GALATIA

GALATIA

¹ - ³ Utus-utus jemaat-jemaat doi lipu Galatia, Yaku, Paulus, tukon sasaibino utus Salani mo polaing yaku, moini sulano ko Mian Bisa Tamanggita tukon Temeneno Yesus Kristus beena balakaat tukon namonondokan doikoo. Yaku teali rasul bolikon tukon lolo doi banggapi kabai sabab banggapi komo bingkate, baimo Yesus Kristus tukon Mian Bisa Tamanggita mo lapamo otuboiyo Yana abali doi namatean. ⁴ Loloiyo Mian Bisa Tamanggita namongiasan, Kristus salakanggene kobutongo teali sosubakon tuuk kita nalalim-lalim, sulano kita sinalamaton doi loonudoo mo lokis nia. ⁵ Nggaale ko Mian Bisa sidutu-posidutukon! Amin. ⁶ Yaku heran tentang Utus-utus! Komuyu Mian Bisa uange tobikon Kristus namaasi, bai diabudodoo komuyu buno mosobit mototonggulunge ko Mian Bisa tukon mololoi "bilita monondok" mo bolikon Bilita Monondok mo luwedoi Mian Bisa. ⁷ Kona bisaan akiyo ko "bilita monondok bailon". Tongo daano komian badaang popitoikene doi komuyu "bilita monondok" tentang Kristus yanila poibalike tobikon nanggabute komuyu. ⁸ Mian mo babotilanggene "bilita monondok" mo sangalaasan doi Bilita Monondok mo lapamo kami babotilanggene, sodiiyomo yana Mian Bisa naukume -- mau kai mianoo kami susuungo kabai malaekat doi surgaa! ⁹ Kami lapamo bantile loolukon, diabudodoo yaku bantile koidan: Mian mo babotilanggene doikoo "bilita monondok" mo sangalaasan ko Bilita Monondok mo lapamo komuyu talimayo doi kami, mianoo sio Mian Bisa naukume! ¹⁰ Oilano tukon doiya natokitaan yaku kabi-kabi moini doi banggapi naakuiyo? Tutuu aki! Yaku tongo moinikene pangakuan doi Mian Bisa. Oila yaku daano kakaate mangala noa doi banggapi sulano nasinanaanggon doi mian? Kalu yaku daano mokubaiyo buno doiya, yaku bolikono Kristus napeleleani. ¹¹ Utus-utus sio potoiyo baikon Bilita Monondok yaku babotilanggenedoo aki naluwe doi banggapi. ¹² Yaku aki mantalima bilitadoo doi banggapi, tukon akiyo komeeng komian mootunggukene doi yaku. Yesus Kristus susuungo komo popitoikene Bilita Monondokoo antoko doi yaku. ¹³ Tantu komuyu lapamo molongol tentang daku tuboan looluk buno meeng komian mangangga agama Yahudi. Komuyu toiyo bulaando daku baranian kubaiyano Mian Bisa najemaat tukon bulaando daku motikasan kakaate momanase. ¹⁴ Doi mangampakongganan agama Yahudi, yaku lobioniiyo ko Yahudi miano mo pokakana tukon yaku. Yaku molole tuuno doi langge-langge tentang adat tumbunggami. ¹⁵ Bai sabab Mian Bisa noano namonondokan, Yana lilike yaku akiyoon kusinuung tukon uange yaku sulano leleaniyo Yana. ¹⁶ Mian Bisa okitakene kona Pau doi yaku sulano Bilita Monondok tentang Na Pau namoola yaku babotilanggene doi mian badaang mobolikon Yahudi. Doiya kosinggatoo yaku aki kutaus doi meeng komian sulano mangkabi otinau. ¹⁷ Yaku koidan aki kutaus doi mian badaang doi Yerusalem mo lapamo mantailukon doi yaku teali rasul. Bai yaku taus doi lipu Arab, maka idoo abali koidan ke Damsyik. ¹⁸ Tolu kotaun doibundu yaku taus ke Yerusalem sulano potoikon tukon Petrus. Yaku dungol tukon yana tongo songulo lima kooloyo kona kalumbit. ¹⁹ Yaku aki kuposuung tukon rasul-rasul bailon, tongo Yakobus, Temeneno utuso. ²⁰ Oila daku tinulis nia bisa. Mian Bisa toiyo baikon yaku aki kubakala-kala! ²¹ Lapa doiya yaku taus doi lipu-lipu Siria tukon Kilikia. ²² Polong naiya kotempono jemaat-jemaat Salani doi Yudea daano komo akiyoon natingoniiyo yaku tukon tontong. ²³ Yanila tolongo molongol mian mobantile, "Mian mo looluk lokis-lokise kami, diabudodoo babotilanggene manganggaan molooluk yase nainakiyonggon." ²⁴ Maka yanila nggaale ko Mian Bisa sabab yaku.

¹ Songulo sangkap kotaun doibundu, yaku abali doi Yerusalem polaing Barnabas, tukon babayo Titus koidan. ² Yaku taus doi Yerusalem sabab Mian Bisa lapamo nyatakanggene doi yaku baikon sio kutaus. Tukon doi meeng kopososuungan lalomo motongo tukon katua-katua imbali yaku talakanggene Bilita Monondok yaku mo babotilanggene doi mian badaang mobolikon Yahudi. Sabab yaku aki kuyase daku kakaatean looluk, mau diabudodoo natongo palasuma. ³ Titus mo lainge yaku, daano meeng ko Yunani miano, bai yana aki napinakisaa mololoi atulan sunat, ⁴ mau kai daano komian badaang mo desaake langgedoo. Yanila daano mian badaang mo popilaing doi golongan lalomo tukon babunokon buno utus. Yanila usok tukon aki nabiyok-biyok tuuk mapalesa tongosobiian mo daano doi kita sabab kita pomeenggon tukon Yesus Kristus. Yanila yase abalinggene kita doi nandondoong tumbeno buno ata, ⁵ bai kami aki mai mangaku kala mau nasoisik doi yanila, sabab kami yase mototooliyo sulano Bilita Monondokoo tataap monondok tuuk komuyu. ⁶ Mau nabuno doiya, aki nadaano kolangge-langge boolu mo kinabi doi yaku doi mian badaang mo inaanggon inodotii -- buno yaku akiyo kona posasalaan kalu yanila moinodotii kabai aki, sabab Mian Bisa aki nalilike koduduso. ⁷ Kona kabalikan, mian badaang mo inanggap inodotiidoo mangakukene baikon Mian Bisa lapamo bintekene yaku babotilanggene Bilita Monondok doi mian bolikon Yahudi, pokakana buno yana lapamo bintekene Petrus sulano babotilanggene Bilita Monondokoo doi Yahudi miano. ⁸ Sabab Mian Bisa mo beekene doi Petrus kona kamampuan sulano teali rasul Yahudi miano, beekene koidan doi yaku kamampuan teali rasul mian mobolikon Yahudi. ⁹ Yakobus, Petrus tukon Yohanes, mo tokita teali katua-katua jemaat, mangakukene baikon Mian Bisa lapamo beekene doi yaku limang kusus nia. Maka yanila pokanggi lima tukon Barnabas tukon yaku buno tanda posobatan. Maka yanila tukon kami loingiyo baikon kami naikon balimang doi antara bangsa-bangsa mo bolikon Yahudi tukon doi antara Yahudi miano. ¹⁰ Kome-komeengo yanila nakakabi doiyamo sulano kami palahatikanggene komian motalalais. Tukon yaku sanaang mokubaiyo langgedoo. ¹¹ Singgatoo Petrus lubat doi Antiokhia, yaku tantange yana tala-talaangan, sabab kona tindakan sala. ¹² Tumbe-tumbeno yana osulang kaan polaing-laing tukon utus-utus mo bolikon Yahudi. Bai Yakobus namian badaang binotokon polongo, yana dedeenggenemo kobutongo doi utus-utus mobolikon Yahudi tukon aki nayase koidan kaan tukon yanila, sabab matakutene mian badaang mo yase sulano sasaibino komian nasinunat. ¹³ Utus-utus Yahudi bailon koidan babunokon Petrus mobakokolii, tobikon Barnabas nalobian babunokon yanila. ¹⁴ Buno doiya yaku kitayo baikon yanila akiyo kosikap pokonoi tukon natalakanaan Bilita Monondokoo, yaku bantil doi Petrus doi mianoo sasaibino salaano mo daano idoo, "Kalu Utus buno Yahudi miano lapamo tubo buno mian bolikon Yahudi, bulaando Utus diabudodoo yase pakisaayo komian badaang bailon tubo buno Yahudi miano?" ¹⁵ Bisa mololoi nasinuungan, kami daano Yahudi miano tukon bolikon "mian mobolikon Yahudi mo baladosa". ¹⁶ Mau nabuno doiya kami toiyo baikon mian abali pokindok tukon Mian Bisa tongo sabab manganggaan doi Yesus Kristus, tukon bolikon sabab mangampakonggon ukum agama. Kami bai mangangga doi Yesus Kristus, sulano kami pokindok tukon Mian Bisa mololoi kami namanganggaanoo, bolikon sabab kami mangampakonggon ukum agama. Sabab tukon mangampakonggon ukum agama aki nameeng komian moola abali pokindok tukon Mian Bisa. ¹⁷ Kami kakaate abali pokindok tukon Mian Bisa mololoi tuboan pomeenggon tukon Kristus. Bai kalu lapamo kubaiyo komo buno doiya, tokita kami daano, "mian badaang mobaladosa" koidan buno mian badaang bolikon Yahudi, oilamo nia koalatino baikon Kristus mo tealikene kami baladosa? Tantu aki! ¹⁸ Kalu yaku tambuun abali otuboiyo kodasar ukum agama mo lapamo yaku manase, maka yaku tudoikene baikon yaku lapamo teali palanggal ukum. ¹⁹ Bai yaku lapamo mate tongo ukum agama -- inakate kabai ukumoo susuungo -- sulano yaku malaat tuboan tuuk Mian Bisa. Yaku lapamo sinempanggon polaing Kristus. ²⁰ Diabudodoo bolikon koidan yaku mo tubo, bai Kristus mo tubo doi butonggu lalomo. Tuboan nia yaku pikikene diabudodoo daano tuboan manganggaan doi Mian Bisa Napau mo seseange yaku tukon mo lapamo sosubakene kobutongo tuuk yaku. ²¹ Yaku aki kupandang enteng ko Mian Bisa namaasi. Kalu mian napotaamian tukon Mian Bisa teali abali monondok sabab ambakonggene koukum agamadoo, koalatino Kristus namatean akiyo kona totuuk!

¹ Utus-utus Galatia miano! Komuyu bisamo molongas! Kabai komuyu lapamo kanakon budukan indee? Kristus namatean sinempang lapamo yaku talakanggene tukon tontong doikoo! ² Soba pobotiikanaku meeng nalangge nia: Oila komuyu lapamo mantalima Mian Bisa Na Roh sabab ampakonggene koukum agama, kabai sabab komuyu molongol Bilita Monondok doi Mian Bisa tukon mangangga doi Kristus? ³ Bulaando komuyu buno longas! Komuyu lapamo atambuune kotuboan boolu tukon Mian Bisa Na Roh, bulaando diabudodoo komuyu yase molaate kona monondokan tukon mubukuanan susuumu? ⁴ Palasuma kai sasaibino mo lapamo komuyu motoupiyodoo? Bulaando kai mopalasuma! ⁵ Mian Bisa beekene Na Roh doikoo tukon kubaiyo komo minasaingdinggon-minasaingdinggon doi antara komuyu. Oilamo Mian Bisa kubaiyo koiya sabab komuyu ampakonggene koukum agama kabai sabab komuyu molongol Bilita Monondokoo tukon mangangga doi Kristus? ⁶ Doiya pokakana buno mo totulis doi Kitab Moliyous lalomo tentang Abraham -- buno naiya, "Abraham mangangga doi Mian Bisa, tukon sabab namanganggaanoo yana Mian Bisa talimayo buno mian mo sanaanggene ko Mian Bisa noano." ⁷ Jadi tobikon doiya komuyu sadaliyo baikon mian mo bisa-bisa Abraham nakatulunan daano mian mo mangangga doi Mian Bisa. ⁸ Kitab Moliyous tumbe-tumbeno lapamo kitayo baikon Mian Bisa daanokene mian badaang mobolikon Yahudi abali pokindok tukon Mian Bisa, kalu yanila mangangga doi Yana. Bilita Monondokoo loolukonoo pinopitoikon doi Abraham naiya janji nia lalomo, "Lolo doikoo, Mian Bisa naikon balakaatiyo sasaibino kobanggapi nai dunia nia bungguno." ⁹ Abraham anggayo, maka yana binalakaati. Bunomo koidan sasaibino komian mo mangangga, naikon binalakaati polaing-laing Abraham. ¹⁰ Mian badaang mo moini doi ukum agama, sasaibino tubo kinutuk, sabab doi Kitab Moliyous totulis, "Mian mo aki namolole ampakonggene sasaibino komo totulis doi Buku Ukum Agama lalomo, Mian Bisa kutuke!" ¹¹ Akiyo meeng komian mo pokindok tukon Mian Bisa sabab mangambakonggon ukum agama. Langgedoo lapamo inokitakon doi Kitab Moliyous lalomo, "Tongo mian mo mangangga doi Mian Bisa tobikon kona potaamian tukon Mian Bisa abali teali monondok, naikon tubo!" ¹² Bai ukum agama aki naberdasarkan manganggaan. Doi Kitab Moliyous lalomo totulis baikon mian mo ampakonggene koukum agama, naikon tubo sabab ukumoo. ¹³ Bai Kristus sobiiyo kita doi ukum agama nakutuk. Yana kubaiyo tukon sodiikene kobutongo nakinutuk sabab kita. Sabab doi Kitab Moliyous lalomo totulis, "Kinutuk komian mo mate motinude doi kayung batango." ¹⁴ Kristus kubaiyo doiya sulano balakaat mo Mian Bisa tetebaikene doi Abraham bineekon koidan doi mian badaang mobolikon Yahudi. Tukon buno doiya kita mo mangangga doi Mian Bisa, mantalima Roh mo tinetebaikon doi Mian Bisadoo. ¹⁵ Utus-utus! Namonondokan yaku mangala contoh doi pangalaman samba kooloyo. Kalu mian mokubaiyo meeng poboiyan teteba tukon tetebadoo lapamo sinatujui, maka akiyo komeeng komian momoola akiyenggene perjanjianoo, kabai suungiyo lobo meeng doi yana. ¹⁶ Mian Bisa naperjanjian-perjanjian kinubai luwedoi Mian Bisa tuuk doi Abraham tukon tuuk mian batulunanggene Abraham. Doi Kitab Moliyous lalomo aki natotulis "tukon tuuk doi mian badaang mobatulunanggene Abraham", koalatino badaang komian. Komo totulis idoo daano "tukon tuuk mian mobatulunanggene ikoo", koalatino tongo meeng komian, doiyamo Kristus. ¹⁷ Komo kabi yaku bantile dimbaa doiyamo naiya: Mian Bisa naperjanjian lapamo kinubai tukon sinatujuimo. Ukum agama mo bineekon 430 kotaun doibundu aki namoola inakiyonggon persetujuan tukon nainapusan Mian Bisa naperjanjianoo. ¹⁸ Sabab kalu Mian Bisa nabineekon tokooton doi ukum agama, maka doiya bolikon perjanjian mo bineekon. Tobikon sabab Mian Bisa lapamo janjikene doi Abraham, maka Mian Bisa beekene doi yana. ¹⁹ Kalu buno doiya, tuuk oila ukum agama mobineekon? Potimbilino doiyamo baikon ukumoo sinuungikon tuuk tudoikene kobanggapi napalanggalan. Ukum agamadoo inapakonggon tongo polong nalubatan meeng komian mobatulunanggene Abraham mo sinombuikon doi Mian Bisa naperjanjian doi Abraham. Ukum agamadoo malaekat-malaekat komo pelenggene tukon mololo doi meeng kobanggapi. ²⁰ Jadi, sio nadaano lua kotambuuno komian, sodo palaluu meeng komian pangantara. Bai Mian Bisa aki napalaluu pangantara, sabab Yana susuungo tindokiiyo. ²¹ Oila doiya koalatino baikon ukum agama posasala tukon Mian Bisa nateteba? Tantu aki! Sabab kalu ukum agama bineekon tuuk mobeekon tuboan doi banggapi, maka kobanggapi moola pokindok tukon Mian Bisa mololoi ukum agama. ²² Bai doi Kitab Moliyous lalomo totulis baikon sasaibino kobanggapi daanomo doi lalim nakuasa. Tobikon doiya, mo bineekon tinetebaikono kona dasar mangangga doi Yesus Kristus bineekon doi yanila mo mangangga. ²³ Akiyoon nalaate kotempono tuuk mangangga doi Kristus, kita dinagai tuuno doi ukum agama; kita buno kinulung polong manganggaanoo inokitakonggon. ²⁴ Tukon buno doiya, ukum agama teali buno padagai kita, polong Kristus lubat tuuk abali pokindokikene monondok tukon Mian Bisa sabab kita mangangga doi Kristus. ²⁵ Diabudodoo, sabab laatemo kotempono banggapi moola mangangga doi Kristus, maka kita akimo koidan dinagai ukum agama. ²⁶ Sabab komuyu mangangga doi Kristus Yesus, maka komuyu pomeenggon tukon Yana; tukon tobikon doiya komuyu teali Mian Bisa napau-pau. ²⁷ Komuyu sasaibino lapamo sinau paisu salani sabab Kristus sambuno, jadi komuyu lapamo mantalima doi butomuyu Kristus susuungo nandondoong. ²⁸ Naiya langge nia akimo kai dinaanokon koposasalaan antara Yahudi miano tukon mian mobolikon Yahudi, antara ata tukon mian mobebas, antara mala-malane tukon boine. Utus sasaibino meeng sabab Kristus Yesus. ²⁹ Kalu komuyu Kristus koona, maka komuyu daano batulunanggene Abraham. Tukon komuyu naikon mantalima oila ko Mian Bisa natinetebaikon.

¹ - ² Bai palaluu yaku tegaskanggene: namalumbitan meeng komian pangalus daano mongula, ano komian mo dagaiyo tukon uluse kona kopontingan-kopontingan polong yana laate kotamano natantukanano koumur. Yana binunokon pokakana buno meeng koata, mau kai kona kanaan yana kotumbuno doi sasaibino do buatoo. ³ Bunomo koidan tukon kita: Daano malumbit akiyoon natobos, kita kinubai ata doi roh-roh mo kuasaiyo nadunia nia. ⁴ Bai doi oloyo mo tantu, Mian Bisa bintekene Na Pau doi dunia. Na Paudoo sinuung doi meeng koboine motubo doi ukum agama lalomo nakakuasaan. ⁵ Tukon buno doiya Yana sobiiyo komian badaang mo tubo doi bilit ukum agama nakakuasaan; sulano kita moola teali Mian Bisa napau-pau. ⁶ Sabab komuyu daano Mian Bisa napau-pau, Mian Bisa sumboliiyo Na Pau na Roh usok doi Utus noano lalomo tukon doi noanggu, doiyamo Roh monggeleamon, "Tama, ya Tamanggu." ⁷ Jadi, komuyu bolikono ata, baimo pau. Tukon sabab komuyu Mian Bisa napau, maka Mian Bisa naikon beekene doikoo sasaibino Kona sinadiakon tuuk Na pau-pau. ⁸ Looluk komuyu akipo tingoniiyo ko Mian Bisa, doiya kosababpo komuyu teali ata doi kuasa-kuasa mo pinookakanakon buno ilah, bai kona bisaan bolikon Mian Bisa. ⁹ Bai diabudodoo komuyu tingoniiyomo ko Mian Bisa, kabai lobian komo bisa koidan, Mian Bisa tingoniiyo komuyu. Nah, bulaando komuyu yase abali koidan doi roh-roh dunia nia, mo muyuk tukon talalais? Bulaando komuyu yase kinubai ata koidan doi roh-rohdoo? ¹⁰ Komuyu lamekene kooloyo-oloyo motantu, bituwon-bituwon motantu, taun-taun motantu. ¹¹ Yaku molili, inai-inai daku pakadakan motuuk doi komuyu akiyo kona totuuk. ¹² Utus-utus! Yaku kabiyo tukon tutuu sulano komuyu teali buno yaku. Sabab yaku koidan lapamo teali buno komuyu. Komuyu aki pokubaiyo komeeng kolobo mo sala doi yaku. ¹³ Komuyu tantu daano moneneeke oila mo tealikene yaku doi tumbeno babilitakene ko Bilita Monondokoo doikoo. Kosababpo doiyamo yaku masakit. ¹⁴ Doi tempodoo komuyu aki pomisikit doi yaku, mau kai butonggu nandondoong buno palasobaan mo babasal doikoo. Mala komuyu talimayo yaku buno talimayo Mian Bisa namalaekat kabai buno mantalima Kristus Yesus susuungo. ¹⁵ Komuyu monondok tuuno doi tempodoo. Bai diabudodoo, inaandomo kai do monondokanoo? Yaku toiyo baikon doi tempodoo komuyu moloyos motuake komatamu susuumuyu tuuk mobeekene doi yaku, kalu koiya moola kinubai. ¹⁶ Oila komuyu diabudodoo lapamo anggape yaku buno musu, sabab yaku nyatakanggene komo kana doikoo? ¹⁷ Mian badaang bailonggon tukon kokobukuan tuuno unggoliiyo komuyu, bai yanila namakisuut aki namonondok. Yanila tongo yase betele mupotaamian tukon kami, sulano komuyu loolainge yanila tukon kakabukuan tuuno. ¹⁸ Takainomo monondok tukon kokobukuanan doi langge-langge mo monondok, asal sidutu buno doiya tukon inai tongo kalu yaku daano mopolaing-laing tukon komuyu. ¹⁹ Daku pau-pau sinoyang! Yaku diabudodoo nia susa koidan sabab komuyu. Yaku susa buno meeng koboloki mosakisaa doi tempo namosuungan pau. Yaku naikon banggadudul susa, kalu Kristus ndondoongo akiyoon natangabos doi butomu! ²⁰ Yaku poloon tuuno daano doi tanga-tanga komuyu diabudodoo, sulano yaku moola basilingan doikoo tukon lalo bailon, sabab yaku akimo kutoiyo yase kubaiyo oila koidan tukon komuyu! ²¹ Utus-utus mo yase tubo doi ukum-ukum agama nakakuasaan, soba ndongoliiyo yaku! Yaku naikon popitoikene doikoo oila komo bisa totulis doi Kitab Ukum Musa lalomo. ²² Idoo totulis baikon Abraham daano kolua komian kona pau: Paudoo meeng tinano daano meeng mian ata, tukon paudoo bailon tinano daano meeng komian mo bebas. ²³ Pau doi boine mo Teai ata suunge biasa sabab banggapi namongiasan. Bai pau doi boine mo bebas, sinuung sabab Mian Bisa tetebaikenemo. ²⁴ Naiya moola pinake buno andean. Lua komian boinedoo daano andean lua koteteba: komeeng kona luwean doi Bunggul Sinai -- doiyamo Hagar; kona pau-pau sinuung teali ata. ²⁵ Jadi, Hagar doiyamo Bunggul Sinai, doi lipu Arab. Yana inumpamakon kota Yerusalem tukon sasaibino kopodungolino diabudodoo nia lapamo teali ata. ²⁶ Bai Yerusalem doi surgaadoo daano Yerusalem mo bebas, tukon yanamo kotinanggita. ²⁷ Sabab doi Kitab Moliyous lalomo totulis, "Labamo ikoo koboine komba, mo aki namosuung! Potetedeso tukon pokokuweiso he ikoo mo aki idan meneemi malalasan mosuungan! Sabab boine nalangkai mo tinggale naikon malaat lobian badaang kona pau, maka baino doi boine mo tubo tukon nalangkai." ²⁸ Utus-utus! Komuyu susuungo daano Mian Bisa napau-pau mo sinuung sabab Mian Bisa nateteba; komuyu pokakana buno Ishak. ²⁹ Doiya kotempono pau mo sinuung loloiyo kobanggapi namongiasan, lokis-lokise kopau nasinuungan sabab Mian Bisa Na Roh namongiasan. Bunomo koidan budodoiya. ³⁰ Bai oila komo totulis doi Kitab Moliyous lalomo? Idoo totulis buno naiya: "Siikayo ata boinedoo tukon napau, sabab pau doi ata boinedoo aki naikon Teai mian moano kona haak tukon pau doi boine mobebasoo." ³¹ Jadi, Utus-utus, kita nia mobolikon pau-pau doi meeng koata boine; kita daano pau-pau doi boine bebas.

¹ Kita diabudodoo bebas, sabab Kristus lapamo bebaskanggene kita! Sabab doiya palataanggene komu bebasan, tukon inai moyase kinubai ata koidan. ² Neneeke, kalu komuyu kabiyo sinunat, doiya koalatino Kristus akiyo kona totuuk doikoo. Mobantile naiya daano yaku susuunggu, Paulus. ³ Koi koidan yaku mebee poingotii doi mian mo kabiyo sinunat, baikon yana sio nalakukene sasaibino koukum agama! ⁴ Kalu komuyu kakaate pokindok tukon Mian Bisa mololoi ukum agama, doiya koalatino mupotaamian tukon Kristus lapamo botol. Tukon buno doiya komuyu tubo bolikon doi lingkungan Mian Bisa namaasi. ⁵ Bai buno kami, kami moinikene baikon tukon Mian Bisa Na Roh natulungano tukon naalasan kami namanganggaan doi Kristus, Mian Bisa moolakene kami pokindok tukon yana. ⁶ Sabab kita lapamo pomeenggon tukon Kristus Yesus, motuluti kabai aki natulutiyo kopalatulan sunat akimo nateali soal koidan. Komo palaluu tongo manganggaan doi Kristus, tukon doiya totong doi kita nda seangano komian bailon. ⁷ Looluk komuyu berjuang tukon monondok! Diabudodoo bulaa komuyu moakimo pomolole koidan doi Mian Bisa namongiasan? Indee komo lapamo oluuliyo komuyu? ⁸ Bisa mo lakukenedoo bolikon Mian Bisa mo lapamo uange komuyu! ⁹ "Pangaani mo soisik naikon tuboimo doi sasaibino kona tampat," mian mobantile. ¹⁰ Mau kai nabuno doiya yaku daano mangangga baikon komuyu aki naikon pomololoi pendirian bailon, sabab kita lapamo pomeenggon tukon Kristus. Tukon yaku mangangga baikon mau indee komo tabule komu pikiran, naikon Mian Bisa ukume. ¹¹ Tentang yaku, Utus-utus, bulaando yaku mobanggadudul minusu kalu yaku babotilanggene baikon palatulan sunatoo palaluu? Kalu yaku babotilanggene buno doiya, maka daku babotilangganano tentang Kristus nasinempangan aki nasumbetene kopalasoalan. ¹² Lobian komo monondok mian badaang mo nggabute komu pikilanoo banggadudulo motobuat banggadudul doi jemaat! ¹³ Utus lapamo inuang tuuk teali mian mo bebas. Bai inai mopakeyo komu bebasanoo tuuk banggadudul tuuno kubaiyo oila komo komuyu yase kubaiyo. Kobalino, komuyu sio poseang-seang tukon popoleleani. ¹⁴ Sasaibino koukum agama tongusokon doi palentadoo mo meeng lalomo, "Siokai ikoo seseange kotulamu banggapi pokakana ikoo moseseange kobutomu susuumu." ¹⁵ Bai kalu komuyu ponggima-nggimakon, neneeke, naikon komuyu polaing-laing manas. ¹⁶ Daku makisuut buno naiya: Sobiiyomo ko Mian Bisa Na Roh nababayo komuyu tukon inaimo potubo loingiyo kobanggapi nainiyas. ¹⁷ Sabab kobanggapi nainiyas aki napokokonoi tukon Mian Bisa Na Roh nainiyas, tukon Mian Bisa Na Roh nainiyas aki napokokonoi tukon banggapi nainiyas. Lua-luadoo posasala, tobikon komuyu aki namoola kubaiyo oila kopoiniyas. ¹⁸ Bai kalu Mian Bisa Na Roh pimpine komuyu, maka komuyu akipo kinuasai doi ukum agama. ¹⁹ Banggapi motubo nainiyas tokita doi nakokubai-kokubai lalomo mo balolowa, madikit, tukon aki namonondok; ²⁰ doi nasosubaan pilogot lalomo tukon motoiyan guna-guna, pomusu-musu, poakate, possunoi, mosobit nggimal tukon butongo susuungo kona inutamakon; pooalaasan tukon posala-salakon, ²¹ misikit konoano, mala-malangu, lame-lame, tukon bai-bailonggon. Yaku ingotiikene komuyu doi sasaibinodoo diabudodoo bunomo kai yaku ingotiikene komuyu loolukoo, baikon mian mo kubaiyo kolangge-langge mobuno doiya aki naikon nateali anggota Mian Bisa namian. ²² Kobalino, kalu mian badaang Mian Bisa Na Roh komo pimpine kona tokitaan doiyamo: Yanila poseang-seang, yanila tedes, yanila noano tanaang, yanila sabal tukon monondok konoano, yanila monondok tuuk doi mian bailon, yanila molole, ²³ yanila ekependeo konoano tukon sidutu moola kuasaiyo kobutongo. Aki daano koukum agama molarange kolangge-langge mobuno doiya. ²⁴ Mian badaang mo lapamo teali Kristus Yesus namian, mian badaangoo lapamo akateyo kobanggapi nandondoong tukon sasaibino kona pisuu tukon nainiyas. ²⁵ Mian Bisa Na Roh lapamo beekene doi kita tuboan mo boolu; tobikon doiya Yana koidan sio nakuasaiyo konda tuboan. ²⁶ Kita aki namoola teali babanggaal, tukon kolosokitiyo konoa, tukon noa misikit meeng pokakana bailon.

¹ Utus-utus! Kalu meeng-meeng komian linaat mokubai meeng kolalim, siokai komuyu mo tubo lolo Mian Bisa Na Roh, babayo mianoo abali doi loloon mo talakana. Bai komuyu sio lakukanggene doiya tukon miyuk-miyuk tukon dagaiyo inai napolong komuyu susuungo tagoda koidan. ² Siokai komuyu po potomboniikene tanggunge komian bailon natanggungan, sulano tukon buno doiya komuyu tulutiyo Kristus napalenta. ³ Kalu meeng komian aanggene kobutongo penting, banggokai aki, mianoo kokoliiyo kobutongo susuungo. ⁴ Meeng-meeng komian sio napalesayo kobutongo susuungo oila kona kalakuan monondok kabai aki. Kalu monondok, yana moola lasayo banggaal doi langgedoo. Bai mau naakimo nabandikanggene tukon mo kinubai mian bailon. ⁵ Sabab memeeng komian sio natanggunge kona tanggung jawab susuungo. ⁶ Mian mo mantalima otunggul Kristus, siokai naebese tukon naguru sasaibino komo monondok mo daano doi yana. ⁷ Inai motangakakon. Mian Bisa aki namoola minaenggon! Oila komo sinakakon doiyamo komo pinupui. ⁸ Kalu mian masakakon tulutiyo kona tabiat, yana naikon pupuiyo komatean doi natabiatoo. Bai kalu masakakon tulutiyo ko Mian Bisa Na Roh napimpinano, yana naikon pupuiyo kotuboan tuuno tukon posidutukon doi Mian Bisa Na Roh. ⁹ Tobikon doiya, inai ndatade momokubai kolangge-langge monondok; sabab kalu kita aki nda tade-tade kubaiyo langge-langgedoo daano koidan kita naikon pupuiyo kohasilo. ¹⁰ Jadi, kalu daanoon kotodanan doi kita, siokai kita kubaiyo komo monondok doi sasaibino komian, utamano tuuno doi nda utus-utus mo meeng komanganggaan. ¹¹ Palahatikanggene mono-monondok taalikon doi sembeleng nia yaku mo tulise susuunggu tukon huluf mo babasal. ¹² Mian badaang mo yase inodotii tukon langge-langge duniawi, yanilamo mokakaate pakisaayo komuyu motulutiyo kopalatulan sunat. Bai yanila kubaiyo doiya sulano ko Yahudi miano naaki nakubaiyo lokis yanila sabab salib Kristus. ¹³ Mian badaang mo loloiyo palatulan sunatoo aki namangapakonggon ukum agama. Bai yanila yase komuyu sinunat, sulano yanila moola banggaalkene baikon komuyu molole doi palatulanoo. ¹⁴ Yaku aki kuyase tuuno mabanggaalkon oilano, kalu bolikon nda Temeneno Yesus Kristus mo lapamo mate sinempang. Sabab tobikon Yana lapamo mate sinempang, maka dunia akiyono koidan kona alati doi yaku. Tukon doi dunia nia, yakudoo pokakana molapamo mate. ¹⁵ Sinunat kabai aki nasinunat, doiya aki napenting. Komo penting doiyamo teali banggapi boolu. ¹⁶ Buat mian badaang mo tubo tukon nandondoongoo, tukon buno koidan buat sasaibino Mian Bisa namian, yaku moinikene Mian Bisa naikon beekene komonondokan tukon namaasi. ¹⁷ Tukon koikoidan inaimo meeng komianoo kubaiyo susa yaku koidan, sabab doi butonggu nia daano kona tanda-tanda baikon yaku pololaing Yesus. ¹⁸ Kinatauwan nda Temeneno Yesus Kristus sidutu balakaatiyo Utus-utus. Amin. Komai Hormat, Paulus