2 TIMOTIUS

¹ - ² Timotius, kupau kinilakon! Yaku, Paulus, tulise naiya suratia doikoo, tukon moinikene boliisi Mian Bisa Tama tukon nda Temeneno Kristus Yesus nabeena balakaat, maasi tukon namonondokan doikoo. Tolongo Mian Bisa namongiasan, yaku biningkat teali rasul Kristus Yesus tukon binotokon sulano babotilanggene kotuboan Mian Bisa mo janjikene. Kotuboan kita talimayo sabab pomeenggonan tukon Kristus Yesus. ³ Yaku basukuul doi Mian Bisa yaku mo leleaniyo tukon noanggu lalomo mo molino buno kumbumbu doi lolukonoo nakubaiyano. Yaku sidutu bakinatauwan doi Mian Bisa sasamba luunggon yaku neneeke doikoo doi sambeang lalomo, mau oloyo mau popook. ⁴ Yaku neneeke konoamu napoloonan. Doiyamo kosababpo yaku yase tuuno pososuung tukon ikoo sulano yaku teali sanaang tuuno. ⁵ Yaku neneeke naikon komu manganggaan mo tutuu doi Kristus, pokakana buno mutaate Lois namanganggaan tukon tinamu Eunike. Tukon yaku anggayo ikoo koidan mangangga buno doiya. ⁶ Tobikon doiya yaku ingotiikene ikoo sulano muotuboikene ko Mian Bisa nakarunia bineekon doikoo doi tempo yaku binggakene kolimanggu doikoo bunggono. ⁷ Sabab Mian Bisa Na Roh nabineekon doi kita, bolikono Roh mo kubaiyo kita teali matakut. Kobalino Mian Bisa Na Roh kubaiyo kita teali bukuan, moono tukon seang tukon moola taane kobutonggita. ⁸ Tobikon doiya inaimo momammaa momebee katarangan tentang nda Temeneno, tukon inaimo koidan momammaakene tentang doi yaku, mo tinalunggu sabab Yana. Kobalino, siokai ikoo tukon bukuanan doi Mian Bisa turut sakisaa tuuk doi Bilita Monondokoo. ⁹ Mian Bisa salamatene kita tukon uange kita sulano teali namian susuungo. Yana kubaiyo doiya bolikon dasarkanggene oila komo lapamo kita kubaiyo, bai dasarkanggene natetel susuungo tukon namaasi. Yana beekene doi kita kona maasi lolo doi Kristus Yesus akiyoon nadunia nia natinealikon. ¹⁰ Tukon diabudodoo, Mian Bisa tudoikene kona maasi doi kita tukon konalubatan ko Tomundo Pasalamaton kita doiyamo Kristus Yesus. Yesus lungguiyo kokuasa matean tukon babayo kotuboan mo posidutukon luwedoi Bilita Monondokoo. ¹¹ Tuuk doi babotilangganamo ko Bilita Monondok doiyamo Mian Bisa binggate yaku teali rasul tukon guru. ¹² Doiyamo kosababpo yaku sakisaa sasaibino nia, bai yaku tataap anggayo, sabab yaku toiyo tuuno indee daku inangga. Yaku anggayo baikon oila komo lapamo Yana monggianggakene doi yaku, Yana moola koidan totooliyo polong doi Oloyo Nakiamatan. ¹³ Loingiyo tukon tutuu kootunggul mokana mo lapamo yaku beekene doikoo. Tukon siokai mutataap bakakanggi doi manganggaan tukon poseangan mo lapamo teali nda milik sabab pomeenggon tukon Kristus Yesus. ¹⁴ Tukon potombonii moluwedoi Mian Bisa Na Roh mo tubo doi kita, siokai mudagaiyo mono-monondok kolangge-langge moano koanggano mo lapamo monggianggakene doikoo. ¹⁵ Ikoo toiyo baikon sasaibino komian doi Asia lipuno lapamo tinggale yaku, tololomo koidan Figelus tukon Helmogenes. ¹⁶ Bai Onesifolus solipuan lapamo bubula luunggon nakubaiyo sanaang konoanggu. Boliisi Temeneno napokokonoi kona tudoikanano kona seang doi yaniladoo. Mau kai yaku doi talunggu lalomo, bai Onesiforus aki namamaakene tentang daku kaadaanoo. ¹⁷ Sambuno polong doi Roma, yana tuluus kakaate mounggoliiyo yaku polong yana posuungganaku. ¹⁸ Tukon ikoo toiyo baikon doi Efesus yana badaang luunggon natulungiyo yaku. Boliisi ko Temeneno natudoikene kona seang doi yana doi oloyo Temeneno naadiliyano sasaibino kobanggapi.

¹ Timotius, kupau! Sio muteali bukuan tongo maasi mo bineekon doi kita, sabab kita pomeenggon tukon Kristus Yesus. ² Otunggul looluk mo lapamo ikoo lengele lengget doi yaku doi mian badaang salaano, siokai mumonggianggakene doi mian badaang mo moola inangga tukon mo pandoi mongotunggul mian bailon. ³ Ikoo sio muturut sakisaa buno Kristus Yesus nasuludadu mo molole. ⁴ Meeng kosuludadu mo daano balimang, aki naikon nasibukene kobutongo, tukon naurusan-urusan susuungo, sabab yana yase sanaanggene kona talenga noano. ⁵ Meeng komian moolaragawan aki naikon nateali juara doi meeng kopertandingan, kalu yana aki naloingiyo koparaturan-paraturan. ⁶ Petani mo lapamo balimang tuuno yanamo kotumbe-tumbeno komoberhaak molaat kohasilo dona langgedo sinakakon. ⁷ Popikikene oila komo lapamo yaku matailukene doiya, sabab Temeneno naikon beena doikoo motoiyan sulano mumangalatikene sasaibino. ⁸ Neneeke naiya: Bilitania Monondok doi yakudoo mobabotilanggene doiyamo bilita tentang Yesus Kristus, Daud nakaturunan; Doiyamo Kristus mo lapamo abali tubo doi namatean. ⁹ Sabab kubabotilangganano ko Bilita Monondok doiyamo, yaku sakisaa; tukon sampe yaku binoboi buno meeng komian lokis. Bai Mian Bisa nabantilan aki namoola binoboi. ¹⁰ Doiyamo kosababpo yaku sabar tanggunge sasaibinodoo tongo mian badaang nakopontingan mo lapamo Mian Bisa lilike, sulano napomalaat kasalamatan mo bineekon lolo doi Kristus Yesus, tukon mo pinolainggon kobosaran mo posidutukon. ¹¹ Bisa tuuno bantilan nia, "Kalu kita lapamo mate polaing Yana, kita naikon tubo koidan polaing Yana. ¹² Kalu kita tataap sabar, kita naikon maparenta koidan polaing Yana. Kalu kita aki naanggayo Yana, Yana koidan aki natalimayo kita. ¹³ Kalu kita aki nda setia, bai Yana tataap molole, sabab aki namoola Yana posalakon Kobutongo susuungo." ¹⁴ Siokai muingotiikene komian badaang tentang sasaibino nia. Doi Mian Bisa salaano, otinaukene yanila sulano inai napodangaanikene tentang kobantilan-bantilan. Koiya akiyo kona totuuk, tongo kai kubaiyo nggabut komian badaang mo mondongolii. ¹⁵ Siokai mukakaate tutuu sulano ko Mian Bisa naakuiyo buno mian mo moola balimang doi Yana. Kakaate sulano naaki mumammaakene komu balimangan, bai otunggulkene tukon kona otunggul-otunggul mobisa doi Mian Bisa. ¹⁶ Dedeenggene kobasalitaan-basalitaan mo akiyo kotakoso tukon mo totulaiyo ko Mian Bisa. Basalitaan-basalitaan mobuno doiya tongo kubaiyo komian pololokon lokis. ¹⁷ Domianoo naotunggul landa buno panakit kanker mobarani. Doi yaniladoo tongusokon Himeneus tukon Filetus. ¹⁸ Yanila lapamo tinggale kootunggul mo kana, tukon nggabute komian songobos namanganggaan. Yanila bantile baikon kotuboan doi matean lapamo teali. ¹⁹ Bai dasar mo moonggol Mian Bisa mo kubaiyo aki natounggot. Doi bunggono totulis naiya, "Temeneno tingoniiyo kona mian-mian", tukon "Mian mo bantile baikon yana Temeneno koona, domianoo sio natade mokubaiyo kokokubai mo sala". ²⁰ Doi bonua mo babasal lalomo talaat moisalomo kololonggu. Daano komo kinubai doi suasa kabai mosoni, bai daano koidan komo kayung kabai buta. Daano komo pinake doi koperluan moistimewa tuuno, tukon daano koidan komo pinake doi koporluan mobiasa. ²¹ Mian mo kumesiyo kobutongo doi sasaibino komo lokis, domianoo naikon pinake tuuk doi koperluan moistimewa. Yana teali natuan koona tukon berguna doi natuan. Yana sinadiakon tuuk pinake doi samba kolimang monondok. ²² Dedeenggene kokasanangan-kasanangan mian mongula. Kakaate doi mutuboan sulano mutulutiyo ko Mian Bisa namongiasan, setia doi naotunggul tukon seseange kotulamu, tukon konoamu sio tanaang. Tubomo buno doiya polaing yanila mo nggeleamon mangkabi tulung doi Temeneno tukon noa monondok. ²³ Inai momalaing doi podangaanian lalomo mian badaang molongas mo akiyo kona tinoi. Ikoo toiyo baikon sasaibinodoo tongo sumbetene kopodangaanian. ²⁴ Mian mo balimang motuuk doi Temeneno aki namoola poodangaani; yana sio napokokonoi doi sasaibino komian tukon moola mongotunggul mian tukon monondok tukon sabar. ²⁵ Yana sio nakokomuyuk kona mongotunggulan mian badaang mo yase lawane; kinatauwan ko Mian Bisa nabeena kasampatan doi mian badaang sulano napobabolii doi nalalim-lalim tukon tingoniiyo kootunggul mo bisa. ²⁶ Tukon kalu buno doiya yanila teali sadar koidan, tukon tosobii doi Ibiliis napalako mo lapamo lakoyo yanila tukon pakisaayo yanila mololoiyo kona mongiasan.

¹ Neneeke naiya: Doi oloyo-oloyo doibundu naikon daano badaang kokasusaan. ² Kobanggapi naikon utamakene kobutongo susuungo, kodoy kuasaiyo yanila, banggaal tukon yase balambuus. Yanila yase totulaiyo komian, nggabute komian motuwa, aki natoiyo bakinatauwan, tukon mesikitene kolangge-langge rohani. ³ Yanila aki naseange kotulano, tukon aki napoiyase momebee ampun, tukon yanila tongo yase lokis-lokise komian bailon sambuno, yase pakeyo komotikasan, yanila barani tukon aki nayase komonondokan. ⁴ Yanila tongo yase kobakulokisanan, banggaal, tukon aki napobapikir nabulusan. Yanila yase tuuno kokasanaangan doi dunia, maka baino moloingiyo ko Mian Bisa. ⁵ Maukai secara doi nakinitaan, yanila taat ampakonggene koagama nakakabi, bai yanila tolayo koagama isino tuuno. Dedeenggene komian nakokubai mobuno doiya. ⁶ Daano doi yaniladoo komo lapamo usokiyo komian nabonua-bonua, maka napogangguwo koboiboine molemah konamian tukon mobadaang tuuno konapolalim tukon koidan moisalomo konapominomooton. ⁷ Doboiboinedoo banggadudul kabiyo nainotunggul, bai aki nabiasa tingoniiyo kootunggul mo kana moluwedoi Mian Bisa. ⁸ Bunomo kai Yanes tukon Yambles molawane Musa looluk, bunomo koidan komian mobadaang motabatiloo yanila molawanemo kootunggul doi Mian Bisa. Konapopikiran rusako, tukon kona pai manganggaan lemamo tuuno. ⁹ Bai yanila aki naikon namalaat oioila, sabab yanila nalongasan naikon tinoimo doi sasaibino komian, buno Yanes tukon Yambres koidan natinoupi. ¹⁰ Bai ikoo lapamo turutiyo daku otunggul-otunggul, daku ndondoong, tukon daku tuboan natujuan. Ikoo lapamo kitayo susuumu bulaando daku tutuuwan momangangga doi Kristus tukon seseange kotula-tulando. Ikoo koidan toiyo daku sabaran tukon daku moonggolan. ¹¹ Ikoo lapamo kitayo daku sinakisaawan tukon yaku sakisaa. Ikoo toiyo sasaibino mo teali doi yaku doi Antiokhia, doi Ikonium, tukon doi Listra; tukon ikoo toiyo sasaibino daku sakisaawan! Bai Temeneno salamatene yaku doi sasaibinodoo. ¹² Takainomo sasaibino komian moiyase tubo tukon moiyase taat tukon tubo pomeenggon tukon Kristus Yesus naikon linoilokis, ¹³ baimokai komian badaang mo lokis tukon komian bakokolii naikon pololokon lokis. Yanila okoliiyo komian bailon banggokai yanila susuungo koidan komo tongokolii. ¹⁴ Bai tentang ikoo, Timotius, siokai mutataap bakakanggi doi otunggul-otunggul mo kana mo lapamo inotunggukon doikoo tukon mo ikoo moanggayo tuuno; sabab ikoo toiyo indee miano komu guru-guru. ¹⁵ Ikoo sio muneneeke baikon sodo doi mupoipoisikan ikoo lapamo tingoniiyo ko Kitab Moliyous. Kitab Moliyousoo beena doikoo motoiyan sulano mumalaat kasalamatan lolo manganggaan doi Kristus Yesus. ¹⁶ Sasaibino komo totulis doi Kitab Moliyous lalomo, Mian Bisa popitoikene tukon berguna sulano naotunggukene komo kana, tukon nateguure tukon konoikene komo sala, tuuk mongotunggul banggapi sulano tubo mololoi Mian Bisa namongiasan. ¹⁷ Tukon Kitab Moliyousoo mian mo meleleani Mian Bisa moola nalinongkapi tukon cukup doi sasaibino tentang kolimang mo monondok.

¹ Kristus Yesus naikon lubat koidan doi dunia nia sulano Naadiliyo komian mo tubo tukon mo mate; tukon Yana naikon lubat tuuk maparenta buno Tomundo. Tobikon doiya yaku kabiyo tukon tutuu doikoo doi Mian Bisa salaano tukon Kristus Yesus: ² Siokai ikoo mubabotilanggene dobilitadoo doi Temenenodoo, tukon desaake sulano komian namolongol, oilakai yanila yase kabai aki. Siokai muekenggele komian, tudoikene kona sala, tukon beena dorongan doi yanila. Otunggule komian tukon sabar tuuno. ³ Sabab naikon nalaate kotempono komian aki nayase koidan mantalima otunggul mo kana. Kobalino, yanila naikon loingiyo konapominomooton, tukon pototongikene koguru-guru sulano naotunggukene kolangge-langge mo monondok doi napai polongol. ⁴ Yanila naikon kukupiyo kotolingainoila doi mo kana, bai naikon tingaakene kosalita-salita mokala. ⁵ Mau kai nabuno doiya, siokai mukuasaiyo kobutomu maukai nabulaando doi ndondongo lalomo koidan. Sabar doi sakisaa lalomo, kubaiyomo komu limang buno babotilangganano ko Bilita Monondok tukon ampakonggene namono-monondok komu limang buno Mian Bisa napeleleani. ⁶ Tentang kobutonggu, laatemo kotempono naikon daku matean buno sosubakon doi Mian Bisa. Soisikeen koidan yaku naikon tinggalemo nadunia nia. ⁷ Yaku lapamo malaing bakurebean tukon namono-monondokan, tukon lapamo laate kogaris napupusan. Yaku tataap taat doi Kristus polong doi napupusan. ⁸ Tukon diabudodoo kopatambo manaangan totiiliyo yaku. Doi Oloyo Nakiamat, Temeneno, Hakim mo adiloo naikon salakanggene dopatambodoo doi yaku, sabab yaku tubo pomeenggon tukon Mian Bisa. Tukon aki natolongo yaku koidan komo mantalima naikon dopatambodoo, bai koidan sasaibino komian mo totiiliyo ko Temeneno nalubatan tukon poloon tuuno. ⁹ Kakaate lubat doi yaku namosobit, ¹⁰ sabab Demas tinggalemo yaku sabab kilakene nadunia nia. Yana tauso doi Tesalonika. Kreskes tauso doi Galatia, tukon Titus doi Dalmatia. ¹¹ Tongo Lukas komo dungol tukon yaku. Lubotiiyo Markus tukon babayo yana polaing ikoo, sabab yana moola tomboniiyaku doi balimangan lalomo. ¹² Yaku sumboliiyomo Tikhikus taus doi Efesus. ¹³ Kalu ikoo lubat, babayo domanteloo yaku mo tinggale doi Troas doi Karpus nabonua. Babayo koidan daku buku-buku, komo utama kubuku-buku mo kinubai moluwedoi kulit teali kertas. ¹⁴ Aleksander, tukang pokubai tambagadoo lapamo lakukene kolangge-langge mo kulokis tuuno doi yaku. Temeneno naikon balase yana mololoi nakokubai. ¹⁵ Ikoo susuumu sio mubaingotii doi yana, sabab yana tantange tuuno konda bilita. ¹⁶ Doiya kosinggato kotumbe-tumbeno yaku ajukanggene mobelayo kobutonggu, akiyo komeeng komian mololainge yaku; sasaibino tinggale yaku. Kinatauwan ko Mian Bisa naaki nasalakene doi yanila nalangge nia! ¹⁷ Bai ko Temeneno loolainge yaku. Yana beena bukuanan tobikon kumoola babotilanggene do Bilitadoo Momonondok, sulano nalinongol doi sasaibino komian mobolikon Yahudi, tukon yaku tosodii doi matean lalomo. ¹⁸ Takainomo Temeneno naikon sodiiyo yaku doi sasamba koniat mo kulokis doi yaku. Yana naikon babayo yaku tukon salamat doi Batomundoan lalomo doi surgaa. Siokai Yana nainakabasal sidutu-posidutukon! Amin. ¹⁹ Daku salam doi Priskila tukon doi Akwila tukon doi Onesiforus pulino. ²⁰ Erastus dungol doi Korintus, tukon Trofimus yaku tinggalemo doi Miletus daano momasakit. ²¹ Kakaate tutuuno sulano mulubat doi tempo naakiyoonan nalaate kotimul. Ebulus, Pudes, Linus, tukon Klaudia yanila kapatuwo konaposalam doikoo; bunomo koidan sasaibino koutus momangangga bailon. ²² Boliisi ko Temeneno nalolainge ikoo. Boliisi ko Temeneno nabalakaatiyo Utus-utus! Komai Hormat, Paulus