GALATIA

GALATIA

¹ Pawl, mifial minung tla fial si lo hen, minung zârah khawm silo hen, Jisu Krist leh mithi lakah mi thawhtu Pa Pathian zârah asi dauh ti mawh ² ka sinah unau um zawzawng tla nih chun: Galatia ram ah kawhmi tla sinah: ³ Pa Pathian leh kan Lalpa Jisu Krist sinah mi zângfahnâk leh remnâk nan sinah um seh. ⁴ Anih nih chun kan Pathian leh Pa rem ti kâng hen tuliau laikulh sual tak lakah hin hawng kan suah khonâk ding hen kan sual tla ruangrûl ah amah a pêk rawh. ⁵ Pathian sinah rokualnâk zungzâl hen um seh! Amen. ⁶ Krist zângfahnâk zârah a nan kawh natu kha chu hâwi hen lâkkhat ko ah Thâwngthâng Ṭha dang leiah nan kawp tâk hi chê ka ti asi. ⁷ Chu chu Thâwngthâng Ṭha dangtir duh mi âumawh an um mi ruangah asi. ⁸ Sikhawmsele kanmah nih mawh vân thawk hen a hawng mi vânmifial khawm nih mawh, Thâwngthâng Ṭha ka nan simh na lo mi kha chu thâwngthâng ṭha dang rerêng a nan simh na chun siatbarh hen um seh. ⁹ A lanah kan sim rawh hâwi hen khan tuah kan sim nawlh asi, "Thâwngthâng Ṭha nan pawm mi silo mi kha chu thâwngthâng ṭha dang âutal nih an simh na chun siatbarh hen um seh." ¹⁰ Asi chun, tuhin minung ma kan lêm Pathian? Asi lo leh, minung ma lawmhtir kan tum ne? Minung lawmhtir hen um sele Krist to-aw ka si lai loh. ¹¹ Chun, unau tla, Thâwngthâng Ṭha ka sim mi kha minung tla thu asi lo ti ka nan theihtir na. ¹² Minung thawk hen ka tawng mi asi lo, mi nih sîntir mi khawm ka si lo, Jisu Krist langhnâk ruangah tawng mi ka si dauh. ¹³ Juda tla phung-leh-lam sawnh dân ah chun a lânah ka umdân chu nan theih rawh kha, kha hâwi hen Pathian kawhmi tla fâk tak a nehsawh hen ka nawktir na tâwn kha. ¹⁴ Chun, hawng kan thlâktu tla thurovuih lakah ṭhanemsemsê ka ngâi fâk khun ruangah Juda phung-leh-lam sawnh dân leikângah chun ka phun leh tla lakah keimah rual tla tamtak ka khûp rawh. ¹⁵ Chun, ka nu paw sung thawk hen hawng ka thîmtu leh a zângfahnâk ruangah hawng ka kawhtu Pathian nih chun ¹⁶ Phundang tla lakah a Thâwngthâng Ṭha ka sim khonâk ding hen a Fapa chu thinlung si tak hen keimah lakah a langhtir liau khan midang sinah krai khâi lo hen, ¹⁷ mifial ka si lânah mifial si rawh mi tla sinah Jerusalem khua khawm kal lêm lo hen Arabia ram ah ka kal dauh ving; chun Damaska khua ah ka kîr nawlh. ¹⁸ Chun kum thum nûnah Peter veh ding hen Jerusalem khua ah ka va kal le, a sinah ni leinga ka châm. ¹⁹ Mifial dang tla lam chu Lalpa unau Jem cho lo chu âukhawm ka muh lo. ²⁰ Nan sinah thu ka sim mi tla hi Pathian mitmuh ah ka âwkrâwl lo. ²¹ Chu nûnah chun Siria leh Kilikia ram ah ka kal. ²² Sikhawmsele, Judai ram ah Krist kawhmi tla mêltheih ka si lo nget rih. ²³ "A lânah hawng kan nehsawhtu nih khan a lânah lungnâk thu a râwk tâwntu kha tu chun thu a sim lehlam rawh asi," ti mi simnâk cho an theih. ²⁴ Chun, keimah ruangah Pathian an chawnglawmh rawh.

¹ Chun, kum leili a vei nûnah Tita khawm chu kalpi hen Barnaba rual hen Jerusalem ah ka va kal nawlh. ² Chun, theihtirnâk ruangah ka va kal le, Phundang tla lakah Thâwngthâng Ṭha ka phuang tâwn mi hi anmah tla ka simh na; sikhawmsele, mi lian dauh tla chu a dang hen ka simh na, chu hâwi asi lo chun a lânah mi ka rianṭuan mawh tu mi hi a thawttham hen a um lebang lai. ³ Sikhawmsele, Tita ka sinah um mi khawm chu Greek mi sikhawmsele fêmtan piak râm hen a um lo; ⁴ chu chu unau telê a thup hen an hawng lûtpi na mi ruangah asi; chubang tla chu to-aw ah hawng kan siam khonâk ding hen Krist Jisu ah chun thawsuaknâk kan nei mi hi thlingthlâk ding hen a thup hen an lût. ⁵ Sikhawmsele, Thâwngthâng Ṭha thudik chu nan sinah a um kumza khonâk ding hen sâwtlotê khawm a pumpêk hen an thu kan zâwt lo. ⁶ Chun, mi lian dauh ah an ruat mi tla lakah chun zeitin mi tal khawm si sele, ka rangah â dang lêm lo, Pathian nih âukhawm a thliar lo--mi lian dauh ah an ruat mi tla nih chun ngaihdân thar zeikhawm an ka sap lo. ⁷ Chu ngâk hen fêmtan tla Thâwngthâng Ṭha Peter sinah kiltir asi hâwi hen fêmtan lo tla Thâwngthâng Ṭha ka sinah kiltir hen a um ti an theih. ⁸ Fêmtan tla sinah mifial si ding hen Peter rangah ṭuanpiaktu tak nih chun Phundang rangah mifial si ding hen ka rang khawmah hawng ka ṭuan piak ruangah; ⁹ zângfahnâk hawng ka pêk mi chu an theih khawmah Jem, Peter leh Johan tla hotu ah an ruat mi tla nih chun kannih Phundang tla sinah kal ding leh annih fêmtan tla sinah kal ding hen kei leh Barnaba chu a kawmhnâk kut vawrhlei hawng kan pêk. ¹⁰ Mipâm tla kan theihkumza cho an duh, chu tak chu ti ding hen ka tum tâwn mi rêng asi. ¹¹ Chun, Peter chu Antiokei ah a hawng liauah sâwi ding hen a um ruangah mâitawnh hen ka êl. ¹² Mi âu tla mawh Jem thawk hen an hawng kal lânah chun anih nih chun Phundang tla sinah a ei tâwn, sikhawmsele, an hawng tlung kâ hen Phundang tla fêmtan ding hen duhpitu fêmtan mi tla chu a ṭih ruangah tel nawlh lo hen â thlei rawh. ¹³ Juda lungtu unau dang tla khawm an zer bâk rawh, chun Barnaba men an zerhnâk hen an kuihsih rê asi. ¹⁴ Sikhawmsele, Thâwngthâng Ṭha thudik hâwi hen anna rep lo tih ka theih hen Peter sinah an ektê mâika ah, "Nang, Juda mi si hen, Juda tla hâwi a um lo hen Phundang tla um hâwi hen na um dauh chun zeitin zia hen Phundang tla Juda tla hâwi hen na umtir râm na zia?" ka ti. ¹⁵ Kannih lam chu, "Phundang misual," ti tla hâwi si lo hen, Juda mi si hen suak kan si. ¹⁶ Sikhawmsele, Dân thilti tla ruangah mi mawhtir lo hen a um lo le, Jisu Krist lung ruangah cho mawhtir lo hen a um dauh ti kan theih, kannih khawm nih Dân thilti ruangah silo hen, Krist lungnâk ruangah mawhtir lo a kan um khonak ding hen Krist Jisu chu kan lung asi: Dân thilti ruangah âukhawm mawhtir lo hen an um lai loh. ¹⁷ Krist ah mawhtir lo a um kan tum bû hen kanmah tak khawm Phundang tla hâwi hen misual kan si chun Krist chu sual rianṭuantu asi mazei? Asi rîlmâl lo. ¹⁸ Ka thil siat tla kha ka sak nawlh chun buartu ka si ti ka langhtir mi asi lai. ¹⁹ Pathian leikângah ka nung khonâk ding hen kei lam chu dân ruangah dân leikângah ka thi rawh asi. ²⁰ Krist sinah khenhbêk hen ka um rawh sikhawmsele ka nung; kei lam chu ka si lo rawh, Krist chu keimah lakah a nung dauh asi; chun tuah taksa ah ka nung mi hi lungnâk ah nung ka si--Pathian Fapa, hawng ka zângfah le, ka ruangrûl ah â pêk mi lungnâk ah chun. ²¹ Pathian zângfahnâk chu ka veih lo, Dân ruangah repnâk a um asi chun Krist chu a thawt hen a thi mi asi lai.

¹ Aw, Galatia ram a mi â tla; âu nih an dâwi na? Nan mitmuh ngelchel ah Jisu Krist chu khenhbêk hen fiang tak a langhtir asi mi. ² Hi cho hi nanmah thawk hen theih ka duh, Dân thilti ruangah ma Thlarau nan tawng, nan ngâi hen nan lung ruangah ma? ³ Hi hâwi tluk na maw nan â e! Pathian Thlarau ah dawmh ko rawh hen, taksa hen ma nan lîm awt lak? ⁴ Thil chu hâwi tluk chu ṭhatvakpi lo hen ma nan tuar? Ṭhatvakpi lo hawng si tatak sele ne! ⁵ Chun, nan sinah Thlarau a nan pêk natu leh nan lakah thilchê titu nih chun Dân thilti ruangah ma a ti, nan ngâi hen leh nan lung ruangah ma? ⁶ Abraham nih Pathian a lung le, chun chu lungnâk chu repnâk ah ruat asi hâwi khan. ⁷ Chun, theih u, lungnâk ah um mi tla, chu tak chu Abraham fa tla an si. ⁸ Chun, Pathian lasui thu nih chun Pathian nih lungnâk ruangah Phundang tla a mawhtir na awt lo ti theihkan hen, "Na lakah phun kip malsâwm piak hen an um lai," ti hen Abraham sinah Thâwngthâng Ṭha chu a simhkan kha. ⁹ Chun, lungnâk ah um tla chu Abraham zumhkâi mi hen malsâwm piak vevê hen an um tâwn asi. ¹⁰ Dân thilti a um mi vial tla chu siatbarh hen an um ruangah, "Dân lasuibu ah thurîn zawzawng hâwi hen ti ding a um lotu zawzawng chu siatbarh hen um seh," ti hen Pathian lasui thu nih a sim ruangah. ¹¹ Chun, Pathian mitmuh ah âukhawm Dân ruangah mawhtir lo hen an um lo ti a lang asi. "Mi rep tla chu lungnâk hen an nung lai," ti hen Pathian lasui thu nih a sim ruangah. ¹² Chun, Dân chu lungnâk ah mi asi lo, "Chu hâwi a titu chu, chu lakah chun a nung lai," ti asi dauh. ¹³ Krist chu kan ruangrûl ah siat ting hen Dân siat lakah mi hawng kan suah rawh; "Thing ah thlâi mi vial chu siat ting an si," ti hen Pathian lasui thu nih a sim ruangah. ¹⁴ Chun, Abraham rangah malsâwmnâk chu Krist Jisu ah Phundang tla tlûnah a hawng um kho lai le, chun lungnâk ruangah Thlarau tiamh chu kan tawng kho lai. ¹⁵ Unau le tla, minung hâwi hen ka sim hi, minung thutiam si khawmsele birhtir rawh nûnah an phelh dah lo, sap khawm an sap dah ber lo, ¹⁶ Chun, Abraham sinah asi, thu chu tiamh hen a um mi chu, a chi thlâk tla sinah khawm. Mi tamtak thu sim mi hâwi hen, "Chi thlâk tla sinah khawm," a ti lo le, mi pakhat thu sim mi hâwi hen, "Na chi thlâk sinah khawm" ti asi dauh, chu chu Krist chu asi. ¹⁷ Chun, hi hâwi hen ka ti asi: Thutiam Pathian birhtir rawh mi chu Dân kum zali leh kum sâwmthum nûnah um rawh mi nih khan thutiam chu zeikhawm lo hen a veih loh. ¹⁸ Ro ting ding chu Dân ruangah asi chun thutiam ruangah asi lai loh; sikhawmsele Pathian thutiam ruangah asi Abraham sinah a pêk mi chu. ¹⁹ Asi lo leh, Dân chu zei ti zia hen um mi me asi ne? Abraham chi thlâk thutiamnâk chu a hawng kal lân lo chu buarnâk tla ruangah sap hen a um le, vânmifial tla mang hen rêl kut ah birhtir asi. ²⁰ Chun, rêl rerêng mi pakhat sinah asi dah loh, Pathian lam chu pakhat asi. ²¹ Asi lo leh, Dân nih chun Pathian thutiam tla chu a kham mazei? Si lo e; Dân, mi nungtir khotu pêk hen a um rawh chun, repnâk chu Dân ruangah um ngelchel ding asi. ²² Sikhawmsele, Jisu Krist lungnâk ruangah thil tiam chu a lungtu tla sinah pêk asi khonâk ding hen Pathian lasui thu nih chun sual tangah zeizawng a khâr ver. ²³ Sikhawmsele, lungnâk a hawng tlung lân khan lungnâk hawng lang ding mi rangah khâr hen, Dân tangah vêng kan si kha. ²⁴ Chun, lungnâk ruangah mawhtir lo kan si khonâk ding hen Dân chu Krist leiah hawng kan ruitu asi. ²⁵ Sikhawmsele, tuah lungnâk a hawng tlung nûnah hin dân hen ruinâk tangah kan um lo rawh. ²⁶ Krist Jisu lung ruangah Pathian fa tla nan si ver. ²⁷ Nan lakah Krist ah baptis si rawh mi vial tla kha Krist hen nanna thuam rawh ruangah. ²⁸ Chunah chun Juda mi a um kho lo le, Greek mi khawm a um kho ber lo, chunah chun to-aw a um kho lo le, to-aw lo khawm a um kho ber lo, chunah chun mipa leh nunau khawm a um kho ber lo; Krist Jisu lakah nan ektê hen pakhat nan si ruangah. ²⁹ Chun, Krist tâ nan si chun Abraham thlah, thutiam hâwi a ro ting ding tla nan si.

¹ Sikhawmsele, hi hâwi hen ka ti asi: Rotingtu ding chu zeizawng tlûnah hotu sikhawmsele ngâksia asi kar chun to-aw hen zeikhawm â dang lo; ² a pa ruat tik chu a tlung lân lo chu vêngtu leh zauhkhenhtu tangah a um dauh asi. ³ Chu hâwi hen ngâksia kan si liau khan laikulh thilbul tangah to-aw ah kan um; ⁴ sikhawmsele, a tik a hawng tling rawh chun, fa sinâk kan tawng khonâk ding hen Dân tangah um tla chu tlanh ding hen Pathian nih a Fapa, nunau ring mi, Dân tangah hawng suak hen a fial rawh. ⁶ Chun, fa nan si ruangah Pathian nih a Fapa Thlarau chu "Abba, ka Pa" ti a auh hen, kan thinlung ah a hawng fial. ⁷ Chun, to-aw na si lo rawh le, fa na si dauh; chun fa na si chun Pathian zârah rotingtu na si. ⁸ Sikhawmsele a lânah Pathian nan theihlo liau khan, nan umdân lak khawmah Pathian si lo mi sal nan si. ⁹ Tuah Pathian nan theih nûnah lam chun asi lo, Pathian mi theih nan hawng si nûn hin ti ding asi dauh, thilbul chak lo leh dawrlâp sal ah um mi leh nan duhnâk leikângah chun zeitin zia kîr nawlh me nan si? Zeirangah chu tla sal ah um ding nan duh nawlh êu? ¹⁰ Nan rangah ni lawh ka ruang salam lai ti ka nan ṭihṭanh piak na. ¹² Unau le tla, ka nan ngiar na, keimah hâwi hen um u; kei khawm nanmah hâwi hen ka um dangâiah. Ka pawi zeikhawm nan khawih lo. ¹³ Thâwngthâng Ṭha nan sinah ka hawng sim masa tan kha ka taksa a chak lo ruangah asi ti nan theih asi. ¹⁴ Chun, ka taksa nan rangah lêmnâk um mi chu nan zauhnawmh lo le, nan ṭih ber lo; Pathian vânmifial hâwi hen Krist Jisu hâwitê hen nan ka kawmh dauh kha. ¹⁵ Vânṭha nanna tinâk kha zei hâwi a hawng si rawh? Tikho si sele nan mit chawih zek hen nan ka pêk lai rawh ti ka nan theih piak na. ¹⁶ Chun, thudik tak ka nan simh na ruangah nan leido ma ka si rawh? ¹⁷ Ṭha leikângah silo hen, semsêngâi tak hen an hâwl na tâwn le; asi, anmah tla nan hâwl khonâk ding hen lênglei ah an khâr khumh na ding an duh asi. ¹⁸ Thu ṭha leikângah lam chun nan sinah ka um liau lâwng silo hen zei liau khawmah ṭhanemsemsê ngâi hi a ṭha asi. ¹⁹ Ka fa duhtak le tla! Krist chu nanmah lakah siam rangtling hen a um lân lo chun fa ring nganfâk hâwi hen kan lungkham nawlh na. ²⁰ Asi, tuliau hin nan sinah um hen, ka aw-hâu dangtir ka duh zia bâk chu nanmah ruangah ka lawksawng asi. ²¹ Dân tangah um duh le tla, hawng ka simh u. Dân thu chu nan ngâi tâwn lo ma? ²² Hi hâwi hen rîn asi: "Abraham nih fapa panih a nei le, pakhat chu salnu lakah, pakhat chu salnu lo lakah. ²³ Sikhawmsele, salnu lakah mi chu taksa dân hâwi hen a suak le, salnu lo lakah mi lam chu thutiam ruangah suak asi," ti hi. ²⁴ Chubang thu chu tahṭhimhnâk asi; chubang nunau tla chu thutiam panih an si; pakhat chu Sinai tlâng ah mi sal si ding hen fa ringtu chu Hagar asi. ²⁵ Chun, Hagar hi Arabia ram Sinai tlâng asi, Jerusalem tuliau a um mi hen â bang asi, a fa tla hen to-aw ah an um ruangah. ²⁶ Sikhawmsele, vân Jerusalem lam chu sal silo mi asi, chun, chu tak chu kanmah nu asi. ²⁷ Pathian lasui thu nih, "Nang, ching, fa ring dah lo, a lâwm rawh! Nang, fa ring hen nganfâk tuar dah lo, âu rawh! Pasal nei mi ngâk chun um harnu nih chun fa le a nei tam dauh asi," ti hen a sim hâwi khan. ²⁸ Chun, unau tla, kannih hi Isak hâwi khan thutiam fa tla kan si. ²⁹ Sikhawmsele, chu liau chun taksa dân a suak mi nih Thlarau dân hen suak mi chu a nehsawh hâwi khan, tu khawmah chu hâwi ber asi. ³⁰ Sikhawmsele, Pathian lasui thu nih zeitin a sim: "Salnu chu a fapa hen nar rawh; salnu fapa nih chun salnu lo fapa chu ro a tingpi awt lo," a ti. ³¹ Chun, unau tla, salnu lakah mi fa tla kan si lo le, salnu lo lakah mi fa tla kan si dauh.

¹ Sal si lo ding hen Krist nih hawng kan suah kha, chun bir tak hen dîr ule, sal liangbat lakah chun tâng nawlh lah u. ² Ngâinik u, kei Pawl nih nan sinah ka sim hi, fêm nan tantir chun Krist chu nan rangah zeikhawm ṭhatvaknâk asi lai loh. ³ Asi, Dân thu zawzawng zâwt ding hen battirtu an si ti fêmtantirtu vial sinah ka theihtir nawlh asi. ⁴ Nannih Dân lakah mawh lo tumtu tla, Krist hen nanna ṭhen rawh: Zângfahnâk chu nan tlûktâk rawh. ⁵ Kannih nih chun Thlarau zârah lungnâk hen repnâk lungumnâk kan ngâk ruangah. ⁶ Krist Jisu ah chun fêmtan hi zeikhawm a ṭhatnâk a um lo, fêmtan lo khawm zeikhawm a ṭhatnâk a um lo; lungnâk, zângfahnâk ah ṭuan tam chu a ṭhavak asi. ⁷ Ṭha tak hen nan tek tâwn khateh; thudik chu nan zâwt lonâk ding hen âu nih a nan kham na? ⁸ Hi lêmnâk hi a nan kawh natu sin thawk hen mi asi lo. ⁹ Thilnu tâwmtê nih sang tlang chu a pum hen a zunh tâwn. ¹⁰ Thil dangpi ah nan ngaih lai lo ti Lalpa lakah chun kei nih chun ka nan ruat na; sikhawmsele a nan nawktir natu chu âutal si sele a tlûnah thu tlû ding mi chu a tuar lai. ¹¹ Unau tla, kei nih hin fêmtan thu ka sim nget chun zeirangah nehsawh hen ka um nget rih? Chu hâwi asi chun kraws a suihnâk chu veih asi lai rawh. ¹² A nan nawktir natu tla chu lawnh tlak dâidua sele ka duh. ¹³ Unau tla sal silo ding hen kawh nan si; sikhawmsele, sal nan si lonâk chu taksa rangah dêngkhâwngnâk ah mang lah ule, zângfahnâk hen rian a ṭuan piak tawnh chiau u. ¹⁴ Nangmah na dâwt hâwi hen na zâwlbâwm tla na dâwt ding asi," ti thu kâ khat nih hin Dân thu zawzawng chu a rangtlingtir rawh asi. ¹⁵ Sikhawmsele, nanna seh hen nanna ei tawnh chun nanna veih tawnh lonâk ding hen a thiamthih u. ¹⁶ Chun, hi hi ka ti asi: Thlarau ah um u, chun taksa duhnâk chu nan zûl lai loh. ¹⁷ "Taksa nih hin Thlarau lei donâk a duh tâwn, Thlarau khawm nih taksa lei donâk a duh tâwn; thilti nan tum mi tla chu nan ti kho lonâk ding hen chubang tla chu â kalh asi. ¹⁸ Sikhawmsele, Thlarau rui a nan um chun Dân tangah nan um lo. ¹⁹ Chun, taksa thilti tla chu a lang fiang asi; chubang chu hi hi asi: ²⁰ Duhnâk, nâwmtâmnâk, hurnâk, ruk sawnhnâk, dâwi thiamnâk, huatnâk, tawhnâk, thîknâk, thinthawknâk, mah kawngkâ ruatnâk, a dang hen umnâk, a dang hen lungnâk, ²¹ nahsuahnâk, zû rîtnâk, zû mun ah lâwmnâk tla, hi bang tla hi: Chubang tla chu a lânah, chu hâwi thil ti mang tla nih chun Pathian Ram anna ting lai loh ti ka nan simhkan na hâwi khan ka nan simhkan na hi. ²² Thlarau rah lam chu zângfahnâk, lâwptlonâk, remnâk, dawnhkhonâk, vêlneihnâk, ṭhatnâk, ²³ zumhkainâk, mi tangah dawnhkhonâk, sûmkhonâk tla asi dauh; chu hawi kalh kâng hen Dân thupêk rerêng a um lo. ²⁴ Chun, Krist Jisu mi le nih chun taksa chu a sual dawnnâk leh a duhnâk tla hen an khenhbêk rawh. ²⁵ Thlarau ah nung kan si chun Thlarau ber ah kan um nawlh lai. ²⁶ A do tawnh hen, a nahsuah tawnh hen, kanna sung-û tir ding asi loh.

¹ Unau tla, mi nih sual zeital a ti liauah tanh sut hen um sele, nannih Thlarau mi le tla, "Lêmnâk ka tawng sual bâk lai," ti a vêng bû hen chu hâwi mi chu dawnhkho tak hen dirh nawlh u. ² Nan thilrit phurh tla chu a sâwng tawnh u, chun Krist dân thu chu nan zâwt mi asi lai. ³ Mi zei silo pet hen mi lian dauh ah â ruat chun mah â perpet mi asi. ⁴ Mikip mah thilti a nik chiau seh, chu nûn chun midang tlûn silo hen mah lak cho ah putso ding a nei lai. ⁵ Mi kip mah phurh chiau an phurh awt ruangah. ⁶ Chun, sîntirnâk tawngtu nih chun thu ṭha zawzawng sîntirtu sinah pêk bâk seh. ⁷ Perpet hen um lah u; Pathian chu zuahnawmh kho mi asi lo; mi nih a tuh mi vial chu lîlâ chu a ât awt ruangah. ⁸ Mah taksa leiah tuhtu nih chun taksa mi siatnâk a ât lai; Thlarau lei tuhtu lam nih chun Thlarau a mi zungzâl ah mi nungnâk a ât awt asi. ⁹ Chun, thu ṭha ti neng lo ding; kanna dâithlanh lo chun a tikah kan ât awt ruangah. ¹⁰ Chun, tik a rem zia hâwi vima hen mi zawzawng tlûnah thu ṭha kan ti lai, lungnâk dâwngsung tla lakah mi tlûnah kan ti dauh chem ding asi. ¹¹ Keimah kut ngelchel hen nan sinah lasui puam rut hen ka rîn mi hi zauh u. ¹² Taksa a mêl dawhtir duhtu vial nih fêmtan si ding hen an fial râm na tâwn asi; zei dang ruang khawm asi lo le, Krist kraws ruangah nehsawh an tuar lonâk ding cho asi. ¹³ Fêmtan men nih Dân thu an zâwt lêm lo, nan taksa ah putso ding an nei khonâk ding hen fêm an tantir na ding an duh mi cho asi. ¹⁴ Kei lam nih chun kan Lalpa Jisu Krist kraws lo chu ka putso lo ding zia chu, chu zârah chun laikulh hi ka rangah khenh hen a um rawh, kei khawm laikulh rangah khenh hen ka um asi. ¹⁵ Siamthar nawlhnâk lo chu fêmtan hi zeikhawm asi lo. Fêmtan lo khawm zeikhawm asi lo. ¹⁶ Chun, chu dân hâwi a um mi vial tla tlûnah remnâk leh zângfahnâk um seh, Pathian phun thîm Israel tla tlûnah khawm. ¹⁷ Tu thawk hen âukhawm nih hawng ka nawktir lah seh; ka taksa ah hin Jisu singsiahnâk tla ka put ruangah. ¹⁸ Unau tla, Lalpa Jisu Krist zângfahnâk nan thlarau sinah um seh. Amen.