EPHESI

EPHESI

¹ Pawl, Pathian duhzia hen Krist Jisu mifial nih: Pathian mi tla Ephesi khua ah um mi tla, Krist Jisu ah mi zumhkâi le tla sinah chun-- ² Pathian kan Pa leh Jisu Krist sinah thawk hen zângfahnâk leh remnâk nan sinah um seh. ³ Kan Lalpa Jisu Krist Pathian leh Pa chu sawr hen um seh. Anih nih chun vân mun tla ah khin Krist ah chun thlarau lei malsâwm piaknâk kip hen mal hawng kan sâwm le, ⁴ zângfahnâk ah thenhlimh leh simsâwi kawp lo hen a mâika ah kan um khonâk ding hen tual tuah lânah Krist ah a tâ si ding hen a hawng kan thîm hâwi khan. ⁵ A zângfahnâk rokual zia sawr ding hen amah thinlung tluk leh lawmhkâng hâwl hen Jisu Krist zârah amah tâ rangah fa ah siam ding hen hawng kan ruat rawh ruangah. Chu zângfahnâk chu a Fapa duhtak lakah chun a thawt hen hawng kan pêk. ⁷ A thisen hen amah lakah kan tlanhnâk kan nei asi, a zângfahnâk chawng zia hâwi vima hen kan buarnâk tla ngaihdamnâk chu. ⁸ Chu zângfahnâk nih chun amah nih fing tak leh theihthiam tak hen hawng kan vurh asi, a duhzia thuthup kan sinah hawng kan theihtir mi hen. ⁹ Tik rangtling khawsât tikah a lawmhkâng zeizawng vân ah thu um tla, tual tlûnah thu um tla khawm Krist ah a pumh ding mi chu amah nih ti a tum hâwi khan; amah lak takah asi. ¹¹ Amah duhkâng a remruat hâwi vima hen thu zeizawng a tum mi a ruatkan si rawh hen amah lakah ber a mi si dingah siam kan si, ¹² kannih Krist lungum masa rawh tla hi a rokual sawrnâk langhtu kan sinâk ding hen. ¹³ Amah lakah nannih khawm thudik chu nan ruangsuahnâk Thâwngthâng Ṭha chu nan ngâi hen, lung khawm nan lung nûnah amah lakah Thlarau Thenhlimh tiamh hen chun singsiah hen nan um kha. ¹⁴ Chu chu Pathian rokual zia sawrnâk dingah amah tâ ngelchel tlanhnâk ding hen kan ro tingnâk dingah tiamhnâk asi. ¹⁵ Churuangah, kei khawm nih Lalpa Jisu lungnâk nan lakah um, Pathian mi le tla zawzawng tlûnah nan langhtir tâwn mi tla chu ka theih hen, ¹⁶ kan Lalpa Jisu Krist Pathian rokualnâk Pa nih chun amah theihnâk leikângah finghnâk leh theihfiangnâk Thlarau a nan pêk kho na nâk ding hen ka thlachamnâk tla ah chun nan min lam hen nan tlûnah lâwmthu sim ka bâng lo. ¹⁸ Chun, nan thinlung mit tla deitir a um hen amah kawhnâk lungumnâk tla hen mi thenhlimh tla lakah chun a ro ting ding rokual chawng zia tla, ¹⁹ mithi lakah mi a thawh nawlh liau leh lalnâk, thuneihnâk, thiltikhonâk, lâirêlnâk zawzawng tla, hi laikulh ah cho silo hen laikulh hawng tlung ding khawmah min sak zawzawng tla tlûn ving ah vân mun tla ah a vawrhlei ah a totir liauah Krist lakah a ṭuan mi, a thari chaknâk ṭuan zia hâwi vima hen khan kannih lungtu leikângah a thiltikhonâk a lianh zia tla zei hâwi asi nan theih kho lai. ²² Chun, thil zeizawng a kê tangah a siah le, amah chu zeizawng tlûnah lû rang dingah kawhmi tla sinah a pêk; ²³ kawhmi tla chu a taksa asi, zeizawng ah zeizawng khattirtu rangtlingnâk chu.

¹ Nannih khawm nan buar mi leh nan sual tla ruangah thi nan si liau khan a nan nunh na asi. ² Chubang lakah chun a lân khan hi laikulh dân hâwi hen nan um kha, boruak ah thuneihnâk lal tuah lunglo fa tla rangah ṭuan chirtu thlarau dân hâwi hen. ³ Chubang lunglo fa tla lakah chun kannih khawm a lân chun taksa leh thinlung duhkâng ti hen, kan taksa duhnâk tla hâwi hen kan um ver le, midang tla hâwi ber hen Pathian thinrunhnâk tuar ding hen suak mi rêng kan si kha. ⁴ Sikhawmsele, Pathian nih chun zângfahnâk a chawng hen a zângfahnâk fâk tak ruangah khan, ⁵ kan buarnâk tla ruangah thi kan si liau khawmah Krist rual hen hawng kan nunh bâk le, zângfahnâk hen ruangsuah nan si; ⁶ Krist Jisu ah amah rual ber ah hawng kan thawh hen, vân mun tla ah amah sinah hawng kan totir rawh. ⁷ Chun, tik hawng tlung ding mi lakah Krist Jisu ah kan tlûnah vêl nei hen a zângfahnâk neih fâk zia chu a zauhtir kho lai. ⁸ Lungnâk ruangah Pathian zângfahnâk hen ruangsuah nan si; chu khawm chu nanmah lakah suak asi lo le, Pathian thilpêk asi; thilti ruangah si lo, chu lo chun mi anna khâwng lebang lai. ⁹ Thil ṭha ti rang dingah Krist Jisu ah chun siam a um hen amah kut suak kan si le, ¹⁰ chu thil ṭha ti chu kan umnâk dingah Pathian nih a timhtuah kan mi asi. ¹¹ Churuangah, a lânah nannih taksa ah Phundang, taksa kut hen siam, "fêmtan" an ti mi tla nih "fêmtan lo" an ti na mi tla, kha liau khan, ¹² Krist lo hen Israel tla lakah mi nanna dang hen, laikulh hin lungumnâk rerêng nei lo leh Pathian lo a um hen, thutiamnâk tla lakah khual um hen nan um mi kha theihkumza u. ¹³ Tuah lam chun Krist Jisu ah nannih a lâiah lât tak hen umtu tla kha Krist thisen ah naihtir hen nan um rawh. ¹⁴ Krist amah ngelchel nih remnâk hawng kan siam piak ruangah; anih nih chun remlonâk thil ti ding tla lakah thupêk dân um chu a taksa ah tlâutir a um hen, ¹⁵ Juda tla leh Phundang tla chu pumkhat ah a siam le, an karah kardangnâk vâm chu a chimtir le, chun amah lakah chun phun nih tla chu minung thar pakhat a siam hen remnâk a siam kho lai. ¹⁶ Kraws ah Krist thihnâk zârah phun nih tla chu taksa pumkhat ah siam hen Pathian hen a remtir asi, chu kraws nih chun remlonâk chu a thah ruangah. ¹⁷ Chun a hawng kal chun nannih Phundang lât tak a um tâwn mi tla sinah remnâk Thâwngthâng Ṭha a nan simh na le, nâitê ah um tâwn mi Juda tla sin khawmah remnâk Thâwngthâng Ṭha a sim ber. ¹⁸ Krist zârah Thlarau munkhat ah Pa sinah, Juda leh Phundang nih lût khonâk kan nei vevê asi. ¹⁹ Chun, tuah khual leh ram dang mi salam nan si lo le, mi thenhlimh tla hen khualaikhat leh Pathian dâwngsung tla nan si dauh rawh asi. ²⁰ Krist Jisu tak chu a ki ah lung herh chem si hen mifial tla leh khuavâng tla lungphum tlûnah sak nan si. ²¹ Amah lakah chun in sak dang dang êp tak a tawnh hen, Lalpa lakah chun Biakin thenhlimh ah â chang vima; ²² nannih khawm, amah lakah chun Thlarau a Pathian umnâk ding remh tawnh hen sak mi nan si.

¹ Churuang chun, kei Pawl, nannih Phundang tla ruangah Krist Jisu ah rêngtla nih hin-- ² nan rangah Pathian zângfah zauhkhenhnâk rian hawng ka pêk mi kha nan hawng theih lai rawh. ³ Kha hâwi hen thuthup chu theihtirnâk ah theihtir hen ka um kha, a lânah tâwi tek hen ka rîn mi hâwi thu kha; ⁴ kha ruang khan nan rêl hen Krist thuthup ka theih zia nan theih lai. ⁵ Chu chu tuliau a mifial thenhlimh tla leh a khuavâng thenhlimh tla sinah Thlarau theihtir hen a um rawh hâwi khan, a lân khan minung fa tla sinah theihtir hen a um dah lo; ⁶ chu chu hi hi asi: Thâwngthâng Ṭha ruangah hin Krist Jisu ah Phundang tla hi Juda tla rotingtu, taksa pumkhat lakah ṭeng tla, thutiam tingpitu tla an si hi. ⁷ A thiltikhonâk ṭuan zia hâwi hen a thawt hen pêk mi Pathian zângfahnâk chu hawng ka pêk hâwi vima hen chu Thâwngthâng Ṭha rianṭuantu ah siam ka si. ⁸ Phundang tla sinah Krist neihsiahnâk sût châwk lo rê thâwngthâng sim ding leh thuthup zungzâl thawk hen Pathian zeizawng siamtu lakah thuh hen a um mi zauhkhenhnâk chu zeise asi ti mi mêchem ngâk a mê dauh sinah chu zângfahnâk chu pêk asi. ¹⁰ Chun, kan Lalpa Krist Jisu ah hi a tum mi a zungzâl remruat hâwi vima hen tu liauah vân mun tla ah khin lalnâk leh thuneihnâk tla sinah chun Pathian finghnâk kip kawhmi tla ruangah theihtir hen a um kho lai. ¹² Krist Jisu kan lung ruangah chun amah lak berah ngamhnâk leh râlṭhatnâk ṭha tak a lât khonâk kan nei. ¹³ Chun, nanmah ruangah hamh ka tuarnâk tla ruangah hin lungdawng lo ding hen ka nan ngiar na chubang chu nan rokualnâk asi. ¹⁴ Churuang chun, Krist chu lungnâk ruangah nan thinlung ah a chêl khonâk ding hen, a rokualnâk neih zia hâwi vima hen a Thlarau zârah minung sungril leiah chun thiltikhonâk ah chaktir hen a nan umtir na khonâk ding hen, Pa, tual leh vân ah dâwngsungkhur kip min putso mâika ah chun ka siksidîr tâwn le, chun Pathian rangtlingnâk zawng tluk hen khattir a nan um khonâk ding hen, nannih zângfahnâk ah ram thlâk leh ngauhsan nei a um hen, mi thenhlimh zawzawng hen a kauh zia, a sâu zia, a sâng zia, a thûk zia tla theihfiang khonâk, Krist zângfahnâk theih phâk lo theih khonâk nan nei kho lai. ²⁰ Chun, kanmah lakah ṭuan tâwntu thiltikhonâk hâwi vima hen kan deih le, kan dawnruat zawzawng ngâk a fâk dauh tikhotu sinah, ²¹ zungzâl thlâk zawzawng tiang hen kawhmi tla lakah leh Krist Jisu ah rokualnâk um seh; Amen.

¹ Chun, a nâutirnâk leh thu tang dawnhnâk zawzawng nei hen zângfahnâk ah a dawnh tawnh bû hen, ² dawnhkhonâk nei hen, remnâk phuarnâk ah chun Thlarau ah a pumkhatnâk chu kil ding a ti hen, ³ a nan kawh na nâk tlâk a um ding hen, kei, Lalpa ah rêngtlâ nih hin ka nan ngiar na. ⁴ A nan kawh na san lungumnâk munkhat hen kawh nan si hâwi ber hen khan taksa pumkhat leh Thlarau pakhat cho a um. ⁵ Lalpa pakhat, lungnâk munkhat, baptisma munkhat, ⁶ zeizawng Pathian feh Pa pakhat cho a um le, anih chu zeizawng tlûnah a um le, zeizawng ṭawl hen a um le, zeizawng sungah a um ber asi. ⁷ Sikhawmsele, Krist thilpêk tahnâk hâwi vima hen zângfahnâk chu kan sinah pêk chiau asi. ⁸ Pathian lasui thu nih, "Tlûnlei ah a kâi liau khan tleih tla tamtak a put na; minung tla sin khawmah thilpêk tla a pêk na," ti hen, a sim hâwi khan. ⁹ Chun, "A kâi," ti hi tual tang niam dauh tla ah a ṭum masa tâ lo chun zeitin asi kho lai? ¹⁰ A hawng ṭum mi chu zeizawng a khattir khonâk ding hen vân zawzawng tlûnlei ah a kâi mi ber kha asi. ¹¹ Chun, lungnâk leh Pathian Fapa theihnâk leikângah chun thuruat hen, upa si hen, Krist rangtlingnâk lenh zia tluk hen kan ektê hen kan um lan lo chu, ¹² rian ṭuannâk ṭuan ding hen mi thenhlimh tla rangtlingnâk ding hen, Krist taksa remh ding hen mi zeimaw mi chu Thâwngthâng Ṭha simtu rangah, ¹³ zeimaw mi chu kawhmi châwmtu leh sîntirtu rangah a pêk na; chun diklonâk ah ngamlêmnâk hâwi hen, ¹⁴ fing perpet a minung perpet bû hen, sîntirnâk thilti kip nih khatlei khatlei ah vawrh leh ranh mi ngâksia kan si lai lo rawh le, ¹⁵ zângfahnâk thudik sim hen zeizawng ah amah lakah kan ṭhanglian kho dauh lai; amah chu lû asi, Krist chu. ¹⁶ Amah zârah taksa pumpiluk chu a tlâinâk kip ṭuan ruangah êp tak a tawnh le peh dut hen, ṭeng kip ṭuan zia hâwi chiau hen, zângfahnâk a siamṭha ding hen taksa chu a pungtir tâwn asi. ¹⁷ Chun, hi hi ka sim hen Lalpa ah chun ka nan theihtir na asi: Phundang tla chu thinlung mangtlâklo put a an um hâwi hen um lah rawh ule, ¹⁸ theihlonâk anmah lakah um mi chu theihlonâk ruangah chun Pathian nungnâk lakah ṭhen a um hen, an theihnâk lakah chun an hawng mûi asi, an thinlung a mawlâwt ruangah. ¹⁹ Chubang tla nih chun a theihkhonâk an nei lo ruangah thil nâwmtâm kip hamkah tak a ti ding hen hurnâk ah anna pumpêk rawh. ²⁰ Nannih lam nih chun Krist chu nan châwng le, ²¹ a aw-hâu ngâi hen amah lakah sîntir hen um nan si rawh chun Jisu lakah thutak um mi hâwi hi; ²² "A lânah nan umdân leikângah minung li bumnâk duhnâk hâwi a râwk dadauh kha lit ule, ²³ nan thinlung thlarau ah chun a thar hen hawng um ule, ²⁴ minung thar, thudik repnâk leh thenhlimhnâk ah Pathian hâwi a siam hen khan a thuam u," ti thu hi. ²⁵ Chun, âwkrâwl sim mâk hen, mah zâwlbâwm sinah thudik sim chiau u, a ṭeng tawnh chiau kan si ruangah. ²⁶ Thinrun khawm ule, sual lam chu sual lah u; nan thinthawknâk chu nî nih tlâkpi lah seh. ²⁷ Diabol chu mun kenh lah u. ²⁸ Fîr mang nih chun fîr lah rawh sele, a samphâng mi sinah chun a pêk ding a nei khonâk ding hen a kut ah thil ṭha hen a hamh dauh seh. ²⁹ Thu ṭha lo rerêng nan kâ ah suak lah seh, a herh zia hâwi vima a siamṭha ding hen thu ṭha vial suak dauh seh, a ngâitu tla rangah zângfahnâk asi khonâk ding hen. ³⁰ Chun, Pathian Thlarau Thenhlimh chu lungzûrtir lah u, tlanhnâk ni rang dingah chu hen chun singsiah hen nan um kha. ³¹ Khânâk thinthawknâk, sirleihnâk rângnak, simsiatnâk zawzawng chu bângtâk hen um seh. ³² Chun, a zângfah tawnh hen siherhnâk nei hen um ule, Pathian nih Krist ah a nan ngaihdam na hâwi ber hen a ngaihdam tawnh u.

¹ Chun, a fa duhtak tla hâwi hen anmah bangh ding hen um tum u. ² Krist nih a nan dâwt na le, rimthâw rang dingah Pathian sinah thil ap ah leh bâwlnâk ah kan ruangrûl ah â pêk mi hâwi khan zângfahnâk ah um u. ³ Sikhawmsele, mi thenhlimh tla ti ding hen â dawh mi, duhnâk leh nâwmtâm zawzawng hamkahnâk hen nan lakah sim hen khawm um lah seh; ⁴ kangal thu, thu-do-tla-lo, chapo thu khawm chubang chu â dawh lo asi; chubang ti ngâk chun lâwmthu sim dauh u. ⁵ Pung mang leh mi nâwmtâm leh mi duhlei rerêng nih chun (mi duhlei chu ruk sawnhtu asi) Krist leh Pathian Ram ah chun tingvo rêng an nei lo ti nan theih asi. ⁶ Âukhawm nih thu salam hen an perpet lah na seh; chubang thu ruang chun Pathian thinrunhnak lunglo mi tla tlûnah a tlung tâwn. ⁷ Churuangah anmah bâwmpi lah na u. ⁸ A lânah khan mûi ah nan um le, sikhawmsele Lalpa mi tla nan si nûnah chun chêu lakah nan um rawh. Churuangah, chêu lakah um mi tla hâwi hen nan um ding asi. ⁹ Chêu nih chun ṭhatnâk, repnâk leh thudik rah kip a suah tâwn ruangah. ¹⁰ Lalpa lawmhkâng zei me asi ti sîn ding hen a ṭang u. ¹¹ Chun, mûi thilti rah dah lo lakah chun telnâk rerêng nei lah u, tel ngâk hen an mawh zia theihtir dauh na u; ¹² a thup hen thil ti tâwn tla chu a sim khawm ningzâk a kâi ruangah. ¹³ Sikhawmsele, thu zeizawng an mawh zia theihtir hen um hi chêu langhtir mi asi tâwn; langhtir hen um mi vial chu chêu asi. ¹⁴ Churuangah, "Nang, it meng le, mithi lakah mi thawk rawh; chun, Krist nih a nan cherh lai," a ti kha. ¹⁵ Chun, mi fing lo tla hâwi a um lo hen, mi fing tla hâwi a um dauh hen, nan umdân ah a thiamthih u; ¹⁶ ni tla hi a ṭha lo ruangah tik remkâng siam vima u. ¹⁷ Churuangah â hen um lah ule, Lalpa duhzia zei me asi ti theih dauh u. ¹⁸ Chun, uain rî hen um lah u, chu lak chun sûmkholonâk a um ruangah; Thlarau a khat hen um dauh u. ¹⁹ Sawrnâk la tla, Pathian la tla, Thlarau lei la tla hen a sawnh tawnh hen, Lalpa chu nan thinlung ah la sak piak hen, ṭingṭang tum piak u. ²⁰ Kan Lalpa Jisu Krist min hen, Pathian, Pa sinah zeizawng lakah lâwmthu sim kumza u. ²¹ Krist ṭih bû hen a pumpêk tawnh chiau u. ²² Nupi tla, Lalpa sinah nanna pumpêk mi hâwi hen mah pasal tla sinah a pumpêk u. ²³ Krist amah ngelchel taksa ruangsuahtu si hen kawhmi lû asi hâwi hen pasal chu nupi lû asi. ²⁴ Chun, kawhmi tla Krist sinah anna pumpêk mi hâwi hen nupi tla chu an pasal tla sinah a pumpêk na seh. ²⁵ Pasal tla, nan nupi tla zângfah na u, Krist nih kawhmi tla a zângfah le, an ruangrûl ah amah â pêk hâwi hen khan, ²⁶ annih chu tî a ṭâwl hen, thu nih chun a thiangtir hen a thenhlimhtir kho na nâk ding hen; ²⁷ chun, kawhmi tla chu nâwm kawp lo leh thurh lo leh chu hâwi thu rerêng put lo hen, thenhlimh leh simsâwi kawp lo a um dauh hen amah sinah kawhmi tla rokual tak hen â pêk chawlh kho lai. ²⁸ Chu hâwi ber hen pasal tla khawm nih mah taksa hâwi hen mah nupi tla chu an zângfah ding asi. ²⁹ Mah nupi zângfahtu chu mah â zângfah mi asi. Âukhawm mah taksa an hua dah lo, an châwm hen an dâwt dauh tâwn asi. Krist nih kawhmi tla a dâwt na hâwi hen; ³⁰ taksa ṭeng tla kan si ruangah. ³¹ Churuang chun, mipa nih a nu leh pa a kaltâk hen a nupi a sihawh lai le, chun an panih hen taksa pumkhat an hawng si lai rawh. ³² Chu thuthup chu a rokual asi, sikhawmsele kei lam nih chun Krist leh Kawhmi tla thu ka sim asi. ³³ Zeikhawm si sele, nan lakah mi khawm nih mah â zângfah hâwi ber hen mah nupi zângfah chiau seh: nupi khawm chu a pasal ṭih leh zah ding hen a thaimthih seh.

¹ Ngâksia tla, Lalpa ah nan nu leh pa thu zâwt u; chu chu thil dik asi. ² "Na nu leh na pa chawnglawmh rawh" (chu chu thupêk masachem thutiam sap mi chu asi): ³ "Chun na rangah a ṭha lai le, tual ah hin na dam sâwt lai." ⁴ Chun, nannih nu leh pa tla; nan fa tla thinruntir lah ule, Lalpa nunsimhnâk leh simhfâinâk ah chun zauhkhenh u. ⁵ To-aw tla, Krist thu nan zâwt hâwi hen ṭih leh thir bû hen, thinlung lungkhat hen, ⁶ minung mitzauh vêng hâwi cho silo hen, Krist to-aw hâwi hen thinlung ah Pathian duhzia ti dauh hen, ⁷ minung rianṭuan hâwi cho silo hen, Lalpa rianṭuan hâwi dauh hen duh tak bû a ṭuan hen, ⁸ to-aw khawm si seh, to-aw lo khawm si seh, mikip nih thil ṭha an ti mi vial chu Lalpa sinah mi a lîlâ an tawng nawlh lai ti theih hen, taksa ah nan hotu tla thu zâwt u. ⁹ Chun, nannih hotu tla, chu hâwi ber hen anmah leh nanmah hotu chu vân ah a um ti leh anih nih chun mi duh khun a nei lo ti theih hen, râp lo hen an tlûnah ti bâk u. ¹⁰ A dawnghchemnâk ah Lalpa ah leh a chaknâk ah thiltikhonâk nei hen hawng um u. ¹¹ Diabol ngamlêmnâk tla chu nan do khonâk ding hen Pathian râlthuam rangtling hen a thuam u. ¹² Kan paihpi mi tla hi taksa leh thisen an si lo, lalnâk leh thuneihnâk tla leh hi thim tlûnah lâirêltu tla leh vân mun tla ah thlarau sual um mi tla an si dauh. ¹³ Churuangah, ni ṭha lo ah chun nan do khonâk ding hen leh nan ti thluh ver nûn khawmah nan dîr khonâk ding hen Pathian râlthuam rangtling lâk u. ¹⁴ Chun, nan tâi chu thudik a sâwm hen, repnâk chu phâw ah sawng hen, ¹⁵ remnâk Thâwngthâng Ṭha timhtuahnâk chu nan kê ah bunh hen dîr u. ¹⁶ Chubang lo khawm chu lungnâk phâw lâk ule, din hen chun chanhtiang fungzum alh kho zawzawng chu nan mih kho lai. ¹⁷ Chun, ruangsuahnâk lukhuh leh Thlarau nâmsâu (Pathian thu) chu lâk ule, ¹⁸ thlachamnâk leh deihnâk kip hen zeiliau zawngah Thlarau a thlacham hen chu leikângah chun mi thenhlimh zawng rangah ṭhanemsemsê ngâi tak hen leh deih thlir hen a ringrâwn u. ¹⁹ Thâwngthâng Ṭha thuthup râlṭha tak a phuang ding hen, ka kâ ka âng hen thu simtir a ka um khonâk ding hen ka rangah khawm hawng ka deih piak u. ²⁰ Chu leikângah chun ka sim ding hâwi chu râlṭha tak a ka sim khonâk ding hen. Chu Thâwngthâng Ṭha rêl rêngkhimh ka si. ²¹ Sikhawmsele, nannih khawm nih zei hâwi hen ka um, ka thâwngthâng nan theih khonâk ding hen Tukika, Lalpa ah unau duhtak leh rianṭuantu zumhkâi tak nih hin zeizawng a nan theihtir na lai. ²² Hi ruang takah hin amah chu nan sinah ka hawng fial asi, kan thâwngthâng nan theih khonâk ding hen leh anih nih hin nan thinlung an lungngamh kho na ding hen. ²³ Pa Pathian leh Lalpa Jisu Krist thawk hen remnâk leh lungnâk hen zângfahnâk unau tla zawzawng sinah um seh. ²⁴ Kan Lalpa Jisu Krist chuai lo hen a zângfahtu zawzawng tla sinah dâwtnâk um seh.