GALATƖ

GALATƖ

¹ A maa Pol na ɩ a nɩ-tʋnaa ɩ̃ tɩɩrɛ a Naaŋmɩn Sɛbɛ na kʋrↄ nyɩ. Aa ɩ nɩbɛ ɩ̃ vɛl ma ir mɩɩ nɩrɛ jie a yi ɩ̃ ɩ a nɩ-tʋnaa wa. Ɩ̃-cɛ a yi na a Jeeju-Kirisi jie nɩ a Sãa Naaŋmɩn jie na maal ʋ ʋ ir a kũu pʋↄ. ² Sɩ ɓã na taa nɩ a yɛɛr bala ba jaa na be nɩ ma na sɩ puor a nyɩmɩ duo-puorbo na be a Galatɩ-tẽw pʋↄ. ³ A sũofʋ nɩ a pɩɛnfʋ na yi a sɩ Sãa Naaŋmɩn nɩ a Nɩ-kpɛ̃ɛ Jeeju-Kirisi jie á be a nyɩ jie. ⁴ A Kirisi ʋlↄ de na a ʋ mɩ̃ɛ ƴↄ̃w a kũu pʋↄ na ʋ faa sɩ a sɩ maal-faar pʋↄ a mɩnɛ ʋ na tʋↄ wɩɛ sɩ a daarʼãa yel-kpansɩ pʋↄ, tu nɩ a sɩ Sãa Naaŋmɩn pʋ-tɩɛrʋ̃. ⁵ A ʋlↄ sↄ a pɛwfʋ a daar a jaa. Amɛn. ⁶ Nʋↄr tɩɩ na kpaa ma a mɩnɛ nyɩ na bara a Naaŋmɩn a lɛ a pʋpʋr na ɩ a ʋlↄ na bʋↄl nyɩ nɩ a ʋ sũofʋ a Kirisi pʋↄ, ɩ̃ na nyɩ lɛ sↄwrↄ a ƴɛr-kpee ba na hiere. ⁷ Ɩ̃ ƴɛr-son ma lɛ be be kpee go wa, ɩ̃-cɛ nɩbɛ ŋmɛɛ be na a nyɩ sↄ̃w nyanyaana a nyɩ tɩɛrɩ̃sɩ bʋↄrↄ ba lɩɛb a Kirisi ƴɛrɩ̃. ⁸ A ala ɩ̃ ɩ nɩrɛ wa wa na a nyɩ sↄ̃w, a ala ɩ̃ saarɩ̃ ɩ a sɩmɩ mɩ̃ɛ ʋ mɩɩ sɩ-tʋnaa na yi a saa juu, ɩ̃ wa ƴɛr nyɩ ƴɛr-kpee ɩ̃ma ɩ a ala sɩ na ma ƴɛrɛ nyɩ ʋ wa, a Naaŋmɩn pↄfʋ ú nyↄw ʋ! ⁹ Ɩ̃ dãa na de nĩe yel nyɩ, ɩ̃ lɛ bↄ̃w yele nyɩ a ƴɛ̃ƴɛrɩ̃ go: a nɩrɛ wa ƴɛr nyɩ ƴɛr-kpee nyɩ na ma dãa wõ sɛr wa, a Naaŋmɩn pↄfʋ ú nyↄw ʋ! ¹⁰ A lɛ bʋↄrↄ na a yel áa nɩbɛ ɩ̃ bʋↄrↄ ba kpiire ma mɩɩ? Kpee! A Naaŋmɩn ɩ̃ bʋↄrↄ ʋ kpiire ma. Ɩ̃ cãa na bʋↄrↄ a nɩbɛ ba pɛwrɛ ma mɩɩ? A maa dãa cãa bʋↄrↄ a nɩbɛ ba pɛwrɛ ma, ɩ̃ kↄ̃ↄ dãa ɩ a Kirisi tʋ̃tʋnↄ wa. ¹¹ Yɛɛr, ɩ̃ yel nyɩ na, a ƴɛr-son ɩ̃ na ma hiere ma yi nɩrɛ sɛ̃ wa. ¹² Maa pↄw ʋ nɩrɛ jie wa, ɩ̃ aa mɩ ɩ nɩrɛ ɩ̃ jaan ma wa, ɩ̃-cɛ a Jeeju-Kirisi mɩ̃ɛ ɩ̃ miil ma. ¹³ Nyɩ wõ na a ba ƴɛr a mɩnɛ a ɩ̃ maalfʋ na dãa be a lɛdaar ɩ̃ na dãa puoro a Jufisɩ puorfʋ, a mɩnɛ ɩ̃ na mɩ dãa nyɩrɩ̃ kpowro a Naaŋmɩn duo-puorbo, bʋↄrↄ ɩ̃ wɛl ba bar. ¹⁴ Ɩ̃ vɩɛ na a ɩ̃ tↄ deme bala sɩ na ɩ nɩ a bõ-ƴen a Jufisɩ puorfʋ pʋↄ bar, a mɩnɛ ɩ̃ na daa tʋlↄ gãw ba a ɩ̃ sãa-kʋnbↄ maal-bie pʋↄ. ¹⁵ Ɩ̃-cɛ a Naaŋmɩn de na nĩe vɛl ma ir ɩ̃ a ba wa bɩɛr dↄw ma. A ʋ pʋ-pɩlaa ɩnɛ ʋ bʋↄl ma ƴↄ̃w a ʋ tʋmↄ pʋↄ, ¹⁶ ɩ̃ a lɛdaar ʋ na nyɛ a vɩɛlɛ ʋ na miil ma a ʋ Bie a mɩnɛ ɩ̃ na tʋↄ mana a ʋ ƴɛrɩ̃ kʋrↄ a nɩ-bʋlsɩ, maa cen nɩrɛ jie na soor ʋ bom wa. ¹⁷ Maa mɩ cen a Jerujalɛm na nyɛ a bala na de nĩe ɩ ma a nɩ-tʋnɩsɩ wa, ɩ̃-cɛ ɩ̃ irʼã cen a Arabɩ wɩɛr ɩ̃ pãa lɩɛb wa a Damasɩ-tẽw. ¹⁸ Yomo ata a maal ɩ̃-cɛ ɩ̃ cen a Jerujalɛm na bↄ̃w a Pɩɛr, ɩ̃ jɛ a be maal bibie pie-nʼanuu a ʋ sɛ̃. ¹⁹ Maa nyɛ nɩ-tʋnaa kpee ɩ̃ a ala ma ɩ a Jakɩ na ɩ a Nɩ-kpɛ̃ɛ yɛbɛ ʋ wa. ²⁰ A ala ɩ̃ na yel nyɩ, a Naaŋmɩn bↄ̃w na ka a maa ŋmaa jiri wa. ²¹ A ala ɩ̃ baar ɩ̃ cenʼã a Sɩrɩ nɩ a Sɩlɩsɩ wɛɛ. ²² A ʋna daarʼãa pʋↄ, a Kirisi duo-puorbo na be a Jude wɩɛr pʋↄ ma dãa bↄ̃w ma wa. ²³ Ba dãa na wõ a ala a nɩbɛ na ƴɛrɛ a ɩ̃ ɩnɛ tɛw, áa ʋlↄ na dãa kpowro ba a korĩ-cɛ lɛ lɩɛbʼã ƴɛrɛ a Naaŋmɩn ƴɛrɩ̃ ʋlↄ ʋ na dãa bʋↄrↄ ʋ sãw bar, ²⁴ ɩ̃ na ba pɛwrɛ a Naaŋmɩn a ɩ̃ ɩnɛ.

¹ A mɩnɛ a yomo pie-nʼanuu for bir na tↄl baar, a maa nɩ a Banabasɩ lɛ cenʼã a Jerujalɛm. Ɩ̃ mɩ tɛrɛ na a Tɩtɩ cenʼɩ̃. ² Ɩ̃ cenʼã a-na-ɩ a Naaŋmɩn ɩ̃ dãa miil ma áa sɛw na ɩ̃ cen. A mɩnɛ sɩ na kpaarɩ̃ taa nɩ a bala ɩ̃ na bↄ̃w ka a ni-dierbe ba ɩ, ɩ̃ man ba na a ƴɛr-son ʋlↄ ɩ̃ na ƴɛrɛ kʋrↄ a nɩ-bʋlsɩ, a mɩnɛ a ɩ̃ korĩ-cɛ tʋmↄ nɩ a ɩ̃ ƴɛ̃ƴɛrɩ̃ tʋmↄ kↄ̃ wa lo wa. ³ Ɩ̃-cɛ a mɩnɛ a ɩ̃ lãa-yʋↄrↄ Tɩtɩ na saarɩ̃ ɩ a Gɩrɛkɩ nɩrɛ, ɩ̃ aa dãa fɛr ʋ, ʋ na ŋmaa a yʋↄr ⁴ tuure nɩ a mɩnɛ a yɛ-kpansɩ bala na dãa sↄↄlɩ̃ kpɛ a sɩ pʋↄ na bʋↄrↄ wa. A bana nɩbɛ sↄↄlɩ̃ na kpɛ bʋↄrↄ ba jʋʋr a faafʋ ʋlↄ sɩ na pↄw a Jeeju-Kirĩsi pʋↄ, a mɩnɛ a ba na tʋↄ lɩɛb sɩ a sɩ lɛ ɩ a gbãgbaar. ⁵ Saa dãa sↄw a ba ƴɛrɩ̃ fɩ̃ɩ wa, a mɩnɛ a sɩ na tɛrɛ a Kirisi yel-mɩ̃ɛ ƴɛrɩ̃ cĩcĩ a nyɩ ɩnɛ. ⁶ A ala ɩ̃ ɩ a bala ɩ̃ na dãa tɩɛr bↄ̃w ka a ni-dierbe ba ɩ — a ala ba na dãa ɩ, ma ɩ ma bom wa, a-na-ɩ a Naaŋmɩn ma Ꞌwuoro a nɩrɛ ɩ̃gan wa — a bana nɩbɛ naa ma dãa tɛrɛ jaan-kpee na dↄↄl ma wa. ⁷ Ɩ̃ ba ɛ̃ɛ na nyɛ a mɩnɛ a Naaŋmɩn na ƴↄ̃w ma a tʋn ɩ̃ na hier a ʋ ƴɛr-son kʋ a nɩ-bʋlsɩ, a mɩnɛ ʋ na mɩ ƴↄ̃w a Pɩɛr ʋ na mɩ hier kʋ a Jufisɩ. ⁸ A-na-ɩ a Naaŋmɩn ir ma ɩ̃ ɩ a nɩ-tʋnaa a nɩ-bʋlsɩ jie, a mɩnɛ ʋ na mɩ ir a Pɩɛr ʋ ɩ a nɩ-tʋnaa a Jufisɩ jie. ⁹ A Jakɩ, a Pɩɛr nɩ a Jã a popuorbo na de a ba ɩ a ba nɩ-bɛrɛ bↄ̃w na a nason tʋn ʋlↄ a Naaŋmɩn na ƴↄ̃w ma, ɩ̃ nyↄↄr sɩ a nur puor na miile a sɩ bõ-ƴen ɩfʋ a Kirisi pʋↄ, ɩ̃ a sɩ man taa áa sɩmɩ na cen na tʋnↄ a nɩ-bʋlsɩ sↄ̃w, ɩ̃-cɛ a bala cen a Jufisɩ sↄ̃w. ¹⁰ A ala tɛw ba na yel sɩ ɩ na á sɩ bↄ̃w nɩ a nɩ-kↄmsɩ bala na be a ba sↄ̃w a Jerujalɛm: bom ʋ, na dãa be a ɩ̃ suur pʋↄ ɩ̃ na maal. ¹¹ Ɩ̃-cɛ a mɩnɛ a Pɩɛr na wɩ a Ãtɩyↄsɩ, ɩ̃ gal ʋ na a nɩbɛ jaa nii-sↄ̃w a-na-ɩ ʋ bɩɛ na. ¹² A mɩnɛ a Jakɩ nɩbɛ na ma dãa wɩ sɛr wa, ʋ ma dãa na lãa dɩrɛ nɩ a nɩ-bʋlsɩ a dɩb, ɩ̃-cɛ a mɩnɛ a Jakɩ nɩbɛ na wɩ baar, ʋ ŋmaa na dɩrɛ kpee, a-na-ɩ dãbɩ̃ɛ dãa na nyↄw ʋ a bala na ma cɛ̃pɛrɛ a yʋↄr ŋmaafʋ ƴɛrɩ̃ ɩnɛ. ¹³ A yɛɛr ŋmɛɛ na ɩ a Jufisɩ mɩ tɛrɛ na a poe ayi a Pɩɛr kaarɩ̃, cere nɩ a Banabasɩ mɩ̃ɛ wa mɩ kpɛ a ana tʋmↄ pʋↄ. ¹⁴ Ɩ̃-cɛ a mɩnɛ ɩ̃ na nyɛ a ba maalfʋ a aa cere taa nɩ a Kirisi yel-mɩ̃ɛ ƴɛrɩ̃ wa, ɩ̃ yelʼã a Pɩɛr a nɩbɛ ba jaa mi-sↄw: “A fʋ̃ʋ na ɩ a Jufi ɩ̃ maala a nɩ-bʋlsɩ maal-bie ɩ̃ bar a Jufisɩ maalfʋ, mɩnɛ fʋ na tʋↄ fɛr a nɩ-bʋlsɩ a ba na maala a Jufisɩ kaarɩ̃?” ¹⁵ A sɩmɩ a Jufisɩ na dↄw, saa ɩ a nɩ-bʋlsɩ bala a Jufisɩ na bʋↄlↄ a maal-faar deme wa. ¹⁶ Ɩ̃-cɛ sɩ bↄ̃w na ka a nɩrɛ ma toro a Naaŋmɩn nii-sↄw a Mowisi ƴɛr-kpɛn jↄfʋ ɩnɛ wa, ɩ̃ a nɩrɛ ma torʼã a Naaŋmɩn nii-sↄw a Jeeju-Kirisi ʋ na ƴↄ̃w a nyãa ɩnɛ. Ala-ɩ̃-sↄ, a sɩmɩ mɩ̃ɛ sↄw na de a Jeeju-Kirisi, a mɩnɛ a sɩ na tʋↄ tor a Naaŋmɩn nii-sↄw a sɩ ƴↄ̃w-nyãa sɩ na tɛrɛ a Kirisi ɩnɛ, ɩ̃ a kↄ̃ ɩ a Mowisi ƴɛr-kpɛn jↄfʋ ɩnɛ ʋ wa. A-na-ɩ nɩrɛ kↄ̃ tor a Naaŋmɩn nii-sↄw a ƴɛr-kpɛn ʋ na jↄrↄ ɩnɛ wa. ¹⁷ Ɩ̃-cɛ a ala ɩ̃ ɩ a Kirisi ɩnɛ sɩ bʋↄrↄ sɩ tor a Naaŋmɩn nii-sↄw, ɩ̃ wa nyɛ bↄ̃w ka maal-fãa deme sɩ ɩ a nɩ-bʋlsɩ kaarɩ̃, a lɛ yelʼã áa ʋna maal-fãa naa yi na a Kirisi jie mɩɩ? A kↄ̃ ɩ a lɛ wa. ¹⁸ A ala ɩ̃ ɩ ɩ̃ lɛ nyↄw na ɩ̃ cↄↄrↄ a ƴɛr-kpɛn jↄfʋ ʋlↄ ɩ̃ na dãa sãw bar, ɩ̃ na ɩ na nɩrɛ ʋlↄ na mab a Naaŋmɩn jie. ¹⁹ A-na-ɩ a ala ɩ̃ ɩ a ƴɛr-kpɛn ʋ, ɩ̃ kpi na a kũu ʋlↄ na yi a ƴɛr-kpɛn jie, a mɩnɛ ɩ̃ na tʋↄ tɛrɛ a baafʋ ɩ nɩ a Naaŋmɩn nɩrɛ. Ba kú ma na nɩ a Kirisi a nɩ-kʋ-daa juu, ²⁰ a mɩnɛ a kↄ̃ cãa ɩ a maa sↄ a baafʋ ʋlↄ na be a ɩ̃ pʋↄ wa, ɩ̃-cɛ a Kirisi sↄ. A ɩ̃gan buur baafʋ ʋlↄ ɩ̃ na tɛrɛ a ƴɛ̃ƴɛrɩ̃ na, ɩ̃ tɛrɛ ʋ na a Naaŋmɩn Bie ɩ̃ na ƴↄ̃w a nyãa ɩnɛ, a ʋlↄ na nʋ ma ɩ̃ de tↄ a ɩ̃ ɩnɛ kpi. ²¹ Maa jaara a Naaŋmɩn wɩɛfʋ bara wa, a-na-ɩ a ala ɩ a ƴɛr-kpɛn ɩnɛ a nɩrɛ na tor a Naaŋmɩn nii-sↄw, a Kirisi kũu na ɩ na pↄrↄ.

¹ A nyɩna Galatɩ nɩ-dãbolo naa, ala ɩ̃ ƴↄ̃w nyɩ a tɩsↄↄlʋ̃ʋ ʋlↄ? Mɩnɛ a wa ta a lɛ? A-na-ɩ nyɩ wõ na a Jeeju-Kirisi ƴɛrɩ̃ cɛcɛ wↄ̃ taa nɩ a nyɩ nii-sↄw ba dãa kpa ʋ a nɩ-kʋ-daa juu. ² Ɩ̃ bʋↄrↄ na ɩ̃ soor nyɩ bom kãw a nyɩ kʋ ma a sↄwfʋ. Nyɩ pↄw na a Naaŋmɩn Sɩɛ a ƴɛr-kpɛn jↄfʋ ɩnɛ, mɩɩ a-na-ɩ nyɩ wõ na a Naaŋmɩn ƴɛr-son ɩ̃ sↄw? ³ Mɩnɛ nyɩ na tʋↄ ɩ a dãbolo a lɛ? A Naaŋmɩn Sɩɛ pʋↄ nyɩ nyↄw a nyɩ Naaŋmɩn sↄr tufʋ, ɩ̃ lɛ bʋↄrↄ nyɩ baarʼɩ̃ nyɩ mɩ̃ɛ fãgã? ⁴ Pↄrↄ nyɩ pↄw a ana yele a jaa na ta nyɩ mɩɩ? A kↄ̃ tʋↄ ɩ pↄrↄ wa. ⁵ A lɛdaar a Naaŋmɩn na ma kʋ nyɩ a ʋ Sɩɛ ɩ̃ mɩ maala a nↄ-kofʋ tʋmↄ a nyɩ sↄ̃w, ʋ ma maalʼã a-na-ɩ nyɩ jↄrↄ na a ƴɛr-kpɛn, mɩɩ a-na-ɩ nyɩ wõ na a ʋ ƴɛrɩ̃ ɩ̃ sↄw? ⁶ Nyɩ́ tɩɛrʼɩ̃ a mɩnɛ a Naaŋmɩn Sɛbɛ na yel a Abʋraham ɩnɛ. A yelʼã á ʋ ƴↄ̃w na a Naaŋmɩn a nyãa ɩ̃ a Naaŋmɩn de ʋ ʋ ɩ nɩ-toraa a ʋ nii-sↄw. ⁷ Nyɩ sɛw na nyɩ bↄ̃w áa bala na ƴↄ̃w a Naaŋmɩn a nyãa, bala ɩ̃ sɩrɩ̃ ɩ a Abʋraham bal nɩbɛ. ⁸ A Naaŋmɩn Sɛbɛ de na nĩe yel áa Naaŋmɩn nↄↄ de na a nɩ-bʋlsɩ a ba tor a ʋ nii-sↄw a ba ƴↄ̃w-nyãa ɩnɛ. Ala-ɩ̃-sↄ ʋ de nĩe man a ƴɛr-son naa kʋ a Abʋraham: “A nɩ-bʋlsɩ ba jaa na pↄw na a nason a fʋ ɩnɛ.” ⁹ A nↄhↄ̃, a bala na tɛrɛ a ƴↄ̃w-nyãa na mɩ pↄw na a nason lãa nɩ a Abʋraham na dãa sↄw de a Naaŋmɩn ƴɛrɩ̃. ¹⁰ Ɩ̃-cɛ nabier na nyↄw na a nɩrɛ lɛ na bʋↄrↄ a torfʋ a ƴɛr-kpɛn jↄfʋ pʋↄ, a-na-ɩ a sɛbʼã a Naaŋmɩn Sɛbɛ pʋↄ áa nɩrɛ lɛ na ma jↄrↄ a ala a jaa na sɛb a Naaŋmɩn ƴɛr-kpɛn Sɛbɛ pʋↄ wa, á ʋ na pↄw na nabier. ¹¹ Sɩ nyɛ na bↄ̃w ka nɩrɛ ma tʋↄrↄ toro a Naaŋmɩn nii-sↄw a ƴɛr-kpɛn ɩnɛ wa, a-na-ɩ a sɛbʼã a Naaŋmɩn Sɛbɛ pʋↄ áa ʋlↄ na tor a ʋ nii-sↄw a ʋ ƴↄ̃w-nyãa ʋ na tɛrɛ ɩnɛ na baa na. ¹² Ɩ̃ a ƴɛr-kpɛn ma ɩrɛ bõ-ƴen nɩ a ƴↄ̃w-nyãa wa. A-na-ɩ a yelʼã a Naaŋmɩn Sɛbɛ pʋↄ áa ʋlↄ na ɛ̃ɛ maala a ƴɛr-kpɛn tʋmↄ a jaa na pↄw na a baafʋ a ala ɩnɛ. ¹³ Amɩ yelʼã: “A nabier na mɩ ta na a ʋlↄ ba nↄↄ kpara yaala a daa juu.” Ɩ̃ a mɩnɛ a Kirisi na de a ʋna nabier a sɩ ɩnɛ, ʋ da sɩ na faa a ƴɛr-kpɛn nabier pʋↄ. ¹⁴ A ala a jaa maalʼã a lɛ a mɩnɛ a nason ʋlↄ a Naaŋmɩn na dãa pʋlɩ̃ nɩ a Abʋraham na mɩ tʋↄ ta a nɩ-bʋlsɩ a Jeeju-Kirisi ɩnɛ, nɩ a mɩnɛ a sɩ na mɩ tʋↄ pↄw a Naaŋmɩn Sɩɛ ʋlↄ ʋ na dãa pʋlɩ̃ nɩ sɩ a sɩ ƴↄ̃w-nyãa pʋↄ. ¹⁵ Yɛɛr, ɩ̃ na de na a nɩbɛ maalfʋ miilʼɩ̃ nyɩ bom. A ala ɩ̃ ɩ nɩrɛ biinʼã nʋↄr a mɩnɛ a na sɛw, nɩrɛ kãw ma tɛrɛ sↄr na sãw a ʋna nʋↄr bar mɩɩ ʋ dↄↄl bom kãw wa. ¹⁶ Ɩ̃ sɩ bↄ̃w ka a Naaŋmɩn dãa na pʋlɩ̃ nɩ a Abʋraham nɩ a ʋ bal parvʋↄr nɩrɛ kãw. A Naaŋmɩn Sɛbɛ ma yel á ʋ pʋlɩ̃ nɩ na a ʋ bal parvʋↄr nɩbɛ wↄ̃ taa nɩ nɩ-yaw ba ɩ wa, ɩ̃-cɛ a yelʼã á ʋ bal parvʋↄr nɩrɛ kãw, na miile a nɩ-bõ-ƴen tɛw, na ɩ a Kirisi. ¹⁷ Nyɛ a ala ɩ̃ na bʋↄrↄ ɩ̃ yel. A ƴɛr-kpɛn ala na bɩɛr wa a lɛ a yomo kↄↄr anaan dↄↄl lɩjɛrʼɩ̃ pie na tↄl baar ma tʋↄrↄ sãwna a nʋↄr ʋlↄ a Naaŋmɩn na de nĩe biin wa. A ala ɩ̃ dãa ɩ a lɛ ʋ, a ʋna nʋↄr biinfʋ kↄ̃ tʋↄ cãa ɩ bom wa. ¹⁸ A ala ɩ̃ ɩ a yel-sono ala a Naaŋmɩn na gbɛɛrɩ̃ bin sɩ yi na a ƴɛr-kpɛn jↄfʋ pʋↄ, aa lɛ tʋↄrↄ yire a pʋlɩ̃fʋ pʋↄ wa. Ɩ̃-cɛ a Abʋraham pↄw na a ana yele a Naaŋmɩn pʋlɩ̃fʋ pʋↄ. ¹⁹ A ala ɩ̃ ɩ a lɛ ʋ, bõ ɩnɛ ba ƴↄ̃w a ƴɛr-kpɛn? A Naaŋmɩn bɩɛrʼã ƴↄ̃w a ƴɛr-kpɛn a sɩ na tʋↄ bↄ̃w a ala na ɩ a mabfʋ a ʋ nii-sↄw. A dãa na sɛw a kam wa ta nɩ a lɛdaar a Abʋraham bal nɩrɛ ʋlↄ ɩnɛ ba na pʋlɩ̃ nɩ nↄↄ waara. A sɩ-tʋnɩsɩ dãa na de a ana ƴɛr-kpɛn wa nɩ man kʋ a Mowisi na dãa ɩ a lↄlʋↄrↄ. ²⁰ Ɩ̃-cɛ a ala ɩ̃ ɩ nɩ-bõ-ƴen tɛw ɩ̃ maala a bom, lↄlʋↄrↄ ma beree be wa. Ɩ̃ a Naaŋmɩn ɩ na a ʋlↄ tɛw na wa nɩ a ʋna pʋlɩ̃fʋ naa. ²¹ A lɛ bʋↄrↄ na a yel a ƴɛr-kpɛn lɛ lɩɛbɛ na a Naaŋmɩn pʋlɩ̃fʋ mɩɩ? Aa ɩ lɛ ʋ wa. A ala ɩ̃ dãa ɩ a ƴɛr-kpɛn be na be na tʋↄrↄ kʋrↄ a nɩbɛ a baafʋ, sɩ naa dãa na sɩrɩ̃ tor a Naaŋmɩn nii-sↄw a ana ƴɛr-kpɛn jↄfʋ ɩnɛ. ²² Ɩ̃-cɛ a Naaŋmɩn Sɛbɛ miilʼã áa maal-fãa kpalʼã a nɩbɛ ba jaa a kasu pʋↄ a mɩnɛ a bala na sↄw de a Jeeju-Kirisi na tʋↄ pↄw a bom ʋlↄ a Naaŋmɩn na pʋlɩ̃ nɩ a ƴↄ̃w-nyãa deme. ²³ A mɩnɛ a ƴↄ̃w-nyãa daar na ma dãa ta sɛr wa, a ƴɛr-kpɛn dãa na pↄw sɩ kasu pʋↄ lɛɛ wa ta nɩ a lɛdaar a ƴↄ̃w-nyãá ƴɛrɩ̃ na yi a cãa pʋↄ. ²⁴ Ála-ɩ̃-sↄ a ƴɛr-kpɛn dãa na wↄ̃ taa nɩ a sɩ tↄtↄwrↄ wa ta nɩ a lɛdaar a Kirisi na wa, a mɩnɛ sɩ na tʋↄ tor a Naaŋmɩn nii-sↄw a ƴↄ̃w-nyãa ɩnɛ. ²⁵ Ɩ̃ a ƴɛ̃ƴɛrɩ̃ nã a ƴↄ̃w-nyãa daar na ta, a tↄtↄwrↄ ʋlↄ ma lɛ cãa tɛrɛ fãgã a sɩ jie wa. ²⁶ A-na-ɩ a nyɩ ƴↄ̃w-nyãa nyɩ na tɛrɛ be nɩ a Jeeju-Kirisi pʋↄ, nyɩ ɩ nɩ a Naáŋmɩn bibiir nyɩ jaa. ²⁷ A nyɩ́mɩ jaa ba na dãa mʋr a kʋ̃ↄ a nyɩ ɩ nɩ a Kirisi a bõ-ƴen, a Kirisi nyɩ de su a lɛ a cẽcen kaãrɩ. ²⁸ Ala-ɩ̃-sↄ a Jufi nɩrɛ ma be kpee nɩ a nɩ-bʋlↄ wa; a gbãgbaa ma mɩ be kpee nɩ a ʋlↄ na sↄ a ʋ mɩ̃ɛ wa; a daba ma mɩ lɛ be kpee nɩ a pↄw wa. Nyɩ jaa ɩ na bõ-ƴen a mɩnɛ nyɩ na be a Jeejũ-Kirisi pʋↄ. ²⁹ Ɩ̃ a ala ɩ a Kirisi ben nyɩ ɩ, nyɩ ɩ na a Abʋraham bal nɩbɛ, na pↄwrↄ a ala a Naaŋmɩn na pʋlɩ̃ nɩ a bana nɩbɛ naa.

¹ Nyɩ́ nyɛ a ala ɩ̃ na bʋↄrↄ ɩ̃ yel. A bie na ɩ a gã-diere, ɩ̃ wa cãa pab, ʋ sɩrɩ̃ na wↄ̃ taa nɩ a gbãgbaa a mɩnɛ ʋ na saarɩ̃ ɩ a ʋ saa gã-diere. ² A lɛdaar ʋ na cãa pab, ʋ be na a ꞋwoꞋwuorbo nuu pʋↄ ɩ̃ a ŋmɛɛ mɩ Ꞌwuoro a ʋ gã-yele, wa tara nɩ a daar ʋlↄ a sãa na ƴↄ̃w. ³ A sɩmɩ mɩ, a lɛ a mɩ daa be sɩ. A lɛdaar sɩ na dãa cãa pab, a tẽw na pʋↄ sɩ-bʋrↄ bʋrↄ gbãgbaar sɩ dãa ɩ. ⁴ Ɩ̃-cɛ a daar ʋlↄ a Naaŋmɩn na ƴↄ̃w, ʋ ta na ʋ bar a ʋ Bie ʋ wa, a pↄw dↄw ʋ, ʋ be a Jufisɩ ƴɛr-kpɛn pʋↄ, ⁵ a mɩnɛ ʋ na faa a bala na be a ƴɛr-kpɛn pʋↄ, ɩ̃ a sɩ na tʋↄ lɩɛb ɩ a Naaŋmɩn bibiir. ⁶ Ɩ̃ a mɩnɛ nyɩ na tʋↄrↄ bↄ̃wnↄ a nyɩ sɩrɩ̃ na ɩ a Naaŋmɩn bibiir, ʋ ƴↄ̃w na a ʋ Bie Sɩɛ a nyɩ sube pʋↄ ʋ wuure yele, “Aba, ɩ̃ Sãa yaa!” ⁷ A nↄhↄ̃, faa lɛ ɩ gbãgbaa go wa, ɩ̃-eɛ bi-tↄr fʋ ɩ. Ɩ̃ a mɩnɛ fʋ na ɩ a bi-tↄr, a Naaŋmɩn nↄↄ mɩ kʋ fʋ na a ala ʋ na bin a ʋ bibiir ɩnɛ. ⁸ A korĩ-cɛ, nyaa dãa bↄ̃w a Naaŋmɩn wa, ɩ̃ dãa ɩ a gbãgbaar, tʋnↄ kʋrↄ a yele ala na ma sɩrɩ̃ ɩ a Naaŋmɩn wa. ⁹ Ɩ̃-cɛ a ƴɛ̃ƴɛrɩ̃ na nyɩ bↄ̃w na a Naaŋmɩn, ɩ̃ a ala na ɩ a kpɛ̃ɛ ɩ na a Naaŋmɩn bↄ̃w nyɩ na. Ɩ̃ mɩnɛ a na lɛ ɩ a nyɩ na tʋↄ lɩɛb cen a ana yele jie na ma ɩ bom wa, na ma mɩ tɛrɛ fãgã wa? Nyɩ lɛ bʋↄrↄ na nyɩ lɛ lɩɛb ɩ a ba gbãgbaar mɩɩ? ¹⁰ Nyɩ ma de na a bibie a ba be kpee kpee, ɩ̃ ma mɩ de a cur, a daar, nɩ a yomo a ba mɩ be kpee kpee. ¹¹ Ɩ̃ jↄrↄ na dãbɩ̃ɛ a nyɩ maalfʋ ɩnɛ a mɩnɛ a ɩ̃ tʋn ɩ̃ na tʋ̃ a nyɩ sↄ̃w kↄ̃ wa lo wa. ¹² Yɛɛr, ɩ̃ sʋↄr nyɩ na bɩlɛ, nyɩ́ lɩɛb wↄ̃ a ɩ̃ kaarɩ̃ a-na-ɩ ɩ̃ mɩ lɩɛbʼã wↄ̃ a nyɩ kaarɩ̃. Nyaa dãa maal ma bier fɩ̃ɩ wa. ¹³ Nyɩ cãa na bↄ̃w áa wʋlɩ̃ ɩ̃ saa ɩ̃ wa ƴɛr a Kirisi ƴɛr-son kʋ nyɩ a dãdãw. ¹⁴ A mɩnɛ a ɩ̃ wʋlɩ̃ na dãa ɩ nyɩ a won, ɩ̃-cɛ nyaa mel ma mɩɩ lↄb ma bar wa, ɩ̃ nyɩ ɛ̃ɛ na de ma a Naaŋmɩn sɩ-tʋnaa kaarɩ̃, mɩɩ a Jeeju-Kirisi kaarɩ̃. ¹⁵ Nʋ̃ↄ dãa na nyↄw nyɩ, ɩ̃ nyɩnɛ a ʋna nʋ̃ↄ lɛ cen? Ɩ̃ na tʋↄ na yel a asɩmɛ a nyɩ ɩnɛ. A ala dãa ɩ sↄr be na be, nyɩ naa Ꞌloorʼã a nyɩ mimie ƴↄ̃w ma. ¹⁶ A ƴɛ̃ƴɛrɩ̃ na, ɩ̃ lɩɛbʼã ɩ a nyɩ san-sʋbↄ a mɩnɛ ɩ̃ na yel nyɩ a yel-mɩ̃ɛ mɩɩ? ¹⁷ A bana nɩbɛ naa, a ɓĩɓinfʋ ba na tɛrɛ a nyɩjie ma ɩ bõ-son wa, ɩ̃-cɛ ba bʋↄrↄ na ba ŋmaa nyɩ a ɩ̃ jie a nyɩ na ɓĩɓine a ba jie. ¹⁸ A ɓĩɓinfʋ vɩɛlɛ na a ala ɩ̃ ɩ bõ-son ɩnɛ ʋ. Ɩ̃ aa ɩ a lɛdaar tɛw ɩ̃ na ma be a nyɩ jie wa, ɩ̃-cɛ a na mɩ ɩ a daar a jaa. ¹⁹ Ɩ̃ bibiir, a mɩnɛ a na ma nyɩrɩ̃ wono a pↄw na dↄwrↄ, lɛ a mɩ wono ma wa tara nɩ a lɛdaar ba na nyɛrɛ a Kirisi a nyɩ baafʋ pʋↄ. ²⁰ Ɩ̃ tɩɩ na bʋↄrↄ ɩ̃ lɛ be a nyɩ sↄ̃w a daarʼã pʋↄ na lɛ tʋↄ ƴɛrʼɩ̃ nyɩ kↄkɩr kpee a-na-ɩ a tɩɩ na dama ma a nyɩ ɩnɛ. ²¹ Ɩ̃ bʋↄrↄ na ɩ̃ soor a nyɩmɩ na bʋↄrↄ nyɩ de a nyɩ mɩ̃ɛ ƴↄ̃w a ƴɛr-kpɛn pʋↄ, nyaa wo a ala a ƴɛr-kpɛn na yel wa? ²² A-na-ɩ a yelʼã áa Abʋraham dãa na tɛrɛ bi-dabsɩ ayi. Gbãgba-pↄw na dɩ a Agaar ɩ̃ dↄw a bõ-ƴen, ɩ̃ a pↄw na sↄ a ʋ mɩ̃ɛ na dɩ a Sara ɩ̃ mɩ dↄw a bõ-ƴen. ²³ A gbãgba-pↄw ʋlↄ dↄw na a ʋ bie a mɩnɛ ba na ma dↄw a nɩrɛ, ɩ̃-cɛ a pↄw ʋlↄ na sↄ a ʋ mɩ̃ɛ dↄw na a ʋ bie tu nɩ a Naaŋmɩn pʋlɩ̃fʋ. ²⁴ A ƴɛrɩ̃ na wↄ̃ na taa nɩ sʋkpa. A pↄↄbↄ ayi miile na a pʋlɩ̃-tar ayi a Naaŋmɩn nɩ a nɩbɛ na dãa pʋlɩ̃. A Agaar na dↄwrↄ a gbãgba-bibiir miile na a pʋlɩ̃-tar ayi kãw na ɩ a Sɩnayɩ tãw pʋlɩ̃fʋ ƴɛrɩ̃. ²⁵ A Agaar ʋlↄ miile na a Sɩnayɩ tãw na be a Arabɩ wɛkar pʋↄ, ɩ̃ mɩ wↄ̃ taa nɩ a ƴɛ̃ƴɛrɩ̃ Jerujalɛm, a-na-ɩ a ʋna tẽw nɩ a ʋ nɩbɛ ba jaa be na a gbãgba-tʋmↄ pʋↄ. ²⁶ Ɩ̃-cɛ a pↄw ʋlↄ na sↄ a ʋ mɩ̃ɛ miile na a Jerujalɛm ʋlↄ na be a saa juu, ɩ̃ a ʋlↄ ɩ̃ ɩ a sɩ mã. ²⁷ A-na-ɩ a Naaŋmɩn Sɛbɛ yelʼã: “A fʋ̃ʋ pↄw ab, a fʋ̃ʋ na ma bↄ̃w a dↄwfʋ tuo wa, cɩlɛ awra nɩ, cɩɛrɛ nɩ a yele! A-na-ɩ a pↄw ʋlↄ ba na jaar bar na dↄw na bibiir gãw a pↄw ʋlↄ na cãa tɛrɛ a sɩrɛ.” ²⁸ Yɛɛr, a ala ɩ̃ ɩ a nyɩmɩ ʋ, ba dↄw nyɩ na tu nɩ a Naaŋmɩn pʋlɩ̃fʋ a Ɩjakɩ kaarɩ̃. ²⁹ Ɩ̃-cɛ a korĩ-cɛ, a ʋlↄ ba na dↄw a nɩrɛ dↄwfʋ ma hʋↄlↄ na a ʋlↄ ba na dↄw nɩ a Naaŋmɩn Sɩɛ kpɛ̃w, ɩ̃ a lɛ a mɩ be a ƴɛ̃ƴɛrɩ̃ na. ³⁰ Ɩ̃ bõ a Naaŋmɩn Sɛbɛ yel? Ʋ yelʼã: “Diw a gbãgba-pↄw nɩ a ʋ bie bar, a-na-ɩ a gbãgba-pↄw bie nɩ a pↄw ʋlↄ na sↄ a ʋ mɩ̃ɛ bie ma sɛw na lãa pↄw a ba sãa gã-yele wa.” ³¹ Ala-ɩ̃-sↄ yɛɛr, saa ɩ a gbãgba-pↄw bibiir wa, ɩ̃-cɛ a ʋlↄ na sↄ a ʋ mɩ̃ɛ bibiir sɩ ɩ.

¹ A Kirisi faa sɩ na bar, a sɩ na sɩrɩ̃ sↄ a sɩ mɩ̃ɛ. Ala-ɩ̃-sↄ nyɩ́ ɩraa cĩcĩ a be, kↄ̃ lɛ lɩɛb kpɛ a gbãgba-tʋmↄ pʋↄ wa. ² Nyɩ́ cɛlɛ! Maa Pol ɩ̃ yele nyɩ, nyɩmɩ ɩ a ba ŋmaa nyɩ a yʋↄr, a Kirisi ma lɛ ɩrɛ bom a nyɩ nii-sↄw wa. ³ Ɩ̃ lɛ yele na, a nɩrɛ lɛ na ɩ a ba ŋmaa ʋ a yʋↄr áa fɛrʼã ʋ na jↄ a ala a jaa a ƴɛr-kpɛn na yel. ⁴ A nyɩmɩ na bʋↄrↄ a torfʋ a ƴɛr-kpɛn jↄfʋ pʋↄ, nyɩ ŋmaa na taa nɩ a Kirisi, faa a Naaŋmɩn sũofʋ. ⁵ Ɩ̃-cɛ a sɩmɩ, a Naaŋmɩn Sɩɛ ɩ̃ maal sɩ a sɩ tɛrɛ a ƴↄ̃w-nyãa gure nɩ a mɩnɛ ʋ nↄↄ maala sɩ a sɩ toro a ʋ nii-sↄw. ⁶ A sɩmɩ na be a Jeeju-Kirisi pʋↄ, fʋ ŋmaa na a yʋↄr mɩɩ faa ŋmaa wa, aa ɩ bom wa. A ala na ɩ a bom ɩ na a ƴↄ̃w-nyãa na be a nʋfʋ pʋↄ. ⁷ Nyɩ dãa na cere vɩlaa. Ala ɩ̃ var nyɩ a sↄr a nyɩ bar a yel-mɩ̃ɛ cʋfʋ? ⁸ A ala ba na maal tʋↄ nɩ nyɩ a lɛ, ma yi a Naaŋmɩn ʋlↄ na bʋↄlↄ nyɩ jie wa. ⁹ A mɩnɛ ba na ma yel: “Tabɩr fɩ̃ɩ ma tʋↄ na maal a bur-jↄ̃ ʋ vʋ̃ ʋ jaa.” ¹⁰ Ɩ̃ a mɩnɛ sɩ na ɩ a bõ-ƴen a Nɩ-kpɛ̃ɛ pʋↄ ɩ̃ barʼã nyãa a nyɩ ɩnɛ, a nyɩ kↄ̃ lɩɛb a nyɩ tɩɛrɩ̃sɩ wa. Ɩ̃-cɛ a mɩnɛ a nɩrɛ lɛ na wↄ̃ ɩ̃ nyanyaana a nyɩ tɩɛrɩ̃sɩ ʋ na pↄw na a Naaŋmɩn kpãafʋ. ¹¹ Yɛɛr, a ala ɩ̃ ɩ a maa ʋ, a maa cãa ƴɛrɛ a yʋↄr ŋmaafʋ ƴɛrɩ̃, bõ ɩnɛ ba lɛ cãa hʋↄlↄ ma? Ɩ̃ a ala dãa be a lɛ, a Kirisi kũu ʋ na kpi a nɩ-kʋ-daa juu ƴɛrɩ̃ kↄ̃ lɛ cɛ nɩrɛ wa. ¹² A vɩɛlɛ na a bala na nyanyaana a nyɩ tɩɛrɩ̃sɩ na nyɩrɛ cere, a ba wa ir a ba lama bar! ¹³ Yɛɛr, a ala ɩ̃ ɩ a nyɩmɩ ʋ, a Naaŋmɩn bʋↄl nyɩ na a nyɩ na sↄ a nyɩ mɩ̃ɛ, ɩ̃-cɛ nyɩ taa tↄↄ cow nɩ ɩ̃ maala a bom lɛ a nyɩ ɩ̃gan buur na bʋↄrↄ wa, ɩ̃ nyɩ́ ɛ̃ɛ tɛrɛ a nʋfʋ sũono nɩ taa. ¹⁴ A-na-ɩ a ƴɛr-kpɛn a jaa juu ɩ na: “Nʋnↄ a fʋ tↄ sʋbↄ a fʋ mɩ̃ɛ kaarɩ̃.” ¹⁵ Ɩ̃-cɛ a nyɩmɩ nyala taa, Ꞌwↄbↄ nɩ taa a wɛ-dʋn kaarɩ̃, nyɩ́ tɛrɛ nyɩ mɩ̃ɛ kↄ̃ sãwna taa wa. ¹⁶ A ala ɩ̃ na yel nyɩ ɩ na, nyɩ́ bar a nyɩ mɩ̃ɛ kʋ a Naaŋmɩn Sɩɛ ʋ tↄwrↄ nyɩ, a mɩnɛ a nyɩ kↄ̃ wa sↄw a nyɩ ɩ̃gan buur tɩɛrɩ̃sɩ wa. ¹⁷ A-na-ɩ a sɩ ɩ̃gan buur tɛrɛ na a tɩɛrɩ̃sɩ na lɩɛbɛ a Naaŋmɩn Sɩɛ ben, ɩ̃ a Naaŋmɩn Sɩɛ mɩ tɛrɛ a ʋ tɩɛrɩ̃sɩ na lɩɛbɛ a ɩ̃gan buur ben. A ana yele ayi ɩ na taa sama-deme, a saa tʋↄrↄ maala a ala sɩ na bʋↄrↄ wa. ¹⁸ A ala ɩ̃ ɩ a Naaŋmɩn Sɩɛ ɩ̃ tↄwrↄ nyɩ, a ƴɛr-kpɛn ma lɛ tɛrɛ fãgã a nyɩ jie wa. ¹⁹ A nɩbɛ jaa bↄ̃w na a ala na ɩ a ɩ̃gan buur tʋmↄ. A ɩ na a gã-ta-burbur, a tʋ̃-kpansɩ, nɩ a pebfʋ. ²⁰ A mɩ ɩ na a tɩbɛ-lofʋ, a tɩsↄↄlʋ̃ʋ, a Ꞌlaar-taa, a faa-taa, a nyuur, a suur nyɛfʋ nɩ a yo-bↄb tʋmↄ. A mɩ lɛ ɩ na a kpee kpee ŋmafʋ, a jir-ƴɛrɩ̃sɩ, ²¹ a nɩrɛ bom jɩɛlfʋ, a dãa kʋfʋ, a kpokpo dɩb dɩfʋ nɩ a yele ŋmɛɛ na wↄ̃ a lɛ. Ɩ̃ kpãkpana nyɩ na a mɩnɛ ɩ̃ na dãa de nĩe yel nyɩ, a nɩ-lɛ nʋmↄ ma nyɛrɛ sↄr kpɛɛrɛ a Naaŋmɩn fãw pʋↄ wa. ²² Ɩ̃-cɛ a ala a Naaŋmɩn Sɩɛ na wↄnↄ a sɩ baafʋ pʋↄ ɩ na a nʋfʋ, a nʋ̃ↄ, a pɩɛnfʋ, a su-nyↄwraa, a pʋ-pɩlaa, a son ɩfʋ, a dẽdẽ ɩfʋ, ²³ A hɛlɛlɛ ɩfʋ nɩ a mɩ̃ɛ-tɛrɛfʋ. Yɛr-kpɛ̃w ma be be na ma cere nɩ a yel-nↄhↄ̃ wa. ²⁴ A bala na ɩ a Jeeju-Kirisi ben, de na a ba nɩrɛ wãa nɩ a ʋ yele vɩláa nɩ a ʋ mɩ̃ɛ bↄb a ba lãa kpa nɩ ba a Kirisi. ²⁵ A ala ɩ̃ ɩ a Naaŋmɩn Sɩɛ kʋ sɩ na a baafʋ, a sɛw na sɩ bar a sɩ mɩ̃ɛ kʋ ʋ ʋ naa tↄwrↄ sɩ. ²⁶ Sɩ taa ɩ yo-bʋↄrbↄ wa. Sɩ taa mɩ bʋↄrↄ taa a gↄmↄ mɩɩ jɩɛlɛ taa a yele wa.

¹ Yɛɛr, a ala ɩ̃ ɩ kãw wa nyↄw na nɩrɛ ʋ maala bom kãw na ma vɩɛlɛ wa, a nyɩmɩ na tɛrɛ a Naaŋmɩn Sɩɛ, nyɩ́ sũo ʋ ʋ lɛ lɩɛb a ʋ maalfʋ, ɩ̃-cɛ nyɩ́ maalʼɩ̃ ʋ hɛlɛlɛ yɛ̃, mɩ bↄ̃w tɛrɛ a fʋ mɩ̃ɛ a mɩnɛ a bɩɩrfʋ kↄ̃ wa mɩ ta fʋ wa. ² Nyɩ́ jewre taa a toe, ɩ̃ nyɩ na maalʼã a ƴɛr-kpɛ̃w ʋlↄ a Kirisi na kʋ sɩ. ³ A ala ɩ̃ ɩ a nɩrɛ tɩɛr beeka a ʋ ɩ na bom, ɩ̃ ma sɩrɩ̃ ɩ wa, ʋ bɛlɛ na a ʋ mɩ̃ɛ. ⁴ A nɩrɛ lɛ sɛw na ʋ jʋʋr a ʋ mɩ̃ɛ tʋmↄ je kãa. A ala ɩ̃ ɩ a vɩɛlɛ na ʋ na tʋↄ na bar nyãa, ɩ̃ a kↄ̃ ɩ yo-bↄb a nɩŋmɛɛ tʋmↄ jie wa. ⁵ A-na-ɩ a nɩbɛ ba jaa bõ-ƴene-ƴene toe tuofʋ be na a ba jie. ⁶ A ʋlↄ ba na jaana a Naaŋmɩn ƴɛrɩ̃ sɛw na ʋ mɩ bↄ̃w nɩ a ʋ jãjaana nɩ a ʋ yele a jaa. ⁷ Nyɩ taa bɛlɛ nyɩ mɩ̃ɛ wa. Ba maa ɓolĩ Naaŋmɩn wa. A ala a nɩrɛ na bʋr, ala ʋ ma ŋma. ⁸ A ʋlↄ na bʋr a ala a ʋ ɩ̃gan buur na bʋↄrↄ, a ala ʋ na ŋmara na ɩ na a kũu a ɩ̃gan buur ɩnɛ. Ɩ̃ a ʋlↄ na bʋr a ala a Naaŋmɩn Sɩɛ na bʋↄrↄ, a ala ʋ na ŋmara na ɩ na a baa-kↄ̃-tɛw a Naaŋmɩn Sɩɛ ɩnɛ. ⁹ Sɩ taa wa vↄwrↄ a vɩlaa maalfʋ pʋↄ wa, a-na-ɩ a ala ɩ̃ ɩ a suur mↄↄ sãw sɩ a sɩ bar wa, sɩ na ŋma na a ala sɩ na bʋrↄ a lɛ a daar nↄↄ tara. ¹⁰ Ala-ɩ̃-sↄ, a mɩnɛ sɩ na cãa tɛrɛ a daar, sɩ́ sũono a nɩbɛ ba jaa, ɩ̃ sɩ́ nyɩrɩ̃ sũono a yɛɛr bala na tɛrɛ a ƴↄ̃w-nyãa a Kirisi pʋↄ. ¹¹ Maa mɩ̃ɛ ɩ̃ sɛbɛ a ƴɛ̃ƴɛrɩ̃, a mɩnɛ nyɩ na nyɛ a sɛb-bi-bɛrɛ asɩmɛ. ¹² A bala na bʋↄrↄ ba fɛr nyɩ a nyɩ ŋmaa a yʋↄr ɩ na a bala na bʋↄrↄ a nɩbɛ ba kpiire ba a ɩ̃gan buur pʋↄ. Ba maala na a lɛ, a ba kↄ̃ hʋↄlↄ ba a Kirisi kũu a nɩ-kʋ-daa juu ƴɛrɩ̃ ɩnɛ wa. ¹³ A nɩbɛ bala mɩ̃ɛ na cɛ̃pɛrɛ a yʋↄr ŋmaafʋ ƴɛrɩ̃ ma mɩ jↄrↄ a ƴɛr-kpɛn wa, ɩ̃-cɛ ba bʋↄrↄ na nyɩ ŋmaa a yʋↄr a mɩnɛ a ba na tʋↄ bʋↄrↄ a yuor a ʋna jɩbaa a nyɩ ɩ̃gan pʋↄ ɩnɛ. ¹⁴ A ala ɩ̃ ɩ a maa ʋ, maa bʋↄrↄ yuor ɩ̃ a ala ma ɩ a sɩ Nɩ-kpɛ̃ɛ Jeeju-Kirisi kũu a nɩ-kʋ-daa juu ɩnɛ wa. A ʋ kũu lɩɛbʼã a tẽw pʋↄ yele a ɩ yel-kũusɩ a ɩ̃ jie, ɩ̃ mɩ lɩɛb ma ɩ̃ ɩ nɩ-kũu a yele ala jie. ¹⁵ A ala ɩ̃ ɩ nɩrɛ ŋmaa na a yʋↄr mɩɩ Ꞌwaa ŋmaa wa, aa ɩ bom wa. A ala na ɩ a bom ɩ na fʋ ɩ nɩ-paalaa. ¹⁶ A pɩɛnfʋ nɩ a nã-bↄ̃wfʋ á be a bala ba jaa jie na tuure a ʋna sↄrʼãa, nɩ a Naaŋmɩn deme ba jaa. ¹⁷ A daarʼã pʋↄ, nɩrɛ ʋ taa lↄↄ vↄwrↄ ma go wa, a-na-ɩ a fala asɩmɛ ɩ̃ na tɛrɛ miile na a ɩ̃ ɩ na a Jeeju gbãgbaa. ¹⁸ Yɛɛr, a sɩ Nɩ-kpɛ̃ɛ Jeeju-Kirisi sũofʋ ú be nɩ nyɩ a sɩɛ pʋↄ. Amɛn.