JEM

JEM

¹ Jem Pathian leh Lalpa Jisu Krist to-aw nih Pathian mi phun leinih laikulh pumpi ah anna rekrâwi mi tla chu chibai a bûk na. ² Ka unau le tla, nan lakah niknâk zeital hawng um khawmsele, vânṭhatnâk ah ruat u. ³ Nan lungnâk nih chun niknâk tla ah tuarkhonâk a siam ti nan theih. ⁴ Chun, samphâng lo leh rangtling tak hen leh tlawlh lo hen nan um ding hen felfênâk nih chun thil zeizawng ah a nan siam na ti theih u. ⁵ Sikhawmsele, nan lakah âuzawng nih finghnâk a samphâng chun mi zawzawng sinah siang tak leh zângfah tak hen pêk tâwntu Pathian chu deih seh, churawhchun a sinah pêk asi lai. ⁶ Sikhawmsele, zumhmaih lo hen, lungnâk nei hen deih seh; zumhmaihtu chu tisumsumriat titlingtlawk, thli nih a sêm le, a vawrh mi hâwi chu asi. ⁷ Âuzawng chu hâwi mi chu Lalpa thawk hen zeikhawm tawng ding a ruat lah seh, ⁸ thinlung reprâi neilo hen thil a tinâk zawngah bir lo mi asi ruangah. ⁹ Unau mipâm chu Pathian nih a sângtir tikah a lâwm seh, ¹⁰ chun, unau minei chu Lalpa nih a niamh tikah a lâwm seh. Minei chu belhpâr hâwi hen a vei awt ruangah. ¹¹ Nî chu a suak le, a linhnâk nih chun chawmpâr chu a uaitir le, a pâr chu a tlawng le, a dawhnâk chu a vei rawh; chu hâwi ber hen minei chu a rianṭuan ah a vei lai. ¹² Niknâk lakah zumhkâi tak hen um kumzatu chu a thaw a suak! Niknak chu a tuar kho tikah chun, nungnâk lallukhuh pêk asi lai; chu chu Pathian nih amah dâwttu tla rangah pêk ding hen a tiamh na mi lâwmman chu asi. ¹³ Âuzawng nih lêmnâk an tawng liauah, "Pathian lêm ka si," ti lah seh, Pathian chu sual nih lêm kho mi zât asi lo, amah khawm nih âukhawm a lêm dah lo. ¹⁴ Mi kip mah duhnâk sual ah kuaih leh khih hen an um chun, lêmnâk an tawng mi asi dauh. ¹⁵ Chun, duhnâk nih chun fa a pâwi le, sual a ring tâwn, chun, chu sual chu a hawng ṭhang rawh chun thihnâk a ring tâwn. ¹⁶ Ka unau duhtak tla, perpet hen um lah u. ¹⁷ Thilpêk ṭha leh thilpêk rangtling chu vân lei chêu tla siamtu Pathian thawk hen suak mi ver an si, â dang lo le, mûi ah khawm â chang lo. ¹⁸ Amah duhzia hâwi hen thudik ah hawng kan ring le, a thilsiam zawzawng ah mun masachem kan luah khonâk ding hen. ¹⁹ Unau duhtak tla, hi hi theih u, mikip nih thu ngâi ding a chuh sele, thusim chu a chuh lah sele, thin sâu seh. ²⁰ Minung thinrunhnâk nih Pathian repnâk thiltum chu a ṭhatvakpi lo. ²¹ Chîng dân nâwmtâm leh sual kip thawk hen a thlei u. Pathian sinah a pêk ule, chun nan thinlung ah tuh hen a um mi Pathian thu, ruang an suah kho natu chu pawm u. ²² A thu ngâi salam hen â lah ule, chu ngâk chun ti ding hen a tum dauh u. ²³ Âuzawng thu ngâitu si hen, zâwttu asi lo chun thlalang lakah amah mêl fiang tak hen â zauh mi hâwi asi, ²⁴ fiang tak hen â zauh le, a kal rawh chun zei hâwi mi me asi ti a philh sawm tâwn. ²⁵ Sikhawmsele, ruangsuahnâk dân rangtling minung tla suahtu chu zauh hen, zâwttu si hen, ngâi salam leh philhtu silo hen, zûltu chu a thilti Pathian nih mal a sâwm lai. ²⁶ Âuzawng phung thu sunhsaktu ah a ruat hen, a lei a veng kho ṭung lo chun amah â perpet mi asi, chu hâwi minung nih phung thu ah a sawnh dân chu zeikhawm asi lo. ²⁷ Hi hi Pa Pathian nih phung thu ah sawnh dân thenhlimh leh sawnh dân dik dingah a ngaih mi chu asi; ngâkṭah leh numei tla nih hamh an tuar liauah zauhkhenh leh laikulh nâwmtâm buaih lo hen um hi.

¹ Ka unau tla, kan Lalpa Jisu Krist rokualnâk Lalpa chu lungtu nan si ruangah mi thliar bîk nei lah u. ² Nanna pumhnâk in ah, ngûn pizung bunh hen, puan dawh tak aih hen mi hawng lût sele, chun, mi ngâkṭah puan sia tak aih hen hawng bâk sele, ³ puan dawh tak â aih mi chu sunhsak le, a sinah, "Nang hi mun ṭha ah hin to rawh," nan ti, chun mi ngâkṭah sinah chun, "Nang chu khin ah dîr le," asi lo chun, "Ka tonâk kiangah ṭuang ah to rawh," nan ti asi chun, ⁴ nan thinlung ah thliarnâk nei hen, dawnruatnâk sual put hen, simsâwitu nan si awt lo ma? ⁵ Unau tla, ngâinik u, Pathian nih chun hi laikulh ah mipâm tla chu lungnâk nei tam ding leh amah dâwttu tla sinah Ram a tiamh mi luahtu ding hen a thîm na asi. ⁶ Nannih lam nih chun mi ngâkṭah chu nan mualphotir dauh le, mi nei tla chu an nehsawh natu leh lâirêlnâk ah an nûk natu an silo ma? ⁷ Pathian nih a nan pêk na mi min ṭha sâwitu an si. ⁸ Pathian lasui thu nih, "Nangmah na dâwt hâwi hen na zâwlbâwm tla na dâwt ding asi," ti mi Pathian Ram dân nan zawt chun nan ti dik asi. ⁹ sikhawmsele, mi thliar bîk nan nei chun nan sual asi, dân râwktu hâwi hen dân nih an mawhtir na asi. ¹⁰ Âuzawng nih dân pakhattê a buar chun dân zawzawng a buar asi. ¹¹ "Ṭângdang pawmtâk lah," ti mi nih chun, "Mi thah lah," a ti ber asi. Chuvachun, ṭângdang pawmtâk lah khawm le, mi na thah ṭung chun dân râwktu na si rerêng rawh asi. ¹² Churuangah, thawsuaknâk dân hen lâirêl piak a um ding mi tla hâwi hen thu sim ule, thil khawm ti tâwn u. ¹³ Khua a ruat lo mi minung chu Pathian nih lâi a rêl tikah a tlûnah khua a ruat bâk awt lo, sikhawmsele, khuaruatnâk nih chun lâirêtnâk a neh. ¹⁴ Ka unau tla, mi nih, "Lungnâk ka nei," ti khawmsele, thilti a nei ṭung lo chun zei a ṭhavak lai? Chu hâwi lungnâk nih chun amah chu ruang a suah kho lai ma? ¹⁵ Unaupa mawh, unaunu mawh, nipuan lo hen, an nisiar buh ei ding neilo sele, ¹⁶ chun, nan lakah âu nih mawh, an sinah, "Lungngam tak hen kal ule, lum tak hen leh khim tak hen um u," ti ule, nungnâk rangah thil herh nan pêk ṭung lo chun zei me a ṭhavak lai? ¹⁷ Chu hâwi lungnâk thilti neilo mi chu a thi asi. ¹⁸ Sikhawinsele, mi âu nih mawh, "Nangnih lungnâk na nei le, kei nih thilti ka nei asi, na lungnâk chu na thilti tel lo hen, hawng ka zauhtir rawh, chun kei nih ka thilti hen ka lungnâk chu ka nan zauhtir lai. ¹⁹ Pathian chu pakhat asi ti na lung mu? A ṭha, khuri tla khawm nih an lung le, lâu hen an thir tâwn," a ti lai. ²⁰ Mi â, thilti tel lo hen lungnâk ko chu zeikhawm asi lo ti na theih duh ma? ²¹ Hawng kan thlâktu Abraham nih chun a fapa Isak chu mâichâm tlûnah a ap liau khan thilti ruangah Pathian lakah mi dik asi phah lo ma? ²² A lungnâk leh a thilti hen munkhat hen a ṭuan le, chun, thilti ruangah a lungnâk chu a rangtling rawh ti na theih. ²³ Pathian lasui thu nih, "Abraham nih chun Pathian a lung le, chu a lungnâk ruangah Pathian nih mi rep ah a ruat," ti mi kha a dik asi. Abraham chu Pathian hawipa ah siam hen a um asi. ²⁴ Mi nih Pathian sinah mawhlonâk â ting tâwn mi chu lungnâk ruang lâwng silo hen, thilti ruang khawmah asi ti nan theih asi. ²⁵ Chu hâwi ber hen, Rahab â zuar mi nunau khawm nih khan, Israel mifial tla a lawmh na le, lampi dang lei hen a tlungtir na liau khan thilti ruangah mawh lo hen a um asi lo mazei? ²⁶ Thlarau tel lo hen taksa chu thi asi, chu hâwi ber hen thilti tel lo hen lungnâk khawm chu thi asi.

¹ Ka unau tla, nan lakah mi tamtak hi, sîntirtu ah um lah u, kannih sîntirtu tla nih lâirêlnâk fâk khun midang ngâk hen fâk kan tawng lai ti nan theih. ² Kan ektê hen kan sual tâwn. Mi, a thusim ah palh dahlo mi chu mi rangtling asi, a taksa pum khawm vêng kho mi asi. ³ Kan thu ngâi ding hen rang kâ ah thîr kan barh chun kan duhnâk lei zawngah kan kaltir kho na rawh. ⁴ Asi lo leh, lawng khi ruat nik u, lawng hi a lian thlo le, thli fâk tak nih ranh hen a um tâwn narêng hen a hertu nih chun a kaltir duhnâk lei zawngah a hernâk mêtê hen a her tâwn. ⁵ Chu hâwi ber hen lei khawm hi taksa ṭeng mêtê asi le, thungâi â khâwng tâwn. Mei chî tê nih thingmun a khangh fâk zia hi ruat nik u! ⁶ Chun, lei hi mei chî tê hâwi asi. Hi hi laikulh mei asi, chu nih chun taksa pum hi a nawmh le, kan nunchan a râwk le, rêpmun mei nih a khangh mi asi. ⁷ Minung tla, ramsa tla, vâ tla, vâkrit tla leh ngâ chi kip tla ngamtir kho an si. ⁸ Sikhawmsele, lei hi âukhawm nih an vêng kho lo asi, thihnâk tûr hen khat, sual vêng kho lo mi chu asi, ⁹ chu hen chun kan Lalpa leh Pa chu kan sawr tâwn, chu ber hen chun Pathian hâwi hen siam mi minung tla chu hawlhsiat kan barh tâwn, ¹⁰ chu lîlâ thawk hen sawrnâk leh hawlhsiat barhnâk a suak tâwn. Ka unau tla, chu hâwi ding asi lo. ¹¹ Tî nâ pakhat thawk hen tî thâw leh thâwlo a suak tâwn mazei? ¹² Ka unau tla, theipi kûng ah oliv a rah kho lo, grep zûn ah theipi a rah kho lo, tî al nih tî al lo a suah kho ber lo. ¹³ Nan lakah âu me fing hen thu a theihthiam kho mi um? Dawnhkhonâk leh finghnâk hen, a thil ṭha ti hen a umdân ṭha hen zauhtir seh. ¹⁴ Sikhawmsele, nan thinlung ah ṭhatlonâk leh nahsuahnâk leh mah kawngkâ cho ruat mi nan si chun a zûm lah u, thudik do hen âwkrâwl sim lah u. ¹⁵ Chu hâwi mi finghnâk chu vân lei thawk hen a suak mi asi lo le, laikulh leh taksa leh khurî thawk hen mi asi dauh. ¹⁶ Nahsuahnâk leh mah kawngkâ cho ruatnâk a umnâk ah chun nawknâk leh sualnâk chi kip a um tâwn. ¹⁷ Sikhawmsele, tlûnlei thawk hen a hawng suak mi finghnâk lam chu, a masachem hen a thenhlimh le, chu nûnah chun remnâk a duh, a nunnêm le, a kawmh a nuam le, zângfahnâk leh thil ṭha ti hen a khat le, thlei bîk a nei lo le, a perpê lo asi. ¹⁸ Remnâk siamtu nih remnâk chi a tuh mi chu a rangah repnâk asi.

¹ Nan lakah donâk leh elnâk tla hi a zei thawk hen a hawng suak mi me si? Nan taksa ṭeng lakah donâk siam tâwntu chu nan duhnâk thawk hen a hawng suak mi si lo mazei? ² Thil tla nan duh le, nan nei kho lo, churawhchun thah ding nan awt, thil tla nan ngarh le, sikhawmsele nan nei kim lo, churawhchun nanna el le, nanna do, Pathian rangah nan deih lo ruangah thu nan duh mi chu nan tawng lo. ³ Chun, nan deih le, nan deih diklo ruangah nan tawng lo, mah nuamsabut rangah mang ding hen nan awt. ⁴ Nannih mi zumhkâilo tla, laikulh hâwikawmh sinâk hi Pathian mêlma asi ti nan theih lo ma? Âuzawng laikulh hâwikawmh si a duh mi vial chu Pathian mêlma ah â siam tâwn asi. ⁵ Asi lo leh, Thlarau kanmah lakah a um chun thîk rê hen hawng kan duh asi ti hi, Pathian lasui thu nih sim salam hen ma nan ruat? ⁶ Sikhawmsele, zângfahnâk tam khun Pathian nih a pêk tâwn, churuangah Pathian lasui thu nih, "Pathian nih mi â zûm mi tla a do le, â nâutir mi chu zângfahnâk a pêk," a ti asi. ⁷ Churuangah, Pathian thu thu hen um u. Diabol do ule, chun an tektâk na lai. ⁸ Pathian naih u, chun anih nih a nan naih na lai. Misual tla, nan kut tla ṭâwl u, mi perpê tla, nan thinlung thenhlimhtir u, ⁹ ngaihsia u, râk u, ṭap u, nan nihnâk chu ṭapnâk ah a chang seh, nan lâwptlonâk chu zûrnâk ah a chang seh. ¹⁰ Lalpa mitmuh ah a nâutir u, chun a nan chawnglawmh na lai. ¹¹ Ka unau tla, pakhat leh pakhat a sâwi tawnh lah u. Âuzawng a unau sâwitu mawh, simsiattu chu Dân a simsiat hen a sâwi asi. Dân na simsiat chun Dân zâwttu na si lo le, a sâwitu na si dauh asi. ¹² Dân pêktu leh lâirêltu chu Pathian pakhat cho asi. Amah cho nih ruang a suah kho hen, râwk khawm a râwk kho asi. Na unau tla lâirêl piaktu ding hen âu me na rêl? ¹³ Tuah ngâinik u, ’Tusûn ah mawh thâi ah mawh, zei khuapi ah mawh kan va kal lai le, chunah chun kum khat kan va râu lai le, tangka cherkhet tawng ding hen saw kan va leh lai," titu tla, ¹⁴ thâituan ah nan nungnâk thu zei hâwi hen me a hawng um awt ti nan theih lo. Sûm sâwtlotê a hawng lang le, a tlâu nawlh mi hâwi nan si ruangah. ¹⁵ Chun, "Lalpa nih rem a ti chun kan dam lai le, chu chu, kha kha kan ti lai," nan ti ding asi. ¹⁶ Sikhawmsele, tuah nanna zûm hen nanna khâwng, chubang khâwngnâk zawzawng chu sual asi. ¹⁷ Churuangah, âuzawng thil ṭha ti ding theih ko hen tilo chu sual asi.

¹ Chun, tuah nannih mi nei tla, ngâi u! Nan tlûnah hamhnâk a hawng tlung ding mi ruangah chun ṭap ule, râk chiam u! ² Nan neih tla â râwk le, nan nipuan tla rûlchawn nih a ei dih rawh. ³ Nan ngûn leh tangka tla a êk ver rawh le, a êk mi chu nan mawh ti theihnâk asi lai le, nan taksa chu mei kâng hâwi hen a ei hep lai. Ni dawnghnâk leiah chun neih nan khawng asi. ⁴ Nan lo ah lawh nan lâk mi a man nan pêk lo mi tla vûirâmnâk leh fang pumhtu tla âu hâu chu zeizawng tikho Lalpa Pathian nâ nih a theih. ⁵ Tual ah hin nuamchên hen nan um le, lâwptlo tak hen nanna siam le, thah ni ding rangah bit tak hen nanna châwm rawh. ⁶ Mi rep chu nan mawhtir le, nan thah, chun anih nih chun an do na lo. ⁷ Chun, ka unau tla, Lalpa hawng kal lân lo felfê tak hen um u, lo dâwngpu nih chun ruah masa leh madungchem chu a tawng lân lo felfê tak hen thlâi rah sung tak chu a ngâk tâwn. ⁸ Chun, nannih khawm felfê tak hen um u. Lungnâk bir tak nei ule, Lalpa hawng kalnâk ni chu a nâi rawh. ⁹ Unau tla, Pathian nih lâi an rêl piak na lo ding hen pakhat leh pakhat a sâwi tawnh lah u. Lâirêltu chu a nâi le, hawng kal ding hen tîm chia hen a um. ¹⁰ Unau tla, khuavâng, Lalpa min hen thusimtu tla theihkumza u, tuarkhonâk leh felfênâk thu ah zûnzauhnâk ah mang na u. ¹¹ Tuar khotu tla chu mi thawsuak kan ti na. Job felfê zia chu nan theih, Lalpa nih a dawnghnâk ah a ti zia khawm kha nan theih, Lalpa chu siherhnâk leh khuaruatnâk hen a khat zia khawm kha. ¹² Sikhawmsele, ka unau tla, thil zeizawng ah thu nanna tiam liauah siat tham lah u. Tual leh vân min sim hen mawh, thil dang min rerêng sim hen khawm siat tham lah u. Asi mi chu si ko seh, asi lo mi chu si lo ko seh, chu lo chun Pathian lâirêl hen nan um lai. ¹³ Nan lakah a lawksawng mi an um ma? Thlacham seh. Anna lâwm mi an um ma? Sawrnâk la sak seh. ¹⁴ Nan lakah damlo an um ma? Kawhmi Upa kawh sele, anih nih Lalpa min hen sariak thuh hen thlacham seh. ¹⁵ Chun, lungnâk hen thlachamnâk nih chun damlo chu a damh lai le, Lalpa nih a chaktir nawlh lai le, a thilsual ti tla khawm ngaihdam asi lai. ¹⁶ Chun, damh hen nan um khonâk ding hen, nan sual tla thutluang a vawr tawnh ule, thla a cham piak tawnh u, mi rep thlachamnâk nih chun thil fâk tak ati tâwn. ¹⁷ Elija chu kanmah hâwi minung asi, anih nih chun ruah sûr lonâk ding hen semsêngâi tak hen thla a cham le, kum thum leh thla ruk kar ruah a sûr lo. ¹⁸ Chun, thla a cham nawlh le, vân nih ruah a sûrtir le, tual nih thlai rah tla a suah rawh. ¹⁹ Ka unau tla, nan lakah âumawh, thudik thawk hen vâi sele, chun âu nih mawh hawng kîrtir nawlh sele, ²⁰ âuzawng misual lampi a vâinâk thawk hen kîrtir nawlhtu chu thihnâk ah thawk hen a thlarau ruang a suah lai le, sual tamtak ngaihdamnâk a siam piak asi ti a theih seh.