2 TƐSALONIKI

¹ A maa Pol nɩ a Sɩlasɩ nɩ a Timote ɩ̃ sɛbɛ a sɛbɛ na tɩɩrɛ kʋrↄ a nyɩmɩ Tɛsaloniki-tẽw duo-puorbo na be a sɩ Sãa Naaŋmɩn nɩ a sɩ Nɩ-kpɛ̃ɛ Jeeju-Kirisi pʋↄ. ² A sũofʋ nɩ a pɩɛnfʋ na yi a sɩ Sãa Naaŋmɩn nɩ a sɩ Nɩ-kpɛ̃ɛ Jeeju-Kirisi sɛ̃, á be a nyɩ jie. ³ Yɛɛr, a ɩ na son a sɩ jie a sɩ na puor a Naaŋmɩn a nyɩ ɩnɛ a daar a jaa. A sɛw na a sɩ na maal a lɛ, a-na-ɩ a nyɩ ƴↄ̃w-nyãa sɩrɩ̃ na kara dↄↄlↄ; ɩ̃ a nyɩ nʋfʋ nyɩ na tɛrɛ nyɩ jaa fɛw a nyɩ sↄ̃w mɩ nʋ̃ↄnↄ na dↄↄlↄ. ⁴ Ala-ɩ̃-sↄ a nʋmↄ sɩ na a sɩ na mana a nyɩ ƴɛrɩ̃ a Naaŋmɩn duo-puorbo sↄ̃w a jiir a jaa, a mɩnɛ nyɩ na cãa tɛrɛ a su-nyↄwraa nɩ a ƴↄ̃w-nyãa, a ala saarɩ̃ ɩ a hʋↄlfʋ nɩ a won pʋↄ nyɩ na be. ⁵ Á ala a jaa miile na a mɩnɛ a Naaŋmɩn ƴɛrɩ̃ guorfʋ na tor, a-na-ɩ a Naaŋmɩn lɩɛbɛ nyɩ na a nyɩ na sɛw nɩ a ʋ fãw pʋↄ kpɛfʋ, a ala ɩnɛ nyɩ na be a won pʋↄ a ƴɛ̃ƴɛrɩ̃. ⁶ A Naaŋmɩn na maalʼã a ala na tor. A bala na saa a nyɩ be a won pʋↄ, ʋ na mɩ ƴↄ̃w ba na a won pʋↄ, ⁷ ɩ̃ a nyɩmɩ na be a won pʋↄ a ƴɛ̃ƴɛrɩ̃, ʋ nↄↄ kʋ nyɩ na a pɩɛnfʋ, lãa nɩ a sɩmɩ mɩ, a lɛdaar a sɩ Nɩ-kpɛ̃ɛ Jeeju na yire a saa juu ɩ̃ waara nɩ a ʋ fãw sɩ-tʋnɩsɩ. ⁸ A vũ-Ꞌleraa pʋↄ ʋ na wa, na kpãa a bala na ma sↄw a Naaŋmɩn wa, nɩ a bala na jaara a sɩ Nɩ-kpɛ̃ɛ Jeeju ƴɛr-son. ⁹ A ba kpãafʋ pʋↄ ba na wɛ na daadaa, jãa taa nɩ a Nɩ-kpɛ̃ɛ nɩ a ʋ yo-yifʋ fãgã. ¹⁰ A ʋna bibirʼãa mɩ, ʋ na pↄw na a yo-yifʋ a ʋ nɩ-owrsɩ jie, ɩ̃ a bala na dãa sↄw de ʋ, na cɩlɛ na Ꞌwuoro nɩ ʋ, nɩ nↄ-kofʋ mɩ. A nyɩmɩ mɩ, nyɩ na mɩ be na tↄ a ba pʋↄ a lɛdaar, a-na-ɩ nyɩ sↄw na a sɩ ƴɛrɩ̃ sɩ na dãa ƴɛr kʋ nyɩ. ¹¹ Ala-ɩ̃-sↄ a sɩ ma sʋↄrↄ a Naaŋmɩn ƴↄnↄ nyɩ a daar a jaa, a mɩnɛ a Naaŋmɩn na nyɛ nyɩ a nyɩ sɛw nɩ a baafʋ ʋlↄ ɩnɛ ʋ na bʋↄl nyɩ, na mɩ sũo nyɩ a nyɩ maalʼɩ̃ a ʋ fãw a yel-sono ala a jaa nyɩ na bʋↄrↄ, ɩ̃ a bom kↄ̃ ɓↄr a nyɩ ƴↄ̃w-nyãa tʋmↄ pʋↄ wa. ¹² A nↄhↄ̃, a sɩ Nɩ-kpɛ̃ɛ Jeeju yuor na yire na a nyɩ jie, ɩ̃ nyɩ na mɩ pↄw na a yo-yifʋ a ʋ jie, tu nɩ a sɩ Naaŋmɩn nɩ a sɩ Nɩ-kpɛ̃ɛ Jeeju-Kirisi su-pɩlaa tʋmↄ.

¹ - ² Yɛɛr, a ala na ɩ a sɩ Nɩ-kpɛ̃ɛ Jeeju-Kirisi waa bibir, nɩ a mɩnɛ sɩ na duoro taa a ʋ nii-sↄw, sɩ sʋↄrↄ nyɩ na nyɩ taa ɩ a nyɩ tɩɛrɩ̃sɩ a vavire mɩɩ dama nyɩ a nyɩ tɩɛr beeka á Nɩ-kpɛ̃ɛ bibir gↄrʼã ta wa. A na tʋↄ na ɩ nɩrɛ kãw ɩ̃ dãa yel nyɩ a lɛ, yele nɩ á Naaŋmɩn pʋ-tɩɛrʋ̃ ʋ, mɩɩ Naaŋmɩn ƴɛrɩ̃ ʋ ƴɛrʼɩ̃, mɩɩ a sɩmɩ ɩ̃ dãa sɛb nyɩ a lɛ. ³ Nyɩ taa wa bar nɩrɛ ʋ wa bɛlɩ̃ nyɩ fɩ̃ɩ wa. A-na-ɩ a ʋna bibir kↄ̃ↄ ta sɛr wa, ɩ̃ a nɩ-yaw nↄↄ wa jaara na a Naaŋmɩn puorfʋ bara, ɩ̃-cɛ a Burbur Sʋbↄ wa nyɩr a ba nyɛ ʋ, a ʋlↄ na ɩ a nɩ-wɛraa. ⁴ Ʋ na ɩ na a Naaŋmɩn san-sʋbↄ, ɩ̃ ʋ na jɛw na a ʋ mɩ̃ɛ gãw a ala a jaa ba na bʋↄlↄ a Naaŋmɩn, mɩɩ ba na puoro, wa ta nɩ a mɩnɛ ʋ na kpɛɛrɛ jɩnɛɛ a Naaŋmɩn puor-yir kpɛ̃ɛ pʋↄ, ɩ̃ yel á ʋlↄ mɩ̃ɛ ɩ̃ ɩ a Naaŋmɩn. ⁵ Nyaa cãa bↄ̃wnaa a mɩnɛ ɩ̃ na ma dãa yele nyɩ a ala, a lɛdaar ɩ̃ na dãa cãa be nɩ nyɩ wa mɩɩ? ⁶ Nyɩ bↄ̃w na a bom ʋlↄ na vara a Burbur Sʋbↄ ʋlↄ a sↄr a ƴɛ̃ƴɛrɩ̃ na, ɩ̃-cɛ ba na nyɛ ʋ na a lɛ a ʋ daar nↄↄ tara. ⁷ A-na-ɩ a Burbur Sʋbↄ fãgã sↄↄlɩ̃ na gↄr tʋnↄ a ʋ tʋmↄ, ɩ̃-cɛ a ʋlↄ na vara ʋ a sↄr na cãa na maala a lɛ wa ta nɩ a lɛ ba na ire ʋ bara. ⁸ A daar ʋlↄ pʋↄ, a Burbur Sʋbↄ na nyɩrʼã cãa pʋↄ a ba nyɛ ʋ, ɩ̃ a Nɩ-kpɛ̃ɛ na pɛɛl ʋ na kú, ɩ̃ mɩ wɛl ʋ nɩ a ʋ nyɩnyɩlfʋ ʋ na waara nɩ. ⁹ A ʋna Burbur Sʋbↄ naa na wa nɩ na a Satã fãw maala nɩ a nↄ-kofʋ tʋmↄ nɩ a nↄ-kpaar tʋ̃-bʋrↄ bʋrↄ, ŋmara nɩ a jiri, ¹⁰ tʋnↄ nɩ a ʋ gõgolĩfʋ tʋmↄ a jaa, bɛlɛ nɩ a bala na wɛrɛ. Ba na wɛ na a-na-ɩ baa sↄw nʋ a yel-mɩ̃ɛ ʋlↄ na dãa tʋↄrↄ faara ba wa. ¹¹ Ala-ɩ̃-sↄ a Naaŋmɩn ƴↄ̃w a bɛlɩ̃fʋ a na tʋↄ ba a ba na sↄw a jir-ƴɛrɩ̃sɩ. ¹² A nↄhↄ̃, a bala ba jaa na mↄↄ sↄwrↄ a yel-mɩ̃ɛ wa, ɩ̃ wa nʋnↄ a maal-fãa, a Naaŋmɩn na guorʼã a ba ƴɛrɩ̃ ɩ̃ ƴↄ̃w ba yel. ¹³ Yɛɛr, sɩ sɛw na sɩ puor a Naaŋmɩn a daar a jaa a nyɩ ɩnɛ, a nyɩmɩ a Nɩ-kpɛ̃ɛ na nʋ. A-na-ɩ ʋ vɛl nyɩ na ir a nyɩ na de nĩe pↄw a faafʋ, a mɩnɛ a ʋ Sɩɛ na ow nyɩ a kpee, nɩ a mɩnɛ nyɩ na ƴↄ̃w a yel-mɩ̃ɛ ƴɛrɩ̃ a nyãa. ¹⁴ A ƴɛr-son sɩ na wa ƴɛr kʋ nyɩ ɩnɛ a Naaŋmɩn bʋↄl nyɩ a nyɩ na pↄw a ala a jaa, ɩ̃ mɩ bʋↄl nyɩ a nyɩ na tʋↄ mɩ pↄw a sɩ Nɩ-kpɛ̃ɛ Jeeju-Kirisi yo-yifʋ. ¹⁵ Ala-ɩ̃-sↄ yɛɛr, nyɩ́ bↄ̃w ɩraa cĩcĩ, bↄ̃w tɛrɛ nɩ a jaanfʋ ala sɩ na jaan nyɩ a sɩ ƴɛrɩ̃sɩ pʋↄ, mɩɩ a sɩ sɛbɛ pʋↄ. ¹⁶ - ¹⁷ Ɩ̃ sʋↄrↄ na a sɩ Nɩ-kpɛ̃ɛ Jeeju-Kirisi mɩ̃ɛ, nɩ a sɩ Sãa Naaŋmɩn á ú kʋ nyɩ a Ꞌlafʋ a nyɩ sube pʋʋr mɩ sũo nyɩ a nyɩ tɛrɛ a fãgã a tʋ̃-sono nɩ a ƴɛr-sono a jaa pʋↄ. A-na-ɩ ʋ nʋ sɩ na ɩ̃ kʋ sɩ a Ꞌlafʋ a daar a jaa, a sɩ na mɩ tɛrɛ nɩ ʋ a tɩɛrʋ̃ son, a yi a ʋ su-pɩlaa jie.

¹ Yɛɛr, a ƴɛ̃ƴɛrɩ̃ na, nyɩ́ sʋↄrↄ a Naaŋmɩn ƴↄnↄ sɩ, a mɩnɛ a Naaŋmɩn ƴɛrɩ̃ na tʋↄrↄ yɛrɛ pↄwrↄ a jiir a jaa fↄfↄw, ɩ̃ a nɩbɛ na ƴↄnↄ a ƴɛrɩ̃ ʋlↄ, wↄ̃ taa nɩ a mɩnɛ a na dãa maal a nyɩ jie. ² Nyɩ́ lɛ sʋↄrↄ a Naaŋmɩn ʋ faa sɩ a nɩ-burbur nɩ a nɩ-faar jie, a-na-ɩ aa ɩ a nɩbɛ ba jaa ɩ̃ ma tɛrɛ a ƴↄ̃w-nyãa wa. ³ Ɩ̃-cɛ a Nɩ-kpɛ̃ɛ ɩ na dẽdẽ. Ʋ na kʋ nyɩ na a fãgã, ɩ̃ mɩ gu nyɩ tɛɛlɛ a Fãa Sʋbↄ jie. ⁴ Sɩ barʼã nyãa a Nɩ-kpɛ̃ɛ pʋↄ, bↄ̃w ka nyɩ ma maala na a ala sɩ na dãa yel nyɩ, ɩ̃ nyɩ na cãa na maala a lɛ. ⁵ A Nɩ-kpɛ̃ɛ ú tↄw a nyɩ sube kpɛ nɩ a Naaŋmɩn nʋfʋ pʋↄ, nɩ a Kirisi su-nyↄwraa pʋↄ. ⁶ Yɛɛr, a ƴɛ̃ƴɛrɩ̃ na sɩ yel nyɩ na nɩ a sɩ Nɩ-kpɛ̃ɛ Jeeju-Kirisi yuor, nyɩ́ taw yi a yɛɛr bala ba jaa na kpɛ a tõtol jie, na ma mɩ cere tuure nɩ a jaanfʋ ʋlↄ sɩ na dãa jaan nyɩ wa. ⁷ Nyɩmɩ mɩ̃ɛ bↄ̃w na a mɩnɛ nyɩ na sɛw na tↄↄnↄ sɩ, a-na-ɩ saa dãa ɩ tõtol deme a nyɩ sↄ̃w wa. ⁸ Saa dãa sↄw dɩ nɩrɛ bom a pↄrↄ wa, ɩ̃ sɩ ɛ̃ɛ na dãa dɩ a tuo ɩ̃ tʋnↄ nɩ kpɛ̃w a mↄtↄ̃w nɩ a tɩsↄw, a mɩnɛ a sɩ kↄ̃ wa ƴↄ̃w nɩrɛ kãw won wa. ⁹ Aa ɩ saa dãa tɛrɛ sↄr na de a nyɩ bom wa, ɩ̃-cɛ sɩ dãa na bʋↄrↄ sɩ maala a lɛ ɩ nyɩ bõ-tↄↄnaa. ¹⁰ A-na-ɩ a lɛdaar sɩ na dãa cãa be a nyɩ sɛ̃, sɩ dãa na yel nyɩ áa nɩrɛ ma bʋↄrↄ a tʋmↄ wa, ʋ taa mɩ dɩrɛ a bom wa. ¹¹ A-na-ɩ sɩ wõ na a ba yel áa ŋmɛɛ be na a nyɩ sↄ̃w na kpɛ a tõtol, á baa maala bom, ɩ̃ a ala ma ɩ a nɩbɛ jʋʋrfʋ tɛw ʋ wa. ¹² A bana nɩbɛ naa, sɩ yele ba na kpãkpana nɩ ba, nɩ a sɩ Nɩ-kpɛ̃ɛ Jeeju-Kirisi yuor, á bá tɛrɛ a ba mɩ̃ɛ tʋmↄ tʋnↄ guolo nɩ a ba mɩ̃ɛ. ¹³ Yɛɛr, a ala ɩ a nyɩmɩ ʋ, nyɩ taa wa bala a vɩlaa maalfʋ ɩnɛ wa. ¹⁴ A ala ɩ a nɩrɛ mↄↄ sↄw a jaanfʋ asɩmɛ sɩ na kʋ nyɩ a sɛbɛ na pʋↄ wa, nyɩ́ bↄ̃w nɩ a nɩrɛ ʋlↄ, ɩ̃ nyɩ taa wa beree taa nɩ ʋ bom wa, a mɩnɛ a vĩ na nyↄw ʋ. ¹⁵ Nyɩ́ taa wa de ʋ ʋ ɩ nyɩ san-sʋbↄ wa, ɩ̃-cɛ nyɩ́ mana ʋ a yɛ̃, a-na-ɩ nyɩ yɛbɛ ʋ ɩ. ¹⁶ A Nɩ-kpɛ̃ɛ ʋlↄ na tɩɩrɛ a pɩɛnfʋ, a ala saarɩ̃ wↄ̃ mɩnɛ, a ʋlↄ mɩ̃ɛ, ú kʋ nyɩ a pɩɛnfʋ. A Nɩ-kpɛ̃ɛ ú be nɩ nyɩ nyɩ jaa. ¹⁷ A maa mɩ̃ɛ Pol nuu ɩ̃ sɛb puor nyɩ. Nyɩ́ nyɛ a mɩnɛ ɩ̃ na ma sɛb. A ʋlↄ ɩ̃ ɩ a jɩbaa a ɩ̃ sɛbsɩ a jaa pʋↄ. ¹⁸ A sɩ Nɩ-kpɛ̃ɛ Jeeju-Kirisi sũofʋ ú be a nyɩ jie nyɩ jaa fɛw.