KHORINTHEK
Shii Phaul Re-è Igobi Pha Jigigam
YAOPHI
Khorinthek shii Phaul ro igobi pha jigigam ne masipho ro chai nane migi shii diigthek rog shii khoh pha ji zeyjong ro, jithek ne Phaul miirung pha charch shii khia khlei ro. Ji pha ishak shii Khorinth ne Grekh pha bajo boh rajan ro. Ji ne Roman du-ùa iliing pha Akhaya pha bajo jadthek de um. Hì ne chong è, awaithek ro zen pha ji shii wiangwe ne, ruang hà shiie pha layog, chiih-è ichua pha giangthek è thiegdun.
Charch hà che rai chiih-è layog, chiih-è siulao rai pha nane yiygey rai pha chiang shii musaithek sai, thieg pha chiang shii, charch pha muyung, Ragung so pha lasen hèg, chiih-è hòi din pha diigthek shii now srane guaphasamoy è jigigam zey. Bajo iliing è ai riig nyie khi-èrek ne Mua Wie è ji pha musaithek ne chang yi.
Itho 13, shii doh yi Hamangkhung-aphuii ro bran shii ne miie ne zab è wie lasen ro, ji pha jigigam pha itho ne bajo wie è thieg pha ji ro.
Iliing shii um pha ji
Yaophi (1:1-9)
Charch iliing shii yoyo ibrog (1:10—4:21)
Siulao pha munow nane haliing pha chai (5:1—7:40)
Masipho nane migi arek pho (8:1; 11:1)
Charch pha chai nane misia (11:2—14:40)
Masi nane migipho hòi din pha (15:1-58)
Judea hà Masiphothek shii zid (16:1-4)
Nujo miyaothek nane jongsha (16:5-24)
11Phaul è, hanyie shii Hamangkhung-aphuii è yang ne Masi Isu ro guaphasamoy rek yi, chiih-è gathek ro khuiino Sosthenes è de.
2Khorinth shii um pha Hamangkhung-aphuii ro charch chiih-è Hamangkhung-aphuii è hanyie shii zab so pha bran rone ho pha, chiih-è hanyie yi aishii um pho ne Isu Masi rog shii phro, ithek ro Ithong nane gathek ro Ithong, hanyie è Isu Masi shii sia pha zab bran shii ò rek bo.
3Hamangkhung-aphuii gethek ro Aphuii nane Ithong Isu Masi è nathek shii bushun nane liijiing phi bo.
Masi shii khirzeythek
4Nathek chiang shii gune idang guro Hamangkhung-aphuii shii laso phi, nyieliieshii Isu Masi chiang è ai è nathek shii bushun phi. 5Nathek Masi rog shii ò um pha ji è nathek ne zab pha muna, chiih-è ne zab pha yao pha nane zab khani shii bohkhoh rey ruii phro. 6Masi ro mua chiang è nathek shii chuh è rab phi sra ne 7nathek khan muii pha gathek ro Ithong Isu Masi dong ruii pha ji è, nathek shii mua pha khirzey jine iphen jia de ìujia arey yi ro. 8Jong pha Inai shii de nathek shii chuh è ruii phro, jiè nathek ne gethek ro Ithong Isu Masi pha Inai shii ne ichiig oi phro. 9Hamangkhung-aphuii shii migi rek bo, Hamangkhung-aphuii hanyie è nathek shii gathek Ithong awai Dufuii Isu Masi rog ò rek pha ho ro.
Churh shii chedun
10Gethek ro Ithong Isu Masi pha riichai è gu nathek zab shii yao, gu ijakthek, nathek è nyie yao pha ji shii ne nuii, jiè nathek duchoi shii ache ruii phro. Zab ò jia rai bo, jia now bie ne chiih-è jia rek bie bo. 11Chloe haliing pha giak branthek è gu shii miang è yao, gu ijakthek, thiisa hà nathek duchoi shii gui muii ro. 12Gu ne hì duiine nathek shii yao: Nathek zab jia jia ne yo yaodun. Jia è yao, “Gune Phaul rog luagieng” gai è yao, “Gune Apholos rog luagieng” gai è yao, “Gune Phithar rog luagieng” chiih-è gai è yao, “Gune Masi rog luagieng.” 13Masi shii yoyo ibrogthek che nebey! Nathek chiang shii bai hà iy pha ji ne Phaul bey? Nathek ne Phaul ro samoy rey ne khowo yi nebey?
14Gu Hamangkhung-aphuii shii laso phi, Grisphus nane Gaius shii thoh ne gu è nathek hanyie shii khowo aphi ro. 15Chiihphado, nathek ne gu beng è khowo yie phrone, nathek ne hanyie de ayao mua phro. 16(Oh, gu è de Sthephanas nane airo haliing pho shii khowo phi; jishii gu è gai hanyie shii khowo phi pha ji ne gu anow mua ro.) 17Masi è gu shii khowo phi pha athoh ro. Ai è gu shii ne Mua Wie ji yao pha thoh, chiih-è bran khani pha nyuak è rek ne yua pha asi ro, ji pha chiang shii izai rab ne Isu bai shii iy pha blu shii nathek è ariao yi rabo.
Masi ne Hamangkhung-aphuii pha blu nane khani ro
18Hanyie yi san dun ramuii pho ne, Masi bai shii iy pha mua jine adunmey ro: jishii gethek hanyie è ragia rey pho shii ne Hamangkhung-aphuii blu ro. 19Jigigam shii yao,
Gune khua pha khani shii srobro rek ruii phro chiih-è bajo ìd branthek ro khani shii de ijiu jia hà ruii muii phro.
20Ji-è ji arone, khua ne khi hà dun dun lai? Dinne bajo ìd pho ne khi hà dun dun lai? Dinne ichiih sohjambling pha lie pho ne khi hà lei? Hamangkhung-aphuii è ichiih sohjambling pha khani ne bi-ìe rone doh yi!
21Hamangkhung-aphuii è branthek shii awaithek khani è aishii athieg yi pha rab muii. Ji phachiang shii, gethek muyua pha mua ji ne thaluii “bi-ìe” rone yao pha ji ne, hanyie è migi rek pha ji shii ne ragia rey phrone Hamangkhung-aphuii è phakjong ro. 22Jewthek è buangthek pha khagi shii chid, chiih-è Greekthek ne khani shii sow. 23Chiih-è gethek ne, Masi ne zun dun pha ji yao, ji pha mua ne Jewthek shii ne buii ro chiih-è Gaibranthek shii ne adunmey ro; 24jishii Hamangkhung-aphuii è hanyie shii ho pha ji ne, nyi manyi Jewthek nane Gaibran shii de ro, hì pha mua ne Masi ro, hanyie shii Hamangkhung-aphuii ro blu nane Hamangkhung-aphuii ro khani um ro. 25Nyieliieshii Hamangkhung-aphuii ro bi-ìe ne branthek ro khani è bo doh muii ro, chiih-è Hamangkhung-aphuii pha zia ne branthek ro chua è de bo doh muii ro.
26Gu ijakthek, Hamangkhung-aphuii è nathek shii ho mage shii, nathek ne nyie ga thuh shii now bo. Bran è now shii nathek è giak yi khua dinne blu dinne boh ilkhi ro. 27Hamangkhung-aphuii è khani oi pho shii gua pha ji ne nak ne sohjambling pha khani um pho shii biwo rek yi pha rek, chiih-è sohjambling pho zia ro è yao pha ji shii gua ne blu pho shii biwo rey yi. 28Sohjambling pho nyie shii ìu riig muii pha nane thoh muii pha, chiih-è nyie asi rone yao pha ji shii gua srane sohjambling pho è miigak rone now pha srobro yi pha gua phro. 29Hì pha miyao è hanyie de Hamangkhung-aphuii moe shii nyigodog arek mua. 30Jishii Hamangkhung-aphuii è gethek shii Masi Isu rog shii ò rai yi pha noh, chiih-è Hamangkhung-aphuii è Masi shii gethek ro khani rab phi. Ai chiang è gethek ne Hamangkhung-aphuii rog shii giang ruii; gethek de Hamangkhung-aphuii ro so bran rey ro chiih-è gethek ne layog è ichad rey ge ro. 31Ji-è, chiihphado, jigigam shii yao, “Hanyie magungde nyigodog rek yang arone Ithong è nyie rek pha ji shii nyigodog rek bo.”
2Masi zundun pha chiang mua
1“Gu ijakthek, gu nathek shii wuii srane Hamangkhung-aphuii ro ug ne ruii pha izai ji yua shii, gu boh miyaogamthek nane boh è dab pha ji è ayao ro.” 2Gu nathek rog um ba shii, gune gui khani shii nowjong zab shii bia srane Isu Masi shii nane airo bai shii iy pha ji shii nowdang bie. 3Ji-è gu nathek shii wuii shii, gune zia nane rum ne sam, 4chiih-è guro muyua nane mua ne bran khani pha miyaogamthek è khia pha asi ro, jishii Hamangkhung-aphuii ro Ragung pha blu è khagi rek. 5Chiihphado, nathek migi ne bran khani lakhung shii asi ro jishii Hamangkhung-aphuii pha blu lakhung pha ro.
Hamangkhung-aphuii ro khani
6Jishii hanyie yi ragung shii weg arone gune aishii khani pha mua ji yua. Jishii sohjambling è rey pha blu dinne sohjambling shii bukhothek pha bluthek—blu ne awaithek blu shii san muii pha khani ji asi ro. 7Gu è yao pha khani ne branthek è ug ne ruii pha Hamangkhung-aphuii ro ug pha khani ji ro, jishii sohjambling rab pha ibi, hanyie è khuchung mujo gethek ro biisiie ne guajong ro. 8Hì pha sohjambling pha bo khophothek hanyie de hì pha khani ne athieg ro. Ithek è thieg arone, ithek ne biisiie pha Ithong ne bai hà azun chid. 9Jimagunde, jigigam shii yao,
“Hanyie è khuchung de adoh dinne khuchung de ayoi,
hanyie è khuchung de anow pha ji ne rey ruii phro,
Hamangkhung-aphuii è jine hanyie è aishii miie, ji shii saro phi.”
10Jishii Hamangkhung-aphuii è gethek shii airo Ragung è awairo ug pha ji shii ìd yi. Hamangkhung-aphuii ro yang ne bucho hà ug pha blia rangde Ragung è zab sowdun. 11Hì ne bran awairo ragung awaishii um pha ji ne zab awai chiang shii thieg bie; ji duiine, Hamangkhung-aphuii ro Ragung ne Hamangkhung-aphuii chiang zab thieg. 12Gethek ne ichiih sohjambling pha ragung achoi ro; ji pha chiang shii gethek ne Hamangkhung-aphuii è thoh ge pha Ragung shii choi, chiihphado gethek ne Hamangkhung-aphuii è gethek shii phi pha ji ne nyathieg mua phro.
13Ji-è chiihphado, hanyie shii ragung um gethek è ragung pha izaithek yao, jishii gethek ne bran khani è yua pha miyaogamthek jine ayao pha, Ragung pha muyua è yao haro. 14Hanyie shii Ragung oi Hamangkhung-aphuii ro Ragung è thog pha lasen hèg jine ayie mua phro. Ji è rek pha branthek ne jithek shii ne athieg mua chiih-è aishii ne jithek adubo ro; nyieliieshii ithek ro ibid ne Ragung è chua mua bie phro. 15Jimagunde hanyie shii Ragung um, khi-èrek magunde, zab pha ibid shii nyachua mua, jishii hanyie magungde aishii achua mua phro. 16Jigigam shii yao, “Ithong ro khani ne hanyie thieg mua phlei?”
“Aishii ne hanyie è yua mua phlei?”
Jimagunde, gethek ne Masi ro khani um ro.
3Hamangkhung-aphuii pha khiaothek
1Gu ijakthek wo, nyieliieshii gu è hanyie shii ragung um pha branthek shii yao pha duiine izai miyao ji ayao mua, gu è nathek shii ne ichiih sohjambling pha duiine yao chiih-è Masipho migi shii anithek duiine ro. 2Michie ii-àk è asi pha, gune nathek shii niu wang, nyieliieshii nathek ne ji ne arey ba ro. Chiih-è nathek thuh rangde ji asharo ba ro. 3Nyieliieshii nathek murai hì ne thuh de sohjambling pho murai duiine rai bamuii ro. Thiisa hà nathek duchoi shii gidieg um arone nawaithek chung gui rai phro, nathek ne ichiih sohjambling pha rone chiih-è ji pha mizen shii sieng rone khagi arey bey? 4Nathek jia è yao, “Gune Phaul rog luagieng,” chiih-è gai è yao, “Gune Apholos rog lua giung è yao pha ji ne nathek ne sohjambling pha bran duiine achia bey?”
5Yaochak arone, Apholos ne hanyie lei? Chiih-è Phaul ne hanyie ga? Hanyie è migi shii no ne lua pha, gethek ne Hamangkhung-aphuii ro khiao bie ro, gethek zab jia è Ithong è aishii rek boh ne phi pha blia ji rek: 6Gu iriie wey, Apholos è misieng shii khoh phi, jishii misieng sieng yi pha ji ne Hamangkhung-aphuii ro. 7Hanyie jia è misiengthek shii hai magungde chiih-è hanyie jia è kho zuak magungde nyie blia oi ro. Hì ne Hamangkhung-aphuii ro blia ro, nyieliieshii ai è misieng shii sieng yi. 8Thuh shii ne hai pha bran nane khoh phi pha bran ne ò ro, hanyie è nyie khi rek pha ji Hamangkhung-aphuii è ji duiine lasen phi ruii phro. 9Chiih-è gethek ne ò shii Hamangkhung-aphuii pha blia rekramuii ro, chiih-è ithek ne Hamangkhung-aphuii ro raig ro, chiih-è nathek Hamangkhung-aphuii ro hò de ro. 10Hamangkhung-aphuii è gu shii phi pha lasen ji è khoh srane, gune hò wie rung pha duiine sarong rek ruii, chiih-è gai jia è ji pha lakhung shii hò rung, jishii nyie khi-èrek ne rung pha, zab ne ji shii wie gayiig bo. 11Hamangkhung-aphuii è Isu ai jia shii khuchung mujo sarong rab ne ruii jong, chiih-è hanyie è de gai sarong arab muii sha phro. 12Giak ne san, liiman dinne igong um pha lubao è sarong shii hò rung pha rek, giak ne hing, saing dinne sasen è rung phro. 13Chiih-è zab bran mirek pha blia igong ji ne Masi ro Inai thog mage shii doh ruii phro. Ji pha Inai shii bai è zab pha blia shii dong ruii phro; chiih-è hanyie ro jine wie awie bai è chai ruii phro. 14Chiih-è nyie sarong shii rab pha ji ne bai è ahùb arone, ji rung pha bran shii ne lasen mua ruii phro. 15Jishii hanyie ro blia yi bai shii hùb dun arone airo lasen ne amua ruii phro; jishii ai è bai ji è yo arone, awai ne ragia nyarey mua.
16Zai Nathek ne thieg nathek ne Hamangkhung-aphuii ro misia hò ro chiih-è Hamangkhung-aphuii ro ragung ne nathek shii rai phro. 17Ji-è hanyie è Hamangkhung-aphuii ro misia hò shii mua lai ne Hamangkhung-aphuii è aishii de mua ruii phro. Chiih-è Hamangkhung-aphuii ro misiahò ne so ro chiih-è nawai de airo misiahò ro.
18Hanyie de awaishii bi-ìe arek rabo. Chiih-è hanyie magungde de nathek duchoi shii ai ne ichiih sohjambling pha sasab è khua now arone, khua rey yi pha, bi-ìe rey bo. 19Chiih-è ichiih sohjambling pho munow pha khani jine Hamangkhung-aphuii mieg moe shii ne adubo ro. Jigigam shii yao, “Hamangkhung-aphuii ne khuathek shii awaithek briak shii zum din ruii phro.” 20Chiih-è gai jigigam de yao, “Ithong è ne thieg khua rone now pha ji ne adubo ro.” 21Ji-è, hanyie magunde bran è nyie rek mua pha ji shii ne nyigodog arek mua phro. Zai è arone hì zab ne naro ro: 22Phaul, Apholos, chiih-è Phithar; hì pha sohjambling, chai chiih-è iy pha, thuh pha chiih-è phariang pha hì ne zab nathek ro ro, 23chiih-è na ne Masi re-è rey chiih-è Masi ne Hamangkhung-aphuii re-è rey ro.
4Masi ro guaphasamoythek
1Nane gathek shii Masi ro khiaothek duiine now bo, hanyie shii Hamangkhung-aphuii ro ug pha izaithek shii dumuii phi. 2Hì è rek pha Khiaothek ai ne awai masdo shii wie è isiie rek chid phro. 3Thuh shii, gu ne na chiih-è hanyie sohkhung pho shii chua pha ji samdiig arek ro; gu gui lakhung shii de achua ro. 4Gu è now pha ji ne sang ro, jishii ji è ne izai gu ne ichiig rone doh yi pha asi ro. Hanyie è chua pha gu lakhung shii phi pha ji ne Ithong jia bie ro. 5Ji-è nathek ne chua pha ji ne khriig ishak athog ba shii ne hanyie jia shii de achua rabo. Idohhè pha chua pha ji ne Ithong wuii ruii pha ji khan bo; ai ne igiia ug pha ji shii ne isang yi phro chiih-è branthek khani shii ug ne now pha ji shii ne hong ruii phro. Chiih-è chiihphado ithek shii mua sapho pha chiong jine Hamangkhung-aphuii è mua ruii phro.
6Nathek chiang è, gu ijakthek, gu è hì zab yao pha Apholos nane gui, gasa nyi è rek pha ji ne nathek shii rek phi, jiè nyie yao pha miyiaosiu ne nathek shii ìd mua pha, “Bohkhothek shii wie è riig bo” Nathek hanyie de bran jia shii wiangwe srane gai shii makhak-ariing rabo. 7Hanyie è na shii gaithek è de boh rab phlei? Nashii nyie um pha ji ne Hamangkhung-aphuii è phi pha ji asi bey? Wie, na shii um pha lasen ji asi arone nyie khi-èrek ne nyigodog rek mua phlei?
8Nathek nyie chiid pha ji ne zab nathek shii umjong bey? Nathek ne bokho reyjong bey? Nathek ne sajathek rey dun bey? Gethek ne thuh de arey ba ro? Nathek sajathek rey pha ji ne gu è yang ro, jiè gethek ithek rog shii sajathek rek mua. 9Gu ne hì duiine than gethek riigdang pha ji shii zab sohjambling pha hamangkhliie thek nane branthek mieg moe shii branthek è iy pha the muii pha ji duiine guaphasamoythek shii ne Hamangkhung-aphuii è iidohè pha ithua shii phi. 10Masi chiang è gethek ne bi-ìethek ro, jishii nathek ne Masi rog shii um pha ji è khua ro! Gathek ne zia ro, jishii nathek ne gang ro! Gathek shii ne snai muii, jishii nathek shii ne ilab phi. 11Hì pha ishak thokdang shii gethek ne chi-iyiy nane gahang-hang ba; gethek ne yung hègthek guii; gethek shii ne zuang; gethek ne ithua hà lua ne rai; 12Gathek ne blia gang rek srane guithek shii jid yi, gathek shii thamai mage shii, gathek ne khirzey rey, gathek shii diigchiao thog mage shii, gathek è zud; 13gathek shii makhak-riing mage shii, gathek è jum miyaogamthek rog è chang. Chiihphado gethek ne ichiih sohnyiak pha snai muii pha ji asi sha ro; gethek ne thuh shii sohjambling pha izia-ikho ro!
14Gu è nathek shii hì zey pha ji ne, nyieliieshii nathek shii biwo than yi pha azey ro, jishii gui anithek rone nathek shii yua phro. 15Nathek Masipho chai shii itham sua gayiigphothek um ne de, nathek shii aphuii jia bie ro. Nathek chai Masi rog shii ò um pha ji ne gu nathek shii Mua Wie yie pha ji è gu nathek ro aphuii rey ro. 16Gu nathek shii khung, chiihphado, nathek ne gu mirek ji shii lua bo. 17Hì pha blia chiang è hanyie yi guiro bushun nane Masipho chai shii isiie rek pha, gui dufuii Thimothi shii gu nathek shii thoge ro. Gu è iwo chai Masi Isu rog shii ò rek ne nuii pha sbang chiih-è nyie gu è zab pha charch shii yua pha ji ai ne ithek shii now yi.
18Nathek giak ne wiangwe rey dun nyieliieshii nathek ne è now gu ne nathek shii si pha awuii sharuii. 19Jishii, Ithong è yang arone, gu nathek shii khthiie wuii ruii phro, jiè ji pha branthek shii um pha blu wiangwe pha ji shii gune sow pha ro, chiih-è ithek è nyie yao pha ji asi ro. 20Hamangkhung-aphuii ro Sajathua ne miyaogamthek è asi ro, jishii blu è ro. 21Nathek shii ne nyie khi-èrek ne ò chid? Gu ne nathek shii zuang pha wuii ruii haba dinne miie pha ragung nane jum ji yie ne nathek shii wuii ruii habey?
5Charch shii siulao
1Thuh, hì ne nathek duchoi shii bajo buii siulao rek rai pha ji ne yaojong, migi arekpho rangde è jithek pha ichiig ne arek ro. Gu shii yao bran jia ne awai muno rog shii men ramuii ro! 2Nyiekhi-è, chiihphado, nathek ne wiangwe rek mua nebey? Suang lakhung shii, nathek ne duhug rog shii zan chid, chiih-è bran hanyie è jithek rek pha ji shii ne nathek ro ò è khia muii chid. 3-4Chiih-è gu siu ne nathek è ruang magungde, thuh de ragung shii ne thiisa nathek rog shii um ro; chiih-è jimagunde gune nathek rog shii um pha duiine, gu ne Ithong Isu beng è ji pha buii rek pha bran lakhung shii chua pha ne ruiijong ro. Nathek ò shii si rai mage shii, chiih-è gui ragung rog shii si pha ro, gethek ro Ithong Isu pha blu gathek rog shii um ne, 5nathek ne ji pha bran siu mua yi pha sakhathong wad shii phi muii bo, jiè Ithong pha Inai shii ne airo ragung ne ragia rey ruii phro.
6Nathek shii wiangwe rek pha rangsua oi ro! Nathek ne yao pha ji thieg, “Ìujia pha phiia è zab pha miihab nog pha ji shii phieng yi.” 7Nathek de ihèg phiia layog shii khia muii bo, chiihphado nathek de zab igang rey phro. Nathek ne khi-è mia pha ji ne izai gu nathek shii thieg, chiihphado ithek de phiia alua pha miihab nog pha duiine rey bo, chiih-è gethek ro Hiiadun pha sai pha ji ne khriig sha ro, gethek ro Hiiadun pha shiishaiduii Masi ne khlemjong ro. 8Chiihphado, cho gethek ne iweb shii phiia ihèg pha layog um pha nane awie pha ji è asi pha, jishii iweb shii phiia oi pha gang nane izai pha iweb rog shii Hiiadun pha ji shii lubo rek sha rai haro.
9Jigigam shii gu è nathek shii zey pha ji ne gu nathek shii yao siulao pha bran rog shii ijak arek rabo. 10Thuh gu hanyie thek shii gaibranthek hanyie è siulao rek dinne sugoh dinne mugo dinne hanyie è jangbangthek shii siapho shii ayao ro. Ithek shii yoh rey pha ji ne nathek zab ne sohjambling è khia chid ruii phro. 11Gu miyaosiu ne hì ro, bran hanyie è awai shii migipho ro è yao jishii siulao dinne sugoh rek dinne jangbangthek shii sia dinne khlam dinne phuiithiig dinne mugopho rog shii ijak arek rabo. Ji è rek pha branthek rog shii chie pha de adug rabo.
12-13Nyayao chak arone, gune fuangpho shii chua pha guro rangsua asi ro. Hamangkhung-aphuii è ithek shii chua ruii phro. Jishii nathek ne nawaithek ro ò pha branthek shii achua bey? Jigigam shii yao, “Nathek ibrog è awie pha bran shii khia muii bo.”
6Masiphothek chung mak rek rai pha chiang è chuathek hà wuii
1Nathek è hanyie magunde Masipho chung è miyao um arone, ji pha miyao shii Hamangkhung-aphuii pha bran shii khriig rek yi pha khalo shii migi arek pha chuathek ibi shii wuii pha chua um lei? 2Hamangkhung-aphuii bran ne sohjambling shii chua ruii phrone nathek ne athieg bey? Wie, chiihphado, nathek è sohjambling shii chua arone, nathek ne ìu miyao shii achua mua habey? 3Gethek ne hamangkhliiethek shii de chua ruii phrone nathek ne athieg bey? Chiihphado, ichiih pha chai pha manathek shii ne dinne de bajo chua mua! 4Jithek pha miyaothek izai thog mage arone, nathek hanyie è charch shii isiie asi pha bran shii khriig rek yi pha wuii nebey? 5Nathek shii wo muii ro, izai thiisa hà hanyie è Masipho chung gui rai pha ji shii ne chua mua pha khua jia ne um iwa. 6Ji phachiang shii, Masipho jia chua ò hà wuii ne gairo suang rek srane migi-arekphothek shii maley chua yi!
7Hì ne izai chak ro nathek ne nawaithek duchoi shii che srane zab buyud rone doh yi ro. Nathek lakhung ichiig rey yi pha ji ne wie asi bey? Nathek ro rio yi pha wie asi bey? 8Ji phachiang shii, nathek ne nawaithek chung asi pha rek ne chiih-è nawaithek chung rio rai, chiih-è gai migiphothek shii rangde ro! 9Nathek ne izai thieg awie pho ne Hamangkhung-aphuii ro Sajathua akhud mua phro. Nawaithek shii bi-ìe arey rabo; bran hanyie è ichiig rek, dinne hanyie è jangbang shii sia dinne siulao rek dinne bufuii chung siulao rek 10dinne hanyie mugo dinne giichak dinne phuiithiig pho hanyie è gai shii khlam dinne mugopho jithek ne Hamangkhung-aphuii ro Sajathua shii akhud mua phro. 11Nathek giak ne ji duiine ro. Jishii nathek shii ne layog è igang rekjong ro; nathek è Hamangkhung-aphuii shii phijong ro; nathek shii ne gathek ro Hamangkhung-aphuii ro Ragung nane Ithong Isu Masi è nathek shii ne Hamangkhung-aphuii rog shii rangsua ruiijong ro.
Nathek ro siu ne Hamangkhung-aphuii ro biisiie shii blia rek bo
12Giak è yao ruii phro, “Gu shii ne nyie magunde rek yi.” Oh; jishii zab ne nathek shii wie asi ro. Gu ne guishii nyayao muii, “Gune ne nyie magunde rek mua, jishii gune nyie magunde jithek è gu shii khiao arab yi ro.” 13Giak ne yao ruii phro, “Michie ne lui pha ro, chiih-è lui ne michie pha ro.” Oh; jishii Hamangkhung-aphuii è nyimanyi shii jong muii phro. Siu ne siulao rek pha asi ro, jishii Ithong pha blia rek phi pha ro; chiih-è Ithong è siu shii nyie chid pha ji phi. 14Hamangkhung-aphuii è Ithong shii iy dun pha ji è hòi phi, chiih-è gethek shii ai è awairo blu è hòi yi phro.
15Nathek ne thieg nathek ro siu ne Masi ro siu pha thang ro. Gu ne Masi ro siu ichua shii yie ne chiih-è siulao pha siu ichua rab muii habey? Arey muii! 16Dinne nathek ne athieg iwa bran hanyie è awai siu shii siulao shii rung ne bimi rog shii siu jia rey dun bey? Jigigam shii miang è yao, “Siu nyi ne jia rey ruii phro.” 17Jishii hanyie è awaishii Ithong rog shii rung arone ragung shii ne ai rog ò rey dun phro.
18Siulao thoh muii bo. Gai nyie layog rek magungde siu shii achun phro; jishii bran hanyie è siulao pha ichiig layogthek rek arone awai siu shii suang rek phro. 19Nathek ro siu ne Ragung So pha Jewthek misiahò rone athieg bey, hanyie è nathek shii rai ne hanyie è nathek shii phi pha ji ne Hamangkhung-aphuii è phi ne bey? Nathek ne nawaithek ro asi ro jishii Hamangkhung-aphuii ro ro; 20ai è nathek shii igong è phegjong ro. Ji-è nathek ro siu ne Hamangkhung-aphuii ro biisiie shii blia rek bo.
7Yiygey chiang è musaithek
1Thuh, na mizey pha miyaothek chiang shii riig bo, bran jia è ayiyagey pha rek pha ji ne wie rek ro. 2Jishii nyieliieshii siulao ne bajo um ro, jiè zab pha hò-aphuiithek ne awaithek ro yiy um bo, chiih-è zab pha hò-amuiithek ne awaithek ro gey um bo. 3Bufuii è gey duiine liingsed pha blia rek bo, chiih-è bimithek de yiy duiine awaithek blia liingsed pha rek bo, chiih-è zab gai è chid pha ji shii liingsed pha rek rai bo. 4Yiy ne awairo siu pha muspho asi ro, jishii gey ne yiy ro siu pha muspho ro; ji duiine gey de awairo siu pha muspho asi ro, jishii yiy ne gey ro siu pha muspho ro. 5Igobi nasa misia shii yo rai pha nuii rai shii ne, yo nyarai bo jishii misia jong mage shii nawaisa chung agak rai rabo, jishii chiihphado yiygey duiine wie rai bo. Ji duiine nyieliieshii naro azud mua pha ji è Sakhathong è chuajan phi mage phro.
6Gu è hì nathek shii yao pha ji ne yung pha asi ro, jishii jum è phi phro. 7Gu è nathek shii gu duiine rai bo è yang muii ro; jishii zab jijia shii ne Hamangkhung-aphuii ro bajo wie lasen um ro, bran jia shii hì pha lasen um ro, gai shii gai lasen um ro.
8Thuh, ayiy-agey ba pha nane gey oi pha misiungthek shii gu yao nathek de gu mirek duiine athodang pha rai pha ji wie ro. 9Jishii nathek è chidthek pha ji shii azud mua arone, yiygey mage bo—Michid shii hùb shii ne yiygey liak pha hì wie ba ro. 10Yiygey pha bran shii gu muyung um ro jishii hì ne guro asi ro hì ne Ithong ro ro: Yiy ne awaithek gey shii athoh rabo; 11jishii ai è rek arone, ai ne awai ji rai ne dinne awai gey rog shii dinne dog bo; chiih-è gey è yiy shii ache rabo.
12Gaithek shii gu è yao (jishii Gui ne Ithong asi ro) Masipho bran jia shii migi arek pha yiy um chiih-è ai è ai rog shii rai pha ro è nuii arone, ai ne ji pha bimi shii ache rabo. 13Chiih-è Masipho bimi jia è migi arek ba pha bufuii shii yiygey ne chiih-è bufuii ji è bimi rog shii rai pha ro è nuii arone, bimi è ji pha gey shii ache rabo. 14Migi arek ba pha gey jide awai yiy rog shii ò rai pha ji è Hamangkhung-aphuii è nuii, chiih-è migi arek ba pha yiy ji de migi rek pha gey rog shii ò rai pha ji è Hamangkhung-aphuii è nuii phi. Ji-è arek arone, ithek anithek ne migi arek pha ani duiine rey dun phro; jishii hì è rek pha ji è, ithek è Hamangkhung-aphuii shii nuii phi. 15Jimagunde, hanyie yi migi arek ba pha è Masipho yiygey rog shii thoh yang arone, jine rey yi bo. Zai Masipho yiygey shii ne, yiy magun gey magun ichad nyarek mua phro. Hamangkhung-aphuii è nathek shii liijiing hà rai pha ho. 16Nyie khi-èrek ne na yao mua, Masipho yiy, nathek ne nawaithek gey shii ragia arek habey? Din ne khi-èrek ne yao mua, Masipho gey, ithek yiy shii ne ragia arek habey?
Hamangkhung-aphuii è ho pha duiine sieng bo
17Zab nathek shii Hamangkhung-aphuii è ho shii Ithong è nathek shii lasen phi pha ji duiine nathek rai bo. Hì ne gu è zab charchthek shii yua pha Iphey ji ro. 18Migiangkheg pha bran ne Hamangkhung-aphuii è ho pha ji shii nuii arone, ai ne migiangkheg pha nab shii sud pha abidiang rabo; chiih-è migiang-akheg pha branthek è Hamangkhung-aphuii miiho shii nuii arone, ai ne migiang-akheg rabo. 19Bran yi migiangkheg magunde migiang-akheg magungde nyie miyao oi ro, nyie miyao ji ne Hamangkhung-aphuii muyungthek nuii pha ji ro. 20Zab nathek ne Hamangkhung-aphuii è ho pha ji shii nuii mage shii nathek zab ne rai bo. 21Hamangkhung-aphuii è nathek shii ho mage shii nathek ne khiao bey? Wie, buii anow chid rabo; jishii nathek shii ichad rey pha jo um shii, rek bo. 22Chiih-è khiao hanyie shii Ithong è ho pha bran ne ithong ro ichad sha ro; ji duiine ichad bran hanyie shii Masi è ho pha ji shii ne airo khiao ro. 23Hamangkhung-aphuii è nathek shii igong è phegjong ro; jiè bran ro khiaothek arey rabo. 24Gu ijakthek, nathek zab shii Hamangkhung-aphuii è nyie tharo shii ho pha ji ò rai bo.
Ayiy-agey nane misiungthek shii musaithek
25Thuh, ayiy-agey ba pha bran chiang shii na è zey pha ji shii now bo: Ithong è gune nyie muyung oi ro, jishii Ithong ro bushun è migi rek sapho um pha ji è guro munow ji nathek shii phi.
26Thuh pha diig shii wie è rek ne, gu munow ne bran jia nyie khi è um lai ne ji duiine rai pha ji wie liak ro. 27Na shii yiy um bey? Chiihphado aishii ruang rek pha abidiang rabo. Nane ayiy-agey ba bey? Chiihphado yiy asow rabo. 28Jishii na yiygey arone, nane layog arek ro: chiih-è ayiy-agey ba pha bimi yiygey arone, ai ne layog arek ro. Jishii yiygey pha bran shii um pha idang inai pha diig ji nathek shii ragia rek phi pha now ro.
29Gu ijakthek, gu è nyie yao pha ji ne hì ro: ishak ne muna oi sha ro, chiih-è thuh è yie ne yiygey pha bran ne ayiy pha duiine rai bo; 30hanyie choh pho ne, ithek ne duhug arek pha duiine rai bo; hanyie siak pho ne, ithek ne asang pha duiine rai bo; hanyie pheg pho ne, ithek è nyie pheg pha ji ne awairo arey phro; 31hanyie è manathek migiang shii gayiig pho ne, ithek ne ley a-ong pha duiine rai bo. Chiih-è hì pha sohjambling shii, thuh shii duiine, bajo arai mua sha phro.
32Gune nathek shii samdiig è ichad rek phi pha now ro. Ayiy-agey pha bran ne awaishii Ithong rog shii blia rek pha gayiig bo, nyieliieshii ai ne Ithong shii sang yi pha bidiang phro. 33Jishii yiygey pha bran ne sohjambling pha miyaothek shii gayiig, nyieliieshii ai ne awai yiy shii sang yi pha yang; 34chiih-è jiè ai ne ithua nyi shii ri. Ayiy-agey ba pha hò-amuii dinne so bimi ne ithong rog blia shii gayiig rek, nyieliieshii ai ne nyimanyi awai siu nane ragung shii phi pha yang; jishii yiygey pha hò-amuii ne sohjambling pha miyaothek rog shii gayiig rek, nyieliieshii ai ne awai gey shii sang yi pha yang phro.
35Gu è hì yao pha ji ne nathek shii nong phi pha yang ro. Gu nathek shii gak pha abidiang ro. Ji phachiang shii, gu ne nathek shii nyie izai nane nyie wie ji shii rek yi pha yang ro, chiih-è nyie de a-ong pha zab nawaithek shii Ithong ro blia rek pha phi bo.
36Yangne shaduigang rek ne ruii pha idub è ayiy-agey pha phak ne: Bufuii è de miliao bimi pha blia wie arek mua phro è than arone chiih-è ai miiyang ji yi bajo chuh chiih-è ai è than arone ithek ne yiygey rai bo, ai è yang pha duiine, chiihphado ithek ne yiygey rai bo. Ji hàne layog oi ro. 37Jishii bufuii è, ji rek pha bangchiie arek pha, yiy-ayiy phrone awai khani shii chuh è rek, chiih-è ai awai miiyang shii zab chuh è phriie ne chiih-è khuchung mujo nyie rek pha ji ne awai khani shii now arone chiihphado ai miliao hò-amuii shii ayiy pha ji ne wie rek ro. 38Ji-è bran hanyie è yiygey pha ji ne wie rek ro, jishii hanyie è ayiy-agey pha ji ne dinne de bajo wie rek ro.
39Yiygey pha hò-amuii ne awai gey nya rai ba shii ne ichad asi ro; jishii airo gey yi iy dun arone, chiihphado ai è yang pha bran yiygey mua pha ichad ro, jishii ai ne Masipho bie arone ro. 40Jishii ai ne awai è rai pha ji duiine rai arone ai ne sang phro. Jine gu munow ro, chiih-è gu munow ne ji ro gu shii ne Hamangkhung-aphuii ro ragung um ro.
8Jangbangthek shii zid pha michie chiang musai
1Jangbang shii zid pha michie shii nathek è zey pha ji shii now bo.
Hì ne izai chak ro, ji chak, ithek miyao ji duiine “gethek zab shii ne khani um.” Nyiephalai shii, Khani è ne bran shii thud ne wiangwe rek phi; jishii miie pha ji è ne rab phi. 2Hanyie magunde ai ne ìu thieg ro è now arone ai ne nyie thieg chid pha ji ne izai athieg ba ro. 3Jishii bran hanyie è Hamangkhung-aphuii shii miie pho shii ne Hamangkhung-aphuii è thieg ro.
4Ji-è, chiihphado, jangbangthek shii zid pha michie chie pha chiang: gethek ne thieg jangbang ne nyie izai è azen pha chiang shii riu; gethek ne thieg Hamangkhung-aphuii ne jia bie ro. 5Ichiih shii “hamangkhung-aphuiithek” ho pha um magungde, hamangkhung nane sohnyiak shii magunde, chiih-è bajo “hamangkhung-aphuii” nane bajo “ithongthek” magungde, 6Thuh ichiih shii gethek ro Hamangkhung-aphuii ne jia bie ro, Aphuii, hanyie yi zab pha mana shii rab pha nane nyie shii gethek sieng muii pha ji ro; chiih-è Ithong ne jia bie ro, Isu Masi, ai chiang è zab pha mana shii rab chiih-è ai chiang è gethek sieng ramuii pha ji ro.
7Jishii hì pha izai ne zab è athieg ro. Giak bran ne sudoh thog pha jangbang shii zid pha ji chie muii ro, ithek ji chie shii ithek ne hì pha michie ne jangbang è rey pha ro è now bamuii ro; ithek ro munow ne zia ro, chiih-è ithek ne jangbang pha michie ji è ichiig rey dun rone ithek è than. 8Jishii, michie è, gethek ro sieng ne Hamangkhung-aphuii rog shii laziung arey phro, gethek è achie magungde nyie amua phro, gethek è chie magungde nyie aphua phro.
9Gayiig bo, jimagunde, naro ichad pha blia ji è hanyie ne migi shii zia ji pho shii layog hà achiih yi rabo. 10Yangne hanyie yi ji pha miyao shii now pha ji yi zia pho è “Khani” gang pho è Jewthek misiahò shii zid pha michie chie pha miyao ji na shii doh mage ne aishii ne jangbangthek hà zid pha ji chie bo ne lububo arek phi bey? 11Chiih-è jiè naro khuiino ai chiang shii hanyie Masi iy pha zia bran, ne nyieliieshii naro “Khani” è mua dun phro. 12Chiih-è hì duiine naro suang layog rek ne chiih-è munow zia shii saduii phi pha ji è Masipho shii suang layog rek phro. 13Ji-è chiihphado, michie è gu migiphothek shii layog rey arone, gu ne ibey dinne achie phro, jiè gu migipho shii layog hà achiih phro.
9Guaphasamoy ro rangsuathek nane bliathek
1Gune ichad bran asi bey? Gune guaphasamoy asi bey? Gune gethek ro Ithong Isu shii adoh bey? Chiih-è nathek ne gu è ithong shii blia rek pha ji è arey bey? 2Gai è gu shii guaphasamoy rone anuii magungde, izai nathek ne rek! Nyieliieshii nathek chai è Ithong rog ò shii rai pha ji è gune guaphasamoy rone nawai è izai doh yi ro.
3Bran gu shii siakjo mage shii, hì ne gui è khi-èrek ne guishii ragia rek: 4Gu blia chiang michie nane niing pha phi pha rangsua ne gu shii oi bey? 5Gu lua shii gu rog shii Masipho yiy shii yie srane lua pha chiih-è gune gai guaphasamoy nane Ithong ro khuiinothek nane Phithar è rek pha ikhiing ji shii luagieng pha rangsua oì bey? 6Din ne gethek sieng ramuii pha ji shiine gu nane Barnabas jia è blia rek bie habey? 7Arming ne awai bang è blia rek ne bey? Raigpho è awaithek raig pha angur achie habey? Shiishai brogpho ne awai shiishai niu aniing habey?
8Gu shii ne idang pha ikhiingthek phriie phane oi ro, nyieliieshii Iphey shii hì duiine yao ro. 9“Iwoi shan pha ishak shii rawoi ro uphab shii aphang rabo” chiih-è gethek ne Moses ro Iphey tham. Thuh, Hamangkhung-aphuii è rawoi chiang shii gayiig nebey? 10Ai è yao shii ai ne izai gethek chiang shii ayao bey? Oh ji ne gethek shii zey ro. Hanyiejia è woi chiih-è hanyiejia è riug pha ji ne iwoi pha mathang mua phro è luthong ne blia rek. 11Gathek è nathek duchoi shii ragung pha iriie jai. Gathek è phua pha mana nathek è riug ne yie pha ji ne bajo bey? 12Gai è na lakhung shii hì luthong pha rangsua um arone, Gathek shii ne ji è de muna rangsua oi bey?
Jishii hì pha rangsua gathek è blia arek yi ro, ji pha chiang shii, gathek ne Masi ro Mua wie lumuii chiang shii nyie de adiig yi pha zab shii zud. 13Nathek ne izai thieg bran hanyie è Misiahò shii blia rek pho ne Misiahò è michie mua chiih-è hanyie è sraibao shii khlemthek zid pho ne khlemthek zid pha mathang mua ro. 14Ji duiine, Ithong è de yung hanyie è muawie yua pho ne ithek shii ji è sieng ruii phro.
15Jishii gune nyie magungde hì pha rangsuathek shii blia arek ro, chiih-è gune hì pha rangsuathek shii ne gui shii lia pha azey ro. Hanyie magungde guro rangsua shii isloi pha miyaogamthek hà lai shii ne, gune iy liak pha wie phro! 16nyieliieshii muawie ji gu yao rone gune nyigodog rek pha rangsua oi ro. Nyieliieshii, gune hì rek pha muyungthek mua ro. Chiih-è gu muawie ji ayao arone, gu shii ne khama buii ro! 17Gune ichad è guilum ne blia rek arone, gune mua pha luthong ro; jishii gu ne phi pha blia duiine rek, nyieliieshii Hamangkhung-aphuii è gu shii hì pha blia shii rek pha phi. 18Chiihphado, gu shii nyie riinang mua phlei? Hì ne muawie yua shii igong ayie pha ji ne chua ro, Mua wie pha gu ro blia shii guro rangsuathek ne alia ro.
19Gune ichad bran ro, hanyie ro khiao asi ro; jishii khama rek mua pha ji rek ne bajo branthek shii yang yi pha gu ne guishii zab ro khiao rab. 20Gu Jewthek rog shii blia rek shii gu Jewthek shii yang pha Jewthek duiine rai; chiih-è gui rang de Moses ro Iphey shii anuii pha rek srane ithek shii yang pha ithek nyie khi-èrek ne rai pha ji shii rai. 21Ji duiine, gu Gaibranthek rog blia rek shii, gu Gaibran duiine rai, Gaibranthek shii yang pha Jewthek ro Iphey è fuang rai. Hì pha miyao è ne gune Hamangkhung-aphuii ro Iphey anuii pha asi ro; gu ne izai Masi ro Iphey iliing shii ro. 22Gu ithek shii yang pha, ithek duchoi shii gu de migi shii zia duiine ithek è rai. Ji-è gune khama rey mua pha ji rek ne bran shii ragia rek mua pha, bran duchoi shii gu ne ithek khi-è rey pha ji duiine rey dun.
23Zab gu ne hì rek pha ji ne Mua Wie pha chiang è khirzeythek mathang rey yi pha rek. 24Zai nathek ne thieg ranphothek ne chua rai shii, jishii ithek è ne jijia è lasen yang bie, chiihphado lasen mua sapho ran bo. 25Zab ranphothek bran ne idang arai pha rago pha mugo ji mua pha dab shii ilab phi; jishii gethek è rek pha jia ji ne idang rai pha ji shii rek. 26Ji è, gune jong pha ithua shii miang ran, ji è gune diingpho ro hanyie è awairo diing pha ji shii isloi adun yi pha diingpho duiine ro. 27Gaithek shii chua pha iidoh shii guishii zia arey yi pha gune gui siu shii chuh rey yi pha gui shii diigphi.
10Jangbangthek pha gidieg shii phriie
1Gu ijakthek, hanyie è Moses shii luagieng pha blangthek shii nyie rey pha ji ne, gu nathek shii now yi pha yang ro. Ithek ne zab sakhmiing è ragia rek, chiih-è zab shii wie è Khamuii saig è ragia rek phi ne hiìadun. 2Sakhmiing nane khamuii hà ithek ne zab Moses ro luagiengpho rone khowo yie. 3Zab ne ò luruak pha iweb chie 4chiih-è ithek zab ne ò pha luruak pha kho niing. Ithek ne luruak pha lubao è niing ji ne ithek rog shii wuii gieng; chiih-è ji pha boh lubao ne Masi awai ro. 5Jishii chiihphado de Hamangkhung-aphuii ne ithek è bajo shii ne bushun arek ba ro, chiih-è jiè ithek ro siu-iy jithek ne balimuang lakhung shii dayiingdayang rey dun.
6Thuh, hìthek zab ne gethek shii now yi ne ithek è rek pha awie pha bliathek ji achid yi pha phriie, 7chiih-è ithek giak è rek pha duiine, jangbangthek shii asia rabo, jigigam shii yao pha duiine, “Branthek ne niing ne siulao nane awie pha muniing pha michie hà dugdun.” 8Gethek ne siulao pha ichiig arek rabo, ithek giak è ji rek ne inai jia shii bran itham ichiigna-uom iy dun. 9Gethek ne Ithong shii achai rabo, giakthek è ji rek ne ithek shii phamthek è ua muii. 10Gethek ne phosro arek chid phro, giakthek ithek è rek duiine—Chiih-è ua pha hamangkhliie è ithek shii srobro rekmuii.
11Hìthek zab ithek shii rey pha hì ne ithek gai shii miiriig rey yi, chiih-è ithek è gethek shii phriie pha zey. Jishii gethek ne Jong pha ishak thog sharuii phaji shii sieng ramuii ro.
12Na è chuh è riu rone now arone, achiih yi pha gayiig pha ji ne wieliak ro. 13Zab chai phane nathek è thieg ji pha ichua pha chai ne branthek shii thog ramuii ro. Jishii Hamangkhung-aphuii è awai sbang shii ruii, chiih-è nathek shii chuh rai yi pha ai ne nathek ro blu chuh rai muii pha ji è huak ne achai yi phro, nathek shii chai pha ishak shii, ai è nathek shii zud pha chuh phi ruii phro, chiih-è nathek shii khia pha lumuii de phi ruii phro.
14Ji-è chiihphado, gu ijakthek, jangbangthek shii sia pha ji è ruang rai bo. 15Gu ìd pha bran duiine nathek shii yao ro, gu è nyie yao pha ji ne nawaithek shii chua bo. 16Ithong Michie shii gethek khoh muii pha gog nane gethek è nyie shii Hamangkhung-aphuii shii laso phi pha ji: gethek ji niing mage shii, gethek ne Masi ro ifai pha mathang niing rai. Chiih-è gethek ji pha iweb ji: gethek è chie mage shii, gethek ne Masi ro siu pha mathang ro. 17Nyieliieshii gethek zab ne, ichiih ne iweb jia ro, bajo shii, siu ne jia ro, chiih-è gethek zab ne ò pha iweb shii mathang ro.
18Israel pha branthek shii now bo; hanyie è zid pha khlem shii chie pho ne sraibao shii Hamangkhung-aphuii ro blia pha mathang redun ro. 19Chiihphado, gu miyaosiu ne hì bey, jangbang chiih-è zid pha michie hì ne izai nyiemagunde igongthek bey? 20Asi ro! gu è nyie yao pha ji ne migi arek pha branthek ro sraibao shii zid pha ji ne Hamangkhung-aphuii shii azid pha ibuiithek shii zid ro. Chiih-è gu ne nathek yi ibuiithek ro ijak rey bone ayang ro. 21Na ne Ithong ro gog nane ibuii ro gog ne aniing mua phro; nathek ne Ithong ro thiibliie nane ibuii ro thiiliie shii achie mua phro. 2210:22 Iphy 32:21Gethek ne Ithong shii miegriie rey yi pha yang habey? Gethek ne ai è de bajo gang rone now bey?
23“Ji-è ithek è yao,” gethek ne nyie magungde rek mua phro. Jine izai ro, jishii zab ne wie asi ro. “Gethek ne zab nyarek mua phro—Jishii zab ne aphua phro.” 24Hanyie magungde awai shii wie rey pha ji shii ariig rabo, jishii gaishii wie rey pha ji shii riig bo.
25Nawai khani shii nyie musai um magunde, asai pha nathek ne bajarai shii liu pha ibey zab nyachie mua phro. 26Jigigam shii yao, “Sohnyiak nane ji shii nyie um pha ji zab Ithong ro ro.”
27Migi arekpho è na shii michie chie pha ho chiih-è na è wuii pha phak arone, na ibi shii nyie ruii phi pha ji nawai ro now shii nyie musai asai pha chie bo. 28Jishii giakthek è na shii yao, “Hì pha michie ne jangbang shii zid pha michie ro,” Na shii yao pha chiang nane khani pha chiang è ji pha michie achie rabo. 29Jine nawairo munow asi jishii gai bran ro now ji è ro.
“Wie, chiihphado,” giak jia è yao, guro thaluii pha blia shii è gai bran munow è “nyie rek ne nyoi chid phlei?”
30“Gu è gu michie shii Hamangkhung-aphuii shii laso phi arone, nyie rek ne gu è laso phi pha michie chiang shii gaithek è gu shii snyieng phlei?”
31Wie, na nyie rek magungde, na chie niing magungde, hì zab ne Hamangkhung-aphuii pha biisiie shii rek bo. 32Jewthek nane Gaibranthek shii chiih-è Hamangkhung-aphuii ro charch shii diig rey pha blia arek rabo. 33Gu è rek pha ji duiine rek bo; gu è zab shii sang yi pha rek ne bidiang phro, gu ne gui shii wie pha anow ro, jishii zab shii wie rey yi pha now, jiè ithek de ragia rey mua.
111Chiihphado, gu è Masi shii nui pha duiine, gu shii nui bo.
Misia shii khrug chiieg
2Gu nathek shii chiong nyieliieshii nathek è idang gu shii now chiih-è gu nathek shii phi muii pha muyuathek ji shii lua. 3Jishii gu nathek shii thieg yi pha yang ro Masi ne zab pha bran è boh ro, gey ne yiy è boh ro, chiih-è Hamangkhung-aphuii ne Masi è boh ro. 4Ji-è bran hanyie è hong ne misiasia shii Hamangkhung-aphuii ro mua yao ne zab shii airo khrug chaig pha ji ne Masi shii makhak-riing ro. 5Chiih-è hò-amuii hanyie è hong ne misiasia shii nane Hamangkhung-aphuii mua yao shii khrug acheg pha jine awai gey shii makhak-riing rek; bimi nane hò-amuii ne khaziang laig pho è nyie yo asi ro. 6Hò-amuii è awaithek khrug shii acheg arone, ai ne awai khaziang laig liak ji wie ro. Chiih-è hò-amuiithek ne gadong khli magunde khaziang laig magunde biwo pha miyao ro, jiè hò-amuiithek ne khrug cheg chid phro. 7Bufuiithek ne awaithek khrug acheg chid, nyieliieshii bufuiithek ne Hamangkhung-aphuii ro biisiie pha nane ò mia pha jangbangthek doh yi phro. Jishii hò-amuiithek ne hò-aphuiithek ro biisiie doh yi, 8Hò-amuii ne hò-amuii è arey ro, jishii hò-amuii ne hò-aphuii è rey. 9Chiih-è hò-aphuiithek ne hò-amuiithek pha arab ro, jishii hò-amuiithek ne hò-aphuiithek pha rab phi ro. 10Chiihphado, hamangkhliiethek pha chiang è, hò-amuiithek ne awaithek gey ro riichai pha iliing shii um rone doh yi pha awaithek khrug cheg chid. 11Ithong lakhung shii gethek ro chai, hò-amuiithek ne hò-aphuiithek è ichad asi ro, ji duiine hò-aphuiithek de hò-amuiithek è ichad asi ro. 12Hò-amuii ne hò-aphuii è rab pha duiine ro, ji duiine hò-aphuii de hò-amuii è giak ro; chiih-è hì ne zab Hamangkhung-aphuii è rey ro.
13Hò-amuiithek ne Hamangkhung-aphuii shii hong ne misia shii khrug acheg pha sia jine wie ba asi pha awie ba nawaithek shii chua bo. 14Bufuiithek ne khaziang phiang ruii arone biwo ro, 15jishii hò-amuii khurug shii khaziang phiang ruii arone ai ne khie ro. Bimi shii khaziang phiang phi pha ji ne awai khurug shii cheg bo ne phi ro. 16Jishii hanyie magungde hì pha chiang shii khiinaing yang arone, gune nyie yao pha um pha ji ne hì ne gethek shii oi ro chiih-è hì ne charchthek pha Hamangkhung-aphuii shii de gai misia pha Iphey oi ro.
Ithong ro michie
(Mth 26:26-29; Mrg 14:22-25; Lug 22:14-20)
17Chiihphado, muyuathek duiine, gu nathek shii achiong, nyieliieshii nathek ro malethek pha misia ne nyayaochak arone wie è bajo awie pha rek ro. 18Zab è igobi, gu nathek shii yao nathek ro maley shii ne yoh yoh ibrogthek pho de um ro; chiih-è ìujia ne miyao ne gu migi rek. 19(Nathek duchoi shii yo che pha ji ne athan chid rabo hanyie magungde rangsua shii arone sang è doh yi phro.) 20Nathek ibrog è ò shii si mage shii, nathek è chie pha ji ne Ithong ro michie asi ro. 21Na è chie mage shii, zab ne hanyie è chie pha jao, jiè giak ne chi-iyiy bamuii shii, giakthek ne phuiithiigdun. 22Nathek ne chie niing pha nawaithek ro hò oi bey? Din ne nathek ne Hamangkhung-aphuii pha charch shii awie pha rek ne chid pha branthek shii biwo rey yi ne bey? Nathek è gu shii hì pha chiang shii nyie yao bo è now lei? Gu ne nathek shii chiong habey? Khuchunde gune arek ro!
23Gu Ithong è mua pha muyua ji ne gu nathek shii phi: aishii zum pha habiu Ithong Isu iweb dum jia yie srane, 24Hamangkhung-aphuii shii laso phi, ne ji ne yao, “Hì ne guro siu ro, nyie ji ne nathek ro ro. Hì ne gu shii now pha rek bo.” 25Hì duiine, dinne Ithong iweb pha iidoh shii gog chiing srane yao, “Hì pha gog ne Hamangkhung-aphuii ro iwo shiinyie ne gu ifai è phang ne ruii. Khuchung magungde na hì niing shii gu shii now pha hì rek bo.”
26Hì pha miyao è ne zab pha ishak nane hì pha iweb nane gog è niing shii ai awuii sapho shii Ithong iy pha ji khagi rek ro. 27Hì ne hì duiine ro hanyiejia è aishii ilab arek pha Ithong ro iweb dinne gog ji è niing arone, ai ne Ithong ro siu nane ifai shii layog ichiig rek ne suang rey dun. 28Ji-è, chiihphado, igobi nawai shii chai bo, chiih-è iweb ji nane gog ji è niing bo. 29Jishii na Ithong ro iweb nane gog ji è niing shii nyie athieg arone chie niing ji è nathek nawaithek shii chua noh ro. 30Ji-è nathek bajo ne zia nane rad pha um ro, chiih-è bajothek ne iy dun ro. 31Gethek è igobi gethek shii chua bi arone, gethek ne Hamangkhung-aphuii ro chua shii awuii phro. 32Ji-è gethek ne sohjambling rog shii athey yi pha Ithong è gethek shii chua ne lago phi ro.
33Ji-è chiihphado, gu ijakthek, nathek Ithong ro iweb chie pha ò shii khrab mage shii, nawaithek chung khan rai bo. 34Chiih-è hanyie magunde chi-iyiy arone, nane nawai hò hà chie bo, chiihphado nathek ò si rai pha ji shii ne Hamangkhung-aphuii ro chua pha shii asi phro. Chiih-è gai pha miyao ne, gu wuii ruii shii khriig rek phi pha ro.
12Ragung So è lasenthek
1Thuh, na è zey pha Ragung So è lasen hèg chiang ji shii ìd bo. Gu khuiinothek nane bumuiithek wo nathek ne airo izai jishii ìd bone gu yang ro. 2Nathek ne thieg nathek ne migi arekpho ba shii, nathek ne awie pha bajo lumuii shii lua srane chai oi pha jangbangthek shii misiasia. 3Gu nathek shii thieg yi pha yang ro hanyie jia magungde Hamangkhung-aphuii ro Ragung è noh ne lua pho ne, “Isu shii athamai!” Chiih-è aishii ne Ragung So è ayua sapho shii ne, “Isu ne Ithong rone” hanyie magungde anuii mua phro.
4Thiihchiih shii ne Ragung pha ichuathek lasen hèg um ro, jishii ithek shii phi pha ji ne Ragung ò ro. 5Ichiih shii ne Ithong ro blia rek phi pha ichuathek lumuii um magunde jine ò pha Ithong shii blia rek phi. 6Ichiih shii ne ichuathek blia rek pha chua um, jishii ò pha Hamangkhung-aphuii è zab shii awairo blia rek mua pha chua phi. 7Zab shii wie yi pha zab bran shii Ragung um ne lumuii doh yi ro. 8Ragung è bran jia shii ley khani pha mua phi, chiih-è ò Ragung ji è gai bran shii de ìd pha ley khani um pha mua ji phi. 9Chiih-è ò Ragung è bran jia shii migi phi, chiih-è gai bran shii ai è gang yi pha blu phi. 10Ragung è ne bran jia shii ne buangthek pha blia rek yi pha blu phi; chiih-è gai shii ne, Hamangkhung-aphuii ro mua yao yi pha lasen phi; chiih-è gai shii ne, lasen hèg yi Ragung è thog pha ba asi ba ji yo rek yi pha chua phi. Chiih-è giak shii ne a-ìd pha nyuak yao mua pha phi, chiih-è gai shii ne nyie yao pha ji shii yao mua yi pha chua phi. 11Jishii hìthek zab rek pha ji ne ragung ò nane jia bie ro; ai khi-èrek yang lai ne ji duiine, zab pha bran shii yoyo lasen hèg phi.
Siu jia shii ichuathek bajo
12Siu shii iphen um pha duiine, Masi ne siu jia ro; hì ne yo ichuathek rab magungde, thuh shii siu ne jia ro. 13Hì duiine, zab gethek ne, Jewthek chiih-è Gaibranthek magungde, khiao magunde ichad nede, chiih-è Ragung ò pha siu jia shii khowo yie, chiih-è gethek zab Ragung jia è niing pha phi.
14Siu shii awailum ne ichua jia è arab bie ro, jishii bajo ichua è ro. 15Laithek è yao, “nyieliieshii gune wad asi, gune siu è rey pha asi ro è yao arone,” Jine siu pha ichua arey rone asi ro. 16Chiih-è khoh è yao, “nyieliieshii gu ne miegthek asi ro, jiè gu ne siu pha asi ro, ji ne siu pha ichua arey rone asi ro.” 17Zab pha siu yi mieg bie arone, nyie khi-èrek ne yoi mua phlei? Chiih-è hì yi khoh bie arone, nyie khi-èrek ne no mua phlei? 18Hì ne nyieliieshii, Hamangkhung-aphuii è nyie khi è chid lei ne siu shii zab yo ichua rab ne ruii. 19Siu zab yi ichua jia bie arone jine siu asi ro! 20Ji-è, bajo ichuathek nede jishii siu jia ro.
21Ji-è chiihphado, mieg è khow shii ayao muii! Chiih-è khrug è de lai shii ayao mua, “Wie, gu nathek shii achid ro” 22Jishii, zia siu doh pha ichuathek oi arone gune nyie de arek mua; 23chiih-è ji pha ichuathek shii gethek è bajo adunmey pha now pha ji ne gethek è muna boh gayiig rek; chiih-è gethek è akhie pha riig muii pha siu ichuathek, nyie yi muna khie pha ichuathek achid rone yao pha ji ne bajo wie blia rone gayiig rek. 24Hamangkhung-aphuii awai è siu ichuathek ò shii rab ne, hanyie yi boh ilab mua sapho ji shii mua yi. 25Chiih-è jiè siu ne yoyo rek pha oi ro, jishii zab yo ichuathek ne awaithek chung ò rek bo. 26Siu pha ichua jia yi diig arone, zab pha ichuathek ne ai rog shii diig gieng bo; ichua jia è chiong arone, zab pha gai ichuathek ne sang shii mathang ro.
27Nathek zab ne Masi ro siu ro, chiih-è zab jia ne ji pha ichuathek ro. 28Charch hà Hamangkhung-aphuii è zab shii hanyiehanyie shii ithua hà ruii: Igobi pha ithua shii guaphasamoythek shii ruii, chiih-è nyichiieng pha ithua shii chaigthek shii ruii, chiih-è uomchiieng pha ithua ne masdothek shii ruii; chiihphado hanyie è buangthek rek, chiih-è hanyie shii gang pha blu phi, gaithek shii nong phi, ithek shii yua pha, chiih-è a-ìd pha nyuak yao pha ji shii ro. 29Ithek zab ne guaphasamoythek, ithek zab ne chaigthek asi ro, chiih-è ithek zab ne masdothek asi ro. Zab pha bran shii ne buangthek pha blia rek pha blu oi ro, 30miiriie shii gang phi pha, a-ìd pha nyuak yao pha, chiih-è nyie yao pha ji shii yua phi pha blu ne zab shii oi ro. 31Chiihphado nathek ro lubuthek ne miigak pha lasen hèg shii khriig rek bo. Jimagunde, hì duiine lumuii shii luagieng pha ji ne, zab è wie ro.
13Miie
1Gu ne bran nane hamangkhliiethek ro nyuakthek yao mua magungde, jishii gu shii miie oi arone, gu miyao jine thiibiing boi ne shriing sam ne ro pha duiine ro. 2Gu shii liingsed pha yua pha lasen um magungde; chiih-è zab pha khani um magungde chiih-è ug pha ji zab thieg magungde; chiih-è gu shii phiing shii lua yi pha migi um magungde jishii gu shii miie oi arone, gu ne nyie de oi ro. 3Gu shii nyie um pha ji gai shii phi muii magungde, chiih-è gui siu rang de bai shii ziao pha phi muii magungde jishii gu shii miie oi arone, ji ne gu shii wie pha asi ro.
4Miie ne zud chiih-è bushun ro; Miie pha jine miegriie nane wiangwe, wiangwe asi ro; 5miie ne awie pha rek pha nane ibid arek pha chiih-è awie lajia pha nane diig phi pha asi ro; miie ne ichiig shii sasab aruii ro; 6miie ne buii rog shii asang ro, jishii izai rog shii sang. 7Miie ne khuchung de athoh ro, chiih-è migi, luthong zud ne idang ibi rey dun.
8Miie ne idang pha ro. Ji shii ne liingsed pha muathek um, jithek ne thaluii ro; gai nyuakthek yao pha lasen hèg um magungde, jishii ithek ne jongdun; thieg pha khani um magungde, jishii jine san dun phro. 9Jishii gathek ro khani pha lasen hèg chiih-è liingsed pha mua ne khuyo ba ro; 10jishii zab khriig thog mage shii, chiihphado nyie akhriig ba pha ji ne san dun phro. 11Gu ani ba shii, gu miyao, than, chiih-è gu munow ne zab ani duiine ro; thuh shii gu boh rey shah shii, gu ne dinne anithek lumuii shii alua sha ro. 12Gethek è thuh nyie riig pha ji ne jangbang shii rarum mizia duiine ro; chiihphado ji pha ishak shii gethek ne mi riig ruii phro. Thuh shii gu ìd pha ji ne khuyo ba ro; jishii hì ne zab rey ruii phro, gu è Hamangkhung-aphuii ro khani shii rey pha duiine—chiihphado zab rey ruii phro.
13Idohhè shii Migi, luthong, chiih-è miie hì pha uom ne raidun phro; chiih-è hì pha miie ne zab è boh ro.
14Ragung lasenthek chiang
1Hì ne miie ro, chiihphado, nathek ne miie shii mua pha chuh è bidiang chid. Hamangkhung-aphuii ro mua yao pha lasen ne, zab è wie ne nathek ro lubuthek ne ragung pha lasen hèg shii khriig rek bo. 2Hanyie è a-ìd pha nyuakthek ai ne gai shii ayao ro, jishii ai ne Hamangkhung-aphuii shii yao, nyieliieshii hanyie è de aishii athieg mua. Ai ne ug pha izaithek miyao shii Ragung pha blu è yao. 3Jishii hanyie magungde Hamangkhung-aphuii mua ji yao pha ji ne bran shii yao chiih-è ithek shii nong phi, lubu bo rek phi, liijiing rek phi. 4Hanyie magungde a-ìd pha nyuakthek yao arone ai ne awaishii nong bie, jishii hanyie magungde Hamangkhung-aphuii miyao yao arone ai ne zab pha charch shii nong phi.
5Gu è de nathek zab shii a-ìd pha nyuakthek yao bo è yang ro, jishii gu è nathek shii Hamangkhung-aphuii pha mua yao pha lasen um bo ne yang ro. Jishii hanyie è Hamangkhung-aphuii miyao yao pho ne zab charch shii nong mua pha, hanyiejia è ai nyie yao pha ji ayua sapho shii ne Hamangkhung-aphuii mua shii yao phothek bo ba ro. 6Ji-è, gu ijakthek, gu nathek shii a-ìd pha nyuakthek yao arone gune nathek shii blia rey nebey? Gu è nathek shii Hamangkhung-aphuii è phi pha miyaogam, khani, wie mua nane muyua ji ìujia ayie sapho shii ne gu è rek pha nyie ji ne, nyie arey ro.
7Fliie ben duiine chai oì pha Thiibiingkhinkheb manathek yie bo—Jine boi pha goh yo aro sapho shiine nyie khi-èrek ne thieg mage phlei? 8Chiih-è hanyie jia è thu-ungthek pha gow ji wie aro arone hanyie è mak rek pha khriig rek mage phlei? 9Ji duiine, naro mua yi a-ìd pha nyuakthek è sang ayao arone, khi-èrek ne hanyiejia è gao mage phlei? Naro miyaogamthek ji ne hasam hà kheydun phro! 10Sohjambling shiine bajo yo nyuakthek um, jishii miyaosiu oi pha nyuak ne oi ro. 11Jishii nyuak yao pha ji gu è a-ìd arone, hanyie è ji khoh ne yao ramuii pha ji shii ne gu ne fuangphothek rey ruii phro chiih-è ithek de gu shii ne fuangpho rey ruii phro. 12Nathek è Ragung pha lasen um bo è now pha ji è, nyie yi charch shii rung pha nong phi pha ithek ne zab pha lakhung shii bow rab phi pha bidiang bo. 13Chiihphado bran hanyie è a-ìd pha nyuakthek yao pho ne nyie yao pha ji shii yua pha lasen mua bo è sia bo. 14Jishii gu hì duiine sia arone, izai gu ragung ne sia phro, jishii gu khani ne nyie ichua oi ro. 15Chiihphado gu ne nyie rek chid? Gu ne gui ragung rog shii sia, jishii gu gui khani rog sia; gu gui ragung è bai, jishii gu gui khani rog shii bai. 16Na è Hamangkhung-aphuii shii ragung è laso phi bie shii, na è nyie yao pha ji ne athieg pha rek srane, nyie khi-èrek ne athieg pha bran è maley shii “Amin” yao mage phlei? Na è nyie yao pha ji ne ai è yao mua pha lumuii oi ro. 17Naro Hamangkhung-aphuii shii laso phi pha misia ne bajo wie bie arone, gai branthek shii ne anong phi ro.
18Gu ne nathek è de bajo a-ìd pha nyuak yao, jiè gu ne Hamangkhung-aphuii shii laso phi. 19Jishii, chiihphado a-ìd pha nyuakthek itham miyaogamthek yao liak shii ne charch misiasia hà gai shii yua pha miyaogamthek guii yao ne thieg mua pha ji ne wie.
20Gu ijakthek, nathek munow shii ne aniphiing duiine anow rabo; jiè awie pha munow shii ne ani duiine rek ne ruang rek bo, jishii nawai munow shii sey bo. 21Jigigam shii hìne zey ro:
Ithong è yao, “A-ìd pha nyuakthek yao pha bran è kho srane
gu gui branthek shii yao pha ro.
Gu gai sohphothek pha sphunthek è yao ruii è de,
jishii chiihphado gui branthek ne gu shii ayoi ruii phro.”
22Ji-è, chiihphado, a-ìd pha nyuakthek yao pha lasen ji ne migi arekpho khagi rek yi, migipho shii asi ro, jishii Hamangkhung-aphuii pha mua yao pha lasen è migi-asiphothek shii khagi rek phi, migiphothek shii asi ro.
23Chiihphado, zab pha charch ò si srane gai nyuakthek yao pha jao arone—thaluii pha bran nane migi arek pho iliing wuii arone ithek è ithek zab shii ibiu ayao ne bey? 24Jishii zab è Hamangkhung-aphuii mua ji yao shii thaluii pha bran nane migi-arekpho è iliing hà wuii shii, ithek nyie yoi pha ji è ithek shii layog rone chua ruii, ithek è nyie zab yoi pha ji shii chua phro, 25airo ug ne nowthek ne fuang hà yie ruii phro, chiih-è ai ne bam srane Hamangkhung-aphuii shii sia ruii phro, “Zai Hamangkhung-aphuii ne ichiih nathek duchoi shii um rone, nuii ruii phro.”
Charch pha yung
26Hì ne gu miyao pha miyaosiu ji ro, gu ijakthek. Nathek misiasia pha ò si shii, jia shii ibai um, gai shii yua pha um, chiih-è gai yi Hamangkhung-aphuii è mua pha ji um, chiih-è gai yi a-ìd pha nyuakthek è mua yao pha um ro, chiih-è nathek è nyie yao pha ji shii yao phi pha um, zab ne charch shii nong chid. 27Hanyiejia è a-ìd pha nyuakthek yao pha rek arone, nyi uom è muna ayao rabo, jia pha iidoh shii jia è yao bo, chiih-è bran jia yi ithek è nyie yao pha ji shii yaophi bo. 28Jishii a-ìd pha nyuakthek yao pha ji shii yua pha bran hanyie de oi arone, hanyie è gai nyuakthek yao pho ji ne aro pha rai ne chiih-è awai shii yao ne Hamangkhung-aphuii shii yao bie bo. 29Nyi uom yi hanyie è Hamangkhung-aphuii pha mua phi pho ji yao bo, ji pha ishak shii ai è nyie yao pha ji gaithek ne chua bo. 30Jishii giak yi maley shii dug ne Hamangkhung-aphuii è muah choi arone, hanyie yao ramuii pha ji ne thung chid. 31Nathek zab ne Hamangkhung-aphuii mua yao pha rek bo, jia pha iidoh shii jia rek bo ji-è, zab ne ìd ruii phro chiih-è lububo rek pha mua. 32Hamangkhung-aphuii pha mua yao pha lasen jine yao pho iliing shii phriie bo, 33nyieliieshii Hamangkhung-aphuii è gethek shii anuii rabo ne ayang jishii ilab nane liijiing rek bo ne yang ro.
Zab charchthek pha Hamangkhung-aphuii pha bran duiine, 34hò-amuiithek ne malethek shii aro pha rai bo. Ithek maley shii ne nyie yao mua pha oi ro, Jewthek pha Iphey shii yao ro, ithek ne dumuii arek mua. 35Ithek è nyie thieg yang arone, ithek ne hò hà awaithek gey shii sai bi bo. Hò-amuiithek ne charch maley hà yao pha ji ne biwo ro.
36Din ne Hamangkhung-aphuii pha miyaogam ne nathek è thog pha ji è rey mua bey? Din ne hanyie wuii pha ji ne nathek shii wuii bie nebey? 37Hanyie magungde Hamangkhung-aphuii pha muapho dinne Ragung pha lasen um arone, ai ne gu è nathek shii nyie zey pha ji ne Ithong pha muyung rone than chid. 38Jishii ai è jithek shii anuii arone aishii anuii ro.
39Ji-è chiihphado, gu ijakthek, Hamangkhung-aphuii ro mua yao pha nawaithek lubu shii khriig rek bo, jishii gai nyuakthek yao pha ji shii agak rabo. 40Zab pha blia ne wie nane yung pha lumuii ji è rek bo.
15Masi hòi pha ji
1Chiih-è thuh shii, gu ijakthek, gu è nathek shii nyie yua pha Mua Wie ji, nyie ithek è mua pha ji, chiih-è nathek migi chuh riu muii pha ji shii gu nathek shii now yi. 2Jine gu è nathek shii yua pha muawie pha mua ji ro. Nathek è chuh khoh arone muawie ji è nathek shii ragia rey—ji arek sapho shii ne nathek è rek pha migi nyie asi ro.
3Bajoboh pha miigak gu è nyie mua pha ji ne nathek shii phi: Jigigam shii zey pha ji duiine; Masi è gethek layog chiang iy dun, 4Jigigam shii zey pha duiine, ai ne iy ne wiengmuii srane ai ne da-uom pha iidoh shii chai hà hòi; 5ai ne Phithar nane guaphasamoy snanyi shii dong. 6Chiihphado luang jia shii è ai ne wieng guii è muna awairo luagiengpho shii dong, bajo ne thuh thog pha isieng ba ro, jishii giak ne iy jongdun ro. 7Chiihphado ai Jems shii nane iidoh zab pha guaphasamoythek shii dong.
8Gu ne hanyie jia yi adau pha giak pha duiine rangde—zab pha iidoh shii ai gu shii de dongthog. 9Gu ne zab guaphasamoythek è ìu ro—gu ne guaphasamoythek ho mua sapho asi ro, nyieliieshii gu è Hamangkhung-aphuii ro charch shii diig phi. 10Jishii Hamangkhung-aphuii pha bushun è gu nyie gu ji ro, chiih-è gu shii ai è phi pha bushun ji ne bajo blia phi ro. Zab è ìu rey srane, gu ne gai guaphasamoythek è de bajo gang blia rek, jishii hì ne izai gui blia asi ro, jishii Hamangkhung-aphuii pha bushun ne gu rog shii blia rek gieng ro. 11Ji-è chiihphado, hì ne gu è wuiithok magungde dinne ithek è wuiithok magungde, hì ne gethek zab è nyie yao pha ji ro, chiih-è hì ne nyie nathek è migi rek pha ji ro.
Gethek ro hòi
12Thuh, Igobi è gethek ro mua ne Masi iy ne hòi din pha ji yao, nyie khi-èrek ne nathek giak è iy pha ji chai ahoì phrone yao phlei? 13Ji ne izai arone, hì pha miyaosiu è ne Masi ne iy ne ahoì ara ro; 14chiih-è Masi iy pha ji è ahoì arone, gethek ne yua pha nyie oi chiih-è gethek ne migi rek pha de oi ro. 15Ji è de muna, gethek ne Hamangkhung-aphuii chiang shii biidiie doh ro, nyieliieshii gethek è yao ai ne iy pha ji è hòi ro—jishii iy pha ji è chai hà ahoì arone, chiihphado ai ne Masi shii ahoì ro. 16Chiih-è iy pha ji è ahoì arone, Masi de ahoì ba ro. 17Chiih-è Masi yi ahoì ba arone, nathek ro migi ne adubo chiih-è nathek ne thuh de layog hà san badun ro. 18Chiih-è hanyie è Masi shii migi rek ne iy pho de thaluii ara ro. 19Gethek ro chai wie bie pha Masi shii luthong arone chiih-è blia shii oi arone, chiihphado gethek ne sohjambling pha branthek è de bushun ji ro.
20Jishii izai ne hì ro Masi ne iy ne hòi ro, chiih-è hì de izai ro hanyie è iy dun pha ji shii men pho de dinne hòi ruii phro. 21Chiih-è iy pha ji ne bran jia è thog pha miyao duiine, hòi pha ji de bran jia è thog ruii phro. 22Chiih-è zab pha branthek ne Adam rog shii ò rek ne iy dun pha duiine, ji duiine gethek zab ne chai shii hòi ruii nyieliieshii ithek ne Masi rog shii ro. 23Jishii zab awaithek ro ishak shii hòi ruii phro, zab è igobi shii Masi hòi ruii phro, chiihphado ai wuii ruii pha ishak shii, hanyie yi airo jithek de hòi ruii phro. 24Chiihphado jong pha ishak thog ruii phro, Masi ne zab luruak khohphothek shii, riichaithek, chiih-è bluthek è yang è hiia ne chiih-è Hamangkhung-aphuii pha Sajathua hà awairo Aphuii wad shii phi muii phro. 25Jishii Hamangkhung-aphuii è mak pho shii yang ne ai lai iliing hà arek sapho shii ne Masi ne khoh ne rai chid. 26Idohhè pha gidieg ji shii yang pha ji ne iy ji ro. 27Jishii jigigam shii yao, “Hamangkhung-aphuii è zab pha manathek shii awai lai bucho hà ruii muii ro.” Zai, hì ne sang ro. “Hamangkhung-aphuii è, zab pha miyaogamthek” “Zab pha manathek shii” Hamangkhung-aphuii awailum ne alao ro, hanyie è zab pha manathek shii Masi ro iliing shii ro. 28Jishii zab pha manathek Masi ro khoh pha iliing hà ruii mage shii, chiihphado ai awai, Dufuii awai è awai shii ne, hanyie è zab pha manathek ai iliing shii ruii pha Hamangkhung-aphuii iliing hà ruii phro, chiih-è Hamangkhung-aphuii è zab khoh ruii phro.
29Thuh, branthek hanyie è iy pha khowo yie pho shii ne khi-èrek pha ga? Ithek ne yang pha nyie luthong phlei? Iy pha ji ne chai hà ahoì phrone yao pha, giak è yao pha duiine, hì ne izai arone, nyie rek ne ji pha branthek ne iy pho shii khowo phi phlei? 30Chiih-è gethek ne—nyie rek ne idang buii shii ran phlei? 31Gu ijakthek, gu ne idang iy pha ji shii diig rek! Gu ne nathek lakhung shii wiangwe rek, gethek chai gethek Ithong Masi Isu rog shii um pha ji è, gu shii yaothiak bo. 32Gu è ichiih Iphisus hà jabiing pha ibeymuthung rog shii bran duiine now ne mak rek arone gune nyie phua mage phlei? “Jishii iy pha ji yi ahoì arone, chiihphado yao pha ji duiine rey dun,” thimiang ne gethek iy sha, jiè cho gethek ne chie-niing sha rai haro.
33Bi-iè arey rabo, “Awie pha ijak è ziig wie shii mua muii.” 34Nathek nawaithek ro khani wie shii Iidoh khid srane layog lumuii shii thoh muii bo. Nathek giak è Hamangkhung-aphuii shii athieg pho shii gu nathek shii wo yi pha hì yaothiag.
Hòi pha Siu
35Giak è sai ruii, “Nyie khi-èrek ne iy pha ji ne sieng din phlei? Nyie khi-rek pha siu ne ithek shii um ga?” 36Nathek bi-ìe! Nathek è iriie shii nyiak lakhung hà wey shii, jine a-iy sapho shii ne chai hà abeb mua phro. 37Chiih-è nathek è nyie hai pha ji ne iriie bie ro, chiih-è yang ne igam yi, phiug nane gai igam, chiih-è imuii shii ne ahai pha iriie shii hai bie shii iidoh hàne sieng khlei ruii ro. 38Hamangkhung-aphuii è iriie shii ai khi-è yang pha ji shii siu rey yi; ai ne zab pha iriie shii awai siu sbang shii phi.
39Chiih-è zab ibey isiengthek ne ichua ò asi; bran siu shii ne ò jia pha ichua ibey um, ibeymuthung shii ne yo, fuiithek shii ne yo, chiih-è ù shii de yo.
40Chiih-è ichiih shii ne Hamangkhung pha siu chiih-è sohnyiak pha siu um ro; Hamangkhung pha khie siuthek ne sohnyiak pha khie siuthek è yo ro. 41Hasiang shii ne awairo khie um, habie shii ne yo khie um, chiih-è dadiangthek shii ne yo khie um; chiih-è dadiangthek awaithek chung de ichua yo khie um ro.
42Jine khi-èrek ne iy pha ji chai sieng ruii mage ji ro. Siu shii wieng mage shii, hì ne i-iy ro; hòi mage shii hì ne isieng ro. 43Wieng mage shii hì ne akhie pha zia ro; hòi mage shii, hì ne khie nane gang ro. 44Wieng mage shii, hì ne siu sbang ro. Chiih-è hòi mage shii, hì ne luruak siu rey ro, jine izai, jiè siu sbang um pha duiine ragung pha siu um chid. 45Jigigam shii yao, “Igobi pha bran” Adam shii, ne isieng rab; jishii nyichiieng pha Adam ne Ragung chai phi ro. 46Ai-ne igobi shii Ragung è arey ro, jishii siu sbang è ro, ji pha iidoh shii Ragung è rey. 47Igobi pha Adam ne, nyiak è rab ne, sohnyiak è wuii; chiih-è din pha Adam ne Hamangkhung è wuii ro. 48Hanyie yi sohnyiak shii um pha ji ne ithek ne nyiak è rab pha jia duiine ro, hanyie yi Hamangkhung pho ne Hamangkhung è wuii pha jia duiine ro. 49Gethek è sohnyiak è rab pha bran duiine guii, jiè gethek ne hamangkhung è rab pha ji shii guii haro.
50Nyie gu miyaosiu ne, gu ijakthek wo, siu nane ifai Hamangkhung-aphuii pha Sajathua shii mathang oi phro, chiih-è nyie iy dun pha ji ne a-iy pha ji shii ayie mua phro:
51-52Ug pha izai ji shii yoi bo: Gethek ne zab a-iy phro, jishii iidohè pha thu-ung ji thud mage shii, gethek zab ne mieg leb pha duiine blieg shii lai chid. Chiih-è thu-ung thud mage shii, iypho de hòi ne, khuchung de dinne a-iy phro, chiih-è gethek zab ne lai ruii. 53Hanyie iypho ne a-iy bsa hà lai ruii phro. 54Ji è rek pha ji thog mage shii iypho ne a-iy biisa hà lai dun phro, Chiihphado hì pha jigigam ne izai rey ruii phro: “Iy pha ji ne srobro rey mage shii; yang pha ji ne zab rey ge ro!”
55“Iypho nathek ro yang pha ji ne khiisa lei? Iypho nathek ro saduii phi pha blu ne khiisa lei?”
56Iy ne saduii phi pha airo blu ne layog è mua, chiih-è layog è awai blu ne Iphey è mua. 57Jishii Hamangkhung-aphuii è gethek shii Ithong Isu Masi chiang è yang yi pha ji shii laso phi bo!
58Ji-è chiihphado, gu ijakthek, chuh riu ne athodang pha rek bo. Idang nawaithek Ithong ro blia rek bo, nathek ne thieg ro, nathek è Ithong ro blia nyie rek pha ji khuchunde de Adunmey pha arey phro.
16Chid pha migiphothek shii zid
1Thuh shii, Judea hà rai pha Hamangkhung-aphuii pha bran shii nong phi pha nathek è zey pha bang chiang shii now bo. Nathek ne rek chid, gu è Galathia pha charchthek shii nathek shii nyie rek bo è yao pha ji rek bo. 2Zab pha Deobari shii nathek ne bang khrab ne ruii bo, nathek è khama wiang pha sasab è ruii chid, chiih-è ragia rek bo. Ji-è gu wuii shii bang ne dinne athan chid phro. 3Gu wuiithok pha iidoh shii, nathek shii nuii phi rone yaophi pha jigigam phi, chiih-è ithek shii thoh ne nathek ro lasen shii Jerusalem hà wuii yi pha ro. 4Gu shii wuii pha magak arone, ithek ne gu rog shii nyawuii mua phro.
Phaul ro muphak
5Gu Mesidonia hà wuii ched pha iidoh shii nathek shii wuii ruii phro—nyieliieshii gu ne Mesidonia hà wuii chid pha um ro. 6Gu nathek rog shii ìujia ishak nyarai gieng, yangne hakhangshak yi jongdang pha rai pha ro, chiih-è chiihphado shii gu dinne khi hà wuii ne de nathek ne gu lumuii shii athodang pha nong mua phro. 7Gu ne nathek shii ìujia si pha asi pha, Ithong è ishak phi arone, gu nathek rog shii bajo ishak rai pha luthong phro.
8Gu ichiih Iphisus shii Phenthekhosth pha inai thog pha rai pha ro. 9Ji shii thiisa hà gidieg bajo um magunde thiisa hàne boh blia pha khriig chua um ro.
10Thimothi yi nathek lumuii hà wuii ruii arone, nathek duchoi shii wie ho rone aishii than yi pha ho bo, nyieliieshii ai de gu duiine Ithong ro blia rek pha bran ro. 11Hanyie magungde aishii ariig bieyie rabo, jishii nathek ne airo idang pha lumuii shii liijiing hà nong phi bo, jiè ai ne iidoh gui shii dunthok din phro; migipho rog shii iidoh thog din pha gu ne aishii luthong phro.
12Thuh abam Apholos chiang shii. Awai abam rog shii, gai migiphothek rog shii nathek hà wuii yi pha gu è idang lubu bo rek phi. Jishii ai ne hì pha ishak shii dun chid phrone zab athan ba ro. Jishii ai chua mua arone, ai ne wuii dun phro.
Idohhè pha miyaogamthek
13Nowbthan bo, migi shii chuh è riu bo, arum pha gang rek bo. 14Naro zab pha blia ne miie è rek bo.
15Nathek ne Sthephanas chiih-è airo haliing phothek chiang shii ne thieg. Ithek ne Akhaya shii zab è igobi Masipho rey chiih-è Hamangkhung-aphuii ro bran shii blia rek pha zab awaithek shii phi muii. Gu ijakthek, gu nathek shii khung, 16Hanyie magungde ithek rog blia rek gieng, chiih-è ithek ne hì rek pha dumuii shii gieng bo.
17Gu Sthephanas, Forthunathus chiih-è Achaikhus, wuii ruii pha miyao ji shii bajo sang, ithek ne nathek oi pha ji shii zab rek 18chiih-è ithek shii sang yi pha duiine, ithek è nathek shii de sang ba yi phro. Hì-è rek pha branthek ne riig sapho ro.
1916:19 Blk 18:2Asia pha du-ùa shii charchthek pho è nathek ro salam thoh ge ro, Akhuila chiih-è Phrisila chiih-è ithek hò shii si pha charchthek è de lao ne Masipho ro salam thoh ge phro. 20Ichiih pha zab pha migiphothek shii de salam thoh ge, Nawaithek chung jia è gairog shii liijiing pha khichiug rai bo.
21Gui ro wad è hì zey, Phaul è salam ro.
22Hanyie è Ithong shii amiie arone ai lakhung shii ne mucho um ro!
Marana tha—gethek ro Ithong, wuii bo!
23Ithong Isu ro liijiing ne nathek rog shii um bo.
24Isu Masi beng è guro miie ne zab nathek rog shii um bo.