LUKI

LUKI

¹ Ɩ̃ baraa Towfɩl! Nɩ-yaw dɩ na tuo ɩ̃ sɛb a yele ala na maal a sɩ sↄ̃w. ² A be na a lɛ a mɩnɛ a yel-mɩ̃ɛ ƴɛr-manba na man kʋ sɩ a wↄ̃, na ɩ a bala na dãa nyɛ nɩ a ba mimir, wa nyↄw nɩ a nyↄwfʋ daar, ɩ̃ mɩ ɩ a Naaŋmɩn ƴɛr-son tʋ̃tʋnbↄ. ³ Ala-ɩ̃-sↄ a maa mɩ, ɩ̃ mɩ bↄ̃w na Ꞌlo a yele a jaa, cenʼɩ̃ na ta a nyↄwfʋ jie, ɩ̃ bʋↄrↄ ɩ̃ sɛb fʋ a mɩnɛ a yele na tu taa, ⁴ a fʋ na tʋↄ bↄ̃w ka a jaanfʋ ala fʋ na pↄw ɩ na yel-mɩ̃ɛ. ⁵ A lɛdaar a Ɛrↄdɩ na dãa ɩ a Jude jamana, a Naaŋmɩn baar-loro ƴen sʋbↄ be na be na dɩ a Jakarɩ, na be a baar-lorbo bala ba na bʋↄlↄ a Abiya ji-gbulĩ pʋↄ. A ʋ pↄw ba bʋↄlↄ a Elijabɛtɩ na mɩ ɩ a Naaŋmɩn baar-loro bi-pↄw. ⁶ A ba jaa ayi ɩ na nɩ-torisɩ a Naaŋmɩn nii-sↄw, ɩ̃ jↄrↄ a Nɩ-kpɛ̃ɛ ƴɛr-kpɛn nɩ a ʋ ƴɛrɩ̃sɩ a jaa. ⁷ Ɩ̃-cɛ baa dãa tɛrɛ bie wa, a-na-ɩ a Elijabɛtɩ ɩ na pↄw ab, ɩ̃ a ʋlↄ nɩ a Jakarɩ yomo dãa tↄl. ⁸ A daar ta na a Jakarɩ nɩ a ʋ lãa-tʋnbↄ jew taa a tʋmↄ, ʋ be a Naaŋmɩn nii-sↄw a lɛ, tʋnↄ a ʋ baar-lo-tʋmↄ. ⁹ Gbãbie ba lↄb vɛl ʋ ir tu nɩ a mɩnɛ a ba baar-lo-tʋmↄ na be, ʋ kpɛ a Nɩ-kpɛ̃ɛ puor-yir kpɛ̃ɛ na ʋ ƴↄ̃w a tɩ̃ɩ-nyu-vɩlaa a vũu pʋↄ a dɩ. ¹⁰ A nɩ-yaw ɩraa na be a yẽw sʋↄrↄ a Naaŋmɩn a tɩ̃ɩ-nyu-vɩlaa dɩfʋ daar. ¹¹ A Nɩ-kpɛ̃ɛ sɩ-tʋnaa nyɩrʼã a Jakarɩ, na ʋ ɩraa a tɩ̃ɩ-nyu-vɩlaa dɩfʋ jie a dʋrɩ̃ loor. ¹² A lɛ a Jakarɩ na nyɛ ʋ, a ʋ suur dama ʋ na, ɩ̃ a pʋlɩ̃nyɛ vʋ̃ↄnↄ ʋ. ¹³ Ɩ̃-cɛ a sɩ-tʋnaa yelʼã: “Jakarɩ! Taa jↄrↄ dãbɩ̃ɛ wa. A-na-ɩ a Naaŋmɩn sↄw na a fʋ sʋↄrfʋ. A fʋ pↄw Elijabɛtɩ na dↄw na dabile, fú pʋr ʋ a yuor Jã. ¹⁴ Nʋ̃ↄ na nyↄw fʋ na a fʋ cɩlɛ, ɩ̃ a na mɩ nʋmↄ na a nɩ-yaw a ʋ dↄwfʋ ɩnɛ. ¹⁵ A-na-ɩ ʋ na ɩ na gãdaa a Nɩ-kpɛ̃ɛ nii-sↄw. Ʋ kↄ̃ wa nyu a dɩvɛ̃ nɩ a dã-tuo fɩ̃ɩ wa; ɩ̃ wa nyↄw nɩ a bile ʋlↄ pʋↄ tɛrɛfʋ daar, ʋ na sɛw nɩ na a Naaŋmɩn Sɩɛ. ¹⁶ Ʋ na maalʼã a Ɩsɩrayɛl nɩbɛ yaw jie a ba lɛ lɩɛb wa a ba Nɩ-kpɛ̃ɛ Naaŋmɩn jie. ¹⁷ Ʋ na de na a Nɩ-kpɛ̃ɛ nĩe cenʼɩ̃ a Naaŋmɩn Sɩɛ ʋlↄ nɩ a fãgã ʋlↄ a Eli na dãa tɛrɛ. Ʋ na lɩɛbʼã a saanba sube a ba ɩ bõ-ƴen nɩ a ba bibiir, ɩ̃ mɩ lɩɛb a to-wownbo yɛ̃, a ba na tɛrɛ a nɩ-torisɩ yɛ̃; ʋ na maalʼã a nɩbɛ a ba gbɛɛrɩ̃ a ba mɩ̃ɛ a Nɩ-kpɛ̃ɛ ɩnɛ.” ¹⁸ A Jakarɩ soor a sɩ-tʋnaa: “Mɩnɛ ɩ̃ na ɩ ɩ̃ bↄ̃w ka a ɩ na yel-mɩ̃ɛ? A-na-ɩ ɩ̃ korʼã, ɩ̃ a ɩ̃ pↄw yomo mɩ tↄl.” ¹⁹ A sɩ-tʋnaa yel ʋ: “Maa ɩ̃ ɩ a Gabɩyɛl na ma ɩraa a Naaŋmɩn nii-sↄw. A ʋlↄ ɩ̃ tʋ̃ ma a ɩ̃ wa ƴɛrʼɩ̃ fʋ, ɩ̃ man fʋ a ƴɛr-son na. ²⁰ Nyɛ! A nʋↄr na kpal fʋ na, fʋ kↄ̃ tʋↄ ƴɛr ƴɛrɩ̃ wa ta nɩ a bibir ʋlↄ a ana yele na maala wa. A-na-ɩ faa sↄw nɩ puor a ɩ̃ ƴɛrɩ̃sɩ na sɛw a maal a daar ɩ̃ wa ta wa.” ²¹ A nɩbɛ bala cãa na ɩraa gu a Jakarɩ, a nↄɛ ko ba a mɩnɛ ʋ na kam a Naaŋmɩn puor-yir kpɛ̃ɛ pʋↄ a lɛ. ²² A lɛ ʋ na yi, Ꞌwaa dãa tʋↄrↄ ƴɛrɛ nɩ ba wa, a ba bↄ̃w ka bom nyɩr ʋ na a Naaŋmɩn puor-yir kpɛ̃ɛ pʋↄ. A nur ʋ mɩɩnɛ nɩ ba, ɩ̃ Ꞌwaa tʋↄrↄ ƴɛrɛ wa. ²³ A lɛ a ʋ Naaŋmɩn puor-yir kpɛ̃ɛ tʋmↄ jewfʋ bibir na ta, ʋ yi na kul a ʋ yir. ²⁴ A ɩ na fɩ̃ɩ ɩ̃ a ʋ pↄw Elijabɛtɩ tɛrɛ pʋↄ na ʋ sↄↄlɩ̃ nɩ cur anuu, ²⁵ yele nɩ: “Nyɛ a ala a Nɩ-kpɛ̃ɛ na maal a ɩ̃ jie. A daar ta na, ʋ Ꞌwuor ma, ɩ̃ ir a ɩ̃ vĩ ʋlↄ ɩ̃ na dãa tɛrɛ a nɩbɛ nii-sↄw.” ²⁶ A lɛ a Elijabɛtɩ na tɛrɛ a ʋ pʋↄ maalʼɩ̃ cur ayʋↄb, a Naaŋmɩn tʋ̃ na a ʋ sɩ-tʋnaa Gabɩyɛl a Galile, tẽw kãw pʋↄ na dɩ a Najarɛtɩ, ²⁷ be a pↄsabile kãw sɛ̃, na ɩ a Jojɛfʋ baraa. A Jojɛfʋ sãa-kʋmↄ nɩ a Davɩtɩ na dãa ɩ a jamana. Ɩ̃ a pↄsabile ʋlↄ yuor ɩ̃ dɩ a Maarɩɩ. ²⁸ A sɩ-tʋnaa kpɛ na a ʋ sɛ̃ ɩ̃ yel ʋ: “Ɩ̃ puor fʋ na, a fʋ̃ʋ a Naaŋmɩn na vɛl ir maal a vɩlaa. A Nɩ-kpɛ̃ɛ be nɩ fʋ na.” ²⁹ A ƴɛrɩ̃ ʋlↄ dama na a Maarɩɩ suur, ʋ sooro a ʋ mɩ̃ɛ a puorfʋ ʋlↄ par. ³⁰ A sɩ-tʋnaa yel ʋ: “Maarɩɩ! Taa jↄrↄ dãbɩ̃ɛ wa. A-na-ɩ a Naaŋmɩn vɛl fʋ na ir maal a vɩlaa. ³¹ Nyɛ, fʋ na tɛrɛ na a pʋↄ, dↄw dabile, na fʋ pʋr ʋ a yuor Jeeju. ³² Ʋ na ɩ na nɩ-kpɛ̃ɛ, ɩ̃ ba na bʋↄlↄ ʋ na a saa juu Naaŋmɩn Bie. A Nɩ-kpɛ̃ɛ Naaŋmɩn na biin ʋ na ʋ ɩ a jamana a ʋ sãa-kʋmↄ Davɩtɩ kaarɩ̃. ³³ Ʋ na ɩ na a Jakↄb yir deme jamana a daar a jaa, ɩ̃ a ʋ fãw kↄ̃ tɛrɛ baarfʋ daar wa.” ³⁴ A Maarɩɩ soor a sɩ-tʋnaa: “Mɩnɛ a na tʋↄ ɩ a lɛ? A-na-ɩ maa bↄ̃w daba sɛr wa.” ³⁵ A sɩ-tʋnaa yel ʋ: “A Naaŋmɩn Sɩɛ na suu na a fʋ jie ɩ̃ a saa juu Naaŋmɩn fãw na piw fʋ na. Ala-ɩ̃-sↄ a bie ʋlↄ fʋ na dↄwrↄ na ɩ na cɛcɛ, ɩ̃ ba na bʋↄlↄ ʋ na a Naaŋmɩn Bie. ³⁶ Nyɛ, a fʋ yɛbɛ Elijabɛtɩ ba na dãa bʋↄlↄ a pↄw ab, ʋ tɛrɛ na pʋↄ a ʋ korfʋ daar a ɩ cur ayʋↄb a dɩnaa. ³⁷ A-na-ɩ bom ma be be a Naaŋmɩn maala faara wa.” ³⁸ A Maarɩɩ yel: “Ɩ̃ ɩ na a Nɩ-kpɛ̃ɛ tʋ̃tʋnↄ. Á maal a lɛ a ɩ̃ jie a mɩnɛ fʋ na yel.” A sɩ-tʋnaa bar ʋ na ɩ̃ yi cen. ³⁹ A ʋna daarʼãa, a Maarɩɩ yi na pↄↄrↄ cere a Jude wɩɛr kãw pʋↄ na be a tan loor. ⁴⁰ Ʋ ta na kpɛ a Jakarɩ yir, puor a Elijabɛtɩ. ⁴¹ A mɩnɛ a Elijabɛtɩ na wõ a Maarɩɩ puorfʋ, a ʋ bie lɩɛbɛ na a ʋ puorɩ̃, ɩ̃ ʋ sɛw nɩ a Naaŋmɩn Sɩɛ, ⁴² ɩ̃ ʋ wuurʼɩ̃ kpɛ̃w yele: “A Naaŋmɩn be nɩ fʋ na gãw a pↄↄbↄ ba jaa, ɩ̃ ʋ mɩ be nɩ na a bie ʋlↄ na be a fʋ puorɩ̃. ⁴³ Bõ ɩ mɩ ɩ a ɩ̃ Nɩ-kpɛ̃ɛ mã mɩ wa a ɩ̃ sɛ̃? ⁴⁴ A-na-ɩ a mɩnɛ ɩ̃ na tↄↄ wõ a fʋ puorfʋ, a nʋmↄ na a bie ʋ lɩɛbɛ a ɩ̃ puorɩ̃. ⁴⁵ A nʋmↄ fʋ na a-na-ɩ fʋ sↄw nɩ na puor, áa ala a jaa a Nɩ-kpɛ̃ɛ na yel fʋ na maalʼã a lɛ.” ⁴⁶ A Maarɩɩ yel: “Ɩ̃ pɛwrɛ na a Nɩ-kpɛ̃ɛ a ɩ̃ pʋↄ pʋↄ, ⁴⁷ ɩ̃ a ɩ̃ sɩɛ mɩ cɩlɛ na a ɩ̃ Fafaara Naaŋmɩn ɩnɛ, ⁴⁸ a-na-ɩ ʋ Ꞌwuorʼã a ʋ tʋ̃tʋ̃-poole na pab. Wa nyↄw nɩ a ƴɛ̃ƴɛrɩ̃, a bal par bʋrↄ bʋrↄ ba jaa na yelʼã a nʋ̃ↄ ƴala ma na, ⁴⁹ a-na-ɩ a Fãw Sʋbↄ maalʼã tʋ̃-bɛrɛ a ɩ̃ jie. A ʋ yuor ɩ na cɛcɛ. ⁵⁰ A ʋ nã-bↄ̃wfʋ ma be nɩ na a bal par bʋrↄ bʋrↄ ba jaa na jↄrↄ ʋ. ⁵¹ Ʋ miilʼã a mɩnɛ a ʋ nuu fãgã na wↄ̃, ʋ yɛ̃yɛlɩ̃ na a bala na dãa tɛrɛ a yo-bↄfʋ tɩɛrɩ̃sɩ a ba suur pʋↄ bar. ⁵² Ʋ irʼã a jamansɩ a ba jaajiir bar, ɩ̃ maal a bala na pab a ba lɩɛb ɩ nɩ-bɛrɛ. ⁵³ Ʋ kʋ na a kↄ̃ deme a yel-sono a sɛw ba, ɩ̃ diw a tɛraa deme bar a ba cenʼɩ̃ nu-jaalsɩ. ⁵⁴ - ⁵⁵ Ʋ wa na sũo a ʋ tʋ̃tʋnↄ Ɩsɩrayɛl a mɩnɛ ʋ na dãa pʋlɩ̃ nɩ a sɩ sãa-kʋnbↄ, ɩ̃ Ꞌwaa hiin a ʋ nã-bↄ̃wfʋ ʋ na tɛrɛ nɩ a Abʋraham nɩ a ʋ bal par deme a daar a jaa wa.” ⁵⁶ A Maarɩɩ maalʼã cur ata a Elijabɛtɩ sɛ̃, ɩ̃ wa pãa kul. ⁵⁷ A Elijabɛtɩ bie dↄwfʋ daar ta na, ʋ dↄw dabile. ⁵⁸ A ʋ taarba nɩ a ʋ yir deme wõ na a mɩnɛ a Naaŋmɩn na sɩrɩ̃ maal ʋ a vɩlaa, ɩ̃ na ba mɩ tɛrɛ a nʋ̃ↄ a ʋ kaarɩ̃. ⁵⁹ A bibie anuu-nʼata dayen ba wɩ na a bie yʋↄr ŋmaafʋ ɩnɛ, ɩ̃ bʋↄrↄ ba pʋr ʋ a yuor a Jakarɩ na ɩ a ʋ sãa yuor. ⁶⁰ Ɩ̃-cɛ a ʋ mã yelʼã a Ꞌwaa dɩrɛ a lɛ wa, á Jã ba na bʋↄlↄ ʋ. ⁶¹ A ba yel ʋ: “Nɩrɛ ma be be a fʋ yir deme sↄ̃w na dɩ a ʋna yuor wa.” ⁶² Ɩ̃ na ba mɩɩn a sãa nɩ a nur bʋↄrↄ ba bↄ̃w a yo-buor ʋ na bʋↄrↄ ba pʋr ʋ. ⁶³ A Jakarɩ ɩ a ba kʋ ʋ sɛbɛ, ʋ sɛb ƴↄ̃w yel áa ʋ yuor dɩ na Jã. A nↄɛ ko a nɩbɛ ba jaa. ⁶⁴ A jie naan, a Jakarɩ nʋↄr Ꞌlaw na, a ʋ dɛlɩ̃bir mɩ Ꞌlor, ʋ lɛ ƴɛrɛ a ƴɛrɩ̃ pɛwrɛ nɩ a Naaŋmɩn. ⁶⁵ A dãbɩ̃ɛ nyↄw a ba lãa-pɩɛlbɛ ba jaa, ɩ̃ a ba mɩ mana a ala na ta kʋrↄ taa a Jude wɩɛr ʋ jaa pʋↄ na be a tan jur. ⁶⁶ A bala ba jaa na wõ a ʋna ƴɛrɩ̃, de ʋ na ƴↄ̃w a ba suur pʋↄ ɩ̃ yele: “Mɩnɛ a bibile na nↄↄ be? A-na-ɩ a Nɩ-kpɛ̃ɛ fãw be nɩ ʋ na sɩrɛ jaa.” ⁶⁷ A Jã sãa Jakarɩ sɛw nɩ na a Naaŋmɩn Sɩɛ, ɩ̃ hiere yele nɩ: ⁶⁸ “Nyɩ́ pɛwrɛ a Nɩ-kpɛ̃ɛ na ɩ a Ɩsɩrayɛl Naaŋmɩn, a-na-ɩ ʋ wa na a ʋ nɩbɛ sɛ̃ na ʋ faa ba. ⁶⁹ Ʋ ƴↄ̃w sɩ na Fafaar-gãdaa be a ʋ tʋ̃tʋnↄ Davɩtɩ yir deme sↄ̃w, ⁷⁰ a mɩnɛ ʋ na dãa ƴↄ̃w a ʋ ƴɛr-hier-sono a ba yel a korĩ-cɛ jaa. ⁷¹ Ʋ yel sɩ na á ʋ na faa sɩ na a sɩ sama-deme jie, lãa faa nɩ sɩ a bala ba jaa na Ꞌlaar sɩ nuumɩ. ⁷² Lɛ ʋ ma miilʼɩ̃ a ʋ nã-bↄ̃wfʋ a sɩ sãa-kʋnbↄ jie, ɩ̃ ma mɩ tɩɛr bↄ̃w nɩ a ʋ pʋlɩ̃-son, ⁷³ tu nɩ a mɩnɛ ʋ na dãa pʋlɩ̃ nɩ a sɩ sãa-kʋmↄ Abʋraham, ⁷⁴ a ʋ na faa sɩ na a sɩ sama-deme nuumɩ, a sɩ na tʋↄ tʋnↄ a ʋ tʋmↄ, kↄ̃ jↄrↄ dãbɩ̃ɛ wa, ⁷⁵ ɩ̃ na sɩ ow kpee ɩ cɛcɛ, ɩ nɩ nɩ-torisɩ a ʋ nii-sↄw a sɩ baafʋ bibie a jaa pʋↄ. ⁷⁶ Ɩ̃ a fʋ̃ʋ ɩ̃ bie, ba na bʋↄlↄ fʋ na a saa juu Naaŋmɩn ƴɛr-hiere a-na-ɩ fʋ na de na a Nɩ-kpɛ̃ɛ nĩe gbɛɛrɛ a ʋ sↄr, ⁷⁷ na fʋ miil a ʋ nɩbɛ a ba bↄ̃w a faafʋ sↄr, ⁷⁸ a na yi a ba maal-faar a Naaŋmɩn na diere bara kʋrↄ ba ɩnɛ. A-na-ɩ a nã-bↄ̃wfʋ ƴala na a sɩ Naaŋmɩn jie, a ala ɩnɛ a saꞋlon caa nↄↄ wa pur caarɩ̃ sɩ, ⁷⁹ a mɩnɛ ʋ na tʋↄ caarɩ̃ a bala na be a libe pʋↄ, nɩ a bala na pɩɛlʼɩ̃ a kũu, ɩ̃ tↄwrↄ sɩ ƴↄnↄ a pɩɛnfʋ sↄr pʋↄ.” ⁸⁰ A bile nʋ̃ↄnↄ na ɩ̃ a ʋ sɩɛ mɩ pↄwrↄ a fãgã. A wɛkar pʋↄ ʋ be wa ta nɩ a ʋna bibir ʋ na wa yi a Ɩsɩrayɛl nɩbɛ nii-sↄw.

¹ A ʋna daarʼãa a ƴɛrɩ̃ yi na a jaman-kpɛ̃ɛ Ogusi sɛ̃ na yel a ba sↄr a nɩbɛ ba jaa na be a ʋ ten a jaa pʋↄ. ² A sↄrfʋ na ɩ̃ ɩ a dãdãw sↄrfʋ na maal a lɛdaar a Kirinisi na ɩ a Sɩrɩ jamana. ³ A nɩbɛ ba jaa bõ-ƴene-ƴene cenʼã a ba mɩ̃ɛ ten pʋʋr a sↄrfʋ ɩnɛ. ⁴ Ala-ɩ̃-sↄ a Jojɛfʋ mɩ yi na a Najarɛtɩ na be a Galile wɩɛr ɩ̃ cen a Jude, a jamana Davɩtɩ tẽ-dↄwraa ba na bʋↄlↄ a Bɛtɩlɛm, a-na-ɩ a ʋlↄ mɩ̃ɛ mɩ ɩ na a Davɩtɩ yir sʋbↄ nɩ a ʋ bal nɩrɛ. ⁵ Ʋ cenʼɩ̃ na a ʋ baraa Maarɩɩ na tɛrɛ a pʋↄ, a ba na lãa sↄr ba. ⁶ Ɩ̃ a lɛ ba na dãa cãa be a be, a Maarɩɩ dↄwfʋ daar ta na, ⁷ ʋ dↄw a ʋ pↄsabie ʋ ɩ dabile, ɩ̃ vilĩ ʋ a cẽcen gaal a dʋn mʋ̃ↄ ƴↄ̃wfʋ jie, a-na-ɩ baa pↄw a die a sáanba yir pʋↄ wa. ⁸ A ʋna tẽw naa pʋↄ, dↄ-cɩɩnbɛ dãa na be be gana a mↄↄ pʋↄ a tɩsↄw, gure a ba piir, ⁹ a Naaŋmɩn sɩ-tʋnaa nyɩr ba a be ɩ̃ a Naaŋmɩn cãa nyɩnyɩl pↄw ba, a pʋlɩ̃nyɛ nyɩrɩ̃ vʋ̃ↄ ba. ¹⁰ Ɩ̃ a sɩ-tʋnaa yel ba: “Nyɩ taa jↄrↄ dãbɩ̃ɛ wa. Yɛr-son ɩ̃ ƴɛrɛ kʋrↄ nyɩ na ɩrɛɛ nʋ̃ↄ kpɛ̃ɛ a nɩbɛ ba jaa jie. ¹¹ A dɩnaa tɩsↄw na, a Davɩtɩ tẽw pʋↄ, ba dↄw na a Fafaara a nyɩ ɩnɛ, na ɩ a Nɩ-kpɛ̃ɛ nɩ a Kirisi. ¹² Nyɩ́ nyɛ a jɩbaa ʋlↄ nyɩ na bↄ̃wnↄ nɩ ʋ: nyɩ na nyɛ na bi-pɩɩlaa ba na vilĩ cẽcen gaal a dʋn mʋ̃ↄ ƴↄ̃wfʋ jie.” ¹³ Ɩ̃ a jie naan, a saꞋlon sↄdaalsɩ yaw jie wa na pↄw a sɩ-tʋnaa ʋlↄ, ɩ̃ pɛwrɛ a Naaŋmɩn yele nɩ: ¹⁴ “A Naaŋmɩn ɩ̃ sↄ a ju-kpɛ̃ɛ a saꞋlon iin ɩ̃ a pɩɛnfʋ ú be a tẽw pʋↄ, a bala ʋ na nʋnↄ jie.” ¹⁵ A lɛ a sɩ-tʋnɩsɩ na bar a dↄ-cɩɩnbɛ ɩ̃ lɩɛb do a saꞋlon, ba yele na taa: “Nyɩ ɩ a sɩ cen a Bɛtɩlɛm na nyɛ a ala na ta, a ala ɩnɛ a Naaŋmɩn na tʋ̃ yel sɩ.” ¹⁶ Ba pↄw na cen na ta nyɛ a Maarɩɩ, nɩ a Jojɛfʋ, nɩ a bi-pɩɩlaa ba na gaal a dʋn mʋ̃ↄ ƴↄ̃wfʋ jie. ¹⁷ A lɛ ba na nyɛ ʋ, ba manʼã a ala a sɩ-tʋnaa na dãa yel ba a bibile ʋlↄ ɩnɛ, ¹⁸ a nↄɛ ko a bala ba jaa na wõ a ala a dↄ-cɩɩnbɛ na yele ba. ¹⁹ Ɩ̃-cɛ a Maarɩɩ bↄ̃w na tɛrɛ a ana yele a jaa a ʋ pʋ̃ↄ ɩ̃ pɛrɛ. ²⁰ A dↄ-cɩɩnbɛ lɩɛbʼã cen na kʋrↄ a Naaŋmɩn a ju-kpɛ̃ɛ pɛwrɛ nɩ ʋ a ala a jaa ɩnɛ ba na wõ ɩ̃ mɩ nyɛ, a be a lɛ a mɩnɛ a sɩ-tʋnaa na dãa yel ba. ²¹ A bibie anuu-nʼata dayen, na ɩ a ʋ yʋↄr ŋmaafʋ bibir ta na, a ba pʋr ʋ a yuor Jeeju, na ɩ a yuor ʋlↄ a sɩ-tʋnaa na dãa tɩɩr, ɩ̃ a ʋ mã Maarɩɩ ma dãa tɛrɛ a ʋ pʋↄ sɛr wa. ²² - ²⁴ A mɩnɛ a Maarɩɩ pↄdↄↄr na baar ʋ yi a ʋ pↄdↄↄr diem, a ʋlↄ nɩ a Jojɛfʋ irʼã tu a ƴɛr-kpɛn sↄr a mɩnɛ a Naaŋmɩn na dãa miil a Mowisi, á ba de a dabil ba jaa na ɩ a pↄsabiir kʋ a Nɩ-kpɛ̃ɛ. Ba de na a bie cenʼɩ̃ a Jerujalɛm a Nɩ-kpɛ̃ɛ kʋfʋ jie, ɩ̃ mɩ de a baar-lo-bom a mɩnɛ a Nɩ-kpɛ̃ɛ ƴɛr-kpɛ̃w na yel: a ŋmama ayi mɩɩ naŋmam-pↄlↄ ayi. ²⁵ A be a Jerujalɛm, daba kãw be na be na dɩ Sɩmẽw. Ʋ ɩ na nɩ-toraa ɩ̃ mɩ jↄrↄ a Naaŋmɩn, ɩ̃ jɛ ƴↄ̃w toor cɛlɛ a ʋlↄ na waara faara a Ɩsɩrayɛl nɩbɛ a ba won pʋↄ. A Naaŋmɩn Sɩɛ be nɩ ʋ na, ²⁶ ɩ̃ yel ʋ a ʋ na de na nĩe nyɛ a Kirisi ʋlↄ a Nɩ-kpɛ̃ɛ na tʋ̃ ɩ̃ wa pãa bɩɛr kpi. ²⁷ A Naaŋmɩn Sɩɛ tↄw na a Sɩmẽw cenʼɩ̃ a Naaŋmɩn puor-yir kpɛ̃ɛ pʋↄ, ɩ̃ a Jojɛfʋ nɩ a Maarɩɩ wɩ nɩ na a ba bie Jeeju a be, a mɩnɛ a ba na maal ʋ a ala a Naaŋmɩn ƴɛr-kpɛn na yel. ²⁸ A Sɩmẽw de ʋ na ƴↄ̃w a ʋ nuu pʋↄ, ɩ̃ pɛw a Naaŋmɩn yel: ²⁹ “A ƴɛ̃ƴɛrɩ̃ na, Nɩ-kpɛ̃ɛ, fʋ na tʋↄ na bar a fʋ tʋ̃tʋnↄ ʋ cenʼɩ̃ pɩɛnfʋ, a-na-ɩ a fʋ pʋlɩ̃fʋ ƴɛrɩ̃ maalʼã baar: ³⁰ a ɩ̃ mɩ̃ɛ mimir nyɛ na a fʋ faafʋ ³¹ ʋlↄ fʋ na gbɛɛrɩ̃ a bal bʋrↄ bʋrↄ ba jaa nii-sↄw, ³² na ɩ a cãa na caara a nɩ-bʋrↄ bʋrↄ a ba bↄ̃wnↄ fʋ, ɩ̃ mɩ maala a Ɩsɩrayɛl na ɩ a fʋ nɩbɛ yuor ʋ yire.” ³³ A mɩnɛ a Jeeju sãa nɩ a ʋ mã na wõ a ala a Sɩmẽw na yel, nʋↄr ko ba na. ³⁴ A Sɩmẽw sʋↄrʼã a Naaŋmɩn ƴↄ̃w ba ɩ̃ yel a Jeeju mã, Maarɩɩ: “A Naaŋmɩn vɛlʼã ir a bie na a Ɩsɩrayɛl nɩbɛ yaw lofʋ ɩnɛ, nɩ a ba lɩɛb irfʋ ɩnɛ. A Naaŋmɩn ƴↄ̃w ʋ na ʋ ɩ jɩbaa a nɩ-yaw na ƴɛrɛ a ƴɛr-bebe ƴↄnↄ ʋ, ³⁵ a mɩnɛ a yaw jie pʋ-tɩɛrɩ̃sɩ na yi a cãa pʋↄ. Ɩ̃ a fʋ̃ʋ mɩ, a na wʋlↄ fʋ na wↄ̃ taa nɩ bãjɩnɛ ba na cↄrʼɩ̃ fʋ a suur.” ³⁶ Pↄw kãw mɩ dãa na be be na dɩ a An na ma ƴɛrɛ a Naaŋmɩn ƴɛrɩ̃sɩ, a ʋ sãa na dɩ Panʋwɛl na ɩ a Asɛɛr bal nɩrɛ. A pↄw ʋlↄ korʼã yaw. Ʋ dãa na kul a sɩrɛ a ʋ pↄsabile daar maalʼɩ̃ yomo anuu-nʼayi, ³⁷ ɩ̃ jɛ ɩ kpɩ̃ɩ-pↄw wa ta nɩ yomo lɩjaanaan nʼanaan. ꞋWaa yire a Naaŋmɩn puor-yir kpɛ̃ɛ wa; ʋ tʋnↄ na a Naaŋmɩn tʋn a tɩsↄw nɩ a mↄtↄ̃w, ma lũ nɩ a nʋↄr puoro nɩ a Naaŋmɩn. ³⁸ Ʋ ta na a be a daar ʋlↄ pʋↄ, pɛwrɛ a Naaŋmɩn ɩ̃ ƴɛrɛ a Jeeju ƴɛrɩ̃ kʋrↄ a nɩbɛ ba jaa bala na gu a mɩnɛ a Naaŋmɩn nↄↄ faara a Jerujalɛm-tẽw. ³⁹ A lɛ a Maarɩɩ nɩ a Jojɛfʋ na maal a tʋmↄ a jaa baar tu nɩ a mɩnɛ a Nɩ-kpɛ̃ɛ ƴɛr-kpɛn na yel, ba lɩɛbʼã kul a ba tẽw, Najarɛtɩ, na be a Galile wɩɛr. ⁴⁰ A Jeeju nʋ̃ↄnↄ na lãa pↄwrↄ nɩ a fãgã mɩ tɛrɛ nɩ a kpaarfʋ, ɩ̃ a Naaŋmɩn sũofʋ be a ʋ jie. ⁴¹ A yomo a jaa, a Jeeju dↄↄrbↄ ma cenʼã a Jerujalɛm a Pakɩ fɛtɩ ɩnɛ. ⁴² A lɛ a Jeeju na pↄw a yomo pie-nʼayi, ba cenʼɩ̃ ʋ na a fɛtɩ ʋlↄ jie a mɩnɛ ba na ma cere a yomo a jaa. ⁴³ A lɛ a fɛtɩ bibie na tↄl baar, ba lɛ lɩɛbʼã kule ɩ̃ a Jeeju cãa jɛ be a Jerujalɛm, ɩ̃ a ʋ dↄↄrbↄ ma dãa bↄ̃wnaa wa. ⁴⁴ Ba dãa na tɩɛr beeka ʋ pↄw na a ba nɩbɛ kule nɩ, ɩ̃ maal bibir bõ-ƴen a sↄr juu, ɩ̃ bʋↄrↄ ʋ yʋↄrↄ nɩ a ba yir deme nɩ a ba nɩ-bↄ̃wsɩ jie. ⁴⁵ Ɩ̃-cɛ baa nyɛ ʋ wa, ɩ̃ lɛ lɩɛb cen a Jerujalɛm a ʋ bↄfʋ jie. ⁴⁶ Ba bↄ ʋ na maalʼɩ̃ bibie ata ɩ̃ wa pãa nyɛ ʋ a Naaŋmɩn puor-yir kpɛ̃ɛ pʋↄ, ʋ lãa jɛ nɩ a Jufisɩ ƴɛr-kpɛn-jaanba, cɛlɛ a ba ƴɛrɩ̃sɩ, sooro nɩ ba a yele par. ⁴⁷ A bala ba jaa na wõ a mɩnɛ ʋ na ire a ƴɛrɩ̃sɩ par, nↄɛ ko ba na a ʋ yɛ̃ ɩnɛ. ⁴⁸ A lɛ a ʋ dↄↄrbↄ na nyɛ ʋ, nↄɛ kpal ba na. Ɩ̃ a ʋ mã soor ʋ: “Ɩ̃ bie! Bõ ɩ a fʋ maal sɩ a nↄhↄ̃? A fʋ bↄfʋ ƴↄ̃w na a maa nɩ a fʋ sãa dɛn.” ⁴⁹ A Jeeju yel ba: “Bõ ɩ a nyɩ bʋↄrↄ ma? Nyaa dãa bↄ̃w ka a sɛw na ɩ̃ na jɛ a ɩ̃ Sãa yir pʋↄ wa mɩɩ?” ⁵⁰ Ɩ̃-cɛ baa bↄ̃w a ala ʋ na yel ba par wa, ⁵¹ ɩ̃ na ʋ ir pↄw ba kulʼɩ̃ a Najarɛtɩ, ɩ̃ wono ba a toor, ɩ̃ a ʋ mã ƴↄ̃w a ƴɛrɩ̃sɩ a jaa a ʋ suur pʋↄ. ⁵² A Jeeju nʋ̃ↄnↄ na, a ʋ yɛ̃ mɩ dↄↄlↄ, ɩ̃ a ʋ ben nʋmↄ a Naaŋmɩn nɩ a nɩbɛ mɩ.

¹ A daar ʋlↄ a Naaŋmɩn ƴɛrɩ̃ na ta a Jã, a ɩ na a jaman-kpɛ̃ɛ Tɩbɛɛr yomo pie-nʼanuu pʋↄ. A lɛdaar a Pↄ̃sɩ Pɩlatɩ mɩ ɩ a Jude-tẽw jamana, a Ɛrↄdɩ mɩ ɩ a Galile jamana, ɩ̃ a ʋ yɛbɛ Fɩlɩpɩ ɩ a Iture nɩ a Tirakoni jamana, ɩ̃ a Lɩsanɩya ɩ a Abɩlɛn-tẽw jamana. ² A ʋna daar, a An nɩ a Kayifi ɩ̃ mɩ dãa ɩ a Naaŋmɩn baar-lo-nɩ-bɛrɛ. A Naaŋmɩn de na a ʋ ƴɛrɩ̃ kʋ a Jã na ɩ a Jakarɩ bi-daba a be a wɛkar pʋↄ, ³ ʋ yↄ a ten ala a jaa pʋↄ na pɩɛlʼɩ̃ a Jʋrdɛ̃ man, hiere yele a nɩbɛ a ba lɩɛb a ba yɛ̃ ɩ̃ wa ʋ mʋr ba a kʋ̃ↄ, a Naaŋmɩn de a ba maal-faar bar kʋ ba. ⁴ A yele ala ta na a mɩnɛ a Naaŋmɩn ƴɛr-hiere Ejayi na dãa sɛb ƴↄ̃w a ʋ sɛbɛ pʋↄ yele: “Ʋ ɩ na a nɩrɛ na wuure a wɛkar pʋↄ yele: Nyɩ́ gbɛɛrɩ̃ a Nɩ-kpɛ̃ɛ sↄr, nyɩ́ cↄↄrɩ̃ a ʋ sↄr-bil a tor. ⁵ A kokorsɩ a jaa na ɓʋrʼã, a tã-bɛrɛ nɩ a tã-bil a jaa na wɛlʼã gaal tene, a jiir ala na gↄ̃w na torʼã, a sↄr nyara-nyarasɩ na ɩ na pↄlↄ-pↄlↄ, ⁶ ɩ̃ a bal bʋrↄ bʋrↄ ba jaa na nyɛ na a Naaŋmɩn faafʋ.” ⁷ A Jã ma dãa na yele a nɩ-yaw bala na waara a ʋ jie a ʋ mʋr ba a kʋ̃ↄ: “Nyɩna waab bibiirʼãa! Ala ɩ̃ man nyɩ a nyɩ na tʋↄ na jↄ cɩ̃ɛ a Naaŋmɩn su-tuo ɩnɛ na waara? ⁸ Nyɩ́ ɩ a nyɩ maal-bie a miile áa nyɩ yɛ̃ lɩɛbʼã, ɩ̃ nyɩ taa cãa yele a nyɩ mɩ̃ɛ á nyɩ ɩ na a Abʋraham bibiir wa. Ɩ̃ yele nyɩ na: a Naaŋmɩn na tʋↄ na maal a kʋsɩɛ asɩmɛ a lɩɛb ɩ a Abʋraham bibiir. ⁹ Wa nyↄw nɩ a ƴɛ̃ƴɛrɩ̃ ba gↄrʼã jɛw a kpãakpo bʋↄrↄ nɩ a tɩɛ nyɩbɛ ŋmaafʋ. Ala-ɩ̃-sↄ, a tɩɛ lɛ na ma wↄnↄ a wↄ̃-sono wa, ba na ŋmaa ʋ na lↄb ƴↄ̃w a vũu pʋↄ.” ¹⁰ A mɩnɛ a nɩbɛ na wõ a lɛ, ba soorʼã a Jã-Batii a bõ ba sɛw ba maal, ¹¹ ʋ yel ba: “A nɩrɛ ʋlↄ na tɛrɛ a kparsɩ ayi ú ir bõ-ƴen kʋ a ʋlↄ na ma tɛrɛ wa, ɩ̃ a nɩrɛ ʋlↄ na tɛrɛ a bõ-dɩraa, ú mɩ maal a lɛ.” ¹² A lãpo-dierbe mɩ wa na, bʋↄrↄ a Jã ʋ mʋr ba a kʋ̃ↄ, ɩ̃ na ba soor ʋ: “Jãjaana, bõ sɩ sɛw sɩ maal?” ¹³ Ʋ yel ba: “Nyɩ taa diere bom dↄↄlↄ a ala juu ba na ƴↄ̃w á nyɩ ma de wa.” ¹⁴ A sↄdaalsɩ mɩ soor ʋ: “Ɩ̃ a sɩmɩ, bõ sɩ sɛw sɩ maal?” Ʋ yel ba: “Nyɩ taa diere nɩrɛ bom nɩ fãgã wa, nyɩ taa ŋmaara jir-kar ƴↄnↄ nɩrɛ wa. Nyɩ́ ɩ a nyɩ yar a sɛw nɩ nyɩ.” ¹⁵ A nɩbɛ dãa na jɛ ƴↄ̃w a toor cɛlɛ ɩ̃ pɛrɛ a ba sube pʋↄ a ala ɩ a Jã ɩ̃ ɩ a Kirisi, ¹⁶ a Jã yel a ba jaa: “A maa, ɩ̃ mʋrↄ nɩ nyɩ na a kʋ̃ↄ, ɩ̃-cɛ a ʋlↄ na tɛrɛ a fãw gãw ma be na be waara, ɩ̃ maa sɛw nɩ a ʋ nafaba sɩɩrfʋ wa. A ʋlↄ, a Naaŋmɩn Sɩɛ nɩ a vũu pʋↄ ʋ na mʋr nyɩ. ¹⁷ Ʋ tɛrɛ na a ʋ ci-ŋme-daa a ʋ nuu pʋↄ, ʋ na ŋmeere nɩ a ci ɩ̃ yɛlɛ, suure a ci-bie a ʋ boor pʋↄ, ɩ̃ ƴↄnↄ a ure a vũu pʋↄ na ma be kpiinfʋ wa.” ¹⁸ A Jã lɛ jaan ba na yele yaw, ƴɛrɛ nɩ ba a Naaŋmɩn ƴɛr-son. ¹⁹ Ɩ̃ ʋ mɩ de na a jamana Ɛrↄdɩ fãa miilʼɩ̃ ʋ a ʋ yɛbɛ pↄw Ɛrↄdɩya ɩnɛ ʋ na de, ɩ̃ mɩ miilʼɩ̃ ʋ a ʋ tʋ̃-faar a jaa ʋ na tʋ̃, ²⁰ a Ɛrↄdɩ lɛ dↄↄl a asɩmɛ a ʋ maal-faar a jaa juu: ʋ ɩ na a ba nyↄw a Jã ƴↄ̃w a kasu pʋↄ. ²¹ A mɩnɛ a Jã na dãa mʋr a nɩbɛ ba jaa a kʋ̃ↄ baar, lãa nɩ a Jeeju, a Jeeju sʋↄrↄ na a Naaŋmɩn ɩ̃ a saꞋlon yuo, ²² ɩ̃ a Naaŋmɩn Sɩɛ de a naŋmam ɩ̃gan suu wa jɛ a ʋ juu, ɩ̃ a ba wõ ƴɛrɩ̃sɩ a yi be a saꞋlon yele: “Fʋ̃ʋ ɩ a ɩ̃ Bi-nʋnaa, na kpɛ a ɩ̃ suur pʋↄ.” ²³ A Jeeju yomo dãa na tara lɩjɛrʼɩ̃-pie a mɩnɛ ʋ na nyↄw a ʋ tʋn. A nɩbɛ dãa na tɩɛrɛ á ʋ ɩ na a Jojɛfʋ bie, na ɩ a Eli bi-daba. ²⁴ - ³⁸ Nyɛ a mɩnɛ a Jeeju bal-par na be: A Naaŋmɩn mɛ na a Adã, a Adã dↄw a Sɛtɩ, a Sɛtɩ ɩraa ɩ̃ dↄw a Enↄsɩ, a Enↄsɩ ɩraa ɩ̃ dↄw a Kayɩna, a Kayɩna dↄw a Malele, a Malele dↄw a Jarɛdɩ, a Jarɛdɩ dↄw a Ɛnↄkɩ, a Ɛnↄkɩ dↄw a Matusala, a Matusala dↄw a Lamɛkɩ, a Lamɛkɩ dↄw a Nowe, a Nowe dↄw a Sɛm, a Sɛm dↄw a Afasadɩ, a Afasadɩ dↄw a Kayɩna, a Kayɩna dↄw a Sala, a Sala dↄw a Ebɛɛr, a Ebɛɛr dↄw a Falɛkɩ, a Falɛkɩ dↄw a Aragayi, a Aragayi dↄw a Seriki, a Seriki dↄw a Nakↄↄr, a Nakↄↄr dↄw a Tara, a Tara dↄw a Abʋraham, a Abʋraham dↄw a Ɩjakɩ, a Ɩjakɩ dↄw a Jakↄb, a Jakↄb dↄw a Juda, a Juda dↄw a Farɛsɩ, a Farɛsɩ dↄw a Ɛsɩrↄ̃, a Ɛsɩrↄ̃ dↄw a Arɩnɩ, a Arɩnɩ dↄw a Adɩmɩ, a Adɩmɩ dↄw a Aminadab, a Aminadab dↄw a Naasõ, a Naasõ dↄw a Sala, a Sala dↄw a Booji, a Booji dↄw a Obɛdɩ, a Obɛdɩ dↄw a Jɛsɩ, a Jɛsɩ dↄw a Davɩtɩ, a Davɩtɩ dↄw a Natã, a Natã dↄw a Matata, a Matata dↄw a Mɛna, a Mɛna dↄw a Meleya, a Meleya dↄw a Elaakɩm, a Elaakɩm dↄw a Jonam, a Jonam dↄw a Jojɛfʋ, a Jojɛfʋ dↄw a Juda, a Juda dↄw a Sɩmẽw, a Sɩmẽw dↄw a Levi, a Levi dↄw a Mata, a Mata dↄw a Jorim, a Jorim dↄw a Elajɛɛr, a Elajɛɛr dↄw a Jeeju, a Jeeju dↄw a Ɛɛr, a Ɛɛr dↄw a Ɛmadã, a Ɛmadã dↄw a Kosam, a Kosam dↄw a Adɩ, a Adɩ dↄw a Mɛlɩkɩ, a Mɛlɩkɩ dↄw a Neri, a Neri dↄw a Salatɩɛl, a Salatɩɛl dↄw a Jorobabɛl, a Jorobabɛl dↄw a Eresa, a Eresa dↄw a Jowana, a Jowana dↄw a Joda, a Joda dↄw a Jojɛkɩ, a Jojɛkɩ dↄw a Semeyi, a Semeyi dↄw a Matatɩya, a Matatɩya dↄw a Maatɩ, a Maatɩ dↄw a Nagayi, a Nagayi dↄw a Ɛsɩlɩ, a Ɛsɩlɩ dↄw a Nahom, a Nahom dↄw a Amↄsɩ, a Amↄsɩ dↄw a Matatɩya, a Matatɩya dↄw a Jojɛfʋ, a Jojɛfʋ dↄw a Janayi, a Janayi dↄw a Mɛlɩkɩ, a Mɛlɩkɩ dↄw a Levi, a Levi dↄw a Mata, a Mata dↄw a Eli, a Eli dↄw a Jojɛfʋ, ʋlↄ a nɩbɛ na dãa tɩɛrɛ ʋ ɩ a Jeeju sãa.

¹ A Jeeju paalʼɩ̃ na a Naaŋmɩn Sɩɛ na ʋ yi a Jʋrdɛ̃ man wɩɛr ɩ̃ lɩɛb wa, a Sɩɛ tↄw ʋ cenʼɩ̃ a wɛkar pʋↄ, ² a Satã bɩɩr ʋ maalʼɩ̃ bibie lɩjaayi. ꞋWaa dãa dɩ bom a bibie ala pʋↄ wa, ɩ̃ a mɩnɛ a daar ʋlↄ na tↄl, kↄ̃ nyↄw ʋ na. ³ A Satã yel ʋ: “A ala ɩ fʋ ɩ na a Naaŋmɩn Bie, yel a kʋsɩrʼã ʋ lɩɛb ɩ bõ-dɩraa.” ⁴ A Jeeju yel ʋ: “A sɛbʼã a Naaŋmɩn Sɛbɛ pʋↄ: ʻAa ɩ a bõ-dɩraa tɛw ɩ̃ na tʋↄ kʋ a nɩrɛ a baafʋ wa.ʼ ” ⁵ A Satã do nɩ ʋ tãw ju-sↄ̃w ɩ̃ miil ʋ a ten a jaa na be a ka a tẽ-daa ʋ jaa juu, ʋ nyɛ ba lɛ dilo, ⁶ ɩ̃ yel ʋ: “Ɩ̃ na kʋ fʋ na a fãw a ten ala pʋↄ a jaa, nɩ a ba na-yele, a-na-ɩ maa ba kʋ, ɩ̃ mɩ tɛrɛ na sↄr na kʋ a nɩrɛ ʋlↄ ɩ̃ na bʋↄrↄ. ⁷ Fʋ̃ʋ ɩ̃ na sↄ a ala a jaa, a ala ɩ fʋ gburi na a dume ɩ̃ puor ma.” ⁸ A Jeeju yel ʋ: “A sɛbʼã a Naaŋmɩn Sɛbɛ pʋↄ: ʻA Nɩ-kpɛ̃ɛ na ɩ a fʋ Naaŋmɩn fʋ sɛw fʋ puor, ɩ̃ a ʋlↄ tɛw ɩ̃ sɛw fʋ tʋnↄ kʋrↄ.ʼ ” ⁹ A Satã lɛ cenʼɩ̃ ʋ na a Jerujalɛm na ʋ dↄↄl ʋ a Naaŋmɩn puor-yir kpɛ̃ɛ ju-sↄ̃w ɩ̃ yel ʋ: “A ala ɩ fʋ ɩ na a Naaŋmɩn Bie, aw lo a tene, a-na-ɩ a sɛbʼã a Naaŋmɩn Sɛbɛ pʋↄ: ¹⁰ ʻA Naaŋmɩn na ƴↄ̃w na a ʋ sɩ-tʋnɩsɩ a ba gu fʋ tɛɛlɛ,ʼ ¹¹ ɩ̃ a lɛ sɛbʼã go: ʻBa na cↄw fʋ na nɩ a ba nur, a mɩnɛ fʋ kↄ̃ wa ŋme gbɛr wa.ʼ ” ¹² A Jeeju yel ʋ: “A yelʼã a Naaŋmɩn Sɛbɛ pʋↄ: ʻTaa bɩɩrɛ a Nɩ-kpɛ̃ɛ na ɩ a fʋ Naaŋmɩn wa.ʼ ” ¹³ A mɩnɛ a Satã na bɩɩr a Jeeju a lõbobo a jaa baar, ʋ cenʼã ɩ̃ cɛ ʋ, ɩ̃ gu a daar ʋlↄ na sɛw ʋ lɛ wa. ¹⁴ A Jeeju lɩɛbʼã kul a Galile nɩ a Naaŋmɩn Sɩɛ fãw, a ba ƴɛrɛ a ʋ ƴɛrɩ̃ a Galile wɩɛr ʋ jaa pʋↄ. ¹⁵ Ʋ dãa na jaana a nɩbɛ a Naaŋmɩn sↄr a ba puorfʋ yie pʋↄ, ɩ̃ a ba jaa kpiire ʋ. ¹⁶ A Jeeju cenʼã a Najarɛtɩ na ɩ a tẽw ʋlↄ ʋ na dãa nʋ̃ↄ, na ʋ kpɛ a puorfʋ yir pʋↄ a bibi-ciiraa dayen, a mɩnɛ ʋ na ma maala, ɩ̃ ʋ irʼã bʋↄrↄ ʋ Ꞌwuor a Naaŋmɩn Sɛbɛ kʋ a nɩbɛ. ¹⁷ A ba de a ƴɛr-hiere Esayi sɛbɛ kʋ ʋ, ʋ yuo nyɛ a jie ʋlↄ a na sɛb yel: ¹⁸ “A Nɩ-kpɛ̃ɛ vɛl ma na ir ɩ̃ bar a ʋ Sɩɛ ʋ be nɩ ma, ɩ̃ na hier a ƴɛr-son kʋ a nãw deme. Ʋ tʋ̃ ma na ɩ̃ na hier yel a gbãgbaar a ba na sↄ ba mɩ̃ɛ, ɩ̃ mɩ hier yel a jↄn a ba lɛ nyɛrɛ. Ʋ tʋ̃ ma na ɩ̃ na faa a bala ba na kpowro, ¹⁹ ɩ̃ mɩ hier a Nɩ-kpɛ̃ɛ maal-vɩlaa yuon kʋ a nɩbɛ,” ²⁰ ɩ̃ na ʋ pↄw a sɛbɛ lɛ kʋ a tʋ̃tʋnↄ, ɩ̃ jɩnaa. A nɩbɛ bala ba jaa na dãa be be a puorfʋ yir pʋↄ vↄ̃ na a mimir cↄw ʋ, ²¹ ʋ nyↄw ɩ̃ yele ba: “A Naaŋmɩn Sɛbɛ ƴɛrɩ̃ na nyɩ na wõ a ƴɛ̃ƴɛrɩ̃ maalʼã baar a dɩnaa.” ²² A nɩbɛ ba jaa ƴɛrɛ a ʋ son, ɩ̃ a nↄɛ ko ba a mɩnɛ ba na wõ a ƴɛr-vɛlɛ na yire a ʋ nʋↄrɩ̃, a ba yele: “Aa ɩ a Jojɛfʋ bi-daba nɩ a naa wa?” ²³ A Jeeju yel ba: “Ɩ̃ bↄ̃w ka nyɩ na lↄb ma na a sʋkpa na na yel: ʻDↄↄtʋrↄ, kpaar a fʋ mɩ̃ɛ wʋlɩ̃, ɩ̃ maal a ka a fʋ mɩ̃ɛ tẽw pʋↄ a ala a jaa sɩ na wõ a fʋ maalʼã a Kapɛɛnam-tẽw pʋↄ.ʼ ” ²⁴ Ʋ lɛ yel ba na: “Yel-mɩ̃ɛ ɩ̃ yele nyɩ, Naaŋmɩn ƴɛr-hiere ma be be a ʋ nɩbɛ bↄ̃w sↄw de ʋ a ʋ mɩ̃ɛ tẽw pʋↄ wa. ²⁵ Sɩrɛ jaa ɩ̃ yel nyɩ, a ƴɛr-hiere Eli daar, a lɛ a saa na dãa ŋmaa a yomo ata nɩ a cur ayʋↄb, a kↄ̃ kpɛ̃ɛ lo a tẽw ʋ jaa juu, kpɩ̃ɩ-pↄↄbↄ yayaw dãa na be be a Ɩsɩrayɛl-tẽw pʋↄ, ²⁶ ɩ̃-cɛ a Naaŋmɩn ma dãa tʋ̃ a Eli bõ-ƴen kãw jie ɩ̃ a ala ma ɩ a Sarɛpɩta-tẽw pↄw kãw jie na be a Sɩdↄ̃ wɩɛr ʋ wa. ²⁷ A kↄn yayaw mɩ dãa na be a Ɩsɩrayɛl-tẽw pʋↄ a ƴɛr-hiere Elije daar, ɩ̃-cɛ bõ-ƴen kãw a ba sↄ̃w ma dãa pↄlɩ̃ ɩ̃ a ala ma ɩ a Sɩrɩ-tẽw daba Naamã ʋ wa.” ²⁸ A mɩnɛ a nɩbɛ bala na be a puorfʋ yir na wõ a ala, suur nyↄw ba na po nɩ, ²⁹ a ba ir dar ʋ a tẽw pʋↄ yi nɩ cɛ̃cɛ̃w, na ba cenʼɩ̃ ʋ a tãw ʋlↄ juu a ba tẽw na be, ɩ̃ bʋↄrↄ ba daa ʋ kpar a tãw bↄw gbolĩkoor pʋↄ. ³⁰ Ɩ̃-cɛ ʋ tↄl yi a ba sↄↄlɩ̃sↄw ɩ̃ cere. ³¹ A Jeeju cenʼã a Kapɛɛnam-tẽw na be a Galile wɩɛr, jaana a nɩbɛ a puorfʋ yir pʋↄ a bibi-ciiraa dayen. ³² A nↄɛ ko ba a yele ala ʋ na jaana ba ɩnɛ, a-na-ɩ ʋ tɛrɛ na tʋↄfʋ a ʋ ƴɛrɩ̃sɩ pʋↄ. ³³ A puorfʋ yir pʋↄ, daba kãw dãa na be be kↄ̃tↄn bier na tɛrɛ, ʋ wuurʼɩ̃ kpɛ̃w na ʋ yel: ³⁴ “Waai! Najarɛtɩ Jeeju! Bõ ɩnɛ fʋ wa a ka? Má a sɩ sãwfʋ ɩnɛ fʋ wa. Ɩ̃ bↄ̃w na a ʋlↄ fʋ na ɩ, fʋ ɩ na a Naaŋmɩn nɩ-cɛcɛ.” ³⁵ A Jeeju ful ƴↄ̃w ʋ ɩ̃ yel: “Pↄw a nʋↄr! Yi cen ɩ̃ cɛ a daba,” a kↄ̃tↄn lↄb a daba a tene a nɩbɛ sↄ̃w ɩ̃ yi ɩ̃ cɛ ʋ, ɩ̃ ma ƴↄ̃w ʋ wʋlɩ̃ fɩ̃ɩ wa, ³⁶ a ɩ ba jaa nↄ-kpaar a ba ƴɛrɛ kʋrↄ taa: “Yɛr-bõ nɩ a naa? A daba na tɛrɛ na tʋↄfʋ nɩ fãgã ma yel a sɩ-bebe a ba cen yi, a ba ma sɩrɩ̃ yi.” ³⁷ Ɩ̃ a ʋ ƴɛrɩ̃ ta na a ten ala a jaa na be a wɩɛr ʋlↄ pʋↄ. ³⁸ A Jeeju yi na a puorfʋ yir pʋↄ ɩ̃ cen a Sɩmↄ̃ yir. A Sɩmↄ̃ dɩ̃ɛ-mã dãa na be be a ɩ̃gan kpor ʋ kpõ-kpõ, a ba sʋↄr a Jeeju a ʋ sũo ʋ, ³⁹ ʋ gũu cↄw a pↄw ɩ̃ mʋ̃ↄ mimir ƴↄ̃w a ɩ̃gan kporfʋ, ʋ yi ɩ̃ cɛ ʋ, ʋ ir a jie naan ir ba a saan. ⁴⁰ A mɩnɛ a wɩɛr na liwre, a nɩbɛ bala ba jaa na tɛrɛ a baalsɩ a wʋlɩ̃-bʋrↄ bʋrↄ na nyↄw, ba de ba na wa nɩ a Jeeju sɛ̃, ʋ dↄↄl ba a ʋ nur bõ-ƴene-ƴene ɩ̃ kpɛmɛ ba. ⁴¹ A kↄ̃tↄnsɩ mɩ yi na a nɩ-yaw ɩ̃gana pʋↄ wuure yele nɩ: “Fʋ ɩ na a Naaŋmɩn Bie!” Ɩ̃-cɛ a Jeeju ful ba ɩ̃ ma bara ba a ba na ƴɛr ƴɛrɩ̃ wa, a-na-ɩ ba bↄ̃w ka ʋlↄ ɩ̃ ɩ a Kirisi. ⁴² A lɛ a bio na vɩɛ, ʋ yi na cen wɛ-cɛ̃cɛ̃w. A nɩbɛ nyↄw ʋ a bↄfʋ wa cenʼɩ̃ ta pↄw ʋ, ɩ̃ bʋↄrↄ ba gↄw ʋ bin ʋ kↄ̃ cen wɩɛr ɩ̃ cɛ ba wa. ⁴³ Ɩ̃-cɛ a Jeeju yel ba: “A sɛw na ɩ̃ na mɩ hier a Naaŋmɩn fãw ƴɛr-son a ten nɩŋmɛɛ pʋↄ kʋ a nɩbɛ, a-na-ɩ a ala ɩnɛ a Naaŋmɩn tʋ̃ ma ɩ̃ wa.” ⁴⁴ Ɩ̃ na ʋ nyↄw a Naaŋmɩn ƴɛrɩ̃ hiere yʋↄrↄ nɩ a Jude puorfʋ yie pʋↄ.

¹ Bibir kãw a Jeeju be na a Jenejarɛ-man nʋↄr, a nɩbɛ wa fʋr ʋ jilĩ kolĩ a Naaŋmɩn ƴɛrɩ̃ cɛlfʋ ɩnɛ. ² Ʋ nyɛ na gboro ayi a man nʋↄr, a jɩ̃-bɛrbɛ yi a be ɩ̃ suu pɛwrɛ a ba jʋʋr, ³ ʋ kpɛ a gbor bõ-ƴen pʋↄ na ɩ a Sɩmↄ̃ ben ɩ̃ sʋↄr ʋ a ʋ jãa nɩ a gbẽgbere nʋↄr fɩ̃ɩ. A ala ɩ̃ baar, ʋ jɛ na be a gbor pʋↄ ɩ̃ jaana a nɩbɛ. ⁴ A mɩnɛ a Jeeju na ƴɛr a ƴɛrɩ̃sɩ baar, ʋ yelʼã a Sɩmↄ̃: “Duur a gbor cenʼɩ̃ a kʋ̃ↄ sↄↄlɩ̃sↄw ɩ̃ a nyɩ lↄb a jʋʋr.” ⁵ A Sɩmↄ̃ yel ʋ: “Nɩ-kpɛ̃ɛ, sɩ dɩ na tuo a tɩsↄw jaa wa vɩɛ nɩ a bio ɩ̃ na sɩ faa pulpul. Ɩ̃-cɛ a fʋ ƴɛrɩ̃ juumɩ, ɩ̃ na lↄbʼã a jʋʋr.” ⁶ Ba lↄbʼã a ɩ ba pↄw na a jɩmɛ yayaw a ba jʋʋr nyↄw ɩ̃ ɓere, ⁷ a ba Ꞌlɛɛr a ba tↄ deme na be a gbor kpee pʋↄ á ba wa sũo ba. Ba wa na a ba nyↄↄr a jɩmɛ sɛw gboro ayi a vɩrɛ na mʋr. ⁸ A mɩnɛ a Sɩmↄ̃ Pɩɛr na nyɛ a lɛ, ʋ lo na gburĩ a dume a Jeeju nii-sↄw ɩ̃ yel: “Nɩ-kpɛ̃ɛ, taw jãa nɩ ma, a-na-ɩ ɩ̃ ɩ na maal-fãa nɩrɛ.” ⁹ Ʋ yelʼã a lɛ a-na-ɩ nʋↄr kpaw ba na, ʋlↄ nɩ a bala ba jaa ʋ na be nɩ, a jɩm-yaw ala ba na nyↄↄr ɩnɛ. ¹⁰ Lɛ a mɩ dãa wↄ̃ a Sɩmↄ̃ tↄ deme, Jakɩ nɩ a Jã na ɩ a Jebede bi-dabsɩ. Ɩ̃ a Jeeju yel a Sɩmↄ̃: “Taa ɩ a dãbɩ̃ɛ nyↄw fʋ̃ wa. Wa nyↄw nɩ a dɩnaa, nɩbɛ fʋ na nyↄwrↄ.” ¹¹ Ɩ̃ na ba lɛ duur a gboro lɩɛb wa nɩ a man gbẽgbere nʋↄr na bin, ɩ̃ bar a yele a jaa ɩ̃ tu a Jeeju. ¹² A mɩnɛ a Jeeju na dãa be a tẽw kãw pʋↄ, daba kãw a kↄn wʋlɩ̃ na pↄw a ɩ̃gan nyɛ ʋ na ɩ̃ lo kpa pↄw a nii-sↄw ɩ̃ sʋↄr ʋ: “Nɩ-kpɛ̃ɛ, a fʋ̃ʋ sↄw, fʋ na tʋↄ na pↄlɩ̃ ma.” ¹³ A Jeeju turʼã a nuu sɩɩr ʋ ɩ̃ yel: “Ɩ̃ sↄw na, pↄlɩ̃!” A jie naan, a ʋ kↄn wʋlɩ̃ baarʼã, ¹⁴ ɩ̃ a Jeeju yel ʋ á ʋ taa yele bom kʋrↄ nɩrɛ wa, ɩ̃-cɛ á ʋ cen na miilʼɩ̃ a ʋ mɩ̃ɛ a Naaŋmɩn baar-loro, ɩ̃ tɩɩr a baar-lo-yele ala a Mowisi na dãa ƴↄ̃w, a nɩbɛ na bↄ̃w ka ʋ sɩrɩ̃ na pↄlɩ̃. ¹⁵ Ɩ̃ a Jeeju yuor jaar ɩ̃ yire dↄↄlↄ, ɩ̃ a nɩ-yaw ma wa na cɛlɛ a ʋ ƴɛrɩ̃ sʋↄrↄ nɩ ʋ a ʋ kpɛmɛ ba. ¹⁶ Ɩ̃-cɛ a ʋlↄ, ʋ ma yi na a cɛ̃cɛ̃w sʋↄrↄ a Naaŋmɩn. ¹⁷ Bibir kãw a Jeeju jaana na a nɩbɛ. A Farɩsɩ nɩbɛ nɩ a ƴɛr-kpɛn-jaanba na yi a ten ala a jaa na be a Galile nɩ a Jude wɩɛr, nɩ a Jerujalɛm wa na na jɛ a be a ʋ sɛ̃, ɩ̃ a Naaŋmɩn fãw dãa be nɩ ʋ ʋ kpaara a nɩbɛ wʋlɩ̃sɩ. ¹⁸ Nɩbɛ tuo na dab-gbɛr gaajie juu wa nɩ bʋↄrↄ ba kpɛ nɩ ʋ na bin a Jeeju nii-sↄw, ¹⁹ ɩ̃-cɛ baa dãa bↄ̃w a jie na ba na tuure ɩ̃ kpɛɛrɛ nɩ ʋ wa, a-na-ɩ a nɩbɛ waa na. Ala-ɩ̃-sↄ ba do na a garɩ̃ na ba yuo a bↄw ɩ̃ tur ʋ bar nɩ a ʋ gaajie a nɩbɛ sↄ̃w be a Jeeju nii-sↄw. ²⁰ A Jeeju nyɛ na a ba ƴↄ̃w-nyãa ɩ̃ yel a gbɛr: “Ɩ̃ baraa! A Naaŋmɩn de na a fʋ faar bar kʋ fʋ.” ²¹ A ƴɛr-kpɛn-bↄↄnbↄ nɩ a Farɩsɩ nɩbɛ nyↄw ɩ̃ ƴɛrɛ nɩ a ba pʋↄ: “Ala nɩ a naa tↄr ɩ̃ kpɛrɛ a Naaŋmɩn a lɛ? Ala ɩ̃ tɛrɛ sↄr na yel áa Naaŋmɩn de na a maal-fãa bar kʋ a nɩrɛ ɩ̃ a ala ma ɩ a Naaŋmɩn tɛw ʋ wa?” ²² A Jeeju bↄ̃w a ala ba na tɩɛrɛ ɩ̃ yel ba: “Bõ tɩɛrɩ̃sɩ nɩ a ala nyɩ na tɛrɛ a nyɩ pʋ̃ↄ? ²³ Buor ɩ̃ yↄw gãw a yelfʋ: a Naaŋmɩn de na a ʋ maal-fãa bar kʋ ʋ, mɩɩ a ʋ ir cere? ²⁴ Ɩ̃-cɛ ɩ̃ bʋↄrↄ na nyɩ bↄ̃w ka a Nɩbɛ Bie tɛrɛ na sↄr a ka a tẽw pʋↄ na de a nɩrɛ maal-fãa bar kʋ ʋ.” Ala-ɩ̃-sↄ ʋ yel a gbɛr: “A fʋ̃ʋ ɩ̃ yele: ir de a fʋ gaajie kule nɩ.” ²⁵ A jie naan, a gbɛr irʼã a ba nii-sↄw, de a ʋ gaajie pɛwrɛ nɩ a Naaŋmɩn kule nɩ. ²⁶ A nↄɛ ko a nɩbɛ ba jaa a ba pɛwrɛ a Naaŋmɩn, ɩ̃ a dãbɩ̃ɛ nyↄw ba a ba yele: “Sɩ nyɛ na a yel-bↄ̃w-faarsɩ a dɩnaa bibir.” ²⁷ A ala ɩ̃ baar, a Jeeju yi na nyɛ lãpo-diere kãw na dɩ Levi ʋ jɛ be a ʋ tʋn tʋ̃fʋ jie, ʋ yel ʋ: “Ir, tuure ma”, ²⁸ a Levi bar a ʋ yele a jaa ɩ̃ ir tuure ʋ. ²⁹ A Levi maalʼã fɛtɩ kpɛ̃ɛ a Jeeju ɩnɛ be a ʋ yir, a lãpo-dierbe yayaw jie nɩ a nɩbɛ ŋmɛɛ dãa lãa jɛ dɩrɛ nɩ ba a dɩb. ³⁰ A Farɩsɩ nɩbɛ nɩ a ba ƴɛr-kpɛn-bↄↄnbↄ hũhune ɩ̃ yel a Jeeju par-tuurbe: “Bõ ɩ a nyɩ lãa dɩrɛ nyuure nɩ a lãpo-dierbe nɩ a nɩ-faar?” ³¹ A Jeeju yel ba: “Aa ɩ a ɩ̃gan-kpɛn deme ɩ̃ ma cen a dↄↄtↄrↄ yir wa, a wʋlɩ̃sɩ deme ʋ. ³² Maa wa a nɩ-torisɩ bʋↄlfʋ ɩnɛ wa, a nɩsaa faar ɩ̃ wa bʋↄl a ba na lɩɛb a ba yɛ̃.” ³³ A ba yel ʋ: “A Jã par-tuurbe nɩ a Farɩsɩ par-tuurbe ma luure na a nʋↄr sʋↄrↄ nɩ a Naaŋmɩn tↄ̃-tↄ̃-tↄ̃, ɩ̃-cɛ a fʋ par-tuurbe ʋlↄ ma tↄ̃ↄ dɩrɛ nyuure nɩ.” ³⁴ A Jeeju yel ba: “Nyɩ na tʋↄ na ɩ a bala ba na bʋↄl a pↄw kulfʋ jie a ba lũ a nʋↄr a mɩnɛ a sɩrɛ na cãa be a ba sↄ̃w mɩɩ? ³⁵ A daar na ta na, ba na de na a sɩrɛ yi nɩ a ʋ badɛɛ sↄ̃w. A lɛdaar ba na lũ na a nʋↄr.” ³⁶ Ʋ lɛ lↄbʼã a sʋkpa na kʋ ba: “Nɩrɛ ma ɓere cẽcẽ-ŋmãa a kpar-paalaa pʋↄ na ʋ ɓana nɩ kpar-kʋraa wa. A ala ɩ ʋ ɩ na a lɛ, ʋ ɓerʼã a kpar-paalaa bar, ɩ̃-cɛ a cẽcẽ-ŋmãa ʋlↄ ʋ na ɓer a kpar-paalaa ʋlↄ pʋↄ ma diere taa nɩ a kpar-kʋraa wa. ³⁷ A lɛ ʋ mɩ, nɩrɛ ma diere dã-tↄↄraa ƴↄnↄ dʋʋ bɛraa pʋↄ wa. A ʋlↄ ƴↄ̃w a lɛ, a dã-tↄↄraa na wɛlʼã a dʋʋ, a ɩ a ʋ dãa nɩ a ʋ dʋʋ wɛ na. ³⁸ Ɩ̃-cɛ a sɛw na a ba na ƴↄ̃w a dã-tↄↄraa a dʋʋ paalaa pʋↄ. ³⁹ Ɩ̃ a ala ɩ a nɩrɛ nyu na a dã-bɩn, Ꞌwaa lɛ bʋↄrↄ a dã-tↄↄraa wa, a-na-ɩ ʋ ma yelʼã áa dã-bɩn nʋmↄ na gãw.”

¹ A bibi-ciiraa kãw, a Jeeju tↄlʼã yi puo pʋↄ, a ʋ par-tuurbe ɓʋrↄ a ci fↄfↄrↄ Ꞌwↄbↄ, ² a Farɩsɩ nɩbɛ ŋmɛɛ yel ba: “Bõ ɩ a nyɩ maala a ala na ciire a sɩ ƴɛr-kpɛn sↄr pʋↄ a bibi-ciiraa dayen?” ³ A Jeeju mɩ yel ba: “Nyaa Ꞌwuor a Naaŋmɩn Sɛbɛ pʋↄ nyɛ a ala a Davɩtɩ nɩ a ʋ nɩbɛ na maal a lɛ a kↄ̃ na dãa nyↄw ba wa? ⁴ Ʋ kpɛ na a Naaŋmɩn yir de a buru ba na bin a Naaŋmɩn Ꞌwↄb ɩ̃ mɩ kʋ a ʋ nɩbɛ a ba Ꞌwↄb; ɩ̃ a buru ala, nɩsaa pↄrↄ ma dãa tɛrɛ sↄr na Ꞌwↄb ɩ̃ a ala ma ɩ a baar-lorbo tɛw ʋ wa.” ⁵ Ɩ̃ na ʋ lɛ yel ba: “A Nɩbɛ Bie ɩ̃ ɩ a bibi-ciiraa Nɩ-kpɛ̃ɛ.” ⁶ A bibi-ciiraa kãw go, a Jeeju kpɛ na a puorfʋ yir kãw pʋↄ, ɩ̃ nyↄw ɩ̃ jaana a nɩbɛ. Daba kãw be na a be a ʋ dʋrɩ̃ nuu na kpi. ⁷ A ƴɛr-kpɛn-bↄↄnbↄ nɩ a Farɩsɩ nɩbɛ jʋʋrↄ a Jeeju bʋↄrↄ ba bↄ̃w a ala ɩ ʋ na kpaarʼã nɩrɛ a bibi-ciiraa dayen, a-na-ɩ ba bʋↄrↄ na sↄr ba ƴↄ̃w ʋ ƴɛrɩ̃. ⁸ Ɩ̃ ʋ bↄ̃wnaa a ala ba na tɩɛrɛ ɩ̃ yel a daba ʋlↄ a nuu na ko: “Ir ɩraa a ka a nɩbɛ nii-sↄw.” Ʋ pal ir ɩraa. ⁹ Ɩ̃ a Jeeju yel ba: “Ɩ̃ sooro nyɩ na, a bibi-ciiraa dayen, a nɩrɛ tɛrɛ na sↄr na maal a vɩlaa, mɩɩ a bier, na faa a nɩrɛ mɩɩ na kú ʋ?” ¹⁰ Ɩ̃ na ʋ Ꞌwuor ba kolĩ ba jaa, ɩ̃ yel a daba: “Dↄl a fʋ nuu,” ʋ dↄl, ʋ lɛ lɩɛb ɩ nu-son. ¹¹ Ɩ̃-cɛ a nɩbɛ bala, a suur gãw ba na a ba nyↄw ɩ̃ guoro taa a ala ba na tʋↄrↄ maala a Jeeju. ¹² A ʋna daarʼãa a Jeeju do na a tãw juu Naaŋmɩn sʋↄrfʋ, na ʋ be a be sʋↄr a Naaŋmɩn wa vɩɛ nɩ a bio. ¹³ A lɛ a wɩɛr na caarɩ̃ baar, ʋ bʋↄlʼã a ʋ par-tuurbe na ʋ vɛl ir pie-nʼayi, bʋↄlↄ ba nɩ-tʋnɩsɩ: ¹⁴ a Sɩmↄ̃ ʋ na pʋr a Pɩɛr, nɩ a ʋ yɛbɛ Ãdire, nɩ a Jakɩ nɩ a Jã, a Fɩlɩpɩ nɩ a Batelemi, ¹⁵ a Matie nɩ a Tomasɩ nɩ a Alfe bi-daba Jakɩ nɩ a Sɩmↄ̃ ʋlↄ na ma jɛrɛ, ¹⁶ a Jakɩ bi-daba Judasɩ nɩ a Judasɩ Isikaryↄtɩ ʋlↄ na dãa lɩɛb de a Jeeju a juu. ¹⁷ A Jeeju yi nɩ ba na a tãw juu ɩ̃ suu ɩraa nɩ ba dalɩ̃pʋↄ juu, a jie ʋlↄ a ʋ par-tuurbe yayaw na be. Nɩ-yayaw mɩ dãa na yi a Jude wɩɛr ʋ jaa nɩ a Jerujalɛm, nɩ a Tɩɩr nɩ a Sɩdↄ̃ na be a man nʋↄr, ¹⁸ ɩ̃ wa a ʋ ƴɛrɩ̃ cɛlfʋ jie nɩ a ba ɩ̃gan kpɛmɛfʋ, ɩ̃ a bala a kↄ̃tↄnsɩ na dama mɩ nyɛ na a kpɛ̃w. ¹⁹ A nɩbɛ ba jaa bʋↄrↄ na ba sɩɩr a Jeeju, a-na-ɩ a fãw mɩ yi na a ʋ jie ɩ̃ kpɛmɛ ba ba jaa. ²⁰ A Jeeju Ꞌwuorʼã a ʋ par-tuurbe ɩ̃ yel: “Nʋ̃ↄ ma be na a nyɩmɩ jie na ɩ a nãw deme a-na-ɩ nyɩmɩ ɩ̃ sↄ a Naaŋmɩn fãw. ²¹ Nʋ̃ↄ ma be na a nyɩmɩ jie a kↄ̃ na nyↄw a ƴɛ̃ƴɛrɩ̃ na, a-na-ɩ nyɩ nↄↄ pi na. Nʋ̃ↄ ma be na a nyɩmɩ jie na kono a ƴɛ̃ƴɛrɩ̃ na, a-na-ɩ nyɩ nↄↄ laara na. ²² Nyɩ́ ɩ a nʋmↄ nyɩ a lɛ a nɩbɛ nↄↄ Ꞌlaara nyɩ, ɩ̃ jaara nyɩ bara, ɩ̃ tʋrↄ nyɩ, sãwna nɩ a nyɩ yuor ʋ wↄ̃ bom kpana kaarɩ̃ a Nɩbɛ Bie ɩnɛ. ²³ A bibir ʋlↄ, nyɩ́ ɩ a nʋmↄ nyɩ a nyɩ cɩlɛ, a-na-ɩ a nyɩ yar na bɛrmɛ na a be a saa juu. A lɛ a ba sãa-kʋnbↄ mɩ dãa maal a Naaŋmɩn ƴɛr-hierbe. ²⁴ Ɩ̃-cɛ nabier na pↄw na a nyɩmɩ tɛraa deme a-na-ɩ nyɩ gↄrʼã pↄw a nyɩ nʋ̃ↄ a jaa. ²⁵ Nabier na pↄw na a nyɩmɩ na pi a ƴɛ̃ƴɛrɩ̃ na, a-na-ɩ kↄ̃ nↄↄ nyↄw nyɩ na. Nabier na pↄw na a nyɩmɩ na laara a ƴɛ̃ƴɛrɩ̃ na, a-na-ɩ ni-sↄbaa nↄↄ kpɛ nyɩ na a nyɩ kono. ²⁶ “A na ɩ nyɩ na nabier a lɛ a nɩbɛ ba jaa nↄↄ yele a nyɩ son! A lɛ a ba sãa-kʋnbↄ dãa maalʼɩ̃ a jirsɩ ƴɛr-hierbe. ²⁷ “Ɩ̃-cɛ a nyɩmɩ na cɛlɛ ma, ɩ̃ yele nyɩ na, nyɩ́ nʋnↄ a nyɩ dↄ̃ deme. Nyɩ́ maala a bala na Ꞌlaar nyɩ vɩlaa, ²⁸ nyɩ́ bʋↄlↄ a son ƴↄnↄ a bala na sↄnↄ nyɩ, nyɩ́ sʋↄrↄ a Naaŋmɩn ƴↄnↄ a bala na hʋↄlↄ nyɩ. ²⁹ A ala ɩ a nɩrɛ ɓa fʋ na a tʋkpal bõ-ƴen pʋↄ, lɩɛb a tʋkpal gãw na cↄw ʋ. A ala ɩ a nɩrɛ de fʋ na a fu, bar ʋ mɩ de a fʋ kparle. ³⁰ A nɩrɛ lɛ ɩ̃ wa sʋↄr fʋ a bom fú kʋ ʋ, ɩ̃ taa wa sooro a fʋ bom a nɩrɛ na de wa. ³¹ A ala nyɩ na bʋↄrↄ a nɩbɛ ba maala nyɩ, nyɩ́ mɩ maala ba a lɛ. ³² “Á ala ɩ nyɩ nʋnↄ na a bala tɛw na nʋnↄ nyɩ, bõ ƴↄ̃wfʋ nyɩ na pↄw? A-na-ɩ a nɩ-faar mɩ̃ɛ ma mɩ nʋnↄ na a bala na nʋnↄ ba. ³³ Ɩ̃ a ala ɩ nyɩ maala na a vɩlaa a bala tɛw na maala nyɩ a vɩlaa, bõ ƴↄ̃wfʋ nyɩ na pↄw? A-na-ɩ a nɩ-faar mɩ̃ɛ ma mɩ maala na a lɛ. ³⁴ Ɩ̃ a ala ɩ a bala tɛw nyɩ na tɩɛrɛ a nyɩmɩ pɛ̃w ba a bom ba na wa ya na kʋ nyɩ, nyɩ ma pɛ̃w, bõ ƴↄ̃wfʋ nyɩ na pↄw? A nɩ-faar mɩ̃ɛ ma mɩ pɛ̃w na a ba tↄ deme, a ba na mɩ lɩɛb ya ba a libie nʋↄr. ³⁵ Ɩ̃-cɛ nyɩ́ nʋnↄ a nyɩ dↄ̃-deme, nyɩ́ maala ba a vɩlaa, nyɩ́ ma pɛ̃w ba a bom ɩ̃ nyɩ taa cɛlɛ a ba na lɩɛb ya nyɩ wa. A lɛ, a nyɩ yar na bɛrmɛ na, ɩ̃ nyɩ na mɩ ɩ na a saa juu Naaŋmɩn bi-dabsɩ a-na-ɩ ʋ ma maala na a vɩlaa a nɩsaa saansɩ nɩ a nɩ-bebe jie. ³⁶ Nyɩ́ ɩ pʋ-pɩlaa deme a mɩnɛ a nyɩ Sãa na ɩ a pʋ-pɩlaa sʋbↄ. ³⁷ “Nyɩ taa koro nɩrɛ wa, ɩ̃ a Naaŋmɩn kↄ̃ mɩ guor a nyɩ ƴɛrɩ̃ wa. Nyɩ taa ƴↄnↄ nɩrɛ ƴɛrɩ̃ wa, ɩ̃ a Naaŋmɩn ma mɩ ƴↄnↄ nyɩ ƴɛrɩ̃ wa. Nyɩ́ de a nɩbɛ mabfʋ bar kʋ ba; a lɛ a Naaŋmɩn na mɩ de a nyɩ mabfʋ bar kʋ nyɩ. ³⁸ Nyɩ́ tɩɩrɛ; a lɛ a Naaŋmɩn na mɩ tɩɩrɛ kʋrↄ nyɩ. Ʋ na bↄ̃w na sɛw a bõ-mɩɩnaa a nɛ taa, ɩ̃ dam, a sɛw deere, ʋ kʋ nyɩ, a-na-ɩ a bom ʋlↄ nyɩ na de mana nɩ a yele, a ʋna bom a Naaŋmɩn na mɩ de manʼɩ̃ a nyɩ ben.” ³⁹ A Jeeju lɛ lↄb ba na a sʋkpa na: “A jↄ̃w na tʋↄ na tawra a ʋ jↄ̃-tↄ mɩɩ? Má a ba jaa ayi na lo na bↄw pʋↄ. ⁴⁰ Par-tuure ma be be na gãw a ʋ jãjaana wa, ɩ̃ a par-tuure lɛ na jaan baar, ʋ na wↄ̃ na a ʋ jãjaana kaarɩ̃. ⁴¹ “Mɩnɛ ɩ̃ ɩ a fʋ ga a mimir ƴↄ̃w a mobir na be a fʋ yɛbɛ mimirɩ̃, ɩ̃ ma lɛ ɛ̃ɛ bil nyɛ a dakpur na be a fʋ mɩ̃ɛ mimirɩ̃ wa? ⁴² Mɩɩ mɩnɛ fʋ na tʋↄ yel a fʋ yebɛ: ʻƖ̃ yɛbɛ, ɩraa ɩ̃ ir fʋ mobir a mimirɩ̃ bar,ʼ a fʋ̃ʋ na ma nyɛ a dakpur na be a fʋ mimirɩ̃ wa? Fʋna bɛbɛlɛ naa! De nĩe ir a dakpur a fʋ mimirɩ̃ sɛr; lɛ fʋ na bↄ̃w nyɛrɛ tʋↄ ir a mobir na be a fʋ yɛbɛ mimirɩ̃. ⁴³ “Tɩ-son ma be be na wↄnↄ bi-kpana wa; a lɛ ʋ mɩ, tɩ-kpana ma be be na wↄnↄ bi-son wa. ⁴⁴ A-na-ɩ a wↄmↄ ba bↄ̃wnↄ nɩ a tɩɛ; ba maa Ꞌwↄ̃w Ꞌwↄrↄ gʋ-pɩlaa juu wa, ba maa mɩ Ꞌwↄ̃w aaraa gʋ-salaa juu wa. ⁴⁵ A nɩ-son ma irʼã a yel-vɛlɛ ala ʋ na bin a ʋ pʋ-vɩlaa pʋↄ yi nɩ, ɩ̃ a nɩ-kpana ma ir a yel-kpansɩ ala ʋ na bin a ʋ pʋ-bier pʋↄ yi nɩ, a-na-ɩ a ala na sɛw a nɩrɛ pʋↄ, ala ɩ̃ yire a nʋↄr pʋↄ. ⁴⁶ “Mɩnɛ ɩ̃ ɩ a nyɩ bʋↄlↄ ma a ʻNɩ-kpɛ̃ɛ! Nɩ-kpɛ̃ɛ!ʼ ɩ̃ maa maala a ala ɩ̃ na ma yele nyɩ wa? ⁴⁷ A nɩrɛ lɛ na wa a ɩ̃ sɛ̃ cɛl a ɩ̃ ƴɛrɩ̃ ɩ̃ sↄw maala, ɩ̃ na miil nyɩ na a ʋlↄ kaarɩ̃ ʋ na wↄ̃. ⁴⁸ Ʋ wↄ̃ na taa nɩ daba na mɩɛrɛ yir ɩ̃ tuu a bↄw ʋ kpɛ, ʋ kpar a dacin a kubir-pan juu. A kʋ̃ↄ wa na a kʋlaa paal yi ŋmeere a yir ʋlↄ, ɩ̃-cɛ Ꞌwaa tʋↄ ʋ wɛl bar wa, a-na-ɩ ba dãa na bↄ̃w mɛ ʋ. ⁴⁹ Ɩ̃-cɛ a ʋlↄ na wono a ɩ̃ ƴɛrɩ̃ ɩ̃ ma sↄw maala wa, ʋ wↄ̃ na taa nɩ a daba ʋlↄ na mɛ a yir a tẽ-buur juu, ɩ̃ ma tuu a bↄw ɩ̃ kpar a dacin wa. A kʋ̃ↄ ŋme na a yir ʋ tↄ̃ↄ lo a jie naan ɩ̃ a ʋ lofʋ ʋlↄ bɛlɩ̃ na.”

¹ A lɛ a Jeeju na ƴɛr a ʋ ƴɛrɩ̃sɩ a jaa kʋ a nɩbɛ baar, ʋ cenʼã a Kapɛɛnam. ² Sↄdaal-nɩ-kpɛ̃ɛ be na be ɩ Orom nɩrɛ ɩ̃ tɛrɛ tʋ̃tʋnↄ ʋ na nyɩrɩ̃ nʋ. A tʋ̃tʋnↄ ʋlↄ, a dãa na Ꞌwↄbↄ ʋ, ʋ pɩɛlʼɩ̃ a kũu. ³ A lɛ a sↄdaal-nɩ-kpɛ̃ɛ ʋlↄ na wõ a ba ƴɛr a Jeeju ƴɛrɩ̃ ʋ tʋ̃ na a Jufisɩ ni-dierbe ŋmɛɛ a ʋ sɛ̃ a ba sʋↄr ʋ ʋ wɩ faa a ʋ tʋ̃tʋnↄ. ⁴ Ba ta na a Jeeju sɛ̃ nyↄw ɩ̃ lↄbↄ ʋ a nur yele nɩ: “A daba na sɛw na a fʋ na sũo ʋ, ⁵ a-na-ɩ ʋ nʋ na a sɩmɩ Jufisɩ, ɩ̃ ʋlↄ ɩ̃ mɩ ƴↄ̃w a ba mɛ a sɩ puorfʋ̃ yir.” ⁶ A Jeeju pↄ̃w ba cere nɩ. Ɩ̃ a lɛ ba na pɩɛlʼɩ̃ a yir, a sↄdaal-nɩ-kpɛ̃ɛ tʋ̃ na a ʋ badɛɛ a ba tuor yel ʋ: “Nɩ-kpɛ̃ɛ! Taa vↄw fʋ mɩ̃ɛ wa, a-na-ɩ maa sɛw a fʋ na kpɛ a ɩ̃ yir wa. ⁷ A ala ɩnɛ a maa mɩ̃ɛ ma nyɛ sↄr tʋↄ ta fʋ wa, ɩ̃-cɛ ƴɛr ƴɛrɩ̃ tɛw, ɩ̃ a ɩ̃ tʋ̃tʋ̃-bie na kpɛmɛ na. ⁸ A-na-ɩ a maa mɩ̃ɛ tɛrɛ na a ɩ̃ nɩ-bɛrɛ na ɩ̃ jↄrↄ ba, ɩ̃ mɩ tɛrɛ a ɩ̃ sↄdaalsɩ a ba jↄrↄ ma. Ɩ̃ ma yelʼã a bõ-ƴen: Cen ka! ʋ ma cen, ɩ̃ yel a ƴen sʋbↄ: Wa ka! ʋ ma wa; ɩ̃ ma yelʼã a ɩ̃ tʋ̃tʋnↄ: Maal asɩmɛ! ʋ ma maal.” ⁹ A lɛ a Jeeju na wõ a ƴɛrɩ̃ ʋlↄ, nʋↄr ko ʋ na ʋ kpiir a sↄdaal-nɩ-kpɛ̃ɛ ɩ̃ lɩɛb yel a nɩbɛ na tuure ʋ: “Ɩ̃ yele nyɩ na, a Ɩsɩrayɛl nɩbɛ sↄ̃w, maa nyɛ nɩrɛ ʋ tɛrɛ ƴↄ̃w-nyãa ta a daba na wa.” ¹⁰ A nɩbɛ bala a sↄdaal-nɩ-kpɛ̃ɛ na tʋ̃ lɩɛbʼã kul ɩ̃ nyɛ a tʋ̃tʋnↄ ʋ kpɛmɛ. ¹¹ A ala na yi tↄ, a Jeeju cenʼã tẽw kãw ba na bʋↄlↄ Nayɩ̃, a ʋ par-tuurbe nɩ a nɩ-yayaw dãa pↄw ʋ a ba lãa cere. ¹² A mɩnɛ ʋ na pɩɛlɛ nɩ a tẽw ʋlↄ dↄ̃dↄr nʋↄr, nɩbɛ mɩ yire nɩ na kũu a ũufʋ jie. Ʋ ɩ na a ʋ mã bi-daa ɩ̃ a ʋ mã ɩ kpɩ̃ɩ-pↄw. Nɩ-yaw yi na a tẽw ʋlↄ pʋↄ ɩ̃ pↄw ʋ cere nɩ a kũu ũufʋ jie. ¹³ Á lɛ a Nɩ-kpɛ̃ɛ na nyɛ a pↄw, nãw nyↄw ʋ na, ʋ yel ʋ: “Taa kono wa.” ¹⁴ Ɩ̃ na ʋ taw ta sɩɩr a da-gbarɩ̃sɩ ʋlↄ a kũu na be, a bala na de a kũu ɩraa. A Jeeju yel: “Polbile! A fʋ̃ʋ ɩ̃ yele, ir!” ¹⁵ A kũu pal ir jɩnaa ɩ̃ nyↄw a ƴɛrɩ̃sɩ ɩ̃ ƴɛrɛ, ʋ de ʋ kʋ a ʋ mã. ¹⁶ A dãbɩ̃ɛ nyↄw a ba jaa a ba pɛwrɛ a Naaŋmɩn yele: “A Naaŋmɩn ƴɛr-hier-kpɛ̃ɛ ƴen sʋbↄ irʼã a sɩ sↄ̃w ɩ̃ a Naaŋmɩn mɩ wa na Ꞌwuor a ʋ nɩbɛ.” ¹⁷ A nɩbɛ ƴɛrɛ na taa a ʋ ɩnɛ a Jude wɩɛr ʋ jaa pʋↄ de nɩ a tẽ-pɩɛlsɩ a jaa, a ala ʋ na maal. ¹⁸ A Jã par-tuurbe man ʋ na a yele ala a jaa, ʋ bʋↄl ayi a ba sↄ̃w ¹⁹ tʋ̃ ba a Nɩ-kpɛ̃ɛ jie a ba cen na soor ʋ: “Fʋ̃ʋ ɩ a ʋlↄ na sɛw ʋ wa mɩɩ sɩ cãa gure nɩ-kpee?” ²⁰ A nɩbɛ bala ta na a Jeeju sɛ̃ na ba yel ʋ: “A Jã-Batii ɩ̃ tʋ̃ sɩ a sɩ wa soor fʋ a fʋ̃ʋ ɩ̃ ɩ a ʋlↄ na sɛw ʋ wa mɩɩ, a sɩ cãa gure nɩ-kpee?” ²¹ A be a jie naan, ʋ kpɛmɛ na a wʋlɩ̃sɩ deme yayaw nɩ a nɩ-baalsɩ nɩ a kↄ̃tↄn-irbe ɩ̃ yuo a jↄn yayaw mimie. ²² Ɩ̃ na ʋ yel a bala a Jã na tʋ̃: “Nyɩ́ cen na man a Jã a ala nyɩ na nyɛ ɩ̃ mɩ wõ: a jↄn nyɛrɛ na, a gbɛɛ ir cere, a kↄn mɩ pↄlↄ, ɩ̃ a won wono, a kũusɩ jawra na ire, a Naaŋmɩn ƴɛr-son ta na a nãw deme jie. ²³ Á nʋmↄ a ʋlↄ a ɩ̃ maalfʋ na ma cɛ ʋ wa.” ²⁴ A lɛ a bala a Jã na tʋ̃ na lɩɛb kul baar, a Jeeju nyↄw na a Jã ƴɛrɩ̃ mana kʋrↄ a nɩbɛ yele: “Bõ nyɩ cen na Ꞌwuor nyɛ a be a wɛkar pʋↄ? Kakɩr a sɛsɛb na dama? ²⁵ Bõ ʋlↄ nyɩ cen na Ꞌwuor? A daba na ƴaarɩ̃ cẽcen-vɛlɛ? Ɩ̃-cɛ a bala na ma ƴaarɩ̃ a cẽcen-vɛlɛ dɩrɛ nɩ a dɩb vɛlɛ, a jamansɩ yie ba ma be. ²⁶ Bõ ʋlↄ tↄr nyɩ cen na Ꞌwuor? A Naaŋmɩn ƴɛr-hiere? Ↄↄ, ɩ̃ yele nyɩ na, nɩrɛ ʋ na gãw a Naaŋmɩn ƴɛr-hiere. ²⁷ A-na-ɩ a Jã ɩ̃ ɩ a ʋlↄ a Naaŋmɩn Sɛbɛ ƴɛrɩ̃ na yel: ʻA maa, Naaŋmɩn ɩ̃ tʋ̃ a ɩ̃ ƴɛƴɛrɛ ʋ de fʋ nĩe gbɛɛrɩ̃ a fʋ sↄr.ʼ ²⁸ “Ɩ̃ yele nyɩ na, nɩrɛ kãw ma be be ba na dↄw ka a tẽw pʋↄ na gãw a Jã-Batii wa, ɩ̃-cɛ a ʋlↄ na nyɩrɩ̃ pab a Naaŋmɩn fãw pʋↄ gãw ʋ na.” ²⁹ A nɩbɛ ba jaa nɩ a lãpo-dierbe na wõ a Jã kↄkɩr, ba bↄ̃w na áa Naaŋmɩn torʼã ɩ̃ sↄw a Jã mʋr ba a kʋ̃ↄ. ³⁰ Ɩ̃-cɛ a Farɩsɩ nɩbɛ nɩ a ƴɛr-kpɛn-bↄↄnbↄ jaarʼã a ala a Naaŋmɩn na bʋↄrↄ a ba jie bar, a mɩnɛ ba na ma sↄw a Jã mʋr ba a kʋ̃ↄ wa. ³¹ “Babõ ɩ̃ na de a dɩnaa nɩbɛ manʼɩ̃, ɩ̃ babõ kaarɩ̃ ba wↄ̃? ³² Ba wↄ̃ na taa nɩ a bibiir na jɛ a daa pʋↄ ɓolo bʋↄlↄ nɩ taa yele: ʻSɩ ŋme na a kʋↄr ƴↄ̃w nyɩ ɩ̃ nyaa sɛ wa, a sɩ mɩ ŋme a ko-bɩnɛ ƴↄ̃w nyɩ ɩ̃ nyaa mɩ kõ wa.ʼ ³³ A-na-ɩ a Jã-Batii dãa na wa ma bʋn dɩrɛ lɛ wa, ma mɩ nyuure a dãa wa, a nyɩ yel a kↄ̃tↄn ɩ̃ tɛrɛ ʋ. ³⁴ A Nɩbɛ Bie wa dɩrɛ ƴↄnↄ nyuure nɩ, a nyɩ lɛ yel go: ʻNyɩ nyɛ dɩdɩrɛ nɩ dã-nyuure, na ɩ a lãpo-dierbe nɩ a nɩ-faar baraa.ʼ ³⁵ Ɩ̃-cɛ a bala ba jaa na sↄw a Naaŋmɩn kpaarfʋ miile na a yel-mɩ̃ɛ be na a kpaarfʋ ʋlↄ jie.” ³⁶ A Farɩsɩ nɩrɛ kãw bʋↄlʼã a Jeeju a ʋ wɩ a ba lãa dɩ a dɩb, a Jeeju kpɛ a Farɩsɩ nɩrɛ ʋlↄ yir jɛ a dɩb par. ³⁷ Ɩ̃ a be a ʋna tẽw pʋↄ, pↄw kãw dãa na be be na ɩ pↄw fãa. Ʋ bↄ̃w ka a Jeeju jɛ na a dɩb par be a Farɩsɩ nɩrɛ ʋlↄ yir, ɩ̃ de a kã-nyu-vɩlaa na sɛw a kubir yole wɩ kpɛ ɩraa nɩ a Jeeju gbɛɛ par, ³⁸ ɩ̃ kono. A ʋ mↄtↄ̃-kʋ̃ↄ ɓɩnɛ a Jeeju gbɛɛ, ʋ pãa lɩɛb a ʋ jukↄbↄ fↄfↄrↄ nɩ, ɩ̃ nyↄw a Jeeju gbɛɛ ɩ̃ de a kã-nyu-vɩlaa kpaar ƴↄ̃w. ³⁹ A lɛ a Farɩsɩ nɩrɛ ʋlↄ na bʋↄl a Jeeju na nyɛ a lɛ, ʋ yelʼã a ʋ pʋ̃ↄ: “A ala ɩ a daba na dãa na ɩ a Naaŋmɩn ƴɛr-hiere, ʋ naa bↄ̃w na a pↄw na na sɩɩrɛ ʋ, nɩ a mɩnɛ ʋ na wↄ̃. Ʋ na bↄ̃w ka pↄw fãa ʋ ɩ.” ⁴⁰ A Jeeju yel ʋ: “Sɩmↄ̃, ɩ̃ tɛrɛ na ƴɛrɩ̃ na ƴɛr fʋ.” A Sɩmↄ̃ yel: “Jãjaana, ƴɛr!” ⁴¹ A Jeeju yel ʋ: “Nɩbɛ ayi dãa na tɛrɛ san a ʋlↄ jie ba na ma pɛ̃wnɛ a libie. A bõ-ƴen tɛrɛ na warbie ture kʋbaa san, ɩ̃ a kãw tɛrɛ warbie ture pie san. ⁴² Ɩ̃ a mɩnɛ ba na ma tɛrɛ bom na tʋↄ ya a ba sama wa, a libie sʋbↄ de na bar kʋ ba a ba jaa ayi. A nɩbɛ bala ayi pʋↄ, buor ɩ̃ na nyɩrɩ̃ nʋnↄ a libie sʋbↄ?” ⁴³ A Sɩmↄ̃ yel ʋ: “Ɩ̃ tɩɛr ka a ʋlↄ na dãa tɛrɛ a san yaw ʋ.” A Jeeju yel ʋ: “Yel-mɩ̃ɛ fʋ yel.” ⁴⁴ Ɩ̃ lɩɛb miile a pↄw ɩ̃ yel a Sɩmↄ̃: “Fʋ nyɛ na a pↄw naa? A mɩnɛ ɩ̃ na kpɛ a ka a fʋ yir, faa kʋ ma kʋ̃ↄ ɩ̃ pɛw gbɛɛ wa, ɩ̃-cɛ a pↄw na, a ʋ mↄtↄ̃-kʋ̃ↄ ʋ ɓɩ̃ nɩ a ɩ̃ gbɛɛ ɩ̃ fↄfↄ nɩ a ʋ jukↄbↄ bar. ⁴⁵ A fʋ̃ʋ, faa nyↄw ma nuu puor wa, ɩ̃-cɛ a pↄw na, wa nyↄw nɩ a lɛ ɩ̃ na kpɛ, ʋ nyↄw ma na a gbɛɛ puoro nɩ ma ma bara wa. ⁴⁶ Faa mɩ kpaar a kãa ƴↄ̃w ma a juu pʋↄ wa, ɩ̃-cɛ a pↄw na, ʋ kpaarʼã a kã-nyu-vɩlaa ƴↄ̃w ma a gbɛɛ pʋↄ. ⁴⁷ A ala ɩnɛ ɩ̃ yele fʋ na, a ʋ nʋfʋ ʋ na nyɩrɩ̃ nʋ ma, a miile na áa Naaŋmɩn de na a ʋ maal-faar na waa bar kʋ ʋ. Ɩ̃ a ʋlↄ ba na de a fɩ̃ɩ bar kʋ, ʋ ma mɩ miile na a nʋfʋ fɩ̃ɩ.” ⁴⁸ A ala ɩ̃ baar, a Jeeju yelʼã a pↄw: “A Naaŋmɩn de na a fʋ maal-faar bar kʋ fʋ.” ⁴⁹ A bala na dãa lãa jɛ nɩ ʋ ƴɛrɛ na a ba pʋ̃ↄ: “Ala nɩ a naa tↄr ɩ̃ ma mɩ de a nɩrɛ maal-fãa bar kʋ ʋ?” ⁵⁰ Ɩ̃-cɛ a Jeeju yelʼã a pↄw: “A fʋ ƴↄ̃w-nyãa faa fʋ na. Cenʼɩ̃ su-ɓaar.”

¹ A ala na yi tↄ, a Jeeju yʋↄrↄ na a tẽ-bɛrɛ nɩ a tẽ-bil pʋↄ, hiere a Naaŋmɩn fãw ƴɛr-son kʋrↄ a nɩbɛ, ɩ̃ a ʋ par-tuurbe pie-nʼayi dãa na lãa be nɩ ʋ. ² A pↄↄbↄ bala ʋ na dãa diw a kↄ̃tↄn-bebe a ba pʋↄ bar, kpaarɩ̃ ba a wʋlɩ̃sɩ, mɩ lãa na be nɩ ʋ: a Maarɩɩ ʋlↄ na yi a Madala, a kↄ̃tↄnsɩ anuu-nʼayi na dãa yi a ʋ pʋↄ; ³ nɩ a Kuja pↄw Jaan, a Kuja ʋlↄ na ɩ a jamana Ɛrↄdɩ tʋ̃tʋnbↄ nɩ-kpɛ̃ɛ, nɩ a Sujan, nɩ a pↄↄ-yaw ŋmɛɛ go. A bala ɩ̃ ma dãa de a ba yele sũono nɩ a Jeeju nɩ a ʋ par-tuurbe. ⁴ A nɩbɛ yi na a ten a jaa ɩ̃ wa a Jeeju sɛ̃. A lɛ a nɩ-yaw bala na taw tiw taa, ʋ lↄbʼã a sʋkpa na: ⁵ “Daba kãw yi na a ʋ ci yaarɩ̃fʋ jie ɩ̃ a lɛ ʋ na yaara a ci, a ŋmɛɛ lo na a sↄr juu, a ba nɛbʼɩ̃ gbɛɛ ɩ̃ a wɛ-lili nɩɩr dɩ. ⁶ A ŋmɛɛ lo a kubir-pan juu ɩ̃ a lɛ a na bul baar, a ko na, a-na-ɩ aa pↄw a ɓaar wa. ⁷ A ŋmɛɛ go lo a gʋʋr sↄ̃w, a gʋʋr lãa irʼɩ̃ ba piw ba tɛrɛ. ⁸ A ŋmɛɛ lo na a tẽ-vɩlaa pʋↄ naa bul bɩ bie kʋbaa lɛ bↄ̃w dↄↄl.” A lɛ a Jeeju na ƴɛr a lɛ baar, ʋ yelʼɩ̃ na kpɛ̃w: “A ʋlↄ na tɛrɛ a tobo wono nɩ, ú bↄ̃w cɛlɛ!” ⁹ A Jeeju par-tuurbe soor ʋ na a sʋkpa ʋlↄ par, ¹⁰ ʋ yel ba: “A ala ɩ a nyɩmɩ ʋ, a Naaŋmɩn fãw ƴɛr-bↄ̃w-faarsɩ par nyɩrʼã a nyɩ jie. Ɩ̃-cɛ a nɩbɛ ŋmɛɛ, a sʋkpar tɛw ba na wono, a mɩnɛ ʻa ba na Ꞌwuoro ɩ̃ ma nyɛrɛ wa, ɩ̃ mɩ cɛlɛ wono ɩ̃ ma bↄ̃wnↄ a par wa.ʼ ¹¹ “Nyɩ́ cɛlɛ a sʋkpa par: a ci ɩ na a Naaŋmɩn ƴɛrɩ̃. ¹² A nɩbɛ ŋmɛɛ wↄ̃ na taa nɩ a ci ala na lo a sↄr juu. A lɛ ba na wõ a Naaŋmɩn ƴɛrɩ̃, a Satã wa na na ir ʋ a ba sube pʋↄ, a mɩnɛ a ba kↄ̃ sↄw ɩ̃ pↄw a faafʋ wa. ¹³ A nɩbɛ ŋmɛɛ wↄ̃ na taa nɩ a ci ala na lo a kubie wɩɛr. A lɛ ba na wõ a ƴɛrɩ̃ ba ma sↄw na de nɩ nʋ̃ↄ ɩ̃-cɛ aa kpɛ a ba pʋ̃ↄ a tɩɛ nyɩbɛ kaarɩ̃ wa. A ba ƴↄ̃w-nyãa maa kam wa. A bɩɩrfʋ ɩ̃ wa ta ba, ba ma ŋmaa na yi. ¹⁴ A ci ala na lo a gʋʋr pʋↄ wↄ̃ na taa nɩ a bala na wõ a ƴɛrɩ̃, ɩ̃-cɛ ba barʼã a tẽw naa baafʋ dɛn nɩ a naalʋ̃ʋ bↄfʋ, nɩ a yele vɩláa a kpɛ pↄw ba piw ba tɛɛlɛ; a ba wↄmↄ maa karɩ̃ wa. ¹⁵ A ci ala na lo a tẽ-son pʋↄ wↄ̃ na taa nɩ a bala na wõ a ƴɛrɩ̃ ɩ̃ de ʋ tɛrɛ nɩ su-son nɩ su-pɩlaa; a ba cĩcĩ ɩraafu pʋↄ ba ma wↄ̃ na a wↄmↄ. ¹⁶ “Nɩrɛ maa ƴↄ̃w lãpa de pↄw dʋʋ pʋↄ, mɩɩ de su gaajie pulẽe wa. Ʋ ma ɛ̃ɛ na bin ʋ a jie ʋlↄ ʋ na tʋↄrↄ caara, a mɩnɛ a nɩbɛ bala na kpɛɛrɛ na tʋↄ nyɛ a ʋ cãa. ¹⁷ A bom jaa lɛ na sↄↄlɩ̃, a na yi na cãa pʋↄ, ɩ̃ a bom lɛ na ɩ bõ-gbul, a na yi na yẽw a nɩbɛ bↄ̃wnaa. ¹⁸ “Ala-ɩ̃-sↄ, nyɩ́ tɛrɛ nyɩ mɩ̃ɛ a mɩnɛ nyɩ na cɛlɛ, a-na-ɩ a ʋlↄ na tɛraa, ba na lɛ kʋ ʋ na dↄↄl, ɩ̃-cɛ a ʋlↄ na ma tɛraa wa, ba na de na a ala ʋ na tɩɛr beeka ʋlↄ ɩ̃ sↄ.” ¹⁹ A Jeeju mã, nɩ a ʋ yɛɛr wa na pↄw ʋ, ɩ̃ baa dãa tʋↄ ta ʋ wa, a-na-ɩ a nɩbɛ waa na, ²⁰ a ba yel ʋ: “A fʋ mã nɩ a fʋ yɛɛr be na a yẽw ɩ̃ bʋↄrↄ ba nyɛ fʋ.” ²¹ A Jeeju yel ba: “A bala na cɛlɛ a Naaŋmɩn ƴɛrɩ̃ ɩ̃ sↄw maala, bala ɩ̃ ɩ a ɩ̃ mã nɩ a ɩ̃ yɛɛr.” ²² A bibir kãw, a Jeeju nɩ a ʋ par-tuurbe kpɛ na a gbor pʋↄ ʋ yel ba á bá gãw a man gaan, a ba cen. ²³ A mɩnɛ ba na gãwna, a Jeeju gã na gure. A sɛsɛb kpɛ̃ɛ puurĩ ba na a man pʋↄ, a kʋ̃ↄ kpɛ paala a gbor, a ba vɩrɛ na mʋr, ²⁴ a ba taw ta a Jeeju sɩ̃wnɛ ʋ yele nɩ: “Jãjaana! Jãjaana! Sɩ wɛrɛ na!” A Jeeju ir, na ʋ tan a sɛsɛb nɩ a kʋ̃ↄ na dama nɩ a kpɛ̃w, a sɛsɛb ŋmaa a fufu ɩ̃ a kʋ̃ↄ lɛ lo a lɛ a jom. ²⁵ A lɛ a na baar, a Jeeju soorʼã a ʋ par-tuurbe: “Nyɩnɛ a nyɩ ƴↄ̃w-nyãa be?” A dãbɩ̃ɛ nyↄw ba lãa ko nɩ ba nʋↄr a ba sooro taa: “Ala nɩ a naa tↄr, a kʋ̃ↄ tↄr jaa nɩ a sɛsɛb na jↄrↄ a ʋ ƴɛrɩ̃ a lɛ?” ²⁶ Ba cenʼã na ta a tẽw ʋlↄ na ɩ a Jerasɛn nɩbɛ tẽw, na tor taa nɩ a Galile. ²⁷ A lɛ a Jeeju na yi a gbor pʋↄ, a ʋna tẽw nɩrɛ ƴen sʋbↄ tuor ʋ na. A kↄ̃tↄnsɩ ma ire ʋ na, ɩ̃ a korĩ-cɛ jaa ʋ maa suu bom wa. Ʋ maa mɩ gã yir wa, a yar pʋↄ ʋ ma gana. ²⁸ A lɛ ʋ na nyɛ a Jeeju, ʋ wuurʼã ɩ̃ lo a ʋ nii-sↄw ɩ̃ ƴɛrʼɩ̃ kpɛ̃w yel: “Saa juu Naaŋmɩn Bie Jeeju wee! Bõ fʋ nyɛ nɩ ma? Ɩ̃ sʋↄr fʋ na, taa hʋↄl ma wa!” ²⁹ Ʋ yelʼã a lɛ a-na-ɩ a Jeeju yele na a kↄ̃tↄn bier a ʋ yi a daba jie. A gbɛɛ yayaw jaa, a ir ʋ na, a ba lũ ʋ a nur nɩ a bↄ̃jↄrɩ̃sɩ, ɩ̃ mɩ kpal ʋ a gbɛɛ nɩ a kure, ɩ̃-cɛ ʋ ma ŋma bar, ɩ̃ a kↄ̃tↄn ir ʋ kpɛ nɩ a wɛkar pʋↄ. ³⁰ A Jeeju soor ʋ: “Mɩnɛ a fʋ yuor dɩ?” Ʋ yel ʋ: “Kↄ̃-bↄ̃w-nʋↄr ɩ̃ dɩ,” a-na-ɩ kↄ̃tↄn-yaw ɩ̃ dãa ire ʋ. ³¹ A kↄ̃tↄnsɩ bala sʋↄrↄ na a Jeeju tↄ̃-tↄ̃-tↄ̃ a ʋ taa ir ba bar a ba suu a ba kpãafʋ jie wa. ³² A dor yayaw dãa na be be a tãw lõboorɩ̃ Ꞌwↄbↄ a yele yʋↄrↄ nɩ, a kↄ̃tↄnsɩ sʋↄr a Jeeju á ʋ kʋ ba sↄr a ba yi kpɛ ba, ʋ kʋ ba a sↄr. ³³ A kↄ̃tↄnsɩ yi a daba jie kpɛ a dor, a ba dar taa ba jaa suu a tãw fʋↄlaa, lo a man kʋ̃ↄ pʋↄ lim. ³⁴ A nɩbɛ bala na cɩɩnɛ a dor nyɛ na a ala na ta ɩ̃ jↄ kul hier kʋ a nɩbɛ a tẽ-kpɛ̃ɛ nɩ a tẽ-bil pʋʋr. ³⁵ A nɩbɛ yi na cen áa ba Ꞌwuor je kãa a ala na maal. Ba ta na a Jeeju sɛ̃, nyɛ a daba ʋlↄ a kↄ̃tↄnsɩ na yi a ʋ jie, ʋ ɩ nɩ-son, su a cẽcene jɛ nɩ a Jeeju pulẽe, a dãbɩ̃ɛ nyↄw ba. ³⁶ A bala na dãa nyɛ a ala na maal mɩɩnɛ na kʋrↄ a nɩbɛ a mɩnɛ a kↄ̃tↄn-ire na kpɛmɛ. ³⁷ A be jie, a Jerasɛn ten deme ba jaa sʋↄrↄ a Jeeju a ʋ yi ɩ̃ bar ba, a-na-ɩ dãbɩ̃ɛ nyɩrɩ̃ na nyↄw ba. A Jeeju lɛ kpɛ a gbor pʋↄ lɩɛb cen. ³⁸ Ɩ̃ a daba ʋlↄ jie a kↄ̃tↄnsɩ na dãa yi sʋↄrↄ na a Jeeju a ʋ ɩ a ba lãa cen. Ɩ̃-cɛ a Jeeju lɩɛb ʋ bar ɩ̃ yel ʋ: ³⁹ “Lɩɛb kul a fʋ yir na mɩɩn a ala a jaa a Naaŋmɩn na maal iu,” ʋ cen na hier yↄ nɩ a tẽw pʋↄ ʋ jaa kʋ a nɩbɛ a ala a Jeeju na maal ʋ. ⁴⁰ A lɛ a Jeeju na lɛ lɩɛb cen, a nɩbɛ tuor ʋ na, a-na-ɩ ba jaa dãa na gure ʋ. ⁴¹ A daba kãw ba na bʋↄlↄ a Jaarisi na ɩ a puorfʋ yir nɩ-kpɛ̃ɛ ta na a be, lo gburĩ a dume a Jeeju nii-sↄw ɩ̃ sʋↄrↄ ʋ, lↄbↄ nɩ ʋ a nur, a ʋ wa a ʋ yir, ⁴² a-na-ɩ ʋ tɛrɛ na bi-pↄw bõ-ƴen tẽ-tẽ-tẽ na tↄↄ yomo pie-nʼayi na be be kpiire. A lɛ a Jeeju na cere a be, a nɩbɛ fʋr ʋ na a lõbobo a jaa. ⁴³ Ɩ̃ pↄw be na be na tɛrɛ sɩɛ maalʼɩ̃ yomo pie-nʼayi ɩ̃ aa baara wa. Ʋ sãw na a ʋ yele a jaa a dↄↄtↄrsɩ jie ɩ̃ bõ-ƴen kãw ma dãa tʋↄ kpaar ʋ wa. ⁴⁴ Ʋ taw na ta a Jeeju puo-sↄw, ɩ̃ sɩɩr a ʋ kparʋ nʋↄr. A jie naan, a ɩ a ʋ jɩ̃ɩ barfʋ ŋmaa na. ⁴⁵ Ɩ̃ a Jeeju yel: “Ala ɩ̃ sɩɩr ma?” A ba jaa yele á baa sɩɩr ʋ wa. A Pɩɛr yel: “Jãjaana, a ɩ na a nɩ-yaw na fʋr fʋ ɩ̃ gbʋr fʋ a nↄhↄ̃!” ⁴⁶ Ɩ̃-cɛ a Jeeju lɛ yel: “Nɩrɛ sɩɩr ma na, a-na-ɩ fãw yi ma na ɩ̃ bↄ̃wnaa.” ⁴⁷ A pↄw nyɛ bↄ̃w ka a Ꞌwaa tʋↄrↄ sↄↄlↄ wa, ɩ̃ mine wa lo gburĩ a dume a Jeeju pulẽe, ɩ̃ yel a nɩbɛ ba jaa nii-sↄw a ala ɩnɛ ʋ na sɩɩr ʋ, nɩ a mɩnɛ ʋ na kpɛmɛ a jie naan. ⁴⁸ A Jeeju yel ʋ: “Ɩ̃ bi-pↄw, a fʋ ƴↄ̃w-nyãa faa fʋ na. Cere nɩ su-ɓaar.” ⁴⁹ A lɛ a Jeeju na cãa ƴɛrɛ, nɩrɛ yi na a nɩ-kpɛ̃ɛ Jaarisi yir ɩ̃ wa ta yel: “A fʋ bi-pↄw kpi na. Taa lɛ vↄwrↄ a jãjaana wa.” ⁵⁰ Ɩ̃-cɛ a mɩnɛ a Jeeju na wõ a lɛ, ʋ yelʼã a Jaarisi: “Taa jↄrↄ dãbɩ̃ɛ wa. Tɛrɛ a ƴↄ̃w-nyãa tɛw ɩ̃ ʋ na kpɛmɛ na.” ⁵¹ A lɛ ʋ na ta a yir, Ꞌwaa sↄw nɩrɛ ʋ pↄw ba kpɛ nɩ, ɩ̃ a ala ma ɩ a Pɩɛr, nɩ a Jakɩ, nɩ a Jã lãa nɩ a bile sãa nɩ a ʋ mã wa. ⁵² A nɩbɛ ba jaa dãa na kono yãyara nɩ a bile ʋlↄ ɩnɛ, a Jeeju yel ba: “Nyɩ taa kono wa; Ꞌwaa kpi wa, ʋ gurʼã.” ⁵³ Ɩ̃ baa cɛl ʋ be wa, a-na-ɩ ba bↄ̃w ka a bile kpi na. ⁵⁴ Ɩ̃-cɛ a Jeeju nyↄw ʋ a nuu ɩ̃ yel: “Bile wee, ir!” ⁵⁵ A ʋ sɩɛ lɛ lɩɛb wa a ʋ pʋↄ, ʋ pal ir a jie naan, ɩ̃ a Jeeju yel a ba kʋ a bile bõ-dɩraa. ⁵⁶ A pↄsabile dↄↄrbↄ ha nↄɛ ɩ̃ a Jeeju yel ba a ba taa yele bom kʋrↄ nɩrɛ a ala na ta wa.

¹ A Jeeju bʋↄlʼã a ʋ par-tuurbe pie-nʼayi tiw, ɩ̃ kʋ ba a fãgã nɩ a tʋↄfʋ a ba na diw nɩ a kↄ̃tↄnsɩ ba jaa fɛw bar, ɩ̃ mɩ kpaar a wʋlɩ̃sɩ, ² ɩ̃ na ʋ tʋ̃ ba a ba cen na hier a Naaŋmɩn fãw kʋ a nɩbɛ, ɩ̃ kpɛmɛ a wʋlɩ̃sɩ deme. ³ Ʋ yel ba na: “Nyɩ taa tɛrɛɛ bom diere nɩ a sↄr wa, a daa, mɩɩ a wʋↄ, mɩɩ a dɩb, mɩɩ a libie, ɩ̃ nyɩ taa tɛrɛɛ kpar-bɛrɛ ayi wa. ⁴ A yir lɛ pʋↄ nyɩ nↄↄ kpɛ, nyɩ́ jɛ a be wa ta nɩ a mɩnɛ nyɩ na yire a tẽw ʋlↄ pʋↄ. ⁵ Ɩ̃ a ala ɩ a nɩbɛ ma sↄw de nyɩ wa, nyɩ́ yi a tẽw ʋlↄ pʋↄ ɩ̃ tɛb a nyɩ gbɛɛ tãbuulĩ bar, a ɩ bõ-miilaa a ba jie.” ⁶ A ba cen na yʋↄrↄ a ten-ten hiere a Naaŋmɩn ƴɛr-son, kpaara nɩ a nɩbɛ wʋlɩ̃sɩ a jiir a jaa. ⁷ A lɛ a jamana Ɛrↄdɩ na wõ a ala jaa na maala, a tɩɛrɩ̃sɩ nyanyaa ʋ na, a-na-ɩ a nɩbɛ ŋmɛɛ yele na áa Jã Batii ɩ̃ ir a kũu pʋↄ. ⁸ A ŋmɛɛ yele á Eli ɩ̃ lɛ miilʼɩ̃ a ʋ mɩ̃ɛ, ɩ̃ a ŋmɛɛ go lɛ yele á korĩ-cɛ ƴɛr-hiere kãw ɩ̃ lɛ jaw ir. ⁹ Ɩ̃-cɛ a Ɛrↄdɩ yel: “Ɩ̃ ɩ na a ba ŋmaa a Jã juu, ɩ̃ ala nɩ a naa ɩ̃ na wono a ƴɛrɩ̃sɩ a ʋ ɩnɛ a lɛ?” Ɩ̃ bʋↄrↄ ʋ nyɛ a Jeeju. ¹⁰ A Jeeju nɩ-tʋnɩsɩ lɩɛbʼã wa na man ʋ a ala a jaa ba na maal, a Jeeju taw ba vɩrɩ̃ nɩ a Bɛsada-tẽw loor. ¹¹ Ɩ̃-cɛ a nɩbɛ vɩrɩ̃ na bↄ̃wnaa ɩ̃ bɩɛr cen a ʋ jie, a Jeeju sↄw de ba na ʋ man ba a Naaŋmɩn fãw, ɩ̃ kpɛmɛ a wʋlɩ̃sɩ deme. ¹² A mɩnɛ a wɩɛr na liwre, a ʋ par-tuurbe pie-nʼayi taw na ta yel ʋ á ʋ wɛl a nɩbɛ bar a ba cen a tẽ-pɩɛlsɩ pʋↄ na ba bↄ a bõ-dɩraa nɩ a gaajie, a-na-ɩ a jie ʋlↄ ba na be ɩ na wɛkar. ¹³ Ɩ̃-cɛ a Jeeju lɩɛbʼã yel ba: “A nyɩmɩ mɩ̃ɛ, nyɩ́ kʋ ba a bõ-dɩraa a ba dɩ.” A ba yel: “Bur-bie anuu nɩ jɩm-bie ayi tɛw sɩ tɛrɛ. Fʋ bʋↄrↄ na a sɩ mɩ̃ɛ sɩ́ cen na da a bõ-dɩraa wa nɩ kʋ a nɩ-yaw basɩmɛ mɩɩ?” ¹⁴ A-na-ɩ a nɩbɛ bala na dãa be a be, a dabsɩ tɛw, tara na ture anuu. A Jeeju lɛ yel a ʋ par-tuurbe: “Nyɩ́ ŋma a nɩbɛ a ba jɩnaa ji-gbulĩsɩ lɩjaayi nɩ piir-piir.” ¹⁵ A par-tuurbe sↄw ɩ̃ maal a lɛ, a nɩbɛ ba jaa jɛ. ¹⁶ A ala ɩ̃ baar, a Jeeju de na a bur-bie anuu nɩ a jɩm-bie ayi ɩ̃ na ʋ dʋↄ Ꞌwuor a saꞋlon ɩ̃ puor a Naaŋmɩn a bõ-dɩraa ala ɩnɛ, ɩ̃ na ʋ ŋma ŋma kʋ a ʋ par-tuurbe a ba de po a nɩbɛ, ¹⁷ a ba jaa Ꞌwↄb pi ɩ̃ cãa cɛ, a ba woor a bur-ŋmara sɛw pɩɩr pie-nʼayi. ¹⁸ A bibir kãw, a Jeeju be na a cɛ̃cɛ̃w sʋↄrↄ a Naaŋmɩn, a ʋlↄ nɩ a ʋ par-tuurbe, ʋ soor ba: “Ala ʋlↄ a nɩbɛ ma de ma ɩ̃ ɩ?” ¹⁹ A ba yel: “A ŋmɛɛ ma yelʼã a Jã-Batii fʋ ɩ, a ŋmɛɛ go, a Eli fʋ ɩ, ɩ̃ a ŋmɛɛ yele a korĩ-cɛ ƴɛr-hiere ƴen sʋbↄ ɩ̃ jaw yi a kũu pʋↄ.” ²⁰ A Jeeju soor ba: “Ɩ̃ a nyɩmɩ, ala ʋlↄ tↄr nyɩ de ma ɩ̃ ɩ?” A Pɩɛr yel: “Fʋ ɩ na a Naaŋmɩn Kirisi.” ²¹ A Jeeju bↄ̃w kpãkpan ba ɩ̃ yel a ba taa wa ƴɛrɛ kʋrↄ nɩrɛ wa. ²² Ɩ̃ na ʋ lɛ yel áa sɛw na a Nɩbɛ Bie na nyɛ won yaw a bɛlɩ̃, áa Jufisɩ ni-dierbe nɩ a baar-lo-nɩ-bɛrɛ nɩ a ƴɛr-kpɛn-bↄↄnbↄ na jɛ ʋ na bar, a ba na kú ʋ na, ɩ̃ a bibie ata dayen a ʋ na irʼã a kũu pʋↄ. ²³ A ala na yi tↄ, ʋ yelʼã a ba jaa: “A ala ɩ nɩrɛ bʋↄrↄ na ʋ tuure ma, ú jɛ a ʋ mɩ̃ɛ bar ɩ̃ de a ʋ nɩ-kʋ-daa tuo tuure nɩ ma a bio bio jaa. ²⁴ A-na-ɩ a nɩrɛ lɛ na bʋↄrↄ ʋ faa a ʋ mɩ̃ɛ, a ʋ baafʋ na bↄrʼã, ɩ̃ a nɩrɛ lɛ na bara a ʋ baafʋ ʋ bↄrↄ a ɩ̃ ɩnɛ, ʋ na cɩ̃ɛ na. ²⁵ A-na-ɩ a ala ɩ a nɩrɛ pↄw na a tẽw na yele a jaa, ɩ̃ a ʋlↄ mɩ̃ɛ bũburĩ, mɩɩ ʋ wɛ, bõ a na kʋ ʋ? ²⁶ A-na-ɩ a nɩrɛ lɛ a vĩ na nyↄw a maa nɩ a ɩ̃ ƴɛrɩ̃sɩ ɩnɛ, a vĩ na mɩ nyↄw na a Nɩbɛ Bie a ʋ ɩnɛ, a lɛ ʋ nↄↄ waara nɩ a ʋ cãa kpɛ̃ɛ na mɩ ɩ a ʋ Sãa cãa, nɩ a ʋ sɩ-tʋnɩsɩ na ɩ a cɛcɛ ben mɩ. ²⁷ Yel-mɩ̃ɛ ɩ̃ yele nyɩ, a bala na be a ka, a ŋmɛɛ na nyɛ na a mɩnɛ a Naaŋmɩn na diere a ʋ fãw, ɩ̃ wa pãa bɩɛr kpi.” ²⁸ A lɛ a Jeeju na ƴɛr a ƴɛrɩ̃sɩ ala baar, a maalʼã bibie anuu-nʼata, ɩ̃ ʋ taw a Pɩɛr nɩ a Jã nɩ a Jakɩ do nɩ tãw juu a Naaŋmɩn sʋↄrfʋ. ²⁹ A mɩnɛ ʋ na sʋↄrↄ a Naaŋmɩn, a ʋ nii-sↄw lɩɛbʼã, ɩ̃ a ʋ kparʋ lɩɛb pɛlɩ̃ nyɩlɛ ƴala-ƴala-ƴala, ³⁰ ɩ̃ a dabsɩ ayi ɩraa ƴɛrɛ nɩ ʋ. A nɩbɛ bala ɩ na a Eli nɩ a Mowisi ³¹ na nyɩr a cãa kpɛ̃ɛ pʋↄ, a ba mana taa a Jeeju kũu ɩnɛ ʋ na cere kpiire a Jerujalɛm. ³² A gʋ̃ↄ dãa na tɛrɛ a Pɩɛr nɩ a ʋ tↄ deme, ɩ̃-cɛ ba jaw na nyɛ a Jeeju a cãa kpɛ̃ɛ pʋↄ nɩ a dabsɩ ayi na lãa ɩraa nɩ ʋ. ³³ A lɛ a dabsɩ bala na bar a Jeeju ɩ̃ bʋↄrↄ ba cen, a Pɩɛr yelʼã a Jeeju: “Jãjaana, a vɩɛlɛ na sɩ na be a ka. Sɩ na ƴↄ̃w na sɛɛr ata; a bõ-ƴen na ɩ na a fʋ ben, a ƴen sʋbↄ ɩ a Mowisi ben, ɩ̃ a kãw ɩ a Eli ben.” ꞋWaa dãa bↄ̃w a ala ʋ na yele wa. ³⁴ A lɛ ʋ na cãa ƴɛrɛ a lɛ, dↄ̃dↄrɩ̃ma suu na pↄw ba, ɩ̃ a lɛ a Mowisi nɩ a Eli na kpɛɛrɛ a dↄ̃dↄrɩ̃ma ʋlↄ pʋↄ, dãbɩ̃ɛ nyↄw na a par-tuurbe. ³⁵ Ɩ̃ a ƴɛrɩ̃sɩ yi be a dↄ̃dↄrɩ̃ma pʋↄ yele: “A ɩ̃ Bi-daba nɩ a naa, ʋlↄ ɩ̃ vɛl ir: nyɩ́ cɛlɛ ʋ.” ³⁶ A lɛ ba na wõ a ƴɛrɩ̃sɩ ala baar, ba nyɛ na a Jeeju ʋ ɩraa ʋ yẽ. A ʋ par-tuurbe ŋma vʋʋrʋ̃sɩ ɩ̃ baa man a ala ba na nyɛ a daar ʋlↄ pʋↄ kʋ nɩrɛ wa. ³⁷ A dɩvɩɛ bio, a mɩnɛ a Jeeju na yi a tãw juu suu nɩ a ʋ par-tuurbe, nɩ-yayaw tuor ʋ na. ³⁸ A be a nɩbɛ sↄ̃w, daba kãw wuurʼɩ̃ na kpɛ̃w yele: “Jãjaana, ɩ̃ sʋↄr fʋ na bɩlɛ, Ꞌwuor ma a bile, a-na-ɩ ʋlↄ ɩ̃ ɩ a ɩ̃ bi-bõ-ƴen tẽ-tẽ-tẽ. ³⁹ Kↄ̃tↄn kãw ɩ̃ ire ʋ, ɩ̃ ma maal ʋ ʋ wuure a jie naan, vara nɩ fãgã ɩ̃ ma fure a natɛ-fube, ɩ̃ a ʋlↄ wa pãa bar ʋ, a ɩ̃gan ma kar ʋ na. ⁴⁰ Ɩ̃ sʋↄrʼã a fʋ par-tuurbe a ba diw a kↄ̃tↄn bar, ɩ̃ baa tʋↄ wa.” ⁴¹ A mɩnɛ a Jeeju na wõ a lɛ, ʋ yelʼã: “A nyɩmɩ dɩnaa su-kpɛn deme na ma tɛrɛ ƴↄ̃w-nyãa wa! Ɩ̃ be nɩ nyɩ, ɩ̃ dɩ nɩ nyɩ a tuo wa ta nɩ dabor?” Ɩ̃ na ʋ yel a daba: “Taw a fʋ bie wa nɩ ka.” ⁴² A lɛ a daba na taw a bie wa tara nɩ a Jeeju, a kↄ̃tↄn dam ʋ na nɩ kpɛ̃w lↄb a tene, ɩ̃-cɛ a Jeeju mʋ̃ↄ na mimir ƴↄ̃w a kↄ̃tↄn bier, ɩ̃ na ʋ kpɛmɛ a bile kʋ a sãa, ⁴³ a nʋↄr ko a nɩbɛ ba jaa a lɛ ba na nyɛ a Naaŋmɩn bɛrmɛfʋ. A mɩnɛ a nɩbɛ ba jaa na kpiire a Jeeju a ala a jaa ɩnɛ ʋ na maala, ʋ yelʼã a ʋ par-tuurbe: ⁴⁴ “A nyɩmɩ, nyɩ́ bↄ̃w cɛlɛ a ƴɛrɩ̃ na: ba na nyↄw na a Nɩbɛ Bie ƴↄ̃w a nɩbɛ nuu pʋↄ.” ⁴⁵ Ɩ̃-cɛ a ʋ par-tuurbe ma dãa bↄ̃w a ƴɛrɩ̃ ʋlↄ par wa. A dãa na liw ba a ba bↄ̃w faa, ɩ̃ a dãbɩ̃ɛ nyↄw ba a baa Ꞌla soor a Jeeju a ƴɛrɩ̃ ʋlↄ wa. ⁴⁶ Cɩɩrɩ̃-taa irʼã a Jeeju par-tuurbe sↄ̃w a ba bʋↄrↄ ba bↄ̃w a ʋlↄ na ɩ a kpɛ̃ɛ a ba pʋↄ. ⁴⁷ A Jeeju bↄ̃w a ala ba na tɩɛrɛ ɩ̃ taw bibile wa nɩ ʋ ɩraa a ʋ lõboorɩ̃, ⁴⁸ ɩ̃ ʋ yel ba: “A nɩrɛ lɛ na sↄw de a bibile na a maa ɩnɛ, a maa mɩ̃ɛ ʋ sↄw de, ɩ̃ a ʋlↄ na sↄw de ma, mɩ sↄw na de a ʋlↄ na tʋ̃ ma. A-na-ɩ a ʋlↄ na nyɩrɩ̃ pab a ʋ mɩ̃ɛ a nyɩ jaa sↄ̃w, ʋlↄ ɩ̃ ɩ a kpɛ̃ɛ.” ⁴⁹ A Jã yel: “Jãjaana, sɩ nyɛ na nɩrɛ kãw ʋ de a fʋ yuor diwre nɩ a kↄ̃tↄnsɩ bara, a sɩ dãa bʋↄrↄ sɩ pɩɛrɩ̃ ʋ bar, a-na-ɩ Ꞌwaa be a sɩ pʋↄ wa.” ⁵⁰ A Jeeju yel ʋ: “Nyɩ taa pɩɛrɛ ʋ bara wa, a-na-ɩ a nɩrɛ ʋlↄ na ma jaar a nyɩ ƴɛrɩ̃ wa, nyɩ nɩrɛ ʋ ɩ.” ⁵¹ A mɩnɛ a daar ʋlↄ ba na diere a Jeeju duoro nɩ a saꞋlon na pɩɛlɛ, ʋ ŋme na nyãa a Jerujalɛm cenfʋ ɩnɛ. ⁵² Ʋ tʋ̃ na nɩbɛ a ba de ʋ nĩe cen na kpɛ Samari tẽ-bile kãw pʋↄ a ʋ gaajie gbɛɛrɩ̃fʋ ɩnɛ. ⁵³ Ɩ̃-cɛ a tẽw ʋlↄ nɩbɛ ma sↄw de ʋ wa, a-na-ɩ a Jerujalɛm ʋ dãa cere. ⁵⁴ A mɩnɛ a ʋ par-tuurbe Jakɩ nɩ a Jã na nyɛ a lɛ, ba yelʼã: “Nɩ-kpɛ̃ɛ, fʋ bʋↄrↄ na sɩ bʋↄl a vũu ʋ yi a saꞋlon ɩ̃ suu wa dɩ ba mɩɩ?” ⁵⁵ A Jeeju lɩɛb mʋ̃ↄ mimir ƴↄ̃w ba. ⁵⁶ Ɩ̃ na ba lɛ cen tẽ-kpee. ⁵⁷ A lɛ ba na cãa be a sↄr juu cere, daba kãw yelʼã a Jeeju: “Ɩ̃ na tuure fʋ na a jiir a jaa fʋ na cere.” ⁵⁸ A Jeeju yel ʋ: “A sɛ̃nɛ tɛrɛ na a ba bↄↄr, ɩ̃ a wɛ-lili mɩ tɛrɛ a ba cor, ɩ̃-cɛ a Nɩbɛ Bie ma mɩ tɛrɛ jie ʋ na gaala a ʋ juu wa.” ⁵⁹ Ʋ lɛ yelʼã nɩsaa kpee: “Wa tuure ma.” Ʋ yel: “Nɩ-kpɛ̃ɛ! Kʋ ma sↄr ɩ̃ kulʼɩ̃ ũu a ɩ̃ sãa baar.” ⁶⁰ Ɩ̃-cɛ a Jeeju yel ʋ na: “Bar a nɩ-kũusɩ a ba uune a ba kũusɩ, ɩ̃ a fʋ̃ʋ, cen na hier a Naaŋmɩn fãw kʋ a nɩbɛ.” ⁶¹ A kãw yel: “Ɩ̃ na tu fʋ na, ɩ̃-cɛ kʋ ma sↄr ɩ̃ de nĩe kulʼɩ̃ puor a ɩ̃ yir deme baar.” ⁶² A Jeeju yel ʋ: “A nɩrɛ ʋlↄ na de a nii kʋↄrↄ nɩ, ɩ̃ ŋmele Ꞌwuoro a puo-sↄw, Ꞌwaa sɛw nɩ a Naaŋmɩn fãw wa.”

¹ A ala na yi tↄ, a Nɩ-kpɛ̃ɛ lɛ bʋↄlʼã a par-tuurbe lɩjaata nɩ pie-nʼayi ŋmɛɛ go, tʋ̃ ba ayi-yi a ba de ʋ nĩe cen a ten a jaa pʋↄ nɩ a jiir a jaa a ʋlↄ mɩ̃ɛ na sɛw ʋ cen. ² Ʋ yel ba na: “A puo bɛrmɛ na, ɩ̃-cɛ a ci-ŋmarba ma jɛ̃ bom wa. Ala-ɩ̃-sↄ nyɩ́ sʋↄr a Puo Sʋbↄ ʋ ƴↄ̃w a tʋ̃tʋnbↄ a ba cen na ŋma a ʋ ci. ³ Nyɩ́ cere, ɩ̃ bↄ̃wnaa, peli kaarɩ̃ ɩ̃ tʋnↄ nyɩ a wɛ-baar sↄ̃w. ⁴ Nyɩ taa tɛrɛɛ libie wole wa, nyɩ taa tɛrɛɛ wʋↄ wa, nyɩ taa tɛrɛɛ nafaba wa, nyɩ taa mɩ ɩrɛɛ a sↄr pʋↄ puoro nɩrɛ wa. ⁵ A yir lɛ pʋↄ nyɩ na kpɛɛrɛ nyɩ́ de nĩe yel: ʻSu-ɓaar ú be nɩ a yir na.ʼ ⁶ Ɩ̃ a ala ɩ nɩrɛ be na na ɩ a su-ɓaar sʋbↄ, a nyɩ su-ɓaar na be na a ʋ jie; a ala ma ɩ lɛ ʋ wa, a na lɩɛbʼã wa a nyɩ sɛ̃. ⁷ Nyɩ́ jɛ be a yir ʋlↄ pʋↄ dɩrɛ nyuure nɩ a ala ba na kʋrↄ nyɩ, a-na-ɩ a tʋ̃tʋnↄ sɛw nɩ na a ʋ yar. Nyɩ taa mɩ lɩɛrɛ a yie yʋↄrↄ nɩ wa. ⁸ A tẽw jaa lɛ nyɩ nↄↄ kpɛ a ba sↄw de nyɩ, nyɩ́ dɩrɛ a dɩb ala ba na kʋrↄ nyɩ, ⁹ nyɩ́ kpaar a wʋlɩ̃sɩ deme bala na be a be ɩ̃ yel a tẽw ʋlↄ nɩbɛ: ʻÁ Naaŋmɩn fãw ta na pɩɛlʼɩ̃ nyɩ.ʼ ¹⁰ Ɩ̃-cɛ a tẽw jaa lɛ pʋↄ nyɩ nↄↄ kpɛ a baa sↄw de nyɩ wa, nyɩ́ yi a ʋ sↄɛ pʋↄ ɩ̃ yel: ¹¹ ʻA nyɩ tẽw tãbuulĩ tɩɛ na mar sɩ a gbɛɛ, sɩ pine na ƴↄnↄ nyɩ, ɩ̃ nyɩ́ cãa bↄ̃wnaa a Naaŋmɩn fãw pɩɛlʼã.ʼ ¹² Ɩ̃ yele nyɩ na, a ƴɛrɩ̃ guorfʋ dayen, a Sↄdↄm hʋʋr nyɛfʋ na sa na a tẽw naa ben. ¹³ “Nabier na ta na a nyɩmɩ Kↄrajɩ̃-tẽ-deme! Nabier na ta na a nyɩmɩ Bɛsada-tẽ-deme! A-na-ɩ a nↄ-kofʋ tʋmↄ ala na maal a nyɩ sↄ̃w, a ala ɩ̃ dãa ɩ a Tɩɩr nɩ a Sɩdↄ̃ a maal a lɛ, ba naa su na cẽcen jaar a jie naan jɛ nɩ tãpɛlɩ̃ jɩnaa nɩ, miilʼɩ̃ áa ba yɛ̃ lɩɛbʼã. ¹⁴ Ala-ɩ̃-sↄ, a lɛ a Naaŋmɩn na guoro a nɩbɛ ƴɛrɩ̃sɩ, a Tɩɩr nɩ a Sɩdↄ̃ hʋʋr nyɛfʋ na sa na a nyɩ ben. ¹⁵ Ɩ̃ a nyɩmɩ, Kapɛɛnam-tẽ-deme, nyɩ tɩɛrʼã beeka a nyɩ na do na a saꞋlon mɩɩ? Nyɩ na ɛ̃ɛ na wur suu ta a kpɩɩn tẽw.” ¹⁶ Ʋ lɛ yelʼã a ʋ par-tuurbe: “A ʋlↄ na cɛlɛ a nyɩ ƴɛrɩ̃sɩ, mɩ cɛlɛ na a ɩ̃ ƴɛrɩ̃; a ʋlↄ na jaar nyɩ, maa ʋ mɩ jaar, ɩ̃ a ʋlↄ na jaar ma, ʋ mɩ jaarʼã a ʋlↄ na tʋ̃ ma.” ¹⁷ A par-tuurbe lɩjaata nɩ pie-nʼayi bala lɩɛbʼã wa, a nʋ̃ↄ ƴala ba a ba yel: “Nɩ-kpɛ̃ɛ, a fʋ yuor maalʼã a kↄ̃tↄnsɩ tↄr jaa bal a ba mɩ̃ɛ a sɩ jie.” ¹⁸ A Jeeju yel ba: “Ɩ̃ dãa na Ꞌwuor nyɛ a Satã na yi a saꞋlon ɩ̃ lo a mɩnɛ a saa na ma nyɩɩlɛ. ¹⁹ Nyɩ́ nyɛ, ɩ̃ kʋ nyɩ na tʋↄfʋ a nyɩ na nɛbʼɩ̃ a wɩɩr nɩ a lan, nɩ a Bier Sʋbↄ fãw ʋ jaa. Bom jaa ma be be tʋↄrↄ maala nyɩ bier wa. ²⁰ A be na a lɛ ɩ̃-cɛ nyɩ taa cɩlɛ a-na-ɩ a kↄ̃tↄnsɩ balʼã a ba mɩ̃ɛ a nyɩ jie wa, ɩ̃-cɛ nyɩ́ cɩlɛ a-na-ɩ a Naaŋmɩn sɛbʼã a nyɩ yoe a be a saa juu.” ²¹ A daar ʋlↄ naan pʋↄ, nʋ̃ↄ ƴala na a Jeeju a yi a Naaŋmɩn Sɩɛ jie, ʋ yel: “Ɩ̃ Sãa, ɩ̃ puoro fʋ na, a fʋ̃ʋ na ɩ a saa juu nɩ a tẽw Nɩ-kpɛ̃ɛ, a mɩnɛ fʋ na sↄↄlɩ̃ a yele ala a nɩ-kpaarsɩ nɩ a yɛ̃ deme jie, ɩ̃ miilʼɩ̃ a bibiir. Ɩ̃ Sãa, a lɛ ʋ, fʋ̃ʋ a nʋmↄ a fʋ maal a lɛ.” ²² “A ɩ̃ Sãa barʼã a yele a jaa ƴↄ̃w a ɩ̃ nurɩ̃. Nɩrɛ ma bↄ̃w a ala a Bie na ɩ ɩ̃ a ala ma ɩ a Sãa tɛw ʋ wa. Nɩrɛ ma mɩ bↄ̃w a ala a Sãa na ɩ ɩ̃ a ala ma ɩ a Bie tɛw ʋ wa, nɩ a ʋlↄ a Bie na bʋↄrↄ ʋ miilʼɩ̃.” ²³ Ɩ̃ naa ʋ lɩɛb yel a ʋ par-tuurbe tɛw: “A nʋmↄ na a bala a ba mimie na nyɛ a ala nyɩ na nyɛrɛ! ²⁴ A-na-ɩ ɩ̃ yele nyɩ na, a Naaŋmɩn ƴɛr-hierbe nɩ a jamansɩ yayaw dãa na bʋↄrↄ ba nyɛ a ala nyɩ na nyɛrɛ ɩ̃ baa nyaa wa; ba mɩ dãa na bʋↄrↄ ba wõ a ala nyɩ na wono, ɩ̃ baa wonaa wa.” ²⁵ A ƴɛr-kpɛn-bↄ̃wnↄ kãw irʼã bʋↄrↄ ʋ bɩɩr a Jeeju, na ʋ soor ʋ: “Jãjaana, bõ ɩ̃ na maal ɩ̃ pↄw a baa-kↄ̃-tɛw?” ²⁶ A Jeeju soor ʋ: “Bõ ɩ̃ sɛb a Naaŋmɩn ƴɛr-kpɛn sɛbɛ pʋↄ? Bõ fʋ ma Ꞌwuor nyɛ a be?” ²⁷ A daba yel: “Fʋ na nʋnↄ na a Nɩ-kpɛ̃ɛ na ɩ a fʋ Naaŋmɩn nɩ a fʋ suur ʋ jaa nɩ a fʋ baafʋ nɩ a fʋ fãw nɩ a fʋ tɩɛrʋ̃ ʋ jaa, ɩ̃ mɩ nʋnↄ a fʋ tↄ sʋbↄ a fʋ mɩ̃ɛ kaarɩ̃.” ²⁸ A Jeeju yel ʋ: “Yel-mɩ̃ɛ fʋ yel. A fʋ̃ʋ maal a lɛ, fʋ na pↄw na a baa-kↄ̃-tɛw.” ²⁹ Ɩ̃-cɛ a ƴɛr-kpɛn-bↄ̃wnↄ ʋlↄ bʋↄrↄ na ʋ miilʼɩ̃ a ʋ torfʋ, ɩ̃ yel a Jeeju: “Ala ɩ̃ ɩ a ɩ̃ tↄ sʋbↄ?” ³⁰ A Jeeju lɛ lɩɛb yel ʋ: “Daba kãw dãa na yi a Jerujalɛm ɩ̃ cere a Jeriko-tẽw. Ʋ lo na a nyanyube sↄ̃w a ba nyↄw ʋ yaar a yele, ɩ̃ naa ba pↄb pↄb ʋ bar, a cɛ fɩ̃ɩ ʋ naa kpi. ³¹ A be na a lɛ, a Naaŋmɩn baar-loro kãw mɩ de a ʋna sↄr cere. A lɛ ʋ na nyɛ a ʋna daba, ʋ golʼã de a lõboor sↄr cen. ³² A lɛ ʋ mɩ, a Levi bal nɩrɛ kãw mɩ ta na a be a ʋna jie naan mɩ nyɛ a daba ʋ gã a lɛ, ʋ mɩ gol tↄl de a lõboor sↄr cen. ³³ Ɩ̃-cɛ a Samari-tẽw nɩrɛ kãw na tↄlↄ nɩ a sↄr ta na nyɛ a lɛ, a nãw nyↄw ʋ, ³⁴ ʋ taw ta de dɩvɛ̃ pɛw nɩ ʋ a natɩɛ ɩ̃ pur a kãa ƴↄ̃w, ɩ̃ de cẽcen vilĩ pↄw. A ala ɩ̃ baar, ʋ ɓↄw ʋ na dↄↄl a ʋ mɩ̃ɛ bʋ̃ↄ juu cenʼɩ̃ a saanba yir pʋↄ, naa ʋ gaal ɩ̃ gã gu ʋ a tɩsↄw. ³⁵ A mɩnɛ a bio na vɩɛ, ʋ tũ na ir warbie kↄↄr anaan kʋ a yir sʋbↄ ɩ̃ yel ʋ: ʻꞋWuoro a daba na vɩlaa. A maa lↄↄ lɩɛb wa, ɩ̃ na kʋ fʋ na a ala fʋ na maala dↄↄlↄ a ʋ ɩnɛ.ʼ ” ³⁶ A mɩnɛ a Jeeju na ƴɛr a lɛ baar, ʋ soorʼã a ƴɛr-kpɛn-bↄ̃wnↄ: “Mɩnɛ fʋ tɩɛr? A nɩbɛ ata bala pʋↄ, buor ɩ̃ ɩ a daba ʋlↄ a nyanyube na pↄb tↄ sʋbↄ?” ³⁷ Ʋ yel ʋ: “A ʋlↄ na wɩɛ ʋ, ʋlↄ ʋ.” A Jeeju yel ʋ: “A fʋ̃ʋ mɩ, cen na mɩ maal a lɛ.” ³⁸ A mɩnɛ a Jeeju nɩ a ʋ par-tuurbe na be a sↄr juu cere, ʋ vɩɛ na kpɛ tẽ-bile kãw pʋↄ, na ʋ cen pↄw kãw na dɩ Martɩ yir, ʋ de ʋ ir a saan. ³⁹ A pↄw ʋlↄ dãa na tɛrɛ yɛ-bile na dɩ Maarɩɩ. A Maarɩɩ wa na jɛ a Nɩ-kpɛ̃ɛ pulẽe cɛlɛ a ʋ ƴɛrɩ̃sɩ. ⁴⁰ Ɩ̃-cɛ a Martɩ tɩɛrɩ̃sɩ ma dãa jɛ ji-bõ-ƴen wa, a yi a tʋ̃-bʋrↄ bʋrↄ ʋ na maala jie, ʋ taw na ta yel a Jeeju: “Nɩ-kpɛ̃ɛ! Aa ɩ fʋ bom a ɩ̃ yɛ-bile na jɛ ɩ̃ bar ma ɩ̃ tʋnↄ a tʋn a ɩ̃ yẽ wa mɩɩ? Yel ʋ ʋ wa sũo ma!” ⁴¹ A Nɩ-kpɛ̃ɛ yel ʋ: “Martɩ wee! Fʋ barʼã a tɩɛrɩ̃sɩ a dama fʋ, a kpɛmɛ kʋ fʋ, a yel-yaw fʋ na maala ɩnɛ. ⁴² Ɩ̃-cɛ bom bõ-ƴen tɛw ɩ̃ sa gãw a jaa. A Maarɩɩ vɛlʼã ir a ʋna bom son a nɩrɛ na ma tʋↄrↄ faara wa.”

¹ Bibir bõ-ƴen, a Jeeju sʋↄrↄ na a Naaŋmɩn jie kãw. A lɛ ʋ na sʋↄr baar, a ʋ par-tuure kãw yel ʋ na: “Nɩ-kpɛ̃ɛ, jaan sɩ a Naaŋmɩn sʋↄrfʋ a mɩnɛ a Jã na jaan a ʋ par-tuurbe.” ² A Jeeju yel ba: “A lɛ nyɩ na sʋↄrↄ a Naaŋmɩn, nyɩ́ yel: ʻSɩ Sãa! A fʋ yuor ú ow kpee, a fʋ fãw ú wa. ³ Kʋrↄ sɩ a bibie a jaa, a bõ-dɩraa ala na sɛw nɩ sɩ. ⁴ De a sɩ faar bar kʋ sɩ, a-na-ɩ a sɩmɩ mɩ, sɩ ma de na a nɩrɛ lɛ na bɩɛ a sɩ jie bɩɛfʋ bar kʋ ʋ. Taa bar sɩ a sɩ kpɛ a bɩɩrfʋ pʋↄ wa.ʼ ” ⁵ A Jeeju lɛ yel ba na go: “A ala ɩ a kãw a nyɩ sↄ̃w tɛrɛ na a ba-daba na ʋ cen na nyɛ ʋ a tɩsↄw porɩ̃ ɩ̃ yel ʋ: ʻƖ̃ ba yaa! Pɛ̃w ma bur-bie ata, ⁶ a-na-ɩ ɩ̃ baraa kãw yi na wɩɛr wa a ɩ̃ sɛ̃, ɩ̃ a maa tɛrɛ bom jaa kʋrↄ ʋ wa,ʼ ⁷ a nʋmↄ-wa-sↄw a ʋ tↄ sʋbↄ ʋlↄ na be a diem na yel ʋ na: ʻTaa vↄwrↄ ma wa; sɩ pↄw na a pan baar, a maa nɩ a ɩ̃ bibiir gã na; maa lɛ tʋↄrↄ ire kʋrↄ fʋ buru wa.ʼ ⁸ Ɩ̃ yele nyɩ na, a ʋlↄ ma saarɩ̃ ir kʋ ʋ bom a-na-ɩ a ʋ baraa ʋ ɩ wa, ɩ̃ ʋ na irʼã kʋ ʋ a yele a jaa ʋ na bʋↄrↄ, a-na-ɩ ʋ vↄwrↄ ʋ na. ⁹ “Ɩ̃ a maa, ɩ̃ yele nyɩ na, nyɩ́ sʋↄrↄ ɩ̃ nyɩ na pↄw na, nyɩ́ bʋↄrↄ ɩ̃ nyɩ na nyaa na, nyɩ́ ŋmeere a pan ɩ̃ ba na yuo nyɩ na. ¹⁰ A-na-ɩ a nɩrɛ lɛ na sʋↄrↄ ma pↄw na; a ʋlↄ na bʋↄrↄ ma nyaa na, ɩ̃ ba ma yuo na a pan a ʋlↄ na ŋmeere ɩnɛ. ¹¹ Sãa buor ɩ̃ be a nyɩ sↄ̃w, a ala ɩ a ʋ bie sʋↄr ʋ na a jɩm ʋ de waab kʋ ʋ? ¹² Mɩɩ a ʋlↄ ɩ̃ sʋↄr ʋ a nↄjɛl, ʋ de lãw kʋ ʋ? ¹³ A ala ɩ a nyɩmɩ na ɩ a nɩ-faar, nyɩ bↄ̃w na yel-vɛlɛ ma kʋ a nyɩ bibiir, mɩnɛ ɩ̃ ɩ a kↄ̃ nyɩrɩ̃ nʋmↄ a nyɩ Sãa na be a saa juu ʋ na tɩɩr a ʋ Sɩɛ kʋ a bala na sʋↄrↄ ʋ wa?” ¹⁴ A Jeeju dãa na diwre kↄ̃tↄn na maal daba ʋ ɩ nↄ-mu sʋbↄ. A lɛ a kↄ̃tↄn na yi baar, a nↄ-mu sʋbↄ lɛ ƴɛrɛ na a ƴɛrɩ̃sɩ, a nↄɛ ko a nɩbɛ. ¹⁵ Ɩ̃-cɛ a nɩbɛ ŋmɛɛ yelʼã: “A Bɛɛjɛbul na ɩ a kↄ̃tↄn nɩ-kpɛ̃ɛ, a ʋ fãw ʋ diwre nɩ a kↄ̃tↄnsɩ bara.” ¹⁶ Ɩ̃ a nɩŋmɛɛ bʋↄrↄ na ba jʋʋr ʋ bↄ̃w a ʋ tɛw ɩ̃ sʋↄrↄ ʋ a ʋ maal bom miilʼɩ̃ ba a ba bↄ̃w ka a Naaŋmɩn jie a ʋ fãw sɩrɩ̃ yi. ¹⁷ Ɩ̃-cɛ a Jeeju bↄ̃w na a ala ba na tɩɛrɛ ɩ̃ yel ba: “A tẽw jaa lɛ na var ayi jɛbɛ nɩ a ʋ mɩ̃ɛ ʋ na wɛlʼã, ɩ̃ a ʋ yie na lo na dↄↄl taa bõ-ƴene-ƴene. ¹⁸ A lɛ ʋ mɩ, a ala ɩ a Sãta lɩɛbʼã jɛbɛ nɩ a ʋ mɩ̃ɛ, mɩnɛ a ʋ fãw na ɩ ɩ̃ tʋↄ cãa be be? Ɩ̃ yelʼã a lɛ a-na-ɩ nyɩ yelʼã a Bɛɛjɛbul fãw ɩ̃ de diwre nɩ a kↄ̃tↄnsɩ. ¹⁹ Ɩ̃ a maa, a ala ɩ a Bɛɛjɛbul fãw ɩ̃ diwre nɩ a kↄ̃tↄnsɩ, a bala na tuure nyɩ, ala fãw ba ma diw nɩ ba? Ala-ɩ̃-sↄ a bala tↄr jaa ɩ̃ na ɩ a nyɩ ƴɛr-guorbo. ²⁰ Ɩ̃-cɛ a ala ɩ a Naaŋmɩn tʋↄfʋ ɩ̃ diwre nɩ a kↄ̃tↄnsɩ, a miile na áa Naaŋmɩn fãw ta na a nyɩ jie. ²¹ “A gãdaa na bↄ̃w tɛrɛ a jɛb yele gu nɩ a ʋ yir, a ʋ yele ma jɛ na vɩlaa. ²² Ɩ̃-cɛ a ala ɩ a ʋlↄ fãgã na gãw ʋ wa na tʋↄ ʋ, maal ʋ ʋ bal, ʋ na fa na a ʋna gãdaa jɛb yele ala ʋ na dãa tɩɛrɛ nɩ ɩ̃ de a ʋ yele a jaa po a nɩbɛ. ²³ “A ʋlↄ na ma be a ɩ̃ jie wa, ʋ ɩ na a ɩ̃ san-sʋbↄ, ɩ̃ a ʋlↄ na ma sũono ma a sɩ lãa kaala wa, ʋ yɛ̃yɛlɛ na bara.” ²⁴ “A kↄ̃tↄn bier ɩ̃ yi a nɩrɛ pʋↄ, ʋ ma cenʼã na viire yʋↄrↄ a wɛkar pʋↄ, bʋↄrↄ a jie ʋlↄ ʋ na tʋↄrↄ pɩɛnɛ. A ʋlↄ ɩ̃ wa faa, ʋ ma yelʼã: ʻƖ̃ na lɩɛbʼã kul a ɩ̃ yir ʋlↄ pʋↄ ɩ̃ na yi ɩ̃ cɛ bar.ʼ ²⁵ A lɛ ʋ na lɩɛb wa, ʋ nyɛ na a ba pɩɩr a yir ʋlↄ ɩ̃ gbɛɛrɩ̃ a yele vɩlaa. ²⁶ A lɛ, ʋ ma lɩɛbʼã cen na bↄ a ʋ tↄ deme anuu-nʼayi na nyɩrɩ̃ ɩ a kↄ̃tↄn-faar gãw ʋ, a ba lãa lɩɛb wa kpɛ a yir ʋlↄ pʋↄ jɛ a be. A ala ɩ̃ baar, a daba ʋlↄ ben ma nyɩrɩ̃ na bɛlɩ̃ gãw a dãdãw.” ²⁷ A mɩnɛ a Jeeju na ƴɛrɛ a lɛ, pↄw kãw yel ʋ na nɩ kpɛ̃w be a nɩbɛ sↄ̃w: “A nʋmↄ a pↄw ʋlↄ na dↄw fʋ nɩ a ʋ bɩr fʋ na ƴɛn.” ²⁸ Ɩ̃-cɛ a Jeeju yelʼã: “A ɛ̃ɛ nʋmↄ a bala na cɛlɛ a Naaŋmɩn ƴɛrɩ̃ ɩ̃ sↄw maala.” ²⁹ A mɩnɛ a nɩ-yaw na tiwre taa a Jeeju sɛ̃, ʋ nyↄw na ɩ̃ yele: “A dɩnaa nɩbɛ ɩ na nɩ-faar. Ba bʋↄrↄ na ba nyɛ nↄ-kofʋ tʋn ʋ ɩ ba jɩbaa, ɩ̃-cɛ baa be na nyɛ bom ɩ̃ a ala ma ɩ a Jonasɩ jɩbaa ʋ wa. ³⁰ A mɩnɛ a Jonasɩ na ɩ a jɩbaa a Nɩnɩvɩ-tẽ-deme jie, lɛ a Nɩbɛ Bie na mɩ ɩ a jɩbaa a dɩnaa nɩbɛ jie. ³¹ A ƴɛrɩ̃sɩ guorfʋ dayen, a tẽ-nɩdaa pↄↄ-jamana na irʼã ɩraa a dɩnaa nɩbɛ nii-sↄw ɩ̃ ƴↄ̃w ba a ƴɛrɩ̃, a-na-ɩ ʋ yi na a tẽw baarfʋ jie ɩ̃ wa cɛl a jamana Salʋmↄ̃ yɛ̃. Ɩ̃ a nyɩmɩ, nyɩ nyɛ na a ʋlↄ na gãw a Salʋmↄ̃ a nyɩ sↄ̃w. ³² A ƴɛrɩ̃sɩ guorfʋ dayen, a Nɩnɩvɩ-tẽ-deme na mɩ irʼã ɩraa a dɩnaa nɩbɛ nii-sↄw ɩ̃ ƴↄ̃w ba a ƴɛrɩ̃, a-na-ɩ ba lɩɛbʼã a ba yɛ̃ a lɛ ba na wõ a Jonasɩ ʋ hier a Naaŋmɩn ƴɛrɩ̃. Ɩ̃ a nyɩmɩ, nyɩ nyɛ na a ʋlↄ na gãw a Jonasɩ a nyɩ sↄ̃w. ³³ “Nɩrɛ ma ƴↄnↄ a lãpa ɩ̃ diere sↄↄlↄ, mɩɩ pↄwrↄ lakpow pʋↄ wa, ɩ̃-cɛ a jie ʋlↄ ʋ na tʋↄrↄ caara ba, ba ma ɛ̃ɛ dↄↄl ʋ, a mɩnɛ a nɩbɛ bala na kpɛɛrɛ a be na nyɛ a cãa. ³⁴ A fʋ mimie ɩ̃ ɩ a fʋ ɩ̃gan lãpa; a ala ɩ a fʋ mimie ɩ na mimi-sono, a fʋ ɩ̃gan ʋ jaa na mɩ caarɩ̃ na, ɩ̃ a ala ɩ a fʋ mimie sãw na, a fʋ ɩ̃gan na mɩ liw na. ³⁵ Ala-ɩ̃-sↄ, bↄ̃w tɛrɛ a fʋ mɩ̃ɛ, a cãa ʋlↄ na be a fʋ pʋ̃ↄ ʋ taa wa lɩɛb ɩ libe wa. ³⁶ A ala ɩ a fʋ ɩ̃gan ʋ jaa caarɩ̃ na, ma cɛ jie bar a libe pʋↄ wa, ʋ na be na a cãa pʋↄ ʋ jaa, wↄ̃ taa nɩ a mɩnɛ a lãpa na ma caarɩ̃ fʋ.” ³⁷ A mɩnɛ a Jeeju na ƴɛrɛ a ƴɛrɩ̃, a Farɩsɩ nɩrɛ kãw bʋↄl ʋ na be a ʋ yir a dɩb dɩfʋ ɩnɛ, ʋ cen na kpɛ jɛ a dɩb par. ³⁸ A nʋↄr ko na a Farɩsɩ nɩrɛ ʋlↄ a lɛ ʋ na nyɛ a Jeeju ʋ jɛ a dɩb par ɩ̃ ma dãa de nĩe pↄl a ʋ mɩ̃ɛ wa. ³⁹ Ɩ̃-cɛ a Nɩ-kpɛ̃ɛ yel ʋ na: “A nyɩmɩ Farɩsɩ nɩbɛ! Nyɩ́ nyɛ a mɩnɛ nyɩ na wↄ̃: nyɩ ma pɛw na a nyɩ ŋman nɩ a nyɩ laa puo-sↄw bar, ɩ̃ a nyɩ pʋↄ sɛw nɩ na a nyanyu-tɩɛrɩ̃sɩ nɩ a fãa maalfʋ. ⁴⁰ Dãbolo nyɩ ɩ lɛɛ! A ʋlↄ na maal a puo-sↄw, má a ʋlↄ ɩ̃ mɩ maal a pʋↄ! ⁴¹ Nyɩ́ ɛ̃ɛ de a ala na be a pʋ̃ↄ kʋ a nãw deme, ɩ̃ a yele a jaa na ɩ na cɛcɛ a nyɩ jie. ⁴² “Ɩ̃-cɛ nabier na pↄw na a nyɩmɩ Farɩsɩ nɩbɛ, a-na-ɩ nyɩ ma irʼã a Naaŋmɩn ben a nyɩ jɛɛ-yele pʋↄ nɩ a yel-bulisɩ a jaa na ɩ a jɩɛr, ɩ̃ ma lɛ ɛ̃ɛ bar a Naaŋmɩn torfʋ nɩ a ʋ nʋfʋ; a ala ɩ̃ dãa sɛw nyɩ maala ɩ̃ kↄ̃ hiin a yel-bil ala wa. ⁴³ “Nabier na pↄw na a nyɩmɩ Farɩsɩ nɩbɛ, a-na-ɩ nyɩ nʋ na a nii-sↄw jaajiir a puorfʋ yie pʋↄ, ɩ̃ ma mɩ bʋↄrↄ a nɩbɛ ba jaa ba puoro nyɩ a dar pʋↄ. ⁴⁴ Nabier na pↄw nyɩ na! A-na-ɩ nyɩ wↄ̃ na taa nɩ a yar ala kaarɩ̃ a nɩbɛ na ma nɛbɛ, ɩ̃ ma bↄ̃wnaa wa, a-na-ɩ bom ma be be miile a yar ʋ wa.” ⁴⁵ A ƴɛr-kpɛn-bↄ̃wnↄ kãw yel a Jeeju: “Jãjaana, a lɛ fʋ na ƴɛrɛ, má a sɩmɩ mɩ fʋ mɩ tʋrↄ.” ⁴⁶ A Jeeju yel: “Nabier na mɩ pↄw nyɩ na a nyɩmɩ ƴɛr-kpɛn-bↄↄnbↄ, a-na-ɩ nyɩ ma tuo na a nɩbɛ a to-bɛrɛ na kpɛmɛ a tuofʋ, ɩ̃ nyɩ maa ir a nyɩ nuu sɩɩrʼɩ̃ fɩ̃ɩ wa. ⁴⁷ Nabier na pↄw nyɩ na! A-na-ɩ nyɩ ma cↄↄrɩ̃ na a Naaŋmɩn ƴɛr-hierbe yar ɩ̃ a ɩ a nyɩ sãa-kʋnbↄ ɩ̃ kú. ⁴⁸ A lɛ, nyɩ miilʼã a nyɩ sↄw na a ala a nyɩ sãa-kʋnbↄ na dãa maal, a-na-ɩ bala ɩ̃ kú a Naaŋmɩn ƴɛr-hierbe ɩ̃ a nyɩ cↄↄrɩ̃ a ba yar. ⁴⁹ Ala-ɩ̃-sↄ a Naaŋmɩn na ɩ a Kpaarfʋ Sʋbↄ yel: ʻƖ̃ na tʋ̃ nɩ na a ƴɛr-hierbe nɩ a nɩ-tʋnɩsɩ a ba jie; ba na kú na a ŋmɛɛ ɩ̃ hʋↄl a ŋmɛɛ,ʼ ⁵⁰ a mɩnɛ a ƴɛrɩ̃ na tuo a dɩnaa nɩbɛ juu a Naaŋmɩn ƴɛr-hierbe jɩ̃ɩ ɩnɛ ba na deer, wa nyↄw nɩ a mɩnɛ a Naaŋmɩn na maal a tẽw, ⁵¹ ɩ̃ wa mɩ nyↄw nɩ a mɩnɛ ba na kú a Abɛl wa ta nɩ a Jakarɩ ba na kú a baar lofʋ jie nɩ a Naaŋmɩn puor-yir kpɛ̃ɛ sↄↄlɩ̃sↄw. Sɩrɛ jaa ɩ̃ yel nyɩ, ba na tuo na a dɩnaa nɩbɛ a ʋna ƴɛrɩ̃. ⁵² “Nabier na pↄw na a nyɩmɩ ƴɛr-kpɛn-bↄↄnbↄ, a-na-ɩ nyɩ irʼã a bↄ̃wfʋ nakili bar. Nyɩmɩ mɩ̃ɛ ma kpɛ wa, ɩ̃ nyɩ mɩ varʼã a sↄr a bala na dãa bʋↄrↄ ba kpɛ.” ⁵³ A lɛ a Jeeju na yi a jie ʋlↄ baar, a ƴɛr-kpɛn-bↄↄnbↄ nɩ a Farɩsɩ nɩbɛ nyↄw na ɩ̃ bʋↄrↄ ʋ a gↄn, papire nɩ ʋ, bʋↄrↄ ʋ ƴɛr ƴɛrɩ̃sɩ yayaw ⁵⁴ na ba bɩɩrɛ nɩ ʋ, ʋ na ƴɛr ƴɛrɩ̃ lɩɛb nyↄw nɩ a ʋ mɩ̃ɛ.

¹ A daar ʋlↄ pʋↄ, a nɩbɛ tiw na taa ture-ture, fʋrↄ taa nɛbɛ taa, a Jeeju ƴɛrʼɩ̃ a ʋ par-tuurbe na ʋ yel ba: “A dãdãw bom ɩ na: nyɩ́ gu nyɩ mɩ̃ɛ a Farɩsɩ nɩbɛ tabɩr ɩnɛ na ɩ a ba poe ayi tɛrɛfʋ. ² Bom ma be be na sↄↄlɩ̃ ɩ̃ mↄↄ yire eãa pʋↄ wa. ³ Ala-ɩ̃-sↄ a ala a jaa nyɩ na yele a libe pʋↄ na yi na cãa pʋↄ a ba bↄ̃wnaa, ɩ̃ a ala nyɩ na hũhune a di-bile pʋↄ ba na hierʼã a ala a gara jur. ⁴ “A nyɩmɩ na ɩ a ɩ̃ badɛɛ, ɩ̃ yele na kʋrↄ nyɩ, nyɩ taa jↄrↄ dãbɩ̃ɛ a bala ɩnɛ na ma kú a ɩ̃gan baar, ɩ̃ ma lɛ tʋↄrↄ maala bom kãw wa. ⁵ Ɩ̃ na miil nyɩ na a ʋlↄ na sɛw a nyɩ na jↄrↄ: nyɩ́ jↄrↄ a ʋlↄ na tʋↄrↄ diere a nɩrɛ baafʋ ɩ̃ mɩ tɛrɛ a tʋↄfʋ lↄbↄ nɩ ʋ ƴↄnↄ a wɛfʋ jie. Yel-mɩ̃ɛ ɩ̃ yele nyɩ, ʋlↄ nyɩ sɛw na jↄrↄ. ⁶ “A tɩ̃ɩtɩ̃ɩ, má a libie pie ba ma da nɩ a ba bõ-bie anuu. Ɩ̃-cɛ a Naaŋmɩn maa hiin bõ-ƴen a ba pʋↄ bar wa. ⁷ Ɩ̃ aa ɩ a ala tɛw ʋ wa; ʋ sↄrʼã a nyɩ jukↄbↄ tɩɛ jaa bↄ̃w a nʋↄr. Ala-ɩ̃-sↄ nyɩ taa ɩ a dãbɩ̃ɛ nyↄw nyɩ wa: nyɩ sa na a tɩ̃ɩtɩ̃ɩ-yayaw. ⁸ “Ɩ̃ yele nyɩ na, a nɩrɛ lɛ na cã yel a nɩbɛ nii-sↄw á ɩ̃ ben ʋ ɩ, a maa Nɩbɛ Bie na mɩ yelʼã a Naaŋmɩn sɩ-tʋnɩsɩ nii-sↄw a ɩ̃ ben a sʋbↄ ʋlↄ ɩ. ⁹ Ɩ̃-cɛ a nɩrɛ lɛ na cɩɩrɛ a nɩbɛ nii-sↄw a Ꞌwaa bↄ̃w ma wa, a maa Nɩbɛ Bie na mɩ cɩɩrɩ̃ na a Naaŋmɩn sɩ-tʋnɩsɩ nii-sↄw a maa bↄ̃w a sʋbↄ ʋlↄ wa. ¹⁰ “A nɩrɛ lɛ na kpɛrɛ a maa, Nɩbɛ Bie, a Naaŋmɩn na de na a ʋ fãa bar kʋ ʋ; ɩ̃-cɛ a nɩrɛ lɛ na sãwna a Naaŋmɩn Sɩɛ yuor, a Naaŋmɩn ma be na de a ʋ fãa bar kʋ ʋ wa. ¹¹ “A lɛ ba nↄↄ tawra nyɩ cere nɩ a puorfʋ yie pʋↄ, mɩɩ a tẽw nɩ-bɛrɛ nɩ a fãgã deme nii-sↄw, nyɩ taa ɩ a ɩ nyɩ tɩɛrʋ̃ a mɩnɛ nyɩ na ɩrɛ ɩ̃ mana a nyɩ ben, mɩɩ a ala nyɩ na sɛw nyɩ yel wa, ¹² a-na-ɩ a Naaŋmɩn Sɩɛ na mɩɩn nyɩ na a daar ʋlↄ pʋↄ a ala nyɩ na sɛw nyɩ yel.” ¹³ Daba dãa na be be a nɩbɛ sↄ̃w ɩ̃ yel a Jeeju: “Jãjaana, yel a ɩ̃ yɛbɛ ʋ ɩ a sɩ po a sɩ gã-yele.” ¹⁴ A Jeeju yel ʋ: “Daba wee! Ala ɩ̃ ƴↄ̃w ma ɩ̃ ɩ a nyɩ ƴɛr-guoro, mɩɩ ɩ̃ na poro nyɩ a nyɩ gã-yele?” ¹⁵ Ɩ̃ na ʋ yel a nɩbɛ: “Nyɩ́ tɛrɛ jɩmɛ ɩ̃ mɩ tɛrɛ a nyɩ mɩ̃ɛ a yel-yaw bↄfʋ ɩnɛ, a-na-ɩ a nɩrɛ baafʋ ma yi a ʋ yel-yaw tɛrɛfʋ ɩnɛ wa.” ¹⁶ Ala-ɩ̃-sↄ a Jeeju lↄb a sʋkpa na kʋ ba. Ʋ yelʼã: “Daba dãa na be be na ɩ naaba, na ma pↄw yel-yayaw a ʋ por pʋↄ. ¹⁷ Ʋ nyↄw na ɩ̃ pɛrɛ a ʋ suur pʋↄ yele nɩ: ʻMɩnɛ ɩ̃ na ɩ? A-na-ɩ maa tɛrɛ a jie ɩ̃ na bine a ɩ̃ yele wa.ʼ ¹⁸ Ɩ̃ na ʋ yel: ʻNↄhↄ̃ ɩ̃ na maal: Ɩ̃ na wɛlʼã a ɩ̃ bobo ɩ̃ lɛ mɛ bõ-bɛrɛ, na ɩ̃ woor a ɩ̃ ci nɩ a ɩ̃ yele a jaa ƴↄ̃w, ¹⁹ ɩ̃ na ɩ̃ pãa yel a ɩ̃ mɩ̃ɛ: Daba wee! Fʋ tɛrɛ na yele yayaw na fʋ bin yomo yayaw ɩnɛ. Tɛrɛ nʋ̃ↄ jɛ nɩ, dɩrɛ nyuure nɩ.ʼ ²⁰ Ɩ̃-cɛ a Naaŋmɩn yelʼã a daba ʋlↄ: ʻFʋ ɩ na dãbol! A dɩnaa tɩsↄw na, ba na de na a fʋ baafʋ ɩ̃ a ana yele fʋ na gbɛɛrɩ̃ bin, ala na sↄ?ʼ ” ²¹ Ɩ̃ a Jeeju yel ba: “A lɛ a mɩ wↄ̃ nɩ a ʋlↄ na wobo a yel-yaw bine a ʋ mɩ̃ɛ ɩnɛ ɩ̃ ma ɩ naaba a Naaŋmɩn nii-sↄw wa.” ²² A ala ɩ̃ baar, a Jeeju yelʼã a ʋ par-tuurbe: “Ala-ɩ̃-sↄ ɩ̃ yele nyɩ, nyɩ taa waala a nyɩ baafʋ ɩnɛ yele nɩ a bõ nyɩ na dɩrɛ, mɩɩ waala nɩ a nyɩ ɩ̃gan ɩnɛ a bõ nyɩ na nyɛ su wa. ²³ Má a baafʋ gãw na a bõ-dɩraa ɩ̃ má a ɩ̃gan mɩ gãw na a cẽcen. ²⁴ Nyɩ́ Ꞌwuor nyɛ a gbagbar: ba maa bʋr wa, ba maa ŋma wa, baa mɩ tɛrɛ gar mɩɩ boor ma bin ci wa, ɩ̃-cɛ a Naaŋmɩn ɩ̃ guolo ba. Ɩ̃ a nyɩmɩ, má nyɩ sa na a lili. ²⁵ A nyɩ waalɩ̃fʋ pʋↄ, ala a nyɩ pʋↄ na tʋↄ tↄ a ʋ baafʋ bibie dↄↄl fɩ̃ɩ? ²⁶ A ala ɩ nyaa tʋↄrↄ maala a ala na ɩ a fɩ̃ɩ wa, bõ ɩ a nyɩ waala a ala ɩnɛ na cɛ? ²⁷ Nyɩ́ Ꞌwuor a tɩ-pube: ba maa tʋ̃ tʋn wa, ba maa wob cẽcen su wa, ɩ̃-cɛ ɩ̃ yele nyɩ na, a Salʋmↄ̃ mɩ̃ɛ nɩ a ʋ na-yele a jaa ma dãa su cẽcen ʋ vɩlaa ta a tɩ-pube asɩmɛ bõ-ƴen wa. ²⁸ A ala ɩ a Naaŋmɩn ma ƴaarɩ̃ na a tɩ-pube ala a lɛ, na be a mↄↄ pʋↄ a dɩnaa ɩ̃ a ba lↄbↄ ƴↄnↄ a vũu pʋↄ a bio, ʋ kↄ̃ tʋↄ maal nyɩ a gãw a lɛ wa mɩɩ? A nyɩ ƴↄ̃w-nyãa pabʼã a Naaŋmɩn jie. ²⁹ Ɩ̃ a nyɩmɩ, nyɩ taa bʋↄrↄ a ala nyɩ na dɩrɛɛ wa, mɩɩ a ala nyɩ na nyuure wa, ɩ̃ nyɩ taa ɩ a pʋlɩ̃nyɛ vʋ̃ↄnↄ nyɩ a ala ɩnɛ wa. ³⁰ A-na-ɩ a bala na ma bↄ̃w a Naaŋmɩn wa ɩ̃ ma bʋↄrↄ a yele ala a jaa, ɩ̃ a nyɩmɩ, a nyɩ Sãa bↄ̃w ka nyɩ bʋↄrↄ na a ana yele. ³¹ Nyɩ́ ɛ̃ɛ bʋↄrↄ a Naaŋmɩn fãw ɩ̃-cɛ ʋ na kʋ nyɩ na a yele ala dↄↄl. ³² “Ɩ̃ piir, nyaa jɛ̃ bom wa, ɩ̃ nyɩ taa jↄrↄ dãbɩ̃ɛ wa, a-na-ɩ a nyɩ Sãa, a nʋmↄ ʋ na ʋ de nyɩ ƴↄ̃w a ʋ fãw pʋↄ. ³³ Nyɩ́ da a nyɩ yele de a libie po a nãw deme; nyɩ́ bʋↄrↄ a libie wʋʋr ala na ma sãwna wa, ɩ̃ kaala a na-yele na ma be baarfʋ jie wa bine a saa juu, a-na-ɩ a nyanyuur ma pɩɛlɛ be wa, ɩ̃ a kpolo ma be be mↄↄrↄ wa. ³⁴ Nyɩ́ bↄ̃wnaa, a jie a nyɩ na-yele na be, be a nyɩ tɩɛrɩ̃sɩ na mɩ be. ³⁵ “Nyɩ́ gbɛɛrɩ̃ a nyɩ mɩ̃ɛ ɩ̃ ƴↄ̃w a nyɩ lãpar, ³⁶ ɩ̃ wↄ̃ taa nɩ a tʋ̃tʋnbↄ na gure a ba nɩ-kpɛ̃ɛ, a daar ʋlↄ ʋ na yire a kul-taa fɛtɩ jie waara, a mɩnɛ a ʋlↄ wa wa ta ŋmeere a pan, ba yuo ʋ a jie naan. ³⁷ Á nʋmↄ a tʋ̃tʋnbↄ bala a ba nɩ-kpɛ̃ɛ na waara nyɛrɛ a ba jɩnɛɛ nɩ a mimir. Yel-mɩ̃ɛ ɩ̃ yele nyɩ, ʋ na gbɛɛrɩ̃ na a ʋ mɩ̃ɛ ɩ̃ ƴↄ̃w ba a ba jɛ a dɩb par ɩ̃ ʋ taw ta po ba a dɩb. ³⁸ A ala saarɩ̃ ɩ a tɩsↄw porɩ̃, mɩɩ a nↄdɛɛ kuon daar ʋ wa nyɛ a lɛ, a na nʋmↄ na a ʋ tʋ̃tʋnbↄ bala. ³⁹ Nyɩ́ bↄ̃wnaa, a ala ɩ a yir sʋbↄ dãa na bↄ̃w a lɛɛr-buor a nyanyuur na waara, ʋ kↄ̃ bar ʋ ʋ wa kpɛ a yir pʋↄ wa. ⁴⁰ A nyɩmɩ mɩ, nyɩ́ gbɛɛrɩ̃ gu, a-na-ɩ a Nɩbɛ Bie na wa na a daar ʋlↄ pʋↄ nyɩ na ma tɩɛrʼɩ̃ ʋ wa.” ⁴¹ A Pɩɛr soor a Jeeju: “Nɩ-kpɛ̃ɛ, sɩmɩ tɛw fʋ lↄb a sʋkpa na kʋ mɩɩ a nɩbɛ ba jaa fʋ mɩ yele?” ⁴² A Nɩ-kpɛ̃ɛ yel: “Tʋ̃tʋ̃-buor ɩ̃ ɩ a nɩ-dẽdẽ na tɛrɛ a yɛ̃? Ʋ ɩ na a ʋlↄ a ʋ nɩ-kpɛ̃ɛ na ƴↄ̃w a ʋ Ꞌwuoro a ʋ yir deme kʋrↄ ba a dɩb a daar ʋlↄ na sɛw. ⁴³ Nʋ̃ↄ na be na a ʋna tʋ̃tʋnↄ jie a mɩnɛ a ʋ nɩ-kpɛ̃ɛ na lɩɛbɛ waara nyɛrɛ ʋ ʋ maala a lɛ. ⁴⁴ Sɩrɛ jaa ɩ̃ yele nyɩ, a ʋ nɩ-kpɛ̃ɛ na kʋ ʋ na a ʋ yele a jaa ʋ Ꞌwuoro. ⁴⁵ Ɩ̃ a ala ɩ a tʋ̃tʋnↄ ʋlↄ yelʼã a ʋ mɩ̃ɛ á ʋ nɩ-kpɛ̃ɛ ma waara fↄw wa, ɩ̃ nyↄw ɩ̃ pↄbↄ a tʋ̃tʋnbↄ nɩ a tʋ̃tʋ̃-pooli, na ʋ dɩrɛ nyuure nɩ, a dãa kʋrↄ ʋ, ⁴⁶ a ʋ nɩ-kpɛ̃ɛ na wa na a bibir ʋlↄ ʋ na ma tɩɛrʼɩ̃ wa nɩ a daar ʋlↄ ʋ na ma bↄ̃w wa, ɩ̃ ʋ na ŋma ʋ na ayi lↄb ʋ ƴↄ̃w a bala pʋↄ na ma tɛrɛ ƴↄ̃w-nyãa wa. ⁴⁷ “A tʋ̃tʋnↄ ʋlↄ na bↄ̃w a ala a ʋ nɩ-kpɛ̃ɛ na bʋↄrↄ ɩ̃ ma gbɛɛrɩ̃ a yele ɩ̃ maal tu nɩ a ʋ nɩ-kpɛ̃ɛ pʋ-tɩɛrʋ̃ wa, ba na nar ʋ na yayaw. ⁴⁸ Ɩ̃-cɛ a ʋlↄ na ma bↄ̃w buon wa ɩ̃ maal a ala na sɛw a ba na pↄb ʋ, ba na nar ʋ na fɩ̃ɩ tɛw. A ʋlↄ ba na kʋ a yayaw ba na soor ʋ na yaw mɩ, ɩ̃ a ʋlↄ nuumɩ ba na ƴↄ̃w a yayaw, ba na soorʼã a gãw a lɛ. ⁴⁹ “Vũu ɩ̃ wa nɩ lↄb ƴↄ̃w a tẽw pʋↄ, ɩ̃ na ɩ̃ tɩɩ bʋↄrↄ ʋ gↄr Ꞌle. ⁵⁰ Ɩ̃ sɛw na ɩ̃ kpɛ a won pʋↄ a wↄ̃ taa nɩ kʋ̃ↄ pʋↄ ba mʋrↄ ma, ɩ̃ a tɩɩ na kpɛmɛ kʋ ma wa tara nɩ a mɩnɛ a na maala baara. ⁵¹ Nyɩ tɩɛrʼã beeka pɩɛnfʋ ɩ̃ wa nɩ ƴↄnↄ a tẽw pʋↄ mɩɩ? Kpee! Ɩ̃ yele nyɩ na, wɛ-taa ɩ̃ ɛ̃ɛ wa nɩ. ⁵² Wa nyↄw nɩ a ƴɛ̃ƴɛrɩ̃, a nɩbɛ anuu na be a yir bõ-ƴen, na wɛrɛ na taa; ata na jɛbɛ nɩ na ayi, ɩ̃ ayi mɩ jɛbɛ nɩ ata. ⁵³ A sãa na jɛbɛ nɩ na a ʋ bi-daba ɩ̃ a bi-daba mɩ jɛbɛ nɩ a ʋ sãa; a mã na jɛbɛ nɩ na a ʋ bi-pↄw ɩ̃ a bi-pↄw mɩ jɛbɛ nɩ a ʋ mã; a dɩ̃ɛ-mã na jɛbɛ nɩ na a ʋ bi-daba pↄw, ɩ̃ a bi-daba pↄw mɩ jɛbɛ nɩ a ʋ dɩ̃ɛ-mã.” ⁵⁴ A Jeeju mɩ dãa na yele a nɩbɛ: “A nyɩmɩ wa nyɛ a dↄ̃dↄrɩ̃-salaa a mↄtↄ̃w mʋrfʋ loor, nyɩ ma yelʼã a jie naan áa saa na wa na, ɩ̃ a lɛ a ma sɩrɩ̃ maal. ⁵⁵ Ɩ̃ a sɛsɛb ɩ̃ wa yi a tẽw parɩ̃ ɩ̃ tɛbɛ, nyɩ ma yelʼã a susuur na kú na, ɩ̃ a lɛ a ma sɩrɩ̃ maal. ⁵⁶ Nyɩna poe ayi deme naa! Nyɩ ma tʋↄ na bↄ̃w a mɩnɛ a yele na be a tẽw pʋↄ nɩ a saꞋlon, ɩ̃ mɩnɛ a ɩ a nyɩ maa lɛ ɛ̃ɛ bↄ̃w a mɩnɛ a daar na na be a ƴɛ̃ƴɛrɩ̃ wa? ⁵⁷ “Mɩnɛ a ɩ a nyɩ maa tɩɛr nyɛ a nyɩ mɩ̃ɛ a ala na tor sɛw a nyɩ na maal wa? ⁵⁸ A ala ɩ a fʋ san-sʋbↄ bʋↄl fʋ na cere nɩ a ƴɛr-guoro jie, dɩ tuo a nyɩ guor a ƴɛrɩ̃ be a sↄr juu a baar. A ala ma ɩ lɛ ʋ wa, ʋ na fɛr fʋ na ta nɩ a ƴɛr-guoro nii-sↄw, a ƴɛr-guoro de fʋ kʋ a kasu-gure, ɩ̃ a kasu-gure de fʋ pↄw a kasu pʋↄ. ⁵⁹ Ɩ̃ yele fʋ na, faa be na yi a be, ɩ̃ ma ɩ fʋ ya na a fʋ san a jaa baar wa.”

¹ A daar ʋlↄ naan, a nɩbɛ wa na mana kʋrↄ a Jeeju a mɩnɛ a jamana Pɩlatɩ na ɩ a ba kú a Galile nɩbɛ ŋmɛɛ a daar ʋlↄ ba na be a baar lofʋ jie. ² A Jeeju yel ba: “Nyɩ tɩɛrʼã beeka a ba kú ba na a lɛ a-na-ɩ ba nyɩrɩ̃ na maal a fãa gãw a Galile nɩbɛ ba jaa mɩɩ? ³ Aa ɩ lɛ ʋ wa! Ɩ̃-cɛ a nyɩmɩ mɩ, a ala ɩ nyaa lɩɛb a nyɩ yɛ̃ wa, lɛ nyɩ na mɩ kpi nyɩ jaa. ⁴ Mɩɩ a nɩbɛ pie-nʼanuu-nʼata bala a yir woor na kar lo kú a be a Silowe, nyɩ tɩɛrʼã beeka a bala ɩ̃ nyɩrɩ̃ bɩɛ gãw a Jerujalɛm tẽ-deme ba jaa mɩɩ? ⁵ Aa ɩ lɛ ʋ wa! Ɩ̃-cɛ a nyɩmɩ mɩ, a ala ɩ nyaa lɩɛb a nyɩ yɛ̃ wa, lɛ nyɩ na mɩ kpi nyɩ jaa.” ⁶ A Jeeju mɩ lↄbʼã a sʋkpa na kʋ ba: “Daba kãw dãa na tɛrɛ fɩgɩ tɩɛ a ʋ puo pʋↄ. Bibir kãw, ʋ cenʼã a ʋ Ꞌwↄ̃w a wↄmↄ, ɩ̃ na ʋ bↄ faa. ⁷ A lɛ a be, ʋ yel a ʋ tʋ̃tʋ̃-bie: ʻGɛlɛ! Yomo ata nɩ a dɩnaa ɩ̃ na ma wa a tɩɛ na wↄmↄ Ꞌwↄ̃wfʋ ɩ̃ ma bↄ faa. Bõ ɩnɛ ʋ na piw a wɩɛr a lɛ a pↄrↄ? Ŋmaa ʋ lↄb bar!ʼ ⁸ A tʋ̃tʋ̃-bie yel ʋ: ʻNɩ-kpɛ̃ɛ, bar ʋ a yuon na go. Ɩ̃ na kↄ na viirĩ kolĩ ʋ ɩ̃ na ɩ̃ ƴↄ̃w a pʋↄrʋ̃. ⁹ A nʋmↄ wa sↄw, a ka nɩ a yuon na na waara, ʋ na wↄnↄ. A ala ma ɩ lɛ ʋ wa, fú ɩ a ba ŋmaa ʋ lↄb bar.ʼ ” ¹⁰ A bibi-ciiraa dayen, a Jeeju jaana na a nɩbɛ a puorfʋ yir kãw pʋↄ. ¹¹ A be, ʋ nyɛ na pↄw a kↄ̃tↄn na ka, ʋ ɩ wʋlɩ̃ maalʼɩ̃ yomo pie-nʼanuu-nʼata ɩ̃ maa mɩ tʋↄ dↄl fɩ̃ɩ wa. ¹² A Jeeju nyɛ ʋ na ɩ̃ bʋↄl ʋ ʋ wa, ʋ yel ʋ: “Pↄw wee, a fʋ wʋlɩ̃ baar fʋ na!” ¹³ Ɩ̃ na ʋ dↄↄl ʋ a nur, a pↄw dↄl a jie naan, ɩ̃ nyↄw ɩ̃ pɛwrɛ a Naaŋmɩn. ¹⁴ Ɩ̃-cɛ suur nyↄw na a puorfʋ yir nɩ-kpɛ̃ɛ, a mɩnɛ a Jeeju na kpaar a pↄw a bibi-ciiraa dayen, ʋ yel a nɩbɛ: “Bibie ayʋↄb nyɩ sɛw nyɩ tʋ̃ a tʋn. Nyɩ́ ma wa a bibie ala pʋↄ a ba kpaar a nyɩ wʋlɩ̃sɩ. Nyɩ taa ma waara a bibi-ciiraa dayen wa!” ¹⁵ A Nɩ-kpɛ̃ɛ yel ʋ: “Nyɩna poe ayi deme naa! A nyɩ jaa bõ-ƴene-ƴene maa yuo a nyɩ nii mɩɩ a nyɩ bʋn a bibi-ciiraa dayen cenʼɩ̃ a ba nyu kʋ̃ↄ wa mɩɩ? ¹⁶ Nyɩ́ nyɛ a pↄw na. Ʋ ɩ na a Abʋraham yãw a Satã na hʋↄl a yomo pie-nʼanuu-nʼata. Aa dãa sɛw ɩ̃ na faa ʋ a ʋna hʋʋr naan ɩnɛ a bibi-ciiraa dayen wa mɩɩ?” ¹⁷ A mɩnɛ a Jeeju na ƴɛrɛ a lɛ, vĩ nyↄw na a ʋ sama-deme, ɩ̃ a nɩbɛ ba jaa cɩlɛ a tʋ̃-vɛlɛ ala a jaa ʋ na maala ɩnɛ. ¹⁸ A Jeeju lɛ yel ba na go: “Bõ a Naaŋmɩn fãw wↄ̃ taa nɩ? Bõ ɩ̃ na de manʼɩ̃ ʋ? ¹⁹ Ʋ wↄ̃ na taa nɩ a muta-tɩɛ bir kaarɩ̃ a daba na de bʋr a ʋ nakʋↄ pʋↄ, ʋ bul nʋ̃ↄ ɩ tɩɛ, a lili cen na ƴↄ̃w a ba cor a ʋ wulbie juu.” ²⁰ Ʋ lɛ yelʼã: “Bõ ɩ̃ na de manʼɩ̃ a Naaŋmɩn fãw? ²¹ Ʋ wↄ̃ na taa nɩ a tabɩr a pↄw na de ƴↄ̃w a buru jↄ̃ yaw pʋↄ ʋ maal a jↄ̃ a jaa a vʋ̃ ir.” ²² A Jeeju cere na a Jerujalɛm na ʋ cʋbↄ a tẽ-bɛrɛ nɩ a tẽ-bil jaana a nɩbɛ a Naaŋmɩn ƴɛrɩ̃, ²³ a nɩrɛ kãw soor ʋ: “Nɩ-kpɛ̃ɛ, a nɩbɛ bala na pↄwrↄ a Naaŋmɩn faafʋ, fɩ̃ɩ tɛw ba ɩ mɩɩ?” Á Jeeju yel ba: ²⁴ “Nyɩ́ dɩ tuo kpɛ nɩ a dↄ̃dↄr nↄ-bile pʋↄ. Maa ɩ̃ yele nyɩ, nɩ-yaw na bʋↄrↄ na ba kpɛ ɩ̃ ba kↄ̃ tʋↄ wa. ²⁵ “A daar ɩ̃ wa ta a yir sʋbↄ ir nyↄw a pan kpal, nyɩ na ɩraa na a be a yẽw ɩ̃ ŋmeere a pan yele nɩ: ʻNɩ-kpɛ̃ɛ, yuo sɩ a pan bɩlɛ.ʼ Ɩ̃ ʋ na yel nyɩ na: ʻMaa bↄ̃w a jie nyɩ na yi wa!ʼ ²⁶ A be nyɩ na nyↄw ɩ̃ yele: ʻMá a sɩmɩ ɩ̃ lãa dɩ taa a dɩb, lãa nyu nɩ, ɩ̃ a fʋ man a Naaŋmɩn ƴɛrɩ̃ a sɩ tẽw.ʼ ²⁷ Ʋ na lɛ yel nyɩ na: ʻMaa bↄ̃w a nyɩ yifʋ jie wa. Nyɩ́ taw yi ɩ̃ cɛ ma, a nyɩmɩ nyɩ jaa na maala a fãa!ʼ ²⁸ A be, a na ɩ nyɩ na kõ-yel-bie nɩ nyɩmɛ nyɩrfʋ, a lɛ nyɩ na nyɛrɛ a Abʋraham nɩ a Ɩjakɩ nɩ a Jakↄb nɩ a Naaŋmɩn ƴɛr-hierbe ba jaa a Naaŋmɩn tẽw, ɩ̃ a nyɩmɩ ʋlↄ, a ɩ ba lↄb nyɩ na bar a yẽw. ²⁹ A nɩbɛ na mɩ yi na a mↄtↄ̃w purfʋ jie nɩ a mↄtↄ̃w mʋrfʋ jie nɩ a tẽw lõbobo a jaa ɩ̃ wa jɛ dɩrɛ a dɩb a be a Naaŋmɩn tẽw. ³⁰ Nyɩ́ cɛlɛ: a par-pↄↄrbↄ ŋmɛɛ na lɩɛbʼã ɩ a ni-dierbe ɩ̃ a ni-dierbe ŋmɛɛ lɩɛb ɩ a par-pↄↄrbↄ.” ³¹ A ala na yi tↄ, a Farɩsɩ nɩbɛ ŋmɛɛ wa na yel a Jeeju: “Ir yi cen ji-kpee, a-na-ɩ a jamana Ɛrↄdɩ bʋↄrↄ na ʋ kú fʋ.” ³² A Jeeju yel ba: “Nyɩ́ cen na yel a ʋna sɩ̃sↄl naan, áa dɩnaa nɩ a bio, á ɩ̃ na diw na a kↄ̃tↄn-bebe bar, ɩ̃ kpaar a nɩbɛ wʋlɩ̃sɩ, ɩ̃ a bibie ata dayen á ɩ̃ tʋn na baarʼã. ³³ Ɩ̃-cɛ a dɩnaa nɩ a bio nɩ a dayere, a sɛw na ɩ̃ cere nɩ a ɩ̃ sↄr, a-na-ɩ aa sɛw a Naaŋmɩn ƴɛr-hiere na kpi ji-kpee, ɩ̃ ma ɩ a Jerujalɛm-tẽw pʋↄ ʋ wa. ³⁴ “A nyɩmɩ Jerujalɛm tẽ-deme na ma kú a Naaŋmɩn ƴɛr-hierbe ɩ̃ ma lↄb a bala ʋ na tʋ̃ a nyɩ sↄ̃w nɩ a kubie, gbɛɛ amɩnɛ ɩ̃ dãa bʋↄrↄ ɩ̃ kpaarɩ̃ nyɩ ƴↄ̃w a ɩ̃ pulẽe, a mɩnɛ a nʋ̃ↄ na ma kpaarɩ̃ a ʋ bil ƴↄ̃w a ʋ pɩrɛ pʋↄ, ɩ̃ a nyaa sↄw wa. ³⁵ Nyɩ́ cɛlɛ! A nyɩ yir na lɩɛbʼã ɩ da-kpolo. Ɩ̃ yele nyɩ na, nyɩ kↄ̃ lɛ su ma mimir wa tara nɩ a daar ʋlↄ nyɩ na yele áa nʋmↄ a ʋlↄ na waara nɩ a Nɩ-kpɛ̃ɛ yuor wa!”

¹ Bibi-ciiraa dayen, a Jeeju kpɛ na a Farɩsɩ nɩbɛ nɩ-kpɛ̃ɛ kãw yir dɩb dɩfʋ jie, a ba jʋʋrↄ ʋ. ² A be, daba kãw wʋlɩ̃-mↄraa na nyↄw ɩraa na a ʋ nii-sↄw, ³ a Jeeju soor a ƴɛr-kpɛn-bↄↄnbↄ nɩ a Farɩsɩ nɩbɛ: “Sↄr be na be a nɩrɛ na kpɛmɛ a wʋlɩ̃ sʋbↄ a bibi-ciiraa dayen mɩɩ, sↄr ma be be wa?” ⁴ Ɩ̃-cɛ baa haa ʋ nʋↄr wa. A lɛ, a Jeeju nyↄw a wʋlɩ̃ sʋbↄ kpaar a ʋ wʋlɩ̃, ɩ̃ ɩ ʋ yi cere. ⁵ Ɩ̃ ʋ yel ba: “A ala ɩ nɩrɛ a nyɩ sↄ̃w tɛrɛ na bi-daba mɩɩ naab ʋ lo a bule pʋↄ a bibi-ciiraa dayen, ʋ na bar ʋ na a be mɩɩ? Má ʋ na ir ʋ na fↄfↄw.” ⁶ A baa tʋↄ haa nʋↄr ƴɛr ƴɛrɩ̃ wa. ⁷ A Jeeju nyɛ na a mɩnɛ a nɩbɛ bala ba na bʋↄl a dɩb ɩnɛ na tuure a nii-sↄw jaajiir ɩ̃ lↄb a sʋkpa na kʋ ba jaa: ⁸ “A ala ɩ a nɩrɛ bʋↄl fʋ na a kul-taa fɛtɩ jie, taa de nĩe cen na jɛ a nii-sↄw jaajie wa. Nɩrɛ kãw na gãw fʋ ba na mɩ bʋↄl na tʋↄ na ta, ⁹ ɩ̃ a ʋlↄ na bʋↄl nyɩ wa wa yel fʋ á fʋ ir ɩ̃ cɛ a jaajie kʋ ʋ, a lɛ, vĩ na kpɛ fʋ na, a mɩnɛ fʋ na ire eere a jaaji-baaraa pʋↄ. ¹⁰ Ɩ̃-cɛ a ala ɩ ba bʋↄl fʋ na, ɛ̃ɛ cen na jɛ a jaaji-baaraa pʋↄ. A lɛ a ʋlↄ na bʋↄl fʋ nↄↄ kpɛɛrɛ ʋ na yel fʋ na: ʻƖ̃ baraa wee! Ir do ka iin a nii-sↄw jaajie pʋↄ.ʼ Be a fʋ yuor na tɩmɛ a nɩbɛ ba jaa nii-sↄw fʋ na jɛ dɩrɛ nɩ a dɩb. ¹¹ A-na-ɩ a ʋlↄ na bʋↄrↄ ʋ bɛrmɛ a juu, a Naaŋmɩn na wur ʋ na suu nɩ, ɩ̃ a ʋlↄ na sↄw wur a ʋ mɩ̃ɛ, a Naaŋmɩn na jɛw ʋ na irʼɩ̃.” ¹² A ala ɩ̃ baar a Jeeju yelʼã a ʋlↄ na bʋↄl ʋ a fɛtɩ ɩnɛ: “A ala ɩ fʋ bʋↄlↄ na nɩbɛ a dɩb ɩnɛ, taa bʋↄlↄ a fʋ badɛɛ, mɩɩ a fʋ yɛɛr, mɩɩ a fʋ bal nɩbɛ, mɩɩ a fʋ tↄ deme na ɩ a naabsɩ wa, a-na-ɩ ba na mɩ tʋↄ na maal fʋ a ala fʋ na maal ba, na ba ya fʋ. ¹³ Ɩ̃-cɛ a ala ɩ fʋ bʋↄlↄ na a nɩbɛ a fɛtɩ ɩnɛ, bʋↄl a nãw deme, nɩ a nɩ-kↄↄr, nɩ a gbɛɛ, nɩ a jↄn. ¹⁴ A lɛ, nʋ̃ↄ na be na a fʋ jie a-na-ɩ baa tʋↄrↄ yara fʋ wa, ɩ̃ a Naaŋmɩn ɩ̃ na ya fʋ a daar ʋlↄ a nɩ-torisɩ na ire a kũu pʋↄ.” ¹⁵ A bala na lãa be nɩ a Jeeju a dɩb dɩfʋ jie, bõ-ƴen wõ na a ƴɛrɩ̃ ʋlↄ ɩ̃ yel a Jeeju: “A nʋmↄ a ʋlↄ nↄↄ dɩrɛ a dɩb a Naaŋmɩn tẽw!” ¹⁶ A Jeeju yel ʋ: “Daba kãw maalʼã fɛtɩ dɩb ɩ̃ bʋↄl nɩ-yayaw. ¹⁷ A lɛ a dɩb dɩfʋ daar na ta, ʋ tʋ̃ na a ʋ tʋ̃tʋnↄ ʋ cen na yel a bala ʋ na bʋↄl a fɛtɩ jie, á ba wa a-na-ɩ ba gbɛɛrɩ̃ na a yele a jaa baar. ¹⁸ Ɩ̃-cɛ a ba jaa bõ-ƴene-ƴene nyↄw na a yele ɩ̃ sↄrↄ. A dãdãw sʋbↄ yelʼã a tʋ̃tʋnↄ: ʻƖ̃ da na po-paalaa a sɛw ɩ̃ cen na Ꞌwuor kãa. Gaafɩra, maa tʋↄrↄ wɩɛrɛ wa.ʼ ¹⁹ A kãw yel ʋ: ʻƖ̃ da na nadɛɛ pie ɩ̃ bʋↄrↄ ɩ̃ tʋ̃ nɩ ba tʋn Ꞌwuor je kãa. Gaafɩra, maa tʋↄrↄ wɩɛrɛ wa.ʼ ²⁰ A bõ-ƴen lɛ yel ʋ: ʻƖ̃ de na pↄw paalʋ̃ʋ na. Ala-ɩ̃-sↄ maa tʋↄrↄ wɩɛrɛ be wa.ʼ ²¹ Á tʋ̃tʋnↄ lɩɛb kul a ʋ nɩ-kpɛ̃ɛ sɛ̃ na man ʋ a lɛ, a suur nyↄw a yir sʋbↄ ʋ yel a ʋ tʋ̃tʋnↄ: ʻLɩɛb cen fↄfↄw a daa pʋↄ nɩ a sↄɛ pʋↄ bↄ a nãw deme, nɩ a nɩ-kↄↄr, nɩ a jↄn, nɩ a gbɛɛ wa nɩ a ka.ʼ ²² A ɩ na fɩ̃ɩ a tʋ̃tʋnↄ lɩɛb wa yel: ʻNɩ-kpɛ̃ɛ, ɩ̃ maalʼã a mɩnɛ fʋ na yel ɩ̃-cɛ jaajiir cãa na cɛ.ʼ ²³ A be jie, a nɩ-kpɛ̃ɛ yel ʋ: ʻLɩɛb cen a sↄr-bil pʋↄ nɩ a sɛɛr pʋↄ na fʋ fɛr a nɩbɛ a ba wa kpɛ, a ɩ̃ yir na sɛw. ²⁴ Ɩ̃ yele nyɩ na, a bala ɩ̃ na dãa bʋↄl, nɩrɛ kãw a ba sↄ̃w ma be na Ꞌlɛm a ɩ̃ dɩb wa.ʼ ” ²⁵ A nɩ-yaw dãa na tuure a Jeeju ʋ lɩɛb yel ba: ²⁶ “A ala ɩ a nɩrɛ waara na a ɩ̃ sɛ̃ ɩ̃ ma Ꞌlaar a ʋ sãa, mɩɩ a ʋ mã, mɩɩ a ʋ pↄw, mɩɩ a ʋ bibiir, mɩɩ a ʋ yɛɛr, mɩɩ a ʋ yɛ-pↄↄbↄ, nɩ a ʋlↄ mɩ̃ɛ jaa wa, Ꞌwaa tʋↄrↄ ɩrɛ a ɩ̃ par-tuure wa. ²⁷ A ʋlↄ na ma de a ʋ nɩ-kʋ-daa tuo tuure nɩ ma wa, Ꞌwaa tʋↄrↄ ɩrɛ a ɩ̃ par-tuure wa. ²⁸ A ala ɩ a nɩrɛ a nyɩ sↄ̃w bʋↄrↄ na ʋ mɛ yir woor, má ʋ na jɛ na sɛr ɩ̃ sↄr a yele je kãa a ala ɩ a libie ala ʋ na tɛrɛ na ta na a yir tʋmↄ a jaa. ²⁹ A ala ma ɩ lɛ ʋ wa, ʋ kpar a yir baar ɩ̃ ma lɛ tʋↄrↄ a yir mɩɛrɛ baara wa, a bala ba jaa na nyɛrɛ a lɛ, ba na laara ʋ na yele nɩ: ³⁰ ʻA daba na mɛ na a ʋ yir ta nɩ sↄ̃w ɩ̃ ma tʋↄ baar wa.ʼ ³¹ Mɩɩ a ala ɩ a jamana kãw bʋↄrↄ na ʋ cen na jɛbʼɩ̃ a ʋ jaman-tↄ sʋbↄ kãw, má ʋ na jɛ na pɛ je kãa a ala ɩ ʋ na tʋↄ na de dabsɩ ture pie tuoro nɩ a ʋlↄ na tɛrɛ dabsɩ ture lɩjɛr waara nɩ a ʋ jie. ³² A ala ɩ Ꞌwaa tʋↄrↄ wa, a lɛ a jamana ʋlↄ na cãa be a nɩdaa waara, ʋ na tʋ̃ na nɩbɛ a ʋ jie a ba ɓaalɩ̃ ʋ. ³³ A lɛ ʋ mɩ, nɩrɛ ma be a nyɩ sↄ̃w na tʋↄrↄ ɩrɛ a ɩ̃ par-tuure ɩ̃ a ala ma ɩ ʋ jaarʼã a ʋ yele a jaa ʋ na sↄ bar wa. ³⁴ “A nasõ ɩ na bõ-son ɩ̃-cɛ a ala ɩ a ʋ nʋ̃ↄ yi na, mɩnɛ ba na ɩ ɩ̃ maal ʋ ʋ lɛ nʋmↄ? ³⁵ Aa tʋↄrↄ saala a tene nãw wa, aa mɩ tʋↄrↄ ɩrɛ pʋↄrʋ̃ wa. Yẽw ba ma lↄb ʋ bar. A ʋlↄ na tɛrɛ tobo cɛlɛ nɩ, ú wonaa!”

¹ A lãpo-dierbe nɩ a nɩ-faar ba jaa taw na pɩɛl a Jeeju cɛlɛ a ʋ ƴɛrɩ̃, ² a Farɩsɩ nɩbɛ nɩ a ƴɛr-kpɛn-bↄↄnbↄ hũhune ɩ̃ yele: “A daba na sↄw na de a nɩ-faar a ba lãa dɩrɛ a dɩb.” ³ A Jeeju lↄb a sʋkpa na kʋ ba: ⁴ “A ala ɩ a nɩrɛ a nyɩ sↄ̃w tɛrɛ na piir kʋbaa, ɩ̃ a bõ-ƴen wa bↄr, ʋ kↄ̃ bar a kʋbaa for bir bala na cɛ be a dↄ-cɩɩn-bãa ɩ̃ yↄ bↄ a ʋlↄ na bↄr, wa ta nɩ a lɛ ʋ na nyɛrɛ ʋ wa mɩɩ? ⁵ A lɛ ʋ na wa nyɛ ʋ, nʋ̃ↄ nyↄw ʋ na ʋ ɓↄw ʋ dↄↄl bↄ̃w juu ⁶ kulʼɩ̃ ɩ̃ bʋↄl a ʋ badɛɛ nɩ a ʋ tↄ deme tiw ɩ̃ yel ba: ʻNyɩ́ ɩ a nʋmↄ nyɩ a ɩ̃ kaarɩ̃, a-na-ɩ ɩ̃ nyɛ na a ɩ̃ pɛr ʋlↄ na dãa bↄr.ʼ ” ⁷ A Jeeju yel ba na: “Lɛ a nʋↄ kpɛ̃ɛ na mɩ be a Naaŋmɩn tẽw a maal-fãa sʋbↄ bõ-ƴen ɩnɛ na lɩɛb a ʋ yɛ̃, gãw a nɩ-torisɩ kʋbaa for bir na ma lɛ sɛw a yɛ̃ lɩɛbfʋ wa. ⁸ “Mɩɩ a ala ɩ a pↄw tɛrɛ na libi-kure pie ɩ̃ a bõ-ƴen wa bↄr, ʋ kↄ̃ ƴↄ̃w lãpa ɩ̃ de a saar pɩɩrʼɩ̃ a dir ɩ̃ bↄ̃w bↄ ʋ wa nyɛ ʋ wa? ⁹ A lɛ ʋ na nyɛ ʋ, ʋ ma bʋↄlʼã a ʋ badɛɛ nɩ a ʋ tↄ deme tiw ɩ̃ yel ba: ʻNyɩ́ ɩ a nʋmↄ nyɩ a ɩ̃ kaarɩ̃, a-na-ɩ ɩ̃ nyɛ na a ɩ̃ libi-kur ʋlↄ na dãa bↄ̃r.ʼ ” ¹⁰ A Jeeju lɛ yel ba na: “A lɛ ʋ, nʋ̃ↄ ma be na a Naaŋmɩn sɩ-tʋnɩsɩ jie a maal-fãa sʋbↄ bõ-ƴen ɩnɛ na lɩɛb a ʋ yɛ̃.” ¹¹ A Jeeju lɛ yelʼã go: “Daba kãw dãa na tɛrɛ bi-dabsɩ ayi, ¹² a bidab-bile yel a sãa: ʻƖ̃ sãa wee! Kʋ ma a fʋ yele ala na ɩrɛ a ɩ̃ ben,ʼ a ʋ sãa de a ʋ yele po ba ba jaa ayi. ¹³ A ɩ na fɩ̃ɩ, a bidab-bile woor a ʋ yele a jaa yi cenʼɩ̃ nɩdaa tẽ-kpee pʋↄ, na ʋ bũburĩ bar a burbur maalfʋ pʋↄ. ¹⁴ A lɛdaar ʋ na sãw a ʋ yele a jaa baar, kↄ̃ tuo lo na a ʋna tẽw pʋↄ ɩ̃ a nãw nyↄw ɩ̃ kpɛɛrɛ ʋ. ¹⁵ Ʋ cenʼã a ʋna tẽw naa nɩrɛ kãw jie, na ɩ ʋ tʋ̃tʋnↄ, ʋ de ʋ ƴↄ̃w a ʋ puo pʋↄ ʋ cɩɩnɛ dor. ¹⁶ Ʋ ma bʋↄrↄ na ʋ mɩ Ꞌwↄb a jↄ̃-pↄbↄ ala a dor na Ꞌwↄbↄ ɩ̃-cɛ nɩrɛ maa dãa kʋ ʋ wa. ¹⁷ A be jie, ʋ pɛ na a ʋ suur pʋↄ ɩ̃ yel: ʻA ɩ̃ sãa tʋ̃tʋnbↄ ba jaa tɛrɛ na bõ-dɩraa a ƴↄ ba, ɩ̃-cɛ ɩ̃ be ka kpiire nɩ kↄ̃. ¹⁸ Ɩ̃ na irʼã lɩɛb kul a ɩ̃ sãa sɛ̃, na ɩ̃ yel ʋ: Ɩ̃ sãa, ɩ̃ maalʼã fãa a Naaŋmɩn jie nɩ a fʋ jie. ¹⁹ Maa lɛ sɛw a fʋ na bʋↄl ma a fʋ bi-daba wa. De ma ɩ̃ wↄ̃ taa nɩ a fʋ tʋ̃tʋnↄ ƴen sʋbↄ,ʼ ²⁰ ɩ̃ na ʋ ir lɩɛb kule a ʋ sãa sɛ̃. “A lɛ ʋ na cãa be a nɩdaa waara, a ʋ sãa gbã na nyɛ ʋ a nãw nyↄw ʋ, ʋ jↄ tuor worĩ ʋ. ²¹ A bi-daba yel ʋ: ʻƖ̃ sãa, ɩ̃ maalʼã fãa a Naaŋmɩn jie nɩ a fʋ jie. Maa lɛ sɛw a fʋ na bʋↄl ma a fʋ bi-daba wa.ʼ ²² Ɩ̃-cɛ a sãa yelʼã a ʋ tʋ̃tʋnbↄ: ʻNyɩ́ cen fↄfↄw na de a fu ʋlↄ na nyɩrɩ̃ vɩɛlɛ wa nɩ su ʋ. Nyɩ́ mɩ de a nubi-suuraa su ʋ, ɩ̃ su ʋ a nafaba. ²³ Nyɩ́ nyↄw a nale Ꞌwↄr wa nɩ kú a sɩ Ꞌwↄbↄ cɩlɛ nɩ, ²⁴ a-na-ɩ a ɩ̃ bie na, ʋ dãa na kpi, ɩ̃ ʋ lɩɛbʼã ɩ nɩ-mimir. Ʋ dãa na bↄr, ɩ̃ sɩ lɛ nyɛ ʋ na,ʼ ɩ̃ na ba nyↄw ɩ̃ cɩlɛ. ²⁵ “A bidab-kpɛ̃ɛ ʋlↄ dãa na be a puo pʋↄ. A lɛ ʋ na lɩɛb wa pɩɛlɛ a yir, ʋ wõ na a bɩnɛ ba na sɛbɛ hele nɩ, ²⁶ ɩ̃ bʋↄl a tʋ̃tʋnↄ ƴen sʋbↄ soor a ala na be be, ²⁷ ʋ yel ʋ: ʻA fʋ yɛ-bile lɩɛbʼã wa, a fʋ sãa ɩ a ba kú a nale Ꞌwↄr, a-na-ɩ ʋ lɛ nyɛ na a ʋ bie nɩ ɩ̃gan kpɛ̃w.ʼ ²⁸ A bidab-kpɛ̃ɛ nyɛ suur ɩ̃ jaar a yir pʋↄ kpɛfʋ, a ʋ sãa yire á ʋ ɓaalɩ̃ ʋ ʋ wa kpɛ. ²⁹ Ɩ̃-cɛ ʋ yelʼã a sãa: ʻNyɛ, a yomo waa na ɩ̃ na tʋnↄ fʋ a tʋn ɩ̃ maa dãa wõw toor a fʋ ƴɛrɩ̃ kãw pʋↄ wa, ɩ̃-cɛ faa mɩ kʋ ma bʋle gbɛ-bõ-ƴen sɛr ɩ̃ ɓolĩ a ɩ̃ badɛɛ wa. ³⁰ Ɩ̃-cɛ a fʋ bie na na sãw a fʋ yele nɩ a pↄↄ-baar, ɩ̃ lɩɛb wa, a fʋ ɩ a ba kú a nale Ꞌwↄr ƴↄ̃w ʋ!ʼ ³¹ A sãa yel ʋ: ʻƖ̃ bie, fʋ be na ka a ɩ̃ sɛ̃ a daar a jaa. A yele a jaa ɩ̃ na tɛrɛ a mɩ ɩ na a fʋ ben, ³² ɩ̃-cɛ a sɛw na a sɩ na ɓolo cɩlɛ nɩ, a-na-ɩ a fʋ yɛbɛ na, ʋ dãa na kpi, ɩ̃ ʋ lɛ lɩɛbʼã ɩ nɩ-mimir. Ʋ dãa na bↄr, ɩ̃ sɩ lɛ nyɛ ʋ na.ʼ ”

¹ A Jeeju lɛ yelʼã a ʋ par-tuurbe go: “Dab-naaba kãw dãa na tɛrɛ yel-Ꞌwuoro, ɩ̃ a ba wa man kʋ ʋ a mɩnɛ a ʋ yel-Ꞌwuoro ʋlↄ na sãwna ʋ a yele, ² a ʋ nɩ-kpɛ̃ɛ bʋↄl ʋ ʋ wa ʋ soor ʋ: ʻBõ ƴɛrɩ̃sɩ nɩ a ala ɩ̃ na wono a fʋ ɩnɛ? Sↄr a yele miilʼɩ̃ ma a mɩnɛ fʋ na tʋ̃ a fʋ tʋn, a-na-ɩ faa lɛ tʋↄrↄ ɩrɛ a ɩ̃ yel-Ꞌwuoro go wa.ʼ ³ A yel-Ꞌwuoro lɩɛb yel a ʋ mɩ̃ɛ: ʻMɩnɛ ɩ̃ na ɩ? A-na-ɩ a ɩ̃ nɩ-kpɛ̃ɛ na de na a ʋ yele ɩ̃ cɛ ma. Ɩ̃ kʋↄrↄ mɩɩ? Maa mɩlɩ̃ nɩ a kↄb wa. Ɩ̃ sʋↄrↄ dɩrɛ mɩɩ? Vĩ na nyↄw ma na. ⁴ Ɩ̃ pãa na bↄ̃w a ala ɩ̃ na maala a nɩbɛ na sↄw de ma a ba yir, a lɛ a ɩ̃ nɩ-kpɛ̃ɛ nↄↄ bara ma a tʋn pʋↄ.ʼ ⁵ Ɩ̃ ʋ bʋↄlʼã a bala ba jaa na dãa pɛ̃pɛ̃ a ʋ nɩ-kpɛ̃ɛ yele, a ba wa bõ-ƴene-ƴene. Ʋ soor a dãdãw sʋbↄ: ʻAmɩnɛ fʋ tɛrɛ a ɩ̃ nɩ-kpɛ̃ɛ a san?ʼ ⁶ Ʋ yel ʋ: ʻA kãa na sɛw a tasa-bɛrɛ kʋbaa ʋ,ʼ a yel-Ꞌwuoro yel ʋ: ʻDe a fʋ sɛbɛ, jɛ fↄfↄw ɩ̃ sɛb lɩjaayi nɩ pie ƴↄ̃w.ʼ ⁷ Ɩ̃ lɛ soor a kãw: ʻƖ̃ a fʋ̃ʋ, amɩnɛ san fʋ tɛrɛ?ʼ Ʋ yel ʋ: ʻCi bↄtↄr kↄↄr anuu ʋ.ʼ A yel-Ꞌwuoro yel ʋ: ʻDe a fʋ sɛbɛ. Sɛb kↄↄr anaan ƴↄ̃w.ʼ ⁸ A yel-Ꞌwuor-gõgolaa ʋlↄ nɩ-kpɛ̃ɛ pɛw ʋ na a lɛ ʋ na tɩɛr a nɩdaar a ʋ yele maalfʋ pʋↄ, a-na-ɩ a tẽw na nɩbɛ ma tɛrɛ na yɛ̃ a ba tↄ deme jie gãw a cãa pʋↄ nɩbɛ. ⁹ “Ɩ a maa ɩ̃ yele nyɩ na, nyɩ́ de a tẽw na na-yele na ɩ a gõgolĩfʋ bom, na nyɩ ŋma nɩ ba, a mɩnɛ a daar ʋlↄ a na mↄↄ lɛ tʋↄrↄ sũono nyɩ wa, a ba na de nyɩ kpɛ nɩ a daadaa kpɛfʋ jiir pʋↄ. ¹⁰ A ʋlↄ na ɩ yel-mɩ̃ɛ sʋbↄ a yel-bil pʋↄ, ʋ na mɩ ɩ na yel-mɩ̃ɛ sʋbↄ a yel-bɛrɛ pʋↄ. A ʋlↄ na gõgolo a yel-bil pʋↄ, ʋ na mɩ gõgolo na a yel-bɛrɛ pʋↄ. ¹¹ A ala ɩ nyaa dãa ɩ yel-mɩ̃ɛ deme a tẽw na na-yele pʋↄ wa, ala na ƴↄ̃w nyɩ a nyɩ Ꞌwuoro a yel-sono? ¹² Ɩ̃ a ala ɩ nyaa dãa ɩ yel-mɩ̃ɛ deme a nɩrɛ bom pʋↄ wa, ala na kʋ nyɩ a ala na ɩ a nyɩ ben? ¹³ “Tʋ̃tʋnↄ ma be be na tʋↄrↄ tʋnↄ nɩ-bɛrɛ ayi tʋn wa. Ʋ na Ꞌlaarʼã a kãw ɩ̃ nʋ a ƴen sʋbↄ, mɩɩ ʋ na marʼã a kãw ɩ̃ kpɛrɛ a ƴen sʋbↄ. Nyaa tʋↄrↄ puoro a Naaŋmɩn ɩ̃ mɩ ɩrɛ a na-yele gbãgbaar wa.” ¹⁴ A Farɩsɩ nɩbɛ, na dãa nʋ a libie, cɛlɛ na a ƴɛrɩ̃sɩ ala a jaa, ɩ̃ na ba laara a Jeeju. ¹⁵ A Jeeju yel ba: “A nyɩmɩ, a nɩbɛ nii-sↄw nyɩ ma maalʼã wↄ̃ taa nɩ nyɩ torʼã, ɩ̃-cɛ a Naaŋmɩn bↄ̃w na a nyɩ sube. A-na-ɩ a ala a nɩbɛ na Ꞌwuoro a ɩ bõ-kpɛ̃ɛ, a ɩ na bõ-kpana a Naaŋmɩn nii-sↄw. ¹⁶ “Wa ta nɩ a Jã-Batii daar, a dãa na ɩ a Naaŋmɩn ƴɛr-kpɛn nɩ a ʋ ƴɛr-hierbe daar. Wa nyↄw nɩ a daar ʋlↄ, ala ba hiere a Naaŋmɩn fãw ƴɛr-son a nɩbɛ ba jaa ƴↄ̃w kpɛ̃w bʋↄrↄ ba kpɛ a Naaŋmɩn fãw ʋlↄ pʋↄ. ¹⁷ Ɩ̃-cɛ a saꞋlon nɩ a tene tↄlfʋ nyɩrɩ̃ na yↄw gãw a Naaŋmɩn ƴɛr-kpɛn bõ-bile fɩ̃ɩ sãwfʋ. ¹⁸ “A daba lɛ na diw a ʋ pↄw bar ɩ̃ lɛ kul pↄw kpee, ʋ maalʼã a fãa, ɩ̃ a ʋlↄ na kule a pↄw ʋlↄ a ʋ sɩrɛ na diw bar, ʋ mɩ maalʼã a fãa. ¹⁹ “Dab-naaba dãa na be be na ma dãa suure cẽcẽ-vɛlɛ na kpɛmɛ a dafʋ, ɩ̃ mɩ dɩrɛ a dɛ̃w a bibie a jaa. ²⁰ Ɩ̃ nãw sʋbↄ mɩ dãa na be be na dɩ Lajaar, a natɩɛ na pↄw a ʋ ɩ̃gan ʋ jaa ʋ ma gana nɩ a naaba yir dↄ̃dↄr nʋↄr. ²¹ Ʋ ma dãa na bʋↄrↄ ʋ tʋↄ dɩ a dɩb-pʋrↄ ala na loro a naaba dɩb dɩfʋ jie, ɩ̃ aa ɩ a ala tɛw ʋ wa, a baar tↄr jaa ma lɛ wɩ na dɛlɛ a ʋ natɩɛ. ²² A nãw sʋbↄ ʋlↄ wa kpi na, a sɩ-tʋnɩsɩ de ʋ cenʼɩ̃ ʋ lãa jɛ nɩ a Abʋraham a Naaŋmɩn ji-vɩlaa, ɩ̃ a naaba wa mɩ kpi na, a ba ũu. ²³ A be a kpɩɩn tẽw, a mɩnɛ ʋ na be a hʋʋr nyɛfʋ pʋↄ ʋ gbã na nyɛ a Abʋraham a nɩdaa ʋ lãa jɛ nɩ a Lajaar. ²⁴ A be ʋ wuur yel: ʻƖ sãa Abʋraham wee, bↄ̃w ma nãw bɩlɛ. Tʋ̃ a Lajaar ʋ cen na ɓɛ kʋ̃ↄ nɩ a ʋ nubir wa ɓãa nɩ ma a dɛlɩ̃bir, a-na-ɩ a wono ma na yayaw a ka a vũu na pʋↄ.ʼ ²⁵ Ɩ̃-cɛ a Abʋraham yel ʋ na: ʻƖ̃ bie, tɩɛr bↄ̃w nɩ a mɩnɛ fʋ na dãa pↄw a fʋ nason a lɛ fʋ na dãa cãa be a tẽw juu, ɩ̃ a Lasaar mɩ dãa pↄw a nabebe ɩ̃ a ƴɛ̃ƴɛrɩ̃ na ʋ be na a ka na ʋ bar tɩɛrʋ̃, ɩ̃-cɛ a fʋ be a won pʋↄ. ²⁶ Aa ɩ a lɛ tɛw ʋ wa, ɩ̃-cɛ bↄw kpɛ̃ɛ mɩ be na be ba na ƴↄ̃w ʋ var a sɩmɩ nɩ a nyɩmɩ, a mɩnɛ a ʋlↄ na bʋↄrↄ ʋ yi a ka ɩ̃ wɩ a nyɩ sɛ̃ Ꞌwaa tʋↄrↄ wa, ɩ̃ a nɩrɛ kↄ̃ mɩ tʋↄ yi a nyɩ sɛ̃ ɩ̃ gãw a sɩ jie wa.ʼ ²⁷ A be jie, a naaba yel: ʻƖ̃ sãa, a ala ɩ a lɛ ʋ, ɩ̃ sʋↄrↄ fʋ na: tʋ̃ a Lajaar a ɩ̃ sãa yir ²⁸ a-na-ɩ ɩ̃ tɛrɛ na yɛɛr anuu a be, ʋ cen na kpãkpan ba a mɩnɛ ba kↄ̃ wa mɩ wa a hʋʋr nyɛfʋ jie na wa.ʼ ²⁹ A Abʋraham yel ʋ: ʻA fʋ yɛɛr tɛrɛ na a Mowisi nɩ a Naaŋmɩn ƴɛr-hierbe. Bá cɛlɛ a ala ba na sɛb!ʼ ³⁰ A naaba yel: ʻƖ̃ sãa Abʋraham, aa ɩrɛɛ wa, ɩ̃-cɛ a ala ɩ nɩrɛ yi na a kũu pʋↄ cen a ba jie, ba na lɩɛbʼã a ba yɛ̃.ʼ ³¹ Ɩ̃-cɛ a Abʋraham yel ʋ na: ʻA ala ɩ baa cɛlɛ a Mowisi nɩ a Naaŋmɩn ƴɛr-hierbe ƴɛrɩ̃ wa, ɩ̃ a nɩrɛ saarɩ̃ yi a kũu pʋↄ a kↄ̃ maal ba a ba lɩɛb a ba yɛ̃ wa.ʼ ”

¹ A ala na yi tↄ a Jeeju yelʼã a ʋ par-tuurbe: “Yele na be na be a daar a jaa maala a nɩbɛ a ba kpɛɛrɛ a tule pʋↄ. Ɩ̃-cɛ nabier na pↄw na a ʋlↄ na saa a wa tara. ² A nɛ-kpɛ̃ɛ ba na luure yara a nɩrɛ ʋlↄ nyɩɩmɩ ɩ̃ lↄbↄ ʋ ƴↄnↄ a man kʋ̃ↄmɩ, a na cãa na sa ʋ gãw ʋ na wa maala a nɩ-kↄmsɩ basɩmɛ ƴen sʋbↄ ʋ kpɛɛrɛ a tule pʋↄ. ³ Nyɩ́ bↄ̃w tɛrɛ nyɩ mɩ̃ɛ! “A ala ɩ a fʋ yɛbɛ wa maal fʋ na a fãa, fú gal ʋ, a ʋlↄ ɩ̃ lɩɛb a ʋ yɛ̃, de bar kʋ ʋ. ⁴ A ala saarɩ̃ ɩ ʋ maal fʋ na bier gbɛɛ anuu-nʼayi a bibir bõ-ƴen pʋↄ, ɩ̃ mɩ lɩɛb wa a gbɛɛ anuu-nʼayi yel fʋ á ʋ lɩɛbʼã a ʋ yɛ̃, fú de bar kʋ ʋ.” ⁵ A nɩ-tʋnɩsɩ yelʼã a Nɩ-kpɛ̃ɛ: “Maal a sɩ ƴↄ̃w-nyãa ʋ bɛrmɛ dↄↄl.” ⁶ A Nɩ-kpɛ̃ɛ yel: “A ala ɩ nyɩ dãa na tɛrɛ a ƴↄ̃w-nyãa ʋ jɛ̃ a muta-tɩɛ bir kaarɩ̃, nyɩ naa tʋↄ na yel a tɩɛ na a ʋ elĩ cen na ba a man kʋ̃ↄmɩ, ɩ̃ ʋ na maalʼã a lɛ nyɩ na yel. ⁷ “A ala ɩ nɩrɛ kãw a nyɩ sↄ̃w tɛrɛ na tʋ̃tʋnↄ ʋ kʋↄrↄ ʋ, mɩɩ ʋ ŋmaara ʋ a dʋn, ɩ̃ wa yi a puo pʋↄ wa, ʋ na yel ʋ na á ʋ wa fↄfↄw jɛ dɩ dɩb mɩɩ? ⁸ Má ʋ na ɛ̃ɛ na yel ʋ: ʻMaal ma bõ-dɩraa ɩ̃ gbɛɛrɩ̃ de bin ma, a maa wa dɩ nyu nɩ sɛw baar, fú pãa mɩ dɩ nyu nɩ.ʼ ⁹ Ʋ na puorʼã a ʋ tʋ̃tʋnↄ a-na-ɩ ʋ maalʼã a ala ʋ na ƴↄ̃w ʋ ʋ maal mɩɩ? ¹⁰ Lɛ a mɩ wↄ̃ a nyɩ jie. A nyɩmɩ wa maal a ala ba na ƴↄ̃w nyɩ baar, nyɩ́ yel: ʻSɩ ɩ na tʋ̃tʋ̃-pↄrsɩ. A ala na sɛw sɩ maal, ala tɛw sɩ maal.ʼ ” ¹¹ A Jeeju cere na a Jerujalɛm na ʋ tↄl yi a Samari nɩ a Galile cara pʋↄ. ¹² Ʋ cenʼã na kpɛɛrɛ tẽ-bile kãw pʋↄ a kↄn pie jↄ tuor ʋ ta sↄ̃w ɩraa ¹³ ɩ̃ bʋↄlↄ ʋ nɩ kpɛ̃w yele: “Jeeju, Jãjaana, bↄ̃w sɩ nãw bɩlɛ!” ¹⁴ A Jeeju nyɛ ba ɩ̃ yel ba: “Nyɩ́ cen na de a nyɩ mɩ̃ɛ miilʼɩ̃ a Naaŋmɩn baar-lorbo.” Ɩ̃ a lɛ ba na cãa be a sↄr juu cere, ba pↄlɩ̃ na. ¹⁵ A bõ-ƴen a ba sↄ̃w nyɛ na a ɩ ʋ pↄlɩ̃ na ɩ̃ lɛ lɩɛb de a ʋ gbɛ-tule pɛwrɛ a Naaŋmɩn nɩ kpɛ̃w cere nɩ. ¹⁶ Ʋ lo na kpa vↄↄl a nii-sↄw a Jeeju gbɛɛ par ɩ̃ puoro ʋ. A daba ʋlↄ ɩ na Samari-tẽw nɩrɛ. ¹⁷ A be jie, a Jeeju yel: “Aa ɩ nɩbɛ pie ba ɩ na pↄlɩ̃ wa? Ɩ̃ a pie for bir bala, nyɩnɛ ba be? ¹⁸ A ala ma ɩ a saana na tɛw ʋ wa, nɩ-bõ-ƴen ma be be na tɩɛr a ʋ lɩɛb wa pɛw a Naaŋmɩn wa?” ¹⁹ Ɩ̃ na ʋ yel ʋ: “Ir kule. A fʋ ƴↄ̃w-nyãa faa fʋ na.” ²⁰ A Farɩsɩ nɩbɛ soorʼã a Jeeju a dabor a Naaŋmɩn fãw na waara, ʋ yel ba: “A Naaŋmɩn fãw ma waara a nɩrɛ nyɛrɛ ʋ wa. ²¹ Ba kↄ̃ yel a ka ʋ be mɩɩ, a be ka ʋ be wa. Ɩ̃ nyɩ́ bↄ̃wnaa a Naaŋmɩn fãw be na a nyɩ sↄ̃w.” ²² A ala na yi tↄ, a Jeeju lɛ yelʼã a par-tuurbe: “Daar kãw na ta na a nyɩ na bʋↄrↄ nyɩ nyɛ a Nɩbɛ Bie bibir ƴen sʋbↄ, ɩ̃ nyɩ kↄ̃ nyɛ wa. ²³ Ba na yel nyɩ na: ʻNyɩ́ nyɛ ʋ ka!ʼ mɩɩ ʻNyɩ́ nyɛ ʋ be ka!ʼ Nyɩ taa cere be wa, nyɩ taa jↄrↄ tuure ba wa. ²⁴ A-na-ɩ a mɩnɛ a saa na ma nyɩnyɩl a saꞋlon caarɩ̃ a lõboor bõ-ƴen wa cen na ta nɩ a lõboor kpee, lɛ a Nɩbɛ Bie na be a ʋ bibir. ²⁵ Ɩ̃-cɛ a sɛw na ʋ na de nĩe nyɛ hʋʋr yayaw ɩ̃ a dɩnaa nɩbɛ jaar ʋ bar. ²⁶ A ala na dãa ta a Nowe daar, na lɛ bↄ̃w na ta a Nɩbɛ Bie daar mɩ. ²⁷ A nɩbɛ dãa na dɩrɛ nyuure nɩ kule nɩ taa, ɩ̃ mɩ tɩɩrɛ a ba bibiir a ba kule, wa ta nɩ a bibir ʋlↄ a Nowe na kpɛ a gbor kpɛ̃ɛ pʋↄ, ɩ̃ a kʋ̃ↄ wa ŋme pↄw ba a ba kpi ba jaa. ²⁸ A lɛ ʋ mɩ, a ala na dãa ta a Lↄtɩ daar na lɛ bↄ̃w na ta go. A nɩbɛ dãa na dɩrɛ nyuure nɩ, daara a yele ƴaba nɩ, bʋrↄ a yele, mɩɛrɛ nɩ a yie. ²⁹ Ɩ̃-cɛ a bibir ʋlↄ a Lↄtɩ na yi a Sↄdↄm-tẽw pʋↄ, Naaŋmɩn ɩ na a vũu nɩ a kʋsɩ-Ꞌlerisɩ a yi a saꞋlon ɩ̃ lo pↄw ba a ba kpi ba jaa. ³⁰ A lɛ a na mɩ be a bibir ʋlↄ a Nɩbɛ Bie nↄↄ nyɩrɛ. ³¹ “A bibir ʋlↄ, a nɩrɛ ʋlↄ na be a gar juu ɩ̃ a ʋ yele be a diem, ʋ taa suure diere wa. A lɛ ʋ mɩ, a ʋlↄ na be a puo pʋↄ, ʋ taa lɩɛbɛ puo-sↄw wa. ³² Nyɩ́ tɩɛrʼɩ̃ a ala na dãa ta a Lↄtɩ pↄw! ³³ A ʋlↄ na bʋↄrↄ ʋ faa a ʋ mɩ̃ɛ, ʋ na ɛ̃ɛ na bↄr, ɩ̃ a ʋlↄ na sↄw a ʋ bↄrfʋ, ʋ na baa na. ³⁴ Ɩ̃ yele nyɩ na, a ʋna daarʼãa, nɩbɛ ayi na lãa na gã a tɩsↄw a gaajie bõ-ƴen juu, a Naaŋmɩn na de na bõ-ƴen ɩ̃ cɛ a bõ-ƴen bar. ³⁵ Pↄↄbↄ ayi na lãa na ƴɛrɛ jↄ̃, ʋ na de na bõ-ƴen ɩ̃ cɛ a bõ-ƴen bar. [ ³⁶ Dabsɩ ayi na be na a puo pʋↄ, ɩ̃ ba na de na a bõ-ƴen ɩ̃ cɛ a kãw bar.”] ³⁷ A par-tuurbe soor ʋ: “Nɩ-kpɛ̃ɛ, nyɩnɛ a ana yele na maal?” A Nɩ-kpɛ̃ɛ yel ba: “A jie ʋlↄ a bõ-kũu na be, be a sidune na mɩ lo duo.”

¹ A Jeeju lɛ bↄ̃w na lↄb a sʋkpa na kʋ ba bʋↄrↄ ʋ miil ba a ba sɛw na na sʋↄrↄ a Naaŋmɩn a daar a jaa kↄ̃ bala wa. ² Ʋ yelʼã: “Yɛr-guoro dãa na be tẽw kãw pʋↄ. ꞋWaa jↄrↄ Naaŋmɩn wa, Ꞌwaa mɩ ƴↄnↄ nɩrɛ wa. ³ Kpɩ̃ɩ-pↄw kãw mɩ dãa na be a ʋna tẽw naa pʋↄ, ma cere a ʋ jie tↄ̃-tↄ̃-tↄ̃ yele ʋ: ʻGuor a ɩ̃ ƴɛrɩ̃ a ɩ̃ san-sʋbↄ ɩnɛ.ʼ ⁴ A ƴɛr-guoro jaarʼã gbɛɛ amɩnɛ jaa, ɩ̃ a ala ɩ̃ baar, ʋ yelʼã a ʋ mɩ̃ɛ: ʻYel-mɩ̃ɛ ʋ, maa jↄrↄ Naaŋmɩn wa, maa mɩ ƴↄnↄ nɩrɛ wa, ⁵ ɩ̃-cɛ a-na-ɩ a kpɩ̃ɩ-pↄw na vↄwrↄ ma na a lɛ, ɩ̃ na guorʼã a ʋ ƴɛrɩ̃. A ala ma ɩ lɛ ʋ wa, ʋ na ma wa na wɛlɛ ma a juu a daar a jaa.ʼ ” ⁶ A Nɩ-kpɛ̃ɛ Jeeju yelʼã: “Nyɩ́ wõ a ala a ƴɛr-guor-gõgolaa sʋbↄ ʋlↄ na yel. ⁷ Ɩ̃ a nɩbɛ bala a Naaŋmɩn na vɛl ir na ma wuure bʋↄlↄ nɩ ʋ a mↄtↄ̃w nɩ a tɩsↄw, a Naaŋmɩn kↄ̃ guor a ba ƴɛrɩ̃ miilʼɩ̃ a ba yel-mɩ̃ɛ wa mɩɩ? Ʋ na kama na a ba sũofʋ? ⁸ Ɩ̃ yele nyɩ na, ʋ na guorʼã a ba ƴɛrɩ̃ fↄfↄw. Ɩ̃-cɛ a Nɩbɛ Bie, ʋ na nyɛ na a ƴↄ̃w-nyãa a nɩbɛ jie a ka a tẽw juu a lɛ ʋ nↄↄ lɩɛbɛ waara mɩɩ?” ⁹ A Jeeju lɛ bↄ̃w na lↄb a sʋkpa na a bala ɩnɛ na ma tɩɛrɛ a ba ɩ na a nɩ-torisɩ a Naaŋmɩn nii-sↄw ɩ̃ ma kpɛrɛ a nɩbɛ. ¹⁰ Ʋ yelʼã: “Nɩbɛ ayi dãa na cen a Naaŋmɩn puor-yir kpɛ̃ɛ pʋↄ Naaŋmɩn sʋↄrfʋ jie. Bõ-ƴen ɩ na Farɩsɩ nɩrɛ, ɩ̃ a bõ-ƴen ɩ lãpo-diere. ¹¹ A Farɩsɩ nɩrɛ ɩraa na iin ɩ̃ sʋↄrↄ a Naaŋmɩn yele nɩ a ʋ mɩ̃ɛ: ʻNaaŋmɩn, ɩ̃ puoro fʋ na a-na-ɩ maa wↄ̃ a nɩbɛ ŋmɛɛ kaarɩ̃ na ɩ a nyanyube, nɩ a nɩ-gõgolĩsɩ, nɩ a pepebsɩ, mɩɩ a lãpo-diere na kaarɩ̃ wa. ¹² Ɩ̃ ma lũ na nʋↄr gbɛɛ ayi a bibie anuu-nʼayi pʋↄ, ɩ̃ ma mɩ ir a bõ-ƴen pie pʋↄ a yele a jaa pʋↄ ɩ̃ na ma pↄw.ʼ ¹³ Ɩ̃-cɛ a lãpo-diere ɩraa jãa fɩ̃ɩ ma Ꞌlara dʋↄrↄ Ꞌwuoro a saꞋlon wa, ɩ̃ lↄbↄ a nur yele: ʻNaaŋmɩn, bↄ̃w ma nãw bɩlɛ, a maa na ɩ a maal-fãa sʋbↄ.ʼ ¹⁴ “Ɩ̃ yele nyɩ na, a daba ʋlↄ lɩɛbʼã kulʼɩ̃ a Naaŋmɩn torfʋ, ɩ̃ ɛ̃ɛ cɛ a Farɩsɩ nɩrɛ ʋlↄ bar, a-na-ɩ a nɩrɛ lɛ na bʋↄrↄ ʋ bɛrmɛ a juu, a Naaŋmɩn na wur ʋ na suu nɩ, ɩ̃ a nɩrɛ lɛ na sↄw wur a ʋ mɩ̃ɛ, a Naaŋmɩn na jɛw ʋ na irʼɩ̃.” ¹⁵ A nɩbɛ wa nɩ na bibi-bil a Jeeju sɛ̃ a ʋ sɩɩr ba, a par-tuurbe nyɛ a lɛ ɩ̃ gala ba. ¹⁶ Ɩ̃-cɛ a Jeeju ɩ na a ba taw ta hɩ ʋ a bibiir bala, ɩ̃ ʋ yel: “Nyɩ́ bar a bibiir a ba wa a ɩ̃ sɛ̃, nyɩ taa pɩɛrɛ ba bara wa a-na-ɩ a bala na wↄ̃ a ba kaarɩ̃, bala ɩ̃ sↄ a Naaŋmɩn fãw. ¹⁷ Yel-mɩ̃ɛ ɩ̃ yele nyɩ, a ʋlↄ na ma sↄw a Naaŋmɩn ʋ tɛrɛ ʋ a bibile kaarɩ̃ wa, Ꞌwaa be na tʋↄ kpɛ a Naaŋmɩn fãw pʋↄ wa.” ¹⁸ A Jufisɩ nɩ-kpɛ̃ɛ kãw soorʼã a Jeeju: “Jãjaan-son, bõ ɩ̃ sɛw ɩ̃ na maal ɩ̃ pãa pↄw a baa-kↄ̃-tɛw?” ¹⁹ A Jeeju yel ʋ: “Bõ ɩ̃ ɩ a fʋ bʋↄl ma a nɩ-son? Nɩ-son ma be, ɩ̃ a ala ma ɩ a Naaŋmɩn tɛw ʋ wa. ²⁰ Fʋ bↄ̃w na a Naaŋmɩn ƴɛr-kpɛn: taa wa gana nɩ pↄw kpee wa, taa wa kúrↄ nɩrɛ wa, taa wa jure wa, taa wa ŋmara jir-kara ƴↄnↄ nɩrɛ wa; jↄrↄ a fʋ sãa nɩ a fʋ mã.” ²¹ A daba yel: “Ɩ̃ maalʼã a ana yele a jaa a ɩ̃ bibile daar wa ta nɩ a dɩnaa.” ²² A mɩnɛ a Jeeju na wõ a lɛ, ʋ yelʼã a daba: “Bom bõ-ƴen cãa na cɛ fʋ. Da a fʋ yele a jaa fʋ na tɛrɛ, de a libie po a nãw deme, ɩ̃ fʋ na pↄw na a na-yele a Naaŋmɩn tẽw. A ala ɩ̃ baar, fú wa tuure ma.” ²³ Ɩ̃-cɛ a mɩnɛ a daba na wõ a ala, nyãa nyɩl ʋ na, a-na-ɩ ʋ sɩrɩ̃ na le. ²⁴ A Jeeju nyɛ na a mɩnɛ a nyãa na nyɩl a daba, ɩ̃ yel áa kpɛmɛ na a mɩnɛ a naabsɩ na kpɛɛrɛ a Naaŋmɩn fãw pʋↄ. ²⁵ Ʋ lɛ yelʼã: “A na yↄw na a nyʋↄmɩ na kpɛɛrɛ a mɩsɩn-bↄw pʋↄ gãw a naaba na kpɛɛrɛ a Naaŋmɩn fãw pʋↄ.” ²⁶ A nɩbɛ bala na wõ a ala, ba yelʼã: “A ala ɩ a lɛ ʋ, ala na pↄw a faafʋ?” ²⁷ A Jeeju yel: “A ala a nɩrɛ na ma tʋↄrↄ maala wa, a Naaŋmɩn ma tʋↄ na maal.” ²⁸ A be jie a Pɩɛr yel: “Nyɛ a sɩmɩ, sɩ barʼã a yele ala sɩ na dãa tɛrɛ, ɩ̃ tuure fʋ.” ²⁹ A Jeeju yel ba: “Yel-mɩ̃ɛ ɩ̃ yele nyɩ, a nɩrɛ lɛ na bar a ʋ yir, mɩɩ a ʋ pↄw, mɩɩ a ʋ yɛɛr, mɩɩ a ʋ dↄↄrbↄ, mɩɩ a ʋ bibiir a Naaŋmɩn fãw ɩnɛ, ³⁰ ʋ na pↄw na a gãw a lɛ a daarʼã pʋↄ sɩ na be a ƴɛ̃ƴɛrɩ̃, ɩ̃ ʋ na mɩ pↄw na a baa-kↄ̃-tɛw a daar ʋlↄ pʋↄ na be a puo-sↄw waara.” ³¹ A Jeeju taw na a ʋ par-tuurbe pie-nʼayi kpaarɩ̃ a ʋ pulẽe, ɩ̃ yel ba: “Nyɩ́ nyɛ, sɩ cere na a Jerujalɛm, ɩ̃ a be, a ala a jaa a Naaŋmɩn ƴɛr-hierbe na sɛb a Nɩbɛ Bie ɩnɛ, a na maalʼã baar. ³² A-na-ɩ ba na nyↄw ʋ na kʋ a nɩ-bʋlsɩ a ba la ʋ, ɩ̃ na ba tʋ ʋ, ɩ̃ puur a natɛɛr ƴↄ̃w ʋ, ³³ ɩ̃ fↄbʼɩ̃ ʋ a kpaara ɩ̃ cɛ ʋ kú. Ɩ̃ a bibie ata dayen, ʋ na irʼã a kũu pʋↄ.” ³⁴ Ɩ̃-cɛ a ʋ par-tuurbe ma dãa bↄ̃w a ala ʋ na yele par fɩ̃ɩ wa. A ƴɛrɩ̃ ʋlↄ dãa na liw ba a baa dãa tʋↄ bↄ̃w a par wa. ³⁵ A mɩnɛ a Jeeju na pɩɛlɛ a Jeriko-tẽw, jↄ̃w kãw dãa na jɛ a sↄr nʋↄr sʋↄrↄ a yele. ³⁶ Ʋ wõ na a nɩbɛ na tↄlↄ ɩ̃ soor a ala na be be, ³⁷ a ba yel ʋ áa Najarɛtɩ Jeeju ɩ̃ tↄlↄ ³⁸ ʋ wuur yel: “Davɩtɩ Bie Jeeju yaa, bↄ̃w ma nãw bɩlɛ!” ³⁹ A bala na de a nĩe, gala ʋ na, a ʋ pↄw a nʋↄr, ɩ̃-cɛ ʋ jaarʼã ɩ̃ ɛ̃ɛ wuurʼɩ̃ kpɛ̃w yele: “Davɩtɩ Bie, bↄ̃w ma nãw!” ⁴⁰ A Jeeju ɩraa ɩ̃ ƴↄ̃w a ba taw ʋ wa nɩ a ʋ sɛ̃. A lɛ a jↄ̃w na ta pɩɛl ʋ baar, a Jeeju soor ʋ na: ⁴¹ “Bõ fʋ bʋↄrↄ ɩ̃ maal fʋ?” A jↄ̃w yel: “Nɩ-kpɛ̃ɛ, maal ɩ̃ lɛ nyɛrɛ.” ⁴² Á Jeeju yel ʋ: “Lɛ bↄ̃w nyɛrɛ! A fʋ ƴↄ̃w-nyãa faa fʋ na.” ⁴³ A jie naan, ʋ lɛ bↄ̃w na nyɛrɛ, ɩ̃ pɛwrɛ a Naaŋmɩn tuure nɩ a Jeeju, a nɩbɛ ba jaa nyɛ a lɛ ɩ̃ mɩ pɛw a Naaŋmɩn.

¹ A Jeeju kpɛ na a Jeriko-tẽw pʋↄ tↄlↄ. ² A be, dab-naaba kãw ba na bʋↄlↄ a Jake, na ɩ a lãpo-dierbe nɩ-kpɛ̃ɛ, ³ bʋↄrↄ na ʋ nyɛ a Jeeju bↄ̃w a sʋbↄ ʋlↄ ʋ na ɩ, ɩ̃ Ꞌwaa dãa tʋↄrↄ wa a-na-ɩ a nɩbɛ waa na, ɩ̃ ʋ ɩ nɩ-ŋmãa. ⁴ A lɛ, ʋ jↄ na cen nii-sↄw na do tɩɛ kãw juu ba na bʋↄlↄ sɩkomↄↄr, a Jeeju nyɛfʋ ɩnɛ, a-na-ɩ be ʋ sɛw ʋ tↄlʼɩ̃. ⁵ A lɛ a Jeeju na ta a tɩɛ ʋlↄ par, ʋ dʋↄ na Ꞌwuor a tɩɛ juu ɩ̃ bʋↄl yel: “Jake, suu fↄfↄw, a-na-ɩ a sɛw na ɩ̃ na kpɛ a fʋ yir a dɩnaa.” ⁶ A Jake suu na fↄfↄw de ʋ, a nʋ̃ↄ ƴala ʋ. ⁷ A mɩnɛ a nɩbɛ na nyɛ a lɛ, ba hũhune na ba jaa ɩ̃ yele: “A maal-fãa sʋbↄ yir ʋ cen na kpɛ!” ⁸ Ɩ̃-cɛ a Jake irʼã ɩraa a Nɩ-kpɛ̃ɛ nii-sↄw ɩ̃ yel ʋ: “Nɩ-kpɛ̃ɛ, ɩ̃ na de na a ɩ̃ yele po jɛ̃ taa kʋ a nãw deme, ɩ̃ a ala ɩ ɩ̃ dãa na bɛlɩ̃ nɩrɛ bom de, ɩ̃ na lɩɛbʼã kʋ ʋ gbɛɛ anaan dↄↄk.” ⁹ A Jeeju yel ʋ: “A faafʋ ta na a yirʼã pʋↄ a dɩnaa, a-na-ɩ a ʋlↄ mɩ̃ɛ, ʋ mɩ ɩ na a Abʋraham yãw. ¹⁰ A-na-ɩ a Nɩbɛ Bie wa na na bʋↄrↄ a bala na bↄr, ʋ faa ba.” ¹¹ A lɛ a nɩbɛ na cɛlɛ a ana ƴɛrɩ̃sɩ, a Jeeju lɛ lↄbʼã a sʋkpa kʋ ba go, a-na-ɩ ʋ dãa na pɩɛlɛ a Jerujalɛm, ɩ̃ a nɩbɛ mɩ dãa tɩɛrɛ áa Naaŋmɩn fãw na ta na fↄfↄw. ¹² Ʋ yelʼã: “Nɩ-kpɛ̃ɛ kãw dãa na be be. Ʋ wa yi na cen tẽ-nɩdaa a ba na ƴↄ̃w ʋ ʋ ɩ jamana ɩ̃ ʋ lɛ lɩɛb wa. ¹³ A lɛ ʋ na bʋↄrↄ a cenfʋ, ʋ bʋↄlʼã a ʋ tʋ̃tʋnbↄ pie de sɛlɩ̃-bie na ɩ a ba libie kʋ ba bõ-ƴene-ƴene ba jaa ɩ̃ yel ba: ʻNyɩ́ de ƴaba nɩ wa ta nɩ a mɩnɛ ɩ̃ na lɩɛbɛ waara.ʼ ¹⁴ Ɩ̃-cɛ a ʋna nɩ-kpɛ̃ɛ tẽw nɩbɛ dãa na Ꞌlaar ʋ. Ba irʼã nɩbɛ tʋ̃ a ba bɩɛr ʋ cen na yel á baa bʋↄrↄ a daba ʋlↄ ʋ ɩ a ba jamana wa. ¹⁵ “A lɛ ʋ na ɩ a jamana baar ɩ̃ lɛ wa, ʋ ƴↄ̃w na a ba bʋↄl a tʋ̃tʋnbↄ bala ʋ na dãa kʋ a libie, a ba wa ʋ soor ba a amɩnɛ ba na pↄw. ¹⁶ A dãdãw sʋbↄ ta na yel: ʻNɩ-kpɛ̃ɛ, sɛlɩ̃-bie pie ɩ̃ pↄw dↄↄl a ʋlↄ fʋ na kʋ ma juu.ʼ ¹⁷ A jamana yel ʋ: ʻA vɩɛlɛ na. Fʋ ɩ na tʋ̃tʋ̃-son. A mɩnɛ fʋ na ɩ a yel-mɩ̃ɛ sʋbↄ a bõ-bile pʋↄ, ɩ̃ na ƴↄ̃w fʋ na a fʋ Ꞌwuoro a ten pie.ʼ ¹⁸ A tuure mɩ ta na ɩ̃ yel: ʻSɛlɩ̃-bie anuu ɩ̃ pↄw nɩ a ʋlↄ fʋ na kʋ ma.ʼ ¹⁹ A jamana mɩ yel a ʋlↄ: ʻA fʋ̃ʋ mɩ, fʋ na Ꞌwuoro na a ten anuu.ʼ ²⁰ A tʋ̃tʋnↄ ƴen sʋbↄ ta na mɩ yel: ʻNɩ-kpɛ̃ɛ, nyɛ a fʋ sɛlɩ̃-bir ɩ̃ na ƴↄ̃w cẽcen pʋↄ tɛɛlɛ fʋ. ²¹ Ɩ̃ jↄrↄ fʋ na dãbɩ̃ɛ, a-na-ɩ a fʋ ben kpɛmɛ na. Fʋ ma de na a ala na ma ɩ a fʋ bom wa, ɩ̃ ma mɩ ŋma a ala fʋ na ma bʋr wa.ʼ ²² A jamana yel ʋ: ʻFʋna tʋ̃tʋ̃-fãa naa! A fʋ ƴɛrɩ̃ ɩ̃ na de lɩɛb dↄↄl a fʋ juu. Fʋ na dãa bↄ̃w ka ɩ̃ ben kpɛmɛ na, ɩ̃ ma diere a ala na ma ɩ a ɩ̃ bom wa, ɩ̃ mɩ ŋmara a ala ɩ̃ na ma dãa bʋr wa, ²³ ɩ̃ mɩnɛ a ɩ a faa dãa de a ɩ̃ libie kʋ a ƴaƴabsɩ, a maa wa lɩɛb wa, ɩ̃ nyɛ dↄↄlaa wa?ʼ ²⁴ Ɩ̃ na ʋ yel a bala na ɩraa a be: ʻNyɩ́ faa a ʋ sɛlɩ̃-bir kʋ a ʋlↄ na tɛrɛ a sɛlɩ̃-bie pie.ʼ ²⁵ A ba yel ʋ: ʻNɩ-kpɛ̃ɛ, má pie jaa ʋ tɛrɛ!ʼ ²⁶ Ʋ yel ba: ʻƖ̃ yele nyɩ na, a ʋlↄ na tɛraa, ba na lɛ kʋ ʋ na a dↄↄl, ɩ̃-cɛ a ʋlↄ na ma tɛraa wa, ɩ̃ tɛrɛ a fɩ̃ɩ, ba na de na a lɩ̃ɩ ala a ʋ jie. ²⁷ Ɩ̃-cɛ a ɩ̃ sama-deme bala na ma dãa bʋↄrↄ ɩ̃ ɩ a ba jamana wa, nyɩ́ nyↄↄr ba wa nɩ a ka, na nyɩ kú a ɩ̃ nii-sↄw.ʼ ” ²⁸ A lɛ a Jeeju na ƴɛr a lɛ baar, ʋ de ba na nĩe a ba cere a Jerujalɛm. ²⁹ Ɩ̃ a lɛ ʋ na tara a Bɛfaje nɩ a Betani na pɩɛlʼɩ̃ a tãw ʋlↄ ba na bʋↄlↄ a Olivi-tɩɩr tãw, ʋ tʋ̃ na a ʋ par-tuurbe ayi, ɩ̃ yel ba: ³⁰ “Nyɩ́ cen a tẽw ʋlↄ na be a nii-sↄw. A nyɩmɩ wa ta a be, nyɩ na nyɛ na bʋ̃-bile ba na lũ, nɩrɛ na ma do sɛr wa. Nyɩ́ Ꞌlor wa nɩ. ³¹ A nɩrɛ wa soor nyɩ á bõ nyɩ Ꞌloro ɩrɛ nɩ, nyɩ́ yel áa Nɩ-kpɛ̃ɛ ɩ̃ bʋↄrↄ ʋ.” ³² A bala ʋ na tʋ̃ cenʼã na nyɛ a be a mɩnɛ a Jeeju na yel ba. ³³ A lɛ ba na cãa Ꞌloro a bʋ̃-bile, a bʋ̃ↄ deme soor ba na: “Bõ nyɩ Ꞌloro a bʋ̃-bile ɩrɛ nɩ?” ³⁴ A ba yel ba áa Nɩ-kpɛ̃ɛ ɩ̃ bʋↄrↄ ʋ, ³⁵ ɩ̃ na ba de a bʋ̃-bile cenʼɩ̃ a Jeeju sɛ̃, ɩ̃ lↄb a ba cẽcene dↄↄl a ʋ juu, ɩ̃ ɩ a Jeeju ʋ do jɛ. ³⁶ A lɛ ʋ na cere, a lɛ a nɩbɛ mɩ yɛrɛ a ba cẽcene pↄwrↄ a sↄr cere nɩ. ³⁷ Ɩ̃ a lɛ ʋ na tara a Jerujalɛm, suure nɩ a Olivi-tɩɩr tãw sↄr, nʋ̃ↄ ƴala na a nɩ-yaw bala ba jaa na ma tuure ʋ, a ba pɛwrɛ a Naaŋmɩn nɩ kpɛ̃w a ana tʋ̃-kpɛn a jaa ba na nyɛ ɩnɛ. ³⁸ Ba yele na: “A Nɩ-kpɛ̃ɛ Naaŋmɩn ú be nɩ a jamana ʋlↄ na waara nɩ a ʋ yuor! A pɩɛnfʋ ʋ be a saꞋlon, ɩ̃ a Naaŋmɩn ʋ sↄ a ju-kpɛ̃ɛ a saꞋlon iin!” ³⁹ A Farɩsɩ nɩbɛ ŋmɛɛ na dãa be a nɩbɛ sↄ̃w, yelʼã a Jeeju: “Jãjaana, tan a fʋ par-tuurbe a ba sine.” ⁴⁰ A Jeeju yel ba: “Ɩ̃ yele nyɩ na, a bala ɩ̃ sine, a kʋsɩɛ na wuure na.” ⁴¹ A mɩnɛ a Jeeju na tara a Jerujalɛm, nyɛ a tẽw, ʋ kõ na a ʋ ɩnɛ ⁴² ɩ̃ yel: “A nyɩmɩ mɩ, a ala ɩ nyɩ dãa na bↄ̃w a dɩnaa bibirʼã, a ana yele na kʋrↄ nyɩ a pɩɛnfʋ ɩ̃-cɛ a ƴɛ̃ƴɛrɩ̃ na, a liw na a nyɩ jie. ⁴³ A-na-ɩ a daar nↄↄ ta na a nyɩ sama-deme wa tiw kolĩ nyɩ, jɛ var gu nyɩ, ɩ̃ jɛbɛ nɩ nyɩ a lõbobo a jaa. ⁴⁴ Ba na bũburĩ nyɩ na, ɩ̃ wɛl a nyɩ tẽw bar. Ba kↄ̃ bar kubie a lɛ dↄↄl taa fɩ̃ɩ wa, a-na-ɩ a daar ʋlↄ a Naaŋmɩn na wa a nyɩ faafʋ ɩnɛ, nyaa bↄ̃wnaa wa.” ⁴⁵ A Jeeju kpɛ na a Naaŋmɩn puor-yir kpɛ̃ɛ pʋↄ, diwre a bala na ƴaba bara ⁴⁶ ɩ̃ yele ba: “A sɛbʼã a Naaŋmɩn Sɛbɛ pʋↄ: ʻA ɩ̃ yir na ɩ na a puorfʋ yir,ʼ ɩ̃-cɛ nyɩ lɩɛb ʋ na ʋ ɩ a nyanyube sↄↄlɩ̃fʋ jie.” ⁴⁷ A bibie a jaa, a Jeeju ma jaana na a nɩbɛ a be a Naaŋmɩn puor-yir kpɛ̃ɛ pʋↄ, a Jufisɩ baar-lo-nɩ-bɛrɛ nɩ a ba ƴɛr-kpɛn-bↄↄnbↄ nɩ a ba nɩ-bɛrɛ dãa bʋↄrↄ ba kú ʋ, ⁴⁸ ɩ̃-cɛ baa bↄ̃w a mɩnɛ ba na ɩrɛ wa, a-na-ɩ a nɩbɛ ba jaa nyɩrɩ̃ na ƴↄ̃w toor cɛlɛ a ʋ ƴɛrɩ̃sɩ.

¹ Bibir kaw, a Jeeju jaana na a nɩbɛ a Naaŋmɩn puor-yir kpɛ̃ɛ pʋↄ, ƴɛrɛ nɩ a Naaŋmɩn ƴɛr-son, a Jufisɩ baar-lo-nɩ-bɛrɛ, nɩ a ba ƴɛr-kpɛn-bↄↄnbↄ, nɩ a ba ni-dierbe ta ² soor ʋ: “Yel sɩ a nyɩnɛ fʋ na pↄw a sↄr maala nɩ a yele asɩmɛ? Ala ɩ̃ kʋ fʋ a sↄr?” ³ A Jeeju yel ba: “Ɩ̃ na mɩ soor nyɩ na bom bõ-ƴen. Nyɩ́ man ma: ⁴ a Jã-Batii kʋ̃ↄ mʋrfʋ, nyɩnɛ a yi? A Naaŋmɩn jie ʋ, mɩɩ a nɩbɛ jie ʋ?” ⁵ Ɩ̃-cɛ ba nyↄw na ɩ̃ pɛrɛ ƴↄnↄ taa a ba mɩ̃ɛ ɩ̃ yele: “A ala ɩ sɩ yelʼã á Naaŋmɩn jie a yi, ʋ na soor sɩ na á bõ ɩnɛ saa sↄw de a Jã wa. ⁶ Ɩ̃ a ala ɩ sɩ yelʼã á nɩbɛ jie a yi, a nɩbɛ ba jaa na lↄb sɩ na nɩ a kʋsɩɛ kú, a-na-ɩ ba dãa na sↄw nɩ a ba pʋↄ ʋ jaa áa Jã ɩ na a Naaŋmɩn ƴɛr-hiere.” ⁷ A be jie, ba yelʼã: “Saa bↄ̃w a jie a ʋ kʋ̃ↄ mʋrfʋ na yi wa.” ⁸ A Jeeju lɩɛb yel ba: “A maa mɩ, ɩ̃ kↄ̃ mɩ yel nyɩ a jie ʋlↄ ɩ̃ na pↄw a sↄr maala nɩ a yele ala wa.” ⁹ A ala na yi tↄ, a Jeeju lↄbʼã a sʋkpa na kʋ a nɩbɛ. Ʋ yelʼã: “Daba kãw sɛlʼã dɩvɛ̃-tɩɩr a ʋ puo pʋↄ ɩ̃ bↄ tʋ̃tʋnbↄ ƴↄ̃w a ba Ꞌwuoro, ɩ̃ yↄ cen jie kãw kam a be. ¹⁰ A lɛ a tɩ-wↄmↄ daar na ta, ʋ tʋ̃ na tʋ̃tʋnↄ kãw a nɩbɛ bala jie a ʋ cen a ba kʋ ʋ a ala na ɩ a ʋ ben, ʋ wa nɩ. Ɩ̃-cɛ a tʋ̃tʋnbↄ bala narʼã a ʋlↄ ʋ na tʋ̃ ɩ̃ diw ʋ bar ʋ kulʼɩ̃ nu-jaala. ¹¹ A puo sʋbↄ lɛ bↄ̃w tʋ̃ a tʋ̃tʋnↄ ƴen sʋbↄ, a ba mɩ nar ʋ ɩ̃ tʋ tʋ ʋ, ɩ̃ diw ʋ bar ʋ mɩ kulʼɩ̃ nu-jaala. ¹² Ʋ lɛ bↄ̃w tʋ̃ a ata sʋbↄ a ba nyↄw ʋ nar ƴↄ̃w wʋlɩ̃, ɩ̃ lↄb ʋ bar yẽw. ¹³ A be jie, a puo sʋbↄ yel: ʻMɩnɛ ɩ̃ na ɩ? Ɩ̃ na tʋ̃ na a ɩ̃ bi-nʋnaa; a nʋmↄ wa sↄw ba na jↄ na a ʋlↄ.ʼ ¹⁴ Ɩ̃-cɛ a lɛ a tʋ̃tʋnbↄ bala na nyɛ ʋ, ba yelʼã kʋ taa: ʻA naa ɩ̃ ɩ a gã-diere; nyɩ́ ɩ a sɩ kú ʋ bar ɩ̃ de a gãw.ʼ ¹⁵ Ɩ̃ na ba nyↄw ʋ vu yi nɩ a puo cɛ̃cɛ̃w, kú ʋ bar. “A na be a lɛ, bõ a puo sʋbↄ na pãa maal ba? ¹⁶ Ʋ na wa na na kú a tʋ̃tʋnbↄ bala bar, ɩ̃ de a puo kʋ a nɩ-kpeesɩ.” A lɛ a nɩbɛ na wõ a ƴɛr-bir ʋlↄ, ba yelʼã: “A taa be a lɛ wa!” ¹⁷ Ɩ̃-cɛ a Jeeju Ꞌwuor ba na kir-kir-kir ɩ̃ yel: “A ala ɩ a lɛ ʋ, bõ a ƴɛrɩ̃ na na sɛb a Naaŋmɩn Sɛbɛ pʋↄ bʋↄrↄ a yel? ʻA kubir ʋlↄ a dacin-mɩɛrbɛ na dãa jaar bar, lɛ lɩɛbʼã ɩ a kubir ʋlↄ ba na de ƴↄ̃w a dacin gbɛr pʋↄ.ʼ ¹⁸ “A nɩrɛ lɛ nↄↄ loro a kubir ʋlↄ juu, a sʋbↄ ʋlↄ na karʼã, ɩ̃ a ʋlↄ juu a kubir ʋlↄ nↄↄ loro, ʋ na pʋ̃pʋrɩ̃ ʋ na bar. ¹⁹ A mɩnɛ a ƴɛr-kpɛn-bↄↄnbↄ nɩ a baar-lo-nɩ-bɛrɛ na bↄ̃w ka bala a Jeeju lↄbↄ nɩ a sʋkpa, ba dãa na bʋↄrↄ ba nyↄw ʋ a ʋna daarʼãa pʋↄ, ɩ̃-cɛ ba dãa na jↄ dãbɩ̃ɛ a nɩbɛ ɩnɛ.” ²⁰ Ba nyↄw na ɩ̃ jʋʋrↄ a Jeeju, ɩ̃ ir jʋjʋʋrbↄ bar a ba cen a ʋ sɛ̃, maala wↄ̃ nɩ-sono ba ɩ, bʋↄrↄ ʋ ƴɛr ƴɛrɩ̃ lɩɛb nyↄw nɩ a ʋ mɩ̃ɛ, a ba ƴↄ̃w ʋ a fãgã sʋbↄ nuumɩ na ɩ a ba tẽw nɩ-kpɛ̃ɛ. ²¹ Ba soor ʋ na: “Jãjaana, sɩ bↄ̃w ka a fʋ ƴɛrɩ̃sɩ nɩ a fʋ jaanfʋ fʋ na jaana a nɩbɛ de na a sↄr. Fʋ maa Ꞌwuor a ala a nɩrɛ na ɩ wa, ɩ̃-cɛ fʋ ma jaana na a nɩbɛ a Naaŋmɩn sↄr a yel-mɩ̃ɛ pʋↄ. ²² Sↄr be na be a sɩ na ma ya a lãpo kʋ a Orom jaman-kpɛ̃ɛ, mɩɩ sↄr ma be be wa?” ²³ Ɩ̃-cɛ a Jeeju bↄ̃w nɩ na a ba bɛraa ɩ̃ yel ba: ²⁴ “Nyɩ́ miilʼɩ̃ ma libi-kur. Ala nii-sↄw nɩ ala yuor ɩ̃ be be?” A ba yel ʋ: “A Orom jaman-kpɛ̃ɛ ʋ.” ²⁵ A be jie, a Jeeju yel ba: “Nyɩ́ lɩɛbɛ kʋrↄ a Orom jaman-kpɛ̃ɛ a ala na ɩ a Orom jaman-kpɛ̃ɛ ben, ɩ̃ mɩ kʋrↄ a Naaŋmɩn a ala na mɩ ɩ a Naaŋmɩn ben.” ²⁶ Baa tʋↄ nyɛ mabfʋ jie a ʋ ƴɛrɩ̃sɩ pʋↄ ʋ na ƴɛrɛ a nɩbɛ nii-sↄw wa; ɩ̃ nↄɛ ɛ̃ɛ na ko ba a ba ŋma vʋʋrɩ̃sɩ. ²⁷ A Saduse nɩbɛ na ma yele áa kũusɩ ma ire a kũu pʋↄ wa, nɩbɛ ŋmɛɛ ta na soor a Jeeju: ²⁸ “Jãjaana, a Mowisi sɛbʼã a ʋ sɛbɛ pʋↄ yel sɩ, a ala ɩ a nɩrɛ tɛrɛ na yɛbɛ ʋ wa kpi ɩ̃ cɛ a pↄw bar, a Ꞌwaa tɛrɛ bibiir wa, a nɩrɛ ʋlↄ ʋ de a kpɩ̃ɩ-pↄw dↄw bibiir a ʋ yɛbɛ ʋlↄ yuor ɩnɛ. ²⁹ Yɛɛr anuu-nʼayi dãa na be be; a ba kpɛ̃ɛ kulʼã pↄw ma dↄw bie wa ɩ̃ kpi, ³⁰ a ʋ tuure de a kpɩ̃ɩ-pↄw ma mɩ dↄw bie wa ɩ̃ mɩ kpi, ³¹ a ata sʋbↄ de, a mɩ ɩ a wãa naa. A lɛ a wↄ̃ nɩ a yɛɛr anuu-nʼayi bala ba jaa. Baa tʋↄ dↄw bie wa ɩ̃ mɩ kpi, ³² ɩ̃ a pↄw wa pãa bɩɛr kpi. ³³ A na be a lɛ, a kũu-pʋↄ-irfʋ daar, buor sʋbↄ ɩ̃ na sↄ a pↄw? A-na-ɩ a ba jaa anuu-nʼayi dãa na kul ʋ.” ³⁴ A Jeeju yel ba: “A dabsɩ nɩ a pↄↄbↄ na be a tẽw na pʋↄ, kule na taa. ³⁵ Ɩ̃-cɛ a bala a Naaŋmɩn na kʋ a sↄr a ba na ir a kũu pʋↄ, tɛrɛ nɩ a baafʋ a tẽw ʋlↄ na waara ɩnɛ, baa kule taa wa. ³⁶ Baa lɛ be na kpi wa, a-na-ɩ ba na wↄ̃ na a Naaŋmɩn sɩ-tʋmsɩ kaarɩ̃. Ba ɩ na a Naaŋmɩn bibiir a mɩnɛ ba na ir a kũu pʋↄ. ³⁷ A ala ɩ a kũu-pʋↄ-irfʋ ʋ, a Mowĩsi miilʼã a ala a tɩ-bile a vũu na Ꞌlere ƴɛrɩ̃ pʋↄ, a mɩnɛ ʋ na yel áa Nɩ-kpɛ̃ɛ ɩ na a Abʋraham nɩ a Ɩjakɩ nɩ a Jakↄb Naaŋmɩn. ³⁸ Ɩ̃ a Naaŋmɩn ma ɩ a nɩ-kpɩmɛ Naaŋmɩn wa, nɩ-mimie Naaŋmɩn ʋ ɩ, a-na-ɩ a ʋ jie a nɩbɛ ba jaa ɩ na nɩ-mimie.” ³⁹ A be jie, a ƴɛr-kpɛn-bↄↄnbↄ ŋmɛɛ yelʼã: “Jãjaana, sɩrɛ jaa ʋ!” ⁴⁰ A-na-ɩ a nɩrɛ ma lɛ dãa Ꞌlara sooro ʋ bom kãw go wa. ⁴¹ A Jeeju yel ba: “Mɩnɛ ɩ̃ ɩ a nɩbɛ ma yel áa jamana Davɩtɩ bie a Kirisi ɩ? ⁴² A-na-ɩ a Davɩtɩ mɩ̃ɛ yelʼã a Pɛwfʋ sɛbɛ pʋↄ: ʻA Nɩ-kpɛ̃ɛ Naaŋmɩn yelʼã a ɩ̃ Nɩ-kpɛ̃ɛ: Jɛ a ɩ̃ dʋrɩ̃ loor ⁴³ wa ta nɩ a daar ʋlↄ ɩ̃ nↄↄ maala a fʋ sama-deme a ba ɩrɛɛ a fʋ gbɛɛ dↄↄlfʋ jie.ʼ ⁴⁴ A ala ɩ a Davɩtɩ bʋↄlↄ ʋ na Nɩ-kpɛ̃ɛ, mɩnɛ ʋ na lɛ tʋↄ ɩ a ʋ bie?” ⁴⁵ A mɩnɛ a nɩbɛ ba jaa na cɛlɛ a ʋ ƴɛrɩ̃sɩ, a Jeeju yelʼã a ʋ par-tuurbe: ⁴⁶ “Nyɩ́ gu nyɩ mɩ̃ɛ a ƴɛr-kpɛn-bↄↄnbↄ ɩnɛ. Ba ma su na a cẽcẽ-bɛrɛ yʋↄrↄ nɩ, bʋↄrↄ nɩ a nɩbɛ ba jaa ba puoro ba a dar pʋↄ; ba nʋ na a nii-sↄw jaajiir a ba puorfʋ yie pʋↄ, mɩ nʋ nɩ a nɩ-bɛrɛ dakↄↄr jur jɩnaafʋ a fɛtɩsɩ jie. ⁴⁷ Bala ɩ̃ ma bɛlɛ a kpɩ̃ɩ-pↄↄbↄ yele fara dɩrɛ, ɩ̃ ma bↄ̃w nɩ sʋↄr a Naaŋmɩn kamʼɩ̃, bʋↄrↄ a nɩbɛ ba Ꞌwuoro ba. Yɛr-kpɛ̃ɛ na dↄↄlʼã a ba juumɩ.”

¹ A Jeeju dʋↄ na Ꞌwuor nyɛ a mɩnɛ a tɛraa deme na ƴↄnↄ a ba libie, a be a Naaŋmɩn libie ƴↄ̃wfʋ jie. ² Ʋ mɩ nyɛ na kpɩ̃ɩ-pↄw nã-dɩrɛ ʋ ƴↄnↄ libi-kure ayi na wↄ̃ taa nɩ tama ayi, ³ ɩ̃ yel: “Yel-mɩ̃ɛ ɩ̃ yele nyɩ, a kpɩ̃ɩ-pↄw na na nyɛrɛ a nãw, ƴↄ̃w na gãw a nɩbɛ ba jaa. ⁴ A-na-ɩ a ba jaa, ba ƴↄ̃w na a ala ba na dɩ ɩ̃ cɛ, ɩ̃-cɛ a pↄw na nɩ a ʋ nãw ʋ jaa, ʋ ƴↄ̃w na a ala a jaa ʋ na dãa bin gu nɩ a ʋ mɩ̃ɛ.” ⁵ A nɩbɛ ŋmɛɛ ƴɛrɛ na a Naaŋmɩn puor-yir kpɛ̃ɛ ƴɛrɩ̃, kpiire nɩ a mɩnɛ ba na mɛ nɩ ʋ a kubi-vɛlɛ, ɩ̃ ƴaarɩ̃ nɩ ʋ a yel-ɓↄmↄ ba na kʋ a Naaŋmɩn. A Jeeju yel ba: ⁶ “A ala nyɩ na nyɛ, a daar na ta na a kʋsɩr kãw kↄ̃ tʋↄ cɛ dↄↄl ɩraa a ʋ tↄ sʋbↄ juu wa. Ba na wɛlaa na a jaa kpar a tene.” ⁷ A be jie, ba soor ʋ na: “Jãjaana, dabor a yele ala na ta? Bõ-buor ɩ̃ miile a daar ʋlↄ a ana yele na tara?” ⁸ A Jeeju yel ba na: “Nyɩ́ gu nyɩ mɩ̃ɛ kↄ̃ bar nɩrɛ ʋ wa bɛlɩ̃ nyɩ wa, a-na-ɩ a nɩ-yaw na de na a ɩ̃ yuor wa nɩ yele á bala ɩ̃ ɩ a Kirisi. Ɩ̃ ba na mɩ yelʼã áa daar tara na. Nyɩ taa tuure ba wa. ⁹ A nyɩmɩ wa wõ a jɛb ƴɛrɩ̃sɩ nɩ a faa-taa, nyɩ taa wa ɩ a dãbɩ̃ɛ nyↄwrↄ nyɩ wa, a-na-ɩ a sɛw na a ala na de nĩe ta baar, ɩ̃-cɛ a kↄ̃ gↄr ɩ a tẽw baarfʋ wa.” ¹⁰ Ʋ lɛ yelʼã: “Tẽw na nɩbɛ na irʼã jɛbɛ nɩ tẽ-kpee nɩbɛ, ɩ̃ a jamana kãw na irʼã jɛbɛ nɩ a jaman-kpee. ¹¹ A tẽw na dama na nɩ kpɛ̃w, ɩ̃ a wʋlɩ̃-yʋↄrsɩ nɩ a kↄ̃-bɛrɛ na lo na a tẽ-bʋrↄ bʋrↄ pʋↄ. IIierũu na mɩ be na a saꞋlon ƴↄnↄ a nɩbɛ a dãbɩ̃ɛ pʋↄ. ¹² Ɩ̃-cɛ a yele ala a jaa kↄ̃ ta sɛr wa, ɩ̃ ba na nyↄↄr nyɩ na hʋↄlↄ nyɩ. Ba na nyↄↄr nyɩ na cenʼɩ̃ a ba puorfʋ yie pʋↄ, nɩ a kasu yie pʋↄ. Ba na taw nyɩ na cenʼɩ̃ a jamansɩ nɩ a fãgã deme nii-sↄw a maa ɩnɛ. ¹³ Be nyɩ na nyɛ a sↄr ƴɛr a nyɩ yel-mɩ̃ɛ kʋ ba. ¹⁴ Nyɩ́ nyɛ a ala na sɛw nyɩ ƴↄ̃w a nyɩ jur pʋↄ: nyɩ taa de nĩe waala a ala ɩnɛ nyɩ nↄↄ yele faara nɩ a nyɩ juu wa, ¹⁵ a-na-ɩ a maa, ɩ̃ na kʋ nyɩ na a ala nyɩ na ƴɛrɛ, mɩ kʋ nɩ nyɩ a kpaarfʋ ʋlↄ a nyɩ sama-deme na faara a juu, ɩ̃ ma mɩ tʋↄrↄ cɩɩrɛ wa. ¹⁶ A nyɩ saanba mɩ̃ɛ, nɩ a nyɩ mã nʋmↄ, nɩ a nyɩ yɛɛr, nɩ a nyɩ bal nɩbɛ, nɩ a nyɩ badɛɛ na de nyɩ na a juu a fãgã deme jie. Ba na kú na a ŋmɛɛ a nyɩ sↄ̃w, ¹⁷ ɩ̃ a nɩbɛ ba jaa na Ꞌlaar nyɩ na a maa ɩnɛ. ¹⁸ Ɩ̃-cɛ a nyɩ jukↄbir bõ-ƴen kↄ̃ be na bↄr wa. ¹⁹ Nyɩ́ nyↄw cĩcĩ. A lɛ nyɩ na faa a nyɩ baafʋ. ²⁰ “A nyɩmɩ wa nyɛ a sↄdaalsɩ a ba kpal a Jerujalɛm, nyɩ́ bↄ̃wnaa, a ʋ wɛlfʋ pɩɛlʼã yɛ̃yɛ̃. ²¹ A lɛ, a bala nↄↄ beree a Jude, bá jↄrↄ duoro a tan jur. A bala nↄↄ beree a Jerujalɛm tẽ-pʋ̃ↄ bá jↄrↄ yire, ɩ̃ a bala nↄↄ beree a cɛ̃cɛ̃w ba taa kpɛɛrɛ a tẽw pʋ̃ↄ wa. ²² A bibie ala na ɩ na a daar ʋlↄ a Naaŋmɩn na kpãana a Ɩsɩrayɛl nɩbɛ, maala nɩ a ala a jaa na sɛb a ʋ Sɛbɛ pʋↄ. ²³ Won na nyɩrɩ̃ na ta a pↄↄ-pʋʋr deme nɩ a bala na tɛrɛ a bi-pɩɩlsɩ a bibie ala cara pʋↄ. Á-na-ɩ won kpɛ̃ɛ na ta na a tẽw ʋlↄ, ɩ̃ a Naaŋmɩn su-tuo na lo na a ʋ nɩbɛ juu. ²⁴ Sↄ-bãjɩnɛ ba na kú nɩ ba. Ba na nyↄↄr ba na cenʼɩ̃ a ba ɩ gbãgbaar a tẽ-bʋrↄ bʋrↄ a jaa pʋↄ, ɩ̃ a nɩ-bʋlsɩ ɩ̃ na sãsarɩ̃ a Jerujalɛm-tẽw, wa ta nɩ a mɩnɛ a ba fãgã daar nↄↄ baara. ²⁵ “Jɩbsɩ na nyɩrʼã a mↄtↄ̃w pʋↄ, nɩ a cuu pʋↄ, nɩ a ŋmarbie pʋↄ. Tuo na be na a tẽ-bʋrↄ bʋrↄ nɩbɛ ba jaa jie a ka a tẽw juu, a ba ɓine a man kʋ̃ↄ ɩnɛ na hele, ɩ̃ kara duoro ɩ̃ suure. ²⁶ A dãbɩ̃ɛ na maalʼã a nɩbɛ a ba pɛl a mɩnɛ ba na jɛ cɛlɛ a bier ala nↄↄ tara a tẽw pʋↄ, a-na-ɩ a fãgãsɩ ala na be a saꞋlon na damʼã nyãkarɩ̃ taa. ²⁷ A lɛdaar, ba na nyɛ na a Nɩbɛ Bie ʋ be a dↄ̃dↄrɩ̃ma pʋↄ nyɩnyɩlɛ waara nɩ a fãgã kpɛ̃w. ²⁸ A yele ala ɩ̃ wa tara, nyɩ́ ir ɩraa ɩ̃ jɛw a jur, a-na-ɩ a nyɩ faafʋ daar pɩɛlʼã.” ²⁹ A ala na yi tↄ, a Jeeju lↄbʼã a sʋkpa na kʋ ba: “Nyɩ́ nyɛ a fɩgɩ tɩɛ nɩ a tɩɩr a jaa. ³⁰ A nyɩmɩ wa Ꞌwuor nyɛ a ba tↄbↄ, nyɩ ma bↄ̃w ka a susuur daar tara na. ³¹ A lɛ ʋ mɩ, a nyɩmɩ wa nyɛ a ana yele a tara, nyɩ́ bↄ̃w ka a Naaŋmɩn fãw mɩ tara na. ³² Yel-mɩ̃ɛ ɩ̃ yele nyɩ, a ƴɛ̃ƴɛrɩ̃ na nɩbɛ kↄ̃ baar ba jaa wa, wa ta nɩ a ana yele a jaa nↄↄ tara. ³³ A saꞋlon nɩ a tene na tↄlʼã, ɩ̃-cɛ a ɩ̃ ƴɛrɩ̃ ma be tↄlfʋ jie fɩ̃ɩ wa. ³⁴ “Nyɩ́ tɛrɛ nyɩ mɩ̃ɛ. Nyɩ taa bar a folfʋ, nɩ a dãa kʋfʋ, nɩ a tẽw na baafʋ dɛn, a ɩ tuor a nyɩ tɩɛrɩ̃sɩ pʋↄ wa. A ala ma ɩ lɛ ʋ wa, a Kirisi waa bibir nↄↄ puurĩ nyɩ na, ³⁵ a mɩnɛ a jʋↄ na ma lo pↄw a jɩmɛ, a-na-ɩ a na lo na pↄw a nɩbɛ ba jaa na be a ka a tẽw juu. ³⁶ Nyɩ taa gure wa. Nyɩ́ ɛ̃ɛ sʋↄrↄ a Naaŋmɩn a daar a jaa, a mɩnɛ a nyɩ na tʋↄ cɩ̃ɛ a ala a jaa ɩnɛ na sɛw a ta, ɩ̃ na nyɩ tʋↄ ɩraa a Nɩbɛ Bie nii-sↄw.” ³⁷ A Jeeju ma jaana na a nɩbɛ a mↄtↄ̃w a Naaŋmɩn puor-yir kpɛ̃ɛ pʋↄ, ɩ̃-cɛ a tɩsↄw wa ta, ʋ ma cenʼã na gã a tãw ʋlↄ juu ba na bʋↄlↄ a Olivi-tɩɩr tãw. ³⁸ Ɩ̃ a nɩbɛ ba jaa ma ca na ir wa a Naaŋmɩn puor-yir kpɛ̃ɛ pʋↄ a dʋ̃Ꞌwʋlɩ̃ ɓaaraa a ʋ ƴɛrɩ̃ cɛlfʋ ɩnɛ.

¹ A bur-pʋↄr fɛtɩ ba na bʋↄlↄ a Pakɩ dãa na pɩɛlɛ. ² A Naaŋmɩn baar-lo-nɩ-bɛrɛ nɩ a ƴɛr-kpɛn-bↄↄnbↄ bʋↄrↄ na a mɩnɛ ba na ɩrɛ ɩ̃ bũbure a Jeeju, ɩ̃ a nɩrɛ kↄ̃ bↄ̃wnaa wa, a-na-ɩ ba dãa na jↄrↄ a nɩbɛ dãbɩ̃ɛ. ³ A daar ʋlↄ pʋↄ a Satã kpɛ na a Judasɩ ba na mɩ bʋↄlↄ a Isikaryↄtɩ, ⁴ ʋ ir cen na guor taa nɩ a Naaŋmɩn baar-lo-nɩ-bɛrɛ nɩ a Naaŋmɩn puor-yir kpɛ̃ɛ gugurbe nɩ-bɛrɛ, a mɩnɛ ʋ na ɩrɛ ɩ̃ ƴↄnↄ a Jeeju a ba nur pʋↄ. ⁵ A nʋ̃ↄ ƴala ba a ala ba na wõ ɩnɛ, a ba man taa a libie ba na yara a Judasɩ, ⁶ ʋ sↄw ɩ̃ pãa bʋↄrↄ a daar ʋlↄ ʋ na tʋↄrↄ ƴↄnↄ ʋ a ba nur pʋↄ, ɩ̃ a nɩrɛ kↄ̃ bↄ̃wnaa wa. ⁷ A Bur-pʋↄr Fɛtɩ dayen ba na sɛw ba kú a Pakɩ peli ta na, ⁸ a Jeeju tʋ̃ a Pɩɛr nɩ a Jã na ʋ yel: “Nyɩ́ cen na gbɛɛrɩ̃ sɩ a Pakɩ dɩb a sɩ tɩ na dɩ.” ⁹ A ba soor ʋ: “Nyɩnɛ fʋ bʋↄrↄ sɩ cen na gbɛɛrɩ̃ a dɩb?” ¹⁰ Ʋ yel ba: “Nyɩ́ cɛlɛ, nyɩmɩ ta a tẽw pʋↄ, nyɩ na tuorʼɩ̃ na daba na tuo kʋ̃ↄ nɩ yuor. Nyɩ́ tu ʋ cen na ta kpɛ a yir ʋlↄ pʋↄ ʋ na kpɛɛrɛ, ¹¹ ɩ̃ na nyɩ yel kʋ a yir sʋbↄ: ʻA sɩ Jãjaana yelʼã a sɩ wa soor fʋ, á nyɩnɛ a die be a ʋlↄ nɩ a ʋ par-tuurbe na dɩrɛ a Pakɩ dɩb.ʼ ¹² Ʋ na miil nyɩ na bↄↄpɩɛn di-kpɛ̃ɛ ba na bↄ̃w gbɛɛrɩ̃ vɩlaa. A be nyɩ na gbɛɛrɩ̃ a dɩb.” ¹³ Ba cenʼã na ta na ba nyɛ a yele a wↄ̃ a mɩnɛ a Jeeju na dãa yel ba, a ba gbɛɛrɩ̃ a Pakɩ fɛtɩ. ¹⁴ A dɩb dɩfʋ daar ta na, a Jeeju nɩ a ʋ nɩ-tʋnɩsɩ jɛ a dɩb nii-sↄw, ¹⁵ ʋ yel ba: “Ɩ̃ tɩɩ na nyɩrɩ̃ bʋↄrↄ ɩ̃ lãa dɩ nɩ nyɩ a Pakɩ dɩbʼãa baar ɩ̃ pãa nyɛ a hʋʋr. ¹⁶ A-na-ɩ yel-mɩ̃ɛ ɩ̃ yele nyɩ, maa lↄↄ dɩrɛ a Pakɩ bõ-dɩraa wa tara nɩ a daar ʋlↄ a fɛtɩ na par na wa nyɩrɛ a Naaŋmɩn fãw pʋↄ wa.” ¹⁷ A mɩnɛ ʋ na ƴɛr a lɛ baar, ʋ de na a dɩvɛ̃ nɩ a ŋman ɩ̃ na ʋ puor a Naaŋmɩn ɩ̃ yel: “Nyɩ́ de a dɩvɛ̃ na na nyɩ nyu Ꞌlʋↄrɩ̃ taa. ¹⁸ A-na-ɩ yel-mɩ̃ɛ ɩ̃ yele nyɩ, wa nyↄw nɩ a ƴɛ̃ƴɛrɩ̃, maa lↄↄ nyuure a dɩvɛ̃ wa tara nɩ a daar ʋlↄ a Naaŋmɩn fãw nↄↄ waara wa.” ¹⁹ A ala ɩ̃ baar, ʋ de na buru na ʋ pɛw a Naaŋmɩn, ɩ̃ ŋma kʋ ba ɩ̃ yel: “A naa ɩ̃ ɩ a ɩ̃ ɩ̃gan [ɩ̃ na de tɩɩr a nyɩ ɩnɛ. Nyɩ́ maala a lɛ bↄ̃wnↄ nɩ ma.” ²⁰ A mɩnɛ ba na dɩ a dɩb baar, ʋ mɩ de na a dɩvɛ̃ nɩ a ŋman kʋ ba ɩ̃ yel: “A dɩvɛ̃ na ɩ̃ ɩ a pʋlɩ̃-ta-paalaa ʋlↄ a ɩ̃ jɩ̃ɩ nↄↄ cire cↄↄrↄ a nyɩ ɩnɛ.] ²¹ Ɩ̃-cɛ nyɩ́ bↄ̃wnaa, a ʋlↄ na ƴↄnↄ ma a ɩ̃ sama-deme nur pʋↄ lãa na jɛ nɩ ma a ka a dɩb dɩfʋ jie. ²² Yel-mɩ̃ɛ ʋ, a Nɩbɛ Bie na sɩrɩ̃ na kpi, a mɩnɛ a Naaŋmɩn na biin a ʋ tɩɛrʋ̃, ɩ̃-cɛ nabier na pↄw na a nɩrɛ ʋlↄ na diere ʋ a juu.” ²³ A be jie, ba nyↄw na ɩ̃ sooro taa, á nɩ-buor a ba sↄ̃w ɩ̃ na maal a bom a lɛ. ²⁴ A nɩ-tʋnɩsɩ nyↄw na ɩ̃ faara taa bʋↄrↄ ba bↄ̃w a buor sʋbↄ a ba sↄ̃w ba na sɛw ba Ꞌwuoro ʋ ɩ a nɩ-kpɛ̃ɛ. ²⁵ A be jie, a Jeeju yel ba: “A tẽw na jamansɩ ma fɛrɛ na a ba nɩbɛ, ɩ̃ a ba tʋtʋↄrbↄ ma ɩ a ba bʋↄlↄ ba a vɩlaa-maalba. ²⁶ Ɩ̃-cɛ a nyɩmɩ, nyɩ taa ɩ a be a lɛ a nyɩ sↄ̃w wa. Ɩ̃ a nɩ-kpɛ̃ɛ a nyɩ sↄ̃w ú ɛ̃ɛ lɩɛb wↄ̃ taa nɩ a bibile, ɩ̃ a ʋlↄ na ɩ a ni-diere ú wↄ̃ taa nɩ a ʋlↄ na ɩ a tʋ̃tʋnↄ. ²⁷ A-na-ɩ ala ɩ̃ ɩ a kpɛ̃ɛ? A ʋlↄ na tɩɩr a sↄr a ba poro a dɩb ʋ, mɩɩ a ʋlↄ na poro ʋ? Má a ʋlↄ na tɩɩr a sↄr ɩ̃ ɩ a kpɛ̃ɛ. Ɩ̃ a maa, na ɩ a nyɩ nɩ-kpɛ̃ɛ, ɩ̃ be na a nyɩ sↄ̃w wↄ̃ taa nɩ a ʋlↄ na poro. ²⁸ “Á nyɩmɩ, nyɩ ɩ na a bala na lãa ɩraa nɩ ma a ɩ̃ won bʋrↄ bʋrↄ pʋↄ, ²⁹ ɩ̃ a mɩnɛ a ɩ̃ Sãa na biin ma ɩ̃ tɛrɛ a jamana fãw, ɩ̃ mɩ biin nyɩ na a nyɩ na tɛrɛ a jamansɩ fãw. ³⁰ A lɛ, sɩ na lãa na dɩrɛ nyuure nɩ a ŋman bõ-ƴen pʋↄ a ɩ̃ fãw pʋↄ. Nyɩ na mɩ jɛ na a naa dakↄↄr jur na nyɩ guoro a Ɩsɩrayɛl bal bʋrↄ bʋrↄ pie-nʼayi ƴɛrɩ̃sɩ.” ³¹ A Jeeju yelʼã: “Sɩmↄ̃, cɛlɛ! A Satã sʋↄrʼã sↄr a ʋ yɛl nyɩ ci kaarɩ̃. ³² Ɩ̃-cɛ ɩ̃ sʋↄrʼã a Naaŋmɩn ƴↄ̃w fʋ a fʋ ƴↄ̃w-nyãa kↄ̃ bũburĩ wa. Ɩ̃ a fʋ̃ʋ wa lɛ lɩɛb a fʋ yɛ̃ ɩ̃ wa, fú sũo a fʋ tↄ deme a ba ɩraa cĩcĩ.” ³³ A Pɩɛr yel ʋ: “Nɩ-kpɛ̃ɛ, ɩ̃ sↄw na na lãa kpɛ nɩ fʋ a kasu pʋↄ, ɩ̃ mɩ lãa kpi nɩ fʋ.” ³⁴ A Jeeju yel ʋ: “Pɩɛr, ɩ̃ yele fʋ na, a nↄraa kↄ̃ kokolĩ a dɩnaa tɩsↄw naan sɛr wa, ɩ̃ fʋ na cɩɩrɩ̃ na gbɛɛ ata a faa bↄ̃w ma wa.” ³⁵ A Jeeju lɛ bↄ̃w na yel ba go: “A mɩnɛ ɩ̃ na dãa tʋ̃ nɩ nyɩ a nu-jaala, a nyaa de a libie, mɩɩ a vɩrwʋↄ, mɩɩ a nafaba wa, bom dãa na ɓↄr nyɩ mɩɩ?” A ba yel ʋ: “Bom ma ɓↄr sɩ wa.” ³⁶ Ʋ lɛ yel ba: “Yɛ̃ƴɛrɩ̃ na, a ʋlↄ na tɛrɛ libie, ú de tɛrɛ a ʋ ɩ̃ganɩ̃, ɩ̃ a ʋlↄ na tɛrɛ a wʋↄ, ú mɩ de tɛrɛ. A ʋlↄ na ma tɛrɛ a sↄ-bãjɩnɛ wa, ú da a ʋ kparʋ lɩɛb da nɩ. ³⁷ A-na-ɩ ɩ̃ yele nyɩ na, ƴɛrɩ̃ be na a Naaŋmɩn Sɛbɛ pʋↄ na sɛw na ta ma. A yelʼã: ʻBa de ʋ na ƴↄ̃w a nɩ-bebe pʋↄ.ʼ Sɩrɛ jaa ʋ, a ala na tor ma tara na a ʋ baarfʋ jie.” ³⁸ A ba yel: “Nɩ-kpɛ̃ɛ, nyɛ, sↄ-bãjɩnsɩ ayi be na ka.” Ʋ yel ba: “A sɛw na lɛ.” ³⁹ A Jeeju yi na a tẽw pʋↄ cere a Olivi-tɩɩr tãw juu, a mɩnɛ ʋ na mɩlɩ̃ nɩ, a ʋ par-tuurbe pↄw ʋ cenʼɩ̃. ⁴⁰ A mɩnɛ ba na ta a jie ʋlↄ, ʋ yel ba na: “Nyɩ́ sʋↄrↄ a Naaŋmɩn a mɩnɛ nyɩ kↄ̃ wa lo a bɩɩrfʋ pʋↄ wa”, ⁴¹ ɩ̃ na ʋ taw jãa nɩ ba, wↄ̃ taa nɩ a mɩnɛ a nɩrɛ na ma lↄb a kubir ʋ ta, ɩ̃ lo gburĩ a dume sʋↄr a Naaŋmɩn ⁴² yel: “Ɩ̃ Sãa, a ala ɩ fʋ sↄw na, maal a tuo ŋman na ʋ jãa nɩ ma, ɩ̃-cɛ a taa ɩ a mɩnɛ ɩ̃ na bʋↄrↄ ʋ wa, ɩ̃ a mɩnɛ a fʋ̃ʋ na bʋↄrↄ.” [ ⁴³ A be jie, a Naaŋmɩn sɩ-tʋnaa kãw yi na a saꞋlon ɩ̃ suu nyɩr ʋ, kʋrↄ ʋ a Ꞌlafʋ. ⁴⁴ A mɩnɛ a Jeeju na be a ni-sↄbaa pʋↄ, ʋ dãa na nyɩrɩ̃ sʋↄrↄ a Naaŋmɩn, a ʋ hanfʋ lɩɛb wↄ̃ taa nɩ jɩ̃ɩ na Ꞌlɛmɛ a tene.] ⁴⁵ A mɩnɛ ʋ na sʋↄr a Naaŋmɩn baar, ʋ irʼã lɩɛb cen a ʋ par-tuurbe jie na nyɛ ba a suur sãw ba a ba gã gure. ⁴⁶ Ʋ yel ba: “Mɩnɛ a ɩ a nyɩ gã gure a lɛ? Nyɩ́ ir sʋↄrↄ a Naaŋmɩn, kↄ̃ wa kpɛ a bɩɩrfʋ pʋↄ wa.” ⁴⁷ A mɩnɛ a Jeeju na cãa ƴɛrɛ a ƴɛrɩ̃, nɩbɛ wa na ta. A Judasɩ na ɩ a par-tuurbe pie-nʼayi ƴen sʋbↄ, ɩ̃ dãa tɛrɛ ba wa nɩ, ɩ̃ taw ta a Jeeju a ʋ worĩfʋ ɩnɛ. ⁴⁸ A Jeeju yel ʋ: “Judasɩ, a worĩfʋ fʋ na worĩ a Nɩbɛ Bie ƴↄ̃w ʋ a ʋ sama-deme nur pʋↄ?” ⁴⁹ A Jeeju tↄ deme nyɛ na a ala nↄↄ tara, ɩ̃ yel ʋ: “Nɩ-kpɛ̃ɛ, sɩ́ de a sↄ-bãjɩnsɩ cɛ nɩ ba mɩɩ?” ⁵⁰ Ɩ̃ a bõ-ƴen a ba sↄ̃w cɛ na a Naaŋmɩn baar-lo-nɩ-kpɛ̃ɛ tʋ̃tʋnↄ dʋrɩ̃ toor ŋmaa lɛ hab! ⁵¹ Ɩ̃-cɛ a Jeeju yelʼã: “A sɛw na. Nyɩ́ bar lɛ!” Ɩ̃ na ʋ sɩɩr a daba ʋlↄ toor ʋ lɛ ɓↄ̃ pↄw. ⁵² Ɩ̃ ʋ soor a Naaŋmɩn baar-lo-nɩ-bɛrɛ nɩ a Naaŋmɩn yir gugurbe nɩ-bɛrɛ nɩ a Jufisɩ ni-dierbe na wa a ʋ nyↄwfʋ jie: “Nyanyuur ɩ̃ ɩ a nyɩ waara nɩ sↄ-bãjɩnsɩ nɩ gʋdɛɛ a ɩ̃ nyↄwfʋ jie mɩɩ? ⁵³ Sɩ ma dãa na lãa be taa bio bio jaa a Naaŋmɩn puor-yir kpɛ̃ɛ pʋↄ, ɩ̃ nyaa dãa ir a nyɩ nuu sɩɩrʼɩ̃ ma wa. Ɩ̃-cɛ a ƴɛ̃ƴɛrɩ̃ na, a ɩ na a nyɩ daar, nɩ a libe fãw daar.” ⁵⁴ Ba nyↄw na a Jeeju cenʼɩ̃ a Naaŋmɩn baar-lo-nɩ-kpɛ̃ɛ yir ɩ̃ a Pɩɛr be nɩdaa tuure ba. ⁵⁵ A mɩnɛ ba na gbↄw a vũu a gbalɩ̃ pʋↄ jɛ nɩ, a Pɩɛr mɩ pↄw ba na jɛ nɩ. ⁵⁶ A tʋ̃tʋ̃-poole nyɛ ʋ na a vũu na caarɩ̃ ɩ̃ Ꞌwuor ʋ kir-kir-kir ɩ̃ yel: “A daba na mɩ dãa na be nɩ ʋ.” ⁵⁷ A Pɩɛr cɩɩrɩ̃ yel: “Poole wee, maa bↄ̃w ʋ wa.” ⁵⁸ A ɩ na fɩ̃ɩ, nɩsaa kpee lɛ nyɛ ʋ na ɩ̃ yel: “A fʋ̃ʋ, fʋ mɩ be na a nɩbɛ bala pʋↄ.” A Pɩɛr yel ʋ: “Daba wee, maa be tↄ wa.” ⁵⁹ A ɩ na fɩ̃ɩ a nɩ-kpee lɛ yel go: “Baalʋ̃ʋ ma be be wa, a daba na mɩ dãa na be nɩ ʋ, a-na-ɩ ʋ ɩ na a Galile nɩrɛ.” ⁶⁰ A Pɩɛr yel: “Daba wee, maa bↄ̃w a ala fʋ na yele wa.” Ɩ̃ a mɩnɛ ʋ na cãa cɩɩrɛ, nↄraa kokolĩ na a jie naan. ⁶¹ A Nɩ-kpɛ̃ɛ ŋmelĩ Ꞌwuor a Pɩɛr kir-kir-kir, a Pɩɛr tɩɛr yuo a ala a Nɩ-kpɛ̃ɛ na dãa yel ʋ, áa nↄraa kↄ̃ kokolĩ a tɩsↄw na sɛr wa, ɩ̃ a Pɩɛr na cɩɩrɩ̃ na gbɛɛ ata a Ꞌwaa bↄ̃w ʋ wa. ⁶² Ɩ̃ a Pɩɛr irʼã yi yẽw kõ kõ-tuo ma ɩ ala wa. ⁶³ A dabsɩ bala na gu a Jeeju, laara ʋ na pↄbↄ nɩ ʋ. ⁶⁴ Ba lũ ʋ na a nii-sↄw pↄw ɩ̃ yele ʋ: “Ala ɩ̃ ŋme fʋ? Bↄ̃w a sʋbↄ!” ⁶⁵ Ɩ̃ na ba lɛ tʋ tʋ ʋ tʋ-bi-yaw go. ⁶⁶ A mɩnɛ a bio na vɩɛ, a Jufisɩ ni-dierbe nɩ a ba baar-lo-nɩ-bɛrɛ nɩ a ba ƴɛr-kpɛn-bↄↄnbↄ kpaarɩ̃ na taa a ba ƴɛrɩ̃sɩ guorfʋ jie. Ba ɩ na a ba taw a Jeeju wɩ nɩ a ba nii-sↄw, ⁶⁷ a ba yel ʋ: “A ala ɩ fʋ̃ʋ ɩ a Kirisi, yel kʋ sɩ.” Ʋ yel ba: “A maa yel nyɩ, nyɩ kↄ̃ sↄw wa, ⁶⁸ ɩ̃ a maa soor nyɩ bom, nyɩ kↄ̃ haa ma nʋↄr wa. ⁶⁹ Ɩ̃-cɛ wa nyↄw nɩ a ƴɛ̃ƴɛrɩ̃ a Nɩbɛ Bie na jɛ na a Fãw Sʋbↄ Naaŋmɩn dʋrɩ̃ loor.” ⁷⁰ A be jie, ba jaa soor ʋ na: “Fʋ sɩrɩ̃ na ɩ a Naaŋmɩn Bie?” Ʋ yel ba: “A lɛ nyɩ na yel, a ʋlↄ ɩ̃ sɩrɩ̃ ɩ.” ⁷¹ A mɩnɛ a na be a lɛ, ba yelʼã: “Bõ ɩnɛ sɩ lɛ cãa bʋↄrↄ nɩbɛ a ba na wa man ƴɛrɩ̃ a ʋ ɩnɛ? A-na-ɩ a sɩ jaa wõ na a ala na yi a ʋ nʋↄr pʋↄ.”

¹ A bala ba jaa na kpaarɩ̃ taa irʼã taw a Jeeju cenʼɩ̃ a Pɩlatɩ nii-sↄw, ² na ba nyↄw ɩ̃ dↄↄlↄ ʋ a ƴɛrɩ̃sɩ yele: “Sɩ nyɛ na a daba na ʋ sãwna a nɩbɛ jur, yele ba a ba taa yara a lãpo kʋrↄ a jaman-kpɛ̃ɛ wa. Ʋ mɩ yele na a ʋlↄ tↄr jaa ɩ̃ ɩ a Kirisi, a lɛ yelʼã a jamana.” ³ A Pɩlatɩ soor ʋ na: “Fʋ̃ʋ ɩ a Jufisɩ jamana?” A Jeeju yel ʋ: “A lɛ fʋ na yel ʋ.” ⁴ A be jie, a Pɩlatɩ yelʼã a Naaŋmɩn baar-lo-nɩ-bɛrɛ nɩ a nɩbɛ: “Maa nyɛ cɛfʋ jie fɩ̃ɩ a daba na jie wa.” ⁵ Ɩ̃-cɛ ba jaarʼã ɩ̃ yele: “Ʋ tↄrↄ na a nɩbɛ ƴↄnↄ a ba dama a tẽw nɩ a ʋ jaanfʋ ʋ na jaana ba. A Galile ʋ nyↄw, ɩ̃ wa yi nɩ a Jude wɩɛr ʋ jaa pʋↄ, ɩ̃ a ƴɛ̃ƴɛrɩ̃ ʋ ta na a ka.” ⁶ A lɛ a Pɩlatɩ na wõ a ala, ʋ soorʼã a ala ɩ a Galile a daba na yi. ⁷ Ɩ̃ a mɩnɛ ba na man ʋ áa Jeeju yi na a wɩɛr ʋlↄ a jamana Ɛrↄdɩ na Ꞌwuoro, ʋ ɩ na a ba cenʼɩ̃ ʋ a ʋ sɛ̃, a-na-ɩ a Ɛrↄdɩ mɩ dãa na be be a Jerujalɛm a ʋna daarʼãa. ⁸ A mɩnɛ a Ɛrↄdɩ na nyɛ a Jeeju, nʋ̃ↄ ƴala ʋ na a-na-ɩ a korĩ-cɛ jaa ʋ dãa na wõ a ʋ ƴɛrɩ̃ ɩ̃ bʋↄrↄ ʋ nyɛ ʋ. Ʋ mɩ dãa na bʋↄrↄ ʋ nyɛ ʋ ʋ maal nↄ-kofʋ tʋn. ⁹ Ʋ soorʼã a Jeeju yel-yayaw, ɩ̃-cɛ Ꞌwaa haa nʋↄr cↄw ʋ wa. ¹⁰ Ɩ̃ a baar-lo-nɩ-bɛrɛ nɩ a ƴɛr-kpɛn-bↄↄnbↄ ɩraa na a be dↄↄlↄ a Jeeju a ƴɛrɩ̃sɩ nɩ kpɛ̃w. ¹¹ A Ɛrↄdɩ nɩ a ʋ sↄdaalsɩ maal ʋ na kpana, ɩ̃ la la ʋ, ɩ̃ pãa de kpar-vɩlaa lↄb yarɩ̃ ʋ, ɩ̃ a Ɛrↄdɩ ɩ a ba lɛ lɩɛb-ʼɩ̃ ʋ cenʼɩ̃ a Pɩlatɩ sɛ̃. ¹² A Ɛrↄdɩ nɩ a Pɩlatɩ dãa na ɩ taa sama-deme a korĩ-cɛ, ɩ̃ a ʋna bibir ba lɩɛbʼã ɩ badɛɛ. ¹³ A Pɩlatɩ kpaarɩ̃ na a baar-lo-nɩ-bɛrɛ nɩ a tẽw nɩ-bɛrɛ nɩ a nɩbɛ jaa, ¹⁴ ɩ̃ yel ba: “Nyɩ wa nɩ na a daba na a ɩ̃ sɛ̃ ɩ̃ yel á ʋ sãwna na a nɩbɛ jur. Ɩ̃ nyɩ́ nyɛ, ɩ̃ Ꞌlo na a ʋ ben a nyɩ nii-sↄw, ɩ̃ maa nyɛ cɛfʋ jie fɩ̃ɩ a daba na jie a ala nyɩ na dↄↄlↄ a ʋ juu wa. ¹⁵ A Ɛrↄdɩ ma mɩ nyɛ cɛfʋ jie a ʋ sɛ̃ wa. Ala-ɩ̃-sↄ ʋ lɛ tɩɩr ʋ kʋ sɩ. Nyɩ́ nyɛ, a daba na ma maal bom kãw a sɛw a ba na kú ʋ wa. ¹⁶ Ala-ɩ̃-sↄ ɩ̃ na ɩ na a ba fↄb ʋ nɩ kpaara, ɩ̃ cɛ ʋ bar.” [ ¹⁷ A Pakɩ fɛtɩ daar, a Pɩlatɩ sɛw na ʋ ma yuo kasu sʋbↄ bõ-ƴen bar kʋ ba.] ¹⁸ Ɩ̃-cɛ a ba jaa fɛw nyↄw na ɩ̃ lãa wuure yele: “Kú a daba na bar! Ɩ̃ yuo a Barabasɩ kʋ sɩ!” ¹⁹ (Damfʋ kãw dãa na ta be a tẽw pʋↄ a Barabasɩ kú nɩrɛ a ba nyↄw ʋ pↄw a kasu pʋↄ.) ²⁰ A mɩnɛ a Pɩlatɩ na bʋↄrↄ ʋ bar a Jeeju, ʋ lɛ bↄ̃w na bʋↄl a nɩbɛ ƴɛrʼɩ̃. ²¹ Ɩ̃-cɛ ba wuure na yele nɩ: “Kpa ʋ yaal! Kpa ʋ yaal a nɩ-kʋ-daa juu!” ²² A Pɩlatɩ lɛ bↄ̃w na soor ba a ɩ gbɛɛ ata: “Fãa buor ʋ maal? Maa nyɛ cɛfʋ jie fɩ̃ɩ a ʋ jie na ƴↄnↄ ʋ a kũu ƴɛrɩ̃ wa. Ala-ɩ̃-sↄ ɩ̃ na ɩ na a ba fↄb ʋ nɩ a kpaara ɩ̃ cɛ ʋ bar.” ²³ Ɩ̃-cɛ ba jaarʼã ɩ̃ nyɩrɩ̃ wuure nɩ kpɛ̃w yele a ba kpa ʋ yaal a nɩ-kʋ-daa juu, ɩ̃ a ba wuurfʋ tʋↄ a Pɩlatɩ ²⁴ ʋ sↄw bar sↄr a na maal a mɩnɛ ba na sʋↄrↄ ʋ. ²⁵ Ʋ yuo na a daba ʋlↄ ba na dãa sʋↄrↄ bar, na ɩ a ʋlↄ na dãa dam a tẽw kú nɩ a nɩrɛ a ba nyↄw ʋ ƴↄ̃w a kasu pʋↄ, ɩ̃ bar a Jeeju ƴↄ̃w a ba nurɩ̃ a ba na maal ʋ a ala ba na bʋↄrↄ. ²⁶ A mɩnɛ ba na cere nɩ a Jeeju, ba tuorʼɩ̃ na a Sɩɩrɛn-tẽw nɩrɛ kãw na dɩ Sɩmↄ̃, ʋ yi a puo pʋↄ ɩ̃ waara, a sↄdaalsɩ fɛr ʋ ƴↄ̃w ʋ tuo a nɩ-kʋ-daa tuure nɩ a Jeeju. ²⁷ A tẽw nɩbɛ yayaw mɩ dãa na tuure ʋ, lãa nɩ a pↄↄbↄ na kono waala nɩ ƴↄnↄ ʋ. ²⁸ Ɩ̃-cɛ a Jeeju ŋmelĩ na yel ba: “Jerujalɛm pↄↄbↄ, nyɩ taa kono a maa ɩnɛ wa! Nyɩ́ ɛ̃ɛ kono a nyɩ mɩ̃ɛ ɩnɛ nɩ a nyɩ bibiir ɩnɛ! ²⁹ A-na-ɩ a daar na ta na, ba na yelʼã áa nʋmↄ a pↄↄbↄ bala na ab, nɩ a bala na ma dↄw a bie wa, ɩ̃ mɩ nʋmↄ a bala na ma dãa ƴɛn a bie wa. ³⁰ A be ba na nyↄw ɩ̃ yele a tã-bɛrɛ: ʻNyɩ́ lo pↄw sɩ!ʼ ɩ̃ mɩ yele a tã-bil: ʻNyɩ́ piw sɩ!ʼ ³¹ A-na-ɩ a ala ɩ ba maalʼã a da-ɓaar a nↄhↄ̃, mɩnɛ a na be nɩ a da-kõw?” ³² Ba mɩ taw na nɩbɛ ayi na ɩ nɩ-bebe cenʼɩ̃ a ba na lãa kú ba nɩ a Jeeju. ³³ A mɩnɛ ba na ta a jie ʋlↄ ba na bʋↄlↄ a “Juŋman jie,” ba kpa na a Jeeju yaal a nɩ-kʋ-daa juu a be, ɩ̃ mɩ kpa a nɩ-bebe ayi bala, a bõ-ƴen be a ʋ dʋrɩ̃ loor, ɩ̃ a kãw be a ʋ gʋbaa loor. ³⁴ Ɩ̃-cɛ a Jeeju yelʼã: “Ɩ̃ Sãa, de bar kʋ ba, a-na-ɩ baa bↄ̃w a ala ba na maala wa.” Ɩ̃ ba de na gbãbie lↄb po nɩ a ʋ cẽcene. ³⁵ A nɩbɛ ɩraa na a be ɩ̃ Ꞌwuoro ʋ. A Jufisɩ nɩ-bɛrɛ kpɛrɛ ʋ na yele: “Ʋ faa na a nɩbɛ. A ala ɩ ʋ ɩ na a Kirisi, a ʋlↄ a Naaŋmɩn na vɛl ir, ú mɩ faa a ʋ mɩ̃ɛ!” ³⁶ A sↄdaalsɩ mɩ laara ʋ na, ɩ̃ taw ta ture ʋ dã-ɓiirũu yele nɩ: ³⁷ “A ala ɩ fʋ̃ʋ ɩ a Jufisɩ jamana, lɩɛb faa a fʋ mɩ̃ɛ!” ³⁸ Ba mɩ dãa na sɛb a ƴɛr-bie na yaal a ʋ ju-sↄ̃w: “A naa ɩ̃ ɩ a Jufisɩ jamana.” ³⁹ A nɩ-bebe bala ba na kpa yaal bõ-ƴen tʋrↄ ʋ na yele nɩ: “Aa ɩ a Kirisi fʋ ɩ wa? Lɩɛb faa a fʋ mɩ̃ɛ ɩ̃ mɩ faa sɩ!” ⁴⁰ Ɩ̃-cɛ a kãw ʋlↄ gala ʋ na yele nɩ: “Faa jↄrↄ Naaŋmɩn wa mɩɩ? A-na-ɩ a fʋ̃ʋ, fʋ mɩ be na a ʋna kpãafʋ naa pʋↄ. ⁴¹ A ala ɩ a sɩ jie ʋ, a kpãafʋ ʋlↄ torʼã, a-na-ɩ sɩ pↄw na a ala na sɛw nɩ a sɩ maal-bie, ɩ̃-cɛ a ʋlↄ, Ꞌwaa sãw bom kãw pʋↄ fɩ̃ɩ wa.” ⁴² Ɩ̃ ʋ lɛ yelʼã: “Jeeju, tɩɛr bↄ̃w nɩ ma a lɛ fʋ nↄↄ waara nɩ a fʋ fãw.” ⁴³ A Jeeju yel ʋ: “Yel-mɩ̃ɛ ɩ̃ yele fʋ, a dɩnaa naan, fʋ na lãa na be nɩ ma a Naaŋmɩn ji-vɩlaa pʋↄ.” ⁴⁴ A mↄtↄ̃w dãa na pɩɛlɛ a ju-sↄ̃w, ɩ̃ a ʋ cãa bↄr, a wɩɛr liw a lɛ a gbɛb pↄw a tẽw ʋ jaa lɛɛ wa ta nɩ a mↄtↄ̃w gↄrfʋ daar. ⁴⁵ A cẽcen kpɛ̃ɛ ʋlↄ na yaal a be a Naaŋmɩn puor-yir kpɛ̃ɛ pʋↄ ɓerʼã ayi, ⁴⁶ ɩ̃ a Jeeju wuurʼɩ̃ kpɛ̃w yel: “Ɩ̃ Sãa, ɩ̃ de na a ɩ̃ sɩɛ bar ƴↄ̃w a fʋ nuumɩ.” A mɩnɛ ʋ na yel a lɛ baar, ʋ ŋmaa na a vʋʋrʋ̃. ⁴⁷ A sↄdal-nɩ-kpɛ̃ɛ nyɛ na a ala na ta ɩ̃ kpiire a Naaŋmɩn yele: “Sɩrɛ jaa ʋ, a daba na ɩ na nɩ-toraa.” ⁴⁸ A nɩbɛ ba jaa na dãa kaal taa wa a Ꞌwuorfʋ jie, nyɛ na a ala na ta a nyɩrɩ̃ tↄ ba, a ba lɩɛb waala kule nɩ. ⁴⁹ A Jeeju badɛɛ ba jaa lãa nɩ a pↄↄbↄ bala na dãa tu ʋ a Galile wa ta nɩ a be, ɩraa na nɩdaa ɩ̃ Ꞌwuoro a ala na tara. ⁵⁰ - ⁵¹ Daba kãw dãa na be be na dɩ Jojɛfʋ. Ʋ yi na a Arimate na ɩ a Jufisɩ tẽw. Ʋ ɩ na pʋ-pɩlaa sʋbↄ nɩ nɩ-toraa, ɩ̃ dãa jɛ cɛlɛ a Naaŋmɩn fãw waa. Ʋ mɩ dãa na be a ƴɛr-guor-nɩ-bɛrɛ pʋↄ, ɩ̃-cɛ Ꞌwaa dãa sↄw a ala a ʋ ƴɛr-guor-tↄ deme na vɛl ir maal wa. ⁵² A daba ʋlↄ cenʼã a Pɩlatɩ sɛ̃ na sʋↄr á ʋ kʋ ʋ a kũu. ⁵³ A ala ɩ̃ baar, ʋ yaw na a kũu suu nɩ ɩ̃ de cẽcen pɩlaa vilĩ pↄw ʋ, ɩ̃ ũu ʋ a yaa kãw pʋↄ ba na dãa kpu kubir pan juu, ɩ̃ a yaa ʋlↄ pʋↄ baa dãa ũu nɩrɛ be sɛr wa. ⁵⁴ A dãa na ɩ a bibi-ciiraa gbɛɛrɩ̃fʋ bibir, ɩ̃ a bibi-ciiraa tara na a ʋ nyↄwfʋ jie. ⁵⁵ A pↄↄbↄ bala na dãa pↄw a Jeeju a Galile wa ta nɩ a be, tu na a Jojɛfʋ. Ba Ꞌwuorʼã a yaa ɩ̃ mɩ nyɛ a mɩnɛ ba na gaal a kũu a be. ⁵⁶ A ala ɩ̃ baar, ba lɩɛbʼã kulʼɩ̃ gbɛɛrɩ̃ a mↄ-nyuu nɩ a kã-nyu-vɩlaa a kũu jɛfʋ ɩnɛ. Ɩ̃ a bibi-ciiraa dayen, ba pɩɛnʼã a mɩnɛ a na yel a Naaŋmɩn ƴɛr-kpɛn pʋↄ.

¹ A jɩmaasɩ bibir dayen, a pↄↄbↄ bala ca na ir de a mↄ-nyuu ala ba na dãa gbɛɛrɩ̃ cenʼɩ̃ a yaa pʋↄ. ² Ba nyɛ na a yaa kubir ʋ bilĩ ɩ̃ cɛ a yaa nʋↄr bar, ³ a ba kpɛ, ɩ̃-cɛ baa nyɛ a kũu wa. ⁴ Ɩ̃ a mɩnɛ ba na cãa tɩɛrɛ ma bↄ̃w a par wa, dabsɩ ayi na su cẽcene na nyɩnyɩlɛ nyɩr ba na, ⁵ a dãbɩ̃ɛ nyɩrɩ̃ nyↄw ba a ba surĩ a jur. A dabsɩ bala yel ba: “Bõ ɩnɛ nyɩ bʋↄrↄ a ʋlↄ na ɩ a nɩ-mimir a kũusɩ sↄ̃w? ⁶ ꞋWaa be a ka wa; ʋ irʼã a kũu pʋↄ. Nyɩ́ tɩɛr bↄ̃w nɩ a ala ʋ na yel nyɩ a mɩnɛ ʋ na dãa cãa be a Galile, ⁷ a á sɛw na a ba na nyↄw a Nɩbɛ Bie ƴↄ̃w a maal-faar deme nurɩ̃, á ba na kpa ʋ na yaal a nɩ-kʋ-daa juu, ɩ̃ a bibie ata dayen á ʋ na irʼã a kũu pʋↄ.” ⁸ Ɩ̃ a pↄↄbↄ tɩɛrʼã yuo a Jeeju ƴɛrɩ̃sɩ, ⁹ ɩ̃ lɩɛb kulʼɩ̃ man a ala a jaa, kʋ a par-tuurbe pie-nɩ-bõ-ƴen, nɩ a ba tↄ deme ba jaa. ¹⁰ A bala na man a ƴɛrɩ̃ ʋlↄ ɩ na a Madala Maarɩɩ, nɩ a Jaan, nɩ a Maarɩɩ na ɩ a Jakɩ mã. A pↄↄbↄ bala ba na lãa be nɩ taa, mɩ manʼã a ʋna ƴɛr-bõ-ƴen kʋ a nɩ-tʋnɩsɩ, ¹¹ ɩ̃-cɛ a nɩ-tʋnɩsɩ ma sↄw wa, a-na-ɩ ba tɩɛrʼã á burbur ba ƴɛrɛ. ¹² Ɩ̃-cɛ a Pɩɛr irʼã jↄ cen a yaa par, ɩ̃ a mɩnɛ ʋ na muul Ꞌwuor ʋ nyɛ na a kũu cẽcene tɛw, a ko ʋ nʋↄr ʋ lɩɛb kule tɩɛrɛ nɩ a ala na ta. ¹³ A ʋna bibirʼãa, par-tuurbe ayi dãa na cere tẽ-bile kãw pʋↄ ba na bʋↄlↄ a Emayisi. A be nɩ a Jerujalɛm ɩ na kilo pie-nɩ-bõ-ƴen. ¹⁴ Ba dãa na mana taa cere nɩ a yele ala a jaa na dãa ta. ¹⁵ A mɩnɛ ba na mana taa sooro nɩ taa, a Jeeju mɩ̃ɛ pↄw ba na lãa cere nɩ. ¹⁶ A ba mimie nyɛ ʋ na, ɩ̃-cɛ baa tʋↄ bↄ̃w a ala ʋ na ɩ wa. ¹⁷ A Jeeju soor ba: “Bõ ƴɛrɩ̃sɩ nyɩ mana taa cere nɩ?” A ni-sↄbaa kpɛ ba a ba ɩraa, ¹⁸ ɩ̃ a bõ-ƴen ba na bʋↄlↄ a Kilopasɩ yel ʋ: “A fʋ̃ʋ tɛw be a Jerujalɛm ma bↄ̃w a ala na dãa ta a be a yɛ̃yɛ̃ na wa mɩɩ?” ¹⁹ Ʋ soor ba: “Yel bõ nʋmↄ ʋ?” A ba yel ʋ: “A ala na ta a Najarɛtɩ Jeeju. Yɛr-hiere ʋ dãa ɩ, ɩ̃ a Naaŋmɩn nɩ a nɩbɛ jaa nyɛ ʋ na, a fãw be a ʋ tʋmↄ pʋↄ nɩ a ʋ ƴɛrɩ̃sɩ pʋↄ. ²⁰ Ɩ̃ a sɩ baar-lo-nɩ-bɛrɛ nɩ a sɩ ni-dierbe nyↄw ʋ na tɩɩr a ba ƴↄ̃w ʋ a kũu ƴɛrɩ̃, ɩ̃ kpa ʋ yaal a nɩ-kʋ-daa juu. ²¹ A sɩmɩ, sɩ dãa na tɩɛrɛ a ʋlↄ nↄↄ faa Ɩsɩrayɛl nɩbɛ. Ɩ̃-cɛ aa ɩ a ala tɛw ʋ wa; a bibie ata nɩ a dɩnaa a yele ala na ta. ²² Ɩ̃-cɛ a pↄↄbↄ ŋmɛɛ na be a sɩ pʋↄ ko sɩ na nʋↄr. Ba ca na ir cen a yaa pʋↄ a dɩnaa ²³ ɩ̃-cɛ baa nyɛ a kũu wa. Ba mɩ lɩɛbʼã wa na man sɩ a Naaŋmɩn sɩ-tʋnɩsɩ nyɩr ba na, ɩ̃ yel kʋ ba áa Jeeju ɩ na nɩ-mimir. ²⁴ A sɩ tↄ deme ŋmɛɛ cenʼã a be a yaa pʋↄ na ba nyɛ a yele a jaa a be a mɩnɛ a pↄↄbↄ na dãa yel. Ɩ̃-cɛ baa nyɛ a ʋlↄ tↄr jaa wa.” ²⁵ A be jie, a Jeeju yel ba: “Nyɩ faa na yɛ̃! Nyaa sↄw nɩ puor a ala a jaa a Naaŋmɩn ƴɛr-hierbe na yel wa. ²⁶ Aa dãa sɛw a Kirisi na nyɛ a hʋʋr a lɛ ɩ̃ pãa yi a yuor wa mɩɩ?” ²⁷ Ɩ̃ ʋ man ba na a yele ala na be a Naaŋmɩn Sɛbɛ pʋↄ a ʋ ɩnɛ, nyↄw nɩ a sɛbsɩ ala a Mowisi na sɛb, cen na de nɩ a Naaŋmɩn ƴɛr-hierbe sɛbsɩ a jaa. ²⁸ A mɩnɛ ba na tara a tẽw ʋlↄ pʋↄ ba na cere, a Jeeju maalʼã wↄ̃ taa nɩ ʋ poro na. ²⁹ Ɩ̃-cɛ ba gↄw ʋ na ɩ̃ yel: “Gã a ka a sɩ jie a-na-ɩ a jaanʋↄr gↄrʼã ta ɩ̃ a wɩɛr liwre,” ʋ kpɛ a be a ba jie. ³⁰ A mɩnɛ ʋ na lãa jɛ nɩ ba a dɩb dɩfʋ jie, ʋ de na a buru, ɩ̃ puor a Naaŋmɩn, ɩ̃ nyↄw ŋmaa kʋ ba, ³¹ a mimie yuo ba a ba bↄ̃w ʋ, ɩ̃-cɛ ʋ bↄrʼã a ba nii-sↄw a jie naan. ³² Ba yele na kʋrↄ taa: “Má a nʋ̃ↄ dãa na nyↄw sɩ a lɛ ʋ na ƴɛrʼɩ̃ sɩ a sↄr juu ɩ̃ man sɩ a Naaŋmɩn Sɛbɛ ƴɛrɩ̃ par,” ³³ a ba ir a jie naan lɩɛb cen a Jerujalɛm. A be ba nyɛ na a par-tuurbe pie-nɩ-bõ-ƴen na kpaarɩ̃ taa nɩ a ba tↄ deme. ³⁴ Ba yelʼã kʋ a bala ayi na ta: “A Nɩ-kpɛ̃ɛ sɩrɩ̃ na ir a kũu pʋↄ! Ʋ nyɩrʼã a Sɩmↄ̃.” ³⁵ A ayi bala mɩ man kʋ a par-tuurbe a ala na dãa ta ba a sↄr juu, nɩ a mɩnɛ ba na dãa bↄ̃w a Jeeju a lɛ ʋ na ŋmara a buru. ³⁶ A mɩnɛ ba na cãa ƴɛrɛ a lɛ, a Jeeju mɩ̃ɛ ta na ɩraa a ba sↄ̃w ɩ̃ yel ba: “Su-ɓaar ú be nɩ nyɩ.” ³⁷ A pʋlɩ̃nyɛ vʋ̃ↄ ba a ba tɩɛr beeka nɩ-kpɩɩn ʋ. ³⁸ Ɩ̃-cɛ ʋ yel ba na: “Bõ ɩnɛ a suur dama nyɩ a nyɩ baala ma a nyɩ pʋ̃ↄ? ³⁹ Nyɩ́ Ꞌwuor nyɛ a ɩ̃ nur nɩ a ɩ̃ gbɛɛ, ɩ̃ bↄ̃w ka maa ʋ, sɩrɛ jaa. Nyɩ́ sɩɩr ma nyɛ, a-na-ɩ a nɩ-kpɩɩn maa tɛrɛ nɩn nɩ a kↄbↄ a ɩ̃ kaarɩ̃ wa.” ⁴⁰ Ɩ̃ na ʋ miilʼɩ̃ ba a fala na be a ʋ nur nɩ a ʋ gbɛɛ pʋↄ. ⁴¹ A nʋ̃ↄ tɩɩ na nyɩrɩ̃ nyↄw ba a baa bↄ̃w sↄw nɩ puor sɛr wa, ɩ̃ ɩraa a nↄɛ ko ba. Ála-ɩ̃-sↄ a Jeeju soor ba a ala ɩ bõ-dɩraa be na be, ⁴² a ba kʋ ʋ jɩm-bir ŋmãa ba na cɩ̃ɩ, ⁴³ ʋ de Ꞌwↄb a ba nii-sↄw. ⁴⁴ A ala ɩ̃ baar, ʋ yel ba na: “Nyɩ́ nyɛ a ala ɩ̃ na ma dãa yele nyɩ a mɩnɛ ɩ̃ na dãa cãa be nɩ nyɩ. Ɩ̃ yelʼã áa ala a jaa na sɛb a ɩ̃ ɩnɛ a Mowisi ƴɛr-kpɛn sɛbɛ pʋↄ, nɩ a ƴɛr-hierbe sɛbsɩ pʋↄ, nɩ a Pɛwfʋ sɛbɛ pʋↄ, a sɛw na a na ta a lɛ.” ⁴⁵ Ɩ̃ ʋ caarɩ̃ na a ba sube a ba bↄ̃w a Naaŋmɩn Sɛbɛ ƴɛrɩ̃ par, ⁴⁶ miilʼɩ̃ ba a mɩnɛ a na sɛb a Naaŋmɩn Sɛbɛ pʋↄ áa Kirisi sɛw na na nyɛ hʋʋr kpi, ɩ̃ pãa ir a kũu pʋↄ a bibie ata dayen. ⁴⁷ Áa mɩ sɛw na ba de a ʋ yuor cenʼɩ̃ na hier kʋ a nɩbɛ, á bá lɩɛb a ba yɛ̃ a Naaŋmɩn na de a ba maal-faar bar kʋ ba. Á bá nyↄw be a Jerujalɛm ɩ̃ cen na ta nɩ a nɩ-bʋrↄ bʋrↄ ba jaa jie. ⁴⁸ Ɩ̃ ʋ lɛ yelʼã go: “A nyɩmɩ na nyɛ a yele a mɩnɛ a na ta, nyɩmɩ na man kʋ a nɩbɛ. ⁴⁹ Ɩ̃ a maa, ɩ̃ na tʋ̃ na a ʋlↄ a ɩ̃ Sãa na pʋlɩ̃ nɩ nyɩ, ɩ̃ a nyɩmɩ, nyɩ́ jɛ a Jerujalɛm-tẽw pʋↄ wa ta nɩ a daar ʋlↄ a saa juu fãw na suure pↄwrↄ nyɩ.” ⁵⁰ A ala ɩ̃ baar, ʋ tɛrɛ na a ʋ par-tuurbe cenʼɩ̃ a Betani-tẽw loor, ɩ̃ tur a nur sʋↄr a Naaŋmɩn sũofʋ ƴↄ̃w ba. ⁵¹ Ɩ̃ a mɩnɛ ʋ na cãa sʋↄrↄ ƴↄnↄ ba, ʋ ŋmaa na yi a ba sↄ̃w duoro a Naaŋmɩn tẽw. ⁵² Ɩ̃ a bala, a mɩnɛ ba na puor ʋ baar, nʋ̃ↄ ƴala ba na a ba lɩɛb kul a Jerujalɛm, ⁵³ ɩ̃ ma cere a Naaŋmɩn puor-yir kpɛ̃ɛ pʋↄ a daar a jaa na pɛwrɛ a Naaŋmɩn.