PHILIPI

PHILIPI

¹ Pawl leh Timothe, Krist Jisu ah to-aw tla nih chun: Krist Jisu ah mi thenhlimh, Philipi khua ah um zawzawng tla sinah, kawhmi hotu tla leh rianṭuantu tla sinah khawm-- ² Pathian kan Pa leh Lalpa Jisu sinah thawk hen zângfahnâk leh remnâk nan sinah um seh. ³ Ni masachem thawk khan tutiang hen Thâwngthâng Ṭha zanhnâk ah nanna tel bâk ruangah ka nan theih pup na zâwn kipah ka Pathian sinah lâwmthu ka sim tâwn. Nanmah rangah thla ka nan cham piak na nâk kipah lâwm tak hen ka deih rawh. ⁶ Nanmah lakah thil ṭha dawmhtu nih khan Jisu Krist ni tiang hen a rangtlingtir vima awt, chu tak chu ka lung thlir ruangah. ⁷ Nanmah tla leikângah chu hâwi thinlung put chu kei rangah chun â dawh rerêng asi, ka thinlung ah ka nan siah na ruangah; ka rêngkhimhnâk tla ah Thâwngthâng Ṭha diknâk thu ka simnâk ah leh ka birhtirnâk tla ah khawm, nan ektê hen zângfahnâk chu hawng ka bâwmpitu tla nan si dangâiah. ⁸ Krist Jisu siherhnâk ah chun nan ektê hen ka nan ngâi na zia chu Pathian hawng ka theihpitu asi. ⁹ Chun, nan zângfahnâk nih theih rangtlingnâk leh fâifîmnâk zeizawng ah a nei khunnâk ding hen thla ka cham tâwn hi; chun, Pathian rokualnâk leh sawrnâk dingah Jisu Krist zârah repnâk rah um mi hen hawng khat hen, Krist ni rangah a tak tak leh simsâwi kawp lo nan si khonâk ding hen thil ṭha khun tla chu ṭha nan ti kho lai. ¹² Chun, unau tla, ka tlûnah thil hawng tlung mi tla kha Thâwngthâng Ṭha zanhnâk ding a hawng si thlo lehlam asi ti nan theih ka duh asi. ¹³ Chun, ka rêngkhimhnâk tla hi lal in vêngtu kawrsen murui zawzawng leh midang zawzawng sinah chun Krist ruang asi ti a lang rawh. ¹⁴ Lalpa ah unau tam dauh khawm nih ka rêngkhimh tla ruangah lung thlir hen ṭih lo hen Pathian thusim leikângah an râl a ṭhat zia a fâk khun asi. ¹⁵ Zeimaw mi nih chun nahsuah leh elnâk ruang khawmah Krist thu an phuang tâwn; zeimaw mi nih chun lâwm ruangah an phuang tâwn; ¹⁶ murui khat nih chun Thâwngthâng Ṭha mawhlonâk thu sim ding hen ruat ka si ti theih hen zângfahnâk ruangah an sim tâwn. ¹⁷ Murui khat lam nih chun ka rêngkhimh ruangah lawksawngnâk hawng ka sap piak tum hen, a tak silo hen, mah mâisialnâk ruangah Krist thu chu an sim tâwn. ¹⁸ Zeitin rawh ne? Zeiruang khawm asi lo, thu zeizawng ah a telê hen mawh a tak hen mawh Krist thu sim hen a um rerêng asi; chubang lakah chun ka lâwm le, asi, ka lâwm vima lai. ¹⁹ chu chu thla nan ka cham piaknâk ruangah leh Jisu Krist Thlarau hawng ka pêk mi ruangah ka ruangsuahnâk a hawng si awt tih ka theih ruangah, zei lak khawmah mualphotir hen ka um awt lo le, râlṭha tak hen, keimah umdân hâwi nget hen, ²⁰ tu khawmah nungnâk ruangah mawh thihnâk ruangah mawh ka taksa ah Jisu chawnglawmh hen a um dauh awt ti ka lungumnâk leh ka duhnâk hâwi vima hen. ²¹ Kei rang chun nung hi Krist asi ruangah, thih khawm dingchangnâk asi. ²² Sikhawmsele, taksa nung hi ting mi si sele, chu chu ka rianṭuan rah hâwi si sele, chun a zei mi me ka thîm dauh awt ti lam chu ka theih loh. ²³ A lâi laklawh ah hin a ngaihnâk theihlo hen ka um ko asi, suak hen Krist sinah um duhnâk ka nei ruangah, chu chu thungâi a ṭha dauh asi. ²⁴ Sikhawmsele, nanmah ruangah nung hen um kumza hi a herh dauh asi, ²⁵ chun chu chu ka lung thlir ruangah ka um kumza awt tih ka theih; asi, lungnâk ah chun nan hawng ṭhangnâk ding leh nanna lâwmnâk ding hen nan ektê sinah ka um kumza awt tih ka theih; ²⁶ chun, nan sinah ka um awt ruangah nan ka putsonâk chu Krist Jisu ah a zual khonâk ding hen. ²⁷ Zeikhawm si sele, nan umdân chu Krist Thâwngthâng Ṭha hen a êp ta seh, chun, nanmah tla an veh na khawmsele, nan sinah um lo khawmsele thlarau munkhat ah dîr thlir hen thinlung munkhat ah Thâwngthâng Ṭha lungnâk thu chu ṭanh leh ṭuan dut hen, ²⁸ dotu tla zei leikâng khawmah lâu lo hen nan um ti nan thâwngthâng ka theih kho lai, chu chu an rangah veihnâk asi ti theihtirnâk fiang tak asi, nannih rang lam chun ruangsuah ding nan si ti theihtirnâk fiang tak asi dauh, chu khawm chu Pathian lakah mi asi. ²⁹ Krist ruangah amah nan lung cho si lo hen amah ruangah nan tuar khawm siang asi; ³⁰ donâk keimah lakah nan muh tâwn mi, tu khawmah keimah lakah a um ti nan theih mi, chu tak chu nan nei bâk rawh hi.

¹ Chun, Krist ah ṭangpinâk rerêng, zângfahnâk ah lungngamnâk rerêng, Thlarau kawhnâk rerêng, siherhnâk leh zângfahnâk rerêng tla a um chun, ² thinlung munkhat a um hen, zângfahnâk munkhat nei hen, thinlung ah thurual hen munkhat a um hen, ka lâwmnâk rangtlingtir u. ³ Zuamchawh leh sung-û tirnâk ruangah zeikhawm ti lo hen, mikip nih nâu tak hen mah ngâk a midang ṭha dauh ah ruat chiau seh; ⁴ mah tâ cho zauh lo hen, midang tâ khawm zauh chiau dauh u. ⁵ Hi thinlung, Krist Jisu khawm ah um mi kha nanmah lakah um seh: ⁶ Anih nih chun Pathian hâwi a um hen, Pathian tluk ah um chu thil uh tlâk ah a ruat lo le, ⁷ minung tla hâwi a hawng suak hen, to-aw hâwi hen â siam le, amah leh amah â nâutir dauh rawh. ⁸ Chun, minung hâwi a um hen, â nâutir le, thih phah rê hen thu zâwt hen a hawng um rawh, kraws a thihnâk tak chu. ⁹ Churuang chun, Jisu min hen mikip vân ah um mi tla, tual ah um mi tla, tual tangah um mi tla hen ¹⁰ anna siksidîrnâk ding leh Pa Pathian rokualnâk ding leh "Jisu Krist chu Lal asi," ti hen lei kip nih a phuangnâk ding hen, ¹¹ Pathian nih anih chu fâk tak hen a chawnglawmh bâk rûl le, min zawzawng ah min chungnungchem chu a pêk rawh. ¹² Chun, ka duhtak tla, thu nan zâwt kumza hâwi khan, ka um liau cho ah ṭuan lo hen, tu ka um lo kar hin ṭuan dauh lehlam hen, lâu leh thir bû hen nanmah ruangsuahnâk ṭuan u; ¹³ amah lawmhkâng rangah ti tum ding leh ti ding hen nanmah lakah ṭuantu chu Pathian asi ruangah. ¹⁴ Sual neilo leh nun tluang tla, thlâk rualo leh simhngâilo tla lakah Pathian fa simsâwi kawp lo tla nan si khonâk ding hen chipchiarnâk leh êlnâk tla um lo hen zeizawng ti u, chubang lakah chun nungnâk chu pêk hen laikulh ah hin chêutirtu hâwi hen nan lang tâwn; ¹⁶ chun, nabeibâng hen ṭuan khawm ka si lo ruangah Krist ni ah chun putso ding ka nei kho lai. ¹⁷ Asi, nan lungnâk hâwlnâk leh rianṭuannâk lakah chun tawih hen um menza khawmsele ka lâwm asi, nan ektê hen ka nan lawmhpi ber na. ¹⁸ Chu hâwi ber hen nannih khawm a lâwm ule, hawng ka lawmhpi bâk u. ¹⁹ Sikhawmsele, nan thâwngthâng ka theih hen, ka lungngam kho bâk ding hen sâwtlotê nûnah Timothe hi nan sinah fial ding hen Lalpa Jisu ah chun ka lungum asi. ²⁰ Amah cho hi hawng ka tuarpitu leh an ruat piak tatak natu chu asi. ²¹ An ektê hen Jisu Krist rangah hâwl lo hen, mah rangah an hâwl tâwn. ²² Sikhawmsele, anih hi chu nik hen a um rawh zia nan theih, fa nih a pa rian a ṭuan hâwi hen Thâwngthâng Ṭha zanhtir leikângah hawng ka ṭuanpi tâwn kha. ²³ Chun, ka umdân ding ka theih kâ hen anih hi hawng fial sawm sele ka ti asi. ²⁴ Sikhawmsele, keimah tak khawm sâwtlotê ah hawng kal ding hen Lalpa ah chun ka ruat thlir asi. ²⁵ Sikhawmsele, Epaprodita, ka unaupa, ka rianṭuanpitu, ka kawrsen hâwi leh nan mifial ka thil samphangnâk ah hawng ka tlawmh belhtu hi nan sinah hawng fial herh hen ka theih. ²⁶ Anih nih chun nan ektê hen thungâi hen a nan ngâi na le, a dam lo ti nan theih ruangah thungâi a lawksawng. ²⁷ Thi viviar a damlo chu asi narêng hen. Sikhawmsele, Pathian nih anih chu a zângfah le, chun amah lâwng silo hen, lawksawng tlûnah lawksawng singsuannâk ka nei lonâk ding hen keimah hawng ka zângfah khawm asi ber. ²⁸ Chun, anih hi nan muh nawlh tikah nanna lâwm khonâk ding hen kei ka lawksawng a ṭhatvaknâk ding hen khulrang dauh hen ka hawng fial sawm asi. ²⁹ Chun, anih hi lâwm tak hen Lalpa ah chun hawng dawng ule, hi bang hâwi mi hi sung-û tir u; ³⁰ nan tlawmh-belhnâk a tinh mi mabân chu pehpârnâk ding hen thih ûi lo a ti hen, Krist rianṭuannâk ruangah thi viviar hen a hawng um rawh dangâiah.

¹ A dawnghchemnâk ah chum, unau le tla, Lalpa ah chun a lâwm u. Thu a mahmun lîlâ nan sinah rîn nawlh hi kei rangah chun nengtawr a kâi lo, nan rangah a ṭangkâi ruangah. ² Ui tla, fêmtan ding an duhpi natu lakah chun a thiamthih u, thil ṭha lo titu tla lakah chun a thiamthih u. ³ Kannih Pathian Thlarau zârah Pathian sawnh leh Krist Jisu putso leh taksa tlûnah rinhsannâk ngauh lotu tla hi fêmtan tla kan si dauh asi. ⁴ Duh châng sele chu kei khawm taksa lakah rinhsannâk ngauh kho ka si. Midang rerêng nih taksa lakah rinhsannâk nei hen anna ruat chiau chun kei ka ruat khun asi; ⁵ ni riat ni ah fêmtan, Israel thlâk lakah mi, Benjamin chi, Hebrai mi tak lakah suak ka si; Dân leikângah chun Farisai ka si; ⁶ ṭhanemsemsê leikângah chun kawhmi tla nehsawhtu ka si. Mi nih dân thupêk zûl hen, mirep an sinâk ah chun, kei khawm sâwi ding ka um lo. ⁷ Sikhawmsele, kei rangah dingchang ding vial chu chubang chu Krist ruangah dawk phahnâk ah ka ruat asi; ⁸ asi chiammâm, ka Lalpa Krist Jisu theihnâk rokual khun ruangah thil zeizawng khawm dawknâk ah ka ruat asi; amah ruangah thil zeizawng ka dawk ver le, chubang chu thanawmrawpâi tluk cho ah ka ruat le, ⁹ Krist ka ting khonâk ding leh mah repnâk (Dân lakah repnâk chu) nei lo hen, Krist lung ruangah repnâk (Lung ruangah Pathian lakah repnâk chu) nei dauh hen, amah lakah um ka si khonâk ding hen; ¹⁰ a thihnâk va bangh a thi hen, amah hen a thawknawlhnâk thiltikhonâk hen, a tuarnâk tla bâwmpinâk hen, ka theih khonâk ding hen; ¹¹ mithi lakah mi thawknawlhnâk chu ka ting kho ram lai mawh ti hen. ¹² Ka ting rawh ka ti mi lam chu asi lo le, rangtling ka si khawm ka ti mi si lo, "Krist nih a ka tleih san chu ka tleih kho lai mawh," ti hen a ṭhâwl hen ka ṭhâwl dauh asi. ¹³ Unau le tla, tleih hen ka ruat lo. Sikhawmsele, hi thu pakhat hi ka ti tâwn--dung leiah thu um tla chu philh hen, mâi leiah thu um tla chu ti hen, ¹⁴ Krist Jisu ah Pathian tlûnlei kawhnâk san lâwmman tawng ding hen, tiamhnâk lei chu ka fûk rarâm asi. ¹⁵ Chun, Thlarau ah upa vial chu hâwi thinlung put hen kan um lai; chun zei leikâng khawmah thinlung dang put nan si chun, chu khawm chu Pathian nih a nan theihtir na lai. ¹⁶ Zeikhawm si sele, kan kal dân kêl hen kan kal lai rih. ¹⁷ Unau le tla, ka umdân zûltu hawng si u, chun zauhtawnh ding kanmah nan kan nei le chu hâwi vima um tla chu ṭha hen zauh u. ¹⁸ Mi tamtak an kal le, chu tla chu Krist kraws mêlma an si hi an thâwngthâng kan simh nget na mi kha, Tuah khawm ṭap bû hen kan simh na hi; ¹⁹ chubang tla dawnghnâk chu veihnâk asi, an pathian chu taksa duhnâk asi, anna khâwngnâk chu an mualphonâk asi, laikulh thu tla an duh tâwn asi. ²⁰ Kannih lam chu kan khawsaknâk chu vân ah asi; chu thawk ber chun Ruangsuahtu Lal Jisu Krist chu kan ngâk kumza asi. ²¹ Anih nih chun a ṭuan hen zeizawng khawm amah thu thu hen a umtir kho, chu ṭuan zia hâwi vima hen kan taksa chaklo tak hi, amah taksa rokual hâwi a um ding hen a siam nawlh lai.

¹ Churuangah, ka unau duhtak leh ngâi tak, ka lâwmnâk leh ka lallukhuh tla, chu hâwi chun Lalpa ah bir tak hen dîr u, ka duhtak tla. ² Lalpa lakah chun thinlung munkhat put ding hen Eudia ka ngiar le, Suntuki khawm ka ngiar ber asi. ³ Asi, nang khawm ka liangbat bahpitu tatak, ka nan sâwm bâk, kha nunau tla kha ṭangpi rawh. Thâwngthâng Ṭha ah chun hawng ka ṭuanpi tâwn le, Klemen hen, ka ṭuanpi midang nungnâk bu ah min chuang tla hen khan. ⁴ Lalpa ah chun a lâwm kumza u. Ka ti nawlh lai, a lâwm u. ⁵ Nanna dawnhkho zia mi zawzawng theih si seh; Lalpa chu a nâi asi. ⁶ Zei lak khawmah lawksawng lah u; zeizawng ah thlacham leh deih hen, lâwmthusim tel vima hen, nan duhnâk tla chu Pathian sinah theihtir hen um dauh seh. ⁷ Chun, Pathian lungngamhnak thinlung rerêng theih châwk lo ni khan, nan thinlung leh nan dawnruatnâk tla chu Krist Jisu ah chun a nan vêng piak na lai. ⁸ A dawnghchem ah chun, unau le tla, a dik mi zawng, zah a kâi mi zawng, â rep mi zawng, a thenhlimh mi zawng, duh a kâi mi zawng, a thang dawh mi zawng, ṭhatnâk rerêng a um hen sawr tlâk rêng a um chun chubang chu dawnruat u. ⁹ Nan thil sîn tla, nan thil tawng tla, nan thil theih tla, keimah lakah nan thil muh tla khawm kha bang hâwi ti tâwn u; chun lungngamnâk Pathian ni chun a nan umpi na lai. ¹⁰ Sikhawmsele, thilpêk nan hawng ka ruatpiaknâk tla chu tuah nan hawng tharh nawlh ruang hin Lalpa ah chun thungâi ka lâwm asi; chu leikâng chu ruat lam chu nan ruat chiammâm ngâk, tik dêngkhâwng nan tawng lo ruangah cho asi. ¹¹ Ka samphâng mi thu sim lam chu ka si lo le, kei lam chu zei hâwi tal hen um khawmsele lungâwi vima ka awt rawh. ¹² Nâu tak hen umdân ka thiam le, nei hen umdân khawm ka thiam ber, thil zeizawng lakah leh thil zawzawng ah khawp leh sungvâng a umdân, neih leh samphâng hen umdân thuthup chu ka theih rawh. ¹³ Krist hawng ka chaktirtu ah chun zeizawng ka ti kho asi. ¹⁴ Sikhawmsele, ka lawksawngnâk tla ah hin nan ka lawksawngpi hi a ṭha asi. ¹⁵ Chun, nannih Philipi mi tla, Thâwngthâng Ṭha tlung tîr liauah, Makedonia ram thawk hen ka suak liau khan, nanmah cho lo chu Kawhmi murui pakhat khawm nih thilpêk leh tingvo leikângah chun an ka ṭangpi lo ti nanmah tak nih nan theih bâk. ¹⁶ Thesalonika khua ah ka um liau khawm khan ka samphângnâk ṭangpi ding hen veikhat cho silo hen veinih tiang nan hawng kuat kha. ¹⁷ Thilpêk lam chu hâwl ka si lo le, rah, nanmah leikângah pungtir ding chu hâwl ka si dauh. ¹⁸ Sikhawmsele, zeizawng ka nei le, ka si â rem rawh. Epaprodita kut ah thil nan ka kuat mi tla chu ka tawng le zei ka ngâi lo rawh. Chubang chu zeilo rimthâw rim, bâwlnâk sâng tlâk Pathian lawmhkâng asi. ¹⁹ Chun, ka Pathian nih chun Krist Jisu ah a rokualnâk chawng zia hâwi vima hen nan samphangnâk zeizawng khawm an ṭangpi na lai. ²⁰ Chun, Pathian kan Pa sinah chun zungzâl hen rokualnâk um seh. Amen. ²¹ Krist Jisu ah mi thenhlimh kip chibai hawng ka bûk piak na u. Ka sinah unau um tla nih hin chibai a nan bûk na. ²² Mi thenhlimh zawzawng nih chibai a nan bûk na, Kaisar in ah um mi tla nih hin an bûk dauh chem na. ²³ Lalpa Jisu Krist zângfahnâk chu nan thlarau sinah um seh.