JOHAN

JOHAN

¹ A tîr ah Thu a um, Thu chu Pathian sinah a um; Thu chu Pathian asi. ² A tîr thawk hen Pathian sinah a um. ³ Zeizawng a ektê hen amah siam asi; thilsiam zawzawng hi amah siamlo zeikhawm a um lo. ⁴ Amah lakah chun nungnâk a um; chu nungnâk chu minung tla chêunâk asi. ⁵ Chêu chu mûi lakah a hawng chêu le, mûi nih chu chu a neh lo. ⁶ Pathian fial mi pakhat a um le, a min chu Johan asi. ⁷ Theihpitu ding hen a hawng kal le, chêu thu chu theihtir ding hen; amah ruangah mi zawzawng nih an lung khonâk ding hen. ⁸ Anih chu chêu chu asi lo, chêu thu chu theihtir ding hen hawng kal asi dauh. ⁹ Chêu dik tak mikip chêutirtu kha laikulh ah a hawng kal liau asi. ¹⁰ Anih chu laikulh ah a um, laikulh amah siam asi, laikulh nih amah an theih lo. ¹¹ Amah ram ah a hawng kal le, amah mi tla nih an duh lo. ¹² Sikhawmsele, amah duhtu vial chu an sinah Pathian fa tla si khonâk ding a pêk, a min zumhtu tla chu. ¹³ Minung thlâknâk thawk hen ring mi an si lo; taksa duhnâk thawk hen ring mi khawm an si lo; mipa duhnâk thawk hen ring mi khawm an si lo; Pathian thawk hen ring mi an si dauh. ¹⁴ Thu chu minung ah a hawng a chang le, kan lakah a um rawh. A rokual zia kan muh. Zângfahnâk leh thudik hen a khat. Hi hi rokualnâk chu asi, Pa, Fapa neihlem hâwi a sinâk chu. ¹⁵ Johan nih a thu a theihtir le, a âu le, "Ka dung leiah hawng ka zûltu nih khan hawng ka lehkhalh rawh asi, keimah lânah um asi rawh ruangah,’ ti hen a thu ka sim mi kha amah hi asi," a ti. ¹⁶ A rangtlingnâk kanna ting chiau, zângfah nûnah zângfah singsuannâk hen, ¹⁷ Dân Mosi nih a pêk, zângfahnâk leh thudik Jisu Krist ruangah a hawng um. ¹⁸ Âukhawm nih Pathian an muh dah lo, Fapa neihlem, Pa kiangah um mi tak nih khan, amah a theihtir rawh asi. ¹⁹ Chun, Juda le nih "Âu me na si?" ti hen, deih ding hen, Jerusalem thawk hen a sinah bâwlpu tla leh Levi chi tla an fial liau khan hi hi Johan theihtirnâk chu asi; ²⁰ pheh lo hen a phuang le, "Mesia ka si lo," ti hen a phuang. ²¹ Chun annih nih chun a sinah, "Âu me na si ne?" Elija na si ma? an ti le, an deih. Chun, anih nih chun "Ka si lo," a ti. "Khuavâng chu na si ma?" an ti. Chun, anih nih chun, "Ka si lo," a ti le, a sâng. ²² Chun annih nih chun a sinah, "A si chun, âu me na si ne? Hawng kan fialtu tla kan sâng khonâk ding hen hawng kan simh ma ne? Na thâwngthâng rerêng zeime na sim awt?" an ti. ²³ Chun, anih nih chun, " ’Lalpa lampi dingtir u,’ ti hen, ’ramkaro ah âutu aw-hâu ka si,’ " Khuavâng Isai sim hâwi khan, a ti. ²⁴ An mifial tla chu Farisai tla le sinah mi an si. ²⁵ Chun, annih nih chun a sinah, "Mesia tal, Elija tal, Khuavâng khawm chu na si lêmlo chun, zeirangah na baptis na ne?" an ti le, an deih. ²⁶ Chun, Johan nih an sinah, "Kei nih tî hen ka baptis le, nan lakah mi pakhat nan theihlo mi a dîr asi. ²⁷ Anih chu ka dung leiah hawng ding mi chu asi, a pheikawk rî sût tlâk khawm ka si lo," a ti le, a sâng. ²⁸ Chubang thil chu Jordan lanh ah Bethani ah, Johan baptis nâk ah khan an ti asi. ²⁹ Chun, a thâituan ah chun Johan nih Jisu a sinah a hawng kal mi a muh. Chun a sim le, "Zauhnik u, Pathian Dawrâ Fa laikulh sual kalpitu ding khi! ³⁰ Hi hi asi, ’Minung pakhat hawng ka lehkhanh mi nih khan hawng ka zûl awt, ka lânah a um rawh asi, ka ti mi kha,’ ³¹ Amah chu ka theih lo, sikhawmsele, Israel tla sinah a hawng langhnâk ding hen, tî hen baptis ding hen ka hawng kal asi," a ti. ³² Chun, Johan nih a theihtir le, a sim le, "Thlarau chu vaṭhu hâwi hen vân thawk hen hawng ṭum ka muh le, a tlûnah a fû ko. ³³ Amah chu ka theih lo le, sikhawmsele, tî hen baptis ding hen hawng ka fialtu nih khan ka sinah, ’Âu tlûn zawngah Thlarau hawng ṭum hen, a tlûnah um ko na muh mi chu, amah chu Thlarau Thenhlimh hen baptistu ding chu asi,’ hawng ka ti. ³⁴ Chu chu ka muh rawh le," "chun hi hi Pathian Fapa asi ti ka theihtir rawh," a ti. ³⁵ Chun, a thâituan ah Johan a dîr le, a ṭhiruai le panih hen; ³⁶ chun, Jisu kal liau a zauh le, "Zauhnik u, Pathian Dawrâ Fa khi," a ti. ³⁷ Chun a ṭhiruai panih nih chun a thusim chu an theih le, Jisu an zûl rawh. ³⁸ Chun, Jisu â hawi le, an hawng zûl mi a muh le, an sinah "Zei me nan hâwl?" a ti. Chun, annih nih chun, "Rabbi, (chu chu Sîntirtu tinâk asi), zeiah na um?" an ti. ³⁹ Anih nih an sinah, "Hawng kal ule, nan muh lai," a ti. Chuvachun, an kal le, a umnâk chu an muh le, chu ni ah chun a sinah an um ko le, zânlei dâr li ding asi. ⁴⁰ Johan thusim chu theih hen Jisu zûltu panih lakah pakhat chu Andri, Simon Peter unau asi. ⁴¹ Anih nih chun a masachem hen a unau Simon a muh le; a sinah, "Mesia kan tawng rawh," a ti, (Sariak Thuh an ti mi chu), ⁴² churawhchun Simon chu Jisu sinah a hawngpi. Jisu nih anih chu a zauh le, "Johan fapa Simon na si, Kipha an sak lai," a ti le, (chu chu Peter tinâk asi, Peter chu lungpi tinâk asi.) ⁴³ Chun, a thâituan ah chun Jisu chu Galili ah kal a tum le, Philip a muh le, a sinah, ’Hawng ka zûl rawh," a ti. ⁴⁴ Philip chu Betsaida mi asi, chu chu Andri leh Peter umnâk khua asi. ⁴⁵ Philip nih chun Nathanael a muh le, a sinah, "A thâwngthâng Mosi nih Dân lasuibu ah a rîn mi leh khuavâng tla nih an rîn mi kha, amah chu kan muh rawh. Nazaret Jisu Josef fapa chu," a ti. ⁴⁶ Chun, Nathanael nih chun a sinah, "Nazaret ah thil ṭha a suak kho mazei?" a ti. Philip nih chun a sinah, "Hawng le zauh," a ti. ⁴⁷ Jisu nih Nathanael a sinah a hawng mi a muh le, a thâwngthâng sim le, "Zauhnik u, Israel mi tak ngamlêmnâk rerêng neilo hi," a ti. ⁴⁸ Nathanael nih a sinah "Nangnih zeitin na theih?" a ti. Jisu nih a sinah, "Philip nih a nan kawh lânah theipi phûr ah na um liau khan ka nan muh," a ti. ⁴⁹ Nathanael nih, "Sîntirtu Pathian Fapa na si, Israel tla Lalchem na si hi," ti hen a sâng. ⁵⁰ Jisu nih a sinah, "Theipi phûr ah ka nan muh, na sinah ka nan ti ruangah na lung mu? Hi ngâk hen thil rokual dauh hi na muh lai," a ti le, a sâng, ⁵¹ Chun, Jisu nih a sinah, "Thungâi tak hen ka nan simh, vân â awng hen, Pathian vânmifial tla Minung Fapa tlûnah hin ṭum leh kâi nan muh teh lai," a ti,

¹ Ni thum ni ah, Galili ram ah Kana ah umhnâk a um le, chunah chun Jisu nu a um, ² Jisu leh a ṭhiruai tla khawm umhnâk ah an sâwm na, ³ Chun, uain a tinh lo le, Jisu nu nih chun a sinah, "Uain an nei lo rawh," a ti, ⁴ Chun, Jisu nih a sinah, "Nu, nangnih na ka theih piak ding zei me a um? Ka tik a tlung lo rih," a ti, ⁵ Chun a nu nih lâiraw tla sinah, "Nan sinah a sim mi vial chu ti vima u," a ti, ⁶ Chun, Juda tla ṭâwl thiang dân hâwi hen lungbêl paruk, tahnâk nih mawh tahnâk thum mawh tlum chiau, chunah chun an toh. ⁷ Chun, Jisu nih an sinah, "Tibêl tla tî hen khah u," a ti. Chun, a kâ rual hen an khah seng. ⁸ Chun, an sinah, "Tuah than ule, lâiraw hotu sinah kalpi u," a ti. Chun, an kalpi rawh. ⁹ Chun, lâiraw hotu nih chun tî uain â chang mi chu a tem le, zei thawk mi asi ti a theih loh, lâiraw tî thantu tla nih chun an theih. Mo pasal chu a kawh le, ¹⁰ a sinah, "Mi kip nih a tîrah uain ṭha an suah tâwn; chun, an din ual nûnah a ṭha lo dauh mi chu an suah tâwn; nang lam nih chun tutiang hen uain ṭha na kil," a ti. ¹¹ Jisu nih singsiahnâk a ti masachemnâk hi Galili ram ah Kana ah chun a ti le, a rokual zia a langhtir rawh; chun, a ṭhiruai tla nih chun amah chu an zumh rawh. ¹² Chu nûnah chun Kapernaum ah a va kal le, a nu, a unau tla leh a ṭhiruai tla hen; chunah chun ni sâwtlotê an châm. ¹³ Chun, Juda Kalkanh Kût a nâi rawh le, Jisu Jerusalem ah a va kal. ¹⁴ Pathian Biakin ah châw, dawrâ, vaṭhu zuartu tla leh tangka thlengtu tla an to mi a muh. ¹⁵ Chun, ritual hen vuaknâk a siam le, dawrâ leh châw an ektê hen Pathian Biakin thawk hen a nar na le; tangka thlengtu tla tangka chu a bungh le, an dawhkân tla a thlûk piak na. ¹⁶ Chun, vaṭhu zuartu tla sinah chun, "Hi bang tla hi kalpi u, ka Pa in sawlehnâk in ah mang lah u," a ti. ¹⁷ "Na in ah ka semsê ngaihnâk nih hawng ka ei hep lai," ti rîn asi ti a ṭhiruai tla nih an theih nawlh rawh. ¹⁸ Chuvachun, Juda tla nih a sinah, "Hi bang thil na ti mi hi singsiahnâk zei me na hawng kan zauhtir kho?" an ti le, an sâng. ¹⁹ Jisu nih an sinah, "Hi Pathian Biakin hi râwk ule, ni thum karah ka dirh nawlh lai," a ti le, a sâng. ²⁰ Chun, Juda tla nih chun, "Hi Pathian Biakin hi kum sâwmli leh kum ruk sak asi, nangnih ni thum karah na dirh awt mu?" an ti. ²¹ Sikhawmsele, a taksa biakin thu a sim asi. ²² Churuangah, mithi lakah mi a thawknawlh liauah hi hi a sim ti a ṭhiruai tla nih an theih nawlh rawh le; chun, Pathian lasui thu leh Jisu thusim chu an lung rawh. ²³ Chun, Kalkanh Kût ah, Jerusalem ah a um liau chun a singsiahnâk ti tla an muh le, mi tamtak nih a min an zumh rawh. ²⁴ Sikhawmsele, Jisu chu an sinah a lungngam thiam lo, mi zawzawng a theih le; ²⁵ minung thu âukhawm simhfiang a herh lo, amah nih minung thinlung ah a um mi vial chu a theih ruangah.

¹ Chun, Farisai tla lakah mi a min Nikodem, Juda le hotu pakhat a um; ² chu chu zân ah Jisu sinah a hawng kal le, a sinah, "Sîntirtu, Pathian sinah mi sîntirtu dingah hawng kal na si ti kan nan theih; Pathian an sinah a um lo chun hi singsiahnâk tla na ti hâwi hi âukhawm an ti kho lai loh," a ti. ³ Chun, Jisu nih a sâng le, a sinah, "Thungâi tak hen ka nan simh, mi âukhawm a suaknawlh lo chun Pathian Ram a muh kho lai loh," a ti. ⁴ Nikodem nih a sinah, "Mi a tar nûnah zeitin a suak kho lai? A nu paw sungah veinih lût hen a suak kho lai mazei?" a ti. ⁵ Jisu nih a sâng le, "Thungâi tak hen ka nan simh, mi âukhawm tî ah leh Thlarau ah a suak lo chun Pathian Ram ah a lût kho lai loh. ⁶ Taksa ah a suak mi chu taksa asi, Thlarau ah a suak mi chu Thlarau asi. ⁷ Na suakthar ding ka nan ti mi hi chê ti lah. ⁸ Thli kha zei tal ah a duh duh hen a lêng tâwn, a hâu na theih, sikhawmsele, kha zei thawk hen hawng mi me, kha zei leiah a kal awt ti na theih lo; âuzawng Thlarau ah suak mi chu, chu hâwi hen an um, a ti. ⁹ Chun, Nikodem nih a sâng le, a sinah, "Chu chu zeitin a um kho lai?" a ti. ¹⁰ Jisu nih a sâng le, a sinah, "Israel tla sîntirtu minthang na si mi, chu chu na theihthiam lo ma? ¹¹ Thungâi tak hen ka nan simh, kannih nih kan theih mi chu kan sim tâwn, kan muh mi chu ka theihtir tâwn; sikhawmsele, kan theihtirnâk nan pawm lo. ¹² Laikulh thil tla kan simh na mi nan lung lo chun, vân lei thil tla an simh na sele zeitin nan lung lai? ¹³ Vân ah âukhawm an kâi dah lo, Minung Fapa vân thawk hen hawng ṭum mi cho lo hi chu. ¹⁴ Chun, Mosi nih ramkaro ah rûl a thlâi hâwi khan, Minung Fapa hi thlâi hen a um ding asi. ¹⁵ Âukhawm amah lungtu nih chun amah ruangah zungzâl nungnâk an nei khonâk ding hen. ¹⁶ Pathian nih laikulh thungâi a dâwt le, churawhchun a Fapa neihlem a pêk, amah chu âuzawng a zumhtu vial thi lo hen, zungzâl nungnâk an nei khonâk ding hen. ¹⁷ Laikulh mawhtir ding hen Pathian nih a Fapa laikulh ah a fial lo, laikulh amah ruangah ruangsuah hen an um khonâk ding hen a fial dauh asi. ¹⁸ Âuzawng amah zumhtu chu mawh hen an um lo; âuzawng zumhlotu chu mawh chia hen an um, Pathian Fapa neihlem min an zumh lo ruangah. ¹⁹ Hi hi mawhnâk asi, chêu laikulh ah a hawng kal le, sikhawmsele mi le tla nih chêu ngâk hen mûi an duh dauh, an thilti tla an sual ruangah. ²⁰ Âuzawng thilti sual mi nih chêu an hua tâwn, chêu ah khawm an hawng lo, chu lo chun an thilti tla a lang lai. ²¹ Sikhawmsele, âuzawng a ti dik mi vial an thilti tla Pathian ruangah ti an si ti a lang khonâk ding hen chêu ah an hawng kal," a ti. ²² Chu nûnah chun Jisu a ṭhiruai tla hen Judai ram ah an kal le, chunah chun an sinah a um ko le, a baptis na tâwn. ²³ Johan khawm nih Ainon ah Salim khua kiangah a baptis na bâk, chunah chun tî a tam ruangah; chun mi an hawng le, baptis an si. ²⁴ Johan chu rêngin ah an khumh lo rih. ²⁵ Chun, Johan ṭhiruai tla leh Juda pakhat, ṭawl thiang thu ah anna êl. ²⁶ Chun, Johan sinah an hawng le, a sinah, "Sîntirtu, Jordan râlah na sinah um, a thu na theihtir mi nih khan, ngâinik, kha nih khan a baptis na le, mi zawzawng a sinah an hawng kal asi!" an ti. ²⁷ Johan nih a sâng le, "Minung nih zeikhawm a nei kho lo, vân ah mi pêk asi lo chun. ²⁸ ’Kei Mesia ka si lo, a mâi leiah fial ka si,’ ka ti mi kha, nanmah tak hawng ka theihpitu nan si. ²⁹ Mo neitu chu mo pasal chu asi; sikhawmsele, mo pasal hâwipa dîr hen a thu theihtu chu mo pasal aw ruangah thungâi hen â lâwm tâwn; churuangah, tuhin ka lâwmnâk a rangtling rawh asi. ³⁰ Anih chu sung-û dadauh ding asi, kei lam chu nâu dauh ding ka si. ³¹ "Tlûnlei thawk hen a hawng kal mi chu mi zawzawng ngâk hen chungnungchem asi; tual ah suak mi chu tual ah mi asi le, tual thu a sim tâwn, vân thawk hen a hawng kal mi chu mi zawzawng ngâk hen chungnungchem asi. ³² A muh leh a theih mi zawng a theihtir tâwn asi, âukhawm nih a thu theihtirnâk an pawm lo. ³³ A thu theihtirnâk pawm mi nih ’Pathian chu a dik asi,’ ti a singsiah. ³⁴ Pathian fial mi nih chun Pathian thu a sim tâwn; anih nih chun a Thlarau khatnâk rangtling a pêk. ³⁵ Pa nih Fapa a dâwt le, a thiltikhonâk ah thil zeizawng a pêk rawh. ³⁶ Âuzawng Fapa zumh mi zawng nih zungzâl nungnâk an nei rawh; sikhawmsele, âuzawng Fapa thu ngâilotu vial nih nungnâk an nei lai lo le, Pathian thinrunhnâk an tlûnah a um kumza dauh asi," a ti.

¹ Chun, Jisu nih Johan ngâk hen ṭhiruai tam dauh a siam mi leh a baptis ti Farisai tla nih an theih ti Lalpa nih a theih kâ hen, ² (Sikhawmsele Jisu tak nih chun a baptis lo, a ṭhiruai tla nih an baptis tâwn.) ³ Judai ram chu a kaltâk le, Galili ram ah a kîr nawlh rawh. ⁴ Chun, Samari ram a pal ding asi. ⁵ Chuvachun, Samari ram ah khua pakhat, Saikar an ti mi chu a tleng le, Jakob nih a fa Josef sinah mun a pêk mi kiang kha; ⁶ Jakob tikhurchawh khawm kha chunah chun a um. Chun, Jisu chu a lam kal dît ruangah tikhurchawh kiang ah a to: Sûn dâr leinih liau asi. ⁷ Chun, Samari nunau pakhat tî than a hawng. Jisu nih a sinah, "Din ding hawng ka pêk," a ti. ⁸ A ṭhiruai lam chu ei ding châwk hen khua ah an kal rawh. ⁹ Chuvachun, Samari nunau nih chun a sinah, "Nang Juda mi na si, kei Samari nunau ka si, zeitin zia hen ka sinah din ding na ka deih?" a ti. (Juda tla nih Samari tla zei lak khawmah an mang dahlo ruangah.) ¹⁰ Chun Jisu nih a sâng le, a sinah, "Pathian thilpêk le, Din ding hawng ka pêk,’ na sinah titu hi theih le chu, nangnih a sinah na deih dauh ding asi, chun, anih nih tî nung a nan pêk rawh ding asi," a ti. ¹¹ Chun, nunau nih chun a sinah, "Pu, a thannâk zeikhawm na nei lo mi, tikhurchawh a thûk thlo mi, kha zei a mi tî nung na tawng? ¹² Kan pu Jakob ngâk hen na rokual dauh mazei? Anih nih chun tikhurchawh hi hawng kân pêk le, amah khawm nih a din le, a fa le, a ran tla hen," a ti. ¹³ Chun, Jisu nih a sâng le; a sinah, "Âuzawng hi tî dintu vial an tîhâl nawlh lai; ¹⁴ âuzawng an sinah ka pêk ding mi tî dintu vial lam chu zungzâl hen an tîhâl lai loh, kei nih an sinah tî ka pêk ding mi chu an sung ah tî nung a um lai le, zungzâl nung tiang hen a irh lai," a ti. ¹⁵ Chun, nunau nih chun a sinah, "Pu, chu tî chu hawng ka pêk, ka tîhâl lonâk ding leh hi bang tiang tî than ding hen ka hawng lonâk ding hen," a ti. ¹⁶ Chun, Jisu nih a sinah, "Na pasal va kawh le, hinah hawng nawlh," a ti. ¹⁷ Chun, nunau nih chun a sinah, "Pasal ka nei lo," a ti le, a sâng. Jisu nih a sinah, "Pasal ka nei lo, na ti mi hi, na dik ngâk; ¹⁸ pasal panga na nei rawh, tuah mi hi na pasal asi lo asi, hi thu hi na sim dik ngâk," a ti. ¹⁹ Nunau nih chun a sinah, "Pu, khuavâng na si ti ka theih. ²⁰ Kannih thlâktu tla nih chun hi tlâng ah hin Pathian an sawnh tâwn; sikhawmsele, nannih nih chun, ’Minung nih Pathian an sawnhnâk mun ding chu Jerusalem ah a um,’ nan ti tâwn," a ti. ²¹ Chun, Jisu nih a sinah, "Nunau, ka thu lung rawh, hi tlâng kher lo khawm ah, Jerusalem kher lo khawm ah Pa nan sawnh tik a tlung awt rawh. ²² Nannih nih nan theih lo mi nan sawnh tâwn; kannih nih kan theih mi kan sawnh tâwn. Ruangsuaknâk Juda tla sin thawk hen a hawng suak awt asi. ²³ Chuvachun, a tik a tlung awt rawh, tu khawmah a tlung liau chir, chu tik chun Pathian sawnhtu tatak tla nih Thlarau leh thudik hen Pa an sawnh lai, Pa nih chu hâwi mi chu amah sawnhtu ding hen a hâwl asi. ²⁴ Pathian chu Thlarau asi, a sawnhtu tla nih Thlarau leh thudik hen an sawnh ding asi," a ti. ²⁵ Chun, nunau nih chun a sinah, "Mesia, (Sariak Thuh an ti mi chu) a hawng kal awt ti ka theih, anih chu a hawng kal tikah zeizawng hawng kan simh lai," a ti. ²⁶ Chun, Jisu nih a sinah, "Keimah a nan sawnhtu hi amah chu ka si," a ti. ²⁷ Chun, chu liau tak chun a ṭhiruai tla chu an hawng kal le, nunau a sawnh mi chu chê an ti; sikhawmsele, âukhawm nih, "Zeime na hâwl?" "Zeirang nunau na sawnh?" khawm an ti lo. ²⁸ Chun nunau nih chun a tibêl a kaltâk le, khua ah a kal, mi zapi sinah, ²⁹ "Ka thilti zawzawng hawng ka simh vimatu mi pakhat a um, hawng kal ule, zauhnik u, Mesia asi kho lai ma?" a ti. ³⁰ Chun, annih chu khua ah mi chu an hawng suak le, amah lei an fûk rawh. ³¹ Chu karah a ṭhiruai tla nih chun a sinah, "Sîntirtu, ei rawh," an ti chiam. ³² Sikhawmsele, anih nih chun an sinah, "Buh nan theihlo mi ei ding ka nei," a ti. ³³ Chun, ṭhiruai tla chu anna sâwn le, "A ei ding mi nih an hawng put piak masi le?" an ti. ³⁴ Chun, Jisu nih an sinah a sim le, "Hawng ka fialtu duhzia ti leh a rianṭuan dih ding hi ka buh asi. ³⁵ Nannih nih, ’Fâng ât ding thla li a um rih,’ nan tilo mazei? Ngâi u, ka nan simh na; chuanh ule, lo tla zauh u, tu thawk hen ât ding hen a vâng asi. ³⁶ A âttu nih lawh a tawng tâwn le, zungzâl a nung tiang um ding hen rah a khawmh tâwn, a tuhtu leh a âttu anna lâwm vevê khonâk ding hen. ³⁷ ’Pakhat nih a tuh le, midang nih a ât, ti thu hi, chu lak chun a dik asi. ³⁸ Nan ṭuan tha fâk lo ât ding hen ka nan fial na kha; midang nih an ṭuan le; nannih nih an ṭuan chia chu nan zulhpeh asi," a ti. ³⁹ Chun, nunau nih chun, "Ka thilti zawzawng a hawng ka simh vima," ti hen, a theihtir mi thu ruang khan, chu khua mi Samari mi tamtak nih Jisu an zumh rawh. ⁴⁰ Chuvachun, Samari mi tla chu Jisu sinah an hawng le, an sinah châm ding hen an ngiar chiam; chun, chunah ni nih a châm. ⁴¹ Chun, midang tamtak nih amah thu ruangah an lung rawh. ⁴² Chun annih nih chun, nunau sinah chun, "Tu lam chun na thusim ruangah lung kan si lo rawh; kanmah ngelchel nih a thu kan theih le, hi minung hi laikulh Ruangsuahtu asi ngelchel ti kan theih rawh," an ti. ⁴³ Chun, ni nih nûnah chun chu thawk hen a suak le, Galili ram ah a kal rawh. ⁴⁴ Jisu tak nih, khuavâng chu amah khua leiah chun chawnglawmh hen a um dah lo ti a theihtir tâwn. ⁴⁵ Chuvachun, Galili ram a va tlung chun Galili ram ah mi tla nih an lawmh le, Jerusalem ah Kût liauah a thilti zawzawng an muh ruang khan; annih khawm chu Kûtnâk ah an kal bâk dangâiah. ⁴⁶ Chun, Galili ram ah Kana ah tî uain a changtirnâk kha a hawng tleng nawlh. Chun, Sorkar rianṭuantu âumawh a um le, a fapa Kapernaum ah a damlo. ⁴⁷ Chun, Jisu Judai ram mi Galili ram ah a hawng ti a theih kâ hen a va kal, a fapa damh ding hen a ngiar chiam le, a thi awt ngangâi asi. ⁴⁸ Chun, Jisu nih a sinah, "Singsiahnâk tla leh thilchê tla nan muh lo chun nan lung rîlmâl lai loh," a ti. ⁴⁹ Chun, Sorkar rianṭuantu nih chun a sinah, "Pu, ka fa thih lânah hawng ko me a," a ti. ⁵⁰ Chun, Jisu nih a sinah, "Tlung ko rawh, na fapa chu a dam rawh," a ti. Chun, chu minung nih chun Jisu nih a sinah thu a sim mi chu a lung le, a kal rawh. ⁵¹ Chun a kal liauah a to-aw tla nih an hawng dawng le, "Na fapa chu a dam rawh," an hawng ti. ⁵² Chun, anih nih chun an sinah a dam liau tik chu a deih na. Chun, annih nih chun a sinah, "Mazân nî her sat ah a râifanh nih a thlah rawh asi," an ti. ⁵³ Chun, a pa nih, Jisu nih a sinah, "Na fapa chu a dam rawh," a ti liau tak chu asi ti a theih rawh; chun, amah leh a dâwngsung tla nih an ektê hen Jisu an zumh rawh. ⁵⁴ Chu chu Jisu nih a thilchê ti Judai ram thawk hen Galili ram ah a hawng kal liauah a ti veinihnâk chu asi.

¹ Chubang nûnah chun Juda tla Kût pakhat a um le, Jisu Jerusalem ah a va kal. ² Chun, Jerusalem ah chun Dawrâ Kawtkâ kiangah zur a um le, chu chu Hebrai hawlh hen Betzatha an ti le, sârbûk panga a nei. ³ Chunah chun damlo, mitchâw, kekhêng leh zeng tla tamtak an zâu. (Tî a tlingtlawk ding mi chu an ngâk. ⁴ Vei zeimaw zat chu rilî ah vânmifial chu a hawng ṭum le, tî a hawng tlawktir. Chun, titlawk lakah ṭum masachemtu chu zei nganfâk zawng damtir hen a um.) ⁵ Chun, dam lo kum sâwmthum leh kum riat a ngawr mi chunah chun âumawh a um. ⁶ Chun, Jisu nih a zâu ko mi chu a muh le, chu hâwi hen sâwt tak a um rawh ti a theih le, a sinah, "Damh na duh ma?" a ti. ⁷ Chun, damlo mi nih chun, "Pu, tî a tlingtlawk chun zur ah hawng ka siahtu ka nei lo le, ka kal karah mi nih an hawng ka sawhkhanh tâwn," a ti le, a sâng. ⁸ Chun, Jisu nih a sinah, "Thawk le, na tangphah lâk le, kal rawh," a ti. ⁹ Chun, lâkkhatko ah chu minung chu a dam le, a tangphah chu a lâk le, a kal rawh. Chu ni chu Dinhni asi. ¹⁰ Chuvachun, Juda le nih a damh mi sinah chun, "Dinhni asi, na tangphah lâk a zarh," an ti. ¹¹ Chun, anih nih chun an sinah, "Hawng ka damhtu nih ka sinah, ’Na tangphah lâk le, kal rawh, hawng ka ti asi," a ti le, a sâng. ¹² Chun, annih nih chun a sinah, " ’Na tangphah lâk le, kal rawh,’ na sinah titu chu âu me si?" an ti le, an deih. ¹³ Sikhawmsele, a damh mi nih chun âu me asi a theih lo le, chunah chun mi zapi an um ruangah Jisu tâ nih a kal rawh. ¹⁴ A nehnûn ah chun Jisu nih anih chu Pathian Biakin ah a muh le, a sinah, "Ngâi rawh, na dam rawh hi, thil sual nawlh lah rawh, chu lo chun thil ṭhalo khun na tlûnah a hawng um sual lai," a ti. ¹⁵ Chun, chu minung chu a va kal le, Juda le sinah chun a damhtu chu Jisu asi ti a simh na. ¹⁶ Chun, Dinhni ah chubang thil tla chu a ti ruangah Juda tla nih Jisu an nehsawh rawh. ¹⁷ Sikhawmsele, Jisu nih annih chu a sawnh na le, an sinah, "Ka Pa nih tutiang khawm hen rian a ṭuan tâwn, kei khawm nih ka ṭuan tâwn," a ti. ¹⁸ Chuvachun, Juda tla nih thah ding an tum khun le, Dinhni a buar ruang cho khawm asi lo le, Pathian amah Pa ah a ruat le, Pathian tluk hen â siam ruang khawmah asi. ¹⁹ Chun, Jisu nih an sinah, "Thungâi tak hen ka nan simh na, Fapa nih amah ko hen zeikhawm a ti kho lo, Pa thilti a muh mi cho lo chu; thil a ti mi hâwi zawng chu, Fapa khawm nih a ti bâk tâwn. ²⁰ Pa nih Fapa a dâwt le, a thilti zawzawng a sinah a zauhtir tâwn; hi ngâk a thilti rokual dauh hi a sinah a zauhtir teh lai, chê nan ti dingah. ²¹ Pa nih mithi tla a thawh le, a nungtir tâwn hâwi hen, Fapa khawm nih a duh mi zawng a nungtir tâwn. ²² Pa nih âu lâi khawm a rêl piak lo, lâirêl zawzawng Fapa a rêltir dauh; ²³ mi zawzawng nih Pa an zah hâwi hen, Fapa khawm an zahnâk ding hen. Âuzawng Fapa zahlo chu, Pa a fialtu khawm zahlo asi. ²⁴ "Thungâi tak hen ka nan simh na, âuzawng ka thu theih hen, hawng ka fialtu lung nih chun zungzâl nungnâk a nei rawh, mawh hen a um lo le, thihnâk thawk hen a suak le, nungnâk ah a lût dauh asi. ²⁵ Thungâi tak hen ka nan simh na, a tik a tlung awt rawh, tu khawmah a tlung liau chir, chu tik ah chun mithi tla nih Pathian Fapa aw-hâu an theih lai le, a theihtu vial an nung lai. ²⁶ Pa nih amah lakah nungnâk a nei hâwi hen, Fapa khawm amah lakah nungnâk a neitir; ²⁷ chun, Minung Fapa asi ruangah a sinah lâirêl ding thuneihnâk a pêk. ²⁸ "Hi hi chê ti lah u, a tik a tlung awt rawh, chu tik ah chun thlân ah a um mi zawzawng nih a aw-hâu an theih lai le, an suak ver lai; ²⁹ thil ṭha titu tla chu nungnâk ting hen an thawknawlh lai le, thilsual titu tla chu mawhnâk ting hen an thawknawlh lai. ³⁰ "Keimah thu hen zeikhawm ka ti kho lo; Pa nih hawng ka simh hâwi vima hen lâi ka rêl tâwn, ka lâirêl chu dik tak asi, keimah thu thu hen um ka tum lo le, hawng ka fialtu duhzia hen um ka tum tâwn ruangah. ³¹ "Mah thâwngthâng theihtir sele, ka theihtirnâk a dik lai loh. ³² Ka thâwngthâng theihtirtu chu midang asi; anih nih chun ka thâwngthâng a theihtir mi chu a dik ti ka theih. ³³ Nannih nih Johan sinah mi nan fial le, chun, anih nih thudik a nan theihtir na kha. ³⁴ Theihtirnâk ka pawm mi chu, minung thu asi lo; sikhawmsele ruang nan suak khonâk ding hen hi thu hi ka sim asi. ³⁵ Chu Johan chu khâwnvâr alh tak leh chêu tak chu asi; a chêu ah chun a lâwm rih ding nan duh kha. ³⁶ Sikhawmsele, theihtirnâk ka nei mi hi Johan theihtirnâk ngâk khan a rokual dauh asi: Pa nih thilti dih ding hawng ka pêk mi, ka thilti tak nih hin Pa nih hawng ka fial ti ka thâwngthâng a theihtir asi. ³⁷ Pa hawng ka fialtu khawm nih chun ka thâwngthâng a theihtir rawh. Nannih nih zeiliau khawmah a aw-hâu nan theih dah lo, a mêl khawm nan muh dah lo. ³⁸ A thu khawm nan thinlung ah nan kil kumza lo, a fial mi hi nan lung lo ruangah. ³⁹ Pathian lasui thu nan rêl tâwn, a sung ah zungzâl nungnâk um hen nan ruat ruangah; chubang chu ka thâwngthâng theihtirtu asi. ⁴⁰ Sikhawmsele, nungnâk nei ding hen ka sinah nan hawng duh lo. ⁴¹ Minung chawnglawmhnâk ka lawmh lo; ⁴² nannih kan theih na, Pathian dâwtnâk nan thinlung ah nan nei lo. ⁴³ Ka Pa min hen ka hawng mi asi, nannih nih nan ka pawm lo; midang amah min hen hawng sele, anih chu nan pawm lai. ⁴⁴ Nannih chawnglawmh tawng lawmhtu tla, zeitin me nan lung kho lai? Pathian cho thawk hen a suak mi chawnglawmhnâk chu nan hâwl lo mi. ⁴⁵ Kei nih Pa sinah kan phiar na ding hen ruat lah u: an phiar natu chu pakhat a um, nan rinhsan Mosi hi. ⁴⁶ Mosi nan lung chun kei khawm nan hawng ka lung rawh ding asi; anih nih chun keimah thâwngthâng a rîn ruangah. ⁴⁷ Sikhawmsele, a thurîn chu nan lung lo chun, zeitin ka thu nan lung lai?" a ti.

¹ Chubang thil tla nûnah chun, Jisu chu Galili rilî, Tiberia rilî an ti mi, varâl leiah chun a kal rawh. ² Chun, damlo tla tlûnah singsiahnâk a ti mi tla chu an muh ruangah mi zapi tamtak nih amah an zûl. ³ Chun, Jisu chu tlâng ah a kâi le, chunah chun a ṭhiruai tla sinah a to. ⁴ Chun, Juda tla Kalkanh Kût chu a nâi rawh. ⁵ Chun, Jisu nih a chuanh le, mi zapi tamtak nih amah lei fûk hen a muh le, Philip sinah, "Hi bang tla ei ding sang a zei me kan châwk lai?" a ti. ⁶ Chubang thu chu Philip rangah niknâk ding hen a sim asi, a ti ding mi chu amah nih a theih ko dangâi ah. ⁷ Philip nih a sinah, "Mi kip nih tâwm seng anna ting ding khawm hen denari zanih man sang nih a tinh lai lo," a ti le, a sâng. ⁸ Chun, a ṭhiruai tla lakah pakhat, Simon Peter unau Andri nih chun a sinah, ⁹ "Barley sang tlang panga leh ngâ panih neitu mipa ngâksia pakhat hinah a um; sikhawmsele, minung chu tluk rak lakah, chu chu zeime a tlâk lai?" a ti. ¹⁰ Chun, Jisu nih, "Mi zapi tla chu totir na u," a ti. Chun, chu mun ah chun ramhthep tamtak a um. Chun, mipa tla chu an to le, an tam lei chu sângnga ding an si. ¹¹ Chun, Jisu nih sang tlang tla chu a lâk le, lâwmthu a sim thluh chun a to mi tla sinah a ṭhen le, chu hâwi ber hen ngâ tla khawm chu an duh rî hen a ṭhen. ¹² Chun, an khawp nûnah, a ṭhiruai tla sinah chun, "Zeikhawm tlâu lo ding hen a lei mi neknâwi tla rût u," a ti. ¹³ Chuvachun an rût le, barley sang tlang panga eitu tla ei bang neknâwi hen khobung leinih an khah. ¹⁴ Chun, mi zapi nih chun singsiahnâk chu an muh ka hen, "Hi minung hi, Khuavâng laikulh ah a hawng kal ding chu asi tatak mahi!" an ti. ¹⁵ Chun amah chu lal ah siam ding hen tleih râm tum hen an hawng kal awt ti Jisu nih a theih le, tlâng ah amah dei hen a dang hen a kal rawh. ¹⁶ Chun zânleibâi ah chun, a ṭhiruai tla chu rilî ah chun an va kal le; ¹⁷ lawng ah anna chuan le, rilî ah chun Kapernaum an fûk. Chun, khua a thim rawh le, Jisu tâ nih an sinah a hawng tleng lo rih. ¹⁸ thli chawp tak a râng ruangah tî tlingtlawk a sâng dadauh asi. ¹⁹ Chun, stade kul leh panga mawh sâwmthum mawh an vei rawh chun, Jisu chu rilî tlûnah kê hen a kal mi, lawng a hawng naih hen an muh le, an ṭih. ²⁰ Sikhawmsele, anih nih chun an sinah, "Keimah ka si, ṭih lah u," a ti. ²¹ Chun, lawng ah chun chuantir an duh rawh, chun, zeikarlo ah lawng nih chun an fûk mi tlâng chu a tleng chawlh rawh. ²² A thâituan ah chun rilî khat lei râl ah mi zapi dîr tla nih chun lawng pakhat lo chu lawng dang an muh lo le, Jisu chu a ṭhiruai tla sinah lawng ah chun â chuan bâk lo le, a ṭhiruai tla anmah dei hen an kal ti an theih. ²³ Sikhawmsele, Lalpa nih lâwmthu a sim nûnah sang an einâk mun kiang ah khan, Tiberia thawk hen lawnglêng tla a hawng tlung. ²⁴ Chun, mi zapi nih chun Jisu leh a ṭhiruai tla chu an um lo rawh ti an theih rawh chun, annih khawm lawnglêng lakah chun anna chuan le, Jisu hâwl hen Kapernaum ah an hawng tlung. ²⁵ Chun, rilî râl ah an tawng le, a sinah, "Sîntirtu, zeitik me hi leiah na hawng tleng?" an ti. ²⁶ Chun, Jisu nih an sinah, "Thungâi tak hen ka nan simh na, thilchê tla nan muh ruangah nan ka hâwl mi asi lo le, sang tlang nan ei le, nan khawp ruang dauh khan asi. ²⁷ Buh ral kho mi ruangah ṭuan lah u, zungzâl tiang hen nungnâk um kumza ding mi buh, Minung Fapa nih a nan pêk na ding mi ruang chun ṭuan u; Pa Pathian nih chun anih chu a birhtir rawh dangâiah," a ti le, a sâng. ²⁸ Chun, annih nih chun a sinah, "Pathian rian kan ṭuan khonâk ding hen zeime kan ti ding?" an ti. ²⁹ Chun, Jisu nih an sinah, "Pathian rianṭuan chu hi hi asi, a fial mi hi zumh ule," a ti le, a sâng. ³⁰ Chun, annih nih chun a sinah, "Singsiahnâk zeime na ti lai, kan muh hen kan nan lung khonâk ding hen? Zei thil me na ti lai? ³¹ Kan pu tla nih ramkaro ah manna kha an ei le, ’Vân thawk hen an sinah sang ei ding a pêk, ti rîn hâwi hen," an ti. ³² Chun, Jisu nih an sinah, "Thungâi tak hen ka nan simh na, vân thawk hen mi sang kha Mosi nih an pêk na mi asi lo, ka Pa lam nih chun vân thawk hen sang tak an pêk na asi hi. ³³ Pathian sang chu vân thawk hawng ṭum hen, laikulh sinah a nungnâk pêktu hi asi," a ti. ³⁴ Chun, annih nih chun a sinah, "Lalpa, chu sang chu zungzâl hen hawng kan pêk rawh," an ti. ³⁵ Chun, Jisu nih an sinah, "Kei hi nungnâk sang chu ka si, âuzawng ka sinah a hawng kal mi chu a sungvâng lai loh, âuzawng hawng ka zumhtu chu zeitik khawmah a tîhâl lai loh. ³⁶ Sikhawmsele, nannih nih nan ka muh khawmah nan ka lung lo ti ka nan simh na. ³⁷ Pa nih a ka pêk mi zawzawng ka sinah an hawng ver lai; âuzawng ka sinah hawng kal mi chu ka nar rîlmâl lai loh. ³⁸ Mah duhzia ti ding hen vân thawk hen hawng ṭum ka si lo le, hawng ka fialtu duhzia ti ding hen hawng ṭum ka si dauh. ³⁹ Hi hi hawng ka fialtu duhzia chu asi, anih nih a ka pêk mi zawzawng zeikhawm thlâu lo sele, ni dawngh ni ah chun thawh dauh na sele. ⁴⁰ Chun, hi hi ka Pa duhzia asi, âuzawng Fapa muh hen, zumhtu zawng nih zungzâl nungnâk nei sele; chun, kei nih ni dawnghnâk ah chun annih chu ka thawh na lai," a ti. ⁴¹ Chun, "Vân thawk hen sang hawng ṭum mi chu ka si," a ti ruangah Juda tla chu a tlûnah an chipchiar. ⁴² "Hi minung hi Josef fa Jisu asi lo ma? a nu leh a pa khawm kan theih. ’Vân thawk hen hawng ṭum ka si,’ zeitin a ti zia?" an ti. ⁴³ Chun, Jisu nih an sinah, "Chipchiar lemang lah u. ⁴⁴ Pa hawng ka fialtu nih a hîp lo chun âukhawm ka sinah a hawng kal kho lai loh, chun, kei nih ni dawnghnâk ah chun ka thawh lai. ⁴⁵ Khuavâng tla lasuibu ah, "Pathian sîntir hen an um ver lai," ti rîn asi. Mi kip Pa thu theih hen sîn mi vial chu ka sinah an hawng kal tâwn. ⁴⁶ Âukhawm nih Pa an muh lo, Pathian sinah hawng suak cho lo nih chun; anih nih chun Pa chu a muh. ⁴⁷ Thungâi tak hen ka nan simh na, âuzawng a lungtu nih chun zungzâl hen nungnâk a nei rawh asi. ⁴⁸ Kei hi nungnâk sang chu ka si. ⁴⁹ Nan pu tla nih ramkaro ah manna kha an ei narêng hen an thi. ⁵⁰ Hi hi vân thawk hen sang hawng ṭum mi chu asi, mi nih a ei hen, a thi lonâk ding hen. ⁵¹ Kei hi vân thawk hen sang nung hawng ṭum chu ka si, âuzawng nih hi sang hi a ei chun zungzâl hen a nung kumza lai; asi, laikulh nungnâk dingah ka pêk ding mi sang chu ka taksa hi asi, " a ti. ⁵² Chuvachun, Juda tla anna êl le, ’Hi minung nih hin zeitin me a taksa ei ding hen hawng kan pêk kho lai?" an ti. ⁵³ Chun, Jisu nih an sinah, "Thungâi tak hen ka nan simh na, Minung Fapa taksa nan ei hen, a thisen nan din lo chun, nanmah lakah nungnâk nan nei lo. ⁵⁴ Âuzawng ka taksa ei hen, ka thisen dintu nih chun zungzâl nungnâk a nei rawh. Chun, ni dawnghnâk ah annih chu ka thawh na lai. ⁵⁵ Ka taksa hi buh tak asi, ka thisen hi din ding tak asi. ⁵⁶ Âuzawng ka taksa ei hen ka thisen dintu chu, keimah lakah a um kumza tâwn, kei khawm amah lakah ka um kumza tâwn. ⁵⁷ Pa nung mi nih chun hawng ka fial le, Pa ruangah nung ka si hâwi hen, âuzawng hawng ka eitu chu keimah ruangah anih khawm a nung lai. ⁵⁸ Hi hi vân thawk hen sang hawng ṭum chu asi: pu tla nih sang chu an ei le, an thi hâwi kha asi lo, âuzawng hi sang eitu zawng chu zungzâl hen a nung kumza lai," a ti. ⁵⁹ Chubang thu chu, Kapernaum ah a sîntir na liau khan, pumhnâk in ah a sim. ⁶⁰ Chuvachun, a ṭhiruai tla zeimaw mi tamtak nih chu chu an theih le, "Hi hi thu har tak asi: âu nih a ngaihtawnh dân a thiam kho lai?" an ti. ⁶¹ Chuvachun, chu thu lakah chun a ṭhiruai tla an chipchiar ti Jisu nih a thinlung hen a theih le, an sinah, "Hi thu nih hin zei an khamtir na? ⁶² Minung Fapa hi a lânah a umnâk mun ah a kâi mi nan muh chun, zeitin si lai ne? ⁶³ Nungtirtu chu thlarau asi, taksa chu zeirang khawmah a tlâk lo; nan sinah thu ka sim mi tla hi thlarau asi, nungnâk khawm asi. ⁶⁴ Sikhawmsele, nan lakah zeimaw mi lunglo an um," a ti. Jisu nih a lunglotu tla leh a tleihtirtu ding chu a tîr thawk hen a theih ruangah. ⁶⁵ Chun, amah nih, "Chu ruangah asi, nan sinah, ’Pa nih a pêk mi cho lo chu, âukhawm ka sinah an hawng kal kho lai loh,’ ka ti mi kha," a ti. ⁶⁶ Chu nûnah chun amah zûltu tla lakah tamtak nih an kaltâk le; amah an kawmh nawlh lo rawh. ⁶⁷ Chuvachun, Jisu nih leinih tla sinah chun, "Nannih khawm kal ding nan duh bâk ma?" a ti. ⁶⁸ Chun, Simon Peter nih a sinah, "Lalpa, âu sinah me kan kal lai? Nangnih zungzâl nungnâk thu na nei asi. ⁶⁹ Nang Pathian Mi Thenhlimh chu na si ti kan lung hen kan theih rawh," a ti le, a sâng. ⁷⁰ Chun, Jisu nih an sinah, "Nannih leinih tla hi keimah thîm nan si lo ma? Nan lakah minung pakhat lam chu diabol asi," a ti. ⁷¹ Iskariot Simon fapa Juda, leinih tla lakah â tel bâk mi thu kha a sim asi, anih chu a tleihtirtu ding asi ruangah.

¹ Chu nûn chun, Jisu nih Galili ram a ṭawl le; Juda tla nih amah thah an tum ruangah Judai ram chu a ṭawl duh lo. ² Chun, Juda tla Basâ Kût chu a nâi rawh. ³ Chun, a unau tla nih a sinah, "Hi thawk hen Judai ram ah va kal rawh, an zûltu tla khawm nih na thilti hi an muh khonâk ding hen. ⁴ Âukhawm nih a thup hen thil an ti lo, mah min thang duh ko hen. Hi bang thil tla hi na ti asi chun, laikulh sinah a theihtir rawh," an ti. ⁵ A unau tla khawm nih an zumh lo. ⁶ Chun, Jisu nih an sinah, "Ka tik a tlung lo rih; nannih tik lam chu a tlung kumza asi. ⁷ Laikulh nih an hua kho na lo, kei lam chu a ka hua tâwn, a thilti tla a sual ti ka simhfiang ruangah. ⁸ Nannih kûtnâk ah va kal u, kei lam chu kûtnâk ah hin ka kal awt lo rih, ka tik a tlung lo rih ruangah," a ti. ⁹ Chun, chu thu chu an sinah a sim le, Galili ram ah a um ko rih. ¹⁰ Sikhawmsele, a unau tla chu kûtnâk ah an kal tâ nûnah chun anih khawm zatlâng theihlo hen, a thup hâwi hen a va kal bâk. ¹¹ Chun, Juda tla nih kûtnâk ah chun anih chu an hâwl le, "A zeime a um?" an ti. ¹² Chun, a thu mi zapi lakah mi nih anna chaih chur; a zeimaw mi nih, "Mi ṭha asi," an ti; midang nih, "Silo, mi zapi a perpet dauh asi," an ti. ¹³ Sikhawmsele, Juda tla an ṭih ruangah âukhawm nih a thu an phuang ngam lo. ¹⁴ Chun, kût lâikhing ah, Jisu Pathian Biakin ah a va kal le, a sîntir na. ¹⁵ Chun, Juda tla nih, "Hi minung nih hin a sîn lo hen zeitin lasui a thiam?" an ti le, thungâi chê an ti. ¹⁶ Chun, Jisu nih annih chu a sâng le, "Ka thu sîntir hi ka tâ asi lo le, hawng ka fialtu tâ asi dauh; ¹⁷ âuzawng amah duhzia ti duh nih chun, thu sîntir hi Pathian lakah mi ma si, keimah phuak sawm hen ka sim mi ma, a theih lai. ¹⁸ Âuzawng mah phuak sawm hen thusimtu chu, mah rokualnâk hâwltu asi; a fialtu rokualnâk hâwltu lam chu, chu chu mi dik tak asi, amah lakah chun diklonâk rerêng a um lo. ¹⁹ Mosi nih Dân chu an pêk na lo mazei? Sikhawmsele, nan lakah âukhawm nih Dân chu nan zâwt fâwn lo. Nannih nih zeirangah thah nan hawng ka tum?" a ti. ²⁰ Chun, mi zapi nih chun, "Khuri na nei asi; âu nih me thah ding a nan tum?" an ti le, an sâng. ²¹ Chun, Jisu nih a sâng le, an sinah, "Thil pakhat ka ti le, nan ektê hen chê nan ti. ²² Hi ruangah asi, Mosi nih fêmtan thu an pêk na le; (Mosi thawk hen mi asi lo, thlâktu tla thawk hen asi dauh) Dinhni khawmah mi fêm nan tan tâwn. ²³ Mosi Dân buar lo ding hen Dinhni khawmah mipa nih a fêm a tan tir chun, kei nih Dinhni ah mi ka damh ver ruangah ka tlûnah nan thinrun mu? ²⁴ Mitmâi zauh hen thu thlûk lah ule, rep tak hen thlûk dauh u," a ti. ²⁵ Chun, Jerusalem ah mi zeimaw mi nih, "Hi minung hi thah an tum mi kha asi lo ma? ²⁶ Zauhnik u, langngân hen thu a sim le, a sinah zeikhawm an sim lo. Amah hi Mesia asi ti lâirêltu tla nih an theih tatak menmaw? ²⁷ Hi minung hi, zei thawk hen a hawng mi me si ti kan theih asi, Mesia lam chu a hawng kal tikah âukhawm nih a zei thawk hen a hawng mi me si ti an theih lai loh," an ti. ²⁸ Churuang chun Jisu nih Pathian Biakin ah a sîntir na pah hen a âu le, "Nannih nih nan ka theih, zei thawk hen ka hawng kal ti nan theih. Sikhawmsele mah thu hen hawng ka si lo, hawng ka fialtu chu mi dik tak asi, anih chu nan theih lo. ²⁹ Kei lam nih chun anih chu ka theih; a sin thawk hen hawng ka si, amah nih hawng ka fial asi," a ti. ³⁰ Chuvachun, anih chu tleih an tum le, sikhawmsele a tik a tlung lo rih ruangah âukhawm nih a tlûnah kut an thlâk lo. ³¹ Mi zapi lakah tamtak lam nih chun anih chu an zumh le, "Mesia chu a hawng tikah hi minung ngâk hen tam dauh singsiahnâk a hawng ti lai mazei?" an ti. ³² Chun, Farisai tla nih a tlûnah mi zapi tla nih a thup hen anna chaihnâk thu tla chu an theih le; chun, bâwlpu lal tla leh Farisai tla nih tleih ding hen tleihtu tla an fial rawh. ³³ Chun, Jisu nih, "Sâwtlotê nan sinah ka um lai rih le, hawng ka fialtu sinah ka kal lai. ³⁴ Nannih nih nan hawng ka hâwl lai le, nan hawng ka tawng lai loh; ka umnâk ah nan hawng kho lai loh," a ti. ³⁵ Chun, Juda tla anna sâwn le, "Kan muh lo ding hen hi minung hi a zeime a kal awt? Greek tla sinah Juda ṭiau rekrâwi tla sinah kal hen Greek tla chu a sîntir na awt masi? ³⁶ ’Nannih nih nan ka hâwl lai le, nan ka tawng lai loh; ka umnâk khawmah nan hawng kal kho lai loh, a ti mi hi, zei a tinâk me asi?" an ti. ³⁷ Chun, Kût ṭiak awt ni, ni rokual takah chun, Jisu a dîr le, a âu le, "Âuzawng a tîhâl mi chu ka sinah hawng kal sele din seh. ³⁸ Âuzawng hawng ka zumhtu chu Pathian lasui thu sim hâwi hen tî nung va tla amah thawk hen a hawng luang lai," a ti. ³⁹ Chu thu chu a zumhtu tla nih Thlarau an nei ding thu a sim asi; Thlarau chu pêk asi lo rih, Jisu chu chawnglawmh hen a um lo rih ruangah. ⁴⁰ Chun, mi zapi tla lakah a zeimaw mi nih chubang thu chu an theih le, "Hi minung hi khuavâng chu asi tatak ko!" an ti. ⁴¹ Midang tla nih, "Anih chu Mesia chu asi hi!" an ti. Zeimaw mi lam nih chun, "Zeitin Mesia chu Galili ram thawk hen a hawng suak lai? ⁴² Mesia chu David thlâk lakah, David umnâk khua Bethlehem ah a suak ding asi ti Pathian lasui thu nih a sim lo mazei?" an ti. ⁴³ Chuvachun, amah ruangah mi zapi lakah ṭhennâk a hawng um rawh. ⁴⁴ Zeimaw mi nih chun tleih an duh le, sikhawmsele âukhawm nih kut an thlâk lo. ⁴⁵ Chun, vêngtu tla chu bâwlpu tla leh Farisai tla sinah an hawng chun, annih nih chun an sinah "Zeirangah nan hawngpi lo?" an ti. ⁴⁶ Vêngtu tla nih chun, "Khi bang hâwi hen mi nih thu an sim dah lo," an ti le, an sâng. ⁴⁷ Chun, Farisai tla nih chun an sinah, "Nannih khawm hum hen nan um bâk rawh mu? ⁴⁸ Lâirêltu tla leh Farisai tla lakah mi rerêng amah zumhtu an um mazei? ⁴⁹ Hi bang Dân theihlo mi zapi tla hi siat phurhtu an si," an ti le, an sâng. ⁵⁰ Nikodem, a lânah Jisu sinah a hawng mi kha, an lakah tel bâk asi le, an sinah, ⁵¹ "Amah thawk ngelchel hen a thu theih leh a thilti theih lânah kan dân nih mi mawh a phurhtir tâwn mazei?" a ti. ⁵² Annih nih chun a sinah, "Nang khawm Galili mi na maw na si bâk? Hâwl le, Galili ram ah chun khuavâng âukhawm suak ding an um lo ti theih ko me," an ti le, an sâng.

¹ [Chun, mikip mah in chiau ah an kal rawh. Jisu lam chu Oliv tlâng ah a kal rawh. ² Chun, zîng ah Pathian Biakin ah a lût nawlh le, mi zawzawng a sinah an hawng kal le, chun, anih chu a to le, anmah tla a sîntir na. ³ Chun, Dân sîntirtu tla leh Farisai tla nih nunau pakhat ṭângdang a pawmtâk liau chir ah an tleih mi an hawngpi le, chun a lâi ah an dîrtir le ⁴ a sinah, "Sîntirtu, hi nunau hi ṭângdang a pawm liau takah an tleih asi. ⁵ Dân ah Mosi nih hi hâwi hi lung hen thi thlo seh ding thu hawng kan pêk le, nangnih zeitin hi thu hi na ngaih?" an ti. ⁶ Chu thu chu amah niknâk ding hen an ti le, a phiarnâk ding an tawng khonâk ding hen. Chuvachun, Jisu a kûn le, a kutdawng hen tual ah a rîn. ⁷ Chun, an deih seset ruangah anih chu a thawk le, an sinah, "Nan lakah sual neilo mi zawng nih amah chu lung hen seh masa seh," a ti. ⁸ Chun, a kûn nawlh le, a kutdawng hen tual ah a rîn nawlh. ⁹ Chun, annih nih chun a thusim chu an theih hen, upachem nih a dawmh le, a dawngh tiang hen, pakhat khat hen anna relh hep le; chun Jisu cho a um rawh, nunau a lâi ah a umnâk mun ah a um mi hen khan. ¹⁰ Chun, Jisu a thawk le, a sinah, "Nunau, zeiah me an um rawh? Âukhawm nih an mawhtir lo mu?" a ti. ¹¹ Chun, anih nih chun, "Lalpa, âukhawm nih an hawng ka mawhtir lo," a ti. Chun, Jisu nih a sinah, "Kei khawm nih ka nan mawhtir lo; kal le, tu thawk hen sual lah rawh," a ti.] ¹² Chun, Jisu nih an sinah thu a sim nawlh le, "Kei laikulh chêu ka si; âuzawng hawng ka zûltu chu mûi ah a kal lai lo, nungnâk chêu a nei dauh lai," a ti. ¹³ Chuvachun, Farisai tla nih a sinah, "Mah nâ theihtir mi na si; na theihtirnâk a dik lo," an ti. ¹⁴ Jisu nih an sinah, "Mah thu theihtir khawmsele, ka thu theihtir a dik asi; kei nih ka hawng suaknâk leh ka kalnâk lei ding khawm ka theih; nannih lam nih chun ka hawng suaknâk leh ka kalnâk ding lei khawm nan theih lo. ¹⁵ Nannih nih minung ngaihdân hâwi hen lâi nan rêl tâwn; kei lam nih chun âukhawm an lâi ka rêl lo. ¹⁶ Lâirêl khawmsele ka lâirêlnâk a dik; keimah lâwng ka si lo le, kei leh Pa hawng ka fialtu kan si dauh ruangah. ¹⁷ Asi, nan Dân ah, ’Mi panih theihpinâk a dik,’ ti rîn asi ko khateh. ¹⁸ Kei hi mah thu theihtirtu ka si, Pa hawng ka fialtu nih chun ka thu a theihtir asi," a ti le, a sâng. ¹⁹ Chun, annih nih chun a sinah, "Na pa zeiah a um?" an ti. Jisu nih, "Nannih nih kei nan hawng ka theih lo, ka Pa khawm nan theih lo; kei nan hawng ka theih chun, ka Pa khawm nan theih lai," ti hen a sâng. ²⁰ Chubang thu chu Pathian Biakin ah a sîntir na liauah, thawhlâwm siahnâk mun ah a sim le; âukhawm nih amah an tleih lo, a tik a tlung lo rih ruangah; ²¹ Chun, anih nih chun an sinah, "Ka kal ving awt, nannih nih nan ka hâwl lai le, nan sual mawhnâk lakah nan thi lai; ka kalnâk dingah nan hawng kal kho lai loh," a ti nawlh. ²² Chun, Juda tla nih, "Ka kalnâk dingah nan hawng kal kho lai loh, a ti mi hi, â thah awt masi?" an ti. ²³ Chun, anih nih chun an sinah, "Nannih tanglei thawk hen suak nan si; kei lam chu tlûnlei thawk hen suak ka si; nannih laikulh a suak nan si; kei lam chu hi laikulh a suak ka si lo. ²⁴ Churuangah, nan sinah, ’Nan sual mawhnâk lakah nan thi lai,’ ka ti mi kha; anih chu ka si ti nan lung lo chun, nan sual mawhnâk lakah nan thi lai," a ti. ²⁵ Chun, annih nih chun a sinah, "Âu me na si?" an ti. Jisu nih an sinah, "A tîr thawk hen nan sinah ka sim tâwn kha. ²⁶ Nannih thu lakah hin thil tamtak sim le ruat ding ka nei; zeikhawm si sele, hawng ka fialtu chu mi dik tak asi; a sinah thu ka theih mi vial laikulh sinah ka simh," a ti. ²⁷ Pa thu an sinah a sim ti an theih lo. ²⁸ Chuvachun, Jisu nih, "Nannih nih Minung Fapa hi nan thlâi tikah, anih chu ka si ti leh kei nih mah thu hen zei thil khawm ka ti lo, Pa nih hawng ka simh hâwi vima hen hi bang thu hi ka sim dauh asi ti nan theih teh lai. ²⁹ Hawng ka fialtu chu ka sinah a um le, hawng ka thlahthlamh lo; a lawmh kâng thil ka ti kumza ruangah," a ti. ³⁰ Chubang thu chu a sim liauah mi tamtak nih amah chu an zumh rawh. ³¹ Chun, Jisu nih a lungtu Juda tla sinah chun, "Ka thu nan zâwt kumza chun ka ṭhiruai tla nan si tatak lai; ³² chun thutak nan theih lai le, thutak nih chun sal an suah na lai," a ti. ³³ Chun, annih nih chun a sinah, "Abraham thlâk tla kan si, âu sal khawmah kan um dahlo rih; Sal an suah na lai,’ zeitin zia na ti mi mesi?" an ti le an sâng. ³⁴ Jisu nih an sinah, "Thungâi tak hen ka nan simh na, âuzawng thilsual titu vial sual sal asi. ³⁵ Sal chu zungzâl hen in ah a um kumza lo; fapa lam chu zungzâl hen a um kumza tâwn. ³⁶ Chuvachun, Fapa nih sal a nan suah na chun, nan suak tatak lai. ³⁷ Abraham thlâk tla nan si ti ka theih; si khawm ule, thah nan ka tum, ka thu nih nan thinlung ah mun a nei lo ruangah. ³⁸ Kei nih ka Pa sinah thil ka muh mi chu ka sim tâwn; nannih khawm nih nan pa sinah thil nan theih mi chu nan ti tâwn," a ti. ³⁹ Chun, annih nih chun a sinah "Kan pa Abraham asi," an ti le, an sâng. Chun, Jisu nih an sinah, "Abraham fa le nan si chun, Abraham thilti kha nan ti ding asi. ⁴⁰ Sikhawmsele, tuah thah nan ka tum. Pathian sinah thutak ka theih mi, an simh natu ka si; Abraham nih chun hi hâwi hen a ti lo. ⁴¹ Nannih nih nan pa thilti chu nan ti tâwn, a ti. Chun, annih nih chun a sinah "Lakfâ tla kan silo, Pa pakhat chi kan nei, Pathian chu," an ti. ⁴² Jisu nih an sinah, "Pathian nan pa asi chun, nan hawng ka dâwt lai; Pathian sinah suak le, amah sin thawk hen hawng kal ka si; keimah thu hen hawng kal ka si lo, amah fial mi ka si dauh. ⁴³ Zeirangah ka hawlh umzia nan theihthiam lo? Ka thusim nan ngâi set lo ruangah asi. ⁴⁴ Nannih chu nan pa diabol sin thawk hen suak nan si le, nan pa duhzia ti nan duh. Anih chu a tîr thawk hen mi thahtu asi, thutak ah a um lo, a sung ah thutak a um lo ruangah. Âwkrâwl thu a sim chun amah lakah mi a sim tâwn; mi âwkrâwl asi, âwkrâwlpa khawm asi. ⁴⁵ Thutak ka sim ruangah nannih nih nan hawng ka lung lo asi. ⁴⁶ Nan lakah sual leikângah mawh nan hawng ka phurhtir khotu âu a um? Thutak ka sim khawmah nannih nih zeirang nan hawng ka lung lo? ⁴⁷ Pathian sinah thawk hen suak nih chun Pathian thu a ngâi tâwn; hi ruang hin nan ngâi lo asi, Pathian sin thawk hen suak nan silo ruangah," a ti. ⁴⁸ Chun, Juda tla nih chun a sinah, "Samari mi khuri nei na si kan ti mi kha, kan dik ngen lo ma?" an ti le, an sâng. ⁴⁹ Jisu nih, "Khuri nei ka si lo; ka Pa ka chawnglawmh asi dauh, nannih nih chun nan hawng ka chawnglawmh lo. ⁵⁰ Sikhawmsele, mah rokualnâk hâwl ka si lo; a hâwltu leh a lâirêltu mi pakhat a um. ⁵¹ Thungâi tak hen ka nan simh na, mi nih ka thu a zâwt chun, a thi rerêng lai loh," a ti. ⁵² Juda tla nih a sinah, "Khuri nei na si ti tuah kan nan theih rawh. Abraham a thi rawh, khuavâng tla hen, nangnih, ’Mi nih ka thu a zâwt chun a thi rerêng lai loh,’ na ti. ⁵³ Kan thlâktu Abraham ngâk hen na rokual dauh mazei? Anih khawm a thi rawh, khuavâng tla khawm an thi rawh; âu ah me na rêl?" an ti. ⁵⁴ Jisu nih, ’Mah a chawnglawmh sele ka rokualnâk zeikhawm asi lai lo; ’Kan Pathian’ nan ti mi ka Pa chu, hawng ka chawnglawmhtu asi; ⁵⁵ nan nih nih amah nan theih lo; kei lam nih chun amah ka theih; Amah ka theih lo, ti sele, nanmah hâwi hen mi âwkrâwl ka si lai; sikhawmsele, amah ka theih le, a thu khawm ka zâwt tâwn. ⁵⁶ Nan thlâktu Abraham kha, ka ni muh ding asi ruangah thungâi â lâwm tâwn; chun a muh le, â lâwm," a ti le, a sâng. ⁵⁷ Chun, Juda tla nih chun a sinah, "Nang kum sâwmnga khawm tling lo rih hen, Abraham na muh mazei?" an ti. ⁵⁸ Jisu nih an sinah, "Thungâi tak hen ka nan simh na, Abraham suak lânah mi ka si rawh," a ti. ⁵⁹ Chuvachun, a sehnâk lung an sar le, sikhawmsele Jisu â thup le, Pathian Biakin ah mi chu a suak rawh.

¹ Chun, Jisu nih a kal pah hen a suak tîr thawk hen mi mitchâw pakhat a muh. ² Chun, a ṭhiruai tla nih a sinah, "Sîntirtu, mitchâw chia hen a suak mi hi âu nih me thil sual a ti, hi nih hin ma, a nu leh a pa nih?" an ti le, an deih. ³ Jisu nih, "Hi minung khawm nih a sual lo, a nu leh a pa khawm nih an sual lo; Pathian rianṭuan a tlûnah a langhnâk ding hen asi dauh. ⁴ Sûn asi liauah hawng ka fialtu rian ka ṭuan ding asi; zân asi awt rawh hi, chu tikah chun âukhawm nih rian an ṭuan kho lai loh. ⁵ Laikulh ka um karah laikulh chêu ka si," a ti le, a sâng. ⁶ Chu hâwi hen a sim thluh rawh chun, tual ah chil a sâk le, chil hen chun nêng a tuah le, chun, nêng chu a mit ah a buah le, ⁷ chun a sinah, "Siloam zur ah va ṭâwl rawh," a ti. (Siloam chu Fial tinâk asi.) Chun, a va kal le; a ṭâwl le, mit dei hen a hawng nawlh rawh. ⁸ Chuvachun, a zâwlbâwm tla leh a lânah a kut dawnh muh tâwntu tla nih, ’Hi minung hi to bû hen kut dawnh tâwn kha asi lo ma?" an ti. ⁹ Midang nih, "Amah kha asi," an ti. Midang nih, "Asi lo, amah banghtu dauh asi," an ti. Anih nih chun, "Kha kha ka si," a ti. ¹⁰ Chun, annih nih chun a sinah, "Na mit zeitin a hawng dei le?" an ti. ¹¹ Anih nih chun, "Jisu an ti mi nih khan nêng a siam le, ka mit ah a buah le, Siloam zur ah va kal le, ṭâwl rawh,’ hawng ka ti rawh asi," a ti. ¹² Chun, annih nih chun a sinah, "Anih chu zeiah a um?" an ti. "Ka theih lo," a ti. ¹³ Chu lânah mitchâw chu Farisai tla sinah an kalpi. ¹⁴ Chun, Jisu nih nêng a siam le, a mit a deitir ni kha Dinhni asi. ¹⁵ Chun, Farisai tla nih a mit a hawng deinâk a muh zia dân an deih nawlh. Anih nih chun an sinah, "Ka mit ah nêng a siah le, ka ṭâwl le, ka muh kho asi," a ti. ¹⁶ Chun, Farisai tla zeimaw mi nih, "Chu minung chu Dinhni a khunhriah lo ruangah, Pathian sinah thawk hen suak asi lai loh," an ti. Zeimaw mi lam nih chun, "Misual nih hi hâwi thilchê zeitin a ti kho lai?" an ti. Chun, anmah lakah ṭhennâk a hawng um rawh. ¹⁷ Chun, mitchâw sinah chun, "Na mit a deitir mi kha amah chu zeitin na ngaih?" an ti nawlh. Chun, anih nih chun, "Khuavâng asi, a ti. ¹⁸ Sikhawmsele, Juda tla nih mit deinâk tawngtu nu leh pa chu an kawh na lânlo chu, mitchâw asi, mit deinâk a tawng ti, a thu chu an lung lo. ¹⁹ Chun, a nu leh a pa sinah, "Hi minung hi, nan fapa mitchâw chia hen a suak nan ti mi kha masi?Zeitin tuah a muh kho zia?" ti hen, an deih. ²⁰ A nu leh a pa nih chun, "Hi hi kan fapa asi ti kan theih, mitchâw chia hen a suak ti khawm kan theih; ²¹ sikhawmsele, zeitin tuhin a hawng muh kho rawh zia hi kan theih loh, a mit deitirtu khawm kan theih loh, amah deih u; a upa bâk rawh asi, amah thu chu amah nih a sim lai!" an ti le, an sâng. ²² Juda le an ṭih ruangah a nu leh a pa nih chun, chubang thu chu an sim asi. Juda tla nih chun âuzawng nih, "Anih chu Mesia asi," ti hen ṭanhtu chu pumhnâk in ah mi nar asi lai ti hen rem an ti chia khap asi. ²³ Churuangah asi, a nu leh a pa nih chun, "A upa bâk rawh mi chu amah deih u," an tinâk chu. ²⁴ Chun, mitchâw chu an kawh nawlh le, a sinah, "Pathian sawr rawh, kha minung lam kha chu misual asi ti kan theih," an ti. ²⁵ Chun, anih nih chun, "Misual asi le silo ka theih lo, thil pakhat ka theih, a lân khan ka mit a châw le, tuah ka muh kho hi," a ti le, a sâng. ²⁶ Chun, annih nih chun a sinah, "Na tlûnah zeitin a ti? Na mit zeitin a deitir?" an ti. ²⁷ Chun, anih nih chun an sinah, "Masa khan kan simh na le, nan ngâi lo; zeirangah theih nan duh nawlh zia? Nannih khawm a ṭhiruai tla si bâk nan duh mu?" ti hen a sâng. ²⁸ Chun, annih nih chun an fâi le, "Nang hi amah ṭhiruai na si le, kannih lam chu Mosi ṭhiruai tla kan si. ²⁹ Pathian nih Mosi a sawnh ti kan theih, hi minung lam hi chu zei thawk hen hawng suak me asi ti kan theih loh," an ti. ³⁰ Chun, chu nih chun an sinah, "Chu tak chu asi a chênâk chu, a zei thawk hen me suak asi ti nan theih lo, sikhawmsele ka mit a deitir asi. ³¹ Pathian nih misual thu a ngâi tâwn lo ti kan theih; sikhawmsele, âuzawng nih Pathian sawnhtu asi hen, a duhzia thil a ti chun, anih chu Pathian nih a ngâi piak tâwn. ³² Laikulh um tîr thawk hen âukhawm nih mitchâw chia hen a suak mi mit an deitir nawlh ti theih asi dah lo. ³³ Hi minung hi Pathian thawk hen suak asi lo chun zeikhawm a ti kho lai loh," a ti le, a sâng. ³⁴ Chun, annih nih chun a sinah, "Nang sual lumpi hen suak na si, nangnih na hawng kan simh bâk mu?" an ti le, an sâng. Chun, anih chu an nar rawh. ³⁵ Chun, an nar ti Jisu nih a theih le; chun, anna tawng rawh chun, "Minung Fapa na zumh ma?" a ti. ³⁶ Chun, anih nih chun, "Pu, anih chu âu me asi, ka zumh khonâk ding hen?" a ti le, a sâng. ³⁷ Jisu nih a sinah, "Anih chu na muh rawh asi, an sawnh liau chirtu hi asi, a ti. ³⁸ Chun, anih nih chun, "Lalpa, ka lung," a ti le, a mâimûk. ³⁹ Chun, Jisu nih, "Lâirêl ding hen hi laikulh ah hin hawng kal ka si, mitchâw tla an mit a deinâk ding leh mitdei tla chu an mit a châw khonâk ding hen," a ti. ⁴⁰ Chun, a sinah Farisai um mi tla nih chun chubang thu chu an theih le, a sinah, "Kannih khawm hi mitchâw kan si bak bei ne?" an ti. ⁴¹ Chun, Jisu nih an sinah, "Mitchâw si u le chu sual nan neilo ding mi; sikhawmsele kan muh kho,’ tuah na ti dangâiah, churuang chun nan sual a um kumza asi," a ti.

¹ Thungâi tak hen ka nan simh na, "Âuzawng dawrâ kulh kawtkâ ah lût lo hen, a dang lei hen kâi mi chu, chu minung chu fîrmang leh rawkmang asi. ² Âuzawng kawtkâ ah lût lam chu, dawrâ vêngtu asi. ³ Kawtkâ vêngtu nih anih chu a awng piak tâwn; dawrâ tla nih a aw an theih tâwn le; amah dawrâ tla chu an min hen a kawh chiau na le, a suakpi na tâwn. ⁴ A tâ zawzawng a suaktir na chun, an mâi leiah a kal le, dawrâ tla nih chun amah an zûl tâwn le, a aw an theih ruangah. ⁵ Midang an zûl lai lo le, an tek khalh dauh lai; midang tla aw chu an theih lo ruangah," a ti. ⁶ Chu tahṭhimh thu chu Jisu nih an sinah a sim le; sikhawmsele, zei thu me an sinah a sim ti an theihtiam lo. ⁷ Chun, Jisu nih an sinah a sim nawlh le, "Thungâi tak hen ka nan simh na, kei hi dawrâ kawtkâ chu ka si. ⁸ Ka lânah hawng kal zawzawng tla kha fîrmang leh rawkmang tla an si; sikhawmsele dawrâ tla nih chun an thu an ngâi lo. ⁹ Kei kawtkâ chu ka si; âuzawng keimah lakah a lût mi chu ruangsuah hen a um lai le, a lût hen a suak lai, ei ding a tawng lai. ¹⁰ Fîrmang chu fîr ding leh thah ding leh rawk ding lo chun a hawng kal lo; kei lam chu nungnâk an nei khonâk ding hen, tamtak an nei khonâk ding hen, hawng kal ka si. ¹¹ "Kei dawrâ vêngtu ṭha ka si: dawrâ vêngtu ṭha nih dawrâ tla rangah a nungnâk a pêk tâwn. ¹² Lawh kal mi, dawrâ vêngtu tak silo hen dawrâ tla a tâ silo mi nih chun chingngia a hawng kal mi a muh chun dawrâ tla a tektâk tâwn; chun chingngia nih chun a seh na le, a rektir phin na tâwn; ¹³ lawh a kal mi asi le, dawrâ tla a thlû-nâ lo ruangah a tektâk tâwn asi. ¹⁴ Kei lam chu dawrâ vêngtu ṭha ka si; Pa nih a ka theih mi leh kei nih Pa ka theih hâwi hen ka tâ ka theih le; ka tâ khawn nih an ka theih asi; ¹⁵ chun, dawrâ tla rangah chun ka nungnâk ka pêk. ¹⁶ Chun, hi dawrâ kulh ah mi lo hi dawrâ dang ka nei; annih khawm ka hawngpi na ding asi, ka aw an ngâ lai; chuvachun rual khat hen an um lai le, vêngtu pakhat hen. ¹⁷ "Hi hi ruangah hin Pa nih hawng ka dâwt asi; lâk nawlh ding hen ka nungnâk ka pêk awt ruangah hin. ¹⁸ Âukhawm nih ka sinah mi an lâk kho lai loh, keimah thu thu hen ka pêk awt asi. Pêk kho ka si, lâk nawlh kho khawm ka si. Hi thupêk hi ka Pa thawk hen ka tawng asi," a ti. ¹⁹ Chubang thu ruang chun Juda tla lakah ṭhennâk a hawng um nawlh. ²⁰ An lakah cherkhet nih, "Khuri a nei le, a â asi hi; zeirangah a thu nan ngâi?" an ti. ²¹ A zeimaw mi nih, "Hi bang thu hi khuri nei thusim asi lo; khuri nih mitchâw mit a deitir kho mazei?" an ti. ²² Chun, Jerusalem ah Biakin Apnâk Kût liau asi; chu chu busik liau asi. ²³ Chun, Jisu chu Pathian Biakin ah, Solomon sârbuk ah â vel. ²⁴ Chun, Juda tla a kiangah an hawng kal le, a sinah, "Zei tiang me laklawh hen na hawng kan tuah awt? Mesia na si chun, fiang tak hen hawng kan simh rawh," an ti. ²⁵ Jisu nih an sinah, "Ka nan simh na rawh kha, nan lung lo; ka Pa min hen thil ka ti mi hi, hi nih hin ka thâwngthâng a theihtir asi. ²⁶ Sikhawmsele, nan lung lo, ka dawrâ lakah mi nan silo ruangah. ²⁷ Ka dawrâ tla nih ka aw an theih tâwn, kei khawm nih annih chu ka theih na le, annih nih chun an hawng ka zûl tâwn; ²⁸ an sinah zungzâl nungnâk ka pêk tâwn; an vei rîlmâl lai lo le; âukhawm nih ka thiltikhonâk ah mi an hawng ka suh lai loh. ²⁹ Annih hawng ka pêktu ka Pa chu, mi zawzawng ngâk hen a rokual chem asi: âukhawm nih Pa thiltikhonâk ah mi chu an suh kho lai loh. ³⁰ Kei leh Pa chu pumkhat kan si," ti hen a sâng. ³¹ Chun, Juda tla nih chun a sehnâk ding hen lung an sar nawlh. ³² Jisu nih annih tla chu a sawnh na le, "Pa sinah suak rianṭuan ṭha cherkhet ka nan zauhtir na le, kha bang rianṭuan tla lak khan a zeiruang khan me lung hen nan hawng ka seh awt?" a ti. ³³ Juda tla nih chun a sinah, "Rian ṭha ruangah lung hen kan seh awt lo; Pathian na sâwi ruangah leh nang minung si ko hen Pathian ah na siam ruang hin asi dauh!" ti hen, an sâng. ³⁴ Jisu nih an sinah, "Nan Dân ah Pathian nih, ’Pathian tla nan si,’ ti rîn asi lo ma? ³⁵ Pathian lasui thu nih a sim mi chu zungzâl rangah a dik asi ti kan theih; chun Pathian thupêk hen an um mi tla chu Pathian nih pathian tla a ti na. ³⁶ Kei rangah chun, Pa nih a hawng ka thîm le, chun laikulh ah a hawng ka fial. Churuangah zeitin zia hen, ’Pathian Fapa ka si,’ ka ti ruangah, Pathian na simsiat, nan ti kho zia? ³⁷ Ka Pa rianṭuan ka silo chun, hawng ka lung lah u. ³⁸ Sikhawmsele, ṭuan ka si chun, kei hawng ka lunglo khawm ule, rianṭuan tla hi lung u; Pa keimah lakah a um ti leh kei Pa lakah ka um ti nan theih hen leh nan theihthiam khonâk ding hen," a ti le, a sâng. ³⁹ Chun, anih chu tleih an tum nawlh le, sikhawmsele, an kut lakah mi a suak rawh. ⁴⁰ Jordan varâl ah, Johan nih a tîr ah a baptisnâk mun ah khan a kal ving nawlh le, chunah chun a um ko. ⁴¹ Chun, mi cherkhet a sinah an hawng kal le, "Johan nih thilchê zeikhawm chu a ti lo le; sikhawmsele Johan nih hi minung thu a sim mi zawzawng kha a dik ma hi," an ti. ⁴² Chunah chun mi cherkhet nih amah an zumh rawh.

¹ Chun, mi pakhat, a min Lazar; Mari leh a unau nu Marthi umnâk khua Bethani ah mi damlo a um. ² Mari sariak rimthâw, Lalpa chulh hen, a sam hen a kê nâwttu, kha ṭapa Lazar kha asi, a damlo mi chu. ³ Chun, a farnu le nih Jisu sinah, "Lalpa, ngâinik, na dâwt mi kha a damlo," ti hen, mi an fial. ⁴ Chun, Jisu nih chu chu a theih le, "Hi damlonâk hi thihnâk ding asi lo, Pathian rokualnâk ding asi dauh, Pathian Fapa chu hi ruang hin chawnglawmh asi khonâk ding hen," a ti. ⁵ Chun, Jisu nih Marthi leh a unau nu leh Lazar a dâwt. ⁶ Churuangah a damlo ti a theih chun, a umnâk mun ah ni nih a um rih. ⁷ Chun, chu nûnah chun a ṭhiruai tla sinah, "Judai ram ah kan kal nawlh lai," a ti. ⁸ Chun, ṭhiruai tla nih chun a sinah, "Sîntirtu, mazannâi ko khan Juda tla nih lung hen seh an tum mi kha; chunah chun na kal nawlh awt mazei?" an ti. ⁹ Chun, Jisu nih, "Sûn ah dâr leinih a um lo mazei? Mi sûn ah a kal chun, â suih dah lo, hi laikulh chêu hi a muh ruangah. ¹⁰ Sikhawmsele, mi zân ah a kal chun â suih tâwn, amah lakah chêu a umlo ruangah," a ti le, a sâng. ¹¹ Chubang thu chu a sim le; chun, chu nûnah chun an sinah, "Kan hâwi Lazar chu a it rawh; a it mi va ṭhangh ding hen ka kal awt asi," a ti. ¹² Chun, ṭhiruai tla nih chun a sinah, "Lalpa, a it rawh chun a dam nawlh lai bei a," an ti. ¹³ Jisu nih a thih thu a sim asi, sikhawmsele annih nih chun a taksa it mi thu a sim mi mawh an ti. ¹⁴ Chuvachun, Jisu nih fiang tak hen an sinah a sim le, "Lazar a thi asi. ¹⁵ Chun ah ka umlo mi chu nanmah rangah kan lawmh piak na asi, nan lung khonâk ding hen; sikhawmsele, a sinah kan kal lai," a ti. ¹⁶ Chun, Thom, (Phîr an ti mi) nih chun, a ṭhiruai hâwi tla sinah, "A thihnâk ah thi bâk ding hen kan kal lai," a ti. ¹⁷ Chun, Jisu a va tleng liauah, ni li thlân ah a um rawh ti a theih. ¹⁸ Bethani chu Jerusalem kiang asi, stade nih tluk ding a lât asi; ¹⁹ chun, an ṭapa thih ruangah lungngamh ding hen Juda tla cherkhet Marthi leh Mari sinah an hawng kal. ²⁰ Chun, Marthi nih chun Jisu a hawng kal awt ti a theih kâ hen a va dawng; Mari lam chu in ah a to ko. ²¹ Chun, Marthi nih chun Jisu sinah, "Lalpa, hinah um le chu ka ṭapa a thi lo ding mi. ²² Tu khawmah Pathian sinah na deih mi zawng chu Pathian nih a nan pêk lai ti ka theih," a ti. ²³ Jisu nih a sinah, "Na ṭapa a thawknawlh lai," a ti. ²⁴ Marthi nih chun a sinah, "Ni dawngh ni ah, thawknawlhnâk ah chun a thawknawlh lai ti ka theih," a ti. ²⁵ Jisu nih a sinah, "Kei hi thawknawlhnâk leh nungnâk chu ka si, âuzawng hawng ka zumhtu chu thi khawmsele a nung kumza lai; ²⁶ a nung mi zawng nih hawng ka zumhtu chu an thi rîlmâl lai loh; chu thu chu na lung ma?" a ti. ²⁷ Anih nih chun a sinah, "Lung ta a, Lalpa; Mesia, Pathian Fapa, laikulh ah a hawng kal ding mi chu na si ti ka lung," a ti. ²⁸ Chun, chu thu chu a sim thluh kâ hen a kal le, a unau nu Mari chu a thup hen a kawh le, "Sîntirtu hinah a um le, a nan kawh," a ti. ²⁹ Chun, anih nih chun, chu chu a theih kâ hen mawhsareh hen a thawk le, a sinah a va kal. ³⁰ (Jisu chu khua ah a lût lo rih, Marthi nih a dawng liauah a umnâk mun ah a um ko rih.) ³¹ Chun, in sungah a thlangamhtu Juda tla nih chun Mari mawhsareh hen a thawk le, a suak mi an muh kâ hen, thlân ah ṭap ding hen a kal awt bei an ti le, an zûl. ³² Chun, Mari chu Jisu umnâk chu a va tleng le, a muh kâ hen a kê bul ah a bawkbukhup le, a sinah, "Lalpa, hinah um le chu, ka ṭapa a thi lo ding mi, a ti. ³³ Chun, Jisu nih Mari ṭap leh a hawng zûltu Juda tla ṭap chu a muh le, a thinlung hen a rûm le, a lawksawng le, ³⁴ "Anih chu zeiah nan vûi?" a ti. Annih nih chun a sinah, "Lalpa, hawng kal le, zauhnik," an ti. ³⁵ Jisu a ṭap rawh. ³⁶ Chun, Juda tla nih chun, "Zauhnik u, Lazar hi a dâwt chiam me!" an ti. ³⁷ Sikhawmsele, zeimaw mi nih chun, "Hi minung, mitchâw mit deitirtu nih hin, hi minung khawm hi a thi lo tir kho lo ma?" an ti. ³⁸ Chun, Jisu chu a thinlung hen a rûm nawlh le; thlân chu a va tleng rawh. Chu thlân chu pûk asi le, a kawtkâ ah chun lung pakhat hen an sinh. ³⁹ Jisu nih, "Lung hi ṭhial u," a ti, A thi mi farnu Marthi nih a sinah, "Lalpa tu chun â râwk lai rawh, a thihnâk ni li asi rawh ruangah," a ti. ⁴⁰ Jisu nih a sinah, "Na lung chun Pathian rokual zia na muh lai, ka nan ti lo mazei?" a ti. ⁴¹ Chun, lung chu an ṭhial rawh, Chun, Jisu chu a vân a tâu le, "Pa, ka thu na hawng ka ngâi piak ruangah na tlûnah ka lâwm. ⁴² Ka thu na ka ngâi piak kumza ti ka theih asi; sikhawmsele, mi zapi hêl buk dîr mi tla ruangah chun chu chu ka sim asi, nangnih na ka fial ti an lung khonâk ding hen," a ti. ⁴³ Chun, chu hâwi hen a sim thluh kâ hen aw-hâu fâk tak hen, "Lazar, hawng suak rawh," a ti le, a âu. ⁴⁴ Mithi chu a kût a kê thlân puan tuam bû hen a hawng suak rawh, a mêl chu thlân puan hen tuam asi. Jisu nih an sinah,"Samh ule, kal tir u," a ti. ⁴⁵ Churuang chun Mari sinah an hawng mi Jisu thilti muhtu Juda tla lakah cherkhet nih amah an zumh rawh. ⁴⁶ Sikhawmsele a zeimaw mi chu Farisai tla sinah an va kal le, an sinah Jisu thilti tla chu an simh na. ⁴⁷ Chuvachun, bâwlpu lal tla leh Farisai tla nih chun lâirêltu tla an pumh na le, "Zeitin se kan ti lai? Hi minung nih hin thilchê a ti asi. ⁴⁸ Hi hâwi hen kan thlahthlamh chun mi zawzawng nih amah an zumh lai le; chun, Rom minung tla an hawng lai le, kan mun thenhlimh leh kan phun tla hi hawng kan suh lai," an ti. ⁴⁹ Chun, an lakah minung pakhat Kaiapha, chu kum chun Bâwlpu Lalchem asi le, an sinah, "Nannih nih zeikhawm nan theih lo thlo; ⁵⁰ phun pumpi vei lonâk ding hen mipi rûlah mi pakhat thih, nan rangah a ṭha ti khawm nan ruat lo," a ti. ⁵¹ Chu thu chu amah phuak sawm hen a sim lo, chu kum chun Bâwlpu Lalchem asi le, an phun tla ruangrûl ah Jisu thih ding a simkan mi asi dauh asi. ⁵² Chu phun tla ruangrûl cho chu asi lo, Pathian fa laikulh ah anna rek mi tla zawzawng murui khat ah a pumh na ding khawm hen asi. ⁵³ Chuvachun, chu ni thawk chun amah thah ding hen anna thluk. ⁵⁴ Churuang chun Jisu chu Juda tla lakah â langh lo rawh le, chu thawk hen ramkaro leiah a kal dauh le, Efraim khua ah chun an kal le, chunah chun a ṭhiruai tla hen an um. ⁵⁵ Chun, Juda tla Kalkanh Kût chu a nâi rawh le, mi cherkhet a thianh ding hen, ram thawk hen, Kalkanh Kût lânah Jerusalem ah an kal. ⁵⁶ Chuvachun, Jisu an hâwl le, Pathian Biakin ah dîr bû hen anna sâwn le, "Zeitin nan ruat? Kûtnâk ah a hawng kal lai lo ma?" anna ti. ⁵⁷ Bâwlpu lal tla leh Farisai tla nih amah chu an tleih khonâk ding hen âuzawng nih a umnâk an theih chun phuang ding asi ti hen thu an pêk rawh.

¹ Chun, Kalkanh Kûtnâk ding ni ruk a um rih, Jisu nih mithi lakah a thawh mi Lazar umnâk Bethani khua kha a hawng tleng. ² Chunah chun amah rangah zân puai an tuah le; Marthi nih eibâr a tuah le, Lazar lam chu a buh dûmpitu pakhat asi. ³ Chun Mari nih Litra khat spiknard sariak rimthâw man har tak a hawng put le, Jisu kê tla a chulh le, a sam hen a kê tla chu a nâwt; chun, chu sariak rim hen chun in chu a khat phak. ⁴ Sikhawmsele, Juda Iskariot, a ṭhiruai lakah pakhat, a tleihtirtu ding mi nih chun, ⁵ "Hi sariak rimthâw hi zeirangah denari zathum a zuar hen, mipâm le sinah an pêk lo?" a ti. ⁶ Mipâm a sunhsak ruangah chu thu chu a sim asi lo; mifîr asi le, tangka tawbala a kil le, a sungah siah mi chu a lâk tâwn ruangah asi. ⁷ Chun, Jisu nih, "Zeitin khawm ti lah u! Phûm hen ka um ding mi ni rangah kil seh. ⁸ Mipâm tla chu nan sinah an um kumza mi; kei lam chu nan sinah um kumza ding ka si lo," a ti. ⁹ Chun, Jisu chunah chun a um ti Juda mi zapi tamtak tla nih an theih rawh le; chun, an kal le, Jisu ruang cho hawng kal an si lo le, mithi lakah mi thawh mi Lazar khawm kha an muh khonâk ding hen asi. ¹⁰ Chun, bâwlpu lal tla chu Lazar khawm thah ding hen anna thluk; ¹¹ amah ruangah Juda tla cherkhet nih an kaltâk na le, Jisu an zumh ruangah. ¹² A thâituan ah chun, Kûtnâk ah hawng kal mi, mi zapi tamtak nih, Jisu Jerusalem ah a hawng awt ti an theih. ¹³ Tûmkâu tla an put le, amah dawng ding hen an va suak le, "Hosana, Lalpa min hen Israel Lalchem a hawng kal mi chu a thâw a suak," ti hen, an âu. ¹⁴ Chun, Jisu nih sanatung fa a muh le, a tlûnah â chuan le, ¹⁵ "Ṭih lah, Zion fanu! Zauhnik, na Lalchem chu, sanatung fa tlûnah chuan hen, a hawng kal," ti rîn hawi khan. ¹⁶ Chubang chu a tîr chun a ṭhiruai tla nih an theih lo le; sikhawmsele, Jisu chawnglawmh hen a um nûnah chun a thâwngthâng lakah chubang thu chu rîn asi ti leh a tlûnah chubang thil chu an hawng ti asi ti an hawng theih rawh. ¹⁷ Chun, Lazar thlân ah mi a kawh le, mithi lak mi a thawh liauah a sinah mi zapi an um mi tla nih khan, a thu chu an theihtir vima. ¹⁸ Churuang chun asi, mi zapi tla khawm nih chun an va dawng mi chu, chu thilchê chu a ti asi ti an theih ruangah. ¹⁹ Chuvachun, Farisai tla nih, "Zauhnik u, zeikhawm nan ti kho lo hi; zauhnik u, laikulh nih amah an zûl rawh hi," anna ti. ²⁰ Chun, Kûtnâk ah Pathian sawnh ding hen va kal mi tla lakah Greek âu tla mawh an um le; ²¹ chun, chubang tla chu Galili ram ah Betsaida khua mi Philip sinah chun an hawng kal le, a sinah, "Pu, Jisu muh kan duh," an ti le, an ngiar. ²² Philip nih chun Andri a simh le; chun, Andri leh Philip nih chun Jisu an simh. ²³ Chun, Jisu nih a sâng le, an sinah, "Minung Fapa chawnglawmh hen a um ding tik chu a tlung rawh. ²⁴ Thungâi tak hen ka nan simh na, fâng mal tual ah a tlâ hen, a thi lo chun, amah lâwng hen a um kumza tâwn; a thi lam chun tamtak hen a rah tâwn. ²⁵ Âuzawng a nungnâk unhtu nih chun a thlâu tâwn; âuzawng hi laikulh ah hin a nungnâk siarlotu nih chun zungzâl nungnâk a kil kumza lai. ²⁶ Âuzawng nih ka rian a ṭuan chun hawng ka zûl seh; ka umnâk ah ka to-aw khawm a um lai. Âuzawng nih ka rian a ṭuan chun anih chu Pa nih a chawnglawmh lai. ²⁷ "Tuah ka thinlung a lawksawng; zei ka sim lai? ’Pa, hi tik lakah hin ruang hawng ka suah rawh,’ ka ti lai ma? Zeikhawm si sele, hi tuar ding mi tik tak hi ka hawng san asi. ²⁸ Pa, na min chawnglawmh rawh," a ti. Chuvachun, vân thawk hen aw-hâu a hawng suak le, "Ka chawnglawmh rawh, ka chawnglawmh nawlh lai," a ti. ²⁹ Chun, mi zapi a kiangah dîr tla nih chun chu chu an theih le, "Khua a ri asi," an ti le, midang tla nih, "Vânmifial nih amah a sawnh asi," an ti. ³⁰ Jisu nih a sâng le, "Chu aw-hâu chu ka rangah suak asi lo, nanmah rangah asi dauh. ³¹ Tuah hi laikulh hi lâirêl asi; tuah hi laikulh lal hi lawnh asi lai. ³² Chun, kei tual ah mi thlâi hen ka um chun mi zawzawng keimah sinah ka hîp lai," a ti. ³³ Chu thu chu a thih zia ding theihtirnâk ding hen a sim asi. ³⁴ Chun, mi zapi nih a sinah, "Mesia chu zungzâl hen a um kumza awt ti Dân ah kan theih; nangnih, ’Minung Fapa thlâi hen a um ding asi,’ zeitin zia hen ti me na si? Chu Minung Fapa chu âu me asi?" an ti le, an sâng. ³⁵ Chun, Jisu nih an sinah, "Chêu hi sâwtlotê nan lakah a um rih. Chêu nan nei kar hin kal u, mûi nih an tanh na lonâk ding hen; âuzawng mûi ah a kal mi nih chun, a kalnâk suankhân a theih lo. ³⁶ Chêu nan nei sung hin chêu hi zumh u, chêu fa tla nan si khonâk ding hen," a ti. Chubang thu chu Jisu nih a sim le; chun, a kal le, an muh lo ding hen â thup rawh. ³⁷ An mâika ah chu hâwi thilchê cherkhet ti khawmsele amah an zumh lo: ³⁸ "Lalpa, kan thusim âu nih me lung? Lalpa thiltikhonâk khawm âu sinah me a lang?" ti, khuavâng Isai thusim kha a tlung khonâk ding hen. ³⁹ Hi ruangah hin asi an lung kholo, Isai nih, ⁴⁰ "Amah nih an mit a chawtir le, an thinlung a changtir le; chu lo chun an mit hen an muh lai le, an thinlung hen an theih lai le, chun, anna her nawlh lai le, kei nih annih chu ka damh na lebang lai," ti a sim nawlh ruang hin. ⁴¹ Isai nih a rokualnâk a muh le, a thâwngthâng a sim ruangah chubang thu chu a sim asi. ⁴² Sikhawmsele, lâirêltu tla lakah cherkhet khawm nih Jisu an zumh rawh le; sikhawmsele Farisai tla ruangah anna phuang lo, chu lo chun pumhnâk in ah mi nar hen an um lai: ⁴³ Pathian lakah mi sawrnâk ngâk hen chun, minung lakah mi sawrnâk, an duh dauh dangâiah. ⁴⁴ Chun, Jisu a âu le, "Âuzawng hawng ka zumhtu chu kei hawng ka zumh asi lo, hawng ka fialtu zumh asi dauh. ⁴⁵ Âuzawng hawng ka muhtu chu hawng ka fialtu muh asi. ⁴⁶ Chêutirtu ah laikulh ah hawng kal ka si hi, âuzawng hawng ka zumhtu vial chu mûi ah an um kumza lonâk ding hen. ⁴⁷ Âuzawng ka thusim theih hen, ngâilo sele; kei nih a lâi ka rêl lo; laikulh lâirêl ding hen hawng kal ka si lo le, laikulh ruangsuah ding hen hawng kal ka si dauh. ⁴⁸ Âuzawng hawng ka duh lo hen, ka thusim tla lawmhlo nih chun, lâirêltu pakhat a nei asi. Ka thusim kha, kha nih khan, ni dawngh ni ah chun amah chu lâi a rêl lai. ⁴⁹ Keimah phuak sawm hen ka sim lo; Pa hawng ka fialtu nih ka sim ding leh ka ruat ding hi, thu hawng ka pêk dauh asi. ⁵⁰ A thupêk chu zungzâl nungnâk asi ti ka theih. Churuangah chun thu ka sim mi hi Pa nih hawng ka simh hâwi vima hen ka sim asi," a ti.

¹ Tuhin Kalkanh Kût lânah mi ni asi. Jisu nih hi laikulh a kaltâk ding mi leh Pa sinah a kal ding tik a rangah a tlung rawh ti a theih. Laikulh ah amah tâ tla chu a dâwt kumza na le, chun a dawngh tiang hen a dâwt na. ² Jisu leh a ṭhiruai tla chu zânriah an dûm. Diabol nih Juda Iskariot Simon fapa chu Jisu tleihtir ding hen a ruat ving rawh. ³ Jisu nih chun Pa nih thiltikhonâk rangtling a pêk ti a theih; Pathian sinah thawk hen a hawng kal mi leh Pathian sinah a kal awt ti a theih. ⁴ Chun, Jisu chu dawhkân ah mi a thawk le, a nipuan a tlûn mi thuang a lît le, chun thlan nâwtnâk puan a tâi ah a menh. ⁵ Chun, mâihûm ah tî a tleng le, a ṭhiruai tla kê a ṭâwl le, thlan nâwtnâk puan â menh mi hen chun a nâwt vima na. ⁶ Chuvachun, Simon Peter sinah a hawng kal, anih nih chun, "Lalpa, nangnih ka kê na ṭâwl awt ma?" a ti. ⁷ Jisu nih a sinah, "Ka thilti hi tuah na theih lo; nûnah na theih lai," a ti le, a sâng. ⁸ Peter nih a sinah, "Ka kê na ṭâwl rîlmâl lai loh," a ti. Jisu nih a sinah, "Ka ṭâwl lo chun ka sinah zeikhawm tingvo na nei lai loh," a ti. ⁹ Simon Peter nih a sinah, "Lalpa, ka kê cho silo hen, ka kut leh lû khawm," a ti. ¹⁰ Jisu nih a sinah, "Tak khawlh rawh nih chun a kê lo chu ṭâwl a ngâi lo, a thiang ver; nannih nan thiang--nan ektê lam chu asi lo," a ti. ¹¹ A tleihtirtu ding chu a theih ruangah; churuang chun, "Nan ektê chun nan thianglo," a ti asi. ¹² Chuvachun, an kê a ṭâwl le, a nipuan tla â ruk nawlh le, a to nawlh, chun an sinah, "Nan tlûnah ka thilti hi zei tinâk me si, nan theih ma? ¹³ Nannih nih ’Sîntirtu leh Lalpa’ nan ka ti tâwn; nan dik, ka si ngâk. ¹⁴ Kei Lalpa leh Sîntirtu men nih nan kê ka ṭâwl chun, nannih khawm nih nan kê nanna ṭâwl piak ding asi. ¹⁵ Nan tlûnah ka ti hâwi hen nannih khawm nih nan ti bâk ding hen zûnzauh ding ka nan pêk na asi. ¹⁶ Thungâi tak hen ka nan simh na, to-aw a pu ngâk hen a rokual lo; mifial khawm a fialtu ngâk hen a rokual lo. ¹⁷ Chubang thil chu nan theih chun, ti u le nan thaw a suak lai! ¹⁸ "Nan ektê thu ka sim lo; ka thîm mi tla chu ka theih, sikhawmsele chu chu, ’Ka sang eitu nih a hawng ka leido rawh,’ ti Pathian lasui thu kha a hawng tlung khonâk ding asi. ¹⁹ Tu thawk hen a hawng tlung lânah ka nan simh na hi, a hawng tlung tikah kei hi amah kha ka si ti nan lung khonâk ding hen. ²⁰ Thungâi tak hen ka nan simh na, âuzawng ka fial mi vial lawmhtu chu, keimah a ka lawmh asi; âuzawng kei lawmhtu chu, hawng ka fialtu lawmh asi," a ti. ²¹ Jisu nih chu hâwi hen a sim thluh rawh chun, a thinlung hen a lawksawng le, "Thungâi tak hen ka nan simh na, nan lakah mi pakhat nih a ka tleihtir lai," ti hen, a theihtir rawh. ²² Chun, ṭhiruai tla nih chun a ti mi bîk an theih lo le, anna zauh. ²³ Chun, a ṭhiruai tla lakah pakhat, Jisu nih a dâwt mi chu, dawhkân sîrah Jisu sang hen a to. ²⁴ Chun, Simon Peter nih chu sinah chun, "Âu tak me a sim, hawng ka simh," ti hen, a kut a vei. ²⁵ Chun, anih chu, Jisu ṭâng ngenh hen a va âwn le, a sinah, "Lalpa, âu tak me asi?" a ti. ²⁶ Chun, Jisu nih "Sang sêu ka nîm lai le, ka pêk mi chu asi lai," a ti le, a sâng. Chuvachun, sang sêu chu a nîm nûnah a lâk le, Iskariot Simon fapa Juda sinah chun a pêk. ²⁷ Chun, sang sêu chu a pêk nûnah chun Setan a sung ah a lût. Chuvachun, Jisu nih a sinah, "Na ti ding chu ti rereh rawh," a ti; ²⁸ chun, dawhkân sîrah to mi dang tla âukhawm nih zei thu me a sinah a sim ti an theih lo. ²⁹ Zeimaw mi nih, Juda chu tangka tawbala a kil ruangah, "Jisu nih, ’Kût rangah thil kan herh phung tla va châwk rawh,’ a ti mi mawh ’Mipâm tla sinah zeilo pêk ding, a ti mi mawh," an ti asi. ³⁰ Chun, anih nih chun sang sêu chu a lâk le, a suak sawm le; chu liau chu zân asi. ³¹ Chuvachun, a kal nûnah Jisu nih a sim le, "Tuah chun Minung Fapa chawnglawmh hen a um rawh, amah ruangah Pathian khawm chawnglawmh hen a um asi. ³² Pathian nih amah lakah chun anih chu a chawnglawmh lai, a chawnglawmh sawm lai. ³³ Nau le tla, sâwtlotê nan sinah ka um rih. Nannih nih nan hawng ka hâwl lai; chun, Juda tla sinah, ’Ka kalnâk dingah nan hawng kal kho lai lo,’ ti hen ka sim hâwi khan tuah chu hâwitê hen nan sinah, ka sim hi. ³⁴ Thupêk thar ka nan pêk na hi, a dâwt ule; kei nih ka nan dâwt na hâwi hen, nannih khawm a dâwt u. ³⁵ Nanna dâwt chun, mi zawzawng nih ka ṭhiruai tla nan si ti chu lak chun an theih na lai," a ti. ³⁶ Simon Peter nih a sinah, "Lalpa, a zeiah na kal awt?" a ti. Jisu nih, "Ka kalnâk dingah, tuah na hawng ka zûl kho lai loh; hi nûn lam chun na hawng ka zûl lai," a ti le, a sâng. ³⁷ Peter nih a sinah, "Lalpa, zeirangah tu khawmah ka nan zûl kho awt lo zia? Nangmah ruangah ka nungnâk ka pêk lai," a ti. ³⁸ Jisu nih, "Keimah ruangah na nungnâk na pêk awt mu? Thungâi tak hen ka nan simh, nangnih veithum na ka pheh lân lo chu âr a khuang lai loh," a ti le, a sâng.

¹ "Nan thinlung lawksawng lah seh; Pathian zumh u, kei khawm hawng ka zumh u. ² Ka Pa in ah umnâk tamtak a um le; nan rangah mun siam hen ka kal awt hi. Chu hâwi hen um lah sele, ka nan simh na lai lo mazei? ³ Chun, nan rangah mun ka va siam chun, ka hawng nawlh lai le, ka sinah ka nan lâk na lai; ka umnâk ah nannih khawm nan um kho bâk nâk ding hen. ⁴ Ka kalnâk ding a lampi nan theih," a ti. ⁵ Thom nih a sinah, "Lalpa, na kalnâk ding kan theih lo, a lampi zeitin kan theih lai?" a ti. ⁶ Jisu nih a sinah, "Keimah hi lampi leh thutak leh nungnâk ka si; keimah lakah kal lo mi chu âukhawm Pa sinah an tlung lai loh. ⁷ Kei hawng ka theih mi si ule, ka Pa khawm nan theih rawh ding mi; tu thawk hen amah nan theih le, amah nan muh rawh," a ti. ⁸ Philip nih a sinah, "Lalpa, Pa chu hawng kan zauhtir, chuvachun kan rangah â tâwk lai," a ti. ⁹ Jisu nih a sinah, "Philip, hi tiang nan sinah ka um le, chu khawmah na hawng ka theih lo mu? Âuzawng hawng ka muhtu chu Pa muh asi, ’Pa chu hawng ka zauhtir rawh,’ zeitin zia hen ti me na si? ¹⁰ Kei Pa lakah ka um leh Pa keimah lakah a um ti na lung lo ma? Nan sinah thu ka sim mi hi, keimah phuak sawm hen ka sim lo; Pa keimah lakah a um kumza le, a thil a ti dauh tâwn asi. ¹¹ Kei Pa lakah ka um leh Pa keimah lakah a um ti hawng ka lung u; asi lo leh, thilti ruang tal hen hawng ka lung u. ¹² Thungâi tak hen ka nan simh na, âuzawng hawng ka zumhtu nih chun thil ka ti mi tla hi anih khawm nih a ti bâk lai; hi ngâk a thil rokual khawm a ti lai, Pa sinah ka kal awt ruangah. ¹³ Chun, ka min hen zeizawng nan deih mi vial chu ka ti vima lai, Pa Fapa ruangah chawnglawmh hen a um khonâk ding hen. ¹⁴ Nannih nih ka min hen zei thil tal nan ka deih chun, chu chu ka ti vima lai. ¹⁵ "Nannih nih nan ka dâwt chun, ka thupêk tla nan zâwt lai. ¹⁶ Chun, Pa ka deih lai le, anih nih chun ṭangpitu dang a nan pêk na lai, zungzâl hen nan sinah um ding hen; ¹⁷ chu chu Thlarau, Pathian thutak phuangtu asi; laikulh nih anih chu an nei kho lo, amah an muh lo hen an theih lo ruangah; nannih nih anih chu nan theih, nan sinah a um kumza ruangah; chun nanmah lakah a um awt asi. ¹⁸ "Ngâkṭah hen ka nan kaltâk na awt lo le, nan sinah ka hawng kal nawlh lai. ¹⁹ Sâwtlotê ah laikulh nih a ka muh lai lo rawh; sikhawmsele nannih nih chun nan ka muh lai; keimah ka nung ruangah nannih khawm nan nung bâk lai. ²⁰ Chu ni ah chun kei ka Pa lakah ka um mi leh, nannih keimah lakah nan um mi leh, kei nanmah lakah ka um mi nan theih lai. ²¹ "Âuzawng ka thupêk tla theih hen zâwt mi chu hawng ka dâwttu asi; âuzawng hawng ka dâwttu chu ka Pa nih a dâwt lai, kei khawm nih anih chu ka dâwt lai le, a sinah kâ langh lai," a ti. ²² Chun, Juda (Iskariot lo nih) a sinah, "Lalpa, kannih sinah na langh lai le, laikulh sinah na langh lo ding chu zei zia me?" a ti. ²³ Jisu nih a sâng le, a sinah, "Mi nih a ka dâwt chun ka thu a zâwt lai le; ka Pa nih anih chu a dâwt lai le; a sinah kan hawng kal lai le, a sinah kan um kumza lai. ²⁴ Âuzawng a ka dâwt lo mi nih chun ka thu a zâwt lo; thu nan theih mi hi ka tâ asi lo, Pa hawng ka fialtu tâ asi dauh. ²⁵ "Nan sinah ka um sung hin, hi bang thu hi ka nan simh na hi. ²⁶ Chun, ṭangpitu, Thlarau Thenhlimh Pa nih ka min hen a hawng fial ding mi nih khan chu nih chun zeizawng a nan sîntir na lai le, nan sinah ka sim rawh mi zawzawng an theihtir nawlh na lai. ²⁷ "Lungngamnâk ka nan mâk na; keimah lungngamnâk ka nan pêk na; laikulh nih a pêk hâwi hen ka nan pêk na lo hi. Nan thinlung lawksawng lah seh, ṭih khawm ṭih lah seh. ²⁸ ’Ka kal awt le, nan sinah ka hawng nawlh lai,’ ka nan ti na mi kha nan theih rawh. Nannih nih hawng ka dâwt mi si u le chu, Pa sinah ka kal awt ruangah nanna lâwm ding asi; Pa chu keimah ngâk hen a rokual dauh ruangah. ²⁹ Tuah a hawng tlung lânah hin, ka nan simh na rawh hi, a hawng tlung tikah nan lung khonâk ding hen. ³⁰ Nan sinah thu tam ka sim awt lo rawh, laikulh lal a hawng kal awt ruangah. Anih chu keimah lakah zeikhawm thu a nei lo. ³¹ Sikhawmsele, kei nih Pa ka dâwt leh Pa nih thu hawng ka pêk hâwi vima hen thil ka ti; laikulh nih an theih khonâk ding hen asi hi. "Thawk u, hin a mi hi kan kal lai."

¹ "Kei grep zûn tatak ka si, ka Pa chu dûm zauhkhenhtu asi. ² Keimah lakah mi ṭeng rahlo mi vial a lawnh tâwn; a rah mi vial a thenhlimhtir tâwn, a rah tam khunnâk ding hen. ³ Nan sinah ka thusim ruang khan tu khawmah nanna thenhlimh chia rawh asi. ⁴ Keimah lakah um kumza u, kei khawm nanmah lakah ka um kumza lai. Ṭeng chu grep zûn ah a um kumza lo chun amah lung hen a rah kho lo hâwi hen, nannih khawm keimah lakah nan um kumza lo chun, nan rah kho lai loh. ⁵ "Kei grep zûn chu ka si, nannih a ṭeng tla chu nan si. Âuzawng keimah lakah a um kumza hen, kei khawm amah lakah ka um kumzanâk chu, chu chu tamtak hen a rah tâwn; keimah lo hen zeikhawm nan ti kho lo ruangah. ⁶ Mi keimah lakah a um kumza lo chun, ṭeng hâwi hen lawnh hen a um le, a uai tâwn; chun, an khawmh le, mei ah an paih le, a kâng tâwn. ⁷ Nannih keimah lakah nan um kumza hen, ka thu nanmah lakah a um kumza chun, nan duh mi zawng deih u, nan rangah ti hen a um vima lai. ⁸ Hi ruang hin ka Pa chu chawnglawmh hen a um tâwn, tamtak nan rahnâk takah hin; chuvachun ka ṭhiruai tla nan si lai. ⁹ Pa nih a ka dâwt hâwi ber hen kei khawm nih ka nan dâwt na hi; ka dâwtnâk ah um kumza u. ¹⁰ Nannih nih ka thupêk tla nan zâwt chun ka dâwtnâk ah nan um kumza lai; kei nih ka Pa thupêk tla ka zâwt le, a dâwtnâk ah ka um kumza hâwi hen; ¹¹ "Ka lâwmnâk nanmah lakah a um kumzanâk ding hen leh nan lâwmnâk a rangtling khonâk ding hen, hi bang thu hi nan sinah ka sim rawh hi. ¹² Hi hi ka thupêk asi: Kei nih ka nan dâwt na hâwi ber hen, nannih khawm a dâwt u. ¹³ Minung nih a hâwi ruangrûl ah a nungnâk a pêk nûn lêm ah dâwtnâk fâk dauh âukhawm nih an nei lo. ¹⁴ Thu ka nan pêk na mi zawng nan ti chun, ka hâwi tla nan si lai. ¹⁵ To-aw ka nan ti na lai lo rawh; a pu thilti to-aw nih a theih lo. Hâwi tla ka nan ti dauh na rawh; Pa sinah thil ka theih mi zawzawng nan sinah ka phuang rawh ruangah. ¹⁶ Nannih nih nan hawng ka thîm lo, keimah nih ka nan thîm dauh na, va rah ding leh nan rah um kumza ding hen ka nan ruat na asi; ka min hen Pa sinah nan deih mi zawng a nan pêk na ding hen. ¹⁷ Nanna dâwt khonâk ding hen hi bang thu hi ka nan pêk na. ¹⁸ "Laikulh nih a nan hua na chun, an hua na lân khawmah keimah an ka hua ti nan theih. ¹⁹ Nannih laikulh mi si ule, laikulh nih amah minung a dâwt ding asi; laikulh mi nan si lo le, laikulh ah mi ka nan thîm na ruangah, laikulh nih an hua na asi. ²⁰ To-aw a pu ngâk hen a rokual lo, ti thu kan simh na rawh kha, theihkumza u. Anmah nih kei an ka nehsawh chun, nannih khawm an nehsawwh na lai; ka thu an zâwt chun, nannih thu khawm an zâwt lai. ²¹ Sikhawmsele, hi bang thil zawzawng hi ka min ruangah nan tlûnah an ti lai, hawng ka fialtu an theih lo ruangah. ²² Kei hawng kal hen an sinah thu sim lo sele, sual an nei lo ding mi; tu lam chu an sual phelhsawlhnâk an nei lo rawh asi. ²³ Âuzawng kei hawng ka huatu nih chun, ka Pa khawm a hua asi. ²⁴ Thil âukhawm ti dah lo mi tla an sinah ti lah sele, sual an nei lo ding mi; tu lam chu annih nih kei leh ka Pa hawng kan muh vevê rawh le, hua khawm hawng kan hua rawh asi. ²⁵ Zeikhawm si sele, an Dân bu ah, Annih nih a san umlo hen an ka hua rawh,’ ti thurîn kha a hawng tlung khonâk ding hen an ti asi. ²⁶ "Chun, Pa sinah mi ṭangpitu nan sinah ka fial ding mi, Pa lakah suak Thlarau Pathian thutak phuangtu chu, a hawng tlung tikah, anih nih chun ka thu a theihtir lai. ²⁷ Nannih khawm nih nan theihtir bâk lai, a tîr thawk hen ka sinah nan um ruangah.

¹ "Nan lungnâk nan thlâu lonâk ding hen nan sinah hi bang thu hi ka sim hi. ² Pumhnâk in ah mi an nar na lai le; asi, âuzawng an thah natu vial nih Pathian tlûnah thil ṭha ti hen anna ruat lai, chu tik chu a hawng tlung awt. ³ Chubang thil chu an ti lai, Pa leh kei an hawng kan theih lo ruangah. ⁴ Hi bang thu hi nan sinah ka sim rawh hi, a tik chu a hawng tlung tikah, kan simh na rawh ti nan theih khonâk ding hen. "Chubang thil chu a tîr thawk hen kan simh na lo, nan sinah ka um rih ruangah. ⁵ Tu lam chu hawng ka fialtu sinah ka kal awt asi; nan lakah âukhawm nih, ’A zei ah na kal awt?’ ti hen nan ka deih lo. ⁶ Hi bang thu hi ka sim ruangah nan thinlung chu ngaihsiat hen a khat. ⁷ Sikhawmsele, thudik ka nan simh na; ka kal nan rangah a ṭha; ka kal lo chun, ṭangpitu chu nan sinah a hawng kal awt lo; ka kal lam chun nan sinah ka hawng fial lai. ⁸ Anih chu a hawng tlung chun sual thu ah leh rep thu ah leh lâirêl thu ah laikulh an mawh ti a theihtir lai: ⁹ sual thu ah an mawh ti a theihtir lai, kei an hawng ka zumhlo ruangah; ¹⁰ rep thu ah an mawh ti a theihtir lai; Pa sinah ka kal awt le, nannih nih nan ka muh awt lo rawh ruangah; ¹¹ lâirêl thu ah an mawh ti a theihtir lai, hi laikulh lal hi mawh hen a tlû rawh ruangah. ¹² "Nan sinah thu sim ding tamtak ka nei rih, sikhawmsele tu lam chun nan tlinh lai lo rih. ¹³ Sikhawmsele, Thlarau diktak chu, a hawng tlung tikah, thutak zawzawng ah an rui na lai; amah phuak sawm hen thu a sim awt lo; thu a theih mi vial chu a sim dauh lai; thil hawng tlung ding tla khawm nan sinah a phuang lai. ¹⁴ Anih nih chun kei hawng ka chawnglawmh lai; ka tâ lakah mi a lâk lai le, nan sinah a phuang awt asi. ¹⁵ Pa nih thil a nei mi zawzawng ka tâ asi; churuangah, ’Ka tâ lakah mi a lâk lai le, nan sinah a phuang lai, ka ti hi. ¹⁶ "Sâwtlotê ah nannih nih kei nan hawng ka muh lai lo le, sâwtlotê ah nannih nih kei nan hawng ka muh nawlh lai," a ti. ¹⁷ Chun, a ṭhiruai tla zeimaw mi nih, "Kan sinah a thusim hi zei me si, ’sâwtlotê ah nannih nih kei nan hawng ka muh lai lo le, sâwtlotê ah nannih nih kei nan hawng ka muh nawlh lai,’ a ti mi leh ’Pa sinah ka kal awt ruangah,’ a ti mi hi?" anna ti. ¹⁸ Chun, annih nih chun, "Hi hi zei me si, ’Sâwtlotê,’ a ti mi hi? A thusim kan theihthiam lo," an ti. ¹⁹ Chun, amah deih an duh ti Jisu nih a theih le, an sinah, " ’Sâwtlotê ah nannih nih kei nan hawng ka muh lai lo, sâwtlotê ah nannih nih kei nan hawng ka muh nawlh lai,’ ti hen, ka thusim hi nanna deih mu? ²⁰ Thungâi tak hen ka nan simh na, nannih nan mitthli a tlâ lai le, nan ṭap chiam lai le, laikulh lam chu anna lâwm lai; nannih nan ngaihsia lai le, sikhawmsele nan ngaihsiatnâk chu lâwmnâk ah â chang lai. ²¹ Nunau a nganfâk liauah a ngaihsia tâwn, amah tik a tlung rawh ruangah; sikhawmsele, nau a nei rawh chun a lawksawngnâk chu a theih nawlh lo rawh; laikulh ah minung a hawng suak mi chu a lawmh ruangah. ²² Chun, tuah nan lawksawng le, sikhawmsele ka nan muh nawlh na lai, nan thinlung â lâwm lai le, nanna lâwmnâk chu âukhawm nih an lâk piak na lai loh. ²³ "Chu ni ah chun nannih nih zeikhawm nan hawng ka deih lai loh. Thungâi tak hen ka nan simh na: Pa sinah zeizawng ka min hen nan deih mi chu a nan pêk na lai. ²⁴ Keimah min hen zeikhawm nan deih lo; deih u, chun nan tawng lai; nan lâwmnak a rangtling khonâk ding hen. ²⁵ "Chubang thu chu tahṭhimh thu hen nan sinah ka sim; a tik a tlung awt, chu tik chun nan sinah tahṭhimh thu hen thu ka sim lai lo rawh le, fiang tak hen Pa thâwngthâng chu ka nan simh dauh na lai. ²⁶ Chu ni ah chun keimah min hen nan deih lai; chun: ’Pa sinah kei nih ka nan ngiar piak na lai,’ ka nan ti na lo. ²⁷ Pa ngelchel nih a nan dâwt na; nannih nih kei nan hawng ka dâwt le, Pa thawk hen suak ka si ti nan hawng ka lung ruangah. ²⁸ Kei Pa sin thawk a hawng suak hen, laikulh ah hawng kal ka si; laikulh kaltâk hen, Pa sinah kal nawlh ding ka si," a ti. ²⁹ Chun, a ṭhiruai tla nih, "Ngâinik, tu lam chun fiang tak hen thu na sim, a thluamthlâm rerêng hen thu na sim lo rawh hi. ³⁰ Nangnih zeizawng na theih le, âukhawm nih an deih a herh lo ti tuah kan theih rawh; hi ruang hin Pathian sinah mi hawng suak na si ti kan lung," an ti. ³¹ Chun, Jisu nih a sâng le, an sinah, "Tuah chun nan lung rawh mu? ³² Ngâi u, a tik a tlung awt; asi, a hawng tlung liau asi, chu tik chun mah in chiauah nanna rek ver lai le, keimah lâwng hen nan ka kaltâk lai; sikhawmsele Pa ka sinah a um ruangah mah lâwng hen ka um lo. ³³ Hi bang thu hi nan sinah ka sim rawh hi; keimah lak hin nan lungngamnâk ding hen. Laikulh ah hin hamh hen nan um tâwn; sikhawmsele, lungngam tak hen um u, laikulh ka neh rawh," a ti.

¹ Chubang thu chu Jisu nih a sim le; vân lei zauh hen, "Pa, a tik a tlung rawh. Na Fapa chawnglawmh rawh, Fapa nih a nan chawnglawmhnâk ding hen; ² kha hâwi hen mi zawzawng tlûnah thu nei hen na siam mi nih khan, a sinah na pêk mi vial tla sinah zungzâl nungnâk a pêk khonâk ding hen. ³ Hi hi zungzâl nungnâk asi, nang Pathian tak cho leh na fial mi Jisu Krist theih hi. ⁴ Nangnih thil ti ding na hawng ka pêk mi kha ka ti dih le, tual ah ka nan chawnglawmh rawh. ⁵ Pa, laikulh um lânah na sinah rokualnâk ka nei mi hen khan, tuah nangmah sin ngelchel ah hawng ka chawnglawmh rawh. ⁶ "Nangnih laikulh lakah suak mi tla keimah na ka pêk mi sinah khan na min ka langhtir rawh; annih chu na tâ an si kha, nangnih annih chu na hawng ka pêk asi; annih nih chun na thu an zâwt rawh. ⁷ Nangnih thil na ka pêk mi zawzawng, na sinah thawk hen suak asi ti an theih rawh. ⁸ Nangnih thu na ka pêk mi tla kha an sinah ka pêk rawh ruangah; chubang chu an tawng le, na sinah thawk hen suak ka si ti dik tak hen an theih rawh, nangnih na ka fial ti khawm an lung rawh. ⁹ "An rangah ka ngiar piak mi hi laikulh rangah ngiar piak ka si lo, nangnih na ka pêk mi tla rangah asi dauh, na tâ an si ruangah. ¹⁰ Thil zawzawng ka tâ vial chu na tâ asi; na tâ chu ka tâ asi; anmah lakah chawnglawmh hen ka um tâwn. ¹¹ Chun, kei lam chu laikulh ah ka um lai lo rawh, hi bang tla lam chu laikulh ah an um, kei na sinah ka hawng awt rawh. Pa Thenhlimh, nangnih kei na ka pêk mi tla hi na min hen hum rawh, pumkhat an si khonâk ding hen, kanmah pumkhat kan si hâwi hen. ¹² An sinah ka um liau khan, nangnih kei na ka pêk mi tla hi na min hen ka hum tâwn; annih chu ka vêng le, an lakah pakhat khawm an vei lo, a tlâu ding mi pa lo kha chu; Pathian lasui thu a hawng tlung khonâk ding hen. ¹³ Sikhawmsele, tuah na sinah ka hawng awt rawh; laikulh ah hi bang thu hi ka sim asi, ka lâwmnâk anmah lakah an nei rangtlingnâk ding hen. ¹⁴ Na thu an sinah ka pêk rawh le; chun, laikulh nih annih chu an hua le, laikulh ah mi an si lo ruangah, kei laikulh ah mi ka si lo hâwi hen. ¹⁵ Nangnih annih chu laikulh ah mi lâk ding hen ngiar ka si lo le, Misual pa lakah na hum ding ka ti dauh asi. ¹⁶ Annih chu laikulh ah mi an si lo, kei laikulh ah mi ka si lo hâwi hen. ¹⁷ Annih chu thutak hen thenhlimhtir rawh, na thu chu thutak asi. ¹⁸ Nangnih laikulh ah na ka fial hâwi khan, kei khawm nih annih chu laikulh ah ka fial na hi. ¹⁹ Anmah ruangah na sinah ka pêk, annih khawm nangmah sinah anna pêk bâk khonâk ding hen. ²⁰ "Hi bang tla rang cho hin ngiar piak ka si lo, an thu ruangah kei hawng ka zumh ding mi tla rang khawmah ngiar piak ka si. ²¹ An ektê hen pumkhat an si khonâk ding hen thla ka cham. Pa, nang keimah lakah na um mi leh kei nangmah lakah ka um hâwi hen, annih khawm kanmah lakah an umnâk ding hen; nangnih kei na ka fial ti laikulh nih an lung khonâk ding hen. ²² Chun, nangmah nih rokualnâk na ka pêk mi kha kei nih an sinah ka pêk rawh; annih, chu pumkhat an sinâk ding hen, kannih pumkhat kan si hâwi hen; ²³ kei anmah lakah, nang keimah lakah, annih chu rangtling tak hen pumkhat an si khonâk ding hen; nangnih kei na ka fial ti leh na ka dâwt hâwi hen annih hi na dâwt ti laikulh nih an theih khonâk ding hen. ²⁴ "Pa, nangnih na ka pêk mi tla hi ka umnâk ah ka sinah um ding hen ka duh; nangnih na ka pêk mi ka rokualnâk kha an muh khonâk ding hen; laikulh um lânah nangnih na ka dâwt rawh ruangah. ²⁵ Pa rep tak, laikulh nih chun an theih lo le, kei lam nih chun ka nan theih; hi bang tla khawm nih hin nangnih kei na ka fial ti an theih rawh. ²⁶ Chun, an sinah na min ka theihtir le, ka theihtir vima lai; nangnih kei na ka dâwtnâk kha anmah lakah a um, kei khawm anmah lakah ka um khonâk ding hen," a ti.

¹ Jisu nih chubang thu chu a sim thluh rawh chun, a ṭhiruai tla hen an suak le, Kidron tiva an kanh. Chunah chun dûm a um, chunah chun an lût le, amah leh a ṭhiruai tla hen. ² Chun, a tleihtirtu Juda khawm nih chu mun chu a theih; Jisu chu a ṭhiruai tla sinah chunah chun a kal tâwn ruangah. ³ Chun, Juda nih chun kawrsen rual hen, bâwlpu lal tla leh Farisai tla sinah um mi vêngtu tla hen a kalpi na le; ⁴ Jisu nih a tlûnah thil tlung ding zawzawng chu theih hen, a va suak le; an sinah, "Âu me nan hâwl?" a ti. ⁵ Annih nih chun a sinah, "Nazaret mi Jisu," an ti le, an sâng. Jisu nih an sinah; "Keimah hi ka si," a ti. Chun, a tleihtirtu Juda khawm chu an lakah a dîr. ⁶ Chun, "Keimah hi ka si," a ti kâ hen, an dung leiah anna nâwp le, tual ah an tlû. ⁷ Chun, anih nih chun an sinah, "Âu me nan hâwl?" a ti le, a deih nawlh. Chun, annih nih chun,"Nazaret mi Jisu," an ti. ⁸ Jisu nih, "Keimah hi ka si ti ka nan simh na khateh; nannih nih kei nan ka hâwl asi chun hi bang tla hi kaltir u," a ti le, a sâng. ⁹ (A thusim, "Pa, nangnih kei na ka pêk mi tla lakah pakhat khawm ka thlâu lo," a ti mi kha a tlungnâk ding hen.) ¹⁰ Chun, Simon Peter nih nâmsâu a pâi mi a phâwi le, Bâwlpu Lalchem sal a tuk le, a vawrhlei nakhaw a themh phak. Sal min chu Malka asi. ¹¹ Chun, Jisu nih Peter sinah, "Nâmsâu kha a kâwng ah khumh nawlh rawh; Pa nih hâi hawng ka pêk mi hi ka din lo lai ma?" a ti. ¹² Chuvachun, kawrsen murui leh an hotu lalchem hen, Juda tla vêngtu tla nih chun Jisu an tleih le, an phuar le, ¹³ Ana sinah an kalpi masa le, Kaiapha nupi pa asi ruangah. Kaiapha chu, chu kum chun Bâwlpu Lalchem asi. ¹⁴ Kaiapha chu, "Phun pumpi ruangrûl ah minung pakhat thih a ṭha," ti hen, Juda tla thlûkpitu kha asi. ¹⁵ Chun, Simon Peter nih Jisu a zûl le, a ṭhiruai dang pakhat hen. Chu ṭhiruai chu Bâwlpu Lalchem mêltheih asi le, Jisu sinah Bâwlpu Lalchem in kulhsung tualmâi ah a lût bâk le; ¹⁶ sikhawmsele Peter chu lêng leiah kawtkari ah a dîr. Chun, ṭhiruai dang, Bâwlpu Lalchem mêl theih chu a va suak le, inkhâr vêngtu nungâk a sawnh le, Peter a lûtpi. ¹⁷ Chun, inkhâr vêngtu nungâk nih chun Peter sinah, "Nang khawm hi minung ṭhiruai tla lakah tel bâk na si mu?" a ti. Anih nih chun, "Ka si lo," a ti. ¹⁸ Chun, sal tla leh vêngtu tla chu chunah chun an dîr le, a dâi ruangah meihawl hen mei an tih le, anna aih. Peter khawm an sinah â tel le, dîr bû hen mei â aih bâk. ¹⁹ Chun, Bâwlpu Lalchem nih chun Jisu chu a ṭhiruai tla thâwngthâng leh a sîntir zia thu a deih. ²⁰ Jisu nih a sâng le, a sinah,"Laikulh sinah mi zatlâng theih hen, thu ka sim tâwn kha; pumhnâk in leh Pathian Biakin, Juda zawzawng pumhnâk tla ah chun ka sîntir kumza na tâwn kha. A thup hen zeikhawm ka sim lo. ²¹ Zeirangah kei na ka deih? An sinah ka thusim zia ka thu theihtu tla deih; ngâi rawh, chubang nih chun ka thusim chu an theih khateh," a ti. ²² Chu chu a sim kâ hen a kiangah a dîr mi vêngtu pakhat nih Jisu a bengh le, "Bâwlpu Lalchem hi hâwi hen na sâng mu?" a ti. ²³ Jisu nih a sinah,"Thu sual sim ka si chun, ka sualnâk hawng ka theihtir; sikhawmsele, thu ṭha ka sim khawmah zeirangah na hawng ka bengh?" a ti le, a sâng. ²⁴ Chun, Ana nih chun phuar bû hen Bâwlpu Lalchem Kaiapha sinah a fial. ²⁵ Chun, Simon Peter nih dîr bû hen mei â aih. Chun, "Nang khawm a ṭhiruai lakah tel bâk na si mu?" an ti. Peter lam nih chun, "Ka si lo," ti hen â pheh. ²⁶ Bâwlpu Lalchem sal tla lakah pakhat Peter nih a nakhaw a themh piak mi rualsia nih chun, "A sinah dûm ah khan ka nan muh lo mazei?" a ti. ²⁷ Chun, Peter chu â pheh nawlh le; chun âr a khuang sawm rawh. ²⁸ Chun, Jisu chu Kaiapha in thawk hen Governor in ah an kalpi nawlh le; zînglei asi le; chun, annih lam chu Governor in ah an lût lo, nawmh lo hen, Kalkanh Kût an ei khonâk ding hen. ²⁹ Chun, Pilat an sinah a va suak le, an sinah, "Hi minung tlûnah hin thupawi zei me nan nei?" a ti. ³⁰ Annih nih chun a sinah, "Hi minung hi misual si lah sele na sinah kan hawngpi lai loh," an ti le, an sâng. ³¹ Chun, Pilat nih an sinah, "Nanmah nih kalpi ule, nan dân hâwi hen a lâi rêl u," a ti. Juda tla nih a sinah, "Kanmah thu hen âukhawm thah khonâk kan nei lo," an ti. ³² A thih zia ding thu Jisu nih a sim hâwi hen a tlung khonâk ding hen. ³³ Chuvachun, Pilat chu a in ah a lût nawlh le, Jisu a kawh le, a sinah, "Juda tla Lalchem na si ma?" a ti. ³⁴ Jisu nih, "Hi hi nangmah phuak sawm hen ma na sim, midang nih an simh mi ma, ka thâwngthâng hi?" a ti le, a sâng. ³⁵ Pilat nih, Kei Juda ka si mazei? Nangmah phun tla leh bâwlpu lal tla nih ka sinah a nan hawngpi asi hi; zei thil me na ti?" a ti le, a sâng. ³⁶ Jisu nih "Lalchem ka sinâk chu hi laikulh thawk hen mi asi lo. Lalchem ka sinâk chu hi laikulh thawk mi si sele, ka to-aw tla nih an do lai; Juda tla sinah pêk hen ka um lonâk ding hen; sikhawmsele, lalchem ka sinâk chu hinah thawk hen mi hi asi lo," a ti le, a sâng. ³⁷ Chun, Pilat nih a sinah, "Lalchem na si na maw?" a ti. Jisu nih, "Si ta a, Lalchem ka si. Thutak theihtir hi ka suak san leh laikulh ah ka hawng san asi. Âuzawng thutak lakah mi vial nih ka thu a zâwt tâwn," a ti. ³⁸ Pilat nih a sinah, "Thutak zei me si?" a ti. Chun, chu thu chu a sim kâ hen, a suak nawlh le, Juda tla sinah a va suak nawlh le, an sinah, "Zeikhawm a sualnâk ka muh lo. ³⁹ Sikhawmsele, Kalkanh Kût ah minung pakhat kan suah piak na ding hen Dân nan nei; chuvachun, Juda tla Lalchem hi an suah piak na sele nan duh ma?" a ti. ⁴⁰ Chun, annih chu an âu nawlh le, "Hi minung hi chu si lah seh; Baraba si dauh seh," an ti. (Baraba chu rawkmang asi.)

¹ Chun, chu liau chun Pilat nih Jisu a kalpi le, a vuak. ² Chun, kawrsen tla nih chun ling lukhuh an phiar le, an khuhtir le, puan senduk an aihtir le; ³ chun, a kiangah an hawng kal le, "Chibai! Juda tla Lalchem!" an ti le, an bengh. ⁴ Chun, Pilat chu a suak nawlh le, an sinah, "Zauhnik, zeikhawm a sual ka muh lo ti nan theihnâk ding hen, nan sinah ka hawngpi hi," a ti. ⁵ Chun, Jisu chu ling lukhuh leh puan senduk chu aih bû hen a hawng suak. Chun, Pilat nih an sinah, "Zauhnik, Minung hi!" a ti. ⁶ Chun, bâwlpu lal tla leh vêngtu tla nih chun amah an muh kâ hen an âu le, "Kraws ah khenhbêk rawh! Kraws ah khenhbêk rawh!" an ti. Pilat nih an sinah, "Nanmah nih kalpi ule, kraws ah khenhbêk u; kei lam nih chun zeikhawm a sualnâk ka muh lo," a ti. ⁷ Juda tla nih chun a sinah, "Kan Dân pakhat a um, chu Dân hâwi vima hen Pathian Fapa ah â siam ruangah a thi ding asi," an ti le, an sâng. ⁸ Chun, Pilat nih chu thu chu a theih chun a lâu khun; ⁹ a in ah a lût nawlh le, Jisu sinah, "Zei lei mi me na si?" a ti. Sikhawmsele, Jisu nih a sâng lo. ¹⁰ Chun, Pilat nih a sinah, "Nangnih kei na ka sâng lo mu? A nan suah kho ka si, kraws ah a nan khenhbêk kho ka si ti na theih lo ma?" a ti. ¹¹ Jisu nih, "Tlûnlei thawk hen pêk na si lo chun, ka tlûnah hin tikhonâk rerêng na nei lai lo; churuangah na sinah hawng ka pêktu nih khan sual a phurh khun asi," a ti. ¹² Chu thawk chun Pilat nih suah a tum le; sikhawmsele Juda tla an âu le, "Hi minung hi na suah chun Rom Lalchem hâwipa na si lai loh; âuzawng lalchem ah â siam mi vial chu Rom Lalchem do an si," an ti. ¹³ Chun, Pilat nih chubang thu chu a theih kâ hen Jisu a suakpi le, a min lungphah, Hebrai hawlh hen Gabatha an ti mi--chu munah chun lâirêlnâk tophah ah a to. ¹⁴ Chun, chu ni chu Kalkanh Kût Timhtuah ni asi le, nî sunh liau ding asi. Chun, anih nih chun Juda tla sinah, "Zauhnik u, nan Lalchem hi!" a ti. ¹⁵ Chun, annih chu an âu le, "Thah rawh, thah rawh, kraws ah khenhbêk rawh!" an ti. Pilat nih an sinah, "Nan Lalchem hi kraws ah ka khenhbêk lai ma?" a ti. Bâwlpu lal tla nih, "Rom Lalchem lo chu lalchem kan nei lo," an ti le, an sâng. ¹⁶ Chuvachun, Pilat nih kraws ah khenhbêk ding hen anih chu an sinah a pêk rawh. Chuvachun, Jisu an kalpi rawh. ¹⁷ Chun, anih chu mah rangah kraws put hen, "Luruh mun," an ti mi, Hebrai hawlh hen Golgotha an ti mi chu, chu mun tiang chun a va suak. ¹⁸ Chunah chun kraws ah an khenhbêk le, midang panih hen, a sîr leiah pakhat vevê hen, a lâi ah Jisu. ¹⁹ Chun, Pilat nih lasui a rîn le, kraws ah a bêk. ’NAZARET MI JISU JUDA TLA LALCHEM,’ ti hen rîn asi. ²⁰ Chun, chu lasui chu Juda tamtak nih an rêl le; Jisu kraws ah an khenhbêknâk mun chu khuapi kiang asi. Hebrai hawlh, Rom hawlh leh Greek hawlh tla hen rîn asi. ²¹ Chuvachun, Juda bâwlpu lal tla nih chun, Pilat sinah, Juda tla Lalchem,’ ti hen, rîn lah; Juda tla Lalchem ka si a ti,’ ti hen rîn dauh rawh," an ti. ²² Pilat nih, "Ka rîn rawh asi," a ti le, a sâng. ²³ Chun, kawrsen tla nih Jisu chu kraws ah an khenhbêk thluh rawh chun a puan tla an lâk le, phel li ah an suah le, kawrsen tla nih phel khat seng anna ting. A kawrdawh khawm an lâk, kawrdawh chu ṭhitlo mi asi le, a ngâwng thawk hen a pum hen tah ver asi. ²⁴ Churuangah annih nih chun, "Kan thlêk lai loh, âu tâ ding si lai kan chamchawh lai," an ti. Pathian lasui thu, "Ka nipuan tla anna ṭhen le, ka kawrdawh chu an chamchawh," ti, a tlungnâk ding hen. Chubang thil chu kawrsen tla nih an ti. ²⁵ Chun, Jisu kraws kiangah a nu leh a nu naunu, Mari Klopa nupi leh Mari Magdala mi an dîr. ²⁶ Chun, Jisu nih a nu leh a ṭhiruai a dâwt mi kha a kiangah dîr mi a muh le, a nu sinah, "Nu, zauhnik, na fapa kha," a ti. ²⁷ Chun, ṭhiruai sinah chun, "Zauhnik na nu kha!" a ti. Chun, chu thawk chun chu ṭhiruai nih chun amah in ah anih chu a kalpi rawh. ²⁸ Chu nûnah chun, Jisu nih thil zeizawng tuah a rangtling rawh ti a theih le, Pathian lasui thu kha a tlungnâk ding hen, "Ka tî a hâl," a ti. ²⁹ Chunah chun bêl pakhat uain thur hen khat dil an tuah le; chun, sponge (hâng dâwp kho mi) pakhat chu uain thur hen khat zit chiah mi, husop thing fungpâr ah an târ le, a mûr ah an tawngh. ³⁰ Chun, Jisu nih uain thur chu a tem thluh rawh chun, "Â lîm rawh," a ti. Chun, a lû a kûn le, a nukrî a chat rawh. ³¹ Timhtuah ni asi rawh. Churuang chun Juda tla nih Pilat sinah khenh hen um mi kê tla khiak ding hen leh an ruak tla kalpi ding hen an deih. Chu chu Dinhni ah kraws ah an um ko lonâk ding hen asi, Dinhni chu ni rokual tak asi ruangah. ³² Chun, kawrsen tla chu an hawng le, a sinah kraws ah an khenhbêk mi tawngtîr mi leh minung pakhat chu an kê tla an khiak le; ³³ sikhawmsele, Jisu kiangah an hawng kal le, a thi ving rawh ti an theih le, a kê tla an khiak lo. ³⁴ Sikhawmsele, kawrsen tla lakah minung pakhat nih a nâk ah fei hen a sunh le; chun thisen leh tî a suak sawm rawh. ³⁵ (A muhtu nih chun a theihtir rawh, a theihtirnâk a dik asi; a sim dik ti a theih, nannih khawm nih nan lung khonâk ding hen.) ³⁶ Pathian lasui thu, "A ruh khiak asi lai loh," ti, tlungnâk ding hen chubang thil chu a hawng um rawh. ³⁷ Chun, Pathian lasui thudang nih, "An sunhnâk chu an zauh lai," a ti nawlh. ³⁸ Chun, chu nûnah chun, Josef, Arimathai khua mi, (Jisu ṭhiruai asi le, sikhawmsele Juda tla a ṭih ruangah a thup hen um asi.) anih nih chun Jisu ruak chu kalpi kho ding hen Pilat sinah a deih le, chun Pilat nih a siang. Chuvanchun, a hawng kal le, a ruak chu a kalpi rawh. ³⁹ Chun, Nikodem, a tîrah zân ah Jisu sinah hawng kal mi nih khan murrah leh aloe chawmh chia litra zâ ding put hen a hawng. ⁴⁰ Chun, Jisu ruak chu an lâk le, Juda tla phûm dân hâwi hen rimthâw tla hen chun puan mangṭhia hen an tuam. ⁴¹ Chun, kraws an khenhbêknâk mun ah chun dûm pakhat a um le, dûm ah chun âukhawm vûi dah lonâk thlân thar pakhat a um. ⁴² Chun, Juda tla Timhtuah ni asi ruangah, thlân chu an kiang ko asi le, chunah chun Jisu an vûi rawh.

¹ Chun, ni sarih ni lakah ni masachem ah, zîngtê, a mûi rih liauah, Mari Magdala mi chu thlân ah a va kal le, lung chu thlân ah mi ṭhinh hen a muh. ² Chuvachun, a tek le, Simon Peter leh ṭhiruai dang Jisu nih a dâwt mi sinah chun a hawng kal le, an sinah, "Thlân ah mi kha Lalpa chu an kalpi rawh, an siahnâk mun kan theih lo," a ti. ³ Chuvachun, Peter chu a suak le, ṭhiruai dang hen chun thlân lei an fûk. ⁴ Chun, munkhat hen an tek le; ṭhiruai dang nih chun Peter a lanh le, thlân chu a tlung masa. ⁵ Chun, a kûn le, puan mangṭhia tla a um mi chu a muh le; sikhawmsele, a sungah a lût lo. ⁶ Chun, Simon Peter khawm nih a dung leiah a ṭhâwl le, a va tlung le, thlân sungah a lût le; ⁷ puan mangṭhia tla a um mi leh a lû ah thlan nâwtnâk puan a um mi chu, puan mangṭhia lakah umlo hen, zual chia hen mun dang ah a um mi a muh. ⁸ Chuvachun, ṭhiruai dang, thlân tlung masa mi khawm chu a lût bâk le, a muh le, a lung. ⁹ Mithi lakah mi a thawknawlh ding asi ti Pathian lasui thu kha an theih lo rih ruangah. ¹⁰ Chun, ṭhiruai tla chu in ah an kal nawlh rawh. ¹¹ Sikhawmsele, Mari chu lêng ah thlân kiangah ṭap bû hen a dîr le; chun ṭap bû hen a kûn le, thlân sung chu a bih le; ¹² chun, vânmifial panih puan vâr aih hen, Jisu ruak zâunâk mun ah chun, pakhat a lû leiah, pakhat a kê leiah an to mi a muh. ¹³ Chun, annih nih chun a sinah, "Nunau, zeirangah na ṭap?" an ti. Anih nih chun an sinah, "Ka Lalpa an kalpi le, an siahnâk ram ka theih lo ruangah!" a ti. ¹⁴ Chun chu hâwi hen a sim kâ hen a dung lei â her le, Jisu a dîr mi a muh le, Jisu asi ti a theih lo. ¹⁵ Jisu nih a sinah, "Nunau, zeirangah na ṭap?" Âu me na hâwl?" a ti. Anih nih chun, dûm zauhtu bei a ti le; a sinah, "Pu, amah hinah mi hi na kalpi asi chun, na siahnâk mun hawng ka simh le, chuvachun ka lâk lai," a ti. ¹⁶ Jisu nih a sinah, "Mari," a ti. Anih chu â her le, a sinah Hebrai hawlh hen, "Rabboni," a ti; chu chu "Sîntirtu" tinâk asi. ¹⁷ Chun, Jisu nih a sinah, "Hawng ka banh lah; tu tiang khawm hen Pa sinah ka kâi lo rih asi. Sikhawmsele ka unau tla sinah va kal le, an sinah, ’Ka Pa, nan Pa, ka Pathian, nan Pathian sinah ka kal awt,’ a ti, va ti rawh," a ti. ¹⁸ Mari Magdala mi chu a va kal le, ṭhiruai tla sinah, "Lalpa chu ka muh rawh," a ti, a sinah thu a sim zia tla khawm chu a simh na. ¹⁹ Chun, chu ni, ni sarih ni masachem ah, zânleibâi ah, Juda tla ṭih ruangah ṭhiruai tla umnâk inkhâr tla chu an khâr nûn chun, Jisu an lakah a hawng dîr le, an sinah, "Nan tlûnah lungngamnâk um seh," a ti. ²⁰ Chun, chu chu a sim thluh rawh chun a kut leh a nâk an sinah a zauhtir. Chun, Lalpa chu an muh rawh chun ṭhiruai tla chu anna lâwm rawh. ²¹ Chun, Jisu nih an sinah, "Nan tlûnah lungngamnâk um seh; Pa nih kei hawng ka fial hâwi hen ka nan fial na hi," a ti nawlh. ²² Chun, chubang thu chu a sim thluh ah chun an tlûnah a thâw a suah le, an sinah, "Thlarau Thenhlimh nei u. ²³ Âu sual zawng nan ngaihdam mi vial chu ngaihdam asi lai; âu sual zawng nan ngaihdam lo mi vial chu ngaihdam lo asi lai," a ti. ²⁴ Chun, Jisu a hawng kal liau khan leinih tla lakah tel bâk, Thom, (phîr an ti mi chu), an sinah a um bâk lo. ²⁵ Chuvachun, ṭhiruai dang tla nih chun, a sinah, "Lalpa chu kan muh rawh," an ti. Sikhawmsele, Thom nih chun an sinah, "A kut ah thîr khenhnâk masî tla ka muh hen leh thîr khenhnâk masî tla ka kutdawng ka purh hen, a nâk ah ka kut hen ka tham lo chun ka lung rîlmâl lai loh," a ti. ²⁶ Chun, ni riat nûnah, a ṭhiruai tla chu in sungah an um nawlh le, Thom khawm an sinah a um bâk. Jisu a hawng kal le, inkhâr tla chu khâr asi le, an lakah a hawng dîr rawh le, an sinah, "Nan tlûnah lungngamnâk um seh," a ti. ²⁷ Chun, Thom sinah chun, "Na kutdawng hen hawng tham le, ka kut tla hi zauh rawh; na kut hawng banh le, ka nâk tham rawh; lunglo hen um lah le, lung rawh!" a ti. ²⁸ Thom nih a sinah, "Ka Lalpa leh ka Pathian na si," a ti le, a sâng. ²⁹ Jisu nih a sinah, "Nangnih chun na hawng ka muh ruangah na lung asi mu? Muhlo hen hawng ka lungtu zawng chu an thaw a suak," a ti. ³⁰ Chun, Jisu nih ṭhiruai tla mâika ah chun singsiahnâk dang cherkhet a ti; chubang chu hi lasuibu ah hin rîn asi lo. ³¹ Sikhawmsele, hi bang hi, Jisu chu, Mesia, Pathian Fapa asi ti nan lung khonâk ding hen leh nan lung ruangah a min hen nungnâk nan nei khonâk ding hen rîn asi.

¹ Chu nûnah chun, Tiberia Rilî ah Jisu chu a ṭhiruai tla sinah â langh nawlh le; hi hâwi hen â langh. ² Simon Peter, Thom, (phîr an ti mi), Galili ram ah Kana mi Nathanael, Zebedai fa tla leh a ṭhiruai panih tla hen anna pûm. ³ Simon Peter nih chun an sinah, "Ngâ tleih hen ka kal awt," a ti. Annih nih chun a sinah, "Kannih khawm na sinah kan hawng bâk lai," an ti. Chun, an suak le, lawng ah anna chuan le; chu zân chun zeikhawm an tleih lo. ⁴ Chun khuafîm chat ah Jisu chu seppho ah a dîr le; sikhawmsele ṭhiruai tla nih chun Jisu asi ti an theih lo. ⁵ Chun, Jisu nih an sinah, "Nau le tla, ngâ nan tawng ma?" a ti. Annih nih chun a sinah, "Kan tawng lo," an ti le, an sâng. ⁶ Chun, anih nih chun an sinah, "Lawng sîr vawrhlei kâng khan lên vawrh ule, nan tawng lai," a ti. Chun, an vawrh le ngâ a tam ruangah an nûk kho lo. ⁷ Chuvachun, ṭhiruai, Jisu nih a dâwt mi nih khan, Peter sinah, "Lalpa asi," a ti. Chuvachun, Lalpa asi ti Simon Peter nih a theih kâ hen, a kawrdawh â menh le, takkaro hen um asi ruangah, rilî ah â khâwk rawh. ⁸ Sikhawmsele, ṭhiruai dang tla nih chun lawng fatê hen, lên lakah ngâ khat phak nûk bû hen an hawng fûk le, tlâng thawk hen a lât loh, dâwng zanih ding mawh cho asi. ⁹ Chun, tlâng an tleng hen, chunah chun meihawl hen mei tih mi an muh le, a tlûnah ngâ em mi leh sang tlang an muh. ¹⁰ Jisu nih an sinah, "Tuah nan ngâ tleih kha a zeimaw mi hawng put u," a ti. ¹¹ Chun, Simon Peter chu a va a chuan le, lên chu ngâ lian pipi khat hen vakap leiah a nûk le, zâ leh sâwmnga leh pathum asi; chu tluk rak sikhawmsele lên chu a tlêk lêm lo. ¹² Jisu nih an sinah, "Zîngbuh ei u," a ti. Chun, ṭhiruai tla lakah âukhawm nih a sinah, "Âu me na si?" ti hen an deih ngam lo, Lalpa asi ti an theih. ¹³ Chun, Jisu a hawng kal le, sang tlang chu a lâk le, an sinah a pêk na le, ngâ khawm chu hâwi a pêk na. ¹⁴ Chu chu Jisu mithi lakah mi a thawknawlh nûnah, a ṭhiruai tla sinah â langh veithumnâk asi. ¹⁵ Chun, zîngbuh an ei thluh ah, Jisu nih Simon Peter sinah chun, "Simon, Johan fapa, hi bang tla ngâk hen nangnih kei na ka dâwt dauh ma?" a ti. Anih nih chun a sinah, "I, Lalpa, ka nan dâwt ti na theih," a ti. Jisu nih chun a sinah, "Ka dawrâ fa tla zauhkhenh rawh," a ti. ¹⁶ A veinihnâk ah, a sinah, "Simon, Johan fapa, nangnih kei na ka dâwt ma?" a ti nawlh. Anih nih chun a sinah, "I, Lalpa, ka nan dâwt ti na theih," a ti nawlh. Jisu nih chun a sinah, "Ka dawrâ tla zauhkhenh rawh," a ti. ¹⁷ Chun, a veithumnâk ah chun a sinah, "Simon, Johan fapa, nangnih kei na ka dâwt ma?" a ti. A veithumnâk ah, "Nangnih na ka dâwt ma?" a sinah a ti ruangah chun Peter a lawksawng le, a sinah, "Lalpa, zeizawng na theih le, ka nan dâwt ti na theih," a ti. Jisu nih a sinah, "Ka dawrâ tla zauhkhenh rawh. ¹⁸ Thungâi tak hen ka nan simh, na ngâksia liau khan na tâi na sâwm le, na duhnâk zawngah na kal tâwn; sikhawmsele, na upa tikah na kut na phar lai le, midang nih an sâwm piak lai le, na duhlonâk leiah an kalpi lai," a ti. ¹⁹ (Chubang thu chu zei hâwi a thihnâk hen me Peter nih Pathian a chawnglawmh lai ti theihtirnâk ding hen a sim asi.) Chun, chu chu a sim thluh rawh chun, Jisu nih a sinah, "Hawng ka zûl," a ti. ²⁰ Chun, Peter chu â hawi le, Jisu nih ṭhiruai a dâwt mi, zânriah ei liauah a ṭâng ngenh hen a um le, "An tleihtirtu ding chu âu me si?" titu nih khan, a hawng zûl mi a muh. ²¹ Chun, Peter nih anih chu a muh le, Jisu sinah, "Lalpa, hi minung nih hin zei me a ti lai?" a ti. ²² Jisu nih a sinah, "Ka hawng kal nawlh tiang um kumza ding hen duh châng sele, na rang zei me si? Nangmah nih hawng ka zûl ko," a ti. ²³ Chuvachun, chu ṭhiruai chu thi lo ding hen a thu chu unau tla lakah a thang rawh; sikhawmsele, Jisu nih a thi lai loh ti a sinah a sim lo. "Ka hawng kal nawlh tiang hen um kumza ding hen duh châng sele, na rangah zei me si?" a ti mi cho asi. ²⁴ Chu ṭhiruai chu hi bang thu theihtirtu leh rîntu hi asi; a theihtirnâk hi dik tak asi ti kan theih. ²⁵ Chun, Jisu thilti a dang cherkhet khawm a um, chubang chu pakhat khat hen rîn awt ver sele, lasuibu rîn ding zawzawng chu laikulh khawmah tlum ding hen ka ruat lo.