THILTI

THILTI

¹ Theophil duhtak: Ka lasuibu masachem lakah khan Jisu thilti leh sîntirnâk a dawmhtirnâk zawzawng thu kha ka rîn asi. ² Thlarau Thenhlimh hen a mifial tla sinah thu a pêk thluh nûnah vân ah kâi hen a um ni tiang thu kha. ³ Chu mifial tla sinah chun hamhnâk chu a tuar nûnah theihtirnâk tamtak leh nung hen â zauhtir le, ni sâwmli tiang an sinah â langh le, Pathian Ram thu a sim tâwn. ⁴ Chun, anna pûm mi tla a kawmh na, "Jerusalem kaltâk lah u, Pa thutiam ka sim mi nan theih mi kha hawng ngâk u," a ti thlir. ⁵ "Johan nih khan tî hen a baptis tâwn le, sikhawmsele ni sâwtlotê ah Thlarau Thenhlimh hen baptis nan si lai," a ti. ⁶ Chun, mifial tla chu Jisu hen anna pûm rawh chun a sinah, "Lalpa, tuah masi Israel tla sinah ram na pêk nawlh awt?" an ti le, an deih. ⁷ Chun, Jisu nih chun an sinah, "Pa nih a tik leh a ni amah thu thu a um hen a ruat mi chu nannih theih ding asi lo. ⁸ Sikhawmsele, Thlarau Thenhlimh chu nan tlûnah a hawng tlung tikah thiltikhonâk nan nei lai. Chun, Jerusalem ah, Juda leh Samari ram khua kipah leh kâwlkil tiang khawm hen ka thu theihpitu tla nan si lai," a ti. ⁹ Chun, chubang thu chu a sim thluh nûnah an muh ko bû hen vân ah kâi hen a um; chun sûm nih an muh phâk lo ah a phenh rawh. ¹⁰ Chun, a kâi liauah vân lei an zauh ko liauah, mi panih puan ngo aih hen an kiangah an hawng dîr. ¹¹ Annih nih chun, "Galili ram mi tla, zeirangah vân lei zauh hen nan dîr ko? Hi Jisu nan sin thawk hen vân ah kâi hen a um mi hi vân ah a kâi mi nan muh hâwi ber hen amah ngelchel hi a hawng kal nawlh lai," an ti. ¹² Chun, Oliv Tlâng an ti mi thawk hen chun Jerusalem ah an kîr nawlh le; chu tlâng chu Jerusalem kiang asi, Dinhni ah kal tâwk cho asi. ¹³ Chun, an lût hen an umnâk kardang tlûn dauh ah chun an kâi le: Peter, Johan, Jem leh Andri hen, Philip leh Thom hen, Bartholomai leh Mathai hen, Alphai fapa Jem leh Simon Zelot murui a mi leh Jem fapa Juda hen an si. ¹⁴ Chubang tla zawzawng chu nunau âu tla mawh leh Jisu nu Mari hen, Jisu unau tla hen, thinlung munkhat hen thla an cham. ¹⁵ Chun, chubang ni tla ah chun unau tla lakah Peter chu a dîr le, an ektê hen zâ leh kul ding an si. ¹⁶ "Unau le tla, Thlarau Thenhlimh nih, David kâ ah, Jisu tleihtu tla ruitu Juda thu a simhkan mi kha, kha Pathian lasui thu kha a hawng tlung ding rêng asi. ¹⁷ Juda chu kan lakah rêlsih asi le, hi bang rianṭuan lakah hin tingvo khawm a nei bâk. ¹⁸ (Chun, chu minung nih chun a sual man hen mun pakhat a châwk le, a bingbilet hen a tlâ le, a lâi ah a kek phut le, a ril zawzawng a suak ver. ¹⁹ Chun, chubang thu chu Jerusalem ah um mi tla zawzawng nih an hawng theih le; chun chu mun chu anmah hawlh hen, "Akeldama," an ti, chu chu "Thisen Mun," tinâk asi.) ²⁰ "Sawrnâk labu ah hi thu hi rîn asi: ’A umnâk a karo hen um seh, chun a sungah âukhawm um lah seh,’ ti leh, ’A hotu sinâk midang nih ting seh,’ ti hi. ²¹ "Chun, Lal Jisu kan lakah lût leh suak tâwn hen a um kar zawng, Johan baptisma thawk hen kan sinah mi vân ah kâi hen a um ni tiang khan hi bang hawng kan kawmh tâwntu tla lakah hin minung pakhat a thawknawlhnâk hawng kan theihpitu rangah a um ding asi," a ti. ²³ Chun, mi panih an thîm le, Josef Barsaba an ti mi, (a min tak chu Justa an ti), chun pakhat chu Mathia asi. ²⁴ Chun, thla an cham le, "Nang Lalpa, minung zawzawng thinlung theihtu, ²⁵ Juda nih chun amah umnâk ah kal ding hen hi bang rianṭuan leh mifial rian a bângtâk mi hi a ruangrûl ding hen hi minung panih hi âu dauh me na thîm hawng kan theihtir," an ti. ²⁶ Chun, an chamchawh mi chu Mathia tlûnah a tlû. Chun, anih chu mifial leikhat tla lakah chun rêlsih asi rawh.

¹ Chun, Pentekost ni a hawng tlung. An ektê hen mun khat ah anna pûm ver. ² Chun, lâkkhatko ah vân thawk hen rihâu thlipi râng hâwi hen a hawng tleng khup; chu nih chun an tonâk in chu a hawng khattir ver. ³ Chun, lei tla, amah leh amah a ṭhen hen mei hâwi hen an sinah a hawng a langh rawh. ⁴ Chun, an ektê hen Thlarau Thenhlimh hen an hawng khat ver le, Thlarau nih a hawlhtir hâwi vima hen hawlh dang hen an hawng hawlh rawh. ⁵ Chun, laikulh ah phun kip lakah thawk hen Pathian sunhsak mi Juda tla Jerusalem ah an um. ⁶ Chun, chu rihâu chu an theih kâ hen mi zapi an hawng a pûm le, mikip nih mifial tla hawlh chu anmah hawlh hâwi hen an hawng theih ruangah an thinlung a nawk. ⁷ Chun, an ektê hen an lawksawng le, thungâi chê an ti, "Hi bang an hawlh mi tla zawzawng hi Galili ram ah mi an si lo mazei? ⁸ Zeitin zia, kan ektê hen kan suakpi mi hawlh hâwi hen kan theih chiau? ⁹ A zeimaw mi chu Parthian phun tla, Media phun tla, Elamitai phun tla kan si le; zeimaw mi chu Mesopotamia ram ah um mi le, Juda ram ah um mi tla, Kapadokia ram ah um mi tla, Ponto leh Asia ram ah um mi tla, ¹⁰ Phrugia leh Pamphulia ram ah um mi tla, Aigupta leh Kurini khua kiangkam Libia ram ah um mi tla, zeimaw mi Rom khua Khual Judai leh phun lût tla hen kan si le; ¹¹ zeimaw mi Kret tikulh mi leh Arabia ram mi le kan si; Pathian thil rokual tla an sim mi kha mah hawlh hâwi chiau kan theih hi!" an ti.’ ¹² Chun, an ektê hen thungâi chê an ti le, a ngaihtawnh dân an theih lo, "Hi bang hi zei zia mesi?" anna ti. ¹³ Zeimaw mi nih an nihsanh na le, "Uain thar an rî asi hi," an ti. ¹⁴ Sikhawmsele, Peter chu leikhat tla hen an dîr dut le, anih nih chun hâu fâk tak hen an sinah a sim: "Nannih Judai ram ah mi tla, nannih Jerusalem ah um mi zawzawng tla, hi bang hi theih u, ka thu khawm ngâi u. ¹⁵ Hi bang tla hi nan ruat hâwi hen an rî lo, zînglei dâr kua cho asi rih hi; ¹⁶ hi bang hi khuavâng Joel nih a sim mi kha asi: ¹⁷ ’Pathian nih ni madung tla ah chun, mi zawzawng tlûnah ka Thlarau ka tawih lai le, nan fapa tla leh nan fanu tla nih ka thu an sim lai, nan tlangvâl tla nih muhtirnâk an muh lai, chun tar tla nih mang tla an manh lai. ¹⁸ Asi, chubang ni tla ah chun ka to-awpa tla, ka to-awnu tla tlûnah khawm ka Thlarau ka tawih lai, chun ka thu an sim lai. ¹⁹ Chun, tlûnlei vân ah thilchê tla, leh tanglei tual ah singsiahnâk tla ka muhtir lai. Thisen, mei leh meikhû tla hen; ²⁰ nî thim ah â chang lai le, chun thlâ thisen ah â chang lai. Lalpa Ni rokual tak leh minthang tak chu a hawng tleng lânah chun, ²¹ âuzawng Lalpa min lam mi vial chu an him lai, a ti,’ a ti mi kha. ²² "Nannih Israel mi le tla, hi bang thu hi theih u rawh: Nazaret Jisu, Pathian nih amah mang hen nan lakah thil rokual tla, thilchê tla, leh singsiahnâk tla a ti mi nih khan a nan theihfiangtir na kha; nannih nih chubang chu nan theih asi. ²³ Kha minung kha Pathian ruat chia leh theihkan hâwi hen an tleihtir le, nannih nih misual kut ah kraws ah nan khenh le, nan thah rawh. ²⁴ Kha minung kha Pathian nih thihnâk phuar tla chu a sût piak le, a thawh rawh; amah chu thihnâk nih tleih pawt kho asi lo ruangah. ²⁵ Chun, David nih a thu a sim le: ’Ka mâika ah zungzâl hen Lalpa chu ka muh tâwn, ka lawksawng lonâk ding hen ka vawrhlei ah a um asi. ²⁶ Churuangah ka thinlung a lâwptlo le, ka lei khawm â lâwm. Churuangah ka taksa khawm lungumnâk ah a um lai. ²⁷ Ka thlarau mithi khua ah na mâk lo ruangah na mi thenhlimh thût na siang lai loh. ²⁸ Nangnih nungnâk lampi tla hawng ka theihtir le, nangnih na mêl hen lâwmnâk hen hawng ka khattir lai,’ ti hen. ²⁹ "Unau le tla, thlâktu David thu hi ṭih lo hen nan sinah ka sim kho. Anih chu a thi le, vûi khawm an vûi rawh, a thlân khawm tutiang hen kan sinah a um kumza. ³⁰ Anih chu khuavâng asi le, Pathian nih David thlâk tla âumawh a tophah tlûnah a totir awt ti siatsirh hen a sim ti a theih le; ³¹ chun, chubang chu a theihkan ruangah Mesia thawknawlhnâk thu a sim asi, ’Mithi khua ah mâk hen a um lo le, a ruak khawm a thu loh; ti hen. ³² Jisu chu Pathian nih a thawh nawlh asi, chu chu a theihtu kan ektê hen kan si ver asi. ³³ Pathian vawrhlei ah chawnglawmh hen a um le, Thlarau Thenhlimh tiamh mi chu Pa sinah thawk hen a tawng le, nan muh leh nan theih mi hi a hawng tawih asi hi. ³⁴ David lam chu vân ah a kâi lo asi, amah ngelchel nih: ’Lalpa nih ka Lalpa sinah: Ka vawrhlei ah to rawh, ³⁵ na mêlma tla na kê sirhsanh ah ka siam lânlo chu, a ti,’ a ti dauh asi kha. ³⁶ "Chun, Jisu nan khenhbêk mi ngelchel kha Pathian nih Lal leh Mesia si hen a siam rawh ti Israel phun kip nih theih chiau seh," a ti. ³⁷ Chun, chubang thu chu an theih hen an thinlung ah sunh hâwi hen an hawng si rawh le, Peter leh mifial dang tla sinah chun, "Unau tla zeitin me kan ti lai?" an ti. ³⁸ Chun, Peter nih chun an sinah, "Rim ule, nan sual tla ngaihdamnâk ding hen Jisu Krist min hen baptis hen um chiau u, chun Thlarau Thenhlimh pêk mi hi nan tawng lai. ³⁹ A tiamh mi kha nannih rangah khawm, nan fa tla rangah khawm, lât tak ah mi zawzawng rangah khawm, Lalpa kan Pathian nih a sinah a kawh mi vial tla rangah khawm asi," a ti. ⁴⁰ Chun, thu dang cherkhet hen a simhfiang le, "Hi bang misual tla sinah rêpnâk tlung ding mi lakah a vêng u," ti hen a fawrh na. ⁴¹ Chun, a thu zâwttu vial baptis an si rawh le, chu ni ah chun mi sâng thum sap hen an um. ⁴² Chun, mifial tla sîntir hen, kawmhnâk hen, munkhat buhkhêng dûm hen leh thlacham hen ṭhanemngâi tak hen an um vima. ⁴³ Chun, mikip nih an ṭih rawh le, mifial tla nih chun thilchê leh singsiahnâk cherkhet an ti. ⁴⁴ Chun, a lung mi zawng nih chun zeizawng anna bâwm chiau, ⁴⁵ an ro tla, an neih tla an zuar le, an herh tâwk chiau hen an ektê sinah chun an ṭhen tâwn. ⁴⁶ Chun, nisiar thinlung munkhat hen Pathian Biakin ah chun ṭhanem ngâi tak hen an um tâwn le, an in lei tla khawmah sang an phel le, lâwptlo leh lungâwi tak hen buh an ei tâwn le, ⁴⁷ Pathian an sawr le, mi zawzawng lawmhkâng hen an um tâwn. Chun, ruang a suah mi tla chu Lalpa nih nisiar an sinah a sap vima tâwn.

¹ Chun, Peter leh Johan chu sûnnilei dâr thum ah thlacham hun liau chun Pathian Biakin ah lût ding hen an kal. ² Chun, patling âumawh a suak tîr thawk hen kekhêng an hawng zawnh le, chu minung chu Pathian Biakin ah an lût mi tla sinah kut dawnh ding hen "Kawtkhâr Dawh," an ti mi bul ah chun nisiar an ittir tâwn asi. ³ Chu minung nih chun Peter leh Johan chu Pathian Biakin ah an lût mi a muh na le, kut a dawnh. ⁴ Chun, anih chu an zauh le, chun Peter nih, "Hawng kan zauh rawh," a ti. ⁵ Chun, anih nih chun an lakah zeimawh tawng ding a lungum le, a zauh na. ⁶ Sikhawmsele, Peter nih, "Tangka leh ngûn zeikhawm ka nei lo, ka neihlem ka nan pêk lai; Nazaret Jisu Krist min hen kê hen kal rawh," a ti. ⁷ Chun, a kut vawrhlei a tleih le, a thawh le; chun lâkkhatko ah a kê tla leh a kemit ruh tla chu a hawng chak sawm rawh. ⁸ Chun, anih chu a per le, a dîr le, kê hen kal a dawmh rawh. Chun, kê hen kal leh per leh Pathian sawr bû vima hen Pathian Biakin ah a lût bâk rawh. ⁹ Chun, kê hen kal leh Pathian a sawr mi chu mi zawzawng nih an muh, ¹⁰ chun Pathian Biakin Kawtkhâr Dawh bul ah kut dawnh hen to tâwn mi kha asi ti an theih le; a lakah thil a hawng tlung mi chu thungâi chê an ti le, anna nawk. ¹¹ Chun, anih nih chun Peter leh Johan chu a tleih na ko liauah mi zawzawng, nih thungâi chê an ti, Solomon Sârbûk an ti mi lakah chun an sinah an hawng a pûm. ¹² Chun, Peter nih mi zapi tla a muh na rawh chun an sinah, "Nannih Israel mi le tla, hi bang hi zeirangah chê nan ti? Kanmah thiltikhonâk leh Pathian sunhsaknâk ruangah anih hi kan kaltir mi hâwi ngâi chun zeirangah nan hawng kan zauh? ¹³ Abraham, Isak, Jakob tla Pathian, hawng kan thlâktu tla Pathian nih chun a To-aw Jisu a chawnglawmh rawh asi. Anih chu nan tleihtir le, Pilat nih suah a tum khawmah a mâika ah nan duh lo kha. ¹⁴ Mi Thenhlimh leh Rep tak kha nan duh lo le, mi thahtu kha nan sinah pêk nan ngiar dauh. ¹⁵ Chun, Nungnâk Siamtu chu nan thah asi. Sikhawmsele, Pathian nih anih chu mithi lakah mi a thawh nawlh--chu chu a theihtu tla kan si. ¹⁶ Chun, amah min lung ruangah a min hen chun hi minung nan muh leh nan theih mi hi a chaktir rawh asi; chun amah ruangah lungnâk a hawng um mi nih chun nan ektê mitmuh ah a damtir ver asi. ¹⁷ "Sikhawmsele, unau le tla, nan hotu tla khawm nih an âtnâk ruangah an ti tâwn hâwi khan nan ât ruangah hi bang hi nan ti asi ti ka theih. ¹⁸ Sikhawmsele, Pathian nih khuavâng zawzawng kâ ah a Mesia nih hamhnâk a tuar ding mi thu a theihtirkan mi kha, kha hâwi khan a tlungtir rawh asi. ¹⁹ Churuangah nan sual tla tlâutir asi khonâk ding hen rim ule, a her nawlh u. ²⁰ Chun, Lalpa thawk hen thlarau chaknâk a hawng tlung kho lai, chun Jisu, Mesia nan rangah ruat mi khawm kha a hawng fial kho lai. ²¹ Sikhawmsele, zeizawng siamṭhat tik a tlung lânlo chu vân nih anih chu a kil rih ding asi; chu siamṭhat ding thu chu Pathian nih laikulh a siam tîr thawk hen a khuavâng thenhlimh tla kâ hen a sim rawh kha. ²² Mosi ngelchel nih, ’Lalpa nan Pathian nih keimah a hawng ka fial hâwi hen nan unau tla lakah khuavâng pakhat a nan fial piak na lai. Anih nih chun thu zawzâwng nan sinah a sim mi vial chu nan ngâi piak lai. ²³ Chun, mi âuzawng chu khuavâng thu ngâi piak lotu vial Israel tla lakah mi tlâutir ving asi lai, a ti kha. ²⁴ Samuel thawk hen khuavâng zawzawng, an dunglei mi tla hen thu an sim mi vial nih khan tûliau thâwngthâng hi an simkan tâwn; ²⁵ Nannih hi khuavâng tla leh thutiam fa tla nan si asi; Pathian nih Abraham sinah, Nangmah ruangah laikulh phun kip an thaw a suak lai, ti hen, nan thlâktu tla sinah a tiamh kha. ²⁶ Pathian nih a to-aw chu a ruat le, nan sual tla hertâk tir chiau ding hen mal a nan sâwm na ding hen nanmah sinah a hawng fial masachem asi hi," a ti.

¹ Chun, Peter leh Johan nih mi tla sinah thu an sim liauah bâwlpu lal tla, Pathian Biakin hotu tla leh Sadukai tla chu an sinah an hawng tleng khup le, ² an sîntir na mi leh Jisu ruangah mithi lakah thawk hen thawknawlhnâk thu an sim ruangah thungâi an lungsilo. ³ Chun, an tleih na le, zânlei asi ruangah a thâizîng tiang hen rêngin ah an khumh na. ⁴ Sikhawmsele, thu ngâitu tla lakah cherkhet nih an lung le; an tam lei chu patling vial khawm sângnga an tling. ⁵ Chun, a thâituan ah chun an hotu tla, upa tla leh Dân sîntirtu tla chu Bâwlpu Lalchem Ana, Kaiapha, Johan, Alekzandar leh Bâwlpu Lalchem chi zawzawng tla Jerusalem ah anna pûm. ⁷ Chun, Peter leh Johan chu a lâi ah an dîrtir na le, "Zei thiltikhonâk hen me, asi lo leh, âu min hen me hi bang hi nan ti?" an ti le, an deih na. ⁸ Chun, Peter chu Thlarau Thenhlimh hen a khat le, an sinah, "Mi zawzawng hotu tla, upa tla: ⁹ Mi khêng sinah rian ṭha kan ti mi thu ah, ’Hi minung hi zeirangah me a hawng dam?’ ti hen, tusûn ah hin nan hawng kan salh chun, ¹⁰ nannih zawzawng nih theih u rawh, chun, Israel mi zawzawng khawm nih theih na seh, Nazaret Jisu Krist, kraws ah nan khenhbêk mi Pathian nih mithi lakah thawk hen thawh nawlh mi kha, amah min ngelchel hen hi minung hi hinah nan mâika ah dam hen a hawng dîr rawh asi hi. ¹¹ ’Nannih in saktu le tla, Nan duhlo mi lung kha a ki ah lung ṭangkâi chem a hawng si mi kha, amah hi asi.’ ¹² Midang âu sin khawmah ruangsuaknâk a um lo; laikulh ah minung min sak lakah ruang hawng kan suah khotu ding min dang rerêng an um lo," a ti. ¹³ Chun, Peter leh Johan râlṭhat zia an muh hen lasui thiamlo mi leh mi narân an si ti an theih hen thungâi chê an ti. Jisu sinah an um ti an theih rawh. ¹⁴ Chun, an damtir mi chu an sinah dîr mi an muh le, zeikhawm an simsâwi kho lo. ¹⁵ Chun, an lâirêlnâk thawk hen a dang hen an kaltir na nûnah anna thluk le, ¹⁶ ’Hi minung tla hi zei hâwi hen kan ti lai? Thilchê thang tak an ti, ti Jerusalem ah um mi zawzawng nih fiang tak hen an theih rawh hi, Kannih khawm nih kan pheh kho lêm lo. ¹⁷ Sikhawmsele mi sinah an phuang dadauh lonâk ding hen tu thawk hen âu sin khawmah hi min hen thu an sim lonâk ding hen kan ṭhih na lai," an ti. ¹⁸ Chun, annih chu an kawh na le, Jisu min hen thu simlo thlo ding hen leh sîntir lo thlo ding hen an ti thlir na. ¹⁹ Sikhawmsele, Peter leh Johan nih an sinah, "Pathian mitmuh hen Pathian thu zûl ngâk hen nannih thu zûl a dik dauh lai menmaw, dawn set nik u. ²⁰ Kannih lam chu thil kan muh mi leh kan theih mi tla hi simlo hen kan um kho lo," an ti. ²¹ Chun, annih nih chun an ṭhih nawlh khun na le, an suah na rawh le, mi zapi ruangah rêpnâk remkâng an tawng lo; an thilti ruang khan mi zawzawng nih Pathian an chawnglawmh fâwn. ²² Thilchê hen an damtir mi pa chu kum sâwmli ngâk a tam dauh asi. ²³ Chun, Peter leh Johan chu an suah na le, anmah murui tla sinah an va kal le, bâwlpu lal tla leh upa tla nih an sinah an sim mi vial chu an simh ver na. ²⁴ Chun, a ngâitu tla nih chun thu anna rual le, hâu fâk tak hen Pathian sinah, "Lalpa, nang vân leh tual leh tisumsumriat leh a sungah um tla zawzawng siamtu na si; ²⁵ nangnih Thlarau Thenhlimh hen kan thlâktu na to-aw David kâ hen hi bang thu hi na sim asi: ’Phundang tla zeirangah me an thinthawk, phun kip nih zeirangah thil salam an dawnruat? ²⁶ Laikulh lalchem tla nih an do; chun hotu tla khawm anna pûm le, Lalpa leh a Mesia tlûnah chun, ti hen. ²⁷ Hi khua ah hin na to-aw thenhlimh, na sariak thuh Jisu tlûnah khan Herod leh Pontia Pilat hen, Phundang leh Israel mi tla hen anna pûm chiam asi, ²⁸ na kut hen leh na thinlung hen hawng tlung ding a ruatkan mi vial kha ti ding hen. ²⁹ Chun, tuah, Lalpa, hawng kan ṭhih zia tla hi ngâinik, na to-aw tla hi râlṭha tak hen na thu simtir le, ³⁰ mi tla damtir ding hen nangnih na kut hawng phar, na to-aw thenhlimh Jisu min ruangah singsiahnâk leh thilchê tak tla titir na," an ti. ³¹ Chun, thla an cham thluh nûnah anna pûmnâk mun chu a hawng a nîn le, an ektê hen Thlarau Thenhlimh hen an hawng khat le, râlṭha tak hen Pathian thu an sim rawh. ³² Chun, a lungtu mi zapi tla chu thinlung munkhat leh dawnruatnâk munkhat hen an um; an lakah pakhat khawm nih an thil neih, "Ka tâ bîk asi," an ti lo; thil zawzawng anna bâwm ver tâwn. ³³ Chun, mifial tla nih chun lungum tak hen Lalpa Jisu thawknawlhnâk thu an theihtir tâwn. An ektê tlûnah Pathian zângfahnâk rokual tak a um. ³⁴ Chun, an lakah khawm sam leh phâng âukhawm an um lo; mun tla, in tla nei mi vial nih an zuar le, an thil zuar tla chu a man an hawng put le, ³⁵ mifial tla kê bul ah an siah tâwn; an thil herh tâwk chiau hen an ṭhen seng tâwn." ³⁶ Chun, Josef, mifial tla nih Barnaba an ti mi (chu minung min umzia chu "Fawrhtu" tinâk asi), Levi chi, Kupra mi asi. ³⁷ Chun, lo pakhat a nei le, a lo chu a zuar le, a man a hawng put le, mifial tla kê bul ah a siah rawh.

¹ Sikhawmsele, mi pakhat a min Anania, a nupi Saphir hen an um le, Anania nih chun an thil neih zeimaw zat tla a zuar le, ² a nupi theih hen a man zeimaw zat ding a pheh. Chun, zeimaw zat ding a hawng put le, mifial tla kê bul ah a siah. ³ Sikhawmsele, Peter nih, "Anania, Thlarau Thenhlimh sinah âwkrâwl thu sim ding hen leh thil man zeimaw zat pheh ding hen zeirangah Setan nih na thinlung a khattir? ⁴ A um sung zawng kha na tâ asi lo masi? Na zuar nûn khawm khan na thu thu hen a um lo masi? Zeirangah me hi bang thu hi na thinlung hen na dawnruat? Minung sinah âwkrâwl thu na sim lo le, Pathian sinah âwkrâwl thu na sim dauh asi," a ti. ⁵ Chun, Anania nih chubang thu chu a theih kâ hen a tlû le, a thi rawh. Chun, a theih mi vial nih thungâi an ṭih. ⁶ Chun, tlangvâl tla chu an thawk le, an tuam le, an zawnh le, an vûi rawh. ⁷ Chun, dârkar thum nûnah a nupi chu thil umzia theihlo hen a lût. ⁸ Chun, Peter nih a sinah, "Hawng ka simh rawh, thil chu hi zat ko hen ma nan zuar?" a ti. Chun, anih nih chun, "I, hi vial ko hi asi," a ti. ⁹ Chun, Peter nih a sinah, "Zeirangah me Lalpa Thlarau niknâk ding hen thu nanna rual? Ngâinik, na pasal vûitu tla chu kawtkari ah an um rawh, nang khawm an zawnh lai," a ti. ¹⁰ Chun, lâkkhatko ah a kê bul ah a tlû sawm le, a thi bâk rawh. Chun, tlangvâl tla chu an hawng lût le, anih chu thi hen an hawng muh, an zawnh le, a pasal kiangah chun an vûi rawh. ¹¹ Chun, kawhmi tla zawzawng leh chubang thu theih mi vial tla nih chun thungâi an ṭih. ¹² Chun, mi zapi lakah mifial tla nih singsiahnâk leh thilchê cherkhet an ti tâwn. Chun, annih chu an ektê hen thinlung munkhat hen Solomon Sârbûk ah chun anna pûm tâwn. ¹³ Midang lam chu âukhawm an lakah anna tel ngam lo rawh. Sikhawmsele, mi nih annih tla chu an sawr na tâwn. ¹⁴ Chun, Lalpa ah lungtu mipi leh nunau cherkhet tla chu an sinah sap hen an um vima tâwn. ¹⁵ Chun, damlo tla khawm zâwllâi ah an hawng zawnh le, ihkhun leh tangphah tla ah an ittir na le, Peter kal mi a thlapelê nih mi zeimaw zat a dulh khonâk ding hen. ¹⁶ Chun, Jerusalem kiangkam khua mi, mi zapi tla khâwm chu damlo tla, khuri nâwmtâm nehsawh tla an hawng kalpi; chubang tla khawm chu an hawng dam vima. ¹⁷ Chun, Bâwlpu Lalchem leh a hâwi tla zawzawng an hawng a thawh le, (chubang a hâwi tla chu Sadukai murui an si le,) thungâi an nahsuah na; ¹⁸ mifial tla chu an tleih le, zatlâng rêngin ah an khumh na rawh. ¹⁹ Sikhawmsele, zân ah Lalpa vânmifial pakhat nih inkhâr tla chu a hawng awng le, a suakpi na le, ²⁰ Pathian Biakin ah va dîr ule, mi le tla sinah hi bang Nungnâk thu zawzawng hi va sim u," a ti. ²¹ Chun, chu thu chu an theih rawh chun khuadei awt bâiah Pathian Biakin ah an va lût le, an sîntir na rawh. Sikhawmsele, Bâwlpu Lalchem leh a hâwi tla chu an hawng kal le, lâirêltu tla leh Israel thlâk tla upa zawzawng an kawh na le, mifial tla chu hawngpi na ding hen rêngin ah chun mi an fial. ²² Sikhawmsele, vêngtu tla chu an va kal le, rêngin ah chun annih chu an muh na loh; chun an kîr nawlh le, ²³ "Rêngin chu ṭha tak a khâr hen, a vêngtu tla khawm kawtkari ah dîr hen kan muh; sikhawmsele, kan awng le, a sungah âukhawm kan muh loh!" ti hen, an sim. ²⁴ Chun, Pathian Biakin hotu leh bâwlpu lal tla nih chubang thu chu an theih le, "Hi bang hi zei tluk hen a zan lai aw!" ti hen, an thu lakah chun thungâi an lawksawng. ²⁵ Chun, minung pakhat a hawng kal le, "Rêngin ah mi nan khumh na mi tla nih khan Pathian Biakin ah dîr hen an sîntir na e!" ti hen, a hawng sim. ²⁶ Chun, hotu chu a mi le tla hen chun an va kal le, zatlâng an ṭih ruangah tluang tak hen an hawngpi na le, chu lo chun lung hen seh an ṭih. ²⁷ Chun, an hawng tlengpi na rawh chun lâirêltu tla mâika ah chun an dîrtir na. Bâwlpu Lalchem nih chun an sinah, ²⁸ "Hi min hen sîntir lo ding hen kan nan ti thlir na rawh khateh, sikhawmsele nan thusim Jerusalem a khat rawh, hi minung thihnâk ruangah mawhtir ding nan hawng kan duh asi hi," ti hen, a salh na. ²⁹ Sikhawmsele Peter leh mifial tla nih chun, "Minung thu ngâk hen Pathian thu kan zûl dauh ding asi. ³⁰ Nannih nih Jisu thing ah thlâi hen nan thah mi kha, kan thlâktu tla Pathian nih a thawh nawlh rawh asi. ³¹ Amah ngelchel kha Pathian nih Ruitu leh Ruangsuahtu rangah um ding hen a vawrhlei ah a chawnglawmh rawh, Israel tla sual rimtir ding leh ngaihdam ding hen. ³² Chubang thu chu a theihtu tla kan si. Thlarau Thenhlimh, Pathian nih a thu zûltu tla sinah a pêk mi kha a theihtu asi bâk," an ti. ³³ Chun, annih nih chun chubang thu chu an theih hen thungâi an thin a purh le, thah an tum na rawh. ³⁴ Sikhawmsele, lâirêltu tla lakah chun a min Gamaliel, Farisai, Dân sîntirtu, mi zawzawng lakah minthang tak minung pakhat chu a dîr le, chu minung tla chu suah na rih ding thu a pêk. ³⁵ Chun, lâirêltu tla sinah chun, "Israel mi tla, hi minung tla tlûnah thil ti ding nanna tîm mi hi a thiamthih u. ³⁶ A lân khawm khan, Theuda, ’Milian ka si,’ ti hen a hawng um le; chu minung sinah chun mi cherkhet, mi zali ding an va a ṭâwm le; anih chu thah hen a um rawh; a thu zâwttu vial an ektê hen anna rek ver, zeikhawm an si lo rawh. ³⁷ Chu nûnah chun min rîn liau khan, Galili ram ah mi Juda kha a hawng um nawlh le; a sinah zeimaw mi a kuih nawlh na le; sikhawmsele, anih khawm chu a thi rawh, a thu zâwttu vial tla chu an ektê hen anna rek ver rawh. ³⁸ Churuangah tuah ka nan ti na, hi tla hi tawngh lah na ule, um ko na seh; hi bang an thiltum leh an thilti hi minung suah mi ko asi chun a tlâu ko lai; ³⁹ sikhawmsele, Pathian suah mi asi chun anmah tla nan tlâutir kho na lai loh; chu lo chun Pathian do nan si lebang lai," a ti. Chun, a sim mi chu rem an ti rawh. ⁴⁰ Chun, mifial tla chu an kawh na le; an vuak na le; an vuak thluh nûnah Jisu min hen thu simlo rawh ding ti thlir hen an thlah na rawh. ⁴¹ Chun, lâirêltu tla lakah thawk hen an suak le, chu min ruangah chun mualpho tuar tlâk ah ruat an si ruangah chun thungâi anna lâwm. ⁴² Chun, nisiar Pathian Biakin ah leh anmah in tla ah, "Jisu chu Mesia asi," ti hen, sîntir leh simh an bâng lêm lo.

¹ Chun, chu liau chun ṭhiruai tla chu an pung dadauh liauah Greek Juda tla leh Juda tak tla lakah êlnâk a um. Greek Juda tla nih chun nisiar thawhlâwm ṭhen lakah an numei tla an thlawrhthlâu na an ti. ² Chun, leinih tla nih chun lungtu mi zapi tla chu an kawh le, "Pathian thusim bângtâk hen, ei leh bâr rian kan ṭuan chun a ṭha lai loh. ³ Unau tla, Dân lakah Thlarau leh finghnâk hen a khat mi, min ṭha karo pasarih thîm u, annih chu hi bang thil ruattu rangah hin kan siam na lai; ⁴ kannih lam chu thlacham leh thusim leiah kanna pêk lai," an ti. ⁵ Chu thu nih chun mi zapi zawzawng a lawmhtir le; chun Stephen, lungnâk leh Thlarau Thenhlimh hen khat mi leh Philip, Prokora, Nikanor, Timon, Parmena, Nikola, Juda tla phun lût Antiokei khua mi hen an thîm le; ⁶ chu minung tla chu mifial tla mâika ah an dîrtir na. Chun, annih nih chun thla an cham le, an tlûnah kut an thâng. ⁷ Chun, Pathian thu chu a zan le, Jerusalem khua ah ṭhiruai tla thungâi an pung, bâwlpu lakah khawm minung cherkhet nih lungnâk chu an zâwt rawh. ⁸ Chun, Stephen chu vêlneihnâk leh thiltikhonâk hen a khat le, minung lakah thilchê leh singsiahnâk rokual tak a ti tâwn. ⁹ Sikhawmsele, sal suak mi tla pumhnâk an ti mi lakah mi zeimaw mi leh Kurini khua mi tla, Alekzandria khua mi tla lakah mi zeimaw mi tla leh Kilikia ram mi tla, Asia ram mi tla pumhnâk lakah mi zeimaw mi tla chu an hawng thawk le, Stephen chu an hawng êl. ¹⁰ Sikhawmsele, a finghnâk leh a simpitu Thlarau chu an do kho lo rawh. ¹¹ Chun, mi tla an nawh le, chu mi tla nih chun, "Mosi leh Pathian a simsâwi mi kan theih," an ti. ¹² Chun, mi tla, upa tla leh Dân sîntirtu tla an fawrh le, Stephen an tleih le, lâirêltu tla sinah an kalpi. ¹³ Chun, theihtu telê an siam le, chu minung tla nih chun, "Hi minung nih hin hi Pathian Biakin thenhlimh leh Mosi Dân hi a simsiat nget tâwn; ¹⁴ Nazaret Jisu nih hin hi Pathian Biakin hi a siat lai le, Mosi nih Dân hawng kan pêk mi tla a dangtir awt ti a sim mi kan theih," an ti. ¹⁵ Chun, lâirêltu tla to mi zawzawng nih chun Stephen an zauh ko le, a mêl chu vânmifial mêl hâwi hen an muh.

¹ Chun, Bâwlpu Lalchem nih chun, "Hi bang thu hi a dik ma?" a ti. ² Chun, Stephen nih, "Unau tla, pa tla, ngâinik u! Kan thlâktu Abraham, Haran khua ah a um lânah Mesopotamia ram ah a um liau khan rokualnâk Pathian chu a sinah a hawng a langh le, ³ a sinah, ’Na ram leh na dâwngsung tla thawk hen suak le, ram ka nan zauhtir ding mi leiah kal rawh,’ a ti. ⁴ Chun, anih chu Kaldai tla ram thawk hen a kal le, Haran khua ah a va um rawh. Chun, a pa thih nûnah chu thawk hen tuah nan umnâk khua leiah hin Pathian nih a ṭiautir. ⁵ Chun, hinah chun zeikhawm mun luah ding, a kê siahnâk tlâk khawm a pêk lo; sikhawmsele, amah leh a nehnûnah a thlâk tla tiang a ro ting ding hen pêk a tiamh le, fa a neih lân khawmah. ⁶ Chun, Pathian nih hi hâwi hen a sim: ’A thlâk tla mi ram leiah kum zali an châm lai le, mi nih sal ah an siam lai le, an nehsawh na lai,’ ti hen. ⁷ Chun, Pathian nih, ’Sal ah tângtirtu phun chu keimah nih lâi ka rêl piak na lai, chun chu mi nûnah chun an hawng suak lai le, hi mun ah hin ka rian an hawng ṭuan lai,’ a ti. ⁸ Chun, Pathian nih a sinah fêmtan thu dân a tuk le; chun Abraham nih chun Isak a ring le, a ni riat ni ah a fêm a tan. Chun, Isak nih chun Jakob a ring le, chun Jakob nih chun chi thlâktu leinih tla kha a ring na. ⁹ "Chun, chi thlâktu tla nih khan Josef an nahsuah le, Aigupta ram leiah an zuar. Sikhawmsele, Pathian chu a sinah a um. ¹⁰ A hamh tuarnâk zawzawng ah a sanh vima, Aigupta lalchem Pharoa khawm a zângfahtir le, mifing tak asi ti a theihtir. Chun, anih nih chun Aigupta ram leh a in ah minung zawzawng tlûnah hotu ah a siam rawh. ¹¹ Chun, Aigupta leh Kanaan ram zawzawng ah chun pâm a tlung le, hamhnâk fâk tak a tlung rawh; kan thlâktu tla nih chun ei ding rerêng an tawng lo rawh. ¹² Sikhawmsele, Jakob nih chun Aigupta ram ah fâng a um ti a theih kâ hen kan thlâktu tla chu a fial na; chu chu an kal dawmhnâk asi. ¹³ Chun, an kal veinihnâk ah chun Josef nih a unau tla sinah â theihtir le; chun Josef unau tla chu Pharoa nih a theih rawh. ¹⁴ Chun, Josef nih a pa Jakob leh a unau zawzawng a kawhtir; anmah tla chu sâwmsarih leh panga an si. ¹⁵ Chun, Jakob chu Aigupta ram ah a va kal le; chun amah leh kan thlâktu tla chu an thi rawh. ¹⁶ Sekem khua ah an zawnh le, Abraham nih Sekem khua ah Hamor fapa tla thawk hen thlân tangka hen a châwk mi lakah an vûi rawh. ¹⁷ "Chun, Pathian nih Abraham sinah thu a tiamh mi tik kha a hawng tlung awt hen Aigupta ram ah kan minung tla chu an hawng pung le, an hawng tam dadauh. ¹⁸ Churawhchun Josef theihlo mi lalchem dang Aigupta ah a hawng a lal rawh. ¹⁹ Chu nih chun kan chi tla ngamlêm a pêk na le, kan thlâktu tla chu a nehsawh na le, an fasêm tla nung lo ding hen a lawnhtir na tâwn. ²⁰ Chu liauah chun Mosi a hawng suak le, a mêl thungâi a ṭha. A pa in ah thla thum an châwm; ²¹ chun, an lawnh nûnah Pharoa fanu nih a lâk le, amah fa rangah a châwm rawh. ²² Chun, Mosi chu Aigupta ram mi tla finghnâk zawzawng a sîntir le, a thu lakah leh a thilti lakah thungâi a rokual. ²³ "Chun, anih chu kum sâwmli a tling awt bâiah a unau Israel thlâk tla chu veh a tum. ²⁴ Chun, an lakah minung pakhat nehsawh a tuar liau a muh le, a sanh le, nehsawh tuartu lawhbâ chu a sam le, Aigupta minung chu a thah rawh. ²⁵ Mosi nih chun amah kut hen Pathian nih anmah tla a hum na ti a unau tla nih an theih lai mawh a ti le, sikhawmsele an theih loh. ²⁶ Chun, a thâituan ah an lakah minung panih anna sual liauah an sinah a hawng tleng le, ’Pu le tla, unau nan silo mazei; zeirangah diklo tak hen nanna ti?’ ti hen, remh a tum. ²⁷ Sikhawmsele, a zâwlbâwm lakah ṭhatlo rawttu dauh nih chun Mosi chu a tul le, ’Kan tlûnah hotu ah leh lâirêltu ah âu nih a nan siam? ²⁸ Mazân ah Aigupta minung na thah mi hâwi khan thah na hawng ka tum asi mu?’ a ti. ²⁹ Chun, chu minung thu ruangah chun Mosi chu a tek le, Midian ram ah a um le, chunah chun fapa panih a nei. ³⁰ "Chun, kum sâwmli a vei nûnah Sinai Tlâng ramkaro thingbûk lakah, meialh lakah vânmifial pakhat a sinah a hawng a langh. ³¹ Chun, Mosi nih a muh rawh chun a thil muh chu thungâi chê a ti. Chun, zauh ding hen a va naih liauah Lalpa aw-hâu nih, ³² ’Kei na thlâktu tla Pathian ka si, Abraham Pathian, Isak Pathian, Jakob Pathian, a hawng ti. Chun, Mosi chu a thir le, a zauh ngam lo rawh. ³³ Chun, Lalpa nih chun a sinah, ’Na pheikawk kha lît rawh; na dîrnâk mun kha tual thenhlimh asi. ³⁴ Aigupta ram ah ka mi um tla chu an hamh tuar zia ka muh ko asi, an rûm mi khawm ka theih ko, anmah tla sanh na ding hen ka hawng ṭum rawh asi. Aigupta ram ah ka nan fial lai,’ a ti. ³⁵ "Chun, Mosi, ’Hotu leh lâirêltu ah âu nih me a nan siam? ’ ti hen, an nar mi chu thingbûk lakah vânmifial a sinah â langh mi nih khan a bawmh le, Pathian nih amah ngelchel chu hotu leh sanhtu si ding hen a fial asi. ³⁶ Anih nih chun Aigupta ram tla, Tipi Sen tla leh ramkaro tla ah chun kum sâwmli karah thilchê leh singsiahnâk tla a muhtir tâ le, anmah tla a rui na rawh. ³⁷ Israel thlâk tla sinah, ’Pathian nih kei hawng ka siam hâwi hen khuavâng ah a nan fial lai, nan unau tla lakah mi asi lai, titu kha asi, Mosi chu. ³⁸ Chu minung chu ramkaro ah mi zapi lakah Sinai Tlâng ah a sawnhtu vânmifial sinah leh kan thlâktu tla sinah a um mi kha asi; chu minung chu hawng kan pêk singsuan ding hen thu nung tla lâktu kha asi. ³⁹ "Kan thlâktu tla nih chun a thu an zûl duh lo le, an nar le, an thinlung tla chu Aigupta ram leiah a kîr nawlh rawh. ⁴⁰ Aron sinah, Kan mâi ruai ding hen pathian tla hawng kan siam piak rawh; Mosi Aigupta ram thawk hen hawng kan ruitu tâ nih a thâwngthâng kan theih lo rawh,’ an ti. ⁴¹ Chun, chubang ni ah chun chawpê fa ruk an siam le, a ruk chu ran thah hen an sawnh, anmah tla kut suak lakah chun anna lâwm rawh. ⁴² Chun, Pathian nih a hawitâk na le, vân ah ârfi tla mâi an mûk khonâk ding hen annih tla chu a hawitâk na rawh, khuavâng lasuibu ah: ’Israel phun le tla, ramkaro ah khan kum sâwmli karah sa thah hen leh ran thah hen kei nan hawng ka sawnh mazei? ⁴³ Molok puanin leh pathian Rephan ârfi khawm chu mâimûk ding hen a ruk nan siam mi kha nan hâwl dauh kha. Churuangah Babulon lanh leiah ka nan kîrtir ving na lai, ti rîn hâwi khan. ⁴⁴ "A lem a muh hâwi hen siam ding hen Mosi simhtu nih ruat hâwi khan kan thlâktu tla nih ramkaro ah khan theihtirnâk Puanin chu an nei. ⁴⁵ Chu ber chu kan thlâktu tla thlâk nawlh khawm nih an nei vima ding hen, Pathian nih kan thlâktu tla mâiah Phundang a nar mi tla ram an luah liauah khan Josua hen an lût; David hawng um tiang khan chunah chun a um ko. ⁴⁶ David chu Pathian mitmuh hen duh tlâk hen a um le, Jakob Pathian rangah umnâk siam piak ding a deih. ⁴⁷ Sikhawmsele, Solomon nih in chu a sak piak dauh asi. ⁴⁸ "Sikhawmsele, Chungnungchem chu kut hen sak mi in ah a um dah lo; khuavâng nih: ⁴⁹ ’Lalpa nih, Vân ka laltophah asi le, tual chu ka kê sirhsanh asi. In zei hâwi nan hawng ka sak piak lai? Ka rangah dinhnâk mun zeiah me? ⁵⁰ Keimah kut hen hi bang thil zeizawng hi ka siam asi lo ma?’ a ti," ti hen, a sim hâwi khan. ⁵¹ "Mi lungkhung, lunglo mi thinlung puttu leh nasêt tla, zeiliau zawngah Thlarau Thenhlimh nan do kumza; nan thlâktu tla ti hâwi vima khan nan ti tâwn. ⁵² Nan thlâktu tla nih khuavâng tla lakah âu me an nehsawh lo mi um? Mi Rep tak hawng kal ding mi thu simhkantu kha an thah le, chu Minung tak chu tleihtirtu leh thahtu nanmah hi tuah nan si. ⁵³ Dân, vânmifial tla pêk singsuan mi kha muh ko hen zûllotu le tla!" a ti. ⁵⁴ Chun, chubang thu chu an theih hen thungâi an thin a run le, Stephen tlûnah chun an hachang an rial. ⁵⁵ Sikhawmsele, anih chu Thlarau Thenhlimh hen khat asi le, vân lei a zauh thlir le, Pathian rokual zia leh Pathian vawrhlei ah Jisu a dîr mi a muh. ⁵⁶ "Zauhnik u! Vân â awng mi ka muh le, Pathian vawrhlei ah Minung Fapa a dîr mi khawm ka muh, a ti. ⁵⁷ Chun, annih chu hâu fâk tak hen an âu le, an nâ an huh le, a rual hen an nam le, ⁵⁸ khua thawk hen an nar le, lung hen an seh. A theihtu tla nih chun tlangvâl pakhat a min Sawl kê bul ah chun an puan tla an siah. ⁵⁹ Chun, Stephen nih, "Lalpa Jisu, ka thlarau lâk rawh," ti hen, Lalpa a kawh liauah lung hen an seh chiam. ⁶⁰ Chun, a siksidîr le, hâu fâk tak hen a âu le, "Lalpa, an thilsual ti hi an tlûnah mawh phurhtir lah na," a ti. Chun, chu thu chu a sim thluh kâ hen a thi rawh.

¹ Sawl khawm nih a thi mi chu rem a ti. Chun, chu ni ah chun Jerusalem ah kawhmi um tla chu nehsawh tuar anna dawmh rawh. Mifial tla cho lo chu lungtu zawzawng tla chu Judai leh Samari ram khua kipah anna rekrâwi ver rawh. ² Chun, Pathian sunhsaktu âu tla nih mawh Stephen chu an vûi le, thungâi hen an ṭappi. ³ Sawl lam nih chun kawhmi tla thungâi a nehsawh na le, in kipah a lût le, nunau mipa hen a nûk na le, rêngin ah a khumh na tâwn. ⁴ Chun, anna rekrâwi mi tla chu khua kip ah an kal le, thu chu an sim vima. ⁵ Chun, Philip chu Samari khuapi ah a va kal le, an sinah Mesia thu a phuang. ⁶ Mi zapi tla nih chun Philip nih a sim mi chu an ngâi thlir. An ektê hen a thusim an ngâi le, thilchê a ti mi tla an muh. ⁷ Mi tamtak thawk hen thlarau nâwmtâm tla chu hâu fâk tak a âu hen an hawng suak. Zeng leh kekhêng tamtak tla khawm damh an si. ⁸ Chun, chu mi khuapi ah chun lâwmnâk fâk tak a hawng um rawh. ⁹ Chun, chu mi khuapi ah chun a min, Simon, minung pakhat a um le; anih nih chun dâwi mang hen Samari mi tla chu chê ti tak hen a siam na tâwn. Amah nih chun milian ka si a ti, ¹⁰ mi zawzawng nih chun, mi sia chem thawk hen lalchem tiang hen, "Hi minung hi Pathian thiltikhonâk, ’Thiltikhonâk Rokual,’ an ti mi kha asi hi," ti hen, a thu an sunhsak tâwn. ¹¹ A dâwi mang hen sâwt tak chê ti tak hen a siam na tâwn ruangah a thu an sunhsak tâwn asi. ¹² Sikhawmsele, Philip nih chun Pathian Ram Thâwngthâng Ṭha leh Jisu Krist min an sinah a sim, chun amah chu an lung rawh, nunau mipa hen baptis an si rawh. ¹³ Chun, Simon men nih a lung bâk rawh; chun baptis asi rawh chun Philip sinah a um ko le, singsiahnâk leh thilchê tak tla a ti mi a muh le, thungâi chê a ti tâwn. ¹⁴ Chun, Jerusalem ah mifial um mi tla nih khan Samari mi tla nih Pathian thu an lung ti an theih rawh chun an sinah Peter leh Johan chu an fial na. ¹⁵ Annih chu an tlung rawh chun Thlarau Thenhlimh an tawng khonâk ding hen thla an cham piak na. ¹⁶ Chu lânah chun an lakah âu tlûn khawmah Thlarau Thenhlimh a hawng tlung lo rih le, Lalpa Jisu min hen baptis an si cho asi. ¹⁷ Chun, mifial tla nih chun an tlûnah an kut an thâng le, Thlarau Thenhlimh chu an tawng rawh. ¹⁸ Chun, mifial tla kut thâng ruangah Thlarau Thenhlimh pêk asi ti Simon nih a muh hen, ¹⁹ "Hi hâwi hen thuneihnâk hi hawng ka pêk bâk u, âu tlûn tal ah kut ka thângnâk zawngah Thlarau Thenhlimh an tawng khonâk ding hen," ti hen, an sinah tangka pêk a tum rawh. ²⁰ Sikhawmsele, Peter nih a sinah, "Na tangka hi na tlâu rual hen tlâu bâk seh, Pathian thilpêk tangka sum hen châwk na tum ruangah. ²¹ Hi bang thu lakah hin na tel bâk lo, tingvo khawm na nei lo; na thinlung Pathian ngaih hen â rep lo. ²² Churuangah na sual hi rim le, Lalpa sinah thlacham rawh, chun na thinlung hen na dawnruat mi hi an ngaihdam lai mawh. ²³ Ngarhnâk khâ leh sual rêng tlâknâk ah na um ti ka muh asi," a ti. ²⁴ Chun, Simon nih, "Nan sim mi hi zeikhawm ka tlûnah a tlung lonâk ding hen Lalpa sinah thla hawng ka cham piak u," a ti le, a sâng. ²⁵ Chun, annih nih chun Lalpa thu chu an theihtir le, an sim thluh rawh chun Peter leh Johan chu Jerusalem ah an tlung nawlh rawh. Thâwngthâng Ṭha chu Samari ram mi khua tamtak ah an sim vima. ²⁶ Chun, Lalpa vânmifial pakhat nih Philip chu a sawnh le, "Thawk le, simlei Jerusalem thawk hen Gaza khua a tleng mi lampi ah khan kal rawh," a ti. (Chu lampi chu ramkaro lampi asi.) ²⁷ Chun, a thawk le, a kal rawh. Chun, Ethiopia ram ah minung pakhat Ethiopia lalnu Kandaki tangah mi tilkhei lal tak, a thil zawzawng kiltu, Jerusalem ah Pathian sawnh ding hen a va kal le, ²⁸ a tlung leiah chun kari ah to bû hen khuavâng Isai lasuibu a rêl vima. ²⁹ Chun, Thlarau Thenhlimh nih chun Philip sinah, "Khi kari khi va naih le, va kawmh rawh," a ti. ³⁰ Chun, Philip chu mi tilkhei sinah chun a va tek le, khuavâng Isai lasuibu a rêl mi a theih le, "Na rêl mi kha a umzia na theih ma?" a ti. ³¹ Chun, anih nih chun, "Âukhawm simhfiang lo hen zeitin ka theih kho lai?" a ti. Chun, a sinah to ding hen Philip chu a sâwm rawh. ³² Chun, Pathian lasui thu a rêl liau mi chu hi hi asi: "Thah ding mi dawrâ hâwi hen anih chu an kalpi le, dawrâ fa a mul mêttu mâika ah a dâisip hâwi hen anih khawm nih a kâ a âng loh. ³³ Â nâutir liauah a tlûnah diknak hen lâi an rêl lo; hi a thlâk tla thâwngthâng âu nih me sim lai? Laikulh thawk hen a nungnâk an lâk piak rawh dangâiah," ti hi. ³⁴ Chun, tilkhei nih chun Philip a sawnh le, a sinah, "Khuavâng nih hi thu tla hi âu thu me a sim, amah thu ma, midang thu? Ka nan deih," a ti. ³⁵ Chun, Philip nih chun a sim le, chu Pathian lasui thu chu a bul ah a dawmh le, a sinah Jisu thu a simh. ³⁶ Chun, lampi ah an kal liauah tî umnâk ah an tleng le; chun tilkhei nih chun, "Zauhnik, hinah tî a um, baptis ding hen zei nih me hawng ka kham chem?" a ti. ³⁷ Chun, Philip nih chun a sinah, "Na thinlung zawzawng hen na lung chun na baptis kho lai," a ti. Chun, anih nih chun tihin a sâng le, "Jisu Krist chu Pathian Fapa asi ti ka lung," a ti. ³⁸ Chun, kari a dinhtir le, an panih hen, Philip leh tilkhei chu tî lakah chun an va kal le, chun, Philip nih chun anih chu a baptis rawh. ³⁹ Chun, tî thawk hen a hawng suak kâ hen Lalpa Thlarau nih Philip chu a lâk ving rawh. Chun, tilkhei nih chun anih chu a muh nawlh lo rawh; lâwm tak hen a kal vima ruangah. ⁴⁰ Sikhawmsele Philip chu mi nih Azota khua ah an muh nawlh rawh. Chun, a kal zar le, Kaisari khua a tlung tiang hen khua kip ah Thâwngthâng Ṭha chu a sim vima.

¹ Sawl lam nih chun Lalpa ṭhiruai tla a ṭhih mi leh thah a tum mi thu a sim nget rih le, Bâwlpu Lalchem sinah a kal. ² Damaska khuapi ah mi pumhnâk in zawzawng mi tla sinah pêk ding hen lasui a deih le, chu lampi leiah minung âutal lungtu a muh chun, nunau khawm, mipa khawm Jerusalem ah phuar bû hen a hawng kalpi kho na ding hen. ³ Chun, a kal liauah, Damaska khuapi ah a tlung awt bâiah, lâkkhat ko ah chêu vân thawk hen a kiangkam a hawng chêu pup le; ⁴ chun tual ah a tlû le, a sinah, "Sawl, Sawl, nangnih zeirangah na hawng ka nehsawh?" ti hen, hâu a theih. ⁵ Chun, anih nih chun "Lalpa âu me na si?" a ti. Chun, Lalpa nih chun, "Jisu na nehsawh mi ka si. ⁶ Sikhawmsele, thawk le, khua ah lût rawh, chun na ti ding mi a nan simh lai," a ti. ⁷ Chun, a sinah kal bâk mi chu hawlh lo hen an dîr thlo le, hâu lam chu an theih le, sikhawmsele, âukhawm an muh lêm lo. ⁸ Chun, Sawl chu tual ah mi chu a thawk le, chun a hawng meng le, zeikhawm a muh kho lo rawh. Chun, a kut ah an ruai le, Damaska ah an lût. ⁹ Chun, ni thum khua muhlo hen a um le, zeikhawm a ei hen a din lo. ¹⁰ Chun, Damaska khuapi ah chun a min Anania, ṭhiruai pakhat a um. Chun, muhtirnâk a nei le, Lalpa nih chun a sinah, "Anania," a ti. Chun, anih nih chun "Lalpa hinah ka um," a ti. ¹¹ Chun, Lalpa nih chun a sinah, "Thawk le, Zâwllâi Ding an ti mi leiah kal le, Tarsa khua mi a min Sawl chu Juda in ah va hâwl rawh; thla a cham liau chir asi. ¹² Chun, muhtirnâk ah chun minung pakhat a min Anania chu lût hen a mit deitir ding hen a tlûnah kut thâng hen a muh rawh," a ti. ¹³ Chun, Anania nih chun, "Lalpa, chu minung chu Jerusalem ah na mi thenhlimh tla lakah a sual tam zia thu mi cherkhet kâ ah ka theih asi. ¹⁴ Chun, hinah khawm na min lamtu vial phuar na ding hen bâwlpu lal tla thawk hen thu a tawng asi," a ti le, a sâng. ¹⁵ Sikhawmsele, Lalpa nih chun a sinah, "Kal ko rawh, Phundang tla, lalchem tla leh Israel mi tla sinah ka min theihtirtu ding hen leh mang dingah ka thîm mi asi lo mazei? ¹⁶ Chun, ka min ruangah hamhnâk zei hâwi tluk a fâk mi a tuar ding amah ka theihtir awt asi," a ti. ¹⁷ Chun, Anania chu a va kal le, in ah a lût. Chun, a tlûnah a kut a thâng le, "Ka nau Sawl, na mit deinâk ding leh Thlarau Thenhlimh khat hen na um khonâk ding hen, Lalpa, na hawng kalnâk lampi ah na sinah â langh mi Jisu nih khan hawng ka fial asi," a ti. ¹⁸ Chun, veikhatko ah a mit thawk hen hir hâwi hen a tlâ sawm le, a mit a dei nawlh rawh. Chun, a thawk le, baptis asi rawh. ¹⁹ Chun, buh a ei le, â panh nawlh rawh. Chun, Damaska ah ṭhiruai um tla sinah chun ni zeimaw zat a um. ²⁰ Pumhnâk in ah chun Jisu chu Pathian Fapa asi zia thu a phuang rawh. ²¹ Chun, a thu theihtu zawzawng nih thungâi chê an ti, "Hi minung hi Jerusalem ah Jisu min lamtu tla nehsawh tâwntu kha asi lo mazei? Chubang mi tla chu tleih hen bâwlpu lal tla sinah ruai na ding chu a hawng kal san asi lo mazei?" an ti. ²² Sawl lam chu thil a ti kho dadauh le, chu Jisu chu Mesia asi ti a simhfiang, Damaska ah Juda um tla nih chun an êl kho lo. ²³ Chun, ni sâwt tak nûnah chun Sawl thah ding hen Juda tla chu anna thluk. ²⁴ Sikhawmsele, anih nih chun an phiar mi chu a theih rawh. Chun, thah ding hen kulh kawtkâ kipah a sûn a zân hen an bawh tâwn. ²⁵ Sikhawmsele, a ṭhiruai tla nih chun anih chu an kalpi le, zân ah kulh lêng leiah bâwm hen an thlâk rawh. ²⁶ Chun, Sawl chu Jerusalem ah a va tleng kâ hen ṭhiruai tla chu kawmh a tum, annih lam nih chun an ektê hen an ṭih, ṭhiruai asi bâk ti an lung lo. ²⁷ Barnaba lam nih chun anih chu a kalpi le, mifial sinah chun a hawng kalpi le, lampi ah Lalpa a muh le, a sawnh zia tla, Damaska khuapi ah Jisu min hen râlṭha tak hen thu a sim zia tla khawm chu an sinah a sim rawh. ²⁸ Chun, Sawl chu Jerusalem ah chun lût leh suak hen a um rawh le, Lalpa min hen râlṭha tak hen thu a sim tâwn. ²⁹ Chun, Greek Juda tla sinah thu a sim le, a êl na le; annih lam nih chun anih chu thah an tum. ³⁰ Chun, unau tla nih chu chu an theih rawh chun Kaisari khua ah an kalpi le, Tarsa khua ah an fial ving. ³¹ Chun, kawhmi tla chu Juda ram kiangkam ah, Galili kiangkam tla, Samari kiangkam tla ah chun an bir dadauh le, lungngam tak hen an um rawh. Chun, Lalpa ṭih îk hen, Thlarau Thenhlimh lungngamh hen an um le, an pung dadauh. ³² Chun, Peter chu mun kip a ṭawl le, veikhat chu Lida khua ah mi, mi thenhlimh tla veh ding hen a va kal. ³³ Chunah chun a min Ainias, a khêng mi ruangah kum riat ihkhun ah it kumza mi a muh. ³⁴ Chun, Peter nih a sinah, "Ainias, Jisu Krist nih chun a nan damh asi; thawk le, na tangphah zual rawh. ³⁵ Chun, Lida khua leh Saron phai ah um mi tla zawzawng nih chun Ainias chu an muh le, Lalpa leiah anna hawi rawh. ³⁶ Chun, Jopa khua ah a min Tabitha lungtu pakhat a um. (Greek hen a min chu Dorka asi, chu chu ’Sakhi’ tinâk asi.) Chu nunau chu thil ṭha ti hen a hun zawzawng a mang tâwn le, chun, mipâm tla a ṭangpi tâwn. ³⁷ Chun, chubang liauah chun a damlo le, a thi rawh; chun, tak an khawlh le, a tlûn mi kardang ah an zâutir. ³⁸ Chun, Lida khua chu Jopa khua thawk hen a lât chiam lo le, ṭhiruai tla nih chun Peter chu chunah chun a um ti an theih le, "Mawhsareh hen kan sinah hawng kal nawlh," ti hen ngiar chiam ding hen a sinah minung panih an fial. ³⁹ Chun, Peter chu a thawk le, an sinah a kal rawh. Chun, a tlung ka hen a tlûnah mi kardang ah an kalpi le; numei zawzawng chu a kiangah dîr hen, Dorka chu an sinah a um liauah a kawrdawh siam tla, a puan siam tla zauhtir bû hen an ṭap ver. ⁴⁰ Sikhawmsele, Peter nih chun an ektê hen a suaktir ver na le, a siksidîr le, thla a cham rawh. Chun, ruak leiah â hawi le, "Tabitha, thawk rawh," a ti. Chun, a mit a hawng meng le, Peter a muh kâ hen a to. ⁴¹ Chun, Peter nih chun a kut a pêk le, a thawh rawh; mi thenhlimh tla leh numei tla chu a kawh na le, dam hen a muhtir na. ⁴² Chun, chu chu Jopa khua zawzawng ah chun an theih ver rawh; mi cherkhet nih Lalpa an lung rawh. ⁴³ Chun, Peter chu ni tamtak Jopa khua ah Simon, savun siamtu in ah chun a châm.

¹ Chun, Kaisari khua ah a min, Kornelia, minung pakhat a um, "Itali Kawrsen Murui," an ti mi lakah kawrsen zâ hotu asi. ² Pathian sunhsak mi asi le, a dâwngsung tla zawzawng hen Pathian an ṭih tâwn. Mi sinah thilthawt cherkhet a pêk tâwn le, Pathian sinah khawm thla a cham tâwn. ³ Chu minung nih chun zânlei dâr thum liau dingah muhtirnâk a nei le, fiang tak hen Pathian vânmifial pakhat a sinah lût hen, "Kornelia," ti hen a muh. ⁴ Chun, Kornelia nih chun anih chu a zauh ko le, a ṭih, "Pu, zei mesi?" a ti. Chun, anih nih chun a sinah, "Na thlachamnâk leh na thilthawt pêk tla kha ka theihkumza ding hen Pathian mâika ah a tlung rawh. ⁵ Tuah Jopa khua ah mi fial le, minung pakhat Simon Peter an ti mi chu va dawngtir na rawh. ⁶ Savun siamtu Simon in ah a tlung asi; a in chu tisumsumriat kapah a um," a ti. ⁷ Chun, vânmifial chu a kal kâ hen, Kornelia nih chun a to-aw tla lakah minung panih leh a rianṭuan tâwntu lakah Pathian sunhsak mi kawrsen pakhat a kawh na. ⁸ Chun, thu zawzawng a simh thluh na rawh chun Jopa khua leiah a fial na rawh. ⁹ Chun, a thâituan ah, an kal liauah Jopa khua kiang an tlung awt bâi ah, Peter chu thlacham ding hen nî sunh chirah, in tlûnah a kâi. ¹⁰ Chun, a sung a vâng le, ei ding a duh rawh; chun, ei ding an siam liauah chun muhtirnâk a nei rawh. ¹¹ Chun, vân â awng hen, zeilo bâwm, puan lian tak hâwi hen a muh. ¹² Chun, chu sungah chun kê pali nei ransa tla leh vâkrit leh chungzuang vâ zeizawng an um. ¹³ Chun, a sinah aw-hâu hen, "Peter, thawk rawh, thah le, ei rawh," a hawng ti. ¹⁴ Sikhawmsele, Peter nih chun, "Lalpa asi lo; a thianglo mi leh a nâwmtâm mi zeikhawm ka ei dah lo," a ti. ¹⁵ Chun, aw-hâu nih chun veinihnâk ah, "Pathian nih a thianh rawh mi chu nangnih a thianglo ti lah," a ti. ¹⁶ Chu hâwi karo hen veithum a hawng um le; chun, bâwm chu vân ah lâk hen a hawng um nawlh rawh. ¹⁷ Chun, Peter nih muhtirnâk a muh mi a thu umzia chu a ngaihnâk theihlo hen a lawksawng liauah, Kornelia mifial tla nih chun Simon in chu an hawng hâwl rawh le, ¹⁸ kawtkari ah an dîr le, Simon Peter an ti mi chu chunah chun a um leh umlo an deih. ¹⁹ Chun, muhtirnâk thu a dawnruat liauah Thlarau nih a sinah, "Mi pathum nih an hâwl. ²⁰ Chun, thawk le, ṭum le, zeikhawm zumhmaih lo hen anmah chu zûl rawh; annih chu ka fial mi asi," a ti. ²¹ Chun Peter chu minung tla sinah chun a ṭum le, an sinah "Nan hâwl mi hi keimah ka si; zei me nan hawng san?" a ti. ²² Chun, annih nih chun, "Vânmifial thenhlimh pakhat nih Kornelia kawrsen zâ hotu, mi rep tak, Pathian ṭih mi, Juda phun zawzawng nih an zah mi sinah chun na thusim theih ding hen, a in ah nangmah kawh ding hen a simh asi," an ti. ²³ Chun, annih tla chu a kawh na le, a riaktir na rawh. Chun a thâituan ah chun Peter chu a thawk le, an sinah a kal le, Jopa khua mi unau, mi zeimaw mi khawm a sinah an kal bâk. ²⁴ Chun, a kip ah Kaisari khua ah chun a lût rawh. Chun, Kornelia nih chun a unau tla leh a kâwi duh chem tla pumh hen annih chu a ngâk ko na. ²⁵ Chun, Peter chu a lût awt liau takah Kornelia nih chun a va dawng le, a kê bulah a bawkbukhup le, Pathian hâwi hen a mâimûk. ²⁶ Sikhawmsele, Peter nih chun a nih chu a thawh le, "Dîr rawh, kei khawm minung ka si bâk," a ti. ²⁷ Chun, a sinah thu sim bû hen a lût le, mi cherkhet an um mi chu a muh. ²⁸ Chun, an sinah, "Juda mi nih phundang kawmh leh an sinah kal a thianglo zia nannih nih nan theih asi; sikhawmsele, âukhawm thianglo leh nâwmtâm ka ti ding asi lo ti Pathian nih hawng ka theihtir asi. ²⁹ Churuangah nan hawng ka kawh kâ hen khan êl lo hen ka hawng kal rawh asi. Chun, ka nan deih na asi, zei me nan hawng ka kawhnâk san?" a ti. ³⁰ Chun, Kornelia nih chun, "Ni li asi rawh, tu tik ding chirah hin ka in ah zânlei dâr thum ah thla ka cham le, minung pakhat puan chêu tak aih hen ka mâika ah a dîr le, ³¹ ’Kornelia, na thlachamnâk kha theih hen a um rawh, mi sinah na thilpêk tla khawm kha Pathian nih a theihkumza. ³² Churuangah Jopa khua ah mi fial le, Simon Peter an ti mi chu na sinah kawh rawh; anih chu tisumsumriat kapah savun siamtu Simon in ah a tlung asi,’ a ti. ³³ Churuangah na sinah mi ka hawng fial sawm asi; na hawng kal hi a ṭha. Chun Lalpa nih thu a nan pêk mi vial chu theih ding hen kan ektê hen hinah kan um asi hi," a ti. ³⁴ Chun, Peter nih a sim le: "Pathian nih mi duh bîk a nei lo ti diktak hen ka theih, ³⁵ sikhawmsele, phunkip lakah âuzawng amah ṭih hen rep tak a ti mi vial a lawmh kâng an si tâwn. ³⁶ Anih nih chun lungngamnâk Thâwngthâng Ṭha Jisu Krist kâ ah sim hen, Israel thlâk tla sinah thu a kuat le, (Jisu chu mi zawzawng Lalpa asi.) ³⁷ Johan nih a sim tâwn mi baptis nûnah khan, Galili ram thawk hen thuzanh a dawmh le, Juda ram zawzawng a zân ver kha, ³⁸ nannih nih nan theih bâk khateh; Nazaret Jisu kha, kha hâwi hen Pathian nih anih chu Thlarau Thenhlimh leh thiltikhonâk hen a vurh zia kha; anih nih chun mi tlûnah ṭhattir leh diabol nehsawh zawzawng damh hen a ṭawl tâwn le, Pathian a sinah a um. ³⁹ Juda ram leh Jerusalem ah a thilti zawzawng theihtu tla kan si; anih chu kraws ah thlâi hen an thah rawh. ⁴⁰ Pathian nih anih chu ni thum ni ah a thawh nawlh le, fiang tak hen a zauhtir. ⁴¹ Sikhawmsele mi zawzawng sinah asi lo, Pathian nih theihtu ah a ruatkan mi tla sinah cho asi; kanmah tla mithi lakah thawk hen a thawhnawlh nûnah a sinah ei leh bâr mi tla sinah hin. ⁴² Anih chu mithi tla leh minung tla tlûnah Lâirêltu ah Pathian ruat chu asi ti mi sinah phuangpitu leh theihtir ding hen Pathian nih thu hawng kan pêk asi. ⁴³ Âuzawng amah lungtu vial a min ruangah sual tla ngaihdam hen an um lai ti, hi bang a thâwngthâng hi khuavâng zawzawng nih an theihtir tâwn kha," a ti. ⁴⁴ Chun, Peter nih chubang thu chu a sim liau takah chun Thlarau Thenhlimh a hawng tlung rawh. ⁴⁵ Chun, fêmtan tla lakah lungtu tla, Peter zûltu vial nih chun Thlarau Thenhlimh pêk mi chu Phundang tla lakah khawm tawih asi ruangah thungâi chê an ti. ⁴⁶ Hawlh theihlo hen thu sim hen, Pathian sawr hen an theih fâwn. ⁴⁷ Chun, Peter nih a sawnh le, "Hi bang mi tla, kanmah hâwi hen Thlarau Thenhlimh tawng bâk mi tla hi baptis an si lonâk ding hen tî mang ding an khap kho mazei?" a ti. ⁴⁸ Chun, Jisu Krist min hen baptis ding thu a pêk. Chubang nûnah chun ni zeimaw zat châm an ngiar.

¹ Chun, Judai ram ah mifial le unau um tla nih chun Phundang tla khawm nih Pathian thu an zûl ti an theih rawh. ² Chun, Peter chu Jerusalem ah a tlung kâ hen fêmtan tla nih a sinah, ³ "Fêmtan lo tla in ah na lût le, an sinah na ei tâwn," ti hen an salh. ⁴ Sikhawmsele, Peter nih chun a bul thawk hen a sangtê hen an sinah a simhfiang na le: ⁵ "Jopa khua ah thlacham hen ka um le; chun muhtirnâk ka nei le, zeilo bâwm, puan lian tak hâwi, a ki pali ah khih hen vân thawk hen thlâk mi ka muh; ka kiang ngelchel ah a hawng ka naih. ⁶ Chun, chu chu ka zauh ko le, ka ruat le, kê li nei ran tla, ramsa tla, vâkrit leh chungzuang vâ tla ka muh. ⁷ Chun, aw-hâu nih, ’Peter thawk rawh, thah le, ei rawh, a hawng ka ti hen ka theih. ⁸ Sikhawmsele, kei nih, ’Lalpa, asi lo, thianglo leh nâwmtâm zeikhawm ka kâ ah a lût dah lo,’ ka ti. ⁹ Sikhawmsele, vân thawk hen aw-hâu nih chun veinihnâk ah, ’Pathian nih a thenhlimhtir rawh mi chu nangnih a thianglo ti lah,’ ti hen a hawng ka sâng. ¹⁰ Chu hâwi karo hen veithum a hawng um rawh chun zeizawng vân ah lâk hen a um rawh. ¹¹ Chun, chu liau tak chun minung pathum Kaisari khua thawk hen ka sinah an hawng fial le, ka umnâk inah an hawng dîr rawh. ¹² Chun, Thlarau nih âukhawm thliar bîk lo hen anmah tla zûl ding hen hawng ka fial. Hi bang unau paruk khawm nih an ka zûl bâk, Kornelia in ah kan lût le; ¹³ chun, anih nih chun kan sinah, a inah vânmifial a dîr mi a muh zia leh vânmifial nih chun a sinah, ’Jopa khua ah mi fial le, Simon Peter an ti mi chu va kawhtir rawh; ¹⁴ anih nih chun thu a nan simh na lai le, chu thu hen nang leh na dâwngsung tla chu ruangsuah hen nan um lai,’ a ti zia khawm hawng kan simh. ¹⁵ Chun, thu ka sim tîrah Thlarau Thenhlimh kan tlûnah a hawng tlungtir liau hâwi ber hen khan an tlûnah a hawng tlung rawh. ¹⁶ Chun, Lalpa thu, ’Johan nih tî hen mi a baptis tâwn kha; sikhawmsele, nannih lam chu Thlarau Thenhlimh hen baptis nan si lai,’ a ti zia kha ka hawng theih nawlh rawh. ¹⁷ Chun, Lalpa Jisu Krist an lung kâ hen Pathian nih thilthawtpêk hawng kan pêk hâwi hen khan an sinah a pêk na ṭung chun, kei rîlmâl hi Pathian êl kho mi ma ka si?" a ti. ¹⁸ Chun, chubang thu chu an theih hen an dâisip rawh, "Chu hâwi asi chun Pathian nih Phundang tla nung ding hen rim a siang rawh ma chu!" ti hen, Pathian an sawr rawh. ¹⁹ Chun, Stephen thah liauah nehsawhnâk ruangah anna rekrâwi mi tla kha Phoiniki ram tla, Kupra tikulh tla, Antiokei khua tla tiang hen an kal. Juda tla sinah cho lo chun âu sin khawmah thu an sim lo. ²⁰ Sikhawmsele, an lakah zeimaw mi chu Kupra tikulh leh Kurini khua mi tla an si le, chu minung tla nih chun Antiokei khua chu an tlung hen Greek tla sin khawmah thu an sim le, Lalpa Jisu Thâwngthâng Ṭha chu an sim vima rawh. ²¹ Chun, Lalpa Jisu thiltikhonâk nih anmah tla a bawmh na le, Lalpa leiah anna hawi rawh. ²² Chun, an thâwngthâng chu Jerusalem ah kawhmi um tla nâ ah chun a hawng lût rawh le; chun, Antiokei khua tiang hen Barnaba chu an fial rawh. ²³ Chun, anih chu a va tleng le, Pathian zângfahnâk chu a muh le, thungâi â lâwm, ṭhanemngâi tak hen Lalpa lakah zumhkâi ding hen an ektê hen a fawrh na rawh. ²⁴ Barnaba chu mi ṭha tak asi le, Thlarau Thenhlimh leh lungnâk hen khat mi asi. Chun, mi cherkhet chu Lalpa sinah anna sap rawh. ²⁵ Chun, Barnaba chu Sawl hâwl ding hen Tarsa khua ah a kal. ²⁶ Chun, a tawng rawh chun Antiokei khua ah chun a hawng kalpi. Chun, kum khat bo kawhmi tla pumhnâk ah chun anna tel tâwn, mi cherkhet an sîntir na tâwn. Ṭhiruai tla, "Kristian," an ti masachemnâk chu Antiokei khua ah asi. ²⁷ Chun, chu liau chun khuavâng tla âumawh Jerusalem thawk hen Antiokei khua ah chun an va kal. ²⁸ Chun, an lakah minung pakhat a min, Agaba a dîr le, laikulh zawzawng ah pâm fâk tak a tlung awt ti Thlarau simh hen a theihtir le; chu pâm chu Klaudia lal liauah a hawng tlung rawh. ²⁹ Chun, ṭhiruai tla nih chun an ti kho ri chiau hen Judai ram unau tla sinah chun ṭangpinâk ding kuat an tum. ³⁰ Chu chu an ti ngelchel rawh, Barnaba leh Sawl kut ah chun upa tla sinah an kuat rawh.

¹ Chun, chu liau chun Lalchem Herod nih kawhmi tla lakah âumawh nehsawh tum hen nâm a lek rawh. ² Chun, Jem, Johan unau chu nâmsâu hen a thah. ³ Chun, chu nih chun Juda tla a lawmhtir ti a theih le, Peter khawm chu tleih a tum vima. (Chubang ni tla chu Sang Thilnu telhlo ni asi.) ⁴ Chun, an tleih nûnah chun rêngin ah an khumh le, kawrsen murui li, pali vima hen an vêng sâwng vima le, Kalkanh Kût thluh ah mi zawzawng sinah suah a tum. ⁵ Churuangah Peter chu rêngin ah chun a umtir rih; sikhawmsele, kawhmi tla nih amah rangah ṭhanemngâi tak hen Pathian sinah thla an cham piak tâwn. ⁶ Chun, Herod nih chun a suah awt liauah, chu zân takah chun Peter chu kawrsen panih karah chikchîn panih khih hen a it le; a vêngtu tla khawm kawtkarî ah an um le, rêngin chu an vêng. ⁷ Chun, lâkkhat ko ah Lalpa vânmifial pakhat chu a kiangah a hawng dîr le, in sungah chun chêu zeimawh a hawng um le; chun, Peter nakah a bengh le, a ṭhangh le, "Thawk rawh," a ti. Chun, chikchîn tla chu a kut ah mi a tlâ sawm rawh. ⁸ Chun, vânmifial nih chun a sinah, "Puan a aih le, na pheikawk a bunh rawh," a ti. Chun, anih nih chun chu hâwi hen a ti. Chun, vânmifial nih chun a sinah, "Na puan ṭha tak hen a bah le, hawng ka zûl rawh," a ti. ⁹ Chun Peter chu a suak le, a zûl rawh; vânmifial changh zia chu a tak asi ti a theih loh, muhtirnâk a muh mi mawh a ti dauh. ¹⁰ Chun, a vêngtu tawngtîr mi leh a sangtu an lanh nûnah chun lêng suaknâk ding thîr inkhâr chu a va tleng le, chu chu an rangah â awng sawm rawh. Chun, an suak le, tualmâi pakhat an lanh le; chun vânmifial nih chun a kaltâk rawh. ¹¹ Chun, Peter chu a fîm kâ hen, "Lalpa nih a vânmifial a fial le, Herod kut ah mi leh Juda mi tla lungumnâk zawzawng thawk hen ruang ka suak ti tuah dik tak hen kâ theih rawh," a ti. ¹² Â dawnruat thluh nûnah, Johan Mark an ti mi nu Mari in ah chun thlacham hen mi cherkhet anna pûm. ¹³ Chun, inkulh khâr a kik kâ hen, a min Rodi, nungâk pakhat, sâng ding hen a va kal. ¹⁴ Chun, Peter hâu a theih kâ hen â lâwm ruangah kulh chu awng lo hen a lût nawlh ving, chun Peter chu inkhâr bulah a dîr ti a va sim. ¹⁵ Sikhawmsele, annih nih chun, "Na â rawh ma hi!" an ti. Anih nih chun, "Thungâi tak asi," ti hen, â ṭang thlo. Chun, annih nih chun a vânmifial asi chu!" an ti. ¹⁶ Sikhawmsele, Peter nih chun a kik lemang le; chun an awng rawh chun amah chu an muh le, thungâi chê an ti. ¹⁷ Chun, anih nih chun an dâisipnâk ding hen a kut a vei. Lalpa nih rêngin thawk hen amah a suah zia tla chu a simh na rawh. Chun, "Hi bang thu hi Jem leh unau tla va simh na u," a ti. Chun, a suak le, a dang leiah a kal rawh. ¹⁸ Chun, nî a suak le, kawrsen tla chu, "Peter kha zeiah a um rawh?" ti hen thungâi anna nawk. ¹⁹ Chun, Herod nih chun a hâwl le, a tawng lo, a vêngtu tla chu a rêp na le, thah ding hen thu a pêk rawh. Chun, Herod chu Judai ram thawk hen Kaisari khua ah a va kal le, chunah chun a um ko. ²⁰ Chun, Herod chu Tura leh Sidon khua mi tla tlûnah thungâi a lungsilo; chun annih nih chun Blasta, lal ihkhun vêngtu chu an hâwi ah an siam le, thu a rual hen a sinah an hawng. Lalchem ram leiah pâm buh thiar tâwn mi an si ruangah Herod sinah an va kal le, remnâk an ngiar. ²¹ Chun, a ni tiam ni ah Herod nih chun lal puan â aih le, laltophah ah a to le, an sianh thu a sim. ²² Chun, mi zawzawng nih chun "pathian hâu asi hi, minung hâu asi lo," an ti le, an âu tâwn. ²³ Chun, anih nih chun Pathian sinah chawnglawmhnâk a pêk lo ruangah Lalpa vânmifial nih lâkkhat ko ah a tleih le, khuprûl nih a ei le, a thi rawh. ²⁴ Pathian thu lam chu a zân le, a pung vima. ²⁵ Chun, Barnaba leh Sawl nih chun rian chu an ṭuan thluh nûnah Jerusalem thawk hen an kîr nawlh rawh le, Johan Mark an ti mi chu an sinah an kalpi.

¹ Chun, Antiokei khua mi kawhmi tla lakah chun khuavâng tla leh sîntirtu tla an um: Barnaba, Simeon, (Niger an ti mi), Kurini khua mi Lukia lal Herod unau ding, Manain leh Sawl tla an si. ² Chun, Lalpa rian an ṭuan le, buh an ngei liauah Thlarau Thenhlimh nih Barnaba leh Sawl hi anmah ka ruat na mi rianṭuan ding hen hawng ka thlei piak u," a ti. ³ Chun, buh an ngei le, thla an cham thluh rawh chun an tlûnah kut an thâng le, an kaltir na rawh. ⁴ Chun, Thlarau Thenhlimh fial hen an kal le, Selukia khua ah an ṭum le, chu thawk hen Kupra tikulh ah lawng hen an kal. ⁵ Chun, Salami khua ah an um liauah Juda pumhnâk in tla ah Pathian thu an sim tâwn le; Johan Mark khawm kha an rianṭuan ding hen an kalpi. ⁶ Chun, tikulh chu Paphos khua tiang hen an ṭawl ver le, dâwithiam, khuavâng telê, Juda mi pakhat an muh, a min chu Bar-Jisu asi. ⁷ Chu minung chu lal ruangrûl ah Sergia Pawlas, mi fing tak sinah um mi asi. Chu lal ruangrûl nih chun Barnaba leh Sawl chu a kawh na le, Pathian thu theih a tum. ⁸ Sikhawmsele, Elima dâwithiam (chu chu a min umzia asi), chu nih chun lal ruangrûl chu lungtir lo ding tum hen annih chu a kham na. ⁹ Chun, Sawl, Pawl an ti mi ber chu Thlarau Thenhlimh hen a khat le, anih chu a zauh ko le, ¹⁰ Nang diabol fapa, nang repnâk zawzawng huatupa Lalpa lampi rep tak tla hi siattir na bâng lo mu? ¹¹ Theih rawh tuah Lalpa kut na tlûnah a tlâ asi hi, na mit a châw lai le, khua chêu na muh lai loh," a ti. Chun, sûm leh mûi nih amah a tlâk nawh le, kut hen ruaitu ding hâwl hen â dap lemang rawh. ¹² Chun, lal ruangrûl nih chun chu thil chu a muh le, Lalpa thâwngthâng sîntirnâk chu thungâi chê a ti le, a lung rawh. ¹³ Chun, Pawl chu a murui tla hen Paphos khua thawk hen chun lawng hen an kal le, Pamphulia ram ah Perga khua an tleng le, chun Johan nih khan annih chu a kaltâk na le, Jerusalem ah a kîr nawlh rawh. ¹⁴ Sikhawmsele, annih chu Perga khua thawk hen an kal vima le, Pisidia ram ah Antiokei khua ah an tleng le; chun Dinhni ah pumhnâk in ah an lût le, an to. ¹⁵ Chun, Dân leh khuavâng tla lasuibu rêl dih ah pumhnâk in hotu nih an sinah mi an fial le, Unau le tla, mi tla fawrhnâk thu zeimawh nan nei chun sim u," an ti. ¹⁶ Chun, Pawl chu a dîr le, a kut a vei le, a sim: " Israel mi tla leh Pathian ṭihtu tla, ngâinik u. ¹⁷ Hi bang Israel mi tla Pathian nih hin kan thlâktu tla a thîm le, Aigupta ram ah an châm liau khan a chawnglawmh na le, Pathian nih a thiltikhonâk hen Aigupta thawk hen a suah na rawh . ¹⁸ Chun, kum sâwmli bo ramkaro ah khan a zauhkhenh na. ¹⁹ Chun, Kanaan ram ah mi phun sarih a râwk nûnah khan an ram chu kum zali leh sâwmnga kar luah ding hen a pêk na. ²⁰ Chubang nûnah chun lâirêltu tla a pêk na le, khuavâng Samuel tiang khan. ²¹ Chun, chu nûnah chun lal an deih le, chun, Pathian nih Saul, Kis fapa, Benjamin phun lakah mi kha an sinah a pêk le, kum sâwmli rang dingah. ²² Chun, anih chu a ṭhial nûnah khan an lal rangah David a siam rawh; Pathian nih chu minung chu thu theihtir hen, ’David, Jese fapa, ka thinlung hâwi put mi ka tawng rawh, anih nih chun ka duh mi vial a ti lai," a ti. ²³ Chu minung thlâktu lakah chun Pathian nih thu a tiamh hâwi vima hen Israel tla sinah Ruangsuahtu Jisu a hawng tlunh. ²⁴ A hawng kal lânah Johan nih rimnâk ruangah baptis thu Israel mi zawzawng sinah a sim. ²⁵ Chun, Johan nih a ti ding mi a ti dih awt liau khan, "Nannih nih âu si ding hen nan ka ruat? Amah chu ka si lo, sikhawmsele ka dung leiah mi âumawh a hawng kal awt asi, kei lam chu a pheikawk ri sût tlâk khawm ka si lo,’ a ti. ²⁶ "Unau le tla, Abraham thlâk tla, nan lakah Pathian ṭihtu tla, kanmah tla sinah hin hi bang ruangsuaknak thu hi hawng kan kuat rawh asi hi. ²⁷ Jerusalem ah um tla nih an hotu tla hen anih chu an theihlo ruangah anih chu mawhtir hen, chu thu chu an rangtlingtir rawh. ²⁸ A thihnâk khawp rê hen a tlûnah zeikhawm an muh lo khawmah Pilat sinah thah ding hen an ngiar. ²⁹ Chun, a thâwngthâng Pathian lasui thu nih a sim hâwi hen zeizawng an lîm rawh chun kraws ah mi chu an lâk le, thlân ah an vûi rawh. ³⁰ Sikhawmsele, Pathian nih mithi lakah mi a thawh nawlh le, ³¹ chun, Galili ram thawk hen Jerusalem ah amah rual hen an kal bâk mi tla sinah chun ni sâwt tak kar chu â langh tâwn; chubang mi tla chu tuhin mi sinah a thu theihpitu tla an si. ³² Kannih khawm nih thlâktu tla sinah thu tiamh kha a thâwngthâng lawmhkâi kan hawng sim asi hi, kha hâwi hen Pathian nih Jisu a thawh mi lakah khan, kannih an fa tla sinah hin a rangtlingtir asi. Sam panihnâk ah: ’Ka fapa na si; tusûn hin ka nan ring,’ ti rîn hâwi khan. ³⁴ Thûtnâk munah kal lo rawh ding hen Pathian nih anih chu mithi lakah mi a thawh nawlh ding zia thu chu hi hâwi hen a sim: ’David sinah zângfahnâk ka tiamh thlir mi tla kha nangmah ka nan pêk lai,’ ti hen. ³⁵ Churuangah Sam dang ah: ’Na Mi Thenhlimh chu Thûttir na siang lai loh,’ a ti. ³⁶ David lam chu a thlâk tla lakah Pathian thiltum chu a ṭuan dih nûnah khan a thi le, thlâktu tla sinah an vûi le, a thû rawh asi. ³⁷ Sikhawmsele, Pathian thawh mi lam kha chu a thû kho lo. ³⁸ Chun, unau le tla, theih u; amah ruang chun sual ngaihdamnâk thu nan sinah sim asi. ³⁹ Âuzawng a zumhtu vial chu zei lak zawngah amah mawhlotir hen an um, chubang lakah chun Mosi Dân nih mawhlotir hen nan um kho lo. ⁴⁰ Churuangah râlring u, chu lo chun khuavâng tla lasuibu ah an sim mi kha nan tlûnah a tlung lebang lai: ⁴¹ ’Zauhnawmhtu tla, zauhnik u! Chê ti ule, tlâu ko u, nan dam kar hin thil kâng khat ka ti mi hi, chu thil chu mi nih an simh na khawmsele, nan lung lo thlo lai, ti kha," a ti. ⁴² Chun, Pawl leh Barnaba chu pumhnâk in thawk hen an suak liauah Dinh ni nawlh ah chubang thu chu sim nawlh ding hen an ngiar na. ⁴³ Chun, anna pûm mi tla chu an ṭiak kâ hen, Juda leh phun lût tla cherkhet nih Pawl leh Barnaba chu an zûl vima na le; mifial tla nih an sinah thu an sim le; chun Pathian zângfahnâk ah um kumza ding hen an fawrh na. ⁴⁴ Chun, Dinhni nawlh ah chun khuatê hen Pathian thu ngâi ding hen an hawng a pûm. ⁴⁵ Sikhawmsele, Juda tla nih mi zapi an muh kâ hen thungâi an nahsuah na; Pawl thusim chu an êl le, an râp. ⁴⁶ Chun, Pawl leh Barnaba nih chun râlṭha tak hen an sim le, "Pathian thu hi nanmah tla sinah sim masa ding rêng asi; sikhawmsele, nan nar le, zungzâl nung tlâk lo hen nanna ruat rawh nûnah hin theih u, Phundang leiah kanna her lai rawh. ⁴⁷ Chu hâwi hen chun Lalpa nih thu hawng kan pêk asi: ’Phundang tla chêutirtu ah ka nan ruat kâwlkil tiang hen Ruangsuahtu ah na um khonâk ding hen,’ ti rîn hâwi khan,’ an ti. ⁴⁸ Chun, Phundang tla nih chun chubang thu chu an theih hen anna lâwm le, Pathian thu an chawnglawmh. Chun, zungzâl nung ding a ruat mi vial chu an lung rawh. ⁴⁹ Chun, Lalpa thu chu chu ram ah chun a zan rawh. ⁵⁰ Sikhawmsele Juda tla nih chun nunau zahkâi Pathian sunhsaktu tla leh khua upa tla chu an fawrh na le, Pawl leh Barnaba chu an nehsawhtir na le, an ram thawk hen an nar na rawh. ⁵¹ Chun, annih nih chun an tlûnah an kêzaphah valeidip an khâwng le, Ikoniam khua an tleng. ⁵² Chun, ṭhiruai tla Antiokei ah chun lâwmnâk leh Thlarau Thenhlimh hen an khat chiau.

¹ Chun, Ikoniam khua ah chun Juda tla pumhnâk in ah an lût le, thu an sim tâwn le, Juda leh Phundang tla tamtak nih an lung. ² Sikhawmsele, lunglotu Juda tla nih Phundang tla chu an fawrh na le, unau tla chu an huatir na. ³ Churuangah Lalpa leiah râlṭha tak a thu sim hen chunah chun sâwt ual an um le, Lalpa nih chun singsiahnâk leh thilchê tla an kut ah titir hen, a zângfahnâk thu a theihtir tâwn. ⁴ Sikhawmsele, khua ah mi, mi zapi tla chu anna êl rawh le, a zeimaw mi nih Juda tla an sanh na le, a zeimaw mi nih mifial tla an sanh na. ⁵ Chun Phundang tla leh Juda tla, an hotu tla hen chun mifial tla chu ningzakkâi tak hen siam ding leh lung hen seh ding hen anna tîm awt liauah annih nih chun an theih. ⁶ Chun, Lukaonia ram ber ah chun Lustra leh Derbe khua tla leh a kiangkam ram tla ah an tek; ⁷ chubang tla ah chun Thâwngthâng Ṭha an sim vima. ⁸ Chun, Lustra khua ah chun kekhêng âumawh a to tâwn le, a suak tîr thawk hen kekhêng rerêng asi, kê hen a kal dah lo. ⁹ Chu minung nih chun Pawl thusim a ngâi le, chun Pawl nih chun anih chu a zauh ko le, damnâk ding hen lungnâk a nei ti a theih le, ¹⁰ hâu fâk tak hen, "Na kê hen ding ziar hen dîr rawh," a ti. Chun, anih chu a thawk le, kê hen a kal rawh. ¹¹ Chun, mi zapi tla nih Pawl thilti chu an muh kâ hen, Lukaonia hawlh hen fâk tak hen, "Pathian tla chu minung hâwi hen kan sinah an hawng ṭum rawh asi hi!" an ti. ¹² Chun, Barnaba chu Zeus an ti le, Pawl chu thusimtu dauh asi ruangah Hermes an ti. ¹³ Chun, Zeus biakin dâilêng ah a um mi chu a bâwlpu nih chun chawchal leh chawmpâr ṭhi tla inkhâr kiangah an hawng put le, mi zapi tla hen chun sawnhnâk rangah thah an tum rawh. ¹⁴ Sikhawmsele, mifial Barnaba leh Pawl nih chun chu chu an theih kâ hen an puan an thlêk le, mi zapi lakah an lût le, an âu le, ¹⁵ "Pu le tla, hi bang thil hi zeirangah nan ti? Kannih khawm nan thinlung hâwi put minung kan si; hi bang thil mang tlâk lo tla nan hertâk hen vân le, tual le, tisumsumriat le, an sungah um mi zawzawng siamtu Pathian nung sinah chun nan hawng a her khonâk ding hen Thâwngthâng Ṭha kan tlunh na asi. ¹⁶ Chu Pathian nih chun tuan liauah phun kip mah lampi chiau zawh a siang le, ¹⁷ sikhawmsele, Pathian nih amah chu a dik asi ti theihtirnâk umlo hen a siam lo, chu hâwi hen thil ṭha a ti tâwn, vân thawk hen ruah tla leh ei ding a nan pêk na, nan thinlung lâwmnâk hen a nan khattir na tâwn kha," an ti. ¹⁸ Chun, chubang thu chu mi zapi nih anmah sawnhnâk ding ran an thah ding mi chu zângrah hen an khap na. ¹⁹ Sikhawmsele, Antiokei leh Ikoniam khua mi Juda âumawh chunah chun an hawng kal le, mi zapi tla chu an lêm na rawh. Chun, Pawl chu lung hen an seh le, thi hen an ruat ruangah khua lêng leiah an nûk rawh. ²⁰ Sikhamsele, ṭhiruai tla chu a kiangkam ah an dîr liauah a hawng thawk le, khua ah chun a lût rawh. Chun, a thâituan ah chun Barnaba hen Derbe khua ah an kal rawh. ²¹ Chun, khua ah chun Thâwngthâng Ṭha an sim le, ṭhiruai cherkhet an siam nûnah Lustra, Ikoniam leh Antiokei khua leiah an kîr nawlh rawh. ²² "Hamhnâk tamtak tuar hen Pathian Ram ah kan lût ding rerêng asi," ti hen ṭhiruai tla thinlung an birhtir le, lungnâk ah chun um kumza ding hen an fawrh vima na. ²³ Chun, kawhmi murui kipah chun upa tla an ruat piak na le, buhngei bû hen thla an cham thluh chun an lung mi Lalpa sinah chun an kiltir na vima tâwn. ²⁴ Chun, Pisidia ram an ṭawl vima le, Pamphulia ram chu an tleng. ²⁵ Chun, Perga khua ah thu an sim thluh rawh chun Atalia khua ah an kal. ²⁶ Chu thawk chun lawng hen an kal le, Antiokei khua chu an hawng tlung nawlh rawh, chu chu an thilti dih chia chu ti ding hen unau tla Pathian zângfahnâk kiltir hen an mâk na nâk kha asi. ²⁷ Chun, an tlung nûnah kawhmi tla chu an pumh na le, Pathian nih anmah tla mang hen thil a ti mi zawng tla leh phundang tla rangah lungnâk inkhâr a awng piak na zia tla chu an sim. ²⁸ Chun, ṭhiruai tla sinah chun sâwt tak an um rawh.

¹ Juda ram thawk hen an hawng kal le, unau tla sîntir anna dawmh rawh: "Mosi Dân hâwi hen fêm nan tantir lo chun ruangsuah nan si kho lai loh," ti hen, an sîntir na. ² Chun, Pawl leh Barnaba chu anmah tla hen êl hen anna do ruangah Pawl leh Barnaba chu an lakah âu tla hen mawh, chu thunawk ruang chun Jerusalem khua ah mifial tla leh upa tla sinah kal ding hen an ruat. ³ Chun, kawhmi tla nih chun an thlah na le, annih nih chun Phundang tla her nawlhnâk thu chu sim vima ding hen Phoiniki ram leh Samari ram an ṭawl dih rawh; chun, unau tla zawzawng thungâi an lâwmhtir na. ⁴ Chun, Jerusalem chu an va tleng rawh chun kawhmi tla, mifial tla, upa tla nih chun an hawng lawmh na le, chun Pathian nih anmah tla mang hen thil a ti mi zawng tla chu an simh na. ⁵ Sikhawmsele, Farisai murui lakah mi âu tla mawh lungtu an thawk le, "Phundang tla chu an fêm tan ding asi. Mosi Dân zûl ding hen an sinah thu pêk thlir ding asi," an ti. ⁶ Chun, mifial tla leh upa tla chu chubang thu chu ruat ding hen anna pûm. ⁷ Chun, anna êl chiam nûnah Peter a thawk le, an sinah: "Unau tla, Phundang tla nih keimah kâ hen Thâwngthâng Ṭha theih hen zûl ding leh Pathian nih tuan thawk hen nan lakah mi hawng ka ruat zia nan theih. ⁸ Chun, mi thinlung theihtu Pathian nih kanmah a hawng kan pêk hâwi ber khan Thlarau Thenhlimh an sinah pêk bâk hen an lakah â lâwm ti a theihtir. ⁹ Chun, kannih leh annih thliar leh dang lo hen an lungnâk hen an sual a ngaihdam na. ¹⁰ Chun, kan thlâktu tla leh kannih neh kho lo mi liangbat kha tuah ṭhiruai tla lakah ngauh tum hen zeirangah Pathian finghnâk nan êl? ¹¹ Anmah lungnâk hâwi ber hen kannih khawm nih Lalpa Jisu zângfahnâk ruangah ruangsuak ding hen kanna ruat a si," a ti. ¹² Chun, mi zawzawng chu an dâisip le, Barnaba leh Pawl nih Pathian nih anmah tla mang hen Phundang tla lakah singsiahnâk leh thilchê a ti mi thu kha an sim kar zawng an ngâi. ¹³ Chun, an sim thluh nûnah Jem nih a sim bâk le: "Unau tla ka thu ngâi u. ¹⁴ Pathian nih amah min zah ding hen an lakah mi tla lâk ding hen Phundang tla a veh mi thu chu Simon nih hin a sim rawh. ¹⁵ Chun, chubang thu leh khuavâng tla thu hi â meh asi: Pathian lasui thu nih a sim hâwi hen, ¹⁶ ’Chubang nûnah chun ka kîr nawlh lai le, David basâ a chim mi kha ka siam nawlh lai. A râwk mi tla khawm ka remh nawlh lai. ¹⁷ Midang, Phundang tla zawzawng ka min hawng ka bâwmtu tla nih chun Lalpa an hâwlnâk ding hen, chu basâ chu ka dirh nawlh lai ti hen. ¹⁸ Laikulh siam tîr thawk hen hi bang thu theihtir tâwntu Lalpa nih chun a ti,’ ti rîn hi. ¹⁹ "Churuangah hi hâwi hen ka ruat asi, Phundang tla lakah Pathian leiah anna her mi tla chu hamhtir na lo sele, ²⁰ ruk sawnhnâk thil nâwmtâm ei tla, pungnâk tla, s a rawm dît hen thah leh thisen ei tla bângtâk ding hen an sinah lasui kuat sele ka ti asi. ²¹ Mosi nih tuan liau thawk hen khua kipah a thu simpitu a nei tâwn le, pumhnâk in ah Dinhni kipah a thu chu rêl asi tâwn kha," a ti. ²² Chun, mifial tla leh upa tla chu kawhmi zawzawng tla hen chun an murui lakah mi an thîm le, Pawl leh Barnaba sinah Antiokei khua ah kaltir ṭha an ti. An thîm na mi min chu Juda, Barnaba an ti mi leh Sila an si le, chu mi tla chu unau tla lakah hotu dauh an si. ²³ Chun, hi hâwi hen lasui an rîn le, an kut ah an kuat: "Mifial tla leh upa tla, nan unau tla nih Antiokei khua tla, Siria ram tla leh Kiliki ram ah Phundang unau um tla chibai kan bûk na. ²⁴ Kan murui lakah mi âu tla nih mawh an nawktir na hen, nan thinlung ah an lawksawng tir na ti kan theih, an sinah thu zeikhawm kan pêk na lo. ²⁵ Churuangah thu rual hen kanna pûm le, kan hâwi duhtak Barnaba leh Pawl, ²⁶ Lalpa Jisu Krist min ruangah thih le nung ûi lo tla kal rual ah hin mi thîm tla nan sinah hawng kal tir bâk ṭha kan ti. ²⁷ Chun, Juda leh Sila kan hawng fial na asi, annih khawm nih hi bang thu hi hawlh kâ hen an simh na lai. ²⁸ Thlarau Thenhlimh leh kannih nih hi bang thu herh lo hi ritphurh nan tlûnah thâng lo sele ṭha kan ti. ²⁹ Ruk sawnhnâk sa ei tla, thisen ei tla, pungnâk tla bângtâk ule kan ti; hi bang hi nan bâng chun nan rangah a ṭha lai. Dam hen um u," ti hen. ³⁰ Chun, an fial na le, an kal le, Antiokei khua ah an tleng le; chun, mi zapi tla an pumh na le, lasui chu an pêk na. ³¹ Chun, an rêl thluh rawh chun lungngamnâk thu ruangah chun thungâi anna lâwm. ³² Chun, Juda leh Sila chu khuavâng an ti le, thu cherkhet hen unau tla chu an lungngamh na le, an birhtir. ³³ Chun, chunah chun sâwt dauh an um nûnah anmah fialtu tla sinah tlung nawlh ding hen unau tla nih chun lungngam tak hen an tlungtir nawlh na rawh. ³⁴ Sikhawmsele, Sila chu chunah um ko ṭha a ti. ³⁵ Pawl leh Barnaba lam chu Antiokei khua ah chun Lalpa thu sîntir hen leh sim hen an um ko le, midang cherkhet hen. ³⁶ Chun, ni zeimaw zat nûnah chun Pawl nih Barnaba sinah, "Tuah kal nawlh sele, khua kipah Lalpa thu kan simnâk zawngah unau tla kha veh vima sele, an umdân kan zauh na lai," a ti. ³⁷ Chun, Barnaba nih chun Johan Mark an ti mi chu an sinah kalpi a tum. ³⁸ Sikhawmsele, Pawl lam nih chun anih chu an sinah kalpi ṭha a ti lo, Pamphulia ram ah anmah tla a kîrtâk na le, rianṭuannâk ah an sinah a kal bâk lo ruangah khan. ³⁹ Chun, cherkhet anna êl le, anna ṭhen rawh. Barnaba nih Mark a kalpi le, Kupra tikulh leiah lawng hen an kal rawh. ⁴⁰ Pawl lam nih chun Sila chu a thîm le, unau tla nih chun Lalpa zângfahnâk ah an ap na nûnah an kal rawh. ⁴¹ Chun, kawhmi murui tla chu birhtir vima hen Siria leh Kiliki ram a ṭawl rawh.

¹ Chun, Pawl chu Derbe leh Lustra khua ah a kal. Chun, chunah chun a min Timothe, ṭhiruai pakhat a um. Lungtu Juda nunau fapa asi le, a pa lam chu Greek mi asi. ² Lustra leh Ikoniam khua ah unau um tla nih chun anih chu an sawr tâwn. ³ Pawl nih anih chu a sinah kal bâk ding hen a duh. Chun chu leiah Juda um tla ruangah a fêm a tan piak le, a pa chu Greek mi asi ti an theih ver ruangah. ⁴ Chun, khua kipah an kal pah hen Jerusalem ah mifial leh upa um mi tla thu thlûk kha zûl ding hen unau tla sinah an pêk vima na. ⁵ Chun, kawhmi murui chu lungnâk ah chun chak dadauh hen an um le, nisiar hen an pung dadauh rawh. ⁶ Chun, Thlarau Thenhlimh nih Asia ram ah thusim a khap ruangah Phrugia leh Galatia ram chu a ṭawl rawh. ⁷ Chun, Musia ram kiangah an tlung rawh chun Bithinia ram ah lût an tum le, sikhawmsele Jisu Thlarau nih a siang lo. ⁸ Chun, Musia ram chu an lanh le, Troas khua ah an kal. ⁹ Chun, zân ah Pawl nih muhtirnâk a muh; Makedonia ram ah minung pakhat dîr hen, "Makedonia ram ah hawng kâi le, hawng kan bawmh rawh," ti hen, ngiar chiam hen a muh. ¹⁰ Chun, muhtirnâk a muh kâ hen Makedonia ram ah chun kal a tum sawm le, an sinah Thâwngthâng Ṭha sim ding hen Pathian nih hawng kan kawh ti kan theih. ¹¹ Chun, Troas khua thawk hen lawng hen kan kal le, tluang tak hen Samothraki khua ah kan kal le, a thâituan ah chun Neapoli khua ah kan kal le, ¹² chun, chu thawk chun Philipi khua ah kan kal le, chu khua chu Makedonia ram ah mi khua pakhat asi, chu bial ah chun khua herh chem asi; Rom khua thawk hen ṭiau mi tla khua asi. Chu khua ah chun ni tamtak kan châm. ¹³ Chun, Dinhni ah kulh kawtkhâr lênglei ah tiva kap ah thlachamnâk mun si ding hen kan ruat mi lakah chun kan kal. Chun, kan to le, nunau an hawng mi tla sinah chun thu kan sim. ¹⁴ Chun, a min Lidia puan senduk zuartu Thiatira khua mi, Pathian sawnhtu nunau pakhat nih kan thu a theih le, chun Pawl thusim zûl ding hen Lalpa nih chun a thinlung a fiangtir rawh. ¹⁵ Chun, amah leh a dâwngsung tla hen baptis an si rawh chun, Lalpa lungtu tak hen nan hawng ka ruat chun ka in ah hawng tlung u," ti hen hawng kan ngiar chiam le, hawng kan thloh rawh. ¹⁶ Chun, thlachamnâk mun ah chun kan kal liauah, nungâk âumawh khuri chamchawh thiam mi kan tawng le, anih nih chun a chamchawh thiamnâk ruangah a pu le chu sum tamtak a tawngtir tâwn. ¹⁷ Chu minung nih chun Pawl leh kanmah a hawng kan zûl le, "Hi bang minung ruangsuahnâk lampi simtu tla hi Chungnungchem Pathian to-aw an si," ti hen a âu. ¹⁸ Chu hâwi hen chun ni sâwt tak a ti tâwn. Chun, Pawl chu a lung silo rawh le, â her le, khuri sinah chun, Jisu Krist min hen a sungah mi hawng suak ding hen thu ka nan pêk," a ti. Chu liau chir chun a suak sawm rawh. ¹⁹ Chun, a pu le nih an sum tawngnâk a tlâu ti an theih hen Pawl leh Sila chu an tleih le, hotu tla mâika ah sumtuah mun ah an nûk na. ²⁰ Chun, lâirêltu tla sinah an kalpi na le, "Hi minung tla hi Juda tla an si le, kan khua thungâi an nawktir, ²¹ dân kan zûl thianglo mi tla an sîntir na le, "Kannih chu Rom mi kan si," an ti. ²² Chun, mi zapi tla khawm chu mifial tla do na ding hen an hawng a thawh le, lâirêltu tla nih chun an puan tla an lît piak na le, ṭhianṭhunh hen vuak ding thu an pêk. ²³ Chun, vei cherkhet an vuak na nûnah rêngin ah an khumh na le, a vêngtu sinah ṭha tak hen vêng thlir ding hen an ti. ²⁴ Chu hâwi tluk hen thu an pêk ruangah anih nih chun rêngin sungah a khumh na le, an kê tla chu tungkhâwng lakah a thlâk na. ²⁵ Sikhawmsele, thanṭim ah Pawl leh Sila chu Pathian sinah thla an cham le, la an sak le, rêngtlâk tla nih an ngâi. ²⁶ Chun, lâkkhat ko ah lî fâk tak a hawng a nîn le, chun rêngin lungphûm tla chu â nîn; chun, inkhâr zawzawng â awng sawm le, mikip rêngkhimh tla chu â sût rawh. ²⁷ Chun, a vêngtu chu a it mi a hawng â ṭhang le, rêngin inkhâr tla chu awng hen a muh le, rêngtlâk tla chu an tek mawh a ti le, nâmsâu a phâwi le, â thah awt. ²⁸ Sikhawmsele, Pawl chu hâu fâk tak hen a âu le, "Zeitin khawm a ti lah, kan ektê hen hinah kan um ver rih asi," a ti. ²⁹ Chun, a vêngtu nih chun khâwnvâr a lam le, a lût le, lâu leh thir bû hen Pawl leh Sila mâika ah a bawkbukhup. ³⁰ Chun, annih chu a kalpi na le, "Pu le tla, ruangsuak a um ding hen zei me ka ti lai?" a ti. ³¹ Chun, annih nih chun a sinah, "Lalpa Jisu chu nang leh na dâwngsung tla hen lung ule, ruangsuak hen nan um lai," an ti. ³² Chun, a sinah leh a in ah um mi zawzawng tla sinah chun Lalpa thu an sim. ³³ Chun, chu zân lîla ah chun a kalpi na le, an vuaknâk a zual mi tla chu a ṭawl piak na le; chun amah leh a dâwngsung tla zawzawng hen baptis an si sawm rawh. ³⁴ Chun, a in ah a kalpi na le, ei ding a pêk na le, chun Pathian an lung ruangah anih chu a dâwngsung tla zawzawng hen anna lâwm rawh. ³⁵ Chun, a thâizing ah, lâirêltu tla nih chun, "Kha minung tla kha suah na rawh," ti hen, kawrsen tla an fial. ³⁶ Chun, rêngin vêngtu nih chun Pawl sinah an thu a simh, "Lâirêltu tla nih chun an suah na ding hen mi an hawng fial asi; churuangah tuah hawng suak ule, lungngam tak hen kal u," a ti. ³⁷ Sikhawmsele, Pawl nih chun an sinah, "Rom mi kan si, kan mawh leh mawh lo theihlo hen mi zatlâng mitmuh hen hawng kan vuak le, rêngin ah hawng kan khumh; tuah a thup hen suah ding hawng kan tum asi mu? Asi kho lai loh, anmah ngelchel hawng na sele hawng kan suah seh," a ti. ³⁸ Chun, kawrsen tla nih chun chubang thu chu lâirêltu tla sinah chun an sim. Chun, Rom mi an si ti an theih rawh chun an ṭih rawh. ³⁹ Chun, an va kal le, ngaihdam an deih na le, an suah na le, khua thawk hen kal ving ding hen an ngiar na. ⁴⁰ Chun, rêngin thawk hen an suak le, Lidia in ah chun an lût. Chun, unau tla chu an muh na le, lung an ngamh na le, an suak rawh.

¹ Chun, Amphipolia leh Apolonia khua an lanh le, Thesalonika khua ah an tleng le, chunah chun Juda tla pumhnâk in a um. ² Chun, Pawl nih a ti dân hâwi nget hen pumhnâk in ah a lût. Dinhni veithum kar Pathian lasui thu chu ruatpi na hen, ³ leh Mesia chu hamhnâk tuar ding rerêng asi zia tla mithi lak mi thawk nawlh ding asi zia tla chu a simhfiang le, a langhtir tâwn. "Hi Mesia a thu ka nan simh na mi hi, amah hi Krist chu asi," a ti tâwn. ⁴ Chun, an lakah zeimaw mi chu lêm hen an um le, Pawl leh Sila chu an kawmh rawh; Pathian sunhsak mi Greek mi zapi cherkhet leh nunau ruitu cherkhet hen. ⁵ Sikhawmsele, Juda lunglo tla nih chun an nahsuah na le; sumtuah mun ah mi zângzê âu tla mawh misual an sinah an hawngpi le, mi zapi an pumh na le, khua zawzawng an nawktir. Zason in an hawng nam le, mi zatlâng sinah kalpi ding an tum. ⁶ Chun, annih chu an tawng na lo le, Zason leh a unau dang âu tla mawh khua hotu sinah an nûk le, an âu le, "Laikulh nawktirtu tla kha hinah khawm an hawng kal le, Zason nih hin a in ah a tlungtir na. ⁷ Hi tla zawzawng hi, ’A min Jisu, lal dang a um,’ ti hen, Kaisar thu kalh hen an um tâwn asi," an ti. ⁸ Chun, mi zapi leh khua hotu tla nih chun chubang thu chu an theih rawh chun an nawk rawh. ⁹ Chun, Zason leh midang tla thawk hen tangka an lâk le, an suah na rawh. ¹⁰ Chun, unau tla nih chun zân ah Pawl leh Sila chu Beria khua ah an kaltir sawm na le, chunah an va tlung rawh chun Juda tla pumhnâk in ah an lût. ¹¹ Chunah mi tla chu Thesalonika khua tla ngâk chun an ṭha dauh le, chun thinlung lâwm tak hen thu chu an pawm le, an thu chu a dik leh diklo theih ding hen nisiar hen Pathian lasui thu ah an hâwl tâwn. ¹² Chun, an lakah mi cherkhet nih an lung rawh; Greek nunau zahkâi tla leh mipa tla khawm neptuai an lung lo. ¹³ Sikhawmsele, Thesalonika khua mi Juda tla nih chun Pawl nih Beria khua ah Pathian thu a sim ti an theih kâ hen chunah khawm chun an va kal le, mi zapi tla chu an fawrh le, an nawktir nawlh rawh. ¹⁴ Chun, unau tla nih tisumsumriat tiang kal ding hen Pawl chu an fial sawm rawh. Sila leh Timothe lam chu chunah chun an um ko rih. ¹⁵ Chun, Pawl kalpitu tla nih chun Athen khua tiang hen an kalpi le; chun Sila leh Timothe chu chelh rî hen a sinah kal tuannâk ding thuchah put hen an tlung rawh. ¹⁶ Chun, Pawl nih Athen khua ah annih chu a ngâk na liauah chun khua chu pathian lem tla khat hen a muh le, a thinrun rawh. ¹⁷ Chun, pumhnâk in ah Juda tla leh Pathian sunhsaktu tla a êlpi tâwn le, sumtuah mun ah khawm chunah a um mi vial tla chu nisiar a êlpi na tâwn. ¹⁸ Chun, Epikuria mi leh Stoik mi lakah mi fing âumawh khawm nih anih chu an hawng êlpi. A zeimaw mi nih, "Hi mi katam nih hin zei me sim a tum?" an ti. A zeimaw mi nih Jisu thu leh thawknawlhnâk thu a sim ruangah, "Ramdang pathian tla thusimtu asi bei a!" an ti. ¹⁹ Chun, anih chu an tleih le, Arawpagi ah chun an hawng kalpi le, a sinah. "Hi sîntirnâk thar na sim tâwn mi hi hawng kan theihtir kho lai ma? ²⁰ Thilchê zeilo kan nâ ah na hawng tlunh asi; chun hi bang thil umzia hi theih kan duh," an ti. ²¹ (Athen khua mi zawzawng chu an khua ah khual um mi tla khawm thu thar ngâi ding leh sim hen lawh an ruang nget tâwn.) ²² Chun, Pawl chu Arawpagi lâi takah chun a dîr le, a sim le: "Nannih Athen khua mi tla, zeizawng lakah phung-leh-lam sunhsak mi nan si ti ka theih. ²³ Ka tawih pah hen nan sawnh mi tla ka zauh liauah, mâichâm pakhat tlûnah, "Theih loh Pathian sinah," ti hen, rîn ka muh asi. Chun, theihlo hen nan sawnh tâwn mi kha, chu thu chu ka nan simh na hi. ²⁴ Pathian, laikulh leh a sungah thil zeizawng Siamtu chu tual leh vân Lalpa asi ruangah kut hen sak mi in tla ah a um lo; ²⁵ thil a samphâng mi hâwi hen minung kut hen rianṭuan piak hen a um dah loh, amah ngelchel chu nungnâk tla, thawsuaknâk leh thil zeizawng pêktu asi. ²⁶ Chun, tual tlûn zawzawng ah um ding hen phûr munkhat ver hen phun kip minung a siam le, an rangah tik a ruat le, an umnâk ding rî khawm a siam le, ²⁷ Pathian an hâwl hen an theih khonâk ding hen; sikhawmsele, anih nih chun hawng kan lât lo chiau asi, ²⁸ churuangah, ’Amah ruangah kan nung, kan châng hen kan um asi.’ Nanmah lakah la phuak thiam âu nih mawh, ’Kannih khawm a thlâk tla kan si,’ ti hen an sim hâwi khan. ²⁹ Chun, Pathian thlâk tla kan si rawh chun Pathian chu ngûn, tangka, lung mawh minung zungthiam leh thilthiam siam mi hâwi hen kan ruat ding asi loh. ³⁰ Pathian nih chun amah kan theihlo liauah a ngaihzia hawng kan thiam piak tâwn le; sikhawmsele, tuah ramkipah mi zawzawng rim ding thu a pêk rawh asi, ³¹ ni a tiamh ruangah, chu ni ah chun a minung ruat mi tla chu tual ah mi tla rep tak hen lâi a rêl lai; chu chu Pathian nih amah chu mithi lakah mi thawh hen mi zawzawng sinah a theihtir rawh," ti hen. ³² Chun, mithi lakah thawknawlhnâk thu chu an theih kâ hen, a zeimaw mi an nihsanh, a zeimaw mi nih, "Hi thu hi na sinah kan hawng ngâi nawlh lai," an ti. ³³ Chun, Pawl chu an lakah thawk hen a kal rawh. ³⁴ Sikhawmsele, mi âu tla mawh a sinah anna tel thlir le, an lung rawh. Chubang lakah zeimaw mi chu Arawpagi mi Dionisias leh nunau pakhat a min Damaris leh an sinah midang tla hen an si.

¹ Chu nûnah Pawl chu Athen khua ah mi chu a suak le, Korin khua ah a kal rawh. ² Chun, a min, Akuila Juda pakhat a muh le, chu minung chu Pontia ram ah a suak mi asi, Klaudia nih Juda zawzawng Rom khua thawk hen suak ding thu a pêk ruangah a nupi Priskili hen Itali ram thawk hen hawng tleng kâ an si. ³ Chun, Pawl chu chu tla sinah chun a tlung bâk rawh le, chun an rianṭuan hâwi ṭuan mi asi ruangah an sinah a um le, an sinah a ṭuan tâwn, an rianṭuan chu puanin siamtu an si. ⁴ Chun, Dinhni kipah pumhnâk inah thuruatnâk nei hen thu a sim tâwn, Juda leh Greek chu tla chu lêm a tum tâwn. ⁵ Chun, Sila leh Timothe chu Makedonia ram ah mi chu an hawng kal le, Pawl chu thusim cho hen a um rawh. Jisu kha Krist chu asi ti Juda tla sinah a simhfiang tâwn. ⁶ Sikhawmsele, an do le, an fâi le, Pawl nih a puan a thing le, an sinah, "Nan thihnâk mawh chu nanmah nih phurh ko u, kei lam chu ka thiang asi; tu thawk hen Phundang tla sinah ka kal lai," a ti. ⁷ Chun, chunah mi chu a kal le, a min Tita Justa, mi pakhat in ah a lût le, chu nih chun Pathian a sawnh tâwn le, a in khawm chu pumhnâk in hen â peh asi. ⁸ Chun, Krispa pumhnâk in hotu nih chun a dâwngsung tla zawzawng hen Lalpa an lung le, Korin khua mi cherkhet khawm nih an theih le, an lung bâk, chun baptis an si rawh. ⁹ Chun, zân ah Lalpa nih Pawl sinah chun muhtirnâk hen, "Ṭih lah le, dâisip um lo hen thu sim vima rawh; ¹⁰ kei na sinah ka um asi, nganfâk pêk ding hen âukhawm na tlûnah kut an thlâk lai loh, hi khua ah hin minung cherkhet ka nei asi," a ti. ¹¹ Chun, Pawl chu chunah chun an lakah Pathian thu sîntir hen kum khat leh thla ruk a um rawh. ¹² Chun, Galio chu Akaia ram ah lal ruangrûl ah a um liauah Juda tla nih a rual hen Pawl rangah an do chiam le, lâirêlnâk ah an hawngpi le, ¹³ "Hi minung hi dân lo hâwi hen Pathian sawnh ding hen mi a lêm tâwn asi," an ti. ¹⁴ Chun, Pawl nih a sâng awt hen, Galio nih Juda tla sinah, Juda le tla, hi hi thil diklo thu mawh thilsual mawh tal si sele, ngelchel hen ka nan sunhsak na lai, ¹⁵ sikhawmsele, thu tla, min tla nan dân thu ko asi chun nanmah nih ruat ko u, kei lam chu chu hâwi thu chu lâirêl ka duh lo," a ti. ¹⁶ Chun, lâirêlnâk tophah thawk hen chun annih chu a nar na rawh. ¹⁷ Chun, Greek mi zawzawng nih pumhnâk in hotu Sosthen an tleih le, lâirêlnâk tophah mâika ah chun an vuak le, Galio nih chun chubang an thilti chu zeikhawm ah a siar piak na lo. ¹⁸ Chun, chu nûnah chun Pawl chu ni sâwt tak a châm ko le, Churawhchun unau tla chu hâwlh ṭha hen a ṭhen na le, chu thawk hen Priskili leh Akuila hen Siria ram leiah lawng hen a kal rawh. Pawl nih thutiamh a nei ruangah Kenkriai khua ah a lû a mêt ta. ¹⁹ Chun, Ephesi khua chu an hawng tlung le, chunah chun annih chu a mâk na rawh. Anih lam chu pumhnâk in ah a lût le, Juda tla hen thu chiamcheriamtê hen a sim. ²⁰ Chun, sâwt dauh châm ding hen an ngiar le, sikhawmsele, rem a ti lo le, ²¹ "Pathian nih a siang chun nan sinah ka hawng kal nawlh lai," ti hen, hawlh ṭha hen an ṭian le, Ephesi khua thawk hen lawng hen a kal rawh. ²² Chun, lawng ah mi chu Kaisari khua ah a suak le, Jerusalem ah a va kal le, kawhmi tla chu chibai a bûk na; chu nûnah chun Antiokei khua ah a kal rawh. ²³ Chun, chunah chun sâwt tak a um nûnah a kal nawlh le, ṭhiruai tla zawzawng chu birhtir hen Galatia ram leh Phrugia ram chu a ṭawl thluh rawh. ²⁴ Chun, Juda pakhat a min Apolo, Alekzandria khua ah a suak mi, thusim thiam tak, Ephesi khua ah chun a va kal le; anih nih chun Pathian lasui thu tla thungâi a theih. ²⁵ Chu minung chu Lalpa Lampi thu leiah sîn mi asi le, thinlung ah ṭhanem ngâi tak asi ruangah Jisu thâwngthâng chu thanuam tak hen a sim le, a sîntir na tâwn. Sikhawmsele, anih chu Johan baptis thu cho a theih. ²⁶ Chun, pumhnâk in ah râlṭha tak hen thusim â dawmh rawh. Chun, Priskili leh Akuila nih chun a thusim an theih le, an in ah an kalpi le, a sinah Pathian Lampi thu rep khun hen an simhfiang rawh. ²⁷ Chun, anih nih chun Akaia ram ah lan ding a tum kâ hen unau tla nih an fawrh le, amah an lawmhnâk ding hen ṭhiruai tla sinah lasui an rîn piak le, chun a tlung rawh chun Pathian zângfahnâk ruangah lungtu tla chu thungâi a ṭangpi na. ²⁸ Mi zatlâng theih hen Juda tla chu a êl na le, a dawngh thlo na; Pathian lasui thu mang hen Jisu kha Krist chu asi ti a theihtir na.

¹ Chun, Pawl nih chun saklei bial a ṭawl dih ver le, Apolo Korin khua ah a um kar khan Ephesi khua chu a tleng le, ṭhiruai tla âumawh a muh na. ² Chun, anih nih chun an sinah, nan lung tîr liau khan Thlarau Thenhlimh nan tawng ma?" a ti. Chun, annih nih chun a sinah, "Tawng lo, Thlarau Thenhlimh a um ti rerêng khawm theih khawm kan theih loh," an ti. ³ Chun, anih nih chun, "Zeitin mi baptis me nan si?" a ti. Annih nih chun, "Johan baptis lakah," an ti. ⁴ Chun, Pawl nih chun, Johan nih chun mi sinah ’Ka dunglei ah hawngtu ding mi, Jisu chu nan lung ding asi,’ ti hen rimnâk ruangah baptisma hen a baptis tâwn asi kha," a ti. ⁵ Chun, chu thu chu an theih kâ hen Lalpa Jisu min hen baptis an si rawh. ⁶ Chun, Pawl nih an tlûnah a kut a thâng le, Thlarau Thenhlimh chu an tlûnah a hawng tlung rawh. Chun, hawlh theih loh hen thu an sim le, Pathian thu khawm an sim rawh ⁷ An ektê hen leinih an si. ⁸ Chun, Pawl chu pumhnâk in ah a lût tâwn le, thla thum tiang râlṭha tak hen thu a sim le, Pathian Ram thu leikângah chun mi a êl le, a thlûk na tâwn. ⁹ Sikhawmsele, a zeimaw mi an lungkhung le, an lung duh lo le, Lalpa Lampi chu mi zapi mâika ah an simsâwi. Churuangah Pawl nih chun a kaltâk na le, ṭhiruai tla chu a dang hen a kalpi na, nisiar hen Turana sîntirnâk in ah thuruatnâk a nei tâwn. ¹⁰ Chu hâwi karo hen kum nih tiang a ti le, chun, Asia ram ah um mi zawzawng Juda tla leh Greek tla khawm nih Lalpa thu an theih rê asi. ¹¹ Chun, Pathian nih Pawl kut hen thilchê nêptuai a titir lo; ¹² chun a taksa ah mi nâwtnâk puan tla mawh puanthuan tla mawh damlo tla sinah an hawng put le, an nganfâk tla a dam tâwn le, an sung thawk hen khuri tla khawm an suak tâwn. ¹³ Chun, dâwi mang hen a zî lemang mi Juda âumawh, "Pawl nih a thu a phuang tâwn mi Jisu min hen ka nan fâi asi," ti hen khuri nei tla tlûnah Lalpa Jisu min an lam nget tâwn. ¹⁴ Chun, Juda mi, bâwlpu lal pakhat Skeva nih chun chu hâwi ti mi fapa pasarih a nei. ¹⁵ Sikhawmsele, khuri nih an sinah, "Jisu ka theih, Pawl khawm ka theih, nannih lam chu âu me nan si," a ti na. ¹⁶ Chun, khuri nei nih chun a per nawh na le, an ektê hen a neh na le, chun chu in thawk hen chun takkaro leh liam hen an tek. ¹⁷ Chun, Ephesi khua ah um mi zawzawng, Juda tla leh Greek tla sinah khawm chu thu chu a thang rawh le, chun an ektê hen an lâu le, Lalpa Jisu min a lian rawh. ¹⁸ Chun lungtu tamtak an hawng kal le, an thilti tla chu thutluang an vâwr le, anna phuang rawh. ¹⁹ Dâwithiam tamtak khawm nih an lasuibu tla an hawng put ver le, mi zawzawng mitmuh ah an duah rawh, chun a man an sût le, tangka sîng nga si hen an theih. ²⁰ Chu hâwi tluk fâk hen Lalpa thu chu a zan le, a neh vima rawh. ²¹ Chun, chu nûnah chun, Pawl nih Makedonia ram leh Akaia ram chu ṭawl rih hen, Jerusalem khua ah kal ding a thinlung a um, "Chunah ka kal thluh chun Rom khua ah ka tlâwng fâwn ding asi," a ti. ²² Chun, a rianṭuantu panih, Timothe leh Erasta chu Makedonia ah a kaltir tâ na le, anih lam chu Asia ram ah a um rih. ²³ Chun, chu liauah chun Lalpa Lampi ruangah Ephesi khua ah nawk rarâu hen anna nawk lo. ²⁴ Minung pakhat a min Demetri tangkarua dêng hen, tangkarua hen Artemis ruk siam thiam mi tla sinah lawh kalnâk tamtak a pêk tâwn le, ²⁵ chu minung nih chun annih chu a kawh na le, an riantûan hâwi ṭuantu tla hen chun an sinah, "Pu le tla, hi rian hi kan neihnâk asi ti nan theih, ²⁶ hinah Ephesi khua cho silo hen, Asia ram pumpi ding dêng khawm, hi Pawl nih hin, ’Kut hen siam mi pathian tla hi chu pathian asi lo,’ ti hen, mi cherkhet a lêm na le, anna pêk ver rawh asi ti nannih ngelchel khawm nih nan muh hen nan theih. ²⁷ Chun, kan rianṭuan min a sia lai ti ṭihnung a kâi. Chu cho silo hen, pathiannu Artemis biakin khawm hi an siar lai lo. Asia ram mi zawzawng leh laikulh mi nih an sawnh tâwn mi hi a rokualnâk a nâu lai ti ṭihnung a kâi asi," a ti. ²⁸ Chun, chubang thu chu an theih kâ hen thungâi an thinrun le, "Ephesi khua ah mi Artemis hi rokual tak asi!" ti hen an âu. ²⁹ Chun, a khua hen anna nawk ver rawh le, Gaia leh Aristarka, Makedonia ram ah mi, Pawl zûltu tla chu an tleih le, a rual hen zauhnuam mun ah an tekpi chiam na. ³⁰ Chun, Pawl nih mi zapi lakah lût a tum le, ṭhiruai tla nih an siang lo. ³¹ Chun, Asia ram hotu chem tla lakah zeimaw mi âumawh Pawl hâwi tla an si le, a sinah minung an fial le, zauhnuam mun ah chun lût lo rarâm ding hen an lêm chiam na. ³² Chun, anna pûm mi tla chu anna nawk le, mi tam dauh nih anna pûmnâk san khawm an theih loh, churuangah a zeimaw mi thu pakhat hen an âu le, a zeimaw mi thu dang hen an âu. ³³ Chun, mi zapi lakah zeimaw mi nih Alekzandar mawhlonâk thu sim dân ding chu an sim le, Juda tla nih anih chu mâilei ah an tûl vima. Chun, Alekzandar nih chun a kut hen a zâp le, mi zawzawng sinah chun a mawhlonâk thu sim a tum. ³⁴ Sikhawmsele, anih chu Juda mi asi ti an theih kâ hen, dârkar nih tiang thurual tak hen, "Ephesi khua ah mi Artemis hi rokual tak asi!" ti karo hen an âu. ³⁵ Chun, khua ah lasui rîntu nih mi zapi a dâitir ruap na nûnah chun, "Ephesi khua mi le tla, "Artemis rokual tak biakin leh vân thawk hen ruk a tlâ mi kha, Ephesi khua mi tla hi a vêngtu nan si ti âu me theihlotu um? ³⁶ Chun, hi bang thu hi êl kho mi zât asi lo mi chu nan dâisip ding asi, thu dawn lo hen zeikhawm nan ti ding asi lo. ³⁷ Hi minung tla nan hawng put na mi hi biakin râwkmang tla an si lêmlo. ³⁸ Chun, Demetria leh a hâwi zungthiam tla khawm nih âu lak tal ah thupawi an nei chun, thupawi simnâk in tla chu awng chia asi khateh; lal ruangrûl khawm an um le, a salh na seh. ³⁹ Thildang pawiherh nan nei asi chun pumh tâwnnâk ah an remh lai. ⁴⁰ Tusûn nawktul mi ruangah hin salh ṭihnungkâi hen kan um rawh hi, a phûr umlo hen; chu hâwi chu asi le, hi pumhnâk san hi zeikhawm kan sim kho awt lo hi," a ti. ⁴¹ Chun, chu hâwi thu a sim thluh rawh chun anna pûm mi tla chu a ṭiak tir na rawh.

¹ Chun nawknâk chu a reh kâ hen Pawl nih ṭhiruai tla a kawhtir le, a fawrh na le, hawlh ṭha hen a ṭhen na le, Makedonia ram ah kal ding hen a suak rawh. ² Chun, thu cherkhet ṭhiruai tla fawrh vima hen chu ram chu a ṭawl thluh le, Akaia ram a tleng rawh. ³ Chun, chunah chun thla thum a râu nûnah Siria ram leiah lawng hen a kal awt le, Juda tla nih amah an phiar ruangah Makedonia ram pal pah hen tlung a tum rawh. ⁴ Chun, Purha fapa Sopater Beria khua mi tla, Thesalonika khua mi Aristarka leh Sekunda, Derbe khua mi Gaia, Timothe leh Asia ram ah mi Tukika leh Trophima tla a sinah Asia ram tiang an kal bâk. ⁵ Chubang tla nih chun hawng kan kalpi le, Troas khua ah chun hawng kan ngâk ko. ⁶ Kannih lam chu sang thilnu telhlo ni zawzawng nûnah chun Philipi khua thawk hen chun lawng hen kan kal le, ni nga nûnah Troas khua ah an sinah kan tlung le, chunah chun ni sarih kan châm. ⁷ Chun, ni sarih masachem ah chun sang phel ding hen kanna pûm liauah Pawl nih a thâituan ah kal a tum ruangah an sinah chiamcheriam hen thu a sim; thanṭim tiang hen thu a sim vima. ⁸ Chun, kardang sâng dauh ah kanna pûmnâk ah chun khâwnvâr cherkhet a um. ⁹ Chun, a min Eutuk tlangvâl pakhat langawtkawt ah a to le, a ngû lemang, Pawl nih thu a sim mi a sâwt ruangah, anih chu ihmu suak a diarh kholo le, in chuanh thum thawk hen a tlâ le, a ruak hen an sar. ¹⁰ Sikhawmsele, Pawl a va ṭum le, a pawm le a lawh. Anih nih chun, "Lawksawng lah u," "a nûkri a chat lo rih!" a ti. ¹¹ Chun, Pawl chu a kâi nawlh le, sang chu a phel le, buh a ei. Sâwt tak khuadei tiang hen an sinah thu a ruat, chun chu nûnah chun a kal rawh. ¹² Chun, tlangvâl chu in leiah dam hen an kalpi le, thungâi an lungngam rawh. ¹³ Chun, kannih lam chu lawng ah kan kal rawh le, Aso khua fûk ding hen lawng hen chun kan suak masa le, chu lakah chun Pawl chu chuantir rih ding kan tum; anih lam nih chun kê hen kal a tum ruangah chu hâwi hen amah nih a ruat rerêng asi. ¹⁴ Chun, Aso khua ah hawng kan tawng rawh chun lawng ah kan chuantir le, Mitulini khua kan tleng. ¹⁵ Chun, chu thawk hen chun lawng hen kan kal nawlh le, a thâituan ah chun Kio tikulh zâwn kan tleng; chun a thâituan ah Samo tikulh kan pal le, chun a thâituan ah chun Mileti khua kan tleng nawlh. ¹⁶ Chun, Pawl nih Asia ram ah um sâwt a duh lo ruangah Ephesi khua chu lanh a tum chia rêng asi, tikho asi chun Jerusalem khua ah Pentekost ni tanh a tum le, kal â nam asi. ¹⁷ Chun, Mileti khua thawk hen chun Ephesi khua ah mi a fial le, kawhmi upa tla a tawng ding hen a sinah a kawhtir. ¹⁸ Chun, a sinah an hawng tlung rawh chun an sinah, "Asia ka tlâwng tîr ni thawk hen khan nan sinah ka um sung zawzawng ka umzia nan theih; ¹⁹ mi tangah dawnh bû hen leh Juda tla nih an hawng ka phiar ruangah mitthli tlâk leh thil hamhkâi ka tlûnah a hawng um mi tuar bû hen Lalpa rian ka ṭuan tâwn kha. ²⁰ Kha hâwi hen khan a ṭhatvaknâk thu nan sinah zeikhawm sim ka sûm lo le, mi zatlâng lakah leh in kipah ka nan sîntir na tâwn kha. ²¹ Juda tla leh Greek tla sinah khawm Pathian leiah thinlung lêttirnâk thu leh kan Lalpa Jisu Krist leiah lungnâk thu ka theihtir tâwn kha. ²² Chun, theih u, tuhin thinlung ah kal lo kholo hen ka theih ruangah Jerusalem khua ah ka kal awt hi, chunah chun ka lakah thil hawng tlung ding rî ka theih loh. ²³ Thlarau Thenhlimh nih, ’Phuarnâk leh hamhnâk nih a nan dawng,’ ti hen khuakip ah a hawng ka theihtir tâwn, chubang cho chu ka theih asi. ²⁴ Sikhawmsele, ka tekzuamnâk lampi ka mabân lîm ding leh Pathian zângfahnâk Thâwngthâng Ṭha theihtir ding hen, Lalpa Jisu sinah kha bang rianṭuannâk rian ka tawng mi kha ṭuan dih tâ sele ka nungnâk khawm unh tlâk ah ka ruat lo. ²⁵ Chun, theih u, nannih zawzawng, Pathian Ram thu phuang vima hen ka sawk lemang tâwnnâk tla nih hin ka mêl nan muh lai lo rawh ti ka theih. ²⁶ Churuangah mi zawzawng thisen ah ka buah lo asi ti tusûn ah ka nan theihtir na. ²⁷ Pathian ruat zawzawng a ektê hen nan sinah simh kâ sûm lo kha. ²⁸ Pathian kawhmi tla amah thisen hen a châwk mi tla chu châwm ding hen nanmah tla leh nan ho na mi tla zawzawng tlûnah a thiamthih u, Thlarau Thenhlimh nih an tlûnah hotu ah a nan siam na asi. ²⁹ Ka kal nûnah chingngia râng tla nan lakah a hawng lût lai le, murui tla an zuah lai loh ti ka theih. ³⁰ Nan lakah mi ngelchel khawm ṭhiruai le tla nih nan sinah kawptir ding hen thu dang sim hen nan hawng um lai. ³¹ Churuangah ruat tet u; kum thum thlo mitthli tlâk bû hen, a sûn a zân hen mikip nunsimh ka bâng lo kha, theihkumza u. ³² "Tuhin Pathian leh a zângfahnâk thu ah ka nan kiltir na hi, chu nih chun a nan ṭhangtir kho na lai, mi thinlung thenhlimh tla lakah malsawmnâk a nan neitir kho na lai. ³³ Âu tangka khawm, ngûn tla, nipuan tla ka ngarh dahlo kha. ³⁴ Hi kut tla nih hin kei leh ka hâwi tla pawiherh a suah tâwn kha nanmah tak nih nan theih. ³⁵ Zeizawng ka ti mi vial zûn ka nan zauhtir na tâwn kha, chubang hâwi hen hamh tak a ṭuan bû hen Lalpa Jisu thu theihkumza bû hen mi chaklo tla nan ṭangpi ding asi; amah ngelchel nih, "Zeilo lâk lei ngâk hen pêk lei a ṭha dauh," a ti. ³⁶ Chun, chu hâwi thu chu a sim thluh rawh chun a siksidîr le, an ektê hen thla a champi na. ³⁷ Chun, an ektê hen an ṭap chiam le, an ir leh Pawl ir tawnh hen anna châwchawk chiam le, ³⁸ a mêl an muh nawlh lo ding mi thu a sim mi chu an ngaihsiatnâk chem asi. Chun, lawng tiang hen amah an thlah rawh.

¹ Chun, annih tla hen kanna ṭhen le, lawng hen kan kal le, chu nûnah chun ding zar hen Kos tikulh kan tleng le, chun a thâituan ah Rodi tikulkh kan tleng nawlh le, chu thawk hen kan kal vima le, Patara khua kan tleng. ² Chun, Phoiniki ram ah lan ding lawng pakhat kan tawng le, kan kal vima. ³ Chun, Kupra tikulh kan muh le, simlei kâng hen kan lanh le, Siria ram leiah kan kal vima. Tura khua ah chun tlâng ah kan suak tâ rih le, chunah chun lawng ah mi thil thiar ding asi. ⁴ Chun, ṭhiruai tla kan hâwl na le, chunah chun ni sarih kan châm. Chun, annih nih chun Thlarau simh hen Pawl sinah Jerusalem khua pal lo ding an ti. ⁵ Sikhawmsele, chubang nûnah chun kan suak le, kan kal rawh. Unau tla nih chun an ektê an nupi fatê tla hen dâilêng tiang hen hawng kan thlah. Chun, tisumsumriat kap ah chun kanna siksidîr le, thla kan cham ta. ⁶ Chun, "Dam tak hen," kanna ti le, lawng ah chun kan a chuan le, annih lam chu an in leiah an lâwi nawlh rawh. ⁷ Chun, Tura khua mi lawng ah kan kal rawh chun Tolemai khua kan tleng le, unau tla chibai kan bûk na le, an sinah nikhat kan châm. ⁸ Chun, a thâituan ah chun kan suak le, Kaisari khua kan tleng. Chun, Thâwngthâng Ṭha simtu Philip in ah kan lût le, anih chu pasarih tla lakah pakhat kha asi, a sinah kan châm. ⁹ Chu nih chun fanu pali a nei le, nungâk thenhlimh an si le, Pathian thu an sim tâwn. ¹⁰ Chun, chunah chun ni cherkhet kan châm le, chu liauah chun Judai ram ah mi a min Agaba khuavâng pakhat a hawng. ¹¹ Chun, kan sinah a hawng kal le, a kê tla, a kut tla amah nih â phuar le, chun " ’Jerusalem khua ah Juda tla nih hi hâwi hen hi tâisâwm neitu hi an phuar lai le, Phundang tla kut ah an pêk lai,’ Thlarau Thenhlimh nih a ti," a ti. ¹² Chun, chubang thu chu kan theih kâ hen kannih leh chu khua mi tla nih chun Pawl chu Jerusalem khua ah kal lo ding hen kan ngiar chiam. ¹³ Chun, Pawl nih a sâng le, "Zeirangah nan ṭap le, nan ka ngaihsia tir? Lalpa Jisu min ruangah chun Jerusalem khua ah phuar cho tâwk ka ti lo le, thih khawm ka iam asi," a ti. ¹⁴ Chun, lêm kho asi lo nûnah chun, "Lalpa thu thu si seh," kan ti le, kan bâng rawh. ¹⁵ Chu nûnah chun kan thilri kan timh le, Jerusalem khua ah kan kal. ¹⁶ Kaisari khua mi ṭhiruai tla âumawh kan sinah an hawng bâk le, annih nih chun a min Nason, ṭhiruai masa murui Kupra tikulh ah mi pakhat kan tlungnâk in ding dâwngpupa chu an put bâk. ¹⁷ Chun, Jerusalem khua ah kan tlung rawh chun unau tla nih lâwm tak hen hawng ka dawng. ¹⁸ A thâituan ah chun Pawl le hen Jem va veh ding hen kan kal; chunah chun kawhmi upa tla zawzawng khawm an um. ¹⁹ Chun, Pawl nih annih tla chu chibai a bûk thluh na nûnah chun a rianṭuannâk mang hen Pathian nih Phundang tla sinah thil a titir mi vial chu a kipkâwi hen a sim. ²⁰ Chun, unau tla nih chun chubang thu chu an theih hen Pathian an chawnglawmh; chun Pawl sinah, "Unaupa, Juda tla lakah lungtu tla tam zia na muh le, an ektê hen Dân leiah ṭhanem an ngâi asi. ²¹ Chun, nannih Phundang tla lakah Juda um tla zawzawng sinah chun an fa tla fêmtan lo ding leh dân hâwi hen um lo ding ti hen, Mosi Dân mâktâknâk na sîntir na tâwn ti, mi kâ ah na thu hi an theih. ²² Zeitin me silai rawh ne? Na hawng tleng ti an theih awt ko dangâiah. ²³ Churuangah na sinah kan sim hâwi hen ti le: Thutiam nei mi, mi pali kan sinah an um; ²⁴ chu tla chu kalpi na le, an sinah va a thianh bâk le, an lû an mêt khonâk ding hen an rangah thil hêu rawh. Chun, mi zawzawng nih mi kâ ah na thu an theih mi vial kha thudik asi lo ti an theih lai le, nangmah ngelchel khawm Dân zûl hen rep tak hen na um bâk ti an theih awt asi. ²⁵ Phundang tla lakah lungtu tla leikâng thu chu ruk sawnhnâk thil leikângah, sa rawm dît hen thah mi ei leikâng leh pung leikângah anna thliar ding asi ti hen kan rêl le, kan rîn rawh kha," an ti. ²⁶ Chun, a thâituan ah chun Pawl nih mipa tla chu a kalpi na le, an sinah a va a thianh bâk, Pathian Biakin ah chun a lût le, an rangah sa thah chiau ding a pêk na lân lo chu thianhnâk ni an nei awt rih ti, bâwlpu sinah an simhkan. ²⁷ Chun, ni sarih chu a tling awt bâiah Asia ram ah Juda tla nih chun Pawl chu Pathian Biakin ah chun an muh le, zapi zawzawng an fawrh na le, anih chu an tleih le, an âu. ²⁸ "Israel mi le tla!" hawng kan bawmh u!’’Hi minung hi ram kipah mi zawzawng sinah Juda tla, Mosi Dân leh hi Pathian Biakin simsiattu kha asi; chu lo khawm Pathian Biakin ah hin Greek mi tla khawm a lutpi le, hi mun thenhlimh hi a nawmh rawh asi," an ti. ²⁹ (Chu lânah khua ah chun Ephesi khua mi Trophima chu a sinah an muh le, Pawl nih chu minung chu Pathian Biakin ah a lûtpi asi ti hen an ruat asi.) ³⁰ Chun, khua tê hen an châng sup le, minung tla chu an tek le, Pathian Biakin ah mi an nûk zek le, in an khâr sawm. ³¹ Chun, anih chu thah an awt liauah chun Jerusalem khua mi anna nawk ti thu chu kawrsen murui hotu lianchem sinah an va thanh. ³² Chun, anih nih chun kawrsen tla leh kawrsen hotu tla a kalpi sawm na le, an sinah tek hen an va ṭum le; chun annih nih chun hotu lianchem leh kawrsen tla chu an muh kâ hen Pawl an vuak mi chu an bâng rawh. ³³ Chun, hotu lianchem nih chun a hawng naih le, Pawl chu a tleih le, chikchîn panih hen khih ding thu a pêk le, âu me asi, zei se a ti, ti a deih. ³⁴ Chun, mi zapi lakah mi khing chu thu khat hen an âu le, mi khing chu thu dang hen an âu; chun an nawktul ruangah a ti zia a theih lo le, kulh sungah kalpi ding thu a pêk. ³⁵ Chun, Pawl nih leilâk a tleng liauah mi zapi an rothawk zia a fâk ruangah kawrsen tla nih anih chu an châwi vima le; ³⁶ mi zawzawng nih veih ko u," ti hen an âu le, an zûl dutmat. ³⁷ Chun, Pawl chu kulh lakah an kalpi awt liauah anih nih chun kawrsen hotu lianchem sinah chun, "Na sinah ah thu kâ khat ka sim kho lai ma?" a ti. Chun, anih nih chun, Greek hawlh na theih na maw?" ti hen a deih. ³⁸ "Tuan ah, mi tla fawrh hen, mi thah mang tla sâng li ramkaro ah kalpitu tla Aigupta ram ah mi kha na si lo mazei?" a ti. ³⁹ Pawl nih chun Juda mi, Kilikia ram ah Tarsa khua mi ka si, khua salam ah um mi ka si lo, hawng ka zângfah le, mi zawzawng sinah thu hawng ka simtir rawh," a ti. ⁴⁰ Chun, rem a ti ka hen Pawl chu leilâk ah a dîr le, mi zawzawng dâisipnâk ding hen a kut a zâp; chun an dâiruap kâ hen Hebrai hawlh hen an sianh:

¹ Unau le tla, pa le tla, tuah nan sinah ka mawhlonâk thu ka sim awt mi hi ngâinik u," a ti. ² Chun, Hebrai hawlh hen an sinah thu a sim ti an theih kâ hen an dâiruap; chun, anih nih chun, ³ Juda mi ka si, Kilikia ram ah Tarsa khua ah suak mi ka si, sikhawmsele hi khua ah hin Gamaliel sinah sîn hen ṭhanglian ka si. Kan thlâktu tla Dân umzia kerme tatak chu sîn tâwn hen um mi ka si, tusûn ah nanmah hâwitê hen, Pathian rangah semse ngâi bâk mi ka si. ⁴ Chun, hi leikâng zûltu tla hi thah ding rê hen ka nehsawh na tâwn le, nunau mipa hen ka phuar tâwn le, rêngin ah ka khumhtir na tâwn. ⁵ Bâwlpu lalchem leh upa tla zawzawng khawm nih chubang thu chu an hawng ka theihpi kho, an sinah mi unau tla rangah pêk ding hen lasui ka tawng le, chun Damaska khua ah um mi vial an rêp na ding hen, phuar bû hen Jerusalem khua ah kalpi na ding hen ka kal kha. ⁶ "Chun, ka kal le, Damaska khua kiang ka tlung rawh chun sûn ah nî sunh liauah, lâkkhat ko ah vân thawk hen chêu fâk tak ka kiangkam a hawng cherh pup. ⁷ Chun, tual ah ka tlû le ka sinah, "Sawl, Sawl, nangnih zeirangah na ka nehsawh?" ti hen hâu ka theih. ⁸ Chun, kei nih, ’Lalpa âu me na si?’ ti hen ka sâng. Chun, anih nih chun, ’Nazareth Jisu, na nehsawh mi ka si,’ a ti. ⁹ Chun, ka hâwi tla nih chun chêu chu an muh narêng hen hawng ka sawnhtu hâu lam chu an theih loh. ¹⁰ Chun, kei nih, ’Lalpa zei me ka ti lai?’ ka ti. Chun, Lalpa nih chun ka sinah, ’Thawk le, Damaska khua ah lût rawh, thil zawzawng na ti ding hen ruat mi zawng a nan simh lai,’ a ti. ¹¹ Chun, chêu rokual ruangah chun khua ka muh kho lo le, ka hâwi tla nih kut hen an hawng ka ruai le, Damaska khua ah ka lût rawh. ¹² "Chun, mi pakhat Anania, Dân leikângah Pathian sunhsak mi leh Damaska khua ah um mi Juda tla zawzawng nih an zah thlo mi pakhat chu ka sinah a hawng kal le, ¹³ ka kiangah a dîr le, ka sinah, ’Ka nau Sawl, mitdeinâk nei rawh,’ a hawng ka ti. Chun, chu liau takah chun amah chu ka muh rawh. ¹⁴ Chun, anih nih chun, ’Kan thlâktu tla Pathian nih a duhzia theihtu a leh mi rep to-aw tak chu muh hen, a hawlhkâ theihtu khawmah a nan ruat rawh. ¹⁵ Na muh leh na theih mi thu lak khan mi zawzawng sinah amah thu theihpitu na si lai. ¹⁶ Chun, zeirangah me na um ko? Thawk le, a baptis le, na sual na ṭâwl thiang ding hen a sinah thlacham rawh,’ hawng ka ti. ¹⁷ Chun, Jerusalem khua ah hin ka tlung nûnah Pathian Biakin ah thla ka cham liauah, muhnâk nei hen ka um le, ¹⁸ chun, ’A nam le, Jerusalem khua mi suak rawh, ka thâwngthâng na sim ding mi chu an lung awt lo hi,’ a hawng ka ti liau ka muh. ¹⁹ Chun, kei nih ’Lalpa, pumhnâk in kipah a nan lungtu tla zawng chu rêngin ah ka khumh na le, ka vuak na tâwn mi kha an theih ko asi. ²⁰ Chun, na thu theihtu Stephen an suah liauah khan kei khawm a kiangah ka dîr le, rem ka ti le, a thahtu tla puan khawm ka kil piak na asi,’ ka ti. ²¹ Chun, anih nih chun, ’Kal rawh, hi thawk hen lât takah Phundang tla sinah ka nan fial dauh lai,’ hawng ka ti rawh," a ti. ²² Chun, chu tiang chu a ngâi le, chun hâu fâk tak hen, "Hi bang hâwi mi hi laikulh thawk hen tlâutir u; nung tlâk asi lo," an ti rawh. ²³ Chun, an âu le, an puan tla an lît le, an lawnh le, valeidip an vawrh le; ²⁴ chun, kawrsen hotu lianchem nih Pawl chu kulh sungah kalpi ding thu a pêk, a tlûnah chu hâwi tluk an âunâk san chu theih ding hen vuak ding a ti. ²⁵ Chun, savun ri hen an phuar thluh nûnah Pawl nih a kiangah dîr mi kawrsen zâ hotu sinah, "Rom mi rerêng nan vuak kho ma si, mawhtir rawh mi khawm silo hen?" a ti. ²⁶ Chun, kawrsen zâ hotu nih chun chu chu a theih kâ hen kawrsen hotu lianchem sinah a kal le, "Na thilti ding hi thiamthih râu rawh. Hi minung hi Rom mi asi," a ti. ²⁷ Chun, kawrsen hotu lianchem chu a va kal le, a sinah, "Rom mi na si ma? hawng ka simh rawh," a ti. Chun, Pawl nih chun, "Ka si," a ti. ²⁸ Chun, kawrsen hotu lianchem nih chun, "Chu khua mi si ding hen kei lam chu tangka cherkhet ka hêu asi," a ti le a sâng. Chun, Pawl nih chun, "Kei lam chu Rom mi rerêng ah suak ka si," a ti. ²⁹ Chun, Pawl rangah salh tumtu tla nih chun anih chu an kaltâk rawh; kawrsen hotu lianchem khawm nih Rom mi asi ti a theih rawh chun a lâu, a phuar ruangah a lâu khun. ³⁰ Chun, a thâituan ah chun, Juda tla nih zeiruangah me Pawl an phûm ti theihfiang ding hen kawrsen hotu lianchem nih chun anih chu a sût le, bâwlpu lal tla leh lâirêltu zawzawng tla pumh ding thu a pêk le, Pawl chu a kalpi le, an mâika ah a dîrtir rawh.

¹ Chun, Pawl nih lâirêltu tla chu a zauh ko na le, "Unau le tla, tusûn tiang hen Pathian mitmuh hen ṭhatnâk lei ka theih mi ti hen ka um tâwn," a ti. ² Chun, Bâwlpu Lalchem Anania nih chun Pawl kiangah dîr mi tla sinah a kâ ah bengh piak ding thu a pêk. ³ Chun, Pawl nih a sinah, "Nang vâm buah ngo pa, Pathian nih a nan bengh dauh lai; nang Dân hâwi a lâi na ka rêl piak ding hen na to le, Dân lo hâwi hen bengh ding na hawng ka ti asi mu?" a ti. ⁴ Chun, a kiang ah mi tla nih, "Pathian Bâwlpu Lalchem na fâi mu?" an ti. ⁵ Chun, Pawl nih, "Unau le tla, Bâwlpu Lalchem asi ti ka theih loh asi; ’Na unau tla hotu tlûnah thu ṭhalo sim lah, ti hen khawm rîn asi," a ti. ⁶ Chun, Pawl nih a zeimaw mi chu Sadukai tla, a zeimaw mi chu Farisai tla an si ti a hawng theih hen lâirêltu tla lakah chun a âu le, "Unau le tla, Farisai fapa khawm ka si; mithi lungumnâk leh thawknawlhnâk thu ah salh hen ka um asi hi," a ti. ⁷ Chun, chu thu a sim thluh rawh chun Farisai tla leh Sadukai tla anna êl le, anna ṭhen. ⁸ Sadukai tla nih, "Mithi thawknawlhnâk rêng a um lo, vânmifial khawm a um lo; thlarau khawm a um lo," an ti tâwn. Farisai tla lam nih chun a kâng thum hen a um asi ti an lung. ⁹ Chun, thungâi anna nawk rawh; Farisai leiah mi Dân sîntirtu tla zeimaw mi an dîr le, an êl, "Hi minung hi a sualnâk zeikhawm kan theih loh; thlarau khawm nih vânmifial khawm nih hawng kan sawnh menza khawmsele zei me pawi lai?" a ti. ¹⁰ Chun, anna êl dadauh ruangah kawrsen hotu lianchem nih Pawl an dawh dip lai ti a ṭih le, kawrsen tla sinah va kal hen an lakah mi kulh sungah zângrah ko hen kalpi ding a ti. ¹¹ Chun, zân ah chun Lalpa chu Pawl kiangah a dîr le, "Lungngam tak hen um rawh, Jerusalem khua ah ka thu na theihtir hâwi ber hen Rom khua khawm na theihtir ding asi," a ti. ¹² Chun, nî a suak hen Juda tla chu thu anna rual le, Pawl an thah lân lo chu zeikhawm temlo ding hen siat anna sirh. ¹³ Chu thu lakah phiartu tla chu sâwmli ngâk a tam an si. ¹⁴ Chun, annih chu bâwlpu lal tla leh upa tla sinah an kal le, "Pawl kan thah lân lo chu zeikhawm temlo ding hen siat kanna sirh ver asi. ¹⁵ Churuangah nannih nih lâirêltu tla hen a thup hen a thu rep khun a ruat tum hâwi hen nan sinah hawngpi ding hen kawrsen hotu lianchem sinah pheh zâu hen va sim u; nan kiangah a hawng tlung lânah kannih amah thah ding hen kanna râlring ko," an ti. ¹⁶ Sikhawmsele, Pawl farnu fapa nih an bawh mi thu a theih le, kulh sungah chun a lût le, Pawl chu a va simh. ¹⁷ Chun, Pawl nih chun kawrsen zâ hotu pakhat a kawh le, "Hi tlangvâl hi hotu lianchem sinah kalpi rawh; a sinah thu zeimawh sim ding a nei asi lai," a ti. ¹⁸ Chun, kawrsen hotu lianchem sinah a va kalpi le, "Pawl rêngtlâ nih khan a hawng ka kawh le, hi tlangvâl hi na sinah hawngpi ding hen a hawng ka fial le, na sinah thu zeimawh sim ding a nei asi lai," a ti. ¹⁹ Chun, kawrsen hotu lianchem nih chun a kut ah a tleih le, a dangah a kalpi, a thup hen, "Zei me hawng ka simh ding na nei?" ti hen a deih. ²⁰ Chun, anih nih chun "Pawl thu chu rep dauh khun hen na ruat ding hâwi hen a thâituan ah lâirêltu tla sinah kalpi ding hen Juda tla nih deih ding hen rem an ti khap. ²¹ Sikhawmsele, an thu lung lah le, an lakah minung sâwmli ngâk a tam nih an bawh ko le, chubang tla nih chun amah an thah lân lo chu zeikhawm tem lo ding hen siat anna sirh; tuhin na thu ngâk hen tîm chia zet hen an um ko asi," a ti. ²² Chun, kawrsen hotu lianchem nih chun tlangvâl chu a kîrtir le, "Hi bang thu na hawng ka theihtir mi hi âukhawm simh lah a ti thlir. ²³ Chun, kawrsen zâ hotu panih a kawh le, "Zân dâr kua ah Kaisari khua tiang kal ding hen kawrsen zanih hen, rang tlûnah chuan murui sâwmsarih hen, fei put mi zanih hen a tîm u," a ti. ²⁴ Chun, Lâirêltu Felik sinah chun him tak hen an tlungtir khonâk ding hen Pawl chuannâk ding hen rang tla timhtuah ding a ti na. ²⁵ Chun, hi hâwi hen lasui a rîn le: ²⁶ "Klaudia Lusia nih Felik Lâirêltu ṭha chem chibai a bûk. ²⁷ Hi minung hi Juda tla nih an tleih le, an thah awt liauah an sinah kawrsen tla ka kalpi na le, Rom mi asi ti ka theih le, ruang ka suah rawh. ²⁸ Chun, an phiarnâk san theih ka duh le, lâirêltu tla sinah ka kalpi le, ²⁹ chun an dân thu zei lakah mawh an phiar asi ti ka theih le, sikhawmsele an phiarnâk thu lakah thihnâk leh phuarnâk phah rê ding hen zeikhawm ka theih loh. ³⁰ Chun, Juda tla nih amah an bawh ti, mi nih an hawng ka simh kâ hen na sinah amah hi ka hawng fial sawm rawh asi, a phiartu tla khawm a tlûnah thupawi an nei mi vial na mâika ah sim ding hen thu ka pêk na," ti hen. ³¹ Chun, kawrsen tla nih chun a thupêk hâwi hen chun Pawl chu, chu zân ah an kalpi le, Amtipatris khua an tlengpi. ³² Chun, a thâituan ah chun rang tlûn chuan mi tla chu a sinah kal vima ding hen an kaltâk na, kulh sungah chun an kîr nawlh rawh. ³³ Chun, annih chu Kaisari khua chu an tleng le, Lâirêltu sinah lasui chu an pêk le, Pawl khawm a mâika ah an dîrtir. ³⁴ Chun, Lâirêltu nih lasui a rêl thluh rawh chun Pawl umnâk ram a deih. Chun, Kilikia ram ah mi asi ti a theih kâ hen, ³⁵ "An phiartu tla khawm chu an hawng tleng tikah na thunawk chu ka ruat lai," a ti. Chun, Herod in ah vêng ding thu a pêk.

¹ Chun, a ni nga nâk ah Bâwlpu Lalchem Anania a hawng tleng le, upa âumawh tla hen, a min Tertulla thusim thiam pakhat hen; chun, Pawl tlûnah thupawi chu Lâirêltu Felik sinah an sim. ² Chun, Pawl chu an kawh nûnah chun Tertulla nih chun amah phiar a dawmh: ³ "Felik ṭha chem, nangmah zârah thungâi kan lungngam ruangah leh na zauhkhenhnâk ruangah hi phun tla hi sual tla ṭha tak hen khap hen a um tâwn ruangah, zei mun zawngah lungâwi tak hen kanna lâwm tâwn. ⁴ Sikhawmsele, na rangah nengtawr kâi tuk si ding ka duh lo le, na nunnêmnâk hen thu kâ khat lam chu na hawng ka ngâi piak ding hen ka nan ngiar asi. ⁵ Hi minung hi mi huatkâi tak, laikulh ah Juda murui zawzawng nawktirtu leh Nazaret murui tla lakah an lupû chem pakhat asi ti kan theih le; ⁶ Pathian Biakin nawmh ding a tum le, churuangah kan tleih asi; kan dân hâwi hen a lâi kan rêl ding asi. ⁷ Sikhawmsele, kawrsen hotu Lusia nih kan kut thawk hen zâng hen a lâk le, phiartu tla chu na mâika ah hawng ding hen thu a pêk. ⁸ Nangmah ngelchel nih salh hen kan phiarnâk thil zawzawng hi amah lakah na theih kho lai," a ti. ⁹ Chun, Juda tla khawm nih chun, "Chubang thu chu chu hâwi asi," ti hen an bawppi bâk. ¹⁰ Chun, Lâirêltu nih chun thu sim ding hen Pawl chu a simh kâ hen Pawl nih chun: "Nang kum tamtak hi phun tla lâirêl piaktu na si ti ka theih ruangah lâwm tak hen ka mawhlonâk thu ka sim awt," a ti. ¹¹ Jerusalem khua ah Pathian sawnh ding hen ka kalnâk thawk hen ni leinih lêm asi lai lo rih ti na theih ko lai. ¹² Pathian Biakin khawmah, pumhnâk in khawmah, khua khawmah âukhawm ka êl na mi leh mi zapi ka fawrh mi annih nih an ka muh lo. ¹³ Tu khawmah an ka phiarnâk thu hi nangmah theih ah a bul an zâwt kho lai loh. ¹⁴ Sikhawmsele, hi thu hi na sinah ka phuang lai, ’murui dang,’ an ti mi leikâng dân hâwi hen hawng kan thlâktu tla Pathian ka sawnh tâwn--Dân leh khuavâng tla lasuibu ah rîn mi zawzawng lung hen. ¹⁵ Chun, mi rep tla leh replo tla thawknawlhnâk a um lai ti Pathian leiah ka lungum le, hi bang tla khawm nih hin chubang tla chu an lung bâk. ¹⁶ Churuangah chun Pathian leikângah leh minung leikâng khawmah thinlung sual lo ding ko hi kil kumza ka tum tâwn asi. ¹⁷ Chun, kum tamtak nûnah hin ka phun tla sinah thil pêk ding leh sa thah ding put hen ka kal. ¹⁸ Chun, chubang thil ka pêk liauah chun mi zapi tello hen, a chaihtul hen Pathian Biakin ah thenhlimh hen an hawng ka muh. ¹⁹ Sikhawmsele, chunah chun Asia ram ah mi âumawh an um kha, chubang tla nih chun ka tlûnah thu an nei chun hin ah hin na mâika ah um hen an hawng ka phiar ding asi. ²⁰ Asi lo leh, hi bang mi ngelchel nih hin lâirêltu mâika ah ka dîr liauah ka sual mi zei me an muh sim na seh, ²¹ hi thu kâ khat ruangah hin asi lêm lo chun an lakah dîr hen, "Mithi thawknawlhnâk thu lakah tusûn ah hin nan mâika ah salh hen ka um asi,’ ka ti kha," a ti le a sâng. ²² Chun, Felik nih chun Thu umdân chu a theihfiang dauh ruangah "Kawrsen hotu lianchem Lusia chu a hawng tleng tikah nan thu chu ka thlûk lai," ti hen a siah rawh. ²³ Chun, dâwt dauh hen a hâwi le nih rian an ṭuan piak mi khap lo hen vêngtir ding hen kawrsen zâ hotu sinah thu a pêk. ²⁴ Chun, ni zeimaw zat nûnah Felik chu a nupi Drusila, Juda nunau hen an hawng. Pawl chu a kawhtir le, Krist Jisu lungnâk thu chu a ngâi. ²⁵ Chun, Pawl nih chun repnâk thu tla, sûmnâk thu tla, lâirêlnâk hawng um ding mi thu tla chiamcheriam hen a sim liauah Felik chu thungâi a lâu le, "Kal ko rih, a dêngkhâwng tik zawngah ka nan kawh lai," a ti. ²⁶ Pawl nih tangka a pêk ding a lungum le, churuangah chun zinh dauh hen a kawh le, a sawnh tâwn asi. ²⁷ Sikhawmsele, kum nih nûnah Porkia Festa nih Felik chu a thleng rawh, chun Felik nih chun Juda tla lakah min ṭhat a duh le, Pawl chu phuar chia hen a mâk rawh.

¹ Chun, Festa nih chun ram chu a awp rawh le; chun, ni thum nûnah Kaisari khua thawk hen Jerusalem khua ah a va kal. ² Chun, bâwlpu lal tla leh Juda upa tla nih chun a sinah Pawl thâwngthâng chu a sia leikâng an theihtir. ³ Jerusalem khua ah Pawl hawng kalpi ding hen zângfahnâk Festa rangah an deih chiam le, lampi ah bawh hen thah an tum. ⁴ Sikhawmsele, Festa nih chun, "Pawl chu Kaisari khua ah an vêng ko le, kei khawm sâwtlo tê ah ka tlung awt. ⁵ Churuangah chu minung nih sualnâk a ti chun nan lakah hotu tla hawng ka zûl na sele, phiar u seh," a ti le a sâng. ⁶ Chun, Festa chu an lakah ni riat mawh ni râ lêm a châm lo le, Kaisari khua ah a tlung nawlh rawh. Chun, a thâituan ah chun lâirêlnâk tophah ah a to le, Pawl chu hawngpi ding hen thu a pêk. ⁷ Chun, Pawl chu a hawng tleng rawh chun Jerusalem khua thawk hen an hawng kal mi Juda tla chu a kiangah an dîr le, a tlûnah thupawi cherkhet rit tak an sim le, a thu phûr chu an sût kho lêm lo. ⁸ Pawl nih chun a mawhlonâk thu a sim le, "Juda tla Dân tlûnah, Pathian Biakin thu lakah Kaisar tlûn khawmah thil rerêng ka sual loh," a ti. ⁹ Sikhawmsele, Festa nih chun Juda tla lakah min ṭhat a duh le, Pawl sinah chun, "Jerusalem khua ah va kal le, khinah ka mâika ah hi bang thu hi ruat ding na duh ma?" a ti le a sâng. ¹⁰ Pawl lam nih chun, "Kaisar lâirêlnâk tophah mâika ah lâi na ka rêl ding lakah ka dîr mi hi; Juda tla tlûnah thil zeikhawm ka sual lo, nang khawm nih chu chu thungâi na theihfiang. ¹¹ Misual ka si hen thihnâk phah rê hen thil ka ti asi chun thih khawm ka êl loh. Sikhawmsele, hi bang an hawng ka phiarnâk thu hi a phûr zeikhawm a um lo chun âukhawm nih an sinah an hawng ka pêk kho lai loh. Kaisar sinah ka tlunh lai," a ti. ¹² Chun, Festa nih chun lâirêlpitu tla a sawnh thluh rawh chun, "Kaisar sinah tlunh na tum chun, Kaisar sinah na kal ko lai ma chu," ti hen a sâng. ¹³ Chun, ni zeimaw zat nûnah chun lalchem Agripa leh Berniki chu Kaisar khua ah an hawng tlung le, Festa chibai an bûk. ¹⁴ Chun, ni cherkhet an châm ruangah Festa nih chun Pawl thunawk chu lalchem sinah chun a sim le: ¹⁵ "Felik nih khan mitâng âumawh a mâk le, Jerusalem khua ah ka um liauah khan bâwlpu lal tla leh Juda upa tla nih a thâwngthâng an hawng ka simh le, mawhtir ding hen an ngiar. ¹⁶ Chun, kei nih an sinah, ’An phiar mi leh a phiartu tla chu anna tawng le, an phiarnâk lakah a mawhlonâk thu simnâk a remkâng â tawng lân lo chu mi rerêng rêp ding leh salh hi Rom khua mi dân asi lo,’ ti hen ka sâng. ¹⁷ Chun, hinah an hawng tlung rawh chun sâwt chiam lo hen a thâituan ah chun lâirêlnâk tophah ah ka to le, chu minung chu hawngpi ding hen thu ka pêk. ¹⁸ Chun, a phiartu tla an dîr liauah ka ruat tluk hen a tlûnah a sualnâk thupawi zeikhawm an sim kho lo. ¹⁹ An phung-leh-lam dân tla leh Jisu, mi pakhat thi rawh mi, Pawl nih chun ’A nung nawlh asi,’ ti hen a sim le, chu hâwi ruangah a tlûnah thunawk tla an nei asi dauh. ²⁰ Chun, kei nih chubang thu tla chu ruat ding châng rêng ka theih lo le, Jerusalem khua ah kal hen, khinah chubang thu ruat ding a duh leh duhlo ka deih. ²¹ Sikhawmsele, Pawl nih chun lalchem lâirêl piak a ngiar dauh le, churuangah Kaisar sinah ka kaltir kho lân lo chu vêng ding hen thu ka pêk," a ti. ²² Chun, Agripa nih chun Festa sinah chun, "Kei khawm chu minung thusim chu ngâi ka duh tâwn asi," a ti. Chun, Festa nih chun, "Thâi ah a thusim na ngâi bâk lai," a ti. ²³ Chun, a thâituan ah chun Agripa leh Berniki chu rokual tak hen an hawng kal le, thusimnâk in ah an lût le, kawrsen hotu lian tla hen leh khua ah mi ṭha dadauh tla hen; chun, Festa thu hen Pawl chu in sungah an hawngpi rawh. ²⁴ Chun, Festa nih chun, "Lalchem Agripa leh hinah kan lakah um zawzawng tla: Hi minung nan muh mi hi asi a thâwngthâng Juda tla zawzawng leh Jerusalem mi tla nih ka sinah phiarnâk an hawng tlunh mi kha. Chun, an ektê hen nung tlâk asi lo ti hen an âu chiam. ²⁵ Sikhawmsele, a thihnâk khawp rê hen zeikhawm a ti lo ti ka theih le, chun, amah nih lalchem sinah tlunh a tum ruangah fial ka tum asi. ²⁶ Sikhawmsele, a thu a bul leh pâr zeikhawm ka lalchem sinah rîn ding ka theih loh. Churuangah nan mâika ah ka hawng kalpi hi, Lalchem Agripa, nangmah mâika ah hawng kalpi dauh ka si, salh thluh nûnah zeimaw tal rîn ding ka nei khonâk ding hen. ²⁷ Mitâng lalchem sinah fial hen a tlûnah an phiarnâk thu theihtir lo chu âtkâi tak asi," a ti.

¹ Chun, Agripa nih Pawl sinah chun, "Na mawhlonâk thu na sim kho," a ti. Chun, Pawl nih a kut a phar le, a mawhlonâk thu a sim: ² "Lalchem Agripa! Juda tla nih an hawng ka phiarnâk zawzawng kha ka mawhlonâk thu tusûn ah hin na mâika ah ka sim awt ruangah lâwm hen ka theih. ³ Hi hi ka lâwmnâk chem asi; Juda tla lakah dân leh thunawk zawzawng lakah na fing thlo ruangah; churuangah zângfahtê hen na hawng ka ngâi piak ding hen kan ngiar asi. ⁴ "A tîrah ka ngâksia liau thawk hen ka phun tla lakah leh Jerusalem khua ah ka umdân tla kha Juda tla zawzawng nih an theih. ⁵ A tîr thawk hen ka thâwngthâng an theih, kha hâwi hen kan phung-leh-lam kermê chem dân hâwi vima hen Farisai ah ka um kha, an duh chun an hawng ka simpi kho asi. ⁶ Chun, Pathian nih kan thlâktu tla sinah thu a tiamnâk lakah lungngamnâk thu lakah hin tuah lâirêl piak hen ka dîr hi, ⁷ chu thutiam chu ka phun leinih nih a sûn a zân hen Pathian rian ṭhanemngâi tak a ṭuan hen tawng ding an lungum tâwn. Aw Lalchem, chubang lungumnâk thu ruangah chun Juda tla nih an hawng ka phiar asi hi! ⁸ Pathian nih mithi tla a thawh ti hi zeirangah me lung tlâklo hen nan ruat? ⁹ "Kei khawm nih Nazaret Jisu min kalhkâng hen thil cherkhet ti sele ṭha hen ka theih tâwn. ¹⁰ Chu hâwi chu Jerusalem khua ah ka va ti tâwn le, chun, bâwlpu lal tla sinah thawk hen thu ka tawng le, mi thenhlimh tla lakah mi cherkhet rêngin ah ka khumh tawn; chun an thah liauah thah rem ti leikângah ka ṭang tâwn. ¹¹ Chun, pumhnâk in kipah simsiat a an umnâk ding hen ka rêp vima na le, chun an tlûnah thungâi ka rât hen ramdang mi khua tiang khawm ka nehsawh na tâwn. ¹² "Chu hâwi ti ding hen bâwlpu lal tla thawk hen thuneihnâk thupêknâk tla lasui put hen Damaska khua ah ka kal. ¹³ Aw Lalchem, ka kal liauah nî sûn liau chirah vân thawk hen chêu zeimawh nî ngâk hen chêu dauh, keimah leh ka kalpi mi tla kiangah chêu ka muh. ¹⁴ Chun, kan ektê hen tual ah kan tlû le, Hebrai hawlh hen, Sawl, Sawl! Nangnih zerangah na ka nehsawh? Sunhnâk fungkhenh na rangah a fâk, hawng ka ti mi hâu ka theih. ¹⁵ Chun, kei nih, ’Lalpa âu me na si?’ ka ti. Chun, Lalpa nih chun, ’Jisu na nehsawh mi chu ka si; ¹⁶ sikhawmsele, thawk le dîr rawh; hi bang na thil muh tla leh na sinah ka langhnâk ding thil tla chu rianṭuan lakah leh theihtu ah a nan siam ding hen na sinah ka hawng a langh asi. ¹⁷ Mi zawzawng leh Phundang tla kut lakah ka nan hum lai; ¹⁸ an mit deitir ding hen an sianha ka nan fial hi, chun mûi chu chêu leiah an hawng hertâk lai le, Setan thuneihnâk chu Pathian leiah an hertâk lai, sual ngaihzia thiamnâk an tawngnâk ding leh an hawng ka lung ruangah thenhlimh rawh mi le tla lakah ro anna ting khonâk ding hen,’ " a ti. ¹⁹ "Churuangah, Lalchem Agripa, vân ah thawk hen muhnâk ka nei mi chu ka êl lo le, ²⁰ a tîrah Damaska khua mi tla sinah, chu nûnah chun Jerusalem khua mi tla sinah, Juda ram kip mi tla sinah, Phundang tla sinah khawm rim min put tlâk hen thilti, rim hen, Pathian leiah anna hernâk ding hen ka sim dauh tâwn asi. ²¹ Churuang chun asi, Juda tla nih chun Pathian Biakin ah an hawng ka tleih le, thah an hawng ka tum asi. ²² Sikhawmsele, Pathian sinah thawk hen ṭangpinâk ka tawng ruangah tusûn tiang hen nâuta leh mi lian tla sinah thu theihtir hen ka um ko rih le, khuavâng tla leh Mosi nih thil hawng tlung ding mi an sim mi thu cho lo chu thudang ka sim lo. ²³ Kha hâwi hen Mesia nih hamhnâk a tuar ding leh mithi lakah mi a thawknawlh masachem ding asi ti mi zawzawng sinah leh Phundang tla sinah khawm chêu muhtirtu asi lai, an ti mi thu kha," a ti. ²⁴ Chun, chu hâwi hen a mawhlonâk thu Pawl nih a sim liauah Festa nih chun hâu fak tak hen, "Pawl! Na â asi, na sîn tamnâk nih a nan âttir asi hi!" a ti. ²⁵ Sikhawmsele, Pawl nih chun, Festa ṭha chem ka â lo; thudik tak leh thufing tak ka sim dauh asi hi. ²⁶ Hi bang thu hi lalchem nih a theih asi, a sin khawmah ṭihlo hen ka sim asi; hi bang thil hi a sinah zeikhawm thuh pheh lo hen dik tak hen ka theih; hi bang hi in kî ah sim asi lo. ²⁷ Lalchem Agripa, khuavâng tla thu na lung ma? Na lung ti ka theih," a ti. ²⁸ Chun, Agripa nih chun Pawl sinah, "Sâwtlotê ah lêm hen Kristian ah siam na hawng ka tum asi hi!" a ti. ²⁹ Chun, Pawl nih chun, "Sâwt seh sâwt lah seh, nangmah cho ka ti lo, tusûn ka thu theihtu zawzawng khawm hi keimah hâwi a um ding hen Pathian sinah ka deih asi, rêng lam chu khimh lo hen," a ti. ³⁰ Chun, lalchem, governor, Berniki leh an sinah to mi tla hen chun an thawk le; ³¹ chun, a dang hen an kal le, anna sâwn le, "Hi minung nih hin thihnâk leh rêng khimhnâk ding rê hen thil zeikhawm a ti lo ma hi a," a ti. ³² Chun, Agripa nih Festa sinah, "Hi minung nih hin Kaisar sinah tlunh ding tiamh lah sele chu a suak ko ding mi," a ti.

¹ Chun, Itali leiah lawng ah kal ding hen thu an thlûk kâ hen, Pawl leh rêngtlâ dang âumawh chu Rom kawrsen zâ hotu, Lalchem an ti mi lak mi Julius sinah an ap. ² Chun, Andramitiam khua lawng, Asia tisumsumriat kap khua tla pal ding hen chun kan a chuan le, tisumsumriat ah kan kal rawh. Makedonia ram ah mi Aristarka, Thesalonika khua thawk hen mi kan sinah a um. ³ Chun, a thâituan ah Sidon khua kan pal. Julius nih chun Pawl thungâi a sunhsak le, a panhtir ding hen a hâwi tla sinah a tâwitir. ⁴ Chun, chu thawk hen tisumsumriat kan kal nawlh le, a mahlo leiah hawng kan ranh ruangah Kupra tikulh, thli theihlonâk leiah kan tek. ⁵ Chun, Kilikia ram leh Pamphulia ram naih tisumsumriat kan lanh nûnah Lukia ram ah Mura khua kan tleng. ⁶ Chunah chun kawrsen zâ hotu nih chun Alekzandria lawng Itali ram pal ding mi chu a tawng le, chu lakah chun hawng kan chuantir. ⁷ Ni sâwt tak dusah hen kan kal le, Nidos khua zâwn harsa tak hen kan tlung rarâm le, thli nih hawng kan khirh ruangah Salmoni rîlah Kret tikulh phenh ah thli theihlonâk leiah kan tek le; ⁸ chun, har tak hen vakap rîl vima ah kan kal le, likâwlneng dawh an ti mi mun chu kan tleng rawh; chu kiangah chun Lase khua a um. ⁹ Chun, ni cherkhet a vei rawh ruangah leh lawng ah kal ṭihnung a kâi ruangah, Buh Ngei Ni chu a lanh rawh asi. Pawl nih chun a simhfâi na le: ¹⁰ an sinah "Pu le tla, lawng ah tuah kal hi râwknâk leh veihnâk fâk tak a tlung awt ti ka theih, thil leh lawng cho ka ti lo le, kanmah tla khawm ka ti asi," a ti. ¹¹ Sikhawmsele, kawrsen zâ hotu nih chun Pawl thusim ngâk hen lawngpu leh lawng neitu thu a lung dauh. ¹² Chun, busik tuarnâk ding hen likâwlneng chu â rem lo ruangah mi tam dauh nih chu thawk hen tisumsumriat ah kal hen, Phoiniki khua tlung rarâm hen, chunah busik tuar ding thu an thlûk. Phoiniki khua chu Kret tikulh likâwlneng pakhat asi, mar sak leh sim sak hawi kâng asi. ¹³ Chun, sim thli chu duhsah hen a lêng rawh chun an duhzia an tawng mawh an ti le, thîr cha-âi chu an nûk le, Kret tikulh kap lei hen an rial vima. ¹⁴ Sikhawmsele, sâwtlotê nûnah tikulh lei thawk hen chun thli fâk tak a hawng râng rawh le, chu thli chu ’Eurokuilo’ an ti. ¹⁵ Chun, lawng chu a hawng nam le, thli leiah a hawi kholo kâ hen kan thlah rawh le, hawng kan ranh chiam ko rawh. ¹⁶ Chun, a min Kauda tikulh metê phên ah thli theihlonâk ah kan tek le, har tak hen lawnglêng kan hum kho râm. ¹⁷ Chun, lawng chu an nûk zawk nûnah rirual tla hen lawng chu an khih le, Surti leiah ranh an ṭih le, puan zârnâk zeizawng an thlûk le, thli nih hawng kan ranh ko rawh. ¹⁸ Chun, a thâituan ah titlingtlawk nih hawng kan lawh chiam rawh ruangah chun lawng ah mi thil chu tî lakah lawnh an dawmh rawh. ¹⁹ Chun, a thâituan ah anmah kut ngelchel hen lawng mi thil-le-rî an lawnh nawlh rawh. ²⁰ Chun, ni sâwt tak, nî khawm ârfi khawm a lang lo le, thlipi fâk tak nih hawng kan vuak le, dam ding rerêng kanna ruat lo rawh. ²¹ Chun, buh ei lo hen sâwt tak an um nûnah Pawl chu an lakah a dîr le, "Pu le tla, Kret tikulh ah khan sût lo hen ka thu kha lung ule, hi bang râwknâk leh siatnâk hi a tlung lo ding mi. ²² Sikhawmsele, tu khawm hin lungngam tak hen um ding hen ka nan fawrh na; nan lakah âukhawm nih nan lû nan lauh lai loh, lawng lam chu a tlâu awt asi. ²³ A tâ ka si le, ka sawnh tâwn mi Pathian vânmifial pakhat tuzân ah hin ka kiang ah a hawng dîr le, ka sinah, ²⁴ ’Pawl ṭih lah, Kaisar mâika ah na dîr ding asi; chun, ngâinik, lawng lakah na sinah kal mi zawzawng tla khawm Pathian nih a nan pêk,’ hawng ka ti asi. ²⁵ Churuangah, Pu le tla, lungngam tak hen um u; Pathian ka lung, hawng ka simh hâwi vima hen a um awt asi. ²⁶ Sikhawmsele, tikulh a zei ah mawh hawng kan ranh ding asi," a ti. ²⁷ Chun, Andria tisumsumriat thli nih khatlei khatlei ah hawng kan ranh le, zân leili a tling zân ah chun thanṭim ah mawh tlung awt hen anna theih. ²⁸ Chun, tî thûk zia an tah le, lam kul hen an theih; chun, sâwtlotê ah an tah nawlh le, lam leinga hen an theih. ²⁹ Chun, lawng taw leiah thîr cha-âi pali an thlâk le, chu lo chun lungruk nâwngah hawng kan ranh lebang lai ti an ṭih; chun thungâi khuadei an mawhlah. ³⁰ Chun, lawng ah mi tla nih chun lawng lû leiah thîr cha-âi thlâk ding hâwi hen a perpet na le, lawnglêng chu tisumsumriat ah an thlâk le, lawng chu tektâk an tum. ³¹ Chu liauah Pawl nih chun kawrsen zâ hotu leh kawrsen tla sinah chun, "Hi bang tla hi lawng ah an um ko lo chun an him lai loh," a ti. ³² Chun, kawrsen tla nih chun lawnglêng ri tla an sah le, an thlah rawh. ³³ Chun, khuadei awt bâiah chun Pawl nih mi zawzawng chu buh ei ding hen a fial na le, "Tusûn hi ni leili asi rawh, zeikhawm ei lo hen nan ngâk le, nan ngei lemang asi. ³⁴ Churuangah buh ei ding hen ka nan fial na asi; nan damnâk ding asi, nan lû lakah mi sam zâi pakhat khawm a tlâu lai loh," a ti. ³⁵ Chun, chu thu chu a sim thluh rawh chun sang a lâk le, mi zawzawng mâika ah chun Pathian sinah lâwmthu a sim le, a ei rawh. ³⁶ Chun, annih khawm lungngam tak hen an um le, buh an ei bâk rawh. ³⁷ Chun, lawng ah mi chu kan ektê hen 276 kan si. ³⁸ Chun, an khawp rawh chun fâng chu tisumsumriat ah an lawnh le, lawng chu an zângtir rawh. ³⁹ Chun, nî a hawng suak rawh chun tlâng chu zei ram me asi ti an theih loh; sikhawmsele zei likâwlneng mawh seppho an muh le, chu tlûnah chun lawng kaltir ding an tum. ⁴⁰ Chun, thîr cha-âi rêngnâk chu an sah le, tisumsumriat ah an mâk le; churawhchun, a hernâk phuarnâk tla chu an sût le, mâilei puanzâr chu thli sêm kâng tlûnlei ah an sangh le, seppho chu an fûk rawh. ⁴¹ Sikhawmsele, tizangrual panih â tawngnâk ah kan lût sut le, lawng chu tual an suttir rawh; chun, lawng lû lei chu a tâng thlir le, changh kholo hen a um ko le, a taw lei lam chu tikîr a fâk ruangah kuai â dawmh rawh. ⁴² Chun, kawrsen tla nih rêngtlâ tla chu thah ding hen anna thluk le, chu lo chun anna liau lai le, an tek lai ti an ṭih. ⁴³ Sikhawmsele, kawrsen zâ hotu nih Pawl rangah hum ding a duh le, an thiltum chu a khap na; tiliau thiam vial tisumsumriat ah khâwk hen tlâng lei kâi masa ding leh midang chu a zeimaw mi thing phel tlûn tla ah, ⁴⁴ a zeimaw mi lawng kuai mi thing phel tlûn leh thil-lê-rî tlûn tla ah kâi ding hen thu a pêk. Chu hâwi chun an ektê hen tlâng ah him tak hen an kâi ver.

¹ Chun, kan kâi nûnah chun tikulh min chu Malta asi ti kan theih rawh. ² Chun, phun dang tla nih thungâi hawng kan zângfah; ruah a sûr ruangah leh a dâi ruangah mei an tih le, kan ektê hen hawng kan lawmh. ³ Chun, Pawl nih chun thing têl khat a khawmh le, mei a tih le, a lîn ruangah rûl a hawng suak le, a kut ah a chuk le â thlâi ko. ⁴ Chun, phun dang tla nih chun a kut ah rûl â thlâi ko mi chu an muh le, "Hi minung hi, mi thahtu asi ngelchel lai, tisumsumriat thawk hen tek khawmsele phû lamtu nih chun nung ding hen rem a ti lo si lai," an ti. ⁵ Sikhawmsele, anih nih chun rûl chu mei lakah a thing bawk le, zeikhawm â ti lo. ⁶ Annih nih chun phing ding hen mawh lakkhat ko ah thi hen tlû sawm ding hen an ruat le; chun sâwt ual an zauh ko le, zeikhawm â ti lo ti an theih rawh chun an thinlung an dang nawlh le, "pathian pakhat asi hi," an ti. ⁷ Chun, chu mun kiang chu tikulh ah lalchem a min Publias mun a um; chu nih chun hawng kan lawmh le; ni thum lâwm tak hen hawng kan tlungtir. ⁸ Chun, Publias pa damlo leh nal kal hen a it ko; chun Pawl chu a sinah a kal le, a tlûnah a kut a thâng le, thla a cham piak le, a dam rawh. ⁹ Chu thluh chun, chu tikulh ah mi a dang nganfâk nei mi vial an hawng kal le, a damh na. ¹⁰ Chu ni tla ah chun thungâi hawng kan chawnglawmh le, kan kal awt rawh chun thilpêk cherkhet leh kan thil herh tla lawng ah hawng kan siah piak. ¹¹ Chun, thla thum nûnah a min "Pathian Phîr tla," ti mi Alekzandria khua lawng, busik ah tikulh ah a um rawh. ¹² Chun, Surekus khua kan pal le, chunah chun ni thum kan châm. ¹³ Chu thawk hen kanna hêl le, Reziam khua kan tleng le, chun ni khat nûnah simlei thli a râng le, a thâituan ah Puteoli ah kan tleng nawlh le, ¹⁴ chunah chun lungtu tla kan muh le, an sinah ni sarih châm ding hen hawng kan thloh le, chu hâwi chun Rom khua leiah kan kal vima rawh. ¹⁵ Chun, unau tla nih kan thâwngthâng an theih kâ hen chu thawk chun Apius sumtuah leh khual tlungnâk in pathumnâk ah hawng kan dawng ding hen an hawng kal le; Pawl nih chu minung tla chu a muh na rawh chun Pathian sinah lâwmthu a sim le, a lungngam rawh. ¹⁶ Chun, Rom khua ah kan lût rawh chun Pawl chu a vêngtu kawrsen sinah amah cho um ding an siang. ¹⁷ Chun, ni thum nûnah Pawl nih chun Juda tla hotu dauh vial a pumh na le; chun an hawng a pûm le, an sinah, "Ka unau Israel le tla, mi zawzawng leh kan thlâktu dân lakah ka ti lo khawmah Jerusalem khua thawk hen Rom mi tla kut ah an hawng ka tângtir asi. ¹⁸ Chun, annih nih chun an hawng ka salh thluh rawh chun thihnâk khawp rê ka tlûnah zeikhawm a um lo ruangah thlah an hawng ka tum. ¹⁹ Sikhawmsele, Juda tla nih chu chu an êl ruangah Kaisar sinah tlunh lo kho ka si lo rawh le, sikhawmsele ka phun tla phiarnâk nei hen ka ti mi asi lo. ²⁰ Chubang leikângah chun nanmah muh ding hen ka nan kawh na asi; Israel tla lungumnâk ka bawppi ruangah hi chikchîn hi khih ka si," a ti. ²¹ Chun, annih nih chun a sinah, "Na thâwngthâng Judai ram thawk hen lasuikuat kan muh lêm lo, unau tla âukhawm nih hinah hawng kal hen na lakah thupawi zeizawng an phuang lo, sim khawm an sim lo. ²² Khawmsele, hi murui hi ram kipah simsiat an si le, nangnih zeitin na ngaih, theih kan duh," an ti. ²³ Chun, ni an tiamh le, chu ni chun a tlungnâk in ah mi tamtak an hawng kal le, zîngtê thawk hen zânlei tiang an sinah chu thu chu a simhfiang le, Pathian Ram thu a theihtir na le, Mosi Dân lasuibu thu leh khuavâng tla lasuibu thu hen Jisu leiah anmah tla a lêm tlawtlawt na. ²⁴ Chun, a zeimaw mi nih a thusim chu an lung le, a zeimaw mi nih an lung lo. ²⁵ Chun, anna remlo rawh le, Pawl nih thu kâ khat a sim thluh ah chun an suak rawh. A thusim chu hi hi asi: "Thlaraau Thenhlimh nih khuavâng Isai kâ ah nan thlâktu tla sinah a sim mi kha a dik thlo asi. ²⁶ ’Hi phun tla sinah hin va kal le, sim rawh: Nâ hen chun nan theih narêng hen a ngaihtawnh dân lam chu nan theih rîlmâl lai loh; muh lam chu nan muh narêng hen theih lam chu nan theih lai loh. ²⁷ Hi phun thinlung hi a mawlâwt le, an nâ tla a ngawng dauh le, an mit khawm an sîm le, chu lo chun an mit hen an muh lai le, an nâ hen an theih lai le, an thinlung hen an theihthiam lai le, anna her nawlh lai le, chun kei nih ka damh na lebang lai,’ a ti ruangah. ²⁸ "Chun, Pathian ruangsuahnâk thu hi Phundang tla sinah kuat asi ti theih u, annih lam nih chun ngâi khawm an ngâi lai," a ti. ²⁹ Chun hi bang thu tla hi a sim thluh nûnah Juda tla chu an kal ving le, anmah leh anmah anna êl. ³⁰ Chun, Pawl chu kum nih pumpial amah in lâng lakah a um le, a sinah lût mi zawng a lâwmlût na tâwn. ³¹ Anih nih chun Pathian ram thu ah leh Lal Jisu Krist thu khawm râlṭha tak hen a simh na tâwn le, âukhawm nih amah an khap lêm lo.