THUPHUANG

THUPHUANG

¹ Jisu Krist thuphuang, Pathian nih a to-aw tla theihtir ding hen a sinah a pêk mi, thu hawng um sawm ding mi thu chu asi. Chu chu, a vânmifial mang hen, a to-aw Johan a hawng theihtir le, ² chu Johan nih chun Pathian thu leh Jisu Krist theihtirnâk thu leh a thilmuh tla chu a theihtir. ³ Hi simhkannâk thu rêltu leh ngâitu leh a sungah thu â rîn mi pawmtu tla chu an thaw a suak. Hi zawng thil a hawng um ding mi tik chu a nâi rawh ruangah. ⁴ Johan nih chun Asia ram ah kawhmi murui sarih tla sinah: Um liau leh um rawh leh hawng um ding mi sinah leh a laltophah mâika ah thlarau pasarih tla thawk hen, Jisu Krist theihpitu zumhkâi tak, mithi lakah mi suak masachem leh tual ah lal tla lâirêltu thawk hen zângfahnâk leh remnâk nan sinah um seh. Hawng kan zângfah le, a thisen hen kan sual lakah mi hawng kan tlanh le, ⁶ a Pathian leh Pa rianṭuan ding hen a lalram ah bâwlpu ah hawng kan siamtu Jisu Krist sinah rokualnâk leh lâirêlnâk chu zungzâl hen um seh! Amen. ⁷ Ngâinik u, anih chu sûm tla hen a hawng awt, mikip nih an muh lai le, a sunhtu tla khawm nih, laikulh ah phun zawzawng amah ruangah an thinlung a fâk lai. Chu hâwi asi! Amen. ⁸ "Kei Alpha leh Omega ka si," Lalpa Pathian, um liau leh um rawh leh hawng um ding mi, zeizawng tikho nih chun a ti asi. ⁹ Kei, Johan nan unanpa, Jisu ah hamhnâk tla, a ram leh a tuarnâk ah an bâwmpi natu hi, Pathian thu ruang leh Jisu theihtirnâk thu ruangah Patmos tikulh ti mi ah chun siah hen ka um le, ¹⁰ Lalpa ni ah chun Thlarau hen ka hawng um le, ka dunglei ah tâwtawrâwt hâu hâwi hen hâu fâk tak hen, ¹¹ "Na thil muh ding mi chu lasuibu ah rîn le, Kawhmi murui sarih tla, Ephesi, Smirna, Pergamos, Thiatira, Sardis, Philadelphia leh Laodikei khua ah kuat rawh," a ti mi ka theih. ¹² Chun, a hawng ka sawnhtu chu muh ding hen ka her le, chun, ngûn meichêu tung sarih ka muh. ¹³ Meichêu tla lakah chun, minung hâwi, a kê pâr tiang hen puan â aih le, a ir ah ngûn ri hen â sâwm mi ka muh. ¹⁴ Chun, a lû leh a sam chu vûr hen â bang mi samul hâwi hen a vâr, a mit tla chu meialh hâwi asi le; ¹⁵ a kezaphah tla chu dâr a tlêu mi hâwi asi le, mei ah êr mi hâwi asi, a hâu chu tî tamtak khâwk hâu hâwi asi. ¹⁶ A vawrhlei kut hen ârfi pasarih a put le; chun, a kâ thawk hen nâmsâu hâr nih nei a suak le, a mêl chu nî sûn liau hâwi hen a chêu. ¹⁷ Chun, amah chu ka muh kâ hen mithi hâwi bang hen a kê bul ah ka tlû rawh. Chun, anih nih chun a kut vawrhlei chu ka tlûnah a thâng le, ka sinah, "Ṭih lah, kei masachem leh madungchem leh, ¹⁸ a nung mi chu ka si, ka thi le, sikhawmsele, ngâinik, zungzâl rangah ka nung nawlh rawh asi. Thihnâk leh mithi khua tlûnah thuneihnâk chu ka nei ber asi. ¹⁹ Chuvachun, na thil muh rawh mi tla leh thil um liau leh thil hawng um ding mi thu tla chu rîn rawh; ²⁰ ka kut vawrhlei ârfi pasarih tla leh ngûn meichêu siahnâk pasarih na muh mi thuthup chu; ârfi pasarih tla chu kawhmi pasarih vânmifial tla an si, meichêu pasarih chu kawhmi pasarih tla chu an si.

¹ "Ephesi khua mi kawhmi vânmifial sinah chun rîn rawh: "A kut vawrhlei ah ârfi pasarih put hen, ngûn meichêu pasarih kiangah â zî lemang mi nih khan hi bang thu hi a sim asi. ² Na thilti zia tla, na hamh zia leh na felfê zia tla, misual tla na sâithiam lo zia tla ka theih. Mifial si lêm lo hen mifial â ti mi tla chu na nik ber le, mi âwkrâwl an si ti na theih rawh le; ³ felfênâk na nei ber le, ka min ruangah na tuar rawh le, na zuai lêm lo. ⁴ Sikhawmsele, sâwinâk ka nan nei asi, na dâwtnâk masachem kha na bângtâk asi. ⁵ Churuangah, na tlûk khalh rawh mi kha theihkumza le, rim hen thilti masachem kha ti nawlh rawh; chu lo chun na sinah ka hawng lai le, na rim lo chun na meichêu kha a mun ah mi ka ṭhial ving lai. ⁶ Sikhawmsele, hi hi na ṭhatnâk chu asi, Nikola murui tla thilti na hua mi hi; chu chu kei khawm nih ka hua bâk asi. ⁷ "Thlarau nih kawhmi tla sinah thu a sim mi hi nâ a nei mi nih chun theih na seh. "A nehtu vial sinah chun Pathian Dûm ah mi nungnâk thing rah ei ding hen thu ka pêk lai a ti," ti hen. ⁸ "Chun, Smirna khua kawhmi vânmifial sinah chun rîn rawh: "Masachem leh madungchem a thi le, a nung nawlh mi nih khan hi bang thu hi a sim asi. ⁹ Na hamh zia tla, na pâm zia tla ka theih le, sikhawmsele, na nei ṭung fâwn! Juda tak silo hen, Juda kan si titu, Setan murui lakah mi tla nih a nan simsâwi mi chu ka theih. ¹⁰ Na tuar ding tla hi ṭih lah, ngâinik, Diabol nih niknâk ah a nan siah lai le, nan lakah mi zeimaw mi rêngin ah a nan khumh na awt asi, chun, ni râ hamh nan tuar lai. Thih tiang hen zumhkâi hen um rawh, chuvachun nungnâk lallukhuh ka nan pêk lai. ¹¹ "Thlarau nih kawhmi tla sinah thu a sim mi hi nâ a nei mi nih chun theih na seh! "A nehtu vial chu thih nihnâk nih zeitin khawm a ti lai lo, a ti" ti hen. ¹² "Chun, Pergamos khua kawhmi, vânmifial sinah chun rîn rawh: "Nâmsâu hâr nih nei mi nih khan hi bang thu hi a sim asi. ¹³ Setan tophah umnâk ah na um mi kha ka nan theih; ka min na kil thlir le, Setan umnâk ah hawng ka theihpitu zumhkâi tak Antipa an thah liau khawm khan ka rangah na dik hen na lungnâk na thlâu lo asi. ¹⁴ Sikhawmsele, tâwm sâwinâk ka nan nei asi, Balaam sîntirnâk thu pawmtu âu tla mawh nan umpi ruangah khan, Balaam nih chun Israel tla chu ruk sawnhnâk sa ei ding leh pung le lêngnâk ah tlûktir ding hen Balak chu a sîntir. ¹⁵ Chubang hen, nang khawm nih Nikola murui tla sîntirnâk thu pâwmtu âu tla mawh na umpi asi. ¹⁶ Chuvachun, rim rawh, chu lo chun na sinah ka hawng sawm lai le, ka kâ ah nâmsâu hen ka hawng do na lai. ¹⁷ "Thlarau nih kawhmi tla sinah thu a sim mi hi nâ a nei mi nih chun theih na seh! "A nehtu zawng sinah manna thuh mi chu ka pêk lai, lungvâr khawm ka pêk chiau na lai, chu lung tlûnah min thar â rîn mi hen, chu chu a tingtu cho lo nih chun âukhawm nih an theih lo, a ti" ti hen. ¹⁸ "Chun, Thiatira khua kawhmi vânmifial sinah chun rîn rawh: "Pathian Fapa, a mit meialh hâwi mi, a kezaphah tla dâr hâwi a tlêu mi nih khan hi thu hi a sim asi. ¹⁹ Na thilti zia tla, na zângfahnâk tla, na zumhkâinâk tla, na rianṭuan zia tla leh na felfê zia tla ka theih, na thilti madungchem tla chu a tîr mi ngâk hen a fâk dauh ti ka theih. ²⁰ Sikhawmsele, sâwinâk ka nan nei, nunau Jezebel, Pathian khuavângnu â ti mi kha na sâithiam le, anih nih chun ka to-aw tla chu pung le lêngnâk leh milem sawnhnâk thil ei tla sîntir hen diklonâk ah a nan rui na asi. ²¹ Chun, a sual rimnâk ding tik ka ruat piak le, sikhawmsele, a hurnâk sual chu a rim duh lo. ²² Chuvachun, anih chu ṭângdang pawmtu tla hen an sualnâk ihkhun ah chun fâk tak tuar ding hen ka lawnh na asi. Chu nunau hen an thilsual ti chu an rim lo chun tuah ka ti awt asi. ²³ Chun, kei khawm nih a zûltu tla chu ka thah na lai le, kawhmi murui tla nih chun kei hi mi duhnâk tla leh an thinlung tla dawnruatnâk theihtu chu ka si ti an hawng ka theih lai, chun, nan thilti hâwi vima hen kan rulh na lai. ²⁴ "Sikhawmsele nannih Thiatira ah mi zeimaw mi chu Setan thilthup thûk an ti mi tla leh sîntirnâk diklo thu pawm lotu tla tlûnah chun thilrit dang kan phurhtir na awt lo ti ka sim asi. ²⁵ Nan nei chia lam kha ka hawng kal lân lo chu kil thlir u. ²⁶ A dawngh tiang hen ka duhzia hâwi hen zumhkâi tak hen ṭuantu leh nehtu chu ka Pa sinah thuneihnâk ka tawng mi hâwi hen phun tla tlûnah thuneihnâk ka pêk na lai. ²⁷ Tual bêl mân dip hen vuak mi hâwi hen thîr ṭhianṭhunh hen lâi an rêl piak na lai. ²⁸ Chun, deirêl ârfi chu anmah tla ka pêk na lai. ²⁹ "Thlarau nih kawhmi tla sinah thu a sim mi hi nâ a nei mi nih chun theih na seh, a ti" ti hen.

¹ "Sardis khua kawhmi vânmifial sinah chun rîn rawh: "Pathian Thlarau pasarih leh ârfi pasarih neitu nih khan hi thu hi a sim asi: Na thilti tla chu ka theih, thi ko bû hen nung min na put mi hi ka theih asi. ² Churuang chun, a ṭhang le, na nei chia kha a thi dep lân ah chaktir rawh. Na thilti kha ka Pathian mitmuh hen a rangtling lo ti ka theih. ³ Ê-aw ngâilo, na sual tla rim le, an sîntir mi tla leh na theih rawh mi tla kha theihkumza rawh. Na vêng lo chun mifîr hâwi hen zei tikah na sinah ka hawng awt ti na theih lai lo. ⁴ Sikhawmsele, Sardis khua ah an nipuan thiang mi tâwmtê nan um. Chu hâwi ti tlâk mi nan si ruangah, puanvâr aih hen ka sinah nan hawng lai. ⁵ A nehtu vial chu hâwi hen puanvâr aihtir an si lai le, Nungnâk lasuibu ah mi an min chu ka râwk rîimâl lai lo, ka Pa mâika ah leh a vânmifial tla mâika ah an min ka phuang dauh lai. ⁶ "Thlarau nih kawhmi tla sinah thu a sim mi hi nâ a nei mi nih chun theih na seh, a ti" ti hen. ⁷ "Chun, Philadelphia khua kawhmi vânmifial sinah chun rîn rawh: "Mi thenhlimh mi dik tak, David renh nei hen, âukhawm khâr lo ding hen awngtu leh âukhawm awng lo ding hen khârtu nih khan hi thu hi a sim asi. ⁸ Na thilti zia tla ka theih; ka sîntirnâk thu tla na zûl hen zumhkâi tak hen na um le, thiltikhonâk tâwmtê na nei ti ka theih, âukhawm nih an khâr kho lo mi kawtkâ na mâika ah kan awng piak asi. ⁹ Ngâinik, Setan pumhnâk in tla lakah mi, Juda tak silo hen Juda anna ti mi tla chu ka hawng fial lai le, na kê bul ah kan mâimûktir lai le, âuzawng nih ka nan zângfah ti an theih lai rawh. ¹⁰ Felfê tak hen ka thupêk tla na pawm ruang khan, tual ah mi zapi an um mi tla nik ding hen, laikulh zawzawng tlûnah tik hawng tlung ding mi lakah chun kei khawm nih ka nan hum lai. ¹¹ Âukhawm nih na lallukhuh chu an lâk piak lo ding hen na thilneih chia kha kil thlir rawh, ka hawng tuan awt hi. ¹² A nehtu vial chu ka Pathian Biakin ah chun intung ah ka siam lai le, chu thawk chun an suak lai lo rawh. Chun, anmah lakah chun, ka Pathian min leh, ka Pathian khuapi Jerusalem thar, ka Pathian sinah mi vân thawk hen a hawng ṭum ding mi min chu ka rîn lai le, ka min thar khawm ka rîn lai. ¹³ "Thlarau nih kawhmi tla sinah thu a sim mi hi nâ a nei mi nih chun theih na seh, a ti" ti hen. ¹⁴ "Laodikei khua kawhmi vânmifial sinah chun rîn rawh: "Amen thawk hen theihpitu zumhkâi tak leh Pathian thilsiam bul nih khan hi thuchah hi a sim asi. ¹⁵ Na thilti tla ka theih, na kîk lêm lo, na lum lêm lo mi hi, na kîk mawh na lum mawh ding hi ka nan duh asi! ¹⁶ Lum ṭung lo, kîk ṭung lo hen na lum cho ruangah ka kâ lak mi ka nan sâk awt asi. ¹⁷ ’Ka nei le, sum leh pâi ka chawng le, zeikhawm ka samphâng lo,’ na ti le, sikhawmsele, mi ngâkṭah tak leh zângfah kâi tak na si zia tla, na pâm zia leh takkaro leh mitchâw na si zia na theih lo asi. ¹⁸ Minei na si khonâk ding hen ka sinah mi, ngûn thenhlimh châwk ding hen ka nan simh asi. Puanvâr na aih ding hen leh na takkaro ningzakkâi tak chu khuh ding leh na mit ah buaih ding hen mit fâk turpâng tla châwk ding ka nan simh asi, na muh khonâk ding hen. ¹⁹ Ka dâwt hen ka zângfah mi tla chu ka fâi hen nun ka simh na tâwn, semsêngâi le, rim rawh. ²⁰ Ngâinik, kawtkari ah dîr hen ka kik hi, âuzawng ka hâu theih hen kawtkâ hawng ka awnh chun, a sinah ka lût lai le, zânriah ka ei lai le, anih khawm ka sinah a ei bâk lai. ²¹ A nehtu vial chu ka laltophah ah ka sinah ka totir lai le, kei khawm nih ka neh le, ka Pa sinah a laltophah ah ka to hâwi hen. ²² "Thlarau nih kawhmi tla sinah thu a sim mi hi nâ a nei mi nih chun theih na seh, a ti" ti hen.

¹ Chu nûnah chun langhtirnâk dang ka nei le, vân ah kawtkâ â awng mi chu ka muh. Chun, aw-hâu ka theih masa mi, tâwtawrâwt âwn hâu hâwi mi nih a hawng ka sawnh le, "Hinah hawng kâi rawh, hi nûnah thu a hawng um ding mi tla chu ka nan zauhtir lai," a ti. ² Chun, lâkkhat ko ah Thlarau hen ka hawng um sawm le, ngâinik, vân ah chun laltophah ah chun âumawh a to. ³ A mêl chu Jaspar leh sardonik lung hâwi ko hen a lang le, chunah chun laltophah kiangah chumchâ, emeral lung hâwi mi hi a kho. ⁴ Chun, laltophah chu laltophah dang kul leh pali nih an kulh, laltophah ah chun upa kul leh pali chu puanvâr aih leh ngûn lallukhuh khuh hen an to. ⁵ Chun laltophah thawk hen chun, mîmthlalek tla, aw-hâu tla, khuari tla chu ri urmar hen a hawng suak. Chun, meifâr pasarih laltophah mâika ah chun a alh le, chu tla chu Pathian thlarau pasarih tla chu an si. ⁶ Chun, laltophah mâika ah chun tisumsumriat thlalang hâwi, kristal lung hâwi hi a um le, chun, laltophah kulh dak hen thilnung pali dung leh mâi hen a khat phak mi an um. ⁷ Thilnung pakhatnâk chu chakeibaknei hâwi asi. Thilnung panihnâk chu chawpê hâwi asi. Thilnung pathumnâk chu minung hâwi asi. Thilnung palinâk chu mupi zuang liau hâwi asi. ⁸ Chun, thilnung pali nih chun thla paruk chiau an nei le, an sunglei leh lênglei mit hen a khat phak, sûn leh zân hen la sak an bâng lo; "Lalpa Pathian zeizawng tikhotu, a um rawh mi leh, a um liau mi leh a hawng um ding mi chu, a thenhlimh, a thenhlimh, a thenhlimh," ti hen. ⁹ Chun, thilnung pali tla nih chun laltophah ah a to mi, zungzâl hen a nung kumza mi chu la rokual tak hen an chawnglawmh hen lâwmthu an sim kipah, ¹⁰ Upa kul leh pali tla chu laltophah ah a to mi mâika ah chun an lallukhuh chu siah hen zungzâl nung kumza mi chu an mâimûk le; ¹¹ "Nang kan Lalpa leh kan Pathian, rokualnâk tla, chawnglawmhnâk tla, thiltikhonâk tla tawng tlâk na si. Nangnih zeizawng na siam le, nangmah duh thu hen nungnâk na pêk na asi," an ti.

¹ Chun, laltophah ah a to mi kut vawrhlei ah chun lasuibuzual, sunglei leh lênglei hen â rîn mi, singsiahnâk pasarih hen singsiah thlir mi chu ka muh. ² Chun, vânmifial chak tak, aw-hâu fâk tak hen, "Âu me lasuibuzual hi kêu hen a singsiahnâk tla samh tlâktu um?" ti hen a âu mi ka muh. ³ Sikhawmsele, vân khawmah, tual khawmah, tual tang khawmah, lasuibu chu kêu hen a sunglei zauh khotu âukhawm an um lo. ⁴ Chu lasuibu chu kêu hen a sunglei khawm zauh tlâktu âukhawm an um lo ruangah ngaihsia tak hen ka ṭap rawh. ⁵ Chun, Upa tla lakah mi pakhat nih chun, "Ṭap lah, ngâinik, chakeihaknei Juda phun ah mi, David thlâk nih khan lasuibu chu kêu ding leh a singsiahnâk pasarih tla khawm samh ding hen a neh rawh," a hawng ka ti. ⁶ Chun, laltophah leh thilnung pali tla lâiah leh upa tla lâi chem ah chun Dawrâ Fa thah rawh mi, ki pasarih leh mit pasarih nei, a dîr mi ka muh le, chubang mit pasarih leh ki pasarih tla chu Pathian thlarau pasarih tual tlûn zawzawng ah fial mi tla an si. ⁷ Chun, Dawrâ Fa chu a va kal le, laltophah ah a to mi kut vawrhlei mi lasuibu chu a lâk rawh. ⁸ Chun, lasuibu chu a lâk kâ hen thilnung pali tla leh upa kul leh pali tla chu ṭingṭang leh ngûn berhbu rimthâw hen a khat mi put chiau hen Dawrâ Fa mâika ah chun an bawkbukhup rawh; chubang rimthâw tla chu Pathian mi tla thlachamnâk asi. ⁹ Chun, "Nang lasuibu chu lâk hen, a singsiahnâk tla samh tlâk na si; Thah hen na um rawh le, chikip a mi tla, hawlh kip a mi tla, mikip a mi tla, phun kip a mi tla, Pathian rangah na thisen hen na châwk na. ¹⁰ Kan Pathian rianṭuan ding hen Lalram bâwlpu ah na siam na rawh, chun, tual ah chun lâi an rêl lai," ti hen la thar an sak rawh. ¹¹ Chun, ka zauh le, laltophah leh thilnung pali leh upa tla kiangah chun vânmifial a sîng a sîng tamtak aw-hâu chu ka theih. Thilnung tla leh upa tla leh laltophah hêl hen an dîr le, hâu fâk tak hen, ¹² "Dawrâ Fa thah rawh mi hi, thiltikhonâk tla, neih leh siahnâk tla, finghnâk tla, chaknâk tla, chawnglawmhnâk tla, rokualnâk tla, malsâwmnâk tla tawng tlâk asi," ti hen la an sak. ¹³ Chun, vân leh tual tlûnah leh tual tang leh tisumsumriat sungah thilsiam chikip leh laikulh sungah an um mi zawzawng tla nih, "Laltophah ah a to mi leh Dawrâ Fa sinah chun, malsâwmnâk leh chawnglawmhnâk tla rokualnâk tla leh lârêlnâk tla zungzâl hen um seh ti hen an la sak ka theih. ¹⁴ Chun, thilnung pali tla nih chun, "Amen," ti hen an sâng le, upa tla khawm nih bawkbukhup hen an mâimûk rawh.

¹ Chun, Dawrâ Fa nih chun singsiahnâk pasarih lakah pakhat chu a samh liau ka muh le, chun thilnung pali lakah pakhat nih chun khuari mi hâu hâwi hen, "Hawng rawh," a ti mi ka theih. ² Chun, ka zauh le, rang ngo ka muh, a tlûnah chuan mi nih chun chanhtiang a put le, a sinah lallukhuh an pek le, neh vima ding hen a suak rawh. ³ Chun, singsiahnâk panihnâk chu a samh kâ hen thilnung panihnâk nih, "Hawng rawh," a ti mi ka theih. ⁴ Chun, rang dang a sen mi a hawng suak nawlh lo, a tlûnah â chuan mi sinah chun tual tuknâk umtir ding hen thuneihnâk an pêk, khatlei khatlei anna thah tawnh ding hen; chun nâmsâu lianpi an pêk. ⁵ Chun, singsiahnâk pathumnâk chu a samh kâ hen, thilnung pathumnâk nih chun, "Hawng rawh," a ti mi ka theih; chun ka zauh le, rang dum ka muh, a tlûnah â chuan mi nih chun khinghnâk a put. ⁶ Chun, thilnung pali tla lâiah chun aw-hâu hâwi hen, ’’Ni khat lawhman wheat fâng, khîng khat ni khat lawhman hen barley fâng khîng thum; oliv thing leh grep zûn lam chu râwk lah," a ti mi ka theih. ⁷ Chun, singsiahnâk palinâk chu a samh kâ hen, thilnung palinâk nih chun "Hawng rawh," a ti mi ka theih. ⁸ Chun, ka zauh le, rang a dâng mi ka muh le, a tlûnah â chuan mi min chu Thihnâk an ti, a dunglei ah Mithi khua nih a hawng zûl sawm. Nâmsâu hen thah ding leh pâmnâk, râi leh sarâng hen thah na ding hen tual mun li ṭhen hen mun khat tlûnah thuneihnâk an pêk. ⁹ Chun, Dawrâ Fa nih chun singsiahnâk panganâk chu a samh kâ hen mâichâm tangah chun theihtirnâk thu zumhkâi tak hen an pawm mi ruangah leh Pathian ruangah an thah na mi thlarau tla ka muh. ¹⁰ Annih nih chun aw-hâu fâk tak hen, "Lalpa, Zeizawng tikhotu, Mi Thenhlimh leh dik tak! Zei tiang me lâirêl lo hen tual ah an um mi tla tlûnah kan thisen suaknâk phû chu lam lo hen na um awt? ti hen an âu. ¹¹ Chun, an sinah puanvâr an pêk chiau na le, an to-aw hâwi tla leh an unau tla, anmah hâwi ber hen thah ding mi tla kha an kim ver lân lo chu anna dîn rih ding asi ti hen an simh. ¹² Chun, Dawrâ Fa nih singsiahnâk paruknâk chu a samh mi ka zauh le, chun lî thungâi a hawng a nîn le, nî chu samul puandum hâwi hen a hawng dum le, thlâ khawm thisen hâwi hen a hawng sen. ¹³ Chun, ârfi tla vân thawk hen, theipi kûng thlipi nih a vuak le, a rah hel tla a tlawng mi hâwi hen tual ah an tlâ rawh. ¹⁴ Chun, vân chu lasuibu an zual mi hâwi hen a tlâu rawh; chun tlâng leh tikulh kip chu an umnâk mun ah mi ṭhial hen an um rawh. ¹⁵ Chun, tual ah lal tla, lâirêltu tla, kawrsen hotu tla, minei tla, mi chak tla, sal leh sal lo tla chu pûk ah leh tlâng ah lungpi tangah tla anna thup. ¹⁶ Chun, tlâng tla leh lungpi tla sinah chun, "Hawng kan denh rawh, Dawrâ Fa thinthawknâk thawk hen leh laltophah ah a to mi mitmuh lonâk ah hawng kan phenh rawh, ¹⁷ an thinthawknak ni rokual tak asi rawh hi, âu nih me do hen tuar kho lai?" an ti.

¹ Chu nûnnah chun tual ah leh tisumsumriat ah leh thing tlûnah thli rerêng a lêng lonâk ding hen tual thli pali chu tleih hen tual kil li ah an dîr mi vânmifial pali ka muh. ² Chun, vânmifial dang, Pathian nung, singsiahnâk put hen suahlei ah a kâi mi ka muh, anih nih chun, vânmifial pali, mual tla leh tisumsumriat râwktu dingah Pathian nih a ruat mi tla sinah chun, aw-hâu fâk tak hen, ³ "Kan Pathian to-aw tla chu an chal ah kan singsiah na lân lo chu mual leh tisumsumriat leh thing tla chu râwk lah rih u,’ ti hen a âu. ⁴ Chun, Pathian singsiahnâk hen an chal ah an singsiah zat chu ka theih. Israel thlâk phun kip a mi nuai khat leh sîng li leh sâng li an singsiah rawh asi. ⁵ Juda phun a mi sîng khat le sâng nih, Reuben phun a mi sîng khat le sâng nih, Gad phun a mi sîng khat le sâng nih, ⁶ Aser phun a mi sîng khat le sâng nih, Naphtali phun a mi sîng khat le sâng nih, Manaseh phun a mi sîng khat le sâng nih, ⁷ Simeon phun a mi sîng khat le sâng nih, Levi phun a mi sîng khat le sâng nih, Isakar phun a mi sîng khat le sâng nih, ⁸ Zebulun phun a mi sîng khat le sâng nih, Josef phun a mi sîng khat le sâng nih, Benjamin phun a mi sîng khat le sâng nih an singsiah rawh. ⁹ Chun, chu nûnah chun ka zauh le, mi zapi cherkhet, âukhawm rêlchâwklo, phun kip lakah mi tla, chi kip lakah mi tla, mikip lakah mi tla, hawlh kip lakah mi tla, puanvâr aih hen, leh tûmkâu put hen, laltophah mâika ah leh, Dawrâ Fa mâika ah an dîr mi ka muh. ¹⁰ Chun, chubang tla nih chun, "Kan Pathian laltophah ah a to mi leh Dawrâ Fa thawk hen kan ruangsuahnâk a hawng tlung rawh," ti hen fâk tak hen an âu. ¹¹ Chun, vânmifial zawzawng tla chu laltophah leh upa tla leh thilnung pali tla hêl bung hen an dîr le, laltophah mâika ah, ¹² "Amen! Malsâwmnâk tla, rokualnâk tla, finghnâk tla, lâwmthusimnâk tla, zahnâk tla, chawnglawmhnâk tla, thiltikhonâk tla, chaknâk tla, zungzâl hen kan Pathian sinah um seh, Amen," ti hen Pathian an mâimûk. ¹³ Chun, upa tla lakah pakhat nih chun ka sinah, "Hi bang puanvâr aihtu tla hi âu tla me an si, a zei thawk hen me an hawng?" ti hen a hawng ka deih. ¹⁴ Chun, kei nih chun a sinah, "Pu, nangmah nih na theih dauh ko khateh," ka ti. Chun, anih nih chun ka sinah, "Hi bang tla hi nehsawhnâk fâk tak thawk hen him tak hen an hawng suak mi tla an si, an puan tla chu Dawrâ Fa thisen ah suk hen an vârtir asi, ¹⁵ churuangah, Pathian laltophah mâika ah dîr hen a sûn a zân hen a rian an ṭuan asi; chun, laltophah ah a to mi nih chun a vêng na lai. ¹⁶ An sung a vâng lai lo le, an tî khawm a hâl lai lo, nî nih a emh na lai lo le, a linhnâk khawm nih a hamhtir na lai lo. ¹⁷ Dawrâ Fa laltophah lâiah a um mi chu an vêngtu asi lai le, nungnâk tiva ah a kalpi na lai; chun, Pathian nih an mit ah mi mitthli zawzawng a nâwt piak na lai," a ti.

¹ Chun, Dawrâ Fa nih chun singsiahnâk pasarihnâk chu a samh ka hen vân ah chun dârkar chanve ding chu dâisipnâk a hawng um. ² Chun, Pathian mâika ah vânmifial pasarih an dîr mi ka muh le, an sinah chun tâwtawrâwt pasarih an pêk na. ³ Chun, vânmifial dang a hawng le, ngûn rimthâw duahnâk bâwm put hen mâichâm kiangah a dîr. Chun, laltophah mâika ah ngûn mâichâm tlûnah mi thenhlimh zawzawng thlachamnâk tla sapsuannâk ding hen zeilo rimthâw tamtak a sinah an pêk. ⁴ Chun, Pathian mâika ah a dîr mi vânmifial kut thawk hen chun zeilo rimthâw khû leh mi thenhlimh tla thlachamnâk chu vân lei a kâi rawh. ⁵ Chun, vânmifial nih chun zeilo rimthâw duahnâk bâwm chu a lâk le, mâichâm mi mei hen a khattir le, tual ah a lawnh rawh. Chun, khuarît tla, aw-hâu dang tla, mîmthlalek tla, lînîn tla a hawng um sawm rawh. ⁶ Chun, vânmifial pasarih tâwtawrâwt pasarih puttu tla chu tum ding hen anna timhtuah rawh. ⁷ Chun, a masachem mi nih chun a tum le, rial leh mei thisen hen chawmh mi, a hawng um sawm le, chubang tla chu tual ah lawnh asi rawh. Chun, tual mun thum ṭhen hen mun khat leh thing mun thum ṭhen hen mun khat chu a kâng hep, chun, belh ring zawzawng khawm a kâng ver. ⁸ Chun, vânmifial panihnâk nih chun a tum le, tlâng lianpi mei nih a khangh mi hâwi hi tisumsumriat ah lawnh hen a um. Chun, tisumsumriat chu mun thum ṭhen hen mun khat chu thisen ah â chang rawh. ⁹ Chun, tisumsumriat ah thilsiam nungnâk nei tla chu mun thum ṭhen hen mun khat an thi le, lawng tla khawm mun thum ṭhen hen mun khat râwk hen an um. ¹⁰ Chun, vânmifial pathumnâk nih chun a tum le, ârfi lianpi, meifâr hâwi hen a alh mi vân thawk hen a hawng tlâ le, tiva tla leh tinungva tla chu mun thum ṭhen hen mun khat a denh rawh. ¹¹ (Chu ârfi min chu Khâtnâk asi) Tî mun thum ṭhen hen mun khat chu a khâ hep rawh, chu tî chu an din le, mi tamtak an thi rawh. ¹² Chun, vânmifial panihnâk nih chun a tum le, nî mun thum ṭhen hen mun khat leh thlâ mun thum ṭhen hen mun khat leh ârfi tla khawm mun thum ṭhen hen mun khat chu â râwk hep rawh; an chêunâk tla leh sûn khawm mun thum ṭhen hen mun khat a tlâu le, zân khawm chu hâwi ber hen a um. ¹³ Chun, ka zauh le, mupi vân lâiah a zuang mi nih, aw-hâu fâk tak hen "Vânmifial pathum an tâwtawrâwt tum hâu hawng um ding mi ruangah, tual ah an um mi tla tlun a pit! a pit! a pit!" a ti mi ka theih.

¹ Chun, vânmifial panganâk nih chun a tâwtawrâwt a tum le, ârfi pakhat vân thawk hen tual ah a tlâ mi ka muh le, vânmifial sinah chun khurtawdawnglo renh chu an pêk rawh. ² Chun, anih nih chun khurtawdawnglo chu a awng le, chun khurtawdawnglo thawk hen meialh fâk tak khû hâwi a hawng suak le, chu mei khû ruang chun nî leh boruak chu a hawng mûitir rawh. ³ Chun, meikhû thawk chun khâubawk tla an hawng suak, tlâng cha-âi tla nih thiltikhonâk an nei hâwi hen an sinah thiltikhonâk pêk an si. ⁴ Chun, an chal ah Pathian singsiahnâk a nei lo mi minung tla cho lo chu, tual ah belh tla, thing tla leh thlâi rerêng râwk lo ding hen simh an si. ⁵ Chun, khâubawk tla sinah chun, chu minung tla chu thah ngâi chu thah lo hen, thla nga hamhtir ding hen thu pêk an si, an hamhtir dân chu tlâng cha-âi nih mi a seh hen a hamhtir na mi hâwi asi. ⁶ Chun, chu thla nga sung chun mi nih thihnâk an hâwl khawmah an tawng lai lo, thih an duh lai le, thihnâk nih a tekkhalh na lai. ⁷ Chun, khâubawk tla umdân chu rang tla râltuk ding hen anna tîm zet mi hâwi an si; ngûn lallukhuh hâwi anna khuh le, an mêl khawm minung mêl hâwi asi. ⁸ Chun, nunau sam hâwi an nei le, an hâ khawm chakeibaknei hâ hâwi asi. ⁹ Chun, an ir ah thîr phaw hâwi mi an nei le, an thla zâp hâu chu râltuk ding hen rang tamtak nih kari nûk hen an tek mi hâu hâwi asi. ¹⁰ Chun, tlâng cha-âi hâwi hen tawmei leh henhnâk an nei le, an tawmei ah chun thla nga kar minung nganfâktir khonâk an nei. ¹¹ Khurtawdawnglo lakah thuneitu vânmifial chu lal ah an nei le, Hebrai hawlh hen a min chu, "Abadon" asi le, Greek hawlh hen chun, "Apollion" asi (a umzia chu, "Râwktu" tinâk asi.) ¹² Tlûnpitnâk masachem chu a reh rawh le, hi nûnah tlûnpitnâk panih a hawng um awt nawlh asi. ¹³ Chun, vânmifial paruknâk nih chun a tâwtawrâwt chu a tum le, Pathian mâika ah ngûn mâichâm ki tla thawk hen aw-hâu ka theih le, ¹⁴ chu aw-hâu nih chun, vânmifial paruknâk tâwtawrâwt a put mi sinah chun, "Eufretis tipi ah vânmifial pali phuar hen an um mi tla kha suah na rawh!" a ti. ¹⁵ Chun, chu dârkar leh ni leh thla leh kum ruat chia lakah, minung mun thum ṭhen hen mun khat thah ding hen anna tîm zet mi vânmifial pali tla chu an sût na rawh. ¹⁶ Rang kêng tlûnah anna chuan mi kawrsen tla tam zia chu sîng lir hen mun sing nih (200,000,000) an si ti an ka simh. ¹⁷ Chun, muhtirnâk ah chun, rang leh a tlûnah anna chuan mi ka muh le, mei leh saphir leh kât eng hâwi mi phaw an nei le, rang lû tla chu chakeibaknei lû hâwi asi le, an kâ thawk hen mei leh meikhû leh kât tla a hawng suak. ¹⁸ Chun, chu hamhtirnâk pathum, mei leh meikhû leh kât an kâ thawk hen a hawng suak mi hen chun minung mun thum ṭhen hen mun khat chu thah an si rawh. ¹⁹ Rang tla thiltikhonâk chu an kâ ah leh an tawmei ah a um, an tawmei tla chu rûl hâwi asi, lû an nei le, chu hen mi nganfâk an pêk na tâwn asi. ²⁰ Chun, chubang rêpnâk nih a thah bang minung tla nih chun, an thil siam tla chu bângtâk lo hen, khuri tla leh ngûn milem tla, tangka milem tla, dâr milem tla, lung milem tla, thing milem tla, zeikhawm muh kho lo, theih kho lo, kal kho lo tla chu an sawnh le an rim lêm lo. ²¹ Mi an thah mi tla leh dâwi an mang mi tla, pung leh lêng an mangnâk leh fîr an mangnâk khawm an thlah lêm lo.

¹ Chun, vânmifial dang chak tak pakhat, sûm hen â thuam mi, vân thawk hen a hawng ṭum mi ka muh le, a lû ah chun chumchâ a kho le, a mêl chu nî hâwi asi le, a kê tla chu meizîk hâwi asi. ² Chun, a kut ah chun lasuibuzual samh chia a put le, a kê vawrhlei hen tisumsumriat a lamh le, a kehlei hen tlâng a lamh; ³ chun, chakeibaknei hûk hâwi hen hâu fâk tak hen a hûk rawh, chun a hûk dih rawh chun (chu mi rual hen khuarît hâu pasarih nih a zulh) khuarît pasarih tla nih a aw-hâu chu an sang bâk rawh. ⁴ Chun, khuarît pasarih tla nih an aw-hâu an suah kâ hen, ka rîn awt le, sikhawmsele, "Khuarît pasarih thusim tla kha pheh thlir, rîn lah" ti hen vân thawk hen aw-hâu ka theih rawh. ⁵ Chun, vânmifial tisumsumriat ah leh tlâng ah a dîr mi ka muh mi nih khan a kut vawrhlei vân leiah a phar le, vân, a sungah thil zeizawng siamtu, tual, a sungah thil zeizawng leh tisumsumriat a sungah thil zeizawng siamtu, ⁶ zungzâl hen a um kumza mi Pathian min chu sâl hen, "Hun a tlâi lai lo rawh, ⁷ sikhawmsele, vânmifial pasarihnâk nih a tâwtawrâwt chu a tum tikah Pathian thuthup chu a tling lai rawh, a to-aw khuavâng tla sinah a phuang rawh hâwi khan," a ti. ⁸ Chun, vân thawk hen aw-hâu ka theih mi nih khan a hawng ka sawnh nawlh le, "Tisumsumriat leh tlâng ah a dîr mi vânmifial kut a mi lasuibuzual samh chia kha lâk rawh," a ti mi ka theih. ⁹ Chun, vânmifial sinah chun ka va kal le, a sinah, "Lasuibuzualtê kha hawng ka pêk me," ka ti le, anih nih chun ka sinah, "Lâk le, ei hep, chun, na pawsung chu a khâtir lai le, na kâ ah lam chun khuaizû hâwi hen a thlum lai," a ti. ¹⁰ Chun, a kut a mi lasuibuzualtê chu ka lâk le, ka ei hep le, ka kâ ah chun khuaizû hâwi hen a thlum le, ka dawlh nûnah lam chun ka pawsung chu a khâ tik rawh. ¹¹ Chun, "Mi tamtak tla, phun tamtak tla, hawlh tamtak tla, lal tamtak tla sinah Pathian thuchah na phuang nawlh ding asi," a hawng ka ti.

¹ Chun, tahnâk fung, ṭhianṭhunh hâwi mi an hawng ka pêk le, "Thawk le, Pathian Biakin leh mâichâm chu tah le, a sungah sawnhtu tla khawm rêl na. ² Sikhawmsele, biakin lênglei kulh sung lam chu tah sih lah, chu chu phun dang sinah pêk asi rawh, annih nih chun Khua Thenhlimh chu thla sâwmli leh thla nih an lamhbêk lai. ³ Chun, ka thu theihpitu mi panih chu ka fial lai le, salâpuan aih hen ni sâng khat zanih leh sâwmruk Pathian thu an sim lai," a ti. ⁴ Chun, laikulh Lal mâika ah an dîr mi, theihpitu panih tla chu oliv thing panih leh meichêu panih chu an si. ⁵ Chun, annih chu âuzawng nih nganfâk pêk an tum chun a kâ thawk hen mei a hawng suak le, an leido tla chu a veih na asi. Annih tla chu âuzawng nih thah ding awttu chu thah an si lai. ⁶ Chubang tla nih chun thu an sim kar vial chu ruah sûr lo ding hen vân pingtir khonâk an nei, an duh tik zawngah thisen ah changtir ding hen tiva tla tlûnah thuneihnâk an nei le, laikulh hi rêpnâk râi chi kip hen rêp ding hen thu an nei. ⁷ Chun, an theihtirnâk thu chu an sim dih tikah Sarâng khurtawdawnglo thawk hen a hawng suak mi nih khan a do na lai le, a neh na lai le, a thah na lai. ⁸ Chun, an ruak chu an Lalpa an khenhbêk mi khua rokual zâwllâi ah an siah lai le, chu khua rokual zauhtirnâk ah chun Sodom, mawh Aigupta ti asi. ⁹ Chun, mi zapi lakah phun zawzawng tla, phun kip leh hawlh kip nih, ni thum leh sûnlân an ruak tla chu an zauh lai le, a vûi ding an siang lai lo. ¹⁰ Hi mi panih an thi ruangah, tual ah mi zapi tla chu anna lâwm lai le, lâwmnâk an siam lai le, thilpêk tla anna kuat lai, hi khuavâng panih tla nih tual ah mi zapi tla chu an hamhtir na ruangah. ¹¹ Chun, ni thum leh sûnlân nûnah chun Pathian nungnâk thaw chu an sungah a lût le, an dîr rawh, chun, a muhtu tla nih chun an ṭih na rawh. ¹² Chun, khuavâng panih tla nih chun, vân thawk hen aw-hâu fâk tak hen, "Hinah hawng kâi u," ti hen an theih, chun, an leido tla nih an muh na ko bû hen vân ah sûm lakah an kâi rawh. ¹³ Chun, chu liau tak chun, lî thungâi thlâk â nîn le, khua chu mun râ ṭhen hen mun khat a chim rawh, lînîn lak chun mi sâng sarih an thi le, an thibang tla chu thungâi an lâu le, Pathian vân ah a um mi chu an chawnglawmh rawh. ¹⁴ Chun, tlûnpitnâk panihnâk chu a reh rawh le, ngâinik! tlûnpitnâk pathumnâk chu a um tuan awt rawh. ¹⁵ Chun, vânmifial pasarihnâk nih chun a tâwtawrâwt chu a tum le, "Laikulh ram chu kan Lalpa leh Mesia ram a hawng si rawh, anih nih chun zungzâl hen lâi a rêl lai," ti hen vân thawk hen aw-hâu a hawng suak. ¹⁶ Chun, Pathian mâika ah an laltophah ah upa kul leh pali an to mi tla chu bawkbukhup hen Pathian an mâimûk le, ¹⁷ "Zeizawng tikhotu, Lalpa Pathian, um liau leh um rawh mi, na thiltikhonâk rokual tak chu lâk hen, lâirêl na dawmh rawh ruangah ka nan sawr asi! ¹⁸ Lunglotu tla chu an thinthawk le, nang thinthawknâk khawm a hawng tlung bâk rawh. Mithi tla lâirêl piak tik leh na to-aw khuavâng tla sinah leh, mi thenhlimh tla sinah, na min zahtu mi lian leh mi mê tla sinah lâwmman na pêk ding tik leh tual râwktu tla chu râwk bâk na ding tik chu a hawng tlung rawh," an ti. ¹⁹ Chun, vân ah Pathian biakin chu â awng le, chun, a biakin sungah Thudântuk Bâwm chu a hawng lang rawh; chun, mîmthlalek tla, aw-hâu tla, khuarît tla, lînîn tla, rial chawp tak tla thungâi a hawng um rawh.

¹ Chun, thilchê rokual tak vân ah a hawng lang le, nunau nî hen â thuam le, a kê tangah thlâpa a um mi, ârfi leinih hen siam mi lallukhuh â khuh mi a um. ² Chu nih chun nâu a pâwi le, nâu neih nganfâk tuar hen a râk rawh. ³ Chun, thilchê dang vân ah a hawng lang nawlh le, rûlrêu sen lianpi, lû pasarih leh ki parâ a nei mi, lallukhuh pasarih â khuh mi a hawng um. ⁴ A mei hen chun vân ârfi tla mun thum ṭhen hen mnn khat a nûk le, tual ah a thlâk rawh, chun, nunau nih fa a ring ding mi chu a ring kâ hen a dawlh khonâk ding hen a mâika ah a dîr ko. ⁵ Chun, phun zawzawng tlûnah thîr ṭhianṭhunh hen lâirêltu dingah fapa a ring le, sikhawmsele, a fa chu Pathian sinah a laltophah ah chun lâk hen a um rawh. ⁶ Chun, nunau chu ramkaro ah Pathian nih amah rangah mun a ruat piak mi ah chun a tek rawh, chunah ni sâng khat zanih leh sâwmruk an châwm khonâk ding hen. ⁷ Chun, vân ah chun tuknâk a hawng um le, Mikael leh a vânmifial tla nih rûlrêu chu an do le, rûlrêu leh a mifial tla khawm nih an hawng do na bâk. ⁸ Sikhawmsele, rûlrêu chu an neh le, amah leh a mifial tla chu vân ah um siang asi lo rawh. ⁹ Chun, rûlrêu lianpi, Diabol mawh, Setan an ti mi, laikulh zawzawng perpettu chu tual ah an lawnh rawh, a mifial tla khawm an lawnh sih. ¹⁰ Chun, vân ah aw-hâu fâk tak ka theih mi nih chun, ’Tuah chun kan Pathian ruangsuahnâk leh a thiltikhonâk leh Lal asi zia chu a langhtir le, tuah a Mesia thuneihnâk chu a langhtir rawh! Kan unau tla phiar hen Pathian mâika ah a sûn a zân hen a dîr tâwn mi chu vân thawk hen lawnh asi rawh," a ti. ¹¹ Kan unau tla nih chun Dawrâ Fa thisen zârah leh thih ngamh rê hen thudik an phuangnâk zârah anih chu an neh rawh; ¹² chun, vân tla leh a sungah um mi tla a lâwm u, sikhawmsele, tual leh tisumsumriat tlûn chu a pit! Diabol nih chun tik tâwmtê cho a nei rawh ti a theih ruangah a thinthawk bû hen nan sinah a hawng ṭum rawh," a ti. ¹³ Rûlrêu nih chun tual ah lawnh asi ti a theih ka hen fapa ringtu nunau chu a râl rawh. ¹⁴ Chun, nunau chu kum thum leh a sêu zauhkhenh ding hen leh rûlpi lakah a him khonâk ding hen, a mun ramkaro leiah zuang ding hen mupi thla panih an pêk. ¹⁵ Chun, rûlpi nih chun chu nunau chu fenhtir ding hen tiva hâwi hen a kâ lâk mi tî chu a suah rawh. ¹⁶ Sikhawmsele, tual nih nunau chu a ṭangpi le, tual nih chun a kâ a âng le, rûlpi nih a kâ lakah tiva hâwi hen a suah mi tî chu a dawlh hep. ¹⁷ Chun, Rûlrêu chu nunau tlûnah a thinthawk le, a thlak tla an um rih mi, Pathian thupêk tla zâwt hen Jisu theihtirnâk thu pawmtu tla chu do ding hen a suak rawh. ¹⁸ Chun, Rûlrêu chu tipi kap ah chun a dîr rawh.

¹ Chun, sarâng, ki parâ leh lû pasarih a nei mi, tisumsumriat thawk hen a hawng suak mi ka muh le, a ki kip ah lallukhuh a um le, a lû kip ah simsiatnâk min â rîn asi. ² Chun, sarâng ka muh mi chu keitê hâwi asi le, a kê tla chu vawm kê hâwi asi le, a kâ chu chakeibaknei hâwi asi; chun, rûlrêu nih sarâng chu amah thiltikhonâk leh a laltophah leh amah thuneihnâk fâk tak a pêk. ³ Chun, a lû pakhat chu thih phah rê hen liamh hen a um le, sikhawmsele, a mâ chu a dam le, tual a mi zawzawng nih chê an ti le, chu sarâng chu an zûl rawh. ⁴ Chun, sarâng sinah rûlrêu nih a thuneihnâk a pêk ruangah rûlrêu chu mi zapi nih an sawnh rawh, "Sarâng hâwi hi âu an um? Âu a do khotu um?" ti hen sarâng khawm chu an mâimûk. ⁵ Chun, sarâng chu sual thu ṭihnungkâi tak sim ding leh thla sâwmli leh thla nih thuneihnâk pêk asi. ⁶ Pathian leh a min leh, vân ah a umnâk mun leh vân ah an um mi zawzawng simsiat chu a dawmh rawh. ⁷ Chun mi thenhlimh tla chu do hen neh siang an si le, chi kip tla, mikip tla, hawlh kip tla, phun kip tla tlûnah thuneihnâk pêk asi. ⁸ Chun, tual ah an um mi zawzawng lakah laikulh um lân thawk hen thah rawh mi Dawrâ Fa nungnâk lasuibu ah an min â rîn lo mi vial nih chun amah an mâimûk lai. ⁹ "Âuzawng nâ a nei mi nih chun ngâi seh. ¹⁰ Âuzawng tleih tumtu chu tleih hen an um lai le, nâmsâu hen thah tumtu chu nâmsâu hen thah hen a um bâk lai. Chu chu mi thenhlimh tla felfênâk leh zumhkâinâk chu asi. ¹¹ Chun, sarâng dang tual ah a hawng suak mi ka muh le, dawrâ hâwi hen ki panih a nei le, rûlrêu hawlh hâwi hen a hawlh. ¹² Sarâng masa dauh thuneihnâk zawzawng kha a mitmuh ah a mang rawh, tual leh a tlûnah a um mi zawzawng tla chu sarâng masa thih phah rê ding hen â liam le, a dam nawlh mi chu sawnh ding hen thu a pêk na. ¹³ Chun, hi sarâng panihnâk nih hin mi zawzawng mitmuh ah vân thawk hen tual ah mei tlâktir kho rê hen thilchê ti khonâk a nei. ¹⁴ Chun, sarâng masachem mitmuh ah thilchê a ti mi hen khan tual tlûnah mi zawzawng chu a perpet na rawh. Chun, sarâng nih chun nâmsâu hen thi khawp rê hen liamh hen a um le, a dam nawlh mi sarâng chawnglawmhnâk ding hen mi zawzawng chu sarâng masachem lem tuah ding hen thu a pêk na. ¹⁵ Chun, sarâng masachem lem chu hawlh kho ding hen leh amah sawnh lotu vial thah kho ding hen sarâng panihnâk nih nungnâk thaw pêk ding hen siang asi. ¹⁶ Chun, mi zawzawng, a lian a mê hen, a nei a pâm, to-aw leh to-aw lo tla khawm, an kut vawrhlei ah mawh, an chal ah mawh singsiahnâk a neitir na. ¹⁷ Singsiahnâk sarâng min mawh, a min nambar mawh neitu tla cho lo nih chun âukhawm nih an châwk hen an zuar kho lo rawh. ¹⁸ Hinah hin finghnâk langh khonâk a um. Theih khonâk nei mi nih chun sarâng nambar chu zâwt set seh; chu nambar chu minung ruangrûl ah asi le, chu chu zaruk leh sâwmruk leh paruk asi.

¹ Chun, ka zauh le, Dawrâ Fa Zion tlâng ah a dîr mi leh an chal ah a min leh a Pa min â rîn mi, mi nuai khat leh sîng li leh sâng li a sinah an dîr mi ka muh, ² chun, vân thawk hen zeilo hâu, tî tamtak sâitâr ah â khâwk mi hâu hâwi leh khuarît fâk tak hâu hâwi ka theih le, chun, ka hâu theih chu ṭingṭang tumtu tla nih an ṭingṭang an tum mi hâu hâwi asi. ³ Laltophah mâika ah leh thilnung pali tla leh upa tla mâika ah chun la thar an sak le, chu la thar chu âukhawm nih tual a mi tlanh chia tla mi nuai khat leh sîng li leh sâng li tla cho lo nih chun anna sîn kho lo. ⁴ Chubang tla chu nunau lakah â nawmh lo mi tla an si; nungâk thenhlimh hâwi an si, Dawrâ Fa kalnâk kipah zûltu tla an si, Pathian rangah leh Dawrâ Fa rangah rah masachem si ding hen minung tla lakah mi tlanh an si. ⁵ Diklo nâk âwkrâwl an sim mi âu nih khawm an theih dah lo. ⁶ Chun, tual ah an um mi tla, phun kip tla, chi kip tla, hawlh kip tla, mi kip tla sinah zungzâl Thâwngthâng Ṭha thuchah sim ding hen vânmifial dang vân chung sâng ah a zuang mi ka muh. ⁷ Chun, anih nih chun, hâu fâk tak hen, "A lâirêl tik chu a tlung rawh ruangah Pathian ṭih ule, chawnglawmh u, tual leh vân, tisumsumriat leh tinungva tla siamtu chu mâimûk u," a ti. ⁸ Chun, vânmifial panihnâk nih chun, "Babulon khua rokual ah mi pungmang nâk uain hâi, phun zawzawng dintirtu chu a tlû rawh, a tlû rawh," a ti. ⁹ Chun, vânmifial pathumnâk nih chun hâu fâk tak hen, "Âuzawng nih sarâng leh a lem mâimûk hen an chal ah mawh an kut ah mawh singsiahnâk an nei chun, ¹⁰ chu tla chu Pathian thinthawknâk uain, a thinthawknâk hâi ah khat dil a tleng mi dintu an si lai le, vânmifial thenhlimh tla leh Dawrâ Fa mitmuh ah mei leh kât hen rêp an si lai. ¹¹ Chu minung tla rêpnâk meikhû chu zungzâl hen a kâi lai le, sarâng leh a lem mâimûktu tla, a min singsiahnâk neitu tla vial chu a sûn a zân hen dinh ni an nei lai lo," ti hen a âu. ¹² Hinah hin mi thenhlimh Pathian thupêk tla leh Jisu lungnâk thu zâwttu tla felfênâk chu a lang asi. ¹³ Chun, vân thawk hen aw-hâu nih, "Hi hâwi hen rîn rawh, Lalpa rianṭuannâk ah an thi mi tla chu tu thawk hen an thaw a suak," a ti. Thlarau nih chun, "Chu hâwi chu asi," ti hen a sâng. Chun, "An rianṭuan hamhnâk chu an dinhtâk rawh le, an thilti nih chun a zûl na lai rawh," a ti mi ka theih. ¹⁴ Chun, ka zauh le, sûm vâr ka muh, chun, sûm tlûnah minung hâwi hen ngûn lallukhuh khuh hen, favah hâr tak put hen a to mi ka muh. ¹⁵ Chun, vânmifial dang Pathian biakin thawk hen a hawng suak le, sûm tlûnah a to mi sinah chun hâu fâk tak hen, ât a zâ rawh ruangah na favah kha mang le ât rawh, tual ah mi fâng a min rawh asi," a ti. ¹⁶ Chun, sûm tlûnah a to mi nih chun a favah chu tual ah a thlâk le, tual mi fâng chu an ât rawh. ¹⁷ Chun, vânmifial dang, vân ah Pathian biakin thawk hen a hawng suak nawlh le, anih khawm nih favah hâr tak a put bâk. ¹⁸ Chun, vânmifial dang mei tlûnah thuneitu chu mâichâm thawk hen a hawng sim nawlh le; anih nih chun hâu fâk tak hen, vânmifial favah hâr tak a put mi sinah chun "Na favah hâr tak kha mang le, tual ah grep rah sûr tla khi va ât rawh, grep rah tla a min ver rawh khi," ti hen a âu. ¹⁹ Chun, vânmifial nih chun a favah chu tual ah a thlâk le, tual mi grep rah chu a ât le, grep sûrnâk khur kâu tak, Pathian thinthawknâk grep sûrnâk khur ah a lawnh rawh. ²⁰ Chun, grep rah tla chu khuapi lênglei ah grep sûrnâk ah an chîl le, chun, grep sûrnâk khur thawk hen chun, thisên a hawng suak le, mêl zanih tiang a luang le, feet nga tiang a thûk.

¹ Chun vân ah chun singsiahnâk dang rokual tak leh chê tak ka muh le, vânmifial pasarih, rêpnâk pasarih puttu tla chu, chu chu rêpnâk madungchem chu asi, chu ri rawh chun Pathian thinthawknâk chu a dawng rawh. ² Chun, tisumsumriat thlalang hâwi mi, mei hen a chawmh mi ka muh le, sarâng leh a lêm leh a min nambar nehtu tla chu an hawng suak le, Pathian nih ṭingṭang a pêk na mi chu put hen tisumsumriat thlalang hâwi mi kap ah an dîr mi ka muh ber. ³ Chun, Pathian to-aw Mosi la leh Dawrâfa la chu an sak le, Lalpa Pathian zeizawng tikho, na thilti tla chu a rokual hen a chê le! Nang phun kip Lalchem, na lampi tla chu a dik hen â rep asi! ⁴ Lalpa, âu nih nang a nan ṭih lo lai! Na rokualnâk phuang lotu âu a um lai? Nangmah lâwng na thenhlimh asi! Na thilti rep tla chu mi kip nih an muh rawh, phun kip an hawng lai le a nan sawnh lai," an ti. ⁵ Chu nûn chun vân ah biakin â awng le, a sungah Pathian umnâk Puanin Thenhlimh ka muh. ⁶ Chun, biakin sung thawk hen vânmifial pasarih, rêpnâk pasarih puttu tla chu puan thenhlimh vâr tak aih hen, an sûm ah ngûn tâisâwm sâwm hen an hawng suak. ⁷ Chun, thilnung pali lakah pakhat nih chun, vânmifial pasarih tla sinah, zungzâl hen a nung kumza mi Pathian thinthawknâk hen a khat mi ngûn berhbu pasarih a pêk na. ⁸ Chun, biakin chu Pathian rokualnâk leh thiltikhonâk khû hen a khat phak le, vânmifial pasarih tla rêpnâk pasarih chu a len lân lo chu biakin ah chun âukhawm an lût kho lo.

¹ Chun, biakin thawk hen hâu fâk tak hen vânmifial pasarih tla sinah, "Kal ule, Pathian thinthawknâk berhbu tla chu tual ah thlêt u," a ti mi ka theih. ² Chun, vânmifial pakhatnâk chu a kal le, a berhbu chu tual ah a thlêt le, chun sarâng singsiahnâk neitu leh a lem mâimûktu tla tlûnah chun masia fâk tak a hawng tlung rawh. ³ Chun, vânmifial panihnâk nih a berhbu chu tisumsumriat ah a thlêt le, tî chu mithi thisen hâwi hen a hawng um le, chun, tisumsumriat ah thilnung chikip chu an thi ver rawh. ⁴ Chun, vânmifial pathumnâk nih a berhbu chu tiva ah leh tinungva ah a thlêt le, thisen ah anna chang rawh. ⁵ Chun, vânmifial tî tlûnah thuneitu nih chun, "Nang Mi Thenhlimh, a um rawh mi leh a um liau mi, na lâirêl tla chu a dik asi, ⁶ annih nih chun mi thenhlimh leh khuavâng tla thisen an suah le, an din dingah thisen na pêk na mi hi anna dêng cho asi," a ti mi ka theih. ⁷ Chun, mâichâm thawk hen aw-hâu nih chun "Lalpa Pathian Zeizawng tikho, na lâirêl tla chu a dik hen â rep asi," a ti mi ka theih. ⁸ Chun, vânmifial palinâk nih chun a berhbu chu nî lakah a thlêt le, nî chu minung tla ût rê emh ding hen a lîn rawh. ⁹ Chun, chu minung tla chu nî nih ût rê hen emh na khawmsele, nî tlûnah thuneitu Pathian chu sawr leh chawnglawmh ngâk hen hawlhsiat an barh le, an sualnâk chu an rim lêm lo. ¹⁰ Chun, vânmifial panganâk nih a berhbu chu sarâng laltophah ah a thlêt le, sarang ram zawzawng chu a hawng mui hep le, an nganfâk tuk ruangah an lei tla an seh le, ¹¹ an mâ leh an nganfâk ruangah vân Pathian chu hawlhsiat an barh le, sikhawmsele, an thilti sual chu an rim lêm lo. ¹² Chun, vânmifial paruknâk nih chun a berhbu chu Eufretis tipi ah a thlêt le, chun, saklei thawk hen lal hawng kal ding mi tla rangah lampi a um khonâk ding hen tî chu a kang rawh. ¹³ Chun, rûlrêu leh sarâng leh khuavâng telê kâ thawk hen thlarau nâwmtâm pathum chu-uh hâwi an hawng suak mi ka muh. ¹⁴ Chun, chu tla chu khuri thlarau thilche titu tla an si. Hi thlarau pathum tla hi Zeizawng tikho Pathian ni rokual ah râltuknâk ah kalpi na ding leh laikulh lal zawzawng tla pumh na ding hen an suak rawh. ¹⁵ Ngainik, mifîr hawi hen ka hawng kal awt, râlring hen nipuan aih kumza hen a um mi chu a thaw a suak, chu lo chun takkaro leh mualpho hen a um sual lai. ¹⁶ Chun, thlarau nih chun mun pakhat Hebrai hawlh hen Armagedon an ti mi ah chun lal tla chu a kalpi na rawh. ¹⁷ Chun, vânmifial pasarihnâk nih chun a berhbu chu boruak ah a thlêt le, chun, biakin ah laltophah thawk hen, "Â lîm rawh," ti hen aw-hâu fâk tak a hawng suak. ¹⁸ Chun, mîmthlalek tla, aw-hâu tla, khuari tla, lî fâk tak â nîn le, tual ah minung siam tîr thawk hen chu hâwi hen lînîn fâk chu a um dah lo. ¹⁹ Chun, khua rokual chu mun thum hen â ṭhen le, ram kip mi khuapi zawzawng chu â râwk ver rawh. Chun, Pathian nih Babulon khua rokual tak chu a theihkumza le, a thinthawknâk fâk tak uain hâi chu a dintir rawh. ²⁰ Chun, tikulh zawzawng tla chu a vei le, tlâng zawzawng tla khawm a vei rawh. ²¹ Chun, rialpi lian tak, khîng sâwmnga rit chiau vân thawk hen minung tla tlûnah a tlâ, chun, chu hâwi rêpnâk ruangah minung tla nih chun Pathian hawlhsiat an barh rawh.

¹ Chun, vânmifial pasarih, berhbu pasarih puttu lakah pakhat chu ka sinah a hawng le, "Hawng le, nunau â zuar mi minthang tak rêp ding mi, tiva tamtak kiangah khuapi rokual tak chu ka nan zauhtir lai. ² Tual ah lal tla nih chun anih chu an pung tâwn le, tual ah mipi tla chu duh a mangnâk uain chu dinh hen a rîttir na asi," a ti. ³ Thlarau hen ka hawng um le, vânmifial nih ramkaro ah a hawng ka kalpi. Chun, sualnâk min hen a khat mi sarâng sen lû pasarih leh ki parâ a nei mi tlûnah nunau a to mi ka muh. ⁴ Nunau nih chun puan senduk leh sen lâr â aih le, ngûn leh lungmantam leh aitikep lung hen â thuam le, ngûn hâi, pungmangnâk thil nâwmtâm hen a khat mi a put. ⁵ A chal ah thuthup, "Babulon khua rokual, â zuar mi zawzawng tla nu leh laikulh ruisualtu," ti hen a min â rîn. ⁶ Chun, chu nunau chu mi thenhlimh tla thisen leh Jisu lakah zumh an kâi ruangah thah hen an um mi tla thisen hen a rî mi ka muh le, ka muh ka hen thungai chê ka ti. ⁷ Chun, vânmifial nih chun ka sinah, "Zeirangah chê na ti? Nunau leh a phurhtu sarâng, lû pasarih leh ki parâ a nei mi thuthup chu ka nan simh lai. ⁸ Sarâng na muh mi kha a hawng um duak le, a um lo nawlh fâwn, khurtawdawnglo thawk hen a hawng suak lai le, veih depnâk ah a kal lai. Chun, tual ah an um mi tla, tual umtîr thawk hen nungnâk lasuibu ah min â rîn lo mi tla nih chun sarâng chu an muh tikah, a hawng um duak le, a um lo nawlh fâwn mi, a hawng lang awt nawlh mi chu chê an ti lai. ⁹ "Hinah hin theihthiamnâk thinlung nei a herh asi. Lû pasarih chu nunau tonâk tlâng pasarih chu asi. Lal pasarih tla khawm kha an si; ¹⁰ panga tla chu neh hen an um rawh le, pakhat nih lâi a rêl liau le, pakhat dang chu a hawng um lo rih le, a hawng um tik chun sâwtlotê cho a um ding asi. ¹¹ Chun, sarâng a hawng um duak le, a um lo nawlh mi tak kha lal pariatnâk asi le, pasarih lakah pakhat kha a vei ding mi chu asi. ¹² "Chun, ki parâ na muh mi tla kha lal parâ ram a nei lo rih mi tla an si le, sikhawmsele, dârkar khat ding cho sarâng hen lal hâwi hen lâi an rêl lai. ¹³ Chun, chu parâ tla nih chun thurual hen sarâng chu an thiltikhonâk leh thuneihnâk an pêk rawh. ¹⁴ Chu tla nih chun Dawrâfa chu an do lai le, sikhawmsele, Dawrâfa chu hotu tla Hotu, lal tla Lal asi ruangah, amah kawh mi tla, thîm mi tla leh amah zûltu zumhkâi tla nih chun an neh na lai," a ti. ¹⁵ Chun, vânmifial nih ka sinah, "Nunau â zuar mi tonâk tî na muh mi kha, mi zapi tla, phun tla, hawlh tla an si," a ti. ¹⁶ Chun, ki parâ leh sarâng na muh mi nih khan nunau â zuar mi chu an hua lai le, a thilneih tla an lâk piak lai le, takkaro hen an mâk lai le, a sa khawm an ei lai le, mei hen an duah hep lai. ¹⁷ Pathian thutiam chu a tling lân lo chu a duhzia an tinâk ding leh, anna thurual hen an ram chu lâirêl ding hen an thiltikhonâk sarâng sinah an pêknâk ding hen Pathian nih an thinlung ah a duhtir na asi. ¹⁸ Chun, "Nunau na muh mi kha khua rokual tak, tual ah lal tla tlûnah lâirêltu chu a si," a ti.

¹ Chu nûn chun, vânmifial dang thuneihnâk fâk tak nei hen vân thawk hen a hawng ṭum mi ka muh le, a rokualnâk nih chun tual a cherh hep. ² Vânmifial nih chun hâu fâk tak hen, "Babulon khua rokual tak, khuri tla, thlarau nâwmtâm tla, nâwmtâm kip leh vâ nâwmtâm tla umnâk chu a tlû rawh; ³ a hurnâk uain rât tak chu phun zawzawng tla nih an din rawh. Tual ah lal tla nih anih chu an pung tâwn le, laikulh sawlehtu tla nih chun a duhnâk sual chu nei phahnâk ah an mang tâwn," ti hen a âu. ⁴ Chun, vân thawk hen aw-hâu dang nih a sim mi ka theih le, ’’Ka mi le tla, a sinah mi hawng suak u, a sualnâk lakah a tel lah u, a rêpnâk lak khawmah nanna tel ding si lo. ⁵ A sualnâk tla nih chun vân khawm a tawngh le, Pathian nih a thilti sual khawm a theih ko. ⁶ Amah nih a nan ti na mi hâwi hen va tirûl bâk u, amah thilti lehnih hen rulh bâk u. A nan dintir na mi lehnih ngâk a chak hen, a hâi lakah tleng piak bâk u. ⁷ A rokualtir hen nuam a chenh zia hâwitê hen, tuarnâk leh lawksawngnâk pêkrûl bâk u. A thinlung hen chun, Lalnu ka si, numei ka si lo, lawksawngnâk rerêng ka tawng lai lo, a ti asi. ⁸ Churuangah ni khat lakah amah rêpnâk chu a hawng tlung lai le, amah lâirêl piaktu Lalpa Pathian chu a rokual ruangah, anih chu râi tla, ngaihsiatnâk leh pâm nih a tlunh lai le, mei nih a khangh hep lai," a ti. ⁹ Chun, tual ah lal tla amah pung tâwntu leh, a nuamsabut chenhpitu tla nih chun a kâng mi khû chu an zauh tikah, ¹⁰ a rêpnâk ṭih ruangah lât takah an dîr mi tla nih chun, "Babulon khua rokual tak chu ṭihnung a kâi hen a tlûn a pit! Dârkar khat lak ko ah hi Babulon khua rokual tlûnah hin rêpnâk a hawng tlung ngâk chu!" an ti. ¹¹ Tual ah sawlehtu tla thil chu âukhawm nih an châwk piak na lo ruangah amah chu ngaihsia tak hen an ṭappi rawh: ¹² an thil tla chu, ngûn tla, tangkarua tla, lungmantam tla âitikep lung tla, puan mangṭhia tla, puan senduk tla, mâimaw puan tla, puan senlâr tla, thing man tam chi kip tla, sâihâ hen siam mi thil leh thing man tam hen siam mi tla, dâr leh thîr hen siam mi tla, lungvâr hen siam mi tla hen; ¹³ chun, mawsawla thing tla, rimthâw tla, rimthâw duah mi zât tla, sariak rimthâw tla, bawraw tla, murrah tla, uain tla, sariak tla, sangvut tla, fâng tla, chaw tla, dawrâ tla, rang tla, kari tla, sal leh minung nungnâk tiang hen asi. ¹⁴ Tual ah sawlehtu tla nih chun, "Thil ṭha nei ding hen na duh mi tla leh neih leh siah leh thil thaw leh thil dawh zawzawng nih a nan kaltâk rawh, na tawng nawlh lai lo rawh, an ti. ¹⁵ Tual ah sawlehtu tla, amah ruangah minei an si phah mi tla chu tuarnâk ṭih ruangah lât tak thawk a dîr hen, ¹⁶ ’’Khua rokual, puan mangṭhia leh puan senduk leh sen lâr aih hen, ngûn leh lungmantam leh âitikep lung hen â thuam mi chu a tlûn a pit! ¹⁷ "Dârkar khat ko ah chu zawng neih leh siah a thlâu rawh," ti hen amah sûn hen an ṭap rawh. Chun, lawng hotu tla, lawng ah kal tâwntu tla, lawng ah mi tla leh tisumsumriat ah rianṭuantu tla chu lâtpi ah dîr hen, ¹⁸ a kâng mi khû chu an muh le "Hi hâwi tluk hen khua rokual chu a um nawlh lai lo rawh," ti hen an âu. ¹⁹ Chun, an lû ah valeidip an phulh le, ngaihsia tak a ṭap bû hen, "Khuapi rokual tak chu a tlûn a pit! A neihnâk ruangah minei si mi tla leh tisumsumriat ah lawng neitu tla chu dârkar khat lak ko ah a tlâu rawh hi," an ti. ²⁰ Aw vân tla, Pathian mi tla, mifial tla, khuavâng tla a lâwm u, amah thilti hâwitê hen Pathian nih a tlûnah lâi a rêl rawh. ²¹ Chun, vânmifial rokual tak nih lung lianpi, fângrialnâk tî ah mi a sar le, tisumsumriat ah a lawnh le "Babulon khua rokual chu hi hâwi hen fâk tak hen lawnh asi lai le, âukhawm nih an muh nawlh lai lo rawh," a ti. ²² Chun, ṭingṭang tumtu tla, zeilo tum thiam tla, theikhang tumtu tla, tâwtawrâwt tumtu tla nih an tum mi, rihâu khawm nâ lakah an theih lai lo rawh; zungthiam rerêng na lakah an muh lai lo rawh, fângrialnâk rihâu khawm na sungah an theih lai lo rawh; ²³ khâwnvâr khawm na sungah a chêu lai lo rawh le, pasal leh mo hâu khawm na sungah an theih nawlh lai lo, na sawlehtu tla chu tual ah mi lian tla an si le, na dâwi hen phun zawzawng na perpet na kha. ²⁴ Khuapi sungah khuavâng tla leh Pathian mi thenhhinih tla thah hen an um mi tla thisen zawzawng chu muh asi ruangah Babulon chu rêp asi rawh," a ti.

¹ Chu nûn chun, vân ah mi zapi aw-hâu fak tak hâwi hen,’’Halleluia’’ (Pathian chu sawr u), ruangsuahnâk tla, rokualnâk tla, thiltikhonâk tla, kan Pathian tâ asi; ² a lâirêlnâk tla chu a dik hen â rep asi, anih nih chun nunau â zuar mi rokual tak, a hurnâk ruangah tual râwktu chu a thu a chek piak rawh, a to-aw tla a thah na mi phû chu a lam piak rawh," a ti mi ka theih. ³ Chun, an âu nawlh le, "Halleluia’’ (Pathian sawr u), khuapi a kâng mi khû chu zungzâl hen kâi seh," ti hen. ⁴ Chun, upa kul leh pali leh thilnung pali tla chu an bawkbukhup le, Pathian laltophah ah a to mi chu an mâimûk le, "Amen!’’Halleluia’’ (Pathian chu sawr u!)" an ti. ⁵ Chun, laltophah thawk hen aw-hâu a hawng suak le, ’Nannih a to-aw tla leh amah zahtu mi lian leh mi mê tla, kan Pathian chu sawr u," a ti. ⁶ Chun, mi zapi cherkhet aw-hâu hâwi leh, tî tamtak â khâwk mi rihâu hâwi leh khuarît fâk tak hâwi hen, ’’Halleluia’’ (’Pathian chu sawr u), kan Lalpa, Pathian Zeizawng tikho chu lalchem asi, ⁷ lâwptlo tak hen kan um lai le, amah kan chawnglawmh lai, Dawrâ Fa nupi neih chu a zâ rawh le, a nupi khawm â tîm zet rawh," a ti mi kha ka theih. ⁸ Puan mangṭhia chu mi thenhlimh tla thilti rep asi ruangah, puan mangṭhia thiang tak, a lek mi chu aihtir ding hen pêk asi. ⁹ Chun, vânmifial nih ka sinah, "Dawrâ Fa nupi neihnâk puai ah an sâwm mi tla chu an thaw a suak, ti hen rîn rawh," a hawng ka ti. Chun, vânmifial ber nih, ’Hi bang thu hi Pathian thudik chu asi,’ a ti nawlh. ¹⁰ Chun, amah chu sawnh ding hen a kebul ah ka kûn le, sikhawmsele, anih nih ka sinah, "Kha hâwi hen ti lah, kei chu nangmah unau leh Jisu thusim zâwttu tla hâwi hen to-aw ka si, Pathian lam sawnh rawh,’ a ti. Jisu nih thudik a sim mi chu khuavâng tla lakah thaw khumh hen thu sim asi. ¹¹ Chun, vân â awng mi ka muh le, chun, rang ngo leh a tlûnah â chuan mi, zumhkâi leh diktak, an ti mi chu ka muh le, anih nih chun rep tak hen lâi a rêl le, ral a do tâwn. ¹² A mit chu meialh hâwi asi le, lallukhuh tamtak â khuh le, chun a tlûnah min rîn amah cho lo nih chun âukhawm nih an theih kho lo mi a nei. ¹³ Puan thisen hen â chulh mi â aih le, a min ah chun, "Pathian thu" an ti. ¹⁴ Chun, vân ah kawrsen tla nih chun, puan mangṭhia vâr tak aih hen rang ngo tlûnah chuan bû hen an zûl. ¹⁵ Chun, a kâ thawk hen namsâu hâr tak a suak le, chu hen chun phun kip a neh lai, thîr ṭhianṭhunh hen lâi a rêl lai le, Pathian Zeizawng tikho thinrunhnâk fak tak grep surnâk khur ah an sur lai. ¹⁶ Chun, a puan leh a kê ah min rîn, "lal tla Lal leh hotu tla Hotu," ti hen a um. ¹⁷ Chun, nî lakah vânmifial a dîr mi ka muh le, anih nih chun vân lâiah vâ an zuang mi tla sinah hâu fak tak hen, ¹⁸ "Lal sa tla, kawrsen hotu sa tla, mi chak sa tla, rang leh a tlûnah chuantu tla, mi zawzawng, to-aw leh to-aw lo, mi lian leh mi mê tla sa nan ei khonâk ding hen, Pathian puai rokual tak tuahnâk ah hawng a pum u," ti hen a âu. ¹⁹ Chun, sarâng tla, tual a lal tla, an kawrsen tla chu, rang tlûnah a chuan mi leh a kawrsen tla do ding hen anna pûm mi ka muh. ²⁰ Chun, sarâng chu an tleih le, khuavâng telê, sarâng singsiahnâk nei mi leh a lem maimûktu tla, an perpet na tâwnnâk thilchê a mitmuh ah titu tla kha an tleih sih le, an panih hen kât hen a kâng mi meizur ah a nung hen an lawnh na. ²¹ An kawrsen tla chu rang tlûnah â chuan mi kâ thawk hen a suak mi nâmsâu hen thah an si rawh. Chun, vâ zawzawng tla nih chun an sa tla chu duh tâwk hen an ei rawh.

¹ Chun, vânmifial, khurtawdawnglo renh leh chikchîn lian tak put hen, vân thawk hen a hawng ṭum mi ka muh. ² Chun, rûlrêu, rûlpi tar, chu chu Diabol mawh, Setan chu a tleih le, kum sâng khat rang ding hen a phuar rawh. ³ Vânmifial nih chun khurtawdawnglo ah a khumh le, a khar pang le, kum sâng a tling lân lo chu phun kip a perpet lo rawh nâk ding hen a sengh tap le, chu nûn chun sâwtlotê suah nawlh rih ding asi. ⁴ Chun, laltophah tla ka muh le, a tlûnah mi an to le, an sinah lâirêlnâk an pêk na le, chun, Jisu theihtirnâk thu ruangah leh Pathian thu ruangah lû tan hen an thi mi thlarau tla leh sarâng leh a lem mâimûk lo hen, an chal ah mawh, an kut ah mawh singsiahnâk neilotu tla thlarau khawm ka muh le, chubang tla chu an nung le, Jisu Krist hen kum sâng khat lâi an rêl. ⁵ Chun, mithi dang tla lam chu kum sâng khat a ral lân lo chu an nung lo rih. Hi hi thawknawlhnâk masachem chu asi. ⁶ Hi thawknawlhnâk masachem ah a tel mi tla chu an thaw suak hen anna thenhlimh asi, chubang tla tlûnah chun thih nihnâk nih thu rerêng a nei lai lo le, Pathian leh Krist bâwlpu tla an si lai le, amah hen kum sâng khat lâi an rêl lai. ⁷ Chun, kum sâng khat a tling tikah Setan chu a tângnâk ah mi suah hen a um lai le, ⁸ tual ah phun tla, Gog leh Magog chu perpet ding leh râltuk dingah pumh na ding hen a suak lai, chubang tla tam zia chu tisumsumriat kapah sep hâwi an si. ⁹ Chun, tual tlûn khat zat hen an kal le, Pathian mi le umnâk leh Pathian nih a dâwt mi khua chu an hual le, chun, vân thawk hen mei a hawng tla le, a khangh hep na rawh. ¹⁰ Chun, anmah perpettu Diabol chu, sarâng leh khuavâng telê umnâk mei leh kât zur ah an lawnh rawh, chun, zungzâl hen sûn leh zân hen rêp hen an um lai. ¹¹ Chun, laltophah lianpi vâr tak leh a tlûnah a to mi ka muh le, a mâika mi tual leh vân an tek ving le, muh kho an si lo rawh. ¹² Chun, mithi tla, a lian a mê hen, laltophah mâika ah an dîr mi ka muh le, chun lasuibu tla chu a kêu le, chun, lasuibu dang, nungnâk lasuibu khawm a kêu le, chun, mithi tla chu an thilti lasuibu tla ah â rîn hâwitê hen lâirêl piak hen an um rawh. ¹³ Chun, tisumsumriat nih a sungah mithi tla chu a suah le, thihnâk leh mithi khua tla khawm nih an sungah mithi tla chu an suah le, an ektê hen an thilti hâwitê hen lâirêl piak hen an um. ¹⁴ Thihnâk leh mithi khua tla chu meizur ah an lawnh rawh. Chu chu thih nihnâk chu asi. ¹⁵ Âuzawng nungnâk lasuibu ah a min rîn hen a um lo mi chu meizur ah an lawnh rawh.

¹ Chun, vân thar leh tual thar ka muh le, vân masa leh tual masa chu a vei rawh, tisumsumriat khawm a um lo rawh. ² Chun, khua thenhlimh Jerusalem thar chu, mo, a pasal hen a tawng ding hen dawh tak hen â thuam ziar mi hâwi hen, Pathian sin thawk hen vân ah mi a hawng ṭum mi ka muh. ³ Chun, laltophah thawk hen aw-hâu fâk tak hen, "Ngâinik, Pathian bâsâ chu minung lakah a hawng um rawh, anih chu an sinah a um lai le, annih tla chu a mi le an si lai le, Pathian ngelchel chu an sinah a um lai le; an Pathian asi lai. ⁴ An mit a mi mitthli zawzawng a nawt lai le, thihnâk a um lai lo rawh le, ngaihsiatnâk tla, ṭapnâk tla, nganfâk tla, a um lai lo rawh, thil masa tla chu a vei rawh," a ti mi ka theih. ⁵ Chun, laltophah ah a to mi nih chun, "Ngâinik, thil zawzawng ka siam thar rawh," a ti. Chun, ka sinah, "Rîn rawh, hi bang thu hi a dik hen zumh a kâi asi," a ti. ⁶ Chun, hi hawi hen a sim le, "Â lîm rawh, kei Alpha leh Omega, a bul leh a dawng ka si, a tîhâl mi zawng sinah nungnâk tiva ah mi a thawt hen ka pêk lai. ⁷ A nehtu vial nih chubang tla chu ka sinah mi a tawng lai le, anih chu ka fa asi lai. ⁸ Sikhawmsele, mi zer tla, lunglo tla, mi lêmtu tla, mi thahtu tla, mi hur tla, dâwithiam tla, milem sawnhtu tla leh âwkrâwl simtu tla tingvo mun chu mei leh kât hen a kâng mi zur asi, chu chu thih nihnâk chu asi. ⁹ Chun, vânmifial pasarih tla lakah pakhat, berhbu pasarih khat phak hen rêpnâk pasarih puttu chu ka sinah a hawng le, "Hawng le, Mo, Dawrâ Fa nupi chu ka nan muhtir lai," a ti. ¹⁰ Chun, Thlarau nih tlâng lianpi sâng takah a hawng ka kalpi le, Jerusalem khua thenhlimh Pathian rokualnâk hen a chêu mi, Pathian sinah mi, vân thawk hen a hawng ṭum mi chu a hawng ka zauhtir. ¹¹ A chêu zia chu lungmantam, jaspar lung hâwi hi asi, kristal lung hâwi hen a lek. ¹² Kulh rokual tak, sâng tak a nei le, kawtkâ leinih leh kawtkâ kipah vânmifial leinih an um. Kawtkâ kipah min rîn a um le, chu chu Israel phun leinih tla min asi. ¹³ Saklei ah kawtkâ pathum, marlei ah pathum, simlei ah pathum, thlanglei ah pathum. ¹⁴ Chun, chu khua kulh nih chun lungphum leinih a nei le, chu lak chun Dawrâ Fa mifial leinih min a rîn. ¹⁵ Chun, a hawng ka sawnhtu nih, khua leh a kawtkâ leh a kulh chu, tah ding hen ngûn fung a put le, ¹⁶ khua chu kil li asi le, a dung leh a vâng â chan asi, vânmifial nih chun khua chu fung hen chun a tah le, mêl sâng khat leh zanga asi, a dung leh a vâng, a sâng leikâng â chan rang. ¹⁷ Chun, vânmifial nih kulh khawm chu minung tah dân hâwi hen a tah le, dâwng zâ leh sâwmli leh dâwng li asi. ¹⁸ Chun, a kulh chu jaspar lung hen siam asi, khua chu thlalang thenhlimh hâwi, ngûn thenhlimh hen siam asi. ¹⁹ Chu khua kulh lungphûm tla chu lungmantam chi kip hen thuamh asi. Lungphûm masachem chu jaspar lung asi le, a panihnâk chu saphir lung asi le, a pathumnâk chu kalsedoni lung asi le, a palinâk chu emeral lung asi le, ²⁰ a panganâk chu sardonik lung asi le, a paruknâk chu karnelian lung asi le, a pasarihnâk chu krisolit lung asi le, a pariatnâk chu beril lung asi le, a pakuanâk chu topaz lung asi le, a parânâk chu krisopra lung asi le, a leikhatnâk chu jasin lung asi le, a leinihnâk chu amethi lung asi. ²¹ Chun, kawtkâ leinih chu âitikep lung leinih asi, kawtkâ zawzawng chu âitikep lung pakhat chiau hen siam asi. Chun, khua tualmâi chu ngûn thenhlimh asi le, thlalang hâwi hen lan dak muh kho asi. ²² Lalpa Pathian Zeizawng tikho leh Dawrâ Fa chu biakin asi ruangah chun ah chun biakin rerêng ka muh lo. ²³ Chun, chu khua nih chun a cherhtu ding hen nî a herh lo, thlâ khawm a herh lo; Pathian rokualnâk nih a cherh le, an meichêu chu Dawrâ Fa asi. ²⁴ Chun, phun kip a chêu ah an um lai le, tual ah lal tla nih an neih leh siah tla an lûtpi lai. ²⁵ Chun, khuapi kawtkâ chu â awng kumza lai le, an khâr lai lo rawh, chunah chun zân a um lai lo rawh. ²⁶ Phun kip nih rokualnâk leh neih leh siah an lûtpi lai. ²⁷ Sikhawmsele, nâwmtâm tla leh thil dawh lo titu tla leh âwkrâwl simtu tla chu an lût lai lo; Dawrâ Fa nungnâk lasuibu ah an min â rîn mi cho an lût lai.

¹ Chun, vânmifial nih chun nungnâk tiva kristal lung hâwi hen a tlêu mi, Pathian leh Dawrâ Fa laltophah thawk hen a hawng suak mi hawng ka zauhtir. ² Chun, nungnâk thing, tiva kap khatlei vevê ah zât leinih hen thla kip a rah mi a um le, chu thingnah tla chu phun kip damhnâk ding asi. ³ Chun, chu khuapi ah chun Pathian siatbarh rerêng a um lai lo rawh le, Dawrâ Fa leh Pathian laltophah chu a um dauh lai, chun, a to-aw tla nih amah an sawnh lai. ⁴ Chun, a mêl an muh lai le, an chal ah a min rîn asi lai. ⁵ Chun, zân a um lai lo le, khâwnvâr chêu leh nî chêu a herh lai lo le, Lalpa Pathian chu an chêu asi ruangah, zungzâl hen lâi a rêl lai rawh. ⁶ Chun, anih nih chun ka sinah, "Hi bang thu hi zumh a kâi hen a dik asi, Lalpa Pathian, khuavâng tla sinah thlarau pêktu nih chun, thu hawng tlung sawm ding mi tla chu a to-aw tla chu zauhtir ding hen a vânmifial chu a fial asi. ⁷ Chun, Jisu nih, "Ngâinik, ka hawng kal tuan awt hi, hi lasuibu ah khuavâng tla thusim zûltu vial chu an thaw a suak," a ti. ⁸ Chun, kei Johan, hi bang thu zawzawng muhtu leh theihtu chu ka si. Chun, chubang thu tla ka muh hen ka theih rawh chun, a hawng ka zauhtirtu vânmifial chu sawnh ding hen a kê bulah ka bawkbukhup rawh. ⁹ Chun, anih nih chun ka sinah "Hi hâwi hen ti lah, kei chu nangmah leh na unau khuavâng tla leh hi lasuibu thu zûltu tla hâwi hen to-aw ka si bâk, Pathian sawnh dauh rawh," a ti. ¹⁰ Chun, anih nih chun ka sinah, "Hi lasuibu ah khuavâng tla simkannâk thu tla hi pheh lah, hi bang thil tla a hawng tlung ding mi tik chu a nâi rawh hi. ¹¹ Mi replo chu replo hen um ko na seh, mi nâwmtâm chu nâwmtâm hen um ko na seh, mi rep chu rep hen um ko na seh, mi thenhlimh chu thenhlimh hen um ko na seh," a ti. ¹² Chun, Jisu nih, "Ngâinik!" "Ka hawng kal tuan awt hi! Mi kip an thilti hâwi vima hen pêk na ding hen ka lâwmman ka hawng put awt asi. ¹³ Kei Alpha leh Omega, a masachem leh a madungchem, a bul leh a dawng ka si," a ti. ¹⁴ An nipuan thiang tak hen suktu leh nungnâk thing rah ei hen khuapi kawtkâ ah a lût khotu tla chu an thaw a suak. ¹⁵ Lênglei ah chun, ui tla, dâwithiam tla, pungmang tla, milem sawnhtu tla, âwkrâwl sunhsaktu tla leh âwkrâwl sim mang tla chu an um lai. ¹⁶ "Kei, Jisu nih, kawhmi murui tla sinah hi bang thu tla hi theihtir ding hen ka vânmifial chu ka hawng fial asi. David bulpi leh a thlâk, ârfi chêu tak, deirêl ârfi chu ka si" a ti. ¹⁷ Thlarau leh mo nih chun, ’’Hawng rawh" an ti. A theihtu zawng nih, "Hawng rawh," ti seh. A tîhâl mi zawng chu hawng seh, nungnâk tî hi a duhtu zawng nih a thawt hen lâk seh. ¹⁸ Kei, Johan nih, hi lasuibu hi simhkannâk thu theihtu zawng chu ka theihtir na asi. Âuzawng nih hi bang thu hi a sap chun, hi lasuibu ah rêpnâk â rîn mi tla hi Pathian nih a tlûnah a sap bâk lai. ¹⁹ Chun, âuzawng nih hi lasuibu ah simhkannâk thu â rîn mi chu a veih chun hi lasuibu ah â rîn mi nungnâk thing rah leh Khua Thenhlimh ah mi a tingvo chu Pathian nih a lâk piak ving lai. ²⁰ Hi thu theihtirtu nih hin, "Ka hawng kal tuan awt," a ti. Amen, hawng kal ko me, Lalpa Jisu! ²¹ Lalpa Jisu zângfahnâk chu mi thenhlimh tla sinah um seh.