2 TIMOTE

¹ - ² A maa Pol ɩ̃ tɩɩrɛ a sɛbɛ na kʋrↄ a Timote na ɩ a ɩ̃ bi-nʋnaa, a maa na ɩ a Jeeju-Kirisi nɩ-tʋnaa, tuure nɩ a Naaŋmɩn pʋ-tɩɛrʋ̃, a mɩnɛ ɩ̃ na mana a baafʋ ƴɛrɩ̃ ʋlↄ a Naaŋmɩn na pʋlɩ̃ nɩ sɩ a Jeeju-Kirisi pʋↄ. A sũofʋ nɩ a nã-bↄ̃wfʋ nɩ a pɩɛnfʋ na yi a sɩ Sãa Naaŋmɩn nɩ a sɩ Nɩ-kpɛ̃ɛ Jeeju-Kirisi sɛ̃, á be a fʋ jie. ³ Ɩ̃ puoro na a Naaŋmɩn ʋlↄ tʋmↄ ɩ̃ na tʋnↄ nɩ a ɩ̃ suur ʋ jaa, a mɩnɛ a ɩ̃ sãa-kʋnbↄ na mɩ dãa maal, a-na-ɩ ɩ̃ ma tɩɛrɛ nɩ fʋ na, sʋↄrↄ nɩ a Naaŋmɩn ƴↄnↄ fʋ a daar a jaa ma gala wa. ⁴ Ɩ̃ cãa na bↄ̃w nɩ a fʋ kuon, ɩ̃ tɩɩ bʋↄrↄ ɩ̃ lɛ nyɛ fʋ, a nʋ̃ↄ na ƴala ma. ⁵ Ɩ̃ lɛ tɩɛrʼɩ̃ na a fʋ ƴↄ̃w-nyãa son ʋlↄ a fʋ mã-kpɛ̃ɛ Lowisi, nɩ a fʋ mã Enisi na dãa de nĩe tɛrɛ. Ɩ̃ a fʋ̃ʋ mɩ, ɩ̃ bↄ̃w na bↄ̃w ka fʋ mɩ tɛrɛ ʋ na. ⁶ Ala-ɩ̃-sↄ ɩ̃ jawra fʋ, a mɩnɛ ɩ̃ na dãa dↄↄl fʋ a nuu a fʋ pↄw a tʋↄfʋ ʋlↄ a Naaŋmɩn jie, pine ʋ a vũu kaarɩ̃, ʋ Ꞌlere. ⁷ A-na-ɩ a Sɩɛ na a Naaŋmɩn na kʋ sɩ, Ꞌwaa ɩ dãbɩ̃-sɩɛ wa, ɩ̃ a fãgã, a nʋfʋ, nɩ a mɩ̃ɛ-tɛrɛfʋ Sɩɛ ʋ kʋ sɩ. ⁸ Ala-ɩ̃-sↄ, taa jↄrↄ vĩ a sɩ Nɩ-kpɛ̃ɛ ƴɛrɩ̃ ƴɛrfʋ ɩnɛ wa, nɩ a maa ɩnɛ na be a kasu pʋↄ a ʋ ɩnɛ wa, ɩ̃ ɛ̃ɛ sↄw de a Naaŋmɩn fãgã a sɩ lãa dɩrɛ taa a tuo a ʋ ƴɛr-son ɩnɛ. ⁹ A-na-ɩ a Naaŋmɩn faa sɩ na, ɩ̃ mɩ bʋↄl sɩ a sɩ ɩ nɩ-eɛeɛ. Ɩ̃ aa ɩ tʋmↄ sɩ tʋ̃ kʋ ʋ wa, ɩ̃-cɛ a ʋna bʋↄlfʋ yi na a ʋ mɩ̃ɛ pʋ-tɩɛrʋ̃ pʋↄ nɩ a ʋ sũofʋ ʋ na dãa kʋ sɩ a Jeeju-Kirisi pʋↄ a korĩ-cɛ jaa. ¹⁰ Ɩ̃ a ƴɛ̃ƴɛrɩ̃ na sɩ nyɛ ʋ na a cãa pʋↄ, a mɩnɛ a sɩ Fafaara Jeeju-Kirisi na nyɩr, sãw a kũu lↄw bar, ɩ̃ caarɩ̃ nɩ a ʋ ƴɛr-son a baafʋ na ma tɛrɛ a sãwfʋ wa. ¹¹ A Naaŋmɩn biin ma na ɩ̃ ɩ ƴɛƴɛrɛ, nɩ nɩ-tʋnaa, nɩ a jãjaana a ʋna ƴɛr-son ɩnɛ. ¹² A ala ɩnɛ ɩ̃ mɩ dɩrɛ a tuo a lɛ, ɩ̃-cɛ aa ɩ ma vĩ wa, a-na-ɩ ɩ̃ bↄ̃w na a sʋbↄ ʋlↄ ɩ̃ na barʼɩ̃ a nyãa. Ɩ̃ mɩ sɩrɩ̃ na bↄ̃w ka a ʋ na tʋↄ na gu a ala ʋ na kʋ ma ɩ̃ tɛɛlɛ, wa ta nɩ a ʋ lɛwaa bibir. ¹³ A ana ƴɛr-sono fʋ na dãa wõ a ɩ̃ jie, bↄ̃w nyↄw tɛɛlɛ, tɛrɛ nɩ a ƴↄ̃w-nyãa nɩ a nʋfʋ ala na be a Jeeju-Kirisi pʋↄ. ¹⁴ Bↄ̃w gu a ʋna jaan-scm a Naaŋmɩn na kʋ fʋ, nɩ a ʋ Sɩɛ fãgã na be a sɩ pʋ̃ↄ. ¹⁵ Fʋ bↄ̃w na ka a Ajɩ wɩɛr nɩbɛ ba jaa jaar ma na bar. A Fɩjɛl nɩ a Ɛmↄjɛn mɩ be na tↄ. ¹⁶ A Nɩ-kpɛ̃ɛ, ú bↄ̃w a Onɩsɩfↄↄr yir deme nãw, a-na-ɩ ʋ dãa na wa ɓaalɩ̃ ma gbɛɛ yayaw. A mɩnɛ ɩ̃ na dãa be a kasu pʋↄ a bↄ̃jↄrɩ̃sɩ pʋↄ, ɩ̃-cɛ vĩ ma nyↄw ʋ wa, ¹⁷ ɩ̃ a mɩnɛ ʋ na wa a Orom-tẽw pʋↄ ʋ ɛ̃ɛ na dɩ tuo bↄ ma nyɛ. ¹⁸ Ɩ̃ fʋ mɩ bↄ̃w na vɩlaa a mɩnɛ ʋ na dãa nyɩrɩ̃ sũo ma a Ɛfɛɛsɩ-tẽw pʋↄ. A Nɩ-kpɛ̃ɛ ú sũo ʋ, ú pↄw a Naaŋmɩn nã-bↄ̃wfʋ a ƴɛrɩ̃ guorfʋ dayen.

¹ Ala-ɩ̃-sↄ ɩ̃ bie, pↄw a fãgã ʋlↄ na yi a Jeeju-Kirisi sũofʋ pʋↄ. ² A ala fʋ na jaan a ɩ̃ jie a nɩ-yaw nii-sↄw, de mɩɩn kʋ nɩ-dẽdẽsɩ na mɩ tʋↄrↄ mana kʋrↄ a nɩ-kpeesɩ. ³ A fʋ̃ʋ mɩ, dɩrɛ a tuo a mɩnɛ fʋ na ɩ a Jeeju-Kirisi sↄdaal-dẽdẽ. ⁴ A sↄdaala ʋlↄ na be a tʋmↄ pʋↄ, ɩ̃ bʋↄrↄ a ʋ maalfʋ a nʋmↄ a ʋlↄ na de ʋ a sↄdaalsɩ, maa lɛ tʋↄrↄ beree tↄ a bibie a jaa yel-bʋↄrsɩ pʋↄ wa. ⁵ A nɩrɛ ʋlↄ na mɩ kpɛ a dãw-taa pʋↄ, a ala ɩ ʋ bʋↄrↄ na ʋ pↄw a yar, a sɛw na ʋ na jↄrↄ tuure nɩ a mɩnɛ ba na mana ʋ. ⁶ A kʋↄraa ʋlↄ na tʋnↄ a tʋ̃-kpɛ̃w sɛw na na de me pↄw a puo wↄmↄ. ⁷ Tɩɛrɛ nɩ a ala ɩ̃ na yel fʋ, ɩ̃ a Nɩ-kpɛ̃ɛ na maal fʋ na a fʋ bↄ̃w a yele a jaa par. ⁸ Cãa bↄ̃w nɩ a Jeeju-Kirisi a Naaŋmɩn na maal ʋ ir a kũu pʋↄ, na ɩ a Davɩtɩ bal nɩrɛ, tu nɩ a ƴɛr-son ʋlↄ ɩ̃ na mana, ⁹ a ʋlↄ ɩnɛ ɩ̃ mɩ pↄw a won, a ba wa lũ nɩ ma a bↄ̃jↄrɩ̃sɩ a fãa sʋbↄ kaarɩ̃. Ɩ̃-cɛ a Naaŋmɩn ƴɛrɩ̃ ma lũ wa. ¹⁰ Ala-ɩ̃-sↄ ɩ̃ sↄw nyↄw a ɩ̃ mɩ̃ɛ a yele a jaa pʋↄ, a bala a Naaŋmɩn na vɛl ir ɩnɛ, a mɩnɛ a ba na mɩ tʋↄ pↄw a faafʋ ʋlↄ na be a Jeeju-Kirisi pʋↄ, lãa nɩ a yo-yifʋ na ma tɛrɛ a baarfʋ wa. ¹¹ A ƴɛrɩ̃ na ɩ na yel-mɩ̃ɛ: “A ala ɩ sɩ lãa na kpi nɩ ʋ, sɩ na mɩ lãa na tɛrɛ nɩ ʋ a baafʋ. ¹² A sɩmɩ ɩraa cĩcĩ, sɩ nↄↄ mɩ lãa de nɩ ʋ a fãw. A sɩmɩ jaar ʋ bar, ʋ nↄↄ mɩ jaar sɩ na bar. ¹³ A sɩmɩ ma ɩ yel-mɩ̃ɛ deme wa, ɩ̃ ʋlↄ ʋlↄ cãa na ɩ a yel-mɩ̃ɛ sʋbↄ, a-na-ɩ Ꞌwaa tʋↄrↄ lɩɛbɛ cɩɩrɛ a ʋ mɩ̃ɛ wa.” ¹⁴ Jawra ba a ana yele a jaa ɩnɛ, kpãkpana nɩ ba a Naaŋmɩn nii-sↄw, a ba taa faara taa nɩ a ƴɛr-bie ala na waara nɩ a jɛb wa, a-na-ɩ aa maala bõ-son wa, ɩ̃ a ma ɛ̃ɛ na cere nɩ a bala na cɛlɛ a sãwfʋ jie. ¹⁵ Ƴↄ̃w fãw ɩ̃ miile a fʋ mɩ̃ɛ nɩ-toraa a Naaŋmɩn nii-sↄw, wↄ̃ taa nɩ a tʋ̃tʋnↄ na ma jↄrↄ a vĩ a ʋ tʋmↄ ɩnɛ wa, mɩ bↄ̃w mana nɩ a yel-mɩ̃ɛ ƴɛrɩ̃ a mɩnɛ a na sɛw. ¹⁶ Ŋmaa yi a ƴɛr-pↄrsɩ ala na ma tɛrɛ a par wa pʋↄ, a-na-ɩ a bala na be tↄ, a ma tawra ba na jãana nɩ a Naaŋmɩn. ¹⁷ A ba ƴɛrɩ̃sɩ ba na ma jaana a nɩbɛ wↄ̃ na taa nɩ a natɩ-yaraa na yara nɩrɛ. A Imene nɩ a Fɩlɛtɩ mɩ be na a ba pʋↄ. ¹⁸ Ba faa na a yel-mɩ̃ɛ, ɩ̃ lɩɛb a popuorbo ŋmɛɛ tɩɛrɩ̃sɩ yele nɩ áa sɩ kũu irfʋ gↄrʼã tↄl. ¹⁹ Ɩ̃-cɛ a dacin kparaa a Naaŋmɩn na kpar tɛrɛ na kpɛ̃w, a ba sɛb a jɩbaa ƴↄ̃w a nↄhↄ̃: “A Nɩ-kpɛ̃ɛ bↄ̃w na a bala na ɩ a ʋ ben,” ɩ̃, “A nɩrɛ lɛ na yel áa Nɩ-kpɛ̃ɛ ben ʋ ɩ, sɛw na na taw a ʋ mɩ̃ɛ jãa nɩ a burbur.” ²⁰ A yir kpɛ̃ɛ pʋↄ, a yel-bʋrↄ bʋrↄ ma be na be. Ba maalʼɩ̃ na a ŋmɛɛ a sɛlmɛ, mɩɩ a kur, ɩ̃ mɩ maalʼɩ̃ a ŋmɛɛ a tɩɛ, mɩɩ a yaara. A dãdãw yele sɛw nɩ na a tʋ̃-vɛlɛ, ɩ̃-cɛ a tuuraa ɩ a bibie a jaa tʋ̃-pↄrsɩ yele. ²¹ Ala-ɩ̃-sↄ, a ala ɩ a nɩrɛ taw na a ʋ mɩ̃ɛ vɩrɩ̃ nɩ a yel-burbur ala pʋↄ, ba na de ʋ na ƴↄ̃w a tʋ̃-vɛlɛ pʋↄ, ow ʋ kpee, ʋ sɛw nɩ a Nɩ-kpɛ̃ɛ tʋmↄ, na tʋↄrↄ maala a tʋ̃-vɛlɛ bʋrↄ bʋrↄ a jaa. ²² Ŋmaa yi a yele ala pʋↄ na ɩ a pↄlↄ a vɩláa, ɩ̃ tuure a torfʋ, a ƴↄ̃w-nyãa, a nʋfʋ, nɩ a su-ɓaar, pↄw nɩ a bala ba jaa na puoro a Nɩ-kpɛ̃ɛ nɩ a su-cɛcɛ. ²³ Taw yi a dãbol ƴɛrɩ̃sɩ ba na mana taa a pↄrↄ, a-na-ɩ fʋ bↄ̃w ka a maa yaarɩ̃ wa nɩ gↄ̃-bↄfʋ wa. ²⁴ Ɩ̃ aa vɩɛlɛ a Naaŋmɩn tʋ̃tʋnↄ na ɩ gↄ̃-bʋↄrↄ wa, ɩ̃-cɛ ʋ sɛw na ʋ ɩ nɩ-hɛlɛlɛ a nɩbɛ ba jaa jie, mɩ tʋↄrↄ jaana ba ɩ̃ mɩ ɩ a su-nyↄwraa sʋbↄ a nɩŋmɛɛ bier maalfʋ pʋↄ. ²⁵ A sɛw na ʋ tɛrɛ su-ɓaar jaana nɩ a bala na tɛrɛ nɩ ʋ a cɩɩrʋ̃, bↄ̃w nɩ ka, a nʋmↄ-wa-sↄw, a Naaŋmɩn na maal ba na a ba lɩɛb a yɛ̃, ɩ̃ wa bↄ̃w a yel-mɩ̃ɛ, ²⁶ lɛ tʋↄ pↄw a ba tɩɛrɩ̃-sono, yi nɩ a Satã cakpor pʋʋr, a ʋlↄ na nyↄↄr ba tɛɛlɛ a ba maala a ʋ pʋ-tɩɛrʋ̃.

¹ A sɛw na a fʋ na bↄ̃w ka áa tẽw baarfʋ daar, a won kpɛ̃ɛ na ta na. ² A-na-ɩ a nɩbɛ na Ꞌwuoro na a ba mɩ̃ɛ tɛw, nyɩrɩ̃ nʋ a libie, bʋↄrↄ nɩ a yuor nɩ a ju-kpɛ̃ɛ, kpɛrɛ a Naaŋmɩn, wõw nɩ a toor a ba dↄↄrbↄ jie. Ba na bɛlɩ̃ na a puor, ɩ̃ ma ƴↄnↄ a Naaŋmɩn wa. ³ Ba mɩ kpɛ na a bɩcɩɩr, ɩ nɩ a nɩ-bebe nɩ a cicilbe, maala nɩ a burbur, ɩ nɩ a gbor-gbor deme, mɩ Ꞌlaarʼɩ̃ a son maalfʋ. ⁴ Ba na mɩ diere na taa a jur, ɩ nɩ a nɩ-kaba kaba, bɛlɛ nɩ a ba mɩ̃ɛ a ju-kpɛ̃ɛ bↄfʋ ɩnɛ, bʋↄrↄ a ala ba na nʋ, gãw a Naaŋmɩn. ⁵ Ba na maala na wↄ̃ taa a Naaŋmɩn ba ƴↄnↄ, ɩ̃-cɛ ba kↄ̃ sↄw a ʋ fãw wa. Taw a fʋ mɩ̃ɛ yi nɩ a bana nɩbɛ sↄ̃w. ⁶ A ba pʋↄ, a ŋmɛɛ ma gũu na kpɛ a yie pʋↄ bɛlɩ̃ a pↄↄ-gẽgemsɩ, na mɩ sɛw nɩ a maal-fãa, a yel-bʋrↄ bʋrↄ vɩláa na mɩ nyↄw. ⁷ Ba ma jaana na a yele a daar a jaa, ɩ̃ ma tʋↄrↄ bↄ̃wnↄ a yel-mɩ̃ɛ ƴɛrɩ̃ fɩ̃ɩ wa. ⁸ A mɩnɛ a Janɛsɩ nɩ a Jãbɛrɛsɩ na dãa var a Mowisi ƴɛrɩ̃, a lɛ a bana nɩbɛ mɩ vara a yel-mɩ̃ɛ. A ba juu bↄrʼã, a ba puorfʋ ma lɛ tor wa. ⁹ Ɩ̃-cɛ baa cere nii-sↄw wa, a-na-ɩ a nɩbɛ ba jaa na bↄ̃w na a ba gẽgem-maalfʋ, wↄ̃ taa nɩ a mɩnɛ ba na dãa bↄ̃w a Janɛsɩ nɩ a Jãbɛrɛsɩ ben. ¹⁰ Ɩ̃-cɛ a fʋ̃ʋ, fʋ nyɛ na a ɩ̃ jaanfʋ bↄ̃w, ɩ̃ mɩ bↄ̃w a ɩ̃ maalfʋ, a ɩ̃ pʋ-tɩɛrɩ̃sɩ, nɩ a ɩ̃ ƴↄ̃w-nyãa, nɩ a mɩnɛ ɩ̃ na tɛrɛ a su-nyↄwraa, a nʋfʋ, ɩ nɩ a nɩ-var. ¹¹ Fʋ mɩ lɛ bↄ̃w na a ɩ̃ kpowfʋ, nɩ a ɩ̃ won; a ala na dãa ta ma a Átɩyↄsɩ, a Ɩkↄnɩyↄ̃, nɩ a Lɩsɩtɩ ten pʋʋr. Kpow-wↄ̃ mɩnɛ maa dãa pↄw wa! Ɩ̃-cɛ a Nɩ-kpɛ̃ɛ faa ma na a ala a jaa pʋↄ. ¹² A lɛ ʋ, a bala ba jaa na bʋↄrↄ ba tuure a Naaŋmɩn sↄr vɩlaa a Jeeju-Kirisi pʋↄ na pↄw na a kpowfʋ. ¹³ Ɩ̃-cɛ a nɩ-bebe nɩ a jɩ-bʋʋrbↄ na cere na nii-sↄw a ba fãa pʋↄ, bɛlɛ nɩ a nɩbɛ, ɩ̃ a ba mɩ bɛlɛ ba. ¹⁴ A ala ɩ a fʋ̃ʋ ʋ, ɩraa cĩcĩ a ala fʋ na jaan bↄ̃w pʋↄ, mɩ tɩɛr ka a ɩ na yel-mɩ̃ɛ, a-na-ɩ fʋ bↄ̃w na a bala na jaan fʋ. ¹⁵ Wa nyↄw nɩ a fʋ bibile daar, fʋ bↄ̃w na a Naaŋmɩn Sɛbɛ ƴɛrɩ̃sɩ, na tʋↄrↄ kʋrↄ fʋ a kpaarfʋ ʋlↄ na miile a faafʋ sɩ na tɛrɛ a Jeeju-Kirisi pʋↄ a ƴↄ̃w-nyãa ɩnɛ. ¹⁶ A Naaŋmɩn Sɛbɛ ƴɛrɩ̃sɩ a jaa yi na a ʋ Sɩɛ tʋmↄ pʋↄ, na sɛw nɩ a nɩbɛ jaanfʋ, miile nɩ ba a ba mabfʋ jie, cↄↄrↄ nɩ ba, ɩ̃ mɩ gbɛɛrɛ nɩ ba a ba na tor. ¹⁷ A nↄhↄ̃, a Naaŋmɩn tʋ̃tʋnↄ na tʋↄ sɩrɩ̃ bɩ, mɩ tɛrɛ a ala na sɛw ʋ a tʋ̃-sono a jaa pʋↄ.

¹ Ɩ̃ kpãkpana fʋ na a Naaŋmɩn nɩ a Jeeju-Kirisi nii-sↄw, a ʋlↄ nↄↄ guoro a nɩ-mimie nɩ a kũusɩ ƴɛrɩ̃. Ɩ̃ mɩ tɩɛrɛ nɩ na a lɛdaar ʋ na waara ɩrɛ a jamana. ² Ala-ɩ̃-sↄ ɩ̃ yele fʋ, eɛlɛ tↄ a daar a jaa, hiere a Naaŋmɩn ƴɛrɩ̃, a lɛ a sↄr na yuo nɩ a lɛ ʋ na ma mɩ yuo wa. Gala ba, mɩɩ fule ƴↄnↄ ba, kpãkpana nɩ ba, tɛrɛ nɩ a su-varkpara jaana nɩ ba. ³ A-na-ɩ daar nↄↄ ta na a nɩbɛ kↄ̃ lɛ sↄwrↄ a jaan-son wa, ɩ̃ ba na maala na a ala na nʋmↄ ba, woorʼɩ̃ a jãjaanba duo, a ba jaana ba a ala ba na bʋↄrↄ. ⁴ Ba kↄ̃ lɛ cãa cɛlɛ a yel-mɩ̃ɛ wa, ɩ̃-cɛ ba na lɩɛbʼã cɛlɛ a kpurĩsɩ. ⁵ Ɩ̃-cɛ a fʋ̃ʋ, bↄ̃w tɛrɛ a fʋ mɩ̃ɛ a yele a jaa pʋↄ, dɩrɛ nɩ a tuo, bↄ̃w tʋnↄ a Naaŋmɩn ƴɛr-son ƴɛrfʋ tʋmↄ, maala nɩ a ala a jaa a Naaŋmɩn na ƴↄ̃w fʋ. ⁶ A ala ɩ a maa ʋ, a daar ta na ɩ̃ na lɩɛb ɩ a baar-lo-bom. A ɩ̃ Naaŋmɩn tẽw cenfʋ daar ta na. ⁷ Ɩ̃ jɛbʼã a jɛb-son, ɩ̃ mɩ jↄ a ɩ̃ dãw-taa jↄa baar. Ɩ̃ mɩ dãa na bↄ̃w gu a Naaŋmɩn ƴɛr-son. ⁸ A ƴɛ̃ƴɛrɩ̃ na, a ɩ̃ tʋↄfʋ bom gure ma na, na ɩ a torfʋ yar a Nɩ-kpɛ̃ɛ ʋlↄ na ɩ a Goguor-dẽdẽ na kʋrↄ ma a ʋ waa bibir dayen.Ɩ̃ aa ɩ maa tɛw ʋ kʋrↄ wa, ɩ̃-cɛ a bala ba jaa na sɩrɩ̃ cɛlɛ a ʋ nyɩrfʋ dayen. ⁹ Yↄ̃w fãgã ɩ̃ wa a ɩ̃ sɛ̃ pʋrpʋr, ¹⁰ a-na-ɩ a Demasɩ bar ma na ɩ̃ cen a Tɛsaloniki-tẽw a-na-ɩ ʋ nyɩrɩ̃ na nʋ a tẽw na yele. A Kɩrɛsɛ̃ mɩ cen a Galatɩ-tẽw, ɩ̃ a Tɩtɩ mɩ cen a Dalmasɩ-tẽw. ¹¹ A Luki ʋ yẽ tɛw ɩ̃ be nɩ ma. Taw a Markɩ tɛrɛ wa nɩ, a-na-ɩ ɩ̃ nyɛ na bↄ̃w ka ʋ na tʋↄ na sũo ma a tʋmↄ pʋↄ. ¹² Ɩ̃ tʋ̃ na a Tɩsɩkɩ bar ʋ cen a Ɛfɛɛsɩ-tẽw. ¹³ A fʋ̃ʋ wa waara, fʋ tɛrɛ de a kparʋ ɩ̃ na bar a Torowasɩ-tẽw a Karpɩsɩ yir, mɩ tɛrɛ de nɩ a ɩ̃ sɛbsɩ, ɩ̃ taa wa hiine a sɛbsɩ ala ba na maalʼɩ̃ a gan wa. ¹⁴ A Alɛsãdɩrɛ na ɩ a jujuure maal ma na bier ma ɩ wa. A Nɩ-kpɛ̃ɛ na ya ʋ na tu nɩ a ala ʋ na maal. ¹⁵ A fʋ̃ʋ mɩ, tɛrɛ a fʋ mɩ̃ɛ a ʋ jie, a-na-ɩ ʋ nyɩrɩ̃ na jɛbʼɩ̃ sɩ a ƴɛrɩ̃sɩ ala sɩ na ƴɛr ɩnɛ. ¹⁶ A mɩnɛ ba na bʋↄl ma ɩ̃ cen a ƴɛrɩ̃ guorfʋ jie a dãdãw, nɩrɛ ma dãa be be na ɓã ma wa. Ba jaa jaar ma na bar. A Naaŋmɩn, ʋ taa wa ƴↄnↄ ba ƴɛrɩ̃ a ala ɩnɛ wa. ¹⁷ Ɩ̃-eɛ a Nɩ-kpɛ̃ɛ dãa na ɩraa cĩcĩ a ɩ̃ lõboorɩ̃, ɩ̃ kʋ ma fãgã ɩ̃ tʋↄ ƴɛr a Naaŋmɩn ƴɛrɩ̃ vɩlaa vɩlaa, a nɩ-bʋrↄ bʋrↄ jaa wonaa. Ɩ̃ a Naaŋmɩn faa ma na a gbeen nʋↄrɩ̃. ¹⁸ A Nɩ-kpɛ̃ɛ na faa ma na a maal-bebe a jaa pʋↄ, ɩ̃ maal ma ɩ̃ kpɛ a ʋ saa juu fãw pʋↄ vɩlaa. A ʋlↄ ɩ̃ sↄ a yo-yifʋ a daar a jaa fɛw. Amɛn. ¹⁹ Puor a Pɩrɩsɩ, nɩ a Akɩlasɩ, nɩ a Onɩsɩfↄↄr yir deme kʋ ma. ²⁰ A Erasɩtɩ jɛ na be a Kↄrɛ̃tɩ-tẽw, ɩ̃ a lɛ ɩ̃ na yi a Mile-tẽw a dãa na Ꞌwↄbↄ a Torofim. ²¹ Yↄ̃w fãgã ɩ̃ wa ɩ̃-cɛ a aar daar wa ta. A Ubulu nɩ a Pʋdɛ̃, a Linisi, a Kiloja, nɩ a yɛɛr ba jaa puoro fʋ na. ²² A Nɩ-kpɛ̃ɛ ú be nɩ fʋ a sɩɛ pʋↄ. Á Naaŋmɩn sũofʋ ú be a nyɩ jie.