मरकुस

Mark

मरकुस

यूहन्ना बपतिसमा देणै वाल़ै रौ प्रचार

(मती3:1-12; लूका3:1-18; यूहन्ना1:19-28)

¹ एज़ौ खुशी रौ संदेश यीशु मसीहा रै बारै दी आ, ज़ुण परमेश्वरा रौ छ़ोहरु आ। एज़ौ खुशी रौ संदेश इणौ शुरु हुऔ। ² यीशु रै संसारा दी आशणै कु पैहलै अलग-अलग गुरुऐ आशणै वाल़ै बौग्ता री बुशै कौरियौ धर्म शास्त्रा दी यीशु रै बारै दी लिखौ थौ। मलाकी गुरुऐ इणौ थौ लिखौ औन्दौ कि परमेश्वरै आपणै छ़ोहरु लै इणौ बोलौ आ कि, “शुण! हाऊं ताऊं कु औगाड़ीऐ आपणौ एक आदमी भेज़ा ऊ। सेऊ ताऊं कालै बाट त्यार कौरा सा। ज़िणौ बौड़ै नेतै रै स्वागता लै त्यार कौरा ई।” ³ यशायाह गुरुऐ इणौ थौ लिखौ औन्दौ कि, “सुनसान ज़ागहा दी एक आदमी री हाकै ई लागी औन्दी शुणिदै, “प्रभु कालै आशणा लै बाट त्यार कौरौ, ज़ो बिल्कुल साफ और सीधी आ।” (मतलब कि आपणै-आपणै ज़ीऊ त्यार कौरौ और आपणी-आपणी ज़िन्दगी सुधारौ।) ⁴ भौरी पैहलै ज़ो आशणै वाल़ै बौग्ता री बुशै हुई थी, तिऐं पूरी कौरियौ एक आदमी आशौ ज़ासरौ नाऊं यूहन्ना थौ। सेऊ यरदन नौईं पारभिलै बंज़र ज़बीना दी आशौ। और लोगू लै बोलदै लागौ कि बुरी बाटा छ़ाड़ियौ मन बौदल़ौ और माफी पाईंणै लै परमेश्वरा काऐ आशौ। यूहन्नै लोगु लै बोलौ कि बपतिस्मा निंयौ ज़ो मन बदुल़णै री निशाणी आ। ⁵ सारै यहूदा परदेशा रै लोग और यरुशलेम शहरा दी रौइणै वाल़ै सारै लोग यूहन्ना काऐ आशै, और आपणै-आपणै पाप मानियौ यरदन नौईं दी यूहन्ना कु बपतिस्मा निंयौ। एज़ै कारण लोग तेसलै यूहन्ना बपतिस्मा दैणै वाल़ौ बोला थै। ⁶ यूहन्ना ऊंटा रै बाल़ा रै चाणै औन्दै जुड़कै भिड़ा थौ, और कमरा दी भिड़ा थौ च़ामड़ा री गाची। यूहन्ना सिरफ सापा री मौउसी और ज़ांगली मौ खा थौ। यूहन्ना रौ खाणौ और भिड़नौ पुराणै ज़मानै रै गुरु ज़िणौ थौ। ⁷ यूहन्ना बोला थौ, “मू बासियै जुण आशणै वाल़ौ आ, सेऊ एती बौड़ौ आ, हाऊं एस जोगी भी नाईं कि धौनी झ़ुकियौ तेसरै बुटा रै तौसमै खोलू। ⁸ हाऊं दिआऊ तुमुलै पाणी कौरिऐ बपतिस्मा, पर सेऊ दिया तुमुलै परमेश्वरा री पवित्र आत्मा, ताकि सै तुमु परमेश्वरा री बाटा दी अण्डावा।”

यीशु रौ बपतिस्मौ और परीक्षा

(मती3:13; 4:11; लूका3:21,22; 4:1-13)

⁹ एकी दिनै यीशु गलीला परदेशा रै नासरत गांवा कु आशियौ यरदन नौईं काऐ डैऔ। तिऐ यूहन्ना लोगु लै बपतिस्मा दैंदै थौ लागौ औन्दै। यीशुऐ भी यूहन्ना काऐ डेइयौ बपतिस्मा निऔं। ¹⁰ ज़ौणी यीशु पाणी मांझ़िआ कु खौड़ौ उठौ तिणी ई यीशुऐ सौरग दुई भिलै च़ीरिंदै देखौ और आपू माथै परमेश्वरा री आत्मा कबुतरा रै रुपा दी उतुरदै देखी। ¹¹ और सौरगा कु परमेश्वरा री हाक शुणुई कि, “तू मैरौ प्यारौ छ़ोहरु ई। हाऊं ताऊं देखियौ भौरी खुश ऊ।” ¹² खरकच़ार परमेश्वरा री आत्मै यीशु सुनशान ज़ागहा दी नियौ। ¹³ तिऐ यीशु खतरनाक छ़ोटै-छ़ोटै ज़ीव-जन्तु मांझ़ीऐ चालीस दिना झ़ाऊं रौऔ। तिऐ आशौ शैतान, ज़ुण बुरी आत्माएं रौ परधान आ। शैतानै यीशु कै बूशै शुणाइयौ फसाउणौं और परखुणौं च़ाऔ, पर यीशुऐ तेसरी एक बूश भी नाईं मानी। तैबै सौरगा रै दूतै सौरगा कु आशियौ यीशु री सेवा कौरदै लागौ।

यीशु रै सेवा रै कामा री शुरूआत

(मती4:12-17; लूका 4:14,15)

¹⁴ दख बौग्तै बासिऐ राज़ै हेरोदेस अंतिपासै यूहन्ना पाकड़ियौ ज़ेला दी टाल़ौ, तैबै यीशु गलील परदेशा दी आशियौ, परमेश्वरा रै खुशी रौ संदेश शुणाउंदै लागौ। ¹⁵ यीशुऐ बोलौ, “सेज़ौ बौग्त आशी गौ आ ज़ेबी परमेश्वर आशियौ लोगु रै ज़ीवा दी राज़ कौरा लौ। आबै इणौ कौरौ, बुरी बाट छ़ाड़ौ, आपणौ मन बदल़ौ, और एस खुशी रै संदेशा माथै विश्वास कौरौ।”

झ़ींवर औटाऊणै

(मती4:18-22; लूका5:1-11)

¹⁶ ज़ेबी यीशु गलीला रै झ़ीला रै डीका बाटियै थै डेउंदै लागौ औन्दै, तेबी यीशु कै शमौन और तेसरौ भाई अन्द्रियास दिशै। सै झ़ींवर थै। सै थै झ़ीला दी ज़ाल़ा टाल़दै लागै औन्दै। ¹⁷ और यीशुऐ तिउंलै बोलौ; मूं पिछ़ू आशौ; हाऊं तुमु आदमिउं पाकुड़नै वाल़ै चाणाऊ।” ¹⁸ तैबै खरकच़ार तिऊं दुई भाइउऐ ज़ाल़ छ़ाड़ौ पोरु, आपू डेवै यीशु पीछ़ु। ¹⁹ यीशु तिदुरा कु दख दूर डैऔ, तिऐ दिशै यीशु कै जब्दी रै दुई छ़ोहरु याकूब और यूहन्ना। सै भी झ़ींवर थै। सै थै लागै औन्दै ज़ाल़ा गांठदै। ²⁰ यीशुऐ सै खरकच़ार औटाऐ; तिउंऐ आपणौ बाब छ़ाड़ौ किश्ती दी मुंज़ुरदारु आइलै, और आपू डेवै यीशु पीछ़ु।

बुरी आत्मा वाल़ौ आदमी च़ांगौ कौरणौ

(लूका4:31-37)

²¹ तेत बासियै यीशु आपणै च़ेलेऊ आइलै कफरनहूम गावां दी आशौ। तिऐ आशियौ खरकच़ार एक धार्मिक खुंबल़ी दी डैऔ, आराम वाल़ै दिना दी। तेत बासियै तिऐ शिक्षा दैंदै लागौ। ²² ज़ेती भी लोग थै तिऐ बोशै औन्दै, यीशु री शिक्षा शुणियौ सारै हैरान हुऐ। कैलैकि यीशु शिक्षा हका कोरिऐ दिया थौ। यीशु री शिक्षा यहूदी शास्त्री लोगू ज़िणी नाईं थी। ²³ तियां ताकै तियां धार्मिक खुंबल़ी दी एक आदमी थौ, ज़ासदी बुरी आत्मा थी लागी औन्दी। तेबी तिऐं बुरी आत्मै राड़ै मारियौ बोलौ, ²⁴ “ओ, नासरता रै यीशु! हाऊं ज़ाणा ऊ कि तू कूण ई। तू परमेश्वरा रौ पवित्र आदमी ई। तैरौ आमू आइलै का काम आ? का तू नाश कौरदै ई आशौ औन्दौ आ?” ²⁵ यीशुऐ तिऐं बुरी आत्मा लै डांटियौ बोलौ, “तू च़ुटुक थाक्क! एस आदमी छ़ाड़ियौ बाइरै निकुल़।” ²⁶ तिऐं बुरी आत्मै सेज़ै आदमी छ़ाटौ-बिछ़ौड़ौ, तेत बासिऐ तेस आदमी छ़ाड़ियौ बाइरै निकल़ी। ²⁷ ज़ेती भी तिऐ लोग थै सै हैरान हुऐ और आपू माज़ियै चौपड़िंदै लागै कि “इयौ यीशु हका कोरिऐ किणी शिक्षा दिया? इदरा झ़ाऊं कि बुरी आत्माएं भी एसरौ हुकम पोरु माना ई।” ²⁸ यीशु रै बारै दी सारी खबर खरकच़ार गलील परदेशा दी आगी बाशियै फैली।

भौरी रोगिऊ ठीक कौरणै

(मती8:14-17; लूका4:38-41)

²⁹ यीशु खरकच़ार धार्मिक खुंबल़ी कु निकल़ियौ याकूब और यूहन्ना आइलै शमौन और अन्द्रियासा सै घौरा दी डैऔ। ³⁰ तिऐ शमौन री शाशू च़ाता ई बुखार कोरिऐ भौरी बिमार थी। तिऊं घौरा रै लोगुऐ खरकच़ार यीशु काऐ बोलौ, “शमौना री शाशू बुखारा कोरिऐ भौरी बिमार आ।” ³¹ यीशु शमौना री शाशू काऐ डैऔ, तियांरौ हाथ पाकड़ौ और सै खौड़ी उठाई। तियांरौ बुखार तेबी ठीक हुऔ। तेत बासियै सै तिउंरी सेवा कोरदै लागी। ³² ब्याल़कै, दिनै ओउड़ियौ, लोग बीमार और ज़ासदी बुरी आत्मा थी लागी औन्दी यीशु काऐ आणदै लागै। ³³ गावां रै भौरी लोग शमौना रै दारा काऐ भौरुऐ। ³⁴ यीशु भौरी लोग ज़ासदी काई रौंगा री बीमारी थी लागी औन्दी च़ांगै कियै। और बुरी आत्मा ज़ासदी लागी औन्दी थी तिऊंकु सै आत्माएं भी गाड़ी पोरु। यीशुऐ बुरी आत्माएं लै बोलणे रौ कोई मौकौ ना दैऔ। कैलैकि बुरी आत्माएं ज़ाणा थी कि यीशु कुण आ।

एखुलै दी यीशु रै प्राथना कौरणी

(लूका 4:42-44)

³⁵ तेत बासियै यीशु दोतकै पौरै सुतियौ उठौ। सौ बाइरै निकल़ियौ एखुले ज़ागह दी डेइयौ तिऐ प्राथना कौरदै लागौ। ³⁶ तैबै शमौन और तेसरै साथी यीशु लोड़दै लागै, कि यीशु केशी डैऔ औलौ। ³⁷ तेत बासिऐ तिउंकै यीशु मिलौ और सै यीशु कु बोलदै लागै कि सारै लोग ई तुमु लोड़दै लागै औन्दै। ³⁸ यीशुऐ तिउंलै बोलौ, “ओरु आशौ! आमै नीज़ुका रै गांवा दी डेई। हाऊं दुनिया दी एथिलै ऊ आशौ औन्दौ कि लोगू लै शिक्षा देई सकू।” ³⁹ तेत बासियै यीशु गलील परदेशा री धार्मिक खुंबल़ी दी डेइऔ खुशी रौ संदेश शुणाउंदै लागौ और ज़ासदी बुरी आत्मा थी तिऊंकु बुरी आत्मा गाड़दै लागौ।

कोढ़ा वाल़ौ आदमी ठीक कौरणौ

(मती8:1-4; लूका5:12-16)

⁴⁰ एकी दिनै यीशु काऐ एक कोढ़ी आशौ। सौ यीशु रै बांगणै बौंधियौ औरज़ कौरदै लागौ, “तुमै मू च़ांगौ कौरनै च़ाह लै ता हाऊं च़ांगौ हुआ ऊ।” ⁴¹ यीशुऐ दया कौरियौ आपणै हाथा बढ़ाइयौ रौ छ़ूऔं और तेसलै बोलौ, “हाऊं च़ाहा ऊ कि तू च़ांगौ च़ाईं हुऔ।” ⁴² तेभी सेज़ौ आदमी च़ांगौ हुऔ। ⁴³ यीशुऐ तेसलै सख्ता ई कोरिऐ बोलौ, ⁴⁴ “इयैं बूश कासी काऐ ना बोलै। तू सीधौ याजका काऐ डेऊ। परमेश्वरै आपणै सेवक मूसा रै ज़रीऐ ज़ैज़ै नियम ई दैऔ औन्दै, तिऊं अपणाइयौ बल़ी चड़ाऊ, ताकि याजक तैरै बारै दी लोगू काऐ बोला कि तू च़ांगौ और शुद्ध हुई गोई।” ⁴⁵ पर सेज़ौ आदमी लोगू काऐ डेइऔ इयां बूशा फैलाउंदै लागौ कि, “यीशुऐ हाऊं च़ांगौ कियौ ऊ।” एज़ै कारण यीशु कै गांव-गांवा दी नाईं डेउवौ। तैबै यीशु बंज़र ज़बीना दी रौइंदै लागौ। तेती माथै भी लोग गांव-गांवा कु यीशु काऐ तिऐ आशा थै।

अधरौंगा वाल़ौ आदमी च़ांगौ कौरणौ

(मती9:1-8; लूका5:17-26)

¹ काई दिना बासियै यीशु कफरनहूम गावां दी वापिस आशौ। लोगुऐ शुणौ कि यीशु एकी घौरा दी आ। ² तैबै तिऐ एतरै लोग भौरुऐ कि दारा काऐ भी ज़ागहा नाईं थी। यीशु तिऊं काऐ परमेश्वरा रै वचना शुणाउंदै लागौ औन्दौ थौ। ³ तैबै तिदै च़ार आदमीउऐ च़ुंगियौ एक इणौ आदमी आणौ ज़ासकै आपणै ज़िसमा रौ केज़ौ भी अंग नाईं हिलाइया थौ। ⁴ भौरी लोगू री भीड़ा ई तिउंकै यीशु काऐ नाईं पउंच़ुऔ। एज़ी ताईं तिउंऐ ऊपरै स्वाणै पारै च़ड़ियौ तेस घौरा रै छ़ापरा कु कुछ़ ज़ाण्दै गाड़ियौ बिस्तरै रै च़ार कुणै दी लोउल़ी बानियौ सेज़ौ बीमार आदमी यीशु काऐ धौनी उतारौ। ⁵ तैबै यीशु तिऊं च़ार आदमीउ रौ विश्वास देखियौ बिमार आदमी लै बोलौ, “माऊं, तैरै पाप माफ हुई गोऐ ई।” ⁶ तैबै ज़ो तिऐ यहूदी शास्त्री थै बोशै औन्दै, सै आपणै मौना दी गुणमुणांदै लागै कि, ⁷ “इयौ यीशु परमेश्वरा री बुराई कौरा आ, पाप ता सिरफ परमेश्वर माफ कौरा आ सा।” ⁸ यीशु कु खरकच़ार ज़ाणुई ऐरौ कि इयै लोग आपणै-आपणै मौना दी मैरै बारे दी का ई लागै औन्दै। यीशुऐ तिउंलै बोलौ, “तुमै आपणै मौना दी का ई लागै औन्दै गुणमुणांदै? ⁹ आसान का सा? बीमार आदमी लै इणौ बोलणौ कि, “तैरै पाप माफ हुई गोऐ’ या इणौ बोलणौ कि, ‘खौड़ौ उठ, आपणौ बिस्तर च़ुंग और आण्डदै लाग्ग?’ ¹⁰ पाप माफ कौरनौ और च़ागौ कौरनौ इयै दुइया काम सिरफ परमेश्वर ई कौरी बौल़ा आ। तुमु कै देखाउणा लै कि पाप कौरने रौ हक मूकै आ, ज़ुण परमेश्वरा री तौरफा कु भेज़ौ औन्दौ ऊ, हाऊं एस आदमी ठीक कौराऊ।” तैबै यीशुऐ तेस बीमार आदमी देखियौ बोलौ, ¹¹ “हाऊं ताउंलै बोलाऊ, खौड़ौ उठ, आपणौ बिस्तर च़ुंग और घौरै डेऊ।” ¹² तैबै सेज़ौ आदमी खरकच़ार सारै लोगू रै सामनै उठौ और आपणौ बिस्तरौ च़ुंगियौ बाइरै डैऔ। तिऐ सारै लोग इणै देखियौ हैरान हुऐ और इणै बोलियौ परमेश्वरा री बौड़ाई कौरी, कि “इणौ आमुऐ पैहलै केभी ना देखौ।”

लेवी औटाउणौ

(मती9:9-13; लूका5:27-32)

¹³ यीशु तेस घौरा कु गलील झ़ीला रै डीका काऐ डैऔ। तैबै लोगू री भिड़ यीशु काऐ डेई। यीशु लागौ तिऐ तिउंलै शिक्षा दैंदै। ¹⁴ तेत बासियै यीशु दुज़ी ज़ागहा दी डैऔ। तैबै यीशुऐ हलफी रौ छ़ोहरु देखौ ज़ासरौ नाऊं लेवी थौ। सौ मामलै निणै वाल़ेउ रै आडै माथै थौ बोशौ औन्दौ। यीशुऐ तेसलै बोलौ, ‘मू पीछ़ आश।” तैबै सौ उठियौ यीशु पीछ़ु लागौ आण्डदै। ¹⁵ एकी दिनै तिणी मामलै निणै वाल़ै लेवीऐ यीशु आपणै घौरा दी रोटी खांदै औटाऔ। मामलै निणै वाल़ै और पापी लोग भी बोशै रोटी ख़ांदै, यीशु रै च़ेलेउ आइलै। ¹⁶ कुछ़ यहूदी शास्त्री और फरीसी लोग ज़ुण आपूलै धर्मी समझ़अ तै, तिउंऐ देखौ कि यीशु पापी लोगू आइलै रोटी खांदै औ लागौ औन्दौ। तैबै तिउंऐ यीशु रै च़ेलेउ लै बोलौ, “यीशु कैलै खा सा इऊं पापी लोगू आइलै रोटी?” ¹⁷ यीशुऐ इणै शुणियौ तिउंलै बोलौ, “भौलै-च़ांगेउ लै डाक्टरा री ज़ुरत नाईं औन्दी, बीमारा लै हुआ सा। हाऊं धर्मी लोगू नाईं बल्कि पापी लोगू औटाउंदै ऊ आशौ औन्दौ, ताकि सै परमेश्वरा री बाटा दी आशा।”

ब्रौता(उपवासा) रौ सवाल

(मती9:14-17; लूका5:33-39)

¹⁸ यूहन्ना बपतिस्मा दैणै वाल़ै रै च़ेलै और फरीसी थै ब्रौता कौरदै लागै औन्दै। (एज़ौ तिंउरै धर्मा रौ रिवाज़ थौ।) तैबै सै यीशु काऐ आशियौ यीशु लै बोलदै लागै, “यूहन्ना रै च़ेलै और फरीसी रै च़ेलै ता कौराई ब्रौत। पर तुमारै च़ेलै ब्रौत नाईं कौरदै। इणौ कैलै सा?” ¹⁹ यीशुऐ तिउंलै बोलौ, “ज़ेबी झ़ाऊं लाड़ौ साथा दी हुआ, का बराती ब्रौता कौरदै लागा ई? ज़ेबी झ़ाऊं लाड़ौ बरातीउ रै साथाई हुआ, सै खुश हुआ ई। तेबी तिउंकै ब्रौता कौरने री का ज़ुरत हुआ? ²⁰ पर सेज़ै दिन आशा ई, ज़ेबी लाड़ौ तिऊंकु अलग कौरालै, सेज़ै बौग्ता दी सै ब्रौत कौराई।” ²¹ यीशुऐ इणौ भी बोलौ, “केज़ौ भी आदमी नौऐ कापड़ै रौ टालकौ पुराणै ज़ुड़कै दी ना लाइंदौ। नाईम ता धोइंदै बारै सेज़ौ नौऐ कापड़ै रौ टालकौ तेस पुराणौ ज़ुड़कौ पोरु थोसियौ ज़ादड़ौ च़ीरा सा। ²² यीशुऐ तिउंलै इणौ अनेणौ भी दैऔ, “अंगूरा री सूर चाणना लै ताज़ै अंगूरा रौ रस दख बौग्ता बासियै फैलियौ पुराणै च़ामड़ै रौ थौउलौ भी पोरु च़ीरा। ज़ेथ कोरिऐ अंगूरा रौ रस और थौउलौ दुइया बर्बाद हुआ ई। एथिलै ताज़ै अंगूरा रौ रस नौऐ थौउलै दी भौराई।”

आरामा रै दिना रौ भी प्रभु

मती12:1-8; लुका6:1-5

²³ इणौ हुऔ कि एकी दिनै यीशु आपणै च़ेलेऊ आइलै आरामा वाल़ै दिना दी डोखरेउ दी थौ लागौ औन्दौ डेउंदै। यीशु रै च़ेलेऊ कै थी भूख लागी औन्दी। तेस डोखरै दी थै गीऊं बौऔ औन्दै, सै च़ेलै लागै तिऊं गिऊं सै सीला चोड़ियौ खांदै। ²⁴ तैबै फरीसीउऐ यीशु लै बोलौ, “देखौ। ज़ेज़ौ काम आरामा रैदिना दी कौरनौ मना सा, सेज़ौ काम तुमारै च़ेलै कैलै कौराई?” ²⁵ यीशुऐ तिउंलै बोलौ, “धर्म शास्त्रा दी तुमुऐ ज़ुरुर पौढ़ौ औलौ कि ज़ेबी राज़ौ दाऊद और तेसरै साथी भूखै थै, तिउंकै खाणा लै कुछ़ भी नाईं थौ, तैबै दाऊदै का कियौ? ²⁶ आपणी ज़ुरता लै परमेश्वरा रै आराधना री ज़ागहा दी अबियातार नांवा रौ प्रधान याजका काऐ डेइयौ तिराकु दाऊदै परमेश्वरा काऐ च़ड़ाई औन्दौ भौगा री रोटी खाई, और आपणै साथीउ लै भी देई ज़ो सिरफ याजक ई खा थै।” (दाऊदै एज़ौ काम आरामा रै दिना दी कियौ। तैबै भी दाऊदा री बुराई कोइयेउऐ ना की, पर फरीसी लोग थै यीशु री बुराई कौरदै लागै औन्दै।) ²⁷ यीशुऐ तिउंलै इणौ भी बोलौ, “परमेश्वरै आरामा रौ दिन आपमी रै फाइदै लै चाणौ आ, ना कि आदमी आरामा रै दिना रै नियम मानणा लै चाणौ।” ²⁸ यीशुऐ इणौ भी बोलौ, “हाऊं, ज़ो परमेश्वरा री तरफा कु भेज़ौ औन्दौ ऊ, आरामा रै दिना रौ भी प्रभु ऊ।”

शुकै औन्दै हाथा वाल़ौ आदमी च़ांगौ कौरणौ

(मती12:9-14;लूका6:6-11)

¹ एकी औज़ौ आरामा रै दिना दी यीशु यहूदी लोगू री धार्मिक खुंबल़ी दी डैऔ। तिऐ एक आदमी थौ ज़ासरौ हाथ बीमारी कोरिऐ शुकी गौ थौ। ² तैबै कुछ़ फरीसी लोग यीशु माथै आरोप लाइणा लै तेसरी ताकी दी थै रौऐ औन्दै कि का यीशु एस आदमी आराम वाल़ै दिना दी ठीक कौरा या नाईं कौरदौ? (यहूदी लोगू रै धर्मा दी आराम वाल़ै दिना दी केज़ौ भी काम कौरनौ मना थौ।) ³ यीशुऐ शुकै औन्दै हाथ वाल़ै आदमी लै बोलौ, “मांझ़ाई आशियौ खौड़ौ ऊ।” ⁴ तैबै यीशुऐ लोगुकु पूछ़ौ, “का आरामा रै दिना दी भौलौ कौरनौ ठीक आ या बुरौ कौरनौ? प्राण बच़ाउणौ या मारनौ?” पर कोइयै ज़वाब ना दैऔ। ⁵ यीशु दुखी हुऔ कैलैकि तिंउरै मन भौरी डीठ बौणी गौऐ थै। तैबै यीशुऐ रोशुइयौ लोगू भिलै देखौ और तेस आदमी लै बोलौ, “आपणौ हाथ औगाऊं कर।” तिणियै हाथ औगाऊं कौरौ, तैबै तेसरौ हाथ च़ांगौ हुऔ। ⁶ तैबै फरीसी बाइरै डेइयौ खरकच़ार हेरोदेस राज़ै रै गुटा आइलै यीशु रै विरोधा ई सलाह कौरदै लागौ कि किणै कोरिऐ यीशु झ़ांगुलै।

भीड़ा रौ यीशु पिछ़ु हुणौ

⁷ तैबै यीशु भीड़ा कु अलग हुणा लै आपणै च़ेलेऊ आइलै गलील झ़ीला काऐ डैऔ, पर ज़ो कुछ़ यीशु कौरदै थौ लागौ औन्दौ तेसरै बारै दी शुणियौ एक भौरी बौड़ी भीड़ पीछ़ु आशी। ⁸ तिऐं भीड़ा दी गलील परदेश, यहूदा परदेश, यरुशलेम शहर, इदूमी देश और यरदन नौईं पार भिला रै लोग इदरा झ़ाऊं कि सूर और सैदा शहरु रै नज़दीका रै लोग भी आशै औन्दै थै। ⁹ यीशुऐ भौरी बीमार लोग च़ांगै कियै थै, तैबै बीमार लोग यीशु माथै थै लागै औन्दै पौड़दै कि किणै कोरिऐ यीशु छ़ूइंयौ आमै ठीक हूलै। ¹⁰ भीड़ा रै कारण यीशुऐ आपणै च़ेलेऊ लै बोलौ कि तुमै मूकालै एक छ़ोटी किस्ती त्यार छ़ाड़ेऊ ताकि मू भ़ीड़ ना दबावा। ¹¹ बीमार लोगू री भीड़ा दी इणै भी लोग थै ज़ो कि बुरी आत्मा रै वशा दी थै। ज़ैबै केभी सै बुरी आत्माएं यीशु देखा थी, तैबै तिऊं आपणै वशा दी कौरै औन्दै लोग यीशु काऐ धौनी लोटाल़ा थी। तिऊं लोगू रै मुंआ कु सै बुरी आत्माऐं राड़ै मारियौ बोला थी कि, “तू परमेश्वरा रौ छ़ोहरु ई।” ¹² यीशुऐ तिऊं बुरी आत्मा लै सख्त हुकम दैऔ, “तुमै मू ना देखाऔ कि हाऊं कुण ऊ।”

बारह (प्रेरित) च़ेलेउ छ़ाँटणै

(मती10:1-4; लुका6:12-16)

¹³ यीशु तेत बासियै गलील झ़ीला रै उतर दिशा री पहाड़ीउ दी च़ौड़ौ, और ज़ास यीशु च़ाह थै सै आपू काऐ औटाऐ, और सै सब कुछ़ छ़ाड़ियौ यीशु काऐ आशै। ¹⁴ यीशुऐ खास कामा लै बारह आदमी च़ेलै चाणै, ताकि सै यीशु रै साथा-साथाई रौआ और यीशु तिऊं भेज़ा, कि सै परमेश्वरा रौ संदेश शुणावा। ¹⁵ और सै लोगुकु बुरी आत्माएं गाड़ने रौ हक छ़ाड़ा। ¹⁶ तिऊं बारह च़ेलेऊ रै नाऊं एज़ै-एज़ै ई, शमौन ज़ासरौ नाऊं यीशुऐ पतरस छ़ाड़ौ। ¹⁷ और जब्दी रौ छ़ोहरु याकूब और तेसरौ छ़ोटौ भाई यूहन्ना, ज़ासरै बारै दी यीशुऐ इणौ बोलौ कि ज़िणौ सौरग खरखच़ार गुड़ा आ, तिणी रोशिया ई इयै। ¹⁸ और अन्द्रियास, फिलिप्पुस, बरतुलमै, मती, थोमा, हलफी रौ छ़ोहरु याकूब, तद्दै, और दुज़ौ शमौन, ज़ुण रोमी सरकारा रौ बिरोधी थौ। ¹⁹ यीशुऐ करियोत गांवा रौ यहूदा भी चुनौ, ज़ुणियै यीशु पकड़ाऔ आ।

यीशु और बालज़बूल

(मती12:22-32; लूका11:14-23; 12:10)

²⁰ ज़ैबै यीशु च़ेलेऊ आइलै घौरा दी आशौ, ज़िऐ यीशु रौआ थौ, तिऐ भी एक भौरी भीड़ कौठी हुई गोई। यीशु कामा दी भौरी उलज़ी गोऔ, इदरा झ़ाऊं कि यीशु और तेसरै च़ेलेऊ कै रोटी खाणा रौ बौग्त भी नाईं थौ। ²¹ ज़ैबै यीशु रै टौबरुऐ इणौ शुणौ तैबै सै यीशु ओरु आणना लै डेवै कैलैकि सै आपू मांझ़िऐ बोलदै लागै कि यीशु रौ दिमाग ठिकाणै दी ना आसतौ। ²² ज़ेज़ै यहूदी शास्त्री लोग यरुशलेम शहरा कु थै आशै औन्दै, सै यीशु लै इणौ लागै बोलदै कि एस भीलै ता शैतान आ ज़ासरै ज़रिऐ यीशु बुरी आत्माएं गाड़ा सा। ²³ यीशुऐ सै शास्त्री लोग आपू काऐ औटाइयौ अनेणै देइयौ समझ़ाऐ कि शैताना कैलै गाड़ा सा शैतान? ²⁴ यीशुऐ तिउंलै बोलौ, “ज़ेज़ै राज़ा दी आपू मांझ़िऐ फुट पौड़ा ली ता सेज़ौ राज़ नाईं बौणी रौइंदौ। ²⁵ ज़ेज़ै घौरा दी आपू मांझ़िऐ फूट पौड़ा ली ता सेज़ै घौरा रै लोग भी कौठै नाईं रौइंदै। ²⁶ एज़ै कारण शैतान भी आपणै राज़ा दी फूट टाला लौ ता तेसरौ राज़ किणै कोरिऐ बौणी रौआ? ²⁷ केज़ौ भी आदमी केज़ै ताकतबर आदमी रै घौरा दी घुसड़ियौ तेसरौ घौर तेभी झ़ाऊं नाईं लूटींदौ, ज़ेबी झ़ाऊं तेस ताकतबर आदमी बाना नाईं लै। इणै कोरिऐ तेस घौर लूटी बौल़ा ई। ²⁸ हाऊं तुमुलै सौच़्च़ौ बोलाऊ कि लोगू रै सारै पाप, सारी बुराई भी माफ हुआ ई। ²⁹ पर ज़ो परमेश्वरा री आत्मा रै बारै दी बुरौ बोलाई तेसलै केबी भी माफी ना मिलदी। और सौ सौदा लै आरोपी बौणा आ।” ³⁰ यीशुऐ इणौ तैबै बोलौ कैलै कि सै लोग बोला थै कि यीशु दी बुरी आत्मा सा।

यीशु री आमा और भाई

(मती12:46-50; लूका8:19-21)

³¹ तैबै यीशु री मां और भाई तिऐ पौउंच़ै, सै थै बाइरै खौड़ै, तिउंऐ लोगूकै बोलौ कि यीशु बाइरै औटाऔ। ³² यीशु काऐ थी भीतै भौरी भिड़ बोशी औन्दी। लोगुऐ यीशु लै बोलौ, “तुमारी मां और भाई तुमु बाइरै औटावा ई।” ³³ यीशुऐ तिउंलै बोलौ, “मेरी मां और भाई कुण ई?” ³⁴ ज़ेज़ै लोग यीशु काऐ थै बोशै औन्दै, यीशुऐ तिऊं भिलै देखियौ बोलौ कि, “देखौ मेरी मां और भाई इयै ई। ³⁵ ज़ो परमेश्वरा री इच्छ़ा दी च़ाला ई, सेई सी मेरी मां और भाई, बौइणी।”

बीजा बौइणै वाल़ै रौ औनेणौ

(मती13:1-9;लूका8:4-8)

¹ तेत बासियै यीशु तौऐं गलील झ़ीला रै डीका काऐ शिक्षा दैंदै लागौ। तिऐ यीशु काऐ एती बौड़ी भीड़ कौठै हूई, कि यीशुऐ झ़ीला दी एकी किस्ती दी पा पौड़ौ बोशणौ। और लोगू री भीड़ बोशी झ़ीला रै डीका काऐ। ² यीशु तिऊं काऐ कहाणी शुणाइयौ भौरी बूशै लागौ शिखाउंदै। यीशुऐ शिक्षा दैंदी बारै तिउंलै बोलौ, ³ “इयै कहाणी शुणौ। एक ज़िमदार बीजा बौइंदै निकल़ौ। ⁴ बीजा बौइंदी बारै कुछ़ बीज छ़ुटौ बाटा दी, सौ च़ुणौ च़ड़कुऐ। ⁵ कुछ़ बीज फोकुऔ पथरिल़ी ज़मीना दी ज़िऐ सौ बीज ज़ल्दी ता ज़ौमौ, ⁶ पर भौरी माटी ना मिलणै रै कारण ज़ैबै ताती रुढ़ लागी तैबै सै आंगुरै शुकै पोरु। ⁷ और कुछ़ बीज पौड़ौ झ़ाड़िऊ मांझ़ियै। ज़िणी सौ बीज बौड़िंदै लागौ मातौल़ै दबाऔ झ़ाड़िउऐ। एज़ै कारण सौ बीज नाईं फौल़ौ। ⁸ पर कुछ़ बीज पौड़ौ आच़्छ़ै माटै माथै। सौ ज़ौमौ और ज़ौमियौ भौरी फौल़ौ। कुछ़ फौल़ौ तीस पाथै, कुच़ साठ पाथै, और कुछ़ शौ पाथै। ⁹ तैबै यीशुऐ तिउंलै बोलौ, “तुमै मेरी कहाणी रौ मतलब समझ़ुणौ च़ाहा ई, ता तुमै ध्याना देइयौ सुंच़ेऊ कि तुमै का शुणा ई।” ¹⁰ तेत बासियै ज़ैबै सै भीड़ तिऐ कहाणी शुणियौ वापिस डेई गोई थी, तैबै यीशु रै बारह च़ेलै और कुछ़ औज़ौ लोगुऐ यीशु काऐ आशियौ पूछ़ौ, “इयैं कहाणी शुणाउणै रौ मतलब का सा?” ¹¹ तैबै यीशुऐ तिउंलै ज़वाब दैऔ, ‘इबी झ़ाऊं लोग नाईं ज़ाणा थै कि परमेश्वर आशियौ लोगू रै ज़ीवा दी राज़ कौरा आ। तुमुकै ता एस भेता रै बारै दी मुइंयै सब कुछ़ आ बोलौ औन्दौ, पर ज़ो लोग परमेश्वरा री बाटा दी ना आशै, इयै कहाणी तिऊं लोगू लै आ। ¹² इयै बूशै सच्च़ी आ ज़ो यशायाह गुरुऐ इणै लोगू लै सात शौ साल पैहलै बोली आ कि, ‘ज़ो लोगु देखा ताई रौंगै, पर सुंच़दै नाईं, और शुणा ताई रौंगै, पर समझ़ुदै नाईं, इणै लोग ना ता बदल़िदै, सा ता इउंलै माफी मिलदी।’” ¹³ तौऐं यीशुऐ तिउंलै बोलौ, “का तुमै इयैं कहाणी रौ मतलब सा समझ़ुंदै? तैबै तिऊं सारी कहाणी किणै कोरिऐ समझ़ा ई? ¹⁴ सौ बीजा बौइणै वाल़ौ ज़िमदार इणौ आ, ज़िणौ परमेश्वरा रौ वचन शुणाउणै वाल़ौ आ। ¹⁵ ज़ो बीज बाटा दी पौड़ौ आ तेथरौ मतलब आ कि कुछ़ लोग परमेश्वरा रौ वचन ता शुणा ई, पर आपणै ज़ीवा दी ना छ़ाड़दै। सै तेस बाटा दी पौड़ै औन्दै बीजा बाशियै ई ज़ो केभी भी ना फौल़दै। ज़िणौ च़ड़कु बीज च़ुणा आ, तिणौ शैतान खरकच़ार आशियौ तिंउरै ज़ीवा कु परमेश्वरा रौ वचन च़ोरा आ। ¹⁶ ज़ो बीज पथरियाल़ी ज़मीना दी पौड़ौ थौ तेथरौ मतलब इणौ आ कि कुछ़ लोग परमेश्वरा रौ वचन शुणियौ खरकच़ार खुशी कोरिऐ माना ई। ¹⁷ पर ज़ैबै विश्वासा रै कारण केज़ौ भी कष्ट या सताव आशा, तैबै फेटी फशटा ई। कैलैकि सै आपणै ज़ीवा दी परमेश्वरा रौ वचन नाईं बसाल़दै। ¹⁸ और ज़ो बीज झ़ाड़िऊ माझ़ियै पौड़ौ थौ, सौ खौड़ी ना उखरांदौ। तेथरौ मतलब इणौ आ कि कुछ़ लोग ता परमेश्वरा रौ वचन शुणा ई। ¹⁹ बासियै दुनिया री च़िन्ता दी, रुपाऐ पैसै, दुज़ी च़ीज़ेउ रै लाल़च़ाई फौसियौ परमेश्वरा रै विश्वासा दी नाईं बौढ़दै। ²⁰ ज़ो बीज आच्छ़ी ज़मीना दी पौड़ौ थौ सौ भौरी फौल़ा आ। तेथरौ मतलब इणौ आ कि कुछ़ लोग परमेश्वरा रौ वचन आच्छ़ा कोरियै शुणा ई और तेस वचना माथै च़ाला भी और विश्वासा दी बौढ़ा ई। इणै आदमी तेस बीजा बाशियै ई ज़ो बीज तीस पाथै, साठ पाथै और शौ पाथै फौल़ौ आ।”

दिऐ रौ औनेणौ

(लूका8:16-18)

²¹ तैबै यीशुऐ तिउंलै इणौ भी बोलौ, “का लम्प पलंगा थाल छ़ाड़ना लै आणा ई या बाल्टी थाल? नाईं, पर एथलै आणा ई कि घौरा भीतै ऊंच़ी ज़ागहा दी छ़ाड़ियौ लोगूकै प्याशौ लागा। ²² कैलैकि कोई भी च़ीज़ मेरी नौज़री कु छ़िपी औन्दी ना आसती, ज़ो परगट ना करियाली, और ना ही कुछ़ छ़ुपौंदौ आसरौ, ज़ो उज़ाल़े दी ना आणियालौ। ²³ तुमै इयैं बूशै समझ़ुणौ च़ाह ई, ता शुणौ, और सुंच़ौ, ज़ो कुछ़ भी हाऊं बोलाऊ।” ²⁴ यीशुऐ तौऐं तिउंलै बोलौ, “ज़ेजै नापा कोरिऐ तुमै नापा लै, सेज़ै नापा कोरिऐ तुमुलै भी नापिया। ज़ो कुछ़ हाऊं तुमुलै बोलाऊ भौरी ध्याना देइयौ शुणौ और सुंच़ौ कैलैकि ज़ेती ध्याना देइयौ तुमै शुणियौ सुंच़ा लै तेती ज़ादी तुमु दी समझ़ आशा आ। एती नाईं बल्कि परमेश्वर तुमुलै एथकु भी ज़ादी समझ़ दिया आ। ²⁵ पर ज़ो ध्याना कोरिऐ समझ़ुणौ नाईं च़ाइंदै, ज़ो कुछ़ तिउंऐ शुणौ थौ, तेस भी पोरु बिसरिया ई। ज़ासकै कुछ़ आसा आ, तेसकै औज़ौ भी मिला, पर ज़ासकै ज़ादौ नाईं आसतौ, तेसकै ज़ो थोड़ौ-बौहत आसा आ, सौ भी नाईं रौइंदौ कैलैकि सै समझ़ुंदै नाईं।”

ज़ौमणै वाल़ै बीजा रौ औनैणौ

²⁶ यीशुऐ तिउंलै बोलौ, “परमेश्वरा रौ राज़ इणौ आ ज़िणौ केज़ै ज़िमदारै ज़बीना दी बीज बौऔ आ। ²⁷ बीजा बौइयौ आपू आशौ घौरै, और कुछ़ दिना बीतियौ डैऔ सौ आपणै डोखरे दी। तिणियै का देखौ कि सौ बीज़ थौ ज़ौमियौ बौड़ौ हुऔ औन्दौ। तेसकै पौतौ भी ना लागौ कि इयौ किणौ हुऔ आ। ²⁸ ज़बीन आपू थी लागी औन्दी फसल पैदौ कौरदै। पैहलै निकल़ै आंगुरै, तेत बासियै सीलै, तेत बासियै सीलेऊ माझ़ियै त्यार गुल़ै। ²⁹ ज़ैबै फसल त्यार हुई तेभी तिणियै मुंज़ुरदारा भेज़ै कैलैकि फसल काटणै रौ बौग्त आशी गौ थौ।”

राई रै बीजा रौ औनेणौ

(मती13:31,32,34; लूका13:18,19)

³⁰ यीशुऐ तिउंलै इणौ भी बोलौ, “हाऊं तुमु काऐ परमेश्वरा रै राज़ा रै बारै दी किणौ बोलु लै? केज़ै औनेणै देइयौ तेसरै बारै दी समझ़ाऊ लै? ³¹ परमेश्वरा रौ राज़ राई रै दाणै ज़िणौ आ। राई रौ बीज देखणा लै ता भौरी छ़ोटौ हुआ सा। ³² पर ज़ेबी तेस बौआ ई, तैबै ज़ौमियौ सौ बीज एती बौड़ौ पौधौ बौणा कि च़ड़कु भी तेस थाल आशियौ बसेरौ कौरा ई?” ³³ यीशु इणै औनैणौ देई-देइयौ परमेश्वरा रौ वचन समझ़ावा थौ, जेती तिऊं लोगू री समझ़ थी। ³⁴ यीशु बिणा औनेणै देइयौ तिऊं आइलै कुछ़ भी ना बोला थै, पर ज़ेबी यीशु और च़ेलै एखुली दी थै तैबै यीशु तिऊं काऐ सारी बूशेउ रौ मतलब बोला थौ।

बागुर शान्त कौरणौ

(मती8:23-27;लूका8:22-25)

³⁵ सेज़ै दिना दी ज़ेबी ब्याल़ हुई, तैबै यीशुऐ आपणै च़ेलेऊ लै बोलौ, “आशौ आमै झ़ीला पारभिलै डेई।” ³⁶ लोगू री भीड़ा छ़ाड़ियौ च़ेलै यीशु आइलै एकी किस्ती दी डेवै। और तिऊं आइलै औज़ौ भी काइयै किस्ती च़ाली। ³⁷ तेभी खरकच़ार भौरी तेज़ बागुर लागौ, इदरा झ़ाऊं कि पाणी रै छ़ालै कोरिऐ किस्ती भी पूरी भौरुई। ³⁸ तियां ताकै यीशु किस्ती दी पिछ़ली भिलै शिराणै माथै मूंडा छ़ाड़ियौ सुतदै थौ लागौ औन्दौ। तैबै च़ेलेऊऐ यीशु ज़गाऔ और डौरी-डौरियौ यीशु लै बोलौ, “ओ गुरु! का तुमु कै फिकर ना आसती कि आमै डुबदै ई लागै औन्दै?” ³⁹ यीशु खौड़ौ हुऔ और आपणै हुकमा देइयौ बागुर और पाणी रै छ़ालै लै बोलौ, “पोरु घट!” इणै बोलदा बेर हुई बागुर और पाणी रै छ़ालै तेभी बंद हुऐ। ⁴⁰ तैबै यीशुऐ च़ेलेऊ लै बोलौ, “तुमै कैलै डौरै ई? का तुमुकै आज़ा झ़ाऊं मू माथै विश्वास ना हुऔ?” ⁴¹ सै च़ेलै भौरी डौरै और आपू मांझ़ियै बोलदै लागै, “इयौ कुण औलौ इणौ पा? पाणी, बागुर भी एसरौ हुकम माना ई।”

बुरी आत्मा वाल़ौ आदमी च़ांगौ कौरणौ

(मती8:28-34; लूका8:26-39)

¹ यीशु झ़ीला पारभिलै डेइयौ गिरासेनीउ रै इलाकै दी पौउंच़ौ। ² ज़िणी यीशु किस्ती कु उतरौ, तिणी खरकच़ार एक आदमी, ज़ासदी बुरी आत्मा थी, सौ यीशु कु मिलौ। ³ सौ आदमी तिऐ रौआ थौ ज़िऐ मौरै औन्दै लोग दबावा ई। तेस कोइयौ शांगल़ी दी भी ना बानी बौल़ा थौ। ⁴ कैलैकि सौ बार-बार रशै और शांगल़ी दी हुआ थौ बानौ औन्दौ, पर तिणियै सै शांगल़ी भी पोरु चोड़ी रशेउ रै भी कौरा थौ टुकड़ै-टुकड़ै। तेस केज़ौ भी आदमी आपणै वशा दी ना कौरी बौल़ा थौ। ⁵ सौ लगातार राची-दिनै ज़ागहा दी और ढोके माथै डेइयौ राड़ै मारा थौ, और पात्थरु कोरिऐ आपणै ज़िसमा री च़ौरच़ै कौरा थौ। ⁶ सौ आदमी यीशु देखियौ दूरा कु यीशु काऐ दुड़ौ। सौ धौनी झ़ुकियौ यीशु री भक्ति कौरदै लागौ। ⁷ यीशुऐ तेस भीतै ज़ो बुरी आत्मा थी, तियांलै बोलौ, “एस आदमी छ़ाड़ियौ बाइरै निकुल़।” ⁸ बुरी आत्मै यीशु लै राड़ै मारियौ बोलौ, “ओ परमेश्वरा रै छ़ोहरु यीशु। मूकु का च़ाहा ई? हाऊं ताउंलै परमेश्वरा रै नांवा कोरिऐ औरज़ कौरा ऊ कि तू मूलै दु:ख ना दै।” ⁹ यीशुऐ तिऐं बुरी आत्मा कु पूछ़ौ, “तैरौ का नाऊं आ?” बुरी आत्मै बोलौ, “मैरौ नाऊं आ सेना, कैलैकि आमै भौरी सी।” ¹⁰ तेस आदमी रै जरिऐ तिऐं बुरी आत्मै यीशु कै भौरी औरज़ कौरी कि, “आमू एस इलाकै कु बाइरै ना गाड़ै।” ¹¹ तिऐ पहाड़ा माथै सुंगरु रौ गोल़ थौ च़ौरदै लागौ औन्दौ। ¹² तिऐ बुरी आत्मै यीशु कै औरज कोरियै बोलौ, “आमू इउं सुंगरु दी भेज़, आमै इउं भीतै डेई।” ¹³ यीशुऐ तिउंलै हुकम दैऔ। सै बुरी आत्माएं तेस आदमी कु निकल़ियौ तिऊं सुंगरु भितै डेई। सुंगरु रौ गोल़, ज़ो दुई हज़ारा रै लगभग थौ, मातौल़ै दुड़ियौ, पड़ झ़ीला दी। तैबै मौरै तिऐ डुबियौ। ¹⁴ तिऊं सुंगरु च़ारनै वाल़ै भागै पोरु, तिउंऐ शहरा, गांवा दी डेइयौ लोगूकै इयै खबर शुणाई। और ज़ो कुछ़ हुऔ थौ तेस देखणा लै लोग आशै। ¹⁵ सै यीशु काऐ डेवै। तिऊं कै तिऐ तेस आदमी ज़ासदी बुरी आत्मा री पूरी सेना थी भौरुई औन्दी, जुड़कै भिड़ियौ और दिमाग ठीक हुइयौ बोशौ औन्दौ दिशौ। तैबै सै लोग डोरी गोऐ। ¹⁶ इउं देखणा वाल़ै लोगूकै सुंगरु और ज़ासदी सै बुरी आत्माएं थी, तेसरौ पूरौ हाल तिऊं दुज़ै लोगूकै शुणाऔ। ¹⁷ तैबै तिऊं लोगुऐ यीशु कै औरज़ कौरी और बोलौ, “छ़ौंटी। आमारै इलाकै कु पोरु डेऊ।” ¹⁸ ज़ैबै यीशु किस्ती दी लागौ च़ड़दै, तैबै सौ, ज़ासदी पैहलै सै बुरी आत्मा थी, यीशु काऐ औरज़ कौरदै लागौ, “मू आपू आइलै दैऔ रौइणै।” ¹⁹ पर यीशुऐ सौ आपू आइलै ना दैऔ आशणै, और यीशुऐ तेसलै बोलौ, “आपणै घौरै डेऊ और आपणै लोगूकै बोलै कि ताऊं माथै दया कौरियौ प्रभुऐ ताउंलै किणै बौड़ै काम किए ई।” ²⁰ यीशु रै बोलणै माथै सौ डैऔ और दिकापुलिस परदेशा दी एज़ी बूशा रौ परचार लागौ कौरदै कि, “यीशुऐ मूलै किणै बौड़ै काम किऐ ई।” इणै शुणियौ सारै लोग हैरान हुऐ।

याईरा री मौरी औन्दी छ़ोटी और एक रोगली छ़ेवड़ी

(मती9:18-26; लूका 8:40-56)

²¹ ज़ैबै यीशु तौऐं किस्ती दी झ़ीला रै तेस पार डेवै, तैबै यीशु काऐ एक बौड़ी भीडे कौठै हुई झ़ीला रै डीका दी। ²² तैबै धार्मिक खुंबल़ी रौ एक मुखियौ यीशु काऐ आशौ। तेसरौ नाऊं थौ याईर। सौ यीशु देखियौ यीशु री लातेऊ माथै पौड़ौ। ²³ तिणियै यीशु कै औरज़ कौरी, और इणौ बोलौ, “मेरी छ़ाटी माईं मौरनै वाल़ी आ। तुमै मैरै घौरा कै आण्डियौ मेरी माईं माथै हाथ छ़ाड़ौ, तैबै सै माईं च़ागी हुआ आ, और सै मौरनै कु बौच़ा आ।” ²⁴ तैबै यीशु तेस आइलै डैऔ। एक भौरी भीड़ यीशु पीछ़ु च़ाल पौड़ी, इदरा झ़ाऊं कि लोग यीशु माथै पौड़दै थै लागै औन्दै। ²⁵ तिऐ एक छ़ेउड़ी थी, तियां दी बारह साला ओलै लोऊ बौइणै री बीमारी थी। ²⁶ तियांऐ भौरी डाक्टरु कु ईलाज़ कौराइयौ भी दु:ख उठाऔ। आपणी सारी धन-ज़यदाद खर्च़ कौरियौ भी तियांलै कुछ़ सुख ना मिलौ, पर तियां री बीमारी औज़ौ भी बौढ़दै लागी। ²⁷ तियांऐ यीशु रै बारे दी शुणौ, सै भीड़ा मांझ़ियै यीशु पीछ़ु आशी। ²⁸ सै बोला थी कि, “हाऊं यीशु रै जुड़कौ छ़ूऊं लै ता हाऊं च़ांगी हुआ ऊ।” ²⁹ तियांऐ यीशु रौ जुड़कौ छ़ूऔं और तेभी तिऐं छ़ेउड़ी रौ लोऊ बौइणौ बंद हुऔ। तियांकै आपणै ज़िसमा दी च़गरु ई ऐरौ कि, हाऊं च़ागी हुई गोई।” ³⁰ यीशुऐ आपणै ज़ीवा दी च़गरौ कि, :मूकु शक्ति निकल़ी आ।” यीशुऐ खरकच़ार भीड़ा दी पीछ़ाऊं मुड़ियौ पूछ़ौ, “मैरौ जुड़कौ कुणियै छ़ूऔं?” ³¹ यीशु रै च़ेलेऊऐ यीशु लै बोलौ, “तुमै देखदे ई लागौ औन्दै कि तुमु माथै भीड़ आ लागी औन्दी पौड़दै। तौऐं भी पूछ़ा ई तुमै इणौ कि, ‘हाऊं कुणियै छ़ूऔं?” ³² तैबै यीशुऐ लोगू भिलै देखियौ सुंच़ौ कि, “हाऊं कुणियै छ़ूऔं औलौ?” ³³ सै छ़ेउड़ी इणौ ज़ाणियौ कि तियां आइलै केती भौलौ काम हुऔ, डौरियौ और कांबियौ यीशु काऐ आशी। सै यीशु री लातेऊ माथै पौड़ी और तियांऐ यीशु काऐ आपणै सारौ हाल सच़्च़-सच़्च़ बोलौ। ³⁴ यीशुऐ तियांलै बोलौ, ‘माईं, तू च़ांगी हुई गोई कैलैकि तांऐ मू माथै विश्वास छ़ाड़ौ। आरामा कोरिऐ डेऊ, और आपणी दु:ख पीड़ा कु बौच़ी रौऊ।” ³⁵ ज़ैबै यीशु बोलदै थौ लागौ औन्दौ, तैबै धार्मिक खुंबल़ी रै याईर नांवा रै मुखियै रै घौरा कु लोगुऐ आशियौ याईरा लै बोलौ, “तुमारी माईं मौरी गोई। आबै गुरु लै कष्ट ना दैऔ।” ³⁶ ज़ो बूश सै लोग बोलदै थै लागौ औन्दै, यीशुऐ तिऐं बूशा री कौन्थशुणी की, और तेस याईरा लै बोलौ, “नाईं डर! सिरफ विश्वास छ़ाड़!” ³⁷ यीशुऐ पतरस, याकूब, और याकूबा रौ भाई यूहन्ना आपणै साथा दी नियै। तिणियै औज़ौ कोइयौ ना नियौ। ³⁸ यीशु धार्मिक खुंबल़ी रै मुखियै रै घौरा दी पौउंच़ै। यीशुऐ लोग लेरदै, छ़ाती पीटदै और राड़ै मारदै देखै। ³⁹ यीशु घौरा भीतै डेवै और तिउंलै बोलौ, “तुमै कैलै ई लागै औन्दै हालै पाइंदै और लेरदै? इयै माईं मौरी नाईं बल्कि सुती औन्दी आ।” ⁴⁰ सै लोग लागै यीशु रौ मज़ाक उड़ाउंदै। यीशुऐ सारै आदमी बाइरै गाड़ै। आपू डैऔ तिऐं माईं रै मां-बाब और तिऊं चिन च़ेलेऊ आइलै भीतरै, ज़िऐ सै माईं थी। ⁴¹ यीशुऐ तिऐं माईं रौ हाथ पाकड़ौ और तियांलै आपणी बोली दी बोलौ, “तलीता कूमी” ज़ेथरौ मतलब इणौ आ, “ओ माईं! हाऊं ताउंलै बोलाऊ, उठ।” ⁴² माईं खरकच़ार उठियौ च़ालदै-फिरदै लागी। (सै बारह साला री थी।) इणै देखियौ लोग खरकच़ार भौरी हैरान हुऐ। ⁴³ यीशुऐ तिउंकै च़ितल़ाऔ कि एज़ी बूशा रौ कासी कै पौतौ ना च़ाईं लागौ। तैबै यीशुऐ इणौ भी बोलौ, “इयैं माईं लै कुछ़ खाणा-पीणा लै दैऔ।”

नासरता दी यीशु री बेइज्ज़ती

(मती13:53-58; लूका4:16-30)

¹ कफरनहूम गांवा कु निकल़ियौ यीशु आपणै गांव नासरता दी आशौ। यीशु रै च़ेलै भी साथा दी डेवै। ² ज़ेबी आराम वाल़ौ दिन आशौ यीशुऐ धार्मिक खुंबल़ी दी शिक्षा देई। तेसरी शिक्षा शुणियौ भौरी लोग हैरान हुऐ। तैबै सै बोलदै लागै कि, “इणी शिक्षा केशकु शिखी औली इणियै? और इणी शक्ति वाल़ै कामा कौरनै रौ हक कुणियै दैऔ आ एसकै? ³ एस ता आमै भौरी पैहलै ओलै ज़ाणी। का यीशु मिस्त्री रौ छ़ोहरु ना आसतौ? का सौ मरियमा रौ छ़ोहरु, याकूब, योसेस, यहूदा और शमौना रौ बौड़ौ भाई ना आसतौ? यीशु री बौइणी भी रौआ ई आमू मांझ़िऐ। इयौ सेज़ौ यीशु ना बा?” एज़ै कारण तिऊं लोगूकै यीशु माथै शक हुऔ तिउंऐ यीशु माथै विश्वास ना कियौ। ⁴ यीशुऐ तिउंलै बोलौ, “धार्मिक गुरु री इज़्ज़त हुआ सारी ज़ागहा दी। सिरफ आपणै देशा दी, आपणै गांवा दी और आपणै घौरा दी नाईं औन्दी।” ⁵ यीशुऐ तिऐ कुछ़ बीमार लोगू माथै हाथा छ़ाड़ियौ सै ता च़ांगै कियै। बाकी तिंउरै शका रै कारण यीशु शक्ति रै भौरी काम नाईं कौरी बौल़ी। ⁶ यीशु कै तिंउरै शका देखियौ भौरी दु:ख और हैरानी हुई। यीशु शिक्षा दैंदी बारै गांव-गांवा दी गुमदै थौ लागौ औन्दौ।

बारह (प्रेरित) च़ेलेउ भेज़णै

(मती10:5-15; लूका9:1-6

⁷ यीशुऐ आपणै च़ुनै औन्दै बारह च़ेलै आपू काऐ औटाऐ, और तिऊं दुई-दुई कोरिऐ अलग-अलग ज़ागहा दी लागौ भेज़दै। यीशुऐ तिउंलै लोगुकु बुरी आत्माऐं गाड़नै रौ हक दैऔ। ⁸ यीशु च़ाह थौ कि च़ेलै आपणी ज़ुरता रै बारै दी झ़ौरी ना कौरा। एज़ै कारण आपणै च़ेलेऊ लै हुकम दैऔ, “बाटा लै हाथा दी डिंगौ, लातु दी चैपलै रै इलावा कुछ़ भी ना नियै ऊ, ना रोटी, ना बैग और ना जेबा दी पैसै। ⁹ दुज़ौ कुरतौ भी ना नियौ, ज़ो जुड़कै तुमुऐ भिड़ौ औन्दै ई, सै मोकते ई।” ¹⁰ तौऐं यीशुऐ तिउंलै इणौ भी बोलौ, “ज़ेज़ै घौरा दी तुमु माना लै सेज़ै घौरा दी रौइणौ, ज़ेबी झ़ाऊं तुमै सेज़ै गांवा दी ई। ¹¹ केज़ै गांवा रै लोग तुमारी बूशै नाईं शुणा लै, नाईं माना लै, तैबै तिराकु निकल़ियौ आपणी चैपली री धूड़ भी पोरु झाड़ै ऊ। इणै देखियौ सै समझ़ा ई कि परमेश्वर तिउंलै ज़ुरूर सज़ा दिया आ। कैलैकि तिउंऐ परमेश्वरा री शिक्षा नाईं शुणी।” ¹² तेत बासिऐ सै बारह च़ेलै दुई-दुई कोरिऐ अलग-अलग गांवा दी डेइयौ शिक्षा दैंदै लागै कि, “मन बौदल़ौ, पापा री बाट छ़ाड़ौ, परमेश्वरा री बाटा दी आशौ।” ¹³ तिउंऐ भौरी लोगुकु बुरी आत्माऐं गाड़ी। च़ेलेऊऐ बीमार लोगू रै मूंडा माथै तेला लाइयौ प्राथना कौरियौ बीमार लोग ठीक कियै।

युहन्ना बपतिस्मा देणै वाल़ै रौ खून

(मती14:1-12; लूका9:7-9)

¹⁴ यीशु रौ नाऊं इबी च़ारो तरफाई फैली गौ थौ। यीशु रै बारै दी सारै लोगू री अलग-अलग राय थी। केज़ै बोला थै इणौ कि यीशु यूहन्ना बपतिस्मा दैणै वाल़ौ आ, ज़ो मुर्दे मांझ़िआ कु ज़ीउंदौ हुई गौ आ। एज़ै कारण यीशु कै शक्ति वाल़ै काम ई लागै औन्दै हुंदै। ¹⁵ कुछ़ लोग बोला थै इणौ कि, “एऊ एलियाह सा।” और कुछ़ लोग बोला थै इणौ कि, इयौ पुराणै ज़मानै ज़िणौ गुरु आ।” ¹⁶ राज़ै हेरोदेस अंतिपासै भी इयै च़र्च़ा शुणी। हेरोदेस राज़ौ लागौ बोलदै कि, “यूहन्ना बपतिस्मा दैणै वाल़ौ ज़ासरौ मुइंयै मूंड कटाऔ थौ, सौ ज़िउंदौ हुई गौ आ।” ¹⁷ राज़ै हेरोदेस अंतिपासै आपूलै एक राणी थी आणी औन्दी। पर सौ ताका थौ आपणै भाई फिलिप्पुसा री छ़ेउड़ी आपूलै आणनै ज़ासरौ नाऊं हेरोदियास थौ। तिणी राज़ै का कियौ? ¹⁸ आपणी राणी गाड़ी पोरु, आपू आणी आपणै भाई री छ़ेउड़ी आपूलै। ¹⁹ तैबै यूहन्ना बपतिस्मौ दैणै वाल़ौ राज़ै काऐ डैऔ और राज़ै लै बोलौ कि, “तुमुऐ गलत कौरी गौ आ कि आपणै भाई री छ़ेउड़ी आपूलै आणी गोई। इयौ एक भौरी बौड़ौ पाप आ।” राज़ै यूहन्ना री बूश मानी भी और तिणियै सुंच़ौ भी कि इयै बूश बाकेई गलत आ। पर तेसकै थी सै आपणै भाई री छ़ेउड़ी सुखी औन्दी। एज़ै कारण तिऐं गाड़नै भी नाईं च़ाह थौ। राज़ै आपणै सिपाई यूहन्ना भिलै छ़ाड़ै, तिउंऐ यूहन्ना पाकड़ियौ आणौ तैबै टाल़ौ ज़ेला दी। राज़ौ ज़ाणा थौ कि यूहन्ना एक धौर्मी और पवित्र आदमी आ। राज़ौ यूहन्ना री रक्षा भी कौरा थौ, और यूहन्ना री बूशै बौड़ै मज़ै कौरिऐ शुणा भी थौ, पर राज़ौ इयैं बूशै शुणियौ घबरा भी थौ। ²⁰ सै छ़ेउड़ी हेरोदियास ताका थी यूहन्ना पोरु झ़ंगाउणै, पर इणौ नाईं थी सै कौरी बौल़ा। कैलैकि सौ राज़ौ यूहन्ना कु भौरी डौरा थौ। ²¹ एकी दिनै का हुऔ तेस राज़ै रौ जन्म दिन आशौ। तिणी राज़ै आपणै जन्म दिना लै परधान, नेते ज़ेती भी आसा थै, सारै औटाऐ। और तिउंलै खाणै पिणै रौ इन्तज़ाम भी थौ कियौ औन्दौ। ²² सै लोग खाई-पीयौ निपटै। तेत बासियै तिऐं हेरोदियासा री माइंयै नाच़णौ-गाणौ शुरु कियौ। तिऐं माईं रै नाच़-गाणै ऐ ज़ेती भी मेहमान थै आशै औन्दै सित राज़ै भौरी खुश कियै। तिणी राज़ै तिऐं माईं लै बोलौ, “माईं, तैरै नाच़-गाणै देखियौ मैरौ ज़ीऊ भौरी खुश हुई गौ आ, तू इणौ बोल तैरै का च़ाईं, ²³ इदरा झ़ाऊं कि तू मूकु मैरै राज़ा रौ आधौ हिस्सौ भी मांगा ली हाऊं तेस दैणा लै भी त्यार ऊ।” ²⁴ सै माईं डेई खरकच़ार आपणी आमा हेरोदियासा काऐ बोलदै कि राज़ौ इणौ बोला, “तैरै का च़ाईं?” तैबै हेरोदियासै यूहन्ना पोरु झ़ंगाउणै रौ मोकौ देखियौ बोलौ, “इणौ बोल, यूहन्ना बपतिस्मौ दैणै वाल़ै रौ मूंड दैऔ काटियौ।” ²⁵ खरकच़ार सै माईं राज़ै काऐ डेई और राज़ै लै बोलौ कि, “मूकै यूहन्ना बपतिस्मौ दैणै वाल़ै रौ मूंड दैऔ काटियौ।” ²⁶ राज़ौ हुई गौ भौरी परेशान, “ओहो माईं, तांऐ का मांगौ इणौ पा?” पर आपणै बाइदै रै कारण राज़ौ नाईं मुकरी बौल़ौ। कैलैकि राज़ौ आपणै मेहमानू रै सामनै बेइज़्ज़त नाईं च़ाह थौ हुणौ। ²⁷ राज़ै आपणै एक सिपाई लै बोलौ, “ज़ेला दी डेऊ यूहन्ना रौ मूंड आण काटियौ।” ²⁸ सिपाई ज़ेला दी डैऔ, तिणियै यूहन्ना रौ मूंड एकी थाल़ी दी काटियौ आणौ, तैबै दैऔ तिऐं माईं कै। माइंयै दैऔ आपणी आमा कै। ²⁹ तैबै ज़ो यूहन्ना रै च़ेलै थै, तिउंकै यूहन्ना रै बारै दी पौतौ लागौ, सै भौरी परेशान और दु:खी हुऐ। तिउंऐ ज़ेला दी डेइयौ यूहन्ना रौ मौड़ौ आणौ और यहूदी रीति-रिवाज़ा रै मुताबिक किरया-कर्म कियौ।

च़ेलेउ री वापसी और एखुले दी रौईणौ

(मती14:13,14; लूका9:10)

³⁰ तैबै यीशु रै बारह च़ेलै गांव-गांवा कु यीशु काऐ आशै, ज़ो यीशुऐ दुई-दुई कोरिऐ भेज़ै थै। तिउंऐ ज़ो कियौ और शिखाऔ थौ, तेथरै बारै दी यीशु काऐ बोलौ। ³¹ तिऐ भौरी लोग थै आशदै-डेउंदै लागै औन्दै। यीशु और तेसरै च़ेलेऊ कै तिऐं ज़ागहा दी रोटी खाणै रौ मौकौ भी ना मिलौ थौ। यीशुऐ तिऊं च़ेलेऊ लै बोलौ, “तुमै मू आइलै एखुली ज़ागहा दी च़ालौ, तेशी दखज़ेई आराम कौरौ।” ³² तैबै यीशु और च़ेलै किस्ती दी बोशियौ एखुली ज़ागहा दी डेवै।

पाँज़ हज़ार पूरषा लै रोटी खिलाउणी

(मती14:15-21;लूका9:11-17; यूहन्ना6:1-14)

³³ पर भौरी लोगुऐ यीशु डेउंदी बैरै देखै कि इयै केशी डियाई। साथा दी रवायी भी ऐरै कि इयै कुण ई। एज़ै कारण सै लोग यीशु और च़ेलेऊ कु पैहलै तिऐं ज़ागहा दी पौउंच़ै। ³⁴ ज़ैबै यीशु किस्ती कु बाइरै उतरौ तैबै यीशुऐ तिऐं ज़ागहा दी भौरी बौड़ी भीड़ देखी आशी औन्दी, यीशु कै तिऊं लोगू देखियौ दया आशी, कैलैकि सै लोग इणै थै ज़िणी अण भेराल़डु री भेरै हुआ ई। ज्ञाना कु भी खाली और खाणै घौट भी। ³⁵ ज़ैबै ब्याल़ हुई गोई तैबै यीशु रै च़ेलेऊऐ यीशु काऐ आशियौ बोलौ, “इयै ज़ागहा भौरी सुनशान आ। आबै राच हुई लागी आ। ³⁶ तुमै इउं लोग नीज़ुका री बस्ती और गांवा दी छ़ाड़ौ ताकि इयै लोग पैसेऊ देइयौ रोटी खाई बौल़ा।” ³⁷ इणै शुणियौ यीशुऐ तिऊं च़ेलेऊ लै बोलौ, “तुमै दैऔ इउंलै खाणा लै। “तिउंऐ बोलौ, “अगर आमुकै एती पैसै हुआ थै ज़ेती एक आदमी छ़ौ: मीनै दी कमावा, तैबै भी इउंलै खाणौ नाईं खिलाई बौल़ा थै।” ³⁸ यीशुऐ च़ेलेऊ कु पूछ़ौ, “तुमु कै केती रोटी ई?” च़ेलेऊऐ लोगुकु पौतौ कौरियौ बोलौ, “पांज़ रोटी और दुई माछ़ी ई।” ³⁹ तैबै यीशुऐ सारै लोग अलग कौरियौ लाइणी दी धौनी बोशाल़ै शौ-शौ ⁴⁰ और पचास-पचासा री पांगती दी। ⁴¹ यीशुऐ सै पांज़ रोटी और दुई माछ़ी आपणै हाथा दी पाकड़ी और सौरगा भिलै देखियौ परमेश्वरा रौ धन्यावाद देइयौ आशीष मांगी। तेत बासियै यीशुऐ सै रोटी चोड़ियौ आपणै च़ेलेऊ कै थाकौ दैंदै लागी। च़ेलै थाकै लोगूकै दैंदै लागी। यीशुऐ सै दुई माछ़ी भी लोगू मांझ़िऐ बांटी। ⁴² सारै लोगुऐ पेटा भौरियौ रोटी खाई। ⁴³ तेती माथै भी रोटी और माछ़ी रै बारह छ़ाबड़ै बौच़ै। ⁴⁴ तिऊं लोगू मांझ़िऐ सिरफ मर्दू गिणियौ 5000 लोग थै।

यीशु रौ पाणी माथी आण्डणौ

(मती14:22-23; यूहन्ना6:15-21)

⁴⁵ तेत बासियै यीशुऐ खरकच़ार आपणै च़ेलेउ लै बोलौ कि, “तुमै किस्ती दी च़ौड़ौ।” सै च़ेलै यीशुऐ बैतसैदा रै इलाकै दी आपू कु पैहलै भेज़ै। ⁴⁶ यीशुऐ सै भीड़ा रै लोग छ़ाड़ै पोरु और आपू डैऔ प्राथना कौरना लै एक पहाड़ी माथै। ⁴⁷ ज़ैबै ब्याल़ हुई तेबी च़ेलेऊ री किस्ती झ़ीला रै मांज़ा-मांज़ थी। यीशु थौ तेबी एखोली झ़ीला रै डीका दी। ⁴⁸ यीशुऐ देखौ कि बागुर इउं री किस्ती च़लाउणै ना दैंदौ। च़ेलेउ कै किस्ती च़लाउणै री बौड़ी मुश्कल़ हुई गोई। सै च़ेलै गोऐ घबराई। दोतकै पौरै चिया कु पांज़ा बाज़ै दी यीशु झ़ीला दी पाणी माथै आण्डियौ च़ेलेऊ काऐ डैऔ। यीशु ताका थौ तिऊंकु झ़ीला दी अगाड़िऐ डेउणौ। ⁴⁹ ज़िणी चेलैउऐ सौ पाणी माथै आण्डदै देखौ, सै च़ेलै घबराइयौ लागै राड़ै मारदै। तिउंऐ सुंच़ौ कि भूत आशी गौ आ। ⁵⁰ यीशुऐ तिउंलै तेभी बोलौ, “डौरौ नाईं। हिम्मत छ़ाड़ौ। हाऊं इदै।” ⁵¹ तैबै यीशु च़ेलेऊ आइलै किस्ती दी च़ौड़ौ, सौ बागुर तेबी गौटौ। च़ेलै इणै देखियौ भौरी हैरान हुऐ। ⁵² रोटी रौ हैरानी वाल़ौ काम भी तिउंऐ देखौ थौ। पर सै समझ़ी ना बौल़ै कि यीशु दी केती शक्ति आ। तिंउरै मन भौरी डीठ बौणी गोऐ थै।

गन्नेसरता गाँवा दी रोगी ठीक कौरणै

(मती14:34-36)

⁵³ तेत बासियै सै गन्नेसरत गांवा दी पौउंच़ै, किस्ती बानी तिउंऐ डीका काऐ। ⁵⁴ ज़िणी सै किस्ती कु उतरै, तिदलै लोगुऐ यीशु खरकच़ार रवाऔ। ⁵⁵ तिदलै लोगुऐ दुड़ियौ सारै बिस्तरै दी गिनियौ आणै। ⁵⁶ ज़िऐ-ज़िऐ यीशु गांवा दी या शहरा दी डिया थौ, तिऐ लोग बीमार आदमी बज़ारा दी बोशाल़ा थै। सै लोग यीशु काऐ औरज़ कौरा थै कि, “आमू तुमारै जुड़कै रौ एक दूरौ दैऔ एरी छ़ूइंणै।” ज़ेती लोगुऐ भी यीशु छ़ूऔं सै ठीक हुऐ।

रीती रिवाज़ा रौ पालन कौरना रौ सवाल

(मती15:1-9)

¹ तैबै फरीसी लोग और कुछ़ यहूदी शास्त्री लोग, ज़ो यरुशलेम शहरा कु आशै थै, सै कौठै हुइयौ यीशु काऐ आशै। ² तिउंऐ देखौ कि यीशु रै कुछ़ च़ेलै यहूदी रीति-रिवज़ा रै मुताबिक बिणा हाथा धोइयौ ई लागौ औन्दै रोटी खांदै। ³ यहूदी लोग, खास कोरिऐ फरीसी लोग, आपणै बज़ुरगा री रीति-रिवाज़ा माथै च़ाला थै। ज़ेबी झ़ाऊं आपणै रीति-रिवाज़ा रै मुताबिक आपणै हाथ नाईं धोआ थै, तेभी झ़ाऊं रोटी नाईं खा थै। ⁴ और बज़ारा कु ज़ो भी च़ीज़ आणा थै, आपणै धार्मिक नियमा रै मुताबिक बिणा धोऐ कुछ़ भी नाईं खा थै। इणै काइयै रिवाज़ थै, ज़ेथरौ सै पालन कौरा थै। ज़िणौ कि लोटड़ी, घड़ै, तांबै रै ओखर आच़्छ़ै कोरिऐ धोआ मांज़ा थै। ⁵ फरीसी और यहूदी शास्त्रीउऐ यीशु कु पूछ़ौ, “तैरै च़ेलै बज़ुरगा रै नियमा माथै कैलै ना च़ालदै? बल्कि आमारै नियमा रै मुताबिक अण हाथा धोइयौ रोटी खांदै ई लागौ औन्दै।” ⁶ यीशुऐ तिउंलै ज़वाब दैऔ, “यशायाह गुरुऐ तुमु ज़िणै कपटी लोगू रै बारै दी आशणै वाल़ै बौग्ता री बूशै ठीका ई लिखी औन्दी, ‘इयै लोग मेरी इज़्ज़त मुंआ कोरिऐ ता कौरा ई पर ज़ीवा कोरिऐ ई मूकु भौरी दूर। ⁷ इयै मेरी तारिफ फज़ूल कौरा ई। और आदमी रै चाणै औन्दै नियमा माथै च़ाला ई।’ ⁸ परमेश्वरा रौ हुकम मानणै री बज़ाय तुमै आपणै बज़ुरगा री रीति-रिवाज़ा रौ पालन कौरा ई। ⁹ तुमै आपणै रीति-रिवाज़ मानणा लै परमेश्वरा रौ हुकम किणै आच़्छ़ै कोरिऐ टाल़ा ई। ¹⁰ परमेश्वरै आपणै सेवक मूसा रै ज़रिऐ आमुलै हुकम दैऔ कि, ‘तुमै आपणै मां-बापा री इज़्ज़त कौरौ। ज़ो आपणै मां-बापा लै बुरौ बोला लौ तेस लोग ज़ुरुर मारा ई।’ ¹¹ पर तुमै एस हुकमा रौ बिल्कुल उल्टौ कौरा ई। अगर केज़ौ आदमीऐ आपणै मां-बापा री मज़द कौरनी च़ाईं, पर सौ आपणै मां-बापा लै बोला लौ इणौ कि, ‘ज़ो कुछ़ मुइंयै तुमुकै दैणौ जा थौ कुछ़ ना देई बौल़दौ।’ ¹² तैबै तुमै सब बोलाई कि इयौ ठीक आ लागौ औन्दौ बोलदै। ज़ो बिल्कुल गलत आ। ¹³ इणै कौरिऐ तुमै आपणै चाणौ औन्दौ रीति-रिवाज़ा कोरिऐ परमेश्वरा रौ हुकम चोड़ा ई। तुमै इणै-इणै भौरी काम कौरा ई।”

आदमिउ अशुद्ध कौरणै वाल़ी बुशै

(मती15:10-20)

¹⁴ यीशुऐ तौऐं सारै लोग आपू काऐ औटाइयौ बोलौ, “तुमै सारै मेरी बूशै शुणियौ समझ़ौ। ¹⁵ केज़ौ भी खाणौ ज़ो आदमी खा आ, सौ खाणौ आदमी रौ मन गान्दौ नाईं कौरदौ, पर ज़ो आदमी रै ज़ीवा कु बाइरै आशा सा, सौ आदमी रौ मन गान्दौ चाणा आ। ¹⁶ एज़ी बूश ध्याना कौरिऐ शुणौ और सौमझ़ौ।” ¹⁷ तैबै यीशु लोगू छ़ाड़ियौ तेस घौरा भीतै डैऔ, ज़ासदी सौ रौआ थौ। तैबै यीशु रै च़ेलेऊऐ एज़ै अनेणै रौ मतलब पूछ़ौ। ¹⁸ यीशुऐ बोलौ, “का तुमै एती अनज़ाण ई? का तुमुऐ एती भी ना सौमझ़ौ कि ज़ेज़ी भी खाणै री च़ीज़ै आदमी रै पेटा भीतै डिया ई, सेज़ी च़ीज़ै खाइयौ आदमी केभी भी गान्दौ ना बौणदौ? ¹⁹ कैलैकि सै खाणै री च़ीज़ै तेसरै मौना दी नाईं बल्कि पेटा दी डिया ई, और खाइयौ निकल़ा ई बाइरै।” (इणै समझ़ाइयौ यीशुऐ बोलौ कि ज़ेती भी खाणै री च़ीज़ै ई, सै परमेश्वरा री नौज़री दी शुद्ध ई।) ²⁰ यीशुऐ तौऐं बोलौ, “ज़ो बुरी बूश आदमी रै मौना कु बाइरै आशा आ, सै बूश आदमी गान्दौ चाणा आ। ²¹ कैलैकि बुरै विच़ार लोगू भीता कु निकल़ा ई। और सै केज़ी भी छ़ोटुड़ी-छ़ेउड़ी या मर्दू आइलै गान्दै काम, च़ोरी, हत्या, दुज़ै री बोउटी या मर्दू आइलै गान्दै काम, ²² लाल़च़, बुराई, धोखौ, केज़ी भी छ़ोटुड़ी-छ़ेउड़ी या मर्दू लै लोभीणौ, ज़लन, पुराज़, उंकार, औज़ौ भी काइयै बुरै काम कौरा ई। ²³ इयै सारी गलत-गलत बूशै लोगू रै मौना कु निकल़ा ई, और सै आदमी गान्दौ चाणा ई।”

सुरुफिनीकी ज़ाती री छ़ेवड़ी रौ विश्वास

(मती15:21-28)

²⁴ गलील परदेशा कु निकल़ियौ यीशु आपणै च़ेलेऊ आइलै और सैदा शहरु रै परदेशा दी डैऔ। यीशु तिऐ एकी घौरा दी डैऔ। यीशु नाईं च़ाह थौ, कि लोग तेस देखा। पर तिऊं लोगुकु सौ च़ोरुई ना बौल़ौ। ²⁵ तिऐ एकी छ़ेउड़ीऐ यीशु रै बारै ई शुणौ। तियांरी माईं दी थी बुरी आत्मा लागी औन्दी। सै यीशु री लातेऊ माथै पौड़ी, और यीशु कै औरज़ कौरदै लागी। ²⁶ सै फिनिकी परदेशा री यूनानी छ़ेउड़ी थी। सै यीशु काऐ बार-बार औरज़ कौरियौ बोलदै लागी कि, “मेरी माईं कु बुरी आत्मा पोरु गाड़ौ।” ²⁷ यीशुऐ तियांलै अनेणै देइयौ तियांरै परखुणा लै बोलौ, ‘का एक बाब लोल़डै री रोटी कुकरा कै शोटा आ? लोल़डेउ री रोटी कुकरु लै दैणी आच़्छ़ी नाईं।” ²⁸ तैबै तिऐं छ़ेउड़ीऐ ज़वाब देइयौ बोलौ, “ओ प्रभु। पर छ़ोहरु कै रोटी खाइयौ ज़ो च़ुर-च़ार धौनी पोरु छ़ुटा आ तिऊं टुकड़ै ता कुकर खा ई। कुकुर तिऊं खाइयौ आपणौ पेट भौरा ई।” ²⁹ यीशुऐ तिऐं छ़ेउड़ी रै इणै ज़वाब शुणियौ तियांलै बोलौ, “तैरौ विश्वास भौरी बौड़ौ आ। तू घौरै डेऊ। तेरी माईं कु बुरी आत्मा निकल़ी गोई।” ³⁰ सै छ़ेउड़ी घौरै डेई, तियांऐ आपणी माईं घौरा दी चुटुकच़ार देखी बिस्तरै दी लाम्बी पौड़ी औन्दी। और बुरी आत्मा भी थी तियांकु निकल़ी औन्दी।

टौणै और तोतलौ आदमी ठीक कौरणौ

³¹ तेत बासिऐ यीशु सूर शहरा रै इलाकै छ़ाड़ियौ सैदा शहरा बाटियै दिकापुलिस परदेशा दी गलील झ़ीला काऐ पौउंच़ै ज़िऐ दुज़ी ज़ाति रै लोग रौआ थै। ³² तिदलै लोगुऐ एक आदमी यीशु काऐ आणौ ज़ो ज़बाना रौ थौ लाटौ, और कौंथु रौ थौ टौणौ। तिऊं लोगुऐ यीशु कै औरज़ की कि, “एस माथै आपणौ हाथ छ़ाड़ौ एरी।” ³³ यीशुऐ सौ लाटौ-टौणौ भीड़ा कु अलग नियौ और तेसरै कौंथु दी आपणी अऊंठी टाल़ी और थूक लाइयौ तेसरी ज़ीभ छ़ूईं। ³⁴ यीशुऐ शौईं छ़ाड़ियौ सौरगा भिलै देखौ और तेसलै आपणी बोली दी बोलौ, “इफतह” जेथरौ मतलब आ, “पोरु खुल!” ³⁵ तेसरै कौंथु तेभी खुलै और तेसरी ज़ीभ भी खुली पोरु। सौ साफ-साफ बोलदै लागौ। ³⁶ यीशुऐ तिऊं लोगू लै आच्छ़ै कोरिऐ समझ़ाइयौ बोलौ, “तुमै इयैं बूश कासी काऐ ना बोलेऊ।” ज़ेती ज़ादै यीशुऐ सै लोग समझ़ाऐ, तेती ज़ादै सै यीशु रै बारै दी परच़ार लागै कौरदै। ³⁷ ज़ेती भी लोग थै तिऐ, सै हैरान हुऐ और बोलदै लागै, “यीशुऐ ज़ो भी कियौ सारौ आच़्छ़ौ कियौ। यीशु लाटेउ लै बोलणै री और टौणेउ लै शुणने री तागत दिया सा।”

च़ार हज़ार लोगु लै रोटी खिलाउणी

(मती15:32-39)

¹ सेज़ै बौग्तै दी, दिकापुलिस परदेशा दी, ज़िऐ दुज़ी ज़ाति रै लोग रौआ थै, तौऐं एक बौड़ी भिड़ कौठै हुई। तिऊं लोगूकै खाणा लै कुछ़ भी नाईं थौ। यीशुऐ आपणै च़ेलेऊ औटाइयौ बोलौ, ² “मूकै इऊं लोगू माथै तरस आशदै लागौ औन्दौ, कैलैकि इयै चिया दिना ओउलै ई मू आइलै। इऊं कै खाणा लै नाईं कुछ़ भी आसतौ। ³ इऊं हाऊं घौरै भूखै भेज़ू लै ता इऊंकै डेउंदै-डेउंदै बाटा दी रिंगणौ लागा आ। कुछ़ लोग ता भौरी दूरा कु ई आशै औन्दै।” ⁴ च़ेलेऊऐ पूछ़ौ, “इयैं सुनशान ज़ागहा दी रोटी रौ इन्तज़ाम किणै कोरिऐ हुआ सा?” ⁵ यीशुऐ पूछ़ौ, “तुमुकै केती रोटी ई?” तिउंऐ बोलौ, “सात।” ⁶ तैबै यीशुऐ तिऊं लोगू लै धौनी बोशणा लै बोलौ। तैबै यीशुऐ सै सात रोटी आपणै हाथा दी पाकड़ी और परमेश्वरा रौ धन्यवाद दैऔ। तेत बासियै यीशुऐ रोटी चोड़ियौ आपणै च़ेलेऊ कै थाकौ दैंदै लागी। च़ेलै थाकै लोगूकै दैंदै लागी। ⁷ तिउंकै कुछ़ माछ़ी भी थी। माछ़ी लै भी यीशुऐ परमेश्वरा रौ धन्यावाद देइयौ आपणै च़ेलेऊ लै बोलौ, “इऊं माछ़ी लोगू लै बांटौ।” ⁸ सारै लोगुऐ पेटा भौरियौ खाऔ। तेती माथै भी तिउंकै सात बौड़ै छ़ाबड़ै रोटी रै बौच़ै। ⁹ लगभग च़ार हज़ार लोग थै तिऐ बोशौ औन्दै। तेत बासियै यीशुऐ सै आपणै-आपणै घौरै भेज़ै। ¹⁰ यीशु तिदरा कु आपणै च़ेलेऊ आइलै खरकच़ार किस्ती दी बोशियौ दलमनूता रै इलाकै दी डैऔ।

फरीसिउ रै ज़रिए सौरगा रै निशाणा री माँग

(मती16:1-4)

¹¹ तिऐ कुछ़ फरीसी लोग यीशु काऐ आशियौ बहंस कौरदै लागै। सै यीशु परुखणा लै कुछ़ हैरान वाल़ै काम लागै मांगदै ज़ो एक निशाणी बौणा की यीशु परमेश्वरा कु आ आशौ औन्दौ। ¹² यीशुऐ शौईं छ़ाड़ियौ तिउंलै बोलौ कि, “एज़ै पोस्तै रै लोगू काऐ हाऊं केज़ी भी निशाणी ना देखाउंदौ।” ¹³ तेत बासियै यीशु फरीसी छ़ाड़ियौ आपणै च़ेलेऊ आइलै किस्ती दी च़ौड़ियौ झ़ीला रै दुज़ै धुरै दी डैऔ।

फरीसिउ और हेरोदेसा रौ संज़ेड़ौ

(मती16:5-12)

¹⁴ च़ेलै रोटी निणै बिसरुइ गौऐ थै। किस्ती दी तिउंकै सिरफ एका रोटी थी। ¹⁵ यीशुऐ तिउंकै च़ितल़ाऔ, “शुणौ, फरीसी और राज़ै हेरोदेसा रै संज़ेड़ै कु बौच़ियौ रौएऊ।” ¹⁶ पर च़ेलेऊऐ यीशु रै बोलणै रौ मतलब ना सौमझ़ौ, और सै आपू मांझ़िऐ चौपड़िंदै लागै कि, “ आमुकै रोटी नाईं, तैबै बोलौ औलौ यीशुऐ इणौ।” ¹⁷ तिंउरै विच़ारा ज़ाणियौ यीशुऐ तिउंलै बोलौ, “तुमै आपू मांझ़िऐ कैलै ई लागै औन्दै चौपड़िंदै कि आमू कै रोटी नाईं? का तुमै नाईं समुझ़दै? तुमु दी दिमाग ना आसतौ? ¹⁸ तुमु दी आखी ई, का तुमै देखी ना बौल़दै? तुमुकै कौंथु ई, का तुमुकै शुणिंदौ नाईं? का तुमुकै याद नाईं आसतौ? ¹⁹ ज़ेबी मुइंयै पांज़ रोटी कोरियौ पांज़ हज़ार लोगू लै रोटी खिलाई, तेबी रोटी रै भौरै औन्दै केती छ़ाबड़ै बौच़ै ई?” च़ेलेऊऐ ज़वाब दैऔ, “बारह छ़ाबड़ै।” ²⁰ यीशुऐ बोलौ, “ज़ेबी मुइंयै सात रोटी कोरिऐ च़ार हज़ार लोगू लै रोटी खिलाई, तेबी केती छ़ाबड़ै बौच़े ई भौरै औन्दै?” तिउंऐ बोलौ, “सात।” ²¹ तैबै यीशुऐ तिउंलै बोलौ, “का तुमै एती मुर्ख ई? इबी झ़ाऊं भी ना समुझ़ुदै? हाऊं रोटी रै बारे दी नाईं बोला थौ पर हाऊं बोला थौ तुमुलै इणौ कु तुमै फरीसी लोगू और हेरोदेसा रै बुरै विच़ार और शिक्षा कु बौच़ियौ रौऔ।”

बैतसैदा दी एक शेड़ौ ठीक कौरणौ

²² यीशु किस्ती कु उतरियौ आपणै च़ेलेऊ आइलै बैतसैदा गांवा दी आशौ। तिऐ लोगुऐ एक आखीउ रौ शेड़ौ यीशु काऐ आणौ। तिउंऐ यीशु काऐ औरज़ कौरी कि, “छ़ौंटी, तू एस शेड़ौ आपणै हाथै छ़ूउं एरी।” ²³ यीशुऐ सौ शेड़ौ हाथा कु पाकड़ियौ गांवा कु बाइरै नियौ, तेसरी आखीउ दी थूक लाइयौ और तेस माथै हाथा छ़ाड़ियौ बोलौ, “का ताउंकै दिशदै लागौ औन्दौ?” ²⁴ तिणियै ऊपरै देखियौ बोलौ कि, “मूकै आदमी दिशदे ई लागै औन्दै। पर इयै आदमी इणै दिशा ई ज़िणै चालदै-फिरदै पेड़ ई।” ²⁵ यीशुऐ दुबारौ तेसरी आखिऊ माथै हाथ छ़ाड़ौ। सौ शेड़ौ बौड़ै ध्याना कोरिऐ देखौ और ठीक हुऔ। तेसरी आखी आच़्छ़ै कोरिऐ देखदै लागी। ²⁶ यीशुऐ सौ आदमी इणै बोलियै घौरै छ़ाड़ौ कि, “तू गांवा दी ना डेवै।”

पतरसा रौ प्रभु यीशु ’मसीह’ मानणौ

(मती16:13-20;लूका9:18=21)

²⁷ तैबै यीशु और तेसरै च़ेलै गलीला परदेशा छ़ाड़ियौ कैसरिया फिलिप्पी रै नीज़ुका रै गांवा भिलै डेउंदै लागै। बाटा दी यीशुऐ आपणै च़ेलेऊ कु पूछ़ौ, “लोग मैरै बारे दी का बोलाई कि हाऊं कुण ऊ?” ²⁸ च़ेलेऊऐ यीशु लै ज़वाब देइयौ बोलौ, “लोग तुमुलै यूहन्ना बपतिस्मौ दैणै वाल़ौ, या एलियाह, या कोई पुराणौ गुरु ससझ़ा ई, ज़ुण मौरियौ ज़ीउंदै हुए ई।” ²⁹ यीशुऐ बोलौ, “ओरी री बूशै छ़ाड़ौ, तुमै आपणी बूश कौरौ। तुमै का समझ़ा ई?” पतरसै ज़वाब दैऔ, “तुमै आमारै मसीहा ई। ज़ुण परमेश्वरै ई चुनौ औन्दै।” ³⁰ यीशुऐ तिउंकै च़ितल़ाऔ, “तुमुऐ ठीक बोलौ आ पर तुमै एज़ी बूश लोगू काऐ ना बोलेऊ।”

आपणै मौरणै रै बारै दी यीशु रै बोलणौ

(मती16:21-23;लूका9:22)

³¹ तैबै यीशु तिउंलै बोलदै लागौ, “हाऊं परमेश्वरा री तरफा कु आशौ औन्दौ ऊ, पर इणौ ज़रुरी आ कि लोग मू भौरी सतावा। और इणौ भी ज़रुरी आ कि यहूदी स्याणै लोग, बौड़ै याजक और यहूदी शास्त्री मेरी इज़्ज़त ना कौरा। और सै मू ज़ुरुर झ़ांगा। तेत बासियै हाऊं चिजै दिनै ज़ीउंदौ हुआ ऊ।” ³² एज़ी बूश यीशुऐ आपणै च़ेलेऊ कै साफ-साफ बोली। तैबै पतरसै यीशु एकी भिलै नियौ और तेसलै डांटियौ बोलौ, “तांऐ इणौ नाईं जा थौ बोलणौ।” ³³ तैबै यीशुऐ पीछ़ाऊं मुड़ियौ आपणै च़ेलेऊ भिलै देखदी बारै पतरसा लै डांटियौ बोलौ, “मूकाऐ कु दूर डेऊ कैलैकि शैतान ताऊं कु इणी बूशै आ बोलाउंदै लागौ औन्दौ। तेरी सोच़-विचार परमेश्वरा ज़िणी नाईं आ, पर लोगू ज़िणी आ।”

यीशु पिछ़ु आण्डणै रौ मतलब

(मती16:24-28; लूका 9:23-27)

³⁴ यीशुऐ आपणै च़ेलै और दुज़ै लोग आपु काऐ औटाइयौ बोलौ, “ज़ो भी मैरौ च़ेलौ बौणनौ च़ाह लौ, सौ आपणी इच़्छ़ा छ़ाड़ा लौ, आपणौ क्रूस च़ुंगा लौ, और मू पीछ़ु आशा लौ। (मतलब कि निन्दा और दु:ख सहन कौरा लौ, और आपणै प्राणा दैणा लै भी त्यार रौआ।) तैबै पा बौणा सौ मैरौ च़ेलौ। ³⁵ कैलैकि ज़ो आपणौ प्राण दैणौ नाईं च़ाह लौ तेसलै परमेश्वरा आइलै सदा री ज़िन्दगी नाईं मिलदी। पर ज़ो मूकालै और मैरौ खुशी रौ संदेश शुणाउणे री बज़ाह कु आपणै प्राण दैणा लै य्यार औलौ, तेसलै परमेश्वरा आइलै सदा री जिन्दगी मिला आ। ³⁶ लोग पूरै संसारा री खुशी पाई बौल़ा ई, पर एथरौ का फाइदौ आ आपणौ प्राण खोआ लौ पोरु? ³⁷ परमेश्वरा आइलै सदा री ज़िन्दगी पाईणा लै आमै परमेश्वरा लै कुछ़ भी नाईं देई बौल़दै। ³⁸ मू और मेरी शिक्षा अपणाउणा लै ज़ो आज़ शर्मिया लौ, ता ज़ेबी हाऊं आपणै पवित्र सौरगा रै दूता आइलै आपणै बाबा री शाना देखाइयौ आशु लै, तैबै तिऊं हाऊं नाईं अपणाउदौ

¹ यीशुऐ इणौ भी बोलौ, “हाउँ तुमुलै सौच्च़ौ बोलाऊ कि इदै इउँ खौड़ै लोगु मांझ़िऐ कु कुछ़ आदमी ज़ुरूर आपणी ज़िन्दगी दी देखा लै कि परमेश्वर शक्ति भौलौ राज़ कौरणा लै आशौ आ।”

यीशु रौ रूप बौदलिणौ

(मती17:1-13; लूका:28-36)

² छौ: दिना बासिऐ यीशुऐ पतरस, याकुब और युहन्ना आपु आइलै नियै। तैबै सै एक उंच़ै ढोकै माथै डेऐ । तिऐ एखुली दी तिऊं चिन चेलेऊ काऐ यीशु च़ौमकौंदौ दिशौ। ³ यीशु रै ज़ुड़कै इणै प्याशै ज़िणै और शेतै बौणै कि इयैं धौतरी दी केज़ौ भी धोबी तिणै प्याशै ज़िणै और शेतै ज़ुड़कै नाईं धोई बौल़दौ। ⁴ तियां ताकै तिऐ यहुदी लोगु रै पुराणै ज़मानै रै दुई स्याणै भी हुऐ परगट, ज़ासरै नाउं मुसा और एलिय्याह थै। सै दुई थै लागै औन्दै यीशु आइलै बुशै लाइंदै। ⁵ तैबै पतरसै यीशु लै बोलौ, “गुरुजी एउ केती आच्छौ आ कि आमै इदै ई, आमै चीन ताम्बु लाई, एक तुमु कालै, एक एलिय्याह कालै, एक मुसा कालै।” ⁶ पतरसा कै सौमझिदै नाईं थौ लागौ औन्दौ, “कि हाऊं का बोलु” कैलैकि सै इणौ देखीऔ डौरी गौऐ थै। ⁷ तैबै तिऊं माथै एक बादल छ़ाऔ, तेस बादला मांझिऐ कु परमेश्वरा री हाक शुणुई कि, “इयौ मैरौ प्यारौ छ़ोहरु आ। एसरी बुशै शुणौ।” ⁸ तैबै एकदम तिऊं च़ेलेउऐ च़ारो तौरफाई देखौ, ता यीशु रै सिवाऐ तिऊं आइलै कोई नाईं थौ। ⁹ ज़ैबै सै ढोकै कु तौल़ै थै लागै औन्दै आशदै, तेबी यीशुऐ आपणै च़ेलेउलै हुकम दैऔ कि,“ज़ो तुमुऐ देखौ आ, तेथरै बारै दी लोगु काऐ तेबी झाऊं कुछ ना बोलेऊ ज़ेबी झाऊं हाऊं, ज़ुण परमेश्वरा री तौरफा कु भेज़ौ औन्दौ ऊ, मौरियौ ज़िउंदौ ना हुउलौ।” ¹⁰ तैबै च़ेलेउऐ इयै बूश आपणै ज़िवा दी छ़ाड़ी, और आपु मांझीऐ चौपड़िंदै लागै कि मौरियौ ज़िउंदौ हुणै रौ का मौतलब हौलौ। ¹¹ तैबै तिउंऐ यीशु कु पुछ़ौ, “यहुदी रै शास्त्री लोग बोलाई कि एलिय्याह गुरु रौ, मसीह कु पैहलै आशणौ ज़ुरुरी आ। इयौ किणौ आ? कैलैकि तुमै ता आशी गौऐ थै पैहलै और आज़ आमुऐ एलिय्याह दुजी बारै आशदै देखौ।” ¹² यीशुऐ ज़वाब दैऔ, “इणौ सौच्चौ आ कि एहिल्याह गुरु पैहलै आशौ आ और मसीहा लै बाट तैयार कौरा आ। हाऊं तुमुलै बोलाउ, युहन्ना बपतिस्मा दैणै वाल़ौ एहिल्याह गुरु री ज़ागह दी मुकु पैहलै आशी गौ आ। लोगुऐ आपणी मौर्ज़ी कौरिऐ सेउ सौताऔ ज़िणौ तेसरै बारै दी लिखौ औन्दौ थौ। ¹³ ऐबै तुमै सुंचौ कि मैरै बारै दी भी, ज़ुण परमेशवरा री तौरफा कु आ भेज़ौ औन्दौ, धर्म शास्त्रा दी इणौ लिखौ औन्दौ कि लोग मुलै भौरी दु:ख दिआ ई, नफरत कौराई, मुँ नाईं मानदै।”

बुरी आत्मा वाल़ौ छ़ोहरू च़ांगौ कौरणौ

(मती17:14-21; लूका9:37-43)

¹⁴ जेबी यीशु और चिन च़ेलै बाकि च़ेलेउ काऐ पौउंच़ै, तैबै तिउंऐ देखौ कि तिऐ एक बौड़ी भीड़ै सै बाकि च़ेलै घेरै औन्दै थै और यहुदी शास्त्री थै लागै औन्दै तिऊं आइलै बहंस कौरदै। ¹⁵ खरकच़ार सारै लोग यीशु देखिऔ हैरान हुऐ। तैबै दूड़िऔ तिउंऐ यीशु काऐ आशिऔ तेसरौ स्वागत कियौ। ¹⁶ यीशुऐ तिऊंकु पुछ़ौ, “तुमै मैरै च़ेलेउ आइलै कैलै थै लागै ओन्दै बहंस कौरदै?” ¹⁷ तैबै भीड़ा मांझिऐ कु एक आदमिऐ ज़्वाब दैऔ, “गुरुजी! मुंइऐ आपणौ छ़ोहरु थौ तुमु काऐ ठीक कौरणा लै आणौ औन्दौ पर तुमै इदै नाईं थै। मैरै छ़ोहरु दी एक बुरी आत्मा सा ज़ुणिऐ एउ ज़बाना रौ लाटौ चाणी गौ आ। ¹⁸ ज़िऐ किऐ एस बुरी आत्मा पाकड़ा सा, तिऐ बुरी आत्मा एस धौनी लोटाल़ा। और एसरै मुआंदी निकल़ा ई शेफै। आपु लागा दांदु कुट-कुटाउंदै। तैबै बौणा डौकडौकौ। मुइंऐ तुमुरै च़ेलेउ लै बोलौ, ‘एस माऊं कु बुरी आत्मा पोरू गाड़ौ’ पर ईउंकै नाईं गाड़ुई।” ¹⁹ इणौ सब शुणिऔ यीशुऐ ज़्वाब दैऔ, “का कौरुलै। तुमुकै मुं माथै इबी झाऊं निश्वास नाईं आ? हाऊं केभी झाऊं रौआउ तुमु आइलै? तुमरौ एस अविश्वास किणै कौरीऐ कौरु सहन? एस छ़ोहरु मूंकाऐ आणौ।” ²⁰ तैबै लोगुऐ सेउ छ़ोहरु यीशु काऐ आणौ। ज़ैबै बुरी आत्मै यीशु देखौ, खरकच़ार बुरी आत्मै छ़ोहरु बांथ रौंगा रौ मेकिऔ धौनी लोटाल़ौ। तेसरै मूँआकु शेफै निकल़ी और सेउ माटै मांझी लागौ खोरोल़िदै। ²¹ .यीशुऐ तेस छ़ोहरु रै बाबा कु पुछ़ौ, “एस री हालत केभी ओअलै इणी?” तिणीऐ बोलौ, ”ल़ोलडी ओअलै आ। ²² एती नाइं बल्कि बुरी आत्मा एस झांगणा लै केभी टाला आगी मांझीऐ, केभी टाला पाणी मांझिऐ। तुमै कौरी बौल़ाई ता दया कौरिऐ आमारी मज़द कौरौ एरी।” ²³ यीशुऐ तेसलै बोलौ, ताइंऐ का बोलौ, ‘तुमै कौरी बौल़ाई ता’? शुण! ज़ुण मू माथै विश्वास कौरा आ तेसलै हाऊं सारौ-कुछ़ कौरा उ।” ²⁴ खरकच़ार तेस छ़ोहरु रै बाबै ज़ोरै बोलौ, “मुकै दख ज़ेई विश्वास आ। मैरौ विश्वास बौढ़ाऔ एरी।” ²⁵ ज़ैबै यीशुऐ देखौ कि भीड़ बौड़दै सा लागी औन्दी तैबै यीशुऐ तिऐं बुरी आत्मा लै डांटिऔ बोलौ, ओ लाटौ-टौणौ कौरणै वाल़ी आत्मा! हाऊं ताउंलै हुकम दिआउ, एस छ़ोहरु भीतै कु पोरु निकुल़! ऐबै केभी ना आशै एस छ़ोहरु दी।” ²⁶ तैबै सै बुरी आत्मा ज़ोरै राड़ै मारियौ छ़ोहरु भीताकु निकल़ी। सेउ छ़ोहरु मौरौ औन्दौ ज़िणौ बौणौ। कई लोग ता इणौ लागै बोलदै, “एउ गौ मौरी।” ²⁷ पर यीशुऐ तेस छ़ोहरु रौ हाथ पाकड़ौ और सेउ खौड़ी उठाऔ। सेउ छ़ोहरु खौड़ी उठौ और बिल्कुल ठीक हुऔ। ²⁸ यीशु और तेसरै च़ेलै ज़ेबी घौरा भीतै एखुलै दी थै, तैबै च़ेलेउऐ यीशु कु पुछ़ौ, “आमुकै सै बुरी आत्मा कैलै ना गाड़ुई?” ²⁹ यीशुऐ ज़्वाब दैऔ, “इणै रौंगा री बुरी आत्मा ब्रौता कौरी और प्राथना कौरी गाड़िया सा। कैलैकि एज़ी आत्मा गाड़नै रौ दुज़ौ तौरिकौ कुछ़ नाईं।”

आपणै मौरणै रै बारै दी यीशु रै दूजी बारै बोलणौ

(मती17:22,23; लूका9:43-45)

³⁰ यीशु और तेसरै च़ेलै तिऐं ज़ागह छ़ाड़िऔ गलील परदेशा दी थै लागै औन्दै डेउंदै। यीशु नाईं च़ाह थौ कि कासी कै भी पौतौ लागा कि सै कियै ई डेऊंदै लागै औन्दै, ³¹ कैलैकि सेउ एखुलै दी आपणै च़ेलेउ लै शिक्षा दैणौ च़ाह थौ। यीशुऐ च़ेलेउ लै बोलौ, “हाऊं, ज़ुण परमेश्वरा री तौरफा कु भेज़ौ औन्दौ ऊ, लोगु रै हाथै पाकड़ुवाइया ऊ, सै मुं झांगा ई, पर मौरिऔ हाऊं च़िज़ै दीना दी तौइंऐ ज़िउंदौ हुआ उ।” ³² च़ेलै यीशु री एज़ी बूश सौमझुदै नाइं थै लागै औन्दै। सै यीशु कु एज़ै बारै दी पुछ़णा लै डौरा थै।

सौबी कु बौड़ौ कुण?

(मती18:1-5; लूका9:46-48)

³³ यीशु तौइंऐ आपणै च़ेलेउ आइलै कफरनहुम गांउ दी आशौ। घौरा भितै डेईऔ यीशुऐ आपणै च़ेलेउ कु पुछ़ौ, “तुमै बाटा दी केथरै बारै दी थै च़ौपड़िंदै लागै औन्दै?” ³⁴ सै च़ेलै शौरमा रै मारै च़ुटुक थाकै। कैलैकि सै बाटा दी इणौ थै लागै औन्दै च़ौपड़िंदै, आमु बारह च़ेलेउ मांझी कु सारेउ कु बौड़ौ कुण आ?” ³⁵ तैबै यीशुऐ बोशिऔ सै च़ैलै आपु काऐ औटाईऔ बोलौ, “तुमु मांझीआ कु कुण च़ाह बौड़ौ बौणनौ, सेउ सारेउ कु छ़ोटौ और सारेउ रौ सेवादार बौणालौ।”(सेज़ौ आदमी परमेश्वरा री नौज़री दी सारेउ कु बौड़ौ हुआ सा।) ³⁶ तैबै तिउंऐ एक माउं तिऊं च़ेलेउ काऐ आणौ। सेज़ौ माउं यीशुऐ आपणी उँगाली ऐ च़ुंगौ और च़ेलेउ लै बौलौ, ³⁷ “केज़ौ भी आदमी मैरै नाउँ कौरी कास्स छ़ोटौ माउं अपणावा लौ तैबै सौमझौ कि सेउ मुँ आ लागौ औन्दौ अपणाऊं दै। ज़ेज़ौ मुँ अपनावा लौ, सेज़ौ आदमी परमेश्वर अपणावा सा, ज़णियै हाऊं भेज़ौ औन्दौ।”

ज़ो बिरोधा दी नाई सेउ हका दी आ

(लूका9:49-50)

³⁸ तैबै युहन्ना नावां रै च़ेलेऐ यीशु लै बोलौ, “गुरुजी, आमुऐ एक आदमी देखौ आ ज़ुण तुमुरै नाऊँ कौरी बुरी आत्मा थौ लागौ औन्दौ गाड़दै। आमुऐ कौरी तेसलै मना, कैलैकि सेउ तुमुरै च़ुनै औन्दै च़ेलेउ मांझीआ रौ नाईं थौ।” ³⁹ यीशुऐ बोलौ, “तेस आदमी लै मना न कौरौ। कैलैकि कि ज़ुण मैरै नाउँ कौरीऐ हैरानी वाल़ै काम कौरा आ, सेउ फेटी मुलै बुरौ नाईं बोलदौ। ⁴⁰ ज़ुण आमुरै विरोधा ई नाईं आ सै आमुरै तौरफा ई। ⁴¹ इणौ सौच्च़ौ आ कि ज़ेज़ौ आदमी तुमु लै मैरै च़ेलै ज़ाणिऔ एक ग्लास पाणी पिलावा लौ तैबै परमेश्वर तेसलै ज़ुरुर इनाम दिआ आ।”

ठोकरा रौ कारण बौणनौ

(मती18:6-9; लूका17:1,2)

⁴² यीशुऐ इणौ भी बोलौ, मू माथै विश्वास छ़ाड़नै वाल़ौ, चाऊ सेउ छोहरु औलौ, केज़ौ भी आदमी तेस पापा री बाटा दी निइयौं तेस विश्वासा दी डगमगावा लौ, ता परमेश्वर तेसलै ज़ुरुर सौज़ा दिआ आ। इणै आदमी लै परमेश्वरा री सौज़ा मिलणै कु आच्छ़ौ थौ कि तेसरै गौल़ै दी घौरटा रौ ज़ौंदर बानिऔ तेस गैहरै ताला दी डुबावा। ⁴³ तु आपणै हाथै इणौ काम कौरालौ, ज़ो ताऊं पापा री बाटा दी निइंयौ विश्वासा दी डगमगावा लौ, तैबै ताऊंलै आच्छ़ौ आ कि तेस हाथ पोरु काटै। दुई हाथा कौरी नौरका दी डिया लौ, ज़ियै आग केभी ना ईशदी, एथकु आच्छ़ौ आ कि टुंडै रौइयौ तु सौरगा दी डेआ ई। ⁴⁴ [ज़िऐ तिऊंरौ किड़ौ नाईं मौरदौ और आग नाईं इशदी।] ⁴⁵ तैरौ बांगणौ ताऊं बुरी बाटा दी नियां लौ ता तांउलै आच्छ़ौ आ कि तु नौरका कु बौच़ियौ लौंगड़ौ रौईयौ सौरगा दी डेआ। ⁴⁶ [ज़िऐ तिऊंरौ किड़ौ नाईं मौरदौ और आग नाईं इशदी।*] ⁴⁷ अगर तेरी आख इणौ देखा ली कि तु विश्वासा ई डगमगाईयौ प़ाप़ा री बाटा दी डेई गौ, ता तिऐं आख तु पोरु गाड़ै। नाईं ता दुईआ आखी कौरी नौरका दी डिया ई, ⁴⁸ ज़िऐ सौदा दु:ख ई, ‘ज़िऐ आदमी दी किड़ै पा लागा ई और तिदली आग केभी ना ईशदी।’ ⁴⁹ कैलैकि ज़ेज़ौ आदमी नौरका दी डिया सा, सेज़ौ आदमी सौदा तौड़फा आ। ⁵⁰ रोटी खांदी बारै लूण आच्छ़ौ आ। अगर लूणा मांझिऐ दुजी च़िज़ै मिलाईऔ लूणा रौ स्वाद पोरु खोआ लै ता तैबै तेस लूण केथ कौरिऐ कौराई लुणुऔं? तुमै लोग लुणा ज़िणै ई। कैलैकि तुमै मुं माथै विश्वास छाड़ा ई। तुमै प़ाप़ा री बाटा दी डेईयौ आपणै विश्वासा रौ स्वाद ना खोएउ। एकी–दुज़ै कु बौड़ै हुणै री ईच्छ़ा छ़ाड़ियौ एकी-दुजै आइलै मिली-ज़ुलिऔ रौऔ।”

तलाका रै बारै दी यीशु री शिक्षा

(मती19:1-12; लूका16:18)

¹ तैबै यीशु कफरनहुम गांवा छ़ाड़ियौ यहुदा परदेशा भिलै लागौ डेउंदै। तैबै यीशु और तेसरै च़ेलै यरदन नौईं पारा रै परदेशा दी आशै। तिऐ भी यीशु काऐ एक भौरी भीड़ कौठै हुई। यीशु तिऐ लोगु लै शिक्षा दैंदैं लागौ, ज़िणौ कि सेउ सौदा कौरा थौ। ² तैबै कुछ़ फरिसी लोग यीशु काऐ आशै और तेस पौरखूणा लै पुछ़दै लागै कि, “एक आदमी लै आपणी छ़ेवड़ी रौ फैसल़ौ कौरणौ ठीक आ या नाईं ?” ³ यीशुऐ ज़्वाब दैऔ, “परमेश्वरै आपणै सेवक मुसा रै ज़ौरिऐ केज़ौ हुक्म आ दैऔ औन्दौ?” ⁴ तिऊं लोगुऐ बोलौ, “मुसा रै नियमा ई इणौ आ लिखौ औन्दौ, ज़ुण आदमी आपणी छ़ेवड़ी रौ फैसलौ कौरणौ च़ाहा सा, सेउ आदमी तिऐं राज़ीनाउं देइयौ पोरु गाड़ी सौका आ।” ⁵ यीशुऐ तिउंलै बोलौ, “मुसै एज़ौ हुकम तुमु पुराणै ज़मानै रै लोगु लै एथलै लिखौ थौ कैलैकि लोग परमेश्वरा री इच्छ़ा पूरी कौरणै कु पोरु मुकरा ई। ⁶ धर्म शास्त्रा दी इणौ आ लिखौ औन्दौ कि परमेश्वरै दुनिया च़ाणनै री शुरुआता दी मौरद और छ़ेउड़ी च़ाणै ई। ⁷ और इणौ भी लिखौ औन्दौ कि ‘मौरद आपणै माँ-बाबा छ़ाड़ियौ आपणी छ़ेउड़ी आइलै मिली रौआ आ। ⁸ और सै एका ज़िस्म थाकाई बौणी।’ एज़ै कारणै सै दुई नाईं बौल्कि एक ज़िस्म बौणाई। ⁹ एथीलै परमेश्वर एक मौरद और छ़ेउड़ी शादी दी ज़ोड़ा आ तैबै आदमीउऐ सै दुई नाईं च़ाईं अलग कौरणै। ¹⁰ ज़ेबी यीशु आपणै च़ेलेउ आईलै घौरा दी थै तैबै च़ेलै एज़ै बारै दी तौइंऐ यीशु कु पुछ़दै लागै। ¹¹ तैबै यीशुऐ तिउंलै बोलौ, “ज़ुण आपणी छ़ेउड़ी लै राज़ीनाऊं देईऔ दुजी छ़ेउड़ी आइलै शादी कौरा सा, सेऊ आपणी पैहली छ़ेउड़ी रै विरोधा ई गान्दै काम कौरा आ। ¹² और ज़ेजी छ़ेउड़ी आपणै बोउटै लै राज़ीनाउं देइयौ दुजै आदमी आइलै शादी कौरा सा, सै छ़ेउड़ी भी आपणै पैहलै बोउटै रै विरोधा इ गान्दै काम कौरा आ।”

छ़ोहरू लै आशीर्वाद

(मती19:13-15; लूका18:15-17)

¹³ लोग यीशु काऐ लोल़डै लागै आणदै ताकी यीशु तिउंलै छ़ुईयौ आशीष दिआलौ। पर यीशु रै च़ेलेउऐ सै लोग डांटै। ¹⁴ इणै देखिऔ यीशुऐ रोशुइयौ, आपणै च़ेलेउलै बोलौ, “लोल़डेऊ मूं काऐ आशणै दैयौ। इऊं ना रोकौ। कैलैकि इणै लोगु रै ज़ीवा दी परमेश्वर राज़ कौरा आ ज़ुण इऊं लोल़डेउ बाशीऐ भोल़ौ आ। ¹⁵ हाऊं तुमुलै सौच्च़ौ बोलाऊ, ज़ुण लोग परमेश्वरा रौ राज़, इउं लोल़डेउ बाशीऐ नाईं अपणावा लौ, तेसरै ज़ीवा दी परमेश्वर केभी भी राज़ नाईं कौरी बौल़दौ।” ¹⁶ इणै बोलियौ यीशुऐ सै लोल़डै आपणी उंगाल़ी ऐ च़ुंगै और तिऊं रै मुंडा माथै हाथा छ़ाड़ियौ तिउंलै आशीष देई।

धनवान छ़ोहरू और सदा री ज़िन्दगी

(मती19:16-30; लूका18:18-30)

¹⁷ ज़ेबी यीशु आपणै च़ेलेऊ आइलै बाटा दि थौ लागौ औन्दौ आण्डदै, तेबी एक आदमी दूड़ियौ यीशु काऐ आशौ, तिणियै यीशु रै बागंणै बौधिंऔ तेसकु पुछ़ौ, “ओ सारेउ कु भौलै गुरू आ! मुलै इणौ बोलौ कि परमेश्वरा आइलै सौदा री ज़िन्दगी पाइणा लै मूँ का ज़ा सा कौरणौ।” ¹⁸ यीशुऐ तेसलै बोलौ, “तू मुलै सारेउ कु भौलौ कैलै बोला ई? एसरौ मतलब सुंच़ एरी। केज़ौ भी आदमी सारेउ कु भौलौ नाईं आ सिरफ परमेश्वर ई सारेउ कु भौलौ आ। ¹⁹ परमेश्वरा आईलै सौदा री ज़िन्दगी पाईणा लै परमेश्वरा रै हुकम, ताइंऐ धौर्मशास्त्र पौड़ै हौणै, खून ना कौरणी, दुजै री छ़ेउड़ी आइलै गान्दै काम ना कौरणी, च़ोरी ना कौरणी, झ़ुठी गवाही ना देणी, धोखै-बाज़ी ना कौरणी, आपणै माँ-बाबा री ईज़्ज़त कौरणी।’ एज़ै नियमा माथै च़ालणौ ज़ुरुरी सा।” ²⁰ तैबै तिणी आदमीऐ बोलौ, “गुरुजी ईउं सारी बुशै ता हाऊं लोल़डी ओउलै मानाउं। का मुइंऐ औज़ौ ज़ा कुछ़ कौरणौ?” ²¹ तैबै यीशुऐ तेस आदमी भिलै बौड़ै ध्याना कौरिऐ देखियौ तेस आइलै प्यार कियौ और बोलौ, “ताउंलै औज़ौ भी एक काम आ ज़ो ताइंऐ कौरणौ ज़ा सा। ज़ो धन-ज़यदात ताउंकै आ, तिऐं बेचियौ ज़ो पैसै बौणाई, तिऊं पैसै गरीबु कै बांट। तेथ बासिऐ आशै तू मुं पीछ़ु। तैबै ताउंलै सौरगा दी औसली धन मिला आ।” ²² इणै शुणियौ सेउ आदमी ज़िऊंशुऔ । सेउ मूं औंकड़ाइयौ पोरु डैऔ। कैलैकि सेउ आदमी भौरी सेठ थौ। ²³ यीशुऐ च़ारो तौरफा ई देखियौ आपणै च़ेलेउ लै बौलौ, “सेठ आदमिउ कै आपणै ज़िवा दी परमेश्वरा रै राज़ कौरणै री ज़ाज़त देणी केती मुश्किल आ।” ²⁴ च़ेलै एज़ी बुशै शुणियौ हैरान हुऐ कैलैकि सारै लोग सुंच़ा थै कि परमेश्वरा री आशीषा कौरियौ सेठ बौणा ई। तैबै यीशुऐ तिउंलै तौइंऐ बोलौ, “ओ मैरै लोल़डेउऔ , ज़ुण पैसै माथै भरोसौ छ़ाड़ा ई तेसलै आपणै ज़िवा दी परमेश्वरा रौ राज़ कौराउणौ भौरी मुश्किल हुआ आ। ²⁵ ज़िणौ उंटा कै सिउणी रै शेड़ै बाटिऐ निकुल़नौ भौरी कठिन हुआ आ, तेथकु भी कठिन आ सेठ आदमिउ लै आपणै ज़िवा दी राज़ कौरणै दैणौ।” ²⁶ इणै शुणियौ चेलै औज़ौ भी भौरी हैऱान हुऐ। सै आपु मांझीऐ पुछ़दै लागै, “ज़ैबै सेठ आदमी ना बौच़ी बौल़दौ तैबै कुण बौच़ा सा?” ²⁷ यीशुऐ सै बौड़ै ध्याना कौरी देखै और तिउंलै बोलौ, “आदमिउ कै ता इणौ नाईं औन्दौ पर परमेश्वरा कै हुआ सा। कैलैकि परमेश्वर सारौ कुछ़ कौरी बौल़ा आ।” ²⁸ पतरस यीशु लै बोलदै लागौ, “ देख, आमै सारौ कुछ़ छ़ाडियौ ताऊं पीछु लागै औन्दै आण्डदै।” ²⁹ यीशुऐ बोलौ, “हाऊं तुमुलै सौच़्च़ौ बोलाउ कि ज़ुणियै मैरौ च़ेलौ बौणना लै और खुशी रौ संदेश शुणाउणा लै आपणै घौर या आपणी भाई-बौईणी या आपणै माँ-बाब या आपणै छ़ोटी-छ़ोहरु या आपणी जमीन छ़ाड़ा ई, ³⁰ तेसरी ज़िन्दगी लै शौ गुणौ कौरियौ मिला आ। तेसकै घौर और आपणै टौबरा ज़िणै लोग मिला ई। तेसकै डोखरै भी मिला ई। लोग तेस सौतावा ई पर सेउ मुं आइलै। सौदा री ज़िन्दगी ज़िवा सा ज़ेबी हाऊं राज़ौ बौणु लै। ³¹ भौरी लोग इणै ई ज़ुण आपु लै बौड़ै बौणा ई। ज़ेबी हाऊं राज़ौ बौणियौ आशु लै तेबी सै लोग छ़ोटै हुआई। ज़ुण आपुलै छ़ोटै सौमझा ई सै हुआई बौड़ै।

आपणै मौरणै रै बारै दी यीशु रै चीजी बारै बोलणौ

(मती20:17-19; लूका18:31-34)

³² तेथ बासिऐ यीशु यरुश्लेमा शहरा भिलै बाटा दी लागौ आण्डदै। कुछ़ लोग भी लागै यीशु पीछ़ु आण्डदै। यीशु रै च़ेलै हैरान थै कि यीशु लागौ औन्दौ यरुश्लेमा लै डेउंदै। कैलै कि तिऐ इणै भी लोग थै ज़ो यीशु रै विरोधी थै। ज़ेज़ै लोग यीशु पीछ़ु थै डेउंदै लागै औन्दै सै गौऐ थै डौरी कि तिऐ यीशु रौ का हाल औलौ। बाटा दी यीशुऐ सै बारह च़ुनै औन्दै च़ेलै अलग नियैं। ज़ो कुछ़ यीशु आइलै हौणै वाल़ौ थौ तेथ रै बारै दी तौइंऐ लागौ आपणै च़ेलेउ कै बोलदै। ³³ यीशुऐ बोलौ, “शुणौ आमै यरुश्लेमा लै ई डेउंदै लागै औन्दै। तिऐ हाउँ, ज़ुण परमेश्वरा री तौरफा कु ऊ भेज़ौ औन्दौ, बौड़ै याजक और शास्त्रीउ रै हाथाई पकड़ाईया ऊ। सै मुलै मौउता री सौज़ा देइयौ मूं दुज़ी ज़ातिऊ रै हाथा दी दिआई। ³⁴ सै लोग मैरौ मज़ाक उड़ावा ई, मुंआ दी थुकाई, कोढ़ै मारा ई। सै मूं पोरु झांगा ई, पर हाऊं चिजै दिनै तौइंऐ हुआ उ ज़िउंदौ।”

याकूब और युहन्ना री औरज़

(मती20:20-28)

³⁵ बाटा दी डेउंदै- डेउंदै ज़ब्दी रै दुई छ़ोहरू याकूब और युहन्ना (ज़ो यीशु रै च़ुनै औन्दै बारह च़ेलेउ मांझीआ कु थै) यीशु काऐ आशै। तिउंऐ यीशु लै बोलौ, “गुरुजी, ज़ो आमै मांगी ई तुमै आमुलै पुरौ कौरेउ।” ³⁶ यीशुऐ तिउंलै बोलौ, “तुमै का च़ाहा ई ?” ³⁷ तिउंऐ बोलौ,“ ज़ेबी तुमै राज़ै बौणा लै तेबी आमै भी तुमु आइलै राज़ कौरणौ च़ाई। आमु मांझियै कु एक बोशाल़ेउ सुल्टी भिलै और एक बोशाल़ेउ उल्टी भिलै।” ³⁸ तुमै नाईं सौमुझ़दै कि तुमै का ई लागै औन्दै मांगदै। ज़ेज़ौ दु:ख मुइंऐ झ़ेलनौ आ का तुमै तेस झ़ेली बौल़ाई? ज़िणौ एथ बासियै मूं झांगा ई का तुमै तिणौ मौरी बौल़ा ई?” ³⁹ याकुबै और युहन्नै बोलौ ओ आमै कौरी बौल़ी ई।” यीशुऐ बोलौ, “तुमै भी दु:ख झ़ेलियौ मौराई। ⁴⁰ पर मूंकाऐ उल्टी सुल्टी बियै बोशणै वाल़ौ सिरफ परमेश्वर च़ुना आ। एज़ौ नाईं मैरौ काम।” ⁴¹ बासिऐ ज़ैबै बाकि दस च़ेलेउ कै पौतौ लागौ एज़ी बुशै रौ, तैबै सै याकुब और युहन्ना लै भौरी रोशुऐ। ⁴² तैबै यीशुऐ सारै च़ेलेऊ लै आपु काऐ औटाईऔ बोलौ,“ तुमै ज़ाणा ई कि केज़ै भी सौरकारा रै ज़ुण बौड़ै नेतै ई सै आपणी मौरज़ी कौरिऐ लोगु माथै राज़ कौरा ई। सै आपणौ हक देखाउणौ च़ाहा ई। ⁴³ पर तुमु मांझीऐ इणौ नाईं च़ाई हुणौ। तुमु मांझिऐ ज़ुण सारेउकु बौड़ौ बौणनौ च़ाहा लौ तिणिऐ तुमु सारेउ रौ सेवादार च़ाईं बौणनौ। ⁴⁴ ज़ेज़ौ परधान बौणनौ च़ाहा लौ, सेउ बौणालौ सारेउ रौ नुकुर। ⁴⁵ कैलै कि हाऊं ज़ुण परमेश्वरा री तौरफा कु आ भेज़ौ औन्दौ, दुजेउ कु आपणी सेवा कौराउंदै नाईं आशौ औन्दौ बौल्कि दुजेउ री सेवा कौरदै ऊ आशौ औन्दौ। इदरा झांऊं कि मूं पोरु झांगा ई। मेरी मौउता कु भौरी लोग आपणै पाप़ा री सौज़ा कु बौच़ी बौल़ा ई।

शेड़ै बरतिमाई री आखी ठीक कौरणी

(मती20:29-34; लूका18:35-43)

⁴⁶ तेथ बासिऐ यीशु आपणै च़ेलेउ आइलै यरिहो शहरा लै आशौ। ज़ेबी सै तिदरु निकुल़दै थै लागै औन्दै तेबी यीशु आइलै बौड़ी भीड़ थी तैबै बाटा दी एक शेड़ौ भिखा मांगदै थौ बोशौ औन्दौ। तेसरौ नाउं थौ बरतिमाई, ज़ासरौ मौतल़ब तिमाईं नावां रै आदमी रौ छ़ोहरु। ⁴⁷ ज़ैबै तिणीऐ शुणौ कि नासरता गावां रौ यीशु लागौ औन्दौ डेउंदै एज़ी बाटा दी, तैबै तिणिऐ हाकेउ मारिऔ बोलौ, “ओ यीशु दाउदा रौ छ़ोहरू मूं माथै दया कौर।” ⁴⁸ ओऱी लोगुऐ तेस शेड़ै लै बोलौ, “च़ुटुक थाक्क।” पर सेउ शेड़ौ लागौ औज़ौ ज़ोरै-ज़ोरै हाकेउ मारदै, ओ यीशु दाउदा रौ छ़ोहरू मूं माथै दया कौर।” ⁴⁹ तैबै यीशुऐ टेकीऔ बोलौ, “एस शेड़ौ इदै औटाऔ।” लोगुऐ तेस शेड़ै लै बोलौ,“ हिम्मत छ़ाड़, उठ! यीशु ताऊं औटाउंदै लागौ औन्दौ।” ⁵⁰ सेउ आपणै च़ादरु शोटियौ ऊछ़ल़ियौ उठौ और यीशु काऐ आशौ। ⁵¹ यीशुऐ तेसलै बोलौ, “का च़ाहा ई तु? ताउंलै हाऊं का कौरु?” शेड़ै आदमीऐ बोलौ, “गुरुजी, हाऊं देखणौ च़ाहा ऊ।” ⁵² यीशुऐ बोलौ, “डेउ! ताइंऐ मूं माथै विश्वास कियौ आ, एज़ी ताइंऐ तु च़ांगौ हुऔ ई।” सेउ शेड़ौ तेबी देखदै लागौ। तेथ बासिऐ सेउ बाटा दी यीशु पीछ़ु लागौ आण्डदै।

यरश्लेमा दी ज़ीत आशणी

(मती21:1-11; लूका19:28-40; यूहन्ना12:12-19)

¹ यीशु और तेसरै च़ेलै यरुश्लेम शहरा कु दख पिछ़ुड़ै ज़ैतुन नावां री पहाड़ी दी पौउंच़ै। तिऐ दुई गाऊं थै, ज़ासरै नाउं बैतफगै और बैतनिय्याह थै। तैबै यीशुऐ आपणै च़ेलेऊ मांझिऐ कु दुई च़ेलै इणै बोलियौ भेज़ै कि ² “आपणै सामनै वाल़ै गाउं दी डैयौ तिऐ पौउच़ियौ तेभी तुमुकै खाम्बै दी एक गौधेटु मिला बानौ औन्दौ ज़ास माथै ईभी झ़ाऊं कोई ना बोशौ। तेस खोलिऔ ओरू आणेऊ। ³ अगर तुमु कु कुण पुछ़ा लौ, ‘एस खोलियौ केशी निआंईं?’ तैबै तुमै बोलियौ, ‘एसरी प्रभु कै ज़ुरत आ। प्रभु एस गाधेटु ईभी भ़ेज़ा ओरू।” ⁴ तैबै सै च़ेलै डेई गौऐ। डेऊंदै-डेऊंदै तिउंऐ एक घौरा रै दारा काऐ एक गौधेटु देखौ बानौ औन्दौ। तैबै च़ेलै तेस गाधेटु काऐ डेईऔ तेस खोलदै लागै। ⁵ तिऐ ज़ेज़ै लोग थै सै च़ेलेऊ लै बोलदै लागै कि, “तुमै का कौरा ई? एस गाधेटु कैलै खोलाई?” ⁶ यीशुऐ ज़िणौ तिउंलै बोलौ थौ तिउंऐ तिणौ बोलौ तिऊं आदमीऊ लै। इणौ शुणियौ तिऊं आदमिउ ऐ सेउ गौधेटु निणै दैयौ। ⁷ च़ेलेऊ ऐ सेउ गाधेटु यीशु काऐ आणौ तेस माथै आपणै ज़ुड़कै बिछ़ाऐ। तैबै यीशु तेस गौधेटु माथै बोशौ। ⁸ डेऊंदै-डेऊंदै भौरी लोगुऐ आपणै-आपणै शौल, च़ादरू, ज़ुड़कै बाटा दी बिछ़ाऐ। कुछ लोगुऐ ता डोखरै दी डेईयौ हौरी-हौरी डाल़ी आणी काटियौ, तैबै बिछ़ाई यीशु रै स्वागता लै बाटा ई धौनी। (ज़िणौ खास आदमिऊ रै स्वागता लै यहुदी लोग कौराई।) ⁹ ज़ो लोग यीशु आइलै औगाड़िऐ-पिछ़ाड़िऐ थै लागै औन्दै आण्डदै सै ज़ै ज़ै कार कौरदै लागै कि, “होशन्ना ! तुमै परमेश्वरा रै नाउं कौरीऐ आशै ई। तुमारी ज़ै ज़ै हो ! ¹⁰ ज़िणौ पुराणै ज़मानै दी दाऊद राज़ौ थौ, तुमै भी आमारै राज़ै ई। होशन्ना ! सौरगा दी परमेश्वरा री बौड़ाई हो !” ¹¹ तैबै यीशु यरुश्लेमा शहरा दी पौउंच़ौ। तिऐ सेऊ परमेश्वरा रै घौरा दी डैऔ। तेबी ब्याल़ हुई गोई थी। तैबै यीशुऐ तिऐ सारौ कुछ़ देखियौ, आपणै च़ेलेउ आईलै राच़ बिताऊंदै शहरा कु बाइरै बैतनिय्याह गाउं दी आशौ।

बिणा फौल़ा रौ फेड़ू रौ पेड़

(मती21:18,19)

¹² दुज़ै दिनै यीशु और तेसरै च़ेलै बैतनिय्याह गावां कु यरुश्लेम शहरा लै डेउंदै लागै। बाटा दी डेउंदै-डेउंदै लागी यीशु कै भूख। ¹³ दख दूर यीशुऐ एक फेड़ु रौ पेड़ देखौ ज़ो हौरौ भौरौ थौ। यीशुऐ सुंच़ौ कि एस पेड़ा कु कुछ़ खाणा ल़ै मिला लौ। ज़ेबी यीशु तेस पेड़ा काऐ डैऔ, यीशु कै तेस पेड़ा दी पाचा-पाच मिलै। तेस पेड़ा दी फौल़ नाईं थै कैलैकि सेउ बौग्त फौल़ा रौ नाईं थौ। ¹⁴ यीशुऐ तेस पेड़ा देखियौ तेसलै बोलौ, “आज़ा कु पोरू तु केभी ना च़ांईं फौल़ौ।” इऐ बूश च़ेलेउऐ भी शुणी।

परमेश्वरा रै घौरा कु सामाना बेच़णै वाल़ै गाड़नै

(मती21:12-17;लूका19:45-48; यूहन्ना2:13-22)

¹⁵ तैबै यीशु और तेसरै च़ेलै यरुश्लेम शहरा दी आशै। यीशु तिऐ परमेश्वरा री आराधना वाल़ै घौरा ई डैऔ। तिऐ खौल़ै दी कुछ़ लोग समाना बैच़दै थै लागै औन्दै। यीशु तिऊं समाना बेच़णै वाल़ै लोगु बाइरै गाड़दै लागौ, ज़ेज़ै लोग तिऐ पैसेऊ री औदल़ी-बौदल़ी कौरणै वाल़ै थै, यीशुऐ तिउंरी रेढ़ी पौल्टी। तिऐ ज़ैज़ै लोग भेटा च़ौड़ाउणा लै कबुतर और दुजी च़ीज़ बेच़ा थै यीशुऐ तिंउरै बोशणै रै पाटड़ै भी पोरु पौल्टै। ¹⁶ यीशुऐ केज़ौ भी आदमी समाना कौरी खौल़ै री बाटा ई डेऊणै नाईं दैऔ। ¹⁷ तैबै यीशु शिक्षा दैन्दै लागौ कि, “धर्म शास्त्रा ई इणौ आ लिखौ औन्दौ कि ‘मैरौ घौर सारी ज़ातिउ रै लोगु कालै प्राथना कौरणै रौ घौर आ। पर तुमुऐ ता ज़ादै पैसेऊ लै समाना बेच़ियौ एऊ लुटणै वाल़ेऊ रौ आड्डौ चाणी ऐरौ आ।” ¹⁸ इणै शुणियौ बौड़ौ याजक, और यहुदी शास्त्री लोग यीशु झांगणै रै बारै दी सुंच़दै लागै। कैलैकि सै यीशु देखियौ डौरा थै, कि सारै लोग यीशु री शिक्षा शुणियौ हैरान थै। ¹⁹ ब्याल़कै, न्यारै हुईऔ, यीशु और तेसरै च़ेलै तेस शहरा छ़ाड़ियौ वापिस बैतनिय्याह गावां लै डेआ थै।

शुकै औन्दै फेड़ू रै पेड़ा कु शिक्षा

(मती21:20-22)

²⁰ दुजै दिनै यीशु और तेसरै च़ेलै यरुश्लेम शहरा भिलै थै डेउंदै लागै औन्दै। तिदै बाटा दी तिउंऐ सेउ फेड़ु रौ पेड़ ज़ौड़ी कु शुकौ औन्दौ देखौ, ज़ासलै यीशुऐ फिटकार दैऔ थौ। ²¹ पतरसा कै याद आशौ कि यीशुऐ तेस पेस पेड़ा लै का बोलौ थौ। तैबै पतरसै यीशु लै बोलौ, “ओ गुरु देख! एज़ौ फेड़ु रौ पेड़ , ज़ासलै तुमुऐ फिटकार दैऔ थौ, एउ शुकी गौ आ।” ²² यीशुऐ बोलौ, “तुमै हैरान कैलै हुआई? परमेश्वरा माथै विश्वास कौरौ। ²³ हाऊं तुमुलै सौच्च़ौ बोलाउ कि ज़ुण इयैं पहाड़ी लै बोला लौ कि, तु उठ, समुन्दरा दी डेउ’। और सै शक ना कौरालै आपणै ज़िवा दी, पर आपु कौरालै इणौ विश्वास कि ज़िणौ मुइंऐ बोलौ आ तिणौ हुऔ आ, तैबै परमेश्वर तेसलै तिणी ई कौरा आ। ²⁴ कैलैकि हाऊं तुमुलै बोला ऊ कि ज़ो कुछ तुमै प्राथना दी मांगा ई, विश्वास कौरौ कि सेउ तुमुलै मिली ऐरौ आ तैबै परमेश्वर तुमुलै तिणी कौरा आ। ” ²⁵ यीशुऐ औज़ौ बोलौ कि, “ज़ेबी तुमै प्राथना कौरणा लै त्यार हुआई, अगर तेबी तुमुकै याद आशा कि कुणियै तुमुलै बुरौ कियौ आ , तैबै पैहलै तेस माफ कौरौ ताकि परमेश्वर भी तुमारै पाप माफ कौरा। ²⁶ अगर तुमै दुजैउरी गौलती माफ नाईं कौरालै, तैबै परमेश्वर भी तुमारै पाप माफ नाईं कौरदौ।

यीशु रै अधीकारा माथी सवाल

(मती21:23-27; लूका20:1-8)

²⁷ तैबै यीशु यरुश्लेम शहरा दी आशीऔ परमेश्वरा री आराधना रै घौरा रै खौल़ा ई डैऔ। तिऐ यहुदी शास्त्री, बौड़ै याजक और स्याणै लोग यीशु काऐ आशै। ²⁸ सै यीशु कु एक स्वाल पुछ़दै लागै कि, “ज़ो कुछ ताइंऐ ईज़ कियौ आ, इणै कौरणै रौ हक ताउंकै कुणियै दैऔ आ?” ²⁹ तैबै यीशुऐ तिउंलै बोलौ, “हाऊं भी तुमु कु एक स्वाल पुछ़ाऊ, तुमै पैहलै तेस स्वाला रौ ज़्वाब दैऔ, तैबै हाऊं भी तुमुलै बोलाउ कि हाऊं ज़ो कौराऊ कासरै हौका कौरिऐ कौरा ऊ। ³⁰ तुमै मुकै ज़्वाब दैऔ कि युहन्ना बपतिस्मौ दैणै वाल़ौ कासरै बोलणै माथै बपतिस्मौ दिआ थौ? परमेश्वरा रै बोलणै माथै या लोगु रै बोलणै माथै दिआ थौ?” ³¹ इणै शुणियौ सै लोग आपु मांझी च़ौपड़िंदै लागै, “आमै बोलुलै कि परमेश्वरा रै बोलणै माथै, तैबै ईणियै बोलणौ आ इणौ कि तुमुऐ तेस माथै विश्वास कैलै ना कियौ?’ ³² अगर आमै बोलुलै कि लोगु रै बोलणै माथै, तैबै लोग रोशिणै ई कैलै कि ऐ लोग माना ई इणौ कि युहन्ना परमेश्वरा री तौरफा कु आशौ औन्दौ गुरु आ।” ³³ तैबै तिउंऐ यीशु लै ज़्वाब दैऔ, “आमै नाईं ज़ाणदै। आमुकै पौतौ नाईं।” तैबै यीशुऐ तिउंलै बोलौ, हाऊं भी तुमुकै नाईं बोलदौ कि ज़ो हाऊं कौराऊ, तेस कासरै हौका कौरिऐ कौराऊ।”

बुरै ज़िमीदारु रौ औनेणौ

(मती21:33-46; लूका20:9-19)

¹ तैबै यीशुऐ तिऊं यहुदी शास्त्री, बौड़ै याजक और स्याणै लोगु लै बोलौ, “इयैं कहाणी शुणौ। एक आदमीऐ अंगुरा रौ बौगिच़ौ लाऔ। तेस बौगिच़ै रै च़ारो तौरफा दी तारबाड़ लाऔ। और तिऐ बौगिच़ै दी एकी भिलै अंगुरा रै रस गाड़नै री ज़ागह भी चाणी। और तिऐ कामा कौरणै वाल़ेउ कै ठेकौ देईयौ आपु कुछ़ बौग्ता लै दूर देशा लै डेइयौ। ² ज़ेबी अंगुरा री फौसल़ा रौ बौग्त आशौ, तैबै तिणिऐ आपणौ एक नुकुर इणै बोलियौ भेज़ौ कि, ‘ठेकेदारु काऐ डेईयौ अंगुरा री फौस़ला मांझिऐ कु मैरौ हिस्सौ आणै ओरू।’ ³ ज़ेबी सेउ नुकुर ठेकेदारु काऐ आशौ तैबै तिऊं ठेकेदारुऐ पिटौ और खाली हाथै वापिस भेज़ौ। ⁴ तैबै मालिकै दुजौ नुकुर भेज़ौ पर तेस नुकरा री तिउंऐ बेईज्ज़ती कौरियौ तेसरौ मूंड भानौ। ⁵ तैबै मालिकै औज़ौ एक नुकुर भेज़ौ, सेउ झांगौ तिऊं ठेकेदारेउऐ जिउंदौ पोरु। तिणिऐ भौरी नुकुर भेज़ै पर तिऊं मांझिऐ कु कुछ़ ई पिटै, कुछ़ ई झांगै। ⁶ ऐबै रौआ मालिका कै एका भेज़णा लै, सेउ थौ तेसरौ छ़ोहरू। मालिकै आपणौ छ़ोहरू भी भेज़ौ। तिणिऐ ज़ाणौ कि, ‘सै ठेकेदार मैरै छ़ोहरू री इज़्जत कौरा लै।’ ⁷ पर ज़ेबी ठेकेदारूऐ सेउ छ़ोहरू देखौ आशदै ता सै आपु मांझी चौपड़िंदै लागै कि, ‘एउ ता बा इऐं ज़मीना रौ मालिक। आशौ, आमै एस पोरू झांगी तैबै हुआ सा ऐ ज़मीन आमारी।’ ⁸ तिउंऐ सेउ छ़ोहरू पाकड़ौ और झांगियौ बौगिच़ै कु बाईरै शोटौ।” ⁹ तैबै यीशुऐ तिऊं यहुदी नेतेउ कु पुछ़ौ कि, “ऐबै सेउ मालिक का कौरा आ? सेउ मालिक बौगिच़ै दी आशियौ तिऊं ठेकेदारू झंगाईयौ बौगिच़ै रौ ठेकौ कास ओरी कै दिआ सा। ¹⁰ का तुमुऐ धर्मशास्त्रा दी इणौ नाईं पौड़ौ कि, ज़ो पात्थर घौर चाणनै वाल़ै मिसत्रिउ ऐ बेकार ज़ाणियौ शोटी ऐरौ थौ, सेज़ौ पात्थर घौरा री दवाली रै कुणै दी लागणै वाल़ौ पात्थर बौणौ ¹¹ एज़ौ काम परमेश्वरै कियौ आ, और आमारी नौज़री दी नोखौ आ।’ ¹² तैबै सै यहुदी नेतै यीशु पाकुड़नौ च़ाह थै, कैलै कि सै सौमझी ऐरै थै कि यीशु आमारै बारै दी इयैं कहाणी शुणावा आ’ पर सै नेते लोग डौरा थै ओरी लोगु कु ज़ो तिऐ थै। तैबै सै यीशु छ़ाड़ियौ तिदरु पोरु डेऐ।

कैसरा लै मामलौ देणौ

(मती22:15-22; लूका20:20-26)

¹³ तैबै यहुदी नेतेउऐ कुछ़ फरीसी और कुछ़ हैरोदेसा रै राज़ै रै गुटा रै लोग यीशु काऐ भेज़ै। सै च़ाह थै कि यीशु गलत बुशै बोला ताकि सै एस पाकड़ा लै। ¹⁴ तैबै सै लोग यीशु काऐ आशै और यीशु लै बोलदै लागै, “ओ गुरु, आमै ज़ाणी कि तुमै ईमानदार ई, तुमै बिल्कुल परवाह नाईं कौरदै कि लोग तुमारै बारै दी का सुंच़ा ई। तुमै छ़ोटै-बौड़ै कासी री परवाह नाईं कौरदै। तुमै ता सिरफ परमेश्वरा रै बाटा री सौच्च़ी शिक्षा दिआ ई। का आमुऐ रोमी राज़ै मामलौ दैणौ च़ाईं या नाईं च़ाईं दैणौ ? ¹⁵ रोमी राज़ै कै मामलौ दैणौ गलत आ या ठीक आ?” यीशुऐ ज़ाणी एरौ थौ कि, ‘इऐ लोग मूं फौसाऊणा लै लागै औन्दै पुछ़दै।’ यीशुऐ बोलौ, “तुमै मूं कैलै पौरखा ई? तुमै मूकाऐ एक सिक्कौ आणौ मुकै देखाऔ।” ¹⁶ तिउंऐ एक सिक्कौ आणियौ यीशु कै दैऔ। तैबै यीशुऐ पुछ़ौ, “एस सिक्कै दी कासरौ नाउं और फोटु आ छ़ौपौ औन्दौ ?” तिउंऐ ज़्वाब दैऔ, “केसर राज़ै रौ।” ¹⁷ तैबै यीशुऐ तिउंलै बोलौ,“ज़ो रोमी राज़ै रौ आ तेस रोमी राज़ै कै दैयौ और ज़ो परमेश्वरा रौ आ तेस परमेश्वरा कै दैयौ।” यीशु री ईणी बुशै शुणियौ सै लोग हैरान हुऐ कैलै कि तिऊं कै यीशु नाईं फौसाईया थौ।

दूजी बारै पैदौ हुणौ और शादी

(मती22:23-33; लूका20:27-40)

¹⁸ तैबै कुछ़ सदुकी लोग यीशु काऐ आशै। सदुकी लोग एक यहुदी धार्मिक गुटा रै लोग थै ज़ो इणौ माना थै कि मौरणै बासिऐ ज़िन्दगी नाईं आ। ऐ लोग एज़ी बशै कौरिऐ यीशु फौसाउणौ च़ाहा थै। सै लोग यीशु कु एक सवाल पुछ़दै लागै, ¹⁹ “गुरुजी, परमेश्वरै आपणै सेवक मुसा रै ज़ौरिऐ आमुलै हुकम दैऔ कि , ‘अगर एक आदमी शादी कौरिऔ बिण सन्तानै मौरा सा, तैबै तेसरै भाईऐ तेसरी छ़ेउड़ी आईलै शादी कौरणी ज़ुरुरी आ, ताकि तेस मौरै औन्दै भाई रौ वंश बौणी रौआ।’ ²⁰ ऐबै एकी बारै री बूश शुणौ। एकी घौरा दी सात भाई थै। सारेउ कु बौड़ै भाइऐ शादी कौरी, पर सेउ मौरौ पोरु। तेसरी औलाद नाईं हुई। ²¹ तैबै दुज़ै भाईऐ तिऐं छ़ेउड़ी आइलै शादी कौरी ताकि तेस भाई री औलाद बौणी रौआ। पर सेउ भी मौरौ पोरु, तैबै तेसरी औलाद भी नाईं हुई। तैबै चिजै भाईऐ तिऐं छ़ेउड़ी आइलै शादी कौरी, तैबै सेउ भी मौरौ तिणी पोरू। ²² तैबै साता रै साता भाइऐ तिऐं छ़ेउड़ी आइलै शादी कौरी, पर सै सारै बिण औलादी रै मौरै। तेथ बासिऐ सै छ़ेउड़ी भी मौरी पोरु। ²³ ऐबै तुमै बोलौ, अगर मौरणै बासिऐ ज़िन्दगी आ, तैबै तिऐं ज़िन्दगी दी सै छ़ेउड़ी तिऊं साता भाइऊ मांझियै कु कासरी छ़ेउड़ी हुआ सा? कैलैकि सै सारेउ री छ़ेउड़ी थी?” ²⁴ तैबै यीशुऐ तिउंलै बोलौ, “तुमै का ई लागै औन्दै बोलदै? तुमु दी औकल नाईं आ? तुमै ना ता धर्मशास्त्रा री बुशै सौमुझदै और ना ता परमेशवरा री शौक्ति मानदै। तुमारौ विश्वास गौलत आ। ²⁵ ज़ेबी लोग मौरै औन्दै मांझिऐ कु जिऊंदै हुआ लै, तेबी शादी-ब्याह नाईं औन्दी, कैलैकि तेबी सै सौरगा रै स्वर्गदुता बाशी हुणै ई ज़ो शादी नाईं कौरदै। ²⁶ और मौरणै बासिऐ ज़िउंदै हुणै रै बारै दी तुमुऐ इणौ पौड़ौ आ कि परमेश्वरै एक झ़ाड़ी भितै कु आपणै सेवक मुसा लै बोलौ आ कि, "हाऊं परमेश्वर ऊ। ज़ास्स तुमारै बुज़ुर्ग इब्राहिम, इसहाक, याकूब भी माना ई।’ ²⁷ मौरै औन्दै लोग नाईं बौल्कि जिउंदै लोग परमेश्वर माना ई। इब्राहिम, इसहाक और याकुब इबी झ़ाऊं परमेश्वर माना ई ता सै जुरुर इबी झांऊ ज़िउंदै ई। ज़ैबै तुमै नाईं मानदै कि मौरणै बासिऐ भी ज़िन्दगी आ, तैबै ता तुमै सौच्च़ाई कु भौरी दूर ई।”

सौबी कु बौड़ी आज्ञा

(मती22:34-40; लूका10:25-28)

²⁸ एक यहुदी शास्त्री तिऊं लोगु री बुशै थौ लागौ औन्दौ शुणदै। तिणिऐ ज़ाणौ कि यीशु किणै आच्छ़ै ढौंगा कौरिऐ सा स्वालु रै ज़्वाबा दैंदै लागौ औन्दौ। तैबै सेउ यीशु कु पुछ़दै लागौ कि, “आमुकै दैऔ औन्दै हुकमा मांझिऐ कु केज़ौ हुकम आ ज़ो सारेउ कु जुरुरी ज़ा मानणौ? ²⁹ यीशुऐ ज़्वाब दैऔ कि, “सारेउ कु ज़ुरुरी हुकम एज़ौ आ कि, ओ इस्राएल! आमुरौ परमेश्वर प्रभु एका सा। ³⁰ आपणै पूरै ज़िवा कौरिऐ परमेश्वरा कु प्यार कौर, और आपणै पूरै प्राण, पूरै दिमाग, सारी तागता कौरिऐ परमेश्वरा री सेवा कौर। ³¹ दुजौ ज़ुरुरी हुकम ऐ आ कि, ‘ज़िणौ प्यार तु आपु आइलै कौरा ई तिणौ प्यार तुमै आपणै आस-पड़ोसा रै लोगु आइलै भी कौरौ।’ ईउं दुई हुकमा कु बौड़ौ केज़ौ भी हुकम नाईं आ।” ³² तैबै तिणी यहुदी शास्त्री ऐ यीशु लै बोलौ, “गुरुजी, तुमुऐ बिल्कुल सौच्चौ बोलौ आ कि परमेश्वर एका सा। तेस छ़ाड़ियौ दुजौ कोई भी ईश्वर नाईं आ। ³³ आमुऐ परमेश्वरा कु आपणै सारै ज़िऊ, सारै दिमाग, और सारी तागता कौरी च़ाई प्यार कौरणौ, और आपु ज़िणौ आपणै आस-पड़ोसा रै लोगु आइलै भी च़ाईं प्यार कौरणौ। भेटा च़ौड़ाउणै कु और बौल़ी दैणै कु आच्छ़ौ आ इणौ कौरणौ। ³⁴ ज़ैबै यीशुऐ देखौ कि एउ आदमी सौमझदारी कौरी ज़्वाब दिआ आ तैबै यीशुऐ बोलौ कि, “तू आपणै ज़िवा दी परमेश्वरा रौ राज़ कौराउणै कु दूर नाईं आ।” तेथ बासिऐ यहुदी नेतेउ रै लोगु काऐ यीशु पौरखुणा लै केज़ै भी स्वाल पुछ़णै री हिम्मत नाईं पौड़ी।

मसीह कासरौ छ़ोहरु आ?

(मती22:41-46; लूका20:41-44)

³⁵ यीशुऐ परमेश्वरा रै घौरा दी, शिक्षा दैंदी बारै बोलौ, “यहुदी शास्त्री लोग कैलै बोलाई कि परमेश्वरा रै भेज़ौ औन्दौ मसीह सिरफ दाउदा रौ छ़ोहरु आ? ³⁶ दाऊद राज़ै ता परमेश्वरा री आत्मा दी हुइऔ बोलौ थौ कि, ‘परमेश्वरै मैरै प्रभु कु बोलौ, “मेरी सुल्टी भिलै बोश ज़ेबी झांऊ हाऊं तैरै दुश्मन ना हौराई सौकु”। ³⁷ ज़ेबी दाऊद राज़ै मसीहा लै मैरौ प्रभु कौरिऐ बोलौ थौ, तैबै मसीह ता दाऊदा राज़ै कु बौड़ौ आ!” तैबै तिऐ ज़ो भौरी बौड़ी भीड़ थी, सै लोग यीशु री शिक्षा बौड़ी खुशी कौरिऐ थै लागै औन्दै शुणदै।

शास्त्रिउ कु बौच़ियौ रौएउ

(मती23:1-36; लूका20:45-47)

³⁸ लोगु लै शिक्षा दैंदी बारै यीशुऐ बोलौ, “यहुदी शास्त्री लोगु रै विच़ारु कु और तिउंरी शिक्षा कु बौचियौ रौऐउ। सै आपणै लाम्बै कोटा भिडियौ घमण्डा कौरिऐ घुमणौ पसन्द कौरा ई। और सै च़ाहा ई कि लोग बज़ारु दी तिउंरी ईज्ज़त कौरा। ³⁹ और सै धार्मिक खुम्बल़ी दी सारेउ कु आगु बोशणौ च़ाहा ई। अगर तिऊं कुण आपणै घौरै औटावा लै, सै शास्त्री लोग तिऐ भी आच्छ़ी ज़ागह दी बोशणै च़ाहा ई। ⁴⁰ और ऐ शास्त्री लोग गरीब विधवा रौ सारौ कुछ़ लुटाई। तैबै सै लोगा कै देखाल़ना लै लाम्बी-लाम्बी प्राथना कौरा ई। इणै लोगु लै परमेश्वर भौरी बौड़ी सौज़ा दिआ आ।”

गरीब बिधवा रौ दाण

(लूका 21:1-4)

⁴¹ यीशु परमेश्वरा री आराधना रै घौरा री कोठड़ी रै सामनै बोशियौ देखदै लागौ कि लोग परमेश्वरा लै भेटा दैंदै ई लागै औन्दै। काईऐ सेठ लोग परमेश्वरा लै भौरी भेंट लागै दैंदै। ⁴² तैबै तिऐ एक गरीब विधवा आशी और तिऐं कोठड़ी दी दुई सिक्कै टाल़ै। ⁴³ यीशुऐ इणै देखियौ आपणै च़ेलै आपु काऐ औटाईयौ तिउंलै बोलौ, “हाऊं तुमुलै सौच्च़ौ बोलाऊ कि ईंऐ विधवा छ़ेउड़िऐ इउं सारै सेठ लोगु मांझीआ कु ज़ादौ दाण दैऔ आ। ⁴⁴ सेठ लोगुऐ ता आपणै भौरी धना मांझीऐ कु कामती धन दैयौ आ परमेश्वरा लै पर ईयैं गरीब छेउड़िऐ ता आपणी सारी कौमाई परमेश्वरा लै देई एरी आ। ईयैं आपु कालै कुछ़ ना बौच़ाऔ।”

परमेश्वरा रै घौरा रै विनाशा री भविष्यवाणी

(मती24:1,2; लूका21:5,6)

¹ ज़ेबी यीशु परमेश्वरा री आराधना रै घौरा कु बाइरै निकुल़दै थौ लागौ औन्दौ, तैबै यीशु रै एक च़ेलै यीशु लै बोलौ, “गुरूजी, देखौ एउ परमेश्वरा रौ घौर केती बौड़िया सा। केती आच्छ़ै और बौड़ै-बौड़ै पात्थर इ इदै लागै औन्दै।” ² तैबै यीशुऐ तिउंलै बोलौ, “ज़ो तुमै देखदै ई लागै औन्दै, ज़ो तुमुकै आच्छ़ौ आ लागदै लागौ औन्दौ, इदै पात्थरा माथै पात्थर भी नाईं बौच़दै, ज़ो दौबा लौ नाईं।”

मुसीबत और कल़ेश

(मती24:3-14; लूका21:7-19)

³ तैबै यीशु नाल़ा पारभिलै ज़ैतून नांवा री पहाड़ी माथै बोशौ, ज़िदरा कु परमेश्वरा री आराधना रौ घौर नौज़दीक दिशा थौ। तिऐ पतरस, याकूब, यूहन्ना और अन्द्रियास यीशु आईलै थै। तैबै एखुलै दी च़ेलेउ ऐ यीशु कु पुछौ,“ ⁴ ज़ेज़ी बुशै तुमुऐ परमेश्वरा रै घौरा रै बारै दी बोली ई, एज़ी बुशै केभी हुआ ई? आमै किणौ ज़ाणी कि ऐ हुणै वाल़ी ई? का कोई निशाण आसती आ?” ⁵ तैबै यीशु तिउंलै बोलदै लागौ, “बौच़ियौ रोएऊ, कुणियै तुमुलै धोखौ ना च़ाईं दैयौ। ⁶ कईयै झ़ुठै आदमी आशिऔ बोलाई कि सै परमेश्वरा री तौरफा कु भेज़ै औन्दै मसीह ई, और भौरी लोग तिऊं पीछ़ु डेउणै ई। ⁷ ज़ेबी तुमै शुणालै कि ज़ागह-ज़ागह दी लौड़ाई-झौगड़ै ई औन्दै लागै औन्दै तेभी तुमै घबराएऊ नाईं। इऐ बूश हुणी ता ज़ुरूरी आ। तैबै भी आखरी बौग्त नाईं। ⁸ एकी ज़ाती रै लोग दुजी ज़ाती रै लोगु रौ विरोध कौराई, एक देश दुजै देशा रौ विरोध कौरा आ। काई ज़ागह दी भुईंच़ाल़ हुणै ई और काई ज़ागह दी काल़ पौड़नै ई। ऐ ता दु:ख मुसिबता री शुरूआत आ। ज़िणौ एक छ़ेउड़ी हौल़खुंदी बारै पैहलै कु बेदन झेला सा। बासियै तियांरी बेदण बौड़ा सा। ⁹ तुमै बौच़ियौ रौएऊ कैलैकि लोग तुमारै खिलाफा दी हुणैई। सै लोग तुमु पंच़ाइतु दी, कोर्टा दी पाकड़ियौ निंयाईं और तुमु धार्मिक खुंबल़ी दी पिटावा ई। मेरी वज़ाह कु बौड़ै-बौड़ै राज़ अधिकारी काऐ तुमारी पूछ़ताछ़ कौरावा ई। तुमै तिऊं काऐ मैरै बारै दी गवाही दिआ ई। ¹⁰ दुनिया री हर ज़ाती रै लोगु कै मैरौ खुशी रौ संदेश शुणाउणौ ज़ुरुरी आ। तेथ बासिऐ आखरी बौग्त आशा आ। ¹¹ ज़ेबी तुमु कोर्टा दी निंयालै तेभी पैहलै कु सूँच़णौ शुरु ना कौरेऊ कि तिऐ का बोलु लै। परमेश्वर तुमुलै बोला आ कि ज़ो तुमुऐ तिऐ बोलणौ आ कैलै कि तेभी बोलणै वाल़ै तुमै नाईं, पर परमेश्वरा री पवित्र आत्मा तुमुकु बोलावा। ¹² और ज़ूण मूं माथै विश्वास कौराई, तिउंरै भाई आपणै भाई लै, बाब आपणै छ़ोहरु लै, लोलडै आपणै माँ-बाबा झांगणा लै दुश्मनु कु पौकड़ावा ई। ¹³ और सारै लोग तुमु आईलै दुश्मनी छ़ाडा ई कैलै कि तुमै मूं माथै विश्वास कौराई। पर जेज़ै आखरी झांऊ मूँ माथै विश्वास कौरालै, सै बौच़ाई।

बौड़ी मुसीबत और काल़

(मती24:15-28; लूका21:20-24)

¹⁴ इणौ बौग्त आशणौ आ ज़ेबी एक भौरी बुरौ आदमी आशियौ एस परमेश्वरा री आराधना रौ घौर सारेऊ कु शुध्द ज़ागह गान्दी कौरा आ। (पौढ़णै वाल़ौ सौमझ़ालौ ) तेभी ज़ेज़ै लोग यहुदा परदेशा दी औलै तिउंऐ बौच़णा लै पहाड़ी दी ज़ा डेऊणौ। ¹⁵ तैबै ज़ो लोग तौंगा दी औणै बोशै औन्दै, तिउंऐ समाना आणना लै भीतरै नाईं डेउणौ, तिऐ रूकेउ नाईं। ¹⁶ ज़ुण तेभी डोखरेऊ, बौगिच़ेऊ दि औलै, सै आपणै शौल, झुड़कै निणालै घोरै ना डेवेऊ। ¹⁷ सेज़ै दिना दी तिऊं छ़ेउड़ी लै भौरी मुश्किल हुआ आ ज़ो गौरकै ज़िवा री औली और ज़ासकै दूध पीणै वाल़ै लोल़डै औलै। ¹⁸ सैज़ै बौग्ता दी ईणी मुसिबतै हुणी ज़िणी दुनिया री शुरूआता कु आज़ा झाऊं कादी ना हुई, और ना ता एथ बासिऐ केभी हुणी। ¹⁹ तुमै प्राथना कौरदै थाकेऊ लागी कि तेबी शेल़ै रै दिन ना च़ाई हुऐ। नाईं ता लोगु कै शेल़ै दी घोरा छ़ाड़ियौ डेउणौ भी मुश्किल हुआ। ²⁰ परमेश्वरै आपणै च़ुनै औन्दै लोग, ज़ो परमेश्वरा माथै विश्वास कौराई, तिंउरै बारै दी सुँच़ियौ सौ बौग्त कम कौरी ऐरौ आ। नाईं ता एक भी आदमी ज़िउंदौ ना रौइणौ थौ। ²¹ ज़ैबै तुमै शुणालै कि, ‘मसीह इदै आ’ या मसीह तिदै आ’ तैबै तिऊं बुशै माथै विश्वास ना कौरेऊ। ²² आखरी बौग्ता दी झ़ुठै गुरु लोग और झ़ुठै मसीह भी हुआ ई ज़ो निशाण और हैराणी वाल़ै काम देखाईयौ लोगु परमेश्वरा री बाटा कु टाल़नै री कोशिश कौराई। पर सै सफल नाईं औन्दै। ²³ तुमै सौम्भल़ियौ रौएउ कैलैकि मुइंऐ तुमुलै सारी बुशै पैहलै बोली गोई ज़ो हुणै वाल़ी ई।

आदमी रै छ़ोहरु रौ दूजी बारै आशणौ

(मती24:29-31; लूका21:25-28)

²⁴ तिऊं दु:ख मुसिबता बासिऐ इणौ हुआ ज़िणौ भौरी बौग्त पैहलै गुरू लोगुऐ आशणै वाल़ै बौग्ता रै बारै दी बोलौ थौ कि, सुरज़ काल़ौ पौड़ा आ, और ज़ून भी राची प्याशौ दैणौ बंद कौरा आ। ²⁵ और ज़ेती भी सौरगा दी तारै दिशाई, और ऐ सारै छुटणै ई तोल़ै और सौरगा री बौड़ी शौक्ति हिलणी ई। ²⁶ तैबै हाऊं, ज़ुण परमेश्वरा री तौरफा कु भेजौ औन्दौ ऊ, पुरी शौक्ति और शाना कौरिऐ बादला माथै आशा ऊ और सारै लोग मूं देखाई। ²⁷ तैबै हाऊं आपणै स्वर्गदूत भेज़ा ऊ, ताकि सै पुरी दुनिया रै कुणै-कुणै कु मैरै च़ुनै औन्दै लोग कौठै कौरा, ज़ो मुं माथै विश्वास कौराई।

फेड़ु रै पेड़ा रौ उदाहरण

(मती24:32-35;लूका21:29-33)

²⁸ फेड़ु रै पेड़ा कु कुछ़ औनैणौ शिखौ कि ज़ेबी फेड़ु रै पेड़ा रै शाउंटै कौउंल़ै हुआई और तेसदी पाच लागदै लागा ई तेभी तुमुकै पौतौ लागा कि फौल़ दैणै रौ बौग्त आशी ऐरौ आ। ²⁹ तिणी ज़ेबी तुमै देखा लै कि एज़ी बुशै हुआ ई, तेभी ज़ाणेऊ कि मैरौ दुजी बारै आशणै रौ बौग्त हुई एरौ आ। ³⁰ हाऊं तुमुलै सौच्च़ौ बोलाऊ, एज़ौ पौस्तौ खौत्म हुणै कु पैहलै एज़ी बूशै पुरी हुआ ई। ³¹ सौरग और पृथ्वी भी टौल़ा ई, पर मेरी बूशै केभी ना टौल़दी।

उज़ी रौएऊ

(मती24:36-44)

³² मैरै दुजी बारै आशणै रै बौग्ता रै बारै दी कोई ना ज़ाणदौ, सिरफ परमेश्वरा कै आ पौतौ। ना ता स्वर्गदुता कै, और ना ही मुकै आ पौतौ। ³³ शुणौ! तुमै उज़ी रौऐउ कैलैकि तुमै नाईं ज़ाणदै कि सेज़ौ दिन केभी आशा आ। ³⁴ ज़िणौ एक बौड़ै घौरा रौ मालिक घौरा छ़ाड़ियौ परदेशा लै डिया आ। आपणौ घौर संभाला आपणै नुकरू कै अलग-अलग काम दिआ आ। ³⁵ एथीलै उज़ी रौएऊ, कैलै कि तुमे नाईं ज़ाणदै घौरा रौ मालिक केबी आशा सा, ब्याल़ी या आधी राचीऐ या कुखड़ै बाशदी बारी या दोउती राची। ³⁶ इणौ ना च़ाईं हूऔ सेउ खरक च़ार आशियौ तुमु सुतै औन्दै देखा। ³⁷ और ज़ो हाऊं तुमुलै बोलाऊ, तेसी इ सौभी आइलै बोलाऊ : उज़ी रौएऊ!”

यीशु रै बिरोधा दी यीशु पकुड़ना लै च़ाल

(मती26:1-5; लूका22:1,2; यूहन्ना11:45-53)

¹ दुई दिना बासिऐ फसह और बिण संज़ेड़ै री रोटी रौ साज़ौ हुणै वाल़ौ थौ। यहुदी शास्त्री और बौड़ै याजक यीशु पौकड़ाईऔ झांगणौ च़ाह थै। ² पर सै बोला थै कि एस साज़ै रै दिना दी नाईं पाकुड़दै। नाईं ता भीड़ा रै लोग हालौ मौच़ावा ई। एथकु सै लोग यीशु च़लाकी कौरिऐ च़ोरुइयौ एखुले दी पाकुड़नै च़ाहा थै।

बैतनिय्याह दी यीशु रोटी खांदै

(मती26:6-13; लू12:1-8)

³ यीशु बैतनिय्याह गांवा दी शामौना रै घौरा दी आशौ ज़ुण पैहलै कोड़ी थौ। ज़ेबी सै रोटी खांदै थै बोशै औन्दै तेभी तिऐ एक छ़ेउड़ी आशी ज़ासरै हाथा दी ज़ौड़ी-बुटी री खुशबुदार तेला री शीशी थी। सेऊ तेल भौरी शुध्द और कीमती थौ। तिऐं छ़ेउड़ीऐ सै शीशी च़ोड़ी और सेऊ तेल यीशु रै मुंडा तौल़ै पेरौ। ⁴ तैबै कईऐ लोग ज़ो तिऐ बोशै औन्दै थै सै आपु मांझिऐ रोशुईऔ बोलदै लागै कि, “एऊ मैहंगौ तेल बर्बाद कैलै कियौ औलौ? ⁵ एस तेला री कीमत एती आ कि ज़ेती एक आदमी एकी साला दी ध्याड़ी कौमावा आ। एस तेल बेच़ियौ पैसै गरीब लोगु दी बांटणै च़ाई थै।”सै लोग तिऐं छ़ेउड़ी लै धौमकी भी दैंदै लागै। ⁶ तैबै यीशुऐ तिऊं लोगु लै बोलौ, “तुमै इयैं छ़ेउड़ी लै कैलै रोशिआई? ईयैं तंग कैलै कौराई? ईयैं छ़ेउड़िऐ मैरै भौलै लै कियौ आ। ⁷ गरीब लोग ता तुमु आईलै सौदा साथा ई रौआई। तिऊं आईलै ज़ेबी भी भौलाई कौरणै च़ाह लै कौरी बौल़ा ई। पर हाऊं तुमु आईलै सौदा नाईं रौईंदौ। ⁸ ईयैं छ़ेउड़िऐ ज़ो भोलाई कौरणी थी कौरी एरी आ। ईयैं छेउड़िऐ मैरै मुंडा दी खुशबुदार तेला पेरिऔ मौरणै कु पैहलै मैरौ ज़िसम दबाऊणा लै तैयार कौरी ऐरौ आ। ⁹ हाऊं तुमुलै सौच़्चौ बोलाऊ, पुरी दुनिया दी ज़िऐ-ज़िऐ परमेश्वरा रै खुशी री खौबर शुणावा लै, तिऐ-तिऐ ईंयैं छ़ेउड़ी रै कामा री बुशै भी हुआ ई।”

यहूदा रौ विश्वासघात

(मती26:14-16; लूका22:3-6)

¹⁰ तैबै करियोत गांवा रौ यहुदा, ज़ुण यीशु रै बारह चुनै औन्दै च़ेलेऊ मांझ़िऐ कु एक थौ, सेउ बौड़ै याजकु काऐ डैऔ और बोल़ौ कि, हाऊं यीशु पौकड़ावा ऊ।” ¹¹ इणै शुणिऔ सै लोग भौरी खुश हुऐ और यहुदा कै पैसेऊ दैणै रौ वाईदौ कियौ। तैबै तहुदा यीशु पौकड़ाउणा लै मौकौ लोड़दै लागौ।

च़ेलेउ आइलै आखरी बार साज़ै री रोटी खाणी

(मती26:17-25; लूका22:7-14, 21-23; यूहन्ना13:21-30)

¹² तैबै बिण संज़ेड़ै री रोटी रै साज़ै रौ पैहलौ दिन थौ ज़ेबी यहुदी लोगु रै हर टौबर फसह रै गाबड़ु री बौल़ी च़ौड़ावा थै। तैबै यीशु रै च़ेलेउऐ यीशु कु पुछ़ौ कि, “गुरुज़ी, तुमै किऐ च़ाहा ई कि आमै तुमु कालै साज़ै री रोटी खाणै रौ इन्तज़ाम कौरुलै?” ¹³ तैबै यीशुऐ आपणै च़ेलेऊ मांझिआ कु दुई च़ेलै भेज़ै और तिउंलै बोलौ कि, “तुमै यरुश्लेमा शहरा दी डैऔ। तिऐ तुमुकै एक आदमी मिला ज़ुण काछ़ा माथै पाणी री बोटल़ोऊ चुंगिऔ आ डेउंदै लागौ औन्दौ। तुमै तेस आदमी पीछ़ु डेवेऊ। ¹⁴ ज़ैज़ै घौरा दी सेऊ आदमी डैआ लौ, तुमै तेस घोरा रै स्याणै लै बोलेऊ कि गुरु इणौ बोला आ, “मुंकालै तैयार कियौ औन्दौ कौमरौ केज़ौ आ? ¹⁵ तैबै सेऊ घौरा रौ स्याणौ तुमुकै तेस घौरा री माथली मंजली दी सौज़ाऔ औन्दौ बौड़ौ कौमरौ देखावा आ। तुमै तिऐ साज़ै री रोटी खाणै रौ इन्तज़ाम कौरेऊ।” ¹⁶ तैबै च़ेलै यरुश्लेम शहरा दी डेवै। ज़िणौ-ज़िणौ यीशुऐ बोलौ थौ तिणी तिऊं आईलै हुऔ। तैबै तिउंऐ तिऐ साज़ै री रोटी रौ इन्तज़ाम कियौ। ¹⁷ ब्याल़कै यीशु आपणै बारह चुनै औन्दै च़ेलेऊ आईलै सेज़ै घौरा दी आशै ज़िऐ साज़ै री रोटी खाणै रौ इन्तज़ाम थौ कियौ औन्दौ। ¹⁸ ज़ैबै सारै बोशिऔ रोटी खांदै लागै तैबै यीशुऐ बोलौ, “तुमै सारै ई इदै मुंआइलै रोटी खांदै लागै औन्दै। हाऊं तुमुलै सौच्च़ौ बोलाऊ कि तुमु मांझिऐ कु एक आ ज़ो मूं पौकड़ावा आ।” ¹⁹ इणै शुणिऔ सै सारै परेशान हुऐ और एक-एक कौरिऐ सारै बोलदै लागै, “का हाऊं ता नाईं?” ²⁰ तैबै यीशुऐ बोलौ, “सेऊ तुमु बारह च़ुनै औन्दै च़ेलेउ मांझिऐ आ, ज़ुण मुं आईलै बोशिऔ मैरै खोरू कु रोटी च़ोबिऔ आ खांदै लागौ औन्दौ। ²¹ हाऊं, ज़ुण परमेश्वरा री तौरफा कु भेज़ौ औन्दौ ऊ, मैरौ मौरणौ ता इणौ भी आ लिखौ औन्दौ। फिटकार तेस आदमी लै ज़ुण मूं पौकड़ावा आ। तेस आदमी लै तैबै आच्छ़ौ थौ कि तेसरौ ज़न्मा ना हुआ थौ।”

प्रभू भोज

(मती26:26-30; लूका22:14-20; 1कुरुन्थियों11:23-25)

²² रोटी खांदी बारै यीशुऐ एक रोटी च़ूंगी और परमेश्वरा रौ धन्यवाद कौरिऔ रोटी चोड़ी और आपणै च़ेलेऊ लै देई और बोलौ, “ईंयै रोटी मैरौ ज़िसम सौमझिऔ खाऔ।” ²³ तैबै यीशुऐ अंगुरा रै रौसा रौ खोरु च़ुंगौ और परमेश्वरा रौ धन्यवाद कौरिऔ आपणै च़ेलेउ लै दैऔ और सै च़ेलै तेस खोरु कु बारी-बारिऐ पिंदै लागै। ²⁴ तैबै यीशुऐ बोलौ, “एस आंगुरा रौ रौस तुमै मैरौ लोऊ सौमझौ ज़ो भौरी लोगु तिंउरै पापा री सौज़ा कु बौच़ाउणा लै बौइणै वाल़ौ आ। मैरै मौरणै कु परमेश्वर लोगु आईलै एक नौउंऔ रिश्तै रौ वाईदौ पाक्कौ कौरा आ। ²⁵ हाऊं तुमुलै सौच्च़ौ बोलाऊ कि एथ बासिऐ हाऊं अंगुरा रौ रौस दुजी बारै नाईं पिंदौ तेबी झांऊ ज़ेबी झ़ांऊ राज़ौ बौणियौ आशियौ ना पिऊ।” ²⁶ तैबै भजन गाईयौ सै घौरा कु बाईरै निकल़ियौ ज़ैतून पहाड़ी लै डेवै।

पतरसा री इनकार कौरनै री भविष्यवाणी

(मती26:31-35; लूका22:31-34; यूहन्ना13:36-38)

²⁷ बाटा दी डेऊंदै-डेऊंदै यीशुऐ बोलौ, “धर्मशास्त्रा दी इणौ आ लिखौ औन्दौ कि, ‘हाऊं भेराल़डु झांगा ऊ, तैबै भेरी ओरु-पोरु भागा ई।’ ईणी मूं भी पौकड़ाउईयौ झांगा ई, तैबै तुमै सारै विश्वासा ई डौगमौगावा ई और मुं छ़ाड़ियौ भागा ई। ²⁸ पर हाऊं ज़िउंदौ हुईऔ तुमु कु औगाड़िऐ गलील परदेशा ई पौउंच़ाऊ। तिऐ हाऊं तुमु कै मिला ऊ।” ²⁹ पतरसै यीशु लै बोलौ, “च़ाऊ सारै विश्वासा दी डौगमौगाइऔ भागा लै, तैबै भी हाऊं तुमु छ़ाड़ियौ ना डेउंदौ।” ³⁰ इणै शुणियौ यीशुऐ पतरसा लै बोलौ, “हाऊं ताउंलै सौच़्च़ौ बोलाऊ कि आज़ राची कुखड़ै रै दुई बारै बाश्णै कु पैहलै तु चिया बारै आपणै मुंआ कु बोलाई कि तू मुं नाईं ज़ाणदौ।” ³¹ तैबै पतरसै औज़ौ भी काठै कौरिऐ बोलौ कि, “च़ाऊ मूं ताऊं आइलै मौरणौ भी जा लौ, तैबै भी हाऊं केभी ना बोलदौ कि हाऊं तुमु नाईं ज़ाणदौ!” और सारै च़ेलै इणौ लागै बोलदै।

गतसमनी दी प्राथना

(मती26:36-46; लूका22:39-46)

³² तैबै सै एकी बौगीच़ै दी पौहुंच़ै ज़ासरौ नाऊं गतसमनी थौ। तिऐ यीशुऐ आपणै च़ेलेऊ लै बोलौ, “तुमै इदै बोशी रौएऊ ज़ेबी झांऊ हाऊं पार्थना कौरूलै।” ³³ तैबै यीशुऐ तिऊं माझ़िआ कु पतरस, याकूब और युहन्ना आपू आइलै दौख आगुड़ै नियैं। तेबी यीशु भौरी दु:खी थौ। ³⁴ यीशुऐ तिऊं चिन च़ेलेउ लै बोलौ कि, “हाऊं भौरी दु:खी ऊ, इदरा झाऊं कि मैरै प्राण डेऊणै वाल़ै ई। तुमै इदै ऊज़ी रौएऊ।” ³⁵ यीशु दौख आगुड़ै डेईयौ धौनी ज़बीना माथै मूंडा लाईयौ प्राथना कौरदै लागौ कि कौरी बौल़ा ई ता एस दु:खा रौ बौग्त मूं काऐ रौ पोरू टाल़। ³⁶ यीशुऐ बोलौ,” ओ बाब! तुमै ता सब कुछ़ कौरी बौलाई। एस दु:खा रौ बौग्त मूंकाऐ रौ पोरू टाल़। तैबै भी मेरी नाईं बौल्कि तेरी मौर्ज़ी च़ाईं पुरी हुई।” ³⁷ तैबै यीशु आपणै च़ेलेउ काऐ आशौ देखै ता सै थै सुतै औन्दै। यीशुऐ शामौन पतरसा लै बोलौ, “शामौन, तु सुतदै ई लागौ औन्दौ? का तू एकड़ी घौड़ी भी उज़ी नाईं रौई बौल़दौ? ³⁸ तुमारौ ज़िऊ ता मैरै हुकमा मानणा लै तैयार आ, पर तुमारै ज़िवा री ईच्छ़ा पूरी कौरणै री शक्ति तुमु दी नाईं आ। ज़ागदै रौएऊ और प्राथना कौरेऊ ताकी तुमै ईम्तियाना दी फेल ना हुआ।” ³⁹ यीशु तीदरा कु डैऔ और तिणी प्राथना कौरदै लागौ ज़िणी पैहलै की थी। ⁴⁰ ज़ेबी यीशु दुजी बारै आशौ तेबी भी सै च़ेलै सुतै औन्दै थै कैलै कि तिउंकै भौरी नीज थी लागी औन्दी। ज़ैबै यीशु तिऊं उज़ीयावा थौ ता सै शौरमा रै मारै यीशु लै कुछ़ ना बोली बौल़ा थै। यीशु तौइंऐ प्राथना कौरदै डैयौ। ⁴¹ तैबै चीजी बारै यीशु सुतै औन्दै च़ेलेउ काऐ आशौ और तिउंलै बोलौ, “का तुमै औज़ौ सुती गौऐ? बस। उठौ! देखौ! सौ बगत आशी ऐरौ आ ज़ेबी हांऊ, ज़ुण परमेश्वरा री तौरफा कु भेज़ौ औन्दौ ऊ, पापी लोगू रै हाथा दी पकड़ाइणै वाल़ौ ऊ। ⁴² उठौ औगांऊ आण्डौ। देखौ मुं पकड़ाउणै वाल़ौ आशी गौ आ।”

यीशु धोखै दी पाकुड़नौ

(मती26:47-56;लूका22:47-53; यूःन्ना18:3-12)

⁴³ यीशु इणौ बोलदै थौ लागौ औन्दौ कि खरकच़ार यहूदा, ज़ो चुनै औन्दै बारह च़ेलेउ मांझिया कु एक थौ, तिऐ आशौ। तेस आइलै एक भोरी भीड़ थी ज़ासकै तलवारै और डींगै थै। सै भीड़ बौड़ै याजक यहूदी शास्त्री और स्याणै लोगुऐ भेज़ी औन्दी थी, यीशु पाकुड़णालै। ⁴⁴ यहूदै पैहलै बोलौ औन्दौ थौ कि, “ज़ासरै गौल़ै दी घीणा लाइयौ खोबू देउ लै सौ इ आ यीशु। तेस पाकड़ेउ और सौंभाल़ियौ निंएऊ।” ⁴⁵ तैबै यहूदा खरकच़ार यीशु काऐ आशौ और बोलौ, “गुरी जी!” साथाई तेसरै गौल़ै दी घीणा लाइयौ खोबू दैऔ। ⁴⁶ तैबै तिऊं लोगुऐ आगुड़ै आशियौ यीशु पाकड़ौ। ⁴⁷ इणै देखियौ एकी च़ेलै आपणी तलवार गाड़ियौ परधान याजका रै नुकरा रौ कौंथू पोरू पा काटौ। ⁴⁸ यीशुऐ तिऊं लै बोलौ, का तुमै मूं डाकू समझ़ियौ तलवारी और डिंगै कौरौ पाकुड़दै आशै औन्दै? ⁴⁹ “हाऊं ता रोज़ तुमु आइलै रौआ थौ और परमेश्वरा रै घौरा दी शिक्षा दिआ थौ। तेबी तुमै मूं आसानी कौरी पाकड़ी बौल़ा थै। पर इणौ सारौ एथिलै हुऔ ताकी धर्मशास्त्रा दी लिखी औंदी आशणै वाल़ै बौग्ता री बूश पूरी हुआ।” ⁵⁰ तैबै सारै च़ेलै यीशु छ़ाड़ियौ पोरु भागै। ⁵¹ तैबै एक ज़वान आदमी आपणै नांगै जिस्मा दी एक च़ादरू कौशटियौ यीशु पिछ़ाड़ी- पिछ़ाड़िऐ थौ डेउंदै लागौ औन्दौ। तिऊं लोगुऐ सेउ आदमी पाकड़ौ। ⁵² पर सौ आदमी आपणौ च़ादरू छ़ाड़ियौ तिदरु नांगी भागौ पोरू।

बौड़ी खुम्बल़ी काऐ यीशु

(मती26:57-68; लूका22:54,55, 63-71; यूहन्ना18:13,14, 19-24)

⁵³ ज़ुणी लोगुऐ यीशु पाकड़ौ थौ तिउंऐ यीशु परधान याजका रै घौरा दी निंयौ। तिऐ सारै बौड़ै याजक, यहूदी लोग और स्याणै लोग कौठै थै हुऐ औन्दै। ⁵⁴ पतरस यीशु पिछ़ाड़ी- पिछ़ाड़िऐ परधान याजका रै घौरा रै खौल़ै झाऊं डैऔ। पतरस तिऐ च़ोउकीदारु काए बोशियौ आगी तापदै लागौ। ⁵⁵ बौड़ै याजक और सारै यहूदी फैसलै कौरनै वाल़ी खुबंल़ी रै लोग च़ाहा थै कि कोई यीशु रै विरोधा दी गवाई दिआ ज़िणै कौरिऐ यीशु लै मौरने री सज़ा मिला। ⁵⁶ काफी लोग यीशु रै विरोधा दी गवाई दैन्दै लागै पर तिउंरी बुशै आपु मांझीऐ नाईं मिला थी। ⁵⁷ तैबै काई लोग खौड़ै हुईयौ झूठी गवाई दैन्दै लागै कि, ⁵⁸ आमुऐ शूणौ आ कि इयौ बोला, ‘हाऊं आदमी रै चाणौ औन्दौ परमेश्वरा रौ घौर ढाल़ियौ चिआ दिना दी एक दूजौ परमेश्वरा रौ घौर चाणाऊ ज़ो आदमी रै हाथा कौरिऐ नाईं आ चाणौ औन्दौ।’” ⁵⁹ तैबै एज़ी बूशा दी भी तिउंरी गवाई एकी दूजै आइलै नाईं मिला थी। ⁶⁰ तैबै परधान याजक आपू खौड़ी उठियौ तिऊं सारेउ रै सामनै यीशु कु पुछ़दै लागौ, “तू ज़वाब कैलै ना देन्दौ? इउं गवाइउ रौ ताउंकै कोई ज़वाब नाईं आसतौ?” ⁶¹ पर यीशु च़ुटुक थाकौ। तिणिऐ कुछ़ भी ज़वाब ना दैऔ। तैबै परधान याजकै औज़ौ पूछ़ौ, “का तू परमेश्वरा रौ छ़ोहरू मसीहा ई?” ⁶² यीशुऐ बोलौ, “ओ। और तुमै देखाई कि हाऊं ज़ुण परमेश्वरा री तौरफा कु भेज़ौ औन्दौ ऊ, परमेश्वरा री सुल्टी भिलै बोशियौ राज़ कौराउ, और बादल़ु दी स्वर्गा कु आशाऊ।”* ⁶³ इणै शुणियौ परधान याजकै रोशुइयौ आपणै ज़ुड़कै च़ीरियौ बोलदै लागौ कि, आबै आमुकै कासी री गवाई री ज़ुरत नाईं आसती ⁶⁴ कैलै कि आमुऐ आपु शूणी गौ आ कि इयौ परमेश्वरा री बुराई कौरा आ। आबै तुमै इणौ बोलौ कि तुमारौ फैसलौ का सा?” सारै लोगुऐ बोलौ कि यीशु लै मौरनै री सज़ा मिलणी च़ाईं। ⁶⁵ तैबै तिऊं मांझ़िआ कु कुछ़ लोग यीशु रै मुंआ दी थूकदै लागै। यीशु री आखी दी कापड़ौ बानियौ सै लोग तेस पिटदै लागै और तेसरौ मज़ाक उड़ाइयौ बोलदै लागै, “अगर तू गुरू ई ता बोल, ताऊंदी कुणिऐ लाई आ?” और परधान याजका रै च़ोउकी दारुऐ भी यीशु दी थापै लाई।

पतरसा रौ इन्कार

(मती26:69-75; लूका22:56-62; यूहन्ना18:15-18, 25-27)

⁶⁶ ज़ेबी यीशु री पूछ़ताछ़ हुंदै लागी औंदी, तेबी पतरस तौल़ भिलै खौल़ै दी थौ। तैबै परधान याजका री एक नुकराण तिऐ आशी। ⁶⁷ तियांऐ पतरस आगी तापदै देखौ ता तियांऐ तेस भिलै बौड़ै ध्याना कौरिऐ देखियौ बोलौ, “तू भी ता नासरता रै यीशु आइलै साथा ई थौ।” ⁶⁸ तैबै पतरसै बोलौ, “तू का बोलाई? हाऊं तेस नाईं ज़ाणदौ।” पतरस खोल़ी काऐ आशौ और तेबी कुखड़ौ एकी बारै बाशौ। ⁶⁹ तैबै तिऐं नुकराणिऐ तिऐ खौड़ै लोगु लै बोलौ कि, “इयौ आदमी यीशु रौ साथी आ।” ⁷⁰ तैबै पतरस दूजी बारै मुकरौ कि, “हाऊं तेस नाईं ज़ाणदौ।” दख बौग्ता बासिऐ तिऐ ज़ो लोग थै तिउंऐ पतरसा लै बोलौ, “तू ता बिल्कुल गलील परदेशा रौ आदमी लागा ई। तू ज़ुरूर यीशु रै साथी मांझीया कु एक ई।” ⁷¹ तैबै पतरस कसमा खांदै लागौ, “हाऊं तेस आदमी बिल्कुल भी ना ज़ाणदौ। अगर हाऊं झूठ बोलूलौ ता परमेश्वरै मुलै सज़ा च़ाईं देई।” ⁷² तेबी खरकच़ार कुखड़ौ दुजी बारै बाशौ। पतरसा कै आद आशी कि यीशुऐ तेसलै बोलौ थौ कि, “कुखड़ै रै दुई बारै बाशणै कु पैहलै तू चिआ बारै मुकरा ई कि तू मूं नाईं ज़ाणदौ।” एज़ी बूश याद कोरियौ पतरस ज़ोरै ज़ोरै लेरदै लागौ।

पिलातुसा रै सामने यीशु

(मती27:1,2, 11-14; लूका23:1-5;यूहन्ना18:28-38)

¹ दोउत राची यहूदी शास्त्री, बौड़ै याजक और स्याणै लोग, ज़ो यहूदी फैसलै कौरनै वाल़ी खुंबल़ी रै ज़ौणै थै। तिउंऐ आपु मांझीऐ चौपड़ुइयौ यीशु तिदरु बानियौ पिलातुसा काऐ निंयौ। (पिलातुस यहूदा परदेशा दी रोमी सरकारा रौ बौड़ौ आफसर थौ।) ² पिलातुसै यीशु कु पूछौ, “का तू यहूदी लोगु रौ राज़ौ ई?” यीशु ऐ ज़वाब दैऔ, “ओ! तुमै ता आपु ई बोलदै लागै औन्दै।” ³ तैबै बौड़ै याजक यीशु माथै भौरी कुछ़ गलत आरोप लाइंदै लागै। ⁴ पिलातुसै यीशु कु औज़ौ पूछ़ौ, “का तू ज़वाब नाईं दैन्दौ? इयै लोग तैरै विरोधा ई भौरी कुछ़ ई बोलदै लागै औन्दै।” ⁵ तैबै भी यीशुऐ कुछ़ ना बोलौ। यीशु रै च़ुटुक रौइणै कु पिलातुस भौरी हैरान हुऔ।

मौरनै री सौज़ा री आज्ञा

(मती27:15-26; लूका23:13-25; यूहन्ना18:39–19:16)

⁶ हर साल ज़ैबै यहूदी लोग फसह रौ साज़ौ मनावा थै तैबै रोमी सरकारा री तौरफा कु यहूदी लोगु रै बोलणै माथै एक कैदी आज़ाद हुआ थौ। ⁷ बरअब्बा नावां रौ एक आदमी ज़ो कैदीऊ आइलै कैदा इ बन्द थौ, ज़ुणिऐ झ़ौगड़ै कौरदी बारी एकी रौ खून कियौ थौ। ⁸ तैबै सारी भीड़ पिलातुसा काऐ आगुड़ै डेइयौ पिलातुसा लै बोलदै लागै कि, “ ज़िणौ तुमै हर साल कौराई। ऐज़ी बारै भी तिणौ कौरौ। आमुलै एक कैदी आज़ाद कौरौ।” ⁹ पिलातुसै तिउंलै ज़वाब दैऔ, “ का तुमै च़ाहा ई कि हाऊं तुमुलै एस यहूदी रौ राज़ौ आज़ाद कौरू?” ¹⁰ कैलै कि सेऊ ज़ाणा कि बौड़ै याजक लोग यीशु री मीश कौराई और यीशु तैबै इ पकड़ाऔ आ। ¹¹ बौड़ै याजकु ऐ भीड़ा रै लोगु लै बोलौ कि यीशु नाईं बल्कि बरअब्बा नावां रौ कैदी मांगौ। तैबै भीड़ा रै लोग मांगदै लागै कि बरअब्बा नावां रौ आदमी आज़ाद कौरौ। सेज़ै बौग्तै रोमी सरकारा री ज़ेला दी कुछ़ इणै कैदी भी थै ज़ुणिऐ रोमी सरकारा रै बिरोधा ई आन्दोलन कौरियौ काई लोग झ़ांगै ई। ईउं मांझिऐ एक बरअब्बा नावां रौ कैदी भी थौ। ¹² तैबै पिलातुसै पूछ़ौ कि, “हाऊं यहूदी लोगु रै राज़ै रौ का कौरू?” ¹³ भीड़ा रै लोगुऐ ज़ोरै बोलौ, तेस क्रूसा माथै च़ड़ाऔ” ¹⁴ पिलातुसै बोलौ, “कैलै? तिणिऐ का बूरौ कियौ आ?” पर सै लोग औज़ौ भी ज़ोरै-ज़ोरै बोलदै लागै कि, “एस क्रूसा माथै च़ौड़ाऔ।” ¹⁵ तैबै पिलातुसै भीड़ा रै लोग खुश कौरना लै बरअब्बा नावां रौ कैदी आज़ाद कियौ। और यीशु रोमी सिपाइऊ कै कोड़ै मारना लै और क्रूसा दी च़ड़ाउणा लै साम्बी ऐरौ आ।

सिपाइउ रै ज़ौरिऐ यीशु री बेइज्ज़ती

(मती27:27-31; यूहन्ना19:2,3)

¹⁶ रोमी सिपाईउ ऐ यीशु पिलातुसा रै महला री खोल़ी भीतै निंऔ। तिऐ तिउंऐ सारै सिपाई कौठै कियै। ¹⁷ तैबै यीशु रौ मज़ाक उड़ाउणा लै यीशु कै एक बैंगनी रौंगा रौ च़ोगौ भिड़ाऔ ज़िणौ राज़ै लोग भीड़ा थै। और तिउंऐ यीशु रै मुंडा दी काँडेऊ रौ एक ताज बेलिऔ लाऔ। ¹⁸ तैबै सै लोग “ यहूदीउ रै राज़ै री ज़ै ज़ै” बोलियौ यीशु रौ मज़ाक उड़ाऊंदै लागै। ¹⁹ सिपाई घड़ी-घड़ियै यीशु मूंडा दी छिवांटी री लाईंदै लागै। और यीशू माथै थूकदै भी लागै। और सै मज़ाका दी यीशु रै सामनै धौनी झुकियौ नमस्तै कौरदै लागै ²⁰ ज़ैबै तिउंऐ आच्छ़ा कौरिऐ मज़ाक ऊड़ाऔ तैबै सिपाईउऐ सै बैंगनी रौंगा रै जुड़कै उतारियौ तेसकै तेसी रै ज़ुड़कै भिड़ाऐ। तैबै यीशु क्रूसा माथै च़ड़ाउणा लै तेस शहरा कु बाइरै निंऔ।

यीशु क्रुसा माथी च़ौड़ाऊणौ

(मती27:32-44; लूका23:26-43; यूहन्ना19:17-27)

²¹ यीशु क्रूस आपणै काछ़ा माथै च़ुंगियौ आण्डदै थौ लागौ औन्दौ। तैबै बाटा दी सिपाइउऐ एक आदमी पाकड़ौ ज़बर ज़ौस्ती तेसकु क्रूस च़ुंगाउणै भेज़ौ। सौ आदमी कुरैन नांवा रै देशा रौ रौइणै वाल़ौ थौ। सौ गांवा कु आशदै थौ लागौ औन्दौ। तेस आदमी रौ नाऊं शमौन थौ ज़ो सिकन्दर और रूफुस नावां रै दुई छ़ोहरू रौ बाब थौ। ²² क्रूसा माथै च़ड़ाऊणा लै एक ज़गाह थी ज़ासरौ नाउं गुलगुता थौ। गुलगुता रौ मतलब आ खोपड़ी ज़ीणी ज़ागाह। तिउंऐ यीशु तिऐ आणौ। ²³ क्रूसा माथै च़ड़ाउणा कु पैहलै बेदणी मिटाउणा लै तिउंऐ अंगूरा रै रसा दी मुर्र नावां री ज़ौड़ी-बूटी मिलाइयौ यीशु लै पिलाउणा री कोशिश की पर यीशुऐ नाईं पियौ ²⁴ तैबै यीशु क्रूसा माथै छ़ाड़ियौ तेसरै हाथा-बांगणेउ दी प्रेगै ठासी और यीशु रै जुड़कै रोमी सिपाइउऐ पौर्च़ी टालियौ आपु मांझिऐ बांटै। ²⁵ दोउती लगभग नौ बाज़ै तिउंऐ यीशु क्रूसा माथै च़ड़ाऔ। ²⁶ क्रूसा माथै एक तख्ती भी टांगी ज़ासदी यीशु लै लिखौ औन्दौ थौ कि, “यहूदी लोगू रौ राज़ौ।” ²⁷ यीशु आइलै दुई डाकु भी थै ज़ो अलग अलग क्रूसा माथै थै च़ड़ाऐ औन्दै। एक थौ यीशु री सुल्टी भीलै और एक थौ उल्टी भीलै। ²⁸ ज़िणौ धर्मशास्त्रा दी भौरी पैहलै यीशु रै बारै दी आशणै वालै बौग्ता री बूश कौरियौ लिखो थौ कि, “सौ कैदीऊ मांझ़िऐ गिणौ आ,” सेज़ौ वचन पूरौ हुऔ आ। ²⁹ तिऐ बाटा दी आशणै-डेउणै वाल़ै लोग भी यीशु री बेईज़्ज़ती थै कौरदै लागै औन्दै। सै आपणै मुंडा हिलाई-हिलाईयौ थै बोलदै लागै औन्दै कि, “अरे, परमेश्वरा रौ घौर ढाल़ियौ चिजै दिना दी तेस चाणनै वाल़ौ! ³⁰ आबै क्रूसा कु उतरियौ देखाऊ और आपू ता बच़।” ³¹ यहूदी शास्त्री और बौड़ै याजक भी यीशु रौ मज़ाक उड़ाईयौ बोलदै लागै कि, “इणिऐ ता दूजै लोग बौच़ाऐ ई आबै आपू ना बौच़ी बौल़दौ। ³² इयौ आपूलै मसीह और इस्रायला रौ राज़ौ माना आ। अगर इयौ आमारै सामनै क्रूसा कु उतरा लौ ता आमै भी ऐस माथै विश्वास कौरी ई।” यीशु आइलै ज़ो दुइया भीलै डाकु थै टांगै औन्दै सै भी यीशु रौ मज़ाक उड़ाउंदै थै लागै औन्दै।

यीशु रै प्राण छ़ाड़नै

(मती27:45-56; लूका23:44-49; यूहन्ना19:28-30)

³³ दुसै लगभग बारह बाज़ै सारै देशा दी ईनारौ हुऔ और चिआ घांटै झ़ाऊं ईनारौ थौ। ³⁴ दुसकै चिआ बाज़ै यीशुऐ ज़ोरै आपणी बोली दी बोलौ, “इलोई, इलोई लमा शबक्तनी” ज़ासरौ मतलब आ, “मैरै परमेश्वर! मैरै परमेश्वर! ताऐं हाउँ कैलै छ़ाड़ी ऐरौ ऊ?” ³⁵ तिऐ ज़ो लोग खौड़ै थै, कुछ़ लोगुऐ इणै शुणियौ गलत समझ़ियौ बोलौ, “शुण! इयौ एलियाह गुरू लै आ औटाइंदै लागौ औन्दौ।” ³⁶ एक आदमी फेटा मारियौ एक स्याईचूश सिरकै दी भिज़ाइयौ एक लांबै डिंगै दी बानियौ यीशु लै दैन्दै लागौ ताकी यीशु तेस चुशियौ पिया। तैबै कुणिऐ बोलौ, रुक! देखी ऐरी कि एलियाह गुरू एस क्रूसा कू उतारदै आशा कि नाईं।” ³⁷ यीशुऐ औज़ौ राड़ मारी और तेबी प्राण छ़ाड़ै। ³⁸ तियां ताकै यरूश्लेम शहरा दी परमेश्वरा रै घौरा भितै सारेउ कु शुद्ध ज़गाह दी सामनै ज़ो परदौ थौ, सौ माथा कु तौल़ झ़ाऊं च़ीरुइयौ दुई भिलै हुऔ। ³⁹ यीशु काऐ ज़ो रोमी सिपाइउ रौ आफसर थौ तीणिऐ देखौ कि, यीशु किणौ मौरौ आ, तैबै तीणिऐ बोलौ, “सौच्च़ी ई, ईयौ आदमी परमेश्वरा रौ छ़ोहरू थौ।” ⁴⁰ काईऐ छ़ेउड़ी दूरा कु थी लागी ऐंदी देखदै। इयै छ़ेउड़ी गलील परदेशा कु थी यीशु आइलै यरूश्लेमा दी आशी औंदी, तिऊं मांझिऐ मगदल गांवा री एक मरियम थी और दूजी याकूब और यौसेसा री आमा मरियम थी, और सलोमी नावां री एक छ़ेउड़ी भी थी। ⁴¹ औज़ौ भी मोकती छ़ेउड़ी थी तिऐ। ज़ेबी यीशु गलील परदेशा दी थौ तेबी इयै सारी छ़ेउड़ी तेस पिछ़ु डेईयौ तेसरी सेवा कौरा थी।

यीशु ओडाच़ी दी छ़ाड़नौ

(मती27:57-61; लूका23:50-56; यूहन्ना19:38-42)

⁴² ज़ैबै ब्याल़ हुई ऐरी ता एथीलै कि तैयारी रौ दीन थौ, ज़ो सब्ता रै दिना कु एक दिन पैहलै हुआ थौ। ⁴³ तेबी अरमतिया रै रौइणा वाल़ौ यूसुफ आशौ ज़ो बौड़ी खुंबल़ी रौ ज़ौणौ थौ और आपु भी परमेश्वरा री राज़्या री बाट लोड़ा थौ तिणीऐ हिम्मत छ़ाड़ियौ पिलातुसा कु यीशु रौ मौड़ौ मांगौ। ⁴⁴ पिलातुस हैरान हुऔ कि यीशु एती शीग्री किणौ मौरौ आ। तैबै तीणिऐ सौ आफसर औटाऔ ज़ुणिऐ यीशु क्रूसा माथै च़ड़ाऔ थौ। पिलातुसै आफसरा कु पूछ़ौ का यीशु मौरी गौ आ? ⁴⁵ ज़ेबी तीणी रोमी सिपाइउ रै आफसरै बोलौ कि यीशु मौरी गौ आ तैबै पिलातुसै यीशु रौ मौड़ौ निणै दैऔ। ⁴⁶ तैबै युसुफै लाठै रौ कापड़ौ खरीदियौ आणौ। और यीशु रौ मौड़ौ क्रूसा कु धौनी गाड़ियौ तेस लाठै दी मेटौ और तैबै एक ओडाच़ी दी छ़ाड़ौ ज़ो ढोकै दी काटियौ थी चाणी ऐंदी और सै ओडाच़ी एक बौड़ै पात्थरा कौरिऐ बंद कौरी। ⁴⁷ मगदल गांवा री मरियम, और योसेसा री आमा मरियम, दुइया देखदै थी लागी औंदी कि यीशु रौ मौड़ौ किऐ छ़ाड़ाई।

यीशु रौ दूजी बारै जिंऊँदौ हुणौ

(मती28:1-8; लूका24:1-12; यूहन्ना20:1-10)

¹ ज़ैबै यहूदी लोगु रौ आरामा रौ दीन खत्म हुई गौ थौ, तेबी मगदल गाँवा री मरियम, सलोमी और याकूबा री आमा मरियम, इउं चिन छ़ेउड़िउऐ यीशु रै मौड़ै दी लाईणा लै खुशबुदार समान खरीदियौ आणौ। ² दुजै दिनै ज़ो हौफ्तै रौ पैहलौ दीन थौ, तेबी दोउतौ च़िलकी आरी इयै चिन छ़ेउड़ी सेज़ी ओडाच़ी भिलै च़ाल पौड़ी ज़िऐ यीशु रौ मौड़ौ थौ छ़ाड़ौ औन्दौ। ³ सै आपु मांझीऐ थी लागी औन्दी बोलदै कि, “आमु कालै भितरै डेउणा लै तेस पात्थर कुण गाड़ा सा, ज़ो ओडाच़ी बंद कौरना लै आ लाऔ औन्दौ। ⁴ ज़ेबी तिउंऐ तिऐ पंउच़ियौ देखौ ता सौ बौड़ौ पात्थर थौ तिदरा कु पोरु पा घिसरौ औन्दौ। ⁵ सै छ़ेउड़ी तिऐ ओडाच़ी भीतै डेई ता तिऐ सुल़टी भिलै थौ एक ज़वान आदमी शेतै जुड़कै भिड़ियौ बोशौ औन्दौ। सै छ़ेउड़ी हैरान हुई। ⁶ तीणिऐ तिऊं छ़ेउड़ी लै बोलौ, “हैरान ना हुऔ। तुमै नासरता रौ यीशु लोड़दै ई लागी औन्दी ज़ो क्रूसा माथै थौ च़ौड़ाऔ औन्दौ। सौ ज़िउँदौ हुई गौ आ। सौ इदै नाई आसतौ। देखौ, एज़ी ज़ागाह दी थौ छ़ाड़ौ औन्दौ। ⁷ तुमै आबै डैऔ। यीशु रै च़ेलेउ लै, और खास कौरिऐ पतरसा लै बोलौ कि यीशु तुमकु औगाड़िऐ गलील परदेशा लै डिआ सा और तिऐ तुमै तेस देखा ई, ज़िणौ तिणिऐ बोलौ थौ। ⁸ सै छ़ेउड़ी बाइरै आशियौ तिदरु भागी। सै कांबदै थी लागी औन्दी और डौरी औन्दी थी। तिऊं छ़ेउड़िउऐ कासी कै ना बोलौ कैलै कि सै डौरी गोई थी।

मरियम मगदलीनी कै यीशु दिशणौ

(मती28:9-10; यूहन्ना20:11-18)

⁹ हौफ्तै रै पैहलै दिना दी दोउती ज़ेबी यीशु ज़िउंदौ हुऔ ता पैहलै मगदल गांवा री मरियमा कै दिशौ। ज़ासकु यीशुऐ सात बुरी आत्माऐं गाड़ी थी। ¹⁰ तिदरौ डेइयौ तिऐं इयै बुशै यीशु रै साथिउ कै बोली ज़ो यीशु लै शोक कौरदै और लेरदै थै लागै औन्दै। ¹¹ ज़ेबी तिऊं च़ेलेउऐ शुणौ कि यीशु ज़िउंदौ हुई गौ आ और मरियमा कै दिशौ आ तैबै तिउंकै विश्वास ना हुऔ।

दुई च़ेलेउ कै यीशु दिशणौ

(लूका24:13-35)

¹² तेत बासिऐ यीशु दुई च़ेलेउ कै भी दिशौ ज़ो आपणै गांवा लै थै लागै औन्दै डेउंदै। ¹³ तिउंऐ भी वापिस यरूश्लेमा दी डेइयौ ओरी च़ेलेउ कै यीशु रै बारै दी बोलौ पर तिऊं च़ेलेउऐ तैबै भी विश्वास नांई कियौ।

ग्याराह च़ेलेउ कै यीशु दिशणौ

(मती28:16-20; लूका24:36-49; यूहन्ना20:19:23; प्रेरितों1:6-8)

¹⁴ तेत बासिऐ यीशु तिऊं ग्यारह च़ेलेउ कै भी दिशौ ज़ेबी सै रोटी खान्दै थै लागै औन्दै। यीशुऐ सै च़ेलै डांटै कैलै कि तिंउरै मन डीठ बौणी गोऐ थै और ज़ुणिऐ भी यीशु ज़िउंदै हुणै बासिऐ देखौ थौ, तिउंरी बुशैऊ माथै तिऊं च़ेलेउऐ विश्वास नांई कौरौ। ¹⁵ तैबै यीशुऐ तिउंलै बोलौ, “तुमै सारी दुनिया दी डेइयौ सारै लोगू कै खुशी रौ संदेश शुणाऔ। ¹⁶ ज़ो आदमी खुशी रै खौबरा माथै विश्वास कौरा लौ बपतिस्मा निआं लौ सौ बौच़ा आ। पर ज़ो खुशी रै संदेशा माथै विश्वास नांई कौरालौ सौ परमेश्वरा री तौरफा कु सज़ा पा सा ¹⁷ विश्वास कौरनै वाल़ेउ री पहचान इयै हुआ कि सै मैरै नांवा कौरिऐ बूरी आत्मा गाड़ा ई। ¹⁸ और नौई-नौई बोली बोलाई। और सै गौल़ती दी साप भी छ़ूआं लै, या कोई बीश भी पिआ लै तैबै भी तिउंलै कुछ़ ना हुंदौ। और सै बीमार लोगु माथै हाथा छ़ाड़ियौ ता सै बीमार लोग भी च़ांगै हुआ ई।”

यीशु रौ सौरगा लै डेऊणौ

(लूका24:50-53; प्रेरितों1:9-11)

¹⁹ इउं बुशु बोलियौ परमेश्वरै प्रभु यीशु सौरगा लै उठाऔ। सौरगा दी डेईयौ प्रभु यीशु परमेश्वरा रै सुल़टी भिलै बोशौ। ²⁰ तेत बासीऐ प्रभु यीशु रै च़ेलै तीदरु डेइयौ सारी ज़ागाह दी खुशी रौ संदेश शुणाउंदै लागै। तैबै प्रभु यीशु तिउंरै ज़रिऐ हैरानी वाल़ै काम कौरदै लागौ ज़िणै कौरिऐ लोगु कै पौतौ कि इयौ खुशी रौ संदेश सच्च़ौ आ।