2 तीमुथियुस

तीमुथियुस के नाम लिखी पवलुस के दूसर चिट्ठी

इआ चिट्ठी के परिचय

तीमुथियुस के नाम लिखी यीसु मसीह के खास चेला पवलुस के दूसर चिट्ठी माहीं, पवलुस अपने एकठे जबान साथी, अउर सहायक के रूप माहीं काम करँइ बाले तीमुथियुस काहीं निजी सलाह देत हें। अउर इआ चिट्ठी माहीं धीरज के बारे माहीं बताबा ग हय। अउर तीमुथियुस काहीं सलाह अउर उत्साहित कीन ग हय, कि सताव अउर बिरोध के बावजूदव ऊँ इमानदारी के साथ यीसु मसीह के बारे माहीं लोगन काहीं बताबत रहँय, खुसी के खबर अउर पबित्र सास्त्र के पुरान नेम के सही सिच्छन माहीं अटल बने रहँय, अउर सिच्छा देंइ अउर प्रचारक के रूप माहीं आपन करतब्य निभाबत रहँय।

तीमुथियुस काहीं खास करके “मूरखँइ के फालतू बाद-बिबादन से” जिनसे मुसीबत पइदा होती हईं, उनखे खतरन के बारे माहीं चेतउनी दीनगे ही। काहेकि एसे कुछू फायदा नहीं होय, बलकिन इआ सुनँय बालेन के खातिर बिसुआस से भटकँय के कारन होत हय।

ईं सगलेन से, तीमुथियुस काहीं खुद के अउर लेखक के खुद के जीबन के बारे माहीं, अउर उनखे उद्देस्य के बारे माहीं अउर उनखे बिसुआस, सहनसीलता, प्रेम, धीरज, अउर सताव के समय माहीं दुख सहँइ के उदाहरन काहीं सुधि देबाबा ग हय।

रूप-रेखा :

भूमिका 1:1,2

प्रसंसा अउर उपदेस 1:3—2:13

सलाह अउर चेतउनी 2:14—4:5

पवलुस के खुद के दसा4:6-18

उपसंहार 4:19-22

पवलुस के अभिबादन

¹हम पवलुस आहेन, हे तीमुथियुस इआ चिट्ठी हम तोंहईं लिख रहेन हय, जउन तूँ हमरे पियार लड़िका कि नाईं हया, जउन अनन्त जीबन देंइ के वादा परमातिमा किहिन रहा हय, ओखे मुताबिक जेतने जने प्रभू यीसु मसीह के ऊपर बिसुआस करत हें, उनहीं बतामँइ के खातिर, परमातिमा के इच्छा से, हम यीसु मसीह के खास चेला आहेन। ²हम प्राथना करित हएन, कि पिता परमातिमा अउर हमरे पंचन के प्रभू मसीह यीसु के तरफ से तोंहईं किरपा, दया, अउर सान्ति मिलत रहय।

धन्यबाद अउर उत्साहित करब

³जउन मेर परमातिमा के सेबा हमार पुरखा करत रहे हँय, उहयमेर हमहूँ सुद्ध मन से करित हएन, परमातिमा के धन्यबाद होय कि हम तोंहरे खातिर हमेसा प्राथना करित हएन। ⁴अउर हमरे खातिर तूँ जउन आँसू बहाया हय, उनहीं सुधि कइके हम तोंहसे मिलँइ के खातिर दिन-रात इच्छा करित हएन, कि कबय मिली, अउर तोंहसे मिलिके आनन्दित होइ जई। ⁵हमहीं यीसु मसीह के ऊपर किहे तोंहरे निस्कपट बिसुआस के सुधि आबत ही, जउन मेर पहिले तोंहार नानी लोइस अउर महतारी यूनीके करत रही हँय, अउर हमहीं इआ पूर बिसुआस हय, कि तूँ उहयमेर निस्कपट बिसुआस अबहिनव करते हया। ⁶इहय कारन से हम तोंहईं सुध देबाइत हएन, कि तूँ परमातिमा के उआ बरदान काहीं, जउन हमरे हाँथ धइके प्राथना किहे के व्दारा तोहईं मिला रहा हय, ओखर निकहा से उपयोग करत रहा। ⁷काहेकि परमातिमा हमहीं पंचन काहीं डेराँइ बाली आत्मा नहीं दिहिन, कि हम पंचे डेरई, बलकिन सामर्थ के अउर प्रेम करँइ बाली खुद काहीं काबू माहीं रक्खँइ बाली आत्मा दिहिन हीं। ⁸एसे तूँ प्रभू के बारे माहीं दुसरेन काहीं बतामँइ माहीं न लजा, अउर न हमहिन से लजा, जउन खुसी के खबर सुनामँइ के कारन जेल माहीं बंद हएन, पय परमातिमा के दिहे सामर्थ के मुताबिक खुसी के खबर काहीं सुनामँइ के खातिर, हमरे कि नाईं दुख उठाबा, ⁹परमातिमा हमहीं पंचन काहीं मुक्ती दिहिन हीं, अउर पबित्र जीबन जिअँइ के खातिर बोलाइन हीं, एसे नहीं कि हम पंचे निकहे काम किहेन हय, बलकिन परमातिमा अपने उद्देस्य काहीं पूर करँइ के खातिर, हमहीं पंचन काहीं बोलाइन हीं, काहेकि परमातिमा संसार के बनामँइ से पहिलेन, अपने किरपा से मसीह यीसु के व्दारा, मुक्ती देंइ के योजना बनाइन रहा हय। ¹⁰पय अब हमहीं पंचन काहीं मुक्ती देंइ बाले यीसु मसीह, संसार माहीं आइके उआ किरपा काहीं प्रगट किहिन, अउर उँइन मउत के सक्ती काहीं खतम कइ दिहिन, अउर जउन परमातिमा के साथ हमेसा जीबन बितामँइ के मोका देत ही, उआ खुसी के खबर के प्रचार किहिन। ¹¹इहय खुसी के खबर काहीं फइलामँइ अउर उपदेस देंइ के खातिर, हम यीसु मसीह के खास चेला ठहरेन हय। ¹²इहय कारन हम ईं दुखन काहीं सहित हएन, पय लजई नहीं, काहेकि जिनखे ऊपर हम बिसुआस किहेन हय, उनहीं हम जानित हएन; अउर हमहीं पूर बिसुआस हय, कि जउन खुसी के खबर परमातिमा हमहीं सउँपिन हीं, ओखर रखबारी ऊँ अन्त समय तक कइ सकत हें। ¹³जउने सत्य बातन काहीं हम तोहईं सिखायन हय, उनहीं तूँ उआ बिसुआस अउर प्रेम के साथ, जउन मसीह यीसु माहीं मिले हँय, उनहीं आपन आदर्स बनाइके रखा। ¹⁴अउर पबित्र आत्मा के व्दारा, जउन हमरे पंचन के जीबन माहीं रहत हय, जउन तोंहईं सउँपा ग हय, इआ निकही थाती के रखबारी करा।

¹⁵तूँ जनते हया, कि आसिया प्रदेस के सगले बिसुआसी हमहीं छोंड़िके चलेगें हें, उन माहीं फूगिलुस अउर हिरमुगिनेस घलाय हें। ¹⁶उनेसिफुरूस के घराना के ऊपर प्रभू दया करँय, काहेकि ऊँ कइअक बेरकी हमसे मिलँय आए रहे हँय, हम जेल माहीं बंद रहेन हय, तऊ मिलँय से नहीं लजानें, एसे हमहीं बड़ी सान्ति मिली। ¹⁷पय जब ऊँ रोम देस माहीं आएँ, तब बड़ी मेहनत से ढूँढ़िके हमसे मुलाखात किहिन। ¹⁸प्रभू करँइ कि न्याय के दिन, उनखे ऊपर प्रभू के दया होय, अउर जउन-जउन सेबा ऊँ इफिसुस सहर माहीं किहिन हीं, उनहीं तूँ निकहा से जनते हया।

यीसु मसीह के सच्चा सिपाही

¹एसे हे बेटा तीमुथियुस, मसीह यीसु से जउन किरपा तोहईं मिली हय, ओसे तूँ आत्मिक जीबन माहीं मजबूत होइजा, ²अउर परमातिमा के जउने बातन काहीं खुब मनइन के आँगे हम तोहईं बतायन तय, उन बातन काहीं अइसन काबिल मनइन काहीं सउँपि द्या; जउन दुसरे काहीं सिखामँइ के काबिल होंय। ³अउर यीसु मसीह के सच्चे सिपाही कि नाईं, हमरे साथ दुख उठाबा। ⁴जब कउनव सिपाही लड़ाई माहीं जात हय, त उआ इआ कोसिस करत हय, कि अपने अधिकारी काहीं खुस करय, अउर खुद काहीं लड़ाई के काम के अलाबा, संसार के दुसरे कामन माहीं मन नहीं लगाबय। ⁵अगर कउनव लड़ाई लड़ँइ बाला नेम के मुताबिक नहीं लड़य, त उआ मुकुट2:5 इनाम नहीं पाबय। ⁶जउन किसान खेती करँइ माहीं मेहनत करत हय, फसल के फायदा पहिले ओहिन काहीं मिलँय चाही। ⁷जउन हम कहित हएन, ओखे ऊपर ध्यान द्या, अउर प्रभू तोहईं सगली बातन काहीं समझँइ के बुद्धी देइहँय। ⁸अउर यीसु मसीह काहीं सुधि रक्खा, जउन दाऊद के कुल माहीं जनम लिहिन, अउर मरिके जिन्दा होइगें; इहय खुसी के खबर आय, जेखर हम प्रचार करित हएन। ⁹खुसी के खबर के खातिर हम अपराधी कि नाईं दुख उठाइत हएन, इहाँ तक कि हम जेल माहीं घलाय बंद हएन; पय तूँ इआ जानिल्या, कि परमातिमा के बचन काहीं फइलँय से कोऊ नहीं रोंक सकय। ¹⁰इहय कारन से हम परमातिमा के चुने लोगन के खातिर, हरेक दुख-मुसीबत काहीं उठाबत रहित हएन, जउने ऊँ पंचे घलाय मसीह यीसु के ऊपर बिसुआस करे से जउन मुक्ती मिलत ही, ओही अनन्त महिमा समेत पामँय। ¹¹इआ बात बेलकुल सही आय, कि

अगर हम पंचे यीसु मसीह के साथ मर गएन हय, (मतलब अपने पापी सुभाव के खातिर) त उनहिन के साथ जिऊ अउब।

¹²अगर हम पंचे यीसु के खातिर दुख-मुसीबत सहत रहब, त यीसु मसीह के साथ राजव करब, अगर हम पंचे यीसु काहीं इनकार करब, त ऊँ हमहीं पंचन काहीं अपनामँइ से इनकार करिहँय।

¹³अगर हम पंचे बिसुआस के काबिल न रही, तऊ परमातिमा बिसुआस के काबिल बने रहत हें, काहेकि परमातिमा जउन वादा करत हें, ओही जरूर पूर करत हें, ऊँ कबहूँ नहीं बदलँय।

निकही सिच्छा देंइ के निरदेस

¹⁴जउने बातन काहीं हम तोहईं बताएन हय, उनहीं बिसुआसी मनइन काहीं सुध देबाबा, अउर प्रभू काहीं गबाह मानिके उनहीं चेताय द्या, कि बचन के सब्दन काहीं लइके फालतू बहँस न करँय, काहेकि इनसे कउनव फायदा नहीं होय; बलकिन सुनँइ बाले बिसुआस से भटक जात हें। ¹⁵तूँ अइसन काम करँइ बाले बनँय के कोसिस करा, जउने परमातिमा के आँगे लजाँय न परय, बलकिन परमातिमा तोहईं अपने काम के काबिल समझँय, अउर तूँ परमातिमा के सत्य बचन काहीं निकहा से लोगन काहीं सिखामँइ बाले ठहरा। ¹⁶जउन मनई परमातिमा के बिरोध माहीं बात कहत हें, उनसे तूँ बचे रहा, काहेकि इआमेर के मनई, अउरव अभक्ती माहीं बढ़त जइहँय। ¹⁷अउर इआमेर के लोगन के सिच्छा सड़े-घाव कि नाईं फइलत जात ही, हुमिनयुस अउर फिलेतुस उँइन गलत सिच्छा देंइ बालेन म से आहीं। ¹⁸जउन इआ कहत हें, कि जउन बिसुआसी मरिगें तय, उनखर मर के जि उठब होइ चुका हय, ऊँ सत्य से भटकिगें हँय, अउर कुछ मनइन के बिसुआस काहीं नास कइ देत हें। ¹⁹तऊ परमातिमा जिनहीं चुनिन हीं, ऊँ बिसुआस माहीं पक्की नेव कि नाईं मजबूत बने रइहँय, काहेकि उनखे ऊपर बचन रूपी छाप लगी हय, “कि प्रभू अपने चुने मनइन काहीं पहिचानत हें।” अउर “जे कोऊ प्रभू के नाम के ऊपर बिसुआस करत हय, उआ बुरे कामन से बचा रहय।”

²⁰कउनव बेउहर के घर माहीं, केबल सोन-चाँदिन भर के नहीं, बलकिन लकड़ी अउर माटिव के बरतन घलाय होत हें; पय कुछ बरतन निकहे कामन माहीं, अउर कुछ साधारन कामन माहीं उपयोग कीन जात हें। ²¹एसे अगर कउनव मनई खुद काहीं बुराइन से सुद्ध करी, त उआ निकहे कामन माहीं काम आमँइ बाले बरतन कि नाईं पबित्र ठहरी, अउर अपने मालिक के काम अई, अउर हरेक निकहे कामन के खातिर तइआर रही। ²²एसे हे तीमुथियुस, तूँ जबानी के बुरी इच्छन से दूरी रहा, अउर जउन सुद्ध मन से प्रभू के नाम लेथें, उनखे साथ पूरी धारमिकता, अउर बिसुआस के साथ, बड़े प्रेम से मिल-जुलिके रहा। ²³पय फालतू बहँस करँइ, अउर बाद-बिबाद से अलग रहा; काहेकि तूँ जनतेन हया, कि इनसे झगड़ा होत हय। ²⁴अउर प्रभू के सेबक काहीं झगड़ालू न होंइ चाही, बलकिन सगले मनइन के साथ कोमलता के बेउहार करँइ, अउर परमातिमा के बचन काहीं निकहा से सिखामँइ बाला होंइ चाही, अउर हरेक बातन काहीं सहँइ बाला होंइ चाही। ²⁵अउर उआ अपने बिरोधिन काहीं नम्रता से समझाबय, का पता परमातिमा उनहीं मुक्ती पामँइ के मन देंइ, अउर ऊँ सत्य काहीं पहिचान लेंइ। ²⁶अउर एखे व्दारा सचेत होइके परमातिमा के इच्छा पूरी करँइ के खातिर, सइतान के चंगुल से अजाद होइ जाँय।

आखिरी दिनन माहीं आमँइ बाला अधरम

¹हे तीमुथियुस, तूँ जानिल्या, मसीह के दुबारा आमँइ से पहिले, आखिरी दिनन माहीं खुब बुरा समय अई। ²काहेकि मनई स्वार्थी, जादा धन कमाय के लालची, खुद के कामन के बड़ाई करँइ बाले, खुद काहीं दुसरे से बड़ा मानँइ बाले, दुसरे के बुराई करँइ बाले, महतारी-बाप के कहा-बतान न मानँइ बाले, जउन उनखर मदत करी, ओखर उपकार न मानँइ बाले, बुरे काम कइके परमातिमा के ऊपर बिसुआस न करँइ बाले, ³कोहू के ऊपर दया न करँइ बाले, कोहू के गलती माफ न करँइ बाले, दुसरेन के ऊपर दोस लगामँइ बाले, खुद काहीं काबू माहीं न रक्खँइ बाले, दुसरेन काहीं नुकसान पहुँचामँइ बाले, जे परमातिमा के ऊपर बिसुआस करत हें उनखर बइरी, ⁴बिसुआस घात करँइ बाले, ढिंठाई के काम करँइ बाले, खुद पर घमन्ड करँइ बाले, अउर परमातिमा के बचन काहीं न मानिके, बलकिन खुद के खुसहाल जिन्दगी काहीं चाहँय बाले होइहँय। ⁵ऊँ पंचे अइसन ढोंग करिहँय, कि परमातिमा के सगलेन से बड़े भक्त उँइन आहीं, पय परमातिमा के सामर्थ काहीं न मनि हँय, अइसन मनइन से तूँ दूरिन रह्या। ⁶इनहिन म से कुछ लोग अइसन हें, जउन लोगन काहीं धोखा दइके चुप्पय से उनखे घरन माहीं घुसि जात हें, अउर चंचल मेहेरिअन काहीं अपने गलत सिच्छा माहीं फँसाइके, अपने बस माहीं कइ लेत हें, जउन पाप के बोझ से दबी अउर हरेकमेर के बुरी इच्छन से भरी रहती हईं। ⁷ऊँ हमेसा सिखत त रहती हईं, पय परमातिमा के सत्य सिच्छा के ग्यान काहीं नहीं जाने पउतीं। ⁸अउर यन्नेस अउर यम्ब्रेस जइसन मूसा नबी के बिरोध किहिन रहा हय, उहयमेर इऊँ पंचे घलाय परमातिमा के सत्य बचन के बिरोध करत हें, ईं त अइसन मनई आहीं, जिनखर बुद्धी भ्रस्ट होइगे ही, अउर ऊँ परमातिमा के सत्य बचन के बिसुआस करँइ माहीं निकम्मा हें। ⁹पय ऊँ गलत सिच्छा देंइ बाले लोगन काहीं जादा समय तक धोखा न दए पइहँय, काहेकि जइसन यन्नेस अउर यम्ब्रेस के मूर्खता सगले मनइन काहीं मालुम परिगे तय, उहयमेर इनहूँ के मालुम होइ जई।

तीमुथियुस काहीं खास निरदेस

¹⁰चाह कुछू होय, पय तूँ हमरे सिच्छा के पालन किहा हय, हमरे चाल-चलन, हमरे जीबन के लच्छ, मनइन काहीं परमातिमा के बचन सुनाउब रहा हय, हमार मसीह के ऊपर बिसुआस, हरेक मेर के बातन काहीं सहँइ के हमार छमता, कइसन हम सगले लोगन के साथ धीरज अउर प्रेम से रहेन, अउर तूँ हमरे सताए जाँय, अउर दुख-मुसीबत माहीं हमार मदत किहा हय। ¹¹अउर जब हम अन्ताकिया सहर, इकुनियुम अउर लुस्त्रा सहरन माहीं रहेन हय, तब उहाँ के मनई हमहीं खुब मारिन-पीटिन रहा हय, इहाँ तक कि मारि डारँइ चाहत रहे हँय, उनखे अलाबव दुख-मुसीबत परे हँय, जिनहीं हम सहेन रहा हय, पय प्रभू हमार उन सगलेन से रच्छा किहिन हीं। ¹²पय जेतने मनई मसीह यीसु के ऊपर बिसुआस कइके, उनखे बचन के मुताबिक जीबन बितामँइ चाहत हें, ऊँ सगले सताए जइहँय। ¹³पय गलत सिच्छा देंइ बाले, अउर दुसरेन काहीं मसीह के बिसुआस से भटकामँइ बाले, दुसरेन काहीं धोखा देत, अउर खुद धोखा खात, मसीह के बचन से दूर होत चले जइहँय। ¹⁴पय हे तीमुथियुस, जउने बातन काहीं तूँ सिखे हया, अउर बिसुआस किहा हय, इआ जानिके उनहिन माहीं मजबूत बने रहा, तूँ ईं बातन काहीं हमसे पंचन से सिखे हया। ¹⁵अउर लड़िकइन से पबित्र सास्त्र तोंहार जाना हय, जउन तोहईं मसीह यीसु के ऊपर बिसुआस किहे से, मुक्ती पामँइ के खातिर बुद्धिमान बनाय सकत हय। ¹⁶सगला पबित्र सास्त्र परमातिमा के अँगुआई से लिखा ग हय, जउन उपदेस देंइ, अउर समझामँइ, अउर जीबन काहीं सुधारँय, अउर सत्य के सिच्छा के खातिर लाभदायक हय। ¹⁷जउने परमातिमा के ऊपर बिसुआस करँइ बाले, बिसुआस माहीं मजबूत बनिके, हरेक भलाई के कामन के खातिर उपयोगी बन जाँय।

प्रचार करँइ के हुकुम

¹हे तीमुथियुस, परमातिमा अउर मसीह यीसु काहीं गबाह मानिके, जउन जिअत अउर मरे मनइन के न्याय करिहँय, यीसु मसीह जउन सगले मनइन के ऊपर राज करँइ के खातिर अइहँय, उनखर सुध देबाइके तोहईं हुकुम देइत हएन। ²कि तूँ खुसी के खबर के प्रचार करा; चाह तोहईं सुबिधा होय, चाह असुबिधा, आपन करतब्य करँइ के खातिर हर समय तइआर रहा, हरेक मेर के बातन काहीं सहिके, अउर निकही सिच्छा द्या, जउन बुरा काम करत हें, उनहीं चेताय द्या, अउर उनहीं डाँटा, समझाबा। ³हम इआ एसे बताइत हएन, कि एक समय अइसा अई, कि जब मनई उत्तम उपदेस काहीं सुनँय तक न चइहँय, ऊँ अपने मन के मुताबिक अपने खातिर उपदेस देंइ बालेन काहीं एकट्ठा कइ लेइहँय। ऊँ उहय उपदेस सुनइहँय, जउन ऊँ पंचे सुनँय चाहत हें। ⁴ऊँ सत्य उपदेस काहीं न सुनिके कथा-कहानिन काहीं सुनँय माहीं मन लगइहँय। ⁵पय तूँ ईं सगली बातन से सचेत रहा, दुख-मुसीबत सहा, अउर खुसी के खबर के प्रचार के काम करा, अउर जउन सेबा तोहईं सउँपी गे ही, ओही पूर करा।

पवलुस के अन्तिम गबाही

⁶अब हमरे जीबन काहीं परमातिमा के खातिर बलिदान करँइ के समय आइगा हय, अउर हमार इआ दुनिया से जाँइ के समय आइगा हय। ⁷जइसन एकठे पहिलमान नेम से कुस्ती लड़िके जीतके इनाम पाबत हय, उहयमेर जउन काम परमातिमा हमहीं दिहिन रहा हय, ओही हम निकहा से पूर कइ चुकेन हय, अउर हम उआ काम काहीं पूरे बिसुआस के साथ किहेन हय। ⁸भबिस्य माहीं हमरे खातिर धरम के उआ मुकुट धरा हय, जउन धरमी मनइन काहीं दीन जात हय, जउने काहीं प्रभू, जउन धरमी अउर न्यायी हें, हमहीं अउर उन सगलेन काहीं घलाय, जउन उनखे आमँइ के इन्तजार काहीं पियार जानत हें, न्याय के दिन देइहँय।

पवलुस के निजी सँदेस

⁹हे तीमुथियुस, हमरे लघे हरबी आमँइ के कोसिस करा। ¹⁰काहेकि देमास इआ संसार के बातन काहीं पियार जानिके हमहीं छोंड़ि दिहिस ही, अउर थिस्सलुनीके सहर काहीं चला ग हय। क्रेसकेंस गलातिया प्रदेस काहीं अउर तीतुस दलमतिया प्रदेस काहीं चला ग हय। ¹¹अउर केबल लूका हमरे लघे हें। अउर तूँ मरकुस काहीं साथ माहीं लइके चले आबा; काहेकि उआ हमरे सेबा के खातिर खुब काम के हय। ¹²तुखिकुस काहीं हम इफिसुस सहर काहीं पठय दिहेन हय। ¹³जउन कोट हम त्रोआस सहर माहीं करपुस के इहाँ छोंड़ि आएन हय, जब तूँ अया, त ओही अउर किताबन काहीं खास करके चर्म-पत्रन (खास करके गाड़र के चमड़ा से बनी किताबन) काहीं लेत अया। ¹⁴सिकन्दर तमेर हमहीं खुब नुकसान पहुँचाइस ही; प्रभू ओही ओखे काम के मुताबिक बदला देइहँय। ¹⁵तुहूँ ओसे सचेत रह्या, काहेकि उआ हमरे उपदेस के घोर बिरोध करत रहा हय। ¹⁶सुरू माहीं जब हम आपन बचाव करँइ के खातिर, सबूत देंइ लागेन, तब हमरे पच्छ माहीं बोलँइ के खातिर कोऊ आँगे नहीं आबा, बलकिन ऊँ पंचे हमहीं अकेले छोंड़ि दिहिन तय। हम प्राथना करित हएन, कि परमातिमा उनखे इआ गलती काहीं माफ करँय। ¹⁷पय प्रभू हमरे साथ माहीं रहे हँय, अउर हमहीं सामर्थ दिहिन, जउने हमरे व्दारा खुसी के खबर के भरपूर प्रचार होइ सकय, जउने सगले गैरयहूदी लोग सुन लेंय; अउर परमातिमा हमहीं त सेर के मुँहे से छोड़ाइन हीं। ¹⁸अउर प्रभू हमहीं हरेक बुरे कामन से बचइहँय, अउर मुक्ती कइके अपने स्वरगराज माहीं सुरच्छित पहुँचइ हँय, उनहिन के बड़ाई जुग-जुग होत रहय। आमीन।

आखिरी अभिबादन

¹⁹प्रिस्का अउर अक्विला काहीं, अउर उनेसिफुरूस के परिबार काहीं नबस्कार। ²⁰इरास्तुस कुरिन्थुस सहर माहीं रहिगा हय, अउर त्रुफिमुस बिमार रहा हय, त ओही हम मिलेतुस सहर माहीं छोंड़ि आए हएन। ²¹जाड़े के रित से पहिले आमँइ के कोसिस किहा। यूबूलुस, अउर पूदेंस, अउर लीनुस अउर क्लौदिया, अउर सगले भाइन के तोहईं नबस्कार। ²²हम प्राथना करित हएन, कि प्रभू तोंहरे साथ रहँय, अउर तोंहरे पंचन के ऊपर प्रभू के किरपा होत रहय। आमीन!