ROM

ROM

¹ Pawl, Jisu Krist to-aw, mifial si ding hen kawh mi, a Thâwngthâng Ṭha sim ding hen Pathian nih a kawh mi nih chun: ² Chu Thâwngthâng Ṭha, a Fapa kan Lalpa Jisu Krist thu chu, Pathian nih tuan liauah Pathian lasui thu thenhlimh ah chun a khuavâng tla kâ hen a tiamh rawh. ³ Anih chu taksa lei thu ah chun David thlâk ah suak asi le, ⁴ thenhlimhnâk thlarau lei thu ah chun mithi lakah thawk hen a thawknawlhnâk nih chun, Pathian Fapa asi zia fâk tak hen a theihtir. ⁵ A min ruangah lungnâk chu phun kip lakah mi lungtir hen, amah ruangah chun, zângfahnâk leh mifial sinâk ka ting rawh. ⁶ Chubang tla lakah chun nannih Rom khua ah um mi tla khawm Jisu Krist ah kawh mi tla nan si. ⁷ Churuangah nannih Rom khua ah um mi tla, Pathian nih a dâwt mi tla leh amah mi tla si ding hen kawh mi tla zawzawng sinah ka rîn asi: Pathian kan Pa leh, Lal Jisu Krist sinah thawk hen zângfahnâk leh remnâk nan sinah um seh. ⁸ Laikulh zawzawng ah nan lungnâk thu a thang ruangah nan ektê tlûnah ka lâwmnâk thu Jisu Krist zârah Pathian sinah ka sim masa rih asi. ⁹ Ka thlachamnâk lakah chun bâng lo hen nan min ka lam tâwn le, tutal hin nan sinah ka hawng kalnâk ding hen Pathian thu thu hen tlâwngnâk tik ka tawng rarâm khonâk ding hen ka deih tâwn ti a Fapa Thâwngthâng Ṭha ah ka thlarau ah a rian ka ṭuan tâwn mi Pathian chu a theihtu asi. ¹¹ Nan birhnâk dingah thlarau lei thilpêk zeimaw tal ka nan pêk kho na ding hen an muh na ding thungâi ka duh. ¹² Chu chu nan nungnâk leh ka nungnâk hen kanna ṭangpi tawnh khonâk ding hen ka tinâk asi. ¹³ Unau le tla, hi hi theih u: ka nan veh na ding hen vei tamtak ka tum rawh le, sikhawmsele, thil zeimawh nih a hawng ka kham kumza tâwn asi. Phundang tla lakah lungthar ka tawng hâwi hen nan lak khawmah lungthar tawng ka duh tâwn asi. ¹⁴ Mi zawzawng sinah, mifing leh mifing lo tla sinah, mithiam leh mithiam lo tla sinah bat ka nei. ¹⁵ Chuvachun, nannih Rom khua ah um mi tla sinah khawm Thâwngthâng Ṭha sim ding hen ka mawhlah kumza. ¹⁶ Thâwngthâng Ṭha ah zumhnâk rangtling ka nei: âuzawng a lungtu zawng rangah ruangsuah ding hen Pathian thiltikhonâk asi, a tîrah Juda tla rangah asi le, chun Phundang tla rangah khawm asi. ¹⁷ Thâwngthâng Ṭha nih chun a dawmhtîr thawk hen a dawngh tiang hen Pathian ah lungnâk ruang cho ah minung chu rep hen a um ti a langhtir asi. "Mi rep chu lungnâk hen a nung lai," ti Pathian lasui thu nih a sim hâwi khan. ¹⁸ Thutak rep lo tak a khamtu tla Pathian sunhsaklonâk leh replonâk zawzawng tlûnah vân thawk hen Pathian thinthawknâk a hawng lang asi. ¹⁹ Pathian nih a rêp na le, Pathian nih a theihtir rawh ruangah Pathian thâwngthâng theih ding mi chu an sinah theihtir hen a um dangâiah. ²⁰ A thil muh kho lo tla, a zungzâl thiltikhonâk leh a Pathian zia chu laikulh siamtir thawk hen fiang tak hen muh hen a um le, thilsiam ah chun a lang asi. Churuang chun phelhsawlhnâk ding reng an nei lo! ²¹ Pathian theih ko hen Pathian hâwi hen an chawnglawmh lo, lâwmthu khawm an sim lêm lo; thu salam an dawn dauh le, an thinlung ah chun mûinâk hen a hawng khat rawh asi. ²² Mifing ah anna ruat le, sikhawmsele, mi â ah an hawng a chang; ²³ thi kho lo Pathian chu sawnh lo hen, thi kho mi minung ruk tla, vâ tla, ran tla, vâkrit tla ruk chu an sawnh asi. ²⁴ Churuangah an taksa ningzakkâi tak a siam tawnh ding hen an thinlung duhkâng hâwi hen thu nâwmtâm ti ding siang hen Pathian nih a kaltâk asi. ²⁵ Pathian thutak chu âwkrâwl ah changtir hen a siamtu sawnh ngâk hen a siam mi chu sawnh hen a rian an ṭuan dauh dangâiah. A siamtu chu zungzâl hen sawr tlâk asi. Amen. ²⁶ Churuang chun Pathian nih ningzakkâi tak a hur siang hen a hawitâk na. Nunau tla tiang khawm nih an umdân an suakpi mi chu dân lo hâwi a um ding hen anna dangtir dangâiah. ²⁷ Mipa khawm nih nunau mang dân kêl bângtâk hen, hur hen duhnâk anna neih le, mipa leh mipa ṭhalo tak hen anna ti, an sual man tawng ding chu anmah lakah an tawng. ²⁸ Chun, Pathian theih an duh lo ruangah thil dawh lo tla ti ding hen a duh lo kâng thinlung neih siang hen Pathian nih a hawitâk na rawh. ²⁹ Chun, replonâk zawzawng, sualnâk zawzawng tla, hamkahnâk zawzawng tla, ṭhatlonâk zawzawng hen an khat le, nahsuahnâk tla, mi thahnâk tla, tawhnâk tla, perpetnâk tla, nunchan ṭhalonâk tla hen an khat. ³⁰ Chaih mang tla, mi chawngawih mang tla, Pathian, huatkâng hen um mi tla, â liantir mi, mi zûm tla, â khâwng mi tla, thilsual thar suahtu tla, nu leh pa thu ngâilo tla, ³¹ sia leh ṭha theihnâk neilo tla, thupêk buartu tla, zângfahnâk thinlung suakpi lo tla, zângfahnâk neilo tla an si. ³² Chu hâwi thil titu tla chu thi ding rêng an si ti Pathian ruat chu theih ko hen, anmah lâwng nih ti mi cho khawm silo hen, midang ti tâwntu tla tlûnah khawm anna lâwm tâwn.

¹ Churuangah, ka hâwi tla, midang tla tlûnah lâi nan rêl mu? Mi âutal si khawm ule, ngaihdamnâk rerêng nan nei lo. Midang lâi nan rêl liauah chu hâwi thil an ti mi tla hâwi nan ti bâk tâwn ruangah nanmah leh nanmah nanna mawhtir asi. ² Chu hâwi thil ti tâwntu tla tlûnah chun Pathian nih a lâirêlnâk chu dik tak asi vima asi ti kan theih. ³ Churuangah, ka hâwi tla, nannih chu hâwi thil ti tâwn tla sâwitu, nannih nih chu hâwi thil nan ti bâk dangâiah Pathian nih lâi a rêlnâk lakah âwl ding nanna ruat mazei? ⁴ Asi lo leh, Pathian ṭhatnâk nih rimnâk ding hen a nan ruai na tâwn ti theihlo hen, a ṭhatnâk neih tam zia leh â zauh kho zia leh â dawnhkho zia chu nêp dîk hen ma nan ruat? ⁵ Thinlung lianhnâk leh thinlung khauhnâk nan nei. Churuangah Pathian thinrunhnâk leh lâirêlnâk dik tak a hawng lang tik Ni ah chun nanmah rêpnâk lian dauh nan siam asi. ⁶ Pathian nih chun mikip an thilti hâwi vima hen lâwmman a pêk lai. ⁷ Thil ṭha ti rarâm hen, rokualnâk leh chawnglawmhnâk leh thi kho lo mi nungnâk hâwltu tla sinah chun zungzâl nungnâk a pêk lai. ⁸ Midang tla chu mah kawngkâ lâwng ruat mi an si le, a dik mi chu an duh lo, a dik lo mi chu an zûl dauh tâwn; an tlûnah chun Pathian thinthawknâk leh thinrunhnâk tla a um lai. ⁹ Minung thilsual titu tla tlûnah hamhnâk leh ngaihsiatnâk fâk tak a um lai le, Juda tla tlûnah a um masa lai le, chun Phundang tla tlûnah khawm a um lai. ¹⁰ Sikhawmsele, thu ṭha titu vial sinah chun rokualnâk tla, chawnglawmhnâk tla, lungngamnâk tla Pathian nih a pêk na lai le, Juda tla sinah pêk asi masa lai le, chun Phundang tla sinah khawm pêk asi lai. ¹¹ Pathian nih mi zawzawng bang ver hen a zauhkhenh ruangah. ¹² Âuzawng Dân neilo hen thil a sual mi chu Dân lo hen a vei lai, chun Dân nei hen a sual mi chu Dân ah lâirêl hen a um lai. ¹³ Chun, mi nih Dân a theih mi ko asi chun Pathian lakah mi rep asi lo, Dân nih a herh a ti mi tla a ti chun Pathian lakah mi rep asi lai. ¹⁴ Phundang tla nih chun Dân an nei lo; sikhawmsele mah thinlung suakpi mi hen Dân thilti tla chu an ti chun, chubang tla nih chun Dân neilo khawmsele anmah leh anmah Dân ah an um chawlh asi. ¹⁵ An nunchan nih chun Dân thilti tla chu an thinlung ah rîn asi ti a zauhtir. Chun, an siat leh ṭhat theihnâk khawm nih hi hi a dik asi ti a theihtir le, an thinlung tla chu â êl le, anna mawhtir thulh, zeimaw zâwnah anna mawhlotir thulh. ¹⁶ Pathian nih Thâwngthâng Ṭha ka sim hâwitê hen minung thinlung tla lakah mi thuthup tla chu Jisu Krist mang hen lâi a rêl ding Ni ah chun rêl hen an um lai. ¹⁷ zei hâwi na si rawh ne? Juda ka si na ti le, Dân chu na rinhsan le, Pathian na putso; ¹⁸ Pathian nih ti ding hen a nan duh mi na theih le, chun Dân thu ah sîntir hen na um le, thil dik tla chu ti ding hen: ¹⁹ Dân ah chun finghnâk leh thutak umdân na nei ruangah nangmah tak mitchâw tla ruaitu, mui lakah umtu tla cherhtu ²⁰ mifinglo tla finghtirtu, mimâwl tla sîntirtu si hen na ruat. ²¹ Midang tla na sîntir na le: zeirangah nangmah na sîn lo? Nang, fîr lo ding hen sîntirtu, na fîr tâwn mu? ²² Nang ṭângdang pawm lo ding hen simhtu: nangnih ṭângdang na pawm tâwn mu? Nang, milem huatu, milem biakin ah mi thil tla na fîr tâwn mu? ²³ Nang, Dân putsotu, nangnih Dân na buar ruangah Pathian min na siattir tâwn mu? ²⁴ Pathian thu nih a sim hâwitê khan Pathian min chu nanmah Juda tla ruangah Phundang tla lakah siattir hen a um rawh asi. ²⁵ Dân zâwttu na si chun na fêmtannâk chu a ṭhavak asi; Dân buartu na si lam chun na fêmtan chu tan lo hâwi asi ko rawh. ²⁶ Churuangah fêmtan lo mi nih chun Dân thuruat tla a kil chun a fêmtan lo mi chu tan hâwi hen ngaih asi awt lo mazei? ²⁷ Chun, Phundang mah umzia hen fêmtan lo hen Dân chu a zâwt kim chun, nang Juda lasui thu leh fêmtan Dân nei ko hen Dân buartu, a nan sâwi awt lo mazei? ²⁸ A lêngpuan ko ah Juda mi si chu Juda mi tak asi lo; a lêngpuan ko ah fêmtan chu fêmtan tak asi lêm lo. ²⁹ Khawmsele a lêngpuan si lo hen Juda mi si chu Juda mi tak asi. Chun, fêmtan tak chu thinlung leikângah tan asi, lasui thu ah ko si lo hen thlarau ah asi; chu lakah chun minung sawr a lawh lo le, Pathian sawr an lawh dauh asi.

¹ Asi chun, Juda mi nih chun Phundang tla tlûnah ṭhatvaknâk zei me a neih khun? Fêmtan khawm zei me a ṭhatvaknâk? ² Zeizawng ah a ṭhavak thlo. Pathian thu chu Pathian nih Juda tla sinah a kiltir masachem. ³ Mi zeimaw mi nih lungnâk neilo khawmsele zei me â ti le? An lunglonâk nih chun Pathian zumhkâi zia zeikhawm lo ah a siam lêm mazei? ⁴ Si lo e, Pathian chu mi dik tak asi le, mikip lam chu âwkrâwl si dauh seh. "Nangnih na thusim ah mawh lo hen na ruat lo, lâirêl hen na um khawmah na neh kho ding hen," lâirêl hen Pathian lasui thu nih a sim hâwi khan. ⁵ Sikhawmsele, kan a replonâk nih hin Pathian repnâk chu dawh khun hen a langhtir chun zeise kan sim lai? Pathian nih mi a rêp hen mi replo asi mazei? Minung ti dân hâwi hen ka sim asi. ⁶ Si lo e, chu hâwi asi chun Pathian nih zeitin me laikulh lâi a rêl lai? ⁷ Sikhawmsele, ka âwkrâwl thusim ruangah Pathian thudik zia amah rokualtir khawp rê hen a lang khun ṭung chun, zeirang me kei khawm misual hâwi hen mawhtir hen ka um nget ne? ⁸ Takhan chun, zeirang me, "Thu ṭha a hawng tlung khonâk ding hen thilsual kan ti lai," ti hen kan sim dauh lo? Mi zeimaw mi nih an ka phiar le, simlopi an ka simtir. Chu hâwi mi le tla chu an mawh hâwi hen Pathian nih a rêp lai. ⁹ Asi chun, kannih Juda tla hi Phundang tla ngâk hen kan ṭha khun mazei? Si lo e! Juda tla leh Phundang tla chu sual thiltikhonâk tangah an um ver asi ti a lân khawmah ka zauhtir rawh kha. ¹⁰ Pathian lasui thu nih: "Âukhawm mi rep tak rerêng an um lo, pakhat khawm an um lo; ¹¹ Âukhawm theihthiam rerêng an um lo, âukhawm Pathian sawnh rerêng an um lo. ¹² Amah lo leiah an pial ver le, zeikhawm chawhchân lo hen an um ver: âukhawm thil ṭha ti rerêng an um lo, pakhattê men an um lo. ¹³ An kâ suak nâwmtâm nih chun thihnâk a tlunh tâwn, an lei nih perpetnâk thu a sim. An kâ sung chu rûl tûr hen a khat. ¹⁴ An kâ tla chu hawlhsiat barhnâk thu khâ hen a khat. ¹⁵ An kê chu thisen suah ding hen chak hen a kâr. ¹⁶ An kalnâk zawngah veihnâk leh hamhnâk an mâk tâwn. ¹⁷ Lungngamnâk lampi khawm an theih loh. ¹⁸ An mitmuh ah Pathian ṭihnâk rerêng an nei lo," ti hen, an sim hawi khan. ¹⁹ Dân nih zeizawng a sim mi vial chu Dân thu thu hen um mi tla sinah a sim asi ti kan theih; kâ kip a chîp khonâk ding hen leh laikulh ah mi zawzawng Pathian lâirêl hen an um khonâk ding hen. ²⁰ Chun, Dân thilti ruangah âukhawm a mitmuh ah mawh lo hen an um lo, Dân ruangah sual theih rangtlingnâk a hawng um dangâiah. ²¹ Sikhawmsele, tuah Dân leh khuavâng tla theihtir hâwi hen Dân lo hen Pathian repnâk chu langhhir hen a um rawh; ²² chu chu Pathian repnâk, Jisu Krist lung ruangah a lungtu vial tla sinah langhtir hen a um mi chu asi; dangnâk rerêng a um lo: ²³ mi zawzawng nih thilsual an ti ver le, Pathian rokualnâk anna ting kho lo rawh. ²⁴ Chubang lungtu chu Krist Jisu tlanhnâk um mi ruangah chun a zângfahnâk nih a thawt hen mawhtir lo hen an um. ²⁵ Pathian dawnhkhonâk ah tuan liauah sual tla ngaihdam hen a um ruang khan, Pathian nih amah rep zia zauhtirnâk ding hen Krist Jisu chu a thisen ah, lung ruangah sual thutluang vawrnâk ah a ruat. ²⁶ Tu liauah a rep zia a zauhtirnâk dingah asi amah ngelchel chu mi rep asi khonâk ding hen leh Jisu lungtu vial mawhtirlotu asi khonâk ding hen. ²⁷ Nan putsonâk chu zeiah me a um le? Zeikhawm silo! Zeiruangah ne? Mi nih Dân a zâwt ruangah ma? Si lo e; lungnâk ruangah asi dauh. ²⁸ Chuvachun, Dân thilti silo hen lungnâk ruangah Pathian ah mi rep kan si hen kan ruat asi. ²⁹ Asi lo leh, Pathian chu Juda tla Pathian cho ma si? Phundang tla Pathian khawm asi bâk lo ma? Si bâk ta a. ³⁰ Juda tla chu an lung ruangah mawhtirlonâk ding leh Phundang tla chu an lungnâk ruangah mawhtirlotu ding thu Pathian pakhat cho asi chun Phundang tla Pathian khawm asi bâk lai ta a. ³¹ Asi leh, lung ruangah Dân chu zeikhawm lo ah kan siam mazei? Si rîlmâl lo; Dân chu kan birhtir lehlam asi.

¹ Asi chun, Abraham, taksa dân ah hawng kan thlâktu nih chun zei me a tawng mi chu, zei kan sim lai ne? ² Abraham chu thilti ruangah mawh lo asi chun putso ding a nei asi. Pathian leikâng lam chun a nei lo asi. ³ Pathian lasui thu nih, Abraham nih chun Pathian a lung le, chun chu lungnâk chu repnâk ah ruat asi, ti hen a sim asi. ⁴ Chun, rianṭuantu lawh chu zângfahnâk ah ruat asi lo le, bat ah ruat asi dauh. ⁵ Sikhawmsele, rianṭuan lo hen Pathian sunhsak lo hen mawhtirlotu lung dauh mi lungnâk chu amah repnâk ah ruat asi. ⁶ Mi a thilti ruat lo hen, Pathian nih rêp hen a ruat mi chu mal a sawm piak thu David khawm nih, ⁷ "An buarnâk tla ngaihdam hen a um mi leh, an sual tla khuh hen a um mi chu an thaw a suak. ⁸ Lalpa nih diklonâk nei hen a ruat lo mi chu a thaw a suak," ti hen a sim hâwi khan. ⁹ Asi leh, chu thawsuaknâk chu fêmtan tla tlûnah cho ma a um, fêmtan lo tlûnah khawm? "Abraham lungnâk chu a repnâk ah ruat asi," kan ti ruangah. ¹⁰ Chu chu zei hâwi hen ruat me si ne? A fêmtan nûnah ma? A fêmtan lânah? A fêmtan nûnah asi lo le, a fêmtan lânah asi dauh. ¹¹ Chun, fêmtan lo hen a um liauah lungnâk ah repnâk a tawng ti theihnâk fêmtan singsiahnâk chu â ting le, chu repnâk chu an rangah ruat asi nâk ding hen fêmtan lo tla lakah lungtu zawzawng thlarau pa asi khonâk ding hen. ¹² Fêmtan tla pa khawm asi khonâk ding hen fêmtan tla pa ko asi lo le, kan pa Abraham fêmtan lo hen a um liauah lungnâk a nei hâwi a nei bâk mi pa asi dauh. ¹³ Dân ruangah Abraham leh a thlâk tla sinah chun laikulh ro tingtu ding asi lai ti lam chu tiamh asi lo le, lungnâk ah repnâk ruangah asi dauh. ¹⁴ Dân ah um mi tla chu ro tingtu tla an si chun lungnâk chu zeikhawm ah a ṭhatvak lo le, thutiam khawm chu zeikhawm asi lo. ¹⁵ Dân nih chun thinthawknâk a siam tâwn le, Dân umlonâk ah lam chun buarnâk khawm a um lo. ¹⁶ Churuangah, zângfahnâk hen asi khonâk ding hen lungnâk ruangah asi hi, thlâk tla zawzawng nih chun thutiam chu anna tingnâk ding hen. Dân nei mi tla cho nih an tawng awt lo le, Abraham neih hâwi lungnâk nei tla khawm nih an tawng bâk lai. Mithi tla nungtirtu leh thu um lo tla um hâwi hen simtu a lung mi Pathian mitmuh ah chun Abraham chu kan ektê thlarau pa asi. "Chi tamtak tla pa ah ka nan siam," ti rîn hâwi khan. ¹⁸ Lungum ding hen a umlonâk khawmah anih nih chun lungum tak hen a lung le, chi tamtak tla pa asi khonâk ding hen, "Khi zat khin na thlâk tla an hawng um lai,’ ti hen simh asi hâwi hen khan. ¹⁹ Chun, lungnâk bir lo lêm lo hen, a taksa thi rawh hâwi hen um ding a ruat le, amah chu kum zâ mi bo asi le, ²⁰ Sari ching mi khawm a theih ko, sikhawmsele lungnâk sam hen Pathian thutiam chu a zumhmaih lo le, ²¹ Pathian a chawnglawmh le, a thutiam chu a tingtir kho ti a lung thlo le, a lungnâk chu a bir khun rawh. ²² Churuangah, a lungnâk chu repnâk ah ruat asi rawh. ²³ Chun, a lungnâk chu a repnâk ah ruat asi ti hi amah rang cho ah rîn asi lo le, kanmah rang khawm asi. ²⁴ Jisu kan Lalpa mithi lakah mi thawhtu chu lungtu kan si le, kan lungnâk chu repnâk ah ruat asi awt. ²⁵ Chu Jisu chu kan sual ruangah thi ding hen tleihtir hen a um le, kan mawhlonâk ding hen thawh hen a um.

¹ Churuangah, lungnâk ruangah mawhlo a um hen, kan Lalpa Jisu Krist ruangah Pathian hen rem hen kan um. ² Amah ruang ber ah hi zângfahnâk ah hin bir tak hen kan dîrnâk ah hin lungnâk hen kan lût rawh. Churawhchun, Pathian rokualnâk lungum hen lâwm hen kan um. ³ Chun, chu ko chu silo hen kanna hamhnâk khawmah lâwm hen kan um, hamhnâk nih chun felfênâk a siam le, ⁴ felfênâk nih chun Pathian remtinâk a siam, Pathian remtinâk nih chun lungumnâk a siam ti kan theih asi. ⁵ Chun, Thlarau Thenhlimh kan sinah hawng kan pêk mi nih khan Pathian dâwtnâk chu kan thinlung ah a khattir rawh ruangah lungumnâk nih chun a mualphotir lo. ⁶ Kan chak lo liau khan, a tik takah Krist chu misual ruangrûl ah a thi rawh ruangah. ⁷ Mi rep ruangrûl ah a thih chu mi zeimaw mi rangah thu har tak asi le, mi ṭha ruangrûl lam chun mi zeimaw mi nih thih a va ngamh ko dahmawh. ⁸ Sikhawmsele, Pathian nih chun a kan dâwtnâk chu sawr tlâk hen a langhtir le, misual tla kan si liauah Krist kan ruangrûl ah a thi ruang khan. ⁹ Chun, a thisen ah mawhlotir a kan um rawh nûnah hin amah ruangah Pathian thinthawknâk lakah mi chu ruangsuah hen kan um ngelchel lai. ¹⁰ Mêlma kan si liau men ah a Fapa thihnâk ruangah Pathian hen rem rawh mi kan si chun rem hen kan um rawh nûnah hin a nungnâk ruangah ruangsuah hen kan um ngelchel lai. ¹¹ Chu cho khawm asi lo le, tuah remnâk hawng kan tingtirtu kan Lalpa Jisu Krist ruang chun Pathian ah kanna lâwm asi. ¹² Chun, mi pakhat ruangah sual laikulh ah a lût le, sual ruangah thihnâk a lût fâwn, chu hâwi ber hen mi zawzawng nih thu an hawng sual ruangah thihnâk nih mi zawzawng a zunh hep rawh. ¹³ Dân um lânah laikulh ah sual a um rawh asi: Dân a um lo chun sual chu sual ah ruat asi lo. ¹⁴ Sikhawmsele, Adam thawk hen Mosi tiang hen Adam buarnâk hâwi a thilsual tilo tla lak khawmah thihnâk nih chun lâi a rêl tâwn. Adam chu a hawng kal ding mi Jisu hen tahṭhimhnâk asi. ¹⁵ Sikhawmsele, thilthawt pêk chu sualnâk hen â bang lo fâwn. Mi pakhat sual ruangah men khan mi tamtak an thi chun Pathian zângfahnâk leh mi pakhat Jisu Krist zângfahnâk ruangah thilpêk chu mi tamtak lakah vurh hen a um ngelchel lai. ¹⁶ Chun, thilpêk chu pakhat sual ruangah thu hawng um ding mi hen â bang lo; mawhtirnâk lâirêlnâk chu sual pakhat ruangah a hawng um le, mawhtirlonâk thilthawt pêk lam chu sual tamtak ruangah a hawng um dauh asi. ¹⁷ Adam sual ruangah thihnâk nih, amah pakhat ruang men ah men ah lâi a rêl asi ti a dik asi; sikhawmsele, mi pakhat, Jisu Krist nih thil a ti mi chu a rokual dauk khun asi. Pathian zângfahnâk fâk leh a repnâk tawngtu tla nih chun Krist zârah nungnâk ah lâi an rêl lai. ¹⁸ Chun, sual pakhat ruangah mawhtirnâk lâirêl chu mi zawzawng tlûnah a hawng um le; chu hâwi ber hen thil rep pakhat ti ruangah nungnâk tawngnâk ding ken mawhtirlonâk thilthawt pêk chu mi zawzawng tlûnah a hawng um. ¹⁹ Mi pakhat ê-aw ngâilonâk ruangah khan mi tamtak chu misual an hawng si rawh: chu hâwi ber hen mi pakkat ê-aw ngâinâk ruangah khan mi tamtak chu mi rep an hawng si lai. ²⁰ Chun, sual a lang khun ding hen Dân a hawng um nawlh sawm. Sikhawmsele, sual a pungnâk kipah Pathian zângfahnâk chu a pung khun tâwn. ²¹ Sual nih chun thihnâk hen lâi a rêl hâwitê hen Pathian zângfahnâk nih chun repnâk hen zungzâl nungnâk ting kho rê hen kan Lalpa Jisu Krist ruangah lâi a rêl khonâk ding hen.

¹ Zeise kan sim lai rawh ne? Zângfahnâk chu a pung khonâk ding hen sual hen nget ma kan um awt? ² Si lo e; kannih sual leikângah thi rawh mi, sual hen zeitin me kan nung kho nget lai rih? ³ Kan lakah Jisu ah baptis hen um mi vial tla chu a thihnâk ah baptis hen kan um ti nan theih lo ma? ⁴ Churuangah, a thihnâk ah baptis kan si chun a sinah phûm bâk hen kan um; Pa rokualnâk nih mithi lakah mi Krist a thawh hâwi hen khan, kannih khawm nungnâk thar a kan um khonâk ding hen. ⁵ A thihnâk va bangh hen amah hen kanna tlâi rawh asi chun, a thawknawlhnâk va banghpi khawm hen kanna tlâi ber asi. ⁶ Hi bang hi theih sele; kan minung li chu a sinah khenhbêk hen a um bâk rawh, sual put taksa chu tlâutir a um khonâk ding hen, tu thawk hen sual sal ah kan um lonâk ding hen. ⁷ Âuzawng thi rawh mi chu sual ah mi a suak rawh asi. ⁸ Chun, Krist sinah kan thi bâk rawh chun a sinah kan nung bâk lai ti kan lung asi; Krist chu mithi lakah mi thawh hen a um le, ⁹ a thi nawlh awt lo rawh ti kan theih; thihnâk nih chun amah tlûnah thu a nei lo rawh. ¹⁰ A thihnâk chu sual leikângah zungzâl rangah veikhat cho a thi asi, a nungnâk lam chu Pathian leikângah a nung asi. ¹¹ Chu hâwi ber hen nannih khawm sual leikângah thi rawh ah a ruat ule, Pathian leikângah lam chun Krist Jisu ah nung hen a ruat u. ¹² Churuangah, nan taksa duhzia nan zûlnâk ding hen nan taksa thi kho ah sualnâk nih lâirêl lah seh. ¹³ Nan taksa ṭeng tla khawm replonâk ruakhâu rang dingah sualnâk ah pêk siang lah u; khawmsele, mithi lakah mi nung nawlh hâwi hen Pathian sinah a pêk ule, nan taksa ṭeng tla khawm chu repnâk ruakhâu rang dingah Pathian sinah pêk siang dauh u. ¹⁴ Sualnâk nih nan tlûnah thu a nei awt lo rawh, Dân lâirêl hen um nan si lo le, zângfahnâk lâirêl hen um nan si dauh. ¹⁵ Zeitin asi lai ne? Dân lâirêl hen um kan si lo le, zângfahnâk lâirêl hen um kan si dauh ruangah kan sual ding ma si lai? ¹⁶ Si lo e; âu sin zawngah an thu zâwt ding hen to-aw ah nan lût chun, thihnâk rê hen sual to-aw mawh, repnâk rê hen thu zâwt to-aw mawh, a thu zâwt hen to-aw nan si ti nan theih lo mazei? ¹⁷ Khawmsele, sual to-aw tla si khawm ule, sîntir dân a sinah nanna pêknâk chu thinlung tatak hen nan zâwt hen, chun sual lakah mi suak hen nan um le, repnâk to-aw tla nan hawng si rawh; churuang chun, Pathian sinah lâwmthu um seh; nan taksa chak lo ruangah minung dân hen thu ka sim asi. ¹⁹ Nan taksa ṭeng tla chu nâwmtâmnâk ah leh buarnâk ding hen buarnâk sal ah nanna pêk siang hâwi khan, tuah nan taksa ṭeng tla chu thenhlimhnâk ding hen repnâk to-aw ah pêk siang u. ²⁰ Sual to-aw tla nan si liau khan repnâk lakah nanna lît asi. ²¹ Tuah nan thil zahpi mi lakah hin, kha liau khan rah zei me nan tawng tâwn? Khabang thu dawnghnâk kha thihnâk asi tâwn asi. ²² Tuah lam chun sual lakah mi lît hen nan um le, Pathian to-aw tla nan hawng si hi, thenhlimhnâk tawng phah rê hen rah nan nei asi, chu dawnghnâk ah zungzâl nungnâk hen. ²³ Sual man chu thihnâk asi; Pathian thilthawt pêk lam chu kan Lalpa Krist Jisu ruangah chun zungzâl nungnâk asi.

¹ Asi chun, unau tla, Dân nih chun mi a dam kar zawzawng a tlûnah lâi a rêl tâwn ti nan theih lo masi? Dân theih mi tla sinah ka sim asi hi. ² Nunau pasal nei chu a pasal dam kar zawzawng Dân nih a pasal lakah phuar hen a um tâwn; sikhawmsele, a pasal chu a thih lam chun a pasal leikângah Dân a mi chu thlah hen a um tâwn. ³ Chun, a pasal dam karah midang hen anna umh chun, "Ṭângdang pawmtâktu nu," an ti lai. A pasal a thih lam chun dân a mi chu thlah hen a um le, chun midang nei khawmsele ṭângdang a pawmtâk mi asi lo. ⁴ Chun, ka unau le tla, midang, Pathian leikângah kan rah khonâk ding hen mithi lakah a thawh mi ngelchel kha nan nei khonâk ding hen, Krist taksa ruangah Dân leikângah thah hen nan hawng um rawh. ⁵ Taksa ah kan um liau khan Dân ruangah duhnâk sual a hawng suak mi tla nih chun, kan taksa ṭeng tla ah thihnâk rê a rah ding hen a ṭuan tâwn. ⁶ Tuah lam chun hawng kan tleihtu lakah thi rawh hen, Dân lakah mi thlah hen kan um rawh, Dân rîn mi lampi li ah silo hen, Thlarau lampi ah rian kan ṭuan asi. ⁷ Zei me kan sim lai rawh ne? Dân chu sual masi? Si lo e! Sikhawmsele, Dân ruangah theih si lah sele chu sual kan theih lo ding mi; Dân nih chun, "Uh lah," ti lah sele chu uh hi kan theih lo ding mi. ⁸ Sikhawmsele, sualnâk nih thupêk ruang chun a dêngkhâwng liau tawng hen, uhnâk zeizawng ka sungah a umtir. Dân lo chun sualnâk chu a thi asi. ⁹ Chun, a lan khan kei dân lo hen ka nung le, sikhawmsele thupêk chu a hawng um kâ hen sual a hawng thawk le, ¹⁰ kei chu ka thi rawh. Chun, nungnâk ding hen thupêk chu thihnâk ding a hawng si ti ka theih rawh. ¹¹ Sualnâk nih thupêk ruang chun dêngkhâwng tik tawng hen hawng ka bum le, thupêk chu mang hen hawng ka thah rawh asi. ¹² Chun, Dân chu a thenhlimh asi, thupêk khawm a thenhlimh le, â rep le, a ṭha asi. ¹³ Asi chun, thil ṭha chu ka rangah thihnâk a hawng si masi? Si lo e! Sualnâk chu ka rang thihnâk a hawng si dauh rawh asi. Chun, sualnâk chu sualnâk asi ti a lang khonâk ding hen, thil ṭha chu mang hen a ka thah asi. Sualnâk chu thupêk ruang khan sual fâk tak asi khonâk ding hen. ¹⁴ Dân chu thlarau lei thil asi ti kan theih asi. Kei lam chu taksa leiah mi, sual sal ah zuar rawh mi ka si. ¹⁵ Thil ka ti mi hi a ngaihnâk ka theih lo. Ka ti tâwn mi hi ka thilti duhzia asi lo, ka thil huatkâng tak chu ka ti dauh tâwn asi. ¹⁶ Ka ti duhkâng chu ka ti asi chun, Dân chu a ṭha ti hen zâwt ka si lo lai mazei? ¹⁷ Chun, ka thilti hi keimah ti asi lo rawh le, sual keimah lakah a um mi nih a ti mi asi dauh. ¹⁸ Keimah lakah, chu chu ka taksa lakah tinâk asi, thu ṭha rerêng a um lo ti ka theih. Thil ṭha ti duhnâk chu keimah lakah a um narêng hen, thu ṭha tinâk lam chu a um lo. ¹⁹ Ṭhatnâk ti ka duh mi hi ka ti lo le, sualnâk ti ding ka duh lo mi hi ka ti dauh tâwn. ²⁰ Ka duh lo kâng chu ka ti asi chun, a titu chu kei ka si lo rawh le, sual keimah lakah a um mi chu asi dauh. ²¹ Chun, hi dân hi ka hawng theih rawh; thil ṭha ti ka duh liauah sualnâk ka lakah a hawng um tâwn asi. ²² Ka thinlung tak hen Pathian dân lakah ka lâwm tâwn. ²³ Sikhawmsele, ka taksa ṭeng tla lakah hin dân dang a um ti ka theih, chu nih chun ka thinlung dân a do le, ka taksa ṭeng tla lakah sualnâk dân a um mi sinah chun sal ah hawng ka ruai tâwn. ²⁴ Mi hamhkâi ka si chiammâm e! Hi thihnâk taksa lakah mi hi âu nih me hawng ka suah kho lai? ²⁵ Jisu Krist kan Lalpa ruangah Pathian sinah lâwmthu kan sim asi. Chun keimah tak nih chun ka thinlung hen Pathian dân rian ka ṭuan tâwn, ka taksa lam nih chun sualnâk dân rian a ṭuan tâwn.

¹ Chun, tu lam chun Krist Jisu ah um tla rangah chun mawhtirnâk rêng a um lo rawh. ² Krist Jisu ah nungnâk thlarau Dân nih chun sualnâk leh thihnâk Dân ah mi chu hawng kan suah rawh asi. ³ Taksa chaklonâk ruangah Dân nih ti kho lo mi chu Pathian nih a ti kho. Amah Fapa ngelchel taksa sual hâwi put hen sual bâwlnâk dingah hawng fial hen, taksa lakah sualnâk um mi chu mawh a phurhtir rawh asi. ⁴ Taksa Dân zâwt lo hen thlarau Dân zâwt dauhtu kanmah lakah hin Dân thuruat chu lîm hen a um khonâk ding hen. ⁵ Taksa Dân ah um mi tla nih chun taksa lei thil tla an duh tâwn. Thlarau lei Dân ah um mi tla nih chun Thlarau lei thil tla an duh tâwn. ⁶ Taksa lei thil tla duh chu thihnâk asi le, Thlarau lei thil duh lam chu nungnâk leh lungngamnâk asi. ⁷ Taksa duhkâng chu Pathian donâk asi ruangah chu chu Pathian Dân hen a um lo le, um khawm a um kho lo asi. ⁸ Chun, taksa ah um tla nih chun Pathian an lawmhtir kho lo. ⁹ Sikhawmsele, Pathian Thlarau nanmah lakah a um tatak chun taksa ah um nan si lo le, Thlarau ah um nan si dauh. Khawmsele, âukhawm Krist thlarau neilo mi chu amah lakah mi asi lo, ¹⁰ Krist chu nanmah lakah a um asi chun, sualnâk ruangah taksa chu a thi asi; thlarau lam chu Pathian repnâk hen mirep ah ruat nan si ruangah nungnâk asi. ¹¹ Sikhawmsele, mithi lakah mi Jisu thawhnawlhtu thlarau chu nanmah lakah a um chun mithi lakah mi Krist Jisu thawhnawlhtu nih khan nanmah lakah um mi Thlarau ruangah chun, nan taksa thi kho tla chu a nungtir lai. ¹² Churuangah unau le tla, bat kan nei; taksa duh dân ah um ding hen lam chun asi lo. ¹³ Taksa duh dân hen nan um chun nan thi ngelchel ding asi. Sikhawmsele, taksa thilti tla chu Thlarau ah nan thah tâwn chun nan nung lai. ¹⁴ Pathian Thlarau rui hen an um mi vial tla chu Pathian fa tla an si. ¹⁵ Lâu ah um nawlh ding hen to-aw sinâk thlarau nan tawng asi lo le, fa sinâk thlarau nan tawng asi dauh, chu thlarau ruangah chun ’Abba, ka Pa ti hen kan âu tâwn hi. ¹⁶ Thlarau ngelchel nih chun kanmah thlarau hen Pathian fa tla kan si ti hawng kan theihtir tâwn. ¹⁷ Chun, fa tla kan si chun ro tingtu tla kan si le, Pathian ro tingtu, Krist tingpitu tla kan si. Jisu kan tuarpi tatak chun a sinah chawnglawmh hen kan um bâk lai. ¹⁸ Tu liau tuarnâk tla hi, hi nûnah kan tlûnah rokualnâk langhtir ding mi hen chun tahṭhimh tlâk ah ka ruat lo. ¹⁹ Thilsiam zawzawng tla nih chun thungâi lungum bû hen Pathian fa tla hawng langhnâk chu thungâi an mawhlah asi. ²⁰ Thilsiam zawzawng tla chu thil salam thu thu a umtir ding hen an um rawh, mah duh hen um an si lo le, a umtirtu ruangah asi dauh. Chu lakah chun hi lungumnâk a um nget rih: ²¹ thilsiam zawzawng tla ngelchel khawm chu siatnak to-aw ah mi suah hen an um lai le, Pathian fa tla thawsuaknâk rokual ah chun an lût awt asi. ²² Thilsiam zawzawng tla chu tutiang hen rûm leh nau neih nganfâk tuar hen an um chiau asi ti kan theih asi. ²³ Chu cho asi lo, kannih ngelchel khawm Thlarau Pathian thilpêk nei masatu nih hin, fa kan sinâk, kan taksa tlanhnâk chu ngâk hen, kannih ngelchel khawm kan thinlung hen kan rûm bâk. ²⁴ Lungumnâk hen asi ruangsuah hen kan um mi hi; sikhawmsele, muh kho ko lungumnâk hi lungumnâk asi lo. Mi nih a muh kho ko mi chu zeirangah a lungum nget tâwn? ²⁵ Kan muh lo mi kan lungum asi chun kan ngâk rarâm tâwn asi. ²⁶ Chu hâwi ber hen, Thlarau nih chun kan chaklonâk tla a bawmh tâwn le; zei hâwi a thlacham ding me si ti kan theih lo; sikhawmsele, thlarau nih chun rûm sim kho lo rê hen thla hawng kan cham piak tâwn. ²⁷ Chun, Pathian duhzia hâwi vima hen mi thenhlimh tla chu thla a cham piak na tâwn ruangah, thinlung tla zauhtu nih chun Thlarau duhzia chu a theih tâwn asi. ²⁸ Chun, Pathian dâwttu amah ruat hâwi hen a kawh mi tla rangah chun ṭhatnâk ding hen zeizawng hen a ṭuan piak na tâwn ti kan theih. ²⁹ A theihkan mi tla chu amah Fapa hâwi tak hen um ding hen a ruatkan asi, a Fapa chu unau tamtak tla lakah fa tîr a hawng si khonâk ding hen. ³⁰ Chun, a ruatkan mi tla chu a kawh na le; chun, a kawh mi tla chu amah repnak ruangah mi rep a ruat hen an um chun, mi rep ah a ruat mi tla chu a chawnglawmh na. ³¹ Chubang thu lakah chun zei me kan sim lai ne? Pathian kan leiah â ṭang chun âu nih me hawng kan do kho lai? ³² A Fapa tak khawm zuah lo hen kan ektê ruangrûl ah pêktu nih chun thil zawzawng khawm a thawt hen hawng kan pêk sih awt lo masi? Pathian mi thîm tla chu âu nih phiar lai? ³³ Mawhtirlotu kha Pathian asi. ³⁴ âu nih annih rangah mawhtir kho na lai? Jisu Krist chu thihnâk thawk hen a thawk le, Pathian vawrhlei ah to hen, Pathian sinah hawng kan sim piaktu asi lo mazei? ³⁵ Krist dâwtnâk lakah thawk hen âu nih me hawng kan ṭhen kho lai? Hamhnâk nih mawh, ngaihsiatnâk nih mawh, nehsawhnâk nih mawh, pâmnâk nih mawh, takkaronâk nih mawh, ṭihnungkâinâk nih mawh, nâmsâu nih mawh hawng kan ṭhen kho lai ma? ³⁶ Pathian lasui thu nih, "Nangmah ruangah nî tlâk hen thah hen kan um tâwn, Dawrâ thah ding mi tla hâwi hen ruat kan si,’ ti hen a sim hâwi khan. ³⁷ Ṭhen lah e, chubang zawzawng lakah chun hawng kan dâwttu ruangah rokual tak hen nehtu kan si. ³⁸ Thihnâk tla nungnâk tla, vânmifial tla, lalnâk tla, thil umchia tla, thil hawng um ding mi tla, thiltikhonâk tla, ³⁹ sângnâk tla, thûknâk tla, thilsiam dang rerêng khawm nih, kan Lalpa Krist Jisu lakah um mi Pathian dâwtnâk ah mi chu hawng kan ṭhen kho lai lo ti dik tak hen ka theih.

¹ Krist ah chun thudik ka sim asi, ka âwkrâwl lo. Thlarau Thenhlimh zârah chun ka siat le ṭhat theihnâk khawm nih hawng ka theihpi le, ² ka thinlung ah hin hamhnâk fâk tak leh ngaihsiatnâk reh kho lo ka nei asi. ³ Ka unau le tla, taksa leiah ka phun tla ruangah kei hi Krist sinah mi dangtir kho rê hen anmah ruangah siat phurh hen um rê sele ka ti asi. ⁴ Pathian mi thîm tla an si le, fa sinâk, rokualnâk, thutiamnâk zawzawng tla an ta asi. ⁵ Pu tla chu an tâ asi bâk, taksa leiah Krist chu anmah thawk hen suak asi fâwn; anih chu thil zawzawng tlûnah mi, zungzâl sawr tlâk Pathian asi! Amen. ⁶ Sikhawmsele, Pathian thu chu zeikhawm lo hâwi a um asi lo le, Israel mi zawzawng tla khawm Pathian mi thîm an si ver lo. ⁷ Abraham thlâk tla an si khawmsele an ektê hen a fa tla an si ver lo, "Isak lakah hin na thlâk tla an ti lai," ti asi dauh. ⁸ Chu taksa dân mi fa tla chu Pathian fa an si lo, thutiam fa tla chu Abraham thlâk ah ruat an si dauh tinâk asi. ⁹ Thutiam chu hi hi asi: "A hun liauah ka hawng kal lai le, Sari nih chun fapa a ring lai," ti hi. ¹⁰ Chu cho asi lo le, Rebek nih mi pakhat kan pu Isak lakah phir a pâwi liau khan nau chu a hawng suak lânah, ¹¹ sia leh ṭha an ti lânah, thilti ruang silo hen, a kawhtu duh ruang si dauh hen, thîm leikâng thu ah Pathian thuruat chu a bir khonâk ding hen a sinah chun, ¹² "A upa dauh mi nih a ngâksia dauh mi rian a ṭuan lai," Pathian nih a ti kha. Pathian lasui thu nih, ¹³ "Jakob chu ka dâwt le, Esau lam chu ka hua," ti hen a sim hâwi khan. ¹⁴ Zei me kan sim lai rawh? Pathian lakah chun replonâk a um masi? A um rîlmâl loh. ¹⁵ Anih nih chun, "Ka zângfah mi chu ka zângfah lai le, khua ka ruatnâk lakah chun khua ka ruat lai," ti hen, Mosi sinah a sim mi kha. ¹⁶ Churuangah, a duhtu ruangah asi lo le, a titu ruangah asi lêm lo, a zângfahtu Pathian ruang asi dauh. ¹⁷ Pathian lasui thu nih Pharoa sinah chun, "Hi ruang hin ka nan dirh le, nangmah lakah chun ka thiltikhonâk ka zauhtir khonâk ding hen leh laikulh zawzawng ah ka min a thang khonâk ding hen," a ti asi. ¹⁸ Pathian nih a duh mi zawng a zângfah tâwn le, a duh mi zawng a lungkhungtir tâwn asi. ¹⁹ Nangnih chun, ka sinah, "Zeirang me a nan sâwi nget? A duhzia âu nih me kham tâwn?" na ti awt dahmawh. ²⁰ Asi, sikhawmsele, aw minung, Pathian êltu chu âu me na si le? Thilsiam nih chun a siamtu sinah, ’Zeirangah me hi hâwi hen na hawng ka siam?" a ti lai ma? ²¹ Valei tlang khat bêl pakhat sung tak hen, bêl pakhat sung lo tak siam ding hen belhêmtu nih chun nêng tlang tlûnah thu a nei lo masi? ²² Zângfahnâk bêl, rokual ding hen a timhtuah kanh tla lak chun, a zângfahnâk tam zia a zauhtir khonâk ding hen, thinthawknâk bêl veih tlâk tla tlûnah chun, Pathian nih thinthawk leh a thiltikhonâk langhtir duh khawmsele, â dawnh rarâm chun zei me pawi lai? ²⁴ Chu zângfahnâk bêl tla chu Juda tla lak mi cho silo hen, Phundang tla lakah mi khawm kawh an si. ²⁵ Hose lasuibu ah chun, "Ka mi tla si dah lo mi chu ’Ka mi tla’ ka ti lai. Phun ka dâwt dah lo mi tla chu ’Ka dâwt mi tla’ ka ti lai. ²⁶ Chun, hi hâwi hi asi lai le, an sinah, ’Ka mi tla nan si lo’ a tinâk mun takah chun, ’Pathian nung fa tla’ ti hen an um lai," ti rîn hâwi khan. ²⁷ Isai khawm nih Israel tla thu a phuang le, "Israel tla chu tisumsumriat ah sep zat hen tam khawmsele, a rêp bang cho chu ruangsuah hen an um lai. ²⁸ Lalpa nih chun rang tak a dih ziar hen tual tlûnah a rêp ding thu a lîm awt asi," a ti kha. ²⁹ Isai ber nih, "Thiltikho Lalpa nih chun chi thlâktu hawng kan zuah piak lah sele chu Sodom khua hâwi hen kan um lai rawh, Gomorah khua hâwi hen siam hen kan um lai rawh," ti hen a simkan hâwi khan. ³⁰ Zei me kan sim lai rawh ne? Phundang repnâk ṭhâwl lo tla nih chun repnâk an hawng phâk rawh asi--lungnâk ruangah repnâk chu. ³¹ Israel repnâk zûltu lam nih chun repnâk dân chu a phâk lo rawh. ³² Zei ruang ah me? Lungnâk hen an zûl lo le, thilti a tawng kho hâwi hen an zûl ruangah asi. Tlûknâk lung ah chun an tlu le, ³³ Pathian lasui thu nih: "Zauhnik, Zion ah chun tlûknâk lung leh khamnâk lungpi ka siah le, âuzawng amah lungtu vial chu an lungdawng lai loh," ti hen a sim hâwi khan.

¹ Ka unau tla, ka thinlung duhzia leh ka mi tla rangah Pathian sinah ka thlachamnâk san chem chu ruangsuah hen an um khonâk ding chu asi. ² Pathian leiah ṭhanemsemse an ngâi ti ka theihpi asi, theih rangtling hâwi lam chun an ruat lo. ³ Pathian repnâk theihlo hen, mah repnâk birhtir tum hen, Pathian repnâk ah anna pek lo. ⁴ Krist chu a lungtu tla vial rangah repnâk an nei khonâk ding hen Dân birhtirtu asi. ⁵ Mosi nih chun "Dân ah repnâk zâwttu chu, chu repnâk ruangah chun an nung lai," ti hen a rîn. ⁶ Lungnâk ah repnâk lam nih chun hi hâwi hen a sim: "Nan thinlung ah, ’âu me vân ah kâi lai?’ mawh (chu chu tlûnlei thawk hen Krist hawng ṭumpi ding tinâk asi), ⁷ âu me mithi khua ah ṭum lai?’ mawh (chu chu mithi lakah thawk hen Krist kâipi ding tinâk asi), ti lah u,’ ti hen. ⁸ Asi chun zei me a sim? "Thu nih chun a nan naih, na kâ leh na thinlung khawm ah a um," ti hen a sim asi; chu chu lungnâk thu kan sim tâwn mi hi asi. ⁹ "Na kâ hen Jisu chu Lalpa asi ti na ṭanh hen, mithi lakah mi Pathian nih a thawh ti na thinlung ah na lung chun ruangsuah hen na um lai," ti hen. ¹⁰ Mi leh nih thinlung hen an lung le, repnâk an tawng tâwn; kâ hen an ṭanh le, ruangsuahnâk an tawng tâwn asi. ¹¹ Pathian lasui thu nih, ’’Âuzawng amah lungtu vial an mualpho lai loh," a ti asi. ¹² Juda leh Phundang tla chu zeikhawm ah anna dang lêm lo, Lalpa pakhat an ektê tlûnah Lalpa asi le, a lamtu vial tla tlûnah ṭhatnâk tamtak a nei. ¹³ "Âuzawng Lalpa min lamtu vial tla chu ruangsuah hen an um lai," ti asi. ¹⁴ Asi chun, an lung lo mi chu zeitin an lam lai? A thu an theih lo mi chu zeitin an lung lai? Thusimtu um lo hen zeitin an theih lai? ¹⁵ Fial an si lo chun zeitin thu an sim lai? "Thâwngthâng Ṭha simtu tla hawng kal chu a chê a!" ti hen Pathian lasui thu nih a sim hâwi khan. ¹⁶ Sikhawmsele, Thâwngthâng Ṭha chu an ektê hen an lung ver lo. Isai nih, "Lalpa kan thusim âu nih me lung?" a ti ruangah. ¹⁷ Chun, lungnâk chu theihnâk ruangah a hawng um le, chun theihnâk chu Krist thu ruangah a hawng um. ¹⁸ Sikhawmsele, ka deih le: Thu an theih lo mi hi a dik tak ma? Theih ta a, Pathian lasui thu nih a sim hâwi khan: "An hâu chu ram kipah a thang le, an thu kâwlkil tiang hen a thang rawh," ti hen. ¹⁹ Chun, ka deih nawlh le: Israel mi tla nih an theih lo masi? Mosi chu sângtu ding masachem asi: "Phun ah rêl tlâk lo mang hen, ka nan thîktir na awt; phun fing lo tla chu mang hen nan thin ka nan thawktir na awt," ti hen. ²⁰ Chun, Isai nih râlṭha tak hen, "An ka hâwl lo mi tla tawng hen ka um le, an ka lam lo mi tla sinah theihtir hen ka um," ti hen a sim. ²¹ Sikhawmsele, Israel mi tla thu lakah chun, "Mi ê-aw ngâilo leh hel mang tla rangah nî tlâk hen anmah lawmh duh hen ka bân ka phar tâwn kha," a ti.

¹ Asi chun, Pathian nih a mi tla chu a lawnh masi? Lawnh lo e! Kei khawm Israel mi, Abraham thlâk Benjamin phun ka si. ² Pathian nih a theihkan mi tla chu a lawnh lo. Pathian lasui thu nih Elija thu a sim mi hi nan theih lo ma? Anih nih chun Israel mi tla thu Pathian sinah a tlunh le, ³ Lalpa, na khuavâng tla an thah le, na mâichâm tla an chimtir. Keimah lâwng ka um rih le, kei khawm thah an ka tum asi," a ti mi hi. ⁴ Sikhawmsele, Pathian nih zeitin me a sâng? "Baal mâika ah siksidîr dah lo mi sâng sarih keimah rangah ka zuah ko asi," ti hen a sâng. ⁵ Chu hâwi ber hen, tuliau khawmah, zângfahnâk ruangah Pathian nih a thîm na mi tâwm an um. ⁶ Zângfahnâk ruangah asi chun thilti ruangah asi lai lo rawh. Chu hâwi asi lo chun, zângfahnâk hi zângfahnâk asi lai loh. ⁷ Zeitin asi lai rawh ne? Israel mi tla nih chun an hâwl mi chu an tawng lo le, thîm mi tla lam nih chun an tawng le, a dang zawzawng tla chu an mawlâwt ver rawh asi. ⁸ "Pathian nih tusûn tiang hen ihmu suaknâk thlarau a pêk le, muh kholonâk mit tla, theih kholonâk nâ tla hen," ti rîn hâwi khan. ⁹ Chun David nih chun, "Chun an puai tla chu an rangah thang leh tleihtu, tlûknâk leh rêpnâk hawng si seh. ¹⁰ An muh kholonâk ding hen an mit tla hawng chaw seh, zeiliau zawngah anna hamhnâk ah an kêng kûntir kumza na," a ti. ¹¹ Asi leh, Juda tla an tlû liauah an siatnâk ah an tlû pawt mi ma si lai? Chu hâwi si loh! An tlû ruangah Phundang tla sinah chun ruangsuahnâk a hawng tlung dauh lehlam asi, Israel mi tla thîktir na ding hen. ¹² Churawhchun, Juda tla sualnâk chu laikulh neihsiahnâk asi, chun an thlarau ngâkṭahnâk chu Phundang tla rangah neihsiahnâk asi. An rangtlingnâk châng chu neihsiah khunnâk si lai. ¹³ Churawhchun, nannih Phundang tla sinah ka sim asi, kei Phundang tla sinah fial ka si ruangah, ka phun tla ka thîktir kho râmnâk ding hen leh an lakah zeimaw mi tla ruang ka suah kho na nâk ding hen ka rianṭuannâk hi ka putso asi. ¹⁵ Lawmh lo an si liau men ah laikulh chu Pathian hen hâwi tla ah siam hen an um chun anmah tla lawmhnawlhnâk ding chu thihnâk ah mi nung nawlhnâk lo chu zei me si lai? ¹⁶ Chun, sang sêu masa mi chu a thenlimh chun a tlang khawm chu hâwi a thenlimh asi, chun a ram chu a thenlimh chun ṭeng tla khawm chu hâwi ber asi. ¹⁷ Chun a ṭeng zeimaw mi chu khiak hen a um chun nang, Phundang, oliv suak si hen, Juda lakah peh hen na um le, oliv thing ah ṭhatnâk ram va a bâwm bâk mi na si chun ṭeng dang lakah chun a zûm lah. ¹⁸ A zûm khawm le, nang a ram châwmtu na si lo le, a ram chu a nan châwmtu asi dauh. ¹⁹ Chun, nangnih, "Peh hen ka um khonâk ding hen ṭeng tla khiak hen an um rawh," na ti lai. ²⁰ Hi hi a dik asi: An lunglonâk ruangah khiak hen an um le; nang na lungnâk ruangah na dîr asi. ²¹ A zûm lah le, ṭih lehlam rawh: Pathian nih ṭeng tatak tla chu a zuah lo chun, nang khawm a nan zuah lai loh. ²² Chun, Pathian ṭhat zia leh ṭihnung a kâi zia chu ruat nik; a tlû mi tla rangah chun ṭihnung a kâi le, nang rangah lam chun a ṭha asi, a ṭhatnâk ah na um ko chun; chu lo chun nang khawm sah hen na um lai. ²³ Chun, Juda tla khawm chu lunglo hen an um kumza lo chun, peh hen an um lai; Pathian nih anmah tla a peh nawlh kho na asi. ²⁴ Nang oliv suak rerêng lakah mi tan phak mi men, suak dân lo hâwi hen oliv thing ṭha ah peh hen na um chun chubang a ṭeng tatak tla chu anmah oliv thing lîlâ ah chun peh an si tuktarâi lai. ²⁵ Unau le tla, thuthup hi nan theih loh ka duh lo, chu lo chun nanna fingtir lai le; Phundang tla rangtlingnâk a hawng tlung lân lo chu Israel mi zeimaw mi tla tlûnah thinlung changnâk a hawng tlung rih asi, ti hi. ²⁶ Chun, Israel mi zawzawng ruangsuah hen an um ding zia chu hi hi asi: Pathian lasui thu nih, "Zion thawk hen ruangsuahtu a hawng suak lai le, Jakob thlâk tla thawk hen Pathian sunhsaklonâk a tlâutir lai. ²⁷ Chu chu an sinah ka thutiam ding chu asi, an sual tla ka lâk tik chun," ti hen a sim hâwi khan. ²⁸ Thâwngthâng Ṭha lei dawn chun nanmah tla rangah mêlma an si le, thîm leikâng thu ruat lam chun thlâktu tla ruang khan duhtak tla an si. ²⁹ Pathian nih a thilthawt pêk ah leh a kawhnâk ah chun a thinlung a lêt dah lo. ³⁰ Nannih Phundang tla rangah lam chun, tuan chun Pathian thu nan ngâi lo le, sikhawmsele tuah lam chun, Juda tla nih an ngâilo ruangah Pathian khuaruatnâk nan tawng asi. ³¹ Chu hâwi ber hen tuah chun Pathian nih khua a nan ruat na ruangah hin, khuaruatnâk nan tawng khonâk ding hen, Juda tla khawm nih Pathian thu an ngâi rawh asi hi khuaruatnâk an tawng bâk nâk ding hen. ³² Pathian nih khua a ruat ver na kho ding hen mi zawzawng chu lunglonâk ah a khumh ver rawh. ³³ Pathian finghnâk leh theihnâk tam zia chu a thûk a! A lâirêlnâk tla chu theih kho lo leh a lampi tla chu zâwt kho mi zât asi lo chiam e! ³⁴ Lalpa thinlung chu âu nih me theih? Remruat piaktu ah an a ṭang rawh? ³⁵ Rulhnawlh ding khawm hen a sinah âu nih thu pêk masa? ³⁶ Amah thawk hen leh amah ruangah leh amah sinah thil zawzawng a hawng um asi; amah sinah chun zungzâl hen rokualnâk um seh! Amen.

¹ Chun, unau le tla, Pathian khuaruatnâk ruangah hin bâwlnâk nung leh thenhlimh leh Pathian lawmh tlâk si ding hen nan taksa chu pêk ding hen ka nan ngiar na asi, chu chu nan rianṭuan ding rêng asi. ² Hi laikulh dân hâwi hen um lah ule, Pathian duhzia a ṭha leh lawmh tlâk leh ṭhat rangtling chu nan theihfiang khonâk ding hen nan thinlung a thar a um hen hawng a dang dauh u. ³ Pathian nih a ka pêk mi zângfahnâk ruangah hin nan lakah âukhawm mah umdân tâwk nûnlêm ah sung-û tir lo hen, Pathian nih mikip sinah lungnâk tâwk a pêk hâwi vima hen rep tak a ruat dauh ding hen ka nan ti chiam na. ⁴ Taksa pumkhat ah ṭeng tamtak nan nei, ṭeng zawzawng thilti lam chu â bang lo le, ⁵ chu hâwi ber hen, kannih tamtak sikhawmsele, Krist lakah chun taksa pumkhat kan si le, pakhat khat hen a ṭeng tawnh chiau kan si. ⁶ Zângfahnâk hawng kan pêk hâwi vima hen thilthawt pêk dang dang kan nei chiau le, thusim ding asi chun, kan lung tâwk hâwi vima hen kan sim lai; ⁷ rianṭuan ding asi chun rian kan ṭuan thlir lai; sîntirtu khawm nih sîntir thlir seh. ⁸ Fawrhtu nih chun fawrh thlir seh, thilpêktu nih chun ûi lo hen pêk seh; lâirêltu nih taimâk suah tak hen rêl seh; mi vêlneitu nih lâwm tak hen vêlnei seh. ⁹ Dâwtnâk chu perpetnâk tel lo hen si seh. Sual lei chu hua ule, ṭhat lei chu tleih thlir u. ¹⁰ Unau tla siherh leikângah chun siherh tak hen a siherh tawnh chiau u. ¹¹ Chawnglawmh leikângah chun a duh piak tawnh ule; taimâk suah leikângah chun zângzê lah ule, thlarau leikângah chun ṭhanemsemsê ngâi ule, Lalpa rianṭuan u. ¹² Lungumnâk leikângah chun a lâwm ule, hamhtuar leikângah chun felfê ule, thlachamnâk leikângah chun thlacham kumza ule; ¹³ mi thenhlimh tla samhphângnâk ah chun, ṭangpi ule, khual tla rangah lawmh kumza na u. ¹⁴ An nehsawh natu chu malsâwm na ule; hawlhsiat chu barh lah u. ¹⁵ Â lâwm mi tla chu lâwmpi ule, a ṭap mi tla chu ṭappi u. ¹⁶ Dawnruat munkhat hen a um tawnh u. A Sung-û tir tuk lah u, nauta tla kawmh dauh na u. A fingtir lah u. ¹⁷ Âu sual khawm sual hen rulh lah u. Mi zawzawng ngaih hen thil dawh ruatkan u. ¹⁸ Ti kho asi chun, nangmah lei tal mi zawzawng hen rem hen um u. ¹⁹ Duhtak le tla, nan phû lam lah u, "Keimah nih lehrûl ka sam lai, Lalpa nih a ti," ti rîn asi. ²⁰ Churuangah, na mêlma a sung a vâng chun, ei ding pêk rawh, a tî a hâl chun, din ding pêk rawh; chu hâwi na ti chun a thilti diklonâk tla lakah na mualphoh kho lai. ²¹ Sual neh hen um lah ule, ṭhatnâk hen sual chu neh dauh rawh.

¹ Mi kip an tlûnah lâirêltu thu thu hen um na seh. Pathian thu lo hen âukhawm lâirêltu an um lo; lâirêltu an um mi tla hi Pathian ruat an si. ² Churuangah, âuzawng lâirêltu êltu chu Pathian ruat dotu an si; a dotu tla nih chun anmah tlûnah lâirêlnâk an tawng lai. ³ Lâirêltu tla chu thil ṭha titu rangah chun ṭihnung a kâi lo le, thil ṭha lo titu rangah lam chun ṭihnungkâi an si. Asi chun lâirêltu ṭih lo hen um na duh ma? ⁴ Thil ṭha ti le, a sawr na tawng lai; anih chu na ṭhatnâk ding hen Pathian rianṭuantu asi. Khawmsele, thilsual na ti chun, ṭih rawh, rêp ding hen a thiltikhonâk chu a tak asi ruangah. Anih chu Pathian rianṭuantu, thilsual titu tlûnah thinthawk hen phu lamtu asi. ⁵ Churuagah, thinthawk ṭih ruang ko silo hen na siat leh ṭhat theihnâk ruang khawmah lâirêltu thu thu hen na um ding rerêng asi. ⁶ Hi ruangah hin siah khawm na châwi tâwn khateh; chu hâwi thil tak ti rarâm ding hen Pathian rianṭuantu an asi. ⁷ Mi zawzawng sinah pêk ding mi vial pêk u; tual man pêknâk ding mi sinah chun tual man pêk ule, siah châwinâk ding mi sinah chun siah châwi ule; zah ding mi chu zah u, chawnglawmh ding mi chawnglawmh u. ⁸ A dâwt tawnhnâk cho lo chu âu sin khawmah zeikhawm a bat lah u; mah minung hâwi dâwttu nih chun Dân chu a zâwt kim rawh asi. ⁹ Hi bang, "Ṭângdang pawmtâk lah, mi thah lah, fîr lah," ti leh, thupêk dang um mi rerêng tla hi. "Nangmah na dâwt hâwi hen na zâwlbâwm tla na dâwt ding asi," ti nih hin a put ver asi. ¹⁰ Dâwtnâk nih zâwlbâwm tla a râwk dah lo; churuangah dâwtnâk hi Dân zawh rangtlingnâk asi. ¹¹ Tuliau thil umzia nan theih ruangah leh it mi tla ṭhangh tik asi tatak rawh ti nan theih ruangah chu chu ka sim asi; tuah chun kan lung tîr ngâk hen khan kan ruangsuahnâk chu a nâi dadauh rawh. ¹² Zân hi a ral dêngmâng rawh le, khua a dei awt rawh; churuangah, mûi thilti chu lawnh sele, chêu thuam hen kanna thuam lai. ¹³ Sûn ah um hâwi hen dawh tak hen kan um lai, zû din nawk leh zû rî a um lo hen, hur leh a duh a um lo hen, sual leh a nahsuah a um lo hen. ¹⁴ Lal Jisu Krist râlthuam hen chun a thuam dauh ule, nan taksa duhnâk zawh ding hen zeikhawm a siam lah u.

¹ Chun, lungnâk ah chak lo mi chu a zumhmaihnâk tla simsâwi lo hen lawmh u. ² Mi pakhat nih thil zeizawng hi ei kho hen a ruat le, mi chak lo lam nih chun thlâi ko a ei tâwn. ³ Zeizawng a ei mi nih chun a ei lo mi zauhnawmh lah seh; a ei lo mi khawm nih a ei mi chu simsâwi lah seh: Pathian nih anih chu a lawmh rawh asi. ⁴ Midang to-aw simsâwitu chu âu me na si? A dîr leh a tlûk chu amah hotu rang asi. Sikhawmsele, anih khawm dîrtir hen a um lai, Lalpa nih chun a dîrtir kho asi. ⁵ Mi pakhat nih ni khat hi ni dang ngâk hen a sung-û tir tâwn le, midang nih ni zawzawng hi bang ver hen a ngaih tâwn asi. ⁶ Mi kip mah thinlung lakah a theihthiam seh. Ni ulhtu nih chun Lalpa chawnglawmhnâk ding hen a ulh tâwn asi. Chun, zeizawng eitu nih chun, Pathian sinah lâwmthu a sim ruangah Lalpa chawnglawmhnâk ding hen a ei tâwn; a ei lotu khawm nih chun Pathian sinah lâwmthu a sim le, Lalpa chawnglawmhnâk ding hen a ei lo tâwn asi. ⁷ Âukhawm mah rangah nung kan si lo le, âukhawm mah rangah thi kan si ber lo. ⁸ Kan nung chun Lalpa rangah kan nung le, kan thih khawm Lalpa rangah kan thi asi; churuangah, kan nung khawmah, kan thi khawmah, Lalpa tâ kan si. ⁹ Krist thihnâk leh a hawng nung nawlhnâk san chu, minung leh mithi Lalpa asi khonâk hi asi. ¹⁰ Sikhawmsele, nangnih zeitin na unau na sâwi zia? Asi leh, nangnih zeitin zia na unau na zauhnawmh? Pathian lâirêlnâk tophah mâika ah kan ektê hen kan dîr awt asi. ¹¹ Pathiau lasui thu nih, "Lalpa nih chun, Pathian nung ka si ruangah mikip ka mâika ah an kûn lai le, lei kip khawm nih Pathian ka si zia a phuang lai," ti hen, a sim hâwi khan. ¹² Chun, kan ektê hen Pathian sinah mah thâwngthâng kan sim chiau ding asi. ¹³ Churuangah, kanna sâwi lai lo rawh. Chu ngâk chun, âukhawm nih mah unau khamnâk mawh tlûknâk mawh siam lo a tum dauh u. ¹⁴ Amh lak cho chun thianglo zeikhawm a um lo ti Lalpa Jisu ah chun thungâi ka theihfiang, zeimawh thiang lo hen ruattu rang chun amah rang chun a thiang lo asi. ¹⁵ Na zei lo ei ruangah na unau thinlung a fâk chun dâwtnâk dân na zâwt lo rawh asi. Amah ruangrûl ah Krist a thih piak mi chu na zei lo ei nih veih lah seh. ¹⁶ Chun, na rangah ṭhatnâk chu sual leiah sim hen um lah seh; ¹⁷ Pathian Ram chu din leh ei thu asi lo le, repnâk tla, remnâk tla, Thlarau Thenhlimh lâwmnâk tla asi dauh. ¹⁸ Âuzawng chubang thu lakah chun Krist rianṭuan chu Pathian lawmhkâng leh minung sawr hen a um tâwn asi. ¹⁹ Chun, remnâk ding leh a ṭhattir tawnhnâk thu tla chu kan ṭhâwl lai. ²⁰ Na zei lo ei ruangah Pathian rianṭuan râwk lah. Thu zawzawng a thenhlimh ngâk, sikhawmsele, a zei lo ei nih mi a thlûk chun a eitu rangah sual asi. ²¹ Na unau tlûknâk ding asi chun, sa ei lo tla, uain din lo tla, thil zeizawng khawm tilo a ṭha asi. ²² Lungnâk na nei mi chu Pathian mâika ah nangmah cho theih hen nei ko rawh. Mah nih ṭha ti leikângah mawh hen â ruat lo mi chu a thaw a suak. ²³ Khawmsele, zumhmaihtu nih a ei chun, lungnâk hen a ei lo ruangah mawh hen a um asi; zeizawng lungnâk lo hen ti chu sual asi.

¹ Chun, kannih lungnâk ah mi chak tla nih hin mah lawmhnâk hâwl lo hen, mi chak lo tla ṭangpi leh ritphurh sâwng na ding asi. ² An ṭhatnâk ding hen mah zâwlbâwm tla lawmhtir cho si lo hen Thlarau ah ṭhanglian tir na kan tum chiau lai. ³ Krist khawm nih mah lawmhnâk a hâwl lo. "Nangmah fâitu tla fâinâk chu keimah tlûnah a tlâ," ti rîn hâwi khan asi dauh. ⁴ Pathian lasui thu ah felfênâk leh lungngamnâk tawng hen lungumnâk kan nei khonâk ding hen, tuan liauah rîn mi tla chu kanmah hawng kan sîntirnâk ding asi ruangah. ⁵ Chun, kan Lalpa Jisu Krist Pa leh Pathian chu thinlung munkhat leh thurual a kan chawnglawmh khonâk ding hen, felfênâk leh lungngamnâk Pathian nih chun Krist Jisu sim hâwi hen, thinlung munkhat put hen a nan umtir na seh. ⁷ Churuangah, Krist nih chun Pathian rokualnâk ding hen a nan lawmh na mi hâwi khan a lawmh tawnh u. ⁸ Hi hi ka sim asi: Thlâktu tla sinah thutiam tla kha birhtir ding leh a zângfahnâk ruangah Phundang tla nih Pathian an chawnglawmh khonâk ding hen, Pathian thu a dik ti theihtirnâk ding hen Krist chu fêmtan tla rianṭuan ah a hawng um le; Pathian lasui thu nih: "Churuangah, Phundang tla lakah ka nan sawr lai le, na min chawnglawmhnâk ding hen la ka sak lai," ti hen, a sim hâwi khan. ¹⁰ Chun, a sim nawlh le: "Nannih Phundang zawzawng le tla, a mi tla hen a lâwm u," ti hen. ¹¹ Chun, "Nannih Phundang zawzawng le tla, Lalpa chu sawr u; mi zawzawng khawm nih amah sawr seh," a ti nawlh. ¹² Chun, Isai nih, "Jese zung leh ram chu a um lai le, Phundang tla Lal ah um ding hen a hawng suak ding chu a um fâwn lai; anih chu Phundang tla nih chun an lungum san lai," a ti nawlh ber. ¹³ Thlarau Thenhlimh thiltikhonâk zârah lungumnâk nan nei tam khonâk ding hen, lungumnâk Pathian nih chun nan lung ruangah lâwmnâk leh remnâk chi kip hen a nan khattir na seh. ¹⁴ Chun ka unau le tla, nanmah tla thu chu nanmah ngelchel ṭhatnâk hen nan khat hen, finghnâk chi kip nan nei hen, nun nanna simh tawnh kho ti keimah ngelchel nih dik tak hen ka theih. ¹⁵ Sikhawmsele, Phundang tla lakah Krist Jisu rianṭuantu ah ka um khonâk ding hen Pathian nih hawng ka pêk mi zângfahnâk ruangah hin a nan theihpi na ding hen zeimaw kar lakah râlṭha dauh hen ka rîn asi. Ka ap mi Phundang tla chu Thlarau Thenhlimh nih thenhlimhtir mi an si le, lawmh tlâk an si khonâk ding hen Pathian Thâwngthâng Ṭha leikângah bâwlpu rian ka ṭuan asi. ¹⁷ Chun, Pathian leikângah Krist Jisu ah putso ding ka nei asi. ¹⁸ Krist nih Phundang tla lungtir ding hen, thusim leh thilti hen, singsiahnâk tla leh thilchê tla, Thlarau Thenhlimh thiltikhonâk ah chun, keimah mang hen a thilti tla cho lo chu zeikhawm sim ka ngamh loh. Jerusalem khua leh a kiangkam ram thawk hen, Ilurikon ram tiang hen, Krist Thâwngthâng Ṭha chu ram kipah kim hen ka sim rawh; keimah mang hen a thilti chu chu tluk asi. ²⁰ Asi, midang lungphûm tlûnah dirh ka si lonâk ding hen, Thâwngthâng Ṭha chu Krist min lam rawh nâk mun ah sim lo hen, ²¹ Pathian lasui thu nih: "A thâwngthâng sim dahlonâk mi tla nih chun, an muh lai le, theih dahlo mi tla nih chun an theih lai," ti hen a sim hâwi khan, sim ka tum dauh tâwn asi. ²² Churuang tak chun asi, nan sinah hawng kal ding ka tlawlh kumza tâwn mi chu. ²³ Tuah lam chun, hi ram kiangkam ah hin ṭuannâk mun rerêng ka nei lo rawh le, kum tamtak chu nan sinah hawng kal ding duh hen ka um rawh le, ²⁴ Spain ram ah ka kal tik zawngah kal pah hen a nan muh na ding ka lungum le, nanmah tla chim rang hen a nan kawmh tâ na rih sele, chu leiah ka kalnâk ah chun nannih tla nih nan ka thlah ding hen ka lungum. ²⁵ Tuah lam chun, mi thenhlimh tla rianṭuan ding hen Jerusalem khua ah ka kal awt rih asi. ²⁶ Makedonia leh Gris ram ah mi tla nih chun lungâwi tak hen Jerusalem khua ah mi thenhlimh tla a pâm mi tla rangah sum an thawh rawh asi. ²⁷ Asi, lungâwi tak hen an ti asi, an lakah anna bat rêng asi, Phundang tla nih an thlarau lei thilti tla an bâwmpi na asi chun, laikulh lei thil hen anmah tla ṭangpi bâk rûl a herh rêng asi. ²⁸ Churuangah, chu chu ka ti hen, rah khawm chu anmah tla fiang tlo hen ka muhtir na thluh chun, nanmah tla pal hen, Spain ram ah ka kal vima lai. ²⁹ Chun nan sinah ka hawng kal tikah Krist malsâwmnâk rangtling put hen ka hawng kal lai ti ka theih. ³⁰ Unau le tla, thla nan ka cham piaknâk ah chun, Judai ram ah lunglo tla lakah ka him khonâk ding hen leh Jerusalem khua rang dingah ṭangpinâk ka put mi hi mi thenhlimh tla lawmhkâng tak asi khonâk ding hen thla hawng ka champi rarâm ding hen Lalpa Jisu Krist leh Thlarau Thenhlimh dâwtnâk hen ka nan ngiar chiam na; ³² Pathian rem tih hâwi hen lâwptlo tak a nan sinah ka hawng kal hen kanna panhlâu rual khonâk ding hen. ³³ Remnâk Pathian chu nan ektê sinah um seh. Amen.

¹ Kan farnu Phoibi Kenkria khua ah kawhmi rianṭuantu hi, Lalpa min hen mi thenhlimh tla hâwi ber hen nan hawng lawmh ding ² leh nan bawmh a herhnâk kipah bawmh ding hen an meltheihtir na ka duh asi. Amah ngelchel khawm hi mi tamtak bawmhtu a hawng si tâwn le, keimah ngelchel khawm a ka bawmh asi. ³ Priskili leh Akuila, Krist Jisu ah ka rianṭuanpi, ka nungnâk, ⁴ humnâk dingah ngâwng dawnh tla kha chibai hawng ka bûk piak; kei cho silo hen, Phundang kawhmi murui zawzawng khawm nih an sinah lâwmthu an sim asi. ⁵ An in ah kawhmi tla anna pûm mi tla chu chibai hawng ka bûk piak na ber u. Ka duhtak Epainita, Asia ram ah Krist lung masachemtu kha chibai hawng ka bûk piak u. ⁶ Mari, nan rangah hamh tak a ṭuantu kha, chibai hawng ka bûk piak u. ⁷ Ka hâwi Juda mi, Andronika, leh Junia, ka rêngtlâpi tla kha chibai hawng ka bûk piak u; annih chu mifial tla lakah minthang tak an si le, ka ruangrûl ah Krist lakah um masa dauh an si. ⁸ Ampliata, Lalpa ah ka duhtak kha, chibai hawng ka bûk piak u. ⁹ Krist ah ka rianṭuanpi Urbana leh ka duhtak Stakua chibai hawng ka bûk piak u. ¹⁰ Krist lakah mi tak, Apelis kha chibai hawng ka bûk piak u. Aristobulas dâwngsung tla lakah mi kha chibai hawng ka bûk piak u. ¹¹ Ka phun Herodion kha, chibai hawng ka bûk piak u. Narkisa dâwngsung lakah mi, Lalpa lakah um mi tla kha chibai hawng ka bûk piak u. ¹² Trufaina leh Truphosa Lalpa a rian hamh tak a ṭuan tâwn tla kha chibai hawng ka bûk piak u. Duhtak Parsi, Lalpa lakah hamh tak hen rianṭuan rawh mi kha, chibai hawng ka bûk piak u. ¹³ Lalpa lakah thîm mi Rufa leh a nu, ka nu bâk kha, chibai hawng ka bûk piak u. ¹⁴ Asunkrita tla, Phlegon, Hermi tla, Patroba tla, Herma tla, an sinah, unau um tla hen khan, chibai hawng ka bûk piak u. ¹⁵ Philologa leh Juli hen, Neria leh a farnu hen, Olimpa hen, an sinah mi thenhlimh um mi zawzawng hen khan, chibai hawng ka bûk piak u. ¹⁶ Chawchawk thenhlimh hen chibai a bûk u. Krist kawhmi murui zawzawng nih chibai an bûk na asi. ¹⁷ Chun, unau le tla, sîntirnâk thu nanmah sîn lo leikângah ṭhennâk leh tlûknâk siamtu tla chu ṭha dek a vêng ding leh hawitâk ding hen ka nan ngiar na. ¹⁸ Chu hâwi mi tla nih chun kan Lalpa Krist rian an ṭuan lo le, anmah paw rian an ṭuan dauh tâwn; an kâ ṭhatnâk leh an hawlh thiamnâk hen mi fing lo tla thinlung an perpet tâwn. ¹⁹ Nan lung zia chu mi zawzawng lakah a thang rawh ruangah. Churuangah, nanmah leikâng thu ah ka lâwm asi; khawmsele chu, ṭha leikângah chun nan fing hen sual leikângah nan fing lo ka duh asi. ²⁰ Chun, remnâk Pathian nih chun nan kêzaphah tangah Setan chu a nan lamhbêktir sawm na lai. Kan Lalpa Jisu Krist zângfahnâk chu nan sinah um seh. ²¹ Ka rianṭuanpi Timothe leh ka phun hâwi Lukia tla, Jason leh Sosipater tla nih chibai an bûk na. ²² Kei, Tertia, hi lasui rîntu nih hin, Lalpa min hen chibai ka nan bûk na. ²³ Kei leh kawhmi tla tlungnâk in dâwngpupa Gaia nih chun chibai ka nan bûk na. Khuasung sum zauhkhenhtu Erasta leh kan unaupa Kuarta nih chun chibai an bûk na. ²⁴ Kan Lalpa Jisu Krist zângfahnâk chu nan ektê sinah um seh. Amen. ²⁵ Ka Thâwngthâng Ṭha leh Jisu Krist thusim hâwi hen, thuthup phuangnâk hâwi hen, chu thuthup chu zungzâl thawk hen â thup tâwn. ²⁶ Tuah lam chun langhtir asi le, lungnâk chu a zûl khonâk ding hen, zungzâl Pathian thupêk hâwi vima hen khuavâng tla lasui thu hen phun kip sinah theihtir asi rawh. ²⁷ Nannih an birhtir kho natu Pathian fing sinah cho Jisu Krist ruangah zungzâl hen rokualnâk um seh! Amen.