1 TIMOTHE

1 TIMOTHE

¹ Pawl, Pathian ruang hawng kan suahtu leh Krist Jisu kan lungumnâk ruat mi hâwi hen, Krist Jisu mifial nih chun: ² Lungnâk ah ka fa duhtak Timothe sinah: Pathian, Pa leh Krist Jisu kan Lalpa sinah thawk hen zângfahnâk khuaruatnâk leh remnâk um seh. ³ Makedonia leiah ka kal liauah Ephesi ah um ko ding hen kan ngiar hâwi hen um kan duh nget rih: mi zeimaw mi nih lung dân diklo tla an sîntir na mi chu bâng ding hen thu na pêk na ding asi. ⁴ Thuanthu leh thlâktu tla thâwngthâng dawnglo nih chun lungnâk hen theih mi Pathian thiltum zûl ngâk hen elnâk salam a suah tâwn ruangah chubang tla chu bâng ding hen simh na. ⁵ Nunsimhnâk san chu thinlung thenhlimh leh sia leh ṭha theihnâk thiang leh lungnâk tak thawk hen a hawng suak mi dâwtnâk chu an nei khonâk ding hen asi. ⁶ Chu mi thawk hen mi zeimaw mi chu an pial le, thudo-tla-lo simnâk ah lampi an vâi. ⁷ Anmah thusim umzia leh zumhkâi tak hen an thusim umzia theih ṭung lêm lo hen Pathian dân sîntirtu siding an duh. ⁸ Mi nih dân hi a mang dân ding hâwitê hen a mang chun a ṭha asi ti kan theih. ⁹ Hi tla hi theih sele, Dân hi mi ṭha rangah siam asi lo le, dân siarlotu, buartu tla, Pathian sunhsaklotu tla, misual tla, mi thenhlimh lo tla, Pathian zahlotu tla, pa mawh nu mawh thahtu tla, ¹⁰ pung mang tla, tawkua hur tla, minung fîrtu tla, mi âwkrâwl tla, ¹¹ âwkrâwl a siatsirhtu tla, sawrtlâk Pathian Thâwngthâng Ṭha rokual sîntirnâk dik ka sinah kiltir mi hâwi silo hen, thil dang a um mi tla zawzawng rangah siam asi. ¹² Kan rianṭuan ah hawng kan chaktirtu kan Lalpa Jisu Krist sinah lâwmthu ka sim asi: zumhkâi hen hawng ka ruat le, amah rianṭuantu ah hawng ka ruat ruangah a sinah lâwmthu ka simh. ¹³ A lânah simsâwitu leh nehsawhtu leh zirhtu sikhawmsele lunglo hen theihlo mi ka si ruangah khuaruatnâk ka tawng asi. ¹⁴ Chun, kan Lalpa zângfahnâk chu lungnâk leh Krist Jisu dâwtnâk hen cherkhet hen ka lakah a liam rawh. ¹⁵ Krist Jisu misual tla ruangsuah ding hen laikulh ah hin a hawng kal ti hi zumh a kâi hen thungâi pawm a tlâk asi, an lakah misual chem ka si hi. ¹⁶ Sikhawmsele, hi ruangah hin asi khuaruatnâk ka tawng mi chu, Jisu Krist nih chun misual chem ka lakah hin â dawnhkho zia zawzawng a langhtir khonâk ding hen hi nûnah zungzâl nungnâk nei ding hen amah lungtu tla rangah zûnzauhnâk dingah. ¹⁷ Lalchem zungzâl hen um mi râwk kho lo, muh kho lo, Pathian tak cho chu zungzâl chawnglawmh leh rokual hen um seh, Amen. ¹⁸ Ka fa Timothe, a lânah na thâwngthâng an simkan mi hâwi hen, chu nunsimhnâk thu chu kan kiltir, chubang hen chun donâk ṭha chu na do khonâk ding hen, ¹⁹ lungnâk leh sia leh ṭha theihnâk thiang tak tleih thlir hen, mi zeimaw mi nih chubang chu lawnh hen lungnâk leikângah lawng kuai hâwi hen anna râwk rawh. ²⁰ Chubang tla lakah chun Humenai leh Alekzandar an si le, Pathian simsiat an bâng khonâk ding hen annih chu Setan thiltikhonâk lakah ka pêk na asi.

¹ Chun a masachem hen, deihnâk, thlachamnâk, ngiarnâk, lâwmthu simnâk tla mi zawzawng rangah siam piak na ding hen ka nan fawrh. ² Lal tla leh thuneitu tla zawzawng rangah khawm Pathian sunhsak leh zahkâi tak a rem leh lungngam hen kan um khonâk ding hen. ³ Chu chu ruang hawng kan suahtu Pathian ngaihnâk ah a ṭha hen lawmh tlâk asi; ⁴ anih nih chun mi zawzawng ruangsuah ding leh thudik theih ding hen a duh asi. ⁵ Pathian pakhat cho a um le Pathian leh minung karah thu lanhtu pakhat a um, chu chu Jisu Krist asi. ⁶ Mi zawzawng tlanhnâk ding hen a pêk mi chu: chu chu a tik tak vima ah theihtir hen a um ding asi; ⁷ chu chu ti ding hen phuangtu ah leh mifial ah ruat ka si, thudik ka sim, ka âwkrâwl lo, lungnâk leh thudik ah phundang tla sîntirtu ah ruat ka si. ⁸ Chun, mipa tla nih munkip ah kut thenhlimh phar hen thinrun lo leh a êl lo hen thlacham sele ka duh asi; ⁹ chu hâwi ber hen nunau tla a dâithlanh lo leh a thuam tuk lo hen thuam mah zuam tâwk hen a thuam sele, sam phiar hen mawh ngûn hen mawh âitikep lung hen mawh puan man tamtak tla hen mawh a thuam lo hen; ¹⁰ sikhawmsele, nunau, Pathian ka sunhsak â ti mi tla chu amah zuam tâwk hen thil ṭha ti hen, a thuam sele ka duh. ¹¹ Nunau nih ê-aw ngâi tak hen dâisip hen um tum seh. ¹² Sikhawmsele, nunau nih sîntir ding hen chun ka siang lo, mipa tlûnah thuneih khawm ka siang lo, dâisip hen um dauh na seh. ¹³ Adam chu siam masachem asi le, chu nûnah Evi chu siam asi. ¹⁴ Chun, Adam chu perpet hen a um lo le, nunau lam chu perpet hen a um le, buarnâk ah a tlû rawh. ¹⁵ Sikhawmsele lungnâk leh dâwtnâk leh thenhlimhnâk nei hen thinlung rep tak hen nunau chu a um kumza chun fa tla a ring ruangah ruangsuah hen a um lai.

¹ Âuzawng kawhmi hotu si a duh chun rianṭuan ṭha a duh asi, ti hi a dik asi. ² Chun, kawhmi hotu chu simsâwinâk um lo mi, nupi pakhat nei mi, â sûm kho mi, mi thinlung dik tak, mirep, mi lawmh dân thiam, sîntir thiam mi, ³ zûrît mang lo, vuak mang lo mi, a nunnêm mi, ṭhatlo rawt lo mi, tangka sum sunhsak lo mi, ⁴ zahkâi tak hen fa tla kilkâwi hen mah dâwngsungkhur rep tak hen lâirêl thiam mi si ding asi. ⁵ Mi nih amah dâwngsungkhur lâirêl men rep hen a rêl thiam lo chun Pathian kawhmi zeitin a zauhkhenh kho lai? ⁶ Lung thar mi si ding asi loh, chu lo chun â putso lai le, diabol mawhphurhnâk â ting sual lai. ⁷ Chubang lo khawmah, lênglei ah mi sawr hen a um ding asi, chu lo chun simsiat hen a um lai le, diabol thang ah awh hen a um sual lai. ⁸ Chu hâwi ber hen kawhmi tla rianṭuantu tla chu mi zahkâi an si ding asi; mi ka tam, zû duh mi lêpnâk nâwmtâm ah hamkah mi an si ding asi loh. ⁹ Sia leh ṭha theihnâk thiang hen lungnâk thudik tleihtu an si dauh ding asi. ¹⁰ Chun, chubang khawm chu nik hen um masa seh, chu nûnah simsâwi um lo an si chun kawhmi murui rianṭuan leikâng rianṭuan na seh. ¹¹ Chu hâwi ber hen an nupi tla mi zahkâi an si ding asi, ka tam lo hen sûm kho mi leh zeizawng ah zumhkâi mi an siding asi. ¹² Kawhmi rianṭuantu tla chu an fa tla leh anmah dâwngsungkhur kilkâwi kho mi, nupi pakhat nei mi si seh. ¹³ Kawhmi rianṭuan leikâng ṭha tak hen ṭuan rawh mi tla nih chun Krist Jisu ah dîrnâk ṭha tak leh lungnâk leikângah râlṭhatnâk lian tak anna ting. ¹⁴ Sâwtlotê ah na sinah hawng kal ding lungum hen hi bang thu hi na sinah ka rîn asi. ¹⁵ Sikhawmsele sawt ual ka um dah ah Pathian dâwngsung tla lakah mi zei hâwi hen an um ding me si na theih khonâk ding hen rîn asi, Pathian dâwngsung tla chu Pathian nung kawhmi tla, thudik tung leh ngauhnâk an si. ¹⁶ Chun, Pathian sunhsaknâk thuthup chu êi kho lo rê hen a rokual asi: "Taksa ah a hawng lang, Thlarau ah diknâk langhtir ding hen, vânmifial tla nih muh hen Phun tla nâwngah phuang ding hen, laikulh ah hin mi nih lung hen, vân ah lâk hen a um.

¹ Sikhawmsele, hi nûnah chun mi zeimaw mi tla chu mi âwkrâwl tla perpetnâk ruangah veihnâk thlarau tla leh khuri tla sîntirnâk thu sunhsak hen lungnâk chu an bângtâk mi hi Thlarau nih chun fiang tak a sim. ² Chubang mi âwkrâwl tla chu anmah sia leh ṭha theihnâk ngelchel hen thîr lîn hen belh mi hâwi an si le, ³ nupa umh an khap tâwn le, zei lo ei ding tla, thudik theih hen lungtu tla nih lâwmthu sim hen ting ding hen Pathian nih a siam mi tla chu ei lo ding an ti tâwn. ⁴ Pathian thilsiam kip hi a ṭha le, lâwmthu sim hen ting asi rawh chun zeikhawm duhlo ding asi loh; ⁵ Pathian thu leh thlachamnâk hen thenhlimhtir asi rawh ruangah. ⁶ Chubang sîntirnâk tla, na zûl mi sîntirnâk dik leh lungnâk thu tla ah thlarau ah na châwm hâwi hen unau tla na sîntir na chun Jisu Krist to-aw ṭha tak na si lai. ⁷ Sikhawmsele, Pathian neilo mi thuanthu salam duh lah. Pathian sunhsak mi si ding hen a zawngh rawh; ⁸ taksa zawnghnâk hi ṭha chu a ṭha bâk le, Pathian sunhsaknâk nih chun tuah mi nungnâk leh nungnâk hawng um ding mi pêk ding hen tiamnâk a nei ruangah zeizawng ah a ṭha asi. ⁹ Hi thu hi zumh a kâi hen thungâi pawm a tlâk asi. ¹⁰ Chun, kan lungumnâk chu Pathian nung ah chun kan ngauh ruangah hamh tak a ṭuan hen kan ti rarâm asi, anih chu mi zawzawng Ruangsuahtu asi, lungtu tla rangah asi dauh chem. ¹¹ Chubang thu chu pêk le, sîntir rawh. ¹² Na ngâksia nâk âukhawm nih zauhnawmh lah seh, thusim leikâng tla, changh dân tla lakah, na dâwtnâk, zumhnâk leh thenhlimhnâk lakah lungtu tla zauhtawnh ding hawng si rawh. ¹³ Ka hawng kal lân lo chu, Pathian thu rêl leikâng tla leh, thusim leh sîntirnâk leikâng tla ah teiririal tak hen a mang rawh. ¹⁴ Khuavâng tla simhkannâk thu na sinah pêk asi hâwi hen leh na tlûnah Upa tla kut thângnâk leh nangmah lakah Thlarau lei thilpêk na ting mi kha thlahthlamh lah. ¹⁵ Mi zawzawng lakah mâilei na fûk ti a lang khonâk ding hen, chubang thil tla lakah chun taimâk suah hen a mang rawh. ¹⁶ Nangmah leh na sîntirnâk ah chun a thiamthih rawh, chubang tla thil chu ti hen nangmah leh na thusim ngâitu tla chu ruang na suah awt asi.

¹ Upa tla chu fâi lah le, pa hâwi hen lêm dauh na, tlangvâl tla chu unau hâwi hen, ² tarnu tla chu nu hâwi hen, nungâk tla chu thenhlimh tak a farnu hâwi hen. ³ Numei tatak tla chu zah rawh. ⁴ Sikhawmsele, numei âuzawng nih fa mawh tu tla mawh nei sele, chubang tla nih chun anmah insung lei Pathian sunhsak hen um leh anmah ringtu tla tlûnah ṭha bâk na seh; chu chu Pathian lawmhkâng asi. ⁵ Numei tatak amah lâwng hen a um mi nih chun Pathian tlûnah lungumnâk a nei thlir le, sûn leh zân hen deih leh thlacham hen a um kumza tâwn. ⁶ Sikhawmsele, numei mah nuamhnâk leikângah â mang mi chu a dam liau khawmah a thi chia asi. ⁷ Anmah lakah simsâwinâk an tawnglonâk ding hen, hi thupêk hi pêk na rawh. ⁸ Sikhawmsele, âuzawng nih mah unau rualsia tla ruatkan lo hen, mah insungkhur mi men a ruatkan lo chun, lungnâk chu a pheh khalh le, lunglo mi tla ngâk hen a sual dauh asi. ⁹ Numei kum sâwmruk ngâk a upa asi lo chun numei ah siar lah. Chu lo khawmah, veikhat pasal nei rawh hen; ¹⁰ chun, thil ṭha ti lakah a minthang mi: nunau mah fa le zauhkhenh thiam, a in ah khual tla tlung hen, Pathian mi le kê ṭâwl leh an nawknâk ah ṭangpi hen, thil ṭha tinâk kipah â pêk mi asi ding asi. ¹¹ Sikhawmsele, numei a nungâk dauh mi chu telh lah; pasal nei an duh tikah Krist chu hawitâk hen, ¹² a sinah an thutiam masa chu lawnh hen an um ruangah mawh hen an um tâwn. ¹³ Chun, chu lo khawm chu an tawihnâk in thawk hen in dangah anna kah vima le, zângzêt khawm an mang; zângzêt lâwng khawm silo hen thu sim lo ding mi sim hen kâ tam leh mi thilti sim le rêl piak an mang asi. ¹⁴ Chun, numei nungâk dauh mi tla nih chun pasal nei sele, fa tla nei sele, dâwngsung lâirêl sele, simsawinâk ding tik dêngkhâwng rerêng mêlma chu tawngtir lah sele ka duh asi. ¹⁵ Tu khawmah mi zeimaw mi nih chun Setan lei fûk hen an pialtâk rawh ruangah. ¹⁶ Lungtu nunau âuzawng nih a dâwngsung lakah numei a nei chun, amah nih zauhkhenh seh; kawhmi chu nawktir lah seh; numei tak tla chu an zauhkhenh kho ding hen. ¹⁷ Kawhmi upa lâirêl ṭha mi chu a lehnih hen chawnglawmh tlâk ah ngaih si seh, thusim leh sîntirnâk ah anna hamh mi tla chu sawr tlâk hen ngaih khun si seh. ¹⁸ Pathian lasui thu nih chun, "Chawchal nih fâng a chîl liauah a mûr phuar lah," a ti, "Rianṭuantu chu lawh tawng tlâk asi," a ti ber. ¹⁹ Kawhmi upa an phiarnâk chu theihtu panih mawh pathum mawh kâ thawk hen mi lo chu ngâi lah. ²⁰ Thilsual titu chu mi zawzawng mâika ah nunsimh rawh, midang tla khawm an ṭih bâk khonâk ding hen. ²¹ Hi bang thu hi duh bîk neilo hen thliar le dang neilo hen Pathian leh Krist Jisu leh vânmifial thîm mi tla mitmuh ah zâwt ding hen semsêngâi tak hen ka nan theihtir. ²² Âu tlûn khawmah kut thâng set sut lah, midang sualnâk tla lakah telnâk nei ber lah, a thenhlimhtir kumza rawh. ²³ Tî lâwng din mi si lah le, na paw ruangah leh na damlo nget ruangah uain tâwmtê din tâwn rawh. ²⁴ Mi zeimaw mi sual tla chu a lang ko le, lâirêlnâk ah a tleng masa tâwn; mi zeimaw mi lam chu an dunglei ah a zûl tâwn. ²⁵ Chu hâwi ber hen thil ṭha hi a lang ko mi a um, chubang hâwi lo mi tla khawm chu thuh kho asi loh.

¹ Pathian min leh a sîntirnâk thu simsiat hen a um lonâk ding hen sal si mi tla nih chun anmah hotu tla thu zeizawng ah chawnglawmh tlâk ah ruat na seh. ² Chun, sal, lungtu, hotu nei mi tla nih chun unau an si ruangah siarlo lah na seh, sikhawmsele mavuanâk tawngtu tla chu lungtu leh duhtak tla an si ruangah an rianṭuan khun na seh. Chubang thu chu sîntir le, fawrh rawh. ³ Mi âuzawng nih sîntirnâk dang a sîntir hen, kan Lalpa Jisu Krist thudik leh Pathian sunhsak lei sîntirnâk a lung lo chun, ⁴ anih chu â putso le, zeikhawm a theih lo le, theih ngâk hen êl leh thukalh leikângah chun a â lehlam asi, chubang thawk chun ngarhnâk, sualnâk simsiatnâk, ṭhalo leikângah lungnâk, êlratnâk tla a suak tâwn le; ⁵ chu hâwi êlrât mi tla chu thinlung ṭha lo nei leh thudik neilo mi Pathian sunhsak hi dingchangnâk mawh titu an si. ⁶ Pathian sunhsaknâk hi lungâwinâk â tel chun dingchangnâk tak asi rêng asi. ⁷ Laikulh ah hin zeikhawm kan lûtpi lo, zeikhawm kan suakpi kho ber lo. ⁸ Sikhawmsele ei ding leh aih ding nei hen, chubang lakah chun kan lungâwi lai. ⁹ Sikhawmsele, neih tum mi tla chu lêmnâk tla ah, thang lakah, âtkâi leh râwkkhonâk duhnâk tamtak ah an tlû tâwn. Chubang duhnâk tla nih chun siatnâk leh râwknâk ah chun mi tla a piltir tâwn. ¹⁰ Tangka duhnâk hi sual kip bul asi le, chu chu mi zeimaw mi nih an ngarh le, lungnâk chu an kaltâk le, anmah leh anmah lawksawngnâk tamtak hen an thinlung an khuai. ¹¹ Sikhawmsele, nang, Pathian mi chubang thu chu tektâk le, repnâk, Pathian sunhsaknâk, lungnâk, dâwtnâk, dawnhkhonâk leh nunnêmnâk tla chu zûl rawh. ¹² Lungnâk zuamnâk ṭha chu ti le, zungzâl nungnâk chu tleih rawh; chu chu ting ding hen kawh na si; theihtu tamtak tla mitmuh ah ṭanhnâk ṭha chu na ṭanh rawh kha. ¹³ Pathian thu zeizawng nungtirtu leh Krist Jisu, Pontia Pilat mâika ah ṭanhnâk ṭha ṭanhtu mitmuh ah thu nan pêk. ¹⁴ Kan Lalpa Jisu Krist a hawng a langh lân lo chu thupêk kha thenhlimh tak leh simsâwinâk um lo hen tleih rawh. ¹⁵ Chu langhnâk a tik takah sawrtlâk Pathian tak cho, lalchem tla Lalchem, lalpa tla Lalpa nih chun a zauhtir lai. ¹⁶ Amah cho nih thih kholonâk a nei, chêu naih kholo rê ah a um le, amah chu âukhawm nih an muh dahlo, muh khawm an muh kho ber lo, amah sinah zungzâl chawnglawmhnâk leh thiltikhonâk um seh. Amen. ¹⁷ Hi laikulh minei tla hi a zûm lo ding leh neihnâk zumhkâilo ah an lungumnâk ngauh lo hen, thil zawzawng lâwmnâk dingah hawng kan pêktu Pathian sinah ngauh ding hen nunsimh na rawh. ¹⁸ Thil ṭha ti ding hen, thil ṭha ti tam ding hen, hawk hen, midang tla vauh bâk ding hen simh na. ¹⁹ Nungnâk, nungnâk tatak chu an kil khonâk ding hen tik hawng tlung ding mi rangah chun lungphûm ṭha tak an rangah khawng ding hen fawrh na. ²⁰ Timothe, na sinah kiltir hen um mi chu ṭha tak hen kil. Pathian zahlo leikâng thu sim salam leh diklo tak hen finghnâk an ti mi êlnâk hi mâk. ²¹ Chu chu zeimaw mi nih nei hen anna ruat le, lungnâk lampi chu an pialtâk rawh. Pathian zângfahnâk nan ekte sinah um seh.