1 PETER

1 PETER

¹ Hi lasuikuat hi Jisu Krist mifial Peter thawk hen mi asi: Pontia ram, Galatia ram, Kapadokia ram, Asia ram leh Bithinia ram tla ah rekrâwi hen an um mi Pathian mi thîm tla rangah asi. ² Pathian thiltum hâwi hen Thlarau ah a nan thenhlimhtir na ding leh Jisu Krist ê-aw ngâi ding hen, a thisen hen a nan thiangtir na ding hen amah nih a nan thîm na asi. Nan tlûnah zângfahnâk leh remnâk pungtir hen um seh. ³ Kan Lalpa Jisu Krist Pathian leh Pa chu sawr hen um seh: Anih nih chun a siherhnâk fâk tak hâwi hen, mithi lakah mi Jisu Krist thawknawlhnâk ruangah lungumnâk nung tawng ding hen nungnâk thar a hawng kan pêk. ⁴ Churuangah, a mi tla rangah Pathian nih a siah mi malsâwmnâk rokual tak tla ting ding hen kan chuanh asi. Chu tla chu nâwmtâm kâi lo leh nawh kholonâk mun vân ah nan rangah a nan kil piak na asi. ⁵ Ruangsuahnâk tik dawnghlei ah hawng lang ding mi timhtuah chia chu tawng ding hen lungnâk ruangah Pathian thiltikhonâk hen vêng mi chu nan si. ⁶ Niknâk tamtak nan tuar mi ruangah sâwtlotê kar nan rangah ngaihsiatkâi khawmsele chu lak chun a lâwm u. ⁷ An thiltum chu nan lungnâk a bir asi ti niknâk asi. Ngûn â râwk kho mi men mei hen an nik, chu hâwi hen ngûn ngâk hen a sung dauh mi nan lungnâk khawm chu um vima ding hen nik bâk ding asi. Jisu Krist a hawng lang tikah nan rangah chawnglawmhnâk leh rokualnâk leh zahkâinâk a hawng si kho hi. ⁸ Amah chu muh lo khawm ule, nan dâwt le, chun amah chu tuah nan muh lo khawmsele nan zumh; chun sim kho lo rê mi lâwmnâk rokual hen a nan khattir na asi. ⁹ Nan lungnâk thiltum, nan thlarau tla ruangsuahnâk chu nan tawng ruangah. ¹⁰ Khuavâng tla nih fîmkhur tak hen an hâwl mi leh an deih mi chu ruangsuahnâk thu, Pathian nih thilpêk a nan pêk awt mi chu asi. ¹¹ Zeitik ah a hun asi awt, chun zei hâwi hen a hawng um awt ti muh ding anna tum; Krist Thlarau anmah lakah um mi nih chun Krist tuarnâk ding tla leh rokualnâk a hawng um ding mi tla chu tuliau hun hi a zauhtir. ¹² Tuah thudik leikâng thu an sim mi nan theih hâwi hen Pathian nih chun khuavâng tla sinah a rianṭuan chu an rangah ṭhatvaknâk rang ding silo hen, nanmah ṭhatvaknâk rang ding dauh hen Pathian chu khuavâng tla sinah â langh asi. Thâwngthâng ṭha simtu mifial tla, vân thawk hen Thlarau thiltikhonâk hen fial mi nih chun hi thudik hi a nan simh na asi. Hi thudik tla hi asi, vânmifial tla khawm nih theih an duh mi chu. ¹³ Churawhchun rianṭuan ding hen nan thinlung ah a tîm u. A ringrâwn ule, Jisu Krist a hawng a langh tikah malsâwmnâk a nan pêk na ding mi lakah nan lungumnâk zawzawng chu ngauh u. ¹⁴ Pathian lakah ê-aw ngâi u, nan ât liauah duhnâk nan nei mi hâwi a um ding hen nan nungnâk tla chu siang lah u. ¹⁵ An kawh natu Pathian chu a thenhlimh hâwi hen, nan thilti zawzawng ah a thenhlimh u. ¹⁶ Kei ka thenhlimh ruangah nanna thenhlimh ding asi," ti Pathian lasui thu nih a sim ruangah. ¹⁷ Chun, thliar leh dang nei lo hen, mikip an rianṭuan hâwi chiau hen lâirêl piaktu chu Pa ti hen nan auh chun hi tual ah nan um kar vial amah zah tak hen um u. ¹⁸ An thlâk natu pêk singsuan, nan umdân rawtrâilo lakah mi thil râwkkho mi, tangka leh ngûn hen tlanh nan si lo le, ¹⁹ dawrâ fa simsâwinâk um lo leh nâwm kawp lo mi Krist thisen sung hen tlanh nan si ti nan theih ruangah. ²⁰ Anih chu tual leh vân siam lânah Pathian thîm hen a um le, ni dawnghnâk ah chun nanmah ruangah langh hen a um. ²¹ Amah ruangah mithi lakah mi thawhtu leh a rokualnâk pêktu Pathian lungtu tla nan si le, nan lungnâk leh nan lungumnâk chu Pathian lakah siah thlir u. ²² Unau tla hen a zângfah tawnh tatak ding hen, thudik zâwt hen nanna thenhlimhtir ruangah thinlung ah semsêngâi tak hen a dâwt tawnh u. ²³ Thikho mi nu leh pa fa hâwi silo hen, thikholo mi fa tla, Pathian zungzâl thu nung ah suak nawlh mi nan si ruangah. ²⁴ Pathian lasui thu nih, "Mi zawzawng chu belh hâwi an si; an rokualnâk zawzawng khawm chawmpâr hâwi an si. Belh chu a uai le, a pâr chu a tlawng, ²⁵ sikhawmsele, Lalpa thu lam chu zungzâl hen a um kumza asi," ti hen a sim hâwi khan. Thâwngthâng Ṭha an simh na mi chu hi thu hi asi.

¹ Chuvachun, sualnâk zawzawng tla, ngamlêmnâk tla, perpetnâk tla, nahsuahnâk tla, simsiatnâk tla bângtâk u: ² Fasêm suakthar tla hâwi hen thlarau lei nûk hâng thenhlimh chu duh u; chu nûk hâng chu din hen ṭhang leh ruangsuah nan si kho nâk ding hen. ³ Churuangah, Pathian lasui thu nih, "Lalpa vêlneihnâk chu nan tem rawh,’ ti hen, a sim hâwi khan. ⁴ Lung nung, mi nih zeikhawm rawtrâilo ah an ruat mi, Pathian ngaih hen chun sung tak leh a thîm mi, Lalpa sinah chun hawng u. ⁵ Lung nung tla hâwi hen amah sinah hawng u, chun thlarau lei in saknâk ah mang ding hen a pêk u. Jisu Krist zârah Pathian sinah thlarau lei bawlnâk pawmtlâk ap ding hen chunah chun, bâwlpu thenhlimh nan si lai. ⁶ Churuangah, Pathian lasui thu nih, "Lung sung tak chu ka thîm le, Zion ah a ki ah ka siah; chun, âuzawng amah zumhtu chu an lungdawng lai loh," ti hen a sim hâwi khan. ⁷ Nannih a lungtu tla rangah chun hi lung hi sung tak asi; sikhawmsele, a lunglotu tla rangah lam chun: "In saktu tla nih mangtlâklo hâwi hen an duh lo mi lung kha, lung herh chem a hawng si rawh," ti hen a sim. ⁸ Chun, Pathian lasui thu dang nih, "Hi lung hi minung tla tlûktirtu ding chu asi, anmah tlûktirtu lungpi chu," ti hen, a sim. An rangah Pathian duhzia thu an lung lo ruangah an tlû rawh. ⁹ Sikhawmsele, mûi ah mi suak hen, a chêu chê tak ah lût ding hen a nan kawh natu Pathian thilchê ti tla nan langhtir khonâk ding hen, nannih chu phun thîm, Lalchem bâwlpu tla, phun thenhlimh, Pathian mi tak nan si. ¹⁰ A lân chun Pathian mi tla nan si lo, tu lam chun amah mi tla nan si, a lân chun Pathian khuaruatnâk nan tawng lo, tuah lam chun khuaruatnak nan tawng rawh asi. ¹¹ Duhtak le tla, khual leh khualtlâwng mi nan si ruangah thlarau do tâwntu taksa duhnâk tla bângtâk ding hen ka nan ngiar na asi. ¹² Lunglotu tla lakah nan changh zia chu ṭha tak si seh; chun thilsual titu tla hâwi hen, an simsiat na mi lakah chun nan thil ṭha tla an theihthiam tikah a hawng kalnâk Ni ah Pathian an chawnglawmh kho lai. ¹³ Lalpa ruangah minung nih thuneitu ah a siah na mi sin kipah a pêk u: thuneihnâk sâng neitu Lalchem, ¹⁴ thilsual titu tla rêp ding hen leh thu ṭha titu tla sawr ding hen amah fial mi governor sinah khawm. ¹⁵ Nan thil ṭha ti hen mi a hawlh salam mi tla chu na bângtir ding hen Pathian nih a nan duh na asi. ¹⁶ Thawsuak tak hen um u, nan thawsuaknâk chu zei sual tal phenhtu ah mang lah u, Pathian to-aw hâwi hen um dauh u. ¹⁷ Mi zawzawng chawnglawmh u, na unau lungtu tla dâwt na le, Pathian ṭih u, chun Lalchem chu chawnglawmh u. ¹⁸ To-aw tla, ṭih tak bû hen nan hotu tla thu thu hen um u, mi ṭha leh mi nunnêm tla lakah cho si lo hen, mi ṭha lo tla lak khawmah nan zah na zia langhtir u. ¹⁹ Pathian theihnâk ruangah tuar lo ding tuar hen, ngaihsiatnâk nan tuar rarâm chun Pathian nih chu lakah mal an sâwm na lai. ²⁰ Thilsual nan ti hen, vuak nan tuar hen, felfê tak hen tuar khawm ule, sawrnâk zei me nan tawng lai? Sikhawmsele, thil ṭha nan ti hen, felfê tak hen nan tuar chun Pathian nih chu lakah mal an sâwm na lai. ²¹ Hi hi asi, ti ding hen Pathian nih a nan kawh na mi chu: Krist nih nan rangah a tuar rawh ruangah a nehnûn nan zûl ding hen zûnzauh dingah a nan mâk na asi. ²² Anih nih chun thilsual rerêng a ti lo, a kâ thawk hen âwkrâwl thusim khawm âukhawm nih an theih dah loh. ²³ Mi nih hawlhsiat an barh liau khawmah a barh na bâk lo, a tuar liau khawmah a ṭhih na lo, lâirêltu rep, Pathian lakah a lungumnâk a ngauh dauh asi. ²⁴ Sual leikângah thi rawh hen, repnâk leikângah kan nung khonâk ding hen Krist ngelchel nih kraws ah khan a taksa hen kan sual tla a phurh le, amah liamnâk tla hen damtir hen nan um rawh. ²⁵ Dawrâ tla lampi an vâi mi hâwi nan si. Sikhawmsele, tuah lam chun nan thlarau tla Kiltu leh Dawrâpu chu zûl ding hen kîrtir nan si rawh.

¹ Chu hâwi ber hen, nannih nupi tla, nan pasal tla thu thu hen um u. An lakah zeimaw mi Pathian thu lung lo na khawmsele, thu silo hen, nan nunchan thenhlimh leh zahkâinâk hen neh na ding a tum u. ² Nan nunchan chu a thenhlimh zia leh zah a kâi zia an muh awt ruangah. ³ Nan thuam tla chu lênglei thuam sam phiar mawh, ngûn ṭhi awih mawh, nipuan hen thuam mawh si lah seh. ⁴ Chu ngâk hen chun nan sunglei diknâk tel sih hen, Pathian mitmuh ah sung tak, thlarau nunnêmnâk leh lungngamnâk dawhnâk hen thuam si dauh seh. ⁵ Chu hâwi hen a lânah mi nunau thenhlimh Pathian lungtu tla khawm kha an pasal tla thu thu hen um chu thuam hâwi hen an mang. ⁶ Sari khawm chu hâwi hen a um; Abraham thu thu hen a um le, a pasal chu, "Ka Lalpa," ti hen a auh. Thil zeizawng ah lâu lo hen thil ṭha nan ti chun tuah Sari fanu tla nan si. ⁷ Nannih pasal le tla khawm, nunau hi mi chaklo dauh mi an si ti theih hen chawnglawmh na u; Pathian nungnâk thilthawtpêk an tingpi natu an si ruangah. Hi hi ti ule; chun nan thlachamnâk tla kham hen a um lai loh. ⁸ A dawnghnâk ah chun nan ektê hen thinlung munkhat hen um u, a siherh tawnh u; unau tla hâwi hen a dâwt tawnh u, zângfahnâk nei tawnh ule, a nâutir tawnh u. ⁹ Sual chu sual hen rulh lah u, siatbarhtu chu siatbarh bâk lah na u, chu ngâk chun mal lam sâwm lehlam na u. Churuang chun malsâwmnâk ting ding hen Pathian nih a nan kawh na asi. ¹⁰ Pathian lasui thu nih, "Âuzawng lâwm tak hen nung duhtu leh tik ṭha muh duhtu nih chun, thu ṭha lo leh âwkrâwl thusim bâng seh. ¹¹ Sual kaltâk hen thil ṭha ti seh, remnâk hâwl hen ṭhâwl vima seh. ¹² Lalpa mit chu mi rep tla tlûnah a um le, an thlachamnâk tla khawm a ngâi kumza tâwn; sikhawmsele, thilsual titu tla chu do hen a hertâk dauh na," a ti. ¹³ Thil ṭha hi nan duh chun âu nih an râwk na lai? ¹⁴ Thil dik ti ruangah tuartu ding nan si chun nan thaw a suak. Minung tla khawm ṭih lah ule, lungdawng lah u. ¹⁵ Nan thinlung tla ah Krist rangah zahnâk nei ule, Lal ah siam u. Nanmah lakah lungumnâk nan nei mi simhfiang ding hen an duh natu zawng chu sâng ding hen nunnêm leh zah tak hen a timhtuah kumza u. ¹⁶ Sia leh ṭha theihnâk thiang tak nei ule, an simsiat na nâk leikângah Krist ah nan umdân ṭha sâwitu tla chu mualpho hen an um kho lai. ¹⁷ Thilsual ti ruangah tuar ngâk chun, Pathian rem tizia asi chun, thil ṭha ti ruangah tuar hi a ṭha dauh. ¹⁸ Churuangah, Krist ngelchel chu nan rangah a thi le, sual tla ruangah mi zawzawng rangah veikhat a thi le, Pathian sinah hawng kan ruai ding hen mi ṭha lo ruangrûl ah mi ṭha a thi. Taksa ah chun thah hen a um le, thlarau ah chun nunh hen a um. ¹⁹ Thlarau hen a kal le, rêngin ah mi thlarau tla sinah thu a sim. ²⁰ Chu tla chu a lânah, Noa san ah lawng sâi liauah, Pathian nih dawnhkho tak hen a ngâk na liauah lung ding duhlotu tla thlarau an si. Lawng ah mi tâwmtê, pariat cho tî lakah mi ruangsuak hen an um; ²¹ chu chu baptisma zauhtirnâk asi. Baptisma chu taksa lakah mi nâwmtâm thianhnâk chu asi loh, sia leh ṭha theihnâk hen Pathian lakah thutiam asi dauh. Chu nih chun tuah Jisu Krist thawknawlhnâk zârah ruang a nan suah na asi. ²² Jisu chu vân ah kal hen Pathian vawrhlei ah a to rawh. Vânmifial zawzawng tla leh vân ah thuneitu tla leh thiltikhonâk tla tlûnah lâi a rêl.

¹ Chun, Krist nih taksa hen a tuar rawh ruangah nannih khawm chu hâwi dawnruatnâk hen nanna chaktir ding asi. Âuzawng taksa ah buartu nih chun sual a bângtâk rawh ruangah. ² Churawhchun, tu thawk hen chun minung duh dân silo hen, taksa ah nan um kar zawng chu Pathian duhzia hen nan um ding asi. ³ Chuvachun, lunglotu tla nih ti ding hen an duh mi chu a lânah nan ti tâwk ual rawh. Nan nungnâk tla chu, hurnâk tla, taksa duhnâk tla, uain duhnâk tla, zû mun ah lâwmnâk tla, zû din murui tla, ruk sawnhnâk nâwmtâm tla lakah nan um kha. ⁴ Tuah anmah nuamchênnâk lakah nanna tel bâk lo ruangah lunglotu tla nih chê an ti le, an simsiat na tâwn asi, ⁵ Minung leh mithi lâirêltu ding Pathian sinah chun an thâwngthâng an sim teh lai. ⁶ Mithi tla chu midang zawzawng tla hâwi hen laikulh ah an um liauah lâirêl piak hen an um le, sikhawmsele, Pathian a nung hâwi hen thlarau ah an nung khonâk ding hen an sinah Thâwngthâng Ṭha simh hen an um. ⁷ Thil zawzawng dawnghnâk chu a nâi rawh. Thla nan cham khonâk ding hen mah lakah sûm leh ringrâwn hen nan um ding asi. ⁸ Zeizawng ngâk hen, semsengâi tak hen a dâwt tawnh ule, dâwtnâk nih sual tamtak a khuh tâwn ruangah. ⁹ Chipchiar lo hen khual a tlungtir tawnh u. ¹⁰ Mi kip nih thilpêk nan tawng mi chu Pathian zângfahnâk zauhkhenhtu tla hâwi hen, midang tla ṭhatnâk ding hen ti u. ¹¹ Mi âuzawng nih thu a sim chun Pathian thu sim seh; mi âuzawng nih rian a ṭuan chun Pathian nih chaknâk a pêk hâwi vima hen ṭuan seh. Churawhchun Jisu Krist zârah Pathian chu thu zeizawng ah chawnglawmh hen a um kho lai. Rokualnâk leh thiltikhonâk chu zungzâl hen amah tâ asi. Amen. ¹² Ka duhtak le tla, nan lakah a dân lo hâwi hen thil zeimawh hawng tlung menza khawmsele niknâk fâk tak nan tuar mi hi chê ti lah u. ¹³ A rokualnâk langh hen a um tikah lâwmnâk rangtling hen nan um khonâk ding hen Krist tuarpitu nan si ti theih hen a lâwm dauh lehlam u. ¹⁴ Krist lungtu nan si ruangah fâi nan si chun nan thaw a suak, rokualnâk Thlarau leh Pathian Thlarau chu nan lakah a um ruangah. ¹⁵ Sikhawmsele, nan lakah âukhawm minung thahtu asi ruangah mawh, mifîr asi ruangah mawh, thilsual titu asi ruangah mawh, midang tla thilti ah tel bâktu ruangah mawh tuar ding hen um lah seh. ¹⁶ Sikhawmsele, Kristian na si ruangah na tuar chun ningzak lah, Krist min hen na tuar ruangah chun Pathian sinah lâwmthu sim lehlam rawh. ¹⁷ Lâirêlnâk dawmh ding hen tik chu a hawng tlung rawh, chun Pathian mi tla chu lâirêl piak masa ding asi. Kanmah lakah â dawmh chun Pathian thawk hen Thâwngthâng Ṭha lunglotu tla dawnghnâk chu zei hâwi dek asi lai? ¹⁸ Pathian lasui thu nih, "Mi ṭha tla rang men ah ruangsuah a har chun, Pathian neilo mi leh misual tla rang chun zei hâwi dek asi lai?" ti hen, a sim hâwi khan. ¹⁹ Churuangah Pathian duhzia hâwi hen tuartu tla nih chun thil ṭha ti hen amah Siamtu zumhkâi tak sinah a kiltir na seh.

¹ Chun, nan lakah kawhmi upa tla chu, kei kawhmi upa si bâk mi, Krist tuarnâk tla theihpitu, rokualnâk a hawng lang ding mi ting bâktu ding mi nih hin ka nan fawrh na. ² Nan lakah Pathian murui um mi tla chu, ti ding asi ruangah silo hen, Pathian thu hâwi a thinlung thawk bû hen, lawh duh ruang cho silo hen, thinlung ah duh tak bû hen zauhkhenh u. ³ Nanmah zauhkhenh ding hen pêk an si mi tla tlûnah a laltir lah ule, murui tla zûnzauh ding hen a siam lehlam u. ⁴ Chun, Dawrâpu Lian a hawng a langh tikah a rokualnâk lallukhuh nawh kholo mi chu nan tawng lai. ⁵ Chu hâwi ber hen, nannih seino tla, upa tla thu ngâi u. Nan ektê hen rian a ṭuan piak tawnh ule, thinlung nâunâk hen a thuam u. Pathian nih mizûm tla a do le, â nâutir mi tla lam chu, zângfahnâk a pêk tâwn ruangah. ⁶ Churuangah, a tik takah chun a nan chawnglawmh kho na ding hen Pathian kut chak tak tangah chun a nâutir u. ⁷ Anih nih a nan sunhsak na tâwn ruangah nan lawksawngnâk zawzawng amah lakah ap ver u. ⁸ Ruat tet ule, a ringrâwn u: Nan leido Diabol chu chakeibaknei hâwi hen âumawh veih ding hâwl hen nan kiangkam ah a hûk asi. ⁹ Nan unau laikulh ah um mi tla lakah chun chu hâwi tuarnâk chu a hawng tlung bâk ti theih hen bir tak a lung bû hen amah chu do u. ¹⁰ Chun, Pathian zângfahnâk zawzawng a zungzâl rokualnâk ting ding hen Krist a nan kawh natu nih chun sâwtlotê nan tuar nûnah siam rangtling hen, birhtir hen, a nan chaktir na lai. ¹¹ Amah sinah chun thiltikhonâk chu zungzâl hen um seh: Amen. ¹² Ka unaupa zumhkâi tak hâwi hen ka ruat mi Silas kut ah nanmah fawrhnâk leh Pathian zângfahnâk tatak asi ti theihtir hen, tawi tek hen nan sinah ka rîn asi. Chu lakah chun bir tak hen dîr u. ¹³ Babulon khua ah um mi, nanmah hâwi hen Pathian thîm bâk mi nan farnu nih hin chibai a nan bûk na. Ka fapa Mark khawm nih chibai a nan bûk na. ¹⁴ Kristian dâwtnâk châwchawk hen chibai a bûk tawnh u. Krist ah um mi zawzawng nan ektê sinah remnâk um seh.