemo kona sabel doi dunia, maka kodunia pinupuimo. ¹⁷ Doibundu yaku kitayo komeeng komalaekat bailon koidan tobuat luwedoi Mian Bisa Nabonua doi surgaa. Mau Yana mataani meeng kosabel mo mamangan. ¹⁸ Lapa doiya, meeng komalaekat bailon, mo kuasaiyo kobilat, lubat luwedoi balabaan. Tukon alalo mo babasal Yana bantil doi malaekat mo taaniyo do sabeloo mo mamangan, "Aakenemo komu sabelokon tukon talekemo koanggur-anggur saono doi dunia, sabab kosao-saono moyoomo!" ¹⁹ Maka do malaekatoo aakenemo kona sabel doi dunia tukon taise koanggur-anggur saono doi batango, maka nasakukene doi pakakas popipis anggur ko Mian Bisa nggimalo tuuno mo toku-tokumbe. ²⁰ Do anggur-anggur saonodoo piniis doi kota tonggulungo, tukon luwedoi pakakas popiis do angguroo lomba kosau buno paisu, kona odoonan tolu kosakato kokilo metel, tukon kona ateanan adukon lua kometer.

¹ Doibundu yaku kitayo doi timbu komeeng kolangge mo sosibong tukon bolikon langge kona hebatan. Daano kopitu komalaekat tukon pitu kobalaa napupusan. Naiyamo kona kabusan ko Mian Bisa Naokitakanano Nanggimalan. ² Salataa lapa doiya yaku kitayo komeeng kolangge mo tokita buno doi sulumiin lalomo posombuli tukon bilat. Yaku kitayo koidan komian mo lapamo manaang luwedoi iyayon tukon timbalango, tukon manaang luwedoi mian kosambuno Mopinaloosanomo tukon angka. Komian mo manaangoo kokondong doi sulumiinoo bibilo maka mataani kasapi komo bineekon luwedoi Mian Bisa doi yanila. ³ Tukon yanila mananikene Musa nanyanyian, Mian Bisa napeleleani, tukon Domba Na Pau nanyanyian. Buno naiya koalalo, "Temeneno, Mian Bisa Mobabasal Konakuasa, deikon lobo kona babasalan tukon kona minasaingdinggonan komu kokubai-kokubai! Tomundo sasaibino kobangsa, bolikon langge kona adilan tukon nakanaan komu tindakan-tindakan! ⁴ Indee komiano komo aki namatakutene doi-Koo, Temeneno? Indee komo aki nayase babilitakene komu babasalan? Tolongo Ikoo komo moliyous. Sasaibino kobangsa naikon lubat sosubaiyo Ikoo sabab komu tindakan-tindakan mo adil molapamo sasaibino komian kitayo." ⁵ Sambuno lapa doiya yaku kitayo ko Temeneno na Sandung doi surgaa motobuka, tukon Temeneno na Sandung daano doi lalomo. ⁶ Maka do malaekat mopitudoo tukon pitu do balaadoo tobuat luwedoi Mian Bisa Nabonua. Yanila napakean luwedoi toik lenan mo bilisii tukon nggilep-nggilep. Tukon yanila mapake pokukupi oyopo mo tokubai luwedoi mosoni. ⁷ Doibundu daano komeeng moluwedoi sangkap komahlukoo beena doi pitu komalaekatoo pitu kogalaas mosoni mo moono tukon Mian Bisa nanggimalan, -- Mian Bisa mo tubo sidutu-posidutukon. ⁸ Maka do Mian Bisa Nabonuadoo moono tukon tibolung luwedoi Mian Bisa nababasalan tukon nakuasa. Tukon do balaadoo mopitu namalumbitan do malaekatoo mopitu nababaano akiyoon napupus, akiyo komeeng komian kai mo moola usok doi Mian Bisa Nabonua lalomo.

¹ Maka yaku lengele koalalo mobabasal moluwedoi Mian Bisa Nabonua lalomo mobantil doi mopitu komalaekatoo, "Ampakono tukon kundangemo koantoko domo pitudoo kogalaas ko Mian Bisa nanggimalanoo doi dunia bunggono!" ² Malaekat komeengo ambakon tukon kundange kona galaas antoko doi dunia. Maka sumboto kobisul-bisul mo deikon langge tukon momasakit tuuno doi sasaibino komian mo daano paloosano do iyayonoo, tukon doi mian mo sosubaiyo kotimbalango. ³ Sambuno lapa doiya malaekat koluano kundange kona galaas antoko doi tobun. Maka kopaisu doi tobun tabali buno mian mate sauno, tukon matemo sasaibino komahluk mo tubo doi tobun lalomo. ⁴ Doibundu malaekat kotoluno kundange kona galaas antoko doi paisu-paisu batango tukon kopaisu-paisu matano, maka sasaibino kopaisuno teali sau. ⁵ Yaku lengele komalaekat mo kuasaiyo kopaisu bantile, "Koukuman Ikoo mo otuwengemo doiya adil, oh Moliyous, Mian Bisa mo daano, tukon mo lapamo daano! ⁶ Yanila lapamo kundange kosauno ko Mian Bisa namian tukon nabi-nabi sauno; budodoiya Ikoo kubaiyo yanila monginum sau. Takainomo pantas doiya natuuk doi yanila!" ⁷ Maka yaku lengele koalalo moluwedoi balabaan mobantile, "Temeneno, Mian Bisa Mobabasal Konakuasa, bisa tukon adil kai koukuman-ukuman Ikoo mo otuwenge!" ⁸ Sambuno lapa doiya malaekat kosanggapo kundange kona galaas antoko doi oloyo matano, maka kooloyo matano kai minoolakon mokopupuliyo kobanggapi tukon onaso mo moonas tuuno. ⁹ Kobanggapi kinopupuli tukon doi moonason tuuno, tukon yanila kutukemo ko Mian Bisa sambuno, mo kuasaiyo do balaa-balaadoo. Mau kai nabuno doiya, yanila aki nayase badodoloon doi napolalim-lalim tukon aki nayase nggaale ko Mian Bisa nababasalan. ¹⁰ Maka malaekat kolimano kundange kona galaas antoko luwedoi iyayonoo nakulusii. Maka sasaibino do iyayonoo nabatomundoan teali kalipookan, tukon kobanggapi kakate koalepo sabab namasakitan. ¹¹ Maka yanila kutukemo ko Mian Bisa doi surgaa sabab yanila masakito tukon sabab napo bisul-bisul. Bai yanila aki koidan nabadodoloon doi napokokubai-kokubai mo lokis. ¹² Sambuno lapa doiya malaekat konoomo kundange kona galaas antoko doi Efrat Paisunobatango mo babasaloo. Maka do paisu batangodoo mooti maka kotomundo-tomundo moluwedoi tolopot moola moambakon tukon loloiyo. ¹³ Maka yaku kitayo tolu koibiliis kondondoongo buno tupak. Suwe-suwele tupakoo tobuat luwedoi binda babano, luwedoi iyayon babano, tukon luwedoi nabi mokala-kala babano. ¹⁴ Yanila daano kai ibiliis mo kubaiyo kolangge-langge mominasaingdinggon. Do rohdoo motolu ampakon doi sasaibino kotomundo doi posaapon kodunia tukon pototongikene yanila sulano napo lobosi doi Oloyo mo babasal, doiyamo Oloyo moluwedoi Mian Bisa Mobabasal Konakuasa. ¹⁵ "Polengele! Yaku lubat pokakana kopondikuk! Kinatauwan doi mian mo tataap batodanggon tukon modagaiyo kona pakean, sampe yanila aki naambakon tukon balalau tukon teali mammaa doi mian badaang matano!" ¹⁶ Doibundu do roh-rohdoo pototongikene do tomundo-tomundodoo doi meeng kolipu kalu silingan Ibrani sinombuikon Harmagedon. ¹⁷ Salataa lapa doiya malaekat kopituno kundange kona galaas antoko doi dapang. Maka tololongol kai koalalo mo babasal moluwedoi kulusii Mian Bisa Nabonua, mo bantile, "Lapamo lapa!" ¹⁸ Maka tealimo kodidip monggilep-nggilep tukon guluk alalo mobulungan tukon tolindungan, tukon leali mo lokis. Aki nasidutu teali koleali mobuno doiya salataa kobanggapi natinealikonan. Naiyamo koleali mo lokis tuuno! ¹⁹ Kota mo babasaloo mapasah teali tolu koobos, tukon manaso kai koidan kokota-kota sasaibino konegara doi dunia. Maka ko Mian Bisa neneeke naikon ko Babel mo babasaloo. Maka ko Mian Bisa kubaiyo yana monginum anggur moluwedoi Mian Bisa naanggur galaaso -- doiyamo anggur nanggimalan mo toku-kumbe. ²⁰ Sasaibino kotogong lapus, tukon sasaibino kobungkuko lapus. ²¹ Koudan es babasal, komo suwe-suwele kona babalatan lima kolono kokilogram, otuwong luwedoi timbu tikale ko mian-mian. Maka yanila kutukiyomo ko Mian Bisa sabab balaa udan es mo lokisoo.

¹ Salataa lapa doiya daano komeeng komian moluwedoi malaekat mopitu mo taaniyo do galaasoo lubat doi yaku tukon bantile, "Mai, yaku naikon tudoikonggon doikoo bulaando do pololowadoo babasal naikon nainukuman; doiyamo do kota babasaloo mo kinokondong poloolanikon kopaisu-paisu batango. ² Kotomundo-tomundo doi dunia pololowai tukon yana, tukon kodunia tumbuno teali malangu sabab yanila monginum anggur nabalolowaan." ³ Maka ko Mian Bisa Na Roh kuasaiyo yaku, tukon do malaekatoo babayo yaku doi padang lalomo. Indaa yaku kitayo komeeng koboine moosulang doi meeng koiyayon bungguto kobuluno memela motuwa, tukon mo moono tulisan sambu-sambu pototulai motuuk doi Mian Bisa. Do iyayonoo daano kopitu kooluno tukon songulo kotanduko. ⁴ Do boinedoo bakalambi kotambongo ungu tukon memela motuwa, tukon binubungai mosoni, permata-permata, tukon mutiara. Doi limano yana taaniyo komeeng komanggo mosoni mo moono tukon langge-langge molokis tukon momanggilit, hasil moluwedoi nabalolowaan. ⁵ Doi paaso totulis komeeng kosambu koalatino lahasia. Do sambunodoo doiyamo, "Babel Mo Babasal, tina sasaibino komian mobalolowa tukon mian molokis doi dunia." ⁶ Maka yaku kitayo baikon do boinedoo malangu tukon Mian Bisa namian sauno tukon mian-mian mo inakate sauno sabab yanila taat doi Yesus. Salataa yaku kitayo do boinedoo, yaku teali masaingding. ⁷ Maka do malaekatoo bantile doi yaku, "Oila kosababpo ikoo momasa-masaingding? Tadukai kubontiikonggon kolahasiano do boinedoo tukon kolahasiano koiyayon yana mo lokitiyo, doiyamo iyayon mo daano pitu kooluno tukon songulo kotanduko. ⁸ Do iyayonoo loolukon biasa tubo, bai budodoiya akimo natubo koidan. Yana naapa koidan naikon tobuat luwedoi motombing matean tukon naikon ampakon pakituuwo kosalalaan. Komian mo tubo doi dunia, kosambuno mo aki natotulis doi Buku Mian Tubo lalomo akiyoon kodunia natinealikon naikon masaingding kalu kitayo do iyayonoo. Sabab do iyayonoo loolukon biasa tubo. Budodoiya akimo natubo koidan, bai yana naikon sumbot koidan. ⁹ Doi langge nia lalomo palaluu nadaano kopandoiyan tukon pangalatian. Kooluno mopitudoo doiyamo pitu kobunggul bunggono; doiyamo bungkuko-bungkuko lipu do boinedoo naosulangan. Tukon pitudoo kooluno koidan doiya kai pitu kotomundo: ¹⁰ lima luwedoi yanila lapamo tuwong, komeeng daano mobaparenta, tukon komeeng koidan akiyoon nalubat. ¹¹ Tukon iyayon komo loolukon biasa tubo, bai budodoiya akimo natubo koidan, doiya kai tomundo koaluno. Yana daano kai meeng komian moluwedoi tomundodoo mopitu koidan, komo budodoiya modaano ambakon tujuiyo kasilakaan. ¹² Songulo kotanduk komo ikoo kitayodoo doiyamo songulo kotomundo mo akiyoon natambuun pamarenta. Bai yanila naikon binee kuasa sulano namaparenta buno tomundo polaing-laing tukon do iyayonoo meeng kojam konakalumbit. ¹³ Kosongulo natomundo nia sasaibino daano kona tujuan mo pokakana; yanila sasaibino salakanggene kobukuanan tukon yanila nakakuasaan doi iyayonoo. ¹⁴ Yanila naikon polobosi lawane do Domba Na Paudoo. Bai do Domba Na Paudoo tukon napololaing-lolaing mo satia mo lapamo uange tukon dona linilikkoo naikon lungguiyo do tomundo-tomundodoo, sabab yanamo ko Temeneno sasaibino kotuan, tukon Tomundo sasaibino kotomundo-tomundo." ¹⁵ Do malaekatoo bantile koidan, "Paisu ikoo mo kitayodoo, do pololowadoo nalipu osulangan, doiya kai bangsa-bangsa, rayat-rayat, negara-negara tukon silingan-silingan. ¹⁶ Songulo kotanduko ikoo mo kitayo tukon do iyayonoo naikon mosikitene do pololowadoo. Yanila naikon lambase sasaibino kona polangge, tukon kubaiyo yana teali balalau. Yanila naikon kaane kosailo tukon lopuwokabus tukon bilat. ¹⁷ Sabab ko Mian Bisa lapamo piyeke konoanoila sulano naampakonggene ko Mian Bisa natetel. Ko Mian Bisa tealikene yanila napoomeenggon sulano nasalakanggene yanila nakakuasaan doi iyayonoo, sulano do iyayonoo nabaparentaan polong nateali oila komo Mian Bisa nabinantil. ¹⁸ Do boine ikoo mo kitayodoo doiyamo kota babasal, mo parentayo kotomundo-tomundo doi dunia."

¹ Salataa lapa doiya yaku kitayo komeeng komalaekat bailon obulus lengget doi surgaa. Yana daano kuasa mo babasal, tukon nakomuliaan mokubaiyo posaapon kodunia teali madialan. ² Tukon alalo mo babasal, yana bantil, "Lapamo tuwong! Babel babasal lapamo tuwong! Budodoiya yana tealimo ibiliis-ibiliis nadungolan. Doi lalomo tubo sasaibino kokaliangano kotomisi mo lokis tukon komo minosikiton doi mian. ³ Sabab sasaibino kobangsa-bangsa lapamo monginum anggur namoot doi balolowaan. Kotomundo-tomundo doi dunia pololowaimo yana, tukon dagang-dagang doi dunia teali kaasa sabab namoot mo aki napoo moola kuasaiyo." ⁴ Maka yaku lengele komeeng koalalo bailon moluwedoi surgaa mobantile, "Potobuato kai daku mian! Potobuato kai luwedoi lalomo! Inaimo kai komuyu pololoiyo kona lalim-lalim, tukon turut potanggunge kona ukuman! ⁵ Sabab kona lalim-lalim posusun-susun polong doi timbu, tukon ko Mian Bisa neneeke naikon kona kulokisan. ⁶ Polakukanggene Yana buno lakon kona lakukangganano komuyu; pobalase Yana lualuunggon paku doi sasaibino komo lapamo yana lakukanggene. Poontokiyo Ku manggo tukon suka mo lua lunggon paku kona mosopotan doi suka mobiasa mo sadiakene tuuk doi komuyu. ⁷ Beenamo doi yana sakisaa tukon susaan mo pokakana kona kadaang tukon nababasalan tukon kona kaasaan mo beekenemo doi butongo susuungo. Sabab yana sidutu bantile kobutongo, ’Yaku naiya tomundo pamarenta! Yaku bolikon balu; yaku aki naikon kumotoupi susaan!’ ⁸ Tobikon doiya langgedoo, maka doi meeng kooloyo lalomo tolong yana naikon linubotiimo sesel -- panakit, susaan, tukon malaalan. Tukon yana naikon kinokopuli tukon bilat, sabab ko Temeneno Mian Bisa mo bahikimidoo balakuasa." ⁹ Tomundo-tomundo dunia mo talalaing doi kokubai-kokubai nabalolowaanoo lalomo tukon boinedoo namoot naikon kokoliiyo tukon mandaunggene do kotadoo kalu naikon yanila kitayomo kotibolung mokobung luwedoi bilat mo okopuliyo yana. ¹⁰ Yanila naikon kokondong luwedoi odoonan sabab yanila matakut nakanakon sakisaawanoo. Yanila bantile, "Aduh, bukan maen kona silakaan kokota mo tololongol nia -- kota Babel mo bukuan! Doi meeng kojam lalomo tolong komu ukuman lapamo linaksanakanggon!" ¹¹ Sasaibino kodagang doi dunia kokiil tukon susa sabab do boinedoo, sabab akiyono komeeng komian kai koidan mo mongoli konapo barang-barang binadaganggon. ¹² Akiyono komo mongoli mosoni, suasa, permata, tukon yanila namutiara; tukon koidan toik lenan, toik ungu, sutra, tukon toik momemela motuwa; sasaibino kaliangano kokayung komo akinduung nalinaat, barang-barang moluwedoi gading, tukon moluwedoi kayung mo maaling, doi tambaga, besi, tukon pualam; ¹³ kayu manis kulito, lamba-lamba, setanggi, mur tukon kemenyaan; anggur tukon lisison, tepung maka gandum; saapi tukon domba, kaladai tukon kereta, ata-ata, baikon mau banggapi naansaang. ¹⁴ Sasaibino kopadagang bantile doi boinedoo, "Sasaibino ikoo mo yase alayo doiya akiyono, tukon sasaibino komu kaasaan tukon komu tambonganan lapamo lapus. Ikoo aki naikon mupososuunggene koidan!" ¹⁵ Sasaibino padagang teali mokaasa sabab badagang doi kotadoo naikon kokondong doi naodoonan, sabab yanila matakut nakanakon kosakisaawanno. Yanila naikon kokiil tukon susa, ¹⁶ maka bantile, "Adoh, bukan maen kona silakaan kokota mo tololongol nia! Biasamo yana mapake toik lenan, toik ungu, tukon toik momemela motuwa; biasamo yana moono tukon pobubungai mosoni, permata tukon mutiara! ¹⁷ Bai tolongo meeng kojam, lapus dona kaasaanoo!" Sasaibino kokapiteeng kapal, kopenumpang, tukon mobalimang doi kapal, tukon sasaibino komian kona mangampalan doi tobun, kokondong doi naodoonan. ¹⁸ Tukon nggeleamon salataa yanila kitayo kotibolung mokobung luwedoi bilatoo mo suayo do kotadoo. Yanila bantile, "Akiyo kota bailon buno kota babasal nia!" ¹⁹ Maka yanila tiposiiyo abu doi olunoila buno meeng kopaloosan poloonan, maka kokiil tukon nggele-nggeleamon, "Adoh, bukan maen kona silakaan kokota mo babasal nia! Kona kaasaan lapamo kubaiyo sasaibino komian mo daano kona kapal-kapal doi tobun teali kaasa! Bai tolongo doi meeng kojam lalomo, yana lapamo pakkallapus kona langge-langge!" ²⁰ Eh surgaa, polabakenemo kai luwe kona manasan do kotadoo! Mian Bisa namian, rasul-rasul tukon nabi-nabi, polaba-labamo kai! Sabab ko Mian Bisa lapamo ukume yana buno meeng kopabaloso oila komo lapamo yanila lakukanggene motuuk doi komuyu! ²¹ Sambuno lapa doiya, komeeng komalaekat mo bukuan bingkate komeeng kobatu -- kona kabasal buno batu gilingan mo babasal -- maka nasakukene doi tobun lalomo tukon bantile, "Bunomo kai naiya konakinubaiyan kokota Babel mo tololongoloo naikon sinakukon tukon manas sampe aki naikon napinososuunggon koidan. ²² Komusiik alalo moluwedoi pomaen kasapi, luwedoi sasaibino komomanani, luwedoi moba suling tukon luwedoi popuuk trompet, aki naikon polengele koidan doilalom! Aki naikon napososuunggene komeeng komian polimang moahli idoo, tukon koalalo dobatu pogilingokai aki naikon nalinongol koidan. ²³ Komian aki naikon namokita lampu laango doi komuyu, tukon akimo koidan natololongol kona lamean kolamean basowaanan idoo. Komu padagang-padagang daano kai mian mo totingonii tuuno doi dunia, tukon koidan mumotoiyan-motoiyan mominasaingdinggon Ikoo tipuwomo sasaibino kobangsa doi dunia!" ²⁴ Babel inukum sabab doi kota lalomodoo lapamo linaat konabi-nabi sauno, Mian Bisa namian sauno -- pokoknya sasaibino komian sauno mo lapamo inakate doi dunia bunggono.

¹ Lapamo doiya yaku lengele kolangge meeng buno mian badaang alalo momuuk doi surgaa mo bantil-bantil, "Ponggaale ko Mian Bisa! Konda Mian Bisa doiyamo Mian Bisa mo masalamaton; Yana Mian Bisa mo babasal tukon balakuasa! ² Kona ukuman adil tukon pandoi! Yana lapamo otuwenge koukuman doi balolowa mo babasal, mo lusake kodunia tukon nabalolowaan. Ko Mian Bisa lapamo ukume do pololowadoo, sabab yana akateyomo ko Mian Bisa Napeleleani-peleleani." ³ Maka do mianoo badaang alalo koidan bantile, "Ponggaale ko Mian Bisa! Kotibolung moluwedoi bilat mo suayo do kota babasaloo naikon kalikobungano akiyo kona tade-tadean!" ⁴ Maka kolua kolono sangkap kokatua tukon kosanggapo komahluk mo potikunggon doi Kursiidoo tootuku tukon sosubaiyo ko Mian Bisa mo osulang doi nakursii bunggono. Yanila bantile, "Amin! Ponggaale ko Mian Bisa!" ⁵ Maka nalongol luwedoi kursiidoo komeeng koalalo mo bantile, "Ponggaale ko Mian Bisa, eh sasaibino ko Mian Bisa peleleani-peleleani, tukon sasaibino komian -- babasal poipoisik -- mo sosubaiyo ko Mian Bisa!" ⁶ Salataa lapa doiya yaku lengele kolangge meeng buno pokombulian mian mo badaang tuuno alalo; koalalo buno bokol mo pakapapuung tukon buno guluk motolindungan. Yaku lengele yanila bantile, "Ponggaale ko Mian Bisa! Sabab ko Temeneno, nda Mian Bisa Mobabasal Konakuasadoo budodoiya maparentamo! ⁷ Pomaimo nda laba-laba tukon tedes-tedes; pomaimo nda nggaale kona babasalan! Sabab lapamo polong kooloyo baasowaanan komo mataani totumai Domba Na Paudoo, tukon kobabaabuno lapamo basadia sulano naninikakon. ⁸ Pakean lenan mo dile-dilengan lapamo bineekon doi Yana sulano napakeyo." (Do pakean lenaanoo daano kai kokubai-kokubai momonondok mo linakukanggon doi Mian Bisa namian.) ⁹ Maka do malaekatoo bantile doi yaku, "Tulisemo naiya, ’Kinatauwan komian mo inundang doi lamean banikaan doi Domba Na Paudoo.’ " Doibundu do malaekatoo suungiyo konabantilan koidan, "Naiyamo kobilita mokakana moluwedoi Mian Bisa." ¹⁰ Yaku sosuba doi malaekatoo salaano tukon sosubaiyo, bai yana bantile doi Yaku, "Inai! Inai mososubaiyo Yaku, bai sosubaiyomo kai ko Mian Bisa! Sabab mau Yaku kai Mian Bisa napeleleani pokakana ikoo tukon bunomo sasaibino koutusomu mo bataani momoonggol doi Yesus nakasaksian!" Sabab Yesus nakasaksian doiyamo kai komo okitaikene doi mian-mian mo tololonggol. ¹¹ Doibundu yaku kitayo kosurgaa motobuka, maka tokita komeeng koadalan moute. Kopolokitino kosambuno Mo Taat tukon Mo Talakana. Yana adil moputusiyo koukuman tukon doi polobosian lalomo komo lakukanggene. ¹² Komatano bunomo bilat kolot tukon doi oluno mapake badaang kosonggo batomundoan. Doi butongo totulis komeeng kosambu; tukon tolongo Yana susuungo komo toiyo do sambudoo. ¹³ Jubah napinake lapamo kemeke doi sau lalomo. Tukon Yana kona binantilan, "Mian Bisa na Bantilan". ¹⁴ Kosuludadu surgaa loloiyo Yana tukon molokiti kaladai-kaladai moute, tukon bapake toik lenan mo moute bilisii. ¹⁵ Luwedoi babano tobuat komeeng kobakoko mo mamangan tukon dona bakokodoo Yana naikon lungguiyo kobangsa-bangsa, tukon Yana naikon parentayo yanila tukon tongkat besi. Yana piise koanggur doi pakakas bapiisan lalomo anggur nanggimalan ko Mian Bisa Mobabasal Konakuasa. ¹⁶ Doi najubah tukon doi banano totulis nasambu nia, "Tomundo sasaibino kotomundo, tukon Temeneno sasaibino kotuan." ¹⁷ Maka yaku kitayo komeeng komalaekat kokondong doi oloyo matano bungguto. Tukon alalo mo babasal yana bantile doi sasaibino kotomisi mo benga doi dapang, "Po maimo kai popototongi sulano nda molubotii lamean babasal Mian Bisa molamekene! ¹⁸ Pomaimo kai nda makaan tomundo-tomundo sailo, talenga-talenga kapalano sailo, tukon talenga-talenga sailo; pomaimo nda makaan polokiti kaladai sailo tukon naadalan-adalan sailo, tukon sasaibino kobanggapi sailo, babasal tukon poipoisik, ata tukon mobolikon ata!" ¹⁹ Doibundu yaku kitayo do iyayonoo, tukon tomundo-tomundo dunia tukon yanila nasuludadu-suludadu, pototongi sulano napolobosi lawane yana mo lokitiyo do adalanoo momoute tukon nasuludadu. ²⁰ Maka do iyayonoo linakomo posinggat-singgat tukon nabi makala mo lapamo mongkubai langge-langge mominasaingdinggon doi iyayonoo salaano. (Tukon do langge-langgedoo mominasaindinggon doiyamo kai do iyayonoo natipuwano komian mo daano do iyayonoo paloosano, tukon komian mo sosubaiyo do iyayon timbalango.) Maka do iyayonoo tukon do nabi kaladoo sinakukon tubo-tubo doi bilat babasal lalomo mo kolot-kolot tukon bolerang. ²¹ Tukon yanila suludadu inakate tukon bakoko mo tobuat luwedoi babano do polokiti kaladai moutedoo. Maka kotomisi-tomisi kai lubat tukon kaane tukon namodokoan yanila mo inakatedoo sailo.

¹ Salataa doiya yaku kitayo komeeng komalaekat moobulus luwedoi surgaa. Doi limano yana mataani kunci motombing matean tukon meeng kolante poboboi mo babasal. ² Maka yana lakoyo do bindadoo, binda motuwa, -- doiyamo Ibiliis -- tukon unguwomo soloon kotaun kona kalumbit. ³ Doibundu malaekatoo sakukene bindadoo doi motombing matean lalomo, maka nakunciyo do motombingoo tukon nasegele, sulano do bindadoo naakimo namoola tipuwo kobangsa-bangsa kalu akiyoon napupus kolounu soloon kotaun. Lapamo doiya yana sio nasinodiimo doi tempo mo mosobit. ⁴ Maka yaku kitayo kokursii-kursii, tukon komian mo osulang doi kursii-kursiidoo mobinee kuasa sulano naputusiyo koukuman. Yaku kitayo koidan komian mo lapamo pinatol kooluno uli-uliko sabab yanila mebee kasaksian tentang Yesus, tukon mobabilitakene koteteba moluwedoi Mian Bisa. Do mian-mianoo aki nasosubaiyo koiyayon, mau kai timbalango. Yanila kai aki nabiasa mantarima do iyayonoo paloosano doi paaso kai doi limanoila. Maka yanila tubo koidan tukon maparenta buno tomundo polaing Kristus soloon kotaun kona kalumbit. ⁵ Naiyamo kokadadian tumbeno komian mate nainotuboiyan koidan. (Bai komian mate bailonggon aki nainotuboi koidan kona kalumbit soloon kotaun.) ⁶ Kinatauwan kai komian mo talalaing inotuboi koidan doi kadadian tumbenodoo. Yanila moola nateali Mian Bisa namian. Komatean kajadian koluano aki nakuasaiyo yanila. Yanila naikon teali Mian Bisa naimam-imam tukon Kristus na mian-mian; tukon yanila naikon mobaparenta polaing-laing yana soloon kotaun kona kalumbit. ⁷ Sambuno lapa kabus koloounu soloon kotaundoo, ko Ibiliis naikon sinodiimo luwedoi natinalungguan, ⁸ tukon yana naikon ampakon moakakene kobangsa-bangsa mo tebeaason doi posaapon kodunia, doiyamo Gog tukon Magog. Ibiliisoo pototongikene yanila sulano napolobosian, meeng koaito mo babasal tuuno, kodaango pokakana kobone doi tobun. ⁹ Maka yanila kai tebeaasono doi posaapon kodunia, maka yanila lubotino molobosiyo ko Mian Bisa namian nabasandungan tukon kota Mian Bisa mo mamaasikene. Bai kobilat obulus luwedoi timbu tukon akateyo yanila. ¹⁰ Doibundu Ibiliis mo akakene doi yaniladoo, sinakukon doi bilat mobabasal lalomo tukon doi bolelang. Idoomo kai kona dungolan do iyayonoo tukon do nabi mokala-kaladoo sinakukon loolukon. Yanila naikon sinakisaa oloyo popook polong sidutu-posidutukon. ¹¹ Sambuno lapa doiya yaku kitayo komeeng kokursii moute mo babasal tukon Yana mo osulang doi bunggono. Kotimbu tukon buta lapus luwedoi salaano sampe aki natokita koidan. ¹² Tukon yaku kitayo komian mate, babasal poipoisik, kokondong doi kursiidoo salaano. Maka binukamo kobuku-buku. Maka komeeng kobuku bailonggon binukamo, doiyamo Mian Tubo nabuku. Doibundu koukuman inotuwongikono luwedoi mian mate, potimbongii tukon yanila nakokubai pokokonoi komo totulis doi buku-bukudoo lalomo. ¹³ Maka kotobun salakanggene komian mate komo daano doi lalomo. Maut tukon Alam Maut kai salakanggene komian mate komo daano doi yana. Tukon komian momatedoo sasaibino inotuwongi ukuman mopopaason tukon yanila nakokubai. ¹⁴ Doibundu Maut tukon Alam Maut sinakukon doi bilat babasal lalomo. (Bilat babasal lalomo nia doiyamo kadadian matean koluano.) ¹⁵ Komian mo aki natotulis kosambuno doi Bukudoo Mian Tubo lalomo, sinakukon doi bilat babasal lalomo.

¹ Maka yaku kitayo kotimbu mo boolu tukon dunia mo boolu. Kotimbu tumbeno tukon dunia tumbeno kai lapuso, tukon kotobun lapuso. ² Maka yaku kitayo do kota moliyousoo, doiyamo Yerusalem mo boolu, obulus luwedoi surgaa luwedoi Mian Bisa. Do kotadoo lapamo sinadiakon buno meeng kobabaabu boine mobinunga-bungai sulano napososuung tukon kobabaabu malane. ³ Maka yaku lengele koalal luwedoi kursiidoo mobantile tukon babasal koalalo, "Budodoiya ko Mian Bisa nalipu nadungolan daanomokai posinggat-singgat kobanggapi! Yana naikon tubo tukon yanila, tukon yanila naikon teali namian. Ko Mian Bisa susuungo naikon polaing tukon yanila tukon teali yanila na Mian Bisa. ⁴ Yana naikon soutiyo sasaibino komatano paisuno luwedoi matanoila. Komatean akiyono koidan; kosusaan, kokokiilan, kai komasakitan naikon akiyono koidan. Langge-langge mo malumbito lapamo lapus." ⁵ Maka Yana mo osulang doi kursiidoo bunggono bantile, "Budodoiya Yaku kubaiyo sasaibino boolu!" Yana bantile koidan doi yaku, "Tulise kai naiya, sabab nabantilan-bantilania bisa tukon moola inangga." ⁶ Maka Yana bantile, "Lapamo lapa! Yakumo kai kotumbeno tukon kona pupusan, Yakumo ko Temeneno luwedoi Tumbeno polong doi na Pupusan. Memeeng komian mo molou, naikon Yaku beena monginum barang-barang luwedoi paisu batango mo beena tuboan. ⁷ Komian mo manaang naikon mantalima do langge-langgedoo moluwedoi Yaku. Yaku naikon teali na Mian Bisa, tukon Yana teali Kupau. ⁸ Bai komian matakut komian moaki maangga, mian molokis, pangakate, mian balolowa, motoiyan lokis, mian mososubaiyo kopilogot, tukon sasaibino mokala-kala, naikon sinakukon doi bilat mobabasal lalomo tukon belerang mo kolot-kolot, doiyamo kadadian matean koluano." ⁹ Meeng luwedoi antara kopitu komalaekat mo lapamo mataani galaas-galaas mo moono tukon kopitu kobalaa napupusanoo lubat doi yaku maka bantile, "Mai! Yaku naikon tudoikonggon doikoo ko Babaabu, doiyamo Domba Na Pau naboloki." ¹⁰ Maka ko Mian Bisa Na Roh kuasaiyo yaku, tukon do malaekatoo babayo yaku doi bunggul bunggono mo tatandak tuuno. Yana tudoikene yaku ko Yerusalem, do kota moliyousoo, kotadoo obulus luwedoi surgaa, luwedoi Mian Bisa, ¹¹ tukon kakuasaan tukon Mian Bisa babasalan. Kotadoo montootilang buno batu permata, pokakana kobatu baiduri pandan mo bilisii buno kristal. ¹² Komeselo potikunggon tatandak babasal, tukon songulo lua kotataapon mobabasal, tukon tinotooli songulo lua komalaekat. Doi natataapon-tataapon mobabasal totulis kosongulo lua kobenseno kobangsa Israel sambu-sambuno. ¹³ Daano kotolu kotataapon mobabasal mo sasalaane doi samba kolipu; kotolu taalikon doi tolopot, kotolu taalikon doi lalom, kotolu taalikon doi lembet, tukon kotolu taalikon doi talise. ¹⁴ Do kotadoo pagaro mineseloo kinokondong doi songulo lua kobatu. Doi batu-batu mimeseloo totulis do Domba Na Paudoo napololaing mosongolu lua sambu-sambuno. ¹⁵ Malaekat mo basilingan tukon yakudoo daano kona tongkat pongukul doi mosoni, sulano naukule do kotadoo, kotataapon-tataapono mobabasal tukon kopagaro mominesel. ¹⁶ Do kotadoo kondondoongo poombong songgok -- kokinobuluso pokakana tukon kobelano. Maka do malaekatoo ukule do kotadoo tukon natongkat pongukur; tokita kokinobuluso 2400 kokilo metel; kobelano tukon nakatandak pokakanamo kokinobuluso. ¹⁷ Salataa do malaekatoo ukule kopagaro minesel, tokita kona katandak do meseloo noom kolono kometer. Ukuran mo pinake doi malaekatoo doiyamo ukulan mo pinake doi banggapi. ¹⁸ Komeselo do kotadoo kinubai luwedoi batu baiduri pandan, sabeakai kokotano susuungo luwedoi mosoni tulen, montotilang buno kaca. ¹⁹ Do kotadoo batu-batumo mominesel binunga-bungai tukon sasaibino kobatu permata kokaliangano. Batu mimesel tumbeno kinubai luwedoi batu baiduri pandan, kokoluano luwedoi batu nilam, kokotoluno luwedoi batu yakut, kokosanggapo luwedoi batu zamrut, ²⁰ kokolimano luwedoi batu baiduri sepah, konoomo luwedoi batu delima, kopituno luwedoi batu ratna cempaka, kowaluno luwedoi batu pirus, kosiono luwedoi batu topas, kosongulono luwedoi batu krisoplas, kosongulono meeng luwedoi batu lasuardi, tukon kosongulono lua luwedoi batu kecubung. ²¹ Kosongulono lua kotataapono babasal tongokokondong luwedoi songulo lua komutiara, suwe-suwele kotataapon kinubai luwedoi meeng komutiara. Loloon doi kotadoo kinubai luwedoi mosoni tulen, montotilang buno kaca mo didilengan. ²² Yaku aki kukitayo ko Mian Bisa Nabonua doi kota lalomodoo, sabab ko Mian Bisa Nabonua do yanamo Temeneno susuungo, Mian Bisa Mobabasal Konakuasa, tukon Domba Na Paudoo. ²³ Do kotadoo aki napalaluu kinonoi tukon oloyo panano kai bituwon laango, sabab ko Mian Bisa nababasalan talaangiyomo, tukon Domba Na Paudoo doiyamo koposino. ²⁴ Kobangsa-bangsa doi dunia naikon ambakon doi laango lalomo, tukon kotomundo-tomundo kai naikon babayo kona kaasaan doi kotadoo lalomo. ²⁵ Do kotadoo tataapono tobuka samba-samba kooloyo tukon aki natinataapikon, sabab akiyo kopopook idoo. ²⁶ Kona babasalan tukon nakaasaan kobangsa-bangsa naikon binaba doi kotadoo. ²⁷ Bai komian mo kubaiyo kolangge-langge mo kulokis, kai mian mo kala-kala -- kona palusan oila kolobo mo kulokis, takainomo aki naikon nausok doi lalomo. Komo naikon usok tongo kai mian mo totulis kosambuno doi Buku Mian Tuboan lalomo, doi Domba Na Paudoo nabuku.

¹ Do malaekatoo koidan tudoikene doi yaku kopaisu batango kopaisuno mo mebee tuboan. Do paisu batangodoo montotilang buno kristal tukon lomba luwedoi Mian Bisa nakursii tukon Dombadoo Na Pau, ² doi kotadoo loloono tanga-tangano. Doi paisu batangodoo doi suwe-suwele bibilo daano kokayung molubatene kotuboan, mo sao songulo lua luunggon sataun, doiyamo sobituwon idan nasao. Koloono pinake sulano natangalinggene kobangsa-bangsa. ³ Doi kotadoo lalomo aki natalaat komeeng kolobo mo kanakon Mian Bisa nakutuk. Ko Mian Bisa tukon do Dombadoo Na Pau nakursii naikon daano doi kotadoo lalomo. Kona peleleani-peleleani naikon sosuba doi Yana, ⁴ tukon kitayo koduduso. Kosambuno naikon tinulis doi yanila paaso. ⁵ Yanila akimo napalaluu posi kai oloyo matano laango, sabab kopopook akiyono, tukon ko Temeneno Mian Bisa susuungo naikon komo kadiyoloniiyo yanila. Maka yanila naikon naparenta pokakana kotomundo sidutu-posidutukon. ⁶ Maka do malaekatoo bantile doi yaku, "Nabantilan-bantilania bisa tukon moola inangga. Temeneno Mian Bisa komo beekene kona Roh doi nabi-nabi, lapamo utuse kona malaekat sulano natudoikene doi Napeleleani-peleleani oila komo mosobit sio nateali." ⁷ "Palatikanggene naiya!" Yesus bantile, "Yaku naikon mosobito lubat. Kinatauwan doi mian mo loingiyo kobantilan-bantilan motinantukon doi buku nia lalomo!" ⁸ Yaku, Yohanes, lapamo lengele tukon kitayo sasaibino naiya. Salataa yaku lapa lengele tukon kitayo yaku tootuku doi malaekat salaano mo lapamo otudoikene sasaibinodoo doi yaku, tukon yaku sosubaiyo Yana, ⁹ bai yana bantile doi yaku, "Inai! Inai mososubaiyo yaku! Sosubaiyo ko Mian Bisa! Sabab mau yaku kai peleleani pokakana ikoo, tukon buno koutus-utusomu sasaibino konabi tukon sasaibino komian mo loingiyo koteteba-teteba nai buku nia lalomo!" ¹⁰ Maka yana bantile koidan, "Inaikai molaasiakanggene kobantilan-bantilan motinantukon nai buku nia lalomo, sabab lapamo loolani kotempono sasaibino naiya naikon kona tealian. ¹¹ Mian mo lokis, tadikenemo banggadudul namongkubai lokis; mian mo manggilit, tadikenemo nakanggilitiyo kobutongo; mian mo loingiyo ko Mian Bisa namongiasan, tadikenemo nabanggadudul loingiyo ko Mian Bisa namongiasan, tukon mian mo tubo tolongo doi Mian Bisa, tadikenemo nabanggadudul tubo tolongo tuuk doi Mian Bisa." ¹² "Palatikanggene naiya"! Yesus bantile, "Akimo namalumbit Yaku naikon lubat tukon babayo kotambo tuuk pabalos doi sasamba komian pokokonoi komo lapamo lakukanggene. ¹³ Yakumo kotumbeno tukon kobunduno; Yakumo ko Temeneno moluwedoi Tumbeno polong doi Napupusan." ¹⁴ Kinatauwan doi mian mo kumesiyo kona jubah sahingga polong bilisii yanila minoolakon makaan kayung tuboan saono tukon usok doi kotadoo lalomo loloiyo kona tataapon mobabasal. ¹⁵ Bai komian mo kubaiyo kolobo-lobo mo lokis, mo mapake motoiyan mominasaindinggon, mian mo kubaiyo balolowaan, mo mangakate, mo sosubaiyo kopilogot, tukon mian mo kala-kala, mau doi bantilan-bantilan mau kai tukon kokubai, sasaibino do mianoo kona dungolan doi kota tonggulungodoo. ¹⁶ "Yaku, Yesus, lapamo kapatuwe Daku malaekat doi komuyu sulano yana napailukene naiya lobo-lobo nia motuuk doi jemaat-jemaat napinalaluu. Yaku nia Daud naturunan; Yakumo do mandala mo madialanoo." ¹⁷ Ko Mian Bisa Na Roh tukon Babaabu Boine bantile, "Maimo!" Memeeng komian mo lengele naiya sio koidan nabantile, "Maimo!" Indee komo molou, siokai yana nalubat! Tukon indee komo yase, siokai mamangala tukon babalang do paisudoo mo mebee tuboan. ¹⁸ Doi memeeng komian mo molongol bantilan-bantilan motinantukon doi buku nia lalomo, yaku, Yohanes, beena poingotii nia: kalu mian suungiyo meeng kolobo doi bantil-bantilan nia motinantukon, maka ko Mian Bisa naikon suungiyo koukuman doi mianoo tukon balaa-balaa silakaan mo tinulis doi buku nia lalomo. ¹⁹ Tukon kalu komian kurangiyo komeeng kolobo moluwedoi nabantilan-bantilan motinantukon, maka ko Mian Bisa koidan naikon kurangiyo kona obos mo totulis doi buku nia lalomo -- doiyamo obos moluwedoi kayung tuboan tukon moluwedoi kota momoliyousoo. ²⁰ Yanamo komo pelenggene sasaibino nabilita nia bantile, "Bisa, Yaku naikon mosobito lubat!" Amin! Lubato kai, oh Temeneno Yesus! ²¹ Boliisi ko Temeneno Yesus nabeekene Konabalakaat doi sasaibino ko Mian Bisa namian!