HEBRAI

HEBRAI

¹ A lânah Pathian nih kan thlâktu tla sinah vei tamtak leh kâng tamtak hen khuavâng tla mang hen thu a sim le, ² sikhawmsele ni dawngh lei tla ah chun a Fapa mang hen kan sinah thu a sim. Chu a Fapa chu zeizawng ah rotingtu ah a siam; chu nih chun laikulh khawm hi a siam. ³ Amah chu Pathian rokualnâk hen a chêu le, amah chu Pathian tak banghnâk neitu asi, a thiltikhonâk hen laikulh chu dirh asi. Minung tla sual a thenhlimhhir nûnah Chungnungchem Thiltikhonâk Pathian vawrhlei ah vân ah a to rawh. ⁴ Pathian nih a min khawm anmah tla ngâk hen rokual dauhnâk a pêk hâwi hen Fapa chu vânmifial tla ngâk hen rokual dauh hen a siam. ⁵ Vânmifial tla lakah âu sinah me hi bang thu hi a sim dah tâwn: "Nang lam chu ka Fapa na si, tusûn hin kei na Pa ka si,’ ti mi leh, "Kei a Pa ka si lai le, anih chu ka Fapa asi lai," ti hi. ⁶ Chun, Pathian nih a Fa tîr chu laikulh ah a hawng fial liauah, a sin khawmah, "Pathian vânmifial tla zawzawng nih amah chu sawnh seh, " a ti. ⁷ Chun, vânmifial tla leikâng thu ah chun hi hi a sim asi: "Pathian nih a vânmifial tla chu thil ah a changtir na, a rianṭuantu tla khawm meialh ah a changtir na tâwn." ⁸ Fapa leikâng thu ah lam chun Pathian nih, "Aw Pathian, na laltophah chu zungzâl hen a um ding hen asi, diknâk hen na ram tlûnah lâi na rêl. ⁹ Diknâk chu na duh le, diklonâk chu na hua. Churuangah Pathian, na Pathian nih chun, Na hâwi tla ngâk hen chawnglawmhnâk rokual dauh a nan pêk," ti hen a sim. ¹⁰ "Nang, Lalpa, a tîrah tual na siam le, vân tla khawm nangmah kut hen na siam. ¹¹ Chubang tla chu an vei teh lai le, nang lam chu um kumza ding na si, chun, chubang tla chu nipuan hâwi hen a li teh lai. ¹² Kawrdawh hâwi hen na thlep lai le, nipuan hâwi hen na dangtir lai. Nang lam chu na mun kumza, na san khawm a dawng lai loh," a ti. ¹³ Sikhawmsele, vânmifial tla lakah âu leikâng thu me hi hi a sim dah tâwn: "Na mêlma tla na kezaphah tangah ka siah lân lo chu ka vawrhlei ah to rawh," ti hen. ¹⁴ Vânmifial tla chu zei an si ne? Annih tla chu Thlarau ver Pathian rianṭuantu, ruangsuahnâk tawngtu ding mi tla sinah ṭangpi ding hen fial an si.

¹ Churuangah, nâ hen kan theih mi tla kha semsêngâi tak hen kan sunhsak khun ding asi, chu lo chun kan vei sual lebang lai. ² Vânmifial tla mang hen thu sim kha a dik asi ti a zauhtir asi, chun âuzawng chu chu zûllotu mawh zâwtlotu chu rêpnâk a tawng ding hâwi hen a tawng vima tâwn. ³ Chu tluk rak ruangsuahnâk rokual chu siarlo sele zeitin kan âwl kho zia lai? Chu ruangsuahnâk thu chu a tîrah amah Lalpa nih a phuang rawh le, a theihtu tla nih chun a dik asi ti hawng kan langhtir piak asi. ⁴ Pathian khawm nih singsiahnâk tla leh thilchê tla leh thiltikhonâk zeizawng theihpi na hen, amah duhzia hen Thlarau Thenhlimh thilpêk tla chu a ṭhen tâwn. ⁵ Laikulh a hawng um ding mi a thâwngthâng kan sim mi chu: Pathian nih vânmifial tla tangah chun a siah lo. ⁶ Pathian lasui thu zeimaw nâk ah hi bang thu hi sim asi lehlam: "Aw Pathian, minung hi zei me asi, na theihkumza tâwn le? Minung salam hi zei me asi na veh nget tâwn le? ⁷ Anih chu vânmifial tla ngâk hen nâu dauh hen na siam rih le, rokualnâk leh chawnglawmhnâk na pêk. ⁸ Na thilsiam zawzawng tlûnah hotu ah na siam," ti hen. Chu chu Pathian nih "thil zeizawng tlûnah hotu ah a siam," tinâk asi, hi nih hin zeizawng a uap sih ver asi. Sikhawmsele, tuah thil zeizawng tlûnah minung nih lâi a rêl mi lam chu kan muh lo rih. ⁹ Sikhawmsele, Jisu, vânmifial tla ngâk hen niam dauh rih hen siam mi chu, thihnâk tuar ruangah rokualnâk leh chawnglawmhnâk khuhtir hen kan muh rawh asi. Pathian zângfahnâk zârah mi zawzawng rangah thih piak na ding hen. ¹⁰ Pathian thil zeizawng siamtu leh kiltu nih chun fa tamtak a rokualnâk ting ding hen a hawng put kim na ding hen a tuarnâk ruangah Jisu siam rangtling chu a dik asi. Jisu chu ruangsuahnâk ding hen anmah tla rui natu pakhat asi ruangah. ¹¹ Thenhlimhtirtu leh thenhlimhtir mi tla chu an ektê hen Pa Pakhat ah suak an si ruangah Jisu nih chun annih tla chu unau tla ti a ningzak loh. ¹² "Ka unau tla sinah thu ka sim lai le, anna pûm mi tla nâwng ah chun la hen ka nan sawr lai," ti hen a sim hâwi hen. ¹³ Chun, "Pathian lakah ka lungnâk ka ngauh lai," a ti nawlh. Chun, "Hinah kei leh Pathian nih a ka pêk mi ngâksia tla hi," a ti nawlh fâwn. ¹⁴ Chun, ngâksia tla hi taksa leh thisen nei mi tla an si ruangah Jisu ngelchel khawm anmah hâwi minung taksa put asi bâk. A thihnâk ruangah ¹⁵ thihnâk tlûnah thuneitu Diabol chu a veih khonâk ding leh thih ṭih ruangah dam sungah sal si mi tla chu a suah kho na nâk ding hen. ¹⁶ A ṭangpi na mi chu vânmifial an silo le, "Abraham thlâk tla an si, a ṭangpi na tâwn mi chu," ti hen Pathian lasui thu nih a sim mi hâwi hen khan. ¹⁷ Chun, mi tla rangah thutluangvawrnâk siam ding hen Pathian lei thu tla lakah bâwlpu lalchem siherhnâk nei kho mi leh zumhkâi tak asi khonâk ding hen zeizawng ah a unau tla hâwi hen a hawng um mi chu a rangah a herh rerêng asi. ¹⁸ Amah tak nih lêmnâk tawng hen a tuar rawh ruangah lêmnâk an tawng mi tla chu a ṭangpi na kho asi.

¹ Pathian kawh bîk mi, Kristian ka unau tla Bâwlpu Lalchem si ding hen Pathian nih a fial mi, kan zumh mi Jisu chu zauhnik u! ² Pathian in ah Mosi chu a rianṭuan ah zumh a kâi hâwi hen, Jisu chu a ruattu Pathian rianṭuan ah zumh a kâi asi. ³ In saktu chu in ngâk hen zah a kâi dauh hâwi hen Jisu chu Mosi ngâk hen a rokual dauh asi. ⁴ In kip hi dirhtu an nei chiau le, zeizawng dirhtu lam chu Pathian asi. ⁵ Pathian in ah Mosi chu to-aw hâwi hen zumh a kâi le, Pathian nih mâilei ah a sim ding mi thil tla thusimtu asi. ⁶ Krist chu Pathian in ah thuneitu fapa asi hâwi hen zumh a kâi asi, kan lungum mi lakah kan râlṭhatnâk leh kan lungnâk bir tak hen kan tleih thlir chun Pathian in kan si. ⁷ Chun, Thlarau Thenhlimh nih, "Tusûn hin a aw-hâu nan theih chun, ⁸ ramkaro ah Pathian lakah nan hel le, nan nik chiam hâwi hen khan nan thinlung changtir lah u. ⁹ Chunah chun Thlâktu tla nih, kum sâwmli sung ka thilti muh ko hen, an ka lêm le, an ka nik," Pathian nih a ti. ¹⁰ Churuangah, chu minung tla tlûnah ka rothawk rawh, zumh an kâi lo kumza le, ka thupêk tla khawm an êl. ¹¹ Churawhchun ka rothawk le, thu ka tiamh na; ’Dinhnâk ka pêk na mi ram ah an lût rîlmâl lai loh,’ " ti hen. ¹² Unau tla, a thiamthih u, chu lo chun Pathian nung chu bângtâk ding hen nan lakah âu sungah mawh lunglonâk thinlung sual a hawng um lebang lai. ¹³ Pathian lasui thu nih, ’Tusûn an ti sung hin, nisiar hen a fawrh tawnh u. Chu lo chun, nan lakah mi âumawh sual perpetnâk ah lungkhungtir hen nan um sual lebang lai, ti hen kan sinah a mang asi. ¹⁴ A bul ah lungnâk kan nei mi kha a dawngh tiang hen tleih thlirtu kan si chun Krist tingpitu tla kan hawng si. ¹⁵ Pathian lasui thu nih, "Tusûn ah a aw-hâu nan theih chun Pathian lakah an hel liau mi hâwi khan, nan thinlung khauhtir lah u, ti hen a sim. ¹⁶ Asi chun, âu tla nih me Pathian aw-hâu theih ko na hen a lakah heltu tla kha? Aigupta ram thawk hen Mosi nih a suakpi na mi zawzawng kha an silo mazei? ¹⁷ Chun, âu tlûnah me kum sâwmli sung a lungsilo mi kha? Mi zapi thilsual titu an ruak ramkaro ah a ril phut mi tla tlûnah khan asi lo mazei? ¹⁸ Chun, ê-aw ngâilo tla sinah cho lo chun âu sinah me a dinhnâk ah lût lo ding hen siatsirh hen Pathian nih a tiamh? ¹⁹ Chum, lunglonâk ruangah an lût kho lo rawh asi ti kan theih.

¹ Churuangah, kan ṭih ding asi, chu lo chun Pathian dinhnâk ah lûtnâk ding thutiam um ko hen, nan lakah âumawh a dinhnâk ah lût kho lo hen nan um lebang lai. ² Thâwngthâng Ṭha an sinah sim asi hâwi hen kan sin khawmah sim asi. Sikhawmsele, an thu theih nih chun anmah tla a ṭhatvaktir lêm lo, an thu theih chu an lung tak lo ruangah. ³ Kannih lung rawh mi tla hi chu lût hen Pathian sinah kanna dîn asi. "Ka thinthawk le, ka siatsirh hâwi khan ka sinah lût hen anna dîn lai lo," a ti hâwi khan. Laikulh siam tîr thawk hen a rian tla chu ṭuan thluh rawh khawmsele ti thu hi a sim asi. ⁴ Ni sarih ni thu hi Pathian lasui thu nih zei mun ah mawh a sim asi: "A ni sarih ni ah chun Pathian nih a rianṭuan zawzawng a dinhtâk rawh," ti hen. ⁵ Chun, hi thu ber hi, "Ka dinhnâk ah chun an lût lai loh," a ti nawlh. ⁶ Chun, zeimaw mi chu Pathian sinah dinhnâk ah lût ding mi an um. Thâwngthâng Ṭha thusim theih masatu tla chu an lung lo ruangah Pathian sinah lût hen anna dîn lo. ⁷ Kum tamtak nûnah David lakah a sim mi "Tusûn," ti hen ni dang a ruat nawlh asi. Pathian lasui thu nih, "Tusûn hin a-aw nan theih chun, nan thinlung changtir lah u," ti hen. ⁸ Josua nih chun annih tla chu Pathian dinhnâk ah a kalpi na rawh asi, chun Pathian nih chu nûnah chun ni dang thu a sim lai lo rawh. ⁹ Chun, Pathian mi tla rangah chun ni sarih ni Pathian dinhnâk hâwi kha dinhnâk a um nget rih. ¹⁰ Âuzawng lût hen Pathian sinah â dîn mi chu Pathian nih a rianṭuan a dinhtâk hâwi hen a rianṭuan a dinhtâk. ¹¹ Kan lakah âukhawm ê-aw ngâilo ruangah an lût kho lo phah mi hâwi kan si lonâk ding hen Pathian sinah lût leh a dîn ding hen kan chelh ri kan suah lai. ¹² Pathian thu hi a nung le, thil a ti kho le, nâmsâu hâr nih nei um mi ngâk hen a hâr dauh le, nungnâk leh thlarau liahchân leh thlik phel dip rê hen a tuk kho le, thinlung ah dawn mi leh tum mi tla lakah thu a nei chawlh kho asi. ¹³ Thilsiam Pathian mitmuh ah a lang lo mi rerêng a um loh. A thilsiam zawzawng chu a mitmuh ah langh leh pho hen a um. Kanmah ngelchel nih kan thilti zia kan phuang ngelchel ding mi chu amah sinah asi. ¹⁴ Chun, vân ah kal rawh hen, bâwlpu lalchem rokual Jisu Pathian Fapa chu kan nei ruangah kan thu lung hi kan pawm thlir lai. ¹⁵ Bâwlpu lalchem kan chak lo zia hawng kan theihpi phanh lo mi neitu kan si lo, kanmah hâwi hen thu zeizawng ah lêmnâk tawng rawh mi, sual lam chu sual lo mi, neitu kan si dauh. ¹⁶ Chun, khuaruatnâk kan tawng khonâk ding leh bawmh kan herh tikah ṭangpinâk leh zângfahnâk kan tawng khonâk ding hen zângfahnâk laltophah chu râlṭha tak hen kan naih lai.

¹ Bâwlpu lalchem vial chu mi zapi tla lakah mi thîm an si, chun an ruangrûl ah Pathian sawnh ding hen ruat asi. Anih nih chun sual tla rangah thilpêk tla leh bâwlnâk tla a ap tâwn. ² Amah khawm zeizawng ah mi chak lo asi ruangah zeikhawm theihlo tla leh mi diklo tla sinah â dawnhkho tâwn asi. ³ Chun, chubang ruangah chun mi rangah a ap piak na hâwi hen mah rang khawmah sual tla ruangah ap bâk lo kho asi loh. ⁴ Chun, âukhawm nih chu chawnglawmhnâk chu mah lakah anna ngaih loh, Aron hâwi hen Pathian kawh mi an si lêm lo chun. ⁵ Chu hâwi ber hen, Krist khawm chu bâwlpu Lalchem ah siam ding hen mah â rokualtir loh. Chu ngâk chun Pathian nih, "Nang lam chu ka Fapa na si, tusûn hin na Pa ka si," a ti. ⁶ "Nang lam chu Melkizedek umdân hâwi hen, Zungzâl bâwlpu na si lai," ti hen, mun dangah a sim hâwi ber khan. ⁷ Jisu chu tual ah a um liau tla ah khan thihnâk lakah amah sansuah khotu Pathian sinah fâk tak hen âu leh mitthli tlâ rê bû hen thlachamnâk leh ngiarnâk tla a ap le, nâu tak hen â pêknâk ruangah Pathian nih a ngâi piak. ⁸ Pathian Fapa si menza khawmsele a thil tuar tla lakah ê-aw ngâi â sîn. ⁹ Chun, rangtling tak hen siam a hawng si rawh chun ê-aw ngâitu zawzawng rangah zungzâl ruangsuahnâk phûrpi a hawng si rawh. ¹⁰ Chun, Melkizedek hâwitê hen bâwlpu lalchem si ding hen Pathian nih a phuang. ¹¹ Chu thâwngthâng lakah chun thu tamtak sim ding kan nei, nan theih lo tuktarâi ruangah nan sinah simhfiang a har asi. ¹² A tik thu ruat hen sîntirtu si rawh ding hen nan a dawh le, Pathian thu phûr dawmhtîrnâk sîntir nan herh nget rih. Buh rum silo hen nûk din herh nget mi hâwi nan si rih. ¹³ Nûk hâng rinh mi vial chu a dik leh diklo mi an theih lo, fasêm an si ruangah. ¹⁴ Buh rum lam chu upa sia leh ṭha theih ding hen ei â zawngh mi rangah asi.

¹ Krist thu dawmhtîrnâk sim lo rawh hen, upat lei kan fûk lai rawh, rianṭuannâk mangtlâklo tla leh Pathian leikângah lungnâk tla, ² baptisma tla leh kut ngauh leh mithi thawknawlhnâk leh zungzâl lâirêlnâk leikâng sîntirnâk tla lungphûm chu phûm nawlh lo rawh hen. ³ Pathian nih rem a ti chun chu chu ka ti ngelchel lai. Mâilei kan fûk lai! ⁴ Chun, âuzawng a tlû rawh mi tla chu rim nawlh ding hen zeitin kîrtir nawlh kho an si lai? Veikhat chu thinlung fiangtir hen an um rawh. Chun, van thilpêk tem rawh hen Thlarau Thenhlimh vauh mi anna ting. ⁵ Pathian thu chu a ṭha ti theihfiang hen thiltikhonâk tik a um ding mi tla an theih, ⁶ chun chu nûnah chun an tlû rawh! Chubang hâwi mi tla chu rim nawlh ding hen kîrtir nawlh kho an si loh, Pathian Fapa chu Kraws ah khenhbêk nawlh leh zatlâng lakah an mualphoh ruangah. ⁷ Tual nih a tlûnah ruahtî a tlâ tâwn mi chu a dâwp tikah ṭuantu tla rangah thlâi herh tak a suah piak tâwn, chu chu Pathian nih mal a sâwm mi asi. ⁸ Sikhawmsele, ling tla leh bua tla a suah chun zeirang khawmah a tlâktlâi loh, Pathian siatbarh ṭihnungkâi nâk ah a um le, chun mei hen duah asi lai. ⁹ Sikhawmsele, unau tla, hi hâwi hen sim menza khawmsele, nannih lam chu kan theihfiang na. Na ruangsuahnâk lakah mi malsâwmnâk ṭha dauh tla nanna ting ti kan theih asi. ¹⁰ Tuah nan ti liau hâwi hen, Kristian unau tla sinah Pathian min hen dâwtnâk ruangah nan ti mi leh nan ṭangpi na nâk tla chu philh ding hen Pathian chu mi replo asi loh. ¹¹ Sikhawmsele, a dawngh tiang hen lungumnâk rangtling tawng ding hen nan taimâk chuh dân hâwi khan taimâk suah chiau ule, thungâi ka nan duh na. ¹² Nanna dâithlanh ding ka nan duh na loh, a lung mi tla leh felfê mi tla leh Pathian thutiam anna ting rawh mi tla hâwi hen nan um ding hen ka nan duh dauh na. ¹³ Pathian nih Abraham sinah thu a tiamh liau khan ti ngelchel ding hen siatsirh hen thu a tiamh. Amah ngâk hen rokual dauh a um lo ruangah thu a tiamh liauah amah min sâl hen siat a sirh. ¹⁴ "Mal ka nan sâwm ngelchel lai le, na thlâk tla ka pungtir lai," ti hen a tiamh rawh. ¹⁵ Chun, felfê tak hen a tuar ver nûnah thutiam chu Abraham nih a tawng taktê. ¹⁶ Minung nih siat anna sirh chun anmah ngâk hen rokual dauh mi sâl hen siat anna sirh tâwn asi; anna êlnâk kip khawmah birhtirnâk ding hen siatsirh hi thu dawnghnâk asi tâwn. ¹⁷ Chun, Pathian nih a thutiam rotingtu ding tla sinah chun a thiltum a dangtir kho lo zia theihtir khun duh hen siatsirh hen a birhtir. ¹⁸ Thil panih a um: Pathian a âwkrâwl kho lo mi leh thlakthleng kho lo mi chu, Kannih a sinah himnâk tawngtu tla hi kan mâilei ah lungumnâk chu bir tak tleih thlir ding hen fâk tak hen fawrh kan si. ¹⁹ Kan, thinlung tla rangah thir cha-âi hâwi hen hi lungumnâk hi kan nei, chu chu himnâk leh diknâk asi, chun vân Pathian Biakin puanzar pîn leiah mun thenhlimh sung khet ah a lût. ²⁰ Chunah chun Jisu chu Melkizedek hâwi hen, zungzâl bâwlpu lalchem si rawh hen, kan ruangrûl ah mâitâwntu ah a lût rawh.

¹ Hi Melkizedek hi Salem lalchem asi le, Chungnungchem Pathian bâwlpu asi. Abraham chu râltuknâk ah lalchem tla thah hen a hawng kîr nawlh liauah Melkizedek nih a dawng le, mal a sâwm. ² Abraham nih thil zeizawng parâ lû ah pakhat a pêk. (Melkizedek min umzia pakhatnâk chu "Repnâk Lalchem," tinâk asi. Chun, a min umzia panihnâk ah chun, Salem lalchem asi ruangah, "Remnâk Lalchem" tinâk khawm asi.) ³ Melkizedek chu a pa khawm, a nu khawm, a thlâktu tla âukhawm, a suaknâk khawm, a thihnâk thu rerêng khawm rîn asi loh. Anih chu Pathian Fapa hâwi asi. Zungzâl hen bâwlpu asi kumza. ⁴ Churuangah, a rokual zia chu ruat nik u! Chun, chi thlâktu Abraham nih râltuknâk ah a lâk mi thil zawzawng parâ lû ah pakhat Melkizedek rangah a pêk. ⁵ Levi thlâk tla lakah bâwlpu rian tingtu zawng nih Dân hâwi hen Israel mi zapi lakah parâ lû ah pakhat lâk ding thu an tawng, chu chu anmah unau tla lakah asi, chu tla chu Abraham thlâk tla sin khawmah asi. ⁶ Melkizedek chu Levi chi thlâk silah khawmsele Abraham lakah parâ lû ah pakhat a lâk le, Pathian thutiam tla tingtu chu mal a sâwm rawh. ⁷ Thungâi tak chun malsâwmtu chu mal a sâwm mi ngâk hen a rokual dauh asi. ⁸ Bâwlpu tla leikâng thu lam chu a thi kho mi minung tla nih an lâk le, sikhawmsele Melkizedek lam chu Pathian lasui thu nih a sim hâwi hen a nung kumza mi nih parâ lû ah pakhat a lâk asi. ⁹ Chun, Abraham nih parâ lû ah pakhat a pêk liauah Levi parâ lû ah pakhat lâk tâwntu khawm nih a pêk bâk ti kho asi. ¹⁰ Levi chu a suak pal lo rih ruangah Melkizedek nih a dawng liauah anih chu a thlâktu Abraham nih thlâk ding hen a um ving rawh ti kho asi. ¹¹ Levi thlâk lakah bâwlpu sinâk dân hawi hen, Dân chu Israel mi zapi sinah pêk asi. Chun, tuah Levi thlâk bâwlpu tla rianṭuan chu rangtling mi si sele, Aron bâwlpu sinâk dân hâwi silo hen, Melkizedek bâwlpu sinâk dân hâwi hen bâwlpu dang hawng um ding zeikhawm a herh lai loh. ¹² Bâwlpu sinâk chu a hawng a dang rawh ruangah dân thu chu dangtir bâk a herh rerêng asi. ¹³ Chun, kan Lalpa, a thu an sim tâwn mi kha, phun dang mi asi; chun chu phun lakah mi âukhawm mâichâm ah an ṭuan dah loh. ¹⁴ Kan Lalpa chu Juda phun lakah a hawng suak ti fiang tak hen a lang; hi phun hen anna tlâinâk, bâwlpu leikâng thu ah, Mosi nih zei thu khawm a sim lo. ¹⁵ Chun Melkizedek hâwi hen bâwlpu dang, thupêk dân hawi hen siam si lo mi, ¹⁶ nungnâk thiltikhonâk dawngh neilo hâwi hen siam si dauh mi a hawng um awt chun kan thusim kha thungâi hen a fiang khun lai. ¹⁷ "Nang lam chu Melkizedek hâwi hen zungzâl bâwlpu na si lai," ti Pathian lasui thu nih a sim ruangah. ¹⁸ A chak lo leh a ṭhatvak lonâk ruangah thupêk li chu lawnh asi. ¹⁹ Dân thu nih chun zeikhawm a rangtlingtir lo dangâiah. Lungumnâk ṭha dauh, Pathian kan naih tâwnnâk hi lûtpi hen a hawng um sek lehlam. ²⁰ Chun, Pathian siatsirhnâk khawm a um. Midang tla bâwlpu an si liauah siatsirhnâk zeikhawm a um lo. ²¹ Sikhawmsele, siatsirhnâk leikâng thu ah a sinah, "Lalpa nih siat a sirh le, a thinlung a lêt lai loh: Zungzâl bâwlpu na si lai," a ti liau khan Jisu chu bâwlpu asi rawh. ²² Chu hâwi ber a dang dauh hen Jisu chu thudântuk ṭha dauh birhtirtu a hawng si rawh. ²³ Chun chu lakah chun anna dangnâk a um: bâwlpu tamtak an um le, an rianṭuan an zulhpeh kho lo; a san chu thihnâk ruangah asi. ²⁴ Jisu lam chu zungzâl um kumza mi asi le, a bâwlpu sinâk chu midang sinah pêk kho asi lo. ²⁵ Chun, amah lakah Pathian sinah hawng kal mi tla chu a dawngh tiang hen ruang a suah kho asi, anmah tla rangah thlacham piak hen zungzâl hen a nung kumza ruangah. ²⁶ Churuangah, Jisu kan pawiherh tla pêktu Bâwlpu Lalchem asi. Anih chu a thenhlimh asi amah lakah sualnâk leh mawhnâk a nei lo, misual tla lakah thawk hen â thlei le, vân tlûnlei ah lâk hen a um. ²⁷ Anih chu bâwlpu lalchem dang tla hâwi hen mah sual leh zapi tla sualnâk ruangah bâwlnâk nisiar ap a herh lo. Amah â pêk liau khan mi zawzawng rangah bâwlnâk veikhat ah a lîm rawh ruangah. ²⁸ Mosi dân nih chun bâwlpu lalchem si ding hen mi rangtlinglo tla a ruat le, Pathian lam nih chun dân nûnah a hawng kal mi, zungzâl rangtling hen siam mi Fapa chu a ruat asi.

¹ Chun, kan thusim tla lakah hin a pawiherh chem mi chu hi hi asi: ² Chu hawi bâwlpu lalchem, vân ah khin rokual chem mi laltophah vawrhlei ah to mi, mun thenhlimh chem leh sawnhnâk puanin tatak, minung siam silo mi, Lalpa sak mi lakah rianṭuantu kan nei ti hi. ³ Bâwlpu lalchem vial chu thilpêk leh bâwlnâk tla Pathian sinah ap ding hen ruat an si le, chun kan bâwlpu lalchem khawm nih hin zeimawh tal ap ding nei a herh asi. ⁴ Juda dân hâwi vima hen thilpêk aptu tla bâwlpu an hawng um masa ruangah tual ah hin hawng um sele chu bâwlpu asi lai loh. ⁵ Chubang tla nih chun vân thil tla a telê leh a thlapelê rian an ṭuan tâwn le, Mosi nih sawnhnâk puanin a sak awt liauah Pathian simh asi hâwi khan: "Tlâng ah zûnzauh ding mi a nan zauhtir hâwi khan zeizawng siam ding hen a thiamthih rawh," a ti kha. ⁶ Tuah lam chun thudântuk ṭha dauh thulanhtu asi hâwi vima hen rianṭuannâk ṭha dauh a hawng a ting rawh; chu thudântuk chu thutiam ṭha dauh lakah a birhtir asi. ⁷ Chu thudântuk masa chu sâwinâk um lo si sele panihnâk hi Pathian nih a ruat lo ding mi. ⁸ Anmah tla sâwi hen hi bang hi a sim ruangah, "Ni tla a hawng tlung awt rawh Lalpa nih a ti, chubang ni tla lakah chun Israel dâwngsung tla leh Juda dâwngsung tla sinah chun thudântuk thar ka siam lai. ⁹ Kut hen Aigupta ram thawk hen ka suakpi na liauah an thlâktu tla sinah thudântuk ka siam mi hâwi khan asi lai lo rawh; an sinah thudân ka tuk mi lakah zumh an kâi lo ruangah. anmah tla chu ngaihlo lêm ka thlâk na, Lalpa nih a ti. ¹⁰ Chubang tla nûnah chun Israel dâwngsung tla sinah thudântuk ka siam ding mi chu hi bang hi asi, Lalpa nih a ti. Hi nûn chun an thinlung ah ka thupêk tla ka siah lai le, an thinlung ah ka rîn ber lai le, chun, kei an Pathian ka si lai le, annih chu ka mi tla an si lai. ¹¹ A mêchem thawk hen a lianchem tiang hen an hawng ka theih ver awt rawh ruangah; mah ram ah mi leh mah khua ah mi nih Lalpa chu theih u, ti hen simh an herh lai lo rawh. ¹² An buarnâk tla lakah khua ka ruat lai le, an sual tla khawm ka theih kumza lai lo rawh," a ti. ¹³ Thudântuk thar ti hen a sim ruang khan, a masa mi chu a li rawh asi. Chun, a hawng li rawh mi vial chu a vei awt vima asi.

¹ Chun, thudântuk masa khawm nih khan Pathian sawnh dân tla leh laikulh ah sawnhnâk mun thenhlimh chu a nei. ² Sawnhnâk puanin an siam le, tawngtîr chem chu meichêu siahnâk, dawhkân tla, sang siahnâk tla asi, chu chu mun thenhlimh an ti. ³ Chun puanzâr panihnâk pîn leiah chun sawnhnâk puanin Mun Thenhlimh Chem an ti mi chu a um. ⁴ Chu lakah chun ngûn mâichâm rimthâw duahnâk leh thudântuk bâwm, ngûn hen luanh mi chu a um, chu thudântuk bâwm sungah chun manna ngûn bêl, Aron ṭhianṭhunh chawrh mi, thudântuk lungtlêp tla panih dân thu rînnâk a um. ⁵ A tlûnlei ah tlûnlei Pathian umnâk zauhtirnâk khuaruatnâk tophah sual ngaihdamnâk mun chu cherub nih a tlûnlei ah an thlâ an zarh. Sikhawmsele, tu lam chun zeizawng kim hen kan sim kho lai lo rih. ⁶ Chun, chubang thu tla chu siam a hawng si nûnah chun bâwlpu tla chu Pathian rianṭuan hen sawnhnâk puanin tawngtîr ah an lût kumza tâwn; ⁷ puanzâr panihnâk ah lam chun bâwlpu lalchem cho kum siar hen veikhat, thisen put hen a lût tâwn, chu chu mah rangah leh misual dang tla rangah a ap tâwn. ⁸ Thlarau Thenhlimh nih hi hi a theihtir le, sawnhnâk puanin tawngtir mi a um kar vial chu Mun Thenhlimh Chem ah lûtnâk lampi chu a lang lo rih, ti hi. ⁹ Chu chu tuliau hun zauhtirnâk asi. Chu hâwi vima hen, thilpêk leh bâwlnâk tla khawm an ap tâwn, chubang tla nih chun sia leh ṭha theihnâk leikângah chun a sawnhtu chu a rangtlingtir kho loh. ¹⁰ Chubang chu ei ding tla, din ding tla, ṭâwl ding dang dang hen Pathian nih thil zeizawng a siam nawlh lân karah lênglei dân rang cho ah mang an si. ¹¹ Sikhawmsele, Krist chu thil ṭha a um rawh mi tla lakah Bâwlpu Lalchem hâwi hen a hawng kal asi. A tuarnâk puanin chu a rokual hen a rangtling asi (kut hen sak mi asi loh, chu chu hi laikulh siam mi lakah mi asi loh tinâk asi), ¹² rokual leh rangtling dauh pal hen Mun Thenhlimh Chem ah mi zawzawng rangah veikhat a lût rawh, kêl tla leh chawpê tla thisen silo hen, amah thisen ruangah kan rangah zungzâl ruangsuahnâk â ting rawh. ¹³ Kêl leh chawchal tla thisen leh chawlâ dap, mi nâwmtâm tlûnah theh mi men nih taksa duhnâk sual a thenhlimhtir chun ¹⁴ zungzâl thlarau zârah Krist, simsâwinâk um lo mi bâwlnâk Pathian sinah a ap mi thisen nih chun Pathian nung rianṭuan ding hen kan sia leh ṭha theihnâk chu thilti a thi mi tla lakah chun a thenhlimh awt tuktarâi. ¹⁵ Chun, hi ruangah hin Krist chu thudântuk thar thulanhtu asi, Pathian nih a kawhmi tla chu Pathian nih a tiamh mi zungzâl thudântuk masa tangah buarnâk lakah mi tlanhnâk ding hen Jisu a hawng thi rawh ruangah. ¹⁶ Ro vuihnâk umnâk kipah ro vuihtu chu a thi rawh ti a lang fiang ding asi. ¹⁷ Mi a thih nûnah ro vuihnâk nih thu a nei tâwn, ro vuihtu a dam sung lam chun zeikhawm asi lo. ¹⁸ Chun, thudântuk masa khawm kha thisen lo hen a birhtir lo. ¹⁹ Dân thu hâwi vima hen thupêk vial chu Mosi nih mi zawzawng a simh na nûnah, "Hi hi Pathian nih nan sinah a pêk thlir mi thudântuk thisen asi hi," a ti. Chawfa leh kêl tla thisen chu tî hen, mul lasen hen, husawp hen a chawmh le, Dân lasuibu leh mi zawzawng khawm chu a theh na. ²¹ Chu hâwitê hen sawnhnâk puanin leh rianṭuannâk thuamthil zawzawng chu, chu hâwi ber hen thisen hen Mosi nih chun a theh fâwn. ²² Chun, Dân thu hâwi hen zeizawng thisen hen thenhlimhtir an si; thisen suah lo hen sual ngaihdamnâk rerêng a um loh. ²³ Chun, vân ah thil um mi tla hâwi chu chubang tla hen thenhlimhtir hen an um ding rêng asi. Vân lei thil tatak lam chu chu ngâk hen bâwlnâk ṭha dauh hen thenhlimhtir ding asi. ²⁴ Krist chu kut hen sak mi mun thenhlimh, a tak banghtu ah chun a lût lo le; tuah Pathian mâika ah kan ruangrûl ah dîr ding hen vân ngelchel ah a lût dauh rawh. ²⁵ Juda Bâwlpu Lalchem chu kum siar hen Mun Thenhlimh ah ran thisen put hen a lût le, sikhawmsele Krist lam chu mah va a pêk hen vei tamtak a lût lemang lo. ²⁶ Chu hâwi si lah sele tual tuah tîr thawk hen vei tamtak a tuar rawh ding asi; sikhawmsele, tuliau hun dawnghlei ah hin bâwlnâk ah va a mang chawlh hen sual veihnâk ding hen veikhat ah a hawng lang asi. ²⁷ Chun mikip rangah veikhat thih ruat asi, chu nûnah Pathian lâirêlnâk a um lai. ²⁸ Chu hâwi ber hen Krist khawm mi tamtak sual tla kalpi ding hen veikhat bâwlnâk ah â pêk rawh. Amah ngâktu tla chu ruangsuah na ding hen, sual bâwlnâk ding silo hen, a veinihnâk ah a hawng lang nawlh lai.

¹ Juda Dân chu thil ṭha a hawng um ding mi tak silo hen a thlapelê cho a nei ruangah kum siar hen bâwlnâk lîlâ ap kumza mi nih chun a hawng naihtu tla chu zei tik khawmah a rangtlingtir kho awt lo. ² Chu hâwi si lah sele, a sawnhtu tla chu veikhat ah thenhlimhtir chawlh hen, sual mah lakah a theihnâk tla an nei awt lo ruangah bâwl an bâng ving lai lo rawh ma? ³ Sikhawmsele, chubang bâwlnâk ah chun kum siar hen sual tla theih nawlhnâk a hawng um nget tâwn lehlam asi. ⁴ Chawchal tla leh kêl tla thisen hen chun sual tla veihtir kho asi loh. ⁵ Churuang chun, Krist chu laikulh ah a hawng kal liauah, "Bâwlnâk leh thil ap na duh lo le, ka rangah taksa na ka timhtuah piak dauh. ⁶ Pum duah thil ap leh sual rangah bâwlnâk tla lakah lâwmnâk rerêng na nei lo. ⁷ Churawhchun, kei nih, ’Aw Pathian, ngâinik, Dân lasuibu lakah ka thu rîn asi hâwi hen, na duhzia ti ding hen ka hawng kal,’ ka ti," a ti. ⁸ A tlûnah hin: "Bâwlnâk tla, thil ap tla, pum duah tla, sual rangah bawlnâk tla na duh lo le, chubang lakah chun lâwmnâk na nei lo," a ti le, chubang tla chu dân hâwi hen ap asi. ⁹ Churawhchun, "Aw Pathian, na duhzia ti ding hen hinah ka um a ti. Krist bâwlnâk kha a dirh khonâk ding hen bâwlnâk li chu a lâk ving rawh. ¹⁰ Pathian nih ti ding hen a duh mi hâwite hen Jisu Krist nih a ti ruangah amah taksa lakah mi zawzawng rangah veikhat â pêknâk nih chun sual lakah mi hawng kan thenhlimhtir asi. ¹¹ Chun, Juda bâwlpu kip nih nisiar rianṭuan hen, sual zei tik khawmah veih kho lo mi bâwlnâk tla ap kumza hen an dîr tâwn. ¹² Krist lam chu sual rangah zungzâl bâwlnâk pakhat cho a ap nûnah Pathian vawrhlei ah a to rawh. ¹³ Chunah chun Pathian nih a leido tla a kê tangah a siah na lân lo chu a ngâk kumza. ¹⁴ Thil ap pakhat nih chun sual lakah mi a thenhlimhtir na rawh mi chu zungzâl rangah a rangtlingtir na rawh. ¹⁵ Chun, Thlarau Thenhlimh khawm nih hawng kan theihtir fâwn. ¹⁶ A masachem hen: "Chubang ni tla nûnah chun an sinah thudân ka tuk ding mi chu hi hi asi, Lalpa nih a ti: An thinlung ah ka thupêk tla ka siah lai le, an dawnruatnâk tla ah ka rîn lai," ti hen a sim. ¹⁷ "An sual tla leh an buarnâk tla ka theihkumza lai lo rawh," a ti rawh. ¹⁸ Churuang chun, sual ngaihdam si rawh mi tla rang chun sual veihnâk ding hen bâwlnâk dang a herh lo rawh. ¹⁹ Unau tla, Jisu thihnâk ruangah mun thenhlimh chem ah kal khonâk kan nei. ²⁰ Jisu nih chun puanzâr chu pal hen--chu chu a taksa tinâk asi, lam thar leh nungnâk lampi hawng kan awng piak rawh. ²¹ Pathian dâwngsung lakah bâwlpu rokual tak kan nei rawh. ²² Kan thinlung ah sia leh ṭha theihnâk sual thiang rawh hen, kan taksa tla tî fîm lakah ṭâwl hen lungnâk rangtling nei hen, thinlung tak put hen Pathian kan naih lai. ²³ A thutiam zawt ding hen Pathian kan lung ruangah kan lungum mi thu chu bir tak hen kan tleih lai. ²⁴ Chun, dâwt leh thil ṭha leh a ṭangpi tawnh ding hen kanna ruat tawnh lai. ²⁵ Mi zeimaw mi nih pumhnâk an bângtâk hâwi hen kan um ding si loh. Chu ngâk chun, Lalpa Ni chu a nâi ti kan theih hen kanna fawrhtawnh khun lai. ²⁶ Thudik theihnâk rangtling chu kanna ting nûnah thilsual kan ti êu chun sual tla rangah bâwlnâk a um rîlmâl lai lo rawh. ²⁷ Lâirêlnâk ṭihnungkâi tak leh dotu tla khangh hepnâk thinthawknâk mei a um dauh lehlam lai. ²⁸ Mosi Dân siarlo mi chu theihtu panih pathum mawh thu hen, siherhnâk tel lo hen thah an si. ²⁹ Pathian Fapa zei siarlo hen, thudântuk thisen amah thenhlimhtirnâk chu thil salam a ruat hen zângfahnâk thlarau vûirâmtirtu tla chu zei hâwi tluk rêpnâk fâk dauh tuar tlâk si ding hen me nan ruat? ³⁰ "Phulam rerêng chu keimah nih ka lam lai le, keimah nih ka rulh lai," a ti mi leh, "Lalpa nih a mi tla chu lâi a rêl piak na lai," a ti mi khawm kan theih. ³¹ Pathian nung kut ah tlûk chu thil ṭihnungkâi tak asi! ³² Sikhawmsele, a lânah Pathian chêunâk hen chêutir a nan um nûnah tuarnâk fâk tak nan tuar liauah donâk nih a nan neh na lo mi kha theihkumza u. ³³ A zeimazâwn chun zauhnawmh leh hamhnâk khawm tuar hen zauhnuam ah siam hen nan um le, a zeimazâwn chun an nehsawh mi tla lakah nehsawh hen nan um bâk. ³⁴ Rêng a tlâ mi tla tuarnâk chu nanna ting bâk rawh; thil ṭha dauh um kumza ding mi chu nan nei ti theih hen nan thil an lâk piak na mi tla khawm lâwm tak hen nan tuar kho asi. ³⁵ Chun, lâwmman cherkhet tawng ding mi lakah nan lungnâk thlâu lah u. ³⁶ Pathian duhzia ti ding leh a thutiam chu nanna ting khonâk ding hen felfênâk nan herh asi. ³⁷ Pathian lasui thu nih a sim hâwi khan: Sâwtlotê ah a hawng kal ding mi chu a hawng kal awt, a tlâi lai lo rawh. ³⁸ Sikhawmsele, ka mi rep chu lungnâk hen a nung lai, dunglei ah a kîr lam chun amah lakah lâwmnâk rêng ka nei lai loh," a ti. ³⁹ Sikhawmsele, kannih lam chu vei ding hen dunglei kîr mi kan silo le, lungnâk nei hen ruangsuak mi kan si dauh.

¹ Chun, lungnâk hi thil muh lo rih mi lakah a um ngelchel asi ti lungumnâk leh theihnâk chu asi. ² Chu lakah chun tuan ah mi tla nih khan an lungnâk ruangah Pathian sawr an lawh. ³ Lungnâk hen laikulh hi Pathian thu hen siam asi rawh ti kan theih, chun thil muh kho mi tla chu muh kho lo thawk hen siam asi. ⁴ Lungnâk hen Abel nih chun Kain ngâk chun bâwlnâk ṭha dauh Pathian sinah a pêk; lungnâk ruangah Pathian nih a thilpêk tla a pawm piak le, mi rep asi phah. Chun, chu lungnâk ruang chun Abel nih thih nûnah thu a sim nget rih asi. ⁵ Lungnâk hen Enok kha thihnâk theihlo ding hen lâk ving hen a um le; chun, Pathian nih a lâk ving ruangah muh kho asi lo rawh; lâk ving hen a um lânah Pathian lawmhkâng mi asi ti Pathian thu nih chun a theihtir rêng asi. ⁶ Sikhawmsele, lungnâk lo hen âukhawm nih Pathian lawmhtir kho asi loh. Pathian sinah a hawng kal mi nih chun Pathian chu a um ti leh amah hâwltu tla sinah lâwmman pêk mang asi ti lung ding asi. ⁷ Lungnâk hen Noa chu thil a lang lo rih mi leikâng thu ah Pathian simhkannâk thu a ngâi le, Pathian thu zâwt hen a dâwngsung tla ruangsuaknâk ding hen lawng a sâi; chu nih chun laikulh chu a mawhtir rawh. Churuang chun, lungnâk ruangah repnâk chu Pathian thawk hen â ting rawh. ⁸ Abraham chu Pathian nih a kawh liau khan lungnâk hen Pathian nih pêk ding hen a tiamh mi ram leiah a suak le, a kalnâk lei ding khawm theihlo hen a suak le, a ram chu a mâk rawh. ⁹ Lungnâk hen ram tiamh ah khan mi ram ah châm mi hâwi cho hen a châm ko le, thutiam munkhat hen ro a tingpi ding mi Isak leh Jakob hen puanin ah an um. ¹⁰ Khuapi lungphûm nei mi, Pathian timhtuah leh siam mi chu Abraham nih a ngâk kumza dangâiah. ¹¹ Lungnâk hen Sari khawm nih a tiamhtu chu zumhkâi hen a ruat ruangah a tar nûnah fa pâwi khonâk â ting. ¹² Chun, Abraham chu thi khawmsele vân ah ârfi hâwi a tam hen, tisumsumriat kapah sep rêl châwklo hâwi hen an hawng suak rawh. ¹³ Chubang zawzawng tla chu lungnâk nei hen an thi rawh le, Pathian thil tiam tla chu ting lo hen; sikhawmsele chubang chu lât tak thawk hen an muh le, an lawmh na rawh, tual ah hin ram dang mi leh khualtlâwng salam mi an si ti anna theih. ¹⁴ Chubang tla nih chun anmah rang ding ram an hâwl ti a langhtir. ¹⁵ Chun, an suaktâk mi ram chu lungkham sele chu an kîr nawlhnâk ding a remkâng an tawng rawh ding asi. ¹⁶ Ram ṭha dauh, vân ram duh mi an hawng si le; Pathian nih an Pathian ti hen an kawh ding chu a ningzak loh, an rangah khuapi a timhtuah piak na rawh ruangah. ¹⁷ Lungnâk hen Abraham chu thutiam tla ting hen, "Isak lakah hin na thlâk tla an hawng suak lai," ti hen simh si menza khawmsele, ¹⁸ Pathian nik hen a um liauah a fapa neihlem chu bâwlnâk ah pêk ding hen â tîm rawh. ¹⁹ Abraham nih Isak chu thihnâk lakah mi Pathian nih a thawh kho lai ti a ruat ruangah Abraham nih thihnâk lakah mi Isak chu a tawng nawlh taktê rawh. ²⁰ Lungnâk hen Isak nih chun thil a hawng tlung ding mi tla thu ah Jakob leh Esau mal a sâwm na. ²¹ Lungnâk hen Jakob nih chun a thi awt bâiah Josef fa tla chu mal a sâwm vevê na, a ṭhianṭhunh pâr rinhsan hen Pathian a sawnh. ²² Lungnâk hen Josef nih chun a thi awt bâiah khan Israel tla Aigupta ram thawk hen an suak ding mi thu a sim le, a taksa tla leikângah thu a pêk ²³ Lungnâk hen Mosi a suak liau khan fasêm mêlṭha tak asi an ti ruangah thla thum kar a nu leh a pa nih an thuh le, lalchem thupêk khawm an ṭih loh. ²⁴ Lungnâk hen Mosi nih chun a hawng upat nûnah khan Pharoa fanu lakah a fapa si a duh lo le, ²⁵ sâwtlotê rangah sual nuamchên ngâk hen chun Pathian mi tla hen nehsawh tuar a thîm dauh. ²⁶ Mesia ruangah tuarnâk chu Aigupta ram rothil tla ngâk hen sum rokual dauh ah a ruat le, mâilei ah lâwmman pêk ding mi chu a chuanh ruangah. ²⁷ Lungnâk hen lalchem thinthawknâk chu ṭih lo hen Aigupta ram a kaltâk le, muh kho lo mi Pathian chu a muh ruangah a tuar rarâm asi. ²⁸ Lungnâk hen Kalkanh Kût leh kawtkâ kâwm ah thisen theh kha mang asi le, veihtu vânmifial nih Israel tla fapa tîr chu a thah lonâk ding hen. ²⁹ Lungnâk hen tual hul lakah kal hâwi hen Tipi Sen kha Israel tla an tan le, Aigupta mi tla nih tan bâk an tum le, tî nih a nîm hep na. ³⁰ Lungnâk hen Jeriko khua kulh kha ni sarih Israel tla nih an hêl nûnah a chim rawh. ³¹ Lungnâk hen Rahab â zuar mi nu kha lunglo tla lakah thah bâk asi lo le, thlingthlâktu tla a lawmh na ruangah. ³² Chun, zei me kan sim vima lai rih? Gideon thu, Barak thu, Samson thu, Jeptha thu, David thu, Samuel thu leh khuavâng tla thu chu sim awt sele tik nih hawng ka tinh awt loh. ³³ Chubang tla nih chun lungnâk hen ram tla an lâk le, thu dik an ti le, thutiam tla anna ting, chakeibaknei kâ tla an chîp piak. ³⁴ Mei ṭihnungkâi mih khonâk an nei le, nâmsâu thah ding mi lakah an âwl, chaklonâk lakah mi chaktir hen an um, tuknâk lakah chun rât tak hen an um, ramdang mi kawrsen tla an neh na. ³⁵ Lungnâk hen nunau tla nih an unau rualsia thi hen thawknawlh mi an tawng nawlh. Midang tla sawkphak hen an um, thawknawlhnâk ṭha dauh anna ting khonâk ding hen, ruangsuah na ding an duh lo; ³⁶ midang tla khawm nih nehsawh leh vuak tla an tuar, chu lo khawm chu rêngkhimh leh rêngin ah khumh hen an um, ³⁷ lung hen an seh na, thing lahnâk hen an tan na, nâmsâu hen an thah na, dawrâ leh kêl vun aih hen, pâm tak hen, hamh tak hen, nehsawh hen an um, ³⁸ chubang tla rangah chun laikulh hi umnâk tlâk asi loh! Ramkaro leh tlâng tla ah tek le zâm mi hâwi hen anna sawk le, pûk tla, khur tla ah an um. ³⁹ Chu tla nih chun an lungnâk ruangah sawr tawng rawh hen, Pathian thutiam chu anna ting lo rih. ⁴⁰ Kanmah tel lo hen annih chu rangtlingtir hen an um lonâk ding hen Pathian nih kanmah leikang thu ah thil zeimawh ṭha dauh khun a timhtuah rawh ruangah.

¹ Hawng kan theihpitu mi zapi tamtak kan kiangkam ah um mi ruangah hawng kan nawktirtu zawng leh sual kanmah lakah um mi chu kan lawnh lai. Chun, Jisu kan lungnâk ngauhnâk ah rangtlingtirtu lei chu zauh hen, kan mâilei ah tekzuamnâk ding a um mi lakah felfê tak hen kan tek vima lai. ² Anih nih chun a mâilei ah lâwptlonâk um mi ruangah kraws ah thihnâk chu zei siarlo hen, tuah Pathian laltophah vawrhlei ah a va to rawh. ³ Nanna dâithlanh hen nan lungdawng lonâk ding hen Jisu chu misual amah huatu tla lakah â dawnhkho zia chu ruat u. ⁴ Sual do hen thih phah rê hen nanna ṭang lo rih. ⁵ Fawrhnâk thu fa tla nunsimh hâwi hen Pathian nih a nan simh na mi kha nan philh rawh na maw? "Ka fa, Lalpa nunsimhnâk chu siarlo lah, amah simhfâi hen na um chun a dâithlanh lah. ⁶ Lalpa nih chun a dâwt mi chu a rêp tâwn le, fa hâwi hen a lawmh mi vial chu a vuak tâwn asi." ti hi. ⁷ Nan tuar mi hi nanmah nunsimhnâk asi; fa tla lakah ti mi hâwi hen Pathian nih nan tlûnah a ti asi hi. Pa nunsimh dah lo fa âu me um tâwn? ⁸ Fa zawzawng nih an tawng tâwn mi nunsimhnâk nan tawng lo chun fa tak silo hen, lakfa nan si lai. ⁹ Taksa leiah pa tla nih nun hawng kan simh le, chubang tla chu kan zah na; chu ngâk fâk dauh hen, kan nungnâk ding hen thlarau lei Pa thu thu hen kan um awt lo ma? ¹⁰ Taksa leiah kan pa tla nih sâwtlotê ṭha an ti hâwi vima hen nun hawng kan simh le, Pathian lam nih chun a thenhlimhnâk chu kanna ting kho bâk ding hen kan ṭhatnâk ding hen nun hawng kan simh dauh asi. ¹¹ Chun, nunsimhnâk tla hi tuar liauah chun lawmhkâi hen a lang lo le, lungsiatkâi tak hen a lang dauh tâwn; tuar nûnah lam chun chu lakah nunsimh hen um rawh mi tla rangah chun nungnâk rep lungumnâk lâwmman a tawng tâwn. ¹² Chun, kut uai tla chu zangh u, nan khûp chak lo mi chu chaktir u. ¹³ Kê a khêng mi chu kal kho lo asi ngâk hen damh asi lehlam ding hen lampi ding ah kal u. ¹⁴ Mi zawzawng hen remnâk leh thenhlimhnâk nei ding hen a ṭang u, chubang thenhlimhnâk lo hen âukhawm nih Lalpa an muh lai loh. ¹⁵ Âukhawm Pathian zângfahnâk lakah mi nan tlû lonâk ding hen leh thil khâ chu a hawng ṭhang le, mi tamtak a nawktir na mi hâwi hen nan si lonâk ding hen a thiamthih u. ¹⁶ Âukhawm hur hen Esau hâwi hen taksa mi si hen, fapa upa dauh sinâk buh busuan khat ah zuartu nan si lonâk ding hen a thiamthih u. ¹⁷ Chu nûnah chun, a pa malsâwmnâk chu ting ding duh hen mitthli tla bû hen ngiar khawmsele thinlung lêtnâk a nei lo ruangah a tawng lo rawh ti nan theih asi. ¹⁸ Nannih lam chu Sinai Tlâng tawngh kho mi meialh hen, sûmdum hen, mûi hen, thlipi hen, tâwtawrâwt rihâu hen thusim hâu umnâk tla kha tleng mi nan si lo le, ¹⁹ chubang hâu theihtu tla nih chun thu dang rerêng an sinah sim lo rawh ding hen an ngiar. ²⁰ "Ran tiang khawm nih tlâng chu an tawngh chun lung hen thi thlo seh ding asi," ti thupêk kha an tuar kho lo rawh. ²¹ An thil muh khawm chu thungâi ṭihnung a kâi; chun, Mosi nih, "Ka lâu le, thungâi ka thir," a ti. ²² Zion Tlâng leh Pathian nung khua, vân Jerusalem, a vânmifial sâng tamtak tla umnâk chu nan hawng tleng rawh. ²³ Vân ah an min rîn hen an um mi Pathian fa tîr tla pumhnâk lawmhkâi takah nan hawng tleng rawh. Mi zawzawng lâirêltu leh mi rep thlarau tla rangtling hen siamtu Pathian sinah nan hawng tleng rawh. ²⁴ Jisu, thudântuk thar siamtu, Abel thisen ngâk hen thisen ṭha dauh thehtu sinah nan hawng tleng rawh. ²⁵ Jisu nih nan sinah thu a sim mi êl lo ding hen a thiamthih u. Pathian nih Mosi mang hen tual ah thu a sim mi ngâi duhlotu tla men ruang an suak lo chun, kannih vân thawk hen thu hawng kan simh mi ngâi duhlotu châng chu zeitin ruang kan suak kho lai? ²⁶ Chu liau chun a aw-hâu nih tual hi a ninh, sikhawmsele tuah hin, "Veikhat chu tual lâwng silo hen vân khawm ka ninh teh lai," ti hen a tiamh. ²⁷ "Veikhat chu ka ninh nawlh lai," ti mi nih hin, thil â nîn lo mi tla chu a um kumza khonâk ding hen thilsiam tla chu ninh leh ṭhial hen a um awt ti fiang tak hen a langhtir asi. ²⁸ Chun, ram ninh kho lo mi kanna ting ruangah kanna lâwm lai. Amah lawmhkâng a um hen, ṭih leh zah tâk bû hen, lâwm tak hen Pathian kan sawnh lai; ²⁹ kan Pathian hi mi khanghtu mei asi ruangah.

¹ Krist ah unau nan si ruangah a dâwt tawnh u. ² Khual tla tlûnah dâwtnâk suah philh lah u; zeimaw mi nih theih lo thlo hen vânmifial tla lawmh hen thil an ti. ³ Rêngin ah um mi tla chu mah khawm tâng bâk mi hâwi hen a ruat ule, chun hamh tuartu tla chu mah khawm tuar bâk mi hâwi hen a ruat ule, theihkumza na u. ⁴ Mi zawzawng lakah umhnâk hi chawnglawmh hen um seh, nupi pasal khawm zumhkâi tawnh hen um seh. Hur leh ṭângdang pawmtu tla chu Pathian nih lâi a rêl lai. ⁵ Nan thinlung put zia chu tangka sunhsaknâk tel lo si seh, nan thil neihlem tla tlûnah chun lungâwi u. Pathian nih, "Zeitik khawmah ka nan thlahthlamh rîlmâl lai lo le, ka nan kaltâk rîlmâl lai loh," a ti ruangah. ⁶ Chun, râlṭha tak hen, "Lalpa chu hawng ka ṭangpitu asi, ka lâu lai loh; minung nih zeitin a ka ti kho lai," kan ti tâwn asi. ⁷ Nan hotu, Pathian thu an simh natu chu theihkumza ule, an umdân chu châwng ule, an lung dân chu ruat u. ⁸ Jisu Krist chu mazân khawm, tusûn khawm ah leh kumleza hen a mahmun hen a um kumza. ⁹ Sîntirnâk kip leh sîntirnâk chê tak nih lam dik lakah mi kalpi hen um lah u; thinlung hi Pathian zângfahnâk hen birhtir chu a ṭha, ei ding tla lakah a pêk tuk lo hen; chu leikâng lungkhamtu tla chu chubang lakah chun ṭhatvaknak an tawng lêm lo. ¹⁰ Bâwlpu tla Juda biakin ah rianṭuantu tla nih chun kan mâichâm ah bâwlnâk thil an ei kho lo. ¹¹ Juda bâwlpu lalchem nih chun sual tla rangah bâwlnâk ap ding hen Mun Thenhlimh Chem ah ran tla thisen chu a lûtpi tâwn; sikhawmsele, ran ruak tla chu kulh dâilêng ah an duah. ¹² Chun, Jisu khawm nih amah thisen tak hen sual lakah mi zapi thenhimhtir na ding hen kulh lênglei ah a tuar rawh. ¹³ Chun, amah an zauhnawnhnâk chu phurh hen kulh dâilêng ah amah sinah kan kal lai. ¹⁴ Hi tual ah hin khua mun bir kan nei loh, khuapi a hawng um ding mi chu kan chuanh dauh asi. ¹⁵ Chun, Jisu zârah bâwlnâk hâwi hen sawrnâk chu Pathian sinah kan ap kumza lai; chu chu kan aw-hâu tla hen a min hen lâwmthu tla kan sim kumza lai tinâk asi. ¹⁶ Sikhawmsele, thil ṭha ti leh a ṭangpi tawnhnâk hi philh lah u, chubang hâwi bâwlnâk nih chun Pathian a lawmhtir. ¹⁷ Nan hotu tla thu ngâi ule, an thu thu hen um u. An rianṭuan thâwngthâng Pathian sinah an sim ruangah nan thlarau tla chu dîn lo thlo hen an vêng piak na. An thu nan ngâi chun an rianṭuan chu lâwm tak hen an ti lai, chu lo chun lungsilo bû hen an ti lai le, nan rangah zeikhawm a ṭhavak lai loh. ¹⁸ Kan rangah thlacham u, zeizawng ah rep tak a um ding tum hen, sia leh ṭha theihnâk thiang tak kan nei ti dik tak hen kanna theih. ¹⁹ Chun, khulrang dauh hen nan sinah fial nawlh ka si khonâk ding hen Pathian sinah nan deih ding hen ka nan ngiar khun na asi. ²⁰ Zungzâl thudântuk singsiah si mi nih a thihnâk ruangah Dawrâpu rokual tak Lalpa Jisu chu Pathian nih thihnâk lakah mi a thawh nawlh rawh. ²¹ Jisu Krist zârah amah duhzia ti ding leh amah lawmhtirtu ah um ding hen thlangamhtu Pathian nih chun thil ṭha nan duh mi zawzawng an pêk na seh. Jisu Krist sinah rokualnak zungzâl hen um seh! Amen. ²² Unau tla, fawrhnâk thu tâwmtê ka hawng rîn mi hi ngâi rarâm ding hen ka nan ngiar na. ²³ Kan unaupa Timothe kha rêngin ah mi an suah rawh ti hawng theih u. A hawng tuan chun amah hen kan hawng lai le, ka nan muh na lai. ²⁴ Nan hotu tla leh Pathian mi zawzawng tla kha chibai hawng ka bûk piak u. Itali ram unau tla nih chibai a nan bûk na. ²⁵ Nan ektê sinah Pathian zângfahnâk um seh.