यूहन्ना

John

यूहन्ना

वचन शरीर बौणौ

¹ सौबी कु पैहलै वचन थौ, और वचन परमेश्वरा आइलै थौ, और वचन परमेश्वर थौ। ² एउ ऊ पैहलै परमेश्वरा आइलै थौ। ³ सारौ कुछ़ तेसी कु पैदौ हुऔ, ज़ो कुछ़ हुऔ आ तिऊं मांझ़ीआ कु केज़ी भी च़िज़ै तेसरै बगैर नाईं हुई। ⁴ तेसदी प्राण थै और सै प्राण आदमीउ रौ प्याशौ थौ। ⁵ प्याशौ न्यारै दी च़ौमका आ, और न्यारै सेऊ नाईं अपणाऔ। ⁶ एक आदमी परमेश्वरा री तौरफा कु आशौ ज़ासरौ नाऊं यहुन्ना थौ। ⁷ सेऊ एथीलै आशौ कि प्याशै री गवाही दिआ, ताकी सारै तेसकु विश्वास कौरा। ⁸ आपु ता सेउ प्याशौ नाईं थौ, पर सेउ सेज़ै प्याशै री गवाही दैन्दै आशौ थौ। ⁹ सौच़ौ प्याशौ ज़ुण हर एक आदमी प्याशलौ कौरा सा, धौतरी माथै आशणै वाल़ौ थौ ¹⁰ सेउ दुनीयां दी थौ, पुरी दुनीयां तेसी कु हुई, और संसारै सेउ नाईं पराणौ। ¹¹ सेउ आपणै घौरै आशौ और तेसरै घौरा वाल़ेऊऐ सेउ नाईं अपणाऔ। ¹² पर ज़ुणीऐ सेउ अपणाऔ, तिणीऐ तिउंकै परमेश्वरा री सन्तान हुणै रौ हक दैऔ, तिउंकै भी ज़ुण तेसरै नावां माथै विश्वास छ़ाड़ा ई। ¹³ सै ना ता खुना कु, ना शरीरा री मर्ज़ी कु, ना आदमी री मर्ज़ी कु, पर परमेश्वरा कु पैदै हुए ई। ¹⁴ और वचन देहधारी हुऔ; और दया और सौच़ाई कु भरपूर हुईऔ आमु मांझ़ीऐ वास कियौ, और आमुऐ तेसरी इणी बौड़ाई देखी, ज़िणी बाबा रै एकलौते री बौड़ाई। ¹⁵ यहुन्नै तेसरै बारै दी गवाही देई, और हाका देईऔ बोलौ, “एउ सेज़ौ आ, ज़ासरै बारै दी मुइंऐ बोलौ की ज़ुण मुं बासिऐ आशा आ, सेउ मुंकू भी बौड़ौ आ, कैलैकि सेउ मुंकु पैहलै थौ। ¹⁶ कैलैकि तेसरी भरपुरी कु आमुं सौभी लै दया माथै बौड़ी दया मिली। ¹⁷ एथीलै कि कानून ता मुसा रै देई ऐन्दी, पर बौड़ी दया और सौच़्च़ाई ता यीशु मसीह कु पौऊंच़ी। ¹⁸ परमेश्वर कोईऐ केभी नाईं देखौ, एकलौतौ छ़ोहरु ज़ुण बाबा री उंगाल़ी दी आ, तिणिऐ सेउ पौगड़ौ कियौ।

यूहन्ना बपतिस्मा देणै वाल़ै री गवाही

(मती3:1-12; मरकुस1:1-8; लूका3:1-18)

¹⁹ यहुन्ना री गवाही एज़ी आ, कि ज़ेबी यहुदिऊऐ यरुशलेमा कु याज़क और लेवी तेसकु इणौ पुछ़णा ल़ै भेज़ै, “कि तु कुण ई?” ²⁰ तैबै तिणियै इणौ मानी गौ, और मुकरौ नाईं पर मानी गौ कि “हाऊं मसीह नाईं ऊ।” ²¹ तैबै तिउंऐ तेस कु पुछ़ौ, “तैबै तू कुण ई? का तू एलिय्याह ई?” तिणीऐ बोलौ, “हाऊं नाईं ऊ।” “तैबै का तू सेज़ौ भविष्यवकता ई?” तिणीऐ ज़वाब दैऔ, “नाईं।” ²² तैबै तिउंऐ तेसकु पुछ़ौ, “तैबै तु कुण ई? ताकी आमैं आपणै भेज़णै वाल़ेऊ कै ज़वाब देऊ। तु आपणै बारै दी का बोलाई?” ²³ तिणियै बोलौ, “ज़िणौ यशायाह भविष्यवक्तै बोलौ: ‘हाऊं ज़ांगल़ा दी एक औटाईंणै वाल़ै री बाच़ ऊ कि तुमै प्रभु री बाट सीधी कौरौ’।” ²⁴ सै फरीसीऊ री तरफा कु थै भेज़ै औन्दै। ²⁵ तिउंऐ तेसकु एज़ौ सवाल पुछ़ौ, “अगर तू मसीह नाईं ई, और ना एलिय्याह आसतौ, ना सेज़ौ भविष्यवक्ता, तैबै बपतिस्मा कैलै दिआई?” ²⁶ यहुन्नै तिउंलै ज़वाब दैऔ, “हाऊं ता पाणी कौरी बपतिस्मा दिआऊ पर तुमुमांझ़ीऐ एक आदमी खौड़ौ आ ज़ास तुमै नाईं ज़ाणदै। ²⁷ ज़ुण मुं बासीऐ आशणे वाल़ौ आ, ज़ासरै बुटा रै हाऊं तसमै खोलनै रै लाईक भी नाई।” ²⁸ ऐज़ी बुशै यरदना कु पार बैतनिय्याह दी हुई, ज़ीऐ यहुन्ना बप्तिस्मा दिया थौ।

परमेश्वरा रौ गाबड़ु

²⁹ दुज़ै दिनै तिणियै यीशु आपु बिलै आशदै देखियौ बोलौ, “देखौ, एऊ परमेश्वरा रौ च़ेल़टु आ ज़ुण दुनिया रै पाप उठाईयौ निया सा। ³⁰ एऊ se सैसेऊ आ, ज़ासरै बारै दी मुंईऐ बोलौ थौ, ‘कि एक मौरद मुं पिछ़ु आशा आ ज़ुण मुकु भी बोड़ौ सा, कैलैकि सेऊ मुकु भी पैहलै थौ।’ ³¹ हाऊं ता तेस पराणा भी नाईं थौ, पर एथीलै हाऊं पाणी कौरी बपतिस्मा दैंदै लागौ औन्दौ कि सेऊ इस्राएला माथै पौगड़ौ हुआ।” ³² और यहुन्नै एज़ी गवाही देई: “कि मुंइऐ आत्मा कबुतरा ज़ीणी सौरगा कु उतुरदै देखी आ, और सै तेस माथै रुकी गोई। ³³ हाऊं ता तेस नाईं पराणा थौ, पर ज़ुणीऐ हाऊं पाणी कौरी बपतिस्मा दैंदै भेज़ौ ऊ, तिणीऐ मुलै बोलौ, ‘ज़ास माथै तू आत्मा ऊतुरदै और रुकदै देखा लौ, सेऊ पवित्र आत्मा कौरी वपतिस्मा दैणै वाल़ौ आ।’ ³⁴ और मुंइऐ देखौ, और गवाही देई कि एऊ परमेश्वरा रौ छ़ौहरु आ।”

यीशु रै पैहलै च़ेलै

³⁵ दुज़ै दिनै तौंऐ यहुन्ना और तेसरै च़ेलेऊ मांझ़ीया कु दुई ज़ौणै खौड़ै थै हुऐ औन्दै, ³⁶ और तिणीऐ यीशु ज़ुण डेऊंदै थौ लागौ औन्दौ, देखीऔ बोलौ, “देखौ, एऊ परमेश्वरा रौ च़ेल़टु आ।” ³⁷ तैबै सै दुई च़ेलै तेसरी ईणी बुशै शुणीयौ यीशु पिछु च़ाल पौड़ै। ³⁸ यीशुऐ सै मुड़िऔ पीछ़ाड़िऐ आशदै देखै और तिउंलै बोलौ, “तुमै कास लोड़दै ई लागै औन्दै?” तिउंऐ तेसलै बोलौ, “ओ गुरु, तु कियै रौआई?” ³⁹ यीशुऐ तिउंलै बोलौ, “च़ालौ, पोरु देखौ।” तैबै तिउंऐ डेइयौ तेसरी रौइणै री ज़ागाह देखी, और सेज़ै दिने तेसीई आइलै रौऐ। कैलैकि ब्याल़कै लगभग च़ार बाज़ी गौऐ थै। ⁴⁰ तिऊं दुई माझ़ीया कु, ज़ुण यहुन्ना री बुशै शुणीयौ यीशु पीछ़ु आशै थै, एक शमौन पतरसा रौ भाई अन्द्रियास थौ। ⁴¹ तिणऐ पैहलै आपणै सगै भाई शमौना कु मिलीयौ तेसलै बोलौ, “आमुकै ख्रिस्ट, या मसीह, मिली गौ आ।” ⁴² तिणियै सेऊ यीशु काऐ नियौं। यीशुऐ तेस देखीऔ बोलौ, “तू यहुन्ना रौ छ़ोहरू ई: ताउंलै कैफा या पतरस बोला ई।

फिलिप्पुस और नतनएला रौ औटाउणौ

⁴³ दुज़ै दिनै यीशुऐ गलीला लै डेऊणौ च़ाऔ। सेऊ फिलिप्पुसा कु मिलौ और बोलौ, “मुं पीछु च़ाल।” ⁴⁴ फिलिप्पुस, आन्द्रियास और पतरसा रै इलाकै बैतसैदा रौ रौइणै वाल़ौ थौ। ⁴⁵ फिलिप्पुस नतनएला कु मिलौ और तेसलै बोलौ, “ज़ासरै बारै दी मुसा गुरुऐ पवित्र शास्त्रा दी और भविष्यवक्तुऐ बोलौ आ, सेऊ आमुकै मिली गौ आ; सेऊ युसुफा रौ छ़ोहरु, यीशु नासरी आ।” ⁴⁶ नतनएलै तेसलै बोलौ, “का कोई आछ़ी च़ीज़ भी नासरता कु निकल़ा आ?” फिलिप्पुसै तेसलै बोलौ, “च़ालियौ देख।” ⁴⁷ यीशुऐ नतनएल आपु भीलै आशदै देखिऔ, तेसरै बारै दी बोलौ, “देखौ, एऊ पाकौ इस्राइली आ: एसदी कोई कपट नाई।” ⁴⁸ नतनएलै तेसलै बोलौ, “तू मुं किणै कौरीऐ ज़ाणाई?” यीशुऐ तेसलै ज़वाब दैऔ, “एथकु पैहलै कि फिलिप्पुसे तु औटाऔ, ज़ेबी तु अंज़ीरा (फेड़ु)रै पेड़ा थालै थौ, तेभी मुंइऐ तु देखौ ई।” ⁴⁹ नतनएलै तेसलै ज़वाब दैऔ, “ओ गुरु, तू परमेश्वरा रौ छ़ौहरु ई; तू इस्राइला रौ महाराज़ौ ई।” ⁵⁰ यीशुऐ तेसलै ज़वाब दैऔ, “मुंइऐ ज़ो कुछ़ ताऊंले बोलौ कि मुइंऐ तू अंज़ीरा (फेड़ु) रै पेड़ा थालिऐ देखोई, का तु तैबै कौराई विश्वास? तु एथकु भी बौड़ै--बौड़ै काम देखाई।” ⁵¹ यीशुऐ तौंऐ बोलौ, “हाऊं तुमुलै सौच़्च़ौ—सौच़्च़ौ बोलाऊ कि तुमै सौरग खुलौ औन्दौ, और परमेश्वरा रै दूतु आदमी रै छ़ौहरु माथै ऊतुरदै और ऊपरै डेऊंदै देखाई।”

गलीला रै काना दी पैहलौ हैरानी वाल़ौ काम

¹ तैबै चिजै दिनै गलीला रै काना दी कासरी शादी थी और यीशु री आमा भी तीयै थी। ² यीशु और तेसरै च़ेलै भी तीऐं शादी दी थै औटाऐ औन्दै। ³ ज़ेबी दाखरस कम हुऔ, तैबै यीशु री आमैं तेसलै बोलौ, “तिउंकै दाखरस नाईं रौ।” ⁴ यीशुऐ तींआंलै बोलौ, “ओ छ़ेउड़ी ज़ात, मुकै ताऊंकु का काम? इबी मैरौ बौग्त नाईं आशौ।” ⁵ तेसरी आमैं नुकरु लै बोलौ, “ज़ो कुछ़ सेऊ तुमुलै बोलालौ तिणी कौरेऊ।” ⁶ तीयै यहूदिऊ रै शुध कौरणै रै रीवाज़ा रै अनुसार माटै (पात्थरा)रै छ़ौ घौड़ै थै छ़ाड़ै औन्दै, ज़ेथदी दुई चीन मण आशा थौ। ⁷ यीशुऐ तिउंलै बोलौ, “घौड़ै दी पाणी भौरौ।” तिउंऐ सै घौड़ै टिब-टिबै भौरी गौऐ। ⁸ तैबै यीशुऐ तिउंलै बोलौ, “आबै गाड़ीयौ रोटी च़ाणनै वाल़ै परधाना काऐ निऔं।” और तिउंऐ तिणौ कियौ, ⁹ ज़ेबी रोटी च़ाणनै वाल़ै परधानै सेऊ पाणी च़ाखौ, ज़ो दाखरस बौणी गौ थौ, और तेसकै पौतौ नाईं थौ, कि सेऊ किदरु आशौ आ, (पर ज़ेज़ै नुकरै पाणी गाड़ौ थौ, सेऊ ज़ाणा थौ) तैबै रोटी चाणनै वाल़ै परधानै लाड़ौ औटाईयौ तेस लै बोलौ, ¹⁰ “हर आदमी पैहलै आछ़ौ दाखरस दिया आ और ज़ैबै लोग पिईयौ झूमदै लागाई, तैबै दौख हौल़्कौ दिआई; पर तांईऐ आ आछ़ौ दाखरस ईबी झ़ाऊं छ़ाड़ौ औन्दौ।” ¹¹ यीशुऐ गलीला रै काना दी आपणौ एज़ौ पैहलौ चमत्कार देखाईयौ आपणी बौड़ाई पौगड़ी कौरी ई और तेसरै च़ेलेउऐ तेस माथै विश्वास कियौ। ¹² तेथ बासीऐ यीशु और तेसरी आमा, तेसरौ भाई और तेसरै च़ेलै कफरनहूमा लै डेवै और तीऐ कुछ़ दिना झ़ाऊं रौऐ।

परमेश्वरा रै घौरा कु सामाना बेच़णै वाल़ै गाड़नै

(मती21:12, 13; मरकुस11:15-17; लूका19:45, 46)

¹³ यहुदीऊरै फसह रै साज़ै रौ दीन नज़दीक आशणै वाल़ौ थौ और यीशु यरुशलेमा लै डैऔ। ¹⁴ और तिणीऐ परमेश्वरा रै घौरा दी बौल़द और भेरी और कबूतर बेच़णै वाल़ै और खरीददार बोशै औन्दै देखै। ¹⁵ तैबै तिणीऐ लोउल़ी रौ (कोड़ौ) च़ाणीयौ सारै भेरी और बौल़द परमेश्वरा रै घौरा कु गाड़ी गौऐ, और खरीददारा रै पैसै फोकी गौऐ, और ठेलै उल़टाई गौऐ। ¹⁶ और कबूतर बेच़णै वाल़ेऊ लै बोलौ,“इऊं इदरा कु निऔं। मैरे बाबा रौ घौर व्यपारा रौ घौर नाई चाणौ।” ¹⁷ तेसरै च़ेलैऊ कै आद आशौ कि लिखौ औन्दौ आ, “तैरै गौरा री धुन मुं खा सा।” ¹⁸ ऐथ माथै यहूदिउऐ तेसलै बोलौ, “तू ज़ो एस कौराई ता आ आमुकै कैज़ौ निशाण देखाल़ाई?” ¹⁹ यीशुऐ तिउंलै ज़वाब दैऔ, “एस परमेश्वरा रौ घौर पौरु ढाल़ौ, और हाऊं एस चिन दिना दी खौड़ौ कौराऊ।” ²⁰ यहूदिउऐ बोलौ, “ऐस परमेश्वरा रै घौरा च़ाणना लै दुई बीऐ छ़ौ साल लागै ई, और का तु एस च़िया दिना दी खौड़ौ कौराई?” ²¹ पर तिणीऐ आपणै शरीरा रै बारै दी बोलौ थौ ज़ो परमेश्वरा रौ घौर आ। ²² ज़ेबी सेऊ मौरै औन्दै मांझिया कु ज़ीऊंदौ हुऔ तेसरै च़ेलेउ कै आद आशौ कि तिणीऐ एऊ बोलौ थौ; और तिउंऐ पवित्र शास्त्र और सेज़ौ वचन ज़ो यीशुऐ बोलौ थौ, मानी गौऐ।

यीशु आदमिउ रै मन ज़ाणा सा

²³ ज़ेबी सेऊ यरुशलेमा दी फसह रै बौग्तै साज़ै दी थौ, तेबी भौरी आदमिउऐ सै चिन्ह ज़ो सेऊ देखाल़ा थौ देखीयौ तेसरै नावां माथै विश्वास कियौ। ²⁴ पर यीशु आपु तिंउरै भरोसै माथै नाईं रौ, कैलैकि सेऊ सब कुछ़ ज़ाणा थौ; ²⁵ तेसकै ज़रुरत नाईं थी कि आदमी रै बारै दी कोई गवाही दिआ, कैलैकि आपु ज़ाणा थौ कि आदमी रै मौना दी का सा?

यीशु और नीकुदेमुस

¹ फरीसिया दी नीकुदेमुस नावां रौ एक आदमी थौ, ज़ुण यहूदिऊ रौ सरदार थौ। ² तिणीऐ राची यीशु काऐ आशीऔ तेसलै बोलौ, “ओ गुरू, आमै ज़ाणी कि तु परमेश्वरा री तौरफा कु आशौ औन्दौ गुरु ई, कैलैकि कोई ईऊं चिन्ह ज़ेज़ै तु देखाल़ा ई, अगर परमेरश्वर तेस आइलै नाईं औआ थौ, ता नाईं देखाल़ी बौल़दौ।” ³ यीशुऐ तेसलै ज़वाब दैऔ, “हाऊं तुमुलै सौच़ौ-2 बोलाऊ, अगर कुण दुजी बारै पैदौ नाईं हुआ लौ ता परमेश्वरा रौ राज़ नाईं देखी बौल़दौ।” ⁴ नीकुदेमुसै तेसलै बोलौ, “आदमी ज़ेबी बुढ़ौ औई जा आ, तैबै सेऊ किणै कौरिऐ जन्म नी सौका? का सेऊ आपणी आमा रै गौर्भा दी दुजी बारै डेईयौ जन्म नीं बौल़ा आ?” ⁵ यीशुऐ ज़वाब दैऔ, “हाऊं तुमुलै सौच्चौ-सौच्चौ बोलाऊ, ज़ेबी झ़ाऊं केज़ौ भी आदमी पाणी और आत्मा कु पैदौ नाईं हुआ लौ सेऊ परमेश्वरा रै राज्य़ दी नाईं डेई बौल़दौ। ⁶ कैलैकि ज़ुण शरीरा कु आ ज़न्मौ औन्दौ; सेऊ शरीर आ, और ज़ुण आ आत्मा कु ज़न्मौ औन्दौ; सेऊ आ आत्मा। ⁷ हैरान ना हुऐ कि मुइंऐ ताउंलै बोलौ आ, ‘ताइंऐ दुजी बारै ज़न्म निणौ ज़ुरूरी आ।’ ⁸ बागुर ज़ेज़ी भिलै बौइणौ च़ाह सा, सेज़ी भिलै बौआ सा और तु बागुरा री हाक शुणाई, पर नाईं ज़ाणदौ कि सै किदरौ बौआ और केशी डिया? ज़ुण भी आत्मा कु ज़न्मौ औन्दौ आ, सेऊ ईणी ई आ”। ⁹ नीकुदेमुसै तेसलै ज़वाब दैऔ, “ऐज़ी बुशै किणै कौरिऐ हुआ ई?” ¹⁰ इणै शुणीऔ यीशुऐ तेसलै बोलौ, “तु इस्राइलिऊ रौ गुरू हुईऔ भी ईऊं बुशै नाईं सौमुझ़दौ? ¹¹ हाऊं ताउंलै सौच्च़ौ-सौच्च़ौ बोलाऊ कि आमै ज़ो कुछ़ ज़ाणी ई, तेसी बोली ई, और ज़ो आमुऐ देखौ औन्दौ आ, तेसी री गवाही देई ई, और तुमै आमारी गवाही नाईं मानदै। ¹² ज़ेबी मुइंऐ तुमु लै धौतरी री बुशै बोली, और तुमैं विश्वास नाईं कौरदै, अगर हाऊं तुमकै सौरगा री बुशै बोलु लै, ता तैबै तुमै किणै कौरीऐ कौराई विश्वास? ¹³ और कोई सौरगा दी नाईं च़ौड़ौ, सिरफ सेऊ ज़ुण सौरगा कु उतरौ, मतलब आदमी रौ छ़ोहरू ज़ुण सौरगा दी आ। ¹⁴ और ज़ेज़ी रीति कौरी मुसै ज़ांगला दी साप ऊंचै माथै चौड़ाऔ, सेज़ी रीति कौरी ज़ुरुरी आ की आदमी रौ छ़ोहरू भी ऊंच़ै माथे चौड़ाऊणौ च़ाईं। ¹⁵ ताकी ज़ुण तेस माथै विश्वास कौरा लौ सेउ सौदा री ज़िन्दगी पा। ¹⁶ कैलैकि परमेश्वरै दुनियां आइलै इणौ प्यार छ़ाड़ौ कि तिणीऐ आपणौ एकलौतौ छ़ोहरू दैऔ, ताकि ज़ुण-कुण भी तेस माथै विश्वास कौरा लौ सेऊ नाश नाईं औआ, पर सदा री ज़िन्दगी पा। ¹⁷ परमेश्वरै आपणौ छ़ोहरू दुनियां दी ऐज़ी ताइंऐ नाईं भेज़ौ, कि दुनियां माथै सज़ा रौ हुक्म दिआ, पर एज़ी ताइंऐ कि दुनियां तेसरै ज़ौरीऐ छ़ुटकारौ पा। ¹⁸ ज़ुण तेस माथै विश्वास कौरा आ, तेस माथै सौज़ा रौ हुक्म नाईं औन्दौ, पर ज़ुण विश्वास नाई कौरदौ, सेऊ आरोपी बौणी ज़ा; एथीलै की तिणीऐ परमेश्वरा रै एकलौतै छ़ोहरु रै नावां माथै विश्वास नाईं कियौ। ¹⁹ और सौज़ा री आज्ञा रौ कारण एऊ आ की प्याशौ दुनियां दी आशौ आ, और आदमीऊऐ न्यारौ प्याशै कु प्यारौ ज़ाणौ कैलैकि तिंउरै काम बुरै थै। ²⁰ कैलैकि ज़ुण बुराई कौरा सा, सेऊ प्याशै कु नफरत छ़ाड़ा सा, और प्याशै रै नज़दीक नाईं आशदौ, इणौ ना च़ाईं हुऔ कि तेसरै कामा माथै आरोप लागा। ²¹ पर ज़ुण सौच़ाई माथै आण्डा सा, सेऊ प्याशै रै नज़दीक आशा आ ताकी तेसरै काम पौगड़ै औआ, कि सै परमेश्वरा री तौरफा कु ई किऐ औन्दै।”

यीशु रै बारै दी यूहन्ना री गवाही

²² तेथ बासीऐ यीशु और तेसरै च़ेलै यहूदिया देशा दी आशै; और सेऊ तिऊं आइलै रौईयौ बपतिस्मा दैन्दै लागौ। ²³ यूहन्ना भी शालेमा रै नज़दीक ऐनोना दी बपतिस्मौ दिआ थौ, कैलैकि तिऐ भौरी पाणी थौ, और लोग आशीऔ बपतिस्मौ नीयां थै– ²⁴ यूहन्ना तेबी झ़ाऊं ज़ेला दी नाईं पाऔ थौ ²⁵ तिऐ यूहन्ना रै च़ेलेऊ रौ कास यहूदी आइलै शुद्धी रै बारै दी बुशै-दाशै हुई। ²⁶ और तिउंऐ यूहन्ना काऐ आशीऔ तेसलै बोलौ, “ओ गुरु, ज़ेज़ौ आदमी यरदना नौईं पार भिला रौ ताऊं आइलै थौ, और ज़ासरी ताइंऐ गवाही देई आ; देख, सेऊ बपतिस्मा दिआ सा, और सारै तेस काऐ आशा ई।” ²⁷ यूहन्नै ज़वाब दैऔ, ज़ेबी झ़ाऊं आदमी लै सौरगा कु नाईं दिआ लै, तेबी झ़ाऊं सेऊ कुछ़ नाईं पाई बौल़दौ। ²⁸ तुमै ता आपु मेरे गवाह ई, कि मुइंऐ बोलौ, ‘हाऊं मसीह नाईं, पर तेसकु औगाड़िऐ ऊ भेज़ौ औन्दौ।’ ²⁹ ज़ासरी लाड़ी आ, सेऊ ई लाड़ौ आ; पर लाड़ै रौ गोष्टण ज़ुण खौड़ौ तेसरी शुणा, लाड़ै री बुशैऊ शुणीयौ भौरी खुश हुआ; ऐबै मेरी बौड़ी खुशी पुरी हुई आ। ³⁰ ज़ुरूरी आ कि सेऊ बौड़ा, और हाऊं घौटू। ³¹ “ज़ो माथा कु आशा सा, सेऊ सारेऊ कु आछ़ौ आ; ज़ो आशा सा धौतरी कु सेऊ आ धौतरी रौ; और धौतरी री ई बुशै बोला सा: ज़ो सौरगा कु आशा आ सेऊ सारेऊ कु माथै आ। ³² ज़ो कुछ़ तिणीऐ देखौ, और शुणौ आ, तेथी री गवाही दिआ आ; और कोई तेसरी गवाही नाईं मानदौ। ³³ ज़ुणिऐ तेसरी गवाही मानी गोई तिणीऐ ऐज़ी बुशु माथै मोहर लाई गोई कि परमेश्वर सौच्च़ौ आ। ³⁴ कैलैकि ज़ो परमेश्वरै आ भेज़ौ औन्दौ, सेऊ परमेश्वरा री बुशै बोला सा; केलैकि सेऊ आत्मा नापी–नापीऔ नाईं देन्दौ। ³⁵ बाब छ़ोहरु कु प्यार छ़ाड़ा आ, और तिणीऐ सारी च़ीज़ै तेसरै हाथा दी देई गोई आ। ³⁶ ज़ो छ़ोहरू माथै विश्वास कौरा सा, सौदा री ज़िन्दगी तेसरी आ; पर जुण छ़ोहरू री नाईं मानदौ, सेऊ ज़िन्दगी नाईं देखी बौल़दौ, पर परमेश्वरा रै रोष तेस माथै रौआ ई।”

यीशु और सामरी ज़ाती री छ़ेवड़ी

¹ तैबै ज़ेबी प्रभु कै पौतौ लागौ कि फरीसिऊ ऐ शुणी गौ कि यीशु यूहन्ना कु ज़ादै च़ेलै च़ाणा और बपतिस्मा दिआ आ। ² पर यीशु आपु नाईं तेसरै च़ेलै बपतिस्मौ दिआ थै। ³ तैबै सेऊ यहूदिया छ़ाड़ीऔ दुजी बारै गलीला लै डैऔ, ⁴ और तिऊं सामरिया बाटिऐ डेऊणौ ज़ुरूरी थौ। ⁵ एथीलै सेऊ सूखार नावां रै सामरिया इलाकै झ़ाऊं आशौ, ज़ो सेज़ी ज़बीना काऐ आ ज़ो याकूबै आपणै छ़ोहरू युसुफा कालै देई थी; ⁶ याकूबा रौ कुऔं भी तीऐ थौ। और यीशु बाटाई आंडियौ खौड़ौ औन्दौ तेस कुंऐ काऐ ईणी बोशी गौ। ऐज़ी बुश दिना रै छ़ौउऐ घाण्टै रै करीब हुई। ⁷ तेतीऐ एक सामरी छ़ेउड़ी पाणी भौरदै आशी। यीशुऐ तियांलै बोलौ, “मुलै पाणी पिलाऊ।” ⁸ कैलैकि तेसरै च़ेलै इलाकै दी खाणै-पिणै री च़ीज़ै खरीददै थै डैऔ औन्दै। ⁹ तिंऐ सामरी छ़ेउड़ी ऐ यीशु लै बोलौ, “तू यहूदी हुईयौ मुं सामरी छ़ेउड़ी कु पाणी कैलै मांगाई?” (कैलैकी यहूदी सामरिऊ आइलै केज़ी भी बुशा रौ बरताव नाईं छ़ाड़ा थै।) ¹⁰ यीशुऐ ज़वाब दैऔ, “अगर तु परमेश्वरा रै वरदान ज़ाणा थी, और इणौ भी ज़ाणा थी कि सेऊ कुण आ ज़ो ताउंलै बोला सा, ‘मुलै पाणी पिलाऊ’ ता तु तेसकु मांगा थी, और सेऊ ताउंलै ज़िन्दगी रौ पाणी दिआ थौ।” ¹¹ छ़ेउड़ीऐ तेसलै बोलौ, “ओ प्रभु, ताऊं कै पाणी भौरना लै ता कुछ़ आसतौ भी नाईं, और कुंऔ डुंगौ आ; तैबै सेऊ ज़िन्दगी रौ पाणी ताऊं कै किदरा कु आशौ आ? ¹² का तू आमारै बाबा याकूबा कु बौड़ौ ई, ज़ुणीऐ आमुलै एऊ कुंऔ; और आपु ही आपणी सन्तान, और आपणै धौण-चाणा आइलै एथी कु पिऔ?” ¹³ यीशुऐ तियांलै ज़वाब दैऔ, “ज़ुण-कुण एज़ौ पाणी पिया आ सेऊ औज़ौ चिशौ हुआ आ, ¹⁴ पर ज़ुण-कुण तेस पाणी कु पिया लौ ज़ो हाऊं तेसलै देउलै, सेऊ तैबै केबी भी चिशौ नाईं रौआलौ; (ज़ेबी झ़ाऊं दूनिया रौआली) पर ज़ो पाणी हाऊं तेसलै देउलै, सेऊ तेसदी एक सोतौ बौणा आ ज़ो सौदा री ज़िन्दगी झ़ाऊं बौईंदै रौआ आ।” ¹⁵ छ़ेउड़ी ऐ तेसलै बोलौ, “ओ प्रभु, तेस पाणी मुलै दै ताकी हांऊ चिशौ नाईं रौऊ और ना पाणी भौरना लै ऐती दूर आशु।” ¹⁶ यीशुऐ तियां लै बोलौ, “डेऊ, “आपणौ बोउटौ ईदै औटाऊ।” ¹⁷ छ़ेउड़ी ऐ ज़वाब दैऔ, “कि हाऊं बिण बोउटै री ऊ।” यीशुऐ तियांलै बोलौ, “तू ठीक बोलाई, ‘ हाऊं बिण बोउटै री ऊ।’ ¹⁸ कैलैकि तांईऐ पांज़ बोउटै च़ाणी गौऐ ई, और ज़ास काऐ तु ईबी ई सेऊ भी तैरौ बोउटौ नाईं आ ऐऊ तांईऐ सौच्च़ौ ही बोलौ आ।” ¹⁹ छ़ेउड़ी ऐ यीशु लै बोलौ, “ओ प्रभु, मुकै लागा की तू हुणै वाल़ी बुशै ज़ाणनै वाल़ौ ई। ²⁰ आमुरै नाना बुढ़ुऐ ऐज़ै धारा माथै आराधना की आ, और तुमे बोलाई की सेज़ी ज़गाह ज़िऐ आराधना कौरनी च़ांई येरूशलेमा दी आ”। ²¹ यीशुऐ तियांलै बोलौ, “ओ बौइण, मेरी बुशु रौ विश्वास कर कि सेऊ बौग्त आशणै वाल़ौ आ कि तुमै ना ता इयें धारा माथै बाबा री आराधना कौरालै ना येरूशलेमा ई। ²² तुमै ज़ास नाईं ज़ाणदै, तेसरी आराधना कौराई और आमै ज़ास ज़ाणी ई तेसी री आराधना कौरी ई; कैलैकि उद्धार यहूदीऊ मांझ़िया कु आ। ²³ पर सेऊ बौक्त आशा सा, और ईबी भी आ, ज़ेथदी सौच्च़ै भौगत बाबा री आराधना आत्‍मा और सच़ाई कौरी कौराई, कैलैकि बाब आपुलै इणै ही आराधना कौरनै वाल़ै लोड़ा आ। ²⁴ परमेश्वर आत्मा आ और ज़ुरूरी सा कि तेसरी आराधना कौरनै वाल़ै आत्मा और सौच़ाई कौरी आराधना कौरा।” ²⁵ छ़ेउड़ीऐ तेसलै बोलौ, “हाऊं ज़ाणाऊ कि मसीह ज़ासलै ख्रिस्ट बोलाई, आशणै वाल़ौ आ; ज़ेभी सेऊ आशालौ ता आमुकै सारी बुशै बौला आ।” ²⁶ यीशुऐ तियांलै बोलौ, “हाऊं ज़ो ताऊं आइलै बोलदेऊ लागौ औन्दौ, सेऊ ऊ।”

च़ेलेऊ री वापसी

²⁷ तेतिऐ तेसरै च़ेलै आशी गौऐ, और हैरान हुऐ कि यीशु छ़ेउड़ी आईलै बूशै लाइंदै लागौ औन्दौ; तैबै भी कोइऐ ना पूछ़ौ, “तू का च़ा ई?” या “तियां आईलै बूशै कैलै ला ई?” ²⁸ तैबै तिंऐ छ़ेउड़ीऐ आपणौ पाणी रौ घौड़ौ तिऐ छ़ाड़ियौ इलाकै लै ड़ेई गोई, और लोगु आइलै बोलदै लागी, ²⁹ “आशौ, एक आदमी देखौ, ज़ुणीऐ सब कुछ़ ज़ो मुइंऐ कियौ आ मुलै बोली गौ आ। किऐ एऊ ता मसीह नाईं?” ³⁰ और सै गावां कु निकल़ीयौ तेस काऐ आशदै लागै। ³¹ एथरै बिचा दी तेसरै च़ेलैऊ ऐ यीशु कु इणी औरज़ कौरी, “ओ गुरू, कुछ़ खा ऐरी।” ³² पर तिणीऐ तिऊं लै बोलौ, “मुं काऐ खाणा लै इणी रोटी आ ज़ास तुमै नाईं ज़ाणदै।” ³³ तैबै च़ेलेऊ ऐ आपू मांझ़िऐ बोलौ, “का कुणीऐ यीशु लै कुछ़ खाणा लै आणौ आ?” ³⁴ यीशुऐ तिउंलै बोलौ, “मेरी रोटी ऐज़ी आ कि आपणै भेज़णै वाल़ै री मौरज़ी रै अनुसार च़ालू और तेसरौ काम पूरौ कौरु। ³⁵ का तुमै इणौ नाईं बोलदै, ‘लौईणा लै इभी च़ार मिहनै ई पौड़ै औन्दै?’ देखौ, हाऊं तुमुलै बोलाऊ, आपणी आखी खोलियौ डोखरै दी नौदर लाऔ कि सै लौईणा लै आशी गौऐ। ³⁶ लौइणै वाल़ौ मज़दूरी पा आ और सौदा री ज़िन्दगी लै नाज़ कौठै कौरा आ, ताकी बौइणै वाल़ौ और लौइणै वाल़ौ दूईया मिलियौ खुशी मनावा। ³⁷ कैलैकि इदै एज़ी काहवत ठीक बोशा आ: ‘बौइणै वाल़ौ ओर आ, और लौइणै वाल़ौ ओर।’ ³⁸ मुंईऐ तुमे एस डोखरै लौईणा लै भेज़ै ज़ासदी तुमुऐ मैहनत नाईं की: दुज़ेऊ ऐ मैहनत की और तुमै तिउंरी मैहनता रै फल़ा दी साज़ी हुऐ।”

सामरिउ रै लोगु रौ विश्वास कौरणौ

³⁹ तेस इलाकै रै भौरी सामरिउऐ तिऐं छ़ेउड़ी री बुशै शुणीयौ यीशु माथै विश्वास कियौ; कैलैकि तिआऐं एज़ी गवाही देई थी: ‘तिणीऐ सब कुछ़ ज़ो मुंईऐ कियौ आ, मुलै बोलौ आ।’ ⁴⁰ एथीलै ज़ेबी सै सामरी तेस काऐ आशै, तैबै तेसकु औरज़ कौरदै लागै कि आमारै काऐ रौ औ। तैबै यीशु तिऐ दुई दिना झ़ाऊं रौ। ⁴¹ तेसरै वचना रै कारण तौइंऐ भी भौरी लौगुऐ विश्वास कियौ ⁴² और तिऐं छ़ेउड़ी लै बोलौ, “ऐबै आमै तैरै बोलणा माथै विश्वास नाईं कौरदै; कैलैकि आमुंऐ आपु ही शुणी गौ आ, और ज़ाणी गौ आ कि एऊ सौच्च़ी दुनिया रौ छ़ुटकारौ कौरणै वाल़ौ आ।” ⁴³ तैबै तिऊं दुई दिना बासिऐ सेऊ तिदरा कु निकल़ियौ गलीला लै डैऔ, ⁴⁴ कैलैकि यीशुऐ आपु ई गवाही देई कि भविष्यवक्ता लै आपणै दैशा दी आदर-इज्ज़त नाईं मिलदी ⁴⁵ ज़ेबी सेऊ गलीला दी आशौ, ता गलीली खुशी कौरिऐ तेसकु मिलै; कैलैकि ज़ेती काम तिणीऐ यरुशलेमा दी साज़ा रै बौग्ता दी किऐ थै, तिउंऐ सै काम सब देखै थै, कैलैकि सै भी साज़ा दी थै डै औन्दै।

राज़ा आइलै कामा कौरणै वाल़ै रौ छ़ोहरू च़ांगौ कौरणौ

⁴⁶ तैबै सेऊ तौइंऐ गलीला रै काना गावां दी आशौ, ज़िऐ तिणीऐ पाणी अंगुरा रौ रौसा दी बौदल़ौ थौ। तिऐ राज़ै रौ एक नुकुर थौ ज़ासरौ छ़ोहरु कफरनहूमा दी बीमार थौ। ⁴⁷ सेऊ इणौ शुणियौ कि यीशु यहूदिया कु गलीला दी आशी गौ आ, तेस काऐ डैऔ और तेसकु औरज़ कौरदै लागौ कि च़ाल मैरौ छ़ोहरू ठीक कर: कैलैकि सेउ मौरनै वाल़ौ थौ। ⁴⁸ यीशुऐ तेसलै बोलौ, “ज़ेबी झ़ाऊं तुमै च़िन्ह और नोखै काम नाईं देखालै तेबी झ़ाऊं तुमै केबी भी विश्वास नाईं कौरालै।” ⁴⁹ राज़ा रै नुकुरै तेसलै बोलौ, “ओ प्रभु, मैरै छ़ोहरु रै मौरणा कु पैहलै च़ाल।” ⁵⁰ यीशुऐ तेसलै बोलौ “डेऊ, तैरौ छ़ोहरु ज़ीऊंदौ आ। ”तिणी आदमीऐ यीशु री बोली औन्दी बूश मानी एरी और डेई गौ। ⁵¹ सेऊ बाटाई थौ कि तेसरै साथी तेसकु आशियौ मिलै और बोलदै लागै, “तैरौ छ़ोहरु ज़ीऊंदौ आ।” ⁵² तिणीऐ तिऊंकु पूछ़ौ, सेउ “कैज़ै बौग्तै आच्छ़ौ हुंदै लागौ?” तिउंऐ तेसलै बोलौ, “हीज़ सातवै घाण्टै ऐ तेसरौ बुखार उतरी गौ।” ⁵³ तैबै तिणीऐ ज़ाणी गौ कि ऐऊ सेज़ी घौड़िऐ ठीक हुऔ ज़ेज़ी घौड़िऐ यीशुऐ मुलै बोलौ, “तैरौ छ़ोहरु ज़ीऊंदौ आ,” और तिणीऐ और तेसरै सारै घौरा वाल़ेउऐ सारेउऐ विश्वास कियौ। ⁵⁴ ऐऊ दूजौ च़मत्कार थौ ज़ो यीशुऐ यहूदिया कु गलीला दी आशियौ देखाल़ौ।

अठातिस बौर्षा रौ रोगी च़ांगौ कौरणौ

¹ इऊं बुशु बासीऐ यहूदिया रौ एक साज़ौ हुऔ, और यीशु यरुशलेमा लै डैऔ। ² यरुशलेमा दी भेरी रै बौड़ै-दारा काऐ एक कुण्ड/कुंऔ आ ज़ेथलै इब्रानी भाषा दी बैतहसदा बोलाई; तेसरै पांज़ ओसारै/धुरै ई। ³ इऊं धुरै/डिका दी भौरी बिमार, आखी रै शेड़ै, लौंगड़ै और शूकै औन्दै शरीरा रै (पाणी हिलणै री आशा दी तिऐ रौआ थै।) ⁴ (कैलैकि ठीक बौग्ता दी परमेश्वरा रै दूत कुण्डा दी उतरियौ पाणी हिलावा थै। पाणी हिलदी बारै ज़ुण-कुण पैहलै कुंऐ दी उतरा थौ सेऊ ठीक हुआ थौ च़ाउ तेसदी केज़ी भी बिमारी कैलै ना औली।) ⁵ तिऐ एक आदमी थौ, ज़ो एक बिऐ ठाहरा साला ओउलै बिमारी दी थौ पौड़ौ औन्दौ। ⁶ यीशुऐ सेऊ पौड़ौ औन्दौ देखियौ और इणौ ज़ाणियौ कि सेउ भौरी दिना ओउलै आ ऐज़ी हालता दी पौड़ौ औन्दौ, तिणीऐ पूछ़ौ, “का तू ठीक हुणौ च़ाह ई?” ⁷ तिणी बिमार आदमिऐ तेसलै ज़वाब दैऔ, “ओ प्रभु, मुं काऐ कोई भी आदमी नाईं कि ज़ेबी परमेश्वरा रै दूत पाणी हिलावा ई, ता मुं कुंऐ दी उतारा; पर मैरै पहुंच़णै कु दूज़ौ मुकु पैहलै उतरा आ।” ⁸ यीशुऐ तेसलै बोलौ, “उठ, आपणौ बिस्तरौ च़ुंग और आण्ड़-फिर।” ⁹ सेउ आदमी खरकच़ार ठीक हुई गौ, और आपणै बिस्तरै च़ुंगीयौ आण्डदै-फिरदै लागी गौ। ¹⁰ सेऊ आरामा रौ दिन थौ। एथीलै यहूदी तेसलै ज़ो ठीक हुऔ थौ, बोलदै लागै, “आज़ ता आरमा रौ दीन आ, ताउंलै बिस्तरौ उठाऊणौ ठीक नाईं।” ¹¹ तिणीऐ तिउंलै ज़वाब दैऔ, “ज़ुणिऐ हाऊं ठीक कियो ऊ, तिणीऐ मुंलै बोलौ, “आपणौ बिस्तरौ च़ुंग, और आण्ड-फिर’।” ¹² तिउंऐ तेसकु पूछ़ौ, “सेऊ कुण आदमी आ, ज़ुणिऐ ताउंलै बोलौ, ‘बिस्तर च़ुंग, और आण्ड-फिर’?” ¹³ पर ज़ुण ठीक हुई गौ थौ सेउ भी नाईं ज़ाणा थौ कि सेउ कुण आ?, कैलैकि सेज़ी ज़ागाहा दी भीड़ हुणै रै कारण यीशु तिदरु भागी गौ थौ। ¹⁴ इउं बुशु बासिऐ सेऊ यीशु कु परमेश्वरा रै घौरा दी मिलौ। यीशुऐ तेसलै बोलौ, “देख, तू ठीक हुई गो ई: दूजी बारै पाप ना कौरै, इणौ ना च़ांई हुऔ कि इणै कौरी ताउंलै कोई बौड़ी मुसीबत आशा।” ¹⁵ तीणी आदमीऐ डेईयौ यहूदिऊ लै बोली गौ कि ज़ुणिऐ हाऊं ठीक कियोऊ सेऊ यीशु आ। ¹⁶ ऐथ कौरी यहूदी यीशु सताऊंदै लागै, कैलैकि सेऊ इणै काम साज़ा रै दिना दी कौरा थौ। ¹⁷ एथी माथै यीशुऐ तिउंलै बोलौ, “मैरौ बाब इबी झ़ाऊं काम कौरा आ, और हाऊं भी काम कौराऊ।” ¹⁸ एज़ै मतलबै यहूदी यीशु झ़ांगणा री भौरी कोशीश कौरदै लागै, कैलैकि तिणीऐ साज़ै रै दिना रौ रीवाज़ चोड़ौ, और परमेश्वरा लै आपणौ बाब बोलियौ आपूलै परमेश्वरा रै बराबर माना थौ।

छ़ोहरू रौ हक

¹⁹ एथ माथै यीशुऐ तिउंलै बोलौ, “हाऊं तुमुलै सौच्च़ौ-सौच्च़ौ बोलाऊ, छ़ोहरु आपू ई कुछ़ नाईं कौरदौ, सिर्फ सेउ ज़ुण बाब कौरदै देखा आ; कैलैकि ज़ो-ज़ो काम बाब कौरा आ तिऊं काम छ़ोहरु भी तिणै कौरिऐ कौरा सा। ²⁰ पर बाब छ़ोहरु आईलै प्यार छ़ाड़ा सा और ज़ो-ज़ो काम सेऊ आपु कौरा आ, तिऊं सारै काम तेसकै देखाल़ा आ; और सेउ ऐथकु भी बौड़ै काम तेसकै देखाल़ा, ताकी तुमै हैरान हुआ। ²¹ ज़िणौ बाब मौरै औन्दै उठावा और ज़िउंदै कौरा, तिणी ई छ़ोहरु भी ज़ास च़ाहा लौ तिऊं ज़िउंदौ कौरा आ। ²² बाब कासी रौ फैसलौ नाईं कौरदौ, पर फैसलै रौ सारौ काम छ़ोहरु कै सौंभाल़ी गौ आ, ²³ कि सारै लोग ज़िणौ बाबा री इज्ज़त कौराई, तिणी ई छ़ोहरु री भी इज़्ज़त कौरा। ज़ो छ़ोहरु री इज़्ज़त नाईं कौरदौ, सेऊ बाबा री ज़ुणीऐ सेऊ भेज़ौ औन्दौ आ, इज्ज़त नाईं कौरदौ। ²⁴ हाऊं तुमुलै सौच्च़ौ बोलाऊ, ज़ुण मैरौ वचन शुणियौ मैरै भेज़णै वाल़ै माथै विश्वास कौरा आ; सौदा री ज़िन्दगी तेसरी आ। तेस माथै सौज़ा रौ हुकम नाईं औन्दौ। पर सेऊ मौरनै कु पार हुईयौ ज़िन्दगी दी पहुंची गौ आ। ²⁵ “हाऊं तुमुलै सौच्च़ौ-सौच्च़ौ बोलाऊ सेऊ बौक्त आशा सा, और आबै आ, ज़ेथदी मौरै औन्दै परमेश्वरा रै छ़ोहरु री आवाज़ शुणालै, और ज़ुण शुणालै सै ज़िवा लै। ²⁶ कैलैकि ज़ेजी रीति कौरी बाब आपुदी ज़िन्दगी छ़ाड़ा सा, तिणी रीति कौरी तिणीऐ आपणै छ़ोहरू कै भी ऐऊ हक दैऔ आ कि आपूदी ज़िन्दगी छ़ाड़ा; ²⁷ और तेसकै फैसलै कौरनै रौ हक भी दैऔ औन्दौ आ, एथिलै कि सेऊ आदमी रौ छ़ोहरू आ। ²⁸ इणै कौरी हैरान नाईं हुऔ; कैलैकि सेज़ौ बौक्त आशा आ कि ज़ेती कौब्रा दी ई सै तेसरी आवाज़ शुणियौं निकल़ियौ आशा ई। ²⁹ ज़ुणिऐ भौलाई आ कौरी ऐन्दी सै ज़िन्दगी दी दूजी बारै ज़िउणा लै उठाई, और ज़ुणिऐ आ बुराई कौरी ऐन्दी सै सज़ा लै दूजी बारै ज़िऊंदै हुआ ई।

यीशु रै बारै दी गवाही

³⁰ हाऊं आपु कौरी कुछ़ नाईं कौरी बौल़दौ; ज़िणौ शुणा ऊ, तिणौ फैसलौ कौराऊ, और मैरौ फैसलौ सौच्च़ौ आ, कैलैकि हाऊं आपणी मौरज़ी कौरी नाईं पर आपणै भेज़णै वाल़ै री मौरज़ी च़ाहा ऊ। ³¹ अगर हाऊं आपू ई आपणी गवाही देऊ, ता मेरी गवाही सौच्च़ी नाईं। ³² एक ओर आ ज़ुण मेरी गवाही दिआ सा, और हाऊं ज़ाणाऊ कि ज़ुण मेरी गवाही दिआ आ, सै सौच्च़ी आ। ³³ तुमुंऐ यहून्ना कु पुछ़वाऔ और तिणीऐ सौच्च़ाई री गवाही देई आ। ³⁴ पर हाऊं आपणै बारै दी आदमी री गवाही नाईं च़ांहदौ; तैबै भी हाऊं इऊं बुशै ऐथलै बोलाऊ कि तुमुलै छ़ुटकारौ मिला। ³⁵ सेऊ ता ज़ौल़दौ और च़मकुदौ दिवौ थौ, और तुमुलै कुछ़ बौग्ता झ़ाऊं तेसरै प्याशै दी मौगन हुणौ आच्छ़ौ लागौ। ³⁶ पर ज़ो मुकै गवाही आ सै यूहन्ना री गवाही कु बौड़ी आ; कैलैकि ज़ो काम बाबै मुकै पूरौ कौरना लै आ दैऔ औन्दौ या सेज़ौ काम ज़ो हाऊं कौरा ऊ, सै मैरै गवाह ई कि बाबा रै हाऊं भेज़ौ औन्दौ ऊ। ³⁷ और बाब ज़ुणिऐ हाऊं भेज़ौ औन्दौ ऊ, तिणीऐ मेरी गवाही देई आ, तुमुऐ ना केबी तेसरी हाक शुणी, ना तेसरौ रूप देखौ; ³⁸ और तेसरौ वचन मौना दी टेकाल़ी नाईं छ़ाड़दै, कैलैकि ज़ुणीऐ सेऊ भेज़ौ तुमै तेसरौ विश्वास नाईं कौरदै। ³⁹ तुमै पवित्रशास्त्रा दी लोड़ाई, कैलैकि सौमझ़ा ई कि तेथदी सौदा री ज़िन्दगी तुमुलै मिला आ; और एऊ सेऊ आ ज़ो मेरी गवाही दिया आ; ⁴⁰ तैबै भी तुमै ज़िन्दगी पाइणा लै मुं काऐ आशणौ नाईं च़ांहदै। ⁴¹ हाऊं आदमिऊ कु इज़्ज़त नाईं च़ांहदौ। ⁴² पर हाऊं तुमु ज़ाणाऊ कि तुमुदी परमेश्वरा रौ प्रेम नाईं। ⁴³ हाऊं आपणै बाबा रै नावां कौरीऐ ऊ आशौ औन्दौ, और तुमै मुं नाईं मानदै; अगर दूज़ौ कोई आपणै ही नावां कौरी आशा, ता तेस तुमे मानाई। ⁴⁴ तुमु ज़ो एकी दूज़ै कु इज़्ज़त च़ाहा ई और से इज़्ज़त ज़ो सिर्फ परमेश्वरा री तौरफा कु आ, नाईं च़ांहदै, किणै कौरिऐ विश्वास कौराई? ⁴⁵ इणौ नाईं ज़ाणौ कि हाऊं बाबा काऐ तुमुदी आरोप ला ऊ; तुमुदी आरोप लाइणै वाल़ौ ता मूसा आ, ज़ास माथै तुमारै भरोसौ आ छ़ाड़ौ औन्दौ। ⁴⁶ कैलैकि अगर तुमै मूसा रौ विश्वास कौरा थै, ता मैरौ भी विश्वास कौरा थै, एथीलै कि तिणीऐ मैरै बारै दी लिखौ औन्दौ आ। ⁴⁷ पर अगर तुमै तेसरी लिखी ऐन्दी बुशु माथै विश्वास नाईं कौरदै, ता मेरी बुशु माथै किणौ विश्वास कौराई?”

पाँज़ हज़ार पूरषा लै रोटी खिलाउणी

(मती14:13-21; मरकुस6:30-44; लूका9:10-17)

¹ ईऊं बुशु बासिऐ यीशु गलीला री झ़ीला मतलब कि तिबिरियासा री झ़ीला कु पारभिलै ड़ैऔ। ² और एक बौड़ी भीड़ तेस पिछ़ू हुई गोई कैलैकि ज़ो च़मत्कार सेऊ बिमारु माथै देखाल़ा थौ सै तिऊं दैखा थै। ³ तैबै यीशु पाहाड़ा दी च़ौड़ियौ आपणै च़ैलेऊ आईलै तिऐ बोशी गौ। ⁴ यहूदिऊ रै फसहा रौ साज़ौ नज़दीक थौ। ⁵ ज़ेबी यीशुऐ आपणी आखी उठाइयौ एक बौड़ी भीड़ आपू काऐ आशदै देखी, ता फिलिप्पुसा लै बोलौ, “आमैंं ईउंलै खाणा लै रोटी किदरा कु खरिदियौ आणी लै?” ⁶ तिणीऐ एज़ी बूश तेस पौरखुणा लै बोली, कैलैकि सेऊ आपू ही ज़ाणा थौ कि सेऊ का कौरा। ⁷ फिलिप्पूसै तेसलै ज़वाब दैऔ, “दूई शौ दीनारा री रोटी भी ईउंलै पूरी नाईं औन्दी कि ईऊं मांझीया कु हर एकी लै थोड़ी-थोड़ी मिला।” ⁸ तिऊं च़ेलेऊ मांझ़िया कु शमौन पतरसा रौ भाई अन्द्रियासै तेसलै बौलौ, ⁹ “इदै एक छ़ोहरू आ ज़ासकै ज़ौआ री पांज़ रोटी और दूई माछ़ी आ; पर एती लोगु लै सै का सा?” ¹⁰ यीशुऐ बोलौ, “लोगु बोशाल़ौ।” सेज़ी ज़ागहा दी भौरी घास थौ: तैबै लोग बोशी गौऐ, ज़ास मांझिऐ मौरद तकरीबन पांज़ हज़ार थै। ¹¹ तैबै यीशुऐ रोटी कौरी, और धन्यावाद कौरीयौ बोशणै वाल़ेऊ लै बाँटी गोई; और तिणी ई माछ़ी मांझ़िया कु ज़ेती सै च़ाहा थै बाँटी गोई। ¹² ज़ेबी सै खाईयौ निपटी गौऐ ता तिणीऐ आपणै च़ेलेऊ लै बोलौ, “बौच़ै औन्दै गासड़ू कौठै कौरौ कि कुछ़ डोकै, ना पाईयौ।” ¹³ तैबै तिउंऐ कौठै किऐ, और ज़ौआ री पांज़ रोटी रै टुकड़ै कु ज़ो खाणावाल़ेउ कु बौच़ै औन्दै थै, बारह छ़ाबड़ै भौरै। ¹⁴ तैबै ज़ो च़मत्कार तिणीऐ कौरीऔ देखाल़ौ तेस देखियौ सै लोग बोलदै लागै, “सेऊ भविष्यवक्ता ज़ो दुनिया दी आशणै वाल़ौ थौ पाक्कौ ऐऊ आ।” ¹⁵ यीशुऐ इणौ ज़ाणियौ कि इऐ मुं राज़ौ चाणना लै पाकुड़नौ च़ाहा ई, तैबै पाहाड़ी माथै ऐखुली डेई गौ।

यीशु रौ पाणी माथी आण्डणौ

(मती14:22-23; मरकुस6:45-52)

¹⁶ ज़ेबी राच हुई, ता तेसरै च़ेलै झ़ीला रै डिका काऐ डेवै, ¹⁷ और किशती दी च़ौड़ियौ झ़ीला दी पारै कफरनहूमा लै डेऊंदै लागै। सेज़ै बौग्तै राच हुई गोई थी, और यीशु इभी झ़ाऊं तिऊं काऐ नाईं आशौ थौ। ¹⁸ तेज़ बागुरा कौरीऐ झ़ीला दी पाणी रै छ़ालै उपरै उठदै लागौ। ¹⁹ ज़ेबी सै सुलै-सुलै च़ीन-च़ार मील दूर निकल़ी गौऐ, ता तिउंऐ यीशु पाणी दी आण्डदै और किश्ती रै नज़दीक आशदै देखौ, और डौरी गौऐ। ²⁰ पर तिणीऐ तिउंलै बोलौ, “हाऊं ऊ; ड़ौरौ नाईं।” ²¹ तैबै सै तेस किश्ती दी च़ड़ाऊणा लै तैयार हुई गौऐ और तेबी सै किश्ती सेज़ी ज़ागहा दी पहुंच़ी ज़िऐ सै डेऊंदै थै लागै औन्दै।

लोगु रौ यीशु लोड़नौ

²² दूज़ै दिनै तिऐं भीड़ा रै लोगुऐ, ज़ो झ़ीला रै पारभिलै खौड़ी थी, इणौ देखौ कि इदै एकी छ़ाड़ियौ कोई भी दूजी किश्ती नाईं थी; और यीशु आपणै च़ैलेऊ आईलै तिऐं किश्ती दी नाईं च़ौड़ौ थौ, पर सिर्फ तेसरै च़ैले ही डेवै। ²³ तैबै ओर किश्ती तिबिरियासा कु तिऐं ज़ागहा रै नज़दीक आशी, ज़िऐ तिउंऐ प्रभु रौ धन्यावाद कौरनै बासीऐ रोटी खाई थी। ²⁴ एथीलै ज़ेबी भीड़ै देखौ कि इदै ना ता यीशु आसतौ और ना ता तेसरै च़ेलै, तैबै सै भी किश्ती दी च़ौड़ियौ यीशु लोड़दै-लोड़दै कफरनहूमा दी पहुंच़ै।

यीशु ज़िन्दगी री रोटी

²⁵ झ़ीला पारभिलै ज़ेबी सै तेसकु मिलै ता बोलौ, “ओ गुरु, तू इदै केबी आशौ ई?” ²⁶ यीशुऐ तिउंलै ज़वाब दैऔ, “हाऊं तुमु लै सौच्च़ौ-सौच्च़ौ बोलाऊ, तुमै मुं ऐथलै नाईं लोड़दै कि तुमुऐ च़मत्कार दैखौ पर ऐथलै कि तुमै रोटी खाईयौ डौटी गौऐ। ²⁷ नाश हुणै वाल़ी रोटी लै तुमै मैहनत नाईं कौरौ, पर तिऊं रोटी लै ज़ो सौदा लै रौआ ई, ज़ो आदमी रौ छ़ोहरू तुमुलै दिआ; कैलैकि बाबै मतलब परमेश्वरै तेसदी छ़ाप आ लाई ऐन्दी।” ²⁸ तिउंऐ तेसलै बोलौ, “परमेश्वरा रै कामा कौरना लै आमै का कौरीलै?” ²⁹ यीशुऐ तिउंलै ज़वाब दैऔ, “परमेश्वरा रौ काम ऐऊ आ कि तुमै, ज़ुणिऐ सेऊ भेज़ौ औन्दौ आ, तेस माथै विश्वास कौरौ।” ³⁰ तैबै तिउंऐ तेसलै बोलौ, “तैबै तू केज़ौ च़िन्ह देख़ाल़ा ई कि आमै तेस देखीयौ तैरौ विश्वास कौरु? तू केज़ौ काम देखाल़ा ई? ³¹ आमारै नाना-बुढ़ुऐ ज़ांगल़ा दी मन्नौ (सौरगा री रोटी) खाऔ; ज़िणौ लिखौ औन्दौ आ, ‘तिणीऐ तिउंलै खाणा लै सौरगा कु रोटी देई।” ³² यीशुऐ तिउंलै बोलौ, “हाऊं तुमुलै सौच़ौ-सौच़ौ बोलाऊ कि मूसै तुमुलै सै रोटी सौरगा कु नाईं देई, पर मैरौ बाब तुमुलै सौच्च़ी रोटी सौरगा कु दिआ आ। ³³ कैलैकि परमेश्वरा री रोटी से ई आ ज़ो सौरगा कु उतरियौ धौतरी लै ज़िन्दगी दिआ आ”। ³⁴ तैबै तिउंऐ तेसलै बोलौ, “ओ प्रभु, ऐज़ी रोटी आमुंलै सौदा देई लाऐ।” ³⁵ यीशुऐ तिउंलै बोलौ, “ज़िन्दगी री रोटी हाऊं ऊ: ज़ुण मुं काऐ आशा आ सेऊ केबी भी भूखौ नाईं रौइंदौ, और ज़ुण मुं माथै विश्वास कौरा आ सेऊ केबी भी चीशौ नाईं रौंइदौ। ³⁶ पर मुऐं तुमुलै बोलौ थौ कि तुमुऐ हाऊं देखी भी गो ऊ तैबै भी विश्वास नाईं कौरदै। ³⁷ ज़ो कुछ़ बाब मुलै दिआ आ सेऊ सब मुं काऐ आशा, और ज़ुण भी मुं काऐ आशालौ तेस हाऊं केबी नाईं गाड़दौ। ³⁸ कैलैकि हाऊं आपणी मौरज़ी नाईं पर आपणै भेज़णै वाल़ै री मौरज़ी पूरी कौरना लै सौरगा कु उतरौ ऊ; ³⁹ और मैरै भेज़णै वाल़ै री मौरज़ी ऐज़ी आ कि ज़ो कुछ़ तिणीऐ मुकै दैऔ आ, तेथ मांझ़िया हाऊं कुछ़ ना खोऊ, पर तेस आखरी दिना दी तौऐं ज़िउंदौ कौरु। ⁴⁰ कैलैकि मैरै बाबा री मौरज़ी इणी आ कि ज़ुण-कुण छ़ोहरू देखा लौ और तेस माथै विश्वास कौरा, सेऊ सौदा री ज़िन्दगी पा; और हाऊं तेस आखरी दिनै तौऐं ज़िउंदौ कौरु।” ⁴¹ एथीलै यहूदी तेसलै घुणमुणांदै लागै, कैलैकि तिणीऐ बोलौ थौ, “ज़ो रोटी सौरगा कु उतरी आ, सै रोटी हाऊं ऊ।” ⁴² और तिउंऐ बोलौ, “का ऐऊ यूसुफा रौ छ़ोहरू यीशु नाईं, ज़ासरै मां-बाब आमै ज़ाणी ई? ता एऊ किणौ बोला कि हाऊं सौरगा कु उतरौ ऊ?” ⁴³ यीशुऐ तिउंलै ज़वाब दैऔ, “आपू मांझी नाईं घुणमुणाऔ। ⁴⁴ कोई मुं काऐ नाईं आशी बौल़दौ ज़ेबी झ़ाऊं बाब, ज़ुणिऐ हाऊं भेज़ौ औन्दौ ऊ, तेस झिड़ा नाईं लौ; और हाऊं तेस आखरी दिनै तौइंऐ ज़िउंदौ कौराऊ। ⁴⁵ भविष्यवकता रै लेखा दी इणौ आ लिखौ औन्दौ: ‘सै सारै परमेश्वरा री तौरफा कु शिखाऐ औन्दै औलै।’ ज़ुण-कुणिऐ बाबा कु शुणौ और शिखौ आ, सेउ मुं काऐ आशा आ। ⁴⁶ इणौ नाईं कि कुणीऐ बाब देखौ; पर ज़ो परमेश्वरा री तौरफा कु आ, सिर्फ तिणीऐ ई बाब दैखौ आ। ⁴⁷ हाऊं तुमुलै सौच़ौ-सौच़ौ बोलाऊ कि ज़ुण-कुण विश्वास कौरा सा, सौदा री ज़िन्दगी तेसी री आ। ⁴⁸ ज़िन्दगी री रोटी हाऊं ऊ। ⁴⁹ तुमुरै नाना-बुढ़ुऐ ज़ांगल़ा दी मन्ना खाऔ और मौरी गौऐ। ⁵⁰ इऐ सेज़ी रोटी आ ज़ो सौरगा कु उतरी आ ताकी आदमी तिऊं मांझ़िया कु खा और नाईं मौरा। ⁵¹ ज़िन्दगी री रोटी ज़ो सौरगा कु उतरी, हाऊं ऊ। अगर कोई इऐं रोटी कु खा लौ, ता सौदा लै ज़िउंदौ रौआ; और ज़ो रोटी हाऊं दुनिया री ज़िन्दगी लै दिआऊ, सै मैरौ मांस आ।” ⁵² ऐथ माथै यहूदी इणै बोलियौ आपू मांझ़ी लौड़दै लागै, “ऐऊ आदमी किणै कौरी आमूंलै आपणौ मांस खाणा लै देई बौल़ा आ?” ⁵³ यीशुऐ तिउंलै बोलौ, “हाऊं तुमुलै सौच़ौ-सौच़ौ बोलाऊ कि ज़ेबी झ़ाऊं तुमै आदमी रै छ़ोहरू रौ मांस नाईं खा लै, और तेसरौ लोऊ नाईं पीआ लै, तुमुदी ज़िन्दगी नाईं। ⁵⁴ ज़ो मैरौ मांस और मैरौ लोऊ पिया आ, सौदा री ज़िन्दगी तेसी री आ; और हाऊं आखरी दिना दी तौइंऐ तेस ज़िउंदौ कौराऊ।” ⁵⁵ कैलैकि मैरौ मांस सौच़ी ई खाणै री च़ीज़ आ, और मैरौ लोऊ सौच़ी ई पिणै री च़ीज़ आ। ⁵⁶ ज़ुण मैरौ मांस खा और मैरौ लोऊ पिया आ सेउ मुंदी पाकौ बौणी रौआ आ, और हाऊं तेस दी। ⁵⁷ ज़िणौ ज़िऊंदै बाबै हाऊं भेज़ौ, और हाऊं बाबा रै कारण ज़िउंदौ ऊ, तिणी ई सेउ भी ज़ो मुं खा लौ मैरै कारण ज़िउंदौ रौआ आ। ⁵⁸ ज़ो रोटी सौरगा कु उतरी आ ऐज़ी आ, तिऐं रोटी ज़िणी नाईं ज़ो नाना-बुढ़ुऐ खाई और मौरी गौऐ; ज़ुण-कुण ऐज़ी रोटी खा लौ, सेउ सौदा ज़िउंदौ रौआ।” ⁵⁹ ऐज़ी बूश तिणीऐ कफरनहूमा रै एकी धार्मिक खुम्बल़ी दी शिक्षा दैंदी बारै बोली।

सदा री ज़िन्दगी रै वचन

⁶⁰ तेसरै च़ेलेऊ मांझ़ीया कु भौरी आदमीउऐ इणौ शुणियौ बोलौ, “ऐज़ी काठी बूश आ; इणौ कुण शुणी बौल़ा आ?” ⁶¹ यीशुऐ आपणै मौना दी इणौ ज़ाणियौ कि मैरै च़ेलै आपू मांझ़ीऐ ऐज़ी बूशा माथै घुणमुणा ई, तिऊंकु पूछ़ौ, “का ऐज़ी बुशा कु तुमुदी ठोकर लागा आ? ⁶² अगर तुमै आदमी रौ छ़ोहरू ज़िऐ सेऊ पैहलै थौ, तिऐ उपरै डेऊंदै देखालै, ता का औलौ? ⁶³ आत्मा ता ज़िन्दगी देणै वाल़ी आ, शरीरा कु कुछ़ फाइदौ नाईं आ; ज़ो बूश मुंऐ तुमुलै बोली आ सै आत्मा आ, और ज़िन्दगी भी आ। ⁶⁴ पर तुमु मांझ़िया कु कुछ़ इणै ई ज़ो विश्वास नाईं कौरदै।” कैलैकि यीशु पैहलै कु ज़ाणा थौ कि ज़ो विश्वास नाईं कौरदै, सै कुण ई; और कुण मुं पकड़ावा ई। ⁶⁵ और तिणीऐ बोलौ, “एथीलै मुऐं तुमुलै बोलौ थौ कि ज़ेबी झ़ाऊं कास लै बाबा री तौरफा कु ऐऊ वरदान नाईं मिला लौ तेबी झ़ाऊं सेउ मुं काऐ नाईं आशी बौल़दौ।”

पतरसा रौ विश्वास

⁶⁶ एथ माथै तेसरै च़ेलेऊ मांझ़िया कु भौरी वापिस डेई गौऐ और तेथ बासिऐ तेस आईलै नाईं डेवे। ⁶⁷ तैबै यीशुऐ तिऊं बारह च़ेलेऊ लै बोलौ, “का तुमै भी डेऊणौ च़ाहा ई?” ⁶⁸ शमौन पतरसै तेसलै ज़वाब दैऔ, “ओ प्रभु, आमै कास काऐ डेई? सौदा री ज़िन्दगी री बुशै ता ताउंकै ई; ⁶⁹ और आमुंऐ विश्वास कियौ और ज़ाणी गौऐ कि परमेश्वरा रौ पवित्र आदमी तू ई।” ⁷⁰ यीशुऐ तिउंलै ज़वाब दैऔ, “का मुइंऐ तुमै बारह च़ेलै नाईं छ़ाँटै? तैबै भी तुमु मांझ़िया कु एक आदमी शैतान आ।” ⁷¹ ऐज़ी बूश तिणीऐ शमौन इस्करियोती रै छ़ोहरू यहूदा रै बारै दी बोलौ थौ, कैलैकि एऊ ई थौ ज़ुण बारह च़ेलैऊ मांझ़िया कु एक थौ, तेस पकड़ाउणै वाल़ौ।

यीशु और तेसरै भाई

¹ ईऊं बुशु बासिऐ यीशु गलील इलाकै दी घुमदै थाकौ लागी; कैलैकि यहूदी तेस झ़ांगणै री कोशिश थै कौरदै लागै औन्दै, एथीलै सेऊ यहूदीऊ रै इलाकै दी घुमणौ नाईं च़ा थौ। ² यहूदिऊ रै घौरा रौ साज़ौ नज़दीक थौ। ³ एथीलै तेसरै भाईउऐ तेसलै बोलौ, “इदरा कु यहूदिया लै डेऊ, कि ज़ो काम तू कौराई तिऊं तैरै च़ेलै तिऐ भी देखा। ⁴ कैलैकि इणौ कोइयौ ना औलौ ज़ुण मशहूर हुणौ च़ाहा और च़ोरुइयौ काम कौरा। अगर तू एज़ौ काम कौराई, ता आपु इऐं दुनिया दी परगट औऊ।” ⁵ कैलैकि तेसरै भाई भी तेस माथै विश्वास नाईं कौरा थै। ⁶ तैबै यीशुऐ तिउंलै बोलौ, “मैरौ बौक्त इबी झ़ाऊं नाईं आशौ, पर तुमुलै सारौ बौक्त आ। ⁷ दुनिया तुमु कु दुश्मनी नाईं कौरी सौकदौ, पर दुनिया मुकु दुश्मनी कौरा आ कैलैकि हाऊं तेसरै विरोधाई इऐं गवाही दिआ ऊ कि तेसरै काम बुरै ई। ⁸ तुमै साज़ै दी डैऔ; हाऊं इबी ऐज़ै साज़ै दी नाईं डेऊंदौ, कैलैकि इबी झ़ाऊं मैरौ बौक्त पुरौ नाईं हुऔ।” ⁹ सेउ तिऊंकु ऐज़ी बुशै बोलियौ गलीला दी ई रौई गौ।

गरीबू रै घौरा दी साज़ै मांझ़ी यीशु

¹⁰ पर ज़ेबी तेसरै भाई साज़ै दी डेई गौऐ ता यीशु आपु भी, पौगड़ै दी नाईं पर मानौ च़ोरूइयौ डैऔ। ¹¹ यहूदी साज़ै दी तेस इणै बोलिऔ लोड़दै लागै, “सेऊ किऐ आ?” ¹² और लोगु मांझ़ीऐ तेसरै बारै दी च़ोरी-च़ोरीऔ भौरी का बुशै हुई: कुछ़ बोला थै, “सेऊ भौलौ आदमी आ।” और कुछ़ बोला थै, “नाईं, सेऊ लोगु बिशवाशा आ।” ¹³ तैबै भी यहूदीऊ रै डौरै कोई भी आदमी तेसरै बारै दी खुलियौ नाईं बोला थै।

साझ़ै मांझ़ी यीशु रौ उपदेश

¹⁴ ज़ेबी साज़ै रै आधै दूस बीती गौऐ; ता यीशु परमेश्वरा रै घौरा दी डेईयौ शिक्षा दैन्दै लागौ। ¹⁵ तैबै यहूदीऊऐ हैरान हुइयौ बोलौ, “एसकै बिण पौड़ी विद्या किणी आशी गोई?” ¹⁶ यीशुऐ तिउंलै ज़वाब दैऔ, “मैरी शिक्षा मैरी नाईं, पर मैरै भेज़णै वाल़ै री आ। ¹⁷ अगर कोई तेसरी इच्छ़ा दी आडणौ च़ाहा, ता सेऊ इऐं शिक्षा रै बारै दी ज़ाणा लौ कि इऐ परमेश्वरा री तौरफा कु आ या हाऊं आपणी तौरफा कु बोलाऊ। ¹⁸ ज़ो आपणी तौरफा कु कुछ़ बोला आ, सेऊ आपणी ही बौड़ाई च़ाहा सा; पर ज़ो आपणै भेज़णैवाल़ै री बौड़ाई च़ाहा सा सेऊ ई सौच़ौ आ, और तेसदी कोई बुरी बूश नाईं। ¹⁹ का मूसै तुमुलै नियम नाईं दैऔ? तैबै भी तुमु मांझ़ीया कु कोई नियमा दी नाईं हांडदौ। तुमै मुं कैलै झ़ांगणौ च़ाहा ई?” ²⁰ लोगुऐ ज़वाब दैऔ, “तुमु दी बुरी आत्मा आ! तुमु कुण झ़ांगणौ च़ाहा सा?” ²¹ यीशुऐ तिउंलै ज़वाब दैऔ, “मुइंऐ एक काम किऔ, और तुमै सारै हैरान हुआ ई। ²² ऐज़ै कारणै मूसै तुमुलै खतनौ कौरनै री आज्ञा देई आ (इणौ नाईं सेउ मूसा री तौरफा कु आ पर नाना- बुढ़ु कु च़ाली ऐन्दी आ), और तुमै साज़ै रै दिनै आदमी रौ खतनौ कौराई। ²³ ज़ेबी साज़ै रै दिना दी आदमी रौ खतनौ कौराई ताकि मूसा रै नियमा री आज्ञा टौल़ी ना च़ाईं, ता तुमै मुं माथै ऐज़ी ताइंऐ रोश कैलै गाड़ाई कि मुइंयैं साज़ै रै दिना दी एक आदमी आच्छ़ा कौरीऐ च़ांगौ किऔ। ²⁴ मुंह देखीयौ फैसलौ नाईं कौरौ, पर ठीक-ठीक फैसलौ कौरौ।”

का यीशु ही मसीह आ?

²⁵ तैबै कुछ़ यरुशलेमा दी रौइणै वाल़ै बोलदै लागै, “का एऊ सेऊ नाईं ज़ास झ़ांगणै री कोशिश कौरदै ई लागै औन्दै?” ²⁶ पर देखौ, “एऊ ता खुलम-खुलौ बुशै ला सा और कोई भी तेसलै कुछ़ नाईं बोलदै। का मुख्येऊऐ सौच़ौ-सौच़ौ ज़ाणी ऐरौ आ कि एऊ ई मसीह आ? ²⁷ एस ता आमै ज़ाणी ई कि ऐऊ किदलौ आ; पर ज़ेबी मसीह आशालौ ता कोई नाईं ज़ाणालौ कि सेऊ किदलौ आ।” ²⁸ तैबै यीशुऐ परमेश्वरा रै घौरा दी शिक्षा देन्दी बारै औटाइयौ बोलौ, “तुमै मुं ज़ाणाई, और इणौ भी ज़ाणाई कि हाऊं किदलौ ऊ। हाऊं ता आपु नाईं आशौ, पर मैरौ भेज़णै वाल़ौ सौच़ौ आ, तेस तुमै नाईं ज़ाणदै। ²⁹ हाऊं तेस ज़ांणाऊ कैलैकि हाऊं तेसरी तौरफा कु और तिणीऐ हाऊं भेज़ौ ऊ।” ³⁰ एज़ी बुशा माथै तिउंऐ सेऊ पाकुड़नौ च़ाऔ, तैबै भी कोइऐ तेसदी हाथ नाईं लाऔ कैलैकि तेसरौ बौक्त इबी झ़ाऊं नाईं आशौ थौ। ³¹ तैबै भी भीड़ा रै भौरी लोगुऐ तेस माथै विश्वास कियौ, और बोलदै लागै, “मसीह ज़ेबी आशालौ ता का एथ कु भी बौड़ै च़मतकार देखाल़ाई ज़िणै इणीऐ देखाल़ै ई?”

यीशु पाकुड़नै रौ कोशिश

³² फरीसिउऐ लोगु कु यीशु रै बारै दी एज़ी बुशै च़ोरी-च़ोरीऔ लाइंदै शुणी; और परधान याजकु और फरीसिउऐ तेस पाकुड़ना लै सिपाई भेज़ै। ³³ एथ माथै यीशुऐ बोलौ, “हाऊं थोड़ै बौग्ता झ़ाऊं तौऐं तुमु आईलै ऊ, तैबै आपणै भेज़णै वाल़ै काऐ डेआऊ। ³⁴ तुमै मुं लोड़ाई, पर नाईं मिलु लौ; और ज़िऐ हाऊं ऊ, तिऐ तुमैं नाईं आशी बौल़दै।” ³⁵ एथ माथै यहूदी आपु मांझ़ीऐ बोलदै लागै, “एऊ किऐ डिआ कि एऊ आमुकै नाईं मिलालौ? का एऊ तिऊं काऐ डिआ ज़ो यूनानिया दी तितर बितर हुइयौ रौआई, और यूनानिऊ मांझ़ीऐ भी परचार कौरा? ³⁶ एज़ी का बूश आ ज़ो ईणीऐ बोली, कि ‘तुमै मुं लोड़ाई, पर नाईं मिलु लौ; और ज़ियै हाऊं ऊ, तिऐ तुमै नाईं आशी बौल़दै’?”

ज़िन्दगी रै पाणी री नौ (नदी)

³⁷ साज़ै रै आखरी दिनै, ज़ो बौड़ौ दिन आ, यीशु खौड़ौ हुऔ और औटाइयौ बोलौ, “अगर कोई चिशौ आ ता मुं काऐ आशा और पिया। ³⁸ ज़ुण मुं माथै विश्वास कौरालौ, ज़िणौ पवित्रशास्त्रा दी आशौ आ, ‘तेसरै ज़िवा भिता कु ज़िन्दगी रै पाणी री नौईं बौईयौ निकल़ा’।” ³⁹ तिणीऐ एऊ वचन तिऐं आत्मा रै बारै दी बोलौ, ज़ो तेस माथै विश्वास कौरनै वाल़ै थै; कैलैकि आत्मा इभी झ़ाऊं नाईं उतरौ थौ, कैलैकि यीशु इभी झ़ाऊं आपणी महीमा दी नाईं आशौ थौ। ⁴⁰ तैबै भीड़ा मांझ़िया कु कुणियै ऐज़ी बुशै शुणियौ बोलौ, “सौच़ी ई एऊ सेऊ भविष्यवकता आ।” ⁴¹ दुज़ै आदमिउऐ बोलौ, “ऐऊ मसीह आ।” पर केज़ेउऐ बोलौ, “कैलै? का मसीह गलीला कु आशा आ? ⁴² का पवित्रशास्त्र दी इणौ नाईं आशौ कि मसीह दाऊद रै वंशा कु और बैतलहम गावां कु आशा ज़िऐ दाऊद रौआ थौ?” ⁴³ तैबै तेसरै कारण लोगु मांझ़ीऐ फूट पौड़ी। ⁴⁴ तिऊं मांझ़ीऐ कुछ तेस पाकुडनौ च़ाहा थै, पर कोइऐ तेस माऐ हाथ नाईं पाऔ।

यहुदी अगुएउ रौ अविश्वास

⁴⁵ तैबै सिपाही परधान याजक और फरीसिऊ काऐ आशै; तिउंऐ तेसलै बोलौ, “तुमुऐ सेऊ कैलै नाई आणौ?” ⁴⁶ सिपाहीउऐ ज़वाब दैऔ, “केज़ै आदमिऐ केबी भी ईणी बुशै नाईं लाई।” ⁴⁷ फरीसिउऐ तिउंलै ज़वाब दैऔ, “का तुमै भी बोल़ाउई गौऐ? ⁴⁸ का सरदारु या फरीसिऊ मांझ़ीया कु कोइऐ भी तेस माथै विश्वास कियौ आ? ⁴⁹ पर इऐ लोग ज़ो कानून नाईं ज़ाणदै, शापित ई।” ⁵⁰ नीकुदेमुसै, ज़ो पैहलै तेस काऐ आशौ थौ और तिऊं मांझ़िआ कु एक थौ, तिणीऐ बोलौ, ⁵¹ “का आमरौ नियम केज़ै आदमी लै, ज़ेबी झ़ाऊं पैहलै तेसरी शुणीयौ सौमझ़ा नाईं लै कि सेऊ का कौरा आ, आरोपी चाणाई?” ⁵² तिउंऐ तेसलै ज़वाब दैऔ, “का तू भी गलीला कु ई? लोड़ और देख कि गलीला कु कोई भविष्यवक्ता परगट ता ना हुऔ।” ⁵³ तैबै सौबी आपणै-आपणै घौरै डेई गौऐ।

गाँदै कामा कौरणै वाल़ी लै माफी

¹ पर यीशु जैतूना री धारा दी डैऔ। ² दोउती सेऊ तौऐं परमेश्वरा रै घौरा दी आशौ; सारै लोग तेस काऐ आशै और सेऊ तिऊं लै शिक्षा दैंदै लागौ। ³ तैबै शास्त्री और फरीसीऐ एक छ़ेउड़ी आणी ज़ो गांदै काम कौरदी बारै पाकड़ुई गोई थी, और सै मांझ़ादी खौड़ी कौरीयौ यीशु लै बोलौ, ⁴ “ओ गुरु, ऐ छ़ेउड़ी गांदै कामा कौरदी बारै पाकड़ुई आ। ⁵ कानूना दी मूसै आमुलै हुकम दैऔ आ कि इणी छ़ेउड़ी ढ़ोल़ा कौरी ढोल़ीयाऊणी; आबै तू इऐं छ़ेउड़ी रै बारै दी का बोलाई?” ⁶ तिउंऐ तेस अज़माऊणा लै एज़ी बूश बोली ताकी तेस माथै गौलती लाइणा लै केज़ी बूश पाकड़ा। पर यीशु उटै पौड़ियौ औंउठी कौरी ज़बीना दी लिखदै लागौ। ⁷ ज़ैबै सै काठै-काठै पूछ़दै लागै, ता यीशुऐ सीधौ हुईयौ बोलौ, “तुमु मांझ़िया कु ज़ुण पापी नाईं आ, सेऊ पैहलै ईयां दी ढोल़ा री ला लौ।” ⁸ और तैबै उटै पौड़ीयौ ज़बीना दी लिखदै लागौ। ⁹ पर सै इणौ शुणियौ बौड़ै कु छ़ोटै झ़ाऊं, एक-एक कौरीऐ निकल़ी गौऐ, और यीशु ऐखुली रौई गौ। ¹⁰ यीशुऐ सीधौ हुईयौ तियांलै बोलौ, “ओ बौईण, सै कियै डेवै ई? का कोइऐ ताऊं माथै सौज़ा रौ हुकम नाईं दैऔ?” ¹¹ तिआऐं बोलौ, “ओ प्रभु, कोइऐ नाईं।” यीशुऐ बोलौ, “हाऊं भी ताऊं माथै सौज़ा रौ हुकम नाईं दैन्दौ; डेऊ, और दुजी बारै केभी भी पाप नाईं कौरणौ।”

यीशु दूनिया रौ प्याशौ

¹² यीशुऐ तौंइऐ लोगू लै बोलौ, “दुनिया रौ प्याशौ हाऊं ऊ; ज़ुण मूं पिछ़ू आशालौ सेऊ न्यारै दी नाईं औआलौ, पर ज़िन्दगी रौ प्याशौ पा लौ।” ¹³ फरीसिउऐ तेसलै बोलौ, “तू आपणी गवाही आपू दिआ ई, तेरी गवाही ठीक नाईं।” ¹⁴ यीशुऐ तिउंलै ज़वाब दैऔ, “अगर हाऊं आपणी गवाही आपू ई दिआऊ, तैबै भी मेरी गवाही ठीक आ, कैलैकि हाऊं ज़ाणाऊ कि हाऊं किदरा कु ऊ आशौ औन्दौ और केशी डिआऊ? पर तुमै नाईं ज़ाणदै कि हाऊं किदरा कु आशौ औन्दौ या कैशी डिआऊ। ¹⁵ तुमै शरीरा रै अनुसार फैसलौ कौराई; हाऊं कासी रौ फैसलौ नाईं कौरदौ। ¹⁶ और अगर हाऊं फैसलौ कौरुलौ भी, ता मैरौ फैसलौ सौच़ौ आ; कैलैकि हाऊं ऐखुली नाईं, पर हाऊं ऊ, और बाब आ ज़ुणिऐ हाऊं भेज़ौ औन्दौ ऊ। ¹⁷ तुमारै नियमा दी भी लिखौ औन्दौ आ कि दुई ज़ौणा री गवाही मिलियौ ठीक हुआ आ; ¹⁸ एक ता हाऊं आपणी गवाही आपू ई दिआऊ और दुजी बाब मेरी गवाही दिआ सा ज़ुणिऐ हाऊं भेज़ौ औन्दौ ऊ।” ¹⁹ तिउंऐ तेसलै बोलौ, “तैरौ बाब किऐ आ?” यीशुऐ ज़वाब दैऔ, “ना ता तुमै मूं ज़ाणदै और ना मैरौ बाब, अगर मूं ज़ाणाई ता मैरौ बाब भी ज़ाणाई।” ²⁰ ऐज़ी बुशै तिणीऐ परमेश्वरा रै घौरा दी शिक्षा दैंदी बारै नाज़ा रै गुदामा दी बोली ई, और कोइऐ सेऊ नाईं पाकड़ौ, कैलैकि तेसरौ बौक्त इबी झ़ाऊं नाईं आशौ थौ।

आपणै बारै दी यीशु रै बोलणौ

²¹ तिणीऐ तैबै तिउंलै बोलौ, “हाऊं डिआऊ, और तुमै मूं लोड़ाई और आपणै पापा दी मौराई; ज़िऐ हाऊं डिआऊ तिऐ तुमै नाईं आशी बौल़दै।” ²² एथ माथै यहूदिउऐ बोलौ, “का एऊ आपू ई झ़ांगिया मौरा; ज़िणौ एऊ बोला आ, ज़िऐ हाऊं डिआऊ तिऐ तुमै नाईं आशी बौल़दै’?” ²³ यीशुऐ तिउंलै बोलौ, “तुमै धौनी रै ई और हाऊं माथलौ ऊ; तुमै दुनिया रै ई पर हाऊं दुनिया रौ नाईं। ²⁴ एथीलै मूंइऐ तुमुलै बोलौ कि तुमै आपणै पापा दी मौरालै, कैलैकि अगर तुमै विश्वास नाईं कौरालै कि हाऊं सेऊ ऊ, ता आपणै पापा दी मौरालै।” ²⁵ तिउंऐ तेसलै बोलौ, “तू कुण आ?” यीशुऐ तिउंलै बोलौ, “सेऊ ऊ ज़ो तुमुकै पैहलै ओउलै ऊ बोलदै लागौ औन्दौ। ²⁶ तुमारै बारै दी मूंइऐ भौरी कुछ़ बोलणौ और फैसलौ कौरनौ आ; पर मैरौ भेज़णै वाल़ौ सौच़ौ आ, ज़ो मूंइऐ तेसकु शुणौ आ तेसी ई दुनिया कै बोलाऊ।” ²⁷ सै इणौ नाईं सौमझ़ै कि एऊ आमूं कै बाबा रै बारै दी बोलदै लागौ औन्दौ। ²⁸ तैबै यीशुऐ बोलौ, “ज़ेबी तुमै आदमी रौ छ़ोहरू ऊंच़ै माथै च़ड़ावालै, ता ज़ाणालै कि हाऊं सेऊ ऊ; हाऊं आपू ई कुछ़ नाईं कौरदौ पर ज़िणौ मैरै बाबै मुंकै शिखाऔ तिणी ई एज़ी बुशै बोलाऊ। ²⁹ मैरौ भेज़णै वाल़ौ मूं आइलै आ; तिणीऐ हाऊं एखुली नाईं छ़ाड़ौ कैलैकि हाऊं सौदा सेज़ौ काम कौराऊ ज़ेथ कौरी सेऊ खुश हुआ आ।” ³⁰ सेऊ एज़ी बुशै बोलदै ई थौ लागौ औन्दौ थौ कि भौरी आदमिउऐ तेस माथै विश्वास किऔ।

सच्च़ाई तुमु आज़ाद कौरा सा

³¹ तैबै यीशुऐ तिऊं यहूदिऊ लै बोलौ ज़ुणिऐ तेस माथै विश्वास किऔ थौ, “अगर तुमै मैरै वचना दी बौणी रौआलै, ता सौच़ी मैरै च़ेलै बौणाई। ³² तुमै सौच़ाई ज़ाणालै, और सौच़ाई तुमु आज़ाद कौरा आ।” ³³ तिउंऐ तेसलै ज़वाब दैऔ, “आमै ता अब्राहमा रै वंशा कु ई, और केबी भी कासी रै नुकुर नाईं हुऐ। तैबै तू किणौ बोलाई कि तुमै आज़ाद हुआई?” ³⁴ यीशुऐ तिउंलै ज़वाब दैऔ, “हाऊं तुमुलै सौच़ौ-सौच़ौ बोलाऊ कि ज़ुण-कुण पाप कौरा सेऊ पापा रौ नुकुर औआ। ³⁵ नुकुर सौदा घौरा दी नाईं रौइंदौ; छ़ोहरू सौदा रौआ आ। ³⁶ एथीलै अगर छ़ोहरु तुमु आज़ाद कौरालौ, ता सौच़ी तुमै आज़ाद हुआई। ³⁷ हाऊं ज़ाणाऊ कि तुमै अब्राहमा रै वंशा कु ई; तैबै भी मैरौ वचन तुमुरै ज़िवा दी ज़ागहा नाईं पाइंदौ, एथीलै तुमै मूं झ़ांगणौ च़ाहा ई। ³⁸ हाऊं तेसी ई बोलाऊ, ज़ो आपणै बाबा रै काऐ देखौ आ; और तुमै तेसी ई कौराई ज़ो तुमुऐ आपणै बाबा कु शुणौ आ।” ³⁹ तिउंऐ तेसलै ज़वाब दैऔ, “आमारौ बाब ता अब्राहम आ।” यीशुऐ तिउंलै बोलौ, “अगर तुमै अब्राहमा री सन्तान औलै, ता अब्राहमा ज़िणौ काम कौरा थै। ⁴⁰ पर आबै तुमै मूं ज़िणौ आदमी झ़ांगणौ च़ाहा ई, ज़ुणीऐ तुमुलै सेज़ौ सौच़ाई रौ वचन बोलौ ज़ो परमेश्वरा कु शुणौ; इणौ ता अब्राहमै नाईं किऔ थौ। ⁴¹ तुमै आपणै बाबा ज़िणौ काम कौराई।” तिउंऐ तेसलै बोलौ, “आमै गांदै कामा कु पैदै नाईं हुऐ, आमारौ एक बाबा आ मतलब कि परमेश्वर।” ⁴² यीशुऐ तिउंलै बोलौ, “अगर परमेश्वर तुमारौ बाब हूआ थौ, ता तुमै मूं आइलै प्यार कौरा थै; कैलैकि हाऊं परमेश्वरा री तौरफा कु आशौ औन्दौ ऊ। हाऊं आपू कु नाईं आशौ, पर तिणीऐ हाऊं भेज़ौ। ⁴³ तुमै मेरी बुशै कैलै नाईं समुझ़दै? एथीलै कि तुमै मैरौ वचन नाईं शुणी बौल़दै। ⁴⁴ तुमै आपणै बाब शैताना कु ई और आपणै बाबा री मौरज़ी पूरी कौरणी च़ाहा ई। सेऊ ता पैहलै कु खुनी आ और सेऊ सौच़ाई माथै नाईं टेकौ, कैलैकि सौच़ाई तेसदी आसती नाईं। ज़ेबी सेऊ झ़ूठ बोला आ, ता सेऊ आपणै स्वभाव कु बोला आ; कैलैकि सेउ झ़ूठौ आ और झ़ूठा रौ बाब आ। ⁴⁵ पर हाऊं ज़ो सौच़ौ बोलाऊ, एथीलै तुमै मैरौ विश्वास नाईं कौरदै। ⁴⁶ तुमु मांझ़ीआ कु कुण मूं पापी मानाई? अगर हाऊं सौच़ौ बोलाऊ, ता तुमै मैरौ विश्वास नाईं कौरदै? ⁴⁷ ज़ो परमेश्वरा कु हुआ सा, सेऊ परमेश्वरा री बुशै शुणा सा; और तुमै एथीलै नाईं शुणदै कि परमेश्वरा री तैरफा कु नाईं आ।”

यीशु और अब्राहम

⁴⁸ इणौ शुणिऔ यहूदिउऐ तेसलै बोलौ, “का आमै ठीक नाईं बोलदै कि तू सामरी ई, और ताऊंदी बुरी आत्मा आ?” ⁴⁹ यीशुऐ ज़वाब दैऔ, “मुंदी बुरी आत्मा नाईं आ; पर हाऊं आपणै बाबा री इज़्ज़त कौराऊ और तुमै मेरी बेइज्ज़ती कौराई। ⁵⁰ पर हाऊं आपणी पतिष्ठा नाईं च़ांहादौ; ओ एक आसती आ ज़ुण च़ाहा सा और फैसलौ कौरा सा। ⁵¹ हाऊं तुमुलै सौच़ौ-सौच़ौ बोलाऊ कि अगर केज़ौ आदमी मैरै वच़ना माथै च़ाला लौ ता सेऊ केबी भी ना मौरदौ। ⁵² यहूदिउऐ तेसलै बोलौ, “आबै आमुऐ ज़ाणी गौ कि ताऊंदी बुरी आत्मा सा। अब्राहम मौरी गौ आ, और भविष्यवक्ता भी गौऐ मौरी, और तू बोलाई ‘अगर कोई मैरै वचना माथै च़ालालौ ता सेऊ केबी भी मौरनै रौ स्वाद नाईं च़ाखालौ।’ ⁵³ आमारौ बाब अब्राहम ता गौ मौरी। का तू तेस कु बौड़ौ ई? और भविष्यवक्ता भी गौऐ मौरी। तु आपुलै का सौमझ़ाई?” ⁵⁴ यीशुऐ ज़वाब दैऔ, “अगर हाऊं आपणी महिमा कौरूलौ, ता मेरी महिमा कुछ़ नाईं पर मेरी महिमा कौरणै वाल़ौ मैरौ बाब आ, ज़ासलै तुमै बोलाई कि सेऊ तुमारौ परमेश्वर आ। ⁵⁵ तुमुऐ ता सेऊ नाईं ज़ाणौ; पर हाऊं तेस ज़ाणा ऊ। अगर हाऊं बोलु कि हाऊं तेस नाईं ज़ाणदौ तैबै हाऊं तुमु ज़िणौ झ़ुठौ बौणाऊ, पर हाऊं तेस ज़ाणाऊ और तेसरै वचना माथै च़ालाऊ। ⁵⁶ तुमारौ बाब अब्राहम मैरै दिना देखणे री आशी दी भौरी मौगन थौ; और तिणीऐ देखौ और खुश हुऔ।” ⁵⁷ यहूदिउऐ तेसलै बोलौ, “इबी झ़ाऊं ता तू पचास साला रौ भी नाईं, तैबै भी तांइऐ अब्राहम देखौ आ?” ⁵⁸ यीशुऐ तिउंलै बोलौ, “हाऊं तुमुलै सौच़ौ-सौच़ौ बोलाऊ, कि हाऊं अब्राहमा रै पैदै हुणै कु पैहले ऊ।” ⁵⁹ तैबै तिउंऐ तेसदी लाइणा लै पात्थर च़ुंगै, पर यीशु च़ोरुइयौ परमेश्वरा रै घौरा कु निकल़ी गौ।

ज़न्मा रै शेड़ै रौ औनेणौ

¹ डेउंदी बारै तिणीऐ एक आदमी देखौ ज़ुण जन्मा कु शेड़ौ थौ। ² तेसरै च़ेलेउऐ तेसकु पूछ़ौ, “ओ प्रभु, कुणिऐ पाप किऔ थौ कि एऊ शेड़ौ पैदौ हुऔ, इणी आदमिऐ या एसरै मां-बाबै?” ³ यीशुऐ ज़वाब दैऔ, “ना ता इणिऐ पाप किऔ थौ, ना ता एसरै मां-बाबै; पर एऊ एथीलै हुऔ कि परमेश्वरा रै काम एसदी परगट हुआ।” ⁴ ज़ुणिऐ हाऊं भेज़ौ औन्दौ ऊ, आमै तेसरै काम दिन ई दिना दी कौरणै ज़ुरुरी ई; सै राच आशणै वाल़ी आ ज़ेथदी कोई काम नाईं कौरी बौल़दै। ⁵ ज़ेबी झ़ाऊं हाऊं दूनिया दी ऊ तेबी झ़ाऊं हाऊं दूनिया रौ प्याशौ ऊ।” ⁶ इणौ बोलिऔ तिणीऐ ज़बीना दी थूकौ। और तेस थूका कौरी माटौ सीनौ किऔ, और सेऊ माटौ तेस शैड़ै री आखी दी लाइऔ, ⁷ तेसलै बोलौ, “डेऊ, शीलोह रै कुंऐ दी आखी धोऊ” (शीलोह रौ मतलब आ ‘भेज़ौ औन्दौ’ आ)। तिणीऐ डेइऔ आखी धोई, और देखदै हुइयौ वापीस आशौ। ⁸ तैबै पड़ोसी और ज़ुणिऐ सेऊ भीखा मांगदै देखौ थौ, बोलदै लागै, “का ऐऊ सेऊ नाईं, ज़ुण बोशिऔ भीख मांगा थौ?” ⁹ कुछ़ लोगुऐ बोलौ, “ऐऊ सेऊ ऊ आ; दूज़ेउऐ बोलौ, “नाईं, पर तेसी ज़िणौ कुण ओर आ।” तिणीऐ बोलौ, हाऊं सेऊ ऊ।” ¹⁰ तैबै सै तेसकु पुछ़दै लागै, “तेरी आखी किणै कौरी खुली ई?” ¹¹ तिणीऐ ज़वाब दैऔ, “यीशु नावां रै एकी आदमिऐ माटौ सीनौ किऔ, और मेरी आखी दी लाइऔ बोलौ, ‘शीलोह रै कुंऐ दी डेइऔ धोऊ,’ तैबै हाऊं डैऔ और आखी धोई और देखदै लागौ।” ¹² तिउंऐ तेसकु पूछ़ौ, “सेऊ किऐ आ?” तिणीऐ बोलौ, हाऊं नाईं ज़ाणदौ।”

फरीसिउ रै ज़रिए च़ंगाई रै बारै दी खोज़ खौबर

¹³ लोगुऐ सेऊ ज़ुण पैहलै शेड़ौ थौ फरीसिऊ काऐ नीं गौ। ¹⁴ ज़ेज़ै दिनै यीशुऐ माटौ सीनौ कौरियौ तेसरी आखी खोली थी, सेऊ साज़ै रौ दिन थौ। ¹⁵ तैबै फरीसिउऐ भी तेसकू पूछ़ौ कि तेरी आखी किणै कौरी खूली ई। तिणीऐ तिउंलै बोलौ, “तिणीऐ मेरी आखी दी माटौ लाऔ, तैबै मुंइऐ आखी धोई ई, आबै देखाऊ ऊ।” ¹⁶ एथ माथै कुछ़ फरीसी लोग बोलदै लागै, “एऊ आदमी परमेश्वरा री तौरफा कू नाईं, कैलैकि सेऊ साज़ै रौ दिन नाईं मानदौ।” दूज़ेउऐ बोलौ, “पापी आदमी इणै निशाण किणै कौरिऐ देखाल़ी बौल़ा आ?” और तिऊं मांझ़ीऐ फूट पौड़ी गोई। ¹⁷ तिउंऐ तेस शेड़ै आदमी लै तौइऐं बोलौ, “तिणीऐ तेरी आखी खोली गोई। तू तेसरै बारै दी का बोलाई?” तिणीऐ बोलौ, “सेऊ भविष्यक्ता आ।” ¹⁸ पर यहूदिऊ कै विश्वास नाईं हुऔ कि सेऊ शेड़ौ थौ और आबै देखा आ, ज़ेबी झ़ाऊं तिउंऐ तेसरै, ज़ासरी आखी खुली गोई थी, मां-बाप औटाइऔ ¹⁹ तिऊंकू पूछ़ौ, “का एऊ तुमुरौ छ़ोहरू आ, ज़ासलै तुमै बोलाई कि शेड़ौ पैदौ हुऔ थौ? तैबै आबै एऊ किणौ देखी बौल़ा आ?” ²⁰ तेसरै मां-बाबै ज़वाब दैऔ, “आमै ता ज़ाणी कि एऊ आमुरौ छ़ोहरू आ, और शेड़ौ पैदौ हुऔ थौ; ²¹ पर आमै इणौ नाईं ज़ाणदै कि आबै एऊ किणै कौरीऐ देखा आ, और ना इणौ ज़ाणदै कि कुणिऐ एसरी आखी खोली ई। एऊ स्याणौ आ; एसी कु पूछ़ौ; एऊ आपणै बारै दी आपू बोला आ।” ²² एज़ी बुशै तेसरै मां-बाबै एथीलै बोली कैलैकि सै यहूदिउ कु डौरा थै, कैलैकि यहूदी कौट्‌ठै हुई गौऐ थै कि अगर कोई बोला कि एऊ मसीह आ, ता धार्मिक खुम्बल़ी कु पोरु गाड़ी ई। ²³ एथीलै तेसरै मां-बाबै बोलौ, “एऊ बौड़ौ आ, एसी कु पूछ़ौ।” ²⁴ तैबै तिउंऐ तेस आदमी कु ज़ो शेड़ौ थौ, दूज़ी बारै औटाइऔ तेसलै बोलौ, “परमेश्वरा री बौड़ाई कौर। आमै ता ज़ाणी कि सेऊ आदमी पापी आ।” ²⁵ तिणीऐ ज़वाब दैऔ, “हाऊं नाईं ज़ाणदौ कि सेउ पापी आ कि नाईं; हाऊं एक ही बूश ज़ाणाऊ कि हाऊं शेड़ौ थौ और आबै देखाऊ।” ²⁶ तिउंऐ तेसलै तौइऐं बोलौ, “तिणीऐ ताऊं आइलै का किऔ? और किणै कौरी तेरी आखी खोली?” ²⁷ तिणीऐ तिउंलै बोलौ, ”मुंइऐ ता तुमुलै बोली गौ आ, और तुमुऐ नाईं शुणौ; आबै दूज़ी बारै कैलै शुणनौ च़ाहा इ? का तुमै भी तेसरै च़ेलै हुणौ च़ाहा ई?” ²⁸ तैबै सै तेस लै बुरौ-भौलौ बोलिऔ बोलदै लागै, “तू ई तेसरौ च़ेलौ, आमै ता मूसा रै च़ेलै ई। ²⁹ आमै ज़ाणी कि परमेश्वरै मूसा आईलै बुशै लाई; पर एस आदमी नाईं ज़ाणदै कि एउ किदलौ आ।” ³⁰ तिणीऐ तिऊं लै ज़वाब दैऔ, “एज़ी ता हैरानी री बूश आ कि तुमै नाईं ज़ाणदै कि सेऊ किदलौ आ, तैबै भी तिणीऐ मेरी आखी खोली गोई। ³¹ आमै ज़ाणी कि परमेश्वर पापीऊ री नाईं शुणदौ, पर अगर कोई परमेश्वरा रौ भौगत आ और तेसरी मौरज़ी माथै हाण्डा आ, ता सेउ तेसरी शुणा आ। ³² इऐं दुनिया दी पहला ओउलै केबी भी शुणना लै नाईं आशौ कि कुणिऐ पैदाइशी कु शेड़ै री आखी खोली ई। ³³ अगर एऊ आदमी परमेश्वरा री तौरफा कु नाईं औलौ, ता कुछ़ भी नाईं कौरी बौल़ा थौ।” ³⁴ तिउंऐ तेसलै ज़वाब दैऔ, “तू ता बिल्कुल ई पापा दी पैदौ हुऔ ई, तू आमूंलै का शिखावा इ?” और तिउंऐ सेउ बाइरै गाड़ी गौ।

आत्मा कु शेड़ौ

³⁵ यीशऐ शुणौ कि तिउंऐ सेऊ बाइरै गाड़ी गौ आ, और ज़ेबी सेऊ मिलौ ता तेसलै बोलौ, “का तू परमेश्वरा रै छ़ौहरु माथै विश्वास कौरा ई?” ³⁶ तिणीऐ ज़वाब दैऔ, “ओ प्रभु, सेऊ कुण आ, कि हाऊं तेस माथै विश्वास कौरु?” ³⁷ यीशुऐ तेसलै बोलौ, “ताइंऐ सेऊ देखौ भी आ, और ज़ुण ताऊं आईलै बुशै लाईंदै आ लागौ औन्दौ सेऊ आ।” ³⁸ तिणीऐ बोलौ, “ओ प्रभु, हाऊं विश्वास कौरा ऊ।” और तेसलै ढाल की ई। ³⁹ तैबै यीशुऐ बोलौ, “हाऊं एस संसारा दी फैसलौ कौरदै ऊ आशौ औन्दौ ताकी ज़ुण नाईं देखदै सै देखा और ज़ुण देखा आ सै शेड़ै औआ।” ⁴⁰ ज़ुण फरीसी तेस आइलै थै तिउंऐ एज़ी बुशै शुणीयौ तेसलै बोलौ, “का आमै भी शेड़ै ई?” ⁴¹ यीशुऐ तिउंलै बोलौ, “अगर तुमै शेड़ै औलै ता पापी नाईं उआ थै पर आबै बोलाई कि आमै देखी ई, एथीलै तुमारै पाप बौणी रौआ ई।

भेराल़डु और भेरी रौ औनैणौ

¹ “हाऊं तुमुलै सौच़ौ-सौच़ौ बोलाऊ कि ज़ुण-कुण दारा बाटिऐ भेरी रै बाड़ै दी नाईं आशा लौ, पर औरकेशि यालै आशा लौ, सेऊ च़ोर और डाकू आ। ² पर ज़ुण दारा बाटिऐ भीतरै आशा ता सेऊ भेरी रौ भेराल़ड़ु आ। ³ तेसलै दारा खोलणै वाल़ै दार खोला ई, और भेरी तेसरी बाच़ शुणाई ई, और सेऊ आपणी भेरीउ लै नावां कौरीऐ औटाया और बाइरै नियां आ। ⁴ ज़ेबी सेउ आपणी सारी भेरी बाइरै च़ौराउणा लै गाड़ा सा, ता तिऊंकु औगाड़ी-औगाड़ीऐ आण्डा सा, और भेरी तेस आइलै पिछ़ाड़ी-पिछ़ाड़ी हुआई, कैलैकि सै भेरी तेसरी बाच़ पराणा ई। ⁵ पर सै बिगानै पीछ़ु नाईं डेउंदी, और तेसकु ओरु-पोरु भागाई, केलैकि सै ओरी री बाच़ नाईं पराणदी।” ⁶ यीशुऐ तिउंलै एऊ औनैणौ दैऔ आ, पर सै नाईं सौमझ़ै कि ऐज़ी का बुशै ई ज़ो आमुं आइलै बोला आ।

यीशु आच्छ़ौ भेराल़डु

⁷ तैबै यीशुऐ तिउंलै तौइंऐ बोलौ, “हाऊं तुमु आइलै सौच़ौ-सौच़ौ बोलाऊ, भेरी रौ दार हाऊं ऊ। ⁸ ज़ेती मुंकु पैहलै आशे ई सै सारै च़ोर और ड़ाकू ई, पर भेरीउऐ तिउंरी नाईं शुणी। ⁹ दार हाऊं ऊ; अगर कुण मुं आइलै भितरै आशा लौ, ता छ़ुटकारौ पा लौ, और भितरै-बाइरै आशदै डेउंदै थाका लौ तेसलै घास मिला। ¹⁰ च़ोर केज़ै दुजै कामा लै नाईं पर सिर्फ च़ोरी कौरदै और झ़ांगदै और नाश कौरदै आशा आ; हाऊं ऐथलै आशौ ऊ कि सौबी लै जिन्दगी मिला, और भौरी मिला। ¹¹ आच़्छ़ौ भेराल़ड़ु हाऊं ऊ; आच़्छ़ौ भेराल़डु भेरीऊ लै आपणी ज़ान दिआ आ। ¹² ज़ो नुकुर औआ सेऊ ना ता भेराल़डु आ और ना भेरी रौ मालिक आ, शाल़टौ आशदै देखिऔ भेरी छ़ाड़िऔ भागा आ; और शाल़टौ तिऊं भेरी पाकड़ा और तितर-बितर कौरा आ। ¹³ सेऊ एथीलै भागा आ कि सेऊ नुकुर आ, और तेसकै भेरी री फिकर नाईं आसती। ¹⁴ आच्छ़ौ भेराल़ड़ु हाऊं ऊ; हाऊं आपणी भेरी ज़ाणाऊ, और मेरी भेरी मुं ज़ाणा ई। ¹⁵ ज़िणौ बाब मुं ज़ाणा आ और हाऊं बाब ज़ाणाऊ और हाऊं आपणी भेरी लै आपणी ज़ान दिआऊ। ¹⁶ मेरी तौइंऐ भी भेरी ई, ज़ो एस बाड़ै री नाईं ई। मुं सै भी आणनी ज़ुरुरी ई। सै मेरी बाच़ शुणाली, तैबै एका शाल़ और एका भेराल़ड़ु हुआ। ¹⁷ बाब एथीलै मुं आइलै प्यार छ़ाड़ा आ कैलैकि हाऊं आपणै प्राण दिआऊ कि तेस तौइंऐ वापिस नीऊं। ¹⁸ कोई तेस प्राण मुकु नाईं छ़ुड़ाउंदौ, पर हाऊं आपू ई दिआऊ, मुकै तेस प्राण देणै रौ भी हक आ और, तेस नीणा रौ भी हक आ: एज़ौ हुकम मैरै बाबा कु आ मुलै मिलौ औन्दौ।” ¹⁹ इऊं बुशु कौरीऐ यहूदिउ दी आपु मांझ़िऐ फूट पौड़ी गोई। ²⁰ तिऊं मांझ़िउ कु भौरी ज़ौणै बोलदै लागै, “तेसदी बुरी आत्मा आ, और सेऊ पागल आ; तेसरी कैलै शुणाई?” ²¹ ओरी लोगुऐ बोलौ, “एज़ी बुशै इणै आदमी री नाईं ज़ासदी बुरी आत्मा आ। का बुरी आत्मा शेड़ै री आखी खोली बौल़ा आ?”

यहूदिउ रौ अविश्वास

²² यरुश्लेमा दी स्थापना रौ साज़ौ हुऔ; और हिऊंदा रौ मौसम थौ। ²³ यीशु परमेश्वरा रै घौरा दी सुलैमाना री ओसारै तौंगा दी घूमदै थौ लागौ औन्दौ। ²⁴ तैबै यहूदिउऐ सेऊ आशियौ घेरौ और पूछ़ौ, “तू आमरौ ज़िऊ केबी झ़ाऊं शौखा दी छ़ाड़ाई? अगर तू मसीह ता आमुं आइलै साफ-साफ बोल।” ²⁵ यीशुऐ तिउंलै ज़वाब दैऔ, “मुइंऐ तुमुलै बोली गौ पर तुमै विश्वास ई ना कौरदै। ज़ो काम हाऊं आपणै बाबा रै नावां कौरीऐ कौराऊ सै काम ई मैरै गवाह ई, ²⁶ पर तुमै एथीलै विश्वास नाईं कौरदै कैलैकि तुमै मेरी भेरी मांझ़िया कु नाईं आसती। ²⁷ मेरी भेरी मेरी हाक शुणा ई; हाऊं तिऊं ज़ाणाऊं, और सै मुं पीछ़ु-पीछ़ु आण्डा ई; ²⁸ और हाऊं तिउंलै सौदा री ज़िन्दगी दिआऊ। सै केबी भी नाश नाईं औआ ली, और कोई तिऊं मेरै हाथा कु नाईं छ़ुड़ाउंदौ। ²⁹ मैरौ बाब, ज़ुणिऐ सै मुंकै देई ऐन्दी ई, सारेऊ कु बौड़ौ आ और कोई तिऊं बाबा रै हाथा कु नाईं छ़ुड़ाई बौल़दौ। ³⁰ हाऊं और मैरौ बाब एका ई।” ³¹ यहूदिउऐ तेसदी पात्थरै लाइणा लै तौइंऐ पात्थर च़ुंगै। ³² एथ माथै यीशुऐ तिउंलै बोलौ, “मुंइऐ तुमु कै बाबा री तौरफा कु भौरी भौलै काम देखाल़ै ई; तिऊं मांझ़िआ कु केज़ै कामा लै तुमै मुंदी पात्थरै लाआ ई?” ³³ यहूदिउऐ तेसलै ज़वाब दैऔ, “भौलै कामा लै आमै ताऊंदी पात्थरै नाईं लाइंदै पर परमेश्वरा री बुराई कौरना लै; और एथलै कि तू आदमी हुईयौ आपू ई परमेश्वर बौणाई।” ³⁴ यीशुऐ तिउंलै ज़वाब दैऔ, “का तुमारै कानूना दी नाईं आ लिखौ औन्दौ, ‘मुंइऐ बोलौ, तुमै ईश्वर ई’? ³⁵ अगर तिणीऐ तिउंलै ईश्वर बोलौ ज़ास काऐ परमेश्वरा रौ वचन पौउंच़ौ (और पवित्र शास्त्रा री बूश गौलत नाईं हुई बौल़दी), ³⁶ ता ज़ुण बाबै पवित्र चाणीयौ दुनिया दी भेज़ौ आ, तुमै तेसलै बोलाई, ‘तू बुराई कौरा ई,’ एथीलै कि मुइंऐ बोलौ, ‘हाऊं परमेश्वरा रौ छ़ोहरु ऊ’? ³⁷ अगर हाऊं बाबा रौ काम नाईं कौरदौ, ता मैरौ विश्वास नाईं कौरौ। ³⁸ पर अगर हाऊं कौरा ऊ, ता च़ाऊ मैरौ विश्वास नाईं भी कौरौ; पर तिऊं कामा रौ ता विश्वास कौरौ, ताकी तुमै ज़ाणा और सौमझा कि बाब मुंदी आ और हाऊं बाबा दी।” ³⁹ तैबै तिउंऐ तौइंऐ तेस पाकुड़नै री कोशिश की पर सेऊ तिंउरै हाथा कु निकल़ी गौ। ⁴⁰ तैबै सेऊ यरदना कु पार सेज़ी ज़ागहा दी डेई गौ, ज़िऐ यहून्ना पैहलै बपतिस्मा दिआ थौ, और तिऐ रौ औ। ⁴¹ भौरी लोग तेस काऐ आशियौ बोला थै, “यहून्नै ता कोई च़िन्ह नाईं देखाऐ, पर ज़ो कुछ़ यूहन्नै एसरै बारा दी बोलौ थौ, सेऊ सारौ सौच़ौ थौ।” ⁴² और तिऐ भौरी लोगुऐ यीशु माथै विश्वास कियौ।

लाज़रा रौ मौरणौ

¹ मरियम और तियांरी बौईण मारथा रै गाऊं बैतनिय्याह रौ लाज़र नावां रौ एक आदमी बिमार थौ। ² इऐ सेज़ी मरियम थी ज़ुणीऐ प्रभु तौल़ै तेल पाईयौ तेसरै बांगणै आपणै बाल़ा कौरी गुशै थै, ईयांरौ भाई लाज़र बिमार थौ। ³ तैबै तियांरी बौईणीऐ तेस औटाउणा लै आदमी भेज़ीऔ बोलौ, “ओ प्रभु, देख,ज़ास आइलै तु प्यार छ़ाड़ाई, सेऊ बिमार आ।” ⁴ इणै शुणीऔ यीशुऐ बोलौ, “एज़ी बिमारी मौरनै री नाईं; पर परमेश्वरा री बौड़ाई लै आ, कि तेथ कौरी परमेश्वरा रै छ़ोहरु री बौड़ाई औआ।” ⁵ यीशु ता मारथा और तियांरी बौईण और लाज़रा कु प्यार कौरा थौ। ⁶ तैबै भी ज़ेबी तिणीऐ शुणौ कि सेऊ बिमार आ, ता ज़ेजी ज़ागाह दी सेऊ थौ, तिऐ दुई दिन औज़ौ रुकी गौ। ⁷ तेत बासीऐ तिणीऐ आपणै च़ेलेऊ लै बोलौ, “च़ालौ, आमै तौइंऐ यहुदिया लै डेई।” ⁸ च़ेलेऊऐ यीशु लै बोलौ, “ओ रब्बी, इबी ता यहूदी ताऊं ढोल़ीयाउणौ च़ाहा थै, आबै का तू औज़ौ भी तिऐ डिआ ई?” ⁹ यीशुऐ ज़वाब दैऔ, “का दिना रै बारह घंटै नाईं औन्दै? अगर कुण दुसै हाण्डा लौ, ता ठोकर नाईं लागदी, कैलैकि सेऊ इऐं धौतरी रौ प्याशौ देखा आ। ¹⁰ पर अगर कुण राच़ी हाण्डा लौ ता ठोकर लागा आ, कैलैकि तेथदी प्याशौ नाईं आ।” ¹¹ एज़ी बुशै बोलणै बासीऐ तिणीऐ तिउंलै बोलौ, “आमारौ गोष्टण लाज़र सुती गौ आ, पर हाऊं तेस उज़ीयाउंदै डिआ आ।” ¹² तैबै च़ेलेऊऐ यीशुलै बोलौ, “ओ प्रभु, अगर सेऊ सुती गौ आ, ता च़ांगौ औआ सा।” ¹³ यीशुऐ ता तेसरै मौरनै रै बारै दी बोलौ थौ, पर सै सौमझ़ै कि सेऊ निजा दी सुतणै रै बारै दी बोलौ। ¹⁴ तैबै यीशुऐ तिउंकै साफ-साफ बोली गौ, “लाज़र मौरी गौ आ; ¹⁵ और हाऊं तुमुरै कारण खुश ऊ कि हाऊं तिऐ नाईं थौ ज़ेथकु तुमै विश्वास कौरा। पर आबै च़ालौ, आमै तेस काऐ डेई।” ¹⁶ तैबै थोमै ज़ासलै दिद्‌मुस भी बोला थै, आपणै साथी च़ेलेऊलै बोलौ, “च़ालौ, आमै भी एस आइलै मौरदै डेई।”

यीशु रौ दूजी बारै जिंऊँणौ और ज़िन्दगी

¹⁷ तिऐ पौउंच़िऔ यीशु कै पौतौ लागौ कि लाज़र ओडाच़ी दी छ़ाड़ीऔ च़ार दिन हुई गौऐ ई। ¹⁸ बेतनिय्याह यरुश्लेमा कु कोई दुई मील दूर थौ। ¹⁹ भौरी यहुदी लोग मार्था और मरियमा काऐ तिंउरै भाई रौ पसताऔ दैंदै थै आशै औन्दै। ²⁰ ज़ेबी मार्थै यीशु रै आशणे री खौबर शुणी ता सै तेस मिलदै डेई, पर मरियम रौई घौरा कै बोशी। ²¹ मार्थै यीशु लै बोलौ, “ओ प्रभु, अगर तू इदै औआ थौ, ता मैरौ भाई नाईं मौरा थौ। ²² और इबी भी हाऊं ज़ाणाऊ कि ज़ो कुछ़ तु परमेश्वरा कु मांगा लौ, परमेश्वर ताउंलै दिआ आ।” ²³ यीशुऐ तिआं लै बोलौ, “तैरौ भाई तौइंऐ ज़िउंदौ औआ आ।” ²⁴ मार्थै यीशु लै बोलौ, “हाऊं ज़ाणाऊ कि आखरी दिना दी मौरनै बासिऐ ज़िउणै रै बौग्तै सेऊ ज़िउंदौ औआ।” ²⁵ यीशुऐ तियांलै बोलौ, “मौरणै बासिऐ रौ ज़िउणौ और ज़िन्दगी हाऊं ऊ। ज़ुण मूं माथै विश्वास छ़ाड़ा आ, अगर सेऊ मौरा भी लौ, तैबै भी ज़िउंदौ औआ, ²⁶ ज़ुण ज़िउंदे ई और मुं माथै विश्वास छ़ाड़ा ई, सै केबी भी ना मौरदै। का तू एज़ी बुशा माथै विश्वास कौरा ई?” ²⁷ तिआंऐ य़ीशुलै बोलौ, “ओ प्रभु, हाऊं विश्वास कौराऊ कि परमेश्वरा रौ छ़ोहरु मसीहा आ ज़ुण धौतरी माथै आशणै आल़ौ थौ सेऊ तू ई।

यीशु लेरौ

²⁸ इणै बोलीऔ सै डेई गोई, और आपणी बौईंण मरियम औटाइऔ च़ुटुकच़ार बोलौ, “गुरु इदरी आ और ताऊं औटावा आ।” ²⁹ इणै शुणीऔ सै फेटी उठीयौ तेस काऐ आशी। ³⁰ यीशु इबी झ़ाऊं गावां दी नाईं पौऊंच़ौ थौ पर सेज़ी ज़ागाह दी थौ ज़िऐ मार्था तेस कु मिली थी। ³¹ तैबै ज़ो यहुदी तिआं आईलै घौरा दी थै और तियांलै पसताऔ दैंदै थै आशै औन्दै, ज़ेबी तिउंऐ देखौ कि मरियम फेटी उठीयौ बाइरै डेई गोई ता इणै सौमझ़िऔ कि सै औड़ाच़ी दी लेरदै डिआ सा, ता तिआं पीछ़ु डेई गौऐ। ³² ज़ेबी मरियम तिऐ पौउंच़ी ज़िऐ यीशु थौ ता तेस देखीऔ ई तेसरै बांगणै माथै पौड़ी और बोलौ, “ओ प्रभु, अगर तू इदै औआ थौ, ता मैरौ भाई नाईं मौरा थौ।” ³³ ज़ेबी यीशुऐ सै और तिआं आइलै आशै औन्दै यहुदी लोग, लेरदै देखै, ता सेऊ आत्मा दी उदास और भौरी दुखी हुऔ, ³⁴ और बोलौ, “तुमुऐ सेऊ किऐ आ छ़ाड़ौ औन्दौ?” तिउंऐ तेसलै बोलौ, “ओ प्रभु, हाण्डियौ देख।” ³⁵ यीशु लेरौ। ³⁶ तैबै यहूदी बोलदै लागै, “देखौ, एऊ तेस आइलै केती प्यार कौरा थौ।” ³⁷ पर तिऊं मांझ़िऐ कई लोगुऐ बोलौ, “का एऊ ज़ुणिऐ शेड़ै री आखी खोली, इणौ भी नाईं कौरी बौल़ौ कि एऊ आदमी नाईं मौरा?”

लाज़र ज़िउँदौ कौरणौ

³⁸ यीशु तौइंऐं ज़िवा कु भौरी दुखी हुईयौ औडाच़ी काऐ आशौ। सेऊ एक ढवार थौ और तेस माथै एक पात्थर थौ छ़ाड़ौ औन्दौ। ³⁹ यीशुऐ बोलौ, “एस पात्थर पोरु कौरौ।” तेस मौरै औन्दै री बौईंण मार्थै तेसलै बोलौ, “ओ प्रभु, एथकु ता आबै बास आशा आ, कैलैकि एस मौरीऔ आबै च़ार दिन हुई गौऐ ई।” ⁴⁰ यीशुऐ तिआंलै बोलौ, “का मुंइऐ ताउंलै नाईं बोलौ थौ कि अगर तू विश्वास कौराली, ता परमेश्वरा री बौड़ाई देखाली।” ⁴¹ तैबै तिउंऐ सेऊ पात्थर तिदरा कु पोरु कियौ। यीशुऐ आखी उठाइयौ बोलौ, “ओ बाब, हाऊं तैरौ धन्यावाद कौराऊ कि ताइंऐ मेरी शुणी गोई आ। ⁴² हाऊं ज़ाणा थौ कि तू सौदा मेरी शुणा ई, पर ज़ो भीड़ ओरु-पोरु खौड़ी आ, तिउंरी बजह कु मुंइऐ इणौ बोलौ आ, ज़ेथ कौरी इऐ विश्वास कौरा कि ताइंऐ हाऊं भेज़ौ ऊ।” ⁴³ इणौ बोलीऔ यीशुऐ ज़ौरै हाका देइयौ बोलौ, “ओ लाज़र, निकल़ियौ आश!” ⁴⁴ ज़ुण मौरी गौ थौ, सेऊ कफना कौरी हाथा लाता कु बानुऔ औन्दौ निकल़ियौ आशौ, और तेसरौ मूं थौ काप़ड़े दी मेटुऔ औन्दौ। यीशुऐ तिउंलै बोलौ, एस पोरु खोलौ और डेउणै दैऔ।”

यीशु रै बिरोधा दी यीशु पकुड़ना लै च़ाल

(मती261-5; मरकुस14:1, 2; लूका22:1, 2)

⁴⁵ तैबै ज़ुण यहुदआ मरियमा काऐ थै आशै औन्दै और ज़ुणीऐ तेसरौ एज़ौ काम देखौ थौ, तिऊं माझ़िआ कु भौरी लोगुऐ तेस माथै विश्वास कियौ। ⁴⁶ पर तिऊं मांझ़िआ कु कुछ़ लोगुऐ फरीसिउ काऐ डेइयौ यीशु रै कामा रै बारै दी बोलौ। ⁴⁷ एथीलै प्रधान याजकुऐ और फरीसिउऐ बौड़ी खुम्बल़ी औटाई और बोलौ, “आमै कौरी का ई? एऊ आदमी ता भौरी निशाण देखाल़ा आ। ⁴⁸ अगर आमै एस इणी छ़ाड़ु लै, ता सारै तेस माथै विश्वास कौरा, और रोमी राज़ आशियौ आमारी ज़ागाह और ज़ाती, दुइया माथै राज़ कौरा।” ⁴⁹ तैबै तिऊं माझ़िआ कु काइफा नावां रै एकी आदमीऐ ज़ुण सेज़ी साला दी बौड़ौ याजक थौ, बोलौ, “तुमै कुछ़ भी नाईं ज़ाणदै; ⁵⁰ और ना इणौ सौमझ़दै कि तुमुलै इणौ भौलौ आ कि आमारै लोगु लै एक आदमी मौरा, और सारी ज़ाती नाश ना औआ।” ⁵¹ एज़ी बुशै तिणीऐ आपणी तौरफा कु नाईं बोली, पर सेज़ी साला रै बौड़ै याजक हुइऔ भविष्यदवाणी की, कि यीशु तियां ज़ाती लै मौरा; ⁵² और ना सिर्फ तिआं ज़ाती लै पर ऐथलै भी कि परमेश्वरा री भटकी ऐन्दी सन्तान कौट्ठै कौरा। ⁵³ सेज़ै दिना कु सै तेस झ़ागणै री कौशीश कौरदै लागै। ⁵⁴ एथीलै यीशु तेभी कु यहूदीऊ मांझ़ीऐ पौगड़ै हुईयौ नाईं हान्डौ, पर तिदरा कु डेइऔ जांगल़ा रै नज़दीका रै परदेशा दी इफ्राईम नावां रै एकी इलाकै दी डैऔ; और आपणै च़ेलेऊ आइलै तिदरी रौइंदै लागौ। ⁵⁵ यहूदीऊ रै फसला रौ साज़ौ नज़दीक थौ, और भौरी लोग साज़ै कु पैहलै गावां कु यरुश्लेमा लै डेवै ताकी आपू शुद्ध हुआ। ⁵⁶ तैबै सै यीशु लोड़दै लागै और परमेश्वरा रै घौरा दी खौड़ै हुइऔ आपु मांझ़ीऐ बोलदै लागै, “तुमै का सुंच़ाई? का सेउ साज़ै दी नाईं आशदौ?” ⁵⁷ परधान याजक और फरीसिउऐ एज़ौ हुकम थौ दैऔ औन्दौ कि अगर कासकै इणौ पौतौ लागालौ कि यीशु किऐ आ, ता आमुकै बोलेऊ, ताकी आमै तेस पाकड़ी बौल़ु।

यीशु रै बाँगणेउ दी खुशबूदार तेल पाईणौ

(मती26:6-13; मरकुस14:3-9)

¹ यीशु साज़ै रै छ़ौ दिन पैहलै बैतनिय्याह दी आशौ ज़िऐ लाज़र थौ, ज़ो यीशुऐ ज़िउंदौ कियौ थौ। ² तिऐ तिउंऐ तेसलै रोटी तैयार की; और मार्था थी सेवा कौरदै लागी ऐन्दी, और लाज़र तिऊं मांझ़ीऐ एक थौ ज़ुण तिऊं आइलै रोटी खान्दै थौ बोशौ औन्दौ। ³ तैबै मरियमै जटामांसी रौ आधौ सेर भौरी किमती तेल आणीऔ यीशु री लाता माथै पाऔ, और आपणै बाल़ा कौरी तेसरै लात गुशै; और तेला री खुशबु कौरी घौर खुशबुदार हुई गौ। ⁴ पर यीशुरै च़ेलेऊ मांझ़ीआ कु यहुदा इस्करियोती नावां रौ एक च़ेलौ ज़ुण तेस पकड़ाउणौ च़ाह थौ, बोलदै लागौ, ⁵ “एऊ तेल चिन शौ दिनारा दी बेच़ीऔ गरीबु लै कैलै ना दैऔ औल़ौ?” ⁶ तिणीऐ एज़ी बूश एथकु ना बोली भी नाईं कि तेसकै गरीबु री ज़ौरी थी पर ऐथलै कि सेऊ च़ोर थौ, और तेसकै पैसेऊ रौ बैग हुआ थौ और तेथदी ज़ो कुछ़ पा थै, सेउ गाड़ा थौ तेथकु पोरु। ⁷ यीशुऐ बोलौ, “तेस रौअणै दैऔ। तेस मैरै मौरणा रै दिना लै छ़ाड़नै दैऔ। ⁸ कैलैकि गरीब ता सौदा तुमु आइलै रौआ ई,आ साीब ता सौदा तुमु आईरौआणिरोटी खान्दै थौ बोशौ औन्दौ पर हाऊं तुमु आइलै सौदा नाईं रौऊंदौ।” ⁹ ज़ैबै यहूदिऊ री बौड़ी भीड़ा कै पौतौ लागी गौ कि सेऊ तिऐ आ, ता सै सिर्फ यीशु री वजह कु नाईं आशै पर ऐथलै भी कि लाज़र देखा, ज़ो यीशुऐ मौरै औन्दै मांझ़िआ कु ज़िउंदौ कियौ थौ। ¹⁰ तैबै परधान याजक लाजरा झ़ांगणै री भी कोशिश कौरदै लागै। ¹¹ कैलैकि लाज़रा री वजह कु भौरी यहुदी डेई गौऐ और यीशु माथै विश्वास कियौ। ¹² दुज़ै दिनै भौरी लोगुऐ ज़ो साज़ै दी थै आशै औन्दै, इणौ शुणीऔ कि यीशु यरुश्लेमा लै आ आशदै लागौ औन्दौ। ¹³ तैबै तिउंऐ खजूरा री डाल़ी नीं ई और तेसकु मिलदै डेवै, और हाकै देइयौ बोलदै लागै, “होसाना! आशीष वाल़ौ आ इस्राइला रौ राज़ौ, ज़ो प्रभु रै नावां कौरी आशा आ।” ¹⁴ ज़ेबी यीशु कै गादै रौ गदेटु मिलौ; ता सेउ तेस माथै बोशौ, ज़िणौ लिखौ औन्दौ आ, ¹⁵ “ओ सिय्योना री छ़ोटूड़, “नाईं डौर;bदेख, तैरौ राज़ौ गदेटु माथै बोशीऔ आ आशदै लागौ औन्दौ।” ¹⁶ तेसरै च़ेलै पैहलै ता एज़ी बुशै नाईं सौमझ़ै, पर ज़ेबी यीशु री महिमा परगट हुई ता तिउंकै याद आशी कि एज़ी बुशै तेसरै बारै दी थी लिखी ऐन्दी और लोगुऐ तेस आईलै तिणौ बरताव किऔ थौ। ¹⁷ तैबै भीड़ा रै तिऊं लोगुऐ गवाही देई, ज़ुण लोग तेस आइलै थै ज़ेबी तिणीऐ लाज़र ओड़ाच़ी कु औटाइऔ मौरे औन्दै कु ज़िउंदौ किऔ थौ। ¹⁸ एथी री वजाह कु लोग तेस मिलदै थै आशै औन्दै कैलैकि तिउंऐ शुणौ थौ कि यीशुऐ एउ चमतकार देखाल़ौ आ, ¹⁹ तैबै फरीसिउऐ आपु मांझ़ीऐ बोलौ, “सुंच़ौ ता ठीक कि तुमुकै कुछ़ नाईं बौणदौ। देखौ, धौतरी रै लोग तेस पीछ़ु च़ाल पौड़ी गौऐ।” ²⁰ ज़ुण लोग तेस साज़ै दी आराधना कौरदै आशै थै तिऊं मांझ़िआ कु कुछ़ यूनानी थै। ²¹ तिउंऐ गलीला रै बैतसैदा दी रौइणै वाल़ै फिलिप्पुसा काऐ आशीऔ तेसकु औरज़ की, ‘ओ फिलिप्पुस, आमै यीशु कु मिलणौ च़ाहई।” ²² फिलिप्पुसै आशिऔ अन्द्रियासा कै बोलौ, तैबै अन्द्रियास और फिलिप्पुसै डेइऔ यीशु कै बोलौ। ²³ एथ माथै यीशुऐ तिउंलै बोलौ, “सेज़ौ बौग्त आशी गौ आ कि आदमी रै छ़ोहरु री बौड़ाई औआ। ²⁴ हाऊं तुमुकै सौच़ौ-सौच़ौ बोलाऊ कि ज़ेबी झ़ाऊं गीऊं रौ दाणौ ज़मीना दी पौड़ीऔ मौरदौ नाईं, तेभी झ़ाऊं सेऊ ऐखुली रौआ आ; पर ज़ेबी मौरा आ, ता भौरी फल़ आणा आ। ²⁵ ज़ुण आपणै प्राण प्यारै समझ़ा आ, सेउ तेस पोरु औरावा आ; और ज़ुण इऐं धौतरी दी आपणै प्राण प्यारै नाईं सौमझ़दौ, सेऊ सौदा री ज़िन्दगी झ़ाऊं तेस बौच़ावा आ। ²⁶ अगर कुण मेरी सेवा कौरा आ, ता मूं पीछ़ु हाण्डा लौ; और ज़िऐ हाऊं ऊ, तिऐ मैरौ सेवक भी हुआ। अगर कुण मेरी सेवा कौरा, ता बाब तेसरी ईज़्ज़त कौरा आ। ²⁷ “आबै मैरौ ज़िऊ बेचैन आ। एथीलै आबै हाऊं का बोलु? ‘ओ बाबा, मूं एज़ै बौग्ता कु बच़ाऊ?’ कैलैकि हाऊं ऐथीरी वज़ाह कु इदै पौउंच़ो ऊ। ²⁸ ‘ओ बाबा, आपणै नावां री बौड़ाई कौर।” तैबै सौरगा कु एक हाक शुणुई, “कि मुंइऐ तेसरी बौड़ाई की आ, और औज़ौ भी कौराऊ।” ²⁹ तैबै ज़ुण लोग खौड़ै हुइयौ शुणदै थै लागै औन्दै तिउंऐ बोलौ कि सौरग गुड़ौ। ओरीउऐ बोलौ, “सौरगा रै दुतै तेस आइलै बुशै लाई आ।” ³⁰ तेथ माथै यीशुऐ बोलौ, “एज़ी हाक मुंलै नाईं, पर तुमुलै आशी आ। ³¹ आबै इऐं धौतरी रौ फैसलौ हुणौ आ, आबै इऐं धौतरी रौ आधीकारी पोरु गाड़ीणौ आ; ³² और हाऊं, अगर धौतरी कु ऊंच़ी ज़ागाह दी डेउलै; ता सारेऊ आपू काऐ झीड़ाऊ।” ³³ इणै बोलीऔ यीशुऐ इणौ पौगड़ौ की गौ, कि सेऊ किणी मौउतीऐ मौरा आ। ³⁴ एथ माथै लोगुऐ यीशु लै बोलौ, “आमुऐ कानूना री एज़ी बूश शुणी आ कि मसीह सौदा लै रौआ, तैबै तू कैलै बोलाई कि ‘आदमी रौ छ़ौहरु ऊंच़ै दी च़ड़ाउंणौ ज़ुरुरी आ? ऐउ आदमी रौ छ़ौहरु कुण आ?” ³⁵ यीशुऐ तिउंलै बोलौ, “प्याशौ आबै थोड़ी देरा झ़ाऊं तुमु मांझ़ीऐ आ। ज़ेबी झ़ाऊं प्याशौ तुमु आइलै आ तेभी झ़ाऊं हांड़दै थाकौ लागी, इणौ नां च़ाईं हुऔ कि न्यारौ तुमु आशियौ घेरा; ज़ुण न्यारै दी हांडा आ सेऊ नाईं ज़ाणदौ कि केशी डिआ। ³⁶ ज़ेभी झ़ाऊं प्याशौ तुमु आइलै आ, प्याशै माथै विश्वास कौरौ ताकी तुमै प्याशै री औलाद बौणौ।”एज़ी बुशै बोलीऔ यीशु तिदरा कु डेई गौ और तिऊंकु च़ोरुई थाकौ। ³⁷ तिणीऐ तिउंकै एतरै निशाण देखाऐ, तैबै भी तिउंऐ तेस माथै विश्वास नाईं किऔ; ³⁸ ताकी यशायाह गुरू रौ वचन पुरौ हुआ ज़ो तिणीऐ बोलौ : “ओ प्रभु, मारै शिक्षा रौ कुणीऐ विश्वास किऔ आ? और प्रभु री बाई री ताकत कास थै पौगड़ी हुई आ?” ³⁹ एज़ी वज़ाह कु सै विश्वास नाईं कौरी बौल़ै, कैलैकि यशायाह गुरूऐ इणौ भी बोलौ आ : ⁴⁰ “तिणिऐ तिउंरी आखी शेड़ी, और तिऊंरौ ज़िऊ काठौ किऔ ; केशी इणौ ना च़ाईं हुऔ कि सै आखी कौरी देखा, और ज़िवा कौरी मझ़ा, और आपणौ ज़िऊ बौदला, और हाऊं तिऊं च़ांगै कौरु।” ⁴¹ यशायाह गुरूऐ एज़ी बुशै एथकु बोली कि तिणीऐ तेसरी बौड़ाई देखी, और तिणीऐ तेसरै बारै दी बुशै लाई। ⁴² तैबै भी अधीकारिऊ मांझ़िआ कु भौरीउऐ तेस माथै विश्वास किऔ, पर फरीसिउ री वज़ाह कु पौगड़ै दी नाईं माना थै, केशी इणौ ना च़ांई हुऔ कि सै धार्मिक खुम्बल़ी कु बाइरै गाड़ीया : ⁴³ कैलैकि आदमी री तौरफा कु बौड़ाई तिउंकै, परमेश्वरा री तौरफा री बौड़ाई कु भौरी आछ़ी लागा थी। ⁴⁴ यीशुऐ हाकै देइऔ बोलौ, “ज़ुण मूं माथै विश्वास कौरा आ, सेउ मूं माथै नाईं पर मूं भेज़णै वाल़ै माथै विश्वास कौरा आ। ⁴⁵ और ज़ुण मूं देखा आ, सेऊ मूं भेज़णै वाल़ौ देखा आ। ⁴⁶ हाऊं धौतरी माथै प्याशौ हुइऔ ऊ आशौ औन्दौ ताकी ज़ुण मूं माथै विश्वास कौरा सेऊ न्यारै दी ना रौआ। ⁴⁷ अगर कुण मेरी बुशै शुणीयौ नाईं मानालौ, ता हाऊं तिऊं आरोपी नाईं चाणदौ; कैलैकि हाऊं धौतरी माथै आरोप लाइंदै नाईं, पर धौतरी रै छ़ुटकारै कौरदे ऊ आशौ औन्दौ। ⁴⁸ ज़ुण मूं कुछ़ भी ना मानदौ और मेरी बुशै नाईं अपणाउंदौ तेसदी आरोप लाइणै वाल़ौ ता एक आ : मतलब, ज़ो वचन मुंइऐ बोले ई, से ई फैसलै रै दिना दी तेस माथै आरोप ला ई। ⁴⁹ कैलैकि मुंइऐ आपणी तौरफा कु बुशै नाईं बोली; पर बाबै ज़ुणीऐ हाऊं भेज़ो ऊ तिणीऐ मुलै हुकम दैऔ आ, कि का बुशै लाऊ और का बोलु? ⁵⁰ और हाऊं ज़ाणाऊ कि तेसरौ हुकम सौदा रौ ज़िन्दगी आ। एथीलै हाऊं ज़ो कुछ़ बोलाऊ, तेस तिणी बोलाऊ ज़िणौ बाब मुलै बोला आ।”

यीशु रै आपणै च़ेलेउ रै बाँगणै धोइणै

¹ फसला रै साज़ै कु पैहलै, ज़ेभी यीशुऐ ज़ाणी गौ कि मैरौ बौग्त आशी गौ आ कि धौतरी छ़ाड़ीऔ बाबा काऐ डेउ, ता आपणै लोगु कु ज़ुण धौतरी दी थै ज़िणौ प्यार सेऊ छ़ाड़ा थौ, सौदा झ़ाऊं तिणौ औ प्यार कौरा। ² ज़ेभी शैतानै शमौना रै छ़ोहरु यहूदा इस्करियोती रै ज़िवा दी इणी बूश पाई गोई कि तेस पकड़ावा, ता रोटी खाणै रै बौग्ता ई ³ “यीशुऐ, इणौ ज़ाणीऔ कि बाबै सब कुछ़ मैरै हाथा दी कौरी गौ आ, और हाऊं परमेश्वरा रै काऐ कु आशौ औन्दौ, और परमेश्वरा रै काऐ डिआ ऊ, ⁴ यीशु रोटी छ़ाड़ीऔ उठौ और आपणै उपरा रै जुड़कै पोरु खोलै, और आपणी कौमरा दी गाची बानीऔ। ⁵ ओखरा दी पाणी भौरीऔ च़ेलेऊ रै बागणै धोउंदै और ज़ेज़ी गाच़ी तेसरी कौमरा दी थी बानी ऐन्दी तेथ कौरी गुशदै लागौ। ⁶ ज़ेभी सेऊ शमौन पतरसा काऐ आशौ, तैबै पतरसै तेसलै बोलौ, “ओ प्रभु, का तू मैरै बांगणै धोआ ई?” ⁷ यीशुऐ तेसलै ज़वाब दैऔ, “ज़ो हाऊं कौराऊ, तु तेस इबी नाईं ज़ाणदौ, पर ऐथ बासीऐ सौमझा ई।” ⁸ पतरसै तेसलै बोलौ, “तू मैरै बांगणै केभी ना धौआलौ!” इणै शुणीऔ यीशुऐ तेसलै बोलौ, “अगर हाऊं ताऊं नाईं धोऊ लै, ता मुं आइलै तैरौ कुछ़ भी रिश्तौ नाईं।” ⁹ शमौन पतरसै बोलौ, “ओ प्रभु, ता मैरै बांगणै नाईं, पर हाथ और मूंड़ भी धोऊ।” ¹⁰ यीशुऐ तेसलै बोलौ, “ज़ो धोउई गौ आ तेस बांगणै रै सिवाऐ ओर कुछ़ धौधोउणै री ज़ुरत नाईं, पर सेऊ बिलकुल शुद्ध आ, और तुमै शुद्ध ई पर सौभी रै सौभी नाईं।” ¹¹ सेऊ ता आपणै पकड़ाउणै वाल़ौ ज़ाणा थौ एथीलै तिणिऐ बोलौ, “कि तुमै सौभी रै सौभी शुद्ध नाईं।” ¹² ज़ेभी तिणीऐ तिंउरै बांगणै धोई गौऐ, और आपणै जुड़कै भीड़िऔ बोशी गौ, ता तिउंलै बोलदै लागौ, “का तुमै सौमझ़े ई कि मुंइऐ तुमु आइलै का किऔ? ¹³ तुमै मुलै गुरु और प्रभु बोलाई, और ठीक ई बोलाई, कैलैकि हाऊं सेऊ ऊ। ¹⁴ अगर मुंइऐ प्रभु और गुरु हुइऔ तुमारै बांगणै धोऐ ई, ता तुमुऐ भी एकी दुज़ै रै बांगणै धौउणै च़ांई। ¹⁵ कैलैकि मुंइऐ तुमुलै नमूनौ देखाल़ी गौ आ कि ज़िणौ मुंइऐ तुमु आईलै किऔ आ, तुमुऐ भी तिणी ई कौरनौ। ¹⁶ हाऊं तुमुलै सौच़ौ-सौच़ौ बोलाऊ, नुकुर आपणै मालिका कु बौड़ौ नाईं आ, और ना भेज़ौ औन्दौ आपणै भेज़णै वाल़े कु। ¹⁷ तुमै एज़ी बुशै ज़ाणा ई और अगर तिऊं माना भी लै, ता तुमै आशिष वाल़ै ई। ¹⁸ हाऊं तुमु सौभी रै बारै दी नाईं बोलदौ; ज़ुण मुइंऐ च़ुनी गौऐ, तिऊं हाऊं ज़ाणा ऊ; पर एऊ एथलै आ कि पवित्रशास्त्रा रौ वचन पुरौ हुआ, ‘ज़ुण मेरी रोटी खा आ, तिणीऐ मुं माथै बांगणौ च़ुंगौ आ।’ ¹⁹ आबै हाऊं एथरै हुणे कु पैहलै तुमुलै बोलाऊ ताकी ज़ेबी इणौ हुआ लौ ता तुमै विश्वास कौरा कि हाऊं सेऊ ऊ। ²⁰ हाऊं तुमुलै सौच़ौ-सौच़ौ बोलाऊ कि ज़ुण मैंरै भेजै औन्दै आपणावा, सेऊ मूं आपणावा; और ज़ुण मूं आपणावा सेऊ मैंरै भेज़णै वाल़ौ अपणावा।”

विश्वासघाता री तौरफा दी इशारौ

(मती26:20-25; मरकुस14:17-21;लूका22:21-23)

²¹ एज़ी बुशै बोलीऔ यीशु आत्मा दी बेचैन हुऔ और एज़ी गवाही देई, “हाऊ तुमुकै सौच़ौ-सौच़ौ बोलाऊ कि तुमुं मांझ़िआ कु एक मूं पकड़ावा सा।” ²² च़ेलै डौरी-डौरीयौ कि एऊ कासरै बारे दी बोला आ, एकी दुज़ै भिलै देखदै लागै। ²³ तेसरै च़ेलै माझ़ीआ कु एक जासकु यीशु प्यार कौरा थौ, यीशु री छ़ाती भिलै झुकियौ थौ बोशौ औन्दौ। ²⁴ शमौन पतरसै तेस भिलै इशारै कौरीऔ तेसकु पुछ़ौ, “बोल ता, एऊ कासरै बारे दी बोला आ?” ²⁵ तैबै तिणीऐ तिणी ई यीशु री छ़ाती भिलै झुकीऔ तेस कु पुछ़ौ, “ओ प्रभु, सेऊ कुण आ?” ²⁶ यीशुऐ ज़वाव दैऔ, “ज़ास लै हाऊं एज़ी रोटी रौ गासड़ु च़ोबीऔ देऊ लै सेऊ आ।” और तिणीऐ गासड़ु च़ोबीऔ शमौन इस्करियोती रै छ़ोहरू यहूदा लै दैऔ। ²⁷ गासडु पाकड़ुदै ई, शैतान तेसदी बौसी गौ। तैबै यीशुऐ तेसलै बोलौ, “जो तु कौराई, शिगरी कौर।” ²⁸ पर बोशै औन्दै मांझ़िआ कु कोइऐ ना ज़ाणौ कि तिणीऐ एज़ी बूश तेसलै कैलै बोली आ। ²⁹ यहुदा कै पैसेऊ री थोउली रौआ थी, कुणी-कुणीऐ सौमझ़ौ कि यीशु तेसकै बोलदै लागौ औन्दौ कि ज़ो कुछ़ आमुकै साज़ै ले च़ांई तेस खरीदीऔ आण, या इणौ कि कुछ़ गरीबा लै दै। ³⁰ और सेऊ गासडु निंइऔ तेभी बाइरै डैऔ; और एऊ राच़कौ बौग्त थौ।

नौई आज्ञा

³¹ ज़ेभी सेऊ बाइरै डैऔ ता यीशुऐ बोलौ, “आबै आदमी रै छ़ोहरू री बौड़ाई हुई आ, और परमेश्वरा री बौड़ाई तेसी दी हुई आ; ³² अगर तेसी दी परमेश्वरा री बौड़ाई हुई आ, ता परमेश्वर भी आपु तेसरी बौड़ाई कौरा आ, और फेटी कौरा। ³³ छ़ोहरूओ, हाऊं थोड़ै बौग्ता झ़ाऊं तुमु काऐ ऊ। तैभै तुमै मुं लोड़ाई, और ज़िणौ मुंइऐ यहूदीऊ लै बोलौ, ‘ज़िऐ हाऊं डिआऊ तिऐ तुमै नाईं आशी बौल़दै, तिणी ई, हाऊं आबै तुमुलै भी बोलाऊ। ³⁴ हाऊं तुमुलै एक नौंऔ हुकम दिआऊ, कि एकी दुज़ै कु प्यार कौरौ। ज़िणौ मुंइऐ तुमु आइलै प्यार किऔ आ, तिणी ई तुमै भी एकी दुज़ै कु प्यार कौरौ। ³⁵ अगर तुमैं आपु मांझ़िऐ प्यार छ़ाड़ा लै, ता इणै कौरीऐ सारै ज़ाणालै कि तुमै मैरै ई।”

पतरसा रै मुकुरना रौ इश्शारौ

(मती26:31-35;मरकुस14:27-31; लूका22:31-34)

³⁶ शमौन पतरसै तेसलै बोलौ, “ओ प्रभु, तु केशी डिआई?” यीशुऐ तेसलै ज़वाब दैऔ, “ज़िऐ हाऊं डिआऊ तिऐ तू इबी नाईं आशी बौल़दौ; पर एथ बासीऐ तू मूं पिछ़ु आशाई।” ³⁷ पतरसै तेसलै बोलौ, “ओ प्रभु, इबी हाऊं तांऊ पिछ़ु कैलै ना आशी सौकदौ? हाऊं ता ताउंलै आपणै प्राण भी पोरु दिआऊ।” ³⁸ यीशुऐ ज़वाब दैऔ, “का तू मुलै आपणै प्राण दिआ ई? हाऊं ताऊं लै सौच़ौ-सौच़ौ बोलाऊ कि ज़ेभी झ़ाऊं तू चिआ बारै मैरौ इन्कार नाईं कौरालौ तेभी झ़ाऊं कुखड़ौ नाईं बाशदौ।

परमेश्वरा झ़ाऊँ पऊँच़णा री बाट

¹ “तुमारौ ज़िऊ घबराऔ ना च़ांई; परमेश्वरा माथै विश्वास छ़ाड़ौ और मुं माथै भी विश्वास छ़ाड़ौ। ² मैरै बाबा रै घौरा दी, रौइणा लै भौरी ज़ागाह सा, अगर नाईं औआ थी ता हाऊं तुमुलै बौला थौ; कैलैकि हाऊं तुमुलै ज़ागाह त्यार कौरदै डेआऊ। ³ ज़ेभी हाऊं डेईऔ तुमु कालै ज़ागाह त्यार कौरुलै, ता हाऊं तौइंऐ आशियौ तुमु आपुकाऐ निआंऊ ताकी ज़िऐ हाऊं रौउलै तिऐ तुमै भी रौआ। ⁴ ज़िऐ हाऊं डिआ ऊ तुमै तिदली बाट ज़ाणा ई।” ⁵ थोमै तेसलै बोलौ, “ओ प्रभु, आमै नाईं ज़ाणदै तुमै केशी डिआई; ता बाट किणौ ज़ाणी?” ⁶ यीशुऐ तेसलै बोलौ, “बाट, सौच़्च़ाई और ज़िन्दगी हाऊं ऊ; मैरै बिना कोई बाबा काऐ नाईं डेई बौल़दौ। ⁷ अगर तुमुऐ हाऊं ज़ाणौ थौ, ता मैरौ बाब भी ज़ाणा थै। और आबै तेस ज़ाणाई, और सेउ देखी भी गौ आ।” ⁸ फिलिप्पुसै तेसलै बोलौ, “ओ प्रभु, बाब आमुं कै देखाल़, एती ई आमुं लै भौरी आ।” ⁹ यीशुऐ तेसलै बोलौ, “ओ फिलिप्पुस, हाऊं एती दिना ओउलै तुमु आइले ऊ, और का तू मुं नाईं ज़ाणदौ? ज़ुणीऐ हाऊं देखो ऊ तिणीऐ बाब देखौ आ। तू कैलै बोलाई कि बाब आमुंकै देखाल़? ¹⁰ का तू विश्वास नाईं कौरदौ कि हाऊं बाबा दी ऊ और बाब मुंदी आ? ऐज़ी बुशै ज़ो हाऊं तुमुलै बोलाऊ, आपणी तौरफा कु नाईं बोलदौ, पर बाब मुंदी रौईऔ आपणै काम कौरा आ। ¹¹ मैरौ विश्वास कौरौ की हाऊं बाबा दी ऊ, और बाब मुंदी आ; नाईं ता कामा री वज़ाह कु मैरौ विश्वास कौरौ। ¹² “हाऊं तुमुलै सौच़ौ-सौच़ौ बोलाऊ कि ज़ुण मुं माथै विश्वास छ़ाड़ाई, एजौ काम ज़ेज़ौ हाऊं कौराऊ सै भी कौरा ई, पर एथकु भी बौड़ै काम कौरा ई, कैलैकि हाऊं बाबा काऐ डिआऊ। ¹³ ज़ो कुछ़ तुमै मैरै नावां कौरी मांगाई, तेस हाऊं कौराऊ, कि छ़ोहरु री तौरफा कु बाबा री बौड़ाई हुआ। ¹⁴ अगर तुमै मुकु मैरै नावां कौरी कुछ़ मांगालै, ता हाऊं तेस कौराऊ।

पवित्र आत्मा रौ वाइदौ

¹⁵ “अगर तुमै मुकु प्यार कौराई, ता मेरी आज्ञा मानाई। ¹⁶ हाऊं बाबा कु औरज़ कौराऊ, और सेउ तुमुलै एक औज़ौ मज़द कौरणै वाल़ौ दिया आ ताकी सेऊ सौदा तुमु आइलै रौआ। ¹⁷ मतलब सौच़ाई री आत्मा, ज़ास संसार नाईं आपणाउंदौ, कैलैकि सेऊ ना ता तेस देखदौ और ना तेस ज़ाणदौ; तुमै तेस ज़ाणाई, कैलैकि सेऊ तुमु आइलै रौआ आ, और सेऊ तुमु दी औआ। ¹⁸ “हाऊं तुमु अनाथ नाईं छ़ाड़दौ; हाऊं तुमु काऐ आशा ऊ। ¹⁹ और थौड़ौ बौग्त रौइ गौ आ कि संसार मुं नाईं देखालौ, पर तुमै मूं देखालै; एथीलै कि हाऊं ज़िउंदो ऊ, तुमै भी ज़िउंदै रौआई। ²⁰ सेज़ै दिनै तुमै ज़ाणालै कि हाऊं आपणै बाबा दी ऊ, और तुमै मुंदी ई, और हाऊं तुमु दी। ²¹ ज़ास कै मैरौ हुकम आ और सै तिऊं माना ई, सै मुं आइलै प्यार छ़ाड़ाई; और ज़ुण मूं आइलै प्यार छ़ाड़ाई तिऊं आइलै मैरौ बाब प्यार छ़ाड़ा, और हाऊं तेस आइलै प्यार छ़ाड़ाऊ और आपु तेस माथै परगट औआ ऊ।” ²² तिणी ई यहूदै ज़ुण इस्करियोती नाईं थौ, तेसकु पुछ़ौ, “ओ प्रभु, का हुऔ कि तू आपू आमुं माथै परगट कौरणौ च़ाह ई और धौतरी माथै नाईं?” ²³ यीशुऐ तेसलै ज़वाब दैऔ, “अगर कुण मुंकु प्यार कौरा लौ ता सेऊ मैरौ वचन माना आ, और मैरौ बाब तेसकु प्यार कौरा, और आमै तेस काऐ आशी ई, और तेस आइलै रौअई। ²⁴ ज़ुण मुं आइलै प्यार नाईं छ़ाड़ालौ, सेऊ मैरौ वचन नाईं मानदौ; और ज़ेज़ौ वचन तुमै शुणाई सेऊ मैरौ नाईं पर बाबा रौ आ, ज़ुणीऐ हाऊं भेज़ो ऊ। ²⁵ “एज़ी बुशै मुंइऐ तुमु आइलै रौइऔ तुमुकै बौली इ। ²⁶ पर मज़दगार मतलब पवित्र आत्मा ज़ास बाब मैरै नावां कौरी भेज़ा आ, सेऊ तुमुकै सारी बुशै शिखावा, और ज़ो कुछ़ मुंईऐ तुमुलै बोलौ आ, सेऊ सब तुमुकै याद कौरावा आ। ²⁷ हाऊं तुमुलै शान्ति दिआऊ, आपणी शान्ति तुमुलै दिआऊ; ज़िणौ संसार दिया सा, हाऊं तुमुलै तिणौ नाईं दैंदौ: तुमारौ ज़िऊ घौबराऔ नां च़ाईं और नां च़ाईं डौरौ। ²⁸ तुमुऐ शुणौ कि मुंइऐ तुमुलै बोलौ, “हाऊं डिआऊ, और तुमुकाऐ तौइंऐ आशाऊ।’ अगर तुमै मुंकु प्यार कौरा थै, ता एज़ी बुशा कु खुश औआ थै कि हाऊं बाबा काऐ डेआऊ, कैलैकि बाब मुंकु बौड़ौ आ। ²⁹ और मुंइऐ आबै एस हुणै कु पैहलै तुमुकै बोली गौ कि ज़ेबी सेऊ हुआ, ता तुमै विश्वास कौरौ। ³⁰ हाऊं आबै कु तुमु आइलै औज़ौ भौरी बुशै नाईं लाइंदौ, कैलैकि इऐं धौतरी रौ मुख्यौ आशा आ। मुं माथै तेसरौ कोई हक नाईं; ³¹ पर एऊ एथीलै हुआ आ ताकी संसार ज़ाणा कि हाऊं बाबा आइलै प्यार छ़ाड़ाऊ, और ज़िणौ बाबै मुंलै हुकम दैऔ आ हाऊं तिणी ई कौराऊ। उठौ, इदरा कु डेई ई।

यीशु सौच़्च़ी अंगूरा री लाऊ

¹ सौच्ची बेल हाऊं ऊ, और मैरौ बाब किसान आ। ² ज़ेजी डाल़ी मुंदी आ और नाईं फौल़दी, तिंऐ सेऊ पोरू काटा सा; और ज़ो फौल़ दिआ, तिऐं सेऊ छ़ांटा सा ताकी सै औज़ौ फौल़ा। ³ तुमै ता तेस वचना रै कारण ज़ेज़ौ मुंइऐ तुमुकै बोलौ आ च़ोखे ई। ⁴ तुमै मुंदी बौणी रौ और हाऊं तुमुदी। ज़िणी डाल़ी अगर बेला दी बौणी नाईं रौआ ली ता सै आपु कु नाईं फौल़ी सौकदी, तिणी ई तुमै अगर मुंदी बौणी ना रौआ लै ता नाईं फौल़ी सौकदै। ⁵ हाऊं बेल ऊ : तुमैं ई डाल़ी। ज़ुण मुंदी बौणी रौआ लौ और हाऊं तेसदी, ता सेऊ भौरी फौल़ फौल़ा आ, कैलैकि तुमैं मुकु अलग हुइऔ कुछ़ भी ना कौरी सौकदै। ⁶ अगर कुण मुंदी बौणी नाईं रौआलौ, ता तेस तिऐं डाल़ी बाशीऐ पोरु शोटाई, और सै पोरू शुका आ; और लोग तिऊं कौट्ठै कौरिऔ आगी दी ज़ाल़ाई, और सै पोरु ज़ौल़ाई। ⁷ अगर तुमै मुंदी बौणी रौआलै और मैरौ वचन तुमुदी बौणी रौआलौ, ता ज़ो तुमै मांगणौ च़ाह लै सेज़ौ तुमुलै हुआ सा। ⁸ मैरै बाबा री बौड़ाई इणै कौरीऐ हुआ आ कि तुमै भौरी फौल़ा, तैबै ऐ तुमै मैरै च़ेलै बौणा ई। ⁹ ज़िणौ बाबै मुं आइलै प्यार छ़ाड़ौ, तिणी ई मुंइऐ तुमु आइलै प्यार छ़ाडौ आ; मैरै प्यारा दी बौणी रौ। ¹⁰ अगर तुमै मैरौ हुकम माना लै, ता मैरै प्यारा दी बौणी रौआ लै; ज़िणौ मुंइऐ आपणै बाबा रौ हुकम मानौ आ, और तेसरै प्यारा दी बौणी रौआ ऊ। ¹¹ मुंइऐ तुमुकै एज़ी बूशै ऐथलै बोली ई कि एरी खुशी तुमुदी बौणी रौआ, और तुमुरी खुशी पुरी हुआ। ¹² मैरौ हुकम एज़ौ आ, कि ज़िणौ मुंइऐ तुमु आइलै प्यार किऔ आ, तिणी तुमै भी एकी दुजै आइलै प्यार कौरौ। ¹³ एथकु बौडौ प्यार कासी रौ नाईं कि आपणै गोश्टणा री तांई आपणै प्राण दिआ। ¹⁴ ज़ेज़ी आज्ञा हाऊं तुमुलै दिआऊ, अगर तिऐं मानालै ता तुमै मेरै दोस्त ई। ¹⁵ आबै हाऊं तुमुलै दास नाईं बोलदौ, कैलैकि दास नाईं ज़ाणदौ कि मालिक का कौरा सा; पर मुंइऐ तुमुलै गोश्टण बोलौ आ, कैलैकि ज़ेज़ी बुशै मुंइऐ आपणै बाबा कु शुणी, सै सारी तुमुकै बोली गोई आ। ¹⁶ तुमुऐ हाऊं नाईं च़ुनौ पर मुंइऐ तुमै च़ुनै ई और तुमै मुंइऐ छ़ांटेई कि डेइऔ फल़ आणा और तुमारौ फल़ बौणी रौआ, कि तुमै मैरै नावां कौरीऐ बाबा कु ज़ो भी मांगा ले सेऊ तुमुलै दिआ। ¹⁷ एज़ी बुशु री आज्ञा हाऊं तुमुलै एथीलै दिआऊ कि तुमै एकी दुजै कु प्यार कौरा।

दूनिया आइलै दुशमनी

¹⁸ “अगर दुनियां तुमु कु नफरत कौरा आ, ता तुमै ज़ाणा ई कि तिणीऐ तुमु कु पैहलै मुं आइलै नफरत की आ। ¹⁹ अगर तुमै संसारा रै हुआ थै, ता संसार आपणेऊ कु प्यार कौरा थौ; पर एजी वजह कु कि तुमै संसारा रै नाई, बल्कि मुंइऐ तुमै दुनियां कु छ़ांटी गौऐ ई, एथीलै संसार तुमु कु नफरत कौरा। ²⁰ जेज़ी बुशै मुंइऐ तुमुकै बोली थी, कि नुकुर आपणै स्वामी कु बौड़ौ नाईं औन्दौ, तिऊं याद छ़ाड़ौ। अगर तिउंऐ हाऊं सताओ ऊ, ता तुमु भी सौतावा ई; अगर तिउंऐ मेरी बुशै नाईं मानी, ता सै तुमुरी भी नाईं मांनदै। ²¹ पर एस सब कुछ़ सै मैरे नावां री वज़ह कु तुमु आइलै कौराई कैलैकि सै मैरौ भेज़णै वाल़ौ नाईं ज़ाणदै। ²² अगर हाऊं नाईं आशा थौ और तिऊं आइलै बुशै नाईं लाआ थौ, ता सै पापी नाईं बौणा थै; पर आबै तिउंलै तिंउरै पापा लै कोई बाह्नौ नाई। ²³ ज़ुण मुकु नफरत कौरा लौ, सेऊ मैरै बाबा कु भी नफरत कौरा सा। ²⁴ अगर हाऊं तिऊं मांझ़िऐ सेज़ै काम नाईं कौरा थौ ज़ेज़ै कोई ओरी ऐ नाईं किऐ, ता सै पापी नाई बौणा थै; पर आबै ता तिउंऐ हाऊं और मैरौ बाबा दुइया देखी गौऐ ई और दुइया कु नफरत कौरा ई। ²⁵ एऊ एथीलै हुऔ कि सेऊ वचन पुरौ हुआ, ज़ो तिंउरै कानुना दी थौ लिखौ औन्दौ, ‘तिउंऐ मुकु फुकीई नफरत की ई। ²⁶ पर ज़ैबै सेऊ मज़दगार आशा लौ, ज़ास हाऊं तुमु काऐ बाबा री तौरफा कु भेज़ाऊ, मतलब सौच़ाई री आत्मा ज़ो बाबा री तौरफा कु निकल़ा सा, ता सेऊ मेरी गवाही दिआ सा; ²⁷ और तुमै भी मैरै गवाह ई कैलैकि पैहलै कु तुमै भी मूं आइलै साथाई रौऐ ई।

¹ एज़ी बुशै हाऊं तुमुकै एथीलै बोलाऊ ताकी तुमै ठोकर ना खा लै। ² सै तुमु धार्मिक खुम्बल़ी कु पोरू गाड़ाई, और सेज़ौ बौग्त आशा की ज़ुण-कुण तुमु पोरू झ़ांगा लौ और सै सौमझ़ा लै कि हाऊं परमेश्वरा री सेवा कौरा ऊ। ³ इणौ सै एथीलै कौराई कि तिउंऐ ना बाब ज़ाणौ और ना मुं ज़ाणदे। ⁴ पर ऐज़ी बुशै मुइऐ तुमुलै एथीलै बोली, कि ज़ेबी इऊंरौ बौग्त आशा लौ ता तुमुकै याद आशा की मुंइऐ तुमु कै पैहलै बोली गौ थौ। “मुंइऐ पैहले कु तुमुकै एज़ी बुशै एज़ी ताईंए नाई बोली कैलैकि हाऊं तुमारै साथा दी थौ।

पवित्र आत्मा रै काम

⁵ पर आबै हाऊं आपणै भेज़णै वाल़ै काऐ डिआऊ; और तुमु मांझ़ीआ कु कोई भी मुकु नाई पुछ़दौ, ‘तु केशी डिआई?’ ⁶ पर मुंइऐ तुमुकै एज़ी बुशै बोली आ, एथिलै तुमारौ ज़ीऊ दुखा कौरीऐ भौरुई गौ आ। ⁷ तैबै हाऊं तुमुकै सौच़ौ बोलाऊ कि मैरौ डेऊणौ तुमुलै आच़्छ़ौ सा, कैलैकि अगर हाऊं नाईं डेऊलै, सेऊ मज़दगार तुमु काऐ नाईं आशदौ; पर अगर हाऊं डेऊ लै, ता तेस तुमु काऐ छ़ाड़ाऊ। ⁸ सेऊ आशीऔ दुनियां रै पाप और धर्म और फैसलै रै बारै दी कायल कौरा सा। ⁹ पापा रै बारै दी एथलै कैलैकि सै मुं माथे विश्वास नाईं कौरदै। ¹⁰ और धर्मा रै बारै दी एथलै कि हाऊं बाबा काऐ डिआऊ, और तुमै मुं तैबै नाईं देखदै; ¹¹ फैसलै रै बारै दी एथलै कि दुनियां रौ मुख्य आरोपी चाणी गौ आ। ¹² “मुंइऐ तुमु आइलै औज़ौ भी भौरी बुशै बोलणी ई, पर तुमै तिऊं सैहन नाईं कौरी बौल़दै। ¹³ पर ज़ेबी सै मतलब सौच़ाई री आत्मा आशाली, ता तुमुकै सब सौच़ाई री बाट बोला आ, कैलैकि सेऊ आपणी तौरफा कु नाईं बोलदौ पर ज़ो कुछ़ शुणालौ सेज़ौ बोला आ, और हुणै वाल़ी बुशै तुमुकै बोला आ। ¹⁴ सेऊ मेरी बौड़ाई कौरा आ, कैलैकि सेऊ मेरी बुशु मांझ़िआ कु तुमुलै बोला आ। ¹⁵ ज़ो कुछ़ बाबा रौ आ, सेऊ सब मैरौ आ; एथीलै मुंइऐ तुमुलै बोलौ की सेऊ मेरी बुशा माझ़िआ कु तुमुलै बोला आ।

दु:ख सुखा दी बौदल़िया

¹⁶ “थोड़ै बौग्ता दी तुमै मुं नाईं देखालै, और तैबै थोड़ै बौग्ता दी मुं देखालै।” ¹⁷ तैबै तेसरै कुछ़ च़ेलेऊऐ आपू मांझ़ीऐ बोलौ, “एउ का सा ज़ो एऊ आमुलै बोला आ, ‘थोड़ै बौग्ता दी तुमै मुं नाईं देखालै, और तैबै थोड़ै बौग्ता दी मुं देखालै?’ और एऊ ‘एथीलै कि हाऊं बाबा काऐ डिआ ऊ’?” ¹⁸ तैबै तिउंऐ बोलौ, “एऊ ‘थोड़ौ बौग्त’ ज़ो एऊ बोला आ, का बुश आ? आमै नाईं ज़ाणदै की एऊ का बौला आ?” ¹⁹ यीशुऐ इणौ ज़ाणीऔ कि इऐ मुकु पुछ़णौ च़ाह ई, तिणीऐ बोलौ, “का तुमै आपु माझ़िऐ मेरी इऊं बुशु रै बारे दी पूछताछ कौरा ई, ‘थोड़ै बौग्ता दी तुमै मुं नाईं देखालै, और तैबै थोड़ै बौग्ता दी मुं देखालै’? ²⁰ हाऊं तुमुलै सौच़ौ-सौच़ौ बोलाऊ कि तुमै लेरा लै और दुखी औआलै, पर संसार खुशी मौनावा लौ; तुमुलै शोक औआलौ, पर तुमुरौ शोक खुशी दी बौदलीआ। ²¹ औल़खीणै रै बौग्तै छ़ेउड़ी लै शोक औआ, कैलैकि तियांरौ दुखी रौ बौग्त आशी गौ आ, पर ज़ेबी सै लोल़डौ पैदौ हुआ, ता ऐज़ी खुशी दी की संसारा दी एक आदमी पैदौ हुऔ आ, तेस दुखा री बौग्त तौंइऐ याद नाईं कौरदी। ²² तिणी ई तुमुलै भी इबी शोक आ, पर हाऊं तुमुकै तौइंऐ मिलुलै और तुमुरौ ज़िऊ खुशी कौरी भौरु लै; और तुमारी खुशी कोई तुमुकु नाईं छ़ुड़ाउंदौ। ²³ सेज़ै दिनै तुमै मुंकु कुछ़ ना पुछ़ालै। हाऊं तुमुलै सौच़ौ-सौच़ौ बोलाऊ, अगर बाबा कु कुछ़ मांगा लै, ता सेऊ मेरै नावां कौरी तुमुलै दिआ आ। ²⁴ इबी झ़ाऊं तुमुऐ मैरै नावां कौरी कुछ़ नां मांगौ; मांगालै, ता पा लै ताकी तुमुरी खुशी पुरी औआ।

दूनिया माथी ज़ीत

²⁵ “मुंइऐ एज़ी बुशै तुमुलै अनैणै देईयौ बोली ई, पर सेज़ौ बौग्त आशा आ कि हाऊं तुमुलै तैबै अनैणै देईऔ नाईं बोलुलै, पर खुलीऔ तुमुलै बाबा रै बारै दी बोलाऊ। ²⁶ सेज़ै दिना दी तुमै मैरै नावां कौरीऐ मांगाई; और हाऊं तुमुकै इणौ नाईं बोलदौ कि हाऊं तुमुलै बाबा कु प्राथना कौराऊ; ²⁷ कैलैकि बाब ता आपु तुमु कु प्यार कौरा, कैलैकि तुमुऐ मुं आइलै प्यार कौरौ आ और इणौ भी विश्वास कौरौ कि हाऊं बाबा री तौरफा कु आशौ औन्दौं। ²⁸ हाऊं बाबा री तौरफा कु दुनियां दी आशौ औन्दौ; हाऊं तैबै दुनियां छ़ाड़ीयौ बाबा काऐ डिआऊ।” ²⁹ तेसरै च़ेलेउऐ बोलौ, कि देख आबै तु खुलीऔ बोलाई, और केज़ौ भी अनैणौ नाई बोलदौ। ³⁰ आबै आमै ज़ाणी गौऐ कि तू सब कुछ़ ज़ाणाई, और एथरी ज़ुरत नाईं कि कोई भी ताऊंकु कुछ़ पुछ़ा; एथकु आमै विश्वास कौरी कि तु परमेश्वरा री तौरफा कु ई आशौ औन्दौ। ³¹ इणै शुणीऔ यीशुऐ तिउंलै बोलौ, “का तुमै आबै विश्वास कौराई? ³² देखौ सेज़ौ बौग्त आशा आ पर आशी गौ कि तुमै सारे फोल़ुइयौ आपणी-आपणी बाट निंआई, और मुं एखुली छ़ाड़ाई; तैबै भी हाऊं एखुली नाईं कैलैकि बाब मूं आइलै साथा दी आ। ³³ मुंइऐ तुमुकै एज़ी बुशै एथलै बोली कि तुमुलै मुकु शान्ति मिला। संसारा दी तुमुकै दुख हूआ, पर तुमै काठौ ज़िऊ छ़ाडौ, मुइंऐ संसार ज़िती गौ आ।

यीशु प्राथना बौड़ै याजका ज़ीणी : सौरगा लै

¹ यीशुऐ एज़ी बुशै बोली और आपणी आखी सौरगा भिलै लाइऔ बोलौ, “ओ बाब, सेज़ौ बौग्त आशी गौ आ; आपणै छ़ोहरु री बौड़ाई कौर की छ़ोहरु भी तेरी बौड़ाई कौरा, ² कैलैकि ताइंऐ तेसकै सौभी आदमी माथै हक दैऔ, कि ज़ो ताइंऐ तेसकै दैऔ आ तिऊं सौभी लै सेऊ सौदा री ज़िन्दगी दिआ। ³ और सौदा री ज़िन्दगी इऐ आ की सै ताऊं एक ई सौच़ौ पमरेश्वर और यीशु मसीह, ज़ो ताइंऐ भेज़ौ औन्दौ आ, ज़ाणा। ⁴ ज़ो काम ताइंऐ मुकै कौरना लै दैऔ थौ, तेस पुरौ कौरीऔ मुंइऐ धौतरी माथै तेरी बौड़ाई की आ। ⁵ आबै ओ बाब, तू आपू आइलै मेरी बौड़ाई तिऐं बौड़ाई आइलै कौर ज़ो संसारा रै चाणनै कु पैहलै, मेरी ताऊं आइलै थी।

आपणै च़ेलेउ लै

⁶ “मुंइऐ तैरौ नाऊं तिऊं आदमीउ माथै परगट किऔ आ ज़ो ताइंऐ संसारा मांझ़िऐ कु सै मुंकै ई दैऔ औन्दै, और सै तैरै थै और ताइंऐ सै मुंकै दै, और तिउंऐ तैरौ वचन मानी गौ आ। ⁷ आबै तिउंऐ ज़ाणी गौ कि ज़ो कुछ़ ताइंऐ मुंकै दैऔ आ, सेऊ सब तेरी तौरफा कु आ; ⁸ कैलैकि ज़ो वचन ताइंऐ मुंकै दे ई; मुंइऐ सै तिऊं काऐ पौउंच़ाई गौऐ; और तिउंऐ सै अपणाऐ, और सौच़-सौच़ ज़ाणी गौऐ की हाऊं तेरी तौरफा कु ऊ, और विश्वास कौरी गौ कि तांऐ ई हाऊं भेज़ौ ऊ। ⁹ हाऊं तिउंलै प्राथना कौराऊ; दुनियां लै प्राथना नाईं कौरदौ पर तिउंलै ज़ुण तांइऐ मुकै ई दैऔ औन्दै, कैलैकि सै तैरै ई; ¹⁰ और ज़ो कुछ़ मैरौ आ सेऊ सारौ तैरौ आ और ज़ो तैरौ आ सेऊ मैरौ आ, और इऊं कु मेरी बौड़ाई परगट हुई आ। ¹¹ हाऊं आबै दुनियां दी नाई रौऊंदौ, पर ऐ दुनियां दी रौआई, और हाऊं ताऊं काऐ आशाऊ। ओ पवित्र बाब, आपणे तेस नावां कौरीऐ ज़ो ताइंऐ मुकै दैऔ आ, तिऊं री रक्षा कर कि सै आमु ज़िणै एक हुआ। ¹² ज़ेभी हाऊं तिंउरै साथाई थौ, ता मुंइऐ तैरै तेस नावां कौरीऐ, ज़ो ताइंऐ मुंकै दैऔ तिउंरी रक्षा की। मुंइऐ तिउंरी देख बाल़ की, और नाशा रै छ़ोहरू छ़ाड़ीऔ तिऊं मांझ़िऐ कु कोई नाश नाई हुऔ, एथीलै पवित्रशास्त्रा दी ज़ो बोलौ औन्दौ आ सेऊ पुरौ हुआ। ¹³ आबै हाऊं ताऊं काऐ आशाऊ, और इऊं बुशै दुनियां दी बोलाऊ, कि सै मेरी खुशी आपुदी पुरी कौरा। ¹⁴ मुंइऐ तैरौ वचन तिउंकै पौंउंच़ाई गौ आ; और संसारै तिऊंकु नफरत की, कैलैकि ज़िणौ हाऊं संसारा रौ नाईं, तिणी ई सै भी संसारा रै नाईं। ¹⁵ हाऊं इणी प्राथना नाईं कौरदौ कि तु तिऊं दुनियां कु ऊठाऊ; पर इणी कि तु तिऊं बुराई कु बौच़ाई छ़ाड़ै। ¹⁶ ज़िणौ हाऊं दुनियां रौ नाईं, तिणी सै भी दुनियां रै नाईं। ¹⁷ सौच़ाई कौरीऐ तिऊं पवित्र कर: तैरौ वचन सौच़ौ आ। ¹⁸ ज़िणौ ताइंऐ हाऊं संसारा दी भेज़ौ ऊ, तिणी मुइंऐ भी सै संसारा दी भेज़ै ई; ¹⁹ और तिउंलै हाऊं आपु भी पवित्र हुआऊ, ताकी सै भी सौच़ाई कौरीऐ पवित्र हुआ।

सौबी विश्वासिउ लै

²⁰ “हाऊं सिर्फ इऊंलै औरज़ नाईं कौरदौ, पर तिउंलै भी ज़ुण तिंउरै वचना कौरी मुं माथै विश्वास छ़ाड़ा लौ, ²¹ कि सै सारै एक हुआ लै; ज़िणौ ओ बाब तू मुंदी ई, और हाऊं ताऊंदी, तिणी ई सै भी आमुं दी हुआ, ज़ेथ कौरी संसार विश्वास कौरा की ताइंऐ ई हाऊं भेज़ो ऊ। ²² सै बौड़ाई ज़ो ताइंऐ मुंकै देई मुंइऐ तिउंकै देई आ, कि सै तिणी ई एक हुआ ज़िणौ की आमै एक ई, ²³ हाऊं तिऊंदी और तू मुंदी ई कि सै पवित्र हुईयौ एक हुआलै, और संसार ज़ाणा लौ कि ताऐं ई हाऊं भेज़ौ ऊ, और ज़िणौ ताइंऐ मुं आइलै प्यार किऔ तिणी ई तिऊं आइलै पयार किऔ आ। ²⁴ ओ बाब, हाऊं च़ाहा ऊ कि ज़ो ताइंऐ मुंकै दे ई, ज़िऐ हाऊं ऊ तिऐ सै भी मुं आइलै औआ, कि सै मेरी तिऐं बौड़ाई देखा ज़ो ताइंऐ मुंकै देई आ, कैलैकि ताइंऐ धौतरी चाणनै कु पैहलै मुं आइलै प्यार कियौ। ²⁵ ओ धार्मिक बाब, संसारै हाऊं नाईं ज़ाणौ, पर मुंइऐ तू ज़ाणौ; और इऊंऐ भी ज़ाणौ कि ताऐं ई हाऊं भेज़ौ ऊ। ²⁶ मुइंऐ तैरौ नाऊं तिउंकै बोलौ और बोलदै थाका ऊ लागी की ज़ो प्यार तैरौ मुं आइलै थौ सेऊ तिऊंदी रौआ, और हाऊं तिऊंदी रौऊ।”

यीशु रौ पकड़ाइणौ

(मती26:47-56; मरकुस14:43-50; लूका22:47-53)

¹ यीशुऐ एज़ी बुशै बोलिऔ आपणै च़ेलेऊ आइलै किद्रोन नाल़ा कु पारभिलै डैऔ। तिऐ एक डोखरौ थौ, ज़ेथदी सेऊ और तेसरै च़ेलै डेवै। ² तेस पकड़ाउणै वाल़ौ यहूदा भी सेज़ी ज़ागा ज़ाणा थौ, कैलैकि यीशु आपणै च़ेलेऊ आइलै तिऐ डेउंदै थाका थौ लागी। ³ तैबै यहूदा, फौज़ी री एक टोली और परधान याजकू और फरीसिउ री तौरफा कु प्यादौ आणियौ, दिवै और ज़ोकटी और हथियार आणियौ तिऐ आशौ। ⁴ तैबै यीशु, तिऊं सारी बुशै ज़ो तेस माथै आशणै वाल़ी थी ज़ाणियौ, निकल़ौ और तिउंलै बोलौ, “कास लोड़ाई?” ⁵ तिउंऐ तेसलै ज़वाब दैऔ, “यीशु नासरी।” यीशुऐ तिउंलै बोलौ, हाऊं ऊ,” तेस पकड़ाउणै वाल़ौ यहूदा भी तिऊं आइलै खौड़ौ थौ। ⁶ तेसरै इणौ बोलदै ही, “हाऊं ऊ,” सै पिंछ़ाऊ हुइऔ ज़बीना माथै लोटी गौऐ। ⁷ तैबै तिणीऐ तौइंऐ तिऊंकु पूछ़ौ, “तुमै कास लोड़ाई।” तिउंऐ बोलौ, “यीशु नासरी।” ⁸ यीशुऐ ज़वाब दैऔ, “मुइंऐ ता तुमु लै बोली गौ आ कि हाऊं ऊ, अगर मुं लोड़ाई ता इऊं डेउणै दैऔ।” ⁹ एऊ एथलै हुऔ कि सेऊ वचन पुरौ हुआ ज़ो तिणीऐ बोलौ थौ : “ज़ो ताइंऐ मुकै दे ई तिऊं माझ़िआ कु मुंइऐ एक भी ना औच़ाऐ।” ¹⁰ तैबै शमौन पतरसै तलवार, ज़ो तेसकै थी, गाड़ी और महायाजकु रै दासा दी लाइऔ तेसरौ सुलटौ कौन्थू काटी गौ। तेस दासा रौ नाऊं मलखुस थौ। ¹¹ तैबै यीशुऐ पतरसा लै बोलौ, “आपणी तल़वार म्याणा दी छ़ाड़। ज़ो खोरु बाबै मुलै दैऔ आ, का हाऊं तेस नाईं पीऊ?”

हन्नाह रै सामनै यीशु

¹² तैबै फौज़ीउऐ और तिऊं रै सुबेदारै और यहूदिऊ रै प्यादेउऐ यीशु पाकड़ियौ बानौ, ¹³ पैहलै सेउ हन्ना काऐ निऔं, कैलैकि सेऊ सेज़ी बौरषा रै महायाजक काइफा रौ शेऊरौ थौ। ¹⁴ एऊ सेज़ौ काइफा थौ, ज़ुणीऐ यहूदिऊ लै एज़ी सलाह देई थी कि आमुरै लोगु लै एकी आदमी रौ मौरणौ आछ़ौ आ।*

पतरसा रौ इन्कार

(मती26:69-70; मरकुस14:66-68; लूका22:-57)

¹⁵ शमौन पतरस और एक दूजौ च़ेलौ यीशु पिछ़ाड़ी च़ाल पौड़ै। एऊ च़ेलौ महायाज़कु रौ ज़ाणौ-पहच़ाणौ थौ, सेऊ यीशु रै साथाई महायाजका रै तौंगा दी ड़ैऔ। ¹⁶ पर पतरस बाइरी भिलै दारा काऐ खौड़ौ रौ। तैबै सेऊ दुजौ च़ेलौ ज़ो महायाजकू रौ ज़ाण-पहच़ाणा रौ थौ, बाइरै निकलौ और ज़ो छ़ेउड़ी दारा काऐ औआ थी छ़ाड़ी ऐन्दी तिआंलै बोलियौ पतरस भितरै आणौ। ¹⁷ तिऐं दासी ऐ ज़ो दारा काऐ थी, पतरसा लै बौलौ, “किऐ तु भी एस आदमी रै च़ेलै मांझ़िया कु ता नाईं?” तिणीऐ बोलौ, ”हाऊं नाईं ऊ।” ¹⁸ नुकर और प्यादै शेल़ै री वजह कु गाठै फुकरीऔ आगी तापदै थै लागै औन्दै, और पतरस भी तिऊं आइलै खौड़ौ हुइयौ आगी तापदै थौ लागौ औन्दौ।

माहायाजकु रै ज़रिऐ यीशु कु पूछ़ताछ़

(मती26:59-66; मरकुस14:55-64; लूका22:66-71)

¹⁹ तैबै महाजक यीशु कु तेसरै च़ेलेऊ रै बारै दी और तेसरी शिक्षा रै बारै दी पूछ़दै लागौ। ²⁰ यीशुऐ तेसलै ज़वाब दैऔ, “मुइंऐ दूनिया आइलै खोलियौ बुशै लाई ई; मुइंऐ धार्मिक खुम्बल़ी और परमेश्वरा रै घौरा दी, ज़िऐ सारै यहूदी कौठै हुआ थै, सौदा शिक्षा देई और च़ोरीऐ कुछ़ भी नाईं बोलौ। ²¹ तू मुंकु कैलै पुछ़ाई? शुणनै वाल़ेउ कु पुछ़ कि मुइंऐ तिउंकै का बोलौ। देख, सै ज़ाणाई की मुइंऐ का-का बोलौ।” ²² ज़ेबी तिणीऐ इणौ बोलौ, “तैबै प्यादै माझ़िआ कु एकीऐ ज़ो तिऐ खौड़ौ थौ, यीशु दी थापै लाइयौ बोलौ, “का तू महा याजकू लै इंणै कौरीऐ ज़वाब दिआ ई?” ²³ यीशुऐ तेसलै ज़वाब दैऔ, “अगर मुंइऐ बुरौ बोलौ, ता तियां बुराई री गवाही दै; पर अगर भौलौ बोलौ आ, ता मुं कैलै पिटा ई?” ²⁴ हन्नै सेउ बानौ औन्दौ काइफा महायाजका काऐ भेज़ी गौ।

पतरसा रौ दूजी बारै इन्कार कौरणौ

(मती26:71-75; मरकुस14:69-72; लूका22:58-62)

²⁵ शमौन पतरस खौड़ी हुइयौ आगी तापदै थौ लागौ औन्दौ। तैबै तिउंऐ तेसलै बोलौ, “किऐ तू भी ऐसरै च़ेलै मांझ़िआ कु ता नाईं?” तिणीऐ मुकरियौ बोलौ, “हाऊं नाईं ऊ।” ²⁶ परधान याजकु रै नुकरा मांझ़िया कु एक, ज़ो तेसरै टौबरा माझ़िऊ कु थौ ज़ासरौ कौन्थू पतरसै काटौ थौ, बोलौ, “का मुइंऐ तू तेस आइलै तौंगा दी नाईं देखौ थौ?” ²⁷ पतरस तौइंऐ मुकरौ, और खरकच़ार कुखड़ौ बाशौ।

पिलातुसा रै सामने यीशु

(मती27:1,2; 11-14; 15:1-5; लूका23:1-5)

²⁸ तैबै तिउंऐ यीशु काइफा काऐ कु पिलातुसा रै महला दी नींई गौ, और दोतकौ बौग्त थौ, पर सै आपू महला भीतै नाईं डै ताकी बिटाल़िया नाईं पर फसह री रोटी खाई बौल़ा। ²⁹ तैबै पिलातुस बाइरै निकल़ौ और तिऊं काऐ आशीयौ बोलौ, “तुमै एस आदमी माथै केज़ी बुशा रौ आरोप ला ई?” ³⁰ तिउंऐ तेसलै ज़वाब दैऔ, “अगर एऊ बुरै कामा कौरनै वाल़ौ नाईं औआ थौ ता आमै एस तैरै हाथा दी नाईं दिआ थै।” ³¹ पिलातुसै तिउंलै बोलौ, “तुमै ई निंयौ एस आपणै कानुना कौरी ऐसरौ फैसलौ कौरौ।” यहूदिउऐ तेसलै बोलौ, “आमुकै हक नाईं की आमै कास रौ प्राण नींऊ लै।” ³² एऊ एथलै हुऔ की यीशु री सेज़ी बूश पूरी हुआ ज़ो तिणीऐ इणै, इशारै दैंदी बारै बोली थी की तेसरी मौत किणी हुआ। ³³ तैबै पिलातुस तौइंऐ महला दी भीतरै डैऔ, और यीशु भीतरै औटाइयौ तेसकु पूछ़ौ, “का तू यहूदिऊ रौ राज़ौ ई?” ³⁴ यीशुऐ तेसलै ज़वाब दैऔ, “का तू एज़ी बूश आपणी तौरफा कु बोलाई या दूजेउऐ मैरै बारै दी ताउंकै इणौ बोलौ आ?” ³⁵ पिलातुसै ज़वाब दैऔ, “का हाऊं यहूदी ऊ? तेरी ही ज़ाति और परधान याजकुऐ तू मेरै हाथा दी दैऔ ई। ताइंऐ का किऔ आ?” ³⁶ यीशुऐ ज़वाब दैऔ, “मैरौ राज़ इऐं दुनिया रौ नाईं; अगर मैरौ राज़ इऐं दुनिया रौ औआ थौ, ता मैरै सेवक पिटिया थै कि मूं यहूदिऊ रै हाथा दी नाईं दिआ थै : पर मैरौ राज़ इदलौ नाईं।” ³⁷ पिलातुसै तेसलै बोलौ, “तैबै का तू राज़ौ ई?” यीशुऐ ज़वाब दैऔ, “तू बोलाई की हाऊं राज़ौ ऊ। मुइंऐ एज़ी ताइंऐ ज़न्म निंऔ और एथीलै दुनिया दी आशो ऊ कि सौच़ाई री गवाही देऊ। ज़ुण-कुण सौच़ाई रौ आ, सेउ मेरी बाच़ शुणा आ।” ³⁸ पिलातुसै तेसलै बोलौ, सौच़ाई का सा?” इणौ बोलियौ सेउ तैबै यहूदिउ काऐ डैऔ और तिउंलै बोलौ, “मुकै ता एसदी कुछ़ भी बुराई नाईं दिशदी।

मौरनै री सौज़ा री आज्ञा

(मती27:15-31; मरकुस15:6-20; लूका23:13-25)

³⁹ पर तुमारौ एज़ौ रिवाज़ आ कि फसह दी तुमुलै एक कैदी आज़ाद कौरु। तैबै का तुमै च़ाहा ई कि हाऊं तुमुलै यहूदिया रौ राज़ौ छ़ाड़ू?” ⁴⁰ तैबै तिउंऐ तौइऐं हाकै देइयौ बोलौ, “एस नाईं, पर आमु लै बरअब्बा छ़ाड़।” और बरअब्बा एक डाकू थौ।

¹ एथ माथै पिलातुसै यीशु डींगै कौरी पिटाऔ। ² सिपाइउऐ कांडेउ रौ ताज़ बेलियौ तेसरै मुंडा माथै छ़ाड़ौ, और तेसकै बैंगनी रौंगा रै जुड़कै भिड़ाऐ, ³ और तेस काऐ आशी-आशियौ बोलदै लागै, “ओ यहूदिउ रै राज़ै आ, ढाल!” और तेसदी थापै भी लाई। ⁴ तैबै पिलातुसै तौइंऐ बाइरै निकल़ियौ लोगु लै बोलौ, “ देखौ, हाऊं एस तुमु काऐ तौइंऐ बाइरै आणा ऊ; ताकी तुमै ज़ाणा लै कि मुकै एसदी कुछ़ भी गौल़ती नाईं दिशदी।” ⁵ तैबै यीशु कांडै रौ ताज़ और बैंगनी जुड़कै भिड़ाइयौ बाइरै गाड़ौ; और पिलातुसै तिउंलै बोलौ, “देखौ, एस आदमी!” ⁶ ज़ेबी परधान याजकु और च़ोउकीदारुऐ सेउ देखौ, ता हाका देइयौ बोलौ, “एस क्रूसा माथै च़ौड़ाऊ, क्रूसा माथै!” पिलातुसै तिउंलै बोलौ, “तुमै ई एस निंऔ और क्रूसा माथै च़ड़ाऔ, कैलैकि मुकै एसदी कोई भी गौल़ती नाईं दिशदी।” ⁷ यहूदिउऐ तेसलै ज़वाब दैऔ, “आमारौ भी कानून आ और तेस कानूना कौरी एऊ झ़ांगणै रै लायक आ, कैलैकि एउ आपूलै परमेश्वरा रौ छ़ोहरु आ बौणौ औन्दौ।” ⁸ ज़ेबी पिलातुसै एज़ी बूश शुणी ता औज़ौ भी डौरी गौ, ⁹ और तैबै महला दी भितै डैऔ और यीशु लै बोलौ, “तू किदलौ ई?” पर यीशुऐ तेसलै कुछ़ भी ज़वाब नाईं दैऔ। ¹⁰ एथ माथै पिलातुसै तेसलै बोलौ, “मुं आइलै कैलै ना बोलदौ? का तू नाईं ज़ाणदौ की ताऊं आज़ाद कौरनै रौ हक मुकै आ, और ताऊं क्रूसा माथै च़ड़ाउणा रौ हौक भी मुकै आ।” ¹¹ यीशुऐ ज़वाब दैऔ, “अगर ताउंलै माथा कु नाईं औआ थौ दैऔ औन्दौ, ता तैरौ मुं माथै कुछ़ हक नाईं औआ थौ; एथीलै ज़ुणिऐ हाऊं तरै हाथा दी पकड़ाऔ ऊ तेसरौ पाप ज़ादौ आ।” ¹² एथ माथै पिलातुसै सेऊ छ़ाड़नौ च़ाऔ, पर यहूदिऊऐ हाका देइयौ बोलौ, “अगर तु एस छ़ाड़ाई ता तेरी भक्ति कैसरा भिलै नाईं आ। ज़ुण भी आपुलै राज़ौ बौणा सा सेऊ कैसरा रौ मुकाबलौ कौरा सा।” ¹³ एज़ी बुशै शुणिऔ पिलातुसै यीशु बाइरै आणौ और तिऐं ज़गाह दी एक गद्दी थी ज़ेथलै इब्रानी बोली दी ‘गब्बता’ बोला थै, और फैसलै शुणाउणै वाल़ी गाद्दी माथै बोशौ। ¹⁴ एऊ फसह री त्यारी रौ दीन थौ, और छ़ौउऐ घान्टै रै तकरीबन थौ। तैबै तिणीऐ यहूदिऊ लै बोलौ, “देखौ तुम्हारौ राज़ौ!” ¹⁵ पर तिउंऐ हाकै देई, “निऊं! निऊं! एस क्रुसा माथै च़ौड़ाऊ!” पिलातुसै तिउंलै बोलौ, “का हांऊ तुम्हारौ राज़ौ क्रुसा माथै च़ौड़ाऊ?” परधान याजकुऐ ज़वाब दैऔ, “कैसरा छ़ाड़ीऔ आमारौ कोई भी राज़ौ नाईं।” ¹⁶ तैबै तिणीऐ सेऊ तिंउरै हाथाई देई गौ ताकी तेस क्रुसा माथै च़ौड़ावा लै।

यीशु क्रुसा माथी च़ौड़ाऊणौ

(मती27:32-44; मरकुस15:21-32; लूका23:26-43)

¹⁷ तैबै तिंऊऐ यीशु नीं ऐरौ, और सेऊ आपणौ क्रूस च़ुंगीऔ तिंऐ ज़ागाह कु बाइरै ड़ैऔ, ‘ज़ेथलै खौपड़ी री ज़ागाह’ बोला ई और इब्रानी बोली दी ‘गुलगुता’। ¹⁸ तिऐ तिउंऐ सेऊ और तेस आइलै तौइंऐ दुई आदमी क्रूसा माथै च़ौड़ाऐ, एक ओर भिलै और एक पौर, और मांझ़ा दी यीशु। ¹⁹ पिलातुसै एक तौक्ती लिखियौ क्रूसा दी लाई गोई, तौक्ती दी इणौ थौ लिखौ औन्दौ, “यीशु नासरी, यहूदिउ रौ राज़ौ।” ²⁰ इऐ तौक्ती भौरी यहूदीउऐ पौड़ी, कैलैकि सेज़ी ज़ागाह ज़िऐ यीशु क्रूसा माथै च़ौड़ाऔ थौ इलाकै काऐ थी; और तौक्ती दी इब्रानी और लतीनी और यूनानी दी थौ लिखौ औन्दौ। ²¹ तैबै यहूदिउ रै परधान याजकुऐ पिलातुसा लै बोलौ, “‘यहूदिउ रौ राज़ौ’ नाईं लिखौ पर इणौ कि ‘तिणीऐ बोलौ, हाऊं यहूदिऊ रौ राज़ौ ऊ’।” ²² पिलातुसै ज़वाब दैऔ, “मुइंऐ ज़ो लिखी गौ, सेऊ लिखी गौ।” ²³ ज़ेबी सिपाइउऐ यीशु क्रूसा माथै च़ौड़ाई गौ थौ, ता तेसरै जुड़कै निंईऔ च़ारा भिलै किऐ, हर सिपाइऊ लै एक हिस्सौ, और कुरतौ भी निंऔ, पर कुरतौ बिण सिंऔ माथा कु तौल़ झ़ाऊं बुणौ औन्दौ थौ। ²⁴ एस कुरता लै तिउंऐ आपू मांझ़ीऐ बोलौ, “आमै एस नाईं च़िरदै, पर एथ माथै पौर्च़ी पाई की एऊ कासरौ औलौ।” एऊ एथीलै हुऔ कि पवित्रशास्त्रा दी ज़ो लिखौ औन्दौ थौ सेऊ पुरौ हुआ, “तिउंऐ मैरै जुड़कै आपु मांझ़ीऐ बांटी ऐरै और मैरै जुड़कै माथै पौर्च़ी पाई।” ²⁵ तैबै सिपाइउऐ इणी ई कियौ। यीशु रै क्रूसा काऐ तेसरी आमा और तेसरी आमा री बौंइण, क्लोपासा री छ़ेउड़ी मरियम, और मरियम मगदलीनी खौड़ी थी। ²⁶ ज़ेबी यीशुऐ आपणी आमा, और सेऊ च़ेलौ ज़ास आइलै सेऊ प्यार कौरा थौ आपू काऐ खौड़ै देखै ता आपणी आमा लै बोलौ, “ओ छ़ेउड़ी ज़ात, देख, एऊ तैरौ छ़ोहरु आ।” ²⁷ तैबै तिणीऐ च़ेलै लै बोलौ, “इऐ तेरी आमा आ।” और सेज़ै बौग्ता कु तिणी च़ेलैऐ सै यीशु आमा आपणै घौरै नींई गोई।

यीशु री मौउत

(मती27:45-56; मरकुस15:33-41; लूका23:44-49)

²⁸ एथ बासिऐ यीशुऐ इणै ज़ाणिऔ कि आबै सब-कुछ़ पूरौ हुई गौ आ, एथीलै कि पवित्रशास्त्रा दी ज़ो बोलौ आ सेऊ पूरौ हुआ, और बोलौ, “हाऊं चिशो ऊ।” ²⁹ तिऐ सिरकै कौरीऐ भौरौ औन्दौ एक ओखर थौ छ़ाड़ौ औन्दौ, और तिउंऐ लांबै डिंगै दी स्याइचूश लाऔ और सिरकै दी भिज़ाऔ और यीशु रै मुंआ दी लाऔ। ³⁰ ज़ेबी यीशुऐ सेऊ सिरकौ चुशौ, और बोलौ, “पुरौ हुऔ”; और मूंढ उटै पाईयौ प्राण छ़ाड़ै।

बौड़छ़ै कौरी छोपणौ

³¹ एथीलै कि सेऊ त्यारी रौ दिन थौ, यहूदिउऐ पिलातुसा कु औरज़ कौरी कि इऊं री टांगे पोरु च़ांई चोड़नी और क्रूसा कु उतारनै च़ांई ताकी इऐ ब्रौता रै दिना दी क्रुसा माथै ना रौआ, कैलैकि ब्रौता रौ दिन सारेऊ कु बौड़ौ दिन थौ। ³² और तिऊं सिपाइउऐ आशीऔ तिंऊ आदमी मांझ़िया कु पैहलै री टांगै चोड़ी और तैबै दुजै री भी, ज़ो यीशु आइलै थै क्रुसा माथै च़ौड़ाऐ औन्दै; ³³ पर ज़ेबी यीशु काऐ आशियौ देखौ की एऊ मौरी गौ आ, ता तेसरी टांगै नाईं चोड़ी। ³⁴ पर सिपाइऊ मांझ़िआ कु एकीऐ बरछ़ै कौरीऐ तेसरी शाफड़ी छोपी, और तेसकु खरकच़ार लोहु और पाणी निकल़ौ। ³⁵ ज़ुणिऐ इणौ देखौ, तिणीऐ गवाही देई, और तेसरी गवाही सौच़ी आ; और सेऊ ज़ाणा आ कि सेऊ सौच़ौ बोला आ कि तुमै भी विश्वास कौरौ। ³⁶ एज़ी बुशै एथीलै हुई की पवित्रशास्त्रा दी ज़ो बोलौ औन्दौ आ सेऊ पूरौ हुऔ आ, “तेसरै कोई हाड़कै नाईं चोड़ा लै।” ³⁷ तैबै एक ओरी ज़ागाह दी इणौ आ लिखौ औन्दौ, “ज़ुण तिउंऐ छोपौ आ, तेस माथै सै नौज़र छ़ाड़ा लै।”

यीशु रौ मौड़ौ ओडाच़ी दी छ़ाड़णौ

(मती27:57-61; मरकुस15:42-47; लूका23:44-49)

³⁸ एज़ी बुशु बासिऐ अरिमतिया रै यूसुफै ज़ो यीशु रौ च़ेलौ थौ, पर यहूदिउ रै डौरा कु एज़ी बूश च़ोरी छ़ाड़ा थौ, पिलातुसा कु औरज़ कौरी की का हाऊं यीशु रौ मौड़ौ नीऊं लै। पिलातुसै तेसरी औरज़ शुणी और यूसुफै आशियौ यीशु रौ मौड़ौ निंऔ। ³⁹ नीकुदेमुस भी, ज़ो पैहलै यीशु काऐ राच़ी डैऔ थौ, पचास सेरा रै लगभग मिलाऔ औन्दौ खुशबुदार च़िज़ै और मैंहगै वाल़ौ तेल आणौ। ⁴⁰ तैबै तिउंऐ यीशु रौ मौड़ौ निंऔ, और यहूदिउ रै दाबणा रै रिवाज़ा कौरीऐ सेऊ खुशबुदार च़िज़ै कौरीऐ टाला दी मेटौ। ⁴¹ सेज़ी ज़ागाह दी ज़िऐ यीशु क्रूसा माथै च़ौड़ाऔ थौ, एक बगीच़ौ थौ, और तेस बौगीच़ै दी एक नौईं ओडाच़ी थी ज़ासदी केबी भी कोई नाईं छ़ाड़ौ थौ। ⁴² एथीलै यहूदिउ रै त्यारी रै दिना रै वजाह कु तिउंऐ यीशु तेथी दी छ़ाड़ौ, कैलैकि सै ओडाच़ी नज़दीक थी।

खाली ओडाच़ी

(मती28:1-8; लूका24:1-12; मरकुस16:1-8)

¹ सप्ताह रै पैहलै दिनै मरियम मगदलीनी दोउत राची न्यारै दी ओडाच़ी काऐ आशी, और पात्थर ओडाच़ी कु घिसरौ औन्दौ देखौ। ² तैबै तिउंऐ फेट मारी और शमौन पतरस और तेस दुज़ै च़ेलै काऐ ज़ास आइलै यीशु प्यार कौरा थौ, आशिऔ बोलौ, “तिउंऐ ओडाच़ी भितै कु प्रभु गाड़ीऔ नींई गौ आ, और आमै नाईं ज़ाणदै कि सेऊ किऐ छ़ाड़ी गौ आ।” ³ तैबै पतरस और सेऊ दुज़ौ च़ेलौ निकल़ीऔ ओडाच़ी भिलै च़ाल पौड़ै। ⁴ सै दुइआ साथा-साथाई फेटै देन्दै थै लागै औन्दै, पर दुज़ौ च़ेलौ पतरसा कु औगाड़िऐ डेइऔ ओडाच़ी काऐ पैहलै पौउंच़ौ; ⁵ और उटौ पौड़ीयौ जुड़कै धौनी पौड़ै औन्दै देखै, पर सेऊ भीतरै नाईं डैऔ। ⁶ तेबै शमौन पतरस ज़ो तेस पिछ़ु थौ आशदै लागौ औन्दौ पौउंच़ौ, और ओडाच़ी दी भीतरै डैऔ और जुड़कै पौडै औन्दै देखै। ⁷ और सेऊ कापड़ौ ज़ो तेसरै मुंढा दी थौ बानौ औन्दौ, जुड़कै आइलै पौड़ौ औन्दौ नाईं, पर औलग एकी ज़ागाह दी मेटियौ छ़ाड़ौ औन्दौ देखौ ⁸ तैबै दुज़ौ च़ेलौ भी ज़ो ओडाच़ी काऐ पैहलै पौउंच़ौ थौ भीतरै डैऔ और देखिऔ विश्वास किऔ। ⁹ सै ता इबी झ़ाऊं पवित्रशास्त्रा री तिऐं बूश नाईं सौमझ़ै थै कि सेऊ मौरै औन्दै मांझ़िआ कु ज़िउंदौ हुआ आ। ¹⁰ तैबै सै च़ेलै आपणै घौरै डेई गौऐ।

मरियम मगदलीनी कै यीशु दिशणौ

(मती28:9-10; मरकुस16:9-11)

¹¹ पर मरियम लेरियौ ओडाच़ी काऐ बाईरै खौड़ी रौई, और लेरदै- लेरदै ओडाच़ी भिलै उटै पौड़ियौ। ¹² दुई सौरगा रै दूत च़ौमकीलै जुड़कै भीड़ीऔ एक शिराणै काऐ और दुज़ौ बांगणै काऐ बोशै औन्दै देखै, ज़िऐ यीशु रौ मौड़ौ थौ छ़ाड़ौ औन्दौ। ¹³ तिउंऐ तियांलै बोलौ, “ओ बौईण, तू कैलै लेराई?” मरियमै तिउंलै बोलौ, “तिउंऐ मैरौ प्रभु च़ुंगीऔ नीं गौ आ और हांऊ नाईं ज़ाणदी कि सेऊ किऐ छ़ाड़ौ औन्दौ।” ¹⁴ इणौ बोलियौ सै पिछ़ाऊं फीरी और यीशु खौड़ौ हुऔ औन्दौ देखौ, पर नाईं पराणुऔ कि एऊ यीशु आ। ¹⁵ यीशुऐ तियांलै बोलौ, “ओ छ़ेउड़ी ज़ात, तू कैलै लेराई? कास लौड़ाई?” तिआंऐ सेवक समझ़ीओ तेसलै बोलौ, “ओ महाराज़, अगर ताइंऐ सेऊ नींई गौ आ ता मुकै बोल कि सेऊ किऐ छ़ाड़ौ आ, और हाऊं तेस निआंऊ।” ¹⁶ यीशुऐ तियांलै बोलौ, “मरियम!” तियांऐ पिछ़ाऊं फिरीऔ तेसलै इब्रानी बोली दी बोलौ, “रब्बूनी!” मतलब कि ‘ओ गुरु’। ¹⁷ यीशुऐ तियांलै बोलौ, “मुं नाईं छ़ूं, कैलैकि हाऊं इबी झ़ाऊं बाबा काऐ उपरै नाईं डैऔ, पर मैरै भाइऊ काऐ डेइऔ तिउंलै बोल, कि हाऊं आपणौ बाब और तुमारौ बाब, और आपणै परमेश्वर और तुमारै परमेश्वरा काऐ उपरै डिआऊ।” ¹⁸ मरियम मगदलीनी ऐ डेइऔ च़ेलैऊ कै बोलौ, “मुइंऐ प्रभु देखौ, और तिणीऐ मुंलै एज़ी बुशै बोली।”

च़ेलेउ काए परगट हुणौ

(मती28:16-20; मरकुस16:14-18; लूका24:36-39)

¹⁹ सेज़ै दिनै ज़ो सप्ताह रौ पैहलौ दीन थौ, ब्याल़कै बौग्तै ज़ेबी तिदलै दार ज़िऐ च़ेलै थै, यहूदिउ रै डौरा कु बन्द थै, तैबै यीशु आशौ और तिऊं मांझ़िऐ खौड़ौ हुइऔ तिउंलै बोलौ, “तुमुलै शान्ति मिला।” ²⁰ और इणै बोलिऔ तिणीऐ आपणौ हाथ और आपणी कूख तिउंकै देखाल़ै। तैबै च़ेलै प्रभु देखिऔ खुश हुऐ। ²¹ यीशुऐ तौइंऐ तिउंलै बोलौ, “तुमुलै शान्ति मिला; ज़िणौ बाबै हाऊं भेज़ौ ऊ, तिणीई हाऊं भी तुमु भेज़ाऊ।” ²² इणौ बोलिऔ तिणीऐ तिऊं माथै फूकरौ और तिउंलै बोलौ, “पवित्र आत्मा निऔं। ²³ ज़ासरै पाप तुमै माफ कौरा, सै तिउंलै माफ की ई गौऐ ई; ज़ासरै तुमै छ़ाड़ौ, सै छ़ाडै गौऐ आ।”

थोमा काए परगट हुणौ

²⁴ पर बाराह मांझ़िआ कु एक, मतलब कि थोमा ज़ासलै दिदुमुस बोलाई, ज़ेबी यीशु आशौ ता तेस आइलै नाईं थौ। ²⁵ ज़ेबी ओर च़ेलै तेसलै बोलदै लागै, “आमुऐ प्रभु देखौ आ,” तैबै तिणीऐ बोलौ, “ज़ेबी झ़ाऊं हाऊं तेसरै हाथा दी परेगा रै छ़ेद नाईं देखुलौ, और तेसरै छ़ेदा दी आपणी हाथा री औउंठी नाईं पाऊलौ, तेबी झ़ाऊं हाऊं विश्वास नाईं कौरदौ।” ²⁶ आठा दिना बासिऐ तेसरै च़ेलै तौइंऐ घौरा भीतै थै, और थोमा तिऊं आइलै थौ; और दार बौन्द थै, तैबै यीशु आशौ और तिऊं मांझ़िऐ खौड़ौ हुईऔ बोलौ, “तुमलै शान्ति मिला।” ²⁷ तैबै तिणीऐ थोमा लै बोलौ, “आपणी ओंउठी इदै आणीऔ मैरै हाथ देख और आपणै हाथा री औउंठी मैरै हाथा रै छ़ेदा दी पा, और अविश्वासी नाईं पर विश्वासी बौण।” ²⁸ इणै शुणीऔ थोमै ज़वाब दैऔ, “ओ मैरै प्रभु, ओ मैरै परमेश्वर!” ²⁹ यीशुऐ तेसलै बोलौ, “ताइंऐ हाऊं देखो ऊ, का एथीलै विश्वास कियौ आ? भौलै ई सै आदमी ज़ुणीऐ बिण देखै विश्वास कियौ।”

इयैं किताबी रौ मतलब

³⁰ यीशुऐ ओर भी भौरी चिन्ह च़ेलेऊ कै देखाल़े ई, ज़ो ईयां किताबी दी नाईं लिखौ औन्दौ; ³¹ पर इऐ एथीलै आ लिखी ऐन्दी, कि तुमै विश्वास कौरा कि यीशु ही परमेश्वरा रौ छ़ोहरु मसीह आ, और विश्वास कौरीयौ तेसरै नावां दी सौदा री ज़िन्दगी पाऔ।

तिबिरियास झ़ीला रै ढिका काए च़ेलेउ काए परगट हूणौ

¹ इऊं बुशु बासिऐ यीशु आपू तिबिरियास झ़िला रै डिका दी च़ेलेऊ माथै परगट हुऔ: ² शमौन पतरस, और थोमा ज़ासलै दिदुमुस बोलाई, और गलीला रै काना गांवा रौ नतनएल, और जबदी रै छ़ोहरु, और तेसरै च़ेलेऊ मांझ़िआ कु दुई लोग औज़ौ कौट्ठै थै। ³ शमौन पतरसै तिउंलै बोलौ, “हाऊं माछ़ी पाकुड़दै डिआऊ।” तिउंऐ तेसलै बोलौ, “आमै भी ताऊं आइलै आशी ई।” तैबै सै निकल़ियौ किश्ती दी च़ौड़ै, पर सेज़ी राची तिउंकै कुछ़ ना पाकड़ुऔ। ⁴ दोउत राची ई यीशु डिका काऐ आशियौ खौड़ौ हुऔ; तैबै भी च़ेलेउऐ नाईं पराणौ की एऊ यीशु आ। ⁵ तैबै यीशुऐ तिउंलै बोलौ, “ओ लोल़डेउओ, का तुमुकै कुछ़ माछ़ी आसती आ?” तिउंऐ ज़वाब दैऔ, “नाईं।” ⁶ तिणीऐ तिउंलै बोलौ, “किश्ती रै सुलटी भिलै ज़ाल़ पा लै ता तुमुकै मिला ई।” तैबै तिउंऐ ज़ाल़ पाऔ, और सै भौरी माछ़ी मिलणै री वज़ाह कु ज़ाल़ झिड़ी नाईं बौल़ै। ⁷ तैबै तिणी च़ेलै ऐ ज़ास आइलै यीशु प्यार कौरा थौ, पतरसा लै बोलौ, “एऊ ता प्रभु आ!” शमौन पतरसै इणौ शुणीऔ कि एऊ प्रभु आ, पिठी दी गाची बानियौ कौशी, कैलैकि सेऊ नांगौ थौ, और झ़िला दी डैऔ। ⁸ पर दुज़ै च़ेलै किश्ती दी माछ़ी कौरी भौरुऐ औन्दौ ज़ाल़ झिड़ी-झिड़ीऔ आशै, कैलैकि सै डिका कु ज़ादै दुर नाईं थै, बल्की लगभग दुई शौ हाथ दुर थै। ⁹ ज़ेबी सै डिका दी आशै, ता तिउंऐ गाठे री आग और तेथदी माछ़ी छ़ाड़ी, ऐन्दी और रोटी देखी। ¹⁰ यीशुऐ तिउंलै बोलौ, “ज़ो माछ़ी तुमुऐ इबी पाकड़ी ई, तिऊं माझ़ीऊ कु कुछ़ आणौ।” ¹¹ तैबै शमौन पतरसै किश्ती दी डेइऔ एक शौ तरेपन बौड़ी माछ़ीउ कौरी भौरुऔ औन्दौ ज़ाल़ डिका दी झिड़ौ, और एती माछ़ीउ कौरीऐ भी ज़ाल़ नाईं च़िरुऔ। ¹² यीशुऐ तिउंलै बोलौ, “आशौ, रोटी खाऔ।” च़ेलै माझ़िआ कु कासी री हिम्मत नाईं पौड़ी की तेसकु पुछ़ा, कि “तू कुण ई?” कैलैकि सै ज़ाणा थै की एऊ प्रभु ई आ। ¹³ यीशुऐ आशीऔ रोटी च़ुंगी और तिउंलै देई, और तिणी ई माछ़ी भी देई। ¹⁴ इऔ चिजी बारै आ कि यीशु मौरै औन्दै मांझ़ीआ कु ज़िउंदौ हुईयौ च़ेलेऊ कै दिशौ।

यीशु और पतरस

¹⁵ रोटी खाइऔ यीशुऐ शमौन पतरसा लै बोलौ, “ओ शमौन, यूहना रै छ़ोहरु, का तू इऊं कु बौड़ीयौ मुकु प्यार कौरा ई?” तिणीऐ तेसलै बोलौ, “ओ, प्रभु; तू ता ज़ाणा ई कि हाऊं ताऊं आइलै प्यार कौरा ऊ।” तिणीऐ तेसलै बोलौ, “मैरै गाबड़ु च़ार।” ¹⁶ तिणीऐ तौइंऐ दुज़ी बारै तेसलै बोलौ, “ओ शमौन, यूहना रै छ़ोहरु आ, का तू मुकु प्यार कौरा ई?” तिणीऐ तेसलै बोलौ, “ओ, प्रभु; तू ज़ाणा ई कि हाऊं ताऊं आइलै प्यार कौरा ऊ।” तिणीऐ तेसलै बोलौ, “मेरी भेरी ज़ाग।” ¹⁷ यीशुऐ चिजी बारै तेसलै बोलौ, “ओ शमौन, यूहना रै छ़ोहरु, का तू मुकु प्यार कौरा ई?” पतरस नराज़ हुऔ कि तिणीऐ चिजी बारै तेसलै इणौ बोलौ, “का तू मुकु प्यार कौरा ई?” और तेसलै बोलौ, “ओ प्रभु, तू ता सब कुछ़ ज़ाणा ई; तू इणौ भी ज़ाणा ई कि हाऊं ताऊं कु प्यार कौराऊ।” यीशुऐ तेसलै बोलौ, “मेरी भेरी च़ार। ¹⁸ हाऊं ताउंलै सौच़ौ-सौच़ौ बोलाऊ, “ज़ेबी तू ज़वान थौ ता आपणी कौमर बानीऔ ज़िऐ च़ाह थौ तिऐ डिआ थौ; पर ज़ेबी तू बुड़ौ औआ लौ ता आपणै हाथ फौइलावा ई, और दुज़ै तेरी कौमर बनीयौ ज़िऐ तू नाईं च़ाह लौ तिऐ तांऊ नियां ई।” ¹⁹ तिणीयीशुऐ एज़ी बुशैऊ कौरीऐ इशारौ दैऔ कि पतरस किणी मौता कौरीऐ परमेश्वरा री बौड़ाई कौरा और तैबै तिणीऐ तेसलै बोलौ, “मुं पीछ़ु च़ाल।”

यीशु और तेसरौ प्यारौ च़ेलौ

²⁰ पतरसै मुड़ीऔ सेऊ च़ेलौ पिछ़ाड़ीऐ आशदै देखौ, जासकु यीशु प्यार कौरा थौ, और ज़ुणीऐ रोटी खाणै रै भगता दी यीशु री छ़ाती भिलै झुकीऔ पुछ़ौ थौ, “ओ प्रभु, ताऊं पकड़ाउणे वाल़ौ कूण आ?” ²¹ तेस देखीऔ पतरसै यीशु लै बोलौ, “ओ प्रभु, एसरौ का हाल औआ लौ?” ²² यीशुऐ तेसलै बोलौ, अगर हाऊं च़ाऊ लै कि सेऊ मैरै आशणै झ़ाऊं रुकी रौआ, ता ताउंलै एथकु का? तू मुं पिछ़ु च़ाल।” ²³ एथीलै भाईऊ मांझ़िऐ एज़ी बुशै फौइली गोई कि सेऊ च़ेलौ नाई मौरदौ; पर यीशुऐ तेसकै इणौ नाईं बोलौ थौ कि सेऊ नाईं मौरदौ, पर इणौ बोलौ थौ कि, “अगर हाऊं च़ाऊलै कि सेऊ मैरै आशणै झ़ाऊं रूकी रौआ, ता ताउंलै एथकु का?”

इयैं किताबी रै बारै दी

²⁴ एऊ सेज़ौ च़ेलौ आ ज़ो एज़ी बुशु री गवाही दिआ और ज़ुणीऐ एज़ी बुशै लिखी ऐन्दी ई, और आमैं ज़ाणी ई कि तेसरी गवाही सौच़ी आ। ²⁵ औज़ौ भी भौरी काम ई, ज़ो यीशुऐ किए ई; अगर तिऊं एक एक कौरीऐ लिखा थै, ता हाऊं सौमझ़ा ऊ कि ज़ो किताबै लिखा थै सै संसारा दी नाईं औका थी।