MATHAI

MATHAI

¹ Abraham thlâk, David thlâk, Jisu Krist thlâktu tla anna thlâk zia thâwngthâng chu: ² Abraham fa chu Isak asi, Isak fa chu Jakob, Jakob fa chu Juda leh a unau tla, Juda nih Tamar hen Perez Hezron, Hezron fa chu Ram, Ram fa chu Aminadab, Aminadab fa chu Nason, Nason fa chu Salmon, Salmon nih Rahab hen Boaz an ring, Boaz nih Ruth hen Obed an ring, Obed fa chu Jese, Jese fa chu lalchem David. ⁶ David nih Uria nupi hen Solomon an ring le, Solomon fa chu Rehoboam, Rehoboam fa chu Abizah, Abizah fa chu Asa, Asa fa chu Jehosaphat, Jehosaphat fa chu Jehoram, Jehoram fa chu Uziah, Uziah fa chu Jotham, Jotham fa chu Ahaz, Ahaz fa chu Hezekiah, Hezekiah fa chu Manaseh, Manaseh fa chu Amon, Amon fa chu Josiah, Babulon leiah sal ah an kalpi na liau khan Josiah fa chu Jehoiakin leh a unau tla. ¹² Chun, Babulon leiah sal ah an kalpi na nûnah Jehoiakin fa chu Sialtiel, Sialtiel fa chu Zerubabel, Zerubabel fa chu Abiud, Abiud fa chu Eliakim, Eliakim fa chu Azor, Azor fa chu Zadok, Zadok fa chu Akim, Akim fa chu Eliud, Eliud fa chu Eleazar, Eleazar fa chu Mathan, Mathan fa chu Jakob, Jakob fa chu Josef, Mari pasal chu chu Mari lakah chun Jisu, Mesia an ti mi hi a hawng suak rawh. ¹⁷ Chuvachun, san zawzawng chu Abraham thawk hen David tiang hen san leili asi; David thawk hen Babulon leiah sal ah an kalpi na tiang hen san leili asi le, Babulon leiah sal ah an kalpi na mi thawk hen Mesia tiang hen san leili asi. ¹⁸ Chun, Jisu, Mesia a hawng suak zia chu hi hâwi asi: A nu Mari chu Josef hen anna halh liauah, anna tawng lânah, Thlarau Thenhlimh nih a râitir ti a hawng theih rawh. ¹⁹ Chun, a pasal Josef chu mi rep tak asi le, tlâng zanhtir a duh lo le, a thup hen bângtâk a tum. ²⁰ Sikhawmsele, chubang thu chu a dawn liauah, ngâinik, a mang ah Lalpa vânmifial a sinah â langh le, "Josef, nang David fapa, na nupi Mari chu umpi ding ṭih lah; a nau pâwi chu Thlarau Thenhlimh lakah mi asi. ²¹ Fapa a ring lai le, a min ah Jisu na sak lai; anih nih chun a mi tla an thilsual ti lakah mi ruang a suah na awt ruangah," a ti. ²² Chun, Lalpa nih khuavâng kâ ah, "Ngâinik, nungâk thenhlimh chu a râi lai le, fapa a ring lai le, a min ah Immanuel an sak lai," ti hen a sim mi kha a hawng tlung khonâk ding hen, chubang chu a hawng um asi. (Immanuel chu, "Kan sinah Pathian a um," tinâk asi.) ²⁴ Chun, Josef chu a it mi a thawk le, Lalpa vânmifial nih a sinah thu a pêk hâwi hen chun a ti le, a nupi chu a umpi rawh. ²⁵ Sikhawmsele, fapa a ring lân lo chu anna tawng lo. Chun Josef nih a min ah Jisu a sak rawh.

¹ Chun, lalchem Herod a lal liauah Judai ram ah Bethlehem ah Jisu a hawng suak liauah, ngâinik, khawsak lei thawk hen mifing tla Jerusalem khua ah an hawng kal le, "Kha zeiah Juda tla lalchem a hawng suak mi chu? ² Khawsak leiah a ârfi kan muh le, amah mâimûk ding hen kan hawng kal asi," an ti. ³ Chun, lalchem Herod nih chun chu chu a theih kâ hen a lawksawng rawh. Jerusalem mi zawzawng khawm an lawksawng bâk. ⁴ Chun, bâwlpu lal tla leh Dân sîntirtu tla zawzawng chu a pumh na le, Mesia suaknâk ding chu a deih na. ⁵ Chun, annih nih chun a sinah, "Judai ram ah, Bethlehem ah, hi hâwi hen khuavâng nih a rîn mi kha, ⁶ ’Nang, Bethlehem, Juda ram ah mi, Juda khuapi lakah na mêchem rîlmâl lo! Na sung thawk hen lâirêltu a hawng suak awt ruangah, ka mi Israel tla vêngtu ding chu, ti hi,’ " an ti. ⁷ Chu nûnah chun Herod nih a thup hen mifing tla chu a kawh na le, fiang tak hen ârfi langh liau chu a deih na. ⁸ Chun, annih chu Bethlehem ah a kaltir na le, "Kal ule, nautê thu chu fiang tak hen deih u; chun kei khawm nih amah chu mâi ka hawng mûk khonâk ding hen nan muh kâ hen hawng ka simh u," a ti. ⁹ Chun, lalchem thu chu an theih le, an kal rawh; chun, ngâinik, khawsak leiah ârfi an muh mi kha nautê umnâk tlûn zâwn ah tlung hen a dîr lân lo chu an mâi leiah a kal vima. Chun, ârfi chu an muh rawh chun thungâi anna lâwm. ¹¹ Chun, in sungah an va lût le, a nu Mari sinah nautê chu an muh le, an bawk le, mâi an mûk; chun, an robâwm tla an awng le, a sinah chun lâwmman ngûn tla, bawraw tla leh murrah tla an pêk. ¹² Chun, Herod sinah kîr nawlh lo ding hen an mang ah Pathian simh hen an um ruangah anmah khua leiah lam dang hen an tlung rawh. ¹³ Chun, an tlung nûnah, ngâinik, Lalpa vânmifial chu Josef sinah a mang leiah â langh le, "Thawk le, nautê leh a nu put na le, Aigupta ram ah tek rawh, ka nan simh nawlh lân lo chu chunah chun um kumza; Herod nih nautê veih ding hen a hâwl awt asi," a ti. ¹⁴ Chun, Josef chu a thawk le, mûi leh zân ah nautê leh a nu chu a put na le, Aigupta ram ah a kal; ¹⁵ chun, Herod thih lânlo chu chunah chun a um kumza; Lalpa khuavâng kâ ah, "Ka fapa chu Aigupta ram ah mi ka kawh," ti hen a sim mi kha a hawng tlung khonâk ding hen. ¹⁶ Chu liau chun Herod nih mifing tla nih an perpet asi ti a theih kâ hen a thinthawk, mi a fial le, a tik fiang tak hen mifing tla a deih na hâwi khan, Bethlehem leh a kiangkam zawzawng ah mipa ngâksia kum nih rî hen a tanglei mi chu an ektê hen a thah hep na. ¹⁷ Chun, khuavâng Jeremia nih, ¹⁸ "Ram khua ah hâu an theih, ṭap tla, mithi ngâi hen rûm leh âi tla, Rakel nih chun a fa tla a ṭapnawh na le, an umlo rawh ruangah lungngamh kho asi lo," ti hen a sim mi kha a dik asi. ¹⁹ Sikhawmsele, Herod chu a thi nûnah, ngâinik, Lalpa vânmifial Aigupta ram ah chun Josef sinah a mang ah â langh le, ²⁰ "Thawk le, nautê leh a nu put na le, Israel ram ah kal rawh; nautê thah tumtu tla kha an thi rawh," a ti. ²¹ Chun, a thawk le, nautê leh a nu chu a put na le, Israel ram ah a lût rawh. ²² Sikhawmsele, Arkelaus a pa Herod ruangrûl ah Judai ram ah a lal ti a theih rawh chun chunah va kal a ṭih; chun a mang leiah simh hen a um ruangah Galili leiah a kal ving le, khua pakhat Nazaret an ti mi ah chun a va um rawh. ²³ "Anih chu ’Nazaret mi’ an ti lai," ti hen khuavâng tla kâ ah a sim mi kha a hawng tlung khonâk ding hen.

¹ Chun chu liau chu Baptistu Johan nih chun, ² "Rim u, Vân Ram chu a nâi rawh," ti hen, Judai ramkaro ah thusim hen a hawng kal. ³ Amah chu asi khuavâng Isai nih, "Ramkaro ah mi âu hâu nih chun, ’Lalpa lampi sial ule, a lam tla dingtir u!’ " ti hen, a sim mi kha. ⁴ Chun, Johan nih chun sangâwngsâu mul puan â aih le, a tâi chu savun tâisâwm hen â sâwm le, a buh chu khâubawk leh ram khuaitizû asi. ⁵ Chu liau chun Jerusalem mi tla, Judai ram ah mi zawzawng tla leh Jordan Va dung kiangkam mi tla an suak le, amah sinah an kal le, ⁶ an sual tla thutluang vâwr hen Jordan Va ah chun amah sinah baptis an si rawh. ⁷ Sikhawmsele, Farisai tla leh Sadukai tla tamtak baptis ding hen an hawng kal mi a muh kâ hen an sinah, "Rûl thlâk tla, thinrunhnâk hawng tlung ding mi hi tektâk ding hen âu nih an simh na? ⁸ Nan rim rawh ti zauhtir ding hen thilti hen langhtir u. ⁹ ’Abraham hawng kan thlâktu asi lo mazei?’ ti hen a sung-û tir lah u; Pathian nih hi bang lung tla hi Abraham thlâk tla ah a changtir kho, ka nan ti na hi. ¹⁰ Tu thawk hen reitlung thing phûr kipah an siah rawh; chuvachun, thing kip rah ṭha hen rah lo mi vial an hâu le, mei ah an paih tâwn. ¹¹ Kei lam nih chun nan rimnâk ding hen tî hen ka nan baptis na; sikhawmsele, ka dunglei ah a hawng kal ding mi chu keimah ngâk hen a rokual dauh le, a pheikawk put tlâk khawm ka si lo, anih nih chun Thlarau Thenhlimh leh mei hen a nan baptis na lai. ¹² A kut hen a zâpnâk a put lai le, a chîlnâk mun ah a zâp phin lai le, a siahnâk ah fâng a râwn lai, a hî lam chu mei mit kholo hen a duah hep lai. ¹³ Chu liau chun a sinah baptis ding hen Jisu Galili ram thawk hen Jordan Va ah Johan sinah a hawng kal. ¹⁴ Johan lam nih chun, "Na hawng ka baptis ka herh dauh mi, ka sinah na hawng dauh mu?" ti hen khap a tum. ¹⁵ Sikhawmsele, Jisu nih a sinah, "Tuah rem ti râm rawh, hi hâwi hen Pathian nih a herh a ti mi vial ti hi kan rangah a ṭha asi," ti hen a sâng. Chun, Johan nih rem a ti. ¹⁶ Chun, Jisu baptis asi ka hen ti a mi a suak sawm le, chun, ngâinik, a rangah vân â awng le, Pathian Thlarau chu vaṭhu hâwi hen a hawng ṭum hen, a tlûnah a fû mi a muh. ¹⁷ Chun, ngâinik, vân thawk hen aw-hâu nih, "Hi hi ka Fapa duhtak, thungâi ka lawmh mi chu asi," a ti.

¹ Churawhchun Jisu chu Diabol nih lêm ding hen ramkaro ah Thlarau Thenhlimh nih put hen a um rawh. ² Chun, ni sâwmli leh zân sâwmli buh a ngei nûnah a sungvâng rawh. ³ Chun, Diabol chu a hawng kal le, "Pathian Fapa na si chun hi bang lung hi sang ah chang ding hen thu pêk rawh," a ti. ⁴ Sikhawmsele, anih nih chun, "Minung hi sang cho hen an nung lai lo le, Pathian kâ thu kip suak hen an nung dauh lai, ti rîn asi," ti hen a sâng. ⁵ Churawhchun Diabol nih Khua Thenhlimh ah chun a lûtpi le, Pathian Biakin tlûn sîp zum ah a siah le, ⁶ chun a sinah, "Pathian Fapa na si chun a khâwk rawh; ’Nang lakah chun a vânmifial tla thu a pêk lai le, an kut hen an nan dawmh lai le, chu hâwi asi lo chun na kê hen lung na suih lebang lai, ti Pathian lasui thu nih a sim ruangah," a ti. ⁷ Jisu nih a sinah, "Lalpa na Pathian niksak dêl lah, ti rîn asi" a ti. ⁸ Chun, Diabol nih chun tlâng sâng tak ah a kalpi nawlh le, laikulh ram zawzawng leh an rokualnâk a zauhtir. ⁹ Chun, a sinah, "Bawkbukhup hen hawng ka sawnh le, hi bang zawzawng hi ka nan pêk ver lai," a ti. ¹⁰ Chu ka hen Jisu nih a sinah, "Setan, kal ving!’Lalpa na Pathian sawnh le, amah rian cho ṭuan rawh, ti rîn asi," a ti. ¹¹ Churawhchun Diabol nih a kaltâk rawh. Chun, ngâinik, vânmifial tla nih a rian an ṭuan piak rawh. ¹² Chun, Johan an tleih ti Jisu nih a theih kâ hen Galili ram ah a kal ving le, ¹³ chun, Nazaret a kaltâk le, Kapernaum ah a va um le, chu chu Zebulun leh Naphtali bial ah rilî kap ah um mi asi. ¹⁴ Khuavâng Isai kâ ah, ¹⁵ "Rilî leiah, Jordan varâl ah, Zebulun ram leh Naphtali ram, Phundang tla Galili ram! ¹⁶ Mûi nâwng ah to tla nih chun chêu fâk tak an muh lai, Thihnâk mun leh a thlaliah ah um mi tla tlûnah chun, Chêu a hawng suak rawh,’ ti hen, a sim mi kha a hawng tlung khonâk ding hen. ¹⁷ Chu ri rawh chun Jisu nih chun, "Rim u, Vân Ram a nâi rawh," ti hen sim a dawmh rawh. ¹⁸ Chun, Galili Rilî kap ah a kal pah hen, unau panih, Simon, (Peter an ti mi chu) a unau Andri hen rilî ah chun lên vawrh hen a muh na; ngarâltu an si rerêng. ¹⁹ Chun, Jisu nih chun an sinah, "Hawng ka zûl u, chun minung tleihtu ah ka nan siam na lai," a ti. ²⁰ Chun, lên tla chu kaltâk hen an zûl sawm rawh. ²¹ Chun, chu thawk hen a kal vima le, unau dang panih Zebedai fapa Jem leh a unau Johan chu an pa Zebedai sinah lawng ah an lên tla remh hen a muh na, chun annih chu a kawh na rawh. ²² Chun, lawng leh an pa chu an kaltâk le, Jisu an zûl sawm rawh. ²³ Chun, Jisu nih anna pûmnâk in tla ah sîntir na hen Ram Thâwngthâng Ṭha chu sim hen, mi le tla lakah nganfâk kip leh chaklonâk kip damh hen Galili ram zawzawng a ṭawl. ²⁴ Chun, Siria ram zawzawng ah a thâwng a thang le, chun mi damlo zawzawng damlonâk leh nganfâknâk kip tuar tla, khuri vawnh tla, rualthlû tla, mi khêng tla a sinah an hawng put le, a damh ver na. ²⁵ Galili ram thawk hen, Dekapoli thawk hen, Jerusalem thawk hen, Judai ram thawk hen, Jordan râl thawk hen mi zapi cherkhet nih an zûl.

¹ Chun, Jisu nih mi zapi tla chu a muh na rawh chun tlâng ah a kâi le, a to le, a ṭhiruai tla a sinah an hawng kal le; ² chun thu a sim le, anmah tla a sîntir na: ³ "Thlarau leikângah thinlung hamh mi tla chu an thaw a suak; Vân Ram an tâ asi ruangah! ⁴ "Ngaihsia tla chu an thaw a suak, Pathian thlangamh hen an um awt ruangah! ⁵ "Â dawnh kho mi tla chu an thaw a suak, tual hi an luah awt ruangah! ⁶ "Repnâk ruangah sungvâng tîhâl tla chu an thaw a suak, an khim awt ruangah! ⁷ "Mi khuaruat kho tak tla chu an thaw a suak, Pathian khuaruatnâk anna ting awt ruangah! ⁸ "Thinlung ah thenhlimh tla chu an thaw a suak, Pathian an muh awt ruangah! ⁹ "Remnâk siamtu tla chu an thaw a suak, Pathian fa ah sak hen an um awt ruangah! ¹⁰ "Repnâk ruangah nehsawh tuar rawh tla chu an thaw a suak; Vân Ram an tâ asi ruangah! ¹¹ "Mi nih keimah ruangah an fâi na hen, an nehsawh na hen, âwkrâwl hen sual kip hen an phiar na tikah nan thaw a suak lai. ¹² Lâwm ule, lâwptlo hen um u; vân ah nan lâwmman a tam ruangah. Chu hâwi ber hen nanmah lânah khuavâng um tla khawm an nehsawh na tâwn. ¹³ "Minung zawzawng rangah chitê hâwi nan si. Sikhawmsele, chitê hi a dâwng rawh chun zei hen an al tir nawlh lai? Churawhchun lawnh hen, minung tla chîl salam ding lo chun zeirang khawmah a tlâk loh. ¹⁴ "Laikulh chêu nan si. Tlâng tlûnah khua um chu thuh kho asi loh. ¹⁵ Mi nih khâwnvâr kaih hen tâwng tangah an siah dah lo, a siahnâk mun ah an siah dauh tâwn; chun in sungah mi zawzawng a cherh tâwn. ¹⁶ Chu hâwi ber hen nan chêu chu mi mitmuh ah chêu seh, chuvachun nan thil ṭha ti tla an muh lai le, nan Pa vân ah mi an chawnglawmh kho lai." ¹⁷ "Mosi Dân thu mawh khuavâng tla sîntirnak thu mawh veih ding a hawng kal hen hawng ka ruat lah u; veih ding hen hawng kal ka si lo le, rangtling tir ding hen hawng kal ka si dauh. ¹⁸ Thungâi tak hen ka nan simh na, tual leh vân hi a vei lân lo chu Dân thu ah mi lasui ṭialtê mawh lasui ṭialtê khingkhuai mawh pakhat khawm a vei lai lo, a ektê hen a tlungkim lân lo chu. ¹⁹ Chuvachun, âuzawng hi bang thupêk mêchem lakah hin pakhat mawh buar hen, chu hâwi ti bâk ding hen mi le tla sîntirtu zawng chu Vân Ram ah mi mêchem an ti lai; khawmsele, âuzawng Dân zâwt hen, sîntir bâktu zawng chu Vân Ram ah chun mi lian an ti lai. ²⁰ Nanna repnâk nih Dân sîntirtu tla leh Farisai repnâk hi a khûp lânlo chu Vân Ram ah nan lût kho lai loh ti ka nan simh na." ²¹ "Tuan liau mi tla sinah chun, ’Mi na thah ding asi lo,’ an ti mi leh ’Âuzawng mi thahtu vial chu lâirêlnâk ah dîr ṭihnungkâi tak hen a um lai,’ an ti, ti nan theih rawh. ²² Kei lam nih chun, ’Âuzawng a unau tlûnah thinruntu vial chu lâirêlnâk ah dîr ṭihnungkâi tak hen a um lai le, âuzawng a unau sinah, ’Nang, mido-tla-lo,’ titu vial chu lâirêltu tla rêl piak ding ṭihnungkâi tak hen a um lai; chun, âuzawng ’Nang mi â’ titu vial chu Gehena mei ah lawnh ṭihnungkâi tak hen a um lai ti ka nan simh na. ²³ Chuvachun, mâichâm bul ah na thilpêk na ap liauah na unau nih na tlûnah lungsilonâk a nei ti na theih nawlh chun, ²⁴ chu mâichâm kiangah chun na thilpêk chu mâk thlap le, va kal le, na unau remh tâ rih le, chu nûnah chun na thilpêk chu hawng ap rawh. ²⁵ "Na leido chu lampi ah munkhat hen nan kal liauah remh sawm rawh, chu lo chun na leido nih chun lâirêltu an tleihtir lai le, lâirêltu nih chun kawrsen sinah a nan pêk lai le, rêngin ah a nan khumh sual lai. ²⁶ Thungâi tak hen ka nan simh, quadran tê men na lîm lân lo chu chunah mi chu na suak rîlmâl lai lo. ²⁷ " ’Ṭângdang na pawmtâk ding asi lo,’ an ti, ti nan theih rawh. ²⁸ Kei lam nih chun, âuzawng nunau duhnâk nei hen zauhtu vial chu a thinlung ah ṭângdang a pawmtâk ving rawh ti ka nan simh na. ²⁹ Chun, na mit vawrhlei nih a nan sualtir chun chawih zek le, lawnh ving! Na taksa a pum hen Gehena ah lawnh ngâk hen na taksa ṭeng pakhat vei chu na rangah a ṭha dauh asi. ³⁰ Chun, na kut vawrhlei nih a nan sualtir chun, tan le, lawnh ving! Na taksa a pum hen Gehena ah kal ngâk chun na taksa ṭeng pakhat vei chu na rangah a ṭha dauh asi. ³¹ "Âuzawng nupi mâktu zawng nih chun mâknâk lasui a sinah pêk seh, an ti. ³² Kei lam nih chun, âuzawng tlangvâl duh ruangah silo hen nupi mâktu vial nih chun amah chu ṭângdang a pawmtir asi; chun, âuzawng mi mâk chia umpitu chu ṭângdang a pawmtâk asi ti ka nan simh na. ³³ "Tuan liau mi tla sinah, Âwkrâwl hen siat tleih lah, Lalpa sinah na siat tleih chu lîm rawh,’ an ti, ti nan theih rawh. ³⁴ Kei lam nih chun ka nan simh na, siat rerêng tham lah u; vân min sim hen tham lah u, chu chu Pathian laltophah asi ruangah; tual min sim hen tham lah u, chu chu a kê thângnâk asi ruangah. ³⁵ Jerusalem sim hen khawm tham lah, chu chu Lalchem rokual tak khuapi asi ruangah. ³⁶ Na lû sim hen na tham ding asi lo, sam zâi pakhat khawm na ngotir hen na dum tir kholo. ³⁷ Nan thusim chu asi mi chu si seh,’ ’Silo mi chu silo ko seh,’ chu ngâk hen a lei mi chu Setan lakah suak asi. ³⁸ " ’Mit ruangrûl ah mit, hâ ruangrûl ah hâ,’ an ti, ti nan theih rawh. ³⁹ Kei lam nih chun ka nan simh na, misual do lah u; na vawrhlei biang ah a nan benghtu zawng chu khat leikâng khawm dawnh. ⁴⁰ Chun, âuzawng na lakah thunawk tuah hen na kawrdawh lâk a tum chun na puan khawm lâktir dâidua. ⁴¹ Chun, mêl khat kal ding hen an êngtu zawng sinah chun mêl nih kal rawh. ⁴² An deihtu sinah chun pêk le, na lakah pûk duhtu chu ngaihlo lêm thlâk lah. ⁴³ " ’Na zâwlbâwm tla dâwt le, na mêlma hua na, an ti, ti nan theih rawh. ⁴⁴ Kei lam nih chun ka nan simh na, nan mêlma tla dâwt na ule, an nehsawh natu chu thlacham piak u, ⁴⁵ nan Pa vân a mi fa tla nan si khonâk ding hen. Anih nih chun misual tla leh mi ṭha tla tlûnah chun a nî a suaktir tâwn le, mi rep tla leh mi replo tla tlûnah khawm ruah a sûrtir tâwn asi. ⁴⁶ An dâwt natu cho nan dâwt chun lâwmman zei me nan tawng lai? Siah khawlhtu tla khawm nih chu hâwi hen an ti bâk lo mazei? ⁴⁷ Chun, nan unau cho chibai nan bûk chun zei tipi me midang tla ngâk hen a lei nan ti? Phundang tla khawm nih chu hâwi hen an ti bâk asi lo mazei? ⁴⁸ Chuvachun, nan Pa vân a mi a ṭha rangtling hâwi hen nan ṭha rangtling ding asi.

¹ "Nan thil ṭha ti tla mi muh dingah, minûng mitmuh ah tilo ding hen a thiamthih u; chu lo chun nan Pa vân a mi sinah lâwmman nan nei lai loh. ² "Chuvachun, mi sinah zeilo na pêk chun, mi perpê tla nih mi sawr an lawh khonâk ding hen, pumhnâk in tla ah, zâwllâi tla ah an ti tâwn hâwi hen na mâika ah tâwtawrâwt tumtir lah. Thungâi tak hen ka nan simh na, an lâwmman chu an tawng thluh rawh. ³ Nang lam nih chun, mi sinah zeilo na pêk chun, na kut vawrhlei hen na ti mi chu na kut kehlei nih theih lah seh, ⁴ na zeilo pêk chu a thup hen a um khonâk ding hen; chuvachun, na Pa a thup hen muh tâwntu nih chun a nan rulh lai. ⁵ "Chun, thla nan cham chun mi perpê tla hâwi hen nan ti ding asi lo; mi nih an muh khonâk ding hen pumhnâk in tla ah, zâwllâi lamṭhuam tla ah dîr bû hen thlacham an sunhsak tâwn. Thungâi tak hen ka nan simh na, an lâwmman chu an tawng thluh rawh. ⁶ Nang lam nih chun thla na cham chun na in kardang sung ah lût le, na in khâr le, na Pa a thup hen um mi sinah thlacham rawh; chun, na Pa a thup hen muh tâwntu nih chun a nan rulh lai. ⁷ "Chun, thla nan cham chun Phundang tla hâwi hen nawlh salam lah u; an sim tam ruangah Pathian nih a ngâi piak na ding hen an ruat asi. ⁸ Chuvachun, anmah tla hâwi hen um lah u; amah nan deih lânah nan Pa nih chun zei me nan herh ti a theih ko ruangah. ⁹ Chuvachun, nannih nih chun hi hâwi hen thlacham u: ’Kan Pa vân ah mi, Na min zah hen um seh, ¹⁰ Na Ram hawng tlung seh, na duhzia vân ah an ti mi hâwi hen, tual ah mi nih ti seh. ¹¹ Tusûn hin kan ei khawp buh hawng kan pêk. ¹² Kan thilti palhnâk tla hawng kan ngaihdam, midang tla thil palhnâk tla kan ngaihdam na hâwi hen. ¹³ Sual ding hen lêmnâk ah hawng kan kaltir lah le, Misual thawk hen ruang hawng kan suah rawh,’ ti hen. ¹⁴ "Mi an buar mi tla nan ngaihdam chun nan Pa vân ah mi nih a nan ngaihdam na bâk lai. ¹⁵ Sikhawmsele, mi buarnâk tla nan ngaihdam lo chun, nan Pa nih nan buarnâk tla a nan ngaihdam na bâk lai lo. ¹⁶ "Buh nan ngei tik khawmah mi perpê tla hâwi hen zûr mêl put lah u; annih nih chun mi mitmuh ah buh an ngei mi an langh khonâk ding hen an mêl an zûrtir tâwn. Thungâi tak hen ka nan simh na, an lâwmman chu an tawng dih rawh. ¹⁷ Nang lam nih chun, buh na ngei tikah sariak a thuh le, na mâi a phiah le, ¹⁸ chuvachun na Pa a thup hen um mi mitmuh ah cho lo chun minung mitmuh ah buh ngei hen na lang lai lo; chun na Pa a thup hen muh tâwntu nih chun a nan rulh lai. ¹⁹ "Tual ah rûlchawn leh a êk nih a einâk ah, mifîr tla nih an phûl hen an fîrnâk ah nan ro tla khawng lah u. ²⁰ Vân ah rûlchawn leh a êk nih a ei lonâk ah mifîr tla nih an phûl hen an fîr lonâk ah chun nan ro tla khawng lehlam u. ²¹ Na ro umnâk kipah na thinlung khawm a um lai. ²² "Taksa khâwnvâr chu mit hi asi: chuvachun na mit a fîm chun na taksa a pum hen a chêu hep lai. ²³ Na mit â râwk lam chun na taksa pum hen a mûi hep lai. Chuvachun, na sungah chêu chu mûi si sele, mûi chu a fâk awt chiam e! ²⁴ "Âukhawm nih hotu panih rian an ṭuan kêp kho lo, pakhat hua hen pakhat a duh lai, asi lo leh, pakhat ṭanh hen pakhat a zauhnawmh lai. Pathian leh sum rian nan ṭuan kêp kho lai lo. ²⁵ "Churuangah, ka nan simh na, zei me ka ei lai le, zei me ka din lai aw?’ ti hen, ’Nan nungnâk thu leh zei me ka aih lai aw?’ ti hen nan taksa thu lungkham lah u. Ei ding ngâk hen nungnâk a sung-û dauh lo mazei? Nipuan ngâk hen taksa khawm a sung-û dauh lo mazei? ²⁶ Chungzuang vâ tla khi zauh u, kûi an tuh lo le, an ât lo, fângbâwk ah an râwn lo; sikhawmsele, nan Pa vân a mi nih chun a châwm asi. Nannih chu vâ tla ngâk hen nan sung-û dauh khun lo mazei? ²⁷ Chun, nan lakah âu nih lungkham ruangah mah dung dâwng khat a sângtir kho? ²⁸ "Chun, nipuan thu zeirangah nan lungkham? Mâng tuktîn pâr a ṭhang zia hi ṭha tak hen ruat u; rian an ṭuan lo, la an kher lo. ²⁹ Sikhawmsele, ka nan simh na, Solomon men a rokualnâk zawzawng hen â thuam khawmah hi bang tuktîn pâr pakhat tluk khawm hen thuamh hen a um lo. ³⁰ Chuvachun, mâng belh, tusûn ding a nung, a thâituan ah tappi ah tih nawlh salam ding men Pathian nih chu hâwi tluk a thuamh chun, nannih lung tâwm tla, nipuan a nan pêk tuktarâi na awt lo mazei? Nan lung tâwm chiam e! ³¹ Chuvachun, ’Zei me ka ei lai?’ mawh, ’Zei me ka din lai?’ mawh, ’Zei aih hen me ka um lai?’ mawh, ti lungkham lah u. ³² Phundang tla nih chubang zawzawng chu an hâwl tâwn asi. Chubang zawzawng chu nan herh ti nan Pa vân a mi nih a theih ko asi. ³³ Pathian Ram leh a repnâk chu hâwl masa dauh u, chuvachun chubang zawzawng chu a nan pêk sap na awt asi. ³⁴ Chuvachun, thâi rang ding lungkham lah u, thâi nih chun amah rang dingah a lungkham sawm awt ruangah. Ni khat rangah ni khat hamh chu â tâwk asi.

¹ "Simsâwi lah u, simsâwi hen nan umlonâk ding hen. ² Nan simsâwi na hâwi ber hen an simsâwi na lai; nan tahnâk tê hen an tah piak nawlh na lai. ³ Chun, zeirangah me mah mit ah mi kân um mi chu ruat lo hen na unau mit ah mi fungrêutê um mi chu na muh zia? ⁴ Asi lo leh, zeitin me na unau sinah, ’Na mit ah mi fungrêutê kha hawng ka thuaktir rawh,’ na ti kho lai, nangmah mit ngelchel ah kân um ko hen. ⁵ Mi perpê! Na mit ah mi kân kha lâk masa rawh; chuvachun, na unau mit ah mi fungrêutê thuak ding mi chu fiang tak hen na muh lai. ⁶ "Ui tla sinah thil thenhlimh chu pêk lah u; an hawng a her hen an seh na lebang lai; vawk mâika ah nan âitikep lung tla lawnh lah u, an chîl salam lai. ⁷ "Deih u, chun a nan pêk na lai; hâwl u, chun nan tawng lai; kik u, chun a nan awng piak na lai. ⁸ Âuzawng a deihtu nih chun an tawng tâwn le; âuzawng a hâwltu nih chun an tawng tâwn; âuzawng a kiktu chu an awng piak awt asi. ⁹ Asi chun, nan lakah âutal a fapa nih sangtlêp deih sele, âu nih lung pêk lai? ¹⁰ Asi lo leh, ngâ deih sele, âu nih rûl a pêk lai? ¹¹ Chuvachun, nannih misual men nih nan fa tla thil ṭha pêk ding dân nan theih chun, nan Pa vân ah mi nih chun a deihtu tla chu thil ṭha a pêk dauh khun lai lo mazei? ¹² "Chuvachun, thil zeizawng mi nih nan tlûnah ti sele, nan duh hâwi hen mi tlûn khawmah ti bâk u; chu chu Dân leh khuavâng tla thu asi rêng asi. ¹³ "Kawtkâ bî ah chun lût u; tlâunâk ah kalnâk kawtkâ chu a kâu le, a lampi khawm a kâu le, chu leiah lût mi chu tam khawm thungâi an tam. ¹⁴ Nungnâk ah kalnâk kawtkâ chu a bî le, a lam khawm a tawr le, a tawngtu tla khawm tâwmtê an si. ¹⁵ "Khuavâng telê lakah a thiamthih u; chu tla chu dawrâ vun aih hen nan sinah an hawng kal tâwn le, an sung leiah lam chun chingngia râwlṭâm an si ruangah. ¹⁶ Anmah tla chu an rah lakah nan theih ko lai. Zûn lingnei lakah grep rah an kawih dah tâwn mazei? Bualingnei lak khawmah theipi an kawih dah tâwn mazei? ¹⁷ Thing ṭha zawng a rah a ṭha tâwn le, thing sia lam chu a rah a ṭha lo. ¹⁸ Thing ṭha a rah a sia kho lo le, thing sia khawm a rah a ṭha kho lo. ¹⁹ Thing kip a rah a ṭha lo mi zawng chu an hâu le, mei ah an paih tâwn. ²⁰ Churuangah anmah chu an rah lakah nan theih ko lai. ²¹ " ’Lalpa, Lalpa, hawng ka titu namên Vân Ram ah an lût lai lo; ka Pa vân ah mi duhzia titu lam chu an lût lai.’ ²² Chu ni ah chun mi cherkhet nih, ’Lalpa, Lalpa na min hen thu tla kan sim hen, na min hen khuri tla kan nar le, na min hen thilchê tamtak kan ti tâwn lo mazei?’ an ti teh lai. ²³ Chu ni ah chun ’Nannih thilsual titu tla, ka nan theih na loh, ka sin thawk hen kal u,’ ti hen, annih chu ka simh na teh lai. ²⁴ "Chuvachun, mikip hi bang ka thu theih hen zâwttu zawng chu, mi fing lungpi tlûnah in saktu hen tahṭhimh ding asi. ²⁵ Ruah tla a hawng sûr le, tî tla a hawng lian le, thli tla a hawng râng le, chu in chu a khup khup hen a hawng nam le; sikhawmsele, a chim lo le; lungpi tlûnah sak thlir asi ruangah. ²⁶ "Chun, mikip hi bang ka thu theih hen zâwtlotu chu, mi â sep tlûnah in saktu hen tahṭhimh asi. ²⁷ Ruah a sûr le, tî a hawng lian le, thli a hawng râng le, chu in chu a khup khup hen a hawng nam le, a chim rawh; a râwk zia thungâi a fâk asi, a ti. ²⁸ Chun, hi hâwi hi asi le, Jisu nih chubang thu chu a sim thluh kâ hen, mi zapi tla nih a thu sîntir chu thungâi chê an ti le, ²⁹ Dân sîntirtu tla hâwi silo hen, thuneihnâk nei hâwi tak hen a sîntir na ruangah.

¹ Chun, tlâng ah mi a hawng ṭum nûnah mi zapi cherkhet nih amah an hawng zûl rawh. ² Chun, a sinah phâr a hawng kal le, "Lalpa, na duh chun na ka thenhlimhtir kho," ti hen, mâi a mûk. ³ Chun, Jisu nih a vuanh le, a tham le, "Ka duh, hawng thiang rawh," a ti. Chun, zeikarlo ah a phâr chu a hawng thenhlimh sawm rawh. ⁴ Chun, Jisu nih a sinah, "Âukhawm simh lo ding hen a thiamthih rawh; khawmsele chu bâwlpu sinah vâ a zauhtir le, Mosi nih thilpêk ding a ruat mi kha ap rawh, an theihfiangnâk ding hen," a ti. ⁵ Chun, Kapernaum ah a lût rawh chun a sinah Rom kawrsen zâ hotu a hawng kal le, ⁶ "Lalpa, ka to-aw a khêng le, in ah a rîl ko, thungâi a nganfâk a zual asi," ti hen, a ngiar chiam. ⁷ Chun anih nih chun, "Ka hawng kal lai le, ka damh lai," a ti. ⁸ Chun, kawrsen zâ hotu nih chun, "Lalpa, ka in sung na lûtnâk tlâk asi lo; thu cho sim le, ka to-aw a dam ko lai. ⁹ Kei khawm mi thu hen um ka si le, ka tangah kawrsen tla an um le, chu minung chu, ’Kal rawh,’ ka ti chun a kal tâwn, midang sinah khawm, ’Hawng,’ ka ti chun, a hawng tâwn. Ka to-aw sinah khawm, ’Hi hi ti rawh,’ ka ti chun, a ti tâwn," ti hen, a sâng. ¹⁰ Chun, Jisu nih chubang thu chu a theih chun thungâi chê a ti le, a zûltu tla sinah chun, "Thungâi tak hen ka nan simh na, Israel tla lak khawmah hi tluk rak hen lungnâk fâk hi ka muh lo. ¹¹ Ka nan simh na, sak leh thlang thawk hen mi tamtak an hawng kal lai le, Vân Ram ah chun Abraham tla, Isak tla, Jakob tla sinah an to lai. ¹² Ram fa tla lam chu lênglei mûi ah chun suah hen an um lai le, chun ah chun ṭap leh hachang rial chu a um lai," a ti. ¹³ Chun, Jisu nih kawrsen zâ hotu sinah chun, "Kal ko rawh, na lung hâwi hen na tlûnah hawng tlung seh," a ti. Chun, to-aw chu chu dâr tak ah chun a hawng dam rawh. ¹⁴ Chun, Jisu chu Peter in ah a lût le, a nupi nu chu damlo hen it mi a muh. ¹⁵ Chun, a kut a tham piak le, a damlo chu a reh rawh; chun a thawk le, an eibâr a timhtuah piak na rawh. ¹⁶ Chun zânleibâi ah chun a sinah khuri vuanh tla tamtak an hawng put le; chun thu hen khuri tla a nar le, damlo zawzawng tla chu a damh na le: ¹⁷ Khuavâng Isai nih, "Amah ngelchel nih kan chaklonâk tla a lâk le, kan nganfâk tla a phurh," ti hen a sim mi chu a hawng tlung khonâk ding hen. ¹⁸ Chun, Jisu nih mi zapi cherkhet a kiangkam ah mi a muh rawh chun khatlei varâl ah kal ding hen thu a pêk. ¹⁹ Chun, Dân sîntirtu pakhat a hawng kal le, a sinah, "Sîntirtu, na kalnâk kipah ka nan zûl lai," a ti. ²⁰ Chun, Jisu nih a sinah, "Kâwlui tla nih kua an nei le, tlûn zuang vâ tla nih bû an nei le, Minung Fapa lam nih chun a lû ngauhnâk a nei lo," a ti. ²¹ Chun, a ṭhiruai tla lakah midang nih a sinah, "Lalpa, ka pa hawng ka vûitir tâ rih," a ti. ²² Sikhawmsele, anih nih chun a sinah, "Hawng ka zûl rawh; mithi nih anmah mithi chu vûi seh," a ti. ²³ Chun, lawng ah â chuan le, a ṭhiruai tla nih an zûl. ²⁴ Chun, lâkkhatko ah rilî ah chun thlipi fâk tak a hawng râng le, chuvachun titlingtlawk nih lawng chu a khup khup hen a hawng vurh le; Jisu lam chu a it thlit. ²⁵ Chun, a sinah an hawng le, an thawh le, "Lalpa, hawng kan hum rawh, kan vei awt hi!" an ti. ²⁶ Chun, Jisu nih chun an sinah, "Lung tâwm tla, zeirangah nan ṭih?" a ti. Churawhchun a thawk le, thli leh rilî chu a fâi le; chun a hawng reh dup ko. ²⁷ Chun, mikip nih thungâi chê an ti le, "Hi minung hi zei minung me asi; thli leh rilî tiangmâng khawm nih a thu an ngâi!" an ti. ²⁸ Chun, varâl lei Gadarin mi tla ram chu a va tlung rawh chun, khuri vuanh panih thlân khur thawk hen suak mi nih an hawng tawng le; ṭihnung an kâi thlo le, chuvachun chu lampi ah chun âukhawm an kal ngam lo. ²⁹ Chun, annih nih chun, "Pathian Fapa, kannih leh nang zei kanna tlâinâk um? Tik tiamh tling lânah hawng kan rêp ding hen na hawng mi masi?" ti hen an âu. ³⁰ Chun, an umnâk thawk hen lât ual ah vawk rual tamtak an tlawng. ³¹ Chun, khuri tla nih chun, "Na kan nar chun vawk rual paw sungah khin hawng kan kaltir," ti hen, a sinah an ngiar. ³² Chun, Jisu nih chun an sinah, "Kal ko u me," a ti. Chun, an suak le, vawk paw sungah chun an va lût; chun, vawk rual zawzawng chu kham ah anna khâwk chiam le, rilî ah chun an lût le, tî lakah chun an vei rawh. ³³ Chun, a vulhtu tla chu an tek le, khua ah chun an kal le, zeizawng an sim rawh, khuri vuanh tla tlûnah thil hawng tlung mi tla khawm chu. ³⁴ Chun, khuatê hen Jisu dawng ding hen an hawng suak le; chun Jisu an muh kâ hen an ram thawk hen suak ding hen an ngiar chiam.

¹ Chun, Jisu chu lawng ah â chuan le, rilî chu a kanh le, a umnâk khua chu a tlung. ² Chun, mi khêng pakhat ihkhun ah it bû hen a sinah an hawng zawnh. Chun, Jisu nih an lung zia a muh hen mi khêng sinah chun, "Ka fa, lungngam tak hen um rawh; na sual tla ngaihdam asi rawh," a ti. ³ Chun, Dân sîntirtu tla zeimaw mi tla nih chun an thinlung hen, "Hi minung nih hin Pathian a simsiat asi hi," an ti. ⁴ Chun, Jisu nih an dawn mi tla chu a theih le, "Zeirangah me nan thinlung ah sual hen nan ruat? ⁵ ’Na sual tla ngaihdam asi rawh,’ ti leh, ’Thawk le, kê hen kal rawh,’ ti hi a zei mi a sim awl dauh? ⁶ Zeikhawm si sele, laikulh ah Minung Fapa nih hin sual ngaihdam khonâk a nei ti nan theih khonâk ding hen," a ti le, mi khêng sinah chun, "Thawk le, na tangphah lâk le, na in ah kal rawh," a ti. ⁷ Chun, a thawk le, a in ah a lâwi rawh. ⁸ Chun, mi zapi tla nih chun chu chu an muh rawh chun an ṭih le, minung tla sinah chu hâwi thuneihnâk pêktu Pathian chu an sawr rawh. ⁹ Chun, Jisu chu chu thawk hen chun a kal vima le, siah châwinâk mun ah a to mi, minung pakhat a min, Mathai a muh; chun, a sinah, "Hawng ka zûl rawh," a ti. Chun, a thawk le, a zûl rawh. ¹⁰ Chun, hi hâwi hi asi le, in ah chun buh an ei liauah siah khawlhtu tla leh misual tla tamtak an hawng kal le, Jisu leh a ṭhiruai tla chu an eipi na. ¹¹ Chun, Farisai tla nih chu chu an muh rawh chun a ṭhiruai tla sinah, "Zeirangah me nan sîntirtu nih siah khawlhtu tla leh misual tla sinah a ei le?" an ti. ¹² Sikhawmsele, Jisu nih chu chu a theih kâ hen, "Mi chak tla nih chun daktawr an herh lo le, mi damlo tla lam nih chun an herh asi. ¹³ Chuvachun, ’Bâwlnâk duhlo hen khuaruatnâk ka duh,’ ti hi a umzia va a sîn u; mirep tak tla lam ding hen hawng kal ka si lo le, misual tla lam ding hen hawng ka si dauh," a ti. ¹⁴ Chu liau chun Johan ṭhiruai tla chu Jisu sinah an hawng kal le, "Zeirangah me kannih leh Farisai tla nih hin buh kan ngei lemang tâwn, na ṭhiruai tla lehlam nih an ngei lo,"an ti. ¹⁵ Chun, Jisu nih an sinah, "Mo lawmhtu tla sinah a pasal ding mi a um kar vial chu mo lawmhtu tla nih chun an ulh kho mazei? Sikhawmsele, a pasal ding mi chu an sinah mi kalpi ving ni tla a tlung teh lai, chu tikah lam chun buh an ngei teh lai. ¹⁶ "Chun, âukhawm puan li, tî ṭum suk dahlo mi puan thar tliar hen an belh dah lo; a belhnâk nih chun puan chu a thlêk lehlam lai le, a tlêk khun awt ruangah. ¹⁷ Âukhawm nih uain thar sâvun uain dûr li tla ah an râwn dah lo; an râwn chun savun dûr tla chu a kek lai le, uain chu a tlê lai le, savun dûr tla khawm chu a râwk lai; uain thar chu savun uain dûr thar tla ah an râwn dauh tâwn asi, chun ṭha tak hen a um vevê tâwn," a ti. ¹⁸ Chubang thu chu an sinah a sim liau takah hotu pakhat a hawng le, mâi a mûk, "Ka fanu tuhin a thi le, sikhawmsele, hawng kal le, a tlûnah na kut ngauh le, a nung nawlh ko lai," a ti. ¹⁹ Chun, Jisu a thawk le, a zûl rawh; ṭhiruai tla khawm nih an zûl bâk. ²⁰ Chun, nunau pakhat, kum leinih thî suak hen a damlo mi, a dung leiah a hawng kal le, a puan sâr a tham. ²¹ "A puan sâr cho khawm tawngh sele damh hen ka um ko lai," ti thinlung a nei. ²² Chun, Jisu â her le, amah chu a muh, "Ka fanu, lungngam tak hen um rawh, na lungnâk hi na dampi asi," a ti. Chun, nunau chu, chu dârkar thawk chun a dam rawh. ²³ Chun, Jisu chu hotu in ah a lût le, theikhang tumtu tla leh mi zapi tlawk chur mi tla a va muh rawh chun, "Suak u, ngâksia chu a thi lo, a it mi asi dauh," a ti. ²⁴ Chun, annih nih chun Jisu chu an nihsanh. ²⁵ Sikhawmsele, mi zapi tla chu a nar na nûnah chun a lût le, a kut ah a tleih le, nunau ngâksia chu a thawk rawh. ²⁶ Chun, chu thawk hen chun a thâwngthâng chu ram zawzawng ah chun a hawng thang khap rawh. ²⁷ Chun, Jisu chu chu thawk hen chun a kal vima le, mitchâw panih nih, "David Fapa, kan tlûnah khuaruat rawh," ti hen, âu hen an zûl. ²⁸ Chun, in ah a lût rawh chun mitchâw tla chu a sinah an hawng kal le; chun Jisu nih an sinah, "Hi hi ti kho ding hen nan ka zumh ma?" a ti. Annih nih chun a sinah, "Zumh ta a, Lalpa," an ti. ²⁹ Chun, anih nih chun an mit a tham le, "Nan ka zumh hâwi hen nan tlûnah tlung seh," a ti. ³⁰ Chun, an mit chu a hawng dei rawh. Chun, Jisu nih an sinah, "Âukhawm theihlo ding hen a thiamthih u," a ti thlir. ³¹ Sikhawmsele, annih chu an suak le, chu ram zawzawng ah chun a thâwngthâng an thangtir rawh. ³² Chun, an suak liau chirah, ngâinik, hawlh kholo mi khuri vuanh pakhat a sinah an hawng put. ³³ Chun, khuri chu a nar kâ hen hawlh kholo mi chu a hawlh rawh. Chun, mi zapi tla nih chun thungâi chê an ti le, "Israel tla lakah hi hâwi hi kan muh dah lo," an ti. ³⁴ Farisai tla nih chun, "Khuri lal asi ruangah khuri tla a nar tâwn mi hi," an ti. ³⁵ Chun, Jisu nih anna pûmnâk in tla ah sîntir na hen, Ram Thâwngthâng ṭha chu sim hen, damlo kip leh nganfâk kip tla damh hen, khua lian leh khuatê tla zawzawng a ṭawl. ³⁶ Chuvachun, mi zapi tla chu a muh le, vêngtu neilo dawrâ tla hâwi hen hamh leh rek phun hen an um ruangah thungâi a siherh na. ³⁷ Chun, a ṭhiruai tla sinah chun, "Fângzûn ding thungâi a tam le, sikhawmsele a ṭuantu tla an tâwm. ³⁸ Chuvachun, fângzûn ding hen ṭuantu ding tla fial ding hen fâng dâwngpu sinah chun ngiar u," a ti.

¹ Chun, a ṭhiruai leinih tla chu a kawh na le, khuri nâwmtâm tla nar kho ding hen leh damlo kip leh nganfâk kip damh khonâk ding hen thuneihnâk a pêk na. ² Chun, ṭhiruai leinih tla min chu hi bang hi an si: A masachem ah chun, Peter an ti mi Simon leh a unau Andri; Zebedai fapa Jem leh a unau Johan; ³ Philip leh Bartholomai, Thom leh siah khawlhtu Mathai, Alphai fapa Jem leh Thadai, ⁴ Kana mi Simon leh a tleihtirtu Juda Iskariot tla hi. ⁵ Chubang leinih tla chu Jisu nih a fial na le, an sinah hi hâwi hen thu a pêk: "Phundang tla lampi ah kal lah ule, Samari khua rerêng ah khawm lût lah u; ⁶ Sikhawmsele, Israel phun dawrâ tlâu tla sinah chun kal dauh u. ⁷ Chun, nan kal liauah, "Vân Ram chu a hawng nâi rawh," ti hen, sim vima u. ⁸ Damlo tla damh ule, mithi tla thawh ule, phâr tla thenhlimhtir ule, khuri tla nar u; a thawt hen nan tawng le, a thawt hen pêk u. ⁹ Nan tâisâwm tla lakah ngûn tangka mawh, tangka mawh, dâr tangka mawh put lah u; ¹⁰ khualtlâwngnâk dingah zâl mawh, kawrdawh mawh pheikawk mawh, ṭhianṭhunh mawh put lah u; rianṭuantu chu a ei ding tawng tlâk asi ruangah. ¹¹ "Chun, khua lian ah mawh khuatê ah mawh nan lûtnâk kipah an tlungtir na ding hen a tlâk ding mi hâwl ule, nan suak nawlh lân lo chu chunah chun tlung kumza u. ¹² Chun, in ah chun nan lût awt bâiah chibai bûk na u. ¹³ Chun, in ah mi tla chu chibai bûk tlâk an si chun nan lungngamnâk thu chu an tlûnah tlung seh; an tlâk lo lam chun nan lungngamnâk thu chu nan tlûnah hawng kîr nawlh seh. ¹⁴ Chun, âuzawng an lawmh na lo hen, nan thu khawm ngâilotu zawng, chu in thawk hen mawh, chu khua thawk hen mawh nan suak tikah chun nan kezaphah lakah mi valeidip khâwng u. ¹⁵ Thungâi tak hen ka nan simh na, lâirêl ni ah chun chu khua tla tuar ngâk chun Sodom leh Gomorah ram tuar ding chu a ziachâng a um dauh lai. ¹⁶ "Ngâinik u, chingngia nâwngah dawrâ um hâwi hen ka nan fial na hi: chuvachun, rûl hâwi hen fing hen, vaṭhu hâwi hen pawi khawih lo hen um u. ¹⁷ Sikhawmsele, minung lakah chun a thiamthih u; lâirêltu tla a nan tleihtir na lai le, pumhnâk in tla ah an vuak na lai le; ¹⁸ asi, keimah ruangah governor tla leh lalchem tla mâikaah anmah leh phundang theihnâk ding hen an put na lai. ¹⁹ Sikhawmsele, an tleihtir na tikah chun, "Zeitin me, zei thu me ka sim lai?" ti hen lawksawng lah u; nan sim ding mi chu a tik takah chun a nan theihtir na awt ruangah. ²⁰ A simtu chu nanmah nan si awt lo le, nan Pa Thlarau nih nanmah lakah a sim dauh awt asi. ²¹ "Chun, thah ding hen unaupa leh unaupa anna tleihtir lai le, pa khawm nih a fa a tleihtir ber lai; fa tla khawm nih an nu leh pa tla an do lai le, an thahtir na lai. ²² Keimah min ruangah mi zawzawng huat nan si lai; sikhawmsele, a dawngh tiang hen tuar huamtu zawng chu, chu tak chu ruangsuah hen a um lai. ²³ Chuvachun, khua khat ah an nehsawh na tikah khua dangah tektâk u; thungâi tak hen ka nan simh na, Minung Fapa a hawng kal lânah Israel khua tla chu nan ṭawl thluh lai lo. ²⁴ "Sîntu a sîntirtu tlûnah a um lo; to-aw khawm a pu tlûnah a um lo. ²⁵ Sîntu chu a sîntirtu hâwi hen a hawng um mi leh to-aw chu a pu hâwi hen a hawng um mi chu â tâwk. In dâwngpu hen ’Belzebul’ an ti chun, a dâwngsung tla chu an ti ding rêng asi! ²⁶ "Chuvachun, annih tla chu ṭih lah u; langlo ding hen thuh zeikawm a um lo, theihlo ding hen pheh zeikhawm a um lo. ²⁷ Mûi lakah ka nan simh na mi hi chêu ah sim u; nâ ah nan theih mi hi in tlûnah a chuan hen âu u. ²⁸ Chun, taksa thah kho hen thlarau thah kholotu tla chu ṭih lah u; Gehena ah thlarau leh taksa veih khotu lam chu ṭih lehlam u. ²⁹ Phâisenphittê panih assarion khat hen an zuar tâwn lo mazei? Sikhawmsele, an lakah pakhat khawm nan Pa thu lo hen tual ah a tlâ lai lo. ³⁰ Nan samzâitê tiang khawm rêl hep asi. ³¹ Churuangah ṭih lah u; Phâisenphittê tamtak ngâk hen nan sung-û dauh asi. ³² "Chuvachun, mi le tla mâika ah hawng ka ṭanhtu zawng ka Pa vân ah mi mâika ah ka ṭanh bâk lai. ³³ Sikhawmsele, âuzawng mi le tla mâika ah an hawng ka phehtu zawng ka Pa vân ah mi mâika ah ka pheh bâk lai. ³⁴ "Laikulh ah hin rem lêngtir ding hen hawng kal hen hawng ka ruat lah u. Rem lêngtir ding hen hawng kal ka si lo le, nâmsâu lêngtir ding hen hawng kal ka si dauh. ³⁵ Mi a pa dotir ding hen, fanu a nu dotir ding hen, mo a ni dotir ding hen hawng kal ka si. ³⁶ Mi a mêlma tla chu amah dâwngsungkhur lakah mi ngelchel an si lai. ³⁷ "Âuzawng a nu mawh a pa mawh keimah ngâk hen dâwt dauhtu chu ka mi si tlâk asi lo. Âuzawng a fanu mawh a fapa mawh keimah ngâk hen dâwt dauhtu khawm chu ka mi si tlâk asi lo. ³⁸ Âuzawng a kraws put hen hawng ka zûl lo mi chu ka mi si tlâk asi lo. ³⁹ Âuzawng a nungnâk tawngtu nih chun a dawk lai le; keimah ruangah a nungnâk dawktu nih chun a tawng lai. ⁴⁰ "Âuzawng an lawmh natu chu keimah lawmhtu an si le, âuzawng hawng ka lawmhtu chu hawng ka fialtu lawmhtu asi. ⁴¹ Âuzawng khuavâng chu khuavâng asi ruangah lawmhtu nih chun khuavâng lawmh man a tawng lai le, âuzawng mi rep chu mi rep asi ruangah lawmhtu nih chun mi rep lawmh man a tawng lai. ⁴² Chun, âuzawng hi bang hawng ka zûltu tla lakah a mêchem mi pakhat sinah hin, ka ṭhiruai asi ruangah, tî dâi hâi khat cho khawm pêktu zawng chu, thungâi tak hen ka nan simh na, an lâwmman chu an dawk rîlmâl lai lo," a ti.

¹ Chun, hi hâwi hi asi le, Jisu nih a ṭhiruai leinih tla chu thu a pêk thluh kâ hen chu thawk chun khua nâi tla ah sîntir leh thusim hen a kal rawh. ² Chun, Baptistu Johan nih Krist thilti tla chu rêngin ah a theih rawh chun ṭhiruai zeimaw mi a sinah a fial. ³ "Hawng kal ding mi ma na si, midang kan ngâk lai rih ma?" ti hen, a ṭhiruai tla nih Jisu rangah an deih. ⁴ Chun, Jisu nih an sinah, "Kal nawlh ule, thil nan muh mi leh nan theih mi hi Johan sinah va simh u: ⁵ mitchâw tla an mit a dei rawh, kekhêng tla kê hen an kal rawh, phâr tla an thiang rawh, nasêt tla khawm an nâ a fîm rawh, mithi tla khawm thawh hen an um rawh, mipâm tla sinah Thâwngthâng Ṭha sim asi rawh. ⁶ Âuzawng ka tlûnah zumhmaihnâk neilotu chu an thaw a suak," ti hen a sâng. ⁷ Chu minung tla chu an tlung ka hen Jisu nih mi zapi sinah chun Johan thu a sim rawh, "Zei zauh ding hen me ramkaro ah nan kal mi kha? Lâiluang thli nih a sêm mi ma? ⁸ Asi lo leh, zei zauh ding chem hen me nan kal mi kha? Puannêm aih ma? Puannêm aih tla chu lalchem in tla ah silo ma an um? ⁹ Asi lo leh, zeiruang chem hen me nan kal mi kha? Khuavâng zauh ding hen ma? Asi rîlmâl ka nan ti na, khuavâng ngâk hen khawm rokual dauh. ¹⁰ ’Zauhnik, ka mifial na mâi leiah ka fial asi. Anih nih chun na mâi leiah na lam a sial lai, ti hen a thâwngthâng an rîn mi kha hi minung hi asi. ¹¹ Thungâi tak hen ka nan simh na, nunau ring mi lakah Baptistu Johan ngâk hen rokual dauh an suak lo rih; sikhawmsele, Vân Ram ah mi mêchem khawm anih ngâk hen chun an rokual dauh. ¹² Baptistu Johan umnâk thawk hen tutiang hen Vân Ram nih chun zângnâwrnâk a tawng tâwn le, zângnâwrtu tla nih chun zângran hen an lâk tâwn. ¹³ Khuavâng tla zawzawng leh Mosi Dân thu nih chun Johan a hawng um tiang khan an simkan tâwn asi. ¹⁴ Nan lung duh lam chun, chu chu Elija, hawng kal ding mi chu asi. ¹⁵ Âuzawng theihnâk ding hen nâ nei nih chun theih seh. ¹⁶ "Sikhawmsele, tusan mi tla hi zei hen me ka tahṭhimh lai? Ngâksia sumtuah mun tla ah to hen, an hâwi tla auh hen, ¹⁷ ’Theikhang ka nan tum piak na le, nan lâm ṭung lo; thungâi kan ṭap le, nan ir nan chumh ṭung lo,’ ti mi tla hâwi an si. ¹⁸ Johan chu a hawng kal le, a ei hen a din lo le, Khuri nih a luah ma hi, an ti. ¹⁹ Minung Fapa a hawng kal le, a ei hen a din, ’Zauhnik u, buh ei chak, uain din chak, siah khawlhtu tla leh misual tla hâwipa khi,’ an ti fâwn. Sikhawmsele, a thilti rah tla nih a dik asi ti a zauhtir," a ti. ²⁰ Chun, an rim lo ruangah a thilchê ti tamnâk chem khua tla chu a fâi rawh: ²¹ "Korazin, na tlûn a pit, Betsaida, na tlûn a pit, nan lakah thilchê ti mi tla kha Tura leh Sidon ah ti si sele, salâpuan aih hen valeidip nâwngah to hen an rim ving lai rawh. ²² Sikhawmsele, ka nan ti na, lâirêl ni ah chun nannih tuar ngâk hen Tura leh Sidon tuar ding chu a ziachâng a um dauh lai. ²³ Chun, nang Kapernaum, vân tiang hen chawnglawmh na si awt mazei? Mithi khua tiang hen na kal awt asi. Nangmah lakah thilchê tak ti mi tla kha Sodom ah ti mi si sele, tutiang hen a um kumza lai. ²⁴ Sikhawmsele, ka nan simh na, lâirêl ni ah chun na tuar ding mi ngâk chun Sodom ram tuar ding mi chu a ziachâng a um dauh lai," a ti. ²⁵ Chu liau chun Jisu nih, "Aw ka Pa, tual leh vân Lalpa, nangnih mifing leh mi fâifîm tla sinah hi bang thu hi na pheh, nausêm tla sinah na phuang ruangah hin ka nan sawr. ²⁶ Asi, ka Pa, chu hâwi ti chu nangmah ngaih hen a ṭha asi. ²⁷ "Ka Pa nih thil zeizawng hawng ka kiltir rawh. Pa lo nih chun âukhawm nih Fapa hi an theih loh. Fapa leh an sinah Fapa nih a phuang duhnâk tla cho lo nih chun âukhawm nih Pa chu an theih loh. ²⁸ "Nannih rianṭuan hamh leh thilrit phurh zawzawng tla, ka sinah hawng kal ule, keimah nih ka nan dîntir na lai. ²⁹ Ka liangbat a bat ule, ka sinah a sîn u; dawnh kho mi leh thinlung ah â nâutir mi tak ka si; chun, nan thlarau rangah dinhnâk nan tawng lai. ³⁰ Ka liangbat chu a nuam le, ka phurh khawm a zâng asi," a ti.

¹ Chu liau chun, Jisu chu Dinhni ah fâng mun a pal le, a ṭhiruai tla chu an sungvâng le, favûi tla an khiak le, an ei rawh. ² Chun, Farisai tla nih chu chu an muh le, a sinah, "Zauhnik, na ṭhiruai nih Dinhni ah ti ding a zarh mi chu an ti hi," an ti. ³ Anih lam nih chun an sinah, "David a sungvâng liauah a hâwi tla hen an thil ti kha nan rêl lo mazei? ⁴ Kha hâwi hen Pathian in ah a lût le, amah leh a hâwi tla ei a zarh mi, bâwlpu tla cho nih ei a thiang mi sang siah mi an ei mi thu kha? ⁵ Asi lo leh, Dinhni ah Pathian Biakin ah bâwlpu tla nih chun Dinhni an buar khawmah an mawh lo vima ti Dân thu ah chun nan rêl lo mazei? ⁶ Zeikhawm si sele, Pathian Biakin ngâk hen rokual dauh hinah a um ti ka nan simh na. ⁷ Sikhawmsele, ’Bâwlnâk duhlo hen khuaruatnâk ka duh,’ ti hi a umzia theih rawh mi si u le chu, mi a mawh lo mi tla chu nan mawhtir lo ding mi. ⁸ Minung Fapa hi Dinhni Lal asi ruangah," a ti. ⁹ Chun, chu thawk hen chun a kal le, anna pumhnâk in ah a va lût. ¹⁰ Chunah mi pakhat kutkhêng a um. Chun, an phiar khonâk ding hen, "Dinhni ah damh a thiang ma?" ti hen, Jisu an deih. ¹¹ Chun, Jisu nih chun an sinah, "Nan lakah âutal nih dawrâ pakhat nei ule, chu chu Dinhni ah khursaduap ah tlâ sele, âu nih me tleih hen nûk lo lai? ¹² Dawrâ pakhat ngâk hen minung pakhat chu thungâi a sung dauh a! Churuangah Dinhni ah, ṭhattir a thiang," a ti. ¹³ Chu kâ hen chu minung sinah, "Na bân phar," a ti. Chun, a phar le, khatlei kâng hâwi hen a dam ver. ¹⁴ Churawhchun Farisai tla chu an suak le, amâh an thah khonâk ding dân ruat hen anna thluk. ¹⁵ Sikhawmsele, Jisu nih chun chu chu a theih rawh chun chu thawk hen chun a kal ving. ¹⁶ Chun, mi tamtak nih amah an zûl le, an ektê hen a damh khap na le, a thâwngthâng phuang lo ding hen an sinah a ti thlir. ¹⁷ Khuavâng Isai nih, ¹⁸ "Zauhnik, ka to-aw ka thîm mi, ka duhtak, ka thinlung nih thungâi a lawmh mi hi. A tlûnah ka Thlarau ka siah lai le, chun phundang tla sinah lâirêlnâk thu a sim lai. ¹⁹ A êl lai lo le, âukhawm a âu lai lo le, zâwllâi tla khawmah âukhawm nih a hâu an theih lai loh. ²⁰ Neh ding hen lâirêlnâk ah a fial lân lo chu lâiluang fawp a thlawngh lai lo, la khû khawm a mih lai loh. ²¹ A min chu Phundang tla nih an umsan lai," ti hen, a sim mi kha a hawng tlung khonâk ding hen. ²² Chu liau chun mitchâw hawlh kho lo mi, khuri vuanh pakhat an hawng put le; chun, anih nih chun a damh le, chun a hawlh kho lo mi chu a hawng hawlh kho hen a hawng muh kho rawh. ²³ Chun, mi zapi tla zawzawng nih chun thungâi chê an ti le, "Hi minung hi David Fapa asi lo mazei?" an ti. ²⁴ Sikhawmsele, Farisai tla nih chun chu chu an theih kâ hen, "Hi minung nih hin khuri lal Belzebul thiltikhonâk ruangah lo chun khuri tla a nar lai lo," an ti. ²⁵ Chun, Jisu nih an ruât mi tla chu a theih le, an sinah, "Zei ram khawmah mah leh mah anna do mi zawng an vei tawn; zei khua khawmah dawng khat khawm mah leh mah anna do mi zawng an um khuasuak lai lo. ²⁶ Chun Setan nih Setan ber a nar chun mah a do mi asi lai lo ma, a ram chu zeitin me a dîr kho lai? ²⁷ Chun, kei Belzebul thiltikhonâk ruangah khuri tla nar tâwn ka si chun nan fa tla nih âu ruangah ne an nar tâwn ne? Churuangah annih chu nanmah lâirêltu ding tla an si lai. ²⁸ Sikhawmsele, kei Pathian Thlarau ruangah khuri tla nar tâwn ka si chun Pathian Ram nan sinah a tlung rawh asi lai. ²⁹ "Chu hâwi asi lo chun mi nih mi chak chu a phuar tâ masa lo chun zeitin mi chak in mi lût hen a sum a lâk piak kho lai? Chu nûn lam chun a in chu a phûl piak kho lai. ³⁰ "Âuzawng keimah leiah ṭang lo mi chu hawng ka do asi; âuzawng hawng ka khawmhpi lotu nih chun a thektham asi. ³¹ Churuangah, ka nan ti na, mi an sualnâk kipah leh an simsiatnâk kipah chun ngaihdam an si lai: Thlarau Thenhlimh ngâi simsiat lam chu ngaihdam piak asi lai lo. ³² Chun, âuzawng Minung Fapa simsâwitu zawng chu an simsiatnâk chu ngaihdam piak asi lai; âuzawng Thlarau Thenhlimh ngâi simsâwitu zawng lam chu an simsâwinâk chu tu dam sung khawmah, tik hawng tlung ding mi khawmah chun ngaihdam piak asi lai lo. ³³ "Thing chu a ṭha, a rah khawm a ṭha nan ti lo dâidua chun, thing chu a sia, a rah khawm a sia ti dâidua u; thing chu a rah lakah â theih ruangah. ³⁴ Rûl thlâk tla, nannih sual ko bû hen zeitin me thu ṭha nan sim kho lai? Thinlung ah khat hen a liam mi chu kâ nih a sim tâwn asi. ³⁵ Mi ṭha nih a robâwm ṭha lakah mi thil ṭha tla a suah tâwn le, misual nih chun a robâwm sia lakah mi thil sia tla a suah tâwn. ³⁶ "Chun, ka nan simh na, mi nih thu-do-tla-lo an sim kipah chu thu thâwngthâng chu lâirêl ni ah chun an sim lai. ³⁷ Na thu tla chu lâi a nan rêl ding hen mang asi lai le, na thu lîlâ nih a nan mawhtir awt asi," a ti. ³⁸ Chu liau chun Dân sîntirtu leh Farisai tla lakah mi âu nih mawh an sawnh le, a sinah, "Sîntirtu, na sin thawk hen singsiahnâk muh kan duh," an ti. ³⁹ Anih nih chun an sinah, "Tusan sual tak leh ṭângdang pawmtâk mang tak mi nih chun singsiahnâk an hâwl le, sikhawmsele khuavâng Jona singsiahnâk cho lo chu an sinah singsiahnâk rerêng pêk an si lai lo: ⁴⁰ Jona chu ni thum leh zân thum ngapi paw sungah a um hâwi khan Minung Fapa hi ni thum leh zân thum tual sungah a um bâk awt asi. ⁴¹ Ninevi khua mi tla chu lâirêl ni ah chun tusan mi le tla sinah hin an dîr lai le, an mawhtir na lai, Jona thusim lakah an rim ruangah; ngâinik u, Jona ngâk hen rokual dauh hinah hin a um asi. ⁴² Simlei lalnu kha lâirêl ni ah chun tusan mi tla sinah hin a thawk bâk lai le, an mawhtir na lai; Solomon finghnâk ngâi ding hen men kâwlkil thawk hen a hawng kal ruangah. Ngâinik u, Solomon ngâk hen rokual dauh hinah hin a um. ⁴³ "Chun, khuri nâwmtâm chu mi paw sungah mi a suak rawh chun dînnâk hâwl ê hen tî umlonâk mun tla ah â sawk lemang le, a tawng lo. ⁴⁴ Chun, ’Ka suaknâk in ah khan ka kîr nawlh ko lai,’ a ti le; chun a va tlung rawh chun lâwng tlo hen, thiang ver phiat hen, thuamh ziar hen a muh. ⁴⁵ Chu kâ hen a va kal le, amah ngâk hen sual dauh mi khuri dang pasarih a put na le, chunah chun an lût le, an um kumza tâwn le; chu minung umzia nehnûn lei chu a lân ngâk hen a ṭha lo khun tâwn. Chu hâwi ber hen tusan sual tla tlûnah hin a um teh lai," ti hen, a sâng. ⁴⁶ Mi zapi tla sinah thu a sim liauah chun a nu leh a unau tla chu amah sawnh ding tum hen lênglei ah an dîr. ⁴⁷ Chun, minung pakhat nih a sinah, "Zauhnik, na nu leh na unau tla nangmah sawnh ding hen lênglei ah an dîr ko," a ti. ⁴⁸ Anih lam nih chun a simhtu sinah chun, "Ka nu chu âu mesi? Ka unau tla khawm chu âu me an si?" ti hen a sâng. ⁴⁹ Chun, a ṭhiruai tla leiah a bân a phar le, "Zauhnik u, ka nu leh ka unau tla hi! ⁵⁰ Âuzawng ka Pa vân ah mi duhzia titu zawng chu ka unau tla, ka farnu tla, ka nu tla an si," a ti,

¹ Chu ni chun Jisu chu in ah mi a suak le, rilî kap ah chun a to. ² Chun, a sinah mi zapi cherkhet an hawng a pûm le, chuvachun lawng ah â chuan le, a to le; mi zapi zawzawng chu Seppho ah an dîr. ³ Chun, tahṭhimh thu hen thu tamtak an sinah a sim le: "Fachî vawrhtu fachî vawrh hen a kal. ⁴ Chun, a vawrh liauah a zeimaw mi lam vâu ah a tlâ le, va tla nih an tlanh hep. ⁵ Chun, a zeimaw mi lungpher tual pannâk mun ah a tlâ; tual a sah lo ruangah a kho sawm le; ⁶ sikhawmsele, nî a sâng dauh rawh chun a emh le, a uai tlek le, ram a nei lo ruangah a mawt ko. ⁷ Chun, a zeimaw mi belh lingnei nâwngah a tlâ le, bua chu a hawng sâng vima le, a dawrh kêk. ⁸ Chun, a zeimaw mi tual ṭha lakah a tlâ le, a zeimaw mi a leh zâ hen, zeimaw mi a leh sâwmruk hen, a zeimaw mi a leh sâwmthum hen lebang a rah rawh. ⁹ Âuzawng nâ nei nih chun theih seh," a ti. ¹⁰ Chun, ṭhiruai tla chu Jisu sinah an hawng kal le, a sinah, "Zeirangah me an sinah tahṭhimh thu hen na sim an ti. ¹¹ Chun, anih nih chun a sâng le, an sinah, "Vân Ram thuthup tla chu nannih theih lam chu siang asi, annih theih lam chu siang asi lo. ¹² Âuzawng a neitu chu an pêk sap lai le, an nei thlo lai; sikhawmsele, âuzawng a neilotu chu a neihlem mi khawm lâk piak asi lai. ¹³ Churuangah chun tahṭhimh thu hen an sinah ka sim asi; muh na khawmsele an muh tâwn lo le, nâ hen theih na khawmsele an theih tâwn lo le, a ngaihtawnh dân khawm an theih tâwn lo ruangah. ¹⁴ Chun, Isai thusim kha an tlûnah a hawng tlung mahi: Nâ hen chun nan theih narêng hen a ngaihtawnh dân lam chu nan theih rîlmâl lai lo; muh lam chu nan muh narêng hen theih lam chu nan theih rîlmâl lai lo. ¹⁵ Hi phun tla thinlung hi a mawlâwt rawh le, an nâ tla a ngawng ver le, an mit an sîm le, Chu lo chun kan mit hen kan muh lai le, kan nâ nih a theih lai le, kan thinlung hen kan theih ber lai le, kanna lêt nawlh lai le, anih nih hawng kan damh sual lebang lai,’ an ti, a ti mi kha. ¹⁶ "Nannih mit lam chu a vân ṭha asi, a muh tâwn ruangah; nan nâ khawm a vân ṭha asi, a theih tâwn ruagah. ¹⁷ Thungâi tak hen ka nan simh na, khuavâng tamtak tla leh mi rep tamtak tla khawm nih nan thil muh tla hi muh an duh le, sikhawmsele an muh lo; nan thil theih tla khawm hi theih an duh le, sikhawmsele an theih lo. ¹⁸ "Chuvachun, fachî vawrhtu tahṭhimh thu chu theih u. ¹⁹ Âuzawng nih Ram thu chu nâ nih a theih hen, a ngaihtawnh dân a theih lêm lo chun Setan chu a hawng kal le, a thinlung ah vawrh chia chu a suh ving tâwn. Chu minung chu lam vâu ah vawrh mi chu asi. ²⁰ Chun, lungpher mun ah vawrh mi chu, thu chu theih hen lâwm tak hen tleih tâwntu hi asi: ²¹ Sikhawmsele, amah lakah chun ram a um lo le, sâwtlotê cho a um le; chun thu ruangah chun hamhnâk mawh nehsawhnâk mawh a hawng um hen a zumhnâk a bâng sawm tâwn. ²² Chun, bualingnei nâwngah vawrh mi chu, thu theihtu asi le, sikhawmsele laikulh lungkhamnâk leh neihnâk nih chun thu chu a dawrh le, rah lo hen a hawng um tâwn. ²³ Chun, tual ṭha tlûnah vawrh mi chu, thu chu nâ nih theih hen, a ngaihtawnh dân khawm theih hi asi le, chu minung chu a rah taktê le, zeimaw mi a leh zâ hen, zeimaw mi a leh sâwmruk hen, zeimaw mi a leh sâwmthum hen a pung tâwn," a ti. ²⁴ Tahṭhimh thu dang an sinah a sim nawlh le: "Vân Ram chu mi a lo ah chî ṭha vawrhtu hen tahṭhimh asi; ²⁵ sikhawmsele, mi an it thit karah a mêlma a hawng kal le, fâng lakah chun fâng telê a vawrh le, a kal nawlh ving. ²⁶ Chun, fâng chu a hawng kho le, a hawng vûi le, fâng telê chu a hawng lang rawh. ²⁷ Chun, in dâwngpu to-aw tla chu an hawng kal le a sinah, Ka pu, na lo ah chî ṭha na vawrh lo na maw? Fâng telê khi kha zei lei thawk hen a hawng um mi mesi?’ an ti. ²⁸ Chun, anih nih chun an sinah, ’Mêlma nih a hawng ti mi ma chu!’ a ti. Chun, to-aw tla nih chun, Asi chun chubang tla chu va pumh ko sele rem na ti ma?’ an ti. ²⁹ Anih lam nih chun, ’Ti lai le a, fâng telê chu nan pumh chun fâng nan phâwi sih sual lai. ³⁰ Fâng ât tiang hen munkhat hen kho ko na seh; chun fâng ât tikah fâng âttu tla sinah, ’Fâng telê chu pumh masa tâ ule, duah ding hen têl u, fâng lam chu ka fângbâwk ah thiar u, ka ti teh lai,’ a ti, a ti. ³¹ Tahṭhimh thu dang an sinah a sim nawlh le: "Vân Ram chu anṭam chî mal khat mi nih a lâk le, a lo ah a vawrh mi hâwi chu asi. ³² Chu chu chî zawzawng ngâk hen a mêchem le, sikhawmsele a kho hen a sâng tikah chun thlâi tla ngâk hen chun a lian dauh le, thing a hawng si tâwn le, chuvachun tlûn zuang va tla chu an hawng kal le, a ngê tla ah chun an riak," a ti. ³³ Tahṭhimh thu dang an sinah a sim nawlh le: "Vân Ram chu thilnu nunau nih a lâk le, sangvut seah thum lakah a ektê hen zunh ver tiang hen a phûm mi hâwi chu asi," a ti. ³⁴ Chubang zawzawng chu Jisu nih tahṭhimh thu hen mi zapi tla sinah a sim le, tahṭhimh thu lo hen an sinah zeikhawm a sim lo: ³⁵ Khuavâng nih, "Tahṭhimh thu hen ka kâ ka âng lai le, tual tuah tîr thawk hen thil thup chu ka sim lai," ti hen a sim mi kha a hawng tlung khonâk ding hen. ³⁶ Chu liau chun mi zapi tla chu a kaltâk na le, in ah chun a lût rawh; chun a ṭhiruai tla chu a sinah an hawng kal le, "Lo ah fâng telê tahṭhimh thu kha hawng kan simhfiang," an ti. ³⁷ Chun, anih nih chun a sâng le, ³⁸ "Chî ṭha vawrhtu chu Minung Fapa hi asi; lo chu laikulh hi asi le, chî ṭha chu Pathian Ram fa tla an si le, fâng telê chu Setan fa tla an si. ³⁹ Mêlma, a vawrhtu chu Diabol asi; fâng ât chu laikulh dawnghnâk ding asi; fâng âttu tla chu vânmifial tla an si. ⁴⁰ Chuvachun, fâng telê tla chu an pumh hen mei ah an duah hâwi hen laikulh dawnghnâk ah chun a um lai. ⁴¹ Minung Fapa nih hin a vânmifial tla chu a fial lai le, a ram thawk hen sualtirtu tla leh thilsual titu tla zawzawng chu a khawk na lai le, ⁴² meipi ah an lawnh na lai; chunah chun ṭap leh hachang rial chu a um lai. ⁴³ Chu tikah chun mi rep tla chu an Pa Ram ah nî hâwi hen an chêu lai rawh. Nâ nei nih chun theih seh! ⁴⁴ "Vân Ram chu lo ah ro a thup hen phûm mi hâwi asi; chu chu mi nih a muh le, a thuh le, â lâwm ruangah a neih zawzawng chu a zuar le, chu lo chu a châwk rawh. ⁴⁵ "Chun, Vân Ram chu sawlehtu âitikep lung ṭha tak hâwltu hâwi chu asi fâwn: ⁴⁶ Chun, anih nih chun âitikep lung sung tak pakhat a tawng le, a neih zawzawng chu a zuar le, a châwk rawh. ⁴⁷ "Chun, Vân Ram chu lênkhang tisumsumriat ah vawrh hen, chi kip fûn khup mi hâwi chu asi nawlh fâwn: ⁴⁸ chu chu a khat kâ hen vakap leiah an nûk le; chun an to le, a ṭha mi vial chu bâwm ah an khumh le, a sia mi lam chu an lawnh. ⁴⁹ Laikulh dawngh tikah chun chu hâwi ber hen a um lai. Vânmifial tla chu an hawng suak lai le, mi rep lakah mi misual tla chu an thlei na lai; ⁵⁰ meipi lakah an lawnh lai; chunah chun ṭap leh hachang rial chu a um lai," a ti. ⁵¹ Jisu lîlâ nih an sinah, "Chubang zawzawng chu nan theih ma?" a ti. Annih nih chun, "Theih ta a," an ti. ⁵² Chun, anih nih chun an sinah, "Chu hâwi asi chun, Dân sîntirtu Vân Ram lampi sîntir hen um mi vial chu in dâwngpu a robâwm lakah mi thil thar tla leh thil li tla thuak tâwntu hâwi chu asi," a ti. ⁵³ Chun, hi hâwi hi asi le, Jisu nih chubang tahṭhimh thu tla chu a sim thluh kâ hen chu thawk hen chun a kal rawh. ⁵⁴ Chun, a umnâk khua lei chu a va tleng le, anna pûmnâk in ah chun anmah a sîntir na le, chuvachun thungâi chê an ti le, "Hi minung nih hin hi finghnâk leh hi bang thiltikhonâk tla hi zei thawk hen me a tawng? ⁵⁵ Hi minung hi thing hen thil siamtu fapa kha asi lo mazei? A nu chu Mari an ti mi asi lo mazei? A unau tla khawm Jem, Josef, Simon leh Juda an ti mi tla chu an si lo mazei? ⁵⁶ A farnu tla khawm kan sinah an um ver lo mazei? Hi minung nih hin zei thawk rîlmâl hen me hi bang zawzawng hi a tawng?" an ti. ⁵⁷ Chun, amah an zumh lo. Sikhawmsele, Jisu nih an sinah, "Khuavâng chu amah khua leiah leh amah in leiah cho lo chun chawnglawmh lo hen a um dah loh," a ti. ⁵⁸ Chun, an lung lo ruangah chunah chun thilchê tam a ti lo.

¹ Chu liau chir chun lal Herod nih Jisu thâwngthâng chu a theih le, ² a to-aw tla sinah, "Chu chu Baptistu Johan kha asi ma chu; mithi lakah mi a thawknawlh ma chu; churuangah chubang thiltikhonâk tla nih amah lakah a ṭuan ma chu!" a ti. ³ Herod nih chun a unau nupi Herodi ruangah Johan chu a tleih le, a phuar le, rêngin ah a khumh rawh asi. ⁴ Johan nih chun a sinah, "Anih na umpi hi dân asi lo," a ti piak ruangah. ⁵ Chun, Johan chu thah ding a awt chun mi zapi a ṭih le, khuavâng ah an ruat ruangah. ⁶ Sikhawmsele, Herod suak cham ni chu a hawng tlung le, Herodi fanu chu a lâi ah a lâm le, Herod chu a lawmhtir rawh. ⁷ Churuang chun a deih mi zawng pêk ding hen siat tleih hen a tiamh. ⁸ Chun, anih nih chun a nu fawrh hen, "Hinah hin khêng hen Baptistu Johan lû hawng ka pêk," a ti. ⁹ Chun, lal chu a thinlung a lawksawng rawh; sikhawmsele, a thutiam a buh dumpitu ruangah chun pêk ding thu a pêk. ¹⁰ Chun, mi a fial le, rêngin ah Johan lû chu a tantir. ¹¹ Chun, a lû chu khêng hen an hawng put le, nunau ngâksia sinah chun an pêk. Anih nih chun a nu sinah a kalpi rawh. ¹² Chun, ṭhiruai tla nih a ruak chu an va lâwm le, an phûm le; chun Jisu an va simh. ¹³ Chun, Jisu nih chu chu a theih rawh chun, chunah mi chu lawng hen mi kingnâk mun ah a dang hen a kal rawh. Sikhawmsele, mi zapi tla nih chun an theih kâ hen khua thawk hen kê a kal hen an zûl rawh. ¹⁴ Chun, anih chu vakap ah a suak rawh chun mi zapi cherkhet a muh le, thungâi a siherh na, damlo tla a damh na. ¹⁵ Chun, zânleibâi a hawng si hen ṭhiruai tla chu a sinah an hawng kal le, "Hi hi mi kingnâk mun asi le, a zânleibâi ual rawh; khua tla ah kal hen an rangah ei ding an châwk khonâk ding hen mi zapi tla hi kaltir na me," an ti. ¹⁶ Jisu lam nih chun an sinah, "Annih kal a ngâi lo, nanmah nih ei ding pêk na u," a ti. ¹⁷ Chun, annih nih chun, "Hinah sangtlêp panga leh ngâ panih cho kan nei asi," an ti. ¹⁸ Chun, anih nih chun, "Hinah ka sinah hawng put u," a ti. ¹⁹ Chun, ramhthep tlûnah to ding hen mi zapi tla chu thu a pêk. Sangtlêp panga leh ngâ panih chu a lâk le, vân lei zauh hen mal a sâwm le, a phel le, sângtlêp tla chu a ṭhiruai tla sinah a pêk. Chun, ṭhiruai tla nih chun mi zapi tla sinah an pêk. ²⁰ Chun, an ektê hen an ei le, an khim khap le, an ei bang neknâwi khawm chu an rût le, khobung leinih a khat. ²¹ A eitu tla chu nunau leh ngâksia sim lo hen upa karo khawm sângnga ding asi. ²² Chun, mi zapi tla chu a ṭiaktir na karah a kal lânah khat lei râl ah kal masa ding hen ṭhiruai tla chu lawng ah a chuantir râm na. ²³ Chun, mi zapi chu a ṭiaktir na nûnah thlacham ding hen tlâng ah a dang hen a kal le; chun, zânleibâi a hawng si rawh chun, chunah chun amah cho hen a um rawh. ²⁴ Lawng lam chu rilî lâi chir ah a um le, thli nih amah lo leikângah a sêm ruangah tî tlingtlawk nih a lawh lemang. ²⁵ Chun, khawfîm chat awt bâi ah rilî tlûnah kê hen a kal le, anmah lei a fûk. ²⁶ Chun, ṭhiruai tla nih chun amah chu rilî tlûnah kê hen a kal mi an muh rawh chun, "Mithla ma khi!" ti hen, an thla a kâm le, lâu hen thungâi an âu. ²⁷ Sikhawmsele, Jisu nih anmah a sawnh sawm na rawh, "Lungngam tak hen um u, keimah ka si, lâu lah u," a ti. ²⁸ Peter nih a sâng le, a sinah, "Lalpa, nang na si chun tî tlûnah na sinah hawng ding thu hawng ka pêk," a ti. ²⁹ Chun, anih nih chun, "Hawng kal ko me," a ti. Peter chu lawng lak mi chu a ṭum le, Jisu leikâng fûk hen tî tlûnah kê hen a kal. ³⁰ Sikhawmsele, thli a râng mi chu a muh le," a lâu; chun, a pil awt le, "Lalpa, hawng ka hum rawh," ti hen, a âu rawh. ³¹ Chun, Jisu nih a banh sawm le, amah chu a tleih le, a sinah, "Nang, lung tâwm, zeirangah na zumhmaih?" a ti. ³² Chun, lawng ah anna chuan rawh chun thli chu a bâng ko rawh. ³³ Chun, lawng lakah um mi tla nih chun, "Pathian Fapa na si tak ngâk mahi," ti hen, amah mâi an mûk. ³⁴ Chun, khatlei râl an kâi rawh chun, Genesaret ram an tleng rawh. ³⁵ Chun, chu mun mi tla nih chun amah an theih kâ hen, chu kiangkam ram zawzawng ah chun mi an fial le, damlo zawzawng chu a sinah an hawng put. ³⁶ Chun, a puan sâr tal tham kho ding an deih chiam le; chun a thamtu zawng chu an dam vima rawh.

¹ Chu liau chun Jerusalem thawk hen Farisai tla leh Dân sîntirtu tla Jisu sinah an kal le, ² "Zeirangah me na ṭhiruai tla nih thlâktu thurovuih chu an buar tâwn? Sang an ei chun an kut an ṭâwl lo," an ti. ³ Chun, anih nih chun an sinah, "Nannih khawm nih zeirangah nan thurovuih ruangah Pathian thupêk nan buar ne? ⁴ Pathian nih, ’Na nu leh na pa chawnglawmh rawh, ’Âuzawng a nu mawh a pa mawh simsiattu chu thi ngelchel seh,’ a ti ruangah. ⁵ Nannih lam nih chun, ’Âuzawng a nu mawh a pa mawh sinah na ka mangnâk ding hi Pathian sinah pêk asi rawh, titu zawng chu a nu mawh a pa mawh chawnglawmh ding asi lo,’ nan ti tâwn. ⁶ Chun, nan thurovuih ruangah Pathian thu chu nan thlâu phah rawh mahi. ⁷ Mi perpê tla, Isai nih hin nan thu a simkan mi hi thungâi a dik ko! ⁸ ’Hi minung tla nih hin an kâ hen an ka chawnglawmh le, an thinlung lam nih chun an ka lât tâwn. ⁹ Zeikhawm si sele, an sîntirnâk ah minung thupêk an sîntir na ruangah, an ka sawnh tâwn hi a thawt salam asi,’ a ti," a ti le, a sâng. ¹⁰ Chun, mi zapi tla chu a kawh na le, an sinah, "Ngâi ule, a ngaihtawnh dân thiam u: ¹¹ Kâ ah lût mi chu minung nawmhtu asi lo le, kâ thawk suak mi chu, chu tak chu minung nawmhtu asi dauh," a ti. ¹² Chu liau chun a ṭhiruai tla an hawng kal le, a sinah, "Farisai tla nih kha thu kha an theih le, an thinthawk mi kha na theih ma?" an ti. ¹³ Anih lam nih chun, "Kûng zawzawng ka Pa vân ah mi nih a phun lo mi chu phâwi hen a um lai. ¹⁴ Annih chu zeikhawm siar lah u; ruitu mitchâw an si. Chun, mitchâw nih mitchâw lîlâ a rui chun khursaduap ah munkhat hen an tlâ vevê lai," a ti le, a sâng. ¹⁵ Chun, Peter nih a sinah, "Tahṭhimh thu kha hawng kan simhfiang me ne?" a ti piak. ¹⁶ Chun, anih nih chun, "Tutiang hen nannih khawm nih theihnâk neilo hen nan um nget rih mu? ¹⁷ Kâ ah lût mi vial chu paw lakah a tlâ le, pâwng kalnâk ah lawnh hen a um ti nan theih lo ma? ¹⁸ Kâ thawk suak lam chu thinlung thawk hen a hawng suak le; chu tak nih chun minung a nawmh tâwn asi. ¹⁹ Thinlung ah hin dawnnâk sual tla, mi thahnâk tla, ṭângdang pawmnâk, duhnâk, fîrnâk, phiarnâk, simsiatnâk tla a hawng suak tâwn. ²⁰ Chubang chu minung nawmhtu asi; kut ṭâwl lo hen buh ei lam nih chun mi a nawmh lo," a ti. ²¹ Chun, Jisu chu chunah mi chu a suak. Tura leh Sidon bial ah a kal rawh. ²² Chun, chu ram mi chu Kanaan nunau pakhat a hawng suak le, "Lalpa, David Fapa, hawng ka zângfah rawh, ka fanu khuri nih a tleih thlir asi," ti hen a âu. ²³ Anih lam nih chun kâ khat hen men a sâng lo. Chun, a ṭhiruai tla nih chun, "Kan dung leiah a âu lemang mi, kaltir ko ma a," ti hen an hawng ngiar. ²⁴ Anih lam nih chun, "Israel mi tla dawrâ tlâu sinah lo chun fial ka si lo," a ti le, a sâng. ²⁵ Sikhawmsele, nunau chu a hawng kal le, "Lalpa, hawng ka ṭangpi rawh," ti hen mâi a mûk. ²⁶ Chun, anih nih chun, "Fa tla sang lâk piak hen ui tla sinah lawnh chu â dawh lo," a ti le, a sâng. ²⁷ Anih nih chun, "Lalpa, si lam chu asi; sikhawmsele, ui tla khawm nih an pu dawhkân lakah mi sang neknâwi a tlâ mi chu an ei tâwn lo mazei?" a ti. ²⁸ Chu kâ hen Jisu nih chun a sinah, "Nunau, na lungnâk a fâk tuktarâi; na duh hâwi hen na tlûnah um seh," a ti le, a sâng. Chun, a fanu chu chu dâr thawk chun a hawng dam ko rawh. ²⁹ Chun, Jisu chu chu thawk hen chun a kal le, Galili Rilî kiang a tleng le; chun tlâng ah chun a kâi le, chunah chun a to rawh. ³⁰ Chun, mi zapi cherkhet ke khêng, mitchâw, hawlh kholo, suaksual tla damlo tla tamtak an hawng put na le, a sinah an hawng kal le, a kê kiang ah an siah; chun, a damh khap na. ³¹ Chuvachun, mi zapi nih chun hawlh kho lo tla an hawng hawlh kho hen, a suaksual mi tla an hawng a remh hen, kekhêng tla kê hen an hawng kal hen, mitchâw tla an hawng muh kho mi an muh rawh chun thungâi chê an ti le; chun Israel tla Pathian chu an sawr rawh. ³² Chun, Jisu nih a ṭhiruai tla chu a kawh na le, "Mi zapi tla hi tuah ni thum ka sinah an um rawh le, ei ding zeikhawm an nei lo ruangah thungâi ka lungkham na asi; sungvâng bû hen kîrtir na ka duh lo, chu lo chun lam lakah an vâiphâl lai," a ti. ³³ Chun, ṭhiruai tla nih chun a sinah, "Mi zapi hi tluk rak khawp rê ding hen sangtlêp chu tluk rak ramkaro ah kha zei mi me kan tawng lai?" an ti. ³⁴ Chun, Jisu nih an sinah, "Sângtlêp zeizat nan nei?" a ti. Chun, annih nih chun, "Tlêp sarih leh ngâ tâwmtê," an ti. ³⁵ Chun, anih nih chun tual ah to ding hen mi zapi chu thu a pêk. ³⁶ Chun, sangtlêp pasarih leh ngâ tla chu a lâk le, lâwmthu a sim le, a phel le, ṭhiruai tla sinah a pêk. Chun, ṭhiruai tla nih chun mi zapi tla sinah an pêk. ³⁷ Chun, an ektê hen an ei le, an khawp khap; an ei bang neknâwi khawm chu khobung sarih an rût le, a khat. ³⁸ A eitu tla chu nunau leh ngâksia sim lo hen, upa karo khawm sâng li an si. ³⁹ Chun, mi zapi tla chu a ṭiaktir na nûnah lawng ah â chuan le, Magadan ram leiah a tlung.

¹ Chun, Farisai tla leh Sadukai tla an hawng kal le, amah niknâk ding hen vân thawk hen singsiahnâk anmah zauhtir ding hen an deih. ² Sikhawmsele, anih nih chun an sinah, "Zânleibâi a hawng si rawh chun, ’Ni khua a ṭha awt si lai, vân kam a sen tât, nan ti tâwn. ³ Chun, zîng ah chun, ’Tusûn chu ni khua a ṭha awt lo si lai, vân kam a sen, ni khua a dâwm,’ nan ti tâwn. Ni khua umzia chu nan theihthiam le, sikhawmsele tik singsiahnâk tla hi nan theihfiang kho lo. ⁴ Tusan minung sual tak leh ṭângdang pawmtâk mang tak tla nih chun singsiahnâk an hâwl le, sikhawmsele Jona singsiahnâk cho lo chu an sinah singsiahnâk rerêng pêk asi lai lo," a ti le, a sâng. Chun, anmah a mâk na le, a kaltâk ving na. ⁵ Chun, ṭhiruai tla chu khatlei râl ah an tlung rawh chun sang put an philh. ⁶ Chun, Jisu nih an sinah, "Farisai tla leh Sadukai tla thilnu lakah chun a vêng ule, a thiamthih u, a ti. ⁷ Chun, annih nih chun, "Sang kan put lo thlo," ti hen anna dawnruat. ⁸ Chun, Jisu nih chu chu a theih le, "Lung tâwm tla, zeirangah sang nan nei lo ruangah nan dawn? ⁹ Tu khawmah nan thinlung hen nan theih lo nget rih ma? Mi sângnga sinah sangtlêp panga nan ṭhen mi leh khobung nan rût zat kha nan theih ko lo rih ma? ¹⁰ Mi sâng li sinah sangtlêp pasarih nan ṭhen mi leh khobung nan rût zat kha? ¹¹ Sang thu nan sinah ka sim lo ti zeitin zia nan theih lo? Farisai leh Sadukai thilnu lakah chun a thiamthih u," a ti. ¹² Churawhchun, sang thilnu lakah a thiamthih ding hen a simh na lo le, Farisai leh Sadukai tla sîntirnâk lakah thiamthih ding hen anmah a ti dauh na ti an theih rawh. ¹³ Chun, Jisu chu Philipi Kaisari bial chu a va tlung rawh chun a ṭhiruai tla sinah, "Mi le nih Minung Fapa hi âu si ding hen an ruat?" ti hen, a deih na. ¹⁴ Chun annih nih chun, "Mi zeimaw mi nih, ’Baptistu Johan asi,’ an ti; zeimaw mi nih, ’Elija asi,’ an ti; zeimaw mi nih, ’Jeremia mawh khuavâng âumawh asi,’ an ti," an ti. ¹⁵ Anih nih chun an sinah, "Asi chun, nannih nih âu si ding hen nan ka ruat?" a ti. ¹⁶ Chun, Simon Peter nih, "Mesia, Pathian nung Fapa chu na si," a ti le, a sâng. ¹⁷ Chun, Jisu nih a sinah, "Simon, Johan fapa, na thaw a suak; minung nih a nan theihtir mi asi lo le, ka Pa vân ah mi nih a nan theihtir mi asi dauh. ¹⁸ Chun, nang Peter na si ti ka nan simh; hi lungpi tlûnah hin ka kawhmi ka dirh lai le, thihnâk nih chun a neh lai lo. ¹⁹ Vân Ram renh tla ka nan pêk lai le, tual tlûnah zeizawng na khap mi vial vân ah khap asi lai; tual tlûnah zeizawng na phal mi vial vân ah phal asi lai," a ti le, a sâng. ²⁰ Churawhchun, Mesia asi ti âukhawm simh lo ding hen ṭhiruai tla chu thu a kilh thlir. ²¹ Chu ri rawh chun, Jisu nih Jerusalem ah a kal ding tla, upa tla, bâwlpu lal tla leh Dân sîntirtu tla lakah thil tamtak a tuar ding zia tla, thah hen a um ding zia tla, ni thum ni ah thawk hen a um ding zia tla chu a ṭhiruai tla theihtir a dawmh rawh. ²² Peter nih chun a dangtê hen a kalpi le, "Lalpa, Pathian nih khuaruat seh; chubang chu na tlûnah a tlung rîlmâl lai loh," ti hen, a khap. ²³ Anih lam chu â her le, Peter sinah chun, "Setan, ka dung leiah kal, ka rangah tlûknâk na si; Pathian thil tla ruat lo hen minung thil tla na ruat dauh mahi," a ti. ²⁴ Chun, Jisu nih a ṭhiruai tla sinah, "Âuzawng hawng ka zûl a duh mi nih chun mah hamhnâk siarlo hen, a kraws put hen hawng ka zûl seh. ²⁵ Âuzawng a nungnâk hum duhtu vial a dawk lai; âuzawng keimah ruangah a nungnâk dawktu vial nih a tawng lai. ²⁶ Mi nih laikulh hi a pum hen a ting sele, a nungnâk dawk sele, a rangah zei a ṭhatnâk a um lai? Asi lo leh, mi nih a nungnâk rûlah zei me a pêk lai? ²⁷ Minung Fapa hi a vânmifial tla hen a Pa rokualnâk a thuam hen a hawng kal awt ruangah; chu tik chun mikip an thilti hâwi vima hen a rulh chiau lai. ²⁸ Thungâi tak hen ka nan simh na, hinah dîr tla zeimaw mi hi Minung Fapa a Ram ah hawng mi an muh lân lo chu thihnâk tem lo thlo ding mi an um," a ti.

¹ Chun, ni ruk nûnah chun, Jisu nih Peter, Jem leh a unau Johan tla chu a kalpi na le, a dang hen tlâng sâng takah a kâipi na. ² An mâika ah chun a mêl umzia chu a hawng a dang rawh. A mêl chu nî hâwi hen a hawng chêu le, a nipuan tla chu chêu hâwi hen a hawng vâr rawh. ³ Chun, Mosi leh Elija chu amah hen a sâwn hen an sinah anna langh. ⁴ Chun, Peter nih Jisu a sawnh le, "Lalpa, kan rangah hinah um hi a ṭha; na duh chun hinah hin basâ pathum ka khuar lai; nang rangah pakhat, Mosi rangah pakhat, Elija rangah pakhat," a ti. ⁵ A sim liau chir ah, sûm vâr tak nih anmah a phenh na rawh; chun, sûm thawk hen aw-hâu nih, "Hi hi ka Fapa duhtak, ka lawmh mi chu asi, amah thu ngâi u," a ti. ⁶ Chun, ṭhiruai tla nih chu chu an theih rawh chun tual lei an buk le, thungâi an lâu. ⁷ Chun, Jisu nih annih chu a tham na le, "Thawk ule, lâu lah u," a ti. ⁸ Chun, an vân an tâu le, Jisu cho lo chu âukhawm an muh lo rawh. ⁹ Chun, tlâng ah mi chu an ṭum liauah Jisu nih an sinah, "Minung Fapa hi mithi lakah mi a thawknawlh lân lo chu hi muhtirnâk nan muh mi kha âukhawm simh lah u," ti hen thu a pêk na rawh. ¹⁰ Chun, a ṭhiruai tla nih chun a sinah, "Dân sîntirtu tla nih, ’Elija a hawng kal masa ding asi,’ zeitin zia hen ti me an si le?" ti hen, an deih. ¹¹ Chun, anih nih chun, "Elija chu a hawng kal awt masa rêng asi, zeizawng a hawng remh lai. ¹² Sikhawmsele, ka nan simh na, Elija chu a hawng kal rawh rêng asi, amah chu an theih lo le, a tlûnah an duh duh hen an ti dauh lehlam. Chu hâwi ber hen Minung Fapa khawm nih hin an lakah a tuar bâk awt asi," a ti le, a sâng. ¹³ Chu kâ hen ṭhiruai tla nih chun Baptistu Johan thu an sinah a sim mi ti an theih rawh. ¹⁴ Chun, mi zapi sinah an hawng tlung rawh chun, minung pakhat a sinah a hawng kal le, a mâika ah siksidîr hen, ¹⁵ "Lalpa, ka fapa khi zângfah rawh, rualthlû asi, thungâi a tuar zia a fâk; vei tamtak mei ah a tlû le, vei tamtak tî lakah a tlû tâwn asi. ¹⁶ Chun, na ṭhiruai tla sinah ka hawng put le, an damh kho fâwn lo," a ti. ¹⁷ Chun, Jisu nih, "Tusan lungnâk neilo leh simh har tla, zei tiang me nan sinah ka um lai le, zei tiang me ka nan sang kho na lai? Amah chu ka sinah hin hawngpi u," a ti le, a sâng. ¹⁸ Chun, Jisu nih khuri chu a fâi le, a sung ah mi a suak rawh; chu dâr thawk hen chun ngâksia chu a dam rawh. ¹⁹ Chu nûnah chun ṭhiruai tla chu a dang hen Jisu sinah an hawng kal le, "Zei tin zia me kannih nih kan nar kho lo," an ti. ²⁰ Chun, anih nih chun an sinah "Nan lung tâwm ruangah. Thungâi tak hen ka nan simh na, anṭam chî fang khat hâwi lungnâk nan nei chun, hi tlâng sinah hin, ’Hi thawk hen khinah khin va a ṭhinh, nan ti lai le, â ṭhial ko lai; ²¹ nan rangah ti kho lo zeikhawm a um lai loh," a ti. ²² Chun, Galili ram ah an hawng a pûm liauah Jisu nih an sinah, "Minung Fapa hi minung tla kut ah tleihtir hen a um awt asi. ²³ Chun, an thah lai le, ni thum ni ah thawknawlh hen a um lai," a ti. Chun, a ṭhiruai tla chu thungâi an lawksawng rawh. ²⁴ Chun, Kapernaum chu a hawng tleng rawh chun Biakin thawhlâwm khawlhtu tla chu Peter sinah an hawng kal le, "Nan sîntirtu nih Biakin thawhlâwm chu a pêk bâk tâwn lo ma?" an ti. ²⁵ Peter nih chun, "Pêk bâk ta a," a ti. Chun, in ah a va lût le, Jisu nih a sinah "Simon, zei hâwi hen na ngaih? Tual ah lal tla nih siah mawh sum neih man mawh âu sinah me an lâk tâwn? An fa tla lakah ma, asi lo leh, midang lakah ma?" ti hen a sim khalh. ²⁶ Chun, Peter nih, "Midang lakah," a ti kâ hen, Jisu nih a sinah, "Chu hâwi asi chun, fa tla chu an âwl lai ma chu. ²⁷ Sikhawmsele, nang rilî ah va kal le, siau va thlâk le, ngâ a hawng suak masa mi chu tleih rawh. Chun a kâ na kêu kâ hen stater khat na muh lai; chu chu lâk le, kei leh nangmah rangah an sinah pêk na, chu lo chun annih chu an lung kan sitir lo lebang lai," a ti.

¹ Chu liau tak chun ṭhiruai tla chu Jisu sinah an hawng kal le,"Vân Ram ah âu me rokual chem lai?" an ti. ² Chun, anih nih chun ngâksiatê a kawh le an lakah a dîrtir le, ³ "Thungâi tak hen ka nan ti na, nanna lêt hen ngâksiatê hâwi nan silo chun Vân Ram ah nan lût rîlmâl lai lo. ⁴ Chun, hi ngâksiatê hâwi hen â nâutir mi zawng, chu minung chu Vân Ram ah a rokual chem lai. ⁵ Chun, âuzawng ka min ruangah hi hâwi ngâksiatê pakhat lawmhtu zawng chu keimah an ka lawmh mi asi lai. ⁶ "Sikhawmsele, âuzawng hi bang an ka zumhtu mi mê tla lakah pakhat mawh an ka zumhnâk khamtirtu zawng chu an ngâwng ah fângrialnâk lung lianpi awihtir hen tisumsumriat sungah thlâk ving sele a rangah a ṭha dauh lai. ⁷ Mi zapi tla zumhnâk khamtirtu thil tla ruangah laikulh tlûn a pit! Tlûknâk chu um ding rêng asi. Sikhawmsele, tlûknâk umtirtu tlûn chu a pit! ⁸ "Chun, na kut nih mawh na kê nih mawh a nan sualtir chun tan le, lawnh ving. Kut panih mawh kê panih mawh nei hen zungzâl mei ah lawnh ngâk chun suak sual hen mawh kekhêng hen mawh nungnâk ah lût na rangah a ṭha dauh. ⁹ Chun, na mit nih a nan sualtir chun chawih zek le, lawnh ving. Mit khiang khinih nei hen Gehena mei ah lawnh ngâk chun mit khiang khat nei hen lungnâk ah lût na rangah a ṭha dauh. ¹⁰ "Hi bang mi mê tla lakah pakhat khawm hi zauhnawmh lo ding hen a thiamthih u; an vânmifial tla nih vân ah ka Pa vân ah mi mêl chu an muh kumza tâwn ti ka nan simh na hi. ¹² "Zei hâwi hen nan ngaih? Mi âu nih mawh dawrâ zâ nei sele, an lakah pakhat peu sele, sâwmkua leh pakua chu mâk hen, tlâng ah kal hen a tlâu mi chu a hâwl lai lo mazei? ¹³ Thungâi tak hen ka nan simh na, a tawng nawlh vêk chun sâwmkua leh pakua a tlâu lo mi tla tlûn ngâk hen chun a tlûnah â lâwm dauh lai. ¹⁴ Chu hâwi ber hen mi mê tla lakah pakhat a vei mi khawm hi nan Pa vân ah mi duhzia asi lo. ¹⁵ "Chun, na unau nih na tlûnah thilsual ti sele, kal le, amah leh nangmah cho theih hen a sualnâk chu simhfâi. A nan ngâi piak chun na unau chu na neh mi asi lai. ¹⁶ A nan ngâi piak lo lam chun, midang pakhat mawh panih mawh na sinah put le, chuvachun thu zeizawng chu theihtu panih mawh pathum mawh kâ lakah birhtir hen a um khonâk ding hen. ¹⁷ Chun, annih khawm chu a ngâi piak na lo chun, kawhmi tla sinah tlunh le; chun kawhmi tla khawm a ngâi piak na lo chun anih chu Phundang leh siah khawlhtu hâwi hen ruat si seh. ¹⁸ "Thungâi tak hen ka nan simh na, tual tlûnah zeizawng nan phuar mi vial vân ah phuar asi lai; tual tlûnah zeizawng nan phelh mi vial vân ah phelh asi lai. ¹⁹ "Thungâi tak hen ka nan simh nawlh na, tual tlûnah hin nan lakah minung panih an thil deih leikângah thu anna rual chun, ka Pa vân ah mi nih ti piak hen an um lai. ²⁰ Minung panih mawh pathum mawh ka min hen anna pûmnâk zawngah an lakah ka um tâwn," a ti. ²¹ Chu liau chun Peter a hawng le, a sinah, "Lalpa, ka unau nih vei zeizat thilsual ti sele ka ngaihdam ding? Vei sarih tiang ma si lai," a ti. ²² Jisu nih a sinah, "Vei sarih tiang hen ka nan ti lo, vei sarih mun sâwmsarih tiang hen, ka nan ti dauh asi," ti hen, a sâng. ²³ "Churuangah chun, Vân Ram chu, lalchem âu nih mawh a to-aw tla sinah sum thâwngthâng ruat fiang ding mi hen tahṭhimh asi. ²⁴ Chun, ruat fiang ding hen a hawng dawmh rawh chun minung pakhat talent sîng khat battu a sinah an hawng put. ²⁵ Chun, pêk ding a nei lo ruangah a pu nih chun amah hen a nupi hen, a fa tla hen, a neih zawzawng zuar hen rulh ding thu a pêk. ²⁶ Chuvachun, to-aw nih chun, ’Ka pu, hawng ka ngâk dauh rih le, a ektê hen ka nan pêk ver lai, ti hen a bawk le, mâi a mûk. ²⁷ Chun, chu to-aw pu nih chun thungâi a zângfah le, a thlah le, â bat mi chu a ngaihdam rawh. ²⁸ "Sikhawmsele, chu to-aw chu a suak le, a to-aw hâwi tla lakah pakhat denari zâ battu a muh le; chun a theih le, ’Na bat mi kha hawng ka pêk rawh,’ ti hen, a rawm a dît. ²⁹ Chuvachun, a to-aw hâwi chu a bawk le, ’Hawng ka ngâichâng rih le, ka nan pêk teh lai, ti hen a ngiar chiam. ³⁰ Sikhawmsele, a duh lo le, â bat mi chu a lîm lân lo chu rêngin ah a khumh. ³¹ Chuvachun, a to-aw hâwi tla nih chun a thilti chu an muh le, thungâi an lawksawng le, a thilti zawzawng chu an pu sinah an va simh rawh. ³² Chu kâ hen a pu nih chun anih chu a kawh le, a sinah, ’To-aw sual, na ka ngiar ṭualmâl ruangah na bat mi zawzawng kha ka nan ngaihdam le, ³³ ka nan zângfah hâwi khan nang khawm nih na to-aw hâwi chu na zângfah ding si lo mazei?’ a ti. ³⁴ Chun, a pu chu a thinthawk le, â bat mi zawzawng a lîm lân lo chu rêptu tla sinah a pêk rawh. ³⁵ Mi kip nih thinlung tak hen nan unau tla nan ngaihdam lo chun ka pa vân ah mi khawm nih chu hâwi ber hen nan tlûnah a ti bâk lai," a ti.

¹ Chun, tihin asi le, Jisu nih chubang thu chu a sim dih ka hen Galili ram mi a suak le, Jordan Varâl leiah Judai ram leiah a kal. ² Chun, mi zapi cherkhet nih an zûl le, chunah chun anmah chu a damh na rawh. ³ Chun, Farisai tla a sinah an hawng kal le, amah niknâk ding hen, "Zeiruang zawngah mi nih nupi mâk dân asi ma?" an ti. ⁴ Chun, anih nih chun, "A tîr thawk hen an siamtu nih khan nunau leh mipa a siam le, ⁵ ’Hi ruang hin mipa nih a nu leh a pa a kaltâk lai le, a nupi a sihawh lai; chun, an panih hen pum khat an si lai rawh,’ a ti ti nan rêl lo mazei? ⁶ Chuvachun, panih an silo rawh le, pumkhat an si rawh asi. Churuangah Pathian nih a sihawh rawh mi chu minung nih ṭhen lah seh," a ti le, a sâng. ⁷ Annih nih chun, "Asi chun, zeirangah me Mosi nih mâknâk lasui pêk hen mâk ding thu a pêk ne?" an ti. ⁸ Anih nih chun an sinah, "Mosi nih nan thinlung khauh ruangah ma kha nan nupi tla mâk a siang mi kha; sikhawmsele, a tîr thawk hen chu hâwi asi lo. ⁹ Kei nih chun ka nan ti na, âuzawng midang hen duhnâk ruangah silo hen, nupi mâk hen midang umpitu zawng chu ṭângdang a pawmtâk asi, mâk chia umpitu khawm ṭângdang a pawmtâk asi," a ti. ¹⁰ Ṭhiruai tla nih chun a sinah, "Nupi leikângah mipa thu chu hâwi asi chun umhnâk hi a ṭha lo," an ti. ¹¹ Anih lam nih chun an sinah, "Chu thu chu mi zârân nih an zâwt kho lo, a pêk mi tla cho lo nih chun. ¹² Mi tilkhei an nu paw sung thawk hen chu hâwi a suak mi rêng khawm an um le, mi tilkhei, minung kut hen khei mi khawm an um; mi tilkhei, Vân Ram ruangah tilkhei hen anna siam mi khawm an um. Âuzawng a zâwt kho mi vial nih zawt seh," a ti. ¹³ Chu liau chun an tlûnah a kut thâng hen thla a cham piak na ding hen a sinah ngâksia tetê an hawng put na le; chun ṭhiruai tla nih chun an fâi na. ¹⁴ Jisu lam nih chun, "Ngâksia tetê ka sinah hawng kaltir ule, nar lah na u; Vân Ram chu hi bang hâwi mi tla tâ asi ruangah," a ti. ¹⁵ Chun, an tlûnah a kut a thâng le, chunah mi chu a kal rawh. ¹⁶ Chun, minung pakhat Jisu sinah a hawng kal le, "Sîntirtu, zungzâl nungnâk ka nei khonâk ding hen thil ṭha zei me ka ti lai?" a ti. ¹⁷ Chun, anih nih chun, "Thil ṭha thu zeirangah na ka deih? A ṭha mi chu pakhat cho a um; zeikhawm si sele, nungnâk ah lût na duh chun thupêk tla chu zâwt rawh," a ti. ¹⁸ Chun, anih nih chun, "A zei tak hi me?" a ti. Chun, Jisu nih, "Mi na thah ding asi lo, ṭângdang na pawmtâk ding asi lo, na fîr ding asi lo, na phiar ding asi lo; ¹⁹ na nu leh na pa chawnglawmh rawh," ti mi tla leh, ’Nangmah na dâwt hâwi hen na zâwlbâwm tla na dâwt ding asi,’ ti hi," a ti. ²⁰ Tlangvâl nih chun a sinah, "Chubang thu zawzawng chu ka zâwt tâwn; zei ka tâng rih?" a ti. ²¹ Jisu nih a sinah, "Ṭha rangtling hen um na duh chun, kal le, na neih chu zuar le, mipâm tla sinah pêk rawh; chuvachun vân ah ro na nei lai, chun hawng le, hawng ka zûl," a ti. ²² Tlangvâl lam nih chun chu thu chu a theih hen ngaihsia tak hen a kal ving, sum tamtak nei mi asi ruangah. ²³ Chun, Jisu nih a ṭhiruai tla sinah, "Thungâi tak hen ka nan simh na, minei rangah Vân Ram ah lût chu har tak asi: ²⁴ Chun, ka nan simh nawlh na, minei Pathian Ram ah lût ngâk hen sangâwngsâu ṭhim kua ah lût a awl dauh," a ti. ²⁵ Chun, ṭhiruai tla nih chu chu an theih hen thungâi chê an ti le, "Âu me ruangsuak si kho lai?" an ti. ²⁶ Chun, Jisu nih annih chu a zauh le, an sinah, "Chu chu minung rangah ti kho asi lo le, Pathian rangah lam chun zeizawng ti kho asi," a ti. ²⁷ Chun, Peter nih a sim le, "Zauhnik, kannih nih zeizawng kaltâk hen ka nan zûl le, zei me kan tawng lai ne?" a ti le, a deih. ²⁸ Chun, Jisu nih an sinah, "Thungâi tak hen ka nan simh na, Siamtharnâk ah chun Minung Fapa a rokualnâk tophah ah a to tikah, nannih hawng ka zûltu tla hi, Israel phun leinih tla chu lâirêl hen, laltophah leinih lakah nan to bâk teh lai. ²⁹ Chun, mikip, in tla mawh, unau tla mawh, farnu tla mawh, pa mawh, nu mawh, fa tla mawh, ram tla mawh, ka min ruangah kaltâktu zawng nih chun a leh zâ a tawng lai le, zungzâl nungnâk anna ting lai. ³⁰ Sikhawmsele, mi tamtak, masachem um tla chu madungchem ah an um teh lai; madungchem ah umtu tla khawm masachem ah an um teh lai," a ti.

¹ "Vân Ram chu, in dâwngpu a grep dûm ah rianṭuantu tla ṭuantir na ding hen zîngtê ah suak mi hâwi chu asi. ² Chun, anih nih chun rianṭuantu tla hen ni khat ah denari khat lawh ding hen an thlûk ka hen a grep dûm ah a fial na rawh. ³ Chun, dâr kua ding liauah a va suak le, midang sumtuah mun ah dîr salam mi tla a muh le; ⁴ chun, an sinah, "Nannih khawm grep dûm ah va kal bâk u, a dâwh tâwk ding hen ka nan pêk na lai," a ti. ⁵ Chun, an kal rawh. Chun dâr leinih leh dâr thum ding ah a va suak nawlh le, chu hâwi ber hen a ti fâwn. ⁶ Chun, dâr nga ding liauah a va suak le, midang dîr mi tla a muh le, chun an sinah, ’Zeirangah me nî tlâk hen hinah nan dîr salam?’ a ti. ⁷ Annih nih chun a sinah, Âukhawm nih lawh hawng kan lâk lo ruangah,’ an ti. Anih nih chun an sinah, ’Nannih khawm grep dûm ah kal bâk u, a ti. ⁸ "Chun, zânleibâi rawh chun grep dûm dâwngpu nih chun a sum kilkâwitu sinah, ’Rianṭuantu tla kha kawh na le, a madungchem ah dawmh hen a masachem tiang hen an lawh pêk na rawh,’ a ti. ⁹ Chun, dâr nga tik dingah a mang na mi tla chu an hawng kal le, denari khat seng an tawng. ¹⁰ Chun, a masachem tla chu an hawng kal le, tam dauh tawng ding anna ruat le; sikhawmsele, annih khawm chu denari khat seng an tawng bâk. ¹¹ Chun, an tawng rawh chun, ’Hi bang madungchem tla nih hin dâr khat cho an ṭuan. ¹² Kannih sûn ah hamh leh thawsat tuartu tla tluk hen na siam ṭung fâwn,’ ti hen in dâwngpu tlûnah an chipchiar rawh. ¹³ Anih lam nih chun an lakah minung pakhat sinah, ’Kâwi, na tlûnah zeikhawm ka sual lo a, denari khat lawh ding hen rem kan ti mi silo mazei? ¹⁴ Na tâ kha lâk le, kal ko; nangmah ka nan pêk mi hâwi hen hi madungchem mi sinah khawm hin pêk ding ka duh asi. ¹⁵ Ka tâ asi mi chu ka thu thu hen ka ti ding asi lo ma? Asi lo leh, kei ka ṭha ruangah nangnih na nahsuah mu?’ ti hen, a sâng. ¹⁶ Chu hâwi hen madungchem tla chu masachem an si teh lai, masachem tla khawm chu madungchem an si teh lai," a ti. ¹⁷ Chun, Jisu Jerusalem ah a kal liauah ṭhiruai leinih tla chu a dang hen a kalpi na le, lampi ah chun an sinah, ¹⁸ "Ngâinik u, Jerusalem ah kan kal awt hi; Minung Fapa hi bâwlpu lal tla leh Dân sîntirtu tla kut ah tleihtir hen a um awt asi. Chun annih nih chun thi ding hen a tlûnah thu an thlûk lai le; ¹⁹ nihsuak siamnâk ah mang ding leh vuak ding leh kraws ah khenh ding hen Phundang tla sinah an pêk lai; chun ni thum ni ah thawk hen a um lai," a ti. ²⁰ Chu liau chun Zebedai fapa tla nu chu a fapa panih tla put hen a sinah a hawng kal le, mâi a mûk le, thil zeimawh a deih. ²¹ Chun, anih nih chun, "Zei na duh?" a ti. Chun, anih nih chun a sinah, "Hi ka fapa panih tla hi na Ram ah, na vawrhlei ah pakhat, na kehlei ah pakhat an to khonâk ding hen thu pêk," a ti. ²² Jisu nih, "Nan deih mi chu nan theih lo asi. Ka hâi din ding mi chu nan din kho lai mazei " a ti le, a sâng. Annih nih a sinah, "Ti kho e," an ti. ²³ Anih nih chun an sinah, "Ka hâi din ding mi chu nan din ngelchel lai; sikhawmsele, ka vawrhlei ah leh ka kehlei ah to ding thu chu kei pêk ding asi lo le, ka Pa nih a timhtuah piak mi tla rangah asi dauh lai," a ti. ²⁴ Chun, parâ tla nih chun chu chu an theih rawh chun unau panih tlûnah chun an thinrun rawh. ²⁵ Jisu lam nih chun annih tla chu a kawh na le, "Phundang tla tlûnah lâirêltu tla chu an tlûnah thungâi an lal fâk le, an mi lian tla nih chun thungâi thu an nei tâwn ti nan theih. ²⁶ Sikhawmsele, nannih lakah lam chun chu hâwi asi lai lo; âuzawng nanmah lakah mi lian si ding duhtu vial chu nan to-aw ah a um ding asi. ²⁷ Âuzawng nan lakah a masachem si ding duhtu vial chu nan to-aw ah a um ding asi. ²⁸ Minung Fapa hi mi nih rianṭuan piak ding hen a hawng lo le, rianṭuan ding leh mi tamtak tlanhnâk dingah a nungnâk pêk ding hen a hawng dauh asi," a ti. ²⁹ Chun, Jeriko thawk hen an suak liauah mi zapi cherkhet nih Jisu chu an zûl. ³⁰ Chun, mitchâw panih lam vâu ah to mi nih chun Jisu a hawng kal ti an theih kâ hen, "Lalpa, David Fapa, hawng kan zângfah," ti hen, an âu. ³¹ Chun, mi zapi tla nih chun dâisip ding hen an fâi na le; sikhawmsele, annih nih chun, "Lalpa, David Fapa, hawng kan zângfah," ti hen, fâk khun hen an âu. ³² Chun, Jisu a dîr le, anmah a kawh na le, "Nan tlûnah zeitin an ti na sele nan duh?" a ti. ³³ Annih nih chun a sinah, "Mit dei kan duh," an ti. ³⁴ Chun, Jisu nih thungâi a lungkham na le, an mit a tham le, chun an muh kho sawm le, amah chu an zûl rawh.

¹ Chun, Jerusalem ah an lût awt ah, Bethphage Oliv Tlâng chu an tlung rawh chun Jisu nih ṭhiruai panih a fial na le, ² an sinah, "Mâilei zâwn khua ah khin va kal ule, sanatung rêng mi, a kiangah a fatê hen nan muh ko lai; sût ule, ka sinah hawng ruai u. ³ Chun, âuzawng nih nan sinah zeizawng an sim chun, ’Lalpa nih a duh asi,’ nan ti lai le; chun anih nih chun a hawng fial sawm ko lai," a ti. ⁴ "Zauhnik, na Lalchem chu nâutir tak hen sanatung tlûnah leh sanatung fa tlûn takah to hen, ⁵ na sinah a hawng kal awt ti hen, Zion fanu chu simh rawh," ti hen, khuavâng kâ ah a sim mi kha a hawng tlung khonâk ding hen chubang chu a hawng um rawh asi. ⁶ Chun, ṭhiruai tla chu an va kal le, Jisu nih an sinah thu a pêk na hâwitê hen an ti. ⁷ Sanatung leh a fa chu an hawng ruai le, an tlûnah chun an puan tla an phah le, Jisu chu â chuan rawh. ⁸ Chun, mi zapi lakah tam dauh nih lampi ah chun an puan tla an phah le; midang nih thing nah an sât le, lampi ah an phah. ⁹ Chun, mi zapi a mâi leiah kal mi tla leh a zûltu tla nih chun, "David Fapa sinah Hosana! Lalpa min hen a hawng kal mi chu a thaw a suak. Chungnungchem ah khin Hosana!" ti hen, an âu. ¹⁰ Chun, Jerusalem ah a hawng lût rawh chun, khuatê hen, "Hi minung hi âu me si?" ti hen, an ri tul. ¹¹ Chun, mi zapi tla nih chun, "Hi minung hi khuavâng Jisu, Galili ram ah Nazaret mi chu asi," an ti. ¹² Chun, Jisu chu Pathian Biakin ah a lût le, biakin ah zeilo zuartu tla leh châwktu tla chu a nar na le, tangka thlengtu dawhkân tla leh vaṭhu zuartu tla tophah tla khawm chu a thlûk piak ver na le; ¹³ an sinah, " ’Ka in chu thlachamnâk in an ti lai,’ ti rîn asi; nannih lam nih chun rawkmang tla pûk ah nan siam dauh tâwn asi, a ti. ¹⁴ Chun, Pathian Biakin ah mitchâw tla leh kekhêng tla a sinah an hawng kal le; anmah a damh na. ¹⁵ Sikhawmsele, bâwlpu lal tla leh Dân sîntirtu tla nih a thilchê ti tla leh Pathian Biakin ah, "David Fapa, Hosana!" ti hen, ngâksia âu tla an muh rawh chun, thungâi an lungsi lo le, ¹⁶ a sinah, "Hi bang tla thusim hi na theih ma?" an ti. Chun, Jisu nih an sinah, "Theih ta a," ’Nausêm leh nûk din liau tla kâ ah suak mi nih chun sawrnâk na rangtlingtir rawh,’ ti mi hi nan rêl dah lo ma?" a ti. ¹⁷ Chun, annih chu a kaltâk na le, khuapi lakah mi chu a suak le, Bethani ah a kal le; chunah chun a riak rawh. ¹⁸ Chun, zîng ah khuapi leiah a kîr nawlh liauah a sungvâng rawh. ¹⁹ Chun, lam vâu ah chun theipi kûng a muh le, a va fûk le, a nah cho lo chu zeikhawm a muh lo. Chun, a sinah, "Zungzâl hen hawng rah lah rawh," a ti. Chun, theipi chu a uai sawm rawh. ²⁰ Chun, ṭhiruai tla nih chun chu chu an muh le, "Zei zia me theipi hi a uai sawm ko?" ti hen, thungâi chê an ti. ²¹ Chun, Jisu nih an sinah, "Thungâi tak hen ka nan simh na, lungnâk nan nei hen, nan zumhmaih lo chun, theipi lakah ti mi cho hi nan ti lai lo le, hi tlâng sinah khawm hin hawng a ṭhial le, tisumsumriat ah hawng a lawnh rawh, nan ti chun, nan ti hâwi hen a hawng um lai. ²² Chun, zeizawng lung bû hen nan deih mi zawng chu nan tawng lai," a ti le, a sâng. ²³ Chun, Pathian Biakin ah a lût nûnah a sîntir na liauah chun bâwlpu lal tla leh zatlâng upa tla chu an hawng kal le, a sinah, "Âu thu hen me hi bang thil hi na ti? Âu nih thu a nan pêk?" an ti. ²⁴ Chun, Jisu nih an sinah, "Kei khawm nih thu kâ khat ka nan deih na bâk lai, chu chu nan ka simh chun, âu thu hen me hi bang thil hi ka ti ka nan simh na bâk lai. ²⁵ Johan baptisma kha zei lei mi thu mesi? Vân ah mi thu ma, minung thu?" ti hen a deih na. Chun, anna ruat le, " ’Vân ah mi thu,’ kan ti chun, ’Zeirangah a thu nan lung lo ne?’ hawng kan ti fâwn lai. ²⁶ Chun, ’Minung thu," kan ti chun, mi zapi chu kan ṭih fâwn; mi zawzawng nih Johan chu khuavâng ah an ruat ruangah," an ti. ²⁷ Chun, Jisu rangah an sâng le, "Kan theih loh," an ti. Anih khawm nih chun, "Kei khawm nih âu thu hen me hi bang thil hi ka ti tih ka nan simh na bâk awt lo," a ti. ²⁸ "Sikhawmsele, nannih nih zeitin nan ngaih? Mi âu nih mawh fapa panih a nei. Pakhat sinah chun a va kal le, ’Ka fa, tusûn ah grep dûm ah rian va ṭuan’ a ti. ²⁹ Anih nih chun, ’Ka duh loh,’ a ti le, a sâng. Sikhawmsele, a nehnûn ah a thinlung chu a hawng a lêt le, a kal rawh. ³⁰ Chun, pakhat sinah khawm a va kal le, chu hâwi ber hen a ti. Chun, anih nih chun, ’Pa, ka kal lai,’ a ti le, a sâng. Sikhawmsele, a kal ṭung fâwn lo. ³¹ Chu minung panih nih chun zei mi dauh nih me an pa duhzia an ti?" a ti. Annih nih chun, "A masa dauh mi nih," an ti. Jisu nih an sinah, "Thungâi tak hen ka nan simh na, siah khawlhtu tla leh nunau â zuar mi tla nih chun Pathian Ram an lût khalh na awt ma hi! ³² Johan chu repnâk leikângah chun nan sinah a hawng kal le, amah chu nan lung lo le, siah khawlhtu tla leh nunau â zuar mi tla lam nih chun amah chu an lung le; nanmah nih chu chu nan muh nûn khawmah amah chu nan lung khonâk ding hen nan rim lêm lo. ³³ "Tahṭhimh thu dang ngâi u: mi âumawh in dâwngpu a um le, chu nih chun grep dûm a siam le; dâi hen a kulh le, grep sûrnâk khur a chawh le, in sâng a sak le; chun a bultu tla sinah a thlawh lawh ding hen a ap na le, ram dang ah a kal rawh. ³⁴ Chun, a rah kawih a zâ awt rawh chun a rah lâk ding hen a bultu tla sinah a sal tla a fial. ³⁵ Chun, a bultu tla nih chun a sal tla chu an tleih le, pakhat chu an vuak le, pakhat chu an thah le, pakhat chu lung hen an seh. ³⁶ Chun, sal dang a masa mi tla ngâk hen tam dauh a fial nawlh na le; annih tla tlûnah khawm chun chu hâwi ber hen an ti nawlh na. ³⁷ Chu nûnah lam chun, ’Ka fapa hi chu an zah lai,’ ti hen, a fapa chu an sinah a fial. ³⁸ Sikhawmsele, a bultu tla nih chun a fapa an muh kâ hen, ’Hi minung hi rotingtu ding asi, kan thah lai le, a ro ting ding mi hi kan ting tâk ving lai, an ti. ³⁹ Chun, anih chu an tleih le, grep dûm thawk hen lênglei ah an lawnh le, an thah rawh. ⁴⁰ "Chuvachun, grep dâwngpu a hawng tikah a bultu tla tlûnah chun zeitin a ti na lai rawh ne?" a ti. ⁴¹ Annih nih chun a sinah, "Chubang misual tla chu hamh tak hen a tlâutir na lai le, grep dûm bultu dang, a kawih tik kipah a rah tla chu a sinah pêk vimatu ding tla sinah a thlawh a lawh ding hen a pêk na lai," an ti. ⁴² Jisu nih an sinah, "Pathian lasuibu ah: ’In saktu tla lung duh lo kha, chu tak chu a kil ah lung herh chem a hawng si rawh. Chu chu Lalpa ti asi le, kan mitmuh ah a chê asi,’ ti hi nan rêl lo mazei? ⁴³ Churuangah chun Pathian Ram chu nan sinah mi suh asi lai le, a rah suah ding mi phun tla sinah pêk asi lai ti ka nan simh na. ⁴⁴ Chun, chu lung tlûnah tlû mi chu a kuai dip lai; a denh mi châng chu dip ver a rial lai," a ti. ⁴⁵ Chun, bâwlpu lal tla leh Farisai tla nih chun a tahṭhimh thu chu an theih le, anmah thu a sim ti an theih rawh. ⁴⁶ Chun, amah chu tleih an tum le; sikhawmsele mi zapi chu an ṭih fâwn, khuavâng ah an ruat ruangah.

¹ Chun, Jisu nih anmah a sawnh na le, an sinah tahṭhimh thu hen a simh nawlh na le, ² "Vân Ram chu lalchem âumawh a fapa rangah lâwinâk puai tuah mi hen tahṭhimh asi. ³ Chun, lâwinâk puai ei ding hen a sâwm na mi tla chu kawh ding hen a to-aw tla a fial le, sikhawmsele an hawng duh lo. ⁴ Chun, anih nih chun, ’Ka sâwm na mi tla sinah khan, ngâinik u, ka puai chu ka timhtuah thluh rawh; ka châwchal tla leh ka ran châwm bit tla ka thah le, zeizawng lîm asi rawh; lâwinâk puai ei ding hawng kal u rawh’ ti u," ti hen, to-aw dang tla a fial nawlh. ⁵ Sikhawmsele, zeikhawm an siar piak lo le, an kal ving, pakhat chu a lo ah a kal le, pakhat chu a sawlehnâk ah; ⁶ midang tla nih chun a to-aw tla chu an tleih le, ningzakkâi tak hen an siam le, an thah ving. ⁷ Chun, lalchem chu a thinthawk rawh; a kawrsen tla a fial le, chubang mi thahtu tla chu a veih dep na le, an khua khawm a duah piak hep na rawh. ⁸ Chun, to-aw tla sinah chun, ’Lâwinâk puai timhtuah thluh asi rawh, ka sâwm na mi tla lam kha chu ei tlâk an si lo. ⁹ Chuvachun, lamṭhuam tla ah kal ule, mi nan muh mi kip lâwinâk puai ei ding hen sâwm na u,’ a ti. ¹⁰ Chun chubang to-aw tla chu an suak le, lam tla ah chun an kal le, an muh mi kip misual leh mi ṭha tla khawm an pumh hep na le; chun lâwinâk puai einâk mun chu sâwm mi tla hen an khat rawh. ¹¹ "Sikhawmsele, lalchem chu sâwm mi tla zauh ding hen a hawng lût rawh chun, umhnâk puan aih lo mi minung pakhat chunah chun a muh le; ¹² chun, a sinah, ’Kâwi, zei zia me umhnâk puan aih lo hen hinah na hawng lût le?’ a ti. Chun, anih chu a dâisip. ¹³ Chun, lalchem nih chun a to-aw tla sinah, ’A kut leh kê phuar ule, lênglei ah mûi ah lawnh u; chunah chun ṭap leh hachang rial chu a um lai,’ a ti. ¹⁴ "Sâwm tla chu tamtak an si le, thîm tla lam chu tâwmtê an si," a ti. ¹⁵ Chu liau chun Farisai tla nih chun a thusim lakah an tleih khonâk ding kâng anna thluk. ¹⁶ Chun, an ṭhiruai tla, Herod murui sinah mi tla hen, a sinah an fial le, chubang tla nih chun, "Sîntirtu, mi dik tak na si le, dik tak hen Pathian leikâng thu na sîntir na tâwn le, sunhsak khun mi khawm na nei lo ti kan theih le; âukhawm thliar leh dangnâk na nei lo. ¹⁷ Chuvachun, zei hâwi hen na ngaih hawng kan simh nik? Rom lalchem sinah siah châwi hi dân asi ma si lo?" an ti. ¹⁸ Sikhawmsele, Jisu nih an sual zia chu a theih le, "Mi perpê tla, zeirangah nan ka nik? ¹⁹ Siah tangka chu hawng ka zauhtir u," a ti. ²⁰ Chun, a sinah denari khat an hawng put. Chun, anih nih chun an sinah, "Hi hi âu ruk leh âu min mesi?" a ti. ²¹ Annih nih chun a sinah, "Lalchem," an ti. Chun, anih nih an sinah, "Chu hâwi asi chun, Kaisar thil tla chu Kaisar sinah pêk ule, Pathian thil tla chu Pathian sinah pêk ko u me" a ti. ²² Chubang thu chu an theih rawh chun thungâi chê an ti le, amah chu an kaltâk le, an kal ving. ²³ Chu ni ber ah chun, Sadukai tla thawknawlhnâk um lo titu tla chu Jisu sinah an hawng kal. ²⁴ "Sîntirtu," "Mosi nih, mi fa neilo hen thi sele, a unaupa nih a nupi chu umpi hen a unaupa a thi mi rangah chi a thlâk piak ding asi, an ti. ²⁵ Asi chun ne, kan lakah pasal pasarih an um le, a upachem mi nih nupi a nei le; a thi le; chun, chi a thlâk lo ruangah a nupi chu a unaupa thâwn ding hen a roh; ²⁶ Chu hâwi ber hen panihnâk khawm nih, pathumnâk khawm nih, pasarih tiang hen an umpi chiau. ²⁷ Chun, an ektê hen an thih nûnah chun nunau khawm a thi rawh. ²⁸ Chun, thawknawlh tikah an pasarih lakah a zei mi nupi dauh chem asi lai? An ektê hen an umpi chiau dangâiah," ti hen, an deih. ²⁹ Jisu nih an sinah, "Pathian lasui thu leh Pathian thiltikhonâk nan theih lo ruangah nan ngaihpalh tâwn asi. ³⁰ Thawknawlhnâk ah chun nupi pasal anna umh awt lo le, vân ah vânmifial tla hâwi an si dauh awt asi. ³¹ Chun, mithi thawknawlhnâk thu chu, Pathian nih, ’Kei Abraham Pathian, Isak Pathian, Jakob Pathian ka si, ti hen nan sinah a sim mi kha nan rêl lo mazei? Pathian chu mithi Pathian asi lo le, a nung mi Pathian asi dauh," a ti le, a sâng. ³³ Chun, mi zapi tla nih chun chu chu an theih le, a thu sîntir chu thungâi chê an ti. ³⁴ Farisai tla lam nih chun Jisu nih Sadukai tla chu a êl le, a dawngh thlo na ti an theih hen anna pûm rawh. ³⁵ Chun, an lakah minung pakhat, Dân sîntirtu nih amah niknâk ding hen thu a deih. ³⁶ "Sîntirtu, Dân thu ah zei thupêk hi me a rokual chem?" ti hen. ³⁷ Chun, anih nih chun a sinah, " ’Lalpa na Pathian chu na thinlung zawzawng hen, na thlarau zawzawng hen, na dawnruatnâk zawzawng hen na dâwt ding asi, ti hi. ³⁸ Chu chu thupêk rokual chem leh herh chem asi. ³⁹ Chun, a sangtu chu hi hi asi: ’Nangmah na dâwt hâwi hen na zâwlbâwm tla khawm na dâwt ding asi,’ ti hi. ⁴⁰ Chu thupêk panih lakah chun dân leh khuavâng tla thu zawzawng â ngauh hep asi," a ti. ⁴¹ Chun, Farisai tla chu anna pûm liau chun, Jisu nih annih tla chu thu a deih na, ⁴² "Mesia chu zei hâwi nan ngaih? Âu fapa mesi?" a ti. Annih nih chun a sinah, "David Fapa," an ti. ⁴³ Anih nih chun an sinah, David nih Thlarau Thenhlimh hen, ⁴⁴ ’Lalpa nih chun ka Lalpa sinah, na mêlma tla na kezaphah tangah ka siah lân lo chu ka vawrhlei ah to rawh,’ a ti, ti hen, zeitin zia hen me anih chu Lalpa a ti ne? ⁴⁵ David nih anih chu, ’Lalpa’ a ti asi chun, zeitin a fapa asi kho?" a ti. ⁴⁶ Chun, âukhawm nih kâ khat khawm an sâng kho lo le, chu mi ri rawh chun âukhawm nih thu dang khawm an deih ngam lo rawh.

¹ Chun Jisu nih mi zapi tla leh a ṭhiruai tla sinah thu a sim le, ² "Dân sîntirtu leh Farisai tla chu Mosi tophah lakah an to tâwn le; ³ churuangah an simh na mi zawng chu ti ule; zâwt vima u; an thilti hâwi lam chu ti bâk lah u, sim lam chu an sim tâwn le, an ti ṭung tâwn lo asi. ⁴ Ritphurh hamhkâi tak an siam le, mi tak tlûnah an thâng tâwn le, anmah lam nih chun an kut dawng khawm hen an ṭhial duh lo. ⁵ An thilti zawzawng chu minung muh dingah asi an ti dauh tâwn. An thil bunh tla leh khimh tla chu an lian tir, an puansâr mûm an bawrtir tâwn. ⁶ Puaituahnâk tla ah mun ṭha chem ah, pumhnâk in ah tophah ṭha chem tla ah; ⁷ sumtuah mun ah chibai bûk tla, mi nih ’Sîntirtu,’ an ti na mi tla an duhzia tâwn. ⁸ Nannih lam chu ’Sîntirtu,’ ti ding hen um lah u, an sîntir natu chu pakhat asi le, nannih vial chu unau nan si. ⁹ Chun, tual tlûnah hin âukhawm ka pa ti lah u, nan Pa chu pakhat cho asi, vân ah mi khi. ¹⁰ Ruitu ti ding hen um lah u, nan Ruitu chu pakhat cho asi, Mesia chu. ¹¹ Nan lakah rokual chem mi chu nan to-aw ah um ding asi. ¹² Âuzawng â sung-û tir mi vial an nâu lai le, âuzawng â nâutir mi vial chawnglawmh hen an um lai. ¹³ "Nannih Dân sîntirtu leh Farisai perpê tla, nan tlûn a pit! Vân Ram lampi chu midang tla nan khâr piak na tâwn. Nannih tâ nih nan lût lai lo, mi lût ding tla khawm nan siang fâwn lo. ¹⁴ "Nannih Dân sîntirtu leh Farisai perpê tla, nan tlûn a pit! Numei tla sum nanmah nih nan ei hep le; chun, an in tla nan rawk le, chun mi muh ding hen sâwt tak thla nan cham le; hi ruangah hin mawhnâk lian dauh nan tawng lai. ¹⁵ "Nannih Dân sîntirtu leh Farisai perpê tla, nan tlûn a pit! Phun lût pakhat tê siam ding hen tisumsumriat leh mual nan hêl rê le, chun chu hâwi asi kâ hen anih chu nanmah hâwi hen letnih hen rêp mun ah kal ding tlâk hen nan siam! ¹⁶ "Nannih ruitu mitchâw, ’Âuzawng Pathian Biakin sim hen siatsirh mi vial, chu chu zeikhawm asi lo; âuzawng Pathian Biakin ah ngûn min sim hen siatsirhtu vial nih chun lîm ding asi, titu tla, nan tlûn a pit! ¹⁷ Nannih mi â, mitchâw tla! A zei mi me rokual dauh, ngûn ma, Pathian Biakin, ngûn thenhlimhtirtu chu? ¹⁸ ’Chun, âuzawng mâichâm min sim hen siatsirhtu vial chu zeikhawm asi lo, a tlûnah thilpêk min sim hen siatsirhtu vial lam nih chun lîm ding asi,’ nan ti. ¹⁹ Nannih mitchâw tla! A zei mi me rokual dauh, thilpêk ma mâichâm, thilpêk thenhlimhtirtu chu? ²⁰ Chuvachun, âuzawng mâichâm min sim hen siatsirhtu vial nih chun mâichâm leh a tlûnah um zawzawng min sim hen siat a sirh tâwn. ²¹ Âuzawng Pathian Biakin min sim hen siatsirhtu vial nih chun Pathian Biakin leh a sungah luahtu min sim hen siat a sirh tâwn. ²² Âuzawng vân min sim hen siatsirhtu vial nih chun Pathian laltophah leh a tlûnah to mi chu sim hen siat a sirh tâwn asi. ²³ "Nannih Dân sîntirtu leh Farisai perpê tla, nan tlûn a pit! Pudina tla, mohuri tla, zira tla chu parâ lû ah pakhat nan pêk tâwn le, Dân thu pawiherh dauh--repnâk, khuaruatnâk leh zumhkâinâk tla chu nan dâithlanh tâwn. Chubang tla chu asi nan ti ding mi chu, a dang tla chu tlawlh lêm lo hen. ²⁴ Nannih ruitu mitchâw, marhsâng hap hen sangâwngsâu dawlh ṭungtu tla! ²⁵ "Dân sîntirtu leh Farisai perpê tla! Nan tlûn a pit! Hâi leh khêng lênglei nan ṭâwl thiang le, a sunglei lam chu a thup hen lêpnâk leh sûm kholonâk hen a khat ṭung. ²⁶ Farisai mitchâw, hâi leh khêng sunglei chu ṭâwl masa rawh, a lênglei khawm a hawng thiang khonâk ding hen. ²⁷ "Dân sîntirtu leh Farisai perpê tla, nan tlûn a pit! Thlân ngo tîk hen bawih mi, lênglei ah dawh tak a lang, a sunglei lam chu mithi ruh tla leh nâwmtâm kip hen khat mi hâwi chu nan si. ²⁸ Nannih khawm chu hâwitê hen lênglei ah chun minung mitmuh hen rep tak hen nan lang tâwn le, nan sunglei ah lam chun perpetnâk leh sualnâk hen nan khat fâwn. ²⁹ "Nannih Dân sîntirtu leh Farisai perpê tla! Nan tlûn a pit! Khuavâng tla thlân in tla nan sak le, mi rep thlân tla khawm nan thuamh; ³⁰ ’Kan pu tla dam liau khan um menza bâk khawmsele an thahnâk ah chun kanna tel lai lo, nan ti tâwn. ³¹ Chuvachun, khuavâng tla thahtu tla fa nan si ti nanna theihtir asi. ³² Nan pu tla nih an dawmh mi chu lîm dâidua u. ³³ Rûl tla, rûl thlâk tla, Gehena lâirêlnâk chu zeitin nan âwl kho lai? ³⁴ Churuang chun nan sinah khuavâng tla, mifing tla, Dân sîntirtu tla ka hawng fial awt; zeimaw mi nan thah lai le, kraws ah nan khenh lai, zeimaw mi nanna pumhnâk in tla ah savun ri hen nan vuak lai le, khua kip ah nan nehsawh vima na lai. ³⁵ Chuvachun, Abel mi rep tak thahnâk thawk hen Pathian Biakin leh mâichâm karah Barakia fapa Zekaria nan thah mi tiang khan, tual tlûnah mi rep an thah mi zawzawng chu nanmah tlûnah rêpnâk a hawng tlung kho lai. ³⁶ Thungâi tak hen ka nan simh na, chubang zawzawng chu tusan mi tla tlûnah a hawng tlung lai. ³⁷ "Aw Jerusalem, Jerusalem! Khuavâng tla thahtu, na sinah an hawng fial mi tla lung hen thi thlo hen sehtu! Ârpinu nih a fa tla a thla tangah a khurh na hâwi hen na fa tla vei zeizat me khurh ka tum mi kha! Sikhawmsele, na duh lo. ³⁸ Zauhnik u, nan Pathian Biakin chu a karo hen mâk hen a um rawh. ³⁹ Ka nan simh na, ’Lalpa min hen a hawng mi chu a thaw a suak,’ nan ti lân lo chu tu thawk hen nan ka muh lai lo rawh mahi," a ti.

¹ Chun, Jisu chu Pathian Biakin ah mi a suak le, a kal awt ving. Chun, a ṭhiruai tla chu Pathian Biakin zauhtir ding hen a sinah an hawng kal. ² Anih lam nih chun an sinah, "Hi bang zawzawng hi nan muh mu? Thungâi tak hen ka nan simh na, chimtir lo hen lung â tiang mi rerêng hinah a um lai lo," a ti le, a sâng. ³ Chun, Oliv Tlâng ah chun a to liauah ṭhiruai tla anmah lâwng hen a sinah an hawng kal le, "Chubang chu zeitik ah me a hawng um lai? Na hawng kal nawlhnâk singsiahnâk chu zei me si lai? Hawng kan simh rawh," an ti. ⁴ Jisu nih a sâng na le, "Âukhawm nih an perpet na lo ding hen a thiamthih u. ⁵ Mi tamtak nih, ’Mesia chu ka si,’ ti hen, keimah min sâl hen an hawng kal lai le, mi tamtak an perpet awt ruangah. ⁶ Chun, tuknâk thuthang nan theih teh lai; nan lawksawng lonâk ding hen a thiamthih u; chubang tla chu a hawng tlung ding rêng asi. Sikhawmsele, dawnghnâk chu asi lai lo rih. ⁷ Phun dang leh phun dang anna do lai le, ram dang leh ram dang anna do lai. Mun dang dangah pâm a tlung lai le, lî tla â nîn lai. ⁸ Chubang zawzawng chu nunau nganfâk dawmhnâk asi. ⁹ "Chu tikah chun hamh tuar ding hen a nan tleihtir na lai le, an thah na lai; ka min ruangah phun zawzawng huat nan si lai. ¹⁰ Chu tikah chun mi tamtak an zumhnâk an bângtâk lai le, anna tleihtir tawnh lai, anna hua tawnh lai. ¹¹ Chun, khuavâng telê tamtak khawm an hawng suak lai le, mi tamtak an perpet lai. ¹² Chun, sualnâk a pung awt ruangah mi tam dauh dâwtnâk chu a dâi teh lai. ¹³ Sikhawmsele, a dawngh tiang hen tuar huamtu vial chu, chu tak chu ruangsuah hen a um lai. ¹⁴ Chun, hi Ram Thâwngthâng Ṭha hi phun zawzawng theihtirnâk ding hen laikulh zawzawng ah sim hen a um lai; churawhchun a dawnghnâk a tlung lai. ¹⁵ "Chuvachun, ṭhiautu Fihnungkâi khuavâng Danial sim mi kha, mun thenhlimh ah dîr hen nan muh tikah (a rêl mi zawng nih a umzia theih seh), ¹⁶ Judai ram ah um tla chu tlâng ah tek na seh. ¹⁷ In tlûnah um mi chu in ah zeilo lâk ding hen tum lah seh. ¹⁸ Chun, lo ah um mi chu a puan lâk ding hen kîr nawlh lah seh. ¹⁹ Chubang ni ah chun a râi mi tla leh nauno nei tla tlûn chu a pit lai! ²⁰ Nan tek tik ding busik ah mawh, Dinhni ah mawh a hawng tlung lonâk ding hen thlacham u. ²¹ Chu tikah chun hamhnâk fâk tak a um awt ruangah; chu hâwi hen a fâk mi chu tual umtir thawk hen tutiang hen a um dah lo le, um khawm zeitik khawmah a um nawlh lai lo rawh. ²² Chun, chu ni tla chu tâwitir lah sele, minung rerêng dam hen an suak lai lo. Sikhawmsele, thîm tla ruangah chun chubang ni tla chu tâwitir asi lai. ²³ "Chu tikah chun âuzawng nih nan sinah, ’Zauhnik, Mesia chu hinah a um,’ mawh ’Hinah hi,’ mawh an ti chun lung lah u. ²⁴ Mesia telê leh khuavâng telê tla an hawng suak awt ruangah; chu tla nih chun ti kho sele thîm tla men an perpet khonâk ding hen singsiahnâk leh thilchê rokual tak tla an ti lai. ²⁵ Ngâinik u, ka nan simhkan na hi. ²⁶ "Chuvachun, nan sinah, ’Zauhnik u, ramkaro ah a um, a nan ti na chun suak lah u; ’Zauhnik u, in kardang sungah a um, a nan ti na chun lung lah u. ²⁷ Mîmthlâ sak leiah a hawng lek le, thlanglei tiang khawm hen a lang tâwn le, Minung Fapa a hawng kal nawlhnâk chu chu hâwi chu asi awt ruangah. ²⁸ "Kha zeizawng ah sa ruak umnâk kipah ruaklâwmmû tla anna pûm lai. ²⁹ "Sikhawmsele, chubang hamhnâk ni tla nûntê ah, ’Nî mûitir hen a um lai, thlâ a chêu lai lo rawh le, vân thawk hen ârfi tla an tlâ lai le, vân thiltikhonâk tla chu ninh asi lai. ³⁰ Chu tik ah chun Minung Fapa singsiahnâk chu vândum ah a lang lai. Chu tik ah chun tual ah chi kip nih an ir an chumh lai le, chun Minung Fapa hi thiltikhonâk leh rokualnâk fâk hen vân sûm tlûnah a hawng kal mi an muh lai. ³¹ Chun, a vânmifial tla chu tâwtawrâwt hâu fâk tak hen a fial na lai. Chun thîm mi tla chu kâwlkil li ah mi dawnghnâk thawk hen khatlei dawngh tiang hen an pumh lai. ³² "Chun, theipi kûng ah hin tahṭhimh thu a sîn u; a ṭeng a hawng no le, a nah a hawng chawrh chun ṭhâlpini a hawng suak awt ti nan theih tâwn. ³³ Chu hâwi ber hen nannih khawm nih chubang zawzawng chu nan muh tikah amah chu a hawng nâi rawh, kawtkari ah a um ti theih u. ³⁴ Thungâi tak hen ka nan simh na, chubang zawzawng chu a tlungkim lân lo chu tusan minung tla hi an vei lai lo. ³⁵ Tual leh vân a vei lai le, ka thu lam chu a vei lai lo. ³⁶ "Sikhawmsele, chu ni leh a tik thu Pa cho lo nih chun âukhawm nih, vân ah vânmifial khawm nih, Fapa khawm nih an theih loh. ³⁷ Chun, Noa dam liau hâwi khan Minung Fapa hawng kal nawlhnâk chu asi lai. ³⁸ Chu ni tla ah buanso tlung lân tla ah chun Noa lawng ah a lût ni tiang hen an ei hen an bâr le, nupi pasal anna umh tâwn. ³⁹ Buanso a hawng tlung le, an ektê hen a lâk ver na lân lo chu zeikhawm an theih lo. Minung Fapa hawng kal nawlhnâk chu chu hâwi ber asi lai. ⁴⁰ Chu tikah chun, lo ah minung panih an um lai le, pakhat chu kalpi ving hen a um lai le, pakhat chu mâk hen a um lai. ⁴¹ Nunau panih fâng rialnâk ah chun fâng rial hen an um lai le, pakhat chu kalpi ving hen a um lai le, pakhat chu mâk hen a um lai. ⁴² Churuang chun a ringrâwn u, zei ni ah me nan Lalpa a hawng kal awt nan theih lo ruangah. ⁴³ Sikhawmsele, hi hi theih u, mifîr a hawng kal tik ding in dâwngpu nih theih sele, a vêng lai le, a in a rawktir lai lo. ⁴⁴ Churuangah, nannih khawm râlring kumza hen um u, nanna râlring lo tikah Minung Fapa a hawng kal awt ruangah. ⁴⁵ "To-aw zumhkâi, fing tak, a pu nih a tik kipah an buh ting ding ṭhen piak ding hen a dâwngsung tla tlûnah hotu ah a siam mi chu, a zei mi chem me asi lai? ⁴⁶ A pu a hawng kal tik ah to-aw chubang hâwitê ti hen a hawng muh mi chu a thaw a suak lai. ⁴⁷ Thungâi tak hen ka nan simh na, a neih zawzawng tlûnah hotu ah a siam lai. ⁴⁸ Sikhawmsele, to-aw sual nih chun a thinlung hen, ’Ka pu a hawng sawm lai lo,’ ti hen, ⁴⁹ a to-aw hâwi tla vuak hen, mi a rî mi tla sinah ei hen bâr sele, ⁵⁰ chu to-aw pu chu â râlring lo ni ah, a theih lo karah a hawng kal lai le; ⁵¹ tan nih hen a hawng suah lai le, mi perpê tla tingvo hâwi a tingtir lai. Chunah chun ṭap leh hachang rial chu a um lai.

¹ Chu tik chun Vân Ram chu nungâk thenhlimh parâ an khâwnvâr put hen mo dâwngpu dawng ding hen suak mi tla hen tahṭhimh asi rawh lai. ² An lakah panga an â le, panga an fing. ³ An â mi tla nih chun an khâwnvâr tla an put le, a hâng lam chu an put sih lo. ⁴ A fing mi tla lam nih chun an khâwnvâr tla an put le, an dûr tla lakah a hâng khawm an put sih. ⁵ Chun, mo dâwngpu chu a hawng tlung tlâi ruangah an ektê hen an ngû le, an it thlit rawh. ⁶ "Chun, zân lâi chirah chun, ’Ngâinik u, mo dâwngpu a hawng kal rawh, amah dawng ding hen hawng suak u!’ ti hen, âu hâu a hawng um rawh. ⁷ Chu kâ chun nungâk thenhlimh tla chu an thawk hep le, khâwnvâr tla an timhtuah. ⁸ Chun, a â mi tla nih a fing mi tla sinah, ’Nan khâwnvâr hâng kha hawng kan pêk bâk u; kan khâwnvâr tla a mit awt, an ti. ⁹ Sikhawmsele, a fing mi tla nih chun, ’Kannih leh nannih rangah a tinh lai loh; a zuartu tla sinah kal ule, châwk bâk u,’ ti hen, an sâng. ¹⁰ Chun, châwk ding hen an kal kar chun mo dâwngpu chu a hawng tlung rawh. Chun, a râlring mi tla chu amah hen lâwinâk puai ah an lût le, chun, in chu an khâr rawh. ¹¹ "Chu nûnah chun nungâk thenhlimh dang tla khawm chu an hawng tleng le, ’Ka pu, ka pu, in hawng kan awnh!’ an ti. ¹² Anih lam nih chun, ’Thungâi tak hen ka nan simh na, ka nan theih na lo asi, a ti le, a sâng. ¹³ Chuvachun, ringrâwn hen um u, a ni leh a tik chu nan theih lo ruangah. ¹⁴ "Mi ram dang ah kal awt hen, a to-aw tla kawh hen, a sum tla an sinah a kiltir na mi hâwi chu asi. ¹⁵ To-aw pakhat sinah talent nga a pêk le, to-aw dang sinah talent nih a pêk le, to-aw dang sinah talent khat a pêk. An ti kho tâwk chiau hen a pêk na le, chun a kal rawh. ¹⁶ Chun, talent nga tingtu chu, chu hen chun saw a leh sawm le, talent nga dang a suah. ¹⁷ Chu hâwi ber hen talent nih tingtu khawm nih chun talent nih dang a suah rawh. ¹⁸ Talent khat tingtu lam chu a va kal le, khur a chawh le, a pu tangka chu a thuh rawh. ¹⁹ "Chun, sâwt tak nûnah chun chu to-aw tla pu chu a hawng tlung le, an sinah a sum thâwngthâng a chek. ²⁰ Chun, talent nga tingtu chu a hawng kal le, talent nga dang a hawng put le, ’Ka pu, nangnih talent nga na ka kiltir mi kha; zauhnik talent nga dang ka suah,’ a ti. ²¹ Anih nih chun a sinah, ’To-aw ṭha leh zumhkâi, na ti zia a ṭha, tâwmtê tlûnah zumh na kâi le, tamtak tlûnah ka nan umtir lai; na pu lâwmnâk ah lût rawh, a ti. ²² "Chun, talent nih tingtu khawm chu a hawng kal le, Ka pu, nangnih talent nih na hawng ka kiltir mi kha; zauhnik, talent nih dang ka suah, a ti. ²³ A pu nih chun a sinah, ’To-aw ṭha leh zumhkâi na ti zia a ṭha; tâwmtê tlûnah zumh na kâi le, tamtak tlûnah ka nan umtir lai; na pu lâwmnâk ah lût rawh, a ti. ²⁴ "Chun, talent khat tingtu khawm chu a hawng kal le, ’Ka pu, mi tengkher na si ti ka nan theih le, na tuh lonâk khawmah na ât tâwn le, na vawrh lo mi khawm na pumh tâwn asi. ²⁵ Chun, ka lâu le, ka va kal le, na talent kha tual ah ka thuh le; zauhnik, na tâ tê kha na muh nawlh hi,’ a ti. ²⁶ "A pu nih chun a sinah, ’To-aw rualo leh zângzêpa, ka tuh lonâk khawmah ka ât mi leh ka vawrh lonâk ah ka pumh tâwn ti na theih mu? ²⁷ Chu hâwi asi chun, ka tangka chu sawlehtu tla sinah siah rawh ding na si, chuvachun ka hawng tlung tikah ka tâ hi a pung hen ka tawng nawlh ding asi. ²⁸ Chun, a talent khat kha lak piak ule, talent râ neitu sinah pêk u. ²⁹ Âuzawng a nei mi chu an pêk sap na lai le, an nei tam lai. Âuzawng a neilo mi lam chu a neihlem khawm an lâk piak lai. ³⁰ Chun, to-aw mang tlâklo kha lênglei mûi ah chun lawnh u; chunah chun ṭap leh hachang rial a um lai, a ti le, a sâng. ³¹ "Sikhawmsele, Minung Fapa hi, a vânmifial tla zawzawng hen, a rokualnâk hen a hawng kal tikah a rokualnâk laltophah ah a to lai. ³² Chun, a mâika ah phun kip anna pûm lai le, dawrâ vêngtu nih kêl lakah mi dawrâ a thlei hâwi hen annih tla chu a thlei lai. ³³ Chun, dawrâ tla chu a vawrhlei ah a siah lai le, kêl tla chu a kehlei ah a siah lai. ³⁴ Chu tikah chun Lalchem nih chun a vawrhlei ah mi tla sinah, ’Ka Pa malsâwm mi tla, hawng ule, laikulh siam tîr thawk hen nan rangah Ram timhtuah mi chu a ting u. ³⁵ Ka sung a vâng liauah nannih nih ei ding nan ka pêk le; ka tî a hâl liauah din ding nan ka pêk le; khual ka si liauah nan ka tlungtir. ³⁶ Takkaro ka si liauah puan nan ka aihtir le; ka damlo liauah nan ka veh; rêngin ah ka um liauah ka sinah nan hawng kal asi, a ti lai. ³⁷ "Chu tikah chun mi rep tla nih chun, ’Lalpa, zeitik ah sungvâng hen kan muh le, ei ding kan nan pêk? Tîhâl hen kan muh le, din ding kan nan pêk? ³⁸ Zeitik ah khual hen kan muh le, kan nan tlungtir? Takkaro hen kan muh le, nipuan kan nan aihtir? ³⁹ Zeitik ah damlo hen mawh rêngin ah mawh kan nan muh le, na sinah kan hawng kal? ’ ti hen, an sâng lai. ⁴⁰ Chun, Lalchem nih chun an sinah, ’Thungâi tak hen ka nan simh na, hi bang ka unau mêchem mi tla lakah pakhat tlûnah nan ti mi chu ka tlûnah ti nan si, ti hen, a sâng na lai. ⁴¹ "Chu thluh chun, a kehlei ah mi tla sinah khawm chun, ’Siatbarh mi tla, zungzâl mei diabol leh mifial tla rangah an timhtuah mi lakah chun hawng ka kaltâk u, ⁴² ka sung a vâng liauah nannih nih ei ding nan ka pêk lo; ka tî a hâl liauah din ding nan ka pêk lo; ⁴³ khual ka si liauah nan in ah nan ka tlungtir lo; takkaro ka si liauah puan nan ka aihtir lo; damlo leh rêngin ah ka um liauah nan ka veh lo,’ a ti lai. ⁴⁴ Chu tikah chun annih khawm nih, Lalpa, zeitik ah me sungvâng hen mawh, tîhâl hen mawh, khual hen mawh, takkaro hen mawh, damlo hen mawh, rêngin ah mawh kan muh le, na rian kan ṭuan piak lo?’ ti hen, an sâng lai. ⁴⁵ Chun, anih nih chun, an sinah, ’Thungâi tak hen ka nan simh na, hi bang mi mêchem tla lakah pakhat tlûnah nan ti lo chun ka tlûnah ti lo nan si, ti hen, a sâng na lai. ⁴⁶ Chun, chubang chu zungzâl rêpnâk ah an kal lai; mi rep tla lam chu zungzâl nungnâk ah an kal lai," a ti.

¹ Chun hi hâwi hi asi le, Jisu nih chubang thu zawzawng chu a sim thluh rawh chun, a ṭhiruai tla sinah, ² "Ni nihnâk ah Kalkanh Kût a hawng um awt ti nan theih, Minung Fapa hi khenh ding hen an tleihtir awt asi," a ti. ³ Chu liau chun Bâwlpu Lalchem Kaiapha an ti mi inkulh sung tualmâi ah chun bâwlpu lal tla leh zatlâng upa tla chu anna pûm; ⁴ Jisu chu ngamlêm pêk hen tleih hen an thah khonâk ding hen anna thluk le; ⁵ sikhawmsele, Kût sung chun si lah seh, chu lo chun zatlâng lakah nawknâk a hawng um sual lai," an ti, ⁶ Chun, Jisu chu Bethani ah, phâr Simon in ah a um liauah, ⁷ nunau pakhat alabasta bâwm ah sariak rimthâw man har tak put hen a sinah a hawng kal le, buh a ei liauah a lû ah a tawih. ⁸ Sikhawmsele, ṭhiruai tla nih chun chu chu an muh chun an thinthawk le, "Zeirangah me hi hâwi hen a veih salam? ⁹ Hi sariak hi man tamtak zuar hen, mipâm tla sinah pêk kho asi mi!" an ti. ¹⁰ Jisu lam nih chun chu chu a theih le, an sinah, "Nunau hi zeirangah nan nawktir? Ka tlûnah thil ṭha tak a ti asi. ¹¹ Mipâm tla chu nan sinah um kumza ding an si lo mazei, kei lam chu nan sinah um kumza ding ka si lo. ¹² Hi sariak rimthâw hen ka taksa a tawih mi hi, an hawng ka vûinâk ding mi rangah a timhtuah asi. ¹³ Thungâi tak hen ka nan simh na, laikulh zawzawng ah hi Thâwngthâng Ṭha an simnâk zawngah hi nunau thilti khawm hi amah theihkumzanâk ding hen an sim vima bâk lai," a ti. ¹⁴ Chu nûnah chun leinih tla lakah pakhat Juda Iskariot an ti mi chu bâwlpu lal tla sinah a kal le, ¹⁵ "Amah chu kan tleihtir na lai le, zei nan ka pêk lai?" a ti. Chun, tangka shekel sâwmthum pêk ding an tiamh. ¹⁶ Chu nûnah chun tleih ding hen remkâng tik a hâwl rawh. ¹⁷ Chun, Sang Thilnu telhlo ni, ni masachem ah ṭhiruai tla chu Jisu sinah an hawng kal le, "Kalkanh Kût buh einâk ding hen kha zeiah me an timhtuah piak sele na duh?" an ti. ¹⁸ Chun, anih nih chun, "Khuapi ah âumawh sinah kal ule, a sinah, ’Sîntirtu nih chun ka tik a nâi rawh; ka ṭhiruai le hen Kalkanh Kût na in ah kan mang lai, a ti,’ va ti u," a ti. ¹⁹ Chun, Jisu nih an sinah a ti mi hâwi hen ṭhiruai tla nih chun an ti, chun Kalkanh Kût buh chu an timhtuah rawh. ²⁰ Chun, zânleibâi asi rawh chun, ṭhiruai leinih tla hen buh an dûm le; ²¹ chun, an ei liauah anih nih chun, "Thungâi tak hen ka nan simh na, nan lakah minung pakhat nih a hawng ka tleihtir lai," a ti. ²² Chun, thungâi an lawksawng le, a sinah, "Lalpa, keimah ma?" an ti chiau. ²³ Chun, anih nih chun, "Khêng hawng ka purhpitu tak nih a hawng ka tleihtir lai. ²⁴ Minung Fapa hi a thâwngthâng an rîn hâwitê khan a kal awt asi. Sikhawmsele, Minung Fapa tleihtirtu ding minung tlûn chu a pit! Chu minung chu suak lah sele a rangah a ṭha dauh lai," ti hen a sâng. ²⁵ Chun, a tleihtirtu ding mi Juda nih a sâng le, "Rabbi, keimah ma?" a ti. Anih nih chun a sinah, "Si ta a," a ti. ²⁶ Chun, an ei liauah Jisu nih sang a lâk le, mal a sâwm le, a phel le; chun a ṭhiruai tla sinah a pêk le, "Lâk ule, ei u; hi hi ka taksa asi," a ti. ²⁷ Chun, hâi a lâk le, lâwmthu a sim le, an sinah a pêk le, "Nan ektê hen din u; ²⁸ hi hi ka thisen, sual tla ngaihdamnâk dingah mi tamtak rangah suak mi thutiamnâk chu asi. ²⁹ Sikhawmsele, ka nan simh na, ka Pa Ram ah nanmah tla hen a thar ka din ni a tlung lân lo chu tu thawk hen grep zûn rah lakah mi hi ka din nawlh lai lo rawh," a ti. ³⁰ Chun, la an sak thluh rawh chun an suak le, Oliv Tlâng ah chun an kal rawh. ³¹ Chun, Jisu nih an sinah, "Tuzân hin nan ektê hen nan ka kaltâk ver lai; ’Dawrâ vêngtu chu ka vuak lai le, dawrâ rual chu anna rek ver lai,’ ti rîn asi ruangah. ³² Sikhawmsele, ka thawknawlh nûnah Galili ram ah nan mâi leiah ka kal lai," a ti. ³³ Peter lam nih chun a sinah, "An ektê hen an kaltâk khawm sele, kei lam chu ka nan kaltâk rîlmâl lai lo," ti hen a sâng. ³⁴ Jisu nih a sinah, "Thungâi tak hen ka nan simh, tuzân ah âr khuang lânah veithum na ka pheh lai," a ti. ³⁵ Peter nih a sinah, "Na thihnâk ah chun thi bâk awt khawmsele ka nan pheh rîlmâl lai lo," a ti. Chu hâwi hen ṭhiruai tla zawzawng nih chun an ti chiau. ³⁶ Chu thluh chun Jisu chu anmah tla hen munkhat hen Getsemani an ti mi chu an tleng le, chun a ṭhiruai tla sinah, "Khinah thla ka cham kar vial chu hinah hin to u," a ti. ³⁷ Chun, Peter leh Zebedai fapa panih chu a put na le, a ngaihsia hen thungâi a lawksawng. ³⁸ Chun an sinah, "Ka thinlung thungâi a ngaihsia, thihnâk rê asi; hinah hin um ule, hawng ka vêngpi u," a ti. ³⁹ Chun, tâwm hen mâi leiah a va kal le, a bawkbukhup le, "Ka Pa, tikho asi chun hi hâi nih hin hawng ka lanh seh; sikhawmsele keimah thu silo hen, nangmah thu thu si dauh seh," ti hen thla a cham. ⁴⁰ Chun, ṭhiruai tla sinah a hawng kal le, annih chu it riap hen a muh na, chun Peter sinah, "Nannih nih dârkar khat men nan ka vêngpi kho lo mu? ⁴¹ Lêmnâk ah nan lût lonâk ding hen râlring kumza hen thlacham u. Thlarau lam nih chun a huam le, taksa lam chu a chak lo asi," a ti. ⁴² Chun, veinihnâk ah a va kal le, thla a cham nawlh le, "Ka Pa, din lo hen hi hâi nih hin hawng ka lanh kho lo thlo chun nangah thu thu si seh," a ti. ⁴³ Chun, a hawng kal nawlh le, annih murui chu it riap hen a muh nawlh na le, thungâi an itmu a suak ruangah. ⁴⁴ Chun, a kaltâk na nawlh le, veithumnâk ah a thusim lîlâ thla a cham nawlh. ⁴⁵ Chu thluh chun ṭhiruai tla sinah a hawng nawlh le, an sinah, "Tuah lam chun it ule, a dîn u rawh. Zauhnik u, a tik chu a tlung rawh, Minung Fapa hi misual tla kut ah an tleihtir awt hi. ⁴⁶ Thawk ule, kan kal lai. Zauhnik u, hawng ka tleihtirtu ding chu a nâi rawh hi," a ti. ⁴⁷ Chun, a sim liau chirah Juda, leinih tla lakah pakhat chu a hawng tleng rawh. Amah rual hen bâwlpu lal leh zatlâng upa tla sin thawk hen mi zapi cherkhet nâmsâu leh talhbo put hen an hawng tleng bâk. ⁴⁸ Chun, a tleihtirtu ding mi nih chun singsiahnâk ding a simhkan ver na, "Ka châwchawk mi chu amah chu asi lai, tleih u," ti hen. ⁴⁹ Chun, Jisu chu a va fûk sawm le, "Chibai, Rabbi" ti hen, a châwchawk chiam. ⁵⁰ Chun, Jisu nih a sinah, "Kâwi, na hawng san chu ti rawh," a ti. Chu kâ hen Jisu chu an fûk le, an tleih rawh. ⁵¹ Chun, Jisu murui lakah mi pakhat nih chun a kut hen a banh le, nâmsâu a phâwi le, Bâwlpu Lalchem sal chu a lengh le, a nakhaw tla phak hen a themh. ⁵² Chun, Jisu nih a sinah, "Na nâmsâu kha a siahnâk ah siah nawlh, nâmsâu lektu tla vial chu nâmsâu ber hen an thi awt asi. ⁵³ Tu khawmah vânmifial sâng ruk mun leinih ngâk a tam dauh hawng ka fial piak ding hen ka Pa sinah ngiar kho lo hen ma na ka ruat? ⁵⁴ Sikhawmsele, ngiar menza khawmsele zeitin Pathian lasui thu hi hâwi hen a hawng um ding mi thu hi a hawng tlung kho lai?" a ti. ⁵⁵ Chu liau tak chun Jisu nih mi zapi tla sinah chun, "Nâmsâu tla, talhbo tla put hen rawkmang tleih ding hâwi hen hawng ka tleih ding hen nan hawng suak mu? Pathian Biakin ah nisiar sîntir na hen ka to le, nan ka tleih ṭung lo. ⁵⁶ Sikhawmsele, khuavâng lasuirîn tla chu a tlung khonâk ding hen hi bang zawzawng hi a hawng um rawh asi hi," a ti. Chu liau chun ṭhiruai tla zawzawng nih chun amah chu an thlahthlamh le, an tek ver. ⁵⁷ Chun, Jisu tleihtu tla nih chun Bâwlpu Lalchem Kaiapha in ah Dân sîntirtu tla leh upa tla anna pûmnâk ah chun anih chu an kalpi rawh. ⁵⁸ Sikhawmsele, Peter nih lât tak thawk hen amah chu a zûl le, Bâwlpu Lalchem in kulh sung tualmâi tiang hen; chun, a va lût le, a dawnghnâk muh ding hen vêngtu tla lakah a va to bâk. ⁵⁹ Chun, amah chu an thah khonâk ding hen bâwlpu lal tla leh lâirêltu tla zawzawng nih chun Jisu phiarnâk an hâwl le; ⁶⁰ âwkrâwl saksi tamtak hawng kal na khawm sele zeitin khawm an tawng lo. ⁶¹ A nehnûnah lam chun minung panih an hawng kal le, "Hi minung nih hin ’Pathian Biakin siat hen ni thum sung ah ka sak nawlh kho lai,’ a ti," an ti. ⁶² Chun, Bâwlpu Lalchem chu a dîr le, a sinah, "Zeitin khawm na sâng lo mu? Hi bang tla nih an phiarnâk hi zei ti zia mesi?" a ti. ⁶³ Jisu lam chu a dâisip. Chun, Bâwlpu Lalchem nih chun a sinah, "Pathian nung min hen ka nan fâi. Mesia Pathian Fapa chu na si ma? Hawng kan simh," a ti. ⁶⁴ Jisu nih a sinah, "Si ta a. Sikhawmsele, ka nan simh, hi nûnah Minung Fapa hi thiltikhonâk vawrhlei ah to hen, a vân sûm tlûnah a hawng kal mi nan muh awt asi," a ti. ⁶⁵ Chun, Bâwlpu Lalchem nih chun a nipuan tla a thlêk le, "Pathian a simsiat rawh; theihpitu dang zei kan herh lai rawh? Pathian a simsiat zia tuah nan theih rawh, zeitin nan ngaih?" a ti. ⁶⁶ Annih nih chun, "Thi tlâk asi," ti hen, an sâng. ⁶⁷ Chun, a mêl ah chil an sah le, an vuak le; zeimaw mi nih chun, ⁶⁸ "Nang, Mesia, âu nih a nan bengh? Hawng kan simh," ti hen, an bengh. ⁶⁹ Chun, Peter chu lêng ah inkulh sung tualmâi ah a to le; chun nungâk pakhat a sinah a hawng kal le, "Nang khawm Jisu sinah Galili ram ah um mi kha na si hi," a ti. ⁷⁰ Sikhawmsele, anih nih chun, "Na thusim chu ka theih lo thlo," ti hen an ektê mâika ah a pheh. ⁷¹ Chun in kulh kawtkâ ah a va suak kâ hen nungâk dang nih anih chu a muh le, chunah mi tla sinah chun, "Hi khawm hi Nazaret mi Jisu sinah um mi kha asi hi," a ti. ⁷² Chun, "Chu minung chu ka theih loh," ti hen siatsirh hen a pheh nawlh. ⁷³ Chun, sâwtlotê nûnah a kiangah dîr mi tla nih chun Peter sinah, "Nang khawm hi an sinah mi na si ngelchel, na hawlh ah â thei ko," an ti. ⁷⁴ Chun, anih nih chun, "Chu minung chu ka theih loh," ti hen hawlh siat â barh le, siat â sirh rawh. Chun, âr a khuang sawm. ⁷⁵ Chun, Peter nih chun, Jisu nih, "Âr a khuang lânah nangnih veithum na ka pheh lai," a ti mi thu kha a hawng theih nawlh rawh. Chun, a suak le, ngaihsia tak hen a ṭap rawh.

¹ Chun, zînglei a hawng si rawh chun bâwlpu lal tla leh zatlâng upa tla zawzawng chu Jisu thah ding hen thu anna thluk. ² Chun, an phuar le, an kalpi le, governor Pilat sinah an pêk rawh. ³ Juda, a tleihtirtu nih khan Jisu an mawhtir ti a theih kâ hen â sîr le, tangka shekel sâwmthum kha bâwlpu lal tla leh upa tla sinah a hawng put nawlh le, ⁴ "Sual neilo ka tleihtir mi kha thil ka ti sual asi," a ti. Annih nih chun, "Chu chu kan rangah zei a pawi lai? Nangmah duhzia zawng hen ti," an ti piak. ⁵ Chun, anih nih chun tangka shekel chu mun thenhlimh sungah a lawnh le, a kal ving le, thi thlo hen â âwk rawh. ⁶ Chun, bâwlpu lal tla nih chun tangka shekel tla chu an lâk le, "Hi hi Biakin thawhlâwm bâwm ah siah a thiang lo, thisen man asi ruangah," an ti. ⁷ Chun, anna thluk le, khual tla vûinâk ding hen bêl hêmtu mun chu an châwk rawh. ⁸ Churuangah asi, chu mun chu tutiang hen ’Thisen Mun’ an ti mi chu. ⁹ Chu liau chun khuavâng Jeremia nih, "Chun tangka shekel sâwmthum an hauh mi man, Israel thlâk âu tla nih mawh an hauh mi man chu an lâk le, ¹⁰ Lalpa nih hawng kan tiamh hâwi hen bêl hêmtu mun rangah an pêk," ti hen, a sim mi kha a hawng tlung rawh asi. ¹¹ Chun, Jisu chu governor mâika ah chun a dîr le, chun governor nih chun, "Juda tla Lalchem na si ma?" ti hen, a deih. Jisu nih a sinah, "Si ta a," a ti. ¹² Chun, bâwlpu lal tla leh upa tla nih an phiar liauah zeitin khawm a sâng lo. ¹³ Chun, Pilat nih a sinah, "Hi tluk an phiar mi hi na theih lo ma?" a ti. ¹⁴ Sikhawmsele, kâ khat khawm hen a sâng lo; chun governor nih thungâi chê a ti. ¹⁵ Chun, governor nih kût ni ah chun rêngtlâ pakhat, an duh mi zawng mi zapi chu a suah piak tâwn. ¹⁶ Chun, chu liau chun rêngtlâ, min thang tak, Baraba, an ti mi chu an nei. ¹⁷ Chun, an hawng le, Pilat nih an sinah, "Âu me an suah piak na sele nan duh? Baraba ma, Jisu Mesia an ti mi chu?" a ti. ¹⁸ Nahsuahnâk ruangah anih chu an tleihtir ti a theih ruangah. ¹⁹ Chun, lâirêlnâk tophah ah chun a to liauah, a nupi nih, "Kha mi rep tak tlûnah khan zeikhawm ti lah; tusûn hin amah ruangah mang leiah thil tamtak ka tuar asi," ti hen, a chah. ²⁰ Chun, bâwlpu lal tla leh upa tla nih Baraba deih hen Jisu veih ding hen mi zapi tla chu an lêm. ²¹ Governor nih chun annih tla chu a sawnh na le, "An panih lakah a zei mi dauh me an suah piak na sele nan duh?" a ti nawlh. Chun, annih nih chun, "Baraba," an ti. ²² Pilat nih an sinah, "Jisu Mesia an ti mi hi zeitin ka ti lai rawh ne?" a ti. An ektê hen, "Anih chu kraws ah khenh rawh," an ti. ²³ Chun, anih nih chun, "Zeirangah me? Zei me a sual?" a ti. Sikhawmsele, annih tla chu, "Kraws ah khenhtir rawh," ti hen an âu chiam. ²⁴ Chun, Pilat nih zeitin khawm a ti kho lo le, a nawk awt dadauh ti a theih le, tî a lâk le, mi zapi mâika ah chun a kut a ṭâwl le, "Hi mi rep thahnâk lakah hin ka thiang; nannih nih nanmah ti hen va ti u," a ti. ²⁵ Chun, zatlâng zawzawng nih, "A thihnâk mawh chu kanmah tlûnah leh kan fa tla tlûnah um seh," ti hen, an sâng. ²⁶ Chu thluh chun Baraba chu a suah piak na le; Jisu lam chu a vuak le, kraws ah khenh ding hen a pêk na rawh. ²⁷ Chu thluh chun governor kawrsen tla nih chun Jisu chu lal in ah an kalpi le, an murui lakah mi zawzawng an sinah an pumh na. ²⁸ Chun, a puan tla an lît piak le, puan sen an aihtir. ²⁹ Chun, ling lukhuh an phiar le, an khuhtir le, a kut vawrhlei ah lâiluang an puttir; a mâika ah an siksidîr le, "Chibai, Juda tla Lalchem!" ti hen, nihsuak siamnâk ah an mang. ³⁰ Chun, amah chu chil an sah le, lâiluang chu an suh le, a lû ah an vuak. ³¹ Chun, nihsuak siamnâk ah an mang thluh chun puan chu an lît piak le, amah puan chu an aihtir nawlh le, kraws ah khenh ding hen an kalpi rawh. ³² Chun, an suak liauah, Kurini mi, a min Simon an muh le; chu minung chu a kraws put ding hen an tleih. ³³ Chun, Golgotha, luruh mun an ti mi mun chu an hawng tleng le, ³⁴ uain thur, zei lo khâ hen chawmh mi, a din ding hen an pêk. ³⁵ Sikhawmsele, a tem le, a din duh lo. Chun, kraws ah an khenh thluh rawh chun chamchawh hen a nipuan tla anna ṭhen. ³⁶ Chun, chunah chun an to le, an vêng. ³⁷ A phiarnâk, "HI JISU HI JUDA TLA LALCHEM ASI," ti hen rîn mi a lû tlûnah an bêk. ³⁸ Chun, amah rual hen rawkmang panih an khenh na bâk, a vawrhlei ah pakhat, a kehlei ah pakhat. ³⁹ Chun, mivel kip nih an lû an sut le, ⁴⁰ "Nang, Pathian Biakin siat hen ni thum ah sak nawlhtu, a hum rawh; Pathian Fapa na si chun kraws thawk hen hawng ṭum ko me," ti hen an sîrleih. ⁴¹ Chu hâwi ber hen bâwlpu lal tla nih chun Dân sîntirtu leh upa tla hen, ⁴² "Midang chu hum tâwn hen mah chu â hum kho lo. Israel Lalchem asi lo mazei, tuah kraws thawk hen hawng ṭum ko seh me, chun amah chu kan zumh lai. ⁴³ Pathian a lung si lo ma, amah hi a duh chun tuhin Pathian nih ruangsuah seh, ’Pathian Fapa ka si,’ a ti dangâiah," an ti. ⁴⁴ Rawkmang an khenh mi tla khawm nih chun, chu hâwi ber hen an sîrleih. ⁴⁵ Chun, dâr leinih thawk hen dâr thum tiang hen laikulh a hawng mûi ver rawh. ⁴⁶ Chun, dâr thumnâk dingah chun Jisu chu hâu fâk tak hen, "Eli, Eli, lema sabakthani?" ti hen a âu le, chu chu ’Ka Pathian, ka Pathian, zeirangah na ka kaltâk?’ tinâk asi. ⁴⁷ Chun, a kiangah zeimaw mi dîr tla nih chu chu an theih le, "Hi minung nih hin Elija a kawh asi," an ti. ⁴⁸ Chun, an lakah minung pakhat a tek sawm le, hâng dâwp kho mi a lâk le, uain thur lakah a chiah le, fung lakah a târ le, a dintir. ⁴⁹ Chun, midang tla nih chun, "Um ko seh, amah hum ding hen Elija a hawng lai mawh kan zauh lai," an ti. ⁵⁰ Chun, Jisu chu hâu fâk tak hen a âu nawlh le, a nûkrî a chat rawh. ⁵¹ Chun, Pathian Biakin puanzâr chu a tlûnlei thawk hen a tanglei tiang hen suak dak hen a tlêk rawh. Chun, lî a hawng nîn le, lungpi tla an kak le; ⁵² thlân tla â awng le, mi thenhlimh it rawh mi tla taksa tamtak khawm thawk hen an um rawh. ⁵³ Chubang tla chu Jisu thawknawlh nûnah chun thlân ah mi chu an suak le, Khua Thenhlimh ah chun an lût le, mi tamtak sinah anna langh rawh. ⁵⁴ Chun, kawrsen zâ hotu leh a sinah Jisu vêng hen um bâk mi tla nih chun lînîn leh thil umzia tla chu an muh rawh chun thungâi an ṭih le, "Hi Minung hi Pathian Fapa asi chiammâm," an ti. ⁵⁵ Chun, chunah chun nunau tamtak a rianṭuan piak vima hen Galili ram thawk hen Jisu hawng zûltu tla chu an um le, a râltlâng hen an chawnh. ⁵⁶ Chubang tla lakah chun Mari Magdala mi, Mari Jem leh Josef nu leh Zebedai fapa tla nu le anna tel. ⁵⁷ Chun, zânleibâi a hawng si rawh chun, minei, a min Josef Arimathai thawk hen mi a hawng kal le, amah khawm chu Jisu ṭhiruai asi bâk. ⁵⁸ Chu minung chu Pilat sinah a va kal le, Jisu ruak chu a deih. Chun, Pilat nih lâk ding thu a pêk. ⁵⁹ Chun, Josef nih chun ruak chu a lâk le, puan mangṭhia thiang tak hen a tuam le, ⁶⁰ amah thlân thar lung a ker mi lakah chun a zâutir le; thlân kawtkâ ah chun lung lianpi mi hen a khâr le, a kal rawh. ⁶¹ Chun, Mari Magdala mi leh Mari dang chu chunah chun an um, thlân kawtkâ zâwn ah chun an to. ⁶² Chun, a thâituan ah chun chu chu Timhtuah ni nûnah bâwlpu lal tla leh Farisai tla chu Pilat sinah an hawng a pûm. ⁶³ "Ka pu, chu perpettu nih chun a dam liauah khan, ’Ni thum nûnah ka thawknawlh lai,’ a ti mi kan theih ko. ⁶⁴ Chun, thlân chu ni thum ni tiang hen vêng ding hen thu pêk. Chu hâwi asi lo chun, a ṭhiruai tla nih amah chu an fîr lebang lai le, zatlâng sinah, ’Mithi lakah mi a thawknawlh rawh asi,’ an ti lebang lai; chun perpetnâk madung chu a masa mi ngâk hen a ṭha lo khun lai," an ti. ⁶⁵ Pilat nih an sinah, "Vêngtu kawrsen tla nan nei kha ta a; kal ule, nan ti kho zia zawng hen ṭha tak hen vêngtir ko u me," a ti. ⁶⁶ Chun, vêngtu kawrsen tla hen an va kal le, thlân chu an vêngtir na le, lung chu an singsiah.

¹ Chun, Dinhni nûnah chun zarhkar ni masachem ah khuadei bâi ah, Mari Magdala mi leh Mari dang chu thlân zauh ding hen an kal. ² Chun, lâkkhatko ah lî fâk tak hen â nîn le; Lalpa vânmifial vân thawk hen a hawng ṭum le, lung chu a ṭhial le, a tlûnah a to rawh. ³ A mêl umzia chu mîmthlalek hâwi asi le, a nipuan tla chu vûr hâwi hen a vâr. ⁴ Amah an ṭih ruangah vêngtu tla chu an thir le, a thi mi hâwi hen an um rawh. ⁵ Chun, vânmifial nih chun nunau tla chu a sawnh na le, an sinah, "Nannih nih chun ṭih lah u, Jisu an khenh mi kha nan hâwl ti ka theih. ⁶ Hinah a um lo rawh; a sim mi hâwitê hen a thawknawlh rawh. Hawng ule, a itnâk mun hi hawng zauhnik u. ⁷ Chun, kal rereh ule, a ṭhiruai tla sinah, ’Mithi lakah mi a thawknawlh rawh asi; chun Galili ram ah nan mâi leiah a kal; chunah chun amah chu nan muh lai, ti hen, simh na u. Ngâinik u, ka nan simh na rawh hi," a ti. ⁸ Chun, lâu leh lâwm tak bû hen thlân thawk hen chun an kal rereh le, a ṭhiruai tla simh na ding hen an tek rawh. ⁹ Chun, lâkkhatko ah, Jisu nih annih chu a tawng na le, "Chibai," a ti. Chun, annih nih chun a kezaphah tla chu an tham le, an mâimûk. ¹⁰ Chun, Jisu nih an sinah, "Lâu lah u, kal ule, Galili ram ah kal ding hen ka unau tla va simh na u; chunah chun nan ka muh lai," a ti. ¹¹ Chun, nunau tla chu an va kal liau chun vêngtu kawrsen zeimaw mi chu khuapi ah an lût le, thil umzia zawzawng chu bâwlpu lal tla sinah an va simh. ¹² Chun, upa tla hen anna pûm le, anna thluk rawh; chun kawrsen tla sinah tangka cherkhet an pêk na le, ¹³ "Zânah kan it karah ’A ṭhiruai tla chu an hawng le, amah chu an fîr rawh asi, ti u. ¹⁴ Chun, governor nih chu chu a hawng theih rawh chun amah chu kan lêm lai le, lawksawng lo ding hen kan siam na lai," an ti. ¹⁵ Chun, tangka chu an lâk le, an simh na mi hâwi hen chun an ti rawh. Chun, tutiang hen chu thu chu Juda tla lakah an sim chur asi. ¹⁶ Ṭhiruai leikhat tla chu Galili ram ah, Jisu nih tlâng a ruat piak na mi leiah an kal. ¹⁷ Chun, amah an muh rawh chun mâi an mûk; zeimaw mi nih chun an zumhmaih. ¹⁸ Chun, Jisu chu an sinah a hawng kal le, annih tla chu a sawnh na, "Tual leh vân ah mi thuneihnâk zawzawng ka sinah pêk asi rawh. ¹⁹ Chuvachun, kal ule, phun kip lakah mi ṭhiruai tla ah siam na ule, Pa leh Fapa leh Thlarau Thenhlimh min hen baptis na ule, thu ka nan pêk na mi zawzawng zâwt ding hen sîntir na u. ²⁰ Chun, ngâinik u, kei zungzâl hen laikulh dawngh tiang hen nan sinah ka um vima lai," a ti.