3 यूहन्ना

3 John

3 यूहन्ना

आभिवादन

¹ मूं स्याणे री तौरफा कु तेस आच़्छ़ै गयुसा रै नावां दी, ज़ास आइलै हाऊं सौच़्च़ौ प्यार कौराऊ। ² ओ आच़्छ़ै भाई, मेरी इऐ औरज़ आ; कि ज़िणौ तू आत्मा दी बौड़दै लागौ औन्दौ तिणी ई तू सारी बुशु दी भी बौड़, और भौलौ च़ांगौ रौऊ। ³ कैलैकि ज़ैबै भाईउऐ आशियौ, तेरी सै सौच़्च़ाई री गवाही देई, ज़ास माथै तू सौच़्च़ी हाण्डा ई ता हाऊं भौरी खुश हुऔ। ⁴ मुलै एथकु बौड़ियौ औज़ौ केज़ी खुशी नाईं, कि हाऊं शुणु, कि मैरै लोल़डै सौच़्च़ाई माथै हाण्डा ई।

गयुसा री तारीफ

⁵ ओ आच़्छ़े भाई, ज़ो कुछ़ तू तिऊं भाईऊ आइलै कौरा ई, ज़ो दुजे देशा रै भी ई, तेस आइलै विश्वासी ज़िणौ कौरा ई। ⁶ तिउंऐ खुंबल़ी दी तैरै प्यारा रै बारै दी गवाही देई थी: अगर तू तिऊं तिणौ विदा कौरालौ ज़िणौ परमेश्वरा रै लोगु लै ठीक आ ता आच़्छ़ौ कौराई। ⁷ कैलैकि सै तेस नाउं लै निकल़ै ई, और दुजी ज़ाति कु कुछ़ नाईं निंदै, ⁸ एथीलै इणेऊ रौ स्वागत च़ाईं कौरणौ, ज़ेथकु आमै भी सौच़्च़ाई रै पौक्षा दी तिऊं रै साथी हुआ।

दियुत्रिफेस और दिमेत्रियुस

⁹ मुंइयै खुंबल़ी लै कुछ़ लिखौ थौ; पर दियुत्रिफेस ज़ो तिऊं माझ़िऊ बौड़ौ बौणनौ च़ाहा आ, आमुं नाईं अपणाउंदौ। ¹⁰ ज़ेबी हाऊं आशु लै, ता तेसरै कामा लै ज़ो सेऊ कौरदै आ लागौ औन्दौ याद दिलावाऊ, कि सेऊ आमारै बारै दी बुरी-बुरी बुशै भौका आ; और एथ माथै भी तस्सली नाईं कौरीयौ आपू ई भाईऊ नाईं अपणाउंदौ, और ज़ो तिऊं मानणौ च़ाहा ई, तिउंलै कौरा नाईं: और खुंबल़ी कु गाड़ा आ पोरु। ¹¹ ओ प्यारेउओ, बुराई रै नाईं, पर भलाई रै साथी बौणौ, ज़ुण भलाई कौरा ई, सै परमेश्वरा री तौरफा कु ई; पर ज़ुण कौरा ई बुराई, तिणिऐ परमेश्वर नाईं देखौ। ¹² देमेत्रियुसा रै बारै दी सारेउऐ बल्की सौच़्च़ाईऐ भी आपू ई गवाही देई : और आमै भी गवाही देई, और तू ज़ाणा ई, कि आमारी गवाही सौच़्ची आ।

आखरी अभिवादन

¹³ मुंइयै ताउंलै भौरी कुछ़ लिखणौ थौ, पर सियाही और कलमा कौरी लिखणौ नाईं च़ांहदौ। ¹⁴ पर मुकै विश्वास आ कि हाऊं ताऊंकु फेटी मिलाऊ: तैबै आमै आमनै-सामनै बुशै लाई : ¹⁵ ताउंलै शान्ति मिलदै रौआ। इदलै गोष्टण ताउंलै ढाल कौरा ई : तिदलै गोष्टणा रै नाउं निई-निंयौ ढाल बोलै।