1 PETRUS

1 PETRUS

¹ - ² Utus-utus Mian Bisa namian ililik, mo sasabul doi balausalaan doi kabupaten Pontus, Galatia, Kapadokia, Asia, tukon Bitinia! Yaku, Petrus, Yesus Kristus Narasul, moinikene bilisi ko Mian Bisa beena balakaat tukon namonondokan doikoo tukon lobi-lobian. Komuyu ililik teali Mian Bisa namian pololoi tukon Mian Bisa Tama natetel. Tukon Mian Bisa Na Roh lapamo tealikene komuyu mian mo moliyous, tangalaas tuuk doi Mian Bisa, sulano komuyu taat doi Yesus Kristus tukon pokinoliyousi luwedoi sauno. ³ Maimo nda basukuur doi Mian Bisa, Temeneno Tamanggita Yesus Kristus! Yana seange tuuno kita doiyamo kosababpo Yana beekene doi kita kotuboan mo boolu, tukon otuboiyo koidan Yesus Kristus luwedoi namatean. Naiya beena kita moinian mo moonggol. ⁴ Kita moini sulano kita malaat balakaat-balakaat Mian Bisa mo sadiayo tuuk doi namian, doiyamo balakaat-balakaat mo inabos doi surgaa, sulano aki moola manas, kai teali boowan kai mbules. ⁵ Sasaibinodoo daano tuuk doikoo, sabab komuyu mangangga doi Mian Bisa. Maka komuyu dinagai tukon Mian Bisa nakuasa sulano komuyu mantalima kasalamatan mo sadiamo inokitakon doi loonu napupusan naikon. ⁶ Sabab doiya siokai sanaang konoamu, mau kai nabudodoiya tolongo soisik kosambu bai komiu sio nateali susa sabab komiu toupio bubula kaliangano kopalasobaan. ⁷ Kona makisuut doiyamo tuuk okitakene oila komuyu tutuu mangangga doi Temeneno kai aki. Mosoni mo moola manas, inuji tukon aung. Jadi kopoomanganggaan daano lobian koanggano doi mosoni, jadi sio nainuji koidan sulano nateali moonggol. Tukon buno doiya komuyu naikon ngginaal tukon inodotii kabai kinatandak doi oloyo Yesus Kristus nalubatan koidan. ⁸ Komuyu seseange, mau kai looluk komuyu aki pokitayo. Tukon komuyu mangangga doi Yana mau kai Yana budodoo komuyu akipo kitayo. Doiyamo kosababpo komuyu laba, tukon lasayo kona sanaangan mo babasal tukon aki namoola natabantil. ⁹ Sabab mumanganggaan namakisuut laatemo, doiyamo butomu nakasalamatan. ¹⁰ Naiyamo sasaibino konabi mo telitiyo tukon selidikiyo kokasalamatan, tukon yanila pikikene kobalakaat Mian Bisa mo beekene doi komuyu. ¹¹ Yanila selidikiyo bulaa kai tukon oila kotempono langgedoo naikon natealian, Kristus Na Roh mo makasuutio mo daano doi butongoila. Doi tempodoo kona Roh babotilanggene doi yanila sakisaawan-sakisaawan kaliangano mosio Kristus toupiyo tukon kaliangano kona nakabasalan naikon mo tuundu nalapa doiya. ¹² Doi nabi-nabidoo ko Mian Bisa babilitakene baikon oila komo yanila lakukene bolikon tuuk yanila nakepentingan, bai tuuk ikoo; doiyamo langge-langge diabudodoonia komuyu molengele tukon tontong doi sasaibino komo babayo ko Bilita Yesus Kristus kaliangano. Yanila pelenggene langge-langgedoo doikoo tukon Mian Bisa Na Roh nakuasa mo kapatuwo doi surgaa. Tutuu koidan malaekat-malaekatoo yase koidan mongotoi bilita yanila mo babilitakenedoo. ¹³ Tobikon doiya, siokai komuyu basa-basadia. Badagai tukon moinikene tuuno kobalakaat naikon mo bineekon doikoo doi tempo Yesus Kristus naikon nalubatan. ¹⁴ Taatkai doi Mian Bisa, tukon kai potubo loingiyo komu minomooton loolukonoo, doi tempo komuyu akiyoon potingoniiyo ko Mian Bisa. ¹⁵ Kobalino, siokai po moliyous doi sasaibino kolangge lalomo komuyu mokubaiyo, pokakana buno ko Mian Bisa mo uange komuyudoo moliyous. ¹⁶ Doi Kitab Moliyous lalomo totulis, "Siokai komuyu moliyous, sabab Yaku moliyous." ¹⁷ Komuyu bantile do Mian Bisadoo Tama doi tempo posambeangan doi Yana. Jadi, ko Mian Bisa doiyamo komo hakimiyo kobanggapi pokokonoikene tukon memeeng nakokubai aki nalilike. Sabab doiya kalu komuyu daano nai dunia nia, siokai pokabasale ko Mian Bisa doi mutuboan lalomo. ¹⁸ Komuyu toiyo oila komo lapamo binabeakon potongosodiiyan luwedoi tuboan mo akiyo kotakoso mo tininggoliikon doi tumbumu. Kopebealo bolikon meeng kolangge mo moola manas buno perak kai mosoni, ¹⁹ bai meeng kolobo mo daano tuuno koolino; doiyamo Kristus butongo susuungo, mo teali buno domba mo sinosubakon doi Mian Bisa akiyo seselo kai sosiboliino. ²⁰ Kristus Mian Bisa lilike akiyoon nadunia nia napinasitaka. Tukon doi oloyo-oloyo naloolanimo kolounu napupusan nia, Yana lubat doi dunia sulano posinalamaton. ²¹ Lolo doi Yana komuyu mangangga doi Mian Bisa mo lapamo otuboiyo koidan luwe nadoi matean tukon kabasale Yana. Jadi, Mian Bisa kai kopo manggaan tukon doi Mian Bisa koidan kopo mangabosan moinian. ²² Sabab komuyu taat doi otunggul moluwedoi Mian Bisa, maka komiu kumesiyo kobutomiyu tukon komuyu seseange komian badaang pokakana namanganggaan tukon sanaang. Tobikon doiya, siokai komuyu seseange meeng maka bailon tukon sasaibino konoamu. ²³ Sabab mololoi Mian Bisa nabantilan mo tubo tukon mo posidutukon, komuyu lapamo tinealikon banggapi boolu mo bolikono sinuung moluwedoi banggapi, bai luwedoi Tama mo posidutukon. ²⁴ Doi Kitab Moliyous lalomo totulis buno naiya, "Sasaibino kobanggapi buno bulung, tukon sasaibino kona kinabasalan buno bulung bungano. Bulung molooyu, kobungano koidan matandang; ²⁵ bai ko Temeneno nabantilan tataap tuuk sidutu-posidutukon." Bantilanoo Bilita Monondok mo lapamo binabotilanggon doikoo.

¹ Tobikon doiya, sakukenemo luwedoi butomu sasaibino komo lokis; inai koidan mobakala-kala tukon inai mokakaadukon. Inai masakit konoamu, tukon inai mototulaiyo komian bailon. ² Siokai komuyu teali buno pau mo sodo sinuung, sidutu moloukene naikon susu rohani mo bilisii. Tukon buno doiya komuyu naikon tubo tukon sinalamaton. ³ Doi Kitab Moliyous lalomo totulis buno naiya, "Komuyu lapamo lasakanggene susuumu bulaa kona monondokan ko Temeneno." ⁴ Tobikon doiya, lubat doi Temeneno. Yana buno batu mo tubo, batu banggapi mo sakukene sabab tinoi akiyo kotakoso; bai Mian Bisa komo lilike buno batu mo daano koanggano. ⁵ Komuyu buno batu-batu mo tubo. Tobikon doiya siokai komuyu poyase pinake tuuk kekendenge ko Mian Bisa nabonua rohani. Tukon buno doiya komuyu teali imam-imam, mo tubo tongo tuuk Mian Bisa, tukon mo loloiyo Yesus Kristus sosubakene doi Mian Bisa kososubakon rohani mo konoiyo ko Mian Bisa noano. ⁶ Tobikon doi Kitab Moliyous lalomo totulis buno naiya, "Yaku lapamo lilike meeng kobatu modaano koanggano, yaku abese doi Sion buno batu tuuno; tukon mian mo mangangga doi Yana aki naikon namanasal." ⁷ Batudoo daano koanggano tuuk komuyu mo mangangga. Bai mian badaang mo aki namangangga, tapakemo koayat-ayat Kitab Moliyous nia, "Batu mo aki napinake tukang-tukang bangunanoo tokita teali batu mo tuuno." ⁸ Tukon "Doiyamo batu mo kubaiyo komian takait, batu mo kubaiyo yanila otuwong." Yanila takait sabab yanila aki namangangga naikon ko Mian Bisa nabantilan. Bunomo kai lapamo Mian Bisa tantukanggene yanila kaliangano. ⁹ Bai komuyu daano kai bangsa mo tolilik, imam-imam mo leleaniyo kotomundo, bangsa mo moliyous, tangalaas tuuk Mian Bisa, Mian Bisa susuungo namian. Mian Bisa lilikemo komuyu tukon uange komuyu tobuat luwedoi kalipookan sulano usok doi madialan lalomo, tukon makisuut sulano komuyu popelenggene kokokubai-kokubai bilita kaliangano mo doikono langge. ¹⁰ Looluk komuyu bolikon Mian Bisa namian, bai budodoiya komuyu daano Mian Bisa namian. Looluk komuyu Mian Bisa aki naseange, bai budodoiya komuyu mantalima kona soyang. ¹¹ Utus-utus mo sinoyang! Komuyu daano kai mian molubat tukon nalausalan doi dunia nia. Tobikon doiya yaku kabiyo tuuno sulano komuyu inai motulutiyo kobanggapi noano namongiasan mo sidutu polobosi lawane kobutongo. ¹² Komu kalakuan doi antara mian mo aki natingoniiyo ko Temeneno siokai namonondok tuuno, kalu kai yanila bapitanaakene komuyu buno mian lokis, yanila sio namangakukene komu kokubai mo monondok, tobikon yanila naikon nggaale ko Mian Bisa doi oloyo nalubatan. ¹³ Lolo Temeneno, siokai komuyu tootukuiyo doi sasamba kopototooli banggapi: mau doi Tomundo mo teali ponguasa tuuno, ¹⁴ mau kai doi gubernur mo tinudo luwedoi Tomundo sulano naukume komian mo kubaiyo lokis tukon sulano naodotiiyo komian mo mokubai monondokan. ¹⁵ Sabab ko Mian Bisa yase sulano tukon mukokubai-kokubai mo monondok komuyu kukupe komian longas suungo mo basilingan. ¹⁶ Siokai komuyu tubo buno mian momaladeka, bai inaimo mopakeyo komu maladekaanoo tuuk sunggupiyo komu kulokisan, baimo kai tubo buno Mian Bisa napeleleani. ¹⁷ Anggayo kai sasaibino komian, seseange kai koutus-utusomu tulando Salani. Matakutene ko Mian Bisa, tukon odotiiyo ko Tomundo. ¹⁸ Utus-utus mo teali peleleani, tulutiyo komu tuan tukon odo-odotiiyo tuuno; bolikon tongo doi yanila mo monondok konoano tukon tombosalitaon, bai koidan doi yanila mo sidutu gonggimolon. ¹⁹ Mian Bisa naikon balakaatiyo komuyu, kalu komuyu naikon mangalatikene ko Mian Bisa namongiasan, sabal doi sakisaawan kokubai mo aki naadil. ²⁰ Sabab oilakai kona lobianan kalu komuyu sabar doi sakisaawan ukuman mo siokai po tanggunge tobikon posala? Bai kalu komuyu tukon sabar motanggunge kosakisaawan mo lupayo ikoo sabab kubaiyo komo kana, maka Mian Bisa naikon balakaatiyo ikoo. ²¹ Tuuk doiya ko Mian Bisa uange ikoo. Sabab Kristus susuungo lapamo sakisaa tuuk ikoo, tukon doiya Yana beekene doikoo meeng kosontoh, sulano komuyu tulutiyo kona ampakonan. ²² Yana aki nakubaiyo kolalim, tukon akiyo kai meeng komian molongol Yana mobakala-kala. ²³ Doi tempo natinotosian, Yana aki nabalase tukon mototosii. Doi tempo nasakisaawan, Yana aki namolobosi; Yana tongo salakanggene kona palakala doi Mian Bisa, do Hakimmo mo adil. ²⁴ Kristus susuungo tanggunge konda lalim-lalim doi butongo doi kayung sempang bunggono, sulano kita tosobii doi lalim nakakuasaan, tukon tubo tulutiyo ko Mian Bisa namongiasan. Kristus napakol-pakol komo aline komuyu. ²⁵ Loolukoo komuyu buno domba mo tapa, bai budodoiya komuyu lapamo binaba kokoidan tuuk mololoi Pototooli tukon Popiala butomu.

¹ Bunomo koidan komuyu, bolo-boloki, sio poloingiyo kopo lakai sulano kalu doi yaniladoo daano komo aki namaangga kobilita moluwedoi Mian Bisa, komu kalakuan moola kubaiyo yanila teali maangga. Tukon aki napalaluu komuyu mabantil oioila doi yanila, ² sabab yanila kitayo komu kalakuan mo molino tukon moliyous. ³ Inaikai komu monondokan tongo monondokan doi tonggulung, buno umpamano bubungayano kobuuk kai mapake maemaenan, kai bokukum mo maaling koolino. ⁴ Kobalino, siokai komu tambonganan sumbut doi noamu lalomo, lenggang mo muyuk-muyuk tukon tanaang; doiyamo kotambonganan tuuno mo ano tuuno koanggano menurut Mian Bisa napokita. ⁵ Tukon nakokubainia doi lounu looluk koboiboine baagama moini doi Mian Bisa monggitambonggene kobutongo tukon loingiyo konapo lakai. ⁶ Sarah kai bunomo doiya koidan, yana taat doi Abraham tukon bantile yana natuan. Utus budodoiya daano kai Sarah napau-pau, kalu komuyu kubaiyo kolangge-langge mo monondok tukon aki namatakut doi oilamo. ⁷ Tukon komuyu koidan, lakai-lakai, siokai potubo tukon daano komu pangalatian doi muboloki; tukon mangalatikene baikon yanila daano kai mian mo lemah. Pokubaiyo yanila tukon poodotiiyo, sabab yanila polaing-laing tukon komuyu, naikon mantarima balakaat tuboan mo tuuno moluwedoi Mian Bisa. Kubaiyomo kai naiya, sulano aki nadaano komo halangiyo komu sambeangan. ⁸ Kona kasimpulan doiyamo: siokai Utus-utus pomeenggon silingan tukon meeng kopalasaan. Siokai komuyu poseseang buno mian badaang mo motolutus. Tukon siokai komuyu poseseang tukon lenggang noa monondok. ⁹ Inai mobalase kokulokisan tukon kulokisan, kai mototosii tukon mototosii; kobalino balase tukon makabikene balakaat moluwedoi Mian Bisa. Sabab ko Mian Bisa uange komuyu tobikon sulano pomatarima balakaat doi Yana. ¹⁰ Doi Kitab Moliyous lalomo totulis buno naiya, "Mian mo yase lasakanggene kotuboan tukon yase toupiyo kooloyo-oloyo mo monondok, sio nadagaiyo kosuungo sulano aki nabasilinganggene kolangge-langge mo lokis tukon aki nabantile kolangge-langge mo kala. ¹¹ Yana sio nadedeenggene komo lokis tukon lakukene komo monondok; siokai nakakaate tutuuno sulano nalaate kopoodamean. ¹² Sabab Temeneno sidutu palahatikanggene komian badaang mo tulutiyo kona mongiasan, tukon Temeneno sidutu lengele yanila nasambeang; bai Temeneno lawane komian badaang mo kubaiyo kokulokisan." ¹³ Indee komo yase kubaiyo lokis doikoo, kalu komuyu sanaang kubaiyo komonondok? ¹⁴ Mau kai nabulandomo kopo sakisaawan sabab lakukene kolangge-langge mo monondok, komuyu utung! Inai pomatakut doi indee kai, tukon inai pomolili. ¹⁵ Bai doi noamu lalomo, siokai pobeekene doi Kristus kopongodotii mo tangalaas mo pokokonoi tukon nakadudukan salaku Temeneno. Tukon siokai posidutu basadia tuuk mebee potimbilino doi samba komian mo mansadai tentang moinian mo daano doi komuyu. ¹⁶ Bai lakukene doiya tukon muyuk-muyuk tukon odotiiyo. Tukon siokai konoamu lalomo namolino, sulano kalu komuyu loobukon sabab komuyu tubo tukon monondok buno pololaing Kristus, maka komian mo basalitadoo naikon teali mammaa susuungo. ¹⁷ Tadukai nda sakisaa sabab kubaiyo komo monondok -- kalu doiya daano kai Mian Bisa namongiasan -- maka baino sakisaawan sabab kubaiyo kolokis. ¹⁸ Sabab Kristus susuungo mate tongo idan, tuuk sidutu-posidutukon sabab banggapi nalalim -- meeng komian mo akiyo kona sala, mate tuuk mian mo sala. Kristus lakukene doiya sulano momoola babayo komuyu doi Mian Bisa. Yana inakate tongo butongo dunia, bai inotuboi koidan luwedoi butongomo rohani. ¹⁹ Doi roh ndondoongo lalomo yana taus babotilanggene kobilita moluwedoi Mian Bisa doi roh-roh mo tinalunggu: ²⁰ doiyamo naroh mian madaang mo aki nataat doi Mian Bisa doi Nuh nalounu. Doi tempodoo ko Mian Bisa mototiili tukon sabar sampe polong Nuh alapayo kona kapal. Tongo mian badaang mo daano doi kapal tolong -- sasaibino alu komian -- komo sinalamaton luwedoi lomba babasaloo. ²¹ Jadi, do motealidoo babunokon andean doi mansauan paisu salani mo budodoiyania mosalamatene komuyu. Mansauan paisu salani nia bolikon meeng kobakolobokiyan mokumesian moluwedoi sasaibino komo manggi-manggilit, baimokai mudandi doi Mian Bisa moluwedoi noano lalom mo monondok. Mansauan paisu salanidoo salamatene komuyu sabab Yesus Kristus lapamo abali tubo doi matean, ²² tukon lapamo liba doi surgaa. Budodoiya Yana balakuasa polaing tukon ko Mian Bisa tukon parentayo sasaibino komalaekat-malaekat, sasaibino koponguasa tukon sasaibino kobukuanan.

¹ Sabab Kristus lapamo sakisaa tongo butongo dunia, komuyu koidan sio kobukuanggene kobutomuyu tukon pokokubai mo pokakana doiya. Sabab komian mo sakisaa kobutongo dunia, akimo koidan nakubaiyo kolalim. ² Tobikon doiya, siokai potubo banggadudul doi dunia nia loingiyo ko Mian Bisa namongiasan, tukon bolikon loingiyo kobanggapi naminooton. ³ Doi tempo mo lapamo, komuyu malumbito tuuno kopo kubaiyano oila komian badaang nainiyas kinubai mo aki natingoniiyo ko Temeneno. Komuyu tubo aki namonondok. Komuyu tulutiyo konoamuyu napisuu, mala-malangu, lamean babasal, inum-inum tukon sosubaiyo kopilogot mominosikiton. ⁴ Budodoiya komian mo aki natingoniiyo ko Temeneno, masaingding baikon komuyu aki potubo buno yanila, molasayo kolalim akiyo kobataso. Doiyamo kosababpo yanila totulaiyo komuyu. ⁵ Bai yanila sio namebee potimbilino doi Mian Bisa mo lapamo basadia sulano naadiliyo komian mo tubo tukon mo mate. ⁶ Doiyamo kosababpo Bilita Monondok lapamo pinolonggon koidan doi mian badaang momate. Kona makisuut sulano yanila, mo lapamo inadili doi ndondoong dunia lalomo -- buno kolangge sasaibino komian naikon moinadili -- moola tubo secara rohani, loingiyo ko Mian Bisa namongiasan. ⁷ Sasaibino kolobo lolanimo kona pupusan, sabab doiya siokai komuyu kuasaiyo kobutomu tukon badagai, sulano po moola sambeang. ⁸ Lobian luwedoi sasaibino, siokai komuyu tutuu poseang meeng tukon bailon, sabab tukon koidan seang komuyu naikon basadia koidan sulano poompuni. ⁹ Siokai popotalima meeng tukon bailon doi po bonua suwe-suwele, akiyo kopengeluhan. ¹⁰ Komuyu suwe-suwele lapamo mantalima sabeat-sabeat mo posasala moluwedoi Mian Bisa. Tobikon doiya salaku komo alayo komo monondok moluwedoi Mian Bisa nasabe-sabeat, siokai po gunakanggene do kamampuanoo tuuk nda kopontingan sasaibino. ¹¹ Komian mo pelenggene kobilita, siokai napelenggene kobilita moluwedoi Mian Bisa; mian mo meleleani mian bailon, siokai leleaniyo tukon bukuanan moluwedoi Mian Bisa, sulano doi sasaibino kolangge lalomo, ko Mian Bisa moola kinabasal mololoi Yesus Kristus. Yanamo komo balakuasa tukon moola kinabasal tuuk sidutu-posidutukon. Amin. ¹² Utus-utus mo sineang! Komuyu budodoiya sakisaa tuuno sabab daano moinudi. Bai inaikai polasayo masaingding, bunomo kai daano komeeng kolangge mo bolikon lobo moteali doikoo. ¹³ Bai, siokai polasayo sanaang sabab turut sakisaa polaing-laing tukon Kristus. Maka naikon kalu ko Kristus nainakabasalan inokitakonggon, komuyu naikon labalaba. ¹⁴ Komuyu untung kalu komuyu tinotulai sabab komuyu Kristus napololaing. Doiya koalatino Roh mo babasal, doiyamo Mian Bisa Na Roh, daano doikoo. ¹⁵ Inaikai komeeng komian doi komuyu mosakisaa sabab yana mangakate, kai pondikuk, kai mian lokis, kabai sabab yana masambul mian bailon naulusan. ¹⁶ Bai kalu komuyu sakisaa sabab komuyu Salani mian, inaikai pomammaa sabab do langgedoo. Pobakinatauwan kai doi Mian Bisa, baikon komuyu babayo Kristus sambuno. ¹⁷ Laatemo kotempono ko Mian Bisa adiliyomo kodunia. Tukon ko Mian Bisa namian susuungo kai naikon komo inadili loolukon. Jadi kalu ko Mian Bisa naikon tambuun doi kita, bulaando kai naikon kona tealian tukon mian-mian mo aki namaangga doi Bilita Monondok moluwedoi Mian Bisadoo? ¹⁸ Doi Kitab Moliyous lalomo totulis buno naiya, "Kalu komian mo monondok kai sulito tuuno kona sinalamatonan, oila mo kai koidan naikon komo teali tukon mian-mian mobaladosa mo aki natingoniiyo ko Temeneno!" ¹⁹ Tobikon doiya, kalu daano komian badaang mo sakisaa sabab ko Mian Bisa namongiasan buno doiya, siokai do mianoo natubo tukon talakana tukon monggianggakene kobutongo doi Mopasitakayo yanila. Yana naikon sidutu tapaatiyo kona paladandian.

¹ Yaku makabi palahatian doi sasaibino mukatua-katua jemaat. Yaku tulise naiya salaku tulanggu katua tukon salaku mian mo lapamo sakisiiyo susuungo Kristus nasakisaawan, tukon naikon komo turut koidan kinabasal, kalu Kristus nakinabasalan inokitakon doi banggapi. Yaku kabiyo tukon tutuuno ² sulano komuyu pototooliyo nadomba nia tambuno meeng Mian Bisa mo salakanggene doikoo. Pototooliyo kai yanila tukon noa sanaang buno lakon ko Mian Bisa namongiasan, tukon inaikai natukon noa babalat. Inaikai koidan molakukene komu limang sulano mumalaat kauntungan, bai sabab komuyu tutuu yase momeleleani. ³ Inaikai motindokiiyo buno ponguasa motuuk doi yanila mo kinuasaikon doikoo, bai tealimo sontoh motuuk doi yanila. ⁴ Tukon doi tempo Pototoolidoo mo Babasal nalubatan naikon, komuyu naikon mantarima mahkota mo montootilang, mo aki naikon nambules kona montootilangan. ⁵ Bunomo koidan doiya Utus, komian motatabokon. Potaat doi mian-mian badaang mo motuwa. Utus sasaibino sio pokependeyo kobutomuyu tukon koidan meleleani tukon noa monondok. Sabab doi Kitab Moliyous lalomo totulis buno naiya, "Mian Bisa lawane komian mo batinggai, bai seseange komian mo monondok konoano." ⁶ Sabab doiya, pokependeyo kobutomuyu doi bilit ko Mian Bisa limano mo bukuan, sulano yana akatandake komuyu kalu laatemo kotempono. ⁷ Salakanggene sasaibino komu minolilikon doi Mian Bisa, sabab yana palahatikanggene ikoo. ⁸ Siokai komuyu baingotii tukon basadia! Sabab ko Ibiliis daano mumusu. Yana buno singa moampakon dombalaa doisumai tukon ngangaakon unggoliiyo kona musu. ⁹ Lawane kai yana tukon maanggaan mo moonggol, sabab komuyu toiyo baikon utus-utus tulando Salani bailon doi posaapon kodunia koidan sakisaa buno komuyu. ¹⁰ Bai salalapa komuyu sakisaa soisikeen, ko Mian Bisa susuungo naikon kubaiyo komuyu teali monondok. Yana naikon kekendenge tukon kobukuanggene komuyu tukon koonggoliyo komuyu. Sabab yana daano kai Mian Bisa mo monondok konoano tuuno, mo lapamo uange ikoo sulano moturut lasaiyo kona babasalan mo posidutukon mololo doi Kristus. ¹¹ Yanamo komo balakuasa polong sidutu-posidutukon! Amin. ¹² Daku surat mo palus nia yaku tulise doikoo tukon Silas napotombonii, yaku mo anggape meeng utus Salani mo taat. Yaku yase beena podudunggon doikoo tukon beena moonggalan komuyu baikon oila daku tinulis nia bilita mo bisa tentang Mian Bisa namaasi. Siokai pobataani momoonggol doi maasidoo. ¹³ Tula-tulando meeng kojemaat doi Babilon, koidan Mian Bisa mo lilike, kapatuwo kopongodotii doikoo; bunomo koidan dakupau Markus yaku mo seange. ¹⁴ Popoodoodotikai meeng tukon doi bailon tukon poseang tuuno buno utus Salani. Kinatauwan Temeneno beena namonondokan doi Utus sasaibino mo teali Kristus koona. Komai Hormat, Petrus