1 KORIN

1 KORIN

¹ Pawl, Pathian duhzia hen Jisu Krist mifial si ding hen kawhmi leh kan unaupa Sosthen nih chun: ² Korin khua ah Pathian kawhmi um tla, Krist ah thenhlimhtir hen Pathian mi tla si ding hen kawhmi tla sinah, ram kipah anmah leh kanmah Lalpa Krist min lamtu zawzawng tla hen: ³ Pathian kan Pa leh Lalpa Jisu Krist sinah mi zângfahnâk leh remnâk nan sinah um seh. ⁴ Krist Jisu zârah a zângfahnâk nan sinah pêk mi ruang khan nanmah leikâng thu ah Pathian sinah lâwmthu ka sim kumza tâwn. ⁵ Zeizawng ah thusim kipah leh theihnâk kipah amah lakah chun neihtir hen nan um mi thu ah khan; ⁶ chu hâwi hen Krist thu ka theihtir mi chu nanmah lakah birhtir hen a um kha. ⁷ Chuvachun, kan Lalpa Jisu Krist langhnâk ngâk hen, thilpêk rerêng ah nan samphâng lo. ⁸ Anih nih chun kan Lalpa Jisu Krist Ni ah chun simsâwi kawp lo hen nan umnâk ding hen a dawngh tiang hen a nan birhtir na lai. ⁹ Pathian, a Fapa Jisu Krist kan Lalpa kawmhnâk ah a nan kawh natu kha zumh a kâi asi. ¹⁰ Chun, unau le tla, nan ektê hen thu bang cho nan sim hen, nan lakah ṭhennâk rêng a um lonâk ding hen, thinlung munkhat leh dawnruatnâk munkhat hen nanna tlâi thlir khonâk ding hen kan Lalpa Jisu Krist min hen ka nan ngiar na. ¹¹ Ka unau le tla, nan thu chu nan lakah êlnâk tla a um ti hen Kloi dâwngsung tla nih an ka simh asi. ¹² Hi hi asi ka ti mi chu: mikip nih, "Kei Pawl murui ka si," "Kei lam chu Apolo murui ka si, "Kei lam chu Peter murui ka si" Kei lam chu Krist murui ka si," nan ti chiau hi. ¹³ Krist chu ṭhen hen a um mazei? Pawl nan ruangrûl ah khenhbêk hen a um mazei? Asi lo leh, Pawl min hen baptis hen nan um mazei? ¹⁴ Krispa leh Gaia lo chu nan lakah mi âukhawm ka nan baptis na lo ruangah Pathian sinah lâwmthu ka sim asi. ¹⁵ Chu hâwi asi lo chun mi nih keimah min hen baptis nan si ti an sim lebang lai. ¹⁶ Stephan dâwngsung tla lam chu ka baptis na bâk, chu lo chu midang ka baptis na mawh ka theih loh. ¹⁷ Krist nih chun baptis ding hen a hawng ka fial lo, Thâwngthâng Ṭha sim ding hen a hawng ka fial dauh asi; thufing sim lo hen, chu hâwi asi lo chun Krist kraws chu zeikhawm lo hen ka umtir lebang lai. ¹⁸ Kraws thu chu a tlâu liau chir mi tla rangah chun âtnâk asi; kannih ruangsuah liau mi tla rangah lam chun Pathian thiltikhonâk asi. ¹⁹ Pathian lasui thu nih, "Mi fing finghnâk chu ka veih lai le, mi fâifîm theihthiamnâk chu ka lâwt lai," ti hen, a sim hâwi khan. ²⁰ Mi fing chu kha zeiah me? Mi thiam chu kha zeiah me? Hi laikulh ah êltu chu kha zeiah me? Pathian nih laikulh finghnâk hi âtkâi asi ti a theihtir lo masi? ²¹ Pathian finghnâk ah chun laikulh nih a finghnâk mang hen Pathian an theih kho lo nûnah thusim âtkâi mang hen a lungtu tla ruangsuah chu Pathian nih thungâi ṭha a ti. ²² Juda tla nih chun singsiahnâk tla an hâwl tâwn, Greek tla nih chun finghnâk an hâwl tâwn. ²³ Kannih lam nih chun Krist khenhbêknâk thu kan sim tâwn asi; chu chu Juda tla rangah chun tlûknâk, Phundang tla rangah chun âtnâk asi. ²⁴ Sikhawmsele, Juda tla khawm si seh Greek tla khawm si seh, kawhmi tla rangah chun Krist chu Pathian thiltikhonâk leh Pathian finghnâk chu asi. ²⁵ Pathian âtnâk chu minung finghnâk ngâk hen a fing dauh, Pathian chaklonâk khawm chu minung chaknâk ngâk hen a chak dauh. ²⁶ Unau le tla, Pathian nih a nan kawh na nâk hi ruat nik u, taksa leiah mi fing tamtak tla, mi thiltikho tamtak tla, mi ṭha tamtak tla, kawh an si lo zia hi! ²⁷ Sikhawmsele, Pathian nih laikulh thil â tla chu a thîm dauh le, mi fing tla chu a mualphoh khonâk ding hen. ²⁸ Chun, Pathian nih laikulh thil chak lo tla chu a thîm le, thil chak tla chu a mualphoh khonâk ding hen; chun, laikulh thu sia leh zauhnawmhkâi tla, thil um lo mi tla tiang hen Pathian nih a thîm le, thil um tla chu zeikhawm lo ah a siam khonâk ding hen. ²⁹ Pathian mâika ah âukhawm anna putso kho lai loh. ³⁰ Nannih lam chu amah ruangah Krist Jisu lakah chun nan um asi; anih chu Pathian sinah mi kan rangah finghnâk ah siam asi, repnâk ah, thenhlimhnâk ah, tlanhnâk tla hen. ³¹ Churuangah, Pathian lasui thu nih, "Â putso mi vial nih Lalpa putso seh," ti hen, a sim hâwi khan.

¹ Chun, unau le tla, kei lam chu Pathian thu thup ka nan simh na ding hen nan sinah ka hawng liau khan thusim rokual leh finghnâk rokual ka mang lo. ² Jisu Krist, amah ngelchel khenhbêk hen a um mi thu cho lo chu nan lakah zeikhawm theih ka tum lo kha. ³ Chun, chak lo leh ṭih hen, thungâi thir bû hen nan lakah ka um. ⁴ Chun, nan lungnâk chu minung finghnâk ah ngauh lo hen, Pathian thiltikhonâk ah ngauh hen a um dauhnâk ding hen, ⁵ ka hawlhkâ suak leh ka thusim tla chu thufing hen lêmnâk thu asi lo le, Pathian thlarau leh thiltikhonâk theihtir hen asi dauh kha. ⁶ Sikhawmsele, upa tla lakah chun thufing khawm kan sim tâwn, sikhawmsele, hi laikulh thufing hi asi lo le, hi laikulh lâirêltu tlâu ding mi thiltikhonâk khawm asi lo. ⁷ Pathian finghnâk thuthup chu ka sim dauh tâwn asi, finghnâk â thup mi, kan rokualnâk dingah Pathian nih laikulh um lânah a ruatkan rawh mi chu. ⁸ Chu finghnâk chu hi laikulh lâirêltu tla rerêng nih an theih lo; theih sele chu rokualnâk Lalpa chu an khenhbêk lai loh. ⁹ Pathian lasui thu nih, "Mit nih muh dah lo, nâ nih theih dah loh, minung thinlung a lût dah loh, Pathian nih a dâwt mi rangah a timhtuah mi vial tla chu," ti hen, a sim hâwi khan. ¹⁰ Kannih lam chu chubang chu Pathian nih a Thlarau hen hawng kan theihtir rawh asi. Thlarau nih chun zeizawng a zâwt ver tâwn, Pathian thu thûk khawm. ¹¹ Minung thu tla chu minung thinlung a sungah um mi ber lo nih chun minung lakah âu nih me theih lai? Chu hâwi ber hen, Pathian thu tla thu Pathian Thlarau ber lo nih chun âu nih khawm an theih loh. ¹² Chun, a thawt hen Pathian nih thu hawng kan pêk mi tla chu kan theih khonâk ding hen, kannih lam nih chun laikulh thlarau si lo hen, Thlarau, Pathian sinah mi chu kan tawng dauh asi. ¹³ Minung finghnâk thu leikângah sîntirnâk sim lo hen, Thlarau sîntirnâk thu a sim dauh hen, Thlarau lei thu tla chu thlarau lei mi tla sinah simhfiang hen, chubang thu hawng kan pêk mi tla khawm chu kan sim tâwn. ¹⁴ Laikulh mi nih chun Thlarau lei thu tla chu a lawmh tâwn lo, anih ngaih chun âtkâi an si; Thlarau ah theih mi asi ruangah a theih kho lo rerêng asi. ¹⁵ Thlarau lam nih chun thu zeizawng a theihfiang tâwn, amah chu âukhawm nih an theihfiang lo. ¹⁶ Pathian lasui thu nih, "Âu nih me Lalpa thinlung theih rawh hen, amah thu sîntir kho lai?" ti hen, a sim hâwi khan. Kannih lam nih chun Krist thinlung kan put asi.

¹ Chun, unau le tla, thlarau mi tla sinah sim hâwi hen nan sinah thu ka sim kho lo, taksa mi tla sinah sim hâwi khan ka sim kha, Krist ah fasêm tla sinah sim hâwi cho hen. ² Buh silo hen nûk hen ka nan châwm na kha, buh nan ei kho lo ruangah khan: tu khawmah nan ei kho lo nget rih asi, ³ taksa mi nan si kumza rih ruangah. Nan lakah nahsuahnâk leh êlnâk a um tâwn ruangah hin taksa mi si hen minung hâwi hen nan um asi lo mazei? ⁴ Mi pakhat nih, ’Pawl murui ka si, midang nih, "Kei lam chu Apolo murui ka si" nan ti sung zawng chu minung nan silo mazei? ⁵ Apolo chu zei me asi? Pawl khawm chu zei me asi? Rianṭuantu nanmah tla a nan lungtir natu cho an si, chu khawm chu Lalpa nih a pêk na vevê mi hâwi vima asi. ⁶ Kei nih ka phun le, Apolo nih tî hen a châwm, sikhawmsele, Pathian nih a ṭhangtir asi. ⁷ Chun, a ṭhangtirtu Pathian cho lo chu a phuntu chu zeikhawm asi lo, tî hen châwmtu khawm chu zeikhawm asi bâk lo. ⁸ Chun, a phuntu leh tî hen châwmtu chu pumkhat an si, sikhawmsele anmah rianṭuan hamh zia hâwi vima hen lâwmman an tawng vevê lai. ⁹ Kannih lam chu Pathian rianṭuantu kan si; nannih Pathian lo munma chu nan si. Pathian in sak chu nan si ber. ¹⁰ Pathian nih zângfahnâk hawng ka pêk mi mang hen in sak thiam mi rian ka ṭuan le, lungphûm ka phûm, midang nih a tlûnah in an sak. Sikhawmsele, mikip a tlûnah an sak zia ding mi lakah a thiamthih chiau na seh. ¹¹ Lungphûm chia lo chu lungphûm dang âukhawm nih an phûm kho lai loh, chu lungphûm chu Jisu Krist chu asi. ¹² Chun, lungphûm tlûnah chun âuzawng nih ngûn hen mawh, tangka hen mawh, lung sung hen mawh, thing hen mawh, belh hen mawh, fapawn hen mawh in sak sele--mikip rianṭuan chu a lang rawh lai. ¹³ Krist a hawng langh Ni ah chun a langtir awt ruangah; chu Ni ah chun mei ngelchel nih mikip rianṭuan chu zei hâwi me asi a nik lai rawh. ¹⁴ Âu rianṭuan zawng a tlûnah a sak mi chu a um kumza chun, chu nih chun lâwmman a tawng lai. ¹⁵ Âu rianṭuan zawng a kâng chun, chu nih chun a dawk lai: amah lam chu ruangsuah hen a um lai, sikhawmsele mei ah a lan mi hâwi hen. ¹⁶ Pathian in nan si ti leh Pathian Thlarau nanmah lakah a um kumza ti nan theih lo mazei? ¹⁷ Âuzawng nih Pathian in chu a râwk chun chu minung chu Pathian nih a râwk lai Pathian in chu a thenhlimh ruangah; chu in chu nanmah nan si. ¹⁸ Âukhawm mah a â tir lah seh. Nan lakah âuzawng hi laikulh ah hin fing hen â ruat chun a fing khonâk ding hen mi â ah a chang seh. ¹⁹ Hi laikulh finghnâk hi Pathian ngaih hen âtnâk asi, "Pathian nih mi fing tla chu an fing perpetnâk lakah a awhtir na tâwn," ti hen Pathian lasui thu nih a sim hâwi khan. ²⁰ Chun, Pathian lasui thu dang nih, "Lalpa nih chun mi fing tla dawnruatnâk tla chu a thawt asi ti a theih," ti hen, a sim. ²¹ Churuangah, âukhawm nih minung tla putso lah seh. Zeizawng hi nan tâ asi ver asi. ²² Pawl mawh, Apolo mawh, Kipha mawh, laikulh mawh, nungnâk mawh, thihnâk mawh, thil um chia mawh, thil hawng um ding mi mawh, a ektê hen nan tâ ver asi; nannih khawm Krist tâ nan si; ²³ Krist khawm chu Pathian tâ asi.

¹ Kannih tla hi Krist rianṭuantu leh Pathian thu thup zauhkhenhtu ah mi nih hawng kan ngaih seh. ² Hi lakah hin zauhkhenhtu chu zumhkâi a herh asi. ³ Sikhawmsele, nannih nih nan ka niknâk chu minung dawnruatnâk hen nan ka niknâk chu ka rangah thu metê asi; mah khawm ka nik dah lo. ⁴ Zeikhawm simsâwinâk ka theih lo; sikhawmsele, chu nih chun hawng ka mawhtir lêm lo; hawng ka niktu chu Lalpa asi dauh. ⁵ Chun, a hun lânah hin zeikhawm nik lah u, Lalpa a hawng kal lân lo chu. Anih nih chun mûi thil thup tla chu chêu ah a hawng suah lai le, thinlung ah tum mi khawm chu a hawng langh lai; chu tikah chun mikip nih Pathian lakah chun mah ting tâwk ah sawr an lawh chiau lai rawh. ⁶ Chun, unau le tla, thurîn tla chu nan lanh lonâk ding hen kanmah lakah hin nan châwng khonâk ding hen chubang tla chu nan ṭhatnâk ding hen kei leh Apolo kanna ngaih asi, nan lakah âukhawm pakhat putso hen pakhat nan zauhnawmh lonâk ding hen. ⁷ Nang âu nih me a nan ti bîk? Na ting lo mi chu zei me na nei? Na ting asi chun zeirangah ting lo hâwi hen na sawr phah? ⁸ Tu thawk hen nan khawp rawh, tu thawk hen nan nei rawh, kanmah tel lo hen nanmah lâwng hen nanna lal rawh asi hi: lal tatak ule ka duh asi, kannih khawm nih nanmah tla hen kanna lal khonâk ding hen! ⁹ Pathian nih kannih mifial tla hi thi ding a ruat chia hâwi hen a dawnghchem ah hawng kan langhtir hen ka ngaih asi. Laikulh leh vânmifial tla leh minung tla mitmuh ah zauhnuam ah siam hen kan um hi. ¹⁰ Kannih lam chu Krist ruangah mi â kan si, nannih lam chu Krist ah mi fing nan si dauh. Kannih lam chu kan chak lo le, nannih lam chu nan chak, nannih lam chu mi chawnglawmh hen nan um le, kannih lam chu mi zauhnawmh hen kan um asi. ¹¹ Tutiang khawm hen kan sung a vâng hen kan tî a hâl le, nipuan kanna tinh lo, mi kut nurnâk kan si, umnâk bir kan nei lo; mah kut hen ṭuan hen thungâi kanna hamh. ¹² Mi nih hawng kan fâi chun, mal kan sâwm na tâwn; mi nih hawng kan nehsawh chun kan tuar rarâm tâwn, mi nih hawng kan phûm chun kan lêm na tâwn. ¹³ Tutiang khawm hen laikulh nâwmtâm thu zawzawng, nâwm hâwi hen mi nih hawng kan ngaih asi. ¹⁴ Ka nan ningzaktir na ding hen hi thu hi ka rîn lo le, ka fa duhtak tla hâwi hen nun a nan simh na ding hen ka rîn dauh asi. ¹⁵ Krist lakah chun sîntirtu sîng khat nei khawm ule, pa lam chu tamtak nan nei lo asi; kei nih Krist Jisu ah chun Thâwngthâng Ṭha hen ka nan ring na kha. ¹⁶ Chun, nan ka chawng ding hen ka nan ngiar na. ¹⁷ Churuang chun Timothe, Lalpa lakah ka fa duhtak leh zumhkâi chu nan sinah ka hawng fial asi. Anih nih chun Krist ah ka umdân, ram kipah kawhmi tla murui kip ka sîntir na tâwn mi hâwi hi a nan theihtir na lai. ¹⁸ Chun, kei nan sinah hawng kal lo rawh ding hâwi hen nan ruat ruangah zeimaw mi nanna zûm asi. ¹⁹ Sikhawmsele, Lalpa nih rem a ti chun sâwtlotê ah ka hawng kal lai; chun mi a zûm mi tla thu chu silo hen an thiltikhonâk chu ka theih rawh lai. ²⁰ Pathian Ram chu thu hen a um lo le, thiltikhonâk ah a um dauh asi. ²¹ Zei me nan duh dauh? Vuakfung hen ma nan sinah ka hawng kal lai, dâwtnâk leh dawnhkhonâk thinlung put hen ma?

¹ Nan lakah pung le lêngnâk a um ti thu a thang chiam asi. Chu hâwi pung le lêngnâk chu Phundang tla lak khawmah a um lo mi, nan lakah mi pakhat nih a nu-ei a umpi kha. ² Chun, chu thil titu chu nan lakah mi suah ding mi lawksawngpi ngâk hen zumhnâk ah lam nan mang. ³ Keimah ngelchel hi taksa hen ka tel lo narêng hen thlarau ah lam chun ka tel, thil chu hâwi tluk titu chu tuah khawm Lalpa Jisu min hen chu mi tlûnah lâi ka rêl piak le, nan lakah tel hâwi tluk hen ka ruat rawh. ⁴ Nannih leh ka thlarau chu kan Lalpa Jisu thiltikhonâk ah a pûm hen, ⁵ mi chu hâwi chu a thlarau Lalpa Ni ah chun ruangsuah hen a um khonâk ding hen a taksa tlâutir hen Setan sinah pêk sele ka ti asi. ⁶ Nanna zûmnâk hi a ṭha lo. Thilnu tâwmtê nih sang tlang chu a pum hen a zunh hep tâwn ti nan theih lo masi? ⁷ Thilnu telh lo mi nan si hâwi ber hen sang tlang thar nan si khonâk ding hen thilnu li chu thianh u. Kan Kalkanh Kût khawm an thah rawh asi, Krist ngelchel chu. ⁸ Churuangah, kanna kût lai, thilnu li a kût lo hen, nunsiat leh sualnâk ah kût lo hen, thilnu tel lo hen taknâk leh diknâk sang hen kanna kût lai. ⁹ Ka lasuikuat lakah khan pung-le-lêng mang kawmh lo ding hen nan sinah ka rîn kha. ¹⁰ Kha laikulh ah pung-le-lêng mang tla mawh duhlei leh lêp mang mawh, ruk sawnhtu tla mawh lam chu kawmh lo thlo ding ka ti mi asi lo; chu hâwi si sele chu laikulh thawk hen suak ding nan si awt asi. ¹¹ Tu lam chun âuzawng unau min put ṭung hen pung-le-lêng mang mi mawh, mi duhlei mawh, ruk sawnh mi mawh, mi fâi mang mawh, zûrît mang mawh, lêp mang mawh hawng sele kawmh lo ding hen nan sinah ka rîn asi; chu hâwi mi sinah chun ei khawm ei lo ding hen. ¹² Lênglei ah mi tla chu kei nih ka ruat ding zei me a um? Nannih nih a sungah mi tla nan ruat hen lênglei ah mi tla lam chu Pathian nih a ruat tâwn asi lo ma? Chu misual chu nan lakah mi nar u.

¹ Nan lakah âuzawng nih midang thupawi thenhlimh mâika ah tlunh lo hen mi rep lo mâika ah nan tlunh ngam awt masi? ² Asi chun, mi thenhlimh tla nih chun laikulh lâi an rêl awt ti nan theih lo masi? Chun, laikulh men hi a lâi nan rêl awt asi chun thil mêchem tla khawm chu lâirêl tlâk lo ma nan si ne? ³ Tuliau thil chu sim lo hen, vânmifial tla men lâi kan rêl awt ti nan theih lo masi? ⁴ Chun, thu rêl ding nan nei chun kawhmi tla lakah mawhphurhtu silo mi tla chu nan rêltir na tâwn mazei? ⁵ Nan ningzaknâk ding hen ka sim asi. A unau tla kar lakah thu thlûk kho mi mi fing pakhat tal nan lakah nan tawng kho lo menmaw! ⁶ Unau pakhat nih a unau chu lâirêlnâk ah a tlunh tâwn? Lunglo tla sinah a va si ngê rih. ⁷ Asi, hi hi nanna replonâk tak pakhat chu asi: thupawi nanna neitawnh mi hi. Zeirangah me diklo tak hen nanna tinâk chu nan ṭuan kho lo? Zeirangah naunehnâk chu nan tuar dauh lo? ⁸ Asi nanmah ngelchel nih unau tlûnah khawm nan ti dik lo le, nan nâuneh na tâwn. ⁹ Asi chun, mi rep lo tla nih chun Pathian Ram an luah lai loh ti nan theih lo masi? Perpet hen um lah u; pung-le-lêng mang tla mawh, ruk sawnh tla mawh, ṭângdang pawmtâktu tla mawh, mi hur tla mawh, tawkua hur tla mawh, ¹⁰ fîr mang tla mawh, mi duhlei tla mawh, zûrît mang tla mawh, fâi mang tla mawh, lêp mang tla mawh khawm nih Pathian ram an luah lai loh. ¹¹ Chun, nannih zeimaw mi chu hâwi mi nan si tâwn kha. Sikhawmsele, Lalpa Jisu Krist min leh kan Pathian Thlarau ah ṭâwl thiang nan si rawh, thenhlimh mi nan si rawh le, mawhtir lo mi nan si rawh. ¹² Thil zeizawng ti ka rang a thiang le, thil zeizawng ti a ṭha lêm lo. Sikhawmsele, zei sal ah khawm ka siang lo. ¹³ Ei ding tla chu paw rangah asi, paw chu ei ding tla rangah asi. Sikhawmsele, Pathian nih a tlâutir vevê lai. Chun, taksa hi pung le lêngnâk asi lo le, Lalpa rangah asi dauh; Lalpa khawm taksa rangah asi. ¹⁴ Chun, Pathian nih Lalpa chu a thawh le, kannih khawm a thiltikhonâk hen hawng kan thawh bâk lai. ¹⁵ Nan taksa chu Krist ṭeng tla asi ti nan theih lo masi? Krist ṭeng tla chu lâk piak hen nunau â zuar mi ṭeng tla ah ka siam awt ma? Si lo! ¹⁶ "Asi chun, nunau â zuar mi hen â tlâi mi chu amah hen pumkhat asi ti nan theih lo masi? Pathian lasui thu nih, An panih hen taksa pumkhat an hawng si lai rawh," ti hen fiang tak hen a sim hâwi khan. ¹⁷ Lalpa lakah a pêk mi lam chu amah hen Thlarau pumkhat an si. ¹⁸ Pung le lêngnâk hi tektâk u. Minung thil tisual zeizawng hi taksa lênglei ah asi; pung-le-lêng mang chu amah taksa tlûnah thilsual a ti asi. ¹⁹ Asi chun, nan taksa chu nan sungah um Pathian sinah mi nan tawng mi Thlarau Thenhlimh in asi ti nan theih lo masi? Mah tâ khawm nan si lo le, man hen châwk nan si rawh asi. ²⁰ Churuangah, nan taksa hen Pathian chawnglawmh u.

¹ Chun, nan rîn mi thu tla kha--Mipa rangah nunau tawngh lo a ṭha asi. ² Sikhawmsele, pung le lêngnâk a um tâwn ruangah mipa nih nupi bîk nei chiau sele, nunau khawm nih pasal bîk nei chiau seh. ³ Pasal nih chun a nupi sinah a ting ding tâwk pêk seh; chu hâwi ber hen nupi khawm nih a pasal sinah a ting ding tâwk chu pêk bâk seh. ⁴ Nupi nih chun amah taksa tlûnah thu a nei lo le, a pasal nih chun thu a nei dauh asi; chu hâwi ber hen pasal khawm nih chun amah taksa tlûnah thu a nei lo, a nupi nih chun thu a nei dauh asi. ⁵ Thlacham ding hen nanna pêk khonâk ding hen leh nanna kawmh nawlh khonâk ding hen sâwtlotê rangah rem nan ti vevê cho lo chun âu lei khawm a thlahthlamh lah u, chu lo chun nanna sûm kho lo ruangah Setan nih a nan lêm na lebang lai. ⁶ Sikhawmsele, hi thu hi thupêk leikâng hen ka sim lo le, siang leikâng thu hen ka sim dauh asi. ⁷ Sikhawmsele, mi zawzawng keimah hâwi hen um sele, ka duh asi. Khawmsele, mikip nih Pathian sin thawk hen thilpêk mah tawng zia an nei chiau asi, pakhat nih kâng dang hen, pakhat khawm nih kâng dang nawlh hen. ⁸ Sikhawmsele lêngṭûl tla leh numei tla sinah chun hi hâwi hen ka ti asi. Keimah hâwi tak hen um na sele an rangah a ṭha lai. ⁹ Sûm khonâk an nei lo lam chun a umh na seh; hur ngâk hen a umh chu a ṭha dauh asi. ¹⁰ Chun, anna umh rawh mi tla sinah chun thu ka pêk; keimah pêk lam chu silo hen Lalpa pêk asi dauh: Nupi nih chun a pasal ṭhen lah seh; ¹¹ a ṭhen dâidua chun pasal nei lo hen um dâidua seh, asi lo chun a pasal hen ber a umh nawlh na seh, pasal nih chun a nupi mâk lah seh. ¹² Midang sinah lam chun (Lalpa silo hen, keimah nih) ka sim: Unau âuzawng Kristian a hawng si hen, a nupi chu lunglo mi umpi sele, anih nih chun a sinah um kumza ding a duh chun mâk lah seh. ¹³ Chun, nunau âuzawng Kristian a hawng si hen, pasal lunglo mi a umpi chun, a pasal nih a sinah um kumza ding a duh chun mâk lah seh. ¹⁴ Pasal lunglo mi chu a nupi ruangah Pathian sinah pawmtlâk hen a um le; nupi lunglo mi khawm chu a pasal ruangah Pathian sinah pawmtlâk hen a um bâk; chu hâwi si lah sele, an fa tla chu lunglo mi fa tla hâwi an si lai, sikhawmsele chu hâwi asi ruangah annih tla chu Pathian sinah pawmtlâk hen an um asi. ¹⁵ Sikhawmsele, a lunglo mi nih chun mâk ding a duh chun mâk ko seh, chu hâwi lakah chun unaupa mawh farnu mawh khap asi lai loh; Pathian lam nih chun rem ding hen a kan kawh asi. ¹⁶ Aw! nupi, na pasal ruang na suah awt leh awt lo zeitin na theih kho? Aw! pasal, na nupi ruang na suah awt leh awt lo zeitin na theih kho? ¹⁷ Zeikhawm si sele, Lalpa nih chun mikip sinah a thilpêk dân hâwi chiau leh Pathian nih mikip a kawhnâk dân hâwi chiau hen um seh. Hi hi kawhmi tla zawzawng sinah ka sîntir na mi dân chu asi. ¹⁸ Fêmtan mi kawh asi chun, a fêmtannâk kha veih lêm lah seh. Fêmtan lo mi asi chun, fêm tantir lah seh. ¹⁹ Pathian thupêk tla tleih cho lo chu fêmtan hi zeikhawm asi lêm lo, fêmtan lo khawm hi zeikhawm asi lêm lo. ²⁰ Mi kip kawh hen an um liauah anna ting zia zia hen um chiau seh. ²¹ Sal ah na um mi kawh na si ma? Chu chu ruat duh lah, na suak kho ṭung asi lam chun mang dauh rawh. ²² Sal ah um mi Lalpa nih a kawh mi chu Lalpa sal suaktir asi; chu hâwi ber hen sal silo hen kawh mi chu Krist sal asi. ²³ Man hen châwk nan si rawh, minung tla sal si lah u. ²⁴ Unau le tla, mikip kawh hen nan um liauah nanna ting zia zia hen Pathian sinah um kumza u. ²⁵ Chun, mi âuzawng nupi pasal neilo rih mi leikâng thu ah chun Lalpa thupêk rerêng ka nei lo. Sikhawmsele, zumhtlâk a um ding hen Lalpa sinah mi zângfahnâk tawng ka si ruangah ka ngaihdân ka sim lai. ²⁶ Chun, tuliau hamhnâk ruangah hin hi hi ṭha hen ka ruat, mi a umdân a um kumza hi. ²⁷ Nupi lakah phuar na si ma? Phelhnâk hâwl lah. Nupi lakah phuar lo na si ma? Nupi hâwl lah. ²⁸ Sikhawmsele nupi na nei chun thil na ti sual lo, nungâk thenhlimh khawm nih pasal a nei chun thil a ti sual lo. Sikhawmsele, chu hâwi mi tla nih chun taksa lakah chun hamhnâk an tuar lai; sikhawmsele, kei lam nih chun an tuartir na lo ka duh asi. ²⁹ Sikhawmsele, unau le tla, hi hi ka ti asi: tu thawk chun nupi nei tla chu nei lo hâwi hen an umnâk ding hen leh ³⁰ ṭap le tla chu ṭap lo hâwi hen an um khonâk ding leh â lâwm mi tla chu lâwm lo hâwi a an um khonâk ding leh châwktu tla chu neilo hâwi a an um khonâk ding leh ³¹ laikulh mangtu tla chu mang tuk lo hen an um khonâk ding hen tik hi tâwitir hen a um asi; hi laikulh umdân hi a dawngh lei rawh asi. ³² Sikhawmsele, lungkham nei lo hen nan um ka nan duh piak na asi. Nupi nei lo mi nih chun Lalpa lawmhtir kho zia ding dawnnâk hen Lalpa lei thil chu a lungkham tâwn. ³³ Nupi nei mi lam nih chun a nupi a lawmhtir kho zia ding dawn hen laikulh lei thil a lungkham bâk tâwn, a thinlung ah dawnnâk dang dang a nei tâwn. ³⁴ Pasal neilo mi nih chun a taksa leh a thlarau ah chun thenhlimh tak hen a um khonâk ding hen Lalpa lei thil chu a lungkham tâwn; pasal nei mi lam nih chun a pasal lawmh kho zia ding hen laikulh lei thil chu a lungkham dauh tâwn. ³⁵ Chubang chu nanmah ṭhatnâk ding hen ka sim asi; ri hen ka nan khih kho na nâk ding hen ka sim asi lo le, umdân dawh tak hen nan um khonâk ding leh Lalpa rian chu nawk lo hen nan ṭuan khonâk ding hen ka sim dauh asi. ³⁶ Nupi hual a um lo rih ding hen anna tiam mi thu ah: Mipa nih dik tak hen a umpi ding mi sinah thinlung tleih khonâk a nei lo hen, â sûm kho lo thlo hen, anna umh dâidua a duh chun, a duh hâwi hen a umh dâidua na seh. Hi lakah hin sualnâk a um lo. ³⁷ Sikhawmsele, a mipa nih umpi ngelchel ding duhnâk a nei lêm lo hen, umpi lo ding hen a thinlung ah a tum thlir hen, a thinlung ah sûmkhonâk a nei thlir hen thinlung ah ti ding hen a tum tak chun chu nunau chu a umpi lo a ṭha asi. ³⁸ Chun, umpitu nih a ti ṭha bâk, a umpi lotu nih chun a ti zia a ṭha khun asi. ³⁹ Nupi chu a pasal dam sung chun phuar asi; sikhawmsele, a pasal a thi rawh chun a duh mi zawng anna um kho lai, sikhawmsele Lalpa lakah a um mi asi ding asi. ⁴⁰ Sikhawmsele, kei ngaihdân hen chun a umdân kêl hen a um chun a thaw a suak lai; kei khawm nih Pathian thlarau nei bâk hen ka ruat asi.

¹ Chun, ruk tla lakah bâwlnâk thil tla thu kha chu, "kan ektê hen theihnâk kan nei chiau," ti kanna theih. Theihnâk nih chun mi a putsotir tâwn lo, dâwtnâk lam nih chun mi a siam ṭhat tâwn. ² Âuzawng nih thu zeimawh theih hen anna ruat chun, an theih ding hâwi hen an theih lo rih. ³ Sikhawmsele, âuzawng nih Pathian a dâwt chun, chu tak chu amah theih asi. ⁴ Chun, ruk tla lakah bâwlnâk thil ei leikâng thu ah chun, ruk chu zeikhawm asi lo zia Pathian pakhat cho lo chu Pathian dang rerêng a um lo ti kan theih. ⁵ Vân ah mawh, tual ah mawh pathian min put tla um khawmsele, chu hâwi pathian tamtak leh lalpa tamtak an um ruangah kannih rangah lam chun Pathian pakhat cho, Pa chu a um. ⁶ Amah sin thawk hen zeizawng a suak le, kannih khawm amah rangah um kan si; Lalpa pakhat cho Jisu Krist chu a um, amah ruangah zeizawng a um, kannih khawm amah ruang ber ah um mi kan si. ⁷ Sikhawmsele, chu theihnâk chu mi zawzawng sinah a um lo, chun zeimaw mi nih tutiang hen ruk sawnh zawng an si ruangah ruk lakah bâwlnâk thil hâwi tak a ngaih hen an ei tâwn; chun an sia leh ṭha theihnâk chu a chak lo ruangah a nâwm tâwn. ⁸ Sikhawmsele, ei ding nih hin Pathian mit hawng kan tlungtir lêm lo, ei lah khawmsele kanna râwk lêm lo, ei khawmsele kan ṭha lêm lo. ⁹ Sikhawmsele, thiamthih u, chu lo chun mah thawsuak a um khonâk hi zeitin mawh mi chak lo tla rangah tlûknâk a hawng si lebang lai. ¹⁰ Nang, theihnâk nei mi, âuzawng nih ruk sawnhnâk in ah buhkhêng dûm hen a nan muh chun, annih lam chu mi chak lo hawng si na sele, an sia leh ṭha theihnâk nih chun bâwlnâk thil ei a hawng ngamh awt lo mazei? ¹¹ Chun, na theihnâk ruang chun mi chak lo, unau a thih ruangrûl ah Krist nih a thih piak mi chu a vei awt asi. ¹² Unau le tla lakah chu hâwi thil nan tisual hen, an sia leh ṭha theihnâk chu a chaklonâk thuam ah nan liamh sual chun Krist lakah thil nan tisual asi. ¹³ Churuang chun ei ding nih hin ka unau a tlûktir chun ka unau a tlûktir lonâk ding hen kumleza hen sa rerêng ka ei lai loh.

¹ Mi thawsuak ka si lo mazei? Mifial ka si lo mazei? Kan Lalpa Jisu ka muh rawh lo mazei? Nannih tla chu Lalpa ah ka rianṭuan nan si lo mazei? ² Midang rangah mifial si lah khawmsele nannih rang lam chun ka si; Lalpa ah mifial ka sinâk singsiahnâk chu nanmah hi nan si. ³ Hawng ka salhtu tla ka sâng na nâk chu hi hi asi: ⁴ Din leh ei ding hen thu ka nei lo masi? ⁵ Mifial dang tla leh Lalpa unau tla leh Peter hâwi hen khan Kristian nunau nupi rui ding hen thu kan nei lo mazei? ⁶ Asi lo chun rianṭuan lo ding hen kei chu Barnaba nih thu kan nei lo bîk mazei? ⁷ Kawrsen âu me mah leh mah a châwm hen râltuk dah tâwn? Âu nih me a rah ei ṭung lo hen grep dûm tuah dah tâwn? Asi lo chun, âu nih me ranrual nûk ei ṭung lo hen ranrual zauhkhenh dah tâwn? ⁸ Chubang thu chu minung hâwi cho hen ka sim masi? Dân thu khawm nih chu tak chu a sim bâk lo mazei? ⁹ Mosi Dân lasuibu ah chun, "Chawchal nih fâng a chîl liauah a mûr phuar lah," ti rîn asi. Pathian nih chawchal rang ko masi a ruat piak? ¹⁰ Kanmah rang takah a sim asi lo ma? Asi ta a! Kanmah rang asi an rîn. Tual nâwntu nih chun lungumnâk nei hen nâwn ding asi; fâng âttu nih chun tingvo nei bâk ding hen a ât ding asi. ¹¹ Kannih thlarau lei chî tla chu nan rangah kan tuh rawh chun, nan taksa lei tla thu chu ât khawmsele thil dingchang tak ma asi lai? ¹² Midang men nih nan tlûnah thuneihnâk anna ting chun kannih châng chu ting khun ding kan silo ma? Sikhawmsele, chu thuneihnâk chu kan mang lo; Krist Thâwngthâng Ṭha kan kham lonâk ding hen zeizawng kan tuar rarâm dauh tâwn asi. ¹³ Zarh thil timhtuahtu tla nih chun Pathian Biakin ah mi thil an ei mi leh mâichâm ṭuantu tla nih chun mâichâm ah tingvo an nei ti nan theih lo mazei? ¹⁴ Chu hâwi ber hen Lalpa nih chun Thâwngthâng Ṭha simtu tla chu Thâwngthâng Ṭha chu an ei muhnâk dingah a ruat asi. ¹⁵ Sikhawmsele kei lam nih chun chubang chu pakhat khawm ka mang lo asi. Ka tlûnah chu hâwi nan tinâk ding hen hi thu hi ka rîn asi lo, âuzawng nih ka putso mi hi zeikhawm lo ah an siam ngâk chun thi thlo sele ka rangah a ṭha dauh asi. ¹⁶ Thâwngthâng Ṭha sim khawmsele putso ding rerêng ka nei lo, ti ngelchel ding hen ka tlûnah â thâng asi. Thâwngthâng Ṭha sim lah sele ka tlûn a pit awt asi. ¹⁷ Chu chu mah thu hen ka ti chun lâwmman ka nei asi; sikhawmsele mah thu thu hen asi lo chun Thâwngthâng Ṭha zauhkhenhnâk rian hawng ka kiltir mi ko asi lai. ¹⁸ Ka lâwmman chu zei me asi ne? Thâwngthâng Ṭha lakah ka thuneihnâk chu ka mang diknâk ding hen Thâwngthâng Ṭha ka sim hen lawh lo hen Thâwngthâng Ṭha rian ka ṭuan kho mi hi asi. ¹⁹ Âu sal khawm si lah khawmsele, mi tam dauh ka luh kho ding hen mi zawzawng sal ah kâ siam tâwn. ²⁰ Chun, Juda tla ka luh kho na ding hen Juda tla sinah Juda mi hâwi hen ka um tâwn; Dân tangah um mi tla ka luh kho na ding hen Dân tangah um tla sinah Dân tangah um hâwi hen ka um tâwn, Dân tangah um ṭung lo hen. ²¹ Dân nei lo tla ka luh kho na ding hen Dân nei lo tla sinah Dân nei lo hâwi hen ka um tâwn, Pathian Dân lunglo si lêm lo hen, Krist Dân zâwt ṭung hen. ²² Chak lo tla ka luh kho na ding hen chak lo tla sinah chak lo hâwi hen ka um tâwn; zeitin mawh zeimaw mi tal ruang ka suah kho na ding hen mi zawzawng sinah zeizawng ka si rawh. ²³ Thâwngthâng Ṭha ruangah zeizawng ka ti tâwn, tingvo ka nei kho bâk ding hen. ²⁴ Tekzuam tla chu an ektê hen an tek le, sikhawmsele pakhat cho nih lâwmman a tawng ti nan theih lo mazei? Nan tawng khonâk ding hen chu hâwitê hen tek u. ²⁵ Chun, tekzuamnâk tla lakah chun â ṭang rarâm mi chu zeizawng ah anna sûm tâwn asi. Annih lam nih chun lallukhuh râwk kho tawng ding hen anna ṭang, kannih lam nih chun lallukhuh râwk kho lo tawng ding hen. ²⁶ Chun, chu hâwitê hen tek san bulbal theih lo hen ka tek tâwn. ²⁷ Chu hâwi ber hen boruak eng lo hen ka sualpi tâwn, ka taksa ka êng chiam le, sal ah ka siam tâwn. Chu lo chun midang tla sinah ka phuang nûnah khawm zei zeimawh ti hen keimah ngelchel hi lawnh hen ka um lebang lai.

¹ Unau tla, hi bang hi nan theih loh ka duh lo, kha hâwi a kan thlâktu tla zawzawng sûm tangah an um ver le, an ektê hen tisumsumriat khawm an tan ber le, ² an ektê hen sûm lakah tisumsumriat ah khawm Mosi sinah baptis hen an um ver. ³ An ektê hen thlarau lei buh munkhat hen an ei chiau, ⁴ an ektê hen thlarau lei din ding munkhat hen an din chiau kha; anmah tla zûltu thlarau lei lungpi ah mi kha an din chiau; chu lungpi chu Krist chu asi. ⁵ Sikhawmsele, an lakah mi tam dauh tlûnah chun Pathian a lungsi lo le, ramkaro ah an ruak chu a vawrh phut na. ⁶ Chun, chubang chu kan rangah zauhtirnâk asi, thilsual an duh hâwi khan kan duh bâk lonâk ding hen. ⁷ An lakah mi zeimaw mi ruk sawnhtu an si hâwi khan ruk sawnhtu si lah u. Pathian lasui thu nih, "Zapi chu ei leh din hen an to dut le, pang ding hen an thawk nawlh," ti hen, a sim hâwi khan. ⁸ An lakah zeimaw mi anna pung le, ni khat ah sâng nih leh sâng thum an tlû phah hâwi khan kanna pung ding asi lo. ⁹ An lakah zeimaw mi nih Lalpa an nik le, rûl nih veih hen an um phah hâwi khan Lalpa chu kan nik ding asi lo. ¹⁰ An lakah zeimaw mi an chipchiar le, veihtirtu veihtir hen an um phah hâwi khan chipchiar lah u. ¹¹ Chun, chubang chu zauhtirnâk ding hen an tlûnah a hawng thlung asi kha; kannih, tik dawngh hawng tlungnâk tla hi, nun hawng kan simhnâk ding hen an rîn asi ber. ¹² Churuangah, dîr hen a râlring mi chu a thiamthih seh, chu lo chun a tlû lebang lai. ¹³ Minung tuar kho ri nûnlêm chun lêmnâk rerêng nan lakah a tlung lai loh. Pathian lam chu zumh a kâi asi, anih nih chun nan tuar kho tâwk nûnlêm chun lêmnâk nan tawng a siang lai loh; nan tuar khonâk ding hen lêmnâk rual hen teknâk lampi a siam sawm lai. ¹⁴ Churuangah, ka duhtak le tla, ruk sawnhnâk hi tektâk u. ¹⁵ Mi fing tla sinah sim hâwi hen ka sim asi: Ka thusim hi dawn set nik u. ¹⁶ Malsâwmnâk hâi Pathian sinah lâwmthu ka sim tâwn mi hi Krist thisen bâwmpinâk asi lo mazei? ¹⁷ Kannih mi tamtak hi sang tlang khat taksa pumkhat kan si hi; kan ektê hen sang tlang khat ah mi kanna ting chiau asi. ¹⁸ Taksa leiah Israel tla chu zauhnik u; bâwlnâk sa eitu tla nih chun mâicham chu an bâwmpi lo mazei? ¹⁹ Zei me ka sim ne? Ruk sinah ap mi chu thil asi ti leh ruk khawm chu thil asi ti ka sim mazei? ²⁰ Phundang tla bâwlnâk chu Pathian lakah mi asi lo le, khuri tla lakah anna bâwl tâwn asi ti ka sim mi asi. Nannih lam nih chun khuri tla nan bâwmpi ka nan duh piak na lo asi. ²¹ Lalpa hâi leh khuri hâi munkhat hen nan din kawp kho lai loh; Lalpa dawhkân ah mi leh khuri dawhkân ah mi munkhat hen nan ei kawp kho lai loh. ²² Asi lo chun Lalpa chu thîk ding hen a lung kan fâktir awt bei ne? Amah ngâk hen kan chak dauh hen ma kanna ruat? ²³ Thil zeizawng ti a thiang le, sikhawmsele thil zeizawng ti a ṭha lêm loh. Thil zeizawng hi a thiang le, sikhawmsele thil zeizawng ti nih mi a ṭhattir loh. ²⁴ Âuzawng nih mah ṭhatnâk ding hâwl lo hen midang ṭhatnâk ding hâwl dauh seh. ²⁵ Sumtuah ah an zuar mi sa chu a sia leh a ṭha theihnâk ruangah zeikhawm deih lêm lo hen ei ko; ²⁶ "Tual leh a sungah thu um zawzawng hi Lalpa tâ asi," ti hen Pathian lasui thu nih a sim ruangah. ²⁷ Lunglo mi tla lakah âumawh a nan sâwm na hen, kal nan duh chun sia leh ṭha theihnâk ruangah zeikhawm deih lêm lo hen an hunh na mi zawng chu ei ko u. ²⁸ Khawmsele, âu nih mawh, "Hi hi bâwlnâk asi," ti hen a nan simh na chun a nan theihtir natu ruangah leh sia leh ṭha theihnâk ruangah ei lah u. ²⁹ Nanmah sia leh ṭha theihnâk ka ti lo le, midang sia leh ṭha theihnâk chu asi ka ti dauh. ³⁰ Zeirangah midang sia leh ṭha theihnâk hen ka thawsuaknâk a simsâwi ne? Lâwm tak hen ka ting chun a tlûnah lâwmthu ka simnâk lakah hin zeirangah simsiat ka si? ³¹ Chun, nan ei khawmah, nan din khawmah, nan ti mi kipah khawm Pathian rokualnâk ding ver hen ti u. ³² Kei nih mah ṭhatnâk hâwl hen ruangsuah an si khonâk ding hen mi tamtak ṭhatvaknâk hâwl dauh hen, mi zawzawng zeizawng ah ka lawmhtir hâwitê hen, Juda tla rang khawm, Phundang tla rang khawm, Pathian kawhmi tla rang khawm an tlûk phahnâk ding rerêng zeikhawm ti lah u.

¹ Hawng ka châwngtu si u, kei khawm Krist châwngtu ka si hâwi ber hen. ² Chun, zeizawng ah nan hawng ka theihkumza ruangah leh thurovuih ka nan simh na hâwitê hen nan kil thlir ruangah ka nan sawr na. ³ Sikhawmsele, mipa vial lû chu Krist asi, nunau lû chu mipa asi, Krist lû chu Pathian asi ti hi nan theih ka duh asi. ⁴ Churuangah, mipa âuzawng a lû khuh bû hen thlacham mawh thusimtu nih chun, Krist chu a mualphoh asi. ⁵ Nunau âuzawng a lû khuh lo hen thlacham mawh thusimtu nih chun a pasal a mualphoh asi; chu nunau chu a lû mêt peng mi nunau hen zeikhawm â dangnâk a um loh. ⁶ Nunau lukhuh lo hen a um chun mêt dâidua seh; sikhawmsele, nunau rangah lû mêt mawh mêt peng mawh ningzak a kâi chun lukhuh a khuh seh. ⁷ Mipa lam chu Pathian bangh mi leh rokualnâk asi ruangah lukhuh khuh ding asi lo rerêng asi. Nunau lam chu mipa rokualnâk asi. ⁸ Mipa hi nunau thawk hen suak asi lo le, nunau lam chu mipa thawk hen suak asi dauh. ⁹ Mipa hi nunau rangah siam asi lo le, nunau lam chu mipa rangah siam asi dauh. ¹⁰ Churuang chun, vânmifial tla ruangah nunau nih mipa thuneihnâk tangah a um ti singsiahnâk ding hen â khuh ding asi. ¹¹ Sikhawmsele, Lalpa ah chun nunau hi mipa lo hen a um kho lo, mipa khawm hi nunau lo hen a um kho bâk lo. ¹² Nunau hi mipa thawk hen suak asi hâwi ber hen mipa khawm hi nunau thawk hen suak asi; sikhawmsele, zeizawng hi Pathian thawk hen suak asi. ¹³ Nanmah kha dawn nik u, nunau nih lukhuh khuh lo hen Pathian sinah thlacham hi â dawh mazei? ¹⁴ Mipa nih sam sâu a nei chun a rangah ningzakkâi asi ti nan suakpi mi thinlung khawm nih a nan theihtir na lo mazei? ¹⁵ Nunau lam nih chun samsâu a nei chun a rangah rokualnâk asi dauh; a sam chu khuhnâk dingah pêk asi. ¹⁶ Zeikhawm si sele, âuzawng êl ding hen um sele, chu hâwi dân rerêng kan nei lo, Pathian kawhmi tla khawm nih an nei lêm lo. ¹⁷ Sikhawmsele, ka nan sîntir na mi lakah hin ka nan sawr na kho lo, nan ṭhat khunnâk ding silo hen, nan siat khunnâk ding lei dauh hen nanna pûm tâwn ruangah hin. ¹⁸ A masachem hen kawhmi le tla nanna pûm chun nan lakah ṭhennâk a um tâwn ti ka theih asi; lung khawm ka lung dauh ber asi. ¹⁹ Nan lakah a tak tak tla chu an lang khonâk ding hen nan lakah lungnâk dang a um ding rerêng asi. ²⁰ Chun, nanna pûm hen Lalpa zânriah ei kho asi lo, mikip nih nan ei hen mah zânriah nan ei masa tâwn. ²¹ Chun, mi pakhat a sung a vâng le, mi pakhat a rî fâwn. Zei ti zia me? ²² Din leh einâk ding in nan nei lo masi? Asi lo chun, Pathian kawhmi tla nan zauhnawmh hen zeikhawm neilo tla chu nan mualphoh mazei? Nan sinah zei me ka sim lai rawh ne? Ka nan sawr na awt ma? Hi leikâng hin ka nan sawr na kho lo. ²³ Thu ka nan simh na singsuan mi kha Pathian sinah thawk hen ka tawng mi asi: Kha hâwi hen Lalpa Jisu nih tleihtir hen a um zân ah sang a lâk le, ²⁴ lâwmthu a sim thluh nûnah, a phel le, "Hi hi ka taksa, nan ruangrûl ah pêk ding mi chu asi, nan ka theihkumzanâk ding hen ti tâwn u," a ti kha. ²⁵ Chu hâwi ber hen, zânriah ei thluh ah hâi khawm chu a lâk le, "Hi hâi hi ka thisen, a thutiam thar chu asi, nan din kipah nan hawng ka theihkumzanâk ding hen hi hi ti tâwn u a ti kha. ²⁶ Chu sang chu nan ei hen, hâi chu nan din kip hen a hawng kal nawlh lân lo chu Lalpa thihnâk chu nan zauhtir asi. ²⁷ Churuangah, âuzawng ei tlâk lo hen sang chu a ei hen mawh Lalpa hâi dintu zawng chu Lalpa taksa leh thisen tlûnah mawh a ting lai. ²⁸ Chun, mi a nik sawm seh, chu hâwi hen sang chu ei hen hâi chu din seh. ²⁹ A ei leh a dintu nih chun Lalpa taksa chu a dawn seset lo hen chun mah tlûnah lâirêlnâk ding hen a ei hen a din tâwn asi. ³⁰ Churuangah, nan lakah mi tamtak chak lo hen nan ngawr asi, nêptuai nan thi lo. ³¹ Sikhawmsele, mah leh mah a nik masa sele, Pathian lâirêl hen kan um lo ding mi, ³² lâirêl piak hen kan um khawmah laikulh hen mawhphurh a kan um lonâk ding hen Lalpa nunsimh hen kan um tâwn asi. ³³ Churuangah ka unau le tla, ei ding hen nanna pûm khawmah a ngâk dut tâwn u. ³⁴ Nanna pumhnâk chu lâirêlnâk nan tuar phah lonâk ding hen, âuzawng nih a sungvâng chun a in leiah ei seh. Chun thu chu ka hawng tik zawngah ka hawng remh lai.

¹ Chun, unau le tla, thlarau lei thilpêk tla chu nan theih lo ka duh loh. ² Lunglo tla nan si liau khan zei ti kâng tal hen an ruai na nâk zawngah khabang ruk hawlh kho lo tla leiah khan tlâupi hen nan um ti nan theih. ³ Churuangah, âukhawm nih Pathian Thlarau ah thusim hen, "Jisu chu siat phurh asi," an ti dah lo; chun âukhawm nih Thlarau Thenhlimh ah cho lo chun "Jisu chu Lalpa asi," an ti kho dah lo ti ka nan theihtir na. ⁴ Chun, thilpêk dang dang a um le, Thlarau lam chu munkhat asi. ⁵ Rianṭuan dang dang khawm a um, Lalpa lam chu munkhat asi. ⁶ Ṭuan dân dang dang khawm a um le, Pathian lam chu munkhat asi- mi zawzawng lakah zeizawng ṭuantu chu. ⁷ Sikhawmsele, ṭhatvaknâk ding hen Thlarau theihtirnâk chu mikip sinah pêk chiau asi. ⁸ Mi pakhat sinah Thlarau ah chun finghnâk thu pêk asi; midang sinah chu Thlarau ber nih chun theihnâk thu pêk asi. ⁹ Chun, midang sinah chun chu Thlarau ber ah chun lungnâk pêk asi; midang sinah Thlarau ah chun damh khonâk thilpêk pêk asi. ¹⁰ Midang sinah thilchê tikhonâk tla pêk asi; midang sinah thusim khonâk pêk asi; midang sinah Thlarau tla theih dik khonâk pêk asi; chun midang sinah hawlh chi dang dang hen thusim khonâk ha pêk asi; midang sinah hawlh simhfiang khonâk tla pêk asi. ¹¹ Sikhawmsele, chubang zawzawng chu Thlarau munkhat ver hen chun mikip sinah a duh hâwi zia vima hen a ṭhen hen a ṭuan tâwn. ¹² Taksa hi pumkhat asi, ṭeng tamtak a nei le, taksa ṭeng tla zawzawng chu tam khawmsele taksa pumkhat an si le, Krist chu chu hâwi ber chu asi. ¹³ Kan ektê hen, Juda mawh, Phundang mawh, sal mawh, sal lo mawh taksa pumkhat a um ding hen Thlarau pumkhat cho ah baptis hen kan um chiau le, Thlarau pakhat cho hawng kan dintir chiau fâwn. ¹⁴ Taksa hi ṭeng pakhat cho asi lo le, ṭeng tamtak asi dauh. ¹⁵ Kezaphah nih hin, "Kut ka si lo ruangah hin taksa ah tel ka si lo," ti sele, chu mi ruang chun taksa lakah tel lo asi lêm lo. ¹⁶ Chun, nâ nih hin, "Mit ka si lo ruangah taksa ah tel ka si lo," ti sele, chu mi ruangah taksa lakah tel lo asi lêm lo. ¹⁷ Taksa pum hi mit si ver sele hâu theihnâk chu zeiah me a um lai? A pum hen hâu theihnâk si ver sele rim theihnâk chu zeiah me a um lai? ¹⁸ Sikhawmsele, Pathian nih ṭeng kip tla hi taksa ah hin a duhnâk kipah a umtir chiau rawh asi. ¹⁹ Chun, chubang zawzawng chu ṭeng khat cho si sele taksa hi zeiah me a um lai? ²⁰ Chu hâwi hen, ṭeng tamtak an si le, khawmsele taksa pumkhat cho asi. ²¹ Chun, mit nih hin kut sinah, "Zeirang khawmah ka nan duh lo," a ti kho lo; lû khawm nih hin kezaphah sinah, "Zei tirua khawmah ka nan duh lo," a ti kho lo fâwn. ²² Asi, chu hâwi ngangâk hen, taksa ṭeng chak lo dauh hâwi a lang mi tla hi thungâi an herh asi. ²³ Chun, taksa ṭeng chawnglawmh tlâk lo dauh a kan ruat mi tla hi, chubang tak chu thungâi kan chawnglawmh tâwn. Churawhchun kan ṭeng â dawh lo mi tla lam nih chun chu hâwi hen ti an ngâi lo. ²⁴ Taksa lakah hin ṭhennâk ding rêng a um lo, a ṭeng tla nih hin bang ver hen anna nawkpi tawnh chiaunâk ding hen Pathian nih dawhnâk nei lo ṭeng chu chawnglawmh dauh hen taksa hi a kâwp asi dauh. ²⁶ Chun, ṭeng khat nih a tum chun ṭeng zawzawng nih an tuarpi tâwn, ṭeng khat chawnglawmh hen a um chun ṭeng zawzawng nih an lawmhpi tâwn. ²⁷ Chun, nannih tla hi Krist taksa chu nan si le, a ṭeng tla nan si chiau ber. ²⁸ Chun, Pathian nih zeimaw mi tla chu kawhmi le tla lakah a siah le, a pakhatnâk ah chun mifial tla, a panihnâk ah chun khuavâng tla, a pathumnâk ah chun sîntirtu tla a siah le; chu mi nûnah chun thilchê ti tla a um le, chu mi nûnah chun damtir khonâk thilpêk tla, ṭangpi khonâk thilpêk tla, lâirêl thiamnâk thilpêk tla, hawlh chi dang dang hen thusim khonâk thilpêk tla chu a um nawlh. ²⁹ An ektê hen mifial an si ver mazei? An ektê hen khuavâng tla an si ver mazei? An ektê hen sîntirtu an si ver mazei? An ektê hen thilchê titu an si ver mazei? ³⁰ An ektê hen damtir khonâk thilpêk an nei ver mazei? An ektê hen hawlh theih lo hen thu an sim ver mazei? An ektê hen thu an simhfiang ver mazei? ³¹ Thilpêk rokual chem chu thungâi duh u. Chun, tuah lampi ṭha dauh ka nan zauhtir na awt asi.

¹ Minung hawlh leh vânmifial hawlh hen thu sim khawmsele dâwtnâk ka nei ṭung lo chun dâr ri hâu salam mawh, chêngchêng ri hâu salam mawh ka hawng si lai. ² Chun, thusim khonâk nei hen, thu thup zawzawng leh theih khonâk zawzawng theih ver khawmsele, tlâng ṭhinh khawp rê hen lungnâk nei khawmsele dâwtnâk ka nei ṭung lo chun zeikhawm ka si lai loh. ³ Chun, mipâm tla châwmnâk dingah ka neih zawzawng pêk ver khawmsele, ka taksa khawm kâng ding hen pêk khawmsele dâwtnâk ka nei ṭung lo chun a ṭhavak lai loh. ⁴ Dâwtnâk nih â dawnh kho, vêl a nei tâwn; dâwtnâk nih a nahsuah lo; ⁵ dâwtnâk chu â sawr lo, â zûm lo, dawh lo hen a châng lo, mah rang cho a ruat lo, a thinthawk duh lo, ⁶ sual leikâng a dawn lo, replonâk ah â lâwm lo, thutak lam chu a lawmhpi tâwn. ⁷ Zeizawng a tuar rarâm le, zeizawng a lung le, zeizawng a lungum le, zeizawng ah tlawlhnâk a nei lo. ⁸ Dâwtnâk hi zeitik khawmah a reh lai loh; sikhawmsele, thusimnâk tla hi a bâng teh lai; hawlh theih lo tla hi um khawmsele a bâng teh lai; theihnâk hi um khawmsele a bâng teh lai. ⁹ A kim lo hen kan theih le, a kim lo hen thu kan sim tâwn asi. ¹⁰ A rangtlingnâk a hawng tlung tikah chun a kim lo mi hi bângtir asi lai rawh. ¹¹ Ka ngâksia liauah ngâksia hawlh hen ka hawlh le, ngâksia theih hen ka theih le, ngâksia ruatdân hen ka ruat tâwn. Tuah ka upat nûnah hin ngâksia ti dân chu ka thlah rawh. ¹² Tu lam chun thlalang ah ka muh rianruan asi, chu tikah lam chun mâitawnh hen asi lai rawh; tuah lam chun a kim lo hen ka theih, chu tikah lam chun Pathian nih a hawng ka theih kim hâwi hen ka theih kim lai rawh. ¹³ Chun, hi pathum, lungnâk, lungumnâk leh dâwtnâk tla hi a um kumza lai; chun hi bang tla lakah hin a rokual chem mi chu dâwtnâk hi asi.

¹ Dâwtnâk hi zûl vima ule, thlarau lei thilpêk tla chu duh kumza u. Sikhawmsele, thu nan sim khonâk ding châng chu duh khun u. ² Hawlh theih lo hen thusim nih chun minung sinah sim lo hen Pathian sinah sim asi dauh, âukhawm nih a thusim chu an theih lo; sikhawmsele thlarau lakah chun thu thup a sim asi. ³ Thusimtu lam nih chun minung sinah siamtharnâk thu tla, fawrhnâk thu tla, lungngamnâk thu tla a sim tâwn. ⁴ Hawlh theih lo hen thusim nih chun mah cho a siam ṭha tâwn, thusimtu lam nih chun kawhmi tla a siamṭha dauh tâwn. ⁵ Chun, nan ektê hen hawlh theih lo hen thu nan sim ka nan duh piak na lo! Sikhawmsele, nan ektê hen Pathian thusimnâk thilpêk nan nei chiau ka nan duh piak dauh na asi. Kawhmi le tla nih siamṭhatnâk an tawng khonâk ding hen, a simhfiang lo chun thusimtu chu hawlh theih lo hen thusimtu ngâk chun a rokual dauh rerêng asi. ⁶ Tuah unau le tla, hawlh theih lo a thusim hen nan sinah hawng kal tâ sele, theihtirnâk leikâng mawh, theihnâk leikâng mawh, thusim leikâng mawh, sînnâk leikâng mawh nan sinah ka sim ṭung lo chun zei me ka nan ṭhattir na nâk um lai? ⁷ Thil nung lo tumphung âwn kho mi tla khawm, theikhang mawh, ṭingṭang tla hi suangkhâng nei hen a âwn lo chun zei la me an tum le an sak, zeitin â theih kho lai? ⁸ Dârlâwi hi suangkhâng neilo hen a âwn chun âu nih me râl kah ding hen â timhtuah lai? ⁹ Chu hâwi ber hen nannih khawm nih, lei nih hin theih kho mi hawlh hen nan sim lo chun zei thu me nan sim zeitin a theih kho lai? ¹⁰ Boruak ah hawlh mi ko nan si awt asi. Laikulh ah hin hawlh chi dang tamtak a um asi, sikhawmsele umzia nei lo rerêng a um lo. ¹¹ A hawlh umzia lam chu kan theih lêm lo chun kei hi a simtu rangah phundang ka si lai le, a simtu khawm chu ka rangah phundang asi lai. ¹² Chun, nannih khawm nih thlarau lei thilpêk lakah ṭhanem nan ngâi ruangah hin kawhmi le tla siamṭhatnâk ding nan nei khonâk ding hen hâwl u. ¹³ Churuangah hawlh theih lo a thusim nih chun a simhfiang khonâk ding hen thlacham seh. ¹⁴ Hawlh theih lo hen thla ka cham chun ka thlarau khawm nih thla a cham ngelchel le, ka theihnâk lam chu a ṭhavak lêm lo. ¹⁵ Zeitin asi lai rawh ne? Thlarau hen thla ka cham lai le, theih khonâk khawm hen thla ka cham ber lai. Thlarau hen la ka sak lai le, theihnâk hen khawm ka sak ber lai. ¹⁶ Chu lo chun thlarau hen malsâwm piak na khawmsele theih dah lo tla umnâk ah um mi nih, nan lâwmthusim ah chun zeitin me "Amen" a ti kho lai, na thusim chu a theih lêm lo mi? ¹⁷ Nang lam nih chun lâwmthu chu ṭha tak hen na sim le, midang lam chu a siamṭha lêm lo. ¹⁸ Nanmah ngâk hen hawlh theih lo hen thu ka sim tam ruangah Pathian sinah lâwmthu ka sim le, ¹⁹ sikhawmsele kawhmi tla pumhnâk ah chun hawlh theih lo hen thu sâng khat sim ngâk hen midang tla ka sîntir kho na nâk ding hen ka theih khonâk ding thu panga cho sim ka duh dauh asi. ²⁰ Unau le tla, thinlung leikângah ngâksia lah u. Sikhawmsele, sual leikâng lam chun fasêm si ule, thinlung leikâng lam chun upa si u. ²¹ Pathian Lasui thu nih, "Ramdang mi tla hawlh hen, ramdang mi tla mûr hen, hi bang mi le tla sinah thu ka sim lai le, ka mi le tla nih an ka ngâi piak lêm lai loh, Lalpa nih a ti," ti rîn asi. ²² Churuangah, hawlh theih lo tla hi lungtu tla rangah singsiahnâk asi lo le, lunglo mi rangah asi dauh; thusim lam hi chu lunglo tla rangah singsiahnâk asi lo le, lungtu rangah asi dauh. ²³ Churuangah, kawhmi zawzawng nanna pûm hen nan ektê hen hawlh theihlo hen thu nan sim chun, theih dah lo mi mawh, lunglo tla mawh hawng na sele, a â an ti awt lo ma? ²⁴ Nan ektê hen thu nan sim lam chun lunglo mawh, theih lo mi mawh hawng lût sele, a mawh zia a ngâi mi nih a langhtir lai le, a ngâi mi tla zawzawng nih a salh lai rawh, a thinlung thuthup tla chu langhtir hen a um lai rawh. ²⁵ Chun, bawkbukhup hen mâi an mûk lai le, Pathian nan lakah a um ti a phuang lai. ²⁶ Unau le tla, zeitin asi lai rawh ne? Nan hawng a pûm hen, sawrnâk la mawh, thu sîntirnâk mawh, theihtirnâk thu mawh, hawlh theihlo mawh, simhfiangnâk mawh nan nei chiau tâwn. Zeizawng siamṭhatnâk ding hen ti si seh. ²⁷ Âuzawng nih hawlh theihlo hen thu an sim chun panih nih, a tam chem ah pathum mawh si sele, a sâwng vima na seh; chun pakhat nih simhfiang seh. ²⁸ Simhfiangtu an um lo lam chun kawhmi tla pumhnâk ah dâisip hen um sele, mah leh Pathian sinah sim seh. ²⁹ Thusimtu tla khawm nih panih mawh pathum mawh sim sele, midang tla nih chun dawn seset seh. ³⁰ Sikhawmsele, a kiangah to mi midang sinah theihtirnâk thu pêk hen a um chun a masa mi chu dâisip seh. ³¹ Mi zawzawng anna sîn khonâk ding leh mi zawzawng lungngam tak an um khonâk ding hen nan ektê hen pakhat vima hen thu nan sim kho asi. ³² Thusimtu tla thlarau chu thusimtu thu thu hen an um asi. ³³ Pathian chu nawknâk Pathian asi lo le, remnâk Pathian asi dauh. Mi thenhlimh kawhmi murui zawzawng sinah a um hâwi hen. ³⁴ Kawhmi tla pumhnâk ah chun nunau tla chu dâisip hen um seh; annih lam chu an thusim siang asi loh; Juda dân nih a sim hâwi hen thu zâwt hen um dauh seh. ³⁵ Chun, zeizawng sîn an duh chun mah in leiah mah pasal deih na seh; kawhmi tla pumhnâk ah chun nunau thusim hi ningzak a kâi. ³⁶ Pathian thu hi nanmah lakah suak asi mu? Asi lo leh, nanmah tla sin cho mazei a hawng tlung? ³⁷ Âuzawng thusimtu ah mawh, thlarau mi ah mawh â ruat chun nan sinah ka thurîn hi Lalpa thupêk asi ti hawng theih seh. ³⁸ Sikhawmsele, âuzawng nih a theih lo chun theih lo hen um ko seh. ³⁹ Chun, unau le tla, thusim hi duh thlo ule, hawlh theihlo thusim khawm khap lah u. ⁴⁰ Sikhawmsele, zeizawng dawh tak hen leh rep tak hen ti si seh.

¹ Chun, unau le tla, Thâwngthâng Ṭha ka nan simh na mi kha ka nan theihtir nawlh na lai. ² Chu Thâwngthâng Ṭha chu nan lawmh hen, chu lak ber chun nan dîr hen, thu ka nan simh na mi kha nan lung salam lo hen, nan tleih thlir chun chu lak tak chun ruangsuah hen nan um lai. ³ A masachem hen, ka tawng bâk mi chu ka nan simh singsuan na kha, kha hâwi hen Krist chu Pathian lasui thu hâwi vima hen kan sual ruangah a thi le, ⁴ an vûi le, Pathian lasui thu hâwi vima hen ni thum ni ah thawh hen a um, Peter sinah a hawng a langh kha. ⁵ Chu nûnah chun ṭhiruai leinih tla sinah a hawng a langh nawlh le, ⁶ chu nûnah chun veikhat ah amah zûltu mi zanga ngâk a tam dauh sinah a hawng a langh nawlh. ⁷ Chu lakah mi tam dauh chu tutiang hen an dam rih, a zeimaw mi chu an thi rawh le, chu nûnah chun Jem sinah â langh nawlh, chun chu nûnah mifial zawzawng tla sinah. ⁸ Chun, a dawnghchem ah chun, a tik lo a suak hâwi, keimah sin khawmah â langh. ⁹ Kei lam chu mifial lakah mêchem, kawhmi tla ka nehsawh na ruangah mifial ah ruat tlâk lo ka si. ¹⁰ Sikhawmsele, Pathian zângfahnâk ruangah ka si ding mi chu ka si rawh; chun a zângfahnâk hawng ka pêk mi thu a thawt hen a um lo; chu hâwi ngâk hen anmah tla zawzawng ngâk hen a ṭuan ka hamh dauh kha. Sikhawmsele, keimah nih ka ṭuan lo le, Pathian zângfahnâk ka sinah um mi nih khan a ṭuan dauh asi. ¹¹ Zeikhawm si sele, kei khawm nih, annih khawm nih, kha hâwi khan kan sim tâwn le, kha hâwi khan nannih nih nan lung bâk. ¹² Chun, Krist thu, mithi lakah mi thawh hen a um ti an sim ṭung chun zeitin zia me nan lakah zeimaw mi nih, "Mithi thawknawlhnâk rerêng a um lo nan ti ne? ¹³ Mithi thawknawlhnâk rerêng a um lo chun Krist khawm kha thawh nawlh hen a um lai loh. ¹⁴ Chun, Krist kha thawh hen a um lo chun kan thusim hi zeikhawm lo asi ber lai. ¹⁵ Asi, Krist a thawh ti Pathian kan theihpi ruang khan Pathian thu leikângah theihpitu âwkrâwl kan hawng si ber lai--mithi tla thawh hen an um lo chun amah khawm a thawk lai loh. ¹⁶ Mithi tla thawh hen an um ṭung lo chun Krist khawm kha thawh hen a um lai lo. ¹⁷ Chun Krist kha thawh hen a um lo chun nan lung mi chu zeikhawm asi lai lo le, nan sualnâk ah chun nan um nget asi lai. ¹⁸ Chu hâwi asi chun Krist ah thi mi tla kha an vei ver rawh asi lai. ¹⁹ Tu dam liau cho ah Krist lakah lungumnâk kan nei chun mi zawzawng lakah zângfah kâi chem kan si lai. ²⁰ Sikhawmsele, Krist chu mithi lakah mi thawh hen a um tatak asi, hi hi asi a birhnâk chu mithi zâu rawh mi tla khawm an thawknawlh awt asi. ²¹ Adam ruangah thihnâk a hawng um le, Krist ruang ber hen thawknawlhnâk a hawng um. ²² Adam lakah mi zawzawng an thi tâwn hâwi hen, Krist ah mi zawzawng nunh hen an um hi. ²³ Sikhawmsele, mah tik chiau vima ah, Krist chu thawhnâk mâitâwntu asi le, chu nûnah a hawng kal nawlhnâk ah Krist tâ tla chu. ²⁴ Chu tikah chun dawnghnâk a hawng tlung teh lai, chu nûnah chun lâirêlnâk zawzawng tla leh thuneihnâk leh thiltikhonâk zawzawng tla a veih ver nûnah Pathian sinah Pa sin takah chun Ram chu a pêk lai. ²⁵ A mêlma tla zawzawng a kê tangah a siah lan lo chu anih chu lal ah a um ding rêng asi. ²⁶ Mêlma madungchem veih hen a um ding chu thihnâk hi asi. ²⁷ Pathian lasui thu nih, "Pathian nih thil zeizawng a kê tangah a siah asi, ti hen a sim ruangah. "thil zeizawng" ti mi nih hin Pathian tel lo hen Krist tangah thil zeizawng siah ver ti nâk asi. ²⁸ Chun, Krist lâirêlnâk tangah zeizawng siah hen a um tikah chun Fapa ngelchel khawm chu a tangah zeizawng siahtu tangah chun siah hen a um bâk lai, Pathian chu zeizawng ah zeizawng asi khonâk ding hen. ²⁹ Chu hâwi asi lo chun, mithi ruangrûl ah baptis si mi tla chu zeitin me an ti na lai? Mithi tla chu thawh hen an um lo chun zeirangah me thih ruangrûl ah baptis an si tâwn ne? ³⁰ Zeiruangah me kannih khawm hi dârkar kipah ṭihnungkâi hen kan um tâwn ne? ³¹ Unau le tla, Krist Jisu kan Lalpa ah chun ka nan putso na nâk chu sâl hen, "Nisiar hen ka thi tâwn," ka ti asi. ³² Minung nih ti kho salam hâwi hen Ephesi khua ah sa râng tla ka sualpi asi chun ka rangah zei me a ṭhavak lai? Mithi thawh hen an um awt lo chun kan din hen kan ei ko lai ma? Thai ko ah kan thi awt hi teh. ³³ Perpet hen um lah u; hâwi sual tla nih chun nunchan ṭha an râwk tâwn. ³⁴ Rep tak hen lungfîm ule, thilsual ti lah u. Zeimaw mi nih chun Pathian theihnâk rêng nan nei lo hi; hi hi nan ningzaknâk ding hen ka sim asi. ³⁵ Sikhawmsele, âu nih mawh, ’Mithi tla chu zeitin me thawh hen an um awt? Taksa zei hâwi put hen me an hawng kal awt?" a ti asi lai. ³⁶ Nang mi â, nangmah ngelchel nih na tuh mi khawm hi a thi tâ lo chun nungtir hen a um mazei? ³⁷ Chun, na tuh mi hi a taksa um ding mi chu na tuh lo le, a fâng ko na tuh dauh tâwn; fâng mal mawh, chî dang mal mawh asi kho; ³⁸ sikhawmsele, Pathian nih amah duhzia hâwi vima hen taksa a pêk tâwn, a mal kip sinah mah taksa chiau chu. ³⁹ Taksa zawzawng hi taksa zât khat asi lo le, minung taksa â dang le, rannung taksa â dang le, vâ taksa â dang le, ngâ taksa â dang. ⁴⁰ Vân taksa tla a um, tual taksa khawm; sikhawmsele, vân taksa rokualnâk chu â dang le, tual taksa rokualnâk chu â dang asi. ⁴¹ Nî rokualnâk chu â dang le, thlâ rokualnâk chu â dang bâk, chun ârfi tla rokualnâk chu â dang; ârfi tla lak khawmah an rokualnâk ah chun anna bang lo. ⁴² Mithi thawh nawlhnâk khawm chu hâwi ber asi. Thû kho hen tuh hen a um le, thû kho lo a thawh hen a um; nâu tak a tuh hen a um le, rokual tak a thawh hen a um. ⁴³ Chak lo a tuh hen a um le, thiltikhonâk nei a thawh hen a um. ⁴⁴ Minung lei taksa a tuh hen a um le, thlarau lei taksa a thawh hen a um. Minung lei taksa a um chun thlarau lei taksa khawm a um lai. ⁴⁵ Chu hâwi ber hen, Minung masachem Adam chu minung a hawng si," ti rîn asi. Adam madung dauh chu nungnâk pêktu thlarau a hawng si. ⁴⁶ Sikhawmsele, thlarau lei chu a um masa lo le, minung lei chu a um masa dauh; chu nûnah chun thlarau lei chu a um. ⁴⁷ Minung masachem chu tual a mi valei hen siam asi; minung panihnâk chu vân ah mi asi. ⁴⁸ Valei hen siam mi Adam hâwi kha tual a siam mi tla khawm hi an si; vân ah siam mi Krist hâwi kha vân a mi tla khawm chu an si. ⁴⁹ Chun, tual ah siam mi Adam banghnâk an nei hâwi hen vân ah mi Krist banghnâk chu kan nei awt asi. ⁵⁰ Unau le tla, taksa leh thisen nih hin Pathian Ram chu a luah kho lai loh; thû kho nih hin thû kho lo chu a luah kho lai loh ti ka sim asi. ⁵¹ Ngâinik u, thuthup dik tak ka nan simh na awt hi: Kan ektê hen kan thi lêm lai lo le, sikhawmsele kan ektê hen dârlâwi madungchem a âwn tikah chun sâwtlotê ah, ⁵² mitthlep kar lo ah dangtir hen kan um ver lai; dârlâwi chu a âwn awt asi, chun mithi tla chu thû kho lo a thawh hen an um lai le, kannih khawm dangtir hen kan um lai. ⁵³ Hi thû kho nih hin thû kholonâk â ting ding asi, hi thû kho khawm nih hin thû kholonâk â ting bâk ding asi. ⁵⁴ Chun, hi thû kho nih hin thû kholonâk â ting hen, hi thû kho nih hin thû kholonâk a ting tikah chun, "Nehnâk nih thihnâk a dawlh thluh rawh!" ti thu a hawng tlung lai. ⁵⁵ "Aw thihnâk, na nehnâk chu zeiah me a um? Aw thihnâk, na tûr kha zeiah me a um?" ⁵⁶ Thihnâk tûr chu sual asi le, sual thiltikhonâk chu Dân thu chu asi. ⁵⁷ Sikhawmsele, kan Lalpa Jisu Krist zârah nehnâk hawng kan pêktu Pathian sinah chun lâwmthu um seh. ⁵⁸ Churuangah, ka unau duhtak le tla, bir tak hen, changh kho lo rê hen, Lalpa rian ṭhanemngâi tak a ṭuan kumza hen um u, nan ṭuan hamhnâk chu Lalpa ah chun a thawt dah lo ti nan theih asi.

¹ Chun, mi thenhlimh tla rangah thawhlâwm thu lam kha chu, Galatia ram ah kawhmi tla murui sinah thu ka pêk hâwi hen nannih khawm nih hawng ti bâk u. ² Ni sarih ni masachem ah chun mikip nih malsâwmnâk nan tawng hâwi vima hen khawng chiau ule, ka hawng kal tikah thawhlâwm khawlh rerêng a um lonâk ding hen. ³ Chun, nan zângfah thilpêk chu Jerusalem khua ah kalpi ding hen ka hawng tleng tikah âu tal ṭha nan ti mi zawng lasui put hen ka fial hi. ⁴ Chun, ka kal bâk ding mi asi chun ka sinah an hawng lai. ⁵ Chun, Makedonia ram ka ṭawl dih nûnah chun nan sinah ka hawng kal lai. Makedonia ram chu ka ṭawl rerêng awt asi. ⁶ Nannih sin lam chun ka châm ko asi kho, busik kar zawzawng khawm asi lai dahmawh, zeiah tal ka kalnâk ding kipah nannih nih nan hawng ka thlah khonâk ding hen. ⁷ Tuah kal pah ko hen an muh na ding ka duh lo le, Lalpa nih rem a ti chun nan sinah sâwt dauh châm ding ka ruat asi. ⁸ Sikhawmsele, Pentekost tiang hen Ephesi khua ah ka châm ko lai. ⁹ Kawtkâ kâu tak leh ṭhatnâk tak ka rangah â awng asi, dotu tla tamtak an um ber. ¹⁰ Chun, Timothe kha a hawng tleng chun ngamh tak hen nan sinah a um khonâk ding hen hawng lawmh u; kei nih ka ṭuan hâwi ber hen Lalpa rian chu a ṭuan asi. ¹¹ Churuangah âukhawm nih zauhnawmh lah seh; ka sinah a hawng khonâk ding hen lungngam tak hen hawng thlah u; unau tla rual ah amah muh ding ka ruat asi. ¹² Kan unau Apolo thu kha chu, unau tla rual ah nan sinah hawng ding hen ka ngiar chiam le, sikhawmsele tuah lam chun hawng kal a duh lo thlo, â dêngkhâwng tikah chun a hawng kal lai. ¹³ A vêng ule, lungnâk ah chun dîr thlir ule, nan râl a ṭhattir ule, chak tak hen um u. ¹⁴ Nan ti mi vial chu dâwtnâk ruangah ti mi si ver seh. ¹⁵ Unau le tla, Stephan leh a dâwngsung le tla chu Akai ram ah lungtu masa an si le, Pathian mi tla rianṭuan ding hen anna pêk ti nan theih; ¹⁶ chu hâwi mi tla sinah leh rianṭuan hen ṭangpi leh ṭuan hamh mi vial sinah chun a pêk ding hen ka nan ngiar na. ¹⁷ Chun, Stephan, Fortunata leh Akaika tla an hawng kal mi hi ka lawmh asi, nan um lo mi theih phân lo hen an hawng ka siam ruangah. ¹⁸ Annih nih hin ka thinlung leh nan thinlung an panhtir le, chun hi bang hâwi mi tla hi lawmh u. ¹⁹ Asia ram kawhmi murui tla nih hin chibai a nan bûk na. Akuila leh Priskili, an in ah kawhmi tla hen Lalpa ah chun chibai tamtak a nan bûk na, unau zawzawng nih hin chibai a nan bûk na. ²⁰ Châwchawk thenhlimh hen chibai a bûk chiau u. ²¹ Kei, Pawl nih keimah kut ngelchel hen chibai ka nan bûk na. ²² Âuzawng nih Lalpa a dâwt lo chun siatphurh hen um seh. Kan Lalpa chu a hawng kal hi! ²³ Lalpa Jisu Krist dâwtnâk chu nan sinah um seh. ²⁴ Krist Jisu ah ka nan dâwt na nâk hi nan ektê sinah um seh. Amen.