TITA

TITA

¹ Pawl, Pathian to-aw, zungzâl nungnâk lungum hen, Pathian thîm mi tla lungnâk leikângah leh Pathian sunhsak leikâng thudik theihnâk leikângah, Jisu Krist mifial ber nih chun, ² chu zungzâl nungnâk chu Pathian âwkrâwl sim kho lo nih chun laikulh um lânah a tiamh le, ³ sikhawmsele, amah tik takah chun a thu chu thuchah lakah a langhtir rawh, chu thuchah chu Pathian kan Ruangsuahtu thupêk hâwi vima hen kiltir ka si. ⁴ Tita, zatlâng lungnâk lakah ka fa tatak sinah: Pa Pathian leh Jisu Krist kan Ruangsuahtu sinah mi zângfahnâk leh remnâk na sinah um seh. ⁵ Hi ruangah hin Kret tikulh ah khan ka nan mâk asi, thu ruat mi mabân chu na ruat vima ding hen leh thu kan pêk mi hâwi hen khan khua kipah upa tla na ruat ding hen, ⁶ âuzawng simsâwi kâi lo mi, nupi pakhat nei, fa tla Pathian thulung mi, nuamsabut leikângah simsâwi kâi lo mi, dân lo hâwi hen um lo mi an si ding asi. ⁷ Kawhmi hotu chu Pathian sum zauhkhenhtu asi ruangah simsâwi kawp lo mi asi ding asi: mi simhhar, thintâwi, zûrît mang, mi vuak mang, lêpnâk nâwmtâm lakah hamkah mi asi ding asi loh. ⁸ Mi lawmh dân thiam, ṭha leikâng duh mi, thinlung diktak, mirep, mi thenhlimh, sûm-nâwl kho mi asi ding asi. ⁹ Sîntirnâk diktak leikângah mi a fawrh khonâk ding hen leh êltu tla chu a mawhtir kho na nâk ding hen sîntirnâk hâwi vima hen thu zumhkai tleih thlir mi asi ber ding asi. ¹⁰ Dân lo hâwi a um mi, thu sim salam mi leh perpettu tla tamtak an um ruangah, Juda tla lakah mi an si dauh chem. ¹¹ Chubang tla kâ chu huh piak na ding asi, lêpnâk nâwmtam duh ruangah thu sîntir lo ding mi sîntir hen, mi tla a dâwngsungkhur khur hen an râwk na tâwn. ¹² Kret tikulh lakah mi, anmah lakah mi khuavâng pakhat ngelchel nih, "Kret tikulh ah mi tla chu mi âwkrâwl tla, ran rualo tla, mi zângzê awrṭawh an si kumza," ti hen a sim kha. ¹³ Chu thu theihtir chu a dik asi. Churuang chun Juda tla thuanthu tla leh thudik hawitâk tâwntu tla thupêk chu sunhsak lo hen, lungnâk ah chun an dik khonâk ding hen fâk tak hen nun simh na rawh. ¹⁵ Mi thenhlimh tla rang chun zeizawng a thenhlimh tâwn; sikhawmsele mi nâwmtâm leh lunglo tla rang chun zeikhawm thenhlimh mi a um tâwn loh, an thinlung leh an sia leh ṭha theihnâk rêng khawm a nâwm rawh. ¹⁶ "Pathian kan theih" ti hen, anna ṭang tâwn le, sikhawmsele fihnungkâi tla, ê-aw ngâilo tla, thil ṭha kip ti leikângah Pathian duhlo mi zât an si, an thilti hen an phehtâk tâwn.

¹ Nang lam nih chun sîntirnâk dik tak hen â êp mi thu sim rawh. ² Tarpa tla chu a sûm kho mi, zahkâi, thinlung rep tak, lungnâk leh zângfahnâk leh felfênâk ah dik tak um ding hen fawrh rawh. ³ Tarnu tla khawm nih Pathian thu chu an simsiat lonâk ding hen, nunau kum no dauh tla chu an pasal zângfah ding leh fa zângfah ding leh thinlung rep tak hen um ding leh thenhlimh tak a um ding leh, mah in ah rianṭuantu ah um ding leh, vêlnei hen um ding leh, mah pasal tla thu thu a um ding hen nun an simh na kho ding hen an umdân lak khawmah Pathian zah mi tla, phiartu tla leh zû duh mi tla silo hen, ṭhat leikângah sîntirtu si ding hen fawrh rawh. ⁶ Chu hâwi ber hen, tlangvâl tla chu sûm kho mi si ding hen fawrh rawh. ⁷ Khatlei kângah ṭângṭawm mi tla nih kan tlûnah thu ṭha lo rerêng sim ding a nei lo ruangah an ningzak khonâk ding hen, zeizawng ah thu ṭha ti ding leikângah muhtirtu ah a siam le, na sîntirnâk ah chun na dik zia tla, zah na kâi zia tla, na thusim dik zia tla, sâwi kho lo mi chu langhtir rawh. ⁹ To-aw tla nih chun Pathian kan Ruangsuahtu sîntirnâk thu an bawp khonâk ding hen, êl lo hen, fîr mang lo hen, zumhkâinâk thu zawzawng langhtir hen, an pu tla thu thu hen um ding hen leh zeizawng an lawmhkâng hen um ding hen fawrh rawh. ¹¹ Mi zawzawng rangah Ruangsuahnâk ding hen Pathian nih a zângfahnâk a hawng langh rawh ruangah. ¹² Lungumnâk lawmhkâi kan Pathian rokual tak Ruangsuahtu Jisu Krist rokualnâk langhnâk chu ngâk hen, Pathian sunhsak lonâk leh laikulh duhnâk tla bângtâk hen, tuliau laikulh ah a sûm hen leh rep tak hen leh Pathian sunhsak hen kan um ding asi ti hawng kan sîntir. ¹⁴ Anih nih chun buarnâk zawzawng ah hawng kan tlanh khonâk ding hen leh phun thîm bîk, thil ṭha ti hen semsêngâi, amah rangah a thenhlimhtir khonâk ding hen, kan ruangrûl ah â pêk kha. ¹⁵ Thu nei tak hen chubang thu chu sim hen fawrh le, nunsimh rawh. Âukhawm nih a nan zauhnawmh lah seh.

¹ Lal tla leh thuneitu tla lakah a pêk ding tla, ê-aw ngâi ding tla, thu ṭha kip ti ding hen a tim ding leh âukhawm simsiat lo ding leh ² ṭhatlo rawt lo ding leh mi zawzawng lakah dawnhkhonâk kip langhtir hen nun ṭha ding hen anmah tla theihtir nawlh rawh. ³ Kannih khawm a lânah a tak leh ê-aw ngâilo leh perpet mi leh, duhnâk leh lawmhnâk kip leikângah pial mi leh sual leh nahsuah mang hen um mi leh fihnungkâi leh a huat tawnh mi tla kan si ruangah. ⁴ Sikhawmsele, Pathian kan Ruangsuahtu vêlneih zia leh minung tlûnah a zângfah zia a hawng langh liauah khan; ⁵ thil rep tak hen ti mi, kanmah ngelchel nih ti mi tla chu, chu ruang silo hen, siamtharnâk ṭâwlnâk leh Thlarau Thenhlimh siamthar nawlhnâk nih chun a zângfahnâk hâwi vima hen ruang hawng kan suah rawh. ⁶ Chu Thlarau Thenhlimh kan Ruangsuahtu Jisu Krist zârah chun fâk tak hen kan tlûnah a tawih kha. ⁷ Chuvachun, a zângfahnâk ah mawhtir lo si hen, zungzâl hen nungnâk lungumnâk hâwi vima hen rotingtu dingah siam hen kan um kho lai. ⁸ "Pathian lung rawh mi nih chun thil ṭha ti vima ding hen tum seh," ti thu hi zumh a kâi asi, chu thu chu râlṭha tak hen na sim thlir ding hen ka nan duh asi. Chubang thu chu minung tla rangah a ṭha hen mang a tlâk asi. ⁹ Sikhawmsele deihnâk âtkâi tla, thlâktu tla thu zâwt tla, êlnâk tla, dân thu ruangah a sualnâk tla chu hertâk vima rawh; chubang tla chu zeikhawm ṭhavak lo leh zeikhawm silo ruangah. ¹⁰ A dangtê hen lungnâk nei mi chu veikhat veinih nunsimh nûnlêm chun duh lah; ¹¹ chubang hâwi mi chu a pial hen a sual asi ti na theih, amah leh amah â mawhtir asi. ¹² Artema mawh, Tukika mawh, na sinah ka hawng fial tik chun Nikopoli khua ah ka sinah hawng kal râm rawh, chunah chun busik ah um ka tum ruangah. ¹³ Zena, dân theihtu leh Apolo nih chun zeikhawm an samphâng lonâk ding hen an khualtlawngnâk ah chun semsêngâi tak hen bawmh na rawh. ¹⁴ Kan mi tla khawm nih chun rah lo hen an um lonâk ding hen samphângnâk herh rang dingah chun thil ṭha ti vima a sîn na seh. ¹⁵ Ka sinah um zawzawng tla nih hin chibai a nan bûk; lungnâk ah hawng kan zângfahtu tla kha chibai hawng ka bûk piak. Nan ektê sinah Pathian zângfahnâk um seh.