JUDI

JUDI

¹ A maa Judi na ɩ a Jeeju-Kirisi tʋ̃tʋnↄ, ɩ̃ mɩ ɩ a Jakɩ yɛbɛ ɩ̃ tɩɩrɛ a sɛbɛ na kʋrↄ a bala a Sãa Naaŋmɩn na nʋ, ɩ̃ bʋↄl gu tɛɛlɛ a Jeeju-Kirisi ɩnɛ. ² A nã-bↄ̃wfʋ, a pɩɛnfʋ nɩ a nʋfʋ á lɛ dↄↄl a nyɩ jie. ³ Ɩ̃ badɛɛ, ɩ̃ dãa na tɩɩ bʋↄrↄ ɩ̃ sɛb nyɩ a ala na ɩ a faafʋ ʋlↄ a sɩ jaa na pↄw, ɩ̃ a ƴɛ̃ƴɛrɩ̃, a sɛw na ɩ̃ na sɛb nyɩ a sɛbɛ na, kʋ nyɩ a Ꞌlafʋ a nyɩ jɛbɛ a jaanfʋ ʋlↄ ɩnɛ a Naaŋmɩn na tɩɩr kʋ a ʋ nɩbɛ a gbɛ-daa a daar a jaa ɩnɛ. ⁴ A-na-ɩ nɩ-kpansɩ ŋmɛɛ sↄↄlɩ̃ na fʋr kpɛ a nyɩ sↄ̃w. Ba ma nyↄw na a Naaŋmɩn wɩɛfʋ ƴɛrɩ̃ par lɩɛb mana nɩ a ba burbur maalfʋ, ɩ̃ jaara a Jeeju-Kirisi na ɩ a sɩ Nɩ-kpɛ̃ɛ bõ-ƴen tẽtẽ na sↄ sɩ. Ɩ̃ a korĩ-cɛ jaa a Naaŋmɩn gↄrʼã sɛb a ƴɛrɩ̃ ʋlↄ nↄↄ nyↄwrↄ ba. ⁵ A mɩnɛ nyɩ na saarɩ̃ bↄ̃w a asɩmɛ a jaa, ɩ̃-cɛ ɩ̃ cãa na bʋↄrↄ ɩ̃ jaw nyɩ a mɩnɛ a Nɩ-kpɛ̃ɛ na faa a Ɩsɩrayɛl nɩbɛ a Ejibti-tẽw pʋↄ, ɩ̃ pãa bũburĩ a to-wõwbo bar. ⁶ A sɩ-tʋnɩsɩ mɩ, na ma dãa sↄw ɩraa a fãgã ʋlↄ pʋↄ a Naaŋmɩn na dãa kʋ ba wa, ɩ̃ bar a ba jie, a Naaŋmɩn lũ ba na nɩ a bↄ̃jↄrɩ̃-kpɛ̃w bin a libe pʋↄ, cɛlɛ nɩ a ƴɛrɩ̃ guorfʋ bibir kpɛ̃ɛ. ⁷ Nyɩ mɩ cãa bↄ̃w nɩ a Sↄdↄm nɩ a Gↄmↄↄr ten, nɩ a ana ten na dãa cɛɛl kolĩ ba. A bana ten nɩbɛ mɩ dãa na maal a sɩ-tʋnɩsɩ bala kaarɩ̃. A gã-ta-burbur dãa na be a ba sↄ̃w na ma mɩ ɩ bõ-maalaa wa, ɩ̃-cɛ a vũu na ma tɛrɛ kpiinfʋ wa dɩ ba na bũburĩ bar, ɩ bõ-miilaa a nɩbɛ ba jaa jie. ⁸ A lɛ a mɩ wↄ̃ nɩ a bana jir-ŋma-jaanba naa. A ba tɩɛrɩ̃sɩ ma taw ba na bↄrʼɩ̃, a ba maala a fãa sãwna nɩ a ba ɩ̃gana. Ba ma jaarʼã a Nɩ-kpɛ̃ɛ ƴɛrɩ̃ bar, ɩ̃ ma mɩ kpɛrɛ a bala na nyɩlɛ a saa juu. ⁹ A Mɩsɛl na ɩ a Naaŋmɩn sɩ-tʋ̃-nɩ-kpɛ̃ɛ ma Ꞌla tʋↄ maal a lɛ wa. A mɩnɛ a ʋlↄ nɩ a Satã na cɩɩrɛ taa, á ala na de a Mowisi a lɛ ʋ na kpi, Ꞌwaa Ꞌla tʋ ʋ wa, ɩ̃-cɛ ʋ yelʼã tɛw: “A Nɩ-kpɛ̃ɛ, ú kpãa fʋ.” ¹⁰ A nɩbɛ bala ma kpɛrɛ na a ala ba na ma bↄ̃w a par wa. Ɩ̃ a ala a ba mɩ̃ɛ na bↄ̃w a wɛ-yele kaarɩ̃, a ala ɩ̃ na saa a ba wɛ. ¹¹ Nabier na nyↄw ba na, a-na-ɩ ba de na sↄr bõ-ƴen nɩ a Kayɩ̃, ɩ̃ mɩ de a ba mɩ̃ɛ ƴↄ̃w a Balam burbur pʋↄ a libie ɩnɛ. Ba wɛ na, a-na-ɩ ba maalʼã a Koore kaarɩ̃ na dãa jaar a Mowisi nʋↄr. ¹² Bala waara nɩ a sãwfʋ a nyɩ lãa-taa-dɩb dɩfʋ daar. Ba ma dɩrɛ na, maa mɩ bɛr nɩrɛ wa. Ba wↄ̃ na taa nɩ dↄ̃dↄrɩ̃sɩ a sɛsɛb na de ɩ̃ ma ɩ saa wa, ɩ̃ lɛ wↄ̃ taa nɩ tɩɩr na ta a wↄ̃fʋ ɩ̃ ma lɛ wↄ̃ wa, ɩ̃ kpi daadaa a ba vↄ̃ ba bar. ¹³ A ba vĩ maalfʋ wↄ̃ na taa nɩ a man kʋ̃ↄ a sɛsɛb kpɛ̃ɛ na ŋmeere ʋ fure a fube. Ba mɩ wↄ̃ na taa nɩ ŋmarbie na bↄrↄ yʋↄrↄ, a Naaŋmɩn na gbɛɛrɩ̃ a ji-liwraa na nyɩrɩ̃ liw gbɛb, a ba na be a be a daar a jaa. ¹⁴ - ¹⁵ Nyɛ a mɩnɛ a Ɛnↄkɩ, na ɩ a Adã yãw par anuu-nʼayi na dãa hier yel a nɩbɛ bala ɩnɛ: “Nyɩ́ nyɛ! A Nɩ-kpɛ̃ɛ na tɛrɛ na a ʋ sɩ-tʋnɩsɩ ture ture na ʋ wa nɩ a nɩbɛ ba jaa ƴɛrɩ̃ guorfʋ ɩnɛ, ƴↄ̃w nɩ a nɩ-kpansɩ ba jaa a ƴɛrɩ̃ a ba maal-kpansɩ ɩnɛ a jaa ba na maal jaarʼɩ̃ a Naaŋmɩn bar, nɩ a ba ƴɛr-bebe ɩnɛ a bana nɩ-faar nɩ a bana nɩ-kpansɩ na ƴↄ̃w a Naaŋmɩn.” ¹⁶ A nɩbɛ bala ma hũhune na, waala nɩ a daar a jaa. A ba ɩ̃gan buur bↄb tɛw ɩnɛ ba be ka a tẽw pʋↄ. A yo-bↄb ƴɛrɩ̃sɩ ba ma ƴɛrɛ dↄrↄ nɩ a nɩbɛ a ba yele ɩnɛ. ¹⁷ Ɩ̃-eɛ ɩ̃ badɛɛ, nyɩ́ cãa bↄ̃w nɩ a ala a sɩ Nɩ-kpɛ̃ɛ Jeeju-Kirisi nɩ-tʋnɩsɩ na dãa yel a korĩ-cɛ. ¹⁸ A-na-ɩ ba dãa na yel nyɩ, áa baarfʋ daar, á nɩbɛ bala na tuure a ba ɩ̃gan buur bↄb kpansɩ na wa na laara nyɩ. ¹⁹ Bala mɩ waara nɩ a kpee kpee ŋmafʋ. Baa tɛrɛ Naaŋmɩn Sɩɛ wa; a tẽw pʋↄ tɩɛrɩ̃sɩ ba tɛrɛ. ²⁰ Ɩ̃-cɛ ɩ̃ badɛɛ, nyɩ́ ɩraa cĩcĩ a Naaŋmɩn ƴɛr-eɛcɛ ba na jaan nyɩ pʋↄ, karɛɛ nɩ dↄↄlↄ. Nyɩ́ sʋↄrↄ a Naaŋmɩn nɩ a ʋ Sɩɛ kpɛ̃w, ²¹ bↄ̃w jɩnaa nɩ a ʋ nʋfʋ pʋↄ, cɛlɛ nɩ a Nɩ-kpɛ̃ɛ Jeeju-Kirisi ʋ wa kʋ nyɩ a baa-kↄ̃-tɛw a ʋ nã-bↄ̃wfʋ ɩnɛ. ²² Nyɩ́ tɛrɛ nã-bↄ̃wfʋ a bala na baala jie, ²³ ɩ̃ faa a ŋmɛɛ yi nɩ a Naaŋmɩn su-tuo pʋↄ. A nɩŋmɛɛ jie go, nyɩ́ tɛrɛ nɩ ba nã-bↄ̃wfʋ, cãa jↄrↄ nɩ a Naaŋmɩn, Ꞌlaarʼɩ̃ a ba burbur wa kpɛ nɩ a ba cẽcene sɩɩrfʋ pʋↄ, na mɩ sãw a ba burbur ɩnɛ. ²⁴ Naaŋmɩn sↄ pɛwfʋ, a ʋlↄ na tʋↄrↄ gure nyɩ a lofʋ pʋↄ a jiir a jaa, ɩ̃ mɩ maala nyɩ a nyɩ ɩrɛɛ a ʋ yo-yifʋ nii-sↄw nɩ nʋ̃ↄ kpɛ̃ɛ, kↄ̃ tɛrɛ cɛfʋ jie wa. ²⁵ A ʋna Naaŋmɩn bõ-ƴen tɛw na ɩ a sɩ Fafaara a sɩ Nɩ-kpɛ̃ɛ Jeeju-Kirisi ɩnɛ, ú sↄ a yo-yifʋ, a kpɛ̃w, a tʋↄfʋ nɩ a fãw ʋ jaa, a tẽkorĩ, a ƴɛ̃ƴɛrɩ̃, nɩ a daar a jaa. Amɛn.