2 KORIN

¹ Pawl Pathian duhzia a Krist Jisu mifial leh kan unaupa Timothe nih chun: Korin khua ah Pathian kawhmi um tla sinah leh Gris ram zawzawng ah mi thenhlimh um zawzawng tla sinah chun: ² Pathian kan Pa leh Lalpa Jisu Krist sinah mi zângfahnâk leh remnâk nan sinah um seh. ³ Kan Lalpa Jisu Krist Pathian leh Pa, khuaruattu Pa leh lungngamnâk zawzawng Pathian chu sawr hen um seh. ⁴ Pathian nih lung hawng kan ngamhnâk ngelchel nih hamhnâk zei hâwi mi ah um mi tla khawm chu kan lungngamh kho ding hen anih nih chun kanna hamhnâk zawzawng ah lung hawng kan ngamh tâwn. ⁵ Krist tuarnâk tla chu kan tlûnah a leiluat hâwi hen kan lungngamnâk hi Krist zârah a leiluat asi. ⁶ Sikhawmsele, hamh hen kan um chun nanmah tla ṭangpinâk ding leh ruangsuahnâk ding asi; ṭangpi hen kan um chun nannih khawm ṭangpi hen nan um bâk asi, chu nih chun hamh kan tuarnâk ber hi felfê tak hen nan tuarnâk ah chun chaknâk a nan pêk na asi. ⁷ Chun, hamhnâk ting bâk mi tla nan si hâwi hen lungngamnâk ting bâk mi nan si ti kan theih hen kan lungum piak na nâk hi a bir asi. ⁸ Unau tla, Asia ram ah kan tlûnah hamhnâk a hawng tlung mi thu kha nan theih lo kan duh lo, kha hâwi a fâk tak a tuar kho lo rê hen, nung ding rêng ruat kho lo rê hen, denh pang hen kan um mi kha. ⁹ Asi, mah a zûm lo hen, kanmah lakah a zûm lo hen, Pathian, mithi thawhtu kan zumh dauhnâk ding hen kanmah lakah thihnâk rêpnâk kan nei rawh. ¹⁰ Chu Pathian nih chun chu hâwi tluk a thihnâk fâk tak lakah chun ruang hawng kan suah rawh le, ruang hawng kan suah lai; ruang hawng kan suah vima awt ti amah lakah chun lungumnâk kan ngauh. ¹¹ Mi tamtak zârah thilpêk kan tawng ruangah mi tamtak nih kan tlûnah lâwmthu an sim khonâk ding hen, nannih khawm nih thla nan hawng kan cham piaknâk ah hawng kan bawmh dut u. ¹² Kan putso mi chu hi hi asi: Kan sia leh ṭha theihnâk thu theihtir chu thenhlimhnâk leh Pathian diknâk nei hen, taksa finghnâk ah silo hen, Pathian zângfahnâk dauh hen laikulh ah hin kan changhdân kha nanmah leikângah kan changh dân a ṭha khun. ¹³ Nan sinah nan rêl kho hen leh nan theih kho ding mi cho kan hawng rîn ruangah. ¹⁴ Chun, Lalpa Ni ah nannih kan putso na mi nan si awt hâwi ber hen kannih khawm nan kan putso mi kan si awt ti tuah a chimpâl cho hen nan theih mi kha nan theihfiang ver lai rawh ti ka ruat asi. ¹⁵ Chun, chu lungnâk nei hen, malsâwmnâk letnih nan tawng khonâk ding hen nan sinah hawng masa sele, nanmah tla pal pah hen, ¹⁶ Makedonia ram ah kal vima sele, Makedonia ram thawk hen nan sinah hawng a let nawlh sele ka ti; chun Judai ram ah ka kalnâk dingah chun nanmah tla thlah hen um sele ka ti. ¹⁷ Chun, chu hâwi thinlung ka put liau khan ka thinlung birh lo zia langhtir ma ka si? Asi lo leh, ka sinah, "Asi, asi," ti leh, "Asi lo, asi lo," ti chu um vevê hen thilti ka tum tâwn mi chu taksa hâwi hen ma ka tum? ¹⁸ Zeital si sele, Pathian chu zumh a kâi hâwi hen, nanmah leikângah kan thu hi, "Asi," ti leh, ’Asi lo," ti asi ṭung lo. ¹⁹ Pathian Fapa Jisu Krist a thu, kei leh Silas leh Timothe nih nan lakah kan sim mi kha "Asi," leh ’Asi lo," asi ṭung lêm lo, amah Pathian lakah chun, "Asi," ti a um dauh asi. ²⁰ Pathian thutiam tla chu zeizat tal si khawmsele amah lakah chun, "Asi" ti chu a um le; chun amah ruang khawmah, "Amen" ti chu a um asi, kanmah tla ruangah Pathian rokualnak ding hen. ²¹ Chun, Krist ah nanmah tla hen hawng kan birhtirtu lakah kannih a dangtê hen hawng kan ruitu chu Pathian asi. ²² Anih chu hawng kan singsiahtu leh kan thinlung ah Thlarau Thenhlimh hawng kan pêktu asi ber. ²³ Sikhawmsele, ka thlarau lakah theihtu rangah Pathian ka kawh asi, nanmah tla a nan zuah na ding hen asi Korin khua ah ka hawng kal lo mi kha. ²⁴ Nan lungnâk lakah lalnâk ka nei ka ti lo le, nanna lâwmnâk ṭangpitu kan si ka ti dauh asi; lungnâk ah dîr nan si dangâiah.

¹ Sikhawmsele, keimah leikâng thu ah lam chun hi hi ka tum thlir asi: An ngaihsiattir na ding hen chun nan sinah hawng lo rawh ding hen. Kei nih ka nan ngaihsiattir na chun ka ngaihsiattir mi ber lo nih chun âu me hawng ka lawmhtirtu asi lai? ² Chun, kha ngelchel kha ka rîn asi, chu lo chun ka hawng tikah ka lâwmnâk ding lakah chun ngaihsiatnâk ka tawng lebang lai. ³ Churuangah asi, kha lasuikuat kha nan sinah ka rîn mi kha, hawng ka lawmhtirtu mi zapi tla ber kan ngaihsiattir na ding hen nan sinah ka hawng kal ding hen ka duh lo; ka lâwmnâk chu nan ektê lâwmnâk asi ti ka theih ruangah. ⁴ Mitthli tamtak tla bû hen leh thinlung hamhnâk leh thungâi thlakâm hen ka rîn asi kha; chu chu ngaihsiattir hen nan umnâk ding asi lo le, nan tlûnah dâwtnâk fâk tak ka nei mi hi nan theih khonâk ding hen asi. ⁵ Sikhawmsele, âuzawng nih mi a ngaihsiattir chun keimah nan hawng ka ngaihsiattir lo le, ka ti tuk lonâk ding hen, nan ektê hen, asi lo leh, nan lakah mi zeimaw mi an ngaihsiattir na chiam asi. ⁶ Chu hâwi mi rangah chun mi tamtak nih an rêp mi chu â tâwk rawh asi. ⁷ Chun, rêp nawlh ding ngangâk hen nan ngaihdam hen nan lungngamh dauh ding asi. Chu lo chun zeitin mawh ti hen chu hâwi mi chu a ngaihsiat tuknâk nih a khuh dep lebang lai. ⁸ Chu mi ruangah chun amah leiah nan dâwtnâk chu birhtir ding hen ka nan ngiar na. ⁹ Hi ruang khawm hin ka rîn asi, zeizawng lakah thu nan ngâi leh ngâilo ka nan nik na kho ding hen. ¹⁰ Zei leikâng khawm hen mi nan ngaihdam mi zawng kei khawm nih ka ngaihdam bâk le; ¹¹ kei khawm nih ka ngaihdam chia chu zeizawng ka ngaihdam rawh chun nanmah tla ruangah Krist mâika ah chun ka ngaihdam asi; chu lo chun Setan nih hawng kan sawhkhalh lebang lai; a ngamlêmnâk chu kan palh lêm lo dangâiah. ¹² Chun, Krist Thâwngthâng Ṭha sim ding hen Troas khua ka tlung liau khan Lalpa nih chun lampi hawng ka awng piak narêng hen ka unau tla chu ka muh lo ruangah ka thlarau leiah chun lungngamnâk rerêng ka nei lêm lo. ¹³ Chun, annih chu hawlh ṭha hen ka mâk na le, ka suak le, Makedonia ram ah ka kal rawh. ¹⁴ Sikhawmsele, Krist nehnâk ah hawng kan rui kumzatu leh kanmah tla mang hen mun kipah amah theihnâk rim theihtirtu Pathian sinah chun lâwmthu um seh. ¹⁵ Ruangsuah liau chir mi tla leh a vei liau chir mi tla rangah chun Pathian rangah Krist rimthâw kan si. ¹⁶ Murui khat tla rangah chun thihnâk lakah thihnâk ding rim kan si le, murui khat tla rangah chun nungnâk lakah nungnâk rim kan si. Chubang tla rangah chun âu me tling kho lai? ¹⁷ Mi tamtak nih Pathian thu hi mi tla perpet hen sawlehnâk ah an mang hâwi hen kannih nih chun kan mang lêm lo; thungâi tak hen, Pathian fial hen, Pathian mitmuh hen Krist ah chun thu kan sim tâwn.

¹ Mah a simṭhat kan dawmh awt nawlh fâwn mu? Asi lo leh, nan sinah pêk ding mawh nan sinah thawk hen mawh siamṭhatnâk lasui mi zeimaw mi rangah a herh hâwi hen kan rangah a herh awt bâk ma? ² Nannih hi kan lasui kan thinlung a rîn, mi zawzawng theih leh rêl mi chu nan si. ³ Krist lasui, kanmah tla hawng kan rîntir mi, mângsi hâng hen rîn si lo mi, Pathian nung Thlarau a rîn dauh, lungtlêp ah rîn silo, taksa thinlung tlêp ah rîn mi chu nan si ti fiang tak a langhtir asi. ⁴ Chun, Pathian leiah chun chu hâwi lungnâk chu Krist zârah kan nei asi; ⁵ zeizawng kanmah thawk hen suak a ruat ding hen kanmah cho hen kan tlinh kan ti lo; kan tlinh khonâk chu Pathian sin thawk hen asi dauh. ⁶ Amah ber nih chun thutiam rianṭuantu ah hawng kan tlinhtir le, a lasui thu ko ah rianṭuantu si lo hen, a thlarau rianṭuantu ah asi dauh. A lasui thu ko nih chun a thah tâwn lo, thlarau lam nih chun a nungtir tâwn asi. ⁷ Mosi mêl a rokual ruangah Israel fa tla nih chun a mêl an zauh kho lo le, chu rokualnâk chu a vei duaimâi, thihnâk rianṭuannâk lung ah hawrawp a ṭialh mi men chu hâwi tluk a rokual hen a tlung chun, ⁸ Thlarau rianṭuannâk chu zei hâwi tluk a rokual hen dek a hawng tlung lai! ⁹ Mawhtirnâk rianṭuan men a rokual chun repnâk rianṭuannâk chu rokualnâk leikângah chun thungâi a fâk dauh ding asi. ¹⁰ Rokualtir hen um rawh nih chun hi leikângah lam chun rokualnâk rerêng a nei lo rawh, rokualnâk fâk dauh nih a khûp ruangah. ¹¹ A vei duaimâi mi men rokual hen a um chun um kumza ding mi chu rokual a tuam hen a um dauh khun ding asi. ¹² Chun, chu hâwi lungumnâk kan nei ruangah zeizawng kan sim tâwn asi, Mosi ti hâwi khan kan ti lo; ¹³ anih nih chun a vei duaimâi mi dawnghnâk chu Israel fa tla nih chun an zauh ko lonâk ding hen a mêl chu khuhnâk hen a khuh; an thinlung lam chu khauhtir hen a um dauh. ¹⁴ Tusûn tiang khawmah thutiam li chu an rêl chun khuhnâk lîlâ chu lîm lo hen an um ko ruangah chu khuhnâk chu Krist ah chun tlâulir hen a um rawh. ¹⁵ Sikhawmsele, tusûn tiang hen Mosi lasuibu an rêl kipah an thinlung ah khuhnâk a um tâwn. ¹⁶ Sikhawmsele, an thinlung chu Lalpa leiah a hawi tik zawngah khuhnâk lâk ving asi lai rawh. ¹⁷ Chun Lalpa chu Thlarau asi le, Lalpa Thlarau umnâk kipah thawsuaknâk a um tâwn. ¹⁸ Chun, kannih chu kan ektê hen mêl khuh lo hen thlalang hâwi hen Lalpa rokualnâk cherh hen, rokualnâk thawk hen rokual vima hen, Thu banghpi hâwi a um ding hen dangtir hen kan um tâwn, Lalpa Thlarau lakah mi kanna ting hâwi vima hen.

¹ Churuangah chun zângfahnâk kan tawng hâwi vima hen rianṭuannâk hi kan nei ruangah kan duai lo; ² thil ningzakkâi â thup mi tla chu kan nawng dauh, ngamlêmnâk thu kan mang lo le, Pathian thu mi perpetnâk ding hen khawm kan mang lo; thutak theihtir hen Pathian mitmuh hen mikip sia leh ṭha theihnâk hen mi thinlung tawng hen um kan tum tâwn. ³ Sikhawmsele kan Thâwngthâng Ṭha hi khuh hen a um chun a vei liau mi tla ah hin asi khuh hen a um mi chu; ⁴ Krist Pathian banghpi hen a rokual zia Thâwngthâng Ṭha chêu nih chun anmah a cherh kho lonâk ding hen, chubang lakah chun hi laikulh pathian nih hin lunglo tla thinlung a châwtir rawh ⁵ Mah thu kan sim lo le, Krist Jisu chu Lalpa asi ti kan sim dauh tâwn, kannih khawm Jisu ruangah nan to-aw kan si ti kan sim tâwn. ⁶ Jisu Krist mêl ah chun Pathian rokual zia chêu chu hawng kan pêk ding hen, "Mûi lakah mi chêu a hawng chêu lai," titu Pathian nih chun kan thinlung tla hi a hawng cherh rawh ruangah. ⁷ Sikhawmsele, thiltikhonâk fâk zia chu kanmah sinah mi silo hen Pathian tâ asi dauh khonâk ding hen chu ro chu tualbêl tla ah kan kil asi. ⁸ Khatlei khatlei ah nawktir hen kan um, sikhawmsele kan thaw a pit loh; lawksawng hen kan um le, sikhawmsele kan lung a dawng loh; ⁹ nehsawh hen kan um le, sikhawmsele kaltâk hen kan um lêm loh; tlû thlo hen hawng kan vuak le, sikhawmsele veih thlo hen kan um loh. ¹⁰ Kan taksa ah hin kumleza hen Jisu thihnâk chu kan put vima tâwn le, Jisu nungnâk khawm kan taksa ah hin a lang khonâk ding hen. ¹¹ Kannih dam hen um mi tla hi Jisu ruangah thi dingah tleihtir hen kan um kumza, Jisu nungnâk khawm kan taksa thi kho ah hin a langh khonâk ding hen. ¹² Chun, kanmah lakah hin thihnâk nih a ṭuan tâwn le, nannih lakah lam chun nungnâk nih a ṭuan dauh tâwn asi. ¹³ Sikhawmsele, "Ka lung le, churuangah thu ka sim asi," ti rîn hâwi khan, chu lungnâk thinlung tak chu put hen kannih khawm nih kan lung bâk le, churuangah thu kan sim le, ¹⁴ Lalpa Jisu thawhtu nih chun kannih khawm Jisu sinah hawng kan thawh bâk awt le, nanmah hen hawng kan dîrtir awt ti kan theih. ¹⁵ Zeizawng nanmah ṭhatnâk ding asi, zângfahnâk chu mi tam dauh rangah pungtir hen a um, Pathian rokualnâk ding hen lâwmthu cherkhet a simtir khonâk ding hen. ¹⁶ Churuang chun kan duai lo le, kan lênglei minung hi hawng rawp dadauh khawmsele kan sunglei minung chu nisiar siamthar vima hen a um dauh asi. ¹⁷ Kanna hamhnâk nêptê, tu mitthlep sung cho ah um ding mi nih hin rokualnâk cherkhet zungzâl rang ding hawng kan siam piak dadauh asi. ¹⁸ Thil muh kho tla hi zauh lo hen, thil muh kho lo tla chu kan zauh dauh ruangah; thil muh kho tla hi sâwtlotê rang ding asi le, thil muh kho lo tla lam chu zungzâl rang ding asi.

¹ Kan umnâk in--hi tual ah mi kan taksa hi siat khawmsele, vân ah, in kut hen sak lo mi, zungzâl um ding mi, Pathian sinah mi in bir chu kan nei ti kan theih. ² Vân ah kan umnâk ding mi aih thu ah duh ruangmâng hen hi in ah hin kan rûm huahmah tâwn. ³ Chu hâwi hen aih hen um sele takkaro hen kan um lai loh. ⁴ Kannih hi tual taksa ah um mi tla hi thilrit phurh hen kan rûm tatak asi, aih lo hen um kan duh ruangah asi lo le, aih hen um kan duh ruangah asi dauh, thi kho hi nungnâk nih dawlh dak hen a um khonâk ding hen. ⁵ Chun, chu mi rangah tak chun hawng kan timhtuahtu chu Pathian asi, Thlarau Thenhlimh hawng kan pêktu kha. ⁶ Chun, taksa ah kan um sung hin Lalpa sinah kan um lo ti theih hen kumleza hen thlangam tak hen kan um tâwn; ⁷ muh kho a kal lo hen, lungnâk ah kal dauh hen. ⁸ Thlangam tak hen kan um kan ti taksa ah um lo hen Lalpa sinah um kan duh dauh. ⁹ Churuangah, um sele, um lah sele, amah lawmhkâng si kan tum thlir tâwn asi. ¹⁰ Mi kip nih taksa thu tla chu a siat a ṭhat hen kan ti hâwi vima hen kan tawng chiau khonâk ding hen Krist lâirêlnâk tophah mâika ah chun langhtir hen kan um ver ding asi. ¹¹ Chun Lalpa ṭihnâk dân theih hen minung tla chu kan lêm tâwn le, Pathian sinah lam chun langhtir hen kan um tâwn; nanmah sia leh ṭha theihnâk ah khawm langhtir hen kan um ka lungum. ¹² Nan sinah kanna simṭhat nawlh mi asi lo le, thinlung lei silo hen, langngân ko hen putsotu tla chu zeitin mawh sângnâk ding nan theih khonâk ding hen, kanmah leiah putso san an siam na hen kan sim dauh asi. ¹³ Kan ât leh Pathian rang asi, kan fingh leh nanmah rang asi dangâiah. ¹⁴ Krist dâwtnâk nih chun kan lakah lâi a rêl asi, hi hâwi hen kan ruat: Mi zawzawng thih ruangrûl ah mi pakhat a thi le, churuang chun mi zawzawng chu an thi asi. ¹⁵ Chun, a nung mi tla chu anmah rangah nung an si lo rawh le, an thih ruangrûl ah thi hen thawknawlh mi rangah chun an nung dauhnâk ding hen asi, mi zawzawng ruangrûl ah asi a thi mi chu. ¹⁶ Churuang chun tu thawk hen kannih lam nih chun taksa leiah chun âukhawm kan theih lai lo rawh; taksa leiah Krist chu theih rawh khawmsele tu lam chun kan theih nawlh lo rawh. ¹⁷ Churuang chun âuzawng Krist ah a um chun thilsiam thar a hawng si; thil li chu a vei rawh; ngâinik u! a hawng thar rawh. ¹⁸ Sikhawmsele, zeizawng Pathian sin thawk hen suak asi, anih nih chun Krist ruangah amah hen rem hen a kan siam le, remnâk rianṭuan hawng kan pêk; ¹⁹ kha hâwi hen Pathian nih Krist lakah laikulh hi amah hen a rem hen a siam le, an buarnâk tla chu buarnâk ah ruat piak lo hen a remnâk thu hawng kan kiltir kha. ²⁰ Chun, Krist ruangrûl ah rêl kan si le, Pathian nih kanmah mang hen a nan ngiar chiam na ti kho asi. "Pathian hen hawng a rem u," ti hen Krist ruangrûl ah ka nan ngiar na asi. ²¹ Amah lakah chun Pathian repnâk kan hawng si khonâk ding hen sual rerêng neilo Jisu chu Pathian nih kanmah ruangah sual ah a siam.

¹ Chun, Pathian zângfahnâk nan tawng mi chu ṭhatvakpi lo hen nan um lonâk ding hen Pathian hen kanna ṭuan bâwmnâk ah kan ngiar chiam na asi. ² "Tik lawmhkâi ah ka nan ngâi le, Ruangsuahnâk ni ah ka nan ṭangpi," ti hen Pathian nih a sim mi chu ngâi u. Ngâinik u! Tu hi tik lawmhkâi chu asi, tu hi ruangsuahnâk ni chu asi! ³ Kan rianṭuan hi an sâwi lonâk ding hen zei leikâng khawmah tlûk phahnâk ding rerêng kan siam lo le, ⁴ Pathian rianṭuantu tla hâwi hen zei lak zawngah mi lungnâ tla hen kan um dauh tâwn. ⁵ Thungâi thlâk hen felfê tak a nawknâk ah, harsatnâk ah, hamhnâk ah vuaknâk ah, rêngtlâknâk ah, nawktirnâk ah, ṭuanhamhnâk ah, it chiam lonâk ah, buhngeinâk ah, ⁶ thenhlimhnâk ah, theihnâk ah, dawnhkhonâk ah, vêlneihnâk ah, Thlarau Thenhlimh ah, dâwtnâk ah, ⁷ thutak thu ah, Pathian thiltikhonâk ah, keh leh vawrh hen repnâk riamnâm tla hen, ⁸ rokualnâk leh chawnglawh lonâk hen, min simsiat leh min simṭhat hen, perpettu hâwl hen, mi dik tak si ṭung hen, ⁹ mi theih tlâk lo hâwi hen, minthang tak si ṭung hen; thi viviar hâwi hen, ngâinik u, kan nung ṭung; rêp mi hâwi hen, thah ṭung lo hen; ¹⁰ ngaihsia hâwi hen, sikhawmsele lâwm kumza ṭung hen, mipâm hâwi hen, sikawmsele mi tamtak neitir ṭung hen; zeikhawm nei lo hâwi hen, sikhawmsele zeizawng nei ṭung hen. ¹¹ Korin mi le tla, nan sinah kan kâ kan âng hen kan thinlung a kâu rawh. ¹² Kanmah lakah hin tawrkhân hen nan um lo le, nanmah thinlung ah asi tawrkhân hen nan um dauh mi chu. ¹³ Chun, ka nan pêk na mi hâwitê hen hawng ka pêk rûl bâk ding hen, fa tla sinah sim hâwi hen ka sim asi, nanmah khawm nan thinlung kâutir hen um u. ¹⁴ Lunglo mi tla hen rêlkhâwng lo hen liangbat munkhat bat hen um lah u; sualnâk leh repnâk nih zei me anna munkhatnâk um? Asi lo leh, mûi leh chêu nih zei me kawmhnâk an nei? ¹⁵ Krist leh Beliar khawm nih zei me remnâk an nei? Asi lo leh, lunglo leh lungtu nih zei me tingvo anna bâwmnâk um? ¹⁶ Pathian Biakin leh ruk khawm nih zei me remnâk an nei? Kannih lam chu Pathian nung Biakin kan si; Pathian nih, "Anmah lakah ka um lai le, anmah lakah ka tâwi ber lai; chun, an Pathian ka si lai le, annih khawm ka mi tla an si lai," a ti hâwi khan. ¹⁷ Churuangah, Pathian nih chun, "An lakah mi hawng suak ule, a dang hen um u. Thil nâwmtâm rerêng khawm tawngh lah u; churawhchun ka nan lawmh na lai. ¹⁸ Nan rangah Pa ka si lai le, nannih khawm ka rangah fanu fapa nan si lai, Lalpa zeizawng tikho nih chun a ti," ti hen, a sim hâwi khan.

¹ Chun, duhtak le tla, chubang thutiam chu kan nei ruangah taksa leh thlarau nâwmnâk zawzawng lakah kanna thiangtir lai, Pathian ṭih bû hen thenhlimhnâk rangtlingtir hen. ² Nan thinlung ah mun hawng ka kianh u; âu tlûn khawmah kan sual lo, âukhawm kan râwk lo, âukhawm kan sawhkhalh lo. ³ Chu chu an nan mawhtir na ding hen ka ti asi lo le, thih leh thih khat, dam leh dam khat ding hen kan thinlung ah ka nan kil na ti veikhat liau khan ka sim kha. ⁴ Nannih leikângah chun ka sim ngam tuktarâi, ka nan putso na zia hi a fâk asi; lungngamnâk hen ka khat le, kanna hamhnâk zawzawng ah chun lâwmnâk hen ka khat. ⁵ Makedonia ram ka tlung khawm khan kan taksa nih lungngamnâk rerêng a nei lêm lo, khatlei khatlei ah chun hamhtir hen kan um dauh lehlam; leng leiah a sualnâk tla a um le, sung leiah ṭihnâk tla a um. ⁶ Sikhawmsele, â nâutir mi tla lungngamhtu Pathian nih chun Tita hawng fial hen hawng kan thlangamh rawh. ⁷ A hawng kalnâk cho nih chun asi lo le, nan lunglêng zia tla, nan ṭap zia tla, ka tlûnah ṭhanemsemsê nan ngâi zia tla hawng kan simh hen nanmah an lungngamh na nâk khawm nih chun hawng kan lungngamh rawh asi; chun ka lâwm khun asi. ⁸ Ka lasuikuat nih khan an ngaihsiattir na khawmsele ka sîr lo rawh a tîr lam chun ka sîr asi, kha lasuikuat nih khan a nan ngaihsiattir na ti ka theih ruangah; sikhawmsele, sâwtlotê cho asi kha. ⁹ Tu chun kâ lâwm asi, ngaihsiattir hen nan um ruangah asi lo le, rimnâk ding hen nan ngaihsia ruangah asi dauh. Kanmah ruangah zeikhawm nan dawk lonâk ding hen Pathian duhzia hâwi hen ngaihsiattir hen nan um asi. ¹⁰ Pathian duhzia hâwi hen ngaihsiatnâk nih chun ruangsuahnâk ding hen sîrnâk cho silo hen rimnâk a siam tâwn; laikulh ngaihsiatnâk nih chun thihnâk a siam dauh tâwn. ¹¹ Chun, ngâinik u, Pathian duhzia hâwi a ngaihsiattir hen nan umnâk takah chun thiamthihnâk tla, mah a sim thiamnâk tla, thinthawknâk tla, ṭihnâk tla, lunglêngnâk tla, ṭhanemsemse ngâinâk tla, lehrûl samnâk tla nanmah lakah a siam zia a fâk a! Zeizawng ah chubang thu ah chun nan thiang ti nanna langh rawh. ¹² Chun nan sinah rîn khawmsele a sualtu ruangah khan ka rîn lo le, a sual tuartu ruangah ka rîn lêm lo, kan tlûnah ṭhanemsemsê nan ngâi zia Pathian mitmuh ah nan sinah theihtir hen a um khonâk ding hen ka rîn mi asi dauh. ¹³ Churuangah, lungngam hen kan um rawh. Kanmah lungngamnâk cho lo khawmah, Tita lâwmnâk ruangah kanna lâwm khun le, nannih zawzawng nih a thinlung nan thartir piak ruangah. ¹⁴ A sinah zei leikâng khawmah nanmah tla an putso na khawmsele ka mualpho lo; mualpho ngangâk hen zeizawng nan sinah thu tatak kan sim tâwn hâwi khan Tita mâika ah kan putso mi chu thu tatak a hawng si taktê. ¹⁵ Chun, nan ektê hen a thu nan ngâi zia lâu leh thir bû hen amah nan lawmh zia tla chu theih ko hen a thinlung chu nanmah leikângah a um khun asi. ¹⁶ Zei leikâng zawngah nan tlûnah ka lungngam ruangah kâ lâwm asi.

¹ Chun unau le tla, Makedonia ram ah kawhmi murui lakah Pathian zângfahnâk pêk chu ka nan theihtir na awt. ² Kha hâwi hen hamh hen niknâk fâk tak lakah thungâi anna lâwm, an pâm thlo khawmsele hawknâk fâk tak ah â chang zia kha. ³ Zângfahnâk, mi thenhlimh Judai ram ah um mi tla rianṭuan ah tel mi chu thungâi thlâk a hawng kan deih chiam hen, an ti kho tâwk hen, asi, an ti kho tâwk nûnah a lei khawm anmah thu thu hen an pêk ti ka theihpi na asi. ⁵ Chu khawm chu kan ruat lo hâwi tak hen an ti le, Pathian duhzia hen anmah tak Lalpa sinah leh kanmah sinah anna pêk masa ta rih asi. ⁶ Chun, a lânah a hawng dawmh rawh ruang khan hi dâwtnâk khawm hi nanmah lakah ti thluh sawm ding hen Tita chu kan ngiar rê. ⁷ Chun, zeizawng--lungnâk tla, thusim thiamnâk tla, theihnâk tla, ṭhanemsemsê ngâinâk zawzawng tla, hawng kan zângfahnâk tla nan nei hâwi hen chu zângfahnâk khawm chu nan nei tam khonâk ding hen taimâk suah u. ⁸ Thupêk kâng hen ka sim lo le, midang ṭhanemsemsê ngâinâk hen nanna zângfahnâk dik zia khawm chu nik ding hen ka sim mi asi. ⁹ Kan Lalpa Jisu Krist zângfahnâk chu a pâmnâk ruangah nan hawng nei khonâk ding hen, nei khawmsele nanmah ruang takah a hawng pâm mi kha nan theih asi. ¹⁰ Chun, chu lak chun, ka ngaihdân hâwi hen ka sim asi, chu chu nan rangah a ṭha dangâiah; kum khat asi rawh a dawmh masatu nan si le, nanna dawmh mi lâwng khawm silo hen ṭuan duhnâk khawm nanna dawmh ber rawh. ¹¹ Chun duh ding hen timhtuahnâk a um hâwi khan nan neih hâwi vima hen zawh zet nâk khawm a um khonâk ding hen tu lam chun ti pawt u. ¹² Pêk duhnâk nan nei chun, mi a nei lo nâ silo hen, a neih zia hâwi vima hen a pêk mi chu Pathian lawmh tlâk asi. ¹³ Midang zângkhâitir hen nanmah hamh ding hen ka ti mi asi lo le, a rual rang ding hen nan neih a lei mi chu tuliau hin an samphâng mi thlawp leh belhnâk asi le, ¹⁴ an neih a lei mi khawm nih sam leh phâng thlawp belhnâk a hawng si rûl khonâk ding hen ka ti dauh asi; chun rual rangnâk a hawng um kho lai. ¹⁵ "Manna a sar tam mi nih chun lei hen a nei lo le, a sar tâwm mi nih a sam lêm lo," ti rîn hâwi khan. ¹⁶ Chun, nan rangah kan ṭhanemsemsê ngaihnâk hâwi hen Tita thinlung ah pêk tâwntu Pathian sinah chun lâwmthu um seh. ¹⁷ Anih nih chun kan ngiarnâk chu a pawm ngelchel le, sikhawmsele kan ngiar ruangah cho silo hen amah ngelchel chu ṭhanemsemsê ngâi tak asi le, amah thu thu hen nan sinah a hawng kal awt asi. ¹⁸ Chun, a sinah unaupa kan fial bâk awt le, anih chu Thâwngthâng Ṭha leikângah an sawr mi thu kawhmi murui zawzawng lakah a thang le, ¹⁹ chu ko khawm chu asi lo le, Lalpa rokualnâk ding leh kanna timhtuah zia zauhtirnâk ding hen a rian kan ṭuan mi, hi zângfahnâk thu ah hin kan sinah khua ṭawl bâk ding hen kawhmi murui tla ruat asi rerêng bâk. ²⁰ A rian kan ṭuan mi hi thilpêk leikângah hin âukhawm nih hawng kan sâwi lonâk ding hen kanna thiamthih le. ²¹ Lalpa ngaihnâk cho ah silo hen minung ngaihnâk khawmah thu dawh kan ruatkan tâwn asi. ²² Chun, an sinah kan unaupa kan kaltir awt bâk le, anih chu kâng tamtak ah ṭhanemsemsê ngâi tak asi ti vei tamtak kan nik rawh le, tu lam châng chun thungâi an zumh na ruangah ṭhanemsemsê a ngâi dauh khun rawh asi. ²³ Tita hi chu ka hâwi leh nanmah leikângah ka rianṭuan pi mi asi le, chun kan unau tla hi chu kawhmi murui tla mifial, Krist rokualnâk chu an si. ²⁴ Churuang chun, nan zângfah ti theihnâk leh kan putso na mi theihnâk chu kawhmi murui mâika ah chun an sinah langhtir u.

¹ Mi thenhlimh tla rianṭuan thu lam chu nan sinah ka rîn a herh lo; nanna râlring zia chu ka theih, chu mi leikâng thu ah chun, ² "Kum khat asi rawh, Gris ram mi tla chu timhtuah hen an um rawh," ti hen Makedonia ram mi le tla sinah ka nan putso na tâwn le; chun nan ṭhanemsemsê ngâinâk nih chun an lakah mi tamtak thinlung a panhtir rawh. ³ Sikhawmsele, chu leikâng thu ah chun ka nan putso na nâk chu zeikhawm lo asi lonâk ding hen unau tla hi ka kaltir awt le, ka sim hâwitê hen a timhtuah hen nan hawng um khonâk ding hen; ⁴ chu hâwi asi lo chun Makedonia ram ah mi âu tla nih mawh an hawng ka zûl lebang chun timhtuah lo hen an muh na chun kannih, nannih kan tilo, hi kan zumh na nâk leikângah hin kan mualpho lebang lai. ⁵ Churuangah, unau tla hi nan sinah hawng kal masa hen siang tak hen thilpêk nan tiamhkan mi kha siamkan ding hen ngiar herh hen ka ruat asi, chu tak chu zângrân hen lâk hâwi silo hen siang tak a pêk hâwi dauh hen timhtuah zet hen a um khonâk ding hen. ⁶ Sikhawmsele, chu leikângah vawrh tâwm mi nih chun a ât tâwm lai, a vawrh tam mi nih chun a ât tam lai. ⁷ Mi kip nih siang lo bû hen pêk lo hen, pêk lo kho lo hâwi a ngaih hen pêk ber lo hen, an thinlung ah an tum hâwi vima hen pêk chiau seh. Pathian nih chun lâwm tak a pêktu asi a zângfah tâwn. ⁸ Chun, Pathian nih dâwtnâk kip nan tlûnah a vurh kho asi; chun nannih zeizawng ah a tâwk ri nei kumza hen rianṭuan ṭha kip rangah nan nei kho lai. ⁹ Pathian lasui thu nih, "A ṭhenzâr le, mipâm tla sinah a pêk le, a repnâk chu zungzâl hen a um kumza," ti hen a sim hâwi khan. ¹⁰ Chun, thu siangnâk zeizawng, kanmah ruangah Pathian sinah lâwmthu simnâk siamtu chu nei ding hen, zeizawng ah neihtir a um hen, ¹¹ a vawrhtu sinah chî pêktu leh ei ding rangah buh pêktu nih chun nan vawrh ding mi chî chu an pêk na hen a nan pungtir piak na lai le, nanna repnâk rah tla chu a nan pungtir piak na lai. ¹² Hi ṭangpinâk rianṭuannâk nih hin mi thenhlimh le samphangnâk tla a siremtir mi cho khawm asi lo le, Pathian sinah lâwmthu simnâk tamtak ting hen a luang liam asi. ¹³ Hi rianṭuannâk nih hin a nan nik na ruangah Krist Thâwngthâng Ṭha leikângah nan thinlung nan zâwt zia ruangah leh anmah tla rangah leh mi zawzawng rangah thawhlâwmnâk ah nan thil siang tla ruangah hin Pathian an rokualtir tâwn asi. ¹⁴ Anmah tla tak khawm nih nan tlûnah Pathian zângfahnâk fâk tak ruangah nan rangah thla an cham piak na lai. ¹⁵ A thilpek sim kho lo rê ruangah hin Pathian sinah lâwmthu um seh.

¹ Chun, kei Pawl, nan lakah nan mitmuh ah dawnhkho tak a um hen nan sinah ka um lo kâ hen nanmah leikângah iam tâwn mi nih hin Krist ṭhatnâk leh nunnêmnâk hen kan ngiar na. ² Nan sinah ka hawng tikah ka thinruntir lah ram u--taksa hâwi a um hen hawng kan ruattu tla tlûnah ka lung asi lo kho ruangah. ³ Taksa ah um khawmsele taksa do hâwi hen kanna do lo le, ⁴ kannih râlthuamnâk tla chu taksa mi asi lo le, kulhpi bir tak tla siatnâk ding hen Pathian zârah thiltikho tak asi dauh, ⁵ êlnâk tla leh thil sâng kip Pathian theihnâk kham ding hen sâng tak a siam mi tla chu siat hen, ruatnâk kip Krist thu ngâinâk sal ah kan rui le; ⁶ nan thu ngâi zia a rangtling tikah chun thu ngâi lonâk zawzawng lehrûl sam ding hen kanna tim ber. ⁷ Nan mitmuh ah thil um tla chu asi nan zauh tâwn, âuzawng nih Krist tâ si hen â ruat chun hi hi mah lakah a ruat nawlh seh, amah chu Krist tâ asi hâwi ber hen kannih khawm kan si bâk mi hi. ⁸ Kan thuneihnâk nanmah siatnâk ding silo hen nanmah siamṭhatnâk ding dauh hen Lalpa nih hawng kan pêk mi hi--a putso khun khawmsele ka mualpho awt lo le, ⁹ ka lasuikuat tla nih chun an lauh na ding hen ka duh lo asi. ¹⁰ A lasuikuat tla chu a nei hen a khauh le, a taksa lei lam chu a nêmno le, a hawlh khawm sik a kâi asi," an ti dangâiah. ¹¹ Chu hâwi mi nih chun hi hi ruat seh, nan sinah ka um lo liauah lasuikuat thu ah kan um hâwi hen nan sinah kan um tik khawmah thilti ah kan um ber lai. ¹² Zeimaw mi nih mah a simṭhat mi lakah chun kanna telh sih ngam lo, anmah tla hen khawm kanna tahṭhimh ngam lo; sikhawmsele, annih lam chu mah leh mah tah hen, mah leh mah a tahṭhimh hen thinlung nei lo hen an um. ¹³ Kannih lam chu kan tahnâk ri lêm chun kanna zûm lai lo le, Pathian nih bial hawng kan tingtir le, chu tahnâk hâwi vima hen kanna zûm lai, nanmah khawm huap ding rê a tahnâk chu. ¹⁴ Huap phanh lo pi an huap na hâwi hen kan uap kâu tuk lêm lo; Krist Thâwngthâng Ṭha sim hen nan khua tiang khawm kan hawng kha. ¹⁵ Kan tahnâk ri lêm chun midang ṭuan hamh tla chu kan putso lo le, nan lungnâk a ṭhang zia hâwi vima hen kan huapnâk ri vima ah nan lakah cherkhet liantir hen kan um lai ti lungumnâk kan nei dauh le, ¹⁶ timhtuah chia leikâng thu ah chun midang bial putso lo hen nanmah lanh lei ram tiang khawmah Thâwngthâng Ṭha kan sim khonâk ding hen. ¹⁷ Sikhawmsele, "A putso mi zawng nih Lalpa chu putso seh," ti hen, Pathian lasui thu nih a sim hâwi khan. ¹⁸ Mah simṭhat nih chun sawr a lawh lo le, Lalpa nih a simṭhat mi chu sawr a lawh dauh asi.

¹ Ka ât dauhnâk ah hin nannih nih nanna dawnhkho ding hen ka duh chiam e! Asi, dawnh khawm nanna dawnhkho ngâk e! ² Pathian thîknâk hen asi ka nan thîk na; Krist sinah chun nungâk thenhlimh hâwi hen ka nan pêk kho na bâk ding hen, mi pakhat, Krist chu kan hual piak na ko asi. ³ Sikhawmsele, rûl nih chun ngamlêmnâk hen Evi chu a bum hâwi khan, Krist leiah taknâk leh thenhlimhnâk lakah mi chu zeitin hen mawh nan thinlung chu an râwk na lebang lai ti ka lâu asi. ⁴ Kannih nih a thu kan sim le, nan pawm mi, thlarau leh thâwngthâng ṭha silo hen kan sin thawk hen nanna ting mi thlarau leh thâwngthâng ṭha hen a dang ving mi Jisu dang thu simtu âuzawng thungâi nan sâithiam ruangah. ⁵ Chubang mifial lian chem tla chu zei leikâng khawmah tluk lo ka ruat lo asi. ⁶ Thusim leikângah lam chun hawlh mangdân thiam lah khawmsele theihnâk ah chun chu hâwi ka si lo; zeizawng ah mi zawzawng lakah nanmah leiah kan langhtir kha. ⁷ Asi lo leh, Pathian Thâwngthân Ṭha a thawttham a ka sim hen putso a nan um khonâk ding hen ka nâutirnâk nih khan thil ka tisual mazei? ⁸ Nanmah rian ka ṭuan khonâk ding hen kawhmi dang thawk hen lawh ka lâk le, ka suh na. ⁹ Chun, nan sinah ka um le, ka samphâng liau khan âukhawm ka hamhtir na lo, unau tla chu Makedonia ram a mi an hawng hen ka samphângnâk chu ka si an remtir; zeizawng ah nanmah hamhtir lo hen ka um kha, kha hâwi khan ka um vima lai. ¹⁰ Krist thutak keimah lakah um hâwi hen Akaia ram hi ka putsonâk hi âukhawm nih an ka rehtir lai loh. ¹¹ Zeiruangah me hi hi ka sim? Ka nan zângfah na lo ruangah masi? Pathian nih a theih! ¹² Sikhawmsele, a rêlkhâwngnâk tawng duh tla lakah mi rêlkhâwngnâk chu ka sah khonâk ding hen ka ti rawh, ka ti vima lai; an putsonâk ah chun kanmah um hâwi hen an hawng um khonâk ding hen. ¹³ Mi chubang tla chu Krist mifial ah â siam sawm hen, mifial telê rianṭuantu mi perpet mang tla an si. ¹⁴ Chu chu a chê lo, Setan men chêu mifial ah â siam sawm tâwn. ¹⁵ Churuangah a rianṭuantu tla kha chu repnâk rianṭuantu ah a siam sawm khawmsele thilchê asi lo; chubang tla dawnghnâk chu an thilti hâwi vima asi lai. ¹⁶ Ka sim nawlh lai, âukhawm nih mi â ah hawng ka ruat lah seh; sikhawmsele, nan hawng ka ruat dâidua chun kei khawm nih tâwmtal kan putso kho na nâk ding hen mi â hâwi hen a ngaihzia hawng ka thiam piak u. ¹⁷ Ka sim mi hi Lalpa hâwi hen ka sim lo le, ka putso mi lungnâk nih hin â hâwi hen ka sim asi. ¹⁸ Mi tamtak nih taksa hâwi hen an putso ruangah kei khawm nih ka putso nik lai. ¹⁹ Nannih lam chu mi fing nan si ruangah mi â tla lakah lungâwi tak hen nanna dawnh tâwn. ²⁰ Mi nih sal ah a nan siam na hen an ei hep na sele, sal ah an tleih na sele, mah a sawr sele, nan mêl ah an bengh na sele, nanna dawnh tâwn. ²¹ Kan chak lo rawh hâwi hen sik bû hen ka sim asi. Sikhawmsele, âuzawng nih zei leikâng khawm an ngamh mi vial--â tak hen sim ko sele--kei khawm nih ka ngamh. ²² Hebrai mi an si mu? Kei khawm ka si. Israel mi tla an si mu? Kei khawm ka si. Abrahm thlâk tla an si mu? Kei khawm ka si. ²³ Krist rianṭuantu tla an si mu? Mi â hâwi hen sim ko tâ sele--ka si dauh ngengê. Ṭuan hamhnâk lakah fâk khun hen, rêngin ah tângnâk ah fâk khun hen, vuaknâk ah lei zut hen, thihnâk ah vei tamtak, ²⁴ Juda tla vuaknâk tankhat ah vei sâwmli tlinglo vei nga ka tawng. ²⁵ Vei thum fung vuak hen ka um, veikhat lung seh hen ka um le, veithum lawng râwknâk ka tawng le, zân khat leh ni khat tisumsumriat ah ka um le; ²⁶ khua ṭawlnâk ah vei tamtak, tivatê ṭihnungkâi lakah, rawkmang ṭihnungkâi tak lakah, ka phun hâwi ṭihnungkâi lakah, Phundang tla ṭihnungkâi lakah, khuapi ṭihnungkâi lakah, ramkaro ṭihnungkâi lakah, tisumsumriat ṭihnungkâi lakah, unau telê ṭihnungkâi lakah; rianṭuan dîtnâk leh rianṭuan hamhnâk lakah, ihmu riauraknâk tla ah vei tamtak, ²⁷ sungvâng leh tîhâlnâk ah, buhngeinâk ah vei tamtak, damlo leh takkaro hen umnâk ah. ²⁸ Chun, ka sim lo mi tla khawm chu kawhmi murui zawzawng ka ruat dawnnâk nih nisiar hen hawng ka denh kumza mi hi a um fâwn. ²⁹ Mi âumawh an chak lo chun kei khawm ka tuarpi bâk; mi âumawh sual ah an tlû chun lungfâk hen ka khat tâwn. ³⁰ Putso ding ka si ṭung chun ka chaklonâk lei thil tla asi ka putso awt. ³¹ Jisu Pathian leh Pa, zungzâl a thawsuak hen um mi nih chun âwkrâwl ka sim lo zia a theih. ³² Damaska khua khan lal Areta tangah lâirêltu nih chun hawng ka tleih ding hen Damaska khua kulh kawtkâ chu a vêngtir na. ³³ Chun, langawtkawt ah kulh zulh ah bâwm hen an ka thlâk le, chun a kut lakah mi ka relh pawt rawh.

¹ Ka putso ding rerêng asi. Ṭha lam chu a ṭha lo, sikhawmsele Pathian sinah mi langhnâk leh theihtirnâk thu ka sim sih vima lai. ² Kristian mi pakhat âumawh ka theih le, kum leili asi rawh, vân sâng chem ah khin lâk hen a um (hi hi a hawng um tak ma, asi lo leh, muhtirnâk ma a nei ka theih lo, Pathian cho nih a theih.) ³ Ka sim nawlh fawn lai, hi minung hi Paradis ah lâk hen a um (a lîlâ hen hi hi a hawng um tak ma, asi lo leh, muhtirnâk ma a nei ka theih lo, Pathian cho nih a theih.) ⁴ Thu sim kho lo, minung sim thiang lo tla chu a theih ti ka theih. ⁵ Hi hâwi mi minung chu ka putso lai; sikhawmsele ka chaklonâk lo chu ka putso lai lo. ⁶ A zûm duh khawmsele mi mâwl ka si lai loh, thudik ka sim awt asi; sikhawmsele, ka sûm lai, chu lo chun âuzawng nih an hawng ka muh hâwi leh ka lakah thu an theih hâwi ngâk hen rokual khun hen an hawng ka ruat lebang lai. ⁷ Chun, theihtirnâk tla chu thungâi a fâk ruangah ka sung-û tir tuk lonâk ding hen taksa ah ling hawng ka pêk asi. Setan mifial, kut nurnâk ah hawng ka mangtu ding mi chu; chu lo chun ka sung-û tir tuk lebang lai. ⁸ Chu leikâng thu ah chun a hawng ka kiangtâk khonâk ding hen Lalpa chu veithum ka deih. ⁹ Chun, anih nih chun ka sinah, "Ka zângfahnâk na rangah â tâwk; ka thiltikhonâk hi chaklonâk ah asi rangtlingtir hen a um mi chu," a ti rawh. Chun, Krist thiltikhonâk chu ka tlûnah a um khonâk ding hen lâwm tak hen ka chaklonâk tla hi ka putso dauh lai. ¹⁰ Churuangah, Krist ruangah chaklonâk tla ah, siatnâk tla ah zirhnâk tla, nehsawhnâk tla, vânduainâk tla ka lawmh tâwn; ka chak lo kipah asi ka chak tâwn. ¹¹ Ka â rawh ma hi--nannih nih â lo kho lo hen nan hawng ka siam asi. Kei chu nanmah nih nan hawng ka chawnglawmh ding mi ka si, zeikhawm silah khawmsele zei leikâng khawmah mifial lian chem tla sinah ka niam dauh lêm lo. ¹² Mifial sinâk singsiahnâk tla chu felfênâk zeizawng nei hen, singsiahnâk tla, thilchê tla, thiltikhonâk tla hen nan lakah ti asi tatak kha. ¹³ Zei leikângah me kawhmi murui dang tla ngâk hen niam dauh siam hen nan umnâk chu? Keimah tak nih hin ka nan hamhtir na lonâk leikângah asi ṭung lo chun. Chu chaklonâk ah chun hawng ka ngaihdam u. ¹⁴ Hi hi tuah nan sinah hawng kal ding hen ka timhtuahnâk a veithumnâk ding asi; chun ka nan hamhtir na lai loh, nan tâ chu hâwl ka si lo le, nanmah asi kan hâwl dauh na mi chu: fa le nih nu leh pa rangah an khawng piak ding asi lo le, nu leh pa nih fa tla rangah an khawng piak dauh ding asi. ¹⁵ Chun kei lam nih chun nan thlarau rangah lâwm tak hen ka mang dih lai le, mang dih hep hen ka um lai. A leiluat hen ka nan zângfah na ruang khan; kei nih zângfahnâk tâwm dauh ka tawng phah asi mu? ¹⁶ Sikhawmsele, kei nih chun ka nan hamhtir na lo si tâ sele, sikhawmsele mi perpê rerêng hawng si hen ngamlêm hen ka nan tleih na asi. ¹⁷ Nan sinah ka fial mi tla lakah khan âumawh tal mang hen ṭhatvak phahnâk ah kan mang na mazei? ¹⁸ Tita chu ka fawrh le, amah rual ah unau chu ka fial asi. Tita nih chun, ṭhat phahnâk rerêng a nan nei na mazei? Thinlung munkhat put hen um mi ka si lo mazei? Munkhat lam kal kan si lo mazei? ¹⁹ Tu kar lakah hin nanmah tla sinah kan diknâk thu sim hen hawng kan ruat asi dahmawh. Krist ah chun Pathian mitmuh ah asi thu kan sim mi chu. Sikhawmsele, duhtak tla, zeizawng nanmah siamṭhatnâk ding asi. ²⁰ Ka hawng kal tikah zeitin mawh ka duh hâwi hen ka nan muh na lo hen, kei khawm nan duh hâwi hen nan ka muh lo sual lai ti leh zeitin mawh fâinâk tla, nahsuahnâk tla, thinrunhnâk tla, tawhnâk tla, thu khuar mang tla, sung-û tir tuknâk tla, nawknâk tla a hawng um lebang lai ti leh ²¹ ka hawng kal tikah ka Pathian nih nan lakah a hawng ka mualphoh nawlh hen, a lân thilsual titu tla lakah thil nâwmtâm ti tla, a duh mi tla, hur tla ching hen rim lo mi, mi tamtak tla chu ka ṭappi na lai ti ka ṭih asi.

¹ Hi hi nan sinah ka hawng kal veithumnâk ding asi. Theihtu tla panih mawh pathum mawh kâ ah chun thu kip birhtir hen a um lai. ² Ka simkan rawh le, chun Krist keimah lakah thusim tâwntu chu niknâk nan hâwl ruangah veinihnâk ah nan sinah ka um liauah ka sim hâwi khan tuah nan sinah um lo hen, a lânah thilsual titu tla sinah leh midang zawzawng sinah ka simkan nawlh awt, "Ka hawng nawlh chun ka zuah lai loh," ti hi; anih chu nanmah leiah a chak lo le, nan lakah thiltikho tak asi dauh asi. ⁴ Anih chu chaklonâk ruangah khenhbêk hen a um asi, sikhawmsele Pathian thiltikhonâk ruangah a nung rerêng rawh. Kannih khawm amah lakah chun kan chak lo asi, sikhawmsele nanmah leiah Pathian thiltikhonâk ruangah a sinah kan nung bâk lai. ⁵ Lungnâk ah chun nan um mawh nanmah ngelchel a nik tâwn u; nanmah ngelchel a zauhfiang u. Asi lo leh, nanmah lakah Jisu Krist chu a um ti nanmah tak nih nan theihfiang lo mazei? Duh lo mi nan si lêm lo chun. ⁶ Kannih chu duh lo hen kan um lo ti nan theih lai rih ti ka ruat. ⁷ Chun, thu rerêng nan sual lonâk ding hen Pathian sinah ka deih tâwn le--chu chu kannih hi lawmhkâi hen kan lang khonâk ding asi lo le, nannih nih â dawh mi zawng nan ti khonâk ding hen asi dauh, kannih chu duh lo hâwi hen um khawmsele. ⁸ Thudik ṭanh ding lo chun thudik lo ding hen zeikhawm kan ti kho lo asi. ⁹ Kannih kan chak lo liau khawmah nannih nan chak chun kanna lâwm tâwn asi; hi hi kan deih tâwn; nanmah ṭhat rangtlingnâk hi. ¹⁰ Churuang chun râwk ding silo hen siamṭhat ding dauh hen Lalpa nih thuneihnâk a hawng ka pêk hâwi vima hen nan sinah ka um tikah fâk tak hen nun kan simh na lo ding hen nan sinah ka um lo liau hin hi bang thu hi ka rîn asi. ¹¹ A dawnghchem ah chun unau le tla, lâwm tak hen um u. Ṭhat rangtling hen um ule; lungngam tak hen um ule, thinlung munkhat put ule, lungrual tak hen um u; chun zângfahnâk 1eh remnâk Pathian chu nan sinah a hawng um lai. ¹² Châwchawk thenhlimh hen chibai a bûk u. Mi thenhlimh tla zawzawng nih hin chibai a nan bûk na. ¹³ Lalpa Jisu Krist zângfahnâk leh Pathian zângfahnâk leh Thlarau Thenhlimh kawmhnâk chu nan ektê sinah um seh.