2 TIMOTHE

¹ Pawl, Pathian duhzia hâwi hen, Jisu Krist mifial, Jisu Krist ah nungnâk thutiam kan nei mi chu phuang ding hen fial mi nih chun ² ka fa duhtak Timothe sinah Pathian kan Pa leh Jisu Krist kan Lalpa sin thawk hen zângfahnâk, khuaruatnâk leh remnâk tla um seh. ³ Hawng ka thlâktu tla nih an ti hâwi hen, sia leh ṭha theihnâk fiang tak hen a rian ka ṭuan mi Pathian sinah lâwmthu tla ka sim. A sûn a zân hen ka thlachamnâk ah ka nan theihkumza tâwn asi. ⁴ Na mitthli tlâk tla ka theihkumza le, lâwm a khat hen ka um khonâk ding hen muh ding thungâi ka nan duh asi. ⁵ Na pi Loisi leh na nu Euniki khawm nih an nei mi lungnâk tak na nei ti ka theih. ⁶ Churuangah, ka kut thâng ruangah Pathian thilpêk nangmah lakah um mi kha tharhnawlh ding hen ka nan theihpi asi. ⁷ Pathian nih lâunâk Thlarau hawng kan pêk lo le; thiltikhonâk leh dâwtnâk leh mah a sûmkhonâk Thlarau hawng kan pêk dauh ruangah. ⁸ Chun, kan Lalpa thu theihtirnâk chu zahpi lah le, kei, amah mi rêngtlâ khawm hi hawng ka zahpi ber lah. Thâwngthâng Ṭha ruangah hamh hi Pathian thiltikhonâk hâwi vima hen, hawng ka tuarpi lehlam rawh. ⁹ Anih nih chun kan thilti tla hâwi silo hen, amah ruat leh zângfahnâk hâwi dauh hen ruang hawng kan suah le, kawhnâk thenhlimh hen hawng kan kawh le; chu zângfahnâk chu tual tuah lânah Jisu Krist lakah hawng kan pêk rawh. ¹⁰ Sikhawmsele ruang hawng kan suahtu Jisu Krist a hawng kalnâk nih tuah a langhtir rawh. Krist nih chun thihnâk thiltikhonâk chu veih hen, Thâwngthâng Ṭha hen nungnâk thi kholo mi chu a langhtir rawh. ¹¹ Chu Thâwngthâng Ṭha thu chu theihtir ding hen, phuangtu ah leh mifial ah leh sîntirtu ah ruat ka si. ¹² Churuang chem asi, hi bang thu khawm hi ka tuar mi chu: sikhawmsele ka ningzak lo; ka lung mi Pathian chu ka theih, a sinah ka kiltir mi chu, chu Ni rang dingah chun ṭha dek hen a kil kho ti dik tak hen ka theih ber. ¹³ Jisu Krist lakah um mi lungnâk leh dâwtnâk nei hen, thudik dân ka kâ thawk hen na theih mi tla kha nei thlir rawh. ¹⁴ Thil ṭha na sinah kiltir hen um mi kha kan sungah Thlarau Thenhlimh um mi hen ṭha dek hen kil. ¹⁵ Asia ram ah um zawzawng tla nih an ka hawitâk ti kha na theih le; an lakah Phugela leh Hermozen anna tel asi. ¹⁶ Lalpa nih chun Onesiphora dâwngsung tla sinah khuaruat seh, anih nih chun a hawng ka lawmhtir kumza le; ka rêngkhimh khawm a ka zahpi loh. ¹⁷ Rom khua ah a hawng tlung kâ hen hawng ka tawng lân lo chu a hawng ka hâwl, ¹⁸ chu Ni ah chun Lalpa sinah mi khuaruatnâk tawng ding hen anih chu ruat seh! Ephesi khua ah ka rangah rian a ṭuan fâk zia na theih ual asi.

¹ Chuvachun, nang, ka fa, Jisu Krist zângfahnâk ah hin thiltikhonâk nei hen um rawh. ² Chun, theihtu tamtak tla lakah ka kâ ah thu na theih mi tla kha, chubang chu mi zumhkâi midang tla sîntir singsuan khotu ding tla sinah chun kiltir rawh. ³ Jisu Krist kawrsen ṭha tak hâwi hen hamh hawng ka tuarpi rawh. ⁴ Kawrsen ah um ding hen thîmtu chu a lawmhtir khonâk ding hen, kawrsen âukhawm râltuk liauah tuliau damsung khuasaknâk tla ah a nawktir dah loh. ⁵ Chun, zuamnâk tla lak khawmah mi nih ti khawmsele, dân hâwi hen a ti lo chun nehtu asi dah loh. ⁶ Lo neitu rianṭuan hamh chu a rah ting masatu asi ding asi. ⁷ Ka thusim hi ruat rawh; Lalpa nih chun zeizawng ah theihkhonâk a nan pêk awt ruangah. ⁸ Jisu Krist, David thlâk a mi ka Thâwngthâng Ṭha sim hâwi hen mithi lakah mi thawknawlh kha theih kumza rawh. ⁹ Chu Thâwngthâng Ṭha ruangah chun thilsual titu hâwi hen phuar rê hen hamh tla ka tuar tâwn asi. Sikhawmsele Pathian thu chu phuar hen a um lêm loh. ¹⁰ Churuangah, Jisu Krist lakah um mi ruangsuahnâk chu, zungzâl a rokualnâk hen an tawng kho bâk nâk ding hen, thîm tla ruang chun zeizawng ka tuar tâwn. ¹¹ Hi thu hi zumh a kâi asi: "A thihnâk ah kan thi rawh chun, a nungnâk ah khawm kan nung ber lai. ¹² Kan tuar chun a lâirêlnâk ah lâi kan rêl lai. Amah kan phehtâk chun anih khawm nih hawng kan phehtâk lai. ¹³ Kannih zumhtlâklo hen um kumza khawmsele, anih chu zumhtlâk hen a um kumza asi, amah leh amah a phehtâk kho lêm lo," ti hi. ¹⁴ Chubang thu chu theihpi le, thu salam lakah anna êl lonâk ding hen, Lalpa mitmuh ah semsêngâi tak hen theihtir rawh. Chu chu zeikhawm a ṭhavak lo le, a ngâitu tla rangah veihnâk lam asi tâwn. ¹⁵ Rianṭuantu thu dik thu rep tak hen mangtu chu ningzak ding asi lo hâwi hen, Pathian ngaih hen ṭha hâwi a langhtir ding hen semsêngâi rawh. ¹⁶ Sikhawmsele, chu Pathian zahlo leikâng thu sim salam chu bângtâk tâwn le, chu hâwi mi tla chu Pathian sunhsak lonâk leikângah an zualkâi lai le; ¹⁷ an thu khawm nih masia hâwi hen a ei vima lai; an lakah chun Humenai leh Philepta anna tel asi. ¹⁸ Chubang tla nih chun" ’Thawknawlhnâk chu tu khawmah asi ving rawh," ti hen, thudik leikâng chu an pialtâk le, mi zeimaw mi lungnâk an veih tâwn. ¹⁹ Sikhawmsele, Pathian lungphûm bir chu a dîr kumza le, hi singsiahnâk hi a nei le, "Lalpa nih chun amah tâ tla a theih," ti leh, "Lalpa min lamtu vial nih chun sual kaltâk seh," ti hi. ²⁰ Sikhawmsele, in rokual tla lakah khêng leh bêl ngûn leh tangka hen siam mi cho a um lo le, thing leh valei hen siam tla khawm a um tâwn, zeimaw mi sung-û tir hen a um le, zeimaw mi sung-û tir lo hen a um. ²¹ Churuangah mi nih chubang thu lakah â thliar chun, khêng leh bêl thenhlimh, Lalpa mang tlâk, rianṭuan ṭha kipah tîm chia hen, sung-û tir ding mi chu asi lai. ²² Sikhawmsele, seino duhnâk tla chu tektâk le, thinlung thenhlimh hen Lalpa lamtu vial tla lakah repnâk tla, lungnâk tla, dâwtnâk tla, remnâk tla fûk rawh. ²³ Sikhawmsele, donâk tla a ring tâwn ti theih hen, elnâk âtkâi leh fing lo lakah chun tel ding duh lah. ²⁴ Lalpa to-aw nih chun do ding asi lo le, mi zawzawng lakah vêlnei hen, sîntir thiam hen, sual lakah dawnhkho hen, ²⁵ do ding a tuah mi tla chu dawnhkho tak bû hen sîntir lehlam ding asi; chuvachun Pathian nih thudik chu an theih rangtlingnâk ding hen a rimtir ving hen, ²⁶ Pathian duhzia ti ding hen Lalpa to-aw nih a tleih hen, diabol thang lakah mi an suak kho dah ah.

¹ Chun, hi hi theih u, ni madung tla ah chun tik har tak tla a hawng um lai. ² Mi, mah â zângfah mi tla, tangka sunhsaktu tla, â khâwng mi tla, â zûm mi tla, Pathian simsiattu tla, nu leh pa thu ngâilo tla, lâwm dân theih lotu tla, thenhlimh lo tla, ³ zângfahnâk suakpi lo tla, ṭhat lo rawt tla, phiartu tla, sûm kholo tla, mirâng tla, ṭha duh lo thlo tla, ⁴ mi perpê tla, dung le mâi dawn lo tla, â sung-û tir mi tla, Pathian zângfah ngâk hen mah lawmhnâk cho zângfah dauhtu tla an si awt; ⁵ Pathian sunhsak mi banghnâk an nei lai le, sikhawmsele a thiltikhonâk chu an lung lai loh; chubang hâwi chu hawitâk rawh. ⁶ Chubang tla lakah mi chu, in ah tla lût hen sual ritphurh nunau â dauh tla sal ah tleih tâwntu tla kha an si, chu hâwi nunau tla chu duhnâk kip nih tlâutir hen, ⁷ sîn kumza narêng hen thudik phanh lo mi an si, ⁸ chun, Jani leh Jambre nih Mosi an do hâwi khan chubang tla nih chun thudik hi an do tâwn; thinlung râwk rawh mi, lungnâk leikângah chun Pathian duh lo leikâng mi an si. ⁹ Sikhawmsele, chubang nûnlêm chun an ti lai loh, an ât zia, mi zawzawng sinah a lang awt ruangah, Jani leh Jambre ât zia a lang hâwi khan. ¹⁰ Nang lam nih chun ka sîntirnâk tla, ka umdân tla, ka thiltum tla, ka lungnâk tla, ka dawnhkhonâk tla, ka zângfahnâk tla, ka felfênâk tla, ¹¹ mi nih an ka nehsawnhnâk tla, ka tuarnâk tla, thungâi na theih; Antiokei khua ah, Ikoniam khua ah, Lustra khua ah ka lakah thil tlung mi leh nehsawhnâk ka tuarnâk tla kha, chubang zawzawng ah chun Lalpa nih ruang a hawng ka suah rawh. ¹² Asi, âuzawng Jisu Krist lakah Pathian sunhsak hen umtu zawng nih chun nehsawhnâk tla an tuar ber lai. ¹³ Misual leh perpettu tla lam chu mi perpet leh mah khawm mi perpet a um hen an sual dadauh lai. ¹⁴ Sikhawmsele nang lam chu na lung mi leh sîntir a na um mi thudik tla lakah um kumza rawh. Nangmah sîntirtu tla chu âu me an si ti na theih ruangah. ¹⁵ Chun, Jisu Krist ah lungnâk hen ruangsuahnâk ah an ruai kho ding hen finghnâk an pêk khotu Pathian lasui thu thenhlimh chu na ngâksia liau thawk hen na theih. ¹⁶ Pathian lasui thu kip, Pathian thaw khumh hen pêk rawh mi chu sîntir leikâng tla ah, mawhtir leikâng tla ah, nunsimh leikâng tla ah, repnâk sîntir leikâng tla ah a ṭhavak ber asi. ¹⁷ Pathian mi chu rian ṭha kip ṭuan ding hen kim tak hen thuamh hen a rangtling khonâk ding hen.

¹ Pathian mitmuh leh minung leh mithi lâirêltu ding Jisu Krist mitmuh ah chun a langhnâk leh a ram sâl hen, semsêngâi tak hen ka nan theihtir: ² Thu sim rawh, a tik tla ah, a tik lo tla ah khawm ti vima; dawnhkho tak hen, sîntir bû hen an mawhnâk theihtir le, nunsimh leh fawrh rawh. ³ Sîntirnâk dik an ngâi huam lo tik a hawng tlung awt ruangah; an nâ tla a zâ ruangah anmah duhkâng mi sîntirtu tla an sinah an pumh na lai le, ⁴ an nâ tla thudik leiah an sêttir lai le, thuanthu lei fûk hen an pial rawh lai. ⁵ Nang lam chu zeizawng ah a thiamthih le, hamh tuar le, Thâwngthâng Ṭha simtu lei rianṭuan le, na rianṭuannâk kha zawh rawh. ⁶ Kei lam chu tu khawmah ap hen ka um liau asi le, ka suak tik a tlung rawh. ⁷ Zuamnâk ṭha chu ka ti thluh rawh; ka tekzuamnâk chu ka zawh rawh le, lungnâk chu ka kil ving rawh asi; ⁸ tuah lam chun repnâk lallukhuh chu ka rangah siah hen a um rawh; chu chu Lalpa lâirêltu rep tak nih chun chu ni ah a hawng ka pêk lai. Ka sinah cho silo hen, a langhnâk awrhtu kip tla sinah khawm. ⁹ Rang tak hen ka sinah hawng ram rawh. ¹⁰ Dem nih chun tuliau laikulh hi a sunhsak ruangah hawng ka kaltâk le, Thesalonika khua ah a kal rawh. Kresken chu Galatia ram ah a kal rawh le, Tita chu Dalmatia ah a kal bâk. ¹¹ Luk cho ka sinah a um rawh, Mark kha sâwm le, hawngpi rawh. Anih chu rianṭuanpi leikângah ka rangah a ṭhavak ruangah. ¹² Tukika lam chu Ephesi khua ah ka fial rawh. ¹³ Na hawng tikah Troas khua mi Karpa sinah kawrdawhfual ka mâk mi kha, lasuibu tla hen hawng put le, savun lasui tak kha hawng put. ¹⁴ Alekzandar, dâr êr thiam mi kha, ka lakah thungâi a sual tâwn asi, Lalpa nih chun a thilti zia vima hen lehrûl a sam lai. ¹⁵ A lakah khan nang khawm a thiamthih rawh, kan thu thungâi a do fâk ruangah, ¹⁶ ka mawh lo zia thu ka sim masa tan ah âukhawm nih an ka ṭangpi lo le, an ka thlawrhthlau ver lehlam asi. Mawh phurhtir hen um lah na seh. ¹⁷ Thâwngthâng Ṭha keimah ruangah simh chiau hen a um khonâk ding hen, Phundang tla zawng nih an theih khonâk ding hen, Lalpa nih chun a ka ṭanh le, a ka chaktir lehlam asi; chun chakeibaknei kâ ah mi kha suah hen ka um rawh asi. ¹⁸ Lalpa nih chun sualnâk zawzawng lakah mi a ka suah lai le, a vân ram ah him tak hen hawng ka tlunh lai, amah chu zungzâl hen rokual hen um seh. Amen. ¹⁹ Priskili leh Akuila, Onesiphora dâwngsung zawzawng tla kha chibai hawng ka bûk piak. ²⁰ Erasta chu Korin khua ah chun a um ko. Trophima lam chu Mileti khua ah damlo hen ka kaltâk rawh. ²¹ Busik lânah hawng kal rarâm rawh. Eubulas, Pudens, Linas leh Klaudia leh unau dang tla khawm nih chibai an bûk na. ²² Lalpa chu na thlarau sinah um seh. Pathian Zângfahnâk nan sinah um seh.