MARK

MARK

¹ Hi hi Pathian Fapa Jisu Krist Thawngthang Ṭha tlung dawmhtîrnâk chu asi. ² Khuavâng Isai lasuibu ah: "Ngâinik, ka mifial na mâi leiah ka fial lai le, anih nih chun na lampi a siam lai. ³ Ramkaro ah mi âu hâu nih chun, Lalpa lampi sial ule, a lam tla dingtir u," a ti, ti hen, rîn hâwi khan. ⁴ Johan ramkaro ah Baptistu kha sual ngaihdamnâk ding rimnâk baptisma thu sim hen a hawng kal. ⁵ Chun, Judai ram mi zawzawng leh Jerusalem mi zawzawng tla an suak le, a sinah an kal le, an sual tla thutluang vâwr hen Jordan Va ah chun a sinah baptis an si rawh. ⁶ Chun, Johan chu sangâwngsâu mul puan hen â thuam le, a tâi savun tâisâwm hen â sâwm le, khâubawk leh ram khuaitizû a ei. ⁷ Chun, "Ka dung leiah keimah ngâk hen rokual dauh a hawng kal liau asi; kûn hen a pheikawk ri sût tlâk khawm ka si lo. ⁸ Kei nih chun tî hen ka nan baptis na tâwn le; anih lam nih chun Thlarau Thenhlimh hen a nan baptis na lai," ti hen, a sim. ⁹ Chun, chu liau chun tihin asi le, Jisu chu Galili ram ah Nazaret thawk hen a hawng kal le, Jordan Va ah chun Johan sinah baptis asi rawh. ¹⁰ Tî ah mi a suak kâ hen vân â awng le, Thlarau Thenhlimh vaṭhu hâwi hen a tlûnah a hawng ṭum mi a muh. ¹¹ Chun, "Nang, ka Fapa duhtak na si le, na tlûnah thungâi ka lâwm asi," ti hen, vân thawk hen aw-hâu a hawng suak. ¹² Chun, Thlarau nih chun ramkaro ah a fial sawm. ¹³ Chun, Setan lêm bû hen ramkaro ah ni sâwmli a um le, ramsa tla nâwngah a um le; vânmifial tla nih chun an zauhkhenh rawh. ¹⁴ Chun, Johan chu rêng an thlâk nûnah Jisu chu Pathian Thâwngthâng Ṭha sim hen Galili ram ah a hawng kal le, ¹⁵ "Tik chu a hawng tlung rawh, Pathian Ram khawm a hawng nâi rawh; rim ule, Thâwngthâng Ṭha hi lung u," a ti vima. ¹⁶ Chun, Galili Rilî kap a râwng liauah Simon leh a unau Andri chu rilî ah chun lên vawrh hen a muh na le; ngarâltu an si rêng asi. ¹⁷ Chun, Jisu nih an sinah, "Hawng ka zûl u, minung hâwltu ah ka nan siam na lai," a ti. ¹⁸ Chun, lên tla chu kaltâk hen an zûl sawm. ¹⁹ Chun, lât lo tê a kal rawh chun Zebedai fapa Jem leh a unau Johan chu a muh na le, chu tla chu lên ṭhît hen lawng ah ber an um. ²⁰ Chun, anih nih chun anmah chu a kawh sawm na le; chun an pa Zebedai chu lawh an lâk mi tla hen lawng ah an kaltâk na le, an zûl rawh. ²¹ Chun, Kapernaum khua ah a va lût le; chun Dinhni ah chun pumhnâk in ah a va lût le, a sîntir sawm na. ²² A thu sîntirnâk chu chê an ti thlo; Dân sîntirtu tla hâwi silo hen, thuneihnâk nei hâwi tak hen anmah tla a sîntir na ruangah. ²³ Chun, anna pumhnâk in ah chun khuri nâwmtâm vuanh mi pakhat a um le; anih nih chun, ²⁴ "Nazaret Jisu, kannih leh nang zei me kanna tlâinâk um? Hawng kan veih ding hen na hawng mi masi? Nang ka nan theih, Pathian Mi Thenhlimh na si," ti hen a âu sawm rawh. ²⁵ Chun, Jisu nih a fâi le, "Dâisip, a sungah mi hawng suak rawh," a ti. ²⁶ Chun, khuri nâwmtâm nih chun amah a sûlneng le, aw-hâu fâk tak hen a sungah mi a suak rawh. ²⁷ Chun, an ektê hen thungâi chê an ti. Chuvachun, "Hi hi zei me si le? Sîntirnâk thar asi ma hi! Khuri nâwmtâm tla khawm thu nei tak hen thu a pêk le, a thu anna âwi vima ko râu," ti hen, anna cheih. ²⁸ Chun, Galili ram kiangkam zawzawng ah ram kipah a thâwngthâng a thang sawm. ²⁹ Chun, pumhnâk in ah mi chu a suak rawh chun, Jem leh Johan hen Simon leh Andri in ah chun an lût sawm. ³⁰ Chun, Simon nupi nu chu a dam lo le, a rîl ko; chun, a thâwngthâng chu Jisu an simh sawm. ³¹ Chun, anih nih chun a kut a tleih le, a thawh rawh; chun a zâwt chu a reh le, an eibâr a timhtuah piak na rawh. ³² Chun, zânleibâi ah nî a tlâ nûnah chun damlo zawzawng leh khuri vuanh tla a sinah an hawng put. ³³ Khuatê hen kawtkari ah chun an hawng a pûm khup. ³⁴ Chun, mi cherkhet nganfâk kip hen fâk tla chu a damh na le, khuri cherkhet a nar na; khuri tla nih chun amah an theih ruangah an hawlh ding a siang lo. ³⁵ Chun, a thâizîngtê, khuadei lânah a thawk le, in ah mi chu a suak. Khuapi thawk hen mun king nakah ah a va kal le, chunah chun thla a cham. ³⁶ Chun, Simon leh a hâwi tla nih chun a dung leiah an zûl. ³⁷ Chun, anih chu an tawng rawh chun a sinah, "Mi zawzawng nih an hâwl asi, an ti. ³⁸ Chun, anih nih chun an sinah, "Mun dangah khua nâi tla ah chun kan kal lai, chubang tla ah khawm thu ka sim khonâk ding hen; chu chu ka hawng kal san asi," a ti. ³⁹ Chun, thusim leh khuri tla nar vima hen Galili ram zawzawng ah pumhnâk in tla ah a lût vima. ⁴⁰ Chun, Jisu sinah phâr a hawng kal le, "Na duh chun na hawng ka thiangtir kho," ti hen, a mâika ah siksidîr hen a ngiar chiam. ⁴¹ Chun, anih nih chun thungâi a zângfah le, a banh le, a tawngh, "Ka duh e, hawng thiang rawh," a ti. ⁴² Chun, zeikarlo ah a phâr chu a reh sawm le, a hawng thiang rawh. ⁴³ Chun, Jisu nih chun, "Âu sin khawmah sim lo ding hen a thiamthih rawh; ⁴⁴ sikhawmsele, bâwlpu sinah va a zauhtir le, na thianhnâk ding hen Mosi nih thil a ruat mi tla kha ap rawh, an theihthiam khonâk ding hen," a ti thlir le, a kaltir sawm. ⁴⁵ Sikhawmsele, anih chu a suak le, chu thâwngthâng chu thungâi a phuang le, a zanh. Chuvachun, Jisu chu lang hen khua ah a lût kho lo rawh. Ramkaro mun ah a um le, chun mun kipah mi a sinah an hawng kal tâwn.

¹ Chun, ni zeimaw zat ding nûnah, Kapernaum ah a lût nawlh liauah, in ah chun a um ti thu a hawng thang rawh. ² Chun, kawtkari khawmah umnâk umlo rê hen mi cherkhet an hawng a pûm rawh; chun an sinah thu a sim rawh. ³ Chun, mi khêng pakhat, minung pali nih zawnh hen a sinah an hawngpi. ⁴ Chun, zapi ruangah a kiang tekah an kal kho lo ruangah a umnâk in tlûn an siat le; chun, an pemh thluh rawh chun a tangphah chu a tlûnah mi khêng zâu bû hen an thlâk. ⁵ Chun, Jisu nih an lung zia chu a muh rawh chun mi khêng sinah, "Ka fa, na sual tla ngaihdam asi rawh," a ti. ⁶ Chun, Dân sîntirtu zeimaw mi tla chu chunah chun an to le, ⁷ "Hi minung nih hin zeirangah me hi hâwi hen thu a sim? Pathian a simsâwi asi hi; mi pakhat, Pathian cho lo nih chun âu nih me sual tla ngaihdam kho?" ti hen, an thinlung hen anna ruat. ⁸ Chun, Jisu nih an thinlung ah chu hâwi hen an ruat ti a thinlung hen a hawng theih sawm le, an sinah, "Chubang thu chu zeirangah me nan thinlung ah nan ruat? ⁹ Mi khêng sinah hin, ’Na sual tla ngaihdam asi rawh,’ ti leh, ’Na tangphah lâk le, kê hen kal rawh, ti hi, a zei mi a sim awl dauh’? ¹⁰ Zeikhawm si sele, laikulh ah Minung Fapa nih sual ngaihdam khonâk a nei ti nan theih khonâk ding hen mi khêng sinah chun, ¹¹ ’’Thawk le, na tangphah lâk le, na in ah kal rawh ka nan ti," a ti. ¹² Chun, anih chu a thawk le, a tangphah a lâk sawm le, an ektê muh hen a suak rawh. Churawhchun, an ektê hen thungâi chê an ti le, "Hi hâwi rerêng hi kan muh dah lo," ti hen, Pathian an sawr rawh. ¹³ Chun, Jisu chu a suak nawlh le, rilî kapah chun a kal le; chun mi zapi zawzawng chu a sinah an va kal le, a sîntir na rawh. ¹⁴ Chun, a kal pah hen, Levi, Alphai fapa chu siah châwinâk mun ah to mi a muh le, a sinah, "Hawng ka zûl rawh," a ti. Chun, a thawk le, a zûl rawh. ¹⁵ Chun, hi hâwi hi Jisu nih chun Levi in ah chun buh khêng a dûm le, siah khawlhtu tla leh misual cherkhet nih Jisu leh a ṭhiruai tla chu an dûmpi na. An tam ngâi dangâiah Jisu chu an zûl bâk tâwn. ¹⁶ Chun, Farisai tla lakah Dân sîntirtu tla nih chun Jisu nih misual tla leh siah khawlhtu tla a dûmpi na mi an muh rawh chun, a ṭhiruai tla sinah chun, "Zei zia me siah khawlhtu tla leh misual tla sinah a ei hen a din?" an ti. ¹⁷ Chun, Jisu nih chu chu a theih le, an sinah chun, "Mi chak tla nih daktawr an herh lo le, miṭia lo tla nih an herh dauh asi; mi rep tak tla lam ding hen hawng kal ka si lo le, misual tla lam ding dauh hen hawng kal ka si," a ti. ¹⁸ Chun, Johan ṭhiruai tla leh Farisai tla nih chun buh an ngei le; chun, mi an hawng kal le, Jisu sinah, "Zeirangah me Johan ṭhiruai tla leh Farisai ṭhiruai tla nih buh an ngei le, na ṭhiruai tla nih an ngei tâwn bâk lo?" an ti. ¹⁹ Jisu nih an sinah, "Mo ruaitu tla sinah a pasal ding mi a um kar vial mo ruaitu tla nih chun buh an ngei kho mazei? A pasal ding mi chu an sinah a um kar zawng an ngei kho lai loh. ²⁰ Sikhawmsele, a pasal ding mi chu an sinah mi kalpi ving ni tla a tlung lai le, chu ni ah lam chun an ngei lai." ²¹ "Âukhawm puan li, puan tiṭum suk lo mi tliar hen an belh dah lo; belh nik sele a belhnâk nih chun a thlêk lehlam lai; a thar nih chun a li mi chu a thlêk lai le, a tlêk khun lai. ²² Chun, âukhawm nih uain thar uain dûr li tla ah an râwn dah lo; râwn nik sele, uain nih chun savun dûr tla chu a tâwn phet lai le, uain leh savun dûr tla chu an vei vevê lai. Uain thar chu savun uain dûr thar tla ah an râwn dauh tâwn asi," a ti. ²³ Chun, tihin asi le, Jisu chu Dinhni ah chun fâng mun tla a pal le, chun a ṭhiruai tla nih chun an kal pah hen favûi tla chu an khiak rawh. ²⁴ Chun, Farisai tla nih chun a sinah, "Zauhnik, zeirangah Dinhni ah a thianglo mi chu an ti?" an ti. ²⁵ Chun, anih nih chun an sinah, "David leh a hâwi tla an samphâng le, an sungvâng liauah a thilti kha nan rêl lo mazei? ²⁶ Kha hâwi hen Abiathar Bâwlpu Lalchem asi liauah Pathian in ah a lût le, bâwlpu tla cho lo nih chun ei a thiang lo mi sang an siah mi chu a ei le, a hâwi tla sinah a pêk bâk mi thu kha?" a ti. ²⁷ Chun, amah ber nih chun an sinah, "Dinhni hi minung rangah siam asi le, minung hi Dinhni rangah siam asi lo. ²⁸ Chuvachun, Minung Fapa hi Dinhni lak khawmah Lal asi," a ti.

¹ Chun, Jisu chu pumhnâk in ah chun a lût nawlh le, chunah chun minung pakhat kutkhêng a um. ² Chun, amah an phiar khonâk ding hen Dinhni ah a damh awt leh awt lo an thlingthlâk. ³ Chun, anih nih kutkhêng sinah chun, "A lâi ah dîr rawh," a ti. ⁴ Chun, an sinah chun, "Dinhni ah hin ṭhattir ma a thiang siattir? Ruangsuah ma a thiang thah?" ti hen, a deih na. Sikhawmsele, an dâisip. ⁵ Chun, an thinlung chang zia chu thungâi pawi ti piak hen, thinthawk bû hen anmah tla a zauh na nûnah chu minung sinah chun, "Na kut zangh rawh," a ti. Chun, a van zangh le, a kut chu a dam rawh. ⁶ Chun, Farisai tla chu an suak le, amah an thah kho zia ding ruat hen Herod murui tla hen chun anna thluk sawm. ⁷ Chun, Jisu chu a ṭhiruai tla hen rilî leiah chun anna ṭhinh ving. Chun, Galili ram thawk hen mi zapi cherkhet nih an zûl rawh. ⁸ Chun, a thilti rokual zia chu an theih rawh chun Judai ram thawk hen, Jerusalem thawk hen, Idumai ram thawk hen, Jordan râl thawk hen, Tura leh Sidon khua kiangkam thawk hen, mi zapi cherkhet a sinah an hawng kal. ⁹ Chun, mi zapi ruangah chun a rangah lawnglêng ruat piak ding hen a ṭhiruai tla a simh na, "Chu lo chun an hawng ka eng dûlmâl lebang lai," a ti. ¹⁰ Mi cherkhet a damh na le; chun nganfâk nei mi vial nih amah an tawngh khonâk ding hen an fûk thur. ¹¹ Khuri nâwmtâm tla khawm nih amah chu an muh kip hen a mâika ah bawkbukhup hen, "Nang, Pathian Fapa chu na si," ti hen, an âu tâwn. ¹² Chun, anih nih chun a thâwngthâng chu phuang lo ding hen an sinah thu a kilh vima na. ¹³ Chun, Jisu chu tlâng ah chun a kâi le, amah nih a duh mi vial chu a kawh na; chun annih chu a sinah an va kal. ¹⁴ Chun, a sinah an um khonâk ding hen leh thusim ding leh ¹⁵ khuri tla narnâk thu nei ding hen a fial na khonâk ding hen leinih a ruat. ¹⁶ Chu tla chu Simon (Jisu nih Peter ti hen a auh mi), ¹⁷ Zebedai fapa Jem leh a unau Johan, (chu tla chu Boanerge a sak, chu chu Khuarît fa tla tinâk asi); ¹⁸ Andri, Philip, Bartholomai, Mathai, Thom, Alphai fapa Jem, Thadai, Kana mi Simon leh ¹⁹ a tleihtirtu Juda Iskariot tla an si. ²⁰ Chun, Jisu chu in ah a lût rawh. Chun, mi zapi chu an hawng a pûm nawlh le, chuvachun sang ngangâi men an ei kholo rawh. ²¹ Chun, a dâwngsung tla nih chun chu chu an theih rawh chun, "A â ma chu," ti hen, amah tleih ding hen anna thawh. ²² Chun, Dân sîntirtu tla Jerusalem thawk hen hawng ṭum mi tla nih chun, "Belzebul nei asi hi," an ti; "Khuri lal ruangah asi lo mazei khuri tla a nar tâwn mi," an ti. ²³ Chun, Jisu nih Dân sîntirtu tla chu a kawh na le, tahṭhimh thu hen an sinah, "Setan nih Setan ber zeitin a nar kho lai? ²⁴ Ram khawm mah leh mah a do chun, chu ram chu a dîr kho lai lo. ²⁵ Dâwngsung khat khawm mah anna do chun, chu dâwngsung chu a dîr kho lai lo. ²⁶ Churuangah Setan ram chu ṭhenkhuai hen a um chun a dîr kho lai lo le, a vei thlo lai. ²⁷ "Âukhawm nih mi chak in ah lût hen a sum chu a lâk piak kho tâwn lo, mi chak chu a phuar masa tâ lo chun. Chu nûnah lam chun a in chu a rawk kho lai. ²⁸ "Hi hi theih u! Minung fa tla hi an sualnâk zawzawng ah leh Pathian an simsiatnâk zei lei zawngah khawm an simsiatnâk tla chu ngaihdam an si lai. ²⁹ Sikhawmsele, âuzawng Thlarau Thenhlimh ngâi simsiattu lam chu zeitik khawmah ngaihdamnâk a tawng lai lo, zungzâl sualnâk ah chun mawh hen a um lehlam lai," a ti. ³⁰ "Khuri nâwmtâm a nei asi," an ti ruang khan chu chu a sim asi. ³¹ Chun, Jisu nu leh a unau tla an hawng le, lêng ah an dîr le, amah va kawh ding hen mi an fial. ³² Chun, a kiangah chun mi zapi anna tohâwng le, chun a sinah chun, "Zauhnik, lênglei ah na nu leh na unau tla nih an hâwl," an ti. ³³ Chun, anih nih chun an sinah, "Ka nu leh ka unau tla chu âu me?" ti hen, a sâng. ³⁴ Chun, a kiangah to tla chu a zauh na le, "Zauhnik u, ka nu leh ka unau tla hi! ³⁵ Âuzawng Pathian duhzia titu vial chu ka unau, ka far, ka nu tla an si," a ti.

¹ Chun, Jisu nih Galili rilî kapah chun, a sîntir nawlh na rawh. Chun, mi zapi tla cherkhet a sinah an hawng a pûm le, chun rilî ah chun lawng ah â chuan le, a to le; zapi tla zawzawng chu rilî kap tlâng ah chun an um. ² Chun, tahṭhimh thu hen thu cherkhet a sîntir na; a sîntirnâk ah chun an sinah: ³ "Ngâi u! Fachî vawrhtu fachî vawrh hen a kal le; ⁴ chun, hi hâwi hi asi le, a vawrh liauah a zeimaw mi lam vâu ah a tlâ le, vâ tla nih an ei hep. ⁵ Chun, a zeimaw mi lungpher tlûn tual pannâk ah a tlâ le, tual a sah lo ruangah a keuh sawm. ⁶ Sikhawmsele, nî a hawng sâng dauh rawh chun uai tep hen a emh, ram a nei lo ruangah a rawp ko rawh. ⁷ Chun, a zeimaw mi bualingnei nâwngah a tlâ le, bua chu a hawng sâng le, a dawrh hep le, rah rerêng a rah lo rawh. ⁸ Chun, a zeimaw mi tual ṭha lakah a tlâ le, a kho le, a ṭhang le, a rah rawh; sâwmthum, sâwmruk, zâ lebang hen a pung," a ti. ⁹ Chun, amah nih, "Âuzawng theihnâk ding hen nâ nei nih chun theih seh," a ti. ¹⁰ Chun, mi kingnâk ah Jisu chu a um liauah leinih tla leh amah zûltu tla nih tahṭhimh thu tla chu an deih. ¹¹ Chun, anih nih chun an sinah, "Pathian Ram thuthup chu nannih theih lam chu siang asi le, lêng ah mi tla rangah lam chun zeizawng tahṭhimh thu hen ti asi. ¹² Chuvachun, ’Muh lam chu an muh kho narêng hen, theih lam chu an theih kho lonâk ding hen leh, Nâ hen an theih narêng hen a ngaihtawnhnâk lam chu an theih kho lonâk ding hen. Chu lo chun anna her nawlh lai le, ngaihdam an hawng si sual lebang lai," a ti. ¹³ Chun, Jisu nih an sinah, "Hi tahṭhimh thu hi nan theih kho lo ma? Chu hâwi asi chun, zeitin tahṭhimh thu dang zawzawng tla chu nan theih zia lai? ¹⁴ Fachî vawrhtu nih chun thu chu a vawrh asi. ¹⁵ Chun, lam vâu ah a thu vawrhnâk tla chu hi tla hi an si: Thu an theih kâ hen Setan nih chun an thinlung ah thu vawrh mi chu a lâk piak sawm tâwn. ¹⁶ Chun, chu hâwi ber hen lungpher tlûnah vawrh mi chu hi tla hi an si: Thu an theih kâ hen lâwm tak hen tleih sawmtu tla hi; ¹⁷ sikhawmsele, anmah lakah chun ram an nei lo, sâwtlotê cho an um le; chu nûnah chun thu ruangah hamhnâk mawh nehsawhnâk mawh a hawng um ka hen an tlû sawm tâwn. ¹⁸ Chun, midang tla chu bualingnei lakah vawrh mi chu an si: Chubang tla nih chun thu chu an theih rawh le, ¹⁹ sikhawmsele laikulh lungkhamnâk tla, neihnâk tla, bumnâk tla, thil dang duhnâk tla chu a hawng lût le, thu chu a dawrh le, rah lo hen a hawng um tâwn. ²⁰ Chun, tual ṭha lakah vawrh mi chu hi bang hi an si: Thu chu theih hen, tleih hen, a leh sâwmthum, sâwmruk, zâ lebang hen rah tla hi an si," a ti. ²¹ Chun, Jisu ber nih an sinah, "Khâwnvâr chu a siahnâk ah siah lo hen, tâwng tangah mawh ihkhun tangah mawh, siah ding hen an lâk tâwn mazei? ²² Puang lo ding hen pheh zeikhawm a um lo, lang lo ding hen thuh zeikhawm a um lo. ²³ Âuzawng nih theihnâk ding hen nâ nei nih chun theih seh," a ti. ²⁴ Chun, amah nih an sinah, "Nan ngâi mi chu zei me asi a thiamthih u; nan tahnâk lîlâ hen an tah piak na lai le, an pêk tam khun na lai. ²⁵ Âuzawng a nei mi chu an pêk sap lai le, âuzawng a nei lo mi chu a neihlem khawm an lâk piak lai," a ti. ²⁶ Chun, Jisu ber nih a sim vima le, "Pathian Ram chu hi hâwi hi asi: Mi nih tual ah hin chî vawrh sele, ²⁷ zân ah it thlit hen sûn ah thawk tâwn sele, chî chu zeitin mi zât asi ti theihlo hen a hawng keuh hen a hawng ṭhang rawh. ²⁸ Tual nih amah rah a hawng suahtir tâwn. A tîr chem ah a kûng, chu nûnah chun a vûi; chun chu nûnah a vûi lakah chun fângmal bit. ²⁹ Sikhawmsele, rah chu a hawng min tikah fâng ât a chû ruangah favah chu a thuak sawm tâwn, a ti. ³⁰ Chun, Jisu nih, "Pathian Ram chu zei hen me kan tahṭhimh lai? Asi lo leh, zei tahṭhimh thu hen me kan tahṭhimh lai? ³¹ Anṭam chî mal khat tual ah an vawrh le: tual ah chî zawzawng ngâk hen mêchem khawmsele, ³² a vawrh nûnah lam chun a kho le, thlâi zawzawng ngâk hen a hawng lian dauh rawh. Ṭeng lian tatak a nei le, chuvachun tlûn zuang vâ tla chu a dâidul ah an bû an tuah le, an um," a ti. ³³ Chun, chu hâwi tahṭhimh thu tamtak hen, an theih kho rirî hen thu chu an sinah a sim tâwn. ³⁴ Sikhawmsele, tahṭhimh thu lo hen an sinah thu a sim lo. Amah ṭhiruai tla sinah lam chun mi kingnâk ah zeizawng a simhfiang na tâwn. ³⁵ Chun, chu ni lîlâ ah chun, zânleibâi ah, Jisu nih chun an sinah, "Khatlei râl ah khin kan kal lai," a ti. ³⁶ Chun, mi zapi tla chu kaltâk hen amah chu a um chia tê hen, lawng ah chun an kalpi sawm rawh. Lawng dang tla khawm a sinah an um. ³⁷ Chun, thli chawp tak a hawng râng le, tî tlingtlawk tla chu lawng ah chun a lût chukmak le, chuvachun lawng chu a khat awt ko rawh. ³⁸ Chun, anih chu sanhtling tlinh a it hen, lawng taw leiah chun a um. Chun, an thawh le, a sinah,"Sîntirtu, kan vei ding mi hi pawi na ti lo ma?" an ti. ³⁹ Chun, anih chu a hawng a ṭhang le, thli chu a fâî le, rilî sinah khawm chun, "Dâisip le, um ziar rawh!" a ti. Chun, thli chu a bâng le, a reh dup ko. ⁴⁰ Chun, anih nih chun an sinah, "Zeirang chu tluk rak hen nan lâu le? Lungnâk rerêng nan nei lo rih mu?" a ti. ⁴¹ Chun, dîntuai hen an ṭih lo le, "Hi minung hi âu me si le, thli leh rilî tiang khawm nih a thu an ngâi râu!" an ti.

¹ Chun, rilî râl Gerasin mi tla ram chu an hawng tlung. ² Chun, Jisu chu lawng ah mi a suak nûnah chun minung pakhat, khuri nâwmtâm nei, thlân thawk hen a hawng suak mi nih a tawng sawm le; ³ chu minung nih chun thlân tla lakah chun umnâk a nei tâwn le, âukhawm nih thîr chikchîn hen khawm an phuar kho lo rawh le; ⁴ rêng leh thîr chikchîn tla khawm hen an phuar kumza rawh le; sikhawmsele, thîr chikchîn tla chu a sah le, rêng tla khawm chu a khiak dip tâwn; âukhawm nih an ti kho lo. ⁵ A sûn a zân hen thlân tla ah leh tlâng tla ah chun a âu a âu tâwn le, lung hen khawm â ât kumza tâwn. ⁶ Chun, lât tak thawk hen Jisu chu a muh kâ hen a tek le, a mâimûk. ⁷ Chun, aw-hâu fakpi a âu hen, "Jisu, Pathian Chungnungchem Fapa, kei leh nang zei me kanna tlâinâk um? Hawng ka rêp lo ding hen Pathian min hen ka nan ngiar chiam asi," a ti. ⁸ (Jisu nih chun a sinah, "Nang, khuri nâwmtâm, minung sungah mi hawng suak rawh," a ti rawh dangâiah.) ⁹ Chun, anih nih chun, "Na min zei mesi?" ti hen, a deih. Chun, anih nih chun, a sinah, "Ka min chu khuri zapi asi, cherkhet kan si," a ti. ¹⁰ Chun, chu ram thawk hen chun anmah tla nar lo ding hen Jisu sinah an ngiar chiam. ¹¹ Chun, chu tlâng pangdâr ah chun vawk rual tamtak an tlawng. ¹² Chun, khuri nâwmtâm tla nih chun, "Vawk tla sinah hawng kan fial, an sungah kan lût khonâk ding hen," ti hen, a sinah an ngiar chiam. ¹³ Chun, anih nih chun thu a pêk. Chun, khuri nâwmtâm tla chu an suak le, vawk paw sung tla ah chun an lût le, chun vawk rual chu (sâng nih tluk ding an si) kham ah anna khâwk le; rilî lakah an lût ver; chun rilî ah chun tî thalh hen an thi rawh. ¹⁴ Chun, a vulhtu tla chu an tek le, khua ah leh lo tla ah chun an sim. Mi zapi tla chu zei thil me a hawng si rawh ti zauh ding hen an hawng kal. ¹⁵ Chun, Jisu sinah an hawng tleng le, khuri vuanh, khuri zapi nih a luah mi kha, puan aih hen, thinlung fîm put hen, to mi an hawng muh le; chun an ṭih rawh. ¹⁶ Chun, a theihtu tla nih chun khuri tleih tlûnah thil tlung zia leh vawk thâwngthâng tla chu, chubang tla chu an simh na. ¹⁷ Chun, chu tla nih chun an ram ah mi suak ding hen an ngiar chiam rawh. ¹⁸ Chun, lawng ah â chuan awt liau takah khuri vuanh rawh mi nih khan Jisu sinah um ding a ngiar. ¹⁹ Sikhawmsele, Jisu nih a siang lo le, a sinah, "Na in ah na hâwi tla sinah tlung le, Lalpa nih na rangah thil a nan ti piak mi a rokual zia leh a nan zângfah zia hi va sim rawh," a ti rawh. ²⁰ Chun, a kal le, Dekapoli ah chun Jisu nih a rangah thil a ti piak mi rokual zia chu a phuang rawh. Chun, mi zawzawng nih chê an ti. ²¹ Chun, Jisu chu lawng ah khatlei râl ah a kâl nawlh rawh chun mi zapi cherkhet a sinah an hawng a pûm. Chun, anih chu rilî kapah a um. ²² Chun, pumhnâk in hotu tla lakah pakhat, a min Jaira chu a hawng kal le; Jisu a muh ka hen a kebul ah a bawkbukhup le, ²³ "Ka fanu ngâksiatê a thi awt ngâi le, â panh hen a hawng dam khonâk ding hen hawng kal le, a tlûnah na kut thâng ding hen ka nan ngiar," ti hen, a ngiar chiam. ²⁴ Chun, Jisu chu a sinah a va kal. Chun, mi zapi cherkhet nih an zûl le, an eng chukmak. ²⁵ Chun, nunau pakhat kum leinih thî suak hen a hat kho lo le, ²⁶ daktawr tamtak lakah cherkhet a tuar rawh le, a neih zawzawng khawm a veih hep rawh le, ṭhat lei ngâk hen a zual dauh lehlam. ²⁷ Chu nih chun Jisu thâwngthâng thu tla a theih le, a dung leiah mi zapi lakah chun a hawng kal le, a puan a tawngh. ²⁸ "A puan cho khawm tawngh sele damh hen ka um ko lai," ti a ruat asi. ²⁹ Chun, zeikarlo ah a thî suak chu a hawng reh sawm le, a nganfâk chu damh asi rawh ti a taksa ah a theih rawh. ³⁰ Chun, Jisu nih chun a sungah mi thiltikhonâk suak tâwn mi chu a suak ti a theih le, mi zapi lakah chun â hawi le, " Âu me ka puan tla tawnghtu kha?" a ti. ³¹ Chun, a ṭhiruai tla nih chun a sinah, "Mi zapi nih an eng chukmak mi hi na muh ko mi, ’Âu nih an ka tawngh?’ zeitin zia hen ti me le? ³² Chun, anih nih chun chu thil titu chu muh ding hen â hawi. ³³ Chuvachun, nunau nih chun a tlûnah thil a ti piak mi chu theih hen, lâu leh thir bû hen a hawng kal le, a mâika ah a bawkbukhup le, a sinah thu dik tak hen a simh ver rawh. ³⁴ Chun, anih nih chun a sinah, "Ka fanu, na lungnâk hi na dampi asi, lungngam tak hen kal le, na nganfâknâk chu hawng dam pawt seh," a ti. ³⁵ A hawlh liau chirah, pumhnâk in hotu in thawk hen mi an hawng kal le, "Na fanu a thi rawh; zeirangah Sîntirtu hi na hamhtir nget awt?" an ti. ³⁶ Jisu lam nih chun an thusim chu ngaihlo lêm thlâk hen, pumhnâk in hotu sinah chun, "Lâu lah, lung ko," a ti. ³⁷ Chun, Peter, Jem leh a unau Johan tla cho lo chu âukhawm amah zûl bâk ding a siang lo rawh. ³⁸ Chun, pumhnâk in hotu in chu a va tlung le, Jisu nih an nawk chur mi leh an ṭap chur mi leh an râk chur mi chu a muh. ³⁹ Chun, a va lût rawh chun an sinah, "Zeirangah nâ sêt huam hen nan ṭap? Ngâksia chu a thi lo, a it asi," a ti. ⁴⁰ Chun, annih nih chun an nih sanh ko. Anih lam nih chun an ektê hen a nar phin na le, ngâksia nu leh pa leh a ṭhiruai pathum tla chu a ruai na le, ngâksia umnâk ah chun a va lût. ⁴¹ Chun, ngâksia kut chu a tleih le, a sinah chun, "Talitha, koum," a ti, chu chu "Kuih nu, thawk rawh ka nan ti!" tinâk asi. ⁴² Chun, nunau ngâksia chu a hawng thawk le, a kal sawm ko; amah chu kum leinih mi asi rawh. Chun, annih nih chun chê an ti rarâu lo. ⁴³ Chun, anih nih an sinah, "Hi hi âukhawm nih theih lah seh,’ a ti thlir; chun ei ding pêk ding hen thu a pêk.

¹ Chun, chu thawk hen chun Jisu chu a suak le, a umnâk khua lei chu a tlung le, a ṭhiruai tla nih chun an zûl vima. ² Chun, Dinhni a hawng si le, pumhnâk in ah a sîntir na le, chun, mi cherkhet a thu theihtu tla nih chun,"Hi minung nih hi bang thu hi kha zei mi me a theih le? Hi minung sinah finghnâk pêk asi mi hi zei finghnâk me si le? A kut hen hi tluk rak thilchê a ti mi hi zei zia mesi? ³ Hi minung hi Mari fapa Jem, Josef, Juda, Simon leh a unaupa thing hen thil siamtu kha asi lo mazei? A farnu le khawm hinah kan sinah um an si lo mazei?" an ti le, thungâi chê an ti. Chun, a tlûnah an lungsilo rawh. ⁴ Chun, Jisu nih an sinah, "Khuavâng chu amah khua lei tla ah, amah rualsia tla lakah, amah in tla ah cho lo chun chawnglawmh lo hen a um dah lo," a ti. ⁵ Chun, mi damlo tâwmtê tlûnah kut thâng hen a damh mi cho lo chu chunah chun thilchê rêng a ti kho lo. ⁶ An lung lo ruangah thungâi chê a ti. Chun, sîntir pah vima hen khua tla chu a ṭawl. ⁷ Chun, leinih tla chu a kawh na le, panih vima hen a fial na rawh. Khuri nâwmtâm tla tlûnah thuneihnâk a pêk na. ⁸ Chun, an khualtlâwngnâk ding rangah ṭhianṭhunh cho lo chu zeikhawm, sang khawm, zâl khawm, tâisâwm ah tangka khawm put lo ding hen a ti thlir. ⁹ Pheikawk lam chu ruk ding a ti. "Kawrdawh panih a ruk lah u," a ti. ¹⁰ Chun, amah nih an sinah, "Kha zei khawmah nan tlungnâk in ah chun, chunah mi nan suak lân lo chu tlung kumza u. ¹¹ Chun, zei khua khawmah an lawmh na lo hen, nan thu an ngâi lonâk zawngah chu thawk hen nan suak tikah chun anmah theihtir na ding hen nan kezaphah tangah valeidip kawp mi chu khâwng u," a ti. ¹² Chun, an suak le, rimnâk thu an sim le; ¹³ khuri tamtak khawm an nar le, damlo tamtak khawm sariak an thuh le, an damh. ¹⁴ Chun, lalchem Herod nih chun a theih le, Jisu min chu a thang rawh dangâiah. Mi le tla nih chun, "Baptistu Johan kha mithi lakah mi a thawknawlh rawh le, chubang thiltikhonâk tla nih chun amah lakah a ṭuan asi chu!" an ti. ¹⁵ Midang lam nih chun, "Elija ma chu," an ti; midang nih, "Khuavâng ma chu, tuan ah mi khuavâng tla lakah pakhat hâwi kha," an ti. ¹⁶ Herod lam nih chun a theih rawh chun, "Johan, a lû ka tan mi tak kha a hawng thawknawlh rawh ma chu!" a ti. ¹⁷ Amah Herod nih chun a unau Philip nupi Herodi ruangah mi a fial le, Johan chu a tleihtir le, rêngin ah phuar bû hen a khumh rawh dangâiah. Herodi chu nupi ah a umpi rawh le; ¹⁸ Johan nih chun Herod sinah, "Na unau nupi na umpi mi hi a thiang lo asi," a ti rawh asi. ¹⁹ Churuangah Herodi nih chun amah chu a râl thlo le, thah a duh le, sikhawmsele a ti kho lo. ²⁰ Herod nih Johan chu mi rep leh thenhlimh tak asi ti a theih ruangah amah chu a ṭih le, a hum thlir asi, a thu a ngâi chun a lawksawng ngâi tâwn. ²¹ Chun, Herod suakcham ni ah chun a mi rokual tla, kawrsen hotu lian tla, Galili ram ah mi lian tla rangah zân ah puai a hawng um le, Herodi rang chun tik remchâng a hawng um rawh. ²² Herodi fanu chu a hawng lût le, a lâm le, Herod leh a buh dûmpitu tla chu a lawmhtir na. Chun, lalchem nih chun nunau ngâksia sinah, "Na duh mi zawng hawng ka deih, ka nan pêk lai,’ a ti. ²³ "Zei tal na ka deih mi zawng chu, ka ram khingkhuai khawm ka nan pêk lai," ti hen, a sinah siat a sirh. ²⁴ Chun, anih chu a suak le, a nu sinah chun, "Zei me ka deih lai?" a va ti. Anih nih, "Baptistu Johan lû," a ti. ²⁵ Chun, anih chu khulrang tak hen lalchem sinah chun a va lût sawm le, "Khêng hen Baptistu Johan lû na ka pêk sawm ka duh asi," ti hen, a deih. ²⁶ Chun, lalchem chu thungâi a lawksawng. Sikhawmsele, a siatsirh tla leh a buh dûmpitu tla ruangah chun a êl duh lo. ²⁷ Chun, lalchem nih chun a vêngtu kawrsen pakhat a fial sawm le, a lû hawng put ding thu a pêk. Chun, anih chu rêngin ah a va lût le, a lû a va tan le, ²⁸ a lû chu khêng hen a hawng put le, nunau ngâksia sinah chun a pêk rawh. Chun, nunau ngâksia nih chun a nu sinah a pêk. ²⁹ Chun, a ṭhiruai tla nih chun an theih kâ hen a ruak chu an va lâwm le, thlân ah chun an vûi rawh. ³⁰ Chun, mifial tla chu Jisu sinah an hawng a pûm le, zeizawng an thilti leh an sîntir mi vial an simh. ³¹ Chun, anih nih chun an sinah, "Nanmah tla lâwng hen ramkaro mun ah a dang hen hawng ule, a dîn rih u," a ti. Mi tamtak anna lanh zulmal le, buh ngâi men an ei manh lo. ³² Chun, ramkaro mun ah anmah lâwng hen a dang hen an va kal. ³³ Chun, mi nih an kal liau chu an muh na le, mi tamtak nih anmah tla chu an theih na le, anna pûm le, an lehkhanh rawh. ³⁴ Chun, Jisu chu vakap ah a suak le, mi zapi cherkhet a muh na le, vêngtu neilo dawrâ tla hâwi an si ruangah thungâi a zângfah na le, thu tamtak a sîntir na rawh. ³⁵ Chun, zânleibâi khet ah, a ṭhiruai tla chu a sinah an hawng kal le, "Hi hi mi kingnâk mun asi le, a zânlei ving rawh dangâiah; ³⁶ annih tla hi kan kiangkam lo ah leh khua tla ah kal hen, an ei ding zeimaw tal an châwk khonâk ding hen kaltir na me," an ti. ³⁷ Anih lam nih chun an sinah, "Nanmah nih ei ding pêk na u," ti hen, a sâng. Chun, annih nih chun a sinah, "Sang denari zanih man va châwk hen ei ding kan pêk na awt masi?" an ti. ³⁸ Chun, anih nih chun an sinah, "Sangtlêp zeizat me nan nei? Va zauhnik u," a ti. Chun, an neih zat an theih ka hen, "Sangtlêp panga, ngâ panih hen," an ti. ³⁹ Chun, anih nih chun an ektê hen ramhthep tlûnah chun a murui vima hen totir ding hen an sinah thu a pêk. ⁴⁰ Chun, a tlar hen, zâ tla, sâwmnga tla vima hen an to. ⁴¹ Chun, anih nih chun sangtlêp panga leh ngâ panih chu a lâk le, vân lei hawi hen mal a sâwm le, sangtlêp tla chu a phel le, an mâika ah hunh na ding hen a ṭhiruai tla sinah chun a pêk le, ngâ panih khawm chu mi zawzawng lakah a ṭhen. ⁴² Chun, an ektê hen an ei le, an khim chiau. ⁴³ Chun, sang neknâwi leh ngâ neknâwi khobung leinih an rût le, a khat. ⁴⁴ Sangtlêp eitu tla chu patling lir sângnga an si. ⁴⁵ Chun, Jisu nih mi zapi chu a ṭiaktir na karah varâl leiah Betsaida ah va kal masa ding hen a ṭhiruai tla chu lawng ah a chuantir sawm na. ⁴⁶ Chun, annih chu a ṭiaktir na nûnah chun thlacham ding hen tlâng ah a kal rawh. ⁴⁷ Chun, zânleibâi ah lawng chu rilî lâi takah chun a um le, anih chu amah lâwng hen tlâng ah chun a um. ⁴⁸ Chun, an lawng vei lakah chun an lawksawng hen a muh le, thli nih amahlo leikângah a nam ruangah, khuafîmchat lei zo ah rilî tlûnah kê hen kal hen anmah lei a hawng fûk le, anmah tla lanh a tum. ⁴⁹ Sikhawmsele, annih nih chun anih chu rilî tlûnah kê hen a kal mi an muh rawh chun mithlâ bei an ti le, an âu chiam le, ⁵⁰ an ektê hen amah an muh le, an thla a kâm. Sikhawmsele, anih nih chun anmah chu a sawnh sawm na le, an sinah, "Lungngam tak hen um u; keimah ka si, lâu lah u," a ti. ⁵¹ Chun, lawng ah chun an sinah â chuan le, thli chu a bâng ko rawh. Chun, an thinlung hen thungâi chê an ti. ⁵² Sangtlêp thu chu a ngaihtawnh dân an theihthiam lo dangâiah, an thinlung a chang ruangah. ⁵³ Chun, varâl leiah an kâi rawh chun, Genesaret ram tlâng an tlung le, vakap ah chun lawng chu an rêng. ⁵⁴ Chun, lawng ah mi an suak nûnah chun mi tla nih anih chu an theih sawm le; ⁵⁵ Chu ram kiangkam zawzawng ah an tek chur le, a um ti an theihnâk zawngah damlo tla an tangphah lakah it bû hen an hawng zawnh sup. ⁵⁶ Chun, khuatê leh khua lian tla ah, lo tla ah, kha zeizawng ah a lûtnâk kipah damlo tla chu sumtuah mun tla ah an zâutir na, a puansâr tla tawngh kho an deih chiam le, chun amah tawnghtu zawng chu an dam vima.

¹ Churawhchun, Farisai tla leh Dân sîntirtu tla lakah mi âu tla mawh Jerusalem thawk hen hawng kal tla chu a sinah an hawng a pûm. ² Chubang tla nih chun a ṭhiruai a zeimaw mi tla kut nâwm hen sang an ei mi an muh. "Nâwm" ti hi ṭâwl lo tinâk asi. ³ (Farisai tla leh Juda tla zawzawng nih chun upa thurovuih chu an tleih thlir ruangah an kut ngenh tak hen an ṭâwl lo chun an ei dah lo. ⁴ Chun, sumtuah mun thawk hen an tlung khawmah tak anna khawlh lo chun an ei dah lo. Chun, thu dang tamtak an tleih thlir ding hen an lâk singsuan mi chu a um, hâi tla, bêl tla, dârbêl tla ṭâwl tla hi.) ⁵ Chuvachun, Farisai tla leh Dân sîntirtu tla nih chun, "Zeirangah me na ṭhiruai tla nih upa thurovuih ziatê a um lo hen, kut nâwm hen sang an ei tâwn?" ti hen an deih. ⁶ Anih nih chun an sinah, "Isai nih hin nannih mi perpê tla thu hi a simkan mi a dik tak ko a! ’Hi minung tla nih an kâ hen an ka chawnglawmh le, an thinlung lam nih chun an ka lât. ⁷ Zeikhawm si sele, an sîntirnâk ah minung thupêk tla an sîntir ruangah an ka sawnh tâwn hi a thawt asi,’ ti hen a rîn hâwi khan. ⁸ "Pathian thupêk tla chu thlahthlamh hen minung thurovuih chu nan tleih thlir asi," a ti. ⁹ Chun, amah nih an sinah, "Nanmah thurovuih chu nan tleih khonâk ding hen Pathian thupêk tla nan duh lo hi a ziazâng thungâi nan theih a! ¹⁰ Mosi nih, ’Na nu leh na pa chawnglawmh rawh,’ ti leh, ’Âuzawng a nu mawh a pa simsiattu zawng chu thi ding asi,’ a ti khateh. ¹¹ Nannih lam nih chun hi hâwi hen nan ti tâwn, ’Mi nih a nu mawh a pa mawh sinah, "Na ka mang ding mi hi Korban asi rawh," a ti chun (chu chu ’Pathian sinah pêk,’ tinâk asi), ¹² a nu rangah mawh a pa rangah mawh ti piak zeikhawm nan siang tâwn lo rawh. ¹³ Mi sinah nan thurovuih singsuan nih hin Pathian thu hi a veih tâwn asi; chu hâwi thil chu tamtak nan ti tâwn," a ti. ¹⁴ Chun, mi zapi tla chu a kawh nawlh le, an sinah, "Nan ektê hen ka thu hi ngâi chiau ule, theihthiam u: ¹⁵ Minung lênglei thawk hen a paw sungah lût mi nih amah nawmh kho zeikhawm a um lo; minung paw sung thawk hen hawng suak tla chu minung nawmhtu asi dauh. ¹⁶ Theihnâk ding hen nâ nei nih chun theih seh," a ti. ¹⁷ Chun, mi zapi tla in ah a lût tâk na nûnah a ṭhiruai tla nih chun tahṭhimh thu amah an deih fiang rawh. ¹⁸ Chun, anih nih chun an sinah, "Nannih khawm chu tluk rak hen theihnâk neilo nan si mu? Zeizawng lênglei thawk hen minung paw sungah lût mi zawng, ¹⁹ a thinlung sungah lût lo hen, a paw sungah lût hen vâu kalnâk ah a suak ruangah amah chu a nawmh kho lo ti nan theih lo mazei?" a ti. (chu chu ei ding mi zawng ei a thiang tinâk asi.) ²⁰ Chun, amah nih, "Minung paw sung thawk hen suak nih chun, chu tak nih chun minung a nawmh tâwn asi. ²¹ Paw sungah mi, minung thinlung tla thawk hen ruatdawnnâk sual tla a hawng suak tâwn ruangah; pung-leh-lêngnâk tla, fîrnâk tla, mi thahnâk tla, ²² ṭangdang pawmtâknâk tla, ngarhnâk tla, sualnâk tla, bumnâk tla, simsiatnâk tla, khâwngnâk tla leh âtnâk tla hi. ²³ Chubang thilsual zawzawng tla chu paw sung thawk hen a hawng suak le, minung chu a nawmhtir tâwn," a ti. ²⁴ Chun, Jisu chu a thawk le, chu thawk hen chun Tura leh Sidon kiangkam ah a kal. Chun, in ah a lût le, âu theih khawm a duh lo. Sikhawmsele â thup kho lo. ²⁵ Chuvachun, nunau pakhat, fanu ngâksiatê khuri nâwmtâm vuanh nei mi nih chun a thâwngthâng a theih le, a kebul ah a va bawkbukhup sawm. ²⁶ Nunau chu Greek mi asi le, phun leikângah chun Siria ah Phoiniki ram ah suak mi asi. Anih nih chun a fanu paw sungah mi khuri nar ding hen a ngiar. ²⁷ Chun, anih nih chun a sinah, "Fa tla chu khawp masa na seh; fa tla sang lâk piak hen ui tla sinah lawnh chu â dawh lo," a ti. ²⁸ Anih nih chun a sinah, "Lalpa si chu si ngâk, sikhawmsele dawhkân tangah ui tla khawm nih fa le tla sang neknâwi chu a ei tâwn asi," ti hen a sâng. ²⁹ Chun anih nih chun a sinah, "Na thusim ruangah chun kal rawh le, khuri chu na fanu paw sungah mi a suak rawh," a ti. ³⁰ Chun, a in ah chun a va tlung le, a fa chu khuri nih a suaktâk rawh hen ihkhun ah it mi a muh rawh. ³¹ Chun, Tura ram thawk hen Jisu chu a suak nawlh le, Sidon pal hen Dekapoli ram lan vima hen Galili rilî chu a tlung rawh. ³² Chun, mi pakhat nasêt, hawlh khawm hawlh fiang kho lo mi a sinah an hawng ruai le, a tlûnah a kut thâng ding hen an ngiar. ³³ Chun, anih nih chun zapi nâwngah mi amah cho a dang hen a ruai le, a kutmar hen a nakua tla a tham le, chun chil a sâk le, a lei a tham piak le; ³⁴ chun vân lei zauh hen a thaw a suah le, a sinah, "Ephphatha," a ti. (chu chu "A awng rawh," tinâk asi.) ³⁵ Chun, a nâ tla chu a âwng le, a lei phuarnâk tla khawm chu â sût le, fiang tak hen a hawlh kho rawh. ³⁶ Chun, anih nih chun a sinah âukhawm simh lo ding hen a ti thlir. Sikhawmsele, a khap fâk bilik leh an phuang zia a zual khun tâwn. ³⁷ "Anih nih chun zeizawng ṭha tak hen a ti le, nasêt tla a theihtir le, hawlh kho lo tla khawm a hawlhtir tâwn," an ti le, dîntuai hen chê an ti lo.

¹ Chu ni tla ah chun mi zapi tla cherkhet an hawng um nawlh le, ei ding zeikhawm an neilo liauah chun Jisu nih a ṭhiruai tla chu a kawh na le, an sinah, ² "Mi zapi tla hi tuah ni thum ka sinah an um rawh le, ei ding zeikhawm an neilo ruangah thungâi ka zângfah na asi. ³ Buh ngei hen an in ah ka tlungtir na chun lam lakah an vâiphâl awt dangâiah; zeimaw mi tla châng chu an hawng kalnâk thungâi a lât mi," a ti. ⁴ Chun, a ṭhiruai tla nih chun, "Mi nih hinah ramkaro mun ah hin kha zei mi sang hen me hi bang tla hi an khawptir kho lai?" ti hen, amah an sâng. ⁵ Chun, anih nih chun, "Sangtlêp zeizat me nan nei?" ti hen annih chu a deih na. Chun, annih nih chun "Tlêp sarih," an ti. ⁶ Chun, mi zapi tla chu tual ah to ding hen thu a pêk le; chun sangtlêp pasarih chu a lâk le, lâwmthu a sim thluh nûnah a phel le, an mâika ah hunh ding hen a ṭhiruai tla sinah a pêk. Chun, mi zapi tla sinah chun an hunh rawh. ⁷ Ngatenek tâwmtê an nei ber; chun Jisu nih chun lâwmthu sim hen mal a sâwm le, ṭhiruai tla sinah chubang tla khawm chu an mâika ah hunh ding hen thu a pêk na. ⁸ Chun, an ei le, an khawp chiau; annih tla chu mi sâng li ding an si. An ei bang chu ṭhiruai tla nih khobung sarih an khah. Chun, Jisu nih chun annih chu a ṭiaktir na rawh. ¹⁰ Chun, anih chu a ṭhiruai tla sinah lawng ah chun â chuan sawm le, Dalmanutha ram chu a tlung rawh. ¹¹ Chun, Farisai tla an hawng suak le, Jisu niknâk ding hen a lakah vân a mi singsiahnâk hâwl hen anih chu an êl rawh. ¹² Chun, anih chu a thinlung hen a rûm le, "Zeirangah me tusan mi tla nih hin singsiahnâk an hâwl? Thungâi tak hen ka nan simh na, tusan minung tla sinah hin singsiahnâk rerêng pêk asi lai lo," a ti. ¹³ Chun, annih chu a kaltâk na le, lawng ah chun â chuan nawlh le, varâl leiah a kal rawh. ¹⁴ Chun, a ṭhiruai tla nih chun sang put an philh le, sangtlêp pakhat cho lo chu lawng ah chun sang dang rerêng an nei lo. ¹⁵ Chun, anih nih chun an sinah, "Farisai tla leh Herod thilnu lakah chun a vêng ule, a thiamthih u," a ti thlir. ¹⁶ Chun, annih nih chun, "Sang kan nei lo thlo," ti hen anna ruah. ¹⁷ Chun, Jisu nih chu chu a theih le, an sinah, "Zeirangah sang nan nei lo ruangah nanna ruatdawn? Tu khawmah nan thinlung hen nan theih lo nget rih ma? A ngaihtawnhnâk khawm nan theih lo nget rih mu? Nan thinlung chu a mâwlâwt rawh na maw? ¹⁸ Mit nei ko hen nan muh lo mazei? Nâ nei ko hen nan theih lo mazei? Nan theihkumza lo ma? ¹⁹ Sângnga sinah sangtlêp panga ka phel liauah khan a neknâwi kha khobung zeizat me nan khah?" a ti. Chun, annih nih chun a sinah, "Leinih," an ti. ²⁰ "Chun, sâng li sinah sangtlêp pasarih ka phel liauah khan a neknâwi kha khobung zeizat me nan khah?" a ti. Chun, annih nih chun a sinah, "Khobung sarih," an ti. ²¹ Chun, anih nih chun an sinah, "Tu khawmah a ngaihtawnh dân nan thiam lo rih ma?" a ti. ²² Chun, Betsaida ah a hawng tlung. Chun, Jisu sinah mitchâw an hawng ruai le, amah tawngh ding hen an ngiar. ²³ Chun, anih nih chun mitchâw kut chu a tleih le, khua lêng ah a suakpi le; chun a mit ah chil a sah le, a tlûnah kut a thâng thluh rawh chun, "Khua na muh kho ma?" ti hen a deih. ²⁴ Chun, a vân a tâu le, "Minung tla ka muh le, thing kal hâwi hen ka muh fâwn," a ti. ²⁵ Chun, a mit ah a kut a thâng nawlh le, chun anih nih chun a zauh ko le, a hawng dam le, zeizawng fiang tak hen a muh rawh. ²⁶ Chun, anih nih chun, "Khua khawmah lût lah," ti hen a in ah a tlungtir rawh. ²⁷ Chun, Jisu leh a ṭhiruai tla chu an suak le, Philipi Kaisari khuatê tla ah chun an kal. Chun, kal pah hen a ṭhiruai tla sinah, "Mi nih âu me asi ’an ka ti?" ti hen a deih na. ²⁸ Chun, annih nih chun, "Baptistu Johan asi," a nan ti; midang nih, ’Elija asi,’ a nan ti; a zeimaw mi lam nih chun, "Pathian khuavâng tla lakah pakhat asi,’ a nan ti," ti hen an simh. ²⁹ Chun, anih nih chun an sinah, "Asi chun ne, nannih nih âu asi nan ka ti?" ti hen a deih na. Peter nih chun a sinah, "Mesia chu na si," ti hen a sâng. ³⁰ Chun, anih nih chun a thâwngthâng âukhawm simh lo ding a ti thlir na. ³¹ Chun, Minung Fapa nih chun thil tamtak a tuar ding mi leh upa tla, bâwlpu lal tla, Dân sîntirtu tla duhlo hen a um ding mi tla, thah hen a um ding mi tla, ni thum ni ah a thawknawlh ding mi tla chu a sîntir na rawh. ³² Chubang thu chu fiang tak hen a sim asi. Chun, Peter nih chun anih chu a dang hen a ruai le, nun a simh rawh. ³³ Anih lam chu â her le, a ṭhiruai tla chu a zauh le, "Setan, ka dung leiah kal rawh, Pathian thil tla dawn lo hen, minung thil tla na dawn asi hi," ti hen, Peter nun a simh rawh. ³⁴ Chun, mi zapi tla chu a ṭhiruai tla hen a kawh na le, an sinah, "Âuzawng nih hawng ka zûl a duh chun mah a pheh hen a kraws put hen hawng ka zûl seh. ³⁵ Âuzawng a nungnâk hum duhtu zawng nih a thlâu lai le; âuzawng keimah ruangah leh Thâwngthâng Ṭha ruangah a nungnâk thlâutu nih chun a him lai. ³⁶ Mi nih laikulh hi a pum hen nei sele, a nungnâk thlâu sele, a rangah zei me a ṭhatvaknâk um lai? ³⁷ Mi nih a nungnâk ruangrûl ah zei me a pêk kho lai? ³⁸ Âuzawng tusan zumhkâilo leh thilsual ti mang tla lakah keimah leh ka thu zahpitu zawng chu, Minung Fapa nih hin vânmifial thenhlimh tla hen a Pa rokualnâk ah a thuam hen a hawng kal tikah chun chu minung chu a hawng zahpi bâk lai," a ti.

¹ Chun, Jisu nih an sinah, ’Thungâi tak hen ka nan simh na, hinah dîr tla, a zeimaw mi tla hi Pathian Ram thiltikhonâk hen hawng tlung mi an muh lân lo chu thihnâk tem lo thlo ding mi an um," a ti. ² Chun, ni ruk nûnah chun Jisu nih Peter, Jem leh Johan tla chu a ruai na le, a dang hen tlâng sâng takah anmah tla cho a kâipi na; an mâika ah chun a mêl umzia chu a hawng dang rawh. ³ Chun, a nipuan tla chu tual ah puan suktu nih an suk vâr kho lo rê tiang a vâr tîk hen a lek zur rawh. ⁴ Chun, Elija leh Mosi chu an sinah an hawng a langh le, Jisu hen anna sâwn. ⁵ Chun, Peter nih Jisu a sawnh le, "Rabbi" kan rangah hinah um hi a ṭha; basâ pathum kan khuar lai, nang rangah pakhat, Mosi rangah pakhat, Elija rangah pakhat," a ti. ⁶ An ṭih ngâi ruangah sim ding lêm khawm an theih lo. ⁷ Chun, anmah tla liah hen sûm a hawng zîng le, chun sûm ah chun aw a hawng suak le, "Hi hi ka Fapa duhtak asi, amah thu ngâi u," a ti. ⁸ Chun, an kiangkam an zauh sawm le, anmah tla sinah Jisu cho lo chu âukhawm an muh lo rawh. ⁹ Chun, tlâng ah mi chu an ṭum liauah Minung Fapa mithi lakah mi a thawknawlh nûnah cho lo chun an thil muh tla chu âukhawm simh lo ding a ti thlir. ¹⁰ Chun, chu thu chu an chîng thlir le, "Mithi lakah mi thawknawlh chu zei tinâk me si lai?" ti hen anna deih tawnh. ¹¹ Chun, annih nih a sinah, "Zei ti zia me Dân sîntirtu tla nih, ’Elija chu a hawng kal masa ding asi, an ti zia," ti hen an deih. ¹² Chun, anih nih chun an sinah, "Elija chu a hawng kal masa ding asi rerêng; zeizawng a remh awt asi; thil tamtak tuar hen mi zauhnawmh hen a um ding asi ti Minung Fapa thâwngthâng zei hâwi hen me an rîn? ¹³ Sikhawmsele, ka nan simh na, Elija chu a hawng kal ving rawh asi. Chun, a thâwngthâng an rîn hâwitê khan a tlûnah an duh duh hen an ti ber rawh asi," a ti. ¹⁴ Chun, a ṭhiruai tla sinah an va tlung rawh chun an kiangkam ah mi zapi cherkhet tla leh Dân sîntirtu tla nih an êl na liau an va muh. ¹⁵ Chun, mi zapi zawzawng nih chun Jisu an muh ka hen chun chê an ti ngâi le, a sinah an tek sawm le, chibai an va bûk. ¹⁶ Chun, anih nih chun an sinah, "Annih tla hen zei thu me nanna êl?" ti hen a deih na. ¹⁷ Chun, mi zapi lakah mi pakhat nih a sinah, "Sîntirtu, ka fapa khuri vuanh hawlh kholo chu na sinah ka hawng put le, ¹⁸ a tleihnâk kipah a thlûk chiam tâwn le; chun a buanbarâ tla a tlâ le, a hachang a rial le, â zûk dadauh tâwn. Chun, na ṭhiruai tla hi nar ding hen ka simh na le, an ti kho lo," ti hen a sâng. ¹⁹ Chun, anih nih chun an sinah, "Tusan lungnâk neilo le tla, zei ri me nan sinah ka um lai le? Zei ri me ka nan sang kho na lai? Amah chu ka sinah hawng ruai u," ti hen a sâng. ²⁰ Chun, amah chu a sinah an hawng ruai. Chun, khuri nih chun anih chu a muh kâ hen ngâksia chu cherkhet hen a sûlneng sawm rawh. Chun, tual ah a tlû le, a buanbarâ a tlâ le, a tâl chiam. ²¹ Chun, anih nih chun a pa sinah, "Hi hâwi hen a hawng umtirnâk hi zei tluk a sâwt rawh?" ti hen a deih. Anih nih chun, "A ngâksiatê thawk hen asi; ²² chun amah veih ding hen vei tamtak mei ah leh tî ah khawm a tûl rawh le; sikhawmsele nangnih zeitin mawh tal na ti kho chun hawng kan zângfah le, hawng kan ṭangpi rawh," a ti. ²³ Chun, Jisu nih a sinah, "Na ti kho chun a! Lungnâk neitu rangah chun zeizawng tikho asi," a ti. ²⁴ Chun, ngâksia pa nih chun, "Ka lung, ka zumhmaihnâk ah hin hawng ka ṭangpi rawh," ti hen a âu sawm rawh. ²⁵ Chun, Jisu nih mi zapi an hawng tek le, anna pûm liau a muh rawh chun khuri nâwmtâm chu a fâi le, a sinah, "Nang, khuri hawlh kho lo leh nasêt, thu ka nan pêk, a sungah mi suak le, lût nawlh lah rawh," a ti. ²⁶ Chun, a âu le, cherkhet a sûlneng rawh chun a suak rawh. Chun, ngâksia chu thi hâwi hen a um rawh. Chuvachun, mi tam dauh nih chun, "A thi asi," an ti. ²⁷ Jisu lam nih chun a kut a tleih le, a thawh; chun a hawng thawk rawh. ²⁸ Chun, Jisu chu in ah a va lût rawh chun a ṭhiruai tla nih, "Zeirangah me kan nar kho lo le?" ti hen, mi kingnâk ah an deih. ²⁹ Chun, anih nih chun an sinah, "Hi hâwi hi thlacham cho lo nih chun zeitin khawm a nar kho lo," a ti. ³⁰ Chun, chunah mi chu a suak le, Galili ram chu an lan le, âukhawm nih an theih ding a duh lo. ³¹ A ṭhiruai tla a sîntir na dangâiah; an sinah, "Minung Fapa hi minung tla kut ah tleihtir hen a um ding asi, an thah lai le; chun an thah nûnah ni thum ni ah a thawknawlh lai," a ti. ³² Sikhawmsele, a thusim chu a ngaihtawnhnâk an theih lo le, amah tâ nih an deih ngam lo. ³³ Chun, Kapernaum chu an hawng tlung le, chun in sungah a um liauah chun an sinah, "Lampi ah khan zei thu me nanna êl?" ti hen, a deih na. ³⁴ Sikhawmsele, lampi ah chun, kan lakah âu me a rokual chem lai ne? ti thu anna êl ruangah an dâisip. ³⁵ Chun, anih chu a to le, leinih tla chu a kawh na le, an sinah, "Âuzawng nih masachem si a duh chun, mi zawzawng ngâk hen madungchem ah a um ding asi, mi zawzawng to-aw ah a um ding asi," a ti. ³⁶ Chun, ngâksiatê a ruai le, an lâiah a dîrtir; chun a kuah le, an sinah, ³⁷ "Âuzawng ka min ruangah hi hâwi ngâksiatê pakhat khawm lawmhtu vial chu keimah lawmhtu an si lai; âuzawng kei hawng ka lawmhtu zawng chu keimah cho lawmhtu an si lo le, hawng ka fialtu lawmh khawm an si lai," a ti. ³⁸ Johan nih chun a sinah, "Sîntirtu, âu nih mawh na min hen khuri tla a nar mi kan muh le, hawng kan zûl bâk lo ruangah kan khap ko rawh," a ti. ³⁹ Jisu lam nih chun, "Khap lah u rawh; âukhawm ka min hen thilchê ti hen hawng ka simsiat sawm kho an um lo asi. ⁴⁰ Âuzawng hawng kan do lotu chu kanmah lei ṭângṭawm an si. ⁴¹ Âuzawng ka mi nan si ruangah tî hâi khat din ding an pêk natu chu, thungâi tak hen ka nan simh na, a lâwmman chu a dawk rîlmâl lai loh. ⁴² "Âuzawng hi bang hawng ka zumhtu mi mê tla lakah pakhat khawm tlûktirtu zawng chu an ngâwng ah fâng rialnâk lung lianpi awihtir hen tisumsumriat ah thlâk sele an rangah a ṭha dauh ding asi. ⁴³ Chun, na kut nih a nan tlûktir chun tan ko; ⁴⁴ kut panih nei hen Gehena ah an tholung thih lonâk ah leh mei mit kho lo ah kal ngâk chun, siat leh râwk hen nungnâk ah lût na rangah a ṭha dauh. ⁴⁵ Chun, na kê nih a nan tlûktir chun, tan ko; ⁴⁶ kê panih nei hen Gehena ah an tholung thih lonâk ah leh mei mit kho lo ah lawnh ngâk chun, khêng leh bai bû hen nungnâk ah lût na rangah a ṭha dauh asi. ⁴⁷ Chun, na mit nih a nan tlûktir chun, chawih zek; ⁴⁸ mit khiang khinih nei hen Gehena ah an tholung thih lonâk ah leh mei mit kho lo ah lawnh ngâk chun, mit khiang khat nei hen Pathian Ram ah lût na rangah a ṭha dauh. ⁴⁹ "Mi kip mei hen alhtir an si lai. ⁵⁰ "Chitê hi a ṭha; sikhawmsele, chitê hi a dâwng rawh chun zei hen me an altir nawlh lai? "Nanmah lak takah chitê nei ule, a rem u, a ti.

¹ Chun, Jisu chu a thawk le, chu thawk hen chun Judai ram ah leh Jordan râl ah a kal le; chun, mi zapi tla chu a sinah an hawng a pûm nawlh le; chun, a ti dân kumza hâwi hen a sîntir nawlh na. ² Chun, Farisai zeimaw mi a sinah an hawng kal le, amah niknâk ding hen, "Mi nih nupi mâk a thiang ma?" ti hen an deih. ³ Chun, anih nih chun an sinah, "Mosi nih zei thu me a nan pêk na?" ti hen, a sâng. ⁴ Chun, annih nih chun, "Mosi nih chun mâknâk lasui rîn hen mâk a siang tâwn asi," an ti. ⁵ Sikhawmsele; Jisu nih an sinah, "Nan thinlung khauh ruangah asi chu thupêk chu a nan rîn piak na mi chu. ⁶ Sikhawmsele, tual leh vân tuahtîr thawk hen annih chu nunau leh mipa ah a siam asi. ⁷ Churuang chun mipa nih a nu leh a pa a kaltâk lai le, a nupi a sihawh lai; ⁸ chun, an panih hen chun taksa pumkhat an si lai rawh. Chuvachun, panih an si lo rawh le, taksa pumkhat an si lehlam rawh asi. ⁹ Chuvachun, Pathian nih a sihawh na rawh mi chu minung nih ṭhen lah seh," a ti. ¹⁰ Chun, in ah an lût nawlh rawh chun chubang thu chu Jisu rangah an deih nawlh. ¹¹ Chun, anih nih chun an sinah, "Âuzawng a nupi mâk hen midang umpitu nih chun a nupi chu ṭângdang a pawmtâk asi. ¹² Anih khawm nih chun a pasal a ṭhen hen midang a umpi chun ṭângdang a pawmtâk bâk," a ti. ¹³ Chun, Jisu tawngh ding hen a sinah ngâksia tetê an hawng ruai na le; chun, ṭhiruai tla nih an fâi na. ¹⁴ Sikhawmsele, Jisu nih chu chu a muh rawh chun thungâi a lungsi lo; ṭhiruai tla sinah chun, "Ngâksia tetê tla ka sinah hawng kaltir ule, nar lah na u; Pathian Ram chu hi bang mi tla tâ asi. ¹⁵ Thungâi tak hen ka nan simh na, âuzawng Pathian Ram chu ngâksiatê nih a lawmh mi hâwi hen lawmh lotu zawng chu a sungah an lût rîlmâl lai loh," a ti. ¹⁶ Chun, anmah tla chu a kuah na le, an tlûnah kut thâng hen mal a sâwm na rawh. ¹⁷ Chun, kal ding hen Jisu a suak liauah minung pakhat amah leiah a hawng tek le, a mâika ah a siksidîr le, a sinah, "Sîntirtu ṭha, zungzâl nungnâk ka ting khonâk ding hen zei me ka ti lai?" ti hen a deih. ¹⁸ Chun, Jisu nih a sinah, "Zeirangah me mi ṭha na ka ti? Minung pakhat cho lo chu âukhawm mi ṭha an um lo, chu chu Pathian asi. ¹⁹ Thupêk tla chu na theih ko khateh, ’Mi thah lah, ṭângdang pawmtâk lah, fîr lah, theihpitu âwkrâwl ah suak lah, bum lah, na nu leh na pa zah rawh,’ ti tla hi," a ti. ²⁰ Chun, anih nih chun a sinah, "Sîntirtu, chubang thu zawzawng chu ka ngâksiatê thawk hen ka zâwt tâwn," a ti. ²¹ Chun, Jisu nih amah chu a zauh le, a zângfah le, a sinah, "Kâng khat na bat rih; kal le, na neih zawzawng zuar le, mipâm tla sinah pêk rawh, chun, vân ah ro na nei lai; chun hawng kal le, hawng ka zûl," a ti. ²² Sikhawmsele, chubang thu lakah chun a mêl chu a hawng mûi khup le, ngaihsia tak hen a kal rawh; sum tamtak nei mi asi ruangah. ²³ Chun, Jisu nih a kiangkam a zauh le, a ṭhiruai tla sinah chun, "Sum leh pâi chawng tla rangah chun Pathian Ram ah lût a har awt â!" a ti. ²⁴ Chun, ṭhiruai tla nih chun a thusim chu thungâi chê an ti. Jisu nih a sâng nawlh na le, "Ka fa tla, sum rinhsantu tla rangah Pathian Ram ah lût a har â! ²⁵ Minei Pathian Ram ah lût ngâk hen sangâwngsâu ṭhim kua ah lût a awl dauh," a ti. ²⁶ Chun, annih nih chun thungâi chê an ti le, a sinah, "Asi chun âu me ruangsuak sikho lai ne?" an ti. ²⁷ Jisu nih annih chu a zauh na le, "Chu chu minung nih tikho asi lo le, Pathian lam nih chun tikho lo asi loh; Pathian nih chun zeizawng a ti kho asi," a ti. ²⁸ Peter nih a sinah, "Ngâinik, kannih nih zeizawng kaltâk hen kan nan zûl rawh," ti hen, sim a dawmh rawh. ²⁹ Jisu nih chun, "Thungâi tak hen ka nan simh na, âuzawng keimah ruangah leh Thâwngthâng Ṭha ruangah in mawh, unaupa mawh, farnu mawh, nu mawh, pa mawh, fa tla mawh, ram tla mawh kaltâk rawh mi nih chun, ³⁰ tu dam sung lîlâ hin in tla, unaupa tla, farnu tla, nu tla, fa tla, ram tla a let zâ hen, nehsawhnâk tla hen, tawng lo ding âukhawm an um lo; tik hawng tlung ding mi ah zungzâl nungnâk hen. ³¹ Sikhawmsele, mi tamtak masachem ah um tla chu madungchem ah an um lai, madung chem tla khawm chu masachem ah an um lai, a ti. ³² Chun, Jerusalem ah kâi ding hen lam lakah an um le, Jisu chu an mâi leiah a kal le; annih nih chun thungâi chê an ti; a hawng zûltu tla nih chun an ṭih. Chun, anih nih chun leinih tla chu a dang hen a ruai nawlh na le, ³³ "Ngâinik u, Jerusalem ah kan kâl awt hi; Minung Fapa hi bâwlpu lal tla leh Dân sîntirtu tla sinah tleihtir hen a um awt asi. ³⁴ Chun, annih nih chun a tlûnah thi ding hen thu an thlûk lai le, Phundang tla sinah an pêk lai; chun annih nih chun nihsuak siamnâk ah an mang lai le, chil an sah lai le, an vuak lai le, an thah lai; chun, ni thumnâk ah a thawknawlh lai," ti hen, a tlûnah thil hawng tlung ding mi tla chu an sinah a sim rawh. ³⁵ Chun, Zebedai fapa Jem leh Johan nih chun Jisu chu an hawng naih le, a sinah, "Sîntirtu, na sinah kan deih mi zawng na hawng kan ti piak kan duh," an ti. ³⁶ Chun, anih nih chun an sinah, "Nan rangah zei me an ti piak na sele nan duh?" a ti. ³⁷ Chun, annih nih chun a sinah, "Na rokualnâk ah chun na vawrh leiah pakhat, na kehlei ah pakhat hawng kan totir," an ti. ³⁸ Jisu lam nih chun, an sinah, "Nan deih mi chu nan theih lo asi. Ka hâi din ding mi chu nan din kho mazei? Baptis ka sinâk ah khawm nanna baptis kho mazei?" a ti. ³⁹ Chun, annih nih chun a sinah, "Kan ti kho," an ti. Chun, Jisu nih an sinah, "Ka hâi din ding mi chu nan din lai le, ka baptis si ding khawm chu nan si bâk lai. ⁴⁰ Sikhawmsele, ka vawrhlei ah mawh ka kehlei ah mawh to ding thu chu kei pêk ding asi lo le, an timhtuah piak na mi tla rangah asi dauh lai," a ti. ⁴¹ Chun, parâ tla nih chun chu chu an theih rawh chun Jem leh Johan tlûnah chun thungâi an lungsi lo. ⁴² Jisu lam nih chun annih tla chu a kawh na le, an sinah, "Phundang tla tlûnah lâirêltu ah an ruat mi tla chu an tlûnah thungâi anna lal tâwn le, an mi lian tla nih chun an tlûnah thungâi thu an nei tâwn ti nan theih. ⁴³ Sikhawmsele, nan lakah lam chun chu hâwi asi lai loh; âuzawng nan lakah mi lian si duh mi zawng chu nan to-aw ah a um ding asi. ⁴⁴ Âuzawng nan lakah masachem si duh mi zawng chu mi zawzawng sal ah a um ding asi. ⁴⁵ Minung Fapa khawm nih hin rianṭuan piak ding hen a hawng lo le, rianṭuan ding leh mi tamtak tlanhnâk ah a nungnâk pêk ding hen a hawng kal asi," a ti. ⁴⁶ Chun, Jeriko ah an hawng tlung rawh. Jisu chu Jeriko thawk hen chun a ṭhiruai tla leh mi zapi cherkhet hen a suak liauah kutdawnh mitchâw, Timai fapa Bartimai chu lam vâu ah a to. ⁴⁷ Chun, Nazaret Jisu asi ti a theih ka hen, "Jisu, David Fapa, hawng ka zângfah rawh," ti hen, a âu rawh. ⁴⁸ Chun, mi tamtak nih dâisip ding hen an fâi. Sikhawmsele, anih nih chun, "David Fapa, hawng ka zângfah rawh," ti hen, a âu dadauh. ⁴⁹ Chun, Jisu chu a dîr le, "Amah chu kawh u," a ti. Chun, mitchâw chu an kawh le, a sinah chun, "Lungngam tak hen um le, thawk rawh; a nan kawh," an ti. ⁵⁰ Chun, anih nih chun a puan a lawnh le, a thawk lawt le, Jisu sinah a hawng kal. ⁵¹ Chun, Jisu nih chun amah chu a hawng sawnh le, "Na lakah zeitin an ti sele na ka duh?" a ti. Chun, mitchâw nih chun a sinah, "Rabboni" muh kho ka duh," a ti. ⁵² Chun, Jisu nih a sinah, "Kal rawh, na lungnâk hi na dam phah asi," a ti. Chun, a muh kho sawm le, lampi ah chun Jisu a zûl rawh.

¹ Chun, Jerusalem an naih dâwp ah, Oliv Tlâng Bethphage leh Bethani kiang an tlung rawh chun a ṭhiruai lakah mi panih a fial na le, ² an sinah, "Nan mâilei khua ah khin va kal ule, chun nan lût tîrah Sanatung fa rêng mi, âukhawm chuan dah lonâk nan va muh sawm lai; chu chu sût ule, hawng ruai u. ³ Chun, âutal nih, ’Kha kha zeirangah nan ti awt?’ an ti na chun, ’Lalpa nih a duh asi, hinah a hawng thaktir nawlh sawm lai, ti u, a ti. ⁴ Chun, an kal le, zâwllâi ah inkhâr lênglei ah Sanatung fa rêng mi an va muh le; chun chu chu an sût rawh. ⁵ Chun, chunah chun dîr mi âu tla nih mawh an sinah, "Sanatung fa kha zeirangah nan sût?" an ti. ⁶ Chun, annih nih chun Jisu sim hâwitê khan an sinah an sim le; chun kal ding an siang rawh. ⁷ Chun, sanatung fa chu Jisu sinah an hawng ruai le, a tlûnah chun an puan tla an phah le; chun a tlûnah â chuan rawh. ⁸ Chun, mi tamtak nih lampi ah chun an puan an phah le; midang nih lo mi sâwlring sât hen an phah. ⁹ Chun, a mâi leiah kal tla leh a dung leiah zûltu tla nih chun, "Hosana! Lalpa min hen a hawng kal mi chu a thaw a suak. ¹⁰ Ram hawng tlung ding mi, kan pa David Ram chua thaw a suak, Chungnungchem ah khin Hosana!" ti hen, an âu. ¹¹ Chun, Jisu chu Jerusalem ah Pathian Biakin ah chun a lût rawh. Chun, zeizawng a zauh thluh rawh chun, zânleibâi khawm asi rawh le, a suak le, leinih tla hen Bethani ah an kal rawh. ¹² Chun, a thâituan ah chun, Bethani thawk hen Jisu chu a suak nûnah a sung a vâng rawh. ¹³ Chun, theipi kûng nah nei râl lât hen a muh le, a rah muh ding hen a va kal le; chun a va tlung rawh chun a nah cho lo chu zeikhawm a muh lo le; theipi rah tik asi lo rêng asi. ¹⁴ Chun, Jisu nih thing chu a sawnh le, "Tu thawk hen kumleza hen na lakah âukhawm nih rah ei lah rawh seh," a ti. A ṭhiruai tla nih chun chu chu an theih. ¹⁵ Chun, Jerusalem ah chun an tlung rawh. Pathian Biakin ah Jisu chu a va lût le, chunah mi zuartu tla leh châwktu tla chu a nar na le, tangka thlengtu tla dawhkân tla leh vaṭhu zuartu tla tophah tla khawm chu a thlûk piak na le; ¹⁶ chun, Pathian Biakin ah chun âukhawm nih thil-le-rî an lanpi a siang lo. ¹⁷ Chun, an sinah chun, " ’Ka in chu phun kip rangah thlachamnâk in an ti lai, ti rîn asi lo mazei? Nannih lam nih chun rawkmang tla pûk ah nan siam," ti hen, a sîntir na rawh. ¹⁸ Chun, bâwlpu lal tla leh Dân sîntirtu tla nih chun chu chu an theih le, amah chu an ṭih ruangah a veihnâk ding zia an hâwl. Mi zapi zawzawng nih chun a sîntirnâk chu thungâi chê an ti. ¹⁹ Chun, zânleibâi a hawng si rawh chun Jisu leh a ṭhiruai tla chu khuapi ah mi chu an suak rawh. ²⁰ Chun, zîng ah an kal pah hen theipi kûng chu a ram tiang uai ver hen an muh rawh. ²¹ Chun, Peter nih a theih pup le, a sinah, "Rabbi zauhnik, theipi kûng hawlhsiat na barh mi kha a uai ver rawh," a ti. ²² Chun, Jisu nih an sinah, "Pathian zumh u. ²³ Thungâi tak hen ka nan simh na, âuzawng hi tlâng sinah hin, Hawng a ṭhinh le, tisumsumriat ah a lawnh rawh,’ ti hen, a thinlung ah zumhmaih lo hen a sim mi chu a tlung ngelchel lai ti lungtu nih an sim zia zawng hen an muh lai. ²⁴ Churuangah ka nan ti na, zeizawng thla nan cham hen nan deih mi zawng chu tawng rawh hen a ruat ule, chun nan tawng lai. ²⁵ Chun, thlacham hen nan dîr tik zawngah âu lak khawmah thupawi zeimawh nan nei chun ngaihdam u; nan Pa vân ah mi khawm nih nan buarnâk tla chu a nan ngaihdam na khonâk ding hen. ²⁶ (Chun, nan ngaihdam lo chun nan Pa vân ah mi nih nan buarnâk tla a nan ngaihdam na bâk lai loh," a ti le, a sâng.) ²⁷ Chun, Jerusalem ah chun an tlung nawlh le, chun Pathian Biakin ah Jisu chu a kal liauah bâwlpu lal tla leh Dân sîntirtu tla leh upa tla chu a sinah an kal le, ²⁸ a sinah, "Âu thu hen me hi bang thil hi na ti? Hi bang thil hi ti ding hen âu nih me thu a nan pêk?" an ti. ²⁹ Chun, Jisu nih an sinah, "Kei khawm nih thu kâ khat ka nan deih na bâk lai, hawng ka sâng ule; chun âu thu hen me hi bang thil hi ka ti ka nan simh na lai. ³⁰ Johan baptisma kha vân ah mi thu ma, minung thu? Hawng ka sâng u," a ti. ³¹ Chun, anna ruat le,"Vân ah mi thu, kan ti chun, ’Zeirangah a thu nan âwi lo ne?’ a kan ti ṭung lai, ³² ’Minung thu,’ kan ti lai dek maw aw?" an ti. (Sikhawmsele, mi zapi chu an ṭih le, mi zawzawng nih Johan chu khuavâng tatak ah an ruat khap ruangah.) ³³ Chun, Jisu an sâng le, "Kan theih lo," an ti. Chun, Jisu nih an sinah, "Kei khawm nih âu thu hen me hi bang thil hi ka ti ka nan simh na bâk awt lo," a ti.

¹ Chun, tahṭhimh thu hen Jisu nih an sinah a sim rawh: "Âu nih mawh grep dûm a siam le, dâi hen a kulh le, grep sûrnâk khur a chawh le, in sâng a sak le, a bultu tla sinah thlawh lawh ding hen a pêk le, ram dangah a kal rawh. ² Chun, kawih a chû rawh chun dûm ah a rah mi chu a tingvo bultu tla sinah mi lâk ding hen a bultu tla sinah chun sal pakhat a fial. ³ Chun, chu minung chu an tleih le, an vuak le, kut karo hen an kîrtir nawlh rawh. ⁴ Chun, sal dang an sinah a fial nawlh le; chu khawm chu a lû ah an liamh, ningzakkâi tak hen an siam. ⁵ Chun, sal dang a fial nawlh le; chu minung chu an thah. Sal dang tamtak khawm zeimaw mi an vuak le, zeimaw mi an thah. ⁶ Chun, pakhat, fapa duhtak a nei rih; ’Ka fapa hi chu an zah lai,’ ti hen, anih chu a madungchem ah an sinah a fial. ⁷ Sikhawmsele, chubang a bultu tla nih chun, ’Hi minung hi rotingtu ding chu asi; kan thah lai! Chun, a roting ding mi hi kan tâ asi ko lai,’ anna ti. ⁸ Chun, anih chu an tleih le, an thah le, grep dûm ah mi chu an lawnh rawh. ⁹ "Chuvachun, dûm dâwngpu nih chun zeitin a hawng ti lai? Bultu tla chu a hawng veih na lai le, dûm chu midang tla a pêk lai. ¹⁰ Hi Pathian lasui thu hi nan rêl lo mazei? ’In saktu tla duhlo mi lung kha, chu tak chu a kil ah lung herh chem a hawng si rawh. ¹¹ Chu chu Lalpa ti asi le; kan mitmuh ah a chê asi,’ ti hi," a ti. ¹² Chun, amah chu tleih an tum le, sikhawmsele, mi zapi chu an ṭih le; chu tahṭhimh thu chu anmah tla tisan hen a sim ti an theih dangâiah. Chun, amah chu an kaltâk le, an kal rawh. ¹³ Chun, a thusim ah tleih ding hen Farisai tla leh Herod murui lakah mi âu tla mawh a sinah an fial. ¹⁴ Chun, annih chu an hawng tlung rawh chun a sinah, "Sîntirtu, mi dik tak na si le, âukhawm ṭih leh zah khun na nei lo ti kan theih, âukhawm thliar leh dang lo hen, sîset hen Pathian lei thu na sîntir tâwn asi. Kaisar sinah siah châwi hi dân asi ma si lo? Kan pêk lai ma, pêk lai lo?" an ti. ¹⁵ Anih lam nih chun an perpet zia chu theih hen an sinah, "Zeirangah nan ka nik? Denari khat hawng put ule, ka zauh lai," a ti. ¹⁶ Chun, an hawng put. Chun, anih nih chun an sinah, "Hi hi âu lem leh âu min mesi?" a ti. Chun, annih nih chun a sinah, "Kaisar," an ti. ¹⁷ Chun, Jisu nih an sinah, "Kaisar thil tla chu Kaisar sinah pêk ule, Pathian thil tla chu Pathian sinah pêk u," a ti. Chun, thungâi chê an ti. ¹⁸ Chun, Sadukai tla, thawknawlhnâk a um lo titu tla chu Jisu sinah an hawng kal le, a sinah, ¹⁹ "Sîntirtu, Mosi nih, ’Âuzawng a unaupa nih fa nei lo hen a nupi thih tâk sele, a unaupa nih chun a nupi chu umpi hen a unaupa rangah chi a thlâk piak ding asi,’ ti hen hawng kan rîn piak asi. ²⁰ Unau pasarih an um le, upachem nih nupi a nei le, chi thlah lo hen a thi. ²¹ Chun, a panihnâk nih chun a umpi le, chi thlah lo hen a thi nawlh le; a pathumnâk nih chu hâwi ber hen. ²² Chun, unau pasarih chu chi rerêng thlah lo hen an thi vima. A madungchem ah nunau khawm chu a thi rawh. ²³ Thawknawlh tikah anmah lakah âu nupi me asi lai? An pasarih nih chun nupi ah an umpi dangâiah," ti hen, an deih. ²⁴ Jisu nih an sinah, "Hi ruangah hin silo ma, nan ngaih palh tâwn, Pathian lasui thu leh Pathian thiltikhonâk nan theih lo ruangah hin? ²⁵ Mithi lakah mi an thawknawlh tikah chun mipa leh nunau tla anna umh lai lo rawh le, vân ah vânmifial tla hâwi hen an si awt lehlam asi. ²⁶ Chun, mithi tla thawh hen an um ding thu chu--Mosi lasuibu ah, Thingbû thu ah khan Pathian nih, ’Kei Abraham Pathian, Isak Pathian, Jakob Pathian ka si,’ ti hen, a sawnh zia kha nan rêl lo mazei? ²⁷ Anih chu mithi Pathian asi lo le, minung Pathian asi dauh; thungâi nan ngaih sual asi," a ti. ²⁸ Chun, Dân sîntirtu lakah mi pakhat a hawng kal le, anna êl mi chu a hawng ngâi. Jisu nih annih tla chu ṭha tak hen a sâng ti a theih le, a sinah, "Thupêk zawzawng lakah a zei hi me a herh chem?" ti hen a deih. ²⁹ Jisu nih, "Thupêk herh chem chu hi hi asi: ’Israel tla, ngâi u, Lalpa kan Pathian chu Lalpa pakhat cho asi le; ³⁰ Lalpa na Pathian chu na thinlung zawzawng hen, na thlarau zawzawng hen, na dawnruatnâk zawzawng hen, na chaknâk zawzawng hen na dâwt ding asi, ti hi. ³¹ A sangtu chu hi hi asi: ’Nangmah na dâwt hâwi hen na zâwlbâwm tla na dâwt ding asi,’ ti hi. Hi ngâk hen thupêk rokual rerêng a um lo," ti hen, a sâng. ³² Chun, Dân sîntirtu nih chun a sinah, "Asi ngâk, sîntirtu, amah chu pakhat cho asi le, amah lo chu Pathian dang rêng an um lo, ³³ amah chu thinlung zawzawng hen, theihthiamnâk zawzawng hen, chaknâk zawzawng hen, mah a dâwt hâwi hen zâwlbâwm tla dâwt hi pum duah thilpêk leh bâwlnâk zawzawng ngâk hen a ṭha dauh khun ti hi, na sim dik tak ko, a ti. ³⁴ Chun, fing tak a sâng ti Jisu nih a theih rawh chun a sinah, "Pathian Ram na lât lo," a ti. Chu rî rawh chun âukhawm nih thu rerêng an deih ngam lo rawh. ³⁵ Chun, Jisu nih Pathian Biakin ah a sîntir liauah anmah tla a sawnh na le, "Mesia chu David fapa asi ti Dân sîntirtu tla nih zei zia hen sim me an si? ³⁶ David tak nih Thlarau Thenhlimh hen, ’Lalpa nih chun ka Lalpa sinah, na mêlma tla na kê sirhsanh ah ka siam lân lo chu ka vawrhlei ah to rawh,’ a ti. ³⁷ David tak nih chun anih chu, ’Lalpa,’ a ti dangâiah, zeitin a fapa asi lai?" a ti. Chun, mi zapi vântlâng nih chun lâwm tak hen a thu an ngâi. ³⁸ Chun, a sîntirnâk ah chun, "Dân sîntirtu tla lakah a thiamthih u; annih nih chun kawrdawh fual ruk hen tawih an duh tâwn le, ³⁹ sumtuah mun ah chibai bûk tla, pumhnâk in ah tophah ṭha chem tla, puaituahnâk ah mun ṭha chem tla an ngiat tâwn. ⁴⁰ Numei sum an ei le, mi muh ah sâwt tak thla an cham tâwn; chubang tla nih chun a mawh an phurh zual khun lai," a ti. ⁴¹ Chun, thawhlâwm bâwm zâwn ah chun Jisu chu a to, thawhlâwm ah mi zapi tla tangka thlâk zia chu a zauh le; minei tamtak nih cherkhet an tlâk. ⁴² Chun, numei pâm tak a hawng kal le, lepta panih a thlâk le, chu chu quadran khat tluk asi. ⁴³ Chun, Jisu nih chun a ṭhiruai tla chu a kawh na le, an sinah, "Thungâi tak hen ka nan simh na, thawhlâwm bâwm ah thlâktu dang zawzawng ngâk hen hi numei pâm tak nih a thlâk tam dauh. ⁴⁴ Hi bang zawzawng nih hin an neih a lei mi an thlâk asi; anih lam nih chun a duh liau tak, a neihlemtê, a um san mi zawzawng chu a thlâk ver asi, a ti.

¹ Chun, Pathian Biakin ah mi chu a suak liauah a ṭhiruai tla lakah mi pakhat nih a sinah, "Sîntirtu, zauhnik, a lung leh a in tla hi a rokual châwk a!" a ti. ² Jisu nih a sinah, "Hi bang in rokual tak tla hi na muh mu? Chimtir lo hen lung â chuanh mi rerêng hinah a um lai loh," a ti. ³ Chun, Oliv Tlang ah Pathian Biakin zâwn ah a to liauah, Peter, Jem, Johan leh Andri tla nih chun a sinah, ⁴ "Chubang chu zei tikah a hawng um lai? Chubang zawzawng chu a hawng tlung awt tikah singsiahnâk zei me a um lai? Hawng kan simh," ti hen, a thup hen an deih. ⁵ Chun, Jisu nih an sinah "Âukhawm nih an perpet na lonâk ding hen a thiamthih u. ⁶ Mi tamtak nih, ’Mesia chu ka si,’ ti hen, keimah min sâl hen an hawng kal lai le, mi tamtak an perpet lai. ⁷ Chun, râltuk thu leh râltuk thuthang tla nan theih tikah lawksawng lah u; chubang chu hawng tlung ding rêng asi; sikhawmsele, dawnghnâk chu asi lo rih. ⁸ Phun dang leh phun dang anna tuk lai le, ram dang leh ram dang anna tuk lai le; mun dang dangah lî tla â nîn lai, pâm tla a tlung lai; Chubang chu nau nei nganfâk dawmhtirnâk asi; ⁹ "Sikhawmsele, a thiamthih u; lâirêltu tla an tleihtir na lai le, pumhnâk in tla ah an vuak na lai. Keimah ruangah governor tla leh lalchem tla mâika ah anmah tla theihtirnâk ding hen nan dîr teh lai. ¹⁰ Chun, Thâwngthâng Ṭha hi phun zawzawng sinah sim masa ding asi. ¹¹ Chun, an ruai na hen, an tleihtir na tikah chun, ’Zeime ka sim lai,’ ti hen, a dawnkan lah u; a tik takah chun a nan theihtir na mi zawng; chu tak chu sim u; a simtu chu nanmah nan si awt lo le, Thlarau Thenhlimh asi dauh awt. ¹² Chun, thah ding hen a unaupa nih a unaupa a tleihtir lai le, pa khawm nih a fa a tleihtir lai; fa tla khawm nih an nu leh an pa tla an do lai, an thahtir lai. ¹³ Keimah min ruangah mi zawzawng huat nan si lai; sikhawmsele, a dawngh tiang hen tuar huamtu zawng chu, chu tak chu ruangsuak hen a um lai. ¹⁴ "Sikhawmsele, ’Ṭhiautu Fihnungkâi’ chu a dîr lonâk ding mun ah dîr nan muh tikah, (a rêltu zawng nih a umzia theih seh), chu tikah chun Judai ram ah um tla chu tlâng ah tek seh. ¹⁵ Chun, in tlûnah um mi chu ṭum lah seh; a in ah zeilo lâk ding hen lût lah seh. ¹⁶ Chun, lo ah um mi chu a puan lâk ding hen kîr lah seh. ¹⁷ Chubang ni ah chun râi tla leh nauno pawm tla tlûn chu a pit lai. ¹⁸ Chun, chubang chu busik ah a tlung lonâk ding hen thlacham u. ¹⁹ Chubang ni chu hamhnâk ni asi awt dangâiah, chu hâwi hamh chu Pathian siam tual tuah tîr thawk hen tutiang hen a um dah lo le, zeitik khawm a um lai lo rawh. ²⁰ Chun, Lalpa nih chubang ni chu tâwitir lah sele, minung rerêng dam hen an suak lai loh; sikhawmsele, mi thîm, a ruat mi tla ruangah chun ni tla chu a tâwitir. ²¹ "Chun, chu tikah chun âuzawng nih nan sinah, ’Zauhnik u, Mesia hinah a um,’ mawh ’Zauhnik u, hinah khi!’ mawh an ti na chun lung lah u. ²² Mesia telê tla leh khuavâng telê tla an hawng suak awt dangâiah. Chu tla nih chun singsiahnâk leh thilchê tla an ti lai; tikho sele, thîm tla men an perpet khonâk ding hen. ²³ Nannih lam chu a thiamthih u, zeizawng ka nan simhkan na rawh hi. ²⁴ "Sikhawmsele, chubang ni ah, chubang hamhnâk nûnah chun nî thimtir hen a um lai le, thlâ a chêu lai lo le, ²⁵ vân thawk hen ârfi tla an hawng tlâ lai le, vân ah thiltikhonâk um tla chu ninh asi lai. ²⁶ Chu tikah chun Minung Fapa hi thiltikhonâk fâk tak leh rokualnâk fâk tak hen sûm lakah a hawng kal mi an muh lai. ²⁷ Chu tikah chun vânmifial tla chu a fial lai le, a thîm mi tla chu kâwlkil li ah mi tual dawngh thawk hen vân dawngh tiang hen a lâwr hen a pumh lai. ²⁸ "Chun, theipi kûng ah hin tahṭhimh thu a sîn u; a chawrh a hawng no le, a nah a hawng chawrh chun ṭhâlpini a suak awt ti nan theih tâwn. ²⁹ Chu hâwi ber hen nannih khawm nih chubang chu a hawng tlung mi nan muh tikah chun amah chu a hawng nâi rawh le, kawtkarî ah a um ti theih u. ³⁰ Thungâi tak hen ka nan simh na, chubang zawzawng chu a hawng tlung lân lo chu tusan mi tla hi an tlâu lai loh. ³¹ Tual leh vân a tlâu lai le, ka thu lam chu a tlâu lai loh. ³² "Sikhawmsele, a ni leh a dâr thu chu pa cho lo nih chun âukhawm nih, vân ah vânmifial tla khawm nih, Fapa khawm nih an theih lo. ³³ Thiamthih ule; ringrâwn kumza hen um u; a tik chu nan theih lo dangâiah. ³⁴ Mi, a in kaltâk hen, a sal tla chu thuneitir hen, an rianṭuan ding pêk chiau hen, inkhâr vêngtu khawm râlring ding thu pêk tâ hen, ram lât takah khualtlâwng ving mi hâwi asi. ³⁵ Chuvachun, ringrâwn kumza hen um u; in dâwngpu hawng tlung tik ding chu zân leiah ma, thanṭim ah ma, zîng ah ma asi awt nan theih lo. ³⁶ Chu hâwi asi lo chun, a hawng tlung khup chun it thlit hen a nan muh sual na lebang lai. ³⁷ Chun, nan sinah ka sim mi hi mi zawzawng sinah sim ka si, ringrâwn hen um kumza u," a ti rawh.

¹ Chun, ni nihnâk ah chun Kalkanh Kût leh Sang Thilnu telhlo Kût a um awt le; bâwlpu lal tla leh Dân sîntirtu tla nih chun amah chu ngamlêm pêk a tleih hen an thah khonâk ding zia an hâwl an hâwl le, ² "Kût sung chun si lah seh, asi lo chun mi zapi vântlâng lakah nawknâk a hawng um sual lebang lai," an ti. ³ Chun, Bethani ah phâr Simon in ah chun Jisu chu a um liauah, buh a dûm liauah nunau pakhat alabasta dûr ah spiknard sariak rimthâw a man har tak put hen a hawng kal le, a dûr chu a khuai le, a lû ah a tawih. ⁴ Sikhawmsele, mi zeimaw mi chu an ro a thâwk le, "Zeirangah me sariak rimthâw hi a veih salam? ⁵ Hi sariak hi denari zathum ngâk a tam dauh zuar hen, mipâm tla sinah pêk kho asi mi," an ti. Chun, a tlûnah an chipchiar rawh. ⁶ Jisu lam nih chun, "Zeitin khawm ti lah u; zeirangah nan nawktir? Ka tlûnah thil ṭha tak a ti asi. ⁷ Mipâm tla chu kumleza hen nan sinah um an si le, nan duh tik zawngah annih chu nan zângfah kho mi; kei lam chu kumleza hen nan sinah um ding ka si lo. ⁸ A ti kho tâwk a ti asi; ka taksa hi phûm ding hen a chulh kan asi hi. ⁹ Chun, thungâi tak hen ka nan simh na, laikulh zawzawng ah, kha zeizawng ah, Thâwngthâng Ṭha an simnâk zawngah hi nunau thilti khawm hi amah theihkumzanâk ding hen an sim vima bâk lai," a ti. ¹⁰ Chun, Juda Iskariot, leinih tla lakah mi pakhat nih khan Jisu chu an sinah a tleihtir khonâk ding hen bâwlpu lal tla sinah a va kal. ¹¹ Chun, annih nih chun an theih kâ hen anna lâwm thlo le, a sinah tangka pêk ding hen an tiamh rawh. Chun, a tleihtirnâk ding zia remkâng a hâwl rawh. ¹² Chun, Sang Thilnu telhlo Kût, ni masachem, Kalkanh Kûtnâk dawrâ fa an thah tâwnnâk ni ah chun, a ṭhiruai tla nih a sinah, "Kalkanh Kût buh na ei khonâk ding hen kha zeiah va timhtuah sele na duh?" an ti. ¹³ Chun, a ṭhiruai tla lakah mi panih a fial le, an sinah, "Khuapi ah va lût ule, chunah chun mipa tibêl put hen a nan tawng na lai; amah chu zûl ko u. ¹⁴ Chun, a lûtnâk zawngah, chu in dâwngpu sinah chun, Sîntirtu nih ka ṭhiruai tla hen Kalkanh Kût buh kan einâk ding hen, khual in kardang chu kha zeiah me? a ti,’ va ti u. ¹⁵ Chun, amah nih a tlûn chuanh kardang kâu tak, thil-le-rî um chia, timh chia a nan zauhtir na lai; chunah chun kan rangah timhtuah u," a ti. ¹⁶ Chun, ṭhiruai tla chu an suak le, khuapi ah chun an va lût le, an sinah a sim hâwitê hen an muh le, chun, Kalkanh Kût buh chu an timhtuah rawh. ¹⁷ Chun, zânlei asi rawh chun anih chu leinih tla hen an va kal rawh. ¹⁸ Chun, an dûm le, an ei liauah Jisu nih, "Thungâi tak hen ka nan simh na, nan lakah mi pakhat ka sinah ei bâk mi tak nih hin a hawng ka tleihtir lai," a ti. ¹⁹ Chun, thungâi an lawksawng le, pakhat khat nih a sinah, "Keimah masi?" an ti chiau. ²⁰ Chun, anih nih chun an sinah, "Leinih tla lakah mi pakhat, a sang khêng ah hawng ka nîmpitu hi asi. ²¹ Minung Fapa hi a thâwngthâng an rîn mi hâwitê khan a kal awt asi; sikhawmsele, Minung Fapa tleihtirtu ding minung tlûn chu a pit! Chu minung chu suak lah sele a rangah a ṭha dauh lai," a ti. ²² Chun, an ei liauah Jisu nih sang a lâk le, mal a sâwm thluh rawh chun a phel le, an sinah a pêk le, "Lâk u; hi hi ka taksa asi," a ti. ²³ Chun, hâi a lâk le, lâwmthu a sim thluh rawh chun an sinah a pêk le; chun an ektê hen an din chiau rawh. ²⁴ Chun, anih nih chun an sinah, "Hi hi ka thisen, mi tamtak rangah suak ding mi thudântuk chu asi. ²⁵ Thungâi tak hen ka nan simh na, Pathian Ram ah a thar ka din ni a tlung lân lo chu grep zûn rah lakah mi ka din nawlh lai lo rawh," a ti. ²⁶ Chun, la an sak thluh rawh chun an suak le, Oliv Tlâng ah chun an va kal rawh. ²⁷ Chun, Jisu nih an sinah, "Nan ektê hen nan ka tektâk ver lai le, nan ka mâk thlap lai, Dawrâ vêngtu chu ka vuak lai le, dawrâ tla chu anna ṭhêk lai, ti rîn asi. ²⁸ Sikhawmsele, ka thawknawlh nûnah Galili ram ah nan mâilei ah ka kal lai," a ti. ²⁹ Peter lam nih chun a sinah, "An ektê hen an tektâk khawm sele, kei lam chu ka nan tektâk lai loh," a ti. ³⁰ Chun, Jisu nih a sinah, "Thungâi tak hen ka nan simh, tusûn ah tuzân lîlâ ah hin âr veinih a khuang lânah nangnih veithum na ka pheh lai," a ti. ³¹ Anih lam nih chun fâk tak hen, "Na thihnâk ah thi bâk awt khawmsele ka nan pheh lai loh," a ti chiam. Chun, chu hâwitê chun an ti chiau. ³² Chun, Getsemani an ti mi mun chu an tlung le, chun Jisu nih a ṭhiruai tla sinah, "Thla ka cham kar zawng hinah hin to u," a ti. ³³ Chun, Peter, Jem leh Johan tla chu a ruai na le, thungâi a thlakâm hen a lawksawng rawh. ³⁴ Chun, an sinah, "Ka thinlung thungâi a lawksawng le, thihnâk khawp rê asi; hinah hin um ule, a râlring kumza u," a ti. ³⁵ Chun, tâwm hen mâi leiah a va kal dauh le, tual ah a bawk le, tikho si sele, chu tik nih chun amah lanh ding hen thla a cham. ³⁶ " Abba, ka pa, zeizawng na ti kho le, hi hâi hi ka sinah mi ṭhial rawh; sikhawmsele, keimah duhzia silo hen nangmah duhzia si dauh seh," a ti. ³⁷ Chun, a hawng kal le, annih tla chu it hen a hawng muh na le; chun Peter sinah, "Simon, na it na maw? Dârkar khat khawm râlring kumza hen nan um kho lo mu? ³⁸ Lêmnâk ah nan lût lonâk ding hen râlring kumza hen thlacham u. Thlarau lam nih chun a huam le, taksa lam chu a chak lo asi," a ti. ³⁹ Chun, a va kal nawlh le, a thusim lîlâ sim hen thla a cham nawlh. ⁴⁰ Chun, a hawng nawlh rawh chun annih tla chu it hen a hawng muh nawlh na, an itmu a suak ngâi dangâiah; a sâng duandân an theih loh. ⁴¹ Chun, a hawng kal veithumnâk ah chun, an sinah, "Tuah lam chun it ule, a dîn u. A tâwk rawh! A tik chu a hawng tlung rawh! Zauhnik u, Minung Fapa hi misual tla kut ah an tleihtir awt hi. ⁴² Thawk ule, kan kal lai; zauhnik u, hawng ka tleihtirtu ding mi chu a hawng nâi rawh hi," a ti. ⁴³ Chun, a sim liauah, Juda, leinih tla lakah pakhat chu a hawng tleng sawm le, amah rual hen chun bâwlpu lal tla leh Dân sîntirtu tla leh upa tla sinah mi, mi zapi tla chu nâmsâu leh talhbo put hen an hawng tleng. ⁴⁴ Chun, a tleihtirtu ding mi nih chun, "Ka châwchawk mi zawng chu amah chu asi lai; tleih ule, ṭha tak hen kalpi u," ti hen, singsiahnâk ding a simhkan zet na. ⁴⁵ Chun, a tleng kâ hen amah a va fûk sawm le, "Rabbi," ti hen, a châwchawk chiam. ⁴⁶ Chun, anih chu a vuanh le, an tleih rawh. ⁴⁷ Chun, a kiang ah dîr tla lakah mi âu nih mawh a nâmsâu a phâwi le, bâwlpu lalchem sal chu a tuk le, a nâ a themh piak phak. ⁴⁸ Chun, Jisu nih annih tla chu a sawnh na le, an sinah, "Nâmsâu tla, talhbo tla put hen rawkmang tleih ding hâwi hen hawng ka tleih ding hen nan hawng suak mu? ⁴⁹ Pathian Biakin ah nisiar hen nan sinah ka um tâwn le, nan ka tleih lo mi. Sikhawmsele, Pathian lasui thu chu a hawng tlung khonâk ding hen asi hi," a ti. ⁵⁰ Chun, an ektê hen amah chu an thlahthlamh le, an tek ver. ⁵¹ Chun, tlangvâl âu nih mawh, puan mangṭhia cho aih hen amah chu a zûl le; chun anih chu an tleih le, ⁵² sikhawmsele, a puan mangṭhia chu a kaltâk le, taklâwng hen a tek rawh. ⁵³ Chun, Jisu chu Bâwlpu Lalchem sinah an ruai le, chun amah rual hen chun bâwlpu lal tla, upa tla, Dân sîntirtu tla zawzawng an hawng a pûm. ⁵⁴ Chun, Peter nih chun lâtpi thawk hen amah chu a zûl le, Bâwlpu Lalchem in kulhsung tualmâi tiang hen; chun vêngtu tla sinah mei aih hen a to bâk. ⁵⁵ Chun, Jisu an thah khonâk ding hen bâwlpu lal tla leh lâirêltu tla zawzawng nih chun amah phiarnâk an hâwl le, an tawng lo. ⁵⁶ Mi tamtak nih âwkrâwl hen an phiar le, sikhawmsele an phiarnâk thu chu â bang lo. ⁵⁷ Chun, âu tla mawh an dîr le, âwkrâwl hen an phiar le, ⁵⁸ "Hi minung nih hin, ’Hi Pathian Biakin hi ka siat lai le, ni thum karah biakin dang, kut hen sak lo mi, ka sak lai, a ti, ti kan theih," an ti. ⁵⁹ Sikhawmsele, chu hâwi hen khawm chun an phiarnâk thu chu â bang kho lo. ⁶⁰ Chun, Bâwlpu Lalchem chu a lâi ah a dîr le, Jisu sinah, "Zeikhawm hen na sâng lo mu? Hi bang tla nih a nan phiarnâk hi zei zia me asi?" ti hen a deih. ⁶¹ Anih lam chu a dâisip le, zeikhawm hen a sâng lo. Bâwlpu Lalchem nih chun a sinah, "Mesia Thawsuak Fapa chu na si ma?" ti hen a deih nawlh. ⁶² Chun, Jisu nih, "Ka si; Minung Fapa hi thiltikhonâk vawrhlei ah to hen, vân sûm lakah a hawng mi nan muh awt asi," a ti. ⁶³ Chun, Bâwlpu Lalchem nih chun a nipuan tla a thlêk le, "Theihpitu dang zei me kan ngâi lai rih? ⁶⁴ Pathian a simsiat zia chu nan theih rawh le, zeitin nan ngaih?" a ti. Chun, an ektê hen anih chu thi tlâk asi ti hen an thlûk. ⁶⁵ Chun, a zeimaw mi nih chun chil an sah mâimî le, a mêl an tuam le, an sut le, a sinah, "Âu nih an vuak, sim rawh," an ti. Chun, vêngtu tla nih chun an tleih dîr le, thungâi thlâk hen an bengh. ⁶⁶ Chun, Peter chu tanglei in kulhsung tualmâi ah chun a um liauah Bâwlpu Lalchem zûlvêltu nungâk lakah pakhat a hawng kal le; ⁶⁷ Peter mei aih chu a hawng muh le, "Nang khawm hi Jisu Nazaret mi sinah um kha na si hi," a ti. ⁶⁸ Anih lam nih chun, "Na thusim chu ka theih lo thlo, a ngaihtawnh dân rêng khawm ka theih lo," ti hen, a pheh. Chun, intipûm ah chun a va suak le; chun âr a khuang rawh. ⁶⁹ Chun, nungâk nih chun a muh le, a kiangah dîr mi tla sinah chun, "Hi minung hi an sinah mi asi," a ti nawlh. ⁷⁰ Sikhawmsele, a pheh nawlh. Chun, sâwtlotê nûnah a kiangah dîr mi tla nih chun, Peter sinah, "An lakah mi na si chiammâm, Galili ram ah mi na si dangâiah," an ti. ⁷¹ Anih lam nih chun, "Chu minung nan sim mi chu ka theih lo," ti hen, hawlh siat barh hen siat a sirh rawh. ⁷² Chun, ârkhuang veinihnâk chu a khuang sawm rawh. Chun, Peter nih chun Jisu nih a sinah, "Âr veinih a khuang lânah nangnih veithum na hawng ka pheh lai," a ti mi thu kha a theih nawlh rawh. Chun, chu chu a dawn le, a ṭap rawh.

¹ Chun, zînglei a hawng si kâ hen bâwlpu lal tla chu upa tla leh Dân sîntirtu tla zawzawng hen anna thluk le, Jisu chu an phuar le, an ruai le, Pilat sinah an pêk sawm rawh. ² Chun, Pilat nih chun a sinah, "Juda tla Lalchem na si ma?" ti hen, a deih. Chun, anih nih chun a sinah, "Na sim hâwi hen ka si," ti hen, a sâng. ³ Chun, bâwlpu lal tla nih chun kâng tamtak hen an phiar. ⁴ Chun, Pilat nih a deih nawlh le, a sinah, "Zeikhawm na sâng lo mu? Ngâi rawh, an phiarnâk rîlmâl hi!" a ti. ⁵ Jisu lam nih chun zeikhawm hen a sâng lo rawh le; chuvachun, Pilat nih thungâi chê a ti. ⁶ Chun, Pilat nih chun Kût ni ah chun rêngtlâ pakhat an ngiar mi zawng chu a suah piak na tâwn: ⁷ Chun, minung pakhat Baraba an ti mi chu hel tla lakah rêngin ah a tâng ko; chu tla nih chun helnâk ah chun mi an thah asi. ⁸ Chun, mi zapi an va kal le, an rangah a ti piak na tâwn hâwi a ti ding hen an ngiar rawh. ⁹ Chun, Pilat nih a sâng le, an sinah, "Juda tla Lalchem hi an suah piak na sele nan duh ma?" a ti. ¹⁰ Bâwlpu lal tla nih nahsuahnâk ruangah an hawng ruai ti a theih dangâiah. ¹¹ Sikhawmsele, bâwlpu lal tla nih chun mi zapi tla chu Baraba lam suah piak dauh ding hen an fawrh. ¹² Chun, Pilat nih chun an sinah, "Juda tla Lalchem nan ti mi hi zeitin ka ti lai rawh ne?" ti hen, a sâng nawlh. ¹³ Chun, annih tla chu, "Kraws ah khenhbêk rawh," ti hen, an âu nawlh. ¹⁴ Chun, Pilat nih chun an sinah, "Zeirangah? Zei me a sual," a ti. Sikhawmsele, annih tla chu, "Kraws ah khenhbêk rawh," ti hen an âu chiam. ¹⁵ Chun, Pilat nih chun mi zapi lungâwitir a duh le, Baraba chu a suah piak na rawh. Chun, Jisu chu a vuak thluh rawh chun kraws ah khenhbêk ding hen a pêk rawh. ¹⁶ Chun, kawrsen tla nih chun in kulhsung tualmâi Praitorion an ti mi ah chun amah chu an lûtpi le, an murui lakah mi zawzawng an pumh. ¹⁷ Chun, puan senduk an aihtir le, ling lukhuh an phiar le, an khuhtir. ¹⁸ Chun, "Chibai, Juda tla Lalchem!" ti hen, chibai an bûk rawh. ¹⁹ Chun, a lû ah chun lâiluang hen an vuak le, chil an sah le, siksidîr hen chibai an bûk. ²⁰ Chun, nihsuak siamnâk ah an mang thluh rawh chun puan senduk chu an lît le, amah puan an aihtir nawlh le, kraws ah khenhbêk ding hen an ruai rawh. ²¹ Chun, mi velvâ pakhat, ram lei thawk hen khuapi lei a hawng mi, kawrsen tla nih chun Jisu kraws put ding hen an nawrh. (Simon hi Kurini ah mi Alekzandar leh Rufa pa asi.) ²² Chun, Jisu chu Golgotha an ti mi mun ah chun an ruai le, chu chu "Luruh mun," tinâk asi. ²³ Chun, uain murrah hen chawmh mi an pêk le, sikhawmsele a duh lo. ²⁴ Chun, kraws ah an khenhbêk le, anna ting ding chiau theihnâk ah chamchawh hen a nipuan tla chu anna ṭhen. ²⁵ Chun, Jisu an khenhbêk mi chu zîng dâr kuanâk asi. ²⁶ Chun, a phiarnâk lasui a tlûn leiah an rîn le, "JUDA TLA LALCHEM," ti hen. ²⁷ Chun, amah rual hen chun rawkmang panih an khenhbêk na bâk; a vawrhlei ah pakhat, a kehlei ah pakhat. ²⁸ Pathian lasui thu, "Chun, anih chu misual tla ah ngaih asi rawh," ti mi chu a hawng tlungkim rawh. ²⁹ Chun, mi anna vel mi kip nih an lû lei bû hen, "I hi! Nang Pathian Biakin siat hen ni thum ah sak nawlhtu, a damh le, ³⁰ kraws ah mi kha hawng ṭum me!" an ti. ³¹ Chu hâwi ber hen bâwlpu lal tla nih chun Dân sîntirtu tla hen anmah tla lakah amah zauhnawmh hen, ’Midang men a damh tâwn le, amah chu â damh kho lo. ³² Kan muh hen kan lung khonâk ding hen, Mesia, Israel Lalchem chu, tuhin kraws ah mi chu hawng ṭum se me," an ti. Chun, amah rual hen an khenhbêk na mi tla nih chun anih chu an fâi. ³³ Chun, sûn dâr leinihnâk liau chirah chun sûnnilei dâr thum tiang hen laikulh a hawng thim ver. ³⁴ Chun, sûnnilei dâr thumnâk ah chun aw-hâu fâk tak hen, "Eloi, Eloi, lema sabakthani?" ti hen, a âu le, chu chu, "Ka Pathian, ka Pathian, zeirangah na ka kaltâk?" tinâk asi. ³⁵ Chun, a kiangah dîr mi zeimaw mi tla nih chun chu chu an theih rawh chun, "Ngâinik u, Elija a kawh asi," an ti. ³⁶ Chun, mi pakhat a tek le, sponge uain thur ah khat phak chiah hen lâiluang fung pâr ah a târ le, a dintir. "Um ko seh, amah lâk ding hen Elija a hawng mawh kan zauh lai," a ti. ³⁷ Chun, Jisu chu hâu fâk tak hen a âu le, a nûkrî a chat rawh. ³⁸ Chun, Pathian Biakin puanzâr chu a tlûnlei thawk hen a tanglei tiang hen suak dak hen â thlêk rawh. ³⁹ Chun, a mâilei zâwn kraws kiangah kawrsen zâ hotu dîr mi nih chun chu hâwi Jisu thih dân a muh rawh chun, "Hi minung hi Pathian Fapa asi tatak asi," a ti. ⁴⁰ Chun, nunau tla khawm nih lât tak thawk hen an chuanh le; chubang tla lakah chun Mari Magdala mi, Jemtê leh Josef nu Mari leh Salomi tla anna tel. ⁴¹ Chu tla chu Galili ram ah a um liauah amah zûl hen a rianṭuan piak tâwntu tla chu an si. Nunau dang tamtak Jerusalem ah amah rual hen kal mi tla chu anna tel bâk. ⁴² Chun, zânleibâi a hawng si rawh chun Timhtuah ni asi ruangah, chu chu Dinhni lânah mi ni hi asi. ⁴³ Josef Arimathai khua mi, lâirêltu zahkâi tak, Pathian Ram lungum bâk mi, a hawng le, râlṭha tak hen Pilat sinah a lût le, Jisu ruak chu a deih rawh. ⁴⁴ Chun, Pilat nih chu hâwi hen Jisu a thih tuan chu thungâi chê a ti. Chun, kawrsen zâ hotu chu a kawh le, a thihnâk a sâwt rawh ma ti a deih. ⁴⁵ Chun, kawrsen zâ hotu kâ ah a theih rawh chun a ruak chu Josef sinah a pêk. ⁴⁶ Chun, anih nih chun puan mangṭhia a châwk le, amah chu a lâk le, puan mangṭhia hen chun a tuam le, thlân lung hawrh mi lakah a vûi le, thlân kawtkâ ah chun lungphêngpi rilh hen a khâr. ⁴⁷ Chun, Mari Magdala mi leh Josef nu Mari nih chun an vûinâk chu an muh.

¹ Chun, Dinhni chu a hawng lanh rawh chun, Mari Magdala mi, Jem nu Mari leh Salomi tla nih chun Jisu taksa chulh ding hen an va kal khonâk ding hen zeilo rimthâw an châwk. ² Chun, ni sarih ni masachem ah, zîngtê ah, nî suak nûnah thlân chu an va tleng. ³ Chun, Thlân kawtkâ ah mi lung chu âu nih me a kan rilh piak ving lai aw?" ⁴ anna ti liau chirah an va chuanh le, lung chu rilh chia hen an muh le, lung chu a lian thlo asi. ⁵ Chun, thlân lungah an lût le, tlangvâl pakhat puan vâr aih mi, vawrhlei kângah to an muh le; an lawksawng rawh. ⁶ Chun, anih nih chun, an sinah, ’Lawksawng lah u; Jisu Nazaret mi, an khenhbêk mi kha nan hâwl asi; a thawknawlh rawh; hinah a um lo rawh, zauhnik u, an vûinâk hi! ⁷ Sikhawmsele kal ule, a ṭhiruai tla leh Peter sinah chun, ’Galili ram ah nanmah lânah a kal awt; nan sinah a sim hâwitê khan chunah chun nan muh lai,’ ti hen, simh na u," a ti. ⁸ Chun, an thir le, chê an ti ruangah an suak le, thlân thawk hen chun an tek chiam le; an ṭih ruangah âu sinah khawm zeikhawm an sim lo. ⁹ [Nunau tla chu Peter leh a hâwi tla sinah an kal le, thâwngthang an sinah simh hen a um mi zawzawng chu a tâwikâng hen an simh na. ¹⁰ Chu nehnûnah, Jisu ngelchel nih suahlei thawk hen tlâklei ah a ṭhiruai tla chu zungzâl ruangsuahnâk thu thenhlimh leh nung chu phuang ding hen a fial na.] ¹¹ Sikhawmsele, annih nih chun, a nung nawlh le, muh khawm a muh ti an theih ko na hen an lung lo. ¹² Chun, chu mi nûnah chun an lakah mi panih ram lei fûk hen an kal liauah mêl dang put hen an sinah â langh. ¹³ Chun, annih nih chun ṭhiruai dang tla an va simh le, annih khawm chu an lung lêm lo. ¹⁴ Chun, chu nûn khawmah chun, buh an dûm liauah leikhat tla sinah tak â langh le, a thawknawlh nûnah a muhtu tla thu chu an lung lo ruangah leh an thinlung chang leikâng thu ah a fâi na rawh. ¹⁵ Chun, an sinah, "Laikulh zawzawng ah kal ule, thilsiam zawzawng sinah chun Thâwngthâng Ṭha hi sim u. ¹⁶ A lung hen baptis hen a um mi chu ruangsuak hen a um lai le, a lunglotu lam chu mawh hen a um lai. ¹⁷ Chun, hi bang singsiahnâk tla nih hin lungtu chu a zûl vima lai: Ka min hen khuri tla an nâr lai le, hawlh thar hen an hawlh lai le; ¹⁸ rûl tla kut hen an lâk lai le, thihnâk tûr zei tal din khawmsele zeikhawm a pawi lai lo. Damlo tla tlûnah an kut an thâng lai le, an dam vima lai," a ti. ¹⁹ Chuvachun, Lalpa Jisu chu an sinah thu a sim thluh rawh chun vân leiah lâk hen a um le, Pathian vawrhlei ah a to rawh. ²⁰ Chun, annih chu an suak le, ram kipah thu an sim rawh le, Lalpa nih anmah tla a ṭuanpi na le; a zûltu singsiahnâk tla hen thu chu a birhtir vima.]