LUK

LUK

¹ Theophil duhtak: Mi tamtak nih kan lakah thil a hawng tlung mi tla thâwngthâng rîn an tum rawh le; ² a tîr thawk hen muhtu tla leh thu rianṭuantu tla nih kanmah hawng kan simh hâwi khan an rîn asi. ³ Churuangah a bul thawk hen zeizawng rep tak hen ka zâwt le, a sang vima hen na rangah rîn sele a ṭha lai ka ti asi. ⁴ A lânah thu an sîntir na mi kha dik tak asi ti na theih khonâk ding hen. ⁵ Herod chu Judai ram lalchem asi liauah, Abijah murui ah mi a min Zekaria bâwlpu pakhat a um le; chu nih chun Aron thlâk lakah mi nupi ah a umpi le, a min chu Elizabet asi. ⁶ An panih hen Pathian mitmuh ah rep tak hen an um le, simsâwi kawp lo hen Lalpa thupêk leh dân zâwzawng zâwt hen an um tâwn. ⁷ Sikhawmsele, Elizabet a ching ruangah fa an nei lo le, an panih hen an upa thlo rawh. ⁸ Chun, hi hâwi hi asi le, hâwi le ti dân hâwi vima hen Pathian mâika ah bâwlpu rian a ṭuan liauah, ⁹ bâwlpu dân hâwi hen Lalpa Biakin ah a lût le, rimthâw a duah. ¹⁰ Chun, rimthâw a duah liauah mi zapi nih an ektê hen lêng ah thla an cham. ¹¹ Chun, Lalpa vânmifial pakhat rimthâw duahnâk mâichâm vawrhlei ah dîr hen a sinah â langh. ¹² Chun, Zekaria nih a muh kâ hen a lawksawng le, ṭih khawm a ṭih. ¹³ Sikhawmsele, vânmifial nih chun a sinah, "Zekaria, ṭih lah, Pathian nih na deih mi kha a theih asi, na nupi Elizabet nih fapa a nan ring piak lai, a min ah Johan na sak ding asi. ¹⁴ Chun, nang na lâwptlo hen na lâwm lai le; amah a suak tikah mi cherkhet anna lâwm lai. ¹⁵ Lalpa mitmuh hen milian asi lai le, uain leh zû rerêng a din lai loh, a suaknâk thawk hen Thlarau Thenhlimh hen a khat lai. ¹⁶ Israel thlâk tla tamtak Lalpa an Pathian leiah a hawitir nawlh lai. ¹⁷ Chun, pa le tla thinlung chu fa tla leiah hawitir ding hen leh mi thu ngâilo tla chu mi rep tak finghnâk leiah hawitir ding leh Lalpa rangah mi a tîm zet ding lebang ah timhtuah ding hen Elija thinlung leh a thiltikhonâk put hen Lalpa mâika ah a kal lai," a ti. ¹⁸ Chun, Zekaria nih vânmifial sinah chun, "Chu chu zeitin ka theih lai? Kei tarpa ka si le, ka nupi khawm tarnu asi mi," a ti. ¹⁹ Chun, vânmifial nih chun a sâng le, a sinah, "Gabriel, Pathian mâika ah dîr mi ka si le; a nan sawnh ding leh chubang thu ṭha chu a nan simh ding hen fial ka si. ²⁰ Ngâi rawh, ka thusim tla a tik takah a hawng tlung ding mi na lunglo ruangah chubang thil chu a hawng tlung lân lo chu na dâisip lai le, hawlh khawm na hawlh kho lai loh," a ti. ²¹ Chun, mi zatlâng tla nih chun Zekaria chu an ngâk le, Pathian Biakin sungah a um sâwt ruangah chun thungâi chê an ti. ²² Chun, a suak rawh chun an sinah thu a sim kho lo. Chun, Biakin ah muhtirnâk a muh asi ti an theih le; chun, an sinah kut vai hen, hawlh kho lo hen a um ko rawh. ²³ Chun, a rianṭuannâk ni chu a lîm rawh chun in leiah a lâwi rawh. ²⁴ Chun, chu nûnah chun a nupi Elizabet chu a râi le; chu thla nga kar chu â thup le, ²⁵ "Mi sinah ka minsiat phenhnâk ding hen Lalpa nih a ka muh hen hi hâwi hen a ka ti piak rawh," a ti. ²⁶ Chun, a thla ruknâk ah chun Pathian nih vânmifial Gabriel chu Galili ram ah khua pakhat Nazaret an ti mi ah chun, ²⁷ nungâk thenhlimh pakhat sinah a fial le, chu nungâk chu David thlâk ah mi a min, Josef nupi ham asi: nungâk min chu Mari asi. ²⁸ Chun, vânmifial chu a sinah a lût le, "Chibai, sunhsak bîk, Lalpa na sinah a um," a ti. ²⁹ Chun, chu thusim ruangah chun thungâi a lawksawng le, "Zeitin zia hen chibai hawng ka bûk mi me si lai?" ti hen, a dawnruat. ³⁰ Chun, vânmifial nih chun a sinah, "Mari, ṭih lah; Pathian sunhsaknâk na tawng. ³¹ Ngâinik, na râi lai le, fapa na ring lai le, a min ah chun Jisu na sak ding asi. ³² Anih chu milian asi lai le, Chungnungchem Fapa an ti lai. Lalpa Pathian nih a sinah a thlâktu David laltophah chu a pêk lai. ³³ Jakob thlâk tla tlûnah zungzâl hen a lal lai le, a ram nih dawngh ni a nei lai loh," a ti. ³⁴ Chun, Mari nih vânmifial sinah chun, ’Chubang chu zeitin asi lai, pasal ka neilo mi?" a ti. ³⁵ Chun, vânmifial nih chun a sinah, "Thlarau Thenhlimh na tlûnah a hawng tlung lai le, Chungnungchem thiltikhonâk nih a nan huhphenh lai. Churuangah mi thenhlimh hawng suak ding mi khawm chu Pathian Fapa an ti lai. ³⁶ Chun, ngâinik, na unau nu Elizabet khawm nih a tar nûnah mipa a pâwi rawh; a ching an ti tâwn mi kha, tu thla hi a thla ruknâk asi rawh. ³⁷ Pathian thu suak rerêng thil tikho lo hen a um lai loh," a ti. ³⁸ Chun, Mari nih, "Ngâinik, Lalpa to-awnu ka si, na thu hâwi vima hen ka tlûnah tlung seh," a ti. Chun, vânmifial nih chun a kaltâk rawh. ³⁹ Chu liau chun Mari chu a thawk le, tlâng ram ah, Judai ram ah khua pakhat ah chun a kal sawm le, ⁴⁰ chun, Zekaria in ah a lût le, Elizabet chibai a bûk. ⁴¹ Chun, hi hâwi hi asi le, Elizabet nih Mari chibai bûk chu a theih kâ hen a paw sungah mi nautê chu a châng le, chun Elizabet chu Thlarau Thenhlimh hen a khat rawh. ⁴² Chun, hâu fâkpi hen a âu le, "Nang chu nunau lakah thawsuak na si, na sungah suak ding mi khawm a thaw a suak asi. ⁴³ Ka Lalpa nu ka sinah na hawng kal hi zei zia me si le? ⁴⁴ Ngâinik, na chibai bûk hâu ka nâ ah a lût kâ hen â lâwm ruangah nautê ka paw sungah a châng asi. ⁴⁵ A lungtu nu khawm a thaw a suak asi, a sinah Lalpa nih thu a sim mi kha a hawng tlung awt dangâiah," a ti. ⁴⁶ Chun, Mari nih, "Ka thinlung nih Lalpa a chawnglawmh, ⁴⁷ ka thlarau khawm ruang hawng ka suahtu Pathian ah â lâwm. ⁴⁸ A to-awnu phun nâu zia a muh le, a zângfah ruangah. Tu thawk hen mi zawzawng nih na dingchang an ka ti awt asi. ⁴⁹ Pathian chak nih khan ka tlûnah thil rokual tak tla hawng ka ti piak ruangah. A min khawm â thenhlimh asi. ⁵⁰ A ṭihtu tla chu san nûnah san nawlh tiang hen, khua a ruat vima tâwn. ⁵¹ A bân hen a tha chak zia a zauhtir le, an thinlung dawnruatnâk tla ah anna zûm mi tla chu a ṭhiau phin. ⁵² An laltophah thawk hen lal tla chu a thlâk na le, nâutâ tla chu a sangh na rawh. ⁵³ Sungvâng tla chu thil ṭha tla hen a khawptir na, minei tla chu kut karo hen a kaltir na. ⁵⁴ Kan thlâktu sinah a sim hâwi khan, Abraham leh a thlâk tla chu zungzâl hen khua a ruat ding zia theihkumzanâk ding hen, a to-aw Israel tla chu a ṭangpi rawh," a ti. ⁵⁶ Chun, Mari chu thla thum a sinah a um le, chun a in leiah a tlung nawlh. ⁵⁷ Chun, Elizabet fa ring chu a nikhua rawh le, chun fapa a ring. ⁵⁸ Chun, a zâwlbâwm tla leh a rualsia tla nih chun Lalpa nih thungâi khua a ruat ti an theih le, an lawmhpi. ⁵⁹ Chun, hi hâwi hi asi le, a ni riat ni ah chun nausêm fêmtan ding hen an hawng kal le; a min ah a pa min lîlâ Zekaria ber sak an tum. ⁶⁰ Chun, a nu nih, "Silo, anih chu Johan sak ding asi," a ti le, a sâng. ⁶¹ Chun, annih nih chun a sinah, "Na rualsia lakah hi min put hi âukhawm an um lo," an ti. ⁶² Chun, a pa sinah chun kut vai hen, "A min ah zei me na duh?" an ti. ⁶³ Chun, lasui rînnâk tlêp a deih le, "A min chu Johan asi," ti hen a rîn. Chun, an ektê hen chê an ti ngâi. ⁶⁴ Chun, zeikarlo ah Zekaria chu a hawng hawlh le, Pathian sawr â dawmh rawh. ⁶⁵ Chun, an kiangkam ah um mi tla zawzawng nih chun an ṭih rawh. Chun, chubang thu chu Judai tlâng ram zawzawng ah a thang ver rawh. ⁶⁶ Chun, a theihtu zawng nih an thinlung ah an kil le, "Chu nausêm chu zeitin dek um lai chu aw! " an ti; Lalpa kut nih amah a ṭangpi dangâiah. ⁶⁷ Chun, a pa Zekaria chu Thlarau Thenhlimh hen a khat le, a simkanh le: ⁶⁸ "Lalpa, Israel Pathian chu sawr hen um seh! A mi tla chu a veh le, tlanhnâk a siam piak na. ⁶⁹ A to-aw David dâwngsung tla lakah chun, Ruangsuahtu chak hawng kan dirh piak dangâiah. ⁷⁰ A lânah thawk hen khuavâng thenhlimh tla kâ ah a sim hâwi khan. ⁷¹ Kan leido tla leh hawng kan huatu tla zawzawng lakah ruang hawng kan suah ding hen a tiamh. ⁷² Kan thlâktu tla khuaruatnâk ding leh a thudântuk thenhlimh theihkumzanâk ding hen; ⁷³ kan thlâktu Abraham sinah siat a sirh kha, ⁷⁴ kan leido tla lakah hawng kan hum lai le, ⁷⁵ kan dam sung zawng a mitmuh ah thenhlimh leh rep tak a um hen, lâu lo hen a rian hawng kan ṭuantir. ⁷⁶ Asi, ka fa, nang hi Chungnungchem khuavâng a nan ti lai. Lampi tla siam ding hen Lalpa mâika ah na kal awt dangâiah. ⁷⁷ Kan Pathian thinlung ah a khuaruatnâk ruangah, an sual tla ngaihdamnâk ding hen a minung tla sinah ruangsuahnâk thu theihtir ding hen; Churuang chun tlûnlei thawk hen ni suak nih hawng kan cherh lai. ⁷⁹ Mûi nâwngah leh thihnâk dâidul ah to tla cherh ding hen leh lungngamnâk Lampi ah kan kê kârtir ding hen," a ti. ⁸⁰ Chun, nausêm chu a hawng thang vima le, a thinlung lei a hawng bir dadauh le, Israel tla sinah a hawng a langh lân lo chu ramkaro ah a um ko.

¹ Chun, chu liau chun hi hâwi hi asi le; Kaisar Awgasta nih laikulh zawzawng min rîn ding thu a pêk. ² Chu chu Siria ram ah Kurini chu governor asi liauah min rîn masachem chu asi. ³ Chun, mi zawzawng chu an min rîn ding hen anmah khuapi chiau ah an kal. ⁴ Chun, Josef khawm David dâwngsung tla leh a thlâk asi ruangah Galili ram ah Nazaret khua thawk hen, ⁵ Mari, a nupi ham râi chawp tung hen min rîn ding hen Judai ram ah David khua Bethlehem an ti mi ah chun an kal rawh. ⁶ Chun, Bethlehem ah an um liauah a fa ring chu a hun rawh. ⁷ Chun, a fa tîr ah mipa a ring le; chun puan hen an tuam le, khual tlungnâk in ah mun a um lo ruangah ran râwl pêknâk khêng ah an ittir. ⁸ Chun, chu ram ber ah chun dawrâ vêngtu tla an um le, zân ah dawrâ tla an vêng le, mâng ah an riak nawh. ⁹ Chun, Lalpa vânmifial pakhat an kiangah a hawng dîr le, Lalpa rokualnâk nih an kiang chu a hawng cherh le; chun thungâi an ṭih. ¹⁰ Chun, vânmifial nih chun an sinah, "Ṭih lah ule, ngâi u, mikip tâ ding thâwngthâng ṭha lawmh thanuam kâi tak ka nan thanh na. ¹¹ Tusûn ah hin nan rangah David khua ah Ruangsuahtu, Sariak Thuh chu a suak rawh. ¹² Chun, hi hi nan rangah singsiahnâk ding asi: Nausêm puan hen tuam, ran râwl pêknâk khêng ah it mi nan muh lai," a ti. ¹³ Chun, lâkkhatko ah vânmifial sinah chun vân minung tla zapi an hawng um chiam le, Pathian an sawr le: ¹⁴ "Chungnungchem ah Pathian rokual tak hen um seh. Tual tlûnah a lawmh ngâi mi minung tla sinah remnâk lêng seh," an ti. ¹⁵ Chun, hi hâwi hi asi le, vânmifial tla nih vân ah an kaltâk na kâ hen dawrâ vêngtu tla nih chun, "Tuah Bethlehem tiang hen kal sele, Lalpa nih thu hawng kan theihtir mi a hawng tlung mi chu kan zauh lai," an ti. ¹⁶ Chun, an kal rereh le, chun Mari leh Josef leh nausêm ran râwl pêknâk khêng ah it mi chu an muh. ¹⁷ Chun, an va muh rawh chun nausêm thâwngthâng vânmifial nih a sim mi kha an theihtir na. ¹⁸ Chun, a theihtu zawng nih dawrâ vêngtu tla thusim chu thungâi chê an ti. ¹⁹ Mari lam nih chun thusim zawzawng chu a thinlung ah a dawn le, a kil ko. ²⁰ Chun, dawrâ vêngtu tla nih chun vânmifial sim hâwitê hen zeizawng an muh le, an theih ruangah Pathian chawnglawmh leh sawr bû vima hen an kîr nawlh rawh. ²¹ Chun, a fêmtannâk ding ni riat a hawng tling rawh chun â sêm lânah vânmifial nih a sak chia, Jisu an sak rawh. ²² Chun, Mosi Dân hâwi hen anna thianh ni a tlung rawh chun anih chu, ²³ (Lalpa Dân thu ah, "Mipa fa, fa tîr vial chu Lalpa rangah ruat an ti lai," ti rîn hâwi khan) Lalpa sinah ap ding hen leh ²⁴ Lalpa Dân thu ah, "Vaṭhu bawp khat mawh lâilêng suan panih mawh bâwlnâk ah pêk ding," ti rîn hâwi khan, Jerusalem ah an kalpi. ²⁵ Chun, Jerusalem ah chun minung pakhat a min Simeon a um. Chu minung chu mi rep tak leh Pathian sunhsak mi tak asi le; Israel tla thlangamhtu ding mi chu a ngâk kumza le, a tlûnah Thlarau Thenhlimh a um. ²⁶ Chun, Lalpa Mesia chu a muh lân lo chu a thi lai loh ti Thlarau Thenhlimh nih a theihtir chia rawh. ²⁷ Chun, Thlarau theihtir hen Pathian Biakin ah chun a va lût le; nausêm Jisu chu a nu leh a pa nih Dân hâwi hen a tlûnah ti piak ding hen an hawngpi liauah chun, ²⁸ anih chu a kuah le, Pathian a sawr le: ²⁹ "Lalpa, tuah na thu ziatê hen, na to-aw hi lungngam tak hen na kaltir awt le, ³⁰ na ruangsuahnâk mikip muh ah na siam mi kha ka mit nih a muh rawh. ³² Phundang tla sinah langhtirnâk chêu leh na mi Israel tla rokualnâk ding chu," a ti. ³³ Chun, nausêm thu a sim mi chu a nu leh a pa nih chun thungâi chê an ti. ³⁴ Chun, Simeon nih mal a sâwm na le, a nu Mari sinah, "Hi ngâksia hi Israel tla lakah mi tamtak tlûktir ding leh thawktir ding hen ruat asi; chun duhlo mi chu asi ti singsiahnâk ding chu asi; ³⁵ mi tamtak thinlung tla dawnruatnâk tla chu a lang khonâk ding hen. Asi, nang thinlung khawm nâmsâu nih tleng dak hen a sunh lai," a ti. ³⁶ Chun, mi pakhat, a min Anni khuavângnu, Phanuel fanu, Aser phun ah mi a um le; anih chu tar tak asi le, kum sarih kar chu pasal nei hen a um le, ³⁷ chun, chu nûnah kum sâwmriat leh kum li asi tiang â mei. Anih nih chun Pathian Biakin kaltâk lo hen a sûn a zân a buh ngei leh thlacham hen Pathian a sawnh tâwn. ³⁸ Chun, chu liau takah chun anih chu a hawng kal le, Pathian sinah lâwmthu a sim le, Jerusalem tlanhnâk lungumtu zawng sinah chun Jisu thâwngthâng a sim. ³⁹ Chun, Lalpa Dân hâwi vima hen thil zawzawng an ti rawh chun Galili ram ah anmah khua Nazaret ah chun an tlung nawlh rawh. ⁴⁰ Chun, nausêm chu a ṭhang vima le, a hawng chak dadauh le, finghnâk hen a khat le, Pathian zângfahnâk a tlûnah a um. ⁴¹ Chun, kum siar hen Kût tikah chun a nu leh a pa chu Jerusalem ah an kal tâwn. ⁴² Chun, Jisu chu kum leinih asi liauah kût dân hâwi hen an va kal. ⁴³ Chun, an ṭiak le, an tlung liauah ngâksia Jisu nih chun a umtâk na le, a nu leh a pa nih chun an theih lo. ⁴⁴ Chuvachun, an murui tla sinah a um mawh an ti le, ni khat lam an kal le, an rualsia tla leh an mêltheih tla lakah an hâwl. ⁴⁵ Chun, an tawng lo ruangah hâwl bû vima hen Jerusalem ah an kîr nawlh rawh. ⁴⁶ Chun, hi hâwi hi asi le, ni thum nûnah chun Pathian Biakin ah sîntirtu tla sinah to hen, an thu ngâi hen leh deih na hen an tawng. ⁴⁷ Chun, a thu theihtu zawng nih chun a theih zia leh a sâng zia chu thungâi chê an ti. ⁴⁸ Chun, a nu leh a pa nih chun amah an muh rawh chun thungâi chê an ti le; chun a nu nih a sinah, "Ka fa, zeirangah tihin na hawng kan ti? Na pa leh kei nih thlakâm tak hen kan nan hâwl asi," a ti. ⁴⁹ Chun, anih nih chun an sinah, "Zeirangah nan ka hâwl? Ka Pa in ah ka um ding asi ti nan theih lo mazei?" a ti. ⁵⁰ Chun, an sinah a thusim chu a ngaihtawnh dân an theih lo. ⁵¹ Chun, an sinah a kal le, Nazaret chu an va tleng le, an thu zâwt hen a um. Chun, a nu nih chun chubang thil zawzawng chu a thinlung ah a kil ko. ⁵² Chun, Jisu chu a fing dadauh le, a lian dadauh le, Pathian leh minung sunhsâk hen a um vima.

¹ Chun, Tiberia Kaisar a lal kum, kum leinga nâk ah Pontia Pilat chu Judai ram governor asi le, Herod chu Galili ram lal asi, a unau Philip chu Ituria leh Trakoniti ram lal asi le, Lusania chu Abilen ram lal asi le, ² chun Ana leh Kaiapha chu Bâwlpu Lalchem an si. Chu liau chun ramkaro ah Zekaria fapa Johan sinah chun Pathian thu a hawng tlung. ³ Chun, anih chu Jordan Va kiangkam ram kipah a kal le, thilsual ti ngaihdamnâk ding hen rimnâk baptisma thu a sim vima. ⁴ Khuavâng Isai lasuibu ah: "Ramkaro ah mi âu hâu nih chun, ’Lalpa lampi sial ule, a lam tla dingtir u. ⁵ Hawr kip silh asi ver lai le, tlâng leh mual kip niamh asi lai. Lampi ngâwi tla a hawng ding lai le, Chun lam rual lo tla a rual lai. ⁶ Chun, mi zawzawng nih Pathian ruangsuahnâk chu an tawng lai’ ati," ti hen, rîn hâwi khan. ⁷ Chun, anih nih chun baptis ding hen a sinah mi zapi hawng kal mi tla sinah chun, "Rûl thlâk tla!" ’’Thinrunhnâk hawng tlung ding mi hi tektâk ding hen âu nih nun an simh na? ⁸ Nan umdân hen nan rim tatak ti zauhtir u; chun nan lakah, Abraham chu kan pa asi,’ ti lah u; Pathian nih hi bang lung tla hi Abraham thlâk ah a dirh kho, ka nan ti na hi. ⁹ Tu khawmah reitlung thing phûr kipah an siah rawh; chuvachun, thing kip rah ṭha hen rah lo mi vial an hâu le, mei ah an paih tâwn," a ti. ¹⁰ Chun, mi zapi nih chun a sinah, "Zei me kan ti ding ne?" an ti le, an deih. ¹¹ Chun, anih nih chun an sinah, "Âuzawng kawrdawh panih nei nih chun a nei lo mi sinah pêk seh; âuzawng ei ding nei mi nih chun chu hâwi ber hen ti seh," a ti le, a sâng. ¹² Chun, siah khawlhtu tla khawm baptis ding hen an hawng kal le, a sinah, "Sîntirtu, zei me kan ti ding?" an ti. ¹³ Chun, anih nih chun an sinah, "An rêl piak na mi nûnlêm chu va hauh lah u," a ti. ¹⁴ Chun, kawrsen tla khawm nih a sinah, "Kannih khawm nih zei me kan ti ding?" an ti le, an deih. Chun, anih nih chun an sinah, "Âukhawm nehsawh hen va phiar lah u; nan lawh tâwk ah lungâwi u," a ti. ¹⁵ Chun, mi nih an lungum le, mi zawzawng nih Johan thu an thinlung ah, "Mesia asi lai dahmawh?" ti hen, an dawn liauah, ¹⁶ Johan nih chun a sâng le, an ektê sinah, "Kei nih chun tî hen ka nan baptis na tâwn le; sikhawmsele, keimah ngâk hen mi rokual a hawng kal awt, a pheikawk rî sût tlâk khawm ka si lo; anih nih chun Thlarau Thenhlimh leh mei hen a nan baptis na lai. ¹⁷ A kut hen a ṭawlâwn a put lai le, a chîlnâk mun thiang rel a zâp lai, a pang ah fâng a râwn lai; a hî lam chu mei mit kho lo hen a duah phin lai," a ti. ¹⁸ Chun, fawrhnâk thu dang tamtak hen mi tla sinah Thâwngthâng Ṭha a sim tâwn. ¹⁹ Sikhawmsele, lal Herod chu a unaupa nupi Herodi thu ah leh a thilsual ti zawzawng thu ah chun Johan nih a simhfâi ruangah ²⁰ a thilsual ti zawzawng sap singsuan hen anih chu rêngin ah a khumh rawh. ²¹ Chun, hi hâwi hi asi le, mi zawzawng nih baptis an si thluh rawh chun Jisu khawm baptis asi le, chun thla a cham liauah vân â awng le, ²² chun Thlarau Thenhlimh chu taksa put hen vaṭhu hâwi hen a hawng ṭum le, a tlûnah a fû. Vân thawk hen aw a hawng suak le, "Nang ka Fapa duhtak na si, na tlûnah thungâi ka lâwm," a ti. ²³ Chun, Jisu nih a rianṭuan a dawmh liau khan amah chu kum sâwmthum ding asi rawh; mi ngaih chun Josef fapa asi le, chu chu Heli fa asi, ²⁴ Chu chu Mathat fa asi le, chu chu Levi fa asi le, chu chu Melki fa asi le, chu chu Janai fa asi le, chu chu Josef fa asi, ²⁵ chu chu Matathia fa asi le, chu chu Amos fa asi le, chu chu Nahum fa asi le, chu chu Esli fa asi le, chu chu Nagai fa asi le, ²⁶ Chu chu Maat fa asi le, chu chu Matathia fa asi le, chu chu Semein fa asi le, chu chu Josek fa asi le, chu chu Joda fa asi le, ²⁷ Chu chu Joanan fa asi le, chu chu Resa fa asi le, chu chu Zerubabel fa asi le, chu chu Sialtiel fa asi le, chu chu Neri fa asi le, ²⁸ Chu chu Melki fa asi le, chu chu Adi fa asi le, chu chu Kosam fa asi le, chu chu Elmadam fa asi le, chu chu Er fa asi le, ²⁹ chu chu Josua fa asi le, chu chu Eliezar fa asi le, chu chu Jorim fa asi le, chu chu Mathat fa asi le, chu chu Levi fa asi le, ³⁰ chu chu Simeon fa asi le, chu chu Juda fa asi le, chu chu Josef fa asi le, chu chu Jonam fa asi le, chu chu Eliakim fa asi le, ³¹ Chu chu Melia fa asi le, chu chu Mena fa asi le, chu chu Matatha fa asi le, chu chu Nathan fa asi le, chu chu David fa asi le, ³² chu chu Jese fa asi le, chu chu Obed fa asi le, chu chu Boaz fa asi le, chu chu Salmon fa asi le, chu chu Nason fa asi le, ³³ chu chu Aminadab fa asi le, chu chu Admin fa asi le, chu chu Ami fa asi le, chu chu Hezron fa asi le, chu chu Perez fa asi le, chu chu Juda fa asi le, ³⁴ chu chu Jakob fa asi le, chu chu Isak fa asi le, chu chu Abraham fa asi le, chu chu Terah fa asi le, chu chu Nahor fa asi le, ³⁵ chu chu Seruk fa asi le, chu chu Reu fa asi le, chu chu Pelek fa asi le, chu chu Eber fa asi le, chu chu Selah fa asi le, ³⁶ chu chu Kainan fa asi le, chu chu Arpaksad fa asi le, chu chu Sem fa asi le, chu chu Noa fa asi le, chu chu Lamek fa asi le, ³⁷ chu chu Methusel fa asi le, chu chu Enok fa asi le, chu chu Jared fa asi le, chu chu Mahalalel fa asi le, chu chu Kenan fa asi le, ³⁸ Chu chu Enos fa asi le, chu chu Seth fa asi le, chu chu Adam fa asi le, chu chu Pathan fa asi.

¹ Chun, Jisu chu Thlarau Thenhlimh hen a khat le, Jordan Va thawk hen a kîr nawlh rawh. ² Diabol lêm bû hen ramkaro ah ni sâwmli Thlarau kalpi hen a um. Chun, chu ni kar chun zeikhawm a ei lo; chun a dawnghnâk ah chun a sung a vâng rawh. ³ Chun, Diabol nih chun a sinah, "Pathian Fapa na si chun hi lung hi sang ah chang ding hen thu pêk rawh," a ti. ⁴ Chun, Jisu nih a sinah, "Minung hi sang cho hen an nung lai loh, ti rîn asi," a ti le, a sâng. ⁵ Chun, a kâipi le, zeikarlo ah laikulh ram zawzawng a zauhtir. ⁶ Chun, Diabol nih chun a sinah, "Hi bang zawzawng tlûnah thuneihnâk leh rokualnâk hi ka nan pêk lai; ka sinah pêk asi rawh dangâiah, ka duh mi sinah zawng ka pêk tâwn asi. ⁷ Chuvachun, mâi hawng ka mûk le, a ektê hen na tâ ver asi lai," a ti. ⁸ Chun, Jisu nih a sinah, "Lalpa na Pathian mâimûk le, amah rian cho ṭuan rawh, ti rîn asi," a ti le, a sâng. ⁹ Chun, Diabol nih chun Jerusalem ah a kalpi le, Pathian Biakin tlûn zum ah chun a siah le, chun a sinah, "Pathian Fapa na si chun a khâwk rawh; ¹⁰ ’Nangmah an hum ding hen nang lakah chun a vânmifial tla thu a pêk lai,’ ¹¹ ’Chun an kut hen an nan dawmh lai le, chu lo chun na kê hen lung na suih sual lebang lai,’ ti rîn asi ruangah," a ti. ¹² Chun, Jisu nih a sinah, "Lalpa na Pathian niksak dêl lah, ti asi," ti hen, a sâng. ¹³ Chun, Diabol nih lêmnâk zât kip hen a lêm thluh nûnah chun â dêngkhâwng tik zawng rangah a kaltâk rawh. ¹⁴ Chun, Jisu chu Thlarau thiltikhonâk put hen Galili ram ah a kîr le; chun a thâwngthâng chu, chu ram kiangkam kipah a thang rawh. ¹⁵ Chun, anna pumhnâk in tla ah a sîntir vima na le, mi zawzawng sawr hen a um. ¹⁶ Chun, a ṭhangliannâk Nazaret chu a va tlung le; chun Dinhni ah a ti dân kumza hâwi hen pumhnâk in ah a lût le, rêl ding hen a dîr. ¹⁷ Chun, khuavâng Isai lasuibu chu a sinah an pêk. Chun, lasuibuzual chu a samh le, hi thurînnâk hi a tawng le; ¹⁸ "Riangvâi tla sinah Thâwngthang Ṭha sim ding hen sariak hawng ka thuh ruangah Lalpa Thlarau chu ka tlûnah a um. Anih nih chun sal tla sinah suahnâk thu leh mitchâw tla sinah mitdei nawlhnâk thu sim ding hen, nehsawh tuar tla suaktirnâk ding tla ¹⁹ Lalpa lungâwi kum thu sim ding hen hawng ka fial asi," ti hi. ²⁰ Chun, lasuibu chu a zual le, kilkâwitu sinah a pêk nawlh le, a to rawh. Chun, pumhnâk in ah mi zawzawng mit chu amah lakah a um. ²¹ Chun, an sinah, "Hi Pathian lasui thu hi tusûn ah hin nan nâ theih ah a hawng tlung rawh," ti hen sim a dawmh rawh. ²² Chun, an ektê hen amah an sawr le, a hawlhkâ suak zângfah thu tla thungâi chê an ti. Chun, "Hi minung hi Josef fapa asi lo mazei?" an ti. ²³ Chun, anih nih chun an sinah, "Nannih nih hi tahṭhimh thu hi ’Daktawr, nangmah a damh rawh,’ Kapernaum ah na thilti kan theih mi zawzawng kha hinah nangmah khua leiah khawm hin ti bâk,’ ti hen, nan ka ti ngelchel awt hi," a ti. ²⁴ Chun, anih nih, "Thungâi tak hen ka nan simh na, khuavâng âukhawm mah khua leiah mi nih an lawmh dah lo. ²⁵ "Chuvachun, dik tak hen ka nan ti na, Elija a dam liauah khan kum thum leh thla ruk vân a pit le, laikulh ah pâmpi a hawng tlung liauah khan Israel ram ah numei tamtak an um le, ²⁶ sikhawmsele an lakah âu sin khawmah Elija fial asi lo le, Sidon ram leiah Zarephat khua ah nunau pakhat numei sinah cho fial asi kha. ²⁷ Chun, khuavâng Isai dam liau khawm khan Israel ram ah phâr tamtak an um le; sikhawmsele, an lakah âukhawm thenhlimhtir hen an um lo, Naaman Siria ram ah mi cho thenhlimhtir hen a um dauh kha," a ti. ²⁸ Chun, pumhnâk in ah mi zawzawng nih chubang thu chu an theih kâ hen thungâi an thinthawk le, ²⁹ an thawk le, khua lênglei ah an suah le, lawnh ding hen an khua umnâk kham pâng ah an kalpi rawh. ³⁰ Sikhawmsele, anih chu an karah a lan le, a kal vima. ³¹ Chun, Galili ram ah khua pakhat Kapernaum ah chun a kal rawh. Chun, Dinhni ah mi tla a sîntir le; ³² chun thu nei tak hen a sim ruangah a thu sîntir chu thungâi chê an ti. ³³ Chun, pumhnâk in ah chun khuri nâwmtâm thlarau vuanh mi a um le; anih chu hâu fâk tak hen, ³⁴ "A! Nazaret Jisu, kannih leh nang zeime kanna tlâinâk um? Hawng kan veih ding hen na hawng mi masi? Nang ka nan theih asi, Pathian Mi Thenhlimh na si," ti hen a âu. ³⁵ Chun, Jisu nih a fâi le, "Dâisip le, a sungah mi hawng suak rawh," a ti. Chun, khuri nih chun a lâi ah a thlûk le, nganfâk pêk lo hen a sungah mi chu a suak rawh. ³⁶ Chun, an ektê hen chê an ti ngâi le, "Hi hi zei thu me si le? Thu nei tak leh thiltikho tak hen khuri nâwmtâm tla thu a pêk le, an suak hi," ti hen anna sâwn. ³⁷ Chun, chu ram kiangkam khua kipah a thâwng a thang rawh. ³⁸ Chun, a thawk le, pumhnâk in ah mi chu a suak le, Simon in ah a lût rawh. Chun, Simon nupi nu chu a damlo a zual ngâi le, chun a rangah an ngiar piak. ³⁹ Chun, a kiangah a dîr le, a râifanh chu a fâi le, a reh rawh le; chun a thawk sawm le, an herh phung a timhtuah piak na rawh. ⁴⁰ Chun, nî tlâk awt bâiah nganfâk dang dang hen damlo tla, damlo a nei mi zawzawng nih a sinah an hawngpi le; chun an ektê tlûnah a kut a thâng chiau le, a damh vima na. ⁴¹ Chun, khuri tla khawm, "Pathian Fapa na si," ti hen, an âu le, mi tamtak paw sungah mi an hawng suak. Chun, anmah tla a fâi le, Mesia asi ti an theih le, an hawlh a siang lo. ⁴² Chun, khuadei kâ hen a suak le, ramkaro mun ah a kal le, chun mi zapi tla nih chun an hâwl le, a sinah an hawng kal le, anmah a kaltâk na lonâk ding hen thlauh an tum. ⁴³ Sikhawmsele, anih nih chun an sinah, "Khua dang tla khawmah Pathian Ram Thâwngthâng Ṭha ka sim ding asi, chu ruangah chun fial ka si dangâiah," a ti. ⁴⁴ Chun, Galili ram ah pumhnâk in tla ah thu a sim.

¹ Chun, hi hâwi hi asi le, mi zapi nih Pathian thu an ngâi le, amah an naih dûlmâl liauah, anih chu Genesaret Rilî kap ah chun a dîr le, ² chun rilî kap ah chun lawng panih a um mi a muh le, sikhawmsele ngâ tleihtu tla chu an suak le, an lên tla an suk. ³ Chun, lawng pakhat Simon tâ ah chun â chuan le, a sinah vakap ah mi tâwm tawlh ding hen a deih. Chun, a to le, lawng thawk hen chun mi zapi tla chu a sîntir na rawh. ⁴ Chun, thusim a bâng rawh chun Simon sinah, "Tî thuknâk lei fûk le, ngâ tleih ding hen nan lên tla vawrh rawh," a ti. ⁵ Chun, Simon nih a sinah, "Sîntirtu, hamh tak hen zân khuadei hen kan ti le, zeikhawm kan tawng lo, sikhawmsele na thu hen lên tla ka vawrh lai," a ti le, a sâng. ⁶ Chun, an vawrh le, ngâ cherkhet a khuh le, an lên tla chu a tlêk ṭhikṭhek rawh. ⁷ Chun, lawng dang ah an hâwi tla chu anmah hawng bawmh ding hen kut hen an kawh na. Chun, an hawng kal le, lawng panih chu pil dedêng hen khat phak vevê hen an râwn. ⁸ Chun, Simon Peter nih a muh rawh chun Jisu khup kiangah a bawkbukhup le, "Lalpa hawng ka kaltâk rawh, misual ka si," a ti. ⁹ An ngâ tleih chu amah leh a hâwi tla hen thungâi chê an ti. ¹⁰ Simon murui ber Zebedai fapa Jem leh Johan khawm nih thungâi chê an ti. Chun, Jisu nih Simon sinah, "Ṭih lah, tu thawk hen minung na tleih lai rawh," a ti. ¹¹ Chun, an lawng tla chu vakap ah an kalpi le, zeizawng kaltâk hen amah chu an zûl rawh. ¹² Chun, khua pakhat ah a um liauah mi pakhat a pum hen phâr mi a um. Anih nih chun Jisu a muh le, a bawk le, "Lalpa na duh chun na hawng ka thiangtir kho," a ti le, a ngiar chiam. ¹³ Chun, Jisu nih chun a vuanh le, a tawngh, "Ka duh, thenhlimh rawh," a ti. Chun, zeikarlo ah a phâr chu a tlâu rawh. ¹⁴ Chun, a sinah, "Âukhawm simh lah, sikhawmsele bâwlpu sinah va a zauhtir le, na thianhnâk ding hen Mosi ruat hâwi hen pêk, mi tla theihtirnâk ding hen," a ti thlir. ¹⁵ Sikhawmsele, a thâwng chu a thang zual khun; mi zapi cherkhet a thu theih duh leh nganfâk tla dam duh hen an hawng a pûm chiam. ¹⁶ Sikhawmsele, anih chu ramkaro ah amah ê hen a kal le, thla a cham tâwn. ¹⁷ Chun, ni khat chu a sîntir na liauah Farisai tla leh Dân sîntirtu tla an to le, chubang tla chu Galili leh Judai ram khua kip thawk hen leh Jerusalem thawk hen hawng mi tla an si le; chun mi damhtir ding hen Lalpa thiltikhonâk chu a sinah a um. ¹⁸ Chun, mi pakhat a khêng mi ihkhun hen an hawng zawnh le; a mâika ah siah ding hen lûtpi ding an awt. ¹⁹ Chun, mi zapi ruangah chun lûtnâk an tawng lo le, in tlûnah an kâi le, in tlûn an pemh le, a lâi takah Jisu mâika ah ihkhun hen an thlâk. ²⁰ Chun, an lungnâk chu a muh le, a sinah, "Minung, na sual tla ngaihdam asi rawh," a ti. ²¹ Chun, Dân sîntirtu tla leh Farisai tla nih chun, "Pathian simsiattu hi âu me si le? Pathian cho lo nih chun âu nih me sual tla ngaihdam kho?" ti hen, an ruat. ²² Chuvachun, Jisu nih an ruat mi chu a theih le, an sinah, "Nan thinlung ah zei me nan ruat? ²³ ’Na sual tla ngaihdam asi rawh,’ ti leh, ’Thawk le, kê hen kal rawh,’ ti hi a zei mi me sim a awl dauh? ²⁴ Zeikhawm si sele, laikulh ah hin Minung Fapa nih hin sual ngaihdam khonâk a nei ti nan theihnâk ding hen," a ti le, a khêng mi sinah chun, "Thawk le, na tangphah lâk le, na in ah kal rawh ka nan ti," a ti. ²⁵ Chun, an mitmuh ah a thawk sawm le, a itnâk chu a lâk le, Pathian sawr bû vima hen a in ah a kal rawh. ²⁶ Chun, an ektê hen thungâi chê an ti le, Pathian an sawr le, "Tusûn ah chun thilchê tak kan muh asi," an ti le, thungâi an lâu. ²⁷ Chun, chu thluh rawh chun a suak le, siah châwinâk mun ah a to mi, siah khawlhtu pakhat a min, Levi a muh le; chun a sinah, "Hawng ka zûl rawh," a ti. ²⁸ Chun, zeizawng a kaltâk le, a thawk le, a zûl rawh. ²⁹ Chun, Levi nih chun a in ah Jisu rangah puai rokual tak a tuah le; chun, siah khawlhtu tla leh midang tla hen mi tamtak nih anmah tla an dûmpi na. ³⁰ Chun, Farisai tla leh Dân sîntirtu tla hen, anmah murui lakah mi, a ṭhiruai tla tlûnah an chipchiar le, "Zeirangah me siah khawlhtu tla leh misual tla sinah nan ei hen nan din?" an ti. ³¹ Chun, Jisu nih an sinah, "A dam mi nih chun dâktawr a herh lo le, damlo mi tla nih an herh dauh asi. ³² Mi rep tak tla lam ding hen hawng kal ka si lo le, misual tla rimtir ding hen hawng kal ka si," a ti le, a sâng. ³³ Chun, annih nih chun a sinah, "Johan ṭhiruai tla nih buh an ngei lemang le, thla an cham tâwn; Farisai tla khawm nih chu hâwitê hen an ti tâwn. Sikhawmsele, na ṭhiruai tla nih chun an ei hen an din tâwn," an ti. ³⁴ Jisu nih an sinah, "Mo lawmhpitu tla sinah a pasal ding mi a um kar vial mo lawmhpitu tla chu nan ngeitir kho na tâwn mazei? ³⁵ Sikhawmsele, a pasal ding mi chu an sin thawk hen lâk ving ni a hawng tlung lai, chu ni ah lam chun an ngei teh lai," a ti. ³⁶ Chun, an sinah tahṭhimh thu khawm a sim le: "Âukhawm nih puan thar thlêk hen puan li a belh dah lo, belh sele a thar mi chu a thlêk lai le, a thar tliar leh a li mi chu anna êp lai loh. ³⁷ Chun, âukhawm nih uain thar savun dûr a li mi tla ah an râwn dah lo, râwn sele, uain thar nih chun savun dûr tla chu a tâwn phet lai le, a tlê lai le, savun dûr tla khawm chu a vei lai. ³⁸ Uain thar chu savun uain dûr thar tla ah an râwn dauh ding asi. ³⁹ Chun, âukhawm nih uain a li mi dintu nih chun a thar mi an duh dah lo; ’A li mi a ṭha dauh’ an ti ruangah," a ti.

¹ Chun, Dinhni ah chun fâng mun tla a pal le, a ṭhiruai tla nih chun favûi tla an khiak le; an kut hen an nuai le, an ei. ² Chun, Farisai zeimaw mi tla nih, "Zeirangah me Dinhni nan buar?" an ti. ³ Chun, Jisu nih a sâng le, "David a sung a vâng liauah a hâwi tla hen an thilti kha; khabang tla khawm kha nan rêl lo mazei? ⁴ Kha hâwi hen Pathian in ah a lût le, bâwlpu tla cho lo nih chun ei a thiang lo mi zarh sang chu a lâk le, a hâwi tla sinah a pêk bâk na mi thu kha," a ti. ⁵ Chun, amah nih an sinah, "Minung Fapa hi Dinhni Lal asi," a ti. ⁶ Chun, Dinhni dang ah chun pumhnâk in ah a lût le, a sîntir. Chunah chun minung pakhat kut vawrhlei khêng a um. ⁷ Chun, Dân sîntirtu tla leh Farisai tla nih chun a phiarnâk ding an tawng khonâk ding hen Dinhni ah a damh awt leh awt lo an thlingthlâk. ⁸ Sikhawmsele, anih nih an thinlung chu a theih le, kutkhêng sinah, "Thawk le, a lâi ah dîr," a ti. Chun, a thawk le, a dîr rawh. ⁹ Chun, Jisu nih an sinah, "Dinhni ah hin ṭhattir ma a thiang, siattir? Ruangsuah ma a thiang, thah? Ka nan deih na," a ti. ¹⁰ Chun, an ektê hen chun a zauh na le, a sinah, "Na kut zangh," a ti. Chun, a zangh le, a kut chu a dam rawh. ¹¹ Chuvachun, an thintawr hen an kek awt le, Jisu lakah an ti ding dân anna thluk. ¹² Chun, chu ni tla ah chun thlacham ding hen tlâng leiah a kâi le, chun zân khuadei hen Pathian sinah thla a cham. ¹³ Chun, khua a dei kâ hen a ṭhiruai tla chu a kawh na le, an lakah mi leinih a thîm na le, an min khawmah mifial ti hen a sak: ¹⁴ Chu tla chu Simon, (Peter a sak mi ber) leh a unau Andri, Jem leh Johan, Philip leh Bartholomai, ¹⁵ Mathai leh Thom, Alphai fapa Jem, Simon, (Zelot an ti mi) ¹⁶ Jem fapa Juda leh a tleihtirtu Juda Iskariot tla an si. ¹⁷ Chun, anmah rual hen a tum le, munrâwn ah a dîr le, a ṭhiruai tla mi zapi cherkhet hen, Judai ram ah mi zawzawng leh Jerusalem ah mi leh Tura leh Sidon khua lei mi tisumsumriat kap ah mi, mi tamtak hen; chubang tla chu a thu ngâi duh leh an nganfâk tla damhtir duh hen an hawng kal asi. ¹⁸ Chun, khuri nâwmtâm nehsawh tla khawm an dam rawh. ¹⁹ Chun, amah lakah mi thiltikhonâk a suak le, mikip a damh vima na ruangah mi zawzawng nih chun tawngh an tum. ²⁰ Chun, a vân a tâu le, a ṭhiruai tla chu a zauh na le, "Nannih ngâkṭah tla, nan thaw a suak, Pathian Ram nan tâ asi ruangah! ²¹ "Nannih tuah sungvâng tla, nan thaw a suak, nan khim awt ruangah! "Nannih ṭap le tla, nan thaw a suak, nan ni awt ruangah! ²² "Minung Fapa ruangah mi nih an hua na hen, an nawng na hen, an fâi na hen, nan min a ṭha lo ti hen an lawnh tlak na tikah nan thaw a suak teh lai! ²³ Chu ni ah chun a lâwm ule, lâwptlo hen a lawk u; vân ah nan lâwmman a lian ruangah. Chu hâwi ber hen an thlâktu tla nih khuavâng tla tlûnah an ti tâwn kha. ²⁴ "Sikhawmsele, nannih minei tla, nan tlûn a pit! Nan lungngamnâk nan tawng rawh ruangah. ²⁵ "Nannih tuah khim mi tla, nan tlûn a pit! Nan sung a vâng awt ruangah. "Nannih tuah nih-le-khêk mi le tla, nan tlûn a pit! Ngaihsia hen nan ṭap awt ruangah. ²⁶ "Mi zawzawng nih an nan sawr na tikah nan tlûn a pit teh lai. Chu hâwi ber hen an thlâktu tla nih khuavâng telê tlûnah an ti kha. ²⁷ "Ka thu ngâitu tla, ka nan simh na, nan mêlma tla chu dâwt na ule, an hua natu chu ṭhatnâk ding ti ule, ²⁸ hawlhsiat an barh natu chu malsâwm ule, an sûlneng natu tla chu thlacham piak na u. ²⁹ Biang khatlei an benghtu sinah chun khatlei khawm dawnh rawh; chun, na puan lâktu sinah chun na kawrdawh lâk khawm êl lah. ³⁰ A nan deihtu kip sinah pêk rawh; chun, na thil an lâk piaktu sinah chun deih nawlh lah. ³¹ Chun, mi nih nan tlûnah an ti ding an nan duh na hâwi hen mi tlûn khawmah ti bâk u. ³² "Chun, an dâwt natu cho nan dâwt chun zei lâwmman me nan tawng? Misual tla khawm nih mah dâwttu chu an dâwt bâk asi. ³³ Chun, nan tlûnah an ṭha mi tla sinah cho nan ṭha chun âu sawr me nan tawng? Misual tla khawm nih chu hâwi ber hen an ti tâwn asi. ³⁴ Chun, tawng nawlh ding lungumnâk sin cho ah thil nan pûktir chun, âu sawr me nan tawng? Misual tla khawm nih a lîlâ tawng nawlh ding hen misual tla sinah an pûktir tâwn. ³⁵ Sikhawmsele, nan mêlma tla dâwt ule, an ṭhatnâk ding ti ule, pûktir u, lungdawng lo thlo hen, chun nan lâwmman a rokual lai, Chungnungchem fa tla nan si lai. Anih nih chun lâwm ding theih lo minung tla leh misual tla a dâwt tâwn. ³⁶ Nan pa nih mi a zângfah hâwi hen zângfah bâk u. ³⁷ "Simsâwi lah u, simsâwi hen nan um lai loh; mawhtir lah u, chun mawh hen nan um lai loh; ngaihdam u, chun ngaihdam hen nan um lai. ³⁸ Pêk u, pêk hen nan um lai; ṭhanemsemsê ngâi tak a tah hen, beng zat hen, ninh zat hen, liam pualmâl hen, nan kut ah an pêk na lai. Nan tahnâk lîlâ hen an tah piak na awt dangâiah," a ti. ³⁹ Chun, an sinah tahṭhimh thu a sim le: "Mitchâw nih mitchâw a ruai kho lai mazei? An panih hen khursaduap ah an tlâ vevê lai lo mazei? ⁴⁰ Ṭhiruai chu a sîntirtu tlûnah a um lo; mikip anna sîn thluh tikah an sîntirtu hâwi hen an um lai. ⁴¹ "Chun, zeirangah me mah mit lakah mi kân um mi chu ruat lo hen na unau mit lakah mi fungrêu chu na muh zia? ⁴² Mah mit lakah mi kân um mi chu muhlo hen na unau sinah, ’Unau na mit lakah mi fungrêu kha hawng ka thawhtir,’ zeitin na ti kho le? Mi perpê, na mit lakah mi kân kha thawh masa rawh, chun na unau lakah mi fungrêu chu thawh ding hen fiang tak hen na muh lai, ⁴³ "Thing ṭha rerêng rah sia hen rah a um lo; thing sia khawm rah ṭha hen rah a um ber lo. ⁴⁴ Thing kip anmah rah chiauah â thei asi. Mi nih kûng lingnei lakah theipi an kawih dah lo, ling marai lakah grêp rah an kawih dah lo. ⁴⁵ Mi ṭha nih chun a thinlung robâwm ṭha lakah mi thil ṭha tla a suah tâwn le; misual nih chun a thinlung robâwm sia lakah mi thil sia tla a suah tâwn; a thinlung ah khat mi chu a kâ nih a sim tâwn ruangah. ⁴⁶ "Chun, nannih nih zeirangah me ka thu zâwt ṭung lo hen, ’Lalpa,’ nan ka ti lemang? ⁴⁷ Mi kip ka sinah hawng kal hen, ka thu theih hen zâwttu zawng chu âu hawi me an si ka nan theihtir na lai. ⁴⁸ In saktu, thûkpi chawh hen, lungpi tlûnah lungphûm remh mi hâwi chu asi. Chun, tî a hawng lian chun tizangrual nih chu in chu a khawh le, a ninh kho lo le, a sak zia a ngenh ruangah. ⁴⁹ Sikhawmsele, theih hen zâwtlotu chu, lungphûm lo hen, tual tlûn ko ah in saktu hâwi mi chu asi; chun, tizangrual nih chu in chu a khawh le, a chim sawm le, chu in râwk zia chu thungâi hen a fâk asi," a ti.

¹ Chun, mi le tla nâ theih ah a thusim zawzawng a sim thluh rawh chun Kapernaum ah a lût rawh. ² Chun, kawrsen zâ hotu âumawh a to-aw duhtak a damlo le, a thi awt ngangâi. ³ Chun, Jisu thâwngthâng a theih ka hen a to-aw damh ding hen ngiar chiam ding hen a sinah Juda murui upa tla a fial na. ⁴ Chun, annih chu Jisu sinah an va tleng le, ṭhanemsemsê ngâi tak hen an ngiar chiam le, "Anih hi, hi hi na ti piak tlâk asi; ⁵ kan phun tla a dâwt le, kanna pumhnâk in khawm amah nih hawng kan sak piak asi," an ti. ⁶ Chun, Jisu chu anmah hen a kal rawh; chun in a tlung awt bâiah kawrsen zâ hotu nih chun a sinah a hâwi tla a fial le, "Lalpa, a nawktir lah, ka in sungah na hawng lût ding hen a tlâk lo; ⁷ churuangah na sinah hawng kal ding khawm tlâk hen ka ruat lo; thu cho sim le, ka ngâksia a dam ko lai. ⁸ Kei khawm mi thu hen um mi ka si le, ka tangah kawrsen tla an um le; pakhat sinah, ’Kal rawh,’ ka ti chun, a kal tâwn. Midang sinah khawm, ’Hawng,’ ka ti chun, a hawng tâwn, ka sal sin khawmah, ’Hi hi ti,’ ka ti chun, a ti tâwn," a ti. ⁹ Chun, Jisu nih chubang thu chu a theih rawh chun amah chu chê a ti le, â hawi le, mi zapi amah zûltu tla sinah chun, "Ka nan simh na, Israel tla lak khawmah hi hâwi rak hen lungnâk fâk hi ka tawng lo," a ti. ¹⁰ Chun, a mifial tla chu in ah an tlung nawlh le, to-aw chu dam hen an muh nawlh rawh. ¹¹ Chun, sâwtlotê ah khua pakhat Nain an ti mi ah chun a kal le, a ṭhiruai tla leh mi zapi cherkhet a sinah an kal bâk. ¹² Chun, kulh kawtkhâr kiang ah a va tlung rawh chun mithi an hawng zawnh le, a nu nih a fapa neihlem mi asi le, amah tâ nih numei asi fâwn; an khua mi tla tamtak chu a sinah an um. ¹³ Chun, Lalpa nih chun numei chu a muh kâ hen thungâi a siherh le, "Ṭap lah," a ti. ¹⁴ Chun, a va naih le, lâng chu a tawngh le; chun a zawnhtu tla chu an dîr rawh. Chun, "Tlangvâl, thawk rawh, ka nan ti," a ti. ¹⁵ Chun, mithi chu a to le, a hawlh rawh. Chun, Jisu nih chun a nu sinah a pêk rawh. ¹⁶ Chun, mi zawzawng nih an ṭih le, Pathian an sawr le, "Kan lakah khuavâng rokual tak a hawng um rawh," an ti le, "Pathian nih a mi tla a hawng veh na rawh asi," an ti. ¹⁷ Chun, chu thu chu Judai ram zawzawng leh a kiangkam ram kipah a thang rawh. ¹⁸ Chun, Johan ṭhiruai tla nih chun chubang thu zawzawng chu Johan rangah an simh. ¹⁹ Johan nih a ṭhiruai tla panih a kawh na le, Lalpa sinah chun a fial na le, "Hawng kal ding mi ma na si, midang kan ngâichâng lai rih ma?" ti hen. ²⁰ Chun, chu mi tla chu a sinah an hawng tlung rawh chun, "Baptistu Johan nih, ’Hawng kal ding mi ma na si, midang kan ngâichâng lai rih ma?’ ti hen, na sinah hawng kan fial asi," an ti. ²¹ Chun, chu liau takah chun Jisu nih nganfâk tla, râipi vei tla, khuri vuanh tla tamtak a damh na le, mitchâw tamtak khawm an mit a deitir na. ²² Chun, an sinah, "Kal nawlh ule, thil nan muh mi leh nan theih mi hi Johan va simh u; mitchâw tla an mit a hawng dei rawh, kekhêng tla kê hen an kal rawh, phâr tla an thiang rawh, nasêt tla khawm an nâ a fîm rawh, mithi tla thawh hen an um rawh, mipâm tla khawm nih Thâwngthâng Ṭha simh an tawng rawh. ²³ Chun, âuzawng ka tlûnah lungsilonâk muh lotu chu an thaw a suak, a ti le, a sâng. ²⁴ Chun, Johan mifial tla chu an tlung nûnah Jisu nih mi zapi sinah chun Johan thu a sim le, "Zei zauh ding hen me ramkaro ah nan kal mi kha? Lâiluang thli ninh ma? ²⁵ Asi lo leh, zei zauh ding chem me nan va kal mi kha? Puannêm aih ma? Puan rokual aih leh mi um nuam tla chu lal in ah tla an um. ²⁶ Asi lo leh, zei zauh ding chem hen me nan kal mi kha? Khuavâng ma? Asi chiammâm, ka nan ti na, khuavâng ngâk hen rokual dauh: ²⁷ ’Zauhnik, ka mifial na mâi leiah ka fial asi, anih nih chun na lam a siam lai,’ ti, a thâwngthâng an rîn mi kha, hi minung hi asi. ²⁸ Nunau ring mi lakah Johan ngâk a rokual dauh an um lo; sikhawmsele, Pathian Ram ah a mêchem mi khawm anih ngâk chun a rokual dauh, ka nan ti na," a ti. ²⁹ Chun, mi zawzawng nih an theih rawh chun siah khawlhtu tla hen, Johan baptis si rawh mi tla an si le, Pathian an mawhtir lo. ³⁰ Farisai tla leh Dân sîntirtu tla lam chu a sinah baptis rawh mi an si lo le, anmah rangah Pathian nih rem a ruat piak na mi kha an duh lo. ³¹ Chun, Jisu ber nih "Tusan minung tla hi zei hen me ka tahṭhimh lai? Zei hâwi me an si? ³² Ngâksia tla sumtuah zâwl ah to hen, ’Theikhang kan tum piak na le, nan lâm ṭung duh lo, kan ṭap chiam le, nan ṭap ṭung lo’ ti hen anna auh mi hâwi an si. ³³ Baptistu Johan chu a hawng le, sang a ei lo le, uain khawm a din lo le, nannih nih, ’Khuri luah mahi! nan ti. ³⁴ Minung Fapa a hawng kal le, a ei hen a din le, nannih nih, ’Zauhnik u, ei chak mi, uain din chak mi, siah khawlhtu tla leh misual tla hâwi khi, nan ti fâwn. ³⁵ Sikhawmsele, Pathian finghnâk chu a dik asi ti a fa zawzawng nih an langhtir. ³⁶ Chun, Farisai lakah mi pakhat nih a sinah buh ei ding hen a sâwm. Chun, Farisai in ah chun a lût le, buh a dûm. ³⁷ Chun, chu khua ah nunau pakhat a um. Farisai in ah buh dûm hen a to ti a theih kâ hen alabasta bâwm hen sariak rimthâw a hawng put. ³⁸ A dung leiah a kezaphab bul ah chun ṭap bû hen a dîr le, a mitthli hen a kezaphah a chinh le, a sam hen a nâwt, a kezaphah chu a châwchawk chiam le, sariak rimthâw hen a chulh. ³⁹ Chun, a sâwmtu Farisai nih chun chu chu a muh rawh chun a thinlung hen, "Hi minung hi khuavâng asi chun a tawnghtu nunau hi âu me asi, zei hâwi mi me asi, theih ding mi tak, misual asi dangâiah," a ti. ⁴⁰ Chun, Jisu nih a sinah, "Simon, na sinah thu kâ khat sim ding ka nei," a ti le, a sâng. Chun, anih nih chun, "Sim ko me, Sîntirtu," a ti. ⁴¹ Chun, Jisu nih, "Tangka pûktirtu pakhat sinah mi panih nih lei anna bat. Pakhat denari zâ â bât le, pakhat nih sâwmnga. ⁴² Chun, a rulhnâk an nei lo le, a ngaihdam vevê na. Chuvachun, chu minung tla nih chun a zei mi nih me anih chu a dâwt dauh lai?" a ti. ⁴³ Simon nih chun, "A ngaihdam tam dauh mi nih si hen ka ruat," a ti le, a sâng. Chun, anih nih a sinah, "Na ruat dik ngâk," a ti. ⁴⁴ Chun, nunau lei chu â hawi le, Simon sinah chun, ’Hi nunau hi na muh ma? Na in ah ka hawng lût le, nangnih ka kezaphah ṭâwlnâk ding tî na ka pêk lo, anih lam nih chun a mitthli hen ka kezaphah a chinh le, a sam hen a nâwt asi. ⁴⁵ Nangnih na hawng ka châwchawk rerêng lo; anih lam nih chun ka hawng lût kâ thawk hen ka kezaphah châwchawk a bâng lo. ⁴⁶ Nangnih ka lû ah sariak na ka thuh lo, anih lam nih chun ka kezaphah ah sariak rimthâw a chulh. ⁴⁷ Churuangah ka nan ti, a sual tamtak kha ngaihdam piak hen a um rawh; anih khawm nih thungâi a dâwt asi hi. Sikhawmsele, ngaihdam tâwm mi nih chun a dâwt tâwm tâwn," a ti. ⁴⁸ Chun, nunau sinah chun, "Na sual tla ngaihdam asi rawh," a ti. ⁴⁹ Chun, a buh dûmpitu tla nih, ’Sual tla khawm ngaihdam khotu hi âu me si le?" anna ti. ⁵⁰ Chun, anih nih nunau sinah chun, "Na lungnâk hi ruang na suak phah asi, lungngam tak hen kal rawh," a ti.

¹ Chun, a nehnûn dauh ah chun Jisu thusim leh Pathian Ram Thâwngthâng Ṭha tlungtir hen khua lian leh khuatê tla a ṭawl vima le, a sinah leinih tla chu an um. ² Chun, unau zeimaw mi tla khuri vuanh dam mi tla leh nganfâk dam mi tla hen: Chubang nunau tla chu Mari, a paw sungah mi khuri pasarih an suak mi Magdala mi Mari an ti mi, ³ Herod sum kiltu Chuza nupi Joana, Susana leh midang tamtak tla hen an si. Chubang tla nih chun mah neih hen an eibâr an timhtuah piak tâwn. ⁴ Chun, mi zapi cherkhet an hawng a pûm le, khua kip mi a sinah an hawng kal le, tahṭhimh thu hen thu a sim: ⁵ "Fachî vawrhtu chu a fachî vawrh hen a kal le; chun, a vawrh liauah a zeimaw mi lam vâu ah a tlâ le, mi nih an lamh le, chung zuang va tla nih an tlanh hep. ⁶ Chun, a zeimaw mi lungpher tlûnah a tlâ le, chun a keuh kâ hen a dâm lo ruangah a uai ver. ⁷ Chun, a zeimaw mi bualingnei lakah a tlâ le, bua hen rual cho hen an keuh le, a dawrh nek. ⁸ Chun, a zeimaw mi tual ṭha lakah a tlâ le, a hawng keuh le, a let zâ hen a rah rawh," a ti. Chun, chubang thu a sim liauah a âu le, "Âuzawng theihnâk ding hen nâ nei nih chun theih seh," a ti. ⁹ Chun, a ṭhiruai tla nih chun a sinah, "Hi tahṭhimh hi zei tinâk mesi?" ti hen, an deih. ¹⁰ Chun, anih nih chun, "Pathian Ram thu thup tla chu nannih theih lam chu siang asi le, midang sinah lam chun tahṭhimh thu cho hen sim asi; ’muh khawmsele, muhlo an si khonâk ding hen, nâ hen theih khawmsele, a ngaihtawnh dân an theih lonâk ding hen.’ ¹¹ "Tahṭhimh thu kha hi hi asi: Fachî chu Pathian thu asi. ¹² Chun, lam vâu ah chî a tlâ mi chu, thu theih rawh mi tla hi an si; chun diabol chu a hawng kal le, an lung lo ding hen ruangsuah an si kho lonâk ding hen an thinlung ah mi thu a lâk piak na tâwn. ¹³ Chun, lungpher tlûnah chî a tlâ mi chu an theih kâ hen thu chu lâwm tak hen tleih mi tla an si; sikhawmsele, ram an nei lo; sâwtlotê chu an lung le, lêmnâk tawng tikah an bângtâk nawlh tâwn. ¹⁴ Chun, bualingnei lakah chî a tlâ mi tla chu hi bang minung tla hi an si; an theih nûnah an kal le, taksa lei lungkhamnâk tla, neihsiahnâk tla, damsung nuamchênnâk tla nih chun a dawrh le, an rah a min dah lo. ¹⁵ Tual ṭha lakah chî a tlâ mi lam chu hi bang tla hi an si; thinlung rep leh ṭha hen thu an theih le, an chîng thlir le, felfê tak hen an rah tâwn. ¹⁶ "Âukhawm khâwnvâr kâih hen mâihûm hen an khuh dah lo, ihkhun tang khawmah an siah lo; a lût mi zawng nih a chêu an muh kho ding hen a siahnâk ah an siah tâwn asi. ¹⁷ "Puang lo ding hen pheh zeikhawm a um lo, theih lo ding hen leh lang lo ding hen thuh zeikhawm a um lo. ¹⁸ "Chuvachun, zei hâwi hen se nan theih a thiamthih u; âuzawng a nei mi vial sinah an pêk sap lai le, âuzawng a nei lo mi vial nei hen anna ruat lem mi khawm an suh lai," ati. ¹⁹ Chun, a nu leh a unau tla nih chun Jisu lei an hawng fûk le, sikhawmsele mi zapi ruangah chun a kiangah an tleng kho lo. ²⁰ Chun, "Na nu leh na unau tla nih nangmah muh ding duh hen lênglei ah khin an dîr ko," ti hen, an simh. ²¹ Chun, anih nih chun an sinah, "Hi bang Pathian thu theih hen zâwttu tla hi ka nu leh ka unau tla an si," a ti le, a sâng. ²² Chun, ni khat chu a ṭhiruai tla hen lawng ah â chuan le, chun an sinah, "Rilî varâl leiah khin kan kal lai," a ti, Chun, lawng chu an sût le, an kal rawh, ²³ Chun, an kal liauah Jisu chu a it thlit le, chun rilî ah chun thli a hawng râng le, an lawng chu tî hen a khat awt le, ṭihnungkâi tak hen an um rawh. ²⁴ Chun, a sinah an va kal le, an thawh le, "Sîntirtu, Sîntirtu, kan vei awt hi!" an ti. Chun, Jisu chu â ṭhang le, thli leh titlingtlawk chu a fâi le; chun a bâng le, a reh rawh. ²⁵ Chun, an sinah, "Zeiah me nan lungnâk?" a ti. Chun, an ṭih le, thungâi chê an ti, "Hi hi âu me si le?" Thli leh tî tiang khawm thu a pêk le, anna awi e!" anna ti. ²⁶ Chun, Galili ram zâwn ah Gerasin mi tla ram chu an tlung. ²⁷ Chun, tlâng a kâi rawh chun khua mi khuri vuanh âu nih mawh a tawng le; chu minung chu sâwt tak puan aih lo hen a um le, in khawm ah a um lo, thlân tla ah a um dauh tâwn. ²⁸ Chun, Jisu a muh kâ hen a âu le, a mâika ah a bawkbukhup le, hâu fâk tak hen, "Jisu, Pathian Chungnungchem Fapa, kei leh nang zei me kanna tlâinâk um? Hawng ka rêp rîlmâl lah, ka nan ngiar," a ti. ²⁹ Jisu nih khuri nâwmtâm chu, chu minung paw sungah mi chu suak ding hen thu a pêk rawh ruangah. Chu minung chu vei tamtak khuri nih a tleih tâwn asi, mi nih thîr chikchîn leh rêng an khimh le, an vêng kumza tâwn; sikhawmsele, a phuarnâk tla a sah le, khuri nih ramkaro leiah a khalh tâwn. ³⁰ Chun, Jisu nih, "Na min zei mesi?" ti hen a deih. Chun, anih nih chun, "Zapi," a ti le, a paw sungah khuri tamtak an lût ruangah. ³¹ Chun, khur dawng neilo ah kal ding thu pêk lo ding hen Jisu sinah an ngiar. ³² Chun, chunah chun tlâng ah vawk rual tamtak an tlawng le, chun a sinah vawk paw sungah lût khonâk an ngiar. Chun, anih nih chun thu a pêk. ³³ Chun, khuri tla chu minung paw sungah mi an suak le, vawk paw sungah an lût le, chun vawk rual chu kham ah anna khâwk chiam le, rilî ah an tek le, an tlâ le, tî thalh hen an thi rawh. ³⁴ Chun, a vulhtu tla nih chun thil umzia chu an muh le, an tek phêt le, khua ah leh ram ah chun an sim. ³⁵ Chun, "Zeise asi rawh ne?" ti hen zauh ding hen an suak. Chun, Jisu sinah an tlung le, khuri nih a suaktâk mi chu puan aih hen, thinlung kêl put hen Jisu kebul ah to mi an va muh; chun an ṭih rawh. ³⁶ Chun, a theihtu tla nih chun khuri vuanh a damh zia thu chu, chubang tla sinah chun an simh na rawh. ³⁷ Chun, Gerasin ram kiangkam mi tla zawzawng nih chun thungâi an ṭih ruangah anih chu an sinah mi kal ving ding hen an ngiar le; chun lawng ah â chuan le, a kîr nawlh rawh. ³⁸ Chun, khuri nih a suaktâk mi lam nih chun Jisu sinah um kumza ding a ngiar. Sikhawmsele, Jisu nih, ³⁹ "Na in ah tlung le, Pathian nih na rangah thil a nan ti piak mi hi va sim rawh," ti hen a kaltir rawh. Chun, a kal le, khuapi sung zawzawng ah chun Jisu nih a rangah thil a ti piak zia chu a phuang. ⁴⁰ Chun, Jisu a hawng kîr nawlh rawh chun mi zapi nih amah an lawmh le, an ektê hen amah chu an ngâk ruangah. ⁴¹ Chun, mi pakhat Jaira, pumhnâk in hotu chu a hawng kal le, Jisu kebul ah a bawkbukhup le, a in ah kal ding hen a ngiar. ⁴² Fanu pakhat cho kum leinih ding mi a nei le, chu chu thi awt tetem hen a rîl ko ruangah. Chun, Jisu a kal liauah mi zapi nih an eng dûlmâl. ⁴³ Chun, nunau pakhat, kum leinih thî hat kholo mi a um le, a sum neih zawzawng chu dâktawr tla lakah a veih hep rawh le, âukhawm nih an damh kho lo rawh le; ⁴⁴ chu minung chu a dung leiah a hawng kal le, a puan sâr a tawngh le; zeikarlo ah a thî suak chu a hat sawm rawh. ⁴⁵ Chun, Jisu nih, "Hawng ka tawnghtu kha âu me?" a ti. Chun, "Kei ka si lo," an ti chiau. Peter leh a hâwi tla nih, "Sîntirtu, mi zapi nih an eng chukmak mi, an chîl chukmak khateh," an ti. ⁴⁶ Sikhawmsele, Jisu nih, "Mi âu nih mawh hawng ka tawngh asi, thiltikhonâk ka sungah mi a suak ti ka theih asi," a ti. ⁴⁷ Chun, nunau nih chun â thup kholo ti a theih le, thir bû hen a hawng kal le, a mâika ah a bawkbukhup le, a tawngh sawm le, zeikarlo ah a dam zia chu mi zawzawng mâika ah a sim rawh. ⁴⁸ Chun, anih nih chun a sinah, "Ka fanu, na lungnâk hi na dam phah asi, lungngam tak hen kal rawh," a ti. ⁴⁹ A hawlh liau chirah pumhnâk in hotu in ah mi chu minung pakhat a hawng kal le, "Na fanu a thi rawh, Sîntirtu hi nawktir lah," a ti. ⁵⁰ Jisu nih chun chu thu chu a theih rawh chun, "Lâu lah lung ko, chun a dam nawlh lai," a ti le, a sâng. ⁵¹ Chun, in chu a va tlung rawh chun Peter, Johan leh Jem leh ngâksia nu leh pa cho lo chu âukhawm lût a siang lo. ⁵² Chun, an ektê hen an ṭap chur le, an ir anna chumh le; chun anih nih chun, "Ṭap lah u, a thi lo, a it mi asi," a ti. ⁵³ A thi rawh ti an theih ko dangâiah an nihsanh ko. ⁵⁴ Jisu nih chun a kut a tleih le, "Kuihtê, thawk rawh," a ti le, a kawh. ⁵⁵ Chun, a thlarau chu a hawng kîr nawlh le, a thawk sawm le; chun, zeilo ei ding thu a pêk. ⁵⁶ Chun a nu leh a pa nih chun thungâi chê an ti. Sikhawmsele anih nih chun a thilti chu âukhawm nih theihlo ding hen a khap.

¹ Chun, Jisu nih leinih tla chu a pumh na le, khuri zawzawng tlûnah thiltikhonâk leh thuneihnâk leh nganfâk tla damh khonâk a pêk. ² Chun, Pathian Ram thu sim ding leh damlo tla damh ding hen a fial na rawh. ³ Chun, an sinah, "Nan khual tlâwngnâk ah ṭhianṭhunh mawh zâl mawh, sang mawh tangka mawh zeikhawm put lah u; kawrdawh panih khawm put lah u. ⁴ Chun, nan tlungnâk in zawngah tlung kumza u, chu in thawk hen chun suak u. ⁵ Chun, an lawmh lo natu zawng chu, chu khua thawk hen nan suak tikah chun anmah theihtirnâk ding hen nan kezaphah ah valeidip chu khâwng u," a ti. ⁶ Chun, an kal le, khua an ṭawl vima le, ram kipah Thâwngthâng Ṭha an sim le, mi an damh vima. ⁷ Chun, lal Herod nih a thilti zawzawng chu a theih le, a zeimaw mi nih, "Johan kha a nung nawlh mahi," an ti le, ⁸ a zeimaw mi nih, "Elija a hawng a langh rawh asi hi," an ti le, a zeimaw mi nih, "Tuan liau mi khuavâng âumawh a thawknawlh asi hi," an ti ruangah a lawksawng rawh. ⁹ Chun, Herod nih, "Johan chu a lû ka tan rawh mi; sikhawmsele, hi tluk rak hen a thâwng ka theih mi hi âu mesi?" a ti. Chun, amah chu muh a tum rawh. ¹⁰ Chun, mifial tla chu an hawng tleng rawh chun an thilti tla a sinah an ruah. Chun, anih chu anmah tla put hen Betsaida an ti mi khua ah chun a dang hen a kal rawh. ¹¹ Sikhawmsele, mi zapi tla nih chun an theih le, an zûl vima; chun anih nih chun annih chu a lawmh na le, Pathian Ram thu a sîntir na le, damh ding a herh mi vial a damh na. ¹² Chun zânleibâi zau asi rawh chun leinih tla chu an hawng le, a sinah, "Kan kiangkam khua tla ah leh lo tla ah kal hen, tlungnâk leh ei ding an tawng khonâk ding hen mi zapi hi kaltir na; ramkaro mun ah um kan si mi," an ti. ¹³ Anih nih chun an sinah, "Nanmah nih ei ding pêk na u," a ti. Chun, annih nih chun, "Hi bang minung zawzawng rangah hin ei ding kan va châwk piak na lo chun sangtlêp panga leh ngâ panih cho lo chu zeikhawm, kan nei lo," an ti. ¹⁴ (Upa vial khawm sângnga ding an si.) Chun, a ṭhiruai tla sinah, "A murui hen totir na u, sâwmnga ding vima hen," a ti. ¹⁵ Chu hâwi hen an totir na. ¹⁶ Chun, sangtlêp panga leh ngâ panih chu a lâk le, vân lei zauh hen mal a sâwm le, a phel le, mi zapi mâika ah hunh ding hen a ṭhiruai tla sinah chun a pêk. ¹⁷ Chun, an ei le, an khawp ver le, an ei bang neknâwi tla chu an rût le, khobung leinih a khat. ¹⁸ Chun, Jisu amah lâwng hen thla a cham liauah a ṭhiruai tla chu a sinah an um. Anih nih chun an sinah, "Mi zapi tla nih âu asi an ka ti?" ti hen, a deih na. ¹⁹ Chun, annih nih chun, "Baptistu Johan asi," an ti; sikhawmsele, zeimaw mi nih, "Elija asi," an ti, zeimaw mi nih, "Tuan liauah mi khuavâng âu dauh mawh a thawknawlh rawh asi, an ti," ti hen, an sâng. ²⁰ Chun, anih nih chun an sinah, "Asi chun, nannih nih âu asi nan ka ti?" a ti. Chun, Peter nih, "Pathian Mesia chu," ti hen a sâng. ²¹ Chun, chu thu chu âukhawm simh lo ding hen a khap le, thu a pêk; ²² "Minung Fapa nih hin thil tamtak a tuar ding asi, upa tla, bâwlpu lalchem tla leh Dân sîntirtu tla duhlo hen a um ding asi; thah hen a um ding asi, chun ni thum ni ah thawh hen a um ding asi," a ti. ²³ Chun, amah ber nih mi zawzawng sinah, "Âuzawng nih hawng ka zûl a duh chun, mah a pheh hen, nisiar a kraws put hen hawng ka zûl seh. ²⁴ Âuzawng a nungnâk hum duhtu zawng nih a thlâu lai le; âuzawng keimah ruangah a nungnâk thlâutu zawng nih, chu nih chun a hum lai. ²⁵ Mi nih laikulh hi a pum hen a ting sele, mah a veih hen mawh a râwk sele a rangah zei me ṭhavak lai? ²⁶ Âuzawng keimah leh ka thu zahpitu zawng, Minung Fapa nih hin, amah rokualnâk hen leh a Pa rokualnâk hen vânmifial thenhlimh tla rokualnâk hen a hawng kal tikah chun, chu minung chu a zahpi lai. ²⁷ Dik tak hen ka nan simh na, hinah dîr mi a zeimaw mi tla hi Pathian Ram an muh lân lo chu thihnâk temlo thlo ding an um," a ti. ²⁸ Chun, chubang thusim thawk hen ni riat dingah mawh, Jisu nih Peter, Johan leh Jem chu a kalpi na le, thlacham ding hen tlâng ah an kal. ²⁹ Chun, thla an cham liauah a mêl umzia chu a hawng a dang le, a nipuan chu a hawng vâr le, mit ser rê hen a hawng um rawh. ³⁰ Chun, mi panih amah hen anna sâwn le, chu tla chu Mosi leh Elija an si. ³¹ Rokualnâk hen an hawng a langh le, Jerusalem ah a thihnâk ding thu an sim. ³² Peter leh a hâwi tla lam chu an ngû le; chun an fîm kâ hen a rokualnâk leh a sinah mi panih dîr mi chu an muh rawh. ³³ Chun, Mosi leh Elija nih Jisu an ṭhen awt liauah Peter nih Jisu sinah, "Sîntirtu, kan rangah hinah um hi a ṭha; basâ pathum kan khuar lai le, nang rangah pakhat, Mosi rangah pakhat, Elija rangah pakhat," a ti le, (A thusim khawm theih lo hen.) ³⁴ Chun, chubang thu chu a sim liauah sûm a hawng zîng le, a liah na rawh; sûm ah an lût liauah an ṭih. ³⁵ Chun, sûm ah chun aw-hâu a hawng suak le, "Hi hi ka Fapa, ka thîm mi chu asi, amah thu ngâi u," a ti. ³⁶ Chun, aw-hâu chu a reh kâ hen Jisu chu amah lâwng hen an muh rawh. Chun, an dâisip le, an thil muh chu chu liauah âukhawm an ruah lo. ³⁷ Chun, a thâituan ah tlâng ah mi chu an ṭum nûnah mi zapi cherkhet nih amah chu an hawng dawng. ³⁸ Chun, mipi lakah chun minung pakhat a âu le, "Sîntirtu, ka fapa zauh ding hen ka nan ngiar, ka fa neihlem asi. ³⁹ Chun, khuri nih a tleih tâwn le, a dêng khuai rê lânlo chu a kaltâk duh lo. ⁴⁰ Chun, na ṭhiruai tla sinah nar ding hen ka ngiar na le, an ti kho lo," a ti. ⁴¹ Chun, Jisu nih, "Tusan minung lungnâk neilo leh lungkhung le tla, zei tiang me nan sinah ka um lai le, ka nan sang kho na lai? Na fapa chu hinah hawng put," a ti le, a sâng. ⁴² Chun, a hawng kal liauah khuri nih chun a thlûk chiam le, cherkhet hamh a pêk. Sikhawmsele, khuri nâwmtâm chu a fâi le, ngâksia chu a damh le, a pa sinah chun a kaltir nawlh rawh. ⁴³ Chun, mi zawzawng nih Pathian rokual zia chu thungâi chê an ti. Chuvachun, mi zawzawng nih chun a thilti zawzawng chu chê an ti liauah Jisu nih a ṭhiruai tla sinah, ⁴⁴ "Chubang thu chu nan nâ ah lût seh: Minung Fapa hi minung tla kut ah tleihtir hen a um awt ruangah," a ti. ⁴⁵ Sikhawmsele, a thusim chu a ngaihtawnh dân an thiam lo le, a thu umzia an theih lonâk ding hen an sinah thawk hen â thup asi; chu thusim thâwngthâng chu amah tâ nih an deih ngam lo. ⁴⁶ Chun, "Kan lakah âu me rokual chem lai?" ti hen anna êl. ⁴⁷ Chun, Jisu nih an thinlung ah anna ruah mi chu a theih le, ngâksiatê a kawh le, a sîrah a dîrtir. ⁴⁸ Anih nih chun an sinah, "Âuzawng ka min ruangah hi ngâksiatê hi lawmhtu zawng chu keimah an ka lawmh asi; âuzawng kei an ka lawmhtu vial chu hawng ka fialtu lawmh an si; nan ektê lakah a mêchem mi hi asi rokual chem mi chu," a ti. ⁴⁹ Chun, Johan nih chun, "Sîntirtu, âumawh na min hen khuri tla a nar mi kan muh le, kan nan zûlnâk ah â tel bâk lo ruangah kan khap asi," a ti le, a sâng. ⁵⁰ Jisu nih a sinah, "Khap lah u rawh, âuzawng nanmah do lotu chu nanmah lei ṭângṭawm an si," a ti. ⁵¹ Chun, vân ah a kâi ding tik a tlung awt liauah Jerusalem ah kal ding hen â hawi thlir le, a lânkhân hen thu thanhtu tla a fial na le; ⁵² chun an kal le, amah rangah timhtuah piak ding hen Samari mi tla khua pakhat ah an lût. ⁵³ Chun zauhnâk ah Jerusalem leiah kal ding hen a lang ruangah amah an lawmh lo. ⁵⁴ Chun, ṭhiruai Jem leh Johan nih chun an muh kâ hen, "Lalpa, hi bang tla kâng vernâk ding hen vân ah mi mei thlâktir sele rem na ti ma?" an ti. ⁵⁵ Anih chu â hawi le, a châk na. ⁵⁶ Chun khua dang ah an kal rawh. ⁵⁷ Chun, lampi ah an kal liauah, âu nih mawh a sinah, "Na kalnâk zawngah ka nan zûl lai," a ti. ⁵⁸ Chun, Jisu nih a sinah, ’Kâwlui tla nih kua an nei le, chungzuang va tla nih bû an nei le, Minung Fapa lam nih chun a lû ngauhnâk a nei lo," a ti. ⁵⁹ Chun, midang sinah, "Hawng ka zûl rawh," a ti. Sikhawmsele, anih nih chun, "Lalpa, ka pa hawng ka vûitir tâ rih," a ti. ⁶⁰ Anih nih chun a sinah, "Mithi nih anmah mithi chu vûi seh; nangnih chun Pathian Ram thu sim le, zanh rawh," a ti. ⁶¹ Chun, midang khawm nih, "Lalpa, ka nan zûl lai; sikhawmsele, ka in ah mi tla aw-kâ nêm hen hawng ka thlahtir tâ rih," a ti. ⁶² Chun, Jisu nih a sinah, "Âuzawng tual nâwnnâk tleih hen dung leiah zauh mi chu Pathian Ram rangah a tlâk loh," a ti.

¹ Chun, chu nûnah chun Lalpa nih midang sâwmsarih panih tla a ruat na le, a kalnâk ding khua kipah leh mun kipah, amah lânah panih vima hen a fial na. ² Chun, an sinah, "Fângât ding thungâi a tam le, sikhawmsele a ṭuantu tla an tâwm; chuvachun, a fângât ding hen ṭuantu ding tla fial ding hen fâng dâwngpu sinah ngiar u. ³ Kal u; chingngia nâwngah dawrâ fa um hâwi hen ka nan fial na hi. ⁴ Tangka sâwngkhâwi, zâl, pheikawk tla put lah u; chun, lampi ah âukhawm chibai bûk lah u. ⁵ Chun, in nan lûtnâk kipah a masachem hen, "Hi in ah hin lungngamnâk tlung seh," ti u. ⁶ Chun, chunah lungngamnâk fa a um chun nan lungngamnâk thu chu a tlûnah a um kumza lai; a um lo lam chun nan tlûnah a hawng kîr nawlh lai. ⁷ Chu in ah chun um ko ule, an pêk na mi zawng din hen ei u; rianṭuantu chu lawh tawng tlâk asi. In kip lâwr lah u. ⁸ Chun, khua nan lûtnâk zawngah an lawmh na chun an hunh na mi zawng chu ei u; ⁹ damlo a um chun damh ule, an sinah, ’Pathian Ram nan kiangah a tlung rawh,’ ti u. ¹⁰ Khua nan lûtnâk kip ah an lawmh na lo lam chun, an zâwllâi tla ah suak ule, ¹¹ ’Nan khua valeidip kan kezaphah ah kawp khawm hi nan lakah kan tât hi; sikhawmsele, Pathian Ram nan kiangah a hawng tlung rawh ti theih u,’ ti u. ¹² Ka nan ti na, chu ni ah chun chu khua tuar ding ngâk chun Sodom khua tuar ding chu a ziachâng um dauh lai. ¹³ "Korazin, na tlûn a pit! Betsaida, na tlûn a pit! Nan lakah thilchê tak ti hen a um mi tla kha Tura leh Sidon khua ah ti mi si sele, salâpuan aih hen vachâm lakah to hen an rim ving lai rawh. ¹⁴ Sikhawmsele, lâirêlnâk ah chun nannih tuar ding ngâk chun Tura leh Sidon khua tuar ding chu a ziachâng um dauh lai. ¹⁵ Chun, nang Kapernaum, vân tawngh khet hen chawnglawmh hen na um lai mazei? Mi thi khua tiang hen niamh na si lai. ¹⁶ Jisu nih a ṭhiruai tla sinah, "Âuzawng nannih thu ngâitu chu keimah thu ngâi an si; âuzawng an duhlo natu chu keimah an ka duhlo mi asi; âuzawng kei hawng ka duhlo mi chu hawng ka fialtu duhlo asi," a ti. ¹⁷ Chun, sâwmsarih panih tla chu lâwm tak hen an hawng tlung le, "Lalpa, khuri tla khawm na min ruangah kan thu thu hen an um," an ti. ¹⁸ Chun, anih nih chun an sinah, "Mîmthlalek hâwi hen Setan chu vân thawk hen a hawng tlâ mi kha ka muh. ¹⁹ Rûl tla, tlâng cha-âi tla sirh khonâk thu leh mêlma thuneihnâk zawzawng neh khonâk thuneihnâk ka nan pêk na; zeikhawm nih nganfâk an pêk kho na lai loh. ²⁰ Sikhawmsele, khuri tla nan thu thu hen an um ruangah a lâwm lah u; vân ah nan min rîn asi ruangah a lâwm dauh u," a ti. ²¹ Chun, chu liau takah chun Thlarau Thenhlimh nih lâwmnâk hen a khattir le, "Ka Pa, tual leh vân Lalpa, nangnih mifing leh mi fâifîm tla sinah hi bang thu hi na thuh le, nausêm tla sinah na phuang ruangah hin ka nan sawr asi. Pa, chu hâwi ti chu nang ngaih hen a ṭha asi. ²² "Ka Pa nih thil zeizawng hawng ka kiltir rawh; Pa cho lo nih chun Fapa chu âu mesi ti âukhawm nih an theih loh! Pa khawm chu âu me asi ti, Fapa leh an sinah Fapa nih a phuang duh mi tla cho lo nih chun âukhawm nih an theih loh," a ti. ²³ Churawhchun, Jisu chu ṭhiruai tla leiah â hawi le, a thup hen, "Nan thilmuh tla hi a muhnâk mit tla a vân a ṭha! ²⁴ Ka nan ti na, khuavâng tamtak leh lalchem tla khawm nih nan thilmuh tla hi muh an duh tâwn le, sikhawmsele, an muh kho lo; nâ ah nan theih mi tla khawm hi theih an duh tâwn le, sikhawmsele, an theih lo asi," a ti. ²⁵ Chun, Dân sîntirtu âumawh a dîr le, amah niknâk ding hen "Sîntirtu, zungzâl nungnâk nei ding hen zei me ka ti lai?" a ti. ²⁶ Chun, anih nih chun a sinah,"Dân ah zei me â rîn? Chunah chun zei me na rêl tâwn?" a ti. ²⁷ Chun, anih nih chun, "Lalpa na Pathian chu na thinlung zawzawng hen, na thlarau zawzawng hen, na chaknâk zawzawng hen na dâwt ding asi. Chun, nangmah na dâwt hâwi hen na zâwlpâwm tla na dâwt ding asi," a ti le, a sâng. ²⁸ Chun, anih nih chun a sinah, "Na sâng dik thap; chu hâwi hen ti le, na nung lai," a ti. ²⁹ ’Sikhawmsele, anih nih chun mawh duhlo tuk ah, Jisu sinah, "Ka zâwlbâwm tla chu âu mesi?" a ti. ³⁰ Jisu nih a sâng le, "Mi âumawh Jerusalem thawk hen Jeriko leiah a va kal le, rawkmang tla a tawng le, chu tla nih chun a nipuan an lît piak le, an vuak nek le, thi dêng hen an kaltâk. ³¹ Chun, bâwlpu âumawh chu lampi ah chun a va kal kher le, a muh kâ hen khat leikâng hen a rial ving. ³² Chun, chu hâwi ber hen Levi chi minung pakhat khawm chu chu mun ah chun a hawng tleng le, a muh kâ hen khat leikâng hen a rial ving. ³³ Sikhawmsele, Samari ram ah mi âumawh khualtlâwng a kal le, a umnâk chu a tlung le, a muh kâ hen thungâi a lungkham. ³⁴ A sinah a va kal le, a liam mâ lakah chun sariak leh uain a tawih le, a tuam le, a sa tlûnah a chuanh le, khual tlungnâk in ah a kalpi le, a bulsân rawh. ³⁵ Chun, a thâituan ah chun denari panih a thuak le, khual tlungnâk in vêngtu sinah a pêk le, "Hawng bulsân le, hi lei na hêu mi vial chu ka hawng kîr nawlh tikah ka nan rulh nawlh lai," a ti. ³⁶ "Chu pathum lakah chun rawkmang tla tawngtu zâwlbâwm chu a zei mi chem me si hen na ruat?" a ti. ³⁷ Chun, anih nih chun a sinah, "A lungkhamtu chu," a ti. Chun, Jisu nih a sinah, "Nang khawm chu hâwi ber hen va ti bâk rawh," a ti. ³⁸ Chun, an khualtlâwng pah hen zei khua ah mawh an lût le; chun, nunau pakhat a min Marthi nih a in ah a tlungtir. ³⁹ Anih nih chun unaunu pakhat a nei le, a min chu Mari asi, chu minung chu Lalpa kê bul ah a to le, a thu a ngâi. ⁴⁰ Marthi chu eibâr timhtuah hen â nawk thlo le; chun a sinah a hawng kal le, "Lalpa ka unaunu nih keimah lâwng hen eibâr timhtuah ding hen hawng ka rinh thlap mi hi pawi na ti lo na maw? Hawng ka bawmh ding hen simh teme," a ti. ⁴¹ Chun, Lalpa nih, "Marthi, Marthi, thil tamtak na dawn le, na nawk mahi; ⁴² thil pakhat cho a herh; Mari nih tingvo ṭha chu a thîm le, chu chu lâk piak ding asi loh," a ti le, a sâng.

¹ Chun, veikhat chu Jisu chu zei mun ah mawh thla a cham. Thla a cham thluh rawh chun a ṭhiruai pakhat nih a sinah, "Lalpa, thlacham dân Johan nih a sîntir na hâwi khan hawng kan simh bâk me," a ti. ² Chun, anih nih chun an sinah, "Thla nan cham chun hi hâwi hen ti u: Ka pa, Na min zahkâi seh, Na ram hawng tlung seh. ³ Nisiar hen kan ei khawp hen buh hawng kan pêk, ⁴ Kan sual tla hawng kan ngâihdam, kannih khawm kan sinah battu zawzawng kan ngâihdam tâwn asi. Lêmnâk ah hawng kan lûttir lah," a ti. ⁵ Chun, amah nih an sinah, "Nan lakah mi âumawh kâwi nei sele, zân lâi ah a sinah kal hen, ’Kâwi, sangtlêp pathum hawng ka pûktir; ⁶ ka kâwi khualtlâwng ka sinah a hawng tlung le, a mâika ah hunh ding zeikhawm ka nei lo,’ ti sele; ⁷ anih nih in sung thawk hen, ’Hawng ka nawktir lah; tuah chun in â khâr rawh le, ka fa tla khawm ka sinah ihkhun ah an it rawh; thawk hen ka nan pêk kho lo,’ ti hen sâng sele-- ⁸ ka nan ti na, a kâwi asi ruangah thawk hen a pêk lo narêng hen deih râm tak hen a deih ruangah thawk hen a duh zat zawng a pêk lai. ⁹ "Chuvachun, ka nan ti na, deih u, chun an pêk na lai; hâwl u, chun nan tawng lai; "kik u, chun an awng piak na lai. ¹⁰ Âuzawng a deihtu vial nih chun an tawng tâwn le, âuzawng a hâwltu nih chun an tawng tâwn le, âuzawng a kiktu chu an awng piak awt asi. ¹¹ Nannih murui lakah pa si mi sinah a fapa nih sangtlêp deih sele, âu nih lung pêk lai? Asi lo leh, ngâ deih sele, âu nih ngâ rang chan ah rûl pêk lai? ¹² Asi lo leh, ârti deih sele, tlâng cha-âi a pêk lai mazei? ¹³ Chuvachun, nannih misual men nih nan fa tla thil ṭha pêk ding dân nan theih chun, nan Pa vân ah mi nih chun amah deihtu tla chu Thlarau Thenhlimh a pêk tam khun lai!" a ti. ¹⁴ Chun, Jisu nih khuri hawlh kholo pakhat a nar, chun khuri chu a suak kâ hen hawlh kholo mi chu a hawlh rawh; chun, mi zapi tla nih thungâi chê an ti. ¹⁵ Sikhawmsele, a zeimaw mi nih chun, "Khuri lal Belzebul ruangah asi khuri tla a nar tâwn mi hi," an ti. ¹⁶ Chun, a zeimaw mi nih chun amah niknâk ding hen vân ah mi singsiahnâk an deih. ¹⁷ Anih nih chun an dawn mi tla chu a theih le, an sinah, ’Kha zei ram zawngah mah anna do mi vial an vei tâwn; dâwngsungkhur khat khawm mah anna do mi chu a vei tâwn. ¹⁸ Setan khawm mah anna do chun a ram zeitin a dîr lai? Belzebul ruangah khuri tla a nâr,’ nan ka ti dangâiah. ¹⁹ Chun, kei Belzebul ruangah khuri tla nar ka si chun nan fa tla nih âu ruangah me an nar tâwn ne? Churuangah annih chu nanmah lâirêltu ding tla an si lai. ²⁰ Sikhawmsele, kei nih Pathian thiltikhonâk ruangah khuri tla nar tâwn ka si chun, Pathian Ram nan sinah a hawng tlung rawh mi asi lai. ²¹ "Mi chak nih chun riamnâm rangtling put hen a in a vêng kar chu a sum chu him ziar hen a um kumza tâwn. ²² Sikhawmsele, amah ngâk hen chak dauh nih chun a hawng do le, a neh tikah chun â râlringnâk râlthuam rangtling chu a suh le, a sum a lâk piak mi chu a ṭhen phin tâwn. ²³ "Âuzawng ka leiah ṭângṭawm lo mi chu hawng ka do asi, âuzawng hawng ka pumhpi lo mi chu a thektham asi. ²⁴ "Khuri nâwmtâm chu mi paw sungah mi a suak rawh chun, dinhnâk hâwl hen tî umlonâk mun tla ah â sawk tâwn le; chun, dinhnâk rerêng a tawng lo le, ’Ka suaktâk mi in ah khan ka kîr nawlh ko lai,’ a ti. ²⁵ Chun, a va tlung rawh chun, phiat ver hen, timhtuah hen a muh. ²⁶ Churawhchun a va kal le; amah ngâk hen sual dauh mi khuri pasarih a hawng put le, chunah chun an lût le, an um kumza tâwn; chu minung umzia chu a lân ngâk hen a ṭha lo dauh tâwn asi," a ti. ²⁷ Chun, chu thu chu a sim liauah, mi zapi nâwngah nunau âumawh a âu le, "A nan pâwinâk paw chu a vân a ṭha, na din mi nûk khawm," a ti. ²⁸ Sikhawmsele, anih lam nih chun, "Pathian thu theih hen zâwttu tla hi mi vânṭha an si dauh, ti sim a ṭha dauh," a ti. ²⁹ Chun, mi zapi tla chu a sinah an hawng a pûm liauah, Jisu nih, "Tusan minung tla hi sual tak an si; singsiahnâk an hâwl le; sikhawmsele, Jona singsiahnâk cho lo chu an sinah singsiahnâk rerêng pêk asi lai loh. ³⁰ Jona chu Ninevi khua mi tla rangah singsiahnâk asi hâwi khan, Minung Fapa khawm tusan minung tla rangah hin singsiahnâk asi lai. ³¹ Simlei lalnu kha lâirêl tikah chun tusan mi tla sinah hin a thawk bâk lai le, mawh a phurhtir na lai; Solomon finghnâk ngâi ding hen men kâwlkil ah mi a hawng kal ruangah; chun, zauhnik, Solomon ngâk hen rokual dauh hinah a um asi. ³² Ninevi khua ah mi tla chu lâirêl tikah chun tusan mi tla sinah hin an dîr bâk lai le, mawh an phurhtir lai, Jona thusim ruangah an rim dangâiah; zauhnik u, Jona ngâk hen rokual dauh hinah hin a um asi. ³³ "Âukhawm khâwnvâr an kaih hen mun thupnâk ah mawh tâwng tangah mawh an siah dah lo, a lût mi tla nih chun a chêu an muh khonâk ding hen a siahnâk ah chun an siah dauh tâwn asi. ³⁴ Na taksa khâwnvâr chu na mit asi. Na mit a fîm chun na taksa khawm a pum hen a chêu tâwn, â râwk lam chun na taksa khawm a mûi ver tâwn. ³⁵ Churuangah chun na sungah chêu um chu thim a hawng si sual lai, a thiamthih rawh. ³⁶ Chun, na taksa hi a zei ram khawm mûi lo hen a pum hen a chêu chun, khâwnvâr chêu tak nih a nan cherh hâwi hen na chêu hep lai," a ti. ³⁷ Chun, a sim liauah, Farisai pakhat nih amah chu a sinah buh ei ding hen a sâwm le; chun, a lût le, buh a dûm. ³⁸ Chun, Farisai nih a muh rawh chun, buh ei lânah kut a ṭâwl lo mi chu thungâi chê a ti. ³⁹ Chun, Lalpa nih chun a sinah, "Nannih Farisai nih khêng leh hâi lênglei lam chu nan ṭâwl thiang tâwn; nan sunglei lam chu lêpnâk leh sual hen a khat fâwn. ⁴⁰ Mi â tla, lênglei siamtu nih sunglei khawm a siam lo mazei? ⁴¹ Sikhawmsele, a sungah thil um chu mipâm sinah pêk ding hen mang u; chun, nan rangah zeizawng a thenhlimh lai. ⁴² "Nannih Farisai tla, nan tlûn a pit! Pudina, chawngrei leh, thlâi kip tla parâ lû ah pakhat nan pêk tâwn le, repnâk leh Pathian dâwtnâk chu nan thlahthlamh tâwn. Chubang tla chu asi nan ti ding mi chu, a dang tla chu tlawlh lêmlo hen. ⁴³ "Nannih Farisai tla, nan tlûn a pit! Pumhnâk in ah tophah ṭha chem tla leh sumtuah zâwl ah chibai bûk lebang nan sunhsak tâwn. ⁴⁴ Nan tlûn a pit! Thlân ti theihlo hen, a tlûnah mi an kal tâwnnâk hâwi chu nan si," a ti. ⁴⁵ Chun, Dân sîntirtu pakhat nih a sinah, "Sîntirtu, hi thu na sim mi hi kannih khawm na kan fâi mi asi," a ti le, a sâng. ⁴⁶ Chun, anih nih chun, "Dân sîntirtu tla, nannih khawm nan tlûn a pit! Thil phurh hamhkâi tak tla midang tla nan phurhtir tâwn le, nannih nih chun phurh ding chu nan kutdawng pakhat khawm hen nan tawngh dah lo. ⁴⁷ Nan tlûn a pit! Khuavâng tla thlân in nan sak tâwn le, nan thlâktu tla nih an thah mi an si. ⁴⁸ Chuvachun, nan thlâktu tla thilti tla chu nan theih hen nan tipi na asi; annih nih an thah le, nannih nih an thlân in tla nan sak ruangah. ⁴⁹ Churuangah, Pathian finghnâk khawm nih, ’An sinah khuavâng tla leh mifial tla ka fial lai le, a zeimaw mi an thah lai le, a zeimaw mi an nehsawh lai. ⁵⁰ Chuvachun, Abel thisen suak thawk hen Zekaria, mâichâm leh biakin karah thah mi thisen suak tiang khan, khuavâng zawzawng thisen, tual um tîr thawk hen suak mi chu, tûliau san mi tla tlûnah hin phû an lam kho lai,’ a ti kha. Ka nan simh na, tûliau san mi tla tlûn khawm hin phû an lam lai. ⁵² "Nannih Dân sîntirtu tla, nan tlûn a pit! Finghnâk renh chu nan lâk ving le; nannih tâ nih nan lût lo, mi lût ding khawm nan kham thlo," a ti. ⁵³ Chun, chunah mi chu a suak rawh chun Dân sîntirtu tla leh Farisai tla nih chun amah chu an râl le, thu tamtak an simtir râm le, ⁵⁴ a hawlh sualnâk tleih tum hen an bawh tet.

¹ Chu liauah, mi zapi tamtak lamh chukmâk rê hen an hawng a pûm rawh chun, Jisu nih a masachem hen a ṭhiruai tla sinah, "Farisai tla thilnu perpetnâk lakah chun a thiamthih u. ² Langlo ding hen thuh zeikhawm a um lo; theihlo ding hen pheh zeikhawm a um lo. ³ Churuangah mûi ah nan sim mi zawng kha chêu ah an theih lai le, in kardang sung ah nâ ka ah nan thusim kha in tlûnah a chuan hen an phuang lai. ⁴ "Chun, hâwi le tla, ka nan simh na, taksa thah hen, chu nûnah zei dang khawm ti kholo rawhtu tla chu ṭih lah u. ⁵ Sikhawmsele, nan ṭih ding mi chu âu me si ka nan simh na lai; thah nûn khawmah Gehena ah lawnh khonâk thuneitu Pathian chu ṭih u; asi, ka nan simh na, amah tak chu ṭih u. ⁶ "Phâisenphittê panga assaria nih hen an zuar tâwn lo mazei? Sikhawmsele, an lakah pakhat khawm Pathian nih a relh dah lo. ⁷ Nan samzâi tla tiang khawm hi rêl ver asi. Ṭih lah u; phâisenphittê tamtak ngâk hen nan sung dauh asi. ⁸ "Chun, ka nan simh na, mi le mâika ah hawng ka ṭanhtu zawng Pathian vânmifial tla mâika ah Minung Fapa nih a ṭanh bâk lai. ⁹ Sikhawmsele, mi le mâika ah hawng ka phehtu chu Pathian vânmifial tla mâika ah pheh asi bâk lai. ¹⁰ "Chun, Minung Fapa simsâwitu zawng chu ngaihdam piak asi lai; Thlarau Thenhlimh simsâwi lam chu ngaihdam piak asi lai lo. ¹¹ "Chun, pumhnâk in ah mi tla, lal tla leh hotu tla mâika ah an kalpi na tikah chun, ’Zeitin me, zei thu me ka sâng lai, zei thu me ka sim lai,’ ti hen lawksawng lah u; ¹² a tik takah chun nan sim ding mi chu Thlarau Thenhlimh nih a nan simh na lai," a ti. ¹³ Mi zapi lakah mi âu nih mawh Jisu sinah, "Sîntirtu, ka u sinah kan pa nih hawng kan rauh mi ro hawng ka ṭhenh bâk ding hen simh," a ti. ¹⁴ Sikhawmsele, anih nih chun a sinah, "Minung, nannih tlûnah âu nih me lâirêltu ah leh sum ṭhenhtu ah hawng ka siam?" a ti. ¹⁵ Chun, an sinah, "Thiamthih ule, ngarhnâk rerêng lakah chun a vêng u, neih leh siah hi minung dam san asi lo," a ti. ¹⁶ Chun, an sinah tahṭhimh thu a sim le, "Minei âumawh thungâi a bâwngmal le; ¹⁷ chun a ruat le, zeitin ka ti lai aw? Ka mîm-le-fâng siahnâk ka nei lo, a ti. ¹⁸ Chun, tihin ka ti lai; ka fângbâwk ka siat lai le, lian dauh hen ka sak lai le; chunah chun ka fâng leh ka neih zawzawng ka pumh lai. ¹⁹ Chun, ka thlarau sinah, ’Thlarau, kum tamtak rangah neih tamtak na khawng mi hi; a dîn le, ei hen bâr le, lâwptlo tak hen um rawh ka ti lai, a ti. ²⁰ Sikhawmsele, Pathian nih a sinah, Mi â, tuzân hin na thlarau an lâk piak awt asi; na thil timhtuah tla kha âu tâ me si lai rawh ne?’ a ti. ²¹ "Mah rangah neih khawng hen, Pathian leiah khawng lo mi chu, chu hâwi chu asi tâwn," a ti. ²² Chun, ṭhiruai tla sinah, "Churuangah ka nan simh na, Zei me ka ei lai aw?’ ti hen nan nungnâk thu leh, ’Zei me ka fenh hen ka aih lai aw?’ ti hen nan taksa thu lungkham lah u. ²³ Ei ding ngâk hen nungnâk a sung dauh asi, nipuan ngâk hen taksa a sung dauh asi. ²⁴ Langâk tla hi dawn nik u, fâng an tuh lo, an ât lo, pang leh fângbâwk tla khawm an nei lo; sikhawmsele, Pathian nih a châwm; nannih chu vâ tla ngâk hen chun nan sung-û dauh asi. ²⁵ Nannih lakah lawksawng ruangah âu nih me mah dung dâwng khat hen a sap kho? ²⁶ Hi tê men nan ti kho lo mi, zeirangah me thil dang nan lawksawng tâwn? ²⁷ Tuktin pâr ṭhang zia hi ruat nik u; rian an ṭuan lo, lâ khawm an kher lo; sikhawmsele, ka nan simh na, Solomon a rokualnâk zawzawng hen â thuam mi men hi bang tuktîn pâr pakhat tluk khawm hen thuamh hen a um lo. ²⁸ Chuvachun, mâng belh, tusûn ah nung, a thâituan ah lungthu kâ ah tih nawlh ding men Pathian nih chu tluk rak hen a thuamh chun, aw nannih lung tâwm tla; chu ngâk chun nipuan an pêk khun na lai! ²⁹ "Chun, nan ei ding tla, nan din ding tla hâwl lah u; lawksawng hen um lah u. ³⁰ Laikulh phun kip nih chubang zawzawng chu an hâwl tâwn asi; chubang chu nan Pa nih nan herh ti a theih ko ruangah. ³¹ Amah Ram hâwl dauh u, chun chubang thil tla khawm chu a nan pêk sap na lai." ³² "Murui tâwm tla, lâu lah u; ram an pêk na mi hi nan Pa lawmhkâng tak asi. ³³ Nan neih zawzawng zuar ule, mipâm tla sinah pêk u; vân ah mifîr kal lonâk ah, rûlchawn nih a râwk lonâk ah chun, tangka sâwngkhâwi li kho lo tla, neih vei kho lonâk ah nan ro khawng u. ³⁴ Nan ro umnâk kip ah nan thinlung khawm a um awt ruangah." ³⁵ "Nan tâisâwm sâwm zet hen, nan khâwnvâr khawm alh kumza hen um u; ³⁶ chun, mi nih an pu lâwinâk puai ei a hawng lâwi tikah inkhâr a hawng kik kâ hen, awng piak sawm kho ding hen an ngâk kumza hâwi hen um u. ³⁷ An pu a hawng kal tikah ngâk kumza hen a muh na mi to-aw tla chu an thaw a suak. Thungâi tak hen ka nan simh na, anih nih chun a tâi a sâwm lai le, anmah tla buh dûm hen a totir na lai le, an eibâr a timhtuah lai. ³⁸ Zân lâi ah mawh thawk tikah mawh hawng kal hen, chu hâwi hen a hawng muh chun, chu to-aw tla chu an thaw a suak lai. ³⁹ Sikhawmsele, hi hi theih u, mifîr a hawng tik ding in dâwngpu nih theih sele, a vêng lai le, a in a pemhtir lai lo. ⁴⁰ Nannih khawm râlring kumza hen um u, nanna râlring lo tikah Minung Fapa a hawng kal awt ruangah," a ti. ⁴¹ Chun, Peter nih, "Lalpa, hi tahṭhimh thu hi kanmah cho ma na kan simh, mi zawzawng ma?" a ti. ⁴² Chun, Lalpa nih, "Sum kiltu zumhkâi fing tak a pu nih a tik zawng ah an tingvo buh ṭhen piak ding hen a dawngsung tla lakah hotu ah a siam ding mi chu âu chem me si lai? ⁴³ A pu a hawng kal tikah to-aw chubang hâwi ti hen a hawng muh mi chu an thaw a suak lai. ⁴⁴ Dik tak hen, ka nan simh na, a neih zawzawng tlûnah hotu ah a siam lai. ⁴⁵ Sikhawmsele, chu to-aw nih chun a thinlung hen, ’Ka pu tuah a hawng tlung tuan lai loh,’ ti hen; to-awnu tla, to-awpa tla vuak sele, din leh ei hen rî sele, ⁴⁶ Chu to-aw pu chu, â râlring lo ni ah, a theih lo liauah a hawng kal lai le, tan nih ah a hawng suah lai le, mi zumhkâilo tla ting hâwi a tingtir lai. ⁴⁷ "To-aw a pu duhzia theih ko na hen râlring lo hen a pu duhzia hâwi khawm tilo mi chu vei tamtak vuak asi lai; ⁴⁸ sikhawmsele, a pu duhzia khawm theihlo hen, vuak tlâk rê hen thil titu chu vei tâwmtê vuak asi lai. Âuzawng tamtak an pêk mi sinah chun tamtak an êng lai; âuzawng tamtak an kiltir mi sinah chun tam dauh an êng lai. ⁴⁹ "Laikulh ah mei thlâk ding hen hawng ka si; tu thawk hen kâng rawh sele ka duh a! ⁵⁰ Sikhawmsele, baptis si ding ka nei, chu lîm lân lo chu ka thâw a pit a! ⁵¹ Laikulh ah remnâk lêngtir ding hen hawng kal mi hen ma nan hawng ka ruat? Silo e, ka nan simh na, ṭhennâk lêngtir ding hen hawng kal ka si dauh! ⁵² Tu thawk hen mi panga dâwngsungkhur khat anna ṭhen lai, pathum nih panih, panih nih pathum an do lai; ⁵³ pa nih a fapa, a fapa nih a pa; a nu nih a fanu, a fanu nih a nu; a nînu nih a mo, a mo nih a nînu a do lai," a ti. ⁵⁴ Chun, Jisu nih mi zapi sin khawmah chun, "Thlang leiah sûm a zîng mi nan muh chun, ’Ruah a sûr awt,’ nan ti sawm tâwn; chun, asi taktê. ⁵⁵ Chun, sim thli lêng nan muh chun, ’Thâw a sâ awt,’ nan ti tâwn; chun, asi taktê tâwn. ⁵⁶ Nannih mi perpê tla, tual leh vân umzia khawm nan theihthiam mi, zeirangah tûliau thil umzia hi nan theihthiam lo? ⁵⁷ "Zeirangah me nanmah nih a dik mi chu nan ruat lo? ⁵⁸ Chun, lâirêltu mâika ah na tawhpi mi hen nan kal tikah kal pah hen amah lakah lîmnâk hâwl râm rawh; asi lo chun lâirêltu mâika ah zângrah ko hen an kalpi lai le, lâirêltu nih chun mi tleih hotu an tleihtir lai le, mi tleih hotu nih chun rêng an thlâk sual lai. ⁵⁹ Ka nan simh, lepton tê men na lîm lân lo chu, chunah mi chu na suak rîlmâl lai loh," a ti.

¹ Chun, chu liau tak chun âu tla mawh an hawng um le, chu tla nih chun, Galili ram ah mi, Pilat nih an thisen an Pathian sawnhnâk sa thah tla lakah a telh piak na mi thâwngthâng chu Jisu an simh. ² Chun, anih nih chun an sinah, "Chu Galili ram ah mi tla chu, chu hâwi thil an tuar ruangah Galili ram ah mi zawzawng ngâk hen misual khun hen ma nan ruat? ³ Si loh e, ka nan simh na, nannih khawm nan rim lo chun chu hâwi ber hen nan vei ver lai. ⁴ Chun, Siloam in sâng nih mi leiriat a denh mi khawm kha Jerusalem ah an um mi tla ngâk hen misual khun si hen ma nan ruat? ⁵ Si loh e, ka nan simh na, nannih khawm nan rim lo chun chu hâwi ber hen nan vei ver lai," a ti le, a sâng. ⁶ Chun, hi tahṭhimh thu hi Jisu nih a sim le: "Âu nih mawh grep dûm ah theipi a phun mi pakhat a nei le; chun, a kûng ah chun a rah a hawng hâwl le, pakhat khawm a tawng lo. ⁷ Chun, grep dûm zauhtu sinah, ’Zauhnik, kum thum sung hin hi theipi kûng ah hin a rah ka va hâwl tâwn le, pakhat khawm ka tawng lo; hâu ko; zeirangah mun luah tak hen a um kumza?’ a ti. ⁸ Chun, anih nih chun a sinah, ’Pu, tu kum tal hi um sele, kulh dak hen ka chawh lai le, êk hen ka vurh lai rih le; ⁹ chu tikah a rah chun a ṭha lai, a rah lo lam chun hâu ko,’ " a ti. ¹⁰ Chun, Dinhni ah Jisu nih chun pumhnâk in pakhat ah a sîntir na. ¹¹ Chun, kum leiriat khuri vuanh chak lo rivei nunau pakhat a um; chu minung chu a kûn kumza le, amah lung hen chun ding ziar hen a dîr kho lo. ¹² Chun, Jisu nih a muh kâ hen a kawh le, a sinah, "Nunau, na chaklonâk nih chun a nan thlah rawh," a ti. ¹³ Chun, a tlûnah a kut a thâng le, chun, zeikarlo ah a ding chawlh le, Pathian a sawr rawh. ¹⁴ Chun, Jisu nih Dinhni ah a damh ruangah pumhnâk in hotu chu a thinthawk le, mi zapi chu a sawnh le, an sinah, "Minung rianṭuannâk ding ni ruk a um khateh; chu karah chun hawng ule, a damhtir u, Dinhni ah hawng lo hen," a ti. ¹⁵ Lalpa lam nih chun a sinah, "Nannih mi perpê tla, Dinhni ah mah chawpê mawh sanatung mawh a râwl einâk ah mi sût hen tî din ding hen nan kalpi chiau tâwn lo ma? ¹⁶ Hi nunau hi Abraham fanu asi mi, Setan nih kum leiriat a phuar kumza mi hi Dinhni ah hi minung phuarnâk hi sût piak lo zia masi?" a ti le, a sâng. ¹⁷ Chubang tla chu a sim liauah a mêlma tla zawzawng chu an ningzâk le, mi zapi lam chu a thil rokual ti zawzawng ruangah anna lâwm ver. ¹⁸ Chuvachun, anih nih chun, "Pathian Ram chu zei hâwi mesi? Zei hen me ka tahṭhimh lai? ¹⁹ Anṭam chî mal khat mi nih a lâk le, a dûm ah a vawrh mi hâwi chu asi: chu chu a hawng kho le, thing a hawng si le, chung zuang va tla chu a ṭeng tla ah chun an riak," a ti. ²⁰ Chun, Pathian Ram chu zei hen me ka tahṭhimh lai? a ti nawlh. ²¹ Thilnu nunau nih a lâk le, sangvut seah thum a ektê hen a runh ver tiang hen phûm hâwi chu asi," a ti. ²² Chun, anih nih chun sîntir vima hen, Jerusalem lei fûk hen, khuapi leh khuatê a pal vima. ²³ Chun, mi âu nih mawh a sinah, "Ruangsuah tla chu tâwmtê ma an si?" a ti. Chun, anih nih chun an sinah, ²⁴ "Kawtkâ bî ah chun lût tum râm u; ka nan simh na, mi tamtak nih lût an tum lai le, an lût kho lai loh. ²⁵ In dâwngpu a thawk hen, in a khâr nûnah chun, nannih lênglei ah dîr hen, ’Lalpa in hawng kan awnh,’ ti hen, inkhâr nan hawng kik tikah anih nih: ’Kha zei lei mi me nan si ka nan theih na lo;’ ti hen a nan sâng na lai: ²⁶ chu tikah chun, nannih nih, ’Na mitmuh khawmah kan din hen kan ei rawh khateh; kan zâwllâi tla khawmah na sîntir tâwn khateh,’ nan ti teh lai. ²⁷ Chun, anih nih, ’Ka nan simh na, kha zei lei mi me nan si ka nan theih na lo’ nannih thilsual ti zawzawng tla: ka sinah mi kal ver u,’ a ti teh lai. ²⁸ Abraham, Isak leh Jakob leh khuavâng zawzawng tla chu Pathian Ram ah um mi nan muh hen, nannih lênglei ah suah nan si tikah, chunah chun ṭap leh hachang rial a um lai. ²⁹ Chun, sak leh thlang, sim leh mar thawk hen an hawng kal lai le, Pathian Ram ah an hawng to lai. ³⁰ Chun, ngâinik u, madungchem tla khawm masachem ah um ding mi an um le, masachem tla khawm madungchem ah um ding an um," a ti. ³¹ Chu liau takah chun Farisai âu tla mawh an hawng kal le, a sinah, "Suak le, hinah mi hi kal rawh; Herod nih thah ding an awt asi," an ti. ³² Chun, anih nih chun an sinah, "Chu kâwlui sinah chun hi thu hi va sim u; ngâi rawh, tusûn khawmah thâi khawmah khuri tla ka nar lai le, nganfâk tla khawm ka damh lai le, kip ah ka lîm lai. ³³ Zeikhawm si sele, tusûn khawmah, thâi khawmah, kip khawmah ka kal vima ding asi; Jerusalem ah lo chun khuavâng thih kho asi lo," a ti. ³⁴ "Aw, Jerusalem! Jerusalem! khuavâng tla thahtu, na sinah Pathian nih a hawng fial mi tla lung hen thi thlap sehtu, ârpinu nih a fa tla a thla tangah a khurh hâwi hen na fa tla vei zeizat me khurh ka tum mi kha! Sikhawmsele, na duh lo. ³⁵ Zauhnik, nan in chu a karo hen an mâk piak na rawh. Ka nan simh na, ’Lalpa min hen a hawng kal mi chu a thaw a suak,’ nan ti lân lo chu, nan ka muh lai lo rawh," a ti.

¹ Chun, Dinhni ah Farisai hotu pakhat in ah buh ei ding hen a kal mi chu an thlingthlâk ko le, ² chun, a mâika ah chun damlo a phing mi âumawh a um. ³ Chun, Jisu nih Dân sîntirtu leh Farisai tla chu a sawnh na le, an sinah, "Dinhni ah damh a thiang ma thiang lo?" a ti. ⁴ Annih lam chu an dâisip. Chun, anih nih chun damlo chu a tleih le, a damh le, a kaltir rawh. ⁵ Chun, an sinah, "Nannih lakah nan sanatung mawh nan chawpê mawh tikhur chawh ah tlâ sele, Dinhni ah khawm âu me nûk hen suah lo lai?" a ti. ⁶ Chubang chu an sâng kho fâwn lo. ⁷ Chun, an mi sâwm tla nih tophah ṭha chem an thîm zia Jisu nih a muh le, an sinah tahṭhimh thu a sim: ⁸ "Lâwinâk puai ei ding hen âu nih mawh a nan sâwm tik chun tophah ṭha chem ah to lah; chu hâwi asi lo chun nangmah ngâk hen milian dauh a sâwm lebang lai le, ⁹ chun a nan sâwmtu nih chun, ’Hi minung tonâk ding hi kianh,’ a nan ti lai; chun nang ningzak tak hen tophah ṭha lo chem ah to nawlh ding ṭung ko na si. ¹⁰ An sâwm tik chun tophah ṭha lo chem ah va to rawh; chuvachun, a nan sâwmtu a hawng kal tikah na sinah, ’Kâwi, tophah ṭha dauh ah to rawh,’ a nan ti lai. Chun, buh na dûmpi na mi tla mitmuh ah chawnglawmh hen na um lai. ¹¹ Â sung-û tir mi zawng an nâu lai le, â nâutir mi chu chawnglawmh hen an um lai," an sinah a ti. ¹² Chun, a sâwmtu sinah khawm chun, "Sûn ah mawh, zân ah mawh puai na tuah tikah na kâwi tla, na unau tla, na rualsia tla, na zâwlbâwm minei tla chu sâwm lah; chu lo chun an sâwm bâk lai le, an rulh nawlh kher lai. ¹³ Puai na tuah tik chun mipâm tla, suaksual tla, kekhêng tla, mitchâw tla, sâwm dauh na. ¹⁴ Chun, chubang nih chun an rulhnâk ding an nei lo ruangah na thaw a suak lai; mi rep tla thawknawlh tikah Pathian nih a rulh na awt ruangah," a ti. ¹⁵ Chun, buh a dûmpi mi âu nih mawh chubang thu chu a theih le, Jisu sinah, "Pathian Ram ah buh ei ding mi chu a thaw a suak," a ti. ¹⁶ Chun, Jisu nih chun a sinah, "Mi âu nih mawh zân ah puai rokual tak hen a tuah le, mi tamtak a sâwm le; ¹⁷ chun, a ei tikah chun a mi sâwm tla sinah, ’Hawng kal u rawh, tuah zeizawng tuah thluh asi rawh, ti ding hen to-aw a fial. ¹⁸ Chun, an ektê hen bang ver hen phelhsawlhnâk an siam ver. A masachem nih a sinah, ’Lo ka châwk le, zauh ding hen ka kal a herh asi; zângfah hen ngaihdam hawng ka deih piak,’ a ti. ¹⁹ Chun, midang nih, ’Chawpê bawp nga ka châwk le, a sia a ṭha zauhfiang ding hen ka kal awt, zângfah hen ngaihdam hawng ka deih piak,’ a ti. ²⁰ Chun, midang nih, Nupi ka nei rawh le, churuangah ka hawng kho lo,’ a ti. ²¹ "Chun, to-aw nih chun a pu sinah chubang zawng chu a simh le, chun in dâwngpu chu a thinthawk le, a to-aw sinah, ’Suak le, zâwllâi tla ah, a kenpak tla ah kal rereh le, mipâm tla, suaksual tla, mitchâw tla, kekhêng tla hinah hawng put na,’ a ti. ²² Chun, to-aw nih chun, ’Pu, thu na ka pêk mi hâwi khan ka ti le, sikhawmsele, mun a lâwng nget rih, a ti. ²³ Chun, a pu nih to-aw sinah chun, ’Suak le, lampi tla ah, khuavâu tla ah kal le, ka in khat ding hen hawng kaltir râm na rawh. ²⁴ Ka nan simh asi, mi ka sâwm mi tla nih khan pakhat khawm nih ka puai an ei lai loh a ti," a ti. ²⁵ Chun, mi zapi tla cherkhet a sinah an hawng kal bâk, chun anih chu â hawi le, an sinah, ²⁶ "Âuzawng ka sinah hawng kaltu nih chun a pa le, a nu le, a nupi le, a fa le, a unau le, a farnu le, amah nungnâk khawm a hua lo chun ka ṭhiruai asi kho lai lo. ²⁷ Âuzawng mah kraws put hen hawng ka zûl lo mi vial chu ka ṭhiruai asi kho lai loh. ²⁸ "Nan lakah âuzawng nih in sâng sak tum ule, a tîrah to hen, sak dihnâk khawp sum nan nei le neilo theih ding hen a man zat ding âu nih me a sût lo lai? ²⁹ Chu hâwi asi lo chun, lung phun zet rawh hen a sak dih kho lo chun a zauhtu zawng nih, ³⁰ ’Hi minung nih hin a dirh thlap le, a sak dih kho fâwn lo, ti hen an nihsanh sual lai. ³¹ "Chun, lalchem âu nih me lalchem dang do ding hen a kal awt ah, a tîrah to hen, minung sîng nih hen amah do ding a hawng kal mi chu, minung sîng hen a tâwn ngam awt le awt lo a thlûk tâ lo lai? ³² Chu hâwi asi lo âwk leh, lalchem dang chu lât tak hen a um liauah remnâk lei thu thutiam deih ding hen rêl a fial lai. ³³ Chu hâwi ber hen, nan lakah hin âuzawng a neih zawzawng kaltâk lo mi vial chu ka ṭhiruai asi kho lai loh," a ti. ³⁴ "Chitê hi a ṭha, sikhawmsele, chitê khawm a dâwng chun, zei hen an altir nawlh lai? ³⁵ Tual rangah khawm a ṭha lai lo, chun churtirnâk rang khawmah a ṭha lai loh. Mi nih a lawnh ko tâwn. Âuzawng theihnâk ding hen nâ nei nih chun theih seh," a ti.

¹ Chun, siah khawlhtu tla leh misual tla zawzawng nih a thu theih ding hen a kiangah an hawng fûk. ² Chun, Farisai tla leh Dân sîntirtu tla nih chun, "Hi minung nih hin misual tla a kawmh le, an sinah lebang buh a ei tâwn," ti hen an chipchiar. ³ Sikhawmsele, anih nih chun an sinah hi tahṭhimh thu hi a sim: ⁴ "Nan lakah âuzawng nih dawrâ zâ nei sele, chu lakah pakhat tlâu sele, ramkaro ah sâwmkua leh pakua chu mâk hen, a tlâu mi chu a tawng lân lo chu âu nih a hâwl lo lai? ⁵ Chun, a tawng nawlh chun lâwm tak hen a liang ah a put tâwn. ⁶ Chun, in a tlung kâ hen a hâwi tla leh a zâwlbâwm tla a pumh le, an sinah, ’Hawng ka lawmhpi u, ka dawrâ tlâu kha ka tawng nawlh rawh,’ a ti tâwn. ⁷ Ka nan simh na, chu hâwi ber hen mi rep sâwmkua leh pakua rim ding neilo tla ngâk hen chun misual pakhat a rim mi tlûnah hin vân ah lâwmnâk a um dauh lai." ⁸ "Asi lo leh, nunau pakhat nih dragma parâ nei hen pakhat tlâu sele, khâwnvâr kaih hen, in phiat hen, a tawng lân lo chu chiamchariamtê hen âu me hâwl lo lai? ⁹ Chun, a tawng nawlh chun a hâwi tla leh a zâwlbâwm tla a pumh na le, ’Hawng ka lawmhpi u, ka dragma tlâu kha ka tawng nawlh rawh,’ a ti tâwn. ¹⁰ Ka nan simh na chu hâwi ber hen Pathian vânmifial tla lakah chun misual pakhat a rim mi tlûnah anna lâwm tâwn asi." ¹¹ "Chun, mi âu nih mawh fapa panih a nei. ¹² A ngâksia dauh mi nih chun a pa sinah, ’Pa, ro ka tingvo hawng ka pêk,’ a ti; chun a sum chu an sinah a ṭhen rawh. ¹³ Chun, ni sâwtlotê ah â fapa a ngâksia dauh mi nih chun a tingvo a khawmh hep le, ram lât takah a kal. Chunah chun nuam tuktarâi hen a um le, a sum chu a veih salam rawh. ¹⁴ Chun, a veih hep kâ hen chu ram ah chun pâm thungâi a hawng tlung le, ei ding a sam rawh. ¹⁵ Chun, chu ram ah mi pakhat sinah a va a dawr le; chu nih chun vawk râwl pêk ding hen a lo leiah a fial. ¹⁶ Chun, zeilo kâwng vawk nih an ei mi tla chu thungâi ei bâk ding a duh; âukhawm nih zeikhawm an pêk lo ruangah. ¹⁷ Chun, â theihfiang kâ hen, ’Ka pa sinah lawh a kal mi tla buh ei châwk lo nei an tam tam hen, keimah lehlam chu hinah sungvâng hen ka thi awt ko rawh! ¹⁸ Ka thawk lai le, ka pa sinah ka kal lai le, a sinah, Pa, Pathian lakah leh nangmah mitmuh hen thil ka sual; na fapa si tlâk ka si lo rawh. ¹⁹ Na sinah lawh a kal mi pakhat hâwi hen hawng ka siam rawh ka ti lai,’ a ti. ²⁰ A thawk le, a pa sinah a kal rawh. "Chuvachun, lât takah a um liauah a pa nih a muh le, thungâi a siherh le, a fûk phêt le, an ir anna tawnh le, a châwchawk chiam. ²¹ Chun, a fapa nih a sinah, ’Pa, Pathian lakah leh nangmah mitmuh hen thil ka sual; na fapa si tlâk ka si lo, a ti. ²² Sikhawmsele, a pa nih chun a to-aw tla sinah, Puan ṭha chem kha hawng put rereh ule, aihtir u; a kut ah pizung leh a kezaphah ah pheikawk bunhtir u. ²³ Chawpê fa bit tak kha hawng put ule, thah u, lâwm tak hen kan ei lai. ²⁴ Hi ka fapa hi a thi le, a hawng nung nawlh rawh asi hi; a tlâu le, kan tawng nawlh rawh asi hi,’ a ti. Chun, lâwm tak hen an um rawh. ²⁵ "Sikhawmsele, a fapa a upa dauh mi chu lo ah a um le, chun in a hawng tlung bâiah zeilo tum hâu leh lâm hâu a theih rawh. ²⁶ Chun, to-aw pakhat a kawh le, ’Chu! Chu! zei me si rawh?’ ti hen a deih. ²⁷ Chun, anih nih chun a sinah, ’Na nau a hawng tlung le, him tak hen a muh ruangah na pa nih chawpê fa bit tak kha a thah asi, a ti. ²⁸ Chun, a thin a thawk le, a lût duh lo rawh. Chun, a pa a hawng suak le, a lêm. ²⁹ Sikhawmsele, anih nih chun a pa sinah, ’Ngâi rawh, kum hi tiang hi na rian ka nan ṭuan piak le, na thu tâ nih ka êl dah lo; ka hâwi tla hen lâwmnâk ka siam dingah kêl fatê khawm na ka pêk lo. ³⁰ Sikhawmsele, hi na fapa â zuar mi nunau sinah na sum veih heptu hi a hawng kâ hen amah rangah chawpê fa bit tak kha na va thah piak rih,’ a ti le, a sâng. ³¹ Chun, anih nih chun a sinah, ’Ka fapa, ka sinah um kumza mi na si lo mazei, ka neih zawzawng hi na tâ asi. ³² Lâwptlo tak hen kan um ding asi, hi na nau hi a thi le, a hawng nung nawlh rawh; a tlâu le, kan tawng nawlh rawh asi hi,’ " a ti.

¹ Chun, Jisu nih a ṭhiruai tla sinah, "Minei âu nih mawh sum kiltu a nei le, chu nih chun sum a veih salam piak leikângah a sinah an phiar. ² Chun, anih nih chun amah chu a kawh le, a sinah, ’Na thu ka theih mi hi zei zia mesi? Na sum zauhkhenh thâwngthâng hawng ka rîn piak ver rawh; tu ri hen sum kiltu ah na um kho lai lo rawh,’ a ti. ³ Chun, sum kiltu nih chun a thinlung hen, ’Ka pu nih ka sum kil a ka phelh awt mi hi zeitin ka ti lai aw? Tual chawh tâ nih ka huam lo, kutdawnh tâ nih ka ningzàk fâwn. ⁴ Sum kil a hawng ka phelh tikah an in ah an hawng ka umtir khonâk ding hen ka ti ding dân ka theih rawh, a ti. ⁵ "Chun, a pu sum battu tla chu a kawh khap na le, a masachem sinah chun, ’Ka pu sinah zeizat na bat?’ a ti. Anih nih chun, ⁶ ’Bat zakhat rih oliv sariak,’ a ti. Chun, anih nih chun a sinah, ’Na lasui lâk le, to rereh le, sâwmnga rîn rawh,’ a ti. ⁷ Chun, midang sinah, ’Nang zeizat na bat?’ a ti. Anih nih chun, ’Fâng kor sâng khat,’ a ti. Chun, anih nih chun a sinah, ’Na lasui lâk le, zariat rîn rawh,’ a ti. ⁸ "Chun, a pu nih chun sum kiltu replo chu ti dân a thiam ruangah a sawr rawh le, chêu fa tla ngâk hen hi laikulh fa tla hi anmah san chun an fing dauh asi. ⁹ "Chun, ka nan simh na, sum telê hen nan rangah hâwi tla siam u; sum a veih tikah zungzâl umnâk ah chun an umtir na nâk ding hen. ¹⁰ Âuzawng tâwmtê lakah zumhkâi chu tamtak lakah khawm zumh a kâi tâwn, âuzawng tâwmtê lakah zumhkâilo mi chu tamtak lak khawmah zumh a kâilo tâwn asi. ¹¹ Sum telê lakah men zumh nan kâilo chun âu nih me sum tak chu an kiltir na lai? ¹² Midang lak men ah zumh nan kâilo chun nanmah tâ chu âu nih me an pêk na lai? ¹³ To-aw âukhawm nih hotu panih rian a kêp kho lo; pakhat hua hen pakhat a duh lai, asi lo leh pakhat ṭanh hen pakhat a zauhnawmh lai. Pathian leh sum rian nan ṭuan kêp kho lai loh," a ti. ¹⁴ Chun, Farisai, tangka sunhsaktu tla nih chun chubang thu zawzawng an theih le, an nihsanh. ¹⁵ Chun, anih nih chun an sinah, "Minung mitmuh ah a reptir mi cho nan si, sikhawmsele, Pathian nih nan thinlung a theih; minung lakah chawnglawmhnâk chu Pathian mitmuh hen nâwm tak asi. ¹⁶ "Dân leh khuavâng tla thu chu Johan a hawng um tiang khan a um le; chu thawk chun Pathian Ram Thâwngthâng Ṭha an sim le, mikip zângran ko hen an lût chiau. ¹⁷ Sikhawmsele, Dân thu rîn zek tê tlâu ngâk chun vân leh laikulh tlâu a awl dauh lai." ¹⁸ "Âuzawng nupi mâk hen nupi dang neitu zawng chu ṭângdang a pawmtâk asi; âuzawng mi nupi mâk umpitu zawng chu ṭângdang a pawmtâk asi: ¹⁹ "Chun, minei âumawh a um. Puan senduk leh puan mangṭhia â aih le, nisiar nuam ti tak hen a um tâwn. ²⁰ Chun, a min Lazar kutdawnh pakhat mâ hen a khat phak mi kawtkari ah an siah tâwn le, ²¹ minei dawhkân ah mi thawk hen ei mi neknâwi tlâ mi tla chu ei a duh le; ui tla nih chun a mâ tla an liak piak tâwn. ²² "Chun, kutdawnh chu a thi le, vânmifial tla nih an put le, Abraham ṭângkâ ah an siah. Minei khawm chu a thi le, phûm hen a um rawh. ²³ Chun, mithi khua ah chun nganfâk tuar rerêng hen a um le, a vân a tâu le, lât takah Abraham ṭângkâ ah Lazar um mi a muh rawh. ²⁴ Chun, a âu le, ’Pu, Abraham, hawng ka zângfah le, Lazar kha hawng fial, a kutdawng pâr tî ah chinh sele, ka lei daihnâk ding hen; meialh ah hin thungâi ka hamh asi, a ti. ²⁵ "Sikhawmsele, Abraham nih, Ka fapa, nangnih na dam liau khan thil ṭha na ting le, chu hâwi ber hen Lazar nih thil ṭha lo â ting mi kha theih rawh; sikhawmsele, tuah anih chu hinah lungngam tak hen a um le, nang lam chu na hamh makha. ²⁶ Hi lo khawm ah, hi thawk hen nan sinah kal duh tla chu an kal kho lonâk ding hen leh âukhawm kha thawk hen kan sinah an hawng kho lonâk ding hen kannih leh nannih karah hin tual kak thûk tak an siam asi,’ a ti. ²⁷ Chun, anih nih chun, ’Asi chun, anih chu ka pa in ah fial ding hen ka nan ngiar. ²⁸ Unau panga ka nei ruangah; hi nganfâknâk mun ah hin an hawng kal lebang lai, semsê ngâi tak hen simh na seh,’ a ti. ²⁹ "Abraham lam nih chun, Mosi leh khuavâng tla an nei khateh; anmah thu ngâi na seh, a ti. ³⁰ Chun, anih nih chun, ’Pa Abraham, silo, mithi lakah mi ngelchel an sinah va kal sele an rim lai, a ti. ³¹ Chun, anih nih chun a sinah, Mosi leh khuavâng tla thu an ngâilo chun âumawh a thi mi thawknawlh khawmsele an lung lêm lai lo,’ " a ti.

¹ Chun, Jisu nih a ṭhiruai tla sinah, "Tlûknâk tla hi um lo kho asi lo, sikhawmsele, tlûknâk umtirtu tlûn chu a pit! ² Hi bang mi mê tla lakah pakhat khawm tlûktir ngâk chun a tlûktirtu ngâwng ah fâng rialnâk lung awihtir hen tisumsumriat ah thlâk sele a rangah a ṭha dauh lai. ³ Thiamthih u! "Na unau nih thil a sual chun, nun simh rawh; chun â sîr chun ngaihdam rawh. ⁴ Ni khat ah na tlûnah vei sarih thil sual hen, vei sarih, ’Ka sîr,’ ti hen, nangmah leiah a hawng âwn chun na ngaihdam ding asi," a ti. ⁵ Chun, ṭhiruai tla nih chun Lalpa sinah, "Kan lungnâk pungtir," an ti. ⁶ Chun, Lalpa nih chun, "Anṭam chî fang khat hâwi lungnâk nan nei chun, hi theipi kûng sinah hin, ’Hawng a phâwi le, tisumsumriat ah va a phun, nan ti lai le, nan thu a âwi ko lai." ⁷ "Sikhawmsele, nannih lakah âuzawng nih tual nâwn hen mawh dawrâ vêng hen mawh to-aw nei ule, a hawng tlung kâ hen, ’Buh ei hawng a dawmh sawm,’ âu nih nan ti lai? ⁸ ’Ka ei ding hawng ka tuah piak le, na tâi sâwm le, ka din leh ka ei dih lân lo chu hawng ka bul; chu nûnah chun nang na din hen na ei lai, âu nih ti dauh lo lai? ⁹ Nan thu hâwi hen a ti ruangah nan to-aw sinah lâwmthu nan sim dah mazei? ¹⁰ Chu hâwi ber hen nannih khawm nih nan sinah thupêk zawzawng hâwi hen nan ti nûnah, to-aw salam kan si, kan ti ding mi rêng asi,’ ti u," a ti. ¹¹ Chun, Jerusalem ah an kal awt ah, Samari leh Galili ram chu a lanh. ¹² Khua zeimawh ah a lût awt liauah mi phâr parâ nih an tawng. Chu tla chu lât takah an dîr le, ¹³ chun hâu fâk tak hen, "Jisu! Sîntirtu! hawng kan siherh," an ti. ¹⁴ Chun, anih nih chun chu chu a muh rawh chun an sinah, "Bâwlpu tla sinah va a zauhtir u," a ti. Chun, an kal liauah chun an thiang chawlh rawh. ¹⁵ Chun, an lakah pakhat nih a dam tih â theih kâ hen hâu fâk tak hen Pathian sawr bû hen a kîr nawlh rawh. ¹⁶ Chun, Jisu kê bul ah a bawkbukhup le, a lâwmthu a sim. Chu minung chu Samari mi asi ngengê. ¹⁷ Chun, Jisu nih a sâng le, "Mi parâ kha nan thiang rawh silo ma? Pakua tla kha zeiah? ¹⁸ Pathian sawr ding hen hawng kîr nawlh mi lakah, hi ram dang mi cho lo hi, âukhawm nih an tawng lo masi?" a ti. ¹⁹ Chun, a sinah, "Thawk le, kal rawh, na lungnâk hi na dam phah asi," a ti. ²⁰ Chun, Farisai tla nih Pathian Ram a hawng tlung tik ding an deih ruangah an sinah, "Pathian Ram chu muh kho hen a hawng tlung lo. ²¹ ’Zauhnik, hinah hi,’ mawh ’Khinah khi,’ mawh khawm an ti lai loh. Ngâinik u, Pathian Ram chu nan lakah a um asi," a ti le, a sâng. ²² Chun, ṭhiruai tla sinah chun, "Minung Fapa dam liau ni tla hi ni khat tal nan muh duh ni a um teh lai, sikhawmsele, nan muh lai lo rawh. ²³ Chun, nan sinah, ’Zauhnik u, khinah khi, zauhnik u, hinah hi,’ an ti na lai. Kal lah ule, annih chu zûl lah u: ²⁴ Kâwlkil khatlei dawmh thawk hen khatlei dawngh tiang mîmthlâ a lek le, kâwlkil khatlei tiang a chêu hâwi khan Minung Fapa hi a hawng nawlh ni ah a um awt asi. ²⁵ Sikhawmsele, chu lânah chun thil tamtak a tuar ding asi, chun tusan minung tla duhlo hen a um ding asi. ²⁶ Chun, Noa dam liauah thil umzia hâwi khan, Minung Fapa a hawng kal nawlh ni ah khawm a um bâk lai. ²⁷ Noa chu lawng ah a lût le, buanso a hawng tlung le, an ektê hen a thah ver na ni kha a tlung lân lo chu an din hen an ei le, nupi pasal anna um tâwn. ²⁸ Chu hâwi ber hen, Lot dam liauah a hawng um; an din hen an ei le, an châwk hen an zuar le, an chîng le, an sak tâwn. ²⁹ Sikhawmsele, Sodom khua thawk hen Lot a suak ni ah chun vân thawk hen mei leh kât a sûr le, an ektê hen a thah ver na. ³⁰ Chu hâwi ber hen Minung Fapa hi a hawng a langh ni ah chun a um lai. ³¹ "Chu ni ah chun âuzawng a sum in sungah um hen, amah in tlûnah a um mi chu lâk ding hen ṭum lah seh; chun lo ah um mi chu tlung lah seh. ³² Lot nupi theihkumza u. ³³ Âuzawng a nungnâk hum tumtu nih chun a thlâu lai le, âuzawng a nungnâk thlâutu nih chun a hum lai. ³⁴ Ka nan simh na, chu zân ah chun ihkhun pakhat ah minung panih it mi an um lai le, pakhat chu lâk hen a um lai le, pakhat chu mâk hen a um lai. ³⁵ Nunau panih fâng rial hen an um lai le, pakhat chu lâk hen a um lai le, pakhat chu mâk hen a um lai," a ti. ³⁶ Lo ah mi panih an um lai le, pakhat chu lâk hen a um lai le, pakhat chu mâk hen a um lai. ³⁷ Chun, a ṭhiruai tla nih chun a sinah, "Lalpa, zeiah me?" an ti le, an sâng. Chun, Jisu nih chun an sinah, "Ruak umnâk zawngah ruaklâwmmû tla khawm anna pûm lai," a ti.

¹ Chun, lungdawng lo hen thla an cham kumza ding asi ti theihnâk ding hen ṭhiruai tla sinah tahṭhimh thu a sim: ² "Zei khua ah mawh lâirêltu pakhat a um le, chu nih chun Pathian a ṭih lo le, minung khawm a sunhsak lo. ³ Chun, chu khua ah chun numei pakhat a um le, anih chu, ’Ka leido lakah phû hawng ka lâk piak, ti hen a sinah a kal kumza. ⁴ Chun, sâwt tak a duh lo le; sikhawmsele a nehnûn ah chun a thinlung hen, ’Pathian ṭihlo hen minung sunhsak lah khawmsele, ⁵ hi numei nih hin a ka nawktir ruangah a phû ka lam piak lai, chu lo chun a hawng kal nget lai le, a hawng ka hamhtir lai,’ a ti," a ti. ⁶ Chun, Lalpa nih, "Lâirêltu replo thusim chu theih u. ⁷ An lakah a dawnh rih khawmsele a mi thîm, a sûn a zân hen amah kawhtu tla phû chu Pathian nih a lam piak lai lo ma? ⁸ Ka nan simh na, an phû a lam piak sawm lai. Sikhawmsele, Minung Fapa hi a hawng kal tikah chun laikulh ah hin lungnâk a hawng muh lai mazei?" a ti. ⁹ Chun, mi rep a ruat hen, midang zawzawng zauhnawmh tâwntu âu tla mawh sinah chun hi tahṭhimh thu khawm hi Jisu nih a sim: ¹⁰ "Mi panih Pathian Biakin ah thlacham ding hen an kal le; pakhat chu Farisai asi le, pakhat chu siah khawlhtu asi. ¹¹ "Farisai chu a dîr le, amah lâwng hen hi hâwi hen thla a cham: ’Pathian, midang hâwi hen lêp mang le, replo le, ṭângdang pawmtâktu ka si lo ruangah leh hi siah khawlhtu hâwi khawm hi ka si lo ruangah na tlûnah ka lâwm. ¹² Dinhni kar khat kipah vei nih buh ka ngei tâwn, ka nei mi zawng parâ lû ah pakhat ka pêk tâwn, a ti. ¹³ "Siah khawlhtu lam chu lât takah a dîr le, vân lei khawm a zauh ngam lo. ’Pathian, kei misual hi hawng ka zângfah,’ ti hen, a ir rerêng a chumh. ¹⁴ Ka nan simh na, a masa ngâk hen chu minung chu mawh lo dauh hen a in ah a lâwi rawh. A sung-û tir mi zawng an nâu lai le, â nâutir mi chu chawnglawmh hen an um lai," a ti. ¹⁵ Chun, mi zeimaw mi nih an fasêm tla tlûnah kut thâng ding hen Jisu sinah an hawng put. Ṭhiruai tla nih chun chu chu an muh kâ hen an fâi na. ¹⁶ Sikhawmsele, Jisu nih annih chu a kawh na le, "Ngâksia tetê ka sinah hawng kaltir ule, nar lah u; Pathian Ram chu hi bang minung tla tâ asi ruangah. ¹⁷ Thungâi tak hen ka nan simh na, âuzawng Pathian Ram chu ngâksiatê nih a lawmh hâwi hen lawmh lotu zawng a sungah an lût lai lo," a ti. ¹⁸ Chun, hotu âu nih mawh Jisu sinah, "Sîntirtu ṭha, zungzâl nungnâk ting ding hen zeitin ka ti lai?" ti hen, a deih. ¹⁹ Chun, Jisu nih a sinah, "Zeirangah ṭha na ka ti? Mi pakhat cho lo chu âukhawm ṭha an um lo, chu chu Pathian asi. ²⁰ Thupêk tla na theih khateh, ’Ṭângdang pawmtâk lah, fîr lah; phiar lah, na nu leh na pa chawnglawmh rawh; ti tla hi,’ " a ti. ²¹ Chun, anih nih chun, "Chubang thu zawzawng chu ka ngâksiatê thawk hen ka zâwt vima tâwn," a ti. ²² Chun, Jisu nih chu chu a theih rawh chun a sinah, "Tu khawmah kâng khat na bat; na neih zawzawng zuar le, mipâm tla sinah ṭhen, chuvachun vân ah ro na nei lai; chun, hawng kal le, hawng ka zûl," a ti. ²³ Anih lam nih chun chubang thu chu a theih rawh chun thungâi a zûr le, thungâi a nei ruangah. ²⁴ Chun, Jisu nih amah chu a zauh le, "Mi nei tla chu Pathian Ram ah lût a har awt a! ²⁵ Mi nei Pathian Ram ah lût ngâk hen sangâwngsâu ṭhim kua lakah lût a awl dauh asi," a ti. ²⁶ Chu chu theihtu tla nih chun, "Asi chun âu me ruangsuak kho lai?" an ti. ²⁷ Anih lam nih chun, "Minung ti kholo mi Pathian nih chun a ti kho asi, a ti. ²⁸ Chun, Peter nih, "Zauhnik, kannih nih kan in leh kan lo kaltâk hen ka nan zûl ko rawh," a ti. ²⁹ Chun, Jisu nih chun an sinah, "Thungâi tak hen ka nan simh na, âuzawng Pathian Ram ruangah a in mawh, nupi mawh, unau tla mawh nu leh pa mawh, fa tla mawh kaltâk mi zawng chu, ³⁰ tu dam kar lîlâ ah hin chu ngâk a tam dauh tawng lo ding âukhawm an um lo, tik hawng tlung ding mi lakah zungzâl nungnâk hen," a ti. ³¹ Chun, leinih tla chu a dang hen a kalpi na le, an sinah, "Ngâinik u, Jerusalem ah kan kal awt hi; khuavâng tla thurîn zawzawng kha Minung Fapa tlûnah hin a tlung lai. ³² Phundang tla sinah an pêk lai le, nihsuak siamnâk ah an mang lai le, ningzakkâi tak hen an siam lai le, chil an sah lai. ³³ Chun, an vuak lai le, an thah lai le, chun ni thum ni ah a thawknawlh lai," a ti. ³⁴ Chun, chubang thu rerêng chu a ngaihnâk an theih lo; chun thusim chu an lakah thuh hen a um le, zei me a sim ti khawm an theih lo. ³⁵ Chun, Jisu chu Jeriko a tlung awt ah, mitchâw âumawh lam vâu ah kutdawnh hen a to. ³⁶ Chu nih chun mi zapi kal hâu a theih le, "Zei me si?" ti a deih. ³⁷ Chun, annih nih chun Nazaret Jisu a kal asi ti an simh. ³⁸ Chun, anih chu "Jisu, David Fapa, hawng ka zângfah rawh," ti hen a âu rawh. ³⁹ Chun, a mâi masa mi nih chun dâisip ding hen an fâi le, sikhawmsele anih chu, "David Fapa hawng ka zângfah rawh," ti hen a âu dadauh. ⁴⁰ Chun, Jisu a dîr le, a sinah hawngpi ding thu a pêk le, chun a kiangah an hawng tleng rawh chun, ⁴¹ "Na lakah zeitin an ti piak sele na ka duh?" a ti le, a deih. Chun, anih nih chun, "Lalpa, muh kho ka duh," a ti. ⁴² Chun, Jisu nih a sinah, "Muh kho rawh ne, na lungnâk hi na dampi asi," a ti. ⁴³ Chun, zeikarlo ah a muh sawm le, Pathian sawr bû vima hen amah chu a zûl rawh; chun mi zawzawng nih chun an muh rawh chun Pathian an sawr.

¹ Chun, Jisu Jeriko ah a lût le, a lan awt. ² Chun, minung pakhat a min Zakai a um le, chu minung chu siah khawlhtu hotu asi. Amah khawm thungâi a nei. ³ Chun, Jisu chu zei hâwi mi minung me asi ti muh a tum; mi zapi ruangah amah tâ nih a niam le, a muh kho lo. ⁴ Chun, a lehkhanh le, Jisu zauh ding hen theipi kûng pâr ah a kâi le, chu lampi chu a hawng zawh ding asi ruangah. ⁵ Chun, Jisu chu chu mun a tlung rawh chun a vân a tâu le, a sinah, "Zakai, hawng ṭum rawh; tusûn ah na in ah ka tlung ding asi," a ti. ⁶ Chun, mawhsareh hen a ṭum le, lâwm tak hen amah chu a tlungtir rawh. ⁷ Chun, chu chu an muh kâ hen an ektê hen, "Misual sinah tlung ding hen a lût rawh khi! " an ti le, an chipchiar. ⁸ Chun, Zakai chu a dîr le, Lalpa sinah chun, "Ngâinik, Lalpa, ka neih khingkhuai mipâm tla sinah ka pêk lai le, chun âu lakah tal zei thil tal lêp khawmsele aleh li hen ka rulh nawlh lai," a ti. ⁹ Chun, Jisu nih Zakai thu a sim le, "Tusûn ah hi in ah hin ruangsuaknâk a hawng tlung rawh, anih khawm Abraham fapa asi ruangah. ¹⁰ Tlâu leh vei hâwl leh ruangsuah ding hen Minung Fapa hi a hawng kal ngen asi,’ a ti. ¹¹ Chun, chubang thu tla chu an ngâi liauah, Jerusalem a nâi rawh ruangah leh Pathian Ram hawng lang sawm ding hen an ruat ruangah tahṭhimh thu a simh na. ¹² Chuvachun, hi bang thu hi a sim, "Mi lian âumawh lalchem si ding hen thuneihnâk lâk hen hawng kîr nawlh ding hen lam lât takah a kal. ¹³ A kal awt ah a to-aw parâ a kawh na le, an sinah ngûn tangka pakhat seng a pêk na le, an sinah, ’Ka hawng tlung nawlh lân lo chu hi hen sawleh u,’ a ti. ¹⁴ Sikhawmsele, a ram mi tla nih an hua le, Hi minung hi kan lalchem rangah kan duh lo,’ ti hen a dung leiah mi an fial. ¹⁵ "Chun, lalchem si ding hen thuneihnâk a lâk le, a hawng kîr nawlh rawh chun a to-aw tangka a pêk na mi tla chu an pungtir zat theih ding hen a kawhtir. ¹⁶ Chun, a masachem mi chu a hawng kal le, Pu, na ngûn tangka kha parâ hen a pung,’ a ti. ¹⁷ Chun, anih nih chun a sinah, ’To-aw ṭha, na ti zia a ṭha; tâwmtê tlûnah zumh na kâi ruangah khua râ lakah hotu ah um rawh,’ a ti. ¹⁸ Chun, a sangtu chu a hawng le, ’Pu na ngûn tangka kha panga hen a pung,’ a ti. ¹⁹ Chun anih nih chun, anih sinah khawm chun, ’Nang khua panga lakah hotu ah um rawh,’ a ti. ²⁰ "Chun, midang a hawng le, ’Pu, zauhnik, na ngûn tangka kha! Thlan nâwtnâk puan hen ka kil kumza; ²¹ mi râng tak na si ruangah ka nan ṭih asi; na siah lo mi khawm na lâk le, na tuh lo mi khawm na ât tâwn, a ti. ²² Chun, anih nih chun a sinah, "To-aw sual, na hawlhkâ suak ngelchel hen ka nan mawhtir. ²³ Mi râng tak ka si le, ka siah lo mi khawm ka lâk tâwn le, ka tuh lo mi ka ât tâwn mi na theih ma? ²⁴ "Chun, a kiangah dîr mi tla sinah, ’A ngûn tangka kha lâk piak ule, ngûn tangka parâ neitu sinah pêk u. ²⁵ Chun, annih nih chun a sinah, Pu, ngûn tangka parâ a nei khateh,’ an ti. ²⁶ Ka nan ti na, a nei mi zawng an sap lai le, a nei lo mi chu a neihlem khawm an lâk piak lai. ²⁷ Sikhawmsele, hi bang hawng ka dotu tla nih an tlûnah lalchem si ding hen an ka duhlotu tla hi hawngpi na ule, ka mâika ah thah u,’ a ti," a ti. ²⁸ Chun, chubang hâwi thu a sim thluh rawh chun Jerusalem leiah a kâlpi na. ²⁹ Chun, Bethphage leh Bethani kiang, Oliv Tlâng an ti mi chu a tlung rawh chun ṭhiruai tla lakah mi panih a fial le, ³⁰ "Nan mâilei khua ah khin va kal ule; chunah chun nan lût tîrah sanatung fa rêng mi, âukhawm chuan dah lonâk nan va muh lai; chu chu sût ule, hawng ruai u. ³¹ Chun, âuzawng nih, Zeirangah nan sût? ’ ti hen an deih na chun, hi hâwi hen sim u, ’Lalpa nih a duh asi,’ ti hen," a ti. ³² Chun, a fial mi tla chu an kal rawh le, an sinah a sim hâwitê hen a va muh. ³³ Chun, sanatung fa an sût liauah chun a dâwngpu tla nih an sinah, "Sanatung fa kha zeirangah nan sût?" an ti. ³⁴ Chun, annih nih chun, "Lalpa nih a duh asi," an ti. ³⁵ Chun, Jisu sinah an hawng ruai le; chun sanatung fa tlûnah chun an puan tla an phah le, a tlûnah Jisu an chuantir. ³⁶ Chun, a kalnâk ding lam lakah an puan tla an phah vima. ³⁷ Chun, a tlung bâi ah, Oliv Tlâng liam awt ah chun ṭhiruai mi zapi nih chun a thilchê ti zawzawng an muh ruangah anna lâwm le, hâu fâk tak hen, ³⁸ "Lalpa min hen Lalchem a hawng kal mi chu a thaw a suak! Vân ah rem thu lêng seh. Pathian sinah rokualnâk um seh!" ti hen, Pathian an sawr rawh. ³⁹ Chun, mi zapi lakah Farisai zeimaw mi nih a sinah, "Sîntirtu, na ṭhiruai tla hi nunsimh rawh," an ti. ⁴⁰ Anih lam nih chun,"Ka nan simh na, hi bang tla hi an dâisip chun lung tla tal an âu ding asi," a ti le, a sâng. ⁴¹ Chun, a tlung bâi tem ah, khua chu a muh le, a ṭapnawh le, ⁴² "Aw, nang rîlmâl nih hin tu dam liau lungngamnâk ding thu hi hawng theih râm nik le! Sikhawmsele na muh lonâk ding hen â thup dangâiah. ⁴³ Na mêlma nih na kiang hêl dak hen tual kulh an siam lai le, a nan bual lai le, na kiang hêl dak hen suak kho lo hen a nan um nawh lai. ⁴⁴ Na dâwngsung lakah na fa tla, nangmah hen tual ah an lawnh chiam lai; na sungah lung chuanh mi rerêng an zuah lai lo; a nan veh liau na theih lo ruangah chu hâwi ni tla chu na tlûnah a hawng tlung teh lai," ti hen. ⁴⁵ Chun, Pathian Biakin ah chun a lût le, zeilo zuartu tla chu a nar na le; ⁴⁶ an sinah, " ’Ka in chu thlachamnâk in an ti lai’ ti rîn asi; nannih lam nih chun rawkmang tla pûk ah nan siam dauh hi," a ti. ⁴⁷ Chun, nisiar Pathian Biakin ah chun a sîntir tâwn; chun, bâwlpu lal tla leh Dân sîntirtu tla leh mi zatlâng lakah hotu dauh tla nih amah veih ding an tum. ⁴⁸ Sikhawmsele, mi le tla nih semsê ngâi tak hen a thu an ngâi ruangah a ti ding dân an theih lo.

¹ Chun, ni khat chu Pathian Biakin ah mi tla a sîntir na. Thâwngthâng Ṭha a sim liauah, bâwlpu lal tla leh Dân sîntirtu tla chu upa tla hen a sinah an hawng sut le, ² chun a sinah, "Âu thu hen me hi bang thil hi na ti? Âu nih thu a nan pêk? Hawng kan simh," ti hen an deih. ³ Chun, anih nih chun an sinah, "Kei khawm thu kâ khat ka nan deih na lai, hawng ka simh u; ⁴ Johan baptisma thu kha vân ah mi thu ma, minung thu?" a ti le, a sâng. ⁵ Chun anna ruat le, " ’Vân ah mi thu’ kan ti chun, ’Zeirangah a thu nan âwi lo ne?’ hawng kan ti ṭung lai. ⁶ Chun, ’Minung thu,’ kan ti chun, mi zawzawng nih lung hen hawng kan seh lai; Johan chu khuavâng si hen an ruat ruangah," an ti. ⁷ Chun, an sâng le, "Zei lei thu dauh dek si kan theih loh," an ti. ⁸ Chun, Jisu nih an sinah, "Kei khawm nih âu thu hen me ka ti ka nan simh na bâk awt lo," a ti. ⁹ Chun, zatlâng sinah hi tahṭhimh thu hi a sim rawh: "Âu nih mawh grep dûm a siam le, a zauhtu tla sinah a ap le, sâwt tak râu ding hen ramdang ah a kal rawh. ¹⁰ Chun, a kawih a chû rawh chun dûm ah mi rah chu a tingvo an hawng pêk ding hen a zauhtu tla sinah chun to-aw pakhat a fial le, sikhawmsele a zauhtu tla nih chun an vuak chiam le, kut karo hen an kaltir rawh. ¹¹ Chun, to-aw dang a fial nawlh le, chu khawm chu an vuak nawlh fâwn le, ningzakkâi tak hen an siam le, kut karo hen ber an kaltir nawlh rawh. ¹² Chun, a pathumnâk a fial nawlh le, chu khawm chu an liamh le, an lawnh rawh. ¹³ Chun, grep dûm neitupa nih chun, ’Zeitin ka ti lai aw? Ka fapa duhtak hi ka fial ko lai; anih hi an zah lai dahmawh,’ a ti. ¹⁴ Sikhawmsele, a zauhtu tla nih chun anih chu an muh kâ hen, ’Hi minung hi rotingtu ding chu asi; kan thah lai, chuvachun a ro kanmah rangah asi lai, ti hen anna thluk. ¹⁵ Chun, grep dûm ah mi chu an suah le, an thah rawh. Chuvachun, grep dûm neitupa nih chun an tlûnah zeitin se a hawng ti lai? ¹⁶ A zauhtu tla chu a veih na lai le, dûm chu midang a pêk lai," a ti. Chun, chu chu an theih le, "Chu ngâi chu tlung lah seh! " an ti. ¹⁷ Sikhawmsele, anih nih chun annih tla chu a zauh le, "Hi thu an rîn mi hi zei me asi ne? ’In saktu tla nih lung an duh lo mi kha chu tak chu a kil ah lung herh chem a hawng si rawh,’ ti hi. ¹⁸ Âuzawng chu lung tlûnah tlû mi vial chu an kek dip lai; a denh mi châng chu a rial dip lai," a ti. ¹⁹ Chun, chu liau takah chun Dân sîntirtu tla leh bâwlpu lal tla nih tleih an tum le, sikhawmsele mi zapi chu an ṭih le, chu tahṭhimh thu chu anmah ti san hen a sim ti an theih ruangah. ²⁰ Chun, amah chu governor lâirêlnâk leh thuneihnâk ah tlunh ding hen a thusim sualnâk lâk ding hen an bawh le, thlingthlâktu mi ṭha hâwi hen anna tuah mi tla chu an fial. ²¹ Annih nih chun a sinah, "Sîntirtu, dik tak hen thu na sim hen, âukhawm thliar leh dang neilo hen Pathian thu na sîntir tâwn ti kan theih; ²² Kaisar sinah siah kan châwi mi hi dân asi ma si lo?" ti hen, an deih. ²³ Sikhawmsele, anih nih chun ngamlêm an pêk ti a theih le, an sinah, ²⁴ "Tangka hawng ka zauhtir u. Âu lem leh âu min mesi?" a ti. Chun, annih nih, "Kaisar," an ti. ²⁵ Chun, anih nih chun an sinah, "Chu hâwi asi chun, Kaisar thil tla chu Kaisar sinah pêk ule, Pathian thil tla chu Pathian sinah pêk ko u me," a ti. ²⁶ Chun, mi zapi mâika ah a thusim sual lâk ding an theih lo le, a sângnâk chu thungâi chê an ti le, an dâisip. ²⁷ Chun, Sadukai, thawknawlhnâk a um lo titu tla lakah âu tla mawh a sinah an hawng kal le, ²⁸ a sinah, "Sîntirtu, Mosi nih âuzawng a unaupa nih nupi nei sele, fa neilo hen thi sele, a unaupa nih a nupi umpi hen, a unaupa rangah chi a thlah piak ding asi ti hawng kan rîn piak asi. ²⁹ Asi chun, pasal pasarih an um le, a upachem nih nupi a nei le, fa neilo hen a thi. ³⁰ A panihnâk nih chun a umpi le, ³¹ a pathumnâk nih chun a umpi nawlh le, chu hâwi chiau hen pasarih chu fa neilo hen an thi ver. ³² Chu nehnûnah chun nunau khawm chu a thi rawh. ³³ Chuvachun, thawknawlh tikah a zei mi chem nupi me asi lai? An pasarih hen chun nupi ah an umpi chiau dangâiah," ti hen an deih. ³⁴ Chun, Jisu nih an sinah, "Hi laikulh minung tla hi nupi pasal anna um tâwn; ³⁵ sikhawmsele, chubang tikah tel tlâk mi, mithi lakah mi thawknawlhnâk ah tel tlâk ah ruat mi vial chu nupi pasal anna um awt lo rawh; ³⁶ thi khawm an thi awt lo rawh asi, vânmifial tla tluk hen an um awt ruangah; thawknawlhnâk fa tla an si ruangah Pathian fa tla an si lai. ³⁷ Mithi thawh hen an um lai ti Mosi khawm nih Thing bû thu ah Lalpa chu, Abraham Pathian, Isak Pathian, Jakob Pathian, a ti liau khan a theihtir kha. ³⁸ Anih chu mithi Pathian asi lo le, a nung mi Pathian asi dauh; anih ngaih chun minung zawzawng an nung ver ruangah," a ti. ³⁹ Dân sîntirtu âu nih mawh, "Sîntirtu, na sim mi chu a dik ngâk," an ti le, an sâng. ⁴⁰ Thu dang tâ nih an deih ngam lo rawh. ⁴¹ Chun, anih nih chun an sinah, "Mesia chu David Fapa asi ti zei ti zia hen sim tâwn me an si? ⁴² Sawrnâk Labu ah David tak nih, ’Lalpa nih chun ka Lalpa sinah, ⁴³ na mêlma tla na kê sirhsanh ah ka siam lân lo chu ka vawrhlei ah to rawh,’ a ti, a ti. ⁴⁴ Chuvachun, David nih anih chu ’Lalpa,’ a ti ṭung chun zeitin a fapa asi kho lai ne?" a ti. ⁴⁵ Chun, mi zawzawng theih hen a ṭhiruai tla sinah, ⁴⁶ "Dân sîntirtu tla lakah a thiamthih u; annih chu kawrdawh fual ruk hen tawih an duh tâwn le, sumtuah zâwl ah chibai bûk tla, pumhnâk in tophah ṭha chem tla, puai tuahnâk ah mun ṭha chem an sung-û tir tâwn le; ⁴⁷ numei sum an ei le, mi perpet ding hen sâwt tak thla an cham tâwn; chubang tla nih chun mawh an phurh khun lai," a ti.

¹ Chun, a chuanh le, mi nei tla nih thawhlâwm bâwm ah an thawhlâwm thlâk liau a muh. ² Chun, numei pâm tak âu nih mawh lepta nih a thlâk mi a muh. ³ Chun, anih nih chun, "Thungâi tak hen ka nan simh na, hi bang zawzawng ngâk hen hi numei pâm tak nih hin tam dauh a thlâk: ⁴ Hi zawng tla nih hin an neih a lei mi thawhlâwm ah an thlâk asi; anih lam nih chun a duh liau tak, a nungnâk dingah a neihlem mi a thlâk hep asi," a ti. ⁵ Chun, âu tla nih mawh Pathian Biakin thu, lung ṭha tak leh thilpêk hen an thuamh zia an sim liauah anih nih chun, ⁶ "Hi bang nan thilmuh hi, chimtir lo hen lung â tiang mi rerêng hinah a um lai lo; chubang hâwi ni chu a tlung teh lai," a ti. ⁷ Chun, annih nih chun a sinah, "Sîntirtu, chubang chu zei tikah a hawng um lai? Chubang chu a hawng tlung awt tikah singsiahnâk zei me a um lai?" ti hen an deih. ⁸ Chun, anih nih chun, "An perpet na lonâk ding hen a thiamthih u. Mi tamtak nih, ’Amah chu ka si, a tik a tlung rawh,’ ti hen, keimah min sâl hen an hawng lai; chu minung tla chu zûl lah na u. ⁹ Chun, tuk thu leh nawknâk thu nan theih tikah ṭih lah u. Chubang chu a hawng tlung masa ding rêng asi. A dawnghnâk lam chu a tlung sawm lai lo rih," a ti. ¹⁰ Chun, an sinah, "Phun dang leh phun dang anna do lai le, ram dang leh ram dang anna do lai le, ¹¹ lî fâk tak â nîn lai le, mun dang dang ah pâm a tlung lai le, râi a lêng lai le; vân thawk hen thil ṭihnungkâi tla leh singsiahnâk cherkhet tla a hawng um lai. ¹² Sikhawmsele, chubang thil zawzawng a hawng tlung lânah chun a nan tleih na lai le, an nehsawh na lai. Pumhnâk in tla ah an kalpi na lai le, rêngin tla ah an khumh na lai; lalchem tla leh governor tla mâika ah an kalpi na lai. ¹³ Hi hi Thâwngthâng Ṭha sim ding hen nan tik dêngkhâwng asi lai. ¹⁴ Chuvachun, a sâng ding dân ruatkan lo ding hen nan thinlung birhtir u; ¹⁵ nan mêlma zawzawng an kham na hen an êl kho lo na nâk ding hen thu leh finghnâk ka nan pêk na awt ruangah. ¹⁶ Chun, nan nu leh pa tla, nan unau tla, nan rualsia tla, nan hâwi tla nih an tleihtir na lai; a zeimaw mi an nan thah na lai. ¹⁷ Keimah min ruangah mi zawzawng huat nan si lai. ¹⁸ Sikhawmsele, nan samzâi pakhat khawm a vei lai lo. ¹⁹ Nan felfênâk nih nan nungnâk a hum lai. ²⁰ "Sikhawmsele, kawrsen hotu tla nih Jerusalem an hual mi nan muh tikah a vei awt ti theih u. ²¹ Chu tikah chun Judai ram ah um tla chu tlâng ah tek na seh; a sungah um mi tla nih chun suaktâk na seh; ram ah um mi tla chu a sungah lût lah seh. ²² Chubang ni tla chu phû lam ni asi, thu an rîn mi zawzawng a hawng tlung khonâk ding hen. ²³ Chubang ni ah chun râi tla leh nauno pawmtu tla tlûn a pit lai, laikulh ah hin hamhnâk cherkhet a hawng tlung awt ruangah leh hi phun tla tlûnah hin Pathian thinthawknâk a tlung awt ruangah. ²⁴ Chun, nâmsâu ah an thi lai le, phun kip sinah sal ah put hen an um lai; chun Phundang tla tik a dawng lân lo chu Jerusalem chu lamhbêk hen a um lai. ²⁵ "Chun, nî, thlâ leh ârfi tla ah singsiahnâk a um lai. Tisumsumriat rûm leh a tlingtlawk ruangah tual ah khawm phun kip hamhnâk leh lawksawngnâk a tlung lai; ²⁶ minung tla thlabâr ruangah leh laikulh ah thil hawng tlung ding mi chu dawn ruangah an nang lai; vân thiltikhonâk tla chu â nîn awt ruangah. ²⁷ Chu tikah chun Minung Fapa hi thiltikhonâk leh rokualnâk fâk tak hen sûm lakah a hawng kal mi an muh lai. ²⁸ Chun, chubang thil chu a hawng tlung tikah, tlûnlei zauh ule, chuanh u; nan ruangsuaknâk ding chu a nâi rawh ruangah," a ti. ²⁹ Chun, an sinah tahṭhimh thu a sim le: "Theipi kûng leh thing zawzawng zauh u; ³⁰ a chawrh no kâ hen chu chu nan muh le, ṭhâlpini a suak awt ti mah chiau nih nan theih tâwn. ³¹ Chu hâwi ber hen nannih khawm nih chubang a hawng tlung mi nan muh tikah chun Pathian Râm a nâi rawh ti theih u. ³² "Thungâi tak hen ka nan simh na, thil zawzawng a hawng tlung kim lân lo chu tusan minung tla hi an tlâu lai lo. ³³ Tual leh vân a tlâu lai le, ka thu lam chu a tlâu rêng lai lo. ³⁴ "Sikhawmsele, a thiamthih u, chu lo chun ei khawp tuktarâi hen, zû rî hen, dam sung khawsat dawn hen nan thinlung a khat sual lai. Chu ni ah chun thang awh hâwi hen lâkkhatko ah nan tlûnah a hawng tlung khup lai. ³⁵ Chu hâwitê hen laikulh pumpi ah um mi zawzawng tlûnah chun a hawng tlung awt chiau asi. ³⁶ A ringrâwn u, Minung Fapa mâika ah nan dîr khonâk ding hen leh thil hawng tlung ding mi tla zawzawng ah him ding leh chaknâk nan nei khonâk ding hen thlacham u, a ti. ³⁷ Chun, sûn ah chun Pathian Biakin ah a sîntir na tâwn le; zân ah chun a suak le, Oliv Tlâng an ti mi ah chun a riak tâwn. ³⁸ Chun, zîng ah a thu ngâi ding hen mi zawzawng Pathian Biakin ah a sinah an hawng kal tâwn.

¹ Chun, Sang Thilnu telhlo Kût, Kalkanh Kût an ti mi chu a nâi rawh. ² Chun, bâwlpu lal leh Dân sîntirtu tla nih chun Jisu thah ding dân an hâwl; zatlâng an ṭih fâwn. ³ Chun, leinih tla lakah mi Juda Iskariot an ti mi sungah chun Setan a lût. ⁴ Chun, anih chu a va kal le, an sinah a tleihtir khonâk ding dân bâwlpu lal leh hotu tla chu a va thlukpi na. ⁵ Chun, annih chu anna lâwm le, a sinah tangka pêk an tiamh rawh. ⁶ Chun, anih nih chun rem a ti le, mi zapi umlo karah tleihtirnâk remkâng a hâwl rawh. ⁷ Chun, Sâng Thilnu telhlo ni, Kalkanh Kût nâk dawrâ fa thahnâk ni chu a hawng tlung rawh. ⁸ Chun, Jisu nih Peter leh Johan sinah, "Kalkanh Kût buh kan ei khonâk ding hen kan rangah va timhtuah u," ti hen a fial na. ⁹ Chun, annih nih a sinah, "Zeiah me va timhtuah sele na duh?" an ti. ¹⁰ Chun, anih nih chun an sinah, "Ngâinik u, khuapi ah nan lût chun mipa tibêl put hen nanna tawng lai le, a lûtnâk in ah zûl u. ¹¹ Chun, in dâwngpu sinah chun, ’Sîntirtu nih ka ṭhiruai tla hen Kalkanh Kût buh kan einâk ding hen khual tlungnâk kardang zeiah? a nan ti,’ ti u. ¹² Chun, anih nih chun a tlûn chuanh kardang kâu tak, thil um chia, a nan zauhtir na lai; chunah chun timhtuah u," a ti. ¹³ Chun, an kal rawh le, an sinah a sim hâwitê hen an muh le, Kalkanh Kût buh chu an timhtuah rawh. ¹⁴ Chun, a ei tik rawh chun anih chu buh a dûm le, a ṭhiruai tla nih chun an dûmpi. ¹⁵ Chun, an sinah, "Ka tuar lânah hi Kalkanh Kût buh hi an eipi na thungâi ka duh asi. ¹⁶ Ka nan simh na, hi hi Pathian Ram ah a tatak asi lân lo chu ka ei nawlh awt lo rawh asi," a ti. ¹⁷ Chun, hâi chu a lâk le, lâwmthu a sim thluh rawh chun, "Hi hi lâk ule, a ṭhen u; ¹⁸ ka nan simh na, tu rî hen Pathian Ram a hawng tlung lân lo chu grep rah lakah mi hi ka din nawlh awt lo rawh asi," a ti. ¹⁹ Chun, sang a lâk le, lâwmthu a sim thluh rawh chun a phel le, "Hi hi ka taksa, nan rangah pêk ding chu asi; nan hawng ka theihkumzanâk ding hen hi hi ti tâwn u," a ti. ²⁰ Chun, zânriah ei thluh ah chu hâwi ber hen hâi chu a lâk le, "Hi hâi hi ka thisen, thudântuk thar chu asi, nan ruangrûl ah suak ding chu asi. ²¹ "Sikhawmsele, zauhnik u, hawng ka tleihtirtu ding kut chu ka sinah dawhkân tlûnah a um. ²² Minung Fapa hi an ruat hâwi hen a um awt asi; sikhawmsele, a tleihtirtu ding mi minung tlûn chu a pit!" a ti. ²³ Chun, annih nih, "Kan lakah chu hâwi thil ti ding mi chu âu me si lai le?" ti hen anna deih. ²⁴ Chun, an lakah âu me rokual chem hen ruat asi lai ti thu ah, êlnâk a hawng suak. ²⁵ Chun, anih nih chun an sinah, "Phundang lalchem tla chu an mi le tla tlûnah thu an nei tâwn le, an tlûnah thuneitu tla chu, ’Mipi tla hâwikawmh’ an ti na tâwn. ²⁶ Sikhawmsele, nannih lam chu chu hâwi nan si lai lo; nan lakah a rokual chem mi chu ngâksia dauh hâwi hen um sele, a lal chem mi chu eibâr timhtuahtu hâwi hen um dauh seh." ²⁷ Âu me rokual dauh, buh dûmtu ma, eibâr timhtuahtu? Buh dûmtu asi lo ma? Sikhawmsele, kei lam chu nan lakah eibâr timhtuahtu hâwi hen ka um hi. ²⁸ "Niknâk tla ka tawng kar vial nannih hawng ka umpitu nan si; ²⁹ chun ka ram ah ka dawhkân ah nan din hen nan ei khonâk ding hen ka Pa nih Ram hawng ka ruat piak mi hâwi hen Ram ka nan ruat piak na asi; chun, Israel phun leinih lâirêl piak hen laltophah ah nan to lai. ³¹ "Simon, Simon, ngâinik, Setan nih fâng khei hâwi hen an khei khonâk ding hen nannih tla hi a nan deih na asi. ³² Sikhawmsele, na lungnâk a tlâu lonâk ding hen thla ka nan cham piak asi. Na sîr nawlh tikah nangmah nih na unau tla chaktir na," a ti. ³³ Chun, anih nih chun a sinah, "Lalpa, na sinah chun rêngin leh thihnâk ah khawm kal bâk ka huam asi," a ti. ³⁴ Chun, anih nih chun, "Peter ka nan simh, na hawng ka theihnâk ah hin veithum na ka pheh lân lo chu tuzân âr a khuang lai lo," a ti. ³⁵ Chun, an sinah, "Tangka sâwngkhâwi, zâl leh pheikawk lo hen ka nan fial na liau khan thil nan samphâng rerêng ma?" a ti. Chun, annih nih chun, "Samphâng lo," an ti. ³⁶ Chun, anih nih chun an sinah, "Tu lam chu âuzawng tangka sâwngkhâwi neitu nih chun put seh, zâl hen; âuzawng nâmsâu neilo mi nih chun a puan zuar sele châwk seh. ³⁷ Ka nan simh na hi, ’Anih chu misual lakah an rêlsih rawh,’ ti rîn kha ka tlûnah a hawng tlung ding asi; ka thâwngthâng thu tla kha a tlung dih awt rawh," a ti. ³⁸ Chun, annih nih chun, "Lalpa, zauhnik, hinah nâmsâu panih a um," an ti. Anih nih chun an sinah, "Â tâwk," a ti. ³⁹ Chun, Jisu chu a suak le, a ti dân hâwi nget hen Oliv Tlâng ah chun a kal le, a ṭhiruai tla khawm nih an zûl. ⁴⁰ Chun, a mun chu a va tlung rawh chun an sinah, "Lêmnâk ah nan lût lonâk ding hen thlacham u," a ti. ⁴¹ Chun, lung seh phâk rî hen a dang hen a va kal le; chun a siksidîr le, thla a cham. ⁴² "Pa, rem na ti chun hi hâi hi ka sin thawk hen ṭhinh rawh; sikhawmsele keimah thu silo hen nangmah thu si dauh seh," a ti. ⁴³ Chun, vân thawk hen vânmifial pakhat amah panhlâutir ding hen a hawng a langh. ⁴⁴ Chun, thungâi a thla a kâm le, semsê ngâi khun hen thla a cham; a thlan chu thî hâwi hen tual ah a zut. ⁴⁵ Chun, thla a cham thluh ah chun a ṭhiruai tla sinah chun a hawng le, lawksawng ruangah an it mi a muh rawh chun, ⁴⁶ an sinah, "Zeirangah nan it? Lêmnâk ah nan lût lonâk ding hen thawk ule, thlacham u, a ti. ⁴⁷ Chun, a sim liau chirah chun, mi zapi an hawng kal le, leinih tla lakah mi Juda an ti mi nih chun an mâi a ruai na le; chun, châwchawk ding hen Jisu a hawng fûk. ⁴⁸ Sikhawmsele, Jisu nih chun a sinah, "Juda, Minung Fapa hi châwchawk hen na tleihtir awt masi?" a ti. ⁴⁹ Chun, a kiangkam mi tla nih chun thil hawng tlung ding mi chu an theih rawh chun, "Lalpa, nâmsâu hen kan tuk lai ma?" an ti. ⁵⁰ Chun, an lakah âu nih mawh bâwlpu lalchem to-aw chu a tuk le, a vawrhlei nâ a themh phak. ⁵¹ Chun, Jisu nih a sawnh le, "Hi ri hi hawng ka siang piak u," a ti. Chun, a nâ chu a tham le, a damh rawh. ⁵² Chun, Jisu nih a sinah an hawng mi bâwlpu lal tla, Pathian Biakin hotu tla leh upa tla sinah chun, "Nâmsâu tla, talhbo tla put hen rawkmang tla tleih ding hâwi bang hen nan hawng mu? ⁵³ Pathian Biakin ah nan sinah nisiar ka um liau khan tleih ding hen nan ka awt lo. Sikhawmsele, tu hi nan changh tik asi, mûi thuneihnâk hen," a ti. ⁵⁴ Chun, an tleih le, an ruai le, bâwlpu lalchem in ah chun an kalpi rawh. Chun, Peter nih râllâtpi hen a zûl. ⁵⁵ Chun, in kulh sung zâwllâi ah mei an sêm le, anna topumh le, Peter chu an sinah a va to bâk. ⁵⁶ Chun, mei chêu ah a to liauah nungâk âu nih mawh a muh le, a zauh seset le, "Hi minung khawm hi a sinah a um bâk mi mahi," a ti. ⁵⁷ Peter lam nih chun, "Nunau, anih chu ka theih lo!" ti hen a pheh. ⁵⁸ Chun, a nehnûn dauh ah midang nih a hawng muh nawlh le, "Nang khawm an lakah mi na si hi!" a ti. Peter lam nih chun, "Kei ka si lo," a ti. ⁵⁹ Chun, dârkar khat dingah chun midang nih, "Hi minung khawm hi a sinah a um mi kha asi ngelchel ko; Galili ram ah mi asi hi teh," a ti thlo. ⁶⁰ Chun, Peter nih, "Na thusim chu ka theih lo," a ti. Chun, zeikarlo ah a hawlh liau takah chun âr a khuang sawm rawh. ⁶¹ Chun, Lalpa chu a hawng a hawi le, Peter chu a zauh rawh chun, Peter nih chun, Lalpa nih, "Tusûn ah hin âr a khuang lânah veithum na ka pheh lai," a sinah a ti mi thu kha a hawng theih nawlh rawh. ⁶² Chun, a suak le, a ṭap chiam rawh. ⁶³ Chun, Jisu tleihtu tla nih nihsuak siamnâk ah an mang le, an vuak. ⁶⁴ Chun, a mit an tuam le, "Sim rawh, âu nih a nan vuak?" ti hen, an deih tâwn. ⁶⁵ Chun, thu dang tamtak hen an simsiat le, an fâi. ⁶⁶ Chun, khuadei ka hen zatlâng upa tla, bâwlpu lal tla leh Dân sîntirtu tla chu anna pûm le, an lâirêlnâk ah chun an kalpi le, ⁶⁷ "Mesia na si tak chun hawng kan simh," an ti. Chun, anih nih chun an sinah, "An simh na khawmsele nan lung lai loh; ⁶⁸ an deih na khawmsele nan sâng lai loh. ⁶⁹ Sikhawmsele, tu rî hen chun Minung Fapa hi Pathian thiltikhonâk vawrhlei ah a to lai rawh," a ti. ⁷⁰ Chun, an ektê hen, "Nang hi Pathian Fapa chu na si ma ne?" an ti. Chun, anih nih chun an sinah, "Si ta a," a ti. ⁷¹ Chun, annih nih chun, "Zei theihnâk dang me kan ngâi lai rawh? Kanmah ngelchel nih amah kâ suak kan theih rawh hi teh," an ti.

¹ Chun, anna pûm mi vial chu an thawk le, Jisu chu Pilat sinah an kalpi. ² Chun, "Hi minung nih hin kan phun tla a râwk le, Kaisar sinah siah châwi a khap le, Mesia, Lalchem â ti mi kan theih," ti hen an phûm rawh. ³ Chun, Pilat nih a sinah, "Juda tla lalchem na si ma?’ ti hen a deih. Chun, anih nih chun a sinah "Si ta a," a ti le, a sâng. ⁴ Chun, Pilat nih bâwlpu lal tla leh mi zapi tla sinah chun, "Hi minung lakah hin zeikhawm sualnâk ka theih lo," a ti. ⁵ Sikhawmsele, annih nih chun, "Galili ram ah a dawmh le, hi mun tiang hen Judai ram khua kip ah sîntir hen, mi zawzawng a nawktir tâwn asi," ti hen an ti zual dadauh. ⁶ Chun, Pilat nih chu chu a theih rawh chun, chu minung chu Galili ram ah mi asi leh silo a deih. ⁷ Chun, Herod bial ah mi asi ti a theih kâ hen Herod sinah a fial rawh, chu liau chun anih khawm Jerusalem ah a um bâk. ⁸ Chun, Herod nih Jisu chu a muh rawh chun thungâi â lâwm le, a thâwngthâng a theih ruangah a lân thawk hen khawm muh a duh rêng le, a thilchê ti zeimaw tal muh ding a lungum. ⁹ Chun, thu tamtak a deih le; sikhawmsele, zeikhawm hen a sâng lo. ¹⁰ Chun, bâwlpu lal tla leh Dân sîntirtu tla nih chun dîr hen cherkhet hen an phiar chiam. ¹¹ Chun, Herod leh a kawrsen tla nih chun Jisu an zauhnawmh le, nihsuak siamnâk ah an mang le, chun puan rokual tak aihtir hen Pilat sinah an fial nawlh rawh. ¹² Chun, chu ni tak chun Herod leh Pilat chu anna rem rawh le; chu lân zawzawng chu anna er thlo tâwn asi. ¹³ Chun, Pilat nih bâwlpu lal tla, hotu tla leh mi zawzawng tla a pumh na le, ¹⁴ an sinah, "Midang tla a râwk ti hen hi minung hi ka sinah nan hawng put mi kha asi le, nan mâika ah ka salh le, nan phiar mi thu lakah hi minung tlûnah hin zeikhawm sual ka muh lo asi; ¹⁵ Herod khawm nih a muh bâk lo le; kan sinah a hawng fial nawlh rawh hi; thihnâk rê hen zeikhawm a ti lo. ¹⁶ Chuvachun, ka vuak lai le, ka suah awt ko asi," a ti. ¹⁷ Kût liauah chun an sinah mi pakhat chu a suah piak na tâwn asi. ¹⁸ Sikhawmsele, a rual hen an âu le, "Hi minung hi chu veih le, Baraba kha hawng kan suah piak dauh rawh," an ti. ¹⁹ Chu minung chu khuapi lakah helnâk ruangah leh mi a thah ruangah rêngtlâ asi. ²⁰ Pilat lam nih chun Jisu suah a duh le, an sinah a sim nawlh le, ²¹ sikhawmsele, an âu le, "Kraws ah khenhbêk rawh, kraws ah khenhbêk rawh," an ti. ²² Chun, anih nih chun a veithumnâk ah an sinah, "Zeirangah me? Hi minung nih hin zei thil me a sual? Thihnâk khawp rê hen a lakah zeikhawm ka muh lo; chuvachun, ka vuak lai le, ka suah awt ko asi," a ti. ²³ Annih lam nih chun hâu fâk hen kraws ah khenh ding hen an deih êu. Chun, an aw-hâu nih chun a neh rawh. ²⁴ Chun, Pilat nih chun an deih ziatê hen ti ding hen thu a thlûk rawh. ²⁵ Helnâk leh mi thah ruangah rêngtlâ an deih mi kha a suah le, Jisu lam chu an duh duh ti dingah a pêk rawh. ²⁶ Chun, an kalpi liauah chun Simon, Kurini khua mi, ram lei thawk hen a hawng mi an tleih le Jisu dunglei ah put ding hen a tlûnah kraws chu an thâng. ²⁷ Chun, mi zapi tamtak leh nunau zeimaw mi tla nih ir chumh leh ṭap bû hen an zûl. ²⁸ Jisu lam chu anmah lei â hawi le, "Jerusalem fanu tla, hawng ka ṭappi lah u, nanmah leh nan fa tla rangah ṭap dauh u. ²⁹ Ngâinik u, a ni a tlung awt! Chubang ni ah chun, ’Nunau ching tla, nâu pâwi dahlonâk pâw tla, nâu din dahlo mi nûk tla chu an thaw a suak lai’ an ti lai. ³⁰ Chu tikah chun mi tla nih tlâng tla sinah, ’Hawng kan denh!’ an ti teh lai; mual tla sinah, ’Hawng kan khuh,’ an ti teh lai. ³¹ Thing ring lak men ah hi hâwi an ti chun, a châr mi lak châng chun zei tluk dek an ti lai?" a ti. ³² Chun, a sinah midang panih, misual thah ding hen an hawngpi na. ³³ Chun, "Luruh," an ti mi mun chu an tlung rawh chun, chunah chun kraws ah an khenh le, misual tla hen, a vawrhlei ah pakhat a kehlei ah pakhat. ³⁴ Chun, Jisu nih, "Pa, annih hi ngaihdam na rawh; an thilti hi an theih lo asi," a ti. Chun, chamchawh hen a nipuan tla chu anna ṭhen rawh. ³⁵ Chun, zatlâng tla nih chun dîr hen an chuanh. Chun, hotu tla khawm nih, "Midang men a damtir mi; Pathian thîm mi Mesia asi tak chun amah khawm a damh seh," ti hen an sîrleih. ³⁶ Chun, kawrsen tla khawm nih amah chu nihsuak siamnâk ah an mang le, a sinah an hawng le, uain thur an pêk le, ³⁷ "Juda tla lalchem na si tak chun a damh rawh," an ti. ³⁸ Chun, a tlûn leiah chun, "HI HI JUDA TLA LALCHEM ASI," ti hen lasui rîn a um. ³⁹ Chun, misual khenh mi lakah pakhat nih chun Jisu a fâi le, "Mesia chu na si lo mazei? A damh le, kannih khawm hawng kan damh bâk," a ti. ⁴⁰ Sikhawmsele, pakhat nih chun fâi pah hen a sâng le, "Pathian men na ṭih lo ma? Bang cho hen hawng kan rêp hi. ⁴¹ Kannih lam chu rêp ding rêng kan si; kan thilti diklo man kan tawng asi hi; hi minung nih hin zeikhawm a sual lo," a ti. ⁴² Chun, Jisu sinah, "Jisu na Ram na tlung tikah hawng ka theihkumza," a ti. ⁴³ Chun, Jisu nih a sinah, "Thungâi tak hen ka nan simh, tusûn ah hin ka sinah Paradis ah na um bâk lai," a ti. ⁴⁴ Chun, dâr leinih thawk hen zânlei dâr thum tiang hen laikulh a mûi ver le, ⁴⁵ nî chêu a reh rawh le, chun, Pathian Biakin puanzâr chu a lâi ah â thlêk rawh. ⁴⁶ Chun, Jisu chu hâu fâk tak hen a âu le, "Pa, na kut ah ka thlarau ka nan kiltir," a ti. Chun, chu chu a ti thluh rawh chun a nukrî a chat rawh. ⁴⁷ Chun, kawrsen zâ hotu nih chun thil umzia chu a muh rawh chun, "Hi minung hi zei ti khawm hen mirep asi ngelchel lai," ti hen, Pathian a sawr rawh. ⁴⁸ Chun, chu zauhnuam chu chuanh ding hen mi zapi an hawng a pûm mi tla zawzawng nih chun thil umzia chu an muh rawh chun an ir tla chumh lemang hen an tlung nawlh rawh. ⁴⁹ Chun, a mêltheih tla zawzawng leh nunau Galili thawk hen hawng zûltu tla chubang thil chu chuanh hen lât takah an dîr. ⁵⁰ Chun, minung pakhat, a min Josef, lâirêltu, mi ṭha tak, rep tak a um. ⁵¹ Hi minung nih hin an lâirêl leh an thilti khawm rem a ti lo rêng asi. Juda le khua Arimathai ah mi asi le, Pathian Ram a lungum tâwn. ⁵² Chu minung chu Pilat sinah a kal le, Jisu ruak a deih. ⁵³ Chun, a lâk le, puan mangṭhia hen a tuam le, thlân lung hawrh, âukhawm vûi dahlonâk ah a zâutir. ⁵⁴ Chun, chu ni chu Timhtuah ni asi le, Dinhni a nâi tek rawh. ⁵⁵ Chun, nunau, Galili ram thawk hen a sinah an hawng mi tla nih khan an zûl le, thlân leh a ruak zâutir zia chu an muh. ⁵⁶ Chun, an lâwi nawlh le, zeilo rimthâw tla leh sariak rimthâw tla an siam. Chun, Dinhni ah chun thupêk hâwi hen anna dîn rawh.

¹ Ni sarih ni masachem ah chun, khuadei rianruan ah, zeilo rimthâw an siam mi tla chu put hen thlân ah chun an va kal. ² Chun, thlân ah mi lung chu ṭhinh hen an muh le; ³ chun, an lût le, Lal Jisu ruak chu an muh lo. ⁴ Chun, chubang ruangah an lawksawng liauah chun, minung panih, puan mit ser rê hen aih mi an kiangah an hawng dîr le; ⁵ chun, an ṭih le, an mêl tual tawngh rê hen an kûn liauah annih nih chun an sinah, "Zeirangah mithi lakah a nung mi nan hâwl? ⁶ Hinah a um lo rawh, a thawknawlh rawh; Galili ram ah a um liauah nan sinah a thusim kha theih nawlh u. ⁷ ’Minung Fapa hi misual tla kut ah tleihtir hen a um lai le, kraws ah an khenhbêk lai le, ni thum ni ah a thawknawlh ding asi,’ a ti mi kha," an ti. ⁸ Chun, a thu chu an theih nawlh rawh le, ⁹ thlân ah mi chu an tlung nawlh le, leikhat leh midang zawzawng tla sinah chun chubang thil zawzawng chu an sim. ¹⁰ Chubang tla chu Magdala mi Mari, Joana, Jem nu Mari tla an si; an sinah nunau dang tla khawm nih ṭhiruai tla sinah chun chubang thu chu an sim bâk. ¹¹ Sikhawmsele, chubang thu chu thu salam ah an ruat le, an lung piak na lo. ¹² Sikhawmsele, Peter chu a thawk le, thlân ah chun a tek le; chun a kûn le, a bih le, puan mangṭhia a um mi dei a muh le; chun, thil umzia chu chê ti bû hen a in leiah a lâwi rawh. ¹³ Chun, chu ni takah chun an lakah mi panih chu khua pakhat Emau an ti mi ah chun an kal awt le, chu khua chu Jerusalem thawk hen Stade sâwmruk asi. ¹⁴ Chun, thil a hawng tlung mi zawzawng chu an sim vima. ¹⁵ Chun, an sim le, anna deih liauah chun Jisu ngelchel nih a hawng fûk na le, an sinah a kal bâk rawh. ¹⁶ Sikhawmsele, amah chu an theih lonâk ding hen an mit chu vâitir hen a um. ¹⁷ Chun, an sinah, "Kal pah hen nan ruat mi kha, zei thu me?" a ti. Chun, zûr tak hen an dîr rawh. ¹⁸ Chun, a min Kleopa dauh nih chun a sinah, " Jerusalem ah nangmah cho hen na maw na um, tu liauah thil umzia hi na theih lo ma?" a ti le, a sâng. ¹⁹ Chun, anih nih chun an sinah, "Zei thil me?" a ti. Chun, annih nih chun a sinah, "Nazaret Jisu Pathian leh minung zawzawng mitmuh ah a thu ah leh a thilti ah khuavâng minthang tak thâwngthâng thu; ²⁰ bâwlpu tla leh kan hotu tla nih thah ding hen an pêk le, kraws ah an khenhbêk zia thu tla kha. ²¹ Kannih nih Israel tla tlanhtu si ding hen kan lungum rîlmâl hen, zeikhawm si sele, chubang thil tlungnâk chu tusûn hen ni thum asi rawh. ²² Chubang lo khawm chu kanmah murui ah mi nunau âu tla mawh zîng ah a thlân ah an va kal le, hawng kan lawksawngtir le; ²³ a ruak muh ṭung lo hen ’Pathian vânmifial â langh mi kan muh le, chu tla nih chun a nung nawlh ti an sim,’ an hawng ti. ²⁴ Chun, kan lakah mi âu tla mawh thlân ah chun an kal le, nunau tla sim hâwitê hen an muh le, sikhawmsele, amah chu an muh fâwn lo," an ti. ²⁵ Chun, anih nih chun an sinah, "Mi â tla, khuavâng tla zawzawng thusim lung leikângah thinlung sêt tla! ²⁶ Mesia nih chubang thil chu tuar hen a rokualnâk ah a lût ding rêng asi lo mazei?" a ti. ²⁷ Chun, Mosi leh khuavâng lasui thu thawk hen a dawmh le, Pathian lasui thu zawzawng ah amah thâwngthâng rîn mi vial chu anmah tla a simhfiang vima na. ²⁸ Chun, an kalnâk ding khua chu an tlung awt rawh le, chun, anih chu lât dauh ah kal a tum hâwi hen a um. ²⁹ Chun, kâ hen an thlauh le, "Kan sinah um ko me; a zânlei vung rawh, nî khawm a tlâ awt rawh," an ti. Chun, an sinah um ding hen a lût rawh. ³⁰ Chun, an sinah buh dûm hen a to rawh chun sang a lâk le, mal a sâwm le, a phel le, an sinah a pêk. ³¹ Chun, an mit a hawng dei le, a mêl an theih rawh le, chun, anih chu a vei ving rawh. ³² Chun, annih nih chun, ’Lampi ah hawng kan sawnh liauah Pathian lasui thu tla hawng kan simhfiang liau khan kan thinlung a fiang pum lo ngen mazei?" anna ti. ³³ Chun, chu liau tak chun an thawk le, Jerusalem ah an kîr nawlh le, leikhat tla leh an hâwi tla anna pûm mi chu an muh le, ³⁴ "Lalpa chu a thawknawlh tatak asi; Simon sin khawmah â langh rawh!" an hawng ti. ³⁵ Chun, annih khawm nih lampi ah thil hawng tlung mi leh sang a phel le, a mêl an hawng liah rawh zia tla chu an simh na bâk. ³⁶ Chun, chubang thu chu an sim liauah chun amah ngelchel chu anmah lakah a hawng dîr le, an sinah, "Nan tlûnah lungngamhnâk um seh," a ti. ³⁷ Sikhawmsele, an lâu khit le, mithlâ muh hen anna ruat. ³⁸ Chun, anih nih chun an sinah, "Zeirangah nan lawksawng? Zeirangah nan thinlung ah zumhmaihnâk a hawng um? ³⁹ Ka kut leh ka kezaphah tla hi zauh u, keimah tak kha ka si hi! Hawng ka tham ule, zauh u; nan hawng ka muh hâwi hen thlarau nih taksa leh ruh a nei lo," a ti. ⁴⁰ Chun, chu chu a sim thluh rawh chun a kut leh a kezaphah tla an sinah a zauhtir. ⁴¹ Chun, anna lâwm tuk ruangah an lung lo nget rih le, chê an ti kar chun an sinah, "Hinah ei ding zeilo nan nei ma?" a ti. ⁴² Chun, ngâ rawh vo khat an pêk. ⁴³ Chun, a lâk le, an mâika ah chun a ei rawh. ⁴⁴ Chun, an sinah, "Hi hi ka thu kha asi, Mosi Dân ah, khuavâng lasuibu ah leh Sawrnâk labu tla ah ka thâwngthâng rîn mi vial a hawng tlung ding zia nan sinah ka um liauah ka nan simh tâwn na kha," a ti. ⁴⁵ Chun, Pathian lasui thu theihnâk ding hen an thinlting a finghtir. ⁴⁶ Chun, an sinah, "Hi hâwi hen rîn asi: ’Mesia nih chun hamhnâk a tuar lai le, ni thum ni ah mithi lakah mi a thawknawlh lai le, ⁴⁷ amah min hen rimnâk thu leh sual ngaihdamnâk thu Jerusalem thawk hen phun kip sinah an sim lai,’ ti hen. ⁴⁸ Chubang thil zawzawng chu a theihtu nan si. ⁴⁹ Chun, ka Pa thil tiamh chu nan tlûnah ka hawng fial awt; sikhawmsele, tlûn leiah mi thiltikhonâk hen thuamh nan si lânlo chu khuapi ah hin um kumza u," a ti. ⁵⁰ Chun, Bethani khua vâu tiang hen annih chu a kalpi na le; chun, a bân a phar le, mal a sâwm na. ⁵¹ Chun, mal a sâwm na liau takah chun annih chu a ṭhen na le, vân leiah lâk hen a um rawh. ⁵² Chun, an mâimûk le, lâwm tak hen Jerusalem ah an kîr nawlh rawh le; ⁵³ chun, Pathian Biakin ah chun Pathian sawr hen an um kumza rawh.