TƖTƖ

¹ A maa Pol na ɩ a Naaŋmɩn tʋ̃tʋnↄ nɩ a Jeeju-Kirisi nɩ-tʋnaa ɩ̃ tɩɩrɛ a sɛbɛ na kʋrↄ a Tɩtɩ na ɩ a ɩ̃ bi-tↄr a sɩ ƴↄ̃w-nyãa sɩ na lãa tɛrɛ a Jeeju-Kirisi pʋↄ. A Naaŋmɩn ir ma na ɩ̃ na taw a bala ʋ na vɛl ir, a ba na pↄw a ƴↄ̃w-nyãa, ɩ̃ mɩ bↄ̃w a yel-mɩ̃ɛ ƴɛrɩ̃ vɩlaa na tuure a puorfʋ sↄr; ² a ba na mɩ tɛrɛ a tɩɛrʋ̃ son a baa-kↄ̃-tɛw ɩnɛ, a mɩnɛ a Naaŋmɩn ʋlↄ na maa ŋmaa jiri wa na pʋlɩ̃ nɩ sɩ, ɩ̃-cɛ a tẽw wa bɩɛr maal. ³ Ɩ̃, a mɩnɛ a daar ʋlↄ a Naaŋmɩn na ƴↄ̃w na ta, ʋ miilʼã a ʋ ƴɛrɩ̃ a cãa pʋↄ, tu nɩ a ƴɛrɩ̃ ʋlↄ a sɩ Fafaara Naaŋmɩn na ƴↄ̃w ma ɩ̃ hiere. ⁴ A sũofʋ nɩ a pɩɛnfʋ na yi a Sãa Naaŋmɩn nɩ a sɩ Fafaara Jeeju-Kirisi sɛ̃, á be a fʋ jie. ⁵ A ala ɩnɛ ɩ̃ na bar fʋ a Kɩrɛtɩ-tẽw ɩ na fú gbɛɛrɩ̃ a ala na cɛ a maalfʋ, ɩ̃ biin a duo-puor-ni-dierbe a ten a jaa pʋʋr tu nɩ a ƴɛrɩ̃ ala ɩ̃ na dãa man fʋ. ⁶ A duo-puor-ni-diere sɛw na ʋ ɩ nɩrɛ na ma tɛrɛ mabfʋ jie wa, ɩ̃ mɩ kul a pↄw bõ-ƴen tɛw. A ʋ bibiir bá mɩ ɩ a popuorbo, a nɩrɛ ma tʋↄrↄ ƴↄnↄ ba a burbur ƴɛrɩ̃ wa; ba taa mɩ ɩ to-wownbo wa. ⁷ A-na-ɩ a ni-diere ɩ̃ ɩ a Naaŋmɩn yir-Ꞌwuoro. Aa sɛw ʋ tɛrɛ mabfʋ jie wa. Ʋ taa ɩ nɩrɛ na Ꞌwuoro a ʋ mɩ̃ɛ tɛw, mɩɩ na ɩ a suur sʋbↄ wa. Ʋ taa mɩ Ꞌlaar a dãa nɩ a jɛb jɛbfʋ wa, mɩɩ bɛlɛ a nɩbɛ bʋↄrↄ nɩ a libi-yaw wa. ⁸ Ɩ̃-cɛ a ni-diere sɛw na ú ɩ nɩrɛ na diere a sáanba. Ʋ ɩ a son-bʋↄrↄ, ɩ̃ mɩ bↄ̃w tɛrɛ a yɛ̃, ɩ nɩ nɩ-toraa nɩ nɩ-cɛcɛ, bↄ̃w tɛrɛ nɩ a ʋ mɩ̃ɛ. ⁹ A sɛw na ʋ bↄ̃w ɩraa cĩcĩ a ƴɛr-dẽdẽ ʋlↄ pʋↄ ba na dãa jaana, a mɩnɛ ʋ na tʋↄ kpãkpana a nɩbɛ a jaan-son ɩnɛ, ɩ̃ mɩ tʋↄ miil a bala na cɩɩrɛ a ba burbur. ¹⁰ A-na-ɩ a yaw jie be na be na wõw a toor, ƴɛrɛ nɩ a ƴɛr-pↄrsɩ, bɛlɛ nɩ a nɩbɛ. A bana bɛbɛlbɛ pʋↄ a Jufisɩ nɩbɛ ɩ̃ nyɩrɩ̃ waa. ¹¹ A sɛw na a fʋ na maal ba a ba pↄw a nʋↄr, a-na-ɩ ba ma cenʼã na jaana a ala na ma sɛw wa, nyanyaana nɩ a yie ŋmɛɛ nɩbɛ ba jaa, bɛlɛ nɩ bʋↄrↄ nɩ a libie. ¹² Nɩrɛ kãw dãa na be a ba pʋↄ na ɩ a ba mɩ̃ɛ ƴɛr-hiere ɩ̃ yel: “A Kɩrɛtɩ-tẽw nɩbɛ, jir-ŋmarba ba ɩ a daar a jaa. Ba wↄ̃ na taa nɩ dʋn-bebe, ɩ nɩ tõtol-deme, na mɩ fol.” ¹³ Ɩ̃ a ala a ƴɛr-hiere ʋlↄ na ƴɛrɛ ɩ na yel-mɩ̃ɛ. Ala-ɩ̃-sↄ, bↄ̃w fule ƴↄnↄ ba, a ba bↄ̃w ɩraa cĩcĩ a Naaŋmɩn ƴɛrɩ̃ pʋↄ. ¹⁴ Ɩ̃ ba taa lɛ cɛlɛ a Jufisɩ kpurĩsɩ nɩ a nɩbɛ bala na jaar a yel-mɩ̃ɛ ƴɛr-kpɛn wa. ¹⁵ A yele a jaa ɩ na cɛcɛ a bala na ɩ a nɩ-cɛcɛ jie. Ɩ̃ a ala ɩ a nɩ-kpansɩ ʋ, na ma mɩ tɛrɛ a ƴↄ̃w-nyãa wa, bom ma be be ɩ a cɛcɛ a ba jie wa. A-na-ɩ a ba tɩɛrɩ̃sɩ nɩ a ba mɩ̃ɛ-bↄ̃wfʋ sↄbʼã lɩɛb ɩ bõ-kpana. ¹⁶ Ba ma yelʼã á ba bↄ̃w na a Naaŋmɩn, ɩ̃-cɛ a ba maalfʋ miile na a baa bↄ̃w ʋ wa. Ba ɩ na a bala ba na mele; to-wownbo ʋ, ɩ̃ ma mɩ tʋↄrↄ maala bõ-son fɩ̃ɩ wa.

¹ Ɩ̃-cɛ a fʋ̃ʋ, mana a ala na tuure taa nɩ a jaan-son. ² Yel a dab-koro á bá tɛrɛ a yɛ̃, ɩ nɩ nɩ-hɛlɛlɛ, ɩ̃ mɩ ɩ cɛcɛlbɛ, bↄ̃w ɩraa nɩ cĩcĩ a Naaŋmɩn ƴɛrɩ̃ pʋↄ, a nʋfʋ, nɩ a su-nyↄwraa pʋↄ. ³ A lɛ ʋ mɩ, a pↄↄbↄ bala na kor, a ba cenfʋ á sɛw taa nɩ a bala na be a puorfʋ pʋↄ. A ba taa ɩ nɩ-korbo, mɩɩ a dãa gbãgbaar wa, ɩ̃-cɛ bá ɛ̃ɛ ɩ a ƴɛr-son-manba, ⁴ a mɩnɛ a ba na tʋↄ jaan a pↄↄbↄ a ba nʋnↄ a ba sɩrbɛ nɩ a ba bibnr, ⁵ bↄ̃w tɛrɛ nɩ a ba mɩ̃ɛ, ɩ nɩ cɛcɛ, bↄ̃w tʋnↄ a tʋmↄ a yir pʋↄ, a ba mɩ ɩ a pↄↄ-sono na wono a ba sɩrɛ toor, a mɩnɛ a nɩrɛ kↄ̃ wa kpɛrɛ a Naaŋmɩn ƴɛrɩ̃ wa. ⁶ A lɛ ʋ mɩ a polbil jie, kpãkpana ba a ba bↄ̃w tɛrɛ a ba mɩ̃ɛ. ⁷ Ɩ̃ a fʋ̃ʋ mɩ, fú ɩ a bõ-tↄↄnaa a tʋ̃-vɛlɛ a jaa ɩnɛ; a fʋ jaanfʋ ʋ taa tɛrɛ saanaa wa. Fú ɩ nɩ-hɛlɛlɛ, ⁸ tɛrɛ a yel-mɩ̃ɛ ƴɛrɩ̃sɩ, a mɩnɛ a sama-deme kↄ̃ nyɛ korfʋ jie, a vĩ na nyↄw ba, a-na-ɩ baa nyɛ a cɛfʋ jie wa. ⁹ A gbãgbaar sɛw na na jↄrↄ a ba nɩ-bɛrɛ, maala a ala na nʋmↄ ba a yele a jaa pʋↄ. Baa sɛw na ma cɩɩrɛ ba wa, ¹⁰ mɩɩ ma fara ba yele wa, ɩ̃ ba ɛ̃ɛ na sɛw ba miile a ba maal-bie pʋↄ á ba ɩ na nɩ-sono nɩ nɩ-dẽdẽsɩ, a mɩnɛ a nɩbɛ na ƴↄnↄ a sɩ Fafaara Naaŋmɩn jaanfʋ a ba maalfʋ a jaa pʋↄ. ¹¹ A-na-ɩ a Naaŋmɩn sũofʋ ʋlↄ na ɩ a faafʋ a nɩbɛ ba jaa jie nyɩrʼã cãa pʋↄ, ¹² ma jaana sɩ a sɩ kↄ̃ jaar a Naaŋmɩn sↄr bar, mɩɩ kↄ̃ jɩɛlɛ a tẽw pʋↄ yele wa, ɩ̃-cɛ a sɩ na ɩ cɛcɛlbɛ a ka a tẽw na pʋↄ, ɩ nɩ nɩ-torisɩ, ɩ̃ mɩ ɩ a dẽdẽ a puorfʋ sↄr pʋↄ. ¹³ A ƴɛ̃ƴɛrɩ̃ na, sɩ tɛrɛ na tɩɛrɩ̃-daadaa a Naaŋmɩn jie, cɛlɛ nɩ a bibir ʋlↄ a Jeeju-Kirisi ʋlↄ na ɩ a Nɩ-kpɛ̃ɛ Naaŋmɩn nɩ a sɩ Fafaara nↄↄ nyɩrɛ nɩ a ʋ yo-yifʋ. ¹⁴ Ʋ tɩɩrʼã a ʋ mɩ̃ɛ a sɩ ɩnɛ, na tʋↄ da sɩ faa a yel-faar a jaa pʋↄ, ɩ̃ pɛw sɩ bar a sɩ ɩ a ʋ mɩ̃ɛ tɛw ben, mɩ ɓĩɓine a tʋ̃-vɛlɛ a jaa maalfʋ ɩnɛ. ¹⁵ A nↄhↄ̃ ɩ̃ sɛw a fʋ na man ba, kpãkpana nɩ ba, ɩ̃ gala ba nɩ a kpɛ̃w ʋlↄ a Naaŋmɩn na kʋ fʋ. Taa wa ɩ a nɩrɛ ʋ kpɛrɛ fʋ wa.

¹ Jaw a popuorbo a ba na jↄrↄ a tẽw nɩ-bɛrɛ nɩ a fãgã deme, ɩ̃ mɩ wono ba a toor, sↄw maala nɩ a tʋ̃-vɛlɛ a jaa. ² A ba taa wa koro nɩrɛ, mɩɩ ba taa wa ɩ jɛjɛbɛ wa, ɩ̃ bá ɩ su-ɓaar deme, miile nɩ a ba hɛlɛlɛ yɛ̃ a nɩbɛ ba jaa jie. ³ A-na-ɩ a korĩ-cɛ, a sɩmɩ mɩ, sɩ mɩ dãa na ɩ a gẽgemsɩ nɩ a to-wownbo na dãa bↄr. Sɩ dãa na ɩ a yel-kãkan nɩ a yele ala na kʋrↄ sɩ a vɩláa gbãgbaar. Fãa pʋↄ sɩ dãa be, tɛrɛ nɩ a nyuur, a ba Ꞌlaar sɩ, ɩ̃ a sɩ mɩ lɩɛb Ꞌlaar taa. ⁴ Ɩ̃-cɛ a lɛdaar a sɩ Fafaara Naaŋmɩn son ɩfʋ nɩ a ʋ yɛ̃-bↄ̃wfʋ na nyɩr, ⁵ ʋ faa sɩ na, ɩ̃ aa ɩ a tʋ̃-sono sɩ tʋ̃ kʋ ʋ wa, ɩ̃-cɛ a yi na a ʋ nã-bↄ̃wfʋ jie. Ʋ pɛw sɩ na a dↄw-paalaa kʋ̃ↄ pʋↄ faa nɩ sɩ, ɩ̃ mɩ lɩɛb sɩ nɩ a ʋ Sɩ-cɛcɛ, a sɩ ɩ nɩ-paala. ⁶ A Sɩɛ ʋlↄ, a Naaŋmɩn deer ʋ na kʋ sɩ, a sɩ Fafaara Jeeju-Kirisi ɩnɛ, ⁷ a sɩ na ɩ a nɩ-torisɩ a ʋ sũofʋ ɩnɛ, ɩ̃ mɩ pↄw a baa-kↄ̃-tɛw ʋlↄ sɩ na gu nɩ a sɩ tɩɛrʋ̃ son. ⁸ A ƴɛrɩ̃ na ɩ na yel-mɩ̃ɛ. Ɩ̃ bʋↄrↄ na fʋ bↄ̃w kpãkpan ba a ana yele ɩnɛ, a mɩnɛ a bala na ƴↄ̃w a Naaŋmɩn nyãa, a ba na de a ba mɩ̃ɛ ƴↄ̃w a tʋ̃-vɛlɛ maalfʋ pʋↄ. A asɩmɛ ɩ a yel-sono na sũono a nɩbɛ. ⁹ Ɩ̃-cɛ taw yi a cɩɩrɩ̃-pↄrsɩ pʋↄ nɩ a sãa-kʋnbↄ yoe sↄrfʋ, a jɛb, nɩ a faa-taa a ƴɛr-kpɛn ɩnɛ, a-na-ɩ a ala ɩ na yel-pↄrsɩ na ma tɛrɛ par wa- ¹⁰ A nɩrɛ ʋlↄ na ŋmara a nɩbɛ a kpee kpee, fú kpãa ʋ. A ʋlↄ wa jaar ɩ̃ maala, fú lɛ tu kpãa ʋ. A ʋlↄ ɩ̃ jaar, fú taw yi a ʋ sɛ̃. ¹¹ Fʋ bↄ̃w ka a nɩ-lɛ vɩɛ na ɩ̃ bar a sↄr son, ɩ̃ maala a fãa ƴↄnↄ a ʋ mɩ̃ɛ ʋ yẽ. ¹² A lɛdaar ɩ̃ nↄↄ tʋnↄ a Atema mɩɩ a Tɩsɩkɩ a fʋ jie, pↄw tuor ma a Nikopoli-tẽw, a-na-ɩ be ɩ̃ na jɛ a sɩ̃ɛw. ¹³ Bↄ̃w cɛl tↄ sũo a Jenasɩ ʋlↄ na ɩ a ƴɛr-guoro, nɩ a Apolosi, a ba kↄ̃ tʋↄ faa bom a ba cenfʋ ɩnɛ wa. ¹⁴ A vɩɛlɛ na a sɩ nɩbɛ na jaana a tʋ̃-son maalfʋ a daar a jaa a ala na ba ba ɩnɛ, a mɩnɛ a ba kↄ̃ jɛ pↄrↄ wa. ¹⁵ A bala ba jaa na be nɩ ma puoro fʋ na. Puor a sɩ badɛɛ na be a ƴↄ̃w-nyãa pʋↄ. A Naaŋmɩn sũofʋ ú be a nyɩ jie nyɩ jaa.