EBURO

¹ A korĩ-cɛ a Naaŋmɩn dãa na de a ƴɛr-hierbe ƴɛrʼɩ̃ a sɩ sãa-kʋnbↄ a gbɛɛ yayaw nɩ a yel-bʋrↄ bʋrↄ, ² ɩ̃-cɛ a ƴɛ̃ƴɛrɩ̃ na, na ɩ a baarfʋ daar, ʋ de na a ʋ Bie ƴɛrʼɩ̃ sɩ, a ʋlↄ ʋ na dãa de irʼɩ̃ a tẽw ʋ jaa, ɩ̃ mɩ vɛl ʋ ir, ʋ ɩ a ʋ gã-diere. ³ A Bie ʋlↄ, a Naaŋmɩn yo-yifʋ cãa kpɛ̃ɛ ʋ miilʼɩ̃ a nyɩr, ɩ̃ ʋ mɩ wↄ̃ na taa nɩ a Naaŋmɩn a lɛ a Ꞌlɛ. A ʋ ƴɛrɩ̃ na tɛrɛ a kpɛ̃w ʋ tɩɛ nɩ a yele a jaa. A mɩnɛ ʋ na pɛɛr a nɩbɛ maal-faar bar baar, ʋ do na jɛ a ʋlↄ na ɩ a Fãw ʋ jaa Sʋbↄ dʋrɩ̃ lõboorɩ̃ a saa juu. ⁴ A mɩnɛ a Bie na ɩ a kpɛ̃ɛ gãw a sɩ-tʋnɩsɩ, ala-ɩ̃-sↄ ʋ pↄw na a yuor na gãw a ba ben. ⁵ Sɩ-tʋ̃-buor a Naaŋmɩn wa dãa yel á ʋlↄ ɩ a ʋ bie; á wa nyↄw nɩ a dɩnaa á ʋ ɩ na a ʋ Sãa? Mɩɩ yel, á ʋ na ɩ na a ʋ Sãa, ɩ̃ ʋ ɩ a ʋ bie? ⁶ Ɩ̃ a lɛdaar a Naaŋmɩn na dãa bʋↄrↄ ʋ tʋ̃ a ʋ Bie na ɩ a dãdãw ʋ wa a ka a tẽw pʋↄ, ʋ yelʼã áa sɛw na a Naaŋmɩn sɩ-tʋnɩsɩ ba jaa na puoro ʋ. ⁷ Ɩ̃ a ala a Naaŋmɩn Sɛbɛ na yel a sɩ-tʋnɩsɩ ɩnɛ ɩ na: “A Naaŋmɩn maalʼã a ʋ sɩ-tʋnɩsɩ a ba wↄ̃ sɛsɛb kaarɩ̃, ɩ̃ a bala na ɩ a ʋ tʋ̃tʋnbↄ, ʋ maal ba na a ba wↄ̃ vũu-Ꞌlere kaarɩ̃.” ⁸ Ɩ̃-cɛ a Bie ɩnɛ, a Naaŋmɩn Sɛbɛ yelʼã: “Naaŋmɩn, a fʋ naa-dakↄw jɛ na be daadaa kor, ɩ̃ a fʋ torfʋ wↄ̃ na taa nɩ a naa-dagʋraa a fʋ tↄwrↄ nɩ a tẽw. ⁹ Fʋ nʋ na a ala na tor, ɩ̃ Ꞌlaar a burbur. Ala-ɩ̃-sↄ a Naaŋmɩn, na ɩ a fʋ Naaŋmɩn, de fʋ na gãw a fʋ tↄ deme, ɩ̃ biin fʋ a fʋ ɩ a jamana, bolĩ fʋ a kãa a juu pʋↄ a ɩ fʋ a nʋ̃ↄ.” ¹⁰ A Naaŋmɩn lɛ yelʼã: “Fʋ̃ʋ Nɩ-kpɛ̃ɛ, fʋ irʼã a tẽw a korĩ-cɛ jaa, ɩ̃ a fʋ nur ɩ̃ maal a saꞋlon. ¹¹ A saꞋlon nɩ a tene na wɛlʼã, ɩ̃-cɛ a fʋ̃ʋ na cãa na be. Ba na korʼã cẽcene kaarɩ̃ ¹² ɩ̃ fʋ na pilĩ ba na wↄ̃ taa nɩ kparʋ. Fʋ na lɩɛr ba na wↄ̃ taa nɩ cẽcen ba na lɩɛr, ɩ̃-cɛ a fʋ̃ʋ, fʋ na cãa na a lɛ, kↄ̃ tɛrɛ kũu daar wa.” ¹³ Sɩ-tʋ̃-buor a Naaŋmɩn wa dãa yel á ʋ wa jɛ a ʋ dʋrɩ̃ lõboorɩ̃, ɩ̃ ʋ maal a ʋ sama-deme a ba lɩɛb ɩ a ʋ gbɛɛ dↄↄlfʋ jie? ¹⁴ Ɩ̃-cɛ a sɩ-tʋnɩsɩ ba jaa ɩ na a Naaŋmɩn tʋ̃tʋnbↄ ʋ na tʋ̃ a ba na sũono a bala na sɛw ba pↄw a faafʋ.

¹ A mɩnɛ a Naaŋmɩn na de a ʋ Bie ƴɛrʼɩ̃ sɩ, ala-ɩ̃-sↄ a sɛw na a sɩ na bↄ̃w cɛlɛ tↄ a ana ƴɛrɩ̃sɩ sɩ na wõ, a mɩnɛ sɩ kↄ̃ wa sal lo wa. ² Sɩ bↄ̃w ka a Naaŋmɩn ƴɛrɩ̃ ʋlↄ a sɩ-tʋnɩsɩ na dãa de wa nɩ ɩ na yel-mɩ̃ɛ, ɩ̃ a nɩrɛ lɛ na dãa sãw a ʋna ƴɛrɩ̃, mɩɩ wõw nɩ ʋ a toor, ma pↄw na a yar ʋlↄ na sɛw ʋ. ³ Ala-ɩ̃-sↄ, mɩnɛ a sɩmɩ na ɩ ɩ̃ cɩ̃ɛ, a ala ɩ saa cɛlɛ tↄ a faafʋ ʋlↄ na nyɩrɩ̃ bɛrmɛ a lɛ wa? A ʋna faafʋ ƴɛrɩ̃, a Nɩ-kpɛ̃ɛ mɩ̃ɛ ɩ̃ dãa de nĩe ƴɛr, ɩ̃ a bala na dãa cɛl ʋ mɩ man sɩ na a sɩ bↄ̃w ka a yel-mɩ̃ɛ ʋ, ⁴ ɩ̃ a Naaŋmɩn mɩ̃ɛ mɩ man sɩ a ʋna yel-mɩ̃ɛ a mɩnɛ ʋ na tʋ̃ a nↄ-kofʋ tʋmↄ nɩ a tʋ̃-bʋrↄ bʋrↄ na miile a ʋ kpɛ̃w, ɩ̃ mɩ de a ʋ Sɩɛ tʋ̃-bʋrↄ bʋrↄ po a nɩbɛ a mɩnɛ ʋ na bʋↄrↄ. ⁵ A-na-ɩ a tẽw ʋlↄ nↄↄ waara ƴɛrɩ̃ sɩ na ƴɛr, aa ɩ a sɩ-tʋnɩsɩ a Naaŋmɩn na de a ʋna tẽw kʋ wa. ⁶ Ɩ̃-cɛ nɩrɛ yelʼã a Naaŋmɩn Sɛbɛ pʋↄ a jie kãw: “A bõ a nɩrɛ ɩ a fʋ̃ʋ Naaŋmɩn maa hiin ʋ bar wa? Mɩɩ a bõ a nɩsaa salaa ɩ a fʋ ma cɛlɛ ʋ a lɛ? ⁷ Fʋ lɩɛb ʋ na daar fɩ̃ɩ pʋↄ ʋ pab gãw a sɩ-tʋnɩsɩ, ɩ̃ kʋ ʋ a yo-yifʋ nɩ a ju-kpɛ̃ɛ, ʋ jɛ ɩ a jamana, ⁸ ɩ̃ mɩ kʋ nɩ ʋ a tʋↄfʋ a yele a jaa jie.” A mɩnɛ a na yel: “A Naaŋmɩn kʋ ʋ na a tʋↄfʋ a yele a jaa jie,” a lɛ yelʼã a bom kãw ma be be ʋ na ma tʋↄ wa. Ɩ̃-cɛ, wa ta nɩ a dɩnaa, saa nyɛ a ʋ yele a jaa tʋↄfʋ wa. ⁹ Ɩ̃-cɛ a ala sɩ na nyɛ a ƴɛ̃ƴɛrɩ̃ ɩ na a Jeeju ba na dãa lɩɛb ʋ pab gãw a sɩ-tʋnɩsɩ a daar fɩ̃ɩ pʋↄ, ʋ jɛ ɩ a jamana, pↄw a yo-yifʋ nɩ a ju-kpɛ̃ɛ a ʋ kũu ʋ na kpi ɩnɛ. A Naaŋmɩn maal-vɩlaa ɩnɛ a ta a lɛ, a mɩnɛ a Jeeju na tʋↄ kpi a nɩbɛ ba jaa ɩnɛ. ¹⁰ A Naaŋmɩn ʋlↄ na ir a yele a jaa ɩ̃ mɩ tɛrɛ ba, a mɩnɛ ʋ na bʋↄrↄ ʋ tↄw a bi-dabsɩ yayaw a ba kpɛ a ʋ yo-yifʋ pʋↄ, ʋ nyɛ na a vɩɛlɛ ʋ na lɩɛb a Jeeju na ɩ a ba ni-diere kpɛɛrɛ nɩ ba a faafʋ pʋↄ, ʋ na ɩ a cɛcɛ a ʋ won ʋ na nyɛ ɩnɛ. ¹¹ A nɩbɛ bala a Jeeju na pɛɛr a ba maal-faar bar, nɩ a ʋlↄ, tɛrɛ na a Sãa bõ-ƴen. Ala-ɩ̃-sↄ vĩ ma nyↄw ʋ ʋ na bʋↄlↄ ba a ʋ yɛɛr wa. ¹² A-na-ɩ ʋ yelʼã: “Ɩ̃ na ƴɛrʼã a fʋ ƴɛrɩ̃ kʋ a ɩ̃ yɛɛr. Ɩ̃ na pɛw fʋ na a fʋ duo-puorbo sↄ̃w.” ¹³ Ʋ lɛ yelʼã: “Ɩ̃ na barʼɩ̃ na a Naaŋmɩn nyãa,” ɩ̃ lɛ yel go: “Nyɛ ma, nɩ a bibiir bala a Naaŋmɩn na kʋ ma.” ¹⁴ Ɩ̃ a mɩnɛ a bibiir bala na ɩ a ɩ̃gan buur nɩbɛ, tɛrɛ a jɩ̃ɩ, a Jeeju mɩ̃ɛ mɩ lɩɛbʼã wↄ̃ a ba kaarɩ̃, a mɩnɛ ʋ na tʋↄ sãw nɩ a ʋ kũu a ʋlↄ na tɛrɛ a kũu fãgã, a lɛ yelʼã a Satã, ¹⁵ ɩ̃ mɩ ir a bala na dãa ɩ a gbãgbaar a kũu dãbɩ̃ɛ ɩnɛ a ba baafʋ a jaa pʋↄ bar. ¹⁶ A-na-ɩ sɩ bↄ̃w na vɩlaa á aa ɩ a sɩ-tʋnɩsɩ sũofʋ ɩnɛ ʋ wa wa, ɩ̃-cɛ a Abʋraham nɩbɛ sũofʋ ɩnɛ ʋ wa. ¹⁷ Ala-ɩ̃-sↄ a dãa sɛw ʋ na lɩɛb be a ʋ yɛɛr kaarɩ̃ a yele a jaa pʋↄ, a mɩnɛ ʋ na tʋↄ ɩ a ba baar-lo-nɩ-kpɛ̃ɛ na tɛrɛ a nã-bↄ̃wfʋ, ɩ nɩ dẽdẽ a Naaŋmɩn nii-sↄw, na tʋↄ ir a ʋ nɩbɛ maal-faar bar. ¹⁸ A-na-ɩ a ʋlↄ mɩ̃ɛ mɩ pↄw na a bɩɩrfʋ a won pʋↄ, ʋ na mɩ tʋↄ na sũo a bala na be a bɩɩrfʋ pʋↄ.

¹ Ala-ɩ̃-sↄ yɛɛr a Naaŋmɩn na sↄ, ɩ̃ mɩ bʋↄl a ʋ tẽw kpɛfʋ ɩnɛ, nyɩ́ tɩɛrɛ a Jeeju a Naaŋmɩn na tʋ̃ ʋ ɩ a baar-lo-nɩ-kpɛ̃ɛ, a mɩnɛ a sɩ puorfʋ ƴɛrɩ̃ na be. ² A Jeeju ʋlↄ, ʋ dãa na ɩ a dẽdẽ a Naaŋmɩn ʋlↄ na biin ʋ jie, a mɩnɛ a Mowisi na mɩ dãa ɩ a dẽdẽ a Naaŋmɩn yir deme sↄ̃w. ³ Ɩ̃-cɛ a Jeeju sɛw nɩ na a yo-yifʋ gãw a Mowisi, a mɩnɛ a yir-kpɛɛrɛ na ma pↄw a yo-yifʋ gãw a yir deme. ⁴ A yie a jaa tɛrɛ na a ba yir-kpɛɛrbɛ, ɩ̃-cɛ a ʋlↄ na ɩ a yele a jaa mɩɛrɛ ɩ na a Naaŋmɩn. ⁵ A Mowisi, tʋ̃tʋnↄ ʋ dãa ɩ, ɩ nɩ a dẽdẽ a Naaŋmɩn yir deme ba jaa sↄ̃w, a mɩnɛ ʋ na tʋↄ miile a ala nↄↄ tuure, ⁶ ɩ̃-cɛ a Kirisi, bi-daba ʋ ɩ, mɩ ɩ nɩ a yir-kpɛɛr-dẽdẽ. Ɩ̃ a ʋ yir deme sɩ ɩ, a ala ɩ sɩ ɩraa na cĩcĩ, barʼɩ̃ a nyãa, kãkara nɩ a sɩ gufʋ tɩɛrʋ̃ son ɩnɛ. ⁷ Ala-ɩ̃-sↄ, a mɩnɛ a Naaŋmɩn Sɩɛ na yel: “A nyɩmɩ wa wõ a Naaŋmɩn kↄkɩr a dɩnaa, ⁸ nyɩ taa kpɛmɛ a nyɩ suur, a mɩnɛ nyɩ na dãa maal a lɛ nyɩ na dãa wõw ʋ a toor a ʋna bibir nyɩ na bɩɩr ʋ a wɛkar pʋↄ wa. ⁹ A be a nyɩ sãa-kʋnbↄ dãa bɩɩr ma, jʋʋrʼɩ̃ ma je kãa, a mɩnɛ ba na saarɩ̃ nyɛ a ɩ̃ tʋmↄ a ba ɩnɛ a yomo lɩjaayi pʋↄ. ¹⁰ Ala-ɩ̃-sↄ ɩ̃ nyɛ nɩ a bana nɩbɛ suur, ɩ̃ yel: ʻA ba tɩɛrɩ̃sɩ ma bↄrↄ na a daar a jaa. Baa bↄ̃w a ala ɩ̃ na bʋↄrↄ a ba jie wa.ʼ ¹¹ A mɩnɛ ɩ̃ na nyɛ a suur, ɩ̃ pↄ na yel á baa lɛ kpɛɛrɛ a jie ʋlↄ ba na pↄwrↄ nɩ ma a pɩɛnfʋ go wa.” ¹² Yɛɛr, nyɩ́ bↄ̃w tɛrɛ a nyɩ mɩ̃ɛ, a mɩnɛ a nɩrɛ kↄ̃ wa be a nyɩ sↄ̃w ɩ̃ wa tɛrɛ su-kpana na nyɩrɩ̃ kpɛmɛ ʋ wa ŋmaa yi a Naaŋmɩn-mimir pʋↄ wa. ¹³ Ɩ̃-cɛ, a mɩnɛ sɩ na cãa be a ʋna dayen a Naaŋmɩn Sɛbɛ na bʋↄlↄ “a dɩnaa,” nyɩ́ kʋrↄ taa a Ꞌlafʋ a bibie a jaa, a mɩnɛ a fãa kↄ̃ wa bɛlɩ̃ a nɩrɛ kãw suur kpɛmɛ bar wa. ¹⁴ A-na-ɩ sɩ lãw nɩ na a Kirisi a yele, a ala ɩ sɩ sɩrɩ̃ na bↄ̃w barʼɩ̃ ʋ a nyãa wa ta nɩ a baarfʋ daar, a korĩ-cɛ kaarɩ̃. ¹⁵ A mɩnɛ a na yel: “A nyɩmɩ wa wõ a Naaŋmɩn kↄkɩr a dɩnaa, nyɩ taa kpɛmɛ a nyɩ suur, a mɩnɛ nyɩ na dãa maal a lɛ nyɩ na dãa wõw ʋ a toor wa.” ¹⁶ Babõ ɩ̃ wõ a Naaŋmɩn kↄkɩr ɩ̃ jaar ɩ̃ wõw ʋ a toor? Aa ɩ a bala ba jaa a Mowisi na dãa tɛrɛ yi nɩ a Ejibti-tẽw pʋↄ wa? ¹⁷ Ɩ̃ babõ a Naaŋmɩn dãa nyɛ nɩ a suur wa ta nɩ a yomo lɩjaayi? Aa ɩ a bala na dãa maal a fãa ɩ̃ lo kpi a wɛkar pʋↄ wa? ¹⁸ Ɩ̃ babõ a Naaŋmɩn dãa pↄ yele á baa lɛ kpɛɛrɛ a jie ʋlↄ ba na pↄwrↄ nɩ ʋ a pɩɛnfʋ go wa? Má a bala na dãa wõw ʋ a toor ʋ. ¹⁹ Sɩ nyɛ na a nↄhↄ̃ a mɩnɛ a ba toor wõwfʋ na saa a baa tʋↄ kpɛ a pɩɛnfʋ pʋↄ wa.

¹ Ala-ɩ̃-sↄ, a mɩnɛ a Naaŋmɩn pʋlɩ̃fʋ na cãa be nɩ sɩ a ʋ pɩɛnfʋ pʋↄ kpɛfʋ, sɩ́ tɛrɛ sɩ mɩ̃ɛ, a nɩrɛ kãw a nyɩ sↄ̃w kↄ̃ wa faa ʋ wa. ² A-na-ɩ sɩ mɩ wõ na a ƴɛr-scm a bala na dãa be a wɛkar pʋↄ kaarɩ̃. Ɩ̃-cɛ a bala, a mɩnɛ ba na wõ a ʋna ƴɛrɩ̃, aa ɩ ba bom wa, a-na-ɩ a mɩnɛ ba na wõ, baa sↄw de nɩ a ba suur wa. ³ Ɩ̃-cɛ a sɩmɩ, sɩ na kpɛ na a ʋna pɩɛnfʋ pʋↄ, a-na-ɩ sɩ barʼɩ̃ na a Naaŋmɩn a nyãa, tu nɩ a mɩnɛ ʋ na dãa yel: “Ɩ̃ nyɛ na a suur, ɩ̃ pↄ yel á baa lɛ kpɛɛrɛ pↄwrↄ nɩ ma a pɩɛnfʋ go wa.” Ʋ yelʼã a lɛ ɩ̃-cɛ a pɩɛnfʋ ʋlↄ be nɩ ʋ na a korĩ-cɛ jaa, a lɛ ʋ na maal a tẽw baar. ⁴ A-na-ɩ a Naaŋmɩn Sɛbɛ yelʼã a jie kãw a ala na ɩ a bibie anuu-nʼayi dayen ɩnɛ: “A Naaŋmɩn jɛ na pɩɛn a bibie anuu-nʼayi dayen a ʋ tʋmↄ a jaa ʋ na maal ɩnɛ.” ⁵ Ɩ̃ a Naaŋmɩn Sɛbɛ lɛ yelʼã go: “Baa lɛ kpɛɛrɛ pↄwrↄ nɩ ma a pɩɛnfʋ go wa.” ⁶ A bala na dãa de nĩe wõ a ʋna ƴɛr-son ma dãa tʋↄ kpɛ a ʋna pɩɛnfʋ pʋↄ wa, a-na-ɩ to-woonbo ba dãa ɩ. Ɩ̃-cɛ a sↄr cãa na yuo a nɩŋmɛɛ na tʋↄ kpɛ, ⁷ ala-ɩ̃-sↄ a Naaŋmɩn ƴↄ̃w a bibir ʋ na bʋↄlↄ “a dɩnaa.” A dãa na kam, ɩ̃-cɛ ʋ lɛ ƴↄ̃w a Davɩtɩ ʋ lɛ cↄↄrɩ̃ ƴɛr a tↄlfʋ jie ʋlↄ sɩ na dãa nyɛ, na yel: “A nyɩmɩ wa wõ a Naaŋmɩn kↄkɩr a dɩnaa, nyɩ taa kpɛmɛ a nyɩ suur wa.” ⁸ Á ala dãa ɩ a Jojie tↄw na a nɩbɛ kpɛ nɩ a ʋna pɩɛnfʋ pʋↄ, a Naaŋmɩn kↄ̃ↄ lɛ ƴɛr, ƴↄ̃w nɩ bibir yuo wa. ⁹ Ala-ɩ̃-sↄ a pɩɛnfʋ ʋlↄ na wↄ̃ taa nɩ a Naaŋmɩn bibie anuu-nʼayi dayen pɩɛnfʋ cãa na be be a Naaŋmɩn nɩbɛ ɩnɛ. ¹⁰ A-na-ɩ a ʋlↄ na kpɛ a pɩɛnfʋ ʋlↄ a Naaŋmɩn na gbɛɛrɩ̃ pʋↄ, na mɩ jɛ na pɩɛn a ʋ tʋmↄ ɩnɛ, a mɩnɛ a Naaŋmɩn na mɩ maal. ¹¹ Ala-ɩ̃-sↄ, sɩ́ nyɩrɛ a ʋna pɩɛnfʋ pʋↄ kpɛfʋ, a mɩnɛ a nɩrɛ kãw kↄ̃ↄ wõw toor wↄ̃ taa nɩ a bala na dãa be a wɛkar pʋↄ, ɩ̃ wa faa a ʋna pɩɛnfʋ pʋↄ kpɛfʋ wa. ¹² A Naaŋmɩn ƴɛrɩ̃ ɩ na bõ-mimir na mɩ bↄ̃w a ʋ tʋmↄ, ɩ̃ dɩrɛ gãw sↄ-bãjɩnɛ na dɩrɛ a lõbobo a jaa. Ʋ ma kpɛ na wa ta a yɛ̃ nɩ a sɩɛ sↄ̃w, ɩ̃ mɩ kpɛ ta a kↄbↄ cowfʋ jiir nɩ a kↄↄr pʋ̃ↄ, jʋʋrↄ nɩ a nɩrɛ pʋ-tɩɛrɩ̃sɩ, nɩ a ʋ su-tɩɛrɩ̃sɩ mɩ. ¹³ Bom ma be na sↄↄlɩ̃ a Naaŋmɩn nii-sↄw wa. A yele a jaa fɛw be na cãa pʋↄ, na dɩɛl a ʋlↄ nii-sↄw sɩ na mana a yele a jaa. ¹⁴ Sɩ́ bↄ̃w ɩraa a sɩ puorfʋ ƴɛrɩ̃ pʋↄ cĩcĩ, a-na-ɩ sɩ tɛrɛ na baar-lo-nɩ-kpɛ̃ɛ na gãw a baar-lorbo ba jaa, a Jeeju na ɩ a Naaŋmɩn Bie na va a saꞋlon ʋ jaa bar ɩ̃ ta a Naaŋmɩn nii-sↄw. ¹⁵ Saa tɛrɛ baar-lo-nɩ-kpɛ̃ɛ na ma tʋↄrↄ bↄ̃wnↄ a sɩ won wa, a-na-ɩ a ʋlↄ mɩ̃ɛ dãa na pↄw a bɩɩrfʋ a jaa a sɩ kaarɩ̃, ɩ̃-cɛ Ꞌwaa dãa lo fãa pʋↄ wa. ¹⁶ Ala-ɩ̃-sↄ, nyɩ́ ɩ a sɩ bar nyãa ɩ̃ taw ta pɩɛl a maal-vɩlaa Naaŋmɩn naa-dakↄw, a mɩnɛ sɩ na tʋↄ pↄw a nã-bↄ̃wfʋ nɩ a maal-vɩlaa a na tʋↄ sũo sɩ a daar ʋlↄ na sɛw.

¹ A Naaŋmɩn baar-lo-nɩ-bɛrɛ ba jaa, nɩbɛ ma vɛl ba ir a ba sↄ̃w, a ba ɩ a lↄlʋↄrbↄ lↄrↄ a Naaŋmɩn jie nɩ a bala, diere nɩ a ba yele kʋrↄ ʋ, mɩ loro a baba a ba maal-faar ɩnɛ. ² A baar-loro ma bↄ̃w na tɛrɛ a bala na ma bↄ̃w tɛrɛ a yɛ̃ wa, nɩ a bala na ma bↄ̃w bↄ̃w a Naaŋmɩn wa, a-na-ɩ a ʋlↄ mɩ̃ɛ pↄw na a ana balfʋ a jiir a jaa. ³ Ɩ̃ a mɩnɛ ʋ na mɩ pↄw a ana balfʋ, a sɛw na ʋ na ma mɩ lo a baba a ʋ mɩ̃ɛ maal-faar ɩnɛ, a mɩnɛ ʋ na ma maal a nɩbɛ ɩnɛ. ⁴ Nɩrɛ maa vɛl a ʋ mɩ̃ɛ ir biin á baar-lo-nɩ-kpɛ̃ɛ ʋ ɩ wa, ɩ̃-cɛ a Naaŋmɩn ma vɛl ʋ ir, a mɩnɛ ʋ na dãa vɛl ir a Aarↄ̃. ⁵ A lɛ ʋ, a Kirisi jie. Aa ɩ ʋlↄ ɩ̃ bↄ yuor yel áa baar-lo-nɩ-kpɛ̃ɛ ʋ ɩ wa, ɩ̃-cɛ a Naaŋmɩn yel ʋ: “Fʋ ɩ na a ɩ̃ Bie; wa nyↄw nɩ a dɩnaa ɩ̃ ɩ na a fʋ Sãa.” ⁶ A Naaŋmɩn Sɛbɛ lɛ yelʼã jie kãw go: “Fʋ ɩ na a daar a jaa baar-loro, tu nɩ a mɩnɛ a Mɛkisedɛkɩ na dãa maala.” ⁷ A lɛdaar a Kirisi na dãa be ka a tẽw pʋↄ, ʋ dãa na sʋↄrↄ a Naaŋmɩn ʋlↄ na tʋↄrↄ faara ʋ a kũu pʋↄ, wuure, lↄbↄ nɩ a nur nɩ mↄtↄ̃-kʋ̃ↄ, ɩ̃ a Naaŋmɩn sↄw na a ʋ sʋↄrfʋ a mɩnɛ ʋ na wur a ʋ mɩ̃ɛ. ⁸ A mɩnɛ ʋ na saarɩ̃ ɩ a Naaŋmɩn Bie, ɩ̃-cɛ ʋ jaanʼã a to-wõfʋ a won ala ʋ na nyɛ pʋↄ. ⁹ Ɩ̃ a mɩnɛ ʋ na wa ɩ a cɛcɛ baar, ʋ lɩɛbʼã ɩ a ʋlↄ a faafʋ daadaa na yire a bala ba jaa na wono ʋ a toor jie, ¹⁰ ɩ̃ a Naaŋmɩn de ʋ na ʋ ɩ a baar-lo-nɩ-kpɛ̃ɛ, tu nɩ a mɩnɛ a Mɛkisedɛkɩ na dãa maala. ¹¹ Sɩ tɛrɛ na a yele yayaw mana nyɩ a ala ɩnɛ, ɩ̃-cɛ a par kpɛmɛ na a irfʋ, a-na-ɩ nyɩ balʼã a bom par bↄ̃wfʋ. ¹² A daar ta na a sɛw nyɩ ɩ a jãjaanba, ɩ̃ a nyɩ lɛ cãa bʋↄrↄ ba lɛ jaana nyɩ a dãdãw yele a Naaŋmɩn ƴɛrɩ̃ pʋↄ. A mɩnɛ a na sɛw a nyɩ na dɩrɛ a saab, ɩ̃ nyɩ lɛ cãa na bʋↄrↄ nyɩ ƴɛnɛ a bɩrɛ. ¹³ A ʋlↄ na cãa ƴɛnɛ a bɩrɛ ɩ na a bibile; Ꞌwaa tɛrɛ yɛ̃ bↄ̃wnↄ nɩ a ƴɛr-toraa wa. ¹⁴ Ɩ̃ a saab ɛ̃ɛ na ɩ a nɩ-bɛrɛ ben, a bala, a ba yɛ̃ na tʋↄ na bↄ̃w a son nɩ a bier ba na mɩlɩ̃ nɩ.

¹ Ala-ɩ̃-sↄ, nyɩ́ ɩ a sɩ bar a dãdãw yele a Kirisi ƴɛrɩ̃ pʋↄ ɩ̃ lana nɩ a ala na maala sɩ a sɩ karɛɛ. Saa lɛ bʋↄrↄ sɩ lɛ lɩɛb nyɩ wa nɩ a nyↄwfʋ jie go wa. A-na-ɩ nyɩ gↄrʼã bↄ̃w a mɩnɛ a na sɛw a nyɩ na lɩɛb a yɛ̃ a yel-pↄrsɩ ɩnɛ, nɩ a ƴↄ̃w-nyãa nyɩ na sɛw na tɛrɛ nɩ a Naaŋmɩn. ² Sɩ dãa na man nyɩ a kʋ̃ↄ so-bʋrↄ bʋrↄ ƴɛrɩ̃, nɩ a nur dↄↄlfʋ a nɩrɛ juu ƴɛrɩ̃, nɩ a kũusɩ kũu-pʋↄ-irfʋ ƴɛrɩ̃, nɩ a ƴɛrɩ̃ guorfʋ ʋlↄ nↄↄ waara a daar a jaa ɩnɛ ƴɛrɩ̃. ³ Ɩ̃-cɛ nyɩ́ ɩ a sɩ lana cere, na sɩ pↄw a nɩ-bɛrɛ jaanfʋ. A ala ɩ a Naaŋmɩn sↄw na, a lɛ sɩ na maal. ⁴ - ⁶ A bala na dãa pↄw a Naaŋmɩn cãa, ɩ̃ lɛ ŋmaa yi, sↄr ma lɛ be be a ba na wa nɩ ba, a ba lɛ lɩɛb a ba yɛ̃ wa. A-na-ɩ ba Ꞌlɛmʼã a Naaŋmɩn yel-sono, ɩ̃ mɩ be tↄ a bala pʋↄ na pↄw a Naaŋmɩn Sɩɛ, ma mɩ bↄ̃w ka a Naaŋmɩn ƴɛrɩ̃ ɩ na bõ-son, ɩ̃ mɩ bↄ̃w nɩ a tʋ̃-kpɛn ala nↄↄ tara a daar kãw, ɩ̃ jaar ɩ̃ ŋmaa yi. A bala mɩ̃ɛ ma lɛ lɩɛbʼã kpara a Naaŋmɩn Bie a nɩ-kʋ-daa juu, maala nɩ a nɩbɛ ba jaa kpɛrɛ ʋ. ⁷ A Naaŋmɩn maal-vɩlaa ma be na a ʋna tene na nyu a sa-kʋ̃ↄ na wa a mɩnɛ na sɛw, ɩ̃ bↄ̃w bɩ a ci kʋ a ʋlↄ na kↄ ʋ. ⁸ Ɩ̃-cɛ a Naaŋmɩn pↄ-ƴↄ̃wfʋ ma pɩɛlʼã a ʋna tene na bul a gʋʋr nɩ a mↄ-ure, a-na-ɩ Ꞌwaa ɩ bom wa, ɩ̃ a ʋ baarfʋ daar, vũu na dɩ ʋ na. ⁹ Ɩ̃ badɛɛ, a mɩnɛ sɩ na saarɩ̃ ƴɛrɛ a nↄhↄ̃, ɩ̃-cɛ sɩ barʼã tɩɛrʋ̃ a nyɩ ɩnɛ, a-na-ɩ sɩ bↄ̃w ka nyɩ be na a sↄr vɩlaa pʋↄ na ɩ a faafʋ sↄr. ¹⁰ Naaŋmɩn ma ɩ burbur sʋbↄ wa. ꞋWaa hiine a nyɩ tʋmↄ nɩ a nyɩ nʋfʋ nyɩ na nʋ ʋ wa. A-na-ɩ nyɩ sũo na a ʋ bibiir, ɩ̃ lɛ cãa sũono ba. ¹¹ Ɩ̃-cɛ sɩ tɩɩ na bʋↄrↄ a nyɩ jaa bõ-ƴene-ƴene, nyɩ́ tɛrɛ a ʋna ɓĩɓinfʋ wa ta nɩ a baarfʋ daar, a mɩnɛ a nyɩ na sɩrɩ̃ pↄw a ala a jaa nyɩ na tɩɛrɛ a nyɩ gufʋ tɩɛrʋ̃ son pʋↄ. ¹² Saa bʋↄrↄ nyɩ bal wa, ɩ̃-cɛ nyɩ́ tↄↄnↄ a bala na dãa tɛrɛ a ƴↄ̃w-nyãa, tɛrɛ nɩ a su-nyↄwraa, wa pↄw nɩ a ala a Naaŋmɩn na dãa pʋlɩ̃ nɩ ba. ¹³ A mɩnɛ a Naaŋmɩn na pʋlɩ̃ nɩ a Abʋraham, a ʋ yuor ʋ de pʋlɩ̃ nɩ ʋ, a-na-ɩ nɩrɛ ma lɛ be be gãw ʋ, ʋ na de a ʋ yuor pʋlɩ̃ nɩ wa. ¹⁴ Ʋ yelʼã: “Maa ɩ̃ pʋlɩ̃ nɩ fʋ a maal-vɩlaa maalfʋ ɩnɛ, maalʼɩ̃ a fʋ bal parvʋↄr a ba na paal.” ¹⁵ Ala-ɩ̃-sↄ a Abʋraham dãa na tɛrɛ a su-nyↄwraa wa pↄw nɩ a ala a Naaŋmɩn na pʋlɩ̃ nɩ ʋ. ¹⁶ A ala ɩ nɩrɛ bʋↄrↄ na ʋ pʋlɩ̃, nɩrɛ ʋlↄ na gãw ʋ yuor ʋ ma de pʋlɩ̃ nɩ, a mɩnɛ a pʋlɩ̃fʋ na jɛ jom kↄ̃ tɛrɛ cɩɩrɩ̃fʋ wa. ¹⁷ Ala-ɩ̃-sↄ a Naaŋmɩn de na a ʋ mɩ̃ɛ yuor pʋlɩ̃ nɩ, a-na-ɩ ʋ bʋↄrↄ na a ʋ miil cãa pʋↄ a bala nↄↄ pↄwrↄ a ʋ pʋlɩ̃fʋ bom, a Ꞌwaa lↄↄ lɩɛbɛ a ʋ ƴɛr-bir fɩ̃ɩ wa. ¹⁸ A nↄhↄ̃ a Naaŋmɩn de na a yele ayi na ma tɛrɛ lɩɛbfʋ wa, a ʋ pʋlɩ̃fʋ nɩ a ʋ yuor ʋ na de pʋlɩ̃ nɩ ɩnɛ. A-na-ɩ Naaŋmɩn ma tʋↄrↄ ŋmaara jiri a ʋ ƴɛrɩ̃ ɩnɛ wa. Ala-ɩ̃-sↄ, a sɩmɩ na jↄ sↄↄlɩ̃ a ʋ pʋↄ, sɩ pↄw na a Ꞌlafʋ yaw nyↄw nɩ a sɩ gufʋ tɩɛrʋ̃ son cĩcĩ, a tɩɛrʋ̃ son ʋlↄ sɩ na tɛrɛ gure nɩ a ala a Naaŋmɩn na gbɛɛrɩ̃ a sɩ ɩnɛ. ¹⁹ A ʋna tɩɛrʋ̃ son lũ na a sɩ sɩɛ tɛɛlɛ cĩcĩ, gu nɩ sɩ a sɩ kↄ̃ dama wa. Ʋ cenʼã na va a cẽcen pↄwraa bar, ²⁰ ɩ̃ kpɛ a die ʋlↄ pʋↄ a Jeeju na dãa de nĩe kpɛ a sɩ ɩnɛ. A-na-ɩ ʋ lɩɛbʼã ɩ a daar a jaa baar-lo-nɩ-kpɛ̃ɛ, tu nɩ a mɩnɛ a Mɛkisedɛkɩ na dãa maala.

¹ A Mɛkisedɛkɩ na, dãa na ɩ a Salɛm-tẽw jamana, nɩ a saꞋlon iin Naaŋmɩn baar-loro. A lɛdaar a Ábʋraham na dãa cen na jɛb a jɛb tʋↄ a jamansɩ ŋmɛɛ ɩ̃ waara, a Mɛkisedɛkɩ ʋlↄ jↄ na tuor ʋ, ɩ̃ ƴɛr a nason ƴↄ̃w ʋ, ² ɩ̃ a Abʋraham de a ala a jaa ʋ na pↄw a jɛb jie, ir a bir bõ-ƴen a bie pie pʋↄ kʋ ʋ. A Mɛkisedɛkɩ yuor par ɩ na: “A torfʋ jamana,” ɩ̃ ʋ lɛ ɩ na a Salɛm jamana, a lɛ yelʼã: “A pɩɛnfʋ jamana.” ³ A mɩnɛ a nɩrɛ na ma bↄ̃w a ʋ sãa, a ʋ mã, nɩ a ʋ sãa-kʋmↄ wa, ɩ̃ tↄlfʋ jie kãw ma mɩ mana a ʋ dↄwfʋ nɩ a ʋ kũu wa, ala-ɩ̃-sↄ ʋ wↄ̃ na taa nɩ a Naaŋmɩn Bie na ɩ a baar-loro a daar a jaa. ⁴ Nyɩ́ nyɛ a mɩnɛ a Mɛkisedɛkɩ na ɩ a kpɛ̃ɛ, a sɩ sãa-kʋmↄ Abʋraham wa ir a ala a jaa ʋ na pↄw a jɛb jie bir bõ-ƴen a bie pie pʋↄ kʋ ʋ. ⁵ A Levi yir deme pʋↄ, a bala ba na vɛl ir a ba ɩ a baar-lorbo, sↄr be na be a ba na de a bir bõ-ƴen a bie pie pʋↄ a nɩbɛ jie, tu nɩ a Mowisi ƴɛr-kpɛn; a lɛ yelʼã a ba yɛɛr jie ʋ, a mɩnɛ a ba jaa na saarɩ̃ ɩ a Abʋraham bibnr. ⁶ A Mɛkisedɛkɩ ma dãa ɩ a ba yir sʋbↄ wa, ɩ̃-cɛ ʋ de na a ʋna bir bõ-ƴen a Abʋraham jie, ɩ̃ mɩ ƴɛr a nason ƴↄ̃w ʋ, a mɩnɛ a na saarɩ̃ ɩ a Abʋraham a Naaŋmɩn na dãa pʋlɩ̃ nɩ. ⁷ Baalʋ̃ʋ kãw ma be be wa. A ʋlↄ na ma ƴɛr a nason ma ɩ na kpɛ̃ɛ gãw a ʋlↄ ʋ na ƴɛr ƴↄ̃w. ⁸ A Levi yir deme, nɩ-kpiirsɩ ba ɩ ɩ̃ pↄwrↄ a bir bõ-ƴen a nɩbɛ jie, ɩ̃-cɛ a ala ɩ a Mɛkisedɛkɩ ʋ, a yelʼã a Naaŋmɩn Sɛbɛ pʋↄ á ʋ cãa na. ⁹ Sɩ na tʋↄ na yel a nↄhↄ̃, a mɩnɛ a Abʋraham na ya a bir bõ-ƴen a yele pʋↄ, a Levi ʋlↄ na ma pↄwrↄ a bie a bie pie pʋↄ, mɩ ya na a lɛ. ¹⁰ A-na-ɩ, a lɛdaar a Mɛkisedɛkɩ na dãa jↄ tuor a Abʋraham, a Levi ba na ma dãa dↄw sɛr wa, dãa na gↄr be be a Abʋraham pʋ̃ↄ. ¹¹ A baar-lorbo bala na ɩ a Levi yir deme, bala ɩ̃ dãa ɩ a ƴɛr-kpɛn jur deme a Ɩsɩrayɛl nɩbɛ jie. A ala dãa ɩ a ba tʋmↄ ɩ na cɛcɛ, ba kↄ̃ↄ lɛ bʋↄrↄ baar-lo-kpee na tuure a Mɛkisedɛkɩ maalfʋ wa. A Mɛkisedɛkɩ ʋlↄ ma mɩ lɛ dãa be a Aarↄ̃ yir deme maalfʋ pʋↄ wa. ¹² Ɩ̃ a ala ɩ ba lɩɛrʼã a baar-lorbo, a sɛw na a ba na mɩ lɩɛb a ƴɛr-kpɛn. ¹³ A ʋlↄ ba na ƴɛrɛ a ƴɛrɩ̃ asɩmɛ ƴↄnↄ ɩ na a sɩ Nɩ-kpɛ̃ɛ, na ɩ a yir kpee sʋbↄ, a jie ʋlↄ a nɩrɛ kãw ma mɩ dãa ɩ a baar-loro wa. ¹⁴ Nɩbɛ jaa bↄ̃w na ka a Juda yir deme pʋↄ ba dↄw ʋ, ɩ̃ a lɛdaar a Mowisi na dãa mana a baar-lorbo ƴɛrɩ̃, Ꞌwaa dãa bʋↄl a ʋna yir yuor wa. ¹⁵ Nyɩ́ nyɛ a mɩnɛ a ʋna ƴɛrɩ̃ na cↄↄrɩ̃ nyɩr yi cãa pʋↄ. Baar-lo-kpee lɛ wa na na wↄ̃ taa nɩ a Mɛkisedɛkɩ. ¹⁶ ꞋWaa lɩɛb ɩ a baar-loro tu nɩ a mɩnɛ a nɩbɛ ƴɛr-kpɛn na tu taa wa, ɩ̃-cɛ ʋ lɩɛbʼã ɩ a baar-loro tu nɩ a kpɛ̃w ʋlↄ na yi a baafʋ na ma tɛrɛ a baarfʋ daar wa. ¹⁷ A-na-ɩ a Naaŋmɩn Sɛbɛ yelʼã: “Fʋ ɩ na a daar a jaa baar-loro tu nɩ a mɩnɛ a Mɛkisedɛkɩ na dãa maala.” ¹⁸ A nↄhↄ̃, a korĩ-cɛ ƴɛr-kpɛn hɛlʼã, a-na-ɩ ʋ balʼã ɩ̃ ma lɛ ɩ bom wa. ¹⁹ ꞋWaa dãa lɩɛb bom kãw ʋ ɩ cɛcɛ wa, ɩ̃-cɛ a tɩɛrʋ̃ son na vɩɛlɛ gãw a ʋlↄ wa na lɩɛr ʋ, ɩ̃ a ʋlↄ ɩnɛ sɩ pɩɛlɛ a Naaŋmɩn. ²⁰ Ɩ̃ a ala na lɛ be be ɩ na a Naaŋmɩn pʋlɩ̃fʋ ʋ na de a ʋ yuor pʋlɩ̃ nɩ. A Levi yir deme na dãa ɩ a baar-lorbo ma dãa pↄw a pʋlɩ̃fʋ a lɛ wa. ²¹ Ɩ̃-cɛ a Jeeju, a pʋlɩ̃fʋ ba dãa ƴↄ̃w nɩ ʋ, ʋ ɩ a baar-loro, a mɩnɛ a Naaŋmɩn na dãa yel ʋ: “A Nɩ-kpɛ̃ɛ de na a ʋ yuor pʋlɩ̃ nɩ, ɩ̃ Ꞌwaa lↄↄ lɩɛbɛ wa. Fʋ ɩ na a daar a jaa baar-loro.” ²² Ala-ɩ̃-sↄ, sɩ bↄ̃w ka a pʋlɩ̃-ta-paalaa be na be na vɩɛlɛ gãw a korĩ-cɛ ben, ɩ̃ a Jeeju lɩɛbʼã ɩ a ʋlↄ na miile áa pʋlɩ̃-taa ʋlↄ ma be na bũburĩ wa. ²³ Bõ-kpee lɛ be na be go. A korĩ-cɛ baar-lorbo dãa na waa, a-na-ɩ nɩ-kpiirsɩ ba dãa ɩ. Ba maa tʋↄ kam a ba tʋmↄ pʋↄ wa. ²⁴ Ɩ̃-cɛ a Jeeju baar-lo-tʋmↄ ma tʋↄrↄ cere nɩ-kpee jie wa, a-na-ɩ ʋ be na be a daar a jaa. ²⁵ Ala-ɩ̃-sↄ, a bala na pɩɛlɛ a Naaŋmɩn a ʋ ɩnɛ, ʋ na tʋↄ na faa ba daadaa kpoolaa, a-na-ɩ ʋ be na be a daar a jaa na ʋ sʋↄrↄ a Naaŋmɩn a ba ɩnɛ. ²⁶ A Jeeju ʋlↄ ɩ̃ sɩrɩ̃ ɩ a baar-lo-nɩ-kpɛ̃ɛ ʋlↄ na sɛw sɩ. Ʋ ɩ na cɛcɛ, ma tɛrɛ bier nɩ maal-fãa fɩ̃ɩ wa. Ʋ be na kpee nɩ a maal-faar deme, ɩ̃ do a saꞋlon iin jɛ. ²⁷ Aa lɛ sɛw ʋ loro a baba a bibie a jaa, a bana baar-lo-nɩ-bɛrɛ kaarɩ̃ wa. A bala, ba ma de na nĩe lo a baar a ba mɩ̃ɛ maal-faar ɩnɛ, ɩ̃ pãa lo a nɩbɛ ben. Ɩ̃-cɛ a Jeeju, ʋ de na a ʋ mɩ̃ɛ lo nɩ a baar a gbɛ-daa a daar a jaa fɛw ɩnɛ. ²⁸ A Mowisi ƴɛr-kpɛn pʋↄ, a bala ba na ma biin a ba ɩ a baar-lo-nɩ-bɛrɛ ɩ na a bala na mɩ tʋↄrↄ loro a fãa pʋↄ. Ɩ̃-cɛ a mɩnɛ a ƴɛr-kpɛn na ta kam baar, a Naaŋmɩn de na a ʋ yuor pʋlɩ̃ nɩ, biinʼɩ̃ a ʋ Bie na lɩɛb ɩ a cɛcɛ, a daar a jaa ɩnɛ.

¹ Nyɛ a ala na nyɩrɩ̃ ɩ a kpɛ̃ɛ a asɩmɛ sɩ na ƴɛrɛ ɩnɛ: a ɩ na a mɩnɛ sɩ na tɛrɛ a baar-lo-nɩ-kpɛ̃ɛ a nↄhↄ̃, na jɩnaa a Fãw ʋ jaa Sʋbↄ naa-dakↄw juu, a ʋ dʋrɩ̃ lõboorɩ̃ a saa juu. ² A be, ʋ ma tʋnↄ na a ʋ tʋmↄ a Naaŋmɩn ji-cɛcɛ pʋↄ, a lɛ yelʼã, a gan-yir ʋlↄ pʋↄ na ɩ a gan-yir son, a nɩbɛ nuu na ma ƴↄ̃w wa, ɩ̃-cɛ a Nɩ-kpɛ̃ɛ mɩ̃ɛ na ƴↄ̃w. ³ A baar-lo-nɩ-bɛrɛ ba jaa, a yele tɩɩrfʋ nɩ a baar lofʋ ɩnɛ ba biin ba. Ala-ɩ̃-sↄ a sɩ baar-lo-nɩ-kpɛ̃ɛ mɩ, mɩ sɛw na na tɛrɛ bom ʋ na tɩɩrɛ kʋrↄ a Naaŋmɩn. ⁴ A ala dãa ɩ a ka a tẽw pʋↄ ʋ be, ʋ kↄ̃ↄ ɩ baar-loro wa, a-na-ɩ baar-lorbo be na ka na tɩɩrɛ a yele tuure nɩ a Mowisi ƴɛr-kpɛn. ⁵ A bala, a ba tʋmↄ ba na tʋnↄ a ji-cɛcɛ pʋↄ ɩ na bõ-tↄↄnaa na ɩ a ala na be a saa juu dãadiile. A wↄ̃ na taa nɩ a mɩnɛ a Naaŋmɩn na dãa man a Mowisi a lɛdaar ʋ na dãa bʋↄrↄ ʋ ƴↄ̃w a gan-yir. Ʋ yelʼã: “Nyɛ! Bↄ̃w maal a yele a jaa, tu nɩ a bom ʋlↄ ɩ̃ na dãa miil fʋ a tãw juu.” ⁶ Ɩ̃-cɛ a ƴɛ̃ƴɛrɩ̃ na, a Jeeju tɛrɛ na a tʋmↄ na vɩɛlɛ gãw a ba ben, tu nɩ a mɩnɛ a pʋlɩ̃-ta-paalaa na mɩ vɩɛlɛ gãw a korĩ-cɛ ben, a-na-ɩ ʋ dↄↄlʼã a pʋlɩ̃fʋ ƴɛrɩ̃sɩ na vɩɛlɛ gãw a ala na dãa tↄl, ɩ̃ a Jeeju mɩ̃ɛ ɩ̃ ɩ a lↄlʋↄrↄ. ⁷ A ala ɩ a dãdãw pʋlɩ̃-taa ma dãa tɛrɛ cɛfʋ jie wa, ba kãa dãa lɩɛr ʋ nɩ bõ-kpee wa. ⁸ Ɩ̃-cɛ a Naaŋmɩn nyɛ na a ʋ nɩbɛ a ba tɛrɛ a cɛfʋ jie, ʋ yel: “Nyɩ́ nyɛ! Á daar tara na ɩ̃ nↄↄ cↄↄrↄ a pʋlɩ̃-ta-paalaa a Ɩsɩrayɛl nɩbɛ nɩ a Juda nɩbɛ jie. Lɛ a Nɩ-kpɛ̃ɛ yel. ⁹ Ʋ kↄ̃ wↄ̃ taa nɩ a ʋlↄ ɩ̃ na dãa pʋlɩ̃ nɩ a ba sãa-kʋnbↄ wa, a daar ʋlↄ ɩ̃ na nyↄw ba a nuu taw yi nɩ a Ejibti-tẽw pʋↄ. A mɩnɛ ba na ma dãa ɩraa dẽdẽ a ʋna pʋlɩ̃-taa pʋↄ wa, ala-ɩ̃-sↄ ɩ̃ mɩ bar ba. Lɛ a Nɩ-kpɛ̃ɛ lɛ yel.” ¹⁰ A Nɩ-kpɛ̃ɛ lɛ yelʼã go: “Nyɩ́ nyɛ a pʋlɩ̃-taa yele ɩ̃ nↄↄ cↄↄrↄ nɩ a Ɩsɩrayɛl nɩbɛ a lɛdaar a ana bibie nↄↄ tↄlↄ baara. Ɩ̃ na ƴↄ̃w na a ɩ̃ ƴɛrɩ̃sɩ a ba tɩɛrɩ̃sɩ pʋↄ, ɩ̃ mɩ sɛb a ɩ̃ ƴɛr-kpɛn ƴↄ̃w a ba sube pʋʋr. Ɩ̃ na ɩ na a ba Naaŋmɩn, ɩ̃ ba na mɩ ɩ na a ɩ̃ nɩbɛ. ¹¹ Nɩrɛ kãw ma lↄↄ ire jaana a ʋ tẽw nɩrɛ, mɩɩ a ʋ yɛbɛ yele nɩ á ú bↄ̃w a Nɩ-kpɛ̃ɛ wa. A-na-ɩ a ba jaa nↄↄ bↄ̃w ma na, wa nyↄw nɩ a bala na pab, wa ta nɩ a nɩ-bɛrɛ. ¹² Ɩ̃ na de na a ba cɛfʋ jiir bar kʋ ba. Maa lↄↄ tɩɛrɛ nɩ a ba maal-faar go wa.” ¹³ A mɩnɛ a Naaŋmɩn na ƴɛrɛ a pʋlɩ̃-ta-paalaa ƴɛrɩ̃, ʋ nyɛ na a dãdãw ben ʋ ɩ bõ-kʋraa. Ɩ̃ a ʋlↄ na kor ɩ a bõ-kʋraa maa yaarɩ̃ bↄr wa.

¹ A dãdãw pʋlɩ̃-taa pʋↄ, ba mɩ dãa na ƴↄ̃w a ƴɛr-tu-taa a ba puorfʋ ɩnɛ, nɩ a puorfʋ jie ba na dãa tɛrɛ a ka a tẽw pʋↄ, na ɩ a gan-yir. ² A ʋna gan-yir pʋↄ, a di-dãdãw dɩ na a di-cɛcɛ. A be a lãpa kpɛ̃ɛ be, nɩ a tabala ʋlↄ juu ba na ma bine a Naaŋmɩn buru. ³ A nii-sↄw die, a cẽcen na pↄw, dɩ na a di-ciiraa, ⁴ na tɛrɛ a baar lofʋ jie na ɩ a sɛlmɛ, a ʋ juu a vũu be, ma dɩrɛ a tɩ̃ɩ-nyu-vilaa. A ʋna di-ciiraa pʋↄ a daw mɩ be na be, ba na mar a sɛlmɛ pↄw ʋ jaa, na miile a pʋlɩ̃-taa. A daw ʋlↄ tɛrɛ na a sɛlmɛ yolo a maan na be tↄ, ɩ̃ mɩ tɛrɛ a Aarↄ̃ daa na dãa pu a tɩ-pube, nɩ a kʋsɩ-pɛrɩsɩ ba na sɛb a pʋlɩ̃-taa ƴɛrɩ̃ ƴↄ̃w. ⁵ A ʋna daw juu, yele be na be ba na pɛrɩ̃ na wↄ̃ taa nɩ a Naaŋmɩn sɩ-tʋnɩsɩ ba na bʋↄlↄ a serubɛ̃ na miile a Naaŋmɩn cãa. A ba pɩrɛ pↄw na a baar lofʋ jie na ɩ a maal-fãa de-barfʋ jie. Ɩ̃-cɛ a ƴɛ̃ƴɛrɩ̃ na ma ɩ a daar ʋlↄ sɩ na ƴɛrɛ a asɩmɛ a jaa wa. ⁶ A mɩnɛ ba na gbɛɛrɩ̃ a ana yele a jaa bin a nↄhↄ̃, a baar-lorbo ma kpɛɛrɛ na a bibie a jaa a dãdãw die pʋↄ a ba tʋmↄ tʋ̃fʋ ɩnɛ, ⁷ ɩ̃-cɛ a baar-lo-nɩ-kpɛ̃ɛ ɩ̃ ma kpɛ a nii-sↄw diem gbɛ-daa a yõ-bõ-ƴen pʋↄ. Dʋ̃ↄ jɩ̃ɩ ʋ ma kpɛ nɩ kʋ a Naaŋmɩn a ʋ mɩ̃ɛ ɩnɛ, nɩ a nɩbɛ maal-faar ba na ma bↄ̃w nɩ maal wa. ⁸ A nↄhↄ̃, a Naaŋmɩn Sɩ́ɛ miilʼã cãa pʋↄ, a lɛdaar a ʋna korĩ-cɛ gan-yir na cãa, áa Naaŋmɩn di-ciiraa ma yuo a nɩbɛ kpɛfʋ ɩnɛ sɛr wa. ⁹ A ala ɩ na bõ-miilaa na mana sɩ a ala na be a ƴɛ̃ƴɛrɩ̃ na. A par ɩ na: a yele ala a nɩbɛ na de wa nɩ, nɩ a baba ba na lo kʋ a Naaŋmɩn, ma tʋↄrↄ lɩɛbɛ a bana popuorbo sube a ba ɩrɛ cɛcɛ wa. ¹⁰ A-na-ɩ a ɩ na a ɩ̃gan buur ƴɛrɩ̃sɩ tɛw, na ɩ a bõ-dɩrɩsɩ, a bõ-nyuursɩ, a yele pɛɛrfʋ, nɩ a kʋ̃ↄ sofʋ, ba na ƴↄ̃w wa tara nɩ a yele cↄↄrɩ̃fʋ daar. ¹¹ Ɩ̃-cɛ a Kirisi wa na ɩ a baar-lo-nɩ-kpɛ̃ɛ mɩ tɛrɛ nɩ a yel-vɛlɛ ala na be ka a ƴɛ̃ƴɛrɩ̃. A gan-yir ʋlↄ pʋↄ ʋ na tʋ̃ a ʋ tʋn, vɩɛlɛ na, ɩ̃ mɩ ɩ cɛcɛ gãw a ka a tẽw pʋↄ ben. Aa ɩ nɩbɛ ɩ̃ ƴↄ̃w ʋ wa, a-na-ɩ Ꞌwaa ɩ tẽw pʋↄ bom wa. ¹² Ɩ̃ a mɩnɛ a Kirisi na kpɛ a di-ciiraa pʋↄ a gbɛ-daa a daar a jaa ɩnɛ, Ꞌwaa kpɛ nɩ a bʋdɛɛ nɩ a narali jɩ̃ɩ wa, ɩ̃-cɛ a ʋ mɩ̃ɛ jɩ̃ɩ ʋ kpɛ nɩ, a mɩnɛ ʋ na da sɩ faa a daadaa. ¹³ A bʋdɛɛ nɩ a nadɛɛ jɩ̃ɩ, nɩ a nasabile ba na gbↄw ʋ dɩ ɩ a tãpɛlɩ̃, ba ma de mɩr a bala na sãw, a na cↄↄrɩ̃ a ba ɩ̃gan, ʋ lɩɛ̃b ɩ a bõ-son. ¹⁴ A ala ɩ a lɛ ʋ, nyɛ a mɩnɛ a Kirisi jɩ̃ɩ na nyɩrɩ̃ ɩ a bõ-son! A Naaŋmɩn Sɩɛ na ma tɛrɛ a baarfʋ daar wa, tↄw ʋ na, ʋ lɩɛb ɩ a baar-Ɩo-bom cɛcɛ a Naaŋmɩn nii-sↄw, a ʋ jɩ̃ɩ na pɛw na a sɩ tɩɛrɩ̃sɩ a sɩ tʋ̃-pↄrsɩ na sãw, a sɩ na tʋↄ puoro a Naaŋmɩn-mimir. ¹⁵ AƖa-ɩ̃-sↄ, a Kirisi ɩ na a pʋlɩ̃-ta-paalaa lↄlʋↄrↄ, a mɩnɛ a bala a Naaŋmɩn na bʋↄl na pↄw a yel-sono ala na ma tɛrɛ a baarfʋ wa, a Naaŋmɩn na pʋlɩ̃ nɩ ba. Ba na tʋↄ na pↄw a ala, a-na-ɩ a Kirisi kpi na, na tʋↄ faa a bala na dãa sãw a ƴɛr-kpɛn a dãdãw pʋlɩ̃-taa daar. ¹⁶ A ala ɩ a nɩrɛ ƴɛrʼã a nʋↄr biin a ʋ bibiir ɩnɛ, a sɛw na a ba na bↄ̃w, áa sʋbↄ kpi na, ɩ̃ pãa tɛrɛ a bom ʋlↄ. ¹⁷ A-na-ɩ a nʋↄr biinfʋ ma ɩ bom wa a lɛ a ʋlↄ na biin a nʋↄr na cãa, ɩ̃-cɛ a Ɩɛ ʋ na kpi baar, Ɩɛ ʋ ɩ a bom. ¹⁸ Ala-ɩ̃-sↄ, a nʋↄr ʋlↄ a Naaŋmɩn na dãa ƴɛr biin ʋ ɩ a dãdãw pʋlɩ̃-taa ma dãa ɩ bom wa, ɩ̃ a ala ma ɩ a jɩ̃ɩ na dãa deer wa. ¹⁹ A mɩnɛ a Mowisi na dãa man a ƴɛr-kpɛn ƴɛr-bie a jaa kʋ a nɩbɛ ba jaa baar, ʋ de na nali jɩ̃ɩ nɩ a kʋ̃ↄ, ɩ̃ lɛ de a pɛr jɩ̃ɛw kↄbↄ, nɩ a tɩɛ dale ba na bʋↄlↄ a ɩsↄb, mɩrʼɩ̃ a ƴɛr-kpɛn sɛbɛ, nɩ a nɩbɛ ba jaa, ²⁰ yele nɩ: “A nanɩ ɩ na a jɩ̃ɩ na gbɛɛrɩ̃ a pʋlɩ̃-taa a Naaŋmɩn na kʋ nyɩ a nyɩ na ɩraa dẽdẽ a ʋ pʋↄ.” ²¹ A Mowisi mɩ de na a jɩ̃ɩ mɩr a gan-yir nɩ a puorfʋ yele a jaa. ²² A-na-ɩ a ƴɛr-kpɛn pʋↄ, a wↄ̃ na taa nɩ a jɩ̃ɩ ma cↄↄrɩ̃ a yele a jaa, ɩ̃ a jɩ̃ɩ ma deer wa, a maal-fãa de-barfʋ ma be wa. ²³ A dãa na sɩrɩ̃ sɛw a ba na cↄↄrɩ̃ a saa juu yele ala ba na tↄↄn a nↄhↄ̃, ɩ̃-cɛ, a ala na ɩ a saa juu yele mɩ̃ɛ, a bʋↄrↄ na a baar-lo-yele ala na gãw a dãdãw ben. ²⁴ A-na-ɩ a Kirisi ma kpɛ a ji-cɛcɛ ʋlↄ pʋↄ a nɩbɛ na maal, na ɩ a saa juu bõ-son bõ-tↄↄnaa wa, ɩ̃-cɛ a saa juu tↄr ʋ do, a jie ʋlↄ ʋ na ɩraa a ƴɛ̃ƴɛrɩ̃ a Naaŋmɩn nii-sↄw a sɩ ɩnɛ. ²⁵ A ala ɩ a Jufisɩ baar-lo-nɩ-kpɛ̃ɛ ʋ, ʋ ma kpɛ nɩ na a dʋ̃ↄ jɩ̃ɩ a di-ciiraa pʋↄ a yomo a jaa, ɩ̃-cɛ a Kirisi ma kpɛ gbɛɛ yayaw a ʋ mɩ̃ɛ tɩɩrfʋ ɩnɛ wa. ²⁶ A ala dãa ɩ a lɛ ʋ, ʋ naa dãa na nyɛ a hʋʋr gbɛɛ yayaw, wa nyↄw nɩ a tẽw maalfʋ daar wa ta nɩ a ƴɛ̃ƴɛrɩ̃. Ɩ̃-cɛ a mɩnɛ a baarfʋ daar na pɩɛlɛ, a Naaŋmɩn miilʼɩ̃ ʋ na a gbɛ-daa a daar a jaa ɩnɛ, ʋ na hɛl a maal-fãa a ʋ mɩ̃ɛ ʋ na lo nɩ a baar ɩnɛ. ²⁷ A be na a nɩbɛ ba jaa jie a ba na kpi gbɛ-daa; a ala ɩ̃ baar, a ƴɛrɩ̃ guorfʋ na pãa tu. ²⁸ A lɛ ʋ mɩ a Kirisi lɩɛbʼã ɩ a gbɛ-daa baar-lo-bom a nɩ-yaw maal-faar de-barfʋ ɩnɛ. Ɩ̃ sɩ na lɛ nyɛ ʋ na gbɛɛ ayi pʋↄ, a kↄ̃ lɛ ɩ a maal-fãa de-barfʋ ɩnɛ ʋ wa, ɩ̃-cɛ a bala na cɛlɛ ʋ faafʋ ɩnɛ ʋ na wa.

¹ A Jufisɩ ƴɛr-kpɛn ma ɩ a bõ-son tↄr jaa wa, ɩ̃ a yel-vɛlɛ ala na waara dãadiile ʋ. ꞋWaa tʋↄrↄ maala a bala na pɩɛlɛ a Naaŋmɩn a ba ɩrɛ a cɛcɛ nɩ a ba baar-lo-yele ba na tɩɩrɛ a yomo a jaa ma tɛrɛ a baarfʋ wa. ² A ala dãa ɩ a bala na puoro a Naaŋmɩn a nↄhↄ̃ sube dãa na pɛɛr, a ba tɩɛrɩ̃sɩ kãa lɛ dãa ƴↄnↄ ba ƴɛrɩ̃sɩ a maal-fãa kãw ɩnɛ wa, ɩ̃ ba naa barʼã a baba ala lofʋ. ³ Ɩ̃-cɛ, a ana baar-lo-yele ma ɛ̃ɛ na jawra ba a ba maal-faar a yomo yomo. ⁴ A-na-ɩ a nadɛɛ nɩ a bʋdɛɛ jɩ̃ɩ ma tʋↄrↄ ire a nɩbɛ maal-faar bara fɩ̃ɩ wa. ⁵ Ala-ɩ̃-sↄ, a lɛdaar a Kirisi na dãa kpɛɛrɛ a tẽw pʋↄ ʋ yelʼã a Naaŋmɩn: “Faa bʋↄrↄ baar-lo-bom nɩ nɩrɛ bõ-pↄrↄ wa, ɩ̃-cɛ fʋ mɛ ma na ɩ̃ tɛrɛ a ɩ̃gan. ⁶ Faa nʋ a dʋn ba na gbↄw a kab wa, nɩ a baba ba na lo a maal-fãa de-barfʋ ɩnɛ wa. ⁷ Ala-ɩ̃-sↄ ɩ̃ yel: ʻFʋ̃ʋ Naaŋmɩn, nyɛ ma! Ɩ̃ wa na na maal a ala fʋ na bʋↄrↄ, tu nɩ a ala na sɛb a ɩ̃ ɩnɛ a ƴɛr-kpɛn sɛbɛ pʋↄ.ʼ ” ⁸ Ʋ yelʼã sɛr: “Faa bʋↄrↄ baar-lo-bom nɩ nɩrɛ bõ-pↄrↄ wa. Faa mɩ nʋ a dʋn ba na gbↄw a kab, nɩ a baba ba na lo a maal-fãa de-barfʋ ɩnɛ wa.” Ɩ̃-cɛ a ala a jaa maalʼã tu nɩ a ƴɛr-kpɛn. ⁹ Ɩ̃ a mɩnɛ ʋ na yel a lɛ baar ʋ lɛ yelʼã go: “Fʋ̃ʋ Naaŋmɩn, nyɛ ma! Ɩ̃ wa na na maal a ala fʋ na bʋↄrↄ.” A nↄhↄ̃ a Naaŋmɩn sãw na a dãdãw baar lofʋ, a mɩnɛ ʋ na tʋↄ de a Kirisi mɩ̃ɛ lɩɛrʼɩ̃ ʋ. ¹⁰ A-na-ɩ a Kirisɩ maalʼã a ala a Naaŋmɩn na bʋↄrↄ baar, a mɩnɛ ʋ na de a ʋ mɩ̃ɛ ɩ̃gan ʋ lɩɛb ɩ a baar-lo-bom a gbɛ-daa a daar a jaa ɩnɛ, pɛɛrʼɩ̃ a sɩ maal-fãa bar, ow nɩ sɩ a kpee a sɩ ɩ a ʋ ben. ¹¹ A Jufisɩ baar-lorbo ba jaa ma irʼã ɩraa tʋnↄ a ba tʋmↄ a bibie a jaa, loro a ana baba a daar a jaa na ma tʋↄrↄ diere nɩrɛ maal-fãa bara fɩ̃ɩ wa. ¹² Ɩ̃-cɛ a Kirisi ʋlↄ lo na a baar a gbɛ-daa a maal-faar ɩnɛ, na tɛrɛ a fãgã a daar a jaa, ɩ̃ pãa jɛ a Naaŋmɩn dʋrɩ̃ loor. ¹³ Be ʋ jɛ cɛlɛ a ʋ sama-deme na lɩɛb ɩ a ʋ gbɛɛ dↄↄlfʋ jie. ¹⁴ A-na-ɩ a mɩnɛ ʋ na tɩɩr a ʋ mɩ̃ɛ a gbɛ-daa, ʋ lɩɛbʼã a bala ʋ na pɛw a maal-fãa bar ɩ̃ ow ba kpee, a ba ɩ cɛcɛ. ¹⁵ A Naaŋmɩn Sɩɛ mɩ man sɩ na a lɛ mɩ. A-na-ɩ ʋ yelʼã: ¹⁶ “Nyɩ́ nyɛ a pʋlɩ̃-taa yele ɩ̃ nↄↄ cↄↄrↄ nɩ a Ɩsɩrayɛl nɩbɛ a lɛdaar a ana bibie nↄↄ tↄlↄ baara. Ɩ̃ na ƴↄ̃w na a ɩ̃ ƴɛrɩ̃sɩ a ba tɩɛrɩ̃sɩ pʋↄ, ɩ̃ mɩ sɛb a ɩ̃ ƴɛr-kpɛn ƴↄ̃w a ba sube pʋʋr. Lɛ a Nɩ-kpɛ̃ɛ yel.” ¹⁷ Ɩ̃ ʋ lɛ yelʼã dↄↄl go. “Maa lↄↄ tɩɛrɛ nɩ a ba maal-fãa nɩ a ba cɛfʋ jiir go wa.” ¹⁸ Ɩ̃ a ala ɩ a Naaŋmɩn de na a nɩrɛ máal-fãa bar kʋ ʋ, aa lɛ sɛw ʋ na tɩɩr a bom a ʋ maal-faar de-bar-kʋfʋ ɩnɛ go wa. ¹⁹ Ala-ɩ̃-sↄ yɛɛr, sɩ barʼã nyãa a di-ciiraa pʋↄ kpɛfʋ a yi a Jeeju jɩ̃ɩ ɩnɛ, ²⁰ a mɩnɛ ʋ na yuo sɩ a sↄr paalaa na ɩ bõ-mimir, na po a cẽcen pↄwraa bar, a cẽcen ʋlↄ na ɩ a ʋ mɩ̃ɛ ɩ̃gan. ²¹ Ʋlↄ ɩ̃ mɩ ɩ a baar-lo-nɩ-kpɛ̃ɛ na tɛrɛ a Naaŋmɩn yir deme. ²² Ala-ɩ̃-sↄ nyɩ́ ɩ a sɩ taw ta pɩɛl a Naaŋmɩn nɩ a su-son, barʼɩ̃ tɩɛrʋ̃ jaa a sɩ ƴↄ̃w-nyãa ɩnɛ, tɛrɛ nɩ a suur ʋlↄ a Jeeju jɩ̃ɩ na cↄↄrɩ̃ ir a tɩɛrɩ̃-kpansɩ bar, mɩ tɛrɛ nɩ a ɩ̃gan ʋlↄ ba na pɛw nɩ a kʋ̃ↄ son. ²³ Nyɩ́ ɩ a sɩ bↄ̃w ɩraa cĩcĩ a sɩ gufʋ tɩɛrʋ̃ son pʋↄ sɩ na dãa cã yel a nɩbɛ, a-na-ɩ a ʋlↄ na pʋlɩ̃ nɩ sɩ ɩ na dẽdẽ. ²⁴ Á sɩ́ cɛlɛ taa, kpãkpana nɩ taa a nʋfʋ nɩ a tʋ̃-vɛlɛ ɩnɛ. ²⁵ Á sɩ́ taa bara a sɩ kpaarɩ́-taa pʋʋr cenfʋ wa, a mɩnɛ a nɩŋmɛɛ na mɩlɩ̃ nɩ a lɛbfʋ, ɩ̃-cɛ nyɩ́ ɛ̃ɛ kpãkpana taa, nyɩrɛ maala a mɩnɛ nyɩ na nyɛ a Nɩ-kpɛ̃ɛ bibir na pɩɛlɛ. ²⁶ A ala ɩ ba jaan sɩ na a yel-mɩ̃ɛ a sɩ bↄ̃w baar, ɩ̃ cãa bↄ̃w nɩ maala a fãa, baar lofʋ ma lɛ be be na ire a maal-faar bara wa. ²⁷ Ɩ̃-cɛ a ala na cɛ sɩ ɩ na sɩ́ jɛ nɩ dãbɩ̃ɛ gure nɩ a ƴɛrɩ̃ guorfʋ bibir, nɩ a vũu kpõ-kpõ na wa dɩrɛ a Naaŋmɩn sama-deme. ²⁸ A Jufi nɩrɛ lɛ na wõw a Mowisi ƴɛr-kpɛn a toor, ɩ̃ a nɩbɛ ayi, mɩɩ ata ɩ̃ wa man a ala ʋ na maal, ba ma kú ʋ na ɩ̃ ma bↄ̃w ʋ nãw wa. ²⁹ A ala ɩ a lɛ ʋ, nyɩ́ tɩɛr bↄ̃w a mɩnɛ a ʋlↄ na kpɛrɛ a Naaŋmɩn Bie kpãafʋ na nyɩrɩ̃ bɛlɩ̃. A-na-ɩ ʋ de na a jɩ̃ɩ ʋlↄ na deer a pʋlɩ̃-ta-paalaa ɩnɛ na mɩ pɛw a ʋ suur, ʋ ɩ ʋ pↄrↄ. A ʋ maalfʋ pʋↄ ʋ tʋ na a Naaŋmɩn maal-vɩlaa Sɩɛ. ³⁰ Sɩ bↄ̃w na a sʋbↄ ʋlↄ na yel: “Maa ɩ̃ sↄ a san yawfʋ; maa ɩ̃ na lɩɛb ya ba.” A sʋbↄ ʋlↄ lɛ yelʼã go: “A Nɩ-kpɛ̃ɛ na guorʼã a ʋ nɩbɛ ƴɛrɩ̃.” ³¹ A ɩ na dãbɩ̃ɛ a ʋlↄ jie na kpɛɛrɛ a Naaŋmɩn-mimir nuu pʋↄ! ³² Nyɩ́ cãa bↄ̃w nɩ a ana bibie na tↄl, a lɛdaar nyɩ na dãa pↄw a cãa a Naaŋmɩn jie, ɩ̃ mɩ pↄw a jɛb yayaw. Nyɩ dãa na cãa ɩraa cĩcĩ a ana won pʋↄ. ³³ A daar kãw ba ma tʋrↄ nyɩ na, hʋↄlↄ nɩ nyɩ a nɩbɛ nii-sↄw. A daar kãw pʋↄ go, nyɩ ma lɩɛbʼã ɓã a bala ba na mɩ hʋↄlↄ. ³⁴ Nyɩ dãa na pↄw a kasu deme nyɛ nɩ a nãw, ɩ̃ a mɩnɛ ba na fa a nyɩ yele, nyɩ sↄw na nɩ nʋ̃ↄ, ɩ̃ bar a ba de. A-na-ɩ nyɩ bↄ̃w na ka nyɩ tɛrɛ na yel-sono na vɩɛlɛ gãw a ala, na ma tɛrɛ baarfʋ daar wa. ³⁵ Ala-ɩ̃-sↄ nyɩ taa bar a nyɩ tɩɛrʋ̃ son nyɩ na tɛrɛ wa, a-na-ɩ yar kpɛ̃ɛ gure nyɩ na a ʋ ɩnɛ. ³⁶ A sɛw na a nyɩ na tɛrɛ su-nyↄwraa ɩraa nɩ, na tʋↄ maalʼɩ̃ a Naaŋmɩn pʋ-tɩɛrʋ̃, pↄw nɩ a ala ʋ na pʋlɩ̃ nɩ nyɩ. ³⁷ A-na-ɩ, a mɩnɛ a Naaŋmɩn Sɛbɛ na yel: “A cɛ na fɩ̃ɩ, fɩ̃ɩ tɛw, ɩ̃ a ʋlↄ na waara na ta na. ꞋWaa kama wa. ³⁸ Ɩ̃ a ʋlↄ na tor a ɩ̃ jie a ʋ ƴↄ̃w-nyãa ɩnɛ, ʋ na pↄw na a baafʋ. Ɩ̃-cɛ a ʋlↄ wa lɩɛb a parɩ̃, a ʋ ben kↄ̃ lɛ nʋmↄ ma wa.” ³⁹ Ɩ̃ a sɩmɩ, saa be a bala pʋↄ na lɩɛbɛ a parɩ̃ bↄrↄ wa, ɩ̃-cɛ sɩ tɛrɛ na a ƴↄ̃w-nyãa be nɩ a faafʋ sↄr pʋↄ.

¹ A ƴↄ̃w-nyãa ɩ na a tɩɛrʋ̃ barfʋ a ala ɩnɛ a nɩrɛ na tɛrɛ a gufʋ tɩɛrʋ̃ son cɛlɛ nɩ, nɩ a mɩnɛ ʋ na sↄw bↄ̃w ka ʋ pↄw na a ala ʋ na ma nyɛ wa. ² A ƴↄ̃w-nyãa a korĩ-cɛ deme na dãa tɛrɛ ɩnɛ a Naaŋmɩn dãa kpiir ba. ³ A ƴↄ̃w-nyãa sɩ na tɛrɛ ɩnɛ sɩ bↄ̃w ka a Naaŋmɩn dãa na de a ʋ nʋↄr ƴɛrɩ̃ irʼɩ̃ a tẽw, a na ɩ a ala sɩ na ma nyɛ, yi na a ala sɩ na ma nyɛ wa pʋↄ. ⁴ A Ábɛl ƴↄ̃w-nyãa ʋ na tɛrɛ ɩnɛ ʋ lo a baar kʋ a Naaŋmɩn ʋ vɩɛlɛ gãw a Kayɩ̃ ben, ɩ̃ a ala ɩnɛ a Naaŋmɩn de ʋ ʋ tor, kpiirʼɩ̃ ʋ a ʋ yel-pↄrsɩ ɩnɛ. A ʋ ƴↄ̃w-nyãa ʋ na mɩ tɛrɛ ɩnɛ, a mɩnɛ ʋ na saarɩ̃ kpi, ɩ̃ a ʋ ƴɛrɩ̃ cãa na ƴɛrɛ nɩ sɩ. ⁵ A Ɛnↄkɩ ƴↄ̃w-nyãa ʋ na tɛrɛ ɩnɛ a Naaŋmɩn de ʋ a nɩ-mimir do nɩ a saa juu; Ꞌwaa dãa kpi wa. Ba bↄ ʋ na faa, a-na-ɩ a Naaŋmɩn de ʋ na do nɩ a ʋ sɛ̃. Ɩ̃ a mɩnɛ ʋ na ma dãa de ʋ do nɩ sɛr wa, a Naaŋmɩn Sɛbɛ yelʼã áa ʋ cenfʋ nʋmↄ na a Naaŋmɩn. ⁶ Ɩ̃ a ala ma ɩ a ƴↄ̃w-nyãa ɩnɛ ʋ wa, nɩrɛ kãw ma tʋↄrↄ nʋmɛɛ a Naaŋmɩn wa, a-na-ɩ a ʋlↄ na pɩɛlɛ a Naaŋmɩn sɛw na ʋ bↄ̃w ka a Naaŋmɩn be na be, ɩ̃ a ʋ maal-vɩlaa be na a bala na bʋↄrↄ ʋ jie. ⁷ A Nowe ƴↄ̃w-nyãa ʋ na tɛrɛ ɩnɛ ʋ sↄw a ala a Naaŋmɩn na dãa yele ʋ, a yele ala nↄↄ tara a nɩdaar ɩnɛ. A mɩnɛ ʋ na wõ a Naaŋmɩn ƴɛrɩ̃ ɩ̃ sↄw, ʋ kpalʼã a gbor kpɛ̃ɛ faa nɩ a ʋ mɩ̃ɛ nɩ a ʋ yir deme. A nↄhↄ̃ ʋ ƴↄ̃w na a tẽw ʋ jaa nɩbɛ a ƴɛrɩ̃ a ba Naaŋmɩn ƴɛrɩ̃ jaarfʋ ɩnɛ, ɩ̃ pↄw a torfʋ a Naaŋmɩn jie a ʋ ƴↄ̃w-nyãa ɩnɛ. ⁸ A Abʋraham ƴↄ̃w-nyãa ʋ na tɛrɛ ɩnɛ ʋ wõ a Naaŋmɩn ƴɛrɩ̃ a toor ɩ̃ yi a ʋ tẽw cere a tẽw ʋlↄ a Naaŋmɩn na pʋlɩ̃ nɩ ʋ a ʋ nↄↄ ɩ na a ʋ tẽw. Ʋ yi na cere ɩ̃ ma mɩ bↄ̃w a jie ʋ na cere wa. ⁹ A ʋ ƴↄ̃w-nyãa ʋ na mɩ tɛrɛ ɩnɛ ʋ jɛ a be a ʋna tẽw pʋↄ ba na pʋlɩ̃ nɩ ʋ, ɩ a saana. Gan-yie pʋʋr a ʋlↄ nɩ a tjakɩ nɩ a Jakↄb dãa gana. A bala ayi, ba mɩ dãa na pↄw a ʋna pʋlɩ̃fʋ naa. ¹⁰ Ʋ gana na a gan-yir pʋↄ cɛlɛ nɩ a tẽw ʋlↄ na tɛrɛ a dacin kparaa, a Naaŋmɩn na ɩrɛ a yir-kɩɩrɛ nɩ a mɛmɩɛrɛ. ¹¹ A Abʋraham ƴↄ̃w-nyãa ʋ na mɩ tɛrɛ ɩnɛ ʋ tʋↄ lɛ dↄw a bie, a mɩnɛ a daar na dãa saarɩ̃ po ʋ, nɩ a mɩnɛ a Sara na dãa ab, a-na-ɩ ʋ bↄ̃w na bↄ̃w ka a ʋlↄ na pʋlɩ̃ nɩ ʋ, ɩ na dẽdẽ. ¹² Ala-ɩ̃-sↄ, a nɩ-bõ-ƴen ʋlↄ na dãa ta a kũu, nɩ-yayaw lɛ yi na a ʋ jie waa a saꞋlon ŋmarbie kaarɩ̃, nɩ a man gbẽgbere nʋↄr biire kaarɩ̃ ba na ma bↄ̃wnↄ a nʋↄr wa. ¹³ A ƴↄ̃w-nyãa pʋↄ a nɩbɛ basɩmɛ kpi ba jaa. Baa tʋↄ pↄw a yele ala a Naaŋmɩn na pʋlɩ̃ nɩ ba wa, ɩ̃--cɛ nɩdaa ba gbã nyaa, ɩ̃ gbã puor ba. Ba yelʼã cãa pʋↄ, áa sáanba nɩ a nɩ-yʋↄrbↄ ba ɩ a ka a tẽw pʋↄ. ¹⁴ A nɩbɛ bala na ma yele a lɛ miile na áa ba mɩ̃ɛ tẽw ba bʋↄrↄ. ¹⁵ A ala ɩ ba dãa na tɩɛrɛ a tẽw ʋlↄ ba na bar ɩ̃ wa, ba naa dãa na nyɛ sↄr lɩɛb kul, ¹⁶ ɩ̃-cɛ a-na-ɩ ba bʋↄrↄ na a tẽw ʋlↄ na be a saa juu na vɩɛlɛ gãw a ʋna tẽw. Ala-ɩ̃-sↄ a vĩ ma nyↄw a Naaŋmɩn a ba na bʋↄlↄ ʋ a ba Naaŋmɩn wa, a-na-ɩ ʋ gbɛɛrɩ̃ na a tẽw a ba ɩnɛ. ¹⁷ - ¹⁸ A Abʋraham ƴↄ̃w-nyãa ʋ na tɛrɛ ɩnɛ ʋ de a Ɩjakɩ ʋ na ɩ a baar-lo-bom, a lɛ a Naaŋmɩn na dãa bʋↄrↄ ʋ jʋʋr ʋ je kãa. A Naaŋmɩn dãa na yel ʋ, áa Ɩjakɩ jie a ʋ bal parvʋↄr na yi, tu nɩ a mɩnɛ ʋ na dãa pʋlɩ̃ nɩ ʋ. Ɩ̃ a mɩnɛ ʋ na saarɩ̃ pↄw a ʋna pʋlɩ̃fʋ naa, ɩ̃-cɛ ʋ cãa na sↄw ɩ̃ de a ʋ bi-daadaa kʋrↄ a Naaŋmɩn. ¹⁹ A-na-ɩ ʋ tɩɛrʼã bↄ̃w ka a Naaŋmɩn na tʋↄ na ir a bala na kpi a kũu pʋↄ; ɩ̃ a wↄ̃ na taa nɩ a ʋ bie na dãa na sɩrɩ̃ ir a kũu pʋↄ. ²⁰ A Ɩjakɩ ƴↄ̃w-nyãa ʋ na mɩ tɛrɛ ɩnɛ ʋ ƴɛr a nason ƴɛrɩ̃ ƴↄ̃w a Jakↄb nɩ a Ejayu a yele ala na waara ɩnɛ. ²¹ A Jakↄb ƴↄ̃w-nyãa ʋ na lɛ tɛrɛ ɩnɛ, a lɛdaar ʋ na bʋↄrↄ a kũu, ʋ ƴɛr a nason ƴɛrɩ̃ ƴↄ̃w a Jojɛfʋ bibiir ba jaa, ɩ̃ pɛwrɛ a Naaŋmɩn di nɩ a ʋ dã-ɓʋlaa. ²² A Jojɛfʋ ƴↄ̃w-nyãa ʋ na tɛrɛ ɩnɛ go, a mɩnɛ a ʋ kũu na tara, ʋ ƴɛr a Ɩsɩrayɛl nɩbɛ Ejibti-tẽw yifʋ ƴɛrɩ̃, ɩ̃ man ba a mɩnɛ a na sɛw a ba na maalʼɩ̃ a ʋ kↄbↄ. ²³ A Mowisi dↄↄrbↄ ƴↄ̃w-nyãa ba na tɛrɛ ɩnɛ, a mɩnɛ ba na dↄw ʋ, ba de ʋ na sↄↄlɩ̃ cur ata, a-na-ɩ ba nyɛ ʋ na ʋ ɩ bi-vɩlaa, ɩ̃ a baa jↄ a jamana ƴɛr-kpɛ̃w dãbɩ̃ɛ wa. ²⁴ A Mowisi ƴↄ̃w-nyãa ʋ na tɛrɛ ɩnɛ, a mɩnɛ ʋ na nʋ̃ↄ baar, Ꞌwaa sↄw a ba bʋↄlↄ ʋ a Faarↄ̃ bi-pↄw bie wa. ²⁵ Ɩ̃ ʋ ɛ̃ɛ na vɛl ir a ba na ɓã taa hʋↄlↄ ʋ nɩ a Naaŋmɩn nɩbɛ gãw a mɩnɛ ʋ naa dãa wõ a nʋ̃ↄ a maal-fãa pʋↄ a daar fɩ̃ɩ pʋↄ. ²⁶ A ʋ tɩɛrʋ̃ dãa na be a yar ʋlↄ pʋↄ na waara, ala-ɩ̃-sↄ ʋ nyɛ a ɩ son a mɩnɛ ʋ na pↄw a kpɛfʋ a Kirisi kaarɩ̃, a-na-ɩ a tɛrɛ na par gãw a Ejibti-tẽw na-yele. ²⁷ A Mowisi ƴↄ̃w-nyãa ʋ na tɛrɛ ɩnɛ a dãbɩ̃ɛ ma nyↄw ʋ a jamana suur ɩnɛ wa, ʋ yĩ a Ejibti-tẽw. Ʋ ɩraa na cĩcĩ wↄ̃ taa nɩ ʋ nyɛ na a Naaŋmɩn ba na maa nyɛ wa. ²⁸ A ʋ ƴↄ̃w-nyãa ʋ na mɩ tɛrɛ ɩnɛ ʋ ƴↄ̃w na a ba maal a Pakɩ fɛtɩ, ɩ̃ mɩ ƴↄ̃w a ba bol a jɩ̃ɩ a dↄ̃dↄɛ nↄɛ, a mɩnɛ a sɩ-tʋnaa ʋlↄ na kúrↄ a pↄsabiir kↄ̃ sɩɩr a Ɩsɩrayɛl bibiir wa. ²⁹ A Ɩsɩrayɛl nɩbɛ ƴↄ̃w-nyãa ba na tɛrɛ ɩnɛ ba gãw a man jɩ̃ɛw a tẽ-kõw kaarɩ̃. Ɩ̃-cɛ a mɩnɛ a Ejibti-tẽw nɩbɛ na mɩ bʋↄrↄ ba maal a lɛ, a kʋ̃ↄ de ba na jↄ nɩ. ³⁰ A ƴↄ̃w-nyãa ɩnɛ a Jeriko-tẽw dacine lo a mɩnɛ a Ɩsɩrayɛl nɩbɛ na viirĩ kolĩ ʋ a bibie anuu-nʼayi. ³¹ A ƴↄ̃w-nyãa ɩnɛ a Arahab na ɩ a pↄw-baa ma lãa kpi nɩ a bala na wõw a Naaŋmɩn a toor wa, a-na-ɩ ʋ sↄw na de a bala na dãa wɩ a tẽw jʋʋrfʋ vɩlaa. ³² Bõ ɩ̃ na lɛ yel go? A daar na ɓↄr ma na a ala ɩ ɩ̃ ƴɛrɛ na a Jediyõ, a Barakɩ, a Samsↄ̃, a Jefite, a Davɩtɩ, a Samɩɛl nɩ a Naaŋmɩn ƴɛr-hierbe ƴɛrɩ̃. ³³ A ba ƴↄ̃w-nyãa ba na tɛrɛ ɩnɛ ba tʋↄ jɛb fa a ten, maal a ala na tor, mɩ pↄw a ala a Naaŋmɩn na pʋlɩ̃ nɩ ba, mɩ kpalʼɩ̃ a gbeensɩ nↄɛ. ³⁴ Ba mɩ kpiinʼã a vũu-bɛrɛ bar, ɩ̃ mɩ cɩ̃ɛ a bãjɩnsɩ ba naa dãa kú nɩ ba. A ba ƴↄ̃w-nyãa ɩnɛ a bala na dãa bal lɛ pↄw a fãgã, lɛ lɩɛb ɩ gãdar a jɛb pʋↄ, diw a sↄdaal-sáanba bar. ³⁵ A ƴↄ̃w-nyãa ɩnɛ, pↄↄbↄ lɛ pↄw na a ba nɩbɛ na ir a kũu pʋↄ. Ŋmɛɛ mɩ dãa na pↄw a kpowfʋ kpi nɩ. A ala ɩ ba dãa na lɩɛb a ba ƴↄ̃w-nyãa ba naa bar ba na, ɩ̃-cɛ baa sↄw wa, a mɩnɛ a ba na tʋↄ ir a kũu pʋↄ pↄw a baafʋ ʋlↄ na nyɩrɩ̃ vɩɛlɛ. ³⁶ A ŋmɛɛ go, ba la ba na, ɩ̃ fↄb a ŋmɛɛ, lũ nɩ a banʋmↄ a bↄ̃jↄrɩ̃sɩ pↄw a kasu pʋↄ. ³⁷ Ba lↄbʼã a nɩŋmɛɛ nɩ kubie kú, ɩ̃ lɛ cɛ a ŋmɛɛ ŋma ayi, ɩ̃ mɩ cɛ a ŋmɛɛ nɩ a bãjɩnsɩ kú. A piir nɩ a bʋʋr gã-kpoor ba dãa su yʋↄrↄ nɩ, ɩ nɩ a nãw deme, a ba hʋↄlↄ ba kpowro nɩ ba. ³⁸ A tẽw na ma mɩ sɛw nɩ a nɩbɛ bala wa. Ba bↄrↄ na yʋↄrↄ a wɛkar pʋↄ nɩ a tan pʋʋr, gana a tan nɩ a tene bↄↄr kpolsɩ pʋʋr. ³⁹ A Naaŋmɩn kpiirʼã a nɩbɛ basɩmɛ ba jaa a ba ƴↄ̃w-nyãa ɩnɛ, ɩ̃-cɛ baa mɩ pↄw a ala ʋ na pʋlɩ̃ nɩ ba wa. ⁴⁰ A-na-ɩ a mɩnɛ a Naaŋmɩn na tɩɛrɛ nɩ sɩ, ʋ gbɛɛrɩ̃ na a yel-paala na vɩɛlɛ gãw a ba ben, a mɩnɛ a ba kↄ̃ lɩɛb ɩ a cɛcɛ ɩ̃ a ala ma ɩ sɩ mɩ be na be wa.

¹ Ala-ɩ̃-sↄ a sɩmɩ mɩ, a mɩnɛ sɩ na tɛrɛ a yel-mɩ̃ɛ ƴɛr-manba na nyɩrɩ̃ waa tiw kolĩ sɩ a nↄhↄ̃, nyɩ́ ɩ a sɩ lↄb a ala a jaa na mↄↄnↄ sɩ a Naaŋmɩn sↄr tufʋ bara, nɩ a maal-fãa na maa yaarɩ̃ barʼɩ̃ sɩ, ɩ̃ na sɩ tɛrɛ a su-varkpara jↄrↄ nɩ a dãw-taa ʋlↄ na be a sɩ nii-sↄw, ² Ꞌwuoro nɩ a Jeeju kir-kir-kir. A ʋlↄ ɩ̃ ɩ a ni-diere a ƴↄ̃w-nyãa sↄr pʋↄ, na mɩ tↄwrↄ sɩ wa tara nɩ a baarfʋ jie. A mɩnɛ ʋ na nyɛ a nʋ̃ↄ ʋlↄ na be a ʋ nii-sↄw, ʋ nyↄw na a suur ɩ bar a ba kpa ʋ a nɩ-kʋ-daa juu, ɩ̃ Ꞌwaa mɩ tɩɛrʼɩ̃ a vĩ ʋlↄ na be a kũu lɛ pʋↄ wa. Ɩ̃ a ƴɛ̃ƴɛrɩ̃ na, ʋ jɛ na a Naaŋmɩn naa-dakↄw juu a ʋ dʋrɩ̃ lõboorɩ̃. ³ Nyɩ́ tɩɛrʼɩ̃ a Jeeju, a mɩnɛ ʋ na dãa nyↄw a suur a lɛdaar a nɩ-faar na jɛbɛ nɩ ʋ, a mɩnɛ a nyɩ kↄ̃ wa bal a ɩ̃gana kar nyɩ, a nyɩ sube sãw wa. ⁴ A-na-ɩ a mɩnɛ nyɩ na jɛbɛ nɩ a maal-fãa, baa kú nɩrɛ a nyɩ sↄ̃w sɛr wa. ⁵ Nyɩ hiinʼã a ana Ꞌlafʋ ƴɛrɩ̃sɩ a Naaŋmɩn na dãa ƴɛrʼɩ̃ nyɩ a ʋ bibiir kaarɩ̃? Ʋ yelʼã: “Ɩ̃ bie, taa de a Nɩ-kpɛ̃ɛ kpãafʋ ʋ ɩ fʋ bõ-pↄrↄ wa. Taa ɩ a fʋ suur sãw fʋ a lɛ ʋ na gala fʋ wa. ⁶ A-na-ɩ a Nɩ-kpɛ̃ɛ ma kpãa na a ʋlↄ ʋ na nʋnↄ, ɩ̃ ma mɩ fↄb a nɩrɛ lɛ ʋ na de ʋ ɩ a ʋ bie.” ⁷ Nyɩ́ tɛrɛ su-nyↄwraa a kpãafʋ pʋↄ, a-na-ɩ a ala miile na áa Naaŋmɩn Ꞌwuoro nyɩ na a ʋ bibiir kaarɩ̃. Bile kãw be na be a ʋ sãa na maa kpãa wa? ⁸ A ala ɩ Ꞌwaa kpãa nyɩ a ʋ bibiir ba jaa kaarɩ̃ wa, nyaa sɩrɩ̃ ɩ a ʋ bibiir wa, ɩ̃-cɛ sɛ̃sɛn bibiir nyɩ ɩ. ⁹ Sɩ tɛrɛ na a ɩ̃gan buur saanba na ma dãa kpãa sɩ a sɩ jↄrↄ ba. Wa yele nɩ a sɩ saa juu Sãa, mɩnɛ ɩ̃ sɛw a sɩ na jↄrↄ ʋ, naa pↄw a baafʋ? ¹⁰ A sɩ saanba, ba ma dãa na kpãa sɩ a daar fɩ̃ɩ pʋↄ a mɩnɛ ba na bʋↄrↄ, ɩ̃-cɛ a Naaŋmɩn ma kpãa sɩ na a sɩ son pↄwfʋ ɩnɛ, a mɩnɛ a sɩ na tʋↄ lɩɛb ɩ a cɛcɛ a ʋ kaarɩ̃. ¹¹ A lɛdaar ba na ma kpãa a nɩrɛ a maa nʋmↄ ʋ wa; a ma ɩ ʋ na nãw. Ɩ̃-cɛ a daar kãw, a bala a kpãafʋ na kuol ma pↄw na a pɩɛnfʋ nɩ a torfʋ a ba baafʋ pʋↄ. ¹² Ala-ɩ̃-sↄ, nyɩ́ lɛ kpɛmɛ a nyɩ nur na ƴↄl, nɩ a nyɩ dume na bal. ¹³ Nyɩ́ cↄↄrɩ̃ a nyɩ sↄr ʋlↄ nyɩ na diere, ʋ tor a nyɩ gbɛɛ ɩnɛ, a mɩnɛ a gbɛ-saanaa sʋbↄ gbɛr kↄ̃ lɛ vir wa, ɩ̃-cɛ ʋ na ɛ̃ɛ kpaar. ¹⁴ Nyɩ́ bʋↄrↄ a pɩɛnfʋ a nɩbɛ ba jaa jie, nɩ a cɛcɛ ɩfʋ. A nɩrɛ ma be a lɛ wa, Ꞌwaa wa nyɛrɛ a Nɩ-kpɛ̃ɛ wa. ¹⁵ Nyɩ́ jʋʋrↄ a mɩnɛ a nɩrɛ kↄ̃ wa lo sↄr pʋↄ ɩ̃ faa a Naaŋmɩn wɩɛfʋ wa, mɩɩ a nɩrɛ kↄ̃ wa ƴↄ̃w a ʋ tↄ sʋbↄ pʋ̃ↄ wa. A na wↄ̃ na taa nɩ tɩ-tomaa na bul a nyɩ sↄ̃w sãw a nɩ-yaw nɩ a ʋ lↄw bar. ¹⁶ Nyɩ́ mɩ jʋʋrↄ a mɩnɛ a nɩrɛ kↄ̃ wa ɩ pepebe, mɩɩ na wↄ̃ taa nɩ a Ejayu na ma dãa tɛrɛ puorfʋ tɩɛrʋ̃ wa, na mɩ dãa de a ʋ kpɛ̃ɛ ɩfʋ tɛw nɩ bõ-dɩraa gbɛ-bõ-ƴen tɛw dɩ. ¹⁷ Nyɩ bↄ̃w na ka a mɩnɛ ʋ na lɛ dãa bʋↄrↄ a ʋ sãa ʋ ƴɛr a nason ƴↄ̃w ʋ, aʋ sãa jaar ʋ na bar. ꞋWaa dãa pↄw sↄr na lɩɛb a ʋna maalfʋ, a mɩnɛ ʋ na dãa saarɩ̃ bↄ a sↄr kõ nɩ wa. ¹⁸ Nyaa taw ta ɩraa a Sɩnayɩ tãw nii-sↄw a Ɩsɩrayɛl nɩbɛ kaarɩ̃ wa, a be a vũu kpɛ̃ɛ na ma dãa Ꞌlere, a wɩɛr ma sↄb, ɩ̃ lɛ liwre a jile-jile, a sɛsɛb kpɛ̃ɛ ma ire, ¹⁹ a ɩl gↄ̃-pↄↄr na ma be, ɩ̃ a nɩrɛ kↄkɩr na ƴɛrɛ. A mɩnɛ ba na wõ a ʋna kↄkɩr, ba sʋↄrʼã a ba taa lɛ ɩ a ba lɛ wõ a ʋna kↄkɩr go wa. ²⁰ A-na-ɩ baa dãa tʋↄrↄ tɛrɛɛ a ʋna ƴɛr-bir na yele áa nɩrɛ lɛ wa sɩɩr a ʋna tãw, a ala saarɩ̃ ɩ a dʋ̃ↄ ʋ, bá lↄb ʋ nɩ kubie kú bar. ²¹ A yele ala na nyɩr ba, dãa na nyɩrɩ̃ kʋrↄ ba dãbɩ̃ɛ a Mowisi wa yel: “Dãbɩ̃ɛ nyɩrɩ̃ na nyↄw ma, ɩ̃ mine!” ²² Ɩ̃-cɛ a nyɩmɩ, nyɩ irʼã ɩraa a Sɩ̃ↄ tãw nii-sↄw, a lɛ yelʼã a Naaŋmɩn-mimir tẽw na ɩ a saa juu Jerujalɛm na tɛrɛ a sɩ-tʋnɩsɩ ture ture kↄ̃ bↄ̃w nʋↄr wa. ²³ Nyɩ mɩ taw na ta a Naaŋmɩn bibi-dãdan na duo taa, a bala yoe ba na sɛb a saa juu, nɩ a Naaŋmɩn na ɩ a nɩbɛ ba jaa ƴɛr-guoro. Nyɩ mɩ ta na a nɩ-torisɩ sɩɩr na lɩɛb ɩ a cɛcɛ jie, ²⁴ nɩ a Jeeju na ɩa pʋlɩ̃-ta-paalaa lↄlʋↄrↄ, nɩ a ʋ jɩ̃ɩ na deer tɛrɛ a ƴɛrɩ̃ na vɩɛlɛ gãw a Abɛl ben. ²⁵ Nyɩ́ tɛrɛ nyɩ mɩ̃ɛ kↄ̃ jaar a ʋlↄ na ƴɛrɛ nɩ nyɩ cɛlfʋ wa. A bala na jaar a Naaŋmɩn nʋↄr a Mowisi na dãa de kpãana nɩ ba a ka a tẽw pʋↄ ma cɩ̃ɛ wa, wa yele nɩ a sɩmɩ, a sɩmɩ lɩɛb jaar a ʋlↄ kpãafʋ na yi a saa juu, mɩnɛ sɩ na ɩ ɩ̃ cɩ̃ɛ? ²⁶ A ʋlↄ kↄkɩr na dãa dam a tẽw a korĩ-cɛ lɛ pʋlɩ̃ nɩ sɩ na a ƴɛ̃ƴɛrɩ̃ yele nɩ: “Ɩ̃ na lɛ damʼã a tẽw gbɛ-daa go, ɓã taa nɩ a saꞋlon jaa.” ²⁷ A “gbɛ-daa go” miile na a yele ala a jaa na dama na nyɩ na, a-na-ɩ yel-mɩɛrsɩ ʋ, a mɩnɛ a yele ala na ma tʋↄrↄ dama wa na tʋↄ ɩraa. ²⁸ Ala-ɩ̃-sↄ, a mɩnɛ sɩ na kpɛɛrɛ a Naaŋmɩn fãw pʋↄ na ma tɛrɛ a damfʋ wa, nyɩ́ ɩ a sɩ tɛrɛ sube na puoro ʋ, a sɩ na tʋↄ pɛwrɛ ʋ a mɩnɛ a na nʋmↄ ʋ, ƴↄnↄ nɩ ʋ, mɩ jↄrↄ nɩ ʋ. ²⁹ A-na-ɩ a sɩ Naaŋmɩn ɩ na a vũu Naaŋmɩn na ma wɛlɛ.

¹ A mɩnɛ nyɩ na ɩ a yɛɛr a Kirisi pʋↄ, nyɩ taa wa bara a nyɩ nʋ-taa wa. ² Nyɩ taa wa hiine a sáanba defʋ wa. A lɛ saa na a nɩŋmɛɛ dãa ir a sɩ-tʋnɩsɩ saan ɩ̃ ma mɩ bↄ̃w ba wa. ³ Nyɩ́ bↄ̃wnↄ nɩ a bala na be a kasu pʋↄ, wↄ̃ taa nɩ ba mɩ lãa na pↄw nɩ nyɩ, nɩ a bala ba na kpowro, wↄ̃ taa nɩ ba mɩ lãa na kpowro nɩ nyɩ. ⁴ A sɛw na a nɩbɛ ba jaa ba ƴↄnↄ̃ a kul-taa, ɩ̃ a daba nɩ a pↄw sɛw na ba ɩ dẽdẽ, a-na-ɩ a Naaŋmɩn na guorʼã a bala na pebe, nɩ a gã-ta-burbur deme ƴɛrɩ̃. ⁵ Nyɩ taa ɩ a libie Ꞌlaarfʋ ʋ tʋↄ nyɩ wa, ɩ̃ nyɩ́ ɛ̃ɛ ɩ a nʋmↄ nyɩ a ala nyɩ na tɛrɛ ɩnɛ, a-na-ɩ a Naaŋmɩn yelʼã: “A ala saarɩ̃ wↄ̃ mɩnɛ, ɩ̃ maa bara fʋ wa. Maa jɛrɛ fʋ bara fɩ̃ɩ wa.” ⁶ Ala-ɩ̃-sↄ sɩ na tʋↄ na bar nyãa ɩ̃ yel: “A Nɩ-kpɛ̃ɛ ɩ̃ ɩ a ɩ̃ Sõsũono; maa jↄrↄ dãbɩ̃ɛ wa. Bõ a nɩrɛ na tʋↄ maal ma?” ⁷ Nyɩ́ cãa bↄ̃w nɩ a bala na dãa ƴɛr a Naaŋmɩn ƴɛrɩ̃ kʋ nyɩ, na dãa ɩ a nyɩ ni-dierbe, Ꞌwuoro nɩ a ala ba na maal wa kpi nɩ, ɩ̃ tↄↄnↄ ba a ba ƴↄ̃w-nyãa pʋↄ. ⁸ A mɩnɛ a Jeeju-Kirisi na dãa be, lɛ ʋ cãa be, a jamɩ, a dɩnaa, nɩ a daar a jaa. ⁹ Nyɩ taa wa ɩ a ba taw nyɩ bↄrʼɩ̃ a jaan-kpe-paala pʋↄ wa. A vɩɛlɛ na a nyɩ sɩɛ na pↄw a kpɛ̃w a Naaŋmɩn sũofʋ ɩnɛ, ɩ̃ a kↄ̃ ɩ a bõ-dɩrɩsɩ ƴɛrɩ̃ jↄfʋ na ma mɩ dãa sũo nɩ-bõ-ƴen fɩ̃ɩ wa. ¹⁰ Sɩ tɛrɛ na a baar lofʋ jie, ɩ̃ a baar-lorbo bala na tʋnↄ a Jufisɩ gan-yir pʋↄ ma tɛrɛ sↄr na dɩ a ana yele wa. ¹¹ A ba baar-lo-nɩ-kpɛ̃ɛ ma de na a dʋn jɩ̃ɩ kpɛ nɩ a di-ciiraa pʋↄ kʋ a Naaŋmɩn a maal-faar de-barfʋ ɩnɛ, ɩ̃ ba ma de na a ana dʋn cenʼɩ cɛ̃cɛ̃w na su bar a dɩ. ¹² A ala ɩnɛ a Jeeju mɩ nyɛ a hʋʋr kpi nɩ a tẽw cɛ̃cɛ̃w, a mɩnɛ a ʋ jɩ̃-son na tʋↄ cↄↄrɩ̃ a ʋ nɩbɛ ow ba kpee. ¹³ Ala-ɩ̃-sↄ, sɩ́ yi cen a be a ʋ sɛ̃ a tẽw cɛ̃cɛ̃w mɩ pↄwrↄ a ʋ kpɛfʋ. ¹⁴ A-na-ɩ saa tɛrɛ tẽ-daadaa ka wa, ɩ̃-cɛ sɩ bʋↄrↄ na a ʋlↄ nↄↄ waara. ¹⁵ AƖa-ɩ̃-sↄ, sɩ́ de a Jeeju yuor pɛwrɛ nɩ a Naaŋmɩn a daar a jaa, a wↄ̃ taa nɩ baar-lo-bom na yi a sɩmɩ na kãkara ʋ nↄɛ pʋↄ ¹⁶ Nyɩ taa wa hiine a son maalfʋ nɩ a sũo-taa bara wa, a-na-ɩ a baar-Ɩo-nↄhↄ̃ ma nʋmↄ a Naaŋmɩn. ¹⁷ Nyɩ́ wono a nyɩ ni-dierbe tobr, ɩ̃ mɩ wur á nyɩ mɩ̃ɛ a ba jie. Bala ma gure a nyɩ sɩɩr a daar a jaa, a-na-ɩ Naaŋmɩn na soor ba na a ala daar kãw. Nyɩ́ ɩ a ba tʋ̃ a tʋmↄ nɩ nʋ̃ↄ, kↄ̃ ɩ bá ni-sↄbaa wa, a-na-ɩ a lɛ kↄ̃ sũo nyɩ wa. ¹⁸ Nyɩ́ cãa sʋↄrↄ a Naaŋmɩn ƴↄnↄ sɩ. Sɩ bↄ̃w ka saa tɛrɛ tɩɛrʋ̃ na dama sɩ wa, a-na-ɩ sɩ bʋↄrↄ na sɩ maal a ala na tor a yele a jaa pʋↄ. ¹⁹ Ɩ̃ sʋↄrↄ nyɩ na bɩlɛ, nyɩ́ sʋↄ̃rↄ a Naáŋrnɩn ƴↄnↄ ma ɩ̃ lɛ wɩ a nyɩ jie fↄfↄw. ²⁰ A pɩɛnfʋ sʋbↄ Naaŋmɩn maalʼã a sɩ Nɩ-kpɛ̃ɛ Jeeju-Kirisi ʋ ir a kũu pʋↄ, ɩ̃ maal ʋ ʋ wↄ̃ taa nɩ a piir Dↄ-cɩɩn-kpɛ̃ɛ a sɩjie, a yi a ʋ jɩ̃ɩ na deer cↄↄrↄ nɩ a daadaa pʋlɩ̃-taa. ²¹ A ʋna Naaŋmɩn, ú sũo nyɩ a vɩlaa maal-bʋrↄ bʋrↄ pʋↄ a jaa, a nyɩ maala a ʋ pʋ-tɩɛrʋ, ɩ̃ mɩ maal a sɩ pʋↄ a ala na nʋmↄ ʋ, a yi a Jeejn-Kirisi jie. A ʋlↄ sↄ a yo-yifʋ a daar a jaa. Amɛn. ²² Yɛɛr, ɩ̃ sʋↄr nyɩ na nyɩ́ sↄw de a kpãkpanfʋ ƴɛrɩ̃sɩ asɩmɛ nɩ su-nyↄwraa, a-na-ɩ a sɛbɛ na ɩ̃ na sɛb nyɩ ma bↄ̃w womo wa. ²³ Ɩ̃ bʋↄrↄ na ka nyɩ bↄ̃w á ba barʼã a sɩ yɛbɛ Timote. A ʋlↄ wa wa pʋrpʋr, ɩ̃ na taw ʋ na wɩ nɩ a lɛdaar ɩ̃ nↄↄ wɩɛrɛ a nyɩ sɛ̃. ²⁴ Nyɩ́ puor a nyɩ ni-dierbe ba jaa, nɩ a Kirisi nɩbɛ ba jaa. A Ɩtalɩ-tẽw yɛɛr mɩ puor nyɩ na. ²⁵ A Naaŋmɩn sũofʋ ú be a nyɩ jie nyɩ jaa.