KOLOSA

KOLOSA

¹ Pawl, Pathian duhzia hen Krist Jisu mifial leh Timothe kan unau nih chun-- ² Kolosa khua ah Krist ah mi thenhlimh tla leh unau zumhkâi tla sinah chun: Pathian kan Pa thawk hen zângfahnâk leh remnâk nan sinah um seh. ³ Vân ah nan rangah lungumnâk an siah piak na ruangah, Krist Jisu nan lung zia leh mi thenhlimh tla tlûnah zângfahnâk nan nêi zia kan hawng theihnâk thawk hen chun nan rangah thlacham kumza hen Pathian kan Lal Jisu Krist Pa sinah chun lâwmthu kan sim tâwn, chu lungumnâk thâwngthâng chu a lânah, Thâwngthâng Ṭha thudik thu ah khan nan theih rawh. ⁶ Chu Thâwngthâng Ṭha chu laikulh zawzawng ah rah hen a pung vima hâwi hen nan sinah a tleng kha. Chu hâwi ber hen, Epaphra kan to-aw hâwi duhtak lakah nan châwng hâwi hen, thungâi tak hen Pathian zângfahnâk chu nan ngâi hen nan theih ni thawk khan, nanmah lak khawmah rah hen a pung vima tâwn asi. ⁸ Epaphra hi kan ruangrûl ah Krist rianṭuantu zumhkâi tak asi le, anih nih hin Thlarau ah nan zângfahnâk chu hawng kan simh. ⁹ Churuang chun, Thlarau finghnâk leh theihkhonâk zawzawng leikângah amah duhzia theih rangtlingnâk ah chun nan hawng khat khonâk ding hen, kan theih ni thawk hen chun kannih khawm nih thlacham hen kan deih piak na mi kan bâng lo. ¹⁰ Chun rianṭuan kipah rah hen Pathian theih rangtlingnâk ah mavua dadauh hen lâwm tak a felfênâk leh dawnhkhonâk kip nei kho ding hen a rokualnâk chak zia hâwi vima a chaknâk kipah chak hen, Pa, chêu ah mi thenhlimh tla ro chu bâwm bâk tlâk a hawng kan siamtu sinah chun lâwmthu simh hen zeizawng lakah amah lungâwitir ding hen Lalpa zûl tlâk hen nan um kho lai. ¹³ Anih nih chun mûi thuneihnâk lakah mi hawng kan suah hen a Fapa zângfah tak ram ah hawng kan ṭhial rawh le; ¹⁴ amah lakah kan tlanhnâk kan tawng asi--kan sual tla ngaihdamnâk chu. ¹⁵ Anih chu muh kho lo Pathian banghpi thilsiam zawzawng ngâk a sâng hen suak masachem chu asi; ¹⁶ amah lakah chun zeizawng siam asi le, vân ah um tla, tual ah um tla hen, muh kho tla, muh kho lo tla hen, Thlarau thiltikhonâk tla khawm lâirêltu tla khawm lalnâk tla khawm, thuneihnâk tla khawm, Pathian nih laikulh pumpi hi amah ruangah leh amah rangah a siam mi asi. ¹⁷ Krist chu zeizawng um lânah um mi rawh asi, amah lakah chun zeizawng munkhat dut hen a dîr. ¹⁸ Anih chu a taksa, kawhmi lû asi; zeizawng ah chungnungchem a hawng si khonâk ding hen, a bulpi, mithi lakah mi suak masachem chu asi. ¹⁹ Pathian rangtlingnâk kip chu amah Fapa lakah a um kumza le, a kraws thisen nih chun remnâk siam hen, amah lakah chun zeizawng amah hen remtir hi, Pathian lungsi kâng tak asi; amah lakah chun tual ah thil um tla khawm, vân a thil um tla khawm amah hen remtir hi. ²¹ Chun, nannih a lânah nan thilsual ti ruangah khan amah lakah mi ṭhen hen nan um le, nan thinlung ah mêlma nan hawng si kha, sikhawmsele, tuah lam chun, a mâika ah thenhlimh tak leh simsâwi um lo leh simsâwi kawp lo hen a nan dîrtir na ding hen, a taksa thihnâk ruangah chun amah hen a nan remtir na rawh asi; ²³ ngauhsan nei hen bir tak a um hen, Thâwngthâng Ṭha nan theih mi lungumnâk thawk hen a ṭhial lo hen, lungnâk lakah hin nan um thlir chun chu Thâwngthâng Ṭha chu vânrâng tangah thilsiam zawzawng tla lakah phuang asi kha; kei Pawl hi chu rianṭuantu ah siam ka si. ²⁴ Tuah ka nan tuar piak na mi lakah hin ka lâwm, Krist hamh tuar mabân chu ka taksa ruangah ka tîttak ah hin ka zulhpeh vima asi; ²⁵ a taksa chu kawhmi hi asi. Pathian thu kim tak a sim ding hen zauhkhenhnâk nan Pathian nih nan rangah hawng ka pêk hâwi vima hen chubang tla rianṭuantu ah siam ka si. ²⁶ Chu Pathian thu chu zungzâl leh thlâk um thawk hen thuthup â thup mi kha asi; tu lam chun a mi thenhlimh tla sinah langhtir hen a um rawh. ²⁷ Chubang na sinah chun chu thuthup rokualnâk chawng zia chu Pathian nih theihtir a duh rerêng asi; chu thuthup chu Krist nanmah lakah um mi rokualnâk lungumnâk san chu asi; ²⁸ mikip Krist ah chun ṭha rangtling a kan dîr khonâk ding hen, mikip simhfâi hen, mikip finghnâk kip a sîntir hen a thâwngthâng kan sim tâwn mi hi, ²⁹ chubang hâwi a dîrtir kho ding hen fâk tak hen keimah lakah a ṭuan mi, chu a ṭuan zia hâwi vima hen ti rarâm hen hamh tak hen ka ṭuan tâwn asi.

¹ Nanmah tla leh Laodikei khua um tla leh taksa ah ka mêl muh lo mi vial tla rangah zei ti tluk a fâk hen me kan ṭuan piak na mi hi nan theih ka duh asi. ² Chun, Pathian thuthup finghnâk leh theihnâk ro zawzawng thuhnâk Krist chu an theih khonâk ding hen, theih a lung thlirnâk neihnâk zawzawng chu ting ding hen zângfahnâk ah a sih dut hen, an thinlung tla chu lungngam hen a um kho lai. ⁴ Âukhawm nih thusim thiam hen an perpet na lonâk ding hen chubang chu ka ti asi. ⁵ Taksa hen nan sinah um lo khawmsele, lâwm tak hen nanna rep zia leh Krist nan lung birh zia zauh hen, thlarau ah chun nan sinah ka um asi. ⁶ Churuangah, Krist Jisu, Lalpa chu nan lawmh hâwi khan, amah lakah ram thlâk leh dirh hen sangh dadauh a um hen, an sîntir na hâwi khan nan lungnâk ah chun bir tak a um hen, lâwmthusim nei tam hen amah lakah chun um u. ⁸ Thiamthih u, chu lo chun âuzawng nih Krist thu hâwi silo hen, minung thurovuih leh laikulh thlarau tla lâirêlnâk hâwi dauh hen an thufing leh perpetnâk salam hen râl lâk hen an lâk na lebang lai. ⁹ Amah lakah chun Pathian rangtlingnâk zeizawng chu taksa nei hen a um kumza. ¹⁰ Amah lakah chun nan rangtling rawh le; anih chu lalnâk leh thuneihnâk zawzawng lû asi. ¹¹ Krist fêmtannâk ah chun taksa tîttak lît ver hen amah lak ber ah kut a fêmtan silo hen fêmtan nan si kha; ¹² baptisnâk ah khan a sinah phûm nan si bâk rawh le, chu lak ber ah chun mithi lakah mi amah thawhtu Pathian rianṭuan lung ruangah a sinah thawh nan si bâk kha. ¹³ Chun, nannih buarnâk tla leh nan taksa fêmtan lonâk ruangah thi nan si le, nanmah ngelchel chu amah hen a nan nungtir na asi kha; ¹⁴ kan buarnâk zawzawng hawng kan ngâihdam le, batnâk lasui thupêk a rîn mi kan tlûnah um mi hawng kan kham tâwn chu a veih rawh asi: chu tak chu Kraws a khenhbêk hen a dangah a siah rawh. ¹⁵ Chun, lalnâk leh thuneihnâk tla chu lît hen, chu Kraws lakah chun chubang tla chu neh hen, langngân hen theihtirnâk ah a mang rawh. ¹⁶ Chun, ei thu ah mawh, din thu ah mawh, kût ni thu ah mawh, thla thar thu ah mawh, Dinhni thu ah mawh âukhawm nih an simsâwi lah na seh; ¹⁷ chubang tla chu thil hawng tlung ding mi thlâpelê asi, a tak lam chu Krist asi. ¹⁸ Âukhawm mah duh thu ko a dawnhkhonâk leh vânmifial sawnhnâk mang hen nan lâwmman chu a nan suh lah na seh, an thil muh tla lakah chun um kumza hen, an taksa lei thinlung ruangah a zûm salam hen, Lû chu tleih thlir ṭung lo hen an um. ¹⁹ Amah zârah chun taksa pumpi chu pehnâk leh phuarnâk tla ruangah châwm leh tlâi dut a um hen, Pathian nih ṭhang ding a duh mi hâwi hen a ṭhanglian tâwn. ²⁰ Laikulh thlarau tla lâirêlnâk chu Krist sinah an thih tâk rawh chun, zeirangah me laikulh ah nung ko hâwi hen, minung thutiam leh sîntirnâk, ²¹ "Tawngh tawngh lah le, tem khawm tem lah, tham khawm tham lah" ti hâwi a thupêk tla lakah hin nanna pumpêk ne? ²² Chubang hâwi thil zawzawng chu mang hen veih ding asi. ²³ Chubang thil tla chu, mah duh hâwi hen sawnh leh ngâiniamnâk leh taksa repnâk lakah chun ti ding mi hâwi hen a lang ngâk, sikhawmsele, taksa duhkâng khap leikângah chun zeikhawm a ṭhavak loh.

¹ Chun, Krist sinah thawh hen nan um bâk rawh chun, tlûnlei mi, Pathian vawrhlei ah to Krist umnâk ah thil um tla chu hâwl u. ² Tlûnlei ah thil um lakah chun nan thinlung siah thlir u, tual ah thil um tla lakah chun siah lo hen. ³ Nan thi rawh le, nan nungnâk chu Pathian lakah Krist sinah thuh hen a um rawh ruangah. ⁴ Krist kan nungnâk chu a hawng a langh tikah chun nannih khawm amah sinah rokualnâk ah nanna langh bâk lai. ⁵ Chun, nan taksa ṭeng tual a um tla hi thah u, duhnâk, nâwmtâmnâk, hurnâk, duhnâk sual, duhlei hamkah tla hi, hamkahnâk hi ruksawnhnâk asi; ⁶ chubang thil ruangah asi Pathian thinthawknâk chu lunglo fa tla tlûnah a tlung tâwn mi chu; ⁷ nannih khawm a lânah chubang thil tla lakah nan nung liau khan, chubang lakah nan um tâwn kha. ⁸ Tu lam chun nannih khawm nih hi bang zawzawng sîrleihnâk, thinthawknâk, huatnâk, simsiatnâk nan kâ lakah suak kangal thu tla hi thlah u, âwkrâwl a simhtawnh lah u; minung li chu a thilti hen nan lît rawh le, ⁹ minung thar hen nanna thuam rawh dangâiah, ¹⁰ chu minung thar chu theih rangtlingnâk nei ding hen a siamtu bangh a siamthar hen a um liau chir asi; ¹¹ chu lak chun Greek mi leh Juda mi, fêmtan leh tan lo phundang tla, Skuthia mi tla, sal tla, sal lo tla khawm a um lo; Krist chu zeizawng si dauh hen zeizawng ah a um ber asi. ¹² Chun, Pathian mi thîm, mi thenhlimh leh duhtak tla hâwi hen siherhnâk thinlung tla, vêlneihnâk thinlung tla, ngâiniamnâk tla, ¹³ dawnhkhonâk tla hen a thuam u, âuzawng nih âu lak zawngah thupawi nei ule, a dawnhtawnh hen a ngaihdam tawnh ule, Lalpa nih a nan ngaihdam na hâwi hen khan a ngâihdam u. ¹⁴ Chun, chubang zawzawng lakah chun zângfahnâk nei u, chu chu phuar rangtlingnâk asi. ¹⁵ Chun, Krist remnâk nih chun nan thinlung ah lâirêl seh, chubang hâwi si ding hen taksa pumkhat ah kawh nan si rerêng asi; lâwm ding dan theih u. ¹⁶ Krist thu chu finghnâk kip hen nanmah lakah um chiau seh; sawrnâk la tla, Pathian la tla, Thlarau lei la tla a sîntir hen nun a simhtawnh ule, thinlung zângfahnâk nei hen Pathian chu la sak piak u. ¹⁷ Chun nan ti mi zawng chu thusim lakah mawh, thilti lakah mawh amah zârah Pa Pathian sinah lâwmthu sim bû hen Lalpa Jisu min hen ti ver u. ¹⁸ Nupi le tla, Lalpa lakah a dawh tâwk hâwi vima hen nan pasal le sinah a pumpêk u. ¹⁹ Pasal le tla, nan nupi le tla zângfah ule, an lakah râng lah u. ²⁰ Ngâksia le tla, zeizawng ah nan nu leh pa thu zâwt u, chu chu Lalpa lakah lawmh a kâi asi. ²¹ Pa le tla, nan fa le tla thinrunhtir lah na u, chu lo chun an lung a dawng lebang lai. ²² Sal le tla, taksa a nan hotu le thu hi zeizawng ah zâwt u, minung lawmhtirtu tla hâwi cho hen mit rianṭuan lo hen thinlung pakhat put hen Lalpa ṭih bû hen zâwt dauh u. ²³ A rulhnâk, ro ting ding chu Lalpa sinah thawk hen nan tawng awt ti theih hen, nan ti mi vial chu minung rang hâwi a ti lo hen, Lalpa rang hâwi a ti dauh hen, lung thawk tak hen ti u; Lalpa Krist rian nan ṭuan asi hi. ²⁵ Thil diklo titu nih chun a thilti diklo man chu a tawng nawlh lai; Pathian nih mikip chu bang ver hen lâi a rêl ruangah.

¹ Hotu le tla, nannih khawm nih vân ah hotu nan nei ti theih hen, nan sal tla tlûnah a rep leh dawh tâwk chu ti u. ² Thlacham vima ule, chu lak chun lâwmthu sim bû hen ruat tet u. ³ Hawng ka phuarnâk san Krist thuthup chu phuang ding hen Pathian thu sim ding hen lampi hawng kan awng piak ding hen kannih khawm thla hawng kan cham piak bâk u. ⁴ Ka sim ding hâwi a ka sim khonâk ding hen. ⁵ Tik dengkhâwng hâwi vima hen lênglei mi le tla lakah chun fing tak hen um u. ⁶ Mikip zei hâwi sâng chiau ding me asi ti nan theih khonâk ding hen nan kâ suak chu ngâi tlâk, zângfahnâk tel si kumza seh. ⁷ Lalpa ah unau duhtak, rianṭuantu zumhkâi kan to-aw hâwi Tukika nih hin ka thâwngthâng zawzawng a nan theihtir na lai. ⁸ Hi ruang tak hin anih chu nan sinah ka hawng fial asi, kan thâwngthâng nan theih khonâk ding leh nan thinlung an lungngamh kho na nâk ding hen. ⁹ Onesimus unau zumhkâi leh duhtak nanmah lakah mi hen. Annih tla nih chun hi leiah thil umzia zawzawng hi an theihtir na lai. ¹⁰ Aristarka ka rêngtlapi hâwi nih hin chibai a nan bûk na; Mark, Barnaba tupa khawm nih chibai a nan bûk na, (amah thu ah thupêk tla nan theih kha; nan sinah a hawng kal chun hawng lawmh u): ¹¹ Jisu, Zusta an ti mi nih hin chibai a nan bûk na bâk. Chubang chu fêmtan mi an si le, chu cho chu Pathian ram thu leiah chun ka ṭuanpi mi, hawng ka lungngamhtu an si. ¹² Epaphra nanmah lakah mi, Krist Jisu to-aw nih hin chibai a nan bûk na. Anih nih chun Pathian duhzia zawng upat leh lung thlirnâk nei hen nan dîr khonâk ding hen a thlachamnâk tla ah chun nanmah tla rangah â ṭang kumza tâwn asi. ¹³ Nanmah tla rangah, Laodikei khua tla rangah leh Hirapoli khua ah um mi tla rangah thungâi semsê a ngâi ti ka theihpi asi. ¹⁴ Luk daktor leh Dema nih hin chibai a nan bûk na. ¹⁵ Laodikei khua unau um tla kha chibai hawng ka bûk piak u; Nimpha leh a in ah kawhmi anna pûm mi tla chu chibai hawng ka bûk piak bâk u. ¹⁶ Chun, hi lasuikuat hi nan lakah nan rêl nûnah Laodikei kawhmi tla lakah khawm rêltir na bâk u; nannih khawm nih Laodikei khua ah mi kha hawng rêl bâk u. ¹⁷ Chun, Arkipa sinah khan rianṭuannâk Lalpa lakah na tawng mi kha dih ding hen fîmkhur rawh ti u. ¹⁸ Kei, Pawl nih, keimah kut ngelchel hen chibai ka nan bûk na nâk ka rîn mi asi hi. Ka rêngkhimh tla hi theihkumza u. Zângfahnâk nan sinah um rawh seh.