1 TESALONIKA

¹ Utus-utus jemaat doi Tesalonika, mo tealimo Mian Bisa Tama namian tukon Temeneno Yesus Kristus: Kami, doiyamo Paulus, Silas tukon Timotius moinikene boliisi ko Mian Bisa nabeena balakaat tukon namonondokan doi komuyu. ² - ³ Kami sidutu bakinatauwan doi Mian Bisa sabab Utus sasaibino. Momeenggon mai sambeang doi Mian Bisa tukon Tamanggita, kami sidutu tandayo komuyu. Kami momeenggon sambeanggene komuyu. Kami neneeke bulaando komuyu potudoikanano kopokokubai baikon komuyu mangangga doi Kristus, bulaando komuyu koposeangano komian bailon tobikon komuyu leleaniyo yanila, tukon bulaando kopomoinian tukon moonggolan doi nda Temeneno Yesus Kristus. ⁴ Kami toiyo, Utus-utus, baikon ko Mian Bisa seseange komuyu tukon lapamo lilike komuyu tealikene namian mo tangalaas. ⁵ Sabab kami pelenggene Bilita Monondok doikoo bolikon tolongo bantilan-bantilan balang, bai koidan tukon kuasa tukon Mian Bisa Na Roh. Tukon kami anggayo tuuno naikon kona bisaan ko Bilita Momonondok. Komuyu toiyo bulaando komai tuboan motuuk doi mukeperluan doi tempodoo kami modaano pototongi komuyu. ⁶ Komuyu loloiyo komai kokubai tukon Temeneno nakokubai. Maukai bai posakisaa tuuno, komuyu potalimayo tukon laba-laba dobilitadoo kami babotilanggene doikoo. Do laba-labaanoo Mian Bisa Na Roh komo beekene. ⁷ Tukon doiya komuyu teali contoh doi sasaibino ko Salani miano mo daano doi Makedonia tukon doi Akhaya. ⁸ Sabab tambuun doi komuyu, kaliangano dobilitadoo tentang Temeneno lapamo tololongol doi Makedonia tukon doi Akhaya. Tukon aki nabaino doiya koidan; bai dobilitadoo tentang bulaando kopomanganggaan doi Mian Bisa lapamo tololongol doi yayaa, tobikon kami akimo napalaluu koidan momabantil oioila. ⁹ Sasaibino do mianoo basalitakene tentang bulaando komuyu kopotalimaano kami salataa kami loolukon lubat doikoo. Yanila basilingan tentang bulaando komuyu kopotinggalano kobapilogotan tukon lubat doi meeng ko Mian Bisa mo tubo sulano nda mangangga doi Yana. ¹⁰ Yanila koidan basilingan bulaando kokaliangano komuyu moinikene ko Mian Bisa Napau nalubatan doi surgaa, doiyamo Yesus, mo lapamo Mian Bisa otuboiyo doi matean. Yesus doiyamo komo salamatene kita doi Mian Bisa naukuman naikon molubat.

¹ Utus-utus! Komuyu toiyo baikon komai lubotiiyano komuyu aki napalasuma. ² Komuyu toiyo baikon kami akiyoon mai lubat doikoo doi Tesalonika, kami lapamo sinakisaa tukon tinotulai doi Filipi. Bai mau nabadaang komian molawane kami, konda Mian Bisa lapamo beena baranian doi kami sulano mai pelenggene doikoo Ko Bilita Monondok moluwedoi Yana. ³ Komai tobiano ikoo bolikon meeng kolobo nasalaan; koidan bolikon tukon makisuut mo aki namonondok kabai bakokolian. ⁴ Aki! Kami aki mai basilingan tuuk mokindendeke komian noano, bai tuuk nasanaangan ko Mian Bisa noano, mo ujiyo konoanggami. Sabab kami Mian Bisa akuiyo moolamo pelenggene do Bilitadoo Monondok. ⁵ Komuyu susuumuyu toiyo baikon kami aki natolongo mai silingan komo maamis kabai abuiyo komuyu sulano natosookon kobapilogotan. Mian Bisa komo teali sakisii! ⁶ Kami koidan aki mai kakaate sulano mai malaat panggaal doi mian -- bai doi komuyu kabai doi mian bailon. Kona bisaan buno meeng korasul Kristus, kami moolakai mai umbale meeng kolobo doi komuyu. ⁷ Bai kondondoonggami tolongo bamuyuk-muyuk kalu kami daanoon mopototongi tukon komuyu, pokakana meeng kopau tinano mopialayo kona pau-pau. ⁸ Sabab tukon mai seang maasi, kami basadia mobeekene doikoo bolikon tolongo do Bilita Monondokoo mo luwedoi Mian Bisa, bai maukai mai tuboan koidan. Sabab kami seseange tuuno komuyu! ⁹ Tantu komuyu daano moneneeke bulaando komai motikasan mokakaate tukon kokobukuan. Oloyo maka popook kami balimang sulano kami naaki nakubaiyo susa doi meeng komian koidan doi komuyudoo doi mai babulitakanano do Bilitadoo Monondok mo luwedoi Mian Bisa tuuk doikoo. ¹⁰ Kami tubo moliyous, talakana tukon akiyo kososiboliino doi komuyudoo mo lapamo mangangga doi Kristus. Komuyumokai komai sakisii-sakisii, bunomo koidan doi Mian Bisa. ¹¹ Komuyu toiyo baikon kami kubaiyo komuyu memeeng kopau buno meeng kopau tamano mokindendeke kona pau-pau. ¹² Kami otinauwo komuyu, kami mebee dorongan doikoo tukon kami desaake komuyu sulano potubo pobabunokon doiya sulano ko Mian Bisa noano nasanaang. Sabab ko Mian Bisa lapamo uange komuyu sulano poteali Mian Bisa namian doi Dunia mo Boolu tukon potoupiyo kona babasalan. ¹³ Daano koidan komeeng kolangge bailon mo kubaiyo kami sidutu pelenggene kinatauwan doi Mian Bisa. Langgedoo doiyamo, baikon salataa mai polongganano kobilita moluwedoi Mian Bisa tuuk doikoo, komuyu lengele tukon talimayo bilitadoo bolikon buno bilita moluwedoi banggapi, bai buno bilita mo bisa-bisa moluwedoi Mian Bisa. Yanamo komo balimang doi butomuyu mo mangangga doi Kristus. ¹⁴ Utus-utus, kolangge komuyu mo toupiyo lapamo koidan Mian Bisa naanggota-anggota jemaat doi Yudea toupiyo mo tealimo Yesus Kristus namian. Komuyu toupiyo kosakisaa moluwedoi pobangsa, bunomo lakon ko Mian Bisa naanggota-anggota jemaat doi Yudeadoo natinoupidoo luwedoi Yahudi miano. ¹⁵ Dopai mian-mianoo komo akateyo Yesus tukon nabi-nabi, tukon sakisaayo kami. Yanila musuwo komian sasaibino, tukon ko Mian Bisa aki nasanaanggene tuuno doi yanila. ¹⁶ Tukon yanila ala-alangiyo kami mopelenggene kobilita doi bangsa-bangsa mobolikon Yahudi miano bilita mo moola salamatene dopai bangsa-bangsadoo. Kalu buno doiya dopai Yahudidoo miano suungiyo momeenggon kona pai lalim sulano napolong koaito. Tukon budodoiya kona pupusan yaniladoo laate ko Mian Bisa naukuman! ¹⁷ Bai Utus-utus, salataa kami pobabandakon tolongo aki namalumbit doi komuyu -- pobabandakon doi matanggita bai konoanggita aki -- kami pololokon neneeke ikoo tukon kakaate tutuuno nda pososuung koidan! ¹⁸ Komai tetel sio mai ampakon lubotiiyo komuyu; tukon yaku, lapamo soba-sobayo idan lua luunggon, bai ko Ibiliis alangiyo kami. ¹⁹ Bisa tuuno komuyumo komai moinian tukon komai labaan. Sabab kalu naikon Temeneno Yesus lubat, tukon kita mangadap, maka komuyumo naikon komo teali mai banggaalan! ²⁰ Takainomo komuyumokai komo teali mai banggaalan tukon mai labaan!

¹ Doibundu komai poloonan akimo mai moola taane koidan. Tobikon doiya kami bapikir kona monondokan, tadukai kuinotinggal susuunggu doi Athena, ² tukon kami daano bintekene koutusonggita Timotius. Yana meeng ko Mian Bisa napeleleani mo balimang pomeenggon kami doi babilitakanano ko Bilita Monondok tentang Kristus. Kami bintekene Timotius doikoo sulano yana naekeenggele komuyu tukon naderenge komuyu sulano napololokon moonggol kopomanganggaan doi Kristus. ³ Tukon kalu buno doiya akiyo komeeng komian doi komuyudoo komo mundur sabab doi nda sakisaa nia. Komuyu susuumuyu toiyo baikon do sakisaadoo tongusokon doi Mian Bisa natetel motuuk doi kita. ⁴ Doi tempodoo kami modaano polaing komuyu, kami lapamo pailukene doikoo loolukonoo baikon kita naikon malaat sakisaa. Tukon doiya takainomo bisa-bisa motealimo; komuyu susuumuyu toiyomo. ⁵ Doiyamo kosababpo yaku bintekene Timotius, sabab yaku yase koidan toiyo bulaando kona tobinggatan kopomanganggaan doi Kristus. Yaku sasaakiyo ko Ibiliis nggoola oluliyo komuyu maka sasaibino komai pakadakan teali akiyo kolabano. ⁶ Budodoiya Timotius lapamo abali tukon lapamo pelenggene doi kami kobilita laba-labaan tentang bulaando kopomanganggaan doi Kristus tukon koposeangan. Yana pailukene doi kami baikon komuyu sidutu daano kopokenang-kenangan mo monondok doi kami motangabos doi noamu. Tukon komuyu yase pososuung tukon kami, pokakana buno kamidoo yase pososuung tukon komuyu. ⁷ Doiyamo kosababpo, Utus-utus, doi susaan tukon sakisaa lalomo, kami moola terhibur tentang dosalitadoo doi komuyu. Kopomanganggaan doi Kristus akabasale konoanggami, ⁸ tobikon budodoiya kami rasakanggene kotuboan mobisa-bisa, tongo komuyu tataap kokondong kokoonggol, pomeenggon tukon Temeneno. ⁹ Bulaando kona babasalan komai kinatauwan doi Mian Bisa doi sasaibino kolaba-labaan kami mo toupiyo doi salaano sabab komuyu. ¹⁰ Oloyo popook kami kabiyo doi Yana tukon tootubo konoanggami, sulano kami moola pososuung tukon komuyu sulano mai osukupiyo oilamo kopopinalaluu motuuk manganggaan doi Kristus tentang kona bisaan. ¹¹ Boliisi lakon ko Mian Bisa Tamanggita susuungo, tukon nda Temeneno Yesus nakeseayo kololoon doi kami sulano mai pososuung tukon komuyu! ¹² Boliisi ko Temeneno nakubaiyo komuyu pololokon pomamaasikon meeng tukon bailon tukon popololokon mamaasikene sasaibino komian, sulano doposeangoo nasosuungi, pokakana buno komai seang doi komuyu. ¹³ Tukon buno doiya ko Temeneno naikon ekeenggele konoamu, sulano komuyu moliyous tukon akiyo kososibolii doi Mian Bisa Tamanggita salaano, doi tempodoo nda Temeneno Yesus Nalubatan polaing sasaibino komian mo teali Namian.

¹ Kona pupusan Utus-utus, kami lapamo beena popiala doi komuyu tentang bulaando kopokubaiyano kopotuboan sulano nasanaanggene ko Mian Bisa noano. Takainomo komuyu lapamo tubo buno doiya. Bai budodoiya luwedoi Temeneno Yesus nakuasa, kami kabiyo tuuno doikoo tukon desaake sulano komuyu pokakaate nalobian koidan doi langgedoo! ² Sabab komuyu toiyomo kootunggul-otunggul kami mobeekene doi komuyu luwedoi Temeneno Yesus nakuasa. ³ Naiyamo ko Mian Bisa namongiasan: Sulano komuyu kopotuboan tolongo tuuk doi Yana, potubo moliyous, podedeenggene sasaibino kokokubai molokis. ⁴ Memeeng komalane doi komuyudoo sio natoiyo bulaando kotuboan pomeenggon koboloki tukon kokubai mo sanaanggene ko Mian Bisa noano tukon banggapi. ⁵ Inai potubo loingiyo konoamuyu naminooton doi poboloki, pokakana komian badaang nakokubai mo aki natingoniiyo ko Mian Bisa. ⁶ Lobodoo mobuno doiya, inaikai komeeng komian mokubai sala doi utuso, kabai mookoliiyo. Looluk kami lapamo mebee poingotii tuuno doikoo, baikon ko Temeneno naikon ukume komian badaang mo kubaiyo kokasalahan-kasalahan mobuno doiya. ⁷ Mian Bisa uange kita, bolikon sulano nda tubo balolowa, bai sulano kita tubo tukon kokubai mo sanaanggene konoa-No. ⁸ Mian mo akikene naotunggul nia, bolikonkai akikene kobanggapi, bai akikene ko Mian Bisa mo beekene kona Roh moliyous doikoo. ⁹ Akimo napalaluu koidan kami batulis doikoo bulaando tentang kopoposeangan koutus-utus mo pomeenggon manganggaan. Komuyu susuumuyu lapamo Mian Bisa otunggule sulano poposeang. ¹⁰ Tukon nalobo nia lapamo komuyu tudoikene doi sasaibino koutus mopomeenggon manganggaan doi posaapon ko Makedonia. Bai, Utus-utus, kami kabiyo tutuuno, sulano komu tuboan teali lobian kona monondokan koidan. ¹¹ Pokakaate potubo tukon tanaang tukon inai momongusiki mian bailon naporsoalan. Siokai pobalimang pomounggolii onggos susuumuyu, bunomo lakon kami loolukonoo lapamo parentakene doikoo. ¹² Kalu komuyu tubo buno doiya, komuyu aki pomoini doi indee komiano koidan, tukon komian badaang mo aki namangangga doi Kristus, naikon odotiiyo komuyu. ¹³ Utus-utus, kami yase sulano komuyu potoiyo kona bisaan tentang doi mian badaang mo lapamo mate; sulano komuyu naaki nasusa konoamuyu buno badaang komian bailon mo akiyo kona moinian. ¹⁴ Kita anggayo baikon Yesus lapamo mate tukon abalimo tubo. Doiyamo kosababpo kita anggayo koidan baikon ko Mian Bisa naikon abali otuboiyo sasaibino komian mo anggayo Yesus tukon lapamo mate, sulano yanila tubo polaing Yana. ¹⁵ Kokaliangano langgedoo, naiyamo ko Temeneno naotunggul doi kami moyase pelenggene doikoo: Doi tempodoo Yesus nalubatan, kita mo daano tubo aki naikon nda matailukiyo komian badaang mo lapamo mate doi loolukonoo. ¹⁶ Sio malaekat mobabasal naikon bantilo tukon alalo mo babasal tukon ko Mian Bisa napopuukon pinuuko pokakana komeeng kotanda. Maka Yesus susuungo naikon obulus luwedoi surgaa, tukon Salani miano badaang mo lapamo mate naikon inotuboi loolukon. ¹⁷ Lapa doiya, kita mo daano tubo doiya tempodoo naikon polaing-laing biningkat tukon yanila doi bunom lalomo sulano pososuung tukon Temeneno doi dapang. Maka kita naikon podungoli ko Temeneno posidutukon. ¹⁸ Tobikon doiya, siokai komuyu pokoonggoli noa tukon popakeyo nabantilan-bantilan nia.

¹ Utus-utus, aki napalaluu kami batulis doikoo oila kotempono mo pokokonoi doiya langge-langgedoo naikon natealian. ² Sabab komuyu susuumuyu toiyomo tukon tentang baikon Ko Oloyo Temenenodoo nalubatan naikon molubat pokakana kopondikuk lubat doi popook tangano. ³ Kalu daano komian mobantile, "Sasaibino aman tukon monondok," maka doiyamo kotempono sosinggot yanila naikon malaat silakaan, tukon akiyo komeeng komian momoola luput. Doiya langgedoo naikon teali sosinggoton, pokakana koperasaan sakit mosuungan mo laate meeng koboine naikon mo mosuung. ⁴ Bai komuyu bolikono mian mo tubo doi kalipookan lalomo, tobikon do oloyodoo komuyu gilakene pokakana kopondikuk nalubatan. ⁵ Utus sasaibino daano mian mo tubo doi madialan lalomo; komuyu tongusokon doi oloyo mo madialan. Kita bolikon mian mo tubo doi kalipookan lalomo, kabai mo tongusokon doi popook mo kalipookan. ⁶ Tobikon doiya aki namoola kita momoolo pokakana komian bailon. Kita sio nda badagai tukon konda pikilan sio namadialan. ⁷ Doi popook oloyono komian moolo, tukon doi popook oloyono koidan komian teali malangu. ⁸ Bai kita nia mian badaang mo tongusokon doi oloyo mo madialan; sabab doiya konda pikilan sio namadialan. Kita sio nda tataap mangangga doi Temeneno tukon seseange komian badaang bailon tukon moinikene tuuno baikon ko Mian Bisa salamatene kita. Doiyamo konda tompide mo dupele kita doi nda polobosian molawane kokalipookan. ⁹ Mian Bisa lilike kita bolikon sulano nda inukum, bai sulano nda sinalamaton lolo doi nda Temeneno Yesus Kristus. ¹⁰ Yana mate tuuk kita sulano doi tempo Yana nalubatan koidan -- kai kita daano motubo, kai kita matemo -- kita tubo polaing Yana. ¹¹ Tobikon doiya, siokai komuyu tataap podudunggon tukon pookonggoli, buno pokakana komo daano komuyu mokubaiyo budodoiya nia. ¹² Utus-utus, kami kabiyo tukon tutuu sulano komuyu pohargaiyo komian badaang mo balimang doi komuyudoo; doiyamo yanila mo lapamo Temeneno lilike sulano nakatuaiyo tukon otinauwo komuyu. ¹³ Pokubaiyo yanila tukon poodotiiyo tukon pokilakene sabab neneeke oila komo lapamo yanila kubaiyo. Potubo memeeng tukon monondok. ¹⁴ Kami kabiyo koidan, Utus-utus, liekene tukon monondok komian mo aki nayase balimang; pokeenggele komian noano mo matakut; potomboniiyo komian mo palaluu tinombonii tukon posabar doi sasaibino komian. ¹⁵ Dagaiyo inai nadaano komian mo balese kokulokisan tukon kulokisan. Pokakaate sidutu sulano pokubaiyo komonondokan meeng komian doi meeng komian bailon tukon doi sasaibino komian. ¹⁶ Siokai komuyu momeenggon polaba-laba, ¹⁷ tukon posambeang momeenggon. ¹⁸ Doi sasaibino kondondoong lalomo siokai komuyu pobasukuur, sabab doiyamo ko Mian Bisa nainiyas doi komuyu buno mian mo tubo pomeenggon tukon Kristus Yesus. ¹⁹ Inai motudange ko Mian Bisa Na Roh. ²⁰ Inai moaanggene gampang kobilita-bilita mo bineekon luwe Mian Bisa Na Roh. ²¹ Sasaibino kolobo sio nainuji, tukon komo monondok sio nalinoingi. ²² Dedeenggene sasaibino kokaliangano kokokubai molokis. ²³ Boliisi ko Mian Bisa susuungo komo beekene kita komonondokan, tealikene komuyu mian mo bisa-bisa tubo tongo doi Mian Bisa. Boliisi ko Mian Bisa nadagaiyo kobutomu kokabuson mau roh, jiwa mau kai butomu, polong aki nadaano kona lokisan kalu kotempono konda Temeneno Yesus Kristus lubat koidan. ²⁴ Mian Bisa, mo lapamo uange komuyu, naikon kubaiyo do langgedoo sabab Yana setia. ²⁵ Posambeanggene kami, Utus-utus! ²⁶ Popokila-kilakon sasaibino doi namonondokan buno utus Salani. ²⁷ Mangatas Temeneno nakuasa, yaku kabiyo tukon tutuu sulano po babakene nasuratia doi sasaibino koutus mo pomeenggon manganggaan. ²⁸ Boliisi konda Temeneno Yesus Kristus nabalakaatiyo komuyu. Komai Hormat, Paulus