1 यूहन्ना

यूहन्ना के लिखी पहिल चिट्ठी

इआ चिट्ठी के परिचय

यूहन्ना के लिखी पहिल चिट्ठी के मुख्य दुइठे उद्देस्य हें: (1) अपने पढ़ँइ बालेन काहीं परमातिमा अउर उनखे लड़िका, यीसु मसीह, के सहभागिता माहीं जीबन जिअँइ के खातिर उत्साहित करब, अउर (2) लबरी सिच्छा के पालन करँय, जउने से सहभागिता नास होइ जात ही, एखे बिरोध माहीं चेतउनी देब। इआ झूँठ सिच्छा इआ सोच माहीं चलत रही ही, कि बुराई भवतिक संसार के सम्परक माहीं आमँइ के कारन होत ही, अउर एसे यीसु, परमातिमा के लड़िका, असलिअत माहीं एकठे मनई होइन नहीं सकँय। ईं सिच्छा देंइ बालेन के दाबा रहा हय, कि मुक्ती पामँइ के खातिर मनई काहीं, इआ संसार के जीबन से सम्बन्धित बातन से मुक्त होंइ परी; अउर ऊँ पंचे इहव सिखाबत रहे हँय, कि नयतिकता इआ कि अपने भाई से प्रेम रक्खँय जइसन बातन के मुक्ती से कउनव सम्बन्ध नहिं आय।

इआ सिच्छा के बिरोध माहीं लेखक साफ-साफ इआ बताबत हें, कि यीसु मसीह बास्तव माहीं एकठे मनई रहे हँय, अउर ऊँ इआ बात माहीं जोर देत हें, कि ऊँ पंचे जउन यीसु मसीह माहीं बिसुआस करत हें, अउर परमातिमा से प्रेम रक्खत हें, ऊँ पंचे जरूर आपस माहीं घलाय एक दुसरे से प्रेम रक्खँय।

रूप-रेखा :

भूमिका 1:1-4

जोति अउर अँधिआर 1:5—2:29

परमातिमा के सन्तान अउर सइतान के सन्तान 3:1-24

सत्य अउर झूँठ 4:1-6

प्रेम के करतब्य 4:7-21

बिजई बिसुआस 5:1-21

मनइन काहीं जीबन देंइ बाला बचन

¹इआ चिट्ठी माहीं हम, जीबन देंइ बाले उआ बचन के बारे माहीं लिखित हएन, जउन इआ संसार के बनामँइ से पहिलेव रहा हय, जउने काहीं हम पंचे सुनेन हय, अउर जिनहीं हम पंचे अपने आँखिन से देखेन हय, बलकिन जिनहीं हम पंचे बड़े ध्यान से देखेन, अउर हाँथन से छुएन हय। ²ऊँ अनन्त जीबन देंइ बाले आहीं, उनहीं परमातिमा सगले मनइन के खातिर प्रगट किहिन हीं। हम पंचे उनहीं देखेन हय, अउर उनखे बारे माहीं जउन खुसी के खबर ही, ओही हम पंचे तोंहईं बताइत हएन, कि ऊँ तोंहऊँ काहीं अनन्त जीबन देंइ बाले आहीं, ऊँ पिता परमातिमा के साथ माहीं रहे हँय, अउर पिता परमातिमा उनहीं हमरे ऊपर प्रगट किहिन हीं। ³जउन कुछू हम पंचे उनखे बारे माहीं देखेन, अउर सुनेन हय, ओहिन के खबर तोंहईं पंचन काहीं देइत हएन, कि जउने तुहूँ पंचे हमरे पंचन के साथ सहभागी होइजा; अउर हमार पंचन के इआ सहभागिता, पिता परमातिमा के साथ। अउर उनखे लड़िका यीसु मसीह के साथ ही। ⁴अउर ईं बातँय हम पंचे एसे लिखेन हय, कि हमार पंचन के आनन्द पूर होइ जाय।

उँजिआरे माहीं चलब

⁵जउन खुसी के खबर हम पंचे उनसे सुनेन हय, उहय तोंहईं सुनाइत हएन, उआ इआ आय, कि परमातिमा जोति आहीं; अउर उनमा एक्कव अँधिआर नहिं आय। ⁶अगर हम पंचे कही, कि हमार उनखे साथ सहभागिता ही, अउर पुनि पाप के अँधिआर माहीं जीबन जिअत रही, त हम पंचे झूँठ बोलित हएन, अउर सत्य के मुताबिक जीबन नहीं जी। ⁷पय जइसन ऊँ उँजिआर माहीं चलत हें, उहयमेर अगर हमहूँ पंचे उँजिआर माहीं चली, त एक दुसरे के साथ हमार पंचन के सहभागिता ही; अउर परमातिमा के लड़िका यीसु के खून, हमहीं पंचन काहीं सगले पापन से सुद्ध करत हय। ⁸अगर हम पंचे इआ कही, कि हमरे जीबन माहीं कउनव पाप नहिं आय, त खुद काहीं धोखा देइत हएन, अउर हमरे पंचन के जीबन माहीं सत्य नहिं आय। ⁹पय अगर हम पंचे अपने पापन काहीं सोइकार कइ लेई, त परमातिमा हमरे पापन काहीं माफ करँय, अउर सगले अधरमन से सुद्ध करँइ माहीं, बिसुआस के काबिल अउर धरमी हें। ¹⁰अगर कही, कि हम पंचे कउनव पाप नहीं किहेन आय, त हम पंचे परमातिमा काहीं झूँठ ठहराइत हएन, अउर उनखर बचन हमरे पंचन के जीबन माहीं नहिं आय।

यीसु हमार पंचन के सहायता करँइ बाले आहीं

¹हे हमार पियार लड़िकव, हम ईं बातन काहीं एसे लिखित हएन, कि तूँ पंचे पाप न करा, अउर अगर कोऊ पाप करत हय, त पिता परमातिमा के आँगे हमरे पंचन के पापन के दन्ड से रक्छा करँइ बाले एक जने बिचबई हें, अउर ऊँ धरमी यीसु मसीह आहीं। ²ऊँ केबल हमरे पंचन के पापन के माफी के खातिर भर नहीं, बलकिन सगले संसार के पापन के माफी के खातिर घलाय बलिदान भें। ³अगर हम पंचे उनखे हुकुमन काहीं मानब, त ओसे हम पंचे जान लेब, कि हम पंचे उनहीं जान लिहेन हय। ⁴जे कोऊ इआ कहत हय, कि हम उनहीं जान गएन हय, अउर उनखे हुकुमन काहीं नहीं मानय, त उआ लबरा हय; अउर ओखे जीबन माहीं सत्य नहिं आय। ⁵पय जे कोऊ उनखे बचन के मुताबिक चलत हय, त ओखे जीबन माहीं सचमुच परमातिमा के प्रेम पूरी तरह से बना हय, एहिन से मालुम होत हय, कि हम पंचे उनखे बचन माहीं बने हएन। ⁶जे कोऊ इआ कहत हय, कि हम परमातिमा के बचन माहीं बने हएन, ओही यीसु कि नाईं जीबन जिअँइ चाही।

नबा हुकुम

⁷हे पियार साथिव, हम तोंहईं कउनव नबा हुकुम नहीं लिखी, बलकिन उहय पुरान हुकुम जउन सुरुआतय से तोंहईं मिला हय; इआ पुरान हुकुम उआ खुसी के खबर आय, जउने काहीं तूँ पंचे सुने हया। ⁸पुनि हम तोंहईं नबा हुकुम लिखित हएन; इआ आसा से कि सत्य, मसीह के अउर तोंहरे जीबन माहीं उजागर भ हय, काहेकि अँधिआर खतम होइ रहा हय, अउर सत्य के जोति चमकँइ लाग ही। ⁹जे कोऊ इआ कहत हय, कि हम जोति माहीं हएन; अउर अपने भाई से दुसमनी रक्खत हय, त उआ अबहिनव अँधिआर माहीं हय। ¹⁰जे कोऊ अपने भाई से प्रेम रक्खत हय, उआ जोति माहीं बना रहत हय, अउर कउनव अइसा कारन नहिं आय कि ओही ठोकर लागय। ¹¹पय जे कोऊ अपने भाई से दुसमनी रक्खत हय, उआ अँधिआर माही हय, अउर अँधिआर माहीं चलत हय; अउर नहीं जानय, कि कहाँ जात हय, काहेकि अँधिआर ओखर आँखी बन्द कइ दिहिस ही।

¹²हे पियार लड़िकव, हम तोंहईं एसे लिखित हएन, कि यीसु मसीह के कारन तोंहार पंचन के पाप माफ कीन गें हँय। ¹³हे हमरे बाप कि नाईं मनइव, हम तोंहईं एसे लिखित हएन, कि जउन संसार के सुरुआत से हँय, तूँ पंचे उनहीं जनते हया, हे जमानव, हम तोहईं एसे लिखित हएन, कि तूँ पंचे उआ दुस्ट के ऊपर जीत पाय गया हय; हे पियार लड़िकव हम तोहईं एसे लिखित हएन, कि तूँ पंचे पिता परमातिमा काहीं जान गया हय। ¹⁴हे पितरव, हम तोंहईं एसे लिखेन हय, कि जउन संसार के सुरुआतय से हय, तूँ पंचे ओही जान गया हय; हे नवजमानव, हम तोंहईं एसे लिखेन हय, कि बलमान होइजा, अउर परमातिमा के बचन तोंहरे जीबन माहीं बना रहय, अउर तूँ पंचे उआ दुस्ट के ऊपर जीत पाय गया हय।

संसार से प्रेम न करा

¹⁵तूँ पंचे न त संसार से, अउर न संसार के चीजन से प्रेम रक्खा; अगर कोऊ संसार से प्रेम रक्खत हय, त ओखे जीबन माहीं पिता परमातिमा के प्रेम नहिं आय। ¹⁶काहेकि जउन कुछू संसार माहीं हय, मतलब देंह के अभिलासा, अउर आँखिन के अभिलासा, अउर अपने कमाई के घमन्ड, उआ पिता परमातिमा कइती से नहीं, बलकिन संसार के तरफ से हय। ¹⁷अउर इआ संसार, अउर संसार के सगली अभिलासा, दोनव मिट जात हें, पय जउन मनई परमातिमा के इच्छा के मुताबिक चलत हय, उआ हमेसा बना रहत हय।

मसीह के बिरोधी

¹⁸हे पियार लड़िकव, इआ अन्तिम समय हय, अउर जउनमेर तूँ पंचे सुने हया, कि मसीह के बिरोधी आमँइ बाला हय, ओखे मुताबिक अबहिनव खुब मसीह के बिरोधी तइआर होइगे हँय; एसे हम पंचे जानित हएन, कि इआ अन्तिम समय हय। ¹⁹मसीह के बिरोधी हमरे पंचन के बीचय म से निकरे हँय, पय सही माहीं ऊँ हमार पंचन के साथी न होंहीं; काहेकि अगर ऊँ पंचे हमरे पंचन म से होतें, त ऊँ पंचे हमरे साथय माहीं रहतें, पय ऊँ हमहीं पंचन काहीं छोंड़िके एसे चलेगें हें, कि ऊँ पंचे इआ देखाय सकँय, कि उन म से कोऊ सही माहीं हमार पंचन के कोऊ न होंहीं। ²⁰पय तोंहार पंचन के त ऊँ परम पबित्र परमातिमा, आत्मा के व्दारा अभिसेक किहिन हीं। एसे तूँ पंचे सगले जन सत्य काहीं जनते हया। ²¹हम तोंहईं एसे नहीं लिखेन, कि तूँ पंचे सत्य काहीं नहीं जनते आह्या? बलकिन तूँ पंचे त ओही जनते हया, अउर एसे कि सत्य से कउनव झूँठ नहीं निकरय। ²²पय जे इआ कहत हय, कि यीसु, मसीह न होंहीं, उआ लबरा हय, अइसन मनई मसीह के बिरोधी होत हय, उआ पिता परमातिमा अउर लड़िका यीसु मसीह दोनव काहीं सोइकार नहीं करय। ²³जे कोऊ लड़िका यीसु काहीं सोइकार नहीं करय, ओखे लघे पिता परमातिमव नहिं आहीं; पय जे कोऊ लड़िका यीसु काहीं अपनाय लेत हय, ओखे लघे पिता परमातिमा घलाय हें। ²⁴जउन कुछू तूँ पंचे सुरुआत से सुने हया, उहय तोंहरे जीबन माहीं बना रहय, जउन तूँ पंचे सुरुआत से सुने हया, अगर उआ तोंहरे जीबन माहीं बना रहय, त तुहूँ पंचे लड़िका यीसु माहीं, अउर पिता परमातिमा दोनव माहीं स्थिर बने रइहा। ²⁵अउर परमातिमा हमहीं पंचन काहीं अनन्त जीबन देंइ के बचन दिहिन हीं।

²⁶हम ईं बातन काहीं तोंहईं उनखे बारे माहीं लिखेन हय, जउन तोंहईं पंचन काहीं भरमाय देत हें। ²⁷अउर तोंहार पंचन के उआ अभिसेक, जउन परमातिमा के तरफ से कीन ग हय, तोंहरे जीबन माहीं बना रहत हय; अउर तोंहईं एखर जरूरत नहीं आय, कि तोंहईं कोऊ सिखाबय, बलकिन तोंहईं, त उआ आत्मा, जेसे पबित्र पिता तोंहार अभिसेक किहिन हीं, तोंहईं सगली बात सिखाबत हय। उहय सच्चा हय, झूँठ नहिं आय, आत्मा जइसन तोंहईं सिखाबत हय, उहयमेर तूँ पंचे मसीह माहीं बने रहा।

परमातिमा के सन्तान

²⁸एसे हे पियार लड़िकव, मसीह माहीं बने रहा; कि जब ऊँ प्रगट होंय, त हमहीं पंचन काहीं साहस होय, अउर जब यीसु मसीह दुसराय आमँय, त उनखे आँगे हमहीं पंचन काहीं सरमिन्दा न होंय परय। ²⁹अगर तूँ पंचे जनते हया, कि ऊँ धरमी हें, त इहव जनते हया, कि जे कोऊ धरम के काम करत हय, उआ परमातिमा के सन्तान आय।

¹देखा, पिता परमातिमा हमसे पंचन से केतना प्रेम किहिन हीं, कि हम पंचे परमातिमा के सन्तान कहाई, अउर हम पंचे हइअव आहेन; इआ कारन से संसार के मनई, हमहीं पंचन काहीं नहीं जानँय, काहेकि ऊँ पंचे पिता परमातिमव काहीं नहीं जाने पाइन। ²हे पियार साथिव, हम पंचे परमातिमा के सन्तान आहेन, अउर अबे तक इआ प्रगट नहीं भ, कि हम पंचे का कुछ होब! पय एतना जानित हएन, कि जब यीसु मसीह दुसराय अइहँय, त हमहूँ पंचे उनहिन कि नाईं होइ जाब, काहेकि उनहीं ओहिन मेर देखब, जइसन ऊँ हें। ³अउर जे कोऊ उनखे ऊपर इआ आसा रक्खत हय, उआ अपने काहीं उहयमेर पबित्र रक्खत हय, जइसन मसीह पबित्र हें।

⁴जे कोऊ पाप करत हय, उआ परमातिमा के नेम काहीं टोरत हय, काहेकि नेम काहीं टोरबय पाप आय। ⁵अउर तूँ पंचे त जनतय हया, कि यीसु मसीह हमरे पंचन के पापन काहीं हरँय के खातिर प्रगट भें, अउर इहव, कि उनखे जीबन माहीं कउनव पाप नहिं आय। ⁶जे कोऊ मसीह माहीं बना रहत हय, उआ पाप नहीं करत रहय, जे कोऊ पाप करत रहत हय, उआ न त उनखर दरसन किहिस आय, अउर न उनहीं कबहूँ जनबय भ आय। ⁷हे पियार लड़िकव, कोहू के भरमाए माहीं न अया; उआ जउन धरम के साथ आचरन करत रहत हय, उहय परमातिमा के नजर माहीं निरदोस हय, ठीक उहयमेर जइसन मसीह हें। ⁸जे कोऊ पाप करत रहत हय, उआ सइतान के सन्तान आय, काहेकि सइतान सुरुआतय से पाप करत चला आबा हय, एहिन से परमातिमा के लड़िका प्रगट भे हँय, कि सइतान के कामन काहीं नास कइ देंय। ⁹जे कोऊ परमातिमा के सन्तान बनिगा हय, उआ पाप नहीं करत रहय, काहेकि परमातिमा के बीज ओखे जीबन माहीं बना रहत हय, अउर उआ पाप नहीं करत रहय, काहेकि उआ परमातिमा के सन्तान बन चुका हय। ¹⁰परमातिमा के सन्तान को आय? अउर सइतान के सन्तान को आय? तूँ पंचे इआमेर से उनहीं जान सकते हया, हरेक उआ मनई जउन परमातिमा के नजर माहीं निकहा काम नहीं करय, अउर अपने भाई से प्रेम नहीं करय, उआ परमातिमा के सन्तान न होय।

एक दुसरे से प्रेम करा

¹¹काहेकि जउन उपदेस तूँ पंचे सुरुआत से सुने हया, उआ इआ आय, कि हम पंचे एक दुसरे से प्रेम रखी। ¹²अउर हमहीं पंचन काहीं कैन कि नाईं न बनय क चाही, जउन दुस्टात्मा के काबू माहीं रहा हय, अउर अपने भाई के कतल किहिस रहा हय, उआ अपने भाई काहीं एसे मारि डारिस तय, कि ओखर काम बुरे रहे हँय। अउर ओखे भाई के काम धारमिकता के रहे हँय।

¹³हे भाई-बहिनिव, अगर संसार के मनई तोंहसे इरखा करत हें, त अचम्भा न किहा। ¹⁴हम पंचे जानित हएन, कि मउत के बन्धन से पार होइके अनन्त जीबन पाएन हय; काहेकि हम पंचे अपने भाई-बहिनिन से प्रेम रक्खित हएन, जे कोऊ प्रेम नहीं रक्खय, उआ मउत के दसा माहीं रहत हय। ¹⁵जे कोऊ अपने भाई-बहिनी से इरखा करत हय, उआ कतली हय, अउर तूँ पंचे जनतेन हया, कि कउनव कतली माहीं अनन्त जीबन नहीं रहय। ¹⁶यीसु मसीह हमरे पंचन के खातिर आपन प्रान दइ दिहिन हीं, एहिन से हम पंचे जानित हएन, कि प्रेम का आय? हमहीं पंचन काहीं घलाय अपने भाई-बहिनिन के खातिर, आपन प्रान नेउछाबर कइ देंइ चाही। ¹⁷पय जेखे लघे संसार के सम्पत होय, अउर अपने भाई-बहिनी काहीं कंगाल देखिके, ओखे ऊपर तरस खाइके ओखर मदत न करय, त ओखे जीबन म परमातिमा के प्रेम हय, इआ कइसा कहा जाय सकत हय? ¹⁸हे पियार लड़िकव, हमार पंचन के प्रेम बातन भर माहीं नहीं, बलकिन कामन के साथ अउर सच्चा होंइ चाही।

परमातिमा के आँगे साहस

¹⁹एहिन से हम पंचे जानब, कि हम पंचे सत्य के आहेन; अउर जउने बात माहीं हमार पंचन के मन हमहीं दोस देई, ओहिन के बारे माहीं हम पंचे परमातिमा के आँगे, अपने-अपने मन काहीं ढाढ़स दइ सकब। ²⁰काहेकि परमातिमा हमरे पंचन के मन से बड़े हँय; अउर सब कुछ जानत हें। ²¹हे पियार साथिव, अगर हमार मन हमहीं दोसी न ठहराबय, त हमहीं पंचन काहीं परमातिमा के आँगे साहस मिली। ²²अउर जउन कुछू हम पंचे मागित हएन, उआ परमातिमा से मिल जात हय; काहेकि हम पंचे परमातिमा के हुकुमन काहीं मानित हएन; अउर जउन उनहीं निकहा लागत हय, उहय करित हएन। ²³अउर उनखर हुकुम इआ हय, कि हम पंचे उनखे लड़िका यीसु मसीह के नाम के ऊपर बिसुआस करी, अउर जइसन ऊँ हमहीं पंचन काहीं हुकुम दिहिन हीं, ओहिन के मुताबिक आपस माहीं प्रेम रखी। ²⁴अउर जउन उनखे हुकुमन काहीं मानत हय, उआ परमातिमा माहीं, अउर परमातिमा ओखे जीबन माहीं बने रहत हें। अउर एहिन से, अरथात पबित्र आत्मा से जउने काहीं ऊँ हमही पंचन काहीं दिहिन हीं, हम पंचे जानित हएन, कि परमातिमा हमरे जीबन माहीं बने रहत हें।

आत्मन काहीं जाँचा-परखा

¹हे पियार साथिव, हरेक आत्मा के बिसुआस न माना, बलकिन हमेसा उनहीं जाँच परखिके देखा, कि का ऊँ परमातिमा के तरफ से आहीं कि नहीं? इआ बात हम तोंहसे एसे कहि रहेन हय, काहेकि झूँठ बोलँइ बाले खुब नबी संसार माहीं तइआर होइगे हँय। ²परमातिमा के आत्मा काहीं तूँ पंचे इआमेर से पहिचान सकते हया, हरेक उआ आत्मा, जउन इआ मानत ही, कि “यीसु मसीह मनई के रूप माहीं धरती माहीं आए हँय।” उआ परमातिमा के तरफ से हय। ³अउर जउन आत्मा यीसु काहीं नहीं मानय, उआ परमातिमा के तरफ से न होय; अउर उहय त मसीह के बिरोधी के आत्मा आय; जेखर चरचा तूँ पंचे सुन चुके हया, कि उआ आमँइ बाला हय, अउर उआ अबहिनव संसार माहीं हय। ⁴हे पियार लड़िकव, तूँ पंचे परमातिमा के आह्या, अउर तूँ पंचे ओखे ऊपर बिजय पाए हया; काहेकि ऊँ परमातिमा जउन तोंहरे जीबन माहीं बसे हँय, ऊँ संसार माहीं रहँइ बाले सइतान से बड़े हँय। ⁵ऊँ मसीह के बिरोधी मनई संसारिक जीबन जिअत हें, इआ कारन से ऊँ पंचे संसारिक बात बोलत हें, अउर संसार के मनई उनखर बात सुनत हें। ⁶हम पंचे परमातिमा के आहेन, जउन मनई परमातिमा काहीं जानत हय, उआ हमार पंचन के बात सुनत हय; जउन मनई परमातिमा काहीं नहीं जानय, उआ हमार पंचन के बात नहीं सुनय; इआ मेर से हम पंचे सत्य के आत्मा, अउर भटकामँइ बाली आत्मा, काहीं पहिचान सकित हएन।

परमातिमा प्रेम आहीं

⁷हे पियार साथिव, हम पंचे आपस माहीं एक दुसरे से प्रेम करी; काहेकि प्रेम परमातिमा से मिलत हय, अउर जउन मनई प्रेम करत हय, उआ परमातिमा के सन्तान बनिगा हय, अउर उआ परमातिमा काहीं जानत हय। ⁸अउर जउन मनई प्रेम नहीं करय, उआ परमातिमा काहीं नहीं जानय, काहेकि परमातिमा प्रेम आहीं। ⁹जउन प्रेम परमातिमा हमसे पंचन से करत हें, इआमेर से देखाइन हीं, कि ऊँ अपने एकलउता लड़िका काहीं इआ संसार माहीं पठइन हीं, कि जउने हम पंचे उनखे द्वारा अनन्त जीबन पाई। ¹⁰प्रेम एमाहीं नहीं आय, कि हम पंचे परमातिमा से प्रेम किहेन हय; बलकिन एमाहीं हय, कि परमातिमा हमसे पंचन से प्रेम किहिन हीं; अउर हमरे पापन के माफी के खातिर, अपने लड़िका काहीं पठइन हीं। ¹¹हे पियार साथिव, जब परमातिमा हमरे पंचन के ऊपर एतना प्रेम देखाइन हीं, त हमहूँ पंचन काहीं आपस माहीं एक दुसरे से प्रेम करँय चाही। ¹²परमातिमा काहीं कबहूँ कोहू नहीं देखिस, अगर हम पंचे आपस माहीं प्रेम करित हएन, त परमातिमा हमरे पंचन के जीबन माहीं बास करत हें; अउर उनखर प्रेम हमरे जीबन माही सिद्ध होइगा हय।

¹³इआमेर से हम पंचे जान सकित हएन, कि हम पंचे परमातिमा माहीं बने रहित हएन, अउर परमातिमा हमरे भीतर निबास करत हें; काहेकि ऊँ अपने आत्मा काहीं हमहीं पंचन काहीं दिहिन हीं। ¹⁴अउर हम पंचे देखिव लिहेन हय, अउर गबाही देइत हएन, कि परमातिमा अपने लड़िका काहीं, संसार के मनइन काहीं मुक्ती देंइ के खातिर पठइन हीं। ¹⁵जे कोऊ इआ मान लेत हय, कि यीसु परमातिमा के लड़िका आहीं, परमातिमा ओखे जीबन माहीं बास करत हें, अउर उआ परमातिमा माहीं बना रहत हय। ¹⁶अउर जउन प्रेम परमातिमा हमसे पंचन से किहिन हीं, ओही हम पंचे जान गएन हय, अउर हमहीं पंचन काहीं बिसुआस हय, कि परमातिमा प्रेम आहीं। जउन मनई प्रेम माहीं बना रहत हय, उआ परमातिमा माहीं बना रहत हय; अउर परमातिमा ओखे जीबन माहीं बने रहत हें। ¹⁷हमरे पंचन के बारे माहीं प्रेम इहय रूप माहीं सिद्ध भ हय, जउने न्याय के दिन हमार पंचन के बिसुआस बना रहय, हमार पंचन के बिसुआस एसे बना हय, कि हम पंचे जउन जीबन संसार माहीं जीत हएन, उआ मसीह के जीबन कि नाईं हय। ¹⁸अउर प्रेम माहीं कउनव डेर नहीं होय, बलकिन सिद्ध प्रेम डेर काहीं भगाय देत हय, काहेकि डेर के सम्बन्ध दन्ड से होत हय, अउर जे कोऊ डेरात हय, ओखर प्रेम सिद्ध नहीं भ। ¹⁹हम पंचे एसे प्रेम करित हएन, काहेकि पहिले परमातिमा हमसे पंचन से प्रेम किहिन हीं। ²⁰अगर कोऊ कहय, हम परमातिमा से प्रेम करित हएन; अउर अपने भाई-बहिनी से इरखा रक्खय; त उआ लबरा हय, काहेकि जउन मनई अपने भाई-बहिनी से, जउने काहीं उआ देखत हय, प्रेम नहीं करय, त परमातिमा से जिनहीं उआ देखबय नहीं भ, प्रेम नहीं कइ सकय। ²¹मसीह से हमहीं पंचन काहीं इआ हुकुम मिला हय, कि जे कोऊ अपने परमातिमा से प्रेम करत हय, ओही अपने भाइव से प्रेम करँय चाही।

परमातिमा के सन्तान संसार के ऊपर जीत पाबत हय

¹जे कोऊ इआ बिसुआस करत हय, कि यीसुअय मसीह आहीं, त उआ परमातिमा के सन्तान बन जात हय, अउर जे कोऊ पिता परमातिमा से प्रेम करत हय, त उआ उनखे सन्तानन से घलाय प्रेम करत हय। ²इआमेर से जब हम पंचे परमातिमा से प्रेम करित हएन, अउर उनखे हुकुमन के पालन करित हएन, त एहिन से हम पंचे जान लेइत हएन, कि हम पंचे परमातिमा के सन्तानन से प्रेम करित हएन। ³उनखे हुकुमन काहीं पालन कइके, हम पंचे इआ देखाइत हएन, कि हम पंचे परमातिमा से प्रेम करित हएन, अउर उनखे हुकुमन के पालन करब जादा कठिन नहिं आय। ⁴काहेकि जे कोऊ परमातिमा के सन्तान बन जात हय, उआ संसार के ऊपर जीत पाय लेत हय, अउर संसार के ऊपर जउने से हमहीं पंचन काहीं जीत मिलत ही, उआ आय हमार पंचन के बिसुआस। ⁵जे कोऊ इआ बिसुआस करत हय, कि यीसु परमातिमा के लड़िका आहीं, उहय संसार के ऊपर जीत पाबत हय।

यीसु मसीह के बारे माहीं गबाही

⁶ऊँ यीसु मसीह आहीं जउन हमरे पंचन के लघे पानी अउर खून के व्दारा आए हँय, मतलब यीसु मसीह न केबल पानी के व्दारा, बलकिन पानी अउर खून दोनव के व्दारा आए रहे हँय। ⁷अउर एखर गबाही देंइ बाला पबित्र आत्मा हय, काहेकि पबित्र आत्मा सत्य हय। ⁸अउर गबाही देंइ बाले तीनठे हें; पबित्र आत्मा, अउर पानी, अउर खून; अउर तीनव एकय बात माहीं सहमत हें। ⁹जब हम पंचे मनइन के दीन गबाही काहीं मान लेइत हएन, त परमातिमा के गबाही, त उनसे बढ़िके ही, अउर परमातिमा के गबाही इआ ही, कि ऊँ अपने लड़िका के बारे माहीं गबाही दिहिन हीं। ¹⁰जे कोऊ परमातिमा के लड़िका के ऊपर बिसुआस करत हय, उआ अपने भीतर उनखर गबाही रक्खत हय; जे कोऊ परमातिमा के कही बात के बिसुआस नहीं करय, उआ परमातिमा काहीं झूँठ ठहराबत हय; काहेकि उआ उनखे दीन गबाही के बिसुआस नहीं किहिस, जउन गबाही परमातिमा अपने लड़िका के बारे माहीं दिहिन हीं। ¹¹अउर उआ गबाही इआ आय, कि परमातिमा हमहीं पंचन काहीं अनन्त जीबन दिहिन हीं, अउर इआ जीबन उनखे लड़िका माहीं हय। ¹²जेखे लघे लड़िका हय, ओखे लघे अनन्त जीबन हय; अउर जेखे लघे परमातिमा के लड़िका नहिं आय, ओखे लघे अनन्त जिबनव नहिं आय।

अनन्त जीबन

¹³हम तोंहईं पंचन काहीं, जउन परमातिमा के लड़िका के नाम माहीं बिसुआस करते हया, एसे लिखेन हय; कि तूँ पंचे जाना, कि अनन्त जीबन तोंहार आय। ¹⁴अउर हमहीं पंचन काहीं परमातिमा के आँगे जउन साहस होत हय, उआ इआ आय; कि अगर हम पंचे उनखे इच्छा के मुताबिक कुछू मागित हएन, त ऊँ हमरे बिनती काहीं सुनत हें। ¹⁵अउर जब हम पंचे इआ जानित हएन, कि जउन कुछू हम पंचे मागित हएन, ऊँ हमार पंचन के सुनत हें, त इहव जानित हएन, कि जउन कुछू हम पंचे उनसे माँगन हय, उआ पाएन हय।

¹⁶अगर कोऊ अपने भाई-बहिनिन काहीं अइसन पाप करत देखय, जेखर परिनाम परमातिमा से अलगाव न होय, त उआ अपने भाई-बहिनिन के खातिर प्राथना करय, त परमातिमा उनहीं अनन्त जीबन देइहँय। हम उनखे जीबन के बारे माहीं बात करित हएन, जे कोऊ अइसन पाप माहीं लगे हँय, जउन उनहीं परमातिमा के संगति से अलग नहीं करय। पय कुछ पाप अइसव होत हें, जेखर परिनाम परमातिमा से अलगाव होत हय; हम अइसन पापन के खातिर प्राथना करँइ काहीं नहीं कही। ¹⁷हरेकमेर के अधरम त पाप हय, पय कुछ पाप अइसव होत हें, जेखर परिनाम परमातिमा से अलगाव नहीं होय।

¹⁸हम पंचे जानित हएन, कि जे कोऊ परमातिमा के सन्तान बन जात हय, उआ पाप नहीं करत रहय; पय परमातिमा के लड़िका, ओही बचाइके रक्खत हें, अउर उआ दुस्ट ओही छुए नहीं पाबय।

¹⁹हम पंचे जानित हएन, कि हम पंचे परमातिमा के सन्तान आहेन, अउर सगला संसार दुस्ट सइतान के काबू माहीं हय।

²⁰अउर हम पंचे इहव जानित हएन, कि परमातिमा के लड़िका आय चुके हँय, अउर ऊँ हमहीं पंचन काहीं समझ दिहिन हीं, कि हम पंचे ऊँ सच्चे परमातिमा काहीं पहिचानी, अउर हम पंचे जउन उनमा सत्य हय, मतलब उनखे लड़िका यीसु मसीह माहीं बने रहित हएन; सच्चे परमातिमा, अउर अनन्त जीबन ईंन आहीं। ²¹हे पियार लड़िकव, अपने-आप काहीं मूरतिन से बचाए रक्खा।