KOLOSE

KOLOSE

¹ - ² Utus-utus Mian Bisa namian doi Kolose mosetia pomeenggon tukon Kristus! Buno meeng korasul Kristus Yesus, -- Mian Bisa mobingkate -- yaku, Paulus, polaing-laing tukon utusonggita Timotius, moini boliisi ko Mian Bisa Tamanggita Namebee balakaat tukon namonondokan doi komuyu. ³ - ⁴ Kami lapamo lengele komuyu manganggamo doi Yesus Kristus tukon komuyu seseangemo sasaibino ko Mian Bisa namian. Doiyamo kosababpo tempodoo mai sambeangan motuuk doikoo, kami sidutu bakinatauwan doi Mian Bisa, Tama nda Temeneno Yesus Kristus. ⁵ Komuyu anggayo tukon komuyu seseange, sabab komuyu moinikene naikon oila ko Mian Bisa nasinadia doi surgaa motuuk doi komuyu. Komuyu lapamo lengele doiya langgedoo, salataa Bilita Monondokoo mo bisa mopinolonggon doikoo. ⁶ Bilita moluwedoi Temenenodoo tololongol doi sasaibino kolipu, tukon komian natuboan banggadudul binalakaati luwedoi bilitadoo, buno pokakana komu tuboan nabinalakaatian salataa komuyu molongol komaasi Mian Bisa tukon bisa-bisa motoiyo. ⁷ Dolanggedoo Epafras komo pelenggene doi Utus, tulanggami kami mo seange. Yana Kristus nasosumbolii mosetia balimang tuuk doi nda kopontingan. ⁸ Doi yanamo komai longolano baikon tukon kuasa moluwedoi Mian Bisa Na Roh komuyu moola teali poseseang. ⁹ Doiyamo kosababpo kami sidutu sambeang motuuk doi komuyu salataa kami lengele tentang komuyu. Kami kabiyo doi Mian Bisa sulano ko Mian Bisa Na Roh Nabeena doi komuyu pandoiyan tukon pangalatian sulano komuyu toiyo tukon monondok oila ko Mian Bisa namongiasan. ¹⁰ Tukon kalu buno doiya komuyu malaat tuboan mololoi Mian Bisa namongiasan, tukon sidutu sanaanggene konoa-No, sabab sasaibino kolangge komuyu molaate hasilkanggene kolangge-langge momonondok. Tukon komuyu kopotoiyano tentang Mian Bisa naikon tosuungi koidan. ¹¹ Boliisi tukon kuasa mo babasal moluwedoi Mian Bisa, komuyu inokobukuan tobikon komuyu moola taane kosusaan doi sasaibino kolobo tukon sabar tukon noa sanaang ¹² tukon bantilan kinatauwan doi Tama. Sabab Tama doiyamo komo kubaiyo komuyu moola mantalima oila ko Mian Bisa nasinadiakon Kona mian doi Nabatomundoan lalomo mo madialan. ¹³ Yana lapamo sodiiyo kita doi kuasa mokalipookan tukon biyele kita doi Na Pau Nabatomundoan lalomo mo seseange. ¹⁴ Luwedoi Na Paudoo kita sinodiimo; koalatino konda lalim-lalim lapamo inompuni. ¹⁵ Kristus doiyamo kogambar mo totingonii doi Mian Bisa butongo mo aki natokita; Kristus doiyamo kopau langgong, lobian kona utamaan doi sasaibino kolobo mo tinealikon. ¹⁶ Sabab lolo doi Yana Mian Bisa tealikene kolobo sasaibino doi surgaa tukon doi buta nia bungkukono, sasaibino kolangge mo tokita tukon mo aki natokita, tololo koidan sasaibino koroh mo berkuasa tukon mo maparenta. Sasaibino nadunia nia tinealikon lolo doi Kristus tukon tuuk doi Kristus. ¹⁷ Akiyoon sasaibino kolangge nadaano, Kristus daanomo. Tukon sabab doiyamo koidan maka sasaibino kolangge daano doi nadungolan memeeng. ¹⁸ Yanamo kokapalano doi butongoo, doiyamo jemaat, sabab yanamo kotuboan uuno doi jemaatoo. Yanamo kopau langgong, kotumbe-tumbeno inotuboi koidan doi namatean, sulano Yana susuungo tolong komo teali mo pontiing tuuno doi sasaibino kolangge. ¹⁹ Mian Bisa susuungo komo palaluuwo sulano sasaibino kolangge mo talaat doi Mian Bisa butongo, talaat koidan tukon sukup doi Na Pau butongo. ²⁰ Tukon lolo doi Paudoo koidan Mian Bisa putusiyomo sulano nakubaiyo sasaibino kolobo pokindok koidan tukon Yana -- mau sasaibino kolobo doi buta, mau komo doi surgaa. Mian Bisa kubaiyo doiya lolo doi Na Pau namatean doi kayung sempang. ²¹ Buunia komuyu odoon doi Mian Bisa. Komuyu pomusukene sabab lenggang tukon mupikilan molokis. ²² Bai diabudodoo, tukon Na Pau namatean, Mian Bisa mokubaikene loloon komuyu tukon Yana sulano nateali monondok koidan. Tukon cara doiya komuyu moola binaba mangadap doi Mian Bisa tukon ndondoong mo moliyous, bilisii tukon akiyo kososiboliino. ²³ Bai tantu komuyu sio potataap setia mangangga tukon kokondong moonggol doi mumanganggaan. Inai naikon komuyu sodiiyo kopo moinian mo lapamo bineekon doikoo salataa komuyu mantalima Bilita Monondok doi Mian Bisa. Bilitadoo lapamo pinolonggon doi memeeng komian doi sasaibino kolipu. Tukon tuuk doiyamo koidan yaku, Paulus, lapamo teali peleleani. ²⁴ Budodoiya yaku sanaang mosakisaa tuuk doi mukopontingan. Sabab tukon sakisaawan doi butonggu, yaku osukupiyo oila komo sio nabuno Kristus nasakisaawan tinoupi motuuk doi najemaat, doiyamo butongo. ²⁵ Mian Bisa bintekene yaku teali peleleani jemaat motuuk doi mukopontingan. Yaku sio kupelenggene kobilita moluwedoi Mian Bisa, sasaibino; ²⁶ doiyamo bilita mo malumbito doi abad-abad loolukon ko Mian Bisa mo laasiakanggene doi sasaibino komian, bai budodoiya inokitaikon doi namian. ²⁷ Doi namianoo Mian Bisa yase tudoikene bulaando kona monondokan tukon babasalan kona laasiadoo motuuk doi sasaibino kona mian. Laasiadoo doiyamo: Kristus daano doi butomu, koalatino komuyu naikon tololo lasaiyo ko Mian Bisa nababasalan. ²⁸ Kristus doiyamo komai binasalitakon doi memeeng komian. Kami ingotiikene tukon otunggukene yanila sasaibino kopandoiyan. Komai tujuan doiyamo sulano memeeng komian binaba doi Mian Bisa, buno mian mo toboso doi langge-langge morohani lalomo, sabab lapamo pomeenggon tukon Kristus. ²⁹ Sulano kulaate dolobodoo yaku balimang kakabukuan. Yaku kakabukuan tukon sasaibino daku bukuanan Kristus mo beekene doi yaku tukon mo balimang doi butonggu lalomo tukon moono kuasa.

¹ Yaku yase komuyu potoiyo bulaando daku nggoolaan kakabukuan tuuk doikoo tukon tuuk doi yanila doi Laodekia tukon sasaibino komo aki natingoniiyo yaku secara pribadi. ² Sasaibino naiya yaku kubaiyo sulano yanila konoanoila teali bukuan tukon yanila moola poseseang sulano napomeenggon tuuno. Tukon buno doiya yanila tutuu mangalati tukon anggayo tukon tingoniiyo ko Mian Bisa nalaasia doiyamo Kristus susuungo. ³ Kristus komo abese sasaibino kopandoiyan tukon toiyano ko Mian Bisa doi loolukon motosookon. ⁴ Yaku babilitakene naiya sulano komuyu inai poinokolii doi indee komiano koidan konabantilan maamis doikoo. ⁵ Sabab mau kai yaku poodoonggono doi komuyu, potoiyo yaku daano doi komuyudoo. Tukon yaku laba mokitayo komuyu pomeenggon noa tukon moonggol kopoo manganggaan doi Kristus. ⁶ Utus-utus lapamo talimayo Yesus Kristus doiyamo Temeneno. Tobikon doiya komuyu sio potubo pomeenggon tukon Yana, ⁷ tukon pomoonggol doi Yana. Komuyu siokai pobangune kopoo tuboan tukon Kristus teali uuno. Siokai komuyu pololokon mangangga doi Kristus, buno oila komo lapamo inotunggukon doi komuyu. Tukon siokai konoamu natoku-tokumbe tukon bantilan kinatauwan. ⁸ Komuyu sio pobada-badagai, inai nadaano komian mo pengaruiyo komuyu tukon banggapi namotoiyan mo akiyo kotakoso, bai tolongo atapayo. Domotoiyan-motoiyanoo aki naluwedoi Kristus, bai tolongo banggapi napandapat tukon luwedoi roh-roh mokuasaiyo kodunia. ⁹ Sabab tootubo ko Mian Bisa butongo daano doi Kristus, doiyamo butongo nabatokitaan buno banggapi. ¹⁰ Tukon sabab tuboan pomeenggonan tukon Kristus, komuyudoo binee tuboan tuuno. Sabab Kristus daano kapalano doi memeeng koroh moberkuasa tukon mo maparenta. ¹¹ Sabab pomeenggon tukon Kristus, komuyu lapamo sinunat, bolikon sunat banggapi mo kubaiyo, bai tukon sunat Kristus mo kubaiyo, mo sodiiyo komuyu doi kuasa lenggang mo baladosa. ¹² Sabab singgatoo komuyu posinauwan, komuyu tinadin posinggat-singgat Kristus; tukon basauwanoo mian koidan, komuyu polaing inotuboi koidan posinggat-singgat Kristus sabab komuyu mangangga doi Mian Bisa nakuasa mo lapamo otuboiyo Kristus doi namatean. ¹³ Looluk, komuyu lapamo mate secara rohani sabab komuyu baladosa, tukon sabab komuyu aki posinunat loloiyo koadat. Bai budodoiya Mian Bisa otuboiyo komuyu posinggat-singgat tukon Kristus. Mian Bisa lapamo ompuniyo sasaibino konda lalim, ¹⁴ tukon akiyenggene konda surat samea, moano doi kita, mo nggimoliiyo kita tukon sarat-sarat mo babalat. Tukon mosempange dosuratoo doi kayung sempang, Mian Bisa alapuse sasaibino kopakalaakon doi kita. ¹⁵ Doi kayung sempangoo Kristus kubaiyo sasaibino koroh-roh mo maparenta tukon berkuasa akiyono konapodaya koidan. Doi yaniladoo komian badaang pateekene doi tempo Kristus nasiikaano yanila pokakana komian motinaan salaku tanda Nakomanangan. ¹⁶ Tobikon doiya inai mosodiiyo komian moasalakene komuyu motuuk doi kinaan kai moininum, kai doi oloyo-oloyo kolamekanano kobaagamaan, kai lamekanano kobituwon boolu, kai motuuk doi oloyo Tadean. ¹⁷ Sasaibino doiya tolongo bayangan doi langge-langgedoo naikon mo lubat, bai kona batokitaan doiya langge-langgedoo doiyamo Kristus! ¹⁸ Inai posodiiyo kobutomuyu nainolugi doi mian-mian mo kakaadukon kependeyo kobutongo tukon mo sosubaiyo komalaekat-malaekat. Domianoo banggal-banggaal tukon napikiran-pikiran dunia tukon banggal-banggaalkene kona pokita susuungo, ¹⁹ tobikon akimo koidan nabataani doi Kristus mo teali kapala. Doi Kristus naloolaingano, sasaibino kobutonggita piniala tukon pinoomeenggon doi lolosuano, tukon tubo lolo doi Mian Bisa namongiasan. ²⁰ Komuyu lapamo mate polaing-laing Kristus, tukon lapamo sinodii doi roh-roh mo kuasaiyo naiya dunia nia. Eh, bulaando komuyu tubo buno mian mo daano kinuasai doi dunia nia? Bulaando komuyu mololoiyo doi aturan-aturan buno naiya, ²¹ "Inai motaape naiya", "Inai motamise ndaiya", "Inai mosinggile naiya"? ²² Sasaibino doperaturanoo doiya tuuk doi langge-langge mo pinake bai akiyono kotakoso. Doiya tolongo aturan-aturan tukon otunggul-otunggul banggapi mo kubaiyo. ²³ Takainomo kona tokitaan do langgedoo monondok, tukon binontiikon sulano komian nasosuba doi malaekat, ekependeyo kobutongo tukon sakisaayo kobutongo; bai sasaibino doiya akiyo kotakoso motaane kobanggapi namoot.

¹ Komuyu lapamo inotuboi koidan posinggat-singgat Kristus. Tobikon doiya komuyu sio pomoumbolii sulano pomalaat langge doi surgaa, inaando Kristus tukon Mian Bisa namaparentaan posinggat-singgat. ² Arahkanggene komu pikiran doi langge-langgedoo, inai nabaino langge doi dunia nia. ³ Sabab komuyu lapamo mate, tukon komu tuboan tosookon polaing Kristus doi Mian Bisa. ⁴ Eh, tuboan uuno mo bisa doiyamo doi Kristus tukon kalu Yana tokita naikon komuyu koidan tokita polaing-laing tukon Yana doi Nababasalan lalomo! ⁵ Tobikon doiya, akiyenggene kodunia naminooton-minooton mo otuwenge kobutomu, buno balolowaan, lobo mo aki namonondok, noano lokis, naminooton lokis, tukon modokoan (sabab komodokoan doiya pokakana tukon bapilogotan.) ⁶ Langge-langge mobuno doiya komo lubatene ko Mian Bisa nanggimalan doi mian-mian mo aki naloingiyo. ⁷ Loolukon mau komuyu loloiyo komo minooton-minootonoo, singgatoo komuyu modaano kinuasai. ⁸ Bai budodoiya siokai komuyu aisene kolangge mo lokis doi butomu: inaimo koidan moliit, kai nggimal kai mosikitene komian bailon. Aki namoola tobuat doi suumu kobantilan-bantilan masangolan kai bantilan mo manggilit. ⁹ Inai mobakokolii meeng tukon bailon, sabab kotuboan loolukoo tukon sasaibino kolangge lapamo komuyu tinggale. ¹⁰ Komuyu budodoiya lapamo binee tuboan mo boolu. Komuyu daanokai banggapi boolu, mo daano kiniboolu momeenggon doi motealikene, doiyamo Mian Bisa, pokakana koduduso susuungo. Kona makisuut doiyamo sulano komuyu tingoniiyo ko Mian Bisa tukon tontong. ¹¹ Buno kolimbako doiyamo lapus sasaibino kona posasalaan ko Yahudi miano tukon mobolikon Yahudi, mian mobasunat tukon mian mo aki nabasunat, akimo nadaano koidan naposasalaan komian molulubaton tukon mian lokis, antara ata tukon mian mobebas, sabab Kristus daano sasaibino kolangge-langge tukon Yana pomeenggon yanila sasaibino! ¹² Utus daano Mian Bisa namian. Mian Bisa mamaasikene komuyu tukon piliyo komuyu sulano nateali namian mo tangalaas. Doiyamo kosababpo komuyu sio pookitakene kopoo seang, komuyu sio pomonondok konoamuyu, aki nabingkate kobutongo, matalamuyuk tukon yase sakisaa. ¹³ Komuyu sio posabar doi meeng tukon bailon, tukon sio po poompuni kalu daano komo mangabos noa nggimalan doi bailon. Temeneno tukon sanaang konoano ompuniyo komuyu, jadi komuyu sio poyase ompuniyo meeng tukon bailon. ¹⁴ Tukon komo penting tuuno, doiyamo: Komuyu sio poposeseang sabab do seangoo doiyamo komo pomeenggene Utus-utus sasaibino tobikon nateali talakana. ¹⁵ Siokai komu mongiasan-mongiasan tinantukon doi pokindokan Kristus mo beekene doi noamu lalomo. Sabab Mian Bisa uange komuyu sulano teali anggota meeng kobutong, sulano komuyu tubo doi pokindokanoo lalomo moluwedoi Kristusoo. Siokai komuyu pobakinatauwan. ¹⁶ Siokai doi Kristus naotunggul-otunggul mo moono balakaat natelem doi noamu lalomo. Sio komuyu pootunggul popobee otinau doi namonondokan. Pomanyanyikene kosadeong tukon nggaa-nggaale tukon lagu-lagu rohani; pomanyanyi tuuk doi Mian Bisa tukon perasaan kinatauwan doi noamu lalomo. ¹⁷ Sasaibino oila komo komuyu kubaiyo kabai bantilan, siokai doiya posipatene tukon pobantile luwedoi Temeneno Yesus sambuno. Pobakinatauwan doi Mian Bisa Tama tuuk oila Yesus nailakukon doikoo. ¹⁸ Utus-utus mo teali boloki! Potaat doi polangkai, sabab sio nabuno doiya komu kalakuan maka namoola binantil Salani miano. ¹⁹ Utus-utus mo teali langkai! Seseange komu boloki. Inai monggimoliiyo yanila. ²⁰ Labuk-labuk! Daano kopokuwajipan buno meeng ko Salani miano sulano sidutu taat doi tama tina, sabab doiya komo kindendeke ko Mian Bisa noano. ²¹ Utus-utus mo teali tama! Inai posakitiyo kopo pau-pau noano naaki teali liit konoano. ²² Utus-utus mo teali ata! Doi sasaibino kolangge, siokai komuyu potaat doi mutuan mo doi dunia nia. Inai taat doi yanila tongo doi tempo yanila modaano dagaiyo komuyu, sabab komuyu yase ngginaal. Taatiyo doi yanila tukon noa sanaang, sabab komuyu odotiiyo ko Temeneno. ²³ Indeemo kolimango bineekon doikoo, siokai komuyu limange tukon tootubo konoamuyu, pokakana buno Temeneno kopolineleani, tukon bolikon tongo banggapi. ²⁴ Poneneeke baikon komuyu naikon mantalima tambo doi Temeneno. Oila ko Temeneno nasinadiakon motuuk doi namian, doiyamo kona bineekon doikoo. Sabab dopomajikanoo komuyu moleleaniyo doiya pokakana mo kopoleleaniyani Kristus susuungo. ²⁵ Tukon indee miano komo mongkubai sala, naikon tanggunge kona salaanoo, sabab Temeneno aki napiliyo komian duduso.

¹ Utus-utus mo teali tuan! Siokai komuyu pokubaiyo kopoata-ata doi nakanaan tukon naadil. Poneneeke baikon mau komuyu daano komeeng kopotuan doi surgaa. ² Siokai komuyu posambeang doi nabisa-bisaan tukon pobadagai, tukon basyukuur doi Mian Bisa. ³ Posambeanggene tuuk kami sulano ko Mian Bisa nabeena doi kami todanan mo monondok tuuk mobasalitakene tentang rahasia Kristus. Sabab doiyamo kolanggeno maka yaku diabudodoo nia daano doi talunggu lalomo. ⁴ Posambeanggene sulano kumoola tunggulikene dorahasiadoo doi natontongan bulaando kona tutuuwan. ⁵ Doi potaamian lalomo komuyu tukon mian badaang mo aki namangangga, siokai komuyu potubo pandoi tukon mangala meeng kotodanan momonondok. ⁶ Siokai kolangge-langge komuyu mosidutu bantile namonondok tukon kinilakon. Siokai potoiyo bulaando kona tutuuwan komuyu motimbiliyo komian napasadai-pasadai. ⁷ Tikhikus, nda utus mo sineang, naikon botiikene doi komuyu sasaibino kolobo tentang doiyaku. Yana molole balimang polaing-laing kami tuuk doi Temeneno. ⁸ Yaku bintekene yana doikoo tukon alasan sulano komuyu potoiyo komai ndondoong tukon komuyu potohibur. ⁹ Onesimus naikon ampakon polaing-laing tukon Tikhikus; yana meeng komian doi popolipuiyan. Yana meeng komian mo molole, tukon kami seseange. Yana tukon Tikhikus pailukene doikoo sasaibino komo teali doi kudungolan nia. ¹⁰ Aristarkus, mo daano doi talunggu lalomo polaing-laing yaku, makapatu teteba doi komuyu. Bunomo koidan Markus, montolidan idan tukon Barnabas. (Komuyu lapamo kinopotui bilita sulano potalimayo yana kalu yana lubat doikoo.) ¹¹ Teteba koidan moluwedoi Yesus kosambuno Yustus koidan. Luwedoi Yahudi miano mo lapamo mangangga doi Temeneno Yesus, tolongo yanila toluila tolong budodoiya komo balimang polaing tukon yaku moampakonggene kolimang moluwedoi Mian Bisa. Yanila bisa-bisa tuuno motulungiyo yaku. ¹² Teteba moluwedoi Epafras. Yana koidan luwedoi mupolipuiyan. Yana Yesus Kristus napeleleani, mo sidutu sambeang tutuuno motuuk doi komuyu. Yana kabiyo tutuuno doi Mian Bisa sulano komu manganggaan nateali moonggol tukon komuyu tutuu doi manganggaan, sulano komuyu potalakana taat doi Mian Bisa namongiasan. ¹³ Yaku sakisiiyo susuunggu baikon yana lapamo balimang kokobukuan tuuk doi komuyu tukon tuuk mian badaang mo daano doi Laodekia tukon Hierapolis. ¹⁴ Dokter Lukas, kita mo seange, tukon Demas makapatu teteba doikoo. ¹⁵ Pelenggene komai teteba doi utus-utus Salani miano doi Laodekia; koidan doi Nimfa, tukon doi jemaat mo bakaleda doi bonua. ¹⁶ Salataa lapa naiya suratia binacakon doikoo, usahakanggene sulano doiya nabinacakon koidan doi jemaat Laodekia. Bunomo koidan komuyu sio pomabaca dosuratoo naikon mo kinapatu luwedoi Laodekia tuuk doikoo. ¹⁷ Tukon pailukene Arkhipus, "Alapayo kolimang mo bineekon doikoo tuuk leleaniyo ko Temeneno." ¹⁸ Teteba doi yaku, Paulus. Yaku susuunggu komo tulise naiya sembelengia. Inai potoliminggene baikon yaku modaano doi talunggu lalomo! Boliisi ko Temeneno nabalakaatiyo komuyu. Komai Hormat, Paulus