FILEMↃÞ

FILEMↃÞ

¹ A maa Pol ba na pↄw a kasu pʋↄ a Jeeju-Kirisi ɩnɛ, nɩ a sɩ yɛbɛ Timote, ɩ̃ tɩɩrɛ a sɛbɛ na kʋrↄ a fʋ̃ʋ, sɩ baraa Filemↄ̃ na ɩ a sɩ lãa-tʋnↄ, ² nɩ a Afiya na ɩ a sɩ yɛ-pↄw, nɩ a Arasɩb na ɩ a sɩ jɛjɛb-tↄ sʋbↄ, ɓã taa nɩ a popuorbo bala na ma duoro taa a be a fʋ yir pʋↄ. ³ A sũofʋ nɩ a pɩɛnfʋ na yi a sɩ Sãa Naaŋmɩn nɩ a sɩ Nɩ-kpɛ̃ɛ Jeeju-Kirisi sɛ̃, á be a nyɩ jie. ⁴ Filemↄ̃, a daar a jaa ɩ̃ na ma sʋↄrↄ a Naaŋmɩn, ɩ̃ ma bↄ̃w nɩ fʋ na, mɩ pɛwrɛ nɩ ʋ, ⁵ a-na-ɩ ɩ̃ ma wõ na a ba ƴɛrɛ a fʋ nʋfʋ ƴɛrɩ̃ fʋ na tɛrɛ nɩ a Naaŋmɩn deme ba jaa, nɩ a fʋ ƴↄ̃w-nyãa fʋ na tɛrɛ a Nɩ-kpɛ̃ɛ Jeeju jie. ⁶ Ɩ̃ sʋↄrↄ na a Naaŋmɩn a sɩ bõ-ƴen ɩfʋ a ƴↄ̃w-nyãa pʋↄ na tʋↄ maal fʋ a fʋ na sɩrɩ̃ bↄ̃w a yel-sono ala a jaa sɩ na pↄw a Kirisi jie. ⁷ Yɛbɛ, ɩ̃ cɩlɛ na mɩ tɛrɛ nɩ a su-ɓaar a nʋfʋ fʋ na tɛrɛ nɩ a nɩbɛ ɩnɛ a-na-ɩ fʋ ɓaalɩ̃ na a Naaŋmɩn deme sube. ⁸ Ala-ɩ̃-sↄ, a ala saarɩ̃ ɩ ɩ̃ tɛrɛ na a sↄr a Kirisi pʋↄ na tʋↄ yel fʋ a ala fʋ na sɛw na maal ⁹ ɩ̃-cɛ ɩ̃ bʋↄrↄ na ɩ̃ sʋↄr fʋ a nʋfʋ ɩnɛ. A maa Pol na ɩ a dab-nyãw ba na lɛ pↄw a ƴɛ̃ƴɛrɩ̃ na a kasu pʋↄ a Jeeju-Kirisi ɩnɛ, ¹⁰ ɩ̃ sʋↄrↄ fʋ na a Onejim ɩnɛ, na lɩɛb ɩ a ɩ̃ bie ɩ̃ na dↄw a ka a kasu pʋↄ. ¹¹ A korĩ-cɛ Ꞌwaa dãa ɩ bom wa, ɩ̃-cɛ a ƴɛ̃ƴɛrɩ̃ na ʋ lɩɛbʼã ɩ bom a fʋ jie nɩ a ɩ̃ jie. ¹² Ɩ̃ bara ʋ na ʋ wɩɛrɛ a fʋ jie. A ƴɛ̃ƴɛrɩ̃ na ʋ ɩ na a ɩ̃ ji-gãw. ¹³ Ɩ̃ ɩ̃ dãa na tɩɛrɛ ɩ̃ tɛrɛ ʋ a ka ʋ na sũono ma a fʋ jie, a mɩnɛ ɩ̃ na be a kasu pʋↄ a Naaŋmɩn ƴɛr-son ɩnɛ. ¹⁴ Ɩ̃ maa bʋↄrↄ ɩ̃ maal bom a fʋ puo-sↄw, fɛrʼɩ̃ fʋ a fʋ maal ma a vɩlaa wa, ɩ̃-cɛ a yi a fʋ mɩ̃ɛ jie. ¹⁵ Á nʋmↄ-wa-sↄw fʋ dãa na ŋmaa taa nɩ a Onejim daar fɩ̃ɩ pʋↄ a mɩnɛ a fʋ na tʋↄ lɛ pↄw ʋ, a nyɩ lɛ be taa a daar a jaa. ¹⁶ A-na-ɩ Ꞌwaa lɛ cãa ɩ gbãgbaa tɛw wa, ɩ̃-cɛ ʋ gãw na a gbãgbaa; ʋ lɩɛbʼã ɩ yɛb-nʋnaa. A ɩ̃ mɩ̃ɛ jie, a lɛ a sɩrɩ̃ wↄ̃, ɩ̃ a fʋ jie a gãw na a lɛ, a mɩnɛ ʋ na ɩ a nɩsaa salaa, nɩ a mɩnɛ ʋ na ɩ a fʋ yɛbɛ a Nɩ-kpɛ̃ɛ pʋↄ. ¹⁷ Ála-ɩ̃-sↄ a ala ɩ ɩ̃ ɩ na a fʋ lãa-tʋnↄ, sↄw de ʋ a mɩnɛ a naa dãa ɩ a maa ʋ. ¹⁸ A ala ɩ ʋ sãw fʋ na bom, mɩɩ ʋ tɛrɛ fʋ na san kãw, fú bar kʋ ma ɩ̃ ya. ¹⁹ A maa mɩ̃ɛ Pol ɩ̃ sɛb a sɛbɛ na nɩ a ɩ̃ nuu: ɩ̃ na ya fʋ na. Ɩ̃ maa bʋↄrↄ ɩ̃ yel fʋ a san kpee fʋ na tɛrɛ a ɩ̃ jie wa, a baafʋ ʋlↄ fʋ na tɛrɛ. ²⁰ Ↄↄ, yɛbɛ, ɩ̃ sʋↄr fʋ na a ʋna sũofʋ a Nɩ-kpɛ̃ɛ ɩnɛ; ɓaalɩ̃ ma a suur a Kirisi pʋↄ. ²¹ A lɛdaar ɩ̃ na sɛbɛ a sɛbɛ, ɩ̃ bↄ̃w na bↄ̃w ka fʋ na cɛl ma na, ɩ̃ mɩ lɛ bↄ̃w ka fʋ na maalʼã a gãw a ala ɩ̃ na yel fʋ. ²² Ɩ̃ lɛ bʋↄrↄ na go, a fʋ gbɛɛrɩ̃ ma die kãw, a-na-ɩ ɩ̃ tɩɛrɛ na áa nyɩ Naaŋmɩn sʋↄrfʋ na sↄ-yaa na, ɩ̃ na tʋↄ wɩ a nyɩ sɛ̃. ²³ A Epafɩrasɩ na lãa be nɩ ma a kasu pʋↄ a Jeeju-Kirisi ɩnɛ mɩ puor fʋ na. ²⁴ A Markɩ nɩ a Arɩsɩta, a Demasɩ nɩ a Luki na ɩ a ɩ̃ lãa-tʋnbↄ mɩ puor fʋ na. ²⁵ A Nɩ-kpɛ̃ɛ Jeeju-Kirisi sũofʋ ú be a nyɩ jie.