EFESUS

EFESUS

¹ Mian Bisa namian doi Efesus, mosetia doi Kristus Yesus! ² Yaku, Paulus, rasul Kristus Yesus doi Mian Bisa namongiasan, moinikene sulano ko Mian Bisa Tamanggita tukon Yesus Kristus beena balakaat tukon monondokan doi komuyu. ³ Ngginaal ko Mian Bisa, Temeneno Tamanggita Yesus Kristus! Yana balakaatiyo kita tukon sasaibino kobalakaat rohani doi surgaa lalomo, sabab kita pomeenggon tukon Kristus. ⁴ Akiyoon nadunia nia natinealikon, Mian Bisa lapamo lilike kita lolo doi Kristus tukon komakisuuto sulano kita teali namian mo tangalaas tukon akiyo kona salaan doi salaano. ⁵ Sabab Mian Bisa naseang, maka Y.yana lapamo tantukene loolukon baikon lolo doi Yesus Kristus, Yana naikon bingkate kita teali nalabuk-labuk susuungo. Tukon doiyamo kona iniyas kubaiyo. ⁶ Ngginaal ko Mian Bisa mo babasal, sabab lolo doi na Pau sineang yana mamaasikene tuuno kita. ⁷ Tobikon, Kristus namatean, Mian Bisa bebaskanggene kita, koalatino Yana lapamo ompunio kita doi nda lalim-lalim. ⁸ Yana kubaiyo doiya sabab seange tuuno kita, tukon do seangoo bineekon doi kita tukon moono pandoiyan maka pangalatian. ⁹ Mololoi namongiasan susuungo, Mian Bisa bontiikene doi kita Kona tetel laasiano; Yana lapamo tataapene baikon dona teteloo naikon nainalapa lolo doi Kristus. ¹⁰ Teteloo doiyamo sulano sasaibino kolangge, mau doi surgaa mau doi dunia, teali pomeenggon tukon Kristus buno kapalano. Tukon doiya langgedoo naikon Mian Bisa alapayo kalu laatemo kotempono. ¹¹ Mian Bisa limange sasaibino kolangge lolo doi namongiasan tukon tataapene susuungo. Salataa doi tumbe Yana lapamo lilike kita sabab Yana yase sulano kita nateali namian sabab pomeenggon tukon Kristus. ¹² Tadukai kita, mo tumbe-tumbeno moini doi Kristus, nggaale ko Mian Bisa sabab nababasalan! ¹³ Mau komuyu nalapamo teali Mian Bisa namian doi tempo komuyu molongol Mian Bisa nateteba, doiyamo Bilita Monondok mo beena kasalamatan doikoo. Komuyu mangangga doi Kristus Yesus, tobikon doiya ko Mian Bisa beena paloosan kona langge doikoo, doiyamo na Roh mo dondiikene. ¹⁴ Dorohdoo doiyamo kolaatano baikon kita naikon mantalima oila ko Mian Bisa mo lapamo dondiikene doi namian. Naiya beena manganggaan doi kita baikon ko Mian Bisa naikon sodiiyo kona mian. Ngginaal ko Mian Bisa sabab nababasalan! ¹⁵ Tobikon doiya, salataa yaku lengele baikon komuyu manganggaamo doi Yesus, tukon komuyu seseangemo sasaibino ko Mian Bisa namian, ¹⁶ yaku aki nabontol-bontol daku mopolonggonan kinatauwan doi Mian Bisa tentang komuyu. Sidutu yaku bantile kosambumu doi kusambeangan. ¹⁷ Yaku kabiyo sulano ko Mian Bisa nda Temeneno Yesus Kristus, Tama mo babasal, nabeena Roh doi komuyu. Dorohdoo tealikene komuyu pandoi, tukon naikon okitakene doi komuyu ko Mian Bisa tobikon komuyu tingoniiyo Yana. ¹⁸ Yaku kabiyo doi Mian Bisa sulano nabukayo kopoo pikilan nateali madialan; sulano komuyu pomangalatikene oila komo moola komuyu moinikene doi Mian Bisa mo uangemo komuyu. Koidan sulano komuyu potoiyo bulaando kona badaangan kobalakaat-balakaat mo monondok Mian Bisa mo sadiakene doi namian; ¹⁹ tukon bulaando kona hebatan ko Mian Bisa moono tukon kuasa doi kita mo mangangga. Mian Bisa nakuasadoo pokakana buno kuasa mobolikon langge, ²⁰ mo pakeyo salataa naotuboiyano koidan Kristus doi namatean tukon beena basambuan motatandak podungoli tukon Mian Bisa doi surgaa. ²¹ Kristus nabasambuan lobian tatandak tuuno doi sasaibino kopamarenta nabasambuan, sasaibino koponguasa, sasaibino kokatua, sasaibino kotuan-tuan tukon mau indee komiano koidan komo lapamo binee sambu motatandak; mau mo tubo naiya loonu nia mau mo tubo doi lounu mo lubat. ²² Mian Bisa abese doi bilit sasaibino doi Kristus nakakuasaan, tukon beekene Kristus doi jemaat teali kapala doi sasaibino kolangge. ²³ Jemaat doiyamo Kristus butongo, Yana komo kindendeke mo kindendeke sasaibino kolangge doi yayaamo koidan.

¹ Loolukon komuyu mate secara rohani sabab komuyu daano kopoo lalim tukon komuyu aki poloingiyo ko Mian Bisa naparenta. ² Doiya kosinggatoo komuyu loloiyo kodunia nakabiasaan-kabiasaan; koalatino komuyu molole doi ibiliis nakuasa mobabasal doi dapang, doiyamo roh diabudodoo mo kuasaiyo komian badaang noano mo aki namolole doi Mian Bisa. ³ Loolukon kita sasaibino pokakana tukon yanila; kita tubo mololoi banggapi nalenggang kita tukon kubaiyo oila komo pokokonoi kobutonggita tukon nda pikilan. Doiya kosinggatoo kita nia daano mian badaang mo kanakon Mian Bisa nakiniiti koidan, pokakana buno mian bailon. ⁴ Bai babasal tuuno ko Mian Bisa noano namonondokan! Yana bunomo doiya kona seangano kita, ⁵ tobikon doiya kosinggatoo kita daano mate doi rohani sabab nda tumba-tumbakan, yana otuboiyo kita koidan polaing-laing tukon Kristus. Jadi, baimo Mian Bisa namonondokan konoano, Yana salamatene komuyu. ⁶ Sabab kita pomeenggon tukon Kristus Yesus, Mian Bisa otuboiyo kita koidan posinggat-singgat Yana, sulano kita nda bapalenta koidan posinggat-singgat Yana doi surgaa lalomo. ⁷ Mian Bisa kubaiyo buno doiya sulano doi lounu naikon mo lubat, kobanggapi namoola kitayo bulaando ko Mian Bisa namaasi nababasalan. Mian Bisa okitakene luwedoi noano namonondokan doi kita tukon lolo doi Kristus Yesus. ⁸ - ⁹ Mian Bisa seange komuyu, doiyamo kosababpo Yana salamatene komuyu sabab komuyu mangangga doi Yesus. Dopoo salamatannoo bolikon pousaha susuumuyu. Doiya daano Mian Bisa nakalunia. Jadi, akiyo komeeng komian mo moola babanggaalkene kobutongo doi langgedoo. ¹⁰ Kita nia Mian Bisa komo tealikene, tukon lolo doi Kristus Yesus, Mian Bisa kabiyo kita sulano nda kubaiyo kolangge-langge mo monondok mo lapamo sadiakene motuuk doi kita. ¹¹ Utus-utus mo bolikon Yahudi miano! Poneneeke kopoo ndondoong doi loolukonoo: Komuyu binantil "mian moaki nabasunat", doi Yahudi miano mo akuiyo kobutongo sinunat (komakisuuto mo lapamo malaat paloosan banggapi mo kubaiyo doi yanila butongo). ¹² Doiya kosinggatoo komuyu akipo pomeenggon tukon Kristus, komuyu daano mian molubat-lubaton mo aki natongusokon Mian Bisa namian linilik. Komuyu aki potongusokon doi Mian Bisa tukon namian mo kubaiyomo kona perjanjian. Komuyu tubo doi dunia nia lalomo akiyo kopoo moinian tukon akiyo kopoo Mian Bisa. ¹³ Bai budodoiya, sabab komuyu pomeenggono tukon Kristus Yesus, loolukonoo komuyu mododoon, lapamo linoolanikon doi Kristus namatean. ¹⁴ Sabab Kristus susuungo yanamo komo podamekene kita. Yana pomeenggene ko Yahudi miano badaang tukon mian badaang mobolikon Yahudi teali meeng kobangsa. Mesel popitaso doi yanila, doiyamo pomusuan, lapamo Kristus manase tukon butongo susuungo nainakatean. ¹⁵ Agama Yahudi naukum tukon parenta-parenta tukon atulan-atulanoo lapamo Kristus akiyenggene sulano do bangsadoo molua teali meeng kobangsa banggapi moboolu, mo pomeenggon tukon Yana. Tukon doiya kokubaidoo Kristus daanokene kopodamean. ¹⁶ Namateanoo doi kayung sempang, Kristus pomeenggono do bangsadoo molua, tukon podamekene yanila tukon Mian Bisa, tobikon akiyono do pomusuanoo. ¹⁷ Doiyamo kosababpo Kristus lubat babilitakene ko Bilita Monondok tentang podameanoo doikoo; mau doi komuyu mobolikon Yahudi miano loolukon mo dodoon doi Mian Bisa, mau Yahudi miano mo pokolanikon tukon Mian Bisa. ¹⁸ Tukon lolo doi Kristus, kita sasaibino -- mau Yahudi miano mau mobolikon yahudi miano -- doi Mian Bisa Na Roh mo meeng, moola koolaniyo ko Tama moinodotii. ¹⁹ Tobikon doiya, komuyu koidan bolikono tongusokon mian molubat-lubaton kabai mian doi tonggulung. Komuyu budodoiya daanoon polaing-laing Mian Bisa namian. Komuyu teali Mian Bisa puli-pulino. ²⁰ Komuyu kai kinokondong doi rasul-rasul nabatudangan bunggono tukon nabi-nabi mo abese, tukon Kristus Yesus buno batu mo utama. ²¹ Yanamo komo susune sasaibino do bangunanoo teali Mian Bisa Nabonua mo tangalaas tuuk doi Temeneno. ²² Sabab tuboan pomeenggon tukon Kristus, komuyu koidan daano mobinangun posinggat tukon mian badaang bailon teali meeng kobonua motuuk doi Mian Bisa; idoo Mian Bisa dungol tukon Na Roh.

¹ Doiyamo kosababpo yaku, Paulus, tinalunggu tobikon Kristus Yesus motuuk kopontingan komuyu mo bolikon Yahudi. ² Tantu komuyu lapamo lengele baikon ko Mian Bisa, sabab namonondokan konoano, lapamo beekene doi yaku nalimangia motuuk doi pokopontingan. ³ Mian Bisa bantile kona tetel lasiano tukon pailukene doi yaku. (Tentang nalanggenia lapamo kutulise doi babo tukon palus, ⁴ tukon kalu komuyu basayo, komuyu naikon toiyo kolaasiano motuuk doi Kristus buno yaku motoiyomo.) ⁵ Buunia laasiadoo aki nabinontiikon doi banggapi, bai budodoiya ko Mian Bisa Na Roh lapamo bontiikene doi rasul-rasul tukon nanabi-nabi. ⁶ Laasiadoo doiyamo nia: Lolo doi Bilita Monondokoo, mian mobolikon Yahudi moola lasakanggene ko Mian Bisa nabalakaat-balakaat loolukonoo mosinadiakon tolongo tuuk doi Yahudi miano. Mian badaang mobolikon Yahudi tealimo anggota doi butong mo pokakana, tukon tulut mantalima oila komo Mian Bisa janjikenemo lolo doi Kristus Yesus. ⁷ Mian Bisa beena doi yaku kalunia -- doiyamo limang -- sulano babilitakene ko Bilita Monondokoo. Yaku talimayo kaluniadoo luwedoi Mian Bisa nakuasa mo balimang doi butonggu. ⁸ Doi sasaibino ko Mian Bisa namian, yakumo komo kulokis tuuno. Bai ko Mian Bisa beekene doi yaku kalunia nia: limang babilitakanano doi mian badaang mobolikon Yahudi Bilita Monondok tentang Kristus nakaasaan mo akiyo kona kabusan; ⁹ tukon koidan sulano nalolo doi yaku sasaibino komian toiyo bulaando ko Mian Bisa, Motealikene nadunia nia, kubaiyo kona tetel salataa doi loolukonoo linaasiakon doi dunia. ¹⁰ Ko Mian Bisa namakisuut doiyamo sulano budodoiya, lolo doi jemaat, sasaibino komo mataani kakuasaan doi dapang toiyo ko Mian Bisa napandoiyan tukon sasaibino kolangge kaliangano. ¹¹ Mian Bisa kubaiyo doiya pokokonoi tukon natetel mo posidutukon, mo kinubai tukon lolo doi Kristus Yesus nda Temeneno. ¹² Tukon mangangga doi Kristus tukon sabal pomeenggon doi Yana, kita binee todanan sulano nda koolaniyo ko Mian Bisa tukon totubo komanganggaan. ¹³ Tobikon doiya: inai matakut oila kolobo kaliangano yaku mo toupiyo tobikon komuyu, sabab sasaibino doiya tuuk doi pomonondokan. ¹⁴ Tobikon doiyamo yaku sosuba doi Tama salaano. ¹⁵ Doi yanamo meeng-meeng kopuli doi surgaa tukon doi buta sakean mantalima lenggang mo tangalaas. ¹⁶ Yaku sambeang boliisi ko Mian Bisa mo babasal napokonoi sulano keenggele konoamu tukon Na Roh. ¹⁷ Boliisi sabab komuyu mangangga doi Kristus, Kristus dungol doi noamu lalomo, tukon komu tuboan nakinoonggol tukon kinuasai poseangan. ¹⁸ Yaku sambeang boliisi napolaing-laing sasaibino ko Mian Bisa namian, komuyu moola laate bulaando kona loasan tukon nabulusanan tukon naateanan Kristus naseang, ¹⁹ kalu tolongo banggapi naakal aki namoola inalati doi naateanan tuuno. Boliisi komuyu potingoniiyo Kristus naseangoo, tobikon komuyu moono tukon Mian Bisa napelibadi mo talakana. ²⁰ Tukon Mian Bisa nakuasa mo molole balimang doi butonggita lalomo, Mian Bisa moola kubaiyo lobian odoon kona badaangan doi oila komo moola kita kabiyo kai pikikene. ²¹ Siokai ko Mian Bisa nda kabasale doi jemaat lalomo polong doi nda tulunan, lolo doi Kristus Yesus. Nggaale Mian Bisa sidutu-posidutukon! Amin.

¹ Doiyamo kosababpo yaku -- meeng komian motinalunggu, mo tinaan sabab leleaniyo ko Temeneno -- kabiyo tuuno doi komuyu: potubo pokokonoikene tukon polenggang buno mian mo lapamo Mian Bisa uange. ² Siokai komuyu sidutu poekependeyo konoamuyu, pomantalamuyuk, tukon sabar. Otudoikene komu seang tukon tomboniiyo meeng tukon bailon. ³ Kakaate tutuuno sulano tubo tukon dame sulano pomeenggonan Mian Bisa Na Roh mo tealikene tataap topiala. ⁴ Tolongo daano meeng kobutonggita, tukon meeng ko Roh. Bunomo lakon koidan komuyu inuang tuuk meeng komoinian mo pokakana. ⁵ Tolongo daano meeng ko Temeneno, meeng komanganggaan, meeng kobasauwan paisu salani, ⁶ tukon meeng ko Mian Bisa mo teali Tama sasaibino komian. Yanamo ko Temeneno sasaibino kodunia antoko, mo balimang lolo doi sasaibino, tukon balakuasa doi lalomo sasaibino. ⁷ Kita suwe-suwele mantalima meeng kosabeat lolo doi Kristus nabineekon. ⁸ Doi Kitab Moliyous lalomo totulis, "Sambuno Yana liba doi lipu mo tatandak, Yana mababa badaang komian motinaan; tukon Yana mebee sabeat-sabeat doi banggapi." ⁹ Nah, kalu binantil, "Yana liba" koalatino yana tumbe-tumbeno lapamo obulus polong doi lipu napende-pendean tuuno doi buta sakean nia. ¹⁰ Tukon Yana mo lapamo obulus Yanamo koidan komo liba polong doi lipu mo lobian dodoon kona tatandakan doi sasaibino kotimbu tukon sasaibino kodunia antoko tongusokon tukon nadaanoan. ¹¹ Yana komo "momebee sabeat-sabeat doi banggapi"; kosongobos biningkat teali rasul, kobailon teali nabi; kobailon koidan teali pangampakonggon Bilita Monondokoo, tukon kobailon koidan biningkat teali guru-guru tukon popiala jemaat. ¹² Naiya kinubai sulano ko Mian Bisa namian nalinongkapi tutuuno sulano namoola leleaniyo ko Temeneno tukon nabangune ko Kristus butongo. ¹³ Tukon buno doiya kita sasaibino teali meeng doi manganggaan mo pokakana tentang Mian Bisa Napau. Tukon kita tealimo mian badaang mo babasalo pololokon malumbit pololokon sosuungi kona talakanaan buno Kristus. ¹⁴ Maka kita akimo nda buno labuk-labuk koidan mo doombaa-doombulo tukon takaikanggi doombala doisumai doi solok lupa-lupa kootunggul doi mian badaang mo bakokolii. Yanila atapayo komian tukon yanila napandoiyan bakokolii. ¹⁵ Aki! Kobalino kita sio nda bantile kolangge mo bisa tukon noa momoono seang, tobikon doi sasaibino kolangge kita pololokon malumbit pololokon teali talakana buno Kristus, mo teali kapalaiyo kita. ¹⁶ Doi napimpinano kita, sasaibino koanggota doi butonggitadoo tosusun monondok, tukon koidan pinotaamikon kololosuano meeng-meeng. Tukon kalu meeng-meeng anggotadoo balimang buno doiya, maka sasaibino dobutonggitadoo naikon tobolii teali tabokon tukon bukuan mololoi seang. ¹⁷ Tobikon doiya tongo Temeneno sambuno, naiyamo komo naikon yaku mo bantile tukon tegaase: inaimo potubo koidan buno mian badaang mo aki natingoniiyo ko Mian Bisa, tukon pikikene komo akiyo. ¹⁸ Yanila napikilan kalipookano. Yanila aki natingoniiyo kotuboan Mian Bisa mo beekene, sabab yanila tutuu akiyo kona potoi oioila tentang Mian Bisa. Yanila buno doiya, sabab motikas konoano. ¹⁹ Yanila akiyono konoano momammaa koidan tobikon yanila loloiyomo sasaibino konoanoila napisuu, tukon tubo balolowa konoanoila nainiyas. ²⁰ Bai Kristus Yesus komuyu tingoniiyo bolikon buno doiya! ²¹ Komuyu lapamo lengele tentang Yana! Tukon buno kona pololaing-pololaing, komuyu lapamo inotunggul koidan tentang ko Mian Bisa nasipat-sipat mo daano doi Yana! ²² Tobikon doiya potinggale kobanggapi momalumbito tukon cara tuboan looluk mo minanas doi namongiasan mo atapayo. ²³ Siokai konoamu tukon komu pikilan nakiniboolu sasaibino. ²⁴ Siokai komuyu potubo buno banggapi boolu mo tinealikon buno Mian Bisa natuboan; doiyamo tukon lenggang mo talakana, moloyos tukon moliyous. ²⁵ Tobikon doiya Utus-utus sasaibino, inaimo pokala-kala. Pokubaiyo doi namoloyosan meeng tukon bailon, sabab kita sasaibino kobutonggita danoon mopomeenggon tukon Kristus butongo. ²⁶ Kalu komuyu nggimal, inai pobatadikene nggimalanoo Teaikene komuyu baladosa. Inai ponggimal polong meeng kooloyo, ²⁷ sulano ko Ibiliis aki namalaat todanan. ²⁸ Mian mo biasa pondikuk sio natade mopondikuk. Kobalino yana sio nabalimang sulano namalaat tambo tukon moloyos tukon moola tulungiyo komian mo kakulangan. ²⁹ Kalu komuyu basilingan, inai popakeyo kobantilan mo manggilit. Tolongo popakeyo kobantilan-bantilan pokindok tukon mebee tulungan doi mian bailon. Bantil-bantilan mobuno doiya naikon lubatene komonondokan doi mian badaang mo lengele. ³⁰ Inai mosusakene ko Mian Bisa Na Roh noano. Komuyu lapamo binee tanda tukon Roh, teali Mian Bisa langge. Dorohdoo koidan buno meeng kojaminan baikon Oloyo Tongosodiian naikon lubat doikoo. ³¹ Poalapuse sasaibino konoamuyu namasakitan, abos noa tukon nggimal. Inaimo ponggele-nggeleamon tukon pomasa-masangol. Inai koidan nadaano konoamuyu mosikit kabai palasaan bailon mopokakana tukon mosikitan. ³² Kobalino siokai komuyu namonondok konoamuyu tukon poposeang meeng tukon bailon, tukon sio popoompuni buno Mian Bisa koidan ompuniyo komuyu lolo doi Kristus.

¹ Komuyu daano Mian Bisa nalabuk-labuk mo sineang, sabab doiya komuyu sio pokakaate mololoiyo ko Mian Bisa. ² Komu tuboan sio nadaano koseang, buno Kristus seseange kita. Yana salakanggene kobutongo tuuk doi kita, buno meeng kososubakon mo babangi tukon mosanaanggene ko Mian Bisa noano. ³ Komuyu daano Mian Bisa namian. Sabab doiya, kokokubai-kokubai mo lokis tukon mo aki napokokonoi, kabai buno bati-batinggai aki namoola daano doi komuyu tanga-tangano. Inai komian bailon daano kona bataanian sulano nabantile baikon komuyu kubaiyo kolangge-langge buno doiya. ⁴ Aki koidan namoola ikoo mobantile kobantilan-bantilan mo manggilit, mo lokis tukon mo aki namomoola. Kobalino siokai komuyu bakinatauwan doi Mian Bisa. ⁵ Timbikene mono-monondok: mian mo lokis kona lenggang, kabai aki napokokonoi, kabai bati-batinggai (kokubai mobuno doiya pokakana koidan tukon manganggaan doi bapilogotan), mianoo aki namoola teali Kristus namian tukon Mian Bisa mopalentayo. ⁶ Inai komuyu potangakakon doi salita-salita mo akiyo kotakoso. Sabab langge-langge nia komo lubatene ko Mian Bisa nanggimalan doi mian-mian mo aki naloingiyo doi Yana. ⁷ Jadi, inaimo po pomeenggon koidan tukon mian-mianoo mobuno doiya. ⁸ Komuyu susuungo loolukonoo daano doi kalipookan lalomo. Budodoiya komuyu lapamo teali Temeneno namian, jadi komuyu daanomo doi madialan lalomo. Tobikon doiya komuyu sio potubo doi madialan lalomo. ⁹ Sabab luwedoi madialan doiyamo kona sumbotan sasaibino kokokubai mo monondok, adil tukon moliyous doi Mian Bisa napambaleng. ¹⁰ Pokakaate motingoniiyo oila komo sanaanggene ko Temeneno noano. ¹¹ Inai pokubaiyo kokokubai-kokubai mo akiyo kotakoso buno mian-mian mo tubo doi kalipookan nakinubai. Kobalino, siokai komuyu poakiyenggene kolangge mobuno doiya. ( ¹² Sabab langge-langge yanila mo kubaiyo tosookonoo, tuuk doi nabinisalakonan lapamo minamaakon.) ¹³ Sasaibino kolangge mo inakiyonggon doi madialan lalomo, naikon tokita tukon tontong. ¹⁴ Sabab sasaibino komo moola kinita tukon tontong, doiya madialan. Doiyamo kosababpo mobinantil, "Banguno, eh ikoo mo moolo, tukon tubo doi matean! Kristus montootilang doikoo." ¹⁵ Tobikon doiya, potimbikene mono-monondok komu tuboan. Inai motubo buno mian mobonggu; potubo buno mian badaang mopandoi. ¹⁶ Gunakanggene mono-monondok kotodanan mo daano doikoo, sabab doi lounu nia daano lounu mo lokis. ¹⁷ Inai mobonggu, bai ondosuuke oila ko Temeneno namongiasan. ¹⁸ Inai komuyu pomalangukene koanggur, sabab doiya naikon kulokisene komuyu. Kobalino, siokai komuyu Mian Bisa Na Roh komo kuasaiyo. ¹⁹ Popakeyo kobantilan-bantilan doi nyanyian sadeong nggaa-nggaale tukon lagu rohani, doi mubasa-basalitaan lalomo. Siokai komuyu tukon noamuyu tedes mananikene kongganggaalano ko Temeneno. ²⁰ Sidutu tukon tentang oilamo koidan, siokai komuyu pobakinatauwan doi Mian Bisa Tama, doi Yesus Kristus sambuno nda Temeneno. ²¹ Tuuk odotiiyano Kristus, siokai komuyu popoodotii meeng tukon bailon. ²² Boloki, odotiiyo kona langkai, pokakana doi Temeneno. ²³ Sabab kolangkai yana teali kapala doi boloki, buno Kristus teali kapala doi jemaat tukon yanamo susuungo koidan ko Tomundo Pasalamat doi jemaat mo teali butongo. ²⁴ Bunomo pokakana koidan jemaat odotiiyo ko Kristus, bunomo lakon doi sasaibino kolangge koboloki sio naodotiiyo kona langkai. ²⁵ Langkai seange komu boloki, pokakana Kristus seange kojemaat tukon salakanggene kobutongo motuuk doi jemaatoo. ²⁶ Kristus kubaiyo doiya sulano Yana namoola kumesiyo do jemaatoo tukon naotunggul tukon lolo doi paisu basauwan, sulano doibundu Yana moola salakanggene doi Mian Bisa. ²⁷ Tukon buno doiya Kristus kubaiyo jemaatoo kokondong tukon babasal tukon bilisii doi salaano, akiyo kona salaan kai oila kosala bailon. ²⁸ Bunomo lakon koidan kolangkai sio naseange kona boloki pokakana yana seseange kobutongo susuungo. Mian mo seseange konaboloki koalatino yana seseange kobutongo susuungo. ( ²⁹ Akiyo komeeng komian mo misikitene kobutongo susuungo. Kobalino, yana pialayo tukon dagaiyo buno Kristus koidan pialayo kona jemaat. ³⁰ Kita toiyo doiya, sabab kita daano anggota-anggota doi Kristus butongo.) ³¹ Doi Kitab Moliyous lalomo totulis, "Sabab doiya meeng komala-malane naikon otinggale kotamano-tinano tuuk pomeenggon tukon naboloki, tukon luailadoo teali meeng." ³² Ayatoo mobinantil daano koalatino mo atean. Tukon yaku taamikene doiya doi napotaamian ko Kristus tukon jemaat. ³³ Doi ayatoo motabantil daano kona potaamian koidan tukon komuyu: Siokai memeeng kolangkai seseange kona boloki pokakana yana moseange kobutongo susuungo tukon siokai memeeng koboloki kakaate tuuk odotiiyano kona langkai.

¹ Labuk-labuk! Buno pololaing Kristus, poloingiyo komuorang tua sabab doiyamo komo moola kinubai. ² "Odotiiyo kotamamu tukon tinamu" doiya daano meeng kopalenta tumbeno doi Mian Bisa tukon dinondiikon, ³ doiyamo: "Sulano ikoo mumonondok tukon nabulusan komu umur doi dunia nia". ⁴ Utus-utus mo teali tama! Inai pobulaandekene kopo labuk-labuk sulano naaki napo teali nggimal. Kobalino, popialayo yanila tukon atulan tukon Temeneno naotunggul. ⁵ Utus-utus mo teali ata! Loingiyo komu tuan napalenta doi dunia nia. Kubaiyo doiya tukon palasaan moodotiiyo tukon molole tukon koidan bisa-bisa buno komuyu kubaiyo doi Kristus susuungo. ⁶ Inai pobabunokon doiya tongo doi tempo komuyu daano modinagai, tolongo sulano pomalaat panggaal doi banggapi. Bai siokai komuyu pokubaiyo babunokon Kristus naata mo daano loloiyo ko Mian Bisa namongiasan tukon tootubo konoano. ⁷ Balimangan komuyu mo daano limange bunomo do atadoo, siokai komuyu polimange tukon noa tedesan naadukon buno Temeneno kopo lineleani, tukon aki nabaino banggapi. ⁸ Poneneeke baikon memeeng komian, mau ata mau kai mian mobebas, naikon mantalima posoboli doi Temeneno motuuk doi langge-langge nakinubai mo monondok. ⁹ Utus-utus mo teali tuan! Siokai komuyu pobabunokon buno doiya doi poata. Inaimo pokubaiyo potokuti-potokuti. Neneeke komuyu tukon domu ata-atadoo, sasaibino daano komeeng kona balainggonan, doiyamo Temeneno doi surgaa. Yana aki nalilike komian tambongo. ¹⁰ Kona pupusan, siokai komuyu poteali bukuan tukon bukuanan komuyu mo laate doi Temeneno nakuasa, sabab komuyu pomeenggono tukon Yana. ¹¹ Popakeyo sasaibino kopo pakakas sinadia polobosian Mian Bisa mo beekene doikoo, sulano komuyu moola bataanggon lawane ko Ibiliis nakuasa. ¹² Sabab kita berjuang bolikon tolongo lawane kobanggapi, bai lawane sasaibino kosetan-setan nabukuanan mo kuasaiyomo nalounu nia mo lokis. Kita lawane koibiliis nabukuanan mo kuasaiyo kodapang. ¹³ Tobikon doiya, diabudodoo, popakeyo sasaibino ko Mian Bisa nasenjata polobosian, sulano doi oloyo mo lokis komuyu moola lawane komusuh namolobosian. Tukon sulano kalu komuyu lapamo berjuang polong pupus, komuyu daano motambongan tuuno. ¹⁴ Siokai komuyu pobasadia momeenggon. Popakeyo komololean doi Mian Bisa buno poboot oako, tukon komoliosan buno mubokukum besi. ¹⁵ Sio komololean natuuk doi babilitakanano ko Bilita Monondok mo babayo komonondokan teali musapatu. ¹⁶ Samba-samba kotempo pakeyo komu manganggaan doi Temeneno teali mupangalin; tukon manganggaanoo komuyu moola posoiyo kopana matano modaano koaung moluwedoi ibiliis. ¹⁷ Poalayo kasalamatanoo bunokene songko besi, tukon Mian Bisa nabantilan buno sabel moluwedoi Mian Bisa Na Roh. ¹⁸ Kubaiyo sasaibino doiya loolainge tukon sambeang sulano mumangkabi potombonii doi Mian Bisa. Doi memeeng kotodanan, posambeang bunomo lakon Mian Bisa Na Roh nalolaingano komuyu. Siokai komuyu sidutu badagai tukon inai pokala. Posambeang sidutu motuuk doi Mian Bisa namian. ¹⁹ Tukon posambeang motuuk doi yaku koidan, sulano doi tempo kubasilinganan, Mian Bisa beena yaku bantilan-bantilan mo kana. Tukon sulano yaku barani moola basilinganggene kolaasiano Bilita Monondokoo. ²⁰ Sabab Bilita Monondok doiyamo, yaku teali meeng komian mobabasal, tukon budodoiya daano doi talunggu lalomo. Posambeang sulano yaku barani basilinganggene tentang Bilita Monondokoo, buno bulaando dakubantilano. ²¹ Tikhikus, utusonggita tukon peleleani mo molole doi Temeneno nalimang lalomo, naikon pailukene doikoo sasaibino kolobo tentang doi yaku, sulano komuyu toiyo daku tuboan, tukon daku limang. ²² Doiyamo kosababpo yaku sumboliiyo yana doikoo sulano napailukene komai tuboan doikoo sasaibino, sulano naekeenggele konoamu. ²³ Boliisi ko Mian Bisa Tama, tukon Temeneno Yesus Kristus natealikene sasaibino kojemaat sulano napomeenggon tukon poseang-seang tukon tataap mangangga doi Kristus. ²⁴ Boliisi ko Mian Bisa nabalakaatiyo Utus sasaibino mo seange konda Temeneno Yesus Kristus tukon seang mo aki namoola poso. Komai Hormat, Paulus