2 PETER

¹ Simon Peter, Jisu Krist to-aw leh mifial thawk hen chun Jisu Krist kan Pathian leh ruangsuahtu repnâk ruangah zumhnâk sung tak kanna ting mi hâwi ting bâk mi tla sinah, ² Pathian leh kan Lalpa Jisu theihnâk lakah chun, nan tlûnah zângfahnâk leh remnâk pungtir hen um seh. ³ Amah rokualnâk leh ṭhatnâk zârah hawng kan kawhtu a thâwngthâng theih ruangah a Pathian thiltikhonâk nih nungnâk leh Pathian sunhsaknâk leikângah chun, thil zawzawng hawng kan pêk asi. ⁴ Churuang chun, a thutiam sung tak leh rokual tak chu hawng kan pêk asi; chun, duhnâk ruangah laikulh ah râwknâk a hawng um mi hi tektâk rawh hen, chubang thutiam sung tak leh rokual tak tla ruang chun, Pathian umzia nan bâwmpi kho bâk lai. ⁵ Hi ruang tak hin, taimâk rerêng suah hen, nan zumhnâk lakah chun ṭhatnâk telh ule, nan ṭhatnâk lakah chun theihnâk telh ule: ⁶ nan theihnâk lakah chun sûmnâk telh ule, sûmnâk lakah chun tuarkhonâk telh ule, nan tuarkhonâk lakah chun Pathian sunhsaknâk telh ule, ⁷ nan Pathian sunhsaknâk lakah chun unau tla dâwtnâk telh ule, unau tla nan dâwtnak lakah chun dâwtnâk singsuan nei u; ⁸ hi thil tla hi nan herh mi chu asi, chubang chu tamtak nan nei chun nan tha an thawktir na lai le, kan Lalpa Jisu Krist theihnâk ah chun an chaktir na lai. ⁹ Sikhawmsele, âuzawng chubang thil a nei lo mi chu, a muh khonâk a bî ruangah a muh kho lo asi; a lânah a sualnâk tâwl piaknâk chu a philh rawh asi. ¹⁰ Churuangah, unau tla, a nan kawh na nâk leh an tlanh na nâk chu, birhtir ding hen taimâk suah khun u; chu hâwi hen nan ti chun nan tlû dah lai lo. ¹¹ Hi hâwi hen, Jisu Krist kan Lalpa leh ruangsuahtu zungzâl ram ah lût khonâk chu pêk nan si lai. ¹² Hi ruang hin chubang thil tla chu theih hen, thutak nan sinah um hen, nan bir narêng hen, chubang thil chu an theihpi na ding hen ka timhtuah kumza lai. ¹³ Chun, ka dam kar zawzawng hin, nanmah theihpi hen nan thinlung an thawktir na ding hen ka tum asi. ¹⁴ Kan Lalpa Jisu Krist nih hawng ka theihtir hâwi khan ka taksa a vei tik ding chu a tlung sawm lai ti ka theih asi. ¹⁵ Ka thih nûnah khawm chu thil chu nan theihkumza khonâk ding hen ka ṭang lai. ¹⁶ Kan Lalpa Jisu Krist thiltikho zia leh a hawng kalnâk thu kan theihtir na liau khan thiamthu fing tla zâwttu kan si lo le, a rokualnâk muhtu tla kan si dauh. ¹⁷ Anih nih chun Pa Pathian sin thawk hen rokualnâk leh chawnglawmhnâk pêk asi liau khan kan um ko asi, Chungnungchem aw-hâu chu a tlûnah hi hâwi hen a hawng suak, "Hi hi ka Fapa duhtak, ka lawmh ngâi mi chu asi," ti hen. ¹⁸ Chun, tlâng thenhlimh ah a sinah kan um liau khan chu aw-hâu vân thawk hen a hawng suak mi chu kanmah ngelchel nih kan theih. ¹⁹ Chun, khuavâng thusim, bir tak kan nei le, khua a hawng dei le, deirêl ârfi chu nan thinlung ah a hawng chêu lân lo chu khâwnvâr chêu, mi nih mûi ah an sunhsak hâwi hen nan sunhsak chun a ṭha asi. ²⁰ Pathian lasuibu thu ah simkannâk rerêng hi mah nih simhfiang kho asi lo ti hi zeizawng ngâk hen theihkumza u. ²¹ Simkannâk thu rerêng hi, minung duh thu hen suak asi tâwn lo le, Thlarau Thenhlimh nih mang hen mi nih thu an sim tâwn asi, chu chu Pathian sin thawk hen mi thu asi.

¹ Lânah mi zapi tla lakah khuavâng telê an hawng suak mi hâwi hen, nan lak khawmah sîntirtu telê an hawng suak lai, annih nih chun anmah tla tlanhtu Lalpa chu phehtâk hen, mi râwk khonak ding hen sîntirnâk diklo an hawng lûtpi lai le, an tlûnah mawhsareh hen siatnâk an tlungtir lai. ² Chun, mi tamtak nih an hurnâk leikâng thilti an zûl lai le, chu an thilti ruang chun thudik chu simsiat asi lai. ³ Chun, sîntirtu diklo tla nih chun âwkrâwl thu hen sawlehnak ah an mang na lai. Sikhawmsele, tuan thawk hen an rangah lâirêlnâk chu timh chia asi le, anmah tla tlâutirtu khawm a it lo asi. ⁴ Vânmifial tla nih thil an sual liau khan Pathian nih a zuah lo le, rêpmun ah a lawnh le, lâirêl piak ding ni ngâk hen khur mûi ah a khumh rawh. ⁵ Pathian nih tuan liau laikulh kha a zuah lo le, amah sunhsak lotu umnâk laikulh ah khan buanso a tlungtir rawh; sikhawmsele, Noa repnâk thu simtu leh midang pasarih chu ruang a suah na asi. ⁶ Pathian nih Sodom leh Gomorah khua tla chu Pathian sunhsaklotu tla tlûnah thu a hawng lang ding mi zauhtirnâk ah siam hen mei ah veih hen an um rawh. ⁷ Lot mi rep tak, misual umdân hur tak mi ruangah ngaihsia thlo tâwn mi chu ruang a suah rawh. ⁸ Chu mi rep chu an lakah um hen, a mit hen a muh na le, a nâ hen a theih na le, misual tla umdân ṭhalo tak nih chun nisiar a thinlung an fâktir tâwn. ⁹ Lalpa nih chun amah sunhsaktu tla chu lêmnâk thawk hen suah na ding leh misual tla chu lâirêl ni rang dingah siah rih ding dân a theih. ¹⁰ Chubang tla chu, an taksa duhnâk nâwmtâm lei zûltu tla leh Pathian thuneihnâk zauhnawmhtu tla an si. Hi sîntirtu telê tla hi an râlṭha hen anna zûm le, tlûnlei mi rokualnâk khawm zahnâk an nei lo le, an do lehlam asi. ¹¹ Sîntirtu telê tla ngâk hen chaknâk leh thiltikhonâk nei dauh mi vânmifial tla men nih Lalpa mâika ah chun, an do na hen an phiar ngam na lo mi kha an do na. ¹² Sikhawmsele, hi bang dawnruatnâk neilo tla hi, vâkrit hâwi cho hen suak an si le, thil an theihthiam lo mi tla chu an simsiat le, anmah khawm ramsa hâwi hen veih hen an um lai. ¹³ Tuarnâk siamtu tla chu tuarnâk ber hen rulh an si lai, an rangah din leh ei nuamchên chu sûn nî tangah asi le, nan sinah an ei bâk khawmah, bumnâk ah um hen anna lâwm kar vial chu an rangah ningzaknâk leh mualphonâk cho asi. ¹⁴ An thinlung ah chun nunau duhnâk an khattir le, sual leikang thilti an chim lo, mi chaklo tla an tlûktir le, an thinlung chu duhnâk ah an zawngh nek le, Pathian siatbarh nâk tangah um mi tla an si. ¹⁵ Beor fapa Balaam thilsual ti hen tangka tawng ding duhtupa lampi chu zawh hen, lampi dik chu an mâk le, lampi an vâi rawh. ¹⁶ Chun Balaam chu a thilti sualnâk ruangah fâi hen a um rawh; rang hawlh kholo mi chu minung hawlh hen a hawlh le, khuavâng thilti diklo chu a khap asi. ¹⁷ Chu minung tla chu tikang va ah vândâwm thlipi nih a ranh mi hâwi an si, chubang tla rang ding chun, mûi thûk tak an mun rang dingah Pathian nih a ruat asi. ¹⁸ Diklonâk ah an um mi tla thawk hen an suak rawh mi tla chu tlûktir na ding hen taksa duhnâk sual leh hurnâk an mang tâwn. ¹⁹ Anmah chu râwknâk sal si bû hen, midang rangah sal suaknâk thu an simh na tâwn, âuzawng hawng kan nehtu chu sal ah hawng kan siamtu an si. ²⁰ Lalpa leh Jisu Krist an theih ruangah, laikulh nâwmtâm tla tektâk nun khawmah, chu lak ber ah an tâng nawlh hen, neh hen an um nawlh chun, an umdân madung chu a li mi ngâk hen â râwk dauh lai. ²¹ Lampi rep chu theih nûnah, thupêk thenhlimh an sinah a kiltir na mi chu kaltâk ngak chun, lampi rep chu theihlo dâidua na sele an rang a ṭha dauh lai. ²² "Ui amah luak leiah a kîr le, vawkpi â ṭâwl thiang rawh mi khawm nêngthû ah a bual ding hen a kîr nawlh" ti thufing dik tak chu an tlûnah a hawng lang rawh asi.

¹ Duhtak tla, tuah nan sinah ka rîn mi hi ka lasuikuat veinihnâk asi. Chu lasuikuat tla nih chun nan thinlung dawnruatnâk thenhlimh chu thawhtir ding hen ka ti asi. ² Khuavâng thenhlimh tla thu simhkan leh nan mifial tla kâ ah leh, Lalpa leh Ruangsuahtu thupêk chu nan theihkumza ding hen ka nan duh na asi. ³ Hi hi a masa hen theih ule, ni dawnghlei ah chun, anmah duhnâk hâwl vima a um hen, mi mah kawngkâ cho ruattu tla an hawng um lai. ⁴ "Ka hawng kal lai, a ti mi chu a hawng lo ne? A zei ah a um? Hawng kan thlâktu tla khawm an thi ver rawh, laikulh tuah tir thawk hen thil zeizawng a mahmun kumza ko ne?" ti hen an nihsanh na lai. ⁵ Pathian thu hen tuan liau vân tla a hawng um le, tual khawm tî thawk hen siam asi. ⁶ Chubang lakah chun, chu liau mi laikulh chu tî nih a nîm le, a tlâu rawh ti anna theihtir lo asi. ⁷ Sikhawmsele, tuah vân tla leh tual um mi tla hi, Pathian thu ber hen mei hen veih an si lai le, Pathian sunhsaklo tla lâirêlnâk leh veihnâk ding ni rangah siah an si. ⁸ Sikhawmsele, duhtak le tla, hi thu kâ khat hi philh lah u, "Lalpa ngaih hen, ni khat hi kum sâng khat asi le, kum sângkhat khawm hi ni khat hâwi asi," ti hi. ⁹ Mi zeimaw mi nih Lalpa chu fûm hen an ruat hâwi hen a thutiam leikângah chun a fûm lo, âukhawm tlâu ding siang lo hen, mi zawzawng rim duh hen, nan lakah â dawnhkho mi asi dauh. ¹⁰ Sikhawmsele, Lalpa Ni chu mifîr hâwi hen a hawng tlung lai. Chu ni tla chu vân tla chu rihâu fâk tak hen a tlâu lai le, veih asi lai; tual leh a sungah mi tla chu a kâng lai. ¹¹ Chu zawng thil tla chu râwk a hawng si rawh chun zei hâwi hen um ding mi minung me nan si lai rawh ne? ¹² Pathian Ni a tlung ding na ngâk liauah, thenhlimh tak hen Pathian sunhsak hen um rawh, chu Ni ah chun vân meialh hen a zawrtir lai le, vân thil tla chu linhnâk hen a zawrtir lai. ¹³ Sikhawmsele, Pathian thutiam hâwi hen vân thar leh tual thar, a sungah repnâk um ding mi chu kan ngâk asi. ¹⁴ Churuangah, duhtak le tla, chu Ni nan ngâk ruangah Pathian mitmuh ah thenhlimh leh sual lo hen a sinah lungngam tak hen nan um khonâk ding hen a ṭang u. ¹⁵ Kan unaupa Pawl nih, Pathian nih finghnâk a pêk mi chu mang hen nan sinah lasui a hawng rîn hâwi khan, Lalpa dawnhkhonâk chu ruangsuahnâk tik ṭha a nan pêk na mi hâwi hen ruat u. ¹⁶ Asi, chubang thu chu a lasuikuat zawzawng lakah, hi thu hi a sim asi; chu lak chun thu theih har tak tla khawm a um le, mi finglo leh mi birlo tla nih Pathian lasui thu dang an ngâi sual mi hâwi hen, an ngâi palh le, mah le mah anna tlâutir phah tâwn. ¹⁷ Chun, duhtak le tla, nannih nih chubang thu chu nan hawng theihkan ruangah a râlring u, chu lo chun misual diklonâk ah kalpi sual a um hen, bir tak hen nan um mi nan tlû sual lai. ¹⁸ Sikhawmsele, kan Lalpa leh Ruangsuahtu Jisu Krist zângfahnâk leh theihnâk ah chun hawng ṭhang u. Tuah leh zungzâl tiang hen amah sinah chun rokualnâk um seh! Amen.