1 KORINTUS

1 KORINTUS

¹ - ³ Utus-utus Mian Bisa najemaat doi Korintus! Utus lapamo Mian Bisa uange sulano nateali namian sabab Utus Kristus Yesus namian, polaing-laing doi sasaibino komian inaando kona daanooan komo sosubaiyo konda Temeneno Yesus Kristus, doiyamo konapo Temeneno tukon nda Temeneno koidan. Yaku, Paulus, tukon utusonggita Sostenes, moinikene sulano ko Mian Bisa Tamanggita tukon nda Temeneno Yesus Kristus mebee balakaat tukon namonondokan doikoo. Yaku tulise naiya suratia buno meeng korasul Yesus Kristus, Mian Bisa susuungo mo oduduke tukon luwe koidan doi namongiasan. ⁴ Yaku sidutu bakinatauwan doi Mian Bisa kokaliangano komuyu, sabab komuyu lapamo mantalima maasi doi Mian Bisa mololo doi Kristus Yesus. ⁵ Sabab komuyu lapamo teali Kristus namian, maka komu tuboan kaasakene kolangge sasaibino. Komu motoiyan doi sasaibino kolangge atean tuuno, tukon komuyu pandoi bangotunggulkene doiya motoiyanoo. ⁶ Doiya tudoikene baikon kobilita kaliangano Kristus lapamo kai tangabos doi noamu lalomo, ⁷ tobikon komuyu akipo kakulangan mau nabaino meeng kobalakaat, samantara komuyu mototiiliyo konda Temeneno Yesus Kristus nalubatan tukon sasaibino komian kitayo. ⁸ Kristus susuungo naikon dagaiyo komuyu polong doi napupusan; sulano doi tempo yana lubat koidan, komuyu polinaat akiyo kososiboliino. ⁹ Ko Mian Bisa moola nainangga tutuuno. Yanamo ko Mian Bisa mo lapamo uange komuyu sulano poteali pomeenggon tukon na Pau, doiyamo Yesus Kristus, nda Temeneno. ¹⁰ Utus-utus! Tukon doi nda Temeneno Yesus Kristus sambuno, yaku kabiyo sulano komuyu sasaibino pomeenggon bantilan; sulano naakiyo kopoalaasan doi komuyu. Siokai komuyu pomeenggon, pomeenggon noa tukon pikiran. ¹¹ Sabab, komian badaang doi Kloe solipuan popitoikene doi yaku baikon daano koponggeelekian doi komuyu. ¹² Daku minakisuuti doiyamo baikon doi komuyu daano komo bantile, "Yaku lainge Paulus," daano koidan komo bantile, "Yaku lainge Apolos," kobailon bantile, "Yaku lainge Petrus," daano kobailon bantile, "Yaku lainge Kristus." ¹³ Bulaando Kristus motongobos-obos! Paulus aki namate sinempang motuuk doi komuyu! Komuyu aki posinau paisu salani sulano poteali Paulus napololaing-pololaing, bolikon? ¹⁴ Kinatauwan aki kusauwo paisu salani mau nabaino meeng komian doi komuyudoo, sangalaasan Krispus tukon Gayus. ¹⁵ Inai nadaano meeng komian mobantile baikon yaku lapamo sauwo paisu salani yana sulano nateali pololaing yaku. ¹⁶ (Oo, ide, Stepanus tukon napokaluarga, memang yakumo komo sauwo paisu salani yanila. Bai kobai-bailonggon, kalu kuneneeke, akiyono komian bailon yaku mo sauwo paisu salani.) ¹⁷ Kristus bintekene yaku bolikon sulano kusauwo komian, bai sulano kubabotilanggene Bilita Monondok moluwedoi Mian Bisa; tukon doiya sio kukubaiyo tukon bolikon kupandoiyan basilingan secara banggapi, sulano kokuasa molengget doi Kristus namatean doi kayung sinempang aki nabaino palasuma. ¹⁸ Sabab doi mian badaang mo ompokoniiyo kosilakaan, kobilita kaliangano Kristus namatean doi kayung sempang babunokon kala-kala. Bai doi kita Mian Bisa mo salamatene, doiya bilitadoo buno meeng ko Mian Bisa nakokubai motudoikene kona kuasa. ¹⁹ Sabab doi Kitab Moliyous lalomo, ko Mian Bisa bantile, "Kona pandoiyan mian mosaleh naikon kunggalanggabute, tukon pangalatian mian badaang kona motoiyan naikon yaku alapuse." ²⁰ Jadi, oila kona totuuk do mian badaangoo mosaleh? Oilamo kona totuuk doi yanila mo daano kona ilimuu? Oila kona totuuk komian mopandoy pikikene nadunia nia? Ko Mian Bisa lapamo tudoikene baikon nadunia nia napandoiyan akiyo kotakoso! ²¹ Sabab mau nabulaandomo kobanggapi napandoiyan, yana aki namoola tingoniiyo ko Mian Bisa kalu tolongo napandoiyan susuungo. Bai sabab ko Mian Bisa napandoiyan, maka yana salamatene komian badaang mo mangangga doi yana luwe dobilitadoo kami mo babilitakene komian doi dunia nia mo tolongo aanggene akiyo kotakoso. ²² Ko Yahudi miano palaluuwo komo minasaingdinggon buno meeng kobukutii, tukon Yunani miano palaluuwo tuuno kopandoiyan doi dunia nia. ²³ Bai kita nia tolongo babilitakene Kristus mo mate doi kayung sempang. Doiya bilitadoo singgunge ko Yahudi miano napalasaan, tukon mian badaang mobolikon Yahudi miano tolongo aanggene kala-kala. Tukon mian mobolikon Yahudi miano aanggene meeng kobodoan. ²⁴ Bai doi mian badaang mo lapamo Mian Bisa uange -- mau doi Yahudi miano mau doi mobolikon Yahudi miano -- doiya bilitadoo buno meeng ko Mian Bisa nakokubai motudoikene kona kuasa tukon napandoiyan. ²⁵ Sabab komo tokita bodo doi Mian Bisa, daano lobian kona pandoiyan doi banggapi napandoiyan; tukon komo tokita matalamuyuk doi Mian Bisa, daano lobian kona bukuanan doi banggapi nabukuanan. ²⁶ Utus-utus! Coba poneneeke bulaando kopoo tuboan salataa ko Mian Bisa nauangano komuyu. Tolongo soisik tolong doi komuyudoo komo pandoi, kabai mobalakuasa, kabai motatandak kona sambu dinudukon menurut banggapi napokita. ²⁷ Sabab takainomo ko Mian Bisa sangaja lilike komo inaanggon bodo doi dunia nia, sulano komian badaang mopandoi doi dunia nia teali mammaa. Tukon ko Mian Bisa lilike komo inanggon lemah doi dunia nia, sulano ko mian-mian mo bukuan nateali mammaa. ²⁸ Ko Mian Bisa lilike komo inaanggon pau-pauno, talalais, tukon baikon nadunia nia mo aanggene akiyo kotakoso, sulano ko Mian Bisa namanase nadunia nia nainaanggon palaluu. ²⁹ Tukon nabuno doiya akiyo komeeng komian momoola banggaalkene kobutongo doi Mian Bisa salaano. ³⁰ Tolongo Mian Bisa susuungo komo kubaiyo tobikon Utus pomeenggon tukon Kristus Yesus. Luwedoi Kristus, kita tinealikon pandoi. Tukon luwedoi Yana koidan ko Mian Bisa kubaiyo kita pokindokon tukon kobutongo, tealikene kita namian mo tangalaas, tukon bebaskanggene kita. ³¹ Jadi, bunomo komo totulis doi Kitab Moliyous lalomo, "Komian mo yase banggal-banggaal, sio nabanggaalkene doi oilamo ko Temeneno mo lapamo lakukanggene."

¹ Utus-utus! Tempodoo yaku lubat doikoo tukon babotilangganano doikoo kaliangano ko Mian Bisa natetel mo akiyoon kodunia natoiyo, yaku aki kupakeyo daku pandoiyan doi dunia kai basilingan tukon bantilan-bantilan mo monondok. ² Sabab yaku lapamo niatene baikon kalu yaku daanoon mopolaing tukon komuyu, yaku aki kumopolonggon oioila, tolongo kaliangano doi Yesus Kristus; baikon yana lapamo mate doi kayung sempang. ³ Salataa daano yaku tukon komuyu, yaku matalamuyuk tukon busak-busak matakut. ⁴ Bilita yaku mo pelenggene doikoo yaku aki kupelenggene tukon bantilan-bantilan mo babayo menurut banggapi napandoiyan. Yaku pelenggene doiya tukon cara mo bukutiikanggene baikon ko Mian Bisa Na Roh balakuasa. ⁵ Yaku kubaiyo buno doiya, sulano komu manganggaan doi Kristus aki naluwe doi banggapi napandoiyan, bai luwedoi Mian Bisa nakuasa. ⁶ Mau kai nabuno doiya, daano doi mian badaangoo kona tuboan doi rohani lapamo mono-monondok, takainomo yaku basilingan kokaliangano pandoiyan. Bai naiya pandoiyan nia bolikon pandoiyan doi dunia, kabai pamarenta-pamarenta napandoiyan doi lounu nia, kona kakuasaan molapus. ⁷ Do pandoiyanoo yaku mo lakukanggenemo doiya pandoiyan moluwedoi Mian Bisa. Do pandoiyanoo dunia aki natoiyo, bai ko Mian Bisa lapamo sadiakene komo tuuk kona monondokan doi kita akiyoon nadunia nia napinasitaka. ⁸ Akiyo komeeng doi pamarenta-pamarenta doi lounu nia komo toiyo do pandoiyanoo. Sabab kalu kai yanila toiyomo, tantu yanila akimo napo sempanggene ko Temenenodoo mo babasal. ⁹ Kobalino doiya langgedoo daano buno komo totulis doi Kitab Moliyous lalomo, "Oilamo komo aki nabiasa kinita kai banggapi moola nalengele, tukon moaki nabiasa sumbut doi banggapi napikilan, doiyamo ko Mian Bisa nasinadiakon tuuk doi mian badaang mo mamaasikene yana." ¹⁰ Bai ko Mian Bisa lapamo okitakene doi kita tukon parantaraan Na Roh. Mian Bisa Na Rohdoo solidikiyo sasaibino kolangge, polong doi Mian Bisa natetel-tetel mo sosookon tutuuno. ¹¹ Sabab komo toiyo memeeng komian noano tolongo do mianoo naroh susuungo, bolikon? Bunomo koidan ko Mian Bisa. Komo toiyo ko Mian Bisa noano tolongo Mian Bisadoo Na Roh susuungo! ¹² Tukon kita aki nabineekon koroh dunia nia, bai tolongo Roh mo luwedoi Mian Bisa, sulano kita sasaibino toiyo komo lapamo Mian Bisa beekene doi kita. ¹³ Tobikon doiya, kalu kami jelaskanggene kolangge-langge kaliangano doi Mian Bisa motuuk doi mian-mian mo daano ko Mian Bisa Na Roh, kami aki mai pelenggene tukon banggapi napandoiyan, bai tolongo luwe otunggul doi Mian Bisa Na Roh. ¹⁴ Mian mo akiyo ko Mian Bisa Na Roh, aki namoola mantalima oila do Rohdoo nainokitakon. Sabab doiya mianoo langge-langgedoo nabinantil tolongo buno meeng kokabodokan tolong. Doiya mianoo aki namoola mangalatikene, sabab doiya langge-langgedoo tolongo moola tiningonii tukon secara rohani. ¹⁵ Mian mo daano ko Mian Bisa Na Roh moola nilaiyo sasaibino kolangge, bai akiyo komeeng komian momoola nilaiyo Yana. ¹⁶ Doi Kitab Moliyous lalomo totulis, "Indee komo toiyo ko Temeneno napikiran? tukon indee komo moola otinauwo Yana?" Kitamo komo daano kopikilan mo pokakana tukon Kristus!

¹ Utus-utus, kona tutuuwan yaku aki namoola basilingan tukon komuyu pokakana tukon mian mo daano ko Mian Bisa Na Roh. Yaku tolongo moola basilingan tukon komuyu pokakana tukon komian mo daano tubo loloiyo koroh dunia namongiasan; pokakana komian mo daano pau-pau kona manganggaan doi Kristus. ² Loolukon yaku tolongo moola mebee doi komuyu pau-pau nakinaan, bolikon mian mobabasal nakinaan; sabab komuyu akiyoon namoonggol kopoo manganggaan. Bai budodoiya komuyu akiyoon namoonggol kopoo manganggaan, ³ sabab komuyu daano motubo loloiyo kobanggapi natabiat. Sabab kalu komuyu daano moabos noa tukon poliiton kotula-tulamuyu, bolikon kai doiya meeng kolangge mookitakene baikon komuyu daano motubo loingiyo kobanggapi natabiat, pokakana komian badaang mo aki natingoniiyo ko Mian Bisa? ⁴ Kalu daano komo bantile, "Kami loingiyo Paulus," tukon kobailon bantile, "Yaku loingiyo Apolos," bolikon kai doiya otudoikene baikon Utus nakalakuan buno mian badaang doi dunia? ⁵ Kona tutuuwan Apolos indee miano? Tukon indee miano Paulus? Kami tolongo Mian Bisa napeleleani-peleleani, mo lapamo andane komuyu sulano poanggayo Kristus. Kami tolongo ampakonggene kolimang Temeneno mo tugaskanggene doi kami memeeng. ⁶ Yaku sakakene tukon Apolos tiposiiyo paisu, bai Mian Bisa susuungo komo kubaiyo tubo dolanggedoo mosinakakon. ⁷ Jadi komo penting tolongo Mian Bisa, sabab yanamo komo otuboiyo. Komo sakakene tukon mo tiposiiyo paisu aki napenting; ⁸ luaila tongo pokakana. Yanila memeeng tolongo mantalima tambo doi napo pakadakan. ⁹ Kami tolongo mian badaang mo polaing-laing balimang tuuk doi Mian Bisa nalimang; tukon komuyu pokakana ko Mian Bisa naasi. Utus-utus daano buno Mian Bisa nabonua koidan. ¹⁰ Tukon pandoiyan Mian Bisa mo beekene, yaku pokakana meeng koahli mongkubai bonua lapamo yaku kubaiyo kona pandasi do bonuadoo, tukon mian bailon komo kubaiyo do bonuadoo doi pandasidoo bungkukono. Doi memeeng komian sio napalatikanggene mono-monondok bulaando kona kubaiyano do bonuadoo doi pandasidoo bungkukono. ¹¹ Sabab ko Mian Bisa susuungo lapamo abese Yesus Kristus pokakana komeeng kopandasi motuuk doi bonuadoo; akiyo kopandasi bai-bailon. ¹² Daano komo mongkubai bonua doi pandasidoo tukon mapake mosoni, daano komo mapake perak, daano komo mapake batu motambongan, daano koidan komo mapake kayung, bulung momotuul kai kayung momongula. ¹³ Doi memeeng komian nalimang naikon tokitamo kalu Yesus lubato koidan. Sabab doi oloyodoo bilat komo kubaiyo tokita doi meeng-meeng komian nalimang. Bilat komo ujio tukon komo tantukanggene kona moonggolan doi limangoo. ¹⁴ Kalu do bonuadoo moi nokokondong doi pandasidoo bungkukono taanggene kobilat nasuayo, doiya mianoo naikon mantalima tambo. ¹⁵ Bai kalu mian nalimang mosuwa, yana lugi; yana susuungo naikon salamat, bai buno mian mo lolos mololoi bilat. ¹⁶ Kai Utus toiyo baikon komuyunokon Mian Bisa Nabonua? Tukon baikon ko Mian Bisa Na Roh dungol doi komuyu? ¹⁷ Kalu daano komian mo manase ko Mian Bisa Nabonua, ko Mian Bisa naikon manase do mianoo. Sabab ko Mian Bisa Nabonua tolongo Mian Bisa tolong komo dungol, tukon komuyumo do bonuadoo. ¹⁸ Inai nadaano komeeng komian doi komuyudoo motipuwo kobutongo susuungo. Kalu daano komian doi komuyudoo molasaiyo kobutongo pandoi kalu mian doi dunia napokita, doiya mianoo sio nateali bodo, sulano yana nabisa-bisa teali pandoi. ¹⁹ Sabab komo inaanggon pandoi doi mian doi dunia nia, doiya doi Mian Bisa napambaleng mian mobodo. Doi Kitab Moliyous lalomo totulis, "Ko Mian Bisa osinggaange ko mian-mian mopandoi doi yaniladoo napandoiyan susuungo." ²⁰ Daano koidan mototulis buno naiya, "Ko Temeneno toiyo baikon komian badaang mopandoi napikilan doiya pikilan mo akiyo kona totuuk." ²¹ Tobikon doiya, inai nadaano komeeng komian mo nggaa-nggaale kobanggapi, sabab sasaibino lapamo bineekon teali mulangge: ²² Paulus, Apolos, Petrus, dunia nia, kotuboan tukon matean, naiya lounu nia kai lounu salaan do, sasaibino doiya koomu. ²³ Tukon komuyu Kristus koona, tukon Kristus Mian Bisa koona.

¹ Poakuiyo kami peleleani-peleleani Kristus, mo balatanggung jawab kobabilitakanano ko Mian Bisa natetel-tetel mo akiyoon mian doi dunia natoiyo. ² Kotumbe-tumbeno komo pinalaluu doi peleleanidoo mo buno doiya doiyamo baikon yana sio namolole doi natuan. ³ Kalu yaku aki nateali soal oila komo komuyu -- kabai indee miano -- koidan popikikene kobutonggu. Sabeakai oila daku pinikikon doi butonggu susuunggu mau doiya aki nateali soal. ⁴ Yaku aki kulasae sala doi indee kolanggeno, bai doiya bolikon bukutii baikon bisa-bisa yaku akiyo daku sala. Temeneno komo tantukene daano daku sala kai akiyo. ⁵ Sabab doiya, akiyoon nalaate kotempono, inai komuyu moso-mosobit motantukene baikon memeeng komian daano kona sala kabai akiyo. Pototiiliyomo nalaate ko Temeneno nalubatan. Yanamo komo bukayo sasaibino kolaasia-laasia mo tosookon doi kalipookan lalomo. Yanamo komo bongkale sasaibino koniat mo tangabos doi banggapi noano lalomo. Doiya kosinggatoo maka nasodo meeng-meeng komian mantalima panggaal doi Mian Bisa komo pantas yana talimayo. ⁶ Utus-utus! Komo tuuk doi mukopontingan, yaku lapamo otuuke doi Apolos tukon doi butonggu susuunggu. Kona makisuut sulano kami teali mokitaan tukon komuyu moola balajar oila koalatino kobantilanoo, "Pobataani doi palatulanoo mo daano." Tukon buno doiya akiyo komeeng komian doi komuyudoo momoola banggal-banggaalkene komeeng komian, maka totulaiyo komian bailon. ⁷ Indee kai komo tealikene Utus molobioniiyo komian bailon? Bolikon kai sasaibino kolangge Utus tongo talimayo doi Mian Bisa? Jadi, bulaando muyase banggaalkene kobutomu, mobula-bulaa oila komo daano doi Utus bolikon meeng kolangge mo bineekon? ⁸ Takainomo komuyu akimo pomapalaluu oioila koidan! Komuyu kaasamo! Komuyu tealimo tomundo! Tukon kami aki. Mondoko tuuno komuyu bisa-bisa tealimo tomundo, sulano kami namoola nda polaing-laing mobaparenta. ⁹ Sabab kalu menurut daku palaat, kami nia rasul-rasul, lapamo Mian Bisa tealikene buno banggapi namokitaan tukon doi malaekat napambaleng. Kami buno mian badaang moakiyo kotakoso mo binee ukuman mate doi mian mobadaang salaano tukon mian doi dunia tolo-toloukoniyo. ¹⁰ Sabab Kristus, kami buno mian mo longas, tukon komuyu Salani miano komo pandoi! Kami aki mai bukuan, komuyu komo bukuan! Kami tinotulai, bai komuyu ngginaa-nggaal! ¹¹ Polong doi tempo nia kami toupiyo komalaalan tukon molouwan; komai pakean baino doi butonggami; komian sakisaayo kami; kami aki mai malaat dungolan motataap; ¹² kami babuku tuuno sulano mai malaat kapalaluuwan. Kalu kami kinutuk, kami soboliyo tukon balakaat; kalu kami linokis-lokis, kami sabar; ¹³ kalu komian bantil-bantile kami lokis, kami soboliyo tukon bantilan-bantilan mo monondok. Kami aki mai lobian luwedoi lembut doi dunia nia; polong doi oloyo nia kami tataap pinokakanakon kolangge momanggilit doi dunia nia. ¹⁴ Yaku tulise naiya doikoo bolikon sulano nakubaiyo komuyu mammaa, bai yaku otunggule komuyu buno kupau-pau susuunggu. ¹⁵ Sabab yaku komo teali tamamuyu, mau kai nabuno Salani miano, komuyu songulomo koloon kopo guru. Doi potuboan buno mian badaang mo pomeenggon tukon Kristus, yaku komo teali tamamuyu, sabab yaku komo babayo ko Bilita Monondok kaliangano Kristus doi komuyu. ¹⁶ Tobikon doiya yaku kabiyo tutuuno sulano komuyu loloiyo contoh yaku. ¹⁷ Tuuk doiya yaku lapamo bintekene Timotius nalubat doikoo. Buno Kristus napololaing, yana pokakana daku pau susuunggu yaku mo seange. Yana pau mo moola inangga. Yana naikon tandaikene komuyu kaliangano kotuboan yaku mo loloiyomo sambuno lapa yaku mangangga doi Kristus, doiyamo kona cara kotuboan yaku otunggulikenemo doi memeeng kojemaat doi samba-samba kolipu. ¹⁸ Daano komoimoiya komian doi komuyudoo tealimo banggal-banggaal, sabab yanila aanggene yaku akimo kulubotiiyo ikoo. ¹⁹ Bai kalu ko Temeneno beena todanan yaku lubotiiyo koidan ikoo tukon akimo namalumbit. Sio nalaatemo doiya kotempono, yaku naikon kitayo koidan oila komo moola do mian badaang mo banggal-banggaal nakinubaidoo; aki natolongo yanila nabantilan tolong. ²⁰ Sabab kalu ko Mian Bisa palentayo memeeng komian natuboan, doiya langgedoo totingonii doi mianoo nabukuanan tubo, bolikon tolongo nabantilan-bantilan. ²¹ Jadi polilikemo oilamo kopoo iniyas tuuno! Kai komuyu yase sulano kulubat otunggule komuyu tukon tutuuno kai yaku tolongo lubat otunggule komuyu tukon mantalamuyuk tukon poseangan?

¹ Yaku lapamo mantalima lapulan baikon doi komuyudoo daanomo kokokubai-kokubai basinduwaan mo lobi-lobiano: Daano doi utusonggitadoo komo loloaiyo kona silaabo. Mian badaang mo aki natingoniiyo ko Temeneno bai yanila aki namongkubai kokubai mobuno doiya! ² Mau kai nabuno doiya, Utus daano mobanggal-banggaal. Kona balino Utus sio mususa, tukon sio Utus kaluale komian mo kubaiyo doiya langgedoo. ³ - ⁴ Doi potokitaan, yaku dodoon doi komuyu, bai doi mian noano yaku daano doi komuyu. Jadi yaku yase mokubai tindakan pokakana yaku daano polaing-laing tukon komuyu, "Tukon Yesus Kristus sambuno, yaku okitakene baikon komian mo lapamo kubaiyo kokokubai mobuno doiya kona manggilitan, sio nainukum!" Kalu komuyu pototongi poanggape baikon yaku daano doi komuyudoo, tukon koidan nda Temeneno Yesus nakuasa, ⁵ komuyu sio pobeekene doiya mianoo doi Ibiliis sulano doiya mianoo butongo nasilaka tukon buno doiya kona roh sinalamaton kalu laate kotempono ko Temeneno nalubatan koidan. ⁶ Aki namoola komuyu banggal-banggaal. Ugaate komuyu lapamo toiyo naiya pelibahasa nia, "Ragi mo soisik kubaiyo sasaibino koadonan teali tuboi!" ⁷ Sakukene loolukon doragidoo mo malumbito, doiyamo lagi lalim, sulano komuyu nateali pokakana koadonan mo boolu, bilisii luwedoi ragi lalimoo mo malumbit, tukon yaku toiyo baikon komuyu takainomo buno doiya. Sabab ko Paskah lamekanano kita sasalaanemo, sabab Kristus mo teali buno domba Paskah lapamo kinulbankanggon. ⁸ Jadi, maimo nda lamekene donda lameanoo tukon roti mo akiyo kona ragi, doiyamo roti mo andekene kona moliyousan tukon sasaibino kolangge pokonoi ko Mian Bisa noano. Inai nda lamekene do Paskahdoo tukon roti mo tasambul ragi mo malumbito, doiyamo ragi lalim tukon kulokisan. ⁹ Doi kusurat loolukonoo lalomo, yaku pailukene ikoo sulano naaki pobelgaul tukon mian motolosinduwaon. ¹⁰ Komo yaku makisuutiyo bolikon mian motolosinduwaon kabai momodoko, kabai ponipu kabai mososubaiyo kosetan mo aki natoiyo ko Mian Bisa tutuuno. Bolikon! Yaku aki kumakisuutiyo yanila; sabab kalu komuyu dodooniyo yanila, maka tantumo komuyu sio pokalual nai dunia nia. ¹¹ Daku makisuut doiyamo, baikon komuyu inai pobelgaul tukon mian mo akuiyo kobutongo Salani miano, bai do mianoo basinduwa, kabai modoko, kabai mian mososubaiyo kopilogot, kabai yase lokis-lokise komian bailon, kabai nggolonguon, kai mian mopondikukan. Osulang pokaanggon doiya mianoo inai! ¹² - ¹³ Takainomo koadiliyano komian badaang mobolikon Salani miano bolikon kuulusan. Mian Bisa susuungo komo adiliyo yanila. Bai doi muanggota-anggota jemaat, bolikon kai komuyu susuumuyu komo adiliyo yanila? Doi Kitab Moliyous lalomo totulis, "Siikayo komian molokis modaano doi komuyudoo."

¹ Bulaandokon modaano doi komuyudoo komo barani ampakon doi hakim mo aki natoiyo ko Mian Bisa, sulano nakalaakene koutusonggita mopomeenggon manganggaan, kalu yana daano kona posalakonan tukon do utusoo? Bulaando yana aki nakabiyo doi Mian Bisa namian nauluse doiya palakaladoo? ² Oilakai komuyu aki potoiyo baikon ko Mian Bisa namian moola adiliyo nadunia nia? Jadi, kalu komuyu moola adiliyo nadunia nia, kai komuyu aki naikon pomoola uluse dopalakala-palakala pangadilanoo mo akiyo koalatino? ³ Oilakai komuyu akipo toiyo baikon kita naikon adiliyo komalaekat-malaekat? Lobi-lobian koidan perkara-perkara natuboan samba-samba kooloyo! ⁴ Maka kalu sumbut koperkara-perkara mobuno doiya, kai naikon komuyu kalaakene doi mian mo akiyo kona limang doi jemaat lalomo? ⁵ Bisa-bisa tolongo mongkubai maa! Tantu doi komuyudoo daano meeng komian mo cukup kona pandoiyan momoola alapayo koulusano doi utus-utus sasaibino mo Salani miano napoliitonan! ⁶ Bai kobalino meeng ko Salani miano ampakon doi mian mobolikon Salani miano sulano nakalaakene kona perkara doi utusoo mo Salani! ⁷ Mau naaki naampakon popalakalai doi mian mobolikon Salani miano; modaano kopoliitonan doi komuyudoo doiya bunomo meeng kona salaan doi komuyu. Lobian monondok kalu komuyu kinubai aki naadil, kabai inolugi! ⁸ Bai komuyu susuumuyu komo kubaiyo komian bailon tukon aki naadil. Komuyu susungo koidan mo olugiyo mian bailon. Tukon doiya komuyu kubaiyo doi utus-utusonggita mopomeenggon manganggaan! ⁹ Komuyu kai toiyo baikon komian badaang mo aki naloingiyo ko Mian Bisa namongiasan, aki nateali Mian Bisa namian? Inai potongokolii! Mian badaang molokis kona kokubai, mian badaang mo ososubaiyo kopilogot, mo basinduwa, mo kubaiyo kokokubai mo minamaakon doi tulano malane susuwele kabai boi-boine susuwele, ¹⁰ mo pondikuk, mo modoko, nggolonguwon, mo yase lokis-lokise komian bailon, tukon mo olugiyo komian bailon -- sasaibino mian mobuno doiya aki naikon nateali Mian Bisa namian. ¹¹ Daano komoimoiya doi komuyudoo loolukonoo kona kokubai buno doiya. Bai budodoiya komuyu inokitakonggon bilisiimo doi polalim. Komuyu lapamo teali Mian Bisa namian mo tangalaas. Komuyu lapamo pokindokon koidan ko Mian Bisa, sabab komuyu anggayomo Yesus Kristus tukon sabab kuasa Roh moluwedoi nda Mian Bisa. ¹² Daano komo bantile baikon meeng-meeng komian moola kubaiyo sasaibino kolangge. Bai kalu yaku aki nasasaibino daano kogunano. Jadi mau kai nasasaibino moola kukubaiyo, bai yaku aki kupataikene kobutonggu nakinuasai mau oioilamo. ¹³ Daano koidan komo bantile baikon kokinaan tuuk doi mian tiano, tukon komian tiano dinaanokon tuuk doi kinaan. Bai kolua-luanodoo naikon Mian Bisa akiyenggene. Kobanggapi butongo aki namoola pinake mokubaiyo kolangge mo lokis, bai tolongo tuuk leleaniyo ko Temeneno. Tukon ko Temeneno pialayo do butongoo. ¹⁴ Mian Bisa lapamo otuboiyo Yesus doi namatean, bunomo koidan ko Mian Bisa naikon otuboiyo kita tukon Nakuasa. ¹⁵ Utus-utus toiyo baikon kobutomu daano anggota Kristus butongo. Jadi, moola kai kumangala komeeng koanggota Kristus butongo maka kutealikene meeng koanggota balolowa butongo? Doiya aki nateali! ¹⁶ Kabai ugaate komuyu akiyoon potoiyo baikon komian mo posombuli tukon meeng komian mobalolowa, teali pomeenggon tukon do mianoo mobalolowa! Sabab doi Kitab Moliyous lalomo totulis, "Kolua-luano teali meeng." ¹⁷ Bai komian mo pomeenggono kobutongo tukon Temeneno, ko Temeneno Na Roh tukon do mianoo naroh teali meeng. ¹⁸ Podedeenggene kokokubai-kokubai mo lokis, sabab sasaibino kolalim bailon komian mo kubaiyo, teali bolikon doi mianoo butongo. Bai komian mo mongkubai langge mo lokis, koalatino mongkubai lalim doi butongo susuungo. ¹⁹ Komuyu sio potoiyo baikon kobutomuyudoo Mian Bisa Na Roh nadungolan. Do Rohdoo dungol doi komuyu. Tukon Mian Bisa susuungo komo beekene do Rohdoo doi komuyu. Utus butongo bolikon koomu. Doiya Mian Bisa koona. ²⁰ Ko Mian Bisa lapamo oliyo komuyu tukon lapamo beale botol. Tobikon doiya, pakeyo kobutomu mono-monondok sulano ko Mian Bisa nakinabasal.

¹ Budodoiya yaku yase basilingan kokaliangano soal-soal komuyu mo bantile doi posurat lalomo. Kalu meeng komala-malane aki naosowaan, doiya monondok. ² Bai sulano naaki natogoda sulano naaki nakubaiyo kolangge-langge mo aki namoola, lobian monondok memeeng komala-malane tadukai nadaano kona boloki susuungo tukon memeeng koboine sio nadaano kona langkai susuungo. ³ Kolangkai sio nalakukanggene kona kawajiban buno meeng kolangkai doi naboloki, tukon koboloki sio nalakukanggene kona kawajiban buno meeng koboine doi nalangkai; memeeng sio nalakukene kona kawajiban doi bailon. ⁴ Koboloki aki nakuasaiyo kobutongo susuungo; komo kuasaiyo kobutongo doiyamo nalangkai. Bunomo koidan kolangkai aki nakuasaiyo kobutongo susuungo; komo kuasaiyo kobutongo doiyamo naboloki. ⁵ Inai napoalaas meeng tukon doi bailon doi babolokian tukon balangkaiyan. Moola kalu tongo soisik kotempo, asal suwe-suwele lapamo potoikon. Tukon kalu buno doiya memeeng moola sambeang tukon aki nataganggu. Bai doibundu, siokai komuyu po pokoolanikon koidan buno meeng kolangkai boloki. Kalu aki nabuno doiya, komuyu naikon loloiyo koibiliis nabudukan, sabab komuyu aki pobukuan motaane kopoo moot. ⁶ Yaku bantile naiya bolikon buno meeng kopalenta, bai meeng kootinau. ⁷ Kona tutuuwan yaku lobian yase kalu sasaibino komian teali buno yaku. Bai memeeng lapamo mantalima karunia mo tantu moluwedoi Mian Bisa. Meeng komian mantarima nakarunia nia, kobailon daano kona karuniadoo. ⁸ Doi mian badaang mo akiyoon naosowaan tukon doi boi-boine mo balu, naiya daku otinau: Lobian monondok kalu Utus tataap tubo susuumu buno yaku. ⁹ Bai kalu Utus aki mumoola taane komu moot, Utus tadukai muosowaan. Sabab lobian kona monondokan kalu Utus osowaan kalu mobaino komu moot tokumbe-kumbe. ¹⁰ Doi yanila mo lapamo osowaan, naiya daku palenta: (Kona tutuuwan bolikon yaku komo mebee naiya palenta nia, bai Temeneno.) Meeng koboine mo lapamo osowaan inai nabauntale kona langkai. ¹¹ Bai kalu yana bauntalemo, yana sio natataap aki naosowaan, kabai sulaiyo dona langkai. Tukon meeng kolangkai aki namoola bauntale kona boloki. ¹² Doi bai-bailonggon daku otinau doiyamo: -- naiya kuotinau susuunggu, bolikon Temeneno -- kalu meeng ko Salani miano mangala meeng koboine mo aki namangangga doi Kristus, tukon kona boloki yase tubo tukon yana, do mianoo aki namoola bauntale dona bolokidoo. ¹³ Tukon kalu meeng koboine Salani miano mangala langkai meeng komalane mo aki namangangga doi Kristus, tukon dona langkaidoo yase tubo tukon yana, maka do bolokidoo aki namoola bauntale dona langkaidoo. ¹⁴ Sabab dolangkaidoo mo aki namangangga minoolakon sulano nateali Mian Bisa namian sabab dona poalaanoo tukon boloki mo lapamo teali Mian Bisa namian. Bunomo koidan boloki mo aki namangangga minoolakon sulano nateali Mian Bisa namian, sabab dona poalaanoo kolangkai mo lapamo teali Mian Bisa namian. Kalu aki nabuno doiya, yanila napau-pau tantu pokakanamo komian moaki namangangga napau-pau, banggokai do pau-paudoo inaanggon buno Mian Bisa namian. ¹⁵ Bai kalu do mianoo mo aki namangangga bauntale kona boloki kai nalangkai mo Salanimo, inai mopantane yana. Doi langge nia Utus boine kabai Utus malanedoo bebas, sabab ko Mian Bisa yase sulano Utus tubo tukon monondok. ¹⁶ Sabab Utus meeng koboloki -- mo manganggamo doi Temeneno -- bulaandokon kai Utus momoola toiyo tukon tutuu baikon Utus aki namoola salamatene komu langkai? Bunomo koidan Utus meeng kolangkai Salani miano, bulaandokon kai Utus motoiyo tukon tutuu baikon Utus aki namoola salamatene komu boloki? ¹⁷ Siokai memeeng atule kona tuboan loloiyo ko Mian Bisa nalolaingano buno mo lapamo Mian Bisa tantukene doi yana singgatoo Mian Bisa nauangano sulano namangangga doi yana. Doiyamo koatulan yaku mo otunggukene doi samba-samba kojemaat. ¹⁸ Umpamano, kalu meeng komian lapamo sinunat salataa yana mantalima ponguang doi Mian Bisa, maka inai do mianoo nakakaate sulano akiyenggene do tanda-tanda sunatoo. Bunomo koidan kalu meeng komian akiyoon nasinunat salataa yana mantalima ponguang doi Mian Bisa, inai do mianoo nakabiyo nasinunat. ¹⁹ Sabab mololoi koatulan basunatan kai aki nda mololoi kolua-luanodoo akiyo koalatino oioila. Komo penting tolongo nda loloiyano kopalenta-palenta Mian Bisa. ²⁰ Siokai namemeeng komian natataap tubo doi nandondoong lalomo buno tempodoo yana namantalimaan Mian Bisa naponguang. ²¹ Kalu salataa Utus inuang, Utus daano komeeng kona ata, mau naaki Utus-utus nasusa-susa mopikikene doiya langgedoo. Bai kalu Utus naikon malaat todanan sulano teali bebas, pakeyomo doiya todananoo. ²² Sabab meeng koata mo lapamo mangangga doi Temeneno, doiya Temeneno namian mo bebas. Tukon meeng komian mobebas mo mangangga doi Temeneno, doiya Kristus napeleleani. ²³ Mian Bisa lapamo oliyo Utus tukon lapamo botol koolino. Tobikon doiya, inaikai Utus mobeekene kobutomu sulano nateali banggapi naata. ²⁴ Jadi, Utus-utus, bulaando komu ndondoong doi tempodoo inuang, siokai Utus natataap tubo buno doiya polaing tukon Mian Bisa. ²⁵ Budodoiya kokaliangano doi mian-mian mo akiyoon naosowaan. Kokaliangano doiya langgedoo, yaku aki kumantalima parenta-parenta moluwedoi Temeneno. Mau kai nabuno mian mo tongo Temeneno namaasi moola nainangga, yaku yase beena otinau. ²⁶ Nda neneeke sasaibino kosusaan naiya budodoo, yaku lasayo lobian kona monondokan kalu komian tataap loloiyo kona tuboan buno kona tuboan budodoo naiya. ²⁷ Kalu Utus daanomo komu boloki inaikai mokakaate mopobauntal tukon domo bolokidoo. Kalu Utus akiyoon muyase osowaan, tadukai naaki mumounggolii boloki. ²⁸ Bai kalu Utus osowaan, doiya bolikon lalim. Bunomo koidan kalu meeng koboine osowaan, koalatino yana aki nabaladosa. Tolongo, doi yaniladoo mo osowaano badaang kosusaan konapo sinasalaan. Tukon yaku yase Utus tongosodii doi susaan-susaanoo. ²⁹ Daku makisuut buno naiya, Utus-utus: Kita akimo nabadaang konda tempo. Atambuunemo budodoiya, doi meeng-meeng komian mo daanomo kona boloki siokai natubo adukon buno mian moakiyo kona boloki; ³⁰ mian mo kokiil, tubo adukon buno yana aki nasusa konoano; mian mo kokumbit adukon buno yana aki nalaba-laba; mian mo lapamo mongoli, adukon buno yana akiyo kona oioila; ³¹ tukon mian mo balimang doi langge-langge dunia, siokai natubo adukon buno yana aki napopusinggon doiya langge-langgedoo. Sabab akimo namalumbit naiya dunia nia, doi ndodoongo mo buno naiya, naikon lapus! ³² Yaku yase sulano Utus nabebas doi susaanoo. Komian mo akiyo kona boloki yana ettenge kona pikilan doi langge-langge kokaliangano Temeneno, sabab yana yase sanaanggene ko Temeneno. ³³ Bai komian mo daanomo kona boloki badaang kona pinikikon doi langge-langge nai dunia nia, sabab yana yase sanaanggene kona boloki noano; ³⁴ kona sabab napikilan tongobos-oboso. Meeng koboine mo akiyo kona langkai, kabai meeng kopau boineno, naikon badaang kona pinikikon langge-langge kaliangano Temeneno, sabab yana yase sulano kona jiwa tukon butongo nateali Mian Bisa namian. Bai meeng koboine mo lapamo daano kona langkai, kona pikilan ettenge doi langge-langge nai dunia nia, sabab yana yase sanaanggene kona langkai noano. ³⁵ Yaku tulise sasaibino doiya tuuk doi mumonondokan susuumu, bolikon komakisuuto linalanggon naiya tukon linalanggon doiya. Komo yaku yase tolongo sulano Utus nakubaiyo komo kana tukon mo bisa, tukon sulano Utus namoola ettenge komu pikilan doi Temeneno. ³⁶ Kalu memeeng komian lasayo aki naampakonggene komo bisa doi nabibiyan, kalu yana aki namoola taane kona moot, tukon yana yasemo poala do boinedoo, tadikenemo yana nakubaiyo oilamo kona linasa mo monondok. Yana aki nabaladosa, kalu yana poalamo. ³⁷ Bai kalu memeeng komian lapamo mongkubai kaputusan doi noano lalomo sulano naaki naosowaan tukon kona bibiyan tukon dona kaputusanoo aki napakisaayo, maka doiya nakinubaidoo monondok, asal yana kubaiyo tukon doi nasanaangan. ³⁸ Kona tutuuwan, mian mo osowaan monondok kona kokubai, tukon mian mo aki naosowaan lobian monondok kona kokubai. ³⁹ Meeng koboine mo lapamo osowaan yana tokooton doi langkai bai tolongo kalu dona langkaidoo daano motubo. Kalu kona langkai matemo, do boinedoo bebaso osowaan koidan tukon mian bailon yana mo yase; asal dona osowaananoo baasowaanan Salani. ⁴⁰ Bai yana naikon lobian untung kalu akimo naosowaan koidan. Doiya kupandapat susuungu, bai yaku lasayo baikon doi yakudoo mobantile doiya tukon kuasa Mian Bisa Na Roh.

¹ Budodoiya kaliangano kokinaan mo bineekon pokakana komeeng kososubakon doi pilogot. Takainomo bisa buno mian nabantilano, "Kita sasaibino pandoimo." Bai pandoiyan mokubaiyo komian teali banggal-bangaal, sabea kai koseang mobangune komian butongo. ² Mian mo aanggene baikon yana badaang kona tinoi, kona bisa-bisaan akiyoon natoiyo komo bisa-bisa tuuno. ³ Bai komian mo bisa-bisa seseange ko Mian Bisa, yana Mian Bisa tingoniiyo. ⁴ Kokaliangano soal kaanano kokinaan mo lapamo sinosubakon doi pilogot, kita toiyo baikon kobapilogotan balaanggene kolangge-langge mo aki nabisa-bisa tukon mo akiyo. Tukon kita toiyo koidan baikon ko Mian Bisa tolongo meeng; akiyo kobailon. ⁵ Takainomo badaang koidan komo binantil ilah tukon temeneno; mau komo daano doi timbu mau komo daano doi dunia bungkukono. ⁶ Bai doi kita, ko Mian Bisa tolongo meeng. Yana Tama mo tealikene sasaibino kolangge. Tolongo doi Yana konda tuboan. Tukon ko Temeneno tolongo meeng koidan, doiyamo Yesus Kristus. Luwedoi Yana sasaibino kolangge tinealikon, tukon sabab doi Yana maka kita malaat tuboan. ⁷ Mau kai nabuno doiya, aki nasasaibino komian toiyo doiya langgedoo. Daano komo loolukon biasa sosubaiyo kopilogot. Jadi, tobikon doiya polong doiya budodoo yanila daano molasae baikon kokinaan, mo lapamo sinosubakon doi pilogot, doiya kinaan bapilogotan. Maka kalu yanila kaane doiya kinaanoo, yanila lasaiyo baladosa; sabab yanila namanganggaanoo akiyoon namoonggol. ⁸ Kona bisaanoo doiya kinaanoo susuungo aki nakubaiyo pootamikene kita tukon Mian Bisa natealikene lobian konda pokilakonan. Kalu kita kaane doiya kinaanoo, kita aki nda malaat oioila kountungo. Koidan kalu kita aki nda kaane doiya kinaanoo mau kita aki nda lugi oioila. ⁹ Bai, pobadagai! Inai nasampe teali baikon komian bailon teali baladosa -- sabab kona manganggaan akiyoon namoonggol -- sabab Utus bebas mokubaiyo kooioilamo. ¹⁰ Daku makisuut buno naiya: Andeno Utus, komo moonggolo komu manganggaan, daano moosulang kaan doi balambeaan. Doibundu daano komeeng komian mokitayo Utus moosulang kaan doi balambeaanoo. Kalu do mianoo kona manganggaan akiyoon namoonggol, bolikon kai naapa doiya kubaiyo do mianoo baranikene kaane dokinaanoo mo lapamo bineekon doi pilogotoo? ¹¹ Tukon tobikon doiya, maka Utus namanganggaan tealikene do mianoo namanganggaan mo akiyoon namoonggol teali tapa. Banggokai Kristus mate tuuk do mianoo koidan. ¹² Tukon kalu Utus mongkubai kasalaan mobuno doiya doi utus-utus Salani miano -- doiya Utus lusake yanila namanganggaan mo daano lemah -- maka Utus baladosa doi Kristus. ¹³ Doiyamo kosababpo, kalu kokinaan mangaanikene koutusonggu baladosa maka yaku akimo kumakaan sail koidan. Sabab inai-inaikene koutusonggu baladosa sabab yaku.

¹ Bolikon kai yaku mian mobebas! Bolikon kai yaku rasul? Kai baanggon yaku akiyoon kukitayo Yesus, nda Temeneno? Kai komuyu bolikon kulimang hasilo motuuk doi Temeneno? ² Kalu komian bailon aki naakuiyo yaku meeng korasul, mau nasoisik komuyu akuiyo doiya! Sabab komu tuboan Salani miano doiya bukutii baikon yaku meeng korasul. ³ Kalu komian asalakene yaku, yaku timbiliyo buno naiya: ⁴ Kai yaku aki kuberhak mantalima kinaan tukon paisu sabab daku balimangan? ⁵ Kai yaku aki kuberhak babayo komeeng koboloki Salani miano napolaing-laing yaku doi kuampa-ampakonan, pokakana ko Temeneno Yesus utus-utuso nakinubai tukon doi rasul-rasul bailon, talalaing Petrus? ⁶ Kabai tolongo yaku tukon Barnabas komo sinumbolii moumbal kinaan? ⁷ Akiyo komeeng koanggota suludadu mo sio naokoniiyo kobutongo susuungo doi angkatan molobosidoo! Akiyo kopetani mo masakakon anggur doi nakombungoo maka naaki namakaan do angguroo hasilo doi nakombungoo! Akiyo kopototooli iyayon mo mopiala domba, maka naaki namonginum susu doi nadomba-dombadoo! ⁸ Yaku pelenggene doiya bolikon tolongo berdasarkan mo biasa doi kupengalaman samba-samba kooloyo, bai sabab doi Kitab Moliyous lalomo linoolukonggon doiya langgedoo. ⁹ Doi Musa nabuku lalomo totulis, "Kosaapi mo daano pipike kogandum sulano natoliat gandumoo batuno doi kulito, inai nasinigot kobabano." Do saapidoo kai komo Mian Bisa palatikanggene? ¹⁰ Kabai doiya komo minakisuuti tuuk kita? Takainomo doiya totulis tuuk doi kita. Sabab komian mo limange kokombung tukon mian mo bilisiiyo kona gandum takainomo yana limange tukon moinikene namantalima soobos doi balimanganoo hasilo. ¹¹ Kami lapamo basabukon kalibuang rohani doi mutuboan lalomo. Maka kalu kami mantalima balakaat-balakaat doi pobuatoo, oilakai doiya koalatino kami tuntute todudul badaang doi komuyu? ¹² Kalu komian badaang bailon daano kona haak momoinikene naiya doi komuyu, bolikon kai kami komo lobian komai haak doi yanila? Bai yaku akiyoon kugunakanggene do haakoo. Kobalino yaku yase tuuno motanggunge sasaibino kolangge kalu baino yaku mosumbetene komeeng kolangge mo sembange kobabilitakanano ko Bilita Monondok tentang Kristus. ¹³ Utus tantu toiyo baikon komian mo balimang doi Mian Bisa Nabonua lalomo yanila mantalima kinaan moluwedoi Mian Bisa Nabonua. Tukon mian badaang mo uluse kososubakon abosano, yana malaat soobos doi sosubakonoo mo sinosubakon idoo. ¹⁴ Buno koidan ko Temeneno lapamo tantukene baikon komian mo babilitakene ko Bilita Monondok doiya sio namalaat kaanan doi nababilitaanoo. ¹⁵ Mau kai naakiyoon naidan kupakeyo do haak-haakoo. Tukon yaku tulise naiya suratia bolikon kai koidan tukon makisuut sulano doiya hal-halloo nakinubaimo budodoiya doi yaku. Lobian monondok yaku mate kalu baino molapus langge mo yaku mobanggaalkenedoo. ¹⁶ Sabab, kalu doiya tolongo soal babilitakene ko Bilita Monondok moluwedoi Mian Bisa, maka yaku aki kuberhak mobanggal-banggaal, sabab ko Mian Bisa lapamo bintekene yaku sulano kukubaiyo. Silakamo yaku, kalu yaku aki kubabilitakene ko Bilita Monondokoo! ¹⁷ Umpamano yaku ampakonggene do limangoo moluwedoi kumongiasan susuunggu, maka yaku moola kumoinikene momalaat tambo. Bai yaku babilitakene do Bilitadoo mo Monondok sabab doiya pinalalu tuuno. Yaku Mian Bisa bintekenemo sulano kulimange doiya. ¹⁸ Kalu buno doiya, oila daku tambo? Naiya kotambono: baikon yaku moola babilitakene ko Bilita Monondokoo aki kutonggungikene doi meeng komian sulano natamboyo yaku, sabab yaku aki kutuntute daku haak-haak buno meeng kopopolonggon Bilita Monondok. ¹⁹ Yaku nia bolikon indee miano naata; yaku bebas. Mau kai nabuno doiya, yaku lapamo tealikene kobutonggu nia ata doi sasaibino komian. Yaku lakukene doiya sulano kumoola manangkanggene komian badaang tuuk doi Kristus. ²⁰ Komo doi Yahudi miano, yaku babunokon Yahudi miano sulano kumoola manangkanggene ko Yahudi miano tuuk doi Kristus. Komo doi mian-mian mo tubo mololoiyo Musa naukum, yaku babunokon buno kai mian motokooton doi ukumoo, mau kai yaku kona tutuuwan aki kutokooton doi ukumoo. Yaku kubaiyo doiya sulano kumoola kedele yanila nateali Kristus napololaing. ²¹ Komo bolikon Yahudi miano, yaku babunokonggon meeng komian mobolikon Yahudi miano, mo tubo aki naloingiyo Musa naukum. Yaku kubaiyo doiya sulano yaku moola kedele yanila nateali Kristus napololaing. Bai doiya akiyo koalatino baikon yaku aki kumolole doi Mian Bisa naparenta-parenta; bai yaku kinuasai Kristus naparenta-parenta. ²² Doi mian mo aki namoonggol kona manganggaan tanga-tangano, mau yaku kai babunokonggon buno meeng komian kona manganggaan mo aki namoonggol sulano yaku moola kedele yanila nateali pololaing Kristus. Pendeknya, yaku teali doi sambu-sambu tuuk doi sasaibino komian sulano mau nabulaando kololoono koidan bai yaku moola salamatene kosoobos doi yaniladoo. ²³ Sasaibino doiya yaku lakukene tuuk doi Bilita Monondokoo moluwedoi Mian Bisa, sulano mau yaku talalaing binalakaati. ²⁴ Utus toiyo baikon doi tandingan lalomo sasaibino komo malaing yanila obulen, bai tolongo meeng komian komo malaat tambo. Tobikon doiya poobuleng buno doiya sulano Utus malaat tambono. ²⁵ Doi meeng komian mo daano doi latihan lalomo, yana dagaiyo kobutongo doi sasaibino kolangge. Yana lakukene doiya sabab yana yase nainooni tukon inoon bunga doi namalaatan nomol, doiyamo bunga mo tolongo soisik kotempo molooyumo. Bai nai kita nia dagaiyo kobutonggita doi sasaibino kolangge sabab kita yase nda ininooni inoon bunga mo aki naikon namolooyu. ²⁶ Doiyamo kosababpo yaku obulen tukon makisuut mo tantu. Buno doi tandingan popukulan, yaku aki kubapukul sabalangan. ²⁷ Yaku latiyo kobutongo tukon kakabukuan sulano namoola yaku kuasaiyo. Yaku kubaiyo buno doiya, sabab yaku aki kuyase napolong teali baikon nasambuno yaku tobiyo komian bailon namalaing doi tandinganoo lalomo, yaku susuunggu tinolak.

¹ Utus-utus! Utus siokai muneneeke oila komo tealimo doi nda tulunanoo salataa yanila nalaingano Musa. Yanila sasaibino linolaing tukon bunom, tukon polong salamat yanila mopintosiiyo ko Tobun Memela. ² Sulano nateali Musa napololaing-pololaing, yanila sasaibino sinau doi bunom lalomo tukon doi tobunoo lalomo. ³ Yanila sasaibino makaan kinaan rohani mo pokakana, ⁴ tukon monginum paisu rohani mo pokakana. Yanila sasaibino monginum paisu doi bungkuko batu rohani mo loolainge yanila; do bungkukodoo batu doiyamo Kristus susuungo. ⁵ Mau nabuno doiya, Mian Bisa aki nasanaanggene kosoobos mobadaang doi yaniladoo, tukon doiyamo kosababpo yanila bajan-bajano tasabukon doi padang gurun. ⁶ Sasaibino doiya teali sontoh doi kita, tuuk ingotiikene doi kita sulano inai memeetene kolangge-langge mo lokis mobuno yanila. ⁷ Koidan sulano kita inai nda sosuba doi pilogot buno soobos doi yanila nakinubai. Doi Kitab Moliyous lalomo totulis, "Maka bangsadooila tambuuno kaan inum, tukon osuleng sosubaiyo kopilogot." ⁸ Kita aki namoola kubaiyo kolangge-langge mo lokis buno yaniladoo soobos nakinubai. Sabab, lua kolono tolu koloon komian doi yaniladoo komo mate doi meeng kooloyo sabab yanila kubaiyo doiya. ⁹ Kita aki namoola soba-sobayo ko Temeneno buno yanila soobos mo kubaiyo loolukonoo, tobikon yanila mate tinukuk binda moupason. ¹⁰ Kita aki namoola koidan mondommuk; pokakana komo kinubai doi yaniladoo soobos, tobikon yanila inakate Malaekat Matean. ¹¹ Sasaibino doiya langgedoo teali doi yanila sulano nateali sontoh doi mian badaang bailon. Tukon sasaibino doiya totulis koidan teali tondoon doi kita. Sabab kita tubo budodoiya doi lounu napupusan. ¹² Mian mo akuiyo kobutongo kokondong doi moonggolan, siokai nabada-nabadagai; inai nabaino yana otuwong. ¹³ Samba-samba kosobaan Utus mo toupiyo doiya daano meeng kosobaan mo biasa banggapi toupiyo. Bai ko Mian Bisa molole doi perjanjian. Yana aki nabatadikene Utus sinobai lobian doi mominoolakon. Salataa Utus malaat sobaan, yana beena loloon doikoo sulano muteali bukuan tukon sulano Utus namoola bataanggon. ¹⁴ Tobikon doiya, Utus-utus yaku mo seange, siokai komuyu pomosikitene kososubaan doi pilogot. ¹⁵ Yaku bantile doi komuyu buno mian mo pandoi. Siokai komuyu susuungo potimbongiiyo nia kubantilan nia. ¹⁶ Salataa doi nda monginuman anggur tukon mangkabi kinatauwan doi Mian Bisa, bolikonoo doiya naotudoikanano baikon kita pomeenggon tukon Kristus doi namatean lalomo? Tukon doi tempodoo nda obos-obosano koloti sulano nda kaane posinggat-singgat, bolikonodoo doiya otudoikene baikon kita pomeenggono doi Kristus butongo? ¹⁷ Sabab tolongo meeng koroti tolong, tukon kita sasaibino kaane dorotidoo mo meeng, maka naiya kita nia mo badaang buno meeng komian butongo. ¹⁸ Soba palatikanggene ko Yahudi miano. Yanila mo kaane kokinaan mo sinosubakon doi basosubakonan bungkukono, doiya mian-mianoo pomeenggon do tampatoo. ¹⁹ Oila daku minakisuuti tukon doiya? Bapilogotan kai kinaan mo sinosubakon doi pilogotoo akiyo koalatino. ²⁰ Oilamo komo sinosubakon doi tampatoo basosubakonan motuuk doi pilogot aki nasinosubakon doi Mian Bisa, bai tolongo doi ibiliis. Tukon yaku aki kuyase komuyu mopomeenggon tukon ibiliis. ²¹ Komuyu aki namoola monginum anggur doi Temeneno nagalaas tukon pososinggatene koanggur doi ibiliis koidan nagalaas. Komuyu aki namoola kaan doi Temeneno nameja, tukon koidan doi ibiliis nameja. ²² Kabai kita yase kubaiyo sulano ko Temeneno namasakit konoano? Kai kita lobian konda bukuanan tukon Temeneno? ²³ Komian nabantilan, "Kita moola nda kubaiyo oila konda iniyas." Bisa! Bai aki nasasaibino doi kita mo yase kubaiyo daano kogunano. "Kita moola kubaiyo oilamo konda iniyas" -- bai aki nasasaibinodoo kita mo yase bangune konda tuboan. ²⁴ Inaikai nadaano komeeng komian mobalajuang motolongo tuuk nakopontingan susuungo. Memeeng komian siokai nabalajuang tuuk doi mian bailon nakopontingan. ²⁵ Komuyu moola pokaane kosail oilamo komo binalukon doi labotan sail. Mau naaki posolidikiyo loolukon, mau kai nadaano kopo sasaaki doi noamuyu lalomo. ²⁶ Sabab doi Kitab Moliyous lalomo totulis, "Naiya dunia nia tukon sasaibino koantoko doiya Temeneno koona." ²⁷ Kalu komuyu kinolo kaan luwedoi meeng komian mo bolikon Salani miano, tukon kalu komuyu talimayo do pokolodoo, pokaanemo oila komo sinidokiikon doikoo. Mau naaki posolidikiyo inaando kona luwean doiya kinaanoo, sulano naakiyo kosasaaki doi noamu lalomo. ²⁸ Bai kalu daano komo bantile doikoo, "Naiya kinaan nia lapamo sinosubakon doi pilogot," inaikai mokaane doiya kinaanoo, sabab komuyu palatikanggenemo doiya mianoo nakopontingan tukon doi noamuyudoo lalomo naboti-botikan. ²⁹ Daku makisuut bolikon noamu naboti-botikan bai do mianoo noano naboti-botikan. Tantu daano komo mansadai, "Ah, bulaando daku mongiasan motolongo mian bailon noano nakokila komo popookiyo? ³⁰ Kalu yaku makaan kinaan tukon bakinatauwan doi Mian Bisa, bulaando komian mosalakene yaku mokaane do kinaanoo, sabea kai yaku lapamo bakinatauwan doi Mian Bisa?" ³¹ Oilamo Utus nakinubai -- Utus makaan kabai monginum -- kubaiyomo sasaibino doiya tuuk doi kabasalano ko Mian Bisa sambuno. ³² Mutubo babunokon doiya, sulano Utus aki mukubaiyo komian bailon teali baladosa; kai doi yaniladoo Yahudi miano kabai bolikon Yahudi miano, kabai Mian Bisa najemaat. ³³ Potubo pobabunokon yaku. Yaku kakaate mosanaanggene sasaibino komian noano doi sasaibino kolangge, akiyo komakisuut-makisuut kopontingan butongo susuungo. Daku tujuan sulano yanila sasaibino namoola sinalamaton.

¹ Pololoiyo daku lenggang, pokakana mau yaku moloingiyo Kristus nalenggang. ² Yaku nggaale komuyu sabab komuyu sidutu neneeke yaku tukon loingiyo kootunggul yaku mo beekene komuyu. ³ Bai yaku yase sulano komuyu potoiyo koidan kolangge meeng, doiyamo baikon doi memeeng komala-malane komo teali nakapala doiyamo Kristus; komo teali boloki kapalano doiyamo nalangkai, tukon komo teali Kristus nakapala doiyamo Mian Bisa. ⁴ Kalu doi memeeng komala-malane doi tempo nasambeangan kabai doi nababilitakanano kobilita moluwedoi Mian Bisa doi mian mobadaang salaano, maka namapake toik posunggup oluno, maka doiya mianoo totulaiyo Kristus. ⁵ Tukon kalu komeeng koboine doi tempo doi nasambeangan kabai doi nababilitakanano kobilita moluwedoi Mian Bisa doi mian namadaangan salaano, aki napake toik posunggup oluno, maka do boinedoo mongkubaikene maa kona langkai mo teali kapala doi butongo susuungo. Doiyamo pokakanamo do boinedoo oluno modinalulumo. ⁶ Sabab kalu meeng koboine aki nayase mapake toik posunggup oluno tadukai dona buuk nadinalulu. Bai kalu komeeng koboine kona buuk dinalulu kai ginunting, doiya meeng kopototulai doi yana. Tobikon doiya tadukai yana napake toik posunggupi oluno. ⁷ Komala-malane aki napalaluu mapake toik posunggupi oluno, sabab yana okitakene ko Mian Bisa napelibadi tukon kona kabasalan. Bai koboine tolongo okitakene komala-malane nakabasalan, ⁸ sabab komala-malane aki natinealikon luwedoi boine, bai boine komo tinealikon luwedoi mala-malane. ⁹ Mala-malane aki koidan natinealikon tolongo tuuk doi boi-boine nakapalaluuwan, bai boine tinealikon tuuk doi mala-malane nakapalaluuwan. ¹⁰ Tobikon doiya, sulano komalaekat noano nateali sanaang, meeng koboine siokai napake toik posunggupi oluno buno meeng kotanda baikon yana nalangkai komo kuasaiyo. ¹¹ Mau kai nabuno doiya doi natuboan lalomo buno Salani miano, koboine aki nakokondong susuungo tangalaas doi mala-malane, tukon koidan komala-malane aki nakokondong susuungo, tangalaas doi boi-boine. ¹² Sabab mau kai boinedoo tumbe-tumbeno tinealikon luwedoi mala-malane, bai koidan naapa kai domala-malanedoo sosuung doi boine; tukon sasaibino kolangge luwedoi Mian Bisa. ¹³ Soba Utus-utus popikikene naiya langge nia: Kai monondok meeng koboine nasambeang doi Mian Bisa doi mian namadaangan, akiyo kona posunggupi oluno? ¹⁴ Doi nda pangalaman umum, komuyu lapamo inotunggulkon baikon kalu komala-malane bulusan kona buuk, doiya meeng kolangge mo aki namonondok. ¹⁵ Bai kalu boine, kobuuk bineekon doi yana, sulano tosunggupi kooluno tukon kalu kona buuk bulusan doiya meeng kotambonganan doi yana. ¹⁶ Jadi, kalu daano komo ponggeelekikene naiya masaala nia, tolongo meeng daku binantil doiyamo baikon mau doi kita mau kai Mian Bisa naanggota jemaat bailon sasaibino, tolongo meeng kona kabiasaanoo doi jemaat lalomo; komo sangalaasan doiya akiyo. ¹⁷ Kokaliangano naiya momeeng nia, yaku aki kunggaale komuyu. Doi pototongian bakaledaan akiyo kohasilo mo monondok, tolongo mo lokis. ¹⁸ Kotumbe-tumbeno yaku lengele, baikon doi pototongian lalomo daano kosoobos komo ponggeeleki. Tukon yaku pikikene doiya bilitadoo badaang komo bisa. ¹⁹ Takainomo pantaso nasumbot kopoonggeelekiyan doi komuyu, sulano natotingonii ko Salani miano mo bisa. ²⁰ Bai doi tempo popototongian, doi komuyudoo mokubaiyo bolikon Temeneno Naperjamuan. ²¹ Sabab doi pokaananoo, komuyu suwe-suwele momangala dokinaanoo, sampe daano komo akimo nasamba, sadangkan kobailon teali malangu. ²² Bulaando mobuno doiya? Baanggon kai Utus aki nadaano komu bonua? Utus moola mukaan tukon inum idoo! Kai banggon Utus yase kulokisanggene ko Mian Bisa najemaat tukon tealikene mammaa komian momasikiin? Oilamo komo sio kubantile naikon doi komuyu? Siokai yaku nggaale komuyu? Aki! Mau nabulaandomo yaku aki kunggaale komuyu. ²³ Sabab komo yaku otunggulikene doi komuyu, doiya yaku talimayo doi Temeneno susuungo: baikon doi popookoo salataa Yesus, nda Temeneno nakinulokisanan, yana mangala roti, ²⁴ tukon salataa yana bakinatauwan doi Mian Bisa motuuk doi rotidoo, Yana bisi-bisiliyo do rotidoo tukon limano, maka Nabantile, "Naiyamo kobutonggu mo sinalakanggon tuuk doi komuyu. Pokubaiyomo naiya sulano potandayo yaku." ²⁵ Bunomo lakon salataa lapa kaan, yana mangala kogalaas anggur maka bantile, "Naiya angguria daano komeeng koperjanjian Mian Bisa mo boolu, mosinahkanggon tukon saunggu. Kalu komuyu inume naiya, pokubaiyo naiya sulano potandayo yaku." ²⁶ Takainomo dopo makaanan roti tukon pomonginuman anggur nia, komuyu babilitakene ko Temeneno namatean, polong doi nalubatan. ²⁷ Tobikon kai doiya, mian mo kaane ko Temeneno Naroti tukon inume ko Temeneno Naanggur tukon kokubai mo aki napantas, doiya mianoo baladosa doi Temeneno mo lapamo sosubakene kobutongo tukon sauno. ²⁸ Jadi, memeeng komian sio napalesayo kobutongo loolukon, maka namoola makaan dorotidoo tukon monginum doangguroo. ²⁹ Sabab kalu komian makaan roti tukon monginum anggur tukon tolongo bapiada baikon do perjamuanoo pokokonoi tukon ko Temeneno butongo, do mianoo makaan roti tukon monginum anggur tolongo malaat ukuman doi Mian Bisa doi butongo susuungo. ³⁰ Doiyamo kosababpo badaang doi komuyudoo komo masakit tukon akimo nabukuan, tukon daano koidan komo mate. ³¹ Bai kalu kita palesayo kobutonggita looluk, kita aki Mian Bisa naukume. ³² Bai kalu Mian Bisa ukume kita, yana umbale kita, sulano kita naaki nda kanakon ukuman polaing-laing naiya dunia nia. ³³ Tobikon doiya, Utus-utusonggu, kalu komuyu pototongi mokaan doi Temeneno Naperjamuan, komuyu sio popototiili. ³⁴ Kalu daano komo malaal, yana sio namakaan loolukon doi nabonua. Kalu komuyu palatikanggene naiya langge nia, kopototongian-pototongian doi pobakaledaan aki nalubatene koukuman moluwedoi Mian Bisa motuuk doi butomu susuumu. Kokaliangano langge-langge bailon, naikon yaku talangkanggene doikoo, kalu yaku lubat koidan.

¹ Budodoiya kokaliangano karunia-karunia mo bineekon moluwedoi Mian Bisa Na Roh. Doiya kaliangano yaku yase Utus-utus natoiyo komo bisa. ² Neneeke baikon salataadoo komuyu akiyoon potingoniiyo ko Temeneno, komuyu tagoda mololoiyo kopilogot mo ponga. ³ Komuyu sio potoiyo baikon komian mo linolaing Mian Bisa Na Roh aki namoola bantile, "Yesus kinutuk!" Bunomo koidan akiyo komeeng komian momoola bantile, "Yesus Temeneno!" kalu do mianoo aki nalinolaing Mian Bisa Na Roh. ⁴ Daano komoimoiya kokaliangano kokarunia moluwedoi Mian Bisa Na Roh bai sasaibino bineekon luwedoi Rohdoo mo meeng. ⁵ Daano kokaliangano kolimang motuuk leleaniyo ko Temeneno, bai ko Temenenodoo mo lineleani, Temeneno mo meeng koidan! ⁶ Daano komoimoiya kokaliangano limangano ko Temeneno nalimang, bai komo beena bukuanan doi balimanganoo doi memeeng komian doiyamo Mian Bisa mo meeng koidan. ⁷ Tuuk doi nda monondokan sasaibino, Mian Bisa Na Roh balimang doi samba komian secara memeeng. ⁸ Doi meeng komian, Rohdoo beena kasanggupan sulano nabasilingan tukon nainanggaan. Doi bailon Rohdoo mo pokakana beena kasanggupan sulano natalangkanggene kaliangano ko Mian Bisa. ⁹ Rohdoo mo meeng koidan beena doi meeng komian bailon, mosanggup tuuno sulano namangangga doi Kristus; bainokai doi bailon Rohdoo beena kuasa sulano naaline komian nasesel. ¹⁰ Doi meeng komian beena kuasa sulano nakubaiyo kolangge mominasaindinggon tukon doi mian bailon binee karunia sulano babilitakene ko Mian Bisa natetel-tetel. Doi mian bailon koidan Rohdoo beena kasanggupan sulano natoiyo posasalakene indeemo kokarunia moluwedoi Mian Bisa Na Roh tukon komo bolikon. Daano komo beena kasanggupan sulano nabasilingan tukon moisalomo kosilingan mo minasaindinggon, tukon daano koidan komo binee kasanggupan sulano natalakanggene koalatino do silingan-silinganoo. ¹¹ Sasaibino doiya Roh mo meengoo koidan komo limange; memeeng komian binee karunia mo posasala mololoi Rohdoo namongiasan. ¹² Kristus bunomo banggapi butongo; butongodoo meeng, bai daano badaang koanggotano. Sasaibino do anggotadoo, mau kai nabadaang, bai tolongo meeng kobutongo. ¹³ Bunomo koidan kita sasaibino, mau Yahudi miano mau mian mobolikon Yahudi, ata-ata mau mian badaang mobebas; kita sasaibino lapamo sinau luwedoi Rohdoo mo pokakana, sulano kita nda tinealikon pomeenggon doi Kristusoo butongo. Kita sasaibino koidan toupiyo do Rohdoo mo meeng totubo tuuno. ¹⁴ Sabab do butongoo aki natolongo meeng koanggotano bai badaang koanggotano. ¹⁵ Kalu aino bantile, "Yaku bolikon limanggu, tobikon doiya yaku aki kutongusokon doi butongoo," doiya aki nabalalatii baikon do ainodoo aki natongusokon doi butongoo. ¹⁶ Tukon kalu kotolingainggita bantile, "Sabab yaku bolikon mata, maka yaku aki kutongusokon doi butongo," doiya koidan aki nabalalatii do tolingainggitadoo aki natongusokon doi butongo. ¹⁷ Kalu ande-andeno totubo kobutonggitadoo teali mata, bulaando do butongodoo moola molongol? Kabai kalu totubo butongodoo teali tolingaino, bulaando do butongodoo nasoomanggene? ¹⁸ Kita kitayo baikon ko Mian Bisa mo abese koanggota-anggotadoo doi butongo. Memeeng inabos doi abosano menurut ko Mian Bisa namongiasan. ¹⁹ Kalu sasaibino tolongo meeng koanggotano, inaando kai komo sinombuikon butongo? ²⁰ Jadi, takainomo daano mobadaang koanggotano, bai kobutongo tolongo meeng. ²¹ Tobikon doiya, mata aki namoola bantil doi limano, "Yaku aki kupalaluuwo ikoo!" Kabai oluno bantil doi aino, "Yaku aki kupalaluuwo ikoo!" ²² Kobalino do butongodoo naanggota-anggota mo malamuyukoo, kita palaluuwo tuuno; ²³ tukon do anggota-anggotadoo kita mo aanggene akiyo kogunano, tobikon doiyamo koanggota-anggota kita mo beena lobian badaang konda anggaano. Butongo anggota-anggotano mo tokita aki namonondok, doiyamo konda pinalatikanggon tuuno. ²⁴ Kobutongo anggota-anggotano mo tokita monondok, aki napalaluu kita palatikanggene. Ko Mian Bisa lapamo susune kobutonggita buno doiya tobikon koanggota-anggota mo akiyo koanggano bineekon lobian badaang koanggano. ²⁵ Tukon buno doiya do butongodoo aki natongobos-obos; susuwele anggota palatikanggene meeng tukon bailon. ²⁶ Kalu meeng koanggota sakisaa, sasaibino do anggotadoo sakisaa; kalu meeng koanggota ngginaal, sasaibino koanggota bailon laba-laba. ²⁷ Utus sasaibino komuyu daanoon Kristus butongo tukon komuyu susuwele doiyamo koanggotano doi butongodoo. ²⁸ Bunomo lakon doiya doi jemaat lalomo, ko Mian Bisa lapamo tantukanggene kona abosano doi samba-samba komian: Tumbe-tumbe rasul; koluano, nabi-nabi, kotoluno guru-guru; maka doi yaniladoo mo mongkubai langge-langge mominasaingdinggon, doibundu yanila mo binee karunia sulano naaline komian nasesel, kabai sulano natulungiyo komian bailon, kabai sulano nakatuaiyo, kabai motuuk basilinganan tukon bula-bulaa kosilingan kaliangano mo minasaindinggon. ²⁹ Yanila bolikon sasaibino rasul, kabai nabi, kabai guru. Aki nasasaibino daano kona kuasa momongkubai langge mominasaindinggon, ³⁰ kabai sulano aline komian nasesel, kabai mobasilingan doi bula-bulaa kosilingan kaliangano silingan mo minasaindinggon, kai momoola alatikanggene do silingan-silinganoo. ³¹ Tobikon doiya, siokai komuyu pobausaha tutuuno sulano pomalaat karunia-karunia mo bisa tutuuno. Mau natundu nia yaku otudoikene doikoo kololoon mo monondok tuuno.

¹ Mau kai yaku namoola basilingan tukon bula-bulaa kobanggapi nasilingan, mau kai tukon malaekat nasilingan idanggon, bai yaku aki kumamaasikene komian bailon, maka daku bantilan-bantilanoo tolongo buno langge alalo moakiyo koalatino. ² Mau kai kupandoi mobabilitakene kobilita moluwedoi Mian Bisa, tukon mangalatikanggene sasaibino kolangge-langge mo atean, tukon toiyo sasaibino kolangge-langge tukon mangangga doi Mian Bisa tobikon moola biyele kobunggul, bai yaku aki kumamaasikene komian badaang bailon, maka yaku akiyo koalatino oioila. ³ Mau kai nasasaibino koonggumo, yaku beekene doi mian motalalais, tukon yaku beekene kobutonggu nasinua, bai yaku aki kumamaasikene komian bailon, maka doiya sasaibino akiyo kona totuuk tuuno. ⁴ Mian mo mamaasikene komian bailon, sabal tukon monondok konoano. Yana akiyo kopoliitonan, aki nabukal-bukal konoano, aki nabanggal-banggaal. ⁵ Yana aki nabatinggai, aki nakasal, yana aki napakisaayo komian bailon sulano naloingiyo kona mongiasan susuungo, aki namosobit nanggoliiton, tukon aki naabos noa. ⁶ Mian mo mamaasikene komian bailon, aki nayase kokokubai molokis, yana tolongo yase kokokubai momonondok. ⁷ Yana taanggene salaanggene sasaibino kolangge tukon yase anggayo naikon komonondok tuuno doi memeeng komian; mau doi langge mo bulaandomo kona ndondoong do mianoo modaano kona seang aki nalapus kona moinian tukon nasabalan mototiiliyo sasaibino kolangge. ⁸ Aki naidan naikon daano kotempono doiyaa komian aki napalaluu poseang-seang. Budodoo naiya daano komian mo pandoi mopelenggene kobilita moluwedoi Mian Bisa, bai sio yana naikon natade mopelenggene do bilitadoo. Budodoiya daano komo pandoi basilingan doi bubula kosilingan kaliangano mo minasaingdinggon, bai sio yana naikon natademo basilingan doi silingan-silinganoo. Budodoiya daano komian mo toiyo badaang kolangge, bai sio oila yanila natinoidoo naikon tomilinggene. ⁹ Tobikon, konda motoiyan tukon konda sanggupan mopelenggene kobilita moluwedoi Mian Bisa, akiyoon natalakana. ¹⁰ Sio naikon nalaate kotempono Mian Bisa kubaiyo sasaibino monondok, tukon domo akidoo namonondok naikon lapus. ¹¹ Salataa yaku daano pau mopoipoisik, yaku basilingan buno pau mopoipoisik, daku palasaan buno pau mopoipoisik tukon daku pikilan buno pau mopoipoisik. Budodoiya yaku babasalo, daku kalakuan doi paupaunoanoo yaku sakukenemo. ¹² Oilamo konda kinita budodoiya nia tolongo buno bayangan mo kabur doi sulumiin. Bai sio naikon nda kitayo tutuuno tukon tontong. Budodoiya yaku akiyoon kutoiyo sasaibino, bai sio kutoiyo sasaibino buno ko Mian Bisa toiyo sasaibino kokaliangano doi butonggu. ¹³ Jadi, doi tempo nia daano kotolu kolangge komo sio nda lakukanggene: mangangga, moini tukon pomamaasikon. Komo penting tuuno doi langge nia motolu doiyamo mamaasikene komian badaang bailon.

¹ Siokai komuyu pokakaate sulano pomamaasikene komian badaang bailon. Tukon koidan pokakaate sulano pomantalima karunia-karunia Mian Bisa Na Roh mo beekene, tukon komo utama tutuuno kasanggupan mopelenggene ko Mian Bisa natetel-tetel doi banggapi. ² Mian mo basilingan tukon silingan mo minasaingdinggon, doiya mianoo bolikon basilingan doi banggapi; yana basilingan doi Mian Bisa. Akiyo komian mo mangalatikene oilamo kona binantil, sabab Mian Bisa Na Roh komo tealikene yana mabantil langge-langgedoo tolongo Mian Bisa komo toiyo. ³ Kobalino mian mo pelenggene kobilita moluwedoi Mian Bisa, pelenggene doi banggapi; tuuk keenggele yanila, sulano nabeena samangat doi yanila tuuk hibule yanila. ⁴ Mian mo basilingan tukon silingan mo minasaingdinggon tolongo ekeenggele kobutongo susuungo, baimo kai komian mo pelenggene kobilita moluwedoi Mian Bisa tulungiyo kojemaat nateali maju. ⁵ Kona monondokan kalu Utus sasaibino moola basilingan tukon bubula kosilingan kaliangano mo minasaingdinggon. Bai komo mo monondok tutuuno doiyamo kalu Utus moola babilitakene ko Mian Bisa natetel-tetel. Sabab komian mo pelenggene kobilita moluwedoi Mian Bisa, lobian kona taanggaan tukon doi mian mo moola basilingan tukon bubula kosilingan mo minasaingdinggon; posasala kohallo kalu doi mian mo basilingan tukon bula-bulaa kokaliangano kosilingan mo minasaingdinggonoo bai yana moola jelaskanggene oila dona binantiloo, sulano sasaibino koanggota jemaat laate toiyo konamototuuk. ⁶ Kalu andeno yaku lubat doikoo tukon yaku basilingan tukon bubula kosilingan kaliangano mo minasaingdinggon, oila konatotuuk doiya doi komuyu? Akiyo konatotuuk mau tolongo soisik! Posasala kohallo, kalu yaku mabantil meeng kolangge moluwedoi Mian Bisa, kabai yaku jelaskanggene komeeng kolangge kaliangano doi Mian Bisa, kabai yaku mopolonggon bilita moluwedoi Mian Bisa, kai yaku bangotunggul. ⁷ Komusiik pakakaso mo akiyo kona ansaang mau nabaino soisik, buno suling tukon kasapi, kalu kona tanda-tanda aki naminaenggon tukon tontong, bulaando komian natoiyano indee laguno komo minaenggon? ⁸ Meeng kocontoh koidan: Kalu kotorompet tolongo pinuuk sabalangan, indee miano komo batotobo molobosi? ⁹ Bunomo koidan tukon mukasanggupan sulano nda basilingan tukon bula-bulaa kosilingan kaliangano mo minasaindinggon. Kalu Utus tukon do kasanggupanoo mabantil bantilan-bantilan mo aki natontong, akiyo komeeng komian mo moola mangalatikene oilamo Utus nabinantiloo. Domu bantil-bantilanoo lapus akiyo kona tinudo. ¹⁰ Doi dunia nia daano kobulaa kosilingan, bai akiyo mau nabaino meeng do silingan-silinganoo mo aki nadaano koalatino. ¹¹ Bai kalu yaku aki kumangalatikene dosilinganoo memeeng komian mobantile, maka domianoo mo pakeyo do silinganoo buno mian mososibong doi yaku; bunomo koidan yaku terhadap doi yana. ¹² Kokaliangano komuyu, yaku toiyo komuyu yase tuuno pomalaat karunia-karunia moluwedoi Mian Bisa Na Roh. Bai komo utama tuuno, sio komuyu pokakaate sulano potulungiyo kojemaat nateali maju. ¹³ Doiyamo kosababpo komian mo basilingan doi silingan mo minasaingdinggon, siokai nakabiyo doi Mian Bisa sulano yana nabinee kasanggupan sulano natalakanggene oilamo domo binantiloo. ¹⁴ Sabab kalu yaku sambeang tukon silingan mo minasaindinggon, daku roh takainomo sambeang, bai daku pikiran aki nabalimang. ¹⁵ Jadi, sio oila daku kinubai? Naiya naikon daku kinubai: Yaku sambeang tukon kuroh, bai yaku naikon sambeang koidan tukon daku pikiran. Yaku naikon manyanyi tukon daku roh, bai yaku yase manyanyi tukon daku pikiran. ¹⁶ Sabab kalu Utus bakinatauwan doi Mian Bisa tukon tolongo muroh, tukon daano komian bailon mo aki namangalatikene kosilingan mominasaindinggon mo luwedoi Mian Bisadoo Na Roh, maka doiya mianoo aki namoola bantile, "Yaku setujuiyo" doi sambeang basyukuuranoo; sabab yana aki natoiyo oilamo doi Utus nabinantiloo. ¹⁷ Mau kai domu sambeangan bakinatauwan doi Temeneno monondok tuuno, bai do sambeanganoo akiyo kona totuuk doi mianoo bailon. ¹⁸ Yaku bakinatauwan doi Mian Bisa sabab yaku susuunggu moola basilingan doi bula-bulaa kosilingan kaliangano mo minasaindinggon lobian doi Utus-utus sasaibino. ¹⁹ Mau kai doi pototongian lalomo doi sosubaiyano ko Temeneno, yaku yase tuuno momapake lima kobantilan mo moola mian mangalatikene baimo kai doi loloongo kobantilan mopinake doi silingan mo minasaingdinggon. Yaku yase tuuno komo buno doiya sulano namoola yaku mongotunggul mian. ²⁰ Utus-utus! Inai pobapikir buno labuk-labuk. Doi hal kulokisan, siokai komuyu tataap buno labuk pauno. Bai doi popikiran lalomo, siokai komuyu poteali mian mo babasalo. ²¹ Doi Kitab Moliyous lalomo totulis buno naiya, "Temeneno bantile, ’Tukon perantaraan mian badaang, mo basilingan tukon silingan mo minasaindinggon, yaku naikon basilingan doi mian nia. Doiyamo tukon perantaraan mian badaang molulubaton, yaku basilingan doi kumian; mau kai nabuno doiya, yanila aki nayase mondongolii dakubantilan.’ " ²² Jadi karunia sulano nda basilingan tukon bubula kosilingan mo minasaingdinggon doiya baino meeng kotanda doi mian mo aki namangangga, bolikon tuuk doi mian mo mangangga. Tukon kokarunia mobontiikene ko Mian Bisa natetel doi banggapi doiya meeng kotanda motuuk doi mian mo maangga, bolikon tuuk doi mian mo aki namaangga. ²³ Tobikon doiya, kalu andeno pototongian doi jemaat lalomo, sasaibino koanggota jemaat basilingan doi bula-bulaa kosilingan mo minasaingdinggon, maka nalubat komoimoiya komian doi tonggulung, kabai mian badaang mo bolikon Salani miano, tantu do mian badangoo aanggene komuyu sasaibino tandomo! ²⁴ Bai kalu Utus-utus sasaibino pelenggene kobilita moluwedoi Mian Bisa, maka nalubat komeeng komian mo bolikon Salani miano kabai mian bailon, maka dohal-halloo Utus mo babilitakene sasaibino naikon otudoikene do mianoo nalalim-lalim tukon tealikene yana sadal doi nalalim-lalimoo. ²⁵ Hal-hal mo tosookon doi noano lalomo inokitakon, tobikon yana naikon poipoisik kobutongo maka nasosubaiyo ko Mian Bisa. Yana naikon akuiyo baikon ko Mian Bisa bisa-bisa daano doi komuyudoo. ²⁶ Jadi, Utus-utus, oila koalatino sasaibino doiya? Kalu komuyu pototongi pososubaiyo ko Temeneno, daano komo manani, daano komo bangotunggul, daano komo pelenggene komeeng kolangge moluwedoi Mian Bisa, daano komo basilingan tukon silingan mo minasaindinggon, tukon daano komo jelaskanggene oila domo binantiloo. Bai sasaibino doiya sio nakinubai tukon bangotunggulan tukon doi namonondokan sasaibino. ²⁷ Kalu daano komo yase basilingan doi silingan mo minasaindinggon, siokai nalua kabai kona badaangan tolu komian tolong komo paisoboli. Tukon sio nadaano komo jelaskanggene oila do mianoo mo basilingan nabinantil. ²⁸ Kalu akiyo komo moola jelaskanggene, maka mian badaangoo mo basilingan tukon silingan mo minasaindinggon tadu nabaino aki nabiyok-biyok doi pototongianoo lalomo. Tadukai nabaino yanila bantil-bantil doi noanoila lalomo doi Mian Bisa. ²⁹ Lua kabai tolu komian komo toiyo kobilita moluwedoi Mian Bisa sio napelenggene do bilitadoo tukon kobailonggon timbo-timbongiiyo oila domo binantiloo. ³⁰ Bai kalu ande-andeno do bilitadoo moluwedoi Mian Bisa sumbot doi meeng komian bailon mo osulang doi pototongianoo, maka domianoo mo daano mobasilingan, sio natade. ³¹ Tukon cara mo buno doiya, Utus-utus sasaibino, meeng tukon meeng, moola pelenggene kobilita moluwedoi Mian Bisa; sulano sasaibino moola mantarima otunggul tukon teali mangangga momeenggon. ³² Karunia moluwedoi Roh sulano pelenggene kobilita moluwedoi Mian Bisa moola domianoo pelenggene tukon monondok do bilitadoo. ³³ Mian Bisa doiya Mian Bisa mo yase kokokubai motaatul; yana bolikon Mian Bisa mo yase kokokubai monggabut. Pokakana komo teali doi sasaibino ko Mian Bisa najemaat, ³⁴ koboine sio naaki nabiyok kalu daano kopototongian doi jemaat. Yanila aki naminoolakon basilingan. Yanila aki namoola mataani sambu; doiya pokokonoi tukon agama atulano. ³⁵ Kalu yanila yase toiyo komemeeng kolangge, yanila sio namasadaikene doi napoo langkai doi bonua. Kubaiyo mammaa tuuno kalu meeng koboine basilingan doi pototongian jemaat lalomo. ³⁶ Oilamo ko Mian Bisa nabinantil lubat doi komuyu? Kabai tolongo doikoo tolong dobantilanoo napinolonggonan? ³⁷ Kalu daano komian mo lasayo daano kona karunia sulano napelenggene kobilita moluwedoi Mian Bisa, kabai yana daano kona karunia bailon moluwedoi Mian Bisa Na Roh, do mianoo sio natoiyo baikon oila daku tinulis nia daano meeng kopalenta moluwedoi Temeneno. ³⁸ Bai kalu daano komo aki natalimayo naiya, inai popalatikanggene yana. ³⁹ Tobikon doiya, Utus-utus, pokakaate sulano popelenggene kobilita moluwedoi Mian Bisa, bai inai popantane komian mo yase basalita doi bula-bulaa kokaliangano kosilingan mo minasaindinggon. ⁴⁰ Bai sasaibino sio nakinubai tukon monondok kabai teratur.

¹ Tukon budodoiya, Utus-utus, yaku yase komuyu poneneeke koidan do Bilitadoo Monondok moluwedoi Mian Bisa yaku mo pelenggene loolukonoo doikoo. Komuyu talimayomo, tukon manganggamo doi Kristus sabab do Bilitadoo Monondok. ² Kalu komuyu bataani moonggol doi oilamodoo yaku mo pelenggenedoo maka do Bilitadoo Monondok salamatene komuyu; kasuali kalu Utus mangangga bai aki namangalatikene. ³ Oilamo daku pinolonggon doi Utus-utus doiya lapamo yaku talimayo loolukon. Komo penting buno mo totulis doi Kitab Moliyous lalomo, yaku pelenggene doikoo baikon Kristus mate sabab nda lalim-lalim; ⁴ baikon yana tinadin, bai doibundu yana inotuboi koidan doi oloyo kotoluno. Doiya koidan totulis doi Kitab Moliyous lalomo. ⁵ Yaku popitoikene koidan doikoo baikon Kristus mo inotuboidoo koidan otudoikene koidan kobutongo doi Petrus, tukon koidan doi rasul-rasul mosongulo lua. ⁶ Lapa doiya yana okitakene kobutongo koidan doi lobian lima kosakato kona pololaing sasaibino. Kona badaangan doi mian badaangdoo modaano motubo diabudodoo, tolongo moimoiya komian komo matemo. ⁷ Lapa doiya koidan Kristus okitakene kobutongo doi Yakobus tukon doibundu doi sasaibino korasul. ⁸ Doibundu tutuuno yana okitakene kobutongo doi yaku koidan -- yaku komo buno pau moakiyoon nalaate kotempono kona sinuungan! ⁹ Yaku daano komeeng ko Temeneno Narasul mo aki nainodotii. Yaku aki nateali binantil rasul, sabab lapamo yaku sakisaayo ko Mian Bisa najemaat. ¹⁰ Bai sabab Mian Bisa namaasi yaku teali pokakana naiya kutuboan nia budodoo. Tukon aki napalasuma ko Mian Bisa moompuniyo yaku. Tukon yakumo komo lobian daku balimangan doi sasaibino korasul bailonggon. Bai doiya kona bisaan bolikon kukakaatean; doiya Mian Bisa nausaha mo mamaasikene yaku, tukon mololainge yaku doi kubalimangan. ¹¹ Jadi, mau indee miano kopo mantalimaan Bilitadoo Monondok -- oilakai doiya luwedoi yaku kabai doi rasul-rasul bailonggon -- doiya aki nateali soal. Komo penting tolongo asal kami pelenggenemo do Bilitadoo mo Monondok tukon Utus anggayomo. ¹² Kalu doi kamidoo mo babilitakene doiyamo Kristus lapamo inotuboi koidan doi namatean, bulaando daano doi komuyudoo komo bantile baikon komian momate akimo nainotuboi koidan? ¹³ Kalu bisa komian momate akimo nainotuboi koidan, doiya koalatino Kristus aki nainotuboi koidan doi namatean. ¹⁴ Tukon kalu andeno Kristus aki nainotuboi doi namatean maka akiyo kona totuuk kami mopailukene kooioila tukon akiyo kona totuuk koidan komuyu momangangga, sabab dopoo manganggaanoo akiyo kona dasar oioila. ¹⁵ Lobian koidan doiya, tokita baikon kami kala-kala kaliangano Mian Bisa, sabab kami babilitakene baikon ko Mian Bisa lapamo otuboiyo koidan Kristus doi namatean, banggokai ko Mian Bisa akimo naotuboiyo yana koidan -- kalu takainomo bisa komian momate akimo nainotuboi koidan! ¹⁶ Sabab kalu komian momate akimo nainotuboi koidan, maka Kristus akimo nainotuboi doi namatean koidan. ¹⁷ Tukon kalu Kristus akimo nainotuboi koidan maka komu manganggaanoo tolongo buno monii balang; doiya koalatino komuyu daano doi lalim lalomo tukon akiyo kopoo minoinikon oioila. ¹⁸ Doiya koalatino koidan baikon ko Salani miano mo lapamo mate, koidan akiyo konapo minoinikon. ¹⁹ Kalu konda minoinikon doi Kristus tangatang doi nda tuboan doi dunia nia lalomo, maka doi sasaibino kobanggapi doi dunia nia lalomo, kitamo komo soe tuuno! ²⁰ Bai kona tokitaan Kristus lapamo inotuboi koidan doi namatean. Naiyamo kotambono baikon komian badaang mo lapamo mate naikon inotuboi koidan. ²¹ Sabab komatean usok doi dunia lalomo tukon sabab meeng komian, bunomo lakon tubo koidan doi matean bineekon doi banggapi tukon lolo doi meeng komian koidan. ²² Bunomo lakon sasaibino kobanggapi mate sabab tongusokon meeng tukon Adam, bunomo koidan sasaibino naikon inotuboi, sabab tongusokon teali meeng tukon Kristus. ²³ Bai susuwele naikon inotuboi menurut naobos: tumbe-tumbeno Kristus; doibundu totiili doi tempo yana lubat koidan, maka natuundu komian badaang naobos mo tongusokon doi Kristus namian. ²⁴ Lapa doiya maka nateali kokiamat. Doi tempodoo Kristus lungguiyamo sasaibino kopamarentaan, sasaibino kakuasaan tukon sasaibino kobukuanan; maka Yana naikon salakanggene Kona kakuasaan pokakana kotomundo, doi Mian Bisa Tamanggita. ²⁵ Kristus sio namaparenta momeenggon polong ko Mian Bisa tealikene sasaibino Kristus namusu taaluuk doi Kristus. ²⁶ Musu doibundu yana mo lungguiyomo doiyamo matean. ²⁷ Doi Kitab Moliyous lalomo totulis buno naiya, "Ko Mian Bisa tealikene sasaibino kolangge taaluuk doi Yana." Tontong tuuno baikon komo minakisuuti tukon "sasaibino kolangge" doiya aki natongusokon ko Mian Bisa susuungo, mo tealikene sasaibino langgedoo taaluuk doi Kristus. ²⁸ Bai sambuno sasaibino tinaklukanggon doi Kristus napamarentaan, maka yana susuungo, doiyamo Mian Bisa Napau, naikon salakanggenemo kobutongo doi Mian Bisa mo lapamo tealikene sasaibino kolangge taaluuk doi Yana. Maka ko Mian Bisa susuungo komo parentayo sasaibino. ²⁹ Kalu komian momate aki nainotuboi koidan, bulaando modaano komian mo sinau tuuk doi mian momate? Oila kogunano yanila mokubaiyo doiya halloo? Kalu bisa komian mate aki naikon nainotuboi koidan, oila kogunano yanila mokubaiyo doiya halloo? ³⁰ Tukon oila kokubaiyano koidan kami moyase sasalaane kosusaan samba kotempo? ³¹ Utus-utus! Samba kooloyo yaku taane kosakisaa sabab yaku banggaalkene kopoo tuboan sabab komuyu lapamo mangangga doi Kristus Yesus, nda Temeneno. ³² Kalu doiya tolongo tuuk doi banggapi tolong, oila kountungo doi yaku sulano baladuang pokakana mopooakate koiyayon-iyayon mobarani doi kota nia, doi Efesus? Kalu komian momate aki nainotuboi koidan, nah, lobian komo monondok nda loloiyo kososombotia, "Mai nda kaan inum tukon basana-sanaang, sabab namodoa kita naikon matemo." ³³ Inai potongokolii! Polembelikonan mo lokis kubaiyo lusak konda tuboan mo monondok. ³⁴ Potoiyo budodoiya, tukon inaimo pomongkubai lalim koidan. Kona tutuuwan komuyu sio pomammaa, baikon doi komuyudoo daano komo akiyoon natingoniiyo ko Mian Bisa. ³⁵ Ugaate daano komo mansadai, "Bulaando kai komian momate nainotuboi koidan? Butong mo bulaando komo bineekon doi yanila, nalapa yanila inotuboi koidan?" ³⁶ Bodo tuuno! Kalu Utus masakakon kalibuang doi buta, do kalibuangoo aki natubo, kalu do kalibuangoo aki namate loolukon. ³⁷ Tukon do kalibuangoo Utus mo sakakene doi butadoo lalomo -- ugaatene gandum kalibuango kabai kalibuang bailon -- doiya do kalibuangoo batuno tolong, aki nasasaibino nasinakakonoo naikon tubo. ³⁸ Mian Bisa susuungo komo kubaiyo kondondoongo do kalibuangoo menurut napambaleng momonondok tuuk doi mosinakakonoo. Doi memeeng kokalibuang kaliangano, Mian Bisa komo kubaiyo kondondoongo dokalibuangoo susuwele. ³⁹ Komahluk-mahluk butongo mo daano kona ansaang sasaibino aki napokakana. Kobanggapi butongo sangalaasan, koiyayon koona butongo sangalaasan; kotomisi-tomisi sangalaasanggon kobutongo, tukon koikan-ikan sangalaasan koidan kobutongo. ⁴⁰ Bunomo koidan tukon kolangge-langge doi timbu tukon kolangge-langge doi buta. Kolangge-langge doi timbu susuwele daano kona monondokan susuungo, tukon kolangge-langge doi buta bunomo lakon. ⁴¹ Kooloyo namonondokan posasala kobituwon namonondokan. Kobituwon-bituwon pauno koona sangalaasan kona monondokan. Malah do bituwon-bituwonoo pauno susuwele posasala koidan kona monondokan. ⁴² Bunomo kohalloo tukon komian badaang momate mo inotuboi koidan. Komian butongo mo tinadingoo doiya mian butongo mo moola boowan, bai komian butongo mo inotuboidoo koidan, doiya mian butongo mo aki namoola manas. ⁴³ Salataa komian butongo natinading, do mianoo butongo kulokiso tukon muyuko; bai salataa nainotuboiyan koidan, yana tealimo monondok tukon bukuan. ⁴⁴ Salataa natinadinan, butongo butong moluwedoi dunia; bai salataa tubo koidan, maka do butongo butong moluwedoi Mian Bisa Na Roh komo beekene. Daano komian butongo mo luwedoi dunia, tukon daano koidan komian butongo mo luwedoi Mian Bisa. ⁴⁵ Doi Kitab Moliyous lalomo totulis buno naiya, "Kobanggapi tumbeno, doiyamo Adam, teali mahluk mo tubo," bai Adam doibundu doiya Roh mo mebee tuboan. ⁴⁶ Komo lubat tumbeno loolukon doiya jasmani, bolikon mo rohani. Komo rohani lubat doibundu. ⁴⁷ Adam tumbeno tinealikon luwedoi buta, bai Adam koluano luwedoi surgaa. ⁴⁸ Komian badaang doi dunia nia pokakanamo Adam tumbe-tumbeno, mo tinealikon luwedoi buta, bai kosurgaa miano doiya pokakanamo yana mo lubat doi surgaa. ⁴⁹ Bunomo lakon kita budodoiya bunomo Adam mo tinealikon luwedoi buta, maka naikon kita Teai buno Yana mo luwedoi surgaadoo. ⁵⁰ Daku makisuut, Utus-utus, doiyamo: butonggita mo tinealikon luwedoi sau tukon sail, aki namoola usok doi Mian Bisa na Dunia Boolu; tukon butonggita mo moola mate aki namoola teali monondok. ⁵¹ Popalatikanggene naiya laasia nia: Aki nasasaibino kita naikon mate, bai kita sasaibino naikon tobolii. ⁵² Doiya halloo naikon sosinggot teali tukon tolongo sopiyoman, salataa trompet napinuukan bunduno. Sabab sambuno do trompetoo alalo tololongol, komian badaang momate naikon inotuboimo koidan tukon butonggita mo monondok, tukon kita sasaibino naikon binolii. ⁵³ Kobutonggita mo moola mate nia sio nasinoboli tukon butonggita mo aki namoola mate, tukon butonggita mo luwedoi dunia nia sio nasinoboli tukon butonggita mo luwedoi surgaa. ⁵⁴ Kalu kobutonggita moola mate lapamo sinoboli tukon mian butongo mo aki namoola mate, tukon butonggita mo luwedoi dunia lapamo sinoboli mian butongo mo luwedoi surgaa, doiyamo kosinggatoo maka nateali oila komo totulis doi Kitab Moliyous lalomo, "Komatean lapamo inapusanggon, komanaangan lapamo linaat!" ⁵⁵ "Oh matean, inaando komu manaangan? Oh matean inaando komu kuasa?" ⁵⁶ Komatean nakuasa doiyamo dosa, tukon kodosa ampakonggene kona kakuasaan lolo doi ukum agama. ⁵⁷ Bai kinatauwan doi Mian Bisa; yana mobeena kita manaangan moluwedoi Yesus Kristus nda Temeneno! ⁵⁸ Tobikon doiya, Utus-utus kukinilakon, siokai komuyu pobukuan tukon moonggol. Pobalimang sidutu tuuk Temeneno tukon tutuu, sabab komuyu toiyo baikon sasaibino komo komuyu limange tuuk doi Temeneno, doiya aki napalasuma.

¹ Budodoiya kokaliangano doy bantuan komuyu mo salakanggene doi tulamuyu Salani miano, yaku bontiikene doi komuyu sulano pokubaiyo napokokonoi koalal yaku mo beekene doi jemaat Galatia. ² Doi oloyo komeengo samba-samba kominggu, siokai Utus-utus sasaibino pomangabos doy, susuwele napokonoikene kona pandapatan. Poabese doiya doydoo polong yaku lubat, sulano laate doiya kosinggatoo akimo napalaluu kinombul koidan. ³ Siokai kulubato, maka kumosumbolii mian-mian mo lapamo komuyu sotujuiyo. Yaku naikon beena doi yanila surat kuasa, sulano yanila nababayo do doydoo bantuan doi Yerusalem. ⁴ Tukon kalu natokita monondok baikon mau yaku ampakon koidan tukon yanila, maka yaku naikon ampakon polaing yanila. ⁵ Yaku naikon lubotiiyo komuyu kalu lapamo yaku lupaiyo ko Makedonia, sabab yaku batetel mosampu indaa. ⁶ Moola kai yaku naikon dungol bubula kooloyo tukon komuyu, ugaate napoolapakon koudan tempono. Lapa doiya komuyu moola tomboniiyo yaku banggadudulkene daku ampakonan doi lipu bailon. ⁷ Yaku aki kuyase lubotiiyo komuyu tolongo sampukon balang. Kalu ko Temeneno pataikene, yaku yase dungol adukon malumbit tukon komuyu. ⁸ Naiya budodoo yaku daano modungol doi kota nia, doi Efesus polong kooloyo Pentakosta. ⁹ Badaang kotodanan naimbaa doi balimangan-balimangan mo daano kogunano, mau kai nabadaang komian mo tumbak-tumbak. ¹⁰ Kalu Timotius lubat, potalimayo yana tukon monondok sulano yana lasayo monondok tukon komuyu, sabab yana bunomo yaku koidan mobalimang tuuk Temeneno. ¹¹ Inai sampe daano komo pandange enteng yana. Potomboniiyo yana sulano namoola banggadudulkene kona ampakonan abali doi yaku tukon salamat, sabab yaku totiiliyo kona lubatan tukon utus-utus bailonggon. ¹² Kokaliangano doi utusonggita Apolos, lapamo moimoiya luunggon kupailukene yana sulano yana napolaing koutus bailon mo ampakon lubotiiyo komuyu. Bai yana akiyoon nayakiniyo baikon yana sio naampakono naiya budodoo. Mau nabuno doiya kalu daano kotodanan naikon, tantu yana lubat. ¹³ Siokai komuyu pobadagai tukon pokokoonggol doi potuboan lalomo buno Salani miano. Potindokiiyo tukon barani tukon poteali bukuan. ¹⁴ Sasaibino kopo kinubai, pokubaiyo tukon seang. ¹⁵ Utus tantu toiyomo Stepanus tukon nakaluargaa; yanila kotumbe-tumbeno mo teali Salani miano doi Akhaya. Yanila tukon noano totubo mobalimang kusus moleleaniyo ko Mian Bisa namian. ¹⁶ Yaku pailukene tukon tutuuno sulano komuyu poloingiyo kona atulano domianoo badaang mo buno doiya, maka mian badaang bailon mo balimang pomeenggon tukon meleleani polong yanila. ¹⁷ Yaku sanaang tukon Stepanus nalubatan, Fortunatus tukon Akhaikus. Yanila buno posoboli komuyu doi yaku. ¹⁸ Yanila tealikenemo konoanggu laba-laba, pokakana yanila sanaanggene konoamu. Mian badaang mobuno doiya sio poodotiiyo. ¹⁹ Koanggota-anggota jemaat doi Asia mopolonggon salam doi komuyu. Akwila tukon Priskila maka anggota jemaat mo pototongi doi bonua yanila makapatu salam Salani mo pontiing tuuno. ²⁰ Sasaibino utus naimbaa mopolonggon salam doi komuyu. Popolaing-laingo tukon monondok buno utusonggita Salani. ²¹ Yaku suungiyo naimbaa kosalam yaku mo tulise susuunggu: Salam molengget doi yaku, Paulus. ²² Mian mo aki namaasikene ko Temeneno, sodiiyomo yana nakinutuk! Maranatha -- Kombai Temeneno, lubato! ²³ Boliisi ko Temeneno Yesus nabalakaatiyo Utus. ²⁴ Polaing koseang doi Utus sasaibino mo pomeenggon tukon Kristus Yesus. Komai Hormat, Paulus