मत्ती

Matthew

मत्ती

यीशु रौ वंश (लूका 3:23-38)

¹ अब्राहमा री सन्तान, दाऊदा री सन्तान, यीशु रौ वंश। ² अब्राहम कु इसहाक पैदौ हुऔ, इसहाका कु याकूब पैदौ हुऔ, याकूबा कु यहूदा और तेसरै भाई पैदै हुऐ ³ यहूदा और तामारा कु फिरिस और जोरह पैदौ हुऔ, फिरिसा कु हिस्त्रोन पैदौ हुऔ, और हिस्त्रोना कु एराम पैदौ हुऔ, ⁴ एरामा कु अम्मीनादाब पैदौ हुऔ, अम्मीनादाबा कु नहशोन, और नहशोन कु सलमोन पैदौ हुऔ, ⁵ सलमोन और राहबा कु बोअज पैदौ हुऔ, बोअज और रुता कु ओबेद पैदौ हुऔ, और ओबेदा कु यिशै पैदौ हुऔ, ⁶ और यिशै कु दाऊद राज़ौ पैदौ हुऔ। और दाऊदा कु सुलैमान तियां छ़ेउड़ी कु पैदौ हुऔ ज़ुण पैहला उरिय्याह रै छ़ैऊड़े थै, ⁷ सुलैमाना कु रहबाम पैदौ हुऔ, रहबामा कु अबिय्याह पैदौ हुऔ, और अबिय्याहा कु आसा पैदौ हुऔ, ⁸ आसा कु यहोशाफात पैदौ हुऔ, यहोशाफाता कु योराम पैदौ हुऔ, और योरामा कु उज्जियाह पैदौ हुऔ, ⁹ उज्जियाहा कु योताम पैदौ हुऔ, लयौतामा कु आहाज पैदौ हुऔ, और आहाजा कु हिजकिय्याह पैदौ हुऔ, ¹⁰ हिजकिय्याहा कु मनश्शिह पैदौ हुऔ, मनश्शिहा कु आमोन पैदौ हुऔ, और आमोना कु योशिय्याह पैदौ हुऔ; ¹¹ और बंदी बौणियौ बेबीलोन डेऊंणा रै बौग्तै दी योशिय्याह कु यकुन्याह, और तेसरौ भाई पैदौ हुऔ। ¹² बंदी बौणियौ से बेबीलोना दी निणा कु बासिऐ यकुन्याह कु शालतिएल पेदा हुऔ, और शालतिएला कु जरुब्बाबिल पैदौ हुऔ, ¹³ जरुब्बाबिला कु अबीहूद पैदौ हुऔ, अबीहूदा कु इल्याकीम पैदौ हुऔ, और इल्याकीमा कु अजोर पैदौ हुऔ, ¹⁴ अजोरा कु सदोम पैदौ हुऔ, सदोमा कु अखीम पैदौ हुऔ, अकीमा कु इलीहूदा पैदौ हुऔ, ¹⁵ इलीहूदा कु इलियाजार पैदौ हुऔ, इलियाजारा कु मतान पैदौ हुऔ, मताना कु याकूब पैदौ हुऔ, ¹⁶ याकूबा कु यूसुफ पैदौ हुऔ, ज़ुण मरियमा रौ बोउटौ थौ, और मरियमा कु यीशु ज़ासलै मसीह भी बोलाई, पैदौ हुऔ। ¹⁷ इणै कौरी अब्राहमा कु दाऊदा झ़ाऊं चौदहा पीड़ी हुई, और दाऊदा कु बेबीलोना लै गुलाम हुईऔ पौउंच़णै झ़ाऊं चौदहा पीड़ी, गुलाम चाणीऔ बेबीलोना दी पौच़णै झ़ाऊं रै बौग्ता कु मसीह झ़ाऊं चौदहा पीड़ी हुई।

यीशु रौ ज़ौनम (लूका 1:26-38, 2:1-7)

¹⁸ यीशु मसीह रौ जनम इणै कौरी हुऔ, कि ज़ेबी तेसरी मां मरियमा री मांगणी युसुफा आइलै हुई गोई, ता तिंउरै कौठै हौणै कु पैहलै ई मरियम पवित्र आत्मा री तौरफा कु गौरकड़ी हुई। ¹⁹ तैबै तियांरौ बोउटौ यूसुफ ज़ुण धर्मी थौ और तिऐं बदनाम कौरणौ नाईं च़ाहा थौ, तिऐं च़ुटुक च़ार पोरु छ़ाड़नै रै बारै दी सुंच़दै लागौ। ²⁰ ज़ेबी सेऊ ईऊं बुशै सुंच़दै थौ लागौ औन्दौ ता प्रभु रौ स्वर्गदूत तेसरै सुइणै दी दिशियौ बोलदै लागौ, “ओ यूसुफ! दाऊदा री औलाद, तू आपणी छ़ेउड़ी मरियम आपणै रै काऐ आणना लै नाईं डौर, कैलैकि ज़ो तियांंरै गर्भा दी आ, सेऊ पवित्र आत्मा री तौरफा कु आ। ²¹ सै छ़ोहरु पैदौ कौरा और तू तेसरौ नाऊं यीशु छ़ाड़ै, कैलैकि सेऊ आपणै लोगु रौ तिंउरै पापा कु छ़ुटकारौ कौरा लौ।” ²² एऊ सब एथीलै हुऔ कि ज़ो वचन प्रभु रै गुरु रै ज़रीऐ बोलौ औन्दौ थौ, सेऊ पुरौ हुआ : ²³ “देखौ, एक कुंवारी गौरकड़ी हुआ और एक छ़ोहरु पैदौ कौरा, और तेसरौ नाऊं इम्मानुएल हुणौ, ”ज़ेथरौ मतलब आ—परमेश्वर आमु आइलै आ। ²⁴ तैबै यूसुफ नीजा कु बीऊज़ुऔ प्रभु रै दूता रौ हुकमा कौरी आपणी छ़ेउड़ी आपणै घौरै आणी; ²⁵ और ज़ेबी झ़ाऊं तिआंरौ छ़ोहरु नाईं हुआ लौ तेभी झ़ाऊं सेऊ तियां काऐ नाईं डैऔ : और तिणीऐ तेसरौ नाऊं यीशु छ़ाड़ौ।

ज्योतिषी रौ आशणौ

¹ हेरोदेस राज़ा रै बौग्ता दी ज़ेबी यहूदिया रै बैतलहमा दी यीशु रौ जनम हुऔ, त देखौ, पूर्वा कु कई धर्मा रै गुरु यरुशलेमा दी आशियौ पूछ़दै लागै। ² की यहूदिया रौ राज़ौ ज़ासरौ जनम हुऔ सा, कियै सा? आमुऐ पूर्वा कु तेसरौ तारौ देखौ आ और आमै तेसकै ढाल कौरदै आशै औन्दै। ³ इणौ शुणियौ हेरोदेस राज़ौ और तेस आइलै सारौ यरुशलेम डौरी गौ। ⁴ और तिणीऐ लोगु रै सौबी महायाजक और शास्त्री कौठै कौरीयौ तिऊंकु पूछ़ौ, की मसीह रौ जनम किऐ हुणौ च़ाईं? ⁵ तिउंऐ तेसलै बोलौ, “यहूदिया रै बैतलहमा दी; कैलैकि भविष्यवक्ता री तौरफा कु इणौ आ लिखौ औन्दौ। ⁶ “ओ बैतलहम, ज़ो यहूदा रै देशा दी आ, तू किणै कौरीऐ भी यहूदा रै सौबी अधिकारीउ कु छ़ोटौ नाईं; कैलैकि ताऊं मांझ़िआ कु एक अधिपति निकल़ा सा, ज़ो मेरी प्रजा इस्राएला री रखवाली कौरालौ। ⁷ तैबै हेरोदेसै धौर्मा रै गुरु च़ुटुक च़ार औटाइऔ तिऊंकु पुछ़ौ, की तारौ ठीक कैज़ै बौग्तै दिशौ थौ। ⁸ और तिणीऐ इणौ बोलीऔ सै बैतलमहा लै भेज़ै, की डेइऔ तेस माऊं रै बारै दी ठीक-ठीक पौतौ कौरौ और ज़ेबी सेऊ मिला लौ ता मुंकै खबर कौरैऊ ताकी हाऊं भी आशियौ तेसकै ढाल कौरु। ⁹ सै राज़ै री बुशै शुणियौ डेई गौऐ, और देखौ, ज़ो तारौ तिउंऐ पूर्वा दी देखौ थौ, सैऊ तिऊंकु औगाड़ी-औगाड़ौ च़ालौ, और ज़ीऐ माऊं थौ, सेज़ी ज़ागा दी पौंउच़िऔ टेकी गौ। ¹⁰ तेस तारै देखियौ सै भौरी खुश हुऐ। ¹¹ और तेस घौरा दी पौउंच़ियौ सेऊ माऊं तेसरी मां मरियम आईलै देखौ, और आपणौ-आपणौ झ़ोल़ौ खोलियौ तेस कालै सूनौ, और लोबान, और खुशबुदार च़ीज़ै भेटा देई। ¹² और सुइणै दी स्वर्गदुतै इणौ हुकम दैऔ की हेरोदेशा काऐ औज़ौ नाईं डेवेऊ, सै दुज़ी बाटा दी डेईयौ आपणै देश मिस्रा लै डेई गौऐ।

मिस्र देशा लै डेऊणौ

¹³ तिंउरै डेउणै बासीऐ प्रभु रै एकी दूतै सुइणै दी आशीयौ यूसुफा कै दिशीयौ बोलौ, “उठ, एस माऊं और एसरी मां निंउ और मिस्र देशा लै डेऊ; और ज़ेबी झ़ाऊं हाऊं ताउंकै नाईं बोलुलौ तेबी झ़ांऊ तिऐ रौऊ; कैलैकि हेरोदेस ऐस माऊं लोड़दै लागौ औन्दौ ताकी एस पोरु झ़ांगा।” ¹⁴ तैबै सै राची उठीयौ माऊं और तेसरी मां निंइऔ मिस्रा लै डेई गौऐ, ¹⁵ और हेरोदेसा रै मौरणै झ़ाऊं तिऐ ई रौऐ। एथीलै की सेऊ वचन ज़ो प्रभुऐ गुरु री तौरफा कु बोलौ औन्दौ थौ पूरौ हुऔ : “मुंईऐ अपणौ छ़ोहरु मिस्रा कु औटाऔ।” ¹⁶ ज़ेबी हेरोदेसै इणौ देखौ, की धर्मा रै गुरुऐ तेस आईलै धोखौ कियौ आ, तैबै सेऊ रोशा कु भौरुऔ, और लोग भेज़ीऔ धौर्मा रै गुरु रै ज़रीऐ ठीक-ठीक बोलै औन्दै बौग्ता रै अनुसार बैतलहम और तेसरै ओरु-पोरु री ज़ागहा रै सौबी माऊं ज़ो दुई साला रै या तिऊंकु छ़ोटै थै, झ़ांगी गौऐ। ¹⁷ तैबै ज़ो वचन यिर्मयाह गुरुऐ बोलौ औन्दौ थौ, सेऊ पूरौ हुऔ : ¹⁸ “रामाह दी एक करुण-नाद शुणुऔ, लेरणौ और बौड़ौ दु:ख राहेल आपणै माऊं लै थी लेरदै लागी औन्दी, और च़ुटुक रौइणौ नाईं च़ाहा थी, कैलैकि सै आबै नाईं रौऐ।”

मिस्र देशा कु वापिस आशणौ

¹⁹ हेरोदेसा रै मौरणै बासीऐ, प्रभु रै दुतै यूसुफा कै सुइणै दी दिशीयौ बोलौ, ²⁰ “उठ माऊं और तेसरी मां निंइऔ इस्राइला रै देशा दी डेऊ, कैलैकि ज़ो माऊं रौ प्राण निणौ च़ा थौ, सेऊ मौरी गौ आ।” ²¹ सेऊ ऊज़ुऔ, और माऊं और तेसरी मां आपु आईलै निईंऔ इस्राइला रै देशा दी आशौ। ²² पर इणै शुणियौ की अरखिलाउस आपणै बाब हेरोदेसा री ज़ागाह दी यहूदिया माथै राज़ कौरदै आ लागौ औन्दौ। तिऐ डेउणा लै डोरौ। तैबै सुइणै दी परमेश्वरा कु हुकुम मिलीऔ गलील परदेशा दी डेई गौ, ²³ और नासरत नावां रै गावां दी डेईऔ बौसौ, ताकी सेऊ वचन पूरौ हुआ, ज़ो भविश्यवक्तु री तौरफा कु बोलौ औन्दौ थौ : “तेसलै नासरी बोलाई।”

यूहन्ना बपतिस्मौ देणै वाल़ौ

(मरकुस 1:1-8, लूका 3:1-18, यूहन्ना1:6-8,15-34)

¹ सेज़ै बौग्ता दी यहून्ना बप्तिस्मा दैणै वाल़ौ आशियौ यहूदिया रै ज़ांगल़ा दी इणौ परचार कौरदै लागौ : ² “मन बौदलौ, कैलैकि सौरगा रौ राज़ नज़दीक आशी गौ आ।” ³ ऐऊ सेऊ आ ज़ासरै बारै दी यशायाह गुरुऐ बोलौ थौ, “ज़ांगल़ा दी एक आकै मारीयौ बोलदै आ लागौ औन्दौ, की प्रभु री बाट तयार कौरौ।” तेसरी बाट सीधी कौरौ। ⁴ यूहन्नै ऊंटा रै बाल़ा रै जुड़कै भीड़ै औन्दै थै, और आपणी कौमरा दी च़ामड़ै रौ गाच़ौ थी बानी ऐनदी। तेसरी रोटी थाड़ै और बौणा री माक्खी रौ मौ थौ। ⁵ तैबै यरुश्लेम और सारौ यहूदिया और यरदना रै ओरु-पोरु रै सौबी ज़ागाहा रै लोग तेस काऐ निकल़ीऔ आशै। ⁶ तिउंऐ आपणै-आपणै पाप मानीऔ यरदन नौईं दी तेसकु बप्तिस्मौ निंऔ। ⁷ ज़ेबी तिणीऐ भौरी फरीसि और सदुकि लोग बप्तिस्मा लै आपु काऐ आशदै देखै, त तिणीऐ बोलौ, ओ सापा रै लोल़डेउओ, तुमुकै कुणीऐ बोलौ कि आशणै वाल़ै रोशा कु भागौ? ⁸ आबै तुमै मन बदुल़नै लाईक फल़ आणौ। ⁹ और आपणै-आपणै मौना दी इणौ नाईं सुंच़ौ की आमारौ बाब इब्राहिम आ; हाऊं तुमुलै बोलाऊ की परमेश्वर इंऊ पात्थरु कु भी इब्राहमा कालै सन्तान पैदौ कौरी बौल़ा सा। ¹⁰ आबै कुराड़ पेडु री ज़ौड़ी काऐ छ़ाड़ी औन्दी आ, ताकी ज़ो पेड़ आच़्छ़ौ फल़ नाईं आणदौ, तेस काटियौ आगी दी पा आ। ¹¹ हाऊं ता पाणी कौरी तुमुलै मन बौदुल़णै रौ बप्तिस्मौ दिआऊ, पर ज़ो मुं बासीऐ आशणै वाल़ौ आ; सेऊ मुंकु भी ताकती वाल़ौ आ; हाऊं ता तेसरै बुटा च़ुंगणै रै लाईक भी नाईं आसतौ। सेऊ तुमुलै पवित्र आत्मा और आगी कौरी बप्तिस्मौ दिआ। ¹² तेसरौ शुपौ तेसरै हाथा दी आ, और सेऊ आपणौ खौल़ौ आच़्छै कौरीऐ साफ कौरा, तैबै गिऊं छ़ाड़ा आपणी खौन्दीआल़ी दी भूस ज़ाल़ा आगी दी ज़ो आग केबी ना इशदी।

यूहन्ना कौरी यीशु रौ बपतिस्मौ

(मरकुस 1:9-11, लुका 3:21,22, यूहन्ना 1:31-34)

¹³ सेज़ै बौग्तै यीशु गलीला कु यरदन नौईं रै डिका दी यूहन्ना काऐ तेसकु बप्तिस्मा निंदै आशौ। ¹⁴ पर यूहन्ना इणै बोलियौ तेस रोकदै लागौ, “मुं ता तैरै हाथा कु बप्तिस्मा निणैं री ज़रुरत आ, और तू आशौ मुं काऐ?” ¹⁵ यीशुऐ तेसलै ज़वाब दैऔ, “आबै ता इणी ई हौणै दै, कैलैकि आमुंऐ इणी ई रीति कौरी धौर्मा रै सौबी काम पूरै कौरणै ठीक आ।” तैबै तिणीऐ तेसरी बुशै मानी गोई। ¹⁶ और यीशु बप्तिस्मा निइंऔं खरकच़ार पाणी मांझ़ीऊ कु उपरै आशौ, और देखौ, तेसलै सौरग खुली गौ, और परमेश्वरा री आत्मा कबुतरा रै रुपा दी यीशु माथै आशी। ¹⁷ और देखौ, सौरगा कु परमेश्वरा री हाक शुणुई : “ऐऊ मैरौ प्यारौ छ़ोहरु आ, एसकु हाऊं भौरी खुश ऊ।”

यीशू परखुणौ

(मरकुस 1:12-13, लूका 4:1-13)

¹ तैबै आत्में यीशु ज़ांगल़ा दी नियौं ताकी शैताना कौरी तेसरौ इम्ताहान हुआ। ² यीशु चालिस दिन और चालिस राची भूखौ रौ, तैबै यीशु कै भूख लागी। ³ तैबै पौरखणै वाल़ै नज़दीक आशियौ तेसलै बोलौ, “अगर तू परमेश्वरा रौ छ़ोहरु ई, ता बोल, की इऐ पात्थर रोटी बौणा।” ⁴ यीशुऐ ज़वाब दैऔ, “लिखौ औन्दौ आ, ‘आदमी सिरफ रोटी ई कौरी नाईं, पर हर एकी वचना कु ज़ो परमेश्वरा रै मुंआ कु निकल़ौ औन्दौ आ, ज़ीउंदौ रौआ लौ।” ⁵ तैबै शैतानै यीशु पवित्र गाउं यरुश्लेमा दी नीं गौ, और परमेश्वरा रै घौरा रै छ़ापरा माथै खौड़ौ कियौ, ⁶ और तेसलै बोलौ, “अगर तू परमेश्वरा रौ छ़ोहरु ई, ता इदरु तौल़ै फाल़ दै; कैलैकि लिखौ औन्दौ आ : ‘सेउ तैरै बारै दी आपणै दूता लै हुकम दिआ आ, और सै ताऊं हाथा-हाथा दी च़ुंगा ई ताकी तैरै बांगणै दी पात्थरा कौरी ठोकर ना लागा।’” ⁷ यीशुऐ तेसलै बोलौ, “इणौ भी लिखौ औन्दौ आ : ‘तू प्रभु आपणौ प्रभु परमेश्वर नाईं पौरखै।" ⁸ तैबै शैतानै यीशु एक भौरी ऊंच़ै पहाड़ा माथै निऔं और दुनिया रौ सारौ राज़ और तेथरौ सुख देखाल़ियौ, ⁹ तेसलै बोलौ, “अगर तू मुकै झुकियौ ढाल कौरालौ, ता हाऊं एस सारौ कुछ़ ताउंकै दिआ ऊ।” ¹⁰ तैबै यीशुऐ तेसलै बोलौ, “ओ शैतान दूर डेऊ, कैलैकि लिखौ औन्दौ आ : ‘तू प्रभु आपणै परमेश्वरा कै ढाल कौर, और सिर्फ तेसी री भौक्ती कौर।’” ¹¹ तैबै शैतान तेस काऐ कु डेई गौ, और देखौ, सौरगा रै दूत तेस काऐ आशियौ यीशु री सेवा कौरदै लागै।

यीशु री सेवा रै कामा री शुरुआत

(मरकुस 1:14,15; लूका 4:14,15, 31)

¹² ज़ेबी तिणीऐ इणौ शुणौ की युहन्ना कैदा दी पाई गौ, ता यीशु गलीला लै डेई गौ। ¹³ और नासरत छ़ाड़ियौ कफरनहूमा दी, ज़ो झ़ीला रै डिका काऐ जबूलून और नप्ताली रै देशा दी सा, डेईऔ रौईंदै लागौ; ¹⁴ ताकी ज़ो यशायाह गुरु रै ज़रीयै बोलौ औन्दौ थौ, सेऊ पुरौ हुआ: ¹⁵ “जबूलून और नप्ताली रै देश, झ़ीला री बाटा कु यरदना पार, दुज़ी जाति रौ गलील- ¹⁶ ज़ो लोग न्यारै दी बोशै औन्दै थै, तिउंऐ बोड़ौ प्याशौ देखौ; और ज़ो लोग मौरै औन्दै देश और छ़ांईं दी बोशै औन्दै थै, तिऊं माथै प्याशौ च़ौमकौ।” ¹⁷ सेज़ै बौग्ता कु यीशुऐ परच़ार कौरणौ और इणौ बोलणौ शुरु कौरी गौ कि, “ज़ीऊ बौदलौ कैलैकि सौरगा रौ राज्य नज़दीक आशी गौ आ।”

पैहलै च़ेलेऊ औटाऊणै

(मरकुस 1:16-20; लूका 5:1-11; यूहन्ना 1:35-42)

¹⁸ यीशुऐ गलीला री झ़ीला रै डीका काऐ घुमदै दुई भाई देखै ज़ासरै नाऊं शमौन ज़ासलै पतरस बोला ई, और तेसरौ भाई आन्द्रियास झ़ीला दी ज़ाल़ पाईंदै देखै; कैलैकि सै झ़ींवर थै। ¹⁹ यीशुऐ तिउंलै बोलौ, “मुं पीछ़ु आशौ, ता हाऊं तुमु आदमीऊ पाकुड़णै वाल़ै च़ाणाऊ।” ²⁰ सै खरकच़ार ज़ाल़ा छ़ाड़ियौ यीशु पीछ़ु हुई गौऐ। ²¹ तिदरु आगुड़ै डेईयौ, यीशुऐ तौइंऐ दुई भाई जबदी रै छ़ोहरु याकूब और तेसरौ भाई यूहन्ना देखौ। सै अपणै बाब जबदी आईलै किश्ती दी आपणै ज़ाल़ ठीक कौरदै थै लागै औन्दै। यीशुऐ सै भी औटाऐ। ²² सै खरकच़ार किश्ती और आपणौ बाब छ़ाड़ियौ तेस पीछ़ु हुई गौऐ।

यीशु बीमार आदमिउ ठीक कौरा

(लूका 6:17-19)

²³ यीशु सारै गलीला दी डेईयौ तिउंरी धार्मिक खुंबल़ी दी शिक्षा दैंदै, और राज्य रौ परच़ार कौरदै, और लोगु री हर बिमारी और लाच़ारी दूर कौरदै लागौ। ²⁴ और सारै सीरिया देशा दी यीशु री महीमा फैली गोई; और लोग सारी बिमारी, ज़ो कई रौंगा री बिमारी और दुखा दी पौड़े औन्दै थै, और ज़ासदी बुरी आत्मा थी, और मिर्गीवाल़ै और इणै आदमी ज़ासरै जिस्मा रौ केज़ो भी आंग नाईं हिला थौ, यीशु काऐ आणै और यीशुऐ सै ठीक किऐ। ²⁵ गलील और दिकापुलिस, यरुश्लेम, यहूदिया और यरदन नौईं रै पारा कु भीड़ा री भीड़ यीशु पीछ़ु आशी गोई।

यीशु रौ पहाड़ी उपदेश

¹ यीशु एज़ी भीड़ देखियौ पहाड़ी माथै डेई गौ, और ज़ेबी बोशी गौ ता तेसरै च़ेलै तेस काऐ आशै। ² और यीशु आपणौ मुं खोलियौ तिउंलै एज़ी शिक्षा दैंदै लागौ :

भौलै वच़न

लूका 6:20-23

³ “आशीष वाल़ै ई सै, ज़ो मौना रै निंऊलै ई, कैलैकि सौरगा रौ राज्य तिऊंरौ आ। ⁴ “आशीष वाल़ै ई सै, ज़ो दुख कौराई, कैलैकि सै शांति पाआ लै। ⁵ “आशीष वाल़ै ई सै, ज़ो निऊलै ई, कैलैकि सै धौतरी रै हकदार हुआ लै“। ⁶ “आशीष वाल़ै ई सै, ज़ो धौर्मा रै भुखै और चीशै ई, कैलैकि तिउंलै रौज़ीयौ मिला। ⁷ “आशीष वाल़ै ई सै, ज़ो दया कौरणै वाल़ै ई, कैलैकि तिऊं माथै दया हुआ। ⁸ “आशीष वाल़ै ई सै, ज़ासरौ मन साफ आ, कैलैकि सै परमेश्वर देखालै। ⁹ “आशीष वाल़ै ई सै, ज़ो मेल कराउणै वाल़ै ई, कैलैकि तिउंलै परमेश्वरा रै छ़ोहरु बोला ई। ¹⁰ “आशीष वाल़ै ई सै, ज़ो धौर्मा री वज़ा कु सताई आई, कैलैकि सौरगा रौ राज्य तिऊं रौ आ। ¹¹ “आशीष वाल़ै ई सै, ज़ेबी आदमी मैरै कारण तुमुरी बुराई कौराई, और सतावा और झ़ूठ बोली-बोलियौ तुमुरै बिरोधा दी सौबी रौंगा री बुरी बुशै बोला। ¹² तेबी खुश और मौगन हौणौ, कैलैकि तुमुलै सौरगा दी बौड़ौ इनाम आ। एथीलै कि तिउंऐ सै ज़ो हुणै वाल़ी बुशै बोलणै वाल़ै गुरु थै ज़ो तुमु कु पैहलै थै इणै कौरी सताऐ थै।

लूण और प्याशौ

(मरकुस 9:50; लुका 14:34-35)

¹³ “तुमै धौतरी रै लूण ई; पर अगर लूणा रौ स्वाद बिगड़ा लौ, ता सेऊ तैबै केज़ी चीज़ा कौरी लुणुऔ चाणीया लौ? तैबै सेऊ केज़ै कामा रौ नाईं, सीरफ बाइरै पाइणा लै और आदमी रै लाता थाली फेच़णा लै। ¹⁴ तुमै दुनिया रै दिवै ई। ज़ो गाउं पहाड़ी दी बौसौ औन्दौ आ सेऊ नाईं च़ोरीदौं। ¹⁵ और लोग दिवौ ज़ाल़ियौ टेबल़ा थाली नाईं पर ऊंच़ी ज़ागहा दी छ़ाड़ा ई तैबै तेसकु घौरा रै सौबी लोगु लै प्याशौ पौउंच़ा आ। ¹⁶ तिणी ई तुमुरौ प्याशौ भी आदमी काऐ च़ौमका कि सै तुमुरै भौलै कामा देखियौ तुमुरै बाबा री, ज़ो सौरगा दी आ, बौड़ाई कौरा।

कानूना री शिक्षा

¹⁷ “इणौ ना सौमझ़ौ, कि हाऊं नियम या गुरु री किताबा मिटाऊंदै आशौ ऊ, मिटाऊंदै नाईं, पर पूरी कौरदै आशौ ऊ। ¹⁸ कैलै कि हाऊं तुमुलै सौच़ौ-सौच़ौ बोलाऊ, कि ज़ेबी झ़ाऊं सौरग और धौतरी नाईं टौल़ा ली, तेभी झ़ाऊंं नियमा रौ एक बिन्दु भी पूरौ हुईयौ नाईं टौल़ा लौ। ¹⁹ एथिलै ज़ुण-कुण इऊं छ़ोटै-छ़ोटै हुकमा मांझ़ीआ कु एक भी चोड़ालौ, और तिणी ई लोगु काऐ शीखावालौ, तेसलै सौरगा रै राज्य दी सौबी कु छ़ोटौ बोला ई; पर ज़ुण कुण तेस हुकम मानालौ और लोगु लै शीखावालौ, तेसलै सौरगा रै राज्य दी बौड़ौ बोला ई। ²⁰ कैलैकि हाऊं तुमुलै बोलाऊ, कि अगर तुमरी धार्मिकता शास्त्रिऊ और फरीसिऊ री धार्मिकता कु बौड़ियौ नाईं हुआ ली, ता तुमै सौरगा रै राज्य दी केबी नाईं डेई सौकदै।

रोश और खूण कौरणौ

²¹ “तुमुऐ शुणी गौ, कि पैहलै ज़मानै रै लोगु लै बोलौ औन्दौ थौ कि ‘खून नाईं कौरणौ’ और ‘ज़ुण खून कौरालौ सेऊ कोरटा दी सौज़ा रौ हौकदार औलौ।’ ²² पर हाऊं तुमुलै इणौ बोलाऊ, कि ज़ुण आपणै भाई माथै रोश कौरालौ, सेऊ कोरटा दी सौज़ा रौ हौकदार औलौ, और ज़ुण-कुण आपणै भाई लै निकाम्मौ बोलालौ सेऊ बौड़ी खुम्बल़ी दी सौज़ा रौ हौकदार औलौ; और ज़ुण-कुण बोलालौ ‘ओ मूर्ख’ सेऊ नौरका री आगी दी सौज़ा रौ हौकदार औलौ। ²³ एथीलै अगर तू आपणी भेंट वेदी माथै आणालौ, और तिऐ ताउंकै याद आशाली, कि तैरै भाई रै मौना दी ताउंलै कुछ़ विरोध आ, ²⁴ ता आपणी भेंट तिऐ वेदी काऐ छ़ाड़, और डेइयौ पैहलै आपणै भाई कु मेल-मिलाप कर और तैबै आशियौ आपणी भेंट च़ौड़ाऊ। ²⁵ ज़ेबी झ़ाऊं तू आपणै दुश्मना आइलै बाटा दी ई, तेस आइलै फेटी मेल मिलाप कर किऐ इणौ ना च़ाईं हुऔ कि दुश्मन ताऊं हाकिमा कै दिया, और हाकिम ताऊं सिपाई रै हाथा दी दिया, और ताऊं ज़ेला दी पा। ²⁶ हाऊं तुमुलै सौच़ौ बोलाऊ कि ज़ेबी झ़ाऊंं तू पाई पाई रौ हिसाब नाईं भौरालौ तेबी झ़ाऊंं तू तिदरु नाईं छ़ुटदौ।

गाँदै विच़ार (गाँदै काम)

²⁷ तुमुऐ शुणी गौ आ कि बोलौ औन्दौ थौ, ‘बुरै काम नाईं कौरणै।’ ²⁸ पर हाऊं तुमुलै बोलाऊ, कि ज़ुण-कुण केज़ी दुज़ी छ़ेउड़ी माथै बुरी नौज़र पा लौ तिणीऐ आपणै ज़ीवा दी तियां आइलै बुरौ काम की गौ आ। ²⁹ अगर तेरी सूल़टी आख ताउंलै ठोकर खिलावा ली, ता तिऐं गाड़ीयौ पोरु शोट; कैलैकि ताउंलै इणौ भौलौ आ कि तैरै शरीरा रौ एक अंग खातम हुई गौ और तैरौ सारौ शरीर नौरका दी नाईं पौड़ा। ³⁰ अगर तैरौ सूल़टौ हाथ ताउंलै ठोकर खिलावा लौ, ता तेस काटीयौ पोरु शोट; कैलैकि ताउंलै इणौ भौलौ आ कि तैरै अंगा मांझ़ीऊ कु एक खातम हुई गौ और तैरौ सारौ शरीर नौरका दी नाईं पौड़ा।

राज़ीनाऊँ

(मती 19:9; मरकुस 10:11,12; लूका 6:18)

³¹ “ऐऊ भी बोलौ औन्दौ थौ, ‘ज़ुण-कुण आपणी छ़ेउड़ी लै तलाक दैणौ च़ाहा लौ, ता तियां लै लिखियौ राज़ी नाऊं दिआ लौ। ³² पर हाऊं तुमु लै इणौ बोलाऊ कि ज़ुण-कुण आपणी छ़ेउड़ी लै बुरै कामा रै सिवाऐ केज़ी ओरी कामा कु तलाक दिआ, ता सेऊ तियांकु बुरै काम करावा सा; और ज़ुण-कुण तिऐं पोरु गाड़ी ऐन्दी कु शादी कौरा, सेऊ गान्दौ काम कौरा आ।

कौसम

³³ “तैबै तुमुऐ शुणी गौ कि पैहलै रै आदमीऊ कै बोलौ औन्दौ थौ, ‘झ़ूठी कौसम नाईं खाणी, पर प्रभु कालै आपणी कौसम पूरी कौरौ।’ ³⁴ पर हाऊं तुमुलै इणौ बोलाऊ कि केबी भी कसम नाईं खाणी; ना ता सौरगा री कैलैकि सै परमेश्वरा री बोशणा री ज़ागाह आ; ³⁵ ना धौतरी री, कैलै कि सै तेसरै बागणै री चोउकी आ; ना यरुशलेमा री, कैलैकि सेऊ बौड़ै राज़ै रौ इलाकौ आ। ³⁶ आपणै मुंण्डा री कौसम भी नाईं खाणी कैलैकि तू एक भी बाल़ ना ता उज़ल़ौ, ना ता काल़ौ कौरी सौकदौ। ³⁷ पर तुमुरी बूश ‘हां’ री ‘हां,’ या ‘नाईं’ री ‘नाईं’ च़ांई हुई; कैलैकि ज़ो कुछ़ एथ कु भौरी हुआ आ सेऊ बुराई कौरी हुआ सा।

बौदल़ौ

(लूका 6:29-30)

³⁸ “तुमुऐ शुणी गौ कि बोलौ औन्दौ थौ, ‘आखी रै बौदलै आख, और दांदा रै बौदलै दांद।’ ³⁹ पर हाऊं तुमुलै इणौ बोलाऊ कि बुरै रौ सामनौ नाईं कौरणौ; पर ज़ुण-कुण तैरै सुल़टै गौलौण्टै दी थापै ला लौ, तेस भिलै दुजौ गौलोण्टौ भी कौरै। ⁴⁰ अगर कोई ताऊं माथै ज़ुलम कौरीयौ तैरौ कुरतौ निणौ च़ाहा, ता तेस दुजौ भी निणै दै। ⁴¹ ज़ुण-कुण ताऊं कोस भर बेगारा दी नियां ता तेस आइलै दुई कोस डेऊ। ⁴² ज़ुण-कुण ताऊं कु मांगा, तेसलै दै; और ज़ो ताऊं कु उधार नियां लौ, तेसकु मुं नाईं मोड़।

दुशमणु आइलै प्यार

(लूका 6:27,28, 32-36)

⁴³ “तुमुऐ शुणी गौ आ कि बोलौ औन्दौ थौ, ‘आपणै पड़ोसी कु प्यार छ़ाड़ौ, और आपणै दुश्मना कु दुश्मनी।’ ⁴⁴ पर हाऊं तुमु लै बोलाऊ आ कि आपणै दुश्मना कु प्यार छ़ाड़ौ और आपणै सताउणै वाल़ै लै कौर प्राथना, ⁴⁵ ज़ेथ कौरी तुमै आपणै सौरगा रै बाबा री संतान बौणा ई कैलैकि सेऊ भौलै और बुरै दुइआ माथै आपणी रूड़ी रौ प्याशौ ला सा, और धौर्म और अधर्म दुइआ माथै पाणी ला सा। ⁴⁶ कैलैकि अगर तुमै आपणै प्यार छ़ाड़णै वाल़ेउ आइलै प्यार छ़ाड़ा ई, ता तुमुलै का फल़ औआ? का मामलै निणै वाल़ै भी इणौ ई नाईं कौरदै? ⁴⁷ “अगर तुमै सिरफ आपणै भाई ई कै ढाल कौरा लै, ता केज़ो बोड़ौ काम कौरा ई? का दुज़ी ज़ाति भी इणौ नाईं कौरदी? ⁴⁸ एथीलै च़ाईं कि तुमै भी पाकै बौणौ, ज़िणौ तुमुरौ सोरगा रौ बाब पाकौ आ।

दाण

¹ खौबरदार रौऔ! तुमै आदमी कै देखाउणा लै आपणै धौर्मा रै काम नाईं कौरौ, नाईं ता आपणै सौरगा रै बाबा कु कुछ़ भी फल़ नाईं पा लै। ² “एथीलै ज़ेबी तू दान कौरालौ, ता तू पैहलै बाँइशी नाईं बाज़ै, ज़िणै कुड़ी लोग, खुम्बल़ी दी और गौल़ी दी कौराई, ताकी लोग तिऊं री बौड़ाई कौरा। हाऊं तुमु कु सौच़ौ बोलाऊ कि तिउंऐ आपणौ फल़ पाई गौ। ³ पर ज़ेबी तू दान कौरा लौ, ता ज़ो तैरौ सुल़टै हाथ कौरा आ, तेस तैरौ उल़टौ हाथ नाईं ज़ाणा लौ। ⁴ ताकी तैरौ दान गुप्ता दी रौआ, और तैबै तैरौ बाब ज़ो गुप्ता दी देखा आ, और ताउंलै प्रतिफल़ दिआ।

प्राथना

(लूका 11:2-4)

⁵ “ज़ेबी तू प्राथना कौरा लौ, ता कुड़ी लोगु रै ज़िणौ नाईं कर, कैलैकि लोगु कै दिखाउणा लै धार्मिक खुंबल़ी दी और सौड़की रै मोड़ा दी खौड़ै रौईयौ प्राथना कौरणौ तिउंकै आछ़ौ लागा सा। हाऊं तुमुलै सौच़ौ बोला ऊ कि तिउंऐ आपणौ प्रतिफल़ पाई गौ। ⁶ पर ज़ेबी तू प्राथना कौरा लौ, ता आपणै घौरा भीतै डेऊ; और दार बौन्द कौरीऔ आपणै बाबा कु ज़ो गुप्ता दी आ प्राथना कौर। तैबै तैरौ बाब ज़ो गुप्ता दी देखा सा, ताउंलै प्रतिफल़ दिआ। ⁷ प्राथना कौरदी बारै दुज़ी ज़ातिऊ काऐ बक-बक नाईं कौरै, कैलैकि सै सौमझ़ाई कि तिंउरै भौरी बोलणै कु तिउंरी शुणा ई। ⁸ एथीलै तुमै तिऊं ज़िणै नाईं बौणौ, कैलैकि तुमुरौ बाब तुमुरै मांगणै कु पैहलै ज़ाणा आ कि तुमुरी का-का ज़रुरत आ। ⁹ “ता तुमै इणै रीति कौरी प्राथना कौरौ : ‘ओ आमारै बाब, तू ज़ो सौरगा दी ई; तैरौ नाऊं पवित्र मानणौ च़ाई। ¹⁰ ‘तैरौ राज्य आशा। तेरी इछ़ा ज़ीणी सौरगा दी पूरी हुआ आ, तिणी ई धौतरी दी भी पुरी हुआ। ¹¹ ‘आमारी पूरै दिना री रोटी आज़ आमुलै दै। ¹² ‘और ज़िणै आमुऐ आपणै दुश्मन माफ किऐ ई, तिणी ई तू भी आमारै गुनाह माफ कौर। ¹³ ‘और आमु इम्तीहाना दी नाईं पा, पर बुराई कु बच़ाऊ; (कैलै कि राज्य और पराक्रम और महीमा सौदा तेरी ई आ।’ आमीन।) ¹⁴ “एथीलै अगर तुमै आदमीउ रै गुनाह माफ कौरालै, ता तुमुरौ सौरगा रौ बाब भी तुमु माफ कौरा। ¹⁵ और अगर तुमै आदमी रै गुनाह माफ नाईं कौरा लै, ता तुमुरौ बाब भी तुमुरै गुनाह माफ नाईं कौरदौ।

ब्रौत (उपवास)

¹⁶ “ज़ेबी तुमै ब्रौत कौरा लै, ता कुड़ी लोगु रै ज़िणौ तुमुरै मुंआ दी उदासी ना च़ाईं छ़ाई, कैलैकि सै आपणौ मुं च़ड़ांगी छ़ाड़ाई, ताकी लोग तिऊं ज़ाणा कि इउंरै ब्रौत छ़ाड़ै औन्दै। हाऊं तुमु लै सौच़ौ बोलाऊ कि तिउंऐ आपणौ प्रतिफल़ पाई गौ। ¹⁷ पर ज़ेबी तू ब्रौत छ़ाड़ालौ ता आपणै मुंण्डा दी तेल माँड और मुं धोऊ, ¹⁸ ताकी लोग नाईं पर तैरौ बाब ज़ो गुप्ता दी आ, ताउंलै ब्रौती ज़ाणा। एज़ी हालता दी तैरौ बाब ज़ो गुप्ता दी देखा सा, ताउंलै प्रतिफल़ दिआ।

सौरगा रौ धन

(लूका 12:33-34)

¹⁹ “आपु कालै धौतरी माथै धन कौठै नाईं कौरौ, ज़िऐ किड़ौ और काई बिगाड़ा आ, और ज़िऐ च़ोर च़ोरा सा। ²⁰ पर आपु कालै सौरगा दी धन कौठै कौरौ, ज़िऐ ना ता किड़ौ और ना काई बिगाड़दौ, और ना ता च़ोर च़ोरदौ। ²¹ कैलै कि ज़िऐ तैरौ धन आ तिऐ तैरौ मन भी लागी रौआ सा।

शरीर और प्याशौ

(लूका 11:33-36)

²² “शरीरा रौ दियौ आखा आ : एथीलै अगर तेरी आख नीम्बल़ी आ, ता तैरौ सारौ शरीर भी प्याशै दी आ।” ²³ पर अगर तेरी आख बुरी आ, ता तैरौ सारौ शरीर भी न्यारै दी आ; एज़ै कारण सेऊ प्याशौ ज़ो ताऊं दी आ अगर न्यारौ हुआ ता सेऊ न्यारौ किणौ बौड़ौ औआ!

परमेश्वर और धन

(लूका 16:13, 12:22-31)

²⁴ “केज़ौ भी आदमी दुई मालिका री सेवा नाईं कौरी सौकदौ, कैलैकि सेऊ एकी आइलै दुश्मनी और दुज़ै आइलै प्यार छ़ाड़ा लौ, या एकी कु मिली रौआ और दुज़ो कुछ़ नाईं सौमुझ़दौ। तुमै परमेश्वर और धन दुईया री सेवा नाईं कौरी सौकदै। ²⁵ एथीलै हाऊं तुमु लै बोलाऊ कि आपणै प्राणा लै इणी फिकर नाईं कौरौ कि आमै का खाऊ लै और का पीऊ लै; और ना आपणै शरीरा लै कि का भिड़ु लै। का प्राण रोटी कु, और शरीर जुड़कै कु बौड़ियौ नाईं आ? ²⁶ सौरगा रै च़ौड़कु देखौ! सै ना बौइंदै, और ना काटदै, और ना कोठारा दी सांज़दै; तैबै भी तुमुरौ सौरगा रौ बाब तिउंलै रोटी दिआ सा। का तुमै तिऊं कु भौरी किमती नाईं आ? ²⁷ तुमु मांझ़ीऐ इणौ कुण आ, ज़ो फिकर कौरियौ आपणी उमर थोड़ी भी बड़ाई बौल़ा सा? ²⁸ “और जुड़केउ लै फिकर कैलै कौराई? ज़ांगला रै सोसना (बरासा) रै फुला दी ध्यान दैऔ कि सै किणै कौरी बौड़ा ई; सै ना ता मैहनत कौरदै, ना आपुलै जुड़कै चाणदै। ²⁹ तैबै भी हाऊं तुमु लै बोलाऊ कि सुलैमान राज़ै (ज़ो यहुदीऊ रौ सारेऊ कु बुद्धीमान राज़ौ थौ) सेऊ भी आपणी सुखी ज़ीन्दगी दी इऊं फुलु ज़िणै बांठणै जुड़कै नाईं भीड़ी बौल़ौ। ³⁰ अगर परमेश्वर इयैं धौतरी री घास, ज़मावा सा ज़ो घास आज़ औआ और बासीऐ ज़ौल़ा पोरु, तिउंकै इणै जुड़कै भीड़ावा, ता ओ अविश्वासी लोगुऔ, तुमुकै सेऊ इऊं कु बौड़ियौ कैलै नाईं भिड़ाऊंदौ? ³¹ “एथीलै तुमै फिकर कौरियौ इणौ ना बोलियौ कि आमै का खाऊ लै, या का पिऊ लै, या का भीड़ु लै। ³² कैलै कि पुरी दुनिया रै लोग इऊं सारी च़िज़ेउ लै फिकर कौरदै थाका ई लागी, पर तुमारौ सौरगा रौ बाब ज़ाणा सा की तुमुकै इऊं च़िज़ा री ज़रुरत आ। ³³ एथीलै पैहलै तुमै परमेश्वरा रौ राज़ और तेसरै धौर्म लोड़ौ तैबै ऐ सारी च़िज़ै भी तुमुकै पोरू मिला ई। ³⁴ काला री फिकर नाईं कौरौ, कैलैकि काल कौ दिन आपणी फिकर आपु ई कौरा सा; आज़ा लै आज़ा रौ दुख भौरी सा।

दुजेऊ माथी दोष नाईं लाइणौ

(लुका 6:37,38,41,42)

¹ “कासी दी भी झ़ुठै आरोप नाईं लाऔ तैबै तुमुदी भी झ़ुठै आरोप नाईं लागदै। ² कैलैकि ज़िणौ तुमै आरोप ला ई, तिणी ई तुमु दी भी आरोप लागा ई; और ज़ेज़ै पाथै कौरियै तुमै नापा लै सेज़ै पाथै कौरियै तुमुलै भी नापिआ सा। ³ “तू आपणै भाई री आखी दी सांगर कैलै देखाई, का तांउकै आपणी आखी रौ ड़िगंच़ौ नाईं च़ौगरींदौ? ⁴ ज़ैबै तेरी ई आखी दी ड़िगंच़ौ आ ता तैबै तू आपणै भाई लै किणौ बोली सौका ई, ‘भाई टेक हाऊं तेरी आखी रौ सांगर गाड़ाऊ?’ ⁵ ओ कौपटी! पैहलै आपणी आखी रौ ड़िगंच़ौ गाड़, तैबै तू आपणै भाई री आखी कु तेस सांगर आच्छ़ै कौरी गाड़ी सौका ई। ⁶ “पवित्र च़ीज़ कुकरा लै नाईं दै, और आपणै मोती सूगंरा कै नाईं पा; इणौ ना च़ाईं कि सै तिऊं बांगणा थाली फेंच़ा और पौल़टियौ तुमु च़ीरा खा।

मांगा लै ता तुमुलै मिला सा

(लूका 11:9-13)

⁷ “मांगा लै, ता तुमुकै दिआई, लोड़ा लै ता तुमुकै मिला; खटखटावा लै, ता तुमुलै खुला सा। ⁸ कैलैकि ज़ुण मांगा लौ ता, तेसलै दिआई; और ज़ुण लोड़ा लौ, तेसकै मिला लौ; और ज़ुण खट-खटावा लौ, तेसलै दार खुला सा। ⁹ तुमु मांझ़िऐ कुण इणौ आदमी आ, कि ज़ेबी तेसरौ छ़ोहरु रोटी मांगा लौ, ता तेसलै पात्थर दिआ लौ? ¹⁰ या माछ़ी मांगा लौ, ता तेसलै साप दिआ? ¹¹ ज़ैबै तुमै बुरै हुईयौ आपणै लोल़डेऊ लै आच्छ़ी च़ीज़ै दैणौ ज़ाणाई, तैबै सौरगा दी रौइणै वाल़ौ सारैऊ रौ बाब आपणै मांगणै वाल़ै लोल़डेऊ लै पवित्र आत्मा कैलै ना दैंदौ? ¹² एज़ी बज़ाह कु ज़ो कुछ़ तुमै च़ाहा ई कि आदमी तुमु आइलै कौरा, तुमै भी तिऊं आइलै तिणी ई कौरौ; कैलैकि नियम और गुरु रौ एज़ौ ई ज्ञान (शिक्षा) आ।

साँगड़ी और बिली बाट

(लूका 13:24)

¹³ “साँगड़ै दारा बाटी डैऔ, कैलैकि खुलौ आ सेऊ दार और आसान आ सै बाट ज़ो विनाशा री तौरफा दी पौउंच़ावा; और भौरी सी ज़ुण तिआं बाटा दी डेआई। ¹⁴ कैलैकि साँगड़ौ आ सेऊ दार और काठी आ सै बाट ज़ो ज़िन्दगी भिलै पौउंच़ावा सा; और थोड़ै ई सै लोग ज़ो तिआं बाटा दी आंडाई।

ज़िणौ पेड़ तिणौ फौल़

(लूका 6:43,44; 13:25-27)

¹⁵ “झ़ुठै गुरु कु बौच़ियौ रौएऊ, ज़ो भेरी रै रुपा दी तुमु काऐ आशा ई, पर बासीऐ सै धेड़नै वाल़ै भेड़िऐ ई। ¹⁶ तिंउरै फल़ा कु तुमै तिऊं प्राणा ई। का लोगु झ़ाड़ी कु अंगूर, या काँडै वाल़ै पेड़ा कु अंजीर च़ोड़ाई? ¹⁷ एज़ै ज़रीऐ हर एक आच्छ़ौ पेड़ आच्छ़ौ फल़ आणा सा। ¹⁸ आच्छ़ौ पेड़ निकामौ फल़ नाईं आणी सौकदौ, और ना निकामौ पेड़ आच्छ़ौ फल़ आणी सौकदौ। ¹⁹ ज़ो-ज़ो पेड़ आच्छ़ौ फल़ नाईं आणदौ, तेस काटियौ आगी दी पा ई। ²⁰ एज़ी ताइंऐ तिंउरै फल़ा कु तुमै तिऊं प्राणा ई। ²¹ “जो मुलै, ‘ओ प्रभु! ‘ओ प्रभु!’ बोला ई, तिऊं मांझ़ीऐ कु हर एक सौरगा रै राज्य दी नाईं डेई सौकदौ, पर सेऊ ई डिआ सा ज़ो मेरै सौरगा रै बाबा री इच्छ़ा दी आण्डा आ। ²² सेज़ै दिनै भौरी लोग मुलै बोला लै, ‘ओ प्रभु, ओ प्रभु, का आमुऐ तैरै नाऊं कौरी भविष्यवाणी नाईं की, और तैरै नाऊं कौरी बुरी आत्मा नाईं गाड़ी, और तैरै नाऊं कु भौरी हैरान कौरणावाल़ै काम नाईं किऐ?’ ²³ तैबै हाऊं तिऊं कु खुलियौ बोलु लौ, ‘मुइंऐ तुमै केबी नाईं ज़ाणै। ओ निकामै काम कौरणै वाल़ैउओ, मुंकाऐ कु पोरू डैऔ।’

घौरा चाणनै वाल़ै दुई आदमी बुद्धी वाल़ौ और मूर्ख

(लूका 6:47-49)

²⁴ “एथीलै ज़ुण-कुण मेरी एज़ी बुशै शुणीयौं तिऊं माना सा, सै तिऊं बुद्धिमान आदमीऊ ज़िणै ई ज़ुणीऐ आपणौ घौर चटाना (डोकै) माथै चाणौ। ²⁵ और पाणी आशौ, और बाड़ आशी, और बागुर लागी, और घौरा दी टकराई, तैबै भी सेऊ नाईं ढौल़ौ, कैलैकि तेसरी पौई पाकी ज़ागहा दी थी लाई औन्दी। ²⁶ पर ज़ुण-कुण मेरी एज़ी बुशै शुणाई और तिऊं माथै नाईं आण्डदै, सेऊ तेस निर्बुद्धी आदमी ज़िणौ औआ लौ ज़ुणिऐ आपणौ घौर बाल़ु माथै च़ाणौ। ²⁷ और पाणी लागौ, और बाड़ आशी, और बागुर लागी, और तेस घौरा दी टकराई और सेऊ घौर ढौल़ियौ सत्या नाष हुई गौ आ।” ²⁸ ज़ेबी यीशुऐ एज़ी बुशै बोली गोई, ता इणौ हुऔ कि भीड़ तेसरै उपदेशा कु हैरान हुऐ, ²⁹ कैलैकि यीशु तिऊं शास्त्रिऊ ज़िणै नाईं पर अधिकारी रै ज़िणौ तिउंलै उपदेश दिआ थौ।

कोढ़ा वाल़ौ आदमी ठीक कौरणौ

(मरकुस 1:40-45, लुका 5:12-16)

¹ ज़ेबी सेऊ तेस पहाड़ा कु तौल़ै उतरौ, ता एक बौड़ी भीड़ तेस पीछ़ु हुई गोई। ² और देखौ, एक कोढ़ीऐ नज़दीक आशीयौ यीशु कै ढ़ाल की और बोलौ, “ओ प्रभु, अगर तू च़ाह लौ, ता मु च़ांगौ कौरी बौल़ा ई।” ³ यीशुऐ तेस कोढ़ी माथै हाथ छ़ाड़ौ, और बोलौ, हाऊं च़ाह ऊ कि तू च़ांगौ च़ांई हुऔ” और सेऊ खरकच़ार कोढ़ा कु ठीक हुई गौ। ⁴ यीशुऐ तेसलै बोलौ, “देख, कासी कै नाईं बोलै, पर डेऊ याजका काऐ देखाल़ और ज़ो परमेश्वरा रै आपणै सेवक मुसा रै ज़रीऐ ज़ेज़ै नियम ई दैऔ औन्दै तिऊं अपणाईयौ बौल़ी च़ौड़ाऊ ताकी सै तैरै बारै दी लोगु काऐ बोला कि च़ांगौ और शुद्ध हुई गौ आ।”

एकी सुबेदारा रौ विश्वास

(लूका 7:1-10)

⁵ ज़ेबी यीशु कफरनहूमा दी आशौ ता एकी फौज़ीऐ यीशु काऐ आशियौ तेस कु औरज़ की, ⁶ “ओ प्रभु, मैरौ नुकुर घौरा दी भौरी बीमार पौड़ौ औन्दौ आ ज़ासकै आपणै ज़िस्मा रौ केज़ो भी अंग नाईं हिलाइंदौ।” ⁷ यीशुऐ तेसलै बोलौ, “हाऊं आशियौ तेस ठीक कौराऊ।” ⁸ फौज़ीऐ ज़वाब दैऔ, “ओ प्रभु, हाऊं इणै लायक नाईं कि तू मैरै घौरा कै आश, पर सीरफ आपणै मुंआ कु बोल ता मैरौ नुकुर ठीक हुआ सा। ⁹ कैलैकि हाऊं भी एक फ़ौज़ी ऊ, मुकै हक आ और कई सिपाही मैरै हाथा दी आ ज़ेबी हाऊं एकी लै, बोलाऊ ‘आश!’ तैबै सेऊ आशा सा; और दुजै लै बोलुलौ कि, ‘डेऊ!’ तैबै डेवा सा, अगर आपणै कास नुकरा लै बोलु लै कि ‘इणौ कौर!’ तैबै सेऊ तीणी कौरा सा।” ¹⁰ इणौ शुणीयौ यीशु कै हैरानी हुई, और ज़ो यीशु पीछ़ु थै आशदै लागै औन्दै तिऊं लै बोलौ, हाऊं तुमु लै सौच़ौ बोलाऊ कि मुइंयैं इस्राएला दी भी इणौ विश्वास नाईं देखौ। ¹¹ और हाऊं तुमुलै बोलाऊ कि पूर्व और पश्चिमा कु लोगु आशियौ अब्राहम औए इसहाक और याकूबा आइलै सौरगा रै राज्य दी बोशालै। ¹² पर एज़ै राज्य री औलाद बाइरै न्यारै दी पा लै : तिऐ लेरनौ और दांदा रौ चाकणौ औलौ। ¹³ तैबै यीशुऐ फ़ौज़ी लै बोलौ, “डेऊ, ज़िणौ तैरौ विश्वास आ, तिणी ई ताउंलै औआ।” और तेसरौ नुकुर तेबी ई ठीक हुई गौ।

भौरी रोगिऊ ठीक कौरणै

(मरकुस1:29-34,लूका4:38-41)

¹⁴ ज़ेबी यीशु पतरसा रै घौरै आशौ, ता यीशुऐ तेसरी शाशु बुखारा कौरी बीमार पौड़ी औन्दी देखी। ¹⁵ यीशुऐ तियांरौ हाथ छुंऔ और तियांरौ बुखार उतरी गौ, और सै उठीयौ यीशु री सेवा कौरदै लागी। ¹⁶ ज़ेबी ब्याल़ हुई तैबै सै यीशु काऐ भौरी लोगु आणदै लागै ज़ासदी बुरीआत्मा थी और यीशुऐ सै आत्मा आपणै वचना कौरै गाड़ी गोई; और सारै बिमार लोग च़ांगै किऐ। ¹⁷ ताकी ज़ो वचन यशायाह गुरु रै ज़रीऐ बोलौ औन्दौ थौ सेऊ पुरौ हुआ : “तिणीऐ आपु ई आमारै कमज़ोरी निंई गोई और आमारी बिमारी उठाई गोई।”

यीशु रै च़ेलै बौणनै री कीमत

(लूका 9:57-62)

¹⁸ यीशुऐ ज़ेबी आपणै च़ारो तौरफा दी एक बौड़ी भीड़ देखी ता झ़ीला रै पाराभिलै डेउणा रौ हुकम दैऔ। ¹⁹ तैबै एकी शास्त्रिऐ यीशु काऐ आशियौ बोलौ, “ओ गुरु, ज़ीऐ तू डेवा लौ, हाऊं ताऊं पीछ़ु आशा ऊ।” ²⁰ यीशुऐ तेसलै बोलौ, “शालटा, रै रौइणा लै डेरै हुआई और च़िड़ु-च़िटकेरु रै रौइणा लै कोल़ै हुआई; पर आदमी रै छ़ोहरु रौ कोई घौर नाईं और मुंडा छ़ाड़ने री भी ज़ागहा नाईं आसती।” ²¹ एकी औज़ौ च़ेलै बोलौ, “ओ प्रभु, मूं पैहलै डेऊणै दै ताकी हाऊं आपणौ बाब कौबरा दी दाबु।” ²² यीशुऐ तेसलै बोलौ, “तू मूं पीछ़ु आश, और ज़ो मौरै औन्दै ई तिऊं आपणै मुर्दै दाबणै दैऔ।”

बागुर शान्त कौरणौ

(मरकुस 4:35-41; लुका 8:22-25)

²³ ज़ेबी यीशु किश्ती दी च़ौड़ौ, ता तेसरै च़ेलै तेस पीछ़ु आशी गौऐ। ²⁴ और देखौ, झ़ीला दी एक इणौ बौड़ौ तूफान आशौ कि किश्ती पाणी कु बौरींदै लागी, और यीशु सुतौ औन्दौ थौ। ²⁵ तैबै च़ेलेउऐ नज़दीक डेइयौ यीशु उज़याऔ और बोलौ, “ओ प्रभु, आमु बच़ाऊ आमै नाश ई औन्दै लागै औन्दै।” ²⁶ तिणीऐ तिउंलै बोलौ, “ओ अविश्वासि लोगुऔ, कैलै डौराई?” तैबै यीशुऐ उठीयौ बागुर और पाणी डांटै, और सब शान्त हुई गौ। ²⁷ और सै हैरान हुईऔ बोलदै लागै, “ऐऊ किणौ आदमी आ कि बागुर और पाणी भी एसरौ हुकम मानाई।

बूरी आत्मा वाल़ौ आदमी च़ागौ कौरणौ

(मरकुस5:1-20; लूका 8:26-39)

²⁸ ज़ेबी यीशु पाराभिलै गदरैनियों रै देशा दी पौउंच़ौ, ता दुई आदमी ज़ासदी बुरीआत्मा थी कौबरा कु निकल़ै और यीशु कै मिलै। सै एती रोशा आल़ै थै कि कोई भी सेज़ी बाटा दी नाईं डेई सौका थै। ²⁹ तिउंऐ हाकै मारीयौ बोलौ, “ओ परमेश्वरा रै छ़ोहरु, आमारौ ताऊं कै का काम आ? का तू बौग्ता कु पैहलै ई आमु लै दुख दैंदै आशौ ई?” ³⁰ यीशु कु कुछ़ दुर भौरी का सूंगरा रौ एक झ़ुड़ च़ौरदै लागौ औन्दौ थौ। ³¹ बुरी आत्माऐ यीशु कु औरज़ कियै, “अगर तू आमु गाड़ाई, ता सुंगरा रै शाल़ा दी भेज़। ³² यीशुऐ तिउंलै बोलौ, “डैऔ!” और सै निकल़ियौ सुंगरा दी डेई गौऐ और देखौ, सारौ गोल़ मातोल़ै दुड़ियौ झ़िला दी पौड़ै और डुबियौ पोरु मौरै। ³³ तिऊं सुंगरु च़ारणै वाल़ै इणौ देखीऔ तिदरु पोरु भागै, और इलाकै दी डेइऔ ऐ सारी बुशै और ज़ासदी बुरी आत्मा थी तेसरौ सारौ हाल शुणाऔ। ³⁴ तैबै सारै लोगु यीशु काऐ मिलदै डेई गौऐ, और यीशु कु औरज़ कौरदै लागै कि आमारी सिवां कु बाइरै डेऊ।

अधरौंगा वाल़ौ आदमी च़ांगौ कौरणौ

(मरकुस 2:1-12; लूका5:17-26)

¹ तैबै यीशु किश्ती दी च़ौड़ियौ पारभिलै डैऔ, और आपणै इलाकै दी आशौ। ² और देखौ, भौरी लोग एक आदमी च़ारपाई दी बानिऔ यीशु काऐ आणौ ज़ासरौ ज़िस्मा रौ केज़ो भी अंग नाईं हिलाइया थौ। यीशुऐ तिऊंरौ विशवास देखीयौ, तेस बिमार आदमी लै बोलौ, “ओ छ़ोहरु, हिम्मत छ़ाड़; तैरै पाप माफ हुई गौऐ ई।” ³ एथ माथै कई शास्त्रिउऐ सुंच़ौ, “एऊ ता परमेश्वरा री बुराई कौरा सा?” ⁴ यीशुऐ तिउंरी मौना री बुशै ज़ाणीऔ बोलौ, “तुमै लोग आपणै-आपणै मौना दी बुरौ कैलै सुंचदै लागै औन्दै? ⁵ आसान का सा? बिमार आदमी लै इणौ बोलनौ कि खौड़ौ ऊठ आपणौ बिस्तर च़ुंग और आंड़दै लाग? ⁶ तुमकै देखाल़णा लै कि “आदमी रै छ़ोहरु” कै धौतरी माथै पाप माफ कौरनै रौ भी हक आ तैबै यीशुऐ तेस बिमार आदमी भीलै देखीयौ बोलौ हाऊं ताउंलै बोलाऊ, खौड़ी उठ, आपणौ बिस्तरौ च़ुंग और आपणै घौरै डेऊ। कैलैकि तू ठीक हुई गो ई। ⁷ सेऊ उठीयौ आपणै घौरै डेइ गौ आ। ⁸ लोग इणौ देखीयौ डौरी गौऐ और परमेश्वरा री महिमा कौरदै लागै ज़ुणीऐ आदमी लै इणौ हक दैऔ सा।

मती आपु आइलै औटाउणौ

(मरकुस 2:13-17 लूका5:27-32)

⁹ तिदरा कु औगाड़िऐ डेइयौ यीशुऐ मत्ती नावां रै एकी आदमी लै ज़ो मामलै निणै वाल़ै रै आडै माथै थौ बोशौ औन्दौ सेऊ देखौ, और तेसलै बोलौ, “मु पिछ़ु आश।” सेऊ उठीयौ यीशु पिछ़ु आंडदै लागौ। ¹⁰ और ज़ेबी यीशु मत्ती रै घौरा दी रोटी खांदै बोशौ ता तिऐ भौरी मामलै निणै वाल़ै और पापी लोग आशीयौ यीशु और तेसरै च़ेलै आइलै रोटी खांदै बोशै। ¹¹ इणौ देखीयौ फरीसिऊ ऐ यीशु रै च़ेलैऊ लै बोलौ, “तुमारौ गुरु मामलै निणै वाल़ै और पापी लोगु आइलै रोटी कैलै खा पिआ आ?” ¹² इणौ शुणीयौ यीशुऐ तिउंलै बोलौ, “डाक्टरा री ज़रुरत भौलै-च़ांगै आदमी कै नाईं पर बिमार आदमी कै औआ सा। ¹³ एथीलै तुमै डेइयौ एथरौ मतलब शीखौ : ‘हाऊं बलिदान नाईं पर दया च़ाह ऊ। कैलैकि हाऊं धर्मी आदमीउ नाईं पर पापी आदमीउ औटाउंदेऊ आशौ ऊ।”

ब्रौता(उपवासा) रौ सवाल

(मरकुस 2:18-22 लुका 5:33-39)

¹⁴ तैबै यूहन्ना रै च़ेलेउऐ यीशु काऐ आशीयौ बोलौ, “का मतलब आ कि आमै और फरीसी एती ब्रौत छ़ाड़ी ई, पर तैरै च़ेलै ब्रौत नाईं छ़ाड़दै?” ¹⁵ यीशुऐ तिउंलै बोलौ, “का बराती, ज़ेबी झ़ाऊंं लाड़ौ तिऊं आइलै आ, शोक कौरी सौका ई? पर सै दिन आशालै ज़ेबी लाड़ौ तिऊं कु अलग कौरालै, सेज़ै बौग्ता दी सै ब्रौत कौराई। ¹⁶ केज़ौ भी आदमी नौऐं जुड़कै रौ टालकौ पुराणै जुड़कै दी नाईं लाईंदौ। नाईं ता धोइंदीं बारै सेऊ नौऐं जुड़कै रौ टालकौ तेस पुराणौ जुड़कौ थोसियौ ज़ादड़ौ चीरा सा। और सेऊ टालकौ पुराणै जुड़कै आइलै मेल भी नाईं खान्दौ। ¹⁷ कोई भी आदमी अगुंरा री सूर चाणना लै ताज़ौ अगुंरा रौ रस पुराणै चामड़ै री थोउली दी नाईं छ़ाड़दौ। नाईं ता अगुंरा रौ रस दख बौग्ता बासीऐ फैलीयौ तेस पुराणै चामड़ै रौ थौउलौ भी पोरु च़ीरा ज़ेथ कौरीऐ अगुंरा रौ रस और थौउलौ दुइया बरबाद हुआ ई; पर नौऊऔ अगुंरा रौ रस नौऊई थौउली दी भौरा ई और सै दुईया बौच़ी रौआई।”

मौरी औंदी छ़ोटी और बीमार छ़ेवड़ी

(मरकुस 5:21-43; लूका 8:40-56)

¹⁸ यीशु तिऊं आइलै एज़ी बुशै लाईंदै थौ लागौ औन्दौ, कि देखौ, एक मुख्ऐ आशीयौ यीशु कै ढ़ाल की और बोलौ, “मेरी माईं ईबी मौरी आ, पर च़ाल आपणौ हाथ तिआं माथै छ़ाड़, ता सै ज़ीऊंदी हुआ सा।” ¹⁹ यीशु उठीयौ आपणै च़ेलै आइलै तेस पिछ़ु डेई गौऐ। ²⁰ और देखौ, एक छ़ेउड़ीऐ ज़ासदी बारहा बौरशा ओऊलै लोऊ बौइणै री बिमारी थी, पिछ़ु कु आशीयौ यीशु रै जुड़कै छ़ुंऐ । ²¹ कैलै कि सै आपणै मौना दी बोला थी, “अगर हाऊं यीशु रै जुड़कै छ़ूँउ लै ता हाऊं ठीक औआ ऊ।” ²² यीशुऐ मुड़ीयौ सै देखी और बोलौ, “धीआ हिम्मत छ़ाड़, तैरै विश्वासै तू ठीक कौरी गोई आ।” तैबै सै छ़ेउड़ी तेबी ई ठीक हुई गोई। ²³ ज़ेबी यीशु तेस मुख्या रै घौरा काऐ पौउंच़ौ ता तिऐ बांइशी बज़ाउणै वाल़ै और भीड़ देखी, ²⁴ तैबै बोलौ, “दूर हुऔ इदरु, मांईं मौरी नाईं, पर सुती ऐन्दी आ।” एथ माथै सै यीशु रौ मज़ाक उड़ाऊंदै लागै। ²⁵ पर ज़ेबी भीड़ गाड़ी गोई, ता यीशुऐ भितरै डेइयौ तिऐं मांईं रौ हाथ पाकड़ौ, और सै ज़ीऊंदी हुई गोई। ²⁶ और एज़ी बुशै री खौबर तेस सारै देशा दी फैली गोई।

दुई शेड़ैउ लै आखी देणी

²⁷ ज़ेबी यीशु तिदरु औगाऊं डैऔ, ता दुई शेड़ै तेस पिछ़ु इणौ औटाउंदै लागै, ”ओ दाऊदा री औलाद, आमु माथै दया कर!” ²⁸ ज़ेबी यीशु घौरा दी पौउंच़ौ, ता सै शेड़ै यीशु काऐ आशै, और यीशुऐ तिउंलै बोलौ, “का तुमारौ विश्वास आ कि हाऊं इणौ कौरी सौकाउ आ? तिउंऐ यीशु लै बोलौ, “ ओ, प्रभु!” ²⁹ तैबै यीशुऐ तिउंरी आखी छ़ुइंऔ बोलौ, “तुमारै विश्वासा रै अनुसार तुमुलै हुआ सा। ³⁰ और तिउंरी आखी खुली गोई। यीशुऐ तिउंकै च़ितलाइऔ बोलौ, “खौबरदार, कासी कै भी एज़ी बुशा रौ पौतौ ना च़ांई लागौ।” ³¹ पर तिउंऐ डेइयौ सारै देशा दी यीशु रौ नाऊं फैलाई गौ।

एक लाटौ च़ांगौ कौरणौ

³² ज़ेबी सै बाइरै थै डेउंदै लागै औन्दै ता देखौ, लोगु एक लाटौ ज़ासदी बुरी आत्मा थी लागी ऐंदी, यीशु काऐ आणौ; ³³ और ज़ेबी बुरी आत्मा गाड़ी गोई, ता लाटौ बोलदै लागौ। ऐथ माथै भीड़ हैरान हुईऔ बोलदै लागी, “इस्राइला दी इणौ केबी नाईं देखौ।” ³⁴ पर फरीसिऊऐ बोलौ, “ऐऊ ता बुरी आत्मा रै मुख्या री सहायता कौरी बुरी आत्मा गाड़ा सा।” ³⁵ यीशु सारै इलाकै और गाँव दी फिरदै रौऔ और तिंउरै धार्मिक खुंबल़ी दी डेइऔ उपदेश दैंदै थाकौ लागी, और राज्य रौ खुशी री खबरा रौ परच़ार कौरदै, और सौबी रौंगा री बिमारी और कमज़ोरी दूर कौरदै थाकौ लागी। ³⁶ ज़ेबी यीशुऐ भीड़ देखी ता तेसरै लोगु माथै दया आशी, कैलैकि सै तिऊं भेरी ज़िणी थी ज़ासरौ कोई भेराल़डु नाईं औन्दौ, और सै परेशान और भटकै औन्दै थै। ³⁷ तैबै यीशुऐ आपणै च़ेलैऊ लै बोलौ, “पाच़ै औन्दै डोखरै ता भौरी सी पर लौइणै वालै थोड़े ज़ेई ई। ³⁸ एथीलै डोखरै रै मालिका कु औरज़ कौरौ कि सै आपणै फसला लौइणा लै मज़दूर भेज़ा।”

यीशु रै बारह च़ेलै

(मरकुस3:13-19; लूका6:12-16)

¹ तैबै यीशुऐ आपणै बाहरा च़ेलै आपु काऐ औटाइऐ, और तिउंलै बुरीआत्मा माथै हौक दैऔ कि तिऊं गाड़ौ और सौबी रौंगा री बिमारी और सौबी रौंगा री कमज़ोरी दूर कौरौ। ² इऊं बारह च़ेलै रै नाऊं ऐ आ : पैहलौ शमौन, ज़ासलै पतरस भी बोला ई, और तेसरौ भाई अन्द्रियास; जबदी रौ छ़ोहरु याकूब, और तेसरौ भाई युहन्ना; ³ फिलिप्पुस, और बरतुल्मै, थोमा, और मामलै निणा वाल़ौ मत्ती, हलफाई रौ छ़ोहरु याकूब, और तद्दै, ⁴ शमौन कनानी, और यहूदा इस्करियोती जुणिऐ यीशु पकड़वाऔ आ।

बारह (प्रेरित) च़ेलेउ री सेवा और काम

(मरकुस 6:7-13; लूका 9:1-6,10:4-12)

⁵ इऊं बारह लै यीशुऐ ऐज़ै हुकमा देइऔ भेज़ै : “दुज़ी जाति बीलै नाईं डेइऔ, और सामरीऊ रै केज़ै इलाकै दी नाईं डेइऔ। ⁶ पर इस्राएला रै घौरा ई री औच़ी ऐन्दी भेरी काए डैऔ। ⁷ और आंडदै-आंडदै इणौ परच़ार कौरौ : ‘सौरगा रौ राज्य नज़दीक आशी गौ सा।’ ⁸ बिमार लोगु ठीक कौरौ, मौरै ऐन्दै ज़ीउंदै कौरौ, कोड़ीऊ ठीक कौरौ, बुरी आत्मा गाड़ौ। तुमुऐ मुफता दै पाऔ सा, और मुफता दी दैऔ। ⁹ आपणै गाची दी ना ता सूनौ, और ना ता रुपाऐ, और ना चांबौ छ़ाड़णौ; ¹⁰ बाटा लै ना बैग निंऔ ,ना दुई कुरतै, ना बूट और ना डिंगै निंऔ, कैलैकि मज़दूरा लै तेसरी रोटी मिलणी च़ांई। ¹¹ “ज़ेज़ै क़ज़ै इलाकै या गांवा दी डेआ लै, ता पौतौ लाऔ कि तिऐ कुण आ ठीक। और ज़ेबी झ़ाऊंं तिदरु कु नाईं निकल़ालै, तेसी रै काए रौऔ, ¹² घौरा दी डेउंदै ई तेसलै आशीष दैऔ। ¹³ अगर तेस घौरा रै लोग शान्ती रै लायक औलै ता तिउंलै आशीष मिला सा, अगर सै इणै लायक नाईं औलै ता सै आशीष और शान्ती वापिस आशा सा। ¹⁴ ज़ुण-कुण तुमु नाईं अपणावालै और तुमारी बुशै नाईं शुणालै, तेस घौरा या तेस इलाकै कु डेउंदी बारै आपणै बांगणै री धूल पोरू झ़ाड़ौ। ¹⁵ हाऊं तुमु कु सौच़ौ बौलाऊ कि न्याय रै दिनै तेस इलाकै री हालता कु सदोम और अमोरा रै देशा री हालत भौरी सैहन ना कौरणै रै लायक औआली।

आशणै वाल़ी मुश्किल

(मरकुस 13:9-13; लूका21:12-17)

¹⁶ “देखौ, हाऊं तुमु भेरी रै ज़िणौ शालटै रै मांझ़िऐ भेझ़ाऊं ई, एथीलै सापा रै ज़िणै च़लाक और कबूतरा रै ज़िणै भोल़ै बौणौ। ¹⁷ पर लोगु कु होशिया रौऔ, कैलैकि सै तुमु बौड़ी खुम्बल़ी दी निआं ई, और आपणी पंच़ाइता दी तुमुदी डिंगै ला ई। ¹⁸ तुमै मु कालै जजा और राज़ो काऐ तिऊं माथै, और दुज़ी जाती माथै गवाह हौणा लै पौऊंच़ावा लै। ¹⁹ ज़ेबी सै तुमु पाकड़ालै ता एज़ी फिकर नाईं कौरीऔ कि आमै केज़ी रीति कु या का बोलीलै, कैलैकि ज़ो कुछ़ तुमुरौ बोलणौ औलौ, सेऊ सेज़ी बौग्तै तुमुलै बोला सा। ²⁰ कैलैकि बोलणा वाल़ै तुमै नाईं ई, पर तुमारै बाबा री आत्मा तुमु दी बोला सा। ²¹ “भाई भाई कै और बाब छ़ोहरु कै, झ़ागणा लै दिआलै, और छ़ोहरु माँ बाबा रै विरौद्धा दी उठीऔ तिऊं झ़ंगावा ई। ²² मैरै नावां रै कारण सौबी लोग तुमु कु दुश्मनी छ़ाड़ा लै, पर जो आखरी झ़ाऊं सौबर कौरा लौ तेस ई रौ उद्धार औआ लौ। ²³ ज़ेबी सै तुमु एकी इलाकै दी तंग कौरालै, ता दुज़ो लै भागणौ। हाऊं तुमुलै सौच़ौ बोलाऊ, ता तुमै इस्राएला रै सौबी इलाकै दी नाईं भागालै की आदमी रौ छ़ोहरू आशा लौ। ²⁴ “च़ेलौ आपणै गुरु कु बौड़ौ नाईं औन्दौ; और ना नुकुर आपणै मालिका कु। ²⁵ च़ेलै रौ गुरु रै, और नुकुरा रौ मालिका रै बराबर हौणौ ई भौरी आ। ज़ेबी तिउंऐ घौरा रै मालिका लै शैतान बोलौ ता तेसरै घौरवाल़ै लै का कुछ़ नाईं बोलालै!

कास कु डौरी लै

(लूका 12:2-7)

²⁶ “एथीलै आदमीऊ कु नाईं डौरौ; कैलैकि कुछ़ ढौकौ औन्दौ नाईं कि जो नाईं खोलालै, और ना कुछ़ छुपौ सा जो नाईं ज़ाणियां लौ। ²⁷ जो हांऊ तुमु कु निआरिया दी बोलाउ, तेस तुमै पयाशा दी बोलौ; और जो काना ई कान शुणाई, तेस छापरा माथै कु परकट कौरौ। ²⁸ जो शरीरा कौरी झ़ांगाइ सा, पर नाईं झ़ांगी सौकदौ, तिऊंकु नाईं डौरौ; पर तेस कु डौरौ, जो आत्मा और शरीर दुई नौरका दी नाश कौरी सौका आ। ²⁹ का रुपाऐ कौरी दुई च़ौड़की नाईं बीकदी? तैबै भी तुमारै बाबा री मौरज़ी रै बिना तिऊं मांझ़िऊ कु एक भी ज़मीना माथै नाईं लोटदी ³⁰ तुमारै मुंडा रै बाल़ भी गौणै औन्दै आ। ³¹ एथीलै डौरौ नाईं; कैलैकि तुमै परमेश्वरा लै तिऊं च़ौड़की रै बालरा कु भी ज़ादै किमती ई।

यीशु मानणौ या नाईं मानणौ

(लूका 12:8,9)

³² “जो कोई मूँ आदमीऊ मांझ़िऐ माना लौ ता हांऊ आदमी रौ छ़ोहरु तेस आदमी परमेश्वरा रै सामनै मानाऊ। ³³ पर जो कोई आदमी रै सामनै मैरौ इन्कार कौरा लौ, तेसकु हांऊ भी आपणै सौरगा रै बाबा रै सामनै इन्कार कौराउ। यीशु रै आशणै रौ नतीज़ौ

यीशु आशणै रौ नतीज़ौ

(लूका 12:51-53,14:26-27)

³⁴ “इणौ ना सौमझ़ौ की हांऊ धौतरी दी मेल मिलाप कौरदै ऊ आशौ औन्दौ; हांऊ मेल मिलाप नाईं, पर तलवार च़लाऊंदै आशौ आ। ³⁵ हांऊ ता आशौ सा कि: ‘आदमी लै तेसरै बाबा कु, और छ़ोटी लै तिआं री माँ कु, और बोऊ लै तिआं री शाशु कु अलग कौरु; ³⁶ आदमी रै दुश्मन तेसरै घौरा रै ई लोग हुआई।’ ³⁷ “ज़ो माँ या बाबा मुकु भौरी प्यारौ ज़ाणाई, सेऊ मैरै लायक नाईं; और ज़ो आपणै मांऊ या मांई मुकु भौरी प्यारौ ज़ाणा लौ, सेऊ मैरै लायक नाईं; ³⁸ ज़ो आपणौ क्रूस निंऔ मु पिछ़ु नाईं हांडा लौ सेऊ मैरै लायक नाईं। ³⁹ ज़ो आपणै ज़ान बच़ावालौ, सेऊ तेस नाश कौरालौ लौ; और ज़ो मैरै कारण आपणी ज़ान नाश कौरा लौ, सेऊ तेस बच़ावालौ। प्रतिफ़ल़

आच्छ़ै कौरीयौ आच्छ़ौ (प्रतीफल)

(मरकुस 9:41)

⁴⁰ “ज़ो तुमु अपणावालौ, सेऊ मुं अपणावा सा; ज़ो मुं अपणावा सा सेऊ मैरै भैज़णै वाल़ौ अपणावा सा। ⁴¹ ज़ो गुरु (भविष्यदवक्ता) लै गुरु ज़ाणीऔ अपणावालौ, सेऊ गुरु रौ बौदलौ पालौ; और ज़ो धौर्मी लै धौर्मी ज़ाणीऔ अपणावालौ, सेऊ धौर्मी रौ बौदलौ पालौ। ⁴² ज़ो कौई इऊं छ़ौटे मांझ़िऊ कु एकी लै मैरौ च़ेलौ ज़ाणीऔ सीरफ एक गिलासा शैल़ौ पाणी पिलावालै, हांऊ तुमु कै सौच़ौ बोलाऊ, सेऊ केज़ी रीती कु आपणौ प्रतिफ़ल़ नाईं खोआलौ।”

यीशु और यूहन्ना बपतिस्मा देणै वाल़ौ

(लूका 7:18-35)

¹ ज़ेबी यीशुऐ आपणै बारह च़ेलेऊ लै हुकम देई ऐरौ, ता सेऊ तिंउरै इलाकै दी उपदेश और परच़ार कौरणै लै तिदरा कु डेइ गौ। ² यूहन्नै कैदा दी मसीह रै कामा रौ संदेश शुणौ और आपणै च़ेलै यीशु काऐ इणै पुछ़णा लै भेज़ै, ³ “का आशणै वाल़ौ मसीह तू ई आ (ज़ास पौखधै आमै लागै औन्दै थै), या आमै कास ओरी पौखुलै? ⁴ यीशुऐ तिउंलै ज़वाब दैऔ, “ज़ो कुछ़ तुमुऐ देखौ और शुणौ, डेइऔ तेस यूहन्ना कै बोलौ, ⁵ कि शेड़ै देखाई, लौंगड़ै ई आण्डाई, कोड़ी हुआई ठीक, टौणै ई शुणा, मौरै औन्दै हुआई ज़ीऊंदै, और गरीब आदमीऊ लै शुणावा खुशी रौ संदेश। ⁶ आशीष वाल़ै आ सै, ज़ासदी मैरै कारण ठोकर ना लागाली।” ⁷ ज़ेबी सै तिदरु कु डेइ गौऐ, ता यीशु यूहन्ना रै बारै दी लोगु आइलै बोलदै लागौ, “तुमै ज़ागल़ा दी का देखदै थै डैऔ औन्दै? का बागुरा कौरी हिलणै वाल़ै शाऊंटै देखदै? ⁸ तैबै तुमै का दैखदै डैऔ औन्दै थै? का च़ोगै-बागै भिड़े औन्दै आदमीउ देखदै डेवै थै? नाईं कैलैकि ज़ो आदमी च़ोगै-बागै बीड़ाई सै ठाटा (आरामा) कौरी आपणै मैहला दी रौआई। ⁹ ता तैबै तुमै का देखदै थै डैऔ औन्दै? का कास गुरु देखदै? ओ, हाऊं तुमु लै बोलाऊ कि सेऊ (यूहन्ना) भविश्यवकता कु भी बौड़ौ आ। ¹⁰ यूहन्ना ही सा सेऊ गुरु (दूत) ज़ासरै बारै दी धर्मशास्त्रा दी इणौ लिखौ औन्दौ : ‘कि देखौ, हाऊं आपणौ दूत ताऊंकु औगाड़ीऐ भेझ़ाऊं, सेऊ ताऊंकु औगाड़ीऐ डेइयौ ताऊं कालै बाट तैयार कौरा।’ ¹¹ तैबै यीशुऐ बोलौ, हाऊं तुमुलै सौच़ौ बोलाऊ कि इबी झ़ाऊंं कोई भी इणौ आदमी पैदौ नाईं हुऔ ज़ो यूहन्‍ना कु बौड़ौ आ। पर परमेश्वरा रै राज़ा दी ज़ुण छ़ोटै कु छ़ोटौ आ सेऊ यूहन्ना कु भी बौड़ौ आ। ¹² यूहन्ना बप्तिस्मा देणैवाल़ै रै दिनै दी ऐबी झ़ाऊंं सौरगा रै राज़ा दी ताकती कौरी डेआ सा, और और शक्तीशाली तेस छ़ुड़ावा आ। ¹³ यूहन्ना झ़ांऊ सारै गुरु और नियम भविष्यवाणी कौरा ई। ¹⁴ और च़हा ता मानौ कि एलिय्याह ज़ो आशणैवाल़ौ थौ, सेऊ एऊ ई सा। ¹⁵ ज़ासरै शुणना रै कान सा, सै शुणालै। ¹⁶ “हाऊं ऐज़ी पीड़ी री मसाल कास आइलै देउ? सै तिऊं माऊं सै समान आ, ज़ो बज़ारा दी बोशै औन्दै एकी-दुज़ै लै औटाइयौ बोलाई ¹⁷ ‘आमुऐ तुमुलै बांइशी बज़ाई, और पर तुमै नाच़ै नाईं; आमुऐ दुख किऔ, और तुमुऐ छ़ाती नाईं पीटी।’ ¹⁸ कैलैकि यूहन्ना ना खाइऔ आशौ और ना पिऔ, और सै बोलाई, ‘तेसदी बुरी आत्मा आ।’ ¹⁹ हाऊं आदमी रौ छ़ोहरु, खा पिआ ऊ, पर तुमै बोलाई इणौ कि हाऊं पेटु और सूरी पिणै वाल़ौ, मामलै निणै वाल़ौ और पापी लोगु रौ गौश्टण पर ज़ुण परमेश्वरा री शिक्षा (ज्ञान) मानीऔ च़ाला सा तिउंरी ज़ीन्दगी कु परमेश्वरा रौ ज्ञान सौच़्च़ौ साबीत हुआ आ।

बिण विश्वासा माथी हाय

(लूका10:21,22)

²⁰ तैबै यीशु तेस इलाकौ फिटकारदै लागौ, ज़ासदी तिणीऐ भौरी च़मतकार काम किऐ थै, कैलैकि तिउंऐ आपणौ ज़ीऊ नाईं फिराऔ थौ। ²¹ “हाऐ, खुराजीन! हाऐ, बैतसैदा! ज़ो च़मतकार और आच़्छ़ै काम मुइंयै तुमु मांज़ीऐ किएई अगर तिऊं काम हाऊं बुरै इलाकै सूर और सैदा दी कौरा थौ ता सै तिंउरै बौणै औन्दै बोरी रै जुड़कै भीड़ीयौ और आपणै ज़िवा (शरीरा) दी छ़ारा मांडीयौ केबकै आपणौ मन पापा कु बौदल़ा थै। ²² पर हाऊं तुमु लै बोलाऊ कि फैसलै रै दिना दी तुमारी हालत तिऊं सूर-सैदा गावां कु भी ज़ादी बुरी हुणी आ। ²³ ओ कफरनहुमा रै लोगुओ, का तुमु सौरगा झ़ाऊंं ऊंच़ौ कौरा ई? ताऊं ता तौल़ै उतारा ई आधोलोका (पैताल़ा) लै! ज़ो च़मतकार काम तुमु मांझ़िए कौरै ई, अगर सोदमा दी कौरै थै, ता सेऊ आज़ा झ़ाऊंं बौणी रौआ थौ। ²⁴ पर हाऊं तुमु लै बोलाऊ कि फैसलै रै दिनै तेरी हालत सदोमा री हालता कु ज़ादी बुरी हुणी आ।” ²⁵ सेज़ै बौग्तै यीशुऐ बोलौ, “ओ बाब, सौरगा और धौतरी रै मालिक हाऊं तैरौ धन्यावाद कौरा ऊ कि तू इयै बुशै ज्ञानी और समझ़दारु कु च़ोरी छ़ाड़ी और छ़ोहरु माथै परगट की आ। ²⁶ ओ, बाब ताउंकै इणौ ई आच़्छ़ौ लागौ। ²⁷ “मैरै बाबै मुकै सब कुछ़ देई गौ आ; कोई ना ज़ाणदौ कि छ़ोहरु कुण आ, सिर्फ बाब ज़ाणा सा, और बाब कुण आ इणौ भी कोई ना ज़ाणदौ सिर्फ छ़ोहरु या ज़ास माथै छ़ोहरु तेस परगट कौरणै च़ाह लौ। ²⁸ “ओ सब मैहनत कौरणै वाल़ैउओ और गौरकै थाली दाबुऐ औन्दै लोगुओ, मु काऐ आशौ; हाऊं तुमुलै आराम दिआऊ। ²⁹ मैरौ शमाई आपु माथै च़ुंगौ, और मुकु शीखौ; कैलैकि हाऊं शांत और ज़िवा कु भोलौ आ : और तुमै आपणै ज़िवा दी आराम पा लै। ³⁰ कैलैकि मैरौ शमाई आसान और मैरौ भार हौल़खौ आ।”

छ़ुट्टी रै दिना रौ भी प्रभु

(मरकुस 2:23-28,लूका6:1-5

¹ सेज़ै बौग्तै यीशु आरामा रै दिना दी डोखरै दी थौ डेऊंदै लागौ औन्दौ, और तेसरै च़ेलैऊ रै भूख लागी ता सै गिऊंआ रै सील चोड़ीयौ खान्दै लागै। ² तैबै फरीसीऊ मांझ़ीऐ कु कुछ़ लोगुऐ बोलौ ज़ेज़ौ काम आरामा रै दिना दी नाईं जान्दौ कौरनौ, सेज़ौ काम तुमै कैलै कौराई? ³ यीशुऐ तिउंलै ज़वाब दैऔ, “का तुमुऐ धर्म शात्रा दी नाईं पौड़ौ, ज़ेबी राज़ौ दाऊद और तेसरै साथी भुखै थै, तिऊंकु खाणालै कुछ़ भी नाईं थौ, तैबै राज़ै दाऊदै का कियौ? ⁴ सेऊ परमेश्वरा रै घौरा दी डैऔ, और तिऐ परमेश्वरा लै चड़ाई औन्दी भोगा री रोटी खाई और आपणै साथीऊ लै भी देई, ज़ो सिरफ याजक ही खा थै? ⁵ या का तुमुऐ नियमा दी नाईं पौड़ौ कि याजक आरामा रै दिना परमेश्वरा रै घौरा दी आरामा रै दिना री विधि चोड़ना दी भी निर्आरोप ठहराई? ⁶ पर हाऊं तुमुलै बोलाऊ कि इयै सेऊ आ ज़ो परमेश्वरा रै घौरा कु भी बौड़ौ आ। ⁷ अगर तुमै ऐथारौ मतलब ज़ाणाई, ‘हाऊं दया कौरी खुश हुआउ, बलिदाना कु नाईं,’ ता तुमै निर्आरोपी लै आरोपी नाईं बोला थै। ⁸ आदमी रौ छ़ोहरु ता आरामा रै दिना रौ भी प्रभु आ।”

शुकै औन्दै हाथा वाल़ौ आदमी च़ांगौ कौरणौ

(मरकुस3:1-6; लूका6:1-5)

⁹ तिदरु कु डेइयौ यीशु तिंउरै परमेश्वरा रै घौरा दी आशौ। ¹⁰ तिऐ एक आदमी थौ, ज़ासरौ हाथ शुकौ औन्दौ थौ। तैबै कुछ़ फरीसी और शात्री लोग यीशु माथै आरोप लाईणा लै बोलौ, “का आरामा वाल़ै दिना दी च़ांगौ कौरणौ ठीक आ?” ¹¹ यीशुऐ तिउंलै बोलौ, “तुमु मांझ़िऊ इणौ कुण आ ज़ासरी एक ही भेरी आ, और सै आरामा रै दिनै खाल़ी दी पौड़ाली, ता सेऊ तियां पाकड़ीयौ नाईं गाड़दौ? ¹² भौलौ, आदमी री किमत भेरी कु केती बौड़ीऔ आ! एथीलै आरामा रै दिनै भलाई कौरनी ठीक आ।” ¹³ तैबै यीशुऐ तेस आदमी लै बोलौ, “आपणौ हाथ बौड़ाऊ।” तिणीऐ आपणौ हाथ औगाऊं कियौ, और सेऊ तैबै दुज़े हाथा ज़िणौ ठीक हुई गौ। ¹⁴ तैबै फरीसिऊऐ बाइरै डेइयौ यीशु रै विरोधा दी गुणमुणादै लागै कि ऐस किणै कौरी झ़ांगी।

परमेश्वरारौ छ़ांटौ औंदौ सेवक

¹⁵ इणौ ज़ाणीयौ यीशु तिदरु कु डेइ गौ। और भौरी लोग यीशु पीछ़ु हुइ गौऐ, और यीशुऐ सौबी लोग च़ांगै कियै, ¹⁶ और यीशुऐ सै च़ितलायै कि मूँ परगट नाईं कौरीयौ। ¹⁷ ताकी ज़ो वचन यशायाह गुरुऐ रै ज़रीयै बोलौ औन्दौ थौ, सेऊ पुरौ हुआ : ¹⁸ “देखौ, एऊ मैरौ नुकुर आ, ज़ो मुइयै छ़ांटौ आ; मैरौ प्यारौ, ज़ासकु मैरौ ज़ीऊ खुश आ : हाऊं आपणी आत्मा ऐस माथै पा ऊ, और सेऊ दुज़ी ज़ाति लै फैंसला रौ संदेश दिआलौ। ¹⁹ सेऊ ना झ़ौगड़ौ कौरालौ, और ना नाच़ा गा लौ, और ना बज़ारा दी कोई तेसरी बाच़ शुणालौ। ²⁰ सेऊ फेच़ै औन्दै डाल़ नाईं चोड़ालौ, और ना धुऔं देणै वाल़ौ दियौ इशावालौ। ज़ेबी झ़ाऊंं सेऊ फैसलै माथै ज़ीत नाईं दिलावालौ। ²¹ दुज़ी ज़ाति तेसरै नाऊं माथै आश छ़ाड़ालै।”

यीशु और बालज़बूल

(मरकुस 3:20-30; लुका11:14-23

²² तैबै लोगुऐ एक शेड़ौ और गूंगौ आदमी यीशु कायै आणौ ज़ासदी बुरीआत्मा थी; और यीशुऐ सै ठीक कियौ, और सै बोलदै और देखदै लागै। ²³ एथ माथै सारै लोग हैरान हुईयौ बोलदै लागै, “एऊ का दाऊदा री सन्तान आ!” ²⁴ पर फरीसीऊऐ इणौ शुणीयौ बोलौ, “एऊ ता बुरीआत्मा रै मुख्यौ बालज़बूला री सहायता रै बिणा बुरी आत्मा नाईं गाड़दौ।” ²⁵ पर यीशुऐ तिंउरै मना री बुशै ज़ाणीयौ तिउंलै बोलौ, “ज़ेज़ै राज्य दी आपु मांझ़ीयै फूट हुआ सा, सेऊ पोरु उझड़ा सा; और ज़ेज़ै घौरा या इलाकै दी फूट हुआ सा, सेऊ घौर नाश हुआ सा। ²⁶ और अगर शैतान ई शैतान गाड़ा, ता सेऊ आपणौ ही विरोधी हुई गौ आ; तैबै तेसरौ राज़ किणै कौरीयै बौणी रौआ सा? ²⁷ अगर हाऊं शैताना रै ज़रीयै बुरी आत्मा गाड़ा ऊ ता, तुमारी सन्तान कासरै ज़रीयै बुरी आत्मा गाड़ा ई? एथीलै सै ई तुमारौ फैसलौ कौरा ई। ²⁸ अगर हाऊं परमेश्वरा री शक्ति कौरीयै बुरी आत्मा गाड़ा ऊ ता परमेश्वरा रौ राज़ तुमारै बिच़ा दी आशी गौ आ। ²⁹ या किणै कौरी कोई आदमी कास ताकती वाल़ै रै घौरा दी डेइयौ तेसरी धन-ज़यदाद लूटी सौका आ, ज़ेबी झ़ाऊंं कि पैहलै सेऊ तेस ताकती वाल़ौ आदमी नाईं बानालौ? तैबै सेऊ तेसरौ घौरा री धन-ज़यदाद लूटा सा। ³⁰ ज़ो मैरै साथा दी नाईं आ सै मैरै विरोधा ई, और ज़ो मूं आइलै कौठै नाईं कौरदै सै ढाल़ा ई। ³¹ एथीलै हाऊं तुमुलै बोलाऊ कि आदमी रै सारै रौंगा रै पाप और बुराई माफ हुआ, पर पवित्र आत्मा री बुराई माफ नाईं औली। ³² ज़ुण-कुण आदमी रै छ़ोहरु रै विरोधा दी कोई बुश बोलालौ, तेसरौ एऊ गुनाह माफ हुआ लौ, पर ज़ुण-कुण पवित्र आत्मा रै विरोधा दी कुछ़ बोलालै, तेसरौ गुनाह ना ता लोका दी और ना परलोका दी माफ हुआ लौ।

पेड़ और तेसरौ फौल़

(लूका 6:43-45)

³³ “अगर पेड़ा लै आच़्छ़ौ बोलाई, ता तेसरै फल़ा लै भी आच़्छ़ौ बोलौ, या निक्कामौ बोलाई, ता तेसरै फल़ा लै भी निक्कामौ बोलौ; कैलैकि पेड़ आपणै फल़ा कौरी पराणिआ। ³⁴ ओ सापा रै लौलडेऊ, तुमै बुरै हुईयौ किणै कौरै आच़्छ़ी बुशै बोली सौकाई? कैलैकि ज़ो मना दी भौरुऔ औन्दौ, सेऊई मुंआ दी आशा। ³⁵ भौलौ आदमी आपणै भौलै ज़ीवा कु भौली बूशै ला सा, और बुरौ आदमी ला सा आपणै बुरै ज़ीवा कु बुरी बूशै; ज़ो तुमारै ज़ीवा दी औलौ, सेऊ निकल़ा मुआ कौरी बाइरै। ³⁶ और हाऊं तुमु कु बोलाऊ कि आदमी ज़ो-ज़ो निक्कामी बूशै बोलालै, फैसलै रै दिनै सै हर एक तिऊं बूशै रौ लेखौ दिआलै। ³⁷ कैलैकि तू आपणी बूशा रै कारन निर्आरोप, और आपणी बूशै ही रै कारण दोशी ठहराइयाइ ।”

सौरगा रै निशाणा री मांग

(मरकुस 8:11,12; लूका11:29-32)

³⁸ एथ माथै कुछ़ शास्त्रिऊ और फरीसिऊऐ यीशु लै बोलौ, “ओ गुरु, आमै ताऊं कौरी एक निशाणी देखणी च़ाईं सा” ³⁹ यीशुऐ तिउंलै ज़वाब देयौ, “एज़ै पोस्तै रै बुरै और गलत लोग निशाणी लोड़ाई, पर योना गुरु री निशाणी छ़ाड़ीयौ हाऊं केज़ी भी निशाणी नाईं देखाल़दौ। ⁴⁰ योना च़ीयै दिनै और राच़ी झ़ाऊंं पाणी दी माछ़ी रै पेटा दी रौऔ, तिणी ई आदमी रौ छ़ोहरु च़ीन दिनै औ राच़ी धौतरी रै भीतै रौआलौ। ⁴¹ निनवे देशा रै लोग भी एज़ै पोस्तै रै लोगु आइलै उठीयौ परमेश्वरा रै फैसलै दिना दी तिऊं माथै इलज़ाम ला ई, कैलैकि तिउंऐ योना गुरु रौ परच़ार शुणीयौ आपणौ मन पापा कु बौदलौ आ और इदै ता योना गुरु रौ भी गुरु आ। ⁴² दक्षिणा रै तौरफा री राणी परमेश्वरा रै फैसलै रै दिना दी एज़ै पोस्तै रै लोगु आइलै उठीयौ तिऊं माथै इलज़ाम ला सा, कैलैकि इयै राणी सुलेमान गुरु रै ज्ञान शुणना लै धौतरी रै धुरै कु आशी थी, सुलेमान राज़ै काऐ। और देखौ, इदै ता सुलेमान गुरु कु भी बौड़ौ गुरु आ।

आधै सुधारा कु मुश्किल

(लूका 11:24-26)

⁴³ ज़ैबै आदमी कु बुरी आत्मा निकाल़ा सा तैबै सै बुरी आत्मा आपु कालै खाली ज़ागहा दी आरामा वाल़ी ज़ागहा लोड़ा आ, और ज़ैबै बुरी आत्मा कै किऐ भी ज़ागहा नाईं मिलदी। ⁴⁴ तैबै सै बोला सा, ‘हाऊं आबै आपणै सेज़ै घौरा दी डिआऊ ज़िदरु हाऊं निकल़ी ऊ।’ और ज़ैबै सै बुरी आत्मा वापिस तिए आशा ज़ीदरु सै निकाल़ी थी तिऐ तिआंकै सै ज़ागहा साफ-सुथरी और सज़ी औन्दी मिला आ। ⁴⁵ और सै बुरी आत्मा डेइयौ आपु आइलै औज़ौ सात बुरी आत्माऐं आणा सा, ज़ो तियांकु भी बुरी हुआ ई। इणै कौरीयै सै सारी बुरी आत्माऐं तेस शरीरा दी डेइयौ वास कौरा ई तेस आदमी री हालत ज़ासदी सै बुरी आत्माऐं हुआई पैहलै कु भी ज़ादी बुरी बौणा सा। ऐज़ै पोस्तै रै बुरै लोगु री हालत भी इणी ही हुआई।”

यीशु री आमा और भाई

(मरकुस3:31-35;लुका8:19-20)

⁴⁶ ज़ेबी यीशु भिड़ा आइलै बूशै लाइंदै लागौ औन्दौ थौ, तैबै यीशु री मां और भाई बाइरै खौड़ै थै और सै तेस आइलै बूशै लाइणौ च़हा थै। ⁴⁷ तेस आइलै कुणि एकीयै बोलौ, “देख, तेरी मां और तैरौ भाई बाइरै खौड़ै आ, और ताऊं आइलै बुशै लाइणै च़हा ई।” ⁴⁸ यीशुऐ तिउंलै ज़वाब देयौ, “कुण आ मेरी मां? और कुण आ मैरौ भाई?” ⁴⁹ और आपणै च़ेलै री तौरफा आपणौ हाथा बड़ाईयौ बोलौ, “देखौ, मेरी मां और मेरै भाई ऐ आ। ⁵⁰ कैलैकि ज़ुण-कुण मेरै सौरगा रै बाबा री इच़्छ़ा माथै आँडा ई, सैई मैरै भाई, और मेरी बौइंणी, और मेरी आमा सा।

बीजा बौइणै वाल़ै रौ औनेणौ

(मरकुस 4:1-9 लूका 8:4-8)

¹ सेज़ै दिनै यीशु घौरा कु निकल़ीयौ झ़ीला रै डीका कायै बोशौ। ² और तेस काऐ इणी बौड़ी भीड़ कौट्ठै हुई कि सेऊ किश्ती दी डैऔ और सारी भीड़ ढिका काऐ खौड़ी रौई। ³ और यीशुऐ तिउंलै अनैणै दी भौरी बूशै बोली : “एक बीजा बौइणै वाल़ौ बीजा बौइंदै डैऔ। ⁴ बौइंदै बारै कुछ़ बीज बाटा दी फोकुऔ और सेऊ बीज़ च़ुणौ च़िडु-चिटकोरुऐ। ⁵ कुछ़ बीज़ पौड़ौ पथरियाल़ी ज़बीना दी, ज़िऐ तिउंलै भौरी माटौ नाईं मिलौ और डूंगौ माटौ नाईं मिलणै रै कारण सै फेट्टी ही ज़ौमी गौऐ। ⁶ पर ज़ैबै ताती रुढ़ लागी, तैबै सै आंगुरै पोरु शूकी गौए । ⁷ कुछ़ बीज़ पौड़ौ झ़ाड़िऊ मांझ़ियै और सेऊ बौड़िदैं-बौड़िदैं दाबुऔ पोरु झ़ाड़ीऊ थाल़। ⁸ पर कुछ़ बीज़ पौड़ौ आच्छ़ी ज़बीना दी, और सेऊ भौरी फौल़ौ। कुछ़ फौल़ौ तीस पाथै, कुछ़ साठ पाथै और कुछ़ शौ पाथै। ⁹ ज़ासरै कौन्थू सा सै शुणा लै।”

औनेणै रौ मतलब

(मरकुस 4:10-12 लूका8:9,10)

¹⁰ च़ेलेउऐ यीशु काए आशिऔ तेसकु पुछ़ौ, “तु लोगु कु अनेणै दी का बुशै ला ई?” ¹¹ यीशुऐ तिउंलै ज़वाब दैऔ, “तुमुकै ता सौरगा रै राज़ा रै भेता री समझ़ देई ऐन्दी आ, पर तिउंलै नाईं। ¹² कैलैकि ज़ासकै आस्ती सा, तेसकै औज़ौ मिला सा, और तेसकै भौरी हुआ लौ; पर ज़ासकै कुछ़ नाईं सा, तेसकु ज़ो कुछ़ तेस काए आ, तेस भी पोरु निंआ ई। ¹³ हाऊं तिऊंकु अनेणै दी एथलै बूशै बोलाऊ कि ज़ो लोग देखा ताई रौंगै, पर सुंच़दै नाईं, और शुणा ताई रौंगै पर समझ़दै नाईं। ¹⁴ तिंउरै बारै दी यशायाह गुरु री ऐज़ी भविष्यवाणी पूरी हौआ सा : ‘तुमै कौंथु कु ता शुणा लै, पर समझ़दै नाईं; और आखी कु ता देखालै, पर नाईं दिशदौ। ¹⁵ कैलै कि इऊं लोगु रै ज़ीऊ मोटै हुई गोऐ, और सै कौंथु कु ऊंच़ौ शुणाई सा और तिउंऐ आपणी आखी मीच़ी गोई आ; किऐ इणौ ना च़ांई हुऔ कि सै आखी कु देखा, और कौंथु कु शुणा और ज़ीवा कु समझ़ा, और फिरा लै, और हाऊं तिऊं ठीक कौराउ।’ ¹⁶ पर भौली आ तुमारी आखी, कि सै देखा सा; और तुमारै कौंथु कि सै शुणा ई। ¹⁷ कैलै कि हाऊं तुमुलै सौच़ौ बोलाऊ की भौरी गुरुऐ और धौर्मिऐ च़ाओ कि ज़ो बूशै तुमै देखाई, देखा, पर नाईं देखी; और ज़ो बुशै तुमै शुणाई, शुणा, पर नाईं शुणी।

बीजा बौइणै वाल़ै रै औनैणै रै बारै दी समझ़ाऊणौ

(मरकुस 4:13-20; लूका8:11-15

¹⁸ “ऐबै तुमे बौइणा वाल़ै रै अनेणा रौ मतलब शुणौ : ¹⁹ ज़ुण-कुण राज्य रौ वचन शुणीयौ नाईं समझ़दौ, तेसरै ज़ीवा दी ज़ो कुछ़ औइनौ औन्दौ थौ, तेस सेऊ दुष्ट आशियौ छ़ुड़ाइयौ निंया पौरु। ऐऊ सेऊई बीज आ, ज़ो बाटा रै धूरै दी औइनौँ औन्दौ थौ। ²⁰ और ज़ो बीज़ पथरीयाल़ी ज़मीना दी औइनौ औन्दौ, ऐऊ सेऊ आ, ज़ो वचन शुणीयौ खरकच़ार खुशी कौरियै माना ई। ²¹ पर आपणै दी ज़ौड़ी नाईं पाकुड़णै रै कारण सेऊ थोड़ै ही दीना रौ सा, और ज़ेबी वचना रै कारन दुख या सताव हुआ आ, ता खरकच़ार ठोकर खा सा। ²² ज़ो बीज़ झ़ाड़ीऊ माज़िऐ औइनौ थौ, ऐऊ सेऊ आ, ज़ो वचन शुणा ई, पर दुनिया री च़िन्ता और रुपाऐ पैसै रौ धोखौ वचन दाबा सा, और सेऊ फल़ नाईं आणदौ। ²³ ज़ो आच्छ़ी ज़बीना दी औइनौ औन्दौ, सेऊ ऐऊ आ, ज़ो वचन शुणीयौ समझ़ा सा, और फल़ आणा सा; कोई शौ गुणौ, कोई साठ गुणौ, और कोई तीस गुणौ।”

ज़ाँगली बीजा रौ औनैणौ

²⁴ यीशुऐ तिउंलै एक औज़ौ अनेणौ दैऔ : “सौरगा रौ राज़ तेस आदमी रै समान सा ज़ुणिऐ आपणै डोखरा दी आच्छ़ौ बीज़ बौ। ²⁵ पर ज़ेभी लोग सुतै औन्दै थै ता तेसरौ दुष्मनै आशीयौ गिऊं मांझ़िऐ ज़ांगल़ी बीज बौइयौ डैऔ। ²⁶ ज़ेबी मीण्डु निकल़ै और सील़ लागै, ता ज़ांगल़ी गुल़ै रै पौधै भी दिशै। ²⁷ ऐथ माथै घौरा रै नुकुरै आशीयौ तेसलै बोलौ, ‘ओ मालीक, का ताइंऐ आपणै डोखरै दी आच्छ़ौ बीज़ नाईं बौ थौ? तैबै ज़ांगल़ी गुल़ै रै पौधै तिऊं मांझिए किदरा कु आशै ई?’ ²⁸ तिणिऐ तेसलै बोलौ, ‘ऐऊ कास दुश्मना रौ काम आ।’ नुकुरै तेसलै बोलौ, ‘का तेरी इच्छ़ा सा, कि आमै डेइयौ तेस कौठै कौरी?’ ²⁹ तिणिऐ बोलौ, ‘नाईं, इणौ ना च़ाईं हुऔ कि ज़ांगल़ी गुल़ै रै पौधै कौठै कौरदै बारै तुमै तिऊं आइलै गीऊं भी पोटा लै। ³⁰ लौइणै झाऊं दुईया एकी दूजा आइलै बौड़णै दैऔ, और लौइणै रै बौग्तै झ़ाऊं हाऊं लौइणै वाल़ैऊ कै बोलुलौ की पैहलै ज़ांगल़ी गुल़ै रै पौधै कौठै कौरियौ ज़ाल़ना लै तिंउरै पुलटै बानौ, और गीऊं मैरै कोठे दी कौठै कौरौ’।”

राई रै बीजा रौ औनेणौ

(मरकुस 4:30-32; लूका13:18,19)

³¹ यीशुऐ तिउंलै एक औज़ौ अनेणौ दैऔ : “सौरगा रौ राज़ राई रै एक गुल़ै रै ज़िणौ आ, ज़ो एकी आदमीऐ निंयौ आपणै डोखरा दी बौई गौ। ³² सेऊ सौबी बीज़ा रै गुल़ै कु छ़ोटौ ता औआ सा पर ज़ेबी सेऊ बौड़ा सा तैबै सौबी पौधै कु बौड़ौ औआ सा; और इणौ झ़ोट बौणा सा कि सौरगा रै च़ड़कु आशियौ तेसरी डाल़ी दी डेरौ पा ई।”

खमीरा (आमलै) रौ औनेणौ

(लूका 13:20,21)

³³ यीशुऐ एक औज़ौ अनेणौ तिउंकै शुणाऔ : “सौरगा रौ राज़ संज़ेड़ै ज़िणौ सा ज़ो एकी छ़ेउड़ीऐ निंऔ चीन पाथै पिठै मांझ़ीऐ मुछ़ौ आ और देखदै-देखदै सारौ पिठौ ओसरी गौ आ।”

औनैणै दी बुशै रौ काम

(मरकुस4:33,34)

³⁴ ऐ सारी बूशै यीशुऐ अनेणै दी लोगु कु बोली, और बिना अनेणै देईयौ यीशु तिउंकै कुछ़ नाईं बोला थौ, ³⁵ कि ज़ो वचन गुरु रै ज़रीयै बोलौ औन्दौ थौ, सेऊ पूरौ हुआ : “हाऊं अनेणै बोलणा लै आपणौ मुं खौलुलौ : हाऊं तिऊं बूशै ज़ो दुनियां रै बौणना कु छ़ुपी रौई आ परगट कौरुलौ।”

जाँगली बीजा रै औनैणै रै बारै दी

³⁶ तैबै यीशु भीड़ा छ़ाड़ियौ घौरा दी आशौ, और यीशु रै च़ेलेउऐ तेस काए आशियौ बोलौ, “डोखरा रै ज़ांगल़ी बीजा रौ अनेणौ आमु कै समझ़ाऊ।” ³⁷ यीशुऐ तिउंलै ज़वाब दैऔ, “आच्छ़ौ बीज़ बीज़णै वाल़ौ आदमी रौ छ़ोहरू आ। ³⁸ डोखरै इयै धौतरी आ, आच्छ़ौ बीज राज्य री संतान, ज़ांगल़ी बीज़ दुष्टा री संतान आ। ³⁹ ज़ुणी दुश्मनै सेऊ बौ सेऊ शैतान सा; लौइणौ धौतरी रौ अन्त आ, लौइणै वाल़ौ सौरगा रौ दूत आ। ⁴⁰ ज़िणै ज़ांगल़ी गुल़ै कौठै कौराई और ज़ाल़ा ई तिणी ही इयैं धौतरी रै अन्ता दी हुआ लौ। ⁴¹ आदमी रौ छ़ोहरु आपणै सौरगा रै दूत भेज़ालौ, और सै तेसरै राज्य मांझ़ीऊ कु सौबी ठोकरा रै कारणा लै और बुरै काम कौरणै वाल़ै कौठै कौरा सा, ⁴² और तिऊं आगी रै भाठै दी पाई, ज़िऐ लेरनौ और दांद चाकणै हुआ आ। ⁴³ सेज़ै बौग्तै धौर्मी आपणै बाबा रै राज़ा दी सुरज़ा ज़िणौ च़ौमका लौ। ज़ासरै कौंथू आ सै शुणा लै।

छ़ुपै औन्दै खौज़ानै रौ औनेणौ

⁴⁴ “सौरगा रौ राज़ डोखरै दी छ़ुपै औन्दै रुपाऐ पैसै रै ज़िणौ आ, ज़ो कास आदमी कै मिलौ और च़ोरी गौ, और भौरी खुश हुईयौ डैऔ और आपणौ सब कुछ़ बेच़ी गौ और सेऊ डोखरौ खरीदी गौ।

अनमोल मोती रौ औनेणौ

⁴⁵ “तैबै सौरगा रौ राज़ एकी बणीऐ ज़िणौ सा ज़ो आच्छ़ै मोतीऊ लोड़दै थौ लागौ औन्दौ। ⁴⁶ ज़ेबी तेसकै एक भौरी मैंहगौ मौती मिलौ ता तीणिऐ डेईयौ आपणौ सारौ कुछ़ बेच़ी गौ और सेऊ मोती खरीदी गौ।

ज़ाल़ा रौ औनेणौ

⁴⁷ “तैबै सौरगा रौ राज़ तेस बौड़ै ज़ाल़ा रै ज़िणौ आ ज़ो समुद्रा दी पाऔ, और सौभी रौंगा री माच्छ़ी कौठै कौरियौ आणी। ⁴⁸ और ज़ेबी ज़ाल़ भौरुइ गौ, ता झ़ीवरै सेउ ज़ाल़ झ़ीड़ीऔ डीका माथै आणौ, और बोशियौ आच्छ़ी-आच्छ़ी ता ओखरा दी कौठी की और निकामी-निकामी शोटी गोई पोरू। ⁴⁹ दूनिया रै अन्ता दी इणौ ही हुआ लौ। सौरगा रौ दूत आशियौ दुष्ट लोग धौर्मीऊ लोगा कु औलग कौरा लौ, ⁵⁰ और तिऊं आगी रै भाठै दी पा लै। ज़िऐ लेरनौ और दांद चाकणौ औलौ। पुराणी और नौई शिक्षा रौ दौरज़ौ

पुराणी और नौई शिक्षा रौ महत्व

⁵¹ “का तुमुऐ ऐज़ी सारी बुशै समझ़ी गोई?” तिउंऐ यीशु लै बोलौ, “ओ।” ⁵² यीशुऐ तिउंलै बोलौ, “एथिलै सौबी शास्त्री ज़ो स्वर्गा रै राज्य रौ च़ेलौ बौणौ औन्दौ, तेस घौर वाल़ै रै ज़िणौ आ ज़ो आपणै भण्डारा कु नौई और पुराणी च़ीज़ै गाड़ा सा।

नासरता दी यीशु री बेइज्ज़ती

(मरकुस 6:1-6;लूका 4:16-30)

⁵³ ज़ेबी यीशु ऐ सौबी अनेणै बोली गौऐ थै, ता तिदरु कु डेई गौ। ⁵⁴ और आपणै इलाकै दी आशियौ तिंउरै धार्मीक खुबल़ी दी तिउंलै इणौ उपदेश देन्दै लागौ कि सै हैरान हुइयौ बोलदै लागै, “ऐसकै ऐ ज्ञान और शक्ती वाल़ै काम किदरा कु मिलै इ? ⁵⁵ का ऐऊ बाड़ी रौ छ़ोहरु नाईं आ? और का ऐसरी मां रौ नाऊं मरियम और ऐसरै भाई रै नाऊं याकूब, यूसुफ, शमौन और यहूदा नाईं आ? ⁵⁶ और का ऐसरी सारी बौइणी आमु मांज़ी नाईं रौईंदी? तैबै ऐसकै ऐऊ सौब किदरा कु मिलौ आ? ⁵⁷ ऐज़ी ताऐं तिउंऐ तेसरै कारन ठोकर खाई, पर यीशुऐ तिउंलै बोलौ, “गुरु रौ आपणै देश और आपणै घौरा छ़ाड़ीयौ और किऐ बेईज्ज़ती नाईं औन्दी।” ⁵⁸ और तीणिऐ तिऐ तिंउरै अविश्वासा रै कारन भौरी का सामर्था रै काम नाईं किऐ।

यूहन्ना बपतिसमा देणै वाल़ै रौ खून

(मरकुस 6:14-29; लूका 9:7-9

¹ सेज़ै बोगतै दी च़ौथै हिसै रौ राज़ै हैरोदेसै यीशु रै बारै दी शुणौ, ² और आपणै नुकुरा लै बोलौ, “ऐऊ यूहन्ना बप्तिस्मा देणै वाल़ौ आ! सेऊ मौरै औन्दै माझ़ीऊ कु जिऊंदौ हुई गौ आ, एथिलै तेसकु सामर्था रै काम परगट हुआ। ³ कैलैकि हैरोदेसै आपणै भाई फिलिप्पुसा री छ़ेउड़ी हैरोदियासा रै कारन, यूहन्ना पाकड़ीयौ बानौ और ज़ेला दी पाई गो थौ। ⁴ कैलैकि यूहन्नै तेसलै बोलौ औन्दौ थौ कि ऐऊ छ़ाड़नौ ताउंलै ठीक नाईं आ। ⁵ एथीलै सेऊ तेस झ़ांगणौ च़हा थौ, पर लोगु कु डौरा थौ कैलैकि सै तेस गुरु माना थै। ⁶ पर ज़ेबी हैरोदेसा रौ ज़नम दिन आशौ, ता हैरोदियासा री छ़ोटीऐ पार्टी दी नाच़ीयौ हैरोदेस खुश कियौ। ⁷ ऐथ माथै तीणिऐ कौसम खाइयौ वचन दैऔ, “ज़ो कुछ़ तू मांगा ली, हाऊं ताउंलै दिआ ऊ।” ⁸ से आपणी मां रै उकसाणै माथै बोली, “यूहन्ना बप्तिस्मा देणैवाल़ै रौ मूंड थाल़ी दी इऐ मुं काए आणौ ! ⁹ राज़ौ दुखी हुऔ, पर आपणी कौसमा का, और साथा दी बोशणै वाल़ै रै कारण, हुकम देणौ कि पोरु दैऔ। ¹⁰ और तीणिऐ ज़ेला दी लोग भेज़ियौ यूहन्ना रौ मूंड काटौ; ¹¹ और तेसरौ मूंड थाल़ी दी आणौ और छ़ोटी कै देणौ, और तींए सेउ मूंड आपणी मां काऐ निंयौ। ¹² तैबै यूहन्ना रै च़ेले आशै और तेसरौ मौड़ौ निंइयौ दाबी गौ, और डेईयौ यीशु कै खबर देई।

पाँज़ हज़ार पूरषा लै रोटी खिलाउणी

(मरकुस6:30-44; लूका9:10-17; यूहन्ना 6:1-14)

¹³ ज़ेबी यीशुऐ इणौ शुणौ, ता सेऊ किश्ती माथै च़ौड़ियौ तिदरा कु केज़ी सुनसान ज़ागा दी, ऐखुलै दी डेई गौ। लोग इणौ शुणीयौ इलाकै-इलाकै कु पैदल ई तेस पिछ़ु हुई गौऐ। ¹⁴ तीणिऐ निकल़ियौ एक बौड़ी भीड़ देखी और तिऊं माथै दया की, तिंउरै बिमार लोगु ठीक की। ¹⁵ ज़ेबी ब्याल़ हुई ता यीशु रै च़ेलेउऐ तेस काऐ आशीयौ बोलौ, “ऐज़ी ज़ागा सुनसान आ और बेर औन्दी लागी गोई; इऊं लोगु नीज़ुका रै बस्ती और गांव दी छ़ाड़ौ ताकी इयै लोग आपकालै रौइणै रौ और रोटी (खाणै) रौ इन्तज़ाम कौरा। ¹⁶ पर यीशुऐ तिउंलै बोलौ, “तिऊंरौ डेऊणौ ज़रुरी नाईं! तुमै ही इऊं लै खाणा लै दैऔ।” ¹⁷ तिउंऐ यीशु लै बोलौ, “इयै आमुकै पांज़ रोटी और दुई माछ़ी छ़ाड़ीऔ कुछ़ा ना आसतौ।” ¹⁸ यीशुऐ बोलौ, “तिऊं इदै मू काऐ आणौ।” ¹⁹ तैबै यीशुऐ लोगु लै घासा माथै बोशणै लै बोलौ, और तैबै यीशुऐ सै पाज़ रोटी और दुई माछ़ी आपणै हाथा दी की और सौरगा बिलै देखीऔ परमेश्वरा रौ धन्यवाद देईयौ आशीष मांगी और रोटी च़ेलैऊ कै देई और च़ेलै लागै लोगु कै बांटदै। ²⁰ तैबै सारै लोगुऐ पेटा भौरीऔ रोटी खाई। तेती माथै भी च़ेलेउऐ बौच़ै औन्दै रोटी और माछ़ी रै बारह छ़ाबड़ै भौरै। ²¹ और खाणा वाल़ै छ़ेउड़ीऊ और लोल़डैऊ छ़ाड़ीयौ, पांज़ हज़ार ता मौर्द थै।

यीशु रौ पाणी माथी आण्डणौ

(मरकुस 6:45-52; यूहन्ना 6:15-21)

²² तैबै यीशुऐ खरकच़ार आपणै च़ेलै किश्ती दी डेऊणा लै मज़बूर कियै कि सै तेसकु पैहलै पारै डेआ लै, ज़ेबी झ़ाऊं सेऊ लोगु छ़ाड़ा लौ। ²³ यीशु लोगु छ़ाड़ीयौ, प्राथना कौरना लै औलग पाहाड़ा दी डेई गौ; और ब्याल़ी यीशु तिऐ ऐखुली थौ। ²⁴ सेज़ी बौग्तै किश्ती झ़ीला रै बीच़ा दी बागुरा कौरी हीलदै-ढ़ुलदै थी लागी औन्दी, कैलैकि बागुर सामनै ओउलै थी लागी औन्दी। ²⁵ और यीशु राचकै च़ार बाज़ै झ़ीला माथै हाण्डदी बारै तिऊं काऐ आशौ। ²⁶ च़ेलै यीशु झ़ीला दी पाणी माथै हाण्डदी बारै रै देखीयौ घबराई गौऐ। और बोलदै लागै, “एऊ भूत आ!” और डौरा रै मारै सै हाक्कै मारदै लागै। ²⁷ तैबै यीशुऐ खरकच़ार तिऊं आइलै बूशै लाई और बोलौ, “हिम्मत कौरौ! हाऊं आ, नाईं डौरौ!” ²⁸ पतरसै यीशु लै ज़वाब दैऔ, “ओ प्रभु, अगर तू आ, ता मू आपु काऐ पाणी माथै हाण्डयौ आशणा रौ हुकुम दैऔ।” ²⁹ यीशुऐ बोलौ, “आश!” तैबै पतरस किश्ती कु उतरीयौ यीशु काए डेऊणा लै पाणी माथै हाण्डदै लागौ। ³⁰ पर बागुर देखीयौ डौरी गौ, और ज़ेबी डूबदै लागौ ता हाक्कै मारीयै बोलौ, “ओ प्रभु, मू बच़ाऊ!” ³¹ यीशुऐ खरकच़ार हाथ बड़ाईयौ सेऊ पाकड़ी गौ और तेसलै बोलौ, “ओ अविश्वासी, ताइंऐ कैलै शक कियौ?” ³² ज़ेबी सै किश्ती दी डेई गौऐ, ता बागुर रुकी गौ। ³³ एथ माथै तिउंऐ ज़ो किश्ती दी थै, यीशु लै डाला कौरीयै बोलौ, “सौच़ी ई, तू परमेश्वरा रौ छ़ोहरु आ।”

गन्नेसरता गाँवा दी रोगी ठीक कौरणै

(मरकुस 6:53-56)

³⁴ तैत बासियै सै गन्नेसरत गांवा दी पौउंच़ै। ³⁵ तिदलै लोगुऐ यीशु पराणी गौ और तिदलै लोगुऐ सारै परदेशा दी खबर पउंच़ाई और सारै बिमार लोगु यीशु काऐ आणै, ³⁶ और सै यीशु कु औरज़ कौरदै लागै कि सै तिऊं आपणै जुड़कै ई छ़ुइंणै दै; और ज़ेती लोगुऐ भी यीशु छ़ुंऔं, सै ठीक हुई गौऐ।

रीती रिवाज़ा रौ पालन कौरना रौ सवाल

(मरकुस 7:1-13)

¹ तैबै फरीसी लोग और कुछ़ यहूदी शास्त्री लोग, ज़ो यरुशलेम शहरा कु आशै थै सै यीशु काऐ आशीयौ पूछ़दै लागै, ² “तैरै च़ेलै बज़ुरगा रै नियमा माथै कैलै ना च़ालदै, सै ता बिणा हाथा धोइयौ ई रोटी खा ई?” ³ यीशुऐ तिउंलै ज़वाब दैऔ, “तुमै भी आपणै रीति-रिवाज़ा रै कारण कैलै परमेश्वरा रौ हुकम टाल़ा ई? ⁴ कैलैकि परमेश्वरै बोलौ आ, “आपणै मां-बाबा री इज़्ज़त कौरीयौ’, और ‘ज़ो आपणै मां-बाबा लै बुरौ बोला लौ, सेऊ ज़रुर मौरा सा।’ ⁵ पर तुमै ऐस हुकमा रौ बोल्कुल उल्टौ कौरा ई। अगर केज़ै आदमीऐ आपणै मां-बाबा री मज़द कौरनी च़ाईं, पर सेऊ आपणै मां-बाबा लै बोला लौ इणौ कि, ‘ज़ो कुछ़ मुइंयै तुमुकै दैणौ थौ सेऊ देई गौ मुइंयै सारौ परमेश्वरा कै,’ ⁶ ता सेऊ आपणै बाबा री मज़द नाईं कौरदौ, इणै कौरीयै तुमै आपणै चाणै औन्दै रीति-रिवाज़ कौरीऐ परमेश्वरा रौ हुकम चोड़ा ई। ⁷ ओ कपटी लोगु, यशायाह गुरुऐ तुमुरै बारै दी आशणै वाल़ै बौग्ता री बूशै ठीक ई लिखी औन्दी आ, ⁸ ‘इयै लोग मेरी इज्ज़त मुंआ कोरिऐ ता कौरा ई पर ज़ीवा कौरिऐ ई मूकु भौरी दूर। ⁹ और इयै मेरी तारिफ फज़ूल कौरा ई। और आदमी रै चाणै औन्दै नियमा माथै च़ाला और शिखावा ई।’

अशुद्ध कौरणै वाल़ी बुशै

मरकुस 7:14-23)

¹⁰ यीशुऐ तौऐं सारै लोग आपू काऐ औटाइयौ बोलौ, “तुमै सारै मेरी बूशै शुणियौ समझ़ौ। ¹¹ केज़ौ भी खाणौ ज़ो आदमी खा सा, सेऊ खाणौ आदमी रौ मन गान्दौ नाईं कौरदौ, पर ज़ो गांदी बुशै आदमी रै ज़ीवा कु बाइरै आशा सा, सेऊ आदमी रौ मन गान्दौ चाणा आ।” ¹² तैबै च़ेलेउऐ आशीयौ यीशु कु बोलौ, “का तू ज़ाणाई कि फरीसिऊऐ ऐऊ वचन शुणीयौ ठोकर खाई? ¹³ यीशुऐ तिउंलै ज़वाब दैऔ, “हर पेड़ ज़ो मैरै सौरगा रै बाबा रै नाईं लाऔ औन्दौ, तेस सेऊ पोरु गाड़ा। ¹⁴ तिऊं डेऊणै दैऔ; सै शेड़ै सा और शेड़ै कै बाट देखाऊणा वाल़ै आ अगर शेड़ौ शेड़ै लै बाट दिखाल़ा लौ ता सै दुईयै खाल़ी दी पौड़ा ई।” ¹⁵ इणौ शुणीयौ पतरसै यीशु लै बोलौ, “ऐज़ौ अनेणौ आमू लै समझ़ाऊ।” ¹⁶ यीशुऐ बोलौ। “का तुमै इबी झ़ाऊंं अनज़ाण ई? ¹⁷ का तुमै नाईं ज़ाणदै ज़ो च़ीज़ तुमै खाई सै पेटा भीतै डेया सा, और खाइयौ निकल़ा ई बाइरै? ¹⁸ पर ज़ो कुछ़ मुंआ कु बूरी बुशै निकल़ा ई, सै बूशै आदमी गान्दौ चाणा। ¹⁹ कैलैकि बुरै विच़ार, हत्या, छ़ोटुड़ी-छ़ेउड़ी या मर्दू आइलै गान्दै काम, छ़ोटुड़-छ़ेउड़ी आइलै गान्दै काम, च़ोरी, झ़ूठी गवाई और पुराज़ मौना कु निकल़ा ई। ²⁰ ऐऊ ई आ ज़ो आदमी गान्दौ चाणा, पर बिणा हाथ धौइयौ रोटी खाणौ आदमी गान्दौ नाईं चाणदौ।”

कनानी ज़ाती री छ़ेवड़ी रौ विश्वास

(मरकुस 7:24-30)

²¹ यीशु गलीला कु निकल़ीयौ, सूर और सैदा परदेशा दी डैऔ। ²² तेस परदेशा री एक छ़ेउड़ी आशी, और हाकै मारीयौ बोलदै लागी, “ओ प्रभु! दाऊदा री सन्तान, मूं माथै दया कर! बुरी आत्मे मेरी माईं भौरी सताऊणी लाईं ऐन्दी।” ²³ पर यीशुऐ तियांलै कुछ़ ज़वाब नाईं दैऔ। तैबै यीशु रै च़ेलेउऐ यीशु कु औरज़ की कि, “इयां डेऊणै देऊ, कैलैकि ऐ आमु पीछ़ु हाकै मारीयौ आ आशदै लागी ऐन्दी।” ²⁴ यीशुऐ ज़वाब दैऔ, “इस्राएला रै घौरा री औच़ी औन्दी भेरी छ़ाड़ियौ हाऊं कासी ओरी काऐ नाईं भेज़ौ।*” ²⁵ पर सै आशी, “और यीशु कै ढाला कौरियौ बोलदी लागी* , “ओ प्रभु मेरी मज़द कर।” ²⁶ यीशुऐ ज़वाब दैऔ, “लोल़डेउ री रोटी कुकरु लै दैणी आच्छ़ी नाईं।”* ²⁷ तैबै तिऐं छ़ेउड़ीऐ बोलौ, “सौच़ौ आ प्रभु, पर मालिका कु रोटी खाइयौ ज़ो च़ुर-च़ार धौनी छुटा आ तिऊं गासड़ू ता कुकर खा ई। ²⁸ यीशुऐ तिऐं छ़ेउड़ी रै इणै ज़वाब शुणियौ तियांलै बोलौ, “ओ बौइंण, तैरौ विश्वास भौरी बौड़ौ आ। ज़िणौ तू च़हा ई, तिणौ ही ताउंलै हुआ।“’”‘

कई रोगिऊ ठीक कौरणै

²⁹ तैबै यीशु तिदरु कु डेइयौ गलीला री झ़ीला काऐ आशौ, और पाहाड़ा माथै च़ौड़ियौ बोशी गौ। ³⁰ तैबै भौरी भीड़ यीशु काऐ आशी। सै लोग आपु आइलै लौंगड़े, शेड़ै, लाटै, टुण्डै, और भौरी ज़ौणै यीशु काऐ आणै, और यीशु रै बांगणै काऐ पाऐ, और यीशुऐ सै ठीक किऐ। ³¹ ज़ेबी लोगुऐ देखै कि गूंगै बोलदै लागै, और टुण्डै ठीक हुई गौऐ, और लौंगडै आण्डदै लागै, और शेड़ै देखाई सा ता सारै लोग हैरान हुईयौ इस्राएला रै परमेश्वरा री बड़ाई कौरदै लागै।

च़ार हज़ार लोगु लै रोटी खिलाउणी

(मरकुस8:1-10)

³² यीशुऐ आपणै च़ेलै औटाऐ और तिउंलै बोलौ, “मूकै इऊं लोगू माथै तरस आशदै लागौ औन्दौ, कैलैकि इयै चिया दिनै कु मू आइलै आ और इऊंकै खाणा लै कुछ़ भी नाईं आ। इऊं हाऊं घौरै भूखै भेज़ू लै ता इऊंकै डेऊंदै-डेऊंदै बाटा दी रिंगणौ लागा सा। ³³ च़ेलेउऐ यीशु कु बोलौ, “इयै सुनशान ज़ागहा दी रोटी रौ इन्तज़ाम किणै कोरिऐ हुआ सा?” ³⁴ यीशुऐ तिऊंकु पूछ़ौ, “तुमुकै केती रोटी ई?” तिऊंयै बोलौ, “सात, और थोड़ी ज़ेई माछ़ी। ³⁵ तैबै यीशुऐ तिऊं लोगू लै धौनी बोशणा लै बोलौ। ³⁶ और तैबै यीशुऐ सै सात रोटी और माछी आपणै हाथा दी पाकड़ी और परमेश्वरा रौ धन्यवाद दैइयौ रोटी चोड़ी, और आपणै च़लैऊ कै दैंदै थाकौ लागी, और च़ेलै थाकै लोगू कै दैंदै लागी। ³⁷ सारै लोगुऐ पेटा भौरियौ खाऔ। और तेती माथै भी तिउंकै सात बौड़ै छ़ाबडै रोटी रै बौच़ै। ³⁸ खाणा वाल़ी छ़ेउड़ी और लोल़डेउस छाड़ियौ च़ार हज़ार ता मर्द थै। ³⁹ तैबै यीशुऐ सै लोग आपणै- आपणै घौरै भेज़ै और आपू किश्ती दी बोशौ, और मगदन रै देशा दी आशौ।

सौरगा रै निशाणा री मांग

(मरकुस 8:11-13 लूका12:54-56)

¹ फरीसिऊ और सदूकिउऐ यीशुकाऐ आशीयौ तेस परखुणा लै बोलौ, “आमूकै सौरगा री केज़ी इणी निशाणी देखाल़ कि यीशु परमेश्वरा कु आ आशौ औन्दौ। ² यीशुऐ तिउंलै ज़वाब दैऔ, “ब्याल़ी तुमै बोला ई कि, “सौरग आच़्छ़ौ रौआ, कैलैकि सौरग रातौ आ’, ³ और दोउती उठियौ तुमै बोला ई, ‘आज़ पाणी लागा, कैलैकि सौरग रातौ और धुंधलौ आ। तुमै सौरगा रै हालत देखियौ तेसरौ भेद बोली सौका ई, पर बौग्ता री निशाणी रौ भेद कैलै नाईं बोली सौकदै? ⁴ एजै जुगा रै बुरै और गान्दै काम कौरणा वाल़ै लोग निशाण लोड़ा ई, पर योना रै निशाणी छ़ाड़ियौ तिउंलै औज़ौ कोई निशाणी नाईं दैन्दै।“‘

फरीसिउ और सदुकिउ री शिक्षा रौ संज़ेड़ौ

(मरकुस 8:14-21)

⁵ च़ेलै झ़ीला कु पार पउंच़ै, “पर सै रोटी निणै बिसरुई गौऐ थै। ⁶ यीशुऐ तिउंलै बोलौ, “शुणौ, फरीसीऊ और सदूकिऊ संज़ेड़ै कु बौच़ियौ रौए ऊ। ⁷ यीशु रै च़ेलै आपू मांझ़ियै चौपड़िंदै लागै, “आमुऐ रोटी नाईं आणी, तैबै बोलौ यीशुऐ इणौ। ⁸ तिंउरै विच़ार ज़ाणियौ यीशुऐ तिउंलै बोलौ, “ओ दुनिया रै लोगुऔ, तुमै आपू मांझ़िऐ कैलै ई लागै औन्दै चौपड़िंदै कि आमू कै रोटी नाईं? ⁹ का तुमै इबी झ़ाऊंं नाईं समझ़ुदै? का तुमुकै सै पांज़ हज़ारा री पांज़ रोटी आद नाईं, और ना इणौ कि तुमुऐ केती छ़ाबड़ी च़ुंगी थी? ¹⁰ और ना सै च़ार हज़ारा री सात रोटी, और ना इणौ कि तुमुऐ केती छ़ाबड़ै भौरै थै? ¹¹ तुमै कैलै नाईं समझ़ुदै कि मुइयैं तुमुकै रोटी रै बारै दी नाईं बोलौ, पर हाऊं बोलु थौ तुमुलै इणौ कि तुमै फरीसीऊ और सदूकिऊ रै बुरै विच़ार और शिक्षा कु बौच़ियौ रौएउ। ¹² तैबै यीशु रै च़ेलैऊ कै समझ़ी दी आशौ कि यीशुऐ रोटी रै संज़ेड़ै कु नाईं, पर फरीसीऊ और सदूकिऊ री शिक्षा कु बौच़ियौ रौणा लै बोलौ थौ।

पतरसा रौ प्रभु यीशु ’मसीह’ मानणौ

(मरकुस 8:27-30; लूका9:18-21)

¹³ तैबै यीशु कैसरिया फिलिप्पी रै परदेशा दी आशौ, और आपणै च़ेलेऊ कु पुछ़दै लगौ, “लोग आदमी रै छ़ोहरु लै का बोलाई?” ¹⁴ तिउंऐ बोलौ, “कुछ़ ता युहन्ना बप्तिस्मा देणैवाल़ौ बोलाई, और कुछ़ बोला एलिय्याह, और बोला यिर्मयाह या कोई दुज़ौ गुरु समझ़ा ई, ज़ुण मौरियौ ज़ीउंदै हुए ई। ¹⁵ यीशुऐ तिउंलै बोलौ, “पर तुमै मुलै का बोलाई?” ¹⁶ शमौन पतरसै ज़वाब दैऔ, “तुमै ज़ीऊंदै परमेश्वरा रौ छ़ोहरु मसीहा ई।” ¹⁷ यीशुऐ तिउंलै ज़वाब दैऔ, “ओ शमौन, योना रै छ़ोहरु, तू भौलौ आ; कैलै कि मासै और लौऊऐ नाईं, पर मैरौ बाबा ज़ो सौरगा दी आ, एज़ी बूश ताऊं माथै परगट की आ। ¹⁸ और हाऊं भी ताऊं कु बोलाऊ कि तू पतरस आ, और हाऊं एस ढोल़ा माथै आपणी कलीसिया चाणाउ, और धौतरी रै द्धार तेस माथै प्रबल नाईं हुआ लै। ¹⁹ हाऊं ताउंलै सौरगा रै राज़ा री कुंज़ी दिआउ: और ज़ो कुछ़ तू धौतरी माथै बानालौ, सेऊ सौरगा दी बानिया लौ; और ज़ो कुछ़ तू धौतरी माथै खोलालौ, सेऊ सौरगा दी खुलालौ। ²⁰ तैबै यीशुऐ आपणै च़ेलै च़ितल़ाऐ कि कासी कै नाईं बोलियौ कि हाऊं मसीह ऊ।

आपणै मौरणै रै बारै दी यीशु रै बोलणौ

(मरकुस 8:31-33; लूका 9:22)

²¹ सेज़ै बौग्ता कु यीशु आपणै च़ेलै लै बोलदै लागौ, “ज़ुरुरी आ कि हाऊं यरुश्लेमा लै डेऊ, और पुरनिऊ, और परधान याजकु, और शास्त्रिऊ रै हाथा कु भौरी दुख उठाऊ; और मूं पौरु ज़ांगाई; और चीजै दिनै ज़ीउंदौ हुआ ऊ। ²² तैबै पतरसै यीशु एकी भिलै नियौ और तेसलै डांटियौ बोलौ, “ओ प्रभु, परमेश्वरै केबी ना च़ाईं इणौ कियौ ताऊं आइलै इणौ केबी ना औन्दौ। ²³ तैबै यीशुऐ पीछ़ाऊं मुड़ियौ पतरसा लै बोलौ, “ओ शैतान, मूकाऐ कु दूर डेऊ! तू मुलै ठोकरा रौ कारण आ; कैलैकि तू परमेश्वरा री बुशै माथै नाईं, पर आदमी री बुशै माथै ज़ीऊ ला ई।

यीशु पिछ़ु आण्डणै रौ मतलब

(मरकुस 8:34——9:1; लूका 9:23-27)

²⁴ तैबै यीशुऐ आपणै च़ेलैऊ लै बोलौ, “अगर कुण मूं पिछ़ु हाण्डणौ च़ाहा, ता आपणी इच़्छ़ा पोरु छ़ाड़ा लौ और आपणौ क्रूस च़ुंगीयौ, मुं पिछ़ु हाण्डा लौ। ²⁵ कैलैकि ज़ुण-कुण आपणौ प्राण दैणै नाईं च़ाह लौ तेसलै परमेश्वरा आइलै सौदा री ज़ीन्दगी नाईं मिलदी, पर ज़ो मुकालै और मैरै खुशी रौ सन्देश शुणाऊणे री वज़ाह कु आपणै प्राण दैणा लै तयार औलौ तेसलै परमेश्वरा आइलै सौदा री ज़िन्दगी मिला आ। ²⁶ अगर पुरी दुनिया री खुशी पाई बौल़ा ई, पर एथरौ का फाइदौ आ आपणौ प्राण खोआ लौ पोरु? या आदमी आपणै प्राणा रै बौदलै का दिआ लौ? ²⁷ आदमी रौ छ़ोहरु आपणै पवित्र स्वर्गदूतु आइलै आपणै बाबा री शाना देखाईऔ आशा लौ, और सेज़ै बौग्तै ‘सेऊ हर एकी लै तेसरै कामा रै अनुसार मिनतानौ दिया लौ।’ ²⁸ हाऊं तुमुलै सौच़ौ बोलाऊ कि इदै इऊं खौड़ै लोगू मांझ़िऐ कु कुछ़ आदमी ज़रुर आपणी ज़िन्दगी दी देखा लै कि परमेश्वर शक्ति भौलौ राज़ कौरना लै आशा आ।

यीशु रौ रूप बौदलिणौ

(मरकुस 9:2-13; लूका9:28-36)

¹ इऊं बुशैऊ कु छ़ौ दिना बासीयै यीशुऐ पतरस और याकूब और तेसरौ भाई यूहन्ना आपु आइलै प्राथना कौरदै निंयै, और सै एकान्ता दी केज़ी ऊंच़ी धारा दी डेवै। ² ज़ैबै यीशु प्राथना कौरदै लागौ, तैबै प्राथना कौरदै-कौरदै यीशु रै मुंआ रौ रुप बौदलुई गौ, और यीशु रै जुड़कै उज़ल़ै हुईयौ च़मकुंदै लागै। ³ तिऐ तिउंकै पुराणै ज़मानै रै दुई गुरु दिशै ज़ासरौ नाऊं मुसा और एलिय्याह थौ, सै थै यीशु आइलै बुशै लाईंदै लागै औन्दै। ⁴ एथ माथै पतरसै यीशु लै बोलौ, “ओ प्रभु, आमारौ इदै रौइणौ भौलौ आ। अगर तेरी इच़्छ़ा हुआ ता हाऊं इदै चीन बेदी चाणाउ; एक ताऊं कालै, एक मुसा गुरु कालै, और एक एलिय्याह गुरु कालै।” ⁵ ज़ेबी सेऊ बोलदै थौ लागौ औन्दौ कि तेबी ई सौरगा दी बादल कौठै हुऐ और सै बादला दी घेरुई गौऐ, और तैबै बादला मांझियै कु एक हाक शुणुई : “एऊ मैरौ प्यारौ छ़ोहरु आ, ऐसकु हाऊं भौरी खुश उ : एसरी शुणौ ⁶ तैबै च़ेलै इणौ शुणियौ धौनी पौड़ी गौऐ, और सै भौरी डौरी गौऐ। ⁷ यीशुऐ च़ेलै काऐ डेइयौ सै छ़ुंयैं, और तिउंलै बोलौ, “उज़ीयौ, डौरौ नाईं। ⁸ तैबै तिउंऐ आपणी आखी खोली और तिउंऐ तिऐ यीशु एखुली देखौ। ⁹ ज़ेबी सै टिरा कु डेउंदै थै लागै औन्दै ता यीशुऐ तिउंलै एज़ौ हुकम दैऔ, “ज़ेबी झ़ाऊंं आदमी रौ छ़ोहरु मौरै औन्दै माज़िऊ कु ज़ीऊंदौ नाईं हुआ लौ, तेबी झ़ाऊंं ज़ो कुछ़ तुमुऐ देखौ आ कासी कै ना बोलियौ। ¹⁰ ऐथ माथै यीशु रै च़ेलेउऐ तेसकु पुछ़ौ, “तैबै शास्त्री लोग कैलै बोलाई कि एलिय्याह सौबी कु पैहलै आशा?” ¹¹ यीशुऐ तिउंलै ज़वाब दैऔ, “एलिय्याह ज़रुर आशा, और सौब कुछ़ सुधारा लौ। ¹² पर हाऊं तुमु लै बोलाऊ कि एलिय्याह आशी गौ आ, और लोगुऐ सेऊ नाईं पराणौ; पर ज़िणौ च़ाऔ तिणी ई तेस आइलै कियौ। एज़ी रीति कु आदमी रौ छ़ोहरु भी तिंउरै हाथा कौरी दुख उठाउवाई। ¹³ तैबै यीशु रै च़ेलैउऐ सौमझ़ौ कि यीशु आमुकै यूहन्ना बप्तिस्मा दैणैवाल़ै रै बारै दी बोलौ आ।

बूरी आत्मा वाल़ौ छ़ोहरू च़ागौ कौरणौ

(मरकुस9:14-29; लूका9:37-43)

¹⁴ जेबी सै भीड़ा काऐ पौउंच़ै, ता एक आदमी यीशु काऐ आशौ, और घुंण्डै माथै टेकियौ बोलदै लागौ, ¹⁵ “ओ प्रभु, मैरै छ़ोहरु माथै दया कौर! कैलैकि तेसरै मुआं दी आशा ई शेफै, और सेऊ भौरी दुख उठावा; और केबी सेऊ आगी दी और केबी सेऊ पाणी दी लोटा सा। ¹⁶ मुइंयैं तैरै च़ेलैऊ कु औरज़ की थी कि मैरौ माऊं ठीक कौरौ, पर सै मैरौ माऊं ठीक नाईं कौरी बौल़ै। ¹⁷ यीशुऐ ज़वाब दैऔ, “का कौरुलै, तुमुकै मूं माथै इबी झ़ाऊं विश्वास नाईं आसतौ? तुमारौ ज़ीऊ ता भौरी काठौ आ, हाऊं केबी झ़ाऊंं रौआऊ तुमु आइलै और केबी झ़ाऊंं सहन कौराऊ? आपणौ छ़ोहरु इदै आण। ¹⁸ तैबै यीशुऐ सै बुरी आत्मा डांटी, और सै बुरी आत्मा तेसकु निकल़ी गोई; और सेऊ छ़ोहरु तेबी ठीक हुई गौ। ¹⁹ तैबै च़ेलेउऐ एखुलै दी यीशु काऐ आशीयौ बोलौ, “आमुकै सै बुरी आत्मा कैलै ना गाड़ुई?” ²⁰ यीशुऐ तिउंलै बोलौ, “आपणै विश्वासा रै कमी रै कारण, कैलैकि हाऊं तुमु लै सौच़ौ बोलाऊ, अगर तुमारौ विश्वास राई रै गुल़ै रै बराबर भी हुआ, ता इयै पहाड़ी कु बोली सौका, ‘इदरु डेइयौ इदै डेउ, ता सेऊ डिया लौ; और कोई भी बुश तुमुलै कठीण नाईं हुआ ली। ²¹ पर इऐ ज़ाती बिण प्राथना और उपवासा कोरी नाईं निकुल़दी।)

आपणै मौरणै रै बारै दी यीशु रै दूजी बारै बोलणौ

(मरकुस 9:30-32; लूका9:43-45)

²² जेबी यीशु और तेसरै च़ेलै गलीला दी थै, ता यीशुऐ तिऊं लै बोलौ, “आदमी रौ छ़ोहरु आदमीऊ रै हाथा दी पकड़वाईया सा; ²³ सै तेस झ़ांगाई, और सेऊ चिजै दिना ज़ीउंदौ हुआ। ऐथ माथै सै भौरी उदास हुऐ।

परमेश्वरा रै घौरा रौ मामलौ

²⁴ ज़ेबी सै कफरनहूमा दी पउंच़ै, ता परमेश्वरा रै घौरा रै मामलौ निंणै वाल़ैउऐ पतरसा काऐ आशीयौ तेसकु पुछ़ौ, “का तुमारौ गुरु परमेश्वरा रै घौरा रौ मामलौ नाईं दैन्दौ?” ²⁵ पतरसै बोलौ, “ओ, दिआ सा।" ज़ेबी सै घौरा दी आशै, ता यीशुऐ पतरसा कु पुछ़णै कु पैहलै ही तेसलै बोलौ, “ओ शमौन, तू का सूंच़ाई? धौतरी रौ राज़ौ मामलौ कास कु निंआ ई? आपणै छ़ोहरु कु या परायै कु?” ²⁶ पतरसै यीशु लै बोलौ, “बिगाने कु।’ यीशुऐ पतरसा लै बोलौ ता छ़ोहरु बौच़ी गौऐ। ²⁷ तैबै भी एथीलै कि आमै तिउंलै ठोकर ना लाइलै, तू झ़ीला रै ढिका काई डेइयौ ज़ाल़ पा, और ज़ो माछ़ी पैहलै निकल़ा ली, तिऐं निंऊ; तियांरौ मुं खोलदी बारै ताउंकै एक डौलर मिलालौ, तेस निंईऔ मैरै और आपणै बौदलै तिउंकै दैयौ।

सौरगा रै राज़ा दी बौड़ौ कुण आ

(मरकुस9:33-37; लूका9:46-48)

¹ सेज़ै बौग्तै यीशु रै च़ेलै तेस काऐ आशियौ यीशु कु पुछ़दै लागै, “सौरगा रै राज़ा दी सौबी कु बौड़ौ कुण आ?” ² एथ माथै यीशुऐ एक माऊं आपु काऐ औटाइयौ च़ेलैऊ मांझ़िऐ खौड़ौ किऔ, ³ और तिउंलै बोलौ, “हाऊं तुमुलै सौच़ौ बोलाऊ कि ज़ेबी झ़ाऊंं तुमै नाईं फिरालै और एस माऊं भाशिऐ नाईं बौणालै, तेबी झ़ाऊंं तुमै सौरगा रै राज़ा दी नाईं डेइ बौल़दै। ⁴ ज़ुण-कुण आपुलै एस माऊं भाशिऐ छ़ोटौ कौरालौ, सेउ सौरगा रै राज़ा दी बौड़ौ हुआ सा। ⁵ और ज़ुण-कुण मैरै नाऊं कौरी एक इणै माऊं अपणावा ई सै मूं अपणावा ई।

पापा कौरनै री परेशानी (इम्तीहान)

(मरकुस9:42-48; लूका17:1,2)

⁶ “ज़ुण-कुण इऊं छ़ोटेऊ माझ़िऊ कु ज़ो मूं माथै विश्वास कौरा सा और एक पा लौ ज़ौबरीयै पापा दी, ता तेसलै आच़्छ़ौ इणौ हुआ थौ कि तेस आदमी रै गौल़ै दी घौरटा रौ ज़ौन्दर बानियौ समुन्दरा दी पा। ⁷ पापा रै कारण दुनिया दी फिटकार! पापा री बाटा दी डेउणौ ता ज़रुरी आ; पर फिटकार! तेस आदमी लै ज़ासरै ज़रीयै तुमै पापा री बाटा दी डेवै। ⁸ “तू आपनै हाथ और बांगणै कौरी इणै काम कौरा लौ, ज़ो ताऊं पापा री बाटा दी नीईंयौ विश्वासा दी डगमगावा लै, ता तू तिऊं काटियौ पोरु पा; दुई हाथ और दुई बांगणै कोरिऐ तू नरका दी डिया लौ, ज़िऐ आग केबी नाईं इशदी, ताउंलै एथकु आच़्छ़ौ आ कि टुंडौ या लौंगड़ौ रोइयौ तू सौरगा दी डिया ई। ⁹ अगर तेरी आख इणौ देखा कि तू विश्वासा दी डगमगाइयौ पापा री बाटा दी डेवा लौ, ता तिऐं आख तू पोरु गाड़ै। ताउंलै शेड़ौ रौइणौ आच़्छ़ौ आ। कम से कम तू सौरगा दी ता डिया लौ। नाईं ता दुइया आखी कोरिऐ तू नरका दी डिया ई, ज़िऐ आग आ ज़ो केबी नाईं इशदी।

औच़ी औन्दी भेरी रौ औनेणौ

(लूका 15:3-7)

¹⁰ ताउंलै शेड़ौ रौइणौ आच़्छ़ौ आ। कम से कम तू सौरगा दी ता डिया लौ। नाईं ता दुइया आखी कौरिऐ तू नरका दी डिया ई, ज़िऐ आग आ ज़ो केबी नाईं इशदी। ¹¹ "देखौ, तुमै इऊं छ़ोटेऊ मांझिया कु कासी भी कम नाईं ज़ाणौ; कैलैकि हाऊं तुमु लै सौच़ौ बोलाऊ कि सौरगा दी तिंउरै दूत मैरै सौरगा रै बाबा रौ मूंह सौदा दैखाई।[ कैलैकि आदमी रौ छ़ोहरु औच़ै औन्दै लै बच़ाउदै आशौ औन्दौ आ।] ¹² “तुमै का सुंचा ई? अगर कास आदमी री शौ भेरी आ, और तिऊं मांझिया कु एक औच़ा ली पोरु, तैबै का सेऊ तिऊं नड़ीनवे भेरी तिऐ छ़ाड़ियौ, और टिरा (पहाड़ी) दी ड़ेइयौ, तिऐ औच़ी ऐन्दी भेर तेबी `झांऊ ना लोड़ा ज़ेबी झांऊ सै ओरु ना मिली? ¹³ और अगर सै औच़ी ऐन्दी भेर ओरु मिला आ, ता हाऊं तुमु लै सौच़ौ बोलाऊ कि तैबै सेऊ ऐती खुश तिऊं नड़ीनवे भेरी कालै नाईं औन्दौ ज़ेती तिऐ भेरी लै हुआ। ¹⁴ इणी ई तुमारै सौरगा रै बाबा लै ज़ो सौरगा दी आ इणी इच़्छ़ा नाईं आ कि इऊं छ़ोटेऊ माझ़िऊ कु एक भी खातम हुआ।

अपराधिउ आइलै बर्ताव

¹⁵ “अगर तैरौ भाई ताऊं आइलै गलत कौरा, ता तू डेऊ और एखुलै दी तेस आइलै बुशै लाइयौ तेस समझ़ाऊ; अगर सेऊ तेरी शुणा लौ ता ताउंलै आपनौ भाई मिली गौ। ¹⁶ अगर सेऊ नाईं शुणा लौ, ता एक और दुई ज़ौणै तेस काऐ औज़ौ नींऊ, कि ’हर एक बुश दुई या चीन गवाई दैणै वाल़ै रै मूंआ कु निकल़ा।’ ¹⁷ अगर सेऊ तिऊं री भी नाईं शुणा लौ, ता खुंबल़ी दी बोल, पर अगर सेऊ खुंबल़ी री भी नाईं शुणदौ ता तू तेस दुज़ी जाती और महसूल निणै वाल़ेऊ ज़िणौ ज़ाण।

रोकणौ और मोकौ देणौ

¹⁸ “हाऊं तुमु लै सौच़ौ बोलाऊ कि, ज़ो कुछ़ तुमै धौतरी माथै बानालै, सेऊ सौरगा दी बानिया और ज़ो कुछ़ तुमै धौतरी दी खोलालै, सेऊ सौरगा दी खुला। ¹⁹ तैबै हाऊं तुमु लै बोलाऊ कि, अगर तुमु मांझिया कु दुई ज़ौणै धौतरी माथै केज़ी बूश एक ज़िऊ हुइयौ मांगा लै, ता सेऊ मैरै बाबा री तौरफा कु ज़ो सौरगा दी आ, तिउंलै हुआ लौ। ²⁰ कैलैकि ज़ियै दुई या चीन ज़ौणै मैरै नावां कौरी कौठै हुआइ, हाऊं तिऐ तिऊं मांझियै हुआ ऊ।“

नीघीणै सेवका रौ औनेणौ

²¹ तैबै पतरसै यीशु काऐ आशियौ तेसलै बोलौ, “ओ प्रभु, अगर मैरै भाई मूं आइलै गलत कौरा लौ ता, हाऊं तेस केती बारै माफ कौरु? का सात बारै झ़ाऊं?” ²² यीशुऐ तेसलै बोलौ, “हाऊं ताउंलै इणौ नाईं बोलदौ कि तू तेस सात बारै झ़ाऊं माफ कर पर सत्तर बारै तेस माफ कर। ²³ “एथीलै सौरगा रौ राज़ तेस राज़ा ज़िणौ आ, ज़ुणीऐ आपणै नुकरा रौ हिसाब-किताब निणौ च़ाऔ। ²⁴ ज़ेबी सेऊ हिसाब-किताब निंदै लागौ, ता एक आदमी तेस काऐ आणौ ज़ासकै दौस हज़ार तोड़े रौ कौर्ज़ थौ। ²⁵ ज़ेबै कि कौर्ज़ वापीस दैणा लै तेस काऐ कुछ़ नाईं थौ, ता तिणीऐ आपणै मालिका लै बोलौ, “एस और एसरी छ़ेउड़ी और एसरै लोल़डै और ज़ो कुछ़ एसरौ आ तेस सारौ बेच़ौ, और कौर्ज़ ओरु आणौ।’ ²⁶ एथ माथै तिणी नुकरै धौनी झुकियौ तेसलै ढाल की और बोलौ, “ओ मालिका च़ुटुक रौऊ, हाऊं सारौ कौर्ज़ भौराऊ।’ ²⁷ तैबै तेस नुकरा रै मालिका री तेस नुकरा माथै दया आशी और सेऊ छ़ाड़ी गौ, और तेसरौ कौर्ज़ भी माफ की गौ। ²⁸ “पर ज़ेबी सेऊ नुकर बाइरै निकल़ौ, ता तेसरै गौश्टण मांझ़िऊ कु एक नुकर तेसकै मिलौ ज़ासकै शौ दीनारा रौ कौर्ज़ थौ; तिणिऐ सेऊ पाकड़ियौ तेसरौ गौल़ौ घौटौ और बोलौ, “ज़ो कुछ़ ताऊं माथै कौर्ज़ आ तेस वापिस दै।’ ²⁹ एथ माथै तेसरौ गौश्टण धौनी पौड़ियौ तेसकै औरज़ कौरदै लागौ, ’च़ुटुक रौऊ, हाऊं सारौ कौर्ज़ भौरु।’ ³⁰ तिणीऐ नाईं मानौ, पर सेऊ पाकड़ियौ ज़ेला दी पाऔ और बी झ़ाऊंं कौर्ज़ नाईं दैंऔ तेबी झ़ाऊंं इदै थाक रौई। ³¹ तेसरै गोश्टणै इणौ ज़ो हुऔ थौ तेस देखीयौ भौरी उदास हुऔ, और डेइयौ आपणै मालिका काऐ सारी बुशै बोली गोई। ³² तैबै तेसरै मालिकै सेऊ अपनौ नुकर औटाल़ियौ तेसलै बोलौ, ’ओ पापी नुकर, ताइंयै ज़ो मुकै औरज़ की आ, ता मूंइऐ तैरौ सारौ कौर्ज़ माफ कियौ। ³³ एथीलै ज़िणौ मूंइऐ ताऊं माथै दया की, तिणी ई का ताऊं भी आपणै गोश्टणा माथै दया नाईं कौरणी च़ाईं थी?’ ³⁴ और तेसरै मालिकै रोशा दी आशीयौ सेऊ नुकर सज़ा देणैवाल़ै रै हाथा दी देई गौ, कि ज़ेबी झ़ाऊं सारौ कौर्ज़ नाईं भौरा लौ, तेबी झ़ाऊंं इऊं रै हाथा दी रौऊ। ³⁵ “इणी कौरी अगर तुमु मांझिऊ कु हर एक आपणै भाई ज़ीवा कु माफ नाईं कौरालै, ता मैरौ बाब ज़ो सौरगा दी आ, तुमु लै भी तिणी ई कौरा लौ।

तलाका रै बारै दी यीशु री शिक्षा

(मरकुस10:1-12)

¹ ज़ैबै यीशुऐ एज़ी बुशै बोली गोई, ता यीशु गलीला कु डेइ गौ; और तैबै यीशु और तेसरै च़ेलै यरदन नौई पारा रै परदेशा दी डेवे। ² तिऐ भी यीशु काऐ एक भौरी बौड़ी भीड़ कौठै हुई। और यीशुऐ तिऐ सै चांगै कियै। ³ तैबै कुछ़ फरीसी लोग यीशु काऐ आशै और तेस परखुणा लै पुछ़दै लागै, “एक आदमी लै आपणी छ़ेउड़ी रौ फैसलौ कौरणौ ठीक आ या नाईं?” ⁴ यीशुऐ ज़वाब दैऔ, “धर्म शास्त्रा दी इणौ आ लिखौ औन्दौ कि, परमेश्वरै दुनिया चाणने री शुरुआता दी छ़ेउड़ी और मर्द चाणे ई। ⁵ ’इणौ भी आ लिखौ औन्दौ कि मर्द आपणै मां-बापा छ़ाड़ियौ आपणी छ़ेउड़ी आइलै मिली रौआ और सै एक ज़िसम बौणी रौआ।?’ ⁶ और सै दुई नाईं, बल्कि एक ज़िसम बौणा ई। परमेश्वर एक मर्द और एक छ़ेउड़ी शादी दी ज़ोड़ा आ तैबै आदमीउऐ सै दुई नाईं च़ाईं अलग कौरनै। ⁷ तैबै तिऊं लोगुऐ बोलौ, “मूसा रै नियमा दी इणौ आ लिखौ औन्दौ, ज़ो आदमी आपणी छ़ेउड़ी रौ फैंसलौ कौरनौ च़ाहा सा, सेऊ आदमी राज़ीनांवा देइयौ तिऐं पोरु गाड़ी सौका सा। ⁸ यीशुऐ तिउंलै बोलौ, “मुसै तुमारै ज़ीऊ काठौ हुणा रै कारण तुमुलै आपणी-आपणी छ़ेउड़ी पोरु छ़ाड़नै रौ हुकम दैऔ, पर पैहलै कु इणौ नाईं थौ। ⁹ और हाऊं तुमुलै बोलाऊ, कि ज़ुण-कुण गान्दै काम छ़ाड़ियौ, और केज़ै कारणा कु आपणी छ़ेउड़ी लै राज़ीनांउ देइयौ दुज़ी छ़ेउड़ी आइलै शादी कौरा सा, सेऊ आपणी पहली छ़ेउड़ी रै विरोधा दी गान्दै काम कौरा आसा; और ज़ेज़ी छ़ेउड़ी आपणै बोउटे लै राज़ीनांउ देइयौ दुज़ै आदमी आइलै शादी कौरा सा, सै छ़ेउड़ी भी आपणै बोउटे रै विरोधा दी गान्दै काम कौरा आ।" ¹⁰ च़ेलेउऐ यीशु लै बोलौ, “अगर मर्दू रौ छ़ेउड़ी आइलै इणौ रीशतौ आ, ता शादी कौरनी आछ़ी नाईं।" ¹¹ यीशुऐ तिउंलै बोलौ, “सौबी एज़ौ वचन नाईं मानदै, सिरफ सै ज़ासलै इज़ौ वरदान दैऔ औन्दौ आ। ¹² कैलैकि कुछ़ नामौरद इणै ई, ज़ो मां री कुखी ई कु इणै ज़न्मै; कुछ़ नपुंसक इणै ई, ज़ो आदमीऐ नपुंसक चाणै; और कुछ़ नपुंसक इणै ई, ज़ुणियै सौरगा रै राज़्या लै आपुलै नपुंसक चाणै ई। ज़ो इऊं मानी सौका ई, सै माना लै।"

छ़ोहरू लै आशीर्वाद

(मरकुस10:13-16; लूका 18:15-17)

¹³ तैबै लोग लोल़डेऊ यीशु काऐ आणदै लागै ताकि यीशु तिऊं माथै हाथ छाड़ा और प्राथना कौरा, च़ेलेउऐ सै लोल़डै धौमकाऐ। ¹⁴ यीशुऐ बोलौ, “लोल़डेऊ मुं काऐ आशणै दैऔ, और इऊं नाईं रोकौ, कैलैकि सौरगा रौ राज़ इऊं ज़िणेउरौ आ।" ¹⁵ और यीशुऐ तिऊं माथै हाथ छ़ाड़ियौ तिदरा कु डेई गौ।

धनवान छ़ोहरू और सदा री ज़िन्दगी

(मरकुस10:17-31; लूका 18:18-30)

¹⁶ एक आदमी यीशु काऐ आशौ और तेसलै बोलौ, “ओ गुरु सौदा री ज़ीन्दगी पाइणा लै हाऊं केज़ौ भौलौ काम कौरु?” ¹⁷ यीशुऐ तेसलै बोलौ, “तू मुकै आच्छ़ै कामा रै बारै दी कैलै पुछ़ाई? भौलौ ता एक ई आ, पर अगर तू ज़ीन्दगी दी डेउणौ च़ा ई, ता हुकम मानदै थाक लागी।" ¹⁸ तिणीऐ यीशु लै बोलौ, “केज़ौ हुकम?” यीशुऐ तेसलै बोलौ, “एज़ौ हुक्म आ कि खून ना कौरणौ, गान्दै काम ना कौरनै, च़ोरी ना कौरनी, झ़ुठी गवाही ना दैणी,। ¹⁹ आपणै मां और बाबा री इज़्ज़त कौरनी, और आपणै पड़ोसी आइलै आपु ज़िणौ प्यार छ़ाड़नौ।" ²⁰ तिणी आदमीऐ यीशु लै बोलौ, “इऊं सारी ता हाऊं माना ऊ; आबै मुंदी केज़ी बुशै री कामी आ?” ²¹ यीशुऐ तेसलै बोलौ, “अगर तू ठीक औणौ च़ाआई ता डेऊ, धन-ज़यदाद बेच़ियौ गरीबु लै दै, और ताउंलै सौरगा दी धन मिला सा; और आशियौ मुं पीछ़ु आंड।" ²² पर सेऊ आदमी इणी बुशै शुणियौ उदास हुइयौ डेई गौ, कैलैकि सेऊ भौरी सेठ थौ। ²³ तैबै यीशुऐ आपणै च़ेलैऊ लै बोलौ, “हाऊं तुमु लै सौच़ौ-सौच़ौ बोलाऊ कि सेठा रौ परमेश्वरा रै राज़ा दी डेउणौ भौरी कठीण आ। ²⁴ तुमु लै औज़ौ बोलाऊ कि परमेश्वरा रै राज़ा दी सेठ आदमी रै डेउणै कु उंटा रै सिउणी रै शेड़ै बाटियै डेउणौ आसान आ।" ²⁵ इणौ शुणियौ च़लैऊऐ भौरी हैरान हुइयौ बोलौ, “तैबै कासरौ उदार हुई बौला सा?” ²⁶ यीशुऐ तेस आदमी भिलै देखियौ तेसलै बोलौ, “आदमीऊ कौरी ता इणौ नाईं हुई बौल़दौ, पर परमेश्वरा कौरी सारौ कुछ़ हुई बौल़ा आ।" ²⁷ ऐथ माथै पतरसै यीशु लै बोलौ, “देख, आमै ता आपणौ सारौ कुछ़ छ़ाड़ियौ ताऊं पिछ़ु हुई गौऐ आ : ता आमुलै का मिला सा?” ²⁸ यीशुऐ तिउंलै बोलौ, “हाऊं तुमुलै सौच़ौ बोलाऊ कि नौई सृष्टि दी ज़ेबी आदमी रौ छ़ोहरु आपणी महिमा रै सिंहासना माथै बोशा लौ, ता तुमै भी ज़ो मुं पीछ़ु आ, बारहा सिंहासना माथै बौशियौ इस्राएला रै बारहा गोत्रा रौ फौंसलौ कौरा लै। ²⁹ और ज़ुणी कुणिए घौर, भाई, बौइणी, या मां, आपणै लोल़डे, धूरै डौखरै मैरै नाऊं कालै छ़ाड़ी गौऐ आ, तेसलै शौ गुणा मिला सा, और सेऊ सौदा री ज़ीन्दगी रौ हकदार हुआ। ³⁰ पर भौरी का ज़ो पैहलै आ, सै पिछ़ाड़ी हुआई : और ज़ो पिछ़ाड़ी आ, सै पैहलै हुआई।

बगीच़ै रै मज़दुरु रौ औनेणौ

¹ “सौरगा रौ राज़ एक घौरा रै मालीका ज़िणौ आ, ज़ो दोउती निकल़ौ और आपणै अंगूरा रै बगीच़ै दी मज़दूर लाऐ। ² तिणीऐ मज़दूरा कै एक दीना री दिहाड़ी देइयौ कामा माथै लाऐ और सै आपणी अंगुरा रै बगीच़ै दी भेज़ै। ³ तैबै तिणी मालीकै कौलियारी कु पैहलै कुछ़ लोग बज़ारा दी बेलै खौड़ै देखै, ⁴ और तिणी मालीकै बोलौ, “तुमै भी अंगुरा री बारी दी डैऔ, और ज़ो कुछ़ ठीक आ, तुमुलै दिआऊ।’ तैबै सै भी डेवै। ⁵ तैबै तिणी मालीकै कौलियारी टौल़ियौ दुजै और च़ीजै पहरा रै नज़दीका दी निकल़ियौ तिणौ ई कियौ। ⁶ दीना रौ एक घाटौं रौइयौ सेऊ औज़ौ डेइयौ दुज़ै आदमी खौड़ै देखै, और तिणीऐ तिउंलै बोलौ, ’तुमै कैलै इदै पुरै दिना दी बेलै खौड़ै रौऐ औन्दै? तिउंऐ तेसलै बोलौ, ’एथलै कि कोइऐ भी आमै कामा कौरदै नाईं नींयै।’ ⁷ तिणी मालीकै तिउंलै बोलौ, ’तुमै भी अंगुरा बौगिच़ै दी डैऔ और तिऐ काम कौरौ।’ ⁸ “बयाल़ी अंगुरा री बारी रै मालीकै आपणै खज़ानच़ी लै बोलौ, ’मज़दूरा लै औटाइयौ पिछ़लै कु और पैहलै झ़ाऊंं तिउंलै मज़दूरी दै।’ ⁹ ज़ैबै सै आशै ज़ुणिऐ एकी दिना दी एका घांटौ लाऔ थौ, ता तिउंलै एक दिनार मिलौ। ¹⁰ ज़ो पैहलै आशै औन्दै थै तिउंऐ सौमझ़ौ कि आमु लै भौरी मिला सा, पर तिउंलै भी एक एक दिनार ई मिलौ। ¹¹ ज़ेबी मिलौ ता सै घौरा रै मालीका लै कुड़कुड़ाइयौ बोलदै लागै, ¹² ’इऊं पिछ़लै ता एक ई घांटै दी काम किऔ, ताइंयै सै आमारै बराबर की गौऐ, ज़ुणियै पुरै दिनै रौ भार च़ुंगौ और ताती रुड़ सैहन की?’ ¹³ मालीकै तिऊं मांझ़ीयै कु एकी लै ज़वाब दैऔ, ’ओ गोष्‌टण, हाऊं ताऊं आइलै कुछ़ अन्याय नाईं कौरदौ। का ताइंयै मुकु एक दिनार नाईं मांगौ थौ? ¹⁴ ज़ो तैरौ आ, तेस च़ुंग और डेऊ; मेरी मौरज़ी आ कि ज़ेती ताउंलै देऊ तेती ही इऊं पिछ़लै लै भी देऊ। ¹⁵ का इणौ ठीक नाईं कि हाऊं आपणै धना आइलै ज़िणौ च़ाऊ तिणौ कौरु? का मैरै भौलै हुणा रै कारण तू बुरी नौज़री कु देखाई?’ ¹⁶ एज़ी रीति कु ज़ो पिछलै आ, सै पैहलै हुआई; और ज़ो पैहलै ई, सै पिछ़लै हूआई।"

आपनै मौरणै रै बारै दी यीशु रै चीजी बारै बोलणौ

(मरकुस 10:32-34; लूका18:31-34)

¹⁷ यीशु यरुशलेमा लै डेउंदी बारै आपणै बारहा च़ेलै एखुलै दी नियैं, और बाटा दी तिउंलै बोलदै लागौ, ¹⁸ “शुणौ, आमै यरुशमेला लै ई डेउंदै लागै औन्दै; और आदमी रौ छ़ोहरु परधान याजकु और शास्त्रीऊ रै हाथा दी पकड़वाइया, और सै तेस च़ोरिऐ पाकड़ाई। ¹⁹ और तेस दुज़ी ज़ाति रै हाथा दी दिआई कि सै तेसरौ मज़ाक उड़ावा, और तेसदी कोढ़ै ला, और तेस क्रूसा माथै च़ड़ावा ई, और सेऊ चिज़ै दिनै ज़ीउंदौ हुआ सा।"

एक माँ री औरज़

(मरकुस 10:35-45)

²⁰ तैबै जब्दी रै छ़ोहरु री मांऐ, आपणै छ़ोहरु आइलै यीशु काऐ आशियौ तेसकै ढाल की, और तेसकु कुछ़ मांगदै लागी। ²¹ यीशुऐ तियां लै बोलौ, ’तू का च़ाहा ई?” तिऐं यीशु लै बोलौ, “एस वचन दै कि मैरै ऐ दुई छ़ोहरु तैरै राज़ा दी एक तेरी सुल़टी बिलै दुज़ौ तेरी उलटी बिलै बोशा।" ²² यीशुऐ तिआंलै ज़वाब दैऔ, “तू नाईं ज़ाणदी कि तू का मांगा ई। ज़ो खोरु हाऊं पीणै वाल़ो ऊ, का तुमै पी बौल़ा ई?” तिउंऐ यीशु लै बोलौ, “पी बौल़ी ई।" ²³ यीशुऐ तिउंलै बोलौ, “तुमैं मैरौ खोरु ता पीयालै, पर आपणै सुलटी और उलटी भिलै कासी बोशाल़नौ मैरौ काम नाईं, पर ज़ास कालै मैरै बाबा री तौरफा कु तैयार किऔ औन्दौ आ, तिऊं ई कालै आ।" ²⁴ इणौ शुणियौ दस च़ेलै रै तिऊं दुई भाई माथै रोश आशै। ²⁵ यीशुऐ सै आपु काऐ औटाऐ और तिउंलै बोलौ, “तुमै ज़ाणाई कि दुज़ी ज़ाति रै हाकिम तिऊं माथै हौक कौराई; और ज़ो बौड़ै ई, सै तिऊं माथै हौक च़लावा ई। ²⁶ पर तुमु मांझ़ीऐ इणौ नाईं औलौ; पर ज़ुण-कुण तुमु मांझ़ीऐ बौड़ौ हुणौ च़ाहा, सेऊ तुमारौ नुकुर बौणा; ²⁷ और ज़ो तुमु मांझ़ीऐ परधान हुणौ च़ा सा, सेऊ तुमारौ नुकर बौणा; ²⁸ ज़िणौ कि आदमी रौ छ़ोहरु; सेऊ एथीलै नाईं आशौ कि तेसरी सेवा टहल कौरौ, पर एथीलै आशौ आ कि आपु ई सेवा टहल कौरा, और सौबी लै आपणै प्राण दिआ।"

दुई शेड़ैउ लै आखी देणी

(मरकुस 10:46-52; लूका 18:35-43)

²⁹ ज़ेबी सै यरीहो कु निकल़दै थै लागै औन्दै, ता एक भौरी भीड़ यीशु पीछ़ु हुई गोई। ³⁰ और दुई शेड़ै ज़ो बाटा दी एकी बिलै थै बौशै औन्दै, इणौ शुणियौ कि यीशु इदरा बाटी डेउंदै लागौ औन्दौ, हाकै मारियौ औटाइंदै लागै, “ओ प्रभु, दाऊदा रौ छ़ोहरु, आमू माथै दया कर।" ³¹ लोगुऐ सै धौमकाऐ कि च़ुटुक थाक्कौ, पर सै औज़ौ भी ज़ोरै हाकै मारियौ बोलदै लागै, “ओ प्रभु, दाऊदा रौ छ़ोहरु आमू माथै दया कर।" ³² तैबै यीशुऐ टेकियौ, सै औटाऐ और बोलौ, “तुमै का च़ाहा ई कि हाऊं तुमुलै कौरु?” ³³ तिउंऐ यीशु लै बोलौ, “ओ प्रभु, इणौ कि आमारी आखी खुला ली।" ³⁴ यीशु रै तिऊं शेड़ै माथै दया आशी और तिऊं री आखी छ़ूंईं, और सै शैड़ै तेभी देखदै लागै; और तैथ बासिऐ सै यीशु पिछ़ु आण्डदै लागै।

यरुश्लेमा दी ज़ीत आशणी

(मरकुस11:1-11)

¹ ज़ैबै यीशु और तेसरै च़ेलै यरुशलेमा रै नज़दीक पौउंच़ै और जैतूना री पहड़ी माथै बैतफगे काऐ आशै, ता यीशुऐ दुई च़ेलै इणै बोलियौ भेज़ै, ² सामनै वाल़ै गावां दी डैऔ। तिऐ पौउंच़ीयौ ही तुमुकै एक गादी मिला खुंटी दी बानी औन्दी, और तियां आइलै तियांरौ गदेटु मिला। तिऊं खोलीयौ मुं काऐ आणौ। ³ अगर तुमु आइलै कोई कुछ़ बोला लै, ता तुमै बोलेऊ प्रभु कै ऐसरी ज़ुरुरत आ, तैबै सेऊ तेबी भेज़ा" ⁴ इणौ ऐथलै हुऔ कि ज़ो वचन पुराणै ज़मानै रै गुरु रै तौरफा कु बोलौ औन्दौ थौ सेऊ पुरौ हुआ : ⁵ “सिय्योना री छ़ोटुड़ी कु बोलौ, ’देख, तैरौ राज़ौ ताऊं काऐ आशौ आ : सेऊ निऊलौ आ, और गदेटु माथै बोशौ औन्दौ आ : पर गादी रै माऊं माथै।’” ⁶ च़लैऊऐ डेइऔ, ज़िणौ यीशुऐ तिउंलै बोलौ थौ, तिणौ ही किऔ। ⁷ और गादी और तियां रौ गदेटु आणौ, तिऊं माथै आपणै जुड़कै छ़ाड़ै, और यीशु तेस माथै बोशी गौ। ⁸ तैबै भौरी लोगुऐ आपणै जुड़कै बाटा दी बिछ़ाऊंदै लागै, और कुछ़ लोगुऐ पेड़ा रै शाऊंटै काटियौ बाटा दी बिछ़ाऐ। ⁹ ज़ो भीड़ औगाड़िऐ और पिछाड़िऐ आण्डदै थै लागै औन्दै, सै औटाईयौ बोलदै थै लागै औन्दै, “दाऊदा रै संताना री बौड़ाई हो होशाना, आशीष वाल़ौ ई तुमै ज़ो प्रभु रै नावां कौरीयै आशै ई, सौरगा दी परमेशवरा री बड़ाई हो होशाना।" ¹⁰ ज़ैबै यीशु यरुशलेमा दी डैऔ, ता सारै शहरा दी हलचल माच़ी गोई, और लोग बोलदै लागै, “एऊ कुण आ?” ¹¹ लोगुऐ बोलौ, “एऊ गलीला रै नासरता रौ गुरु यीशु आ।"

परमेश्वरा रै घौरा कु सामाना बेच़णै वाल़ै गाड़नै

(मरकुस11:15-19; लूका19:45-48;यूहन्ना2:13-22)

¹² यीशुऐ परमेश्वरा रै घौरा दी डेइयौ सै सौबी, ज़ो परमेश्वरा रै घौरा दी लेन-देन थै कौरदै लागै औन्दै, गाड़ी गौऐ, सर्राफो रै पीढ़े और कबूतर बेच़णै वालेउ री रैढ़ी पौल्टी ; ¹³ और यीशुऐ बोलौ, “लिखौ औन्दौ आ, ’मैरौ घौर प्राथना रौ घौर आ; पर तुमुऐ एउ लुटणे वाल़ेऊ रौ आड्डौ चाणी गौ आ।" ¹⁴ तैबै शेड़ै और लौंगड़ै, परमेश्वरा रै घौरा दी यीशु काऐ आशै, और यीशुऐ सै ठीक कियै। ¹⁵ पर ज़ैबै परधान याजकु और शास्त्रीउऐ एज़ै हैरान कौरनै वाल़ै काम, ज़ो यीशुऐ कियै, और छ़ोहरुऐ परमेश्वरा रै घौरा दी ’दाऊदा री संताना लै होशाना’ औटाउंदै बारै देखै, ता तिंउरै रोश आशी गोऐ, ¹⁶ और यीशु लै बोलदै लागै, “का तू शुणा ई कि ऐ का बोलाई?” यीशुऐ तिउंलै बोलौ, “ओ; का तुमुऐ इणौ केबी नाईं पौड़ौ : ’लोल़ड़ै और दूध पीणै वाल़ै माऊं कु ताइंऐ अपार स्तुति कराई?” ¹⁷ तैबै यीशु तिऊं छ़ाड़ियौ तेस इलाकै कु बाइरै बैतनिय्याह लै डेवै और बयाल़ी रौऔ तिदै ई।

बिणा फौल़ा रौ फेड़ू रौ पेड़

(मरकुस11:12-14; 20-24)

¹⁸ दोउती ज़ैबै यीशु इलाकै कु डेउंदै थौ लागौ औन्दौ ता यीशु रै भूख लागी। ¹⁹ बाटा दी यीशुऐ एकी बियै फेड़ू रौ एक पेड़ देखौ और सेऊ तेस पेड़ा काऐ डैऔ, और पेड़ा दी पाचा छ़ाड़ियौ और कुछ़ नाईं थौ और तेसलै बोलौ, “आज़ा कु पोरु ताऊंदी केबी फल़ नाईं लागदै। और अंजीरा रौ पेड़ खरकच़ार शुकी गौ। ²⁰ इणौ देखीयौ च़ेलै हैरान हुऐ और तिउंऐ बोलौ, “एऊ फेड़ू रौ पेड़ खड़कच़ार किणौ शुकी गौ?” ²¹ यीशुऐ तिउंलै ज़वाब दैऔ, “हाऊं तुमुलै सौच़ौ बोलाऊ, अगर तुमै विश्वास छ़ाड़ा और शौक नाईं कौरा लै, ता ना सीरफ इणौ कौरालै ज़ो एस फेड़ू रै पेड़ा लै किऔ आ, पर अगर एस पहाड़ी लै बोला लै, ‘तू उठ, और समुन्दरा दी डेऊ’, ता इणौ हुआ ई। ²² और ज़ो तुमै प्राथना दी विश्वासा कौरै मांगा ई सेऊ सौबी तुमुलै मिला ई। "

यीशु रै अधिकारा माथी सवाल

(मरकुस 11:27-33;लूका20:1-8)

²³ यीशु परमेश्वरा रै घौरा दी शिक्षा दैंदै थौ लागौ औन्दौ, ता परधान याजक और स्याणै लोग यीशु काऐ आशै और बोलदै लागै, “तू इणै काम कैज़ै हौक्का कौरी कौरा ई?” और ताउंकै ऐज़ौ हौक कुणीऐ दैऔ आ?” ²⁴ यीशुऐ तिउंलै ज़वाब दैऔ, “हाऊं भी तुमु कु एक सवाल पुछ़ा ऊ; अगर तुमै मुकै ज़वाब दिआ लै, ता हाऊं भी तुमुकै बोलाऊ कि इणै काम कासरै हौका कौरीऐ कौराऊ। ²⁵ यूहन्ना रौ बप्तिस्मा किदरु कु थौ ? सौरगा री तौरफा कु या आदमी री तौरफा कु?” तैबै सै आपु माझ़ीयै चौपड़ीदैं लागै, “अगर आमै बोलुलै ’सौरगा री तौरफा कु’, ता एऊ आमु कु बोला, ’तैबै तुमुऐ तेस माथै विश्वास कैलै ना कियौ?’ ²⁶ और अगर आमै बोलुलै ’आदमी री तौरफा कु’, ता आमु रै भीड़ा रौ डौर आ, कैलैकि इयै सौबी यूहन्ना गुरु माना ई।" ²⁷ तैबै यिऊंऐ यीशु लै ज़वाब दैऔ, “आमै नाईं ज़ाणदै।" यीशुऐ भी तिउंलै बोलौ, “ता हाऊं भी नाईं बोलदौ कि एज़ौ काम केज़ै हौक्का कौरीयै कौरा ऊ।

दुई छ़ोहरू लै आखी रौ दाण

²⁸ “तुमै का सौमझ़ा ई? कासी आदमी रै दुई छ़ोहरु थै; तिणीऐ पैहलै छ़ोहरु लै बोलौ, “ओ छ़ोहरु, आज़ अंगुरा रै डोखरै दी काम कौर।’ ²⁹ तिणी छ़ोहरुऐ ज़वाब दैऔ, “हाऊं नाईं डेऊंदौ’, पर बासीऐ पछ़ताइऔ डैऔ। ³⁰ तैबै सेऊ दुज़ै छ़ोहरु काऐ डेइयौ तिणौ ई बोलौ, तिणी दुज़ै छ़ोहरुऐ बोलौ, “ओ हाऊं डिआ ऊ’, पर नाईं डैऔ। ³¹ इऊं दुई माझ़ीऐ कु कुणीऐ बाबा री इच़्छ़ा पुरी की?” तिउंऐ बोलौ, “पैहलै।" यीशुऐ तिउंलै बोलौ, “हाऊं तुमु लै सौच़ौ बोलाऊ कि मामलै निणावाल़ै और गान्दै काम कौरणै वाल़ै तुमु कु पैहलै परमेश्वरा रै राज़ा दी डेआ ई। ³² कैलैकि यूहन्ना धौर्मा री बाटा देखाऊंदै तुमु काऐ आशौ, और तुमुऐ तेसरौ विश्वास ना कियौ; पर मामलै निणैवाल़ेउऐ और गान्दै कामा कौरणै वाल़ेउऐ तेसरौ विश्वास कियौ : और तुमै इणौ देखीयौ बासिऐ भी नाईं पछ़ताऐ कि तेसरौ विश्वास कौरा थै।

बुरै ज़िमीदारु रौ औनेणौ

(मरकुस12:1-12; लुका20:9-19)

³³ “एक औज़ौ औनैणौ शुणौ : एक घौरा रौ मालिक थौ तिणीऐ अंगुरा रौ बौगीच़ौ लाऔ, तेसरै च़ारो तौरफा दी तारबाड़ लाऔ, तेस बौगीच़ा दी एकी भीलै अंगुरा रै रस गाड़ने री ज़ागहा भी चाणी और छ़ोटी ज़ेई छ़ानी भी चाणी, और तेसरौ ठेकौ ज़िमदारु कै दैइयौ आपु डैऔ परदेशा लै। ³⁴ ज़ैबै अंगुरा चोड़नै रौ बौग्त आशौ, ता तिणी मालिकै आपणै नुकुरा लै फल़ आणनालै ज़ीमदारू काऐ भेज़ै। ³⁵ पर ज़ीमदारुऐ तेसरै नुकुर पाकड़ीऔ, केज़ै पिटै, और केज़ै झ़ांगै पौरु, और केज़ै डोल़ीयाऐ। ³⁶ तैबै तिणी माकिलै पैहलै कु भौरी औज़ौ नुकुर भेज़ै, और तिउंऐ तिऊं आइलै भी तिणौ ई कियौ। ³⁷ बासीऐ तिणी मालिकै आपणौ छ़ोहरु तिऊं काऐ इणौ सुंच़ीयौ भेज़ौ कि सै मैरै छ़ोहरु री इज़्ज़त कौरा लै। ³⁸ पर ज़िमदारुऐ सेऊ छ़ोहरु देखीयौ आपु माझ़ीऐ चौपड़ींदै लागै, ’एऊ ता ऐस बौगीच़ा रौ मालिक आ, आशौ, आमै ऐस पौरु झ़ांगी, ताकी एऊ बौगीच़ौ आमारौ हुआ।’ ³⁹ तैबै तिउंऐ सेऊ छ़ोहरु पाकड़ौ और सेऊ अंगुरा रै बौगीच़ा कु बाइरा गाड़ीयौ पौरु झ़ांगौ। ⁴⁰ एथीलै ज़बी बौगीच़ा रौ मालिक आशा लौ, ता तिऊं ज़मीदारु आइलै का कौरा?” ⁴¹ तिउंऐ तेसलै बोलौ, “सेऊ तिऊं लोग पोरु झ़ांगा और अंगुरा रौ बौगीच़ौ ओरी लोगु कै सौंभाल़ा, ज़ो बौग्तै माथै तेसलै फल़ दिआ कौरा।" ⁴² यीशुऐ तिउंलै बोलौ, “का तुमुऐ केबी पवित्रशास्त्रा दी इणौ नाईं पौढ़ौ कि : ’ज़ेज़ौ पात्थर मिस्त्रीऐ बेकार ज़ाणौ थौ, सेज़ौ पात्थर कुणे दी लागणे वाल़ौ बौणौ? एज़ौ काम परमेश्वरा री तौरफा कु हुऔ, और एज़ौ आमारी नौज़री दी नौखौ आ।’ ⁴³ एथीलै हाऊं तुमुलै बोलाऊ कि परमेश्वरा रौ राज़ तुमु कु निई बौल़ीया और इणी ज़ाति लै ज़ो तेसरौ फल़ आणा, देई बौल़ा लै। ⁴⁴ ज़ो एस पात्थरा माथै पौड़ालौ, सेऊ च़ूर-च़ूर हुआ; और ज़ास माथै सेऊ पात्थर पौड़ालौ, सेऊ पिशीया पोरु पा।" ⁴⁵ परधान याजकु और फरीसी लोग यीशु रै औनैणौ शुणीऐ सौमझ़ी गौऐ कि सेऊ तिंउरै बारा दी बोला आ। ⁴⁶ और तिउंऐ यीशु पाकुड़नौ च़ाऔ, पर सै लोगु कु डौरी गौऐ कैलैकि सै यीशु भविष्यवक्ता माना थै।

शादी दी रोटी खांदै औटाउणै रौ औनेणौ

(लूका 14:15-24)

¹ यीशु औज़ौ तिउंकै औनैणै दी बोलदै लागौ, ² “सौरगा रौ राज़ तेस राज़ै ज़िणौ आ, ज़ुणीऐ आपणै छ़ोहरु री शादी की। ³ और तिणीऐ आपणै नुकर भेज़ै कि ज़ासलै निऊंदौ आ दैऔ औन्दौ तिऊं लोगु शादी री धामा खांदै औटाऊ; पर सै नाईं आशै। ⁴ तैबै तिणीऐ औज़ौ आपणै नुकर इणै बोलीयौ भेज़ै कि, ’ज़ासलै निऊंदौ आ दैऔ औन्दौ तिऊं लोगु लै बोलौ : शुणौ, मुइंऐ धाम तैयार की गौइ आ, (मैरै बौल़द और धाचै औन्दै गूंड ज़ांगै औन्दै आ,) और सब कुछ़ तैयार आ; शादी री धामा दी आशौ।’ ⁵ पर सै माफी मांगीयौ तिदरु कु डेई गौऐ : कोई डेवै आपणै डोखरै लै, कोई डेवै आपणै कामा खौटदै। ⁶ दुजै लोग ज़ो बौच़दै थै लागै औन्दै तेसरै नुकर पाकड़ै और तिउंरी बेइज़ती की और पोरु झ़ांगै ⁷ तैबै राज़ै रै रोश आशै, और तिणीऐ आपणै सिपाई भेज़ीयौ सै खून कौरणै वाल़ै पोरु झ़ांगै, और तिंउरै इलाकै दी आग लाइ और सारौ पोरु ज़ाल़ौ। ⁸ तैबै तिणीऐ आपणै नुकरु लै बोलौ, “शादी री धाम ता तैयार आ पर निऊंदै वाल़ै लोग नाईं आशै। ⁹ एथीलै स़ौड़की दी डैऔ और ज़ेती लोग तुमु कै मिला, सौबी लोगु शादी री धामा खान्दै औटाऔ।’ ¹⁰ तैबै तिऊं नुकरुऐ स़ौड़की दी डेईयौ का भौलै का बुरै, ज़ेती मिलै, सारै लोग कौठै कियै; और शादी रौ घौर पाऊणै कौरी भौरुई गौ। ¹¹ “ज़ेबी राज़ौ पाऊणै देखदै भीतै आशौ, ता तिणीऐ तिऐ एक आदमी देखौ, ज़ुणीऐ शादी रै जुड़कै भीड़ै औन्दै नाईं थै। ¹² तिणीऐ तेसकु पुछ़ौ, “ओ गोश्टण; तू शादी रै जुड़कै भीड़ियौ कैलै नाईं आशौ?” तेस आदमी रौ मुंह बौन्द हुई गौ। ¹³ तैबै राज़ै आपणै नुकरा लै बोलौ, ’एसरै हाथ और बांगणै बानियौ बाइरै नियारा दी पाऔ, तिऐ लेरनौ और दांद पिशणौ हुआ।’ ¹⁴ कैलैकि औटाऐ औन्दै ता भौरी ई और छ़ांटै औन्दै थोड़ै ई।"

कैसरा लै मामलौ देणौ

(मरकुस 12:13-17; लूका20:20-26)

¹⁵ तैबै फरीसि डेईयौ आपु माझ़ीं सुंच़दै लागै कि एस केज़ै ज़रीऐ बुशु दी फसाई। ¹⁶ तैबै तिउंऐ आपणै च़ेलै हेरोदिया आइलै यीशु काऐ इणौ बोलना लै भेज़ै, “ओ गुरु, आमै ज़ाणी आ कि तू सौच़ौ आ, और परमेश्वरा री बाट सौच़ाई कौरी शिखावा आ, और कासी री परवाह नाईं कौरदौ, कैलैकि तू आदमी रौ मुंह देखीयौ बूश नाईं कौरदौ। ¹⁷ एथीलै आमु लै बोल तू का सुंच़ा ई? कैसरा लै मामलौ दैणौ च़ांई कि नाईं।" ¹⁸ यीशुऐ तिउंरी च़ालाकी ज़ाणीऔ तिउंलै बोलौ, “ओ कपटी लोगुऔ, मुं कैलै पौरखा ई? ¹⁹ मामलै रौ सिक्कौ मुकै देखाल़ौ।" तैबै तिउंऐ यीशु काऐ एक सिक्कौ निंऔ। ²⁰ यीशुऐ तिऊंकु पुछ़ौ, “एऊ छ़ाप और नाऊं कासरौ आ?” ²¹ तिउंऐ तेसलै बोलौ, “कैसरा रौ।" तैबै यीशुऐ तिउंलै बोलौ, “ज़ो कैसरा रौ आ तेस कैसरा कै दैऔ; और ज़ो परमेश्वरा रौ आ तेस परमेश्वरा लै दैऔ।" ²² इणौ शुणियौ सै लोग हैरान हुऐ, और तिदरु कु डेई गौऐ।

दूजी बारै पैदौ हुणौ और शादी

(मरकुस12:18-27; लूका20:27-40)

²³ सेज़ै दिनै सदूकी लोगु ज़ो इणौ मानाईं कि ज़ुण मौरा ई सै दुज़ी बारै ज़ीऊंदै नाईं हुन्दै, यीशु काऐ आशै और तेसलै बोलौ, ²⁴ “ओ गुरु, मूसै बोलौ थौ कि अगर केज़ौ आदमी बिण औलादीऐ मौरा लौ, ता तेसरौ भाई तेसरी विधवा छ़ेउड़ी आइलै शादी कौरीयौ आपणै भाई कालै वंश पैदौ कौरा। ²⁵ आबै आमारै घौरा दी सात भाई थै, पैहलौ भाई शादी कौरीयौ मौरी गौ, और दुज़ै भाईऐ तिऐं छ़ेउड़ी आइलै शादी कौरी ताकि तेस भाई री औलाद बौणी रौआ। ²⁶ इणी कौरै चीज़ै और च़ौथेऊऐ भी इणौ कियौ, और साती भाईऊऐ तिऐं आइलै शादी की और बिना औलादीऐ मौरी गौऐ। ²⁷ तेत बासीऐ सै छ़ेउड़ी भी मौरी गोई। ²⁸ ज़ैबै सै छ़ेउड़ी ज़ीऊंदी हुआ ली ता तिऊं साता माझ़ीऊ कु कासरी छ़ेउड़ी हुआ? कैलैकि सै सारैऊ री छ़ेउड़ी थी।" ²⁹ यीशुऐ तिउंलै ज़वाब दैऔ, “तुमै पवित्रशास्त्र और परमेश्वरा री शक्ति नाईं ज़ाणदै; ऐज़े कारणे तुमै गौलती दी पौड़ै औन्दै आ। ³⁰ कैलैकि ज़ीऊंदै हुणा दी सै ना ता शादी कौरदै और ना शादी लै दैंदै पर सौरगा दी परमेश्वरा रै दुतै ज़िणै हुणै ई। ³¹ पर मौरनै बासियै ज़ीऊंदै हुणा रै बारै दी का तुमुऐ एज़ौ वचन नाईं पौढ़ौ ज़ो परमेश्वरै तुमु आइलै बोलौ आ : ³² ’हाऊं अब्राहमा रौ परमेश्वर, और इसहाका रौ परमेश्वर, और याकूबा रौ परमेश्वर आ’? सेऊ मौरै औन्दै रौ नाईं, पर ज़ीऊंदै रौ परमेश्वर आ।" ³³ इणौ शुणियौ लोग तेसरै उपदेश कु हैरान हुऐ।

सौबी कु बौड़ी आज्ञा

(मरकुस 12:28-34; लूका10:25-28)

³⁴ ज़ैबै फरीसिऊऐ शुणौ कि यीशुऐ सदूकिऊ रौ मुंह बौन्द कौरी गौ, ता सै कौठै हुऐ। ³⁵ तिऊं माझ़ीऊ कु एकी आदमीऐ यीशु पौरखुणा लै तेसकु पुछ़ौ, ³⁶ “ओ गुरु, कानूना दी के़ज़ौ हुकम सौबी कु बौड़ौ आ?” ³⁷ यीशुऐ तेसलै बोलौ, “तू परमेश्वर आपणै प्रभु कु आपणै पूरै मन और आपणै पूरै प्राणा और आपणी सारी औकली आइलै प्यार छ़ाड़ै। ³⁸ बौड़ी और ज़रुरी हुकम ता ऐऊ ई आ। ³⁹ और दुज़ी ज़रुरी हुकम भी तिणी आ कि ज़िणौ प्यार तू आपू आइलै कौरा ई तिणौ प्यार तू आपणै आस-पड़ोसा रै लोगु आइलै भी कौरै।’ ⁴⁰ ऐज़ै इ दुई हुकम सौबी कानून और पुराणै ज़मानै रै गुरु री बुनियाद आ।"

मसीह कासरौ छ़ोहरु आ?

(मरकुस 12:35-37; लूका20: 41:44)

⁴¹ ज़ेबी फरीसी कौठै थै, ता यीशुऐ तिऊंकु पुछ़ौ, ⁴² “मसीह रै बारै दी तुमै का सुंच़ा ई? सेऊ कासरौ छ़ोहरु आ?” तिउंऐ यीशु लै बोलौ, “दाऊदा रौ।" ⁴³ यीशुऐ तिउंकै पुछ़ौ, “ता दाऊद आत्मा दी हुईयौ तेसलै प्रभु कैलै बोला सा? ⁴⁴ ’प्रभुऐ, मैरै प्रभु लै बोलौ, मैरी सुल्टी भिलै बोश, ज़ेबी झ़ाऊं हाऊं तैरै दुशमनु तेरी लाता थालै ना कौरु।" ⁴⁵ भौलौ, ज़ैबै दाऊद तेसलै प्रभु बोला सा, ता सेऊ तेसरौ छ़ोहरु किणौ ठहरौ? ⁴⁶ ऐस ज़वाबा दी कोईऐ भी एक बुश ना बोली बौल़ै। सेज़ै दिना कु कासी रै भी तेसकु कुछ़ पुछ़णा री हिम्मत नाईं हुई।

शास्त्रिउ और फरीसिउ कु दूर रौएउ

(मरकुस12:38,39, लूका11:43,46; 20:45,-46)

¹ तैबै यीशुऐ लोगु लै और आपणै च़ेलेऊ लै बोलौ, ² “शास्त्री और फरीसी मूसा री ज़ागहा दी बोशै औन्दै; ³ एथीलै सै तुमुलै ज़ो कुछ़ बोला लै सेऊ तुमुऐ कौरणौ और मानणौ, पर तिऊं ज़िणै काम नाईं कौरणै; कैलैकि सै बोला ता ई पर कौरदै नाईं। ⁴ सै एक इणै भौरी भारा लै ज़ो च़ुंगणौ भौरी गौरकौ आ, तेस बानीयौ तिऊं आदमीऊ रै काछ़ा माथै छ़ाड़ा ई; पर आपु तेस आपणी गुंठी कु भी झीड़नौ नाईं च़ांहदै। ⁵ सै आपणै काम आदमीऊ कै देखाल़ना लै कौरा ई : सै आपणै-आपणै जौंतर बौड़ौ कौराई और आपणै ज़ुड़कै साफ कौरा ई। ⁶ धामा दी खास आछ़ी ज़ागहा, और खुंबल़ी दी आछ़ी-आछ़ी बोशणै री ज़ागहा लोड़ा ई, ⁷ बज़ारा दी ढाल, और आदमीऊ ज़ेबी तिउंलै रब्बी बोलाई ता तिउंकै आच़्छ़ौ लागा आ। ⁸ पर तुमै रब्बी नाईं बौणीयौ, कैलैकि तुमारौ एक ई गुरु आ, और तुमै सारै भाई ई। ⁹ धौतरी माथै कासी लै आपणौ बाब ना बोलीयौ, कैलैकि तुमारौ एक ई बाब आ, ज़ो सौरगा दी आ। ¹⁰ और मालिक भी नाईं बोलीयौ, कैलैकि तुमारौ एक ही मालिक आ, सिरफ मसीह। ¹¹ ज़ो तुमु माझ़ींऐ बौड़ौ आ, सेऊ तुमारौ सेवक बौणा। ¹² ज़ुण-कुण आपूलै बौड़ौ बौणालौ, सेऊ छ़ोटौ बौणालौ : और ज़ुण-कुण आपूलै छ़ोटौ बौणा, सेऊ बौड़ौ कौरीया लौ।

शास्त्रिउ और फरीसिउ री बुराई रै बारै दी रोशिणौ

(मरकुस12:40; लुका 11:39-42 44,52, 20:47)

¹³ “ओ कपटी शास्त्रिउओ और फरीसीउओ, तुमु लै फिटकार! तुमै आदमीऊ कालै सौरगा रै राज्य रौ दार बौन्द कौरा ई, ना ता आपू तेसदी डेऊंदै और ना तेसदी डेऊंणै वाल़ै तेसदी डेऊंणै दैंदै। ¹⁴ (ओ कपटी शास्त्रिऊ और फरीसीऊ, तुमु लै फिटकार! तुमै विधवाऊ रौ घौर सारौ लूटा ई, और देखाउणा लै भौरी बौग्ता झ़ाऊं प्राथना कौरदै रौआ ई : एथीलै तुमुलै भौरी सौज़ा मिला सा।) ¹⁵ “ओ कपटी शास्त्रिउओ और फरीसीउओ, तुमु लै फिटकार! तुमै एक आदमी आपणै वशा दी आणना लै सारै पाणी और धौतरी दी डिआ ई, और ज़ैबै सेऊ वशा दी आशा सा ता तेस आपु कु दुगुणौ नारकीय चाणा ई। ¹⁶ “ओ शेड़ै च़ेलेउओ, तुमु लै फिटकार! ज़ुण बोला ई कि अगर कुण परमेश्वरा रै घौरा री शौपतै खा ता कुछ़ नाईं, पर अगर कुण परमेश्वरा रै घौरा रै सुनै री शौपतै खा ता तेसदी बानीया। ¹⁷ ओ मूर्खो और शेड़ेउओ, कुण आ बौड़ौ ; सुनौ या सेऊ परमेश्वर ज़ासकु सुनौ पवित्र हुआ सा? ¹⁸ तैबै बोला ई कि अगर कोई बेदी री शौपतै खा ता कुछ़ नाईं, पर अगर ज़ो भेटा तेसदी आ, अगर तेसरी शौतप खा ता बानीया सा। ¹⁹ ओ शेड़ेउओ, कुण आ बौड़ौ; भेटा या बेदी ज़ास कौरी भेटा पवित्र हुआ सा? ²⁰ एथीलै ज़ो बेदी री शौपतै खा सा, सेऊ तेसरी और ज़ो कुछ़ तेस माथै आ, तेसरी भी शौपतै खा सा। ²¹ ज़ो परमेश्वरा रै घौरा री शौपतै खा सा, सेऊ तेसरी और तेसदी रौइणावाल़ै री भी शौपतै खा सा। ²² ज़ो सौरगा री शौपतै खा सा, सेऊ परमेश्वरा री ज़ागहा री और तेत माथै बोशना वाल़ै री भी शौपतै खा सा। ²³ “ओ कपटी शास्त्रीउओ और फरीसीउओ, तुमु लै फिटकार! तुमै पुदीनै और सौंफ, और ज़ीरै रौ दौसुऔ भाग ता दिआ ई, पर तुमुऐ कानूना री गैहरी बुशै, मतलब फैसलौ, और दया, और विश्वास पोरु छ़ाड़ी गौ आ; इणौ च़ाईं थौ कि इऊं भी कौरा थै और तिऊं भी नाईं छ़ाड़ा थै। ²⁴ ओ शेड़ै च़ेलैऊओ, तुमै माच़्छर ता छ़ाणा ई, पर ऊंट घुटा ई पोरु । ²⁵ ओ कपटी शास्त्रिउओ और फरीसीउओ, तुमु लै फिटकार! तुमै डौंगै और थाल़ी बाइठी ता माँज़ाई पर सै भितरी आइलै न्यारै और मौल़ा कौरी भौरुउ ऐन्दी। ²⁶ ओ शेड़ै फरीसीउओ, पैहलै डौंगौ और थाल़ी भीतरी आइलै मांज़ौ कि सै बाइरी आइलै भी साफ हुआ। ²⁷ “ओ कपटी शास्त्रिउओ और फरीसीउओ, तुमु लै फिटकार! तुमै चूनै कौरी माशी औंदी कौबरी ज़िणै ई ज़ो बाइरी आलै बड़िया दिशा इ, पर भीतरी आइलै मौड़ै री हाड़केऊ और सारै रौंगा री गान्दी चीज़ा कौरी भौरुऐ औन्दै। ²⁸ एज़ी रीति कौरी तुमै भी बाइरी आइलै भी आदमीऊ कै धौर्मी दिशा ई, पर भीतरी आइलै कपट और अधर्मा कौरी भौरुऐ औन्दै ई।

शास्त्रिउ और फरीसिउ माथी डाँडा री भविष्यवाणी

(लूका11:47-51)

²⁹ “ओ कपटी शास्त्रिउओ और फरीसीउओ, तुमुलै ता ऐ केती बुरी बूश आ! तुमै पुराणै गुरु री ओड़ाच़ी सज़ावा और धौर्मीऊ री ओड़ाच़ी चाणाई, ³⁰ और बोलाई कि, ’अगर आमै आपणै बाब दादै रै बौग्ता दी हुआ थै ता पुराणै गुरु झ़ांगणा लै तिऊं आइलै साथा दी नाईं हुआ थै।’ ³¹ एथ कौरी ता तुमै आपु माथै आपु ई गवाही दिआ ई कि तुमै पुराणै गुरु रै खुनी री संतान ई। ³² और तुमुऐ आपणै बाब दादै रै पापा रौ घौड़ौ पूरौ भौरौ। ³³ ओ साप करैतै रै लोलडेउओ, तुमै नौरका री सौज़ा कु किणै कौरिऐ बौच़ाई? ³⁴ एथीलै देखौ, हाऊं तुमु काऐ पुराणै गुरु और बुद्धी वाल़ै और शास्त्रिऊ भेज़ा ऊ; और तुमै तिऊं मांझ़ीआ कु कुछ़ पोरु झ़ांगाई और क्रूसा माथै च़ड़ावाई, और कुछ़ आदमिउ लै तुमै आपणै आराधना कौरनै री खुंबल़ी दी डींगै ला ई और एकी इलाकै कु दुज़ै इलाकै दी गाड़दै थाका इ लागी। ³⁵ ज़ासकै धौर्मी हाबीला कु बिरिक्याह रौ छ़ोहरु जकरयाह झ़ाऊंं, ज़ो तुमुऐ परमेश्वरा रै घौरा दी और बेदी रै बिचा री ज़ागहा दी झ़ांगौ थौ, ज़ेती धौर्मीऊ रौ लोहू धौतरी माथै बौऔ औन्दौ आ तिऊं सौबी रौ पाप तुमारै मुंडा माथै सा। ³⁶ हाऊं तुमुलै सौच़ौ बोलाऊ कि, ऐ सारी बुशै एज़ै जुगा रै लोगु माथै पौड़ाई।

यरुश्लेमा लै लेरणौ

(लूका13:34,35)

³⁷ ओ यरुशलेमा, ओ यरुशलेमा! तू पुराणै गुरु झ़ांगा ई। और ज़ो ताऊं काऐ भेज़ै ई, तिऊं तुमै ढोल़ीयावा ई। केती बारै मुइंऐ च़ाऔ कि ज़िणौ कुखड़ी आपणै टैऐणु आपणै पांखै थालै कौठै कौरा सा, तिणी ई हाऊं भी तैरै छ़ोहरु कौठै कौरारु, पर तुमुऐ नाईं च़ाऔ। ³⁸ देखौ, तुमारौ घौर तुमु कालै उज़ाड़ी छ़ाड़ा ऊ। ³⁹ कैलैकि हाऊं तुमुलै बोलाऊ कि इबी कु ज़ेबी झ़ाऊं तुमै नाईं बोलालै, ’भौलौ आ सेऊ, जुण परमेश्वरा रै नांवा कौरी आशा सा’ तेबी झ़ाऊं मुं तुमै केबी ना देखालै।"

परमेश्वरा रै घौरा रै विनाशा री भविष्यवाणी

(मरकुस13:1,2; लूका 21:5,6)

¹ ज़ेबी यीशु परमेश्वरा रै घौरा कु बाइरै निकुल़दै थौ लागौ औन्दौ, ता तेसरै च़ेलै परमेश्वरा रै घौरा रै बारै दी यीशु काऐ पुछ़दै आशै। ² तिणीऐ तिउंलै बोलौ, “तुमै एस सब देखदै लागै औन्दै ई ना! हाऊं तुमुलै सौच़ौ बोलाऊ, इदै ढोल़ा माथै ढोल़ भी नाईं बौच़दै कैलैकि इयौ सब कुछ़ ढाल़ीया नाष हुआ।”

मुसीबत और कल़ेश

(मरकुस13:3-13;लूका 21:7-19)

³ ज़ेबी यीशु जैतूना री पहाड़ी माथै थौ बोशौ औन्दौ, ता च़ेलेउऐ एखुली दी यीशु काऐ आशीयौ तेसलै बोलौ, “आमुलै बोल कि एज़ी बुशै केबी हुआ ई? तैरै आशणै रौ और दुनिया आखरी हुणै रौ का निशाण हुआ सा?” ⁴ यीशुऐ तिउंलै ज़वाब दैऔ, “बौच़ियौ रौएऊ! कुणिऐ तुमुलै धोख़ौ ना च़ांई दैऔ, ⁵ कैलैकि कई लोग इणै हुआई ज़ो मैरै नावां कौरीयै आशीयौ बौलाई, हाऊं मसिहा ऊ’, और भौरी लोग तिऊं पीछ़ु डेउणै ई। ⁶ तुमै लड़ाई और झ़ौगड़ै रै बारै दी शुणालै, ता तुमै घौबराएऊ नाईं कैलैकि इयै बुशै हुणी ता ज़रुरी ई, पर सेज़ौ बौग्त आखरी नाईं हुन्दौ। ⁷ कैलैकि एकी ज़ाती रै लोग दुज़ी ज़ाती रै लोगू रौ विरोध कौराई, एकी देशा रै लोग दुज़ै देशा रै लोगू रौ विरोध कौराई, और ज़ागहा-ज़ागहा दी काल़ पौड़ाई, और भुईंच़ाल़ हुणे ई। ⁸ इयै सब बुशै मुसिबता री शुरुआत ई। ⁹ तैबै सै दुख देणा लै तुमु पाकड़ा ई, और तुमु पोरु झ़ांगाई, और मैरै नावां रै कारण सारै लोग तुमु आइलै दुश्मनी छ़ाड़ाई। ¹⁰ तैबै भौरी लोग ठोकर खा ई, और एकी दुज़ै पकड़ावाई, और एकी दुज़ै आइलै दुश्मनी छ़ाड़ा ई। ¹¹ भौरी ज़ौणै ज़ुठै और पुराणै गुरु आशा ई ,और कई ता तिऊं आइलै डेआई। ¹² अधर्म रै बौड़नै कु भौरी लोगु रौ प्यार शेल़ौ पौड़ा सा, ¹³ पर ज़ो आखरी झ़ांऊ मुं आइलै बौणी रौआ लौ, तेसलै सौदा री ज़ीन्दगी मिलाली। ¹⁴ और राज़ा रौ एऊ खुशी रौ संदेश सारी धौतरी माथै परच़ार कौरा लै, कि सब ज़ाती माथै गवाही हुआई, तैबै आखरी बौग्त आशा सा।

बौड़ी मुसीबता री शुरूआत

(मरकुस13:14-23; लूका21:20-24)

¹⁵ “एथीलै ज़ेबी तुमै तिऐं उज़ाड़ने वाली बुरी चीज़ ज़ेथरै बारै दी दानिय्येल गुरु रै ज़रीऐ बोली ऐन्दौ थी, एक भौरी बुरौ आदमी आशियौ एस परमेश्वरा रै आराधना रै घौरा री सारेऊ कु शुद्ध ज़ागह गान्दी कौरा आ (पढ़ने वाल़ौ समझ़ालौ।), ¹⁶ तैबै ज़ेज़ै लोग यहूदिऊ दी औलै सै बौच़णा लै पहाड़ा दी जा डेउणौ। ¹⁷ ज़ो छ़ापरा माथै औलै, सै आपणै घौरा कु समाना आणना लै तौल़ै नाईं उतरीयौ; ¹⁸ और ज़ो डोखरै दी औलै, सै आपणै जुड़कै आणना लै घौरै नाईं डेआलै। ¹⁹ सेज़ै दिनै दी ज़ो छ़ेउड़ी गौरकै ज़ीवारी औली और ज़ासकै दुध पिणै वाल़ै लोल़डै औलै, तुमुलै ऐ केती बुरी बुश आ। ²⁰ प्राथना कौरदै थाकौ लागी कि तुमै शेल़ै रै दिनै या ब्रौता रै दीना दी नाईं जा लौ भागणौ। ²¹ कैलैकि सेज़ै बौग्तै इणौ भौरी दुख हुआ, ज़िणौ धौतरी रै पैहलै कु ना इबी झ़ाऊ हुऔ और ना केबी हुणौ। ²² अगर सेज़ै दिन कम नाईं कौरा थै ता कोई भी प्राणी नाईं बौच़ा थौ, पर च़ुनै औन्दै रै कारण सै दिन कम कौरी गौऐ। ²³ सेज़ै बौग्तै अगर तुमुलै कुण बोला लौ, ’शुणौ, मसीह इदै आ!’ या तिदै आ!’ ता विश्वास नाईं कौरैऊ। ²⁴ कैलैकि झुठै मसीह और झूठै गुरु आशा ई, और बौड़ै निशाण, और हैरानी वाल़ै काम देखाइयौ लोगू परमेश्वरा री बाटा कु टाल़ने री कोशिश कौराई। ²⁵ शुणौ, मुइंयैं तुमुलै सारी कुछ़ बूशै पैहलै ई बोली गोई आ। ²⁶ एथीलै अगर सै तुमुलै बोलालै, ’शुणौ, सेऊ ज़ांगल़ा दी आ’, ता बाइरै नाईं निकल़ीयौ ; या बोलालै ’शुणौ, सेऊ कोठरिउ दी आ’, ता विश्वास नाईं कौरैऊ। ²⁷ कैलैकि ज़िणौ बिज़ल़ी पूर्वा कु निकल़ियौ पश्चिमा झ़ाऊं च़ौमका ई, तीणी ई आदमी रै छ़ोहरु रौ आशणौ हुआ सा। ²⁸ ज़ियै मौरौ औन्दौ प्राणी हुआ सा, तिऐ बाज़ कौठै हुआई।

आदमी रै छ़ोहरु रौ दूजी बारै आशणौ

(मरकुस13:24-27; लूका 21:25-28)

²⁹ “सेज़ै दिना रै दुखा बासिऐ सूरज काल़ौ पौड़ा सा, और सूरज और ज़ून भी प्याशौ दैणौ बन्द कौरा, और तारै सौरगा कु छ़ुटीयौ तौल़ै पौड़ाई और सौरगा री शक्ति हिलणी। ³⁰ तैबै आदमी रै छ़ोहरु री निशाणी सौरगा दी दिशाई, और तैबै सौरगा रै सारै कुला रै लोग हिकड़ौ पीटाई; और आदमी रै छ़ोहरु बौड़ी सामर्था और शाना कौरिऐ सौरगा रै बादल़ा माथै आशदै देखाई। ³¹ सेऊ बांइशी बाज़ियौ आपणै सौरगा रै दूत भेज़ा आ, और सै पुरी दुनिया रै कुणै-कुणै कु मैरै छ़ाँटै औन्दै लोग कौठै कौराई।

फेड़ु रै पेड़ा रौ उदाहरण

(मरकुस13:28-31; लुका21:29-33)

³² “फेड़ू रै पेड़ा कु एज़ौ अनेणौ शिखौ : ज़ेबी फेड़ू रै प़ेडा रै शाउटै कौंउल़ै हुआ ई और तेसदी पाच लागदै लागा ई, ता तेभी तुमुकै पौतौ लागा कि गौरमी आशणै वाल़ी आ। ³³ तिणी ई ज़ेबी तुमै इऊं सब बुशै औन्दै देखा लै, ता तुमै सौमझ़ेऊ कि मैरौ दुज़ी बारै वापिस आशणै रौ बौग्त हुई ऐरौ आ। ³⁴ हाऊं तुमुलै सौच़्च़ौ बोलाऊ कि ज़ेबी झ़ाऊं इऐ सारी बुशै पुरी ना औली, तेबी झ़ाऊं एज़ी पिड़ी रौ नाष नाईं औन्दौ। ³⁵ सौरग और धौतरी टौल़ी सौका ई पर मेरी बोली ऐन्दी बुशै केबी ना टौल़दी।

उज़ी रौएऊ

(मरकुस13:32-47; लूका17:26-30, 34=36)

³⁶ “मैरौ दुज़ी बारै आशणै रै बौग्ता रै बारै दी कोई नाईं ज़ाणदौ, ना सौरगा रै दूत और ना छ़ोहरु, सिरफ परमेश्वरा कै पौतौ। ³⁷ ज़िणै नूहा रै दिन थै, तिणी ई आदमी रै छ़ोहरु रौ आशणौ भी हुआ सा। ³⁸ कैलैकि ज़िणौ पाणी रै विनाशा कौरी पैहलै रै दिना दी, ज़ेबी झ़ाऊं कि नूह ज़ाहज़ा दी नाईं डैऔ, सेज़ै दिनै झ़ाऊं लोग खा-पिया थै, और और तिऊं मांझ़िऐ शादी ब्याऐ औआ थै। ³⁹ और ज़ेबी झ़ाऊं पाणी रै विनाशा आशीयौ सै सारै बौआइयौ नाईं नियै, तेबी झ़ाऊं तिउंकै कुछ़ भी सौमझ़िऐ नाईं आशौ; तिणी ई आदमी रै छ़ोहरु रौ आशणौ भी हुआ आ। ⁴⁰ सेज़ै दिनै दी ज़ो लोग डोखरै दी हुआई, एक नियाई पोरु दुज़ौ छ़ाड़ाई तिदै। ⁴¹ दुई छ़ेउड़ी जाँजै पिशदै रौआई, एक पोरु निया लै और दुज़ी छ़ाड़ा लै तिदै। ⁴² ऐथली ऊज़ी रौऔ, कैलैकि तुमै नाईं ज़ाणदै कि तुमारौ प्रभु केज़ै दिना दी आशा सा। ⁴³ पर इणौ ज़ाणौ कि अगर घौरा रौ मालिक ज़ाणदौ औलौ कि च़ोर केज़ै बौग्तै आशाई ता ऊज़ी रौआ थौ, और आपणै घौरा दी च़ोरी कौरणै नाईं देया थौ। ⁴⁴ एथिलै तुमै भी तैयार रौऔ, कैलैकि ज़ेज़ै बौग्तै रै बारै दी तुमै सुंच़दै नाईं, सेज़ै बौग्तै आदमी रौ छ़ोहरु आशा सा।

विश्वासा वाल़ौ दास और दुष्ट दास

(लूका12:41-48)

⁴⁵ “तैबै सेऊ विश्वासवाल़ौ दास और बुद्धी वाल़ौ दास कुण आ, ज़ो मालिकै आपणै नुकरा-च़ाकरा रौ मुख्यौ च़ाणौ कि सेऊ बौग्ता दी तिउंलै रोटी दिआ? ⁴⁶ भौलौ आ सेऊ दास, ज़ो तेसरौ मालिक आशीयौ इणौ कौरदै तेस देखा लौ। ⁴⁷ हाऊं तुमुलै सौच़्च़ौ बोलाऊ, “सेऊ मालिक आपणै तेस दासा कै आपणी सारी धन-ज़यदादा सौम्भाल़नै रौ हक दिआ सा। ⁴⁸ अगर सेऊ दास सुंच़ा लौ कि मैरौ मालिक ता कुछ़ दिना झ़ाऊं वापिस ना आशदौ, ⁴⁹ और दुज़ै नुकरा लै दुख दैणौ शुरु कौरा लौ, और आपुलै खाणै पिणै रौ इन्तज़ाम कौरा लौ और सूर पिआ लौ। ⁵⁰ ता तेसरौ मालिक बिण बोली तेबी आशा ज़ेबी तेसरौ सुंच़ौ औन्दौ भी नाईं औलौ। ⁵¹ तैबै सेऊ मालिक तेस नुकरा लै सज़ा दिया और अविश्वासिऊ मांझ़िऐ भेज़ा : तिऐ लेरनौ और दांद पिशणौ हुआई।

दस बिण ब्याई छ़ोटुड़ी रौ औनेणौ

¹ “सौरगा रौ राज़ तिऊं दस बिण ब्याई छो़टुड़ी ज़िणौ हुआ ज़ो आपणै मशाल लालटेण निंइयौ लाड़ै कु मिलदै डेई। ² तिऊं मांझ़िऐ पाँज़ मूर्ख और पाँज़ समझ़दार थी। ³ मूर्खै आपणी मशाल लालटेण ता नि ईं, पर आपुकै तेल नाईं निऔ; ⁴ पर समझ़दारै आपणै मशाल लालटेणा आइलै आपणी कुप्पी दी तेल भी भौरी गौ। ⁵ ज़ेबै लाड़ै रै आशणै दी बेर हुई, ता सै सारै डुइणी लाइंदै लागी और सुती गोई। ⁶ “ज़ेबी राच आधी हुई ता धूम माच़ी : ’शुणौ, लाड़ौ आशदै लागौ औन्दौ आ! तेस मिलदै च़ालौ।’ ⁷ तैबै सै दस बिण ब्याई छ़ोटुड़ी उठीयौ आपणै मशाल ठीक कौरदै लागी। ⁸ और मूर्ख छ़ोटुड़ीउऐ समझ़दारा लै बोलौ, ’आपणै तेला माझ़िआ कु कुछ़ तेल आमु कै भी दैऔ, कैलैकि आमारी मशाल इशदै आ लागी ऐन्दी। ⁹ पर समझ़दारै ज़वाब दैऔ, ’पर एऊ आमुलै और तुमुलै पूरौ नाईं औन्दौ; तुमुलै ठीक आ कि तुमै बेच़णै वाल़ेऊ काऐ डैऔ और आपु कालै तेल आणौ।’ ¹⁰ ज़ेबी सै तेला आणदै डेउंदै थी लागी औन्दी ता लाड़ौ पौउंच़ी गौ, और ज़ो त्यार थी, सै तेस आइलै शादी रै घौरा दी डेई गोई और दार बौन्द की ऐरौ। ¹¹ तेत बासिऐ सै दुज़ी पाँज़ बिण ब्याई आशीयौ बोलदै लागी, ’ओ मालिक, ओ मालिक, आमुलै दार खोल!’ ¹² तिणीऐ ज़वाब दैऔ, ’हाऊं तुमुलै सौच़्च़ौ बोलाऊ, हाऊं तुमु नाईं ज़ाणदौ।’ ¹³ एथीलै ऊज़ी रौऔ, कैलैकि तुमै ना सेज़ौ दिन ज़ाणदै, ना सेज़ौ बौग्त ज़ाणदै।

तोड़ै रौ औनेणौ

(लूका19:11-27)

¹⁴ कैलैकि ऐऊ तेस आदमी ज़िणी हालत आ ज़ुण परदेशा लै डेउणै रै बौग्तै आपणै नुकर औटाऐ आपणी ज़ायदाद तिउंकै देई। ¹⁵ तिणीऐ एकी कै पांज़ शर्फी, दुज़ै कै दुई शर्फी, चीज़ै कै एक शर्फी देई; तिणीऐ हर एकी लै तेसरै ताकती रै अनुसार दैऔ, और आपु डेई गौ दुज़ै देशा लै। ¹⁶ तैबै, ज़ासकै पांज़ तोडे मिलै औन्दै थै, तिणीऐ खरकच़ार डेईऔ तिउंरौ लेण-देण किऔ, और तिणीऐ पांज़ शर्फी औज़ौ कौमांई। ¹⁷ इणी ई तिणी दुज़ै नुकरै भी ज़ासकै दुई शर्फी मिली औन्दी थी, दुई शर्फी औज़ौ कौमाई। ¹⁸ पर ज़ासकै एक मिली औन्दी थी, तिणीऐ डेइऔ माटौ खोदौ, और आपणै मालिका री शर्फी दाबी गोई। ¹⁹ “भौरी दिनै बासीऐ तिऊं नुकरा रौ मालिक आशौ और तिउंकै लेण-देणा रै बारै दी पुछ़दै लागौ। ²⁰ ज़ासकै पांज़ शर्फी मिली औन्दी थी, तिणीऐ पांज़ शर्फी आणीऔ बोलौ, ’ओ मालिक, ताइंऐ मुकै पांज़ शर्फी देई औन्दी थी, देख, मुंइऐ पांज़ औज़ौ कौमाई।’ ²¹ तेसरै मालिकै तेसलै बोलौ, ’शाबाश, ओ आच़्छ़ौ और विश्वासा रै लायक नुकर, तू थोड़ै दी विश्वासा वाल़ौ निकल़ौ; हाऊं ताऊं भौरी च़ीज़ा रौ मालिक चाणाऊ। आपणै मालिका री खुशी दी खुश रौऊ। ²² "और ज़ासलै दुई सर्फी मिली औन्दी थी, तिणीऐ भी आशीयौ बोलौ, “ओ मालिक, ताइंऐ मुकै दुई शर्फी देई औन्दी थी, देख, मुइंऐ दुई औज़ौ कौमाई।’ ²³ तिणीऐ मालिकै तेसलै बोलौ, ’शाबाश, ओ आच़्छ़ौ और विश्वासा वाल़ौ नुकर, तू थोड़े दी विश्वासा वा़लौ निकल़ौ; हाऊं ताऊं भौरी चीज़ेउ रौ मालिक चाणाऊ। आपणै मालिका री खुशी दी खुश रौऊ।’ ²⁴ “तैबै ज़ासकै एक शर्फी थी मिली औन्दी, तिणीऐ आशीयौ बोलौ, “ओ मालिक, हाऊं ज़ाणाउ कि तू काठौ आदमी ई : ज़िऐ तू नाईं बौइंदौ तेस भी तू लौआ ई, ज़िऐ तैरौ नाईं आ तिदरु भी तू निंआई। ²⁵ हाऊं डौरी गौ थौ और डेइऔ तेरी शर्फी माटै थाली दाबी गोई। शुण, ज़ो तैरौ आ, सेऊ इदै आ।’ एथीलै ²⁶ तेसरै मालिकै तेसलै ज़वाब दैऔ, “ओ दुष्ट और निकामौ नुकुर, ज़ैबै तू ज़ाणा थौ कि ज़िऐ हाऊं नाईं बौइंदौ तिऐ हाऊं लौआऊ, और ज़िऐ मैरौ नाईं आ तिदरौ हाऊं च़ुंगाऊ; ²⁷ ता ताऐं मेरी शर्फी ब्याज़ा माथै कैलै ना देई ताकि ज़ेबी हाऊं आशा थौ ता तेबी सित ब्याज़ै निआ थौ। ²⁸ एथीलै इयैं शर्फी एसकु ओरु छ़ुड़ाऔ, और ज़ासकै दस शर्फी मुहरै ई, तेसकै दैऔ। ²⁹ कैलैकि ज़ासकै आसती आ और सेऊ ठीक डौंगा रौ बौरता लौ तेसकै औज़ौ मिला। ज़ुण ठीक डौंगा रौ ना बौरता लौ तेसकु सेऊ भी ओरु निईंआ सा ज़ो तेसकै औलौ। ³⁰ और एस निकाम्मौ नुकुर बाइरै न्यारै दी पाऔ, ज़िऐ लेरनो और दांद पीशणौ हुआ आ।

फैसलै रौ दिन

³¹ “ज़ेबी आदमी रौ छ़ोहरु आपणी महिमा दी आशा लौ और सब सौरगा रै दूत तेस आइलै आशाई, ता सेऊ आपणी महिमा रै ज़ागहा माथै बोशौ औन्दौ हुआ। ³² और सारी ज़ाती तेस काऐ कौठी कौराई।; और ज़िणौ भेराल़ड़ु भेरी बाकरी कु औलग कौरा ई, तिणी ई सेऊ भी तिऊं एकी दुज़ै कु औलग कौरा सा। ³³ सेऊ भेरी आपणी सुल़टी भिलै और बाकरी उल़टी भिलै खौड़ौ कौरा सा। ³⁴ तैबै राज़ौ ज़ो आपणी सुल़टी भिलै आ तिउंलै बोला लौ, ’ओ मैरै बाबा रै भौलै छ़ोटी छ़ोहरुओ, आशौ, तेस राज़्या रै हिसेदार बोणौ, ज़ो दुनिया रै पैहलै कु तुमुलै त्यार किऔ औन्दौ आ। ³⁵ कैलैकि हाऊं भूखो थौ, तुमुऐ मुलै खाणा लै दैऔ; हाऊं चिशौ थौ, और तुमुऐ मुलै पिणा लै पाणी दैऔ; हाऊं परदेसी थौ, और तुमुऐ हाऊं आपणै घौरा दी छ़ाड़ौ; ³⁶ हाऊं नांगौ थौ, तुमुऐ मुकालै भिड़ना लै ज़ुड़कै दै; हाऊं बिमार थौ, और तुमुऐ हाऊं पुछ़ौ, हाऊं कैदा दी थौ, तुमै मुकाऐ मिलदै आशै।’ ³⁷ “तैबै धौर्मी लोग तेसलै ज़वाब दिआलै, ’ओ प्रभु, आमुऐ केबी तू भूखौ देखौ और खिलाऔ? या केबी तू आमुऐ चिशौ देखौ और पाणी पिलाऔ? ³⁸ आमुऐ केबी तू परदेसी देखौ और केबी आमुऐ तू आपणै घौरा दी छ़ाड़ौ? या केबी तू नांगौ थौ और केबी ताउंकै जुड़कै भिड़ाऐ? ³⁹ आमुऐ केबी तू बिमार और कैदा दी देखौ और केबी ताऊं काऐ मिलदै आशै?’ ⁴⁰ तैबै राज़ौ तिउंलै ज़वाब दिआ, “हाऊं तुमुलै सौच़्च़ौ बोलाऊ कि तुमुऐ ज़ो इऊं छ़ोटे कु छ़ोटे भाइऊ माझ़िऊ कास एकी आइलै किऔ, सेऊ इ मुं आइलै कियौ।’ ⁴¹ “तैबै सेऊ आपणी ज़ो उल़टी भिलै इ बोशाल़ै औन्दै तिउंलै बोला, ’ओ शापित लोगुओ, मुं काऐ कु तिऐं सदा री आगी मांझ़ीऐ डैऔ, ज़ो शैतान और तेसरै सारै दूता लै आ त्यार की ऐन्दी। ⁴² कैलैकि हाऊं भूखौ थौ और तुमुऐ मुलै खाणा लै नाईं दैऔ; हाऊं चिशौ थौ, और तुमुऐ मुलै पिणा लै पाणी नाईं दैऔ; ⁴³ हाऊं परदेसी थौ, और तुमुऐ हाऊं आपणै घौरा दी नाईं छाड़ौ; हाऊं नांगौ थौ, और तुमुऐ मुलै भिड़नै लै जुड़कै नाईं दैणै; हाऊं बीमार और कैदा दी थौ, और तुमुऐ हाऊं नाईं पुछ़ौ।’ ⁴⁴ “तैबै सै ज़वाब दिआ लै, “ओ प्रभु, आमुऐ तू केबी भूखौ, या चीशौ, या परदेसी, या नांगौ, या बीमार, या कैदा दी देखौ आ, और तेरी सेवा टहल नाईं की?’ ⁴⁵ तैबै सेऊ तिउंलै ज़वाब दिआ, ’हाऊं तुमुलै सौच़्च़ौ बोलाऊ कि तुमुऐ ज़ो इऊं छ़ोटे कु छ़ोटे मांझ़ीआ कु कास एकी आइलै भी नाईं किऔ, सेऊ मुं आइलै भी नाईं कियौ।’ ⁴⁶ और इऊंलै सौदा री ज़ीन्दगी झ़ाऊं सज़ा मिला सा, पर धौर्मी सौदा री ज़ीन्दगी दी डेआई।"

यीशु रै बिरोधा दी यीशु पकुड़ना लै च़ाल

(मरकुस14:1,2; लूका22:1,2; यूहन्ना11:45-53)

¹ ज़ैबै यीशुऐ सब बुशै बोली एरी ता आपणै च़ेलैऊ लै बोलदै लागौ, ² “तुमै ज़ाण ई कि दुई दिनै बासिऐ बिण संज़ेड़ै री रोटी रौ साज़ौ आ, और आदमी रौ छ़ोहरु क्रूसा माथै च़ड़ावणा लै पकड़ावा ई।" ³ तैबै परधान याजक और प्रजा रै लोग काइफा नावां रै बौड़ै याजका रै खौल़ै दी कौठै हुऐ, ⁴ और आपु माझ़िऐ चौपड़िंदै लागै कि यीशु च़लाकी कोरिऐ पाकड़िऔ पोरु झ़ांगी। ⁵ पर सै बोला थै, “साज़ै रै दिना दी नाईं पाकुड़दै, किऐ इणौ ना च़ाईं हुऔ कि भीड़ा रै लोग मौच़ावा लै हालौ।

बैतनिय्याह दी यीशु रोटी खांदै

(मरकुस14:3-9; यूहन्ना12:1-8)

⁶ ज़ेबी यीशु बेतनियाह दी शमौन कोढ़ी रै घौरा दी थौ, ⁷ ता एक छ़ेउड़ी संगमरमरा री शीशी दी भौरी किमती तेल आणीयौ यीशु काऐ आशी, और ज़ैबै यीशु रोटी खांदै थै बोशौ औन्दौ ता सेऊ तेल यीशु रै मूंडा तौल़ै पेरौ। ⁸ इणै देखीऐ यीशु रै च़ेलै रोशुऐ और बोलदै लागै, “इऔ मैहंगौ तेल बर्बाद कैलै कियौ औलौ? ⁹ एस तेल ता आच़्छ़ै दामा दी बेच़ियौ एथरै रुपाऐ गरीब लोगू दी बांटणै च़ाईं थै।" ¹⁰ इणौ ज़ाणीऔ यीशुऐ तिउंलै बोलौ, “तुमै इयैं छ़ेउड़ी लै कैलै रोशीआई? इयैं छ़ेउड़ीऐ मेरी भौलाई लै कियौ आ। ¹¹ गरीब लोग ता तुमु आइलै सौदा रौआ ई, पर हाऊं तुमु आइलै सौदा नाईं रौइंदौ। ¹² इयैं छ़ेउड़ीऐ मैरै मूंडा दी खुश्बुदार तेल पेरौ आ, सेऊ मैरै दबाउणा लै कियौ आ। ¹³ हाऊं तुमुलै सौच़्चौ बोलाऊ, “पूरी दूनिया दी ज़िऐ-ज़िऐ परमेश्वरा रै खुशी रौ संदेश शुणावा लै, तिऐ-तिऐ इयैं छ़ेउड़ी रै कामा री बूशै भी हुआ ई।"

यहूदा इस्करियोती रौ विश्वासघात

(मरकुस14:10,11 लूका22:3-6

¹⁴ तैबै यहुदा इस्करियोतीऐ, ज़ो बारह च़लैऊ मांझ़िआ कु एक थौ, सेऊ बौड़ै याजकू काऐ डेईयौ बोलदै लागौ, ¹⁵ “अगर हाऊं यीशु तुमारै हाथा दी पकड़वाऊ लै ता तुमै का दिआ ई?” तिउंऐ तेसलै तीस च़ांदी रै सिक्कै तोलीऐ देई गौऐ। ¹⁶ और सेऊ तेभी कु यीशु पकड़ाउणा री ताकी दी रौ।

च़ेलेउ आइलै आखरी बार साज़ै री रोटी खाणी

(मरकुस14:12-21;लूका22:7-13,21-23; यूहन्ना13:21-30)

¹⁷ तैबै बिणा संज़ेड़ै री रोटी रै पैहलै दिनै, च़ेलै यीशु काऐ आशीयौ पुछ़दै लागै, “तुमै किऐ च़ाहा ई कि आमै साज़ै री रोटी रौ इन्तजाम कौरी? ¹⁸ यीशुऐ तिउंलै बोलौ, “शहरा दी फलाणै आदमी काऐ डेईयौ तेसलै बोलौ, “गुरु जी बोला ई कि मैरौ बौग्त नज़दीक आ। हाऊं आपणै च़ेलै आइलै तैरै घौरा दी साज़ौ मनाऊ।" ¹⁹ तैबै च़ेलेउऐ यीशु रौ हुकम मानौ और फसह री रोटी त्यार की। ²⁰ ज़ेबी ब्याल़ हुई ता यीशु बारह च़ेलैऊ आइलै रोटी खान्दै बौशौ। ²¹ ज़ेबी सै रोटी खान्दै लागै औन्दै थै ता यीशुऐ तिउंलै बोलौ, “हाऊं तुमुलै सौच़्च़ौ बोलाऔ कि तुमु मांझ़ियै एक आ ज़ो मूं पकड़ावा ई।" ²² इणौ शुणियौ सै भौरी परैशान हुऐ, और हर एक यीशु कु पुछ़दै लागै, ’ओ गुरु जी, का सेऊ हाऊं ऊ?” ²³ यीशुऐ ज़वाब दैऔ, “ज़ुणियै मूं आइलै थाल़ी दी हाथ पाऔ आ, सेऊ ई मूं पकड़ावा। ²⁴ आदमी रौ छ़ोहरु ता ज़िणौ तेसरै बारै दी लिखी औन्दौ आ, मैरौ मौरणौ ता इणी भी आ; पर तेस आदमी लै फिटकार आ ज़ासरै ज़रीऐ आदमी रौ छ़ोहरु पकड़वाइआ: तेस आदमी लै तैबै आच़्छ़ो थौ कि तेसरौ जन्मा ना हुआ थौ।" ²⁵ तैबै यीशु पाकुड़नै वाल़ै यहूदै बोलौ, “ओ रब्बी, का सेऊ हाऊं ऊ?” यीशुऐ तेसलै बोलौ, “ताइंयै बोली गौ।"

प्रभू भोज

(मरकुस14:22-26 ;लूका 22:14-20 और 1कुरिन्थियों 11:23-25)

²⁶ ज़ेबी सै रोटी खान्दै थै लागै औन्दै ता यीशुऐ रोटी च़ुंगी, और परमेश्वरा रौ धन्यावाद कौरीयौ चोड़ी और च़ेलैऊ लै देईयौ बोलौ, “निंयौ, खाऔ; इऔ मैरौ ज़ीसम आ।" ²⁷ तैबै यीशुऐ अंगूरा रौ खोरु च़ुंगीयौ परमेश्वरा रौ धन्यावाद कियौ, और तिउंलै देईयौ बोलौ, “तुमै सब एथकु पीओ, ²⁸ कैलैकि एस अंगूरा रौ रस तुमै मैरौ लोऊ सौमझ़ौ ज़ो भौरी लोगू तिंउरै पापा री सज़ा कु बच़ाउणा लै बौइणै वाल़ौ आ। मैरै मौरने कु परमेश्वर लोगू आइलै एक नौवौ रिश्तै रौ वाइदौ पाक्कौ कौरा आ। ²⁹ हाऊं तुमुलै सौच़्च़ौ बोलाऊ कि अंगूरा रौ एऊ रस सेज़ै दिना झ़ाऊं केबी नाईं पिंदौ, ज़ेबी झ़ाऊं तुमु आइलै आपणै बाबा रै राज़ा दी नौऊंऔ नाईं पीऊ।" ³⁰ तैबै सै भजन गाइयौ जैतूना री पहाड़ी माथै डै।

पतरसा रै मुकुरना री भविष्यवाणी

(मरकुस 14:27-31; लूका 22:31-34; यूहन्ना 13:36-38)

³¹ तैबै यीशुऐ तिउंलै बोलौ, “तुमै सारै आज़ राची मैरै बारै दी ठोकर खाआई, कैलैकि लिखौ औन्दौ आ :’हाऊं भेराल़ड़ु झ़ांगा ऊ, और शाल़ा री भेरी ओरु-पोरु भागा ई।’ ³² पर हाऊं ज़ीउंदौ हुइयौ तुमु कु अगाड़िऐ गलीला लै डेआऊ।" ³³ एथ माथै पतरसै यीशु लै बोलौ, “अगर सारै विश्वासा दी डगमगा लै, पर मैरौ विश्वास केबी नाईं डगमगाऊंदौ।" ³⁴ यीशुऐ तेसलै बोलौ, “हाऊं ताउंलै सौच़्च़ौ बोलाऊ कि आज़ राची कुखड़ै रै बाशणै कु पैहलै, आपणै मुंआ कु चिआ बारै बोला ई कि तू मुं नाईं ज़ाणदौ।" ³⁵ पतरसै यीशु लै बोलौ, “च़ाऊ मूं ताऊं आइलै मौरनौ भी जा लौ, तैबै भी हाऊं केबी ना बोलदौ कि हाऊं तुमु नाईं ज़ाणदौ।" और सारै च़ेलै इणौ लागै बोलदै।

गतसमनी दी प्राथना

(मरकुस 14:32-42; लूका22:39-46)

³⁶ तैबै यीशु आपणै च़ेलै आइलै गतसमनी नाऊं री ज़ागहा दी आशौ और आपणै च़ेलै लै बोलदै लागौ, “तुमै इदै बोशी रौएऊ, ज़ेबी झ़ाऊंं हाऊं प्राथना करुलै।" ³⁷ यीशुऐ पतरस और जब्दी रै दुई छ़ोहरु आपू आइलै नियै, और यीशु भौरी दुखी और घबराऊंदै लागौ। ³⁸ तैबै यीशुऐ तिउंलै बोलौ, “मैरौ ज़ीऊ भौरी दुखी आ, इदरा झ़ाऊंं कि मैरै प्राण डेउणै वाल़ै ई। तुमै इदै ई रुकौ और मूं आइलै ऊज़ी रौएऊ।" ³⁹ तैबै यीशु आगुडै डेइयौ धौनी ज़बीना माथै मूंडा लाइयौ पौड़ौ, और प्राथना कौरदै लागौ, “ओ मैरौ बाब, अगर तू च़ाहा ता एस दुखा रौ खोरु पोरु टाल़, तैबै भी ज़िणौ हाऊं च़ाहा ऊ तिणौ नाईं, पर ज़िणौ तू च़ाहा ई तिणी च़ाईं हुऔ।" ⁴⁰ तैबै यीशु आपणै च़ेलैऊ काऐ आशीऔ देखै ता सै थै सुतै औन्दै तैबै यीशुऐ पतरसा लै बोलौ, “का तुमै एकी घौड़ीयै भी ना ऊज़ी रौई बौल़ै? ⁴¹ ऊज़ी रौएऊ, और प्राथना कौरदै रौऔ कि तुमै मुसीबता दी नाईं च़ाईं पौड़ै।" ⁴² तैबै यीशुऐ दुज़ी बारै डेइयौ इणी प्राथना कौरी, “ओ मैरौ बाब, अगर एऊ मैरै पीयै बिणा नाईं टौल़ी सौकौ ता तेरी इच़्छ़ा च़ाईं पूरी हुई।" ⁴³ तैबै यीशु दुज़ी बारै आशौ तेभी भी सै सुतै औन्दै थै, कैलैकि तिउंकै भौरी नीज थी लागी औन्दी। ⁴⁴ तिऊं छ़ाड़ीयौ यीशु औज़ौ चिज़ी बारै प्राथना कौरना लै डैऔ। ⁴⁵ तैबै यीशुऐ चेलेऊ काऐ आशीयौ बोलौ, “आबै सुती रौएऊ, और आराम कौरौ : देखौ सेऊ बौग्त आशी ऐरौ आ, और आदमी रौ छ़ोहरु पापी लोगू रै हाथा दी पकड़ाउणै वाल़ौ ऊ। ⁴⁶ उठौ! औगाऊं आण्डौ; देखौ, मूं पकड़ाउणै वाल़ौ आशी गौ आ।"

यीशु धोखै दी पाकुड़नौ

(मरकुस14:43-50,लूका22:47-53; यूहन्ना 18:3-12)

⁴⁷ यीशु इणौ बोलदै थौ लागौ औन्दौ कि यहूदा ज़ो बारह च़ेलैऊ माझ़िऊ कु एक थौ सेऊ आशौ, और तेस आइलै एक भौरी भीड़ भी थी ज़ासकै तलवारै और डिंगै थै। सै भीड़ बौड़ै याजक, यहूदा शास्त्री और स्याणै लोगूऐ भेज़ी औन्दी थी, यीशु पाकुड़णालै। ⁴⁸ यहूदै पैहलै बोलौ औन्दौ थौ कि, “ज़ास हाऊं खोबीयाऊलौ सेऊ ई आ; तेस पाकड़ेऊ।" ⁴⁹ और सेऊ खरकच़ार यीशु काऐ आशौ और बोलौ, “ओ गुरु जी, ढाल!” और यीशु भौरी खोबीयाऔ।

बौड़ी खुम्बल़ी काऐ यीशु

(मरकुस 14:53-65; लूका 22:54,55, 63-71; यूहन्ना18:13,14,19-24)

⁵⁰ यीशुऐ तेसलै बोलौ, “ओ गोश्टण, ज़ेजै कामा लै तू आशौ थौ, तेस कौर।" तैबै तिऊं लोगुऐ आगुड़ै आशियौ यीशु पाकड़ौ। ⁵¹ यीशु रै च़ेलैऊ माझ़िऐ कु एकीयै आपणी तलवार गाड़ी और परधान याजका रै नुकरा रौ कौंथु पोरु पा काटौ। ⁵² तैबै यीशुऐ तेसलै बोलौ, “आपणी तलवार म्याना दी छ़ाड़ कैलैकि ज़ो तलवार च़लावा ई सै सारै तलवारा कौरै नाष हुआई। ⁵³ का तू नाईं ज़ाणदौ कि हाऊं आपणै बाबा कु औरज़ कौरी सौका ऊ, और सौ सौरगा रै दूता री बारह पल़टणा कु भौरी मूं काऐ इभी भेज़ी सौका? ⁵⁴ पर धर्मशास्त्रा री सै बुशै कि इणौ ई हुणौ ज़ुरुरी आ, किणै कौरी पूरी हुआई?” ⁵⁵ सेज़ै बौग्तै यीशुऐ भीड़ा रै लोगू लै बोलौ, “का तुमै तलवारी और डिंगै कोरिऐ ई आशै औन्दै। का तुमै मुं डाकू समझ़ाई? हाऊं हर दिन परमेश्वरा रै घौरा दी बोशीयौ तुमुलै शिक्षा दिआ थौ, और तुमुऐ हाऊं नाईं पाकड़ौ। ⁵⁶ पर एऊ सब एथीलै हुऔ आ ताकी पुराणै गुरु रौ सेऊ वचन पुरौ हुआ।" तैबै सारै च़ेलै तेस छ़ाड़ीयौ भागी गौऐ। ⁵⁷ तैबै तिउंऐ यीशु पाकड़ीयौ बौड़ै याजका रै घौरा दी निंयौ। तिये सारै शास्त्री और स्याणै लोग कौठै थै हुऐ औन्दै। ⁵⁸ पतरस यीशु पिछ़ु दूर-दूर आण्डियौ बौड़ै याजका रै गौड़ै झ़ाऊं डैऔ, पतरस तिऐ च़ोउकीदारु काऐ बोशियौ आगी तापदै लागौ। ⁵⁹ बौड़ै याजक और सारै यहूदी फैसलै कौरनै वाल़ी खुंबल़ी रै लोग च़ाह थै कि कोई यीशु रै विरोधा दी गवाई दिआ थै, ⁶⁰ पर भौरी लोग यीशु रै विरोधा दी गवाई दैँदै लागै पर तिउंरी बुशै आपू माँझ़ियै नाइं मिला थी। बासियै दुई ज़ौणै गवाई दैंदै आशै, ⁶¹ और बोलदै लागै, “आमुऐ शुणौ ई कि इयौ यीशु बोला कि हाऊं परमेश्वरा रौ घौर ढाल़ी सौका ऊ और चिया दिना दी चाणाऊ।" ⁶² तैबै बौड़ै याजकै खौड़ै हुईयौ यीशु लै बोलौ, “का तू कोई ज़वाब नाईं दैँदौ? इयै लोग तैरै बारै दी का गवाई दिआ ई? ⁶³ पर यीशु च़ुटुक थाकौ। तैबै बौड़ै याजकै यीशु लै बोलौ, “हाऊं ताउंलै ज़ीऊंदै परमेश्वरा री कौसम दिआऊ कि अगर तू परमेश्वरा रौ छ़ोहरु मसीह ई, ता आमुलै बोल।" ⁶⁴ यीशुऐ तेसलै बोलौ, “ताइंऐ आपु ई बोली गौ; पर हाऊं तुमु लै इणौ भी बोलाऊ कि इबी कु तुमै आदमी रौ छ़ोहरु ज़ो सौभी कु शक्तिवाल़ै परमेश्वरा री सुल़टी भीलै बोशै, और सौरगा रै बादला माथै आशदै दैखाई।" ⁶⁵ एथ माथै बौड़ै याजकै आपणै जुड़कै च़ीरै और बोलौ, “इणीयै परमेश्वरा री बुराई कौरी आ, आबै आमुकै कासी री गवाई री ज़ुरत नाईं? शुणौ, तुमुऐ इबी एज़ी बुराई शुणी आ! ⁶⁶ तुमै का सुंच़ाई?” सारै लोग बोलदै लागै यीशु लै मौरणै री सज़ा च़ाईं मिली।" ⁶⁷ तैबै तिउंऐ यीशु रै मुंआ दी थुकौ और यीशु पीटदै लागै, दुज़ै लोगुऐ यीशु दी थापै लाई और बोलदै लागै, ⁶⁸ “ओ मसीह, अगर तू गुरु ई ता बोल ताउंदी कुणिऐ लाई?”

पतरसा रौ इन्कार

( मरकुस 14:66-72; लूका 22:56-62; यूहन्ना 18: 15-18, 25-27

⁶⁹ पतरस बाइरी भिलै खौल़ै दी थौ बौशौ औन्दौ तैबै परधान याजका री एक नुकराण तेस काई आशी और तेसलै बोलौ, “तू भी तेस यीशु गलीली आइलै थौ।" ⁷⁰ तिणीऐ सौभी काऐ इणौ बोलीयौ इनकार कियौ, “हाऊं नाईं ज़ाणदौ तू का ई लागी औन्दी बौलदै।" ⁷¹ ज़ेबी पतरस बाइरै डैऔ, ता दुज़ी नुकराणीयै पतरस देखीयौ तिऊं लोगू लै बोलौ ज़ो तिऐ थै, “इऔ भी ता यीशु नासरी आइलै थौ।" ⁷² पतरस कौसम खाइयौ औज़ौ मुकरौ : “हाऊं तेस आदमी नाईं ज़ाणदौ।" ⁷³ दख बौग्ता बासियै तिऐ ज़ो लोग खौड़ै थै, तिउंऐ पतरसा लै बोलौ, “पाकौ तू भी तिऊं मांझ़िआ कु एक ई, कैलैकि तेरी बोली तैरौ राज़ खोला सा।" ⁷⁴ तैबै पतरस कौसमा खांदै लागौ ; “हाऊं तेस आदमी बिल्कुल भी नाईं ज़ाणदौ।" और खरकच़ार कुखड़ौ बाशौ। ⁷⁵ तैबै पतरसा कै सै बुशै याद आशी गोई ज़ो यीशुऐ तेसलै बोली थी : “कुखड़ै री बाच़ा दैणै कु पैहलै चिया बारै तू मैरौ इनकार कौरा ई।" और सेऊ बाइरै डेइयौ डीकरी-डीकरीयौ लेरदै लागौ।

पिलातुसा रै सामने यीशु

(मरकुस 15:1; लूका 23:1,2; यूहन्ना18:28-32

¹ ज़ेबी दोउत हुई ता सारै बौड़ै याजक और लोगु रै स्याणै लोगुऐ यीशु झ़ांगणौ च़ाऔ। ² तिउंऐ यीशु बानियौ पिलातुसा काऐ निंऔ ज़ो रोमी सरकारा रौ राज्यपाल (हाकीम) थौ।

यहूदा फाई दी लौटका

(प्रेरितों के काम 1:18,19)

³ ज़ैबै यीशु पाकुड़णै वाल़ै यहूदै देखौ की यीशु आरोपी चाणी गौ आ ता सेऊ भौरी पछ़ताऔ और सै च़ांदी रै तीस सिक्कै बौड़ै याजक और स्याणै लोगु काऐ वापिस आणै। ⁴ और तिणीऐ बोलौ, “मुंईऐ निर्आरोप आदमी पकड़ाइयौ पाप कियौ आ!” तिउंऐ तेसलै बोलौ, “आमुलै का? तू ई ज़ाण।” ⁵ तैबै यहूदै सै सिक्कै मन्दिरा दी शोटियौ डेई गौ, और डेइयौ आपु दी फांसी लाई। ⁶ बौड़ै याजकै सै सिक्कै च़ुंगै और बोलौ, “ऐ, खज़ाना दी छ़ाड़नै ठीक नाईं, कैलैकि ऐ सिक्कै लोऊ री किमत ई।” ⁷ तैबै सै चौपड़ुऐ और तिउंऐ तिऊं सिक्कै कौरी परदेसी दाबणा लै कुम्हारा रौ डोखरौ खरीदी गौ। ⁸ एज़ै कारणै तेस डोखरा लै आज़ा झ़ांऊं लोऊ रौ डोखरौ बोला ई। ⁹ तैबै ज़ो वचन यिर्मयाह गुरु रै ज़रीयै थौ बोलौ औन्दौ सेऊ पुरौ हुऔ: “तिउंऐ सै तीस सिक्कै मतलब सै ठहराई औन्दी किमत (ज़ासलै इस्राएला री संताना मांझ़िऊ कु केती आदमिउए बोलौ थौ) नीं गोऐ।, ¹⁰ और ज़ीणी प्रभुऐ मुलै हुकम दैऔ थौ तिणी ई तिउंऐ कुम्हारा रै डोखरै री किमता दी देई गौ।”

पिलातुसा रै सवाल

(मरकुस 15:2-5; लूका 23:3-5; यूहन्ना 18:33-38)

¹¹ ज़ेबी यीशु तिलातुस हाकिमा काऐ खौड़ौ थौ ता हाकिमै तेसकु पुछ़ौ, “का तू यहूदिया रौ राज़ौ ई? यीशुऐ तेसलै बोलौ, “तू आपु ई बोलदै लागौ औन्दौ।” ¹² ज़ैबै बौड़ौ याजक और स्याणै लोग यीशु माथै आरोप थै लाईंदै लागै औन्दै, ता यीशुऐ कुछ़ ज़वाब नाईं दैऔ। ¹³ एथ माथै पिलातुसै यीशु लै बोलौ, ‘ का तू नाईं सुंच़दौ कि ऐ तैरै बारै दी केती गवाही ई दैंदै लागै औन्दै?” ¹⁴ पर यीशुऐ तेसलै एक भी बुशा रौ ज़वाब नाईं दैऔ, इदरा झ़ाऊंं की हाकिमा कै बौड़ी हैरानी हुई।

मौरनै री सौज़ा री आज्ञा

(मरकुस15:6-15; लूका23:13-25 यूहन्ना18:39, 19:16)

¹⁵ पिलातुस हाकिमा रौ इणौ रिवाज़ थौ कि तेस फसह रै साज़ै दी लोगु कालै कास एक कैदी जास सै लोग च़ाह थै, तेस आज़ाद कौरा थै। ¹⁶ सेज़ै बौग्तै तिंउरी कैदा दी बरअब्बा नावां रौ एक मानौ औन्दौ कैदी थौ। ¹⁷ ज़ैबै सै कौठै हुऐ, ता पिलातुसै तिउंलै बोलौ, “तुमै कास च़ाहा ई कि हाऊं तुमु कालै छ़ाड़ू? बरअब्बा, या यीशु ज़ासलै मसीहा बोला ई?” ¹⁸ कैलैकि पिलातुस ज़ाणा थौ बौड़ै याजक लोग यीशु री मीश कौराई। तैबै यीशु पकड़ाऔ आ। ¹⁹ ज़ैबै पिलातुस फैसलै कौरणै वाल़ी गदी माथै बौशौ औन्दौ थौ ता तेसरी छ़ेउड़ीऐ तेसलै बोलौ, “तू एस धौर्मी रै मामला दी आपणौ हाथ नाईं पा, कैलैकि मुइंऐ आज़ सुइणा दी तेसरै कारण भौरी दु:ख उठाऐ ई” ²⁰ बौड़ै याजकै और स्याणै लोगुऐ आपणै लोग उकसाऐ कि सै बरअब्बा मांगा लै, और यीशु झ़ांगा लै पोरु। ²¹ पिलातुसै तिऊंकु पुछ़ौ, “इऊं दुई मांझ़िआ कु कास च़ाहा ई कि हाऊं तुमु कालै छ़ाड़ू?” तिउंऐ बोलौ, “बरअब्बा।” ²² पिलातुसै तिउंकु पुछ़ौ, “तैबै यीशु, ज़ासलै मसीह बोलाई, एसरौ का कौरु?” सौबीऐ तेसलै बोलौ, “एस क्रुसा माथै च़ड़ाऔ!” ²³ पिलातुसै बोलौ, “कैलै, तिणीऐ का बुराई की आ?” पर सै औज़ौ भी ज़ोरै-ज़ोरै च़िल्लाइयौ बोलदै लागै, “एस क्रुसा माथै च़ड़ाऔ।” ²⁴ ज़ैबै पिलातुसै देखौ कि कुछ़ बौणदै नाईं लागौ औन्दौ पर तिदै भौरी भिड़-भड़ाकौ औन्दै लागौ, ता तिणीऐ पाणी निंयौ और भीड़ा काऐ आपणै हाथ धोऐ और बोलौ, “हाऊं एस धौर्मी रै लोऊ कु निर्आरोप ऊ; तुमै ऐ ज़ाणौ।” ²⁵ सारै लोगुऐ ज़वाब दैऔ, “एसरौ लोऊ आमु माथै और आमारै संताना माथै पौड़ा!” ²⁶ एथ माथै पिलातुसै बरअब्बा तिऊं कालै छ़ाड़ी गौ, और यीशु दी कोढ़ै लाइणा लै और क्रुसा माथै च़ड़ाउणा लै बोली ऐरौ।

सिपाइउ रै ज़ौरिऐ यीशु री बेइज्ज़ती

(मरकुस15:16-20; यूहन्ना19:2,3)

²⁷ तैबै पिलातुसा रै सिपाईउऐ यीशु महला दी निंऔ और सारी पलटन यीशु रै च़ारौ तौरफ कौठै की, ²⁸ और यीशु रै जुड़कै उतारीयौ लाल रौंगा रौ च़ोगौ भिड़ाऔ, ²⁹ और कांडेउ रौ ताज़ बूंणीयौ यीशु रै मूंडा माथै छ़ाड़ौ, और यीशु रै सुल़टै हाथा दी शाऊंटौ दैऔ और यीशु काऐ अगाड़ी घुण्डै टेकियौ तेसरौ मज़ाक उड़ाऊंदै लागै और बोलौ, “ओ यहूदिऊ रै राज़ै, ताउंकै ढाल!” ³⁰ और यीशु माथै थूकौ; और तेस शाऊंटै कौरै यीशु रै मूंडे दी लाईंदै लागै। ³¹ ज़ैबै सै यीशु रौ आच़्छ़ै कौरीऐ मज़ाक उड़ाऔ, ता सेऊ च़ोगौ यीशु कु उतारियौ तेसकै तेसी रै जुड़कै भिड़ायै, और यीशु क्रुसा माथै च़ड़ाउणा लै निंयौ।

यीशु क्रुसा माथी च़ौड़ाऊणौ

(मरकुस15:21-32; लूका23:26-43; यूहन्ना19:17-27)

³² बाइरै डेउंदी बारै तिउंकै शमौन नावां रौ एक कुरैन नावा रै देशा रौ आदमी मिलौ। तिउंऐ सेऊ बाटा दी पाकड़ौ ज़ीतीऐ तेसकु क्रूस च़ुंगाऔ। ³³ सेज़ी ज़ागहा माथै ज़ो गुलगुता मतलब खोपड़ी ज़िणी ज़ागहा बोला ई, तिऐ यीशु आणौ ³⁴ तिउंऐ पित मिलाऔ औन्दौ अंगूरा रौ रस (सिरको) यीशु लै पिणा लै दैऔ, पर यीशुऐ सेऊ च़ाखियौ नाईं पियौ। ³⁵ तैबै तिउंऐ यीशु क्रूसा माथै च़ड़ाऔ, और पर्च़ी टाल़ियौ यीशु रै जुड़कै रोमी सिपाईऊऐ आपू माझ़िऐ बांटै, ³⁶ और तिऐ बोशीयै तेसरौ पैहरौ दैंदै लागै। ³⁷ और क्रूसा माथै एक तख्ती भी लाई ज़ासदी यीशु लै लिखौ औन्दौ थौ कि, “एऊ यहूदिउ रौ राज़ौ यीशु आ”। ³⁸ तैबै यीशु आइलै दुई डाकू भी थै, ज़ो अलग-अलग क्रूसा माथै थै च़ड़ाऐ औन्दै, एक थौ यीशु री सुल्टी भिलै, एक थौ उल्टी भिलै। ³⁹ तिऐ बाटा दी आशणै-डेउणै वाल़ै लोग आपणौ मूंड हिलाई-हिलाइयौ यीशु री बेइज़्ज़ती थै कौरदै लागै औन्दै, ⁴⁰ और इणौ बोला थै, “ओ परमेश्वरा रै घौर ढाल़नै वाल़ै और चिजै दिना दी तेस चाणनै वाल़ौ, आपू ता बच़ाऊ! अगर तू परमेश्वरा रौ छ़ोहरु ई, ता क्रूसा माथै कु उतरियौ आश।” ⁴¹ यहूदी शास्त्री और बौड़ै याजक भी यीशु रौ मज़ाक उड़ाइयौ बोला थै, ⁴² “इणियै ता दुज़ै बौच़ाऐ ई, और आपू नाईं बौच़ी बौल़दौ। एऊ ता ‘इस्राएला रौ राज़ौ’ आ। अगर इयौ आमारै सामनै क्रूसा कु उतरा लौ ता आमै भी एस माथै विश्वास कौरी ई। ⁴³ इणिऐ परमेश्वरा माथै विश्वास कियौ आ; अगर सेऊ ऐस च़ाह ई, ता आबै एस छ़ुड़ावा लौ, कैलैकि इणिऐ बोलौ थौ, “हाऊं परमेश्वरा रौ छ़ोहरु ऊ’।” ⁴⁴ यीशु आइलै ज़ो दुई डाकू थै टांगै औन्दै सै भी यीशु रौ मज़ाक उड़ाउंदै थै लागै औन्दै।

यीशु रै प्राण छ़ाड़नै

(मरकुस15:33-41; लूका23:44-49; यूहन्ना19:17-27)

⁴⁵ दुसकौ बौग्त हुई गौ आ। बारह बाज़ै कु चिआ बाज़ै झ़ाऊं सारै दैशा दी निआरौ पौड़ी गौ। ⁴⁶ दुसकै चिआ बाज़ै दी यीशुऐ ज़ोरै-ज़ोरै बोलौ, “एली, एली, लमा शबक्तनी? ”ज़ासरौ मतलब आ, “ओ मैरौ बाब, ओ मैरौ बाब, तांऐ हाऊं कैलै छ़ाड़ी ऐरो ऊ?” ⁴⁷ ज़ो लोग तिऐ खौड़ै थै, तिऊं माझ़िऐ भौरी लोगुऐ इणौ शुणियौ बोलौ, “सेऊ ता एलिय्याह गुरु लै आ औटाइंदै लागौ औन्दौ।” ⁴⁸ तिऊं सिपाई मांझ़िआ कु एक फेटा मारियौ आशौ, और स्याईचूश सिरके दी भीज़ाइयौ, और एक लाम्बै डिंगे दी बानियौ यीशु कु चुशाऔ। ⁴⁹ तैबै कुणिऐ बोलौ, "रुकौ देखी एरी कि एलियाह गुरू एस बौच़ांउंदै आशा कि नाईं।" ⁵⁰ तैबै यीशुऐ औज़ौ ज़ोरै बोलियौ आपणै प्राण छ़ाड़ी गौऐ। ⁵¹ और देखौ, परमेश्वरा रै घौरा रौ पौरदौ माथा कु तौल़ झ़ाऊं च़ीरुइयौ दुई भिलै हुऔ : और धौतरी हिली गोई और ढोकै टकराउवी गोऐ, ⁵² और ओड़ाची खुली गोई, और सुतै औन्दै पवित्र लोगु रै भौरी मौड़ै ज़ीऊंदै हुऐ, ⁵³ और तेसरै ज़ीऊंदै हुणै बासिऐ सै औड़ाच़ी माझ़िआ कु निकल़ियौ पवित्र इलाकै दि डेवै और भौरी ज़ौणैउ कै दिशै। ⁵⁴ तैबै सरदार और ज़ो तेस आइलै यीशु रौ पैहरौ दैंदै थै लागै औन्दै, तिउंऐ भूंच़ाल़ और ज़ो कुछ़ हुऔ थौ इणौ देखीयौ भौरी डौरी गौऐ और तिउंऐ बोलौ, “सौच़्च़ी इयौ आदमी परमेश्वरा रौ छ़ोहरु थौ!” ⁵⁵ तिऐ भौरी छ़ेउड़ी ज़ो गलीला कु यीशु री सेवा कौरदै बारै तेस आइलै आशी थी, सै दूरा कु थी लागी औन्दी देखदै। ⁵⁶ तिऊं मांझ़िऐ मरियम मगदलीनी, याकूब और योसेसा री मां मरियम, और जब्दी रै छ़ोहरु री मां थी।

यीशु ओडाच़ी दी छ़ाड़नौ

(मरकुस15:42-47; लूका23:50-56; यूहन्ना19:38-4)

⁵⁷ ज़ैबै ब्याल़ हुई ता यूसुफ नावा रौ ज़ो अरिमतिया रौ एक सेठ आदमी, जो आपू ई यीशु रौ च़ैलै थौ, सेऊ आशौ। ⁵⁸ तिणीऐ पिलातुसा कु यीशु रौ मौड़ौ मांगौ। एथ माथै पिलातुसै यीशु रौ मौड़ौ निणै दैऔ। ⁵⁹ यूसुफै मौड़ौ निंयौ, यीशु रौ मौड़ौ मखमला री च़ादरी दी मेटौ, ⁶⁰ और सेऊ मौड़ौ आपणी नौंई ओड़ाच़ी दी छ़ाड़ौ, ज़ो तिणीऐ ढोके दी थी काटियौ चाणी औन्दी, और ओड़ाच़ी दी एक बौड़ै पात्थरा कौरीऐ बन्द कौरिऐ डेई गौ। ⁶¹ मरियम मगदलीनी और दुज़ी मरियम, दुइया तिऐ ओड़ाच़ी काऐ बोशी औन्दी थी।

ओडाच़ी दी पैहरौ

⁶² दुज़ै दिनै ज़ो त्यारी रै दिना बासिऐ रौ दिन थौ, बौड़ै याजक और फरीसिउऐ पिलातुसा काऐ कौठै हुइयौ बोलौ, ⁶³ “ओ महाराज़, आमुकै याद आ तिणी भरमाणै वाल़ै ज़ेबी सौ ज़ीऊंदौ थौ, तिणीऐ बोलौ थौ, ‘हाऊं चीजै दिना बासिऐ ज़ीऊंदौ हुआऊ।’ ⁶⁴ तैबै हुकम दैऔ कि चीज़ै दिना झ़ाऊंं ओड़ाच़ी री च़ोकसी हुआ, इणौ ना च़ाईं हुऔ कि तेसरै च़ेलै आशीयौ तेस च़ोरीये निया लै पोरु, और लोगु लै बोलदै लागालै, ‘सेऊ मौरै औन्दै माझ़िऊ कु ज़ीऊंदौ हुई एरौ आ।’ तैबै पिछ़लौ धोखौ पैहलै कु भी बुरौ हुआ सा।” ⁶⁵ पिलातुसै तिउंलै बोलौ, “तुमकै पैहरुदार ता आसा ई, डैऔ, आपणी सौमझ़ी कौरै च़ोकसी कौरौ।” ⁶⁶ तैबै सै पैहरुदार आपू आइलै निंयै, और पात्थरा माथै मोहर लाइऔ ओड़ाच़ी री च़ोकसी की।

यीशु रौ दूजी बारै जिंऊँदौ हुणौ

(मरकुस16:1-10; लूका24:1-12; यूहन्ना20:1-10)

¹ आरामा रै दिना बासिऐ हौपतै रै पैहलै दिनै दोउती कांडै प्याशिदैं ई मरियम मगदलीनी और दुज़ी मरियम ओड़ाच़ी देखदै आशी। ² और देखौ, एक भौड़ौ भूंइच़ल़ आशौ, कैलैकि प्रभु रौ एक दूत सौरगा कु उतरौ और तिऐ आशीयौ सेऊ पात्थर तिदरा कु पोरु घिसराऔ, और तेथ माथै बौशी गौ। ³ तेस दूतै रौ रुप बिज़ल़ी ज़िणौ और तेसरै जुड़कै च़ौमकिलै थै। ⁴ तेसरै डौरा कु पैहरुदार कांम्बदै लागै, और मौरै औन्दै ज़िणै हुई गौऐ। ⁵ सौरगा रै दूतै तिऊं छ़ोऊंड़ी लै बोलौ, “नाईं डौरौ, हाऊं ज़ाणाऊ कि तुमै यीशु लोड़ादै ई लागै औन्दै ज़ो क्रूसा माथै थौ च़ड़ाऔ औन्दौ। ⁶ सेऊ इदै नाईं आ, पर तेसरै वचना रै अनुसार ज़ीऊंदौ हुई ऐरौ आ। आशौ, इयां ज़ागहा देखौ, ज़ीयै प्रभु थौ छ़ाड़ौ औन्दौ, ⁷ और तुमै फेटी डैऔ यीशु रै च़ैलैउलै बोलौ कि यीशु मौरै औन्दै मांझ़िआ कु ज़ीऊंदौ हुई ऐरौ आ, और सेऊ तुमुकु पैहलै गलीला दी डेइ ऐरौ सा, तिऐ तुमै तेस देखा ई! शुणौ, मुंईऐ तुमुलै बोली ऐरौ आ।” ⁸ सै घबराइयौ और बौड़ी खुशी आइलै तिदरा कु फेटी डेइयौ तेसरै च़ैलेऊ लै एज़ी बुशै बोलणा लै दौड़ी गोई। ⁹ तैबै यीशु तिउंकै मिलौ। और बोलौ, “ढाल”। तिउंऐ यीशु काऐ आशीयौ और तेसरै लात पाकड़ीयौ ढाल की। ¹⁰ तैबै यीशुऐ तिउंलै बोलौ, “नाईं डौरौ; मैरै भाईऊ कै डेइयौ बोलौ कि गलीला लै डैऔ, तिऐ मुं देखालै”

पैहरै देणै वाल़ै खौबर

¹¹ सै डेउंदै ही थै लागै औन्दै कि पैहरुदारै माझ़िऊ कु कुछ़ै इलाकै दी आशीयौ पूरौ हाल बौड़ै याजकै कै शुणाऔ। ¹² तैबै तिउंऐ स्याणै गुरु आइलै कौठै हुइयौ चौपड़ुऐ और सिपाईऊ लै भौरी च़ांदी देइयौ बोलौ, ¹³ “इणौ बोलणौ कि राच़ी ज़ैबै आमै सुतै औन्दै थै, ता तेसरै च़ैलैऊऐ सेऊ च़ोरिऐ निंयौ। ¹⁴ और अगर ऐज़ी बुशै पिलातुस हाकिमा रै काना झ़ाऊंं पौउंच़ाली, ता आमै तेस सौमझ़ाई और आमै तुमु मुश्किला कु बौच़ाई।” ¹⁵ तैबै तिउंऐ रुपाऐ देइयौ ज़िणौ तिउंकै शीखाऔ औन्दौ थौ, तिणी ई कियौ। एज़ी बुशै आज़ा झ़ाऊंं यहूदिऊ दी मशूर आ।

यीशु दिशणौ और यीशु मसीहा री आखरी आज्ञा

(मरकुस16:14-18; लूका24:36-49; यूहन्ना20:19-23; प्रेरितों के काम1:6-8)

¹⁶ ग्यारह च़ैलै गलीला री तियां टिरा माथै डेवै, ज़ो यीशुऐ तिउंकै बोलौ थौ। ¹⁷ तिउंऐ यीशु देखीयौ तेसलै ढाल की, पर कोइयै तेस माथै विश्वास नाईं कियौ ¹⁸ यीशुऐ तिऊं काऐ आशीयौ बोलौ, “सौरग और धौतरी रौ सारौ हक मुंकै आ दैऔ औन्दौ। ¹⁹ एथीलै तुमै डैऔ, सारी ज़ाति रै लोगु च़ेलै चाणौ; और तिउंलै बाब, और छ़ोहरु, और पवित्र आत्मा रै नावां कौरी बप्तिस्मौ दैऔ, ²⁰ और तिउंकै सारी बुशै ज़ो मुंईंऐ तुमुलै हुकम दैऔ आ, मानणौ शिखाऔ : और शुणौ, हाऊं दुनिया रै आखरी झ़ाऊं तुमु आइलै सौदा रौआऊ।