2 THESALONIKA

¹ Pawl leh Silas leh Timothe nih chun: Pathian kan Pa leh Lalpa Jisu Krist ah Thesalonika khua mi kawhmi tla sinah: ² Pa Pathian leh Lalpa Jisu Krist sinah thawk hen zângfahnâk leh remnâk nan sinah um seh. ³ Unau tla, nanmah leikâng thu ah Pathian sinah lâwmthu sim kumza ding rêng kan si; chu chu â dawh rêng asi, nan lungnâk thu thungâi ṭhanglian hen, nan ektê hen nanna zângfah tawnhnâk chu a pung khun ruangah; ⁴ chun, mi nih an nehsawh na nâk zawzawng ah leh hamh nan tuarnâk tla lakah chun nan felfê zia leh nan lung zia ruangah Pathian kawhmi murui lakah chun kannih nih kan putso na tâwn asi, chubang chu Pathian ram ah mi si tlâk a ruat nan si kho awt ti, ⁵ Pathian lâirêlnâk rep tak singsiahnâk fiang tak asi, chu ram ruangah tuar nan si hi. ⁶ Lalpa Jisu, Pathian theihlo mi leh kan Lalpa Jisu Thâwngthâng Ṭha lunglo mi tlûnah lehrûl sam hen a vânmifial chak tak tla hen, meialh lakah vân thawk hen â langh tikah a nan hamhtir natu tla chu hamh hen lehrûl sam leh nannih hamhtuartu tla hi kanmah tla hen dinhnâk ah rulh bâk ding chu Pathian rangah thu rep tak asi. ⁹ Chu ni ah chun, a mi thenhlimh tla lakah chawnglawmh a um ding leh lungtu zawzawng tla lakah chun chu thu kan theihtir na mi kha nan lung ruangah chê ti ding hen a hawng kal tik chun chubang Pathian theihlo mi leh kan Lalpa Jisu Thâwngthâng Ṭha lunglo mi tla nih chun rêp an tuar lai, Lalpa sin thawk leh a chaknâk rokualnâk thawk hen zungzâl veihnâk chu. ¹¹ Chu hâwi hen chawnglawmh leh chê asi khonâk ding hen kan Pathian nih a nan kawh na nâk ah chun kawh tlâk si hen an ruat kho na ding leh ṭhat duhnâk kip leh lungnâk rianṭuan kip a thiltikhonâk ah a lawhtlingtir khonâk ding hen thla kan cham piak kumza na tâwn hi. ¹² Kan Pathian leh Lalpa Jisu Krist zângfahnâk hâwi vima hen kan Lalpa Jisu min chu nanmah lakah chawnglawmh hen a um kho lai le, nannih khawm amah lakah chawnglawmh hen nan um kho lai.

¹ Sikhawmsele, unau tla, kan Lalpa Jisu Krist a hawng kalnâk leh a sinah kanna pûmnâk thu ah chun, "Lalpa Ni chu a tlung chia rawh," ² tinâk thlarau ruangah mawh, thu ruangah mawh, kan sin thawk hen lasuikuat hen mawh, nan thinlung â nîn sawm lonâk ding leh nanna nawk lonâk ding hen kan ngiar na. ³ Âukhawm nih zeitin kâng khawmah an perpet lah na seh, tlûknâk chu a hawng tlung masa ta hen, Dân Buartupa, tlâuveihtu fapa chu a hawng lang lo chun chu Ni chu a hawng tlung lai loh, ⁴ anih nih chun Pathian an ti mi leh an sawnh mi zawzawng do hen, an tlûnah um ding tum hen thang a ṭhattir lai: chun Pathian Biakin ah to hen Pathian hâwi rê hen â phuang lai. ⁵ Nan sinah ka um liau khan chubang thu chu ka nan simh na tâwn ti nan theihkumza lo ma? ⁶ Amah tik cho ah a hawng lang khonâk ding hen zei nih a khap mi me asi ti tuah nan theih. ⁷ Dân buarnâk thuthup nih chun tu khawmah a ṭuan liau chir asi; sikhawmsele, lâk ving hen a um lân lo chu tuhin khaptu a um. ⁸ Chu chu lâk ving tikah chun Dân Buartupa chu a hawng lang lai rawh, Lalpa Jisu nih anih chu a kê ah thaw hen a thah lai le, a hawng kal mi langhnâk nih a veih dep lai. ⁹ Chu Dân Buartu hawng kalnâk chu Setan ṭuan zia hâwi vima hen, thiltikhonâk zawzawng, singsiahnâk zawzawng, ¹⁰ âwkrâwl thilchê zawzawng tla hen, a vei liau mi tla rangah replonâk perpetnâk zawzawng hen asi lai: ruangsuah hen an um khonâk ding hen thudik zângfahnâk chu an zûl lo ruangah asi. ¹¹ Churuangah chun âwkrâwl thu chu an lung khonâk ding hen Pathian nih sual rianṭuannâk an sinah a tlungtir lai, ¹² thudik lunglo hen replonâk ah lâwm mi tla nih chun mawhphurhnâk anna ting khonâk ding hen. ¹³ Lalpa ah unau duhtak le tla, Thlarau ah Thenhlimhtir mi leh thudik lung hen, ruangsuah a um ding hen a tîr thawk hen Pathian nih a nan thîm na ruangah nan dân thu hin Pathian sinah lawmthu sim kumza ding rêng kan si. ¹⁴ Chu hâwi rang ding chun anih nih chun kan Thâwngthâng Ṭha hen a nan kawh na kha, kan Lalpa Jisu Krist rokualnâk nei ding hen. ¹⁵ Chun, unau tla, dîr thlir ule, thudik tla chu sim hen mawh, kan lasuikuat hen mawh, ka nan sîntir na mi kha tleih thlir u. ¹⁶ Chun, kan Lalpa Jisu Krist ngelchel leh Pathian kan Pa, hawng kan zângfahtu leh a siherhnâk hawng kan pêk mi thinlung dik lungumnâk ṭha pêktu nih chun nan thinlung tla chu an lungngamh na hen, ¹⁷ thil ṭha ti leh thusim ṭha zawzawng ah fawrh hen birhtir seh.

¹ A dawnghchemnâk ah chun, unau tla, Lalpa thu hi, nan lakah a um hâwi khan, pung leh chawnglawmh hen a um khonâk ding leh ² mi lungkhung leh misual tla lakah kan him khonâk ding hen thla hawng kan cham piak u; mi zawzawng nih chun lungnâk an nei ver lo. ³ Sikhawmsele, Lalpa chu zumh a kâi anih nih chun an chaktir na hen misual lakah chun an hum na lai. ⁴ Thu kan pêk na mi kha nan zâwt tâwn hen, nan zâwt vima ding hen Lalpa lakah kan zumh na asi. ⁵ Chun, Lalpa nih chun nan thinlung tla chu Pathian zângfahnâk ah leh Krist felfênâk ah chun lûtpi seh. ⁶ Chun, unau tla, kan sinah mi thudik an tawng hâwi a um lo hen, Dân lo hâwi a um mi unau zawzawng lakah chun nanna thliar ding hen kan Lalpa Jisu Krist min hen thu kan pêk na. ⁷ Nanmah ngelchel nih nan kan châwng ding dân nan theih asi; nan lakah kan um liauah kan zângzê dah lo kha; ⁸ âu kut lak mi khawm a thawt hen nan sang kan ei dah lo kha, nan lakah kan rittir na lo ding hen a sûn a zân hen dî leh hamh tak a ṭuan bû hen kan ei dauh asi; ⁹ kan ti kho lo ruangah asi lo le, nanmah nih nan kan châwng ding hen mi zûnzauh ding hen kanna siam dauh asi. ¹⁰ Nan sinah kan um liau khan hi thu hi kan pêk na kha. "Âuzawng nih rianṭuan a duh lo chun ei khawm ei lah seh," ti hi. ¹¹ Nan lakah zeimaw mi zângzê hâwi hen an um tâwn mi tla thâwngthâng kan theih le, chubang nih chun rian rerêng an ṭuan lo le, midang nawktir ding hen anna sawk salam tâwn asi. ¹² Chun, chubang tla chu dâisip a ṭuan ding leh anmah tla sang ei ding hen Lalpa Jisu Krist ah thu pêk hen kan fawrh asi. ¹³ Unau tla, nannih lam chu thil ṭha ti neng lah u. ¹⁴ Chun, âuzawng nih hi lasuikuat ah kan thusim hi an zâwt lo chun, chu minung chu nan kawmh lonâk ding hen singsiah u, a ningzâk khonâk ding hen. ¹⁵ Sikhawmsele mêlma hâwi hen ruat lah ule, unau hâwi hen nun simh dauh u. ¹⁶ Chun, remnâk Lalpa ngelchel nih thil zeizawng ah remnâk an pêk kumza na seh. Lalpa chu nan ektê sinah um seh. ¹⁷ Kei Pawl nih keimah kut ngelchel hen chibai ka nan bûk na hi; hi hi ka lasuikuat kipah singsiahnâk asi, hi hâwi hen ka rîn mi hi. ¹⁸ Kan Lalpa Jisu Krist zângfahnâk nan ektê sinah um seh.