2 TESALONIKA

¹ Utus-utus jemaat doi Tesalonika, mo tealimo Mian Bisa namian Tamanggita tukon Yesus Kristus! Kami, doiyamo Paulus, Silas tukon Timotius, ² moinikene sulano ko Mian Bisa Tama tukon Yesus Kristus mebee balakaat tukon sanaangan doi komuyu. ³ Utus-utus, kami sidutu mopolonggon kinatauwan doi Mian Bisa sabab komuyu. Tukon takainomo kami sio mai kubaiyo buno doiya, sabab komuyu pololokono mangangga doi Kristus, tukon komuyu momeenggon poseang-seang meeng tukon bailon. ⁴ Doiyamo kosababpo bulaando kami bantile doi komuyu samba-samba komai lubotiiyano ko Mian Bisa najemaat-jemaat. Tukon kami sanaang mobasalitakene bulaando komuyu kopotataapan momangangga doi Kristus mau doi sakisaa lalomo tukon sakisaa komuyu mo toupiyo. ⁵ Tukon naiyamo kona tokitaan bulaando kona adilan ko Mian Bisa nakaputusan. Komuyu lapamo sakisaa sabab Mian Bisa na Dunia Boolu, tukon tobikon doiya komuyu inaanggon moola usok doi lalomo. ⁶ Yana lakukanggene oila komo adil, tukon naikon soboliyo kosakisaawan doi mian mo kubaiyo komuyu sakisaa. ⁷ Tukon doikoodoo diabudodoo mosakisaa -- bunomo lakon doi kami -- Mian Bisa naikon beena naleleapan nalaate kooloyono Yesus naobulusan luwedoi surgaa tukon okitakene kobutongo polong namalaekat-malaekat mo tambongan ⁸ tukon koidan aung mo kolot-kolot. Yana obulus sulano naukume komian badaang mo aki napusinggene ko Mian Bisa tukon mo aki nayase tubo pokokonoi tukon ko Bilita Monondok tentang Yesus nda Temeneno. ⁹ Mian badaang naikon mantalima ukuman silakaan sidutu-posidutukon, sinakukon doi tongkulung doi mobolikon Temeneno nalingkungan tukon doi nakuasa mo babasal; ¹⁰ sasaibinodoo naikon teali doi oloyono nalubatan sulano kona mian naakabasale tukon sulano nainodotii doi sasaibino komian mo mangangga. Mau komuyudoo naikon daano doi Mian Bisadoo namian lalomo, sabab komuyu lapamo mangangga doi bilita kami mopelenggene doikoo. ¹¹ Doiyamo kosababpo kami sidutu sambeanggene komuyu. Kami sambeang sulano ko Mian Bisa natealikene komuyu namoola tubo loingiyo kona mongiasan; tobikon doiyamo Yana uwange komuyu. Boliisi ko Mian Bisa, tukon Nakuasa, okoonoyo Kona mongiasan sulano Nakubaiyo komonondok, tukon kindendeke sasaibino kolimang komuyu mo lakukene sabab mangangga doi Kristus. ¹² Tukon kalu buno doiya konda Temeneno Yesus komuyu akabasale, tukon komuyu koidan Yesus akabasale sabab namonondokan konda Mian Bisa noano tukon Temeneno Yesus Kristus.

¹ Tentang konda Temeneno Yesus Kristus nalubatan, tukon tentang konda pinototongikonan doi nda podungolian tukon Yana, naiyamo daku kinabi tukon tutuu doi komuyu: ² Inaikai pomosobit-sobit pusing kai iyos sabab modaano kobilita baikon laatemo kooloyono Yesus nalubatan koidan. Ugaate do bilitadoo luwedoi meeng konubuat, kabai luwedoi meeng kootunggul; kabai naaki nadaano komian mo bantile baikon kami biasa tulise komo buno doiya doi meeng komai surat lalomo. ³ Mau nabulaandomo koidan, inai popataikene komian naokoliiyo komuyu. Sabab kalu akiyoon nalaate do Oloyodoo, siokai nateali nalangge nia loolukon: Badaang komian naikon moupa, moakiyenggene Kristus; tukon do Banggapidoo mo Lokiso yanila lapamo tinantukon usok doi naraka, tukon doi tempodoo doiya yanila okitakene kobutongoila. ⁴ Tukon nababanggaalan yana naikon nggimal tukon atandake kobutongo doi sasaibino kobanggapi nasinosubai, kabai doi sasaibino koilah doi banggapi mo aanggene Mian Bisa. Baikon yana naikon osulang doi Mian Bisa Nabonua tukon pelenggene baikon yanamo ko Mian Bisa. ⁵ Poneneeke baikon yaku daano pailukene sasaibino doiya doi tempodoo kudaanowan polaing komuyu. ⁶ Tukon komuyu toiyo oila diabudodoo komo akiyenggene kona tealian sasaibinodoo. Sio doi tempono mo lapamo Mian Bisa tantukanggene, do Banggapidoo mo Lokis naikon lubato. ⁷ Kobukuanan mo kubayo kolokis lapamo atambuune kona balimangan tukon laasia, bai daano motinaataan. Sio kalu domo taanedoo lapamo sinaakon, ⁸ maka nasodo tokita do Banggapidoo mo Lokis. Maka kalu Temeneno Yesus lubato, Yana akateyo do Banggapidoo mo Lokis tukon naansaang motobuat doi baba-No, tukon komo manase tolongo namontotilangan doi Nalubatan. ⁹ Do Banggapidoo mo Lokis naikon lubat tukon meeng kona kuasa mo babasal moluwedoi Ibiliis. Yana naikon kubaiyo sasaibino kolangge tentang mominasaindinggon langge-langge mobolikon lobo mo moono tukon kobangokoliian. ¹⁰ Yana pakeyo sasaibino kobangokoliian mo lokis sulano naatapayo komian badaang naikon mo silaka. Yanila naikon silaka sabab aki natalimayo tukon aki napo yase kobilita mo bisa moluwedoi Mian Bisa mo moola salamatene yanila. ¹¹ Doiyamo kosababpo ko Mian Bisa olubatene doi yanila komeeng kokuasa mo atapayo yanila, sampe yanila mangangga naikon oila komo aki nabisa. ¹² Kobalino, sasaibino komian mo yase kolalim tukon aki naanggayo domo bisadoo, yanila inukum. ¹³ Utus-utus Temeneno mo mamaasikene! Sidutu kami sio mai pelenggene kokinatauwano doi Mian Bisa tentang doi komuyu, sabab doi temponodoo ko Mian Bisa lapamo lilike komuyu sulano posinalamaton. Langgedoo doiya teali oila ko Mian Bisa Na Roh nalinimang doikoo sulano natealikene komuyu Mian Bisa namian mo moliyous tukon sabab komuyu anggayomo kobilita mo bisa moluwedoi Mian Bisa. ¹⁴ Tobikon doiyamo ko Mian Bisa uangemo komuyu lolo doi Bilita Monondok kami mobabilitakene doikoo. Mian Bisa uange komuyu, sabab Yana yase sulano komuyu turut rasakanggene kona babasalan konda Temeneno Yesus Kristus. ¹⁵ Tobikon doiya, Utus-utus pokokondong kokoonggol tukon pobataani momeenggon doi otunggul-otungguloo mo lapamo kami beekene doikoo, mau natolongo bantilan mau kai natolongo motinulis. ¹⁶ - ¹⁷ Boliisi doi nda Temeneno Yesus Kristus susuungo, tukon nda Mian Bisa Tama hibure tukon keenggele konoamu, sulano pomoola limange tukon babilitakene oila komo monondok. Sabab ko Mian Bisa seseange kita, tukon sabab namonondokan konoano Yana kubaiyo kita tataap sabar, tukon moinikene komo monondok.

¹ Napupusan, Utus-utus, posambeang tuuk doi kami. Posambeang sulano kobilita moluwedoi Temeneno moola tasabukon momeenggon tukon mosobit tinalima monondok, pokakana buno komo lapamo teali doikoodoo loolukon. ² Posambeang koidan sulano ko Mian Bisa nasalamatene kami doi mian badaang mo palalentel tukon molokis. Sabab aki nasasaibino komian anggayo do bilitadoo moluwedoi Temeneno. ³ Bai ko Temeneno setia. Yana naikon ekeenggele komuyu tukon lindungiyo komuyu luwedoi Mo Lokis. ⁴ Tukon kami anggayo tuuno doi Temeneno tentang komuyu, baikon komuyu daano mokubaiyo tukon momeenggon kubaiyo oilamo kolobo kami mo pailukene doikoo. ⁵ Boliisi ko Temeneno naloolainge komuyu sulano nalobian kopomangalatikanano baikon ko Mian Bisa mamaasikene komuyu tukon baikon Kristus beena kasabaran doikoo. ⁶ Utus-utus, tolongo kuasa Yesus Kristus, kami maparentakene sulano komuyu pobadodoonggon doi sasaibino koutus, mo tubo bea-bea, tukon mo aki naloingiyo kootunggul-otunggul kami mobeekene doi yanila. ⁷ Komuyu susuumuyu toiyo baikon komuyu mololoi contoh doi kami. Kami aki mai bea-bea doi tempodoo kami modaano pototongi tukon komuyu. ⁸ Kami aki mai kaane komian nakinaan kalu aki mai beale. Kobalino oloyo popook kami balimang kokobukuan sulano kami aki mai kubaiyo susa mau indee komiano modaano doi komuyudoo. ⁹ Kami kubaiyo doiya bolikon sabab kami akiyo komai haak motuntute sulano komuyu potomboniiyo kami, bai sabab kami yase moteali contoh doikoo. ¹⁰ Doiya kosinggato mai daanoan doi komuyu, kami mebee peraturan nia, "Mian mo aki nayase balimang, aki namoola kaan." ¹¹ Kami bantile naiya sabab kami lengele baikon daano ko mian-mian doi komuyudoo mo tubo bea-bea. Yanila aki namongkubai meeng kolobo, tolongo sibuk momongusoki mian bailon naurusan. ¹² Tukon Temeneno Yesus Kristus nakuasa kami parentayo do mian badaang tukon beena poingotii, sulano yanila nabalimang tukon monondok tukon yanila moumbolii onggos susuungo. ¹³ Bai komuyu inai pomaalinggene mokubaiyo komonondokan. ¹⁴ Ugaate daano komian mo aki naloingiyo oila komai binantil nai sulatia lalomo. Pobadagai doi mianoo mobuno doiya tukon inai poposumboli tukon yana sulano yana namamaa. ¹⁵ Bai inai pokubaiyo yana buno musu; tolongo otinauwo yana buno meeng koutus. ¹⁶ Temeneno doiyamo kouuno konda monondokan. Boliisi Yana nasidutu mebee monondokan doikoo sasaibino kolangge. Boliisi ko Temeneno naloolainge Utus sasaibino. ¹⁷ Teteba moluwedoi yaku, Paulus. Yaku susuunggu komo tulise naiya sembelengia. Naiyamo kotandano yaku mo saape doi sasaibino daku surat. ¹⁸ Boliisi konda Temeneno Yesus Kristus nabalakaatiyo Utus sasaibino. Komai Hormat, Paulus