2 PETRUS

¹ Utus-utus mo tutuu mangangga buno kami! Yesus Kristus, doiyamo Mian Bisa tukon Tomundo Pasalamat kita, moolakene kita mangangga doi Yana, sabab Yana lakukene komo kana. Suratia moluwedoi Simon Petrus, meeng peleleani tukon Yesus Kristus Narasul. ² Boliisi ko Mian Bisa nabeena balakaat tukon namonondokan doikoo tukon lobi-lobian, sabab komuyu tingoniiyo ko Mian Bisa tukon Yesus, nda Temeneno. ³ Mian Bisa lapamo pakeyo kona kuasa tuuk beekene doi kita sasaibino kolobo mo pinalaluu tuuk tuboan bakaleda. Yana lakukene naiya loloiyo oila konda tinoi tentang Yesus Kristus, mo lapamo uange kita tuuk lasakanggene kona kinabasalan tukon yana namonondokan. ⁴ Tukon do kokubaidoo doiya ko Mian Bisa lebesenggene doi kita kobalakaat-balakaat mo akiyo kona bunoan tukon ano koanggano mo lapamo dandikene. Tukon balakaat-balakaatoo komuyu moola tosodii luwedoi momooton molokis mo lusake nadunia nia, tukon komuyu talimayo koilah nasipat. ⁵ Tobikon doiya, kakaate tutuuno sulano komuyu tataap mangangga doi Kristus tukon domu manaanggaanoo sinuungi tuboan monondok. Sangalaasan tuboan monondok komuyu palaluu teali mian moano kona motoiyan, ⁶ tukon sangalaasan komotoiyan, komuyu sio koidan sio kuasaiyo kobutomuyu. Tukon sangalaasan doi kuasaiyomo kobutonggita siokai koidan popialayo kobutomuyu sulano pomoola sasalaane sasaibino kolobo. Doi sangalaasan komoolaan sasalaane sasaibino kolobo, komuyu sio koidan potubo tulutiyo ko Mian Bisa namongiasan. ⁷ Tukon tubo tulutiyo ko Mian Bisa namongiasan sio koidan inosukupi tukon poseangan doi utus-utus momeeng komanganggaan. Tukon koikoidan siokai komuseang doi utus-utus momeeng komanganggaan nasinuungi tukon seang motuuk doi sasaibino komian. ⁸ Sasaibino doiya daano kai lenggang-lenggang komuyu mo palaluuwo. Kalu do lenggang-lenggangoo daano doikoo tukon lobi-lobian, komuyu naikon teali molole tukon daano kona hasil, tukon tingoniiyo Yesus Kristus nda Temeneno tukon lobian monondok koidan. ⁹ Bai mian mo aki namototooli do lenggang-lenggangoo, kona pikilan modipot; yana aki namoola mokita tukon yana tomilinggene baikon kona lalim-lalim mo malumbito lapamo kinumesi. ¹⁰ Sabab doiya, Utus-utus, kakaate tuuno sulano ko Mian Bisa naponguang tukon napolilik doi butomudoo teali pololokon moonggol. Kalu komuyu lakukene doiya, komuyu naikon aki pootinggale ko Mian Bisa. ¹¹ Tukon buno doiya komuyu naikon binee haak tuuno tuuk usok doi Batomundoan mo akiyo kona pupusan moluwedoi Temeneno tukon Yesus Kristus nda Tomundo Pasalamat. ¹² Tobikon doiya, yaku sidutu ingotiikene komuyu kolangge mobinantil kaliangano, mau kai molapamo toiyo tukon mangangga tuuno doi Mian Bisa naotunggul mo lapamo komuyu tarimayo. ¹³ Kalu daano yaku motubo, yaku lasayo palaluu moingotiikene komuyu naikon do langge-langgedoo mobinantil. ¹⁴ Sabab yaku toiyo baikon aki namalumbit koidan yaku naikon tinggalemo nadunia nia, sabab nda Temeneno Yesus Kristus lapamo popitoikene tukon talaang doi yaku. ¹⁵ Maka yaku naikon kakaate sulano kalu yaku matemo, komuyu sidutu neneeke koidan nalangge-langge nia. ¹⁶ Doi tempo kami popitoikenemo doikoo bulaa kona babasalan konalubatan nda Temeneno Yesus Kristus, kami aki mamaangga salita-salita moaki nabisa banggapi napangakakon. Kristus nakinabasalanoo lapamo kami kitayo tukon matanggami. ¹⁷ Kami daano imbali salataa Yana inodotii tukon inakabasal doi Tama Mian Bisa. Doi tempodoo tololongol koalalo moluwedoi Mo Mahamulia, mo bantil doi Yana, "Naiyamo daku Pau sineang. Yana sanaanggene konoanggu!" ¹⁸ Kami lengele susuunggami do lalodoo molubat luwedoi surgaa salataa kami daano polaing Yana doi bunggul moliyousoo bunggono. ¹⁹ Doiyamo kosababpo kami koidan lobian mangangga naikon ko Mian Bisa nateteba nabi-nabi mo pelenggene. Kona monondokan komuyu palahatikanggene do tetebadoo, sabab do tetebadoo buno posi mo talaang doi lipu mokalipookan, polong doi pana nasumbotan, mandala alani komodoa panano doi noamuyu lalomo. ²⁰ Kona tutuuwan siokai komuyu neneeke naiya: Mian Bisa nateteba nabi-nabi napinolonggon aki namoola pinikikon mololoi ndapalaat susuunggita. ²¹ Sabab, aki nabiasa koteteba moluwedoi Mian Bisa pinolonggon tongo luwe banggapi namongiasan. Bai ko Mian Bisa Na Roh kuasaiyo komian sulano napelenggene koteteba moluwedoi Mian Bisa susuungo.

¹ Doi tempodoo molapa doi antara Mian Bisa namian sumboto konabi-nabi mokala. Bunomo koidan doi antara ikoo naikon sumbot koguru-guru mokala. Yanila naikon mongusokon otunggul-otunggul mo aki nabisa mo silakakene komian. Tukon yanila naikon sangkale ko Ponguasa mo lapamo sodiiyo yanila. Tukon buno doiya yanila lubatene kona silakaan doi butongo susuungo, naikon mo tepake yanila tukon mosobit. ² Mau nabuno doiya, madaang komian naikon momoloingi do kokubaidoo tuboan guru-guru mokaladoo mo kinuasai luwe noanoila napisuu. Tukon do guru-gurudoo nakokubai naikon kubaiyo badaang komian mototulaiyo ko Loloon Mobisa mo polong doi Mian Bisa. ³ Sabab yanila modoko, maka guru-guru mokaladoo naikon basalitakene doikoo kosalita-salita yanila mo kalange susuungo sulano namalaat untung moluwedoi komuyu. Bai kopangadilan tuuk otuwenge koukum doi yanila malumbito kona sinadiakonan, tukon nasinakisaawan mo lapamo tinantukon tuuk yanila modaano totiiliyo yanila. ⁴ Malaekat-malaekat mo baladosa kai ko Mian Bisa aki nasodiikene tongosobii doi ukuman, bai sinakukon doi neraka lalomo. Yanila inusokon doi motombing lalomo mo kalipookan tuuk tinaan idoo polong doi Pangadilan Oloyono. ⁵ Bunomo koidan tukon dunia doi loolukoo, ko Mian Bisa aki nasodiikene tongosodii luwedoi ukuman. Ko Mian Bisa lubatene kolomba mobabasal doi dunia komian badaang mo lokis doi tempodoo. Tolongo Nuh polong tukon pitu komian bailonggon komo sinalamaton, sabab Nuh pelenggene bilita kaliangano tuboan mo konoiyo ko Mian Bisa noano. ⁶ Pokakana koidan kohallo tukon kota Sodom tukon Gomora: ko Mian Bisa manase do kota-kotadoo tukon aung sulano teali sontoh kaliangano oila naikon komo teali tukon mian badaang mo lokis. ⁷ Bai Lot sinalamaton, sabab yana tulutiyo ko Mian Bisa namongiasan; yana mandarita tuuno sabab kokokubai mo aki napokokonoi luwedoi mian badaang molokis. ⁸ Doi mian badaang tanga-tangano mobuno doiya Lot mo monondokoo tubo tukon noano sinakisaa, samba kooloyo yana kitayo tukon ndongoliiyo yanila nakokubai-kokubai mo lokis. ⁹ Jadi, Temeneno toiyo bulaando kosalamatanano mian badaang mo loingiyo kona mongiasan kalu yanila masasalaan sobaan-sobaan. Tukon Temeneno toiyo bulaando komangabosan mian badaang mo lokis sulano nasinakisaa doi Pangadilan Oloyono, ¹⁰ tongo mian badaang mo loingiyo yanila noano naminoo-mooton mo manggilit tukon mo totulaiyo ko Mian Bisa nakakuasaan. Bunomo doiya kona baranian tukon nabanggaalan guru-guru mokala-kaladoo tobikon yanila aki namata-matakut mototulaiyo komalaekat-malaekat mo kinabasal doi surgaadoo! ¹¹ Baimo kai malaekat-malaekat mo lobian odoon kona bukuanan tukon mobalakuasa doi guru-guru mokala-kaladoo, aki natuduwe sasaibino komahluk domo babasaloo tukon bantilan-bantilan pototulai doi Temeneno salaano. ¹² Bai doi guru-gurudoo, todudulo tuuno! Yanila buno iyayon mo sinuung sulano nailako tukon inakate. Yanila aki napikikene, bai tongo tindokiiyo tulutiyo konoano, namongiasan tolong sampe yanila tantange kolangge-langge mo aki mamangalatikene tukon bantilan-bantilan totulai. Sabab doiya luwedoi napo kokubai-kokubai susuungo, yanila naikon silaka buno iyayon-iyayon mobarani. ¹³ Salaku ukuman doi nasakisaawan mo lapamo yanila tealikene, yanila naikon susa doi sakisaawan. Doi yanila, langge mo sanaanggene konoano doiyamo mokubaiyo oila tolong doi tempo oloyo sulano naakambule kobutongoila naminooton. Kalu yanila osulang polaing-laing komuyu doi lamean kaanan lalomo, yanila nasikap tinoluwekon sabab yanila malangu tukon noano napisuu. ¹⁴ Yanila aki napuas-puas kubaiyo kolalim, tukon yanila nainiyas doiyamo kitayo koboine balolowa. Tukon mian mo sodo mangangga tukon moakiyoon tuuno namangangga, yanila pangaluiyo. Konoaila pomanaanggono tukon komodokoan. Yanila daano kai mian-mian mo kinutuk! ¹⁵ Sabab yanila aki nayase mololoi loloon mo moloyos, maka yanila tapa. Yanila mangala loloon molinoloi luwe Bileam Beol napau looluk. Bileam nia yase tuuno malaat doy luwedoi nakokubai mo lokis. ¹⁶ Bai yana malaat poingotii tuuno motuuk doi nakulokisanoo, doi tempo kona keledai nabasilinganan tukon banggapi alalo. Maka do nabidoo pinakisaa sulano naatadeo konakokubai mo tindodoo. ¹⁷ Do guru-gurudoo mokala daano kai pokakana kopaisu matano mo motuul tukon buno antong mombuul makansang mo puule. Ko Mian Bisa lapamo sadiayo doi yanila meeng kolipu mo kalipookan tuuno. ¹⁸ Yanila kubaiyo kona pangakuan-pangakuan mo monondok tukon akiyo kotakoso komomootan babalolowaan yanila pakeyo sulano naotuwenge ko mian-mian mo sodo tolong tambunan tongosodii moluwedoi pototongian komian mo tubo tapa. ¹⁹ Guru-guru mokaladoo dondiikene komaladekaan doi mian-mianoo, bai kai yanila susuungo kinubai ata luwedoi kabiasaan-kabiasaan mo lusake kobanggapi. Sabab kalu mian mokinala doi meeng kolangge, maka yana ata moluwedoi mo kalayodoo. ²⁰ Mian mo tingoniiyo ko Temeneno tukon Pasalamaton kita Yesus Kristus lapamo tosobii luwedoi kuasa-kuasa dunia mo kulokisanggene kobanggapi. Bai kalu doibundu yana kositak koidan sampe do kuasa-kuasadoo nakalayo, maka mianoo nandondoong doibundu lobian kulokis doi tumbeno. ²¹ Lobian kona monondok do mian-mianoo mobuno doiya aki nabiasa tingoniiyo kololoon mokana moluwedoi Mian Bisa, baino kai doi yanila mo tingoniiyomo, bai doibundu aki nayase mololoi koparenta-parenta Mian Bisa mo beekene doi yanila. ²² Oila konapo linakukanggon bukutiikanggene kona tutuuwan nasosombotia, "Asu naikon kaane koidan oila komo lapamo toluwekene," tukon "Babung mo lapamo sinau, naikon abali banggolinggon doi lapetak lalomo."

¹ Utus-utusonggu mo sineang! Naiyamo daku surat koluano doikoo. Doi suratnia koluano lalomo, yaku kakaate osumbete kopikiran-pikiran mo bilisii doikoo. ² Yaku pelenggene sulano komuyu neneeke naikon kobantilan-bantilan looluk Mian Bisa nanabi-nabi nabinantiloo, tukon naikon palenta moluwedoi Temeneno, Tomundo Pasalamat, mo pinolonggon doikoo lolo doi rasul-rasul. ³ Tumbe-tumbeno, komuyu sio potoiyo baikon doi oloyo-oloyo napupusan, naikon sumbut komian badaang kona tuboan kinuasai tukon noano napisuu yanila susuungo. Yanila naikon sosiboliiyo komuyu ⁴ tukon bantil buno naiya, "Temeneno nabantilan moperjanji naikon lubat! Budodoiya inaando yana? Tama-tamanggita looluk lapamo mate, bai sasaibino daano pokakana kai buno looluk doi dunia napinasitakaan!" ⁵ Yanila sangadaiyo aki nayase mangakukene baikon loolukoo Mian Bisa pasitakayo kotimbu tukon buta tongo nabantilan. Dunia tealikene luwedoi paisu, tukon paisu; ⁶ tukon paisu koidan -- doiyamo paisu moluwedoi lomba babasal -- dunia loolukoo minanaso. ⁷ Bai timbu tukon buta mo daano budodoiya nia, do Mian Bisadoo nabantilanoo komo pialayo koidan sulano inakabus tukon aung. Budodoiya kotimbu tukon buta daano piniala polong doi oloyo ko mian-mian mo lokis nainukuman tukon nasilakaan. ⁸ Bai utus-utusonggu, meeng kolangge nia inaikai potomilinggene: baikon doi Temeneno napokita, meeng kooloyo aki naposasala tukon soloon kotaun -- kolua-lua nia doi Yana pokakana. ⁹ Temeneno aki natalambat mobeekene oila komo lapamo Najanjikene mau nadaano komo aanggene buno doiya. Kabalino, Yana sabal doikoo, sabab Yana aki nayase meeng komian mosilaka. Yana yase sulano sasaibino komian nabadodoloon doi nalalim-lalim. ¹⁰ Bai Temeneno nalubatan Oloyono naikon lubat buno pondikuk. Doi Oloyodoo timbu naikon lapus tukon lalo mobabasal, tukon lobo-lobo doi timbu naikon kabus tosua, tukon buta sasaibino mo daano doi lalomoo naikon lapus. ¹¹ Sabab sasaibinodoo naikon minanas tukon kokubai mo buno doiya, bulaando kai kona tealian komuyu tubo? Komuyu sio potubo moliyous tukon tongo tuuk doi Mian Bisa. ¹² Namalumbitan kopo totiiliyano tukon poloongganano ko Mian Bisa na Oloyo lubatan. Doi Oloyodoo kotimbu naikon kabus tosua tukon sabab namoonasan, maka kolobo-lobo doi timbu naikon eemo. ¹³ Bai kita mototiili oila mo lapamo Mian Bisa dandiikene, doiyamo timbu mo boolu tukon buta mo boolu, idoo talaat kona adilan. ¹⁴ Sabab doiya, Utus-utus mo sineang, daano komuyu mototiili do Oloyodoo, kakaate tutuu sulano tubo moliyous tukon akiyo kososiboliino doi Mian Bisa salaano. Tukon pialayo kopotaamian mo monondok tukon Mian Bisa. ¹⁵ Poanggene ko Temeneno nasabalan doi kita salaku todanan yana mo beekene doikoo sulano mumoola salamat. Paulus, nda utus mo sineang, lapamo tulise buno naiya koidan doikoo. Yanila tulise doiya tukon Mian Bisa napandoiyan bineekon doi yana. ¹⁶ Doi sasaibino kona surat lalomo, Paulus sidutu tulise kaliangano langgedoo. Takainomo daano kobubula kolangge mo maaling namalaat doi nasurat-suratoo lalomo. Tukon obosoo doiya pinaisobolikon doi mian badaang mo aki motoi oioila tukon mo aki namoonggol kona manganggaan. Langgedoo aki nainelanggon sabab obos-obosoo bailon moluwedoi Kitab Moliyous yanila lakukanggonoo bunomo doiya koidan. Oila konapo ilakukanggonoo tongo tealikene yanila susuungo silaka. ¹⁷ Bai komuyu, Utus-utus mo sineang, lapamo toiyo kaliangano langgedoo. Sabab doiya, pobadagai, kai inai napolong komuyu takaikanggi doi mian-mian molokis natapa-tapaan sampe komuyu otuwong doi lipu pobatudangan mo moonggol. ¹⁸ Siokai po pololokon lasakanggene Yesus Kristus namaasi, Temeneno tukon nda Tomundo Pasalamat, tukon siokai komuyu koidan pololokon tingoniiyo Yana. Tanggaalo kai Yana, budodoiya tukon polong sidutu-posidutukon! Amin. Komai Hormat, Petrus