1 THESALONIKA

¹ Pawl, Silas leh Timothe nih chun: Pa Pathian leh Lalpa Jisu Krist ah Thesalonika khua mi kawhmi tla sinah: Zângfahnâk leh remnâk nan sinah um seh. ² Kan Pathian leh Pa mâika chun, lung ruangah nan thilti zia tla, zângfahnâk ruangah nan ṭuan zia tla, kan Lalpa Jisu Krist lungumnâk ruangah nan felfê zia tla kha philh lo a theih kumzâ hen, kan thlachamnâk tla ah chun nan min lam hen nanmah tla zawzawng ruangah Pathian sinah lâwmthu kan sim tâwn asi. ⁴ Pathian ah duhtak le tla, a nan thîm na zia kha kan theih le, ⁵ kha hâwi hen kan Thâwngthâng Ṭha chu thu cho hen nan sinah a tlung lo le, thiltikhonâk leh Thlarau Thenhlimh leh thungâi tak a theihfiangnâk hen a hawng tlung dauh kha; nanmah kawngkâ ruat hen zei hâwi mi me kan si ti nan theih asi. ⁶ Chun, thu chu hamhnâk tuar bû hen, Thlarau Thenhlimh ah lâwm hen nan pawm le, kanmah leh Lalpa châwngtu nan si. ⁷ Chun Makedonia leh Greek ram ah lungtu zawzawng tla rangah zauhtawnhnâk nan hawng si kha. ⁸ Lalpa thu chu nanmah tla thawk hen a hawng zan rawh le, Makedonia leh Greek ram ah cho silo hen, mun kipah khawm Pathian leiah nan lung zia chu a thang rawh le; chun, kannih nih zeikhawm sim ding rerêng a ngâi lo rawh. ⁹ Anmah tla ngelchel nih nan lakah zei hâwi sunhsaknâk me kan tawng kan thâwngthâng chu an theihtir na tâwn; Pathian nung leh dik tak rianṭuan ding leh a Fapa Jisu thihnâk lakah mi a thawh mi leh Pathian thinrunhnâk hawng tlung ding lakah hawng kan ruangsuahtu Jisu kha vân a mi ngâk ding hen, ruk tla chu, Pathian leiah nan hawitâk zia khawm kha an theihtir na ber tâwn asi.

¹ Unau le tla, nanmah kan veh na nâk kha a thawt lo, ti nanmah ngelchel nih nan theih asi; ² a thawt ngangâk hen, chu lân chun nan theih rawh hâwi hen Philipi khua ah hamh tuar leh ningzakkâi tak hen siam kan si nûn khan nawk tak bû khawm hen Pathian Thâwngthâng Ṭha nan sinah sim ding hen kan Pathian lakah chun kan râl a ṭha lehlam kha. ³ Kan thusim hi âwkrâwl lakah suak asi lo le, nâwmtâm lakah suak khawm asi lo, ngamlêmnâk hen khawm asi lo; ⁴ Thâwngthâng Ṭha kiltir ding hen Pathian nih ṭha hawng kan ti hâwi hen, minung lawmhtir ding hâwi si lo hen, kan thinlung niktu Pathian lawmhtir dauh hen thu kan sim dauh tâwn asi. ⁵ Zeiliau khawmah sawr telê nâk mawh, hamkah phenhnâk mawh kan mang mi an theih dah loh ti nan theih kha, ⁶ Pathian hawng kan theihpitu asi; Krist mifial ka si ruangah mi rangah tuar har tak sikhawmsele, minung lakah, nannih lak khawmah midang lak khawmah chawnglawmhnâk kan hâwl mi an theih dah loh. ⁷ Nu nih nau a pawm mi a dâwt hâwi hen nan lakah nunnêm tak hen kan um dauh kha. ⁸ Chu hâwi ber hen, kan duhzia tak nan hawng si rawh ruangah khan kan duh ṭualmâl na, Pathian Thâwngthâng Ṭha cho silo hen, kanmah nungnâk khawm an pêk na rê kan huam. ⁹ Unau tla, kan rianṭuan hamhzia leh kan rianṭuan dît zia kha nan theih ko kha; nan lakah âukhawm kan rittir na lonâk ding hen a sûn a zân ṭuan hen Pathian Thâwngthâng Ṭha kan simh na tâwn kha. ¹⁰ Nannih lungtu tla tlûnah thenhlimh tak leh rep tak leh simsâwi kawp lo tak a kan um zia kha hawng kan theihpitu tla nan si, Pathian hen. ¹¹ Amah ram leh rokualnâk ah an kawh natu Pathian mi si tlâk a nan um khonâk ding hen, pa nih a fa tla tlûnah a ti hâwi hen, fawrh leh lungngamh leh an theihtir na hen nanmah lak chiauah kan ti chiau na zia nan theih kha. ¹³ Hi ruang hin bâng lo hen Pathian sinah lâwmthu kan sim tâwn, Pathian thu kanmah thawk hen nan theih mi, nan zûl liau khan minung thu zûl hen nan zûl lo le, Pathian thu zûl hen nan zûl dauh ruang khan; chu chu Pathian thu asi rêng, nanmah a lungtu sungah ṭuan tâwntu ber chu asi. ¹⁴ Unau le tla, Judai ram ah Pathian kawhmi murui Krist Jisu a um mi tla châwngtu nan hawng si kha, annih nih Juda tla lakah an tuar hâwi khan, nannih khawm nih nanmah ram mi tla lakah nan tuar bâk asi, ¹⁵ chubang Juda tla nih chun Lalpa Jisu leh khuavâng tla khawm an thah le, kannih khawm hawng kan nar le, Pathian an lawmhtir lo, mi zawzawng an kalh tâwn; ¹⁶ ruangsuah an si khonâk ding hen Phundang tla sinah thusim an khap tâwn; an sual tahnâk khattir tâwn ding hen: Sikhawmsele, thinrunhnâk chu dawng rît hen an tlûnah a hawng tlung rawh. ¹⁷ Sikhawmsele, unau le tla, sâwtlotê rangah nanmah tla hen thinlung leikângah a ṭhen lo hen, mêl cho a muh lo hen kan um rih ruangah duh ûk bû hen nan mêl muh ding hen thungâi kanna ṭang asi! ¹⁸ Nan sinah hawng kal kan tum thlir le, kei Pawl ngelchel khawm nih hin veinih tiang hawng kal ka tum ngengê rawh, sikhawmsele, Setan nih hawng kan kham tâwn asi. ¹⁹ Kan lungumnâk mawh, kanna lâwmnâk mawh, kan lallukhuh putso mawh zei me asi ne? A hawng tikah kan Lalpa Jisu mâika ah chun nanmah ngelchel nan si awt mi asi lo ma? ²⁰ Nanmah tla hi kan putso na mi leh kanna lâwmnâk nan si.

¹ Chun, kan tuar kho lo rawh nûnah chun Athen khua ah kanmah cho mâk hen um sele ṭha kan ti le, ² Timothe, kan unaupa Krist Thâwngthâng Ṭha leiah Pathian rianṭuantu hi, an birhtir na ding leh lungnâk leiah lungngamh na ding hen, kan hawng fial asi. ³ Hi bang hamhtuarnâk ruang hin âukhawm anna nîn lonâk ding hen, hi bang hi tuar ding hen ruat kan si ti nanmah ngelchel nih nan theih. ⁴ Nan sinah kan um liau khan hamhtuar ding kan si ti kan simhkan na rawh kha; chu hâwite hen a hawng tlung rawh ti nan theih kha. ⁵ Churuang chun ka tuar kho lo nûnah, lêmtu nih chun an thlûk na lebang lai le, kan ṭuan hamhnâk chu a thawt lebang lai ti hen, nan lung zia ka theih khonâk ding hen mi ka hawng fial asi. ⁶ Sikhawmsele, Timothe chu nan sin thawk hen tuah kan sinah a hawng tlung hen, an muh na ding kan duh hâwi hen thungâi hawng kan muh ding duh hen zângfah tak hen hawng kan theih tâwn tih thu leh, nan lungnâk leh zângfahnâk thâwngthâng lawmhkâi hawng kan put. ⁷ Churuang chun, unau tla, kan lawksawng leh hamhnâk zawzawng ah, nan lungnâk ruangah nan tlûnah lungngam tak hen kan um rawh. ⁸ Tu chun kan nung rawh, Lalpa lakah bir tak hen nan dîr chun. ⁹ Nan mêl kan muh khonâk ding leh nan lungnâk leiah nan samphângnâk kan chereh kho na nâk ding hen ¹⁰ a sûn a zân hen thungâi tak a thlacham hen, kan Pathian mâika ah nan lakah kanna lâwmnâk zawzawng ruang hin nanmah leikâng thu ah Pathian sinah zei lâwmthu me kan sim rûl kho bâk lai aw? ¹¹ Chun, kan Pathian, kan Pa tak nih chun, kan Lalpa Jisu khawm nih, nanmah leikângah hawng kan rui seh! ¹² Chun, nanmah leikângah zângfahnâk kan nei hâwi hen, nanmah leikângah zângfah tawnhnâk leh mi zawzawng leikângah zângfahnâk chu Lalpa nih chun an pungtir piak na hen an chawngtir na seh. ¹³ Chun, kan Lalpa Jisu a mi thenhlimh zawzawng tla hen a hawng kal tikah, kan Pathian leh kan Pa mâika ah nan thinlung tla thenhlimhnâk leikângah simsâwi kawp lo hen a nan birhtir kho na lai.

¹ Chun, unau le tla, a dawnghchem ah chun, nan umdân ding leh Pathian nan lawmhtir ding dân tuah nan umdân hâwi hi kan sinah mi nanna ting hâwi khan nan châwng khunnâk ding hen Lalpa Jisu ah kan ngiar na hen kan fawrh na asi. ² Lalpa Jisu zârah zei thu tla me kan pêk na nan theih kha. ³ Pathian duhzia nan thenhlimhnâk ding chu hi hi asi, duhnâk hi bâng tâk ule; ⁴ Pathian theihlo Phundang tla hâwi hen hur-khuang leikângah duh lo hen thenhlimh leh chawnglawmh hen mah nupi kil thiam chiau seh; ⁶ chu leikângah chun âukhawm nih buar hen a unau lakah thil ṭha lo ti lah seh; Lalpa chu chu hâwi thil titu zawzawng lehrûl samtu asi ruangah kannih khawm nih kan simkan hen ka nan theihtir na rawh hâwi khan. ⁷ Pathian nih nâwmtâm ding hen a kan kawh lo le, thenhlimh ding hen hawng kan kawh dauh asi. ⁸ Churuangah, a siarlotu nih chun minung a siarlo asi lo le, Pathian, a Thlarau Thenhlimh a nan pêk tâwn natu siarlo mi asi dauh. ⁹ Khawmsele, unau tla, dâwt leikâng thu chu rîn piak nan herh lo, a dâwt tawnh ding hen nanmah ngelchel Pathian sîntir hen nan um ruangah. ¹⁰ Makedonia ram ah unau um tla zawzawng tlûnah chu chu nan ti bâk asi. Sikhawmsele, unau tla, nan châwng khunnâk ding leh dâi dauh hen um leh, mah thilti leh thu kan pêk na mi hâwi khan kut hen ṭuan nan tum thlirnâk ding hen kan fawrh na asi; ¹² chun lênglei mi tla tlûnah dawh tak hen nan um kho lai le, zeikhawm nan samphang kho lai loh. ¹³ Sikhawmsele, unau tla, midang lungumnâk rerêng neilo tla hâwi a nan lawksawng lonâk ding hen, thi mi tla thâwngthâng nan theih loh ka duh lo. ¹⁴ Jisu a thi le, a thawknawlh rawh ti kan lung ṭung chun Jisu lakah thi mi tla chu Pathian nih amah rual hen a hawngpi na bâk lai. ¹⁵ Hi hi Lalpa thu hen nan sinah ka sim asi, kannih Lalpa hawng kal tiang a nung hen um rih mi tla nih hin a thi mi tla chu kan lehkhanh rîlmâl lai lo ti hi. ¹⁶ Lalpa tak chu âu hâu hen, vânmifial chungnungchem hâu hen, Pathian tâwtawrâwt hâu hen, vân thawk hen a hawng ṭum awt dangâiah; chun, Krist ah thi rawh tla chu an thawk masa lai le; ¹⁷ chu nûn chun kannih nung a um rih mi tla hi boruak ah Lalpa dawng ding hen amah rual ah sûm tla lakah khin lâk hen kan um lai; chun, zungzâl hen Lalpa sinah kan um lai rawh. ¹⁸ Churuangah hi thu hen lungiam a sak tawnh u.

¹ Sikhawmsele, unau tla, a tik leh a ni thu rerêng rîn piak nan herh lo. ² Lalpa Ni chu zân ah mifîr hâwi hen a hawng tlung awt ti nanmah ngelchel nih fiang tak hen nan theih ruangah. ³ "Lungngamnâk leh himnâk ti hen an sim liau takah nunau nganfâk hâwi hen lâkkhat ko ah veihnâk an tlûnah a hawng tlung lai le, an âwl rîlmâl lai loh. ⁴ Sikhawmsele, unau tla, nannih lam chu chu Ni nih chun mifîr hâwi hen a nan tanh na ding hen mûi ah nan um lo le; ⁵ chêu fa tla leh ni fa tla nan si ver ruangah zân ah mi kan si lo le, mûi ah mi kan si ber lo. ⁶ Churuangah midang tla hâwi hen kan it ding asi lo, kan meng hen kanna ringrâwn dauh lai. ⁷ It mi tla chu zân ah asi an it tâwn; zûrît tla khawm chu zân ah asi an rî tâwn. ⁸ Sikhawmsele, kannih lam chu ni a mi kan si ruangah lungnâk leh zângfahnâk phâw chu sawng hen, ruangsuahnâk lungumnâk chu lukhuh ah mang hen kanna ringrâwn lai. ⁹ Pathian nih thinrunhnâk tuar ding silo hen kan Lalpa Jisu Krist zârah ruangsuahnâk tawng ding hen hawng kan ruat mi asi dauh ruangah; ¹⁰ kan nung khawmah kan thih khawmah amah hen munkhat a kan nung khonâk ding hen anih chu kan thih rûlah a thi asi. ¹¹ Churuangah a fawrhtawnh hen, a ṭhatvaktir tawnh chiau u, nan ti tâwn hâwi hen. ¹² Sikhawmsele, unau tla, nan lakah hamh leh, Lalpa a nan hotu a um leh a nan simhfâi natu ding leh an rianṭuan ruangah zângfah a thungâi sung-û tir ding hen ka nan ngiar na asi. A rem dut hen um u. ¹⁴ Chun, unau tla, ka nan ngiar na, dân lo hâwi a um tla chu nunsimh ule, thinlung dî tla chu fawrh ule, chaklo tla chu ṭangpi ule, mi zawzawng lakah dawnhkho tak hen um u. ¹⁵ Âukhawm nih âu sual khawm sual hen rulh lo ding hen a thiamthih u; thil nanna ti piak tawnhnâk leikângah leh mi zawzawng tlûnah nanna ti piaknâk leikâng khawmah a ṭha lei vial ti kumza u. ¹⁶ Lâwm kumza u, ¹⁷ bâng lo hen thlacham ule, ¹⁸ zeizawng ah lâwmthu sim kumza u; chu chu nanmah lei thu ah Krist Jisu ah Pathian duhzia asi ruangah. ¹⁹ Thlarau chu mih lah ule; thusim tla zauhnawmh lah u; ²¹ zeizawng nik dauh ule, a ṭha mi vial zâwt ule, ²² sual hâwi hen a lang mi zawzawng lakah a thliar u. ²³ Chun remnâk Pathian tak nih nan pum hen an thenhlimhtir na seh; chun, nan thlarau leh nan thinlung leh nan taksa chu kan Lalpa Jisu Krist a hawng kal tik chun simsâwi kawp lo hen a pum hen hum hen um seh. ²⁴ A nan kawh natu chu zumh a kâi le, ti khawm a ti lai. ²⁵ Unau tla thla hawng kan cham piak u. Unau zawzawng tla kha châwchawk thenhlimh hen chibai hawng ka bûk piak u. ²⁷ Hi lasui hi unau zawzawng sinah rêl ding hen Lalpa min hen kan ngiar na. ²⁸ Kan Lalpa Jisu Krist zângfahnâk chu nan sinah um seh.